பிம்பம்

சைபைகூ வகை கவிதைகளின் தொகுப்பு

2012-01-19T21:39:00.001+05:30

சைபிகூ வகை கவிதைகள் என்பது விஞ்ஞான கற்பனைகள் பற்றி ஹைக்கூ வடிவில் எழுதுவது . உதாரணமாக எதிர்கால நூற்றாண்டு கவிதைகள் எப்படி இருக்கும் /எப்படி எழுதப்படும் என கற்பனையாக எண்ணி எழுதுவது .

அந்த வகையில் எழுதிய சில சைபைகூ கவிதைகளை தொகுத்துள்ளேன் .

சைபைகூ கவிதைகளில் நல்ல தகவல்களும் இருக்க வேண்டும்/பயனுள்ளதாக இருக்கக் வேண்டும் என்ற நோக்கில் எழுதப்பட்டவை இவை . தெரியாத விடயங்கள் இருந்தால் கூகிள் செய்து பாருங்கள் :)

சைபைகூ

இருந்தும் இல்லையாய் இருக்கிறேன் ;
எம் தியரியும் எம்(M) தியரியும் ஒன்று தான் .

சிந்தடிக் டெலிபதியில் பேசிக்கொண்டன இரு மனங்கள்
சிந்திக்காத காதல் என்பது பிழையானது
இருபத்தியிரண்டாம் நூற்றாண்டில் ..

செவ்வானத்தின் வனப்பு :
வாங்கிப் பொருத்திய கண்களினூடு ஊறியது

நேரத்தில் பயணித்து இறந்தகாலம் சென்றுவிட்டேன் ;
அடையாளம் தொலைத்துவிட்டேன் ;
காலம் காட்டும் கடிகாரங்கள் அங்கில்லை .!

பொதுவான சில கவிதைகள்

மெய்யின் மையத்தில் மையல் கொள்ளும்
இதயம் தைக்கும் தையலின் கொள்ளை #காதல்

வளி ஊடுருவும் இதயத்தில் வலிகள் சுமக்கிறான் மனிதன் ,
சிறகுகள் கொண்டு வளியை கிழித்து வழி அமைக்கின்றன பறவைகள் .

இரவி இல்லா இரவில் ;
ஒளிரும் இரவல் வாங்கி :) #நிலவு

7 ஆம் அறிவு - நம்மை இங்கு நாம் தொலைத்தோம் ! தொலைப்போம் !

2011-10-27T19:07:00.000+05:30

ஒரு முறை சுஜாதா அவர்களிடம் ஒருவர் 7 ஆவது அறிவு என்னவாக இருக்கும் என கேட்டதற்கு தொழிநுட்பத்தை .ஊடகங்கங்களை பயன்படுத்தி செய்யப்படுவது என கூறினார் . உதாரணமாக மனிதன் உருவாக்கிய கணணி மனிதனை விட வேகமாக வேலைகள் செய்யும் . அதே போல இயற்கை ஊடகங்களை(சக்திகளை ) பயன்படுத்தும் திறன் சித்தர்களுக்கு இருந்திருக்கிறது .அதானால் தான் இந்த பெயராக இருக்க வேண்டும் .

7 ஆம் அறிவு திரைப்படம் பற்றி விமர்சனமாக இந்த பதிவை வைக்க போவதில்லை . சில விமர்சகர்கள் என்போரின் விமர்சனங்களுக்காக எழுதும் பதிவு .

அதற்கு முதல் இப்போது இருக்கும் தமிழ் மேதைகள் கூட்டம் பற்றி ஒரு வித அறிமுகம் கொடுக்கிறேன் .

இந்த மேதைகள் கூட்டத்தால் எந்த பயனும் இதுவரை காலமும் தமிழுக்கு, சைவத்துக்கு இருந்ததில்லை . எழுத்துலக பிரம்மாக்கள் என்பவர்கள் இலக்கிய சொட்ட சிறு கதையையும் ,கவிதைகளையும் இணையம் முழுக்க கொட்டி வைத்திருக்கிறார்கள் . கவிதைகளுக்கு ,கதைகளுக்கும்,முக்கியமாக சினிமாவுக்கும் இணையத்தில் பஞ்சமில்லை . ஒரு விஞ்ஞானம் பற்றிய விடயமோ ,அது பற்றிய ஆராய்ச்சிகளோ இணையத்தில் இல்லை .தமிழை,தமிழின் தொன்மைகளை விஞ்ஞான பார்வையில் தேடினால் ஒன்றையும் காணக்கிடைக்காது .ஒரு சில பிளாக்கர்களின்(எண்ணலாம்) ஆக்கங்கள் தவிர .

இந்த நேரத்தில் போதிதர்மன் எனும் கதாப்பாத்திரம் 7 ஆம் அறிவில் இருக்கிறது என கேள்விப்பட்டேன் . இணையத்தில் தேடிய போது ஆங்கிலத்தில் பல விடயங்கள் கொட்டிக்கிடந்தது . தமிழில் ஏழாம் அறிவோடு சேர்ந்த செய்திகளாகவே போதிதர்மன் பற்றி தமிழில் காணக்கிடைத்தது .

யாராவது ஒருவர் தமிழின் தொன்மை பற்றி ஆராய்ச்சி செய்தால் அதை பற்றி ஒருவர் கூட வாய் திறந்து பேசுவதில்லை . செம்மால் மானவை எனும் பேராசியர் திருக்குறளில் 140 குறள்களில் இருக்கும் நவீன மருத்துவம் பற்றிய தகவல்களை ஆராய்ந்து எழுதியிருக்கிறார்கள் . இவ்வளவு பெரிய பொக்கிஷத்தை வைத்துக்கொண்டு இத்தனை காலம் எப்படி இருக்கிறீர்கள் என்பது அவரின் கேள்வி??? .இது எத்தனை பேருக்கு தெரியும் .எத்தனையோ பேர் மருத்துவம் படிப்பீர்கள் .யார் தேடியிருக்கிறீர்கள் ! எத்தனை எஞ்சினியர்களுக்கு தஞ்சை பெரும் கோவிலின் கட்டடக்கலை தெரியும் ! எத்தனை பேர் நீங்கள் படிக்கும் துறையில் தமிழை நவீன மயப்படுத்த தயாராக இருக்கிறீர்கள் . இத்தனைக்கும் தகுதி இருந்தால் 7ஆம் அறிவை .முருகதாஸை நீங்கள் தவறாக விமர்சிக்க முடியும் .

வைரமுத்துவிடம் ஒரு பெரிய நடிகர் தமிழ் வருவது போல பாடலில் வரி எழுதி தாருங்கள் ,தாய் குலத்தோடு ஒரு சீன்,உழைக்கும் வர்க்கத்தோடு ஒரு சீன் என கேட்டு வாங்குகிறார்கள் ஒரு உழைப்பும் ஒரு விடயமும் இல்லாமல் . இது எதை, பாச உணர்வை தூண்டி ?யாரை முட்டாளாக்கி பணம் சம்பாதிக்கும் வழி ? இந்த நடிகரின் எல்லா பாடல்களிலும் தமிழ் வருவதை கவனிக்கலாம் . இது ஒரு விடயத்தை சொல்லி,வரலாற்றை சொல்லி தானே தமிழ் தமிழ் என்கிறார்கள் .அதை விட இது எவளவோ மேல்.

தமிழ் உணர்வை தூண்டி விட்டு பணம் சம்பாதிக்க முடியும் என்றால் அதில் எனக்கு பெருமையாக இருக்கிறது .தமிழ் உழைப்பது பெருமை தானே ! அவர் பணம் பண்ணுவது ,கருணாநிதி குடும்பம் பணம் பண்ணுவது ,சூர்யா விஜய் சண்டை ,வரலாறு தவறு ,முருகதாஸ் தவறு என்பதை விட்டு சொன்ன கருத்து புரிந்து கொண்டீர்களா முதல் ? அதற்காக செயற்படுவீர்களா ? .ஒருவருமே செய்யாத போது ஒருவன் செய்ததை மட்டம் தட்டி ,அன்றோடு மறந்து விடுவீர்கள் தானே .

போகி என்ற பெயரில் எங்கள் முக்கிய குறிப்புகளை அழித்தார்கள் என்பது முற்றிலும் உண்மை . எம் முன்னோர்களை சூரன் என்று ,நரகாசூரன் அளித்த நாளை எம்மையே கொண்டாட வைத்துள்ளார்கள் புத்திசாலி ஆரியர்கள் .இன்றும் பிராமணனுக்கு அடிமையாகி பணத்தை சும்மா இறைக்கிறோம் தானே ? தமிழனுக்கு எந்த மதமும் இருந்திருக்கவில்லை ,அவன் கண்டுபிடித்த விடயங்களை ,பொக்கிஷங்களை படையெடுப்புகள் மூலம் பின்னர் எம்மை ஆண்டவர்கள் அழித்தார்கள் என்பது உண்மை . சித்தர்கள் புத்தகங்களில் நவீன விஞ்ஞானம் இருப்பது போன்ற விடயங்கள் எமக்கு தெரியும் .ஆனால் சிலபஸ் படி படித்தோம் ,வேலை கிடைத்தது .பணம் பணம் என்று ஓடினோம் என்று போய்க்கொண்டே இருப்போம் . ஏன் இன்னும் அறிவியலுக்கு ஒவ்வாத சித்திரையை புதுவருடமாக நாம் கொண்டாடவில்லையா ??

இதுவரை தமிழ் சினிமா காட்டாத பக்கத்தை தைரியமாக தமிழை நம்பி எடுத்திருக்கிறார் முருகதாஸ் . முதல் நிமிடங்களில் பல்லவ சாம்ராஜ்ஜியத்தை காட்டும் போதே ஒரு வித திமிர் தொற்றிக்கொள்கிறது. சூர்யாவின் மிடுக்கான தோற்றம் ஒரு வீரனை முன்னிறுத்தியது . போதி தர்மன் பற்றிய முதல் 15 நிமிடங்களுக்கு மிகவும் உழைத்திருக்கிறார்கள் . இதே காட்சி சீனப்படத்தில் வந்திருந்தால் சங் சாங் என்று பேசியிருந்தாலும் பார்த்துவிட்டு இப்படி எல்லாம் தமிழ்ல எடுக்க மாட்டாங்களே என்று திட்டு வேறு . அதே தமிழில் எடுத்தால் ?

படத்தில் வரும் நோக்கு வர்மம் என்பது சித்தர்கள் பற்றி வாசித்தவர்களுக்கு தெரியும் . நோக்கு வர்மம் மட்டும் அல்ல .சித்தர்கள் பல கலைகள் பலருக்கு தெரியாது என்பது நம் துரதிஷ்டம் . ஒன்றுமே தெரியாதவிடத்து இப்படியொன்று இருக்கிறது,தமிழனின் பொக்கிஷங்களில் விஞ்ஞானம் இருக்கிறது என்று நினைவு படுத்தியது முருகதாசின் குற்றமாக இருக்கலாம் .

எம் முன்னோர்களை வணங்காமல் அவர்களை விஞ்ஞானிகளாக பாருங்கள் என்று ஒரு செய்தி வருகிறது . இது எத்தனை பேருக்கு புரிந்திருக்குமோ தெரியவில்லை .

இந்த திரைப்படத்தை புரிந்து கொள்ளாதவர்களுக்கு ஒரே பதில் சொல்லலாம் . "நம்மை இங்கு நாமே தொலைத்தோம் " . நிச்சயம் தமிழர்கள் அனைவரும் பார்க்க வேண்டிய படம் . பார்ப்பதோடு மட்டும் நிறுத்தி விடாதீர்கள் .

பேஸ்புக் Subscribe button பாவிப்பது எப்படி ?

2011-09-16T15:39:00.002+05:30

நீங்கள் ஒருவருடைய நண்பராகாமலேயே அவர் பொதுவாக பகிரும் விடயங்களை பெற்றுக்கொள்வதற்காக பேஸ்புக் Subscribe Button ஐ அறிமுகப்படுத்தி இருக்கிறது .

இந்த Subscribe பொத்தானை இன்றிலிருந்து நீங்கள் உங்கள் கணக்கில் Message ,poke பொத்தானுக்கு அருகில் பார்க்கலாம் . இதன்படி நீங்கள் ஒருவரின் நண்பராகமலேயே அவர் பகிரும் பொதுவான விடயங்களை நீங்கள் பார்க்க முடியும். உதாரணமாக டுவிட்டர் இயங்குவதை போன்று .

நீங்கள் உங்களுக்கு தெரிந்த நண்பர் அல்லாதவர் ஒருவரின் கணக்குக்கு சென்று அவரை பின்பற்றலாம் . அதில் நீங்கள் உங்களுக்கு தேவையான விடயத்தை மட்டும் பின்பற்றிக்கொள்ளலாம்(உதாரணமாக :தேவையில்லை எனில் அவர் இடும் படங்களை தவிர்த்து அவரின் ஸ்டேடஸ் ஐ மட்டும் பெற்றுக்கொள்ளலாம் ).

Subscribe முறையை நீங்கள் விருப்ப பட்டால் செயற்படுத்தி கொள்ளலாம் . விருப்பமில்லையெனில் அதனை நிறுத்தி விடலாம் .நீங்கள் செயற்படுத்தினால் மட்டுமே உங்களை மற்றயவர்கள் பின்பற்றமுடியும் . இதனை செயற்படுத்த https://www.facebook.com/about/subscribe

உங்களுக்கு பிடித்த பிரபலங்களை நீங்கள் பின்பற்றிக் கொள்ளலாம். சாதாரணமாக ஒருவர் 5000 நண்பர்களையே கொண்டிருக்க முடியும் என்பதால் உங்கள் பிரபலங்களின் பேஸ்புக் பக்கங்களை பார்க்க நீங்கள் ஆர்வமாக இருந்தாலும் அவர்கள் உங்களை இணைத்திருக்க மாட்டார்கள் .

பாரதியை முழுமையாக படியுங்கள் !

2011-09-11T19:52:00.000+05:30

பாரதி கண்ட புதுமைப்பெண்,பாரதியின் கனவு,பாரதியின் கவிதைகள் என மூச்சுக்கு ஒரு முறை பாரதி பற்றி பேசுகிறோம் .ஆனால் பெரும்பாலும் பாரதி கூறியதில் ஒரு பகுதியை தான் எடுத்துக்கொள்கிறோம் .அது எம் மனோநிலையின் வெளிப்பாடோ தெரியவில்லை .பாரதியின் நினைவு தினத்தில் ,அவன் எண்ணங்கள் இறக்காத தினத்தில் இதை பதிகிறேன் .

பாரதியை ஒரு சாதாரண நுகர் பொருள் கலாச்சாரத்தில் சிக்கிய மனிதர்கள் வட்டத்துக்குள் சேர்க்க முடியாது .தன் குடும்பம் தன் வட்டம் என்று நினைக்காத "வல்லமை தாராயோ இந்த மாநிலம் பயனுற வாழ்வதற்கே" என்ற வரிகளே பாரதியின் எண்ணத்தின் உயர்வை சொல்லும் . நேரடியாக விடயத்திற்கு வருகிறேன் .

எப்போதும் நாம் பாரதி கூறியதில் பாதியை தான் நினைவில் வைத்திருக்கிறோம் .சில கருத்துகளை அப்படியே எம் தன்மைக்கு ஏற்ப மாற்றியிருக்கிறோம் .பாரதி கண்ட புதுமை பெண்களை உதாரணமாக சொல்லலாம் .

முக்கியமாக "மெல்லத் தமிழினிச் சாகும்" என்று நாம் வெறுமனே கூறுவதுண்டு .பாரதி கூறியது இப்படி சொல்ல கூடாது என்றே !

புத்தம் புதிய கலைகள்-பஞ்ச
பூதச் செயல்களின் நுட்பங்கள் கூறும்;
மெத்த வளருது மேற்கே-அந்த
மேன்மைக் கலைகள் தமிழினில் இல்லை

சொல்லவும் கூடுவ தில்லை-அவை
சொல்லுந் திறமை தமிழ்மொழிக் கில்லை;
மெல்லத் தமிழினிச் சாகும்-அந்த
மேற்கு மொழிகள் புவிமிசை யோங்கும்"

என்றந்தப் பேதை உரைத்தான்-ஆ!
இந்த வசையெனக் கெய்திட லாமோ? என்று முடித்திருப்பார் .

அதற்கான வழியையும் முன் வைத்தான் .நாம் அதனை பின்பற்றுகிறோமா!

சென்றிடு வீர் எட்டுத் திக்கும்-கலைச் செல்வங்கள் யாவும் கொணர்ந்திங்கு சேர்ப்பீர்!

எட்டு திக்கும் சென்றோம் இங்கே கொண்டு வந்து சேர்த்தோமா என்பதே கேள்வி ? அங்கேயே சென்று இருந்துவிட சொல்லவில்லை பாரதி .

"யாமறிந்த மொழிகளிலே தமிழ்மொழிபோல்
இனிதாவது எங்கும் காணோம்; "

இதனை கூறிவிட்டு நாம் நிறுத்தி விடுவோம் . பாரதி வெறுமனே மொழியின் புகழ் பாடிவிட்டு நிறுத்திவிடவில்லை . அவன் புரட்சிக்கவி . சாதாரண கவிஞர்கள் போல் அல்லாததால தான் இன்னமும் உயிர் வாழ்கிறான் .

பாமர ராய், விலங்குகளாய், உலகனைத்தும்

இகழ்ச்சிசொலப் பான்மை கெட்டு, நாமமது தமிழரெனக் கொண்டுஇங்கு வாழ்ந்திடுதல் நன்றோ? சொல்லீர்! தேமதுரத் தமிழோசை உலகமெலாம் பரவும்வகை செய்தல் வேண்டும்.

மொழியின் அழகை உணர்ந்தவர் அதன் தொடர்ச்சியை விரும்பியவர் .அதனோடு நிறுத்திவிடவில்லை .அதற்கு வழியும் சொல்லி இருக்கிறார் . மேலே உள்ள வரிகளை கவனிக்கும் பலர் அவர் காட்டிய வழியில் பயனிப்பதில்லை என்பது நிதர்சனம் .

பிறநாட்டு நல்லறிஞர் சாத்திரங்கள்
தமிழ்மொழியிற் பெயர்த்தல் வேண்டும்;
இறவாத புகழுடைய புதுநூல்கள்
தமிழ்மொழியில் இயற்றல் வேண்டும்;
மறைவாக நமக்குள்ளே பழங்கதைகள்
சொல்வதிலோர் மகிமை இல்லை;
திறமான புலமையெனில் வெளிநாட்டோர்;
அதைவணக்கஞ் செய்தல் வேண்டும்.

நாம் வெளிநாட்டவரை ,வெளிநாட்டு மொழிகளை வணக்கம் செய்கிறோமே தவிர அவர்கள் எம் மொழியை எம்மை பின்பற்றவேண்டும் என்று நினைப்பதில்லை .

இப்படி செய்தால் யார் யார் எல்லாம் விழித்து கொள்வர் என்றும் கூறுகின்றார் .

பள்ளத்தில் வீழ்ந்திருக்கும் குருடரெல்லாம்
விழிபெற்றுப் பதவி கொள்வார்;
தெள்ளுற்ற தமிழமுதின் சுவைகண்டார்
இங்கமரர் சிறப்புக் கண்டார்.

என்னை கவலைகள் தின்னத்தகாதேன்று நின்னை சரணடைந்தேன் என்று பாரதி கூறியது .பணம் என்ற இந்த அற்ப துன்பங்களால் மக்களுக்கும் ,நாட்டுக்கும் ,மொழிக்கும் தான் செய்ய இருந்த செயல் முடியாமல் போய் விடுமோ என்ற கவலையில் தான் பாடினான் . இந்த வரிகளை நாம் எமது அற்ப துன்பங்களுக்கே பயன்படுத்துகிறோம் .

பாரதியின் எண்ணத்திற்கு செயல்வடிவம் கொடுப்போம் !

மங்காத்தா - விமர்சனமல்ல எனது பார்வை

2011-08-31T14:58:00.002+05:30

இது ஒரு வியாபார நோக்க படம் என்பதால் விமர்சனம் அல்லாது எனது பார்வையிலேயே கருத்தை தெரிவிக்கிறேன் .

மங்காத்தா முழுக்க முழுக்க ஒரு வியாபார நோக்கம் கொண்ட அதிரடி திரைப்படமாக இருந்தாலும் வெங்கட்பிரபு தனது பாணியில் இருந்து மாறவில்லை . சீரியசான காட்சிகளும் புன்னகையை தந்துவிட்டு போகின்றன .

முதலில் அஜித்தின் மாறுதலுக்கு வாழ்த்துக்கள் . அசலில் (படம் வெற்றி அடையாவிட்டாலும் ) மற்ற நடிகர்களுக்கும் முக்கியத்துவம் கொடுத்திருந்தார் .அதே இந்த திரைப்படத்திலும் அனைத்து நடிகர்களுக்கும் முக்கியத்துவம் கொடுக்கப்பட்டிருக்கிறது . இதன் கதை திரைக்கதை என அனைத்திலும் இயக்குனர் தான் . இதை முழுக்க முழுக்க இயக்குனர் படமாக பார்க்க முடிவது தமிழ் சினிமாவின் வெற்றி எனலாம் .

கதை இல்லை -தேவையுமில்லை (திரைக்கதை சிறப்பு )

கிரிக்கெட் சூதாட்ட பணத்தை அனைவரும் திட்டமிட்டு கொள்ளை அடிப்பது தான் கதை என ஒரு வரியில் சொல்லிவிடலாம். படத்தின் ற்றேயிலரில் கூட கதை தெரிந்துவிடும் . சில திருப்பங்கள் ,எதிர்பாராத விடயங்கள் திரைக்கதை மூலம் திரைப்படத்தை சிறப்பாக கொண்டு சென்றிருக்கின்றன .ஆரம்பத்தில் திரைக்கதை சோர்வு என்றாலும் பின்னர் நன்றாக இருந்தது .

முக்கியமாக அஜித்தின் நடிப்பு சிறப்பாக இருந்தது .அஜித்தின் கதாப்பாத்திரத்தை அழகாக வடிவமைத்திருக்கிறார் வெங்கட்பிரபு .

காட்டப்படாத பக்கம்(இருந்தால் இன்னும் நன்றாக இருந்திருக்கும் )

கிரிக்கெட்டின் பின்னால் நடைபெறும் சூதை காட்டியது பாராட்டத்தக்கது. ஆனால் இந்த சூதுகளின் பின்னணியோ அல்லது இந்த சூதுகள் ஒரு ஆட்டத்தை எப்படி மாற்றி அமைக்கிறது என்பதை காட்டி இருந்தால் நன்றாக இருக்கும் . இப்படி நடைபெறும் சூதுகள் மூலம் தான் ஒவ்வொரு அணி வீரர்களும் விலைக்கு வாங்கப்படுகிறார்கள். அவர்கள் தான் போட்டியின் திசையையும் மாற்றுகிறார்கள் .

பின்னால் புரளும் பல கோடிக்கணக்கான பணம் ஒரு ரூபாய் கூட செலவில்லாமல் பார்க்கும் எமக்கு புரியப்போவதில்லை . கிரிக்கெட்டின் இந்தப்பக்கத்தையும் காட்டியிருந்தால் பலருக்கு தெரிந்திருக்கும் .

படத்தின் குறைகள்

யுவனின் பின்னணி இசை அருமை .பாடல்கள் தேவை இல்லாத இடங்களில் வருகிறது . கண்ணாடி நீ பாடல் தேவையில்லாமல் வருகிறது . இடைவேளைக்கு முன்னர் சில இடங்களில் கொட்டாவி வருவதை தடுக்க முடியாது .இன்னமும் பெண்களை மோகப்போருளாக மட்டும் பயன்படுத்துவது சலிப்பை ஏற்படுத்துகிறது . தொடர்ந்து அதே அணியுடனேயே படம் எடுப்பதும் சலயொப்பை ஏற்படுத்துகிறது .

மங்காத்தா அஜித் ரசிகர்களுக்கு மட்டுமல்லாமல் பலரும் ரசித்து பார்க்க கூடியதாக இருக்கும் . மொத்தத்தில் ஒரு நல்ல அதிரடி திரைப்படம் பார்த்த மகிழ்ச்சியை கொடுக்கும் .

தமிழர் அறிவுத்தளத்தில் இணைவதற்கான அழைப்பு

2011-08-11T17:43:00.008+05:30

கற்பிப்போம் ,நாமும் தெரிந்துகொள்வோம்

தமிழ் உறவுகளுக்கு வணக்கம் ,

தமிழர்களுக்கென்று அறிவு சார்ந்த தளம் இணையத்தில் இல்லை என்பதை கருத்தில் கொண்டும் எம் சமூக வளர்ச்சியை அடிப்படையாக கொண்டு உருவாக்கப்பட்டுள்ள தளம் இது . http://www.ewow.lk/

இந்த தளத்தின் நோக்கம் அறிய இந்த கட்டுரைக்கு செல்லலாம் : எதற்காக இந்த தளம் ? நோக்கம் ?

இதில் எந்தவிதமான பங்களிப்பையும் நீங்கள் செய்யவும் முடியும் .ஆக்கங்களை நீங்கள் உள்ள துறையிலும்/விருப்பமான துறையிலும் எழுதலாம் . பாடங்கள் வீடியோவில் கற்பிக்கக் கூடியவராக இருந்தால் கற்பிக்கலாம் .பிடித்தமான எந்த பகுதிக்கும் நீங்கள் பங்களிக்கலாம் .

உங்களுக்கு தெரிந்த எந்த விடயமாக இருந்தாலும் அது சமூகத்துக்கு பயனுள்ளதாக இருந்தால் பகிரவும் .அனைவருக்கும் சொல்லிக்கொடுக்கலாம் . அரசியல் சினிமா தொடர்பான எதுவும் இருக்க மாட்டாது .

அனைவரும் ஒன்றிணைந்தால் தான் இந்த தளத்தை தரமானதாகவும் மேலும் வளர்ச்சி பாதையிலும் கொண்டு செல்ல முடியும் . எம்முடன் இணைய விரும்புபவர்கள் இந்த முகவரியினூடு தொடர்புகொள்ளவும் . wowe@ewow.lk

தமிழை இணையத்தில் ஏற்றவேண்டும் விருப்பம் .செயற்பட வேண்டும் .ஆனால் நேரமில்லை ..என்ன செய்வது ?

நீங்கள் கிழமைக்கு ஒரு ஆக்கமா ,அல்லது மாதத்திற்கு ஒரு ஆக்கம் கூட அனுப்பலாம் .தொடர்ந்து முழு நேரமாக இருக்க வேண்டும் என்று இல்லை .

உங்களது சுய விபரத்தை அனுப்பி வைக்கவும் .உங்கள் படைப்புகள் சிறப்பாக இருந்தால் தொடர்புகொள்வோம்.

=================
தளம் வைத்திருப்பவர்களுக்கும் பதிவர்களுக்கும் ....

இலவசமாக தமிழர்களின் அறிவு சார்ந்த தேவைகளை பூர்த்தி செய்யும் நோக்கில், எம்மால் ஆரம்பிக்கப்பட்டுள்ள www.ewow.lk இணையத்தளத்தை உங்கள் தளங்களிலும் ஒரு சிறிய விளம்பரம் மூலம் பகிர்ந்துகொண்டு எம்மை ஊக்கிவிக்கவும்.
எமது தளத்தின் சேவைகள் பிடித்திருப்பவர்கள் மட்டும் இந்த உதவியை செய்யவும்... ஏனையவர்கள் குறைகளை எம்மக்குத்தெரிவிக்கவும் .

எம்முடன் இணைந்து செயலாற்ற நினைப்பவர்களும் தொடர்பு கொள்ளலாம் .
தளம் :
http://www.ewow.lk/

பேஸ்புக் பக்கம் :
http://www.facebook.com/ewowlk

- நன்றி
EwOw Team
இதற்கான இணைப்பை உங்கள் தளங்களில் கொடுக்க

மங்காத்தா பாடல்களில் ரசித்தவை -இனிமையான வரிகளின் நினைவுகள்

2011-08-11T13:04:00.000+05:30

அண்மையில் வெளியான மங்காத்தா பாடல்களில் மென்மையான பாடல்கள் இரண்டு ரசிக்க கூடியதாக இருந்தது . ஒன்று என் நண்பனே ,மற்றொன்று கண்ணாடி நீ கண் ஜாடை நான் . "என் நண்பனே" பாடலின் வரிகளுக்கு கவிஞர் வாலி பலம் ,பாடலுக்கு யுவனின் குரல் பலம் .

கண்ணாடி நீ கண் ஜாடை நான் பாடலுக்கு நிரஞ்சன் பாரதியின் வரிகளில் சரணின் குரலும் ,பவதாரனியின் குரலும் சிறந்த மெல்லிசை பாடலை தந்திருக்கிறது .பாடலை கேட்க்க

கண்ணாடி நீ கண் ஜாடை நான்

என் வீடு நீ உன் ஜன்னல் நான்

என் தேடல் நீ உன் தேவை நான்

என் பாடல் நீ உன் வார்த்தை நான்

என் பாதி நீ உன் பாதி நான்

என் ஜீவன் நீ உன் தேகம் நான்

என் கண்கள் நீ உன் வண்ணம் நான்

என் உள்ளம் நீ உன் எண்ணம் நான்

என் மேனி நீ உன் ஆடை நான்

என் பேச்சு நீ உன் மேடை நான்

என் பாதை நீ உன் பாதம் நான்

என் தென்றல் நீ உன் வாசம் நான்
நான் தான் நீ என்பதை சற்று வித்தியாசமாக வரிகளில் காதல் கலந்து இருக்கும் வரிகள் இவை . இதனை எழுதியவர் கவிஞர் நிரஞ்சன் பாரதி அவர்கள். இவர் வேறு யாரும் அல்ல மகாகவி பாரதியாரின் இரத்தவழி உறவு . மகாகவியின் ஆசீர்வாதம் எப்போதும் இருக்கும் . இந்த தலைமுறைக்கு ஏற்ற படி காதல் கலந்து கொடுத்திருக்கும் வரிகள் இவை .அவரின் எதிர்கால தமிழ் வரிகளின் பயணம் சிறப்புற வாழ்த்துகள் .

ஆனாலும் இந்த பாடலை கேட்க்கும் போது மகாகவியின் அருமையான தமிழ் வரிகளை நினைவுபடுத்தின . ஆனால் அவரின் வரிகளில் காதலுடன் தெய்வீகமும் இருந்தது . அதனையும் இங்கே பகிர்கிறேன் . தமிழ் சுவையும் கூடவே கலந்திருக்கும் . கவிராஜன் பாரதியின் வரிக்கு இசைராஜா இளையராஜா கொடுத்த இசை இது . பாடல் கேட்க்க

பாயு மொளி நீ யெனக்கு,பார்க்கும் விழி நானுனக்கு,
தோயும் மது நீ யெனக்கு,தும்பியடி நானுனக்கு.
வாயுரைக்க வருகுதில்லை,வாழி நின்றன் மேன்மையெல்லாம்;
தூயசுடர் வானொளியே! சூறையமுதே!கண்ணம்மா!

வீணையடி நீ யெனக்கு,மேவும் விரல் நானுனக்கு;
பூணும் வடம் நீ யெனக்கு,புது வைரம் நானுனக்கு;
காணுமிடந்தோறு நின்றன் கண்ணி னொளி வீசுதடீ
மாணுடைய பேர ரசே! வாழ்வு நிலையே!கண்ணம்மா!

வான மழை நீ யெனக்கு வண்ண மயில் நானுனக்கு;
பான மடி நீ யெனக்கு,பாண்டமடி நானுனக்கு;
ஞான வொளி வீசுதடி,நங்கை நின் றன் சோதிமுகம்,
ஊனமறு நல்லழகே!ஊறு சுவையே!கண்ணம்மா!

வெண்ணிலவு நீ யெனக்கு,மேவு கடல் நானுனக்கு;
பண்ணு சுதி நீ யெனக்கு,பாட்டினிமை நானுனக்கு;
எண்ணியெண்ணிப் பார்த்திடிலோர் எண்ணமில்லை நின்சுவைக்கே;
கண்ணின் மணி போன்றவளே! கட்டியமுதே!கண்ணம்மா!

வீசு கமழ் நீ யெனக்கு,விரியுமலர் நானுனக்கு;
பேசுபொருள் நீ யெனக்கு,பேணுமொழி நானுனக்கு;
நேசமுள்ள வான்சுடரே! நின்னழகை யேதுரைப்பேன்?
ஆசை மதுவே!கனியே!அள்ளு சுவையே கண்ணம்மா!

காதலடி நீ யெனக்கு,காந்தமடி நானுனக்கு;
வேதமடி நீ யெனக்கு,வித்தையடி நானுனக்கு;
போதமுற்ற போதினிலே பொங்கி வருந் தீஞ்சுவையே!
நாதவடி வானவளே! நல்லஉயிரே கண்ணம்மா!

நல்லவுயிர் நீ யெனக்கு,நாடியடி நானுனக்கு;
செல்வமடி நீ யெனக்கு,சேமநிதி நானுனக்கு;
எல்லையற்ற பேரழகே!எங்கும் நிறை பொற்சுடரே!
முல்லைநிகர் புன்னகையாய்!மோதுமின்பமே!கண்ணம்மா!

தாரையடி நீ யெனக்கு,தண்மதியம் நானுனக்கு;
வீரமடி நீ யெனக்கு,வெற்றியடி நானுனக்கு;
தாரணியில் வானுலகில் சார்ந்திருக்கும் இன்பமெல்லாம்
ஓருருவமாய்ச் சமைந்தாய்!உள்ளமுதமே!கண்ணம்மா!

வாலியின் வரிகளில் எப்போதும் தமிழ் சொற்கள் விளையாடும் . என் நண்பனே பாடலில் வந்த வளைக்கையை பிடித்து வளைக்கையில் விழுந்தேன் வலக்கரம் பிடித்து வலம் வர நினைத்தேன் . வரிகள் காதலெனும் தேர்வெழுதியில் நான் ரசித்த இந்த வலக்கையில் வளையல்கள் நானல்லவா இன்று வலக்கையை வளைக்கின்ற நாளல்லவா வரிகளை நினைவுபடுத்தியது.

நேரத்தில் விஜயின் நெடும்பயணம்- கி பி 2050

2011-08-09T14:11:00.000+05:30

திண்ணை இணைய வாரப்பத்திரிகையில் வெளியான எனது கதை ...
http://puthu.thinnai.com/?p=3070

பாரிய அணு உலைகள் ,செயற்கை பசுமை, பறக்கும் மின்சார வாகனங்கள் என கி .பி 2050 இல் ஒரு இயந்திரச்சாலை போலவே காட்ச்சியளித்தது ஜப்பானின் தலைநகரம் டோக்கியோ .இயந்திரங்களிடையே சில சில இடங்களில் மனித நடமாட்டமும் இருந்தது .மனிதர்கள் புன்முறுவலுடனும் ஆச்சரியம் கலந்த முகத்துடனும் ஆங்காங்கே குழுக்களாக நின்று சாலையின் பாரிய திரைகளில் செய்தியை பார்த்துக்கொண்டிருந்தார்கள் .

அவர்களின் எதிர்பார்ப்பு, மகிழ்ச்சிக்கு காரணம் உலகையே தமது பக்கம் திருப்பும் வேலையில் அவர்களின் விஞ்ஞானிகள் ஈடுபட்டுக்கொண்டிருப்பது தான் .

மத்திய விஞ்ஞான தொழில்நுட்ப மையத்தில் மும்முரமாக வேலைகளில் ஈடுபட்டிருந்த விஜய்க்கு, இருந்த இடத்தில் ரோபோக்களின் உதவியால் உடல் அசையாத வேலை என்றாலும் மூளை படுவேகமாக இயங்கிக்கொண்டிருந்தது . காரணம் அடுத்த நாள் ஒளியின் வேகத்துக்கு இணையாக செல்லவிருக்கும் விண்வெளிக்கப்பல் பயணத்திற்கு தயார்நிலையில் ஒரு குழுவே இயங்கிக்கொண்டிருந்தது .அதில் தொழில்நுட்பத்தை பரிசோதிக்கும் பொறுப்பு விஜய்யிடம் இருந்ததால் குட்டித்தூக்கம் போட கூட நேரமில்லை .

இருந்தாலும் அங்கு வேலை செய்பவர்களுக்கு இத்தனை மணித்தியாலங்கள் கட்டாயம் உறங்கவேண்டுமென்று கட்டுப்பாடு இருந்தது.அங்கேயே சாய்ந்திருக்கும் கதிரையில் படுத்துக்கொண்டு ஒரு பொத்தானை அழுத்தியதும் கதிரையில் ஒரு வித அதிர்வு தொடர்ந்து இருக்க,இன்னொரு பொத்தானை அழுத்தி எழ வேண்டிய நேரத்தையும் பதிந்துவிட்டு அப்படியே உறங்கிவிட்டான் .

குறித்த நேரத்தில் எழுந்து வேகமாக இயங்க தொடங்கினார்கள் அவர்கள் .புறப்படும் நேரமும் நெருங்கிக்கொண்டிருந்தது .இறுதி செக்கன்கள் வரை தனது நோக்கம் தவிர வேறு எந்த நினைவுகளும் அவன் தலையை தட்டிப்பார்க்கவில்லை .3 ,2 ,1 என செக்கன்கள் கணணி திரையில் எண்ணப்பட்டு முடிந்ததும் தனது விலங்குகளை அவிழ்த்து புறப்பட்டது விண்வெளிக்கப்பல் .

திணிவின் காரணத்தால் உடனடியாக வேகத்தை ஆர்முடுக்க முடியவில்லை . ஆனாலும் சிறிது நேரத்தில் தனது முழு இயந்திர சக்தியையும் பயன்படுத்தி கூடிய வேகத்தை பெற்றுக்கொண்டு பல மைல் தூரம் சென்றது .ஒருவாரத்தில் கிரகங்களை தாண்டி செல்லத்தொடங்கியது .கிட்டத்தட்ட ஒரு வருடத்தின் பின் ஒளியின் வேகத்தின் அரைவாசியை பெற்றுக்கொண்டு சூரிய குடும்பத்தையும் தாண்டி விட்டது .

உள்ளேயும் பல தொழில்நுட்ப வேலைகளில் தொடர்ந்து ஈடுபட்டுக்கொண்டிருந்த விஜய்க்கு அவ்வப்போது தனது அப்பா ,மகன் பற்றிய சிந்தனை எட்டிப்பார்க்கும் .சில வருடங்களாக அவன் தனது தந்தையை பார்க்கவில்லை .இறுதியில் கூட அவன் அவரிடம் சொல்லிவிட்டு வரவில்லை .
அவன் காதல் மனைவி விபத்தில் இறந்து விட்டதால் தனது தந்தையிடமே தனது மகனை பராமரிக்கும் பொறுப்பை கொடுத்துவிட்டு வானியல் ,தொழில்நுட்பம் என்று மூழ்கிவிட்டான் .

மனைவி இறந்ததை நினைத்துக்கொண்டு தனது வானியல் துறையில் கவனம் செலுத்தாமல் இருந்த தன்னை அப்பா தோளோடு தோள் நின்று தட்டிக்கொடுத்ததை நினைத்து ஒரே இடத்ததை பார்த்துக்கொண்டிருக்க ,நண்பர்கள் கை அவனை தட்டி "இன்னும் கொஞ்ச நேரத்திலை ஸ்பெஷிப் ஒளியின் வேகத்தில் 90 % ஐ அடையப்போகிறது "என மகிழ்ச்சியில் கட்டிப்பிடித்து ஜபநிஸ் பாட்டு ஒன்றையும் பாடிக்கொண்டிருந்தார்கள் .

90 % மா !அப்பிடின்னா இனி எங்களுக்கு ஒரு நாள் எண்டா பூமியில் இருக்கிறவங்களுக்கு இரண்டு நாள் . நாங்க பூமியில் இருந்து புறப்பட்டு 2 வருடங்கள் ஆகிறதே! காலம் ஒரு புரியாத புதிர் என தனக்குள்ளேயே விஜய் நினைத்ததும் அவனது தந்தையின் ஞாபகம் மீண்டும் வந்தது .

"அப்பா நேரம்னா என்னப்பா ? டிக் டிக் ன்னு போகுமா ? "என ஆண்டு ஐந்தில் படிக்கும் போது செல்லக்குரலில் அவன் கேட்ட கேள்வியை அப்பா கடவுள் மீது பழி போட்டு புறக்கணிக்காமல் கைகளை பற்றிப்பிடித்து ஆற்றோரமாக அழைத்து சென்று அவனை தூக்கிப்பிடித்தபடி "நேரம்ங்கிறது இந்த ஆறு மாதிரிப்பா போய்க்கொண்டே இருக்கும் .ஒவ்வொரு இடத்திலையும் ஒவ்வொரு வேகம் .இது ஐங்ஸ்டெயின்ன்னு ஒரு பெரியவர் சொன்னது ".

அவன் கேட்ட சின்ன சின்ன கேள்விகளையும் அப்பா புறக்கணிக்காமல் ,அன்பாக பதில் தந்ததை எண்ணி கண் கலங்கியது . இயந்திரங்களோடு பழகியிருந்தாலும் அவனது உணர்வுகள் பூ போலவே இருந்தது .ஒரு தமிழனாக இருந்து இவ்வளவு தூரம் வந்ததற்கு காரணம் ,தனது மழலை கேள்விகளை தந்தை புறக்கணிக்காமல் சலிக்காமல் தேடிப்பிடித்தாவது அவனுக்கு விளக்கிவிடுவார் .

நேரம் பற்றிய இந்த விளக்கம் தான் அவனிடம் நேரபயணம் பற்றிய எண்ணத்தை தூண்டியது .அவன் இந்த வானியல் துறைக்கு வந்ததன் காரணமும் அவன் தந்தை தான் .

என்ன தான் கரண்டியில் தேசிக்காய் வைத்து இலக்கை நோக்கி ஓடினாலும் அன்பு எனும் தேசிக்காய் விழுந்த பின் இலக்கை அடைந்து என்ன பயன் என சலித்துக்கொண்டான் .

மொத்தமாக பூமியில் இருந்து வந்து நான்கு வருடங்களும் ஓடிவிடவே விண்வெளி கப்பலும் கிட்டத்தட்ட ஒளியின் வேகத்தின் 99 % ஐ அடைந்தது .ஒளியின் வேகத்தை அடைந்ததும் விண்வெளிக்கப்பல் கொஞ்சம் ஆட்டம் கண்டு பின்னர் சரியாகிவிட்டது .

வழக்கம் போல தனது யோசனைகளை களைந்துவிட்டு தொழில்நுட்பத்தை பரிசோதிக்கும் வேலைகளில் இறங்கிவிட்டான் .எல்லாம் சரியாக இருந்தது . அதில் இருந்த அனைவருக்கும் என்ன பேசுவதென்றே தெரியாத அளவு மகிழ்ச்சி . காரணம் அவர்கள் அனைவரும் ஐங்ஸ்டேயினின் கனவை,கணிப்பீட்டை உணர்ந்துகொண்டிருக்கிறார்கள் .

அவர்கள் விண்வெளிக்கப்பலில் கழிக்கும் ஒவ்வொரு மணித்தியாலமும் பூமியில் ஒருவருடத்திற்கு சமம் .நேரத்தில் அவர்கள் எதிர்காலத்திற்கு பயணித்தார்கள் .

அவன் தந்தையை பற்றி யோசித்துக்கொண்டிருந்தாலும் அவன் மனைவி இறந்த சோகத்தில் இருக்கும் போது அவனது தந்தை அருகில் வந்து "உறவுகள் எப்போதும் தொடர்ச்சியானதுடா கவலைப்படாதை ஒன்றோடொன்று எப்போதும் தொடர்பிருக்கும்.முடிவென்று ஒன்று இல்லை " என்று சொன்ன ஆறுதல் வார்த்தைகள் அவன் மனதில் ஓடிக்கொண்டிருந்தது .

சில நாட்களில் பூமியிலிருந்து அவனது மகன் அனுப்பிய குரல் செய்தி அவனுக்கு கிடைத்தது ."அப்பா எப்படி இருக்கீங்க ?வாழ்த்துக்கள் வெற்றி கண்டுடீங்க. ஐங்ஸ்டெயின் கனவை நனவாக்கீடீங்க ." என்றதும் அவனது குரல் நிறுத்தப்பட்டு "நாசா மையத்தால் அனுப்பப்பட்ட முதல் பரீட்சார்த்த மிக வேகமான தொடர்பாடல் முறை " என ரெக்கார்டிங் சொன்னது .

அவனுக்கு மிகவும் மகிழ்ச்சியும் ஆச்சரியமாகவும் இருந்தது . தனது மகனும் ஒரு விஞ்ஞானி என எண்ணி பெருமிதத்துடன் தனது குழுவுடன் சில நாட்களில் பூமியை மீண்டும் வந்தடைந்தான் .ஆனால் பூமியில் ஆண்டு அப்போது 2020

2050 இல் இவர்களை அனுப்பியவர்கள் யாரும் இப்போது பூமியில் உயிரோடு இல்லை .ஆனாலும் ஒரு நினைவு சின்னத்தில் இவர்கள் பெயர்கள் "2050 இல் பூமியில் இருந்து புறப்பட்டவர்கள்.இவர்கள் வந்தடையும் ஆண்டு 2120 " என குறிப்பிட்டிருந்தது .

மக்கள் அனைவரும் வரவேற்ப்பு நிகழ்ச்சிகள் என அமர்க்களப்படுத்தியதோடு இளமையாகவே சென்று இளமையாகவே வந்தவர்களை பார்த்து ஆச்சரியப்பட்டனர் .

விஜய் வந்ததுமே தனது பேரப்பிள்ளைகளுடன் வந்திருந்தான் அவனது மகன் .மகன் மிகவும் வயது போனவனாய் இருந்தான் .மகனை பார்த்த மகிழ்ச்சி என்றாலும் விஜய்யிடம் ஏதோ ஒரு நிறைவேறாத ஆசை ஒன்று இருந்தது .

ஒரு மகிழ்ச்சியான செய்தியை முகத்தில் மறைத்துக்கொண்டு வந்த மகன் "அப்பா நான் பரடொக்ஸ் பிரச்சனைகளை நிவர்த்தி செய்து இறந்தகாலத்துக்கு செல்லும் இயந்திரத்தை கண்டுபிடித்துவிட்டேன் ". என்று கூறியதும் பூரித்துப்போனான் விஜய் .

பரடொக்ஸ் னா என்ன தாத்தா என விஜய்யின் கொள்ளுப்பேரன் கேட்க்க விஜய்யின் மகன் அவனை தூக்கி வைத்து "இப்போ தாத்தாக்கு மறுபடியும் வயசு குறைஞ்சா இளமையாகீடுவன் இல்லையா " என சொல்லிக்கொண்டே போனார் .
"ஆமா அப்புறம் "என வியப்பாக கேட்டான் அவன் ."அந்த இளமையான தாத்தாவை எனக்கு பிடிக்காம நானே சுட்டு கொன்னுட்டேன்னா .அந்த இளமையானவரை சுட்டது யாரு ? இது தான் இறந்தகாலத்துக்கு போறதிலை இருந்த பிரச்சனை ".அடிப்படை ஒழுங்கு விதிமுறைகள் மீறப்படும் .

"புரியல்லையே தாத்தா ஒரே குழப்பமா இருக்கு" என இதழை பிதுக்கி வைத்துக்கொண்டு சொன்னான் ."குழப்பமா இருக்கா ? அது தான் பரடொக்ஸ் ". அந்த குழப்பத்தை தான் தாத்தா இல்லாம பண்ணியிருக்கேன் .

இதை உணர்ந்து கவனித்துக்கொண்டிருந்த விஜய்க்கு கண்ணீர் ஊற்றியது .தனது அப்பாவை கட்டிப்பிடித்துக்கொண்டு அழ வேண்டும் போல இருந்தது அவனுக்கு .மீண்டும் தந்தையுடன் தான் இருந்த காலங்கள் வருமா என்று எண்ணி வருத்தப்பட்டான் .

தனது தந்தை விஜய்யின் இந்த பிரச்னையை உணர்ந்த மகன் ,தந்தையை இறந்த காலத்துக்கு அனுப்பினான் .மீண்டும் சின்னவயதுக்கு சென்ற விஜய் தனது தந்தையின் ஒவ்வொரு விளக்கங்களையும் தெரிந்திருந்தாலும் மீண்டும் மீண்டும் ரசித்து கேட்டுக்கொண்டிருந்தான் .தான் எதிர்காலத்திலிருந்து வந்தவன் என்று தந்தையிடம் அவன் இறுதிவரை சொல்லவில்லை .

தன்னையே இழந்து தான் வெளியில் தேடினாலும் மனிதனுக்கே உரித்தான அன்பு ,காதல் ஒன்றும் தேடினாலும் கிடைப்பதில்லை என்பதை உணர்ந்து சிரித்துக்கொண்டே நேரம் பற்றிய அப்பாவின் விளக்கத்தை கேட்டுவிட்டு அவரின் கைகளை பிடித்து கொண்டு ஆற்றங்கரையில் இருந்து நடந்தான் .

கால பயணம் (Time travel)- இறந்த காலத்துக்கு செல்வதில் பரடோக்ஸ் பிரச்சனை

2011-08-04T14:57:00.001+05:30

கால பயணம் பற்றிய முன்னைய ஆக்கம் . காலபயணம் பற்றிய அடிப்படை இல்லாவிட்டால் வாசிக்கவும் - அழுத்துக

காலத்தில் பயணம் செய்வதில் உள்ள பிரச்சனை இறந்த காலத்துக்கு பயணம் செல்வது தான் . எதிர்காலத்தில் பயணம் செய்வதை இதுவரை யாரும் விமர்சிக்கவில்லை.

இந்த பிரச்னையை இலகுவாக விளக்குவதானால் ,உதாரணத்திற்கு நீங்கள் 200 வருடங்கள் பின்னோக்கி சென்று விட்டீர்கள் என்று வைத்துக்கொண்டால் நீங்கள் உங்கள் பிறப்புக்கு முன்னரான காலப்பகுதியில் இருக்கிறீர்கள் .

அதாவது ஒரு விளைவுக்கு (பிறப்பு ) முன்னரே நிகழ்வு (வாழ்தல் ) நடக்கிறது . இது மிகவும் முரண்பாடானது .

இதனை விளக்குவது தான் பிரபலமான கிராண்ட் பாதர் பரடொக்ஸ். உதாரணத்திற்கு நீங்கள் உங்கள் இறந்த காலத்துக்கு சென்று விட்டீர்கள் .அந்த காலத்தில் நீங்கள் உங்கள் சொந்த தாத்தாவையே கொலை செய்ய வேண்டிய நிலை ஏற்படுகிறது . நீங்களும் ஒரு துப்பாக்கியை எடுத்து சுட்டு விட்டீர்கள் .

ஆனால் நீங்கள் உண்மையிலேயே பிறக்கவில்லை . உங்கள் தாத்தா உயிரோடு இருந்தால் தானே உங்கள் தந்தை பிறப்பார் .தந்தை இருந்தால் தானே நீங்கள். ஆகாவே இந்த தொடர்பு வட்டம் துண்டிக்கப்படுகிறது(inconsistent causal loop ) . ஆகவே இது இறந்த காலத்திற்கு செல்வதில் பிரச்சனையான விடயமாக கொள்ளப்பட்டது .

=======================================================================

கள்ள மனதின் ஓரம் - கேளிக்கைக்கு மட்டுமா சமூக இணையத்தளம் ?

2011-08-03T15:29:00.007+05:30

கேளிக்கை /மகிழ்ச்சி என்ற பதம் நுகர்பொருள் கலாச்சார சமுதாயத்தில் திருபடைந்துவிட்டது எனலாம் . நகர்ப்புறம், வெளிநாடு என்ற புதிய அத்தியாயத்தில் நகர்ந்து வரும் உலகில் வெறும் படிப்பறிவை கௌரவத்திற்காக கற்கும் நிலையில் சுய அறிவு ,சுய சிந்தனை உண்மையான அறிவு என்பதெல்லாம் தூக்கி எறியப்பட வேண்டும் என்பதை கல்வித்திட்டம் ஒரு கட்டளையாக பிறப்பிக்கும் காலப்பகுதி இது .

படிக்கிறேன் வேலை தேட வேண்டும் அதனூடு இடை இடையில் கேளிக்கைகள் . இதான் வாழ்க்கை ,இது தான் மகிழ்ச்சி என்ற எண்ணக்கரு நிலவும் காலம் இது .மனிதம் நிலைநாட்டப்படும் போது ,அடுத்தவர் முகத்திலும் மகிழ்ச்சி காண்பதே உண்மையான மகிழ்ச்சி என்பதை உணராத உலகு இது .

இதே எண்ணக்கரு சமூக இணையத்தளங்களிலும் உலவி வருகிறது . சமுதாய வெளிப்பாட்டையே சமூக இணையத்தளம் காட்டவேண்டும் என்பது போய் கேளிக்கைகாக பயன்படுகிறது . கேளிக்கையாக இருப்பது தவறில்லை,கேளிக்கைகாகவே மட்டும் இருப்பது தவறு. சில நேரங்களில் முக்கிய பிரச்சனைகள் வரும் போது விழிப்புணர்வோ ஒரு குரல் கொடுப்போ சமூக இணையத்தளங்களில் நடப்பதில்லை . அப்படி நடத்துபவர்களை தடுக்கும் சமூகமே அதிகம் . நீங்கள் செய்யுங்கள் என்று சொல்ல எனக்கு எப்படி உரிமை இல்லையோ .அதே போல மனிதாபிமான குரல்களை கேலி செய்யும் உரிமை உங்களுக்கு இல்லை .

எனக்கு என்னை சுற்றியுள்ள என் சின்ன வட்டத்துக்கு அடிபட்டால் வருவது இரத்தம் மற்றயவர்களுக்கு /சமூகத்துக்கு வந்தால் அது தக்காளி சட்னி .

ஒரு சமூக பிரச்னையை ,துன்பத்தை கொண்டு செல்லும் ஊடகமாக பயன்பட வேண்டிய சமூக வலைத்தளங்களில் குரல் கொடுப்பவர்களை பார்த்து இதனை செய்வதன் மூலம் என்ன நடக்க போகிறது என்ற கேள்வியை சுய அறிவற்று கேட்பவர்களும் உண்டு .

அவர்களை பார்த்து இதற்கும் ஒரு புரட்சியை எப்படி நடத்த வேண்டு என்று ஒரு பாடம் கல்வித்திட்டத்தில் சேர்க்க வேண்டுமோ என கேள்வி கேட்க்க வைக்கிறது .

அண்மையில் ஒரு நண்பரின் உறவினருக்கு இரத்தம் தேவை என்றவுடன் அதனை பகிர்ந்தவரிடம் போய் இதனால் என்ன ஆக போகிறது என்று கேட்க்கவில்லை .ஆனால் அதே நபர்கள் பொது பிரச்சனைகளுக்கு குரல் கொடுப்பதில்லை .தனக்கென்று வரும் போது அது பெரிது .

சிலர் குணமே கேளிக்கையானவர்கள் கோபமே வராதது போல இருக்கும் .ஆனால் ரஜனி படங்களின் இறுதி காட்சியில் வரும் ஆக்ரோஷம் சமுதாய சீரளிவுகளின் இறுதிக்கட்டத்தில் கூட வருவதில்லை .

ஒரே விடயத்தில் பலரும் ஒரே குரலில் ஓங்கி ஒலிக்கும் போது நிச்சயம் சமூக இணையத்தளமும் முக்கிய ஊடகமாக செயல்ப்படும் காலம் வரும் .

வெளிப்படையாக பேசுதல்? மறைத்து பேசுதல் ? - நீயா நானா

2011-08-02T13:38:00.000+05:30

நீயா நானாவில் நல்ல தலைப்புக்கள் வரும் போது வார இறுதி நாள் ஒழுங்காக செல்லவில்லை என்ற குறையை அந்த இரவுகள் நிவர்த்தி செய்கின்றன .

அது போல இந்த ஞாயிற்றுக்கிழமை(31 /7 /2011 ) ஒளிபரப்பாகிய தலைப்பு மிகவும் சுவாரசியமானதும் ,எமது அன்றாட வாழ்க்கையில் கடந்து வரும் முக்கிய பிரச்சினையுமாகும் .காரணம் தொடர்பாடல் தான் இந்த காலத்தில் எமது வேலைகளையும் அனைத்தையும் கொண்டு செல்கிறது .

வெளிப்படியாக பேசுவது சரியா ? மறைத்து பேசுவது சரியா என்ற விடயத்தில் மிகவும் தெளிவாக இருபக்கம் ஆராயப்பட்டது .

வெளிப்படையாக பேசுபவர்கள் ஏமாளிகள் என்றும் அளந்து பேசுபவர்கள் வஞ்சம் வைத்து பேசுபவர்கள் என்றுமே ஒருவரையொருவர் நினைத்துக்கொண்டிருக்கிறோம் .

ஆனால் இதை பொதுவாக பார்ப்பவர்கள் என்ற கண்ணோட்டத்தில் பார்த்தால் வெளிப்படையாக பேசுபவர்களை நம்பலாம் அமைதியாக ,கமுக்கமாக பேசுபவர்களை நம்ப முடியாது என்ற எண்ணமே நிலவுகிறது .

இந்த இரு பிரச்சனைகளாலும் பாதிக்கப்பட்டவர்களே அதிகம் . வெளிப்படையாக பேசுதல் கூடுதலானோரை பாதித்து விடுகிறது .

முன் வைக்கப்பட்ட சில கருத்துகள் மிக பயனுள்ளதாக இருந்தது . வெளிநாட்டவர்கள் கலாச்சாரம் எப்படி வெளிப்படையாக பேச வேண்டும் என்று கற்று தந்திருக்கிறது ஆனால் எமது காலாசராம் எப்படி மறைத்து பேச வேண்டும் என கற்றுத்தந்திருக்கிறது . உண்மையாக ஒரு சமூகம் வெளிப்படையாக பேசுவதை புரிந்துகொள்ளும் அளவுக்கு முன்னேறாத போது நாமும் அதனை குறைத்துகொள்வது நல்லது .

நாம் வெளிப்படையானவர்கள் என்பதை காட்டிக்கொள்ள தேவையற்ற இடங்களில் அவர்களுக்கு அந்த விடயங்கள் தேவையில்லாத சந்தர்ப்பங்களில் பேசுவது தவறு .ஒருவர் வெளிப்படையாக பேசும் பொது அவரின் நிலையும் மிகவும் முக்கியமானது .

மிகவும் பயனுள்ள தலைப்பாக இருக்கும் . பார்க்க

ஆடிப்பிறப்பு : தமிழர் திருநாள்

2011-07-17T08:17:00.000+05:30

"ஆடிப்பிறப்புக்கு நாளை விடுதலை" என்று நவாலியூர் சோமசுந்தர புலவரது பாடப்புத்தகங்களில் படித்தது நினைவு. இன்று ஆடிப்பிறப்பு (17.7.2011) பனங்கட்டிகூழ் குடித்து மகிழ்ச்சியாய் கொண்டாடும் நாள் .

ஆடிப்பிறப்பு தமிழர்களுக்கு என்றே தனித்துவமான திருநாள் . இன்றுவரை இது யாழ்பாண தமிழர்களால் கடைப்பிடிக்கப்பட்டு வருகிறது .புலம்பெயர்ந்து வாழும் இடங்களிலும் கடைப்பிடித்து வருவது பாராட்டத்தக்கது . தமிழ் நாட்டு மக்கள் இதை பெரும்பாலும் மறந்துவிட்டனர் . மேலைத்தேய கலாசார திணிப்பு காரணமாக இருக்கலாம் .

ஆரியர்களால் திணிக்கப்பட்ட தீபாவளி ,சித்திரை வருடப்பிறப்பு போல் அல்லாது தை திருநாளும் ,ஆடிப்பிறப்பும் தமிழர்களுக்கு என்றே தனித்துவமான திருநாளாகும் .

அப்படி மாதத்தின் முதல் நாட்களை கொண்டாட வேண்டிய காரணம் என்ன என்பதை பார்ப்போம் . தமிழர்களின் திருநாள் எதுவும் அறிவியலுடன் பிழைக்காது . இயற்கையோடு தொடர்புபட்டவை அவை.

உலகிலேயே தமிழ் கலாசாரம் சிறந்து விளங்கியது என்கிறோம் என்றால் அதற்கான காரணம் விவசாயம் ,இயற்கையை மக்கள் மதித்தமை . தமிழர்களின் கலாசாரத்தில் கடவுள் என்ற பதத்திற்கு இடம் கொடுக்காமல் இயற்கையையே மதித்தனர் . தையிலும் சூரியனுக்கு தான் நன்றி செலுத்தினர் .

ஆடி காற்றில் அம்மியும் நகரும் என்பார்கள் .யாழ்ப்பாணத்தின் மீது தென் மேல் பருவக்காற்று வீசும் காலம் இது .யாழ்பாண மக்கள் பட்டம் விட்டு மகிழ்ச்சியாக கொண்டாடுவார்கள் .

தை முதல் தேதி நெல் அறுவடை நன்றி நவிலல் நாள்.ஆடி முதல் தேதி தை மாதத்திற்குப் பின் புது ஆறுமாதம் துவங்கும் நாள்.

வானம் பார்த்த பயிர்கள் விதைதூவும் காலப்பகுதி. மழையால் ஆற்றுநீர் வரும் காலம். எனவே தான் தை முதலும் ஆடி முதலும் கவனத்திற்கு வந்தன.

இந்த காலப்பகுதியை மக்கள் மிகவும் மகிழ்ச்சியுடன் புதிய காலப்பகுதி போல கொண்டாடுவார்கள் .

நவாலியூர் சோமசுந்தர புலவர் பாடலிலேயே ஆடிக்கூழ் எப்படி செய்வது என்றே எழுதி விட்டார் . பாடலின் இனிமையும் சிறப்பும் அது .

ஆடிப்பிறப்புக்கு நாளை விடுதலை
ஆனந்த மானந்தம் தோழர்களே!
கூடிப்பனங்கட்டி கூழுங் குடிக்கலாம்
கொழுக்கட்டை தின்னலாம் தோழர்களே!

பாசிப்பயறு வறுத்துக்குத்திச் செந்நெல்
பச்சை அரிசி இடித்துத் தெள்ளி,,
வாசப்பருப்பை அவித்துக்கொண்டு நல்ல
மாவைப் பதமாய் வறுத்தெடுத்து,

வேண்டிய தேங்காய் உடைத்துத் துருவியே
வேலூரில் சக்கரையுங்கலந்து,
தோண்டியில் நீர்விட்டு மாவை அதிற்கொட்டி
சுற்றிக் குழைத்துத் திரட்டிக்கொண்டு.

வில்லை வில்லையாக மாவைக் கிள்ளித்தட்டி
வெல்லக் கலவையை உள்ளே இட்டு
பல்லுக் கொழுக்கட்டை அம்மா அவிப்பளே
பார்க்கப் பார்க்கப் பசி தீர்ந்திடுமே!

பூவைத் துருவிப் பிழிந்து பனங்கட்டி
போட்டு மாவுண்டை பயறுமிட்டு
மாவைக் கரைத்தம்மா வார்த்துத் துழாவுவள்
மணக்க மணக வாயூறிடுமே

குங்குமப் பொட்டிட்டு பூமாஇலை சூடியே
குத்து விளக்குக் கொளுத்தி வைத்து
அங்கிளநீர் பழம் பாக்குடன் வெற்றிலை
ஆடிப் பாடிப்பும் படைப்போமே

வண்ணப் பலாவிலை ஓடிப்பொறுக்கியே
வந்து மடித்ததைக் கோலிக்கொண்டு
அன்னை அகப்பையால் அள்ளி அள்ளி வார்க்க
ஆடிப் புதுக்கூழ் குடிப்போமே

வாழைப் பழத்தை உரித்துத் தின்போம் நல்ல
மாவின் மாவின் பழத்தை அறுத்துத் தின்போம்
கூழைச் சுடச் சுட ஊதிக்குடித்துக்
கொழுக்கட்டை தன்னைக் கடிப்போமே

ஆடிப்பிறப்புக்கு நாளை விடுதலை
ஆனந்த மானந்தந் தோழர்களே
கூடிப் பனங்கட்டிக் கூழுங் குடிக்கலாம் கொழுக்கட்டை தின்னலாம் தோழர்களே!

காமராஜர் - சுய அறிவு பிறந்த தினம்

2011-07-15T19:21:00.004+05:30

‘ஆறாவது வரை படித்தவர்தானே! என்ற அலட்சியத்துடன் முதல்வர் காமராஜரின் அறைக்குள் அலட்சியமாக நுழைவார்கள் அதிகாரிகள். வெளியே வரும்போது அவர்களின் வால், கால்சட்டைக்குள் மடக்கிச் சொருகப்பட்டு இருந்தது!’ - ஆர் வெங்கட்ராமன்

இன்று ஐயா காமராஜரின் பிறந்தநாள். சிலருடைய பிறப்பு அர்த்தமுள்ளதாக இருக்கும் ,சிலருடைய பிறப்பு மற்றயவர்களுக்கு அர்த்தம் கற்பிப்பதாக இருக்கும் .இதில் இரண்டுக்கும் சொந்தக்காரார் காமராஜர் எனும் பெருந்தலைவர் .இன்னொருவர் சொல்லிக்கொடுத்து வந்த அறிவுக்கும் சுயமான அறிவுக்கும் உழல வித்தியாசத்தை காமராஜரை பார்க்கும் போது உணர முடியும் .

காமராஜர் பற்றி படிக்க படிக்க சுவையாக இருக்கும் .அவரை பற்றிய சில குறிப்புகளை பகிர்ந்துகொள்கிறேன் .

சினிமா என்றால் காமராஜருக்கு பிடிக்காதாம் .அதனால் தான் நிஜமாகவே நாம் சினிமாவில் பார்த்து மட்டுமே வியக்கும் போலி நாயகர்கள் போல அல்லாது நிஜத்தில் நாயகனாக வாழ்ந்திருக்கிறார் .

படிப்பு ஏறாததன் காரணமாக 6 ஆம் வகுப்பிலேயே தனது படிப்பை நிறுத்தி விட்டார் .

ஆங்கிலம் தெரியாமலும் 6 ஆண்டுகளே கற்ற கல்வியுடனும் முதல் அமைச்சர் பதவியேற்ற அவர் தான் தலை சிறந்த தலைமைத்துவத்தை 9 ஆண்டுகளாக தமிழ் நாட்டுக்கு வழங்கினார் .

பலரிடம் ஆலோசனை கேட்கும் நேரு ,இறுதியில் காமராஜர் சொல்வதையே கேட்பார் .

காமராஜர் பட்டபடிப்பு படிக்காதவராக இருக்கலாம் .ஆனால் அவரை சுற்றி எப்போதும் படித்த மேதைகள் மொயத்திருப்பார்கள் .

அரசியலில் தன்னை எதிர்த்தவர்களையே தன்னுடன் சேர்த்துக்கொண்டார் . அவர் முதலமைச்சர் ஆனவுடன் அதே பதவிக்கு தன்னை எதிர்த்து போட்டியிட்டவர்களையே அமைச்சர் ஆக்கினார் .

ஆனந்த விகடன் குறிப்புகள்
=========================================================================

சட்டசபையில் கலைஞர் :- ‘இசைக்கருவிகள் முழங்கினால் நெற்பயிர் வளரும்’ என்று ஏதோ வசனங்கள் சொல்லிகொண்டிருந்தார் .

காமராஜர் கேட்டார்.. “சட்டசபையிலே இதை எல்லாமா பேசறது?”

“சட்டசபையில் என்ன பேசுவது என்று நீங்கள் எழுதிக்கொடுங்கள்… நாங்கள் பேசுகிறோம்!” என்று கூறிவிட்டுக் கலைஞர் அமர்ந்தார்.

==============================================================================================

பொருளாதாரத்தில் ஆடம்ஸ்மித் முதல் கார்ல் மார்க்ஸ் வரை அனைத்து மேதைகளும் கூறிய பொன்மொழி களை அழகாக நாவலர் எடுத் துக் கூறிக்கொண்டிருந்தார்.

காமராஜர் அவரைப் பேசவே விடவில்லை. “அவர்கள் சொன்னது இருக்கட்டும்… நீங்கள் என்ன சொல்கிறீர்கள்?” என்று கேட்டார் .

அவரது காலகட்டத்தில் இந்தியாவிலேயே மிகச்சிறந்த முறையில் நிர்வகிக்கப்பட்ட மாநிலம் என்ற பெருமையை தமிழ் நாடு பெற்றது .

தான் முதல் அமைச்சராக இருந்த போது வறுமையில் வாடிய தன் தாய்க்கு சிறப்பு சலுகைகள் தராதவர் .

ஏழை குழந்தைகளும் கல்வி கற்க வரவேண்டுமென்று மதிய உணவு திட்டத்தை அறிமுகம் செய்தார் .

எழுத்தறிவு இன்மையை போக்க 11 ஆம் வகுப்பு வரை இலவச கட்டாய கல்வியை அறிமுகப்படுத்தினார் .

எல்லா பள்ளி குழந்தைகளுக்கும் இலவச சீருடை வழங்கினார் .

தமிழுக்கு நல்ல அங்கீகாரத்தை பெற்று கொடுத்தார் .தமிழின் அனைத்து விதமான புத்தகங்களையும் வெளியிட்டார் .நீதி மன்றம் அரச அலுவலகம் அனைத்திலும் தமிழை கொண்டுவந்தார் .

மூத்த தலைவர்கள் அரசியலில் பதவி வகிக்ககூடாது,பதவி விலகி கட்சி நலனுக்காக செயல்ப்பட வேண்டும் என்று கூறியதோடு நிற்காமல் தானும் பதவி விலகி முன் உதாரணமாக இருந்தார் .

இரண்டு முறை பிரதமராகும் வாய்ப்பிருந்தும் இந்திரா காந்தி ,சாச்திரியையே பிரதமராக்கினார் . நேரு இறந்த பின்னர் இந்திராகாந்தியை பிரதமராக்கும் வேலையை மிக திறமையாக செய்து முடித்தார் .

அவர், இறக்கும்போது மிச்சம் இருந்தது பத்து கதர் வேஷ்டிகள், சட்டைகள் மற்றும் நூறு ரூபாய்க்கும் குறைவான பணம்!!!!

காமராஜர் பற்றி மேலதிக,கூடுதல் தகவல்கள் படிக்க http://kamaraj101.blogspot.com

எதற்காக இந்த தளம் ? நோக்கம் ? ஒன்று செய்யுங்கள் ..

2011-07-08T12:56:00.006+05:30

இந்த பதிவை எவளவு தூரம் கவனிக்கக் போகிறீர்களோ அல்லது அனைவரிடமும் சேர்க்க போகிறீர்கள் என்று தெரியவில்லை .எத்தனை பேர் இதில் இணைய முன் வந்து நிற்க்க போகிறீர்களோ தெரியவில்லை .ஆனால் தயவுசெய்து ஒரு 5 நிமிடம் ஒதுக்கி படியுங்கள் . http://www.ewow.lk/ தளம் பற்றியது .
கல்வி ,வேறு தொழில் நடவடிக்கைகளுடன் இதையும் இயக்குவதால் எம்மால் முழுநேரமாக தனியாக செய்ய முடியாது . ஆனால் அனைவரும் நேரத்தை ஆக்கபூர்வமாக பயன்படுத்தினால் முடியும் .

ஒரு சமூகத்தின்/மொழியின் வளர்ச்சி அதன் பரிணாம வளர்ச்சியில் தான் இருக்கிறது . அந்த அந்த காலத்திற்கு ஏற்ப மாற்றம் அடைந்து வளர்ச்சியடையவேண்டும் .இணையத்தில் தமிழை தொகுப்போம் .

ஒரு சமூகம் வளர்ச்சி அடைய அந்த சமூகத்திலேயே இருந்து நன்றாக வந்தவர்களின் ஆக்கபூர்வமான பங்களிப்பு மிக மிக முக்கியமானது .ஆனால் எம் சமூகத்தில் உள்ளவர்கள் வளர்ந்தவுடன் தன் சமூகத்தை திரும்பி பார்ப்பதில்லை என்ற எண்ணமே நிலவுகிறது . முக்கியமான காலகட்டத்தில் இருக்கிறோம் .மிகவும் பின் தங்கி இருக்கிறோம் .நிச்சயம் ஒரு இணைய தமிழ் புரட்சி தேவைப்படுகிறது. அதற்கான வேண்டுகோள் பதிவு இது .ஒன்று சேருங்கள் .

இணையம் என்பது எதிர்காலத்தில் ஏழை ,பணக்காரர் வேறுபாடின்றி அனைவருக்கும் கிடைக்க போகும் ஒன்று . உலக விடயங்களை தெரிந்து வைத்திருப்பதன் மூலமும் பகுத்தறிவை வளர்ப்பதன் மூலமுமே எமது சமூகத்தை வளர்க்க முடியும் . அனைவருக்கும் அனைத்திலும் அடிபப்டை அறிவு இருக்க வேண்டும் .கல்வித்தளம் /விழிப்புணர்வு தளம் என்று எந்த வகையிலும் வைத்திருக்கலாம் .

முதலில் வெறுமனே அறிவியல் கட்டுரைகளை மட்டுமே நானும் எனது நண்பன் பிரபுவும் எமது வலைப்பதிவுகளில் கிடைக்கும் நேரங்களில் படித்தவற்றை பகிர்ந்து /எழுதி வந்தோம் . அறிவியல் விடயங்கள் தமிழில் இணையத்தில் தேடினால் கிடைக்க வேண்டும் என்பதே எமது ஒரே நோக்காக இருந்தது .இருவரும் எழுதியதை இணைத்து ஒரு தளமாக்கி தொடர்ந்து எழுவது தான் நோக்காக இருந்தது .

ஆனால் பொதுவாக பார்த்தபோது அறிவியல் விடயம் மட்டுமன்றி கல்வி தொடர்பான எதுவுமே இணையத்தில் தமிழில் இருக்கவில்லை .வளர்ச்சி என்றால் அது அறிவியலில் மட்டுமல்ல எல்லா விடயத்திலும் இருக்க வேண்டும் என்று தோன்றியது .

அதற்காக உருவாக்கப்பட்ட தளம் தான் இது :: http://www.ewow.lk/

இந்த தளத்தில் இணைந்து ஏதாவது ஒரு வகையில் பங்களிப்பு செய்ய விரும்புவர்கள் info@ewow.lk தொடர்புகொள்ளவும் .

இதன் உள்ளடக்கங்கள்::எந்த பகுதிக்கும் பங்களிப்பு செய்யலாம் .

கல்விப்பகுதி : இரசாயனவியல் ,பௌதீகவியல் பாட பகுதிகள் வீடியோ வடிவில் விளங்கப்படுத்தபட்டுள்ளன .: இவை இன்னும் சேர்க்க வேண்டும் .எங்கிருப்பவர்களும் இவற்றை படித்துக்கொள்ளலாம் .

தமிழில் இயங்கவில் ஆவர்த்தன அட்டவணை

ஏன்? எதற்கு ? : ஏன் என்ற கேள்வி மிகவும் முக்கியமானது .இந்த பகுதியை தொகுத்து வருகிறோம் .உங்களுக்கு தெரிந்தவற்றை மூலத்தை குறிப்பிட்டு பகிரலாம்.

சுகாதார கல்விகளையும் வீடியோ வடிவில் தொகுத்துள்ளோம் .வீட்டில் இருப்பவர்களுக்கு நோய்கள் எப்படி ஏற்படுகிறது ?அதை தடுப்பது பற்றி சுகாதார விழிப்புணர்வுக்காக எழுதப்படுகிறது .ஆக்கங்கள் கேள்வி பதில்களாக உள்ளது .

அனைவரும் அடிப்படை சட்டங்கள் தெரிந்திருக்கக் வேண்டும் என்ற நோக்கில் சட்டங்கள் பற்றிய விடயங்களை தொகுக்கிறோம் .மனித உரிமை சட்டங்களையும் தொகுக்கலாம் .

தமிழ் ஆவணப்படங்களும் செய்து வருகிறோம் .

அது தவிர வரலாறு ,தொழிநுட்பம் ,நாகரிகம் என பல விடயங்கள் தொகுக்கப்பட்டு வருகிறது .ஆனால் நாம் அவற்றை வழங்கு விதமும் தொகுக்கும் விதமும் மிகவும் வித்தியாசமானதாக இருக்கும் .

எமக்கு தெரிந்தவற்றை மற்றயவர்களுக்கு தமிழில் கற்பிப்போம்,மற்றவர்களுக்கு தெரிந்ததை நாம் தெரிந்துகொள்வோம். தானாக இணையத்தில் தமிழ் சேர்ந்துகொண்டிருக்கும் .

நண்பர்களுடன் ,சமூக வலைத்தளங்களில் பகிர்ந்தாலே உதவியாக இருக்கும் .. இப்படியான பணிகளில் ஏதாவது செய்ய வேண்டும் என்று எண்ணிக்கொண்டிருப்பவர்களை இந்த செய்தி போய் எட்டினால் போதுமானது .

வேலைத்தளத்தில் பேஸ்புக்கை "Excel"ல் பயன்படுத்துவது எப்படி ?

2011-07-07T12:26:00.003+05:30

பல நிறுவனங்கள் பேஸ்புக்கை தடை செய்துள்ளன .ஆனாலும் வேலைத்தளத்தில் இருப்பவர்கள் சமூக இணையத்தளங்களை பார்ப்பது அதிகம் .

இதனை நிவர்த்தி செய்யவே இந்த அப்பிளிகேஷன் உருவாக்கப்பட்டுள்ளது .

இந்த hardlywork.in என்ற அப்ப்ளிகேஷன் பேஸ்புக் தகவல்களை அப்படியே Excel sheet க்கு மாற்றி உங்களுக்கு வழங்குகிறது .

"வேலை தளத்தில் பேஸ்புக் பார்ப்பது ஒரு வித தயக்கத்தை உண்டாக்கினால் அல்லது யாராவது பார்த்துவிடுவார்கள் என்று எண்ணினால் அதனை எக்செல் வடிவில் வேலை செய்வது போல பயன்படுத்தலாம் .

முதலில் உங்கள் பேஸ்புக் கணக்கினுள் நுழைந்துகொண்டு harldywork.in கிளிக் செய்தவுடன் இப்படியொரு முகப்பு கிடைக்கப்பெறும் .

இதில் Gimmedem spreadsheets ஐ அழுத்தவும் .
அதனை எப்படி பயன்படுத்துவது என்று ஒரு சிறிய அறிமுகம் கிடைக்கும் .

Excelsheet இல் எழுத்துவடிவில் மாற்றும் பகுதியில் உங்கள் நண்பர்களை தேடி அவர்களின் ப்ரோபாயிலை பார்க்கலாம். Search friends பகுதி

எப்படியும் உங்கள் முகாமையாளர் கண்டுபிடித்துவிடுவார் என்றால் இதில் Spacebar ஐ மட்டும் அழுத்தினால் போதும் முழுவதும் இலக்கங்களால் ஆன கணக்கு போல மாறிவிடும் .

இதனை உருவாக்கிய யாலே பல்கலைகழகத்தை சேர்ந்த பி குறோஸ் ஐ கேட்ட போது தன்னிடம் தனது நண்பி பேஸ்புக் வேலைத்தளத்தில் பார்க்கமுடியவில்லை என்று முறையிட்ட பின்பே இதனை உருவாகக் வேண்டுமென்று தனக்கு தோன்றியதாக கூறினார் .

கூகிள்+ சமூக வலைத்தளம் வந்துள்ளது

2011-06-29T17:29:00.002+05:30

மிகவும் சிறப்பாக வெளிவந்துள்ளது . கூகிள் +

அதனுடன் தொடர்புடையதாக Circle + என்றும் அறிமுகப்படுத்தி உள்ளது . உங்கள் நபர்களை குறிப்பிட்ட வட்டத்துள் இணைத்துக்கொள்ளலாம் .

மேலதிக விபரங்கள் வீடியோவில் பார்க்கவும் ..

ஒருவரால் என்ன முடியும்- ஒன்று செய்யுங்கள் !

2011-06-19T19:16:00.004+05:30

எவருக்காகவும் கடவுளை பிரார்த்திக்காதீர்கள் .முடிந்தளவு கடவுளாக இருங்கள் அனைவருக்கும் ..

மனிதனின் அடிப்படைத்தேவைகளில் உறையுளை இழந்து ,முதல் நாள் உண்ட உணவையும் ,உடுத்த உடையையும் மட்டுமே மூலதனமாக கொண்டு இடம்பெயரும் அகதிகளின் தினம் நாளை .

இன்னொருவருடைய துயரை அறிய நான் அப்படி இருந்தால் என ஒரு சுயசரிதையை எம் மனதுக்குள் நாமே எழுதிக்கொள்வது நல்லது .

எம்மால் என்ன செய்ய முடியும் ?-ஒருவரால் மாற்ற முடியும் ...

இந்த முறை அகதிகள் தினத்துக்காக(ஜூன் 20 ) ஐக்கிய நாடுகள் சபையின் அகதிகளுக்கான உயர்ஸ்தானிகர் தாபனம் தனது இணையத்தளத்தில் "ஒன்று செய்யுங்கள் " என்ற தொனிப்பொருளில் தனது தளத்தை நேர்த்தியாக வடிவமைத்துள்ளது . Click here

இந்த தளத்தில் Learn ,Spread the world ,Give என்று மூன்று பிரிவுகளாக பிரிக்கப்பட்டுள்ளது .

வீடியோ பார்க்க

Learn பகுதியில் அகதிகள் படும் துயரங்களையும் ,அவர்களாகவே எம்மை உணர்ந்து அவர்களின் துயரங்களையும் உணரும் வகையிலும் இந்த தளம் அமைக்கப்பட்டுள்ளது .

1 .அகதிகளின் உணர்வுகளை கேட்டல்

2 .உங்களால் போர் சூழலில் இருக்கும் இடத்தை விட்டு வெளியேற வேண்டிய கட்டாயமான சூழ்நிலையில் உங்களால் உங்களை தயார்படுத்திகொள்ள முடிகிறதா என்பதை பரிசோதிக்க விளையாட்டு போல வடிவமைக்கபட்டுள்ளது .- http://www.playagainstallodds.com/

3 .இடம்பெயரும் அகதிகளுக்கும் ,வெளிநாடுகளில் தஞ்சம் கோரும் அகதிகளுக்கும் உதவியாக அவை பற்றி விழிப்புணர்வு கற்பித்தல்கள் இந்த

பக்கத்தில்: -http://www.unhcr.org/pages/4b7409436.html

Spread the world பகுதியில் அனைவரிடமும் விழிப்புணர்வை ஏற்படுத்தல் முக்கியமானது . ஈ மடல்களை அனுப்பலாம் .ஏஞ்சலினா ஜோலியின் வீடியோ காட்சியை பகிரலாம் .

Give என்ற பகுதியில் உங்களால் முடிந்த பணத்தை கொடுக்கலாம் .அல்லது உங்கள் நேரத்தை ஒதுக்கலாம் .

இந்த தளத்திற்கு சென்று உங்களை UNHCR சேவையாளராக இணைத்துக்கொள்ளலாம் .http://www.unv.org/how-to-volunteer.html

அல்லது நேரம் மிக குறைவு எனில் இணையத்தில் உங்களால் செய்யக்கூடியவற்றை பதிந்து உங்களை பதிந்துகொள்ளலாம். .http://www.onlinevolunteering.org/en/vol/index.html

உதவிகள், சேவைகளில் சில்லறை உதவி பெரிய சேவை என்றில்லை .. நீங்கள் செய்யும் ஒவ்வொரு உதவியையும் தொகுத்தால் மிகப்பெரிய அளவில் பயன் கிடைக்கும் .

சமூக இணையத்தளங்களை கொஞ்சம் சமூகத்துக்காகவும் பயன்படுத்துவோம்

காலத்தில் பயணிக்கும் துகள்

2011-06-04T18:59:00.005+05:30

கால பயணம் பற்றிய முன்னைய பதிவு

இந்த நேரத்தை நான்காவது பரிணாமமாக சிந்தித்தால் மட்டுமே உணரமுடியும் . உதாரணமாக நீங்கள் இந்த ஆக்கத்தை ஒவ்வொரு சொல்லாக படிக்கும் போதும் நேரம் இறந்த காலத்துக்கு சென்று கொண்டிருக்கிறது .நேரத்தில் நாம் பயணிக்கிறோம் .

மனிதன் பயணித்த அப்பலோ விண்கலம் 25 ,000 mph எனும் வேகத்தை தான் இறுதியாக அடைந்தது.ஒளியின் வேகத்தில் பயணிக்க இதை விட கிட்டத்தட்ட 2000 மடங்கு வேகம் வேண்டும். அதுவும் சாத்தியமாகும் ,ஆனால் காலம் செல்லும்.

உண்மையில் நேரத்தில் இறந்தகாலத்துக்கோ,எதிர்காலத்துக்கோ பயணிப்பதில் இது மாத்திரமல்ல பிரச்சனை .பரடொக்ஸ்(கிராண்ட் பாதர்,மேட் சயன்டிஸ்ட் ) ,வோர்ம் ஹோல், லூப் பிரச்சனை என்றெல்லாம் பல பிரச்சனைகள்.

ஆனால் மனிதன் தன்னால் பயணிக்க முடியாவிட்டாலும் கிட்டத்தட்ட ஒளியின் வேகத்தில் அணு துகள்கள் பயணிக்க கூடிய அளவு உலகின் மிகப்பெரிய துகள்களை முடுக்கி விடும்( particle accelerator ) மையம் சுவிசில் ஜெனீவாவில் அமைக்கப்பட்டுள்ளது .

அடித்தளத்தில் 16 மைல்கள் தூரமுள்ளதான வட்டவடிவில் அந்த சுரங்கம் அமைக்கப்பட்டுள்ளது .அந்த துகள்களுக்கு சக்தியை வழங்கும் போது ஒரு செக்கனிலேயே பூச்சியத்திலிருந்து 60 ,௦௦௦ mph வரை அது ஆர்முடுக்கபடும் .

அதற்கு வழங்கும் சக்தியை மேலும் மேலும் அதிகரிக்கும் போது ஒரு செக்கனில் 11 ,000 தடவைகள் அந்த வளையத்தை(16 மைல்கள்) சுற்றி வருகின்றன .

கிட்டத்தட்ட இது ஒளியின் வேகம் .ஆனால் முழுதாக ஒளியின் வேகத்தை பெறமுடியா விட்டாலும் ,ஒளியின் வேகத்தில் 99 .99 சதவீதத்தை அடைந்துவிடும் .

இதன் போது அவை நேரத்தில் பயணிக்க தொடங்கிவிடுகின்றன .மிகவும் குறுகிய நேரம் இருக்க கூடிய துகள் பை மேசன்ஸ்(pi-mesons ) ஒரு சில நனோ செக்கனில் கலைந்துவிடும் .ஆனால் இவை நேரத்தில் பயணிக்க தொடங்கியதும் முனனர் இருந்ததை விட 30 மடங்கு நேரம் அதிகமாக இருக்கிறது .

இந்த கணிப்பின் படி பௌதீகவியலாளர்கள் இதை ஏன் நேர இயந்திரமாக பாவிக்க கூடாது என கேள்வி எழுப்பி உள்ளனர் .இதில் இறந்த காலத்துக்கோ எதிர்காலத்துக்கோ செய்தியை அனுப்பி முயற்ச்சிக்கலாம் என்பது அவர்களது கருத்து .

கே வி ஆனந்தின் "கோ" -திரைவிமர்சனம்

2011-04-22T15:57:00.012+05:30

கே வி ஆனந்த் அன் கோ வினுடைய வெற்றி கூட்டணியில் வந்துள்ள இன்னொரு திரைப்படம் கோ .வித்தியாசமான கதைக்களங்களை தேர்ந்தெடுக்கும் கே வி ஆனந்த் கோ வில் பத்திரிக்கை துறையை தேர்ந்தெடுத்திருப்பது மட்டுமல்லாது அதை திரைக்கதையாலும் தனது கமெராவாலும் சிறப்பாக கையாண்டிருப்பது பாராட்டப்படவேண்டியது .

அரசன் (கோ) யார் என்பதை தீர்மானிப்பது பத்திரிகையாளன் கையில் என்ற கருவோடு நேர்த்தியாக நகர்ந்திருக்கிறது திரைக்கதை .

இப்போதையை சாதாரண அரசியல் சூழ்நிலை போல ஆளும் கட்சியும் எதிர்க்கட்ச்சியுமாக மோதிக்கொள்வது போல திரைக்கதையிலும் பிரகாஷ்ராஜும் கோட்டா சிறீனிவாச ராவும் மோதிக்கொள்ள இடையில் மூன்றாவதாக சிறகுகள் எனும் அமைப்பு மாற்றம் தேடும் புரட்சிகர இளைஞர் அமைப்பாய் உருவெடுக்கிறது .

இரு முக்கிய கட்சிகளின் மீதும் இருக்கும் அதிருப்தியால் அவர்களால் எதிர்நோக்கிய பிரச்சனைகளால் தின அஞ்சல் பத்திரிக்கை சிறகுகளுக்கு ஆதரவாக இருக்கிறது .தின அஞ்சலில் ஜீவா புகைப்படபிடிப்பாளராகவும் ,கார்த்திகாவும் பியாவும் நிருபர்களாக இருப்பதோடு இந்த சிறகுகள் அமைப்பையும் மக்களிடத்தில் சரியாக கொண்டு போய் சேர்க்கின்றனர் .

சிறகுகள் அமைப்பின் பிரசார கூட்டத்தில் குண்டுவெடிப்பும் நிகழ அமைப்பில் இருந்த பலரும் இறந்துவிட எஞ்சியவர்கள் இதன் மூலமே தேர்தலில் வெற்றிபெற்றுவிடுகின்றனர் .இதன் பின்னர் சிறகுகள் அமைப்பின் தலைவன் (அஜ்மல் ) ,ஜீவா யார், குண்டுவெடிப்பை நிகழ்த்தியது யார் என்பதை இரண்டாம் பாதியில் திரைக்கதையில் விறு விறுப்பாக சொல்லியிருக்கிறார் இயக்குனர் .

புகைப்படப்பிடிப்பாளராக வரும் ஜீவாவை தமிழ் சினிமாவில் வரும் பஞ் வசனம்,செண்டிமெண்ட் வசனம் பேசும் கதாநாயகன் என்று காட்டாமல் யதார்த்தமான ஒரு சாதாரண பத்திரிகையாளனாக காட்டியிருக்கிறார் இயக்குனர் ஆனந்த் . ஜீவாவின் நடிப்பும் அவ்வளவு யதார்த்தம் .மொத்தமாக தமிழ் சினிமாவின் மாற்றத்துக்கு பாராட்டுகள் .

அதே பத்திரிகையில் நிருபர்களாக இருக்கும் கதாநாயகி கார்த்திகாவும் பியாவும் யதார்த்தமாக தேவையான இடங்களில் வந்து போகின்றனர் . துறு துறு பியாவின் நடிப்பு பாராட்டப்படவேண்டியது .

பிரகாஸ்ராஜ் உம் கோட்டா சிறீநிவாசராவும் ஆளும் கட்சி எதிர்கட்சி தலைவர்கள் பாத்திரத்தில் சிறப்பு . பிரகாஸ் ராஜ் இன் வசனம் பேசும் முறை நடிப்பு திரையில் பார்த்தால் மட்டுமே உணர முடியும் .சாமிக்கு பிறகு கோட்டா சிறீநிவாசன் நடிப்பு பிடித்த படம் இது .

இந்த படத்தில் உண்மையான கதாநாயகன் கே வி ஆனந்த்,ரிச்சர்ட் நாதன் உம் அவரின் கமெராவும் ஜீவாவின் கமெராவும் தான் .ரிச்சர்ட் நாதனின் ஒளிப்பதிவு சண்டை காட்சிகளிலும் சரி பாடல் காட்சிகளிலும் சரி மிக சிறப்பு என்றே சொல்லலாம் .சண்டை காட்சிகளில் சுழன்ற கமெரா பாடல் காட்சிகளில் இயற்கையை அழகாக காட்டிய கமெரா சில காட்சிகளில் தொழில்நுட்பத்திலேயும் கலக்கியிருக்கிறது .

ஹரீஸ் எங்கிருந்து இசையை சுட்டாலும் கேட்க்க நன்றாக இருக்கிறது,காரணம் பா விஜயின் மதன் கார்கியின் வரிகள் அருமை.சில இடங்களில் பின்னணி இசை மிக வித்தியாசமாக இருந்தது .ஆனால் ஒரு இடத்தில் டயிடானிக் இசையை நினைவுபடுத்தியது !! .

படம் யதார்த்தமாக இருப்பதோடு நச்சென்று சில வசனங்களும் இருந்தது . "நமக்கெல்லாம் ஏன் வேண்டாத வேலை அது தான் நாட்டை திருத்த பஞ் டயலாக் பேசிற ஹீரோஸ் இருக்காங்களே !!! ""உங்களுக்கெல்லாம் கிரிக்கெட்டும் சினிமாவும் ஹீரோவும்,தோணி சிக்ஸ் அடிப்பாரா மாட்டாரா என்பது தான் பிரச்சனை " எனும் இடங்களும்" வசனங்கள் அருமை .

அரசியல் நக்கல்களுக்கும் பஞ்சமில்லாமல் காட்சிகளும் கலைஞரும் வந்து போகிறார்கள் . சோனா பிரசார மேடையில் பேசும் தமிழ் குஷ்புவை நினைவுபடுத்துகிறது .

யதார்த்தமான சண்டை காட்ச்சிகள் ,யதார்த்தமான நடிப்பு ,யதார்த்தமான நாயகன் என அத்தனையும் யதார்த்தமாக செய்திருக்கும் கே வி ஆனந்த் இற்கு பாராட்டுகள் .

சினிமா பார்க்கும் மக்களை முட்டாள் ஆக்காத வரிசையில் கோ வும் அந்த அணியும் இணைந்துகொள்ளலாம் .அவ்வளவு யதார்த்தமான சினிமா .விறுவிறுப்புக்கு குறைவில்லாமல் ......

பத்திரிகை துறையை வைத்து எத்தனையோ கதைகள் வந்திருந்தாலும் புகைப்படத்தாலேயே கதை சொல்லும் இந்த யதார்த்தமான திரைப்படம் வரவேற்பு பெறும் .

மதன் கார்க்கி வரிகளின் ரசிகனாய் - 180 பாடல் வரிகள்

2011-04-15T18:52:00.003+05:30

பாடல்கள் என்றால் முதலில் அதில் வரிகளை உன்னிப்பாக ரசிப்பவன் நான் . வரியோடு சேரும் போது தான் அதில் உயிரோட்டம் இருக்கும் .

இதற்க்கு ஒரு காரணம் வைர வரிகளின் சொந்தகாரர் வைரமுத்து அல்லது வரிகளிலேயே இசை கொண்டுவரும் கண்ணதாசனின் வரிகளாகவும் இருக்கலாம் . எல்லாவற்றையும் விட தமிழின் அழகை உணருவது மிக முக்கிய காரணமாக இருக்கலாம் .

ஆனால் அழகான தமிழ் சொற்களை கொண்டலாய்( :-) ) பொழியும் மதன் கார்கியின் மீதான ஈர்ப்பே இரும்பிலே ஒரு இருதயத்தில் இருந்து தொடர்கிறது .

புதிய படமான 180 இல் மதனின் பாடல் வரிகளை மிகவும் எதிர்பார்த்திருந்தேன். எதிர்பார்ப்பை சற்றும் குறைக்கவில்லை .முன்னைய கார்கியின் வரிகளுக்கான பதிவு ..

முதலில் ரசித்த பாடல் .....

சந்திக்காத கண்களில் .... -பாடலை கேட்க்க

சந்திக்காத கண்களில் இன்பங்கள்

செய்ய போகிறேன்

சிந்திக்காது சிந்திடும் கொண்டலாய்

பெய்யப்போகிறேன் ...

குவியமில்லாவுக்கு பிறகு ஈர்த்த சொல் கொண்டலாய் . கொண்டலாய் என்றால் மேகம் . சிந்திக்காது சிந்திடும் மேகம் .அழிந்து வரும் அழகான சொற்கள் அறிமுகம் தொடரவேண்டும் .

அன்பின் ஆலை ஆனாய்

ஏங்கும் ஏழை நானாய்

அன்பையே கொண்டிருப்பவனிடம் ஏங்கும் பெண்ணின் ஏக்கமாய் ஒலிக்கும் வரிகளில் சொற்களின் பாவனை அருமை .

இணையும் முனையம் இதயம் என்று ஆனாலே

பயணம் முடியும் பயமும் விட்டு போகாதோ

இரண்டு இதயங்கள் ஒரே சமயத்தில் இணையும் இடம் இதயம் என்றானபின் பயம் இல்லை என்று காதலின் அர்த்தம் இரு வரியில் சொல்லும் காதல் வரிகள் .

நான் கேட்டு ரசித்த அடுத்த பாடல் துறு துறு கண்ணில் ......

இந்த பாடல் வரிகளை தீட்டிப்பாருங்கள் . ஒவ்வொரு வரிகளுக்குள்ளும் வைரம் ஒளிரும். உணர்வீர்கள் .குழந்தைகள் உலகத்தை எப்படி பார்க்க ஆசைப்படுகிறார்கள் என்ற வரிகள் .

புதிய புதிய உலகம் வேண்டாமே

நேற்றுலகம் நான் காண்பேன்

தூசில்லா பூங்காற்றிலே ...

நவீன உலகின், மனித மனதின் ஏக்கம் மாசில்லாத பூங்காற்று . ஏக்கத்தை இன்னும் அதிகரிக்கும் வரிகள் .

இது மதன் கார்கியின் சிறப்பு . வரிகளுக்கும் பாடகரின் உச்சரிப்புக்கும் மேலும் அழகு. மீண்டும் தமிழின் அழகை கொண்டுவந்துள்ள ளகர வரிகள் மிகவும் பிடித்தது .

பல நாள் இருளும்

ஒரு நாள் சுருளும் எனவே !

மருளும் மனதில்

ஒளியாய் திரளும் கனவே !

மருளும் - பயப்படும்

இருளான வாழ்க்கையையும் ,இறுதியில் இல்லாமல் போகும் வாழ்க்கை எனவும் நினைத்து மருளும் (பயந்து மிரண்டுகொண்டிருக்கும்) மனதிற்கு ஒளியாய் இருப்பது கனவே . வாழ்க்கையின் அர்த்தம் இந்த வரிகள் .இந்த வரிகளின் அழகு உணர பாடலை கேளுங்கள் .

ஏஜே மனம் மறைப்பதேன் பாடலில் ரசித்தது ..

நாடியை தேடி உனது கரம் தீண்டினேன்

நாழிகை ஓடக்கூடா வரம் வேண்டினேன்

இந்த வரியை சிந்தித்த மதனின் சிந்தனைக்கு வாழ்த்துக்கள் .காதலியின் கையை தீண்டும் போது கூட ஆவலுடன் அவள் நாடியிலேயே நேரம் கணித்து நாழிகை ஓடக்கூடாது என வரம் கேட்கும் காதலன் . நேரம் போக கூடாது என்ற எண்ணத்தையும் காதலியை தீண்டுவதையும் இணைத்தது நாடியில் நேரம் பார்ப்பதை உணர்த்துவது அருமை .இரு வரிகளுக்குள் எண்ணமும் நிகழ்வும் .

இளமை ததும்பும் வரிகளிலும் விடவில்லை ..

மேல் விழும் தூறல்

எனது ஆசை சொன்னதா

கால் வரை ஓடி எனது

காதல் சொன்னதா ?

காதலை சரியாய் சொல்லும் மொழி மோகம் என்பதையும் அழகாக விளக்கும் வரிகள் .

இந்த வரிகள் எதிர்பார்ப்பை குறைக்கவில்லை ..அடுத்த பாடல்களின் அழகான வரிகளுக்கான எதிர்பார்ப்பை கூட்டியுள்ளது . மதன் கார்கியின் தரமான வரிகளின் ரசிகனாய் ....

எக்ஸ்ட்ரீம் சூப்பர் மூன் - மார்ச் 19 என்ன நடக்கும் ?அறிவியல் விளக்கம்

2011-03-16T17:03:00.008+05:30

ஜப்பானில் ஏற்ப்பட்ட புவியதிர்வு மற்றும் சுனாமி தாக்கத்திற்கு பின்னர் அனைவரிடமும் கேள்வி எழுப்பி இருக்கும் செய்தி இந்த சந்திரன் பூமிக்கு அருகில் நெருங்கி வரவிருக்கும் செய்தி . இந்த நிகழ்வு மார்ச் மாதம் 19 ஆம் திகதி இடம்பெறும் .

இதன் விளைவாக தான் ஜெப்பானில் பூமியதிர்ச்சியும் ,ஆழிப்பேரலையும் ஏற்ப்பட்டது எனவும் மார்ச் 19 ஆம் திகதி மிகப்பெரிய பூகம்பங்களும் சுனாமி அலைகளும் உலகம் முழுதும் ஏற்ப்படும் எனவும் சில வானவியலாளர்கள் கூறிவருகின்றனர் .

இதெல்லாம் உண்மையா ? ஜெப்பானில் ஏற்ப்பட்ட சுனாமிக்கும் பூமிக்கு மிக அருகில் வரவிருக்கும் சந்திரனும் தொடர்புண்டா ? வரலாற்றில் இப்படி நிகழ்ந்த போது ஏதாவது இதற்க்கு முதல் நடந்திருக்கிறதா? இந்த சூப்பர் மூன் என்றால் என்ன ? என்பவை பற்றி ஆராய்வோம் .

சந்திரன் வழமையாக பூமியை சுற்றி எப்படி இயங்குகிறது ?
சந்திரன் பூமியை சரியான வட்ட பாதையில் சுற்றுவதில்லை .நீள்வட்ட பாதையில் தான் சுற்றுகிறது .

சந்திரனின் நீள்வட்ட பாதையில் மற்றைய பக்கத்தை விட ஒருபக்கம் 31 ,000 மைல்கள் குறைவாகும் .பூமியிலிருந்து மிக தூரத்தில் இருக்கும் போது Apogee நிலையிலும் மிக நெருங்கிய தூரத்தில் இருக்கும் போது Perigee நிலையிலும் இருக்கிறது . மார்ச் 19 ஆம் திகதி மட்டும் இந்த Perigee அதாவது நெருங்கிய நிலையில் சந்திரன் இருக்கப்போவதில்லை .ஒவ்வொரு மாதமும் தான் இது நிகழ்ந்துகொண்டு வருகிறது .

ஆனால் எல்லா முறையும் நீள் வட்ட பாதையும் ஒரே அளவில் இருப்பதில்லை .19 வருடங்களின் பின்னர் இந்த முறை தான் இது மிக மிக அருகில் வரும் . வழமையாக 2 % பூமியை நெருங்கி வரும் இந்த முறை 8 % நெருங்கி வருகிறது .

சூப்பர் மூன் டே(Super moon day ) என்பது என்ன ?

"சூப்பர்" மூன் டே என்பது சந்திரன் எமது பூமிக்கு மிக மிக அருகில் வரும் போது முழுதாக தெரியும் நாள் .அதாவது பூமிக்கு மிக அருகில் ஏற்ப்படும் பௌர்ணமி எனலாம் .

சாதாரணமாக பூமியிலிருந்து 400 ,000 கிலோ மீட்டர்கள் தொலைவில் தான் சந்திரன் இருக்கும் .ஆனால் மார்ச் 19 ஆம் திகதி சந்திரன் சாதாரண தூரம் 400 ,௦௦௦ கிலோமீட்டர்களில் இருந்து 43 ,423 கிலோ மீட்டர்கள் குறைந்து பூமியிலிருந்து 356 ,577 கிலோமீட்டர் தூரத்தில் இருக்கும் .

இந்த தினத்தன்று பூமியதிர்ச்சி ,பெரிய அலைகள் ,சூறாவளி போன்றன உலகம் முழுதும் ஏற்ப்படலாம் என சில வானவியலாளர்கள்/ ஜோதிடர்களின் கருதுகிறார்கள் .

எக்ஸ்ட்ரீம் சூப்பர் முன் டே(Extreme Supermoon day)
மேற்கத்தைய பிரபல வானவியலாளர் ரிச்சர்ட் (Richard Nolle ) தான் சூப்பர் மூன் தினத்தன்று பூமியில் மிகப்பெரிய அழிவுகள் ஏற்ப்படும் என்று தெரிவித்துள்ளார் .இதனால் இதனை எக்ஸ்ட்ரீம் சூப்பர் மூன் டே என கூறியுள்ளார் .

ஆனால் இதை பெரும்பாலான விஞ்ஞானிகள் ஏற்க்கவில்லை என்பது தான் கொஞ்சம் ஆறுதலான விடயம் . காரணம் இதற்க்கு எந்தவித விஞ்ஞான காரணங்களும் இல்லை என்பது அவர்களுடைய கருத்து .

ஜப்பானில் ஏற்ப்பட்ட பூமியதிர்ச்சியும் ,சுனாமியும் இந்த சூப்பர் மூனால் ஏட்ப்பட்டதா என்ற கேள்வி தான் இப்போது பலரிடையே தோன்றியுள்ளது .
இல்லை என்பதே விஞ்ஞானிகளின் திட்டவட்டமான பதில் .காரணம் சுனாமி ஏற்பட்ட தினத்தன்று சந்திரன் சாதாரண தூரத்தை விட பூமியில் இருந்து விலகி இருந்தது .

இதுவரை ஏதாவது பாதிப்புகளை ஏற்ப்படுத்தி இருக்கிறதா என்று பார்த்தால்...

1955 ,1974 ,1992 மற்றும் 2005 களில் சூப்பர் முன் ஏற்பட்ட போது இதே போல இயற்க்கை அழிவுகள் ஏற்பட்டுள்ளன .1955 இல் அவுஸ்திரேலியாவில் ஏற்ப்பட்ட பாரிய வெள்ள(Hunter Valley floods ) அனர்த்தம் .2005 இல் சூப்பர் முன் ஏற்ட்படுவதட்க்கு ஒரு கிழமைக்கு முதல் தான் இந்தோனேசியாவில் சுனாமி ஏற்பட்டது .காற்றினா புயலும் அதனால் தான் ஏற்பட்டது என்கின்றனர் .ஆனால் இவை தற்செயலாக ஏற்ப்பட்டவை என்பது தான் விஞ்ஞானிகளின் கருத்து .

வழமையாக சந்திரனின் ஈர்ப்பால் அலைகளின் உயரம் அதிகரிக்கும் ஆனால் பூமியதிர்ச்சியை ஏட்ப்பட்டுத்தும் அளவுக்கு தட்டுகளை நகர செய்யும் அளவுக்கு மாற்றத்தை இதனால் ஏற்படுத்த முடியாது என விஞ்ஞானிகள் இப்போது திட்டவட்டமாக அறிவுத்துள்ளார்கள்.seismologists and volcanologists கருத்துப்படி பூமியின் உள் சக்திக்கோ (internal energy ) அதன் சமநிளைக்கோ மாற்றம் ஏற்படாது என்று கூறிகின்றனர் .

ஆனால் இந்த முறை சந்திரனை மிக பெரிதாக அனைவரும் அருகில் பார்க்கலாம் .

James Garvin, chief scientist at the Goddard Space Flight Center under NASA, said in an article on NASA's website that "the effects on Earth from a supermoon are minor."

பயனுள்ளதாக இருந்தால் நண்பர்களுடன் பகிருங்கள் .

கறுப்பு உண்மைகள்-அம்மா பகவான் -பாகம் 1

2011-03-08T15:43:00.008+05:30

முக்கிய குறிப்பு

ஊடகங்களால் ஊக்குவித்து வரப்படும் அம்மா பகவான் விடயம் பற்றி தொடராக சமூக நல நோக்கத்துடன் எழுதுகிறேன் .அவரை எதிர்ப்பதற்காக அல்ல ..மக்களின் விழிப்புணர்வுக்காக ..நன்றி கான்வே(Ph .D )

தமிழ் சமுதாயத்தின் சிந்தனைகளில் தடங்கலை ஏற்ப்படுத்தும் விடயங்களில் இந்த தனித்த மனித கடவுள்களின் ஆதிக்கம் அதிகம் .இது அவர்களுடையை உரிமை என்று சொல்லி விடலாம்.ஆனால் பௌத்த மதத்தில் சிறுவர்களை துறவிகளாக சேர்ப்பதை நீங்கள் ஆதரிக்கிறீர்களா ? இல்லை என்றால் இந்த அம்மா பகவான் சமாச்சாரத்தையும் ஆதரிக்க மாட்டீர்கள் .

21 + மேலே முடிவெடுக்கும் பக்குவம் அடைந்த மனநிலையில் இருக்கும் மனிதர்கள் எப்படி வேண்டும் என்றாலும் செல்லுங்கள் .ஆனால் இந்த அம்மா பகவான் கலாச்சாரம் பாடசாலைகளில் சிறுவயது மாணவர்களிடம் திணிப்பு துளிர் விட ஆரம்பித்து உள்ளது .அண்மையில் இலங்கை கிழக்கு பகுதியில் பாடசாலை மாணவர்களிடம் படங்கள் கொடுக்கப்பட்டுள்ளது .

பதின்ம வயதில் பல பிரச்சனைகள் பலருக்கும் வரும் ஆனால் அதை அவர்களே எதிர்கொள்வார்கள் . இடையில் இப்படியானவர்கள் அதை பயன்படுத்தி எப்படியோ புகுந்து விடுகின்றனர் . பின்னர் "காகம் இருக்க பனம் பழம் விழுந்த" கதை தான் . தமது வெற்றிக்கு காரணம் முழுக்க அம்மா பகவான் என்ற மாயை வளர்ந்து விடுகிறது .பின்னர் அது அந்த தனி மனிதர் மீதான வெறியாகவும் மாறிவிடுகிறது .

இவர் யார் என்ற விவரம் பலருக்கு தெரியாமல் இருக்கலாம். அதை வெளிச்சத்துக்கு கொண்டுவரும் பதிவு இது .

1990 களில் இருந்து மிக மிக வேகமான வளர்ச்சி கண்டுவரும் இந்த அமைப்பு 2002 வரை வன்னேஸ் மூவ்மென்ட் (Oneness Movement -OM ) என்று அனைவராலும் அறியப்பட்டிருந்தாலும் இப்போது கல்கி தீக்ஷா மூவ்மென்ட்(Kalki Deeksha Movement) என அழைக்கப்படுகிறது .

இதில் மாய நம்பிக்கைகளில் இருந்து விடுபட்ட முன்னாள் தலைமை உறுப்பினர்களிடம் இருந்து கிடைக்கப்பெற்ற தகவல்களின் அடிப்படையில் இது வெறும் ஏமாற்று வேலை என்று இது நவீன கால மூட நம்பிக்கை என்றும் கூறுகின்றனர் .

இது தென் இந்தியாவில் 1980 களின் இறுதிப்பகுதியில் உருவாக்கப்பட்டது . பொது மக்களிடம் 1991 ஆம் ஆண்டு விஜயகுமார் நாயுடுவால் (அம்மா பகவான் )அறிமுகப்படுத்தப்பட்டது .அவரிடம் இருந்த/வளர்த்துக்கொண்ட மனோதத்துவ ஆற்றல்கள் ,சில முறைகளால் அவர் 1984 களில் இருந்து அவரின் கவரும் திறமையால் பாடசாலையில் இருந்து சில மாணவர்களை தனது பக்கம் இழுத்துக்கொண்டார் .

அவர் தனது ஆன்மீக கற்பித்தலை பல வேதாந்த அறிஞர்களிடம் இருந்து கொஞ்சம் கொஞ்சமாக திரட்டி வளர்த்துக்கொண்டார் . அதில் குறிப்பிடத்தக்கதாக ரமண மகரிஷிகள் ,ஜே கிரிஷ்ணமூர்த்தி ,யு ஜி கிருஷ்ணமூர்த்தி போன்றவர்களிடம் இருந்தே இந்த நுணுக்கங்களை கற்றார் . சமய புரட்ச்சியாளர் ஜே கே கிருஷ்ணமூர்த்தியின் பாடசாலையில் இவர் இருந்த போது இவரின் நடவடிக்கைகளை கண்டித்தார் .

மேலும் விஜயகுமார் தனது பெயரை 1989 களில் கல்கி என மாற்றி அமைத்துக்கொண்டார் . அதாவது கல்கி என்பது இந்து புராணத்தில் கிருஷ்ணரின் 10 ஆவது அவதாரம் என கூறப்படுகிறது .

குறுகிய காலத்திலேயே கல்கி என்ற பெயரில் இருக்கும் சட்ட சிக்கல்கள்,சமூக சிக்கல்கள் காரணமாக தனது பெயரை பகவான் என மாற்றி அமைத்துவிட்டார் .மேலும் தான் கடவுள் என்றும் தான் இந்த உலகில் உள்ள அனைவருக்கும் ஞான ஒளியை அளிக்க போவதாகவும், பின்னர் 2012 இல் 64 ,000 பேருக்கு தான் ஞானம் அளிக்க போவதாகவும் அறிவித்தார் .

இதை எப்படி செய்ய போகிறார் என்றால் "neurobiological brain-shift event " என்ற முறையின் மூலமாம் .அதாவது இந்த முறை மூலம் அவரிடம் இருந்து ,அவர் மனைவியிடம் இருந்து ,சில நெருங்கிய பக்தர்களிடம் இருந்து உங்களுக்கு அருள் வழங்கப்படும் .இது 21 நாள் கோர்ஸ் . அதுவும் அவர்களால் அனுமதிக்கப்பட்ட தீக்ஷா வழங்குனராக நீங்கள் மேலும் செலவழிக்க வேண்டி இருக்கும் . இதுவரை காலமும் அடிப்படை கோர்ஸ் க்கு $7000 டொலர்கள் அறவிடப்பட்டு வந்துள்ளது .

ஆனால் இப்போது அவர் (அம்மா பகவான் ) இதை இலவசமாகவும் விரைவாகவும் அனைவரிடமும் கொண்டு போய் சேர்க்குமாறு கூறியிருக்கிறாராம் .அதனால் சிலரால் இணையங்களில் பரப்புரைகள் நடைபெறுகிறது ..வீடியோ கான்பெரென்ஸ் இல் எல்லாம் பூஜை நடைபெறுகிறதாம் .காரணம் ஒரு வேளை அவரின் அமைப்பு இந்தியாவில் மூடப்படலாம் என்ற அழுத்தம் தான் .

உலகத்தில் இருந்து அனைத்து பாகங்களில் இருந்தும் அனைவரையும் கவர்ந்து இந்த நிகழ்வு நடைபெறுகிறது இலவசமாக .ஆனால் அவர்கள் அறைக்கு $1500

டோலேர்கள் கட்ட வேண்டும் . ஆனால் அந்த அறையின் பெறுமதிகள் $500 கூட

வராது . இது இலவசம் என்று தோன்றவில்லை .

தொடரும் ......
பயனுள்ளது என்றால் ,விழிப்புணர்வு ஏற்ப்படுத்த எண்ணினால் நண்பர்களிடம் இந்த பக்கத்தை பகிருங்கள் ..

பேஸ்புக் - 3 ஆம் நபர் அப்பளிகேசன்ஸ் -கவனம்!!

2011-03-04T13:31:00.009+05:30

நாம் வங்கிக்கு செல்கிறோம் கடன் உதவி பெறும் அவசரத்தில் அவர்கள் தரும் படிவத்தில் என்ன இருக்கிறது என வாசிக்காமல் கையெழுத்து இடுகிறோம் . அது நம்பிக்கை என வைத்துக்கொள்வோம் .ஆனால் அதன் விளைவு பின்னர் தான் தெரியும் .

ஆனால் அதை விட ஆபத்தானது ஒருவரது தனி அடையாளங்களை இன்னொருவர் வைத்திருப்பது . இப்போதைய முன்னணி சமூக இணையத்தளம் பேஸ்புக் அனைவரது தனி அடையாளங்களையும் வைத்திருக்கிறது.

ஆனால் பேஸ்புக் அல்லாத வெளி நபர்கள் வைத்திருப்பது மிகவும் ஆபத்தானது அல்லவா ? எம்மை அறியாமலே நாம் எமது அனைத்து விடயங்களையும் வெளி நபருக்கு கொடுக்கிறோம் .அதற்கான ஊடகம் இந்த 3ஆம் நபர் அப்பிளிகேஷன்கள்(3rd party Applications ).

இதை பலரும் வாசிப்பதில்லை ..

சில வேளைகளில் தேவையில்லாத தகவல்களும் கேட்கப்படும் . கீழே சிறிய எழுத்தில் "By proceeding this ,you agree to Farm villie Terms of services and privacy policy ".

நீங்கள் வழக்கு கூட தொடரமுடியாது .

அண்மையில் வீட்டு விலாசங்களையும் தொலைபேசி இலக்கங்களையும் நீங்கள் பயன்படுத்தும் 3 ஆம் நபர் அப்ப்ளிகேஷன்கள் அணுகுவதற்கு பேஸ்புக் அனுமதி அளித்திருக்கிறது .

இந்த தகவல்கள் அனைத்தும் வெளி நபர்களுக்கு விற்க்கப்படும் . உங்களுக்கு தொந்தரவுகள் பல ஏற்ப்படலாம் . இதை நிறுத்துவதே சிறந்த ஒரே வழி ஆகும் .பார்பதற்கு கவர்ச்சியாகவும் வேறு வேறு தலைப்புகளிலும் வடிவங்களிலும் வரும் .ஆனால் தயவு செய்து அப்ப்ளிகேஷன்கள் பாவிக்க வேண்டாம் .

இதனை தடுப்பது இலகு

பேஸ்புக் கணக்கில் நுழைந்து வலது பக்கம் மேல் மூலையில் இருக்கும் ACCOUNT பகுதிக்கு சென்று PRIVACY SETTINGS அழுத்தவும் .

கீழே APPS AND SETTINGS பகுதியை எடிட் செய்யவும் ..

அதில் Remove Unwanted or spammy Applications என்ற பகுதியை அழுத்தி தேவையில்லாததை அகற்றலாம் .

உங்கள் நண்பர்கள் அதை பாவித்தாலும் ஆபத்து இருக்கிறது .அதை தடுப்பது பற்றி .மேலே உள்ள பகுதிக்கு கீழே உள்ளது இது .

உங்கள் கணக்கை திருடுபவர்களிடம் இருந்து பாதுகாக்க முக்கியமாக செய்ய வேண்டியது .

Account - Account settings சென்று Account security edit செய்து இந்த செயன்முறையை செய்யவும் .

இதன் தொழில்நுட்ப பொறிமுறையை உங்களோடு பகிர்கிறேன்.

பேஸ்புக் செர்வர்கள் மூன்றாம் நபர் அப்ப்ளிகேஷன்களை வைத்திருப்பதில்லை . பெஸ்புக்கின் API (Application programming Interface ) ,REST Interface என்றால் அந்த மூன்றாம் நபர் அப்பிளிகேஷன்கள் பேஸ்புக் உடன் இடைநிலை தொடர்பை ஏற்ப்படுத்த HTTP GET அல்லது POST முறையை பயன்படுத்துகின்றன .

HTTP என்பது இணையத்தினூடு world wide web (www ) ஆல் பயன்படுத்தப்படும் தொடர்புவரைமுறை(Protocol ) கொண்ட தொடர்பாடல் . GET முறை இணைய பக்கத்தில் இருந்து தகவல்களை எடுக்கவும் POST முறை தகவல்களை சேர்க்கவும் பயன்படுகிறது .

அதாவது பேஸ்புக் அப்பிளிகேஷன்களால் உங்கள் ப்ரோபாயில்களில் இருந்து தகவல்களை எடுக்கவும் இடவும் முடியும் .

3 ஆம் நபர் அப்பிளிகேசன்களை செய்பவர்கள் FQL (Facebook Query language ) ஐ பயன்படுத்துகின்றனர் .SQL இட்க்கு ஒப்பானது தான் . இவை programming Languages .டேடாபேசில் இருந்து தகவல்களை பெறுவதற்காக வடிவமைக்கப்பட்டவை . இதனால் அப்பிளிகேஷன்களை உருவாக்குபவர் அந்த அப்பிளிகேஷன்களை பாவிப்பவரிடம் இருந்து அனைத்து தகவல்களையும் பெற முடியும் .

அவ்வளவு தான் விடயம்..ஆனால் பேஸ்புக்கில் அப்பிளிகேசன் பாவிப்பதே வேலையாக வைத்திருப்பவர்களுக்கு தான் வேறு வழி இல்லை .

பயனுள்ளதாக இருந்தால் நண்பர்களுடன் பகிருங்கள்...

இது உங்களுக்கும் நிகழ்ந்திருக்கும் !-விஞ்ஞான விளக்கம்

2011-03-01T13:26:00.005+05:30

முதல் பதிவு -பேய்கள் விஞ்ஞான விளக்கம் -தொடர்ச்சி

இந்த நிகழ்வு உங்கள் அனைவருக்கும் நிகழ்ந்திருக்கும். ஆனால் சிலர் பேயின் தாக்குதல் என்றும் சிலர் அதை பற்றி வெளியில் கேட்க்கமுடியாமலும் அலட்ச்சியமாகவும் இருந்திருப்பீர்கள் .

நீங்க விழித்திருப்பது போன்ற உணர்வும் ஆனால் எழும்ப இயலாத படி உறைந்தது போன்ற உணர்வும் ஏற்ப்பட்டிருக்கும் .கத்துவதற்கு முயல்வோம் ஆனால் கத்த முடியாது .

யாராவது வருவது போன்ற உணர்வு ,பேய் போன்ற ஒரு உருவம் தெரியும் அல்லது யாரோ நெஞ்சின் மீது அமர்த்திருப்பதோ அமத்துவது போன்ற உணர்வு ஏற்ப்படும் .

ஆனால் வரலாற்றில் இதை பேயின் தாக்குதல் என்றே அழைத்து வந்தனர் .ஆனால் இந்த அதிர்ச்சியான நிகழ்வை விளக்க விஞ்ஞானம் தயார் .

சில செக்கன்கள் அல்லது நிமிடங்கள் உடல் முழுதும் உறைந்த நிலையில் சிறிதளவு சுவாசமும் ,வேகமான கண் அசைவும் இருக்கும் .

மேலே குறிப்பிட்ட இந்த பாதிப்புகள் அவர்களை பேயின் மீது நம்பிக்கை கொள்ள வைக்கிறது . நரம்புகளில் இருந்து மூளைக்கு செய்திகள் தவறாக அனுப்பபடுவதால் இந்த sleep paralysis ஏற்ப்படுகிறது.

சுருக்கமாக இந்த நிகழ்வை விவரிக்கிறேன் . ஒருவர் உறங்கும் போது ,அவரது மூளை தசை சுருக்கங்களை அடக்க தகவல்களை அனுப்பும் .

ஆனால் இதே தசைகளை செயல்ப்படுத்த மூளை தகவலை அனுப்ப முதல் ஒருவர் சுய நினைவுக்கு வந்தாராயின் அப்போதே இந்த உறைந்திருப்பது போன்ற உணர்வு ஏற்ப்படுகிறது. அவரால் உடலை அசைக்க முடியாமல் இருக்கும் .

ஒருவர் முழித்திருக்கும் போது எப்படி உடல் உறைநிலை அடைகின்றது என்பதை விபரமாக அறிய வேண்டுமானால் முதலில் உறக்கம் பற்றி ,அதன் நிலைகள் பற்றி தெளிவு இருக்க வேண்டும் .

இந்த பாலூட்டிகள் உறங்கும் போது மூளை இரண்டு நிலைகளை அடைகிறது .ஒன்று Non REM உறக்க நிலையும் அடுத்தது REM உறக்க நிலை .இந்த NREM மற்றும் ரேம் உறக்க நிலைகள் ஒரு வட்டம் போல மாறி மாறி ஏற்ப்படுகின்றன .

5 ஆவது உறக்க நிலை -ரேம்(Rapid eye movement ) நிலை

இரவு நேர உறக்கத்தில் மனிதன் 80 நிமிடங்கள் NREM உறக்க நிலையிலும் 10 நிமிடம் REM உறக்க நிலையிலும் இருக்கிறான் . மொத்தமாக இந்த 90 நிமிட நிகழ்வு மீண்டும் மீண்டும் 3 தொடக்கம் 6 தடவைகள் நிகழ்கிறது .

இந்த NREM உறக்க நிலையில் உடல் சிறு அசைவுகளையே ஏற்ப்படுத்துகிறது .இதன் போது தான் தூக்கத்தில் நடத்தல் உளறல் போன்ற நிகழ்வுகள் ஏற்ப்படுகின்றன .

இந்த REM உறக்கத்தின் போது தான் இதயத்துடிப்பு ,சுவாச வீதம் ,இரத்த அழுத்தம் போன்றன வேறுபடுகின்றன .கண்களின் துடிப்பு அதிகமாக இருக்கும் காரணம் இதன் போது தான் கூடுதலான கனவுகள் ஏற்ப்படுகிறது .உறங்குபவர் இதன் போது தான் அசையும் கனவில் இருப்பார் .

தொடரும் ....

நடுநிசி நாய்கள் - வீராவின் பக்கங்கள்

2011-02-24T09:40:00.020+05:30

முதலில் பாலியல் தெளிவூட்டும் இப்படி மன பக்குவம் அடைந்தவர்களுக்கான(18 +) படங்கள் எடுப்பதற்கு தைரியம் வேண்டும்.அதுவும் முக்கியமாக எமது சமுதாயம் இன்னும் பகுத்தறிவு ,மனப்பக்குவம் அடையாத நிலையில் .ஆனாலும் கவுதம் தெளிவாக சொல்லியிருக்கிறார் பக்குவநிலையை அடைந்தவர்களுக்கான படம் என்று .

பலரின் தவறான புரிதலுக்கு உள்ளான ஆரம்ப கதையின் சுருக்கம் .

சிறுவயதிலிருந்தே பாலியல் துன்புறுத்தலுக்கு உள்ளாக்கப்படும் வீராவிடம் சில வருடங்கள் கழித்து இளம் பராயத்தில் ஏற்ப்படும் மனோநிலை மாற்றமே பல பிரச்சனைகளுக்கு வழிகோலுவதுடன் வாழ்க்கையையும் புரட்டிப்போடுகிறது .

சிறுவயதில் தாயை இழந்து ,தனது தந்தையால் பாலியல் வன்புணர்ச்சிக்கு,துஷ்பிரயோகத்திற்கு உட்படுத்தப்படும் சமீரிட்க்கு(வீராவுக்கு அல்ல ) அவனது பதின்ம வயதில் (Teenage (13 )) அவன் மீது அக்கறை செலுத்தும் பக்கத்து வீட்டு பெண் மீனாட்சி என்பவருடன் பார்த்தவுடனேயே காதல் ஏற்ப்படுகிறது .

இந்த கொடுமைகளை தெரிந்துகொண்ட மீனாட்சி சமீரை காப்பாற்றி தன்னுடன் வைத்துக்கொள்கிறார் .சமீரின் பெயரை வீரா எனவும் மாற்றி அவனை வளர்ந்தார் .வீராவும் மீனாட்சி அம்மா என்று அழைக்க வீரா மீனாட்சி அம்மா உறவில் எந்த களங்கமும் இருக்கவில்லை .வீராவின் நடத்தைகளும் அமைதியாகவே இருந்தது .

இளம்பருவத்தை அடைந்தபோது தனது சிறுவயதில் சமீராக இருந்த போது ஏற்ப்பட்ட பாலியல் கொடுமைகள் அவனை மீண்டும் சமீராக மாற்றுவதோடு மன அழுத்தம் ,பயம் ,எரிச்சலையும் உண்டாக்குகிறது .சிறுவயதிலேயே பாலியல் நடத்தையின் பால் தூண்டப்பட்ட சமீர் தன்னுடன் இருக்கும் தான் காதலித்த பெண்ணாக மட்டுமே தெரியும் மீனாட்ச்சியுடன் கட்டாய உறவு வைத்துக்கொள்கிறான்.

தனக்கு என்ன நடந்தது என்றே தெரியவில்லை ,இனி அப்படி நடக்காது என கூறும் வீரவை புரிந்துகொள்ளாமல் ,ஒரு நல்ல மனநோய் மருத்துவரிடம் காட்டாமல் விட்டத்தில் இருந்து இல்லாத ஒருவரை இருப்பது போல கற்ப்பனை செய்தல்(Hallucinations ) போன்ற பிரச்சனைகள் ஆரம்பிக்கிறது .மிகுதியை படத்தை பார்த்து தெரிந்துகொள்ளுங்கள் .

வீரா என்ற ஒரு மனிதனுக்குள் பல மன போராட்டங்கள் நடக்கிறது .சமீரிடம் இருந்து சில பெண்களை காப்பாற்றி வைத்திருக்கிறேன் என சமீரா ரெட்டியிடமும் ,போலீசிடம் "நாயை கொன்னுட்டியே நீ எல்லாம் ஒரு மனுசனா" என்று சொல்லுமிடங்கள் வீராவின் குணத்தை தனித்து காட்டுகிறது .

முக்கியமாக படத்தின் ஒலிப்பதிவு ,ஒளிப்பதிவு அருமை.மனோஜ் பரமஹம்சா வின் ஓளிப்பதிவு சொல்லவா வேண்டும் . எந்தவித பின்னணி இசையும் இல்லாமல் இயற்க்கை சப்தங்களை வைத்து சிறப்பான ஒலிப்பதிவு .அதுவும் இறுதியில் மழை காட்ச்சிகள் அருமை .

எந்தவித பெரிய நடிகர்களும் இல்லாமல் திரைக்கதையின் மீது மட்டும் நம்பிக்கை வைத்து இயக்குனர் படமாக வெளிவந்திருக்கும் நடுசி நாய்கள் கவுதம் மேனனின் முன்னைய மென்மையான படைப்புகளில் இருந்து மிகவும் வேறுபட்டிருக்கிறது ..வாழ்த்துக்கள் கவுதம் மேனன் .

மனப்பக்குவம் அடைந்தவர்கள் பார்க்கவேண்டிய படம் . இப்படி நமது கண்ணுக்கு தெரியாத பல நடக்கிறது என்பதை காட்டியுள்ள படம் . சிலது அல்ல பல . இந்தியாவில் 53 % மான சிறுவர்கள் பாலியல் துன்புறுத்தல்களுக்கு உட்ப்பத்தப்படுகின்றனர் என அறிக்கைகள் கூறுகின்றன .முக்கியமாக நம்பிக்கைக்குரிய குடும்பத்தை சேர்ந்தவர்கள் தான் கூடுதல் .ஆனால் பலர் முன்வந்து போலீசிடம் தெரிவிப்பதில்லை .

குறை -சில பாலியல் காட்ச்சிகள் குறைத்திருக்கலாம் .ஆனால் எந்த காட்ச்சியிலும் முகத்துக்கு கீழே கமெரா போகவில்லை .பாராட்டுக்கள் கவுதம் .
ஆனால் இதே படம் ஆங்கிலத்தில் வந்திருந்தால் மனம் ஏற்றுக்கொண்டிருக்கும் .!!!

கலாச்சாரம் கட்டுப்பாடு வக்கிரம் என்று கட்டுப்பாடு விதிக்கும் இடம் எயிட்ஸில் முதல் ஐந்துக்குள் உள்ளது .
இப்படி சொல்லி சொல்லியே தெளிவு அற்றவர்கள் ஆக்குவது இல்லாமல் செய்யப்பட வேண்டும் .

யதார்த்த சினிமா என்ற வகையில் சேர்க்க கூடிய படம் இது . படம் குப்பையில்லை .சமூகம் குப்பை என்பது மறுக்கமுடியாத உண்மை .அதை அப்படியே பிரதிபலித்திருக்கிறது இந்தப்படம் .

இந்தப்படத்தை உங்கள் பக்கம் இருந்து பார்க்கவேண்டாம் .மனநோய் பாதிக்கப்பட்ட வீராவின் பக்கம் இருந்து பாருங்கள் .அவனுக்கு பந்த பாசமோ அம்மா அப்பா உறவோ ஒன்றுமே தெரியாது .

தயவு செய்து யாரும் உங்கள் மனதில் வைத்திருக்கும் வக்கிரங்களை கக்காதீர்கள். விமர்சனங்கள் வாசிக்க முதல் படம் பார்த்திருந்தால் இந்த தாய் மகன் உறவு என்ற சிந்தனை அடிப்படை அறிவு உள்ளவர்களுக்கு வந்திருக்காது ..காரணம் அப்படியொன்ற இல்லை . படம் தெளிவாக விளங்கவில்லை என்றால் தெளிவாக்கி கொள்ளுங்கள் .

சில விமர்சனங்கள் ஏன் படைப்பை விமர்சிக்காமல் !! இயக்குனரை விமர்சிக்கின்றன ??. இதை தூக்கி பிடித்து எதிர்த்து தவறானது தான் என காட்ட முனைவது நீங்கள் . .

நடுநிசி நாய்கள் படத்தில் தெளிவில்லை .இப்படியோன்றும் நடப்பதில்லை என்றால் இந்த லிங்க்கை வாசிக்கவும் . இந்தப்படமே உங்களை பாதிக்கிறது என்றால் இந்த சிறுவர் துஷ்பிரயோகம் இவ்வளவு தூரம் அனைவரையும் பாதிக்கும் என்பதை தான் படம் கூறுகிறது .

குடும்பத்தவர்கள் நிச்சயம் பார்க்க வேண்டியது . ஆனால் குடும்பமாக சென்று பார்க்காமல் தனியே சென்று பாருங்கள் .

படம் முடிந்த பின்பு இறுதியாக படத்தில் மருத்துவர் கூறுவதை கேளுங்கள் .பாதி பேர் முதலே எழுந்து வந்துவிட்டார்கள் .