ධනුෂ්කගේ තීරුව~~~ Dhanushka's Line

noreply@blogger.com (Dhanushka Gunasinghe's Hard Code) — Fri, 09 Sep 2022 10:02:00 +0000

ලංකාවෙ රබ‍ර් වලට මොකද වෙන්නෙ.....

ජන දුක අවම කරමින් වර්තමාන අර්බුදයෙන් ගොඩ ඒමට ප්‍රවේශයක් - මහාචාර්ය රොහාන් සමරජීව

noreply@blogger.com (Dhanushka Gunasinghe's Hard Code) — Mon, 02 May 2022 11:42:00 +0000

[මෙම ලියවිල්ල කෙටුම්පතකි; සාකච්ඡාවට සහ සංවාදයට විවෘතයි]

අද අප රට පෙර නොවී විරූ අර්බුදයක ගිලෙමින් පවතියි. බඩු මිල දරා ගත නොහැකි ලෙස ඉහල යමින් පවතී. රාජ්‍ය දත්ත (CCPI) අනුව කොළඹ දිස්ත්‍රික්කයේ ආහාර මිල උද්ධමනය 46.6% දක්වා වැඩිවී තිබේ.

වැඩි මිලට හෝ ලබාගත් ආහාර ද්‍රව්‍ය පිස ගැනීමට ගෑස් හොයාගැනීම දුෂ්කරය, දෙගුණයක් මිලය. දිනපතා කෙරෙන විදුලි කප්පාදු නිසා ජන ජීවිතය අවුල් වී ඇත.

විදුලිය පදනම් කරගත් සුළු සහ මහා ව්‍යාපාර අමාරුවේ වැටී ඇත. ෂෙඩ් ළඟ පෝලිම් රට පුරා දකින්නට ඇත. බෙහෙත් හිඟය ක්‍රමයෙන් උත්සන්න වෙමින් පවතී. පෝලිම්වල මිනිසුන් මියැදෙති. අසාධාරණයනට විරුද්ධව හඬ නගන මිනිස්සු පොලිස් ප්‍රචණ්ඩත්වයට ගොදුරුවෙති. මේ පිළිබඳව ත්‍රෛනිකායික මහනායකවරුන් පවා ජනාධිපතිවරයා වෙත යොමු කල සංදේශයක් මගින් තම දැඩි කනස්සල්ල ප්‍රකාශ කර ඇත.

සිදු කරන සියලු දේ වරද්දා ගත් රාජපක්ෂ ආණ්ඩුව විසින් ප්‍රශ්න තවත් උග්‍ර කරන ලදි. එයට උදාහරණ එමටය.

# ලංකාව සියයට සියයක් කාබනික කෘෂිකර්මයේ යෙදෙන ලෝකයේ පළමු රට බවට පත් කිරීමේ කතාවක් කියා පොහොර ආනයනය තහනම් කළද, අවසානයේ රටට සිදු වුයේ භාවිතා කළ නොහැකි ආනයනික පොහොර සඳහා ඩොලර් මිලියන 6.7 ක් ගෙවන්නටය; අති විශාල මුදලක් ආනයික ආහාර සඳහා ගෙවීමටය; දශක ගණනාවක් තිස්සේ අමාරුවෙන් ගොඩ නගා ගත් ස්‌වයංපෝෂිතබව නැති කර ගන්නටය.

# කෘතිම විනිමය අනුපාතිකයක් පවත්වා ගැනීමට කල උත්සාහය හේතුවෙන් විදේශයන්හී වැඩ කරන ශ්‍රමිකයන්ගෙන් ලැබෙන සම්ප්‍රේශණයන්ද අඩු කරගෙන ඇත.

''හානිය සිදුවුණු පසු එම නිලධාරීන් ඉවත්කිරීම ප්‍රමාණවත් නොවේ''

ආර්ථිකයෙන් පටන් ගත් අර්බුදය මුළුමහත් දේශපාලන ව්‍යුහය සහ සමාජය වෙලා ගෙන ඇත. තවම අපි අර්බුදයේ පතුල දැක නැත. ආර්ථික දුෂ්කරතා හේතුවෙන් ඇරඹුනු විරෝධතා තරුණ පරම්පරාවේ බලාපොරොත්තු විනාශ කර දැමීමේ වගකීම දක්වා පුළුල් වී ඇත. සක්‍රිය පුරවැසියන් නිර්මාණය වී ඇත. ගාලු මුවදොර ප්‍රමුඛව අලුත් පන්නයේ විමධ්‍යගත අරගල භූමි නිර්මාණය වී ඇත.

ජනාධිපතිවරයා යම් වැරදි පිළිගත්තද, ඒවායේ වගකීම භාරගැනීමට කටයුතු කරන බවක් නොපෙනේ. තමන්ගේ තනි අභිමතය මත පත් කර ගන්නා ලද නිලධාරීන්ට වගකීම් පැටවීම නායකයෙකුට කල නොහැක. හානිය සිදුවුණු පසු එම නිලධාරීන් ඉවත්කිරීම ප්‍රමාණවත් නොවේ.

අරගල කරුවන් ඉල්ලා සිටින ආකාරයට ඔවුන් පත්කළ, ඔවුන්ගේ උපදෙස් ඇසු ජනාධිපතිවරයාද ඉල්ලා අස් විය යුතුය. එම වැරදි තීරණ අනුමත කල අග්‍රාමාත්‍යවරයා ඇතුළු කැබිනට් මණ්ඩලයද වග කිව යුතුය. දැනට ඉල්ලා අස් නොවී සිටින අග්‍රාමාත්‍යවරයාද ඉල්ලා අස් විය යුතුය.

ජනාධිපති තුමා සහ රාජපක්ෂවරුන් දේශපාලන කරලියෙන් ඉවත්වීම සක්‍රිය පුරවැසියන්ගේ ප්‍රධාන ඉල්ලීම් බවට පත්වී ඇත. ජනමත සමීක්ෂණ මගින්ද මෙය සනාත කෙරේ.

රට මෙම අගාධයට ඇද දැමු දේශපාලන ක්‍රමයට විකල්පයන් ජනතාව ඉල්ලා සිටී. නමුත්, රට සුවපත් කිරීමේ කාර්යයට නායකත්වය දීමට සහ රාජපක්ෂවරුන් ගෙන් තොර ආණ්ඩුවක් සාදා ගැනීමට පාර්ලි‌‌මේන්තුව අසමත් වී ඇත. විපක්ෂයේ ප්‍රධාන පක්ෂය මෙම අසමත් බවට ප්‍රධාන සාධකයකි. මෙතුලින් සාමකාමී සහ ආණ්ඩුක්‍රම ව්‍යවස්ථාවට අනුකූල ක්‍රමවේදයන් ගැන ජනතා විශ්වාසය පලුදු වීමේ අවදානමක් මතු විය හැක.

ණය ප්‍රතිව්‍යුහගත කිරීම ප්‍රමාදවී පටන් ගත් නිසා, ඉදිරි මාස කිහිපය තුල අත්‍යවශ්‍ය සැපයුම් පවත්වා ගැනීම සඳහා අන්තර්කාලීන මුල්‍ය ප්‍රතිපාදන (bridge financing) ඉක්මනින් සකසා නොගත හොත් ජන ජීවිත අදටත් වඩා දුෂ්කර වනු ඇත.

මානුෂික ආධාර වශයෙන් ලබාගන්න බෙහෙත් තියෙනවා යැයි සිතමු. එහෙත් රෝහලට යන්න වාහනයක් නැතිනම්, ගිලන් රථ පවා ඩීසල් නැතුව දුවන්නේ නැතිනම්, ඒත් අවසන් ප්‍රතිපලය ලෙඩා මැරෙන එක නොවේද?

මෙය ප්‍රචණ්ඩත්වයට තුඩු දිය හැක තත්ත්වයන් නිර්මාණය කිරීමේ අවදානම ඇති කරයි.

ජනාධිපති අග්‍රාමාත්‍ය දෙබෑයන් තියාගෙන කැබිනට්ටුවේ පුද්ගලයින් මාරු කිරීමෙන් අරමුදල් සපයා ගෙන ඉදිරි මාස කිහිපය තුල ආර්ථිකය පවත්වා ගැනීමට නොහැකි බව දැන් ඔප්පු වී හමාරය.

ශ්‍රී ලංකා නීතිඥ සංගමය කියන පරිදි අද අවශ්‍යව ඇත්තේ ආණ්ඩුක්‍රම ව්‍යවස්ථා සංශෝධන ඇතුළු අවම පොදු වැඩ පිළිවෙලක් මත පදනම්වූ සර්ව පාක්ෂික ආණ්ඩුවකි. මෙය අපට සහන දිය හැකි ජාත්‍යන්තර පාර්ශවයන්ගේද අපේක්ෂාව විය හැකැයි උපකල්පනය කල හැක.

රට තුල මෙන්ම ජාත්‍යන්තර වශයෙන් පිළිගැනීමක් ඇති ජනාධිපති වරයෙකු සහ අගමැතිවරයෙකු නොමැතිව ජන දුක අවම කර අර්බුදයෙන් ගොඩ ඒමට මගක් නැත. ජනතාවගේ විශ්වාසය දිනා ගත හැකි, එමෙන්ම අර්බුදයෙන් ගොඩ ඒමට ගතයුතු පියවර ගැන හොඳින් කරුණු පහදා දිය හැකි නායකත්වයක් නොමැතිව මෙය සාර්ථක කර ගත නොහැක.

20වන සංශෝධනය මගින් විධායකය සර්ව බලධාරී කර ව්‍යවස්ථාදායකය බල රහිත කර තිබූ නිසා, එය නිශේධ කිරීමට 21වන සංශෝධනයක් කඩිනමින් අනුමත කර ගැනීම බහු පාක්ෂික ආණ්ඩුවක් පිහිටුවීමට අවශ්‍ය යැයි සලකා එසඳහා කැබිනට් පත්‍රිකාවක්ද ඉදිරිපත් කරනු ලැබූ නමුත් මොනයම් හේතුවක් නිසා හෝ එම ක්‍රියාදාමය කඩාකප්පල් කරනු ලැබීය.

කමිටු පිහිටුවා කල් මැරීම විසඳුමක් නොවන නිසා, දැන් කල යුතු වන්නේ නීතිඥ සංගමය මගින් නිර්දේශ කර ඇති ආකාරයට දහතුන් වැදෑරුම් වැඩ පිළිවෙලක් ක්‍රියාත්මක කිරීමයි. වඩා සවිස්තරව ඔවුන් විසින් ඉදිරිපත් කර ඇති යෝජනා සංක්ෂිප්ත ලෙස පහත ඉදිරිපත් කරනු ලැබේ.

1). සිදු කරනු ලබන සියලු දෑ ආණ්ඩුක්‍රම ව්‍යවස්ථාවට අනුකූලව කල යුතුය.

2). අප්‍රමාදව 20වන සංශෝධනය අහෝසි කරන 21වන සංශෝධනය ඉදිරිපත් කල යුතුය. මෙහිදී ශ්‍රේෂ්ඨාධිකරණයේ සහ අභියාචනාධිකරණයේ විනිසුරුවරුන්ගේ සංඛ්‍යාව අඩු නොකිරීමට වග බලා ගත යුතුය.

3.) මහ බැංකු අධිපති සහ මුල්‍ය මණ්ඩල සාමාජිකයන් ආණ්ඩුක්‍රම ව්‍යවස්ථා සභාව මගින් පත්කිරීම, අමාත්‍යාංශ ලේකම්වරුන් පත්කිරීම අග්‍රාමාත්‍යවරයාගේ උපදෙස් අනුව කිරීම ආදී එකතු කිරීම් කිහිපයක්ද යෝජනා කෙරේ.

4). 21වන සංශෝධනය බලාත්මක කල වහාම සියලු ලේකම්වරුන් සහ සියලු ස්වාධීන කොමිෂන් සභාවන්ගේ (අධිකරණ සේවා කොමිෂන් සභාව හැර) සාමාජිකයන් අලුතින් පත් කල යුතුය.

5). ජනාධිපතිවරයාට කිසිදු අමාත්‍යාංශයක් භාර නොදිය යුතුය.

6). හැකි ඉක්මනින්, උපරිම වශයෙන් මාස 15ක් ඇතුලත, විධායක ජනාධිපති ක්‍රමය අහෝසි කර, පාර්ලි‌‌මේන්තුවට වග කියන අග්‍රාමාත්‍යවරයෙකු ප්‍රමුඛ කැබිනට් මණ්ඩලයක් කේන්ද්‍ර කරගත් ක්‍රමයක් ස්ථාපිත කළ යුතුය.

7). අමාත්‍යවරුන් 15 දෙනෙකුගෙන් සමන්විත අන්තර්කාලීන ජාතික සමගි ආණ්ඩුවක් වහා පිහිට විය යුතුය. පිළිගත් දේශපාලන පක්ෂ අතර මැදුම් සම්මුතියක් ගොඩ නැගිය හැකි මන්ත්‍රීවරයෙකු අග්‍රාමාත්‍යවරයා ලෙස පත් කර ගත යුතුය. එවන් පුද්ගලයෙකු පාර්ලි‌‌මේන්තුව තුල නොමැති නම් ජාතික ලැයිස්තුව මගින් පත්කරන ලද මන්ත්‍රීවරයෙකුගේ ඉල්ලා අස්වීම හරහා පරිබාහිර අයෙකු පත් කර ගත යුතුය.

8). අදාළ නිර්දේශපාලනික වෘත්තීයවේදී, වාණිජ සහ සිවිල් සංවිධාන මගින් ඒ ඒ අමාත්‍යාංශවලට අනුරූප වන 15 දෙනෙකු ගෙන් සමන්විත ස්වාධීන උපදේශක මණ්ඩලයක් පත් කර ගත යුතුය. සියලු තීන්දු තීරණ පාරදෘශ්‍යව ඔවුන්ගේ සහභාගිත්වයෙන් ගත යුතුය.

9). දේශපාලන පලිගැනීම් සම්බන්ධව පත් කල විශේෂ ජනාධිපති කොමිෂන් සභාව අහෝසි කර, ඊට අදාළ ජනාධිපති කොමිෂන් සභා වාර්තාව මත පදනම්ව ක්‍රියා කිරීමෙන් වැළකිය යුතුය.

10). අසරණතම ජන කොටස් කෙරේ විශේෂ අවධානයක් යොමු කරමින් රට ගොඩ ගැනීමේ අවම පොදු වැඩ පිළිවෙලක් ඉහත සඳහන් උපදේශක මණ්ඩලය සහ කැබිනට් මණ්ඩලය ආරම්භයේදීම අනුමත කර ගෙන ක්‍රියාත්මක කල යුතුය. එහි ඇතුලත් කල යුතු උපාංග 12ක් උදාහරණ වශයෙන් සඳහන් කර ඇත.

මෙහි ප්‍රමුඛතම වන්නේ ණය ප්‍රතිව්‍යුහගත කරගැනීමට කරන කටයුතු විධිමත්ව කරගෙන යෑම සහ අන්තර්කාලීන මුල්‍ය ප්‍රතිපාදන සපයා ගැනීම තුලින් අත්‍යවශ්‍ය භාණ්ඩ සහ සේවා පවත්වාගෙන යෑමයි. දූෂණයට සහ රාජ්‍ය දේපල අවභාවිතයට එරෙහි නෛතික ක්‍රමවේදයන්ද මෙහි අඩංගු වේ. වත්කම් ප්‍රකාශන ප්‍රසිද්ධ කිරීමට අවශ්‍ය නෛතික වෙනස්කම්ද ඇතුලත් වේ. සුදුස්සන්ට ඉඩ සැලසෙන අයුරින් ජනතාවගේ නියෝජිතයන් පත් කර ගැනීමේ ක්‍රමය සකස් කර ගැනීමේ වැදගත්කමද අවධාරණය කර ඇත.

11). විධායක ජනාධිපති ක්‍රමය අහෝසි කිරීම අවම පොදු වැඩ පිළිවෙලෙහි අනිවාර්ය අංගයක් විය යුතුය.

12). අවම පොදු වැඩ පිළිවෙල මත පදනම්ව අලුත් අයවැයක් සකස් කල යුතුය.

13). ජාතික සමගි ආණ්ඩුවේ ආයු කාලය මාස 18කට සීමාවේ. මාස 18 ට පසුව පාර්ලි‌‌මේන්තුව විසුරුවා හරිනු ලබන අතර, මැතිවරණය පවත්වන තෙක් සති 6ක් භාරකාර ආණ්ඩුවක් ලෙස ක්‍රියා කල හැක.

ජනාධිපතිවරයා, අග්‍රාමාත්‍යවරයා ප්‍රමුඛව පැවති කැබිනට් මණ්ඩලය රටට කර ඇති හානිය පිලිබඳ වගකීම භාර ගනිමින් සහ අරගලභූමියේ ඉල්ලීමට අවනත වෙමින් ඉල්ලා අස්වීම රට ගොඩ ගැනීමේ මූලික පියවර බව අවධාරණය කල යුතුය.

විවිධ පාර්ශවයන් විසින් ඉදිරිපත් කර ඇති යෝජනා සහ නිර්දේශ අතුරින්, අන් අයගේ අදහස්ද ගොනු කරමින් සකස් කරන ලද ප්‍රමාදයකින් තොරව ක්‍රියාත්මක කල හැකි ආකාරයේ යෝජනා මාලාවක් ලෙස නීතිඥ සංගමයේ යෝජනාවලිය හඳුනාගත හැක. එය වැඩිදුර සාකච්ඡා කර අවශ්‍ය නම් සුළු වෙනස්කම් කිහිපයක් කර වහාම ක්‍රියාත්මක කල යුතුය.

(මහාචාර්ය රොහාන් සමරජීව)
දේශපාලන හා සමාජ ක්‍රියාකාරික

noreply@blogger.com (Dhanushka Gunasinghe's Hard Code) — Sat, 23 Apr 2022 15:57:00 +0000

මැරී මැරී ජීවත්වෙන අපේ නායකයෝ

දේශයක් පාලනය කරනවා කියන්නෙ මහ උතුම් කාර්යයක්. මහා පෞරුෂයක් තියන නායකයො තමයි ලෝකෙ දියුණුයි කියන හැම රටකම සාර්ථකත්වය පිටුපස හිටියේ. ඒ වගේම තවත් සමහර රටවල් විනාශය කරා අරන් ගියෙත් ඒ කාලකන්නි හොර දේශ පාලන කොට්ටාශම තමයි. ලෝක ඉතිහාසය පුරා එහෙම උදාහරණ අනත්තවත් තියනවා. අවාසනාවකට අපේ රටටත් ඒ නරක කාලය උදාවෙලා. දශක දෙක තුනක් තිස්සෙ ‍කල මිනිස්සුම ගත්ත වැරදි තීරණ වල ප්‍රතිඵල අද අපි භුක්ති විදිනවා. මිනිස්සුන්ගේ බලාපොරොත්තු එක එක කඩා වැටෙන කොට ජීවිත ඉල්ලා අරගල කරන්න සටන් වදින්න මිනිස්සුන් අද පාරට ඇවිත්. අගමැති ගේ නිලනිවාසේ සුදුකොඩි වැටෙන තරමට මිනිස්සු දේශ පාලුවන්ට වෛර කරනව.

අවසානයේ කියන්න තියෙන්නෙ සමහර දේශ පාලකයො, නායකයො මැරුනත් මිනිස්සුන්ගේ හිතේ ජීවත් වෙනවා, ඒත් තවත් අය ජීවත් වෙද්දීත් ම්නිස්සු මරණය සමරන්න තරම් තත්වෙට වැටිල.

මෛත්‍රි ව්‍යවස්ථාව ඇති කරන්න

noreply@blogger.com (Dhanushka Gunasinghe's Hard Code) — Wed, 14 Jan 2015 14:19:00 +0000

මෛත්‍රි ව්‍යවස්ථාව ඇති කරන්න පාර්ලිමේන්තුවේ 2/3 ක් අවශ්‍යමය.ඒ සදහා මන්ත්‍රිවරු 150 ක් අවශ්‍යය.එම ගනන මෙම මොහොතේ සන්ධානයෙන් ගත යුතුමය.ව්‍යවස්ථා සංශෝධනයෙන් අනතුරුව රට තුළ මැතිවරණ ක්‍රමය වෙනස් වනු ඇත.ඉන්පසු පනින රිලවුන්ට දූෂිතයින්ට එරෙහිව ඔබේ ඡන්දය භාවිතා කර හොද්ද රස වූ පසු ගොරකා ඉවත් කරන්නාක් මෙන් ඔවුන්ව ඉවත් කර දමන්න
මෛත්‍රීපාල සිරිසේන මහතාට ආණ්ඩුව ගෙනියන්න කවර හෝ පක්ෂයකින් හෝ එකතු වලින් හෝ මේ පාර්ලිමේන්තුවේ ආසන 113 ක් අවශ්යය.ව්‍යවස්ථා සංශෝධන සඳහා 150 ක් අවශ්‍යය
ඒ එක්සිය දහතුන අතර කිරෙන් නැහවු සුවඳ විහිදෙන සමන් පිච්ච මල් දහයකට පහලොවකට වඩා නැත සියයකට ආසන්න පිරිස සොයාගන්න වන්නේ මඩ වලෙ නැටූ ඌරන් අතරින්මය
ඔබටත් මටත් ලෙහෙසියෙන්ම කතාවෙන් සුපිරිසිදු පුද්ගලයින් බලාපොරොත්තු විය හැකි නමුත් යථාර්තය නම් දැනට පාර්ලිමේන්තුවේ ඉන්නේ එවැනි පුද්ගලයින් නොවේ.එම නිසා දින සියය යථාර්ථය කරගැනීමට ඔලු ගෙඩි සම්පූර්ණ කර ගැනීමට අප අකමැති වුවත් විවිධ පුදගලයින්ට
තාවකාලිකව හෝ තනතුරු ලබාදීමට සිදුවනු ඇත
එහෙත් අපට මෛත්‍රී හා රනිල් කෙරෙහි දිගුකාලීනව බලාපොරොත්තු රැඳවිය හැකිය .ජාතික හෙල උරුමය හා ජනතා විමුක්ති පෙරමුණ පක්ෂයන් ලෙස බලාපොරොත්තු තබා ගත හැකිය.
මේ පිරිස එක මතයක රැඳි සිටින තාක් කල් සෙසු කවුරුන් එකතු වූවත් තනතුරු ගත්තත් එයින් මෛත්‍රීපාලනයට බලපෑමක් කල නොහැකිය..

මෙත්තානිසංස සූත්‍රය

noreply@blogger.com (Dhanushka Gunasinghe's Hard Code) — Mon, 06 Jan 2014 04:11:00 +0000

මෙත්තානිසංස සූත්‍රය

තෙරුවන් සරණයි යාලුවනේ. අදත් ඔයාලට ඉතාම වැදගත්වන සූත්‍ර දේශනාවක් තමයි මම ඉදිරිපත් කරන්න යන්නෙ. ඊට කලින් සදහන් කරන්න ඕනි මේ ගොඩක් ලිපි මම යම් යම් තැන්වලින් උපුටාගෙන තමයි නිරමාණය කරන්නෙ. මගෙ ලිපියට සුදුසු කොටස් එ‍හෙමම ගන්න වෙලාවලුත් තියෙනව. මට සුවිශාල දැනුම් සම්භාරයක් තියෙනව කියල හිතන්න එපා. ඒක මට පවක් වෙන්න පුලුවන්. අනිත් කාරණේ මේ ලිපි බලල මට සහයෝගය දක්වන ඔබට විශේෂයෙන් ස්තුති වන්ත වෙන්න ඕනි. ඔබ මේ ලිපි බලන නිසයි මම මේව පල කරන්නෙ. ඒවගේම ලිපි බලල මට දෙමාලියො වගේ ආදරය කරන අයත් ඉන්නව. ඔයාලටත් ඉතා ඉක්මනින් චතුරාර්ය සත්‍යය අවබෝධ වේවා.
හොදයි මෙත්තානිසංස සූත්‍රය සූත්‍ර දේශනාව මම ප්‍රායෝගිකව අත්විදපු සූත්‍ර දේශනාවක්. මෙහි සදහන්වන සියල්ලක්ම නොවුනත් කොටසක් හරි මට හොදින්ම දැනිල තියෙනව. ඒ නිසා මේ මෙත්තානිසංස සූත්‍රය හා කරණීය මෙත්ත සූත්‍රය කියන සූත්‍ර දෙකෙහිම සත්‍යතාවය පෙන්නන්න මට වෙන කිසිම සාක්ෂියක් ඕනි නෑ. මම සහතික කරල කියනව මේ සූත්‍ර දෙක ඔබේ ජීවිතේ ප්‍රායෝගික විදිහට යොදාගන්න පුලුවන් හැබැයි අවංක ශ්‍රද්ධාවෙන් යුක්තව කරනවනම්. සමහර කරුණු ප්‍රසිද්ධියේ ප්‍රකාශ කිරීමට නොහැකි උවත් යම් යම් සුවිශේෂ හැකියාවන් ඇතිවීම, අනතුරු වලින් ආරක්ෂා වීම, ලෙඩදුක්වලින් මිදීම, මිනිසුන් ආකර්ෂණය වගේ දේවල් මම ඉතාම පැහැදිලිව අත්විදල තියෙනව. හැබැයි මේ කාලෙ අධික වැඩ කටයුතු නිසා භාවනා කටයුතු සිදුකරන්නෙ නැති නිසා මේව ගැන අහන්න එපා. අනික් කාරණය මේ දේවල් කිව්වෙ ඔයාල තුල මේ කටයුත්තට උනන්දුව ඇතිකිරීමට මිස පුද්ගලික වාසි තකා නෙවෙයි කියලත් මතක තියාගන්න. තවත් එකක්. ඔබ භාවනා කළයුත්තේ අර මම සදහන් කරපු ආශ්චර්යයන් බලාගෙනත් නෙවෙයි. යාලුවනේ කරණීයමෙත්ත සූත්රය ගැන මම කලින් ලිපිටක් පලකල නිසා ඒ ගැන තවදුරටත් කියන්න යන්නෙ නෑ. මෙන්න මේ ලින්ක් එක මත ක්ලික් කිරීමෙන් ඔයාලට ඒ ලිපිය බලන්න පුලුවන්.
http://www.facebook.com/photo.php?fbid=465191220197423&set=pb.100001196487578.-2207520000.1351683390&type=3&src=http%3A%2F%2Fsphotos-f.ak.fbcdn.net%2Fhphotos-ak-ash4%2F415619_465191220197423_221180853_o.jpg&smallsrc=http%3A%2F%2Fsphotos-f.ak.fbcdn.net%2Fhphotos-ak-ash3%2F560722_465191220197423_221180853_n.jpg&size=1050%2C650

ඉතින් කරණීමෙත්ත සූත්‍රය මෛත්‍රී කරන ආකාරය සදහන් වෙන අතර මෙත්තානිසංස සූත්‍රය මෛත්‍රීයේ ආදීනව හා ආනිසංස කියවෙන සූත්‍රයක්. හොදයි අපි මුල ඉදන්ම පටන් ගමු.

මෙත්සිත මනාව දිගු කාලයක් ප්‍රගුණ කිරීමේදී සිතට දැනෙන සැහැල්ලුව සහනය වචනයෙන් කියා නිම කරන්න බැහැ. එහි මහ පුදුම බලයක් ශක්තියක් තිබෙනවා. කිසිවෙකුට මැඩ පවත්වන්න නොහැකි යටපත් කරන්නට නොහැකි උසස් ආරක්ෂාවක් රැකවරණයක් එයින් ලැබෙනවා. මහා බලගතු ආරක්ෂාවක්. තමා වටා ගොඩ නැගෙනවා. දෙවියන් සහිත ලෝකයාගේ ගෞරවයට පත්වෙනවා. ඔවුන්ගෙන් වැදුම් පිදුම් හිමිවෙනවා. යක්ෂ භූතාදීන්ගෙන් කිසිදු විපතක් හානියක් කරදරයක් කිසිම අයුරකින් සිදුවන්නේ නැහැ. ඔවුන්ගෙන් ගෞරවය, රැකවරණය පමණක් නොව ආරක්ෂාවත් හිමිවෙනවා. උදව් උපකාරත් හිමිවෙනවා. යහලුවනේ මේ ‍තේසිත කියන දේ අපිට මොනතරම් වැදගත්ද? මට හිතෙන්නෙ මේ මෙත්සිත මත තමයි මුලු විශ්වයම රදා පවතින්නෙ කියල. දැන් බලන්නකො අපි එකිනෙකාට මෙත් සිත තියෙනවනම් අපි අනිකා කෙරෙහි දයාව ආදරය වගේ දේවල් ඇතිවෙනව නේද? බලන්නකෝ ලෝක සෞඛ්‍ය සංවිධානය කියන්නෙ මිනිසා කෙරේ මෙත් සිත පතුරවන ආයතනයක්. ඒ ආයතනය නැතිනම් අද කීදෙනෙක් මාරයට බිලිවෙලා ඇත්ද? යුනිසෙෆ්, ලෝක ආහාර වැඩ සටහන ආදී මේ සියල්ල අනිකා කෙරේ පවත්න මෙත් සිත නොවේද? අනිකා කෙරෙහි ද්වේෂයක් ඇති කරගත්තොත් තත්වය කෙපදු වේද? අද ලෝකය පුරා මිසයිල කීයක් නම් ක්ෂණිකව ක්‍රියාත්මක කරන්න පුලුවන් විදිහට පවතිනවද? බැරිවෙලාවත් සිතේ ද්වේශය ඇති උනොත් මේව ක්‍රියාත්මක කරනව. මුලු ලෝකයම විනාශයි. ඉතින් තවකෙකු කෙරේ දයාව අනුකම්පාව දැක්වීම මොනතරම් නම් උතුම් ක්‍රියාවක්ද? පින්වත් යුලවනේ බුදුබව කියන්නෙත් මෙත් සිතේ ප්‍රතිමූර්තියක්. බුදුවරයෙකුට කියන තවත් නමක් ලෙස මෛත්‍රිය හදුන්වන්න පුලුවන්. ඇයි? සකළ ලෝකය කෙරේ පතල මහා කරුණාවෙන් තමයි යමෙක් බුදුබව පතන්නෙ. බුදුවෙලා කරන්නෙත් අසරණ මිනිසුන් කෙරේ මෙත් සිත පතුරවල මේ ඝෝර කටුක සංසාරෙන් මිනිසා ඇතුලු සකල සත්වයන් එතෙර කරන්න උත්සාහ කිරීමයි.

මෙම මෙත්තානිසංස සූත්‍රය අංගුත්තර නිකායේ ඒකාදසක නිපාතයට ඇතුළත් සූත්‍රයක්. මෙය පසු කළෙක මහා පිරුවානා පොත් වහන්සේ නම් වූ මහ පිරිත් පොතටද ඇතුළත් කර තියෙනව.

මෙහි දැක් වූ මෛත්‍රීය අර්පණා (ධ්‍යාන) බවට පැමිණි මෛත්‍රියයි. එබඳු මෛතී‍්‍ර චිත්ත විමුක්තියෙන් යුක්ත පුද්ගලයාට අනුසස් එකොළොසක් ලැබෙනව. මෙහි ඇතුළත් අනුසස් එකොළොසින් දහයක් මෙලොවදී ද එකොළොස වන ආනිසංසය පරලොවදී ද ලැබෙන බව දත යුතුය. ඉතින් ඔය බුදු දහම පරලොවට පමණයි කියන තර්කය බිද දමන්න මෙ හොද අවසථාවක්.

යම් කිසි අයුරකින් එම මෛත්‍රීය පාදක කර ගෙන අර්හත් ඵලය ඉපද වූයේ නම් එකොළොස්වන ආනිසංසය වශයෙන් නිර්වාණ ධාතුවෙන් පිරිනිවන්පානාව.

එසේ නොවී අනාගාමී වුවහොත් අවිහ – අතප්ප සුදස්ස සුදස්සී අකනිට්ඨක යන පංච ශුද්ධාවාසයන් අතුරෙන් එක්තරා බ්‍රහ්ම ලෝකයක ඉපදීම එකොළොස් වන ආනිසංසය වශයෙන් සැලකිය යුතුය.

මෛත්‍රී චිත්ත විමුක්තිය පාදක කරගෙන සෝතාපන්න හෝ සකදාගාමී වී නම් තමන් ලත් ධ්‍යානයේ හැටියට බ්‍රහ්ම ලෝකයෙහි උපදනේය. 11 වන ආනිසංස වශයෙන් එම මෛත්‍රිය පාදක කොට ගෙන අර්හත් ඵලයට පැමිණ අනුපාදි ශේෂ නිර්වාණ ධාතුවෙන් පිරිනිවන්පෑම හෝ අනාගාමීව ශුද්ධා වාස බ්‍ර‍්‍රහ්ම ලෝකයන්හි ඉපදීම හෝ කළ හැක.

මෙසේ අර්පනා බවට නොපැමිණි මෛත්‍රිය පාදක කොට ගෙන සෝතාපන්න හෝ සකදාගාමී වූයේ නම් බ්‍රහ්ම ලෝකයෙහි ඉපදීමක් කළ නොහැකි බැවින් දෙව්ලොව උපදී. එසේම මෛත්‍රී චිත්තයෙන් යුත් තැනැත්තේ පෘථග්ජනව විසූයේ නම් සුවසේ සැතපීම යන දස ආනිසංසයම මෙලොවදී ලබා මරණින් මත්තෙහි “සුගතිංසග්ගං ලෝකං උප්පජ්ජිති ”යි දැක්වූ හෙයින් යහපත් පැවතුම් ඇති සුගතියෙහිම ඉපද ආනිසංස එකොළොසම ලබයි.

ඒ නිසා මෛත්‍රී චිත්තය භාවිත කිරීම මහානුභාව සම්පන්න දිව්‍යමය මන්ත්‍රයක් හා සමාන බැව් දත යුතුය.

මෛත්‍රියෙහි ආනිශංස නොමඳව ලැබීමට නම් කෙසේ මෙත් වැඩිය යුතුද යන්න මෙහි පැහැදිලිව දක්වා ඇත. එනම් ආසේවිතාය, භාවිතාය, බහුලීකතාය, යානිකතාය, වත්ථුකතාය, අනුට්ඨිතාය,පරිචිතාය, සුසමාරද්ධාය වශයෙනි. ආදරයෙන් ආශ්‍රය කරමින් නැවත නැවත වඩමින්, යානාවක් සේ ගෙන, වස්තුවක් සේ රැකබලා ගනිමින්, එළැඹ සිටි සිහියෙන් යුතුව, මනාව ආරම්භ කර පුරුදු කරන ලදුව, තම දෛනික අවශ්‍යතාවක් ලෙස සලකමින් මෙත් වැඩීම සිදුකළ යුතුය.
මේ බව කරණීය මෙත්ත සූත්‍රය තුල මෙසේ දක්වා ඇත.

‘’මාතා යථා නියං පුත්තං
ආයුසා ඒක පුත්ත මනුරක්ඛේ
ඒතංපි සබ්බ භූතේසු
මානසං භවයේ අපරිමානං’’

උතුම් මව් පදවිය උසුලන, ආදරය, කරුණාව, මෛත්‍රියෙන් පිරිපුන් උසස් දරු සෙනෙහසක් ඇති මවක් යම්සේ සිය දිවි දෙවෙනි කොට තම එකම පුතු ආරක්ෂා කරන්නී ද එමෙන් සියලු ලෝක සත්ත්වයා වෙත අපරිමිත මෙත්සිත පැතිරවිය යුතුය. එය බුද්ධ චරිතයේ ආදර්ශයකි. අපේ බුදුරජාණන් වහන්සේගේ මෛත්‍රි බලය, ශක්තිය අපරිමිතයි. මෙතෙකැයි කියා ප්‍රමාණ කළ නොහැකිමය. දරුණු සොරුන්, රෞද්‍ර යක්ෂ, නාග භූ®තාදීන් පහසුවෙන් දමනය කිරීමටත් තම වසඟයට ගැනීමටත් හැකියාව ලැබුණේ අපරිමිත මෛත්‍රී චිත්ත බලය නිසයි. දුටුවන් බියෙන් සැඟවී පලායන තරම් භයානක වූ නාලාගිරි ආදි තිරිසන් සතුන් පවා අහිංසක සැදැහැති දරුවන් සේ සිරිපා මුල දනින් වැඳ වැටෙන පමණට සංවර කිරීමට, දමනය කිරීමට හැකිවූයේ ඒ උතුම් මෛත්‍රි බල ශක්තියෙනි. ජීවිත කාලය පුරාම ද්වේශයෙන් ක්‍රෝධයෙන්, වෛරයෙන් අනේක විධ තර්ජන, ගර්ජන, වදහිංසා පැමිණවීමට උත්සාහ කළ දේවදත්තට කිසිදු වෙනසකින් තොරව මෙත්සිතම වැඩූහ. ගිහිකළ තමනට දාව උපන් රාහුල කුමරුට වැඩි මෛත්‍රියක්, කරුණාවක් නොපැවැත් වූහ. සියල්ලටම සම සිතින් මෙත්සිත වැඩුවා. මහා කාරුණික තථාගතයන් වහන්සේ ගේ මේ උතුම් ආදර්ශයම ගුරුතන්හි තබා සියලු සතුනට සම මෙත් සිතම පැතිරවීමට හැකි හැම උත්සාහයක්ම ගත යුතුයි.

‘තිට්ඨං චරං නිසින්නෝවා
සයා නෝ වා යාව තස්ස විගත මිද්ධෝ’

සිටගෙන සිටියත් ගමනේ යෙදුණත් සක්මන් කරන මොහොතෙත් අසුන්ගෙන සිටියත්, සයනය කරන අවස්ථාවේදීත් අපිරිමිත මෙත් සිත පතුරවන්න හැකියාව තියෙනවා. එපමණක් නොව නින්දට ගොස් නින්ද එනතුරුත් මෙත් සිත වඩන්න හැකි බව පෙන්වා දී තිබෙනවා. මෙයින් අපට පැහැදිලි වන්නේ සෑම ඉරියව්වක සිටම මේ භාවනා ක්‍රමය වඩන්න හැකි බවයි. මේ සඳහා නිශ්චිත වෙන් වූ ඉරියව්වක් නැත. සන්සුන් පරිසරයක හැකි පමණ කාලයක් එකම ඉරියව්වක සිට මේ කමටහන වැඩීමෙන් මෛත්‍රී ධ්‍යාන උපදවන්න හැකි වෙනවා. මෛත්‍රී කමටහන හොඳින් ප්‍රගුණ කර ධ්‍යාන වඩා සෙසු භාවනා කමටහන් ප්‍රගුණ කිරීමටත් විදර්ශනා භාවනා ක්‍රම දියුණු කිරීමටත් පහසු වෙන

1. මෛත්‍රී චිත්තය

මෙජ්ජතීති - මෙත්තා සිතේ පවත්නා මෘදු බව සිනිඳු බව මෛත්‍රියයි. මිත්තේ භවා මිත්තස්ස ඒසා පවත්තීතිපි - මෙත්තා මිතුරා කෙරෙහි වූයේ හෝ මිතුරාගේ පැවැත්මය යන තේරුමට හෝ මෛත්‍රිය යයි කියනු ලැබේ. හිතේසිකා සබ්බ සත්තේසු හිත එරණතා - මෙත්තා සියලු සත්වයන් කෙරෙහි හිතෛශී භාවය හිත පැතිරවීම් ස්වභාවය මෛත්‍රීයයි.

සබ්බ සත්තේසු හිතාකාරප්පවත්ති ලක්ඛණා මෙත්තා සියලු සත්ත්වයන් කෙරෙහි හිත ආකාරයෙන් පැවැත්ම මෛත්‍රියයේ ලක්ෂණයයි. කෝපය සංසිඳවීම මෙයින් ලැබෙන සම්පත්තියයි.

එබඳු මෛත්‍රීයයෙන් යුත් සිත මෛත්‍රී චිත්තයයි දත යුතුය. මෙබඳු මෛත්‍රීයෙන් යුත් තැනැත්තේ,

1. සුවසේ නිදයි. - පිංවත් යාලුව‍ෙන් අද සමහරුන්ට නින්ද කියන්නෙ ලොකු ගැටලුවක්. සමහරු මත්පැන්බොනව සුව නින්දක් ලබාගන්න. තව සමහරු නිදිපෙති අහුරු ගණන් ගිලිනව. ඒත් මෙත් සිත වඩන කෙනා ඉතා සුව නින්දක් බලනව. මොකක්ද මේකට හේතුව. සුව නින්දක් නොලැබෙන්නෙ සිත කලහකාරී නිසා. කරදර වලින් පිරිල නිසා. ඒත් මෙත්සිත වඩන්නන්ට සිතේ ප්‍රභාෂ්වරය නිසා ඔය කිසිම ගැටලුවක් නැහැ. කරදරත් නෑ. තිබුනත් ඒව ආශ්චර්යමත් විදිහට විසදිල යනව. අපට දැනෙන දුක් කරදර වාඩිහරියකට හේතුව අපේම හිතමයි. ඒ ගැන වෙනම වෙලාවක කියන්නම්.
2. සුවසේ අවදිවෙයි - මොකද සිත නිදහස් නිසා ඉතාම සුවෙන් අවදිවෙන්න පුලුවන්. අනික වෙලාවට ඇහැරෙනව. ඕව මහ ආශ්චර්යමත් දේවල්. කරලම බලන්නකෝ.

3. නපුරු සිහින නොදකියි. මම කලින් කිව්වෙ ඔයාලට. හිතේ තියෙන ප්‍රභාෂ්වරය නිසා මෙත් සිත් ඇත්තාට පේන්නෙ හරිම සුන්දර හීන. මල්වත්තක්, දියකඩිත්තක් දැක්කට හිතේ සතුටක් මිස බයක් නෑනෙ නේද? එහෙම නැතනම් කිසිම හීනයක් දකින්නෙ නෑ.

4. මිනිසුන්ට පි‍්‍රය වෙයි. - මොකද හේතුව. අද විද්‍යාව පවා තහවුරු කරනව මිනිස් සිරුරෙන් රශ්මි දහරක් පිටවෙනව කියල. දැන් යමක් ඔයාලට මතක් වෙන්න ඕනි. මොකක්ද? දේවාතිදේව, බ්‍රහ්මාති බූහ්ම ලොව්තුරු සර්වඥයන් වහන්සේගේ බුදුරැස් වලල්ල පිළිබදව. ඒ මෙත්සිතේ පරම උත්තම අවස්ථාව බව කියන්න ඕනි. ඉතින් ඔයාලත්මෙක් භාවනාව කරද්දි ඇසට නෙපෙනෙන රන්වන් රශ්මිධාරාවක් සිරුරින් පිටවෙනව. ඒ‍ෙක ප්‍රභාෂ්වගෙතිය නිසා දකින අයට ඔයාලව පි‍්‍රය වෙනව. හැබැයි මස්මාලු ගිලින්න දගලන අයට කියන්න තියෙන්නෙ කරල බලන්න හරියයිද කියල විතරයි.

5. අමනුෂ්‍යයන්ට පි‍්‍රය වෙයි. මේකට හේතුව තමයි යාලුවනේ මෙත් සිත් ඇත්තා නිතර යහපත් විදිහට සිතන්නෙ. ඔය කුණු මස්මාලු ගිලල බඩ සවුත්තුකරගත්තු ඇවිදින සොහොන්ගෙවල් පස්සෙ තමයි යක්කු පෙරේතයො එන්නෙ. දක්කනෙ මම දාපු ලිපිවල තිබුන කුණු මස්වල හැටි. ඉතින් මිනිස්සු පස්සෙ යක්කු එන්නෙ ආදරේකට නෙවෙයි. හැබැයි මෙත්සිත් ඇති පිරිසිදු අයට අමුනුෂ්‍යයන්ගෙන් කිසි කරදරයක් නෑ. මොකද එයාලට මෙයාගෙන් ගන්න දෙයක් නෑ. තමන්ගෙ පාඩුවෙ ජීවත්වෙන අයට කවුරැත් කැමති. අනික ගන්න දෙයක් නැතිනම් පස්සෙන් එන්නෙ මොකටද?

6. දෙවියෝ රකිති. සක්ක සංයුක්තයේදි සක්දෙවිඳු මිනිසුන්ට වන්දනා කරන්නේ ඔවුන්ගේ යහපැවැත්ම නිසාවෙනි. එහෙයින් දෙවියන්ගේ ආශිර්වාද ලබාගැනීමට පුද පඬුරු පුදා යාඥා කළ යුතු නොවේ. මෛත්‍රි සහගත කාය, වචී, මනෝ කර්ම තුළින් එය සිදු කරගත හැකිය. ගහට්ඨවන්දනා සූත්‍රයේදි ඒ බව මෙසේ දක්වා ඇත.

යේගහට්ඨා පුඤ්ඤකරා
සීලවන්තෝ උපාසකා
ධම්මේන ධාරං පෝසෙන්ති
තේ නමස්සාමි මාතලී

යාලුවනේ යම් කිසි ගෘහපතියෙක් පින්කම් කරයිනම්, සිල්වත්නම්, ධාර්මිකව අඹුදරුවන් පෝෂණය කරයිනම් මම ඔහුට නමස්කාර කරනව කියල සක් දෙවියො මාතලීට කීව. ඉතින් දෙවියන්ගෙන් නමස්කාර කරන අයට දඩබ්බර යකෙක්වත් අනතුරක් කරන්නෙ නෑනෙ.

7. ගිනි – විෂ – ආයුධ හෝ ඔහුගේ කයට නොපිවිසෙයි. මෙය ඉතාම වැදගත්. උදේන රජතුමා මාගන්ධියා බිසවගෙ බොරු බසට රැවටිල නේද සාමාවතිය ඇතුලු පන්සියයක් මරන්න දඊතලයක් විද්දෙ. මොකද උනේ. ඊතලයට වෙච්ච දේ බලන්නකො. ආපහු රජතුමා පස්සෙ ආව. මෙන්න මෙත් බලය. සිරිමා ගනිකාව උත්තරා උපාසිකාවට නේද උණු තෙල් හැලුවෙ. පිච්චුනේ නෑ මෙත් සිත නිසා. පුචි හාමුදුරුකෙනෙක් භාවනා කරද්දි මනුස්සයෙක් කඩු පහරක් ගහල. කඩුව දෙකට නැමුනලු. වැඩිය ඕනි නෑ. ඔයාල දන්නවනෙ මේ ලගදි මම ඉන්න තැනට අකුණක් ගහල බේරුණ හැටි. බල්බ් බිදිල වැටුනත පරිගණකයටවත් මටවත් අබමල් රේණුවක හානියක් නෑ. ඕව ඉතින් දන්නෙ භාවනා කරන අයම තමයි. ඔයාලත් උත්සාහ කරන්න.

8. වහා සිත එකඟ වෙයි. භාවනාවට ඉදගත්තද හිත විහිරෙන්නෙ නෑ. ඒ ගැන මම කලින් කියල තියෙනව. සිතේ තියෙන පිරිසිදුකම තමයි ඒ.

9. මුහුණේ පැහැය බබළයි. මම කලින් කිව්ව රශ්මි දහරාව මතකයිනෙ.

10. නුමුළාව කළුරිය කරයි. මේකත් හිතාගන්න පුලුවන්නේ. හිතේ පිරිසිදු කමම තමයි.

11. මරණින් මතු සුගතියෙහි උපදියි. ආයි දෙකක් නෑ. යහපත් තැනක්ම තමයි.

2. මෛත්‍රී චිත්ත විමුක්තිය

මෛත්‍රීයෙන් යුත් සිත පංච නීවරණා දී සතුරන්ගෙන් විශේෂයෙන් මිදේද එහෙයින් චිත්ත විමුක්තිය යයි කියනු ලැබේ. ධ්‍යාන බවට පැමිණි මෛත්‍රීයට මෙය නමෙකි. මෙත්තා කරුණා මුදිතා උපේක්ඛා අතුරෙන් මෛත්‍රීය දක්වන තන්හි මෙත්තා යි කී කල්හි සමහර තැනෙක ධ්‍යාන තත්ත්වයට පැමිණි මෛත්‍රියටද සමහර තැනෙක ධ්‍යාන පුර්භාග මෛත්‍රීයද ගැනේ. මෙත්තා චේතෝ විමුක්ති යි කිවහොත් ධ්‍යාන බවට පැමිණි මෛත්‍රියම ගැනේ.

මෙත්තා - කරුණා - මුදිතා යන ත්‍රිවිධ වූ බ්‍රහ්ම විහාර භාවනාවෙන් ලැබිය හැක්කේ ප්‍රථම ද්විතීය තෘතීය යන ධ්‍යානයෝය. එබැවින් ඒ ඒ ධ්‍යානයකින් නීවරණයන් ගෙන් හොඳ හැටි මිදුණු සිත මෛත්‍රී චිත්ත විමුක්තිය ලෙස දත යුතුය.

3. මෛත්‍රීය වැඩිය යුත්තේ කෙසේද?

ත්‍රිහේතුක ප්‍රතිසන්ධික යෝගාවචරයා විසින් පිරිසිදු පංචශීලයෙහි හෝ පිහිටා පළිබෝධයන් දුර හැර සුදුසු විවේක ස්ථානයක සුව අසුනෙක හිඳ පළමු කොට ද්වේශයෙහි ආදීනව හා ක්ෂාන්තියෙහි අනුසස් හැකිතාක් දුරට මෙනෙහි කළ යුතුයි. කුමක් හෙයින්ද මෙම භාවනාවෙන් ද්වේෂය දුරු කළ යුතුයි. ක්ෂාන්තිය ලැබ ගත යුතුයි. ආදීනව හා නොදැක්ක දෙය දුරු කරන්නටද ආනිසංස නොදැක්ක දෙය ලබන්නටද නොහැකි බැවිනි ආදීනව මෙසේ මෙනෙහි කළ යුතුය.

කුද්ධෝ අත්ථං නජානාති – කුද්ධෝ ධම්මං නපස්සති

කිපි තැනැත්තා කළ යුත්ත නොදනී. කිපි තැනැත්තා ධර්මය නොදනී.

යමෙක් නිරපරාධී තැනැත්තකුට කිපුණත් උඩු සුළඟට දැමූ ධූලී තම මුහුණටම එන්නාක් මෙන් තමාටම විපත් පැමිණේ.

යමෙක් දඬුවම් නොකළ යුතු කෙනෙකුට දඬුවම් කෙරේද ද්වේශ නොකළ යුත්තෙකුට කිපේද ඔහු දස විධ අන්තරායයන්ගෙන් එක්තරා අන්තරායකට පැමිණේ.

දස විධ අන්තරාය නම්:

1. දරුණු වේදනාවක් විඳින්නට සිදුවෙයි.

2. බලවත් ධන හානියක් සිදුවෙයි.

3. අතපය ආදී අවයව බිඳෙත්.

4. දරුණු ලෙඩක් සැදෙයි.

5. උමතු වෙයි.

6. රාජ උදහසක් ඇති වෙයි.

7. බලවත් චෝදනාවක් අසන්නට සිදුවෙයි.

8. කිට්ටුවර නෑයන්ගේ පිරිහීමක් සිදුවෙයි.

9. වී ගොවිතැන් ආදී භෝගයන්ගේ පිරිහීමක් ඇති වෙයි.

10. ඔහුගේ ගෙය ගිනි ගනී.

මෙකී අන්තරාය දහයෙන් එකකට හෝ කීපයකට මෙලොවදීම මුහුණ පා වැඩි කල් ජීවත් නොවී මරණයටද පැමිණ මරණින් මතු අපායටද පැමිණෙන්නේ ය.

මේ ගැනද සිතන්න.

1. කිපෙන තැනැත්තාට ළඟම ඇත්තෙ පෝරකය හෝ නිරයයි. දන්නවනෙ ඔයාල සමාජෙ ගරන
2. මිනී මැරුවෝ වැඩි දෙනෙක්ම කිපෙන තැනැත්තෝය. කවුරුත් හිනාවෙලා මිනී මරන්නෙ නෑනෙ.
3. කිපීම නීචයන්ගේ ක්‍රියාවකි.

4. නොකිපෙනු, කිපුනත් වචනයක් නොකියනු. කිසිවක් නොකරනු. ලියුමක් පවා නො ලියනු. ලියුවත් තැපැල් නොකරනු. ඔයාල අහල ඇතිනෙ තරහ ගියාම දහයට ගනින්න කියල. ඒවගේ මේකත්. එක් අවස්ථාවක ධම්මපදයෙ තියෙනව යමෙක් නිරපරාදෙ උතුමෙකුට පහරදෙනවනම් ඔහුට සාපවේවා. ඒ පහර දෙන තැනැත්තා කෙරේ කිපෙන උතුමාට ඊට වඩා සාප වේවා කියල. කොහොමද වැඩේ.

5. කිපෙන තැනැත්තා දෝතින් ගිනි අඟුරු ගෙන අනුනට ගසන්නෙක්.

6. කිපෙන තැනැත්තා ඉක්මණින්ම දුගී භාවයට පැමිණේ. මෙසේ කෝපයේ ආදීනව ගැන සිතන්න.

ඉවසීමේ අගය

ඛන්ත්‍යා භීයෝ නවිජ්ජන්ති

ක්ෂාන්තියට වඩා උතුªම් ගුණයක් විද්‍යාමාන නොවේ.

ඛන්තී පරමං තපෝ තිතික්ඛා

ඉවසීම සහිත ක්ෂාන්තියයි උතුම් තපෝ ගුණයයි.

වසන දනා රුපු යුදයට ජය කොඩිය ඉවසීමෙන් සැනසීම ලැබේ.

මේ ආදී ක්‍රමයෙන් ඉවසීමේ වැදගත්කම සැලකිය යුතුයි. මෙසේත් සලකා ඉවසිය නොහැකි නම් උතුමන්ගේ චරිත මෙනෙහි කළ යුතුය.

4. මෙත් වැඩිය යුත්තේ කාටද? - මෙත් නොවැඩිය යුත්තේ කාටද?

ඉවසීමේ අගයද ක්‍රෝධ කිරීමේ ආදීනවද සලකා විවේක ස්ථානයක හිඳ තමා සැපයට කැමති බැවින් සාක්ෂි ස්ථානයෙහි ලා සලකනු පිණිස මම සැප ඇත්තෙක් වෙමි. මම සැප ඇත්තෙක් වෙමි යි. බොහෝ කලක් සලකා අනතුරුව හිතවතාට ද ඉන්පසු මධ්‍යස්ථයාටද පසුව සතුරාටද මෙත් වැඩිය යුතුය.

හිතවතාට මෙත් වැඩීමේදී ලිංග විසභාගත්වය විශේෂයෙන් සැලකිය යුතුය. පිරිමියෙක් ස්ත්‍රියකටද ස්ත්‍රියක් පිරිමියෙකුටද පෞද්ගලික වශයෙන් මෙත් වැඩිය යුතු නොවේ. එසේ කිරීමේදී රාගය මෛත්‍රිය මෙන් වෙස් වලා ගෙන පැමිණ ඒ යෝගාවචරයා මැඩලයි. රාගය මෛත්‍රියට ළඟම සිටින සතුරාය.

ව්‍යාපාදය ඈත සිටින සතුරාය. ඒ නිසා රාගය ආලය පේ‍්‍රමය කියන තත්ත්වයට නොවැටී හිතවත්කම, යහපතක් වීමේ කැමැත්ත යන අදහස්වලට සමාන වන පරිදි රාගයෙන් මෛත්‍රිය පරිස්සම් කරගත යුතුය.

ගල් මුල් ආදියක ගැටීමෙන් හෝ පය පැකිලීමෙන් හෝ හදිසි යමක් කිරීමට කීපවරක්ම වෑයම් කර නොහැකිවීම් ආදියෙන් හෝ මෝඩකම වැඩි තරමට බලවත්වද නිතර නිතරම උපදිනා අස්ථාන කෝපයත් සමඟ දස ආකාරයකට මෛත්‍රීයට ඉඳුරාම සතුරු වූ මේ ව්‍යාපාද උපදී. මෙසේ දස ආකාරයකින් සිතේ උපදිනා තරහවක් වේද නැවත නැවත ගැටීමක් වේද විරෝධයක් වේද ප්‍රතිවිරෝධයක් වේද කිපීමෙන් නැවත නැවත කිපීමෙන් ද්වේෂයක් සිතේ විකෘතියක් සැඩ ගතියක් නොසතුටු ගතියක් ඇත්නම් එය ව්‍යාපාද නීවරණ යයි කියනු ලැබේ කියල සදහන් වෙනව. නිතර හොද වචනයක් පුරුදු කරන්න. නමෝ බුද්ධා වගේ වචනයක් කියවෙනවනම් හදිස්සියකදි මොන තරම් පිනක්ද?

පිළුණු බතක් සියලු දෙනාගේම පිළිකුලට භාජනය වන්නාක් මෙන් කිපෙන පුද්ගලයා සියලු දෙනාගේම පිළිකුලට භාජනය වේ. එසේම යහළුවෙකුගේ වේශයෙන් වෙස්වලා පැමිණෙන සතුරකුමෙන් රාගයද මෛත්‍රියෙහි ස්වරූපයෙන් පැමිණ මෛත්‍රිය වනසයි. එනිසා වෛරය මෛත්‍රියට දුර සිටින සතුරා වශයෙන්ද රාගය ළඟම සිටින සතුරා වශයෙන් ද සැලකිය යුතුය.

ඔබට යම් කිසි වේලාවක කිසිවක් හෝ කිසිවක් ගැන දොම්නසක් අසතුටක් තරහක් පළිගැනීමේ චේතනාවක් වෛරයක් බද්ධ වෛරයක් නැතිනම් ඒ වේලාවට ඔබ තුළ ව්‍යාපාදය නැත. එසේම ඇල්මක් ආශාවක් පේ‍්‍රමයක් ආලයක් තෘෂ්ණාවක් නැතිව හිතවත් කමක් යහපතක් වීමේ කැමැත්තක් නගාසිටුවමි. උසස් කරවමි. යන චේතනාවක් නම් පවතින්නේ ඒ වේලාවේ ඔබ තුළ රාගයද නැත. පවතින්නේ මෛත්‍රියයි.

මෛත්‍රී භාවනාව මහා බලගතු ආනිසංස ඇති කමටහනක්. සියලු පින්කම්වලට වඩා අතිශයින් උසස්, ප්‍රබල අනුසස් ලබාදෙන බව බුදුරජාණන් වහන්සේ පෙන්වා වදාරා තිබේ. කෙනෙක් ජීවිතය පුරාම සිදුකරන සියලු පින්කම් වලට වඩා ඔහු එක මොහොතක් මෛත්‍රී සිත වැඩීමෙන් ලබන පින්කම උසස් වනවා. මංපෙත් සැකසීම, ගිලන් උවටැන, පරෝපකාරය, දන්දීම, පින්දීම් සඟසතු මහා දන්දීම් චීවර පූජා ආදී අනේක විධ පින්කම් සියල්ලම ආකාශයක තිබෙන තරු ගණට සමාන කර දක්වන්න හැකිවේ. මෙලෙස ආකාශයේ තිබෙන තරු එකට එක්ව එක් රාත්‍රියක බබලන්නට වුවහොත් අහස හරිම ලස්සන පි‍්‍රයකරු දර්ශනයක් වෙයි. එහෙත් අපට ආලෝකයක් දෙන්න තරම් ශක්තියක් ඒ තරුවලට නැහැ. එහෙත් අහසේ ඇති එකම සඳ බබලන විට අහසත් අලංකාර වෙනවා සේම අපටත් ප්‍රබල ආලෝකයක් දෙනවා. හිරු ඒ සියල්ලම ඉක්මවා අපට ආලෝකය දෙනවා. මෛත්‍රී භාවනාවේ ආනිසංස මේ හිරු සඳු වගේ් සියලු පින්කම් ඉක්මවා උසස් ප්‍රතිඵල ලබාදෙන අයුරු ධර්මයේ විස්තරව සඳහන්ව තිබේ. එමෙන්ම මෛත්‍රී භාවනා ආනිසංස භික්ෂූන් වහන්සේට තවත් ආකාරයකින් පෙන්වා දී තිබේ.
හොදයි. මම මේතරම් වෙලා ඔයාලට පැහැදිලි කලේ මෙත් වැඩීම කොයිතරම් නම් වැදගත්ද කියල. කෝටි ලක්ෂයක් සක්වල පරයා යන තරම් මෙත් සිත් පැතිර යාමට හේතු වූ මහානුභාව සම්පන්න මෙත්තානිසංස සූත්‍රයේ සිංහල අර්ථය ඔයලට දෙන්නම්.
මෙත්තානිසංස සූත්‍රයේ සිංහල අර්ථය
1. මා විසින් මෙසේ අසන ලදී. එක් සමයෙක්හි භාග්‍යවතුන් වහන්සේ සැවැත් නුවර අනේපිඬු මහ සිටාණන් විසින් කරවන ලද ජේතවන මහා විහාරයෙහි වැඩ වසන සේක. එහිදී භාග්‍යවතුන් වහන්සේ, ´´මහණෙනි, ´´ කියා භික්‍ෂූන්ට ආමන්ත්‍රණය කළ සේක. ඒ භික්‍ෂූහු, ´ භාග්‍යවතුන් වහන්සැ´ යි කියා ප්‍රති වචන දුන්හ. භාග්‍යවතුන් වහන්සේ මෙය වදාළ සේක.

2. ´´මහණෙනි, මෛත්‍රී චෙතෝ විමුක්තිය ආදරයෙන් සේවනය කිරීමෙන්, නැවත නැවත කිරීමෙන්, භාවනා කිරීමෙන් හෙවත් වැඩීමෙන්, නැවත නැවත කිරීමෙන්, යෙදූ වාහනයක් මෙන් කිරීමෙන්, පදිඤ්චි වත්තක් හෝ ස්ථානයක් මෙන් කිරීමෙන්, ඉදිරියෙහි පිහිටි දෙයක් මෙන් කිරීමෙන්, හාත්පසින් මනාකොට රැස් කළ (ගොඩගැසූ) දෙයක් මෙන් කිරීමෙන්, යහපත්ව ආරම්භකොට කිරීමෙන්, ආනිසංශ අටක් බලාපොරොත්තු විය යුතුයි.

3. ´´ඒ කිනම් ආනිශංස අටක්ද? සැපසේ නිදයි. සැපසේ අවදිවෙයි. නපුරු සීන නොදකියි. මිනිසුන්ට ප්‍රිය වෙයි. අමනුෂ්‍යයින්ට ප්‍රිය වෙයි. දෙවියෝ රකිත්. ඔහුට ගින්නක් හෝ විසක් හෝ ආයුධයක් හෝ නොවදී. මෛත්‍රී භාවනාවෙන් රහත් බව ලබන්නට නොහැකිවීනම් (මරණින් මතු) බඹ ලොව උපදී. මහණෙනි, මෛත්‍රී චෙතෝ විමුක්තිය ආදරයෙන් සේවනය කිරීමෙන්, නැවත නැවත කිරීමෙන්, භාවනා කිරීමෙන් හෙවත් වැඩීමෙන්, නැවත නැවත කිරීමෙන්, යෙදූ වාහනයක් මෙන් කිරීමෙන්, පදිඤ්චි වත්තක් හෝ ස්ථානයක් මෙන් කිරීමෙන්, ඉදිරියෙහි පිහිටි දෙයක් මෙන් කිරීමෙන්, හාත්පසින් මනාකොට රැස් කළ (ගොඩගැසූ) දෙයක් මෙන් කිරීමෙන්, යහපත්ව ආරම්භකොට කිරීමෙන්, ආනිසංශ අටක් බලාපොරොත්තු විය යුතුයි.

4. (1) යමෙක් අප්‍රමාණ සතුන් වෙත මෛත්‍රිය සිහියෙන් යුක්තව වඩාද, විදර්‍ශනාවෙන් කෙළෙස් නැති කිරීමයයි කියන ලද රහත් බවට පැමිණියහුගේ දශ සංයෝජනයෝ තුනී වෙත්.

(2) ´´ඉදින් එකද සත්ත්‍වයෙකුට දූෂ්‍ය නුවූ සිත් ඇත්තේ මෛත්‍රී කෙරේද, ඒ කරණකොට ගෙන කුසල් ඇත්තේ වෙයි. සියලු ප්‍රාණීන් කෙරෙහිම සිතින් අනුකම්පා කරන්නාවූ ආය්‍ර්‍යතෙම බොහෝ පින් කරයි.´´

(3) යම් නෙනෙක් සත්ත්‍වයන්ගෙන් පිරුණාවූ පොළොව ජයගෙන තාපසයන් මෙන් දැහැමි රජවරු වූවාහු දන් දෙමින් හැසුරුණහුද, අෂ්ව මෙධය, පුරුෂ මෙධය, සම්මාපාසය, වාචපෙය්‍යය, නිරග්ගලයයි යම් යාග පසක් වෙද්ද, ඒ මහා යාගයෝද මනාකොට වඩන ලද මෛත්‍රී සිතෙහි දහසයවන කලාවටද නොපැමිණෙත්. චන්‍ද්‍රයාගේ රෂ්මිය මෙන් තාරකාවන්ගේ රශ්මිය නැත්තාක් මෙනි.´´

(4) යමෙක් තෙම සතුන් නොමරාද, අනුන් ලවාත් නොමරවාද, අනුන් නොපරදවාද, වෙන කෙනෙකු ලවාත් අනුන් නොපරදවාද, හෙතෙම සියලු සත්ත්‍වයන් කෙරෙහි මෛත්‍රී පිණ්ඩයක් වේ. ඔහු කෙරෙහි කිසිවෙකුගේ වෛරයක් නැත්තේය.´´
ඔන්න දැන් මෙත්තානිසංස සූත්‍රය අතුලු සූත්‍රයන් රාශියක් ඔයාල කියවල තියෙනව. මම කලින් දුන්න කරණීය මෙත්ත සූත්‍රයේ තියෙනව මෙත් වඩන හැටි. බලන්න. බුදුහිමියන් ඇතුලු මහා සංඝයාට දෙන දානෙකට වඩා බලවත් මේ මෙත්සිත මොහොතක් ඇත්කර ගැනීම. මේ පිලිබචව වේලාම සූත්‍ර චේශනාවේ දක්වා ඇති අතර එය මෙමගින් බලන්න.
http://www.facebook.com/photo.php?fbid=462533643796514&set=a.341796045870275.80280.100001196487578&type=3&theater

මෙය උපුටා ගැනීමකි.සියලු දෙනාට කියවා තේරුම් ගැනීම උදෙසා මෙහි පලකලෙමි

“හිස් පුද්ගලයන්ගේ නින්දා අපහාස කිසිසේත්ම ගණන් ගත යුතු නැහැ”

noreply@blogger.com (Dhanushka Gunasinghe's Hard Code) — Mon, 28 Oct 2013 15:03:00 +0000

මේලෝකය හරිම අමුතු යි. යහපත් දෙයක් කළත් බණිනවා. නොකළත් බණිනවා. භාවනා කළත් බණිනවා. භාවනා නොකළත් බණිනවා. බණ කිව්වත් බණිනවා. බණ නොකිව්වත් බණිනවා. සිල්වත්ව ජීවිතය ගත කළත් බණිනවා. දුස්සීලයන්ටත් බණිනවා. ඒ නිසා නින්දා අපහාස කියන්නේ අසත්පුරුෂයන්ගේ සතුට පිණිස පවතින දෙයක්. අසත්පුරුෂයන් සතුටු වන්නේ අනුන්ට නින්දා අපහාස කිරීමෙන්. අනුන්ට ගැරහීමෙන්.

පව්කාර පුද්ගලයන් නිතරම ඊර්ෂ්‍යාවෙන් කල්ගෙවනවා. තව කෙනෙකුට ගෞරවයක් ලැබෙනවාට, ප‍්‍රශංසාවක් ලැබෙනවාට කැමති නැහැ. ඒ නිසා යහපත් වැඩක් කරන්නට හදන විටත්, එය කඩාකප්පල් කරන අදහසින් යහපත් පුද්ගලයාට පවා නින්දා අපහාස කරනවා. ගරහනවා. අභූත චෝදනා කරනවා. එවැනි පුද්ගලයන්ගේ ඇසුර ඉතාමත්ම භයානකයි. එවැනි පුද්ගලයන්ගේ ඇසුරෙන් ලෝකයේ කාටවත් යහපතක් සිදුවන්නේ නැහැ. තමාටත් අයහපතක් සලසන, අනුන්ටත් අයහපතක් සලසන එවැනි පුද්ගලයන්ව හඳුනාගෙන දුරින්ම දුරු කළ යුතුයි.

පවිටු පුද්ගලයන් ලාභ සත්කාර, කීර්ති ප‍්‍රශංසා වලට ඉතාමත්ම කෑදරයි. ඉතින් එබඳු පුද්ගලයන් හැම තිස්සේම කල්පනා කරන්නේ ලාභ, සත්කාර, කීර්ති, ප‍්‍රශංසා ලබාගෙන ජීවත් වෙන ආකාරය විතරයි. ඔවුන්ට කෙලෙහි ගුණ මාත‍්‍රයක්වත් පිහිටන්නේ නැහැ. කෙලෙහි ගුණ නැති අසත්පුරුෂයන්ට උදව් කිරීමෙන් අමාරුවේ වැටෙන්නේ උදව් කරන පුද්ගලයාමයි.

අසත්පුරුෂයාට කොච්චර උදව් ලැබුනත් ඒ හේතුවෙන් ඔහු සත්පුරුෂයෙක් වෙන්නේ නැහැ. අසත්පුරුෂයාගේ ස්වභාවය අඟුරු කෑල්ල වගෙයි. මොනතරම් කිරෙන් සේදුවත් අඟුරු කැබැල්ල සුදු වෙන්නෙ නැහැ. ඒ නිසා අපේ පැරණි කවියන් අසත්පුරුෂයන්ව මේ විදිහට හඳුන්වා දී තිබෙනවා.

“කොතරම් ගුණ කළත් දුදනෝ නොවෙති යහපත්
කිරි දියෙන් දෙවියත් අඟුරු සුදුවෙන කලෙක් නම් නැත්”

මෙහි තේරුම මෙයයි; කොයිතරම් ඇප උපස්ථාන කළත්, උදව්පදව් කළත්, දුර්ජනයන් කිසිදවසක යහපත් වෙන්නෙ නැහැ. කොයිතරම් වාරයක් කිරි වතුරෙන් අඟුරු සේදුවත් සුදු වෙන්නෙ නැහැ. එනිසා අසත්පුරුෂයන්ට සැලකීම නිසා දුක් විඳින්නට සිදුවෙද්දී බුදුරජාණන් වහන්සේ වදාළ මේ ගාථාව සිහි කිරීම ඉතාමත්ම ප‍්‍රයෝජනවත් වෙනවා.

කෙලෙහි ගුණ නොදත් අසත්පුරුෂයෙකුගෙන් බැට කෑ අහිංසක අම්මා කෙනෙකුගේ කතාවක් තමයි මේ ගාථාවට පසුබිම වන්නේ.

බුදුරජාණන් වහන්සේ සැවැත් නුවර වාසය කරන කාලයේ ඉතා අහිංසක පවුලක් වාසය කළා. ඒ නිවසේ ඉතාමත් කාරුණික අම්මා කෙනෙක් හිටියා. ඇයට දරුවන් කිහිප දෙනෙක් හිටියා. ඇය දරුවන්ට වගේම එක්තරා මිත්‍යා දෘෂ්ටික පැවිද්දෙකුට උපස්ථාන කළා. පාවෙය්‍යක ආජීවක නමිනුයි ඒ මිත්‍යා දෘෂ්ටික පැවිද්දාව හඳුන්වන්නේ. මේ අහිංසක අම්මාත්, දරුවනුත් මේ හිස් පුද්ගලයාට උදව් කළේ ශ‍්‍රද්ධාවෙන්මයි. පවුලෙ කෙනෙකුට වගේ සැලකුවා. ආදරයෙන් ඇප උපස්ථාන කළා. පවුලේ හැම කටයුත්තක්ම කිරීමට මොහුගේ ආශිර්වාද ගත්තා. අන්තිමේදී මොහුගෙන් නොඅසා කිසි දෙයක් නොකරන මට්ටමට මේ පවුල පත්වුනා.

මිත්‍යා දෘෂ්ටික පැවිද්දෙකුගේ ග‍්‍රහණයට හසු වූ මේ පවුලට වටිනා දේවල් කරා යන්නට ලැබුනේ නැහැ. ඒ සැවැත් නුවර බුදුරජාණන් වහන්සේ ධර්ම දේශනා කරමින් වැඩසිටි කාලයයි. ඒ බණ අසන්නට යන මිනිසුන් සවසට සුවඳ මල්ගෙන සැවැත් නුවර දෙසට යද්දී අර අම්මා පුදුමයෙන් වගේ බලා සිටියා. නමුත් මේ අම්මාට ජේතවනාරාමයට යාමට අර පාවෙය්‍යක නම් වූ ආජීවකයා තහනම් කරලයි තිබුනේ. හැමතිස්සේම බුදුරජාණන් වහන්සේ ගැනත්, ශ‍්‍රාවකයන් ගැනත් මොහු ඉතා අසාධාරණ විදිහට විවේචනය කරමින් සිටියා.

බුදුබණ අසා පැහැදෙන මිනිසුන් ඉතාම සතුටෙන් බුදුගුණ කිය කියා, බුදුරජාණන් වහන්සේගේ අසිරිය කිය කියා එන අයුරු මේ අම්මා ආශාවෙන් බලා සිටියා. ඇයටත් දෙව්රම් වෙහෙරට යන්නට ආශාවක් ඇතිවුනා. ඉතින් ඇය උපස්ථාන කරන ආජීවකයා ළඟට ගියා. “පින්වත් ආර්යයන් වහන්ස, දෙව්රම් වෙහෙරට යන අය බුදුගුණ කිය කියා ආපසු යන හැටි අසන විට අනේ…. මටත් දෙව්රම් වෙහෙරට යන්නට ආශාවක් ඇති වුනා. ඉතින් මං කල්පනා කළේ බණ අසන්නට යන්නයි. ඔබ වහන්සේ ඒ ගැන මොකක්ද කියන්නේ?”

“අහෝ…! රත්තරන් මෑණියනි, දෙව්රම පැත්ත පළාතෙ යන්න එපා! එතන ගුරුකම් කරනවා. යන යන අය මුලා කොට රවටා ගන්නවා. තරුණ පිරිස මහණ වෙනවා. එතකොට ජාතිය වඳවෙලා යනවා. ඒ නිසා ඔය පැත්ත පළාතට යන්න එපා! භාවනා කරන්න ගිහින් පවුල් අවුල් වෙලා තියෙන්නෙ. ඒ නිසා ශ‍්‍රමණ ගෞතමයන්ගේ උපදෙස් ගන්න යන්න එපා!” කියල මේ අසත්පුරුෂයා අර අම්මාගේ ධර්මශ‍්‍රවණයට බාධා කළා. තමන් මේ සා භක්තිමත්, ආජීවක තැන විසින් දෙන උපදෙස් වලට පිටුපාන්නට අම්මා බිය වුනා. ඒ නිසා ඒ ගමන නැවතුනා.

සැදැහැවතුන් ගේ ජීවිත වලට පින් රැස්වන අයුරු දකිනා විට ඒ අම්මාට නැවත නැවතත් ආශාව ඇතිවුනේ දෙව්රම් විහාරයට යන්නටයි. ඒ සෑම අවස්ථාවේදීම අම්මා කළේ අර මිත්‍යා දෘෂ්ටික පැවිද්දාගෙන් අවසර ඉල්ලීමයි. ඒ පුද්ගලයා කිසිසේත්ම අවසර දුන්නේ නැහැ. අන්තිමේදී අම්මාට මෙහෙම හිතුනා. “අනේ පුතේ, අපේ ආර්යයන් වහන්සේ අපි දෙව්රම් විහාරයට යනවාට කැමැති නැහැ. බුදුරජාණන් වහන්සේගෙන් බණ අසනවාට කැමැති නැහැ. මිනිසුන්ට නිවනක් වුවමනා නැහැලූ. බුදුරජාණන් වහන්සේ වදාළේ ඒ අමා නිවන් සුව බොහෝ දුර නොවේ කියලයි. අපේ ආර්යයන් වහන්සේ කියන්නේ ඒ අමා නිවන් සුව බොහෝ දුරලූ! අනේ පුතේ, මට නම් වුවමනා බුදුබණ අසන්නමයි. මේ නිසා පුතා ගිහින් බුදුරජාණන් වහන්සේට ආරාධනා කරන්න අපගේ නිවසට වඩින්න කියලා. මං දානෙ ටිකකුත් සූදානම් කරන්නම්.”

අම්මා ගේ වචනය පිළිගත් පුතා කෙළින්ම ගියේ අර මිත්‍යා දෘෂ්ටික පැවිද්දා ළඟටයි. ගිහින් කාරණාව කියා හිටියා. ඒ පැවිද්දාට හොඳටම කේන්ති ගියා. “ඒයි රත්තරන් දරුවා, නුඹට පිස්සුද? නුඹලාගේ අම්මාට මනස්ගාතයක් වැදිලා. ඔය අලූත් විලාසිතාවට අහුවෙලා ඉන්නෙ. ආපහු ගෙදර පලයන්.”

“අනේ ආර්යයන් වහන්ස, එහෙම කරන්න බැහැ. අම්මා මට බනීවි.” “නෑ… නෑ… අම්මා බනින්නේ නැහැ. දානෙ හදාපුවාවෙ. මං දානෙට වඩින්නම්. වෙන කවුරුවත් ඕන නැහැ. නුඹ හැරිලා පලයන්.” “අනේ ආර්යයන් වහන්ස, මට නම් එහෙම කරන්න බැහැ. අම්මා මට කුමක් කරාවිද දන්නෙ නැහැ.” “රත්තරන් දරුවෝ, එහෙනම් නුඹ මෙහෙම කරපන්. දෙව්රම් වෙහෙරට ගිහින් ශ‍්‍රමණ ගෞතමයන්ට දුර පාරක් කියාපන්. එතකොට දානෙට වඩිද්දී රවුම ගහගෙන එනවිට වෙලාව ගිහින් ඉවරයි. ඊට පස්සේ දානෙ අපට තමයි. හික්…. හික්….”

රත්තරන් දරුවෝ කියපු නිසා මේ දරුවා මේ මිත්‍යා දෘෂ්ටික පැවිද්දාට හසුවුනා. බුදුරජාණන් වහන්සේ ළඟට ගිහින් ඉතාමත්ම දුර පාරක් කිව්වා. කියල නැවත අර මිත්‍යා දෘෂ්ටික පැවිද්දා මුණගැසුනා. “පින්වත් ආර්යයන් වහන්ස, නුඹ වහන්සේ කියූ පරිද්දෙන්ම මං පාර වරදින විදිහට ආරාධනා කළා.” “මගේ රත්තරන් පුතේ, යසයි! ශ‍්‍රමණ ගෞතමයන්ට පාර වරද්දවන්නමයි තියෙන්නෙ.”

අර පින්වත් අම්මා ඉතාමත් සතුටට පත්වුනා. ගොම ගා ගෙය පිරිසිදු කළා. මල් විසිරෙව්වා. බුදුරජාණන් වහන්සේට වැඩසිටින්නට ගරු සරු ඇතිව ආසනයක් පැණෙව්වා. එදා කාටත් හොරා අර පාවෙය්‍යක ආජීවකයා කුස්සිය පැත්තෙන් ගෙට රිංගුවා. කාමරයට වැදිලා නිශ්ශබ්දව හිටියා. උන්දෑ බලාපොරොත්තු වුනේ කාල වේලා ඉක්මගිය පසු පිසින ලද දානය අනුභව කිරීමටයි.

මහා කාරුණික බුදුරජාණන් වහන්සේව නොමඟ යවන්නට දෙවියන්, මරුන්, බඹුන් සහිත ලෝකයේ කිසිවෙකුටවත් බැරි බව අර මිත්‍යා දෘෂ්ටික පැවිද්දා දන්නෙ නැහැ. ඉතින් බුදුරජාණන් වහන්සේ මහත් කරුණාවෙන් යුතුව ඒ නිවසට වැඩම කළා. අම්මාට පුදුමාකාර සතුටක්. ඒ අම්මා ඉතාමත්ම ශ‍්‍රද්ධාවෙන් දන්පැන් පූජා කළා. දන් වළඳා අවසානයේ බුදුරජාණන් වහන්සේ ඒ අම්මාට චතුරාර්ය සත්‍යය ධර්මය දේශනා කරන්නට පටන් ගත්තා. සතුට ඉවසුම් නැති අම්මා, ඉතාම ප‍්‍රීතියෙන් යුක්තව තුන් යලක් “සාදු! සාදු! සාදු!” කියා සාදුකාර දුන්නා. එතකොට කාමරයේ සිටි පාවෙය්‍යක ආජීවකයාට මේ සාදුනාදය ඇසුනා. ඔහුට ඊර්ෂ්‍යාව ඉහිලූම් නැතුව ගියා. “තට… තට…” ගාමින් වෙව්ලන්න පටන් ගත්තා. මැද්දට කඩා පැන්නා. “ඒයි කාලකණ්ණි ගැහැණිය, තී විනාශ වෙලා පල! තිට දැන්ද සත්කාර කරන්න පැවිද්දන් ඕන වුනේ? තිට සාදුකාර කියවෙන්නේ දැන්ද? නීච ගැහැණිය, තී මගේ බසට පිටුපා මේ ශ‍්‍රමණයාගේ බණ අසා චතුරාර්ය සත්‍යය අවබෝධ කරන්නටද තී හදන්නේ…?” කියා නින්දා අපහාස කොට පලා ගියා.

ඒ අම්මාගේ හදවත කඩාගෙන වැටුනා වගෙයි. විශාල කම්පනයක් ඇතිවුනා. අම්මා දෑස වසාගෙන හඬන්න පටන්ගත්තා. අම්මාගේ සිත නොසන්සුන් වුනා. ධර්ම දේශනාවට එකඟ වෙලා තිබුණු සිත වේදනාවෙන් භරිත වුනා. සිහිය යොමුකරගන්නට බැරි වුනා. මහා කාරුණික බුදුරජාණන් වහන්සේ අම්මා දිහා ආදරයෙන් බැලූවා. “පින්වත් උපාසිකාව, ලෝකයේ පවතින ඔය විසම කතාබහට අපි පැටලෙන්න ඕන නැහැ. අන් අයගේ නින්දා අපහාස ගණන් ගත යුතු නැහැ. ඒවා ගැන අපි සිතන්නට ඕනත් නැහැ. ඒවා නොසලකා හැර අපි තම තමා කළ නොකළ දේ ගැන පමණක් කල්පනා කරමු. දැන් කළ යුතු දේ ධර්මශ‍්‍රවණයයි. ඒ ගැන විතරක් දැන් හිතන්න. මේ ධර්මශ‍්‍රවණයටම සවන් දෙන්න. මේ ගැනම හිතන්න” කියා බුදුරජාණන් වහන්සේ මිහිරි ස්වරයෙන් මෙම ගාථාරත්නය වදාළා.

න පරේසං විලෝමානි – න පරේසං කතාකතං
අත්තනෝ’ව අවෙක්ඛෙය්‍ය – කතානි අකතානි ච

අනුන්ගෙ නින්දා ගැරහිලි – අනුන් කරපු නොකරපු දේ
සිතමින් අපගේ සිතුවිලි – අවුල් නොකර ගන්නේ
තමන්ගෙ දියුණුව සිතමින් – තමන් කරපු නොකරපු දේ
සිතමින් අපගේ දියුණුව – නිති සලසා ගන්නේ

පින්වතුනේ, පින්වත් දරුවනේ, මෙය ඉතාම වැදගත් උපදේශයක්. අපි ඉතාම ශ‍්‍රද්ධාවෙන් හඬ නගා බුදුන් වැන්දොත් සමහර විට තව කෙනෙක් ඒකට දොස් කියාවි. “ඔයාගෙ පාඩුවෙ ඔයා වඳින්න. ඔච්චර හයියෙන් ගාථා කියන්නේ මොකද? ඔයා ශ‍්‍රද්ධාවන්ත කෙනෙක් කියල ලෝකෙට පෙන්නන්න ඕනද?” මෙවැනි දේ කියල අනුන්ට ගරහන අය හැමතැනම ඉන්නවා. ඒ නිසා අනුන්ගේ නින්දා අපහාස අපට වැඩක් නැහැ.

අපි තව එකක් මතක තබාගන්න ඕන. අනුන්ට නින්දා අපහාස කරන, අනුන්ට ගරහන සියලූ දෙනාම ඒ කරන්නේ පිරිසිදු සිතකින් නොව, පිරිහුන සිතකිනුයි. ඒ නිසා ඔවුන් හානිකරගන්නේ තමන්ටමයි. තමන්මයි පිරිහිලා යන්නේ. අනුන්ට ගරහලා නින්දා අපහාස කරලා අභූත චෝදනා කරලා ඒ හේතුවෙන් සැපයට පත් වුන කෙනෙක් ලෝකයේ නැහැ. ඒ නිසා ඕන කෙනෙක් ඕන දෙයක් කියපුවාවෙ. අපි කරන හොඳ වැඩ දිගටම කරමු. අපිත් රකින සිල් තව තවත් හොඳින් රකිමු. අපි තව තවත් හොඳින් බණ භාවනා කරමු. ධර්මය ඉගෙන ගනිමු. චතුරාර්ය සත්‍යය අවබෝධ කරගනිමු. බුදුරජාණන් වහන්සේ වදාළේ ‘ඒ අමා නිවන් සුව බොහෝ දුර නොවේ’ කියලයි. හැබැයි එය අදාල වෙන්නේ ධර්මයේ හැසිරෙන කෙනාට මිසක් ධර්මයේ නොහැසිරෙන කෙනාට නොවෙයි. ඒ නිසා අපි ධර්මයේ හැසිරෙන අය වෙමු.

පූජ්‍ය කිරිබත්ගොඩ ඤාණානන්ද ස්වාමීන් වහන්සේ

ජීව්තයට බුදුදහමෙන් බිදක්

noreply@blogger.com (Dhanushka Gunasinghe's Hard Code) — Sat, 29 Jun 2013 06:15:00 +0000

ඉතාම වටිනා ධර්මදේශනා කිහිපයක් ෂෙයා කරන්න හිතුනේ අද සමාජයේ අපිට නියම බුදුදහම ඇහෙන්නේ නැති කාලයක නියම බුදු දහම කුමක්දැයි පෙන්වාදෙමින් සන්දිට්ඨික වු මේ ධර්මයේ වටිනාමකම කියාදෙන අතිපුජ්යය කිරිබත්ගොඩ ලොකුස්වාමින්වහන්සේගේ මෙහෙවරට පුංචි ශක්තියක් වීමටය.

Download form Google Drive

https://drive.google.com/?tab=mo&authuser=0#folders/0B_yBDRNe7oGTT1NibHNXWGpEXzA

ඔබ ධර්මය තුළ දියුණු වෙනවා ද කියා දැන ගන්නේ කොහොම ද…?

noreply@blogger.com (Dhanushka Gunasinghe's Hard Code) — Fri, 03 May 2013 15:42:00 +0000

දයාබර යාලුවනේ,

බුදු රජාණන් වහන්සේ ගේ ධර්මය තමයි මේ ලෝක‍යේ තිබෙන අසිරිමත්ම දේ. ඒ ධර්මය සිතා ගන්නට බැරි තරම් අසිරිමත්. එහෙම වෙන්නෙ කරුණු කාරණා රාශියක් නිස යි. ඒ අසිරිමත් කරුණු අතර තිබෙන සුවිශේෂී ම දෙයක් තමයි, සම්බුදු සමිඳුන් ගේ ධර්මය කථිතමාත්‍රයකින් කෙළවර නොවීම… ඒ කියන්නේ බුදු රජාණන් වහන්සේ පෙන්වා වදාළ ධර්ම මාර්ගය, කවදාවත් කතාබහකින් ඉවර වෙන දෙයක් ‍නෙවෙයි. ධර්මය කියන්නේ හැම විට ම ප්‍රායෝගික ව ක්‍රියාත්මක කළ යුතු දෙයක්. යම් කිසි කෙනෙක් තුළ ධර්මය ප්‍රායෝගික ව ක්‍රියාත්මක වෙන්නේ නැත්නම්, ඒ කෙනා බුදු සමිඳුන් ගේ ධර්මය තුළ මිය ගිය කෙනෙක්. ඒ කියන්නේ එයා තුළ සද්ධර්මය ජීවමාන වෙන්නේ නැහැ.

ඒ නිසා ධර්ම දේශනා, ධර්ම සාකච්ඡා, වගේ මේ හැම දෙයක් ම එක ම එක නිෂ්ඨාවක් (නිශ්චිත අවසන් අරමුණක්) ‍පිණිස ම යි පවතින්නේ. ඒ නිෂ්ඨාව තමයි, පරිපූර්ණ වශයෙන් කෙළෙස් සංසිඳවීම. ඉතින් මොකක් ම හරි හේතුවන් හින්ද, ධර්ම සාකච්ඡාවකින් හරි ධර්ම ශ්‍රවණයකින් ‍හරි කෙළෙස් සංසිඳවීම සිදු වෙන්නේ නැත්නම්, එතැන බුදු දහම නැහැ. එතැන තිබෙන්නේ ධර්මයේ වේශයෙන් ක්‍රියාත්මක වෙන වෙනත් දෙයකු යි.

ඒ නිසා ධර්මය ගැන උනන්දු වෙන, ධර්මයේ හැසි‍රීමට උත්සාහ කරන ඔබ තුළ, ඇත්තට ම බුදු සමිඳුන් ගේ අවවාදය ක්‍රියාත්මක වෙනවද කියල දැනගන්ට උපාකාර වෙන කරුණු කිහිපයක් ලියන්න ඕනි කියල හිතුන.. හැබැයි මේ දේවල් කියන්නේ, අනිත් අයව මනින්ට නෙමෙයි. එහෙමත් නැත්නම්, තාමන්ව ම මැණගෙන, හීනමානය හරි අධිමානය හරි ඇති කරගන්නට ත් නෙවෙයි. මේ කරුණු දැනගෙන, තමන්ගෙ ම තත්වය තේරුම් අරගෙන, දහම තුළ අප්‍රමාදීවීමට යි.

ධර්මයේ පිහිටපු කෙනා කැළඹුනත් මතුවෙන්නේ ධර්මය විතර යි…

1. ඇත්තෙන් ම ධර්මයේ හැසිරෙන කෙනෙක් තුළ මූලික ව ම ‍සිදු වන දෙයක් තමයි, ඒ කෙනා තුළ ගුණධර්ම දියුණු වීම. කරුණාව, මෛත්‍රිය, අනිත් අය ගේ අදහස් ඉවසීම, අනිත් අයට උපකාර කිරීම ආදී ගුණ ධර්ම ඒ කෙනා තුළ ක්‍රමයෙන් දියුණු වෙනවා. මේ දේ ධර්මතාවයක් හැටියට ම සිදු වෙන දෙයක්.

2. ඒ වගේ ම විශේෂයෙන් ම ඒ කෙනා තුළ ඇති වන ගුණ ධර්මයක් තමයි කෙළෙහි ගුණ දන්නාකම. එය විශේෂ ගුණ ධර්මයක් හැටියට සදහන් කළේ ඇයි…? මේ ගැන කවුරු මොනවා කිව්වත්, කෙළෙහි ගුණ දන්නාකම කියන්නේ, කේවල (මුලුමනින් ම) සත්පුරුෂ භූමිය යි. ඒ කියන්නේ, සත්පුරුෂ භූමි යත් කළගුණ දන්නා බ වත් වෙන් කළ නො හැකි ලෙස බද්ධ වෙලයි තිබෙන්නේ… කෙළෙහි ගුණ දන්නා බව යම් තැනක නැත්නම් එතැන සත්පුරුෂභාවයක් ඇත්තේ ම නැහැ. මොකද බුදු රජාණන් වහන්සේ වදාළා, කෙලෙහි ගුණ නො දන්නා බව, මුලුමනින් ම අසත්පුරුෂ භූමිය බව. යම් කෙනෙක් තුළ, කළ ගුණ දන්නාබව නැත්නම්, ඔහු ඒකාන්තයෙන් ම අසත්පුරුෂයෙක්. විශේෂයෙන් ම යම් කිසි කෙනෙක්, සද්ධානුසාරී භාවයට හෝ පත් වෙනවා නම්, ඔහු තුළ ධර්මතාවයක් හැටියට ම, ස්ථීර ව‍ශයෙන් ම මේ උතුම් ගුණ ධර්මය පිහිටනවා. මෙය බලෙන් රිංගවිය යුතු දෙයක් හෝ, බලෙන් ඇති කළ හැකි දෙයක් හෝ නො වෙයි. ඕනම කෙනෙක් සත්පුරුෂ භූමියට පා තිබයනවා ත් එක්ක ම ධර්මතාවයක් හැටියට ම ඔහු තුළ කළ ගුණ දන්නා බව පිහිටනවා.

3. ධර්මය තුළ දියුණු වෙන, ධර්මය හිතට ගිය කෙනා ගේ තවත් ලක්ෂණයක් තමයි, ඒ කෙනා ලෝකය ත් සමග කැළඹී යන්නේ නැහැ. ඒ කියන්නේ, අපි හිතමු එයාට නින්දා අපහාස හෝ රෝගාබාදිය හෝ වෙන කිසියම් හෝ ව්‍යසනයකට මුහුණ දෙන්න සිදු වෙනවා. ඒත් ඒ දෙවල් වලින් ඒ කෙනා ගේ සිත කැළඹෙන්නේ නැහැ. සිත යම් මට්ටමකට හෝ කැළඹුණත් එයා ට සිහි වන්නේ ධර්මය ම යි. එයා ගේ වචනයෙන් පවා බැහැරට නික්මෙන්නේ ධර්මය ම යි. ධර්මය සිතට නො ගිය කෙනා, ලෝකයත් සමග කැළඹෙනවා වගේ ම, ඒ කැළඹීම තුළින් එයා ගේ අභ්‍යන්තරයේ තිබෙන ‍අකුසල් එළියට පනිනවා. නින්දා අපහාස ලැබුණන් ධර්මයේ පිහිටපු කෙනා ගේ සිත එක්කෝ උපේක්ෂාවට පත් වෙනවා, එහෙමත් නැත්නම්, කැරකි කැරකී ධර්මය තුළ ම පිහිටනවා. මේ දේ ධර්මතාවයක් හැටියට ම සිදු වෙනවා.

4. ඒ වගේ ම බුදු පියාණන් වහන්සේ ත්, ධර්ම රත්නය ත්, සංඝරත්නය ත් මුල් කරගෙන කෙතරම් නින්දා අපහාස, වාද විවාද, ඇතිවුවත්, ධර්මයේ පිහිටපු කෙනා ගේ සිත, නැවත නැවතත් බුදු ගුණ දම් ගුණ සග ගුණ තුළම පිහිටනවා. සංසි‍‍‍‍‍ඳෙනවා. ඇවිස්සී යන්නේ නැහැ.

5. ධර්මයේ හැසිරෙන, ධම්මානුධම්ම පටිපන්න කෙනා ගේ තවත් ලක්ෂණයක් තමයි, එයා කථා කළොත් කථා කරන්නේ ධර්මය ම විතර යි, සිතුවොත් සිතන්නේ ධර්මය ම විතරයි. ඒ දෙක ම නැතිනම් එයා සතිමත් ව උපේක්ෂාවෙන් ඉන්නවා. ධම්මානුධම්ම පටිපන්න කියල කියන්න පුලුවන් වෙන්නේ අන්න ඒ වගේ කෙනෙකුට තමයි.

මේ මූලික ම කරුණු ටිකක් විතර යි..දයාබර යාලුවනේ, ඒ වගේ ම බුදු රජාණන් වහන්සේ දේශනා කර තිබෙනවා, යම් යම් භාවනාවන් වඩන විට, ඒ භාවනාවන් තමන් තුළ වැඩෙනවා ද කියා දැනගන්නට යම් යම් ක්‍රම. ඒ ක්‍රම කිහිපයකුත් ලියන්නම්. සමහර විට ඔබට ප්‍රයෝජනවත් වේවි.

භාවනාවේ දියුණුව මනින්නේ ගූඪ අත්දැකීම් වලින් නො වෙයි…

1. ඔබ අසුභ සඤ්ඤාව එහෙමත් නැත්නම් අසුභ භාවනාව වඩනවා නම් = ‍මේ භාවනාව ඔබ තුළ හොඳින් වැඩෙනවා නම් සිදු වෙන දේ තමයි, ඔබේ සිත මෙවුන්දම් සේවනයෙන්, ඉවතට නැමීම, ඉවතට හැකිලීම. මේ භාවනාව වැඩීම නිසා, මෙවුන්දම් සේවනය ගැන එක්කෝ උපේක්ෂාව ඇතිවෙනවා, නැතිනම් පිළිකුල උපදිනවා. ඉතින් භාවනාව වඩන කාලය දීර්ඝ වුනත් කෙටි වුනත්, ඔබ තුළ මෙවුන්දම් සේවනයට ඇති කැමැත්ත අඩු වෙන්නෙ නැතිනම්, ඔබ තුළ මේ භාවනාව, හොඳින් දියුණු වන්නේ නැහැ. වඩන කාලය කෙටි වුනත් දිග උනත්, මෙවුන්දම් සේවනයට ඇති කැමැත්ත අඩු වෙනවා නම්, ඔබ තුළ මේ භාවනාව හොඳින් වැඩෙනවා.

2. මරණ සඤ්ඤාව එහෙමත් නැත්නම් මරණානුස්සති භාවනාව වඩනවා නම් = ජීවිතය ගැන ඇති ඇල්ම දුරුවෙන්ට පටන් ගන්නවා. සිත ජිවිතට ඇති ඇල්මෙන් ඉවතට නැමෙනවා. හැකිලෙනවා. ජීවිත තණ්හාව ගැන උපේක්ෂාව හරි පිළිකුළ හරි උපදිනවා. මේ කියන්නේ මැරෙන්න හිතෙනවා කියන එක එහෙම නෙමෙයි. මේ භාවනාව වඩන විට ජීවිතය ගැන ඇති දැඩි තෘෂ්ණාව දුරු වෙන්ට පටන් ගන්නවා.

3. අහාරයේ පටික්කූල සඤ්ඤාව වඩනවා නම් = රස තෘෂ්ණාව – ආහාර වල තිබෙන රසයට ඇති ගිජුකම දුරුවෙන්ට පටන් ගන්නවා. සිත කෑමවල රසයට ඇති ආශාවෙන් ඉවතට නැමෙනවා. ඉවතට හැකිලෙනවා. රසතණ්හාව ගැන උපේක්ෂාව හරි පිළිකුළ හරි ඇති වෙනවා. මේ කියන්නේ කෑම ගන්න බැරිව යෑමක් ගැන එහෙම නෙවෙයි.

4. සියලු ලෝකයට නො ඇලෙන සඤ්ඤාව පුරුදු කරනවා නම් = ඒ ඒ ලෝකවල (දිව්‍යලෝක ඇතුළු) ඉපදීමට තිබෙන කැමැත්ත දුරුවෙන්ට පටන් ගන්නවා. ඒ ඒ ලෝකවල ඉපදීමට ඇති කැමැත්තෙන්, සිත හැකිලෙනවා. ඉවතට නැමෙනවා. ඒ ගැන උපේක්ෂාව හරි පිළිකුළ හරි ඇතිවෙනවා.

5. අනිත්‍ය සඤ්ඤාව එහෙමත් නැත්නම් අනිත්‍ය භාවනාව වඩනවා නම් = ලාභ සත්කාර, කීර්ති ප්‍රශංසා වලට තිබෙන කැමැත්ත දුරු වෙන්ට පටන් ගන්නවා. ලාභ සත්කාර කීර්ති ප්‍රශංසා ආදියෙන් හිත ඉවතට නැමෙනවා. ඒවා ගැන උ‍පේක්ෂාව හරි පිළිකුළ හරි ඇති වෙනවා..

ගොඩක් දෙනෙක් වඩන භාවනාවක් නිසා, මේ ගැන පොඩ්ඩක් කියන්නම්. අනිත්‍ය භාවනාව තමන් තුළ වැඩෙනවා ද කියා දැනගන්ට තිබෙන්නේ, ඒ තුළින් ලැබෙන යම් යම් අත්දැකීම් වලින් නෙමෙයි. මුලින් කිව්ව ක්‍ර‍මයෙන්. අනිත්‍ය භාවනාව වඩන ඔබ තුළ ලාභ සත්කාර ගැන, කීර්ති ප්‍රශංසාක ගැන උපේක්ෂාවක් හරි පිළිකුළක් හරි ඇති වෙනවා නම්, සිත ඒවායින් ඉවතට හැරෙනවා නම්, එතනින් තමයි තේරුම් ගන්ට පුලුවන් වෙන්නේ, අනිත්‍ය භාවනාව වැ‍‍‍‍‍ඩෙනවා ය කියා. අනිත්‍ය භාවනාව වඩද්දීත්, “නම ප්‍රසිද්ධකර ගන්නට, බොහෝ දෙනෙක් අතර දැනගත් චරිතයක් වෙන්නට, තමාදහම් දැනුම ඇති අයෙක්, භාවනා කරන අයෙක් කියා ප්‍රසිද්ධ වන්නට, අන් අය‍ගේ ලාභ සත්කාර තමා වෙත ලබාගන්නට,” ආදී වශයෙන් තමා තුළ තිබෙන කැමැත්ත එහෙමම තියෙනවා නම්, එහෙමත් නැත්නම් ටික ටික වැඩි වෙනවා නම්, (කුමන අද්දැකීමක් ලැබුණත්) තේරුම් ගන්නට තිබෙන්නේ, ඔබ තුළ අනිත්‍ය භාවනාව නො වැඩෙන බව යි.

6. අනිච්චේ දුක්ඛ සඤ්ඤාව එහෙමත් නැත්නම්, අනිත්‍ය දේ දුකයි කියා වඩන භාවනාව වඩනවා නම් = මේ භාවනාව ඔබ තුළ හොදින් වැඩෙනවා නම්, “බණ භාවනා කරන්නේ නැතිව අලසව ඉදීම ගැනත්, කුසීතව ඉදීම ගැනත්, කම්මැලි ව ඉදීම ගැනත්, විවිධ දේවල් කරමින් ප්‍රමාදීව ඉදීම ගැනත්, ඔබ තුළ ඉතා ම තද බයක් ඇති වෙනවා. තීවෘර බියක් ඇති වෙනවා.

උපමාවකින් පෙන්වලා දී තිබෙන්නේ, හරියට කඩුවක් අතින් ගත් වදකයෙක්, බෙල්ලට කොටන්න ඉන්න විට ඇතිවෙන බිය වගේ ඉතා තදබල බියක්, මුලින් කියපු දේවල් ගැන ඇති වෙනව කියල යි. ඉතින් කම්මැලි කමට සිටීම ගැන එහෙම බියක් ඇති වෙන්නේ නැත්නම්, ඒ භාවනාව එයා තුළ වැඩිලා නැහැ.

ඇත්තෙන් ම අද කාලේ ධර්මයේ හැසිරෙන්න වෙහෙස වෙන අය දිහා බැලුව ම, ඒ අයට නම් අනිත්‍ය දේ දුකයි කියන සඤ්ඤාව සුවල්පයක් වත් වැඩිල නෑ කියල යි මට නම් හිතෙන්නේ. ඒ තරමට ම ප්‍රමාද වෙවී කාලය කමින් ජීවිත ගතකරනවා.

7. දුක් දේ අනාත්මයි කියා වඩන භාවනාව, (දුක්ඛේ අනත්තසඤ්ඤා) වඩනවා නම් = මේ භාවනාව වැඩීමෙන් සිදු වෙන්නේ, තමන් ගේ ශරීරය ගැනත්, බාහිර තිබෙන සියලු දේ ගැනත් ඇති ‘මම කියන හැගිම, මගේ කියන හැගීම ආදී සියලු මානයන් දුරින් ම දුරු වී යෑම යි.

ප්‍රමාදී අයට පසුතැවෙන්ට වෙන දිනය වැඩි ඈතක ‍නොවේ…

ඉතින් යාලුවනේ ධර්මය තුළ අපි දියුණු වෙනවා ද කියන බලන්ට තිබෙන්නේ, ධර්මයේ හැසිරීම සහ බණ භාවනා කිරීම තුළින් ලැබෙන යම් යම් ගූඪ අත්දැකීම් තුළින් නෙමෙයි. මෙන්න මේ ගුණ ධර්ම තමන් තුළ දියුණු වෙනවා ද නැද්ද කියන එක තුළිනු යි. ඒ නිසා අපි අපි ගැන ම හැගීමක් ඇති කරගනිමු. මේ කියන කිසි දෙයක් තමන් තුළ දියුණු වෙලා නැති නම්, දියුණු වෙනපාටකුත් පේන්න නැතිනම්, අපි ඉක්මණින් ම කළ යුත්තේ, වාද විවාද කර කර, ඔහේ අන්තර්ජාලයේ ඇවිද ඇවිද ඉන්න එක වහාම නවත්ල දමල, ඔලුව ගිනි ගත්ත කෙනෙක් ඒ ගිනි නිවා ගන්න උත්සාහ කරනවා වගේ, ධර්මය දියුණු කර ගැනීම පිණිස මහන්සි වීම යි. ඒ පිණිස ම සියලු දෙනා ගේ ම සිත් පිහිටාවා..!

නමෝ බුද්ධාය!

noreply@blogger.com (Dhanushka Gunasinghe's Hard Code) — Thu, 25 Apr 2013 01:08:00 +0000

මරණය සුන්දර කරගන්නේ කොහොමද?

noreply@blogger.com (Dhanushka Gunasinghe's Hard Code) — Thu, 25 Apr 2013 00:55:00 +0000

මරණය සුන්දර කරගන්නේ කොහොමද?

ධර්මය තුළ ජීවත්වන පිංවත් ඔබට, ඔබගේම ජීවිතය දෙසට හොඳින් සිත යොමුකරලා බැලුවහොත්, වැරැද්ද, නිවැරැද්ද හොඳින්ම පෙනෙනවා. ධර්මය කියලා කියන්නේ අනිත්‍යයට. යමක්‌ අනිත්‍ය යෑයි අපි නුවනින් දකින කොට, ඒ කෙරෙහි බිය සකස්‌ වෙනවා. මොකද ඒ වෙනස්‌ වන දෙයක්‌. මේ වෙනස්‌වීම නොදන්නා කෙනා, ස්‌වභාවයෙන්ම වෙනස්‌ වන දෙයක්‌ වෙනස්‌ නොවී පවත්වා ගැනීමට වෙහෙස ගන්නවා. එතැනදියි දුක සකස්‌ වෙන්නේ. සද්ධර්මයෙන් ඈත්වීම නිසා නිත්‍ය සංඥාවන් තුළින් රූප, වේදනා, සංඥා, සංඛාර, විඤ්ඤාණ ධර්මයන් ගැනීමෙන් වර්තමාන සමාජය ලෝභය, ද්වේෂය, මෝහය තුළින් ඔද්දල් වෙලයි තියෙන්නේ. විනාශය දැක දැකත්, විනාශය ගැන කථා කරමින්ම, එහි ආදීනව දකිමින්ම විනාශය දෙසටමයි සැවොම ගමන් කරන්නේ.

තෘෂ්ණාව, ඔබට ලස්‌සනට පාර පෙන්වනවා තව වේගවත්ව ඉදිරියට යන්න. ද්වේෂය ඔබට ඇති තරම් ආත්මශක්‌තිය ලබාදෙනවා, හිරි ඔතප් හීන කරලා දෙනවා, ඇති වන ඕනෑම බාධකයක්‌ මැඩගෙන ඉදිරියට යන්න. මෝහය ඔබට ආශිර්වාද කරනවා 'මේ මාර්ගයමයි සැප ඇති මාර්ගය' කියලා තව තවත් ඒත්තු ගන්වන්න. දුකේ කළ්‍යාණ මිත්‍රයන් තිදෙනාගේ ඇකයේ උණුසුමට තුරුල් වුණාම දැනෙන ගොරෝසු පහසට ඔබ හරිම කැමතියි. මේ කුණු සැපය විඳිමින්ම ඔබ පන්සල් යනවා. සිල් සමාදන් වෙනවා. දානමානත් දෙනවා. සද්ධර්මයත් ශ්‍රවණය කරනවා. ඒ කියන්නේ මොකද්දෝ බියකුත් තියෙනවා. සැබැවින්ම, ඒ බියත් සකස්‌ කරලා දෙන්නේ ලෝභ, ද්වේශ, මෝහය විසින්මයි.

තමන් කැමති කරන්නා වූ කුණුසැපයේ ආරක්‍ෂාව උදෙසා, අර්ථයෙන් තොරව ජීවිතයේ කොනක්‌ ධර්මයේ ගැට ගසනවා. තමා තමාවම රවටාගන්නවා. කුණු සැපයේ ආරක්‍ෂාව උදෙසා ධර්මයේ රැකවරණය අපේක්‍ෂා කරනවා.

මෙය තමයි සැබෑම පෘතග්ජනභාවය. අයෝනිසෝමනසිකාරය. ලෝභ, ද්වේෂ, මෝහ අකුසල මූලයන්ගේ වර්ධනය උදෙසා, දියුණුව උදෙසා ධර්මයේ පිහිට සොයනවා. ලෝභ, ද්වේෂ, මෝහ අකුසල මූලයන්ගේ මිදීම උදෙසායි අප සද්ධර්මයේ සරණ සෙවිය යුත්තේ. වර්තමාන සමාජය ගමන් කරන්නේ සද්ධර්මයේ අර්ථයට පරස්‌පර විරෝධී ගමනකයි. මමත්වයේ දැඩිභාවය නැමැති, ඔබ හඳුනා නොගත් කුණු හැව, සකස්‌ වෙන පංච උපාදානස්‌කන්ධයන්ගෙන් වෙලී ඇති නිසා, සැබෑ මාර්ගය වැසී නොමගටමයි පාර පෙන්වන්නේ.

වැරදි මාර්ගය ඔස්‌සේම නිවැරදිවීමට යැමේ පුංචි සිද්ධියක්‌ පිංවත් ඔබට මෙහි සටහන් තබනවා.

මෙය සටහන් තබන භික්‍ෂුව හමුවට ධර්මය අහන්න එන ශ්‍රද්ධාවන්ත දරුවෙක්‌ ඉන්නවා. ඔහු විවාහකයෙක්‌. ළමා වයසේ දරුවන් කිහිපදෙනෙක්‌ ඉන්නවා. මේ මහත්මයා සද්ධර්මය නිසාම ජීවිතය නිවැරදි කරගත් අයෙක්‌. දිනක්‌ මේ මහත්තයා කියනවා 'දරුවන්ගේ අකීකරුකම් නිසා, මගේ බිරිඳට හරියට කේන්ති යනවා. එයාට කොච්චර කිව්වත් කේන්තිගන්න එපා කියලා, මොහොතකින් එය අමතක වෙනවා. හැබැයි මම කියලා කියලා දැන් හුඟක්‌ අඩුවෙනුයි කේන්ති ගන්නේ' කියලා.

දවසක්‌ ඒ නෝනාට කේන්ති ගිය වෙලාවක මහත්තයා උපක්‍රමයක්‌ වශයෙන් කියලා තියෙනවා 'ඔයා කේන්ති ගන්න නිසා ඔයාගේ මුහුණ දැන් කැත වෙලා. ඒ නිසා ඔයා කේන්ති ගන්න එපා' කියලා. ඒත් මහත්තයා එහෙම කියපු වෙලාවේ ඉඳලා ඒ නෝනා කරන්නේ මිල ගණන් අධික, ලස්‌සන වෙනවාය කියන ක්‍රීම් වර්ග අරගෙන මුහුණේ ආලේප කරන කටයුත්තලු.

බලන්න. වැරදි මාර්ගය ඔස්‌සේමයි අපි නිවැරදි වෙන්න හදන්නේ.

ලෝකය නිවැරදි කරන්න අපට බැහැ. ඒ නිසා ලෝකය කමටහනක්‌ කරගෙන පිංවත් ඔබ නිවැරදි වෙන්න. ලෝකය නිවැරදි කරන්න බැරි බව නුවණින් හඳුනාගෙනම....

එවිටයි ඔබට පුලුවන් වෙන්නේ වඩාත් නිවැරදි තැන ඔබගේ සිත පිහිටුවාගන්න. වඩාත් නිවැරදි තැන තමයි සද්ධර්මය.

'අනිච්ජාවත සංඛාරා' සියලු සංස්‌කාරයෝ අනිත්‍යයි. ඔතැනම තිබෙනවා, ලෝකය නිවැරදි කරන්නට බැරි බවට බුදුරජාණන් වහන්සේ දෙන සහතිකය. පිංවත් ඔබ ධර්මයේ අර්ථයට විවෘත වෙන්න. එවිට එය සමාජයටත් ආදර්ශයක්‌ වේවි. සංස්‌කාරයන්ගේ අනිත්‍ය බව තමයි ලෝකයේ තිබෙන සංකීර්ණභාවයට, අධිවේගීභාවයට හේතුව. පිංවත් ඔබ සෑම මොහොතකම මෙනෙහි කරන්න 'මම මැරෙණවා'ය කියන කාරණය. නැවත මැරිලා ඉපදෙනවාය කියන කාරණය. පාංශකූලය, හත්දවසේ, තුන්මාසේ පිංකම්.... සාම්ප්‍රදායික මළගෙදරක චාරිත්‍ර වෙනුවට මිය යැමට පෙරම ඔබ, මරණින් මතු සුරක්‍ෂිත පුද්ගලයකු වන්න. එවිටයි ඔබට අවස්‌ථාව ලැබෙන්නේ ඔබම රැස්‌කරපු සංස්‌කාර හේතුවෙන් ලබන භවය අනුන්ගේ පිං ගොටුවකින් යැපීමට අවශ්‍ය නොවන තැනට පත්කරගන්න.

කෙනෙක්‌ මැරුණාට පසු ඔහුගේ මරණය ගැන කම්පා නොවී, ජීවත්ව සිටින විට තමාගේ මරණය ගැන සිතන්න. මරණයත් සමග ජීවත්වෙන්න. එය හරිම සුන්දර ඇත්දැකීමක්‌. මරණයේ සුන්දරම අත්දැකීම ලබන්නේ රහතන්වහන්සේය. මරණය උන්වහන්සේට ආශිර්වාදයකි. මංගල කාරණාවකි. උන්වහන්සේ අවිද්‍යාව අවසන් කර ඇත. ඒ උත්තමයා දුකත්, සැපත්, උපේක්‍ෂාවත් අනිත්‍ය බව ප්‍රත්‍යක්‍ෂ කොට ඇත. ඒ උත්තමයාගේ මරණය හුදු ක්‍රියාවක්‌ පමණක්‌මය. එය මේ ලෝකයේ ඇති සුන්දරම මරණයයි. මාර්ගඵලලාභී දෙව් බඹුන් සාධුකාර දෙන මරණයයි. අනෙකුත් දෙවිවරුන්ට ශෝක උපදවන මරණයයි. මාර පිරිස අත්පොළසන් දෙන මරණයයි. මහපොළොවට පස්‌වන ඇටකැබලිත් පූජණීයත්වයට පත්වෙන මරණයයි.

බලන්නකෝ මරණයක තිබෙන වටිනාකම. අපි මරණය අඩු ලංසුවෙන්, අසුබ ලංසුවෙන් සැලකුවත්, බලන්න, මරණයක ඇති ගාම්භීරත්වය, ප්‍රෙෘඩත්වය. කොටින්ම එය මරණයක්‌ නොව නිවී යැමකි. ඔබට මට නොදැනුනාට, රහතන්වහන්සේගේ මරණය අභියස ලෝක ධාතුව කම්පා වෙයි. ලෝක ධාතුව කම්පාවන්නේ, රහතන්වහන්සේ අවබෝධ ඥාණයෙන් ලෝක ධාතුව කම්පාකළ අයෙකු හෙයිනි. අයෝමය සතරමහා ධාතුව විනිවිද දකිමින් අවබෝධ කළ හෙයිනි. මුළු ලෝක ධාතුවම අනිත්‍යාවබෝධයෙන් හෙළිකොට ගෙන, මුලාව විනිවිද අවබෝධය කරා ගිය හෙයිනි. ඔහුට ලෝකය තවත් හිස්‌ දෙයක්‌, ඵලයක්‌ නැති දෙයක්‌ පමණක්‌මය.

මේ තරම් අර්ථවත් මරණයක්‌ ධර්මය තුළ තිබියදී, තුණ්‌ඩු කෑල්ලක නම ගම ලියා පරදත්තරූප ජීවී ප්‍රේත ප්‍රේතියන්ට පිංදෙමින් අපි මරණයට මොන තරම් අවනම්බුවක්‌ ද, අගෞරවයක්‌ ද කරන්නේ. හිතන්න. ඔය සාම්ප්‍රදායික තුණ්‌ඩු කැබැල්ල බිමින් තියලා 'මට නම් ඔය අනුන්ගෙන් පිං ගන්න මරණයක්‌ එපා'ය කියලා. ශ්‍රද්ධාව, වීර්යය මදභාවය නිසා එච්චර හිතන්න බෑ කියමුකෝ. ඉන් මෙහා බුදුරජාණන්වහන්සේ දේශනා කරනවා, ශීලයෙන් පරිපූර්ණ පිංවතා, පිංවතිය මැරෙන්නේ සිහිනුවණින් සාධුකාර දෙමින්ය කියලා. කවුද මේ ශීලයෙන් පරිපූර්ණ පිංවතා? ඒ සතර අපායෙන් මිදුණ පිංවතායි. මරණින් මතු ඔහු ලබන උපත මොන තරම් ශ්‍රේෂ්ඨ උපතක්‌ වේවි ද? ඇයි අපි එවැනි මරණයකට සූදානම් නොවන්නේ.

ලොකු හෝටලයක තිබෙන මඟුල් උත්සවයකට අඳින සාරිය ගැන හිතනතරම්වත් අපි මරණය ගැන හිතන්නේ නැහැ. ඒකෙන් අදහස්‌ වෙන්නේ, සාරිය ගැන ඔච්චර හිතන්නේ සාරිය දවටගන්න ඔය කය, මරණයට පත්වෙන කයක්‌ කියලා නොසිතනා එකමයි. පිංවත් ඔබට මරණය අමිහිරි අත්දැකීමක්‌. අනුන්ගේ මරණය ගැන කථාකරන අපි තමාගේ මරණය ගැන සිතීමටත් බිය වෙනවා. අසුන්දර මරණයක්‌ අභියස ඇති අසුන්දර කථන්දරය වගේම සුන්දර මරණයක්‌ අභියස ඇති සුන්දර නව ජීවිතය මොන තරම් චමත්කාරජනකද? ලෙඩ ඇඳේ ජීවත්වන අවුරුදු හැත්තෑපහේ මහළු පිංවතා ද යදින්නේ ජීවිතයයි. ඔහු තුළ ඇත්තේ ද ජරා, ව්‍යාධි, මරණ පමණක්‌මය. එහෙත් ඔහුගේ බලාපොරොත්තුව ජීවීතයයි. ධර්මය සරණ කර නොගත් පුද්ගලයා නිරතුරුවම සැප - දුක පටලවාගනී. දුක, සැපයක්‌ කරගන්නා ඔහු සැබෑ සැපයට බියවෙයි. සැබෑ සැපයට අපතුළ බිය සකස්‌ කරන්නේ අකුසලයයි.

පිංවත් ඔබ, මරණයට වටිනාකමක්‌ ලබාදීම උදෙසාම, මරණින් මතු හේතුඵල ධර්මයන්ගෙන් සකස්‌වෙන නව ජීවිතයට වඩාත් හොඳ වටිනාකමක්‌ ලබාගැනීම පිණිසම මේ සටහන උපයෝගිS කරගන්න. මෙය කියවා ඔබ තුළ ජවයක්‌ සකස්‌කර ගන්න. ලොව්තුරා බුදුරජාණන් වහන්සේගේ සිතේ ඇතිවූ සිතිවිල්ලක්‌ ඔබේ සිතේ ඇතිකර ගන්න. රහතන් වහන්සේගේ, රහත් භික්‍ෂුණීන් වහන්සේ නමකගේ සිතේ ඇතිවූ සිතිවිල්ලක්‌ ඔබේ සිතේ ඇතිකරගන්න. මාර්ගඵලලාභී උපාසක, උපාසිකාවගේ සිතේ ඇතිවූ සිතිවිල්ලක්‌ ඔබේ සිතේ ඇතිකර ගන්න.

මේ සටහන් තබන වේලාව රාත්‍රී 1.30යි. නින්ද අහලකවත් නැහැ. පංච නීවරණ පළාගොසින්. සද්ධර්මයට ඇති හිරිඔතප් දෙක නිසා අදහස්‌ එනවා, දෝරෙගලාගෙන. භික්‍ෂුව ඒ අදහස්‌ ඉදිරියේ අනිත්‍ය සංඥාව තබන්නේ නැහැ. පිංවත් ඔබගේ යහපත උදෙසාම... පිංවත් ඔබලාට නොදන්නා යමක්‌ දැනගැනීම උදෙසාම.... මේ ගලා එන්නේ අදහස්‌ නොව කරුණාවයි. මේ කරන්නේ සටහනක්‌ තැබීම නොව ධර්මයේ සංදිට්‌ඨික ගුණයේ අර්ථයයි. මේ මධ්‍යම රාත්‍රිය ගෙවී උදාවන අලුයම ආකාශය සිසාරා සියුම් සංගීත රාවයක්‌ පැතිරෙනවා. හොඳින් අවධානය යොමු කරන විට ඒ දිව්‍ය සංගීතයයි. සංගීත හඬ, ජයමංගල ගාථාවල සංගීත ස්‌වරයයි. සංගීත ස්‌වරය බොහොම පැහැදිළියි. ඒ කියන්නේ දෙවියන් ආයුෂ, වර්ණය, සැපය, බලය ලැබේවා කියලා සිල්වත් ලෝකයාට ප්‍රර්ථනා කරනවා. ආශිර්වාද කරනවා. දෙවියන් ඒ ආකාරයට ආශිර්වාද කරනු ලබන දිව්‍ය සංගීත හඬ ඇසෙනවිට භික්‍ෂුවට හොඳටම විශ්වාසයි මේ මොහොතේ භික්‍ෂුව අපවත් නොවෙන බව. අතීත සංස්‌කාරයන් තව ගෙවීමට ඇති නිසයි මේ මොහොතේ ජීවත්වෙන්නේ. නමුත් මීළඟ නිමේශයේ දිව්‍ය තල වලින් ශෝකී සංගීත රාවයක්‌ භික්‍ෂුවගේ ශ්‍රොaත වලට ඇසුණහොත් භික්‍ෂුව අනිවාර්යයෙන්ම දන්නවා තමා දැන් මරණයට සූදානම් වෙන්නේ කියලා.

බලන්නෘ මොනතරම් ආශ්චර්යමත් ධර්මයක්‌ද ඔබ ඉදිරියේ තිබෙන්නේ කියලා. මෙයයි ධර්මයේ සංදිට්‌ඨික ගුණය. තමා ජීවත්වන බවත්, තමා මැරෙන මොහොතත් දැනුවත්වයි ඔහු ජීවත්වෙන්නේ. පිංවත් ඔබ ශ්‍රද්ධාවෙන්, ශීලයෙන්, ත්‍යාගයෙන්, දේවානුස්‌සතියෙන් පරිපූර්ණ නම් ඔබ මැරෙණ මොහොත දෙවියන් දන්නවා. දෙවියන් ඔබට පාවඩ එලනවා දිව්‍ය තලයකට. බලන්න. මොන තරම් ආශ්චර්යමත් ධර්ම මාර්ගයක්‌ද? මරණය කියන කාරණය මොන තරම් සුන්දර මංගල්‍යයක්‌ද? පිංවත් තරුණ ඔබ දෑඟිලි බැඳලා, අත්පැන් වත්කරලා, පෝරුවට නැගලා, ජයමංගල ගාථා කියවලා මංගල්‍යයක්‌ කරගතහොත් ඒ බැඳුණු මොහොතේ පටන් ඔබ මොන දුක්‌කන්දරාවක්‌ද විඳින්නේ. 'මම' කියන දුක වෙනුවට තව 'මගේ' කියන දුක්‌ කීයක්‌ කරගහගන්න සිද්ධවෙනවාද? පිංවත් ඔබ බැඳෙන සාම්ප්‍රදායික මෝහ මූලික බැඳීම් මංගල්‍යවලට වඩා බුදුරජාණන් වහන්සේ දේශනා කරන ධර්ම මාර්ගය ඔබේ සහකරු, සහකාරිය කරගතහොත් එයයි සැපයම ඉතිරිය කරගත් සැබෑම මංගල්‍යය. අපි 'මරණය මරණය' යෑයි අඳෝනා තැබුවද, ධර්මයට අනුව මෙතැන මරණයක්‌ නැහැ. පුද්ගලයෙක්‌ මැරෙණ නිමේශයේම ඊළඟ ප්‍රතිසන්ධිය සකස්‌කර ගන්නවා. රැස්‌කර ගන්නා වූ සංස්‌කාරයන්ට අනුරූපීව. අපි මෝහය නිසා කුණුවෙන මළකුණක්‌ එම්බාම් එකෙන් සරසවලා, ඒකට මඟුල් ඇඳුම අන්දවලා අඬනවා, වඳිනවා, විලාප තබනවා. අපි මේ විලාප තබන්නේ ඒ මොහොතේ භවයේ කොතැනක හෝ උපත ලබා ඇති සත්වයෙක්‌ වෙනුවෙන්. අන්න ඒ නිසාමයි බුදුරජාණන් වහන්සේ මළකුණකට වටිනාකමක්‌ නොදී මරණින් මතු ලබන භවය සැපවත්කර ගැනිSම උදෙසාම මාර්ගය කියා දෙන්නේ. මෙතැනදීත් අපිට පැහැදිළියි බුදුරජාණන් වහන්සේගේ ධර්මය මරණය ගැනම කථා කරන ධර්මයක්‌ නොව, මරණින් මතු සැපයටම මාර්ගය කථා කරන ධර්මයක්‌ කියලා. පිංවත් ඔබයි මෝහ මූලිකව මරණයක්‌ බදාගෙන ධර්මයේ නැති දුකක්‌ උපදවා ගන්නේ, තෘෂ්ණාවේ දැඩිභාවය නිසාම....

ශ්‍රද්ධාව අඩු පිංවතුන් නිරතුරුවම මැසිවිලි නගනවා, සද්ධර්මයට එරෙහිව. 'බුදුරජාණන් වහන්සේ දුක ගැනමයි කියන්නේ' කියන කාරණය 'ධර්මයට අනුව ගියොත් අපට අඹුදරුවන්, දේපල තනතුර අත්හරින්නයි වෙන්නේ' කියන කාරණය. නමුත් ගිහි පිංවතුන්ලාට ධර්ම මාර්ගයට අදාළව ඉහත කාරණා කිසිවක්‌ අතහරින්න යෑයි කොතනකවත් දේශනා කරලා නැහැ. පංචඋපාදානස්‌කන්ධයේ අනිත්‍යභාවය දකිමින් ඉහත සැප සම්පත් පරිහරණය කරන්න කියලයි බුදුරජාණන් වහන්සේ ගිහි පිංවතුන්ලාට දේශනා කරන්නේ. නමුත් පිංවත් ඔබ අත්හැරීමට ගන්නා උත්සහයේ තරමටම දුක අඩු වෙනවා කියන කාරණය ප්‍රකාශ වෙනවා. පිංවත් ඔබට, බුදුරජාණන් වහන්සේ මරණය ගැන නිතරම මෙනෙහි කරමින් ජීවත්වෙන්න කියලා කියන්නේ, පිංවත් ඔබට මරණය පෙර සඳහන් කළ පරිදි මංගල්‍යයක්‌ කරගන්න මිස හඬමින් විලාප තබමින් කරන අවමංගල්‍යයක්‌ තත්ත්වයට පත්කර ගැනීමට නොවේ. පිංවත් ඔබ මරණයට පෙර සූදානම් වුවහොත් පමණයි ඔබට මරණය මංගල්‍යයක්‌ කරගන්න අවකාශ ලැබෙන්නේ. එම මරණය නැමැති මංගල්‍යයේදී සශ්‍රික දිව්‍යතල වල දෙවියන්, දිව්‍යාංගනාවන් ජයමංගල ගාථා සංගීත ස්‌වරය නගමින්ම ඔබව දිව්‍ය තලවලට පිළිගන්නවා. මේ මනුෂ්‍ය ලෝකයේ කුණු, ජරා, ව්‍යාධි මරණ සැපය වගේද පිංවතුනේ බුදුරජාණන්වහන්සේගේ ධර්මය තුළින් ඔබට පෙන්වන ශ්‍රද්ධාවේ, ශීලයේ, දානයේ පංචඋපාදන්ධයේ අනිත්‍යභාවය දකිමින් ජීවත්වන සැපය. ධර්මයෙන් පිංවත් ඔබට කථාකරන්නේ ඉහත මංගල්‍යයක්‌ වන මරණය නමුත් ශ්‍රද්ධාව අඩු පිංවතුන් 'මරණය' ලෙස දකින්නේ මොන තරම් මෝහ මූලික දෘෂ්ඨිගත මරණයක්‌ද?

දැන් සිටම ලොව සුන්දරම මරණයට ඔබටද ගැනීමට උනන්දු වන්න.......

උපුටා ගැනීම මහ රහතුන් වැඩි මග ඔස්‌සේ....

ඉසිදාසි තෙරණියගේ කථාව-පරදාර සේවනයේ ආදීනව

noreply@blogger.com (Dhanushka Gunasinghe's Hard Code) — Thu, 25 Apr 2013 00:46:00 +0000

මේ ලෝකෙ ඉපදෙන හැම ගෑණු ළමයෙක් ම පුංචි කාලෙ ඉඳන් ම සිහින මවන්නෙ ලස්සන අනාගතයකට. චූටි ම කාලෙ බෝනික්කොත් එක්ක සෙල්ලම් කරනවා, කවනවා, පොවනවා, නාවනවා. තව ටිකක් ලොකු වෙද්දි සෙල්ලම් ගෙවල් හදලා ඒකේ අම්මා වෙනවා. තවත් ටිකක් තේරෙන වයසට එද්දි නිදාගන්නෙත් හුරතල් ටෙඩියෙක් තුරුළු කරගෙන. වයසින් වැඩෙද්දි ඒ හීන ලෝකේ පුළුල් වෙලා හීන මවන්නේ ලස්සන විවාහයකට, යහපත් සැමියෙකුට, නිරෝගී දරු පැටවුන්ට. ඒක එහෙම නේද? ලස්සන විවාහයකුත් වෙලා, යහපත් සැමියෙකුත් ලැබිලා ඒත් තමන් අතේ කිසිම වැරැද්දක් නැති ව සැමියට තමන් ව එපා වුණොත්, විවාහය අසාර්ථක වුණොත් ගැහැණු ළමයෙකුට මොනවා හිතේවිද? වැඩිය හිතන්න යන්නෙපා, ඉස්සරත් මේ වගේ දේවල් වෙලා තියෙනවා ලෝකේ. ඒත් එහෙම වෙන්නෙ ඇයි කියලා කවදාවත් හිතුවෙ නැහැ නේද? එහෙනම් කියවන්නකෝ මේ කථාව...

කුසුම් පුරය නමින් යුතු පාටලී නගරය මේ මහ පොළොවට ආභරණයක්. ශාක්‍ය කුලයේ උපන් ගුණවත් භික්ෂුණීන් දෙනමක් ඒ නගරේ ඉන්නවා. එක් භික්ෂුණියක ගේ නම ඉසිදාසී. දෙවැනි සිල්වත් භික්ෂුණිය ගේ නම බෝධි තෙරණිය. ඒ දෙන්න ධ්‍යාන සැපයෙන් වාසය කරන්නෙ. බුදු සමිඳුන් ගේ ධර්මය ගොඩාක් අහල තියෙනව. ඒ වගේ ම නිකෙලෙස්. දවසක් ඒ භික්ෂුණින් දෙනම පිණ්ඩපාතෙ වැඩිය. දන් වැළඳුව. දෙපා සෝද ගෙන විවේක තැනක සුවසේ සිටිද්දි තමයි මේ කතාබහ ඇති වුණේ.

ආර්ය වු ඉසිදාසී ඔයා හරි ම ලස්සන කෙනෙක්. තව ම ඉන්නෙ තරුණ වයසෙ. ඔයා මහණ වෙන්ට කල්පනා කළේ ගිහි ගෙදර කොයි ආකාරයේ දෝෂයක් දැකල ද?

විවේක තැනක දී මේ විදියට අසද්දී දහම් දෙසීමෙහි දක්ෂ වු ඉසිදාසී භික්ෂුණිය මේ විදියට පිළිතුරු දුන්න. එහෙම නම්,පින්වත් බෝධි,මං මහණ වෙච්ච විදිය අහගන්න.

මගේ තාත්තා සිල්වත් කෙනෙක්,එයා උදේනි නගරයේ සිටුවරයෙක්. මං ඒ ගොල්ලන් ගෙ එක ම දුව. ඒ ගොල්ලන් ගෙ හැම ආදරයක් ම ලැබුණෙ මට. සාකේත නගරයේ උසස් කුලයකින් මට මංගල යෝජනාවක් ආව. ඒ සිටුවරයාට ත් ගොඩාක් වස්තුව තිබුණ. ඒ සිටුතුමා ගේ ලේලිය හැටියට මාව, මාගේ තාත්තා ඒ ගෙදරට පාවා දුන්න. ඉතින් මං නැන්ද යි මාම යි ලඟට උදේ සවස ගිහින් ඒ ගොල්ලන් ගෙ දෙපා වැන්ද. ඔවුන් කියන දේ විතරක් ම කෙරුව. මං මගේ ස්වාමිය හරි,සහෝදර සහෝදරියන් හරි, ඒ කවුරු හරි දැක්කොත් මං පුටුවෙන් නැගිටිනවා. මං ඒ ගොල්ලන්ට වාඩි වෙන්න දෙනව. කෑමෙන් බීමෙන් වුණත්, කැවිලි පෙවිලිවලින් වුණත් ඒ ගොල්ල කැමති දෙවල් හදල දීල සතුටු කරනව. මං ඒ ගොල්ලන්ට හොඳට සැලකුව. අවශ්‍ය දේවල් වෙලාවට හොයල බලල උපස්ථාන කරනව. මං මගේ අතින් සැමියා ගේ පා සෝදල යි ගෙට ගන්නෙ. ස්වාමියා ළඟට මං යන්නෙත් වැඳගෙන යි. මං පනාවත්, සුවඳ විලවුන් වර්ග ත්, වෙනත් දේවලුත්, කණ්ණාඩිය ත් අරගෙන සැමියා ළඟට යනව. මගේ අතින් ම යි මං එයා ව සැරසුවේ. මගේ අතින් ම බත් ඉව්ව. හැලි වලං හේදුව. අම්ම කෙනෙක් එක ම දරුවෙකුට සලකනව වගෙයි මං සැමියට කටයුතු කළේ.

එයාට මං කොයි තරම් ආදරෙන් වැඩකාර කම් කරගෙන හිටියත්, නිහතමානී ව සොයා බලා කටයුතු කරගෙන සිටියත්, කම්මැලි නැති සිල්වත් ජිවිතයක් ගෙවන මට ම යි එයා බණින්නෙ. අන්තිමේ දී එයා ඒ ගොල්ලන් ගෙ දෙමපියන්ට මෙහෙම කිව්ව. "මං යනව මේ ගෙදර අත් හැරල, මට මේ ඉසිදාසී ත් එක්ක පවුල් කන්ඩ ඕන කමක් නෑ." "පුතේ එහෙම කියන්න එපා. ඔය ඉසිදාසී ඤාණවන්ත කෙනෙක් නේ. වාසනාවන්ත කෙනෙක් නෙ. විරියවන්ත යි නෙ. කම්මැලි නෑනෙ. ඉතින් පුතේ. ඔයා මොකද ඉසිදාසීට මේ තරම් අකැමැති?" "ඔව්! ඇය මට වරදක් කළේ නෑ. මට ඉසිදාසී ත් එක්ක ඉන්ඩ ඕන කමක් නෑ. මට ඈ ව අප්පිරිය යි. මට ඇගෙන් වැඩක් නෑ. මං එහෙනම් ඕගොල්ලන්ට ත් නොකියා ම මේ ගෙදරින් යන්ඩ යනව." නැන්ද යි මාම යි එයා ගෙ වචනෙ පිළිගත්ත. ඉතින් ඒ ගොල්ල මගෙන් ඇහැව්ව."දරුවො. ඔයා මොකක් ද අපේ පුතාට කරපු වැරැද්ද? සැක නැතිව කියන්න" මං එයාට කිසි ම වරදක් කළෙ නෑ. හිංසාවක් කළේ නෑ. වැරදි වචනයක් කියල නෑ. ආර්යාවෙනි, ඉතිං එයා මේ තරම් මාත් එක්ක තරහ වුණාට මං මොකද කරන්නේ? "අපේ පුතා ව රැක බලාගෙන හිටිය ලස්සන ලක්ෂ්මී ව අපේ පවුලට නැති වුණා." කියල ඒ දෙමාපියන් මාව ආයෙමත් අපේ තාත්ත ළඟට ඇරලුවා.

ඒ වතාවේ මගේ තාත්ත, අපට වඩා බදු ආදායම භාගයක් ලැබෙන ධනවත් පවුලකට මාව බන්ඳල දුන්න. මාසය යි මං ඒ ගෙදර හිටියෙ. මං කීකරු දාසියක් වගෙ උපස්ථාන කරද්දී, සිල්වත් ව සිටිද්දි, ඒ ගෙදරිනුත් මාව අයින් කළා. අන්තිමේ දී මගේ තාත්තා, සිඟමනේ ඇවිදගෙන ගිය ඉඳුල් කකා ඉන්න මිනිහෙක් එක්කගෙන ආව. "ළමයෝ, ඔය රෙදි කඩමාල්ල යි, ඔය තැටිය යි වීසි කරපන්. මගේ දියණිය ගේ ස්වාමිය බවට පත් වෙයන්." කියල කිව්ව. ඒ මනුස්සයා මම ත් එක්ක ටික කලක් හිටිය. එයත් මාව අත් හැරල ගියා. එයා යන දවසේ තාත්තට මෙහෙම කිව්ව. "මගේ රෙදි කඩමාල්ල යි මගේ තැටිය යි, මට ආපහු ඕන. මං ආයෙමත් සිඟා කන්ඩ පටන් ගන්නව." එතකොට අම්ම යි තාත්ත යි එයාට මෙහෙම කිව්ව. " මේ ගෙදරින් ඔයාට මොනව ද ලැබෙන්නෙ නැත්තෙ? ඕන දෙයක් කියන්න, හරි ගස්සල දෙන්නම්." එහෙම කියද්දි ත් එයා මෙහෙම යි කිව්වෙ. "නෑ මට ජීවත් වෙන්ඩ තාම හයිය තියෙනව. මට මේ ඉසිදාසී ගෙන් වැඩක් නෑ. මට ඉසිදාසී ත් එක්ක පවුල් කන්ඩ ඕනකමක් නෑ." ඒ ඉඳුල් කන මනුස්සය ත් මාව දාල ගියා. මං තනියම හිතන්න පටන් ගත්ත. එක්කෝ මං කාටවත් නො කියා දිවි නසා ගන්නව. එක්කෝ මං මහණ වෙනව.

විනයධර,බහුශ්‍රැත, සිල්වත් භික්ෂුණියක් හිටියා. ආර්ය වු ඒ ජිනදත්තා භික්ෂුණිය පිණ්ඩපාතෙ වඩින ගමන් අපේ ගෙදරට ත් වැඩිය.එතුමිය දැකල අපි සිටිය ආසනේ වාඩි වෙන්න පිළියෙල කළා. එතන හිඳ ගත්ත ඒ භික්ෂුණී ගේ දෙපා වැඳල දානෙ පුජා කරගත්ත. දන් පැන්වලිනුත්, කැවිලි පෙවිලිවලිනුත් ඇයට සැලකුව. "ආර්යාවෙනි, මාත් කැමැති යි මහණ වෙන්න," මං තාත්තා ළඟ වැඳ ගෙන හඬා වැටුණා. "නෑ, මං කරගත්තු පව් තමයි මේ. මම් ම ඒ පව් දිරවල අවසන් කරල දානව." ඊට පස්සෙ තාත්ත මෙහෙම කිව්ව. " නර ශ්‍රේෂ්ඨ වු බුදු රජාණන් වහන්ස් යම් උතුම් ධර්මයක් අවබෝධ කළා නම්, ඔයත් ඒ උතුම් ධර්මයට පැමිණිලා අවබෝධය ලබා ගන්න. නිවනට පත් වෙන්න." මං දෙමාපියන්ට ත්, නෑදැ පිරිසට ත් වන්දනා කළා. ඔන්න ඉතින් මාත් මහණ වුණා. මහණ වෙලා හත් දවසින් මාත් ත්‍රිවිද්‍යාව ලබා ගත්තා.

මට අතීත ජිවිතේ ආත්මභාව හතක් සිහි කරන්න පුළුවන්. මං මේ ජිවිතේ විපාක වින්ඳේ ඒ කාලේ කරපු පවක්. මං ඔයාට එක කියන්නම්. හොඳට අහගෙන ඉන්න. මීට ආත්මභාව හතකට කලින් ඒරකච්ජ නගරයේ ගොඩක් ධනය තියෙන රන්කරුවෙක් වෙලා මං හිටියෙ. මං තරුණකමින් මත් වෙලා හිටිය. මං නොයෙක් කාන්තාවන් පස්සෙ ගියා. මනුස්ස ලෝකෙන් චුත වෙලා මං කෙළින් ම ඉපදුනේ නිරයේ. මං ගොඩාක් කල් නිරයේ දුක් වින්ඳා. නිරයෙන් චුත වුණාට පස්සෙ උපන්නෙ වැඳිරියක ගේ කුසේ. එතකොට මං ඉපදිලා දවස් හත යි. එ වඳුරු රැළේ නායක වඳුරා මගේ පුරුෂ ලිංගය හුරල දැම්ම. පරස්ත්‍රීන් සේවනය කරපු කර්මවිපාක තමයි මං ඒ වින්ඳේ. මං එතැනින් චුත වුණා. සින්ධව වනයේ හිටියා එක ඇහැක් අන්ධ වෙච්ච කුදු ගැහිච්ච බුරු දෙනෙක්. ඒ ගමන මං උපන්නෙ ඇගේ කුසේ. මං කුඩා කාලේ මගේ රහසඟේ ඇට තැලුව. දොළොස් අවුරුද්දක් දරුවන් පිටේ තියාගෙන ඇවිද්දා. නමුත් අර ඇට තලපු තැන තුවාල වෙලා තිබුණේ. ඒ තුවාලෙට පණුවො ගහල මං ලෙඩ උණා. පර ස්ත්‍රීන් සේවනය කරපු එකේ විපාක තමයි.

මං එතනින් චුත වුණා. හරක් වෙළෙන්දෙක් ළඟ හිටපු ගව දෙනෙක ගේ කුසේ ඉපදුනා. මං රතුපාට වහු පැටියෙක්. දොළොස් වෙනි මාසෙ දී අර විදියට ම මාගේ ලිංගයේ ඇට තැලුව. මං නගුල් උස්සගෙන ගියා. ගැල් බර කර තියාගෙන ගියා. අන්ධයෙක් වගේ මං පරස්ත්‍රීන් සේවනය කළ නිසා මං අන්ධ වෙලා, ලෙඩ වෙලා ගියා. මං එතනින් චුත වුණා. නගරේ වීදීයේ දාසියක ගේ කුලයේ තමයි ඊළඟට උපන්නේ. පරස්ත්‍රීන් සේවනය කිරීමේ විපාක බලන්න. ඒ වතාවෙ මං ගැහැණියෙකුත් නො වේ, පිරිමියෙකු ත් නොවේ නපුංසකයෙක්! මං ගොඩාක් දුක් වින්දා, අවුරුදු තිහේ දී මැරුණා. ණය බරින් මිරිකිලා ගිය ගැල් බර ගෙනියන පවුලක යි මං ඊ ළඟට ඉපදුනේ. ඒ ගමන මං ස්ත්‍රියක්.අපේ ගෙදරට ණය ගෙවා ගන්ට බැරි වුණා. ගැල් නායකයා අපේ ගෙදරට ඇවිදින් මං හඬද්දී ම බලාත්කාරයෙන් මාව අරගෙන ගියා. එතකොට මට වයස දහසය යි. මං තරුණ යි. ඒ ගැල් නායකයා ගේ පුතෙක් හිටිය ගිරිදාස කියල. එයා මාව තමන් ගෙදරට කැඳව ගත්ත. එයාට හිටියා හොඳ සිල්වත්, ගුණවත්, ස්වාමිභක්තිය තියෙන බිරිඳක්. මට ඈ ගැන ඉරිසියා හිතුන. ඉතින් මං කළේ ඒ බිරිඳ ගැන කිපෙන විදියට කටයුතු කිරීම යි. මං දාසියක් වාගේ ස්වාමියා ට උපස්ථාන කරද්දී. ස්වාමියා මාව අත් හැරල යන්නෙ, ඒ අකුසල කර්මයේ විපාක වශයෙන්. මං දැන් ඒ කර්මය ත් අවසන් කළා.

මෙය ඔබට යහපත් ධර්ම දානයක් ම වේවා!!!!!!!!!!!
Source : Facebook

වැලන්ටයින් දවසේ තෙරුවන්සරණ යන්න

noreply@blogger.com (Dhanushka Gunasinghe's Hard Code) — Mon, 11 Feb 2013 09:13:00 +0000

හෙට අනිද්දා වැලන්ටයින් අපේ රටට එනවා. අපේ තරුණ තරුණියන්ගේ ඔලුගෙඩි ටික කුරුවල් කරලා මෙහෙම පදිංචි වෙනවා. ඊට කලින් මේ ටික කෙටියෙන් කියන්නම්. දැනගෙන සිටින්න.

ඇටෙන් පොත්තෙන් එන්ටත් කලින් පෙම් පලහිලවු වල පැටලෙන්ට විද්‍යුත් සහ මුද්‍රිත මාධ්‍යයන් වලින් නිතර නිතරම ළමා සහ තරුණ මනස විකෘති කිරීම හේතුවක් වී තිබෙනවා. තමන්ට පෙම්වතියක් හෝ පෙම්වතෙක් නැති වීම ලැජ්ජාවට කරුණක් ලෙස සලකන තැනට එම උමතුව පත්ව තිබෙනවා. ආදරය හැම සත්වයෙකුටම පොදු දෙයක්. එක එක්කෙනා ඒ ගැන එක එක දෙවල් කියයි.

එත් ඔය වැලන්ටයින්ලා ඔයාලාට කියලා දෙන්න දන්නේ නැති ගොඩාක් දෙවල් තියෙනවා. ඒක තමයි සම ශ්‍රද්ධා, සම ශීල, සම දහම් දැනුමක්, සම ත්‍යාග, සම ප්‍රඥ්ඥා තියෙනවානම් නිර්වාණය දක්වාම ඒ අය නැවත මුනගැසෙන බවත් ඒ ධර්මයන් වැඩීමෙන්ම ඉතාමත් සතුටින්, සැපවත්ව, සුවසේ ආර්‍ය අශ්ඨාංගික මාර්ගය වැඩී දෙදෙනාම සියළු සසර දුක් අවසන් කරන බවත්.

ඉතින් වැලන්ටයින්ලා මොනවා කිව්වත්, උදේ හිට රෑ වෙනකල් මොට්ට ගැහැණු මාධ්‍ය අරක්ගෙන පොශ් වෙලා මොනවා කිව්වත්, පිස්සු නවකතා කාරයෝ මොනවා ලිව්වත්, දුස්සීල ගායක ගායිකාවො තම දුස්සීල ජීවිත ගැන ලස්සනට සින්දු හදාගෙන රස කර කර කිව්වත්,මගේ ඔලුවනම් මම කුණු කරගන්නේ නැහැ කියලා හිතට ගන්න.

තරුණ ඔබ දෙදෙනම භාග්‍යවතුන් වහන්සෙ මුළු හදින්ම සරණ යන්න, ඒ උතුම් ශ්‍රී සද්ධර්මයත් සරණ යන්න, ඒ උතුම් අෂ්ඨාර්‍ය පුද්ගල මහා සංඝරත්නය සරණ යන්න, එවිට පින් ගංගාවන් තුනක් ඔබේ ජීවිතයට ගලනවා. ඒ කරලා උතුම් පංච ශීලය සමාදන්ව රකින්න, හැකි විටකදී උපෝසථය වැනි උසස් ශීලයක් හික්මෙන්න, එවිට පින් ගංගා හතරක් දිවා රාත්‍රී ඔබේ ජීවිතයට ගලනවාමයි. ටිකින් ටික ධර්ම ඤාණය දියුණු කරගන්න පොත පත කියවන්න ධර්ම දේශනා වලට සවන් දෙන්න ගෞරවයෙන් ධර්මය සාකච්චා කරන්න ජීවිතයේදී ඕනෑම දෙයකට මුහුණ දෙන්නට අවශ්‍ය ආයුධ ගබඩාව බවට එය පත් වේවි. හැකි සෑම විටකම ඇති විටත් නැති විටත් අල්පමාත්‍ර දෙයක් හෝ දන් දෙන්න පින මෝරාවි. බින්දුවෙන් බුන්දුව නමුත් එක දිගටම පිරෙනවානම් කලය පිරෙනවා වගේ ජීවිතය පිනෙන් පිරේවි. එකතු කරගත් ධර්ම දැනුම නුවණින් නිතර විමසන්න ප්‍රඥ්ඥාව වැඩේවි. ජීවිතය සුවපත් වේවි දන්නේම නැතිව. අන්තිමට මැරිලා පලච්චහම වැලන්ටයින්ලා එන්නේ නැහැ ඔබව සුගතිගාමී කරන්න. නමුත් අර ශ්‍රද්ධාවට පුළුවනි ඒක කරන්න. ශීලයට, ධර්මයට, දානයට, ප්‍රඥ්ඥාවට ඒවායෙන් රැස් වූ පිනට පුළුවනි ඔබව සුගතිගාමී කරන්න, සැපවත් කරන්න.

වැලන්ටයින්ලා කියන පදේට නටන්න ගියොතින් ඔබට මේ ජීවිතෙත් අපායක් වෙලා හිස් අතින්ම මිය ගිහින් දුගතියේ යන්නට සිදු වේවි. ඉතින් ඒ වගේ අවාසනාවන්ත දෙයක් ඔබට සිදු නොවේවා.

වැලන්ටයින් ආපසු රට පටවා වීසා නොදී අසාදු ලේඛණයට ඇතුලත් කරමු.

තෙරුවන් සරණයි..!

By Chathura Wijaya Sri DolahaAmuna

ආශ්චර්යය මෙය නම්

noreply@blogger.com (Dhanushka Gunasinghe's Hard Code) — Tue, 29 Jan 2013 15:57:00 +0000

රටේ රජවරුන්ගේ ඉතිහාසය ගැන අප බොහෝ කරුණු දන්නවා. රජවරුන්ගේ නම්ගොත් ද ඒ ඒ රාජධානි ගැන ද සවිස්තර ව රසවත් විදිහට අප අහල තියෙනවා. බුද්ධ ශාසනයේ ඉතිහාසය ද මේ රටේ ඉතිහාසයට බද්ධ වී තිබෙන්නේ ගහට පොත්ත වගේ. රජවරුන් ඒ ඒ කාලයේ පවත්වාගෙන ගිය පාලන තන්ත‍්‍රයන් ගැන අපට ඉතිහාස පොත්පත්වලින්, සෙල්ලිපිවලින්, ජනප‍්‍රවාදවලින් තමයි දැනගන්නට තිබෙන්නේ. ‘ධාර්මික පාලනයක්’ කියන සංකල්පය සෑම කාලයේ ම අපේ රාජ්‍යයක මූලික අංගයක්. ඉතිහාසයේ රාජ්‍ය පාලනතන්ත‍්‍රයට ‘ධාර්මික පාලනය’ බද්ධ වීමට බුදුරජාණන් වහන්සේගේ විශ්මිත හෙළිදරව්ව ඇතුළත් මේ ධර්මයයි හේතු වුණේ. බුදු දහමේ විස්තර කරන රාජ්‍ය පාලන විධි, බුදුරජාණන් වහන්සේ රජවරුන් උදෙසා කළ අවවාද අනුශාසනා, බුදුරජාණන් වහන්සේ වැඩසිටි කාලයේ හා අතීත බුදුවරුන් වැඩසිටි කාලයේ පැවති පාලන තන්ත‍්‍රයන් පිළිබඳ විස්තර ආදියෙන් අපේ අතීත පාලන ක‍්‍රමය පෝෂණය වුණා.

බුදු දහම පදනම කරගෙන පැවති රාජ්‍ය පාලනයක් ප‍්‍රායෝගික ව හා සාර්ථක ව වසර දහස් ගණනක් බාධක මධ්‍යයේ වුව ද ක‍්‍රියාත්මක කරන්නට අපේ පැරැන්නන් සමත් වුණා. අධාර්මික පාලනයක් පැවති කාලයේ, විදේශ ආක‍්‍රමණ පැවති කාලයේ පවා අපේ පැරැන්නන් සටන් කළේ මේ ධාර්මික පාලනය උදෙසා ම යි. බොහෝ මතවාද තිබුණ ද දෙපයින් නැඟී සිටින්නට අපට එක ම බලය වන්නේ බුද්ධ ශාසනය මුල්කොට පවතින ධාර්මික පාලනය යි. අන්න ඒ පාලනය සොයා යන්නේ කෙසේදැයි කතා කිරීමට දැන් කාලය පැමිණිලා. පහුගිය කාලේ උතුරු නැගෙනහිර ත‍්‍රස්තවාදය තුරන් කිරීමේ සටන අවසන් වුණා. යුද්ධයෙන් සමාජගත වූ ආදිනව දැන් අප ප‍්‍රායෝගික ව අත්විඳිනවා. බටහිර සුප‍්‍රකට දේශපාලන ක‍්‍රම මඟින් නැවතත් ධාර්මික පාලනයක් ඇතිකර ගැනීම නම් සංකල්පයක් ම විතරයි. පංච දුෂ්චරිතය ම සිදු කරමින් බොරුවෙන්, වංචාවෙන් රටක් පාලනය කරන ලෝක දේශපාලන ක‍්‍රම තුළ සංවර්ධනයකට වඩා අපට උරුම වන්නේ හානිකර හෙටක්. යුද්ධය නිමා වූ අපේ රටේ පාලන ක‍්‍රමය ධාර්මික පාලනයක් කරා ගෙන යන්නට රටවැසියන් ලෙස තම තමා විසින් කළ යුතු උතුම් වගකීමක් තියනවා. එය අද ඉටු නො කළහොත් අපේ අනාගතය අඳුරු වෙන බව ඉතිහාසය නැවත් නැවතත් උගන්වා තිබෙනවා. බුද්ධ වචනයේ ඇති ධාර්මික පාලනයක තතු අප හදාරා සිටීම මෙකල පාලනය යම් අයුරකින් හෝ හිතසුව පිණිස සකසා ගැනීමට ඉවහල් වේවි.

බුදුරජාණන් වහන්සේ චක්කවත්ති සීහනාද සූත‍්‍රයේ සක්විති රජවරුන් පිළිපදින සක්විති වත් ගැන දේශනා කොට තිබෙනවා. ‘දළ්හනේමි’ නම් සක්විති රජතුමාගේ පුත් කුමරා හට රාජ තනතුරු ප‍්‍රධානයකොට දින හතකට පසු පියා සතු චක‍්‍රවර්තී මාණික්‍යය අතුරුදන් වුණා. එය නැවත ලබාගෙන සක්විති තනතුර ලබා ගැනීමට සිදු කළ යුතු සක්විති වත් ගැන පිය රජතුමා මෙසේ කියා දුන්නා. ‘‘පුත‍්‍රය, නුඹ ධර්මයෙහි පිහිටා, ධර්මයට ම සත්කාර කරමින්, ධර්මයට ම ගරු කරමින්, ධර්මය ම ප‍්‍රිය කරමින්, ධර්මයට ම පුදමින්, ධර්මයට ම වඳිමින්, ධර්මය ධජය කරගෙන, ධර්මය ම අග‍්‍ර කරගෙන, ධර්මය ම ප‍්‍රධාන කොටගෙන, සිය අඹු දරුවන් සීලයේ පිහිටුවා, ඔවුනට කළ යුතු ධාර්මික ආරක්ෂාව සලසා දිය යුතු ය. සිය බලසේනාව ද ධාර්මික ක්ෂත‍්‍රියයන් ද බ‍්‍රාහ්මණ ගෘහපතීන් ද සීලයෙහි පිහිටුවා ආරක්ෂා කළ යුතු ය. ගම් නියම්ගම් ජනපදවාසීන් ද සිල් ගුණදම් පුරන මහණ බමුණන් ද සිවුපාවුන් හා කුරුල්ලන් ද ආදි සතුන් ද ජීවිත දානයෙන් ආරක්ෂා කළ යුතු ය. සිය රටෙහි අධාර්මික ක‍්‍රියා නො පවත්වන්නට කටයුතු කළ යුතු ය. රටේ ජීවත්වන දුප්පතුන්ට උපකාර කළ යුතු ය. පුත‍්‍රය, සිය රටෙහි රාගාදි කෙලෙස් දමනය කළ, සමනය කළ, දුරින් දුරු කළ යම් මහණ බමුණෙක් වෙත් ද කලින් කල උන්වහන්සේලා කරා ගොස් දැනගත් යමක් අකුසල් ද එය අත්හැරිය යුතු ය. යමක් කුසල් ද එය පිළිගෙන පැවැත්විය යුතු ය. පුත‍්‍රය, නිවැරදි සක්විති වත් මේවා ය”

බලන්න, වගකීම නිසි ආකාරයෙන් ඉටුකරන සැබෑ නායකයාට මහජන මතය විමසීමකින් තොරව ලෝකය ම දිනන්නට හැකි පිරිසිදු ක‍්‍රමයක් පවතින බව භාග්‍යවතුන් වහන්සේ අපට පෙන්වා දුන්නා. එ් සක්විති රජ පදවිය යි.

දළ්හනේමි රජුගේ ඇවෑමෙන් රාජ පරම්පරා හතක් සක්විති පදවිය දැරුවා. අටවැනි රජු සක්විති වත් විමසුවේ නැහැ, ඉටු කළෙත් නැහැ. ඔහු දුප්පතුන්ට ධනය නො දුන් නිසා දිළිඳු බව පැතිරී ගියා. සොරකම ඇති වුණා. අවි ආයුධ පරිහරණය ඇති වුණා. ප‍්‍රාණඝාතය සිදු කරන්නට පටන් ගත්තා. ජනයාගේ ආයුෂ පිරිහුණා. වර්ණය ද පිරිහුණා. මිනිසුන්ගේ ආයුෂ අවුරුදු අසූ දහසක සිට හතළිස් දහසකට අඩු වුණා. බොරුකීමට පටන් ගැනීම නිසා මිනිස් ආයුෂ විසි දහසක් බවට පත් වුණා. කේලාම් කීමට පටන් ගත් නිසා දස දහසකට ආයුෂ අඩු වුණා. පරදාර සේවනයේ යෙදීමෙන් පන් දහසකට ආයුෂ අඩු වුණා.

තද ආශාව, ක්‍රෝධය යන දෙක අතිශයින් පැතිරුණා. මිථ්‍යා දෘෂ්ටීන් බොහෝකොට පැතිරී ගියා. මෙසේ අධර්ම රාගය, විෂම ලෝභය, මිථ්‍යා ධර්මය අතිශයින් පැතිරී ගියා. මව කෙරෙහි වරදවා පිළිපැදීම, පියා කෙරෙහි වරදවා පිළිපැදීම, භික්ෂූන් වහන්සේලා කෙරෙහි වැරදි ලෙස හැසිරීම, සිය පවුලෙහි වැඩිහිටියන්ට යටහත් නො වෙන බව යන මේ වැරදි පහ පැතිර ගියා. මේ ආකාරයට දුශ්චරිතය කරන්නට, කරන්නට ආයුෂ සියයක් දක්වා අඩු වුණා. බලන්න මේ ලෝකයේ සිදුවන අපූරු ධර්මතාවක් බුදුරජාණන් වහන්සේ හෙළි කළා.

මේ වන විට අපේ රටේ සම්මත ආයුෂ අවුරුදු 65- 75 ක් අතර නේ ද පවතින්නේ? ලෝකයේ ගුණ ධර්ම පිරිහීමත් ආයුෂ, වර්ණ, සැප, බල පිරිහීමත් අතර ඇති සම්බන්ධය හරිම විස්මිතයි නේ ද? බුදු නෙතින් දුටු අනාගත ලෝකයේ අපූරු හෙළිදරව්ව තමයි මේ…..

අනාගතයේ මිනිසුන්ගේ ආයුෂ අවුරුදු දහයක් වෙනවා. අවුරුදු දහයක් පරමායුෂ ඇති කාලයේ විවාහ වෙන්නේ අවුරුදු පහෙන්. ඒ කාලය වෙන විට ගිතෙල්, වෙඬරු, තල තෙල්, මී, හකුරු, ලූණු යන මේවායේ රස නැති වී යනවා. අකුසල ක‍්‍රියා අතිශයින් පැතිරෙනවා. ඒ කාලයේ කුසල් යන නමවත් අහන්නට ලැබෙන්නෑ.

සත්වයන් තුළ ඔවුනොවුන් කෙරෙහි දැඩි කෝපය, දැඩි ව්‍යාපාදය, දැඩි ද්වේෂය, දැඩි වධක චිත්තය (මැරීමේ ආශාව) ඇති වෙනවා. අන්න ඒ කාලයේ සත් දවසක් මුළුල්ලෙහි ආයුධවලින් ඇන කොටාගෙන එකිනෙකා විනාශ වෙනවා. අප ජීවත් වෙන්නේ ඒ අඳුරු අනාගතයට යන පාරේ බව බුද්ධ වචනයෙන් ම තහවුරු වුණා නේ ද? රටේ වැඩිවන දුශ්චරිතය දැක දැක ම මේ රටාවේ ම ඉදිරියට යන්නට තරම් අප කෙතරම් පිරිහිලාදැයි හොඳින් විමසා බැලිය යුත්තක්.

අප දන්නවා ලිච්ඡවී රජ දරුවන්ගේ පාලනය ගැන භාග්‍යවතුන් වහන්සේ මහා පරිනිබ්බාන සූත‍්‍රයේ දේශනා කළා. අපරිහානී ධර්ම අනුගමනය කළ ලිච්ඡවීන් හට ගණ තන්ත‍්‍ර පාලනයක් හෙවත් මණ්ඩලයක් විසින් පාලනය මෙහෙයවීමේ ක‍්‍රමයක් තිබුණා. නිතර එක්රැස් වීම, සමඟි ව රැස්වීම, සමඟිව සාකච්ඡා කිරීම, සමඟිව විසිර යාම, පැනවූ නීති කඩ නො කිරීම, නො පැනවූ නීති නො පැනවීම, වැඩිහිටියන්ට ගරු කිරීම, කුල කාන්තාවන්ට හිරිහැර නො කිරීම, සාම්ප‍්‍රදායානුකූල ව ගරුසත්කාර කරන පූජනීය ස්ථානවලට ගරුකිරීම, පිටතින් ශ‍්‍රමණ බ‍්‍රාහ්මණයන් පැමිණි විට තමන්ගේ අය සේ ගරු සත්කාර කිරීම කියන මේවා සප්ත අපරිහානී ධර්ම යි. භාග්‍යවතුන් වහන්සේ අනුමෝදන් වූ ඒ පාලනය සමඟ අද තත්ත්වය සසඳා බලන්න. අප අද ප‍්‍රායෝගිකව මේ අපරිහානී ධර්ම තුළ හික්මෙනවාදැයි හිතන්නට කාලය ඇවිත්. අප වටහාගත යුත්තේ කවදා හෝ අපට හිත සුව පිණිස පරිසරයක් බිහිවනවා නම් ඒ සුචරිතයෙන් යුතු ධාර්මික පාලනයක් තුළින් බව යි.

බලන්න, කුසල්, අකුසල්, පින්, පව, යහපත අයහපත වටහගන්නේ නැතිව අනාදිමත් කාලයක සිට අප බල ගැන්වූ පාලනයන් නිසා බොහෝ දෙනාගේ ම දුසිරිත වැඩි වෙලා. ආයුෂ අඩු වෙලා. වර්ණය අඩු වෙලා. කායික මානසික සැපයත්, බලයත් පිරිහිලා. ධර්මයෙන් ඈත්වී ගිය පරිසරයක් ඇති රටකින් අපට ම කර ඇති හානිය හොඳින් තේරුම් ගත යුත්තක්. අධර්මයට ම සත්කාර සම්මාන කරන මේ යුගයේ බුද්ධ වචනයට මානනය පූජනය කොට කථා කරනවා කියන්නේ කෙතරම් දුලභ දෙයක්දැයි අප තේරුම් ගත යුත්තක්.

රටක් සමාජීය, ආර්ථික වශයෙන් මහා අගාධයකට ඇද දමපු බිහිසුණු ත‍්‍රස්තවාදී යුගයකට පසුව අපි ගොඩනංවන්න බලාපොරොත්තු වෙන ජාතික සහජීවනය කරා යන්නට ද මේ දැහැමි පාලන ක‍්‍රමවේදයේ සරණ හැර අන් සරණක් අප සතුව නැහැ. දිනෙන් දින යෝධ සංවර්ධන ව්‍යාපෘතීන් පණ නගන මේ පසුබිම ධර්මයෙන් පෝෂණය කළ හැකි නම් දස රාජ ධර්මයෙන් රට සුරැකි හෙළ රජ සමය යළි මේ බිම මත පිහිටුවන්නට අපට පුළුවන්. දිනන්නට නො හැකියැයි කී යුද්ධයකින් ජය ගත් රටකට, කරන්නට අපහසු යැයි සිතෙන මෙවන් වෙනසක් කරන්නට බැරිකමක් නෑ. එහෙම වෙන්නෙ, යුද්ධය දිනීම පිණිස යුද උපායන් අප සතු වුණා වගේ ම, ධාර්මික ව ම පාලනය වන රටක් බිහි කිරීම නම් වූ ආශ්චර්යවත් වෙනස කරන්නට උවමනා මඟ මැනැවින් පෙන්වා දෙන උතුම් සම්බුදු දහමත් අප සතුව තිබෙන නිස යි.

මේ වෙනස වෙනුවෙන් අපේ රට පෙළ ගැසුණහොත් ධාර්මික පාලනය මතු කලෙක සෑබෑවක් ම වන බව අපිට විශ්වාස යි.

ප‍්‍රඥවන්තයින් වෙමු….

noreply@blogger.com (Dhanushka Gunasinghe's Hard Code) — Tue, 01 Jan 2013 16:32:00 +0000

අලුත් අවුරුද්දක් ලැබුවා...මේ අවුරුද්දෙවත් අපි අපේ ජීවිතවලට ධර්මය ලංකර ගන්න බලමු නේද? මෙන්න ඒක පටන් ගන්න හොද ලිපියක් කියවලා බලන්න.

භාග්‍යවතුන් වහන්සේ සැවැත් නුවර ජේතවන අසපුවේ වැඩ සිටිද්දී ඛේම කියල දිව්‍ය පුත‍්‍රයෙක් භාග්‍යවතුන් වහන්සේ වෙත පැමිණිලා, ගාථාවලින් මේ විදියට කියා සිටියා “ප‍්‍රඥා රහිත මෝඩ උදවිය ජීවත්වෙන්නේ තමන්ට ම සතුරු වෙලා. නපුරු විපාක දෙන යම් කර්මයක් වෙයි නම්, ඒ පව්ම යි කරන්නේ. ඒ අය ජීවත් වෙන්නේ තමන්ට ම හතුරෙක් විදිහට. නපුරු විපාක දෙන යම් කර්මයක් තියෙනව නම්, ඒ පව් ඒ උදවිය කරනව. යම් දෙයක් කළාට පස්සේ ඒ අනුව දුක් වෙනවා නම්, ඒ දේ කරන්න හොඳ නෑ. අන්තිමේදී කඳුළු පිරුනු මුහුණින් තමයි ඒවයෙ විපාක විඳින්ට සිද්ධ වෙන්නෙ.” කියල ඒ දිව්‍ය පුත‍්‍රයා කියා සිටියා. ඊට පස්සෙ කියා සිටියා, “යම් දෙයක් කළාට පස්සෙ ඒ අනුව පසුතැවිලි වීමක් නැත්නම්, ඒ වගේ දේවල් තමයි කරන්ට ඕනැ. ඒ කර්මයන්ගේ විපාක සතුටු සිතින් විඳින්න පුළුවනි.” කියල.

එතකොට බලන්න පව් කලාම ඒවායේ විපාක විදින්ට සිද්ද වෙන්නේ කදුලූ පිරුණු මුහුනින් තමයි. නමුත් යහපත් දෙයක් කලාම ඒ කර්මයන්ගේ විපාක සතුටු සිතින් විඳින්න පුලූවන්. එහෙනම් කල්පනා කරල බලන්න, අපි කෙසේ විය යුතුද කියල. අපි ප‍්‍රඥා රහිත මෝඩ උදවියගේ ගණයට වැටෙනව ද, ඒ ගණයෙන් ඈත් වෙනවද? කියල කල්පනා කරන්න. ඉතින් ඒකට ප‍්‍රමාද වෙලා බෑ. ප‍්‍රමාද වුනොත් අපිට මේකෙන් ගැලවෙන්ට බැරිව යනවා. ප‍්‍රමාද වුනොත් අපි ප‍්‍රඥා රහිත අයගේ ගොන්නට වැටෙනව. ඒක වළක්වන්න බෑ. අප‍්‍රමාදී බව තුළ තමා ප‍්‍රඥාවන්තයින්ගේ ගොන්නට අපි වැටෙන්නෙ. ප‍්‍රමාදය තුළ අපි හිටියොත් එහෙම ප‍්‍රඥා රහිත උදවිය කරන යම් දේ තියෙනව නම්, ඒක තමයි අපිත් කරන්නෙ. බලන්න ඒ අය තමන්ට ම සතුරුවෙලා ජීවත් වෙනව නේද කියලා.

අපි අතීත ජීවිතවල එහෙම ඕනැ තරම් කරන්න ඇති. තමන් තමන්ට ම සතුරු වෙලා ජීවත් වුන ජීවිත අපිට තිබිල ඇති. එහෙම නොතිබුණා නම්, අපි මේ තරම් දුර මේ සංසාරෙ එන්නෙ නෑනේ. තමන් සැබවින්ම තමන්ට මිතුරෙක් වුනා නම්, මේ සංසාරෙන් අපි නිදහස් වෙලා බොහෝ කල්. ඒ නිසා අපි දැන් ඒක තේරුම් ගන්ට ඕනැ. ඒක තේරුම් අරගෙන තමන්ට හතුරුවෙන ස්වභාවය වළක්වා ගන්ට තම තමා දක්ෂ වෙන්ට ඕනැ. ඒක තව කෙනෙක් කරල දෙන්නෙ නෑ. තව කෙනෙක්ට පුළුවන් තමන්ට හතුරු වෙන විදිහ වළක්වා ගන්ට උපකාර කරන්ට, මග පෙන්වන්ට පමණයි. ”ඔහොම කරන්න එපා. මෙහෙම කරන්න”. මේ ආදී වශයෙන් මග පෙන්වීමක් විතරක් කරන්ට පුළුවන්. අන්න ඒ සඳහා තමා, අපි මේ ධර්මය සිහිකරල දෙන්න කල්පනා කළේ.

එතකොට ඒ දිව්‍ය පුත‍්‍රයා කියා සිටියා ”යම් දෙයක් කළාට පස්සේ, ඒ අනුව දුක් වෙනවා නම්, ඒ දේ කරන්නට හොඳ නෑ. අන්තිමේදී කදුළු පිරුණු මුහුණින් තමයි ඒවයේ විපාක විදින්න සිද්ධ වෙන්නේ” කියල. බලන්න මේ කියන කාරණාව. යම් දෙයක් කළාට පස්සේ ඒ අනුව දුක් වෙනවා නම්, ඒ දේ කරන්ට හොඳ නෑ. අපි මේ ධර්මය සිතේ දරා ගන්ට ඕන. එතකොට ඇයි ඒ දේ කරන්න හොඳ නැත්තේ? අන්තිමේදී කදුළු පිරුණු මුහුණින් ඒවට විපාක විඳින්ට සිද්ධ වෙන නිසා. ඒ විපාක තව කෙනෙක් නොවෙයි විඳින්නේ, තමාම යි. තමන්ටම ඒ දුක් විඳින්න සිද්ධ වෙනව. ඒක තේරුම් ගන්න.

දැන් බලන්න තමාට තමා ම හතුරෙක් වෙනවා නම්, මේ ධර්මය පිළිගන්නේ නෑ නේද? නමුත් අපි යමක් කළා ම ඒකෙ විපාක කඳුළු පිරුණු මුහුණින් විඳින්ට සිද්ධ වෙනවා කියල පිළිගන්නවා නම්, අන්න ඒක කරන්නෙ නෑ තමන්ට මිතුරු කෙනා. එහෙනම් මේක තේරුම් ගන්න. තේරුම් අරගෙන පිළිගන්න. ඊලඟට එයා කියා සිටියේ කුමක්ද? ”යම් දෙයක් කළාට පස්සෙ, ඒ අනුව පසුතැවිලි වීමක් නැත්නම්, ඒවගේ දේවල් තමයි කරන්ට ඕනැ කියල. එහෙනම් අන්න ඒ ධර්මයත් තේරුම් ගන්න. අපි යමක් කළාට පස්සේ ඒකෙන් පසුතැවිලි වීමක් නැත්නම්, ඒ දේ කරන්ට ඕනැ. යමක් කළාට පස්සේ, ඒ දේ අනුව පසුතැවෙනව නම්, ඒ දේ කරන්න හොඳ නෑ. ඇයි ඒක කරන්න හොඳ නැත්තේ? ඒකෙ විපාක විදින්න සිද්ධ වෙන්නෙ කඳුළු ගල ගලා. නමුත් යමක් කළාට පස්සෙ ඒකෙ පසුතැවිලි වීමක් නැත්නම්, ඒ දේවල් කරන්න ඕනැ. මොකද ඒ දේවල් කළ යුත්තේ…? ඒවයෙ විපාක සතුටු සිතින් විඳින්ට පුළුවන් නිසා.

පින්වත් නාවලපිටියේ අරියවංශ හිමිපාණන් විසිනි

සියලූ‍ දෙනාටම තෙරුවන් සරණයි…!

නමෝ බුද්ධාය

noreply@blogger.com (Dhanushka Gunasinghe's Hard Code) — Tue, 11 Dec 2012 05:34:00 +0000

රුවන්වැලි මහ සෑ වන්දනාව

noreply@blogger.com (Dhanushka Gunasinghe's Hard Code) — Tue, 11 Dec 2012 03:09:00 +0000

කිරිකැටියා වෙනුවෙන් මා පිය ඔබේ වගකීම

noreply@blogger.com (Dhanushka Gunasinghe's Hard Code) — Wed, 05 Dec 2012 15:26:00 +0000

බාල ළමා වියේ සංවර්ධනය කියන්නෙ නූතන සෞඛ්‍ය ක්ෂේත‍්‍රයේ බොහොම ඉහළින් පිළිගැනෙන න්‍යායක්. උපතේ සිට අවුරුදු 03 දක්වා වන දරුවන් වෙනුවෙන් ඔවුන්ගේ දෙමව්පියන් හා රැක බලා ගන්නවුන් දියත් කළ යුතු වූ වැඩපිළිවෙළක් ලෙසටත් එය පෙන්වා දෙන්න පුළුවන්. ඒ කුඩා දරුවන් සමාජීය, ආධ්‍යාත්මික, කායික යනාදි වශයෙන් පරිපූර්ණ කරවීම අරමුණු කොටගෙනයි මේ සංකල්පය කි‍්‍රයාත්මක කෙරෙන්නේ.

බාල ළමා වියේ සංවර්ධනය නමින් නූතනයේ අප හඳුන්වන මේ වැඩපිළිවෙළට බුදු දහමෙන් ලැබෙන්නේ නො මඳ පිටිවහලක්. සැබැවින් ම බාල ළමා වියේ සංවර්ධනය නිසියාකාරව සිදු කළ හැකි වන්නේ බුදු දහමේ හර පද්ධතිය තුළින් ලැබෙන්නා වූ ආභාසයෙන්.

වෛද්‍ය විද්‍යානුකූලව බලද්දි, දරුවෙකුගේ වයස අවුරුදු 03ක් වනවිට මොළයේ ඉතා වැඩි ප‍්‍රමාණයක් සංවර්ධනය වී අවසන්. සමහර විට අපි දරුවන්ට යම් යම් දේවල් නිවැරදිව උගන්වන්න කල් යල් එළඹෙනකල් බලන් ඉද්දි, දරුවාගේ මනස එය තමන්ට ග‍්‍රහණය වෙන අයුරින් තේරුම් ගෙන අවසන් වෙන්නත් පුළුවන්. ඒ කියන්නෙ වයස මාස 36ක් වෙනකොට, ඒ කෙටි කාලය තුළ දරුවා සිතීමට, කථා කිරීමට, ඉගෙනීමට සහ තාර්කිකත්වයට අවශ්‍ය හැකියාවන් වර්ධනය කර ගන්නවා. වැඩිහිටියෙකු වූ විට තමන් සතුවන සමාජ චර්යාවන් බොහොමයක් පිළිබඳ මූලික සංකල්ප ගොඩ නැගෙන්නෙ මේ ළාබාල අවධියේ දී ම යි. ඒ කියන්නෙ ජීවිතේ මුල් අවුරුදු කිහිපය බොහෝ කල් පවත්නා වෙනස්කම් හා බලපෑම් ඇති කරවීමට සමත් වෙනවා. යහපත් වැඩිහිටියෙක් සමාජයට දායාද කෙරෙන මූලික පදනම යහපත් ළමාවියක් සතු වීම බව එයින් තහවුරු වෙනවා.

මිනිසත් බවක් ලැබීම අතිශයින් දුර්ලභ වූ දෙයක් බව අප සරණ ගිය තථාගතයන් වහන්සේ දේශනා කොට වදාළා. ඒ සා දුර්ලභ මිනිසත් බවක් ලැබීමට තරම් වාසනාවන්ත වූ ජීවියෙකු යහපත් වූ ධර්ම දායාදයෙන් පෝෂණය කළ හැකි නම්, එය මොන තරම් භාග්‍යයක් ද?

අප අසා තිබෙන්නේ දරු ගැබක් දරා සිටිනා මවක් ඒ ගර්භිණී කාල සීමාව තුළ යහපත් පරිසරයක ජීවත් වීම උපදින්නට සිටින දරුවාට ඉතාමත් සුබවාදී ව බලපාන බවක්. එවන් පරිසරයක දිවි ගෙවන මවකගේ කුසට පැමිණෙන්නෙත් පිනකින් ම යි.

අපේ රටේ නාරිවේදය හා ප‍්‍රසව පිළිබඳ එක් විශේෂඥ වෛද්‍යවරයෙක් සිදු කළ පර්යේෂණයකින් අපූරු දෙයක් ඔප්පු වී තිබුණා. එතුමා සිදු කළේ ධාර්මික, සාමකාමී පරිසරයක දිවි ගෙවීමට මා පියන්ට ඉඩ සලසා දී, ඔවුන්ට බිහි වන දරුවන්ගේ චර්යා රටාවන් සහ ආගමික නැඹුරුවක් නැති, කලකෝලාහල බහුල පරිසරයක සිටි දෙමව්පියන්ට දා වූ දරුවන්ගේ චර්යා රටාවන් අධ්‍යයනය කිරීම යි.

යහපත් පරිසරයක දිවි ගෙවූ මව්පියන්ගේ දරුවන් බොහොම දැහැමි වූත් අධ්‍යාපනයේ දක්ෂ වූත් දරුවන් වුණා. අනෙක් දරුවන් පොදුවේ අධ්‍යාපන දක්ෂතාවයන් අඩු කලහකාරී දරුවන් වී තිබුණා.

දෙමව්පියන් සිල්වත් ව, ධාර්මික ව ජීවත් වෙද්දි පින්වත් දරුවෙකුට ඒ මව් කුස වර්ධනය වීමට අවශ්‍ය පරිසරය සකස් කෙරෙනවා. දරුවන් නො මඟට යොමු වීම බහුල වුණ මේ සමාජයට ගුණගරුක දරුවන් සැබැවින් ම වාසනාවක්. දරු සම්පතක් අපේක්ෂාවෙන් සිටින මව්පියවරුන්ට මෙහිදී අතිමහත් කාර්යභාරයක් ඉෂ්ට කරන්න පුළුවන්. කලකෝලාහල, භයංකාර ශබ්ධ ආදිය බහුල වූ පරිසරයක් වෙනුවට නිදහස්, සාමකාමී, ප‍්‍රියමනාප වටපිටාවක ඒ දරුවාට ජන්ම ලාභය ලබා දෙන්න උත්සුක විය යුත්තේ දෙමව්පියන්. නිරන්තරයෙන් මිහිරි පිරිත් දේශනාවන්, අර්ථවත් ධර්ම කථාවන්, තෙරුවන් ගුණ සිහි කිරීම් ආදි ලොව පවත්නා අතිශය පරිපූර්ණ සුභාෂිතයන් ගර්භිණී මවකගේ සවනට වැකෙනවා නම් එයින් ඉපදෙන්න සිටින දරුවාට සැලසෙන්නෙ යහපතක් ම යි.

දරුවාගේ ජීවිතයට දැනුම සම්පේ‍්‍රෂණය කරන්නට අකුරු කියවන තුරු බලා සිටිය යුතු නැහැ, දරුවා පාසල් යන තුරු බලා සිටිය යුතුත් නැහැ. පරම්පරාවකට එපිටින් සිටි අපේ අම්මල දරුවන් නැළෙව්වේ තෙරුවන් ගුණ කියමින්. දරුවන් නිදන්නේ ඒ සංසුන්, ඉමිහිරි හඬට සවන් දීගෙන ම යි. කුඩා දරුවෙකු ඒ ළමා අවධියේ ලබන සෑම ස්පර්ශයක් ම, සෑම චලනයක් ම, සෑම සංවේදනයක් ම වර්ධනය වෙමින් පවතින මොළයේ සෛල තුළ ප‍්‍රබල වෙනස්කම් ඇති කරවනවා. දෙමව්පියන්, පවුලේ අනිත් සාමාජිකයන් සහ වෙනත් පිරිස් සමඟ රැඳී සිටීමේ දී ඇතිවන අත්දැකීම්, අන්තර් ක‍්‍රියා වගේ ම ප‍්‍රමාණවත් පෝෂණය, මනා සෞඛ්‍යය සහ සුවදායි පරිසරය කියන සාධකත් දරුවාගේ මොළය වර්ධනය වන ආකාරය කෙරෙහි සෘජුව ම බලපානවා.

ඒ වගේ ම මේ අවධියේ දරුවා වර්ධනය වන ආකාරය පසුකාලීනව ලබන අධ්‍යාපන සහ අනෙකුත් ජයග‍්‍රහණයන් කෙරෙහිත්, චරිත ලක්ෂණ කෙරෙහිත් මූලික පදනම සකස් කරනවා. සෙනෙහසින් යුතුව දරුවෙකුට උත්තම දායාදයන්ගෙන් සංග‍්‍රහ, සත්කාර කරන විට ඒ දරුවා අනාගතයේ යහපත් පුරවැසියෙක් බවට පත් වීම සෑම මවක් ම, සෑම පියෙක් ම බලාපොරොත්තු විය යුතුයි.

ඇත්තෙන්ම නැණ ගුණ සුවඳින් පිරිපුන් දරුවෙක් රටට තිළිණ කරවන මෙහෙවර දරු පිළිසිඳ ගැනීමක පටන් ම ආරම්භ කරන්න අපි හැමෝට ම පුළුවන්. මේ ලෝකයේ පවතින අනුත්තරීය වූ පරම සත්‍යය උදෙසා ඒ වාසනාවන්ත දරුවාගේ ජීවිතය යොමු කරවන්න දරුවා බිහිවන තුරුවත් කල් නො මැරිය යුතුයි කියලයි කිව යුත්තේ. ඔබට පුදුම හිතුණ ද? ඒත් එය සත්‍යයක් ම යි.

බෝධි රාජ කුමාරයා පළමු වරට තෙරුවන් සරණෙහි පිහිටියේ මව් කුසේ සිටියදීයි කියලා අපි අහලා තියෙනවා. ඔහු තම යහළුවෙකු අමතා භාග්‍යවතුන් වහන්සේ ඉදිරිපිට දී කියා සිටියේ ‘‘සංජිකාපුත්ත, මගේ අම්මා මං කුසේ ඉද්දි භාග්‍යවතුන් වහන්සේ ව බැහැ දකින්න ගිහින් උන් වහන්සේට වන්දනා මාන කරලා මෙහෙම කියලා තිබුණා. ‘භාග්‍යවතුන් වහන්ස, මගේ කුසේ ඉන්න මේ දරුවා දුවෙක් ද පුතෙක් ද කියලා මං දන්නෙ නෑ. ඒ දරුවා දුවෙක් වුණත්, පුතෙක් වුණත්, ස්වාමීනි ඒ දරුවා දැන් භාග්‍යවතුන් වහන්සේ ව සරණ යනවා. ඒ තථාගත ධර්මය සරණ යනවා. ඒ ආර්ය ශ‍්‍රාවක සංඝරත්නය සරණ යනවා. ස්වාමීනි, මගේ කුසේ ඉන්න මේ දරුවා දිවි තිබෙන තුරාවට තිසරණ සරණෙහි පිහිටි ශ‍්‍රාවකයෙකු ලෙස දරා ගන්නා සේක්වා!’ අන්න ඒ ආකාරයෙනුයි සංජිකාපුත්ත මං මුලින් ම තෙරුවන් සරණ ගියේ.” කියලයි.

තව දුරටත් බෝධි රාජ කුමාරයා පැවසුවේ, ‘‘මං පුංචි දරුවෙක් ව ඉද්දි මගේ කිරි මව මාවත් රැගෙන භාග්‍යවතුන් වහන්සේ ළඟට ගියා. මා ලවා භාග්‍යවතුන් වහන්සේ ට වන්දනා කරවලා මෙහෙම කිව්වා. ‘ස්වාමීනි මේ චූටි දරුවා, බෝධි රාජ කුමාරයා භාග්‍යවතුන් වහන්සේ ව සරණ යනවා. තථාගත ශ‍්‍රී සද්ධර්මය සරණ යනවා. ශ‍්‍රාවක සංඝරත්නය සරණ යනවා. අද පටන් දිවි තිබෙන තුරාවට මේ දරුවා තිසරණ සරණ ගිය ශ‍්‍රාවකයෙකු ලෙස දරා ගන්නා සේක්වා!’ සංජිකාපුත්ත මං එහෙමයි දෙවන වරටත් තෙරුවන් සරණ ගියේ.” කියලයි.

ඉතින් පින්වත් අම්මේ, පින්වත් තාත්තේ, ඔබේ දරුවාට ඒ උත්තුංග දායාදය ලබා දෙන්නට දරුවා ලොකු මහත්වන තුරු හෝ දරුවා බහ තෝරන තුරු ප‍්‍රමාද විය යුතු ද?

පින්වත් අම්මේ, පින්වත් තාත්තේ,

ඔබේ දරුවාට ලෝකය දෙස ආර්ය සත්‍යයට අනුව බලන්නට උගන්වා සම්මා දිට්ඨිය මුලින් ම හුරු කළ හැක්කේ ඔබටයි.
කාමයට නො කැළඹෙන, තරහවට නො යන, හිංසාවෙන් තොර වූ හිතක් ඇතිකර දී සම්මා සංකප්ප මුලින් ම හුරු කළ හැක්කේ ඔබටයි.
බොරුවෙන්, කේලමෙන්, හිස් වචනයෙන්, පරුෂ වචනයෙන් තොර වූ සුභාෂිතය ඉස්මතු කරවා සම්මා වාචා ප‍්‍රගුණ කරවිය හැක්කේ ඔබටයි.
සතුන් මැරීමෙන්, සොරකමෙන්, වැරදි කාම සේවනයෙන් මිදුණු පිවිතුරු ජීවිතයක් කියා දී සම්මා කම්මන්ත මුලින් ම හුරු කළ හැක්කේ ඔබටයි.
පිරිසිදු ව, දැහැමි ව ජීවත් වන්නට වෑයම් කරන හැටි මනසට කා වද්දා සම්මා ආජීවයට සිත යොමු කළ හැක්කේ ඔබටයි.
අකුසල් ප‍්‍රහානය කරන්නට ද කුසල් වඩන්නට ද කියා දී සම්මා වායාම මුලින් ම හුරු කළ හැක්කේ ඔබටයි.
සතර සතිපට්ඨානයට අනුව සිහි නුවණින් කටයුතු කරන අයුරු කියා දී සම්මා සතියත්, බණ භාවනා කරන්නට යොමු කරවා සම්මා සමාධියත් උදෙසා පළමු පියවර යොමු කළ හැක්කේ ද ඔබටයි.
එවිට, සුපින්වත් දරුවන්ගේ බිහි වීම බොහෝ සෙයින් උවමනා කෙරෙන ලෝකයට අතිජාත දරුවන් ජනිත කරවන්නට ධර්මයෙන් ලද පන්නරයෙන් සුපෝෂිත පළමු පියවර තබන පින්වත් අම්මා, පින්වත් තාත්තා ඔබයි.
එයයි අම්මේ, තාත්තේ, නිවැරදි ‘බාල ළමා වියේ සංවර්ධනය’.

කිරිබත්ගොඩ අපේ ලොකුහමුදුරුවන්ගේ සදහම් දේශනා

noreply@blogger.com (Dhanushka Gunasinghe's Hard Code) — Fri, 23 Nov 2012 08:43:00 +0000

කිරිබත්ගොඩ අපේ ලොකුහමුදුරුවන්ගේ සදහම් දේශනා.මේ ධර්මදානය මේ ලෝකේ කාගේහරි හිත සුව පිණිසම වේවා.

http://www.4shared.com/mp3/Xw5CGCJg/Ven_Kiribathgoda_Gnanananda_Th.htm

http://www.4shared.com/mp3/aYE9DCTg/Ven_Kiribathgoda_Gnanananda_Th.htm

භාවනාවට කාලය මදි ද…? කුස්සියෙන් පටන් ගනිමු

noreply@blogger.com (Dhanushka Gunasinghe's Hard Code) — Tue, 20 Nov 2012 11:10:00 +0000

භාවනාවට, ධර්මය අධ්‍යයනයට කාලය මදි යැයි මැසිවිලි නගන ඔබට ඔබේ වටපිටාවෙන්ම විනාඩියක් දෙකක් සොයා දෙන්නට අද අප කල්පනා කළා. ඔබේ වටිනා කාලය සිර වී ඇත්තේ, මුළුතැන්ගෙයි භාජන අතර මෙන්ම වියළි ආහාර අතර සහ කිසිදා පරික්ෂා කොට නොබලන අහු මුලුවල යැයි මා පැවසුව හොත් ඔබ පුදුමයෙන් පුදුමයට පත් වේවි.

ඒ නිසා අවංකව තමා තුළ පවතින අඩුපාඩු දකිමින් එය නිවැරදි කරගත හොත්, ඔබේ කටයුතු අතරේ විශාල මානසික සහනයක් ද ලබා ගැනීමට හැකි වනු ඇත.

මුළුතැන්ගෙයි වැඩකටයුතු කිරීමේ දි නිතර අත්‍යාවශ්‍ය වන දෑ පහසුවෙන් ලබාගත හැකි නම්, එය කාලය ඉතිරි කරවන්නක්. මේ නිසා අපගේ මූලික අරමුණ විය යුත්තේ, මුළුතැන්ගෙයි ඇති ආහාරපාන සහ භාණ්ඩ පිළිවෙළකට තැන්පත් කිරීමයි. මෙවිට අවශ්‍ය යමක් සෙවීමට කාලය ගත කිරීම වෙනුවට, කාලය අපතේ යැවීමකින් තොරවම, නිතර භාවිතා නොකරන දේ පවා සොයා ගත හැකි වනු නො අනුමාන යි.

සතිපතා හෝ මාසික ව නිවසට ගෙනෙනා ආහාරපාන, වැඩි කාලයක් නොයොදා ගබඩා කළ හැකි පරිදි මුළුතැන්ගෙය සංවිධානය කර ගත හැකි නම් එයම විශාල පහසුවකි. එසේම, මෙලෙස ගබඩා කළ දෑ අවශ්‍ය මොහොතේදී ක්ෂණිකව සොයා ගැනීමට හැකි වීම ද ඉතා වැදගත් වේ.

මෙසේ භාණ්ඩ ගබඩා කිරීම පහසුවෙන් කල හැකි ක්‍රමවේදයකට අනුව මුළුතැන්ගෙය සංවිධානය වී නොමැති නම්, කොයිතරම් අස්පස් කළත් නොබෝ කලකින් ම යළිත් මුළුතැන්ගෙය අවුල්වීම වැළැක්විය නොහැකියි.

පහත දක්වා ඇති කරුණු අනුව වරකට විනාඩි 15 බැගින් වැය කිරීමෙන්, දෙසතියක් ගතවත් ම ඔබේ මුළුතැන්ගෙයි ඇතිවන වෙනස ඔබට ම අතිවිඳිය හැකිය.

මේ කරුණු එදිනෙදා පිළිපදිමු

සතිපතා ගෙනෙන ආහාර ද්‍රව්‍ය ගබඩා කිරිමේදී, මෙසේ ආහාර තැන්පත් කරමු.

ටින් කරන ලද ආහාර වෙනම තට්ටුවක තැන්පත් කරන්න.එළවළු වම් පසින්ද, පළතුරු දකුණු පසින්ද, තැන්පත් කරන්න. කාඩ්බෝඩ් පෙට්ටිවල ඇසුරුම් කරන ලද ආහාර පහසුවෙන් ලබා ගත හැකි ස්ථානයක තැන්පත් කරන්න.

එකවර භාවිතා කිරීමට අවශ්‍ය වන ආහාර ද්‍රව්‍ය, කාණ්ඩ වශයෙන් එකට වර්ග කරන්න.

උදාහරණ ලෙස, උදෑසන තේ පිළියෙල කිරීමට අවශ්‍ය පිටි, සීනි, තේ කොළ, කෝපි ආදිය එක ළඟින් තැන්පත් කළ හැකිය. කේක් සැදීමට අවශ්‍ය අද්‍රව්‍ය එක ළඟින් තැන්පත් කළ හැකිය. මෙසේ කාණ්ඩ වශයෙන් ආහාර ද්‍රව්‍ය තැන්පත් කිරීමෙන් ඒවා පහසුවෙන් සොයාගත හැකි වන අතරම, සතිපතා නිවසට ගෙනෙන දෑ, ඉතා අඩු කාලයකින් නිසි තැන තැන්පත් කිරීමට ද හැකිය.

මේ අයුරින් විශාල පරිශ්‍රමයක් නොදරා මුළුතැන්ගෙයි ඇති දෑ පහසුවෙන් සංවිධානය කර ගත හැකිය.

මුළුතැන්ගෙයි උපකරණ පහසුවෙන් ළඟාවිය හැකි එකම ස්ථානයක තබන්න.

ආහාර පිළියෙල කිරීමේදී අවශ්‍ය වන පිහි, කතුරු, ගේටර් ආදී දේ තැබූ ස්ථානය සොයා ගැනීමට විනාඩි පහක් පමණ ගතවේ නම්, එයින් අපතේ යන්නේ ඔබේම කාලයයි. මේ නිසා මෙවැනි උපකරණ සියල්ල ම එකම ස්ථානයක තැන්පත් කිරීමෙන්, යමක් අවශ්‍ය වූ විටෙක ඉක්මණින් සොයාගත හැකි වනු ඇත. මුළුතැන්ගෙයි කටයුතු කිරීමේදී මෙයින් ඔබට ලැබෙන පහසුව ගැන සිතා බලන්න.

සී සීකඩ ඇති දෑ සියල්ල ඉවත් කරන්න.

මුළුතැන්ගෙයි මේස මත හෝ, පැන්ට්‍රියෙහි කවුන්ටර මත තබා ඇති නානාප්‍රකාර දෙයින් ජනිත වන්නේ මහත් අපිළිවෙළකි. එබැවින් නිතර භාවිතා නොවන දේ කවුන්ටරය මතින් ඉවත් කරන්න. ඇතුළින් තැන්පත් කළ උපකරණ අවශ්‍ය වූ විට පිටතට ගැනීමට කාලය වැය වන බව ඔබේ තර්කය විය හැකිය.

ළිප ආසන්නයේම ලබන ඕනෑම දෙයක් පහසුවෙන් තෙල් බැඳීම ස්වාභාවයයි. මෙයින් සිදු වන්නේ එම උපකරණ වරින් වර පිරිසිදු කිරීමට සිදු වීමයි. මේ සඳහා ගතවන කාලය සැලකිය යුතු ලෙස ඉහළ බව, සංසන්දනය කිරීමෙන් ඔබට වටහාගත හැකිය.

වසරකට සිව් වතාවකට වඩා අඩුවෙන් භාවිතා කරන උපකරණ, ගබඩා කාමරයක තැන්පත් කිරීම කෙරෙහි ඔබේ අවධානය යොමු කරන්න.

මුල් කරුණු 3 පිළිපැදීමට කැමති වුණත්, ඉඩකඩ හිඟ වීම ඔබේ ගැටළුව නම් ?

ඔබේ කැබිනෙට්ටු දෙස නෙත් යොමු කරන්න. භාවිතයට නොගන්නා වීදුරු හා පිඟන් භාණ්ඩ කොතෙකුත් ඒවා තුළ තිබේ ද…? මෙවැනි දෑ අවශ්‍ය අයෙකුට හෝ දුගී අයෙකුට ලබාදීම කොරෙහි ඔබ ගේ සිත යොමු කළ හැකියි.

ඉඳහිට භාවිතයට ගන්නා පිඟන් භාණ්ඩ පෙට්ටිවල සුරක්ෂිත ව අසුරා තැබීමෙන්, නිතිපතා අවශ්‍ය දේ සඳහා ඉඩ කඩ සකස් කරගත හැකි ය.

කල් ඉකුත් වූ අහාර ඉවත් කොට, භාවිතයට ගන්නා ආහාර සඳහා ඉඩ සකසාගන්න.

මී ළඟ වතාවේදී විවෘත කරන විට, එහි ඇති කල් ගත වූ ආහාර ද්‍රව්‍ය දෙකක් ඉවත් කරන්න. ශීතකරණයේ ගබඩාකළ නොපිසූ හෝ පිසින ලද ආහාර වර්ග, කල් ගත වීමත් සමඟ රසයෙන් හීන වේ. ඇතැම් විට කල් ගත වීමත් සමඟ ඒවා අනුභවයට නුසුදුසු තත්වයට පත් වීමටද පුළුවන.

මේ නිසා නැවත රත් කර ආහාරයට ගැනීමට අවස්ථාවක් නැතැයි ඔබ දන්නා ආහාරත්, පිසීමක් සිදු නොවෙයි කියා ඔබ දන්නා ආහාරත්, ශීතකරණයෙන්ද, අධි ශීතකරණයෙන්ද ඉවත් කොට භාවිතයට ගත හැකි ආහාර සඳහා ඉඩ සකස් කර ගැනීම ප්‍රායෝගික නොවන්නේ ද?

වැඩිපුර ඇති භාණ්ඩ ඉවත් කරමු

ඔබේ මුළුතැන්ගෙයි දෙක බැගින් ඇති උපකරණ, බඳුන්, සාස්පාන්, හැළි වළන් ආදිය වේ නම් ඒවා පිරිසිදු කොට පසෙකින් තබනා මී ළග අවස්ථාවේ මෙසේ සිතා බලන්න.

මේ භාණ්ඩය මම සම්පූර්ණ වශයෙන් භාවිතයට ගන්නේද‍?

එම භාණ්ඩය භාවිතයට ගන්නේ අර්ධ වශයෙන් බව ඔබේ නිගමනය නම්, ඔබේ සිතින් මෙම ප්‍රශ්නය විමසන්න.

මේ භාණ්ඩය මුළුතැන්ගෙයින් ඉවත් කෙරුනොත් මට යම් පාඩුවක් සිදුවේද?

මේ භාණ්ඩය ලැබුනොත් එය අගය කරනා යම් අයෙක් සිටීවිද?

වඩාත්ම යහපත් තීරණය ගැනීමේ අයිතිය ඔබ සතුය.

බැහැර කරන අරමුණින් දෙන දානය මහත්ඵල නොවන බවයි බුද්ධ දේශනාව වන්නේ. නමුත් ඔබ භාවිතයට නොගන්නා දෙයක් මසුරුකමින් දූවිලි වදිමින් ලබා නොසිට ඉන් ප්‍රයෝජනයක් ගන්නා අයෙකුට දන් දීමෙන් ඔබ හට යම් පමණක හෝ පිනක් රැස්වේ. මෙසේ සිතා කටයුතු කිරීමෙන් කිසිදු පාඩුවක් නොවිඳ මුළුතැන්ගෙය තුළ අමතර ඉඩකඩක් සකස් කර ගැනීමට ඔබට හැකි වනු ඇත. එපමණක් නොව ඔබගේ එදිනෙදා කාර්යයන් වෙනදාටත් වඩා අඩු කාලයකින් නිමා වනු ඔබටම පෙනෙනු ඇත. එවිට ඉතිරි වන්නේ ඔබේ වටිනා කාලය නොවේද? ධර්ම අධ්‍යයනයට කාලය හිග යැයි කියමින් මැසිවිලි නඟන ඔබ මුළුතැන්ගෙය තුලදී පමණක් කොයිතරම් නම් කාලය අපතේ හරින්නේ දැයි සිතා බලන්න. කාර්යක්ෂමව පිළිවෙලකට කටයුතු කිරීමෙන් කාලය ඉතිරි කරගත හැකි ආකාරය ගැන ඔබටම පුදුම හිතෙනවා නේද? මේ අයුරින් ඉතිරි කරගන්නා කාලය ප්‍රයෝජනවත් දෙයකට කැප කිරීමට මහන්සි ගන්න.

කටයුත්තක් අවසන් වීමෙන් පසු, ඉතිරි වන කාලය ප්‍රයෝජනවත් දෙයකට යෙදවීමට අපහසු වන ප්‍රධානතම කරුණක් නම් කුසීතකමයි. යම් වැඩක් කාර්යක්ෂමව සිදු කොට අවසන් වූ විගස, මා වැඩ කරල අවසන් වුණා විතරයි… දැන් මොන භාවනාද? කියා විවේක ගැනීමට පෙළඹුනොත් ඔබේ ඒ කුසීතකම නිසා ඔබ ඉතිරිකරගත් කාලය නින්දටම අපතේ යාවි. ඒ නිසා, වීර්යය අරඹන්න. ඉතිරි වූ විනාඩියක් වත්, අපතේ යවන්න ඉඩ තියන්න එපා..!

අමා දම්විල

noreply@blogger.com (Dhanushka Gunasinghe's Hard Code) — Tue, 20 Nov 2012 11:01:00 +0000

නමෝ බුද්ධාය!

noreply@blogger.com (Dhanushka Gunasinghe's Hard Code) — Tue, 20 Nov 2012 10:48:00 +0000

මහමෙව්නාව භාවනා අසපුවේ ආරම්භය

‘ගෞතම බුදු සසුන බබළවන පිරිසක් බිහිවේවා’ යන උතුම් පැතුම පෙරදැරි කරගෙන 1999 අගෝස්තු මස 14 වැනි දින පොල්ගහවෙල වඩුවාවේ දී අතිපූජනීය කිරිබත්ගොඩ ඤාණානන්ද ස්වාමීන් වහන්සේගේ සුරතින් මංගල ශිලා ප‍්‍රතිශ්ඨාපනය සිදුවීමත් සමඟ මහමෙව්නාව භාවනා අසපුව නම් පුණ්‍ය භූමිය දෙව් මිනිස් ලෝකයට බිහිවුණා. ඉන්පසු ගත වූ මෙම දොලොස් වසරක් වූ කෙටි කාලය තුළදී ‘මහමෙව්නාව’ ලක්දිව ද දේශ දේශාන්තරයේ ද කීර්තිමත් බෞද්ධ සිද්ධස්ථානයක් බවට පත්වුණා.

මහමෙව්නාව භාවනා අසපු සංචිතයේ නිර්මාතෘ වන පූජනීය කිරිබත්ගොඩ ඤාණානන්ද ස්වාමීන් වහන්සේගේ තිස් වසරක් වූ පැවිදි ජීවිතයේ දී ලද අත්දැකීම් මුල් කරගෙන, දියත් කළ ධර්ම දූත සේවාව සුළු කලකින් ම දිවයින පුරා පැතිර ගියා. සරළ සිංහල බසින් බුද්ධ දේශනා විස්තර කර දීම නිසා, සෑම වයස් කාණ්ඩයකම පසුවන සැදැහැවතුන් උන්වහන්සේගේ භාවනා වැඩසටහන් වලට පැමිණෙන්නට පටන් ගත්තා. මනස දියුණු කරගැනීම පිණිස හිත නැවෙන ආකාරයට භාවනාව ඉදිරිපත් කිරීමේ දී උන්වහන්සේ දැක් වූ දක්ෂතාවය, භාවනා පංති සොය සොයා ගිය පිරිසකට විශාල අස්වැසිල්ලක් වුණා. බුදුරජුන් කෙරෙහි ශ‍්‍රද්ධාව ඇති වන සේ ඉතා නිර්මාණශීලී ලෙස ධර්මය ඉදිරිපත් කිරීම නිසා මිහිරි ධර්මයේ රසය මිනිස් හදවත් තුළට දැනෙන්නට පටන් ගත්තා. විශේෂයෙන්ම, ත‍්‍රිපිටක ධර්මය ඇසුරු කරගනිමින් නිර්මල බුද්ධ වචනය ඒ අයුරින්ම ලබාදීමට කටයුතු කිරීම මහමෙව්නාවේ සුවිශේෂීම ලක්ෂණයයි. ඒ අනුව රට පුරා භාවනා කරන, ධර්මය ශ‍්‍රවණය කරන තරුණ පිරිසක් බිහිවුණා. ධර්මයට ලැදි, සිල් රකින දරු පිරිසක් බිහිවුණා. මේ දෙපිරිසම සමඟින්, ගෞතම බුදු සමිඳුන් විසින් මේ ලෝකයට හඬ ගා කියන ලද, එම ඒකායන ඉලක්කය නම් වූ චතුරාර්ය සත්‍යාවබෝධය වෙනුවෙන් ධර්මයේ හැසිරෙන වැඩිහිටි පිරිසක් ද බිහිවුණා.

එහි ප‍්‍රතිඵලයක් වශයෙන් මේ වන විට, 600 කට අධික තරුණ ශිෂ්‍ය ස්වාමීන් වහන්සේලා පිරිසක් ද, හැත්තෑ පහකට අධික තරුණ සිල් මෑණිවරු පිරිසක් ද, ලක්ෂ සංඛ්‍යාත ගිහි ශ‍්‍රාවක පිරිසක් ද, දේශීය සහ විදේශීය ශාඛා මධ්‍යස්ථාන 40 කට අධික ප‍්‍රමාණයක්ද දොළොස් වසරක් වැනි මෙම කෙටි කාලය තුළ දී බිහිවුණා.

දේශීය අසපු ශාඛා ව්‍යප්තිය

පොල්ගහවෙල, මාතර-අපරැක්ක, කඩුවෙල, මාළඹේ, කුණ්ඩසාලය, අනුරාධපුරය, පොළොන්නරුව, කුරුණෑගල, බණ්ඩාරවෙල, මොණරාගල, කතරගම, ඉබ්බාගමුව, මඩවල උල්පත, රත්තොට, සිරිපාගම, එරත්න, බලංගොඩ, සූරියවැව, වළස්මුල්ල, පොල්පිතිගම, ගල්නෑව, ආණමඩුව, හොරණ, පොතුහැර, සේරුපිට, හුණුමුල්ල, සඳලංකාව, නිට්ටඹුව, මහව, ගාල්ල, බුත්තල, වැලිමඩ, බුලත්සිංහල, කන්තලේ, මෙන්ම හලාවත-කොච්චිකඬේ යන ස්ථානයන්හී ද දේශීය අසපු ශාඛා ස්ථාපිත වී තිබෙනවා.

මහමෙව්නාව අසපු මූලස්ථානය පොල්ගහවෙල පිහිටා ඇති අතර, එය ශ‍්‍රී සම්බුද්ධ රාජ මාළිගාව නම් වු අසදෘෂ විහාර මන්දිරයකින්ද, සිරි ගෞතම බෝධි මණ්ඩපයකින් හා සුන්දර සිරි ගෞතම දම්සක් මහා සෑයෙන් සුන්දර වී තියෙනවා. මහමෙව්නාව භාවනා අසපු සංචිතයේ භික්ෂු පුහුණු මධ්‍යස්ථානය මාතර අපරැක්ක මහමෙව්නාව මහා විහාරය කේන්ද්‍ර කරගෙන ක‍්‍රියාත්මක වෙනවා.

මීට අමතරව දඹදෙනිය, වරකාපොළ, මාවතගම, අනුරාධපුරය, උඩුපිල, කඩුගන්නාව යන ස්ථානයන්හි මහමෙව්නාව අනගාරිකා අසපු බිහිවී තියෙනවා.

ඒ අනුව රට පුරා බොහෝ පළාත් ආවරණය පරිදි විහිදී ඇති මහමෙව්නාව භාවනා අසපු නිසා ලක්ෂ සංඛ්‍යාත පිරිසකට සැලසී තිබෙන්නේ ඉමහත් වාසනාවක්. මේ වන විට මෙම බොහෝ අසපු ශාඛාවන් තුළ බුද්ධ ප‍්‍රතිමා වහන්සේලා, සුන්දර චෛත්‍ය රාජයාණන් වහන්සේලා, බෝධීන් වහන්සේලා වැඩසිටිනවා.

විදේශීය දහම් ප‍්‍රචාරය

එමෙන්ම, ඇමරිකා එක්සත් ජනපදය, එංගලන්තය, කැනඩාව, ඕස්ටේ‍්‍රලියාව, ඉන්දියාව, ඩුබායි සහ ජර්මනිය යන විදේශ රටවල් තුළ ද මහමෙව්නාව භාවනා අසපු පිහිටා තිබෙනවා. එමෙන්ම තව බොහෝ රටවලද ධර්ම ප‍්‍රචාරක කටයුතු සිදුවෙනවා.

බොහෝ බෞද්ධ රටවල්වල සහභාගීත්වයෙන් ඉංදියාවේ බුද්ධගයා පුණ්‍ය භූමියේදී පැවැත් වූ ත‍්‍රිපිටක සජ්ඣායනාවට 2006, 2007, 2008 යන වසරවල ශ‍්‍රී ලංකාව නියෝජනය කරමින් සහභාගී වූයේ මහමෙව්නාව භාවනා අසපුවයි.

ගිහි උපාසක පින්වතුන් සඳහා නේවාසිකව බණ භාවනා ප‍්‍රගුණ කරගැනීමට පහසුවක් සලසමින් ගිහි සති භාවනා මධ්‍යස්ථානද පිහිටා තියෙනවා. උපාසක පින්වතුන් සඳහා තඹකන්ද, භාවනා කන්ද සති භාවනා මධ්‍යස්ථානයද, උපාසිකාවන් සඳහා මුතුගල අනගාරිකා අසපුව ඒ සඳහා වෙන්වී තිබෙනවා.

පූජනීය කිරිබත්ගොඩ ඤාණානන්ද ස්වාමීන් වහන්සේ යටතේ පැවිදි වූ ශිෂ්‍ය ස්වාමීන් වහන්සේලා ද දිවයින පුරා විසිරී පවතින මහමෙව්නාව භාවනා අසපු මධ්‍යස්ථාන වල භාවනා වැඩසටහන් සිදුකරනු ලබනවා. එමෙන්ම රට පුරා බොහෝ විහාරස්ථාන වලද වැඩසටහන් සිදුවෙනවා. මේ සියලූ වැඩසටහන් වලට ඉතා විශාල සැදැහැවතුන් පිරිසක් ධර්මශ‍්‍රවණය පිණිස ඒකරාශී වෙනවා. පූජනීය කිරිබත්ගොඩ ඤාණානන්ද ස්වාමීන් වහන්සේ විසින් පවත් වන, භාවනා වැඩසටහන් වලට ඇතැම් දිනවල, 15000 කට අධික පිරිසක් ද සහභාගී වන අවස්ථා තිබෙනවා.

සුවිශේෂී වන්දනා

මීට වසර හතකට පමණ ඉහතදී ස්වර්ණමාලී සෑ අභියස පැවැත් වූ වෙසක් සීල භාවනා වැඩසටහන සඳහා ලක්ෂයකට අධික ජනකායක් සහභාගී වී සිටි අතර, ඉන් පසු ගත වූ වසර කිහිපය තුළ ඒ ශ‍්‍රාවක පිරිසේ සීඝ‍්‍ර වැඩිවීමක් සිද්ධ වුණා. 2008 වසරේ අනුරාධපුරයේ ස්වර්ණමාලි සෑ මළුවේ පූජනීය කිරිබත්ගොඩ ඤාණානන්ද ස්වාමීන් වහන්සේගේ මෙහෙයවීමෙන් පැවැත් වූ ”අසිරිමත් ස්වර්ණමාලී මහ සෑ වන්දනාව” සහ ධර්ම දේශනාමය පින්කම සඳහා ලක්ෂ එකොළහක පමණ සැදැහැවතුන් පිරිසක් රාත‍්‍රිය පුරා සහභාගී වී සිටියා. එය මෑත ඉතිහාසයේ සිරිලක සෑ වන්දනාවකට එක දිගට රැඳී සිටි විශාලතම ජනකාය ද වේ.

එමෙන්ම පසුගිය 2010 වසරේද පූජනීය කිරිබත්ගොඩ ඤාණානන්ද ස්වාමීන් වහන්සේගේ මෙහෙයවීමෙන් පැවැත් වූ ”බුදුරැස් විහිදෙන සෝමාවතී මහ සෑ වන්දනාවටද” ලක්ෂ සංඛ්‍යාත පිරිසක් සහභාගී වුණා.

සදහම් ප‍්‍රකාශන

මේ වන විට පූජනීය කිරිබත්ගොඩ ඤාණානන්ද ස්වාමීන් වහන්සේ විසින් උතුම් බුද්ධ දේශනා අනුසාරයෙන් සරළ සිංහලෙන් ලියන ලද පොත් පත් 90 ක් පමණ ප‍්‍රකාශයට පත් වී තිබෙනවා. එමෙන්ම පාළි සූත‍්‍ර පිටකය උන්වහන්සේ විසින් ම සැමට තේරුම් යන පරිද්දෙන් සරළ සිංහලට පරිවර්තනය කොට ඇති අතර, මේ වන විට සූත‍්‍ර පිටක පොත් එකොළහක් ප‍්‍රකාශයට පත්ව තිබෙනවා.

බුදුරජුන් වදාළ ඉමිහිරි ‘ධම්ම පදය’ අට්ඨකතානුසාරයෙන් සුමධුර භාෂා ශෛලියක් උපයෝගී කරගනිමින් උන්වහන්සේ විසින් ලියූ ‘අමා දම් රස වෑහෙන විස්තරාර්ථ ධම්ම පදය’ පොත් පෙළ ලොකු කුඩා කාගේත් දහම් රස නහර පිනවන මිහිරි දිව ඔසුවක් වැනිය.

මීට අමතරව උන්වහන්සේගේ ධර්ම දේශනා තැන්පත් කැසට් පටි සහ සීඞී තැටි වර්ග සිය ගණනක් හරහා ඒ සුමධුර දෙසුම් තව තවත් සැදැහැවතුන්ගේ පිපාසිත හදවත් තුළට අමා වැස්සක් සේ ඇද හැළීමට ඉඩ සළසා දී තිබෙනවා. එමෙන්ම සාමාන්‍ය ජන හදවත් තුළට ධර්මය රැගෙන යාමේ අරමුණින් ප‍්‍රකාශයට පත්වන ගුණ නැණ සපිරි සාර සංග‍්‍රහය ‘මහාමේඝ’ පුවත්පතද මහමෙව්නාවෙන් පිරිනැමෙන සමාජ සත්කාරයක්. එමෙන්ම අන්තර්ජාතික වශයෙන් ධර්ම ප‍්‍රචාරය කිරීමේ අරමුණින් වෙබ් අඩවියක්ද, සජීවී අන්තර්ජාල විකාශයන්ද ක‍්‍රියාත්මකයි.

සමාජ සත්කාරයන්

මහමෙව්නාව මුල්කරගෙන බොහෝ සමාජ සත්කාරයන් සිදුවෙන අතර, මහමෙව්නාව සුවසේවා ව්‍යාපෘතිය, හැපි ග‍්‍රීන්ස් සංවිධානය ප‍්‍රධාන වේ. රත්නපුර ජාතික රෝහල් පරිශ‍්‍රය තුළ අභිනවයෙන් ඉදිවූ ‘ළමා හා මාතෘ වාට්ටු සංකීර්ණය’ මෙන්ම ආපදාවන්ට පත්වූවන් වෙනුවෙන් ක‍්‍රියාත්මක වූ තවත් පින්කම් බොහෝමයකි.

තෙරුවන් සරණයි!

ලෝකෙ අනික් රටවල මිනිස්සුන්ට වඩා අපේ රටේ මිනිස්සු හුගක් වෙනස්

noreply@blogger.com (Dhanushka Gunasinghe's Hard Code) — Mon, 08 Oct 2012 16:31:00 +0000

ලෝකෙ අනික් රටවල මිනිස්සුන්ට වඩා අපේ රටේ මිනිස්සු හුගක් වෙනස්..ඒ වෙනස අපේ සදාචාරයත් එක්ක බද්ධ වුන එකක්. මේ වෙනස අපිට ආඩම්බරයක් කියල මේ ජායාරූපය බලද්දි පේනවා..

තොරතුරු තාක්ෂණය ගැන අසා දැන ගන්න

noreply@blogger.com (Dhanushka Gunasinghe's Hard Code) — Sat, 14 Jul 2012 22:04:00 +0000

මම අද කියන්න යන්නේ තොරතුරු තාක්ෂණය ගැන උනන්දුවෙන , තොරතුරු තාක්ෂණයහදාරණ ඊට ආශකරන ගොඩක් දෙනක් අහන ඇසිය යුතු මම අද කියන්න යන්නේ තොරතුරු තාක්ෂණය ගැන උනන්දුවෙන , තොරතුරු තාක්ෂණය හදාරණ ඊට ආශකරන ගොඩක් දෙනක් අහන ඇසිය යුතු පොඩ්කාස්ට් එහෙම නැත්නම් අන්තර්ජාල හරහා විසුරුවාහරින සාකච්ඡා කිහිපයක් ගැන.
1. Security Now - මෙතනින් බාගත කරන්න

2. Home Network and Computer Help - මෙතනින් බාගත කරන්න

3. dotcom security weekly -

4.Twit

5.Wall Street Journal -

6.Real Deal

මීට අමතරව ටෙක්කතා පොඩ්කාස්ට් මාලාව තොරතුරු තාක්ෂණය ගැන සිංහලෙන් සොයන ඕනෑම කෙනෙකුට මහගු සම්පතකි

අහංකාර ඉන්දියානුවන් ගෙදර යැවු සිංහ පැටවුන්ට ජයවේවා

noreply@blogger.com (Dhanushka Gunasinghe's Hard Code) — Fri, 02 Mar 2012 14:51:00 +0000

අද සවස මම දැක්ක හොදම ක්‍රිකට් තරගයක් නිමාවට අත් වුනා.උත්වේගකර වුද අතිශය තීරණාත්මක වුද ක්‍රිකට් තරගයක් තුල සුවිශේෂී ජයග්‍රහණයක් ලැබීමට අපේ සිංහ පැටවුන්ට හැකි වුනා.මෙය සුවිශේෂී ජයග්‍රහණයක් වන්නේ ඉන්දීය නාමය කොමන්වෙල්ත් බැංකු තරගාවලින් අතුගා දමන්න අපිට හැකිවු නිසායි.මෙයට අපේ රටේ බොහෝ දෙනා කැමති වනවාට සැකයක් නැත්තේ, පසුසිය ලෝක කුසලාන තරගාවලියේ මෙන්ම පෙරදා නිමාවට පත්වු තීරණාත්මක තරගයකදීද අපව පරාජය කල නිසා නොව, ජයග්‍රහණයෙන් පසුව ඉන්දීය කණ්ඩායමේ හැසිරීම නිසාවෙනි.
ක්‍රීඩකයන්ටත් වඩා රවි ශාස්ත්‍රී වැනි පක්ෂග්‍රාහී නිවේදකයින්ගේ කුණු කටවල් වැහෙන්න අපේ කොල්ලෝ මේ දුන්න පිළිතුරනම් අතිවිශිෂ්ඨයි.
ඉදිරි තරගත් ජනගෙන පළමු වරට මෙම තරගාවලිය ජයගන්න අපේ කොල්ලන්ට ශක්තිය ලැබේවා.......

වින්ඩොස් 8 Consumer Preview

noreply@blogger.com (Dhanushka Gunasinghe's Hard Code) — Thu, 01 Mar 2012 16:09:00 +0000

මයික්‍රොසොෆ්ට් සමාගමේ සභාපති Steven Sinofsky Windows 8 හදුන්වා දෙමින්

මයික්‍රොසොෆ්ට් සමාගම ඊයේ දිනයේ තමන්ගේ නවතම මෙහෙයුම් පද්ධතිය වන වින්ඩොස් 8 හි Cunsumer Preview එහෙම නැත්නම් පාරිබෝගික දැක්ම ඉදිරිපත් කලා. මෙතෙක් වෙනස් මාවත් දෙකක ගමන් කරමින් තිබුන මොබයිල් සහ ඩෙස්ටොප් මෙහෙයුම් පද්ධති එකම මාවතකට පිවිසීමක් ලෙස මෙය හදුන්වන්න පුලුවන්..වින්ඩොස් විස්ටා වලින් පසුව මයික්‍රොසොෆ්ට් සමාගමේ මෙහෙයුම් පද්ධතිවල පවතින ආකර්ෂණීය පෙනුම වින්ඩොස් 8 වලද මනාව පවතිනවා.ස්මාට් ෆොන්වල අතුරුමුහුණතට සමාන Metro (Tile Icon) සහිත අතුරු මුහුණතක් වින්ඩොස් 8 වල දකින්න ලැබෙනවා.

වින්ඩොස් වල මීට පෙර පැවති Start Button එක මීට පසු වින්ඩොස් වලින් සමු ගැනීමද මේ සමග සටහන් වුනා.මයික්‍රොසොෆ්ට් සමාගම මේ සමග තමන්ගේ මොබයිල් ,ටැබ්ලට් සහ ඩෙස්ටොප් සදහා එකම මෙහෙයුම් පද්ධතියක් හදුන්වා දෙන අතර, අලුතින් වෙලද පොලට පැමිනෙන, Dual Core හෝ Quad core processors සහිත ජංගම දුරකතන සහ ටැබ්ලට් සදහා මෙය යොදා ගත හැක.
ඒ සමගම අලුතෙන් හදුන්වාදෙන වින්ඩොස් 8 App Store එක මගින් තමන්ට කැමති Application එකක් මයික්‍රොසොෆ්ට් App ගොනුවෙන් ලබා ගැනීම install කල හැකියි.

වින්ඩොස් 8 , Clod Base OS එකක් නිසා වින්ඩොස් 8 සහිත ජංගම දුරකතනය , ටැබ්ලට් එක සහ ඩෙස්ටොප් එක අතර දත්ත වීම සිදුවේ.මේ නිසා අපේ Browser habits,Book Marks, Passwords සියල්ලම වගේ තොරතුරු cloud එකේ save වීම සිදුවේ.ඒ අනුව ඕනැම එකකින් මේ තොරතුරු පහසුවෙන් ලබා ගත හැක.

වින්ඩොස් 8 Touch Screen , Flips සදහා ඉතාම හොද සහයක් ලබා දේ.
මේ ලින්ක් එකෙන් ගිහිල්ල තමන්ගේ පරිගණකයට වින්ඩොස් 8 දාන්න පුලුවන්ද කියල Assessment Test එක කරල බලන්න.
මෙන්න ලින්ක් එක....Install කරල බලල කරන්න.

For ISO : http://windows.microsoft.com/en-US/windows-8/iso
Internet Base Download : http://windows.microsoft.com/en-US/windows-8/download