வதிலைபிரபா

2011-09-05T00:54:00.000+05:30

பிரித்தானிய, ஈழத்து எழுத்தாளர் கவிஞர். முல்லை அமுதன் பிரித்தானியாவில் ஈழத்து நூல்களின் கண்காட்சிகளை நடாத்துவதில் முழுக்கவனம் செலுத்தி வருகிறார்.

கவிஞர். முல்லை அமுதன்அவர்களின் இயற்பெயர் இரத்தினசபாபதி. மகேந்திரன். இலங்கை, யாழ்ப்பாணம், கல்வியங்காடு இவரது பிறப்பிடம்..புலம் பெயர்ந்து பிரித்தானியாவில் வாழ்ந்து கொண்டிருக்கும் முல்லை அமுதன் பிரித்தானிய, ஈழத்து எழுத்தாளர் ஆவார். பிரித்தானியாவில் ஈழத்து நூல்களின் கண்காட்சிகளை நடாத்துவதில் முழுக்கவனம் செலுத்தி வரும் இவர் 'காற்றுவெளி' என்ற இலக்கிய இதழின் ஆசிரியராகவும் இருக்கிறார்.'காற்றுவெளி' அச்சு இதழாக வந்து, தற்போது இணைய இதழாக வெளிவருகிறது. முல்லை அமுதன் 1980 களில் எழுதத் தொடங்கினார். 1981இல் இவரது முதல் நூலான 'நித்திய கல்யாணி' கவிதை நூல் வெளியானது. இது வரை 12 நூல்கள் வெளியிட்டுள்ளார். ஈழத்து நூல்களை சேகரிப்பதுடன், தொடர்ச்சியாக நூல்கண்காட்சிகளை நடாத்தி, அவற்றை ஆவணப்படுத்தி வரும் இவரால் 10,000 க்கும் அதிகமான நூல்கள், சஞ்சிகைகள் சேகரிக்கப்பட்டுள்ளன. இவற்றுடன் மறைந்த எழுத்தாளர்களின் புகைப்படங்களையும், நினைவுமலர்களையும் சேகரிப்பதிலும் கவனம் செலுத்தி வருகிறார்.
இவரது நூல் கண்காட்சி பற்றி 'பதிவுகள்' இணைய தளத்தில்..

லண்டனில் ஈழத்துத் தமிழ் நூல்களின் கண்காட்சியை மிகுந்த அக்கறையுடனும், பேருழைப்புடனும் நிகழ்த்திவரும் முல்லை அமுதனுக்கு லண்டன் வாழ் தமிழர்கள் நன்றிக்கடன்பட்டிருக்கிறார்கள். இலங்கையிலும் புலம்பெயர் நாடுகளிலும் ஈழத்தமிழர்கள்; வெளியிட்ட பன்னிரண்டாயிரத்துக்கும்; மேற்பட்ட நூல்களை புலம்பெயர்ந்துவாழும் நாடுகளிலிருந்தும், இலங்கையின் பல்வேறு பாகங்களிலும் இருந்தும் முல்லை அமுதன் அரும்பாடுபட்டுத் தேடித் திரட்டி நவம்பர் மாதம் பத்தாம் திகதி ‘இல்போர்ட்’ சென்.லூக்ஸ் தேவாலய மண்டபத்தில் கண்காட்சிக்கு வைத்திருந்தார். பல்வேறு தலைப்புக்களின் கீழ் நூல்கள் பகுதி பகுதியாக பார்வைக்கு வைக்கப்பட்டிருந்தன. இலங்கையிலேயே இவ்வளவு பெருந்தொகை நூல்களை ஒரே கண்காட்சியில் பார்க்க முடியுமா? என்பது சந்தேகமே!
லண்டன் போன்ற தலைநகரில் இத்தகைய ஒரு பிரமிப்பூட்டும் ஈழத்து நூல்களின் கண்காட்சி இடம்பெறுவது எமக்குக் கிடைத்த வரப்பிரசாதம் என்றே கூறவேண்டும்;. அறிவியல், சமயம், வரலாறு, சிறுகதை, கவிதை, நாவல், சமையல், சிறுவர் இலக்கியம்,
விமர்சனம், கட்டுரைகள் ஆகிய பல்வேறு தலைப்புக்களின் கீழ் இலங்கையில் வெளியாகியுள்ள பெருவாரியான நூல்களை பார்க்கும்போது மனதில் மகிழ்ச்சியும் உற்சாகமும் பரவி இருந்ததை உணரமுடிந்தது.

இவ்வளவு பெருந்தொகையான நூல்களை இலங்கையில் இருந்து எழுத்தாளர்களிடமிருந்தும், பதிப்பாளர்களிடமிருந்தம் லண்டனுக்குத் தருவிக்க முல்லை அமுதன் பெரும் கஷ்டங்களை அனுபவித்திருப்பார் என்பதை வலியுறுத்திச் சொல்ல வேண்டியதில்லை. இதனைவிட சைமன் காசிச் செட்டியில் இருந்து டானியல் அன்ரனிவரை மிக அரிதாகவே கிடைக்கக்கூடிய ஈழத்து அறிஞர்கள், எழுத்தாளர்களின் புகைப்படங்களையும் கண்காட்சிக்கு வைத்திருந்தமை இந்த கண்காட்சிக்கு புதிய மெருகு சேர்த்தது எனலாம். காற்று வெளி சஞ்சிகையின் ஆதரவில் இடம்பெற்ற இந்தக் கண்காட்சி முடிவில் நடன நிகழ்ச்சிகளும், இசை நிகழ்ச்சிகளும் இடம் பெற்றன.

வெளிவந்த நூல்கள்
நித்திய கல்யாணி (1981)
புதிய அடிமைகள் (1983)
விடியத்துடிக்கும் ராத்திரிகள் (1984)
யுத்தகாண்டம் (1989)
விழுதுகள் மண்ணைத் தொடும் (1993)
ஆத்மா (1994)
விமோசனம் நாளை (1995)
ஸ்நேகம் (1998)
பட்டங்கள் சுமக்கிறான் (1999)
முடிந்த கதை தொடர்வதில்லை (1999)
யாகம் (2000)
இசைக்குள் அடங்காத பாடல்கள் (2002)
பதிப்பித்த நூல்கள் : இலக்கியப்பூக்கள் (2008)
ஓவியா பதிப்பகம் வெளியீடான 'சுதந்திரன் கவிதைகள்' நூல் வெளிவரக் காரணமானவர்.
- நன்றி.
தமிழ் விக்கிபீடியா
பதிவுகள்.காம்

கல்வி விழா

2011-09-03T18:45:00.000+05:30

2011-06-22T23:37:00.025+05:30

இதயாஞ்சலி

கடந்த ஆண்டு 25-05-2010 அன்று எங்களது தந்தையார் திரு. R. பரமசிவன் B.A.,B.T., (ஆசிரியர், ஓய்வு) அவர்களின் மறைவு எங்களை உலுக்கிப் போட்டது. ௦
10 -06-2011 அன்று எங்களது தாயார் திருமதி. P. ராஜம்மாள் அவர்களின் மறைவு மீண்டும் எங்களை அதிர்ச்சியில் ஆழ்த்திவிட்டது.

- வதிலைபிரபா

கவிதை நூல் வெளியீட்டு விழா

2011-05-27T12:27:00.001+05:30

உலகத் தமிழ்ச் சிற்றிதழ்கள் சங்கம், மகாகவி வாசகர் வட்டம், பதியம் திரைப்பட இயக்கம் மற்றும் தமிழ்நாடு தொடக்கப்பள்ளி ஆசிரியர் கூட்டணி, பெரியகுளம் வட்டம் ஆகியவை இணைந்து நடத்திய கவிதை நூல் வெளியீட்டு விழா 11-10-2009 ஞாயிறு அன்று காலை 10 மணி அளவில் தேனி ஹோட்டல் இன்டர்நேசனல் அரங்கில் நடைபெற்றது..
தேனி நாடார் சரஸ்வதி மகளிர் கல்லூரி செயலாளர் திரு.மு.அமர்நாத் தலைமை தாங்கினார். திரைப்பட இயக்குநர் திரு.ராஜமோகன் முதல் பிரதியை வெளியிட்டு சிறப்புரை நிகழ்த்தினார். தமுஎகச மாநில செயற்குழு உறுப்பினர் கவிஞர் இதயகீதன் முதல் பிரதியை பெற்றுக் கொண்டார். முன்னதாக உலகத் தமிழ்ச் சிற்றிதழ்கள் சங்கத் தலைவர் - ஓவியா பதிப்பக வெளியீட்டாளர் கவிஞர் வதிலைபிரபா வரவேற்றார். திருப்பூர் பதியம் திரைப்பட இயக்கம் கவிஞர் பாரதிவாசன், தமிழ்நாடு தொடக்கப்பள்ளி ஆசிரியர் கூட்டணி மாவட்ட செயலாளர் பெ.பரமசாமி ஆகியோர் முன்னிலை வகித்தனர். நூல் அறிமுகம் மற்றும் நிகழ்ச்சித் தொகுப்பினை உதசிச பொதுச்செயலாளர் கவிஞர் சொர்ணபாரதி வழங்கினார். புலவர் ப.தேவகுரு, தமிழ்நாடு தொடக்கப்பள்ளி ஆசிரியர் கூட்டணி வட்டார தலைவர் கவிஞர் ம.இளம்பரிதி, வட்டாரச் செயலாளர் த.கிருஷ்ணன், மகாகவி பொறுப்பாசிரியர் நகர வங்கி இராதாகிருஷ்ணன், மகாகவி வாசகர் வட்டத் தலைவர் பொன்.அண்ணாத்துரை, எழுத்தாளர் கருணைச்சாமி, தேனி வையைத் தமிழ்ச் சங்கம் நிறுவனர் ச.ந.இளங்குமரன், குறளரசு கழகம் மாவட்டத் தலைவர் ம.சுந்தரமூர்த்தி ஆகியோர் வாழ்த்துரை வழங்கினர். நூலாசிரியர் கவிஞர் பெ.விஜயராஜ்காந்தி ஏற்புரை வழங்கினார்..
"குங்குமப் பூவும் கொஞ்சும் புறாவும்' திரைப்படம் குறித்த ரசிகர்களின் நேரடிக் கேள்விகளுக்கு படத்தின் இயக்குநர் இராஜமோகன் விளக்கம் அளித்தார். தொடர்ந்து இயக்கம் குறித்தான அனுபவங்களையும் பகிர்ந்து கொண்டார். முடிவில் மகாகவி இதழ் ஓவியர் கவிஞர் ஜெ.சுதாகர் நன்றி கூறினார்..

உலகத்தமிழ்ச் சிற்றிதழ்கள் சங்க 5 -வது மாநாடு

2011-05-27T12:03:00.004+05:30

2010 பிப்ரவரி 21 அன்று உலகத்தமிழ்ச் சிற்றிதழ்கள் சங்க 5 -வது மாநாடு - வரலாற்றுச் சிறப்புமிக்க நிகழ்வில் .தினமணி நாளிதழின் ஆசிரியர் திரு கே.வைத்தியநாதன்

மாநாட்டிற்கு முதுபெறும் எழுத்தாளர் தி.க.சி (தி.க.சிவசங்கரன்) அவர்கள், தினமணி நாளிதழின் ஆசிரியர் திரு கே.வைத்தியநாதன் அவர்கள், திரு.தீபநடராசன், திரு. கலாப்பிரியா, திரு.கழனியூரான், திரு. பூ.திருமாறன், இலங்கையைச் சேர்ந்த சிற்றிதழ் ஆசிரியர்களான அந்தனி ஜீவா, த.கோபாலகிருஷ்ணன், சேயன் இப்ராகிம் இன்னும் ஏராளமான சிற்றிதழ்களின் ஆசிரியர்கள், வாசகர்கள் என இலக்கிய கூடல் இனிதே நடந்தேறியது.

உலகத் தமிழ்ச் சிற்றிதழ்கள் சங்கத்தின் மாநாடு முடிந்த பின்னர் உற்சாகத்துடன் தினமணி ஆசிரியர் கே.வைத்தியநாதன். உடன் உலகத் தமிழ்ச் சிற்றிதழ்கள் சங்க தலைவர் வதிலைபிரபா, பொதுச்செயலாளர் சொர்ணபாரதி, பொருளாளர் நந்தவனம் சந்திரசேகரன், மாநாட்டு அமைப்பாளர்கள் சொக்கம்பட்டி ரஹீம், ஜாகிர் உசேன், இலங்கை கிளைச் செயலாளர் அந்தனி ஜீவா, இலங்கை கிளை பொருளாளர் த.கோபாலகிருஷ்ணன், செல்வதரன்.

ஒரு கடிதமடல் கண்டு நிகழ்ச்சியில் கலந்து கொள்ள சம்மதம் தெரிவித்ததோடு மன மகிழ்ச்சியோடு நிகழ்ச்சியில் கலந்து கொண்டு இந்த மாநாட்டின் வெற்றிக்கு வித்திட்ட தினமணி ஆசிரியர் திரு.கே.வைத்தியநாதன் அவர்களுக்கு இந்த மாநாட்டு அமைப்பின் மூலம் நன்றி கூறிக்கொள்கிறோம்.

தானும் ஒரு சிற்றிதழ் ஆசிரியராக தனது பத்திரிக்கை உறவை ஆரம்பித்த நெகிழ்ச்சியான அந்த காலம் முதல் சிற்றிதழ்களின் பங்களிப்பு வெகுசன பத்திரிக்கையால் தரமுடியாது என்பதை ஒப்புக்கொள்வதாக கூறினார்.

தினமணி நாளிதழ் ஆசிரியர் கே.வைத்தியநாதன் அவர்கள் பேசும்போது சிற்றிதழ்களின் அயராத இலக்கிய பணியை, அதன் தாக்கத்தின் வீரியத்தையும் பற்றி தெளிவாக உணர்த்தினார். விளம்பரம் சார்ந்து வரக்கூடிய பத்திரிக்கைகள் எந்தக் கொள்கைக்காக முன்னெடுத்துச் செல்லவேண்டுமோ, அதை அடகு வைக்கும் நிர்பந்தமான சூழ்நிலைக்கு தள்ளப்படுவர். தான் ஆரம்பத்தில் சி்ற்றிதழ் ஆசிரியராக இருந்த அந்த சூழ்நிலையை விளக்கினார். அவர்களுக்கு இருக்கும் அந்த எழுத்து துணிச்சல் வெகுசன பத்திரிக்கைகளுக்கு இருக்காது என்பதை ஆணித்தரமாக கூறினார்.
இலக்கிய உலகில் சிற்றிதழ்களின் வளர்ச்சி மிகவும் அவசியம் மிகத் தரமான படைப்புகளுடன் இன்னும் நிறைய சிற்றிதழ்கள் வரவேண்டும். தொடர்ந்து அவை வரவேண்டும். சிற்றிதழ்களின் மூலம் வளர்ந்தவர்கள் தான் இன்றைய பெரும் எழுத்தாளர் களாக இலக்கிய வானில் உலாவந்து கொண்டிருக்கிறார் கள். இவ்வாறு அவர் கூறினார்.
உதசிசங்கத்தின் தலைவர் வதிலைபிரபா முன்வைத்த தீர்மானத்தில் ஒன்றான சிற்றிதழ் எழுத்தாளர்களுக்கும் கலைமாமணி விருது கொடுக்க வேண்டும் என்பதை மேற்கோள்காட்டி பேசிய தினமணி ஆசிரியர் நமக்கு இந்த விருதுகள் தேவையில்லை. முகம் தெரியாத வாசகர்கூட்டம் நமக்கு தரும் அங்கீகாரம் நோபல் பரிசுக்கு சமம். வழங்குவது கலைமாமணி விருது அல்ல சிரிப்பு நடிகர்களுக்கும், கவர்ச்சி நடிகர்களுக்கும் மத்தியில் நமது இலக்கியம் சிதறவேண்டாம். என்றார்.

2011-02-14T21:28:00.003+05:30

இலங்கையில் சர்வதேச தமிழ் எழுத்தாளர் மாநாடு-2011

இன்று சர்வதேச தமிழ் எழுத்தாளர் ஒன்றியம் முன்னின்று நடாத்திய "சர்வதேச தமிழ் எழுத்தாளர் மாநாடு -2011" கொழும்புத் தமிழ்ச் சங்கத்தில் கோலாகலமாக ஆரம்பமாயிற்று. இம்மாநாட்டுக்காக இலங்கை, இந்தியா, சிங்கப்பூர், ஃபிரான்ஸ், பிரிட்டன், ஜெர்மன், அவுஸ்திரேலியா முதலான பல நாடுகளில் இருந்து எழுத்தாளர்கள், கல்விமான்கள் கொழும்புக்கு வருகை தந்திருந்தனர்.

புலம்பெயர் எழுத்தாளரான லெ. முருகபூபதி (அவுஸ்திரேலியா) அமைப்பாளராக இருந்து ஒழுங்குசெய்த இம்மாநாடு இலங்கை ராஜபக்ஷே அரசின் அனுசரணையுடன் நடைபெறும் கண்துடைப்பு நாடகமே என்ற வதந்தி பரவியதையடுத்து பல்வேறு ஐயங்களும் சர்ச்சைகளும் கிளப்பப்பட்டு வந்தமை நாமறிந்ததே. இதனையடுத்து, உலகெங்கிலும் உள்ள தமிழ் எழுத்தாளர்கள் சிலர் இம்மாநாட்டைத் தாம் புறக்கணிப்பதாக அறிக்கை விட்டிருந்தமை குறிப்பிடத்தக்கது.

இன்று காலை மாநாட்டில் கலந்துகொள்வதற்காக வருகை தந்திருந்த வெளிநாட்டுப் பேராளர்களுக்கான வரவேற்பு ஊர்வலத்தையடுத்து யுத்தத்தினாலும் சுனாமியாலும் உயிரிழந்தவர்களுக்கான ஒருநிமிட மௌன அஞ்சலியோடு தொடக்கவிழா நிகழ்வுகள் ஆரம்பமாயின. மங்கல விளக்கேற்றம், தமிழ்த்தாய் வாழ்த்து, மாநாட்டு கீதம், வரவேற்பு நடனம் முதலான சம்பிரதாய நிகழ்வுகளைத் தொடர்ந்து வரவேற்புரை மாநாட்டின் இலங்கை இணைப்பாளரான டாக்டர் தி. ஞானசேகரத்தால் நிகழ்த்தப்பட்டது. லெ. முருகபூபதியின் தொடக்கவுரையை அடுத்து தலைமையுரையை பேராசிரியர் சபா. ஜெயராசா நிகழ்த்தினார். பேராசிரியர் கா. சிவத்தம்பி வாழ்த்துரை வழங்க, மாநாட்டு மலர் அறிமுக உரையினை டாக்டர் ஜின்னாஹ் ஷரிஃபுத்தீன் நிகழ்த்தினார். மலர் வெளியீட்டுரை கம்பவாரிதி இ.ஜெயராஜ் அவர்களால் நிகழ்த்தப்பட்டது. மாநாட்டு மலரின் முதற்பிரதியைத் தமிழ்த் தொண்டாளர் புரவலர் ஹாஸிம் உமர் பெற்றுக்கொண்டார். அதன் பின்னர் உள்நாட்டு, வெளிநாட்டு அதிதிகளின் சிறப்புரைகள் இடம்பெற்றன.

இலங்கை சார்பாக மூத்த எழுத்தாளரும் மல்லிகை ஆசிரியருமான டொமினிக் ஜீவாவும் இந்திய தமிழ் எழுத்தாளர்கள் சார்பாக வதிலை பிரபாவும் சிறப்புரையாற்றினார்கள். யாத்ரா ஆசிரியர் அஷ்ரஃப் ஷிஹாப்தீன் நிகழ்ச்சிகளைத் தொகுத்துவழங்கினார். 'தமிழ்த்தூது' தனிநாயகம் அடிகளார் அரங்கில் இடம்பெற்ற தொடக்கவிழா நிகழ்வுகள் மதியம் இரண்டு மணியளவில் இனிதே நிறைவுற்றன.

மீண்டும் மாலை ஐந்து மணிக்கு 'எஸ்.டி. சிவநாயகம் அரங்கு' சங்கரப்பிள்ளை மண்டபத்தில் "கணினியும் வலைப்பதிவுகளும்" என்ற தலைப்பில் ஆரம்பமாயிற்று. இந்த அரங்கு இணைப்பேராசிரியை மு.சு. தங்கம் (இந்தியா), டாக்டர் எம்.கே. முருகானந்தன் ஆகியோர் தலைமையில் இடம்பெற்றது. இந்த ஆய்வரங்கின் மதிப்பீட்டாளர்களாக ஞாயிறு தினக்குரல் ஆசிரியர் பாரதி இராஜநாயகம், சி. சிறீசுக்கந்தராசா (கனடா) ஆகியோரும், இணைப்பாளராக மேமன்கவியும் பணியாற்றினர். இவ்வரங்கில் இடம்பெற்ற ஆய்வுரைகள் பற்றிய விபரம் வருமாறு:

1. கணினியில் தமிழ் - கே.சர்வேஸ்வரன் (கணினிப் பொறியியலாளர்)

2. தமிழ் அச்சு வரிவடிவத்துக்கான OCR முயற்சிகள் -செல்வி சபீனா தயானி தயானந்தன்

3. கணினியும் இணையமும் தமிழ் எழுத்துச் சூழலில் ஏற்படுத்திய மாற்றங்கள் - மு. மயூரன்

4. கணினி யுனிகோட் (Unicode) தமிழ்மொழியில் ஏற்படுத்திய தாக்கங்கள் - ஞா. பாலச்சந்திரன் (கணினி விரிவுரையாளர்)

ஆய்வுரைகளையடுத்து, ஐயந்தெளிதலுக்கும் தொகுப்புரைக்கும் நேரம் ஒதுக்கப்பட்டது. அதைத் தொடர்ந்து சான்றிதழ் வழங்கும் வைபவம் இடம்பெற்றது. இறுதியாக மாவை நித்தியானந்தன் (அவுஸ்திரேலியா) இயக்கத்தில் உருவான 'பாப்பா பாரதி' என்ற என்ற சிறுவருக்கான ஒளிப்படம் லெ. முருகபூபதியால் அறிமுகம் செய்துவைக்கப்பட்டது.

நன்றி. inneram.com

2011-02-14T21:21:00.001+05:30

சர்வதேச தமிழ் எழுத்தாளர் மாநாடு- 2011 (3ஆம் நாள் அமர்வு)

நான்கு நாட்களாகக் கொழும்புத் தமிழ்ச் சங்கத்தில் கோலாகலமாக நடைபெற்ற சர்வதேச தமிழ் எழுத்தாளர் மாநாட்டின் 3ஆம் நாள் (08/09.01.2011) அமர்வு பற்றிய விபரங்கள் வருமாறு:

வரதர் அரங்கு

'சிற்றிதழ்'

சுப்பிரமணி மாலதி மண்டபத்தில் இடம்பெற்ற இந்த அமர்வுக்கு இணைத்தலைவர்களாக திரு. சொர்ணபாரதி (இந்தியா- பொதுச் செயலாளர் உலக தமிழ்ச் சிற்றிதழ்கள் சங்கம்), திரு. இரா. நாகலிங்கம் (அன்புமணி- மூத்த எழுத்தாளர்) ஆகியோரும், இணைப்பாளராக செங்கதிரோன் த. கோபாலகிருஷ்ணனும் (ஆசிரியர் -'செங்கதிர்') பணியாற்றினர். இந்த அமர்வில் திரு. டொமினிக் ஜீவா (ஆசிரியர் - மல்லிகை), திரு. எஸ். பி. கனகசபாபதி (கல்கிதாசன் - கனடா) ஆகியோர் ஆய்வு மதிப்பீட்டாளர்களாகச் செயலாற்றினர்.

ஆய்வுரைகள்:

1. இலங்கைச் சிற்றிதழ்களின் - வரலாறும் வளர்ச்சியும் - தெளிவத்தை ஜோசப் (மூத்த எழுத்தாளர்)

2. இலங்கையில் முஸ்லிம்கள் வளர்த்த சிற்றிதழ்கள் - கலாபூஷணம் கவிஞர். ஏ. இக்பால்

3. தமிழகச் சிற்றிதழ்கள் - மணிக்கொடி முதல் மகாகவி வரை - திரு. வதிலைபிரபா (தலைவர். உலகத் தமிழ்ச் சிற்றிதழ்கள் சங்கம்)

4. ஈழத்தில் வெளிவரும் கலை இலக்கியச் சிற்றிதழ்கள் - திரு. க. பரணீதரன் ('ஜீவநதி' – ஆசிரியர்)

5. மலையகத் தமிழ்ச் சஞ்சிகைகள்: ஒரு மதிப்பீடு - இரா. சர்மிளாதேவி (ஆசிரியர். திருத்துவக் கல்லூரி, கண்டி)

6. இலத்திரனியற் சூழலில் புகலிடச் சிற்றிதழ்கள் - திரு. சு. குணேஸ்வரன்

7. ஈழத்துச் சிறு சஞ்சிகைகள் எதிர்நோக்கும் பிரச்சினைகள் - டாக்டர் தி. ஞானசேகரன் ('ஞானம்' – ஆசிரியர்)

8. அவுஸ்திரேலியச் சிற்றிதழ்கள் - திரு. எஸ். கிருஸ்ணமூர்த்தி

9. பிரான்ஸ் நாட்டின் சிற்றிதழ்கள்- ஒரு நோக்கு - திரு. வி. ரி. இளங்கோவன் (பிரான்ஸ்)

10. தமிழ் இணைய இதழ்கள் - திரு. க. பட்டாபிராமன் (இந்தியா - அரிமா பொறியியலாளர்)

ஆய்வுரைகளை அடுத்து க. பட்டாபிராமனால் பன்னாட்டுத் தமிழ் இதழ்கள் குறுந்தகடுக் காட்சியும் ஒழுங்கு செய்யப்பெற்றமை குறிப்பிடத்தக்கது.

2011-02-12T17:09:00.008+05:30

இலங்கையில் வரலாற்றுப்பதிவை ஏற்படுத்திய உலகத் தமிழ்ச் சிற்றிதழ்கள் சங்கத்தின் 6 ஆவது மாநாடு

Tuesday, 25 January 2011 10:38

உலகத் தமிழ்ச் சிற்றிதழ் சங்கத்தின் ஆறாவது மாநாடு 05012011 அன்று கொழும்பு ஸ்ரீ இராமகிருஷ்ண மிஷன் கருத்தரங்கு மண்டபத்தில் உலகத் தமிழ்ச் சிற்றிதழ் சங்கத்தின் தலைவரும் 'மகாகவி' சிற்றிதழின் ஆசிரியரு மாகிய வதிலைபிரபாவின் தலைமையில் நடைபெற்றது.இந்த மாநாட்டுக்கு இந்தியாவிலிருந்து 40 பேராளர்களும் சிற்றிதழ் ஆசிரியர்களும் நம்நாட்டு சிற்றிதழ்களின் ஆசிரியர்களும் பேராளர்களும் பெருமளவில் பங்குபற்றிச் சிறப்பித்தனர்.

ஆரம்ப நிகழ்வு உலகத் தமிழ்ச் சிற்றிதழ்கள் சங்கத்தின் இலங்கைக்கிளைத் தலைவர் திருமதி பத்மா சோமகாந்தன் தலைமையில் ஆரம்பமாகியது.தமிழ்த் தொண்டாளர் புரவலர் ஹாசிம் உமரும் மல்லிகை ஆசிரியர் டொமினிக் ஜீவாவும் முன்னிலை வகிக்க வரவேற்புரையை உலகத் தமிழ்ச் சிற்றிதழ்கள் சங்கத்தின் இலங்கைக் கிளையின் செயலாளர் அந்தனி ஜீவா வழங்கினார். இலங்கையில் கடந்த 46 ஆண்டுகளாகத் தொடர்ந்து வெளிவரும் "மல்லிகை' யின் ஆசிரியர் டொமினிக் ஜீவாவின் உரை இடம்பெற்றது.சஞ்சிகை வரலாற் றில் தான் கடந்து வந்த கரடுமுரடான பாதையையும் கொடுத்த அர்ப்பணிப்பு களையும் எடுத்துக் கூறினார்.தலைமையுரையைத் தொடர்ந்து மாநாட்டுச் சிறப்பு மலராக வெளிவந்த "செங்கதிர்'வெளியிடப்பட்டது.முதல் பிரதியை புரவலர் ஹாசிம் உமர் பெற்றுக்கொண்டார்.தொடர்ந்து சபையிலுள்ளோருக்கு பிரதிகள் வழங்கப்பட்டன.சங்கத்தின் செயற்பாடுகள் பற்றி உலகத் தமிழ் சிற்றிதழ்கள் சங்கத்தின் இலங்கைக்கிளையின் பொருளாளரும் செங்கதிர் ஆசிரியருமாகிய செங்கதிரோன் த.கோபாலகிருஷ்ணன் சிற்றிதழ் சங்கத்தின் செயற்பாடுகளை விளக்கினார்.
ஆரம்ப நிகழ்வைத் தொடர்ந்து பொதுக்குழு அமர்வு வதிலை பிரபா தலைமையில் ஆரம்பமாகியது."உலகத்தமிழ்ச் சிற்றிதழ் சங்கம் மறைந்த முதுபெரும் எழுத்தாளர் வல்லிக்கண்ணனால் ஆரம்பித்து வைக்கப்பட்டது. கடந்த ஐந்து மாநாடுகளும் இந்தியாவிலேயே நடந்துள்ளன.குற்றாலத்தில் நடைபெற்ற ஐந்தாவது மாநாட்டில் எடுத்த தீர்மானத்தின்படி ஆறாவது மாநாட்டை இன்று இலங்கை,கொழும்பிலே நடத்துகிறோம்.இந்த மாநாட்டு அமைப்பாளராகச் செயற்பட்ட அந்தனி ஜீவாவுக்கு எமது பாராட்டுகளைத் தெரி வித்துக் கொள்கிறோம்' என்று வதிலைபிரபா தலைமையுரையில் தெரிவித் தார்.பொதுச் செயலாளர் சொர்ணபாரதி ஆண்டறிக்கையைச் சமர்ப்பித்து உரையாற்றினார்.தொடர்ந்து இந்தியாவிலிருந்து வருகைதந்திருந்த பேராளர் களுக்கு இரண்டு நிமிடம் தங்களை அறிமுகப்படுத்தச் சந்தர்ப்பம் வழங்கப் பட்டது.அதன்படி பதினெட்டுப் பேராளர்கள் தங்களை அறிமுகம் செய்து சிற்றுரை ஆற்றினர்.அவர்களின் உரைகளிலிருந்து பல தகவல்களைப் பெறக் கூடியதாக இருந்தது.அதைத் தொடர்ந்து அடுத்த மாநாட்டை எங்கு நடத்துவது என்று சபையோரின் கருத்துகளைக் கேட்டறிந்து ஏழாவது உலகத்தமிழ் சிற்றிதழ் சங்கத்தின் மாநாட்டை திருச்சியில் நடத்துவதெனத் தீர்மானிக்கப் பட்டு அச்செய்தி சபையில் அறிவிக்கப்பட்டது.நன்றியுரையை ஜீவநதி ஆசிரி யர் கலாமணி பரணிதரன் வழங்கினார்.
தொடர்ந்து சிற்றிதழ்கள் குறித்து கலந்துரையாடல் ஜின்னாஹ் சரிபுதீன் தலைமையில் இடம்பெற்றது. ஜீவநதி, செங்கதிர், படிகள், தென்றல், கதிரவ ன், நீங்களும் எழுதலாம்,கவிஞன்,தொண்டன்,சுவைத்திரள் ஆகிய சிற்றிதழ் களின் ஆசிரியர்குழுவைச் சார்ந்தவர்கள் தத்தமது கருத்துகளைச் சுருக்கமாகத் தெரிவித்தனர்.
உணவு இடைவேளையின் பின் பேராசிரியர் சபா ஜெயராசாவின் தலைமை யில் பாராட்டும் கௌரவிப்பும் நடைபெற்றது.தலைவர் தமது உரையில் எந்த மொழியில் சிற்றிதழ்கள் தோன்றினாலும் அந்தச் சிற்றிதழ்களுக்கு மதிப்புண்டு. ஒவ்வொரு ஆணின் வளர்ச்சிக்குப் பின்புலத்தில் ஒரு பெண் இருப்பாள் .அதேபோல ஒவ்வொரு பெண்ணின் முன்னேற்றத்துக்குப் பின்னால் ஒவ் வொரு ஆண் இருப்பான் என்று சொல்லுவார்கள்.ஒரு எழுத்தாளனுக்குப் பின் னால் சிற்றிதழ்கள் இருக்கும். சிற்றிதழ்கள் மூலம்தான் எழுத்தாளன் முன்னி லைப்படுத்தப்படுகிறான்.
உலக வரலாற்றில் சிற்றிதழ்கள் இரு வகையாகத் தோற்றம் பெற் றன.அவை தருக்க நிலை சிற்றிதழ்கள்,வர்த்தக இதழ்கள் என்று வெளிவர லாயின.வர்த்தக இதழ்களைப் பொறுத்தளவில் அதன் பண்புகள் வேறு.பொதுக் கருத்துகளை வழங்குவனவாக அவை அமைந்தன.சிற்றிதழ்கள் சிறப்பான இலக்கியப் பணியை முன்னெடுத்தன.வர்ததகச் சஞ்சிகைகள் கருத்தியல் உள்ளடக்கத்திலும்,அமைப்பிலும் வேறுபட்டன.வாண்மைச் சிற்றிதழ்கள் ஆய்வு நிலையில் வெளியிடப்படும் தரம்,பண்புச் சிறப்பு, ஆய்வுமுறை, அணு குமுறை என்ற வகையில் அங்கீகரிக்கப்பட்டனவாக அமைந்துள்ளன. இவை பல்வகைக் கருத்தியலுக்கு முக்கியத்துவம் கொடுக்கின்றன.விற்பனை நிலை க்கு மாறாக இலட்சியங்களை நோக்கி, தரத்தை நோக்கி இலக்கியங்கள் முன் னெடுக்கப் பட்டன.இலக்கியச் சிற்றிதழ்களுக்கும்,வர்த்தக இதழ்களுக்கும் வித் தியாசம் இருக்கின்றது.
பழைய சிற்றிதழ்கள்,புதிய சிற்றிதழ்கள் ஆசிரியர்கள் பலர் வெளிவந்து கொண்டிருக்கின்றார்கள்.பழையவர்களிடமிருந்து அனுபவத்தைப் பெற வேண் டும். இரண்டு அமைப்பும் ஒன்றிணைந்து அமைப்பு வடிவில் செயற்படின் நமது சிற்றிதழ்கள் ஒவ்வொன்றும் பாராட்டுக்குள்ளாகும்.ஜப்பான் நாட்டில் இருக் கின்ற நிலைபோல் இருக்கின்ற நிலையை மேம்படுத்திச் செல்லல் அது எல்லாவற்றுக்கும் அவசியம்.அபிவிருத்தி,முன்னேற்றம்,மேம்பாடு என்பவற்றை முன்னெடுத்துச் செல்லவேண்டும்.தரத்தில் எவ்வாறு உயர்ந்து நிற்கின்றது,தொடர்ந்து முன்னேறிச் செல்லும்போது என்ன முன்னேற்றம் ஏற்பட்டுள்ளது போன்ற கணிப்பை ஆசிரியர் கவனத்தில் கொள்ளல் வேண் டும்.பண்பைத் தொடர்ந்து முன்னெடுத்துச் செல்லும்போது உலகத்தரத்தில் எங்கே நிற்கின்றோம் என்பதைக் கவனித்துக்கொள்ள வேண்டிய தேவை சிற்றிதழ்களுக்கு முக்கியம். கருத்து நிலைப்பாடுகள், அழகியல், விமர்சனம், புதியகோட்பாடு,கருத்துக்கண்ணோட்டம் என்பவற்றைத் தமிழில் முன்னெடுத் து வருகின்றனர்.பின்காலனித்துவம்,பின்நவீனத்துவம்,மார்க்சியம் போன்ற கோட்பாடுகள் கருத்தியலில் மாற்றங்களை ஏற்படுத்தி வருகின்றன.இனக் குழுமையில் என்னும் கோட்பாடு அடையாள நெருக்குதலைத் தோற்று விக்கும்.உலகமயமாக்கலின் விளிம்பில் நிற்பவர்கள் சிந்தித்து முழு நிறைவான அறிவுக் காட்சியைப் பெறலாம் என்பதைக் குறிப்பிடலாம் என்று தலைமையுரையில் தெரிவித்தார்.
இவரது உரையைத் தொடர்ந்து பிரபல நாவலாசிரியர் சின்னப்பாரதி உரை நிகழ்த்தினார். நீண்ட காலமாக என்னைத் தெரிந்த அந்தனி ஜீவா உலகத் தமிழ்ச் சிற்றிதழ்கள் சங்க மாநாட்டுக்கு வரும் படி அழைத்திருந்தார்.நான் வந்திறங்கியதும் எனது நாவல் ஒன்றின் சிங்கள மொழிபெயர்ப்பு நூலைக் கொண்டுவந்து தந்தார்கள்.வேற்று மொழிகளில் எனது படைப்புகள் வெளி வருவது எனக்கு மகிழ்ச்சியைக் கொடுக்கும் நிகழ்வாகும்.இன்று இந்த மாநாட்டுக்கு வந்த பிற்பாடு தான் எனக்கு விருது வழங்க இருப்பது தெரிய வந்தது.நான் மார்க்சிய சிந்தனையாளன்.எனக்கு விருதுகள் பெறுவதில் உடன்பாடு இல்லை.அதை நான் விரும்புபவனுமல்ல.
ஏங்கலஸுக்கு அறுபது வயது நிரம்பியபோது இளைஞர் இசைக்குழு அவருக்குப் பாராட்டு வழங்க எண்ணி அவரிடம் போய் அந்த வேண்டுகோளை விடுத்தபோது "மார்க்ஸும் நானும் இறக்கும் வரை எந்தவித பாராட்டு களையும் பெறுவதில்லை என்று தீர்மானித்திருக்கிறோம்'. ஏ.எஸ்.நம்பூதிபாட் ஆட்சிக்கு எதிரான போராட்டங்களை முன்னெடுத்தவர்.எனவே அரச பரிசு களை ஏற்க மறுத்துவிட்டார்.என்னை முன்னிலைப்படுத்தி வழிநடத்திச் சென்ற ஏ.கே.கண்ணன் "பட்டம், பதவி, விளம்பரம், பொருள் என்பவற்றுக்கு ஆசைப் படாதே உன் எழுத்தில் உண்மை இருக்கும், நேர்மை இருக்கும் என்றதனால் நீண்ட பரிசுகள் தேவையில்லை'என்று சொல்லியுள்ளார். ஆகவே அவர்கள் வழியில் வந்த நானும் பரிசுகள் பெறுவதைத் தவிர்த்து வருகின்றேன்.
பிரபல எழுத்தாளர்களாகிய புஸ்கின்,சேக்கோ போன்றோர்களின் எழுத்துத் துறையிலிருந்து பிறப்பை எடுத்தேன்.195253 இல் வெளிவந்த "மனோ ரஞ்சிதம்',"சரஸ்வதி' ஆகியவற்றில் எழுதினேன்.நானும் சிற்றிதழ்களில் எழுதி த்தான் இன்று சிறந்த எழுத்தாளனாக வந்துள்ளேன்.படைப்பின் காத்திரம்தான் எனக்கு மனமகிழ்ச்சியைத் தருகின்றது.நான் மார்க்ஸிஸ்ட் வாழ்க்கையின் போராளியாக நின்று எழுதுபவன் என்று பிரபல எழுத்தாளர் பொன்னீலன் கூறி யுள்ளார்.ஒருவரின் சாதனைகளுக்கு அர்ப்பணிப்புகளும் சரித்திர நிகழ்வுகளும் உலகவரலாற்றில் முக்கியமாகப் பேணப்பட வேண்டும் என்று கூறினார்.
இதைத் தொடர்ந்து விருதுகள் வழங்கப்பட்டன.பாரதி இலக்கிய விருது நாவலாசிரியர் கு.சின்னப்பாரதிக்கும் வல்லிக்கண்ணன் இதழியல் விருது மல்லிகை ஆசிரியர் டொமினிக் ஜீவாவுக்கும் அவ்வை இலக்கிய விருது பத்மா சோமகாந்தனுக்கும் விழாத் தலைவரால் வழங்கப்பட்டது. மேலும்,செங்கதிர் இலக்கிய விருது க.பட்டாபிராமனுக்குக் கொடுக்கப்பட்டது.அத்துடன் நீங்களும் எழுதலாம் அவைத்திரன் படிகள் காந்தியம்,தென்றல், சிராங்கூன் ரைம்ஸ், செங்கரும்பு, குறளருவி ஆகிய சிற்றிதழ்களின் ஆசிரியர்களுக்கும் விருது களும் சான்றிதழ்களும் வழங்கப்பட்டன. பல புதிய முகங்களைச் சந்திக்கும் வாய்ப்பு இம்மாநாட்டால் கிடைத்தது.பல எதிர்பார்ப்புகளுடன் நடைபெற்ற உலகத்தமிழ் சிற்றிதழ்கள் சங்க ஆறாவது மாநாடு நிறைவு பெற்றது. நிகழ்ச்சி அமைப்பாளராக கே.பொன்னுத்துரை செயலாற்றினார்.
- நன்றி. தினக்குரல் நாளிதழ், இலங்கை.

2010-06-05T19:52:00.009+05:30

நவீனத்தின்

முதல் வெளிப்பாடு

விடுதலைக்கானதே!

கவிஞர். வதிலைபிரபா

தலைவர், உலகத்தமிழ்ச் சிற்றிதழ்கள் சங்கம்

நேர்காணல் : நந்தவனம் சந்திரசேகரன்

கவிதை உங்களுக்கு எப்படி வந்தது?
சுமார் 11 வயதிலிருந்தே வாசிக்கத் தொடங்கிய எனக்கு கவிதை வந்தது சற்று ஆச்சரியம்தான். மதுரை அமெரிக்கன் கல்லூரியில் இளங்கலை விலங்கியல் படிக்கும்போதும் கூட கவிதை சற்று தூரம்தான். விருப்பப் பாடமாக creative writing எடுத்து படிக்கும்போதுதான் கவிதை எழுதணும் என்கிற ஆர்வம் ஏற்பட்டது. அதுவரை வாசிப்பில் மட்டும் என்னோடு பயணித்த கவிதைகள் என்னுள் ஏற்படுத்திய எதிர்வினையாய் - எழுத்து வடிவில் காணக் கிடைத்தது.
மெல்ல மெல்ல கவிதை கை வந்தது. எனது நோட்டுப் புத்தகத்தில் பத்திரமாக வைத்திருந்த மயில் பீலிகள் போல் கவிதைகள் அடைகாக்கப் பட்டிருந்தன என்று சொல்லலாம்.
ஹைக்கூ, புதுகவிதை, நவீனம் என எனது கவிதைகளின் அணிவகுப்பும், நீண்டுகொண்டே இருக்கிறது.
'மகாகவி' இதழை 1996 - இல் தொடங்கியவுடன் ஒரு கவிதை இதழாகவே வெளிக்கொணர்ந்தோம். பாரதியின் தாக்கம் என்னுள் முழுமையாகவே வியாபித்திருந்தது. தொடர்ந்து சிற்றிதழ்களில் அமைப்பு ரீதியான பங்களிப்பில் ஈடுபட்டதும் - அதிகமான சிற்றிதழ்களில் எழுதியதும் என்னில் படைப்பாற்றலை அதிகப் படுத்தியது எனலாம்.

எத்தனை ஆண்டுகளாக கவிதை எழுதி வருகிறீர்கள்?
கடந்த 25 ஆண்டுகளாக எழுதி வருகிறேன். இதுவரை சுமார் 250 கவிதைகளுக்கு மேல் எழுதியாகி விட்டது. 'தீ' எனும் ஹைக்கூ தொகுப்பும், 'குடையின் கீழ் வானம்' எனும் கூட்டுத் தொகுப்பும் வெளியிட்டு உள்ளேன். விரைவில் 2 கவிதை தொகுப்பும், ஒரு கட்டுரை, ஒரு சிறுகதை தொகுப்பும் வெளியிட உள்ளேன். ஒரு படைப்பை எழுதியவுடன் உடனே இதழ்களுக்கு அனுப்புவது எனது வழக்கமான ஒன்று. சிற்றிதழ்கள்தான் என் கவிதையின் ஊற்றுக்கண்.

புதுக்கவிதை - நவீனக்கவிதை என்ன வேறுபாடு?
எது புதுசா இருக்கிறதோ அதுவே சிறந்த கவிதை என்பார் கந்தர்வன். கவிதை இயல்பாய் முடிய வேண்டும். கவிதையின் போக்கில் கவிதை இருக்க வேண்டும். ஒருபோதும் கவிஞன் கவிதையில் ஆதிக்கம் செய்யக் கூடாது. இல்லையெனில் அது வெறும் பிரசாரமாகிவிடும் என்பார் கவிக்கோ. அப்துல் ரகுமான்.
இலக்கணம் பிசகாமல் இருப்பது மரபுப் பாக்கள். புதுக் கவிதைகளில் கவித்துவம் மிகுந்திருக்கும். ஆனால் தற்போது நவீனம் எப்படி புரிந்து கொள்ளப்படுகிறது என்பதுதான் கவலை தருகிறது. தன்னை அறிவு ஜீவியாக காட்டிக்கொள்ள - மற்றவர்களிடமிருந்து தனக்கு தனித்துவம் வேண்டுமென்பதற்க்காக புனையப்படுகிறதோ என்கிற கவலையும் இருக்கிறது.
எழுத்துக்களின் அர்த்த ஜாலங்களாக புதுக்கவிதை இருக்கிறது. சொற்களின் மாய ஜாலங்களாக நவீனக் கவிதை இருக்கிறது. மக்களுக்கான இலக்கியம் என புதுக்கவிதை பெரும்பாலும் புனையப்படுகிறது. மக்கள், சமூகம் தாண்டி கலைக்கான இலக்கியமாக நவீனக்கவிதை புரிந்து கொள்ளப்படுகிறது. பெரும்பாலும் இயல்பாகவே புதுக் கவிதைகள் புனையப் படுவதும் உண்டு. படிமம், குறியீடுகள், உத்திமுறைகள் என - இசங்களின் கட்டமைப்பில் மிரட்டும் நவீனக் கவிதைகளும் உண்டு.
எங்கெல்லாம் ஒடுக்கப்பட்ட மக்களின் அபயக் குரல் ஒலிக்கிறதோ - எங்கெல்லாம் தனது அடையாளங்களுக்கென கலகக் குரல் வெளிப்படுகிறதோ, எங்கெல்லாம் தனது இருப்புக்கான போர்க்குரல் ஓங்கி ஒலிக்கிறதோ, ஈழமாகட்டும், பாலஸ்தீனமாகட்டும் ஈரப் பிசுபிசுப்போடு, தூசிகளையும், துயரங்களையும் தாங்கியதான கருமேகம் சூழ்ந்த மண் மீதான உரிமைக்குரல் எங்கெல்லாம் ஒலிக்கிறதோ - அந்தக் குரல்களிலிருந்து வெளிப்படும் படைப்புகள்தான் என்னைப் பொறுத்தவரை நவீனப் படைப்புகளாகும்.
நவீனத்தின் முதல் வெளிப்பாடே விடுதலைக்கானதாகத்தான் இருந்திருக்கும். அது மீறலின் மறுபெயராகவும் இருந்திருக்கலாம். 'நடந்து செல்வதிலிருந்து பறப்பது' என்கிற நவீனம் என்பதுபோல.
போஸ்ட்-மாடர்னிசமோ, சர்ரியலிசமோ, மேஜிக் ரியலிசமோ, எக்சிஸ்டென்சியலிசமோ, சிம்பாலிசமோ, ஆப்டிமிசமோ, இமேஜிசிசமோ இப்படி இருக்கிற நூற்றுக்கும் மேற்பட்ட இசங்கள் உடனடியாக உருவாகவில்லை.
இவை சுயம்பும் அல்ல. தமிழில் தற்போது குழு மனப்பான்மையை உருவாக்கும் விதமாக நவீனப்படைப்புகள் உள்ளன.
உடல்மொழி சார்ந்த படைப்புகள் கூட ஒரு விளம்பர நோக்கில் படைக்கப்படும் படைப்புகளாகவே உள்ளன. உடல்மொழி வாசனை கவிச்சியடிக்கிறது. நவீனம் என்றால் என்ன என்பதை புரிந்து கொள்ளாதவர்களின் கையில் நவீனம் சிக்கி பழமையான தோற்றத்தை தருகிறது.
புதுக்கவிதை புரிந்துகொள்ளவும், நவீனக் கவிதை அறிந்துகொள்ளவும் படைக்கப்படுகிறது என்பதான தோற்றத்தை ஏற்படுத்தி இருக்கிறார்கள். வலி மிகுந்த படைப்புகள் நவீனக் கவிதைகளில் அரிதாகிக்கொண்டு வருகிறது.
நவீன இதழ்கள் என்று சொல்லிக்கொண்டு, விரல் விட்டு எண்ணிவிடக் கூடிய ஒரு சில இதழ்களின் வட்டத்திற்குள் நவீனம் முழிபிதுங்கிக் கிடக்கிறது.
'புதுக்கவிதையின் தொடர்ச்சியே நவீனக் கவிதை' என்பதைப் புரிந்து கொள்ளாதவர்களின் நிலையிது.

நல்ல கவிதை என்பது யாது?
ஒரு நல்ல கவிதை என்பது ஒருபோதும் வாசகனையோ அல்லது வெகு மக்களையோ அந்நியப்படுத்திடாத ஒன்றாகும். காவிரி, பாலாறு, முல்லைப் பெரியாறு என எத்தனையோ ஜீவநதிகளின் நுட்பமான பிரச்சினைகளின் மையமாக தமிழகம் இன்றும் இருக்கிறது. "கங்கை நதிப்புரத்துக் கோதுமைப்பண்டம், காவிரி வெற்றிலைக்கு மாறுகொள்வோம்" என்ற மகாகவி பாரதியின் கனவு இன்றளவும் ஒன்றுபட்ட இந்தியாவின் கனவாக இருக்கிறது. எந்த ஒரு கவிதை, காலம் தாண்டியும் உயிரோட்டமாக இருக்கிறதோ அதுவே நல்ல கவிதை என்பது என் கருத்து.

திருக்குறளின் இன்னொரு வடிவம் ஹைக்கூ என்கிறார்களே! இது சரியா?
திருக்குறளின் இன்னொரு வடிவம் ஹைக்கூ. இது பொருந்தாத ஒன்று. இரண்டடி வெண்பா குறள், 7 சீர்களைக் கொண்டது. இது முற்றிலும் அறநூல். ஆனால் ஹைக்கூ என்பது 3 அடிகளைக் கொண்டதாக இருக்கிறது. 5-7-5 என 17 அசைகளை கொண்டது. இதற்கென்று சில விதிமுறைகள் உள்ளன. 2 -ஆம் அடியின் முடிவில் அல்லது 3 -ஆம் அடியின் ஆரம்ப நிலையில் திடீரென்ற ஒரு திருப்புமுனையை ஏற்படுத்தி விடுவது இதன் சிறப்பு.
குறள் வாழ்வியல் நெறிகளைக் கொண்டதாகிறது. ஒழுங்கு முறைகளை அறிவுறுத்துவதாக அமைந்துள்ளது. அதன்வழி நடக்கவேண்டும். ஹைக்கூ இயற்கை சார்ந்ததாகவும் - பல நுட்பங்களைக் கொண்டதாகவும் இருக்கிறது. ஒரு நல்ல ஹைக்கூ என்பது படைப்பாளன் + வாசகன் இருவரின் பங்களிப்பாக இருக்க வேண்டும். இது இதன் தனிச் சிறப்பு. வாசகனுக்கு படைப்பாளனின் அனுபவத்தை விட முற்றிலும் புதிய வேறொரு அனுபவத்தைத் தரவேண்டும்.
ஆனாலும் குறளின் சிறப்பை நாம் மறுதலிக்க முடியாது. இரண்டு அடிகளில் இவ்வளவு விசயங்களா? என வியந்து பார்ப்போரின் எண்ணிக்கை அளவிட முடியாதது. அதனால்தான் இதை 'உலகப் பொதுமறை' என்கிறோம்.

கவிதையின் அடுத்த நிலை எப்படி இருக்குமென்று எதிர்பார்க்கிறீர்கள்?
கவிதையின் அடுத்த நிலை.. கடிகார முட்களில் தொங்கிக் கொண்டு காலத்தின் பக்கங்களை வேகமாகப் புரட்டிக் கொண்டிருப்பவர்களின் கைகளில் கவிதையிருக்கலாம். ஆனாலும் கருத்துச் செறிவு குறையாமல், புதிய புதிய பொருட் செறிவோடு கவிதையிருக்கும். பாடுபோருட்களின் காட்சி மாறலாம். பாடுபொருட்களுக்குப் பஞ்சமிருக்காது. கவிதையின் தேவை அதிகமிருக்கலாம். அப்போது அநேகமாக கவிதையின் அடுத்த நிலை அதிநவீன தொழில் நுட்பங்களின் பிடியில் மின் கவிதைகளாக வலம் வரலாம். ஈ.புக்ஸ் போன்று ஈ.கவிதைகளும் வரலாம். மரபு - புதுக்கவிதை - நவீனக் கவிதை தாண்டிய நுட்பக் கவிதைகள் கவிதையின் திசைவழி சுட்டும்.
நன்றி:
'சிகரம்' மாத இதழ்.
www.tamilauthors.com

(நன்றி. இனிய நந்தவனம்)

யாதுமாகியவர்

2010-06-04T00:05:00.019+05:30

அப்பா..!

நீங்கள் எனக்காக
விட்டுச் சென்ற வீட்டில்
என் பிள்ளைகளோடு
அமர்ந்திருக்கிறேன்.

என்
செல்பேசியில்
உங்கள் எண்
பதிவு செய்யப்பட்டுள்ளது.

சென்றுவிட்டு
'வருகிறேன்'
என்று சொன்னீர்களே?

செல்பேசி இன்னமும்
என் கைகளில்தான்
இருக்கிறது.

ஊடகங்களின் உளவியல் யுத்தத்தை சிற்றிதழ்கள் தகர்க்க வேண்டும்: எழுத்தாளர் தி.க.சிவசங்கரன்

2010-02-22T18:12:00.000+05:30

பெரும்பான்மை அச்சுஊடகங்களும், காட்சி ஊடகங்களும் மக்களின் பண்பாட்டைச் சீரழிக்கும் உளவியல் யுத்தத்தை நடத்திக் கொண்டிருக்கும் போது, கொள்கைப் பிடிப்புள்ள சிற்றிதழ்கள் சிற்றுளிகளாகி, அந்த மலைகளைத் தகர்க்க வேண்டும் என, சாகித்தியஅகாதெமி விருதுபெற்ற எழுத்தாளர் தி.க.சிவசங்கரன் வலியுறுத்தினார்.

குற்றாலத்தில் 21-02-2010 ஞாயிற்றுக்கிழமை நடைபெற்ற உலகத் தமிழ்ச் சிற்றிதழ்கள் சங்க 5-வது மாநாட்டில் "பாரதி இலக்கிய விருது" பெற்ற அவரது ஏற்புரை:

தமிழ் தேசியத்தை ஆதரிக்காத எவரையும் நேர்மையான எழுத்தாளர் களாகக் கருத முடியாது. தமிழ் மற்றும் தேசியம் பேசும் தினமணி மாதிரியான பெரிய பத்திரிகைகளுடன் இணைந்து சிறு பத்திரிகைகள் இயங்க வேண்டும். சிறு பத்திரிகைகள் இயக்கம் முன்னேற வேண்டும் என்றால் பெரிய பத்திரிகைகளின் ஆதரவு தேவை. பாரதியாரும், பாரதிதாசனும் காட்டிய வழியில் தினமணி மட்டுமே பயணித்துக் கொண்டிருக்கிறது. கார்ப்பரேட் கலாசாரம் தீவிரமாக வளர்க்கப்படும் இன்றைய சூழலில் சிறு பத்திரிகை களின் கொள்கை நெறியும், போக்கும் பாரதிதாசன் பாதையில் இருக்க வேண்டும். மனிதநேயமிக்க அழகியல், அறிவியல், அறவியல் என இம் மூன்றையும் ஒருங்கிணைத்து புதிய படைப்புகளை வெளியிடுவதும், படைப்பதுமான பணிகளைச் செய்வதே இன்றைய காலத்தின் கட்டாயமாகும்.

நமது ஊனோடும், உயிரோடும் கலந்தது தமிழ் தேசியம். இந்தக் குரலை அடக்கி ஒடுக்குவதற்கும், தவறானவழியில் திசை திருப்புவதற்கும் பெரும் பான்மை அச்சு ஊடகங்களும், காட்சி ஊடகங்களும், சில சக்திகளும் வரிந்து கட்டிக்கொண்டு செயல்படுகின்றன. அவை மக்களின் பண்பாட்டைச் சீரழிக்கும் ஓர் உளவியல் யுத்தத்தை நடத்திக் கொண்டிருக்கின்றன. இதில் தரமான எழுத்தாளர்களும், படைப்பாளிகளும்கூட பலிகடா ஆகப் போகின்றனர். எனவே, கொள்கைப் பிடிப்புள்ள சிற்றிதழ்கள், சிற்றுளிகளாகி அந்த மலைகளைத் தகர்க்க வேண்டும்.

அதேவேளையில், சிற்றிதழ்களுக்கு நல்ல படைப்புகளத் தந்துகொண்டே இருக்க வேண்டும் என்ற கொள்கைப் பிடிப்பு படைப்பாளிகளுக்கும் இருக்க வேண்டும். அறிமுகப் படைப்பாளிகள், இளைஞர்கள், மாணவர்களுக்கு சிற்றிதழ்களே நாற்றங்காலாகவும், நடைவண்டியாகவும் இருக்கின்றன, இதில் பயிற்சிபெற்றவர்கள் பின்னாளில் தரமான படைப்பாளிகளாக உருவாகின் றனர். பாரதி முதல் புதுமைப்பித்தன் முதலான மாபெரும் எழுத்தாளர்களும், கவிஞர்களும் சிற்றிதழ்களால் வளர்ந்தவர்கள்தான் என்றார் தி.க.சி.

இலங்கை எழுத்தாளர் அந்தனிஜீவா: உலகத் தமிழ் எழுத்தாளர்கள் மாநாட்டை நடத்த வேண்டும். அடுத்த ஆண்டு ஜனவரியில் இலங்கையில் அத்தகைய ஒரு மாநாட்டை நடத்தவும், அதற்கு தமிழக எழுத்தாளர்களை அழைக்கவும் திட்டமிட்டுள்ளோம். எழுத்தாளர்களும், தினமணி பத்திரிகையும் ஆதரவு அளிக்க வேண்டும்.

பூ. திருமாறன்: சிற்றிதழ்களில் கொலை இல்லை, ரத்தம் இல்லை. உங்களை அறியாமலேயே இந்த சமுதாயத்திற்கு ஒரு சேவை செய்து வருகிறீர்கள். சிற்றிதழ்களுக்கு ஒரு நல்ல காலம் வரும்.

எழுத்தாளர் கழனியூரன்: எதில் எழுதுகிறோம் என்பது முக்கியமல்ல. என்ன எழுதுகிறோம் என்பதுதான் முக்கியம். நல்ல எழுத்துகள் பேசப்படும். அறிவியல் நம்மை வேறுஒரு தளத்திற்கு அழைத்துச்சென்று கொண்டிருக் கிறது. இணையதளம் என்ற அந்த அறிவியல் முன்னேற்றத்தை நாம் பயன்படுத்திக்கொள்ள வேண்டும். இணையதள சிற்றிதழ்களையும் நாம் கணக்கில் எடுத்துக் கொள்ள வேண்டும்.

கவிஞர் கலாப்பிரியா: தி.க.சி.யை ஏற்றுக் கொண்டவர்கள் ஏராளம். அவரிடம் பயின்றவர்களும் ஏராளம். அவர் தனது கருத்தை மகன்களிடம் கூட திணித்த தில்லை. அவர் தனக்கு அறிமுகமான எழுத்தாளர்களை அவர்களது இயற் பெயரைச் சொல்லி அழைப்பதில்லை. அவர்களைக் கெüரவிக்கும் வகையில் புனைப் பெயரைக் கூறியே அழைப்பார்.

எழுத்தாளர் தீப.நடராஜன்: சிற்றிலக்கியங்கள்தான் இலக்கியத்தைக் காப்பாற்றி வருகின்றன. பெரிய இதழ்கள் இலக்கியத்தை மட்டுமே சார்ந்து இருப்ப தில்லை. தினமணி நாளிதழ், இலக்கியத்திற்கென பக்கம் ஒதுக்கி தமிழ்மணியைத் தந்து கொண்டிருக்கிறது. இலக்கிய உலகில் தி.க.சி.க்கு தனி இடம் உண்டு.

சிற்றிதழ்கள் சங்கத் தலைவர் வதிலைபிரபா: அஞ்சல் துறையின் உள்ளூர் அதிகாரிகள் திடீர் திடீரென நூல் அஞ்சலுக்கு கட்டணத்தை உயர்த்தி வருகின்றனர். அந்தப் போக்கைக் கைவிட வேண்டும்.

எழுத்தாளர்.அரங்கமல்லிகா: ஒளவையாரின் சமூக சிந்தனையை யாரும் மறந்துவிட முடியாது. என்னை இலக்கிய உலகுக்கு அறிமுகம் செய்தது தினமணிதான்.

உலகத் தமிழ்ச் செம்மொழி மாநாட்டில் சிற்றிதழ்களுக்கு தனி அமர்வு, கண்காட்சி அமைக்க வேண்டும்

2010-02-22T17:57:00.003+05:30

2010 பிப்.21:

உலகத் தமிழ்ச் செம்மொழி மாநாட்டில் சிற்றிதழ்களுக்கு தனி அமர்வு, கண்காட்சி அரங்கம் அமைக்க வேண்டும் என வலியுறுத்தி உலகத்தமிழ்ச் சிற்றிதழ்கள் சங்க மாநாட்டில் தீர்மானம் நிறைவேற்றப்பட்டது.

குற்றாலத்தில் நடைபெற்ற உலகத் தமிழ்ச் சிற்றிதழ்கள் சங்க மாநில மாநாட்டில் பேசுகிறார் சங்கத் தலைவர் வதிலை பிரபா.

உலகத் தமிழ்ச் சிற்றிதழ்கள் சங்க 5-வது மாநில மாநாடு குற்றாலத்தில் உள்ள திருவிதாங்கூர் அரண்மனையில் ஞாயிற்றுக்கிழமை நடைபெற்றது.

காலையில் நடைபெற்ற பொதுக்குழு அமர்வுக்கு சங்கத் தலைவர் கவிஞர் வதிலைபிரபா தலைமை வகித்தார். துணைப் பொதுச் செயலர் பாரதிவாசன், அமைப்புச் செயலர் திருவள்ளுவர் கா.நாராயணசாமி ஆகியோர் முன்னிலை வகித்தனர்.

பொதுச்செயலர் கவிஞர் சொர்ணபாரதி ஆண்டறிக்கை யையும், பொருளாளர் நந்தவனம்சந்திரசேகரன் பொருள றிக்கையையும் வாசித்தனர். இலங்கை கிளை அறிக்கையை அதன் செயலர் அந்தனி ஜீவா சமர்ப்பித்தார்.

மாநாட்டில் நிறைவேற்றப்பட்ட பிற தீர்மானங்கள்:

உலகத் தமிழ்ச் செம்மொழி மாநாட்டை நடத்தும் தமிழக அரசுக்கு பாராட்டு தெரிவித்துக் கொள்கிறோம். இம் மாநாட்டின் மூலம் தமிழகத்தில் வீடுகள் தோறும் சங்க இலக்கியம் என்ற பெயரில் மலிவுப் பதிப்பில் அனைவருக்கும் சங்க இலக்கியத் தொகுப்பை அரசு வழங்க வேண்டும்.

மத்திய செம்மொழி ஆய்வு நிறுவனம் சிற்றிதழ்களுக்கு ரூ.30 ஆயிரத்தை 3 தவணைகளாக வழங்குகிறது. அதுபோல, தமிழக அரசும் தமிழ் வளர்ச்சித் துறை மூலம் ரூ.50 ஆயிரம் வழங்க வேண்டும். அஞ்சல் துறையில் அவ்வப்போது உருவாக்கப்படும் எழுதப்படாத கெடுபிடிகளை, விதிமுறை களைக் களைய வேண்டும்.

2011 ஜனவரியில் கொழும்பில் நடைபெறும் உலகத் தமிழ் எழுத்தாளர் விழாவில் சிற்றிதழாளர்கள் கலந்துகொள்ள வேண்டும். இலங்கையில் அனைத்து தமிழ் மக்களும் சமஉரிமையும் அந்தஸ்தும் பெற்று, அமைதியுடன் வாழ மத்திய, தமிழக அரசுகள் நடவடிக்கை எடுக்க வேண்டும்.

சிற்றிதழாளர்களுக்கும் கலைமாமணி விருது வழங்க வேண்டும் என்பன உள்ளிட்ட தீர்மானங்கள் நிறைவேற்றப் பட்டன.

மாநாட்டு அமைப்பாளர் சொக்கம்பட்டி ரஹீம் வரவேற்றார். ஜாஹிர் உசேன் நன்றி கூறினார். கண்காட்சி: அதைத் தொடர்ந்து சிற்றிதழ்கள் கண்காட்சியை மகாத்மா காந்தி சேவா மையநிறுவனர் வி.விவேகானந்தன் துவக்கிவைத்தார்.

சிற்றிதழ் குறித்த கருத்தரங்கம் உதயம் ராம் தலைமையில் நடைபெற்றது. தமிழ் மணவாளன், அ.சுபாஷ், பாரதி, சந்திரா மனோகரன், வாழைகுமார், அ.மண்ணுலிங்கம், அ.செல்வதரன் உள்ளிட்டோர் பேசினர்.

ஹைக்கூ

2010-02-01T11:11:00.000+05:30

நீண்ட நேரமாக
பறக்கும் பறவையொன்று
பறந்துகொண்டிருக்கிறது.

உலர்ந்த மணலில்
உறைந்து கிடந்தவிதை மீது
விழுந்தது மழைத்துளி.

மஞ்சள் வெயிலில் மயங்கி
கிடந்த சாரை பாம்பொன்று
ஊர்ந்து செல்கிறது.

உதிரும் சருகில்
தொங்கிக் கொண்டிருக்கிறது
சிலந்தி பூச்சி.

தகிக்கும் தார்சாலையில்
பதியாத சுவடுகள்
இழுவை மாடு.

புற்களை வெட்டாதீர்கள்
உறங்கிகொண்டிருக்கிறது
பனி துளிகள்.

பூக்கள் மலர்கின்றன
வண்ணத்துப் பூச்சிகளை
பிடிக்காதீர்கள்.

கொசு கடித்தபோது
அயர்ந்து உறங்குகிறான்
பிச்சைக்காரன்.

இரவுநேர மழை
வடியும் நீரிடுக்குகளிடையே
கத்துகிற தவளைகள்.

தீட்டப்பட்ட ஓவியம்
உயர்த்து எழுகிறது
பார்வை விழிகள்.

இரவின் மௌனம்
பகலின் இரைச்சல்
உத்திரக் காத்திருக்கும் மலர்.

பூக்களின் தரிசனம்
கண்டு ரசித்தேன்
மலரும் பொக்கைவாய்.

அமாவாசை இரவில்
தொலைந்த நிலா
புழக்கடையில் அக்கா.

ஆழில் பேரலை
அள்ளிச் சென்றது
சாதி முட்களை.

விழிகளால் பேசி
இதழ்களால் எழுதினான்
ஈர முத்தம்.

முகிழ் விழுது
மழி விழுது
ஆடி பழகு.

வெல்ல அபாயம்
காலியான ஊர்
கதறும் தவளைகள்.

பற்றி எரிகிறது
புதர் காடெங்கும்
மோக தீ.

மௌன இரவின்
நிசப்த ஒலிகள்
நீயும் நானும்.

வடியும் இரவின்
கடைசி துளிகள்
வியர்வை பனிக்குடம்.

பழைய செருப்பை
உதறி நடந்தான்
கடிக்கும் புது செருப்பு.

காற்றிலாடும்
ஒற்றை இறகு
வானம் வசப்படுமா?

பூக்களோடு
என்ன உரையாடல்?
ரீங்காரமிடும் வண்டுகள்.

கிளையில்லா மரம்
கண்களை உறுத்துகிறது
கூடில்லா பறவை.

ருசியில்லை
தூர எரிந்தபோது
பசித்தது வயிறு.

மதுரசத்தில் திளைத்தபோது
இறந்து கிடந்தவன் மீது
மொய்க்கும் வண்டுகள்.

முதல்தட்டில் பொருண்மை
கடைத்தட்டில் பொறுமை
இடைத்தட்டில் வெறுமை.