இதயத்தின் சாளரங்கள்

அரசியலமைப்பிற்கு புறம்பானதா? - இந்து சமய அறநிலையத்துறைச் சட்டம் – ஓர் பார்வை - பாகம் 2

2021-08-19T02:27:00.000+05:30

கடவுள் என்பது ஒரு மாயை என்றும், கடவுள் என்று எதுவுமில்லை என்றும், எல்லாம் பிதற்றல் என்றும் ஒரு சொல்லாடல் காலம் காலமாக சொல்லப்பட்டு வருகிறது. யார் கடவுள் என்றும், எதனை கடவுள் என்றும் சொல்ல வேண்டும் என்றும், முடிந்தால் நேரில் வர சொல், நேரில் பேச சொல், உணர செய் என்றும் நம்பிக்கையுள்ளவர்களை, நம்பிக்கையில்லாதவர்கள் கேலி செய்து கிண்டல் செய்வதும் கால காலமாக நடைமுறையில் இருக்கும் செயல்.

கடவுள் என்பதை பிரித்துப் பார்த்தோமேயானால், கட + வுள் என்று வருகிறது. கட என்பது கடந்து என்று அர்த்தம் ஆகிறது. வுள் என்பது உள்ளே என்று பொருளாகிறது, ஆக கடவுள் என்பது கடந்து உள்ளே பார் என்று பொருளாகிறது. இதை தான் இன்றைய தத்துவ விஞ்ஞானிகள் சொல்கிறார்கள் (Psychologist). எண்ணங்கள் செம்மையானால் மற்ற அனைத்தும் செம்மையாகும், செழிப்பமாகும். இதற்கும் கடவுளுக்கும் என்ன தொடர்ப்பு என்று தானே கேட்கிறீர்கள். சரியான கேள்வி.

கடவுள் என்பதை கட + வுள் என்று சொன்னேன் அல்லவா, கடந்து உள்ளே செல்லும் போது நாம் பல விஷயங்களை உணரமுடியும். மூச்சு காற்றின் போக்கினையும், உடலின் செயல்பாடுகளையும் உணர முடியும். ஆழ்ந்து நோக்கும் போது புற செயல்பாடுகளையும் உணர முடியும். பயிற்சியின் உச்சத்தில் புறத்தையும், அகத்தையும் கட்டுப் படுத்தும் பக்குவம் வந்தடைகிறது. இது எதுவும் சித்துவிளையாட்டு கிடையாது. எண்ணங்களின் வலிமையினை எண்ணற்ற ஆராய்ச்சியாளர்கள் உணர்த்தியுள்ளார்கள். விஞ்ஞானிகளால் இன்னும் எதிலிருந்து எப்படி எண்ணங்கள் உருவாகுகின்றன, அது எப்படி திரும்ப திரும்ப சொல்லும் போதோ அல்லது, நினைக்கும் போதோ, நம் செயல்பாடுகள் மாறுகின்றன என்று கண்டுபிடிக்க முடியவில்லை. அவர்கள் சொலவது எல்லாம், மனம் வலிமையானது, எண்ணங்கள் வலிமையானது. இதை தான் நம் கவிஞர் கண்ணதாசன் அற்புதமாகச் சொன்னார், அனுபவம் தான் கடவுள் என்று எளிமையாக புரிந்துக் கொள்ள. அப்படியென்றால் கடவுள் என்று யாருமில்லையா? பொய்யான தோற்றமா என்றால்? நிச்சயமில்லை. ஒவ்வொருவருமே கடவுள் தான். ஆம். கடந்து உள்ளே பார்க்கும் போது, புற/அக த்தினை உணரும் போது, அவற்றை கட்டுப்படுத்தும் போது, எதற்கும் சலனமடையாமல், கலங்காமல், அமைதியாக, ஆழ்ந்து உணரும் திறன் கொண்ட அனைவரும் கடவுளே.

இது அனைவருக்கும் சாத்தியமா என்று கேட்டால், நிச்சயமில்லை. அப்படியென்றால், எல்லோரும் எல்லா நேரங்களில் கடவுளை காண முடியாதா? என்ன செய்வது, அவர்களும் ஒரு முகம் அடைய, அந்த உன்னதநிலை அடைய, அதற்கு விடையாக வந்தது தான் கோவில்களும், பிற ஆலய வழிபாடுகளும். மனிதனை ஒரு மிதப் படுத்தவும், ஓர் நிலை அடையவும், உன்னதநிலை அடைய செய்யவும். சிந்தனைகள் சிதறாமல், பலவற்றை எண்ணங்களில் போட்டு குழப்பாமல், முதலில் தோன்றியது தான் சூரிய வழிபாடு. ஆதி வழிபாடு என்று சொல்லப்படும் சூரிய வழிபாடு, மனிதனால் காண முடிந்த, காணக் கூடிய ஒன்று. அதன் பிறகு வந்தது அல்லது அந்த காலத்திலே வந்தது தான் நிலா வழிபாடு. சூரியனை பிரதானமாகச் சிலரும், நிலாவினை பிரதானமாகச் சிலரும் வழிபட்டு வந்தனர்.

மனிதனின் முதல் மற்றும் பிரதான எதிரியாக ஆரம்ப காலத்தில் இருந்தது மிருகங்கள். அதிலிருந்து காப்பாற்றிக் கொள்ள கல் குகைகளிலும், பாறை கொண்டு அல்லது பாறைக்கடியிலும் தன்னை மறைத்துக் கொண்டான். பிறகு மரத்திலேறித் தன்னை காப்பாற்றிக் கொண்டான். பின்னர் கூட்டம் கூட்டமாகப் பிரிந்து தன் இருப்பினை உறுதிச் செய்து கொண்டான். அப்படி கூட்டம் கூட்டமாகப் பிரியும் போது அந்த அந்த கூட்டங்களை வழி நடத்த ஒரு தலைவன் உருவாகிறான். அப்படித் தோன்றிய கூட்டத் தலைவன் தன் எண்ணத்திற்கும், தான் கடந்து வந்த பாதையில் ஏற்பட்ட அனுபவம் கொண்டும், சூரிய வழிபாடு அல்லது சந்திர வழிபாடு என்று நிறம் பிரித்து வாழ ஆரம்பித்தான். முதலில் காடுகளில் கிடைக்கும் பொருட்களைக் கொண்டும், பின்னர் வேட்டையாடியும், அவனின் பயணம் தொடர்ந்தது. இப்படித் தொடர்ந்த பயணத்தில், ஆரம்பத்தில் ஆராயப்படாத குறுகிய நிலப்பரப்பில் அவர்களுக்குள் பெரிய சண்டை வரவில்லை. போகப் போக அவர்களுக்குள் பேதம் வர முக்கிய காரணமானது உணவும், நீரும் தான். அப்போது தான் அவர்களின் தேடல் விரிந்தது. தேடல் பெரிதானது. எண்ணங்கள் விரிந்தது, பேதமும் விரிந்தது. நாகரீகம் வளர்ந்தது.

இப்படி வளர்ந்த நாகரீகத்தில், மனிதனின் தேடலைப் பொறுத்து ஒவ்வொரு நிலப்பரப்பிலும் ஒவ்வொரு மாதிரியான மனிதர்களும் அவர்களின் நம்பிக்கைகளும் வளர்ந்தது. அதில் எண்ணற்ற மனிதர்கள் தோன்றினார்கள், வழி நடத்தினார்கள். அவர்களை தலைவர்களாகவும், காலப் போக்கில் அவர்களே தங்களைக் காக்க வந்த உத்தம பிறப்புகள் என்றும் நம்பத் தோன்றினார்கள். அப்படி நம்பியவர்களை ஆரம்ப காலங்களில் கல் ஓவியங்களாகவும், மனற்சிற்பங்களாகவும், சிலைகளாகவும் வடிக்கத் தொடங்கினார்கள். சிலை வழிபாடு இப்படித் தான் தோன்றியது, தோன்றியிருக்க வேண்டும். மனிதன் தான் உணர்ந்ததை. தான் பார்த்ததை வடிவங்களாக வடித்து, அதன் மூலம் தன் நம்பிக்கையினைச் செம்மைப்படுத்தியிருக்க வேண்டும்.

இப்படி உருவான சிலைகளையும், சிற்பங்களையும் ஏதோ பாறைகளில் வடிவமைப்பதோடு இல்லாமல், அதற்கு என்று பிரத்தேயகமான இடங்களைத் தேர்ந்தெடுத்து அதில் நிறுவத்தொடங்கினான். பொதுவாக கருதப்பட்ட சூரியன், நிலா போன்றவற்றையும், அதற்கும் வடிவம் கொடுத்து வழிபாடு செய்ய ஆரம்பித்தான். நிச்சயமாக உறுதியிட்டுச் சொல்ல முடியும் ஆரம்பத்தில் ஜாதி அல்லது மதம் என்று பெயரில் பாகுபாடு கிடையாது, ஆனால் அவரவர் நம்பிக்கையின் அடிப்படையில் பாகுபாடு இருந்திருக்கும், இருந்திருந்தால் மட்டுமே பிற்காலத்தில் இப்படியொரு பாகுபாடு ஏற்பட காரணமாயிருக்கும்.. நிற்க

சரி, சிலை வந்தது, சிற்பம் வந்தது, கோவில், ஆலயம், வழிபாட்டுத் தலங்கள் என எல்லாம் தோன்றின, அதற்கும் தலைப்பிற்கும் என்ன சம்பந்தம் என்று தானே கேட்கிறீர்கள், வாருங்கள் பார்க்கலாம்….

அரசியலமைப்பிற்கு புறம்பானதா? - இந்து சமய அறநிலையத்துறைச் சட்டம் – ஓர் பார்வை - பாகம் 1

2021-08-19T02:26:00.001+05:30

மனிதன், மனிதன் என்று அறியப்பட்டு, அவருக்கு ஆறு அறிவு என்றும், மற்ற அல்லது பிற உயிர்களுக்கும் அவருக்கும் நிறைய வேறுபாடுகள் இருக்கிறது என்றும் இந்த உலகம் விஞ்ஞான பூர்வமாக உணர்ந்து கொண்டது வரை அவரின் வளர்ச்சி அபிரிதமானது என்று நம்ப படுகிறது. இந்த பூவுலகில் ஆராயப்பட்டதும், இன்னும் ஆராயப்படவேண்டியதற்கும் வித்தியாசம் நிறைய இருக்கிறது. அப்படியிருக்கும் போதே அவரின் விளையாட்டும், தான் என்ற அகந்தையும், தனக்குத் தான் எல்லாம் தெரியும் என்ற மமதையும் அலாதியானது. வெட்க கேடானது.

மனிதன் தன்னைச் சீரமைத்துக் கொள்ளவும், தன்னை தகவைத்துக் கொள்ளவும், ஓர் நிலைப்படுத்திக் கொள்ளவும் வகுத்துக் கொண்ட விதிகள் தான் சட்டம்.

சட்டம் காலத்திற்கேற்ப ஆண்டவர்களும், நமை ஆண்டு முடித்தவர்களும், ஆளும் வகையறாக்களும் தங்களின் வசதிக்கேற்ப வகுத்துக் கொண்டது தான் சட்டம் என்றால் மிகையாகாது. சட்டம் என்பது ஒரு சமுதாயத்தின் தேவையாகவும், சமுதாயத்தை முற்படுத்தும் நோக்கில், சமுதாயம் சீர்கெடாமல், சமுதாயம் முற்போக்கில் செயல்படவும் வகுத்துக் கொண்டது. சட்டம் அதன் வழி நடப்பவர்களையும், அதன் வழி செல்பவர்களையும் ஒரு மாதிரியும், அவர்களின் நலன் கருதியும், சட்டத்திற்குப்புறம்பாக செல்பவர்களைச் சீர்ப்படுத்தவும், அவர்களையும் சட்டத்தின் படி செயல்பட வைக்கவும் ஏற்படுத்தப்பட்டவை யாகும்.

எது சரி, எது தவறு என்பது அவரவரின் பார்வைக்குச் சென்று விடுகிறது. குற்றம் செய்தவனுக்கு அவனின் செயல் சரியாகவும், அந்த செயலால் இழந்தவனுக்கு அல்லது இழந்தமைக்கு, அவனின் இழப்பு எதிர் தரப்பினைக் குற்றம் செய்தவனாக கருத தூண்டுகிறது. சட்டம் இதற்கு வரைமுறை வைத்து, இத்தகைய செயல் குற்றம் என்றும், இதற்கு தண்டனை இதுவென்றும் ஒரு வரைமுறை வைத்திருக்கிறது. இது சமுதாயம் சுமூகமாக செயல்படவும், சரியான பாதையில் செல்லவும் வழி வகுக்கிறது.

பல்லாயிர ஆண்டுகளாக சில நெறிமுறைகளையும், சில பாரம்பரியங்களையும் வகுத்து அதன் படி செல்ல இயற்கையே சில வழிமுறைகளை வகுத்து கொடுத்துள்ளது. உம். ஆண் என்றும் பெண் என்றும் இருபாலராகப் பிரித்து அவரவருக்கு என்று சில நெறிமுறைகளையும் வகுத்து கொடுத்திருக்கிறது. ஆண் உடலால் பலமுற்றால், பெண் மனதால் இரும்பாகிறாள். இருவருக்கும் உடலமைப்பில் வேறுபட்டாலும், இருவரையும் சமமாகவும், சொல்ல போனால் பெண்ணிற்கு ஓர் உயிரை உருவாக்கும் பெரிய சக்தியைக் கொடுத்திருக்கிறது.

கால காலமாக வெவ்வேறு திசையில் பயணித்து, மனிதன் தான் கண்டதையும், தான் உணர்ந்தவற்றையும், தான் கற்றதையும், தான் மட்டுமன்றி பிறரும் பயன் பெற வேண்டும், அதனை பலவகைகளில் இந்த சமுதாயத்திற்கு விட்டுச் சென்றிருக்கிறான். உம். கல் ஓவியங்கள், சிற்பங்கள், வழிப்பாட்டுத் தலங்கள், பிரம்மாண்டமான படைப்புகள், கவிதைகள், இதிகாசங்கள், இலக்கியங்கள், எழுத்தோவியங்கள், அடையாளங்கள் என சொல்லிக் கொண்டே போகலாம்.

தொல் பொருள் ஆராய்ச்சியாளர்கள் பிரமித்துக் கொண்டிருக்கிறார்கள், ஒவ்வொரு முறை செய்தி வரும் போது மக்கள் அதைப் பற்றி சிலாகிப்பதும், அதை நினைத்து பெருமை அடைவதும், பெருமிதம் கொள்வதும் நிச்சயம் வரவேற்கப் பட கூடியது தான்.

பல கோவில்கள் ஒரு ஊரே அதனுள் அடங்குமளவிற்கு இருப்பதைப் பார்க்கும் போது, அவற்றின் உன்னதம் பல சங்கதிகளை நமக்கு எடுத்துக் காட்டுகிறது. ஸ்ரீரங்கம் ரெங்கநாதர் கோவில் அமைப்பு அதற்கு மிகப் பெரிய சான்றாகும். உயிர் நெல்களை சுமக்கும் கலன்களாக கோபுர கலசங்களை வைத்தார்கள். கோவில்களை பெரியவைகளாக கட்டி, போர் மற்றும் பிற அவசர கால நேரங்களில் மக்களை காக்க உதவினார்கள். எத்தனை எத்தனை படையெடுப்புகள் வந்த போது, பலவற்றை இழந்தபோதும், பல சிற்பங்கள், சிலைகள், கோவில்கள் சிதைக்கப்பட்ட போதும் இன்னும் எத்தனை எத்தனை ஆண்டுகள் வந்தாலும் நம் பாரம்பரியம் சொல்ல இந்த கல் ஓவியங்கள், சிற்பங்கள், இன்னும் பிற நம்மை காக்கும் என்பதில் எந்த ஐயமும் இல்லை. நிற்க.

இப்போது என்ன வந்தது என்று தானே கேட்கிறீர்கள்? அந்த கோவில்களை யாரும் எதையும் செய்யவில்லையே என்று தானே சொல்கிறீர்கள்? இப்போது என்ன நடந்தது, எதற்கு இவ்வளவு பெரிய ஆராய்ச்சி என்று தானே கேட்கத் தோன்றுகிறது? சரியான கேள்வி, வாருங்கள் தேடுவோம். ….

ஒரு புத்தகத்தை கையில் ஏந்துகிறேன் புத்துலகில் நீந்துகிறேன்

2020-06-01T07:47:00.001+05:30

என்னங்க என்று அழைத்தப்படியே சங்கரி வந்தாள். அந்த ஹாலின் ஓர் ஓரத்தில் போடப் பட்டிருந்த சோபாவில் உட்கார்ந்தப்படியே புத்தகம் படித்துக் கொண்டிருந்த கணேஷ், அவளைப் பார்க்காமலே என்ன என்று கேட்டான்.

லாக் டவுன் தளர்வுப் பற்றி இன்னைக்கு சொல்லப் போறாங்களாம், நீங்க கொஞ்சம் டீவியை போடுறீங்களா என்று சொன்னப்படியே வேகமாக ரிமோட்டைத் தேடலானாள் சங்கரி. நானும் தேடினேன் ரிமோட்டை. எப்போதும் டீவி மேலேயே வைத்திருப்போம் என்று சொன்னப்படியே சத்தம் போட்டபடி தேடிக் கொண்டிருந்தாள் சங்கரி. அப்போது எங்கிருந்தோ வந்த ஒரு சத்தம் அவர்களை நிலைக் குலைய செய்தது. அவர்கள் இருவரும் வாசலினை நோக்கிப் போனார்கள். என்ன சத்தம் என்று கேட்டவாறே அவர்கள் இருவரும் மாடியிலிருந்து கீழே பார்த்த போது, அங்கு ஒரே கூட்டம்.

என்ன மனோகர்? என்ன சத்தம் என்று கேட்டார் கணேஷ். அதற்குள் அந்த அப்பார்ட்மெண்ட் செகரட்டரி, “எல்லோரும் கீழே இறங்கி வாங்க. யாரும் வீட்டில் இருக்க கூடாது” என்று சொன்னப்படி கூக்கரலிட்டார்.

சங்கரியும், கணேஷும் கீழே இறங்கிப் போனார்கள். அந்த வசந்தம் அபார்ட்மெண்ட் மிகப் பெரியது. கிட்டத்திட்ட 200 குடும்பங்களை 6 பிளாக்குகளாக கொண்டது. அதில் “அ” பிளாக் செகரட்டரி சொன்னது தான் சங்கரியும் கணேஷூம் கேட்டது. அதன் படி தான் அவர்கள் இறங்கி ரோட்டுக்கு வந்தார்கள்.

அனைவரும் பதட்டத்தில் இருந்தார்கள். ஏதோ ஒரு கவலை, பயம் அவர்களை ஆட்டிப் படைத்துள்ளது நன்றாகத்தெரிந்தது அவர்களி வெளிரிய முகத்தில். இவர்களும் இணைந்து கொண்டார்கள். யாரைக் கேட்பது என்ற பதட்டத்தில் இவர்கள் தவித்திருந்தார்கள். எல்லோரும் செகரட்டரியை நோக்கிய படி இருக்க. கணேஷ் மெல்ல ஆரம்பித்தான், பக்கத்தில் இருந்த நபரிடம்.

என்ன சார் ஆச்சு? ஒரே பதட்டமா இருக்கீங்க. ஏன் செகரட்டரி ஒரே கூப்பாடு போடுறார். என்று அவரை கேள்விகளால் துளைத்தெடுத்தான். அந்த நபர் சொன்னார், எனக்கும் தெரியல சார், நானும் உங்களை மாதிரி தான் சத்தம் கேட்டு தான் வெளியில வந்தேன். இப்போ உங்களை மாதிரி தான் பதில் தெரியாம நிற்கிறேன் என்று. கணேஷூக்கு கோபம் வந்தது. ஏன் எதற்கு என்று கேட்காமலே இப்படி நிற்கிறார்களே என்று தனக்குள் கோபப்பட்டுக்கொண்டு, நேராக செகரட்டரியிடம் சென்றான். “சார் என்னாச்சு என்று கேட்டான்”. செகரட்டரி கொஞ்ச நேரம் சும்மா இருக்கீங்களா, நானே பதட்டமா இருக்கேன் என்று சொன்னார்.

கணேஷூக்கு கோபம் பொத்துக் கொண்டு வந்தது. எதற்குன்னு சொல்லாமல் நான் இங்கு நிற்க முடியாது. நாங்கள் மேலே போகிறோம். எதுவாக இருந்தாலும் எங்கள் வீட்டிற்கு வந்து சொல்லுங்கள் என்று சொன்னப்படியே நடக்கலானான். செகரட்டரி சொன்னார், பொறுப்பா, ரொம்ப கோபப்படற, இங்க எத்தனை பேர் நிற்கிறாங்க. எதாவது தொந்தரவு பண்றாங்களா? ஏன் இப்படி செய்ற என்று கேட்டார்.

கணேஷூக்கு மேலும் கோபம் வந்தது. சார் நீங்க சொல்றது என்ன விதத்தில நியாயம். என்னன்னு சொல்லாம, தெரியாம நிற்க முடியுமா? அவங்க நிற்கிறாங்கன்ன அதற்கு நானும் நிற்கனுமா? எனக்கு இப்ப காரணம் தெரியனும். சொல்லுங்க, இல்லைன்னா, நீங்க அவங்கள வச்சுக்கிட்டு என்ன செய்யனுமோ செய்ங்க, நான் மீட்டிங்கல பார்த்துக்குறேன் என்று சொல்லி புறப்படலானான். செகரட்டரி கணேஷ், கணேஷ் என்று இரண்டு முறை கூப்பிட்டார், ஆனால் அதனை காதில் வாங்கி கொள்ளாமல், பேசிக்கொண்டிருந்த அவன் மனைவி சங்கரியிடம் வந்தான். வா வா நாம் மேலே போகலாம், என்ன காரணம் சொல்ல மாட்டங்களாம், நாம வாய் பொத்திக்கிட்டு நிக்கனுமாம், நாம என்ன இவங்க அடிமையா? அதெல்லாம் முடியாது. நாம் மேலே போவோம். எதுவென்றாலும் அவங்க நம்ம வீட்டிற்கு வந்து சொல்லட்டும் என்று சங்கரியினை வேகப்படுத்தினான். அவளும் வேறு வழியின்றி, வரேன் அக்கா என்று சொல்லிவிட்டு, முனுமுனுத்தப்படியே அவனின் பின்னால் சென்றாள்.

என்னங்க, ஏன் இப்படி கோபம் படுறீங்க, என்ன ஏதேன்னு தெரியறத்துக்குள்ள என்ன அவசரம் உங்களுக்கு. மத்தவங்க மாதிரி நின்னா என்ன குறைஞ்சிடும் என்று சொன்ன சங்கரியினை சுட்டு எரித்துவிடுவது போல் பார்த்தான் கணேஷ். ஏன் அவர் சொன்னா குறைஞ்சிடுவாரா என்று கேட்டப்படியே சோபாவில் போய் உட்கார்ந்தான். என்ன திமிரு அவருக்கு, மத்தவங்க மாதிரி நான் போய் அவங்கள மாதிரி அமைதியா நிக்கனுமா? எனக்கென்ன தலையெழுத்து? என்று புலம்பியபடியிருந்த கணேஷைப் பார்த்து முறைத்துக் கொண்டே கிச்சன் நோக்கிப் போனாள் சங்கரி.

என்ன மனுஷன் இவரு? எதற்கெடுத்தாலும் கோபம், எதற்கெடுத்தாலும் சண்டை, எதற்கெடுத்தாலும் எகத்தாளம், என்று தனக்குள் திட்டியப்படியே அடுப்பில் பாத்திரம் வைத்தாள். என்னங்க காபி சாப்பிடுறீங்களா என்று தன் கணவன் மனதை மாற்ற கிச்சனிலிருந்தே கேட்டாள் சங்கரி. கணேஷ் அப்போது தான் இரண்டாம் அத்தியாத்தியத்தில் செகரட்டரி மற்றும் பிறரைத் திட்டும் படலத்தில் இருந்தான். அவனுக்கும் காபி குடித்தால் கொஞ்சம் நன்றாக இருக்கும் என்று தோன்றியது. இருந்தாலும் முறுக்கோடு, ஏன் இப்ப என் பேச்ச மாத்தப் பார்க்குற, அந்த செகரட்டரி மனைவி எதுவும் சொன்னாளா? என்று சங்கரியிடம் கோபம் காட்டுவது போல், அவள் எதுவும் விஷயம் தெரிந்து வைத்திருக்கிறாளா என்று ஆவலில் கேட்டான் கணேஷ்.

ஏன் அது சொன்னா தான் காபி சாப்பிடுவீங்களா என்று தனக்கே உரிய நக்கலில் பதில் சொன்னாள் சங்கரி. கணேஷூக்கு கோபம் மறுபடியும் வந்தது. ஏன் நீயா சொல்ல மாட்டியா? மனுஷன் இங்க கத்தியே செத்துருவேன் போல, கேட்டா தான் சொல்லுவியோ என்று தன் பதிலை உச்சஸ்தாயில் சொன்னான் கணேஷ்.

அதுக்கு ஏன் இப்படி கத்துறீங்க, இருங்க காபி போட்டு எடுத்துட்டு வரேன் என்று சொன்னாள் சங்கரி. ஏன் காபி போட்டுக்கிட்டே பதில் சொன்னா என்ன குறைஞ்சிடும் என்று விஷயம் தெரியவில்லையே என்று ஆதங்கத்தில் சொன்னான் கணேஷ்.

என்ன அவசரம். இருங்க வரேன். காபி போட்டேன் இந்த எடுத்துட்டு வரேன் என்று சொன்னப்படியே ஒரு கையில் காபி டம்ளரும் மறு கையில் வட்டையும் காபியினை ஆத்திக் கொண்டே வந்தாள் சங்கரி.

வாசலில் காலிங்பெல் சத்தம், “இல்லறம் ஓர் நல்லறம்” புத்தகம் படித்துக் கொண்டிருந்த குமார். யாராக இருக்கும் என்று யோசித்தப்படியே அந்த புத்தகத்தினை மூடி வைத்து வெளியில் யார் வந்திருக்கிறார்கள் பார்க்க கிளம்பினான்.

என்ன அருமையான புத்தகம். ஓர் அழகான குடும்பம். அந்த கணவன் மனைவிக்குள் ஏற்படும் சம்பாஷனைகள் என்ன அருமையா சொல்லியிருக்கிறார் அந்த எழுத்தாளர். எதற்கு அந்த செகரட்டரி அப்படி சொன்னார். என்ன விஷயமா இருக்கும், சங்கரி என்ன சொல்லப் போகிறாள், ஏன் கணேஷ் இவ்வளவு பதட்டம் என்று தன் மனதில் தோன்றிய எண்ணங்களோடு தான் உடுத்தியிருந்த கைலியினை சரி செய்து கொண்டு வாசல் நோக்கிப் போனான் குமார்.

எழுத்துக்களின் அதிசயம் - Magic in English Alphabets - Handwriting Analysis

2020-05-04T15:09:00.000+05:30

ஆங்கில எழுத்துக்களில் ஒவ்வொன்றிலும் ஒளிந்திருக்கிறது ஓர் அதிசயம். ஆம். நாம் எழுதும் ஒவ்வொரு எழுத்தும் நம் எண்ணத்தின் வெளிப்பாடு. நம் எண்ணத்தின் சேர்க்கைகள் வடிவமெடுத்து நம்மை அறியாமலே நாம் வெளிப்படுத்தும் ஓர் அதிசயம் தான் நம் எழுத்தும், கையெழுத்தும்.

சரி, இது ஆங்கில எழுத்திற்கு மட்டும் தானா என்று கேட்டால், எனக்குத் தெரிந்தவரை ஆங்கிலமே பெரும்பாலான மக்களின் பயன்பாட்டு மொழியாகவும், எழுத்து வழி மொழியாகவும் இருந்து வருவதால், அந்த மொழிக்கே நாம் எழுதும் எழுத்தும், கையெழுத்தும் சொல்லும் மர்மமென்ன என்று அறியப்பட ஏதுவாய் முதலில் கண்டுபிடிக்கப்பட்டன இந்த கிராபலாஜி. பிற மொழிகளிலும் இவ்வாராயாச்சி நடைபெற்றுக் கொண்டுதான் இருக்கிறது.

சரி, நாம் இப்போது ஆங்கில எழுத்துக்களில், அகர வரிசையில் முதல் 5 எழுத்துக்களின் கையெழுத்து கூற்றைப் பார்ப்போம்.

First we will see Capital Letters

1. A

இதன் வடிவமைப்பைக் கொண்டு அவர்களின் அன்பு மற்றும் பெற்றோர்களின் மேல் அவர்கள் வைத்திருக்கும் பாசத்தினை அறிய முற்படமுடியும்.

With this capital letter "A", it can be found out how much love and affected the person is and how much affection the person have with parents.

2. B
இந்த எழுத்தின் வடிவமைப்பைக் கொண்டு அந்த எழுத்தாளரின் மூச்சு விடும் தன்மையினையும் அவரின் உடல் நலனையும் அறிய முற்படமுடியும்.

The structure of letter "B" can help the analyst to find out the health issues of the writer.

3. C

The structure of "C" helps the analyst to find out how much interactive the writer is

இந்த எழுத்தினைக் கொண்டு அந்த எழுத்தாளர் எந்த அளவிற்கு பேசி பழக கூடியவர் என்பதை அறிய முற்படமுடியும்.

4. D

This letters helps the analyst to find out how much the writer is physically fit and and also the sensitivity of the writer

இந்த எழுத்தின் வடிவமைப்பைக் கொண்டு அந்த எழுத்தாளர் எந்தளவு உடலளவு தகுதியுடையவராகவும், உணர்ச்சிகள் உடையவராகவும் இருக்கிறார் என்று அறிய முற்படமுடியும்.

5. E

This letter helps the analyst to find out how much the writer is expresssive

இந்த எழுத்தின் வடிவமைப்பைக் கொண்டு அந்த எழுத்தாளர் எந்த அளவிற்கு அவர் தன்னை வெளிப்படுத்திக் கொள்கிறார் என்பதை அறிய முற்பட முடியும்.

இது எல்லாம் நேரடியான ஒன்று, ஒவ்வொருவரின் எழுத்தும் ஒவ்வொரு முறையும் அவர்களின் சூழ்நிலைப் பொறுத்து மாறுபடும். ஆகவே எந்த சூழ்நிலையில் அதனை எழுதினார் என்பதை பொறுத்து தான் அமையும். அது மட்டுமல்லாமல், அனைத்து எழுத்துக்களை அலசி ஆராய்ந்த பிறகே எந்த எழுத்தாளரை அறிய முற்படமுடியும்.

These are all based on general principles in handwriting analysis. This varies from situation to situation and when the writer writes that statement, it all based on that, the handwriting of the writer varies. Each and every letter has to be analyzed and on a whole, the analyst will come to a conclusion.

அடுத்த எழுத்துக்களினை அடுத்த பதிவில் காண்போம். நன்றி

கொரோனாவும் பொருளாதாரமும்

2020-05-03T19:28:00.002+05:30

எத்தனையோ நாம் கடந்து வந்து விட்டோம், கடந்த 100 ஆண்டுகளில் நாம் கடந்து வந்த பாதைகளை நோக்கினால், நிச்சயமாக பிளேக் என்னும் கொள்ளை நோய்க்குப் பிறகு, உலகம் பல மடங்கு மாறியது, பஞ்சம் என்னும் கொடுமை கடந்து வந்த போது கூட அச்சப்படாத சமூகம், பிளேக் வந்த போதும், ப்ளு வந்தபோதும் ஆடி போனது. கிட்டத்திட்ட அன்றைய தேதியில் இருந்த மக்கள் தொகையில் ஒரு குறிப்பிட்ட சதவீதத்தினை இழந்தோம். நாம் எண்ணி பார்க்க முடியாத முன்னேற்றத்தில் தான் இருந்த சமூகமும், மருத்துவமும். ஆனால் அதையெல்லாம் பல விலைக் கொடுத்திருந்தாலும், கடந்து வெற்றி நடையிட்டோம், அதன் பிறகு இரண்டாம் உலகப் போர், இந்தியாவின் விடுதலை, பல் வேறு விதமான பொருளாதார சீர்திருத்தங்கள் என நடையிட்டுக் கொண்டிருந்த போது, 1991ம் வருடம் எடுத்த உலகப்பொருளாதாரம் கொள்கையும் அதன் தாக்கமும் கொஞ்சம் கொஞ்சமாக இந்த உலகைப் புரட்டிப் போட்டது. விஞ்ஞான வளர்ச்சியும், தொழில் நுட்ப புரட்சியும் பெரும் அளவில் உலகை சுருக்கின. எதுவும் எட்டக் கூடிய தூரத்தில் வந்தது. நாம் அமைதியாக ஒரு புரட்சி செய்து கொண்டிருக்க, நம்மில் ஒருசிலர் இந்த உலகை ஆட்டிப் படைக்க வேறு ஒரு விதமான புரட்சியினை முன்னெடுத்துக் கொண்டிருந்தனர்.. அது தான் ஆராய்ச்சி எனும் பெயரில் பல்வேறு விதமான தாக்கங்கள். அணு ஆயுதங்கள், பல்வேறு கிலோமீட்டர் அளவு கூட நாசப்படுத்துமளவிற்கு ஆயுதங்கள், தயாரிப்பதிலும் வெறி கொண்டு வேலை செய்து வந்தனர்.
உலகில் உள்ள பெரும்பாலான நாடுகள், வல்லரசுகளையும் சேர்த்து , தங்கள் ஆண்டு பட்ஜெட்டில் கிட்டத்திட்ட 30% அளவிற்கு பாதுகாப்பு, ராணுவம் மற்றும் ராணுவதளவாடங்களுக்கு செலவு செய்தன.

நாம் நிரந்தரம் என்று நினைத்துக் கொண்டு செய்த செயல்களினால் நாம் உடனடியாக எதிர்வினைகளை எதிர்கொள்ள முடியாமல் தவிக்கிறோம். யாரை குற்றம் சொல்வது என்பதில் இந்த பதிவு இல்லை. யாரையும் குற்றம் சொல்ல இது நேரமும் அல்ல. ஆனால் நாம் பொருளாதாரத்தைப் பற்றி பேசும் பொழுது, நிச்சயமாக இதை உணர்ந்து தான் பேச வேண்டும். இந்த வைரஸ் தாக்கத்திற்கு முன்னரே நாம் மிகவும் மந்தமான நிலையில் தான் பயணித்துக்கொண்டிருந்தோம். இந்த வைரஸ் வந்து உலகளவில் பெரும் சேதத்தினை ஏற்படுத்தியிருக்கிறது என்பதில் ஐயமில்லை.

சரி எந்த எந்த துறை உடனடியாக வெற்றி பெறும், எந்த துறையெல்லாம் நாம் பயணிக்க ஏதுவாக இருக்கும் என்று பார்த்தோமேயானால், உணவு மற்றும் உணவு சார்ந்த பொருட்கள், ஆடை மற்றும் ஆடம்பரமல்லாத அத்தியாவசிய ஆடை வகைகள், மருத்துவம், மருத்துவ உபகரணங்கள், மருந்து, மாத்திரைகள் ஆகிய துறைகள் இப்போதும், இதன் பிறகும் உடனே நமக்கு பொருளாதார வளர்ச்சியில் கை கொடுக்கும்.
மக்களின் சிந்தனை மாறியிருக்கிறது. மாறும். ஏனென்றால், நடுத்தரமும், உயர் நடுத்தரமும், உயர் வர்க்கமும் கூட தங்களின் அன்றாட தேவைகளில் தான் முக்கியத்துவம் கொடுக்க வேண்டிய சூழ்நிலை இருக்கும். இது நெடும் கால திட்டமிடலுக்கு வழி வகுக்கும். ஆதலால் எதிர்கால திட்டமிடல் வைத்திருந்தால் இந்த துறை சார்ந்து பயணியுங்கள். வெற்றி நிச்சயம்.

அடுத்த இரண்டாவது துறைகள் என்று பார்த்தோமேயானால்
தற்காலிக சேமிப்பு, நிரந்தர சேமிப்பு, சிறு மற்றும் குறு தொழில்கள் ஆகியவை மீது மக்களுக்கு கவனம் செல்லும். இந்த நேரம் அவர்களின் அஸ்திவாரத்தினை ஆட்டிப்பார்த்ததால், அவர்கள் இதை நோக்கி தான் பயணம் செய்ய தூண்டும். சேமிப்பு என்பது நகையாகவோ அல்லது Mutual Fund, SIP, SEP, Etc ஆகியவற்றில் கூட இருக்கலாம். இவை அனைத்தும் நடுத்தர, உயர் நடுத்தர மற்றும் உயர் குடும்பங்களுக்கான எண்ணங்களாக இருக்கும் என்பது என் தனிப்பட்ட கணிப்பு. ஆகவே இதை சார்ந்த துறைகளில் உங்கள் எதிர்கால திட்டமிடல் இருந்தால் வெற்றி பெறலாம்.

ரியல் எஸ்டேட் துறை உடனடியாக ஏற்றம் பெறும் நிலையில் இல்லை, என்ன தான் அரசு போராடி அதை தூக்கி நிலை நிறுத்த முயன்றாலும், அதில் உடனடியாக மாற்றம் இருக்கப்போவதில்லை. சரி விலை குறையுமோ, விற்று விடலாமா என்று எல்லாம் உங்களை குழப்பி கொள்ளாதீர்கள். மிகப்பெரிய வீழ்ச்சியினை எதிர் கொண்டாலும் அது எல்லாம் தற்காலிகமே. வருந்த வேண்டாம். அதிக பட்சம் 6-12 மாதங்களில் இந்த துறை இப்படி தான் இருக்கும், விலை பாதாளம் நோக்கி செல்லும். பயந்து விட வேண்டாம். அதன் பிறகு அதன் வளர்ச்சி பெரும் பங்கு வகிக்கும். இழந்ததை மீட்பீர்கள், இது உறுதி. ஏனென்றால், மேற் சொன்ன துறைகளின் வளர்ச்சி, கட்டுமானத்தினைச் சார்ந்திருப்பதால், நிச்சயம் இந்த துறை எழுச்சி பெறும்.

தங்கம் வாங்கலாமா? தங்க பத்திரம் வாங்கலாமா? என்று யோசித்தீர்களேயென்றால், நிச்சயம் தங்கப் பத்திரம் வாங்கலாம். தங்கத்தின் விலையில் பெரிய அளவிற்கு மாற்றமிருக்கும் அதுவும் தற்காலிகமே, 80000 வரை செல்லும் ஒரு சவரன் என்று சொல்லக்கேட்டிருப்பீர்கள், எனக்கென்னவோ அப்படி தோன்றவில்லை, ஒரு சவரன் 50,000-60,000 வரை செல்லலாம், ஒரு வேளை நாம் ஜூன் மாதத்திற்கு பிறகு நிலைமை சரியாகி விட்டது என்று வைத்துக்கொண்டோமேயானால், வரும் ஜூன் 2021 வரை இப்படி ஏற்றத் தாழ்வுகள் தங்கத்தின் விலையிலிருக்கும். இதன் விலை மறுபடியும் இப்போதிருக்கும் விலைக்கே வரலாம். ஆகையால் குறுகிய கால முதலீடு, குறுகிய கால லாபம் பெற நினைப்பவர்கள் இதில் முதலீடு செய்யலாம்.

நீங்கள் பிற துறை சார்ந்து கேள்விகள் கேளுங்கள் நான் எனக்குத் தெரிந்தவரை பதில் சொல்கிறேன்

ஓர் புத்தகத்தின் பயணம் – ஹிட்லர் - ஆய்வு அவரின் கையெழுத்து – பகுத்தாய்வு

2020-05-03T17:24:00.000+05:30

ஓர் சுங்க அதிகாரியின் மகனாகப் பிறந்த ஹிட்லர், ஆஸ்திரியாவில் பிறந்தாலும், தன் பிழைப்பிற்காக வந்த ஒரு நாட்டின் தலைமகனாக மாறி, இரண்டாம் உலகப் போர் வர காரணமானவராக உருமாறியது அனைவரும் அறிந்த ஒன்று.

நல்ல கலை ரசனை உள்ள ஒரு மனிதர், ஓவியத்தில் சிறந்து விளங்கினார். ஆஸ்திரியாவின் ஆர்ட் அகடாமியில் தான் பயில வேண்டும் என்று அதற்கு விண்ணப்பித்து இரு முறையும் தோல்வியுற்றவர். பிழைப்பிற்காக ஓவியம் வரைந்து அதன் மூலம் பொருளீட்டினார் ஹிட்லரின் ஆரம்ப கால பயணமாக விவரிக்கிறது இந்த புத்தகம்.

அம்மாவின் மேல் அலாதி பிரியமும், அவரின் தந்தையின் கண் மூடித்தனமான கண்டிப்பில் வளர்ந்ததையும் விலாவரியாக விவரிக்கிறது. அவரின் தந்தை நாய் போல் அவரை நடத்தியதை நினைத்து பார்க்கும் போது நமக்கே கொஞ்சம் அச்சமாகத் தான் இருக்கிறது. விசிலடித்தால் வந்து நிற்க வேண்டும், பெயர் சொல்லி அழைக்கமாட்டாராம் அவர் தந்தை. இளமை காலங்களில் அவரின் பயணம் மிகப் பெரியளவில் அவருக்கு மன நிறைவையோ சந்தோஷத்தினையோ தரவில்லை. அவரின் தந்தையின் மறைவிற்குப்பிறகு அவரின் தாயாரின் அரவணைப்பில் வளர்ந்து வந்தார். அவரின் ஓவிய கல்வி ஆசை அப்போது தான் துளிர்விட்டது. ஆனால் அவரின் முயற்சிகள் கூடவில்லை. ஒரு வேளை, அன்று அது நடந்திருந்தால், இன்று நாம் டேவின்சி, பிக்காசோ வரிசையில் ஹிட்லரையும் நினைவு கூர்ந்திருக்கலாம். காலம் அவருக்கு வேறு வேலை வைத்திருந்தது.

அவரின் தாயார் மறைவிற்குப் பிறகு சிறிது காலம் தந்தையாரின் பென்ஷன் பணத்தில் வாழ்ந்து வந்தாலும், அவருக்கு அது போதவில்லை, ஆகவே அவர் ஜெர்மனி நோக்கிப் பயணித்தார். அவர் சென்ற நேரம் அப்போது தான் முதலாம் உலகப்போர் தொடங்கிய நேரம். ஜெர்மனி ராணுவத்தில் அவர் “ரன்னர்” ஆக அவருக்கு வேலை கிடைத்தது.

அதாவது போர் நடக்குமிடத்தில், தகவல்களை தங்கள் ராணுவ அதிகாரிகளுக்கும், வீரர்களுக்குமிடையே கொண்டு சேர்ப்பது. என்ன அதிசயம், குண்டு மழை பொழிந்த அந்த சூழ்நிலையிலும் அவர் திறம்பட அந்த வேலை செய்தார். அப்போது உயில் போயிருந்தால், இன்றும் அவர் ஓர் போர் வீரராக மட்டும் நினைவு கூறப்பட்டிருப்பார்.

யுத்தம் முடிந்தது. ஜெர்மனி சரண் அடைந்தது. போரில் மஸ்டர்ட் என்ற கெமிக்கல் வாயுவினால் அவரின் ஓர் கண் தாக்கப்பெற்று அவர் சிகிச்சையில் இருந்தார். இந்த தோல்வி விஷயம் அவரை நிலைகுலைய செய்தது. அவர் இதற்கு காரணம் யூதர்கள் என்று சொல்லி, அவர்களை அழிப்பதே தன் பணி என்று சூளுரைத்தார். முதன் முறையாக அவரின் நாட்டுப் பற்றினையும், அவரின் யூதர் எதிர்ப்பினையும் பதிவு செய்ததாக விவரிக்கிறார் இந்தப் புத்தகத்தின் ஆசிரியர்.

போர் காலத்தில் அவரின் பணியினையும் அவரின் திறத்தினையும் பாராட்டி, ஜெர்மன் ராணுவம் அவருக்கு ”Iron Cross” என்று பதக்கம் வழங்கியது. சிகிச்சை முடிந்த வந்தவர் அப்போது புதிதாக தொடங்கியிருந்த “நாஜி” கட்சியில் சேர்ந்தார், பின்னாளில் உலகமெல்லாம் அந்த இரண்டு எழுத்துக்கள் முழங்கப்பட போவதை யார் அறிந்திருப்பர். முதல் பொது கூட்டம் அந்த பேச்சு அவரை சிகரத்தில் நிறுத்தியது. ஜெரமானியர்களே ஆள தகுதியானவர்கள் என்ற அவரின் கூக்குரல், பேச்சு ஜெர்மானியர்களின் இதயங்களை அசைத்துபார்த்தது.

தோல்வி மேல் தோல்வி, அரசுக்கு அவர் கொடுத்த தொந்தரவு, ஆட்சியாளர்களின் மேல் அவர் பொழிந்த தாக்குதல் அவரை சிறை வாசமிட செய்தது. ஐந்து ஆண்டுகள் என்று முதலில் அறிவிக்கப்பட்டு, பின்னர் ஓராண்டானது. அந்த சிறைவாசம் அவரை செம்மைப்படுத்தியது. அந்த நேரத்தில் அவர் எழுதிய புத்தகம் ”Mein Kampf” ”எனது போராட்டம்” அவரின் எண்ணங்களை விலாவரியாகச் சித்தரித்தது. அவரின் ஆசைகள் பிரதிப்பலித்தன. அவர் அன்று எப்படி இந்தியா பிரிட்டனின் ஆதிக்கத்தில் இருந்ததோ, அது போல் ரஷ்யா ஜெர்மனியின் ஆதிக்கத்தில் வரவேண்டும் என்று விரும்பினார், என அவரின் சிறை வாசம் மற்றும் அவரின் அரசியல் பயணம் பற்றி விலாவரியாக விவரிக்கிறார் இந்த புத்தகத்தின்ஆசிரியர்.

மீண்டு வருகிறார். தலைவர் பதவிக்கு போட்டியிட்டதில் தோல்வி, ஆனால் நாஜி கட்சியின் ஆதரவு இல்லாமல் ஆட்சி அமைக்க முடியாது. ஆகையால் ஆட்சியில் சான்ஸ்லர் பதவி கிடைக்கிறது. இது தலைவருக்கு அடுத்த பதவி. ஆனால் அதிகாரம் குறைக்கப்படுகிறது. சில காலங்களில் நாட்டில் ஏற்பட்ட குழப்பத்தில், இவருக்கு அன்றைய அதிபர் பெரும் அதிகாரங்களை வழங்குகிறார். சிறிது காலத்தில் அதிபர் இறக்க, இவரே முடிச் சூள்கிறார். தேர்தல் முறை ரத்து செய்யப்படுகிறது.

இவரின் முதல் 5 ஆண்டு கால ஆட்சி காலம் பொற்காலம் என சொல்லலாம். ஆம் ஜெர்மனி, தன் முதல் உலகப்போர் தோல்வி, நாட்டில் சீர் குலைந்து போயிருந்த பொருளாதாரம், வேலைவாய்ப்பின்மை, சொல்லி கொள்ளும் அளவிற்கில்லாத இராணுவம் என முடங்கிப் போயிருந்த நாடு, இவரின் முதல் 3 ஆண்டு கால ஆட்சி காலத்தில் சர்வ வல்லமை மிகுந்த இராணுவ நாடாகவும், வேலை வாய்ப்பு குறையில்லா நாடாகவும் உருமாறியது என்று சொன்னால் மிகையாகாது. படிக்காத இவர் தன் அரசாங்கத்தில் நன்கு கற்ற மேதைகளை பணியமர்த்தினார். ஆபாசம், கேளிக்கை என சர்வாதிகாரிகளின் முழக்கமாகவும், வாழ்வாகவும் இருந்த போது, இவர் முற்றிலும் வேறுபட்டார், பெண்களை மதித்தார், மது அருந்தாத ஒர் அதிபராக இருந்தார். இவரால் ஜெர்மனி வல்லமை மிகுந்த நாடாக பயணித்தது.

இவரின் யூதர்களின் மேல் உள்ள வெறுப்புணர்ச்சி சிறிதளவும் குறையவில்லை. இவர் கொன்று குவித்த யூதர்களின் அளவு சொல்லிவிட முடியாது. நாட்டில் உள்ள மக்களையும் அவ்வழியே நடக்க இவர் செய்தது தான் இவரின் உச்ச கட்டம். எங்கும் யூதர்களின் எதிர்ப்பு குரல். ராணுவ வீரர்கள் மற்றும் அதிகாரிகள் யூதர்களை விதவிதமாக கொன்று குவித்தார்கள்.

இவர் உலகை ஆள நினைத்து அண்டை நாடுகளின்மீது யுத்தமற்ற முறையிலும், தனது ராஜதந்திரத்தாலும் போர் புரிந்து நாடுகளை கைப்பற்றினார். ஜப்பான், இத்தாலி போன்ற நாடுகளோடு நட்பு பாராட்டி ரஷ்யாவையும், யூதர்களையும் அழிக்க இவரின் முயற்சி தொடர்ந்தது.

ஏப்ரல் 27ல் பிறந்த இவர், தனது இறுதி பிறந்த நாளை கொண்டாடியது ஓர் மறைவு குகையில். ரஷ்ய படைகள் பெர்லினை ஆக்ரமித்தன, எந்நேரமும் இவரை கைது செய்ய வரக்கூடும் என்பதை உணர்ந்து, அவர் தனது பிறந்த நாள் கொண்டாட்டத்தினையும், தனது அன்பு காதலியையும் மனந்தது அந்த மறைவிடத்தில் தான். அந்த கடைசி நிமிடத்திலும் அவர் முழக்கமிட்டது, ஒரு போதும் நான் கைதியாகப் போவதில்லை. எனது சொத்துக்கள் அனைத்தும் கட்சிக்கும், அப்படியில்லையேல் நாட்டிற்க்கும் என்று உயில் எழுதியதோடு, மக்களுக்கும் ஓர் சாஸனம் எழுதினார். இந்த போர் என்னால் ஏற்பட்டதில்லை, யூதர்களால் மட்டுமே என்று கடைசி தருவாயிலும் முழக்கமிட்டார் என அழகாக முடிகிறது இந்த புத்தகம்.

ஓர் கலைஞன், கலை ரசிகன், நல்ல பண்பாளனின் பயணம் எப்படி மாறிப் போனது என்பதை அழகாக விவரிக்கிறது இந்த புத்தகம். தனது கடைசி நொடியிலும் தன் அம்மாவின் புகைப்படத்தினை கட்டிப்பிடித்தப்படி தற்கொலை செய்து கொண்டவர், பெண்களின் மேல் மிகுந்த மரியாதையை வைத்திருந்தவர். அவரின் யூத வெறுப்பு மற்றும் வெறி அவரின் வாழ்க்கைப் பாதையினை மாற்றியமைத்தது. ஒரு வேளை அவர் தனது முதல் 5 ஆண்டு கால ஆட்சிகாலத்தில் இறந்து போயிருந்தால், உலகம் ஓர் சாதனையாளராக அவரை போற்றியிருக்கும். எண்ணற்ற கண்டுபிடிப்புகள் அந்த காலத்தில் தான் ஜெர்மானியர்கள் செய்யப்பட்டது. வோக்ஸ்வேகன் கார் ஓர் சிறந்த உதாரணம்.

காலம் தான் எப்படி விளையாடுகிறது ஒவ்வொருவரின் வாழ்க்கையிலும். ஓர் கலைஞன் இன்று ஒரு கொடுங்கோலனாகவும், ஈவு இரக்கமற்ற மனிதராகவும் சித்திகரிக்கப்படுகிறார்.

சரி இவரின் வாழ்க்கைப் பயணத்தினைப் பார்த்த நாம், இவரின் கையெழுத்துப் பயணத்தினையும் பார்ப்போம்.

தொடக்க காலத்தில் அவரின் கையெழுத்து ஏதோ தேடலில் இருந்தாலும், மனதில் இனம் புரியாத ஓர் சோகத்தினை கொண்டிருந்தது. அது அவரின் ஆரம்ப கால அல்லது இளமை கால சோகமான வாழ்க்கை முறையினால் ஏற்பட்டதாக கூட இருக்கலாம். அவரின் 12 ஆண்டுகால ஆட்சி கால கட்டத்தில் அவரின் கையொப்பத்தினை பார்த்தால், எளிதாக விளக்க முடியும். அவரின் கையெழுத்து மாறுபட்டுக் கொண்டேயிருந்தது. அது அவரின் எண்ணங்களின் பிரதிப்பலிப்பு. உயிரோட்டமிகுந்த அவரின் எழுத்துக்களில் உயிர் குறைந்து கொண்டே போனது பிற்காலத்தில். அவர் தன்னை கொஞ்சம் கொஞ்சமாக யூதப்போரில் பலியிட்டுக் கொண்டிருந்தார். தெளிவான கையெழுத்து அவரின் இறுதி கட்டத்தில் அவரின் தற்கொலை நாள் அன்று வெறும் புள்ளியில் முடிகிறது. மனதின் ஓட்டம், ஆட்டம் எவ்வாறெல்லாம் அவரின் கையெழுத்தில் பிரதிப் பலிக்கிறது என்பதை நன்கு காண முடிகிறது.

இன்னொரு நாளில் இன்னொருவரின் கையெழுத்தினை நாம் ஆராயலாம். நன்றி, வணக்கம்.

அவனும் அப்படித்தான்....

2019-08-17T10:46:00.001+05:30

அந்தி சாயும் பொழுது, அனைத்து பறவைகளும் தத்தம் கூட்டினை நோக்கிப் பயணிக்க, எங்கோ ஓர் பறவை அந்த வானுயர்ந்த கட்டிடத்தின் விட்டத்தில் அமர்ந்து யாருக்கோ, எதற்கோ கூவிக் கொண்டிருந்தது. அதன் கூக்குரலை யார் கேட்டரோ தெரியவில்லை, நான் கேட்க வேண்டியதாயிற்று. அந்த கட்டிடத்தில் தான் நான் தேடி வந்தவர் இருந்தார். அவர் என்னை மொட்டை மாடியில் நிற்க வைத்து விட்டு, இதோ வருகிறேன் என்று சென்றவர். வரவில்லை, காத்திருக்கிறேன். இப்போது கேட்டிக் கொண்டிருக்கிறேன்.

சுற்றி சுற்றி பார்க்கிறேன், அந்த பறவையின் கூக்குரல் கேட்டு எங்கிருந்தாவது யாரும் வருகிறார்களா என்று.
யாரும் வரவில்லை. எந்த திசையிலும் எதுவும் இந்த கட்டிடத்தினை நோக்கி எதுவும் வருவதாகத் தெரிவதில்லை.

மறுபடியும் பறவையினை நோக்கினேன். அப்போது தான் அந்த பறவையினை உற்று கவனித்தேன். ஆம், அந்த பறவையின் காலில் ஏதோ மாட்டிக் கொண்டிருந்தது. அது பறக்க முடியாமல் அந்த இடைஞ்சலால் தடுமாறிக் கொண்டிருந்தது.
தொடும் தூரத்தில் இல்லை அது, ஆனால் தொடக் கூடிய தூரத்தில் தான் இருந்தது. முயற்சித்தால் தொட்டு விடலாம்.

சரி, பிறகு எதற்காக வான் நோக்கி கரைகிறது. உதவி கேட்டா? பாவம் அதற்கு தெரியாது, இந்த மனிதர்கள், வடிவேல் சொன்னது போல், ””புறா தின்றதுக்கு போரா, ஒரே அக்கபோரா இல்லை இருக்கு””, என்று தங்கள் பாதையில் வேகமாக பயணித்து கொண்டிருந்தார்கள். நிச்சயமாக ஒரு பறவையின் குரல் அவர்களுக்கு கேட்டிருக்காது. மனிதர்களின் அவலமே கேட்காத பொழுது எப்படி இவர்களுக்கு அந்த பறவையின் குரல் கேட்கும். அந்த அலறல் சப்தம், மகிழுந்துகளின் சத்தத்தில், மக்களின் கூக்குரலில், ஆர்ப்பரிப்பில், அழுகுரலில், காற்றின் போக்கில் கரைந்து கொண்டிருந்தது.
இவன் உதவி செய்ய முடிவுசெய்தான், ஆனால் என்ன செய்ய என்று தெரியவில்லை.

அதன் குரல் இவனை என்னவோ செய்தது, எதையோ இழந்ததைப் போல் இவன் உணர்ந்தான்.
இவன் பறவையினை நோக்கி நகர்ந்தான். இவன் அந்த கட்டிடத்தின் உயரத்தில் இருந்தான். அந்த கட்டிடம் எப்படியும் 125 அடிக்கு மேலே இருக்கும். அங்கிருந்து நோக்கும் போது எப்படியும் அந்த நகரத்தின் பெரும் பகுதி அவன் கண்களுக்கு விருந்தாகியது. அந்த நகரத்தின் அழகை அவன் ரசித்துக் கொண்டிருக்கும் போது தான் அந்த பறவையின் குரல் கேட்டது. என்ன பறவை என்று தெரியாது. ஆனால் அதன் குரல் அவனுக்கு வலித்தது.

அந்த நகரம் உயரத்தில் இருந்து பார்க்கும் போது அழகாக இருப்பது போல் தோன்றியது. மனிதர்கள் எறும்புகளைப் போல் ஊர்ந்து கொண்டிருந்தார்கள், கட்டிடங்கள் எல்லாம் தீப்பெட்டிகள் போல அடுக்கப்பட்டிருந்தன. சாயும் சந்தி ஆகையால், விளக்குகள் ஜொலித்துக் கொண்டிருந்தன.....

அவன் அந்த பறவையின் அருகில் வந்து விட்டான். ஆகா, புறா அந்த கட்டிடத்தின் உயரத்தில் இருந்து கத்திக் கொண்டிருந்தது. ஏதோ வீட்டின் சாளரத்தில் இருந்த பொருளை தின்ன சென்றிருக்கும் போது அதன் கால்கள் அந்த நெகிழி பையில் மாட்டிக்கொண்டிருக்க வேண்டும். அதோடு பறந்து அந்த புறா அந்த கட்டிடத்தில் வந்து அமர்ந்து அந்த உணவைக் கொத்தி தின்றிருக்க வேண்டும். காற்றின் வேகத்தில் அந்த நெகிழி பை அதன் கால்களில் மாட்டியிருக்க வேண்டும். இப்போது அதனால் பறக்க முடியாமல் அந்த கால்கள் அந்த நெகிழி பையினால் கட்டப்பட்டிருக்க வேண்டும். அதனால் அதை எடுக்க முடியவில்லை. முயன்று தோற்றதில் அதற்கு வேறு வழி தெரியாமல், கத்த ஆரம்பித்துவிட்டது.

அவனும் அப்படிதான், விடாமல் முயற்சிப்பான், ஒரு கட்டத்தில், ஏதேனும் சிக்கலில் மாட்டும் பொழுது,அதை விடுவிக்க முடியாமல் திணறும் பொழுது, அவன் தன் நம்பிக்கையினை இழப்பான், பின்னர் கொஞ்ச கொஞ்சமாக தன்னை முற்றிலும் தோற்றதாக நினைத்து, அவல குரல் எழுப்ப ஆரம்பிப்பான். அவன் அழுகை அவனுக்கே சில நேரம் எரிச்சல் அளிக்கும். இருந்தும் அழுவான். ஒரு சில நொடிகள் அவன் தொடர்ந்து முயற்சித்திருப்பானே ஆனால், அவன் அந்த சிரமத்தினை முற்றிலும் தோற்கடித்திருப்பான். ஆனால், அவன் இயலாமை, ஆற்றாமை, நம்பிக்கையின் தோல்வி, அவனை பின் வாங்க வைத்து, அவனை எரிச்சலூட்டி, அவனையே அது விழுங்கி விடுகிறது அந்த கோர எண்ணங்கள்.
அதை போல அந்த பறவை, அதன் அலகினால் நெகிழி பையினை கிழித்து குதறியிருக்கலாம், ஆனால் அதன் முயற்சி பறப்பதில் இருந்ததால், அதன் கால்களை அசைக்க முற்பட்டுக் கொண்டிருந்ததால், இந்த சிந்தனை வரவில்லை. விடா முயற்சிக்குப் பிறகு, அது உதவியினைத் தேடுகிறது.

துக்கத்தின் விளிம்பில் இருக்கும் அந்த பறவைக்கு இவன் உதவ முன் வந்தான். அவனுக்குத் தெரியும் என்ன செய்தால், அந்த பறவை பறக்க முடியுமென்று.

இவன் அருகில் வரவர அது பயந்து ஆக்ரோஷமாய் கூக்குரலிட்டது. எல்லா மனிதர்களைப் போல் இவனும் இருந்துவிட்டால் என்ன செய்ய. அதன் உருவம் அருகில் வரும்போது பார்த்தான், நல்ல பெருத்து அழகாய் வளர்ந்திருந்தது அந்த புறா. ஒருவேளை மாமிசம் உண்ணும் பழக்கமிருந்தால், அவன் வீட்டில் மறுநாள் புறாவிருந்தாயிருக்கும்.
அமைதி புறா, அவன் அருகில் வந்தவுடன் தள்ளி தள்ளி போனது. இவன் அதனால் பறக்க முடியாது என்பதை உணர்ந்து, அதன் அருகில் சென்று, அந்த நெகிழி பையினை கால் இடுக்குகளிலிருந்து எடுத்து விட்டான். இப்போது புறா தன் இறக்கைகளை அழகாய் விரித்து மகிழ்வாய் பறந்தது.

அது ஒரு முறை இவன் இருக்கும் திசை நோக்கி தன் சிறகுகளை மகிழ்வோடு இசைத்து அம்சமாய் பறந்தது. அந்த பறவையின் மகிழ்ச்சி இவனுக்கு மகிழ்ச்சியூட்டியது. இவன் உணர்ந்து கொண்டான், கொடுப்பதில் தான் மகிழ்ச்சி, எதைக் கொடுக்கிறோம் என்பதில் இல்லை, எதைக் கொடுத்தாலும் மகிழ்வாக கொடுக்க வேண்டும்.
அவனும் அப்படித்தான், அன்று அந்த அதிகாரி அவனுக்கு அந்த அரிய வாய்ப்பினைத் தராமல் போயிருந்தால், அவர் எப்படி பட்டவராயினும், அந்த காலத்தில் அவனுக்கு செய்த அந்த செயல்/உதவி, அவனை இந்த நிலைக்கு உயர்த்தியிருக்கிறது. அவர் திசை நோக்கி நன்றி செலுத்தினான். அவரும் மேலே வந்துக் கொண்டிருந்தார்....

சூரியன் தன் அழகான அஸ்தமனத்தினை அரங்கேற்றி முடித்திருந்தது, அந்த அழகிய நிலா வான வீதியில் உலா வர ஆரம்பித்திருந்தது, இன்னொரு விடியலைத் தேடி....

கர்ணன் - பாகம் 4

2016-09-11T01:13:00.003+05:30

செஞ்சோற்றுக் கடன் தீர்க்க வஞ்சத்தில் வீழ்ந்தானே கர்ணன் அவனே இந்த பாகத்தின் நாயகன்.

ஒவ்வொருவரும் ஏதேனும் ஒரு காரணத்திற்காக மட்டுமே இந்த யுகத்தில் பிறந்து வந்திருக்கிறோம். ஒவ்வொரு ஆன்மாவும் ஏதோ ஒரு ஆசையினைத் தன்னுள் சுமந்து அதற்கு ஒரு உருவத்தை தேடிக் கொள்கிறது. அந்த ஆசை ஒவ்வொரு உருவம் எடுக்கும் போது அத்தோடு நில்லாமல், புது புது ஆசைகள் பிறந்து அந்த உருவமெடுப்பு தொடர்கிறது. ஒரு கட்டத்தில் அந்த ஆசை முடிவிற்கு வரும் போது அந்த ஆன்மா பெருமாளின் திவ்ய பாதுகையில் சரணடைகிறது. ஆனால் அதற்குள் அந்த ஆன்மா அற்ப ஆசையில் சிதறி காலப்போக்கில் பல்வேறு உருவமெடுத்து ஒவ்வொரு உருவத்திற்கும் பல்வேறு செயல்களைச் செய்து அதற்கேற்றார் போல் பாவங்களையும் சேர்த்து விடுகிறது.

தனக்கு அளிக்கப்பட்ட அந்த அபூர்வசக்தியினைப் பரிசோதிக்க நினைத்த குந்தியின் காரணத்தால் உருவான கர்ணன் நீரோடையில் ஆதரவின்றி அனுப்பபடுகிறான். சஹஸ்ரகவசனாகப் பிறந்தவன் தன் 999 கவசங்களை இழந்து மீதமிருந்த ஒரு கவசத்துடன் கர்ணனாக அவதரித்தவன் தன்னுள்ளே அத்தனைச் சக்திகளையும் கொண்டுமிருந்து தேரோட்டி மகனாக வளர வேண்டியது தான் அவன் ஆன்மா எடுத்த ரூபத்தின் விளைவு. அந்த ஆன்மா ஓர் உயர்குலத்தில் உருவமெடுத்தும் அந்த ஆன்மாவின் முற்பிறவி ஆசை தொடர்ந்தமையால் இப்பிறப்பில் தேரோட்டி மகனாக வளர்ந்து துரியோதனனின் அரவணைப்பில் உய்க்க வேண்டியது ஆனது.
கர்ணன் தான் தேரோட்டி மகன் என்று துயரம் கொள்ளாமல், அன்றைய தேதியில் அந்த குலத்திற்கு இடப்பட்டிருந்த தேர் பராமரிப்பு வேலையில் மட்டும் தன்னை ஈடுபடுத்திக் கொள்ளாமல் தன்னை பல்வேறு நிலையில் உயர்த்திக் கொள்கிறான். பிறப்பால் அரசமைந்தன் ஆனாலும் வளர்ப்பால் திருதாஷ்ட்ரன் அரண்மனையில் பணிபுரியும் அதிரதன் என்ற தேரோட்டியின் மகனாக வளர்க்கப்படுகிறான். ராதேயன் எனும் கர்ணன் அரசமைந்தர்கள் கற்கும் வில்வித்தை, மல்யுத்தம் போன்றவற்றை தானும் கற்று, தேரோட்டி என்ற நிலையிலிருந்து தன்னை உயர்த்திக் கொண்டு அந்த அரசமைந்தர்களுக்கே ஒரு காலத்தில் சவால் விடும்படி உயர்கிறான்.

கர்ணன் தான் கொண்ட கொள்கையின் பிடிவாதத்தால் தான் இன்றளவும் பேசப்படுகிறான். அவன் பிறவியின் நோக்கமே பூமியில் சமநிலை நிறுவ தானாம். அந்த காலத்தில் சத்திரியர்களின் ஆளுமை நிறைந்திருந்தமையால் பிறர் கஷ்டமான வாழ்வை வாழ வேண்டிய கட்டாயம் இருந்ததாம். இந்த சூழ்நிலையால் தான் கர்ணன் தேரோட்டி மகனாக வளர்ந்தாலும் அரசர்களைப் போல் எல்லா துறையிலும் தன்னை தயார்படுத்திக்கொண்டு ஓர் அரசகுமாரனாகத் திகழ்ந்தானாம். கர்ணன் பிறப்பிலே அந்த சத்திரியர்களின் அழிவு நிச்சயிக்கப்பட்டு விட்டது. இந்த பாரதப்போரில் துரியோதனின் சார்பாக போராடியவர்கள் மட்டும் உயிரிழக்கவில்லை, பாண்டவர்களின் சார்பாக போரிட்டவர்களும் உயிரிழந்தார்கள். இதனால் தான் உயர்ந்தவர்கள், தன்னை அழிக்க முடியாது மார் தட்டிக் கொண்டிருந்தவர்கள் எல்லாம் உயிரிழக்க வேண்டியதாகி விட்டது. பூமியின் பாரம் சமநிலைக்கு வந்ததாம்.எதுவும் நிரந்தரமில்லை. எதுவும் உயர்ந்தது தாழ்ந்ததுமில்லை என்று உணர்த்தவே படைக்கப்பட்ட ஓர் அற்புத உயிர் தான் கர்ணனின் பிறப்பு. வெற்றி தோல்வி என்பது என்று எதுவும் கிடையாது. ஓங்கி உயர்ந்த பற்றற்ற நிலை தான் புத்த நிலை, அந்த நிலையினை எவன் ஒருவன் அடைகிறானோ அவனே மற்றவர்களைக் காட்டிலும் உயர்ந்து நிற்கிறான். நான் என்றும் தான் என்றும் தன்னுடையதைப் பிறரிடம் பகிரும் போதும் சரி, பிறரிடம் பகட்டாக எடுத்துக் காட்டும் போதும் சரி, “நான்”, தான் அழிவிற்கு வித்திடப்படுகிறது. எப்படிகைகேயி தான் பெற்ற வரத்தை மந்தரை எனும் தாதியிடம் சொன்னாளோ அன்றே ராம அவதாரத்தின் நோக்கம் செயல்படத்துவங்கியது, அதே போல் என்று குந்தி தனக்குப் பிறந்த கர்ணனை ஆற்றில் விட்டாளோ அன்றே கிருஷ்ண அவதாரம் நோக்கம் செயல்படத்துவங்கியது. குந்தியின் அவசரம், மந்திர துஷ்பிரயோகம், பிறகு குழந்தையினை மறைக்க துவங்கியது, ஆற்றில் நிராதராவாய் விட்டது, அதே அத்தோடு மறந்தது, பாண்டுவிடம் அதை மறத்தது என்று ஒவ்வொரு காரியங்களும் தொடர்ந்து இறுதியில் கர்ணனிடமே இரண்டு வரங்கள் கேட்ட வரை குந்தி கர்ணனுக்கு அந்த அரசகுமாரன் எனும் உயர்பதவியைக் கொடுக்கவில்லை. ”தான்” எனும் அகங்காரத்தில் சஹஸ்ரகவசனாக முற்பிறவியில் அலைந்த கர்ணன், மறுபிறவியில் தான் யார் மைந்தன் என்று அறியாமலே காலத்தினை நடத்த வேண்டிய கட்டாயம் ஆனது. எதுவும் நிரந்தரமில்லை, நிச்சயமுமில்லை. ஒன்றில் லயித்து அதில் தன்னை மறந்து இப்பூவுலகில் மக்கள் புரியும் காரியங்களை நினைத்து பார்க்கும் போது மனம் வேதனையடைகிறது. கர்ணன் யார் மகன் என தெரியாவிட்டாலும், தான் வளர்ந்த இடத்திலும் சரி, தன்னை மதித்து உயர்வு கொடுத்த துரியோதனனிடமும் சரி அவன் செய்கையில் எந்த பற்றுமில்லாமல் கடைசிவரை அந்த உன்னத நிலையினைக் கடைப்பிடித்தான். தன் கவசத்தை இந்திரன் கள்ளத்தனமாக கவர்ந்த போதும் சரி, தனக்கு கற்றுவித்த பரசுராமர் சாபமிட்ட போதும் சரி, தன் அன்னை குந்திதேவியே இரண்டு வரங்கள் பெற்ற போதும் சரி, தான் அழியப் போவது நிச்சயம் என்று தெரிந்தும் தான் கொண்ட கொள்கையில் தன் நண்பனுக்காகப் போராடினான். அதுவே பற்றற்ற நிலை. உயிர் மீதும் சரி, தான் பெற்றிருந்த அபூர்வசக்தியின் மீதும் சரி, தன் அன்னை என்று தெரிந்தும் அவரிடம் செல்லாமல், தன் சகோதரர்கள் என்று தெரிந்தும் பாணடவர்களின் மீது உக்கிர போர் புரிந்த போதும் சரி, கர்ணன் தான் வந்த நோக்கத்தைச் செவ்வனே செய்தான்.

ஒரு முறை கர்ணனா, தர்மரா யார் சிறந்தவர் தானத்தில் என்று சந்தேகம் வந்ததாம் அர்ஜூனனுக்கு. அவன் கிருஷ்ணரிடம் கேட்ட போது, அவர் சமயம் வரும் போது உனக்கு காட்டுகிறேன் என்று சொன்னாராம். ஒரு மழை காலம் வந்த போது, இருவரும் அந்தணர்கள் போல் வேடமிட்டு தருமரிடம் தாங்கள் வேள்வி வளர்க்கப்போகிறோம் அதற்கு சந்தன கட்டைகள் வேண்டுமென்றார்களாம், அதற்கு தருமர் இது கார் காலம், இப்போது முடியாது, வேறு என்ன வேண்டும் என்றாராம். அவர்கள் உடனே கர்ணனிடம் சென்று கேட்ட போது, தன் அரண்மனையில் இருந்த உத்திரங்களை அறுத்தும், வில்லையும் அம்பையும் உடைத்தும் அதன் மூலம் சந்தன கட்டைகளைக் கொடுத்தானாம். ஈதல் என்பது எண்ணத்தின் விளைவு. ஆதலால் கொடையில் சிறந்து வழங்கிய கர்ணனின் உயர்ந்த எண்ணத்தைப் போல் நாமும் நம் எண்ணங்களைச் செம்மையாக்குவோம். ஆக்குவோமாக.

--- தொடரும்

கர்ணன் - பாகம் 3

2016-09-11T01:08:00.002+05:30

எண்ணங்களே வலிமையானவை. எப்படி எண்ணுகிறோமோ அப்படியே நிறைவேறுகிறது. ஒருவன் தனது அற்புத எண்ணத்தால் வலிமை மிகுந்த அமெரிக்காவின் ஜனாதிபதியாக வேண்டுமென்றாலும் அவனால் நிச்சயம் ஆக முடியும். அத்தகைய வல்லமை மிக்க எண்ணத்தினை துச்சமான சில காரியங்களில் லயித்து சுகித்து ஓர் அற்புத பிறவியினை இழத்தல் நீதியாகுமோ?

ஒவ்வொரு மனிதனும் ஒரு அற்புத ஆற்றலைத் தன்னிலையில் நிறுத்தி வைத்திருக்கிறான். சரியான சந்தர்ப்பம், சூழ்நிலை வரும் போது அதனைப் பயன்படுத்துவானேயானால் அவனை வெல்லுவது மிகக் கடினம். அத்தகைய ஆற்றலினை எதற்கு பயன்படுத்தப்போகிறோம் என்பதைப் பொறுத்தே அவனது செயலுக்குப் பயன் விளைகிறது. நல்வழியில் செலுத்தப்படும்போது அது அவனை மட்டுமேயன்றி பிறருக்கும் பயன் தரவல்லது. அதே தவறான முறையில் பயன்படுத்தப்படும் போது, அது அவனை மட்டுமன்றி அவனை சுற்றியிருக்கும் மாந்தர்களையும் அழிக்கவல்லது. ஆகையால் நாம் ஒவ்வொருவரும் எப்படி நம் ஆற்றலைப் பயன்படுத்துகிறோம் என்பது முக்கியமாகிறது.

முற்பிறவியில் சஹஸ்ர கவசனாகப் பிறந்த கர்ணன், சூரியனை நோக்கி கடும் தவமிருந்து சஹஸ்ர கவசத்தைப் பெற்றானாம். நர நாராயணர்கள் தோன்றி 999 கவசங்களை அழித்தனராம். எதற்குமே பயமின்றி துர் செயல்களைப் புரிந்து வந்த சஹஸ்ர கவசன் 999 கவசங்களை இழந்த பின் தன்னிலை மறந்து, பயந்து மறுபடியும் சூரியனிடம் தஞ்சம் அடைந்தானாம். அப்படி தஞ்சமடைந்த போது, நர நாராயணர்கள் சஹஸ்ரகவசனை ஒப்படைக்கும்படி சூரியனிடம் கேட்டார்களாம், அப்போது சூரியன் தன்னை நம்பி வந்தவர்களை எப்படி ஒப்படைப்பது என்று சொன்னாராம். அப்போது நாராயணர் சாபமிட்டாராம், நீ மானுடனாகப் பிறக்க கடவாய் என்று. அப்படி சாபமிட்டமையால் குந்தி தேவிக்கும் சூரியனுக்கும் மகனாகப் பிறந்தானாம் கர்ணன் அந்த பாக்கியிருந்த ஒரு கவச குண்டலத்துடன், இப்படிச் சொல்கிறது நாரதர் கதைகள்.

மந்திரங்களும் தந்திரங்களும் விளையாட்டாகப் பயன்படுத்தப்பட்டால் வரும் விளைவுகள் என்ன என்பதை எடுத்துக் காட்டாக வந்த பிறப்பாகிப் போனது தான் கர்ணனின் பிறப்பு. பிறப்பால் ராஜ வம்சத்தில் பிறந்தாலும், முற்பிறவியில் செய்த தீய செயல்களால் ஒரு தேரோட்டியின் மகனாக வளர்ந்து, எல்லோர் மத்தியிலும் தாய் தந்தை அறியா பிள்ளை என இழி பெயர் பெற்று, அதனை உடைத்தெறிய தன்னையே வளர்த்துக் கொண்ட ஓர் அற்புத பிறவி தான் கர்ணன்.

எத்தனை பேர் இழிவாகப் பேசினாலும், தான் கொண்ட கொள்கையில் ஓர் இம்மி அளவும் பிசகாமலும், தான் கொண்ட இந்த பிறப்பை ஓர் அற்புத படைப்பாக ஆக்க வேண்டும் என்ற உன்னதம் தான் அவனை கொடை வள்ளலாக்கி உயர்வுற செய்தது.

ஒரு கை கொடுப்பதை மறு கை கூட அறியாவண்ணம் கொடுத்து கொடுத்து சிவந்த கரங்கள் என்று சொல்வார்களாம். ஆனால் இன்றோ தன்னிலை மறந்து, தன் நியதி மறந்து, தான் செய்ததை விலை பேசும் மாந்தர்கள் கூட்டத்தில் நாம் வாழ்ந்து வருகிறோம் என்பதை நினைத்து மனம் வருந்துகிறது. கொடை குணம் மலிந்து போட்டி, பொறாமை மிகுந்து ஒவ்வொரு மனிதனும் தன்னை உயர்த்திக் கொள்ள பிறரை வஞ்சிக்கும் குணம் தான் வளர்ந்து கொண்டே போகிறது.

கண்ணன் கீதையில் சொன்னது போல், என்ன கொண்டு வந்தாய், எதை நீ இழப்பதற்கு. இங்கு இழப்பதற்கு ஒன்றுமில்லை. எதுவுமே உன்னுடையதில்லை. இன்று இருப்பது போல் தோன்றும் ஒவ்வொன்றும் நாளை இருக்கப்போவதுமில்லை.

கடமையைச் செய், பலனை எதிர்பாராதே. அந்த அற்புத வரிகளின் நிதர்சனமான நாயகன் தான் கர்ணன். அவன் துரியோதனின் அன்பில் வயப்பட்டு, அவன் தன்னை அங்க தேசத்தின் அரியாசனத்தில் அமர்த்திய போதும் சரி, அவனுக்காக போரில் உயிர் துறந்த போதும் சரி, கர்ணன் தன் கடமையை விட்டு நூலளவும் விலகவில்லை, அதற்காக தன்னை அவன் வருத்திக் கொண்டதுமில்லை. கர்ணன் தன் வாழ்வை ஒரு வேள்வியாக்கி, பரந்தாமனே தன் விஸ்வரூபம் காட்டிய ஓர் அற்புத பிறவி கர்ணன்.

--- தொடரும்.

கர்ணன் - பாகம் 2

2016-09-11T01:04:00.003+05:30

ஒன்றைச் சுமந்து கொண்டு ஒன்றைத் தாங்கி வருவதே ஒவ்வொரு பிறவியும். ஒவ்வொருவரின் ஆன்மாவும் அலை போல் பாற்கடலில் அலைந்து கொண்டிருக்குமாம். அப்போது ஆன்மா முழுவதும் திருபாற்கடல் நாயகன் திருமாலின் அருட்பார்வையில் லயித்து சுகித்து இருக்குமாம்.

சில நேரங்களில் சில ஆன்மாக்கள் அந்த சுகித்த நிலையினைத் துறந்து அற்ப ஆசைக்கு மயங்கி ஓர் உருவம் எடுத்து உலகத்தில் ஜனிக்கும் என்று வேதவிளக்கம் கூறுகிறது.

அப்படிப் பட்ட அந்த ஆன்மா மறுபடியும் திருபாற்கடலில் வந்து கலந்து சுகித்திருக்க பல ஜென்மங்கள் ஆகும். அப்படி எடுக்கப்பட்ட ஓர் அற்புத பிறவி தான் நாமெல்லாம். ஆனால் இதை புரியாமல், தாங்கள் உயர்ந்தவர் என்றும் பிறரைத் தாழ்ந்தவர் என்றும் அற்பமான முறையில் சித்தரித்து இவர்கள் புரிந்திடும் திருவிளையாடல்களைப் பார்க்கும் போது நிச்சயம் சிரிக்கத் தான் தோன்றுகிறது.

எப்படி பிறந்தாலும் இப்பிறவியில் மனிதனாகத் தோன்றியதன் மகத்துவம் உணர்ந்து, ஆறறிவு ஜீவன் எப்படி செயல்பட வேண்டுமோ அப்படி செயல்பட மறுப்பது கேலிக்கூத்தாக்குகிறது அவர்கள் பிறவியின் பயன்கள்.

அப்படித் தான் கர்ணன் தன் முற்பிறவியில் ஓர் சஹஸ்ர கவசம் கொண்ட ஓர் அரக்கனாகப் பிறந்தானாம். அவனை அழிக்க வேண்டுமென்றால் அவன் அணிந்துள்ள 1000 சட்டைப் போன்ற கவசங்களை அழித்து அதன் பிறகு அவனை அழிக்க வேண்டுமாம். அப்படி வரம் பெற்று அவன் செய்த அட்டகாசம் நிறைய. எல்லா தேவர்களும் நாராயணனிடம் முறையிட அவர் நரனாகவும் நாராயணராகவும் அவதரித்து, நரர்கள் 12 ஆண்டுகள் கடும் தவம் செய்தனர், அந்த தவத்தின் மகிமையால் நாராயணர் அரக்கனோடு போரிட்டு அவன் ஒரு கவசத்தை அழித்தாராம். இப்படியாக 999 கவசங்கள் அழித்து முடிக்கும் போது அந்த யுகம் முடிந்து பிரளயம் வந்ததாம், அடுத்து வந்த யுகத்தில் கர்ணன் அந்த மீதியிருந்த ஒரு கவசத்தோடு அவதரித்தானாம். அத்தகைய கர்ணனை அழிக்கவே நர ரூபத்தில் அர்ஜூனனாகவும், கிருஷ்ணன் ரூபத்தில் நாராயணனும் அவதரித்தாராம். 12 ஆண்டுகள் வனவாசம் தான் அந்த 12 ஆண்டுகள் கடும் தவமாம்.

இப்படி சொல்கிறது நாரதர் கதைகள். என்ன செய்தாயோ அது இங்கேயே விட்டுச் சென்று அதை வேறொரு ரூபத்தில் நீயே எடுத்துக் கொள்ளப் போகிறாய். அப்படியிருக்கும் போது ஏன் மனிதா! உனக்குள் இத்தனை பேதங்கள், தான் என்ற திமிரும், தன்னை மிஞ்சி யாருமில்லை என்ற எகத்தாளம்.

உன்னை மிஞ்சி யாருமில்லை என்று எண்ணாதே. உனக்கு முன் தோன்றிய எத்தனையோ தலைமுறை இப்போது இல்லை. அவர்கள் ராஜா ஆகவும், மந்திரியாகவும், வீரராகாவும், மதியுகி மந்திரியாகவும் இருந்திருக்கலாம், ஆனால் இன்று நீ மனிதன் தான். அதை உணர்ந்து கொள். உன் பிறப்பும் அடுத்தவரின் பிறப்பிற்கும் மிகப்பெரிய வித்தியாசமில்லை. அவர் அவர்களின் விருப்பத்திற்கேற்ப எடுத்துக் கொள்ளப்பட்ட ரூபம் தான் இந்த ரூபம்.

ஒன்றிலிருந்து தான் மற்றொன்று தோன்றுகிறது. அதை உணர்ந்து செயல்படுங்கள். நீ எதை செய்கிறாயோ அதன் பயனைத் தான் அனுபவிக்கிறாய். நீ சுகித்திருக்க உன் உழைப்பைக் கொடுத்தாயானால் மட்டுமே நீ சுகித்திருப்பாய், அதை விடுத்து நான் உழைக்கும் தருணத்தில் சுற்றித் திரிவேன் ஆனால் அறுவடை நேரத்தில் மட்டும் வந்து நெல்கதிர்களை அள்ளிச் செல்வேன் என்றால் முடியுமா? யார் உழுவது, யார் விதைப்பது, யார் பராமரிப்பது, யார் நீர் பாய்ச்சுவது, யார் உரமிடுவது, யார் கதிர் அறுப்பது. இத்தனையும் செய்யாமல் அரிசி உணவருந்த முடியுமா?, சிந்தியுங்கள்.

நாம் நெல் விதைத்தால் வேறு முளைக்கப்போவதில்லை. அது போலத் தான் என்ன எண்ணத்தை விதைக்கிறோமோ அதை மட்டுமே அறுக்கப் போகிறோம். முற்பிறவியில் அசுரனாக அவதரித்த கர்ணன், கொடை வள்ளலாகத் திகழ்ந்த போதிலும், அவன் அந்த பிறவியில் அழியாமல் பிரளயத்தின் மகிமையால் அந்த பிறவியினை மறுபிறப்பில் தொடர்கிறான், அவனுடைய எண்ணங்களும் சேர்க்கையின் பயனால் கடுமையாக்கப்படுகிறது. பாண்டவர்களின் மூத்தவனாகப் பிறந்து அவனே அவர்களை எதிர்க்கும் வண்ணம் இந்த பிறவி அமைகிறது.

உங்கள் முற்பிறப்பை அறிய வேண்டுமானால், இந்த பிறப்பின் உங்கள் எண்ணங்களை அலசுங்கள், அதுவே உங்களைப் பற்றிய உண்மையினைச் சொல்லிவிடும். உங்களை உள்நோக்கிப் பாருங்கள், நீங்கள் எடுத்து வந்த இந்த பிறப்பு புரியும். எதற்காகத் தோன்றினோம் என்று புரியும். மனம் சஞ்சலமிடும், ஒரு நிலை படுத்த முடியாமால் தடுமாறும். நாம் குரங்கிலிருந்து பரினாம வளர்ச்சியில் தோன்றியவர்கள் என்பது ஒவ்வொரு முறையும் உணர்த்தப்படும். தாவி திரியும் மனதை ஒரு நிலைப் படுத்துங்கள். உள் நோக்கிப் பாருங்கள், நீங்கள் தெளிவாகத் தெரிவீர்கள். அமைதியாக உள் நோக்கும் போது அலை இருக்காது, ஆர்பரிப்பு இருக்காது. உண்மை புரியும். வந்த நோக்கம் புரியும். நோக்குவோம்......

---- தொடரும்

கர்ணன்

2016-09-11T00:59:00.001+05:30

கர்ணன்

கூட்டமாய் வாழ்ந்து வந்தது ஒரு கூட்டம் அந்த பிரதேசத்தில். அந்த பிரதேசத்தில் நீர் மூன்று பங்காகவும், நிலம் ஒரு பங்காகவும் இருந்தது. அதன் பெயர் பூமி என்றும், அந்த யுகத்தின் பெயர் கலியுகம் என்றும் சொல்லப்பட்டு வந்தது.

அந்த கலியுகத்தில் காலம் காலமாக சொல்லப்பட்டு வந்த ஓர் கதையான இதிகாசம் தான் மகாபாரதம். வியாசரால் எழுதப்பட்ட ஓர் மகா காவியம். பல நெறிமுறைகளைச் சொல்லி தந்த இந்த இதிகாசம், காலத்தின் போக்கில் சில நெறிமுறைகள் இன்றைய முரண் பட்டிருந்தாலும், வலு குறையா ஒரு உன்னதம் என்று தான் சொல்ல முடியும்.

அந்த இதிகாசத்தில் ஒரு அருமையான கதாபாத்திரம் தான் கர்ணன். நம் நடிகர் திலகம் சிவாஜி கணேசன் தன் நடிப்பாற்றலால் பட்டித் தொட்டியெல்லாம் அந்த கதாபாத்திரம் சேர்ந்தடைய செய்தார் என்பது வரலாறு. நம் கதையின் நாயகனின் வாழ்க்கை வரலாறைப் பதிவு செய்ய இல்லை இந்த பதிவு, அதை மையப்படுத்தி இன்றைய சூழ்நிலையின் மனிதர்களும் மனிதமும் என்ற போக்கில் நடைப் பயில போகிறது இந்த பதிவு.

யாரும் யாரையும் நம்பி வருவதில்லை. யாருக்காகவும் இந்த உலகம் நிற்பதில்லை. தன்னை உயர்த்தி பிறரைத் தாழ்த்தி வாழ்ந்திட நினைத்த யாரும் வாழ்ந்ததாய் சரித்திரம் இல்லை. மறுபடியும், மறுபடியும் தனக்காக காத்திருக்கும் இறப்பை மறந்து, தான் மட்டுமே வாழப் போவதாய் எண்ணும் சிலர் செய்யும் விஷமமான பரீட்சைகள் அவர்களை விழுங்குமேயல்லாது மற்றாரை வீழ்த்த போவதில்லை.

செம்மைப் படுத்த வேண்டிய கல்வி இங்கு வியாபாரமாகி போய்விட்டது. கல்வி சிலருக்கு காலத்தின் போக்கில் வாய்க்கப் பெற்று விட்டது. அவர்களின் விதிபடி அது நடந்தேறிவிட்டது, அதற்காக உலகம் அந்த ஒருவரை சார்ந்து இருந்துவிட வில்லை. தான் என்றும் தனக்கு என்றும் இருந்தோர்கள் வாழ்ந்ததாய் சரித்திரம் இல்லை. எல்லாம் வல்ல இறைவன் பார்த்துக் கொண்டு தான் இருக்கிறான். அவன் பெயரில் நடத்தப்படும் இந்த நாடகம், ஒத்திகையன்றி அரங்கேற்றப்படுகிறது, அதுவும் தான் என்ற மமதையில், அகங்காரத்தில், தன்னிலை மறந்து, தான் தோன்றித்தனமாய் விளையாட்டு காட்டப்படுகிறது.

தகுதியற்றவர்கள் முன்னிலைப்படுத்தும் போது இந்த சூழ்நிலை ஏற்படுவது என்பது உலக உண்மையே. இது தெரியாமல் வஞ்சத்தில் வீழ்ந்து விட்டானே இந்த மனிதன். மனிதா, மனிதம் காண மிருகத்தில் தேடாதே, இங்கே பசு தோல் போர்த்திய புலிகள் நிறைய.

பாம்பு விஷம் தான் கக்கும் என்று தெரிந்தும், அதனோடு உறவு கொண்டால், உயிர் போகுமேயல்லாது உறவு வளருமோ. உலக நியதியும் மறந்து, எந்த வரைமுறைக்கும் கட்டுபடாமல் வாழ்தல் சரியாகுமோ.

அர்ச்சுனனுக்கு இணையாகப் போற்றப்பெற்ற கர்ணன் சேராத இடம் தன்னில் சேர்ந்து, அவர்களின் போக்கில் வாழ்ந்து, அவர்கள் செய்வது தான் நியாயம் என்று நினைத்து, உலகத்தின் நியதி மறந்து, அந்த செஞ்சோற்று கடன் தீர்க்க பலரின் வஞ்சத்தின் வீழ்ந்தானே. போரில் வெல்ல முடியா அவனை, அவன் உடலோடு ஒட்டியிருந்த கவச குண்டலங்கள் யாசிக்கப் பெற்று விட, அவன் குருவினாலே சபிக்கப் பெற்ற பாவியானதால் (சபித்தால் தான் குருவோ) சரியான நேரத்தில் அவனுக்கு பயிற்றுவிக்கப் பட்ட வித்தை மறந்தான், தாய் தந்தை யாரைன்று தெரியாமல் வளர்ந்து, ஓர் இக்கட்டான போர் சூழ்நிலையில் தாய் அறியப்பெற்று அவளுக்கு ஓர் வரம் கொடுத்து, அந்த வரத்தால் போரில் நிலை குலைந்தான், ஓர் அந்தணனின் சாபத்தால் தேரோட்டி சரியான நேரத்தில் கழண்று கொள்ள, எல்லாம் அறிந்த கண்ணன் கர்ணனின் தர்மத்தை யாசிக்க, நிராயுதபாணியான கர்ணனை வில்லாளன் வீழ்த்தினான். இது கதை.

--- தொடரும்

இங்கே எனக்காக என்னுயிரே????

2016-08-16T23:40:00.003+05:30

எங்கே யுமில்லாத காணாத காதலை

என்னைத் தேடும் உலகில்
உன்னைத் தேடும் ஜீவன் நான்
என்னுள் உன்னைத் தேடி தேடி
உன்னுள் நானே தொலைகிறேன்...

வந்தாயோ என் அருகில் நீ
தந்தாயோ உன் வாசம் தான்
வந்தாயோ கனவில் தான்
தந்தாயோ உன் நினைவும் தான்…

சிந்தையில் உனை நினைத்து
விந்தையில் லயிக்கிறேன் உயிரே
சிந்தையாய் வந்தாயோ தந்தாயோ
விந்தையாய் என் உயிரானாயோ….

காதலற்ற ஒரூயிர் நான்
காத்திருக்கும் காதல் பறவையானேன்
காதலாய் வருவாய் என
காத்திருக்கும் தூர தேசன் நான்…

மூச்சாய் இருப்பவளோ நீயென
முயற்சிக்கிறேன் முடியாத காதலை
மூச்சாய் நீயிருந்து பயணிக்க
முயற்சி திருவினையாகுமோ….

எங்கே நீயென வினாவோடு விடைக்காக
இங்கே நீவருவாயோ தருவாயோ
எங்கே யுமில்லாத காணாத காதலை
இங்கே எனக்காக என்னுயிரே????

ஒரு தலை காதல்

2016-08-16T23:40:00.000+05:30

ஒரு தலை காதல்

என்னைப் பார்த்து பார்த்து
என்னுள் மறையும் நேரம்
என் முன்னே நீ கடக்க
எனக்குள் ஏதோ மாயம் செய்தாய்…

நொடியில் மறைந்தாலும்
நொடிக்கொரு முறை உன்னைத் தேடி
நொடிமுள்ளை சபிக்கிறேன்
நொடியெல்லாம் உன் நினைவாக…

பார்த்தாய் சிரித்தாய் பேசினாய்
பார்த்து பார்த்து மாய்ந்து போனேன்
பார்க்காமல் மரத்துப் போனேன்
பார்க்க பார்க்க சளைக்காமல் நீ….

பேசும் ஒரு வார்த்தைக்கு
பேசாமல் மௌனம் காத்தேன் பலரோடு…

எனக்காக நீ தந்தது சிரிப்பு தான்
உனக்காக என்னையே தர காத்திருந்தேன்
உனக்குத் தெரியுமா
உன்னை நீ மறந்தாலும் நான் மறவேன்….

எப்படி முடிகிறது உனக்கு
என்னை இம்சித்துவிட்டு மனதார
எனக்கே தெரியாமல்
என்னுள் பயணம் செய்ய…

நான் மட்டும் ரசித்ததை
நான் மட்டும் சுவைத்ததை
நான் மட்டும் கேட்டதை
நான் மட்டுமே ரசிக்கிறேன் தனியாக….

நீ நான், நான் நீ
எத்தனை முறை எழுதியிருப்பேன்
எழுதும்போதெல்லாம் அருகில் இருந்தாய்
எழுதும் வரை ரசித்திருந்தாய்
எங்கே போனாயோ என் அருமை காதலே…

தூர போனாயோ தூரத்திற்கு போனாயோ
தூரமிட்டாலும் இன்றும் அருகிலே
தூக்கத்திலும் கனவாக பயணிக்கிறாய்…

இமைக்கும் நொடியில் சொல்ல நினைத்து
இதயத்தில் இறுதிவரை சுமக்கிறேன்
இன்பமாய் இருந்ததை
இருளில் புதைத்தேனே மனதோடு…

நண்பர்களே!!!
வேண்டாம் சொல்லாத காதல்
வேண்டாம் என்றாலும் சொல்லிடுங்கள்
வேண்டாததை சுமக்க வேண்டாமே….

ஒரு தலையாய் சுமந்து
ஒருவராய் மடிவதை விட
ஒவ்வொருவரும் பகிர்ந்திடுவோம் காதலை
ஒரு சாரர் சொந்தமல்ல காதல்

இலக்கற்ற பயணம்

2016-08-16T23:32:00.002+05:30

இலக்கற்ற பயணம் - ஓர்
இழிவான பயணம்..

தேடித் திரியும் பறவைகள்
தேடலில் சோர்வதில்லை
தேடியது கிட்டும் வரை
இலக்கின் நோக்கம் மாறுவதில்லை...

நீ யார்?
தேடிப்பார் தேடலில் கிட்டும்
விடையல்ல, இன்னும் பல
விடைதெரியா புதிர்கள்...

அன்னையர் தின வாழ்த்து

2016-08-16T23:25:00.002+05:30

கருவில் உருவாகி உயிரை உருவாக்கும்
கருவின் கருவே கண்ணே கண்மணியே
கருத்தாய் உனைவைத்து எழுத்தால் வருடுகிறேன்
கடவுள் நீயென உலகில் உணர்கிறேன்...

பத்து திங்கள் கருவில் சுமந்து
பஞ்சாய் உணர்ந்து பரிவாய் நினைந்து
பதார்த்ததிலும் பத்தியமிட்டு பாசமாய் உள்ளுக்குள்ளே
பரிவோடும் பரவசமோடும் உதிரமோடு உயிரிட்டு...

உள்ளேயே உருவமிட்டு ஆண்/பெண் வடிவமிட்டு
உறுப்புகள் ஒவ்வொன்றும் உன் வயிற்றுனுள்ளே
உல்லாசமாய் வளரவிட்டு சுதந்திரமாய் கட்டுக்குள்ளே
உறவாய் உன் உறுப்புகளோடு உலாவர....

மாதமோ பத்தானது உன்னைக் காண
மாதக்கணக்கில் தவமிருந்து மடியில் தவழ்ந்து
மாறும் உலகில் வெளிச்சமோடு இருளும்
மாறாத உன் உலகிலிருந்து காணவருகிறேன்...

எட்டி உதைத்த போதும் நகைத்தாய்
எள்ளி நகையாடிய போதும் நகைத்தாய் - உனை
எண்ணி நானிருக்க விக்கிட்டு நீரிட்டாய்
எப்படியிருப்பாய் நீயென ஆவலோடு வருகிறேன்...

நீ யாரென எனக்குத் தெரியாது
நீயோர் உயிரிட்டு உணவிடும் உத்தமன்(மி)
நீ என்னை ஈன்றெடுக்க உன்னைத் தந்தவள்
நீ எப்படியிருப்பாய் ஆவலோடு வருகிறேன்...

அந்த நிமிடம் வந்தது வெளிச்சமோடு
அணு அணுவாய் வெளியேறுகிறேன் உனைவிட்டு
அசுர வலியினையும் எனக்காகத் தாங்குகிறாய்
அயராமல் உனை வதைத்து வெளியேறுகிறேன்...

கண் கூசுகிறது நாசி நானுகிறது
கலைந்த உடல் உதிரமோடு வெளியேற
கருவறை சுகம் காற்றோடு மறைந்தது
கண்ணே, நீ தானா அந்த கடவுள்....

தாயே, அன்னையே, அம்மாவே
தரணியில் வந்துதுதிக்க வித்திட்டவளே
எப்படி சொல்வேனோ என்னவென்று சொல்வேனோ

என்னை வெளியிட
உன்னைக் கொடுத்த என்
அன்னையே - வணங்குகிறேன்
உன்னையே...

என் பார்வையில் கபாலி

2016-08-16T23:22:00.001+05:30

ரஜினியின் படம், என் ஆதர்ச கதாநாயகனின் படம். பல வருடங்களுக்குப்பிறகு திரையரங்கில் பார்த்த படம், நிச்சயம் பாராட்டுக்களே.

ஒரே பாடலில் பல கோடி அதிபதியாகாத படம். தொடங்கும் போதே மிரட்டலாய் காட்ட நினைத்த படம்.

எதையும் எதிர்பார்க்காமல் படத்தினைப் பார்த்தால் படம் சலிக்காது.

ஒரு வேகமான கதாப்பாத்திரத்திற்கு திரைக்கதையில் வேகம் கொடுத்தருக்கலாம்.
இன்றைய காலகட்டத்திற்கேற்ப ரஜினியும் மாற்றப்பட்ட படம், அவரின் அடுத்தப் படங்களில் வரப்போகும் மாற்றங்களை முன்னிறுத்தும் படமாக இது அமையும்.

படத்தின் ஒரே வெற்றி, எங்கு நோக்கினும் """மகிழ்ச்சி""".

பிரம்மாண்டமான விளம்பரத்திற்கு, ரஜினி ஒன்றைத் தவிர, திரைக்கதையும்இல்லை, திரைப்படமுமில்லை.

அயராத உழைப்பு படத்தில் இழையோடுகிறது, அங்கே, அங்கே. அதற்கு வாழ்த்துக்கள். படத்தினை திறனோடு எடுக்க சிரம்மேற்கொள்ளாமல், ரஜினி விளம்பரத்தில் சரி கட்ட நினைத்த மற்றுமொரு படம்.

மகிழ்ச்சி வெறும் வார்த்தையில் மட்டுமே....

கவிஞர் நா. முத்துகுமார்....14/08/2016

2016-08-16T23:18:00.002+05:30

ஓர் கவிதையின்
புனித நிரந்தர பயணம்
சென்று வா தமிழே...

இலக்கணத்தின் நீண்ட பயணம்
இறுதியில் இயற்கை உரைத்த
பாடம்
இனியும் காலம் வருமோ
இனியவனின் பாடல் வரிகள்
இனிதாய் காதோரம் இசைக்க...

விழி மூடிப் பார்க்கிறேன்
விடியாத இரவுகள் சிரித்தப்படி
விரியும் உன் வரிகளில்
விடியாமல் ரசித்தேப் போகிறதோ..

நண்பா!!!
தமிழின் சாபம் இது...

வானில் கேட்கலாம்
இடியும் மின்னலும்
இனி உன் வரிகளில்
எம்மைத் தழுவலாம்....

நினைத்துப் பார்க்கிறேன்
நீயில்லாத தமிழினை
முடியவில்லையே.......

முற்றுப்பெறாத முற்றுப்புள்ளி
முடியாத உன் வரிகள்
முடியாத கனவு நாயகனே....

கண்ணதாசன் சொல்லியது போல்
"எந்த நிலையிலும்
எனக்கு மரணமில்லை""" - ஆம்
நீ வரிகளில் வாழபோகிறாய்
உடல் துறந்து
உணர்வுகளில் இனிமேல்...

நினைத்து நினைத்துப் பார்க்கிறேன்
நினைவில் நின்று கேட்கிறேன்
நீயிட்ட வரிகள் ரீங்காரமாய்
-----
சாவே!!!!
போதும் உன் பசி...
-----
நீயில்லாத திரையுலகம்
நீயில்லா இசை
நினைத்துப் பார்க்கிறேன்
அலையற்ற கடல் போல
அன்னையற்ற சிசு போல....
-----
வரிகளில் உறவானவனே
வரிகளில் உணர்வானவனே
வரி வரியாய் கொல்கிறதே
வந்து விடு எனக்காக
வசதியாய் தருகிறேன்
என் உயிரை....
------

என் இளைய தலைமுறையே!!!

2016-08-16T23:17:00.002+05:30

இந்த எழுபதாம் சுதந்திர தினத்தன்று உன் சகோதரன் உன்னோடு பேசுவதில் மற்றற்ற மகிழ்ச்சி…

உன்னோடு தான் தினம் என் பயணம், ஆனாலும் உன்னை எனக்குத் தெரியாது, என்னை உனக்குத் தெரியாது. தினம் பால்வீதியில் நட்சத்திர கூட்டங்களோடு நிலா வீதியுலா வருவது போல் நாமும் கலந்தே பயணித்து தனிமையாகுகிறோம். சுதந்திரம் எனும் பெயரில், கேட்டதை, பார்த்ததை, சொன்னதை மீண்டும் மீண்டும் மனனம் செய்து ஒப்புவிக்க பயில்கிறோம் தடையின்றி. உலகம் தோன்றியது முதல் இது வரை எண்ணற்ற உயிர் தோன்றினாலும், ஒரு சில ஆயிரங்களே சரித்திரத்தில் இடம் பெற்றனர், ஏன் தெரியுமா?. அந்த ஏன் என்ற கேள்வியின் பதில் அது. ஆம், கேட்டதன் விளைவு, கேள்வியின் வீர்யம், உள் நோக்கி பார்த்ததன் விளைவு, தனித்து விட்டது, அவர்களை உலகிற்கு தனித்து விட்டது, தனி முத்திரை பதிக்க விட்டது.

ஒவ்வொரு வகுப்பிலும் ஒவ்வொன்றைக் கற்றோம், அந்த ஒவ்வொன்றின் பயன்பாட்டினை என்றாவது உணர்ந்திருப்போமா?, இல்லை அதன் முக்கியத்துவத்தினை உணர்ந்தோமா?. இன்று வரை மாறாதது எது தெரியுமா?, அடிப்படையில் பயிலும் ஆரம்ப கல்வி தான். ஆம்!, நாம் ஆரம்ப காலத்தில் கற்ற கல்வி, அதாவது தொடக்க கல்வி தான் மாறாதது. ஒருவர் தன் பிஞ்சு வயதில் கற்கும் கல்வி, ஆழ்மனதில் பசுமரத்தானிப்போல் படிந்து விடும். உம். 1+1, எந்த கால கட்டத்திலும் 2 தான். அது போல் பல கற்றோம், அதனை காலப்போக்கில் நாம் மறக்க நினைத்தாலும், நம்மை மட்டும் அகலாது. ஏனென்றால், நம் அன்றாடப் பயன்பாட்டிலும் அது ஊறி விட்டது. அது போல தான் இளமை கல்வியும். ஆழ படியுங்கள், ஆழ்ந்து படியுங்கள். ஆராய்ந்து படியுங்கள். காலப்போக்கில் நாம் நம்மை உணராமல் பயில முயலும் எதுவும் நம்மோடு பயணிப்பதில்லை. அது அந்த கால கட்டத்தோடு முடிந்து விடுகிறது.

நீ மனனம் செய்யாதே!!!. ஆழ்ந்து கற்க முயற்சி செய். பயிற்சி செய் அல்லது முயற்சி செய். தவறு செய். காலப்போக்கில் உன் தவறுகள் உனக்கே ஒரு புது பாதையினைக் கொடுக்கும். சொல்ல முடியாது, இது வரை கற்று வந்தததை விட உன் பாதை எளிமையாகவும், தரமாகவும் கற்க உதவலாம். அது உன்னைப் போல், என்னைப் போல் இருப்பவர்களுக்கு உதவலாம்.

முடியாது என்ற ஒன்று மட்டும் தான் இன்று வரை முடியாமல் இருக்கிறது. முயற்சி செய்யாததால் அது முடியாமல் இருக்கிறது.

ஒரு உண்மை சொல்லட்டுமா!! நிறைய தோல்விகளைச் சந்தித்துப் பார், உன்னை வெல்ல யாராலும் முடியாது. ஒவ்வொரு தோல்வியும் உன்னைச் செதுக்கும். உன் கையிலிருக்கும் உளி, உன்னுள்ளேயே விளையாடும், உன்னையறியாமல் செப்பனிடும்.

இங்கு கற்றுத் தரும் ஆசிரியர்கள் யாரும் ஆச்சார்யர்கள் இல்லை, முன்பு போல் கற்றுத் தர, அதே போல் கற்கும் நீங்களும் (நாமும்) ஏகலவைன் அல்ல. ஆனால் கல்வி கற்பது என்னவோ அன்றும் இன்றும் என்றும் அதே தான். கற்றுக் கொள்பவன் காலப்போக்கில் மாறியதால் கற்பிப்பவனும் மாற வேண்டிய சூழ்நிலை. உன்னைப் புடம் போட வேண்டுமானால் நீ தீயில் உறுகித் தான் ஆக வேண்டும். எந்த அளவிற்கு உன்னை அதில் லயிக்கிறாயோ அது தான் உன் வெற்றியின் அளவு. உன்னை இந்த உலகில் நிலைநாட்டும் அளவு.
புலிகள் வாழும் காட்டில் தான் புள்ளி மானும் வாழ்கிறது. ஆகையால் திருடர்களும், ஏமாற்றும் பித்தர்களும், போலி உறவுகளும், நயவஞ்சக கூட்டம் வாழும் இந்த உலகில் தான் நீ வாழ்ந்து ஜெயிக்க வேண்டும். புள்ளி மான் புலி கண்டு அஞ்சினாலும், உணவருந்தாமலோ, நீர் அருந்தாமல் இல்லை, அதன் வாழ்க்கை முறையினைத் தொடர்கிறது. ஒரு போதும் அஞ்சி துவழ்வதில்லை.

ஒன்று மட்டும் நினைவில் கொள், எதுவும் நிரந்தரமில்லை. இதுவும் கடந்து போகும், இன்னமும் வந்து போகும். வெற்றியினைத் தலைக்கு ஏற்றாதே, தோல்வியினை நெஞ்சில் சுமக்காதே. ஒரு போதும் உலகில் இரவு மட்டும் நிலைப்பதில்லை, சூரியக் கதிர்கள் ஒவ்வொரு இரவினையும் துளைத்தெடுத்து ஒளி தருகிறது. அது போல் உன்னுள் உறங்காமல் உள்ளேயே உரமிடு, உதிரமிடு, உயிரிடு, முயற்சித்தால் முடியாததும் முடிந்துவிடும்.

நம் முன்னோர்கள் விதைத்த இந்த நாடு, ரொம்பநாட்களாய் உரம் தேடி அலைகிறது. இளைய சமுதாயமே!!! நீயே விதையாகு, உன்னுள்ளிருக்கும் ஒவ்வொரு விருட்சமும் இந்த உலகைப் பசுமையாக்கட்டும்.. பசுமை புரட்சி செய்வீராக….

ஒரு விதையிடு, அதை மட்டும் கவணம் கொள், அதை வனமாக்க இந்த உலகம் தயாராய் இருக்கிறது. வசப்படும் தூரம் தான் வானம். வல்லூறுகளைக் கண்டு கலங்காதே. வல்லூறுகளைப் பார்த்து பயந்திருந்தால், இன்று வல்லூறுகளைத் தவிர வேறு பறவையிருந்திருக்காது. உயரப் பறப்பதால் (இருப்பதால்) மட்டும் ஒருவன் வெற்றி பெற்றவனில்லை, உயர்ந்தாலும், எத்தனை உயரம் போனாலும், தன்னிலை மறவாதவன் எவனோ அவனே வெற்றியாளன். ஆகையால் பணிவு கொள்.

உயர்த்திவிட ஏணிகளைத் தேடாதே. இங்கு ஏணிகளும் விற்பனைக்கே. உள்ளொன்று வைத்து புறம் பேசும் கூட்டம் அதிகம், ஆகையால் கவணம் கொள். உன்னை உறிஞ்சி மகிழும் பேதைக் கூட்டம் அதிகம், விழிப்போடிரு. உன்னை மூளைச் சலவை செய்து அவர்கள் கார்யம் சாதித்துக் கொள்ளும் கூட்டம் அதிகம், பக்குவமாய் பயணம் செய். உன்னோடே பயணித்து உன்னை உதைத்து வெளியேற்றும் அட்டைகள் அதிகம், ஆகையால் நிறம் பார்த்து பழகு, பயணி.. எதிலும் விழிப்போடிரு. நன்றிக்கும் விலை பேசும் உலகமிது.

காலத்தோடு பயிர் செய். பொழுதெல்லாம் உனதாக்கு, எல்லா நாளும் நன்னாளே!!! நம்பி பயணம் செய்.. நம்பிக்கையோடு பயணம் செய். உன்னை மட்டும் நம்பு.
உனக்காக பாரதத்தாய் காத்திருக்கிறாள். உன்னை அள்ளிப் பருகி, அரவணைத்துச் செல்ல துடிப்போடு உயிர்ப்பித்துக் கொள்ள காத்திருக்கிறாள். வீறு கொண்டு வா, வெற்றிகளை உனக்கு காணிக்கையாக்க காத்திருக்கிறது இந்த பூவுலகம்.

வாழ்க பாரதம்! வளர்க அதன் புகழ்! வந்தேமாதரம்!

இலை தேடும் வேர் தேடி......(ஓர் காதல் பயணம்)

2015-11-15T23:20:00.000+05:30

இலையும் காயும் காதலிட
இமைக்காமல் சூரியனும் தூதுமிட
இரவெல்லாம் காத்திருக்குமாம் இரண்டும்
இலை காற்றில் செய்தி சொல்ல
இலை சொன்ன சேதிக்கு
இனிப்பாய் பதில் சொல்லுமாம் காயும் கனிந்து...

இப்படியே போனதாம் பொழுதுகள்
இனிப்பிட்ட காய் கனிந்து கீழே விழ
இலை துடித்ததாம் வலியில்
இலை உதிர காற்று வந்ததாம்...

இலை உதிர்ந்து மக்கிட
இதன் முன்னர் விழுந்த கனி
இலையோடு சேர்ந்ததாம் மண்ணில்
இரண்டின் சேர்க்கையில் விதையொன்று
இன்முகமாய் விருட்சமாக தொடங்கியதாம்,,,

இந்த விதை வேரிட மண்ணும் சேர
இந்த பணிக்கு நீரும் துணை வர
இதழோரம் புன்னகைத்து துளிரிட செடியும்
இலையும் மேல் வந்ததாம்
இன்முக சூரியன் ஒளிதர பூ வந்ததாம்
இலையும் பூவோடு காதல் புரிய
இலைமறை காதலல்ல இது
இலையின் காதல் காயோடு....

இந்த காதல் இப்படியே தொடர
இதற்கு வந்ததாம் சிக்கல்
இலை துடிக்க காய் பறித்தனராம்
இலை துடித்தை யார் நோக்குவர்
இலையென இகழ்ந்தனரோ இவ்வுலகில்
இலை உதிர மண்ணில் மக்கியதாம்...

இலை மக்கி வேருக்குச் செல்ல
இலை வேராகிய மன்னனிடம் முறையிட
இலை சொன்ன சேதி கேட்டு
இருத்தல் கொள்ளாமல் வேர் துடித்ததாம்
இச்சேதி தனை நீரிடம் சொல்ல...

இன்முக வாழ்க்கையில் சிக்கலா
இனிதே பயணித்த காதலில் துயரமா
இலை நிலைக் கண்டு துயரமிட்ட நீரும்
இனிதாய் பூத்திட உரமிட்டதாம் வேருக்கு
இலையும் காத்திருந்ததாம் பூவிற்கு,,,

இலை காத்திருத்தல் அறியாமல்
இரவோடு இரவாக வீழ்த்தினான் மரம்தனை
இனிய காத்திருப்பிற்கு வந்ததே வேதனை...

இனியும் துளிர்க்க இயலா வேர்
இரவில் வெட்டி வீழ்த்திட - மக்கிய
இலை இரவெல்லாம் அழுததாம்
இலை அழுத கதை கேட்டு
இடியோடு மேகமும் முழங்கியதாம்
இலை துயர் தீர்க்க ஊரெல்லாம் நீர்
இலை தேடும் வேர் தேடி...

பிரிவும் ஓர் சுகமே!!!!!

2015-08-21T00:23:00.003+05:30

பிறக்குமோ கவிதையும் வரிகளாய் வந்துதிக்குமோ
பிறவாமல் இருந்திடுமோ சில மௌனங்கள்
பிறந்து இறந்திடுமோ சில நெருடல்கள்
பிறக்க நினைக்குமோ சோகங்கள் வார்த்தையாய்
பிறந்தது ஏனோ என நினைத்திடும் தருணங்கள் - இப்
பிறவியில் தொலைத்த அந்த நொடிகள்....

பிரிவும் ஓர் சுகமே நினைவெல்லாம் நிலைப்பதால்
பிரிவில் பிரியும் கசந்த நிகழ்வுகள்
பிரிந்திடுமோ என தவித்த நாட்கள்
பிரிவில் பரிதவித்து உணரும் நிமிடங்கள்
பிரியாவிடைகொடு பிரிவுக்கு பிரியட்டும் நொடிகள்
பிரிவும் ஓர் சுகமே!!!!!

சிற்பமே நீ ஏன் சினமானாய்?

2015-08-21T00:20:00.002+05:30

கதையான கதைகள் நிறைய
கதையே உன் கதை என்ன?????
கதையாகிப் போனதே நேரம்...

கதைக்காமலே கடந்து போனதே
கதைக்க வருவாயோ மறுபடியும்
கதைக்க காத்திருக்கிறேன் நானும்.....

சில நேரங்களில் சில உறவுகள்
சிக்கனமாய் முடிந்து விடுகிறது
சில நேரங்களில் சில்லறைத்தனமாய்
சில நேரங்களில் முடிய கூடாது ஏக்கத்துடன்....

சிலையே நீ ஏன் சினமானாய்
சிக்கனமாய் முடிந்து போனாய்
சில்லறை உறவுகளில் லயித்து போனாய்
சிற்பமே நீ ஏன் சினமானாய்?

சொல்லவா சொன்னதை சொன்னபடி...

2015-08-21T00:19:00.000+05:30

சொல்லவா சொல்ல வந்ததை

சொல்லவா மனதில் உள்ளதை

சொல்லவா நெஞ்சில் நிற்பதை

சொல்லவா நீ கேட்பதால் ...

சொல்லவா அன்று போல்

சொல்லவா இன்று இல்லையென

சொல்லவா மனதில் நின்றதை

சொல்லவா மெல்ல காதோடு...

சொல்லவா விடுகதையான வாழ்க்கையை

சொல்லவா விடை தேடும் பயணத்தை

சொல்லவா நிழலாடும் நிஜத்தை

சொல்லவா உள்ளதை உள்ளபடி...

சொல்லவா சொன்னவன் நானல்லவா

சொல்லவா சொன்ன சொல் வேறல்லவா .

சொல்லவா அழைத்ததை சொல்லவா

சொல்லவா கேட்டதை சொல்லவா....

சொல்லவா விழிகளில் நீரிட்டு

சொல்லவா வார்த்தைகளில் தடுமாறி

சொல்லவா சொன்னதை சொன்னபடி...

சொல்ல துடிக்கிறேன் ஏராளமாய்

2015-08-21T00:17:00.002+05:30

சொல்ல துடிக்கிறேன் ஏராளமாய்
சொல்ல நினைக்கிறேன் தாராளமாய்
சொல்ல சொல் வாயோரமாய்
சொல்ல கொடு காதோரமாய்...

சொல்லும் சொல் நெஞ்சோரமாய்
சொல்ல தவிக்குது வெகு நேரமாய்
சொல்லடுக்கில் இல்லை சேதாரமாய்
சொல்லே சுற்றிவருது ரீங்காரமாய்...

சொல்லவா சொல் சொல்லெடுத்து
சொல்லவா சொல் உளம்திறந்து
சொல்லேன் சொல்லேன் சொல்லாய்
சொல்லத் துடிக்கிறேன் நானுமே...

சொல்லில் சொல் உளமன்றோ
சொல்ல சொல்ல கரையுமன்றோ
சொல்ல துடித்த மனமன்றோ
சொல்வாயோ சொல் எனை வெல்ல....

கதையான கதைகள்

2015-08-21T00:16:00.003+05:30

கதையான கதைகள் நிறைய
கதையே உன் கதை என்ன?????

கதையாகிப் போனதே நேரம்
கதைக்காமலே கடந்து போனதே
கதைக்க வருவாயோ மறுபடியும்
கதைக்க காத்திருக்கிறேன் நானும்.....

சிற்பமே நீ ஏன் சினமானாய்?

2015-08-21T00:16:00.000+05:30

சில நேரங்களில் சில உறவுகள்
சிக்கனமாய் முடிந்து விடுகிறது
சில நேரங்களில் சில்லறைத்தனமாய்
சில நேரங்களில் முடிய கூடாது ஏக்கத்துடன்....

சிலையே நீ ஏன் சினமானாய்
சிக்கனமாய் முடிந்து போனாய்
சில்லறை உறவுகளில் லயித்து போனாய்
சிற்பமே நீ ஏன் சினமானாய்?