მეზღაპრე's Blog

9 აპრილი – ანონსი

noreply@blogger.com (თამთა) — Fri, 08 Apr 2011 05:29:00 +0000

ხვალ, 9 აპრილს სახელმწიფო დასვენების დღეა, ამიტომ "ზღაპრის დღე" არ ჩატარდება.
მომდევნო შაბათს კი ისევ ლიგამუსში დაგხვდებით.

გაზაფხული – მიმოხილვა

noreply@blogger.com (თამთა) — Mon, 21 Mar 2011 20:23:00 +0000

წინა შაბათს ბავშვები გაზაფხულის დადგომის აღსანიშნავად შეიკრიბნენ ლიგამუსში. პირველ რიგში ვიფიქრე საინტერესო იქნებოდა გაგვეგო წელიწადის დროები როგორ გაჩნდნენ. ამიტომ მაღაზიის წიგნებს გადავხედე და გამომცემლობა ”კოდალას წიგნები”-ს წიგნი ”ბერძნული მითები” გადავფურცლე.

ამ წიგნის ერთი თავი წავუკითხე ბავშვებს და ამიერიდან მათ უკვე იციან ვინ არის პერსეფონე, ჰადესი და დემეტრა, ასევე იციან შიკრიკის ფუნქცია და ისიც თუ როგორ წარმოიშვა წელიწადის დროები ძველი ბერძნების მიხედვით.

შემდეგ ბავშვებს ვაჩვენე ჩემი ერთერთი უსაყვარლესი ნახატი: სანდრო ბოტიჩელის ”პრიმავერა”

სანდრო ბოტიჩელი იტალიელი მხატვარი იყო და მისი ეს შედევრი დღეს იტალიის ქალაქ ფლორენციის მუზეუმში ინახება. ”პრიმავერა” იტალიური სიტყვაა და გაზაფხულს ნიშნავს.

გაზაფხულის ფერებში ხატვა ყოველთვის ლამაზ შედეგვს გვაძლევს. ავიღეთ კალკის ფურცელი და დავკუჭეთ, შემდეგ ისევ გავშალეთ და ფლომასტერი გადავუსვით ფურცელზე გაჩენილ ხაზებს.

ასე დაიხატა მრავალი გეომეტრიული ფიგურა კალკის ფურცელზე. ეს გეომეტრიული ფიგურები კი გავაფერადეთ ბრჭყვიალა საღებავებით.

ესეც გაზაფხულის ფერები:

და ბოლოს, დისნეის მოკლემეტრაჟიანი მულტფილმები გაზაფხულის თემატიკის ირგვლივ:

გაზაფხული – ანონსი

noreply@blogger.com (თამთა) — Fri, 18 Mar 2011 18:10:00 +0000

უკვე რამდენიმე დღეა დათბა და უკვე განცდა მაქვს, რომ ბუნება მართლაც იწყებს გამოღვიძებას.
ხვალ 11 საათზე ბავშვების ოთახში გელოდებით...

მხიარული ფიზიკა - ანონსი

noreply@blogger.com (თამთა) — Fri, 11 Mar 2011 13:32:00 +0000

14 მარტს ჩემთვის ძალიან საინტერესო ადამიანის დაბადების დღეა და მინდა ის გაგაცნოთ. მას ალბერტი ერქვა და ძალიან ბევრი ადამიანი დღესაც გენიოსად მიიჩნევს.
ის ფიზიკოსი იყო და ხვალ მინდა გაჩვენოთ რამდენად სახალისოა ფიზიკა. ამიტომ ხვალ ექსპერიმენტებს ჩავატარებთ, დავსვამთ უამრავ კითხვას და ვეცდებით რომ პასუხები ვიპოვოთ მათზე.

დედის დღე - ანონსი

noreply@blogger.com (თამთა) — Fri, 25 Feb 2011 13:20:00 +0000

ხვალიდელ ზღაპრის დღეს დავუთმობთ დედებისთვის საჩუქრის გაკეთებას, რადგან მალე 3 მარტი - დედის დღე დადგება!

მხიარული ოჯახი – მიმოხილვა

noreply@blogger.com (თამთა) — Tue, 22 Feb 2011 09:20:00 +0000

წინა შაბათს, ძალიან საინტერესო ორი საათი გავატარე. საბავშვო ოთახში სტუმრად მოსული ბავშვების ოჯახების შესახებ გავიგე ბევრი რამ და მათ გავაცანი ერთი ძალიან საინტერესო ნორვეგიული ოჯახი.

"იყო და არა იყო რა, ერთი დიდი, ძალიან დიდი ოჯახი: დედა, მამა და მათი რვა შვილი. ბავშვებს ერქვათ: მარენი, მარტინი, მარტა, მადსი, მონა, მილი, მინა და წრიპა მორტენი.." – ასე იწყება ამბავი ერთი მხიარული ოჯახისა, რომელიც ნორვეგიის ერთი უშველებელი ქალაქის ცენტრში, ქვითკირის მაღალი სახლის ერთ ციცქნა ბინაში ცხოვრობს.
ნორვეგიელმა საბავშვო მწერალმა ქალმა, ანე–კატარინე ვესტლიმ, რომელსაც თანამემამულეები "მთელი ნორვეგიის ბებიას" უწოდებენ, წიგნების მთელი სერია შექმნა ღარიბ, მაგრამ ძალიან კეთილსა და ხალისიან ოჯახზე.

წიგნის წაკითხვის შემდეგ, ბავშვებმა დახატეს თავიანთი ოჯახები. რამდენიმე მათგანი:

ამის შემდეგ გავაკარით კედელზე დიდი სახლი. ეს სახლი თავიდან ცარიელი იყო. ბავშვებმა ფურცლებზე დახატეს თავიანთი ოცნების ოთახი და ამ სახლში ჩააკრეს, ასე ავაშენეთ "ლიგამუსის ოცნების სახლი".

მოვრთოთ ბავშვების ოთახი – მიმოხილვა

noreply@blogger.com (თამთა) — Fri, 28 Jan 2011 11:38:00 +0000

ხვალ 11 საათზე დავიწყებ წიგნის კითხვას, ასე რომ არ დაიგვიანო!
ზღაპრის მოსემნის შემდეგ, ლამაზი გირლიანდების გასაკეთებლად ყველანი გადავინაცვლებთ მაგიდებთან. ამ გირლიანდებით კი მოვრთავთ ჩვენი ოთახის ფანჯრებს...

ზღაპრის დღეები – ანონსი

noreply@blogger.com (თამთა) — Fri, 21 Jan 2011 11:21:00 +0000

ხვალ 11 საათზე გელოდებით "ლიგამუსის" ბავშვების ოთახში.
ტუმბოზე მედება საინტერესო წიგნი, მაგიდებზე დაგახვედრებთ ფლომასტერებს და კედელზე გავათავისუფლებ ადგილს, რომ შემდეგ გამოვფინოთ თქვენი ნამუშევრები.

გილოცავ შობა – ახალ წელს ! – მიმოხილვა

noreply@blogger.com (თამთა) — Mon, 17 Jan 2011 10:23:00 +0000

უკვე 2011 წელია...
ახალი წელიც დადგა, ბევრი საჩუქარი მივიღე და კარგად დავისვენე.
ახლა კი ისევ ვაგრძელებ "ლიგამუსში" ყოველ შაბათს ზღაპრის დღეების მოწყობას. ასე რომ გელოდები შაბათობით 11 საათზე, არ დააგვიანო!
წინა შაბათს, ანუ 15 იანვარს უკვე შევიკრიბეთ "ლიგამუსის" ბავშვების ოთახში. მწვანე ხალიჩაზე კოტრიალის დაწყებამდე, ერთმანეთი გავიცანით და მოვუყევით ჩვენი საახალწლო საჩუქრების შესახებ. ძალიან საინტერესო იყო, იმის გაგება რომ ძალიან ბევრმა საოცნებო საჩუქარი მიიღო.
შემდეგ ზღაპრის მოსმენის დროც მოვიდა. გადავშალე წიგნი სახელად "საშობაო მოთხრობები" და ამოვარჩიე ან.წერეთელის მოთხრობა - ”გულმა იგრძნო”. კითხვა რომ დავასრულე, გადავინაცვლეთ მაგიდებისკენ, რომ რამე ლამაზი გაგვეკეთებინა. ამისთვის დავიხმარე ”კოდალას წიგნები”–ის გამომცემლობის წიგნი "რისი გაკეთება შეიძლება ქაღალდისაგან".
და აგერ შედევრებიც:

საახალწლო მზადება – მიმოხილვა

noreply@blogger.com (თამთა) — Tue, 21 Dec 2010 10:37:00 +0000

ზღაპრის წაკითხვის შემდგე, საახალწლო განწყობაზე დავდექით.

წავიკითხე ვაჟა–ფშაველას "მელია კუდაგრძელია (საახალწლო ზღაპარი)" პალიტრა L–ის სერიის "ჩემი საყვარელი ზღაპრების" მეექვსე წიგნიდან.

გადავწყვიტეთ გაგვეკეთებინა მისალოცი ბარათები. დავამზადეთ სამ განზომილებიანი მისალოცები. ესეთი გამოვიდა:

იმისთვის რომ დაამზადო ასეთი მისალოცი, დაგჭირდება:

მაკრატელი
წებო
ფანქარი
ფერადი ფურცლები
ბრჭყვიალა წებოები

აიღე ერთი ფურცელი და შუაზე გადაკეცე – ეს იქნება მისალოცის ყდა, რომელსაც ლამაზად გააფორმებ.

აიღე მეორე იგივე ზომის ფურცელი და ისიც შუაზე გადაკეცე. ამ ფურცელზე დახატე ზოლები, რომლებიც ერთმანეთისგან ერთნაირად იქნებიან დაშორებულები. გამოჭერი. ამ გამოჭრილ ზოლებზე დააწებე ფერად ფურცლებიდან გამოჭრილი ნაძვის ხეები. მორთე ისინი ბრჭყვილა წებოებით.

ეს ნაძვის ხიანი ფურცელი მიაწებე მისალოცის ყდას. აცადე გაშრობა.

პიტერ პენი და ფერიები – მიმოხილვა

noreply@blogger.com (თამთა) — Sun, 12 Dec 2010 20:09:00 +0000

წინა შაბათს განსაკუთრებული დღე გვქონდა, რადგან განსაკუთრებული სტუმრები გვყავდნენ. რუსთავი ორის "საბავშვო ამბების" ჟურნალისტი და ოპერატორი გვეწვივნენ.
ამ კვირას, ანუ 19 დეკემბერს, 11 საათზე გავა სიუჟეტი ზღაპრის დღეების შესახებ.
მოუთმენლად ველოდები...

წინა შაბათის დღის თემა "პიტერ პენი და ფერიები" იყო. ბალახივით მწვანე ხალიჩაზე უამრავი ბავშვი მოკალათდა და სიამოვნებით მისმენდნენ, როგორ ვკითხულობდი ბაკურ სულაკაურის გამომცემლობის ახალ წიგნს "პიტერ პენს".

წიგნი ძალიან მოეწონათ ბავშვებს. მეც ძალიან მომწონს. ნამდვილად კარგი საჩუქარია ეს სამგანზომილებიანი ხმოვანი წიგნი.
შთამბეჭდავია. საინტერესო წასაკითხი და დასათვალიერებელი!
მაგრამ ერთი ძალიან ძალიან დიდი მინუსი აქვს: არარსებული კუნძული, რომელზეც პიტერ პენი ცხოვრობს დაკარგულ ბიჭებთან, პირატებთან, ინდიელებთან და წკრიალასთან ერთად, ნათარგმნია როგორც არა–იყო–რა კუნძული. მე როგორც ამ ნაწარმოების დიდი გულშემატკივარი, გულდაწყვეტილი ვარ რომ ასეთი დიდებული ადგილის სახელი ასე თარგმნეს. თუმცა მესმის რომ სრულიად სუბიექტური დამოკიდებულებაა და თან ეს წიგნის ერთადერთი მინუსია. ამიტომ არ არის რთული დადებითად შევაფასოთ და შეგვიყვარდეს კიდეც ეს წიგნი.

პიტერ პენის მიხედვით, როდესაც ყველაზე პირველმა ბავშვმა ყველაზე პირველად გაიცინა, მისი სიცილი ათას ნაწილად დაიმსხვრა და აქეთ–იქით გაიფანტა. სწორედ ასე გაჩნდნენ ფერიები.
ჩვენ კი ისინი ერთჯერადი თეფშებისაგან გავაკეთეთ. თუ გაინტერესებს, როგორ კეთდება თეფშისგან ფერია ამ ბმულზე გადადი.

როგორ გაჩნდნენ ფერიები?

noreply@blogger.com (თამთა) — Sun, 12 Dec 2010 19:31:00 +0000

პიტერ პენის მიხედვით, როდესაც ყველაზე პირველმა ბავშვმა ყველაზე პირველად გაიცინა, მისი სიცილი ათას ნაწილად დაიმსხვრა და აქეთ–იქით გაიფანტა. სწორედ ასე გაჩნდნენ ფერიები.

ჩვენ კი ფერიების გასაჩენად დაგვჭირდება:

ქაღალდის ერთჯერადი თეფში
მაკრატელი
ფანქარი
გასაფორმებლად: ფლომასტერები, ბრჭყვიალა წებოები და სხვა

თეფში აიღე და მის უკანა მხარეს ფანქრით დახატე როგორც სურათზეა ნაჩვენები. შეგიძლია ფერიას სხვანაირი ვარცხნილობა დაუხატო.

გამოჭერი

მხოლოდ ის ადგილები გამოჭერი, რომლებიც სურათზე წითელი წყვეტილი ხაზით არის აღნიშნული

ისე დაამრგვალე თეფში, რომ სურათზე წითლად აღნიშნული გამოჭრილი ადგილები ერთმანეთში ჩასვა.

ესეც შენი ფერია

ახლა კი გააფორმე. უკვე ფერად ფერიას, შეგიძლია ძუა გაუყარო და ოთახში ჩამოკიდო.

”მზის სისტემის მოდელი-ჭაღი”

noreply@blogger.com (თამთა) — Wed, 08 Dec 2010 10:20:00 +0000

წინა შაბათს, ზღაპრის დღეზე ძალიან საინტერესო რამ გავაკეთეთ...დააჭირე აქ და ნახე. ოთახისთვის ჭაღი დავამზადეთ. ნათურა მზედ ვაქციეთ და ირგვლივ პლანეტები დავუკიდეთ. აი ასეთი გამოგვივიდა:

როგორ კეთდება ”მზის სისტემის მოდელი-ჭაღი”?

დაგჭირდება:

8 ბურთი
ერთი კომპაქტ დისკი
წებო
სარჭი
ძუა
მუყაოს ქაღალდი
მყარი ძაფი
ლურჯი ფლომასტერი
ყვითელი წებოვანი ფურცელი
მაკრატელი
ფანქარი
ბრჭყვიალა წებოები
ფერადი ფურცლები ან ძველი ფერადი ჟურნალები
წიგნი კოსმოსის შესახებ
ყვითელი საღებავი
ფუნჯი
ჩინური მრგვალი ჭაღი
უფროსის დახმარება

პირველ რიგში მოამზადე მზე: აიღე ჩინური ჭაღი და შეღებე ყვითელი საღებავით. აცადე გაშრობა.

სანამ ჭაღი შრება...

დაამზადე ცა. აიღე მუყაოს ქაღალდი და გამოჭერი რაც შეიძლება დიდი წრე. ცენტრში კიდევ პატარა წრე ამოჭერი და ნაპირში ოთხ ადგილას გახვრიტე, ისე როგორც სურათზეა ნაჩვენები. ამ ნახვრეტებში გაუყარე და განასკვე ძაფი. თითო ძაფის სიგრძე დაახლოებით ერთი მეტრი უნდა იყოს. შემდგომ ამ ძაფებს გამოიყენებ ცის სანათზე მისამაგრებლად.

წრის ერთი მხარე გააფერადე ლურჯად.

ყვითელ წებოვან ფურცელზე დახატე სხვადასხვა ზომის ვარსკვლავები და გამოჭერი. ეს ვარსკვლავები ლურჯად გაფერადებულ წრეს მიაკარი.

წრის მეორე მხარეს რვა წრე დახატე (იხ. ზედა ნახატი). ეს წრეები პლანეტების ორბიტების აღმნიშვნელია. თითო წრეს თითო ნახვრეტი გაუკეთე, სადაც პლანეტა დაეკიდება. ეცადე ეს ნავრეტები ერთმანეთისაგან რაც შეიძლება დაშორებული იყოს. არ დაგავიწყდეს, მხოლოდ რვა ნახვრეტი გჭირდება, ანუ რამდენი პლანეტაც არის მზის სისტემაში!

დაიხმარე უფროსი და სანათზე მყარი ძაფით წრე დაამაგრეთ. წრის ვარსკვლავებიანი მხარე ქვემოთ უნდა იყურებოდეს.

ამის შემდეგ ყვითლად გაფერადებული ჩინური ჭაღის ჩამოკიდებაც შეგიძლია.

ახლა კი პლანეტების დამზადების დროც დადგა.

ამისათვის საჭიროა შეიძინო ან სახლში მოიძიო 8 სხვადასხვა ზომის ბურთი. ეს ბურთები შეიძლება სხვადასხვა მასალისაგან იყოს დამზადებული. მთავარია, მსუბუქი იყოს. ჩვენ ნაძვის ხის ძველი ბურთები ავირჩიეთ და პლანეტებად გამოვიყენეთ.

მნიშვნელოვანია გაითვალისწინო, რომ პლანეტები სხვადასხვა ზომის არიან. მერკური ყველაზე პატარა პლანეტაა, შემდეგ მოდის მარსი, დედამიწა და ვენერა მარსზე ორჯერ უფრო დიდები არიან. ნეპტუნი დედამიწაზე უფრო დიდია, მასში სამოცი დედამიწისხელა პლანეტა მოთავსდებოდა. შემდეგ მოდის ურანი, რომელიც იუპიტერზე ოდნავ დიდია. სატურნი ურანზე ბევრად დიდია, ის 764 ჯერ უფრო დიდია ვიდრე დედამიწა. იუპიტერი მთელს მზის სისტემაში ყველაზე დიდი პლანეტაა, ის ისეთი უზარმაზარია, რომ მასში ყველა პლანეტა ერთად მოთავსდებოდა.

კოსმოსის შესახებ ბევრი წიგნი და ენციკლოპედია არსებობს, დაათვალიერე და ნახე როგორ გამოიყურებიან ეს პლანეტები, რა ფერისები არიან, რა ფიზიკური მახასიათებლები აქვთ და ამის მიხედვით გააფორმე ბურთები. შეგიძლია ფერადი ფურცლები ან ძველი ჟურნალები დაჭრა და მიაწებო, შეგიძლია გამოიყენო ბრჭყვიალა წებოებიც.

სატურნის დასამზადებლად ბურთის გარდა დაგჭირდება კომპაქტ დისკიც. სატურნს ძალიან ლამაზი რგოლები აქვს. ამ რგოლების გარეშე სატურნი სატურნი აღარ იქნება, ამიტომ აუცილებლად უნდა გაუკეთო ეს რგოლები.

ამისთვის აარჩიე სატურნის შესაბამისი ზომის ბურთი, რომლის შუაზე გაჭრასაც მოახერხებ. უფროსი დაიხმარე და ბურთი შუაზე გაჭერი. კომპაქტ დისკს წაუსვი წებო ორივე მხარეს და მიაწებე ბურთის ნახევარ სფეროები დისკს, როგორც სუარათზეა ნაჩვენები. სარჭი მიამაგრე ბურთს.

მის დახმარებით მოახერხებ სატურნის ძუაზე დაკიდებას.

თუ ყველა პლანეტა მზად გაქვს და ცოტა შეშრნენ კიდეც, დროა ჩამოკიდო ისინი ცაზე და დაასრულო ჭაღი.

ყველა პლანეტას ძუა გამოაბი. ძუის გამოყენება ძალიან ჭკვიანურია, რადგან ის ადვილად არ წყდება და თან გამჭვირვალეა და თითქმის არ ჩანს. უფროსის დახმარებით, უკვე გაკეთებულ ხვრელებში ჩამოკიდე პლანეტები შემდეგი მიმდევრობით:

მზესთან ყველაზე ახლოს მერკური
შემდეგ ვენერა
დედამიწა
მარსი
მათ იუპიტერი მოსდევთ
შემდეგ მოდის სატურნი
ურანი
ნეპტუნი კი მზისგან ყველაზე შორს მდებარეობს

კიბიდან ჩამოდი და შუქი აანთე. ახლა კი შეგიძლია შენით დამზადებული ”მზის სისტემის მოდელი-ჭაღით” დატკბე.

მხატვრები . რენუარი – მიმოხილვა

noreply@blogger.com (თამთა) — Mon, 06 Dec 2010 22:26:00 +0000

ფრანგული ზღაპრის "სიმართლის მთქმელი ჩიტის" წაკითხვის შემდეგ, დავათვალიერეთ პალიტრა L–ის გამომცემლობის წიგნი რენუარზე.

ისე მომწონს სხვადასხვა მხატვრების შესახებ შექმნილი პალიტრა L–ის წიგნების სერია, რომ მზად ვარ ყოველთვის ვაქო და ვადიდო ეს გამომცემლობა. მართალია ეს წიგნები უფროსებზეა გათვლილი, მაგრამ მხატვრების ნამუშევრები ისეა შერჩეული და წიგნები ისეა აწყობილი, რომ ნებისმიერი ასაკის ადამიანისთვის საინტერესოა მისი დათვალიერება. სწორედ ამიტომ, ზღაპრის დღეებზე ხშირად ვიყენებ ხოლმე სხვადასხვა წიგნს ამ სერიიდან.

გავეცანით რენუარს, მის შემოქმედებას და მის ნახატებზე დაკვირვებით აღმოვაჩინეთ თუ როგორ ხატავდა შუქჩრდილებს.

ჩვენც ავიღეთ სუფთა ფურცლები და დავხატეთ ხე, რომელიც ნახატის ნაწილს ჩრდილში აქცევდა. შემდეგ ვისაც რა მოგვინდა ის დავხატეთ ფურცელზე. ის, რაც მზეში იყო უფრო ნათელი ფერებით გავაფერადეთ და ის რაც ხის ქვეშ მოექცა, ანუ ჩრდილში მოხვდა – უფრო მუქი ფერებით.

უალტ დისნეის დაბადების დღე

noreply@blogger.com (თამთა) — Sun, 05 Dec 2010 20:41:00 +0000

უალტ დისნეი დაიბადა 1901 წლის 5 დეკემბერს.

დისნეილენდის ბლოგზე ვიპოვე ეს იშვიათი ფოტო, რომელიც გადაღებულია 1957 წელს.

ვულოცავ უალტის დაბადების დღეს ყველა იმ ადამიანს, ვინც აფასებს მის შემოქმედებას და იმ საქმეებს რასაც მან ჩაუყარა საფუძველი.

მხატვრები . რენუარი– ანონსი

noreply@blogger.com (თამთა) — Fri, 03 Dec 2010 08:48:00 +0000

ხვალ ბავშვების ოთახში რენუარს გაგაცნობთ. ფრანგული ხალხური ზღაპრის მოსმენის შემდეგ დაგათვალიერებინებთ რენუარის ნამუშევრებს.
მერე კი მივუსხდებით მაგიდებს და ვისწავლით შუქ–ჩრდილების ხატვას.

სამყარო II . მოგზაურობა მზის სისტემის გარშემო – მიმოხილვა

noreply@blogger.com (თამთა) — Mon, 29 Nov 2010 10:00:00 +0000

სამყაროს დღეებმა გაამართლა. ბოლო ორი შაბათი ძალიან საინტერესო და პროდუქტიული გამოდგა. მე ძალიან კმაყოფილი ვარ!

ამ შაბათს წავიკითხე წიგნი, რომელიც ინტერნეტში აღმოვაჩინე ნასას გვერდზე. ძალიან მომეწონა და სპეციალურად შაბათს მოსული ბავშვებისთვის ვთარგმნე ქართულად.

ამ წიგნის სახელია ”პლანეტების პირველი წლიური კონკურსი” და როგორც სათაური მიგვითითებს, ის მოგვითხრობს კონკურსის შესახებ, რომელიც ჩატარდა საუკეთესო პლანეტის გამოსავლენად.

შემდეგ ჩვენ ავაგეთ ”მზის სისტემის მოდელი-ჭაღი”. ისეთი ლამაზი გამოვიდა!!

მის დამზადების ინსტრუქციას შემდეგ პოსტში დავწერ, ეხლა კი სურათებით დატკბით.

სამყარო . მოგზაურობა მზის სისტემის გარშემო – ანონსი

noreply@blogger.com (თამთა) — Fri, 26 Nov 2010 07:01:00 +0000

ხვალ, 11 საათზე პლანეტების დაჯილდოვება იწყება. თუ გაინტერესებს ვინ მიიღებს საუკეთესო პლანეტის წოდებას არ დაიგვიანო.
დაჯილდოვება მალე ჩაივლის, მერე კი უნდა ავაგოთ მზის სისტემის ულამაზესი მოდელი.

სამყარო . მოგზაურობა კოსმოსში– მიმოხილვა

noreply@blogger.com (თამთა) — Mon, 22 Nov 2010 13:27:00 +0000

ბალახივით მწვანე ხალიჩაზე ისევ გადავშალე წიგნი და დავიწყე კითხვა. "კომეტა მუმინების ხობაში" – ეს ტუვე იანსონის დაწერილი წიგნი ჩემი ერთერთი ყველაზე საყვარელი საბავშვო წიგნია.

მუმინტროლი და სნიფი გაემგზავრნენ ობსერვატორიაში, რომ რაც შეიძლება მეტი ინფორმაცია მიიღონ ვარსკვლავების და სამყაროს შესახებ. როგორც ონდატრა ამბობს მალე სამყაროს დასასრული დადგება, რადგან კომეტა ჩამოვარდება დედამიწაზე.

სანამ მუმინტროლი და სნიფი ამ ინფორმაციის სისწორეს ობსერვატორიაში ამოწმებდნენ, ჩვენ გადავწყვიტეთ ლიგამუსის ბავშვების ოთახში შატლი აგვეგო. შატლი კოსმოსური ხომალდია, რომლითაც გავფრინდით და კომეტა ვნახეთ.

დედამიწაზე რომ დავბრუნდით ჩამოვიტანეთ ცოდნა და აი ეს ვიდეო. ამ ვიდეოში ნახავ, რა ვნახეთ და აღმოვაჩინეთ მოგზაურობის დროს.

სამყარო . მოგზაურობა კოსმოსში– ანონსი

noreply@blogger.com (თამთა) — Fri, 19 Nov 2010 13:33:00 +0000

თუ მზად ხარ გახდე ასტრონომი, შაბათს 11 საათზე ლიგამუსის ბავშვების ოთახში მოდი და არ დაიგვიანო!
მუმინების ხეობაში დიდი პრობლემაა! ონდატრა ამბობს მალე კომეტა ჩამოვარდებაო! მუმინების შესახებ თუ მეტი გაინტერესებს, აი ეს პოსტი წაიკითხე. ხვალ კი გავეცნობით წიგნს სახელად "კომეტა მუმინების ხეობაში".
კომეტის ამბავს, ესე ხომ არ დავტოვებთ?!... უნდა რამე ვიღონოთ! ამისთვის კი ვფიქრობ უმჯობესია ხომალდი ავაგოთ და გავემგზავროთ კოსმოსში. ჩევნი თვალით ვნახოთ რა ხდება იქ.

ასტრიდ ლინდგრენის დაბადების დღე – მიმოხილვა

noreply@blogger.com (თამთა) — Tue, 16 Nov 2010 12:56:00 +0000

შაბათს დილით ლიგამუსში რომ მივედი, პირველ რიგში ტორტი გამოვიღე მაცივრიდან და ბავშვების ოთახში შევიტანე. ელენე, ჩემი ერთგული მეგობარი (ყველა მეზრაპრეს ჰყავს ერთგული მეგობარი), ამბობდა: ტორტი აქ რომ დავდოთ, ყველას ნერწყვები მოადგება და ყურადღებას წიგნებზე ვეღარ გადავიტანთო. მე კიდევ უკვე მოჯადოებული ვიყავი ტორტით და ვერაფრით ჩავაბრუნე ის ყუთში. პირიქით, ამოვიღე სანთლები და ჩავარჭე ჯერ ერთიანი, მერე ნულიანი და ბოლოს სამიანი. ლინდგრენი ხომ 103 წლის გახდებოდა.

ბავშვებს ძალიან უყვართ დაბადების დღეები და ბევრნი მოვიდნენ, ძალიან ბევრნი! გოგოებიც იყვნენ, ერთერთი საერთოდ გეგონებოდა ლინდგრენის წიგნიდან გვესტუმრაო.
გავიძრეთ ფეხსაცმელები და გადავძვერით ჩვენს ბალახივით მწვანე ხალიჩაზე.
პირველ რიგში კარგად გავერკვიეთ ვის დაბადების დღეს ავღნიშნავდით. ვინ არის ასტრიდ ლინდგრენი? როგორ იცხოვრა? რა დაწერა? რატომ დაიწყო საერთოდ წიგნების წერა?

ვიდეოს ყურების შემდეგ, გადმოვიღე ლინდგრენის ერთერთი წიგნი "ბულერბიელი ბავშვები" და წავუკითხე ბავშვებს რამდენიმე თავი.

ეს მართლაც რომ ძალიან კარგი წიგნია. ამ ზღაპრის დღისთვის, რომ ვემზადებოდი ის თავიდან ბოლომდე წავიკითხე. თავს ვერ ვიკავებდი ხმამაღლა მეცინებოდა.
სახალისო და კარგი წასაკითხი წიგნია. გირჩევთ ყველას წაიკითხოთ, უფროსებსაც!

ბალახივით მწვანე ხალიჩაზევე დავიწყეთ "ამის პატრონმა რა ჰქნას" თამაში, ამ თამაშს ბულერბიელი ბავშვებიც სიამოვნებით თამაშობენ ხოლმე. ყველამ ჩვენი ფანტი ავირჩიეთ და სათითაოდ ვიხუჭებოდით. ზოგს ასკინკილა ხტუნვა მოუწია, ზოგს მანქანის დახატვა, ზოგსაც თავდაყირა დადგომა.

სტუმრად მოსულ ბავშვების უმრავლესობას ხატვა ძალიან უყვარს, ამიტომ გადავინაცვლეთ მაგიდებთან და დავხატეთ ლინდგრენის წიგნებიდან სცენები და პერსონაჟები. მაგალითად ნიკამ პეპის ცხენი დახატა, ანდრომ ბულერბის სახლები, ივამ კი პოლიციელები, რომლებიც პეპის ესტუმრნენ.

ყველამ გავაკარით ჩვენ ჩვენი ნახატები ოთახის კედლებზე და შემდეგ შევგროვდით ტორტის ირგვლივ. ავანთეთ სანთლები და შუშხუნები, ვუმღერეთ ლინდგრენს დაბადების დღის სიმღერა და დავჭერით ტორტი.

იფ, რა გემრიელი ტორტი გამოდგა! ყველამ ჩავიტკბარუნეთ პირები.

ასტრიდ ლინდგრენის დაბადების დღე – ანონსი

noreply@blogger.com (თამთა) — Fri, 12 Nov 2010 07:48:00 +0000

ხვალ, 13 ნოემბერს, აღვნიშნავთ ასტრიდ ლინდგრენის დაბადების დღეს!
ჩემთან ერთად ბავშვები გაიცნობენ ამ ადამიანს და მის შემოქმედებას წიგნების, თამაშების და სხვა აქტივობების დახმარებით.

მოლა ნასრედინის ოხუნჯობანი – მიმოხილვა

noreply@blogger.com (თამთა) — Thu, 11 Nov 2010 12:17:00 +0000

წინა შაბათს, მოსულ ბავშვებთან ერთად, გავეცანი გამომცემლობა პალიტრა L–ის წიგნს სახელად "მოლა ნასრედინის ოხუნჯობანი".
მოლა ნასრედინი შუა აზიისა და ახლო აღმოსავლეთის ქვეყნების ხალხური პერსონაჟია, უამრავი ანეგდოტის გმირი. ხუმარა და ენამოსწრებული ზოგჯერ ბრძენია, ზოგჯერ მიამიტი, ზოგჯერ კი სულელიც.
ეს წიგნი ძალიან სახალისო წასაკითხია. მოკლე ისტორიების მიუხედავად მაინც არ არის ყველაზე პატარებისთვის განკუთვნილი. ვფიქრობ საშუალოდ 9 წლის ბავშვმა უნდა თვითონ წაიკითხოს და თავისთვის ჩუმად იხითხითოს ან ხმამაღლა იცინოს.

მოლა ნასრედინი მოხერხებული ადამიანია. გადავწყვიტე, ჩვენც რომ გამოგვეცადა ჩვენი თავები, გვეთამაშა ისეთი თამაში რომელიც ბავშვებს შორის ყველაზე მოხერხებულს გამოავლენდა. ვითამაშეთ ჩაძირობანა. ჩვენს შორის ყველაზე მოხერხებული კი ანდრო აღმოჩნდა. მან თავის მოწინაღმდეგეებს ყველა გემი ჩაუძირა.

მოლა ნასრედინის ოხუნჯობანი – ანონსი

noreply@blogger.com (თამთა) — Fri, 05 Nov 2010 10:07:00 +0000

ხვალ უნდა გაგაცნო მოლა ნასრედინი. მხიარული დილა გველის. გელოდები 11 საათზე "ლიგამუსის" ბავშვების ოთახში.

არც ისე საშიში დღე მეზღაპრესთან ერთად! – მიმოხილვა

noreply@blogger.com (თამთა) — Tue, 02 Nov 2010 17:50:00 +0000

წინა კვირაში მოვიარე საკანცელარიო და ათასი წვრილმანის მაღაზიები.
აღმაშენებელზე, რომ საკანცელარიო მაღაზიაა იქ ვიყიდე სახეზე დასახატი ფანქრები, პატარა ყუთებში რომ არის და Nova Color აწერია. არ გირჩევთ მათ ყიდვას ცუდი გამოდგა, ძალიან მკრთალად ხატავს, სამაგიეროდ ადვილად მოსაშორებელია.
ამავე მაღაზიიდან წამოვიღე დიდი შავი ქაღალდები, შავი მარკერი და სტაფილოსფერი ლენტა.
მიწისქვეშა გადასასვლელის მაღაზიები დავიარე ხარისხიანი სტაფილოსფერი ბუშტების ძებნაში და ვიპოვე კიდეც.
შაბათს 30 ოქტომბერს სახლიდან დატვირთული გამოვედი: ჩანთა გადაკიდებული მხარზე, ერთ ხელში ძველებური შანდალი მეჭირა, მეორეში კი პარკები, რომლებშიც სხვადასხვა კოსტიუმი ეწყო, სანთლები, საწრუპები და კიდევ ბევრი სხვა ნივთი.
ეს ყველაფერი რისთვის? იმისთვის რომ არც ისე საშიში დღესასწაული აღმენიშნა ბავშვებთან ერთად.

ამინდიც შესაფერისი იყო – ნისლიანი და მოქუფრული. დარწმუნებული ვარ მშიშარა ბავშვები ლოგინში დარჩნენ და საბნის ქვეშ იმალებოდნენ. ლიგამუსში კი თერთმეტი უშიშარი ბავშვი მოვიდა. მათ ოთახში ჰალოვინის დეკორაცია დახვდათ.
ყველაფერი იმით დაიწყო, რომ ყველანი სხვადასხვა პერსონაჟებად გადავიქეცით: ჯადოქრად, გოგრად, კურდღლად, ვამპირად, პირატად... ძალიან ადვილია ან უნდა გადაიცვა კოსტიუმი, ან მოიხატო სახე სპეციალური სახეზე დასახატი ფანქრებით.

იმ იდუმალ გარემოში, მწვანე ხალიჩაზე მეზღაპრესთან ერთად ზოგი უცნაური, ზოგი სასაცილო და ზოგიც საშიში პერსონაჟი იჯდა და უსმენდა მეზღაპრეს, რომელიც კითხულობდა ოსკარ უაილდის ”კენტერვილის აჩრდილს”.

ეს მოთხრობა წავიკითხე ბაკურ სულაკაურის გამომცემლობის წიგნიდან ”ილუსტრირებული მსოფლიო კლასიკა ბავშვებისთვის”.

”მსოფლიო საბავშვო კლასიკის ილუსტრირებული გამოცემა დამწყები მკითხველებისთვის პირველი ნაბიჯია მსოფლიო ლიტერატურის სამყაროში.

მაქსიმალურად შემოკლებული და მარტივი, ბავშვებისთვის გასაგები ენით დაწერილი ექვსი ყველაზე ცნობილი საბავშვო ნაწარმოები აუცილებლად მოეწონებათ პატარა მკითხველებს და "აიძულებს" მათ, მსოფლიო შედევრების სრული ვერსიებიც დიდი ინტერესით წაიკითხონ.”

ეს წიგნი ძალიან მომწონს რადგან: პირველი, ძალიან კარგი ნაწარმოებები არის შერჩეული; მეორე, ძალიან ლამაზად არის დასურათებული და ხარისხიანი ნამუშევარია, შესაბამისად წიგნის მხოლოდ დათვალიერებაც კი დიდი სიამოვნებაა; მესამე, ტექსტი ისე არის გამარტივებული, რომ დამწყები მკითხველებისთვის უდაოდ მარტივი გასაგები, სასიამოვნო წასაკითხი და საინტერესო არის.
ლიგამუსში 19.20 ლარი ღირს და ძალიან კარგი საჩუქარია ნებისმიერი დამწყები მკითხველისთვის.
კითხვას რომ მოვრჩი, ოთახი ჩავაბნელე და ჩავრთე ვიდეო, რომლის დახმარებითაც შევძელით გაგვეგო ყველაფერი ჰალოვინის შესახებ.

დაიწყო მხიარულება! ბავშვები ორ გუნდად გაიყვნენ, გოგოები ვერსუს ბიჭები. ვითამაშეთ ყველაზე სახალისო თამაშები:

სტაფილოსფერი ლენტა
ოთახში უამრავი სტაფილოსფერი ლენტის ნაწილები იყო მიმოფანტული, ზოგი კარადაში, ზოგი სურათების უკან, ზოგიც კანფეტების ყუთში. 2 წუთის მანძილზე უნდა ეპოვათ რაც შეიძლება მეტი ლენტა და ერთმანეთზე გადაებათ, რომელ გუნდსაც უფრო გრძელი ლენტა ექნებოდა ის გაიმარჯვებდა. და გამარჯვებული არის... გოგოების გუნდი!

მუმიები

თითო გუნდში ორი ტუალეტის ქაღალდი დარიგდა და სამი ადამიანი მოემზადა მუმიად გადასაქცევად. რომელ გუნდშიც უფრო მალე გაახვევდნენ სამ მუმიას ის გაიმარჯვებდა. და გამარჯვებული არის... ბიჭების გუნდი!

შეისრუტე და წაიღე
მაგიდაზე მოვათავსეთ ფერადი ქაღალდისგან გამოჭრილი ჰალოვინისთვის დამახასიათებელი ფიგურები: მოჩვენება, გოგრა, ღამურა და კატა. ყველას დაურიგდა საწრუპი. ყველას თითო წუთი ჰქონდა იმისთვის, რომ რაც შეიძლება მეტი ფიგურა გადმოედო თავის მხარეს. ამას საწრუპის დახმარებით აკეთებდნენ: საწრუპს მიიტან ქაღალდის ფიგურასთან, შეისუნთქავ ჰაერს, ქაღალდი აეკვრობა საწრუპს, გადმოწევ შენკენ და ამოისუნთქავ. და გამარჯვებული არის... გოგოენის გუნდი!

ჰალოვინის აღსანიშნავად კოსტიუმების, კანფეტებისა და მხიარულების გარდა აუცილებელია დეკორაცია. ძალიან ადვილად გასაკეთებელი დეკორაცია: საჭიროა თეთრი სანთელი, წითელი სანთელი, ასანთი და ძველებური შანდალი. თეთრ სანთელზე ვაღვენთებთ წითელ სანთელს. საბოლოოდ ვიღებთ თეთრ სანთელს, რომელზეც თითქოს სისხლის წვეთებია. ეს დეკორაცია უფროსის თანხლებით უნდა გაკეთდეს!

შემდეგ მივირთვით კანფეტები და ბოროტ სახიანი მანდარინები. ძალიან გემრიელი იყო!
დრო ძალიან სწრაფად გავიდა, კიდევ იმდენი რამის გაკეთება შეიძლებოდა...მოფიქრებულიც მქონდა და დაგეგმილიც... მაგრამ დრო არ გვეყო... დასრულდა ”არც ისე საშიში დღე მეზღაპრესთან ერთად”.

პ.ს. მუმიების თამაშის დროს გადაღებული ვიდეო