अनुसिरजण

मुत्तुलक्ष्मी

noreply@blogger.com (नीरज दइया) — Wed, 05 Oct 2011 21:53:44 PDT

धुण लाग्योड़ा दिन

आ कुबाण काठी लागगी लारै

बिचाळै सूं पाछो मुड़ी आवूं

हरेक दाण ।

हुवै सामनो भूलां सूं

अर टुकड़ा मांय मिली

कामयाबी रै साथै

जिका भेज्या हा पाछा

जूण-जातरा रा अखूट आखर ।

बारंबार आवूं-जावूं उण पछै ई

खाडा अर धोरां री

सैंध कीं काम कोनी आवै

सामीं ऊभा होय जावै रोड़ा दांईं

सायरै खातर बपरायोड़ा साधन ।

काच री भींत माथै

हाका करता मारै थाप्यां

मारग री खोज

गांठ्यां खोलता-खोलता

बधता जावै भेद

महीना अर बरसां बिचाळै

बेरहमी सूं

सोख लेवै दिनां मांय सूं निरांयति

तौफान रै चक्कारियै दांईं ले उडै ।

***

सोबत

उजास नै ऊपर सूं थाम’र

सुरां नै संजोया राख्या

कर रिंधरोही रै कोल माथै पतियारो

घोसळो बणायो म्हैं ई ।

कदै-कदास लाग जावै

अणचाइजतो लांपो

तद चलार’र रिंधरोही

बुलावै मेह मामै नै, बरसावै सागीड़ो मेह

बुझा’र अगन करै निरभय ।

अंधारै रै सागै

पसर जावै सूनवाड़

इण ढाळै अमन-चैन रै माहौल मांय

खुद खुद री परखूं धार

छीणी री आवाज भेळै

लालच

रिंधरोही रै बारै

माडाणी करावतो रैवै- भटका ।

***

अनुसिरजण : नीरज दइया

*************************************************************************

तमिल कवयित्री : एस. मुत्तुलक्ष्मी

तमिल री युवा कविता मांय खास नांव । बेगी ई पैलो कविता संग्रह सामीं आवण मांय है ।

*************************************************************************

परिचय दास

noreply@blogger.com (नीरज दइया) — Wed, 05 Oct 2011 21:49:05 PDT

कविता मांय बतळावतां-बतळावतां

कविता मांय बतलावतां-बतळावतां

आबार अबार ही बै निकळग्या अठै सूं

आखी दुनिया नै उखण परा माथै माथै

माटी री खुसबू गंधावै

बां मांय कितरी कला है, कितरी समझदारी

कितरो चांकैसर सोच, कितरी लाग-लपेट

कितरो धीजो, कितरी अक्कल

कितरी संवेदना, कितरी कलाकारी

बां री कविता री कोपी मांय

कीं ठिकाणा हा किसाना रा

कीं तबेला दूधिया रा

कीं ठीहा हा जूता गांठणियां भाइयां रा

लुगाई री कोई फरमाइस ही

तो टाबरां री पेंसिल रो नांव

कूंट आळी चाय री दुकान माथली गप्प ही

जूण सूं आंती आयोड़ी हाका करती हार ही

तो घुप्प अंधारै मांय रळतै आंसुवां री कसक

जिका प्रकासकां कोनी छापी बां री पोथी

बां रो मोल-भाव हो

जिका मौके-बेमौके धिक्कारता रैवता हां :

फटकार रो सबद-सास्त्र हो

अखबारां मांय मिनखपणै री खुरचण रो

ताजो-ताजो दाखलो हो

तो फसलां सूं गायब हुंवती

हरियाळी रा

कीं हाल-चाल हा

बां मांयली माटी काढी

मन नै मथ परा

दुनिया नै उखण परा माथै

कविता रची ।

***

रागळी

ठेठ सूं चाली आवै आ बात कै चांद सीतळ है

आ जुगा-जूनी आ बात कै चांद मांय दाग है

पण चांद मांय कविता जैड़ी एक रागळी है

चांद मांय फाग है

चांद मांय मौसमी राग है

चांद ही है जिण रै पाण आपां अंधारो सह सकां

चांद हाथ री चूड़ी, मतलब रात रो गैणो

चांद मन रै खुणै मांय उग्या तारां भेळै फिरणो है

रूपाळो चांद बायरै रै सागै-सागै

रैवणो है! बैवणो है!

खगोल-सास्त्र दावै भलाई जिंयां कैवो

साहित्य खगोल-सास्त्र रो उल्थो कोनी !!

***

मोल लावो प्रीत-अपणायत

आज रै जमानै रो ढाळो है -

जिको बिक सकै, उण नै बेच देवो

अठै तांईं कै जिको बिकै

बो साहित्य बेच देवो, कला बेच देवो, खेल बेच देवो

जिको नीं बिक सकै

अर बिकण सूं मुकर जावै

उण नै एक्कैकानी कर देवो

करो उण रो तिरसकार

बिकणो ही जुग री जरूरत है

बाकी स्सौ कीं

अणचाइजतो बणग्यो है, टाळीजग्यो है

मोल लावो संवेदना

मोल लावो प्रीत-अपणायत

मोल लावो रिस्ता-नाता

बजार मांय ऊभा हो :

भूमंडलीकरण रै बजार मांय !

***

अनुसिरजण : नीरज दइया

*************************************************************************

भोजपुरी कवि : डॉ. रवीन्द्रनाथ श्रीवास्तव `परिचय दास’

भोजपुरीमें पाँच कविता-संग्रह- एक नया विन्यास (2004), पृथ्वि से रस लेके (2006), चारुता (2006), युगपत समीकरण में (2007), संसद भवन की छत पर खड़ा हो के (2007) रै अलावा केई पोथ्यां प्रकाशित । अबार हिंदी अकादमी रा सचिव।

*************************************************************************

ब्रजेंद्र कुमार ब्रह्म

noreply@blogger.com (नीरज दइया) — Wed, 01 Jun 2011 17:01:46 PDT

अनुसिरजक : नीरज दइया

मरवण रै नांव

सूझै कोनी हाथ नै हाथ

रात रै इण अंधियारै मांय

मरवण ! थारी-

जुगनू जैड़ी मुळक

करै म्हारै अंतस-आभै उजास

बण परभातियो तारो-

थूं कोई अणूती बात ना विचारजै

बिंयां रूप-तीरथ रो पैलो जातरी म्हैं हूं

पण इण मारग है म्हारै दांईं, केई दूजा जातरी ।

थारी निजरां

बसंत रै ओळावै बसंत भेळै

करै चरूड़ म्हारै अंतस-आंगणै मांय

अजंता, ऐलोरा रा गूंगा चितराम

तद सोचजै थूं मरवण

हियो समझै हियै रा हरफ ।

ठाह है थनै म्हारी मरवण !

थारो बसंत आलोक

प्रेरक-जोत बण सोधै-

मरुथळ री छाती दब्या हरियल बाग-बगीचा

अर थारी खिलखिलाट मांय पांगरै

अफसरा रै अरूप रूप री

रूपाळी नै बेजोड़ सोभा ।

मरवण !

थूं ठोकर में ना उडा दियै

ऐ सुपना है म्हारै काचै काळजै रा

काळजो मत बाळजै

करलै इण नै स्वीकार ।

***

कुवै रो मेढक

बाड़ी री कूंट माथै बणयै एक कुवै मांय

निसंक, बेझिझक भोगतो राजसी ठाठ-बाट

तिरिया करतो हो एक मेढक-

बो गाया करतो हो गाणो जी-भर’र

पण सुणणियो कोई कोनीं हो,

हो बो चकारियो ही

खेलण-कूदण, नाचण-गावण वास्तै

घर-गळी आंगणो स्सौ कीं उण खातर ।

कांईं कोनीं देवण खातर

कांईं कोनीं लेवण खातर

कोनी बीं रै कोई भाई-बीरो

कोनी कोई कडूंबै रो का भाइपै रो

ना तो बो किणी देस नै जाणै

ना परदेस सूं कोई साठ-गांठ ।

एक दिन पक्कायत आवैला जोरदार तूफान

धरती भेळी हुय जावैला कुवै री सींव,

भळै आवैला घणी खतरनाक बाढ

साथै लावैला अस्त-पस्त करण नै जोरदार लैहरां ।

उण दिन बो देखैला नूंवै दिन रो नूंवो परभात

सूरज काटैला अंधारो

नूंवादै चांनणै सूं चमकैला

इण दीठाव सूं सूझैला उण नै नूंवो संसार

देखैला कुवै सूं बारली असीम अनंत दुनिया ।

कोनी रैवैला कोई चावना

अर ना हुवैला कीं खोवण री गिरगिराट

कुवै रै मेंढक नांव सूं उण नै मिलैला मुगती ।

***

अनुसिरजण : नीरज दइया

********************************************

बोडो कवि : ब्रजेंद्र कुमार ब्रह्म जलम : 1943

केई कविता संग्रह प्रकाशित । कविता रै अलावा निंबंध लेखन पेटै ई खासो काम करियोड़ो ।

********************************************

सुकुमारन्‌

noreply@blogger.com (नीरज दइया) — Tue, 04 Oct 2011 23:54:15 PDT

आपो आप रो घर

घर एक ई’ज है ।

एक ई’ज घर मांय जीवां, आपां ।

एक ही घर मांय

अलेखूं घर ।

आं मांय ई’ज जीय रैया हां आपां ।

म्हारै घर री भींत माथै

थारी फोटू ।

घर पण म्हारो, थारो कोनी ।

थारै घर री भींत माथै

म्हारी फोटू ।

घर पण थारो, कोनी म्हारो ।

म्हारो आपरो

थारो आपरो

है घर ।

म्हारै घर रा बांडा थारै खातर बंद ।

थारै घर रा बांडा म्हारै खातर बंद ।

आपां जीवां घर मांय

कै कैदी हा, पहरैदार समेत ।

समझ्यो कोनी म्हैं ।

अर, थूं ?

***

आ सदी : एक दीठाव

मिनखां दांईं कट्‌योड़ा हा रूंख

बां री घड़ां सूं अजेस थम्यो कोनी हो ताजो रगत

काल इणी मारग देख्यो अनूठो परभात

दूर भाखरां रै ऊंचै आसण बिराज्यै

सूरज रै मूढै माथै आपां जैड़ी मानवी मुळक ही

पंखेरूंवां रो चैंकारो

छींया री करुणा

पानड़ा माथै सागर-सी बारंबार हिलोरां

बायरै लारै-लारै फूलां रो बोलणो

धरती आभै बिचाळै केई अणसुळझ्या सवाल

आज ओ रोही मरूथळ-दांई धधकै

कट्‌योड़ा रूंखा रै बिचाळै

करै तावड़ो हाऊ-हाऊ

रूंखां रै घावां मांय मून बेकसूर हुवण रो

सरकारी कागदां मांय चांडाला-चौकड़ी री हेकड़ी

रूंखां, मिनखां रै बिचाळै

चमक कुल्हाड़ी री

सूनी हुई इण जमीन माथै

फड़फड़ावै-छटपटावै बै खुद री पांख्यां रै ताण ।

***

फालतू जिनावर

ढीलो हो उण रो अंग-अंग

सांवट राख्यो हो डील खुद रो इंयां

जाणै हंसो बैठो हुवै उड़ण नै तैयार

खुद नै भेळो करतो थको

सूंध्यां बो म्हारा पग

देखै हो म्हैं उण टैम कठीनै और

दया उमटी

उण री आंख्यां मांय ही लाचारी

फेंक्यां म्हैं दोय सबद उण कानी

भूख मिटगी पण बो कोनी हट्यो आपरी जागा सूं

छींयां दांईं करतो रैयो बो म्हारो लारो

बगत बीत्यां

उण रा पग, मूढो अर रूं-रूं बधता गया

दांत, नख उगण लाग्या

आंख्यां माय उपजण लागी रीस

डरता इण सूं बचण लाग्या

म्हारा भायला म्हारै सूं ई’ज

टाबर लुकण लागग्या

बो भळै ई बध्यो

बधतो-बधतो

हुयग्यो म्हारै सूं ई मोटो ।

दांतां मांय चिलकण लागी क्रूरता

तद ई म्हैं अबोलो रैयो

ओ सोच’र कै बो कीं नीं करैला

उण री गुर्‌र-गुर्‌राट सूं

तूटण लागी म्हारी निरायंती

उण रा खिंड्योड़ा रूंवां अर गू-मूत सूं

पसरण लागी बास म्हारै कमरै मांय

उण सूं उफत’र म्हैं बांध दियो

म्हारी आस अर पतियारै री सांकळ सूं

घूमती बगत घींसतो सांकळ

बो ई म्हरै साथै-साथै चालण लाग्यो

जद म्हैं मांदो पड़्यो

बो म्हनै ई’ज खींचण लाग्यो

सांकळ मांय उळझतो म्हैं

म्हारो दम घुटण लागग्यो

अबै फसग्यो निकळूं किंयां

दिन-रात एक ई’ज चिंता

एक दिन जद म्हनै लाग्यो

सांकळ हुयगी है ढीली

तद म्हैं हुयो घणो राजी

चालो हुई छुट्टी

बो दीस्यो कोनी

पण म्हारै अंतस रै आंगणै

लगोलग एक डर बैठो रैयो

म्हारै सूं गैल कोनी छूटी

सांकळ रै दूजै छेड़ै

कठैई बो अजै तांई लुक्योड़ो बैठो हुयो तो

हो सकै किणी कूंट अणजाण खूणै-खचूणै मांय ।

***

अनुसिरजण : नीरज दइया

*******************************************

तेलुगु कवि : सुकुमारन्‌

केई कविता संग्रै प्रकाशित नै पुरस्कृत ।

*******************************************

केदार कानन

noreply@blogger.com (नीरज दइया) — Fri, 27 May 2011 08:25:38 PDT

अनुसिरजक : नीरज दइया

घर

घर घर ही हुवै

हुवो बठै भलाई लाखूं अबखायां

जठै मा हुवै

उडीकती थकी आपरी

बूढी अर थाकल आंख्यां सूं-

भूख अर दरद सूं बेचैन

खुद रै बेटै री

उडीक करती थकी मा ।

घर घर ई हुवै

हुवो बठै भलाई लाखूं दुख

चिडकल्यां रा ई’ज

जिकी दिन भर अथाह आभै मांय

तिरती रैवै

रुळेट-सी रूळती रैवै

अर सिंझ्यां बावड़ै

आपरै आलणां मांय, डाळां माथै

म्हैं कैयो नीं घर-घर ई हुवै

च्यारूंमेर सूं

एक सुख, अपणायत अर कवच लियां ।

***

ओ अणमाप जीवण

जे बचाय सकूं

कीं पण इण जीवण मांय

म्हैं चोरणो चावूं इण जीवण रै

मगसै अंधारै सूं कीं रोसणी

तो स्यात्‌

बा ई’ज रैवैला सागै

उतरो ई’ज गिणीजैला

जीवण रो संबळ

थम्योड़ो है दिन

खिसकै कोनी रात

राई जित्ती ई’ज

कीं धकै बधा सकूं जिंयां कै इण बगत नै

तद दूसर सिरजण हुवैला जुग रो

दूसर सिरजैला ओ बगत

बूकियां रो

अर बूकियां रो

... अर बूकियां रो

जे लगाइजै

थोड़ो ई जोर

राई जित्तो

ऐकठ साथै जोर सूं

हुय जावैला साची जीवण-जीवणो

ओ अणमाप जीवण ।

***

आं च्यार पीढियां मांय

आपरै जीवण रै छेकड़लै बगत मांय

कैवतां हा दादीसा-

कै जद थारै जीसा रो जलम हुयो

तद करज मांय कळीज्योड़ा हा थारा दादोसा ।

कथणो ई अबखो

किण ढाळै कथूं कै बां नै किंयां पाळ्‌या-पोस्या

अर अधकीचरी भणाई हुयगी इंयां किंयां ई’ज

आडै दिन ई चेतै आवै बै दिन

अर आंख्यां डबडबाईज्या

जाणै ऐकलधार उमटी हुवै गंगा-जमना ।

समूळै जीवण बेचैन

करता रैया हाय-हाय सगळी जरूरतां वास्तै

दब्योड़ा जीसा री बै बातां

म्हनै बिंयां री बिंयां चेतै है-

खुद रै ई अंधारै खुद भटकता रैया

निरासा रो लांबो चादरो लपेटियां

डर्‌योड़ी-सी दीठ लियां कदैई मा नै

कदैई म्हनै

आंगणै मांय खाली बैठा बै आभै नै निरखता

म्हैं केई बार देख्यो हो बा नै

आज म्हैं खुद रै बारै मांय विचारूं

टाबरपणै मांय सुणी ही

खुद रै जीसा री कथा चेतै आवै

सोचतो ई’ज रैय जावूं

साचाणी कीं कोनी बदळियो

फगत माथै मांय गुलाब री जागां

ऊग आया है थोर

आंगणै मांय दरी माथै रमता

म्हैं खुद रै टाबरां नै देखूं

बां नै रोटी या जीवण खातर

कोई सुपनो ई नीं देय सकूं म्हैं

लुगाई री आंख्यां मांय दीठाव

म्हारी आंख्यां रै दीठाव सूं जुदा कोनी

मसाणां दांई जीवण सूनो-सूनो अर एकदम भारी

करज रै भारै सूं भारी, अबखो अर उफतावू

लागै है म्हनै म्हारो लाडेसर

बीं री छळ-छंदां सूं जुदा मुळक

म्हनै घणी बार

किणी मुगल-पठान जिसी मुळक लखावै ।

साची कैवतां हा दादीसा

अबै विचारूं-

जुग जरा-सो ई’ज कोनी बदळियो

आं च्यार पीढियां मांय !

***

अनुसिरजण : नीरज दइया

*******************************************************
मैथिली कवि : केदार कानन जलम : 10 जुलाई, 1959 सुपौल (बिहार)
आपरा तीन कविता संग्रै प्रकाशित हुया अर आप अनुवाद पेटै ई जसजोग काम करियो है । श्रीकांत वर्मा री काव्य पोथी मगध रै अलावा ई केई पोथ्यां रो मैथिली अनुवाद साहित्य अकादेमी सूं प्रकाशित ।

*******************************************************

जयप्रभा

noreply@blogger.com (नीरज दइया) — Wed, 25 May 2011 08:55:11 PDT

इणी खातर तो बै रिसी है

एक रै पछै एक लपेटो

उधड़ती बगत

द्रोपदी रै मन मांय कांईं बीती हुवैला

महाभारत साचाणी कीं कोनी कैवै

जद किणी किचक बीं री लटां खांची

भोभर मांय सिकती रैयी उण री कंचन काया

पांच-पांच भरतारां रै होवतां थकां ई’ज

कितरी-कितरी छळीजी बा

व्यास कांईं समझ सकता हा

कै कांईं कांईं लिख्यां कांई कांईं बीतैला

कठैई तूट नीं जावै सती रो सत

बचाय’र निकाळ लेयग्या कथा नै

जुधिष्ठिर कानी मोड़ता थकां

बेजा राजनीति खेली महाभारत लिखतां

व्यास नै दावै जठै कथा मोड़ण मांय आंट ई कांईं ही ?

इण खातर तो बै रिसी है

उणा रै ना घर हुवै ना घरआळी

ना बेटियां

बै तो जलमै घड़ा मांय सूं

बां री तो कोई मा ई’ज नीं हुवै !

***

जीसा क्यूं कोनी आवै ?

मा रो पल्लो खींचती थकी-

“मा ! आ रेलगाड़ी कद थमैला”

आखती हुय’र पूछ्‌यो छोरी ।

बा बीमार मा हांचळ नीं देवै

डब्बै रै दूध सूं मांदगी भुगतै बेटो

आ सोचती मा बिसूर जावै

छेकड़ आ गाड़ी कद थमैला ?

खुवां माथै सालेक रो नानकियो

कदैई उण रो रोवणो ढबै ई’ज कोनी

कांई करै कीं समझ मांय नीं आवै ।

उण रो रोवणो कदैई डबै ई कोनी

बा ऊभी रैवै बेटै नै लाद्‌यां

हाथ-पग दुखै, पण तो ई बिसांई कठै ।

कठैई किणी नै कोई तकलीफ कोनी

मायूस हुयोड़ी बा नानकियै नै पुचकारै

सोय-जा बेटा सोय-जा

मांदगी मांय मा थाक्योड़ी हार्‌योड़ी

टाबर रै मूत सूं आली धोती

ठंडै बायरै रै पाण लेवण लागगी मन रा छोडा ।

अबै भळै टाबर नै उखणण री हिम्मत ई को रैयी नीं

कांई कड़तू दूखण लागी !

फेर ई झालणो है

देस-सेवा खातर सैवणो है

रीत-रिवाज रै पाण झेलणो है

सगळा सूं इधकी बात तो

लुगायां री तकलीफां सूं हूंस लेय’र

आवण वाळै बगत मांय कवियां नै

मावां माथै रचणी है कवितावां

बां खातर ई लुगायां चालो थानै स्सौ कीं सैवणो है ।

बो घणो नान्हो टाबर है

इणी खातर बो मा रै इण त्याग-तप नै नीं ओळखै

बो अजेस रोवण री धुन मांय बस रोवै

....मां ! म्हनै जीसा चाइजै !....

छोटियै भाई रै रींकारै मांय कठैई अणसुणी ना कर देवै मा

मां रो पल्लो खींचता थको

आखती हुयोड़ी छोरी पटकै आपरा हाथ-पग ।

... ठेसण माथै पूगतां ई’ज जीसा आवैला, लाडो !...

(ठीक इणी बगत कविता मांय कवि मराज मा री महिमा री बिड़द बांचै,

उण री सैन-सगती री तुलना धरती माता सूं करै ।)

...जीसा रेलगाड़ी मांय म्हांनै बैठावण नै आवै

पण म्हां भेळा कदैई रेल-जातरा भेळी क्यूं नीं करै ?..

रीस मांय छोरी आपरी संका सीधी मा सामी राखै

तद ई’ज बा मा “घर धरियाणी” रै भार हेठै चींथीजती जावै

इणी खातर ओ कैयो नीं जा सकै

कै हाथ आळै काम नै बिसराय’र

नूंवै काम रै ओळावो धड़ता थका आपां सूं फारिग हुवै

जीसा कदैई सगळा साथै नीं आवै

.... मा ! गुल्फी लेवणी है ! .....

बीं री आ मांग गैरवाजिब कोनी

छेकड़ टाबरां रा ई’ज तो कीं हक हुया करै है

....चुप ! म्हनै उफता मती...

मा धमकावै बीं कनै एक कोड़ी ई कोनी बची

मन मांयली रीस छेकड़ किण माथै उतरती ?

आंख्यां सूं आसुवां नीं ढळकै क्यूं कै काढियोड़ी है कार !

छेकड़ बा ई’ज तो सीख देवै जैड़ी घर धणियाणी !

रेल-गाड़ी री बोगी मांय एकै कानी

खादी धारिया दोय गुंडा करै अखबार सूं राजनीति ।

एक कूंट माथै आराम सूं बिराजै

पापड़-बेलण पकड़ियां मोटी मासी रो फोटू कोरण माय

रुध्योड़ो है कार्टूनिस्ट बाफ्यां निकळती कोफी रा लेवै चुस्कारा

पूरी पाकी हुयोड़ी दाड़ी नै कुचरतो

माइतपणो दरसावता आधो ऊंधीजै

खुद री लुगाई रो गोलो बण्यो

लुगायां रै काम-धाम री कठैई कीं गिनार कोनी

कदैई-कदैई जोरदार कवितावां लिखणियो

एक वामपंथी मानीजतो कवि अठै ई बिराजै ।

पण मुलकाबायरै समान भेळै टाबरां नै

बां री मावां भेळै गाड़ी मांय बैठावै

उण पछै सीटी बजावतां आराम सूं

तीन बजी आळो शो..सनिमा.. तास-पत्ती..

दूजी कोई ऐस मांय मन बिलमावणियां

जीसा बाबत अनजाण भोळा टाबर

जातरा मांय एकली अर बेबस

फगत मावां ई’ज इण ढाळै दुख क्यूं झालै

घणो तपयोड़ो टाबर

कदैई कदैई तमतमा’र सवाल बूझै-

छेकड़ आपां भेळा जीसा क्यूं कोनी आवै ?

***

अनुसिरजण : नीरज दइया

**************************************************************************

तेलुगु कवयित्री : जयप्रभा जलम : 1957 तेलुगु नाटकां माथै पीएच.डी.

तेलुगु री चावी-ठावी कवयित्री जयप्रभा रा सात कविता संग्रै प्रकाशित हुया । कविता साथै आलोचना ई बरोबर लिखै । जूनै साहित्य माथै ई शोध-परख रो लूंठो काम आप करियो है । देस-विदेस मांय कविता-पाठ अर कार्यशालावां मांय भाग लियो ।

**************************************************************************

ब्रजनाथ बेताब

noreply@blogger.com (नीरज दइया) — Tue, 24 May 2011 02:36:03 PDT

म्हारा मसाण कठै ?

आभै मांय

उडण वाळा पंखेरू

आय’र बैठ जा

किणी डाळी माथै

म्हारै आखती का पाखती

थोड़ी’क ताळ खातर

म्हैं थनै देखणो चावूं

थारी पांख्यां नै

जिकी लेय जावै थनै

दूर आभै मांय

अर बणावै

हिस्सो कुदरत रो

पांख्या-

जिकी म्हैं ई लगाई कदैई

अर बणणो चायो हो

हिस्सो खुद री जमीन रो ।

पांख्यां- थारी पांख्यां

जिकी लेय जावै थनै

जमीन सूं आभै तांई

पांख्यां- म्हारी पांख्यां

जिकी फड़फड़ावती ही

जद हर मांय कुळबुळावती

बुलावै ही म्हनै

गांव री हरियाळी

सियाळै रो ठंडो समीकरण

थनै ई ऐड़ो लखावै कांईं

जद थूं बावड़ै कर जातरा

आभै सूं जमीन माथै ?

आभै मांय उडण वाळा फंखेरू

आय’र बैठ जाव

किणी डाळी माथै

म्हारै आखती का पाखती

थोड़ी’क ताळ खातर

थासूं कीं कैवणो है

कीं पूछणो है म्हनै

ओ आभै रा वासिंदा !

बावड़ै पाछो अळधै आभै सूं

सिंझ्यां पैली

क्यूं थूं थारै घोसळै मांय ?

कदैई मारग भूल नीं भटकै

बादळ, बिरखा का कोई भाखर

नीं ढाब सकै कदैई थारो मारग ?

कीं तो बताव

कीं सीखाव म्हनै ई’ज ।

आभै मांय उडण वाळा फंखेरू

आय’र बैठ जाव

किणी डाळी माथै

म्हारै आखती का पाखती

खोल दे अबै तो थूं थारो मून

म्हैं थारी गूंगी भाषा

नीं समझ सकूं

कांई कोई राजनीति

डरावै थनै ई’ज ?

बेघर हुवण रो डर है ?

कांई टोळी सूं टळ्‌यां

थारै मांय ई जागै

म्हारै सरीखो भाव ?

आभै मांय उडण वाळा फंखेरू

आय’र बैठ जाव

किणी डाळी माथै

म्हारै आखती का पाखती

अर होळै सूं

निरायंत नै धीजै सूं

आव बताव

कांई थूं गयो हो

म्हारै गांव कानी

कांई थूं देख’र आयो

म्हारा खेत

सरसों रा फूल ।

किसो’क है बां रो रंग

रातो, मूंगो का धोळो-धप्प ?

कांई थूं मिल्यो

बठै नदी रै कांठै पसवाड़ै

म्हारै घर-आंगणै मांय किण सूं

का हुया भेटा थारा

उठै उण रूंख हेठै

म्हारी ’आतमा’ सूं ?

ऊंचै आभै मांय उडण वाळा फंखेरू

आय’र बैठ जाव म्हारै खन्नै

किणी डाळी माथै

थोड़ी’क ताळ खातर

डर मत ना,

म्हारै खन्नै “क्लाश-नि-कॉफ” नीं

इतरो बता ’दिशव’

कै थूं म्हनै लेय जावैला कांई

खुद रै साथै आभै मांय

जद आ म्हारी जमीन

तिरसकार कर छिटकावैला म्हनै ?

ओ ई नीं बतावैला

तद इत्तो तो भलो करजै

कै सिंझ्यां हुया पैली

उड़ परो जाय आव

बस एक बार

म्हारै गांव कानी

संभाळ आव

म्हारा मसाण कठै

थाकग्यो (जोवतो-जोवतो)

अबै लेवणी चावूं

नींद निरायंत सूं !

***

अनुसिरजण : नीरज दइया

के. वी. तिरुमळेश

noreply@blogger.com (नीरज दइया) — Mon, 23 May 2011 21:38:34 PDT

बेनामी जिनसां

बेनामी जिनसा दीसी तो

बां रै नांव खातर भटकता

बेनामी नै ओळखणो

ओळख परो बकारणो

आपां बेबस हुवां ।

’साने’ आपरी आत्मकथा मांय लिखै-

दुनिया री सगळी जिनसां

आपरो नांव मांगती थकी

जाणै म्हारै पाखती आवती लखावै

नांव देवण रै मिस

लागै सगळा नै भाषा

कै जे आ नीं हुवै तो म्हैं नीं लिखतो ।

डोळी रै उण पार महकै-

रोही रा फूल

रोजीना बां नै चूंट-चूंट

घरै जावै कोई एक जणी

म्हारै कमरै मांय

नांव भूल्यां बैठो म्हैं

बां नै किण ढाळै बकारूं ?

रात नै एक नींद लेय’र उठ्या पछै

बै अळसायोड़ा लाधैला ।

***

अंधारो-उजाळो

काळती मिनकी धोलती मिनकी नै कैयो-

थारै धोळीकी रै मौज है

लोग थनै हेत सूं राखै

खोळै मांय बैठावै-रमावै

थारै म्याऊं करण री जेज है

कै सामीं दूध सूं भरीयोड़ी बाटकी हाजर ।

तद धोळती मिनकी बोली-

थूं काळती हुवण रै कारण ई’ज

दिन बिसूंज्यां किणी नै कोनी दीसै

अंधारै मांय बण अंधारो भटका करै

इणी खातर तो

थनै देखतां ई लात मारण री इच्छया हुवै ।

***

तरीको

कैयो कोनी हो कांईं म्हैं

बो रैवै है इंयां ई’ज

उण नै मत छेड़ो

बो कोई गैलसफो का महामूरख कोनी

उण रो प्रेम रै भोळावै मांय

माथो चकीजैड़ो ई कोनी

घर-परिवार मांय कोई ऐड़ी ओळ ई नीं

कै बीं रै बाप-दादावां मांय

कोई हुयो हुवै इस्सो

उण नै आपरी दुनिया मांय छोड़्यां

कीं नीं करै बो किणी रै ।

बीं री बातां गाळ सरीखी लाग सकै थांनै

उणां रो ढंग-ढाळो ई न्यारो-निरवाळो

छंदां नै किणी फळ दांईं अरोगै

भाठा दांईं बगावै

चौपाळ मांय बैठ’र ओळ्‌यां नै

डोरां दांईं बणावतो थको

बीड़ी रै धूवै दांईं फूंकै

अरथ रा केई केई बादळां नै ।

देस-दिसावर री घुमाई ई’ज नीं करी

बिहार, बंगाल, उडीस

काशमीर, हिमाचळ प्रदेश,

पंजाब, गुजरात, मराठा

कठै’ई कोनी गयो बो

बेलची, भोपाल, भागलपुर

मीनाक्षीपुर, कामाठीपुर, तिरुवनंतपुर

च्यार मीनार, कुतुबमीनार, श्रवण बेलगोल

राजघाट, तालीकोटे, जलियावाला बाग

देख्यो ई कोनी कदैई

गांधी, नेहरू, पटेल, जिन्ना

शेख अब्दुल्ला, इंदिरा गांधी, संजय गांधी

फूलन देवी, हाजी मस्तान

मोरारजी देसाई, क्रांति देसाई, वाजपेयी

अकबर, अशोक, तुगलक

चरणसिंह, स्वर्णसिंह, भिंडरवाला

राज नारायण, अमजद खान

खान अब्दुलगप्फार खान

किणी नै देख्यो कोनी

फेर ई उणा रै कैयोड़ै मांय कूड़ कोनी

सगळी जागावां गयोड़ो है बो

स्सौ की जाणै देख्योड़ो है बो

सगळा नै सावळ ओलखै !

कोई मानै भलाई ना मानै

बो खुद नै महात्मा गांधी समझ’र

बुसट खोल’र बगावतो थको

कैवै- डांडी जातर माथै निकळसूं

टुर परो जा पूग्यो कुंबल तांई

बो ठाह नीं कितरी बार

अन्न-जळ छोड़ नै बरतियो बण सूयग्यो हो

गांधी हत्या रै दिन समझायो कै नीं रैया गांधी

पछै जद नाथूराम गोडसे नै फांसी हुई

ऊभो हो अठै’ई भूण नीची घाल्या ।

खून, लूट-खसोट, अत्याचार, अहिंसा

अकाळ, बीमारी, महाजुद्ध

सगळा आप आप रै तरीकै मुजब चालै

बो भरी दौपारी टकटकी बांध्या

आंख्या फाड़तो सूरज अगाड़ी ऊभो रैवै

किणी सांच नै जाणै उडीकतो हुवै

पण बताओ रो सरी-

कुण-सो देस दोय-दोय सूरज साजैला ?

ओ अबार सूं ई’ज लखण रो लाडो

आंधो हुवण लाग रैयो है ।

***

अनुसिरजण : नीरज दइया

************************************************

कन्न्ड़ कवि : के. वी. तिरुमळेश जलम : 1940 हैदराबाद

केई मौलिक नै अनुवाद रा कविता संगै प्रकाशित अर पुरस्कृत । अंगेजी भाषा रा लूंठा जाणीकार प्रो. के. वी. तिरुमळेश विश्व कविता नै आपरी भाषा कन्नड़ मांय अनुवाद रै जरियै पूगाई अर साहित्यशास्त्र रै केई गूढ विषयां माथै सांतरा निबंध ई लिख्या नै चावा हुया ।

************************************************

अरुण साखरदांडे

noreply@blogger.com (नीरज दइया) — Sat, 28 May 2011 16:30:58 PDT

कागलै रो सराध

कागली आपरै बेटै सूं पूछियो,
अरे, थारै जीसा रो सराध कोनी करणो कांईं ?
कागलै रो बेटो बोल्यो,

जीसा म्हारै खातर कांईं कर्‌यो ?

कागली बोली,

मान्यो जीसा तो

थारै खातर कीं नीं कर्‌यो

पण थनै जाम्यो तो है नीं ?

कागलै रो बेटो रीस मांय

दो-तीन वळा खुद रो माथो पीट्यो

अर बामण कागलै रै अठै गयो परो

ब्रामण कागलै तारीख बता दी

कागलै रो बेटो सराध री

सगळी तैयारी कर ली
सराध आळै दिन दो-च्यार गिनायती ई’ज आयग्या

बामण कागलै विधि-विधान सूं

सगळी रस्मां पूरी करी

कागलै रो बेटो

मिंदर पाखती पेड़ हेठै पिंड राख दियो

मिंदर रै दरवाजै बैठो

आधो पागल मंगतो

भाग’र आयो अर पिंड खावण लाग्यो

“मिनख पिंड नै ले लियो, मिनख पिंड नै ले लियो”

कागलै रो एक गिनायती रोळो कर्‌यो

कागली री आंख्यां गीली हुयगी

आंसू ढळक्या

दोय मोती पेड़ रै मूळ मांय टपक्या

अर सूखी रेत मांत रळग्या ।

***

कविता

कविता रचूं जणा

केई ताळ चोखी लागै

पण पछै एक एक सबद

आंख्यां आगै

सूज-सूज’र हेठै पड़ जावै

जाणै मर परो बो

धूड़ मांय रळ जावै ।

ओ सोच है कै मोरियो

आपरा रूपाळी पांख्यां पसार’र

नाचै

पछै

एक एक कर पांख्यां झड़ जावै

बां नै भेळा करता-करता

काळजो मूंढै कानी आवै

थारै गाला लाली लाज री

थारी आंख्यां मांय तंरग

थारो आवणो

थारो जावणो

थारो मुळकणो

थारो नीं होय परो ई होवणो

ऐ सगळा सदा-सदा खातर

म्हारी कविता रै आंगणै जीवता-जागता

रूपाळा रंगां लियां सबदां मांय

कांईं इंयां ई खिलैला ?

***

एक दिन कांईं हुयो

घर आपरी जड़ां छोड़ दीवी

छप्पर उड़ता, सीटी बजावता

गया परा घूमण नै

थोड़ी’क ताळ मांय खंभा कीं विचार्‌यो

घाल हाथ मांय हाथ बै ई’ज

गया परा नाचण खातर

भीतां आपरा कान खोल्या

जद आंतरै कोई बड़बड़ावै

होळै-होळै बांरा पग

बां कानी मुड़या, आयो

म्हारै लाडा-कोड़ा लडायोड़ो

भींत माथलो कलैंडर

आयो म्हारै पाखती अर

खुल्लै बायरै मांय बो ई

कठै ई उड़ग्यो ।

पैली घर मांय

म्हैं हो ऐकलो

अबै म्हारो ऐकलापो

हुयग्यो जगत रो ।

***

एक रूंख नै घर चाइजै

एक रूंख जोरामरदी

म्हारै घर मांय घुसग्यो

केई बार म्हैं उण नै उखाड़’र

बगा दियो बारै

फेर ई’ज निसरमो

दूजै दिन पाछो मांयनै घुसग्यो

जड़ा जमावण लाग्यो पाछो ।

दिन च्यारे’क हुया कै

म्हैं टी वी देखै हो

रूंख री एक डाळ टी वी सूं बारै आई

परसूं जद पूजाघर मांय पूजा करण नै गयो

पूजाघर रै आखती-पाखती

उण री जड़ा रो जबरो जाळ बिछ्‌योड़ो हो

अबै हरेक कमरै मांय डाळ्‌यां फोड़ परी

उण री जड़ा ऊंची आई है

म्हारै खून रा गिनायती तो

भागग्या

छेकड़ म्हैं धार ली

उण घर नै खुद री छाती माथै सवार हुवण दां

इण खातर बांध परी गांठड़ी

म्हैं कठैई जावण रो मत्तो कर्‌यो

दिन उग्यां जद म्हैं जाग्यो

हिल कोनी सक्यो

म्हारै पगां मांय सूं जड़ा बारै आयगी ही

और तो और उण माथै कोमल कूंपळां

चमचमाट करै ही ।

***

अनुसिरजण : नीरज दइया

*******************************************************************

कोंकणी कवि : अरुण साखरदांडे जलम : 1948

कविता संग्रै : तीन कविता संग्रै प्रकासित नै कोंकणी भाषा मंडल, जनगंगा साहित्य पुरस्कार अर कविता संग्रह ‘कावलयाचें स्राद्ध’ नै साहित्य अकादेमी पुरस्कार बरस 2010 रो ।

********************************************************************

वीरेंद्र कुमार भट्टाचार्य

noreply@blogger.com (नीरज दइया) — Mon, 23 May 2011 07:09:09 PDT

घर

तूट्यै-फूट्यै जूनै
जिण घर मांय रैवूं म्हैं
उण री बंद रैवै बारियां
बंद है जिण रा बांडा
बारी खोली तद दीस्यो-
नदी मांय आवतो उफान
म्हारै घर री नींव
अबै तूटसी... अबै बैसी... ।
***

ओळूं
असमानी आभै मांय
उदासी दांईं उतरै सिंझ्यां
अर अंतस-आभै दीसै-
जीसा रो उणियारो ।
जीवण रै उण पार सूं
जाणै झांको घालता हुवै बै
एक अणजाणै दुख री छींया
सूनी आंख्यां मांय भर परा ।

चाय-बागान मांय जद म्हैं
विचरू ऐकलो
पानड़ा री रुत मांय
धूंवो बगावै चिमनियां
तद चाणचकै मन मांयलो चांद
लुक जावै बादळियां सूं
जीसा जाणै बावड़ै घर कानी
थाक्योड़ा, होळै... होळै ।
***

लासां बिचाळै
लासां ई लासां पसर्‌योड़ी है च्यारूंमेर
डरूं-फरूं वेळा मांय अरज अर चिल्लाटी
आं अकाळ मौतां सूं उठै
म्हारै मन मांय हबीडा़
ओ विलाप ठाह नीं
कित्ती समाधियां खातर
प्रतिभावां अर गुंजाइसां खातर
अर म्हैं देवूं पौरो
एक मसाण रो...

म्हैं तो निरखै हो
एक रूपाळो चितराम
ठाह नीं कद अर किंयां
ओ लाग्यो लांपो
कै राख हुयग्यो स्सौ कीं
उण लासां भेळै
सिळगूं आज तांईं म्हैं
बळ्‌योड़ो सो अर बुझ्योड़ो सो
मन नै किण ढाळै निरायंत देवूं
हाय.. किंयां
इण नै अंवेरणो ई’ज है
इण लाय सूं
नींतर नीं बचैला
कोई चिड़ी रो जायो ई’ज...।
***

मुठ्ठी’क चावळिया
मुठ्ठी’क चावला नै
तरसै मन म्हारो
गूंगो कर छोड़्यो म्हनै
नदी रै दोनूं कांठां
झरै आंख्यां सूं
मोती बेबसी रा
चांद ब्यौपारी री नाव
लेय जावै अनाज ओलै-छानै
नीं लूटां जे गोदाम
तद जीवां किंयां ?
मंदिरां मांय धी रा दिवला
रसोवड़ा रा चूल्हा ठंडा पड़्या
हंसां नै मोती चुगण नै
अर गऊ बापड़ी भूखी मरै
जे कोई भूखो मांगै रोटी
तो तातो चिंपयो चेपै ।
जोरेंगा रै चौगानां मांय
जूण काटण रा पड़ग्या सांसां
साखी है अबोला ऐ रूंखड़ा
आज ई ऊभा है उठै सागण ठौड़
अजै कित्तो बाकी है भोगणो
मिनख रै भाग मांय ?
आ कैड़ी मजाक करी बेमाता
मिल्यां गुमयोड़ी सोनलिया कविता
मुठ्ठी’क चावळियां नै हाय !
तरसतो रैयग्यो म्हारो ओ मन ।
***

मांयलो अंधारो
केई अणकथ्योड़ा डीलबायरा सबद
सरापित उरबसी दांईं
अचेत पड़्‌या है
जीवणभर जुगत जोड़्यां ई
म्हैं चेतन नीं कर सक्यो बांनै

म्हैं हूं
उधार लियोड़ा सबदां सूं
जीवण ढवतो थको
एक क्रीतदास,
मतरां रै सबदां सूं
मूरती पूजा करण आळो
एक बाणियो

जद कै म्हारै मांय सूतो है सुकरात
हियै मांय गूंगो अबोलो है काळीदास

मांय अंधारो
अर बै अबोला सबद ।

***

अनुसिरजण : नीरज दइया

**************************************************************************

असमिया कवि : वीरेंद्र कुमार भट्टाचार्य 14 अक्टूबर, 1924 - 16 अगस्त, 1997

कविता संगै : साहित्य अकादेमी रा अध्यक्ष रैया । लूंठा गद्य लेखक नै कवि । भट्टाचार्य जी नै केई पुरस्कार मान-सम्मान मिल्या ।

**************************************************************************