सबद-नाद

वीरभद्र कार्कीढोली

noreply@blogger.com (Unknown) — Mon, 5 Feb 2024 16:27:00 -0800

दोय नेपाली कवितावां
मूळ कवि - वीरभद्र कार्कीढोली
उलथो - नीरज दइया

फेर थां तांई

आय पूग्यो हूं थां तांई
फेर उणी ठौड़, फेर
जुगा जूनी रीत अपणायत री

जिकी सिंझ्या, जिण रात
भाग्यो हो, फेर बठैई
बठैई मुखोळ, चित्रकार, पेंटर
परिकल्पना, ठियो उडारी
उण दुखदाई हालतां भंवतां
भोगता म्हैं
काढी सदियां री सदियां। अहो!

म्हारो गांव
गांव मांय ई रैया करै बो
इण बगत सागै थांरै, थांरै नजीक
होवै बो। इयां ई कदैई कदैई
कैड़ो बगत हो बो म्हारै खातर
आय पूग्यो हूं फेर
थां तांई, उणी बगत।
भाग्यो हो जठै सूं
ठाह हुवैला थांनै ई।

आय पूग्यो हूं फेर
म्हारी हथेळियां चाइजै म्हनै इण बगत
जुगा जूनो अंतस सूं रिस्तो है थां सूं
इणी खातर सायत आय पूग्यो हूं
फेर थां तांई।
०००

दाय है इणी खातर

दाय है इणी खातर म्हनै
कीं है, स्सौ कीं कोनी
जिया जूण दाय है इणी खातर
सुण्यो हुवैला ओ ई थूं
कंगला नागा-उघाड़ा घर ई दाय है म्हनै।

सावळ जीया जूण जीवण री चावना
कोनी बणावै रिस्तो
आवारा बैवतो आंसु ई कदैई-कदैई
बिना कसूर रै बैवै है बो
जाणै फगत काळजो ई...

फेर आवूंला म्हैं
अेकलो फगत अेकलो
उजास कानी
तद आवूंला म्हैं अंधारै सूं।
किणी दिन छानैमानै
पक्कायत ई आवैला थूं ई।
इण दफै पण
कोनी म्हारै पाखती
थारै दाय पड़ता बै रंग
पण धरती जैड़ी अेक छाती है
अंवेर’र राख्योड़ी म्हारै पाखती थारै वास्तै।

कीं है, स्सौ कीं कोनी
जिया जूण दाय है इणी खातर
किण दिन आवैला थूं
इणी खातर कंगला नागा-उघाड़ा घर
खास दाय है म्हनै।
००००

उलथो - नीरज दइया

---------------------
कवि परिचै - वीरभद्र कार्कीढोली
5 मई, 1964 नै सिक्किम में जलम।
चावी पोथ्यां - कविता संग्रै : निर्माण यो मोड़सम्मको, आभास, कविता पर्खिअेर आधारातसम्म, अेक मुटठी कविता, शब्द र मन, अक्षरहरुको यात्राम, समाधि अक्षरहरू,
ध्वनि-अन्‍तर्ध्वनि ; कहाणी-संग्रै : शब्दमा मनका आवेगहरू अर समय र रागहरू ; संमरण : समिझअेर उनीहरूलाई आद। पोथ्यां रो केई भासावां में अनुसिरजण हुयो। हिंदी में- तुमने जीवन तो दिया..., शब्दों का कोहरा, समाधिस्थ अक्षर आद। प्रक्रिया, प्रथा, स्थापना, होम्रो पीढ़ी जैड़ी चावी पत्रिकावां रै संपादन सूं जुड़ाव। साहित्यश्री नेशनल अवार्ड,
अन्‍तरराष्ट्रीय भाषा साहित्य विशिष्ट सम्मान, अन्‍तरराष्ट्रीय हिन्‍दी सार्क सम्मान, राष्ट्र गौरव सम्मान, निराला साहित्य गौरव सम्मान आद केई नामी पुरस्कारां सूं आदरीज्या थका साहित्यकार।
--------

लीलाधर मंडलोई री कवितावां

noreply@blogger.com (Unknown) — Mon, 2 Nov 2015 08:00:00 -0800

कवि परिचै- हिंदी रा ख्यातनाम कवि-आलोचक अर संपादक लीलाधर मंडलोई रो जलम जन्माष्टमी 1953 नैं गुढी (छिंदवाड़ा) मध्यप्रदेश में हुयौ। चावी पोथ्यां- अेक बहुत कोमल तान, रात-बिरात, मगर अेक आवाज, देखा-अदेखा, क्षमायाचना, लिखे में दुक्ख, काल बांका तिरछा, मनवा बेपरवाह, दिल का किस्सा, अर्थ जल, दाना-पानी, कविता का तिर्यक, कविता के सौ बरस आद। केई मान-सम्मान अर पुरस्कार जिण मांय खास है- पुश्किन, शमशेर, नागार्जुन, रज़ा, रामविलास शर्मा (सगळा कविता खातर), कृति सम्मान, साहित्यकार सम्मान (दिल्ली राजधानी, साहित्य अकादमी) आद। दूरदर्शन रा महानिदेशक रैया मंडलोई अबार भारतीय ज्ञानपीठ रा निदेशक अर ज्ञानोदय मासिक पत्रिका रा संपादक है।

ठिकाणो- 166 दूसरी मंजिल, कैलाश हिल्स, नवी दिल्ली-65 मोबाइल- 9818291188

ई मेल- leeladharmandloi@gmail.com

मूळ कवि : लीलाधर मंडलोई
अनुसिरजण / डॉ. नीरज दइया

भासा-1

म्हैं लिखूं

उण भासा में

जिकी

ओळखै म्हनै।

००

भासा-2

जिकी भासा सपनां रै साथै-साथै चालै

जियां काल देख्यो म्हैं सपनौ

बरसै ही लाय आभै सूं

आज म्हारी भासा ओ बिरवौ लगावै।

००

भासा-3

ऊदई रो घर

कमाल रो रूपाळौ

पण कित्तौ अबखौ

रचू खुद री कविता

दीमक री भासा मांय।

००

फूल

कदैई जिकौ कैयौ हुवैला-

हाडका नै फूल

उण ई’ज देख्यो हुवैला-

मिनख मांयलौ फूल।

००

सूरज री सीध में

कान है पण कान कोनी देवै

हाथ है पण हाथ कोनी देवै

आंख है पण आंख कोनी देवै

मन है पण मन कोनी देवै

काम माथै जावती छोरी

जावै काम माथै

सूरज री सीध मांय।

००

बिना किणी कवि रै

घणौ अबखौ हुवै कविता मांय

जीसा नैं

जियां रा जियां ई लिखणौ

लिखूं जद

अेक सबद- जीसा

म्हारा चाळीस बरस

पड़ जावै ओछा

जीसा री छिंया

जीसा रो हेत

जीसा री मौत

कोनी उतर सकै

कविता मांय सागण ढाळै

जीसा कवि रै मांय है

जियां रा जियां

पूरण हा जिण ढाळै बै

म्हारौ अंतस भरियौ-पूरौ

जीसा सूं

जीसा खुद अेक मुकम्मल कविता हुवै

बिना किणी कवि रै मांड्यां।

००

मंतर

घणी कामेड़ी हुवै मौमाख्यां

फूलां सूं पराग

अर मकरंद करै भेळौ

खुद री टांगां बिच्चै बणी

उण टोकरी मांय

जिकी दीसै कोनी

मौमाख्यां तैयार

करै है सैत

अर करै रूखाळी

बारलै हमलै सूं उण री

अलेखू दुसमियां बिचाळै धिर्योड़ा हां आपां

अर रूखाळी ई कोनी कर सकां

आपां मौमाख्यां सूं सीख्यौ कोनी ओ मंतर।

००

कपाल-किरिया

मा री चिता

बस चटकती लकडियां री गूंज ही

बगत हुयग्यौ हो

पंडित जी कैयौ

‘कपाल किरिया’

अर झला दियौ अेक बेडोळौ लंबौ मोटौ बांसड़ौ

ठाह नीं कांई हुयौ

म्हैं झाल लियौ

भाई रो हाथ

अर बोल्यौ चाणचक

‘जरा’क हळकै हाथ सूं’

अर मींच ली आंख्यां

००

जातरा

अेक लोटौ

अेक डोरी

अेक अंगोछौ

अेक कांबळ

अेक पोटळी

अर अेक डांग

अब कोई पण जातर दौरी कोनी।

००

लड़ू तो हूं पण

लड़ू तो हूं पण

पूरी तरै लड़ण री गत मांय कोनी

जीवूं तो हूं पण

पूरी तरै जीवण री गत मांय कोनी

मरूं तो हूं पण

पूरी तरै मरण री गत मांय कोनी

मा जीवै अर अबै चालीजै कोनी

अर परिवार...

माफी चावूं म्हारै पाखती दूजौ मारग कोनी

थोड़ा’क भळै उडीकौ।

००

लाय

भिड़ै- सबद सूं सबद

म्हारी मेज माथै

अेक चिणखी-सी उठै

अर कविता लाय दांई

पसर जावै

लाय नीं तो कविता क्यांरी...

म्हैं देवूंला हिसाब

खुदरी मूरखता, हेकड़ी, घमंड अर लोभ रो

म्हारै ऊंडै बसियौ हो कोई सक

जिण माथै म्हैं करतौ रैयौ अणूतौ पतियारौ

म्हैं मरणौ कोनी चावतौ हो उण रै हाथां

जद कै जीवणौ थांरै भेळै कितरौ अबखौ

आ अेक सीधी-सरल बात है कै

थे कोनी चावौ म्हनै

म्हारै खातर का डूब मरण री बात

जद कै थे म्हारा इत्ता खास

म्हैं अबोलौ हूं अेक रूंख दांई

इण रो मतलब ओ कोनी कै

म्हैं कोनी हुय सकूं थांरै दांई

हुवणौ थांरै दांई डूब मरै जैड़ी बात हुवैला।

००

जीवन बाबत

सगळी तजबीज कर्यां ई

धरती सूं पचै कोनी

नामुदार प्लास्टिक

अर अबै परमाणु कचरै रै स्वाागत मांय

कित्तौ कसमसीजै ओ राज

कूंपळां अर फूलां रो तो कैवणौ ई कांई

छोटिया टाबरां रै जीवण बाबत

सोचणौ कद बंद हुयौ

००

पाव ब्रेड री बात

जद कै बा रो रैयी है

म्हैं कोनी करूंला पाव ब्रेड री बात

मा दोय दिन जूनी रोटियां रै

बासी सूख्योड़ै टुकड़ा नैं

गिला करैला गुड़ रै पाणी मांय

अर उडीकैला कै बावड़ जावै

बासी सूखा टुकड़ा सूं

जरा’क पीलपीलौ लखाव पाव ब्रेड रो

निजरा लुकोवतौ भाळतौ रैसूं मा भेळै

लुगाई री बापड़ी आंख्यां में

म्हैं दर ई कोनी करूंला

पाव ब्रेड री बात

म्हारी जेब सूं साव परबारी है

ओ है महीनै रो छेहलौ दिन

००

कार्बन मोनोऑक्साइड

कठै सूं आवै इत्ती

कार्बन मोनोऑक्साइड

कै बरफ पिघळै

बगत सूं पैली

धंसकै डूंगर होळै-होळै

होळै-होळै खूटै जीवण।

००

गद्य कवितावां

कै लूण रोटियां मांय

दिनूगै-सिंझ्या..... समदर सूं उठै धोळौ धप्प धूंवौ.... पण समदर सूं कोनी आवै खांसता-खांसता बेदम हुवण वाळा री अवाजां... अबकी दाण मा सूं कैवूंला कै चाल परी म्हारै साथै अर पो परी देख रोटियां कै जठै धूंवौ हुया करै अणथाग पण कोनी हुवै ऊंडै तांई हिला देवण वाळी खांसी.... मा जद पोसी रोटियां वां मांय समदर रो सुवाद हुवैला अर कित्तौ किफायती अर स्वादू हुसी रोटियां रो पोणौ। कै लूण रोटियां मांय मत्तै ई पूगैला...

समदर माथै खासां आपां जद रोटियां... पूगैला सुवाद ई आपी-आप मांय रो मांय अर आपां सुवाद रा समदर हुय जासां अेक दिन ....... अेक दिन ........

००

हत्यारा उतरग्या क्षीरसागर मांय

(अेक)

म्हैं हमेस सकून री नींद लेवतौ। अर अबै जागूं जाणै नींद मांय। डरावणा सुपनां मांय डूब्योड़ी है रातां। म्हैं हत्यारां नै देखूं सुपनां मांय। बां रा चैरा अडोळा दीसै कोनी। बस बां रौ हुवणौ मैसूस करू जाणकारां जिसौ। बै चैरा-मौरां सूं तौ चोखै घरां रा खावता-पीवता दीखै। बां पाखती जोरदार मोटर-कारां है। बै अमूमन मोटी-मोटी कोठ्यां सूं निकळ’र आवै। बां रै लारै चालणियां री जमात है। जिका नवी-नवी सकलां मांय हरेक ठौड़ हाजिर हुवै। बै हथिहारां सूं सज्या-धज्या। बां री आत्मा रौ पाणी सूखग्यौ। कारण कै बै रिपियां रै जोर सूं उण हरेक जिनस नै खरीदण नै आमादा है जिण मांय पाणी हुवै। अर राज खुद आपरै ढंग-ढाळै लागै इण बौपार मांय हत्यारां रौ साखी बणग्यौ। म्हारै इण सुपनै में जिकौ बिना किणी स्टिंग ऑपरेशन रै सूझ रैयौ है, म्हनै कंठां तांई डर मांय डूबौ देवै। म्हैं चीसाळी मारणी चावूं पण आबाज जाणै कंठां मांय अडग़ी। सुपनौ म्हनै लियां भाजै च्यारूमेर। अर म्हैं देखूं बो जिकौ कदैई देख्यौ कोनी। अर इण ढाळै तौ दर ई कोनी देख्यौ। म्हनै लखावै म्हारी आत्मा लोहीझांण।

००

(दोय)

म्हैं तौ बंधक हौ बां रौ। बियां तौ ओ सुपनौ हौ। म्हैं बां रौ लारौ करियौ। कै जाण सकूं बो साच जिकौ आखै जीवण सूं घणौ भारी। पाणी कमती हुवतौ अड़ाणै कठैई। उण खातर म्हैं न्हासूं कै बो कित्तौ बचै का फेर बच जावैला पूरौ। पीढियां री हेमाणी लियां। म्हैं पूगूं अेक मा री कूख मांय। बठै अेक भ्रूण है। खुद रै भार रै तिरेसठ प्रतिशत पानी मांय। उणी’ज सूं प्राण उण रा। म्हैं कियां ओळखूं कै बो उणी मात्रा मांय है। अर बच जावैला जापतैसर। जे पाणी कमती हुयौ। तो बो कित्तौ बच्योड़ौ हुवैला जद कै जूण पासी। म्हैं पूगूं अबै खुद री देही मांय। बठै उण नै हुवणौ चाइजौ दोय-तिहाई का तीन-चौथाई। अर लोही रै प्लाजमा मांय च्यार प्रतिशत हुवणौ जरूरी है। अर कोशिकावां मांय सोलह प्रतिशत। कांई इत्तौ पाणी सही-सही मात्रा मांय हुवैला। अठीनै म्हैं केई बीमारियां सूं घिरगयौ हूं, अबै सुपनै मांय म्हैं हूं डागदर री टेबल पाखती। बो जांच करै अर परची मांय सावचेतियां लिखै। मोटै आखरा मांय बो मांडै ‘शुद्ध पानी’ अर सेवन माथै जोर देवै आ जाणता थकां कै अबै फगत बच्यौ प्रदूषित पाणी। बजार रै दावां नै गळै लटक्यां म्हैं भाजू शुद्ध पाणी खातर। अर कूड़ माथै अेतबार करू कै जिकौ साच दांई पुरसीजै। कै अबै इण मांय अकूत बौपार। बस शुद्ध रो विज्ञापन है अशुद्ध। पाणी मांय बो हुसी, ओ पतियारौ कोनी हुवै अर डर सूं कांपण लागूं।

००

अनुसिरजक परिचै- राजस्थानी रा कवि-आलोचक अर संपादक डॉ. नीरज दइया रो जलम 22 सितम्बर 1968 नैं रतनगढ़ (चूरू) में हुयौ। ‘निर्मल वर्मा के कथा साहित्य में आधुनिकता बोध’ विषय माथै पीअेच.डी.। प्रकाशित अनुवाद : पंजाबी काव्य-संग्रै / अमृता प्रीतम ‘कागद अर कैनवास’ (2000), हिंदी कहाणी-संग्रै / निर्मल वर्मा ‘कागला अर काळो पाणी’ (2002), चौबीस भारतीय भाषावां रै कवियां री कवितावां रो राजस्थानी अनुवाद ‘सबद नाद’ (2012), गुजराती जातरा-वृत्तांत / भोलाभाई पटेल ‘देवां री घाटी’ (2013) अरमोहन आलोक रै पुरस्कृत राजस्थानी कविता-संग्रै रो हिंदी अनुवाद ‘ग-गीत’ (2004)। केई मौलिक अर संपादित पोथ्यां प्रकाशित। आलोचना पोथी ‘बिना हासलपाई’ चर्चित। साहित्य अकादेमी, नवी दिल्ली सूं ‘जादू रो पेन’ माथै बरस 2014 रो ‘बाल साहित्य पुरस्कार’, राजस्थानी भाषा, साहित्य एवं संस्कृति अकादमी, बीकानेर सूं ‘बावजी चतुरसिंहजी अनुवाद पुरस्कार’ आद केई पुरस्कार, मान-सम्मान मिल्योड़ा।

ठिकाणौ : सी-107, वल्लभ गर्डन, पवनपुरी, बीकानेर-334003

मोबाइल : 9461375668 ई मेल- neerajdaiya@gmail.com

हकीरत हीर री कवितावां

noreply@blogger.com (Unknown) — Thu, 16 Jul 2015 08:16:00 -0700

राजस्थानी अनुवाद नीरज दइया

लुगाई

===

लो नोच लो

म्हारो डील

उतार दो म्हारा गाभा

कर देवो भरै बजार नागी

म्हैं बा ई लुगाई हूं

जिकी थांनै जूण सूंपी.... !

उड़ारी...

===

थांरै घर सूं

लेवती टैम सीख

छोड़िया जावूं म्हैं-

म्हारी पांख्यां

जीसा...

जद-कद बुलाओ

तो राखजो चेतो-

अबै कोनी हुवैला सारै म्हारै

पांखां वाळी उड़ारी...

०००

प्रेम-१

बो कदैई-कदैई..

लुक-लुक’र मुळक्या करतो हो

जद-कद उण री बारी आगैकर जावती

गैरी गैरी निजरां सूं ताकतो म्हनै

एक दिन जाय’र ऊभगी उण रै साम्हीं

पूछ्यो- कुण है थूं..?

बो कैयो- कोनी थारो प्रेम म्हैं

अर म्हैं थाकल पगलिया सूं

पाछी आयगी... !

प्रेम-२

----

झील

कदैई सोवती कोनी

आडै दिन तारा उतर’र आवतां

उण री छाती माथै...

रम्मत मांडता बै

केळै रै दरखत री नाव माथै असवार

व्हाला लेवतां उण रै बंद कमलां रा

पण झील नै उण तारै सूं प्रीत ही

जिको आभै मांय एकलो ही चमचमावतो हो-

धूमकेतू दांई... !

प्रेम-३

बो

घणै ऊंचै डूंगर माथै

मून साध्यां बिजारै हो

म्हनै बठै पूगण मांय घणो मोडो हुयग्यो

जद म्हैं बठै पूगी घणी भीड ही

लोग हाथां मांय फूल लियां

उण रै चढावै हा

अर बो

भाठो हुयग्यो हो... !

====

फोटुवां

===

घरै भींतां री दरारां माथै

म्हैं लटका दी कीं फोटुवां

देखण वाळा घणी बार म्हनै

कला रो सोखीन

समझ लेवै.... !

----

गुमयोड़ा सबद.....

===

गुमयोड़ा है सबद

केई दिनां सूं ...

ऐन उणी टैम सूं

जद अळधी भांव

चमचमावती जगमग नगरी

निजरां में आय ढूकी ही....

मून खांधियां बण’र

लियां जावै हा

म्हारा सबद.

===

थांरा सबद ...

===

बा ...

थूं ई तो ही

जिण नै जोवतो हो म्हैं

जलम-जलामांतरां सूं ....

ऐ थारा ई कैयोड़ा सबद हा

जिका आज खांधा देवण नै ऊभा है

सूली माथै चढियोड़ी

मोहब्बत नै... !

===

दरद ....

===

रात ....

जद घाव छाती पीटण लाग्या

कीं आखर चांद सूं टपक्या हा

म्हैं बै सगळा आखर

कूख में बोय दिया ....

आज कवितावां में ...

दरद जलम लियो है.... !

===

फफोला.....
====
सुणो....

बो जिको आंगळी माथै

फफोलो उफसग्यो हो नी.... ?

उण नै म्हैं मसळ’र

लूण लगा दियो ...

अबै थारी ओळूं

दरद कोनी देवै .... !

कवयित्री परिचै 31 अगस्त नै जलमी हकीरत हीर पंजाबी, हिंदी अर असमिया में ई कवितावां लिखै। आसाम में रैवता थका अहिंदी भाषी हुय’र ई हिंदी री सेवा बरोबर करै। अपारा इक दर्द, दीवारों के पीछे की औरत अर ख़ामोश चीखें आद कविता संग्रै प्रकाशित हुयोड़ा, अर कविता-संग्रै दर्द की महक नै केंद्रीय हिंदी निदेशालय सूं हिंदीतर भाषी हिंदी-लेखक पुरस्कार योजना पेटै बरस 2013 रो एक लाख रिपिया रो मोटो इनाम लारलै दिनां घोषित हुयो। अमृता प्रीतम सम्मान अर बीजा केई मान-सम्मान सूं सम्मानित। ई-मेल -harkirathaqeer@gmail.com

सुधीर सक्सेना

noreply@blogger.com (Unknown) — Tue, 23 Jun 2015 17:43:00 -0700

हिंदी साहित्य मांय सुधीर सक्सेना चावै-ठावै कवि रै अलावा संपादक अर लूंठै अनुवाद रूप ई ओळखीजै। आपरो जलम लखनऊ मांय 30 सितंबर 1955 नै हुयो। चावी काव्य-पोथ्यां- बहुत दिनों के बाद (1990), काल को भी नहीं पता (1997), समरकंद में बाबर (1997), ईश्वर हाँ, नहीं... तो (2013) आद। रूसी, पोलिश अर ब्राजीली भाषा रै घणा कवियां री कवितावां रो आप हिंदी अनुवाद करियो। रूस रै चावै 'पूश्किन पुरस्कार' रै अलावा कविता खातर 'वागीश्वरी पुरस्कार' अर 'सोमदत्त पुरस्कार' मिल्योड़ा। कवितावां रा देस-विदेस री केई भाषावां में अनुवाद हुयोड़ा। आं दिनां “दुनिया इन दिनों” (पाक्षिक) पत्रिका रा प्रधान संपादक । ई-ठिकाणो : sudhirsaxena54@gmail.com

प्रेम

=======

संसार मांय जुगां-जुगां पैली

पैल-पोत हो फगत प्रेम

संसार रै सेवट मांय

फगत हुवैला प्रेम

दोनूं कांठां बिचाळै

थिर ऊभो

निजर आवूंला म्हैं

000

सरत

====

मोमाख्यां रै छत्तै मांय

हाथ घाल’र

अर जान जोखम मांय न्हाख’र

लायो हूं

घणो सारो सैत

पण एक सरत है

सैत रै बदळै मांय

थांनै देवणो पड़ेला

थारो सगळो लूण।

००००

थांरी डोळी माथै

==========

आभै मांय

उडूंला एक दिन

किन्नो बण’र

कटण खातर।

कटूंला

अर आय ढूकसूं

आखै जमानै नै अंगूठो बतावतो

थारी बाखळ री डोळी माथै।

0000

लूण

====

बजार मांय आपां रै देखतां देखतां

गायब हुयग्या है लूण रा ढगळिया

अर बां री जागा परसगी है-

पिस्यै लूण री थेलियां,

देखण मांय अबै लूण लूण कोनी लखावै

लखावै जाणै हुवै गाभा धोवण आळो पोडर बेमिसाल

सरकारी इस्तहारां नै देखां

तो बठै ई हाजर कोनी लूण

मोटै सहरां अर राजधानियां री ई बात कोनी

आं दिनां तो हरेक ठौड़

जे बारा पोइंट मांय लिख्योड़ो हुवै “नमक”

तो बड़ा-बड़ा आखरा मांय

मार्का दाई सदा भेळै टंगयोड़ो दिसै आयोडीन ।

0000

यूरेका

======

जे पाणी मांय छपाक सूं

नीं कूदतो आर्कीमिडीज

तो कुण कूकतो

एथेन्स री सड़कां माथै-

यूरेका...यूरेका....

लोग साचाणी बिसरग्या हुवतां

आर्कीमिडीज नै

गीरबो हुवणो चाइजै

हरेक आर्कीमिडीज माथै

जिण सोध्यो अर लाधग्यो

नफरत करो उण सूं

जिका मार न्हाख्यो

खुद रै मांयलै आर्कीमिडीज नै

अर तरस खावो उण माथै

जिको बंद कमरै मांय का सडकां माथै

कदैई आपो बिसराय’र नीं बोल्यो-

यूरेका... यूरेका....!

000

अनुवाद : नीरज दइया

रति सक्सेना

noreply@blogger.com (Unknown) — Tue, 23 Jun 2015 17:32:00 -0700

परिचै : वेब-पत्रिका कृत्या री सम्पादिका रति सक्सेना रो जलम 8 जनवरी, 1954 नै उदयपुर राजस्थान में हुयो। संस्कृत अर हिंदी साहित्य में एम.ए., बी.एड. अर अथर्ववेदीय पदार्थ योजना में पी.एचडी.। आप हिन्दी, अंग्रेज़ी, मलयालम में लगोलग लिखै अर आयोजन-अनुवाद पेटै ई खूब चावा मानीजै। चावी काव्य-पोथ्यां- माया महाठगिनी, अजन्मी कविता की कोख से जन्मी कविता, और सपने देखता समुद्र, एक खिड़की आठ सलाखें। विविध विधावां में केई पोथ्यां छप्योड़ी अर मलयालम सूं हिंदी अनुवाद पेटै साहित्य अकादेमी सूं पुरस्कृत। अबार आप केरल मांय बसै। ई-मेल : saxena.rati@gmail.com

आंसुवां री हेमाणी

एक आंसु

उण खातर

जिको आपां रो नीं बण सक्यो

एक आंसु

आपां रो बण जावण रो

दिखावो करणियै खातर

एक आंसु

खुद सूं खुद री

यारी करावणियै पेटै

आंसुवां री हेमाणी खूटगी !

००००

भलै घरां री छोरियां

भलै घरां री छोरियां

किन्नां कोनी उड़ाया करै

किन्नां में रंग हुवै

रंगां में इच्छावां हुवै

इच्छावां डस लेवै

किन्नां कागदी हुवै

कागद फाट जावै

डील अपवित्र बण जावै

किन्नां में मंझो हुवै

मंझो छूट जावै

मारग भटका देवै मंझो

किन्नां में उडाण हुवै

बादळां सूं टकराव हुवै

नसां तड़का देवै

जणा ई तो

भलै घरां री छोरियां

किन्नां कोनी उडाया करै।

००००

कांई थूं म्हारै सूं बात्यां करसी

पैला दांई

खुद री कबर माथै

धरियै भाठै नै उतार’र

हाडकां माथै चामड़ी चढा’र

थूं म्हारै सूं बात्यां करसी

पैला दांई

उणा पूछियो-

“कियां?”

म्हैं कैयो-

“चामड़ी री बात्यां करै

हाडका गाळ’र

बणगी चूरण

जीभ झड़गी

आवाज आभै में उडगी

"बात्यां तो कर

स्सौ कीं आय जावैला

चामड़ी, हाडियां, जीभ

अर इण पछै

आवाज।”

म्हैं रूंखां री जड़ सूं जीभ बणाई

पनड़ां सूं दांत

घाटियां में घूमती आवाज नै झाली

सागर री छोळां सूं डील बणायो

लेवो, अबै म्हैं तियार हूं

बंतळ करण खातर....

अरे अबै थूं कठै गयो?

००००

म्हैं सोचूं

बां सगळा बाबत

जिका म्हारी मुसाफरी रा जोड़ीदार हुय सकता हा

फेर मुसाफरी कठै सूं रैवती मुसाफरी

कट जावतो बगत- लड़ण अर समझावण में

कांई पछै ई म्हैं टोपो-टोपो पीय सकती ही मुसाफरी नै?

००००

ओळूं

बारी बंद कर दी

आडो ई जड़ दियो

झरोखां रै कानां मांय

लगा दिया जरू डाटा

कोई तीणो कोनी छोड़ियो

जिको रैयग्यो हुवै खुल्लो

फेर ई ठाह नीं कद अर कियां

ओळूं सूं भरीज्यो पूरो घर।
००००

आडा बजावतां सुपनां

इन्नै थोड़ै दिनां सूं सुपनां

कोनी बजायो आडो

बाजी कोनी म्हारै फोन री घंटी

सुपनां नै सायत

नंबरां री ठाह कोनी

सोच्यो कै ई-मेल भेज देवूं

हालचाल तो पूछ लेवूं सुपनां रो

ठाह नीं कठै गुमगी आई डी

सुपनां भेळै

कियां बजावतो कोई आडो?

म्हारै पाखती आडो जिको नीं हो

ठाह ई कोनी पड़ी कद अर कठै

म्हारै घर रो आडो ई गुमग्यो।

००००

उण रा सुपनां

उण नै कैयो हो-

सुपनां देखै

बो सगळी खेचळ करी

सुपनां जोवण री

हरेक दाण दिख्यो उण

घणा सारा चावळां माथै

मछली रा कटपीस

उण नै कैयो हो-

सुपनां लांठा हुवणा चाइजै

उण रै सुपनां में

चावळां रो ढिग्गो ऊंचो हुवतो गयो

अर मछली रा कटपीस बड़ा

उण नै फेर कैयो हो-

“जिसा सुपना देखसी, उणी जोगो बणसी।”

उण सांम्ही सवाल ऊभग्यो-

चावळ बणै का मछली रो कटपीस?

बो विचार करियो

चावळ सूं भूख जासी कुटुंब री

मछली नै तो कोई पण फांस ई सकै कदैई

बो सुपनां नै बिसराय नै

लागग्यो चावळां रै जुगाड़ में।

००००

अनुवाद : नीरज दइया

रजनी भारद्वाज

noreply@blogger.com (Unknown) — Tue, 23 Jun 2015 17:28:00 -0700

परिचै : जलम- 29 नवम्बर, 1968 जयपुर में। कविता अर आलोचना में खास रुचि। काव्य-पोथी “नेह की बारिशें” घणी चावी रैयी। केई संकलनां में रचनावां संकलित। अबार जयपुर जिलै री उच्च माध्यमिक विद्यालय में प्रधानाचार्य रूप कारज। ई-मेल : rajbha.29@gmail.com

पांच कवितावां

(१)

कीं भूकंप

छानैमानै सा

कणा आवै अर

कित्तो कीं ढोह जावै

ठाह ई कोनी पड़ै

कठै

कांई ढहावै

कियां ढहावै

अर किण ढाळै

पसवाड़ै बगतो माणस ई

ओ कीं नीं जाण सकै

एक जीबती

बुलंद इमारत

बिना किणी हाकै रै

आपरै सगळै रोळै साथै

बदळ जावै फगत ढीगलै में

कारण कांई रैयो हुवैला

कमजोर नींव

खूटता रिस्ता

ढीला बंधण

बधती बिचाळै सीलन

का फेर चिलै उतरणो गाड़ी रो.....

००००

(२)

ठाह नीं कांई हुय जावै

जद जद थूं जावै

उणियारां री भीड़ में डूब्योड़ो ओ सैर

हुय जावै खाली-खाली जाणो कोई साव एकलो

अळधै तांई सागो लेवती सिंझ्या ढळै कोनी

तारां छाई रात काट्या ई कटै कोनी

नींदाळूं नैणां राता खाली-खाली

चांद भेळै सूरज रो डेरो हुय जावै

हुवै थारा हाथ खाली

अर जेब्यां ई पण हुवै साव हळकी

खुवै कोनी धरियोड़ो हुवै कोई झोळो

फेर ई ठाह नीं म्हारो कांई-कांई लेय नै जावै थूं

बायरो आय’र थम जावै म्हारै पल्लै

हरफ होठां मांय दब नै रैय जावै

सळ चोस लेवै माथै री सगळी लीकां नै

पण सांसां माथै तो थारी प्रीत रो पैरो हुय जावै.....

(३)

बिना आखरां अर बुणगट रै

बिना हरफ अर बंतळ रै

होठां हुवैला

अर आंख्यां सूं सुभट बांचीज जावैला

जूण री कविता

गजब री बेजा रूपाळी हुवै

आ सांस-सांस मैहकै

आ राग-राग गावै

मन वीणा रै साज सूं सजी

बाजै जाणै तार-तार

इण नै बांचणी कोनी हुया करै

जीवणी पड़ै सांस-सांस.....

००००

(४)

लुगाई हुवणो

मतलब एक बैवती जूण हुवणो

जिकी पकड़िया राखै

एक कांठो तन रो

दूजो मन रो....

दोवां नै

सांधती एक दूजै सूं

बैवती सदा नीर-सरीखी

करती कळ-कळ, कळ-झळ

लुगाई हूं

इणी खातर तो जाणूं

लुगाई हुवण रो अरथाव

एक बैवती जूण हुवणो हुया करै।

००००

(५)

रैय जावै

बिना आखरां रै

कीं अणबोली बतळावण

जिकी कैवै आंख्यां

सुणै होंठ

गावै काळजो

समझै परस

अर उण मुळक सूं महकै

ऐ रचीजै

जिका प्रीत रा महाकाव्य

जिकां रै हुवण रो सबूत

नीं हुय’र ई हुवै सदा सांम्ही

जूण नदी मांय

जद होळै-सी’क प्रेम

परस करतो निकळै नजीक सूं

चाणचकै बस इयां ई....

००००

अनुवाद : नीरज दइया

राज हीरामन

noreply@blogger.com (Unknown) — Tue, 23 Jun 2015 17:25:00 -0700

अनुवाद : डॉ. नीरज दइया

कवि श्री राज हीरामन रो जलम 11 जनवरी, 1953 नै मॉरीशस री धरती हुयो। साहित्य, संपादन अर पत्रकारिता सूं लांठो जुड़ाव। महात्मा गांधी संस्थान रै सृजनात्मक एवं लेखन विभाग में 'रिमझिम' अर 'वसंत' पत्रिका रा वरिष्ठ उप-संपादक श्री राज हीरामन गद्य-पद्य री घणी विधावां में सिरजरण करै। आपरी बीस सूं बेसी पोथ्यां छपी। चर्चित पोथ्यां- धरती तले आकाश, अंधेरे का उजाला, स्वघोषित आचार्य, मोहनदास की नजरों में मॉरीशस भी था, पराए जो थे अपने हो गए, घाव करे गंभीर अर मॉरीशस की कविता आद।

ई-मेल : rajheeramun@gmail.com

आ कैड़ी आजादी ?

======================

थांरी आ दलील

कै घणी आजादी

चोखी कोनी

आ बात तो म्हैं समझी

पण थारी आ कैड़ी आजादी ?

म्हैं खुद नै थारो गुलाम जाणूं !

0000

छींया ई खुभण लागी

=================-

रूंखां हेठली छींया ई

अबै खुभण लागी-

सूइयां जिंया,

इणी खातर काल सूं

चिलकतै तावड़ै मांय

आय’र ऊभग्यो।

मोटा रूंखां री रीत

बेजा माडी हुया करै

जठै तांई बां री छींया पूगै

बठै तांई कीं जमै ई कोनी !

0000

दीठ री कमी

============

धृतराष्ट्र ! गांधारी !! दुर्योधन !!!

थे तीनूं पण आंधा हा

एक तो जलम सूं आंधलो !

दूजी री थी तो आंख्यां

पण साच दीस नीं जावै

बांधी ली आंख्यां आडी पाटी !!

अर तीजो आंख्यां थकां ई आंधो !!

द्रौपदी तो कीं बतायो हो

पण दुर्योधन चिडग्यो

बात तो फगत दीठ री ही

जिका थां सगळा अठै कोनी ही

अर उणा खातर

मंडग्यो महाभारत !

0000

बै सैण हा, दुसमी नीं

==================

थनै क्रॉस माथै टांगणिया

थारा सैण हा, दुसमी नी !

राम !

थन्नै बनवास भेजणिया

थारा सैण हा, दुसमी नीं !

सुणो पांडव !

थानै राज सूं काढणियां

थारा सैण हा, दुसमी नीं !

पृथ्वीराज !

थनै दुसमी रै हाथ सूंपणियां

थारा सैण जयचंद ही हा

कोई दुसमी कोनी हा !!

बापू !

थारै माथै गोळी चलावणिया

थारै देसवाळा ही हा

बै कोई दुसमी कोनी हा।

महान आत्मावां !

अबै थांसूं करूं म्हैं सवाल

बोलो- म्हैं किण सूं डरूं ?

म्हारै घराळा सूं का किणी पारका सूं !

0000

लालित्य ललित

noreply@blogger.com (Unknown) — Tue, 23 Jun 2015 17:22:00 -0700

प्रेम

================

घणा दिनां सूं जोवूं इण नै

लाघण रो नांव ई नीं लेवै

प्रेम मांय सगळा

का सगळा मांय प्रेम

ठाह नीं किण डाळ बिराज्यो

कद उतरैला हेठै

मिनख रै अंतस

आज इण सबद रो बरतणो

साव कमती हुयग्यो

स्यात लोग

जापतो राखण लागग्या

आज सूं पैला तो

कोनी हा इत्ता कंजूस

स्यात लागग्या

निनाणूं रै चक्कर मांय

संचै प्रेम नै

दिलां मांय

सांसां मांय

जूण मांय

रिस्ता मांय सगा भेळै

कांई चाइजै भळै म्हनै

कीं कोनी चाइजै

सुणो ! म्हैं प्रेम मांय पड़ग्यो

म्हनै ठाह है

कद सूं हो प्रेम मांय

तद सूं जद समझ्यो

इण सबद नै

मैसूस करियो तद सूं

ठाह लागगी आज

जद तांई आ दुनिया है

तद तांई जीवसी प्रेम

जे मिटसी स्सौ कीं एक दिन

पण तो ई किताबां रै पानां मांय

सदा हरियो रैसी प्रेम

तकनीक रै जरियै रच्यो-बस्यो रैसी

गीतां मांय, गजलां मांय सदा खातर

अरे प्रेम थारी आंख्यां रै मारग

साव ओळै म्हारै काळजै बडग्यो

म्हारो बणग्यो सोगन खावूं

स्यात प्रेम म्हनै मिलग्यो

का म्हारै तांई पूगग्यो प्रेम

सुणो ! अबै आपां प्रेम मांय हां

इण ढाळै रै प्रेम मांय

जठै फगत अर फगत प्रेम है

प्रेम नै टाळियां कीं कोनी।

================

कुण चतुर सुजान

===================

सगळा छिटकायग्या

मूंढो मोड लियो

पैइसां री यारी

कित्ता’क दिनां री !

आ प्रीत गरज बावळी

कित्ता’क दिन री...

कुण जाणै !

पण म्हैं जाणूं

बगत कमती है

थे गैला बणावो किणी नै

ओ भरम है थांरो

अर दूजो जिण नै बावळो समझो थे

बो खुद री गैलायां माथै

मुळकै चुपचाप।

===============

थारी ओळूं

==============

अबै कोनी आवै म्हनै

कारण कै अंतस बसै म्हारै

एक लखाव दांई

एक खुसबू दांई

कांई हो

कांई कोनी

ओ साच है

स्याही दांई

लिख्योड़ै हरफ दांई

ओळूं

घणीवळा आय जावै

छोळां दांई

आज ई भेळै गुजारियो बगत

पळकण लाग्यो मन-पाटी माथै

थूं बांच लियो

इण नै किणी लखाव दांई

म्हारै दिमाग मांय

उतरी थूं कविता दांई

एक गजल रै ढाळै

एक साच हुवतै सपनै दांई

जिको आपां भेळै जोयो हो

चाणचकै छोळां उठी

म्हारै दिमाग मांय

थांनै पाय’र

साव निरवाळो हुयग्यो म्हैं

कीं नीं चाइजै अबै

म्हैं राजा भोज

थारै मिल्यां पछै

सबद ई हुयग्या अमीर

सरोकार साकार हुयग्या

उडीक पूरी हुयगी

कसक पीड मांय बदळी

यादां रो झरोखो

आपरी कहणी सुणावतो रैयो

मारग कटग्यो होळै होळै।

================

अनुवाद- नीरज दइया

कवि परिचै : लालित्य ललित रो असली नांव डॉ. ललित किशोर मंडोरा। आपरो जलम 27 जनवरी, 1970 नै दिल्ली मांय हुयो। आपरा कविता संग्रै- गांव का खत शहर के नाम, दीवार पर टंगी तस्वीरें, यानी जीना सीख लिया, तलाशते लोग, इंतजार करता घर, चूल्हा उदास है अर समझदार किसिम के लोग चरचा मांय रैया। कविता रै साथै-साथै नवसाक्षरां खातर आप घणो लिख्यो, केई पोथ्यां छप्योड़ी अर बीजी भाषावां मांय अनुवाद ई प्रकाशित। अबार आप नेशनल बुक ट्रस्ट इंडिया रै सहायक संपादक रूप कारज संभाळै। ई-ठिकाणो : lalitmandora@gmail.com

के. रवीन्द्र

noreply@blogger.com (Unknown) — Tue, 23 Jun 2015 17:18:00 -0700

आखो घर-संसार

म्हैं बारियां खोल दी

खोल दिया झरोखां रा पाट

सगळो घर रोसणी सूं भरीजग्यो

महकण लाग्यो थारी खसबू सूं

दरवाजा ई खोल देवूं

बारियां सूं जिको दीसै-

रिंधरोही, डूंगर, नदियां रो दीठाव

सायत आय जावै घर मांय

सजावणो चावूं-

म्हारो आखो घर-संसार

म्हैं दरवाजां अर बारियां माथै

कदैई पड़दा कोनी लटकावूं।

००००

सगळो बियां रो बियां

म्हारै घर में स्सौ कीं

अजेस अंवेर’र राख्यो है

बारियां में थारो उणियारो

दरवाजां माथै पगलिया

आंगणै में हड़हड़ हंसी

कमरां में थारी खसबू

बिछाणां माथै थारो परस

अबार तांई चिप्योड़ी है-

भींतां माथै थारी मुळक

स्सौ कीं है बियां रो बियां

आळै में भेळावणां

अलमारियां में ढिगलो-ढिगलो ओळूं

सावचेती सूं सजा’र राख्योड़ी है,

कलेंडर माथै गयै दिनां रो हिसाब

सगळो है बियां रो बियां

पण हां कठैई फोटू कोनी थारी।

००००

ओळू-1

ओळू आवै-

जद-जद बैठां

कीं सावळ करण नै

कीं नवो रचण नै।

ओळू आवै-

गळियारां री, दरवाजां री

जातरावां री...

क्यूं आवै ओळू

चंचेड़ नै का फेर

देवण नै पछतावो

बुरी ओळू कोनी आवै
हां .... बुरी ओळू कोनी आवै

बुरी ओळू जद कदैई आवै

म्हैं मुळकण लागूं।

००००

ओळू-2

पूरी रात जागतो रैयो

सुपनां सजावतो,

थूं आवै ही, जावै ही

भळै आवती, भळै जावती,

पण ओळू पसवाड़ो फोरियां सूती रैयी।

दिनूगै ओळू ही

जिकी म्हनैं चंचेड़ियो अर जागायो

जद म्हैं जागग्यो

ओळू अळघी ऊभी होय’र

घूर-घूर’र म्हनै देखै ही

अर मुळकै ही,

म्हैं कैयो-

चालो मारग लेवो,

अबै आज नवै दिन

म्हैं नवी ओळू भेळै रैसूं

ओळू नैड़ी आयी

अर हंसण लागी जोर-जोर सूं

लाख करियां जतन

ओळू कोनी खिसकी

ओळू जावै कोनी

पूरै घर माथै कब्जो कर’र

बस जावै सदा खातर

ओळू जिकी एक’र जुड़ जावै

बा जावै कोनी

फगत पसवाड़ो लेय’र

सूय जावै।
००००

जमीन

शहर है कै पसरियां जावै

आपां री आंख्यां में

आपां रै सुपनां में

अणजाण हुवता जावै-

जाणीकार चैरा

सांसां पड़ण लगागी है कमती

दसवै मालै री ऊंची बारी सूं

लोगां नै कोनी सूझै-

जमी माथै ऊभा आपां

शहर है कै परसतो जा रैयो है

थूं कैवै-

छोड़णी कोनी आपाणी जमीन !

उणियारो

म्हारै उणियारै रो

कोई डील कोनी

ना हाथ, ना पग

ना ही कोई पेट

फगत खाली उणियारो है।

हां मांय सूं साव खाली

पूरी तरै सूं थोथो

संवेदनावां सूं, सोच-विचार सूं,

साव थोथो।

पण म्हारो उणियारो सावचेत है

बां संवेदनावां सारू

जिकी उण सूं जुड़ियोड़ी है

उण सोच-विचारां सूं

जिका में फगत मतलब हुवै निजू

बां चिंतावां खातर

जिण सूं उणरो निजू सरोकार हो।

उण नै जरूरत ई कोनी पड़ै

हाथां री, पगां री,

अर ना ई कदैई पेट री

उण नै जरूरत है- फगत उणियारां री

उणियारै नै उणियारो बणावण खातर।

इणी खातर

बो फगत एक उणियारो है

उण रो कोई डील कोनी।

००००

अनुवाद- नीरज दइया

====================

परिचै : कुँअर रवीन्द्र आखै देस-विदेस कला-जगत रो जाणीजतो चावो-ठावो नांव है। रंग, रेखावां अर सबदां रै कलाकार-कवि के. रवीन्द्र रो जलम 15 जून, 1959 नै मध्यप्रदेश रै रीवा में हुयो। आप पत्र-पत्रिकावां, पोथ्यां रै आवरण अर ब्लॉग-जगत में घणा सक्रिय-सैयोगी दीसै। केई मान-सम्मान सूं आदरीज्या अर एकल प्रदर्शिनियां सूं चरचा में रैया। आप मूल में भोपाल वासी पण अबार रायपुर बिराजै, राजकाज रै सीगै छत्तीसगढ़ विधानसभा सचिवालय में कारज। ई-मेल : k.arvindrasingh@yahoo.com

====================

जयप्रकाश मानस

noreply@blogger.com (Unknown) — Tue, 23 Jun 2015 17:15:00 -0700

अन्न-पूजा

जिकां सूं खेत नीं जोतीजै

जिकां सूं बीज नीं बोईजै

जिकां सूं रातीजोगा नीं करीजै

जिकां सूं खेत ऊभ’र उदासी नीं देखीजै

बां री थाळियां रै असवाड़ै-पसवाड़ै

जे महकै अन्न

तो आ बां री चुकता करी रकम रै परताप नीं

फगत आ किरपा है बां री

जिका अन्न नै पूजै।

००००

सगळा सूं चोखी परजा

जिकां राजा री पालकी साथै

कोनी दौड़ै

जिकां राजा री मोजड़ी रा गीत

कोनी गावै

जिकां राजा रै रुख नै देख’र

मूंडै री भाषा कोनी बदळै

जिकी राजा रै जस खातर

साव धोळा फूठरा-पूठरा सबद कोनी बपरावै

चोखी प्रजा हुवै बा, पण

चोखी परजा जलमै-

बिरादरी री चोखै दिनां खातर

चोखी परजा मर जावै-

बिरादरी री चोखै दिनां खातर

सगळा सूं चोखी परजा हुवै घणी कोझी

राज रै राजपत्र मांय

परजा पण हुवै-

चोखी राजा।

००००

आपां रा घर

अपां रै घरां मांय

जित्तो पसरियोड़ो है गांव

उण सूं बेसी पसरग्यो है शहर

जित्ता है ठंडै पाणी रा घड़ा, उण सूं बेसी तिरस

जित्ता है जाळी-झरोखा, भींतां उण सूं कित्ती ई बेसी

जित्ता मांयनै उण सूं बेसी बारै आपां

जित्ता डरियोड़ा हां आपां, आपां रै घरां मांय

उण सूं बेसी जापतैसर है आपां घर

आपां रै सुपनां मांय !

००००

सबद

खुद रै अंधारै मांय पड़ियो हो छानैमानै

मिनख पूग्यो उण पाखती

जागग्यो बो

जाणै हुयग्यो सिनान, मिनख रो रोसणी सूं

फगत इत्तो ई नीं

नहावण कर लियो आखी दुनिया उण रोसणी मांय

ऐकदम नवी चीज- खुद रो नांव काढीजण सूं

संस्कारित हुयग्यो आखो जगत

जियां टाबर रै जलमण माथै

नाचण लागै कोई बरसां सूं बांझ घर-परिवार।

००००

भार

धरती रो वैभव

आभै री ऊंचाई

सूरज री चमक

का फेर

चांद री चांदणी

आखो मिनखपणो

सगळो रो सगळो पुन्न

आखी पिरथवी पलड़ै मांय

भलाई धर देवो ताकड़ी-तोलणियां

डीगै कोनी सूवो

तिल जित्तो ई’ज

किणी राख दियो है

छानै सूं रत्ती भर प्रेम

दूजै पालणै मांय।

००००

तीरथ-जातरा

फगत एकर

गयो हो म्हैं

सगळा सूं सीधै-सरल मिनख रै घरै

सगळा सूं आंटा-टेढा मारगां सूं

गिरतो-पड़तो

अर फेर पाछो कदैई कोनी बावड़ियो

सगळा सूं बेसी हुसियार अर चंट लोगां आळी

खुद री बस्ती मांय।

००००

बच्योड़ा रैसी सगळा सूं चोखा

जायां पछै ई

बच्योड़ा रैसी चोखा मिनख

बां रै पांती री दुनिया सूं

लोककथावां री अखूट दुनिया रै

राजकंवरां दांई।

घणा चोखा मिनख रैसी बच्योड़ा

बां रै पांती री दुनिया सूं

जायां पछै ई

बायरो-पाणी अर अगन दांई

खुद री दुनिया रै, आसैपासै री दुनिया मांय

सगळा सूं चोखा मिनख रैसी बच्योड़ा

बां रै पांती री दुनिया सूं

जायां पछै ई

खुसबू दांई

आखी दुनिया ऊपर छात

बणावतै गुलाब रै फूलां दांई

खुसबू जीवै बायरै-पाणी अर अगन मांय।

००००

अनुवाद- नीरज दइया

====================

कवि परिचै : जयप्रकाश रथ ‘मानस’ रो जलम 02 अक्टूबर, 1965 नै छत्तीसगढ़ रै रायगढ़ मांय हुयो। आप एम.ए. (भाषा विज्ञान), एम.एससी. (आई.टी.) भणियोड़ा अर तीन भाषावां- छत्तीसगढ़ी, हिन्दी, उड़िया मांय लेखन करै। बाल साहित्य, लोक साहित्य, संपादन-अनुवाद, शिक्षा-साक्षरता अर अंतरजाळ-जगत आद पेटै ई आप घणो काम करियो। केई सम्मान अर पुरस्कारां सूं आदरिज्या मानस देस-विदेस मांय केई महतावूं आयोजनां पेटै ई जाणीजै। चावी पोथ्यां- तभी होती है सुबह, होना ही चाहिए आँगन, अबोले के विरुद्ध, साहित्य की सदाशयता, विविध कवि की उपस्थिति, दोपहर में गाँव, छत्तीसगढ़ की लोक कथायें (10 भाग)

ईमेल- rathjayprakash@gmail.com

====================

सबद-नाद

वीरभद्र कार्कीढोली

दोय नेपाली कवितावांमूळ कवि - वीरभद्र कार्कीढोलीउलथो - नीरज दइया

फेर थां तांई

दाय है इणी खातर

उलथो - नीरज दइया

लीलाधर मंडलोई री कवितावां

हकीरत हीर री कवितावां

सुधीर सक्सेना

रति सक्सेना

रजनी भारद्वाज

राज हीरामन

लालित्य ललित

के. रवीन्द्र

जयप्रकाश मानस

दोय नेपाली कवितावां
मूळ कवि - वीरभद्र कार्कीढोली
उलथो - नीरज दइया