වාණිජ LK

ලොව ප්‍රකට වෙළඳ සන්නාමවල නම් හැදුන හැටි

noreply@blogger.com (Vanija LK) — Thu, 18 Sep 2014 12:00:00 +0000

මෙම ලිපිය වෙන්වන්නේ ලොව ප්‍රකට වෙළඳ සන්නාම (Brands) කිහිපයක නම් සෑදුනු ආකාරය පිළිබඳවයි. මෙවැනි නම් බොහෝ විටක එම සන්නම් නාමය අයත් ව්‍යාපාරයේ පුරෝගාමීවරයාගෙ නම හෝ එම නාමය යෙදෙන නිෂ්පාදිතයේ විශේෂතාවක් මත පදනම්ව බිහිවී ඇත.

Adobe - මෙම සමාගමේ සම පුරෝගමියෙකු වූ John Warnock තමා ජිවත් වූ Los Altos ප්‍රදේශයෙහි පිහිටි ඇඩෝබි නමින් වූ කුඩා ගඟේ නාමය තම ව්‍යාපාරයේ නාමයට යොදා ගන්න ලදී.

Amazon - Jeff Bezos විසින් ආරම්භ කරන ලද තම ව්‍යාපාරයට මුල් කාලයේදී Cadabra යන නාමය යොදාගත් නුමුදු පසුව ඉංග්‍රීසි හෝඩියේ අකාරාදී පිළිවෙලට පෙළගැස්වූ විට 'A' අකුරට ලැබෙන වාසිය හා විශාලත්වයෙන් පළමු ස්ථානයේ වැජබෙන ඇමසන් ගඟ හේතුකොටගෙන Amazon යන නාමය යොදාගැනීමට තීරණය කරන ලදී.

Coca Cola - මුල් කාලයේ Coca Cola නිෂ්පාදනයට Coca ශාකයේ පත්‍ර යොදාගැනීමත් සහ Kola ශාකයේ ඇට යොදාගැනීමත් නිසා මේ නාමය බිහිවී ඇත.

Google - 10¹⁰⁰යන අගයේ ගණිතමය නාමය වන 'Googol' යන වචනයෙන් බිඳී ආවකි. මෙමගින් ගුගල් සෙවුම් යන්ත්‍රය මගින් විශාල තොරතුරු ප්‍රමාණයක් සෙවුම් කළහැකි බව අදහස් කෙරේ.

Intel - Integrated Electronics යන්න කෙටි කර බිහිවුවකි.

IKEA - ලොව ප්‍රචලිත ගෘහ භාණ්ඩ නිෂ්පාදන ව්‍යාපාරයක් වන මෙහි I සහ K අකුරු ද්විත්වය එහි නිර්මාතෘවරගේ නම වන Ingvar Kamprad නමෙහි කොටස් දෙකේ මුල් අකුරු අසුරින් වන අතර E අකුර ඔහු හැදු වැඩුණු ගොවිපලේ නමේ ( Elmtaryd) මුල් අකුරයි. K අකුර ඔහුගේ මුල්ගම වන Agunnaryd නියෝජනය කරයි.

KODAK- නිර්මාතෘවන George Eastman ගේ ප්‍රියතම අකුර 'K' වන අතර ඔහු එම අකුර යොදාගෙන
නාමයන් නිර්මාණය කර අවසානයේ තෝරාගත් නාමයයි.

NIKE යනු විජයග්‍රහණ සංකේත කරන ග්‍රීක දේවතාවියගේ නාමයයි.

Pepsi - පෙප්සින් යන ආහාර දිරවීමට යොදාගන්න එන්සයිමයක් ආශ්‍රයෙන් සැදුනු නමකි. නිෂ්පාදිතයේ මුල් කාලයේ පෙප්සි ආහාර දිරවීමට යොදාගත හැකි බිමක් වශයෙන් වෙළඳපලට ඉදිරිපත් කිරීම ඊට හේතුවයි.

Samsung - කොරියානු භාෂාවෙන් 'සැම්' යනු 3 වන අතර 'සුන්' යනු තරුව වේ. එමගින් බලවත් යන්නත් සදාකාලික යන්නත් අදහස් කරන බව පැවසේ.

Toyota - මෙම සමාගමේ නිර්මාතෘ වරයාගේ නම Toyoda යන්න මුල් කාලයේ භාවිතා කරත්, ශබ්ද කිරිමේ පහසුව සහ , එම වචනය ජපන් කතකන අකුරු යොදාගෙන පින්සල් පහර 8 කින් ලිවිය හැකි වීම වාසනාව ගෙන දෙන්නක් බව ඇති විශ්වාසය නිසා Toyota යන්න භාවිතාවට ගෙන ඇත.

Vodafone - Voice, Data, Telephone යන වචන කිහිපය ආශ්‍රයෙන් සෑදුනකි.

Volkswagen - ජර්මානු භාෂාවෙන් මෙහි තේරුම ජනතාවගේ මෝටර් රථය යන්නයි.

*Ferrari, Ford, Porsche,Chrysler,Chevrolet,Lamborghini ආදී නම් ඒවාගේ මුලාරම්භාකයින්ගේ නම් වේ.

අපේ රටේ වෙළඳ සන්නාම කිහිපයක තොරතුරු.

ODEL - ඔඩෙල් හි නිර්මාතෘවරිය වන Otara Del Gunewardene ගේ නම ඇසුරින් බිහිවුවකි. MODEL යන වචනයටත් සමීප බවක් ඇති නිසා එම නම යොදාගෙන ඇතැයි සිතිය හැකිය.

Aitken Spence - 19 වන සියවසේ ලංකාවේ ජිවත් වූ බ්‍රිතාන්‍ය ජාතිකයින් දෙදෙනෙකු වූ Patrick Spence හා Edward Aitken යන අය සහ ඔවුන්ගේ පවුලේ උදවිය මෙම ව්‍යාපාරයේ මුල් පුරෝගාමීන් වූ අතර ඔවුන් මෙම Aitken Spence නම තම ව්‍යාපාරයට යොදාගෙන ඇත.

John keells, Cargills, Hayleys යන සමාගම් ද 19 වන සියවසේ දී ආරම්භ වූ ව්‍යාපාර වන අතර ඔවුන් තම සන්නාම නාමයන් සඳහා තම මුල් පුරෝගාමීන්ගේ නම් අදටත් මෙලෙස භාවිත කරයි.

Dilmah - මේරිල් ප්‍රනාන්දු විසින් තමා ආරම්භ කරන ලද ව්‍යාපාරයට තම පුතුණුවන් දෙදෙනාගේ නම් වන Dilhan සහ Malik යන නම් භාවිතයෙන් සැදුනු නාමය මෙලෙස යොදාගෙන ඇත.

අන්තර්ජාලය ඇසුරිනි...

විගණන ක්ෂේත්‍රයේ දැවැන්තයින් සිව්දෙනා (Big 4 Audit Firms)

noreply@blogger.com (Vanija LK) — Sat, 13 Sep 2014 04:38:00 +0000

විගණන ක්ෂේත්‍රයේ දැවැන්තයෝ සිව්දෙනා යනු වර්තමාන ලෝකයේ විගණනය ඇතුළු ව්‍යාපාර වෘත්තීය සේවා සපයනු ලබන ලොව ප්‍රමුඛ පෙළ ආයතනජාල 4 යි. මෙම ආයතන 2013 වර්ෂයේ ලැබූ ආදායම පහත පරිදිය.

Deloitte Touche Tohmatsu - $32.4bn
PriceWaterhouseCoopers - $32.1bn
Ernst & Young - $25.8 bn
KPMG - $23.4 bn

මෙම ආයතනජාලයන් සතර ලොවපුරා විසිරි සිටින තම සාමාජික ආයතන (Member Firms) මගින් බාහිර/අභ්‍යන්තර විගණන කටයුතු, බදු හා ව්‍යාපාර උපදේශන සේවා, ව්‍යාපාර කටයුතු බාහිරකරණ සේවා (Business Process Outsourcing), ව්‍යාපාර අවදානම් කළමනාකරණය ආදී සේවා රැසක් සිදු කරයි.

නමුත් බොහෝදුරට මොවුන්ගේ ප්‍රධාන ව්‍යාපාර කටයුත්ත වන්නේ බාහිර විගණනය (External/Financial Audit) සිදුකිරිමයි.බාහිර විගණනය හෙවත් මුල්‍ය වාර්තා විගණනය මගින් අරමුණු කරන්නේ ව්‍යාපාරයක් විසින් මුල්‍ය වර්ෂයක් අවසානයේ පිලියල කරඇති මුල්‍ය වාර්තා ගිණුම්කරණ ප්‍රමිත හා ව්‍යාපාරයට ආදලවන නිතිරිතින්ට අනුව පිලියල කිරීමක් කර ඇත්දැයි සහ එම වාර්තා මගින් සාධාරණ හා සත්‍ය ඉදිරිපත් කිරීමක් සිදුකර ඇත්දැයි සහ යන්න පිළිබඳව ස්වාධින මතයක් ලබාදීමයි.

ලෝකයේ බොහෝරටවල පවතින නිතියන්ට අනුව විගණන සේවා සපයන ආයතන ස්වාධින හා දේශීය හිමිකාරත්වයක් සහිත ආයතන විය යුතුය. එම නිසා මෙම අන්තර්ජාතික ආයතන ජාලවලට සෘජුව කිසියම් රටක තම විගණන සේවා සැපයිය නොහැකිය.
උදාහරණයක් ලෙස ශ්‍රී ලංකාවේ ඔවුන්ගේ මෙහෙයුම් කටයුතු සිදුකරන්නේ කරන්නේ ඔවුන්ගේ සන්නාම නාමය, ව්‍යාපාර මොඩලයට හා ප්‍රමිතීන් වලට අනුව කටුයුතු කරන හවුල් ව්‍යාපාර වශයෙන් ලියාපදිංචි වූ ආයතන විසිනි. ඒවායේ හවුල්කරුවන් (Partners) ලෙස කටයුතු කරනුයේ දේශීය වරලත් ගණකාධිකාරී ආයතනයේ පරියචන සහතිකය ලැබූ සාමාජිකයින්ය.

*Deloitte හැරෙන්නට අනෙකුත් ආයතනජාල 3 (KPMG, PwC, E&Y) සඳහාම ශ්‍රී ලංකාවේ තම සන්නාම නාමයෙන් ව්‍යාපාර කටයුතු කරන තම සාමාජික ආයතන (Member Firms) ඇත. නමුත් Deloitte හි මෙරට කටයුතු සිදුකරනුයේ SJMS Associates ආයතනයයි (SJMS Operates As an Independent Correspondent Firm Of Deloitte).

මෙම ලිපියේ මීළඟ කොටස වෙන්වන්නේ මෙම ආයතනජාල 4 පිළිබඳව සංක්ෂිප්ත හැඳින්වීම සඳහායි.

1. Deloitte Touche Tohmatsu

ආරම්භය - 1948දී Touche ආයතනය ඇමරිකාවේ ආරම්භ වේ. එය ජපානයේ Tohmatsu Aoki & Co සමග 1968 දී එකාබද්ධවේ. ඉන්පසුව ඔවුන් එංගලන්තයේ 1845 ආරම්භවූ Deloitte සමග 1989 වර්ෂයේදී ඒකාබද්ධ වේ.
මුලස්ථානය - නිව්යෝක් නගරය
සේවය කරන වෘත්තිකයින් සංඛයාව - 200,000

2. PriceWaterhouseCoopers

ආරම්භය - 1854 දී පමණ Cooper ආයතනය ආරම්භවන අතර පසුව විවිධ ආයතන සමග එකාබද්ධවේ.
අවසාන වශයෙන් Pricewaterhouse සමග 1998 දී ඒකාබද්ධවී ඇත.
මුලස්ථානය - ලන්ඩන් නුවර සහ නිව්යෝක් නුවර
සේවය කරන වෘත්තිකයින් සංඛයාව - 184,000

3.Ernst and Young

ආරම්භය - මුලාරම්භය 1849 දක්වා දිවයයි. 1989 Ernst & Whinney සමග Arthur Young ඒකාබද්ද වේ.
මුලස්ථානය - ලන්ඩන් නුවර
සේවය කරන වෘත්තිකයින් සංඛයාව - 175,000

4.KPMG

ආරම්භය - මුලාරම්භය 1870 දක්වා දිවයයි.විවිධ ව්‍යාපාර බද්ධ වීමෙන් පසුව 1987 දී සිදුවන Peat Marwick International සහ Klynveld Main Goerdeler අතර ඒකාබද්ද වීමෙන් KPMG යන නාමය ඇතිවේ.
මුලස්ථානය - නෙදර්ලන්තය
සේවය කරන වෘත්තිකයින් සංඛයාව - 155,000

අමතර තොරතුරු

මෙහි එක් ආයතන ජාලයක් ගතහොත් අවම වශයෙන් රටවල් 140 ක පමණ ක්‍රියාත්මක වේ. කෙසේනුමුදු 1970 දී පමණ මෙවැනි දැවැන්ත වෘත්තිය සේවා සපයන ආයතන ජාල 8 ක් පමණ ලෝකයේ තිබී ඇති නමුත් ඔවුනොවුන් අතර ඇතිවූ ව්‍යාපාර බද්ධවීම් (Mergers) නිසා එය 5 දක්වා අඩුවී ඇත.

2002 දී Enron යන ඇමරිකානු බලශක්ති හා සම්බන්ධ සමාගම වංචනික ලෙස ගිණුම්කරණ හිඩැස්තුලින් රිංගාගොස් ඉදිරිපත් කල මුල්‍ය ප්‍රකාශ කිරීම හා ඒවායේ වචන්කික භාවය ඔප්පුවිමත් සමග එකල එහි විගණන කටයුතු සිදුකල දැවැන්ත විගණන ආයතනයක් වූ Arthur Andersen බිඳවැටිණි. කෙසේ හෝ දැන් ඇත්තේ දැවැන්තයන් 4 දෙනෙකු විසින් පාලනය කරන කතිපයධිකාරි වෙළෙඳපලකි.

* වර්තමානයේ BDO International (55,000 employees) සහ Grant Thornton 5 සහ 6 ස්ථාන පිලිවෙලින් හිමිකරගෙන සිටි.
* දැනට ශ්‍රී ලංකාවේ Audit Trainee (External)කෙනෙකුගේ මාසික වේතනය ආරම්භයේ දී බොහෝවිට රු.4,500 ක් වන අතර එය කනගාටුවට කරුණකි.

Picture Credit - Econmia, Google and Wikipedia

ඇමරිකාවේ ධනවත්ම පවුල

noreply@blogger.com (Vanija LK) — Tue, 02 Sep 2014 07:01:00 +0000

මේ වසරේ ජුලි මාසයේ Forbes සඟරාව "America's Richest Families" යන තේමාව යටතේ පලකල ලිපියක් මගින් ඇමෙරිකා එකසත් ජනපදයේ ධනවත්ම පවුල ලෙස ශුද්ධ වත්කම් ඇ.ඩො. බිලියන 151.9කට හිමිකම් කියන Walton පවුල නම් කරන ලදී. (මෙහිදී පවුල යනුවෙන් අදහස් කරනුයේ සම්ප්‍රදායික න්‍යෂ්ටික පවුල නොවන බව සලකන්න : බොහෝ දුරට ගතවුන ශතවර්ෂයේ ජිවත් වූ පොදු මුත්තාගෙන් හෝ පියාගෙන් පසු පැමිණෙන පරම්පරාව මෙහි පවුල ලෙස හැදින්වේ.).

කෙසේ නුමුදු ඔබට Walton යන නම එතරම් හුරුපුරුදු නැතිබවට සැකයක් නැත. නමුත් Walmart යන නමනම් ඔබට හුරුපුරුදු ඇති. ඔව්! අද මේ ලිපිය වෙන්වන්නේ ඇමෙරිකාවේ සුප්‍රසිද්ද Walmart සුපිරිවෙළඳසැල් ජාලයේ පුරෝගාමියා වූ සෑම් සහ ඔහුගේ සොහොයුරු බඩ්ගේ දරුවන් ගැනයි. (සමහර මුලාශ්‍ර බඩ් හෙවත් ජේම්ස්ද පුරෝගාමියෙක් ලෙස නම් කලත් සමහරු ඔහු පසුව වොල්මර්ට් හා එක්වුන බව පවසයි).

ඔවුන්ගේ පවුල් ව්‍යුහය හා ඔවුන්ගේ වර්තමාන ශුද්ධ වත්කම් ප්‍රමාණය මෙසේය.

සෑම්ගේ දරුවන්

සෑම් වෝල්ටන් සහ ඔහුගේ බිරිය තම දරුවන්
සිව් දෙනා සමග

ජිම් $ බිලියන 35.3
ඇලිස් $ බිලියන 34.9
සැමුවෙල් $ බිලියන 34.9
ජෝන්

ක්‍රිස්ටි (ජෝන්ගේ වැන්දඹුව) $ බිලියන 37.7

බඩ්ගේ දරුවන්

ඈන් $ බිලියන 4.9
නැන්සි $ බිලියන 4.2

1949 තම ව්‍යාපාර කටයුතු ආරම්භ කරන සෑම් 1962 දී පළමු Walmart වෙළඳසැල ඇමරිකාවේ ආකන්සා(ස්) ප්‍රදේශයේදී ආරම්භ කරයි. ඉක්බිතිව සෑම් විසින් 1969 වර්ෂයේදී තම සුපිරි වෙළෙඳසැල් ව්‍යාපාරය Wal-Mart stores Inc. යනුවෙන් සමාගමක් ලෙස සංස්ථාපිත කරයි. දැනට රටවල් 26 ක තම මෙහෙයුම් කටයුතු කරන Walmart සමාගම මිලියන 2 ක ට ආසන්න රැකියා ප්‍රමාණයක් උත්පාදනය කර ඇත.
සෑම් 1992 දීද, ජේම්ස් 1995 දීද මෙලොවින් සමුගන්නා අතර අද වනවිට මෙම සමාගමහි කොටස්වලින් 50.9% ක අයිතිය ඇත්තේ ඔවුන් දෙදෙනාගේ දරුවන් සතුවයි.

Walmart වෙළඳසැලක් ඉදිරිපස සහ ඇතුලත

ක්‍රිස්ටි වෝල්ටන්

ක්‍රිස්ටි වොල්ටෝන් හෙවත් ජෝන්ගේ වැන්දඹුව අදවනවිට ලොව සිටින ධනවත්ම කාන්තාව ලෙසද නම්දරා සිටි. ඊට අමතවර සෑම්ගේ දරුවන් 3 දෙනා සහ ක්‍රිස්ටි අදවනවිට ඇමරිකාවේ ධනවත්ම පුද්ගලයින් දසදෙනා අතරටද එක්වී තිබේ. රජයේ බදු සිදුරු තුලින් සුක්ෂම ලෙස තම ධනය ආරක්ෂා කිරීම වැනි චෝදනා මෙම පවුලට එල්ලවී ඇති නුමුදු, මොවුන්ට පසු ඇමරිකාවේ ධනවත්ම පවුල ලෙස සිටින කොච් සොහොයුරන්ට වොල්ටන් පවුල් පසුකර යාමටනම් ඇ.ඩොලර් බිලියන 92 ක පමණ වත්කම් ප්‍රමාණයක් අවශ්‍යවේ.

ප.ලි. Walmart හි ක්‍රියාකාරකම් හේතුවෙන් එහි සේවකයින්,කුඩා ව්‍යාපාර ආදී විවිධ පාර්ශවයන්ට පැන නැගී ඇති ගැටළු පාදකකොටගෙන නිපදවූ වාර්තාමය චිත්‍රපටය මෙම YouTube සබැඳියෙන් නරඹන්න.

Audi සහ BMW අතර වෙළඳ දැන්වීම් සටනක්

noreply@blogger.com (Vanija LK) — Tue, 19 Aug 2014 08:23:00 +0000

ලොව ප්‍රචලිත සුඛෝපබෝගී මෝටර් රථ නිෂ්පාදකයින්වන BMW සහ Audi අතර පවතින්නේ දැඩි තරඟයකි. වර්ෂ 2006 දී පමණ මොවුන් තම තරඟය සඳහා නිර්මානාත්මක වෙළෙඳ දැන්වීම කලාව උපයෝගීකරගත් ආකාරය පිලිබඳව තමයි අද මෙම බ්ලොග් අඩවියේ පළමු ලිපිය වෙන්වන්නේ.

>> 2006 වසරේදී පැවති නිව්යෝර්ක් අන්තර්ජාතික මෝටර්රථ ප්‍රදර්ශනයේ දී BMW සමාගම විසින් "World Car Of The Year" සම්මානය ලබා ගැනීමත් සමග මෙම වෙළෙඳ දැන්වීම් සටන ආරම්භවිය.

මෙය BMW තමා ලැබූ ජයග්‍රහණය යොදාගනිමින් තම ප්‍රතිවාදී Audi සමාගම ලැබූ " South African Car Of The Year" ජයග්‍රහණය සුළුකොට තැකීමක් බඳුය.

>> නමුත් ඉන්පසුව BMW සමාගම නොසිතු අන්දමට Audi සමාගම විසින් නිර්මනාත්මකව ප්‍රතිප්‍රහාරයක් එල්ලකරනු ලබයි

Audi සමාගම 2000-2006 වසර දක්වා ප්‍රංශයේ Le Mans හි පැවති ලොවප්‍රකට පැය 24ක ධාවන කාලයක් සහිත තරඟාවලිය ජයග්‍රහණය නොකඩවා ජයග්‍රහණය කිරීම තම වෙළඳ දැන්වීමේ අන්තර්ගතයට යොදාගන්නා ලදී. මෙම තරඟය ජයග්‍රහණය කරනු ලබන්නේ පැය 24 ක් තුල වැඩිම වටප්‍රමාණයක් නිමාකල මෝටර් රථයයි. (A competition aimed to measure the Endurance and speed of the Car as well as the Driver).

>> ඉහත දැන්වීමෙන් අනතුරුව BMW සහ Audi අතර ඇතිව තිබු ද්වන්ධ සටන අවස්ථාවක් කරගනිමින් තවත් පාර්ශවයක් එක්විය. ඒ ජාපනයේ තම මුලස්ථානය පිහිටි Subaru සමාගමයි.

මෙම වෙළෙඳ දැන්වීමට පාදක වුයේ 2006 වසරේ ජර්මනියේ පැවති "International Engine Of The Year" තරඟාවලියේ 2.0-to-2.5 ලීටර් කාණ්ඩයේ හොඳම එන්ජිම සඳහා සම්මානය Subaru විසින් දිනාගැනීමයි. (characteristics such as fuel economy, noise, smoothness, performance and drive-ability were taken into account when selecting the best engine). මෙම වෙළඳ දැන්වීම තුලින් BMW සහ Audi සමාගම් මොටෝර් රථයක එන්ජිමේ ක්‍රියාවලියට Subaru තරම් මුලික තැනක් නොදෙන බවත් ඒ තුලින් ඔවුන්ගේ ද්වන්ධ සටන රුප සුන්දරී තරඟයකට Subaru විසින් උපමාකරන ලදී.

>> Bentley සමාගමෙන් මෙම වෙළෙඳ දැන්වීම් සටන අවසන් කරනුයේ එම සමාගමේ සභාපතිතුමා විසින් හාස්‍යදනවන ලීලාවෙන් පෙනීසිටින දැන්වීමක් පළකිරීම මගිනි.

* තම ප්‍රතිවාදී තරඟකරුගේ නාමය යොදාගනිමින් වෙළඳ ප්‍රචාරණය comparative advertising ලෙසද හැදින්විය හැකිය. සමහර රටවල යම්කිසි නිතිරිතින්ට යටත්ව මෙම ක්‍රමය යොදාගෙන පාරිභෝගිකයාව දැනුවත් කලහැකිය.
* තවසමහරෙක් මෙම වෙළෙඳ දැන්වීම් හුදෙක් මෝටර් රථ රසිකයින්ගේ නිර්මාණ බවත් (විශේෂයෙන් Subaru සහ Bentley දැන්වීම්), තවත් සමහරෙක් මේවා නිල නොවන ලෙස ඉහත සමාගම් විසින් පලකරන ලද ඒවා බවත් පවසයි. කෙසේ නුමුදු මෙම ප්‍රචාරණ දැන්වීම් වල ඇති නිර්මනාත්මකබව නිසාම තවමත් මෝටර්රථ රසිකයින් මෙන්ම වෙළඳප්‍රවර්ධන කටයුතු කරන්නන් අතර කතාබහට ලක්වන බවනම් නොඅනුමානය.