Monster Fiat 128

طريقة فك تنك البنزين و تنظيفه من الداخل والخارج

noreply@blogger.com (sam4ever2010) — Mon, 20 Feb 2017 12:22:00 +0000

بسم الله الرحمن الرحيم

ان شاء الله يا جماعه هشرح ليكم طريقة فك تنك البنزين و تنظيفه من الداخل والخارج وكمان ازاى نرشه من غير ميكانيكى ولا بوهيجى وباقل التكاليف والنتيجه ممتازه ان شاء الله .

أولاً هنحتاج التالى :
- ربع متر صنفره ب 5 جنيه

- علبة لاكيه نص كيلو اى لون ب 15 جنيه

- بخاخة مايه من اى محل ادوات منزليه ب 5 جنيه

- عدد 2 زجاجة "خل" 3.5 جنيه

- 1/8 سلك مواعين ب 2 جنيه

- كيس اريل بجنيه ونص

- قطعة قماش قديمه

- 3 لتر بنزين علشان التنضيف من الخارج وعلشان نخف بيه اللاكيه ولو هتحتاج تحط حبه فى الكربراتير وانت بتدور بعد ما خلصت كل حاجه

التكلفه كدا يعتبر معدتش 35 جنيه كلها

العدد المطلوبة :

- بيبه 13

- مفك عادة

- مفك صليبه

- بنسه

ممكن بالمره تغير معاك الحاجات دى فى حالة لو محتاجه تتغير بس :
- كوعة تنك كاوتش ب 25 جنيه

- نص متر خرطوم نص بوصة للبنزين الراجع ب 4 جنيه

- نص متر خرطوم 1/4 بوصة للفايظ ب 2 جنيه

- طبة تنك ب جنيه

- وردتين نحاس او المونيوم بجنيه

- عدد 4 او 5 كوليه بنزين خليهم احتياطى

يا ريت تعمل حسابك انك تفك التنك يوم متأخر تنضفه وتدهنه وتسيبه يتنشف وتانى يوم تنزل تركب
لو محتاج تعمل لحام فى التنك الحمه قبل ما تنضف او تدهن بس صنفر مكانه ووديه لبتاع ريداتيرات او شكمانات بس تتأكد انه مفيهوش نقطة بنزين ويكون نشف كويس علشان ميحصلش حاجه لا قدر الله
بعد ما تلحم جرب التنك انه مش بيسرب من اى مكان عن طريق انك تحط فيه شوية بنزين وترجه وتقلبه تشوفه هينقط تانى ولا لا .
يا ريت برضو تعملوا الموضوع ده والعربيه مفيهاش بنزين علشان متضطرش تنزل بنزين كتير

الشرح مع الصور تباعا ...

اول حاجه هتعملها قبل اى حاجه عشان متنساش هتفك العوامة من التنك وتخرجها بره ودى هتكون موجودة ف شنطة العربية فى الموديلات المعدلة اما الموديلات العادة مش هتحتاج لانها ملهاش مكان ف الشنطة وهتتفك عن طريق مفتاح بيبه 6 او 7 تقريباً تفك بيها ال 6 صواميل وبعد كده تفصل سلكتين الكهرباء بتوعها وتخليك فاكر مكانهم بالظبط

وقبل ماتشتغل لازم تفضى التنك كله عن طريق انك هترفع العربية من ورا عشان تبقى الرؤية سهلة وتفك الافيز بتاع كوعة التنك وتكون مجهز جردل او طبق بلاستيك غويط تحت التنك عشان تفضى فيه البنزين وممكن تشفطه بخرطوم وتفضيه ف جركن على حسب ومتنساش تفك الافيز بتاع خرطوم الفايظ برضه عشان ميبقاش فى حاجة ماسكة التنك

دلوقتى هتبدأ تفك التنك هتلاقى 4 صواميل مقاس 13 اثنين عاليمين قدام وورا واثنين عالشمال قدام وورا هتفكهم كلهم

وانت بتفك ممكن تسنده بأى حاجه زى عصاية الكوريك مثلا عشان ميقعش عليك لما تفكه

خلاص فكيت ال 4 صواميل .. بكده التنك هينزل معاك بمنتهى السهولة وتاخده بقى على مكان نضيف عشان تروق عليه براحتك

دلوقتى بقى كل ما عليك انك تروقه من بره وتديله غسلة بالبنزين وتشيل من عليه الشحم والزيوت ال عليه دى كلها هيبقى زى الفل

بعد كده بالصنفرة تحاول تنضفه على قد ماتقدر

وتديله بعد كده غسلة تانى بالبنزين وتصنفرة المرة دى بسلك المواعين

اما تخلص تمسحه كله بالفوطه عشان ميبقاش عليه اى تراب او بنزين عشان يبقى جاهز عالرش

دلوقتى انت جاهز للرش وهتجيب اللاكيه وتخفه بشوية بنزين او ثنر وتحطه ف البخاخه وتبدأ ترش الوش بتاع التنك وخلى بالك سد مكان فتحة العوامة بفوطة او ورقة مثلا عشان ميدخلش بويه جوه التنك

وتسيبه شوية اما ينشف وبعد كده تكمل رش باقى التنك

وبكدة تكون خلصت المهمة وترجع تركب كل حاجه وتوصل الخراطيم والكوعة وتشيك عالكوليهات وتربطها كويس وترجع تركب العوامة وتربطها تمام وتركب السلكتين بتوعها

----------------------------------------------------

يارب يكون الموضوع عجبكم ...

مع تحياتى

Sameh Ahmed

طريقه عمل عمره كامله للموتور بتاعك بنفسك وبالخطوات

noreply@blogger.com (sam4ever2010) — Thu, 07 Apr 2016 14:59:00 +0000

بسم الله الرحمن الرحيم

موضوع الناهرده مهم جداً لكل الناس المبتدئة اللى حابه تشتغل بنفسها فى العربية وتبعد عن الصنايعية ، الموضوع هيكون طريقه عمل عمره كامله للموتور بتاعك بنفسك والشرح هيكون بالخطوات ، وان شاء الله مش هيبقى فى حاجه صعبة

فى البداية هنبدأ بالفك وهنا هاننزل الموتور على الارض خالص مش هانشتغل فى الحوض ودة عشان الطريقة تمشى مع عمل شنبر او عمرة كاملة

خطوات فك الموتور من جسم السيارة

- أول حاجة هنفكها البطارية عشان ميحصلش اى قفله لو اى سلوك كهرباء لمست مع أرضى وخصوصاً لما نفك كابل الكهرباء العمومى الواصل للمارش وبعدين هنفك خراطيم البنزين الداخلة والخارجة من الطرمبة وبعديها سلوك البوجيهات الواصلة بالاسبراتير وبعدين نفك الاسبراتير برضه عشان ميتخبطش ولا يتكسر ومفيش مانع نفك الموبينة برضه وبالمرة نفك الكربراتير ، ونبدا نفك الردياتير والخراطيم الداخلة والخارجة للموتور ، هنفك سلك الدبرياج وطبعا اتياش البنزين فى الكربراتير ولو عندك سلك اكسراتير بدل الاتياش هتفصله من الكربراتير ، هنفك كابلات المارش ومن ثم المارش كليا عشان بعد كده هندخل على التقيل ، هنفك العجلتين الامامى بعد رفع العربية بكوريك وبعدين هنفك الكبالن الداخلية والخارجية ونركنهم على جمب ، وأخر حاجه قبل ما نبدأ نفك قواعد الموتور عشان مننساش نفضى زيت الموتور فى جركن او طبق غويط وده بيتم عن طريق فك مسمار كرتيرة الزيت ونسيب الزيت ينزل منها كله .

- المرحلة اللى بعد كدة جسم الموتور نفسه وده متثبت بـ 3 قواعد فى جسم السيارة :
القاعدة الاولى وهى اللى فى كرتيرة السيارة الشمال وانت واقف امام السيارة ودى سهلة جدا لانها باينة وواضحة بمجرد فك مسمار التثبيت كدة القاعدة بقت برة اللعبة .

القاعدة الثانية اسهل بكتير لانها تعتبر شداد للموتور وهى موجودة اسفل الاستبن ودى هانفكها من جسم السيارة وكمان من جسم المحرك عشان الشداد دة طويل وممكن يلاخمنى وانا بسقط المكنة عالأرض أو برفعها بالونش ( بلانكو )

وعلى فكرة موتور الـ 128 سهل يتشال من غير ونش وممكن ينزل على الارض اسهل وبنرفع العربية من فوق منة لان وزنها بيبقى خفيف ، اما لو عندك بلانكو يبقى اريح ليك هترفع بيه المكنة وترجع العربية لورا وبعدين تسقطها عالارض تانى .

القاعدة الثالثة ودى تعتبر أرخمهم وهى القنطرة السفلية ومثبت فيها القاعدة المثلثة الموجودة بالفتيس هننزل تحت العربية ونبدأ بفك الـ 3 مسامير المثبتة للقاعدة فى الفتيس وبعد الفك هاتقابلنا مشكلة القنطرة لانها هاتعوق نزول الموتور فى الارض وعشان نفك القنطرة هاندخل جوة صالون العربية ومن عند منتصف الصدر فى فتحة مربعة فى الارضية غاطسة فيها مسمارين بتوع القنطرة هانفكهم ودة بيتطلب انك تشيل جزء من فرش الارضية ولكن هتحتاج واحد معاك يمسك راس المسمار من جوة الصالون وانت بتفك الصامولة من تحت الحوض ولما نخلص نفك القنطرة من الجزء الامامى للحوض من عند القنطرة الامامية
طبعا مش محتاج انى افكرك انك لازم تكون محمل المكنة بالفتيس بالكامل على كوريك تمساح وده غير الكوريك اللى هتكون رافع بيه العربية ولو عندك حاجة تحمل عليها العربية يكون افضل زى بلوكين رصيف مثلا او الاستاندات الحديد المثلثة دى عشان متحتاجش ل 2 كوريك .

دلوقتى بعد ما فكينا القنطرة بكدة المكنة بقت فى الهوا ونبدأ ننزل الموتور على الارض واحدة واحدة بالكوريك وممكن نرفعه من عالكوريك بسير كاتينه قديم او جنزير او حبل يكون جامد تربطه فى جسم الموتور عشان تحمل عليه بس هتحتاج 2 معاك يساعدوك فى الموضوع ده واما نطمن انة كليا بقى على الارض هنرفع العربية لفوق ونرجعها لورا عشان تبقى بعيد عن الموتور عشان نبدأ الشغل .

لو عاوز تغسل المكنة بالجاز عشان تشتغل على نضافة وبال رايق ومالة اديها غسلة سريعة عشان كل حاجة تبقى منورة ادامك وكمان شكل ترشيح الزيت مش حلو .

دلوقتى متهيالى ممكن نفك الفتيس من الموتور عن طريق مسامير الداير وخد بالك احنا شايلين المارش من الفتيس ودلوقتى ممكن نركن الفتيس على جنب مش محتاجينة

نفك الدسك من على الموتور عن طريق المسامير المثبتة للدرك على الفولام ، ونطلع الاسطوانة لانها ملهاش اى مسامير تثبيت .

نجيب بقى مفتاح لقمة من نوع كويس اوى المانى على سبيل المثال ونفك الـ 4 مسامير بتوع الحدافة بس هاتقابلك مشكلة هنا انك كل اما تيجى تفك تلاقى عامود الكرنك بيلف منك وللتغلب على هذة المشكلة بنجيب نص سبيكة قديمة طبعا ونضؤرها على سنون الفولام وعلى جسم الموتور فى اتجاة معاكس لحركة الفك اللى هو شمال طبعا ، يعنى لو انا واقف قدام الموتور من ناحية الفولام وهفك الـ 4 مسامير طبعا عكس عقارب الساعة يبقى السبيكة تتثبت من الناحية الشمال ، وبعد الفك هتلاقيها لزقة مش عاوزة تتطلع نجيب شاكوش متوسط ( 1 كجم مثلا ) وندق دق خفيف اكنك بتكسر بندق وخايف لتكسر اللى جوة البندقاية والدق ميكنش فى حتة واحدة ولكن على محيط الفولام بصورة متالية ومتتابعة وخلى بالك من الخابور اوعى يضيع منك .

نلف المكنة ونبدا بفك الدينامو كليا مش السير بس ونفك وش التقسيمة البلاستيك
ونهوى بلية الشداد ونخلع سير التقسيمة ونشيل كل الكلام دة على جنب

دلوقتى هانفك طنبورة الكرنك طبعا هانفك المسمار المثبت ليها ودقتين هتلاقيها بقت برة وخلى بالك من الخابور

دلوقتى انا عارف ان فى مشكلة عدم تثبيت المكنة على الارض وعمالة تتحرك وتوقع منك ، طب ما تيجى نفك كرتيرة الزيت وطبعا دى سهلة جدا عن طريق فك مسامير الداير كلها وننيم المكنة على جنبها ونفك طلمبة الزيت عشان ما تتكسرش وطلع ترس طلمبة الزيت عشان ما يضعش فى الورشة

ونحط المكنة على ترابيزة نضيفة على الجزء السفلى ليها (ناحية البي يلات)

تعالى بقى نفك الهد ودة بيتطلب اننا نفك غطاء التاكيهات وبنفس مفتاح العزم الالمانى نفك وش السلندر عن طريق اننا نهوى جميع المسامير بالتتابع المعروف ومن ثم نفكها كلها ودلوقتى بقى عندنا وش السلندر مفكوك والبساتم باينة ، بنظرة الخبير نبص على سطح البساتم ونشوف نسبة الكربون على سطح البستم هل جميعها متساوية ام ان فى بستم او اكثر نسبة الكربون علية اكثر ولا كلهم عليهم نسبة كربون متحجر وعامل تخانة فوق وش البستم لان طبعا دة لة مدلول لو ان فى بستم السطح بتاعة علية نسبة كربون عالية ومتحجرة دة بيدل على ان البستم بيطولة زيت اما من الشنابر واما من الصبابات

نخلى كل بستم فى النقطة الميتة العليا ونحرك البستم بادينا حركة افقية عشان نشوف خلوص البستم فى الشميز ونكرر دة مع الاربع بساتم

اما بخصوص وش السلندر انا مش عاوز اشوف حاجة فية لانى ناوى اعمل كل حاجة فية من قواعد ودلايل وطقم صباب عشان دة مخ المكنة ولازم يتعمل زى ما قال الكتاب وخصوصا ان التكلفة مش عالية دنا بتعامل مع 8 قواعد وطقم صبابات بـ 90 جنية الفرنساوى اللى هو احسن حاجة

ما تنساش تحل المانفول من وش السلندر ملوش لزمة يروح للخراط

هانبدا نفك البيلات والبساتم من البلوك ودلوقتى بقى اسمة بلوك مش موتور

طبعا هاننيم البلوك على الجنب ونفك مسمارين البي ييل رقم 1 ( من ناحية وش التقسيمة ) ونطلع قاعدة البي يل بالسبيكة بتعتة وبخشبة الشاكوش ندق على ذراع البيل عشان يخرج بالبستم بتاعة من البلوك وبعدين نركب نص قاعدة البيل المحلولة ونشبط المسمارين بتوعها فى باقى البيل ونكتب علي سطح البستم بزنبة ارقام رقم 1 فكدة يبقى عندنا البستم بالبيل كامل والبستم مكتوب علية رقم 1 ومتخفش البيلات مش هاتتلخبط مع بعضها لانها مكتوب عليها الارقام

بس فى حاجة مهمة اوى هنا اية هى ؟؟؟ اتجاة البستم فى الشميز ،،،، فية بساتم ( الاصلى ) بيكون مرسوم عليها سهم على سطح البستم بيشاور على مكان معين فى البلوك لو مكنش اعملة انت او شوف تجويف الصبابات على سطح البستم فى اى اتجاة عشان فى التقفيل بامر الله نراعى اتجاة البستم فى الشميز ، وبنفس الطريقة هانفك الـ 4 بيلات

بكدة انت جاهز تودى الشغل للخراط وتعالى نتكلم شوية فى اعمال الخراطة للاجزاء المختلفة للموتور

اولاً لازم تنقى خراط سمعتة كويسة والمكن بتاعة متعاير وجديد لان نسبة نجاح العمرة 99% بتعتمد على توفيق ربنا والخراط

هو اية اللى ممكن يتم علية اعمال الخراطة وهابدا بالوش ، لو كراسى عامود الكامة مبوشة الخراط بيعملها كراسي ، طبعا الخراط هينفض الصبابات واتفقنا اننا هانغيرهم بجديد نوع فرنساوى وهينفض القواعد عدد 8 وهاينطر الدلايل عدد 8

بالنسبة للدلايل وطبعا انت عارف ان الصباب بيتحرك جوة الدليل حركة ترددية او راسية ومعلهوش حمل اوى لكن الدليل نفسة ممكن يسرب زيت داخل غرفة الاحتراق ،،،، صحيح ان الدليل بينزل شحط فى مكانة انما مش كفاية انا عاوز أأمن شغلى مليون فى المية فبطلب من الخراط انة يعمل دلايل بكراسي واسمها دلايل يابانى وهى عبارة عن ان جسم الدليل من الخارج بيعمل فية سن رفيع جدا بارز عن جسم الدليل عشان اما يشحط الدليل فى المكان بتاعة فى وش السلندر السن دة يعمل زى اويل سيل معدنى يمنع مية فى المية اى زيت يتسرب لغرف الاحتراق

عمل 8 قواعد للصبابات ودى بيعملها على المخرطة وبعدين بيعملها فريزة وبعدين بيريح الصباب على القاعدة بتعتة بالرودية

لو ان وش السلندر فى تاكل من مجارى المياة الخراط بيلحم التاكل دة وبيقشط مكانة ودة المسموح بعملة فى الوش انما يقشط الوش بالكامل عشان مقفع والكلام دة مرفوض بالنسبة لى والحل البديل وش سلندر استيراد ستاندر

دى تقريبا جميع اعمال الخراطة فى وش السلندر وبيتغسل بعدها غسيل من نار والخراط بيجيب شنيور وبيركب فية فرشاة سلك وبينضف مجارى الهواء والعادم من اول مكان المانيفولد لغاية الصباب وبيرجع بيلمع زى الجديد ودى نقطة مهمة جدا عشان اى رواسب بتعمل ممانعة للهواء الداخل للموتور او العادم الخارج منة ونرجع نغسل الوش تانى بالجاز بعد التقفيل النهائى ونسيت اقول لحضرتك انك مش هتعتمد على جلد الصباب اللى بيجى فى طقم الجوانات لان خامتة مش تمام وانما بنجيب جلد صباب فرنساوى وبندية للخراط او هو بيكون عندة عشان ما يعطلش على الزبون

يستحسن اما تيجى تستلم الوش من الخراط تخلية يختبرة ادامك والطريقة انة بيحط جااااز مش بنزين على الصبابات ونتركها لمدة كافية ونشوف لو فى ترشيح للصباب من عدمة يعنى كمية الجاز لازم ميحصلهاش اى فقد .. وبكدة يبقى الوش بتعنا تمام التمام

بالنسبة للبساتم .. أولاً مفيش أى اعمال خراطة بتتم على البستم .. لازم بالعين نشوف جسم البستم من برة هل فى خرابيش او مجارى نتيجة الاحتكاك او حتى فى جزء مكسور من البستم لان من المفروض ان جسم البستم من الخارج يكون بيلمع ، كمان سطح البستم لازم يكون متساوى ومفهوش اى كسر

نيجى بقى لنقطة فى غاية الاهمية

مجارى الشنابر .. احنا عمالين نتكلم ان المكنة عاوزة طقم شنبر وبتنفخ زيت والكلام دة ، طب انا اية يضمنلى ان الشنبر الجديد اللى هاركبة هايمنع الزيت المتسرب لغرفة الحريق ، هاتقولى دة جديد ومش متاكل هارد عليك واقولك طب ما يمكن مجرى الشنبر فى جسم البستم هى اللى متاكلة ومبوشة يعنى مهما حكمت الشنبر من جدار الشميز وفى بوش فى البستم نفسة هايخلى الزيت يتسرب لغرف الحريق

طب الحل اية ؟؟؟؟؟؟؟؟؟؟

هانسيب الحل شوية كدة ونتكلم على الشمايز .. حاجة من اتنين اما اننا هانشغل البستم القديم ونعمل شميز جديد على البستم ، او نجيب طقم بستم جديد زيرو 10 على اعتبار ان البستم القديم كان ستاندرد ونوسع فى الشمايز الموجودة

طب الحالة رقم 2 دى سهلة بستم جديد وطقم شنبر جديد نفس الزيرو او المقاس وهانوسع فى الشمايز الموجودة وخلصنا على كدة

طب لو هنشغل البساتم القديمة لانها سليمة ومش مكسرة ولا مجرحة وكان فيها بوش فى مجارى الشنابر وبالاخص شنبر الزيت !!!!!! ساعتها لازم نجيب فرش لشنبر الزيت ودة بيكون عبارة عن سلك زنبركى او سلك واخد شكل تمنيات وسبعات معرج السطح يعنى ووظيفتة انة بيخلى شنبر الزيت مضغوط لبرة شوية وبيملى البوش الموجود مكان شنبر الزيت ، ودة الحل اللى اجلناة فى الفقرة السابقة

عاوزين بقى نشوف الشنبر اللى احنا اشترناه وطبعا بعد عمل شمايز جديدة او توسيع الشمايز الموجودة هل مناسب هلى محمل زيادة

بمنتهى البساطة نركب الشنبر ( واحد تلو الاخر ) فى الشميز وعشان نضمن استواؤة بوش البستم ندخلة الى منتصف الشميز ونشوف الخلوص بتاع الشنبر كام ملى عن طريق الفيلر ومن هنا تقدر تحكم على الشنبر قبل التركيب مناسب من عدمة والخلوص بتاع الشنبر لا يجب ان يتعدى 0.5 ملم فى اى جزى من اجزاء الشميز من اول الشميز لاخرة ودة ترجع لمدى مهارة الخراط لازم الخلوص يكون واحد مفهوش اى اختلاف

وبكدة يبقى خلصنا اعمال الشمايز والبساتم والشنابر ، بالنسبة بقى للكرنك وكراسى التحميل والهلايل ، طبعا احنا بنعمل عمرة كاملة واتفقنا ان الموتور بتعنا بيرزع ، وزى ما انت مودى البلوك للخراط راكب فية الكرنك ، بيتم فك الكرنك وعمل تجليخ ودة الاسم الصح للكرنك مش خراطة ، بيتم عمل تجليخ لاماكن البي يلات وتجليخ لاماكن الكراسي ، طب السبيكة اللى راكبة ستاندر يبقى هانجلخ ونجيب سبيكة زيرو عشرة او على حسب التاكل الحادث فى ركب الكرنك ممكن الخراط يقولك زيرو عشرة مش هاتنفع لان الكرنك فى تاكل كبير هاتلى زيرو عشرين ومالة ساعتها هاجيب طقم سبيكة بالمقاس المطلوب من الخراط لانى هاستلم شغلى منة واحسن سبايك موجودة هى سبايك المصانع الحربية اسمها سبيكة مصانع ودى هاشتريهم واوديها للخراط او ممكن يكون الخراط نفسه عنده منها جديد وهو بيقوم بتجليخ الكرنك وبيركب الكراسي وبيقرط عليها انما ما يمنعش انك تعيد الرباط على كراسي الكرنك للتاكد ، وبتستلم منة الكرنك بيدور بمنتهى السلاسة على كراسية وما فيش اى خلوص بين الكرنك وبين الكراسي لان الهلايل راكبة فى مكانها بالمظبوط ومستريحة كل ما عليك تلف الكرنك لازم يكون زى الملبن حاجة كدة تستمتع بيها وبعد كدة هافك بايدى الكراسى تانى عشان انضف مجارى الزيت حد عارف مش يمكن فى مجارى مسدودة او شبة مسدودة مش بتوصل زيت للكراسي لا يا عم انا انضفها بالهواء بايدى احسن هو انا وراى حاجة

متهيالى كدة خلصنا جميع اعمال الخراطة للمكنة .. نيجى بقى للتقفيل
اولاً لازم كل مسمار فى الموتور يتغسل بالجاز غسلة محترمة اوى واى مسمار المخ بتاعة متاكل لازم يتغير واى مسمار السن بتاعة مفوت لازم يتغير وخلى جنبك علبة شحم ومزيتة
وعاوز اكرر تانى على النضافة لانها نقطة غاية فى الاهمية وتخلى فى ايدك فوطة صفرا نضيفة واى حاجة تشوفها تمسحها بالفوطة الصفرة اكنك موسوس بالظبط ولازم تشتغل فى مكان نضيف على ترابيزة نضيفة اوى واوعى من التراب حتى اللى فى الجو

اول حاجة بتتقفل هى الكرنك بتجيب الكرنك وتركب الكراسى بتعتة واكيد حضرتك بالمسدس الهواء نضفت كل مجارى الزيت الموجودة فى البلوك وخصوصا مجارى الزيت المغذية لكراسي الكرنك بما اننا شغالين فيها دلوقتى

وطبعا وانت بتركب الكراسي لازم تديها زيت قبل التقفيل وانا بصراحة مش فاكر عددهم اما انهم 3 كراسي او 4 مش فاكر بصراحة وعاوزك بقى تربطهم رباط من نار طبعا بمفتاح لقمة وماسورة وتحرق عليهم بضمير اوى اوى

ركبنا كدة كراسي الكرنك والهلايل ولازم نختبر لف الكرنك بسهولة وسلاسة

تعالى بقى نركب البستم رقم 1 اللى اتفقنا انة من ناحية وش التقسيمة

طبعا البستم راكب فى ذراع البيل ونص السبيكة العلوى بالبيل راكبة وانا حاطط زيت على جدار الشميز وفى واحد معاك بيساعدك

هنركب شنبر الزيت وحلقتين الضغط وخلى بالك من اتجاة شنبر الضغط اما ان فى حرف بيكون لفوق او بايدك تشوف تجويف الشنبر هتلاقية لفوق عشان يضغط ولكن معظم الشنبر بيكون فى حرف هجائى ودة الدليل بتاعك انة لفوق

طب اتجاة فتحات الشنابر ازاى؟؟؟؟؟؟؟؟؟ دى نقطة غاية فى الاهمية والاجابة انها لازم تكون على شكل نجمة مرسيدس وبعيدة عن بنوز البيلات ،،، حذارى انك تركب فتحة الشنبر اعلى بنز البيل ادامك محيط البستم كولة اختار اى مكان لكن يكون بعيد عن بنز البيل وتعمل نجمة علية بالشنبر اللى بعدة وشنبر الزيت

طبعا انت حطيت قليل من الزيت على جسم البستم وعلى البنز ،،،،، نجيب زرجينة البساتم ونركب فيها البستم ونخلى بالنا اوى من اتجاة البستم لو تفتكر السهم او اتجاة تجويف الصبابات وبضهر الشاكوش ندق دق مكتوم على سطح البستم لغاية اما يبقى فى النقطة الميتة العليا وزميلك اللى معاك يكبس مكان البيل على الكرنك وبعدها تربط سبيكة الكرنك وتقرط عليها من نار بالماسورة وباكد عليك الرباط يكون من نااااااااااااااار اوعى تتهاون او تخاف ان المسمار يفوت انا عندى يفوت احسن ما يهوى من الشغل وعادة بيكون فية وردة تحت المسمار بتعمل عمل التيلة عشان المسمار ما يفكش من اثر الشغل وبعد اتمام عملية الرباط نلف الكرنك لفتين تلاتة عشان نعرف ونضمن ان البستم شغال فى الشميز بتاعة زى السكينة فى الحلاوة ،،،،، تذكر زى السكينة فى الحلاوة يعنى بدون مجهود فى الدوران وبدون صوت البستم لازم يطلع وينزل سلسل وبتناغم وتحس بية وانت بتلفة كدة وبنفس الطريقة هانسقط الـ 3 بساتم الباقيين

نفسي ربنا يبارك فى الوقت ونكمل تقفيل المكنة

دلوقتى ممكن نركب طلمبة الزيت عشان نقفل الكرتيرة لحسن رمل او تراب يدخل جوة المكنة

هاتقولى المكنة مش متزنة وعمالة تروح يمين وشمال منى ومش عارف امسكها اؤلك ومالة اتعب انت شوية وحاول تحطلها قرمة خشب من هنا ولا من هنا عشان تتزن انما اسيب المكنة معرضة للهوا لا !!!

تعالى بقى نركب وش السلندر

طبعا احنا جيبين طقم جوانات بس بصراحة مش تمام انا هاشترى جوان وش سلندر لوحدة عشان اللى بيجى فى الطقم مش برتحلة بصراحة

وعشان نقفل الجوان تمام لازم نديلة جملكة عشان المياة ومش عاوز افكرك ان سطح البلوك من فوق بيبرق وما فيش اى رواسب لجوان وش السلندر القديم يعنى معمول بصنفرة ناعمة

خلاص ادينا جملكة للجوان وللبلوك واتاكدنا ان جميع قلاووظات المسماير مفيهاش جاز ومتنفضة بالهواء تعالى نحرر الـ 4 بساتم يعنى نخليهم مش فى النقطة الميتة العليا ونركب الوش بتعنا ونربط المسامير رباط خفيف ولما نبدا نقرط نقرط من المنتصف وللخارج بشكل حرف اكس

ممكن نركب الفولام على الكرنك بعد لما نركب اويل سيل الكرنك الخلفى ومش لازم تديلة جملكة بس تركبة صح اوعى يكون مش راكب كويس لحسن يجيب زيت ولو عاوز تديلة جملكة يبقى من على المحيط الخارجى بتاعة طبعا هتحط الخابور مكانة وتركب الفولام وتربط مسامير الكرنك برباط من نااااااااااااااار بنفس طريق الفك اللى هى نص السبيكة القديمه وممنوع منعا باتا تلف الكرنك الا لما نركب سير الكاتينة

حط الاسطوانة وبعدين الدسك وبنظبط مركزية الاسطوانة بعامود دركت معرفش بقى هاتجيبة عندك ازاى

ونتقابل فى الفقرة الجاية بتقفيل الكاتينة

نبدا بتركيب طنبورة الكرنك الامامى بعد تركيب اويل سيل الكرنك الامامى هانحط الخابور مكانة ونركب الطنبورة ونربط المسمار بتعها ونربط بلية الشداد بس منحرقش عليها

هانظبط العلامة بتاعة الطنبورة على جسم البلوك عبارة عن شرط ببدن الطنبورة تقابل شرط على البلوك ونفس الطريقة زنبة ترس الكامة تقابل زنبة معدنية على الصاجة الخلفية لوش التقسيمة مدببة لاسفل ، نركب السير ونشدة عن طريق بلية الشداد ونختبر شد سير الكاتينة بالايد يكون عامل سوستة ولا مشدود اوى ولا مرخى اوى وممكن نقفل الوش البلاستيك الاصفر ،،، طب ما تيجى نسقط الاسبراتير بالمرة طالما احنا محررين البستم رقم 1 والطريقة سهلة اوى

نركب ترس الاسبراتير او اسمة ترس طلمبة الزيت والترس دة بيستمد حركتة الخارجية من عامود الكامات ومن الداخل يوجد مشرشر بيلفف طلمبة الزيت وعامود الاسبراتير

نجيب وش الاسبراتير ونحدد سلكة البوجية رقم واحد هتلاقيها مكتوبة على وش الاسبراتير (1 ) ونسقط الاسبراتير على الوضع دة واتجاة الشاكوش على سلكة البوجية رقم 1 ونربط المسمار المثبت للاسبراتير بس رباط بالايد مش بالمفتاح

تقفيل ادوات التغذية

طبعا اى حاجة بتركب فى البلوك بتتقفل بجملكة
هانركب طلمبة المياة
طلمبة البنزين
الاسبراتير خلاص ركبناة
المانيفولد
الكربراتير
وممكن ندور المكنة على الارض دلوقتى للإختبار و للتلين بعد تركيب دورة المياة ردياتير وخراطيم السحب والطرد

وطبعا المارش بس هانشيلة تانى اما نيجى نسقط المكنة فى الحوض

مش لازم نركب الشكمان فى عملية التليين ، واحنا بنليين لازم نختار اوقات الليل ووش العربية للبحرى ، اثناء التليين لازم جركن مية جنبك وكل شوية تزود الردياتير
بنليين ببنزين 80 افضل
فى بداية التليين ندور ربع ساعة ونبطل نص ساعة لغاية اما الموتور يدور بانتظام وسلاسة
لو عملنا عمرة كاملة مش اقل من صفحتين بنزين للتلين على الواقف ، وبعدها مشوار على طريق مفتوح ليلا مش اقل من 200 كم

نظبط تاكيهات قبل التدوير

نعيد رباط وش السلندر بعد 1000 كم مع ظبط تاكيهات

فى النهاية اتمنى تكونوا استفدتم واى سؤال تحت امركم

الموضوع منقول من أحد السادة الأعضاء ،،،،

----------------------------------------------------

وده فيديو للأستاذ أدهم حسام عامل فيه عمره كاملة للموتور بنفسه

بتاع عربيته فيات 127

عمرة كاملة للموتور

الجزء الأول

الجزء الثانى

----------------------------------------------------

يارب يكون الموضوع عجبكم ...

مع تحياتى

Sameh Ahmed

طريقة تغيير فرش السقف

noreply@blogger.com (sam4ever2010) — Mon, 21 Mar 2016 15:30:00 +0000

بسم الله الرحمن الرحيم

الناهردة هشرحلكم طريقة فك وتغيير وتركيب فرش السقف للعربية

أولاً الخامات المطلوبة :

- 2 متر جلد .. اللون على حسب الاختيار

- علبة غراء سريع نص كيلو ( كله )

- فرشاة دهان صغيرة

- مقص كبير

ثانياً مرحلة التنفيذ :

أول حاجة هنبدأ بيها اننا نفصل الجلد الجديد عشان بعد ما نفك القديم نقدر نركب على طول .. التفصيل هيبقى عبارة عن عمل ثنيات ( مجارى ) للأسياخ عشان تمسك الجلد فى السقف .. هناخد المقاسات بطريقتين .. اول حاجه ممكن ناخد المقاس بالمتر قبل مانفك الفرش القديم ونعلم على ظهر الجلد الجديد وثانى طريقة اننا ممكن بعد ما نفك الجلد القديم نعلم بيه المقاس عالجديد ( فى حالة لو الجلد القديم مشدود صح ) .. بالنسبالى خدت المقاسات من العربية افضل لإن الجلد القديم كان مقاسه مش مظبوط والسقف كان بيهبط على دماغى مع الهواء عالطريق .. وللأسف عشان معنديش ماكينة خياطة .. خدت الجلد وروحت بيه لأقرب ترزى خليته فصلى الجلد بالمقاسات اللى اديتهاله .

ثانى حاجة بعد ما خلصنا من تفصيل الجلد الجديد هنبدأ نفك البربريز الأمامى والخلفى وطريقة الفك سهله جداً هنحتاج فيها مفك عادة ونبدأ نخرج الجوان الكاوتش من جوه العربية واحدة واحدة ونزق الازاز لبره لحد مايخرج كله ، بعد كدة هنبدأ نفك كاوتش الأبواب لحد النص تقريباً ومننساش نفك مقابض الاجناب ومراية الصالون والشماسات ، الخطوة اللى بعديها هنفك فرش السقف الملزوق بحروف الأبواب وحروف الزجاج الامامى والخلفى ، بعد كدة هنبدأ نسحب الاسياخ الموجودة فى فرش السقف ونخلعها من الجلد بالكامل وعددهم تقريباً 5 اسياخ ، وبعد كده هنبدأ نركب الاسياخ فى الجلد الجديد تانى ونعلقهم فى السقف بنفس الطريقة اللى فكيناهم بيها ، بعد كده هنبدأ ندهن حروف الابواب وحروف البربريز الامامى والخلفى بالغراء السريع ونسيبها حوالى 15 : 20 دقيقة وبعد كده هنبدأ نشد الجلد عالحروف ونلزقه والزيادات طبعاً هنبقى نقصها فى الأخر خالص .. وفى النهاية هنركب البربريز الامامى والخلفى تانى وده هيبقى عن طريق حبل دوبار قماش ( حبل غسيل ) ويفضل الحبل يكون من القماش افضل من البلاستيك عشان يكون ناعم عالكاوتش بتاع البربريز وميقطعوش .. الحبل هيتلف حوالين الكاوتش كله ونبدأ نحط البربريز فى مكانه ونبدأ نشد الحبل من جوه العربية وحد تانى يكون واقف معاك بره يكبس بإيده على الكاوتش واحده واحده وانت بتسحب الحبل عشان تدخل الشفف الكاوتش اللى خرجناها بالمفك واحنا بنفكه فى الاول خالص لحد ما الازاز يركب كله تمام .. وطبعأ عشان اكمل الجميل معاكم .. الشرح ده كله انا صورته صوت وصورة بالفيديو عشان ابسط الطريقة لكل الناس .. ومبروك مقدماً

فيديو الشرح

----------------------------------------------------

يارب يكون الموضوع عجبكم ...

مع تحياتى

Sameh Ahmed

الأوراق المطلوبة لإتمام إجراءات الترخيص والتجديد ونقل الملكية ورخص القيادة أول مرة

noreply@blogger.com (sam4ever2010) — Mon, 29 Feb 2016 16:12:00 +0000

بسم الله الرحمن الرحيم

كتير مننا بيكون عايز يعمل رخصة لأول مرة ومش عارف ايه الاجراءات ولا الاوراق المطلوبة ايه وساعة لما بيروح المرور بيبقى تايه ومش عارف يروح فين ولا يعمل ايه .. وناس تانية بتكون شارية العربية لسه جديدة زيرو وعايزة تنقل ملكية او عايزة ترخص العربية لأول مرة .. وفى اللى رخصتهم انتهت وعايز يروح يجدد ومش فاكر هيعمل ايه او ايه الإجراءات المطلوبة .. خلاصة الكلام .. الموضوع ده ان شاء الله هيكون شامل كل التفاصيل اللى ممكن تحتاجوها فى المرور .

-----------------------------------------------

أولاً : الأوراق المطلوبة لإستخراج رخصة قيادة لأول مرة

قبل التوجه للإدارة المرور التابع لها عليك اولا اتباع الأجراءات الآتيه :

أولاً : تجهيز الأتى :

تجهيز 2 صور شخصية حديثه
توجه بالصور والبطاقة إلى أى مستشفى أو مستوصف طبى واستخرج شهادة باطنة وشهادة نظر + فصيلة الدم

ثانياً : التوجه لإدارة المرور التابع لها مع تجهيز الأوراق التالية :

شهادة إتمام المرحلة الدراسية ( ابتدائية - اعدادية - ثانوية - دبلوم - محو اميه كمبيوتر )
بطاقة الرقم القومى أو جواز سفر رقم قومى أصل + 2 صورة
شهادة باطنى + نظر + فصيلة الدم
ملف ورقى + نموذج 256 مرور ( من الخزينة )
عدد ( 2 ) صورة شخصية
شراء ورقة اختبار اشارات كمبيوتر قبل الإختبار ( من الخزينة )

ثانياً : الأوراق المطلوبة لتجديد رخصة قيادة خاصة أو دراجة نارية

الرخصة القديمة
بطاقة الرقم القومى أو جواز سفر رقم قومى
نموذج 256 مرور + شهادة مخالفات
شهادة باطنى + نظر + فصيلة الدم
عدد ( 1 ) صورة شخصية

ثالثاً : اجراءات ترخيص السيارة الجديدة

الإفراج الجمركى ويتم الاستعلام عنه من موظف الإفراجات أو تحويله من الإدارة العامة لمرور القاهرة ( وحدة سكرتارية ) فى حالة عدم وروده أو شهادة بيانات مؤمنة إذا كان الإفراج مجمع لأكثر من سيارة
خطاب المرور الصادر من التاجر إذا كانت المركبة مشتراه من أحد معارض السيارات وأن يكون معتمد بخاتم شعار الجمهورية
فحص السيارة فنياً بعد شراء نموذج الفحص من خزينة الوحدة
التأمين على المركبة تأميناً إجبارياً لدى إحدى شركات التأمين ( مصر للتأمين - رويال - إيماج - البيت المصرى السعودى - وثاق - المشرق - أروب ) ويراعى أن يكون التأمين بعدد السنوات التى ترغب ترخيصها ( عام - عامين - ثلاث أعوام )
سداد الضرائب المقررة لخزينة الوحدة عقب تقديرها من الموظف المختص
نموذج 251 مرور ويتم شراءه من خزينة الوحدة ويكون عدد النماذج بعدد السنوات الراغب فى ترخيصها
تقدم الأوراق للموظف المختص مصحوبة بعدد واحد دوسيه ورقى + 2 صورة بطاقة رقم قومى أو جواز سفر سارى المفعول الإلكترونى الجديد

رابعاً : إجراءات نقل الملكية

عقد البيع الموثق بالشهر العقارى + رخصة التسيير سارية المفعول أو شهادة البيانات المؤمنة الصادرة من المرخص بها المركبة صلاحيتها لمدة ثلاثون يوماً
شهادة براءة الذمة ( شهادة المخالفات ) الصادرة من نيابة المرور القادم منه المركبة صلاحيتها لمدة ثلاثون يوماً
فحص السيارة على نموذج الفحص الفنى ويتم شراءه من خزينة الوحدة وصلاحيتها لمدة ثلاثون يوماً
نموذج 251 مرور ويتم شراءه من خزينة الوحدة ويكون عدد النماذج بعدد السنوات الراغب فى ترخيصها
ملحق وثيقة التأمين الإجبارى ويتم عمله بأحد شركات التأمين ( مصر للتأمين - رويال - إيماج - البيت المصرى السعودى - وثاق - المشرق - أروب ) بإسم المالك الجديد وبدون رقم لوحات معدنية وذلك فى حالة إذا كانت الرخصة سارية المفعول ويراعى أن مدة التأمين تكون بعدد سنوات الراغب الترخيص بها ( عام - عامين - ثلاث أعوام )
تقديم الأوراق للموظف المختص مصحوبة بعدد واحد دوسيه ورقى + 2 صورة بطاقة رقم قومى أو جواز سفر سارى المفعول الإلكترونى الجديد

ملحوظة هامة

إذا كان المتقدم وكيلاً من المالك بموجب توكيل رسمى ضرورة إحضار أصل التوكيل وصورة ضوئية من بطاقة المالك الرقم القومى

خامساً : إجراءات تجديد المركبة

شهادة براءة الذمة ( شهادة المخالفات ) الصادرة من نيابة المرور صلاحيتها لمدة ثلاثون يوماً
نموذج 251 مرور ويتم شراءه من خزينة الوحدة ويكون عدد النماذج بعدد السنوات الراغب فى ترخيصها
التأمين على المركبة تأميناً إجبارياً لدى إحدى شركات التأمين ( مصر للتأمين - رويال - إيماج - البيت المصرى السعودى - وثاق - المشرق - أروب ) ويراعى أن يكون التأمين بعدد السنوات التى ترغب ترخيصها ( عام - عامين - ثلاث أعوام )
فحص السيارة فنياً إذا مضى 3 سنوات على تاريخ أخر فحص فنى
سداد الضريبة المقررة بخزينة الوحدة عقب تقديرها من الموظف المختص

ملحوظة

مواعيد العمل يوميا من الساعة الثامنة صباحاً وحتى الساعة الثامنة مساء عدا يوم الخميس فينتهي العمل في الثانية مساء

----------------------------------------------------

يارب يكون الموضوع عجبكم ...

مع تحياتى

Sameh Ahmed

تعديل فانوس فيات 128 الخلفى الي لمبات ليد

noreply@blogger.com (Unknown) — Sun, 07 Feb 2016 22:33:00 +0000

بسم الله الرحمن الرحيم

الاخوه الكرام اصدقائي الاعزاء مالكي 128 موعدنا اليوم مع تعديل الفانوس الخلفى للعربية من لمبات عادية الى لمبات ليد بأى شكل احنا عوزينه و بتكلفه قليله جدا مقانه بالاسعار فى السوق

الموضوع للاخوه المبتدئين لذلك انا استخدمت مواد بدائيه جدا علشان تبقي متوفره و رخيصه فى نفس الوقت و اللى حابب يغير لحاجه افضل له حريه الاختيار

سيكون الموضوع مقسم الى ثلاث اجزاء سيتم ربطهم قريبأ بعد الفنش النهائى ان شاء الله و أى استفسار انا تحت أمركم

- الجزء الاول الادوات والخامات اللازمه وأماكن الشراء والأسعار

- الجزء التانى تصميم الشكل و تركيب الليدات و التقفيل

- الجزء الثالث تركيب الفانوس فى السياره و اعاده توصيله

--------------------------------------------------------

الجزء الاول
الادوات والخامات اللازمه و أماكن الشراء و الأسعار

1- وش الفانوس الشفاف الى هنستخدمه متوفر منه ثلاث الوان الشفاف و الاحمر و الفاميه و مكان البيع فى مول التوفقيه وسط البلد شركه هبه بلاست الدور التانى .. الطقم مكون من عدد 2 وش فانوس خلفى .. سعر الطقم الشفاف 20 جنيه - سعر الطقم الاحمر 20 جنيه - سعر الطقم الفاميه 55 جنيه .. بالنسبالى أنا فضلت الطقم الشفاف

--------------------------------------------------------

2- بالنسبة للمبات الليد الى هنستخدمها فى الاضاءه متوفر منها جميع الالوان اختار ما تشاء اهم شئ و انت بتشتريها تقول للبائع عاوز 3 فولت لإن يوجد منها 5 فولت و احنا المقاومه الى هنشتغل بيها ل 3 فولت أرجو الانتباه جيداً من هذه النقطة .. مكان البيع باب اللوق من ميدان التحرير محلات كتير بتبيعها انا جبت من محل اسمه حسام عبد الشافى .. السعر 20 جنيه لل 100 ليد العدد بيتقاس على حجم الصوره الى هترسمها على الفانوس الواحد حوالى 120 ليد الى 150 ليد .. انتبه من الفرق بين 3 فولت و 5 فولت .

--------------------------------------------------------

3- ورق كانسون هنستخدمه علشان يقفل اللون الشفاف بتاع الوش الى جبناه .. متوفر منه اكتر من لون اختار اللون اللى يريحك بيتباع فى الفجاله ميدان رمسيس او مكتبه سمير و على او مكتبه المعايرجي او اى مكتبه كبيره سعر الورقه مقاس A4 ( اكبر من الوش ) جنيه و نصف للورقه .

--------------------------------------------------------

4- المقاومه اللى هنستخدمها عبارة عن مقاومة حراريه بمقدار 390 اوم / 5 واط حراريه ودى موجودة برضه فى باب اللوق ومحلات كتير بتبعها انا جبت من محل اسمه البير بجوار محل حسام عبد الشافى .. دى فايدتها تقليل فولت البطاريه من 12 فولت DC الى 3 فولت DC علشان اللمبه الليد متحرقش .. وهنحتاج منها 8 قطع سعر القطعه 3 جنيه تقريبا .

--------------------------------------------------------

5- ورق ابيض A4 عادى بيتباع فى اى مكتبه هنحتاجه علشان نرسم عليه الرسمه للتجربه بالقلم الرصاص

--------------------------------------------------------

6- قطعه كرتون هنقصها على مقاس الفانوس ودى اللى هنثبت عليها اللمبات الليد ونلحم عليها .. إخترتها كرتون علشان سعرها رخيص ومتوفره فى أى مكان .. فى حلول تانيه طبعاً كتير بس أغلى و أماكنها بعيده .. وأنا اخترت أسهل حاجه عشان محدش يدوخ كتير .

--------------------------------------------------------

7- إبره خياطه بتاعت المنجد موجوده عند اى حد بتاع خردوات و سعرها الواحده الكبيره بجنيه .. هات الكبيره بتاعت اللحاف علشان تريحك .. ودى هنستخدمها لتخريم الكرتون و الورق الكانسون علشان نركب رجول اللمبات الليد استعداداً للحام

--------------------------------------------------------

8- قلم ماركر ماركة Yoken هتشترى على حسب لون الورقه الكانسون الى هنستخدمها لو لونها إسود هتجيبه إسود .. لو لونها أحمر هتجيبه أحمر .. بيتباع فى اي مكتبه سعره 7 جنيه او 5 جنيه وده هنرسم بيه الخطوط على الورقه الكانسون علشان نركب عليه اللمبات و تكون خط واحد .

--------------------------------------------------------

9- قصدير لحام البكره سعرها 10 جنيه هنستخدمه فى لحام اللدات و المقاومات مكان البيع باب اللوق .. محلات كتير بتبيعها انا جبت من حسام عبد الشافى .

--------------------------------------------------------

10 : كاويه لحام هنستخدمها فى لحام اللمبات من الخلف .. مكان البيع باب اللوق محلات كتير بتبعها انا جبت من حسام عبد الشافى سعرها بتبتدى من 8 جنيه الى 100 جنيه اشترى ام 15 جنيه حلوه و تكون 80 واط او 100 علشان تنجز معاك .

--------------------------------------------------------

11- سلك توصيل يفضل أن يكون رفيع مثلاً زى سلك شاحن موبايل قديم هنستخدمه فى عمل كبارى توصيل بين اللمبات

--------------------------------------------------------

12- مفكات صليبه و عاده هنستخدمها لفك و تركيب الكشاف

--------------------------------------------------------

13- انبوبه سيلكون شفاف مش ابيض بتتباع عند بتاع الحدايد و البويات او من أى موان سعرها 12 جنيه .. هات الشفاف أفضل علشان الابيض هيبقي وحش وهيبان فى الفانوس .

--------------------------------------------------------

14- اسلاك توصيل 1 ملى من عند أى كهربائى هات خمس أطراف كل طرف لون مثل الصوره و الطول نص متر و لو الراجل رخم عليك هات متر وخلاص .

-------------------------------------------------------

15- بكرة شريط لحام ماركة غزالة من عند اى كهربائي هات الكبيره سعرها 3 جنيه هنلحم بيها الاطراف فى العربيه .

--------------------------------------------------------

والى هنا هنكون خلصنا الجزء الاول من الشرح أسف للتاخير عليكم لطرح الموضوع بالكامل بس والله غصب عنى بقالى حوالى ساعتين بجهز الموضوع فأرجو منكم دعوه صغيره فى ظهر الغيب .

اخوكم الصغير وليد .. مهندس تطوير تكنولوجيا .

انتظرونا غدا فى الجزء الثانى من الموضوع .. الجزء التانى تصميم الشكل و تركيب الليدات و التقفيل .

--------------------------------------------------------------------

بسم الله الرحمن الرحيم

الاخوه الكرام انا اسف جدا على التاخير فى عرض الجزء التاني من موضوع التعديل بسبب بعض الظروف فى العمل و العائله و اتمني من الله ان يتتم علينا صالح الاعمال

ان شاء الله اليوم هنكمل باقى التعديل و هو طريقه تركيب اللمبات على الرسمه و طريقه توصيلها ببعضها و طريقه تركيب المقاومه التى بتخفض الكهرباء من 12 فولت و هو خرج بطاريه العربيه الى 3.5 فولت و هو فولت اللمبات
بسم الله نبدا
اولا لابد من التعرف على الليد او اللمبه الى هنستخدمها فى التشغيل علشان باقى الشرح هيترتب على كده

نلاحظ من الصوره ان الليد له طرفين واحد صغير و ده الطرف السالب و طرف اخر طويل و هو الطرف الموجب و لازم فى التركيب نراعي ان لازم الطرف الموجب الطويل يتلحم مع الطرف الطويل مثله
و الطرف القصير الى هو السالب يتلحم مع طرف اخوه قصير سالب
ولا يجوز ابدا فى حالتنا هنا فى هذا التعديل لحم اطراف موجب مع اطراف سالب او اطراف طويله مع اطراف قصيره وهنا عرفنا مواصفات اللمبه الى هنتعامل معاها فى الشغل ....

ملحوظه مهما جداااا

يوجد لدينا اربع رسومات و كل رسمه هتكون مثلا بلون مختلف وهما النور الصغير و الاستوب و الاشاره و المرشدير
و كل رسمه هيتم توصلها منفصله بسلك خاص و عدم ملامسه اى رسمه الى الرسمه التانيه

بعد لما رسمنا التصميم على الورقه البيضاء هنقوم بنقلها على الورقه الكانسون الى اشترناها فوق و الهدف من الرسم على الورق الابيض الاول علشان يبقي سهل المسح و لكن عند النقل على الورقه السوده هترسم بي القلم المركر الى السود الى اشترناه و ده مبينفعش يتمس و هنخسر ورق كتيرررررر

بعد لما رسمنه الرسمه على الورقه السوده هنقوم لزقنها على الكرتونه الى جهزناها فو ق و بكده هيكون الرسمه فوق الكرتونه
بعدها جه وقت الابره المنجد الى اشترينها و هيا تخريم الرسمه الى على الورقه السوده علشان نزرع اللمبات لان الرجول بتاعه اللمبه ضعيفه و صعب تخرم الكرتونه علشان قويه

مع مراعات عند زرع المبات فى الاخرام ان يكون السطر الى فوق دايما لطرف اللمبه الموجب الى هو الطويل و السطر التانى بتاع الرسمه يكون الطرف السالب بتاع المبه الى هو القصير

مع مراعات كل لمبه اطرفها متلمسش بعض و لكن كل لمبه طرفها يلمس اللمبه الى بعدها الموجب مع الموجب و السالب مع السالب

و ده شكل اللمبات من فوق الرسمه الى على الورقه السوده

هنا احنا عملنا سطر كامل من التصميم و جه وقت اللحام
بعد لما طبقنا اطراف اللمبات مثل الصوره الى فوق بكامل السطر هنقوم بلحم كل الاطراف المواجب مع بعض بالقصدير و كل الاطراف السالب مع بعض مع مراعات ان الاطراف الموجب لا تلمس ابدا
الاطراف السالب

هنا احنا قمنا بلحام الاطراف بس ظاهر فى الصوره سطرين علشان انا بلحم الرسمه كلها مع بعض ولكن حضرتك و انتا بتركب اول مره هيبقي صعب تتعامل مع الكميه الكبيره من اللمبات فهتقوم بتركيب سطر و لحامه و تبتدا فى السطر الاخر و هكذا

فى حاله ان مكان الاطراف بتاعه المبات مش موصله مع بعض هنقوم بتوصلها بسلك الشاحن الى فوق الى جهزناه مثل الصوره
وكده احنا عملنا اول رسمه من الاربعه الى قولنا عليهم فوق النور الصغير و المرشدير و الاستوب و الاشاره
هنقوم بتفيذ بالرسومات الباقيه بنفس الطريقه الى عملنا بيها اول رسمه
مع مراعات ان كل تصميم على حد ولازم عدم ملمسه اى اطراف من الرسمه برسمه تانيه
و كل رسمه هيبقي ليها توصيل منفرد

بعد تنفيذ الاربعه رسومات بالكامل و التاكد من عدم ملمسه اى رسمه للاخره جه وقت توصيل المقاومات الى بتخفض الكهرباء من 12 فولت بتوع البطاريه الى 3.5 فولت بتوع اللمبات
و الطريقه اننا هنحتاج عدد اربع مقومات حراريه علشان كل رسمه هيبقي ليها مقاومه منفرده بعيد عن باقى الرسومات
و هيتم لحم طرف المقامه مع طرف الموجب بتاع اللمبات
بمعني ان احنا لما قومنا بلحام اللمبات مع بعض اصبح جميع الاطراف الموجب مع بعض و جميع الاطراف السالب مع بعض فى كل رسمه على حد
هناخد بقى الطرف الموجب بتاع الرسمه الاولى و نلحم فيه طرف المقامه الاولى
و ناخد الطرف الموجب بتاع الرسمه التانيه و نلحم فيه المقاومه التانيه
و ناخد الطرف الموجب بتاع الرسمه التالت و نلحم فيه المقاومه التالته
و بالمثل الرسمه الرابعه
و بكده احنا اصبح لدينا اربع اطراف من المقاومات الى الاربعه
كده احنا خلصنا الاطرف الموجب كلها بتوع الاربع رسومات و متبقي لدينا اربع اطراف الى هما من كل رسمه بتوع الطرف السالب
هنقوم بجمع جميع الاطراف السالبه مع بعض و جعلهم طرف واحد فقط
ملحوظه هامه جداااااااا
لا يمكن جمع الاطراف الموجب مع بعض فقط السالبه هى الى هتتجمع مع بعض لانها هتوصل بطرف الارضي بتاع العربيه و لو تم جمع الاطراف الموجب مع بعض هيصبح كل الرسومات بتور مع بعض دفعه واحده ولكن بجعل كل رسمه على طرف هنقدر نشغل الرسمه الى احنا عوزنها بمزاجنا
و بكده هنكون بقي عندنا خمس اطراف وهم
اربع اطراف خرجين من المقاومات بتوع الاربع رسومات كل طرف لوحده من مقاومه منفصل عن الى جنبه
و طرف خروج بتاع الارضي الى هو تجميع الاربع اطراف بتوع الطرف السالب بتاع اللمبات
و الى هنا هنبدا تركيب الكرتونه الى صممنا عليها الرسومات داخل الوش بتاع الفانوس الشفاف الى اشترناه

و ان شاء الله فى الجزء الثالث هنقوم بفك الفانوس من العربيه و تقفيل الوش الشفاف عليه بالرسمه الجديده و تركيبه فى العربيه
اخيرا انا اسف جدااااااا على التاخير عليكم فى الموضوع و انا جاهز لاى استفسار عن طريق الموبايل او صفحه الفيس او من التعليقات هنا فى الموضوع

اخوكم فى الله
وليد صلاح
ابو يوسف و عمر و نور
مهندس تطوير

عناوين افضل الورش فى جميع المجالات

noreply@blogger.com (Unknown) — Sat, 06 Feb 2016 10:01:00 +0000

بسم الله الرحمن الرحيم

نعرض عليكم اليوم أماكن وعناوين أفضل الورش والصنايعية لجميع المجالات سواء ( ميكانيكى أو كهربائى أو عفشجى أو سمكرى أو بوهيجى ) اللى اتعامل معاهم أعضاء جروب مونستر فيات 128 بجميع محافظات مصر وشكرو فيهم .. بحيث يكون مرجع لكل الناس .. والموضوع ده هيكون متجدد دائماً وهيتم اضافه عناوين جديده بإذن الله كل فترة .. ونرجوا من لديه اى عنوان جديد لأفضل صنايعى عنده ذمه وضمير ويكون اتعامل معاه وشغله محترم ياريت يعرفنا او يكتب اسمه ورقم تليفونه وعنوانه فى الكومنتات تحت بعد الموضوع عشان نقدر نضيفها للموضوع والكل يستفاد منها .

ملحوظه : للبحث سريع فى هذا الموضوع استخدم اداه البحث فى المواضيع عن طريق الضغط على مفتاح CTRL + F فى الكيبورد للبحث فى الموضوع عن منطقه معينه .

-----------------------------------------------------

# ميكانيكى سيارات :

1- الإسطى ماهر الميكانيكى - العنوان : شارع ترعة الخشاب - قريب من عمارات المنتصر - حدائق حلوان

2- الإسطى حسن جرزا الميكانيكى - العنوان : أمام سور الترب - قبل كوبرى عزبة كامل صدقى - بجوار رضا للبطاريات - حدائق حلوان - موبايل : 01001036764

3- الإسطى عبد الحليم الميكانيكى - العنوان : شارع العطور بعد البوسطة - الطلبية فيصل - عند عربيات كفر طهرمس - موبايل : 01276750840

4- الإسطى زكريا الميكانيكى - العنوان : شارع 4 بجوار كلية الزراعة شبرا الخيمة - موبايل : 01282728714

5- الإسطى حبوكشة الميكانيكى العنوان : بجوار السينما بجوار شيخ العطارين - الوراق - موبايل : 01006286739

6- الإسطى اباظة الميكانيكى - العنوان : اسكندرية - القبارى - شارع الامان بعد الكوبري بشارعين

7- الإسطى رضا الميكانيكى - العنوان : محطة حسن محمد - امام شارع ضياء من على ترسا الرئيسي - قريب من محمد لطفى بتاع قطع الغيار - بعد الصيدلية على اليمين - الهرم

8- الإسطى محمد المحلاوى الميكانيكى - العنوان : الشروق بجوار المشتل - منطقة الورش شبين القناطر - قليوبية

9- الاسطي محمود ( ابو يوسف ) الميكانيكي - العنوان : اسفل الكوبري العلوى بمحافظة الفيوم - موبايل : 01009120166

10- الاسطى محسن الميكانيكى - العنوان : شارع الشيخ غراب امام مدرسة اسكان ناصر جمب فرن العيش - حدائق القبة

11- اﻻسطى عادل الميكانيكى - العنوان : الطالبيه - الهرم - موبايل : 01225324534

12- الإسطى أحمد خير الميكانيكى - العنوان : شارع الدورة الصغيرة متفرع من شارع الشيخ ريحان الرئيسى - عابدين - القاهرة - موبايل : 01289191099

13- الإسطى محمد والإسطى محمود ميكانيكا وعفشة - العنوان : شارع داوود حمدان بجوار مطعم السويسي المحطة الجديدة - الاسماعيلية

14- الاسطى محمد يحيى الميكانيكى - العنوان : اخر شارع رايل امام سور معهد اعداد القادة - حلوان - موبايل : 01118694431

15- الاسطى روماني المكانيكي - العنوان الطالبيه فيصل المساكن امام مدرسه الانوار في شارع الريحانى

16- رمضان ابو محمد ميكانيكا وعفشة - العنوان : شارع العشرين - عين شمس - عزبة كحوش بجوار مدرسة البنات - موبايل : 01007738023

17- الاسطى احمد فرغلى الميكانيكى - العنوان : الزاوية الحمراء - ارض الجنينة - امام مدرسة ابن سيناء بنات اعدادية

18- الاسطي محمد الميكانيكي ( ميكانيكي و عفشجي ) .. موبايل / 01008760223 .. العنوان : شارع وادي النيل - ميت عقبة - خلف اسماك وادي النيل و عمارة الضرائب

19- الاسطى حسن الميكانيكى ( ميكانيكى وعفشجى ) .. موبايل / 01012987580 - العنوان / المساكن خلف قسم حدائق القبة او محطة اتوبيس حدائق القبة .

20- الاسطى أبو رحمه / عم عادل ( ميكانيكى وعفشجى ) العنوان / الشيخ زايد فى الحى 11 وممكن يجى لك لحد البيت وبيبدأ فى شغله من الساعه 6 صباحا ومحترم جدا جدا - موبايل / 01281413571

21- الاسطى صلاح الميكانيكى - العنوان / شارع السودان بجوار موبيليات البربرى امام محطة الاتوبيس

22- المهندس محمد طلبه مركز ميكانيكا وعفشة متكامل للدفع الخلفى خصوصا ( اللادا - 131 -132 - جيب ) طبعا بيشتغل فى كل العربيات بس معندوش كل قطع الغيار بجواره على طول ورشة سمكرة ودوكو محترمة - العنوان / الوراق امام شركة الغاز من بعد نزلة الوراق الدائرى بجوار قاعات الافراح

23- ورشة الحج راشد ( ميكانيكى وعفشجى ) - العنوان / شارع المرور بين السريات - موبايل / 01111033602 - 01004969718 - 01096121566

24- الاسطى سيد الميكانيكى - العنوان / الهرم - مشعل وممكن يجيلك اي مكان - موبايل / 01113408110 - 01024028450

# عفشجى سيارات :

1- الاسطى عمرو الشرقاوى العفشجى - العنوان : خلف كايرو مول - الهرم - موبايل : 01114280007

2- الاسطى سيد العفشجى - العنوان : شارع ترعة الخشاب - قريب من عمارات المنتصر - حدائق حلوان - موبايل : 01280179530

3- الاسطى نحلة العفشجى - العنوان : موجود عند الملف بعد موقف الاوتبيسات قدام شركة المجارى - الوراق

4- الاسطى سيد العفشجى - العنوان : شارع الجيش بعد مزيكا بتاع الكماليات - بعد المطافى - الوراق

5- الاسطى محمد العفشجى - العنوان : القباري خلف مصنع البسكويت - اسكندرية

6- الاسطى محمد سامى العفشجى والشهرة محمد الجيزاوى - العنوان : المعادى - صقر قريش - بجوار اوناش الانقاذ اللى على الاتوستراد - موبايل : 01123330594

7- الاسطى محمد العفشجى - العنوان : عين شمس - شارع ابراهيم عبد الرازق ثالث شارع شمال علي نصيه الشارع بتاع كوتش

8- الاسطى شعبان العفشجى - العنوان : شارع زغلول - الهرم

9- الاسطى سعيد العفشجى - العنوان : خلف أشرفكو بتاع الجنوط اللى فى جسر السويس الرئيسى موبايل : 01014692666

10- الاسطى أيمن العفشجى - العنوان : اسبيكو - محطه الكافتريا - السلام

11- الاسطى طارق العفشجى - العنوان - شارع محطة القبة .. بعد محطة مترو منشية الصدر - موبايل / 01285565731

# كهربائى سيارات :

1- الاسطى حسين كهربائى سيارات ( أخرس ) - العنوان : شارع ترعة الخشاب - قريب من عمارات المنتصر فى الشارع اللى على ناصيته سيد العفشجى - حدائق حلوان

2- الاسطى سمير ( كهربائى سيارات ) - العنوان : بجوار مسجد القاضى - بجوار كبابجى درويش - شبرا الخيمة

3- الاسطى محمد عدى ( كهربائى سيارات ) - العنوان : شارع القومية العربية امام كشرى اشرف والجزار بتاع لحمة الراس - الوراق

4- الاسطى محمد ( كهربائى سيارات ) - العنوان : شارع حسن وهبه - خلف كايرو مول بالظبط - الهرم

5- الاسطى رجب العجوز ( كهربائى سيارات ) - العنوان : شبين القناطر - ميدان المحطة بجوار موقف الميكروباص

6- الاسطى سيد الشرقاوى ( كهربائى سيارات ) - العنوان : شارع محمد على - بجوار قهوة عزرائيل - الاسماعيلية

7- الاسطى سيد ( كهربائى سيارات ) - العنوان : حدائق حلوان خلف مدرسة الشهداء - موبايل : 01279309314

8- الاسطى طلعت ( كهربائى سيارات ) - العنوان : سرايا القبه بعد مستشفي منشية البكري

9- الاسطى محمد ( كهربائى سيارات ) - العنوان : محطة التعاون - فيصل - موبايل : 01063046526

10- الاسطى عبد العزيز ( كهربائى سيارات ) - العنوان : فيصل - شارع العشرين - ابو زيد - موبايل : 01152848555

11- الاسطى سليم ( كهربائى سيارات ) - العنوان : شارع محور مؤسسة الزكاة الرئيسى على اليمين نهاية شارع العصارة - موبايل : 01227064076

12- الاسطي مصطفي الكهربائي .. موبايل / 01221536100 - العنوان : شارع وادي النيل - ميت عقبة - خلف اسماك وادي النيل و عمارة الضرائب

# سمكرى سيارات :

1- الاسطي نبيل السمكرى - العنوان : بلوك 31 الحريفين الدويقه محمول 01222340812

2- الاسطى احمد السمكرى - العنوان : فى الشارع اللي بعد المطافى بتاعت الوراق جنب مغسلة الحربى للسيارات

3- الاسطى شريف عبده السمكرى - العنوان : شارع دمنهور المتفرع من شارع العشريني ثالث ناصية عالشمال - الاسماعيلية

4- الإسطى فارس السمكرى - العنوان : خلف مطابع الأميرية وأمام قاعة الحفلات - موبايل : 01111090290

# دوكو سيارات :

1- عبد العزيز دوكو - العنوان : شبرا الخيمه - عند محطه المؤسسة - شارع زكريا - موبايل : 01222636726

2- الاسطى عبدالله دوكو - العنوان : بلوك 31 الحريفين الدويقه - موبايل : 01225973316

3- الاسطى محمد بيومى دوكو - العنوان : عالكورنيش فى الكيت كات جنب مقلة المحمدية

4- الاسطى ياسر دوكو - العنوان : القباري شارع رشيد رضا عند كشك الكهرباء - الاسكندرية ( مش ورشة - صنايعي بالطلب يعمل امام المنزل الكائن بالعنوان السابق )

# كاوتش سيارات :

1- الاسطى اوطه - العنوان : بجانب محل على كيفك بتاع الفول والطعمية اللى عند السيما - الوراق

2- محمد الفنجرى - العنوان : شارع فاروق - بجوار معرض موبيليات حضرة - الاسماعيلية

3- الورشة الحديثة للكاوتشات - صاحب المحل : عم رزق - العنوان : 2 شارع الطيار فكرى الرئيسى من شارع نادى إمبابة الرياضى

# مراكز ضبط زوايا واتزان وترصيص :

1- المركز الدولى واصحابه المهندس نبيل والمهندس ربيع - العنوان : بعد مستشفى الوراق الجديدة جنب محل الخشب امام بتاع الجنوط والكاوتش

2- الاسطى حسن في بنزينه موبيل الزعيم - العنوان : بجوار مسرح الهرم - وبردو البنزينة دي المغسلة بتاعتها حلوة جدا

3- العنوان : امبابة - أول شارع ترعة السواحل وأنت جاى من الكورنيش أدخل يمين تانى محل جمب السمكرى على طول

# محلات قطع غيار سيارات :

1- احمد بركات - قطع غيار اصلى فيات فقط - العنوان : ميدان المحطة بجوار كشرى سمكة البقلى - الاسماعيلية

2- احمد امين - قطع غيار سيارات - ارخص من اسعار السوق - العنوان : حدائق حلوان - بجوار كوبرى المعصرة طلعة الأتوستوراد - امام مسجد سيجوارت - موبايل : 01111193091

3- جمال شوكس - قطع غيار سيارات - العنوان : شارع ميدان الجامع - حدائق حلوان - امام سور الترب - امام قهوة ليالينا

# ضبط أبواب السيارات واصلاح وتركيب مكن الزجاج :

1- الاسطى محمد - المحل اسمه الحاجة - لظبط أبواب وتصليح وتركيب مكن الزجاج السيارات - خلف مدرسة هدى شعراوى - حدائق حلوان

# تخصصات أخرى :

1- الإسطى علاء الطيار تخصص كربراتير فقط مواعيده بدرى الساعه 6 أو 7 صباحاً عشان الزحمة عليه كتير - العنوان : الشرابيه قريب جدا لجمعيه كنانه الخيريه في شارع الاداره .

2- الاسطى أيمن تخصص كربراتير - العنوان : البوهى - شارع الوحدة - جنب مخزن الخشب فى الشارع بتاع البوسطة

3- الاسطى حسنى تخصص تاكيهات - العنوان : شبرا الخيمة فى الشارع اللي قدام قسم شبرا الخيمة اول

4- ياسر البلبيسى - متخصص فرامل - حلوان - محمول 01009216976 - 01063160800

5- احمد الخراط - العنوان : فى الشارع اللى قدام صيدلية الحكمة فى شارع جمال عبد الناصر - حدائق حلوان - موبايل : 01223579176

6- ورشة تصليح شكمانات ... دنيا الشكمان .. عم صلاح موبايل / 01225154025 -- بندق موبايل / 01224555929 - العنوان / كورنيش الوراق - بعد ميدان الكيت كات - تالت ورشة علي الشمال و انت رايح علي الوراق .

7- ورشة تصليح وتسليك الريداتير : محمد سنبل ( ريداتير - تنظيف - تسليك - لحام - بيع - شراء ) .. ت / 01210995180 - العنوان : المساكن الورا قسم حدايق القبة - او محطة اتوبيس حدايق القبة ( منطقة فيها كل الصنيعية التخطر علي بالك )

8- ورشة تصليح وتسليك الريداتير : الاسطى عبده -العنوان : المطبعة فيصل شارع عمرو بن العاص - تليفون / 01277002325

9- ورشة تصليح فتيس : الورشة الفنية لتصليح جميع انواع الفتيس وضبط عصيان - الاسطى حارس - العنوان / 5 مساكن رئاسة الجمهورية - دار السلام - الملأة - بجوار فوزى بتاع الرينو - موبايل / 01221809985

----------------------------------------------------

يارب يكون الموضوع عجبكم ...

مع تحياتى

Sameh Ahmed

حلول الأعطال الشائعة والمشاكل اللى بتعطل عربيتك

noreply@blogger.com (sam4ever2010) — Thu, 04 Feb 2016 13:33:00 +0000

بسم الله الرحمن الرحيم

شوية معلومات مهمة عالسريع هتستفاد منها مع حملة إفهم عربيتك

----------------------------------------------------

يارب يكون الموضوع عجبكم ...

مع تحياتى

Sameh Ahmed

كيفية شراء سيارة مستعملة

noreply@blogger.com (sam4ever2010) — Thu, 10 Dec 2015 16:24:00 +0000

بسم الله الرحمن الرحيم

عايز تجيب عربية ومش عارف تجيب ايه ؟؟؟

خايف تنزل لوحدك لحسن يتنصب عليك وتلبس فى عربية أى كلام ؟؟؟

هقولك على كل حاجه تخلى بالك منها قبل ماتنزل تشترى أى عربية عشان تبقى فاهم وعارف انت هتعمل ايه ومتخليش حد يضحك عليك وترجع تندم بعد كده وتقول ياريت اللى جرى ماكان

الخطوة الاولى : مرحلة الدراسة

حدد نوع و ماركة العربية من حيث مناسبتها لآحتياجاتك و ميزانيتك وذلك بترتيب عوامل اختيار نوع العربية

1- هاتش باك ولا سيدان ( بشنطة ) - هل تحتاج لمساحات داخلية كبيرة - هل سفرياتك كتير و فيها شنط كبيرة .

2- موتور كبير ولا صغير - استخدامك اكتر جوة البلد ولا برة البلد فى سفريات ذات سرعات عالية و طويلة ، عنصر توفير البنزين مهم بالنسبالك ولا لا ، عدد الاشخاص اللى معاك فى العربية دايماً كتير ولا قليلين ولا فى معظم الاحوال لوحدك.

3- اسعار قطع الغيار

- سعر قطع غيار غالى ... مع عمر افتراضى كبير ... (ممتاز ) بس على حسب ميزانيتك )

- سعر قطع غيار رخيص ... مع عمر افتراضى قليل ... (جيد ) بالنسبة لميزانيتك لآن العربية مش هاتقف عشان قطعة غيار او اكسسوار مطلوبة )

- سعر قطع غيار غالى ... مع عمر افتراضى قليل ....(سيىء)

4- قطع الغيار متوفرة فى التوكيل و خارج التوكيل يبقى عظيم

5- اماكن الصيانة

- شغل توكيلات فقط (مكلف - مريح - لا يستغرق وقت طويل )

- معظم الميكانيكية بيفهموا فيها (ممتاز)

- لها ناس معينة (تبقى تعرفهم الاول )

بعد الخطوة دى هاتبقى حددت و عرفت ماركة العربية - نوع العربية - الموتور - شغل العربية بيبقى فين و اسعارة اية

الخطوة الثانية : مرحلة التحديد

يجب ان تحدد موديل العربية (السنة ) اللى انت عايز تشتريها و ذلك من خلال :

1- ما هى افضل الموديلات لهذا النوع - يعنى سنة كام كان من افضل الموديلات اللى نزلت فى النوع دة .

2- معرفة السعر المتوسط لهذا الموديل (السنة ) من خلال متابعة الاعلانات و الاتصال المباشر و السوق

3- هل الموديل دة متناسب فى متوسط سعرة مع ميزانيتك ولا لأ ..لو كان اعلى أنزل للسنة اللى قبلية و هكذا

4- تنزل السوق مرة ( ليس للشراء ابداً ) و لكن للفرجة و معرفة أخر سعر للموديل دة بعد شوية فصال صغيرين ( وعلى كدة تحدد المتوسط السعرى الفعال لهذا الموديل ) يعنى مش مجرد كلام اعلانات .

بعد الخطوة دى هاتبقى حددت و عرفت موديل العربية ( السنة ) بالظبط اللى عايز تشتريها و كمان متوسط السعر اللى فى السوق للموديل دة .

الخطوة الثالثة : مرحلة النزول للشراء

اهم شئ العربيات تستحق النزول إذا كانت فى اعلان او الفرجة اذا كانت فى السوق

1- الحالة

- فبريكة (دهان مصنع) ... بالكامل ... (ممتاز)

- فبريكة داخل فقط (تحت سنة 2000 ) ... (جيد)

- لا يوجد اى دهان فبريكة فى اى سنة (يعنى راشة برة و جوة ) ... (سىء)

- بالنسبة للموديلات القديمة ( سبعينات - ثمانينات - تسعينات ) مش شرط تهتم بموضوع الفبريكة وتهتم بحالة العربية نفسها متكونش متهانة ومبهدلة ولا تحتاج لأى مصاريف اهم حاجه

2- السعر

- اعلى من المتوسط اللى انت طلعتة ... (ممتاز)

- فى المتوسط اللى انت طلعتة ... (جيد)

- اقل من المتوسط اللى انت طلعتة ... (سىء)

3- الكماليات

هى الكماليات المتعارف عليها فى هذا الموديل من هذة السنة ولا يحبذ اى اضافات اخرى أوعلى حسب مزاجك الشخصى .
كمثال ( ساوند سيستم - اسبويلر - شكمان ديفل - كساحات - كراسى طيارة ... الخ )

4- الموتور

هو السعة اللترية المتعارف عليها فى هذا الموديل من هذة السنة ( ال CC ) كمثال ( 1100 سى سى - 1300 سى سى ... إلخ )

5- اللون

من الالوان اللى كانت متواجدة فى هذا الموديل من هذة السنة يعنى مفيش 128 فى اوائل التسعينات فضى او 127 ذهبى ولا لانسر موف .. مثلاً

6- الرخصة

أ- الرخصة تكون سارية بس بشروط اهمها تكون بأسم المالك ومش المهم فيها أد اية المهم طالعة لمدة اد ايه

- رخصة لمدة سنتين او لمدة 3 سنين ... (ممتاز)

- رخصة لمدة سنة واحدة ... (واحنا دلوقتى فى اولها ) ... (جيد)

- رخصة لمدة سنة واحدة ... (واحنا دلوقتى فى اخرها ) ... (غير جيد) ساعتها هتضطر تسجل العربية بإسمك وترخص من جديد يعنى تخصم ثمن الترخيص من حق العربية او يجددهالك هو ويجبلك شهادة مخالفات

ب- لو توكيل ... (سىء) هتتسحل مشاوير كتير مع المرور انت فى غنى عنها

7- عداد الكيلو مترات

يجب أن يكون متناسب مع عمر العربية بمتوسط من 17 الف كم الى 20 الف كم فى السنة الواحدة

- عداد كيلومترات مظبوط مع المعدل المذكور ... (ممتاز)

- عداد كيلومترات اقل مع المعدل المذكور ... (جيد)

- عداد كيلومترات اقل بكتير من المعدل المذكور ... (غير جيد)

- عداد كيلومترات اكبر من المعدل المذكور ... (سىء)

بعد الخطوة دى هاتكون قررت تنزل ولا لأ عشان تشوف العربية دى او قررت تتفرج عليها و تفحصها

الخطوة الرابعة : مرحلة فحص العربية قبل الشراء

أولاً : خد لفة حوالين العربية من الخارج ولاحظ الاتى :

1- طلاء السيارة

- طلاء السيارة متناسب مع العمر للموديل ولا يوجد أى أجزاء لامعة اكثر من التانية

2- ملاحظة الخدوش والاحتكاكات

- وجودها فوق سنة 2000 ... (جيد)

- عدم وجودها فوق سنة 2000 ... (غير جيد)

- عدم وجودها تحت سنة 2000 ... (سىء)

- عدم وجودها فى الموديلات القديمة ( سبعينات - ثمانينات - تسعينات ) يعنى راشة حديث من الخارج ( ممتاز )

3- الصدمات و الحوادث

ملاحظة اى فوارق بين الخطوط - بين الفوانيس و الرفارف - بين الباب و الحلق بتاعة - بين باب الشنطة و حلق الشنطة - بين الزوايا فى اركان العربية - طبقات عالية شوية فى الدهان عن الباقى - فوارق بين الاكصدام و جسم العربية

4- الزجاج

اى فوارق بين كاوتش الزجاج و الحلق اللى بيركب فية

- كاوتش الزجاج جديد و اسود ولا قديم من عمر العربية

- فى كتابة على اسفل الزجاج (اصلى ولا اتغير)

- نقر متسابة (يبقى احسن ) ولا كلة مية واحدة و بيلمع (قلق)

- فى زجاج الابواب سيف الزجاج اللى فى الباب بالعرض قافل على الزجاج ولا مفارق (يبقى اتفك قبل كدة )

-الزجاج لابس فى المجرى بتاعتة ولا مفارق

5- الاكسسوارات

المرايات - الشبكة الامامية - الفوانيس - الاشارات - المساحات - الاريال - فبر الاكصدام كلها طبيعية للموديل دة ولا فيها افتكاسات فتسيبك منها احسن

6- الكاوتش

- تفاصيلة بارزة وواضحة وشكلة لسة جديد ... (ممتاز)

- تفاصيلة ممسوحة شوية بالنسبة لعمر العربية ... (جيد)

- تفاصيلة ممسوحة اوى وشكلة قديم ... (سىء) وتخصم تمنة من سعر العربية فى متوسط من 1000 : 5000 جنيه على حسب نوع العربية ومقاسات الكاوتش من 13 : 21

7- الفوانيس

- نضيفة و شفافة ... (ممتاز)

- متناسبة مع عمر العربية ... (جيد)

- مغببة و مشبرة ... (سىء)

8- السقف

- نفس درجة و لون العربية كلها ... (ممتاز)

- سواء من العربية بوجة عام ... (جيد)

- احسن من العربية بوجة عام ... (غير جيد)

- غير مستوى و فية اى التواءات ... (سىء)

9- العتب

دة الجزء اللى تحت الابواب ... حط ايدك تحتية و خد سحبة كدة بطول العربية

- سليم و مستوى ... (ممتاز)

- فية حتت متاكلة و اماكن محببة كدة ... ( سىء) علامة صداء ( بارومة موجودة اسفل العربية )

10- الكارتيرات

دة الجزء اعلى العجل و اللى لافف حوالين الكاوتش من فوق

ملاحظة عدم وجود اى اثر صدأ (برومة) - حتت متاكلة - أثر لحامات - اى التواءات - اثر لحاجة زى الزيت منشعة فى المنطقة دى

11- المساعدين

- وقوف السيارة كلها على خط افقى واحد ( يعنى مفيش جهة اعلى من التانية لا ورا ولا قدام )

- عند الضغط على ركن من اركان العربية بتطلع تانى لفوق بنعومة و ثبات ( غير متقطع فى الطلوع )

- عدم وجود اى اثر لزيت او تنضيف حديث ليهم ( بيبقوا فوق العجل و ماسكين العجل بالعربية على شكل عمود رفيع رأسى )

ثانياً : نظرة بسيطة على اسفل السيارة من الخارج ومن الداخل

1 : أسفل السيارة من الخارج :

لاحظ الأتى :

- عدم وجود اى اثر لأنخفاضات او ألتواءات

- عدم وجود صداء ( بارومة )

- عدم وجود اى اثار لزيوت او شحومات قديمة

- علبة الشكمان سليمة و مش مصدية و مفهاش لحامات و خصوصاً فى المناطق الضيقة اللى بتوصل جزء للآخر

2 : السيارة من الداخل :

بعد ما خدت لفة حوالين العربية .. افتح الباب و ادخل عشان تقعد فيها .. بس سيب الباب مفتوح و انت بتقعد ولاحظ الأتى :

- لو لاحظت ان سفل ضلفة الباب بينزل لتحت (بيقرب من الارض ) كتير وانت بتقعد فى العربية يبقى العفشة ضعيفة و المساعدين تعبانين .

- لاحظ كاوتش الباب و حالتة

- لاحظ حلق الباب كلة (اى صداء - خبطات - لحامات - التواءات )

- لاحظ القايم (على يمينك اللى واصل بين اسفل العربية و السقف )

أى التواءات - أثر لحام قديم - فوارق بينة و بين السقف ... علامة سيئة جداً

ثالثاً : دلوقتى إقفل الباب و خش اقعد فى العربية وبص على الأتى :

فرش الصالون :

لاحظ أى أثر لخياطات او ترقيعات او حتت متاكلة فى الفرش وشوف الدواسات و فرش الابواب و الحالة العامة لكل التنجيد الداخلى و مقايستة بعمر العربية ومناسبتة لنمط شخصية البائع .

- وجود فرش اضافى ... (غير جيد) شيلة و بص تحتية

- الفرش الاصلى متناسب مع عمر العربية ... (ممتاز)

- الفرش الاصلى اقل من عمر العربية مع وجود فرش اضافى ... (جيد)

- الفرش الاصلى وحش و متبهدل ... (سىء)

فبر التابلوة

- فبر التابلوة متناسب مع عمر العربية ... (ممتاز)

- فبر التابلوة بيلمع ... (غير جيد)

- فبر التابلوة وحش و مشقق ... (سىء)

السقف الداخلى :

- لاحظ لو اى فوارق او هبوطات او اثار فك و تركيب فى كل السقف و التقائة بالجوانب اللى شاية السقف كلة .

- الدواسات اصلية ولا لأ و هل فى تحتها اى تأكلات او اثار لآحتكاكات مستديمة .

الجزء اسفل التابلوة

- متقفل كويس ومفيش أى أثار لأسلاك او لصدر العربية ... ( ممتاز)

- مفارق و فية اثار فك و تركيب ... ( سىء)

- مفتوح و فية اسلاك واضحة ... (سىء جداً) مؤشر سىء لحالة الكهرباء العامة فى العربية

لوحة العدادات

- اى فوارق بين الزجاج بتاع العدادات و التابلوة ... (سىء)

درج التابلوة

- نضيف و متقفل من اخرة كويس ... (ممتاز)

- مليان حاجات و مكركب ... (غير جيد)

- ضهرة واقع و متبهدل من جوة ... (سىء)

فرامل اليد
وانت قاعد جوة العربية شد فرامل اليد للآخر ولاحظ الاتى :

- فرامل اليد بتتطلع بصعوبة وبتقف ببطىء فى الاخر ... (ممتاز)

- فرامل اليد بتتطلعبراحة و بتصد فى الاخر بنعومة (غير جيد)

- فرامل اليد بتتطلع مرة واحد بسهولة و بتصد فى الاخر مرة واحدة (سىء)

رابعاً : هتنزل من العربية عشان تشوف الشنطة والموتور

×1× هتروح تشوف الشنطة :

- افتح الشنطة ولاحظ بتتطلع لفوق ازاى (بسهولة بتترفع لوحدها - بصعوبة - بتقع تانى )

- شيل فرش الشنطة و بص تحت الفرش ولاحظ اى .. صداء (برومة - انخفاضات - اثر لحامات - شحومات - زيوت) كل دى علامات سيئة

- بص على اركان الشنطة اللى خلف الفوانيس الورانية ولاحظ اى اثار لفك و تركيب - اسلاك بارزة - خبطات (مسمعة جوة )

شوف حالة الاستبن :

- استبن اصلى ... (ممتاز) ساعات بيبقى اصغر من كاوتش العربية العادى (بعض العربيات )

- استبن بحالة كويسة ... (جيد)

- استبن حالتة اسواء من حالات الكاوتش اللى متركب فى العربية ... ( سىء)

×2× هتروح تفتح الكبوت وتشوف حالة الموتور :

أ- اللون و الشكل

ملاحظة لون داخل الموتور (حوض الموتور) نفس لون العربية ولا لآ

- نفس لون و درجة العربية ... (ممتاز)

- اقل من درجة لون العربية (فى اللمعان ) ... (جيد)

- متبهدل كتير عن العربية ... (سىء)

ب- الحالة العامة

ملاحظة الاركان الجانبية فوق و تحت - الوصلات - عدم وجود اى اثار نشع زيت فوق و تحت - مستوى السوائل فى مختلف العلب - عدم وجود اى اثار لحامات او شروخ او تغطيات - البطارية عليها شحم او املاح (بيضاء) - السيور ناعمة و مش ناشفة ولا مشققة - عناصر تركيب الفوانيس من ورا ثابتة و مش مفكوكة قبل كدة - علبة الريداتير مش مصدية - وش الموتور (الصدر) من الناحية المتصلة بالكابينة العزل فيها ماسك نفسة و مش واقع و مفيش اجزاء مصدية الاجزاء فوق العجل (العلب) مفيش فيها لحامات ولونها زى الباقى - الخط العرضى اعلى حوض الموتور مستوى و افقى .

خامساً : اطلب من البائع يدور العربية و انت واقف قدام الموتور ولاحظ الاتى :

- فى صوت قفشة فى التدوير ولا دارت بنعومة

- صوت الموتور نغمة واحدة ولا فيها تقطيعة او ذبذبة

- فى صوت ورة او صفارة صغيرة

- اطلب منة يزود بنزين و شوف .. الصوت بيعلى على وتيرة واحدة ولا بيقطع و فى اصوات تانية دخلت فى الموضوع

- ابعد عن العربية فى اتجاة عمودى .. وشوف فى اى دخان او بخار طالع مهما كان مش ملحوظ فى زغلله و ( ظاهرة السراب ) يعنى حرارة طالعة اعلى الموتور ولا لأ

- ارجع تانى للعربية .. شامم اى ريحة

- شوف مروحة الرياتير اشتغلت ولا لسة

- حط ايدك على الريداتير ... تستحمل تحط ايدك ثانية واحدة ولا بقى سخن و مولع جداً

سادساً : اطلب من صاحب العربية يلف الدركسيون للآخر مرة يمين ومرة شمال

- ما سمعتش اى صوت و انت واقف فوق الموتور ... (ممتاز)

- سمعت صوت طقطقة او صفارة خفيفة اوى ... (سىء)

سابعاً : ارجع ورا العربية و حط ايدك قدام فتحة الشكمان

- سد بأيدك فتحة الشكمان لمدة ثانية واحدة .. لقيت ممانعة و قوة بتبعد ايدك جامد يبقى ... ( ممتاز)

- شيل ايدك و بص فيها لو نضيفة و معلهاش اى حاجة ... (ممتاز)

- مفيش اى حاجة بس فى اى حاجة ولو بسيطة بتطلع من الشكمان سواء ( مياة - رزاز - نقط سوداء - دخان بسيط ) (غير جيد)

- فى اى اثار لنقط سوداء على ايدك ... (سىء)

ثامناً : ادخل جوة العربية تانى ولاحظ الاتى :

1- لف الدركسيون ... ذى ما كنت واقف امام العربية فاكر ( اى تقطيع فى اللفة - تكات - صوت ) .. (سىء)

2- جرب الزجاج الكهرباء فوق و تحت الاربعة

3- بص على مؤشر الحرارة
- ثابت فى النص ... (ممتاز)
- بيشاور عقلة لقدام ... (سىء)

4- شغل التكييف على البارد على اقصى درجة .. ال Rpm هايعلى سنة لفوق .. دة كويس .. حط ايدك على فتحات التكييف .. بتطلع هواء بارد جداً و مستمر لفترة دقيقة لديقتين يبقى كويس
- ال Rpm و التكييف شغال ثابت ... (ممتاز)
- ال Rpm بيترعش و يطلع و ينزل ... (سىء)

5- شامم اى ريحة حاسس بأى صوت خفيف .. لو مفيش .. يبقى تمام

6- اطفى التكييف و خليك قافل الزجاج 3 او 5 ثوانى
- درجة الحرارة ما رحتش بسرعة ... (ممتاز)
- درجة الحرارة فرقت وراحت بسرعة ... (سىء)

>>>>>>>>>>>>>...<<<<<<<<<<<<<

لحظة اتخاذ القرار

× جمع كل النقاط السلبية و سيبك من اى عناصر ايجابية

- لقيت عددها قليل ودرجة اهميتها بسيطة .... (يبقى هاتشترى العربية دى )

- لقيت عددها مساوى او اكتر و درجة اهميتها عالية .... ( يبقى سيبك من العربية دى )

× افتح الباب و انت نازل من العربية وخد قرارك أة ولا لأ ( مهما حصل بعد كدة مايفرقش معاك )

× انزل و اتكلم مع البائع فى تمن العربية و فاصل و اذكر كل مدة احدى السلبيات اللى جمعتها فى دماغك ( مش مرة واحدة ) وحاول توصل معاة لآحسن سعر ممكن ( بدون غتاتة طبعاً )

بالتوفيق ومبروك عالعربية مقدماً ....

----------------------------------------------------

يارب يكون الموضوع عجبكم ...

مع تحياتى

Sameh Ahmed

عناوين فروع شركة النصر لصناعه السيارات

noreply@blogger.com (sam4ever2010) — Tue, 09 Jun 2015 13:24:00 +0000

شركة النصر لصناعه السيارات

العنوان : ( الفرع الرئيسى ) أمام محطة مترو وادى حوف - القاهره - مصر

التليفون : 23690269 - 23691863 - 23691901 - 23692609 -
23696605 - 23690411 - 23690875

----------------------------------------------------------

العنوان : 5 شارع الالفى - وسط البلد - القاهره - مصر

التليفون : 25882427

----------------------------------------------------------

العنوان : 4 شارع المنياوى - غمره - القاهره - مصر

التليفون : 22354485 - 22353637

----------------------------------------------------------

العنوان : 12 شارع سيدى الخياشى - كوم الدكه - الاسكندريه - مصر

التليفون : 033622160

----------------------------------------------------------

العنوان : شارع شركه الكهرباء - محرم بك - الاسكندريه - مصر

التليفون : 033608834

----------------------------------------------------------

العنوان : سمنود - الغربيه - مصر

التليفون : 0402972662

----------------------------------------------------

يارب يكون الموضوع عجبكم ...

مع تحياتى

Sameh Ahmed

طريقة تقسيمة الكاتينة وتغيير السير

noreply@blogger.com (sam4ever2010) — Thu, 26 Mar 2015 11:08:00 +0000

بسم الله الرحمن الرحيم

هشرحلكم طريقة تقسيمة الكاتينة و فوائد ظبطها والأضرار اللى ممكن تحصل لما تكون مش مظبوطة

أولا : الأضرار والمشاكل اللى ممكن تحصل لو الكاتينة مش مظبوطة

- لو الكاتينة مش مظبوطة بتأثر علي سحب العربية و عدم انتظام دوران الموتور والسخونة الزيادة بسبب توقيت الأشتعال أو خروج العادم أو دخول خليط البنزين .

- سير الكاتينة لازم يتغير في معاده أو قبل معاده كمان لأنه من أخطر سيور الموتور لإنه لو تلف ( أتقطع - سنون طارت منه ) ممكن يتسبب فى انه يثنى الصبابات أو يكسر بيستون ( البستم ) .

-----------------------------------------------------------

ثانياً : مكونات تقسيمة الكاتينة

1- ترس الكرنك وهو الترس المسئول عن دوران المناول و الكامة و طرمبة المياه و الدينامو

2- المناول وهو المسئول عن طرمبة البنزين و الزيت و الأسبراتير

3- عمود الكامه وهو المسئول عن فتح و غلق الصمامات ( الصبابات ) و توقيتها

-----------------------------------------------------------

×× العدة المطلوبة لتغيير سير الكاتينة

مفتاح 13

مفتاح 17

مفتاح بيبه 10

مفتاح بوجيهات

مفك عادة أو صليبة علي حسب الأسبراتير لو كلبسات يبقي أحسن عن نفسى أنا مبحبش أبو مسامير

-----------------------------------------------------------

نيجى للشرح وطريقة التركيب :

1- هنفك اول حاجة مسامير غطاء التقسيمة 3 مسامير 10 و الميكانيكي بيبقي مركب 2 و يكسل يربط الثالث .

2- هنفك سلك البوجيه الأول أمام الأسبراتير ثم البوجيه .

3- هنعشق الغيار الرابع وننزل فرامل اليد .

4- هندخل مفك مكان البوجيه و طلع البيستون عند ( TDC ) النقطة الميتة العليا عن طريق زق العربية للأمام أو للخلف أو ممكن نرفع العربية بالكوريك و ندوير العجلة باليد .

5- أول ما البيستون هيجي عند آل ( TDC ) هتلاقي الخرم أو الزنبة اللى فى ترس الكامة مكان نقطة من النقطتين اللى فى الصورة أما الصفراء أو الحمراء لو الصفراء لف لفة كمان لغاية ما يجي عند الـ ( TDC ) و الزنبة تحت مكان الحمراء أو جنبها بس البستون فوق علي الآخر و تمور العربية و تشد فرامل اليد .

6- لو الزنبة قدام البنز اللى طالع من القاعدة اللى لونها لبني في الصورة يبقي التقسيمة مظبوطة لو مرحل سنة يبقي عايزة تتظبط هنفك الصامولة ال17 بتاعة بلية الكاتينة و نخرج السير من الكامة و نلف الكامة بالمفتاح ال17 لغايت ماتظبط الزنبة قدام البنز بالظبط و نركب السير و نزق البلية علشان نشد السير ونقرط علي الصامولة كويس .

7- هنقفل غطاء الكاتينة زي ما فكيناه و البوجيه و نركب السلك بتاعه .

8- هنفك غطاء الاسبراتير و الأسبراتير بمفتاح 13 ونظبط اتجاه الشاكوش علي الركبة المكتوب عليها 4 أو الواصل فيها سلك البوجيه الأخير اللى عند الريداتير.

9- هنقفل الوش بتاع الأسبراتير و نخلي جسم الأسبراتير مهوى سنة بحيث يكون بيلف فى ايدك و حد يدور من جوة تتأكد من وش الأسبراتير راكب صح علشان ميتكسرش هو و الشاكوش و كمان سلوك البوجيهات راكبه صح و ميكونش في سلوك عريانة علشان كهربتها جامدة جداً 20000 فولت ده لو الموبينة العادية و 50000 فولت لو الموبينة الاكترونى .. المهم دلوقتى حد يدورلك العربية و انت هتلف الاسبراتير يمين و شمال سنة صغيرة لو ظابط الكلام ده صح هتدور من أول تكة .

10- على الكهرباء لغاية لما تلاقيها بتسقف و انت بتزود بنزين ووطيها سنة سنة أول ما التسقيف يروح أربط الصامولة بتاعة الاسبراتير على طول وبطل العربية ودور تانى .. بقت تمام خلاص ؟؟ .. اطلع وجرب .. لو سقفت وانت ماشى وطى الكهرباء سنة و جرب تاني لغاية لما تحسها مظبوطة .

وفى النهاية بعد ظبط الكاتينة والكهرباء هتلاقي العربية بقت ناعمة جداً وبتسحب ومبقتش تسخن مقارنة بما قبل .

-----------------------------------------------------------

وبكدة نكون خلصنا والحمد لله ...

اتمنى تكونوا استفدتم من الموضوع

ويارب يكون عجبكم

مع تحياتى

Alaa El-Din Effat

طريقة تغيير طرمبة المياه

noreply@blogger.com (sam4ever2010) — Sun, 01 Mar 2015 12:25:00 +0000

بسم الله الرحمن الرحيم

هنستكمل الصيانة الدورية اللازمة للعربية والناهردة هشرحلكو طريقة تغيير طرمبة المياه ازاى .

أولا عشان تعرف ان طرمبة المياه عندك خلاص باظت وعايزة تتغير هتلاقى المياه مش بتقلب فى الريداتير او هتسمع منها صوت ترزيع وده بيبقى كده خلاص الطرمبة جابت اخرها ولازم تتغير وعشان تتأكد ان صوت الترزيع طالع منها ولا من الدينامو لانهم جمب بعض .. هتجيب ماسورة مياه قديمة تحطها عالطرمبة ( زى سماعة الدكتور :) ) هتكشف عليها يعنى ... ونفس الكلام عالدينامو .. هتعرف الصوت جاى منين .. لو كان الصوت جاى من الدينامو ده حدوته تانيه طبعاً بلى الدينامو هيتغير وده حوار تانى هنتكلم فيه بعدين .

سعر طرمبة المياه :

- صينى 70 جنيه

- تركى 95 جنيه

- يوغزلافى 105 جنيه

- اسبانى 110 جنيه

- ايطالى 115 جنيه

انا بصراحه جبت اغلى حاجه اللى هيه الايطالى .. ودى صورتها

اول حاجه هنعملها طبعا هنفك المسمار ال 19 بتاع رجلاش الدينامو عشان نقدر نهوى السير بتاعه ونفكه .. وابقى افصل السلكة الكهرباء بتاعت الدينامو احتياطى عشان مفيش حاجه تلمس معاك لاقدر الله .

بعد كده هتجيب مفك تحطه تحت السير وتدخله من تحت الطمبورة بتاعت طرمبة المياه وترفعه سنة بسيطه .. وبعدين تدى للعربية الغيار الرابع وتزقها سنة بسيطه لقدام بحيث ان السير يطلع من الطمبورة

دلوقتى بعد مافكينا السير خلاص هنبدأ نفك مسامير الطرمبة هما 4 مسامير 13.. هنفك واحد واحد بالراحه جداً ومنقرصش عليهم واحنا بنفك ولو المسامير تقيلة فى الفك متقرصش عالمفتاح واخبط عليه بايدك واحده واحده لحد مايتفك معاك .

طبعاً كل اللى هتعرف تفكهم هما المسمارين اللى قدامك دول او ممكن ال 3 مسامير اللى ظاهرين فى الصورة وهيفضلنا مسمار واحد بس مش ظاهر ومكانه رخم شوية وده وعشان نفكه هنضطر نفك مسمار قاعدة الموتور ال 17 ونرفع الموتور من تحت بالكوريك .. هتجيب اورمة خشب وتحطها على الكوريك وتحمل على كرتيرة الزيت ولازم اورمة خشب افضل عشان الكرتيرة متتطبقش .. ولازم الموتور يترفع عشان تلاقى زاوية كويسه تقدر تفك بيها المسمار ال 13 الاخير بتاع الطرمبة وهتحتاج مفتاح 13 مشرشر عشان تقدر تفك بيه عشان المكان رخم شوية

بعد ماتفك الاربع مسامير بتوع الطرمبة خلاص هيه كده جاهزة معاك عالخلع على طول وطبعاً هتلاقيها جامده وماسكه ومش عايزة تطلع فى ايدك بسبب السيليكون اللى كانت ملزوقة بيه وهتحتاج شاكوش تقيل ( ادوم ) اخبطها خبطة بسيطه هتلاقيها طلعت على طول خلاص انا كده فكيت الطرمبة من مكانها وطلعتها خلاص وده شكل مكانها بعد ماتفكت

وده شكل الطرمبة بعد ماطلعتها .. طبعا الصدأ واكلها وطالع عين اهلها

ودى الطرمبة الجديدة اللى جبتها جاهزة عالتركيب .. طبعاً فرق شاسع بين الاتنين :D

طبعاً قبل ماتركب هتنظف مكان الطرمبة القديمة ( الشفه الخارجيه ) هتكحتها بسكينه معجون او مفك عادة .. اهم حاجه تشيل الجوان القديم اللى لازق فى الشفه وتصنفرها بصنفره ناعمه على خفيف اوى عشان متبوظش الشفه وتحتاج تغيرها هيه كمان وده موال تانى احنا فى غنى عنه .. اهم حاجه تتأكد ان مفيش اى أثر للجوان القديم خالص .

دلوقتى هتجيب الجوان الجديد اللى جاى مع الطرمبة وتظبط مكانه عالطرمبة نفسها وبعدين هتجيب سيليكون حرارى تدهن بيه الشفه بتاعت الطرمبة قبل ماتحط الجوان عليها .. خلاص حطيت السيليكون وحطيت الجوان .. حط سيليكون تانى فوق الجوان بقى قبل ماتركب الطرمبة وتكبسها فى مكانها .

ده شكل الجوان بتاع طرمبة المياه

وده السيليكون الحرارى اللى انا جبته ماركة اسمها هارديكس صناعة امريكى سعر الانبوبه ب 8 جنيه .. وفى نوع تانى ناس كتير بتشكر فيه اسمه 999 صناعة امريكى برضه وسعر الانبوبه بتاعته ب 15 جنيه موجود عند بتوع قطع الغيار وفى التوفيقية عند واحد مش فاكر اسمه تقريباً منعم صليب .. وانا بصراحه ملقتهوش عندى ومفيش وقت انزل لسه التوفيقية فا جبت النوع ده من عندى امشى بيه حالى وخلاص .

هنا خلاص انا حطيت السيليكون وكبست الطرمبة الجديدة فى مكانها وربطت المسامير تانى تمام الحمد لله .. تقرط عليها خلف خلاف .. يعنى تعشق المسامير كلها فى مكانها من غير تقريط وبعدين لما تيجى تقرط على المسمار اللى عالحرف يبقى تقرط عالمسمار اللى قدامه على شكل حرف X

هنا خلاص الحمد لله خلصت كل حاجه ورجعت كل حاجه زى ماكانت ترجع سير الدينامو مكانه وتشد الدينامو تانى وتربط الصامولة بتاعته وترجع تنزل الكوريك وتريح المكنة مكانها وتربط المسمار بتاع قاعدة الموتور تانى ومتنساش تركب سلكة الكهرباء بتاعت الدينامو بعد ماتوصل كل حاجه .. وبكده نكون خلصنا

----------------------------------------------------

يارب يكون الموضوع عجبكم ...

مع تحياتى

Sameh Ahmed

أسعار قطع غيار لل 128 و 127 و 131 و 132

noreply@blogger.com (sam4ever2010) — Wed, 25 Feb 2015 14:14:00 +0000

بسم الله الرحمن الرحيم

ده موقع فيه قطع غيار لل 128 و 127 و 131 و 132 .. اينعم فى حاجات اسعارها عاليه شوية بس أصلية كلها ومش استيراد

قطع غيار للبيع لكل انواع الفيات

----------------------------------------------------

يارب يكون الموضوع عجبكم ...

مع تحياتى

Sameh Ahmed

جميع اجزاء المحرك وقطع غيار السيارة 128 بالاسماء والصور ... هاااااام ( للمبتدئين )

noreply@blogger.com (sam4ever2010) — Tue, 24 Feb 2015 14:28:00 +0000

بسم الله الرحمن الرحيم

كتير مننا بيسمع ... بساتم ... صباب..كرنك ... ألخ ؟؟ !!!

لكن هل لو شفت حاجه من دول هتعرفها ؟؟؟؟

طبعا لأ ... على العموم ولا يهمك ... أنا هحللك المشكله دى ... باذن الله

خدلك جوله فى الصور دى ... وادعيلى

--------------------------------------------------------------------------------

وش السلندر
Cylinder Head

--------------------------------------------------------------------------------

جوان وش السلندر Head Gasket

--------------------------------------------------------------------------------

البستم Piston

--------------------------------------------------------------------------------

البي ييل Connecting Rod

--------------------------------------------------------------------------------

العلاقة بين البستم و البى ييل
Piston With Rod

--------------------------------------------------------------------------------

الكرنك Crankshaft

--------------------------------------------------------------------------------

العلاقة بين الكرنك والبى ييل والبستم
Connecting Crankshaft With Rod Wit Piston

--------------------------------------------------------------------------------

الشمبر Piston Rings

--------------------------------------------------------------------------------

العلاقة بين الشمبر والبستم
Connecting Piston With Piston Rings

--------------------------------------------------------------------------------

الشميز
Piston Pins

--------------------------------------------------------------------------------

العلاقة بين الشميز والبستم والبى ييل
Connecting Rod with Piston With Piston Rings

--------------------------------------------------------------------------------

بكرة الكرنك Crank Shaft Pulley

--------------------------------------------------------------------------------

السبيكه Rod Bearing Inserts

--------------------------------------------------------------------------------

العلاقة بين السبيكه والبى ييل
Connecting Rod Bearing Inserts

--------------------------------------------------------------------------------

العلاقة بين السبيكه والبى ييل والكرنك
Connecting Rod Bearing With Crankshaft

--------------------------------------------------------------------------------

البلوك Engine Block

--------------------------------------------------------------------------------

الكامة Cam

--------------------------------------------------------------------------------

الصباب Engine Valve

--------------------------------------------------------------------------------

وش التاكيهات Gasket Rocker

--------------------------------------------------------------------------------

جوان وش التاكيهات Cam Cover Rocker Gasket

--------------------------------------------------------------------------------

الكاتينه Cam Wheel

--------------------------------------------------------------------------------

الفولام Fly Wheel

--------------------------------------------------------------------------------

الديسك Pressure Plate

--------------------------------------------------------------------------------

الاسطوانة Clutch Disc

--------------------------------------------------------------------------------

البلية Clutch Release Bearing

--------------------------------------------------------------------------------

طقم الدبرياج ( اسطوانة + ديسك + بلية ) Clutch Kit

--------------------------------------------------------------------------------

الفتيس Gearbox

--------------------------------------------------------------------------------

معلقة الفتيس Shift Linkage Tie Rod

--------------------------------------------------------------------------------

قاعدة الفتيس Gearbox Mounting

--------------------------------------------------------------------------------

الكوبلن C V JOINT

--------------------------------------------------------------------------------

كاوتشات الكبالن ( زيت - شحم )

--------------------------------------------------------------------------------

صليبة الكوبلن Tripod Hub

--------------------------------------------------------------------------------

الكربراتير Carburetor

--------------------------------------------------------------------------------

المانيفولد Manifold

--------------------------------------------------------------------------------

البوبينا (الموبينا) Ignition Coil

موبينة زيت

موبينة الكترونى

--------------------------------------------------------------------------------

الاسبراتير Distributor

--------------------------------------------------------------------------------

غطاء الاسبراتير Distributor Cap

--------------------------------------------------------------------------------

شاكوش الاسبراتير Rotor Arm

--------------------------------------------------------------------------------

البوجيه Spark Plug

--------------------------------------------------------------------------------

سلك البوجيه Spark Plug Wire

--------------------------------------------------------------------------------

كرتيرة الزيت Oil Sump

جوان كرتيرة الزيت

--------------------------------------------------------------------------------

الردياتير Radiator

--------------------------------------------------------------------------------

المارش Starter

--------------------------------------------------------------------------------

اويلسيل (اولسى) Oil Seal

--------------------------------------------------------------------------------

الشربون Carbon Brush

--------------------------------------------------------------------------------

الجوانات Gasket

--------------------------------------------------------------------------------

الدينامو Alternator

--------------------------------------------------------------------------------

الكتاوت Relay

--------------------------------------------------------------------------------

طرمبة البنزين Fuel Pump

طرمبة بنزين ميكانيكية

طرمبة بنزين كهربائية

--------------------------------------------------------------------------------

طرمبة المياه Water Pump

--------------------------------------------------------------------------------

ترس الزيت Oil Pump Drive Gear

--------------------------------------------------------------------------------

طرمبة الزيت Oil Pump

--------------------------------------------------------------------------------

المقصات Axle Control Arm

المقص الخلفى Rear Axle

المقص الأمامى Front Axle

--------------------------------------------------------------------------------

جلب المقصات Rubber Bushings Axle

--------------------------------------------------------------------------------

واير السرعة Speedometer Cable

--------------------------------------------------------------------------------

كالبيرات الفرامل ( الدقمة ) Brake Caliper

--------------------------------------------------------------------------------

طنابير العجل Brake Disc

--------------------------------------------------------------------------------

الماستر العمومى Brakes Master Cylinder

--------------------------------------------------------------------------------

سيرفو الفرامل Brake Booster

مكونات السيرفو الداخلية

العلاقة بين السيرفو والماستر العمومى

--------------------------------------------------------------------------------

علبة الدركسيون ( الاسكاترا ) Quick Steering Rack

كاوتش مزيكا Steering Rack Boot Kit

Tie Rod Linkages بارات علبة الدركسيون

--------------------------------------------------------------------------------
بطاحة Federbeinlager

--------------------------------------------------------------------------------

مساعدين Shock Absorber

سوست المساعدين Coil Springs

--------------------------------------------------------------------------------

الابلاتين Contact set

--------------------------------------------------------------------------------

الكوندنسر condenser

--------------------------------------------------------------------------------

الكونتاكت Ignition Switch

--------------------------------------------------------------------------------

عمة الكربراتير Air Filter Cover

--------------------------------------------------------------------------------

قطمة الدركسيون

--------------------------------------------------------------------------------

فلتر الهواء Air Filter

--------------------------------------------------------------------------------

الميزان

كاوتش الميزان

--------------------------------------------------------------------------------

شداد الموتور

--------------------------------------------------------------------------------

عوامة البنزين

مكان تركيب عوامة البنزين فى شنطة السيارة

--------------------------------------------------------------------------------

ثرموثتات الحرارة

مكان تركيب ثرموثتات الحرارة فى الريداتير

--------------------------------------------------------------------------------

الشاسيه

--------------------------------------------------------------------------------

تنك البنزين Fuel Tank

--------------------------------------------------------------------------------

مكنة مارشدير

--------------------------------------------------------------------------------

ساعة الزيت Oil Pressure Switch

----------------------------------------------------

يارب يكون الموضوع عجبكم ...

مع تحياتى

Sameh Ahmed

كتالوجات السيارة ال 128 العادة والمعدل

noreply@blogger.com (sam4ever2010) — Mon, 23 Feb 2015 12:38:00 +0000

بسم الله الرحمن الرحيم

دى كل كتالوجات السيارة ال 128 العادة والمعدل باللغة العربية واللغة الايطالية عبارة عن ملفات PDF شامله كل حاجه سواء دليل الصيانة ( الميكانيكا والكهرباء ) او قطع الغيار .

---------------------------------------------------------

- كتالوج فيات 128 العربى معدل 1

- كتالوج فيات 128 العربى معدل 2

- كتالوج قطع الغيار الاصلية 128 باللغة الايطالية

- كتالوج فيات 128 العادة باللغة الايطالية

----------------------------------------------------

يارب يكون الموضوع عجبكم ...

مع تحياتى

Sameh Ahmed

عاوز أعدل فرامل ال 128 الخلفيه لديسكات

noreply@blogger.com (sam4ever2010) — Tue, 17 Feb 2015 15:29:00 +0000

بسم الله الرحمن الرحيم

بعد ابحاث كتير توصلت ان فرامل ال 128 الخلفيه بتتعدل لديسكات عادى وطبعا كده اى حد حيقدر يسقط مكنه وحينسى موضوع الفرامل ده غير ان ضعف الفرامل اللى فيها بيخللى العربيه تتكفى للامام عند الفرمله مما يسبب فتح الشاسيه ومشاكل ال 128 اللى احنا عارفينها .

المهم ده موضوع جبته من منتدى اجنبى لتعديل الفرامل بس للاسف مش مصور عمل ايه فى فرامل اليد وعدلها ازاى ؟؟؟

عموماً ده رابط الصفحه للى عاوز يقرأ الموضوع بالكامل يمكن يفهم اكتر منى اللى عمله الراجل ده .

128 Rear Disc Brake Conversion

---------------------------------------------------------

دى الحاجات المطلوبه :

Coupe/Sedan Parking Brake Cable 124
Custom Adapter Plates (L & R)
Custom Rotor Spacers (qty 2)
M8 Flat Head Socket Cap Screws (qty 8)
X1/9 Rear Caliper Brackets (L & R)
X1/9 (or 124) Rear Calipers (L & R)
X1/9 (or 124) Rear Brake Pads (set)
X1/9 (or 124) Copper Crush Washers (qty 2)
X1/9 Rear Brake Hoses (qty 2)
Standard Fiat Brake Rotors (qty 2)

------------------------------------------------------

هو فك الصره ( الدشمة )

وركب الكونفرتر اللى جايبه جاهز

وركب الطنابير وركب الصاموله الكبيره الى مسكاها

بعد كده حط الفلانشه اللى جات مع الكيت اللى اشتراه

بعد كده ركب عليهم الديسكات وثبتهم بالمسمارين

بعد كده ركب الجزء بتاع كالبرات الفرامل وطبعا اتربط فى الكونفرتر اللى ركبه اول حاجه

وركب كالبرات الفرامل اخر حاجه

وده الشكل النهائى

دلوقتى اظن ان ممكن كل حاجه تكون معروفه الا الجزء ده

ده بعد البحث لاقيت انه كيت بيتباع بالشكل اللى انا حاطط صورته كده بالظبط ، ثمنه كام بقى 290 دولار يعنى اكتر من 1000 جنيه فى حتته الحديده وال 8 مسامير دول هو طبعا ممكن يتعمل عند اى خراط بس لازم المقاسات تكون صح بالمللى كمان عشان مقاس الفلانشه ده معمول حساب انه يبقى الديسكات فى نص الكالبرات بالظبط بين فردتين التيل .. ده بالنسبه للتعديل اللى لقيته على النت.

------------------------------------------------------

نيجي لأرض الواقع .. لتعديل ال 28 بديسكات خلفية من ارخص واسرع طرق التعديل وأما مركبته عندي غير من اداء الفرامل تماما بس ركب في الكروما بدون فلانشة كما سبق وذكرت لكن في الريجاتا والريتمو وال 28 ممكن تتعمل فلانشة مستطيلة أبعادها 125 × 50 ×25 مم ( طول × عرض × سمك ) وكلها بالمم وبيتم تفتيح مكان المسامير حسب مقاس اماكن مسامير الكاليبر والشمعدان بقطر 10مم وترك شفة داخلية 3مم واستخدام مسامير النكيه بدون رأس مقاس 10 مم (سن 17 ناعم) وبطول 60 مم وقد تحتاج ل 8 وردة 17 لرجلشة الكاليبر وضبطة لمنع احتكاكة بالديسك أما بالنسبة لكابل الفرامل فبتروح بكابل فرامل 28 و 25 للحاج ابراهيم الخراط في شامبليون امام الكيلاني وبتقولة عايز اعمل نهاية كابل ال 28 زى ال 25 وترجع كابل ال 25 للبياع تانى .

------------------------------------------------------

ملحوظة :
المسافة بين مسمارين الكاليبر بالضبط 88.9 مم وبالتالي يبقي ابعاد الفلانشة بعد اضافة 10 مم كقطر لكل مسمار 17 اللي بيثبت الكاليبر في الفلانشة واضافة 8 مم للحفاظ علي جسائة الفلانشة لكل جانب بعد خرم المسمار يبقي اجمالي العرض 125 مم او 12.5 سم وبالنسبة للطول قطر الدرم او طبلة الفرامل الخلفية لل 28 205 مم او 20.5 مم .. لكن قطر قرص طنبور الفرامل للتمبرا 252 مم او 25.2 سم وبالتالي اكبر ب 5 سم تقريبا بيقسم علي 2 علشان اخد مساحة التشغيل للفلانشة + مساحة تشغيل اماكن المسامير في الشمعدان يبقي طول الضلع 50 مم تقريباً

------------------------------------------------------

دى صوره تخيليه للفلانشه اللى حتركب مكان الدشمه لتثبيت الكالبرات واللى حيتعمل فيها

ودى صوره الدشمه الخلفيه بالطنابير بتاعه ال 125 جبتها من الكتالوج بتاعها

بالاضافة للفلانشة حتشترى عدد 2 كاليبر خلفي ل 125 او 124 او البولونيز وعدد 2 خرطوم فرامل ريجاتا خلفي علشان طوال عن 28 وطقم تيل خلفى 125 وعلبة زيت باكم 400 مم لوكهيد الانجليزي وعدد 2 طنبورة تمبرا امامي او طنابير ريجاتا الامامية بس الافضل التمبرا لانهم اعرض واكبر في القطر وهيتخلصوا من الحرارة اسرع والمسامير الالنكيه وسلك فرامل 28 وتروح للحاج ابراهيم المذكور عاليه .

------------------------------------------------------

يعنى المطلوب دلوقتى عشان التعديل كالأتى :

1- عدد 2 كالبرات خلفى 125 او بولونيز
2- عدد 2 تيل خلفى 125
3- عدد 2 طنبوره امامى تمبرا او ريجاتا
4- عدد 2 خرطوم فرامل ريجاتا خلفى
5- علبه زيت باكم فرامل
6- مسامير النكيه لتثبيت الفلانشه
7- كابل الفرامل يتعدل النهايات بتاعته زى كابل ال 125
8- الفلانشه المستطيلة تتعمل عند الخراط

----------------------------------------------------

يارب يكون الموضوع عجبكم ...

مع تحياتى

Sameh Ahmed

سلك الدبرياج اتقطع منى ومش عارف اعمل ايه !!! هشرحلك طريقة تغيير سلك الدبرياج بالصور

noreply@blogger.com (sam4ever2010) — Mon, 16 Feb 2015 16:49:00 +0000

بسم الله الرحمن الرحيم

ناس كتير بتبقى ماشيه فى امان الله وفجأة سلك الدبرياج بيتقطع بدون اى مقدمات او اى سبب .. ساعتها بيبقى موقف صعب وخصوصاً لما تكون فى وقت متأخر جداً او وقت بدرى جداً او يوم مثلا زى يوم الأحد بيبقى كل الصنايعية وكل المحلات قافله .. ساعتها بتبقى مش عارف تعمل ايه ولا عارف تتصرف ازاى خصوصاً لما يكون معاك عيلتك او حتى ماشى لوحدك .. المهم .. عشان تبقى فى الأمان خلى دايما معاك سلك دبرياج زيادة احتياطى تحسباً لأى موقف مفاجئ ممكن يحصل فى أى وقت لاقدر الله .. وبرضه يبقى معاك علبة شحم وشوية زيت بتاع العربية وياسلام لو معاك مزيته تخليها برضه فى شنطة العربية والحاجات دى كلها رخيصة وبتتباع كلها فى رمسيس والتوفيقية رخيصة جداً يعنى المزيته دى ب 15 جنيه ( الكبيرة ) والصغيرة ب 10 جنيه تقريباً بس بتنفع بصراحه وعلبة الشحم برضه 10 او 15 او 20 جنيه فى انواع كتير وسلك الدبرياج الايطالى ب 17.5 جنيه وهتخلى معاك برضه صواميل 10 وورد احتياطى او تشترى صامولة مخصوص بتبقى لسلك الدبرياج مقاسها 17 بس القلاووظ اللى جواها بيبقى مقاس 10 نفس مقاس قلاووظ سلك الدبرياج ومعاها حته رصاصة كده بتبقى شغلتها زى رجلاش تعلى السلك بدل ماتحط صواميل كبيرة وسعرها جنيه ونص وسعر الرصاصه دى زيها برضه 1.5 .. وخلى معاك منها ديما زيادة عشان السلك لما بيقطع بتضيع فى الشارع على طول .. وده شكلها :

وده شكل سلك الدبرياج الإيطالى .. ( للناس اللى متعرفش شكله )

ندخل فى الموضوع :

دلوقتى انت واقف عالطريق وسلك الدبرياج اتقطع منك وطبعاً انت معاك واحد استبن شايله معاك فى الشنطة .. اول حاجه هتعملها قبل اى حاجه .. هتجيب السلك الجديد اللى معاك وتشحمه كويس من الطرفين وتبدأ تسحب السلك رايح جاى بحيث تدخل الشحم جوا الجراب بتاعه وبعد ماتخلص تشحيم ابدأ بعمل نفس الكلام بالزيت يعنى هتخلى الزيت برضه يدخل فى الجراب من جوه وتزيت الواير كله بحيث ان السلك يبقى مرن وناعم وثلث فى الحركة .

( الشحم )

( المزيته )

تشحم الواير وتسحبه من هنا ومن هنا بحيث تخلى الشحم يدخل جوه الجراب الاسود ونفس الكلام مع التزييت

دلوقتى بقيت جاهز انك تغير سلك الدبرياج خلاص وكل ماعليك انك هتنزل تشوف بدال ( دواسة ) الدبرياج تحت هتلاقى اولها خالص من فوق مسمار بصامولة صغيرة 8 تقريباً دى متشبط فيها طرف سلك الدبرياج فى الدواسة .. هتفك الصامولة دى وتخلع منها السلك .. بعد كده هتقوم تفتح الكبوت وتسحب باقى السلك المقطوع من الناحيه التانيه تطلعه بالجراب بتاعه بحاله بماله كده وترميه .

( مكان المسمار فى اول البدال من فوق )

هتجيب السلك الجديد اللى شحمته وزيته وتدخل اول طرف السلك ( اللى فيه خرم ) فى الفتحه اللى موجوده فى الصدر من ناحية الموتور بحيث تطلعه من الناحيه التانيه ( جوه العربية ) وتشبطه فى المسمار اللى فى البدال بنفس الطريقة اللى فكيته بيها تركبه فى المسمار وتربط عليه الصامولة ويادوب تربطها بايدك بس ومتقرطش عليها للأخر وسيبها مهوية ولا حتى تفكر تربطها بمفتاح .. بإيدك وبس .. لان مهمتها متخليش السلك يفلت من المسمار .. لكن لو قرطت عليها انت كده بتحجم السلك وتخليه ميتحركش براحته وممكن تخليه يقطع بسهوله فى اقرب وقت.. تمام لحد كده .. قبل ماتقوم وتمشى لو فى حد معاك فى العربية خليه يرفعلك بدال الدبرياج ميبقاش ساقط عشان تعرف تطول السلك الناحيه التانيه وميبقاش قصير ولا حتى تحمل على ايدك وتشد انت البدال .. لو مفيش حد هات اي مفك او اي حاجه حاول تحطها تحت البدال ترفعه بيها متخليهوش ساقط ولا مريح .

(مكان الفتحة اللى هتدخل فيها السلك فى جسم الفتيس وتوصله لحد دراع الفتيس)

هترجع تانى ناحية الموتور هتدخل سلك الدبرياج فى فتحه موجوده فى جسم الفتيس تعديه منها وتوصله بالدراع اللى راكب فى الفتيس وتحط الرصاصة دى وتركب الصامولة بالشقلوب ( معكوسة ) .. يعنى متخليش القلاووظ يبقى هوا اللى على طول منه للسلك اقلبها عشان تبقى عاليه شوية عشان لما تيجى تدوس دبرياج ميبقاش فى حك فى التروس او النقلات متجيش الا بصعوبة .. دخلت الصامولة .. اربطها بقى .. وشد دراع الفتيس ده بايدك لحد ماتجيب اخره على قد ماتقدر وافضل اربط الصامولة بإيدك للأخر او ممكن تستعمل مفتاح 17 بس مش مستاهله لإن الصامولة بتبقى مستريحه معاك وانت شادد دراع الفتيس .. تمام كده .. ادخل بقى وجرب دوس دبرياج وانقل نقلاتك وشوف بتيجى معاك ولا لا قبل ماتدور العربية .. وبعدين جرب دور العربية وجرب ادى نقلاتك بس طبعاً بالراحه عشان لو السلك لسه محتاج يتشد متخليش التروس تحك فى بعض لو تمام جرب دوس سنة بنزين وشيل دبرياج كأنك هتتحرك بالعربية شوف العربية بتطلع معاك على طوول ولا لازم تسيب دواسة الدبرياج كتير !! لو تمام يبقى خلاص .. لو لازم تسيب البدال كتير عشان العربية تتحرك يبقى تمور العربية وترجع تهوى الصامولة سنة بسيطه .. وبعدين ترجع تانى وتجرب وتشوف لحد ماتظبط المسافة اللى على هواك .
وبكده نكون خلصنا :) واتمنى تكونو استفدتم .

( مكان سلك الدبرياج من صدر العربية لحد دراع الفتيس )

( ده شكل الصامولة بعد ماتتربط )

ملحوظة : انا شايل البطارية على فكرة من المكان ده وناقلها مكان مروحة التكييف :) عشان محدش يستغرب من الشكل .. وفى صور قديمة وجديدة ..

----------------------------------------------------

يارب يكون الموضوع عجبكم ...

مع تحياتى

Sameh Ahmed

حكايتى مع التاكيهات .. موضوع شامل ومفصل عن طريقة ظبط التاكيهات

noreply@blogger.com (sam4ever2010) — Sun, 15 Feb 2015 13:36:00 +0000

بسم الله الرحمن الرحيم

طبعا حضرتك عارف البساتم بتشتغل إزاى وتوصيلها مع الكرنك من تحت .. فوق بقى فى وش السلندر ايه اللى بيميز عربية عن التانية ماهو كل العربيات ميكانيكيا واحدة .. واللى بيفرق عربية من التانية هو وش السلندر .

الفيات عاملة وش سلندر خفيف وظريف وسهل الظبط لكن القوة اللى بيأثر بيها على أداء الموتور ضعيفة بالمقارنة مع المواتير الالمانى واليابانى لأن كل واحد عنده التكنولوجيا بتاعته اللى عمل بيها وش الموتور .

العربيات الألمانى بقى عاملين تكنولوجيا أحسن شوية والإيطاليين سرقوها منهم اما اليابانيين بقى محدش قدهم عملوا وش سلندر تحفة بيطلع من مكنة 1600 سى سى قدرة 170 حصان

اللى جاى بقى أشكال الوش من جوه وهشرح التاكيهات بإذن الله

هنبدأ الأميريكان ماسلز ( الموستانج ) ، الصورة اللى جاية دى للوش بتاع السلندر هتلاحظ الشواكيش طالعة نازلة فوق الصبابات والسوست الجامده دى اللى بتساعد انها تحكم الصبابات فى غرف الحريق ، الشواكيش دى بقى لازم تظبط المسافة بينها وبين الصباب اللى بتدق عليه علشان ماتبقاش محملة ( علشان كده يقولك التاكيهات محملة ) أو يكون الخلوص بزيادة فيقولك التاكيهات مفتوحة وفى كلتا الحالتين العربية مش بتبقى مظبوطة - تسخن - تاكل بنزين - تنفخ زيت تضرب كاوتش الصبابات - وحاجات تانية كتير ممكن تعمل بلاوى مع ان ظبطها قمة فى السهولة والعبط .. تمام كده وخلى بالك ان معظم مواتير الفيات بالشكل ده والشواكيش بتتظبط مسمار وصامولة

نوع تانى بقى وده فى معظم العربيات الألمانى زى ماقلتلك ، اللى الطلاينة سرقوها ودى هتلاقيها فى الفولكس والفيات الألمانى والمواتير بتاعت السفينة الـ 132 وهى دى بقى اللى لازم تروح للخراط علشان يظبطها

ده شكل وش ال 132 من فوق بعد فك غطا التاكيهات

وده موتور كامه واحدة علوية برضو نفس النظام ركز بقى ، لاحظ ان عمود الكامة ماشى من فوق ( اللى باللون الغامق ومتثبت فى الوش .. شايف الأجزاء المثلثة اللى بتلمع وعاملة زى الجبنة النستو هى دى حدبات الكامة وظيفتها : العمود ده معمول بالكمبيوتر ومتقسم انه طول ماهو بيلف يفتح الصبابات ويقفلها حسب تقسيمة الصانع وده طبعا بيبدأ مع طلوع ونزول البستم والإشعال وهكذا طيب ايه اللى تحت حدبات الكامة بقى ؟؟ الأطباق والكستبانات ده بيبقى فى النوع ده من وش السلندر العمود بينزل يفتح الصباب ويقفله عن طريق الطبق والكستبان .. الكستبان فوق سوستة الصباب خبط لزق ، الأطباق بقى هى اللى بتتغير صيف وشتاء بمقاسات معروفه

بيتهيألى ان الصورة كده بدأت توضحلك صح ؟؟

علشان كده قابل بقى الصورة دى قطاع عرضى للوش ده بالظبط زى ماقلتلك مثلث الجبنة النستو بالسن بتاعه طالع نازل يفتح الصباب ويقفل بالسوستة لازم بقى المسافة مابين العمود ( قصدى مثلث الجبنة ) تكون مريحة لما يكون السن بتاعه لفوق ولو مش كده بتروح للخراط بيشيل الأطباق بطريقة هو عارفها ويغيرها ويظبط الخلوص ( المشكلة بقى يا كبير انك لازم تروح بدرى عند الخراط وتفتح كبوت العربية فى حته ظله وتبرد العربية تلج علشان يظبط الخلوص صح وماتبقاش محمله ولا مهوية لأنى زى ما قلت لو محملة هتاكل مثلث الجبنة النستو - تاكل بنزين - تهرب زيت لغرف الحريق لو ضغط الزيت جامد - وبلاوى تانية كتير ) ربنا يكفينا شر التاكيهات .

---------------------------------------

أشكال تانية برضو كنت عاوز أقولك عليها النوع ده فى الهوندا الأكورد بحبه جدا لأنه يجمع مابين قوة العزم وسهولة الظبط ولو مش واضح إسألنى هتلاقى الشكل ده برضو فى بعض العربيات الصينى بس الفرق بقى شكل المثلث فى عمود الكامة مختلف .. لأ كمان ده بيضاوى وشايف المسمار اللى بصامولة الصغير ده اللى بتظبط التاكيهات منه .. شايف الجمال والسهولة وفى نفس الوقت برضة قوة العزم

انا ما بحبش الحال المايل ، بس الكامة المايلة برضو ليها عيوبها وميزاتها

( مواتير شعبى بـ 1800 جنية الموتور بالفتيس ) والشكل ده فى معظم مواتير ال 131 الشعبى ومواتير البولونيز ( مع ان اخر موديل للبولونيز كان نازل 2003 ) بس فكرته حلوة برضه عمود الكامة تحت ومايل كده ومتوصل بالكرنك وسير الكاتينة فى منه نوعين ( سير كاوتش مسنن ) أو ( جنزيز ) علشان كده يقولك المواتير الكاتينة الجنزير خشنة وعمرها قصير من يومها

هنا بقى الشواكيش طالعة نازلة بحركة العمدان الإستيك الرفيعة Pushrods اللى تحت دى بتاخد الحركة من تحت عند عمود الكامة ( الكامة السفلية اللى قلتلك عليها ودى سهلة اوى فى ظبطها مفك وبنسة وفيلر

اهو كمان شكل تانى ونفس الفكرة

التاكيهات بتاعت الـ 128 نفس فكرة المواتير الالمانى لازم الخراط اللى يعملها انت هتروح بإذن الله لأى خراط بتاع كرنك ومواتير .. تنزل من البيت قبل ما الورشة تفتح ب 4-5 ساعات تفتح كبوت العربية وتسيب الوش يهدى على ماتشرب كام سيجارة مع كوباية شاى من الترمس أو حاجة ساقعة مع الجرنال :)

وأهم حاجة تفصل كابل الأرضى من البطارية ( ضرورى)

اول ما الوش يبرد هتبتدى تفور العمة بتاعت الكربراتير والخراطيم وأى حاجة تعترض غطا التاكيهات لحد ما يبقى زى كده

هتفك غطا التاكيهات بس وتعمل حسابك على جوانين إحتياطى من عند بتاع الكماليات ( سعر الجوان 5 جنيه نوع فل )

غطا التاكيهات بعد ماتفك ال 6 مسامير والجوان بتاعه نفس شكل الغطاء من تحت

هتلاقى من فوق عمود الكامة وتحته الأطباق والكستبانات غطسانين فى الزيت هتجيب سرنجة كبيرة وتشفط الزيت اللى حوالين الأطباق تحت حدبات الكامة ( مثلثات النستو ) وتستنى الخراط علشان ييجى يشتغل على طول بإذن الله
هييجى صاحبنا معاه الأطباق فى العلبة ومعاه العدة يظبط الخلوص ويقيس بالفيلر ويغير الاطباق المحملة ويظبط تمام

بعد كده تقفل موتورك وتدوره وتتأكد ان كل حاجة تمام ومفيش اى تسريب وماتنساش تجمع ( تربط ) المسامير بتاعت غطا التاكيهات خلف خلاف ولو الجوان فلين ماتحرقش عليه رباط عشان مايفوتش ويعمل مشكلة لا قدر الله

hydraulic valve lifter

valve tappet

classic car overhead

ده بتاع البولونيز وال 131 المواتير الشعبى عمود الكامة أهو تحت بياخد الحركة من الكاتينة وهنا كاتينة جنزير على فوق بالرود ( الصباع الطويل ) على عامود التاكيهات ( شواكيش ) وطبعا طريقة ظبطة سهلة بمفك وبنسة وفيلر

Engine tappets, Hydraulic valve lifter

وادى كمان البلوف اللى قلنا عليها بتاعت اللادا واللانوس ( فكيتها مرة فى الورشة كان واحد جاى ومعاه جولييت وكانت جايبة جوان وش ، طبعا فورت كل البلوف ومن جوا البلف كان مليان طحينة فكيتهم والحمدلله بلف بلف ورجعوا تانى فلة )
الميزة بقى فى البلوف دى انها بتدى عزم أكبر على السرعات العالية وتخليلك الموتور على الطريق محدش يلحقك علشان كده لما كنت رايح الغردقة بالفيرنا كنت بخيط واحد بتاع لانوس لحد سرعة 160 ميحصلنيش ، بعد كده صباح الفل الاقيه واخد الطريق قطر معرفتش أحصله ) مرة تانية كنت على طريق السويس بالـ 131 وقابلتنى صديقتى اللدودة اللادا برضو طلع منى على الخامس

ده الكستبان من جوا

وبرضو دى كستبانات

هنا بتظبط التاكيهات عن طريق انك تلف الكستبان وتظبط بالفيللر .. ده بقى وش السيلندر بتاع السيفيك ال 1600 سى سى فاكرين الموتور التعبان ده اللى بيطلع 120 حصان وانت طالع طبعا ده قصة لوحديها بص كده طبعا ماشاء الله تحفة فنية انت عارف صبابات البنزين والعادم طبعا الوش ده متطور جدا وتكنولوجيا سابقة أوانها

الجزء العلوى بتاع صبابات العادم وطبعا تقدر تظبطها بكل سهولة مش لازم خراط ( مفك وبنسة وفيلر ) الناحية بقى اللى فوق صبابات العادم وجنبها اللى فيها المواسير دى :
بتركب البوجيهات جوا المواسير دى وتلاقى البوجيه فى وسط غرفة الحريق وش عشان كده الموتور ده حامى وعالى الأداء

حاجة تانية كمان بخصوص الـ VTEC

المكنة دى المفروض انها 16 صباب

ايوه فعلا 4 صباب لكل بستم لكن هيا بتشتغل فى العادى 12 صباب والزيادة دول بيفتحوا مع ال VTEC على 3.5 أو 4.5 أر بى ام عشان تشتغل معاك 16 صباب وتاخد منها أقوى عزم ، وتلاحظ الموضوع ده لما تكون بتشد بيها ( الزنة المشهورة بتاعت مواتير السيفيك ) وخصوصا مواتير الـ SI والـ TYPE-R بس الـ VTEC مابقاش ينزل الإتحاد الأوروبى عشان بيزود إستهلاك الوقود ومش متناسب مع مواصفاتهم علشان كده شركة هوندا عملت الـ I-VTEC وضحكت عليهم ونزلت أسواق أوروبا ، لكن مع الأسف مبقيناش نطلع من مواتير السيفيك الهورس باور بتاع زمان لكن برضو الهوندا هوندا

هنرجع تانى للموضوع ببعض الصور الجديدة والشرح بتاعها

زى ماتكلمنا قبل كده ، فيه بعض أنواع العربيات من الكورى واليابانى التاكيهات مش بتتظبط ولا أطباق ولا رجلاش ( مفك وبنسة وفيلر ) اللى هيا بتبقى بلوف هيدروليك ودى صورة قريبة ليها .. شايفين هنا مفيش رجلاش مجرد البلف منه للمساعد لسوستة الصباب ومن فوق الجزء المدور ده عمود الكامة وهو بيلف ، بيفتح ويقفل والميزة فى البلف انه عمره طويل بس ركز معايا لو صوته على لازم يتكشف عليه ( اللى هوا صوت التنقير فى الموتور من فوق لأنه لوباظ هتبقى مشكلة كبيرة لا قدر الله )

تمام كده البلف اللى على الشمال ده فى خروم بيدخل منها الزيت لأنه جواه بستم صغير ( أيوه بستم ) وسوسته قويه وخلى بالك البستم بيبوظ والسوستة بتضعف علشان كده لازم تتابع الموضوع ولما تسمع أى صوت مشتبه فيه لازم تفتح وتبص على الدنيا جوا فيها ايه بص معايا كده

وش موتور عمود الكامة فوق بالمثلثة بتاعته Cam Lobe والبلف اللى هو Lash Adjuster الركبة اللى بتقابل عمود الكامة Rocker

وده الكستبان العادى اللى بيتغيرله طبق واللى على اليمين هيدروليك وده شكل الظبط بالفيلر بس خلى بالك كل عربية بتختلف عن التانية فى المقاس ( بيبقى مكتوب فى الكاتالوج بتاعها ) اللى بتحطه بالفيلر سواء لصباب العادم أو صباب دخول البنزين

الشكل ده بيظبط على 0.1

وده فيديو شرح يوضح اكتر طريقة الظبط ازاى

نيجى بقى للعدد المستخدمة فى ظبط التاكيهات غير المفك والبنسة والفيلر

الزرجينتين دول بتفك بيهم سوست الصبابات ودى بتنفع للتاكيهات اللى على الشواكيش

ودى كمان زرجينة تانية لفك الصباب بس ممكن ماتنفعش عندك او إحتمال انها تنفع فى حدود 40% ودى مش هتحتاجلها الا لو هتعمل كاوتش صباب اوروديه او عمرة

هو ده بقى المهم عربيتك هتتفك بالزرجينتين دول واحدة بتريح بيها الطبق لتحت تيجى على سنها بالجنب وتحط طرف الزرجينة وبعدين هتلاقى الطبق طلع معاك بالظبط زى أوشاط الطاولة

المفك اللى على اليمين تظبط بيه التاكيهات الشواكيش والفيلر المايل ده اللى بنقيس بيه يباشا

لاحظ هنا المفك فى النص والأسود ده زى مفتاح مشرشر ( بنستغنى عنهم بمفك ومفتاح 13 وخلاص وبيأدى نفس الغرض ) والفيلر موجود فيه جميع المقاسات اللى ممكن تحتاجها كلها ( 1مم ، 0.9مم ، 0.8 ......... 0.1مم )

سؤال ؟؟ وجواب !!

س : ياريت بعد الشرح والتوضيح نعرف اسم كل قطعة وبتتباع فين فى السوق المصرى ؟

ج : مكان بيع العدد دى فى شارع الجمهورية وفى التوفيقية وعند مين بالتحديد تقريبا شارع زكى والسعر كالتالى : زرجينة الصبابات مش هتحتاجها فى عربيتك لكن سعرها 40 جنيه والفيلر ب 10 جنيه والنوع كبير المايل ده بـ 15جنيه

س : ايه العدد والادوات الى احتاجها لخلع طبق تاكيه او اشيك على ثغرة الطبق ؟

ج : حديدة حرف يوه U ، وأجنه مايلة عامله زى سكينة الموز .

س : بس ليه السر فى ان الخراط بشحمه ولحمه هوا اللى لازم يظبط التاكيهات ؟ علشان هيخرط ؟؟ طيب لو حبيت أستبدل الاطباق باطباق جديدة مش المفروض ان الاطباق دى بتتباع زى اى قطعة غيار ؟ مثلا الطبق اللى يكون فاتح او عالى استبدله بطبق جديد ؟ كمان انا عايزك تشرحلى ايه الى بيعمله الخراط بالضبط فى الطبق ؟ مش بيخرطه ؟ طيب ما انا أستبدله واريح نفسى ؟؟

ج : الخراط بيعمل الشغلانة دى تسليه وماتنساش انه اكتر واحد عنده من الاطباق دى لأنه طول النهار والليل بيفك فى مواتير ويعمل عمرات ويقفل يبقى علشان تشترى الأطباق هتجيب العلبة الكاملة والعده والموضوع هيكلفك على الأقل 300 - 400 جنيه وظبط التاكيهات عند اى خراط هيكلفك 30 جنيه والإختيار اولا وأخيرا لحضرتك

وده اللى بيعمله الخراط بالظبط

وده شكل الأطباق اللى بتتغير

ودى شوية فيديوهات عالماشى بيوريك فيها كل اللى عايز تعرفه عن طريقة ظبط التاكيهات وتغيير الأطباق ( الكستبانات )

----------------------------------------------------

يارب يكون الموضوع عجبكم ...

مع تحياتى

Sameh Ahmed

عمل تقويات للسيارة بالكامل

noreply@blogger.com (sam4ever2010) — Thu, 12 Feb 2015 19:09:00 +0000

بسم الله الرحمن الرحيم

موضوع مهم جداً لكل ركاب ال 128 وهو عمل تقويات ودعامات للعربية كلها لمنع الشروخ اللى بتحصل فى الشاسيه او الركب او الشنطة او او او .. ندخل فى الموضوع ... ونبدأ بالشاسيه :
طبعا اي حد راكب 128 مر بمشكلة الشاسيه سواء يفتح او يتشرخ يقوم يجري علي السمكرى الحم الحم الحم زرجينة فوق و زرجينة تحت و شيل الموتور و ركب و رش الحوض و فلوس يمين و شمال و اول مطب هوب ولا اكنك عملت حاجة المشكلة بقي في الصنايعى بيحل المشكلة اللى قدام و مبيحلش السبب الاصلى اللى هوا كذا حاجة مساعدين مثلا المساعد بايظ او محجر بيرزع في المطبات ويشرخ العلب ويفتح شاسيه .. حتت باروما بسبب تراكم المياه .. مقص بايظ ،،، الخ وطبعا انتو عارفين عربية بقالها اكتر من 30 سنة ماشية في شوارع مصر و علي ايامها مكنش فيه معالجة للشاسيه ضد الصدا و التاكل ولا الكلام ده خالص يبقي كده نبص علي سبب المشكلة الاول ، و بعدين تاني حاجة المقاسات الصح يعني لازم حد بيفهم في الشاسيه و المقاسات مش اي زراجين و خلاص لان السنتيمتر بيفرق في حاجات كتيير ثالث حاجة و ديه الاهم نوع اللحام المفروض ارجون طبعا لو رحت لسمكري و قلتله ارجون هيفتكرك بتشتمه رابع حاجة العزل فيه طرق كتير بس اسهلهم و ارخصهم بلاك او بيتومين او شيش لوك علي حسب التسميات و فيه حاجات تانية كتير عند بتوع بويات العربيات خامس حاجة التدعيم عن طريق الشدادات من البطاحة للبطاحة ، من البطاحة للركبة النحيتين ، من البطاحة لتحت الازاز الامامي .. في العصب من الركبة للمقص النحيتين .. من الركبة للركبة .. و من المقص للمقص .. ومن المقص للميزان .. وطبعا احنا بنعملهم عمولة لكن برة بيبقي كيت كامل طبعا احنا ملناش دعوا بالحاجات ديه احنا بتوع العمولة :D و في حل اخير انك تصب رصاص بس التكلفة بتبقى عالية جدا .

نيجى بقى للمشاكل اللى بيسببها الشروخ و فتح الشاسيه :

1- عومان فى العربية وعدم القدرة على السيطرة عليها خصوصاً عند الضغط علي دواسة البنزين مع الغيار الاول .

2- تاكل في الكاوتش و كل ما تظبط زوايا مبتتظبطش .

3- جلب العافشة تبوظ باستمرار .

4- خروج اكس و صليبة الكوبلن برا الفتيس .

5- طقة مع الفرامل او علي المطبات .

اسيبكم مع الصور ...

الكيت الجاهز بتاع بلاد بره

شداد من المقص للميزان

شدادات عمولة للحوض

شداد من البطاحة للبطاحة

شداد الشنطة

وبكدة نكون خلصنا والحمد لله ...

اتمنى تكونوا استفدتم من الموضوع

ويارب يكون عجبكم

مع تحياتى

Alaa El-Din Effat

أسعار الصاج

noreply@blogger.com (sam4ever2010) — Thu, 12 Feb 2015 18:59:00 +0000

بسم الله الرحمن الرحيم

الأسعار دى تقريبية من أسعار السوق سواء جديد أو استيراد فى الوكالة أو عزبة شلبى أو اماكن ومحلات الاستيراد وطبعاً الأسعار قابلة للزيادة او النقصان حسب سعر السوق .

ودى أسعار من مصنع عباد الرحمن فى شبرا الخيمه للصاج وطبعاً بنقدم شكر وتحية خاصة للباشا عمرو احمد Amr Ahmed ال اتبهدل معانا ونزل خد جولة ف السوق عشان يجبلنا الاسعار دى :)
بالنسبه لصاج الفيات 128 .. فى 4 مصانع بتعمل الصاج بتعها و الاسعار بتختلف من مصنع لمصنع حسب الخامة .. أفضل حاجه كخامة نضيفة مصنع الفؤاد .. السعر الاعلى .

الصدر الأمامى من 160 ل 230 جنيه

الظهر الخلفى من 200 ل 240 جنيه

الرفرف الامامى من 100 ل 150 جنيه

الرفرف الخلفى من 195 ل 240

طبلة الباب من 75 ل 115 جنيه

العتب من 55 ل 90 جنيه

فخده كامله بـ 600 جنيه

قنطرة امامى بـ 45 جنيه

قنطره خلفى بـ 160 جنيه

سلاح تحت كامل فردة شاسيه بـ 60 جنيه

سلاح علوى الى فيه الصوابع بـ 35 جنيه

الصوابع القطعه بـ 10 جنيه

كبووت بـ 470 جنيه

الشنطه بـ 400

الكرتيره الخلفيه بـ 60 جنيه

الدواسه بـ 50 جنيه

قوايم ابواب الواحده بـ 45 جنيه

التوربيدو "الجزء الصاج الى تحت الزجاج الامامى والخلفى"
الامامى بـ 130 جنيه
الخلفى بـ 160 جنيه

داير رفرف بـ 50 جنيه

نص رفرف بـ 45 جنيه

عندهم كمان كشافات وشبك للعربيه .. بصراحه فى فرق جامد فى الخامة بين الصاج الغالى و العادى الرخيص وعندهم كل الصاج لانواع كتير .. شاهين و فيرنا وهيونداى وعربيات تانيه ...

-----------------------------------------------

ودى مجموعة اسعار تانية ف أماكن تانية زى الوكالة وعزبة شلبى

سقف بدون قوايم : 1000 جنيه

سقف بالقوايم : 1200 : 1300 جنيه

قنطرة : 55 جنيه

4 ابواب : 1000 : 1200 جنيه

طبلة باب : 85 جنيه

كبوت : 500 : 600 جنيه

رفرف امامى أو خلفى : 130 : 150 جنيه

صدر معدل بالستارة : 180 : 200 جنيه

صدر معدل بدون ستارة : 130 - 150 جنيه

فردة شاسيه : 75 جنيه

ركبة : 30 جنيه

قاعدة بطارية : 20 جنيه

--------------------------------------------------------

يارب يكون الموضوع عجبكم ...

مع تحياتى

Sameh Ahmed

رش عربيتك دوكو بنفسك - موضوع كامل وشامل الأسعار والخامات

noreply@blogger.com (sam4ever2010) — Thu, 12 Feb 2015 18:58:00 +0000

بسم الله الرحمن الرحيم

الموضوع ده انا ناقله من كذا ماكن : جروب الحرفيين الهواة - موقع نايل موتورز شرح الأستاذ احمد فارما وطبعاً عدلت فيهم شوية حاجات تنسيق للموضوع والذى منه وقولت أجمعه هنا عشان يبقى مرجع لكل الناس والكل يقدر يستفاد منه على طول .. وطبعاً البركة فى الرجالة اللى قامت بالواجب وعملوا الموضوع ده بنفسهم .. ندخل فى الموضوع .

-------------------------------------------------

عملية دهان السيارات في مصر .. عملية مفتوحة للنصب بشكل كبير سواء إستخدام الخامات الرديئة .. أو إستخصار المجهود والكروتة أو المبالغة في السعر ومن هنا ومن هذا المنزلق قررت إني أرش عربيتي بإيدى أنا فتحت موضوع دوكوو .. لكن إتأخر كتير لأكتر من سبب لاداعي لشرحها .. فتحت جوجل صور وسجلت على منتدى أجنبى للسيارات الكلاسيكية .. قابلت واحد إسمه Matt على منتدى أمريكى الراجل ده صاحب مركز تجديد السيارات الكلاسيكية وكتر خيره فضل ماشى معايا خطوة بخطوة .. لأن للأسف في البحث على جوجل .. ملقتش ولا موضوع بالعربي عن رش العربيات .. إلا طبعا الدعاية عن الورش أو خلافه .. لكن حد حط خبرته في طريقة رش العربيات .. بصراحة ملقتش فأنا قررت أن أكون أول مصرى عربى يعمل عربيته بإيده بدون خبرة سابقة وأول مصرى يعمل عربيته ويوضح للناس الخطوات خطوة بخطوة بالصور قدر الإمكان ونايل موتورز أجدر أنه يشيل الموضوع ده .

-------------------------------------------------

الخامات المطلوبة علشان تعمل عربيتك في جراجك أو تحت بيتك :

1- كومبروسور هواء ( انا طبعا ماجبتش .. فكنت بستخدم الكومبرسور بتاع واحد بتاع محل كاوتش وزيت قريب مني )
2- مسدس هوا .. سعره بــ 120 - 140 جنيه
3- معجون صاج .. عبوة 3 كيلو في حدود 50 جنيه .
4- معجون فايبر .. إستخدامه قليل ورخيص بـ 25 : 40 جنيه
5- ورق سنفرة متنوع .. 80-120-320-600-1200 ... إلخ .. الفرخ الورق بــ 4 جنيه
6- جركن ثنر وده رخيص بــ 16 جنيه الجركن 3 لتر تقريبا
7- سكينة معجون وجلدة فرد .. بــ 5 جنيه تقريبا
8- 3 بكرات لزق ورق .. البكرة بـــ 3.5 جنيه
9- كام كيلو ورق جرايد بـ 5 : 10 جنيه
10- علبة فيللر بطئ بـ 40 جنيه
11- بطانة للصاج إسمها كابسي سيرفسر تقريباً بـ 30 جنيه

-------------------------------------------------

المرحلة الأولى : صنفرة العربية بالكامل عالصاج

الخطوة الأولى زي ما عم Matt قالى لازم العربية تكون على الصاج فكان لازم ألتزم حرفيا وشلت البوهية كلها على الصاج .. شيل البوهية له اكتر من خيار .. ياإما تشيلها بالسنفرة . سنفرة 40 او 80 أو بطرق كيميائية أو بصاروخ وديسك سنفرة .. الأسهل الكيماوى .. لكن ماحاولتش بصراحة فشلتها بالصاروخ وديسك السنفرة .

شكل الديسك كالأتى

الصاروخ بيتمسك بزاوية 30 درجة على الصاج بدون ضغط على الصاج يدوبك تمشيه كده رايح جاى .. العملية في الاجمال خدت منى 3 ساعات فى الاربع ابواب .. والرفرفين اللى ورا العربية بقت كده على الصاج .

العربية فى النهاية بقت زى كدة بالمنظر ده

ده شكل الصاروخ بالديسك

طبعاً الصاروخ البوش ده أنضف وأغلى حاجه سعره تقريبأ 1500 جنيه .. وفى أنواع تانيه كويسة برضه وشغاله بس صينى وسعرها 130 : 150 جنيه منها ماركة كراون

كدة خلصنا المرحلة الأولى والعربية بقت عالصاج

-------------------------------------------------

المرحلة الثانية : دهان البطانة على الصاج

هتروح عند بتاع الدهانات .. وتقوله عاوز كابسي سيرفسر surfacer ودي بطانة للصاج مباشرة ولو لقيت عنده كابسى كوت 805 .. هاته البطانة دي للصاج بشكل مباشر علشان عزلها .. وعزل الصاج .. الكيلو بــ 17 ج تقريبا حسب مانا فاكر .

1- تغسل العربية غسلة محترمة .. بالمياه والصابون
2- تنشفها كويس أوي بفوطة ماتسبش وبر على العربية
3- تلزق الازاز والاجزاء الي مش هتترش بالجرايد
4- تمسح أي تراب بفوطة قطن ( انا مسحتها بفانلة داخلية قديمة )
5- تخفف البطانة بالفيلر بالنسبة الي مكتوبة على علبته .. غالبا 1 : 2 التلت ثنر .. والتلتين بطانة .. وترجها كويس قبل ما تحطها في علبة مسدس الهوا .. وياريت تقف في حتة بعيد عن التراب والهواء والعفرة والطريق .
6- ترش يمين وشمال .. ببطئ مش اوي يعني تظبط المسدس إن الرش يكون خفيف علشان ميسيلش .

الصورة من موقع أجنبى .. وأتمنى الاقى صور العباقرة المصريين بتوعنا وهما شغالين هتكون افضل

كده خلصنا المرحلة الثانية والعربية دلوقتي بقت على البطانة

-------------------------------------------------

المرحلة الثالثة : ظبط السوكة body lines

بصوا يارجالة .. كنا وصلنا إن العربية دلوقتي على البطانة .. البطانة اللى على الصاج اللى إسمها سيرفيسر surfacer .

الخطوة دى بتغسل فيها العربية كويس جداً .. وتبل السنفرة (سنفرة 120) ويدوبك تحط السنفرة على الصاج وتزقها ماتحكش جامد يعنى يادوب تمشي إيدك بالسنفرة على الصاج لحد ما تخلص العربية كلها وتسيبها تنشف حوالى ساعتين تلاتة براحتها خالص علشان المرحلة الجاية مرحلة المعجون .. والمعجون بيشرب الميه واقل رطوبة هيشربها ولو شرب ميه أو شم رطوبة بعد ما ترش هينفخ والبوهية هتشقق وتطقطق وتبقا ليلتك سودا يامعلم .

انت بتسنفر لحد استواء السطح والأهم طريقه السنفره .. بتلف فرخ السنفره على حاجة اسمها sand-block ودى عبارة عن خشبة مستقيمة (أو أى جسم صلب مستوى ) بيتحط عليه السنفرة علشان لما تسنفر بيه .. يكون السطح مستوى تماما

اتجاه السنفرة في السطح المستوي .. بيكون حرف X تسنفر من فوق لتحت مايل يمين .. ومايل شمال بالتساوي الساند بلوك ممكن يكون بلاطة طويلة وتلف عليها السنفره ... دي تضمنلك تقريبا سطح مستوي ودي احسن من طريقة الصنايعيه في انه يسنفر بإيده لأن ده العك بعينه وبتعمل grooves ومابتديش سطح ولو حتى شبه مستوي .. بتلاقي الجمب مموج .. السنفرة تحت الساند بلوك .. يتكون مستقيمة تماما لما تمشيها على حته فيها عالي وواطي.. هتعمل كونتاكت مع العالي الأول .. وهتفضل تاكل فيه لحد ماتوصل للواطي وتكون معاك النتيجة أن العالي بقا في نفس مستوى الواطي والسطح مستقيم تماما

بعد ما العربية نشفت .. تمسحها كويس جداً .. وتبدأ تشد لزقة ورق على الحتت الي أنت هتظبط فيها السوكة .. فيه حاجة إسمها ( الإدة ) بتشديد الدال .. دي بتتحط فوق السوكة .. وتتلزق عليها .. وتشد عليها المعجون وتسيبه ينشف وتشيل ( الإدة ) دى وتكمل المعجون تانى .. الإدة دي زي المسطرة الحديد كده أنا طبعا ماعرفتش أجيبها منين .. فروحت إستلفت صفيحة منشار طويلة بتاع 2 متر من النجار إلي قدامى هتقضى نفس الغرض وكان فيه كسر في العتبة سنفرته بالصاروخ وحطيت عليه شعر فايبر .. وحطيت عليه بولى إستر مخلوط بالمصلب .

ودى كانت أخر حاجة قدرت أجمعها من شرح الدكتور احمد فارما وبعد كده الموضوع بقى عبارة عن رغى عالفاضى وصور منتهية الصلاحية ومش عارف اصلا شكل عربيته بقى عامل ازاى !!! والله اعلم

-------------------------------------------------

المرحلة الرابعة : مرحلة التجهيز لدخول الفرن

ودول شوية فيديوهات عالماشى لطريقة تجهيز ورش العربية دوكو

-------------------------------------------------

وده موضوع تانى للأستاذ عمرو محسن عمل عربيته بنفسه ربنا يباركله

السلام عليكم يا اصدقائى الحرفيين .. اولا احب اشكركم جميعا لمساندتى وتشجيعى ثانيا التقرير المفصل :
مبدئيا انا عربيتى قديمه وزى ماهتشوفوا الصور انا اشتغلت على ال 4 رفارف وجزء من السقف وجزء من الشنطه والكبوت .

1- خامات التاسيس :
- علبة معجون ستوك 3 كيلو بـ 40 جنيه
- فيلر سريع كابسى بالمصلب بالتنر علبه 1.7 كيلو بـ 42 جنيه
- 1/8 كيلو دوكو احمر ب 15 جنيه لخلطه مع الفيلر لتقريب لون البطانه الى اللون النهائى

2- العدد والادوات المستخدمه :
- 2 فرخ صنفره 60 بـ 8 جنيه
- فرخ صنفره 180 بـ 4 جنيه
- فرخ صنفره 320 بـ 4 جنيه

- سكينه معجون و 2 فبره بـ 15 جنيه
- مساكة صنفره ب 15 جنيه
- قرص صنفره للصاروخ ب 8 جنيه
- صاروخ
- كمبريسور

3- الفينش :
- كيلو دوكو فرن كابسى بالثنر والمصلب والجرايد وبكر اللزق بـ 133 جنيه
مصنعية كابينة الفرن 70 جنيه
الشاى وكده للصنايعى 20 جنيه

كده الاسعار بالتفصيل الممل

ندخل على التشغيل والوقت :
العربيه اخدت 3 ايام عمل بواقع 3 ساعات فى اليوم وده طبعا لضيق وقتى وانى لازم افحص وارخص باسرع وقت .

- اليوم الاول تجهيز العربيه (غسيل العربيه غسله محترمه ) علشان ابين البويه المطقطقه واشتغلت الاول بالصاروخ وعليه قرص الصنفره لحد ما نزلت كل البويه المطقطقه ولمعت مكانها والصاج المكشوف وبعد كده بالمياه والرابسو والصنفره ال 60 عديت على العربيه بالكامل ادتلها شطفه محترمه تانى ونشفتها جامد وبعدين تم عمل المعجون طبعا هدرت كتير لحد ما قدرت اضبط كميه المعجون مع المصلب ومسك السكينه والفبره على كل الاجزاء مع مراعاة العالى والواطى .

- اليوم الثانى عمل تصفيه للمعجون بالصنفره 60 مع المياه بالرابسو ( جردل فيه مياه بالرابسو وفوطه صفراء ) لازم المياه مع الصنفره والصنفره تكون فى المياه قبل الاستخدام بربع ساعه وبعدها تنشيف العربيه وتلقيط المناطق الواطيه بالمعجون وبتكون اسهل واوضح .

- اليوم الثالث والاخير تم تنعيم الاجزاء الملقطه بالصنفره الـ 180 ورش الفيلر ( البطانه ) بالكمبريسور مع خلطه ب 1/8 كيلو احمر علشان اللون يستر باقل كمية دوكو وده كان بالنهار واخد حوالى ساعه ونصف لحد ما نشف وبعدها صيفت الفيلر بالصنفره ال 320 والمياه والرابسو لحد ما وصلت لدرجة النعومه المطلوبه ووديتها الكابينه واديت للصنايعى الدوكو والجرايد واللزق وهو قام بالتلزيق والدهان النهائى .

ودى محصلة الشغل بتاعى والحمد لله

وده الشكل النهائى

واخيرا بشكركم كلكم لمساندتى وتشجيعى ومشاركتى فرحتى بإتمام تجربتى .

-------------------------------------------------

وده موضوع تانى للأستاذ Zingo Beso Zingo

=========================
إزاى تدهن عربيتك بـ 100 جنيه بنفسك
=========================

بسم الله الرحمن الرحيم

الموضوع و ما فيه كنت بسأل من يجى سنة فيها إيه لو دهان العربية حاجه غير الدوكو ؟ الكتروستاتيك - انامل - أو لاكيه حتى ؟ إيه اللى هيجرى .. مهندس الفحص كده كده أيدة طويلة و لو عربية زيرو و عصلجت معاه هيفرتك الفرش بتاعها علشان صاحبها يدفع أضعاف الرشوة لسروجى .. و كمان فيه مواقف ممكن تحصل وأنت مزنوق مادياً و محتاج تتصرف .. النمرة أتسرقت أو وقعت و طبعاً لازم تعمل مذكرة فقد فى القسم و مينفعش تمشى أكتر من 3 أيام و إلا لو لجنه رخمة قابلتك !!! ربنا يستر .. و طبعاً لازم فحص و تسلم النمرة القديمة و تأخد نمرة غيرها .. والعربية شكلها جربان من الركنه فى الشارع والشمس و المطر و .... إلخ و الميزانية بايظة ووراك فحص .. توكل على الله و تابع معايا .

-------------------------------------------------

1- تودى العربية لسمكرى إبن حلال يلملك اللى فيها .. و من خلال خبرتى المتواضعة مع " دقاق الصاج " أحب أقول إن 99.999% منهم شغلهم لازم يطلع فيه عيوب والحاجه اللى تدق وتآخد حموات مستحيييييييل ترجع بأبعاد الفابريكا .. فالمهم تهتم بإن ميكونش فيه بارومه أو شروخ أو أو ... الأساسيات يعنى .

2- تستلم العربية و تجهز الآتى :

× مكان للشغل (جراج أو شارع هادى قريب أو قدام البيت لو فيه مكان

× صاروخ قطعية (فيه أنواع صينى فى العتبة و الرويعى و الجمهورية من أول 75 جنيه .. و أنضف الأنواع INGCO - APT Crown لو صاروخ 5 بوصة ممكن يوصل لـ 175 - 200 جنيه ) - لو معندكش صاروخ مفيش مشكلة بس هتتعب شوية فى السنفرة يدوى .

× أفرخ سنفرة 80 ، 140 (ممكن السنفرة الـ 80 تجيبها بكرة بالمتر, هات 4 متر, بتستحمل شوية عن الأفرخ الورق بس هاتها مقاس 100 مش 80)

× مسدس بينت زوم اللى فى التليفزيون .. بيتباع على موقع سوق بـ 200 ج بالشحن .. أو تأجر مسدس و كمبروسر من أى محل جنبك ( مسدس الدوكو فى كلوت بك من أول 60 ج و إنت طالع )

× علبة معجون حديد ( استوك ) علبة 2.750 جم - بيقولو عليها 3 ك + انبوبة المصلب بتاعها بـ 43 ج (ماركة معفنه اسمها ميدو و كل الصنايعية شغالين بيها متفكرش هيجيبلك سكينز حاشا و ماشا .. و أتأكد أوى من السعر علشان سألت على الواحد كيلو نفس النوع لاقيتها بـ 45 جنيه فى محل تانى !!!

× علبة لاكية ( لاكيه بأقول مش دوكو .. و يكون لامع بتاع سايبس .. و تجيب أرباع وانصاص لاكية و تخلطهم لنفس درجة اللون أو تخلى الموان يخلطهملك لو عاوز درجة صعبه شوية )

× بلاستيكة فرد و سكينة معجون

× خرطوم علشان هنشفط شوية بنزين من التانك أو شوية ثنر لو هتستخدم مسدس رش ( مش بينت زووم Paint Zoom علشان الثنر هيأكله )

× بكرة لزق ورق و شوية جرايد محترمين

3- تلبس عفريتة الشغل وتفضى العربية من بره بالكامل من أى حاجة زى المساحات والمرايات الجانبية والفوانيس والغمازات والإشارات والباكتات والدلايات والإكصدامات .. يعنى خليها عالصاج بس .

4- تبدأ بسنفرة 80 أو 100 لكامل جسم العربية سواء علية دوكو قديم أو أتعمل فيه سمكرة و بقى عالصاج .. لو فيه أى معجون قديم مشقق أو مطقطق لازم ييجى عالصاج فى الجزء المطقطق ده ( الصاروخ وقرص سنفرة 40 هيساعدك جداً ) .. كله يتسنفر حلو وبعدين يتغسل بالمياه و تنشفه .

5- تفتح علبة المعجون وتقلبها بسكينة المعجون علشان الزيت اللى عالوش يتخلط بيها .. و تسحب شوية عالسكينة ( نص سكينة المعجون و تحط عليه من 2-3 سم مصلب وتقلب ببلاستيكة الفرد المصلب مع المعجون اللى عالسكينة و تبدأ تسحب معجون بالبلاستيكة ( مش بالسكينة ) .

ملحوظة مهمة : أوعى و إياك تحط المصلب على العلبة كلها تخلط حبه حبه على القد و تكون أيدك سريعه فى فرد المعجون عالصاج .. لو بطئ .. قلل الكمية علشان المعجون بعد مبيتخلط بالمصلب قدامك عالأكثر 4 دقايق و تلاقيه نشف و هو لسه عالسكينة و تضطر ترميه وبالنسبة لسحب المعجون بيكون على المناطق اللى فيها شغل سمكرة أو كان فيها طقطقة معجون قديم ( و شلته طبعاً بالصنفرة ) .. لو عندك أى جزء مدهون قبل كده و مفيش فيه شغل يبقى تخليه متصنفر بس و متجيش جنبه بأى معجون .

6- سنفر ثم سنفر و بعدين بقى ... سنفر .. المرحلة دى كل متخدم فيها حلو الناتج النهائى هيطلع بإذن الله ممتاز .. و أفضل طرق الصنفرة على حاجه إسمها Sand block دى حته خشب بتلف عليها السنفرة و تسنفر بيها مش بإيدك .. علشان بتساوى العالى مع الواطى بالضبط و لو حته لسه محتاجه معجون نضفها من غير مياه ( علشان المعجون لو تحته مياه هيقع بسرعه ) و تزود معجون .. و تسنفر و تسنفر و تسنفر .

7- بعد المعجون كده وصلنا لمرحلة الرش و تلبيس العروسة شوية جرايد قديمة وبكرة لزق الورق .. وطبعاً عارف هتعمل إيه .. أى كاوتش - زجاج - نواكل - بلاستيكات - كوالين - مقابض .... إلخ أى حاجة معرفتش تفكها تداريها تمام باللزق و الجرايد .. و تخلى أيدك مسطرة عالحرف بالضبط و أنت بتغطى علشان الدهان ميبقاش طالع مثلاً على كاوتش البربريز من جنب و الجنب التانى نازل .. ولو مكنتش فكيت الكاوتش بالجنوط ممكت تلبسه أكياس قمامة .

ملحوظة هامة : الفواصل اللى بين الأبواب وفواصل الكبوت والشنطة والريداتير وأماكن الفوانيس كل الحاجات دى يتحط عليها جرايد علشان البوية متدخلش على أماكن انت مش عاوزها .

8- تخلط الألوان وتخفها بالبنزين أو النفط الأبيض .. أو الثنر لو مسدس رش معدن .. تجرب الأول على لوحة علشان تضبط اللون واللزوجة ( محتاج يتخفف او يتقل ) و تبدأ ترش السقف الأول .. وايدك تكون سريعة نسبياً بنظام التسطير ( يعنى رايح من اليمين للشمال فى سطر وراجع من الشمال لليمين على السطر اللى بعده ) .. وبعدين الشنطة و الكبوت .. وبعدين الجوانب وتسرع إيدك فيهم أكتر علشان البوية متسيلش ( لإن الجوانب واقفة مش نايمة زى السقف و الشنطة ) .. كيلو بوية + لتر بنزين يكفو العربية كلها تمام و يتبقى منها حسب سرعة أيدك .. وممكن بعد متنشف تأخد وش تانى ( كيلو اللاكية بـ 20 ج بس يا محترم .. مش الدوكو اللى أقل نوع بـ 120 و مضروب كمان و لسه فرن و شاى و سجاير و ليله ميعلم بيها غير ربنا .

9- طبعاً بعد متنشف تانى يوم ( الجفاف المبدئى 4 ساعات .. الجفاف التام 16 ساعة ) .. هتركب تانى كل الإكسسوارات و الكماليات اللى فكيناها .. و ميمنعش لو تجيبلك علبتين دوكو اسبراى .. واحده سودا وواحدة فضى ميتالك .. للأكصدام و المرايات و الجنوط ... هتلاقى شكل تانى .

النتيجة : عن تجربة أكتر من شهر حتى الآن .. اللاكية بيستحمل الشمس و التراب و الزيت و الجاز و البنزين و الشحم ( عادى بأحط الحاجات دى علشان أطفال الشوارع متقعدش عالعربية ) و بيتغسل بالمياة و الصابون عادى .. و لونه مبيغيرش .. و بيلمع أقل شوية من الدوكو ( بس لمعه مقبولة جداً خاصة إنه مدخلش فرن و لا أخد وش ليكر و لا بولش و لا الكلام ده ), فيه كل درجات الألوان و تخلط كمبيوتر و يدوى زى ما أنت عاوز ( مش زى ألوان علب الإسبراى الجاهز ) .. والأهم طبعاً .. بثمن كيلو دوكو أوميجا أو كابسى أو ميدو اللى شغال بيه كل الصنايعية اللى سعرها من 120 - 150 للكيلو تقدر ترش عربيتك وش نضافة كل 6 شهور ب 20 ج للكيلو .

-------------------------------------------------

تكلفة الخامات اللازمة لرش السيارة دوكو فرن كالاتى :

أولاً اسعار البويات :

النوع الأول

اردئ نوع هو الاوميجا سابقا او كابسى حاليا بعد ما شركة بورسعيد اشترتة ودة الكيلو 120 جنية شامل المصلب والتنر

النوع التانى

الجينرال ودة لبنانى الكيلو 150 شامل المصلب والتنر

النوع الثالث

ماكسمير ودة ايطالى الكيلو 180 شامل المصلب والتنر

النوع الرابع

اسكينز ودة فى منة المانى وتركى والاغلب هيكون مضروب بالتركى مش هتلاقى الالمانى والاسم التجارى بتاعة اسمها البغبغان لان اللوجو بتاعها بغبغان ودة الكيلو بتاعة من 400 لـ 500 شامل التنر والمصلب .

ملحوظة

الورنيش لازم يبقى نفس نوع البوية وفى منة درجات حسب اللمعه الى انت عايزها وسعر الورنيش نفس سعر نوع البوية لو هترش بكيلو بيتحط نص كيلو ورنيش على الكيلو .

-------------------------------------------------

ثانياً أسعار الخامات

بالنسبة لأسعار الخامات انا معرفهاش بصراحه بس دى أسعار جبتها من خلال كومنتات الرجالة عالجروب اللى جربوا عملو دوكو لعربياتهم وجابو الخامات بنفسهم ، وعن قريب بفكر أعمل الحوار ده أنا كمان .. اشمعنى انا هيه جت عليا :)

سكينة معجون و2 فبره بـ 15 جنيه
صنفره ومعجون ستوك بـ 55 جنيه
مساكه للصنفره بـ 15 جنيه
فلر بلون البطانه بـ 40 جنيه
البويه كابسى بـ 110 جنيه والفرن الكيلو بـ 140 جنيه بالمثبت والتنر والورنيش
يعنى الإجمالى كله العده والمونه بـ 265 جنيه لسه بعد مخلص ان شاء الله هرشها فى كابينه بـ 70 جنيه كده وصلنا لـ 335 جنيه

علبة معجون 3 كيلو و المصلب بتاعة بـ 43 جنيه
سعر المعجون علبه كيلو و ربع + انبوبه المصلب ب 23 جنيه

فيللر سريع 1 كيلو بـ 30جنيه
قرص صنفرة للصاروخ 40/80 بـ 2.5 جنيه
ورق صنفرة مقاسات بـ 5 جنيه الفرخ
جركن ثنر 1 لتر بـ 5 جنيه
جركن ثنر 2 لتر بـ 10 جنيه
فلر بطئ بعد سحق المعجون و التلقيط و ده بـ 40 جنيه
و بعدين الدوكو كابسى أو أوميجا حسب طلبك (عادى - ميتالك - تخليط ألوان بالكمبيوتر- و ساعات بيغشو فيها بيحطو خامات رخيصة فى الخلط لذلك محتاجه أمانه) الأسعار من 130 جنيه و إنت طالع للكيلو و قالى رش أى عربية عند بتاع الكابينه 70 جنيه + الشاى بتاعة

----------------------------------------------------

يارب يكون الموضوع عجبكم ...

مع تحياتى

Sameh Ahmed

عايز تجيب ساوند سيستم محترم تعالى هنا

noreply@blogger.com (sam4ever2010) — Thu, 12 Feb 2015 18:55:00 +0000

بسم الله الرحمن الرحيم

لهواة الساوند سيستم والصوت النضيف .. نفسك تشغل الكاسيت تسمع صوت حلو وقوى وبيز جامد وتسمع بيه الشارع كله .. يبقى تعمل حسابك على 2500 ثمن ساوند سيستم كامل مكون من كاسيت وسماعتين وجي ام وبازوكا .. ودول اللى هشرحهم هنا

-------------------------------------------------------

طبعا اول حاجه الواحد بيفكر فيها هيه الكاسيت والواحد لما بينزل السوق يلف بيبقى محتار يجيب ايه وماركه ايه وبكام ومنين والكلام ده كله .. انا طبعا لفيت قبليكو ودوخت عشان اعرف ايه الكويس وايه النص كم .. لان السوق مليان انواع كتير زي بايونير وسونى وسيمفونى وكينوود غير الانواع الصينى المرطرطه وبأسعار مختلفة .. طبعا التوب بتاع الماركات من رأيي البايونير والسونى والكينوود .. انا فضلت البايونير بصراحه كماركه وكسعر وكأوبشن كمان وصوت محترم وجامد واداء .. ده سعره ب 595 جنيه .. صناعة تايلاندى .. وطبعا فى ناس كتير اشترته بسعر اغلى وهتستغرب من السعر ده بس انا بصراحه جايبه من محل موزع معتمد لتوكيلات بايونير وسونى وكينوود وسيمفونى .. مكان المحل العتبة - اول شارع الازهر .. اسم المحل العريبى .. وليه فرع تانى برضه فى شارع الازهر

تانى حاجه بتجيبها السماعات .. وبرضه هتدوخ وتلف كتير عشان الانواع برضه ياما .. انا بصراحه جربت البايونير وجربت الكينوود وصوت الكينوود عجبنى اكتر كصوت وكخامة وتقفيل نضيف ومحترم احسن من البايونير 100 مرة مع العلم ان البايونير اللى موجود فى منه فيتنامى والكينوود صينى بس الكينوود انضف بصراحه عن تجربة .. ودى سعرها 345 جنيه . البايونير ال 500 وات ب 300 جنيه

ثالث حاجه الجى ام .. برضه فى ماركات كتير .. انا فضلت السيمفونى وخدت بكلام الناس اللى جربت قبلى وطبعا الجي امات درجه الوات بتاعتها بتختلف على حسب اللى انا عايز اعمله .. يعنى مثلا فى جي ام 400 وات و 500 و 640 وات وفى 2 مخرج وفى 4 مخرج وطبعا عشان هركب سماعتين وبازوكا يبقى هحتاج 4 مخارج ودول نوعين يا اما ال 500 وات او ال 640 وات بس انا اخترت ال 640 عشان يبقى اقوى ويقدر يقوم البازوكا طبعاً .. سعره 645 جنيه

اخر حاجه البازوكا .. فى منها البايونير ال 1300 وات وفي ال JBL ال 1000 وات وبرضه خدت بكلام الناس اللى جربت وشكرولى فى البايونير وجربتها وفعلا صوتها ماشاء الله عليه بيز جامد واداء محترم .. سعرها 640 جنيه .. ال JBL ب 575 جنيه

طبعا بعد مابتشترى الساوند سيستم كله بتشترى السلوك والتوصيلات .. هتجيب وصلتين RC جولد بليتد زى دول كده دى طولها 5 متر ب 50 جنيه من عند ادريان .. طبعا فى حاجه احسن منها اسمها افيو بس اغلى وطولها اقصر اعتقد ب 85 جنيه عند راديو شاك

دى الافيو فى راديو شاك ب 85 جنيه

وبالنسبة للسلوك لازم تجيب سلوك نضيفه محمله ماركة السويدى .. عشان خاطر سلوك السماعات اللى بتبقى جايه معاها نفسها بتبقى تعبانه 0.5 مللى ودى طبعاً بتقصر عالصوت ومش بيطلع قوى زى مانت عايز فا بتنزل على شارع نجيب الريحانى وباب اللوق تاخد لفه حلوة عشان تجيب السلوك دى هيه مكلفه شوية بس حاجه محترمه وتعيش معاك .
2 متر سلك سماعات 2.5 ملى لكل فردة 18 جنيه
4 متر سلك 4 مللى شعر ازرق 16 جنيه
4 متر سلك 6 مللى شعر احمر 25 جنيه
4 متر سلك 6 مللى شعر اسود 25 جنيه
4 متر سلك 1.5 مللى شعر ازرق 6 جنيه
الالوان انا اللى مختارها عشان ابقى عارف كل سلك بتاع ايه عشان الدنيا متسحش على بعضها

وبكده انت بقى عندك ساوند سيتسم محترم تعمل بيه احلى شغل عالطريق .. وهديه منى لكل الناس .. طريقة التوصيل والتركيب

--------------------------------------------------------

يارب يكون الموضوع عجبكم ...

مع تحياتى

Sameh Ahmed

طريقة عمل الرينجات فى الفوانيس

noreply@blogger.com (sam4ever2010) — Thu, 12 Feb 2015 18:41:00 +0000

بسم الله الرحمن الرحيم

طريقة عمل الرينجات فى الفوانيس

اول حاجه نيجى للخامات ودى متعبة شوية فى شرائها عشان كل حاجه بتتجاب من مكان غير التانى .. المهم هنحتاج التالى :-

1- عود اكريليك تخانه 10 مللى .

2- 4 لمبات ليد ابيض ثلجى 5 مللى + 2 مقاومة 1 كيلو / نص وات

3- انبوبة سيليكون ازاز .

4- انبوبة ارنديد شفاف .

5- 1 متر سلك شعر 0.5 مللى او 1.0 مللى او سلك سماعات 1 مللى .

6- بكرة شريط لحام .

7- 1 متر مكرونة حرارى صفراء ( بتاعت السخانات الكهرباء السلك )

8- نص متر مكرونة حرارى سوداء ( بتنكمش مع الحرارة )

أماكن بين الخامات :

- الاكليليك في محل فى عابدين ورا القصر على طول فى الشارع اللى على ناصيته الجامع وسعر العود 15 جنيه .

- اللمبات والمقاومات من اي محل الكترونيات فى باب اللوق سعر الليدات الواحدة ب 25 قرش والمقاومات برضه نفس الكلام 25 - 50 قرش .

- سيليكون الازاز والارنديد من اي حد بتاع حدايد وبويات - انبوبة السيليكون ب 3 جنيه والارنديد ب 15 جنيه .

دى طبعاً انبوبة سيليكون كبيرة اغلى

ده الارنديد الشفاف

- سلك الكهرباء وشريط اللحام من اي كهربائى

- المكرونة الحرارى الصفراء المتر بجنيه ونص والسودا المتر ب 6 جنيه فى شارع نجيب الريحانى فى وسط البلد .

خلاص جبت الخامات كلها .. اتفرج بقى عالفيديو ده وانت تفهم كل حاجه

How To Make Custom LED Angel Eyes Rings DIY

اول حاجه هتفك الفوانيس من العربية وهتجيب حته حبل دوبار وتعمل بيها شكل القوس او العين دى على مقاس الفانوس من بره بالويم كده وتاخد طولها بالظبط وتحطها جمب عود الاكريليك وتقطع الطول ده بصفيحه منشار رفيعه ( لونها بيبقى اخضر ) منشار اركيت يعتبر .
قطعت خلاص حتتين واحده لكل فانوس .. هتجيب ورق فويل بتاع المطبخ وتلف بيه الاكريليك ده وتدخله الفرن حوالى 10 دقائق لربع ساعة لحد ما الاكريليك يبقى طرى خالص وتقدر تتحكم فيه وتشكله براحتك .
طلعت الاكريليك من الفرن .. خلي بالك امسكه بجوانتى او حته عشان هيبقى سخن جداً الفويل .. وطلعه وهات علبة سمنة صغيرة ولف عليها الاكريليك ويكون معاك بخاخه مياه اول ماتلفه على علبه السمنة تبخ عليه مياه عشان يبرد ويمسك نفسه فى ساعتها .
هتقطعه بالظبط على مقاس الباغة بتاعت الفانوس وتشرشرها زي الفيديو بالظبط بمنشار الاركيت او صفيحه المنشار دى هتبقى فى الاخر بالشكل ده

هتجيب الفوانيس تشيل منهم اللمض وتلف الفانوس كله بالورق الفويل وتدخله برضه الفرن 10 : 20 دقيقة عشان السيليكون يفك وتقدر تطلع الباغة الازاز بسهولة من غير ماتكسرها

- هتخرم الرينجين بشينيور ببنطة 5 مللى حدادى على قد اللمبة الليد وتكبس اللمبة فى الخرم تبقى ثابته ولو بتتحرك ممكن تحط نقطة امير عليها وتركبها عشان متفكش تانى .
- طبعاً هيكون معاك كاوية لحام عشان هتلحم سالب المقاومة فى الموجب بتاع اللمبة الليد ودايما الموجب هتعرفه هتلاقى رجله اطول من السالب .
ودى دايرة التوصيل بتاعت اللمض .

خلى بالك وانت بتشتغل هتدارى السلوك كلها بالمكرونة الحرارى الصفراء وشريط اللحام عشان لمبة الفانوس سخونيتها عاليه جداً وهتسيح السلوك لو معزلتهاش

بعد ما بتخلص بتلزق الرينج ده فى الباغة الازاز بتاعت الفانوس بالارنديد الشفاف وتثبتها كويس جداً وبعدين بتقفل الفانوس زي ماكان تانى وتلزق الباغة الازاز فيه بالسيليكون حوالين الفانوس كله لانك بتكون نضفت وشلت السيلكون القديم خلاص وتسيبه لتانى يوم يكون نشف ومسك نفسه .
خلاص الفانوس نشف وبقى تمام .. ركب كل حاجه زي ماكانت ووصلة فى العربية زى ماكان والكهرباء بتاعت الرينج هتاخدها من نور التابلوه بحيث لما تفتح نور التابلوه ينور معاه ودى ممكن اي كهربائى يعملهالك ب 5 جنيه مش حوار .
وده شكل الفانوس بعد ماركبته وجربته وعلى فكرة كنت لسه ملزقتوش بالسيليكون كنت مثبته كده بس عشان لو فى اي حاجه مضطرش افك تانى .. خلى بالك قبل ماتقفل ركز كويس جداً عالتوصيلات وجرب قبل ماتقفل وكل حاجه بالظبط عشان اي غلطة فى التوصيل هتعيد كل حاجه من الاول تانى . ودى طريقة التوصيل الصحيحة زى اللى معمولة فى الصورة بالظبط موجب الليد مع سالب المقاومة وموجب المقاومة على موجب البطارية ، وسالب الليد مع موجب الليد التانى وسالب الليد التانى مع سالب البطارية .

ده الشكل النهائى بعد ماخلصت كله وقفلت .. بالمناسبة اللى هيقولى الحاجب ده ازاى .. ده عبارة عن جلد بتاع فرش الباب القديم قصيت منه حته بالشكل ده ولزقته على وش الفانوس بالارنديد الشفاف .

--------------------------------------------------------

يارب يكون الموضوع عجبكم ...

مع تحياتى

Sameh Ahmed

تغيير وظبط فرش الباب

noreply@blogger.com (sam4ever2010) — Thu, 12 Feb 2015 17:57:00 +0000

اللى عايز يظبط فرش الببان عنده ويغيره ميجبش الفرش التعبان السوليتكس الرخيص ابو 60 جنيه ده ويرجع الجلد بتاعه يقشر والخشب يتكسر تانى ويبقى شكله مقرف ويرجع يغيره من جديد كل فترة .

هات طقم فرش النوفا الفبر استيراد من الوكالة وركبه احسن وسعره كامل بالمخادع بتاعته بطفايات السجاير اللى ورا ب 250 وممكن تفاصل كمان فيه ، وهحكيلكم عن تجربتى مع الموضوع ده ..

فى البداية اول ماجبت العربية كانت بالفرش السوليتكس المعفن ده

نزلت الوكالة جبت طقم فرش النوفا وطبعاً دوخت على مالقيته وللأسف الفرش اللى جبته كان تعبان شوية وخصوصاً بتاع الباب الشمال بتاع السواق .. كان مكسر ومبهدل وطبعاً خدت الطقم بسعر اقل عشان حالته وحشه .. كنت واخد الطقم ب 200 بالمخادع بالطفايات وكمان خليته ادانى فرش باب يمين زياده عشان الباب الشمال كان مكسر وقولتله هبقى اتصرف فيه واحاول اظبطه .

وده شكل الباب الشمال اللى حالته تعبانه ومكسر خالص

المهم جبت الفرش الزياده بتاع الباب اليمين ده وبدأت اشوف الحتت المكسرة دى فين واحاول اقصها من الباب اليمين والحمها فى الشمال بالفبر السخن .. بقيت اكسر فى الباب الزيادة حتت صغيرة واسيحها عالنار واصبها والحم بيها

طبعاً مكنتش عايز فتحه السماعه الحقيرة دى خالص وكان لازم اقفلها اول حاجه

قصيت علي مقاسها حته فبر وحطيتها عليها قفلتها بيها

وبالفبر السخن وهوا سايح بقيت اصب حوالين الحته دى وافرده بسكينه معجون بحيث انها تبقى حته واحده مع الباب

وكده بعد ما خلصتها ... وطبعا مخلى جمبى بخاخه مياه عشان كل ماصب فبر سايح وافرده ابخ عليه مياه بارده عشان ينشف ويمسك على طول فى ساعتها

مسكت الباب كله حته حته وبقيت الحم فى الحتت المكسرة دى بالفبر

وهنا برضه صبيت فبر سايح على الوش مكان فتحه السماعات دى وفردته عشان يبقى حته واحده وميبقاش فى حته عاليه وحته واطيه

ده شكل الباب من الضهر بتاعه بعد ما خلصته كله لحامات بالفبر

بعد ماخلصت جبت دباسه مكتب كبيرة وبقيت ادبس الفواصل الزياده اللى حطتيها مكان الحتت المكسرة عشان تبقى برضه جامده ومتفكش تانى مع الوقت وكده الشكل النهائى للباب بعد ما ظبطه وبقى تمام

نزلت بعد كده عالمناصرة خدت لفة حلوة على بتوع الجلود كلهم لقيت كل خامات الجلد مش قد كده وغاليه عالفاضى وطبعا عيب الجلد انه بيقشر مع الوقت لإنه مش جلد طبيعى طبعاً وكله جلد سكاى واخر مازهقت دخلت على بتوع الاقمشه وجبت 2 متر ونص قماش اطيفة اسود ب 43 جنيه وعلبة كلة ( غراء سريع ) ماركة الشعلة الاسبانى وخدت الحاجه وروحت بدأت اشتغل تانى فى الباب بقيت اظبط المقاسات وقصيت على مقاس الباب بالظبط القماشه ، بقيت ادهن الباب حته حته بالكلة وفى نفس الوقت وانا بفرد القماش عالباب بريحه عالباب مش بشده اوى عشان التنفيخ اللى فى الباب يبقى ظاهر وميختفيش وبعد ما خلصت لزق بالكله بقيت ادبس الحروف بالدباسه عشان الكله متفكش مع الوقت والقماش يفك من الباب تانى وده شكل الباب بعد ما خلص

طبعاً كان لازم حته شياكه كده عشان اكمل الطقم عندى لانى كنت حابب اعمل فرش العربية لونين ( أزرق × اسود ) زى الكراسى والطارة .. كنت شوفت عند واحد من بتوع الجلود فى المناصرة الفرش اللونين ده وده عبارة عن زى قماش زى قطيفه ناعمه من فوق وفى فى النص طبقة سفنج طوله متر وعرضه 140 تقريباً .. المتر بتاعه ب 30 جنيه وانا جبت متر واحد بس وقصيت منه الاجزاء اللى فى النص دى ولزقته بكله على القماش القطيفة الاسود

وده الباب الخلفى بعد ماخلص نفس الكلام

طبعاً هنا كنت فتحت اماكن المخدع والطفاية ومكان دراع الازاز بتاع الباب

وده الشكل النهائى بعد ماركبته فى العربية

ده الباب الشمال اللى كان مكسر وطالع عين امه

الباب اللى ورا

--------------------------------------------------------

يارب يكون الموضوع عجبكم ...

مع تحياتى

Sameh Ahmed

طريقة تأمين كبوت وشنطة العربية منعاً للسرقة

noreply@blogger.com (sam4ever2010) — Thu, 12 Feb 2015 17:25:00 +0000

بسم الله الرحمن الرحيم

فى البداية فى كذا طريقة عشان تأمن كبوت عربيتك ميتفتحش بسهولة او ميتفتحش خالص الا بمعرفتك ، ويفضل انك تعمل الطرق كلها مع بعض عشان اللى يفكر بس يفتح الكابوت يلعن اليوم اللى اتولد فيه :p

--------------------------------------------------------

اول طريقة :-

- تدارى واير سلك الكبوت بخرطوم كهرباء البرتقالى من اول طرف السلك عند الصدر لحد اخره عند الكالون بحيث يبقى ثابت وكمان سلك الكبوت يكون ماشى من ورا موتور المساحات مش من قدامه عشان لما الحرامى يحاول يدخل ايده ويشد الواير يبقى ماسك الخرطوم مهما يشد فيه الواير مش هيتحرك ويفضل ثابت .

--------------------------------------------------------

تانى طريقة :-

- هتجيب مسمار جنش من عند اي بتاع حدايد وبويات وتربطه فى عضم الكبوت فوق فى اوله ناحيه البطارية ، وهتجيب حته حبل دوبارة او سلك فرامل يد قديم او سلك فرامل عجلة مثلا حاجه فى حدود طول متر ... هتعدى السلك ده من اي فتحه فى صدر العربية بس تكون قدام المسمار الجنش اللى ربطه فى عضم الكبوت وتبقى عامل فى طرف السلك ده عقدة بحيث تعلق السلك ده فى المسمار الجنش وتقفل الكبوت وتشد الواير او السلك ده من جوه العربية وتربطه فى الدواسات مثلا او تعمله برضه مسمار جنش تانى تثبته فى القايم جمب الباب تحت علبة الفيوزات مثلا بحيث اللى يجى يفتح الكبوت ميفتحش خالص الا اما لازم يفتح العربية ويفك السلك ده ويفتح الكبوت من الدراع بتاعه العادى :)

والفكرة دى تم تنفيذها بالفعل واللى قام بتنفيذها :

الاستاذ / أدهم حسام

الاستاذ / محمد السونى

الخامات موجودة عن اي موان
مسمار سقف مدور
قفيز واير ( قفيز واحد او اثنين علي حسب )
مسمار حرف L
أى واير فرامل يد قديم .. او لو بيتباع بالمتر هات نص متر

محدش يسأل اسئلة غريبة ... الصور واضحة و محدش يقولي التكلفة كام ... دي حاجات بسيطة

--------------------------------------------------------

ثالث طريقة :-

- تجيب قفلين كبوت زى اللى راكب عندك فى العربية وسلكين فتح الكبوت واحد نفس نوع العربية وواحد تانى بتاع عربية ريتمو عشان طويل - هتروح لأي سمكرى تلحم القفلين فى الاجناب عند اول الكبوت فوق الرفارف وتخليه يلحملك مسمار زى اللى فى نص الكبوت عشان لما تقفل ينزل يعشق والكبوت يتقفل خالص والسلوك كلهم هتوصلهم مع بعض فى نفس الدراع اللى بتفتح بيه عادى ، ودى تعتبر افضل حاجه تتعمل تمنع رفع الكبوت نهائى بس برضه يفضل تكون عامل ال 3 طرق مع بعض لانك متعرفش الحرامى ممكن يعمل ايه سواء يكسر الكبوت نفسه خالص او يكسر الاقفال حتى بس اهم شئ انك تكون عامل الامان بزياده عشان تعطله بزيادة

--------------------------------------------------------

- رابع طريقة :-

- بعد ماتكون عملت ال 3 طرق خلاص تركب انذار فى العربية عشان اللى يهوب ناحيتها بس تعمل دوشه على طول .. مابالك لسه هيفك ويكسر ويعمل .. استحاله هيكمل شغل ( سرقة ) وهيسبها ويجرى .

وفى طريقة مشابهه لموضوع الانذار برضه قام بتنفيذها احد الاعضاء

الاستاذ / احمد محمد

طريقة عمل انذار للعربية .. يشتغل عند فتح الكبوت .. وممكن نفس الحوار يتعمل عند فتح الببان او الشنطة

الخامات :

مفتاح واحد شدة
عدد 2 مفتاح ثلاجة ( لعربية بيجو )
3 متر سلك كهرباء
بكرة شريط لحام

دى رسمة لطريقة التوصيل ( دائرة التوصيل )

وده شرح الفكرة بالفيديو

وبرضه لو عايز الكلاكس يشتغل مع فتح الباب او الشنطة كل ماهتعمله هتاخد سلكة من مفتاح الثلاجه بتاع الباب وتوصلة على مفتاح الثلاجه اللى فى الكبوت ( ارضى )

--------------------------------------------------------

نيجى بقى لطريقة تأمين شنطة العربية :-

- نفس السمكرى اللى كنت عنده هتخليه يخرملك خرمين فى الصدر بتاع الشنطة وفى باب الشنطة نفسها خرمين برضه فوق الخرمين اللى تحت ببونطة مقاس 13 وهتجيب مسمارين 13 طول 5 : 8 سم مثلا ومعاهم وردتين وصامولتين .. المسمارين دول هتدخلهم فى الخرمين اللى فى باب الشنطة بالورد وتربطهم بالصواميل يبقو ثابتين بحيث لما تقفل الشنطة المسامير تنزل فى الاخرام وتبقى ثابته لان شنطة ال 28 عيبها انها بتتحرك يمين وشمال ولما تتحرك يمين بتخرج لسان القفل من مكانه والشنطه تفتح بسهوله ومهمه المسمارين دول يخلوها متتحركش من مكانها وتفضل ثابته .

بكده انت أمنت كبوت وشنطة عربيتك من السرقة وادعولى بقى على الأفكار دى :)

--------------------------------------------------------

يارب يكون الموضوع عجبكم ...

مع تحياتى

Sameh Ahmed

صلح عربيتك بنفسك

noreply@blogger.com (sam4ever2010) — Thu, 12 Feb 2015 16:52:00 +0000

بسم الله الرحمن الرحيم

دى مجموعة فيديوهات شرح عن صيانة الكربراتير والاسبراتير وتغيير قطع غيار فى العافشة وعمرة كاملة للموتور للفنان الكبير والعضو المتميز ( أدهم حسام )

صلح عربيتك بنفسك

--------------------------------------------------------------------------------

الجزء الأول

--------------------------------------------------------------------------------

الجزء الثانى

--------------------------------------------------------------------------------

الجزء الثالث

--------------------------------------------------------------------------------

الجزء الرابع

--------------------------------------------------------------------------------

الجزء الخامس

--------------------------------------------------------------------------------

الجزء السادس

--------------------------------------------------------------------------------

الجزء السابع

--------------------------------------------------------------------------------

عمرة كاملة للموتور

الجزء الأول

الجزء الثانى

--------------------------------------------------------

يارب يكون الموضوع عجبكم ...

مع تحياتى

Sameh Ahmed