demain je brule

العنوان الجديد للمدوّنة

noreply@blogger.com (Clandestino) — Fri, 23 Oct 2009 18:34:00 +0000

بعد الهدية اللي جاتني من عند "عمار" بمناسبة العرس الانتخابي ، (مقصّ عربي) ، نرجو من كافة اصدقاء القاطنين داخل ارض الوطن متابعة نشاط المدونة على العنوان التالي:
http://www.el-clandestin1.blogspot.com/
و نعتذر بالمناسبة لغياب الإخراج الخاص بالمدونة ، على خاطر هاذية نسخة فوفتوكوبي مستعجلة للمدونة انشالله يتم استرجاع بقية جزئيات المدونة الاصلية في الايام القليلة القادمة. مع الشكر

في البوسطة

noreply@blogger.com (Clandestino) — Mon, 12 Oct 2009 17:10:00 +0000

كان مكتب البريد مكتظا كالعادة
وقف بالطابور الاوّل , و كان الشخص الذي يقف امامه تفوح منه رائحة اللحم ، يبدو انه يعمل جزّارا (قصابا) في المسلخ البلدي,
اقلقته رائحة اللحم و الدماء المتعفّنة فانتقل الي الطابور الموالي ,
رغم انّه اطول من الطابور الأوّل...

فصدمته رائحة الرجل الواقف امامه
كانت رائحة تعرّق
يبدو انه عامل يومي (مرمّاجي) لم ينفض التراب من يديه, كان يبدو عليه التعب و الارهاق
الا ان رائحة تعرقه كانت اهون و اقل وقعا من رائحة الجزّار
التفت الى اليمين كانت هنالك فتاة تضع نظارات سوداء ... ممتلئة ... ترتدي ديجين يكشف عن تضاريس جسمها
كانت القاعة الشبه مظلمة، باردة بهواء التكييف لا تستدعي ارتداء النظارات الشمسية ..و رغم ذلك لم تنزع الفتاة نظاراتها.
ربما كانت تحاول اخفاء عينيها
لا يهم مادامت ترتدي الدجين...لا حاجة لعينيها... من يبحث عن العيون في زمن الدجين

بعد ثلاث ارباع الساعة, وصل الى الشبّاك ...التفت الى اليمين , لقد اختفى الجزّار و ذهبت رائحة الدماء
لقد نجح الطابور الثاني

التفت من جديد ,. بحث عن الفتاة, فلم يجدها

الفاجعة في سبعة صور

noreply@blogger.com (Clandestino) — Fri, 25 Sep 2009 17:39:00 +0000

جثامين الضحايا في المستشفى المحلي بالرديّف - الله يرحمهم

مدينة الرديّف يوم 23 سبتمبر 2009

الرديّف و الرديّف ...ثمّ الرّديّف

noreply@blogger.com (Clandestino) — Thu, 24 Sep 2009 15:04:00 +0000

الرديّف او "الـرّدِيـف" كيما ينطقوها جماعة الجزيرة و العربية ... تجدد العهد ... و "تبرز" مرّة اخرى ارتباطها و ارتباط مصير اهاليها ... و تؤكّد تعلّقهم الغير مشروط و تشبّثهم الدائم ...
موش بولي النّعم (كسائر المناطق) ، و ليس بالأعياد و الافراح (الدائمة) ، و لا بجودة الحياة و لا بمعدلات التنمية و النمو و تصنيفات دافوس و تقييمات الخبراء و احصاءات الهيئات العالمية و جداول ترتيب الدول و البلدان..
قدر اهالي الرديّف غير قدر بقية المناطق ... رغم انتمائهم لنفس الأرض و نفس الراية ...و حملهم نفس بطاقات الهوية ... انتمائهم ارتبط بطريقة حتمية ... بالكوارث و المصائب و الفواجع و خيام اللاجئين ... و الاحزان و البكاء اما ابواب المستشفيات، قبل تسلّم جثامين الضحايا الابرياء.
نفس سيناريو ربيع 2008 تكرر في خريف 2009...
نفس التفاصيل ... نفس الاشخاص ... نفس الابطال ... مع تغيّر الادوار و الفصول
اعوان الداخلية و الجيش الوطني اللي قمعوا مظاهرات 2008 بالحديد و النار ، استبدلوا الماطراك و البنادق و قاذفات القنابل المسيلة للدموع بوسائل الانقاذ و النجدة. نفس سيارات الباقة و ناقلات الجنود ، اللي كانت تنقل المعتقلين ، تحوّلت لعبارات تنقل المواطنين عبر الطرقات المحطمة جراء السيول و الوديان. و مبعد يقلك في تونس سبعة عن ارسال قوات من الداخلية و الجيش لاغاثة المنكوبين ...
و من وقتاش خرجت القوات هذية من الرديّف ؟؟
ما يكفيش انّو الاهالي دفعوا ثمن مطالبتهم بأبسط حقوقهم ، دفعوه من دمهم و دم اولادهم ... ما يكفيش الاهمال و اللامبالاة .. ما يكفيش انو اولاد المعتقلين يعدّيو عام من الحزن و الخصاصة و الاهمال ، و في الوقت اللي يحتفل فيه سائر الناس بشهر رمضان و بالعيد ، يعانيو باش يزورو اباءهم في سجون الولايات الاخرى. و في الوقت اللي رجعت فيه التلامذة للمكاتب و الطلبة للجامعات ، يعاني اهالي المساجين باش يوفّرو الحد الادنى للبقاء...

هذا الكل ما يكفيش باش يتعاود السيناريو و تتجدد المأساة.
بربي شنوة ذنب الارملة المسكينة و ابناءها (الايتام) الثلاثة اللي طاحت عليهم دار في حي يسمّى بالـ "ملاجئ " او حي العمال .
شنوة ذنب الضحايا العشرين ؟؟؟ شنوة عندهم عملوا ؟؟ فاش قصّروا زعمة ؟؟ زعمة قصروا في حق البلاد ؟؟ ما دفعوش الشهداء في ثورة الاستقلال ؟؟ ما خدموش في اعماق المناجم المظلمة ؟؟ ما دفعوش الضرائب ؟؟ زعمة بخلوا باش يعطيو من عرقهم و من صحتهم و صحة اولادهم باش يخرّجوا الفسفاط ؟؟
الفوسفاط اللي عندو 50 سنة يتصدّر و يتصنّع و يتحوّل في مصانع التحويل و مصانع التخطيط و مراكز صنع القرار ...يتحوّل لنزل و مطارات و طرقات سيارة و مرافق بعيدة على اهالي الرديّف ... مرافق يتحمّلوا طواعية التنقل اليها و التمتع بخدماتها دون تذمر ...هوما يعتبرو المرافق هذيكة مكاسب للبلاد موش لمناطق بعينها كيما كانو يظنّوا انو الفوسفاط هو مكسب وطني و ثروة من ثروات البلاد، للجميع الحق في التمتع بعوائدها ...

ذنب الضحايا انهم يسكنو في احياء اقرب منها للقصديرية ، اشباه منازل ، هياكل متداعية ، آيلة للسقوط ، قاعدة تستنى في أوّل هبة ريح و اول كميات متاع امطار الخريف ... منازل تتسببّ و تتعلل باش تطيح و تتسوّى بالأرض. مادام ما فماش شكون تفكرها بالصيانة ... مادام مافماش شكون حاول يجددها و ينقل سكان الـ "ملاجئ" لملاجئ اقوى و افضل.

ضحايا فيضانات 2009 غير ضحايا فيضانات العاصمة في 2007 ، في 2007 كانت فمة تيارات و مجاري متاع وديان جرفت بعض الطرقات و السيارات و المساكن ، و قوة التيار تخلي قدرة الانشاءات و البناءات على الصمود ضعيفة.
في 2009 فمة امطار و ارتفاع منسوب المياه ، و من ثمة دخول المياه للمنازل و تداعيها و انهيارها على من فيها.
كارثة 2009 ماهياش كارثة متاع تقصير من وزارة البيئة و التجهيز و ديوان التطهير، ماهياش كارثة ناتجة على قصور في توقّع كميات الامطار الفصلية اللي فاجات الجميع ... كارثة 2009 هي كارثة متاع فقر ، تراكم متاع عشريات متتالية من الفقر ، و انحدار حادّ لمستوى المعيشة متاع مناطق كاملة من وطننا .

ولاية المهدية نزلت فيها 200 مليمتر و كذلك ولاية صفاقس و بعض مناطق ولاية المنستير ، وهي كميات تتجاوز الـكميات المسجلة في الرديّف . و رغم ذلك -والحمد لله - ما تسجلتش حوادث انهيار منازل و سقوط الاسقف على المتساكنين تحتها. نحمد ربي لأنو سكان المناطق المذكورة يسكنو في مساكن و احياء موش في ملاجئ. و الا لكانت الكارثة متضاعفة.
البارح في تونس 7 ، في الاعلام عن انقطاع المرور بين مختلف المناطق ، يقلك اللي (الطريق بين صفاقس و المهدية مقطوعة على مستوى الكيلومتر ............ و يمكن المرور عبر الطريق السيّارة)
في حين انو في الاعلام الخاص بالطرقات الرابطة بين الرديف و توزر و قفصة و القصرين ، كانت فمة صيغة وحدة:
( انقطاع الطريق الرابطة بين الرديف و توزر على مستوى ...... و المرور غير ممكن)

فشتان بين اللي وقت اللي تغرق الكياس يلقى أوتوروت و بين اللي عندو جرد "بيست" عندها سنوات منسية و في اول مطر يلقى روحو معزول عن العالم.

Happy Birthday عيد ميلاد سعيد

noreply@blogger.com (Clandestino) — Thu, 03 Sep 2009 12:00:00 +0000

نتوجّه الى كل مواليد الـثالث من سبتمبر ( و خاصّة المولودين سنة 1936 ) بأعطر و ارقّ التهاني و التمنيات بالعمر المديد و موفور الصحّة و العافية. و بهذه المناسبة السعيدة يسعدنا ان ننقل اليكم تهاني كل فئات الشعب الكريم ، راجين من المولى عزّ و جلّ ان يجعل كل ايامنا افراحا و مسرّات و مهرجانات و اعياد ميلاد مجيدة ، و يحمي بلادنا من فتنة الأعداء الحاقدين المتربصين بقيمها و الطاعنين في انجازاتها و مكاسبها ، و يقينا من شرّ الازمات الاقتصادية و ازمات البترول و البطاطا و نقص الحليب و البيض و اليغورت و الفانتا ليمون.
و نرجوه كذلك ان يشفي مرضانا و يخفف عنهم و يرزقهم جميل الصبر و السلوان و ينزع عنهم القهر و اليأس والحقد المعشش في قلوبهم بمناسبة شهر الصيام ، و بمناسبة كل آذان يرفع في كل مدينة او قرية من قرى الجمهورية ...

و في ما يلي عيّنات من الشعب الكريم أبت الا ان تقدّم التهاني بنفسها لمواليد هذا اليوم المبارك:

العاملـــين بالفكر - 24/24 و 7ايام/7 تحت الحيوط

العاملين بالسّــاعد

ممثّلي قطاع النقل العمومي في تونس

ممثّلــي قطاع النقل الدولي(الخاص) و الناشطين في سبيل إحياء مشروع الاتحاد المغاربي

المواطنون و المواطنات المتمتعين بجودة الحياة و كل مستلزمات العيش الكريم
(مسيرة عفوية للتعبير عن الشكر و الامتنان في منطقة الرديّف )

جمعيات و منظمات المجتمع المدني

ممثلي السلطة الرابعة (بعد الانقلاب الكرماوي)

عينة اخرى من الشعب الكريم المتمتع بجودة الحياة (الركض وراء الخبزة )

ممثلينا في الخارج (او بالاحرى من وصل منهم على قيد الحياة)

و في الختام قطاع اليد العاملة الاحتياطية (كيما جيش الاحتياط في الميدان العسكري)
وهي ما اصطلح على تسميته عالميا بجمهور البطّالة

و شكرا .... لمسدي الخدمات الاشهارية المجانية

noreply@blogger.com (Clandestino) — Wed, 02 Sep 2009 13:41:00 +0000

مللي حليت المدوّنة ، تكوّنت عندي عادة (منعرفش عادة حميدة و الا عادة سيئة) ، عادة كنت ساعات نغفل عليها و ساعات نتذكرها ،وهي في العموم عادة باهية و ممتعة لكل المدوّنين في العالم (بالنسبة للمدونين التوانسة منعرفش على خاطرهم حالة خاصّة)
وهي تفقّد احصاءات المدوّنة و عدد الزوّار و البلدان اللي جاو منها الزوّار الى غير ذلك من المعلومات اللي يتيحها موقع العدّاد.

... زوّار من امريكا ، زوار من روسيا و من اوروبا و من افريقيا و و من آسيا...زوار من كل مكان و من كل البلدان و الجنسيات و بكل اللغات.... زوّار تعرف انو مافماش شنوة يجمعك بيها ، و مافماش روابط مشتركة تنجم تخلي انسان من المناطق هذيكة يعرفك او يطلع على كلام كتبتو بلغة مختلفة على لغتو ...
فقط القوقل ... القوقل و الحاسوب و المايكروسوفت هي اللي تجمعكم و تخليكم تتقابلو و لو افتراضيا ... و هذا في حدّ ذاتو شي غريب ، و كان الى وقت قريب يعتبر ضرب من ضروب الخيال و يكاد يكون من المعجزات و الخوارق.

يكفي انك تلقى زائر من ولاية امريكية بعيدة ، و الا زائر من الصين او من استراليا او معلق من البيرو او كوستاريكا ، ممكن دخلوا يفتّشوا على صورة ، ممكن غلطوا في الرابط او رماهم محرّك البحث (القوقل) على ضفاف المدوّنة بدون اي موجب او مبرر منطقي ... باش تحسّ كمدوّن انك وليت عنصر (مهمّ) في المنظومة العالمية ، و يتكوّن كذلك لدى المدوّن احساس بأنو بحساب البلوقر و مدونتو البسيطة اصبح مؤثّرا في الرأي العام العالمي و لو بنسبة 0.000000000000001 %
او اقل من ذلك.
وهذا احساس ممتع في حدود معيّنة لأنو اذا تجاوز الحدّ المعتدل فإنو يولي سبب لجملة من الامراض النفسية و يتسبب للمدوّن في فقدان الاحساس بالاطار اللي يعيش فيه و يمتزج الحقيقي بالافتراضي (خاصة مع تعدد الهويات المستعارة و الاقنعة الافتراضية) و تظهر اعراض خطيرة و مرضية تستدعي التوقف الفوري عن التعامل مع الحاسوب و مراجعة اقرب عيادة للطب النفسي او عيادة لمعالجة الادمان.

النهارين و انا نتفقد في زوّار المدوّنة نلقى اللي فمة قرابة الـ20 زائر دخلوا للمدوّنة من رابط واحد ، يوصّل لمدوّنة تونسية تحوم حول صاحبها شكوك و شبهات كبيرة حول ميولاته الجنسية الشاذّة تجاه الاطفال و اللي كان عبّر عن عيّنة منها في سابقة خطيرة على الواب التونسي و حكى احد فصولها في في احدى تدويناته ...
و كانت عدة مدونات الكترونية تونسية تعرضت للموضوع و فمة شكون لام على المعني بالامر و فمة شكون اصرّ على ملاحقة السيّد هذا قضائيا و فمة شكون اكتفى بمقاطعة المدونة المذكورة و صاحبها .
انا كمدوّن تونسي غير مختصّ في التفاصيل القانونية و ماعنديش فكرة عن الاجراءات الواجب اتباعها في موقف مشابه ، نكتفي باش نطالب بمزيد تسليط الضوء على القضية بطريقة اشمل خاصة انو السيّد المدوّن تجاهل كل طلبات التوضيح اللي توجهتلو من طرف بقية المدونين .
و نتمنى كذلك انو الاطراف المعنية بقطاع التربية و التعليم في بلادنا و الاطراف المكلّفة بحماية الطفولة تتدخّل للتحرّي اكثر في الموضوع و لما لا طرحه للنقاش في مستويات تتجاوز اطار المدوّنات و يتم خلاله دراسة الظاهرة و البحث فيها و تحديد مدى انتشارها خاصة انّ الاطلاع على الانترنات و استعمالها لا يزال حكرا على مجموعة لا تمثّل سوى نسبة قليلة من العدد الجملي للسكّان...
انا لهنا مانيش نطالب بالتتبع العدلي ضد شخص المدون المذكور لانّ الحكاية و حسب كلامو عندها اكثر من 20 سنة و لا جدوى من اعادة البحث فيها خاصة مع صعوبة امكانية العثور على الاطراف المتضررة (تلامذة المدرسة و خاصة التلميذة المسماة "محبوبة" اللي اورد اسمها في تدوينتو المشبوهة) . اما نتمنى انو كل المدونين يعاودو يقراو النص متاع البيدوفيل و ياقفوا يقفة صحيحة في قضية مبدئية لا تقبل التهاون او التراخي في التنديد بيها.

نرجع لموضوع الروابط ، قلت اللي فمة قرابة الـ20 زيارة جاية من المدونة المشبوهة ، و رغم اللي انا مانيش معني بالنوايا الخفية لصاحب المدوّنة المذكورة الا اني (منخبيش عليكم) خفت من انتقال الشبهات للمدونة متاعي ، و مالقيت مانقول سوى اني نشكرو على مجهوداتو ، و خاصة على الاشهار المجاني لمدونتنا المتواضعة ، و سعيه المتواصل للقيام بدور يرفض الكثيرون القيام به .
و ماذابية لهنا نوضحلو انو لأسباب متعددة منجمش نوفّـرلو المقابل لخدماتو الاشهارية ، خاصّة و انها مبادرة شخصية اقدم عليها من طرف واحد و من غير استشارتي . و باش نعتبرها من قبيل حمل القفة لانو كيما تعرفو من اهم مبادئ مدوّنة "غدوة نحرق" هو "لا للقفّــة" و خاصّة القفّة المجانية ...

فنعاود نشكروا مرّة اخرى و نثني على المجهود الي يذكر فيشكر ، رغم انّ النتائج ماهياش بالاهمية اللي يتصوّرها ( لأنو الـ20 زائر اللي جاو من عندوا ما يمثّلو كان نسبة بسيطة من عدد الزيارات اليومية للمدوّنة ) و انا نتفهّم محدودية قدرات المدونة و محدودية قدرات صاحبها (في كل المجالات ماعدى مراقبة مفاتن تلميذات الرابعة ابتدائي) . و في الختام نتمنى (من كل قلبي) انو يزيد يتعمّق في البحث في مدونة غدوة نحرق و يقرأ و يطـّـلع على مزيد التدوينات ، لأنو الاكيد انو فمة عشرات التدوينات الممتازة اللي ينجّم يعاود ينشرها ، لما في ذلك من فوائد اخرى لا تخفى على احد ، من فتح افاق تثقيفية و توعوية و تربوية (ههههه) و تحسين مستوى و لما لا الارتقاء الى ما يمكن انو يجلب اكثر من الـ20 زائر يوميا.

انفجار مخزن للوقود المهرّب من الجزائر

noreply@blogger.com (Clandestino) — Wed, 02 Sep 2009 13:32:00 +0000

حريق هائل لمخزن للوقود المهرًّب من الجزائر في مدينة القصرين
فيديو فايسبوك

اش حطيتلها يا معمر؟؟

noreply@blogger.com (Clandestino) — Tue, 01 Sep 2009 22:48:00 +0000

الاعلان العالمي لحقوق الانسان

noreply@blogger.com (Clandestino) — Tue, 01 Sep 2009 09:46:00 +0000

تحذير 1 : النص الوارد في الفيديو بالانقليزية

تحذير 2 : الرجاء عدم مقارنة ما ورد في الفيديو بما هو موجود في بلاد السبوعــي ، لما في ذلك من مخاطر الصدمات النفسية و العاطفية و خطر الاصابة بالإكتئاب المزمن و الحسرة على ما مضى من اعمارنا و الأسف على مستقبل الاجيال القادمة.

Belle et Sebastian - le pastie de la bourgeoisie

noreply@blogger.com (Clandestino) — Mon, 31 Aug 2009 20:17:00 +0000

Belle et Sebastian

أغنية لكل مستمع ------ Air - Femme d'argent

noreply@blogger.com (Clandestino) — Mon, 31 Aug 2009 20:11:00 +0000

Air - moon safari - 1998

بربي سيّبوهم عواشر و رمضان

noreply@blogger.com (Clandestino) — Thu, 27 Aug 2009 12:00:00 +0000

اهل القرية الطيّبين و رغم ما يشاع عن كونهم طيّارات و مهفّات ، كانوا نيّة ، و يسهل باش تعدّيها عليهم و تخوّفهم و تعيشهم الرعب ،
و بشويّة بلوط و لغة مضروبة تنجم تقنعهم انو الحليب موش ابيض بل عندو الوان اخرى أخضر و ازرق و بنفسجي ، و ممكن كذلك تقنعهم انو المعيز تطير و الغول و العنقاء موجودين في المحمية الطبيعية المجاورة ، و تنجّم كذلك تبيعلهم القرد و مبعد تشبع ضحك على ذقونهم ...

الطيبة و النيّة متاع اهالي القرية خلاتهم مهزلة و مسخرة بين الامم ... وجهة اللي يسوى و اللي ما يسواش و قبلة الباحثين على السهريات و الشيخات بارخص الاسعار، يكفي انو يدخل الزائر بشوية اوروات في جيبو باش يعيش حلم حياتو و يتمتّع بالضيافة و الحفاوة و يشوف اللي عمرو ما شافوا في بلادو ، و يكون محل ترحاب الأهالي و ديار الأهالي و في بعض الاحيان بنات الاهالي و نسائهم ...
حاصيلو القرية هاذي ولات خيشة تحت الساقين ... للماشي و الجاي ... الطالع و النازل ... و خاصة للي عندو الاورو و الدولار.

و من الخصال الحميدة لأهل القرية انهم كانو متسامحين ، لدرجة تثير القلق و تثير الشكوك و المخاوف حول طبيعة هؤلاء الناس ...
التسامح باهي اما هاذم كثّروا على ما وصاهم بالتسامح
فكانو اذا شدّوا السارق متلبّس بالجرم المشهود ، اي يدّو في الشكارة كيما يقولوا الفرنسيس ، يسامحوه . على سبيل المثال ، واحد يسرق طرف معدنوس و الا كعبات بطاطا من نصبة في السوق و الا يخطف الساك متاع مرا عزوزة و الا يدخّل يدو في مكتوب واحد متعدّي و ينحيلو عشرة و الا عشرين الف كلّها امور طبيعية و عادية جدّا ، و بعمرو ما حدّ تشكى من الممارسات هاذي و قاللك يلزم نوقفوها عند حدّها . فـ وقت اللي يتشدّ واحد من اللي ذكرتهم كان الجميع ياقف مع السارق و بالتسامح المعهود و بطيبة السذج كان الجميع ينادي بالعفو عن اللص
"سيّبوه بربّــي عواشر و رمضان ..."
" تي شنيّة هي كعبتين بطاطا ؟؟ شد خو هاي دينار و سيّبوا ..."
"اعطيه زوز كفوف و سيّبوا و يرحم والديك من فوق ..."
"سيّبوا و قول يجعل بلاه على غير ايديّا ..."
"هو ربي يغفر و يعفو و يسامح و انتي باقي شادد الصحيح..."

و كان اللي يطالب بحقّوا في تتبع اللصوص يعتبر مارق و خارج عن القانون و متمرّد ، و في كثير من الاحيان يتم نفيو الى منطقة الكهوف او ما وراء الجبال

فتقوّت شوكة اللصوص في القرية و ماعادش يحكم فيهم حدّ ، و يقال انّهم اكتسبوا جرأة و وقاحة غريبة يحسدوهم عليها بقية زملائهم في بقية البلدان ، اللي مازالو لتوة ما يسرقوا المحل كان كي يبدأ مولاه غايب و ما يمدو ايديهم لجيب المواطن كان في وقت الغفلة و لحظة السهو ...
و وصلت بيهم القوة و العجرفة متاعهم انهم كانوا يدخلوا للمتاجر و يهزو السلعة اللي تعجبهم و ما يكلمهم حدّ
يتعدّاو للتاجر بيدو و يدخّلوا ايديهم لمكاتبو ينحّيولو الملمّة و اللي ثمة، وهو يشكر فيهم و يمدح و ياويلو كان قال فيهم اقل كلمة
و الا حاول يحتج او يقاوم ..
حتى والي السلطان و شرطة الوالي و حرس الاسواق حاروا فيهم و سلموا امرهم لله و قالوا هاذي فرقة ما يقوى عليها كان ربّي و تاكدو انو زايد باش يحاولو ايقافهم و ردعهم و لما لا ارسالهم للسجون السلطانية الفخمة ...
و في بعض الاحيان كان تصير الغلطة و ياقع واحد سيء الحظ من الشرط في المحظور و حل فموا و قاللهم راهو عيب اللي تعملوا فيه و ما يجيش و رجّعوا متاع النّاس ... كان ياكل ما ياكل الطبل نهارة العيد ، و يشبع ضرب و مشطة للي يتوب و يقلّهم عندكم الحق و بارك الله فيكم و ربي يعينكم...

و كذلك كان الامر مع الوالي و مساعديه و اعوانو ، و وصل الامر للسلطان و شاعت اخبار في البلاد اللي هو متقلق من الموضوع و باش يوقّف المهزلة إلا انو كان في كل مرّة يعمل عين رات و عين ماراتش ، لدرجة انو فمة شكون دخلو الشك في نوايا السلطان و قال اللي -لا قدّر الله - السلطان يمكن يكون متواطئ مع مروّعي الاسواق و عاشقي جيوب الاهالي.

و في نهار من نهارات ، و في نوبة متاع جنون و متاع تهوّر حبّت العصابة توسع دائرة الاعمال متاعها و تنتقل بيها الى نطاق اكبر ...
و بالغرور و الوقاحة المعتادة انتقلو الى ما وراء القرية و ماوراء الجبال و الكهوف و عبروا الى ضفة النهر ...
البلاد الاكثر ربح من جيوب المواطنين و محفظات النسوة و صناديق المتاجر و الاسواق
و ضربو ضربتهم الأولى ...
الا انهم نساو اللي في العالم فمة عباد اخرى ، مختلفة على شعب الـنيّة و الهبلة و الدغف و الدراوش
و طاحو مع عباد ما يطيقوش العوج و ما يتحملوش الظلم و ما يسلموش في متاعهم بسهولة
و وحلوا وحلة كبيرة الله لا يخرّجهم منها حسب دعاء احد اهالي القرية اللي ما حبّش يكشف هويتو

فيديو فايسبوك

مع الاسف تمر جانبية اه لحسن الحظ والحمد لله مرت جانبية

noreply@blogger.com (Clandestino) — Tue, 25 Aug 2009 10:06:00 +0000

اللي يقول اللي الشعب هذاية تاعب و ماعادش عندو ما يقول و ما يعبّر راهو غالط. و اللي يقول زادة اللي الشعب هذاية مستسلم لمصيرو و مسلـّم نفسوا للاحكام و قاضي الاحكام و صاحب أغنية يا قاضي الأحكام ( الأخ سمير الوصيف يذكرو بالخير) راهو غالط...

شعب العشرة مليون اللي جاب فرحات حشّـاد و جاب الحبيب بورقيبة و قبلهم جاب علي بن غذاهم شيخ العربان و زميمهم ... الشعب العريق هذاية صبر ياسر و ماعادش ينجم يزيد يصبر...و برغم وداعتو و طيبتو و صبرو على ثقيلي الظل (من السيّاح و من اهل البلد) و تفانيه في خدمتهم و توفير اسباب الراحة و الرفاهية ليهم ... فكان من الطبيعي انو يوصل لنهار كيف ما هذا ... نهار يعلن فيه العصيان في وجه ثقيلي الظلّ و يصيح : "يزّززززيي فككككككككّ ..."

الشّعب الكريم فدّ و تطيقر مبعد سنوات العوج و اللغة المضروبة ... و فوق العوج و اللغة المضروبة تحمّل المصاريف و خلّص الفاتورات (القانونية و الغير قانونية ) ، و كان (دائما و ابدا) هو الدغفة ، السّـاذج ، النيّة ، البوهالي ، الدرويش اللي يتدروش عليه الجميع و ماعندوش الحق يسيّب الدروشة (حتى على روحو)...

ناقف لهنا و نعمل توضيح هام على خاطر سي عمار الـ404 الحقيقي (موش العمامير البوذرّوح المعششة في البلوقوبطاطا متاع حسين) جبد المقصّ متاعو و بدأ يقلّب في مدونة غدوة نحرق باش يلقى البلاصة المناسبة للتمقيص..
كلامي هذا يخصّ مجموعة على الفايسبوك ، مجموعة تكوّنت خصّيصا لسي توفيق العبيدي رئيس قسم الرياضة في التلفزة التونسية ، تطالب فيه سي توفيق بـ "تعليق الصّباط"...
و اشكون ما يعرفش توفيق العبيدي ؟؟ المعلّق الرياضي الاوّل في تونس ، توفيق الوحيد ، الفريد من نوعو (آخر كعبة في الفترينة) ، معلّم المعلّقين ، المجدّد دائما و ابدا في دومانو ، هاوي الاسفار و اكتشاف البلدان و حضارات الشعوب ، صاحب الضمير الصحفي ، المعلق التونسي الوحيد اللي ما ينجّمش يفلّت التظاهرات الرياضية ، العاب اولمبية ، العاب متوسّطية، بطولات عالمية ّ، دورات اقليمية ، بطولات قارية ، راليات ، دورات تنس، كرة يد ، كرة سلة ، كرة قدم، سباحة ّ، عدو ريفي ، سباق خيل ، كانوي كاياك ، ملاكمة ، مصارعة ، تايكواندو ، جي جي تسو برازيلي ، تسلق جبال ، قفز باللاستيك ، صيد اسماك، صيد فراشات ....
و فمة أخبار حول استدعائه من طرف كبرى الشبكات التلفزيونية في بلاد العم سام لتغطية السوبر باول نظرا لخبرته كذلك في كرة القدم الامريكية ... الا انو رفض الدعوة بكل لطف ...لأسباب مجهولة.

سي توفيق العبيدي يعتبر من المشاكل المزمنة اللي أثّرت سلبا على الصحافة الرياضية و قطاع الرياضة بشكل عام ، و بفضل الطلعة البهيّة متاعو ، الاكيد انو نفّر العديدين من متابعة المقابلات و التظاهرات الرياضية اللي يقوم بتغطيتها ، و ساهم بطريقة غير مباشرة في خدمة منافسي قناتنا الوطنية ، و مكّنها من مشاهدين اضافيين و حرم بالتالي قناة تونس سبعة من مداخيل اشهارية اضافية .

لهنا نوصلو لنقطة اخرى هامة و اللي ربما تساعدنا باش نجاوبو على السؤال حول الاسباب اللي تخلي مسؤولي التلفزة يحافظو على توفيق العبيدي ضمن فريق المعلقين و عدم اجباره على الاكتفاء بمسؤولياته كرئيس قسم الرياضة و اعطاء الفرصة للمعلقين الشباب.
خاصة و انو اللعبة فيها نسب مشاهدة ، و مداخيل اشهارية.
الاجابة الوحيدة للسؤال هذاية هو انو مسؤولي تونس سبعة عندهم لوجيك اخرى يخممو بيها و هي ابعد ما يكون على منطق المنافسة بين المؤسسات الاعلامية في العالم،
قناتنا المحترمة و المحظوظة ماعندهاش مشكلة متاع اشهار و مداخيل اشهار ... مادام عندها الإتاوة اللي تقبض فيها مع كل فاتورة من فاتورات ستاغ تخرج في البلاد، كل دينار يدخل للشبابيك متاع الستاغ قناة تونس سبعة تاخذ منو نسبة، و نخليلكم الحساب باعتبار عدد المشتركين و نسب الاستهلاك المنزلي اللي التلفزة ماتمثّل كان جزء ضئيل منو مقارنة ببقية التجهيزات المنزلية ...
و لذلك ما يهمهمش شكون يعلق و شكون يقدم البرامج ، ما يلوّجوش برشة شكون وجهو يصلح للتلفزة و شكون اللي عندو اطلالة تقطع الرزق و العياذ بالله ، ما يهمهمش اذا كان السيّد المعلق ماعندوش ادنى معرفة بالرياضة اللي يعلّق عليها ، الكلها خدمة "كعور و ....."و"ديما يمشي ..." و "عندكش عندي..." و "دز تخطف" و "خلي هكاكة اللي عجبو عجبو و اللي ماعجبوش يطيّر قرنو

و في الختام نتمنّى انو قراء المدوّنة يضمّوا اصواتهم لاصوات مجموعة الفايسبوك و ينضمّوا لحملة مناشدة سي توفيق باش يعلّق (الصّباط) .
و نخليكم مع تشكيلة متميّزة من روائع سي توفيق العبيدي اثناء تعليقه على مقابلات كرة القدم ، على امل انّو حتى المترددين و المتشككين يقطعوا الشكّ باليقين و يقتنعو بضرورة تخليص قطاع التعليق الرياضي من صاحب الـ "دائما و أبدا"

"قالك أسامة الملولي من مواليد1954

قالك أسامة الملولي وضعتو أمّو في بحر المرسى

أسامة موجود على الكولوار رقم 6 و هو على الكولوار رقم 5

"الي يكون في المركز الأول أثناء السباق يكون عليه ضغط كبير و ساعات صاحب المركز الثاني يفرش عليه السباق

عوض باش يقول :" يتبع خطى أو يحذو حذو الملولي" هاو آش قال :"على الشباب التونسي أنو يقتفي أثر الملولي

وسام يحيى قطع ألاف الكلمترات

بن خلف الله قاعد يقوم بادوار غريبة

منافسي اسامة ملولي لا ينامون الليل وهم يرتعدون

هيرتا برلين متصدر الطليعة في طليعة المتصدّرين

احمد الحامي و طويلة لكن ارضية و قصيرة

العلاقي يختلي بالحارس

لميدالية الذهبية الي تحصل عليها السباح الصيني أثارت الكثير من الحبر

وفي الأخير ما يصح كان الصحيح.... والآن نستمع بكل خشوع وإجلال إلى النشيد الرسمي.

الملولي المرة هذي خذا الميدالية الذهبية و ما كل مرة تسلم الجرة

الترجي الرياضي الساحلى

نظرا للإقبال الجمهوري الكبير و الكبير جدا

الحارس يخرج الكرة بطراطش الصوابع

تمشي الكورة لحكيم (كريم حقي)

سالومان(سلومون كالو)

سيف غزال يلحس الكورة لحسان

الحارس رشيق ومرن

هجوم سريع لكنه بطيء

حسين الراقد جميل وجميل جدا

إذا على هذا التحليل المقتضب نعود إلى ستوديوهاتنا الرئيسية

يلزم حبك الهجومات بطريقة سريعة وسريعة جدا

حكيم قالو حسين الراقد ديما تمريرات ساهلة و دقيقة
-توفيق لعبيدي: هذا مانعبرو عنو بالسهل الممتنع

شوقي بن سعدة

رقم 13 يخرجو الحكم

حضور جماهيري غفير ما فماش ابلاصة شاغرة

القربي الى الراقد الى بن خلف الله و مساحة رأوية شاسعة جدا

تمر الكورة فوق الحارس ذو القامة المديدة

باهية الميكارى يخلط و الا ما يخلطش يخلط و الا ما يخلطش....

الرياضة التونسية تعيش في الربيع متاعها رغم الي احنا في فصل الصيف

و فما تناغم كبير بين الدفاع التونسي

نشوفو محم... نشوفو الهجوم هذايا ...

وسام باش يدخل منذ قليل

من دون اي مقدمات نمرو لأحمد الصالحي ....

زاكوورا(زوكورا)

لنستمع لدقيقة الصمت

إنقضاض إنزلاقي

الإقبال الجمهوري

كرة على القائم الأيمن.. لا الأيسر..لا الأوسط.. و البرة

آلهة الملعب غاضبة على عصام جمعة

مع الاسف تمر جانبية آآه لحسن الحظ والحمد لله مرت جانبية

الصعب الممتنع

المصدر

حتى اولاد الحومة ولاو يعرفوا حدود حرّية التعبير

noreply@blogger.com (Clandestino) — Fri, 21 Aug 2009 12:47:00 +0000

اضغط لقراءة المزيد

على عكس العديد من الكائنات الافتراضية اللي انغمست بصفة مرضية في الالعاب الافتراضية و ولات مختصّة في الكلام البذيء و الجارح في الفايسبوك و المدوّنات ، و لـحدّّ الساعة مازال اغلبهم يعتقد انّ حرية التعبير هي تسييب الماء على البطيخ و التخلي عن كل الضوابط الاخلاقية و عدم احترام ابسط قواعد الذوق السليم

إنـــشالله رمضانكم مبروك

noreply@blogger.com (Clandestino) — Thu, 20 Aug 2009 09:45:00 +0000

قصص دموية

noreply@blogger.com (Clandestino) — Fri, 14 Aug 2009 10:33:00 +0000

قصة دموية 1 - الشقالة الطائرة:
حدّث التاكسيست قال :
نهار من نهارات وقفتني حريفة - حاشا خليقة الرحمان- ... هي في الواقع موش حريفة بالمفهوم السائد ، بالعكس ، كلمة حريف ربما تأدي المعنى اكثر من كلمة حريفة ...ميترو و خمسة و ثمانين طول على ما يعادلها في العرض ... واقفة على زويز عرص عيار 45 ......غلطة فادحة متاع هندسة وراثية ... فوضى متاع هرمونات ...عجّة (أو تسطيرة) متاع جينات مجهولة الهوية ... نسبتها لجنس الإناث جريمة في حقو (و قد يكون في حقّ جنس الذكور كذلك و الجنس البشري عموما ) ...
قلت "يا فتّاح يا رزّاق ... سترك يا ربّ " و وقفت الكرهبة...
حلّت الباب التيلاني ، قلتلها "سامحني اختي ، كان ما تراش مانع تطلع مالشيرة اليسار ، عندي المورتيسور اليمين طايب في حالة "
قحرتلي قحرة شككتني في روحي ، (شكّيت اللي ربما نكون قتلتها واحد مالعايلة و الا تسببتلو في 10 سنين حبس )...
عملت روحي موش خايف و تبسّمتلها ، نزلت على الفلسة متاع الكونتور ، "وين نوصّل اختي ؟؟"
"برّة سوق ... انده.."
ندهت كيما قتلي و عملت روحي نغني مع الكاسات ...
انا نسوق و هي "دور على اليمين" "دور على اليسار " "امشي في الطويل " للي وصلنا لحومة شعبية" عندي فيها ذكريات أليمة ... و مانتذكرش روحي قبضت حق الكورسة في الانهج متاعها ...
أيّست مالكورسة و استخلفت ربّي في التعب متاعي و تعب الكرهبة ، الا انّو فات الفوت و ماعادش نجّم ناقف و نهبّط الولية اللي ورايا ، خاصّة و هي تكوّر في ميدانها و امام جمهورها ، و اي مغامرة غير محسوبة من شيرتي ربما تكلفني ما يتجاوز حق ّالكورسة ...

من نهج لنهج و من زنقة لزنقة ، وصلنا قدام الدّار ... هبطت وقتلي ستنى خويا توة نجيبلك الفلوس... حلت الباب (تلامحت ما يقارب الميتين شقف اخضر متاع بيرة مرميين في المدخل ) ، و دخلت ...
كنت باش نمشي على روحي الا انو ابليس (يلعنو و يخزيه) و الطمع طلعوهالي في مخي باش نستنى ...
ما فماش دقيقة و نسمع في الصيحة " شنوة الفطور ؟؟؟"
مبعد تسارعت الاحداث ، برشة صياح و سبّ ، و بكاء و اصوات غريبة ، ميّزت من جملتها صوت الآفة البشرية اللي كانت باركة على المورتيسور متاع كرهبتي تسبّ في شخص آخر "يا طـ***** ، يا ولد الـ******* ، ***** ****** ****** ****** ****** ...."
، و اصوات متاع ضرب و حاجات رزينة تضرب في الحيوط و تطيح على القاعة، تطرشيق متاع بلار و قزاز مكسر...و تجيني شقالة مقرونة (بلحمها) طايرة و تضرب الباربريز...
فـ من غير ما نمسح البلار من المرقة و السباقيتي اللاصقة فيه ... خدّمت الكرهبة و انطلقت و دفع الله ماكان اعظم.

قصة مدمية - خيبة أمل:
هاذية قصة متاع مواطن تونسي مقيم في اوروبا ، تعرّف على زميلتو (الاجنبية) في الخدمة ، قاللها نحبّك قاتلو وهو كذلك ، شافتو نهار يصلي قاتلو فاش تعمل ؟؟ فهّمها في الاسلام و حدّثها على الاسلام و القيم متاعو، فعجبها الكلام و لقات اللي الاسلام هو الدين اللي يناسبها و لقات فيه برشة حاجات كانت تفتقدها.
ايا عرّسو و عاشوا جميع للي جاء الصيف و قالها نروّحوا لتونس ...فرحت و قالت هاذي مناسبة نزور الاسلام في ارض الاسلام و نشوف المسلمين و نعاين الدين هذا في ارضو و نشوف تأثيرو في العباد الغادي.
هوما في المطار يستناو ، قالها راجلها دقيّقة هاني راجعلك ...
بطى شويّة ياخي مشات تلوّج عليه ... تلقاه في الفريشوب يشوف و يقلّب في دبابز الويسكي و الفودكا...
" يا فلان شنوّة هذا ؟؟؟"
تبسّم تبسيمة صفراء " لا لا موش ليا ، هاذم كادو للاولاد في تونس ..."

قصّة دموية 3 - بكارة ناس بكري:
مبعد ما وفات السهرية و روّحت العباد ، هزّ العروس زوجتو و مشى بيها لعشّ الزوجية...
و في اسرع من لمح البصر كانوا في بيت النوم ...ديكور ليلة الدخلة نفسو من عهد عبد الحليم حافظ ... نصف اضاءة ... موسيقى خافتة ... ريحة متاع ورد حطتو امّ العروس على الفرش ...
انطلق الزوج في تطبيق التعليمات بالحرف الواحد، حسب توجيهات الاصدقاء و الاصحاب و حسب طريقة الاستعمال متاع الليلة الاولى الواردة في الكتب متاع دار الفنون و في صفحات الاعلان و الصريح..
اعاد تجربة التعليمات عديد المرات الا انو في كل مرّة ما تحصّلش على النتيجة المرجوّة ، و ما صارش اللي يلزمو يصير حسب كتيّب التعليمات...

قام من الفرش جبد باكو الدّخان ، شعّل سيقارو ، قعد يخزر لزوجتو ...مازال موش فاهم الوضعية ...يستنّى في توضيحات
زوجتو قعدت متخبية في الظلام متاع البيت ...ساكتة
سألها :" شنوة اللي صار ؟؟"
- "........"
- "شبيه مافماش؟؟"
- "شنوة الي مافمّاش ؟؟"
- "شكون عمل بيك هكّة ؟؟"
-" ماعمل بيا حدّ ... انتي يظهرلي فيك امورك ماتعجبش ... تراه مدّلي سيقارو ..."
- " و تتكيّف زادة ؟؟"
-"...امالا تتكيّف وحدك ؟؟؟"

حلّ فمّو... جبد سيقارو مالباكو ...مدهولها في الظلام ...
-" بريكية ..."
جبد البريكية و شعّللها السيقارو و قعد يخزرلها تتبسّم على ضوء البريكية

- "توة كيفاش باش نعمل ؟؟؟ اش باش نقول و اش باش نحكي ؟؟؟ نقللهم مرتي راهي طلعت مكـسّـ.... ؟؟؟ تي مانجّم حتى ننطقها الكلمة ..."
-"لا قولها ميسالش ...قولها و انتي على دينك..."
- " شنوة يكون موقفك وقت اللي بوك و خوك و امك يسمعوا ، شنوة موقفي انا قدام الناس و العالم و المجتمع ؟؟؟ كيفاش باش نعمل ؟؟
- تحب نقلك اش باش تعمل ؟؟ انتي بيك على الدّم ؟؟ تحب على الدم برّة تفرّج في الجزيرة ... و الا نقلك اضرب راسك على الحيط توة يطلع الدّم..."

فكان الامر كذلك ، خرج الرويجل من بيت النوم و قعد قدام التلفزة يتفرّج في الجزيرة.

يا فــرحة مــا تمّت :))

noreply@blogger.com (Clandestino) — Fri, 31 Jul 2009 12:04:00 +0000

نصيحة لـ مدمنــي الستاد باش يردّوا بالهم من خطر اهمال زوجاتهم في سبيل الجمعية:)))
و هاي النتيجة قدامكم

تقارير سرّية و عاجلة من ملفّات عبد العزيز الجريدي

noreply@blogger.com (Clandestino) — Wed, 29 Jul 2009 11:40:00 +0000

في انتظار بقية حلقات مسلسل الطرايح اللي وعدنا بيها فنان المزابل نقلب مؤقّتا هذه الصفحة الحزينة من صفحات البلوقوسفير التونسي ، و نمرّ لرداءة من نوع آخر ، و خنّــار آخر ما يبعدش برشة على ما سبق ، خصوصا و انّ العلاقة موجودة بين الاثنين .

في الوقت اللي تخصصت فيه كل جريدة تونسية في مجال معيّن و تميّزت فيه ،( الصريح و الشروق متخصصة في التقارير المنقولة من الجزيرة و القدس العربي و العرب العالمية ، الانوار تنفرد بمقالاتها الكارثية و ملحقها الشهير بملفاته الغرائبية حول السحر الاسود و الماورائيات و الاطباق الطائرة و تنبؤات نوستراداموس و سيناريوات الحروب القادمة بين العرب و اسرائيل ، البيان و المصوّر ماخذين فون دو كومارس في الرياضة و اخبار الكورة و البروموسبور ، الاعلان و اخبار الجمهورية عاملين اتفاقية غير معلنة مع المشعوذين و الدجالين و العرافين ) تتميّز جريدة "كل الناس " بالتقارير السرّية اللي تنشرها اسبوعيا في الصفحة الثانية . تقارير سرّية دقيقة و محيّنة و توصف بالتفصيل تحرّكات الارهابيين المتربصين ببلادنا و تنقلاتهم و فتاويهم و القرارات الصادرة عن اجتماعاتهم ، و تنجموا زادة تلقاو اخبار مرعبة عن عمليات "دموية " قريبة الحدوث و في اماكن معروفة ، معروفة لصاحب التقرير موش لقارئ الجريدة اللي يلزموا يحاول يطلّع وحدو مكان العملية القادمة و يلزموا كذلك يحاول يعرف نسبة الحظ السيّء اللي عندو باش يكون من ضحايا الهجمة المتوقّعة.
و في الواقع هذاية اسلوب (اسلوب الخوف الغامض) تم استعمالو من طرف الادارة الامريكية بعد هجمات 11 سبتمبر 2001 و تم خلالو التلاعب بمؤشرات الانذار من الهجمات الارهابية صعودا و نزولا (حسب الظروف في العراق و افغانستان و حتى حسب الاوضاع الاقتصادية الداخلية ) ، و تمّ كذلك الاعلان في عديد المناسبات عن هجمات ارهابية وشيكة على التراب الامريكي و تم في عشرات المرات ارسال تحذيرات للمواطنين و السفارات الامريكية في عديد بلدان العالم (وصل حدّ منع السفر لبعض البلدان) من عمليات اختطاف و تفجيرات انتحارية و تفجيرات باستعمال السيّارات المفخخة.
احنا في تونس و بحكم انو جاليتنا في الخارج عندها الامكانيات باش تهني على روحها و قادرة باش تاخذ بايها (و بالوافي ) و ماهيش في حاجة للحماية او التحذير من المصالح الامنية و القنصلية ، فكان الاتجاه الرئيسي للحملة هو المواطنين في الدّاخل . و اثارة الرعب من الشبح الاسلامي و زرع الشكّ ما بيناتهم بطرق تنجّم تتعدى على المواطن البسيط ربّ الاسرة اللي يخاف على روحو و على عايلتو من قنابل تنظيم القاعدة.
و تنجموا تشوفو الصور متاع عيّنات من التقارير السرّية اللي تم نشرها في صحيفة كل الناس خلال شهر جويلية .:

نادل المطعم ، طبّاخ النزل ، رئيس الحانة ، المرشد السياحي ، الشاب القاعد بجنبك يشرب في البيرة ، البزناس اللي يقانص في نساء و
رجال التوريست ، ينجّموا يكونوا ارهابيين و ينجّم يفجّروا ارواحهم عليك في اي لحظة لذلك ردّ بالك و ما تعطيش الامان

تقرير حول الوعظ في قاعات الافراح ، اما بربي ثبّتوا في التقرير الاخير: للمسافرين اللي يتنقلو ا ما بين الـ 3 و الـ5 صباحا يردّوا بالهم من مجموعات السلفيين اللي جاهم الامر باش يسافروا في الاوقات هذية.
و اذا صادفتو حدّ يطلب في المساعدة (باش يبدّل العجلة) او عائلة في مشكلة على جوانب الطريق السريعة ماعليكم كان تفصعوا بجلودكم و تتصلو بالسلط الامنية للقبض على الارهابيين

بعد التنديد بالمهرجانات و (دعارة) الشواطئ موعدكم مع العمليات الفرجوية ، عمليات دموية قبل شهر رمضان باش تتنفّذ في اماكن محددة و للاسف ماذكرهاش صاحب الجريدة مانعرفش علاش ، لإبقاء التشويق ؟؟؟ و الا ربما باش ينظم مسابقة بالـ آس أم أس ، (باعتماد الخيارات م1 و م2 و م3 و م4 للاماكن المرشّحة باش تكون هدف للضربة القادمة و يكون توزيع الجوائز يوم عيد الفطر )

و كي العادة ، يلزم من الاضافة التونسية او اللمسة التونسية ، و اذا كانت سياسة الخوف الدّائم سياسة امريكية فسياسة سبّ الاعراض و الاهانة و تطييح القدر هي صنعة تونسية (ميا يالميا) و يتميّز بيها الصحفيين متاعنا (زيادة على مواهبهم السابقة كيما ضرب بعضهم البعض و سبان بعضهم و القوادة و هزّان القفة اللي ريناه في اجتماعات النقابة)
لهنا قالك نساء الاخوان يبيعو في الفودكا ابسولوت تحديدا ( و على ما يبدو حصريا اي انو اللي بيعو في البيرة و المرناق في منازلهم ماهمش من الاخوان اما اللي بيعو الانواع المستوردة هاذكم هوما الخوانجية) و بـ 40 دينار الدبوزة باش يموّلوا بيها عملياتهم القادمة.

شكر لموزّع الطرايح ...مع تمنياتي بالشفاء العاجل

noreply@blogger.com (Clandestino) — Tue, 28 Jul 2009 21:55:00 +0000

مبعد ما توقّعت انّو الجربوع المسنّ حط كوردة في السقف و ودّع الاعزّاء عليه باش ينتحر كي الجرابع اللي سبقوه و اضمحلّوا من البلوقسفار ، فوجئت بيه عاود طلع ( كي الجني او العفريت بسم الله الرحمان الرحيم ) كابس رويحتو زعمة زعمة قالك باش يبدا يفرّق في الطرايح . و فعلا بدأ يوزّع في الطرايح (القاسية) و نلقى اسمي في راس القائمة (باش القراء ما يتفجعوش نطمّنهم اللي هذية طرايح افتراضية لانو الطرايح الواقعية حاجة مختلفة و تتحكم فيها ظروف و معادلات اخرى).
بداية نحبّ نشكرو على الامتياز و الحظوة انّو بدا بيا انا شخصيا و اعطاني الطريحة رقم واحد رغم انو العمروش هو اللي بعثلو بالرسالة و كان الاجدر انو يبدا بالعمروش اما ميسالش هذية حركة نبيلة مانجّم كان نشكرو عليها.
الطريحة الافتراضية المذكورة الحقيقة تعمل الكيف و تبرز المواهب الكامنة في كهل الخمسين (مازالت البركة) ، خاصة انو مازال عندو ما يقول في روحو (خلي نطلعلو شوية المورال يمشيشي ينتحر الكازي و الا تضربوا جلطة يبقى الواحد عايش بعقدة الذنب انو تسبب في خسارة البلاد لمربّي متاع اجيال مافماش كيفو ).
و انا كنت لمت العمروش علاش كبّش فيه نهارة اللي شدّو بالكمشة مسيّب الفران ما و حاطط الماسك الغالط ، خصوصا انو اعترف انوّ هو المدوّن اللي اسمو الجني و في مناسبة اخرى اعترف بانو يستعمل في نفس الحاسوب مع الجني و من بعد فسّخ كل شيء... نهارتها قلت للعمروش اللي السيّد معذور (...) في السنّ هذيكة و بامكانياتو الذهنية و العصبية المحدودة من الطبيعي انو ينسى هو اشكون و يدخّلها بعضها ، خصوصا انو دخل في عدّة مناسبات في مونولوق يثير الاعجاب متاع انسان يسال في روحو على صحتو و امورو المادية و العائلية و غيرها و من بعد يجاوب نفسه و يشكر روحو اللي خذات الوقت باش سألت عليه و اطمأنّت على اخبارو.

حاصيلو (نرجع لفنان الزبالة) انا نشجعك و ننصحك باش تواصل (لا تيأس) هذاكة المطلوب ، الروح النضالية ، روح المقاومة ، روح لن يمرّوا يا صديقي ... و نزيد نعاودلك و نقلك فعلا احسنت و ابدعت و بارك الله فيك ، انت اليوم اثبتت للمدوّنين و للعالم و التاريخ (بالمناسبة توة نكلم شكون يسجّللك وقفة و يحطهالك في البالماراس التدويني متاعك ) انو اي انسان ينجّم يكون جربوع و موش بالضرورة يكون فرخ في العشرينات ...تنجّم تكون جربوع حتى في الخمسين و تنجم تكون جربوع في الستين ، كيما تنجّم تكون جربوع في السبعين و فمة فرص كبيرة انك تبقى جربوع لما بعد السبعين (كيما السيّد اللي نعرفوه الناس الكل) ...و بالمناسبة عندي اقتراح بسيط ، كان تنجّم تنشر الوصفة متاعك و تكشفها للجميع ، تعميما للفائدة و حفاظا على الخبرات و المعارف اللي قريب تندثر مالبلاد ، علاش نقعدوا نستناو للي يجي نهار تتفقد المواهب هاذي مالبلاد و نقعدوا نتحسّروا عليها و ربما نستوردوها مالخارج بما في ذلك من خسارة فادحة للاقتصاد ... و في نفس الوقت ربما تحصّل في جرّتها ارباح مادية تعمل بيهم راسمال خيرلك من الوقفات التاريخية و الاصوات المزيّفة في التي ان بلوقس و( و اللي الحقيقة رغم عدم جدواها و قيمتها الهزيلة اللي تقرب مالصفر الابسولو فبقيت محروم منها لحدّ الساعة و مافماش اجماع حول مصداقية الجحر متعدد الابواب و الفتحات اللي تكتب فيه).

و ربحا للوقت و باش مانطوّلش برشة نقلك و لشرذمة الغباء ، الحرافيش و الجرذان المحتمي بيهم ،اذا كان تتصوّروا اني عامل منها راسمال حكاية التدوين و الا نستنّى منها في جوائز و اوسمة و مقابل مادّي و وقفات يحسبهالي التاريخ راكم غالطين ، و كان تتصوّروا انو 24 ساعة من العمل البحثي المتواصل و المجهود المضني متاع مراهق الخمسين و اللي سماها هو طريحة باش تحيّرلي شعرة ، و الا كيما يقول العمروش تنقصلي مغرفة من صحفة الشربة (هههه) كيف كيف راكم غالطين ... و نزيد نطمّنكم ماعنديش النية لا باش نترشح للرئاسة لا باش ندخل البرلمان لا باش نترشح في الانتخابات البلدية باش نحافظ على سمعتي (هههه) في وسط الاوباش ، و تنجّموا تقعدوا لـمابعد القرن 25 و تنسقوا مجهوداتكم و تتوارثو انتوما و اولادكم و اولاد اولادكم المجهود باش تسبّوا مدونة غدوة نحرق و اقصى ماتنجمو تعملوه هو بطبيعة الحال معروف ( وهو حاجة تعملو فيها يوميا في الحفر اللي تسميو فيها مدونات )... و كان تتصوّروا انو باش تكون مدوّن يلزمك تهبط للمجاري و تقرا اللي يكتبوه المرضى و المعاقين و اصحاب العاهات المزمنة ، و تقرا السبّ و الشتم متاع عباد عندها عقد نفسية تعود الي الطفولة المبكرة و تعاني حاليا من مشاكل نفسية و اجتماعية تستدعي التدخّل العاجل ، و تتفرّج على المباشر على الخطاب العنصري و السبّ المجاني للاسلام و الإزدراء لكل ماعندو علاقة بالدين الاسلامي و بالقرآن و السنّة ، راكم غالطين يا جبورة و تموتو و انتوما تحلموا باش تنحّوه الدين هذاية مالبلاد و مستحيل تحصّلوا على اجماع و تقعدوا هكاكة كعبتين و كعبة تلمّدو بعضكم مبعد كل طريحة (صحيحة موش بشكوطو كاللي يحكي عليها معلّم الارياف) ياكلها واحد منكم تتفرّجوا شوية على صاحبكم ياكل في الضرب ، تسيّبوا شوية كلام زايد و بذاءة و تتفرّقوا من جديد في انتظار الطريحة الجايّة.
و بالنسبة لحفركم اللي تسميوها مدونات تهنّاو مانعرفش عناوينها و لا منين ندخلها و عندي اشهرة ماللي جبدت عليها الساش ، و اقعدوا تخبّطوا هكاكة كي المهبلة بلغة محلي و محلك و جيتك و ما جيتنيش و هاذية وقفة يسجالك التاريخ و لن يمرّوا يا صديقي .
و في الختام قبل ما نحيي الجربوع الخمسيني على صحة رقعتو و استماتتو في تشليك نفسو و النزول الى ما دون الحضيض ، خاصة انو الجرابع اللي سبقوه كيما متاع حمقستان و المسلم السابق كانوا أكرمو لحيتهم بيديهم و مشاو دون رجعة في حين هو و امثالو قعدو مكبشين كي المحمصة المحروقة في قاع الطنجرة (ههه) يستناو في الجافال ، نحب نسألوا زوز اسئلة و نطمّنو اللي عندو مهلة من هوني لـ2050 باش يجاوب ، و في نهاية الامر ماحاجتيش بيها الاجابة متاعو ، السؤال الأول علاش فسّخ كل ماعندو علاقة بسقوط القناع متاعو في مدونة 100 قصيد للحرية ؟ و السؤال الثاني هو كيفاش عمل باش تجاوز الصدمة المروّعة اللي ضربتو بعد رسالة العمروش ،
و قداش استعمل مسكنات و مضادات الاكتئاب ، و قداش كسّر من شقف بيرة على الحيوط (متاع بيتو موش متاع الفايسبوك ) ؟؟؟

ناس بكري قالو "الـطير الحرّ اذا حصل يسبل الريش"، لكن ها الجرابع هاذي ابعد ما يكون على مفهوم كلمة الـ "حرّ" ، و اثبتو لارواحهم و للتاريخ (اللي يحبو يدخلولو بمدونة تافهة و حساب مجاني على البلوغر) انّهم شلايك (بالصبع) ، شلايك من النوع الجوتابل اللي اذا تقطعت تترمى في البوبالة و ما تصلحش حتى باش تتباع فريب . ناس مازوشية تتلذذ بالضرب و تحشش على العصا و ما تجي للثنية كان اذا كلات المسبط. يكبّشوا كي الطفيليات و ما يسيّبوا كان ما يقطّعهم الواحد طروف و يريّشهم امام انظار الجميع.
.
و تذكرت لهنا حكاية قديمة متاع واحد من بني مروان جاء يتجلطم على واحد من بني معاوية بن ابي سفيان فجاوبو بميساج كودي قالو : سيّد العير جدي ابو سفيان و سيّد النفير جدّي عتبة و لو قلت حبيلات و غنيمات و الطائف لقلنا صدقت و رحم الله عثمان.

انا باش نقول لمفرّق طرايح الشوكوطوم ، يا فلان ، يا شلاكة ، يا جربوع ،يا جبري ، (اعذروني على التكرار هههه هاذية الكل كلمات سينونيم نجّم نلخّصها في كلمة وحدة اما التكرار ساعات باهي ) يا فأر المجاري ، يا مراهق ، يا قذر ، يا خنزير ، يا بعوضة المستنقعات ،يا ذبابة التسي تسي (هههه) يا مريض ، يا ناقل الامراض ، يا معقّد ، يا هايشة ، راك مازلت بعييد ياااسر .... و باش تبقى بعيد ، و هذية حقيقة يصعب انك تفهمها و هاو باش نزيدك زيادة فسّرها كيما تفسرها ...لو كان جيت مالاول حكيت على الكريطة و الشلاكة و البيرة و جبل الشعانبي ...لقلنا صدقت و رحم الله المزالي
:)))
ايا برّة توة تعدى لاقرب صيدلية ليل شوف روحك تزيدشي تعاودك الجلطة مرة اخرى
و ماذابيك تواصل في توزيع الطرايح ، باهيتلك الصنعة الجديدة ، تنجم تصلحلك هواية لما بعد التقاعد و تهنى من شيرتي ، باش نسامحك منو هكة كان غلطت معايا و الا مع واحد من الاخيان ، و حتى كان طلعت انتي هو منتحل اسم الحرفوش الآخر و حتى لوكان تطلع انتي هو ابو العربي نفسه ، تهنى ماعادش باش نتعرّضلك بسوء موش على خاطر الطرايح متاعك لكن شفقة و رافة بحالك
:)

رسالة من العمروش الى المدوّن المسمّى براستوس

noreply@blogger.com (Clandestino) — Mon, 27 Jul 2009 11:50:00 +0000

اقوم بنشر الرسالة هنا نظرا لعدم امكانية الدخول لمدونته من تونس و لاني -ربما- كنت سببا في حجبها :))

" ما يحز في نفسي انك مازلت مصرا على المضي قدما دونما حياء من ما فعلته وتفعله
غريب امرك ياصاح
اذ انت اكرمت اللئيم تمرد كنت اظن انك ستقدر تستري عليك وعلى انتحالك لشخصية المعاق لتعويض عجز او نقص ولكنك ربما لم تقدر الامر حق قدره ولم تنتبه ان عفوي عنك مرده الشفقة ولا شيء غير الشفقة
ربما كنت احتقرك في البداية لا نني ظننتك شابا يافعا تلهث وراء شهواتك كلهث الخنزير وراء القمامة ولكن بمرور الوقت ثبين لي انك
اولا كهل متصابي قارب الخمسين من العمر ورغم بلوغك ارذل العمر فانك لم تتب بعد ولم يحترق كبدك بعد بالكحول (انت بالطبع حر هنا فلست وصيا )
ثانيا ربما كانت هناك عوائق ذهنية او مادية او ظروف مادية منعتك من اكمال دراستك واكتفيت بالباك(ربما سادسة فقط) واصبحت معلم مناطق ظل مع ما يتطلبه ذلك من كفاح وتمرميد وغبرة وشقان الوديان ومن هنا ياتي حقدك على العلم والمتعلمين ومن اوتو من العلم كثيرا ومهاجمتك لهم باستمرار
ثالثا دفاعك المستميت عن المراة وحريتها وحقها في التعبير وفي اول فرصة لا تتوانى عن تحقيرها ودعوتها لفراشك(ولو انني اتخيل ذلك صعبا عليك في عمرك) وتعاملها كانها شيء ويختفي الحوار والكلام الطيب وترجع لك حيوانيتك لتشبه المراة بالالة ولا ترى فيها الا جانبا واحد وتغتزل عقلها وادبها وثقافتها فياشباع لرغبتك وتتجرا على قول ان مهاجمتها لك هي لنقص لديها ؟؟؟؟؟ يالله ما ابلدك هنا اجيبك بعجالة واخبرك ان النساء العفيفات الاحرار على غرار اخواتنا الثلاث حفظهم الله وزادهم علما على علم هنا من فئة نادرة يمثلن لامثالك نجوما ترى من بعيد وليست لك القدرة على الوصول اليهن برذالتك ومرضك وجبنك وتبلد عقلك سيظللن مجرد حلم على غرار الصور التي تراها في المجلات او الافلام فمستواك في النساء هو بية الذيبة وانيسة دوبل فاي وبهيجة وليس لك في الطيب نصيب فلا تنادي ارجوك بالحب والعطر وماشابه ذلك فانت بعيد عنه وعاش من عرف قدره
فضلا عن كونهن شريفات عفيفات ومحصنات فدعوتك مردودة عليك
ولذلك فافرح وقر عينا فلست حاقدا عليك او ناقما منك فقط مشفق عليك وعلى ماكابدته طيلة حياتك وقد اضحكني تعليق مجهول يسخر من تاريخ التمرميد الي عديتو وانت وسط الحفر اتفهم انه في الثمانينات كان الوقت غير الوقت وكان هناك شقاء وتعب وهذا مايجعلك هكذا يا جني الزبلة
فعلا اني اشفق عليك.
هذا وقد قيل سالتفت لحكاية النعجة واللية الي لتوة تعاود فيها
اولا بالنسبة للدكتور الذي ازعجك نجاحه وهو في نصف عمرك (اي والله يتجاوز الثلاثين بقليل) فقط تذكر اسمه فربما ستسمع به قريبا وسترى المستقبل الزاهر الذي ينتظره ويحق لي وهو واجب ايضا ان افتخر به وبنجاحه الذي هو ايضا نجاح لكل تونسي وخاصة في بلد صعب كامريكيا اين شق طريقه بثبات ونجاح واني شكر الله ان تمكنت يوما من معرفته ومن صداقته (كان ولى وزير توة نكلمهولك على دار شعبية ولا سبرولس ههههههه)
لناتي الان فيما يخصني ولتكف عن توهم انني اتخف منك ومن غيرك جبنا
انا ياصاح في الثلاثين من عمري
درست في تونس واخذت اجازاتي في التسويق وعمري 24 سنة
الوالد رحمه الله بعثني للدراسة في الخارج اين انهيت مرحلة ثالثة تخصص تجارة عالمية وعرض عليا منصب اطار بشركة خاصة اشتغلت بتفاني وتمكنت بعد ثلاث سنوات من الحصول على الاقامة الدائمة وتحصلت هذه السنة على الجنسية
منذ عام تقريبا استقلت من الشركة وفتحت مكتب خدمات واعمال اسديها للخواص والشركات بمقابل على ان اتكفل بكل شيء وهم يدفعون واللحمد لله اموري ماشية واصبحت في وضعية يحسدني عليها الاسوياء فما بالك بامثالك وذلك بفضل من الله وتوفيقه
اشتريت مؤاخرا منزل بتونس وساعود قريبا للزواج بابنة الحلال انشاء الله
ولذا اموري في العنبر والحمد لله
تعلقي بالتدوين والمدونات مرده حرصي على عدم الانبتات من جذوري ولاكون على اتصال وعلى علم بكافة المستجدات
سوف تقول ان الكلام سهل واي كان يستطيع اختلاق قصة نجاح وولذلك اتحداك امام الملاء ان نكشف الاثنان عن شخصياتنا(كنت كشفت بعض المعلومات للاصدقاء مع الصور )وعن الطريق المهني والعلمي لذي قطعه كلانا لنرى من احق بالشفقة من الاخر.
فبنصف حياتك تمكنت بفضل الله وحده من عيش وتحقيق ما انت تعده حلما
ايضا شاركت في انتخابات حرة نزيهة بطريقة ديمقراطية وذلك لاول مرة وهذا شيء لن ولم تذقه في حياتك ابدا بل ستظل متخفيا وراء اسم مستعار وتصور في الكاريكاتور على عمار هههههههه
مالذي تريده اكثر من ذلك؟
اخبرني مالذي فعلته في حياتك وفي دنياك بصرف النظر عن اعدادك لمرقة العجة لفنان مشهور اورسمك لكاريكاتير هدية لاخر والذي بالمناسبة سيكون اليوم في تونس(مرسال خليفة)
الكرة في ملعبك
اعلم انك لن تنشر هذا التعليق وستكتفي بالهروب كعادتك والتلكك والمغالطة
ساقوم بنشره عند الاخوات باذن الله وعند كلندو وفي مدونة الطمبر وفي مدونتي لامضي بعدها في عطلة وابتعد عن عفن لمرضى
نقطة.

ة"

في انتظار عودة كبير الحرافيش

noreply@blogger.com (Clandestino) — Mon, 27 Jul 2009 10:35:00 +0000

الحق مااااات و العدل مااااات ....لما مات عاشور الناقي ابو الحرافيش في حارتنا ههههههههههه

ّشكر خاص للبرباش اللي طلّع الطقطوقة هاذي من فيلم الحرافيش - 1986

عودة الى موضوع القوارض و مناشدة لحلبودة بالعودة

noreply@blogger.com (Clandestino) — Sun, 26 Jul 2009 11:15:00 +0000

يقوم العديد من المدوّنين و خاصة منهم المعروفين بمجموعة الأغبياء وهم خليط غير متجانس من غريبي الاطوار و المرضى (البسيكوبات) بدرجات متفاوتة ، باستعمال العديد من الاقنعة فنجد للشخص الواحد عدّة اسماء مستعارة و عدّة مدوّنات و اتجاهات مختلفة للخطاب المعتمد في كل منها، فهو "علماني" بالمفهوم التونسي في احداها (اي اسلاموفوبي )، وهو مساند للمقاومة في فلسطين و متضامن مع شهدائها في مدوّنة اخرى ذلك انّ مساندة غزة تعتبر ارهابا بالنسبة لمن ينسبون انفسهم الى العلمانية عندنا و لا يمكن ان تتسق مع القناع الاوّل ، وهو مربّ و فنان في مدونة اخرى يحاول الظهور فيها بمظهر المربي الجدير بالثقة اللذي يمكن ان توكل به مهمة تربية الاجيال مع انها مهمة خطيرة و تركها بيد اشخاص من هذا النوع يعدّ امرا خطيرا و غير مضمون العواقب.
و من مخاطر الافراط في استعمال الاقنعة هو الوقوع في المحظور و المحظور هنا هو سقوط الاقنعة جميعها و الوقوف للحظة تحت الشمس وهو امر لا تقدر الجماعة على تحمله ، خصوصا و انهم يطلقون على انفسهم (و بكل فخر ) اسم "الجرابع" و الجرابع كما تعلمون جميعا هي ثدييات صغيرة من فصيلة القوارض ، مفسدة للمزروعات و المحاصيل و حاملة للجراثيم و ناقلة للامراض تعيش في الجحور تحت الارض و في مجاري الصرف الصحّي حيث توفّر الظلمة و الرطوبة مناخا مثاليا و صحيا لتكاثرها.

و ما اوردته الصديقة عبرات في مدونة النضال ضدّ الطابور الخامس يعدّ مثالا على ذلك ، و المدوّن اللذي يطلق على نفسه براستوس كشف نفسه و (زلعها) في سياق تعقيبه على تعليقات العمروش في مدونة مائة قصيد للحرية. و في لحظة ( امتزجت فيها الحماسة بالتهوّر اندفع ليردّ على تعليق للعمروش ) لكنه لم يعثر على القناع المناسب فارتدى قناع الجنّي ناسيا انه يجب ان يكون براستوس في تلك اللحظة و في ذلك المكان ... لكن "ساعة القضاء ليها غفلة" و يمكن معاينة آثار (الحادث التدويني في مدونة مائة قصيد للحرية علما و ان المعني بالامر قام بـ "تطويق منطقة الحادث " و محا كل ما له علاقة بالموضوع)

و في نفس السياق كنت قد لاحظت في فترة سابقة ان بعض الجرابع الاقلّ شأنا (تتميّز اساسا بالسطحية الشديدة و الجهل و السذاجة ما يجعل اي حوار معها مضيعة للوقت ) كانت تصرّ باصرار غبي على أنني و مجموعة من الزملاء المدونين وراء مدوّنة النضال ضدّ الطابور الخامس ، و أننا أسسنا تلك المدوّنة للنضال ضدّهم ههههههههه ، ايّ غرور اعمى و ايّ "بهامة" تدفع "جربوعا" من فصيلة "جربوع المتاعب" (هذية لقيتها في موقع دراسي حول فصائل القوارض) و فاتهم انّهم احقر و اهون و اوضع من ان يكتب عنهم تدوينة فمابالك بتأسيس مدوّنة كاملة .
و انا كنت ذكرت في عديد المناسبات انّني ادوّن باسم مستعار و لست بحاجة لمزيد الاقنعة كي أواصل التدوين ، و اذا كنت في مدوّنتي ذكرت و لا زلت أذكر اشخاصا و مؤسسات تمتلك الصلاحيات اللازمة و السلطة و القوة الكافيتين لارسالي و ارسال معظم المدونين (عدا الجرابع المتعاونين منهم) الى ما وراء الشمس ، فلا أرى كيف يتصوّر هؤلاء المرضى انّني سألتجأ لقناع ثان للتدوين (ضدّهم)
حاصيلو شي يثير القرف ، هل هم مهمون لهذه الدّرجة ؟؟ قطعا لا و لكنّه الحمق و الجهل و الغرور الغير محدود.

اليوم تملكني الضحك و انا اتابع المناشدة الجماعية للفقيد عاشور ناجي (اسكنه الله فراديس جنانه) بالعودة الى التدوين ، علما و انّ فترة غيابه عن التدوين لا تتعدى الشّهر الواحد . شهر واحد و صاح القوم ...و اااااعاشوراه ...انجدنا انقذنا ... اجريييلنا رانا اتخذنا ...

و كأنّ الشقي عاشور يمتلك العصا السحرية التي ستخرجهم من انابيب الصرف الصحّي الى النور ، و كأن عاشور يمتلك الحكمة و سيحقق المعجزات ( يظنون ايضا انّه قادر على تغيير مجرى التاريخ)، و كأن عاشور سيقوم بمحو كل ما له علاقة بالعروبة و الاسلام من هذه الارض ، وهم لا يعلمون انّه نفسه غير قادر على محو عقده النفسية (او التقيّحات النفسية التي يعاني منها على حدّ قوله) فضلا عن تخليصهم جميعا من عقدهم و امراضهم النفسية المزمنة.
التبرير و التفسير الوحيد الذي وجدته لهذه المناشدة هو انّهم بحاجة لمن يتلقّى الضرب عوضا عنهم ، وهو الخبير في فنون صحة الرقعة و قلة الحياء و انعدام المصداقية و التلوّن بكل الالوان الزائفة.

و من المؤشّرات الطيبة كذلك انو جماعة الجرذان اتفضحو و فاحت ريحتهم و ما قعدلهم كان السبّان و الكلام الزايد ، نعرف واحد جربوع منهم يسبّ الجميع دون استثناء ، يسبّ في الليل و في النهار و يوم الاحد ، يسبّ في التوالات و قدام التلفزة ، يسبّ قبل ما يرقد و مبعد ما يقوم ، و يصطنع التعليقات الانونيم ليقوم باطلاق العنان لغريزته الحيوانية في السبّ و الشتم .
انا نعذرو المسكين ، لأنو حسب مافهمت من عديد التعليقات يعاني من ازمة نفسية و عقد يصعب حلّها و لو انو نستغرب وجود مثل هذه العقد في مجتمع كيما المجتمع التونسي اللي ماعندوش ماضي في المجال هذا.

و في الختام انا زادة نوجّه نداء الى عاشور ، نطالبو بالعودة السريعة ، و نقلو ارجع يا عاشور ماتخافش ، ارجع عليك امان الله ، ارجع و نوعدك باستقبال الابطال .

مهرجان الحميـــر

noreply@blogger.com (Clandestino) — Thu, 23 Jul 2009 20:36:00 +0000

فرصة للحمير كي تسمع اصواتها (بكل حرية) حتى و لو كانت من انكر الاصوات

ابشروا ...يا أهل قفصة

noreply@blogger.com (Clandestino) — Tue, 21 Jul 2009 20:06:00 +0000

حسب صحيفة الشروق متاع نهارة الاحد (19/07/2009)، قالك السيّد وزير الشباب و الرياضة عمل رحلة مكوكية في ربوع ولاية قفصة و تجوّل بين مختلف المعتمديات و المناطق ، جايب معاه "حقيبة مالية" بـ 5 مليارات مليم ( اينعم خمسة مليارات بالتمام و الكمال مليم ينطح ملّيم) لإنجاز عدد من المشاريع لفائدة شباب الرديف و المتلوي و المظيلة و أم العرايس ، و بناء "دور شباب عصرية و ملاعب معشبة و مسابح " ... و قالك كذلك اللي المشاريع هذية حقيقة موش مجرد كلام خاصّة أنو وقتنا توة ماعادش وقت "دار الشباب الجامدة" اللي "تطغى على انشطتها الصبغة الرسمية و الخطابات الصعبة الفهم" و الشاب اليوم في حاجة "للانترنات و القنوات التلفزية العالمية و الرياضات الأنيقة مثل التنس و السباحة" ، و لذلك باش يتمّ توسعة دور الشباب و تعصيرها و تجهيزها بشاشات بلازما من الحجم الكبير و توفير الارتباط لكل القنوات التلفزية بما فيها المشفرة ، و باش يتمّ توفير الانترنات (متاع زوز ميغابيت في الثانية) بـ100 مليم الساعة...
و تم الاعلان كذلك عن انتداب كل خريجي شعبة التربية البدنية اصيلي الجهة بداية من السنة الدراسية القادمة ، و هاذية بصراحة و بدون (درجة ثانية) بشرى حقيقية للعديدين .

فمة بعض الحاقدين اللي يصطادوا في المياه العكرة اللي ربما يقولوا اللي الخمسة مليارات - لا قدّر الله -شويّة و ما تكفيش لإتمام كل المشاريع اللي ذكرتها ، هذوكم ما نجّم كان نوجّهلهم نصيحة من نصائح الدكتور عبد العزيز الجريدي باش يمشيوا يتمسّحوا على عتبات السفارات الاجنبية و يمارسوا الدعارة الحقوقية بعيد على بلادنا .

فـبالرغم من كون ّ جمعيات متاع كورة كيما الترجي او النجم عندها ميزانيات تتجاوز الحقيبة المالية متاع الحوض المنجمي ، و رغم ما يشاع عن بعض الناس اللي (و العلم لله) يصرفوا الخمسة مليارات هاذم في تبحيرة في جزر المحيط و شويّة كراهب ، او ما بلغنا من بعض الاطراف المشبوهة اللي فمة واحد تونسي شرى دار في امريكا الشمالية بـ 2 مليارات و نصف بحساب الدولار ،
فالخمسة مليارات مبلغ معتبر و كبير ، انا مثلا - و العياذ بالله من كلمة انا - مانتذكرش نهار مشيت للبانكة نلقى في الصولد متاعي مليار ، و نتحدّى اي من المدوّنين او القرّاء عاش التجربة (الرهيبة ) هاذي و كذلك الامر بالنسبة لغالبية الشعب الكريم ..
المليارات هاذية لعبة كبيرة برشة تتجاوزنا و تتجاوز اهالينا في الحوض المنجمي المساكين اللي خرجوا يصفقوا و يزغردوا (دائما حسب الجريدة ) احتفاء بالـحقيبة التاريخية .
لهنا عندي ملاحظة ربما تبدو للبعض شكلية و هي علاش يخليو 4 معتمديات في خمسة مليارات ؟؟ كيفاش باش يحسبوها ؟؟ كيفاش باش يقسموها ؟؟ لذلك نقترح اضافة معتمدية خامسة لاقتسام الحقيبة المالية ، لتسهيل الحساب و اضفاء مزيد الشفافية ... بحساب مليار لكل منطقة و ربي ينزّل البركة ... خاصة و انو الحكاية موش باش تفرّق برشة لعباد عاشوا اكثر من خمسين سنة في الميزيريا المزمنة.

اول قدم تطأ القمر ماكانتش تلبس شلاكة

noreply@blogger.com (Clandestino) — Mon, 20 Jul 2009 21:59:00 +0000

كان العرب اثناء اوقات فراغهم (وهي كثيرة) يتأملون السماء و يتغنّون بالليل و النجوم و القمر و يطلقون عليه الاسماء العديدة و يصفون به الحسنوات من نساء ذلك الزمان (اما حسنوات هذا الزمان فلا يعترفن بغير اقمار النايلسات و الهوتبيرد و بُـدور روتانا و نجوم الستاراك بمختلف نسخها ) .
و من ذلك ما قاله امرئ القيس الشاعر الجاهلي المعروف ( يصف الليل و شدة سواده):" فيا لك من ليل كأنّ نجومه بكل مغار الفتل شدّت بيذبل"
و ما قاله احد الشعراء الصعاليك بعد ذلك بأكثر من ألف عام :" يا نجوم الليل الضواية ... انا عندي معاك الف حكاية ... و كلام طويل"
(لاحظوا تطوّر الصورة الشعرية و عمق المعاني في نمط شعر المزاودية مقارنة بـالشعر الجاهلي و التفوّق الواضح لصاحب نجوم الليل الضواية على صاحب المعلقة بدليل شهرته الكبيرة لدى شباب البيزا و الكراب و الدانات و الدليس الممزوج)
فالعرب اذن لم يكونوا ( بقر الله في زرع الله) في علوم و تكنولوجيات الفضاء كما يشاع عنهم ، بل كانوا سباقين في هذا المجال و في مجالات اخرى (ذات صلة) ، فهم يتصدرون العالم في عدد المنجمين و العرافين و السحرة و يحتلون مناصب بارزة في اهم الاتحادات و المجالس الفلكية المحلية و الاقليمية و حتى العالمية ، كما انّ البرنامج الفضائي لأمة الـ300 مليون يعبتبر الاقدم و الاهم من نوعه في العالم ، وهو يختصّ اساسا في رصد الهلال و توحيد اوقات الآذان بين الدول و إيجاد القبلة من أيّ مكان على وجه البسيطة .
اما استكشاف المريخ و الزهرة و كواكب المجموعة الشمسية و الرحلات المأهولة الى القمر او غيره فلم تكن يوما من اولويات البرنامج الفضائي العربي ، فهذه (حكاية فارغة) لا جدوى منها و من الاجدر تركها للأمم الاقل شأنا.
لذلك كان من الطبيعي انّ اوّل قدم تطأ القمر قبل اربعين عاما لم تكن قدما عربية بل كانت اقداما امريكية (اصيلة) حققت ما تغافل عنه العرب اثناء قرون الماكلة و النوم و التغني ببدر البدور و الجازية و قمر ليلة اربعطاش.
يومها ( 20 جويلية 1969) قال نيل ارمسترونق قولته الشهيرة "انها خطوة صغيرة لإنسان ...و قفزة عملاقة للإنسانية" ولم يذكر ريتشارد نيكسون و لم يشر اليه لا من قريب و لا من بعيد ، و في هذا دليل آخر على انّ ارمسترونق لا يحمل في عروقه اي قطرة من الدماء العربية و الا لكان شكر و اثنى و نوّه و أشاد بالرعاية الموصولة من لدن ولي النعم اللذي لولاه لما كان في ذلك المقام.

اثر أوّل قدم بشرية على القمر و يمكن التأكد من عدم وجود اثار تكركير شلاكة عربية من النوع الرفيع

و رغم ما سمعناه عن انّ القصّة برمّتها إشاعة و كذبة محبوكة و (مونتاج ) مفبرك في ستوديوهات هوليوود ، و رغم ما اشيع عندنا عن قصة الدرين (مرافق ارمسترونق) اللذي سمع الآذان على سطح القمر و اعتنق الاسلام و ابقى الامر سرا خوفا من اغتياله من طرف الصهيونية العالمية (الحاقدة) فمن غير المنصف و غير المعقول عدم الاقرار بالتأخّر البسيط اللي تمرّ به الصناعة الفضائية العربية ،
خصوصا و أنّ النادي االفضائي لم يبق حكرا على الكوسمونوت الروس و الأسترونوت الامريكان بعد دخول التايكونوت المايد اين شاينا على الخط .
لذلك اوجّه نداء الى وكالة الفضاء العربية ان تنظر بأكثر جدية الى مسألة البعثات المأهولة الى الفضاء ، كما اناشد الهيأة المذكورة ان تعفي القردة و الكلاب من عناء التجارب الاولية ، و أن ترسل البعض من عصابة الـ22 (او جميعهم) في اولى الرحلات التجريبية ... اللي ماذابينا تكون الى ما وراء الشمس باعتبار الخبرة الطويلة لسيئي الذكر في مجالات ماوراء الشمس من سجون و اقبية (سيلون) و ما الى ذلك .

في طريقهم الى ما وراء الشمس