Mypoems-ನನ್ನ ಕವನಗಳು

ಮೌನ ನಂಬಿಕೆ

2026-11-01T05:33:48.949-08:00

ದೇವಾ!, ನಿನ್ನ ಯೋಜನೆ ಬಲ್ಲವರಾರು?

ಅದು ಸಮಯೋಚಿತವಾಗೇ ಇರುವುದು.

ಕೆಲವು ಸಮಯಗಳಲ್ಲಿ,

ಜೀವನದ ಪಯಣದ ಹಾದಿಯಲ್ಲಿ,

ಪ್ರಕ್ರಿಯೆಯ ದಾರಿಯಲ್ಲಿ

ನೋವುಗಳು, ಕಠಿಣ ಸವಾಲುಗಳಿರುವುದು,

ಆದರೆ ಎಂದಿಗೂ ಮರೆಯದಿರು,

ನಿನ್ನ ಕೂಗು, ನಿನ್ನ ಪ್ರಾರ್ಥನೆ

ದೇವರಿಗೆ ಕೇಳಿಸುತ್ತಿಲ್ಲವೆಂದು ಕಂಗೆಡದಿರು.

ದೇವರ ಮೌನವೆಂದರೆ

ನಿನ್ನ ಬಗ್ಗೆ ಗಮನವಿಲ್ಲವೆಂದಲ್ಲ,

ನಿನಗಾಗಿ ಮಹತ್ತಾದದ್ದನ್ನು

ರೂಪಿಸುತ್ತಿದ್ದಾರೆಂಬ ಸಂಕೇತ.

ತಾಯಿನಾಡಿನ ಘನತೆ

2026-10-11T01:03:19.460-07:00

ವರುಷಗಳೇ ಉರುಳುವುವು ಯಾರಿಗೂ ಕಾಯದೆ,

ನನ್ನ ದೇಶದ ಘನತೆ, ಗೌರವ ಎಂದೂ ಮಾಸದಿರಲಿ.

ನನ್ನ ದೇಶದ ಆತ್ಮ, ಅದು ಸನಾತನ, ನಿತ್ಯ ನೂತನ,

ತಾಯಿ ಭಾರತೀಯ ಹೆಮ್ಮೆ, ಘನತೆಯ ನಾವು ಕಾಯುವ.

ದೇಶ ದ್ರೋಹಿಗಳು ಹಲವಾರು ಇಹರು ಇಂದು ಇಲ್ಲೇ,

ಉಪ್ಪು ತಿಂದ ಮನೆಗೆ ಎರಡು ಬಗೆಯಲು ಸದಾ ಮುಂದು.

ಅವಳ ಕರುಣೆ ನಮ್ಮ ಮೇಲಿರಲಿ ಅವರ ಸದೆಬಡಿಯಲು,

ಪ್ರಾಣ ಇಂದೇ ಮುಡಿಪು, ಅವಳ ಗೌರವ ಕಾಪಾಡಲು.

ಇಂದು ಇಹರು ದೇಶ ಪ್ರೇಮಿಗಳಿ ಅವಳ ಕಾಯುತಾ,

ಸಮಯ ಒದಗಿ ಬರಲು ಪ್ರಾಣವನೇ ನೀಡುವರು.

ತಾಯ ಸೇವೆಗೆ ಸದಾಸಿದ್ಧ, ಹೃದಯದಲಿ ಕಾಣ್ವರೂ,

ದೇಶದ್ರೋಹಿಗಳ ಮುಖವಾಡ ಕಳಚಿ, ಘರ್ಜಿಸುವರು.

ಸಂತಸದ ಹೆಜ್ಜೆಗಳು

2026-10-11T00:26:48.551-07:00

ಬಾ ಜೊತೆಯಾಗಿ ನಲಿಯುತಾ ಹೆಜ್ಜೆ ಹಾಕೋಣ,

ಕೈ ಹಿಡಿದು ಗುನುಗುತ್ತಾ ನಗುತ್ತಾ ಮಾತಾಡೋಣ.

ಜೀವನ ಜಂಜಾಟದಲ್ಲಿ ಕಷ್ಟ-ನಷ್ಟಗಳು ಇದ್ದದ್ದೇ!,

ಈ ದಿನ ಎಲ್ಲವ ಮೂಲೆಗುಂಪಾಗಿಸಿ ನಲಿಯೋಣ.

ತಲೆಯಲ್ಲಿ ತುಂಬಿದೆ ನೂರೆಂಟು ಗಂಟು-ಮೂಟೆ,

ಯಾವುದೂ ಪ್ರಯೋಜನಕ್ಕೆ ಬಾರದ ಘನ ಕಸವದು.

ನೆಮ್ಮದಿಯ ಹಾಳುಮಾಡಿ, ಸಿಹಿ ನಿದ್ದೆ ಕೆಡಿಸುವುದು,

ಜೀವನ ಪ್ರೀತಿಯ ಕಸಿದುಕೊಂಡು ರಕ್ತ ಹೀರುವುದು.

ಮನದ ಕೊಳೆಯನ್ನೆಲ್ಲಾ ಧ್ಯಾನದಿ ತೊಳೆಯೋಣ,

ಹೊಸದಿನ, ಹೊಸಬಗೆಯಲಿ ನಗುತಾ ನಲಿಯೋಣ,

ನವರಾತ್ರಿಯಲ್ಲಿ ತಾಯ ಆಶೀರ್ವಾದ ಪಡೆಯೋಣ,

ನಮ್ಮೆಲ್ಲಾ ನೋವು-ನಲಿವುಗಳ ಸಮದಿ ಸವಿಯೋಣ.

ಮಧುರವೋ? ನೋವೋ?

2026-09-27T07:20:02.824-07:00

ಇದೆ ಜಾಗವಲ್ಲವೇ?

ನಾನು ಇಲ್ಲಿಯೇ ಬಿದ್ದದ್ದು,

ಜ್ಞಾನ ತಪ್ಪಿದ್ದು,

ಮತ್ತೆ ಜೀವನದಲ್ಲಿ ಏಳಲಾರದೆ ಪರಿತಪಿಸಿದ್ದು,

ಇದೆ ಉದ್ಯಾನವಲ್ಲವೇ?

ನಾ ಇಷ್ಟ ಪಟ್ಟಿದ್ದು?

ಇಂದೇಕೆ ಮನವು ತೊಳಲುತ್ತಿದೆ,

ಸಂತಸ ಮಾಯವಾಗಿದೆ,

ಕಾರ್ಮೋಡ ಬೆನ್ನು ಹತ್ತಿದೆ,

ಓ! ಇದೇ ಹೂವಿಗೆ ಮನ ಸೋತಿದ್ದು,

ಅದರ ಬಣ್ಣ, ಪರಿಮಳ ಮನ ಸೆಳೆದಿತ್ತು,

ಅದರ ಹೆಸರ ಹುಡುಕುತ್ತಾ ಅಲೆಮಾರಿಯಾದೆ,

ಹುಡುಕುತ್ತಾ. ಹುಡುಕುತ್ತಾ ಎಡವಿ ಬಿದ್ದೆ,

ಎಲ್ಲವು ನೆನಪಾಗಿದೆ, ಮಧುರವೋ? ನೋವೋ?

ಮನದ ಪಯಣ

2026-09-27T07:02:46.285-07:00

ಓ! ಈ ದಾರಿ ಮನದಲ್ಲಿ ನೆಲೆ ನಿಂತಿದೆ,

ಮುನ್ನಡೆಯುತಿರೆ ಸಂತಸ ಉಕ್ಕುವುದು,

ಅವ್ಯಕ್ತ ಭಾವ ಹೊಮ್ಮುವುದು ಹೃದಯದಿ,

ಎಂದೋ ಕಂಡ ಸಂತಸ, ಪಟ್ಟ ರೀತಿ ಅನನ್ಯ,

ಏನೋ ಸೆಳೆತ, ಹಗುರ ಹೃದಯದಲ್ಲಿ ಪುಳಕ,

ಪಯಣವೋ!, ಹಾರಾಟವೋ! ಎಲ್ಲವೂ ಸುಲಲಿತ,

ನಿನ್ನೆ ನಡೆದುಹೋದೆನೆಂಬ ಪರಿಚಯದ ಬಿಂಬ,

ಸಾಗುತ್ತಾ, ಸಾಗುತ್ತಾ ದಣಿವರಿಯದ ಪಯಣ,

ಮನದಲ್ಲಿ ಹಾಸುಹೊಕ್ಕಾಗಿದೆ ಸಂತಸದ ಪಯಣ,

ಎಲ್ಲಾ ಪಯಣವೂ ಹೀಗೆ ಇರಲಿ ಮಧುರ,

ಪಯಣದ ಆಯಾಸವಿಲ್ಲ, ಬೇಸರವಿಲ್ಲ,

ಸಂತಸ ಬಿಟ್ಟು ಬೇರೇನೂ ಅಲ್ಲಿ ಇರಲಿಲ್ಲ,

ಈ ದಾರಿ, ಈ ಪಯಣ ಅತಿ ಮಧುರ, ಅನಂತ.

ಗಣೇಶನ ಆಗಮನ

2026-09-27T06:52:18.065-07:00

ಬಾ ಗಣೇಶ, ಪ್ರತಿ ವರುಷದಂತೆ

ಬಾದ್ರಪದ ಮಾಸ ಶುಕ್ಲ ಚೌತಿಯಂದು,

ನೀ ಬಂದು ನಮ್ಮ ಹರಸು,

ನೀ ಬಂದು ನಮ್ಮನ್ನೆಲ್ಲಾ ಒಗ್ಗೂಡಿಸು.

ಅಮ್ಮನ ಕರೆದೊಯ್ಯಲಿ ಏಕಿಷ್ಟು ತವಕ,

ನೀ ಬರಲು ಸಂತೋಷ, ಸಡಗರ ನಮಗೆ,

ಮೂರು, ಐದು, ಏಳು ಇಪ್ಪತ್ತೊಂದು ದಿನ,

ನಮ್ಮ ಜೊತೆ ನೀ ನೆಲೆಸಿರುವೆ ಬಂಧುವಾಗಿ.

ಸಂಬಂಧಗಳ ಗಟ್ಟಿಗೊಳಿಸಲು ನೀ ಬಾ,

ನಮ್ಮ ಕಷ್ಟ ಕೋಟಲೆಗಳ ಕಳೆಯೆ ನೀ ಬಾ,

ವಿಘ್ನಗಳ ಪರಿಹರಿಸಿ ದಾರಿಯ ನೀ ತೋರು ಬಾ,

ಸಮಾಜದ ಸಾಮರಸ್ಯ ರಥವನೇರಿ ನೀ ಬಾ.

ಬರುವಾಗ ನೀ, ಜೊತೆ ಮಳೆಯ ಕರೆ ತಾ,

ಈ ಭುವಿಯ ತಂಪಾಗಿಸು, ಸಂತೈಸು ಬಾ,

ಹೊಸ ಯೋಚನೆಗೆ ಸ್ಫೂರ್ತಿಯಾಗಿ ಬಾ,

ಸಾಧನೆಗೆ ಶಿಲ್ಪಿಯಾಗಿ ಮನದೊಳು ನಿಲ್ಲು ಬಾ.

ರಾತ್ರಿ ಊಟ: ಧ್ಯಾನ

2026-08-02T09:22:44.760-07:00

ರಾತ್ರಿ ಊಟ ಮಾಡುವಾಗ ....

ಶಾಂತಿಯುತ ವಾತಾವರಣವಿರಲಿ,

ಸಂಜೆ ದೇವರ ಬಳಿ ದೀಪಗಳ ಬೆಳಗಿಸಿ,

ಹಿತವಾದ ಸಂಗೀತ ಮನಸ್ಸಿಗೆ ಕೇಳಲಿ,

ಊಟದ ಮೇಜಿನ ಬಳಿ ವಾದ ವಿವಾದ ಬೇಡ,

ಆಹಾರವನ್ನು ನಿಧಾನವಾಗಿ ಸೇವಿಸಿ, ಧ್ಯಾನದಂತೆ

ನಿಧಾನವಾಗಿ ಚೆನ್ನಾಗಿ ಅಗಿಯಿರಿ,

ಸದಾ ಧನಾತ್ಮಕತೆಯ ಚರ್ಚಿಸಿ,

ತಿಂದ ಆಹಾರ ದೇಹಕ್ಕೆ ಮುದ ನೀಡುವುದು.

ಪ್ರೇರಣೆ: ಅಸಿತ್ ಕುಮಾರ್ ಸನ್ಯಾಲ್

ಮೂರು ದಿನದ ಸಂತೆ

2026-07-25T04:17:20.274-07:00

ಹಲವು ವರ್ಷಗಳ ಕಠಿಣ ಪರಿಶ್ರಮ,

ಸಾಧಿಸಿದೆನೆಂಬ ಹುಸಿನಗೆಯ ಭ್ರಮೆ,

ನೀಲಿ ಆಕಾಶದಲ್ಲಿ ನೆಟ್ಟ ಕಣ್ಣುಗಳು,

ಹಿಂದೆ ಬಿಟ್ಟುಬಂದ ಅನೇಕ ನೆನಹುಗಳು.

ನಾನು ಇಲ್ಲಿಗೆ ಹೇಗೆ ಬಂದೆ?

ಗಳಿಸಿದ್ದು ಇಷ್ಟೊಂದು ಭ್ರಮೆ,

ಕಳೆದುಕೊಂಡದ್ದು ನೂರರಷ್ಟು,

ಈ ಬದುಕು ಮೂರು ದಿನದ ಸಂತೆ.

ಆದರೂ ಮನದಲ್ಲಿ ಶೂನ್ಯಭಾವ,

ಸಂತೋಷವಿಲ್ಲ, ಶಾಂತಿಯಿಲ್ಲ,

ಏಕಾಗಿ ಈ ಜೀವನ ಪ್ರಶ್ನೆ ಕಾಡಿದೆ,

ಏಕಾಗಿ ಇಲ್ಲಿಗೆ ನಾ ಬಂದೆ, ಉತ್ತರವಿಲ್ಲ.

ನಿನ್ನೆ, ಇಂದು, ನಾಳೆ

ಮೂರು ದಿನಗಳಲ್ಲಿ ಕಳೆದು ಹೋದೆವು,

ಮುಂದೆ ಏನು ಪ್ರಶ್ನೆಗೆ ಉತ್ತರ ಹುಡುಕುತ್ತಾ,

ಇಲ್ಲಿ ಎಲ್ಲರೂ ನಮ್ಮಂತವರೇ, ದಾರಿ ಕಾಣದವರು.

ವಿರಾಮ

2026-07-18T23:46:33.816-07:00

ರಾತ್ರಿ ಬೆಳಗು ಕಾಣದ ದರ್ಶನಗಳ ಅನಾವರಣ,

ಸಂತೋಷ ಬಿಟ್ಟು ಭ್ರಮೆಯ ಹಿಂದೆ ನಾವು,

ಕನಸ ಕಾಣುತ್ತಲೇ ಜೀವನ ಸವೆಸಿದವರು,

ವಾಸ್ತವವ ಅರಿಯದೆ ಕಣ್ಣೀರಿಡುವವರು.

ಅಲ್ಲೂ ಇಲ್ಲದೆ, ಇಲ್ಲೂ ಇಲ್ಲದೆ,

ನಡುವೆ ನರಳುವವರು ನಾವು,

ಜೀವನ, ಭ್ರಮೆಯ ನಡುವೆ ನಾವು,

ಆಯ್ಕೆ ಗೊಂದಲ ನರಕ ಯಾತನೆ.

ಎಲ್ಲವ ಬಿಟ್ಟು ನಡೆಯಲು ವ್ಯಾಮೋಹ,

ಎಲ್ಲವ ಇಟ್ಟು ನಡೆಯಲು ಸ್ವಾರ್ಥ,

ಎರಡೂ ಇರದೆ ಬರಿಗೈ ದಾಸರು,

ಸಾವು, ಬದುಕಿನ ನಡುವೆ ವಿರಾಮ.

ಹುಡುಕಾಟ

2026-07-18T23:33:31.716-07:00

ನನ್ನ ನಾನು ಹುಡುಕುತ್ತಿದ್ದೇನೆ,

ನನ್ನೊಳಗೆ, ಹೊರಗೆ,

ನಾನು ಯಾರು? ಏಕಿಲ್ಲಿ?

ಭ್ರಮೆಯ ಪ್ರಪಂಚದಲ್ಲಿ ಏಕಾಂಗಿ!.

ಉದ್ದೇಶಗಳ ಮರೆತಿರುವೆ,

ದಾರಿ ಕಾಣದೆ ಅಲೆಯುತ್ತಿರುವೆ,

ನೀರ ಸುಳಿಯಲ್ಲಿ ಸಿಲುಕಿರುವೆ,

ಬಂದು ಹೋಗುವ ಆಟದಲ್ಲಿ.

ಎಷ್ಟು ಯುಗಗಳೋ ತಿಳಿಯೆ?,

ಜ್ಞಾನವಿಲ್ಲದೆ ಅಲೆದಿರುವೆ,

ಯಾರ ಬರುವಿಕೆಗೆ ಕಾಯುತಿಹೆ?

ಬಲ್ಲವರಿಲ್ಲ ನಾ ಏಕಾಂಗಿ.

ಒಳಗೊಂದು ಆಶಾಕಿರಣ,

ಜ್ಞಾನೋದಯವಾಗುವುದೆಂದು,

ಎಲ್ಲಿ?, ಯಾವಾಗ?

ಸಮಯವೇ ಉತ್ತರ ಕೊಡಬೇಕಿದೆ.

🎶 ಎಸ್. ಜಾನಕಿ - ಭಾವಗಳ ಕೋಗಿಲೆ

2026-07-12T09:33:28.441-07:00

ಬೆಳಗಿನ ಜಾವ ಮೌನದಿ ನಿಮ್ಮಯ ಹಾಡು ಕಣ್ಣ ತೆರೆವುದು,

ಕಾಲಾತೀತ ಪರಿಮಳ ಹೊತ್ತ ಸೌಮ್ಯ ತಂಗಾಳಿಯಂತೆ.

ಮಲ್ಲಿಗೆಯ ಸುಗಂಧ, ಮನೋಹರ, ಶುದ್ಧ,ಕೋಮಲ,

ಆತ್ಮಗಾನ ಲಹರಿ ಹರಿಗರ್ಪಿತವದು ಹೃದಯ ಶರಣಾಗುವುದು.

ನಿಮ್ಮ ಪ್ರೀತಿಯ ಹಾಡು, ನೋವಿನ ಹಾಡು,

ಮಧುರ ಗಾನ ನೋವ ತಣಿಸುವ ಅಮೃತಗಾನ.

ಪ್ರತಿ ಆಲಾಪನೆ ಹೃದಯದ ಪ್ರಾರ್ಥನೆ,

ಮನಕೆ ನೆಮ್ಮದಿ ಗಾನ ಸರಸತಿಯ ಪಿಸುಮಾತು.

ನಿಮ್ಮ ಧ್ವನಿ ಕೋಗಿಲೆಯ ಗಾನದಂತೆ,

ಕೃಷ್ಣನ ಮಧುರ ಮುರಳಿ ನಾದದಂತೆ.

ನಿಮ್ಮ ಹಾಡ ಕೇಳಿ ಬೆಳೆದೆವು, ಕನಸ ಕಂಡೆವು,

ನಿಮ್ಮಂತೆ ಹಾಡ ಬಲ್ಲವರು ಯಾರಿಹರು?.

ಓ ಜಾನಕಿ, ಕೋಗಿಲೆ ಕಂಠದ ಗಾಯಕಿ,

ನಿಮ್ಮ ಕಂಠದ ಸಂಗೀತ ಕಿವಿಯಲಿ ನಲಿಯಲಿ.

ಮನದಲಿ ನಿಮ್ಮ ಮಧುರ ಗಾನ ಅಮರವಾಗಲಿ,

ನಾವು ಧನ್ಯ, ನೀವು ಅಮರ, ನಿಮ್ಮ ಹಾಡು ಅಮರ.

ಜೀವನ ನಾಟಕ

2026-07-10T23:10:06.714-07:00

ಬೆಳ್ಳಂ ಬೆಳ್ಳಿಗೆ ಕಣ್ಣು ತೆರೆವುದು,

ಹಳ್ಳಿಗಳಿಂದ ಬರುವ ತರಕಾರಿ,

ಹಣ್ಣು, ಹೂವು ಮಾರಾಟದ ಮಳಿಗೆ,

ಜೀವನದ ಹಾದಿಯ ಪಯಣ ನಿರಂತರ.

ಕೆಲವರಿಗೆ ದಿನದ ಹೊಟ್ಟೆಪಾಡು,

ಮತ್ತೆ ಕೆಲವರಿಗೆ ಹಣ ಮಾಡುವ ದಂಧೆ,

ಮತ್ತೆ ಕೆಲವರಿಗೆ ಜೀವನ ಪ್ರೀತಿ,

ಮತ್ತೆ ಕೆಲವರಿಗೆ ಮೋಸ ಮಾಡುವ ಚಾಕರಿ.

ನಗರದ ಅಂಗಡಿ ಬೀದಿಗಳು,

ಬೀದಿ ದೀಪಗಳು, ಕಟ್ಟಡಗಳು,

ದಿನವೂ ನಾಟಕ ನೋಡಿ ನೋಡಿ,

ನಗುತ್ತಿವೆ ಮಾನವನ ಪಾಡು ಕಂಡು.

ಕೆಲವು ಮುಖಗಳಲ್ಲಿ ರಾಕ್ಷಸತನ,

ಕೆಲವು ಮುಖಗಳು ಹಸುಳೆಗಳು,

ಮತ್ತೆ ಕೆಲವು ಕಾಡು ಮೃಗಗಳು,

ಮತ್ತೆ ಕೆಲವು ನರಿಗಳೇ ಸರಿ.

ಮಳೆಯೇ! ಓ ಮಳೆಯೇ!

2026-07-05T00:55:05.925-07:00

ಮಳೆಯೇ! ಓ ಮಳೆಯೇ!

ಎಲ್ಲಿ ಹೋದೆ ನಾ ನಿನ್ನ ಅರಸುತಿಹೆ,

ಬಂದೆ ಎಂದು ಓಡಿ ಬರುವೆ,

ಮನೆಯ ಆವರಣ 'ಹನಿ'ಸದೆ ಓಡುವೆ,

ಮನೆಯ ಬಾಗಿಲ ತೆರೆದು ಕಾದಿಹೆ,

ಗಾಳಿ ಗೆಳೆಯನ ಕೂಡಿ ಮಾಯವಾಗುವೆ,

ಏಕಿನಂತ ಸಿಟ್ಟು, ಸೊಡರು,

ನಿನ್ನ 'ಗುಟುರು' ಕೇಳಿ ವರ್ಷವಾಗಿದೆ,

ಬರುವೆ ಎಂಬ ಭರವಸೆ ಹಸಿರಾಗಿದೆ,

ಬಾ ಗೆಳೆಯನೇ ಬಾ, ತಂಪಾಗಿಸು ಬಾ,

ಭೂ ತಾಯಿಯ ಮಡಿಲ ಹಸಿರಾಗಿಸು ಬಾ.

ನಾವು ಚೇತನರು

2026-06-28T00:08:36.720-07:00

ಕತ್ತಿಯಿಂದ ತಿವಿದರು,

ಬಂದೂಕು ಗುಂಡುಗಳಿಂದ ಸುಟ್ಟರು,

ದೇವಸ್ಥಾನಗಳ ಲೂಟಿ ಮಾಡಿದರು,

ನಮ್ಮವರ ಸಮಾಧಿಯ ಮೇಲೆ ಅವರ ವೈಭವ,

ಕಾಲ ಎಲ್ಲವ ಮರೆಯಿಸಿದೆ,

ಸೂರ್ಯ ಮತ್ತೆ ಸುಡುತ್ತಿದ್ದಾನೆ,

ನಮ್ಮ ನಾಯಕರು ಕಾಲು ನೆಕ್ಕುತ್ತಿದ್ದಾರೆ,

ಉಂಡ ಮನೆಗೆ ದ್ರೋಹ ಬಗೆವರ ಸಂಖ್ಯೆ ಹೆಚ್ಚಿದೆ,

ನಮ್ಮ ಉಧಾರತೆಗೆ ನಾವು ಬೆಲೆ ತೆರುತ್ತಿದ್ದೇವೆ,

ನಮ್ಮವರಿಂದಲೇ ನಾವು ಕಡೆಗಣಿಸ್ಪಟ್ಟಿದ್ದೇವೆ,

ನಗುವುದ ನಿಲ್ಲಿಸಿದ್ದೇವೆ,

ಪ್ರೀತಿಸುವುದ ಮರೆಯದೇ,

ಬದುಕುವುದ ಮರೆಮಾಚದೆ,

ಅವರು ದ್ರೋಹ ಬಗೆಯುತ್ತಲೇ ಇದ್ದಾರೆ,

ನಾವು ಕಾಯುತ್ತಲೇ ಇದ್ದೇವೆ,

ನಾವು ಬದುಕುವುದ ನಿಲ್ಲಿಸುವುದಿಲ್ಲ,

ನಮ್ಮ ಜೀವನ ಪ್ರೀತಿ ಸಾಯುವುದಿಲ್ಲ,

ಮೆರೆಯುವವರು ನಾಶವಾಗಲಿದ್ದಾರೆ,

ದ್ರೋಹಿಗಳು ಬಂದುಹೋಗುವರಷ್ಟೇ!,

ನಾವು ಅವಿನಾಶಿಗಳು,

ನಾವು ಚೇತನರು.....

ಅನಂತ!

2026-06-27T23:39:51.884-07:00

ಈ ರಾತ್ರಿ ಸುಂದರವಾಗಿದೆ,

ನನ್ನ ಜನರ ಮುಖದಂತೆ,

ರಾತ್ರಿ ತಾರೆಗಳು ಮಿನುಗುತ್ತಿವೆ,

ನನ್ನ ಜನರ ಕಣ್ಣುಗಳಂತೆ,

ಬೆಳಗಿನ ತೇಜ ಸೂರ್ಯ,

ನನ್ನ ಜನರ ಹೊಳೆವ ಆತ್ಮದಂತೆ,

ಶಕ್ತಿ ಎಂದಿಗೂ ಅವಿನಾಶಿ,

ರೂಪ ಮಾತ್ರ ಬೇರೆಬೇರೆ,

ನನ್ನ ಜನರ ಕೀರ್ತಿಯಂತೆ,

ನನಗೆ ಕೊನೆ ಎಂಬುದಿದೆ,

ನಾನು ಅನಂತದಲ್ಲಿ ಅನಂತ,

ನನ್ನೊಳಗೆ ನಾನು,

ಅನಂತದೊಳು ಶೂನ್ಯ,

ನಾನು ನಾನೇ, ಅನಂತದ ಅನಂತ...

ನಾನು ಭಾರತೀಯ!

2026-06-27T23:12:11.042-07:00

ನಾನು ಭಾರತೀಯ!

ವಂದೇ ಮಾತರಂ ಹಾಡುತ್ತೇನೆ,

ಕನ್ನಡ ನನ್ನ ಮಾತೃಭಾಷೆ,

ನಾನು ದಕ್ಷಿಣದವನೆಂಬ ಹೆಮ್ಮೆಯಿದೆ,

ನನ್ನ ಮೈಬಣ್ಣ ಗೋಧಿಬಣ್ಣ.

ಎಲ್ಲ ಭಾಷೆಗಳನ್ನು ಪ್ರೀತಿಸುತ್ತೇನೆ,

ಎಲ್ಲಾ ಜನರನ್ನು ಗೌರವಿಸುತ್ತೇನೆ,

ವೈವಿಧ್ಯ ಸಂಸ್ಕೃತಿಯ ಅರಿವಿದೆ,

ಬಹು ದೇವರ ಪೂಜಿಸುವ ನಾಡು ನನ್ನದು,

ಮಣ್ಣು,ಕಲ್ಲು, ನದಿ, ಮರ, ಗಿಡ, ಎಲ್ಲವು ದೇವರೇ.

ಯಾವುದು ಸತ್ಯವೋ ಅದನ್ನೇ ಪಾಲಿಸುತ್ತೇನೆ,

ಯಾವುದು ನಿತ್ಯವೋ ಅದೇ ಉಸಿರಾಗಿದೆ,

ಯಾವುದು ಅವಿನಾಶಿಯೋ ಅದೇ ನಂಬಿಕೆಯಾಗಿದೆ,

ಯಾವುದು ಶ್ರೇಷ್ಠವೋ ಅದೇ ನಾನಾಗಿಹೆ,

ಶ್ರೇಷ್ಠತೆಯ ಬೆಳಕಿನಲ್ಲಿ ನಾನು ಜ್ಯೋತಿ ಆಗಿಹೆ.

ಜೀವನದ ಹಾದಿ

2026-06-21T08:59:43.994-07:00

ಮಗನೇ, ನಾನು ನಿನಗೆ ಹೇಳುವೆ:

ನನ್ನ ಜೀವನವು ಹೂವಿನ ಹಾಸಿಗೆ ಆಗಿರಲಿಲ್ಲ.

ಅದರಲ್ಲಿ ನೋವಿನ ಒರತೆಗಳಿವೆ,

ಕನಸಿನ ಚೂರುಗಳಿವೆ, ಹೃದಯದಲ್ಲಿ

ಹರಿದುಹೋದ ನೆನಪುಗಳು, ಮಡುಗಟ್ಟಿವೆ

ಕಲ್ಲು ಮುಳ್ಳುಗಳ ನೆಲದ ಕಠಿಣ ನಡೆ—

ಕಾಲು ನೋವಿನ ಭಾರದ ಹೊರೆಯಾಗಿವೆ.

ಎಲ್ಲಾ ಕಾಲದಲ್ಲೂ ನಾನು ಹತ್ತುತ್ತೇನೆ,

ಕಷ್ಟದ ಬೆಟ್ಟಗಳ ಹತ್ತಿ ಇಳಿದಿದ್ದೇನೆ,

ಊರಿನ ಮೂಲೆಗಳನ್ನು ತಿರುಗಿದ್ದೇನೆ,

ಕೆಲವೊಮ್ಮೆ ಅಳುತ್ತಾ ಕತ್ತಲೆಯಲ್ಲಿ ಹೋಗುತ್ತಿದ್ದೆ

ಎಲ್ಲಿ ಬೆಳಕಿನ ಕೊರತೆಯೋ ಅಲ್ಲಿ, ಹೃದಯದಲ್ಲಿ.

ಹುಡುಗ, ನೀನು ಗೆಲುವಿಗೆ ಬೆನ್ನು ತೋರಿಸಬೇಡ.

ನೋವಿಗೆ ಹೆದರಬೇಡ ದೈರ್ಯದಿಂದ ಎದುರಿಸು.

ಗೆಲುವಿಗೆ ದಯೆಯಿಲ್ಲ ಕಠಿಣ ಪರಿಶ್ರಮ ಬಯಸುವುದು.

ಬೀಳಲು ಹೆದರಬೇಡ, ದೈರ್ಯದಿಂದ ಎದ್ದು ನಿಲ್ಲು

ನನ್ನ ಹಾರೈಕೆ ನಿನಗಾಗಿ ಸದಾ ಇದೆ - ಮುಂದೆ ಸಾಗಲು

ಸಾಧಿಸು ನನ್ನ ಕನಸುಗಳ ದೋಣಿಯ ಹತ್ತಿ ಸಾಗು

ನನಸಾಗಿಸುವ ಛಲ ನಿನ್ನಲ್ಲಿರಲಿ - ಗೆಲುವಿನಲ್ಲಿ ನಾನಿರುವೆ.

ಪ್ರೇರಣೆ: ಲ್ಯಾಂಗ್ಸ್ಟನ್ ಹ್ಯೂಸ್

ಕನಸ ಬೆಳೆಯುತ್ತಾ...

2026-06-21T00:19:36.570-07:00

ಬಹಳ ವರುಷಗಳ ಹಿಂದೆ,

ನನ್ನ ಕನಸುಗಳ ಬಹುತೇಕ ಮರೆತಿದ್ದೆ.

ಅದು ನನ್ನ ಮನದಲ್ಲಿತ್ತು,

ನನ್ನ ಕಣ್ಣ ಮುಂದೆ,

ಸೂರ್ಯನಂತೆ ಪ್ರಕಾಶಮಾನ —

ನನ್ನ ಕನಸು.

ಬಂಗಾರ ಬಣ್ಣದ ಕನಸು.

ತದನಂತರ ಮನದ ತಡೆ ಗೋಡೆ ಏರಿತು,

ನಿಧಾನವಾಗಿ ಬೆಳೆದಿತ್ತು,

ನಿಧಾನವಾಗಿ ಗೊತ್ತಾಗದೆ,

ನನಗೂ ನನ್ನ ಕನಸಿನ ನಡುವೆ.

ಆಕಾಶವನ್ನು ಮುಟ್ಟುವವರೆಗೂ ಏರಿತು—

ಗೋಡೆ.

ನೆರಳು.

ಕೈ ಕಟ್ಟಿಹಾಕಿತ್ತು ಕತ್ತಲು.

ನಾನು ಕಪ್ಪು.

ನಾನು ನೆರಳಿನಲ್ಲಿ ಬೆಚ್ಚಗೆ ಮಲಗಿದೆ.

ಕತ್ತಲು ನನ್ನ ಸುತ್ತಲೂ,

ನನ್ನ ಕನಸಿನ ಬೆಳಕು ಮರೆಯಾಗಿತ್ತು,

ಕನಸ ಬೆಳಕು ನನ್ನ ಮುಂದೆ ಇರಲಿಲ್ಲ,

ನನ್ನ ಮನದಲ್ಲಿ ಕಾರ್ಮೋಡ.

ಕಣ್ಣಿಗೆ ಕತ್ತಲ ದಪ್ಪ ಗೋಡೆ.

ಕರಿ ನೆರಳು.

ಮನದಲ್ಲಿ ಅಳುಕು.

ಭಯ.

ಜವರಾಯನ ನೆಂಟತನ ಹತ್ತಿರ.

ಇನ್ನು ಹತ್ತಿರ.

ಭಯಾನಕ.

ಕರಿ ನೆರಳು.

ಕತ್ತಲ ಸಾಮ್ರಾಜ್ಯದಲ್ಲಿ

ತೂರಿ ಬಂದಿತ್ತು ಬೆಳಕಿನ ಸಣ್ಣ ಕಿರಣ.

ಹೊಸ ಭರವಸೆ.

ಹೊಸ ಕನಸಿನ ಹಂಬಲ.

ಮನದಲ್ಲಿ ಕನಸಿನ ಮೊಳಕೆ.

ಕೈ ಕಟ್ಟು ಬಿಚ್ಚಿತ್ತು ಬೆಳಕು.

ನನ್ನ ಕೈಗಳು!

ನನ್ನ ಕತ್ತಲ ಕೈಗಳು!

ಬಿಡುಗಡೆಗೆ ಕಾಯುತ್ತಿತ್ತು.

ಹಾರಲು.

ಗೋಡೆಯನ್ನು ಭೇದಿಸಲು!

ನನ್ನ ಕನಸಗಳ ರೆಕ್ಕೆ ಬಲಿತಿತ್ತು!

ಕತ್ತಲೆಯ ಛಿದ್ರಗೊಳಿಸಿದೆ,

ಕರಿ ನೆರಳ ನುಂಗಿ ಹಸಿವ ನೀಗಿಸಿದೆ,

ಬೆಳಕ ನೀರ ಕುಡಿದು,

ಕನಸ ನೀರಡಿಕೆ ಬಸಿದು,

ನಭಕ್ಕೆ ಹಾರಿದೆ,

ಮನದ ಅಂಕುಶಗಳ ಕುಟ್ಟಿ,

ಕನಸ ಬೆಳಕಿನ ಕಡೆಗೆ.

ಮುನ್ನುಗಿದೆ.

ದಣಿವಿಲ್ಲದೆ.

ನನ್ನ ಕನಸುಗಳ ಮಡಿಲಿಗೆ.

- ಪ್ರೇರಣೆ: ಲ್ಯಾಂಗ್ಸ್ಟನ್ ಹ್ಯೂಸ್

ಕನಸು

2026-06-20T23:40:59.362-07:00

ಕನಸುಗಳ ಬಿಗಿದಪ್ಪಿ,

ಉಸಿರಾಗಿಸಿಕೊಳ್ಳೋಣ.

ಕನಸು ನಮ್ಮಯ ಪ್ರಾಣವೇ,

ಕನಸಿಲ್ಲದ ನಾವು ಹೆಣವೇ!

ರೆಕ್ಕೆಗಳು ಬೇಕು,

ಹಕ್ಕಿ ಹಾರಲು,

ಕನಸುಗಳು ಬೇಕು,

ನಾವು ಬಾಳಲು.

ಕನಸುಗಳ ಬಿಗಿದಪ್ಪಿ,

ನಮ್ಮದಾಗಿಸಿಕೊಳ್ಳೋಣ.

ದೊಡ್ಡ ಕನಸುಗಳ ಬೆನ್ನಹತ್ತಿ,

ಆಗಸದಲ್ಲಿ ತೇಲೋಣ.

ಕನಸೇ ಬಾ!, ನನ್ನನಪ್ಪು,

ನಿದ್ದೆಯ ಕೆಡಿಸಿ ನನ್ನನೊಪ್ಪು.

ತೇಲುತ ಆಗಸದಿ ಸಂತಸಬಡು,

ನನಸಾಗಿಸುತ ಜೀವಕ್ಕೆ ಸಂತಸಕೊಡು.

ನಗುವಿನ ನದಿ

2026-06-20T23:03:27.890-07:00

ಮನಸ್ಸು ನಿರ್ಮಲ, ನಿರಾಳ ಆಗಸದಂತೆ,

ದಿನವೂ ನಗುತ್ತೇನೆ, ಎದುರಿಗೆ ಬಂದವರ ನೋಡಿ,

ಕ್ಷಣಮಾತ್ರದ ಕ್ರಿಯೆ ಅದು, ಪ್ರತಿಕ್ರಿಯೆಗೆ ಕಾಯದೆ,

ಎದುರು ಬಂದವರಿಗಾಗಿ ನನ್ನ ಹೂ ನಗು, ಸ್ವಾಗತ,

ಕೆಲವರು ನನ್ನ ಮಂದಹಾಸಕ್ಕೆ ನಗುವರು,

ಮತ್ತೆ ಕೆಲವರು ಮುಖ ಗಂಟ್ಟಿಕ್ಕುವರು,

ಮನದಲ್ಲಿ ನೂರು ಕದನವಿದೆ ನಿಲ್ಲದೆ,

ಕದನದ ಪರಿಣಾಮ ಮುಖದಲ್ಲೇಕೆ?

ಮನದಲ್ಲಿ ಮಿಂಚು ಗುಡುಗುಗಳಿರಲಿ,

ಕಣ್ಣಲ್ಲಿ ಹೊಸತನದ ಚೈತನ್ಯವಿರಲಿ,

ತುಟಿಯಂಚಲಿ ಮಿನುಗಲಿ ತಾರೆಯ ನಗು,

ಜಾರಿ ಹೋಗುವ ಕ್ಷಣಗಳ ಆನಂದಿಸುತ್ತೇನೆ,

ಮತ್ತೆ ಅವು ಎಂದೂ ಬಾರವು, ಅವು ಕ್ಷಣಿಕ,

ಮನಸ್ಸು ಕೋಮಲ, ಮಧುರ, ಹರಿವ ನದಿಯಂತೆ,

ನಿರ್ಮಲ ಮನಸ್ಸಿನ ಗಾನ ಲಹರಿ ಹರಿಯಲಿ,

ಹರಿವ ಜಂಜಾಟದಲ್ಲಿ ಕಲರವ ಕಳೆಯದಿರಲಿ.

ಬಾಂದಳದ ತಾರೆಗಳು

2026-06-06T23:23:53.151-07:00

ಬಾಂದಳದಲ್ಲಿ ತಾರೆಗಳ ಹೂ ಅರಳಿದೆ,

ನಗುನಗುತ್ತಲೇ ಕಣ್ಣ ಮಿಟುಕಿಸುತ್ತಿವೆ.

ಮನದ ಬಾಂದಳದಿ ಸಾವಿರ ವಿಚಾರಗಳಿವೆ,

ಅರಳುವ ಮೊದಲೇ ಆತಂಕದಿ ಮುದುಡುತ್ತಿವೆ.

ಆ ತಾರೆಗಳು ಸ್ವತಂತ್ರದಿ ನಗುತ್ತಿವೆ,

ಈ ತಾರೆಗಳು ಬಿಡುಗಡೆಗೆ ಹಪಹಪಿಸುತ್ತಿವೆ.

ಆ ತಾರೆಗಳ ನಿಯಂತ್ರಿಸುವವನಾರೊ?,

ಈ ತಾರೆಗಳ ಬಳಸುತ್ತಿರುವವನಾನೇ!.

ದಾಟಿ ಪರಿಧಿಗಳ ಬಾಂದಳದಿ ನಗುತ್ತಿವೆ,

ದಾಟಲಾರದೆ ಅಂಕೆಶಂಕೆಯಲಿ ನಲುಗುತ್ತಿವೆ.

ಪ್ರಕೃತಿ ತತ್ವಗಳ ಎಲ್ಲೇ ಮೀರುವುದೇ?,

ಅಂಕೇಶಂಕೆಯಲ್ಲಿ ಮಿಂದು ನರಳುವುದೇ?.

ಯಾವ ದಾರಿ ಹುಡುಕುವುದೋ?,

ಯಾರು ದಾರಿ ತೋರುವರೋ?.

ಸಾಧನೆಯ ಹಠಹಿಡಿದು ಹೊರಡುವುದೋ?,

ಅಂಕೇಶಂಕೆಯಲ್ಲಿ ನೊಂದು ಬೇಯುವುದೋ?.

ದಾರಿ ತೋರಬೇಕು, ಬೆಳಕು ಹಾಯಬೇಕು,

ಆ ಕಾಲಕ್ಕೆ ಹಂಬಲದಿ ಕಾಯಬೇಕು.

ಅರಿತು ಪ್ರಕೃತಿ ತತ್ವಕ್ಕೆ ತಲೆಬಾಗಬೇಕು,

ಅಲ್ಲಿಯವರೆಗೂ ಪ್ರಯತ್ನಿಸುತ್ತಲೇ ಇರಬೇಕು.

ಸಿಹಿಮಾತು - ಬಿರುಗಾಳಿ

2026-06-06T21:33:17.090-07:00

ಸಿಹಿಮಾತು, ಸಿಹಿಮಾತು,

ಈ ಎದೆಯು ಬಯಸುತಿದೆ.

ಬಿರುಗಾಳಿ, ಬಿರುಗಾಳಿ,

ಈ ಎದೆಯ ನಡುಗಿಸುತಿದೆ.

ಸಿಹಿಮಾತು, ಸಿಹಿಮಾತು,

ಕರುಣೆಯ ಕಡಲ ಸೇರುವುದು.

ಬಿರುಗಾಳಿ, ಬಿರುಗಾಳಿ,

ಮರಣದ ಭಯವ ತರುವುದು.

ಸಿಹಿಮಾತು, ಸಿಹಿಮಾತು,

ಹೃದಯದ ಹೂವು ಅರಳುವುದು.

ಬಿರುಗಾಳಿ, ಬಿರುಗಾಳಿ,

ಭರವಸೆಯ ದೀಪವ ಆರಿಸುವುದು.

ಸಿಹಿಮಾತು, ಸಿಹಿಮಾತು,

ಜೀವನದ ದಾರಿದೀಪವಾಗುವುದು.

ಬಿರುಗಾಳಿ, ಬಿರುಗಾಳಿ,

ಜೀವನ ಅಲ್ಲೋಲಕಲ್ಲೋಲವಾಗುವುದು.

07.06.2026

ಇರುಳ ನೆರಳಿನ ಪಯಣ

2026-05-31T06:31:24.147-07:00

ಇರುಳ ಕತ್ತಲಿನಲ್ಲಿ ಬಯಕೆಗಳ ಕನಸ ನೆರಳ ಹೆಣೆದೆ,

ರಾತ್ರಿಯ ಪ್ರಶಾಂತ ಕತ್ತಲೆಯ ನೆಲಹಾಸಿನ ಮೇಲೆ,

ಅಸ್ಪಷ್ಟ, ಅಗೋಚರ, ಅಲೆದಾಟ, ತೀರದ ದಾಹ,

ಇರುಳ ಕತ್ತಲೆಯಲ್ಲಿ ನಡೆವ ದಾರಿ ಕಾಣದಾಯಿತು.

ಪ್ರಯಾಣದ ದಾಹ, ಬಾಯಾರಿಕೆ, ಹತಾಶೆ,

ಬಳಲಿಕೆ,ದಾಹ ತಣಿಸುವರೆಂದು ಕಾಯುವಿಕೆ,

ಕಣ್ಣರಳಿಸಿ ನೋಡಿದರೂ ಸುತ್ತಲೂ ಬರೀ ಕತ್ತಲೆ,

ಭಯ ಕತ್ತಲ ಆವರಿಸಿ ದೇಹ ಬೆವೆತಿದೆ ದಾರಿ ಕಾಣದೆ.

ಮುಂದೆ ಹೆಜ್ಜೆ ಇಡುವುದೋ!, ದ್ವಂದ್ವ,

ಮುಂದೆ ದಾರಿ ಕಾಣುವುದೇ!, ಪ್ರಶ್ನಾರ್ಥಕ,

ಮರದ ಬುಡದಲ್ಲಿ ಬೆವೆತು ಮಲಗಿದೆ,

ನಾಳೆಯ ಕರಾಳ ಚಿತ್ರವ ನೆನೆದು ಬೆದರಿದೆ.

ದಾಹ, ಬಳಲಿಕೆ, ತಂಪಾದ ಗಾಳಿಗೆ ನಿದ್ದೆಯ ನಶೆ,

ಕನಸ ಪಯಣದಲ್ಲೂ ಬಯಕೆ ನೆರಳು ಹೆಣೆದಿದೆ,

ಹಕ್ಕಿಗಳಿಂಚರ, ಬೆಳಗಿನ ಮಂಜು ಎಚ್ಚರಿಸಿತು,

ಭಯ ಕರಗಿತು, ಸೂರ್ಯೋದಯ ತೆರೆ ಎಳೆದಿತ್ತು.

ಮೌನ - ಮಾತು

2026-05-30T09:07:06.399-07:00

ಪ್ರೀತಿಯ ಭಾವವ ವ್ಯಕ್ತಪಡಿಸು,

ಮೌನ ಪ್ರೀತಿಯ ಭಾಷೆಯಲ್ಲ,

ಸಮಯಕ್ಕೆ ಮಾತುಗಳ ಜೋಡಿಸು,

ಸಾಂತ್ವನದ ಮಾತುಗಳು ಹೃದಯ ತಟ್ಟುವುವು.

ಹೃದಯ ತೆರೆದು ಮಾತನಾಡು,

ಮಾತುಗಳು ಮಧುರ ಪುಷ್ಪಗಳ ಅರ್ಪಿಸು,

ಮೌನ ಬೇಡ, ಮೌನರಾಗ ಬೇಡ,

ಪದಗಳು ಸಂಗೀತವಾಗಿ ರಾಗ ಮಾಲಿಕೆಯಾಗಲಿ.

ಹೇಳಿಬಿಡು, ಮಧುರ ಮಾತುಗಳಲ್ಲಿ,

ಒಪ್ಪುವುದೋ!, ಇಲ್ಲವೋ!, ಗೊಂದಲಬೇಡ,

ಹೃದಯ ನಿನ್ನದಾದರೆ ಜೊತೆಗೂಡುವುದು,

ಇಲ್ಲವಾದರೆ ಅದೊಂದು ಮರೀಚಿಕೆಯಷ್ಟೇ!.

ನಿನ್ನದೆಂದು ಬರೆದಿರುವುದು ಕಾದಿದೆ ನಿನಗಾಗಿ,

ನಿನ್ನದಲ್ಲದ ಹೃದಯ ನಿನಗೇಕೆ ಹೇಳು!,

ಪ್ರಶ್ನಿಸು, ಹೇಳು, ಕೇಳು, ಬಿಡುಗಡೆಗಾಗಿ,

ಮೌನವಾಗು, ಜೊತೆಗೂಡು ನಿನ್ನದಾದಂತೆ.

ಚಿತ್ತಾರದ ಕನಸು

2026-05-29T22:19:56.051-07:00

ನಿನ್ನ ನೆನಪಿನ ಣೆಯೇರಲು ನನ್ನೊಳಗೆ ಕಾಡುತ್ತಿದೆ,

ಕಾಡುವ ಇರುಳ ಕನಸಿನ ದೇವತೆ ನೀನು,

ಸಂಶಯಾನದ ಮೌನಗೀತೆಯಲ್ಲಿ ನೀ ಪ್ರತಿದ್ವನಿಸುವೆ,

ಕಾಡಿನ ಕಣಿವೆಯ ಮೌನರಾಗವು ನೀನೇನೆ.

ರಾಧಾ-ಕೃಷ್ಣರಂತೆ ಪ್ರೀತಿಸುವ ಬಾ,

ಹೋಳಿಯ ಬಣ್ಣಗಳಲ್ಲಿ ನಿನ್ನ ನಗುವ ಕಂಡೆ,

ಇರುಳು ಎಂದೂ ಮುಗಿಯದಿರಲಿ ಸದಾ,

ಹೃದಯಗಳು ಬೆರೆತು ಸಂಭ್ರಮಿಸಲಿ ಸದಾ.

ನಿದಿರೆ ದೂರಾಗಿ ಹೊಸ ಕನಸುಗಳ ತೆರೆದಿದೆ,

ಕತ್ತಲೆಯ ಭಯ ದೂರಾಗಿ ಹೊಸತನ ಮೇಳೈಸಿದೆ,

ಬೆಳಕಿನ ಚಿತ್ತಾರದಂತೆ ಮನವು ಕುಣಿದಿದೆ,

ನಮ್ಮ ಪ್ರೀತಿ ಹೃದಯದೊಳಗೆ ನರ್ತಿಸಿದೆ.

ನೀ ಮನದಲ್ಲಿ ಹೆಜ್ಜೆ ಇಡಲು ಆನಂದವೇ!,

ಮೈ-ಮನಗಳಲ್ಲಿ ಸದಾ ಸಂತೋಷವೇ!,

ಹೃದಯದ ಮಿಡಿತದಲ್ಲಿ ನೀ ಬೆರೆತುಹೋಗು,

ಉಸಿರಿನ ಕಣ-ಕಣಗಳಲ್ಲಿ ನೀ ಕರಗಿ ಹೋಗು.