ನೆನಪಿನ ಪುಟಗಳು

ದಡ್ಡ - ಬುದ್ದಿವಂತ

2021-02-24T08:17:00.002-08:00

ನಾನು
ಬುದ್ದಿವಂತ...!!!
ಎಂದೆನಿಸಿದಾಗ
ದಡ್ಡನಾಗುವೆ.

ನಾನೆಂತ ದಡ್ಡ...!!!
ಎಂದೆನಿಸಿದಾಗ
ಬುದ್ದಿವಂತನಾಗುವೆ.

#ಶಿವಚನ#

ಅಜ್ಞಾನಿ - ಜ್ಞಾನಿ

2021-02-24T08:12:00.001-08:00

ಅಜ್ಞಾನಿಗಳ
ಜೊತೆಯಲ್ಲಿರುವ
ಜ್ಞಾನಿ
"ಅಜ್ಞಾನಿ"

ಜ್ಞಾನಿಗಳ
ಜೊತೆಯಲ್ಲಿರುವ
ಅಜ್ಞಾನಿ
"ಜ್ಞಾನಿ"

#ಶಿವಚನ#

ಮನೆ - ಮೆದುಳು

2021-02-24T08:05:00.001-08:00

ನಾವು
ಮನೆಗಿಂತ
ಮೆದುಳಿನಲ್ಲೇ
ಹೆಚ್ಚು ನೆಲೆಸೋದು...

ಅದು ಮನೆಯೂ ಹೌದು...
ಸೆರೆಮನೆಯೊ ಹೌದು...

ಬೇಕಿದ್ದು ...
ಬೇಡದ್ದು...
ಎಲ್ಲವು ತುಂಬಿಕೊಳ್ಳುವ...
ಕಸದ ಡಬ್ಬವೂ ಹೌದು...

#ಶಿವಚನ#

ನೋವು-ನಗು

2020-11-10T01:47:00.003-08:00

ನೋವಿನಲ್ಲಿ
ನಗುವುದು
ಕಷ್ಟ.....
ಆದ್ರೂ
ನಗ್ಬೇಕು ...

ಯಾಕೆಂದ್ರೆ
ಆ ನಗುವಿನಲ್ಲಿ
ಹುಚ್ಚುತನ ಇರುತ್ತೆ....

ಅದಕ್ಕೆ
ಏನನ್ನೆಲ್ಲ ಗಳಿಸೋ
ಶಕ್ತಿ
ಇರುತ್ತೆ...

ಒಮ್ಮೆ ನೋವಿನಲ್ಲಿ
ನಕ್ಕು ನೋಡು...
ಆಗ
ಅದು
ನಿನಗೇ
ಅರ್ಥವಾಗುತ್ತೆ.

#ಶಿವಚನ#

Hindsight is 20/20

2020-05-23T02:55:00.001-07:00

=======******=======

2020 ವರ್ಷದ ಪ್ರಕಾರ,

ಮದುವೆಗೆ 20 ಜನ,
ಮಸಣಕೆ 20 ಜನ,
ಬಂದ್ರೆ ಸಾಕು.

ಯಾಕಂದ್ರೆ.......
ಮನಸಿಂದ ಕುಶಿ ಪಡೊ,
ಮನಸಿಂದ ದುಃಖ ಪಡೋ,
ಆ 20 ಜನ,
ಗಳಿಸೋದು,
ಸುಲಭವಲ್ಲ.

#ಶಿವಚನ#

=======******=======

Note:
ಮಸಣ: I'm referring to "ಅಂತ್ಯ ಸಂಸ್ಕಾರ" here.

ಹೊಸ ದಿನ

2019-10-21T23:39:00.000-07:00

ನೋವು-ನಲಿವುಗಳ ಹೊತ್ತ,

ಹೊಸ ದಿನ,

ಮತ್ತೆ ಬಂದಿದೆ...

ವ್ಯರ್ಥವಾಗಿ ಕಳೆದ,

ಹಳೆಯ ದಿನದ ಲೆಕ್ಕ ಕೇಳಲು... !!!

ಕುಯಿಕ್ ಮಂಜುನಾಥ

2017-07-25T00:33:00.000-07:00

ಕಾರಣಾಂತರಗಳಿಂದ ಹಳೆ ಬಾಡಿಗೆ ಮನೆ ಬಿಟ್ಟು, ಹೊಸ ಬಾಡಿಗೆ ಮನೆಗೆ ಹೋಗಬೇಕಾಗಿ ಬಂತು. ಹಳೆ ಮನೆ ಬಿಡುವ ಸಮಯದಲ್ಲಿ ಮನೆಗೆ ಬಣ್ಣ, ಶುಚಿಗೊಳಿಸುವ ಖರ್ಚು ಎಂದು ಒಂದು ತಿಂಗಳ ಬಾಡಿಗೆ ಹಣವನ್ನು ಮನೆಯ ಮಾಲೀಕರು ಪಡೆಯುತ್ತಾರೆ. ನಾವು ಕೊಟ್ಟ ಅಡ್ವಾನ್ಸ್ ಹಣದಲ್ಲಿ ಈ ಮೊತ್ತವನ್ನು ಕಡಿತಗೊಳಿಸಿ ಉಳಿದ ಅಡ್ವಾನ್ಸ್ ಹಣವನ್ನು ವಾಪಸ್ಸು ಕೊಡುತ್ತಾರೆ. ಇದು ನಮ್ಮಲ್ಲಿ ಬಹಳಷ್ಟು ಜನರಿಗೆ ತಿಳಿದಿರುವ ವಿಚಾರವೇ..

ಹಳೆಯ ಮನೆಯ ಮಾಲೀಕರ ಜೊತೆಗೆ ಉತ್ತಮ ಬಾಂಧವ್ಯವಿತ್ತು. ಈಗಲೂ ಇದೆ.

ಹಾಗಾಗಿ ಉಳಿದ ಅಡ್ವಾನ್ಸ್ ಹಣವನ್ನು ಮರಳಿಸುತ್ತ, "ಶಿವು, ನಿನಗೆ ಯಾರಾದರೂ ಮನೆಗೆ ಪೇಂಟ್ ಮಾಡುವವರು ಗೊತ್ತೇ?.." ಎಂದು ಹಳೆಯ ಮನೆಯ ಮಾಲೀಕ ಅಂಕಲ್ ಕೇಳಿದರು. ಆಗ ನೆನಪಾಗಿದ್ದೆ ಈ ಮಂಜುನಾಥ್.

ಹೊಸ ಬಾಡಿಗೆ ಮನೆಗೆ ಈ ಮಂಜುನಾಥನೇ ಪೇಂಟ್ ಮಾಡಿದ್ದ. ಹಿಂದೆ ಹೊಸ ಮನೆ ನೋಡಲು ಹೋದಾಗ ಇವನ ಪರಿಚಯವಾಗಿತ್ತು.
ಪರಿಚಯವಾಗಿದ್ದಾಗಲೇ ನನಗೆ "ಸಾರ್, ಪೇಂಟಿಂಗ್, ಎಲೆಕ್ಟ್ರಿಕ್, ಪ್ಲಮ್ಬಿಂಗ್, ಮನೆ ಶಿಫ್ಟಿಂಗ್ ಹಾಗು ಏನೇ ಕೆಲಸಗಳು ಇದ್ದರೂ, ನಮಗೆ ಹೇಳಿ ಸರ್" ಎಂದು ಮಂಜುನಾಥ್ ಹೇಳಿದ್ದು ನೆನಪಾಯಿತು.
ಅವನು ಮಾಡುವ ಕೆಲಸಗಳ ಪಟ್ಟಿ "One stop for all your needs" ಎನ್ನುವ ಹಾಗಿತ್ತು.

"ಹಾ ಅಂಕಲ್. ಒಬ್ಬರು ಗೊತ್ತು. ಮಂಜುನಾಥ್ ಅವರ ಹೆಸರು. ಅವರ ನಂಬರ್ ಕೊಡ್ತೀನಿ, ಮಾತಾಡಿ" ಎಂದು ಹೇಳಿದೆ.
ಅದಕ್ಕೆ ಅಂಕಲ್ "ಶಿವು, ಅವರು ಈಗ ನಮ್ಮ ಮನೆಗೆ ಬರೋಕೆ ಆಗುತ್ತಾ ಅಂತ ಒಮ್ಮೆ ಫೋನ್ ಮಾಡಿ ಕೇಳು" ಎಂದು ಕೇಳಿದರು.
ಸರಿ ಅಂಕಲ್ ಎಂದು ಮಂಜುನಾಥನಿಗೆ ಕಾಲ್ ಮಾಡಿದೆ. ಕರೆಗೆ ಸ್ಪಂದಿಸಿ "ಐದು ನಿಮಿಷದಲ್ಲಿ ನೀವು ಹೇಳಿದ ವಿಳಾಸಕ್ಕೆ ಬರ್ತೀನಿ" ಎಂದು ಹೇಳಿ ಇಪ್ಪತ್ತೇ ನಿಮಿಷದಲ್ಲಿ ಬಂದ.

ಮಂಜುನಾಥನಿಗೆ ಬಣ್ಣ ಹಚ್ಚಬೇಕಾಗಿದ್ದ ಮನೆಯನ್ನೆಲ್ಲ ತೋರಿಸಿ, ಹಣದ ಮಾತುಕತೆ ನಡೆಸಿ ಒಪ್ಪಂದ ಸೂಚಿಸಲಾಯಿತು.
ಕೊನೆಯಲ್ಲಿ ಅಂಕಲ್ "ನೋಡಿ ಮಂಜುನಾಥ್, ನಮ್ ಶಿವು ಹೇಳಿದ್ದರಿಂದ, ನಿಮ್ಮನ್ನು ನಂಬಿ ಈ ಕೆಲಸ ನಿಮಗೆ ಒಪ್ಪಿಸಿದ್ದೇವೆ. ಕೆಲಸ ಚನ್ನಾಗಿ ಮಾಡ್ಬೇಕು. ಹೇಳಿದ ಸಮಯದಲ್ಲಿ ಮುಗಿಸಬೇಕು" ಎಂದು ಹೇಳಿದರು.
ಅದಕ್ಕೆ ಮಂಜುನಾಥ "ಸರ್, ನಮಗೆ ಕೆಲಸ ಕೊಟ್ಟಿದಿರಲ್ಲ... ಇನ್ನು ಮರೆತುಬಿಡಿ... ಕೆಲಸ ಆದ್ಮೇಲೆ ನೋಡಿ ಹೇಳಿ... ನಮ್ ಕೆಲಸ ನೋಡಿ ನೀವೇ ಇನ್ನೊಬ್ಬರಿಗೆ ಹೇಳ್ಬೇಕು... ನಮ್ ಕೆಲಸ ಎಲ್ಲ ಕುಯಿಕ್... ಕುಯಿಕ್..."
ಅಂಕಲ್ ಹಾಗು ನಾನು ಈ "ಕುಯಿಕ್, ಕುಯಿಕ್" ಅಂದ್ರೆ ಏನು ಎಂದು ಅರ್ಥ ಆಗದೆ ಒಬ್ಬರ ಮುಖವನ್ನೊಬ್ಬರು ನೋಡಿಕೊಂಡೆವು.
ನಾನು ಮಂಜುನಾಥನಿಗೆ "ಕುಯಿಕ್..?" ಎಂದು ಪ್ರಶ್ನಿಸುವ ಧಾಟಿಯಲ್ಲಿ ಅದರ ಅರ್ಥ ಕೇಳಿದೆ..
ಅದಕ್ಕೆ ಮಂಜುನಾಥ ಮತ್ತದೇ ಧಾಟಿಯಲ್ಲಿ "ಹ್ಞೂ ಸರ್... ಕುಯಿಕ್... ಕುಯಿಕ್... ಮಾಡ್ತೀವಿ" ಅಂದ...
ಅರ್ಥವಾಗದೆ ಇದೊಳ್ಳೆ ಕುಯಿಕ್ ಆಯ್ತಲ್ಲಪ್ಪಾ ಎಂದು ಯೋಚಿಸುತ್ತಿರುವಾಗ, ಊಹೆಯಿಂದ "ಕ್ವಿಕ್ (Quick) ಆ...?" ಎಂದೇ...
ಅದಕ್ಕೆ ಮಂಜುನಾಥ "ಹಾಂ ಸರ್... ಕುಯಿಕ್..." ಎಂದ..

ಪ್ರೀತಿಯಿಂದ,
ಶಿವಪ್ರಕಾಶ್

ಸುಂದ್ರಿ ಕಲಿಸಿದ ಪಾಠ

2017-01-18T06:13:00.000-08:00

ಇಂಜಿನಿಯರಿಂಗ್ ನಾಲ್ಕನೇ ಸೆಮಿಸ್ಟರ್ ಓದುತ್ತಿದ್ದಾಗ ನಡೆದ ಘಟನೆ ಇದು.

ಸಾಯಂಕಾಲದ ಸಮಯ ಕ್ಯಾಂಪಸ್ ಮುಂದೆ ಇದ್ದ ಕ್ಯಾಂಟೀನ್'ನಲ್ಲಿ ನಾನು, ನಟ, ರಘು ಮೂವರು ಟೀ ಕುಡಿತಾ ಇದ್ವಿ. ಅಲ್ಲಿಗೆ ನಮ್ ಕ್ಲಾಸ್ಮೆಟ್ ಸುಂದರ್(ನಾವ್ ಪ್ರೀತಿಯಿಂದ ಸುಂದ್ರಿ ಅಂತೀವಿ) ಬಂದ.

ನಾವೆಲ್ಲರೂ ಹಾಯ್ ಸುಂದ್ರಿ ಅಂದ್ವಿ...
ಅವನು "Yo Man... Hi..."ಎಂದ.
ನಾನು "ಹೇಗ್ ನಡೀತಿದೆ Studies ಸುಂದ್ರಿ?" ಎಂದು ಕೇಳಿದೆ.
ಅವನು "Yo Man... It's going good. How about Yours?" ಎಂದ.
ಹೀಗೆ ನಾವು ಕನ್ನಡದಲ್ಲಿ ಮಾತಾಡುತ್ತಿದ್ದರೆ ಅವನು ಇಂಗ್ಲೀಷಿನಲ್ಲೇ ಮಾತನಾಡುತ್ತ ಹೋದ.

ಅಂದಿನವರೆಗೂ ಅಚ್ಚ ಕನ್ನಡದಲ್ಲಿ ಸ್ಪಷ್ಟವಾಗಿ ಮಾತಾಡುತ್ತಿದ್ದ ನಮ್ ಸುಂದ್ರಿ, ಇದ್ದಕ್ಕಿದ್ದಂತೆ ಎಲ್ಲರ ಜೊತೆ ಇಂಗ್ಲೀಷ್ ನಲ್ಲಿ ಮಾತನಾಡುತ್ತಿದ್ದುದು ಕಂಡು ನಮಗೆ ಆಶ್ಚರ್ಯವಾಯಿತು.
ಕುತೂಹಲ ತಡೆಯಲಾಗದೆ ನಟ "ಅಲ್ವೋ ಸುಂದ್ರಿ, ಯಾಕೇ ನಾವು ಏನು ಕೇಳಿದ್ರು ಇಂಗ್ಲೀಷ್'ನಲ್ಲೆ ಉತ್ತರಿಸುತ್ತಿದ್ದೀಯ?" ಎಂದ.
ಅದಕ್ಕೆ ಸುಂದ್ರಿ "You know man. Last Week, I have joined spoken English class. Our tutor suggested us to speak in English. We all should speak in English. You know, If we practice from now, by final year, we will speak fluently. It will help in our campus placement interviews." ಎಂದ.

ನಾವು ಕೂಡ ಕನ್ನಡ ಮಾಧ್ಯಮದಿಂದ ಬಂದವರಾಗಿದ್ದೆವು. ಕನ್ನಡ ಮಾಧ್ಯಮದಿಂದ ಬಂದ ನಮಗೆ ಇಂಗ್ಲೀಷ್ ನಲ್ಲಿ ಮಾತನಾಡುವುದು ತುಂಬ ಕಷ್ಟದ ವಿಷಯವಾಗಿತ್ತು. ಕ್ಲಾಸ್ನಲ್ಲಿ Lecture ಕೇಳುವ ಪ್ರಶ್ನೆಗೆ ಉತ್ತರ ಗೊತ್ತಿದ್ದರೂ ಅದನ್ನು ಉತ್ತರಿಸುವಾಗ ಎಲ್ಲಿ ಇಂಗ್ಲೀಷ್ ಪದಗಳು ನೆನಪಿಗೆ ಬಾರದೆ(ವ್ಯಾಕರಣ ಕೇಳಲೇ ಬೇಡಿ) ಅವಮಾನವಾಗಿ ಬಿಡಬಹುದೋ ಎನ್ನುವ ಹೆದರಿಕೆಯಿಂದ ಉತ್ತರಿಸಲು ಹಿಂಜರಿಯುತ್ತಿದ್ದೆವು.

ಒಂದೇ ದೋಣಿಯಲ್ಲಿ ಸಾಗುತ್ತಿದ್ದ ನಮಗೆ, ಸುಂದ್ರಿ ಹೇಳಿದ ಮಾತುಗಳು ವೇದವಾಖ್ಯದಂತೆ ಕೇಳಿಸಿತು. ಅಂದು ಅಲ್ಲೇ ನಾವೆಲ್ಲರು ಸುಂದ್ರಿ ಸೇರಿದ Spoken English ಕ್ಲಾಸ್ ಗೆ ಸೇರಬೇಕೆಂದು ಒಮ್ಮತದಿಂದ ನಿರ್ಧರಿಸಿದೆವು. ಹಾಗೆ ಸೇರಿಕೊಂಡೆವು ಕೂಡ.

ಹೀಗೆ ನಮ್ಮ Spoken English ಪ್ರಯಾಣ ಶುರುವಾಯಿತು...

ನಾವೆಲ್ಲರೂ ಸೇರಿ ಇಂಗ್ಲೀಷ್ ಕ್ಲಾಸ್ಸಿಗೆ ಹೋಗಿ ಬರುತ್ತಿದ್ದೆವು.
ಒಂದು ವಾರ ಹೀಗೆ, ಜೊತೆ ಜೊತೆಯಲಿ ಹೋಗಿ ಬರುವುದು ನಡೀತು.

ಒಂದು ವಾರ ಕಳೆದ ಬಳಿಕ, ನಟ ಕ್ಲಾಸ್ಸಿಗೆ ಬರುವುದನ್ನು ನಿಲ್ಲಿಸಿದ.
ಎರಡನೇ ವಾರಕ್ಕೆ ರಘು ನಿಲ್ಲಿಸಿದ.

ನಟ ಹಾಗು ರಘು ಇಬ್ಬರಿಗೂ ಆಗಲೇ ಕ್ಲಾಸ್ ಬೋರ್ ಆಗಿ ಹೋಗಿತ್ತು. ಅವರು ಮಾಡುತ್ತಿದ್ದ ಪಾಠವು ಅಷ್ಟಕ್ಕಷ್ಟೇ ಇತ್ತು...
ಆದರೂ ನಾನು ಮತ್ತು ಸುಂದ್ರಿ ಧೃತಿಗೆಡತೆ ಹೋಗುತ್ತಿದ್ದೆವು.

ಇನ್ನೊಂದು ವಾರ ಕಳೆಯುವಷ್ಟರಲ್ಲಿ ನಮ್ ಸುಂದ್ರಿನೂ ಬರೋದು ನಿಲ್ಲಿಸಿದ....!!!!

ನಾನು ಒಬ್ಬಂಟಿಯಾದೆ...!!!

ಒಬ್ಬನೇ ಹೋಗುವುದು ಬೇಸರದ ವಿಷಯವಾಗಿತ್ತು. ಅದಕ್ಕೆ "ಲೋ ಸುಂದ್ರಿ, ಬಾರೋ, ಯಾಕೋ ಬರೋದು ನಿಲ್ಲಿಸ್ತೀಯಾ? " ಎಂದು ಕೇಳಿದೆ...
ಅದಕ್ಕೆ ಇಂಗ್ಲೀಷಿನಲ್ಲೇ ಮಾತನಾಡುವುದನ್ನು ರೂಢಿಸಿಕೊಂಡಿದ್ದ ನಮ್ ಸುಂದ್ರಿ ಇದ್ದಕ್ಕಿದ್ದಂತೆ (ಸು)ಸಂಸ್ಕೃತ ಭಾಷೆಯಲ್ಲಿ "ಹೊಗ್ ಮಗ,

ಆ ನನ್ ಮಕ್ಳು ಮಾಡೋದು ಅಸ್ಟ್ರಲ್ಲೇ ಇದೆ.

ಏನೂ ಹೇಳಿಕೊಡೋದಿಲ್ಲ.

ಬರಿ 'ಮಾತಾಡಿ, ಮಾತಾಡಿ' ಅದೇ ಬರುತ್ತೆ ಅಂತಾರೆ.

ಬರಿ ನಾವ್ ನಾವ್ ಮಾತಾಡೋಕೆ ಅಲ್ಲಿಗೆ ಯಾಕ್ ಬರ್ಬೇಕು.

ಏನಾದ್ರು ಹೇಳ್ ಕೊಡ್ಬೇಕು ತಾನೇ ?"(ಇಲ್ಲಿ ಸುಸಂಸ್ಕೃತ ಪದಗಳಿಗೆ ಕತ್ತರಿ ಹಾಕಲಾಗಿದೆ) ಎಂದು ಪ್ರಶ್ನಿಸಿದ.

"ಅಲ್ಲೋ, ದುಡ್ಡು ಕಟ್ಟಿದ್ದಕ್ಕಾದ್ರೂ ಬಾರೋ..." ಎಂದೆ.
ಅದಕ್ಕೆ ಸುಂದ್ರಿ "ಫುಲ್ ದುಡ್ಡು ಕಟ್ಟಿಲ್ಲ ಮಗಾ, ಅಡ್ವಾನ್ಸ್ ಮಾತ್ರ ಕಟ್ಟಿದ್ದೆ." ಎಂದ.
ಸುಂದ್ರಿ, ನಟ ರಘು ಅಡ್ವಾನ್ಸ್ ಮಾತ್ರ ಕಟ್ಟಿ ಸೇರಿದ್ರು.
ನಾನೊಬ್ನೆ ಬುದ್ದಿವಂತ...!!!, ಸುಂದ್ರಿಯ ವೇದವಾಖ್ಯಗಳ ಅತಿಯಾದ ಪ್ರೇರಣೆಯಿಂದ ಪೂರ್ತಿ ಹಣ ಕಟ್ಟಿದ್ದು...!!!

ನೀತಿ ಪಾಠ(ಸುಂದ್ರಿಯಿಂದ ಕಲಿತಿದ್ದು): ಅತಿಯಾದ ಪ್ರೇರಣೆ ಒಳ್ಳೆಯದಲ್ಲ.

ಪ್ರೀತಿಯಿಂದ,
ಶಿವಪ್ರಕಾಶ್

Random Thoughts: ಕೆಲವು ಪುಟಗಳೇ ಹಾಗೆ...

2017-01-09T07:59:00.000-08:00

ಕೆಲವು ಪುಟಗಳೇ ಹಾಗೆ...

ಓದುಗನನ್ನು ಮುಂದೆ ಸಾಗಲು ಬಿಡುವುದಿಲ್ಲ... ಅಲ್ಲೇ ನಿಲ್ಲಿಸಿಬಿಡುತ್ತವೆ... ಬಹುಶಃ ಆ ಪುಟಗಳಿಗೆ ಯಾವುದೋ ವಾಸ್ತು ದೋಷ ಇರಬೇಕು ಅನ್ಸುತ್ತೆ... ಇಂತಹ ಪುಟಗಳಲ್ಲಿ ಸಿಕ್ಕಿ ನಲುಗುವವರಲ್ಲಿ ನಾನು ಒಬ್ಬ. ನನ್ನ ಈ ಸಮಸ್ಸೆ, ನಿನ್ನೆ ಮೊನ್ನೆಯದಲ್ಲ. ಸ್ಕೂಲು ಕಾಲೇಜಿನಲ್ಲಿ ಇದ್ದಾಗಿನಿಂದಲೂ ಇದೆ ಸಮಸ್ಸೆ. ಇದರಿಂದ ಹೊರಬರಲು ಪ್ರಯತ್ನಿಸಿ, ಪ್ರಯತ್ನಿಸಿ, ಸಾಕಾಗಿ ಹೋಗಿದೆ.

ನನ್ನದೊಂದು ಕೆಟ್ಟ ಚಾಳಿ. ಯಾವಾಗಲೂ ಮೊದಲನೇ ಪುಟದಿಂದ ಶುರು ಮಾಡಿ ಕೊನೆ ಪುಟ ತಲುಪುವುದು. ಮಧ್ಯೆ ಎಲ್ಲಾದರೂ ಮೇಲೆ ಹೇಳಿದ ಸಮಸ್ಸೆ ಬಂದರೆ, ಅದರಿಂದ ಹೊರಬರಲು ನಾ ಪಡುವ ಕಷ್ಟ ಅಷ್ಟಿಷ್ಟಲ್ಲ.

ನನ್ನ ಬಹಳಷ್ಟು ಸ್ನೇಹಿತರಿಗೆ ಈ ಸಮಸ್ಸೆ ಇಲ್ಲ. ಅವರು ಅಂತಹ ಪುಟ ಬಂದೊಡನೆ, JUMP ಮಾಡಿ, ಬೇರೆ ಪುಟಕ್ಕೆ ಹಾರಿಬಿಡ್ತಾರೆ... "ಲೋ ಹ್ಯಾಗೋ ಜಂಪ್ ಮಾಡ್ತೀರಾ ?, ಆ ಪುಟಕ್ಕೂ, ಈ ಪುಟಕ್ಕೂ link miss ಆಗೋಲ್ವಾ ?" ಎಂದು ಕೇಳಿದರೆ ಅವರು "ಅಲ್ಲೇ ಸಿಕ್ಕು ಒದ್ದಾಡುವ ಬದಲು, JUMP ಮಾಡುವುದೇ ಒಳಿತು" ಅಂತಾರೆ. ಇನ್ನು ಕೆಲವು ಮಹಾಶಯರು, Random ಆಗಿ Chapter ತೆಗೆದು ಓದ್ತಾರೆ. ಅವರಿಗೊಂದು Hats Off..

ನನ್ನ ಪ್ರಕಾರ ಅವರ ಈ ವಿಧಾನ ಸೂಕ್ತ ಅನ್ನಿಸುತ್ತೆ. ಸುಮ್ಮನೆ ಅಂತಹ ಪುಟದಲ್ಲಿ ಸಿಕ್ಕಿ ನಲುಗುವ ಬದಲು, ಜಂಪ್ ಮಾಡುವುದೇ ವಾಸಿ.

ಇನ್ನೂ ಕಾದಂಬರಿ ಓದುವಾಗಲಂತೂ, ಯಾವುದೋ ವಿಷಯದಲ್ಲಿ ಕಳೆದು ಹೋಗಿ ಮತ್ತೆ ವಾಪಸ್ ಬಂದು ಶುರು ಮಾಡುವ ವೇಳೆಗೆ, ಮೂಲ ಕಥೆಯೇ ಮರೆತು ಹೋಗಿರುತ್ತದೆ...

ಇದು ಕಾದಂಬರಿಯ ಶ್ರೇಷ್ಠತೆ ಇರಬಹುದು. ಆದರೆ ನನ್ನಂತವರಿಗೆ... ಇದು ಜೇಡರಬಲೆ ....!!!

ಮೈಮರೆಯದಿರಿ...!!!

2016-11-30T00:20:00.000-08:00

ಉಜ್ಜಿದ ನಂತರ...
ಒತ್ತುವ ಮುನ್ನ...
ಮೈಮರೆಯದೆ....
ಎಚ್ಚರವಾಗಿರಿ....!!!

ಒಮ್ಮೆ ಹೋದರೆ....
ಸರಿಪಡಿಸಿಕೊಳ್ಳುವುದು....
ತುಂಬಾ ಕಷ್ಟ...!!!

ಅಯ್ಯೋ... ಅಪಾರ್ಥ ಮಾಡಿಕೊಳ್ಳಬೇಡಿ...!!!

ನಾ ಹೇಳಿದ್ದು, ಕ್ರೆಡಿಟ್/ಡೆಬಿಟ್ ಕಾರ್ಡ್ ಉಜ್ಜಿದ ನಂತರ, PIN ಒತ್ತುವ ಮುನ್ನ, ಪಾವತಿಸಬೇಕಾಗಿರುವ ಮೊತ್ತವನ್ನು ಒಮ್ಮೆ ಪರೀಕ್ಷಿಸಿಕೊಳ್ಳಿ... ಒಮ್ಮೆ ಹೋದರೆ ಸರಿಪಡಿಸಿಕೊಳ್ಳುವುದು ತುಂಬಾ ಕಷ್ಟ...!!!

ಜಾಗೊ ಗ್ರಾಹಕ್... ಜಾಗೊ..!!!

--
ಶಿವಪ್ರಕಾಶ್ ಎಚ್. ಎಮ್.

ಅಂದು-ಇಂದು ೧

2016-11-07T03:44:00.000-08:00

ಅಂದು:
ಯಾರು...
ಯಾರಿಗೆ...
ಯಾವಾಗ...
ಹೇಳಿದರು...?

ಇಂದು:
ಯಾರು...
ಯಾರಿಗೆ...
ಯಾವಾಗ...
ಹೇಳಿದರು...?
ಎನ್ನುವುದನ್ನು
ಹೇಗೆಲ್ಲಾ ತಿರುಚಿ ಹೇಳಬಹುದು...?

ಇಂದಿನ ಮಾಧ್ಯಮಕ್ಕೆ ಸುಳ್ಳನ್ನು ಸತ್ಯ ಮಾಡುವ, ಸತ್ಯವನ್ನು ಸುಳ್ಳುಮಾಡುವ ಶಕ್ತಿ ಇದೆ. ಜನರೂ ಕೂಡ ಯಾವುದೇ ಸುದ್ದಿಯನ್ನು ಒಮ್ಮೆ ಪರಾಮರ್ಶಿಸದೆ ನಂಬಿಬಿಡುತ್ತಿದ್ದಾರೆ. ಯಾರಿಗೂ ಸತ್ಯ ಬೇಕಿರುವಂತೆ ಕಾಣುತ್ತಿಲ್ಲ. ಸುಂದರ ಸುಳ್ಳನ್ನು ನಂಬುತ್ತಾ, ತಮ್ಮ ನಂಬಿಕೆಗಳಲ್ಲೇ ಬಂಧಿಯಾಗುತ್ತಿದ್ದಾರೆ.

ಶಿವಪ್ರಕಾಶ್

ಅಂಬಿಗನಿರದ ಈ ದೋಣಿಗೆ..

2016-11-03T08:08:00.001-07:00

ಮನುಜ..
ಸರಿಯಾಗಿ ನೋಡು...
ಹಣವಿಲ್ಲದೆ ನಿನಗೆ ಸಿಕ್ಕಿಹ...
ಬೆಲೆಕಟ್ಟಲಾಗದ ಅತ್ಯಮೂಲ್ಯ ಕೊಡುಗೆ ಇಲ್ಲಿದೆ...

ಇಲ್ಲಿ...
ಗಾಳಿಯಿದೆ...
ನೀರಿದೆ...
ಹಾಗು ಬೆಳಕಿದೆ...

ಬೆಳಕಿಲ್ಲದೆ ಬದುಕಿಲ್ಲ...
ಗಾಳಿಯಿಲ್ಲದೆ ಉಸಿರಿಲ್ಲ...
ನೀರಿಲ್ಲದೆ ನೀನೇ ಇಲ್ಲ..

ಉಚಿತವಾಗಿ ಸಿಕ್ಕಿದೆಯೆಂದು...
ಹಾಳು ಮಾಡಬೇಡ...
ಕಾಲಮೀರಿದೊಡೆ... ಪರಿತಪಿಸಿದರೂ...
ನಿನಗೆ ಕ್ಷಮೆಯಿಲ್ಲ...

ಅಂಬಿಗನಿರದ ಈ ದೋಣಿಗೆ,
ನೀನೆ ಅಂಬಿಗ...
ಇಲ್ಲಿ ಕಿಚ್ಚಿದೆ... ನೀರೂ ಇದೆ...
ಕಿಚ್ಚು ಹಚ್ಚಿದ್ದು ನೀನು...
ಆರಿಸಬೇಕಾಗಿರುವುದು ನೀನೇ...!!!

ಎಚ್ಚೆತ್ತುಕೊ...
ಈಗಾಗಲೇ ಬಹಳ ತಡವಾಗಿದೆ...
ಬಹಳ ತೆರಿಗೆ ಕಟ್ಟಿ ಕೊಳ್ಳುವ ದಿನ ಬಲುದೂರವಿಲ್ಲ...
ಆ ದುರಂತಕ್ಕಾಗಿ ಕಾಯಬೇಡ...

ನೀರಿನಾಳ ಅರಿಯದ...
ಈ ಕಾಗದದ ದೋಣಿಗೆ,
ಬುದ್ಧಿಯಂಬ ಕಿಚ್ಚು ಹಚ್ಚಿ....
ಕಾಪಾಡು...

ಬಳಸು...
ಬೆಳಸು...
ನಾಳಿನವರಿಗೂ ಕಾಪಾಡು...
ನಾ ಸುಟ್ಟು ಬೂದಿಯಾಗುವ ಮೊದಲು....

ಇಂತಿ ನಿನ್ನ ಹಡೆದವ್ವ,
ಪ್ರಕೃತಿ ಮಾತೆ...

---
ಶಿವಪ್ರಕಾಶ್ ಎಚ್ ಎಮ್

ಅವಧಿಯ ಕ್ಲಿಕ್ ಆಯ್ತು ಕವಿತೆಗೆ ಬರೆದ ಕವಿತೆ..
ಅವಧಿಯಲ್ಲಿ ಪ್ರಕಟವಾದ ಕೊಂಡಿ: ಅಂಬಿಗನಿರದ ಈ ದೋಣಿಗೆ..

ಕ್ಲಿಕ್ಕು ಕ್ಲಿಕ್ಕಿಸುತಿದ್ದುದರ ಕವಿತೆ

2016-11-03T08:03:00.002-07:00

ಕ್ಲಿಕ್ ಆಯ್ತು ಕವಿತೆ
ಕ್ಲಿಕ್ಕು ಕ್ಲಿಕ್ಕಿಸುತಿದ್ದುದರ ಕವಿತೆ.....

ಭೂತಕಾಲಕೆ ನಿನಪಾದೆ...
ನಿನಪು ನೆನಪಿಸುತ ವರ್ತಮಾನವಾದೆ..
ಭವಿಷತ್ ಎಚ್ಚರಿಸುವ ಇತಿಹಾಸವಾದೆ....

ಕಪ್ಪು ಬಿಳುಪಾದೆ...
ಬಣ್ಣ ಬಣ್ಣದ ಚಿತ್ರವಾದೆ....
ನೆರಳು ಬೆಳಕಿನ ಆಟವಾದೆ....

ಪಡೆದುಕೊಂಡಿರುವುದರ
ಹಾಗು
ಕಳೆದುಕೊಂಡಿರುವುದರ
ನಡುವೆ
ಕನ್ನಡಿಯಾದೆ....

ಕೊಬ್ಬಿದ ಕಬ್ಬಿಣದ ದೇಹ ನನದು,
ನಾಜೂಕಾದ ಟಚ್ ಸ್ಕ್ರೀನ್ ಬೆಡಗಿ ಬಂದೊಡನೆ,
ಮೂಲೆಗುಂಪಾದೆ... ತುಕ್ಕುಹಿಡಿದೆ... ಸಮಾಧಿಯಾದೆ...

ನಿನ್ನ ನಿನಪುಗಳಿಗೆ...
ಹಸಿರು ಊಸಿರಾಗಿಸಿರುವೆ...
ಅಷ್ಟು ಸಾಕು ನನಗೆ...
ಇನ್ನು ನಿಶ್ಚಿಂತೆಯಿಂದ
ಚಿರನಿದ್ರೆಗೆ ಜಾರುವೆ...

ಕ್ಲಿಕ್ ಆಯ್ತು ಕವಿತೆ
ಕ್ಲಿಕ್ಕು ಕ್ಲಿಕ್ಕಿಸುತಿದ್ದುದರ ಕವಿತೆ.....

ಪ್ರೀತಿಯಿಂದ,
ಶಿವಪ್ರಕಾಶ್ ಎಚ್. ಎಮ್.

ಅವಧಿಯ ಕ್ಲಿಕ್ ಆಯ್ತು ಕವಿತೆಗೆ ಬರೆದ ಕವಿತೆ..

ಅವಧಿಯಲ್ಲಿ ಪ್ರಕಟವಾದ ಕೊಂಡಿ: ಕ್ಲಿಕ್ ಆಯ್ತು ಕವಿತೆ : ಟಚ್ ಸ್ಕ್ರೀನ್ ಬೆಡಗಿ ಬಂದೊಡನೆ..

ಅವರಿಗಸ್ಟೆ ಗೊತ್ತು...

2016-06-02T07:56:00.000-07:00

ಅವರವರ ಬದುಕು
ಅವರಿಗಸ್ಟೆ ಗೊತ್ತು...

ಉಟ್ಟ ಬಟ್ಟೆಯ ನೋಡಿ..
ಇರುವ ವಸ್ತುಗಳ ನೋಡಿ...
ನೀ ಅಳೆಯಬೇಡ...
ಅವರವರ ಬದುಕು ಅವರಿಗಸ್ಟೆ ಗೊತ್ತು...

ಮುಖದ ನಗು ನೋಡಿ...
ಕೊಳೆತು ಬಿದ್ದ ಹಣವ ನೋಡಿ...
ನೀ ಅಳೆಯಬೇಡ...
ಅವರವರ ಬದುಕು ಅವರಿಗಸ್ಟೆ ಗೊತ್ತು...

ಪಡೆದುಕೊಂಡಿರುವುದಸ್ಟೆ ನೋಡಿ..
ಕಳೆದುಕೊಂಡಿರುವುದ ನೋಡದೆ...
ನೀ ಅಳೆಯಬೇಡ...
ಅವರವರ ಬದುಕು ಅವರಿಗಸ್ಟೆ ಗೊತ್ತು...

ಚಂದದ ದೋಣಿಯ ನೋಡಿ..
ಸೆಳೆವ ಸುಳಿಯ ನೋಡದೆ...
ನೀ ಅಳೆಯಬೇಡ...
ಅವರವರ ಬದುಕು ಅವರಿಗಸ್ಟೆ ಗೊತ್ತು...

ಹೊಳೆವ ಕಣ್ಣ ಹಿಂದಿರುವ ಅಳುವ ತಿಳಿದವರಾರು...
ಚಂದದ ಬೂಟು ಕೆಳಗಿರುವ ತೂತು ಕಂಡವರಾರು...
ಅಳೆಯಬೇಡ ಅವರ ಬದುಕ...
ಅವರವರ ಬದುಕು ಅವರಿಗಸ್ಟೆ ಗೊತ್ತು...

Inspired by below Picture:

ಪ್ರೀತಿಯಿಂದ,
ಶಿವಪ್ರಕಾಶ್

Reynolds

2016-05-31T07:11:00.000-07:00

ಇಂದು ಆಫೀಸ್ ನಲ್ಲಿ ಹೊಸ Note Pad ತಗೊಳೋಕೆ ಹೋದೆ...
Store in-charge ಹತ್ರ "Note Pad" ಕೇಳಿದೆ...
Store in-charge ನೋಟ್ ಪ್ಯಾಡ್ ಕೊಡ್ತಾ, ಬಗೆಬಗೆಯ ಪೆನ್ ತೋರಿಸಿ "ಪೆನ್ ಬೇಕಾ?" ಎಂದ...

ಹಾಗೆ ಎಲ್ಲಾ ಬಗೆಬಗೆಯ ಬಣ್ಣ ಬಣ್ಣದ ಪೆನ್ನುಗಳನ್ನು ನೋಡುತ್ತಿರುವಾಗ,......
ಎಲ್ಲಾ ಪೆನ್ನುಗಳ ನಡುವೆ Reynolds ಬಾಲ್ ಪೆನ್ ಕಾಣಿಸಿತು... !!!!
ಹಾಗೆ ಒಂದೆರೆಡು ನಿಮಿಷ ನಾನು ಅಲ್ಲಿ ನಿಂತಿರುವುದನ್ನು ಮರೆತು, ನನ್ನ ಬಾಲ್ಯಕ್ಕೆ ಹಾರಿದೆ...

ಬಾಲ್ಯದಲ್ಲಿ ಮೊದಲು ನನ್ನ ಕೈಗೆ ಸಿಕ್ಕದ್ದು ಬಳಪ...
ನಂತರ ಸಿಕ್ಕಿದ್ದು ಸೀಸ ಕಡ್ಡಿ...
ಅನಂತರ ಸಿಕ್ಕಿದ್ದು ಯಾವುದೋ ಪೆನ್ನು...
ಅನಂತರ ಬಹಳ ಆಸೆ ಪಟ್ಟು ಕೊಂಡಿದ್ದು Reynolds ಬಾಲ್ ಪೆನ್..
ಅನಂತರ ಇಂಕ್ ಪೆನ್ ಇಷ್ಟ ಪಟ್ಟೆ....
ಹಾಗೆ ಒಂದು ಪೆನ್ ಆದ್ಮೇಲೆ ಇನ್ನೊಂದು ಪೆನ್ ಇಷ್ಟ ಪಟ್ಟು ತಗೊಳ್ತಾ ಹೋದೆ...

ನಾನು ಮೊದಲ ಬಾರಿ Reynolds ಪೆನ್ ಹಿಡದಿದ್ದು ಐದನೇ ತರಗತಿಯಲ್ಲಿ ಇದ್ದಾಗ ಅನ್ಸುತ್ತೆ...
ಶಾಲೆಯಲ್ಲಿ ಅದೆಸ್ಟೋ ಹುಡುಗರು ಸೀಸಕಡ್ಡಿ ಹಿಡ್ಕೊಂಡು ಬರಿತಾ ಇದ್ರೂ...
Reynolds ಪೆನ್ ಇದ್ದದ್ದು ಕೆಲವೇ ಕೆಲವರ ಬಳಿ..
ಅಂದು ನಾನು ಮೊದಲ ಬಾರಿಗೆ ಆ ಪೆನ್ ಹಿಡಿದಾಗ ಏನೋ ಒಂದು ಹೆಮ್ಮೆ..

ನನ್ನ ಹತ್ರನೂ Reynolds ಪೆನ್ ಇದೆ ಎನ್ನುವ ಹೆಮ್ಮೆ...
ಈ ಎಲ್ಲ ಕಾರಣಗಳಿಂದಾಗಿ ಅಂದು ಈ ಪೆನ್ ನನಗೆ ಬಹಳ ವಿಶೇಷವಾಗಿ ಕಾಣುತ್ತಿತ್ತು...

ಹಾಗೆ ಬೆಳೆಯುತ್ತಿದ್ದಂತೆ Reynolds ಹೋಗಿ Cello, Parker ಹಾಗೆ ಹಲವು ಹೊಸ ಮಾದರಿಯ ಪೆನ್ನುಗಳು ನನ್ನ ಕೈ ಸೇರಿದವು...

ಏನೇ ಹೇಳಿ ಅಂದು Reynolds ನನ್ನ ಕೈಗೆ ಸಿಕ್ಕಾಗ ಪಟ್ಟ ಹೆಮ್ಮೆ....!!!!, ಇಂದು ಅದೆಸ್ಟೋ ಹಣ ಕೊಟ್ಟು ಪೆನ್ ಕೊಂಡರು ನನಗೆ ಸಿಗುವುದಿಲ್ಲ..

"ಸರ್, ಯಾವ ಪೆನ್ ಬೇಕು...?" ಎಂದು Store in-charge ನನ್ನ ಅಲುಗಾಡಿಸಿ ಕೇಳಿದಾಗಲೇ ನಾನು ವಾಸ್ತವಕ್ಕೆ ಬಂದದ್ದು..
ಪ್ರಜ್ಞೆಯಿಂದ ಹೊರಬಂದವನಂತೆ "ಹಾಂ..." ಎಂದೆ...
"ಯಾವ ಪೆನ್ ಬೇಕು ಸಾರ್...?"
"Reynolds ಬಾಲ್ ಪೆನ್.. " ಕೊಡಿ ಎಂದು ಮುಗುಳ್ನಗುತ್ತಾ ಕೇಳಿದೆ...

ಅಂದಹಾಗೆ, ಐದನೇ ಕ್ಲಾಸ್ ಗು ಇಂದಿಗೂ ಸುಮಾರು 23-24 ವರ್ಷಗಳ ಅಂತರ..
ಅದೆಸ್ಟೋ ಪೆನ್ನುಗಳು ಹಿಡಿದ ನಂತರ ಇಂದು ಮತ್ತೆ Reynolds ಬಾಲ್ ಪೆನ್ ಹಿಡಿತಾ ಇದೀನಿ..
ಅಂದಿನಂತೆ ಇಂದು ಕೂಡ ಯಾಕೋ ಈ ಪೆನ್ನು ಬಹಳ ವಿಶೇಷವಾಗಿ ಕಾಣಿಸ್ತಾ ಇದೆ...

ವಯಸ್ಸಾದಂತೆ(Seriously... ಹ್ಹ ಹ್ಹ ಹ್ಹ) ನಾವು ನೋಡುವ ವಸ್ತುಗಳು ನಮಗೆ ವಿಭಿನ್ನವಾಗಿ ಕಾಣಿಸುತ್ತವೆ ಅಂತಾರೆ... ಅದಕ್ಕೆ ಅನ್ಸುತ್ತೆ ನನಗೆ Reynolds ಬಾಲ್ ಪೆನ್ ವಿಶೇಷವಾಗಿ ಕಾಣಿಸ್ತಾ ಇದೆ...

“The simple things are also the most extraordinary things, and only the wise can see them.” -- Paulo Coelho

ಏನೂ ಅರ್ಥವಾಗಲಿಲ್ಲ... ಸುಮ್ಮನಾಗಿಬಿಟ್ಟೆ...

2015-12-16T05:48:00.000-08:00

ದೂರದ ಚಿಕ್ಕದೊಂದು ಹಳ್ಳಿಯಲ್ಲಿ ಇಂಗ್ಲೀಷ್ ಮಾಸ್ತರ್ ಆದ ನಾನು, ಪ್ಯಾಟೆಯಲ್ಲಿ ಇರೋ ಮಗನ ಮನೆಗೆ ಬಂದೆ. ಹಾಗೆ ಒಂದೆರೆಡು ದಿನ ಮಗ, ಸೊಸೆ, ಕಾಲೇಜ್ ಓದುತ್ತಿದ್ದ ಮೊಮ್ಮಗನೊಂದಿಗೆ ಇದ್ದು ಹೋಗೋಣವೆಂದುಕೊಂಡೆ...

ಪ್ರತಿದಿನವೂ ಬೆಳಿಗ್ಗೆ ಗಡ್ಡ ತೆಗೆಯುವ ಅಭ್ಯಾಸ ನನ್ನದು.. ಊರಿಂದ ಬರುವಾಗ ಶೇವಿಂಗ್ ಸೆಟ್ ಜೊತೆಯಲ್ಲೇ ತಂದಿದ್ದೆ.. ಕನ್ನಡಿ ಇರಲಿಲ್ಲ. ಮೊಮ್ಮಗನ ಕರೆದು MIRROR ಕೇಳಿದೆ... ಬಂದು ನ್ಯೂಸ್ ಪೇಪರ್ ಕೊಟ್ಟ.. ತಲೆ ಕೆಡಸಿಕೊಂಡು ಪೇಪರ್ ಹೆಸರು ನೋಡಿದೆ.. "Bangalore Mirror" ಎಂದಿತ್ತು..
ಹೋಗ್ಲಿ ಬಿಡು... ಒಂದು ದಿನ ಶೇವಿಂಗ್ ಮಾಡಿಲ್ಲ ಅಂದ್ರೆ ಪ್ರಳಯ ಆಗೋಲ್ಲ ಅಂತ ಸುಮ್ಮನಾಗಿಬಿಟ್ಟೆ.

================================================

ಮೊದಲು ದಿನ ಪ್ಯಾಟೆಯನೊಮ್ಮೆ ಸುತ್ತಿ ಸಾಯಂಕಾಲ ಮನೆಗೆ ಬಂದೆ. ಸಂಜೆ ಹಿಂತಿರುಗಿದಾಗ ಸ್ವಲ್ಪ ಹಸಿವಾಗಿತ್ತು.. ಅಲ್ಲೇ ಟೇಬಲ್ ಮೇಲಿರೋ Black Berry ಹಣ್ಣು ನೋಡಿ, "Black Berry" ಕೊಡು ಎಂದು ಮೊಮ್ಮಗನ ಕೇಳಿದೆ.
ಮೊಮ್ಮಗ ಬಂದು "ತಾತ, ಮುಂಚೆ Black Berry ಇತ್ತು, ಅದನ್ನು ಮಾರಿ ಬಹಳ ದಿನ ಆಯ್ತು.. ಈಗ ನನ್ನ ಹತ್ತಿರ ಇರೋದು Apple" ಎಂದು ಮೊಬೈಲ್ ಕೈಗಿಟ್ಟ..
ಏನೂ ಅರ್ಥವಾಗಲಿಲ್ಲ... ಸುಮ್ಮನಾಗಿಬಿಟ್ಟೆ...

================================================

ಮೊಮ್ಮಗ ಕೈಯಲ್ಲಿ ಏನೋ ಹಿಡಿದುಕೊಂಡು ಒಂದೇ ಸಮನೆ ನೋಡ್ತಾ ಇದ್ದ...
"ಹೋಗಿ ಒದ್ಕೊಳ್ಳೊ" ಅಂದೆ...
"ಹ್ಞೂ ತಾತ, ಅದನ್ನೇ ಮಾಡ್ತಾ ಇರೋದು" ಅಂದ...
"ಏನೋ ಕಿಂಡಲ್ ಆ" ಅಂದೆ...
"ಹ್ಞೂ ತಾತ.... KINDLE" ಅಂದ.
ತಾತನಿಗೇ ಕಿಂಡಲ್ ಮಾಡೋ ಮೊಮ್ಮಗನ ಕಂಡು...
ಏನೂ ಅರ್ಥವಾಗಲಿಲ್ಲ... ಸುಮ್ಮನಾಗಿಬಿಟ್ಟೆ...

================================================

ವಯಸ್ಸಾದವರಿಗೆ ಒಂದಲ್ಲಾ ಒಂದು ರೋಗ ಇದ್ದೆ ಇರುತ್ತೆ. ನನ್ನದೊಂದು ರೋಗಕ್ಕೆ ಡಾಕ್ಟರ್, ರಾತ್ರಿ ಮಲಗುವ ಮುಂಚೆ, ಟ್ಯಾಬ್ಲೆಟ್ ತಿನ್ಬೇಕು ಅಂತ ಕೆಲವು ಟ್ಯಾಬ್ಲೆಟ್ ಕೊಟ್ಟಿದ್ರು..
ಟ್ಯಾಬ್ಲೆಟ್ ಅನ್ನು ಅಲ್ಲೇ ಹಾಲ್ ನಲ್ಲಿ, ಟೇಬಲ್ ಮೇಲೆ ಇಟ್ಟಿದ್ದೆ...
ಮೊಮ್ಮಗನ್ನ ಕರೆದು "ಅಲ್ಲೇ ಹಾಲ್ ನಲ್ಲಿ ಟ್ಯಾಬ್ಲೆಟ್ ಇದೆ ಕೊಡು" ಎಂದು ಕೇಳಿದೆ..
ತಂದು ಅದೇನೋ ಕೊಟ್ಟ... ಅದೇನು ಅಂತ ಅರ್ಥವಾಗಲಿಲ್ಲ... ಸುಮ್ಮನಾಗಿಬಿಟ್ಟೆ...

================================================

ಸಾಕಪ್ಪ ಈ ಪ್ಯಾಟೆ ಸಹವಾಸ.. ನಾಳೆನೇ ಊರಿಗೆ ಹೋಗಿಬಿಡೋಣ ಎಂದುಕೊಂಡು ಮೊಮ್ಮಗನ್ನ ಕರೆದು, ನಮ್ಮೂರಿಗೆ ಹತ್ತಿರ ಇದ್ದ ಒಂದು ಪ್ಯಾಟೆಯ ಊರಿನ ಹೆಸರು ಹೇಳಿ, "ನಾಳೆ ಬೆಳಿಗ್ಗೆ ಬಸ್ ಸ್ಟಾಂಡ್ ಗೆ ಹೋಗಿ, ನಾಳೆ ರಾತ್ರಿಯ ಬಸ್ಸಿಗೆ ಟಿಕೆಟ್ ಬುಕ್" ಮಾಡುವಂತೆ ಹೇಳಿದೆ... ಅದಕ್ಕೆ ಮೊಮ್ಮಗ "ಆಯ್ತು ತಾತ... ಆದರೆ, ಅಲ್ಲಿಗೆ ಯಾಕೆ ಹೋಗ್ಬೇಕು.. ?? ಈಗಲೇ ಇಲ್ಲೇ RedBus ನಲ್ಲಿ" ಮಾಡ್ತೀನಿ ಅಂದ..
ಅರ್ಥವಾಗಲಿಲ್ಲ... ರೆಡ್ ಬಸ್ಸೋ.. ವೈಟ್ ಬಸ್ಸೋ... ಊರು ಮುಟ್ಟಿದರೆ ಸಾಕೆಂದುಕೊಂಡು ಸುಮ್ಮನಾಗಿಬಿಟ್ಟೆ...

================================================

ಮಲಗುವ ಮುಂಚೆ "ಗುಡ್ ನೈಟ್ ಮೊಮ್ಮಗ" ಅಂದೆ.
"ಹಾಕ್ತೀನಿ ತಾತ" ಅಂದ..
ಅರ್ಥವಾಗಲಿಲ್ಲ... ಸುಮ್ಮನಾಗಿಬಿಟ್ಟೆ...

ಇಂತಿ ನಿಮ್ಮ ಪ್ರೀತಿಯ,
ಶಿವಪ್ರಕಾಶ್ ಹೆಚ್. ಎಮ್.

Devon Avenue (Chicago)

2015-12-04T05:24:00.000-08:00

ಯಾವದೇ ಊರಿಗೆ ಹೋದರೂ, ಯಾವುದೇ ರಾಜ್ಯಕ್ಕೆ ಹೋದರೂ, ಯಾವುದೇ ದೇಶಕ್ಕೆ ಹೋದರೂ, ಹೋಗುವ ಮುಂಚೆ "ಅಲ್ಲಿ ನಮ್ಮವರು ಇರುವರೇ?" ಎನ್ನುವ ಪ್ರಶ್ನೆ ನಮ್ಮಲ್ಲಿ ಹಲವರಿಗೆ ಮೂಡುತ್ತದೆ.

ನಮ್ಮವರು ಎನ್ನುವ ಪದ ಊರಿಂದ ಆಚೆ ಹೋದಾಗ ನಮ್ಮೂರಿನವರು, ರಾಜ್ಯದಿಂದ ಆಚೆ ಹೋದಾಗ ನಮ್ಮ ರಾಜ್ಯದವರು ಅಥವಾ ನಮ್ಮ ಭಾಷೆಯವರು, ಹಾಗೆ ದೇಶದಿಂದ ಆಚೆ ಹೋದಾಗ ನಮ್ಮ ದೇಶದವರು ಎಂದು ಬದಲಾಗುತ್ತದೆ. ನಮ್ಮವರು ಇದ್ದಾರೆ ಎನ್ನುವ ಪದ ನಮಗೆ ಒಂದು ರೀತಿಯ ಸಮಾಧಾನ ಕೊಡುತ್ತದೆ.

ನನ್ನ ಮಡದಿ ನಂದಿನಿ ಈ ಹಿಂದೆ ಶಿಕಾಗೋದಲ್ಲಿನ ಕನ್ನಡಿಗರ ಪರಿಚಯವನ್ನು ನಿಮಗೆ "ವಿದ್ಯಾರಣ್ಯ ಕನ್ನಡ ಕೂಟದ ಸಂಕ್ರಾಂತಿ ಹಬ್ಬ - 2015" ಎನ್ನುವ ಲೇಖನದಲ್ಲಿ ಪರಿಚಯಿಸಿದ್ದಳು. ನಾನು ಈ ಲೇಖನದಲ್ಲಿ ನಿಮಗೆ ಶಿಕಾಗೋದಲ್ಲಿ ಇರುವ ಡಿವಾನ್ ಅವೆನ್ಯೂ ಸ್ಥಳದ ಕೆಲವು ಚಿತ್ರಗಳನ್ನು ಹಂಚಿಕೊಳ್ಳುತ್ತೇನೆ. ಇಲ್ಲಿ ನಿಮಗೆ ಭಾರತೀಯ ಹಾಗು ಪಾಕಿಸ್ತಾನಿ ಅಂಗಡಿಗಳು, ಹೋಟೆಲ್ ಗಳು ಕಾಣಸಿಗುತ್ತವೆ. ಈ ಸ್ಥಳದಲ್ಲಿ ಇದ್ದಾಗ ನಿಮಗೆ ನಿಮ್ಮ ದೇಶದಲ್ಲೇ ಇದ್ದೀರಾ ಎನ್ನುವ ಭಾವನೆ ಮೂಡುವುದರಲ್ಲಿ ಯಾವುದೇ ಸಂದೇಹವಿಲ್ಲ.

ಕೆಳಗಿನ ಕೆಲವು ಚಿತ್ರಗಳನ್ನು ನೋಡಿದರೆ ನಿಮಗೆ ಆ ಸ್ಥಳದ ಬಗ್ಗೆ ಒಂದು ಚಿತ್ರಣ ಮೂಡಬಹುದು:
ಮೊದಲಿಗೆ ನಮ್ಮ "ಉಡುಪಿ ಪ್ಯಾಲೇಸ್":

ಉಡುಪಿ ಪ್ಯಾಲೇಸ್ ಹೋಟೆಲ್ ನಲ್ಲಿ ನಿಮಗೆ ದಕ್ಷಿಣ ಭಾರತದ ತಿಂಡಿ ಮತ್ತು ಉಪಹಾರಗಳು ದೊರೆಯುತ್ತದೆ. ಇದಕ್ಕೆ ಕರ್ನಾಟಕದ ಉಡುಪಿಯ ಹೆಸರಿದ್ದರೂ, ಅಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದವರಿಗೆ ಕನ್ನಡ ಗೊತ್ತಿರಲಿಲ್ಲ. ನಾನು ಮಾತನಾಡಿಸಿದ ಇಬ್ಬರಲ್ಲಿ ಒಬ್ಬರಿಗೆ ತೆಲುಗು ಹಾಗು ಇನ್ನೊಬ್ಬರಿಗೆ ಹಿಂದಿ ಗೊತ್ತಿತ್ತು. ಅದೊಂದು ವಿಷಯ ಬಿಟ್ಟರೆ ತುಂಬಾ ಚನ್ನಾಗಿ ಮಾತನಾಡಿಸಿದರು. ಉಪಹಾರದ ರುಚಿ ಅಧ್ಭುತ ಅಲ್ಲದಿದ್ದರೂ ಒಂದು ಲೆವೆಲ್ ಗೆ OK.

ನಮ್ಮ "Mysore Woodlands":

ಮೈಸೂರು ವುಡ್-ಲ್ಯಾಂಡ್ಸ ಹೋಟೆಲ್ ನಲ್ಲಿ ನಿಮಗೆ ದಕ್ಷಿಣ ಭಾರತದ ತಿಂಡಿ ಮತ್ತು ಉಪಹಾರಗಳು ದೊರೆಯುತ್ತದೆ. ಇಲ್ಲಿ ಕೆಲವರು ಕನ್ನಡದಲ್ಲಿ ಮಾತನಾಡಿದ್ದನ್ನು ಕೇಳಿ ಕುಶಿಯಾಯಿತು. ಇಲ್ಲಿಯ ಉಪಾಹಾರ ರುಚಿಯಾಗಿತ್ತು.

"Patel Brothers" Grocery shop:

ಪಾಟೇಲ್ ಬ್ರದರ್ಸ್ ನಲ್ಲಿ ದಿನಸಿ, ಹಣ್ಣು, ತರಕಾರಿ, ಬೇಕರಿ ತಿನಿಸುಗಳು, Ready to eat ಪ್ಯಾಕೆಟ್ ಗಳು ಹಾಗು ಹಲವು ದಿನನಿತ್ಯದ ಸಾಮಾನುಗಳು ದೊರೆಯುತ್ತಿದ್ದವು.

Hotel Annapurna:

India Book House:

ಇಲ್ಲಿ ತೆಲುಗು, ತಮಿಳು ಬಾಷೆ ಸೇರಿ ಹಲವು ಬಾಷೆಯ ಪುಸ್ತಕಗಳು ಇದ್ದವು ಆದರೆ ಕನ್ನಡದ ಒಂದೇ ಒಂದು ಪುಸ್ತಕ ಇಲ್ಲಿ ಇರದೇ ಇದ್ದದ್ದು ನಮಗೆ ಬಹಳ ಬೇಸರ ತರಿಸಿತು. ಮುಂದಿನ ಬಾರಿ ಹೋದಾಗ ಕೆಲವು ಕನ್ನಡ ಪುಸ್ತಕಗಳನ್ನು ನಾನೇ ಉಡುಗೊರೆಯಾಗಿ ಕೊಡಬೇಕೆಂದಿದ್ದೇನೆ.

Taj Sari Palace:

Other Shops:

Devon Street:

ನಾನು ಗಮನಿಸಿದಂತೆ, ಇಲ್ಲಿರುವ ಅಂಗಡಿಗಳಿಗೆ ಬರುವ ಗ್ರಾಹಕರು ತುಂಬಾ ಆರಾಮವಾಗಿ ಸಂತೋಷದಿಂದ ಅವರವರ ಭಾಷೆಯಲ್ಲಿ ಮಾತನಾಡುತ್ತಿದ್ದರು. ಆದರೆ ಕೆಲವು ಕನ್ನಡಿಗರು ಕನ್ನಡ ಮಾತನಾಡಲು ಬಂದರೂ ಅಸ್ಟೊಂದು ಉತ್ಸಾಹ ತೋರಿಸದಿದ್ದದ್ದು ಬೇಸರ ತರಿಸಿತು. ನಿಜ ಎಲ್ಲರೂ ಹಾಗೆ ಇರುವುದಿಲ್ಲ ಆದರೆ ನಾ ಗಮನಿಸಿದ ಕೆಲವರಲ್ಲಿ ಕಂಡದ್ದು ಇದು. ಇದಕ್ಕೆ ಇರಬೇಕು "ಇಂಡಿಯನ್ ಬುಕ್ ಹೌಸ್"ನ ಅಂಗಡಿಯಲ್ಲಿ ಒಂದೇ ಒಂದು ಕನ್ನಡ ಪುಸ್ತಕ ಇಡದಿರುವುದು. ಕೆಲವು ಸಣ್ಣ ವಿಷಯಗಳನ್ನು ಬಿಟ್ಟರೆ ಇಲ್ಲಿ ನಿಮಗೆ "Home away from home" ಫೀಲ್ ಆಗುವುದಂತೂ ನಿಜ.

ಈ "ಡಿವಾನ್ ಅವೆನ್ಯೂ" ರಸ್ತೆಯ ಒಂದು ಭಾಗಕ್ಕೆ "ಮಹಾತ್ಮ ಗಾಂಧಿ ಮಾರ್ಗ್" ಎಂದು ಹೆಸರಿಡಲಾಗಿದೆ. (ಮಾಹಿತಿ: https://en.wikipedia.org/wiki/Devon_Avenue_(Chicago))

ನಿಮ್ಮವ,

ಶಿವಪ್ರಕಾಶ್

ನಾನು

2015-09-17T21:00:00.000-07:00

ನನ್ನದೇನೂ ಇಲ್ಲದ

ನನ್ನನ್ನು

"ನಾನು"

ಕೊಲ್ಲುತಿದೆ..

ದೇಹ.. ??

ಅದ್ಯಾರೋ ಕೊಟ್ಟದ್ದು..

ರೂಪ... ??

ದೇಹವೇ ನಿನ್ನದಲ್ಲದ ಮೇಲೆ, ರೂಪ ನಿನ್ನದಾಗುವುದಾದರೂ ಹೇಗೆ.. ?

ಹುಟ್ಟು.. ??

ನೀನು

ಕಾರಣನಲ್ಲ...

ಆದರೆ,

"ನಾನು" (ಎನ್ನುವ) ಹುಟ್ಟಿಗೆ

ನೀನು

ಕಾರಣ.. !!!

ಸಾವು.. ?

ಅದು ನಿನ್ನ ಕೈಯಲ್ಲಿ ಇದೆಯೇ.. ??

ಗೊತ್ತಿಲ್ಲ.. !!

ದೇಹವನ್ನು ಕೊಂದರೆ,

ದೇಹ ನಶಿಸಬಹುದು..

ಆದರೆ

"ನಾನು"

ಸಾಯುವುದೇ.. ?

ಗೊತ್ತಿಲ್ಲ.. !!!

ಆತ್ಮ.. ??

ನೀನು ಆತ್ಮವೇ.. ??

ಗೊತ್ತಿಲ್ಲ..

ಹಾಗಾದರೆ,

ಗೊತ್ತಿರುವುದಾದರು ಏನು... ?

ನಿನಗೆ ಗೊತ್ತಿರುವುದು.

ಕೇವಲ

"ನಾನು"...

ನನ್ನದೇನೂ ಇಲ್ಲದ

ನನ್ನನ್ನು

"ನಾನು"

ಕೊಲ್ಲುತಿದೆ..

ಇಂತಿ "ನಾನು" ನಿಮ್ಮ,

ಶಿವಪ್ರಕಾಶ್..

ಲೋ.. Party ಕೇಳ್ರಾಲೊ..

2015-06-17T04:47:00.000-07:00

ಮೈಸೂರಿನ ಕಾಲೇಜ್ನಲ್ಲಿ ಓದುತ್ತಿದ್ದಾಗ, ಒಂದು ಬಾಡಿಗೆ ರೂಮ್ ಮಾಡಿಕೊಂಡು ನಾವು ನಾಲ್ಕು ಜನ ಸ್ನೇಹಿತರು(ನಾನು, ನಟ, ರಘು, ಸಂಗು) ಒಟ್ಟಿಗೆ ತಂಗಿದ್ದೆವು. ಹೀಗೆ ಒಂದು ಸೆಮಿಸ್ಟರ್ ಪರೀಕ್ಷೆಯ ಮುಂಚೆ ಕೆಲವು ದಿನಗಳ ರಜೆ ಇತ್ತು. ಪರೀಕ್ಷೆ ಹತ್ತಿರ ಬಂತೆಂದರೆ ನಮಗೆ ಎಲ್ಲಿಲ್ಲದ ಶ್ರದ್ದೆ ಬಂದುಬಿಡುತ್ತದೆ. ಹೀಗೆ ಶ್ರದ್ದೆಯಿಂದ(ಸಂದೇಹ ಬೇಡ.. :P !!!) ನಾವೆಲ್ಲಾ ಓದುತ್ತಿದ್ದಾಗ ನಮ್ಮ Classmate ಗೆಳೆಯ ಪ್ರೀತಮ್ ರೂಮ್ಗೆ ಬಂದ.
ಒಮ್ಮೆ ಎಲ್ಲರೂ ಅವನಿಗೆ ಹಾಯ್ ಹೇಳಿ ಮತ್ತೆ ನಮ್ಮ ಪುಸ್ತಕಗಳನ್ನು ಹಿಡಿದು ಕುಳಿತೆವು.
ಅವನು ನಮ್ಮನ್ನು ನೋಡಿ "ಲೋ, ಏನ್ರೋ ಹಿಂಗ್ ಓದ್ತಾ ಇದೀರಾ... ನನ್ಮಕ್ಳ...... ಫ್ರೆಂಡ್ ಬಂದಿದಾನೆ.... ಒಂದೆರಡು ನಿಮಿಷವಾದ್ರು ಮಾತಾಡಿಸಬೇಕು ಅಂತ ಗೊತ್ತಗೊಲ್ವ... ?" ಎಂದ.
ಅದಕ್ಕೆ "ನೀನು ಬಿಡಪ್ಪ... already ಪುಸ್ತಕಾನ ಎರಡು ರೌಂಡ್ ತಿರುಗಿಸಿ ಹಾಕಿರ್ತೀಯ.. ಅದಕ್ಕೆ ಆರಾಮ್ ಆಗಿ ಇದೀಯ.. ನಾವು ನೋಡು ಇಲ್ಲಿ ಬಟ್ಟೆ ಹರ್ಕೊಂಡು ಈಗ ಓದ್ತಾ ಇದೀವಿ.. " ಎಂದ ನಟ.
ಅದಕ್ಕೆ ಪ್ರೀತಮ್ "ಅಲ್ಲ ಮಗ, ಹೊಸ ಬಟ್ಟೆ ಹಾಕೊಂಡು ಬಂದಿದೀನಿ... ನೋಡಿ ಚನ್ನಾಗಿದೆ ಅಂತ ಅದರೂ ಹೇಳ್ಬಾರ್ದ.. " ಎಂದ.
ಅದಕ್ಕೆ ನಾವು "Dress ಚನ್ನಾಗಿದೆ ಮಗ.. ಸೂಪರ್.. " ಅಂದ್ವಿ..
ನಾವು ನಾಲ್ಕು ಜನ ಮತ್ತೆ ಪುಸ್ತಕ ಹಿಡಿದು ಕುಳುತ್ವಿ..
ಎರಡು ನಿಮಿಷ ಸುಮ್ಮನಿದ್ದು "ಮಗ... " ಅಂತ ಪ್ರೀತಮ್ ರಾಗ ಎಳೆದ..
"ಏನೋ ಪ್ರೀತಮ್ ನಿನ್ ಗೋಳು... ಎಕ್ಷಾಮ್ ಕಣೋ.. ಓದೋಕೆ ಬಿಡೋ.. " ಎಂದ ನಟ..
"ಲೋ.. ಮಕ್ಳ.. ಇವತ್ತು ನನ್ನ ಬರ್ತ್ ಡೇ ಕಣೋ.. " ಎಂದ ಪ್ರೀತಮ್..
ನಾವು ನಾಲ್ಕು ಜನ ಒಬ್ಬೊಬ್ಬರಾಗಿ "ಹ್ಯಾಪಿ ಬರ್ತ್ ಡೇ ಮಗ" ಅಂತ Wish ಹೇಳಿ ಮತ್ತೆ ಪುಸ್ತಕ ಹಿಡಿದೆವು.
ಮತ್ತೆ ಒಂದೆರಡು ನಿಮಿಷ ನೋಡಿ, ಮತ್ತೆ "ಮಗ... " ಅಂತ ರಾಗ ಎಳೆದ ಪ್ರೀತಮ್..
"ಮತ್ತೇನೋ.. " ಎಂದ ಸಂಗು..
ಅದಕ್ಕೆ ಕೋಪದಿಂದ ಪ್ರೀತಮ್ ರಾಗ ಎಳಿತಾ.. "ಲೋ ಮಕ್ಳ... ನನ್ ಬರ್ತ್ ಡೇ ದು... Party ಕೇಳ್ರಾಲೊ.. " ಅಂದ... :) :)

ನಮ್ಮ ಪ್ರೀತಮ್ ನಂತೆ ಯಾರ್ಯಾರಿಗೆ Exam Time ನಲ್ಲಿ "ಹ್ಯಾಪಿ ಬರ್ತ್ ಡೇ" ಮಿಸ್ ಆಗಿದೆಯೋ ಅವರೆಲ್ಲರಿಗೂ "ಹ್ಯಾಪಿ ಬರ್ತ್ ಡೇ.. ".
ಅಂದಹಾಗೆ.. ನಿಮ್ಮ Party ಯಾವಾಗ.. ?

ಪ್ರೀತಿಯಿಂದ,
ಶಿವಪ್ರಕಾಶ್ ಎಚ್. ಎಮ್

ಬೆಳ್ಳಗಿರುವುದೆಲ್ಲ ಹಾಲಲ್ಲ..

2015-06-11T22:55:00.000-07:00

ಸಿಹಿಯಾಗಿರುವುದೆಲ್ಲ,

ಅಮೃತವಲ್ಲ...

ಕಹಿಯಾಗಿರುವುದೆಲ್ಲ,

ವಿಷವಲ್ಲ...

ಕಹಿಯಲ್ಲೂ ಸಿಹಿ ಇರಬಹುದು..

ಸಿಹಿಯಲ್ಲೂ ಕಹಿ ಇರಬಹುದು...

ನೋವಲ್ಲಿ ನಲಿವಿದ್ದಂತೆ...

ನಲಿವಲ್ಲಿ ನೋವಿದ್ದಂತೆ....

ದಾರಿಯೊಂದು ಕವಲೊಡೆದು

ಎರಡಾಗಬಹುದು,

ಯಾರಿಗೆ ಗೊತ್ತೇ.... ? ಅದೇ ಕವಲೊಡೆದ ದಾರಿ,

ಮುಂದೆ ಒಂದಗಲೂಬಹುದು..

ಮೋಡದಿಂದ ಸುರಿದ ಮಳೆ ನೀರೆಲ್ಲಾ,

ಭೂಮಿ ಸೇರದು...

ಭೂಮಿ ಸೇರಿದ ಮಳೆ ನೀರೆಲ್ಲಾ

ಮತ್ತೆ ಮೋಡ ಸೇರದಿರಬಹುದು..

ಉಸಿರು ನಿಂತಾಗ,

ದೇಹ ಸತ್ತಿರಬಹುದು...

ದೇಹ ಸತ್ತಿದ್ದಾರೂ,

ಆತ್ಮ ಬದುಕಿರಲೂಬಹುದು...

ಶಾಂತಿದೂತನಲ್ಲೊಬ್ಬ,

ಕ್ರಾಂತಿಕಾರಿ ಇರಬಹದು,

ಕ್ರಾಂತಿಕಾರಿಯಲ್ಲೊಬ್ಬ,

ಶಾಂತಿದೂತನಿರಬಹುದು...

ಅಹಿಂಸವಾದಿಗಳೆಲ್ಲ,

ಸಸ್ಯಹಾರಿಗಳಲ್ಲ...

ಹಿಂಸವಾದಿಗಳೆಲ್ಲ,

ಮಾಂಸಹಾರಿಗಳಲ್ಲ...

** ಹೀಗೆ ಹಿಟ್ಲರ್ ಬಗ್ಗೆ ಯೋಚಿಸುತ್ತಿದ್ದಾಗ ಮೂಡಿದ ಸಾಲುಗಳಿವು..

** ಹಿಟ್ಲರ್ ಒಬ್ಬ ಸಸ್ಯಾಹಾರಿ ಎಂದು ಕೆಲವರು ಹೇಳುತ್ತಾರೆ.. ಕೆಲವರು ಈ ವಾದವನ್ನು ಸುಳ್ಳು ಎಂದೂ ಹೇಳುತ್ತಾರೆ..

** ಒಬ್ಬ ವ್ಯಕ್ತಿ, ಸನ್ನಿವೇಶ, ಪರಿಸರ, ದೃಶ್ಯ ನೋಡಿ ತಾಳೆ ಹಾಕಿ ಹೇಳುವುದು ಯಾವಾಗಲು ಸತ್ಯವಾಗಿರುವುದಿಲ್ಲ ಎನ್ನುವ ಆಲೋಚನೆಯಿಂದ ಬರೆದ ಸಾಲುಗಳಿವು..

** ಸ್ಫೂರ್ತಿ (ಗೆಳೆಯ ಸತೀಶ್ ಅರ್ ಬೆಂಗಳೂರು ಕಳಿಸಿದ ಮೆಸೇಜ್) :

Can u judge who is the better person out of these 3 ?

Mr A - He had friendship with bad politicians, consults astrologers, two wives, chain smoker, drinks eight to 10 times a day.

Mr B - He was kicked out of office twice, sleeps till noon, used opium in college & drinks whiskey every evening.

Mr C - He is a decorated war hero,a vegetarian, doesn't smoke , doesn't drink and never cheated on his wife.

You would want Mr.C rite.

But..
Mr. A was Franklin Roosevelt!

Mr. B was Winston Churchill!!

Mr C Was ADOLF HITLER!!!

Strange but true..
Its risky to judge anyone by his habits !
Character is a complex phenomenon.

So every person in ur life is important ,don't judge them ,accept them.

ಇಂತಿ,

ಶಿವಪ್ರಕಾಶ್,

ಅರವತ್ತಕ್ಕೆ ಅರುವು-ಮರುವು

2015-06-04T00:58:00.003-07:00

ಅರವತ್ತಕ್ಕೆ ಅರುವು-ಮರುವು,

ಆದರೆ, ನಮಗಿನ್ನೂ ಕೇವಲ ಮೂವತ್ತು... !!!

ಒಂದು ಕೈಯಲ್ಲಿ ಮೊಬೈಲು,

ಇನ್ನೊಂದು ಕೈಯಲ್ಲಿ ಕಾಫಿ ಕಪ್,

ಯಾವುದು ಬಾಯಿಗೋ, ಯಾವುದು ಕಿವಿಗೋ,

ಅರಿಯದ ಹೊತ್ತು....

ನಮಗಿನ್ನೂ ಕೇವಲ ಮೂವತ್ತು... !!!

ಲಿಫ್ಟಿನ ಮುಂದೆ ಆಕ್ಸೆಸ್ ಕಾರ್ಡ್ ಹಿಡಿದು ನಿಲ್ಲುವ,

ವಾಶ್ ಬೆಸಿನ್ನಿನಲಿ ಸೂಸು ಮಾಡುವ,

ಇಂದು ನಾ ನಡೆದಿದ್ದೆಸ್ಟು..?? ಎಂದು App ಲಿ ನೋಡುವ...

ನಮಗಿನ್ನೂ, ಕೇವಲ ಮೂವತ್ತು... !!!

ರಸ್ತೆ ಮಧ್ಯದಿ ನಿಂತು, ನಾನೆತ್ತ ಹೋಗುತಿರುವೆನೆಂದು ಯೋಚಿಸುವ,

ನ್ಯೂಸ್ ಪೇಪರ್ ಕೈಯಲಿ ಹಿಡಿದು, ಜೂಮ್ ಮಾಡ ಹೊರಟಿರುವ,

ಪ್ರಜ್ಞೆ ಇಲ್ಲದ ಹೊತ್ತು...

ನಮಗಿನ್ನೂ, ಕೇವಲ ಮೂವತ್ತು... !!!

ಹ್ಯಾಂಗ್-ಔಟ್ ಅನ್ನೂ ಕಂಪ್ಯೂಟರ್ನಲ್ಲೆ ಮಾಡಿ,

ಟು ಪ್ಲಸ್ ತ್ರೀ ಗೂ ಮೊಬೈಲ್ನ ಕ್ಯಾಲ್ಸಿ ತೆಗೆವ,

ಇದ್ದಲ್ಲೇ ಎಲ್ಲ ಬೇಕೆನುವ...

ನಮಗಿನ್ನೂ, ಕೇವಲ ಮೂವತ್ತು... !!!

ಅರವತ್ತಕ್ಕೆ ಅರುವು-ಮರುವು,

ಆದರೆ, ನಮಗಿನ್ನೂ ಕೇವಲ ಮೂವತ್ತು... !!!

Art Of Living International Center - Bangalore

2015-05-05T02:43:00.000-07:00

ಕೆಲ ದಿನಗಳ ಹಿಂದೆ ಸ್ನೇಹಿತರೊಂದಿಗೆ "Art Of Living International Center - Bangalore" ಗೆ ಭೇಟಿ ಕೊಟ್ಟೆವು. ವಿಶಾಲವಾದ ಆವರಣ, ನೋಡಲು ತುಂಬಾ ಸೊಗಸಾಗಿದೆ ಹಾಗು ಶಾಂತಿಯಿಂದ ಕೂಡಿದೆ. ಸಮಯ ಸಿಕ್ಕಾಗ ಒಮ್ಮೆ ಭೇಟಿ ಕೊಡಿ.

ಅಲ್ಲಿ ತೆಗೆದ ಕೆಲವು ಚಿತ್ರಗಳು ನಿಮಗಾಗಿ:

Helipad

Vishalakshi Mantap

Kitchen Room Where Prasada will be served

Vishalakshi Mantap

A Guide who took us on tour around the campus

Vishalakshi Mantap

Goshaala

Dhanvanthari
@ Sri Sri College Of Ayurvedic Science and Research Hospital

Sri Sri College Of Ayurvedic Science and Research Hospital

ವಿದ್ಯಾರಣ್ಯ ಕನ್ನಡ ಕೂಟದ ಸಂಕ್ರಾಂತಿ ಹಬ್ಬ - 2015

2015-04-21T05:18:00.000-07:00

ವಿದ್ಯಾರಣ್ಯ ಕನ್ನಡ ಕೂಟ(ಶಿಕಾಗೋ)ದ "ಸಂಗಮ" ಮ್ಯಾಗಜಿನ್ ನ ಯುಗಾದಿ ಸಂಚಿಕೆಯಲ್ಲಿ ಪ್ರಕಟವಾದ ನನ್ನ ಲೇಖನ.

ಸಂಕ್ರಾಂತಿ ಹಬ್ಬದ ಕೆಲವು ಚಿತ್ರಗಳು:

ಹಗಲುಗನಸಿನ ಬೆನ್ನೇರಿ

2015-03-11T23:26:00.000-07:00

ವಿದ್ಯಾರಣ್ಯ ಕನ್ನಡ ಕೂಟ(ಶಿಕಾಗೋ)ದ "ಡಿಂಡಿಮ" ತ್ರೈಮಾಸಿಕ ಪತ್ರಿಕೆಯಲ್ಲಿ ಪ್ರಕಟವಾದ ನನ್ನ ಲೇಖನ.

ದೇವರಿದ್ದಾನೆ...!!!

2014-07-07T23:26:00.000-07:00

ಹೌದು. ದೇವರಿದ್ದಾನೆ. ಅವನಿಲ್ಲ ಎಂದು ಊಹಿಸಿಕೊಳ್ಳಲು ಕೂಡ ನನ್ನಿಂದಾಗದು. ಅವನಿದ್ದಾನೆ ಎಂಬ ನಂಬಿಕೆಯೇ ಅದೆಸ್ಟೋ ಜನರಿಗೆ ಆಶಾಕಿರಣ. ಯಾರೊಂದಿಗೂ ಹಂಚಿಕೊಳ್ಳಲಾಗದ ನೋವುಗಳನ್ನು ಅವನೊಂದಿಗೆ ಮಾತ್ರ ಹಂಚಿಕೊಳ್ಳಬಹುದು. ನಮ್ಮ ಮಾತನ್ನು ಅವನು ಯಾವತ್ತು ಕೇಳುವುದಿಲ್ಲ ಎಂದಿಲ್ಲ.

"ದೇವ ನಿನ್ನ ಇರುವ ನಂಬಿ ಜೀವ ಕೋಟಿ ಸಾಗಿದೆ". ಹೌದು ನಿನ್ನನ್ನು ನಂಬಿ ಜೀವನ ಸಾಗಿಸುವವರ ಜ್ಯೋತಿ ನೀನು. ನೀನಿರುವೆ ಎಂದು ಅದೆಸ್ಟೋ ಸಲ ಸಾಭೀತು ಪಡಿಸಿರುವೆ. ಬೇರೆ ಬೇರೆ ರೂಪದಲ್ಲಿ ದರ್ಶನವನಿಟ್ಟು ಬದುಕುವ ಮಾರ್ಗವನ್ನು ಹೇಳಿಕೊಟ್ಟಿರುವೆ. ಕೆಲವರು ನೀನು ಹಾಕಿಕೊಟ್ಟ ಮಾರ್ಗದಲ್ಲಿ ಶ್ರದ್ದೆಯಿಂದಲೋ, ಇನ್ನೂ ಕೆಲವರು ಭಯದಿಂದಲೋ(ತಪ್ಪು ಮಾಡಿದರೆ ನೀ ಶಿಕ್ಷಿಸುವೆ) ಜೀವನ ಸಾಗಿಸುತ್ತಿದ್ದಾರೆ.

ಹಾಗೆ ನಿನ್ನ ಹೆಸರನ್ನು ದುರುಪಯೋಗ ಮಾಡಿಕೊಳ್ಳುವವರು ಕೂಡ ಇದ್ದಾರೆ. ನಿನ್ನನ್ನು ಹಣ ಮಾಡುವ ಯಂತ್ರದಂತೆ, ಮತ ಹುಟ್ಟಿಸುವ ಗುಂಪಿನಂತೆ, ರಕ್ತ ಚಲ್ಲಿಸುವ ದ್ವೇಷದಂತೆ ದುರುಪಯೋಗ ಪಡಿಸಿಕೊಳ್ಳುತ್ತಾರೆ. ಹೀಗೆ ಜನರಿಗೆ ಮೋಸ ಮಾಡಲು ನೀನು ಅವರ ಕೈಗೆ ಅಸ್ತ್ರ ಆಗಿಬಿಟ್ಟಿದೀಯ. ಬಹುಶಃ ಅಂತವರನ್ನು ತಿದ್ದಲು ನೀನು ಮತ್ತೊಂದು ಅವತಾರ ಪಡೆಯಬೇಕೆನೋ.

ನಿನ್ನ ಮೇಲಿನ ಭಯ ಭಕ್ತಿ ನಿನ್ನ ನಂಬಿದವರಿಗೆ ಎಂದಿಗೂ ಕಡಿಮೆಯಾಗಿಲ್ಲ, ಕಡಿಮೆಯಾಗುವುದಿಲ್ಲ. ನೀನು ಬೇಕು. ಕಷ್ಟ ಕೊಟ್ಟರೂ, ಸುಖ ಕೊಟ್ಟರೂ ನೀನು ಬೇಕು. ನೀನಿಲ್ಲ ಎಂದು ಊಹಿಸಿಕೊಳ್ಳುವುದು ಆಸಾಧ್ಯ. "ನೀನಿಲ್ಲ" ಎಂಬ ಒಂದೇ ಒಂದು ಮಾತು ಜನ ನಂಬಿದ್ದಾರೆ, ಈ ಜೀವಕುಲ ಅದೆಂದೋ ನಿರ್ನಾಮವಾಗುತ್ತಿತ್ತು. ನೀನು ಬದುಕುವ ನಿಯಮವಾಗಿ, ಧರ್ಮ ಪಟಿಸುವ ಮಂತ್ರವಾಗಿ ನೀನು ಬೇಕು. ನೀನು ನಮಗೆ ಬೇಕು.

"ನೀನಿಲ್ಲದ ನಾವು, ಕುರುಬನಿಲ್ಲದ ಕುರಿಗಳ ಮಂದೆ" ನಮ್ಮ ಪ್ರತಿ ನಡೆಯಲ್ಲೂ ನೀನಿರುವೆ. ಇದು ನಿನ್ನದೇ ಆಟ. ನಡೆಸು ನಮ್ಮನು ಕೈಹಿಡಿದು. ತಪ್ಪು ಮಾಡದ ಹಾದಿಯಲ್ಲಿ ಮುನ್ನೆಡೆಸು. ನಿನ್ನ ನಂಬಿದ ನಮ್ಮ ಹೆಸರಿಗೆ ಕಳಂಕ ಬರದಂತೆ.

ನಿನ್ನಿಸ್ಟದಂತೆ ನೀ ಬರೆಸಿಕೊಂಡ ಲೇಖನವಿದು, ಹಾಗಾಗಿ ಇದರ ಕತೃ ಕೂಡ ನೀನೆ. ನಾನು ಬರೆಸಿಕೊಳ್ಳಲು ಉಪಯೋಗಿಸಿಕೊಂಡ ಯಂತ್ರಮಾನವ ಅಸ್ಟೇ.

ಇಂತಿ,

ದೇವರು.

೨ ಜೂನ್ ೨೦೧೪. ಬೆಳಿಗ್ಗೆ ೨:೩೦