PAUL WA PILI BLOG

VIDEO YA MKE WA MAREHEMU GODFREY LWENA, VICTORIA MASSITA AKIBANISHA MUMEWE HAKUWA NA UGOMVI NA MTU

2018-02-26T12:31:00.000+03:00

BREAKING NEWS: MBUNGE WA MBEYA MJINI JOSEPH MBILINYI 'SUGU' AMEHUKUMIWA KWENDA JELA MIEZI MITANO

2018-02-26T12:19:00.001+03:00

Mahakama ya Hakimu Mkazi Mbeya imewatia hatiani mbunge wa Mbeya Mjini, Joseph Mbilinyi maarufu kwa jina la Sugu na Katibu wa Chadema Kanda ya Nyanda za Juu Kusini, Emmanuel Masonga na kuwahukumu kifungo cha miezi mitano jela kila mmoja.

Hukumu hiyo imetolewa leo Februari 26,2018 na Hakimu Mkazi Mfawidhi wa mahakama hiyo, Michael Mteite.

Sugu na Masonga wamehukumiwa kwa kosa la kutumia lugha ya fedheha dhidi ya Rais wa Jamhuri wa Muungano wa Tanzania John Pombe Magufuli.

Wawili hao wanadaiwa kutenda kosa hilo kwenye mkutano wa hadhara uliofanyika Desemba 30, mwaka wa jana. eneo la Uwanja wa Shule ya Msingi Mwenge jijini Mbeya.

Mwisho.

FEDHA BANDIA ZENYE THAMANI YA SHILINGI MIL 40.6 ZAKAMATWA MKOANI MOROGORO

2018-01-16T09:06:00.001+03:00

Morogoro

Na, OmaryHussein

Watu watano wanashikiliwa na Polisi mkoani Morogoro, kwa makosa tofauti yakiwemo ya watu wawili kukutwa na pesa bandia zenye thamani ya zaidi ya shilingi Milion 40.6 na mabunda 22 ya karatasi zinazotumika kutengeneza noti hizo, huku wengine wawili wakikutwa na vipande 4 vya pembe za Ndovu.

Kwa mujibu wa kamanda wa Polisi mkoani Morogoro SACP Urlich Matei, kukamatwa kwa watuhumiwa wote ni juhudi ziliztotokana na taarifa kutoka kwa raia wema, ambapo wapo waliotoa taarifa za uwepo wa biashara ya utengenezaji wa fedha bandia katika Mtaa wa Kihonda maeneo ya Yespa, nje kidogo ya Manispaa ya Morogoro, na baada ya kufaatilia taarifa hizo, ndipo wakafanikiwa kuwakamata watuhumiwa hao ambao wamejulikana kwa majina ya Osona Oriko (22yrs) mkazi wa Kihonda pamoja na Yusufu Abdul (12yrs) mkazi pia wa kihonda .

Aidha askari wa jeshi hilo kwa kushirikiana na maafisa wa wanyama pori Tarafa ya Mikumi, wamefanikiwa kuwakamata, watu wawili waliojulikana kwa majina ya Shamte Mohamed (22yrs) na Selemani Meya (23yrs) wote wakazi wa ludewa wilayani Kilosa wakiwa na vipande vinne vya pembe za ndovu wakiwa wamevihifadhi katika mfuko wa rambo mweusi.

Kwa mujibu wa Kamanda wa Polisi Mkoa wa Morogoro SaCP Matei amesema watuhumiwa wote wanaendelea kuhojiwa na watafikishiwa mahakamani baada ya uchunguzi kukamilika.

MWISHO.

WATU 11 WAMEFARIKI DUNIA NA WENGINE SITA KUJERUHIWA BAADA YA GARI AINA YA HIECE KUGONGANA NA MALORI MATATU

2018-01-15T12:47:00.002+03:00

KAGERA,

Na, Mariam Emily

Watu 11 wamefariki dunia na wengine sita kujeruhiwa kutokana na ajali ya gari aina ya hiece kugongana na malori matatu katika kijiji cha Mubigera kata ya Nyantakara wilaya ya biharamulo mkoani kagera wakati wakisafiri kutoka wilaya ya kibondo kuelekea kahama mkoani Shinyanga.

Mganga mkuu wa hospitali teule ya Biharamulo Dr Grasmus Sebuyoya amethibitisha kupokea miili ya watu hao wakiwa maiti na majeruhi sita na kwamba kati ya majeruhi hao wawili hali zao ni mbaya na waliofariki wa jinsia ya kiume ni saba na jinsia ya kike ni watatu

Dr Sebuyoya amewataja waliojeruhiwa kuwa ni Juma Samo (25) Joseph Otieno (30), Oscar Leonard Sebastian (27), Baseke Mashinga Nyabashiki (31), Mahalulo Charles (25) na majeruhi wa sita hajafahamika kwa kuwa hajajitambua na kwamba maiti waliofia eneo la tukio ni Tisa na wawili wamefariki baada ya kufikishwa hospitalini hapo.

Awali Mwenyekiti wa kijiji cha Mubigera Bw Mapunda Kayuki amesema ajali hiyo imetokea jana majira ya Saa 11 jioni ambapo hiece ilitaka kukwepana na roli kwenye barabara ya biharamulo kwenda kahama kwenye kijiji hicho na kugongana ambapo dereva wa hiece na tingo wake ni miongoni mwa waliofariki

Bw Kayuki amesema hiece hiyo yenye namba za usajili T.542 DKE ilikuwa ikitokea kibondo kwenda kahama ambapo maroli yaliyohusika kwenye ajali hiyo ni T.860CGS, T.103 DUJ na T.147 DUJ magari yako chini ya usalama wa jeshi la polisi kwa uchunguzi zaidi.

Kamanda wa jeshi la polisi mkoani Kagera Agustino Olomi amesema hajakamilisha taarifa kamili ya tukio hilo ikiwa ni pamoja na kutambua majina ya waliopoteza maisha mpaka ajiridhishe na taarifa, zitatolewa kwa umma bila kutia mashaka ili ndugu wa marehemu waweze kujua na kufuatilia kwa uhakika.

MWISHO

BOMOA BOMOA MWANZA YAWALIZA WAFANYABIASHARA WA SAMAKI NA DAGAA

2018-01-14T13:58:00.000+03:00

Kampuni hodhi ya rasilimali za reli nchini (Rahco) imeanza utekelezaji wa kubomoa nyumba zote zilizojengwa ndani ya njia ya reli katika mkoa wa Mwanza huku zaidi ya wafanyabiashara 200 wa samaki na dagaa jijini humo wakikosa sehemu ya kwenda kufanyia biashara zao baada ya kubomolewa vibanda vyao.

Hata hivyo, tofauti na vilio vya baadhi ya wananchi wengine wanaokumbwa na adha kama hiyo, baadhi ya wafanyabiashara hao walikiri kuvamia eneo hilo tangu mwaka 1994 baada ya reli hiyo kuacha kufanya kazi.

Ofisa Mfawidhi wa Rahco, Daimon Mwakaliki alisema ubomoaji huo ni utekelezaji wa mpango wa Serikali wa kupisha ujenzi wa reli ya kisasa ya Standard Gauge.

Bila kutaja idadi ya nyumba za watu, taasisi za Serikali na zisizo za kiserikali, kidini, shule na viwanja vya michezo, zitakazoathirika, Mwakaliki alisema utekelezaji huo umeanza ikiwa ni siku tatu tangu Naibu Waziri wa Ujenzi, Uchukuzi na Mawasiliano kuagiza kuanza ubomoaji huo.

Alisema watakaobomolewa ni wale waliojenga ndani ya mita 15 kutoka stesheni ya reli hadi bandarini na kutoka njia kuu ya reli na kuendelea, itakuwa mita 30.

“Zoezi hili si la kushtukizwa kwani tulitoa notisi kwa watu wote waliovamia miezi sita iliyopita, baadhi yao walibomoa wenyewe lakini baadhi walikaidi ingawa pia juzi tulipita kwenye maeneo yote yatakayobomolewa kuwatangazia kuanza kuwabomolea,” alisema Mwakaliki.

Bomoabomoa hiyo imeukumba ukuta wa Uwanja wa Nyamagana, ukuta wa Mamalaka ya Bandari, kiwanda cha samaki cha Vicky na taasisi nyingine yakiwamo makanisa na nyumba za kawaida.

MWISHO.

MAUTI ILIYOZIKWA ZAIDI YA MWEZI MMOJA ULIOPITA YAFUKULIWA KWA LENGO LA KUCHUNGUZWA

2017-12-28T18:42:00.001+03:00

GAIRO,MOROGORO

NA, OMARY HUSSEIN

Huzuni na simanzi zimetawala kwa zaidi ya masaa nne kwa wakazi wa kijiji cha Kilimani kata ya Msingisi wilaya ya Gairo mkoani Morogoro baada ya familia ya watoto wanne wakiongozwa na mama yao mzazi kufika kijijini hapo na kufukua kaburi alipozikwa baba yao aliyezikwa miezi miwili iliyopita, wakidai kuwa na mashaka na kifo chake ikiwa ni sehemu moja wapo ya kutekeleza agizo la mahakama ya hakimu Mkazi mkoa wa Morogoro.

Wanafamilia hao walifika kijijini hapo wakiwa na ulinzi wa polisi kwa ajili ya kusimamia kufukuliwa kwa kaburi hilo na watoto hao kupata nafasi ya kuhakikisha kama mwili uliozikwa ni baba yao mzazi au siyo pamoja na kufanyiwa uchunguzi kubaini sababu zilizopelekea kifo chake huku wakisema kilicho wasukuma kufika mahakamani ni kutokuwepo maelewano mazuri baina ya ndugu wa upande wa baba yao kutokana na marehemu huyo kufariki na kuzikwa bila kupewa taarifa yoyote walisema watoto wa Marehemu Merina na Yared Stanford.

Baadhi ya watoto wa Marehemu wakitafakari baada ya kuona mwlili wa marehemu baba yao

Kwa mujibu wa Mke wa marehemu Julieth Majaliwa amesema mara ya mwisho kuwasiliana na mumewe walikua nyumbani kwao jijini Dar es salaam ambapo alimuaga anaenda kijijini kwao kuwajulia hali ndugu zake lakini tangu alivyo ondoka hawakuwa tena na mawasiliano nae mpaka waliposikia kwa watu kuwa mume wake amefariki dunia

Baadhi ya Familia wa Marehemu wakiangua kilio baada ya kuona mwili wa Marehemu

Mjomba wa Marehemu aliyefahamika kwa majina ya Mlinga Alpakshad amesema wameamua kumzika marehemu huyo bila kutoa taarifa kwa familia yake kutokana na watoto pamoja na mama yao kumtelekeza wakati alipokuwa anaumwa.

Mwili wa Marehemu Stanford Gombo ukitolewa kaburini

Kwa mujibu wa daktari Msaidizi Mwandamizi George Mkoba kutoka hospitali ya wilaya ya gairo amesema kwa sasa wamechukua baadhi vipimo (SAMPULI) kwa ajili ya kupelekwa kwa mkemia mkuu kwa ajili ya vipimo zaidi kama walivyoagizwa na mahakama.

Kwa mujibu wa ndugu wa marehemu Mzee Stanford Gombo amefariki dunia Novemba 11 mwaka huu kijijini hapo baada ya kuugua kwa muda mrefu, huku familia yake ikiongozwa na Mama na watoto wa nne wakidai kutokuwa na taarifa ya kuugua kwake mpaka kufariki dunia, hatua iliyopelekea wao kukimbilia mahakamani.

MWISHO

UJENZI WA GHOROFA UMEKULA KERO KWA UWANJA WA NDEGE WA NJOMBE

2017-12-28T17:50:00.003+03:00

NJOMBE

Licha ya naibu waziri wa Ujenzi ,Mawasiliano na Uchukuzi Dkt John Elias Kwandikwa kutoa agizo la kusitisha ujenzi wa jengo refu la Ghorofa Mbele ya uwanja wa Ndege wa mkoa wa Njombe ili kuacha wazi eneo hilo la ndege kupaa, agizo hilo limeonekana kupuziwa kwani ujenzi huo umeendelea kama kawaida.

Agizo la kusitisha ujenzi huo lilitolewa wiki moja iliyopita na naibu waziri huyo wakati akiwa katika ziara mkoani humo kukagua miradi ya maendeleo ikiwemo barabara , majengo na viwanja vya ndege baada ya kubaini ujenzi huo ambao umetajwa kuweka mazingira ya hatari kwa ndege kupaa endepo kutatokea shida katika kupaa.

Pamoja na Kusitisha ujenzi huo Naibu waziri huyo alifika katika eneo linalotekelezwa mradi huo na kubaini kuwa ujenzi umekuwa ukiendelea bila ya uwepo wa wataalamu hali ambayo inaweza kujakuwa na madhara hapo baadae endapo litajengwa chini ya kiwango na kuagiza wataalamu wote wa ujenzi huo kukaguliwa vyeti vyao.

Blog hii imefika katika eneo la ujenzi na kushuhudia ujenzi ukiendelea na kuzungumza na mkandarasi Enjinia Yusuph Bikube anaetekeleza ujenzi wa jengo hilo la ghorofa ambaye anasema mamlaka za mkoa wa Njombe ikiwemo ya viwanja vya ndege na halmashari zimeafikiana na kuamua kumruhusu mteja wake kuendelea na ujenzi huku zikimtaka kupunguza urefu wa jengo hilo kutoka ghorofa nne hadi mbili.

Siku chache zilzopita akizungumzia Ujenzi wa jengo hilo Dkt kwandikwa alisema ujenzi unapaswa kusimama mara moja huku akimuagiza meneja wa meneja wa uwanja huo Hana Kibopile kufatilia nyaraka za kuruhusiwa kujenga kwani jengo refu kuwepo uwanja wa Ndege ni hatari .

Akizungumza na Blog hii Mmiliki wa jengo hilo Sebastian Sanga amesema ana vibali vyote halali ambavyo vinamruhusu kuendelea na ujenzi huo na kwamba mara tu baada ya naibu waziri kusitisha ujenzi maafikiano yalifanyika ya kupunguza urefu wa jengo hilo lililokuwa lijengwe ghorofa nne na badala yake ziwe mbili na kukili kupata hasara ya zaidi ya shilingi mil 50 na serikali kwani vifaa vingi vimeharibika baada kusitisha ujenzi kwa takriban mwaka.

MWISHO

KESI INAYOWAKABILI WABUNGE WA CHADEMA SUZANA KIWANGA NA PETER LIJUALIKALI YAPIGWA KALENDA MPAKA DESEMBA 6 MWAKA HUU

2017-12-05T15:43:00.003+03:00

Na, Omary Hussein, Morogoro

Mahakama ya hakimu mkazi Mkoa wa Morogoro, kwa mara nyingine imeshindwa kutoa dhamana kwa Wabunge wa Chama cha Demokrasia na Maendeleo Chadema Peter Lijualikali wa Kilombero pamoja na Suzani Kiwanga wa Mlimba na washtakiwa wengine 34 wa Chama hicho, baada ya kutokea mvutano wa kisheria baina ya upande wa Mawakili wa Serikali na ule wa utetezi, juu ya kiapo kilichowasilisha na Serikali cha kupinga washtakiwa hao kupatiwa dhamana, hatua iliyopelekea Hakimu Ivan Msaki, kuhairisha tena kesi hiyo hadi Desemba 6, watakapojadili tena kiapo hicho.

Wabunge hao pamoja na washtakiwa wengine 34 wanafikishwa mahakamani hapo, wakishtakiwa kwa makosa nane ambayo ni Kula njama ya kutenda kosa, Mkusanyiko usio wa halali, Kufanya Ghasia, uchochezi wa kutenda kosa shtaka ambalo linawakabili Mbunge Peter Lijualikali na Suzani Kiwanga, Shtaka la tano likiwa kuchoma nyumba mali ya Serikali ya Kijiji, sita Uharibifu wa mali zenye thamani ya Milioni 100.8 huku shitaka la saba na nane likiwa ni uharibu wa mali kwa makusudi, Makosa ambayo wanadaiwa kuyatenda Novemba 26 , mwaka huu katika kata ya Sofi Wilayani Malinyi kwenye uchaguzi mdogo wa marudio ya Udiwani.

Awali upande wa mawakili wa Serikali, unaoongozwa na Sunday Hyera kwa kushirikiana na Edgar Bantulaki waliwasilisha kiapo cha kupinga dhamana kwa washtakiwa hao, upande wa utetezi wa washtakiwa, unaoongozwa na Wakili Barthalomeo Tarimo pamoja na Peter Kibatala, uliiomba mahakama kuwapatia dhamana washtakiwa hao , kwani tayari wamefaata taratibu zote zinazotakiwa, ikiwa ni pamoja na kuwasilisha hati ya kupinga kiapo hicho kilichowasilisha na mawakili wa Serikali, kilichopinga washtakiwa hao kupatiwa dhamana.

Hata hivyo baada ya upande wa Washtakiwa hao, kuwasilisha maombi hayo. Upande wa Mawakili wa Serikali nao waliendelea na msimamo wao, na kuiomba Mahakama izuie dhamana hiyo, hadi hapo nao watakapopitia hati iliyowasilisha na upande wa utetezi ya kutaka washtakiwa hao wapatiwe dhamana kwani ni haki yao ya msingi.

Baada ya kusikiliza maelezo ya pande zote mbili, Hakimu wa kesi hiyo Ivan Msaki alichukua maamuzi ya kuhairisha tena kesi hiyo hadi Desemba 6 ya Mwaka huu, ambapo watakutana tena kujadili juu ya kiapo kilichokuwa kimewasilishwa na upande wa mawakili wa Serikali, kupinga washtakiwa hao kupatiwa dhamana.

MWISHO

WATUMISHI WATATU WILAYA YA MANYONI WAFUKUZWA KAZI KWA UZEMBE KAZINI

2017-08-26T17:23:00.000+03:00

Manyoni, Singida.

Baraza la madiwani katika halmashauri ya wilaya ya Manyoni limewafukuza kazi watumishi watatu wa halmashauri hiyo kwa makosa tofauti yakiwemo uzembe kazini uliosababisha kifo cha mjamzito mmoja wakati akijifungua.

Akitangaza uamuzi huo, mwenyekiti wa halmashauri hiyo Mosses Mathonya katika baaraza la madiwani katika mkutano wa kawaida alisema watumishi watatu wamefukuzwa kutokana na tuhuma mbali mbali,zikiwemo uzembe wa madaktari Mika Iloti muuguzi msaidizi daraja la kwanza na mtaalam wa kuchoma dawa za usingizi pamoja na Dk John Amita mtaalam wa upasuaji kuchelewesha upasuaji wa mzazi na kusababisha kifo cha Sai Richard.

Aidha mtumishi mwingine aliyefukuzwa ni Genesius Rugemalira mkuu wa kitengo cha ununuzi halmashauri hiyo anatuhumiwa kwa makosa mawili ambayo ni kupotosha bodi ya Zabuni katika kumpata Mzabuni na kununua mitungi ya gesi 242 kwa mzabuni ambaye hakuidhinishwa na bodi ya zabuni na kusababisha hasara ya Tsh 10,648,000 na katika kosa la pili anatuhumiwa kufanya matendo yaliyo kinyume na maslahi ya umma kinyume na kanini no.42 aya ya 10 sehemu (a) ya jedwali la kwanza la kanuni za utumishi wa umma za mwaka 2013 na kumsababishia mwajiri hasara.

Katika hatua nyingine baadhi waheshimiwa madiwani wamemtaka mganga mkuu wa hospitali ya halmashauri Nelson Bukuna kutoa ufafanuzi wa kina kuhusiana ukosefu wa baadhi ya dawa alieleza kuwa kukosekana kwa dawa hizo kunatokana kucheleweshwa kwa fedha kutoka wizarani.

Bukuna alisema tatizo la kukosekana kwa baadhi ya dawa limejitokeza hivi karibuni na kwamba awali halikuwepo na kwamba tatizo hili limejitokeza mwezi huu na hivyo kama italetwa tatizo hilo litaisha.

Aidha kwa upande wa mbunge wa Manyoni Daniel Mtuka alisema fedha zipo hivyo utaratibu wa kununua dawa ufanyike."Dawa zipo naomba nishirikishwe,ili niwasiliane na waziri mwenye dhamana na hata Rais alishasema Fedha zipo suala la dawa lisiwe tatizo"alisema Mtuka.

Kwa upande wa mkurugenzi mtendaji wa halmashauri Charles Fussi aliwataka viongozi kuacha siasa na blabla nyingi za kuwadanganya wananchi na kwamba huu siyo wakati wa siasa na badala yake wafanye kazi kwa vitendo."Sasa hivi hakuna hela iliyoletwa kwa ajili ya dawa,serikali kwa mwezi huu haijatoa hela,sikuzungumza tu,watu kwenye kazi hatutaki blabla hela haijaletwa ikiletwa lazima wananchi wajue"alisema Fussi.

MWISHO

WATU SABA WAMEFARIKI DUNIA BAADA YA BUS KUPINDUKA KATIKA MILIMA YA NDOLOLO

2017-08-24T17:39:00.000+03:00

NA, PETER LAURENCE
MOROGORO
24/08/2017

Watu Saba wamefariki Dunia wengine 38 wakijeruhiwa wilayani Ulanga Mkoani Morogoro mara baada ya Bus walilokuwa wakisafiria kupinduka katika Milima ya Ndololo, huku miili ya watu hao waliofariki dunia ikihifadhiwa katika chumba cha mahiti cha hospitali ya wilaya ya Mahenge.

Kwa mujibu wa Mganga Mkuu wa hospitali ya wilaya ya ulanga, waliofariki sita ni wanaume na mmoja ni mwanamke,huku basi lililopata ajali likijulikana kwa jina la Mfundo ambalo lilikuwa likitokea Ilonga kuelekea Morogoro.

MWISHO:

WATU WATATU WAFARIKI DUNIA BAADA YA GARI AINA YA HAICE KUGONGA TRENI MKOANI MOROGORO

2017-08-24T12:45:00.000+03:00

NA, FARID SAIDY

MOROGORO

24/08/2017

Watu watatu wamefariki Dunia huku wengine 29 wakijeruhiwa, baada ya daladala waliyokuwa wakisafiria kugonga Treni ya abiria iliyokuwa inatokea bara kwenda Dar es salam katika eneo la Tanesco Manispaa ya Morogoro, huku idadi hiyo ya Majeruhi wengi wao wakiwa ni wanafunzi wa Shule za Sekondari za Tushikamane na Mji Mpya.

Kwa mjibu wa Mganga mfawidh wa hospitali ya mkoa wa Morogoro DR Francis Semwene amethibitisha kupokea majeruhi hao 31 huku watatu wakifariki dunia ambao wawili na wanafunzi na mmoja akiwa bado hajulikani na wengine 28 wakiendelea Matibabu.

kwa upande wake kamanda wa Polisi Mkoani Morogoro Ulrich Matei amesema chanzo cha ajali hiyo ni uzembe wa Dereva aliyekuwa anaendesha daladala ambayo ilikuwa inatokea mjini kwenda Kihonda kuover take gari nyingine bila kuangalia mbele hatua iliyoplelekea kuivamia treni hiyo ya abiria iliyokuwa inatokea mkoani Kigoma kwenda Dar es Salaam .

Majeruhi wa ajali wanendelea kupatiwa matibabu katika hospitali ya rufaa ya mkoa wa morogoro huku dereva wa gari hiyo aina ya coster yenye namba za usajili T 438 ABL anashikiliwa na jeshi la Polisi baada ya kusababisha ajali hiyo na kutaka kukimbilia pasipojulikana ndipo wananchi wenye hasira walipomkamata na kuanza kumpiga na ndipo aliposaidiwa na polisi.

MWISHO:

MBUNGE WA JIMBO LA KILOMBERO AHUKUMIWA MIEZI SITA JELA

2017-01-11T17:34:00.000+03:00

Kilombero, Morogoro.

Mahakama ya Wilaya ya Kilombero imemuhukumu kifungo cha miezi Sita mbunge wa Jimbo Kilombero mkoani Morogoro kupitia chama cha Demokrasia na maendeleo Chadema Peter Lijualikali wenye miaka (30) mara baada ya kumkuta na hatia ya kufanya fujo na kusababisha taharuki katika uchaguzi wa kumtafuta mwenyekiti wa Halmashauri hiyo Machi Mosi mwaka 2016 mwaka wa jana.

Peter Lijualikali ambaye ni mbunge wa Jimbo la Kilombero pamoja na Stephano Mgata,wote wawili wamefikishwa katika mahakama ya wilaya ya Kilombero, baada ya kudaiwa kutenda kosa hilo Machi mosi mwaka jana saa nne Asubuhi katika eneo la Kibaoni katika ukumbi wa Halmashauri ya Wilaya ya Kilombero, ambako kulikuwa na uchaguzi wa kumtafuta mwenyekiti wa Halmashauri hiyo.

Washtakiwa hao kwa pamoja walifanya fujo hizo kinyume na kifungu namba 89, kifungu kidogo cha kwanza B cha kanuni ya adhabu sura ya 16 kama ilivyofanyiwa marejeo mwaka 2002. Awali washtakiwa hao kwa pamoja walikana mashtaka na hivyo kufanya kesi hiyo kusikiliza ushahidi wa pande zote mbili na upande wa mashtaka ukathibitisha shtaka hilo bila kuacha shaka.

Hakimu mkazi wa mahakama ya Wilaya ya Kilombero Timothy Lyon amesema mahakama hiyo imewatia hatiani kwa kosa hilo na kwa kuwa mshtakiwa wa kwanza Mbunge Lijualikali ambaye alikuwa na kesi tatu huko nyuma na kutiwa hatiani, basi anahukumiwa jela miezi sita kutokana na mahakama kuona kuwa ni mzoefu, huku mwenzake ndugu Mgata yeye akihukumiwa kifungo cha miezi sita nje, kutokana na kuoneka ni mara ya kwanza kuhukumiwa.

Baada ya kutolewa kwa hukumu hiyo mbunge huyo amepelekwa kwenye gereza la Kilimo la Idete, ambako ndiko atatumikia kifungo chake cha miezi sita.

MWISHO.

DED WA MKINGA APANDISHWA KIZIMBANI KWA TUHUMA ZA KUMTISHIA KUMUUA NA BASTOLA ASKARI WA USALAMA BARABARANI

2016-10-17T18:24:00.002+03:00

NA, PETER LAURENCE

Bastola ya Mkurugenzi Huyo iliyoitumia kumtishia kumuua askari wa usalama Barabarani

Jeshi la Polisi Mkoani Morogoro limemfikisha mahakamani Mkurugenzi mtendaji wa halmashauri ya Mkinga mkoani Tanga Emmanuel Mkumbo mkazi wa Tegeta jijini Dar es Salaam, kwa tuhuma za kumtishia kumuua kwa bastola askari wa usalama barabarani, wakati akiwa katika majukumu yake ya kikazi pamoja na kuvunja sheria za usalama barabarani.

Gari binafsi aliyokuwa anaitumia mkurugezi wa Halmashauri ya Mkinga

Hapa akijifichwa kupigwa picha na Waandishi wa Habari

Mtuhumiwa huyo amesomewa mashtaka mawili mbele ya hakimu Agripina Kimanze chini ya mwendesha mashtaka wa serikali Sunday Hyera pamoja na Edger Bantulaki, ambapo kosa la kwanza ni kutishia kuua na la pili ni makosa ya usalama barabarani ambayo yote amekana kuhusika nayo.

Tukio hilo limetajwa kutokea October 15 mwaka huu, katika eneo la mkambarani pembezoni kidogo mwa mji , ambapo mtuhumiwa huyo alikuwa akiendesha gari aina Prado ya yenye namba za usajili T 845 CTJ na aliposimamishwa na askari hao wa usalama barabani kutokana na kuendesha gari hiyo kwa mwendo kasi, akagoma kutoa ushirikiano kwa askari aliyemsimamisha na kudai yeye ni mfanyakazi wa serikali.

Baada ya kushindwa kuelewana na askari huyo, mkurunguzi huyo aliomba kuonana na mkuu wa kituo katika eneo hilo, hata hivyo wakati akipelekwa na askari mmoja aliyefahamaika kwa jina moja la Titunda kupitia gari hilo, Mkurungezi huyo alimtolea bastola askari huyo na kumtaka kushuka kwenye gari na yeye kugeuza na kuendelea na safari yake, hata hivyo alipofika katika eneo la Mikese, aliweza kukamatwa na askari waliokuwa wamepewa taarifa juu ta tukio hilo.

Baada ya kukutwa na makosa hayo mtuhumiwa huyo amefikishwa mahakamani kujibu tuhuma hizo,ikiwemo ya kutishia kuua, kuendesha gari bila kuwa na bima pamoja na kuendesha kwa mwendo kasi, Makosa ambayo yote ameyakana.

Mkurugenzi huyo ameachiwa kwa dhamana na kesi yake imetapangwa kusikilizwa tena Oktoba 31 ya mwaka huu.

MWISHO:

WAZIRI LUKUVI AFANYA ZIARA YA KUSHTUKIZA OFISI YA MASJALA YA ARDHI MANISPAA YA MOROGORO

2016-10-17T18:24:00.001+03:00

Na, Omary Hussein, Morogoro.

Waziri wa Ardhi nyumba na maendeleo ya makazi William Lukuvi amefanya ziara ya kushtukiza katika ofisi ya Masjala ya Ardhi Manispaa ya Morogoro na kukuta hati zaidi ya 100 ambazo zimekamilika lakini bado hazijatolewa kwa wahusika huku Maofisa wa Ardhi katika ofisi hiyo wakishindwa kutoa sababu za msingi  za kuchelewesha kutolewa kwa hati hizo.

Kufuatia hali hiyo Waziri lukuvi ametoa mwezi mmoja kwa mkurugenzi wa manispaa ya morogoro pamoja na Afisa Ardhi mteule kuhakiksha hati zote zinatolewa kwa wahusika na endapo itashindikana basi atawachukulia hatua za kinidhamu.

Katika hatua nyingine imebainika kuwa asiilimia 85 ya nyumba katika manispaa ya maorogoro zimejengwa katika makazi yasiyo Rasmi ambapo imetajwa kuwa ni asilimia 15 pekee ndizo zmejengwa katika makazi yanayo tambuliwa kuwa rasmi.

Ziara ya waziri Lukuvi mkoani Morogoro imelenga kuhamasisha zoezi la Urasimishaji wa ardhi ambapo ametoa  hati miliki kwa wakazi wa Mtaa wa Bigwa ambao wameshiriki katika urasimishaji wa maeneo yao.

MWISHO:

MAGIC FM NA RADIO 5 YA ARUSHA ZAFUNGIWA KWA MUDA NA SERIKALI KWA MADAI YA UCHOCHEZI

2016-08-29T19:08:00.000+03:00

Waziri wa Habari, Utamaduni , Sanaa na Michezo Nape Moses Nnauye amezifungia radio mbili kwa muda usiojulikana kwa makosa ya kuandaa vipindi ambavyo vimerushwa hewani vinavyoashiria uchochezi.

Akizungumza na waandishi wa habari, Waziri Nape amesema kuwa uamuzi wa kuvifungia vituo hivyo umefikiwa baada ya kujirdhisha kuwa kipindi cha Matukio kilichorushwa Agosti 25, 2016 muda wa saa 2 usiku hadi saa 3 na kituo cha utangazji cha Radio 5 pamoja na kipindi cha Morning Magic katika kipengele cha Kupaka Rangi Agosti 17 vilikuwa na maudhui ya uchochezi unaoweza kuleta uvunjifu wa Amani.

Nape amesema kuwa kufuatia hilo amevifungia kwa muda usiojulikana kwani wamekiuka masharti ya kanuni ya 5 (a, b, c na d) , kanuni ya 6 (2a, b na c) na kanuni ya 218 ya huduma za utangazaji ya mwaka 2005.

Wakati vituo hivyo vikifungiwa kwa muda usiojulikana kamati ya maudhui imepewa jukuu la kuviita na kusikiliza kwa kina Zaidi utetezi wao na ni hatua gani zaidi ya kuchukua dhidi yao kwa mujibu wa kanuni ya huduma za utangazaji.

Nape ameendelea kuvitahadhalisha vyombo mbalimbali vya habari kutoshawishika kuvunja sheria na kanuni zinazoongoza tasnia ya habari ili kulinda heshima ya tasnia yetu na wakati huo kuhakikisha nchi inabaki na Amani, Mshikamano na Umoja.

MWISHO:

POLISI MKIMKUTA MTU YEYOTE MSITUNI PIGENI BILA HURUMA, RC MAKONDA,

2016-08-26T09:54:00.001+03:00

Mkuu wa Mkoa wa Dar es Salaam, Paul Makonda ameliagiza Jeshi la Polisi kuwagonga na kuwapiga wahalifu wowote wakiwamo majambazi pindi wanapowakamata.

Akizungumza wakati wa kuaga miili ya askari watatu kati ya wanne wa Jeshi la Polisi waliouawa wiki hii katika tawi la benki ya CRDB lililopo Mbande wilayani Temeke jijini Dar es Salaam, Makonda alisema jambazi atakapokutwa popote iwe msituni iwe wapi agongwe na apigwe.

Alisema alipopata taarifa ya vifo vya askari hao wanne alifungua pazia za madirisha nyumbani kwake na kuwaangalia askari wanaolinda na kulia kwa uchungu na kwamba usiendelezwe ukichaa wa haki za binadamu kwani ni uendawazimu ambao hauwezi kuvumilika.

“Kamanda Sirro (Simon) mimi ndiyo mkuu wako wa mkoa nasema ukikamata hao watu popote gonga, piga na watu wa haki za binadamu wakija waambie waje kwangu, hatuwezi kukaa kwenye mkoa ambao haupo salama,” alisema Makonda aliyedai hana maneno mazuri ya kusema kwa sababu hakuumbwa kumfurahisha mtu, bali anafanya kazi ya Mungu na wakati wake ukiisha ataondoka.

“Kama kuna haki za binadamu nataka haki za askari wangu kwanza. Kama hao watu wa haki za binadamu wapo nataka kuona wakiandamana kukilaani kitendo hiki, ”alisema Makonda.

MWISHO:

RAIS AFANYA UTEUZI MWINGINE WA KAIMU MKURUGENZI WA MAMLAKA YA VITAMBULISHO VYA TAIFA ( NIDA)

2016-08-25T17:03:00.003+03:00

Leo August 25 2016 Rais wa Jamhuri ya Muungano wa Tanzania Dkt. John Pombe Magufuli leo amemteua Andrew Wilson Massawe kuwa Kaimu Mkurugenzi Mkuu wa Mamlaka ya Vitambulisho vya Taifa (NIDA).

Kabla ya uteuzi huo Bw. Andrew Wilson Massawe alikuwa Mkurugenzi wa Mifumo ya Kompyuta katika Benki Kuu Tanzania (BOT).

Andrew Wilson Massawe anachukua nafasi iliyoachwa wazi na Dkt. Modestus Francis Kipilimba ambaye ameteuliwa kuwa Mkurugenzi Mkuu wa Idara ya Usalama wa Taifa. Uteuzi wa Bw. Andrew Wilson Massawe unaanza mara moja.

MWISHO:

ALIYEWAHI KUWA MBUNGE WA JIMBO LA KILOMBERO ABDUL MTEKETA ATOA MSAADA WA MAGODORO 200 WILAYANI KILOMBERO

2016-08-24T16:46:00.002+03:00

Na,Mohamed Ferooz

IFARAKARA/MOROGORO

Ukosefu wa gari la wagonjwa, uhaba wa watumishi na vifaa tiba ni changamoto ambazo zimeendelea kuiandama hospital ya Wilaya ya kilombero mkoani Morogoro, hatua iliyopelekea kushindwa kutoa huduma stahiki kwa wananchi wanaoishi wilayani humo.

Kutokana na ongezeko la kasi la idadi ya watu Wilayani humo, imeleezwa kuna kila haja kuboresha huduma hizo mhuhimu, ili kukidhi mahitaji ya huduma za kimatibabu, zinazohitajika wilayani humo.

Akizungumza na mtandao huu wakati akipokea msaada wa magodoro kutoka kwa mbunge mstaafu wa jimbo hilo Abdul Mteketa, Mganga mkuu wa kituo hicho cha Kibaoni Peter Mlenge amesema kutokana na hospitali hiyo kutarajiwa kuwa hospitali ya halmashauri ya mji wa ifakara inabidi wadau na serikali kuongeza jitihada za kuiborsha hospitali hiyo ambayo hali yake sio nzuri kimuonekano pamoja na huduma kutokana na ukosefu wa wataalamu na pamoja na vifaa. .

Aliyewahi kuwa Mbunge wa Jimbo la Kilombero Abdul Mteketa akizungumza na waandishi wa Habari ambao hawako kichwani.

Aliyewahi kuwa mbunge katika jimbo hilo la Kilombero kupitia chama cha mapinduzi CCM abdul Mteketa anahitikia wito huo na kumua kutoa msaada wa magodoro 50 katika hospitali hiyo huku magodoro mengine 150 akitoa kwa watu kwa wazee, wakimama na watu wasiojiweza wilayni humo..

MWISHO:

MAJAMBAZI YAUA POLISI 4 USIKU WA KUAMKIA LEO, MBANDE JIJINI DAR ES SALAAM

2016-08-24T08:31:00.002+03:00

Jeshi la Polisi limethibitisha kuwa jumla ya askari wake wanne wameuawa usiku wa kuamkia leo baada ya majambazi kuvamia tawi la benki ya CRDB lililopo Mbande, wilayani Temeke, jijini Dar es Salaam.
Akizungumza moja kwa moja kupitia kituo cha Redio One Stereo leo asubuhi, Kamanda wa Polisi Kanda Maalum ya Dar es Salaam, Simon Sirro, amesema watu kadhaa wamekamatawa na msako unaendelea ili kuwapata waliotekeleza unyama huo.

Sirro amesema taarifa kutoka eneo la tukio zinaonesha kuwa majambazi hao walikuwa 14 na baada ya kufanya mauaji hao, walivamia kituo cha polisi cha Mbande kisha wakavunja stoo na kuchukua sare ya askari na silaha.

Akielezea namna tukio hilo lilivyotokea, Kamanda Sirro amesema wahalifu hao walitumia mwanya wakati askari wakibadilishana lindo katika taasisi hiyo ya fedha na kuibuka ghafla na kuanza kurusha risasi.
Kwa mujibu wa Sirro, gari la polisi limechakazwa kwa risasi na askari mmoja aliyekuwa lindo alifanikiwa kukimbia na ndiye aliyeweza kutoa taarifa na maelezo ya namna tukio lilivyofanyika.

“Watu kadhaa wamekamatwa na tunaendelea na msako. Tunawataka wakiwa hai au wafu,” amesema Kamanda Sirro huku akiwataka watu kujihadhari na yeyote anayejitambulisha kwao kuwa ni askari bila kuonesha kitambulisho.

Ameendelea kusema kuwa baada ya operesheni ya kukomesha mtandao wa wahalifu kama hao na wengine kukimbilia nchi jirani, masalia wameanza kujikusanya na kutekeleza matukio ya mauaji huku askari wakilengwa.

MWISHO.

KATIBU WA CHAMA CHA MPIRA WA MIGUU MANISPAA YA MOROGORO MMFA AFIKISHWA MAHAKAMANI KWA TUHUMA ZA RUSHWA YA CHAKULA WAKATI WA UCHAGUZI WA CHAMA HICHO

2016-08-23T23:53:00.002+03:00

NA, Happynes James

Morogoro

Katibu wa chama cha mpira wa miguu manispaa ya Morogoro (MMFA ) Kafale Maharagande amefikishwa mahakamani na taasisi ya kuzuia na kupambana na rushwa Takukuru mkoani humo kwa tuhuma za kutoa rushwa ya chakula chenye thamani ya shilingi milioni moja na laki tano (1,500,000) kwa wajumbe wa chama hicho hili wamchague wakati wa uchaguzi.

Katibu wa MMFA Kafale Maharagande akiwa Mahakamani

Akisomewa mashtaka hayo na mwendesha mashtaka wa Tukukuru mkoani Morogoro Cleonce Cleophace mbele ya hakimu mkazi Ivan Msacky, mtuhumiwa huyo anatuhumiwa kutenda kosa hilo julai 24 mwaka huu wakati wa uchaguzi wa chama hicho ambapo alichaguliwa tena kuwa katibu wa chama hicho cha mpira wa miguu..

Mwendesha Mashtaka wa TAKUKURU mkoani Morogoro Cleonce Cleophace akinena jambo na mmiliki wa Blog Hii.

Ikiwa umepita mwezi mmoja na siku moja tangu kufanyika kwa uchaguzi wa MMFA, ambao ulimtangaza Kafare Maharagande kuwa katibu mkuu wa chama hicho, mpinzani wake Jofrey Mwatesa hakuridhishwa na matokeo hayo, hatua iliyopelekea kuandika barua ya kukata rufaa kwa kamati ya uchaguzi na nakala kupeleka TAKUKURU kupinga matokea hayo kwa madai ya katibu huyo kutoa rushwa ya chakula kwa wajumbe wa chama hicho.

Kukiwa na hali ya bado sintofahamu kwa kamati ya uchaguzi iliyosimamia uchaguzi huo kuhusu sakata hilo, Taasisi ya kuzuia na kupambana na rushwa mkoani humo, wanamfikisha katibu huyo mahakamani tayari kujibu tuhuma hizo zinazomkabili.

Hata hivyo mtuhumiwa huyo amekana kutenda makosa hayo licha ya upande wa TAKUKURU kuikikishia mahakama kuwa ushahidi wa tuhuma hizo ushakamilika.

Kesi hiyo inatarajiwa kuendelea tena Septemba mosi mwaka huu huku mtuhimiwa huyo akiwa nje kwa dhamana.

MWISHO:

VIJANA 9100 KUTOKA MIKOA MITANO WAPATIWA MAFUNZO YA UFUNDI STADI NA VETA KWA LENGO LA KUWAWEZESHA KIUCHUMI

2016-08-19T23:12:00.002+03:00

Jumla ya vijana 9100 wanaoishi katika mazingira magumu na hatarishi kutoka katika mikoa ya Dar es salaam,Lindi, Morogoro,Mtwara na Pwani,wamepatiwa elimuya ufundi stadi, kwa lengo la kuwakwamua kutoka katika umaskini, huku kipaumbele kikitolewa kwa wenye ulemavu.

MKuu wa Mkoa wa Morogoro Dr Kebwe Steven Kebwe akikagua moja ya bidhaa ya zilitengenezwa na vijana waliopata elimu ya stadi za kazi katika kijiji cha Mchomwe wilayani Kilombero mkoani humo.

Mkuu wa Mkoa wa Morogoro Dr Kebwe Steven Kebwe akiwa na Mbunge wa Jimbo la Mlimba Suzana Kiwanga wakiangalia bidhaaa zilizotengenezwa na vijana waliojiajiri wenyewe mara baada ya kupata elimu ya ufundi stadi kutoka VETA.

Baadhi ya vijana waliyohitimu elimu ya mafunzo ya stadi za kazi kutoka katika kijiji c ha Mchomwe Wilayni Kilombero

Vijana walipata elimu ya udereva kutoka chuo cha VETA - Mikumi, wakishangilia kwa furaha mara baada ya kupewa Leseni zao za udereva

Vijana Waliopata elimu ya stadi za kazi za ushonaji na Mapambo wakifurahi

Mkuu wa Mkoa wa Morogoro Dr Kebwe Steven Kebwe ( wa Tano toka kulia na Kushoto ) akiwa na Mkuu wa Wilaya ya Kilombero Jemsi Lionyo ( wa nne kutoka Kushoto), Mbunge wa Jimbo la Mlimba Suzana Kiwanga ( wa nne Kutoka Kulia), Mkurugenzi wa Veta kanda ya Mashariki Asanterabi Kanza ( wa tatu kutoka Kulia), Meneja wa Mradi wa Plan International Simon Ndembeka (wa tatu kustoka Kulia), Meneja wa mradi wa Plan International tawi la Ifakara Majani wa pili kutoka kulia na wengineo

Kipaji chako ndio ajira yako, mmoja kati ya vijana walipewa elimu na VETA akionyesha ustadi wake katika sekta ya umeme

Mafunzo hayo yametolewa na VETA kwa kushirikiana na Plan International, yakiwa na mkakati wa kuwawezesha vijana 57,300 wanaoishi katika mazingira magumu hasa maeneo ya vijijini, kupatiwa elimu ya kujiwekea akiba na kuwawezesha kufungua miradi mbalimbali itakayosaidia kuwainua kiuchumi.

Mafunzo hayo ya ufundi stadi yamelenga kuwafikia vijana husika maeneo wanayoishi, kwa mifumo ya nadharia na vitendo na pia kwa njia ya uanagenzi, kwa lengo la kuhakikisha ifikapo mwaka 2020 vijana wengi na wanaoishi katika mazingira magumu wanasaidiwa ili kujikwamua kiuchumi.

Katika mahafali ya kwanza yalifanyika katika katika kijiji cha mchomwe na ifakara mjini mgeni rasmi alikuwa mkuu wa mkoa wa Morogoro Dr kebwe Steven Kebwe, huku wito ukitolewa kwa mashiriki mengine kuweza kujitokeza na kuwawezesha vijana hasa wale wanaoishi katika mazingira magumu kwa lengo la kuwakwamua,

MWISHO:

WANAFUNZI HEWA WA SEKONDARiI 2331 WABAINIKA MKOANI SIMIYU

2016-08-18T22:06:00.002+03:00

Baada ya kufanya uhakiki wa Wanafunzi Uongozi wa Mkoa wa Simiyu umebaini uwepo wa wanafunzi hewa 2331 katika shule za Sekondari za Mkoa huo.

Taarifa hiyo imetolewa na Mkuu wa Mkoa huo, Mhe. Anthony Mtaka wakati alipozungumza na Walimu Wakuu na Waratibu Elimu Kata mara baada ya kuwakabidhi Vishikwambi (Tablets) vilivyotolewa na Shirika lisilokuwa la Kiserikali la EQUIP Tanzania kwa ajili ya utunzaji wa Takwimu muhimu za Sekta ya Elimu,.

Mtaka amesema kati ya Halmashauri sita za Mkoa huo, Ni Halmashauri ya Wilaya ya Bariadi tu ambayo haina wanafunzi hewa wakati Halmashauri ya Wilaya ya Busega ikiwa na wanafunzi hewa 110, Itilima 2137, Maswa 14, Meatu 125 na Halmashauri ya Mji wa Bariadi 439.

Kufuatia kuwepo kwa wanafunzi hewa Mkuu wa Mkoa huo amesema, Serikali Mkoani humo imepanga kufanya mabadiliko ya Wakuu wa Shule za Sekondari katika Mkoa mzima, wakati taratibu za kinidhamu zikiendelea kwa wakuu wa shule waliotoa takwimu za uongo za wanafunzi katika shule zao, wakati kwa upande wa shule za Msingi, mabadiliko yatafanyika baada ya kumaliza mtihani wa darasa la saba.

Mtaka amesema kabla ya uteuzi wa wakuu wa shule na walimu wakuu utafanyika upekuzi (vetting) kwa wale watakaopendekezwa ili kujiridhisha kama wahusika wana sifa na uwezo wa kuendesha shule na kusimamia fedha za Serikali zinazopelekwa shuleni kwa ajili ya kugharama elimu ya bila malipo.

Akitoa shukrani kwa Shirika la EQUIP Tanzania, Mkuu wa Mkoa amesema Shirika hilo limekuwa msaada katika kutatua baadhi ya changamoto za Watendaji katika Sekta ya Elimu mkoani Simiyu ikwa ni pamoja na kuwawezesha Waratibu Elimu Kata kwa kuwapa pikipiki na kuwapa fedha za mafuta shilingi 206,000 kwa kila mwezi pamoja na kutoa mafunzo kwa walimu wakuu na walimu wakuu wasaidizi.

Aidha, Mtaka amesema analishukuru shirika hilo kuona umuhimu wa kutoa vishikwambi kwa Walimu wakuu na Waratibu Elimu Kata ambavyo ameelekeza vitumike kutunza takwimu sahihi za kieleimu ikiwemo idadi ya walimu na wanafunzi.

Kwa upande wake Katibu Tawala Mkoa wa Simiyu, Jumanne Sagini amewataka Walimu Wakuu na Waratibu Elimu Kata kuvitunza vishikwambi hivyo na kuvitumia kwa malengo yaliyokusudiwa.

Naye Mkuu wa EQUIP Tanzania Mkoa wa Simiyu, Phoebe Okeyo amesema Vishikwambi hivyo vitawasaidia Viongozi wa Elimu ngazi ya Mkoa, Wilaya na kata kupata taarifa za masuala mbalimbali yanayofanyika shuleni.

“Sasa hivi mtegemee kupata taarifa sahihi katika sekta ya Elimu kwa sababu ya hivi vifaa tulivyovitoa leo, tumeanza kama pilot study kwa Mikoa ya Simiyu, Shinyanga, Mara, Tabora, Dodoma,Lindi na Kigoma. Tunatarajia kuongeza mikoa ya Katavi na Singida Januari, 2017”alisema Okeyo.

Jumla ya Vishikwambi(tablets) 637 vimetolewa kwa Walimu wakuu 516 na Waratibu Elimu Kata 121 kutoka Halmashauri zote sita za Mkoa wa Simiyu, ambapo kila kimoja kina thamani ya shilingi 315,000/=.

MWISHO:

SOURCE: MPEKUZI BLOG

PICHA ZA MAZISHI YA RAIS MSTAAFU WA AWAMU YA PILI YA SERIKALI YA MAPINDUZI YA ZANZIBAR, MZEE ABOUD JUMBE MWINYI

2016-08-15T16:40:00.001+03:00

Wananchi wakibeba jeneza lililobeba mwili wa marehemu Mzee Aboud Jumbe Mwinyi, Raisi Mstaafu wa awamu ya pili ya Serikali ya Mapinduzi ya Zanzibar, Wakati wa Mazishi yake yaliyofanyika leo mchana nyumbani kwake Migombani Unguja

Source: Michuzi Blog

BASATA YAMTOA KIFUNGONI MSANII WA BONGO FLEVA NAY WA MITEGO KWA MASHARTI

2016-08-15T16:22:00.001+03:00

Baraza la Sanaa la Taifa (BASATA) limemfungulia Msanii wa muziki wa kizazi kipya Emmanuel Elibariki maarufu kwa jina la Nay wa Mitego kuendelea na shughuli za Sanaa baada ya kuwa ametekeleza adhabu (maagizo) zote alizopewa kama masharti ya kumfungulia.

Aidha, BASATA kama mlezi wa wasanii linamfungulia kufuatia yeye mwenyewe (Nay wa Mitego) kujutia na kukiri kwamba amejifunza na yuko tayari kubadilika na kwamba hatarudia makosa aliyoyafanya.

Hata hivyo, pamoja na kumfungulia kuendelea na shughuli za Sanaa Baraza linamweka kwenye uangalizi maalum msanii huyo kama sehemu ya kuhakikisha anaendesha shughuli za Sanaa kwa kuzingatia sheria, kanuni na taratibu sambamba na kuzingatia maadili katika kazi zake.

Itakumbukwa kwamba mnamo tarehe 27/07/2016 Baraza lilimfungia Msanii Nay wa Mitego kwa kipindi kisichojulikana na kumtaka kutekeleza maagizo yafuatayo:

1.Kuhakikisha amesajiliwa na kuwa na kibali cha kuendesha shughuli za Sanaa

2. Kulipa faini ya shilingi milioni moja (1,000,000/-)

3. Kuomba radhi watanzania kupitia mkutano na waandishi wa habari na kwenye akaunti zake za mitandao ya kijamii

4. Kuufanyia marekebisho wimbo wa ‘Pale Kati’ ili ubebe maudhui yenye maadili

Msanii Nay wa Mitego ametekeleza adhabu zote tajwa hapo juu. Leo hii tunamkabidhi rasmi cheti chake cha usajili na kibali cha BASATA.

Hata hivyo, pamoja na kuleta marekebisho mara mbili ya wimbo wa ‘Pale Kati’ Baraza bado halijaridhishwa na marekebisho hayo hivyo linaendelea kuufungia wimbo huu hadi hapo litakapojiridhisha umekidhi vigezo vya kimaadili.

Katika kikao na Msanii Nay wa Mitego cha kufanya tathimini ya utekelezaji wa adhabu yake kilichofanyika tarehe 12/08/2016 Ofisi za BASATA ameagizwa kuendelea kuufanyia marekebisho wimbo wake huo kama bado anaona anauhitaji.

Baraza linatoa maelekezo kwa vyombo vya habari na watanzania kwa ujumla kuacha kuucheza wimbo huo hadi hapo itakapoelekezwa vinginevyo. Hatua na adhabu za kisheria zitachukuliwa kwa chombo chochote cha habari kitakachokiuka agizo hili.

Aidha, katika kikao hicho cha tathimini ilibainika kwamba Msanii Nay wa Mitego kwa taarifa potofu alizopewa alipanda Jukwaani kwenye tamasha la Mwendo Kasi la tarehe 30/07/2016 akiwa katika adhabu. Kwa kosa hili ameandika barua ya kuomba radhi na Baraza linafikiria hatua za kuchukua kwa waandaaji wa tamasha hili.

Baraza linatoa wito kwa wasanii kuendelea kuzingatia sheria, kanuni na taratibu za uendeshaji shughuli za Sanaa sambamba na kuhakikisha wanazingatia maadili katika kila kazi wanazobuni ili kuepuka matatizo yasiyo ya lazima ambayo yanaathiri kazi zao kwa kiasi kikubwa sana.

MWISHO:

MTUHUMIWA WA MAUAJI JIJINI MWANZA AUAWA WAKATI AKIJARIBU KUWATOROKA ASKARI POLISI

2016-07-31T11:01:00.001+03:00

Mtuhumiwa wa ujambazi Msafiri Suleiman maarufu kwa jina la Juma Msukuma ameuawa wakati akijaribu kuwatoroka Polisi.

Kamanda wa Polisi wa Mkoa wa Mwanza, Ahmed Msangi alisema jana kuwa tukio hilo lilitokea Julai 28 mwaka huu majira ya saa 10.30 jioni katika eneo la Igoma kata ya Igoma jijini Mwanza.

Kamanda Msangi alisema mtuhumiwa siku hiyo alikuwa amekamatwa na Polisi akituhumiwa kufanya matukio ya unyang’anyi wa kutumia silaha akishirikiana na wenzake watatu.

Aliwataja watu hao aliokuwa akishirikiana nao ambao kwa sasa wamekamatwa na polisi kuwa ni Jackson Magesa ( Nyakibimbi), Samwel Mwita na Boniphace Nyamhanga.

Kamanda alisema baada ya mahojiano na polisi mtuhumiwa alikiri kuhusika na uhalifu na akakubali kwenda kuwaonesha askari sehemu aliyoficha silaha maeneo ya Buhongwa mlimani.

Alisema walipofika eneo husika aliwaonesha mkasi mkubwa wa kukatia vyuma na kipande cha nondo, huku akiwathibitishia kuwa silaha alikuwa ameichimbia ardhini katika eneo hilo.

“Wakati askari wakiwa kwenye harakati za kufukua ili waichukue silaha hiyo, mtuhumiwa alitumia mwanya huo kuanza kukimbia huku akiwa na pingu mkononi, askari walifyatua hewani risasi tatu, lakini mtuhumiwa hakutii amri hiyo ndipo alipopigwa risasi mguuni na kufanikiwa kukamatwa”, alifafanua.

Alisema alifariki dunia akiwa njiani kupelekwa hospitali.

“ Watuhumiwa aliokuwa akishirikiana nao tumewakamata na tumewakuta wakiwa na bunduki aina ya Rifle Mark 4 ikiwa na risasi nne, ikiwa na kitako cha bunduki waliyopora, nyundo moja na vipande vitatu vya nondo”, alisema.

“ Watuhumiwa hao tunawashikilia kwa matukio ya unyang’anyi ni Nyashishi, Buhongwa, Bulale, Nyambichi na Mwananchi ambapo walipora silaha toka kwa mlinzi wa Kampuni ya Paroma Patrol Security Service”, alsema kamanda huyo wa polisi.

MWSIHO: