Mark Anthony Sammut

Tal-Labour tilfu l-enerġija

2021-06-15T16:08:00.000+02:00

Wara tmien snin jiġġieldu gwerra ta’ propoganda qarrieqa. Wara tmien snin ta’ carpet bombing li r-roadmap tal-power station tal-Electrogas hija l-manna mis-sema; li għandhom viżjoni pożittiva; li bis-saħħa tagħha jitraħħsu l-kontijiet tad-dawl; li dan fl-aqwa interess tal-poplu; li kollox sar skont is-sewwa. Wara tmien snin il-Labour ammettew li d-deċiżjoni kienet ħażina u li kienu jafu minn qabel li ħażina. Għal dan kollu, iżda, qed iħallas il-poplu, int u jien. Waqt li huma jippuppaw u jimpalaw.

Tal-Labour, permezz tal-Ministru responsabbli, fost ħafna propoganda, qalulna li issa ser jordna IT-TIENI INTERCONNECTOR għall-enerġija. Dan hu t-tieni interconnector li l-Gvern Nazzjonalista ta’ Gonzi ddeċieda dwaru xi ħmistax il-sena ilu; li l-pjan għalih kien ġie miftiehem mal-Gvern Taljan u mal-Unjoni Ewropea dak iż-żmien; li l-infrastruttura għalih f’Malta kienet saret bil-lest mill-Gvern Nazzjonalista; li l-infrastruttura għalih fi Sqallija hija miftehma u ħafna minn f’postha bis-saħħa ta’ Gvern Nazzjonalista; li llum nafu li bl-EWWEL INTERCONNECTOR nistgħu nieħdu dawl ħafna orħos mill-power station tal-Electrogas tal-Labour; u li kieku ma kienx hemm interessi u prioritajiet oħra t-TIENI INTERCONNECTOR kien maħsub jitpoġġa f’postu u jibda jaħdem fl-amministrazzjoni eletta fl-2013.

Minflok tal-Labour abbandunaw dan kollu biex imbarkaw fuq il-famuża Electrogas li biex iħaddmuha kellhom ipoġġu mostru ta’ tank tal-gass fil-bajja ta’ Marsaxlokk.

L-iskandli wara din il-power station illum nafuhom. Kixfithom Daphne Caruana Galizia. Qatluha brutalment talli kixfithom. Inkixfu li r-roadmap ma kienet xejn ħlief pjan ta’ korruzzjoni li bħalha qatt ma rajna. Korruzzjoni mill-kbir saż-żgħir, ta’ miljuni fuq miljuni. Maħsuba li jiġu moħbija f’kumpaniji sigrieti fil-Panama.

Għamlu tmien snin jigdbu. Jonfqu l-eluf minn flus il-poplu fi propoganda biex jippruvaw ibellgħuhielna kemm huma ġenwini, nodfa, bravi, qalbhom taħraqhom għall-ġid tal-poplu. Tmien snin iżebilħu lil kull min tkellem il-verità; jgħidulu “negattiv”, “għajjur”. Fuq deċiżjoni li tal-Labour kienu jafu min qabel li hi ħażina, u apposta, b’qerq, għax b’hekk kienu ser jimpalaw il-miljuni, xorta wettqu il-pjan tad-deċiżjoni il-ħażina. Biex issa tal-Labour qalulna li dik kienet deċiżjoni ħażina u ser immorru għat-tieni interconnector, id-deċiżjoni t-tajba u nadifa tal-Gvern Nazzjonalista. Bil-konsegwenza li xorta, għal ħafna snin xorta ser nibqgħu nixtru l-enerġija mill-power station tal-korruzzjoni bi prezzijiet aktar għolja minħabba d-deċiżjoni ħażina u korrotta tal-Labour.

Tal-Labour, fis-snin qabel l-2013, għamlu pjan biex jaħdmu lill-poplu – “Roadmap”. Kienu jafu li hemm id-deċiżjoni t-tajba tal-Gvern Nazzjonalista tat-Tieni Inteconnector. Kienu jafu li bil-pjanijiet li l-BWSC power station kien maħsub li tinqaleb għall-gass. Kienu jafu li d-deċiżjoni tal-Electrogas hi ħażina u l-intenzjonijiet kienu ħżiena u oxxenament korrotti. Imma il-pjan kien li jaħdmuna. Ilhom tmien snin jaħdmuna. €50 miljun minnhom illum nafu minn fejn ħaduhom: mit-tibdil li għamlu fis-sistema tal-kontijiet tad-dawl u l-ilma. Li tkellimna aħna fuqha tliet snin ilu u li issa ikkonfermaha l-Awditur Ġenerali. Ħa nibqgħu boloh ja poplu u nħallu lil min jaħdimna hekk?

Tmien snin damu jiġġieldu l-verità. Imma ż-żejt jitla f’wiċċ l-ilma. Is-sewwa jirbaħ. Il-maskra issa waqgħet u lil tal-Labour qed narawhom fis-sura vera tagħhom.

IR-ROAD MAP TAL-LABOUR TKOMPLI

Propju nhar is-Sette Giugno, qrajna f’The Times, li tal-Labour ser jissussidjaw lill-ispekulaturi, negozjanti u żviluppaturi ta’ artijiet u bini f’Malta biex jgħinuhom ibiegħu lill-barranin. Ser jagħtuhom sa 50% tal-ispejjeż li jagħmlu waqt fieri barra minn Malta fejn imorru bħala sensara ta’ bejgħ ta’ artijiet u bini lill-barranin.

Għal dan l-iskop tal-Labour waqqfu aġenzija – Property Malta Foundation – flimkien mal-Malta Development Association. Ir-rappot jgħid li l-għajnuna hija: “... open to a number of professionals, including consultants, estate agents and property negotiators and may be used to recoup some of the costs on travel, accommodation and fees related to participating in the fairs.”

Is-Segretarju Parlamentari tal-Labour Chris Agius qalilna li waqt il-pandemija id-domanda għall-propjetà f’Malta baqgħet f’saħħitha u n-numru ta’ konvenji żdied bħala konferma li s-settur huwa mutur ewlieni tal-ekonomija. Allura jekk dan is-settur privat sejjer tajjeb għalfejn toħroġ flus mit-taxxi li jħallas il-poplu biex tissussidjah?

Imma fis-Sette Giugno il-Ministru tal-Labour hu rapportat hekk: “We want to encourage the industry to promote our country overseas because we have a lot of value to offer.” Waqt li ż-żgħażagħ tagħna isiru skjavi tal-banek biex forsi jixtru xi appartament u jaħdmu b’ilsienhom barra; waqt li uliedna bilkemm għadhom jaffordjaw jixtru u qed jispiċċaw jaħdmu b’ilsienhom barra biex forsi jlaħħqu mal-kera, aħna nissussidjaw mit-taxxi tagħna l-bejgħ tal-propjetà lill-barranin. Din Malta Tagħna Lkoll? Dan l-aqwa żmien?

LAQTET IL-MUSMAR FUQ RASU

Marisa Xuereb hija il-President tal-Kamra tal-Kummerċ, Intrapriża u Industrija – jiltaqgħu hawnhekk is-settur privat tal-kummerċ, l-imprendituri, l-industrijalisti li huma kolonna mill-aktar importanti għall-ekonomija ta’ pajjiżna.

Maris Xuereb tkellmet fil-konferenza ta’ ġimgħa ilu L-ISTAT TAN-NAZZJON, organizzata fil-Palazz Verdala tal-President. Il-kumment qasir tagħha huwa wieħed mill-aħjar kummenti li smajt tul snin – kumment ta’ kwalità u mimli sens.

Qaltilna li f’dan il-pajjiż aċċettajna żewġ affarijiet foloz: 1) li biex l-ekonomija tikber irridu niddependu fuq il-kostruzzjoni; 2) li l-kostruzzjoni hemm bżonn li tagħmel ħsara u tkerrah l-ambjent. Marisa Xuereb sostniet li dan hu minħabba li NIRRIFJUTAW LI NIPPJANAW FIT-TUL. Fil-fatt kif qalet tajjeb “M’għandnix pjanar, għandna biss permitting.” Id-deċiżjonijiet ma jkunux fl-interess tal-poplu.

Ħarsu lejn l-oxxenità mostru ta’ deċiżjoni tal-Labour bi Planning Authority pupazz tal-proġett f’San Ġiljan fuq l-art tal-ITS. Min gawda minna? Min għamel il-flus? Il-poplu jew ftit nies?

GRAZZI EDWARD de BONO

Din il-ġimgħa ħallietna figura, ġgant Malti tal-era kontemporanja – il-ħassieb oriġinali ta’ fama internazzjonali Edward de Bono. Ħoloq it-terminu Lateral Thinking u l-kunċett tas-Six Thinking Hats. Edward de Bono studja u rriċerka kif jiżviluppa l-ħsieb u għallem li hemm mod kif insibu soluzzjonijiet ġodda b’mod kreattiv. Hemm ħafna x’niskopru fit-tagħlim tiegħu. Mhux biss il-poplu Malti imma d-dinja kollha grata lejh.

Dan l-artiklu deher fil-ħarġa tal-Mument tal-Ħadd 13 ta' Ġunju 2021

Nieħdu Miżuri Pożittivi u Kuraġġużi

2021-06-06T09:18:00.002+02:00

Dan l-artiklu deher fil-ħarġa tal-Mument tal-Ħadd 6 ta' Ġunju 2021

Irridu Stat ta’ kulħadd? Irridu Stat ġenwin, nadif, serju? Irridu Stat inklussiv, fejn ħadd ma hu ‘il fuq mil-liġi? Irridu Malta rispettata, fdata, fejn ilkoll inħossuna fid-dar komuni tagħna? Jekk ir-risposta hi IVA, allura jeħtieġ nifthiemu fuq pakkett ta’ miżuri pożittivi u kuraġġużi.

Issa ilni numru ta’ snin attiv bħala ċittadin, sew fis-soċjetà ċivili, fil-politika kif ukoll fil-komunità fejn ngħix. Qattajt żgħożiti fil-volontarja u attiv fi gruppi varji fil-parroċċa u fil-lokalità. Diġa ikkontestajt żewġ elezzjonijiet mal-Partit Nazzjonalista, u ilni ħmistax-il sena Kunsillier Lokali fil-Gudja. Għal xi żmien servejt bħala President tal-Kumitat Eżekuttiv tal-Partit. Dawn kienu snin fejn rajt mill-qrib xi jfisser l-impenn politiku.

Mhux veru li ż-żgħażagħ mhumiex interessati fil-politika. Iż-żgħażagħ iridu politika nadifa, ġusta, aperta għall-ideat ġodda, politika li tħaddan lil kulħadd, hu x’inhu t-twemmin jew l-inklinazzjonijiet personali. Iż-żgħażagħ iridu azzjoni biex ikollhom preżent u futur aħjar. U dan iriduh ILLUM. Sew fejn jidħol l-ambjent, sew fejn tidħol l-edukazzjoni, sew fejn jidħlu l-opportunitajiet ta’ xogħol, u divertiment san.

Fil-fehma tiegħi għandna niddeċiedu dwar riforma radikali fejn jidħlu l-partiti politiċi. Jien nemmen li din trid tibda billi neħilsuhom mill-qarnita tal-flus tal-ispekulaturi. Minkejja l-liġi li suppost tirregola l-finanzjament tal-partiti politiċi, x’ħin niġu għall-fatti inisbu li hemm miljun toqba kif min irid jinxtara bil-flus jinxtara għas-skapitu tal-interessi nazzjonali, tal-poplu.

Wasal iż-żmien li tinstab soluzzjoni kif il-partiti jiġu appoġġjati b’finanzjament pubbliku b’mod li ma jkollhomx bżonn jittalbu l-pakketti tal-flus mingħand min jiflaħ. L-istorja li kellna, sa mill-elezzjoni tal-2013, tar-raba’ sular fil-Kwartieri tal-Partit Laburista hija biss xaqq ċkejken ta’ dawl – kif jgħidu the tip of the iceberg – ta’ pattijiet u wegħdi li nafu kif issarfu.

Minn dak in-nhar ‘il hawn kellna stejjer ta’ skandli u korruzzjoni bla preċedenti b’mijiet ta’ miljuni involuti. In-nies issaqsi x’sehem għadda għand il-partit u l-politiċi tal-Gvern Laburista? In-nies issaqsi, per eżempju, kif tispjega d-direct order li swiet qrib €330 miljun tal-bini ta’ estensjoni għall-anzjani f’San Vinċenz? Hemm katina twila ta’ skandli u korruzzjoni. Ħadd mhu ta’ subgħajh f’ħalqu.

It-tieni riforma li jeħtieġ issir jekk irridu nibdew triq ġdida lejn is-serjetà hi li noftmu l-partiti mix-xandir xempju ta’ propoganda li tixraq biss f’pajjiżi bla tħaddim ġenwin tad-demokrazija.

Hemm riformi oħra importanti li huma urġentement meħtieġa jekk irridu nnaddfu l-istalel maħmuġin tal-politika. Uħud minnhom insemmuhom fid-dokument approvat mill-Kunsill Ġenerali tal-PN f’Diċembru 2019 bl-isem “Riforma u Tiġdid - Governanza Tajba għal Demokrazija b’Saħħitha”.

Ma nistgħux nibqgħu nitkellmu fuq valuri u ideali. Mill-kliem ngħaddu għall-fatti u għall-azzjoni. Dmirna hu nibnu konsensus nazzjonali favur ideat bħal dawn. Inkella ma jfissru xejn il-konferenza li, b’intenzjonijiet tajba, qed isiru għand il-President ta’ Malta.

ĦAQQNA NKUNU FUQ IL-LISTA L-ĦADRA

Ma nifhimx għaliex l-awtoritajiet fir-Renju Unit qed ikaxkru saqajjhom biex ipoġġu lil Malta fuq il-Lista l-Ħadra tal-ivvjaġġar ħalli l-Ingliżi ma jkollhom l-ebda diffikultà li jiġu Malta bħala turisti jew għal xogħol u negozju. Bħalissa Ingliżi li jiġu Malta jaf ikollhom joqgħodu kwarantina meta jirritornaw.

Fil-fehma tiegħi is-sitwazzjoni dwar il-pandemija u l-miżuri li qed jieħu l-gvern, fosthom il-programm avvanzat ta’ vaċċinazzjoni, għandhom jirrasiguraw lill-awtoritajiet Ingliżi li Malta hija post ‘safe’ fejn l-Ingliżi jistgħu jiġu mal-familja u jqattgħu btala mill-isbaħ. Dan għandna bżonnu biex l-industrija tat-turiżmu li minnha jiddependu eluf ta’ ħaddiema taqbad ir-ritmu li jixirqilha.

Il-pandemija tatna daqqa’ ta’ ħarta li jeħtieġ nirkupraw minnha mill-aktar fis. Fl-ewwel erbgħa xhur ta’ din is-sena kellna tnaqqis fit-turisti ta’ 88% fuq l-istess perjodu tas-sena 2020, u ta’ 98% mqabbel mal-istess perjodu tal-2019.

Nisperaw li f’Lulju inkunu fuq il-Lista l-Ħadra.

KUXJENZA SOĊJALI

Għadu kif ġie pubblikat ir-riżultat tal-istħarriġ tal-opinjoni pubblika magħruf bħala Eurobarometer organizzat f’Marzu/April ta’ din is-sena. Kif mistenni l-pendemija iddominat l-opinjoni tal-Maltin u l-Għawdxin.

B’dana kollu kont tassew sodisfatt bil-mod kif wieġbu l-Maltin dwar kwestjonijiet ta’ importanza fondamentali – 83% jemmnu li s-saħħa għandha tibqa’ priorità meta mqabbla mal-ekonomija; 48% jemmnu fil-ħidma konkreta kontra t-tibdil fil-klima; filwaqt li 31% appellaw għal aktar miżuri kontra l-faqar u l-esklużjoni soċjali u aktar attenzjoni fejn tidħol il-migrazzjoni.

Din hi xhieda importanti tal-kuxjenza soċjali tal-poplu tagħna. Irridu nibnu aħjar fuq dan is-sentiment. Ir-riżultat wera li 65% huma mħassbin dwar il-ġejjieni, filwaqt li 38% esprimew sens ta’ tama fil-futur. Konferma ta’ kemm fadal x’isir biex il-poplu tagħna jkun f’saħħtu u ferħan.

Bżonn ir-raġuni, rispett u djalogu

2021-05-16T08:33:00.003+02:00

Dan l-artiklu deher fil-ħarġa tal-Mument tal-Ħadd 16 ta' Mejju 2021

Is-soċjetà Maltija ma hix l-unika soċjetà li qed taffaċċja kwestjonijiet u ġrajjiet tal-akbar konsegwenzi. Jiena nifhem li mill-ħolqien tiegħu il-bniedem ma waqaf qatt jevolvi u jbiddel miegħu d-dinja ta’ madwaru. Mhux biss irnexxielna negħlbu l-ostakoli kollha u nimmultiplikaw u nikbru, talli llum hawn kważi 8 biljun persuna fuq wiċċ l-art. Irnexxielna wkoll inkattru l-ġid u inferrxuh ma’ ħafna bnadi fid-dinja għall-ġid ta’ biljuni, anke jekk fadal numru kbir ta’ miljuni li qed jgħixu f’kondizzjonijiet miżerabbli ta’ skjavitù, faqar u mard.

Fl-aħħar għoxrin sena b’mod partikolari ir-ritmu tal-bidla irranka bil-kbir tant li ħafna minna qisna qed ngħixu ħolma nippruvaw nifhmu x’laqatna. Filwaqt li qed ngħixu bidliet ekonomiċi, tekonolġiċi, soċjali, u politiċi, naħseb li l-element li l-aktar ser ikollu konsegwenzi, posittivi u negattivi, huma l-bidliet li qed isawwru klima kulturali ġdida.

Jien nitlaq mill-punt li hekk kif il-kriżi tal-bidla fil-klima naturali tolqot lil kulħadd f’kull parti tad-dinja, hekk ukoll il-kriżi tal-bidla kulturali. Irridu ngħixu magħha u nisfruttaw l-irwiefen tagħha għall-ġid.

Biex nagħmlu dan b’suċċess jeħtieġ naffaċċjaw is-sitwazzjoni bir-raġuni, b’rispett għal xulxin, u fi spirtu ta’ djalogu ġenwin. Naf li fin-nofs hemm prinċipji fondamentali. Naf li għal ħafna f’pajjiżna huma prinċipji b’għeruq fil-fond li dwarhom ma jista’ jkun hemm l-ebda kompromess. Però prinċipju li ma nistgħux nerġgħu lura minnu hu l-prinċipju li aħna irridu ngħixu u naħdmu flimkien fi Stat imħaddem bid-demokrazija.

L-ABORT

Niddikjara bil-quddiem – jien ma naqbilx mal-abort. Jien nemmen fil-valur bla qies tal-ħajja mill-konċepiment sal-mewt. Ejja nsaħħu l-edukazzjoni sesswali, ejja nsaħħu s-saħħa sesswali, imma qatt ma għandha tinqered ħajja umana. Dan ma jfissirx li miniex lest li niddjaloga bir-raġuni u bir-rispett, anke ma’ min hu favur li f’Malta ndaħħlu l-abort.

Jekk fuq l-użu tal-kannabis setturi ta’ mexxejja responsabbli qed jappellaw biex wieħed ma jgħaġġilx jagħlaq id-diskussjoni u talbu li l-materja titħalla għal wara l-elezzjoni, wisq aktar is-suġġett tal-abort m’għandux jiġi diskuss, jew deċiż, ftit xhur qabel elezzjoni ġenerali meta qiegħdin fi kważi kampanja elettorali.

Bir-raġuni, bir-rispett u bid-djalogu, iżda bil-kalma, imbagħad inkunu nistgħu niddiskutu, kif qed jissuġerixxi Bernard Grech, kif inħarsu l-ħajja mill-konċepiment sal-mewt, u l-miżuri meħtieġa favur is-saħħa sesswali ta’ kulħadd mingħajr ma tkun ipperikolata l-ħajja tat-tarbija kemm qabel u wara t-twelid.

Hi tassew stramba li nagħmlu tant affarijiet biex inħarsu l-ħajja tal-annimali, u nittrattaw il-ħajja tal-bniedem fil-ġuf b’mod hekk ħafif.

NAGĦTU ĠEJJIENI LIŻ-ŻGĦAŻAGĦ BL-EDUKAZZJONI

L-akbar rigal li nistgħu nagħtu liż-żgħażagħ hu edukazzjoni ta’ kwalita’ miż-żmien bikri tat-trobbija, għaż-żmien primarju, sekondarju, post-sekondarju u dawk terzjarju u vokazzjonali.

Sfortunatament minkejja l-isforzi ta’ kulħadd għadu ma rnexxielniex ikollna servizzi u programmi edukattivi li qed jiżviluppaw il-ħiliet intelletwali u kreattivi taż-żgħażagħ tagħna fid-diversità tagħhom. Numru kbir ta’ żgħażagħ mhux qed jingħataw l-appoġġ meħtieġ biex jiffurmaw u jiżviluppaw ruħhom b’mod li jiksbu suċċess fil-karriera li jixtiequ jsegwu.

Is-servizzi ta’ gwida vokazzjonali jeħtieġ jissaħħu u jilħqu lil kulħadd fi proċess kontinwu. Il-kurrikulu u s-sillabi jeħtieġ li l-ewwel jirnexxielhom jaslu sabiex isawwru l-karattru ta’ kull ġuvni u tfajla. Filwaqt li s-suġġetti akkademiċi huma essenzjali, il-formazzjoni psiko-soċjali, il-ħiliet bażiċi li wieħed jgħix b’mod attivi u ċiviku f’komunità, u l-ħiliet kulturali, kreattivi u etiċi huma aktar fondamentali biex iż-żgħażagħ tagħna jirnexxu fil-ħajja u fuq il-post tax-xogħol. Jekk jirnexxielna nibnu dan il-pedament ta’ kull tfajla u ġuvni, imbagħad irridu nassiguraw li kull persuna tiżviluppa l-moħħ tagħha skont ix-xeħta tagħha – lingwi, xjenza, matematika, teknoloġija informatika, u dan bħala l-bażi għall-għażliet vokazzjonali u professjonali ta’ dak li jkun.

Jiddispjaċini ninnota li s-soċjetà ftit li xejn qed tagħti każ dan is-settur vitali tal-edukazzjoni.

IL-FUTUR TAL-EWROPA

Ġimgħa ilu, fid-9 ta’ Mejju, Jum l-Ewropa, ġiet imnedija l-Konferenza dwar il-Futur tal-Ewropa. Dan hu proċess li ser idum sejjer sas-sena d-dieħla, 2022. Il-ħsieb hu li jitwettaq djalogu u riflessjoni li fih jieħdu sehem kemm jista’ jkun nies minn kull saff tas-soċjetà f’kull Stat Membru.

Aħna hawn Malta wkoll jeħtieġ li nirriċerkaw u niddiskutu x’Unjoni Ewropea nixtiequ naraw tiżviluppa fis-snin li ġejjin. Issa għandna esperjenza ta’ 17 il-sena. Din kienet sħubija storika li qed tagħtina ġid kbir, mhux biss finanzjarju imma wkoll fl-iżvilupp tas-soċjetà tagħna u l-opportunitajiet kbar li għandna li nieħdu sehem bil-libertà kollha fl-akbar suq tad-dinja.

Ejja insibu l-ħin nagħtu ideat ta’ x’irridu li jkun il-futur.

AWGURI DESTINY

Minn qalbi nawgura suċċess lil Destiny Chukunyere fil-Eurovision Song Contest ta’ din il-ġimgħa. Ngħid għalija diġa’ nħossni grat għas-suċċess li qed tikseb bit-talent tal-kant sabiħ tagħha, u ċert li ser tkompli tagħmel unur lil Malta. Forza Destiny!

Partit Li Qed Juri t-Triq

2021-05-10T09:01:00.001+02:00

Dan l-artiklu deher fil-ħarġa tal-Mument tal-Ħadd 9 ta' Mejju 2021

M’hemmx għalfejn nistennew titħabbar l-elezzjoni biex insiru nafu liema triq ta’ ġid ser jaqbad Gvern Nazzjonalista. Mill-bidu tal-ħidma tiegħu ftit xhur ilu l-Kap il-ġdid tal-PN Bernard Grech insista li l-partit għandu juri lill-poplu proposti konkreti fl-oqsma kollha tal-ħajja hekk kif dawn ikunu finalizzati. Din il-ġimgħa tnieda proġett li minnu kien inkarigat Claudio Grech, biex jixpruna l-ħidma li hemm bżonn u permezz ta’ timijiet differenti – 14-il Cluster – janalizzaw l-oqsma differenti u jfasslu proposti konkreti li fuqhom ser ikun ibbażat il-programm elettorali li jmiss.

Diġa’ bdejna naraw riżultati. Taħt it-tmexxija ta’ Ryan Callus ġew formulati u pubblikati proposti dwar il-qasam tal-enerġija. Taħt dik ta’ Robert Arrigo rajna pjan effettiv għat-turiżmu. Din il-ġimgħa il-Kap Bernard Grech u Claudio Grech urewna l-istampa wiesa’ tal-viżjoni u l-programm li qed jinbena bid-dokument “ Gvern Alternattiv b’Viżjoni – BIL-ĠID KOMUNI FIĊ-ĊENTRU.” U fil-ġimgħat li ġejjin ser inkomplu insiru nafu proposti fl-oqsma l-oħra tal-iżvilupp ekonomiku, soċjali, politiku u kulturali.

Prosit Bernard. Prosit Claudio. Prosit kulmin hu involut. Jien ukoll inħares ‘il quddiem biex fit-team li qed imexxi Claudio Grech naħdum fuq il-Viżjoni Soċjo-Ekonomika 2030, kif irridu naraw lil pajjiżna daqs għaxar snin oħra.

PROGRAMM TASSEW INTERESSANTI

Id-dokument juri bidla qawwija u interessanti ta’ kif Gvern Nazzjonalista immexxi minn Bernard Grech ser ifassal u jwettaq it-tmexxija tal-pajjiż.

Mhux aktar “soċjetà” u “ekonomija” f’tug-of-war ma’ xulxin. Minflok ilkoll flimkien naħdmu biex “ikollna ekonomija li taħdem għan-nies, fl-interess tan-nies u li ssawwar soċjetà li jimpurtaha.”

Mhux aktar soċjetà fejn xejn mhu xejn, u kollox jgħaddi. Minflok ser naħdmu flimkien biex ikollna soċjetà “fejn veament nerġgħu nibdew insejħu lil xulxin aħwa Maltin. Ser nibnu fuq il-valuri tal-ġustizzja soċjali, solidarjetà, l-ekwità, id-diversità u l-valur imprezzabbli tal-ħajja.” Fi kliem ieħor, Valuri umani f’soċjetà moderna.

Mhux aktar gvern moħħu biss fil-poter tiegħu nniffsu, romblu minn fuq kulħadd, bi ksur sfaċċat ta’ liġijiet u regoli u b’impunità għal min jagħmel il-ħażin. Minflok ser insewwu l-ħsara enormi li saret lir-reputazzjoni ta’ pajjiżna permezz ta’ tmexxija nadifa u serja, niġġieldu u nkunu viġilanti kontra l-abbużi u l-korruzzjoni. Irridu li l-gvern ikun tan-nies u għan-nies, u mhux bil-maqlub nies qiegħdin hemm biex iservu n-nies fil-poter.

Idħlu u aqraw id-dokument f’din il-ħolqa: https://bit.ly/GvernAlternattiv

IL-ĠURNALIŻMU ĦIELES HUWA L-OSSIĠNU TAD-DEMOKRAZIJA

L-aħbarijiet dwar dak li qed jiġri bil-COVID fl-Indja kienu mimlijin bi stejjer ta’ nies imutu għax ma sabux ossiġnu.

Hekk jiġrilha d-demokrazija mingħajr l-ossiġnu ta’ ġurnaliżmu ħieles, indipendenti u investigattiv. Mijiet ta’ ġurnalisti mietu fil-qadi ta’ dmirijiethom jew soffrew il-martirju għall-impenn u l-kuraġġ li ma jittradixxux il-valur tas-sewwa u l-verità.

F’pajjiżna il-ġurnalisti veri sikwit huma attakkati, imfixkla, soġġetti għal kampanji ta’ mibgħeda u stmerrija, imfixxkla fil-ħidma tagħhom, f’riskju anke għal ħajjithom. F’din l-atmosfera taħt il-Gvern Laburista Daphne Caruana Galizia ġiet assassinata bl-aktar mod makabru u selvaġġ.

Il-Ħadd li għadda fakkarna il-Jum Dinji tal-Ġurnalisti. Ejja nqumu mir-raqda. Ejja nifhmu li anke fid-dinja demokratika hemm forzi tad-dlam li qed il-ħin kollu jnaqqru mid-drittijiet fondamentali tal-libertà tal-espressjoni, id-dritt li l-poplu jkun jaf il-verità, id-dritt tal-poplu li jara li l-Gvern jagħti rendikont ta’ kull ħaġa li jagħmel u jonfoq u theddid ieħor bħal dan.

Mhux paroli. Imma viġilanza kontinwa u kuraġġ u sagrifiċċji biex nirreżistu lil min irid joħdilna l-milja tad-drittijiet tagħna ta’ poplu liberu, ħieles u demokratiku.

NERSQU LEJN IN-NORMALITÀ

Jidher li bil-mod il-mod qed negħlbu l-eqqel tal-pandemija COVID. Kemm hi ħaġa sabiħa li nersqu lejn in-normalità – tfal, studenti u għalliema fil-klassi; anqas pressjoni fuq l-isptarijiet u l-professjonijiet mediċi u nurses; ħwienet u ristoranti miftuħa; knejjes miftuħin; aktar ħruġ u aktar kuntatt soċjali.

Importanti nifhmu li saħħitna u saħħet il-familji tagħna hi f’idejna. Ma jfissirx li għaliex ir-restrizzjonijiet qed jiġu rilassati allura kulħadd jintelaq u nwarrbu l-prekawzjonijiet meħtieġa. Niftakru li l-virus qed ifaqqas varjanti differenti. Niftakru li l-vaċċin ser jgħin imma mhux il-miraklu kontra kollox. Għadna il-bogħod milli ngħidu li rbaħnilu lil COVID.

Ingawdu l-ħajja b’responsabbilità u noqgħodu attenti.

VIVA L-OMMIJIET. GRAZZI MA.

Illum Jum l-Omm. Ma tistax issir bniedem mingħajr omm. Iva bis-sehem tal-missier. Imma r-rabta mal-omm hi l-ewwel rabta tal-bniedem ma’ bniedem ieħor.

X’ħasra li hawn tant ulied li ma japprezzawx l-għożża u l-istima li jistħoqqilha l-omm. X’ħasra li ħafna ommijiet isibu ruhom fl-isfortuna jew fl-iżvantaġġ soċjali u ekonomiku li ma jirrealizzawx is-sbuħija u s-sodisfazzjon li persuna tkun omm.

Il-ġurnata tal-lum m’għandhiex tkun speċjali. Għandha biss tkun tifkira qawwija biex kull ġurnata nagħmluha speċjali għal kull omm. Nieħu din l-okkażjoni biex nawgura u nirrangrazzja b’mod partikolari lil aktar żewġ ommijiet importanti f’ħajti: ‘l ommi u ‘l-mara tiegħi.

GRAZZI JOE DIMECH

Għal Għawdex il-Perit Joe Dimech kien ikona għal kulħadd, speċjalment għan-Nazzjonalisti. Huwa magħruf bħala bniedem onest, integru, prudenti, tal-familja, nisrani, b’kuxjenza ċivili attiva. Għal snin twal kien spalla mill-aqwa tal-PN, President tal-Kumitat Distrettwali, Sindku tar-Rabat, Perit mill-aktar imfittex.

L-eżempji tal-ħajja ta’ Joe Dimech huma tagħlimiet importanti għal kull min jidħol fil-politika. Grazzi Perit.

Bil-Fatti l-PN iġib il-Ħaddiema 'l Quddiem

2021-05-02T11:09:00.004+02:00

Dan l-artiklu deher fil-ħarġa tal-Mument tal-Ħadd 2 ta' Mejju 2021

L-istorja soċjali ta’ pajjiżna turi l-kontribut kbir li taw Gvernijiet Nazzjonalisti favur il-ħaddiema nisa u rġiel, Maltin u Għawdxin. Il-PN dejjem emmen f’soċjetà li tistma indaqs id-dinjità ta’ kull min jagħti sehemu fil-ġid tal-pajjiż, sew jekk ikunu ħaddiema, min iħaddem, investituri, self-employed jew industrijalisti. Il-PN dejjem sostna li l-qasma u l-konflitt tal-klassi ħsara biss jagħmel lis-soċjetà.

Min-naħa tiegħu l-Partit Laburista kien jippretendi li għandu xi monopolju fuq il-ħaddiema. Minbarra miżuri ta’ ġid li introduċew gvernijiet Laburisti, il-fatti fl-istorja juru li l-Partit Laburista abbuża bil-kbir mill-għajta ‘Partit tal-Ħaddiema’ u setturi sħaħ ta’ ħaddiema u l-familji tagħhom sfaw traduti u użati għall-finijiet tal-propoganda fiergħa tal-Labour.

Il-Partit Nazzjonalista fil-Gvern bil-fatti irrispetta u żied bil-kbir id-drittijiet tal-ħaddiema u tal-Unjons tagħhom. Aħna emminna li l-akbar ġid li jista’ jagħmel Gvern Nazzjonalista lill-ħaddiema hu li jagħti lilhom u lill-uliedhom kull opportunità ta’ edukazzjoni u taħriġ. Meta tela’ fil-Gvern, il-PN sab Università mfarrka bi ftit mijiet ta’ studenti u b’sistema edukattiv fi kriżi mill-iċken sal-ogħla livell. Minn dan sofrew bil-kbir ulied il-ħaddiema. Mhux hekk il-PN fil-Gvern: ħallejna Università b’eluf ta’ studenti, żidna eluf oħra bit-twaqqif tal-MCAST, ilkoll bi stipendju; tkattret bil-kbir il-varjetà ta’ suġġetti, oqsma, snajja, professjonijiet li bdew jiġu mgħallma; ħloqna skemi ta’ scholarships li fetħu bibien li l-istudenti qatt ma ħolmu ta’ studju u taħriġ barra minn Malta; u mhux l-inqas daħħalna lil Malta fl-Unjoni Ewropea fejn tajna lill-ħaddiema u liż-żgħażagħ Maltin u Għawdxin l-akbar suq ta’ xogħol u faċilitajiet li qatt wieħed seta’ jimmaġina.

Matul din il-ġimgħa ta’ attivitajiet b’risq Jum il-Ħaddiem li fakkarna l-bieraħ, il-Kap tal-Partit Bernard Grech kellu kwantità ta’ laqgħat ma’ setturi diversi ta’ nies tax-xogħol. Għal darb’oħra il-Kap wera biċ-ċar l-impenn ġenwin li għandu l-Partit Nazzjonalista biex itejjeb il-qagħda tal-ħaddiema Maltin u Għawdxin billi jġedded u jsaħħaħ il-qafas soċjo-ekonomiku ta’ pajjiżna. Hekk jagħmel min tassew jirrispetta u jħobb il-ħaddiema.

NIFIRĦU BL-AĦBAR POŻITTIVA TAL-MONEYVAL

Bħala poplu, u bħala Nazzjonalisti, nifirħu bl-aħbar li r-rapport tal-Moneyval li mistenni jkun pubblikat fis-sajf ser jagħtina ċertifikat tajjeb. Nittamaw li dan ikun il-bidu biex tibda tissewwa l-ħsara kbira li għamel il-Gvern Laburista fir-reputazzjoni ta’ pajjiżna bi ħsara kbira għas-setturi finanzjarji li minnhom jiddependu eluf ta’ ħaddiema.

Il-qawl jgħid: agħtih il-fama u armieh l-baħar. Malli wieħed jitlef il-fiduċja, jitlef kollox, u diffiċli biex tirbaħha lura. Imma ċ-ċertifikat tal-Moneyval għandu jkun il-punt tat-tluq biex nassiguraw li nirbħu lura din il-fiduċja.

Ma setax jonqos li l-propogandisti tal-Labour ħasbu li din hi xi rebħa tal-Gvern tagħhom. Ma jistax ikun aktar bogħod minn hekk. Min ikollu l-iċken qatra ta’ diċenza fil-Labour messu qed jagħmel l-irmied fuq rasu u jħabbat fuq sidru l-mea kulpa u jitlob skuża. Skuża għaliex qatt ma messna messejna il-qiegħ tal-korruzzjoni u l-abbużi biex kellna nagħaddu minn din l-investigazzjoni internazzjonali. Skuża għaliex l-imġieba diżastruża tal-Gvern Laburista ser tfisser piżijiet u ħlasijiet ġodda kuljum fis-setturi finanzjarji kollha bil-burokrazija dettaljata u ġdida li ġiet imposta wara li mal-ftit ħallelin weħlu l-biċċa l-kbira tat-tajbin.

Taħt Gvernijiet Nazzjonalisti l-iċċekjar u s-superviżjoni fuq l-operat finanzjarju f’pajjiżna dejjem kien isir, u lanqas konna nindunaw għaliex dejjem ġie assigurat li ħadd ma jażżarda jipperikola r-reputazzjoni tagħna. Kienet proċedura normali. Qatt ma bżajna li aħna f’riskju. Iżda taħt il-Labour dak li kien normali sar straordinarju bil-konsegwenzi gravi li ser nibqgħu insofru għal ħajjitna.

Il-propogandisti għomja u mħallsa tal-Labour jistgħu ipaċpċu kemm iridu. Imma l-uġiegħ tal-konsegwenzi iħossuh il-ħaddiema li jaħdmu f’dan il-qasam.

Gvern Nazzjonalista għandu l-pjan biex bi kredibilità jikseb lura lejn pajjiżna l-ġieħ u l-fiduċja li jistħoqq lill-poplu tagħna.

SKANDLU TA’ 270 MILJUN DIRECT ORDER

Il-kuntratt b’direct order tal-estensjoni li inbniet f’San Vincenz de Paule ġie dikjarat li sar bi ksur tal-liġi mill-Awditur Ġenerali. Ir-rapport tal-Awditur, li ġie rapportat b’mod dettaljat f’The Times, Net News u f’ġurnali oħra, huwa l-aħħar prova f’katina ta’ każi li bdiet sa mill-ewwel jiem tal-Gvern Laburista fl-2013, tmien snin ilu.

Direct Order tfisser li l-Gvern qabad kuntratt ta’ 270 miljun u tah lil min ried bla ebda sejħa għall-offerta, bla ebda kompetizzjoni. Dan sar bi ksur sfaċċat tal-liġijiet tal-pajjiż u tar-regolamenti finanzjarji. F’pajjiż ieħor demokratiku kienu mill-ewwel jiġu sospiżi Ministri, Segretarji Parlamentari u kull uffiċjal li kellu x’jaqsam ma’ deċiżjoni bħal din. Imbagħad isiru l-investigazzjonijiet u jittieħdu l-passi kollha skont il-liġi.

Kemm ser idum il-poplu ma jiftaħ għajnejh u jinduna li dawn l-abbużi qed jherru s-sinsla u l-pedamenti ta’ pajjiżna. Kemm ser indumu ma nindunaw li dawn il-miljuni huma misruqa minn ħalqna u minn ħalq uliedna? Mill-pensjonijiet u mis-servizzi tas-saħħa? X’jiswa ċertifikat tal-Moneyval jekk il-Gvern rinfaċċat b’akkużi bħal dawn jibqa’ għaddej romblu minn fuq kulħadd? Kif jista’ pajjiżna jikseb il-fiduċja li għandu bżonn bi Gvern li jiġi jaqa’ u jqum minn dak li hu sewwa?

Il-Partit Laburista nganna ‘l-poplu

2021-04-24T21:44:00.001+02:00

Dan l-artiklu deher fil-ħarġa tal-Mument tal-Ħadd 25 ta' April 2021

Meta fl-2013 maġġoranza kbira għażlu l-Partit Laburista fil-Gvern, kienu emmnu li tassew kien ser ikun hemm bidla għall-aħjar fit-tmexxija tal-pajjiż. Wegħduna tmexxija fejn kulħadd jiġi stmat skont il-merti u t-talenti tiegħu. Wegħduna li l-ġid tal-pajjiż ser ikun gawdut b’aktar ġustizzja. Wegħduna li l-Gvern ser ikun “tagħna lkoll”. Wegħduna li kollox ser isir fil-miftuħ u bla ħabi. Wegħduna id-dritt li nesprimu fehmitna bla biża’. Wegħduna li ser inkunu l-aqwa fl-Ewropa. Wegħduna edukazzjoni ta’ kwalità aħjar. Wegħduna saħħa u sptarijiet f’Malta u Għawdex aħjar. Wegħduna ħarsien tal-ambjent mill-aqwa. Wegħduna tmexxija bla ebda korruzzjoni. Insomma, wegħduna “l-aqwa żmien”.

Filwaqt li diversi marru tajjeb u stagħnew aktar milli bassru, inġenerali is-sitwazzjoni tal-familji, ż-żgħażagħ, il-ħaddiema, l-anzjani hija sitwazzjoni imċajpra u inċerta. Mhux biss minħabba l-COVID, imma l-aktar minħabba il-ħażen, il-korruzzjoni, l-abbużi, l-ħela tal-flus, il-partiġjaniżmu sfrenat li bih mexa il-Labour, li wiegħed li kellu jkun gvern serju tal-Maltin kollha. Bir-riżultat li llum pajjiżna ħa reputazzjoni xejn sabiħa.

Il-ħtija għal dan l-ingann ma taqax fuq bniedem wieħed jew tnejn, anke jekk x’uħud aktar ħatja min ħaddieħor. Il-ħtija hija responsabbilità ta’ partit sħiħ. Għal darb’oħra l-Labour, din id-darba b’libsa aktar moderna u tlellex, inganna poplu sħiħ.

Nifhem li fl-2013, wara kważi 25 sena tal-Partit Nazzjonalista fil-Gvern, il-poplu bi ħġaru ried ibiddel. Naturali. Imma issa kull ċittadin, jemmen x’jemmen, hu mistenni jerfa’ r-responsabbilità biex flimkien nagħtu lil Malta l-gvern li tassew jixirqilna.

MHUX VERU T-TNEJN L-ISTESS – HEMM DIFFERENZI KBAR

Spiss tisma’ li m’hemmx għażla bejn iż-żewġ partiti. Għall-akkużi li jsirulhom tal-Labour iwieġbu “Għax ma tarawx x’għamlu n-nazzjonalisti”. L-ewwel wieħed li jirrikonoxxi d-difetti u l-iżbalji tal-PN huwa jien. Qatt ma bżajt nikkritika l-PN, anke meta kien fil-Gvern, fejn emmint li kien hemm bżonn. I always stood up to be counted.

Imma hemm oċejan jaqsam bejn id-difetti tal-PN u l-kriminalità tal-PL. Trid tkun għama iżraq jew kompliċi fil-ħażen biex id-differenza ma tarahiex.

Dan l-aħħar sirna nafu b’liema qerq tal-Labour ingannaw bit-tajn li tefgħu. Mhux veru kien hemm korruzzjoni fil-każ tal-Power Station tal-BWSC. Mhux veru kien hemm abbużi fil-każ ta’ Anthony Debono, ir-raġel ta’ Giovanna. Mhux veru kien hemm abbuż u ksur ta’ liġi fil-każ tal-permess tal-bini ta’ Victor Scerri fil-Baħrija. Dawn huma kollha sentenzi ta’ Qrati u awtoritajiet oħra li ħarġu fl-aħħar ftit ġimgħat.

B’differenza mill-ħażen li wettqu huma, dan kien biss tajn li ntefa’ biex jingannaw poplu sħiħ.

INSAĦĦU, MHUX INFIXXKLU, L-GĦAQDIET VOLONTARJI

Ma jistax ikollna soċjetà tassew demokratika li tħaddem is-solidarjetà mingħajr volontarjat ħaj, impenjat, u b’saħħtu.

Bla ebda konsultazzjoni vera l-Gvern Laburista jrid jgħaddi liġijiet li r-riżultat tagħhom ser ikun muntanja ta’ burokrazija li ser tifga l-volontarjat. Veru li irridu nilqgħu għas-sangisugi li jippruvaw jinqdew bil-volontarjat biex jaħslu flus maħmuġin jew biex bħal Fariżej jidhru sbieħ u karitattevoli waqt li fil-moħbi jwettqu l-kriminalità organizzata fi sħubija ma’ min ikun fil-poter. Imma s-soluzzjoni mhux li tuża bulldożer.

Is-sitwazzjoni wasslet biex issa inħoloq Volontarjat Action Group magħmul minn qrib 100 għaqda volontarja biex flimkien nirresistu din il-liġi u nwasslu biex tiġi irtirata. Imbagħad il-Gvern għandu jpoġġi mal-volontarjat u jniedi diskussjoni serja u ġenwina. Jien ċert li insibu soluzzjoni vera, anke għall-perikolu tal-ħasil tal-flus.

NGĦINU Ż-ŻGĦAŻAGĦ U STUDENTI

L-istudenti u żgħażagħ tagħna diġa’ tilfu ħafna minħabba l-COVID – esperjenzi sbieħ ta’ tagħlim fl-iskejjel, Università, MCAST, ITS, Sixth Forms, Giovanni Curmi; l-esperjenzi ta’ attivitajiet sportivi u extrakurrikulari; l-esperjenzi tal-laqgħat wiċċ imb’wiċċ mal-għalliema; tħarbit fl-eżamijiet; u ħafna inkwiet ieħor.

Jien nemmen li għandna noħolqu programmi speċjali biex lil dawn iż-żgħażagħ u studenti nikkumpensawhom tal-esperjenzi u opportunitajiet ta’ formazzjoni li tilfu.

Fuq kollox ma nżidulhomx inkwiet b’nuqqas serju ta’ ippjanar għall-eżamijiet li ser isiru.

PN BI PROPOSTI TA’ ĠID GĦAL KULĦADD

Il-Kap tal-Partit Bernard Grech din il-ġimgħa ħabbar il-proposti fid-dettal tal-PN għall-qasam tat-turiżmu. Kellna reazzjoni posittiva ħafna mill-Korpi Kostitwiti dwar dan il-pjan. Qalulna: “Pjan sħiħ li jinkludi kemm viżjoni kif ukoll azzjoni”. U dan wara li ftit ilu ħabbarna l-pjan tal-pjan għall-qasam tal-enerġija.

Grazzi Bernard u grazzi kull min qed jagħti sehemu. Taħt it-tmexxija tal-Kap u l-Grupp Parlamentari qed nuru kemm tassew qed niġġeddu u kemm għandna ideat validi biex inġeddu l-pajjiż u kulħadd igawdi mill-ġid f’pajjiż li jikseb lura l-fiduċja u r-rispett ta’ kulħadd.

Bil-mazza u l-iskalpell

2021-04-18T09:49:00.003+02:00

Dan l-artiklu deher fil-ħarġa tal-Mument tal-Ħadd 18 ta' April 2021

Ħames mitt sena ilu kien hemm blokka rħam ta’ Carrara li għal ħafna snin kienet mitluqa fejn id-Duomo, il-Katidral ta’ Firenze. Tant kienet kbira li laqqmuha “Il-Ġgant”. Sakemm ġie Mikelanġelo li għal aktar minn sentejn ħela saħħtu b’mazza u skalpell biex ħareġ minnha l-famuż David, li llum jinsab fil-Gallarija tal-Akkademja, b’kopja tiegħu fil-post oriġinali fejn Palazzo Vecchio.

Il-politika mhux biss hi vokazzjoni mill-aktar nobbli, imma hija wkoll arti fiha nnifisha. Jgħidulha l-arti ta’ dak li hu possibbli. Imma arti tibqa’. L-ebda opra ta’ arti ma taqa’ mis-sema jew tfaqqa’ subgħajk u tiġi f’idejk. Tkellmu ma’ nies tal-arti – pitturi, skulturi, żeffiena, mużiċisti, poeti u kittieba. Kollha jgħidulek li jegħrqu l-għaraq tad-demm biex iwelldu l-ħolqien artistiku mill-ġuf tal-vokazzjoni artistika li jħossu tbaqbaq f’qalbhom u f’moħħhom.

IDEAL

Dażgur, il-politika hi ideal. Kieku mhux hekk x’ġibda jista’ fiha għal min iħoss tbaqbaq fih il-vokazzjoni li jissagrifika lilu nniffsu għall-ġid ta’ ħutu l-bnedmin, tas-soċjetà? Vokazzjoni vera, ġenwina u kkultivata iġġib ġid kbir għal kulħadd. Min jidħol għaliha irid ikun lest li jissagrifika lilu nniffsu, u jaħdem ma’ kulħadd b’ħafna paċenzja u perseveranza. Il-politiku vokat irid ikun lest jaffaċċja l-irjieħat kollha li jġib miegħu l-proċess demokratiku.

B’SAQAJNA FL-ART

L-ideal tal-vokazzjoni politika ma jfissirx li ngħixu fis-sħab, fl-illużjoni, fin-nostalġiji. L-ideal ifisser li taffaċċja kuljum ir-realtà tal-ħajja, bis-sabiħ u l-ikraħ tagħha; bit-tamiet u l-qtigħ il-qalba, mingħajr ma nitilfu l-iskop li għalih qed naħdmu.

Is-surveys huma importanti u tajjeb li jkunu analizzati bis-serjetà. Imma s-surveys huma pinnur li juru l-buffuri tar-riħ. Il-politiku sod, li jgħix il-vokazzjoni tal-ideal b’sentiment qawwi ta’ realiżmu, għandu mhux jinjora l-buffuri tar-riħ imma jħaddem il-qlugħ tiegħu biex jisfrutta dawn il-buffuri biex jidderieġi d-dgħajsa politika tiegħu lejn dak li nemmnu hu għall-akbar ġid tal-poplu tagħna.

Bħall-artist, irridu nipperseveraw, b’reżiljenza, għaqal u kuraġġ; fuq kollox b’mazza u skalpell f’ħidma kontinwa biex naqra naqra niskolpixxu proġett politiku mill-isbaħ u tal-aqwa fejda.

IL-PN FORZA KREATTIVA

Dan hu x’turi l-istorja tal-partit tagħna. Għahekk jien kandidat fi ħdan dan il-partit. Mhux partit tal-anġli jew perfett. Huwa partit ta’ bnedmin ġejjin minn kull rokna tas-soċjetà tagħna. Imma bid-difetti b’kollox inħossuna kburin li konna l-aktar forza kreattiva fit-trasformazzjoni ta’ din il-ġebla f’pajjiż mill-aqwa li hawn fl-arja Ewro-mediterranja.

Din it-trasformazzjoni fissret sagrifiċċji kbar għall-mexxejja u s-segwaċi nazzjonalisti. Ħafna kienu dawk li bassru it-tifrik tal-partit. Ħafna kienu l-avversarji u l-ostakoli li poġġewlna. Tort tagħna u mhux ġew mumenti meta ħafna nies iddejqu minna u mid-difetti tagħna, waqt li oħrajn għoġobhom it-tlellix propogandistiku tal-mument.

Id-dmir tagħna hu li nissaħħu u ningħaqdu fir-rieda li nkomplu naħdmu bla heda biex nibnu l-proġett li l-poplu għandu bżonn għall-ġid ta’ uliedna u pajjiżna. Il-Partit Nazzjonalista qatt ma kellu ideal short-term. Il-“Malta Tagħna Lkoll” u “L-Aqwa Żmien” jistgu jgħammxu l-għajnejn, imma bil-fatti jirriżulta li huma proġetti fieragħ li imlew il-bwiet tal-ftit u dgħajjfu pajjiż u soċjetà sħiħa.

JERĠA’ JMISS LILL-PN

Li nsewwu l-ħsara kbira li ġab il-Labour fl-aħħar snin. In parti jiddependi minna li noffru lill-poplu alternattiva b’saħħitha, fejjieda, reali. Hemm ħafna u ħafna aktar xogħol x’inwettqu. Kulmin hu fil-partit, mill-iżgħar partitarju sal-Kap, irridu nagħtu sehemna.

Jiddependi wkoll minn ħafna Maltin u Għawdxin oħra li, hi x’inhi l-fehma politika tagħhom, għandhom biżżejjed melħ f’moħħhom u biżżejjed kuxjenza li suppost iġiegħluhom iqumu mil-loppju, mill-passività, li s-sistema tal-Labour daħluna fiha. Dawn huma wkoll fid-dover li jaħdmu biex jgħinu l-poplu jifhem.

IMĦALLFIN ĠODDA

Din il-ġimgħa għamilna pass ieħor ‘l quddiem u saret l-ewwel għażla ta’ Imħallfin li ma kinetx f’idejn il-Prim Ministru tal-ġurnata. Din kienet waħda mill-proposti konsistenti fl-aħħar programmi elettorali u dokumenti tal-PN. Hija proposta li r-rappreżentanti tal-PN fit-taħditiet kostituzzjonali insistew għaliha. Hija miżura li ġġieldu għaliha diversi għaqdiet volontarji fi ħdan is-soċjetà ċivili. Huwa pass. Fadal ħafna aktar xi jsir.

Awguri lill-Imħallfin il-ġodda.

AKTAR NISA FIT-TMEXXIJA

Konxju li t-tibdil fil-Kostituzzjoni biex ikun hemm aktar nisa fil-Parlament ġab miegħu kontroversji. Jien ħsibt ħafna fuq dan il-pass. Nixtieq fuq li nixtieq li jkollna aktar nisa fil-Parlament għax il-poplu jagħraf l-importanza ta’ dan; għax il-poplu jagħraf il-merti kbar ta’ kandidati nisa; għax aktar nisa jidħlu għall-vokazzjoni politika; għax il-kondizzjonijiet tax-xogħol tal-politiċi jinbidlu radikalment u jirrikonoxxu l-irwol tal-mara fis-soċjetà. Hekk nixtieq u għahekk ser naħdem. Imma minħabba l-kwistjoni tal-incumbency, li fil-Parlament preżenti n-numru ta’ nisa hu baxx ħafna, ikkonvinċejt ruħi li kellna bżonn inħaffu l-proċess b’miżura temporanja u pożittiva bħal dik li adottajna.

Fil-Parlament ipproponejna li nassiguraw li l-miżura tapplika anke jekk it-tielet partit ikun rappreżentat fil-Parlament. Tal-Labour irrifjutaw u waħedna ma kellniex il-voti biex tgħaddi l-emenda tagħna. Proponejna tibdil ieħor li jtejjeb is-sistema, imma kollu ġie rifjutat. Nibqgħu ninsitu u naħdmu biex ikollna sistema elettroali aktar ġusta u trasparenti, minkejja li tul is-snin qatt ma nstab l-appoġġ tal-Partit Laburista biex nagħmlu dan.

Tinħass iż-żiffa tal-bidla

2021-04-13T10:38:00.009+02:00

Dan l-artiklu deher fil-ħarġa tal-Mument tal-Ħadd 11 ta' April 2021

Jiddependi minn kull wieħed u waħda jekk din iż-żiffa tibqax biex tiżviluppa f’riħ, jekk jista’ jkun riefnu, ta’ bidla. Il-mexxej il-ġdid tal-PN, Bernard Grech, hu nnifsu wiċċ ġdid, relattivament żagħżugħ, li qed jimbotta l-bidla. Fi ftit xhur kiseb l-appoġġ massiv tal-partit u ħafna simpatija mill-poplu inġenerali. Issa qed inħossu sew it-tnemnim ta’ ritmu jiżdied fit-tmexxija effettiva tal-partit u fil-viżjoni u d-direzzjoni ġodda li l-PN fil-Gvern se joffri lill-poplu Malti u Għawdxi. ISSA HU L-WAQT li kull partitarju, tesserat, membru f’xi kumitat tal-partit jagħmel deċiżjoni b’saħħitha li jagħti s-sehem kollu possibbli. F’IDEJNA.

AWGURI GĦALL-FTUĦ TAL-ISKEJJEL

Għada jibda l-proċess tal-ftuħ gradwali tal-iskejjel. Importanti li lkoll – ġenituri, tfal u studenti, għalliema, ħaddiema, tat-trasport – nikkoperaw biex dan ikun suċċess u nkomplu inbattu l-pandemija. Kulħadd jaf eżatt x’irid jagħmel. Diġa uliedna u l-istudenti tilfu ħafna. M’hemm xejn aqwa mill-edukazzjoni fl-iskejjel, wiċċ imb’wiċċ mal-għalliema, ma’ sħabna fil-klassi, fil-logħob u l-avventuri. Kuraġġ u grazzi lill-għalliema kollha. Awguri lill-iskejjel kollha.

Wieħed jinnota pero kif ħafna minn dawn l-istudenti għadhom fil-għama dwar x’ser ikun qed jiġri mill-eżamijiet. Jekk forsi s-sena l-oħra l-pandemija ġiet fuqna għall-għarrieda, naħseb li sena wara l-Gvern kellu żmien biżżejjed li jippjana.

IRRIDU VOLONTARJAT ĦIELES

Il-Liġijiet u r-Regolamenti li saru bl-iskop li jkun miġġieled il-ħasil tal-flus qed jheddu l-indipendenza u l-ħajja tal-għaqdiet volontarji – mill-iċken sal-akbar. Il-Gvern Laburista ma kienx kapaċi jiddistingwi bejn min irid bi kriminalità mafjuża jikkorrompi u jaħsel il-flus (money laundering) u min irid biss ikun ta’ servizz u karità għal min hu fil-bżonn.

Issa l-għaqdiet volontarji – minn kumitat taż-żgħażgħ sa każini ta’ banda, ta’ sport, ta’ arti u kultura, ta’ ambjent, għaqdiet ta’ servizzi soċjali u kull tip ta’ għaqda volontarja – jinsabu taħt il-madmad ta’ muntanja ta’ burokrazija bil-perikolu ta’ eluf kbar ta’ multi jekk wieħed jimla xi formola ħażin jew jinsa jimlieha. Is-settur volontarju illum hu fil-perikolu u jeħtieġ li l-Gvern jieqaf mill-aggressjoni tiegħu u kulħadd ipoġġi madwar mejda biex jinsatbu soluzzjonijiet ġusti u proporzjonali fil-ġlieda kontra l-ħasil tal-flus.

Sadanitant, kull min hu fis-settur volontarju għandu jirrifletti u jmiss b’idejh il-konsegwenzi tal-korruzzjoni, abbużi u immunità li l-Gvern Laburista stess xettel fis-soċjetà tagħna.

800 PRIĠUNIER – L-AQWA FL-EWROPA

Skont ir-Rapport SPACE għall-2020 (l-istatistika annwali penali tal-Kunsill tal-Ewropa) Malta għandha l-ogħla żieda fir-rata ta’ priġunieri fil-ħabs mqabbla mad-daqs tal-popolazzjoni, kważi 800 priġunier is-sena l-oħra, inkluż 60 mara. Fit-tmien snin ta’ Gvern Laburista din ir-rata splodiet. Il-ħabs tagħna huwa l-ħabs bil-ħames l-akbar popolazzjoni ta’ priġunieri barranin – aktar min nofs il-popolazzjoni ta’ priġunieri. Aktar minn kwart qiegħdin il-ħabs fuq reati konnessi ma’ droga. Il-ħabs Malti irreġistra wkoll l-ogħla rata ta’ suwiċdji fil-ħabs – 25.2 għal kull 10,000 priġunier. Ir-rapport jagħti ħafna tagħrif dwar is-sitwazzjoni f’Malta mqabbla ma’pajjiżi oħra tal-Kunsill tal-Ewropa.

Pajjiż modern u serju għandu jagħti każ ta’ rapporti bħal dawn. Nemmen li għandna nagħmlu sforz biex b’mod oġġettiv ispirat mis-sens ta’ ġustizzja, fairness u saltna tad-dritt nanalizzaw x’jista’ jsir biex ma jkunx hemm popolazzjoni fil-Faċilità Korrettiva ta’ Kordin akbar milli tassew hemm bżonn.

Kważi 40 sena ilu Louis Galea, meta kien ministru responsabbli mill-ħabs, kien ta bidu għal riforma f’dan is-settur. Kien hu li inroduċa ideat ġodda ta’ rijabilitazzjoni u trattament ta’ priġunieri u bidel l-isem minn “Ħabs Ċivili ta’ Kordin” għal “Faċilità Korrettiva ta’ Kordin”. Kompla warajh Tonio Borg u oħrajn. Jekk il-ħabs ma jsirx tassew ‘faċilità korrettiva’ u ta’ rijabilitazzjoni ikun hemm konsegwenzi serjissima fuq is-soċjetà kollha. Fadal ħafna xi jsir.

IL-ĠAR TAGĦNA L-LIBJA

Ħadt gost biż-żjara li l-Prim Ministru Abela u l-Ministru tal-Affarijiet Barranin Bartolo għamlu fil-Libja wara l-ftehim internazzjonali li wassal biex il-pajjiż ikollu gvern temporanju ta’ għaqda nazzjonali taħt it-tmexxija tal-Prim Ministru interim Abdul Hamid Dbeibah. Issa ser nerġgħu niftħu l-Ambaxxata u jibdew it-titjiriet bejn iż-żewġ pajjiżi. L-Unjoni Ewropea ilha tagħti kontribut biex jinstabu s-soluzzjonijiet meħtieġa f’pajjiż ilu snin imkisser bi gwerrer u ġlied intern.

Huwa fl-akbar interess tagħna li l-Libja tikseb il-paċi, l-istabbilità u l-aħjar governanza possibbli. Il-poplu Libjan hu poplu ħabib u qrib tagħna. Għalina l-Libja huwa suq mill-aktar importanti li jeħtieġ inkomplu nagħtuh l-ogħla priorità. Fuq kollox sigurtà, ordni u organizzazzjoni fuq il-kosta tal-Libja huma parti mis-soluzzjoni għall-problema tal-immigrazzjoni lejn ix-xtut Ewropej, inkluż tagħna.

TISLIMA LIL WILLIAM POMROY U ĠORĠ BUGEJA

Fi żmien erba’ xhur tlifna tnejn mill-aqwa irġiel li kellna fil-PN - Ġorġ Bugeja f’Jannar u issa William Pomroy. Il-funerali li sarilhom jixhdu r-rispett li dawn iż-żewġ ġentlomi kienu jgawdu sew fost ix-Xlukkajri kif ukoll fi ħdan il-partit.

Kienu Maltin ta’ veri; bnedmin tal-ogħla valuri; ħaddiema eżemplari u bieżla; nies b’kuxjenza ċivika mill-aqwa. Bħala Nazzjonalisti għixu ż-żmenijiet koroh taħt is-soċjalisti fis-sebgħinijiet u t-tmeninijiet. Huma eżempju għal min irid jagħti sehem u servizz bnin u ġenwin fil-politika.

Grazzi Ġorġ u William. U grazzi lill-familji tagħhom.

Għanqbuta mifruxa ma’ kullimkien

2021-04-04T11:28:00.002+02:00

Dan l-artiklu deher fil-ħarġa tal-Mument tal-Ħadd 4 ta' April 2021, Jum l-Għid il-Kbir

L-Għid it-Tajjeb lil Kulħadd.

Il-Kristjaneżmu mingħajr l-Għid kien ikun reliġjon bla togħma. Dan l-aħħar smajt frażi li laqtitni: It-tradizzjoni hi l-fidi ħajja tal-mejtin, dawk li ġew qabilna. Imma it-tradizzjonaliżmu huwa l-mewt tal-fidi tal-ħajjin. Sfortunatament is-soċjetà tagħna hi mimlija tradizzjonaliżmi superfiċjali. Dan ukoll insibuh fl-għeruq tal-mod kif nagħmlu politika. Ngħożżu it-tradizzjoni, jiġifieri l-wirt, imma jeħtieġ li niġġeddu fis-sustanza, valuri u verità.

L-għanqbuta tal-Mafja

Għadna kif fakkarna ‘Jum il-Ħelsien’, proprju minn Gvern li waħħad lil Malta f’għanqbuta ma’ barranin. Tajniehom power station, Enemalta, sptarijiet, artijiet u ma nafx x’hiex iżjed. Dak “Ħelsien”! U ma għamilnihiex għax kien jaqbel lil pajjiżna. Le. Għamilnieha biex is-swaba’ tal-qarnita jagħmlu lira. Din il-ġimgħa komplejna nsiru nafu aktar. Grazzi għal xogħol kbir minn Times of Malta u konsorzju ta’ ġurnalisti barranin fid-Daphne Project, dak li bdiet tinvestiga Daphne Caruana Galizia ħames snin ilu tkompla u llum sirna nafu li Macbridge, il-kumpanija l-oħra li bħal 17 Black kellha tgħaddi €5,000 kuljum lil Konrad Mizzi u Keith Schembri, hi ta’ Chen Cheng, dak li f’isem Shanghai Electric innegozja l-bejgħ tal-Enemalta u l-proġett tal-windfarms fil-Montenegro.

Imma sirna nafu ħafna aktar. Fl-inkjesta Egrant, il-Maġistrat Aaron Bugeja kien sab emails li juru li dan Chen Cheng, flimkien ma' Konrad Mizzi, Keith Schembri, Brian Tonna, u ċertu "Sai" (Mizzi?) kienu beħsiebhom jibdew joffru servizzi ta' viżas, permessi għal residenza, ċittadinanza u proprjetà lil ċittadini Ċiniżi. Fil-konklużjoni tal-inkjesta li Muscat kien żamm mistura, il-Maġistrat jirrakkommanda investigazzjoni kriminali fuq dan il-proġett. Forsi l-Kummissarju jsib ħin jaġġornana ftit f'hiex waslet din l-investigazzjoni, tliet snin wara.

Issa ġie żvelat ukoll kif dan Cheng kien partner ma' Mao Haibin f'kumpanija li toffri viżas liċ-Ċiniżi. Dan Mao huwa uffiċċjal għoli tas-Shanghai Overseas Chinese Exit-Entry Services, kumpanija li l-Gvern Malti taha konċessjoni ESKLUSSIVA biex hi biss tbiegħ viżas residenzjali Maltin fiċ-Ċina, Hong Kong u Macao.

Mao għandu wkoll partnership ma' Aron Mifsud Bonnici, l-avukat ta' Konrad Mizzi li kien tpoġġa fil-Bord tal-Enemalta meta sar il-bejgħ tal-ishma liċ-Ċiniżi u meta ġie negozjat il-proġett korrott tal-Montenegro. Bejniethom ibiegħu wkoll il-viżas residenzjali liċ-Ċiniżi.

U hemm aktar. Ħu Mao, ċertu Mao Haichun, għandu żewġ kumpaniji oħra bi sħab ma' Roderick Cutajar, li kien CEO tal-Malta Residence and Visa Program, aġenzija tal-Gvern. Kumpanija minnhom tbiegħ il-proprjetà, u l-oħra ċ-ċittadinanza. Ħalli dik l-iskema tal-bejgħ tal-passaporti, jeħilbuha kollha. U għax taf int, fil-Moviment, is-CEOs kollha kellhom business "on-the-side". Bħal Joseph Cuschieri, Heathcliff Farrugia u Johann Buttigieg, li Robert Abela għadu jiddefendi sal-lum.

U ma ninsewx ukoll f'dan iż-żmien min kien il-Konslu Ġenerali li kellna Shanghai: Aldo Cutajar. Dan Aldo jiġi ħu s-Segretarju Permanenti Ewlieni Mario Cutajar, u ġie arrestat f'Awwissu li għadda għax sabulu nofs miljun fi flus kontanti moħbija d-dar u €400,000 oħra moħbija f'bank fl-Emirati Għarab Magħquda.

Għadna qed insiru nafu, naqra naqra, kemm kienet mifruxa din l-għanqbuta. Kemm kellha swaba' ma' kullimkien il-qarnita.

Huwa ċar li dan ma kienx xogħol individwu wieħed, kif qed jipprova jpenġieha l-Labour. Din hija kriminalità organizzata. Organizzazzjoni sħiħa li tixtri, tinxtara, tikkorrompi, tirrikatta, issikket, tisraq, taħsel li tisraq, u fejn kien hemm bżonn toqtol.

Din kienet ir-roadmap. Dan hu l-Moviment Laburista li Robert Abela ddefenda u għadu jiddefendi.

LE MHUX L-ISTESS

Mhux veru il-PN u l-PL huma l-istess. Din hi d-diska li taqbel lil min qiegħed hemm biex jisraq, biex dak li jagħmel hu jidher normali.

Nerġa ngħid: Korruzzjoni jkun hemm dejjem. Biss kien hemm żmien fejn il-korruzzjoni kienet tkun frott individwu, u allura kien faċli għall-istituzzjonijiet li jieħdu azzjoni. Li qed naraw illum huma l-ogħla saffi tal-gvern parti minn xibka sħiħa ta’ korruzzjoni, jorganizzawha huma, u jidħlu bi sħab mal-kriminali u mal-qattiela. U din rajnieha biss fiż-żmien meta fil-Gvern hemm il-Labour.

Il-qarnita illum mifruxa ma' kullimkien. U allura ma nistgħu nnaddfuha qatt kemm idum il-Partit Laburista fil-Gvern. Biex il-pajjiż joħroġ minn din l-istorja kerha, isib tarf tal-verità, issir ġustizzja ma' kulħadd, u dak li nsteraq jintradd lura liċ-ċittadini Maltin, pajjiżna jrid jibda Paġna Ġdida mal-Partit Nazzjonalista b'Bernard Grech Prim Ministru.

Prim Ministru li mhux kompromess, li ma kienx imdaħħal f'dan it-tgħaffiġ, u li m'għandu bżonn joqgħod jgħatti għal ħadd. Ħalli flimkien naraw li dan il-pajjiż jerġa' jsir normali, isimna jerġa' jitnaddaf, u kulmin għamel il-ħażin iwieġeb ta' għemilu.

U mbagħad iva, inkunu nistgħu nerġgħu nużaw il-politika bħala għodda ta’ ġid għal kulħadd.

Inqumu mir-raqda!

2021-03-29T13:08:00.005+02:00

Dan l-artiklu deher fil-ħarġa tal-Mument tal-Ħadd 28 ta' Marzu 2021

Lanqas in-Netflix mhu kapaċi jipproduċi sensiela hekk twila ta’ episodji ta’ korruzzjoni u abbużi daqs kemm qed jirnexxielhom tal-Labour. Ma tlaħħaqx. Anqas tkun taf minn fejn ser tibda. Tisma’ episodju u tinsa l-ieħor. U dan hu l-perikolu. Minbarra it-theddida tal-panedmija, għandna it-theddida li l-poplu jaqta’ qalbu u jinfetta ruħu bl-imxija tax-‘xejn mhu xejn’.

MHUX IT-TNEJN L-ISTESS!

Le, mhux iż-żewġ partiti l-istess. Hemm differenzi kbar bejn il-PN u L-PL. Il-PN għandu paġni koroh, deċiżjonijiet żbaljati, seta’ għamel aktar u aħjar, fl-istorja tiegħu. Imma l-miżien tal-PN jiżen favur it-tajjeb bil-bosta aktar milli favur il-ħażin.

Il-Labour huwa wkoll protagonist tal-istorja ta’ pajjiżna. Ukoll għamel ħafna ġid. Ukoll seta’ għamel aktar u aħjar. Imma l-istorja turi li hemm għeruq fit-twemmin u fl-imġieba tal-Labour li jagħmilhom jidhru qaddisin meta fl-Oppożizzjoni u li jinbidlu meta jkunu fil-gvern. Il-lupu liebes ta’ ħaruf. L-istorja turina rabta fil-fond bejn il-Labour u l-kriminalità organizzata, rabta li ilha tirrepeti ruħha fl-istorja ta’ pajjiżna. Fis-sebgħinijiet u t-tmeninijiet ukoll kellna Gvern Laburista ta’ abbużi, korruzzjoni, vjolenza galore, immunità, frame-ups, taħwid – li spiċċaw ħallewna pajjiż tat-tielet dinja. U issa wkoll – Gvern Laburista li għandu r-rekord assolut ta’ abbużi, korruzzjoni, ħasil ta’ flus, qtil, ħsara lil Malta b’konsegwenzi serji. B’Ministri nfushom involuti direttament fil-kriminalità! Mhux aħna qed ngħiduh, il-kriminali u x-xhieda tal-Istat qed jgħiduh.

Le mhux it-tnejn l-istess… umilment nemmen li hemm differenzi kbar. Min jgħid li t-tnejn huma l-istess ikun kompliċi fil-propoganda tal-Labour li dak li qed nassistu għalih mhu xejn straordinarju u l-poplu għandu jaċċettah. Ejja inqumu mir-raqda! Għandna dritt nippretendu aħjar għal pajjiżna.

MA JRIDUX JINBIDLU – IL-KORRUZZJONI SISTEMA TA’ KONDOTTA

Jien nemmen li fost l-eluf kbar li jappoġġjaw lill-Labour hemm eluf li huma Maltin serji u ġewnini. Għandhom dritt sħiħ għall-opinjoni tagħhom u jien nirrispettaha. Anzi jien nemmen li Malta għandha bżonn li jkollha partiti differenti, il-Knisja, is-soċjetà ċivili u NGOs attivi oħrajn.

Imma lil dawn l-eluf ġenwini insaqsihom: Possibbli lesti tibqgħu ċassi quddiem sitwazzjoni fejn ħafna minn sħabkom u n-nies li emmintu fihom huma kriminali? Għaliex ħafna partitarji Laburisti meta jikkumentaw fuq il-media isostnu li “aħna ma jimpurtaniex mill-korruzzjoni”. Għaliex jaċċettaw li l-mexxej, uffiċjali, Ministri u Deputati huma daqshekk beżżiegħa li mhux kapaċi jagħżlu l-verità u jieqfu favur is-sewwa? Għaliex l-ebda kelma ta’ dispjaċir dwar il-kwantità ta’ każi ta’ abbużi, serq, korruzzjoni u anke qtil? Kif jista’ il-Labour ikun strument ta’ fejda fi stat bħal dan? Imbagħad tiġu tgħidu li l-Partit Nazzjonalista “negattiv”?

Id-diska imġenġla tal-Labour hi: Għax ma tarawx x’ġara fi żmienkom? Ir-risposta tagħna hi: Għidulna, x’ġara? Għax f’kull każ li jsemmu issib li jew ittieħdu l-passi kontra n-nies involuti, kienu min kienu, jew dak li jsemmu hu gidba. Hekk kif illum nafu li kienet gidba l-propoganda dwar il-korruzzjoni tal-power station BWSC. Hekk kif illum nafu li kienet gidba l-istorja dwar il-korruzzjoni ta’ Anthony Debono, ir-raġel ta’ Giovanna, storja fejn Robert Abela innifsu kien l-avukat tal-kuntrattur “whistleblower” li ma ġiex emmnut mill-Qorti; u fejn il-prosekutur kien l-Assistent Kummissarju Ian Abdilla, dak li kull rapport tal-FIAU li wasal quddiemu ħbieh u ma ressaqx lil min kellu jressaq, imma lil bniedem innoċenti għoġbu jressqu. Biex insemmu żewġ eżempji biss.

Illum nafu li dak il-gideb u tajn li waddbu kienu qed jitfgħuh biss biex jippruvaw jiġġustifikaw il-kriminalità reali li kienu qed iwettqu huma. Dik li tfisser meta jgħidu “Għax ma tarax x’għamlu tal-PN”. Inqumu mir-raqda!

MILL-OPRI TIEGĦEK NAGĦRFEK

Tajjeb infakkru ftit ir-rekord tal-PN fil-Gvern. Għal-lum infakkar biss:

• Daħħal lil Malta fid-dinja tat-telekommunikazzjoni diġitali;

• Ipprovda sorsi ta’ ilma u enerġija kostanti;

• Tana sistema ta’ tisfija tad-drenaġġ biex il-baħar u l-bajjiet tagħna tnaddfu;

• Bena biżbilju toroq ġodda, flyovers, mini, u xogħlijiet infrastrutturali li bidlu pajjiż;

• Bena sptar ġdid u immodernizza s-sistema kollha tas-saħħa;

• Ittripla il-bini tal-Università u għamilha b’xejn għal kulħadd;

• Waqqaf l-MCAST u fassal u beda Campus ġdid;

• Bena skola ġdida kull sena u immodernizza l-iskejjel kollha;

• Ta l-istipendju lill-istudenti post sekondarji kollha;

• Żied il-benefiċċji soċjali u l-pensjonijiet;

• Appoġġja l-arti u l-kultura f’kull sfera;

• Bena diversi ċentri sportivi, inkluż skola dedikata għall-Isport.

Lanqas il-gazzetta kollha mhi biżżejjed biex infakkru ir-rekord sabiħ u ta’ ġid enormi li wettqu gvernijiet nazzjonalisti. U dan apparti ir-rekord storiku li għamel lil Malta nazzjon indipendenti u daħħalna membri fl-Unjoni Ewropea. U dejjem, madwar id-dinja, żamm lil Malta bħala pajjiż ammirat, fdat u rispettat. Kollu grazzi għal politiċi kompetenti, b’viżjoni u serji. Għax iva, lanqas il-politiċi mhuma kollha l-istess. U le, mhux dejjem konna hekk. Inqumu mir-raqda!

GRAZZI GĦAS-SERVIZZ TAS-SAĦĦA

Dan l-aħħar erġajt missejt mas-servizzi tal-Isptar Mater Dei. Veru mhux kollox tajjeb u perfett. Imma ħassejtni grat u kburi li f’dan in-naqra ta’ pajjiż għandna servizz nazzjonali tas-saħħa b’xejn (jiġifieri imħallas mit-taxxi tagħna) u hekk professjonali. Ilkoll – mill-Ministru sal-iċken wieħed fostna – għandna napprezzaw dan il-wirt u naħdmu l-ħin kollu biex insaħħuh.

MARATONA DALGĦODU

Inqumu mir-raqda u llum nagħmlu sforz biex nagħtu mill-aħjar li nistgħu. Bil-ftit mill-ħafna għall-ġid ta’ pajjiżna; ta’ uliedna u l-familji tagħna. Il-Partit Nazzjonalista bit-tmexxija ta’ Bernard Grech qed juri li tassew hu kapaċi jagħti Paġna Ġdida lil Pajjiżna. Grazzi bil-quddiem.

Kemm hemm x'nagħmlu!

2021-03-21T10:37:00.003+01:00

Dan l-artiklu deher fil-ħarġa tal-Mument tal-21 ta' Marzu 2021

Sa mill-ewwel ġranet tal-Labour fil-gvern mill-2013 ‘l hawn assistejna għal stejjer ta’ abbużi, korruzzjoni u kriminalità bl-involviment ta’ ismijiet fl-ogħla karigi tal-Partit Laburista u l-Gvern. Fuq dawn l-istejjer tkellem kulħadd, iżda kellna skiet itarrax min-naħa tal-membri, kumitati, uffiċjali, media u esponenti tal-Partit Laburista. L-interventi tagħhom kienu biss ta’ difiża kontinwa u kampanja li kull kritika kienet biss frott Oppożizzjoni “negattiva”.

Il-proċessi li għaddejjin fil-Qrati bħalissa juru biċ-ċar id-diżonestà tal-aġir u l-propoganda tal-Labour.

Il-partitarji, membri u attivisti ta’ partit politiku, hu liema hu, ġenwinament jagħmlu sagrifiċċji kbar għal partit li jemmnu fil-politika tiegħu. Iżda meta jibqgħu siekta u, agħar, jiġġustifikaw il-ħażin, l-abbużi u l-korruzzjoni, sempliċiment għax qed isiru mill-partit tagħhom u mhux minn partit ieħor, isiru kompliċi. Il-lealtà ġenwina lejn il-partit titlob li min jara l-ħażin iqum, jitkellem fl-apert u jipprotesta, mhux iħalli l-partit tiegħu jitnawwar u mixtri minn interessi li huma f’konflitt mal-interessi tal-poplu.

Il-ħuta minn rasha tinten!

BERNARD U T-TIĠDID TAL-PN

Il-Kap tal-Partit Nazzjonalita Bernard Grech qed iwettaq rivoluzzjoni siekta fil-PN fil-ftit xhur minn meta ġie elett. F’dawn l-aħħar xhur, minn magna li kienet fir-rivers, il-PN beda jorganizza magna li teħodna ‘l quddiem. Qed naraw sinjali pożittivi ta’ tiġdid f’kull saff tal-partit, mill-kumitati sezzjonali, sal-Fergħat, Kumitat Eżekuttiv u anke Kunsill Ġenerali.

Bernard Grech qed iżid fl-appoġġ popolari u qed jibni tim b’saħħtu – Deputati, Media, Uffiċjali, voluntiera u esperti. Issa ser nidħlu f’fażi importanti ta’ tfassil ta’ politika u programmi għall-ġejjieni ta’ pajjiżna. Aħna lkoll mistennija inqumu, insiru attivi, ma nibżgħux, niddjalogaw bejnietna u ma’ ħaddieħor. Jeħtieġ nieħdu aħna l-inizjattiva biex insiru nafu min huma l-kandidati, insegwu n-NET FM, NET TV u nixtru u naqraw In-Nazzjon u Il-Mument.

Ejjew nagħmlu ħilitna sabiex il-maratona tal-Ħadd 28 ta’ Marzu terġa’ tkun suċċess. Kulħadd jagħti skont kemm jista’. Bil-ftit mingħand il-ħafna il-PN ikollu l-mezzi biex ikompli jiġġedded u jissaħħaħ u jwassal il-messaġġ tiegħu b’mod aktar effettiv.

ENERĠIJA GARANTITA U SOSTENNIBBLI

Il-PN ħabbar proposti konkreti dwar is-settur tal-enerġija elettrika li hija l-bażi essenzjali ta’ kull tip ta’ progress u servizz. Nieqfu zopptu kull darba li tieqaf l-enerġija.

Bernard Grech jemmen li m’għandniex f’kollox nistennew l-elezzjoni biex infiehmu l-poplu l-alternattivi li joffri l-PN. Flimkien ma’ Ryan Callus, il-Kelliemi tal-Partit għall-Politika dwar l-Ilma, Enerġija u Żvilupp Sostenibbli, il-Kap tal-Partit wera kif hekk kif inkunu fil-gvern ser naħdmu biex nassiguraw provvista ta’ enerġija skont il-bżonnijiet tal-poplu tagħna. Qed naħsbu għat-tieni Interconnector, enerġija mix-xemx u mir-riħ, ħlas aħjar lil min għandu l-pannelli, roħs fit-tariffi tad-dawl, karrozzi li jaħdmu bid-dawl u diversi proposti oħra.

Il-PN għandu rekord tal-aqwa investimenti biex biddel lil Malta minn pajjiż tat-Tielet Dinja għal wieħed fost il-pajjiżi l-aktar żviluppati. Il-PN huwa l-Gvern li wettaq bil-fatti u li ġab bidliet kbar għall-progress ta’ Malta u l-poplu tagħha, progress li minnu gawda kulħadd.

SPIŻA ENORMI GĦAL PAJJIŻNA

Il-COVID-19 qed tagħti daqqa ta’ ħarta mill-kbar nett għall-ekonomija ta’ pajjiżna u l-għixien tal-familji tagħna. Il-Gvern qed ikun kostrett joħroġ miljuni kbar mill-kaxxa ta’ Malta biex jappoġġja l-impiegi, industriji u negozji. Resqin għat-tieni sajf tista’ tgħid b’ebda turiżmu. Dan minbarra l-konsegwenzi serjissimi fl-oqsma l-oħra tas-saħħa u tal-edukazzjoni.

Maħniex waħedna. Il-pandemija mhix tort tal-gvern u laqtet lid-dinja kollha. Imma l-mod kif irreaġixxejna għaliha u ilqajna għaliha hija responsabbilità tiegħu. Is-sena 2020 f’Malta kienet waħda fejn l-imwiet żdiedu bi 12 fil-mija fuq figuri tas-snin ta’ qabel. Sfortunatament il-Gvern Laburista għamel żbalji serji fil-mod kif mexxa u naqas serjament milli jieħu l-passi meħtieġa biex jipproteġi s-saħħa tagħna u s-sigurtà ekonomika ta’ pajjiżna.

Kull wieħed u waħda minna għandna responsabbilità kbira li nieħdu aħna stess il-prekawzjoni biex ma nħallux il-virus jirkeb lilna jew l-familji tagħna. Ejjew naħdmu sabiex bil-prekawzjonijiet tagħna u bl-għajnuna tal-vaċċin Malta tkun tista’ terġa’ tqum fuq saqajha f’saħħitha fid-dinja l-ġdida post-COVID.

KAMPANJA ITMA’ U LIBBES

F’Malta għad għandna familji li m’għandhomx x’jilbsu u jbatu l-kesħa fix-xitwa. Huma tant fqar li bilkemm għandhom flus biex jixtru x’jieklu u x’jilbsu. Li nilbsu sew u nissaħħnu huwa dritt fondamentali. Kull min għandu ħwejjeġ tajbin li mhux qed juża’ għandu javviċina l-knisja tal-lokal u jagħmel id-donazzjoni ta’ dawn il-ħwejjeġ.

Din hi l-kampanja tul ir-Randan li l-Knisja qed torganizza permezz tal-Caritas.

GRAZZI SOCIAL WORKERS

Nhar it-Tlieta 16 ta’ Marzu kien il-Jum Dinji għax-Xogħol Soċjali. Din hi kategorija ta’ ħaddiema professjonali li għalkemm mhix viżibbli daqs il-frontliners fil-ġlieda kontra l-COVID huma mill-aktar essenzjali fil-ġlieda kontra kwantità ta’ problemi soċjali li individwi, familji u komunità naffaċċjaw kuljum. Dawn il-ħaddiema jaħdmu fis-skiet f’diversi dipartimenti u aġenziji tal-gvern u f’għadd ta’ NGOs.

Is-Social Work hija vokazzjoni u professjoni mill-aktar nobbli. Ejjew napprezzawhom u ninkoraġġuhom.

Mhux COVID biss...

2021-03-14T17:45:00.003+01:00

Artiklu li deher fil-ħarġa tal-Mument tal-Ħadd 14 ta' Marzu 2021

F’ “L-AQWA ŻMIEN” tikkonfondi liema storja tikkummenta. It-tentazzjoni hi li niffoka fuq l-emerġenza nazzjonali li l-COVID-19 ġabet fuq il-poplu tagħna. Emerġenza li ġiet aggravata bl-inkompetenza politika tal-Gvern ta’ Robert Abela. Iżda, f’dawn l-aħħar ġranet tant seħħew stejjer serji li nħoss li minflok nitkellem biss fuq waħda għandi naqsam magħkom riflessjonijiet fuq uħud minnhom.

RAĦAL SĦIĦ BIL-ĠUĦ

Il-biċċa l-kbira minna lanqas biss tgħaddilna minn moħħna li f’pajjiżna jista’ hawn min qed ibati l-ġuħ. Fil-verità aktar minn 1500 familja talbu l-għajnuna tal-knejjes parrokkjali biex jgħinuhom jakkwistaw l-ikel għall-familja. Jiġifieri f’Malta, fl-“Aqwa Żmien”, għandna raħal ċkejken sħiħ fejn in-nies ma għandhomx ikel biżżejjed għall-familja u jibagħtu ‘l uliedhom jorqdu bil-ġuħ.

Tul dan ir-Randan il-CARITAS qed tmexxi kampanja ITMA’ U LIBBES. Ilkoll kemm aħna għandna ngħinu. Ikun tajjeb li fil-knisja fejn nattendu inħallu flus, ħwejjeġ tajbin u ikel. Imma l-aħjar ħaġa hi li nagħtu vouchers jew inċemplu fuq in-numru apposta tal-Caritas għall-familji fil-bżonn:

€11.65 titma tifel/tifla għal ġimgħa (SMS 50619270)

€20 titma’ koppja anzjana għal 5 t’ijiem (ċempel 51002037)

€50 titma’ familja ta’ 4 għal 3 t’ijiem (ċempel 51902072)

Skont l-Uffiċċju Nazzjonali tal-Istatistika fl-2020 kellna kważi 83,000 persuna f’riskju ta’ faqar, waqt li madwar 40,000 persuna qed jgħixu f’kondizzjonijiet serji ta’ deprivazzjoni.

EMERĠENZA NAZZJONALI FIS-SAĦĦA

Is-sħaba sewda ta’ korruzzjoni li figuri ewlenin fi ħdan il-Gvern u l-Partit Laburista tefgħu fuq Malta u fl-aħħar sena, il-Covid-19, tant qatgħulna nifisna li mhux qed jirnexxielna naraw il-problemi fis-saħħa tal-poplu b’mod ċar. Iva, il-mod kif il-Gvern ta’ Robert Abela mexxa fir-rigward tal-pandemija aggrava bil-kbir sitwazzjoni li nibtet f’pajjiżna bħal fid-dinja kollha. Imma sadanitant hemm sitwazzjonijiet oħra li qed iġibu tbatija, inkwiet u tħassib fost eluf ta’ familji, speċjalment dawk milquta minn ċertu mard u kondizzjonijiet. Irrid nuri is-solidarjetà, fost oħrajn, ma’:

• Familji li tilfu qrabathom minħabba l-COVID.

• Dawk li mardu bil-COVID.

• Dawk li jinsabu isolati fl-isptarijiet u djar tal-anzjani.

• Dawk li kellhom l-operazzjonijiet tagħhom posposti.

• Dawk li tnaqsilhom xi servizz bżonnjuż tas-saħħa.

• Dawk li għandhom bżonn il-kemoterapija kontra l-kanċer u qed ikollhom jittalbu għaliha lil Community Chest Fund.

• Dawk li jbatu minn kondizzjonijiet speċjali bħal Cystic Fibrosis – kondizzjoni li Mandy Vella qed tagħmel kampanja importanti dwarha.

Hemm ħafna aktar x’ngħidu. Imma fir-rigward ta’ dawn l-aħħar tnejn ma jistax ikun li l-Gvern ma hux kapaċi jsib is-soluzzjonijiet finanzjarji biex jixtri bi prezzijiet speċjali l-mediċini meħtieġa, anke jekk dawn iqumu flejjes kbar. Ma narax għalfejn għal kura dawn in-nies iridu jittalbu għal karità, meta bi ftit miljuni li ma huma xejn fil-baġit biljunarju tal-Gvern dawn jistgħu jieħdu l-kura bi dritt.

MEXXEJ LABURISTA INKOMPETENTI U PRUŻUNTUŻ

Is-saga ta’ deċiżjonijiet u messaġġi żbaljati li għamlu Robert Abela, sħabu, u l-media Laburista appoġġjata mill-PBS hija fl-għerq tal-emerġenza nazzjonali fis-saħħa li qed naffaċċjaw. Kieku żammejna is-sistema li applikajna fil-bidu tal-pandemija kieku m’aħniex f’din il-kriżi. Minflok, fost ħwejjeġ oħra:

• Għamilna festival biċ-ċikċifogu lejn l-aħħar ta’ Ġunu 2020 biex niċċelebraw “ir-rebħa fuq il-pandemija”;

• Robert Abela ħafer il-multi – dak infurzar!

• Organizzajna parties internazzjonali kbar li pajjiżi oħra irrifjutaw, għax kellna l-“protokols u l-mekkaniżims” ta’ Julia Farrugia f’posthom.

• Ftaħna l-ajruport mingħajr ebda restrizzjonijiet;

• U serraħna moħħ in-nies li l-“mewġ qiegħed biss fil-baħar” u li ser “nitilqu niġru”.

Altru illi Robert Abela, sħabu u l-media Laburista bil-PBS magħha huma responsabbli.

IL-GVERN U L-LABOUR IŻOLATI

Kulħadd illum jinsab vuċi waħda dwar il-bżonn li l-pandemija tiġi miġġielda b’mod effettiv – tobba, nurses, spiżjara, laboratorji, ħaddiema fi sptarijiet u djar tal-anzjani, għaqdiet tal-employers, business, is-soċjetà ċivili, unjons. Imma fuq din ma nisimgħu qatt għaliex hemm ċensura sħiħa mill-PBS.

Issa għax kulħadd qed jikkritika l-imġieba tal-Gvern, f’erbat ijiem inħarġu iżjed multi milli nħarġu fl-erba’ xhur ta’ qabel, mingħajr ma kien għadu nbidel xejn mill-avviżi legali li kien hemm fis-seħħ. Mela allura kellu raġun min kien qed jgħid li ma kienx qed isir infurzar.

Il-Partit Nazzjonalista huwa minn ta’ quddiem favur is-saħħa tal-poplu b’sensiela ta’ proposti dwar x’jista’ jsir biex il-poplu jieħu lura saħħtu u n-normalità għall-ħajja tiegħu. Ibda biex billi l-politiċi jieqfu jindaħlu fuq l-awtoritajiet tas-saħħa, aħseb u ara illi jkeċċu u jagħlqu ħalq l-esperti li jtuhom pariri mediċi li ma jogħġbuhomx!

NAĦSBU FL-ISTUDENTI

Filwaqt li l-iskejjel u l-għalliema qed jagħmlu jistgħu bl-użu tal-internet biex ikomplu jgħallmu lill-istudenti, speċjalment issa li l-iskejjel ser ikunu magħluqin, m’hemmx dubju li l-istudenti – mill-iċken sal-ogħla livell – li inqabdu fil-kriżi tal-pandemija qed isofru konsegwenzi.

Importanti li naħsbu bis-serjetà kif ser norganizzaw miżuri biex, hekk kif il-pandemija tiġi mirbuħa, ngħinu l-istudenti f’kull livell jikkumpensaw dak li tilfu u jirbħu lura l-livelli, l-formazzjoni u t-taħriġ li għandhom dritt għalih.

THEDDIDA GĦAR-REPUBBLIKA

Bħallikieku l-Gvern ta’ Robert Abela m’għandux biżżejjed ma x’hiex iħabbel rasu, sab anke il-ħin biex jhedded li għaqda volontorja Repubblika li jfixkilha serjament fil-ħidma tagħha jekk tkompli bil-kritika politika tagħha kontra l-Gvern.

Din mhix biss theddida għal Repubblika. Din hi theddida għar-repubblika u għas-soċjetà ċivili kollha. Għax f’Malta għandna diversi NGOs li fejn iħossu l-ħtieġa jagħmlu kampanji ta’ kritika kontra deċiżjonijiet u l-politika tal-Gvern. Din l-Art Ħelwa, Flimkien għal Ambjent Aħjar, Moviment Graffitti – dawn issa ser nhedduhom li ma jibqgħux NGOs jekk jagħmlu xi protesta jew jikkritikaw deċiżjoni tal-Gvern?

Id-dritt ta’ espressjoni u ta’ assoċjazzjoni huwa dritt fundamentali tal-bniedem. Dritt li twelidna bih u ħadd ma għandu għalfejn itihulna, wisq anqas jipprova jeħodulna.

Iżda akbar ma hi t-theddida għad-demokrazija u l-libertà aktar il-poplu jifhem il-bżonn tal-bidla u ta’ paġna ġdida għal pajjiżna.

Flimkien mal-mara 'l quddiem

2021-03-07T15:33:00.001+01:00

Dan l-artiklu deher fil-ħarġa tal-Mument tal-Ħadd 7 ta' Marzu 2021

M’hemm l-ebda progress veru mingħajr is-sehem sħiħ tal-mara f’kull attività tal-bniedem. Sa mill-bidunett il-mara kienet hemm u mingħajrha ħadd minna kieku mhu qiegħed hawn. Illum fil-biċċa l-kbira tal-postijiet fid-dinja, inkluż f’Malta, insibu il-mara mhux biss protagonista tal-istess ħajja u trobbija tal-ulied, imma insibuha preżenti b’mod kreattiv u produttiv fl-oqsma soċjali, ekonomiċi, kulturali u anke politiċi.

L-ewwel pass fl-1947

F’Malta il-mara għamlet avvanzi kbar tul l-aħħar 35 sena. L-ewwel mertu u bis-saħħa tagħha, imbagħad bis-saħħa ta’ għaqdiet ċivili tan-nisa, imbagħad anke bis-saħħa tal-politiċi. Pass importanti sar fl-1947 fi l-Assemblea Nazzjonali li fasslet il-Kostituzzjoni ġdida li daħlet fis-seħħ dik is-sena tat id-dritt tal-vot lil kull mara bħal kull raġel. Wara dan il-pass r-ritmu għall-avvanza tal-mara fuq livell legali u politiku kien kajman għal ħafna snin. Fis-sittinijiet il-gvern ta’ Borġ Olivier fetaħ it-triq għal paga indaqs mal-irġiel fis-settur pubbliku. Fis-sebgħinijiet il-gvern ta’ Mintoff estenda din l-ugwaljanza għas-settur privat. Imma imbagħad kellu jkun il-gvern ta’ Fenech Adami li ġab rivoluzzjoni favur l-ugwaljanza tal-mara mar-raġel.

Hekk kif fetaħ il-Parlament fl-1987 wara r-rebħa tal-PN, l-ewwel liġi li Fenech Adami għadda mill-Parlament kien l-Att dwar il-Konvenzjoni Ewropeja li bih dil-Konvenzjoni saret parti mil-ligi ta’ Malta. B’hekk l-artikolu 14 tal-istess Konvenzjoni li jipprojbixxi d-diskriminazzjoni bbażata fuq is-sess għall-ewwel darba f’Malta sar part mill-qafas legali.

Ftit wara, b’inizjattivi dak iż-żmien ta’ Louis Galea Ministru tal-Politika Soċjali, il-Gvern biddel il-Kostituzzjoni biex id-dritt għall-ugwaljanza bejn l-irġiel u n-nisa jiġi rikonoxxut bħala dritt fondamentali. B’hekk l-ebda liġi u l-ebda awttorità ma setgħet aktar tiddiskrimina kontra l-mara.

Dan fetaħ it-triq biex ġiet riformata mill-qiegħ il-liġi tal-familja bis-saħħa ta’ konsultazzjoni wiesgħa imnedija b’Whita Paper SĦAB INDAQS FIŻ-ŻWIEĠ. Dan wassal biex il-gvern ressaq il-liġi biex minn saħħa u predominanza tar-raġel fiż-żwieġ u fil-familja ngħaddu għal tmexxija flimkien indaqs bejn il-mara u r-raġel. Il-liġi ġabet ugwaljanza kemm fil-liġi tal-propjetà kif ukoll fil-liġi tal-persuni.

Fl-1987 il-Gvern mill-ewwel waqqaf il-Kummissjoni għall-Avvanz tal-Mara u aktar tard għadda il-liġi – L-Att dwar l-Ugwaljanza bejn Irġiel u Nisa (Kap 456) – biex din issir permanenti bl-iskop li fuq bażi ta’ kuljum tgħasses ħalli n-nisa jgawdu fil-milja tagħhom id-drittijiet daqs l-irġiel u biex kull mara jkollha s-saħħa tieħu l-passi ħalli ħadd ma jżeblagħha, inkluż billi l-fastidju sesswali sar reat speċifiku. Din l-ispinta ġabet magħha tibdil fil-liġijiet tax-xogħol, income tax, soċjali u pensjonijiet u liġijiet oħra.

Imma l-akbar kontribut ta’ Gvern Nazzjonalista għall-ugwaljanza tal-mara kien il-ftuħ beraħ tal-bibien tal-edukazzjoni. Minn Università bi ftit mijiet b’maġġoranza ta’ rġiel Gvernijiet Nazzjonalista bnew Università tal-eluf b’maġġoranza ta’ nisa f’kull qasam ta’ tagħlim u speċjaliżżazzjoni, numru sew minnhom oqsma ġodda.

Fl-istess waqt biddel il-bażi ekonomika mill-qiegħ sabiex ġab setturi ġodda tal-ekonomija fejn il-ħila tal-mara setgħet tibbrilla – is-settur tas-servizzi finanzjarji, l-industrija tal-farmaċewtika u l-mediċini, dik tal-avjazzjoni, servizzi marittimi. Il-gvern kabbar u wessa’ is-servizzi ta’ welfare u wellbeing fl-oqsma soċjali, edukattivi, tas-saħħa u sportivi.

Pass rivoluzzjonarju

Pass ieħor rivoluzzjonarju li minnu il-mara Maltija u Għawdxija gawdiet bla qies kienet is-sħubija ta’ Malta fl-Unjoni Ewropea. Waħda mir-rebħiet soċjali li kiseb il-gvern b’din is-sħubija kienet li daħħalna parti sħiħa fil-mudell soċjali Ewropew. Dan kien il-mudell l-aktar progressiv fid-dinja, mudell li tal-Labour iġġieldu bil-kbir biex ma nsirux parti minnu. Tiftakru? Kien hawn fejn il-mara ma stenniet lil ħadd u uriet il-ħila u l-intelliġenza tagħha billi b’ottiżmu, kuraġġ u avventuriżmu ħatfet l-opportunitajiet kollha li offriet l-Ewropa – fl-edukazzjoni, fil-kultura, fix-xjenza, fl-iskambji fil-businesses, universitajiet u kull settur tal-ħajja.

Dan biex niftakru ftit li l-progress veru favur il-mara ġabuh Gvernijiet Nazzjonalisti kontra l-perċezzjoni żbaljata ta’ ħafna, frott propoganda qarrieqa, li dan kien biss frott tal-Labour. Fl-aħħar snin il-Gvern Laburista, wara l-istorja tal-mistħija fis-sebgħinijiet u t-tmeninijiet fir-rigward tal-ugwaljanza tal-mara, kompla jibni b’diversi miżuri fuq is-sisien sodi u infrastruttura li bnew il-Gvernijiet Nazzjonalsiti ta’ qabel.

Wasalna fejn suppost? Le, jonqos ħafna x’intejjbu, u dejjem x’ngħassu. Bħalissa qed isir xogħol biex ikollna aktar nisa fil-Parlament. Dan għandu jixpruna lil ħafna nisa u tfajliet biex jieħdu sehem f’kull livell ta’ tmexxija kull fejn ikunu.

Jien nemmen b’qawwa li aktar kemm ikollna soċjetà fejn in-nisa u l-irġiel ikunu indaqs f’kullox u f’kull ħin aktar ikollna soċjetà b’saħħitha, fil-paċi u fil-ġid.

Il-ħażin jherri t-tajjeb

2021-03-01T10:21:00.001+01:00

Artiklu ppubblikat fil-Mument tal-Ħadd 28 ta' Frar 2021

Hija fin-natura tal-bniedem li jinġarr mal-kurrent; li jagħlaq għajnejh għal dak li hu ħażin sakemm ma jolqotx lilu; li kollox jgħaddi basta mhux wara biebu; li kollox sew sakemm hu qed ipappieha. Jagħmel hekk mhux għax kattiv, jew għax hu bniedem ħażin, imma għax dak ikun l-eħfef mod biex jirnexxielu jkampa mentalment quddiem l-inġustizzji u l-korruzzjoni.

Iżda l-istorja turina li kull darba li nagħmlu hekk inkunu qed inħallsu aħna stess, u uliedna, għall-konsegwenzi li jirriżultaw.

Fil-verità dan mhux xi fenomenu biss li ngħixu hawn Malta.

Fl-aħħar tmien snin nistgħu ngħidu li dan il-fenomenu sar l-ideoloġija u l-programm tal-Partit u l-Gvern Laburista. L-istrateġisti tal-partit qed jagħżlu li jirkbu fuq din id-dgħjufija tal-bniedem – li jsibha aktar faċli jagħlaq għajnejh għall-ħażin milli jkollu l-kuraġġ jiġġilidlu.

Malta b’livell daqshekk baxx ta’ fiduċja

Din hi ideoloġija u programm li daħlu lill-poplu f’waħda mill-akbar kriżijiet politiċi li qatt kellna b’konsegwenzi serji fuq l-ekonomija u l-ħaddiema ta’ pajjiżna. Qatt daqs issa Malta ma kellha livell daqshekk baxx ta’ fiduċja fix-xena Ewropea u internazzjonali. Spiċċajna m’għadniex fdati kif inhu meħtieġ. U l-fiduċja hija l-bażi ta’ kull relazzjoni.

It-traġedja tal-assassinju politiku tal-ġurnalista Daphne Caruana Galizia għadha qed tirbombja bil-kbir f’pajjiżna. Din hi traġedja li seħħet għax il-Gvern Laburista ħoloq l-atmosfera u l-ambjent biex da isseħħ. Bil-provi illum nafu li Daphne kienet qed tikxef korruzzjoni enormi fl-ogħla livelli tal-Gvern Laburista sa mill-bidu tal-amministrazzjoni fl-2013.

Il-Partit Laburista ma għamel xejn biex jevita din l-atmosfera u ambjent ta’ korruzzjoni. Għal kuntrarju ta s-sinjali kollha possibbli li kulħadd jista’ jagħmel li jrid b’impunità sħiħa – nepotiżmu u patrunaġġ bla rażan; ħadd ma jasal imkien jekk mhux tal-Partit, mill-ogħla istituzjonijiet sa l-iċken impieg, inkluż impiegi fittizji biex ma tmurx għax-xogħol; il-meritokrazija intremiet il-baħar; ir-regolamenti spiċċaw lanqas jiswew ħaqq il-karti miktubin fuqhom; Direct Orders bil-miljuni u lil tal-qalba; kuntratti maħduma bizzilla sa minn qabel ma telgħu fil-gvern; l-Awtoritajiet qishom biċċa lastiku jiġġebbdu skont “x’għandhom bżonn tal-qalba”; xiri ta’ voti bi pjaċiri li għalihom iħallas il-poplu bit-taxxi tiegħu.

Din il-ġimgħa wieħed mill-akkużati bil-qtil ta’ Daphne AMMETTA l-akkuża u laħaq ftehim li jagħti informazzjoni dwar reati kriminali oħra, u ħa sentenza ridotta ta’ ħmistax-il sena ħabs. Wasalna biex jittieħdu passi għaliex persuna oħra, Melvyn Theuma, ingħata proklama biex isalva ġidu u kixef dak li kien jaf dwar l-assassinju ta’ Daphne. U wasalna biex Melvyn Theuma jieħu l-proklama għax meta arrestawh inzerta li ma sabx quddiemu l-ispettur “orrajt” li avżawh qabel li kellu jinterrogah. U Melvyn beża’, u qabad jitkellem.

Dan kollu seta’ ġie evitat. Kif? Kieku l-Partit Laburista, Prim Ministru, Ministru u Membri Parlamentari tiegħu, qdew dmirhom u baqgħu leali lejn il-poplu u l-Kostituzzjoni kif ħalfu bil-ġurament meta telgħu fil-gvern. Kieku Joseph Muscat ħa l-passi ovvji dwar Keith Schembri u Konrad Mizzi hekk kif bdew ħerġin il-fatti. Kieku fin-nuqqas ta’ Muscat, dawn il-passi ħaduhom il-Membri Parlamentari Laburisti fil-voti ta’ fiduċja li ttieħdu fil-Parlament. Kieku Edward Scicluna flok għalaq għajnejh għal ħażin biex ma jitlifx il-paga, rabba sinsla u qal “Le”. Kieku dan sar, kieku Malta ma daħlitx fi kriżi. Kieku Malta għadha tgawdi r-reputazzjoni tajba li kellha. Kieku s-servizzi bankarji mhumiex fi kriżi. Kieku maħniex f’riskju ma ngħaddux mill-Moneyval. Kieku eluf ta’ imjpiegi fis-servizzi finanzjarji u l-gaming mhumiex fil-periklu.

U kieku Daphne Caruana Galizia għadha ħajja.

Jien minix wieħed minn dawk li nara kollox ħażin. Nara li qed isiru ħafna ħwejjeġ tajbin ta’ kuljum fis-saħħa, fl-edukazzjoni, fl-infrasttrutura, u f’oqsma oħra. Imma anke dan it-tajjeb qed jiġi infettat u mherri mill-ħażen li tħalla jirrenja bla rażan matul dawn l-aħħar snin. Għax l-għażliet li jsiru mhumiex isiru skont x’jaqbel il-poplu. Skont l-interess tal-ġid komuni. Iżda skont minn fejn dawk tal-qalba ser jagħmlu lira. Jew ewro. F’ċertu każi, anke ħamest elef minnhom kuljum.

Naħdmu favur il-kultura tal-ġid komuni

Dmirna fil-Partit Nazzjonalista hu li naħdmu favur il-kultura tas-sewwa. Favur il-kultura tal-ġid komuni. Hemmhekk igawdi kulħadd, mill-kbir saż-żgħir. U kulħadd ikun jista’ jgħix bis-serħan tal-moħħ li meta ser jiġi bżonn l-istituzzjonijiet, ser isibhom jipproteġuh, hu min hu, u mhux jipproteġu lill-kriminali.

Il-mewġ m'għadux fil-baħar

2020-09-23T13:22:00.005+02:00

Fi żmien ftit xhur morna minn mudell ta' eċċellenza f'dak li kien il-kontroll tal-pandemija tal-#Covid19, għal wieħed mill-pajjiżi bl-ogħla rata ta' infezzjonijiet u b'numru ogħli ta' mwiet.

Ftit tal-ġimgħat ilu, ħames professjonisti tas-saħħa Maltin fosthom is-Supretendent tas-

saħħa

Pubblika Charmaine Gauci u l-President tal-Assoċjazzjoni Medika Maltija (MAM) Martin Balzan, ippubblikaw paper f'ġurnal mediku internazzjonali fejn saħqu li ż-żieda qawwija ta' infezzjonijiet li ġiet fis-sajf hija tort ta' min promwova l-festivals u l-attivitajiet turistiċi tal-massa mingħajr limitu u mingħajr kontroll, fl-istess żmien li pajjiżi oħra kienu qed iwaqqfuhom (https://bit.ly/32W7XxK).

Jgħidu wkoll li l-messaġġi "inkonsistenti ta' setturi minbarra l-awtoritajiet tas-saħħa", li bdew jgħidu lill-pubbliku li kollox taħt kontroll, li Malta "miftuħa għal business", li kollox "lura għan-normalità", li l-mewġ qiegħed fil-baħar, fixklu dak kollu li kien inkiseb.

15-il mewt fi żmien xahar mhux ċajta. Agħar minn hekk, faqqas numru ogħli ta' infezzjonijiet fid-djar tal-anzjani, dawk l-aktar vulnerabbli minn din il-marda. Fir-residenza San Ġużepp tal-Fgura biss hemm 100 anzjan minn 298 li nstabu pożittivi.

Il-professjonisti mediċi kienu ċari. Dan id-diżastru hu kollu ħtija tad-deċiżjonijiet politiċi irresponsabbli tal-Ministru Julia Farrugia u tal-Prim Ministru Robert Abela. Il-"mekkanisms" u l-"protokols" li serraħtulna moħħna bihom fallew għal kollox. U dan proprju ftit ġranet qabel tibda s-sena skolastika.

Jekk baqagħlkom farka diċenza, erfgħu r-responsabbilità politika ta' għemilkom. Din il-mewġa intom tellajtuha fuq l-art.

Nagħti l-kondoljanzi tiegħi lill-qraba ta' dawn il-vittmi.

The PN that I yearn for

2020-09-23T13:20:00.002+02:00

This article was published in The Times of Malta on 1 August 2020

Today, Nationalist Party councillors cast their vote in a defining moment in the party’s history. Today, party councillors will decide whether they want to retain the status quo, or whether they want to empower the party to change direction.

I have been in the party long enough to acknowledge that the problems we have today did not crop up yesterday, neither did they magically appear three years ago. They have been slowly accumulating long before then. But rather than tackling them with a solution, we have let them fester with inaction.

Worse, we have poisoned the wound by adopting Labour’s propaganda and made it our own. We have labelled some of our own as “old guard”, others as the “elite”, the “establishment” and “ignorant”.

This cannot go on.

As a teenager I had always looked at the Nationalist Party as a leading, professional, policy-based political force.

I first got interested in politics during the campaign for EU membership. At the time, my generation did not just think of the EU as a club to join. We viewed it as a holistic system of values, ideals, standards we believed our country deserved to achieve.

It was a cultural shift, away from the insularity and mediocrity of the past, and onwards towards openness, inclusion, and better democratic norms.

We now realise we never really got there. Our dream was cut short by cynicism, by those who told us we are too small; that our mentality, our culture, can never change.

But that resignation, that cynicism, is what allowed our country to slip back to the ways of the past. Corruption is the norm.

State institutions do not function. Journalists are bullied. Political murders and frame-ups have reared up their heads again.

Over the past two years, like my parents before me, I had to be out on the streets, protesting together with many other young people and activists. We were denouncing corruption, fighting off the Mafia, standing up to the network of organised crime that has taken hold of our institutions. We will keep going till we bring it all down.

But bringing it down once is not going to be enough. It is now time we come together to construct its replacement.

I yearn for a Nationalist Party that can continue the ‘European’ project we started years ago. Our mentality too can slowly change. We dreamed Europe then, but we stopped half way. Let’s dream Europe again. Culturally and not just economically.

I yearn for a Nationalist Party that stands for universal values of honesty, transparency, accountability, political responsibility, good governance and social justice, but which is not stuck to expired dogmas.

I yearn for a Nationalist Party that places the environment at the forefront, and which measures the success of our quality of life not just by the money we rake in but by the clean air we breathe.

I yearn for a Nationalist Party that can once again re-instil a love for the common good, as opposed to the individualistic amoral familism which has taken over.

I yearn for a Nationalist Party that is a continuous producer of evidence-based policies and scientifically-researched proposals.

I yearn for a Nationalist Party that is once again at the forefront of technology and digital innovation.

I yearn for a Nationalist Party that rebuilds our institutions as functioning, independent, public-serving bodies which fulfil their roles without political interference.

I yearn for a Nationalist Party that welcomes all: those to our left, who want an end to the system of corporate-funded pseudo-democracy which serves those who finance it the most before those who need it most; and those to our right, who want a free market where competition is fair and not based on political connections and bribes; the workers, who need a guaranteed protection of their rights to sustain their livelihood and to end their precariousness; the environmentalists, who believe our environment and ecology are a common heritage we need to protect for our children; and the nationalists, who believe our identity, our traditions, our language and our heritage need to be cherished and safeguarded.

I yearn for a Nationalist Party that feels like home to all; from the manual labourer to the warranted professional, from the employee to the business owner, from the passion-driven youngster to the experienced pensioner.

I yearn for a Nationalist Party that once again leads and shows the way with persuasion and determination.

But to be all this we must change ourselves. We must be able to win elections. We cannot succumb to an inevitable electoral loss just to satisfy personal piques.

When watching a collision in slow motion, it is our duty to change course now rather than resign ourselves to changing the car after it happens.

And then we need to heal, grow, regroup and reorganise. And we can do it together.

A new generation is waiting in the back seat, and this new generation has had enough of politicians using the party for their personal vendettas, for their own ego trips, or to indulge the chips on their shoulders. It has had enough of politicians squabbling about historical grudges or reminiscing about long-lost glory days.

My generation has had enough of being told about our past. It is time we are allowed to shape our future.

Diskors fil-Protesta quddiem il-Parlament 22/06/2020

2020-06-23T16:57:00.001+02:00

“Ħallu l-istituzzjonijiet jaħdmu”

Hekk ilhom jgħidulna, għal dawn l-aħħar sentejn u nofs li ilna niltaqgħu biex infakkru l-assassinju brutali ta’ ġurnalista, ta’ mara, ta’ omm.

“Ħallu l-istituzzjonijiet jaħdmu”

Hekk baqgħu jgħidulna tul il-protesti kontinwi li għamilna bejn Novembru u Jannar li għaddew, nitolbu li nsiru nafu l-verita, nippretendu li ssir ġustizzja.

“Ħallu l-istituzzjonijiet jaħdmu”

Għaddew ix-xhur, u llum nafu sew x’kienu qed jagħmlu l-istituzzjonijiet waqt li Joseph Muscat u Robert Abela kienu qed jgħidulna biex inħalluhom jaħdmu.

Kellna l-Kummissarju tal-Pulizija jinforma lil ħabib tal-qalb ta’ Melvin Theuma bid-dettalji tal-investigazzjoni, u jitolbu jmur isiblu fejn Theuma ħeba r-recordings.

Kellna l-Assistent Kummissarju Silvio Valletta, imexxi l-investigazzjoni, u jsiefer jara l-football, u jiekol il-kannolli, mas-suspettat li kien qed jinvestiga.

Kellna l-investigaturi jagħtu d-dettalji ta’ kull pass li jagħmlu fl-investigazzjoni lil Keith Schembri u Joseph Muscat, il-ħbieb tal-qalb ta’ Yorgen Fenech.

Kellna l-Assistent Kummissarju Ian Abdilla tal-Economic Crimes Unit, iġemma’ fil-kxaxen rapport wara rapport ta’ ħasil ta’ flus, ta’ korruzzjoni, u reati kriminali oħra.

Dak li kienu qed jagħmlu l-istituzzjonijiet.

Mhux talli ma kienux qed jaħdmu biex toħroġ il-verita, talli kienu qed jaħdmu biex jgħattuha darba għal dejjem.

Minflok ma jaħdmu, kienu qegħdin jaħdmuna.

Dalgħodu, sab il-ħin jitla’ jixhed Keith Schembri. Il-mobile miskin baqa’ ma sabux. Imma għamlulu sensiela ta’ mistoqsijiet, fosthom fuq 17 Black. Niftakru, din 17 Black konna sirna nafu li kienet dikjarata bħala kumpanija li flimkien ma’ Macbridge kienu ħa jkunu l-klijenti, u allura dawk li ħa jgħaddu l-flus, lill-kumpanija tiegħu Tillgate u lill-kumpanija ta’ Konrad Mizzi Hearnville. Wara snin jgħidilna li ma jafx ta’ min hi 17 Black, illum Keith Schembri ammetta li ilu snin jigdeb, u qalilna li dik il-kumpanija fetaħha għax hu kellu f’moħħu jagħmel negozju ma’ Yorgen Fenech meta jispiċċa mill-politika.

Issa jien, erġajt mort nara l-email li Nexia BT bagħtu f’ismu f’Diċembru 2015, fejn qalu li l-kontijiet li riedu jiftħu għal Schembri u għal Mizzi, kienu ħa jdaħħlu €2 miljuni, €5,000 kuljum, mingħand 17 Black u McBridge. Pero l-email ma tgħidx hekk biss. L-email tgħid li dawk iż-żewġ miljuni mingħand 17 Black, kien ħa jdaħħalhom fi żmien sena. U kollha nafu Keith Schembri, li int ma kontx ħa tispiċċa mill-politika, sentejn biss wara li sirt Chief of Staff.

Fuq din il-gidba li għamilt taħt ġurament, fuqha waħedha ukoll missek ġejt arrestat, aħseb u ara fuq il-gideb kollu li għidt u l-ħmieġ kollu li wettaqt f’dawn is-seba’ snin.
U jekk qatt kellna xi dubju, li f’dawn is-seba’ snin pajjiżna sar pajjiż immexxi mill-kriminali, il-konferma smajnieha mill-kriminali stess fix-xhieda li ngħatat fil-Qorti.

Smajna li ngħixu f’pajjiż fejn il-kriminali, jagħżlu huma meta jsir ir-raid fuqhom “ara ma tiġux il-Ħadd ta, għax ikolli l-lottu”. Ngħixu f’pajjiż fejn il-kriminali, jserrħu moħħhom li jistgħu jibqgħu għaddejjin bi qtil, billi jibagħtu lil xulxin is-surveys li juruhom li l-Mafja qiegħda minn fuq. Ngħixu f’pajjiż fejn il-kriminali, jagħżlu huma liema Spettur “orrajt” ser jagħmlilhom l-interrogazzjoni wara r-raid. U milli jidher nafu li nafu llum, għax b’xi miraklu tal-ġustizzja divina, flok tfaċċa quddiem Melvin Theuma l-ispettur l-orrajt li qalulu li ħa jkellmu u ħa jwaqqagħlu l-akkużi, tfaċċa spettur ieħor. U Theuma beża’, ippenikja, u qabad jikxef kollox. Li kieku ma kinetx għal din il-kumbinazzjoni divina l-istituzzjonijiet għadhom qed jaħdmuna u jgħaddu ż-żmien bina.

Ngħixu f’pajjiż fejn il-kriminali la jbeżżagħhom il-Gvern, la jbeżżgħuhom il-Pulizija, lanqas ibeżżagħhom l-Avukat Ġenerali. Tafu x’qalu bil-ġurament li beżżagħhom biss. Il-protesti, u l-velji li konna nagħmlu kull xahar aħna.

F’dan il-pajjiż, aħna l-erbat iqtates holier-than-thou li m’għandniex x’nagħmlu konna l-unika biża’, l-unika inkwiet li kellhom il-kriminali u li ma ħalliethomx jorqdu bil-lejl. Aħna fit-toroq. U dan jgħidha wkoll l-Ombudsman fir-rapport annwali tiegħu li ġie ppubblikat sagħtejn ilu. "kienet id-determinazzjoni tas-socjeta civili ma fatturi ohra li waqqghu amministrazzjoni li kellha appogg qawwi mill-poplu". U b’dan niftaħru u ftaħru intom kollha li pparteċipajtu mqar f’waħda minnhom, għax konna aħna ċ-ċittadini l-unika istituzzjoni li f’dawn is-snin ħadmet, għamlet dmirha, u ħabbet lil pajjiżha.

U maħniex ser nieqfu nofs triq.

Nerġa’ ngħid, “il-ġlieda kontra l-Mafja tista’ tiġi miġġielda biss fil-miftuħ. Fit-toroq”

U fit-toroq ħa nkomplu niġġielduha.

Ħalli l-kriminali u l-politiċi alleati tagħhom jibqgħu jinkwetaw, jibqgħu ma jorqdux komdi.

Ħalli fl-aħħar toħroġ il-verita’ kollha.

Ħalli fl-aħħar issir ġustizzja.

Muscat, it will be the people who will not leave any stone unturned

2019-11-27T00:20:00.001+01:00

Article published in the Malta Independent on Tuesday 26 November 2019

Make no mistake about it. We are in the midst of the country’s worst ever Constitutional crisis. And this crises was triggered by none other than our Prime Minister himself.

On Tuesday, Muscat publicly took over the investigation of a political assassination of a journalist who was uncovering his own government’s dirty secrets. A clear sign, if any were further needed, of the complete take-over of our institutions.

Furthermore, he prematurely announced the negotiation of a Presidential pardon with a person described to have acted as a “middleman” in the assassination in exchange for information, before his interrogation was yet ready and before the terms of the pardon were agreed and granted. Deliberately or not, with that announcement Muscat alerted those involved in the assassination that the noose was tightening.

The day after, the primary “person of interest” was arrested as he tried to make his way out of the country. This “person of interest” happens to be one of the owner’s of a powerstation commissioned by Muscat’s government, and which was the main electoral promise on which this government was elected. This same “person of interest” had been found out to be the owner of the infamous 17 Black, a Dubai-based company which was planning to funnel, or might still be funneling, €5,000 a day to Muscat’s own Chief-of-Staff Keith Schembri and one of his Ministers, Konrad Mizzi. No investigations were triggered when this was uncovered. No instution did its job.

To compound matters, “this person of interest” has himself asked for a Presidential pardon to give information on others involved. The day after, Muscat’s own Party Deputy Leader was interrogated by the Police on this same assassination. The following day, at least three staff from his Secreteriat were also interrogated.

We now have a situation where three persons have already asked for a Presidential pardon in exchange for information: Vincent Muscat (il-Koħħu), the “middleman”, and Yorgen Fenech. Joseph Muscat, apparently with full knowledge of what is being uncovered in the interrogations, has the sole discretion to decide who gets pardoned, on what terms and for what information.

His conflict of interest is clear and obvious. Justice cannot remotely be seen to be done if he retains his position. The man whose Ministers and Chief-of-Staff are directly linked and implicated, who spent 6 years defending their every deed and misdemanour, cannot be trusted with taking the proper decisions about who of them gets to face justice.

There is no proper resolution to this matter except for Joseph Muscat’s resignation. It is the only way we can hope for proper justice to be served and the full truth to be uncovered.

And justice cannot stop only with the bribed. We need to also have a look at the bribers. Because politicians are not corrupt on their own. There are also those who corrupt them.

That’s why this movement, including people from all walks of life and from various political parties, which is being formed and getting stronger, will not stop when the people behind Daphne Caruana Galizia’s assassination get their punishment. We will neither stop when the corrupt and bribed politicians go to jail. We will neither stop when political responsibility is assumed. We will neither stop when we get a new Prime Minister or a different Party in government. Because this time, we are not after changing the brand or the image of whoever is in power.

We no longer want to fine-tune the system, or even to reform the system. We now need to break the system

The system where politicians are subservient to the oligarchs who finance their campaigns. The system where political parties are at the mercy of big businesses who keep them afloat. The system where a few elites believe they have a divine right to run the country no matter who’s in power.

All this needs to end. We will not stop until it does. And we will not let anyone tell us that it cannot be done, that that’s what Malta is, that we have to learn live with it.

We have already seen where “living with it” has led us. To the murder of one of our own.

And we will never allow Daphne Caruana Galizia’s blood to have been spilt in vain. The least we can do, is to let it water our hope for a better Malta, a normal and European Malta, a new Malta. The Malta she hoped to live in and died fighting for.

This time, we will not stop until we finish what she started.

Biex il-PN jerġa' jkun rebbieħ

2019-07-22T14:23:00.001+02:00

Ftit ġimgħat ilu, l-Partit Nazzjonalista sofra l-akbar telfa elettorali li qatt kellu mit-Tieni Gwerra Dinjija ‘l hawn. Dan ir-riżultat ma nistgħux infarfruh taħt it-tapit bħallikieku qatt ma seħħ.

B’xorti ħażina, ir-reazzjoni tat-tmexxija tal-Partit hekk kif ħareġ dak ir-riżultat kienet waħda li bilkemm titwemmen. Skont it-tmexxija kien jaħti kulħadd barra hi: kien tort ta’ (a) xi deputati parlamentari, (b) l-“hekk imsejjħa bloggers”, (c) l-“hekk imsejjħa NGOs”, (d) il-mezzi tax-xandir indipendenti, (e) dawk li għażlu li ma jivvutawx, (f) l-elettorat ta’ dak id-distrett jew l-ieħor. Bil-għan li tfittex skuża u taħrab mir-realtà, it-tmexxija bdiet twaħħal f’kollox u f’kulħadd.

Jidher ċar li erġajna bdejna nirrepetu l-istess żbalji li saru fiż-żmien meta, għar-riżultati ħżiena, kienu weħlu blogger oħra, xi mezzi tax-xandir indipendenti u dawk il-votanti li “ma fehmuniex”. Attitudni bħal din m’hi ser twassalna mkien. Jekk lill-Partit irridu nreġġuh lura biex ikun wieħed rebbieħ, kulma għandna nagħmlu hu li nagħtu daqqa t’għajn lejn il-mera.

Skont il-Kostituzzjoni, l-Membri Parlamentari huma r-rappreżentanti ta’ aktar minn 135,000 votant u dawn il-Membri Parlamentari ma nistgħux intuhom ‘l ġenb. U biex ngħidu kollox, ħlief għal xi ftit kitbiet fuq il-media soċjali minn numru żgħir ħafna minnhom, ebda wieħed minn dawn id-Deputiat qatt ma naqas lill-Partit jew mar lil hinn mit-twemmin bażiku tiegħu.

Jeħtieġ nifhmu li l-bloggers, il-mexxi tax-xandir indipendenti u l-NGOs ma jiżfnux skont dak li jdoqq il-Partit. Ikexkixni l-ħsieb li fil-Partit – l-istess Partit li minn dejjem kien minn ta’ quddiem fid-difiża tal-libertà tal-kelma u tad-drittijiet tal-bniedem - jista’ jkun hemm xi ħadd li jaħseb li għandna xi dritt divin li lil dawn insoddulhom ħalqhom.

Iva, l-Partit jinsab maqsum. M’huwiex maqsum bejn “dawk ta’ Delia” u “dawk ta’ Simon”: dan ix-xenarju huwa biss propaganda tal-Labour. Simon Busuttil ilu żmien twil isostni li għall-ġejjieni m’huwiex interessat li jkollu kariga fil-Partit u fil-fatt, minn jeddu, żamm ruħu lil hinn miċ-ċentru tal-attenzjoni f’dawk li huma kwistjonijiet purament tal-Partit. Il-Partit lanqas m’huwa maqsum bejn dawk tal- “establishment” u dawk tan-“new way”. Din ukoll hija propoganda simili għal tal-Labour. Jekk niġu għal dan, jista’ jingħad li l-biċċa l-kbira ta’ dawk li jkunu madwar Delia u li huma ħobża u sikkina miegħu, huma ħafna aktar “establishment” minn dawk li kienu jiffurmaw it-tmexxija preċedenti, filwaqt li bosta minn dawk li qed jappoġġjaw il-mozzjoni tagħna huma d-demm il-ġdid tal-Partit: żgħażagħ u persuni li b’xi mod qatt ma kienu viċin il-poter. Dawn b’ebda tiġbid tal-imaġinazzjoni ma jistgħu jiġu mpinġija bħala l-“old guard” jew l-“establishment”: ipinġuhom b’dan il-mod dawk li, eżatt bħal tal-Labour, għandhom interess li jqarrqu.

Iva, l-Partit huwa maqsum. Bejn dawk li jemmnu li l-Partit jista’ jingħaqad u jiġġieled elezzjoni ġenerali b’Adrian Delia fit-tmun, u dawk li din l-idea ma tappellalhom xejn. Bejn dawk li jidhrilhom li Delia jista’ jrebbaħna lura dak li tlifna, u dawk li jemmnu li sakemm idum hu fit-tmun tal-Partit m’għandniex l-iċken ċans li nirbħu.

Fl-aħħar mill-aħħar, l-għaqda fil-Partit hi r-responsabbiltà tat-tmexxija. Bl-istess mod, m’hi ħadd ħlief t-tmexxija li għandha r-responsabbiltà li tirbaħ il-fiduċja tal-elettorat. Li tirbaħ il-fiduċja tal-membri parlamentari. Li tikkonvinċi lill-bloggers u lill-NGO’s li t-taqtigħa tagħhom hi tal-Partit ukoll. It-tmexxija ma tistax tippretendi l-vot mingħand dawk li kontinwament qed jiġu mpinġija bħala “nazzjonalisti li ma jridux jaċċettaw kap elett demokratikament”. Ħadd m’hu sid dawn il-votanti. Jekk mexxej ma jispirax il-fiduċja tagħhom, inkunu boloħ jekk nistennew li dawn sempliċement se jċedu u xorta waħda joħorġu jivvutaw għall-Partit tiegħu.

Il-vot m’huwiex xi dritt tal-Partit Nazzjonalista. Il-fiduċja m’hix xi ħaġa awtomatika, imma hi xi ħaġa li trid tintrebaħ.

Din kienet ir-raġuni għaliex, fl-isfond tar-riżultati elettorali, tajt parir lill-Kap tal-Partit u lis-Segretarju Ġenerali li f’ġieh l-għaqda fil-Partit u għall-ġid tiegħu ma kellniex għażla oħra ħlief li nwarrbu biex b’hekk nagħtu l-ispazju għal tmexxija ġdida li tkun kapaċi tgħaqqad u li tkun kapaċi ssewwi l-ħsara li kkaġunajna fir-relazzjoni ma’ bosta votanti nazzjonalisti. Mhux biss tkellimt, imma għamilt ukoll l-ewwel pass u rriżenjajt minn President tal-Kumitat Eżekuttiv tal-Partit.

Minn dakinhar ‘l hawn, it-tmexxija tal-Partit wettqet żball wara l-ieħor. Dik il-ġimgħa sħiħa ta’ ġlied u nkwiet dwar il-co-option tas-siġġu parlamentari li ġie vakat setgħet ġiet evitata. U bis-saħħa tal-fatt li t-tmexxija baqgħet tirrifjuta li titlob vot ta’ fiduċja, ħlejna xahrejn sħaħ li fihom stajna ħdimna qatigħ b’riżq ir-rifondazzjoni u l-bini mill-ġdid tal-Partit.

Kien din is-sitwazzjoni tal-biki u din l-ebusija tar-ras li kkonvinċietni li naċċetta l-istedina ta’ Ivan Bartolo biex ningħaqad miegħu u flimkien insejjħu għal laqgħa tal-Kunsill Ġenerali biex b’hekk il-Kunsilliera tal-Partit jingħataw l-opportunità li jgħidu tagħhom u jesprimu ruħhom dwar jekk għadx għandhom fiduċja fil-Kap tal-Partit.

Naqbel kompletament ma’ dawk li jsostnu li dan kollu seta’ faċilment ġie evitat. Mexxej li huwa politikament matur kien isejjaħ dan il-vot ta’ fiduċja minn jeddu. Li kieku għamel dan, kien ikun anqas diviżiv u kien jirbaħ ir-rispett. Dan huwa tabilħaqq il-mod kif iġibu ruħhom mexxejja ta’ stoffa.

Il-mazz issa jinsab f’idejn il-Kunsilliera. Dawn jeħtieġ li jiddeċiedu jekk, minkejja l-istampa ċara li toħroġ mir-riżultati elettorali riċenti u mis-sondaġġi regolari, l-Partit għandux jibqa’ mdendel ma’ Adrian Delia sal-elezzjoni li jmiss jew inkella għandniex nevitaw id-diżastru billi tinbidel ir-rotta, tinbidel it-tmexxija u mmorru lil hinn mit-triq li qabad il-Partit tul dawn l-aħħar sentejn.

Huma l-Kunsilliera li jeħtieġ jiddeċiedu jekk il-Partit għandux ikollu mexxej li jispira l-fiduċja jew wieħed li t-tmexxija tiegħu hi msejsa fuq il-biża’. Tmexxija li toħroġ idejha u ttik merħba minflok tmexxija li sserraħ fuq l-ibbuljar. Tmexxija li jkollha l-ħila li tiffoka fuq strateġija li tista’ trebbaħ lill-Partit u mhux waħda li moħħha biss biex tgħatti l-iżbalji tagħha.

Bħalma dejjem għamilt, jien lest li nbaxxi rasi għal dak kollu li jiddeċiedi l-ogħla organu tal-Partit. Madankollu l-Kunsilliera għandhom dejjem jiftakru li ebda wieħed mill-400,000 votanti imxerrdin madwar il-pajjiż m’hu obbligat li jbaxxi rasu għal dak li jrid il-Kunsill Ġenerali.

Huma dawk li jħollu jorbtu. Biex il-PN jerġa’ jkun rebbieħ, huma proprju lil dawk li jeħtieġ li nisimgħu u nikkonvinċu.

Dan l-artiklu ġie ppubblikat bl-Ingliż fuq il-ħarġa tat-Times of Malta tat-Tnejn 22 ta' Lulju 2019:
https://timesofmalta.com/articles/view/for-the-pn-to-win-again-mark-anthony-sammut.723640

Il-bidla li l-Gudja għandha bżonn

2019-05-23T12:38:00.001+02:00

Qed noqorbu lejn it-tmiem ta’ kampanja elettorali oħra, kampanja elettorali li fiha rridu nagħżlu min ser jirrapreżentana fil-Parlament Ewropew u min ser jirrapreżentana fil-Kunsilli Lokali rispettivi tagħna. Bħala kandidat għall-Kunsill Lokali tal-Gudja, illum ser inħares ftit lejn x’sar fil-Gudja u x’inhi l-għażla li għandhom quddiemhom ir-residenti tal-Gudja.

F’dawn is-sitt snin li damet din il-leġislatura, li ttawlet mill-erba’ snin li suppost damet għax tħassru l-elezzjonijiet ta’ sentejn ilu, wieħed ftit li xejn issib inizjattivi ġodda li saru mit-tmexxija tal-Kunsill. Infatti, ħafna mill-proposti li wieħed isib fil-manifest tal-Partit Laburista din is-sena huma kelma b’kelma bħall-proposti li għamel l-istess Partit Laburist għall-Gudja sitt snin ilu. It-tisbiħ u l-pavimentar taċ-ċentru storiku, day centre għall-anzjani, Ċentru Ċiviku li jiġbor fih il-bżonnijiet tal-lokal, manutenzjoni ta’ toroq, kollha kellhom isiru tul din il-leġislatura. U jekk ma sarux meta kellhom sentejn iżjed milli ppjanat biex iwettqu l-programm elettorali, kif wieħed jista’ jemmen li ser isiru fil-leġislatura li jmiss?

Fil-programm elettorali li qed jippreżentaw din is-sena hemm xi punti li jbellħuk. Qed jgħidulna li jridu jindirizzaw bis-serjetà l-problema tal-parkeġġ. Tajjeb ukoll. Mela jistgħu jispjegawlna għalfejn f’Novembru li għadda għamlu u-turn, u l-bye-law li kellna ndaħħlu fis-seħħ wara qbil unanimu daru kontrieha u bdew jgħidu li “tmur kontra l-Kostituzzjoni” għax toħloq “diskriminazzjoni”? Kif iriduna nemmnuhom li jridu jieħdu passi biex jindirizzaw il-problema tal-parkeġġ, meta kellna s-soluzzjoni f’idejna, lesta biex tiġi implimentata, u irtiraw lura minnha għax wisq probabbli kien hemm min hekk ordnalhom jagħmlu?

Qed jgħidulna wkoll li jridu djalogu mal-ajruport biex jikkumpensa għall-impatt tiegħu fuq il-Gudja. Din isbaħ. Illum qed jgħidu li jridu djalogu. F’laqgħa numru 96 f’Jannar 2018, meta ppreżentajna l-mozzjoni dwar il-bye-law tal-parkeġġ, ivvutaw kollha kemm huma biex jemendaw din il-mozzjoni u jneħħu minnha proprju t-talba tagħna li jitkomplew id-diskussjonijiet mal-Ajruport biex ikun jista’ jpatti għall-impatt li qed ikollu fuq ir-residenti. Ivvutaw kontra, u ivvutaw biex jitwaqqaf kwalunkwe’ djalogu mal-Ajruport. Issa qed iwegħduh fil-manifest elettorali.

F’dawn il-ġranet anke waħlu tabelli ma’ numru ta’ toroq li kienu mwegħdin iżda fejn ix-xogħol ma sarx biex iġibu xi skuża. Daqqa jwaħlu fil-kuntratturi, daqqa fil-Gvern, daqqa skuża u daqqa oħra. Wara li f’sitt snin ma sabux iċ-ċans iwettqu dak li wegħdu, fl-aħħar xahar bdew ħerġin l-iskużi.

Ir-realtà hi li jitla’ minn jitla’ mill-kandidati tal-Partit Laburista, huwa obbligat biss jimxi kif jitmexxa mill-Partit. Illum in-nies raw b’għajnejhom kif il-kunsilliera tal-Partit Laburista jintużaw mill-Gvern biex jiddefendu dak li jrid hu, minflok ma jiddefendu r-residenti. U allura jekk in-nies verament iridu bidla biex jerġa’ jkollna Kunsill Lokali ħaj, Kunsill Lokali li jaħdem għal kulħadd, Kunsill Lokali li jiġġieled fl-interess tar-residenti, l-għażla hija waħda. Huma aħna l-kandidati tal-Partit Nazzjonalista li fil-Gudja nistgħu verament inġibu l-bidla li hemm bżonn fit-tmexxija. Li nistgħu inwettqu l-programm elettorali tagħna, programm elettorali li jinkludi t-tisbiħ taċ-ċentru storiku, spazji miftuħa u b'aktar siġar, spazji għall-klieb u l-annimali, day centre u night shelter għall-anzjani, servizz ta' trasport b'xejn madwar il-Gudja li jservi primarjament l-anzjani, skips taħt l-art li jneħħu l-ħmieġ u l-irwejjaħ, bye-law dwar il-parkeġġ li tkun implimentata bis-sħiħ, skambji għaż-żgħażagħ, manutenzjoni ta’ toroq u bankini, aktar programmi artistiċi u kulturali kif diġa’ organizzajna, u ħafna aktar.

Il-Gudja għandha bżonn nifs ġdid. Nappella lir-residenti biex għal darba, ituna ċ-ċans inwettqu l-viżjoni tagħna, u jaraw kif ma jiddispjaċiehomx.

Dan l-artiklu deher fil-ħarġa tan-Nazzjon tal-Erbgħa 22 ta' Mejju 2019

Għalfejn nhar is-Sibt għandek tivvota lill-Partit Nazzjonalista?

2019-05-21T12:17:00.001+02:00

Bħal-lum ġimgħa tkun għaddiet il-kampanja elettorali, il-poplu jkun xeħet il-vot tiegħu għar-rappreżentanti tiegħu fil-Parlament Ewropew u fil-Kunsilli Lokali ta’ kull lokalità.

Fil-kampanja issemmew ħafna temi u saru diversi proposti. Tajjeb ninnutaw però li kien il-Partit Nazzjonalista li għamel kampanja ta’ proposti u li ppreżenta r-raġunijiet reali għalxiex in-nies ser jivvutaw fil-25 ta’ Mejju. Min-naħa tal-Partit Laburista rajna biss kampanja ta’ ħafna qlub, kampanja ta’ tgħajjar lejn esponenti tal-Partit Nazzjonalista, bit-timbru ripetut ta’ “tradituri”, u reazzjonijiet fejn jew jirredikolaw jew jispinnjaw il-proposti tal-Partit Nazzjonalista.

Għax fuq x’hiex għandek tiddeċiedi lil min ser tivvota nhar is-Sibt? L-ewwelnett, fil-Parlament Ewropew, ser tkun qed tagħżel liema huma dawk ir-rappreżentanti li l-aħjar isemmgħu leħnek. Leħnek. Leħen iċ-ċittadin, u mhux leħen il-Gvern, jew leħen “Malta” li l-Gvern jippretendi li huwa leħnu. U hemmhekk ċert li l-kandidati tal-Partit Nazzjonalista huma l-aħjar għażla. Kemm abbażi ta’ dak li għamlu f’din il-leġislatura: direttiva għall-bilanċ bejn il-ħajja u x-xogħol, liġi dwar il-fruntieri, masterplan dwar id-diabete u d-dyslexia, rikonoxximent u ħlas għall-Youtubers Maltin, u anke abbażi ta’ dak li jridu jagħmlu fil-leġislatura li jmiss, inkluż masterplan biex tissaħħaħ il-ġlieda kontra l-kanċer.

Anke meta wieħed iqabbel il-kandidati taż-żewġ partiti, id-differenza hija netta. Il-Partit Nazzjonalista qed jippreżenta sett kandidati bi kredenzjali Ewropej b’saħħithom, uħud minnhom esperti fil-liġijiet u l-qafas strutturali Ewropew. Il-Partit Laburista qed jippreżenta sett kandidati li jinkludu lil min instab ħati kriminalment ta’ serq u tixrid ta’ materjal personali kompromettenti, u lil min dejjem iġġieled kontra li Malta ssir membru fl-Unjoni Ewropea. Fl-istess ħin, taf li l-MEPs tal-Partit Nazzjonalista ħa jkomplu bis-sħiħ il-ġlieda għall-ġustizzja u għat-tisħiħ tal-istituzzjonijiet, u biex f’Malta terġa’ tirrenja s-saltna tad-dritt, u taf li mill-banda l-oħra l-MEPs tal-Partit Laburista ħa jkomplu jiskużaw lill-Gvern u jippruvaw jgħattulu.

It-tieni fattur tad-deċiżjoni ta’ nhar is-Sibt hija li bil-vot tiegħek int ser tagħti jew siġġu lill-Partit Soċjalista Ewropew, u allura vot għal Frans Timmermans bħala President tal-Kummissjoni Ewropea, jew siġġu lill-Partit Popolari Ewropew, u allura vot għal Manfred Weber bħala President tal-Kummissjoni. Xi jfissru għall-Malta dawn iż-żewġ kandidati?

Manfred Weber (PPE, xellug) u Frans Timmermans (PSE, lemin)

Timmermans huwa l-kandidat li fil-manifest tiegħu jinkludi kemm li l-abort isir dritt fl-Unjoni Ewropea kollha, kif ukoll li fl-Ewropa jkun hawn taxxa komuni għall-pajjiżi kollha, li fid-dibattitu tal-Ħamis li għadda speċifika li jridha tkun ta’ 18%. Dan ifisser li Malta jispiċċilha l-inċentiv ta’ taxxa baxxa ta’ 5% li biha tattira kumpaniji internazzjonali. Din il-proposta hija theddida kbira għal aktar minn 35,000 impjiet li jiddependi minn dawn il-kumpaniji, b’mod partikolari fis-setturi tal-gaming u tas-servizzi finanzjarji.

Weber min-naħa tiegħu huwa ħabib kbir ta’ Malta, żar Malta diversi drabi, u dejjem iddefenda d-dritt tagħna li nagħżlu aħna r-rata ta’ taxxa tagħna. Huwa wkoll il-kandidat li tkellem fil-Kunsill Ġenerali li għadda tal-Partit Nazzjonalista, u li ddefenda l-wirt Kristjan li tħaddan l-Ewropa, u li allura jirrispetta bil-kbir l-għażla ta’ Malta li ma tinkludix l-abort.

Dik hi l-għażla li trid issir nhar is-Sibt. Mihix għażla ta’ min ser ikun fil-Gvern f’Malta, għax il-Gvern mhux ser jinbidel. Hija għażla imma ta’ min ser jirrapreżentak fil-Parlament Ewropew, u lil min trid President tal-Kummissjoni Ewropea.

Huwa għalhekk li Joseph Muscat kontinwament iqarraq billi jinsisti li din hi elezzjoni bejnu u bejn Adrian Delia. Għax jaf li jekk in-nies jagħżlu skont il-manifesti taż-żewġ kandidati għall-Presidenza, jew skont il-livell tal-kandidati taż-żewġ partiti, miż-żewġ aspetti joħroġ tellief.

U minkejja li din l-elezzjoni ma tibdilx il-Gvern, nemmen li jekk irid il-poplu Malti jista’ jibdel l-attitudni tal-Gvern. Għax għandna bżonn Gvern li ma jkomplix jinjora r-realtajiet soċjali li qed joħloq bil-mudell ekonomiku insostennibli tiegħu. Għandna bżonn Gvern li ma jinjorax liż-żgħażagħ li mhux jaffordjaw jixtru fejn joqogħdu, li ma jinjorax il-pensjonanti, li ma jinjorax l-għoli eżaġerat tal-ħajja, li ma jinjorax il-prekarjat u l-istaġnar tal-pagi, u li ma jinjorax ir-rakkomandazzjonijiet li qed isirulu minn kullimkien biex iwettaq ir-riformi li hemm bżonn biex jerġa’ jkollna pajjiż tassew demokratiku.

L-għażla hi f’idejn il-poplu. Jew Gvern li jkompli jirrombla, b’Timmermans President tal-Kummissjoni, u b’MEPs li iżjed jinħlew jgħattulu milli jwettqu programm ta’ fejda għall-poplu, jew Gvern li jkollu jibdel l-attitudni, b’Weber President tal-Kummissjoni, u b’MEPs li joħorġu b’aktar direttivi Ewropej li jtejbu l-livell tal-għixien tagħna kif għamlu sa issa. Dik hija l-għażla ta’ nhar is-Sibt li ġej. Inħalli f’idejkom.

Dan l-artiklu deher fil-ħarġa tal-Mument tal-Ħadd 19 ta' Mejju 2019

Il-Gudja fl-Elezzjoni tal-Kunsilli Lokali

2019-05-16T20:28:00.001+02:00

Programm Elettorali għal kull lokalità

Kif dejjem għamel Partit Nazzjonalista f’kull elezzjoni tal-Kunsilli Lokali, nieda programm elettorali għal kull lokalità. Il-punti prinċipali ta’ kull programm elettorali ser ikunu qed jitqassmu fid-djar tagħkom, filwaqt li l-programm elettorali sħiħ jinsab fis-sit tal-Partit fuq dan il-link, fejn wieħed jista’ jsib il-kandidati u l-wegħdiet għal kull lokalità f’Malta u Għawdex: http://www.pn.org.mt/kandidati_kunsilli_lokali

Dawn il-programmi saru wara konsultazzjoni sħiħa mal-Kunsilliera Lokali tagħna, il-kandidati għal Kunsill Lokali, u l-Kumitati Sezzjonali tagħna fil-lokalitajiet, u jirreflettu ħsieb li dejjem applika għall-Partit Nazzjonalista: għalina kull individwu mhuwiex biss numru li jgħix waħdu, imma huwa membru ta’ komunità li għandu jkollu sehem sħiħ fiha.

Illum, bħala kandidat għal Kunsill Lokali tal-Gudja, ser nitkellem ftit dwar il-programm elettorali tagħna f’din il-lokalità.

Infrastruttura

Nibdew bl-infrastruttura, li dwarha f’dawn is-sitt snin terminu ta’ dan il-Kunsill ftit li xejn sar. Hemm bżonn urġenti ta’ programm pjanat ta’ tiswijiet tal-bankini madwar il-lokalità, li jinkludi eżerċizzju biex il-bankini jkunu kollha aċċessibbli għal persuni b’diżabbilità u anzjani.

Barra minn hekk, inkomplu bil-programm ta’ tiswijia ta’ toroq, partikolarment fil-qalba storika tal-Gudja. Anzi, toroq fil-qalba storika bħal Triq iż-Żebbuġa, Santa Katerina, u d-Dejqa, għandhom jiġu pavimentati.

Mhux biss iċ-ċentru storiku, iżda wkoll it-toroq rurali. Il-Kunsill Lokali rnexxielu jġib kważi miljun ewro f’fondi tal-Unjoni Ewropea biex dawn it-toroq, fosthom Triq Victor Pasmore, jiġu rranġati. S’issa, ix-xogħol baqa’ ma bediex.

Apparti minn hekk iridu jissolvu darba għal dejjem problemi li ilhom ikarkru magħna żmien, bħall-problem tal-għargħar fi Triq l-Għelejjel u fi Triq Birżebbuġa, fejn il-problema inħolqot mix-xogħol li għamel dan il-Kunsill stess.

Traffiku u parkeġġ

Il-problema tal-parkeġġ baqgħet kulma jmur jiżdied, u fil-Gudja inħolqot is-sitwazzjoni partikolari ta’ karozzi li jitħallew hemm kultant għal xhur sħaħ minn min isiefer. Fuq dan l-aspett irridu naħdmu fuq żewġ binarji. L-ewwelnett, nimplimentaw il-bye-law li konna proponejna li tillimita l-parkeġġ fl-istess post għal min mhux resident għal mhux aktar minn 24 siegħa, u jekk hemm bżonn nieħdu kull azzjoni legali biex din tibda tkun infurzata. It-tieni, nesploraw il-possibilità li flimkien mal-privat nibnu parkeġġ pubbliku li joffri rati sussidjati lir-residenti.

Mill-banda l-oħra, biex niffaċilitaw it-trasport ġol-lokalità stess, nidentifikaw postijiet fejn flimkien mal-privat nipprovdu servizz ta’ roti għall-użu tal-pubbliku għal trasport fil-qrib, fil-lokal, lejn l-Ajruport u anke lokalitajiet viċin. Naraw ukoll li jibda jiġi provdut trasport b’karozzi żgħar għall-anzjani ġol-lokalità stess.

Ambjent u Ndafa

Fil-Gudja kellna u għad għandna problemi kbar bl-indafa. Problemi fil-ġbir tal-iskart, u anke bin-nuqqas ta’ knis f’diversi partijiet tal-lokal. Irridu naraw li l-kuntratti li l-Kunsill jagħti f’dawn is-servizzi jiġu infurzati kif suppost.

Barra minn hekk, irridu nsebbħu l-lokal tagħna. Beħsiebna nniedu programm ta’ tħawwil ta’ siġar, tisbiħ ta’ sqaqien, gallariji u twieqi bl-involviment tar-residenti, u nneħħu siġar invażivi li qed jikkawżaw ħsarat biex minflokhom inħawlu siġar endemiċi baż-żebbuġ, rand, ħarrub, tin u żnuber.

Ma’ dawn inżidu l-laned tal-iskart tal-ħmieġ tal-annimali madwar il-lokalit Irridu naraw li r-residentielettorali tagħna f’din il-lokalità, u nipprovdu dog park fejn min għandu kelb jista’ jgawdieh f’ambjent sigur.

Sport

Fil-qasam tal-isport aħna l-kunsilliera tal-Partit Nazzjonalista fil-Gudja diġa’ għamilna ħafna, tant li l-Gudja klassifikat għal tliet darbiet fl-ewwel tliet postijiet tal-Awards tal-Kumitat Olimpiku Malti. Iżda nistgħu nagħmlu aktar. Irridu naraw li l-programmi ta’ Aerobics u Pilates jibqgħu għaddejjin b’mod kontinwu, noħolqu gym fl-apert għall-użu ta’ kulħadd, u nġeddu l-ftehim li l-Kunsill Lokali kellu mal-Gudja United FC għall-użu tal-grawnd tal-futbol, sabiex dan ikun aċċessibbli għal komunità u fejn possibli għall-iskejjel.

Dan huma ftit mill-propoosti li qed nagħmlu fil-programm elettorali tagħna. F’artikli oħra nipprova nħares lejn proposti oħra, speċjalment dawk soċjali, edukattivi u kulturali. Li hu żgur hu li bħalma mill-minoranza ħdima qatiegħ biex intejbu l-kwalità tal-ħajja tan-nies fir-raħal tagħna, hekk ukoll lesti nagħmlu dan jekk inkunu fit-tmexxija, b’ideat ġodda u konkreti. Il-Gudja tista’ tkun ħafna isbaħ u aħjar, u konvint li flimkien, nistgħu nġibu l-bidla li l-Gudja tant għandha bżonn.

Il-Kunsilli Lokali mhumiex super-favoriti tiegħu

2019-05-09T09:28:00.001+02:00

Hekk stqarr il-Prim Ministru Joseph Muscat ftit tal-ġimgħat ilu waqt attività tal-Partit Laburista. Il-Kunsilli Lokali qatt ma kienu super-favoriti tiegħu. U dan jidher bil-fatti. Apparti li fil-bidu tagħhom il-Partit Laburista lanqas biss emmen fihom, il-mod kif ġab ruħu l-Prim Ministru f’dawn is-sitt snin juri li mhux biss ma kienx jemmen fihom fil-passat, imma għadu ma jemminx fihom s’issa.

Matul dawn is-sitt snin, minflok ma l-Kunsilli Lokali ġew mgħoddija iżjed poteri u magħhom iżjed finanzjament, kif dejjem sar fi żmien Gvern Nazzjonalista, raw il-poteri tagħhom jitnaqqru, u l-allokazzjoni tiżdied b’rata li bilkemm baqgħet tlaħħaq ma kemm qed togħla l-ħajja. Il-ħajja mhix togħla biss għall-anzjani, għaż-żgħażagħ u għall-familji, iżda qed togħla wkoll għall-Kunsilli. L-ispejjeż tal-kuntratti obbligatorji, bħat-tindif u ġbir ta’ skart, tant qed jogħlew li mill-allokazzjoni l-Kunsilli bilkemm qed jibqagħlhom finanzi biex iwettqu proġett. Wieħed kultant jibda jissuspetta jekk din hux qed issir b’mod intenzjonat biex imbagħad il-Gvern jgħid li l-Kunsilli mhux jagħmlu xogħolhom u jkompli jeħdilhom iżjed affarijiet minn idejhom, bħalma diġa’ għamel.

Dan hu l-kontra ta’ dak li dejjem emmen il-Partit Nazzjonalista: is-sussidjarjetà u d-deċentralizzazzjoni tal-poter. Aħna nemmnu li l-Gvern għandu jitlaq iżjed poteri minn idejh u jgħaddihom lill-poplu, u hekk għamilna. Dal-Gvern bil-maqlub, irid kollox fil-kontroll ta’ Kastilja. Mill-problemi tal-lokalitajiet, sal-istituzzjonijiet tal-pajjiż. Ħalli jekk jista’ jkun kulħadd iqis ruħu ta’ tallab li jitkarrab għand il-Gvern.

U dan ma ngħiduhx aħna, dan jgħiduh anke Sindki Laburisti. “Ġibtuna tallaba”, “biex tinqeda minn xi awtorità trid tkun taf lil xi ħadd”, qallu Sindki Laburisti lil Ministru Owen Bonnici u lis-Segretarju Parlamentari Silvio Parnis fil-Parlament waqt il-Laqgħa tas-Sindki.

Saħansitra meta dan il-Gvern nieda r-riforma tal-Kunsilli Lokali, il-Partit Nazzjonalista ressaq mat-tmenin proposta biex il-Kunsilli Lokali jkunu aktar effettivi u jingħataw aktar poteri. Ħafna minn dawn il-proposti kienu proprju fil-qasam soċjali. Iżda l-Gvern rema dawn il-proposti kollha, għax kif qal Silvio Parnis “ma nieħdux pariri mill-Oppożizzjoni.” Dik l-arroganza li llum telgħet għal rashom.

Issa l-Partit Laburista nieda l-programmi elettorali tiegħu għal-lokalitajiet u fosthom insibu numru ta’ proposti tal-Partit Nazzjonalista li rema ftit tax-xhur ilu. Fosthom l-introduzzjoni tal-community policing, li saħansitra ivvutaw kontrieha fil-Parlament, l-introduzzjoni tad-day centres u night shelters f’kull lokalità, u għajnuna lil persuni li qed isoffru mis-solitudni u mid-dimensja. Il-Gvern issa anke qed jgħid li jrid isaħħaħ il-koperazzjoni mal-Gwardjani Lokali, meta kien hu stess li neħħa l-infurzar minn idejn il-Kunsilli Lokali!

Għal darboħra, toħroġ in-negattività li jaħdem biha dan il-Gvern, li jpinġi lilu nnifsu bħala xi Gvern pożittiv iżda mbagħad huwa l-iktar Gvern li ħoloq firda u prova jkisser lil kulmin kritikah, kull rapport li ħammarlu wiċċu, u anke kull rapport li ressaqlu proposti ġodda.

Il-Partit Nazzjonalista jibqa’ kommess li permezz tal-kandidati tiegħu jkun vuċi taċ-ċittadini u tal-lokalitajiet tagħhom, quddiem Gvern li m’għadux jimpurtah mill-bżonnijiet ta’ kuljum taċ-ċittadin komuni. Din mihix elezzjoni li ser tbiddel Gvern, iżda hija elezzjoni li fiha nistgħu nibdlu l-attitudni ta’ dan il-Gvern.

Dan l-artiklu deher fil-ġurnal in-Nazzjon tal-Erbgħa 8 ta' Mejju 2019

Tibda l-kampanja elettorali

2019-05-07T09:11:00.001+02:00

F’dawn il-ġranet ingħata bidu għal kampanja elettorali għall-elezzjonijiet tal-Parlament Ewropew u tal-Kunsilli Lokali. U mal-ewwel ħareġ ċar li l-Partit Laburista fil-Gvern, minkejja l-priedki kollha ta’ pożittività li jagħmel, imbarka fuq kampanja negattiva għall-aħħar ta’ attakki, ingann u gideb biex jipprova jkisser lill-Partit Nazzjonalista.

Fuq barra, jipprova jpinġi kampanja kollha qlub u mħabba, bil-logo tal-figolla mċappas ma’ kullimkien. Iżda tmur dibattiti, u tisma’ d-diskors tal-esponenti laburisti, tinduna bl-ingann tal-kampanja tagħhom.

L-ewwelnett, jippruvaw isikktu kull kritika kostruttiva u kull argument realistiku bħala “negattività”, anzi kultant saħansitra bħala tradiment. Jippruvaw ipinġu lil kulmin jitkellem fuq dak li qed jiġri ħażin f’Malta bħala xi traditur li ma jħobbx lil Malta. Minn banda jippriedkaw li jridu Oppożizzjoni li taħdem flimkien mal-Gvern u li toħroġ l-id tal-ħbiberija, u mill-banda l-oħra meta l-Oppożizzjoni tippubblika l-proposti u d-dokumenti tagħha tisma’ Ministru u Segretarji Parlamentari jgħidulek “aħna ma nieħdux pariri mill-Oppożizzjoni”. U tinduna li din it-tattika hija biss tentattiv biex isikktu l-kritika u biex isikktu l-Oppożizzjoni.

It-tieni mbagħad, jgħaddu għal qerq. Per eżempju fuq San Pawl il-Baħar, għaddejja kampanja sħiħa jiftaħru li mnalla kien il-Gvern li ħareġ għonqu biex jagħmel it-toroq li m’għamilx il-Kunsill Lokali. Li mhu veru xejn. Il-Kunsill Lokali ta’ San Pawl il-Baħar pjana u ħareġ il-flus hu għal dan il-proġett ta’ toroq, imma minħabba li Infrastructure Malta ħatfet il-kuntratturi kollha ma setgħux isibu kuntrattur biex iwettqu. Għaldaqstant, qabbdu huma lil Infrastructure Malta biex twettqu, daqs li kieku hija l-kuntrattur imqabbad mill-Kunsill. Iżda l-finanzjament ġej kollu mill-Kunsill, li tarġa intalab iħallas għalih bil-quddiem! U dan wara li dan il-Kunsill solva d-deficit li ħalla warajh il-Kunsill b’maġġoranza Laburista. L-istess mod kif il-Kunsill Lokali tal-Mosta illum il-ġurnata spiċċa b’surplus wara li solva d-dejn ta’ nofs miljun li ħalliet warajha maġġoranza Laburista.

U l-qerq fil-kampanja fuq livell nazzjonali huwa impressjonanti. Pruvaw ibellgħuha li l-Partit Nazzjonalista b’xi mod prova jħassar xi elezzjonijiet jew ma jemminx fid-demokrazija, bl-argument li hemm 71 kunsillier tal-Partit li mhux ser jerġa’ jikkontesta. Dan meta l-Partit Laburista għandu 112-il kunsillier li mhux ser jikkontesta, fosthom 8 Sindki! Dan meta kien il-Partit Laburista li ħassar il-Kumitati Amministrattivi u l-elezzjonijiet tagħhom. Dan meta kien il-Partit Laburista li ħassar l-elezzjonijiet kollha tal-Kunsilli Lokali sentejn ilu. Dan meta l-unika elezzjoni tal-Kunsilli li tħassret kienet dik tal-Imdina, fejn il-Partit Laburista preżenta biss kandidat wieħed u allura ma hemmx bżonn issir elezzjoni. U tagħhom, jippruvaw jitfgħuh fuq il-Partit Nazzjonalista, li kien il-Partit li waqqaf il-Kunsilli Lokali u li dejjem emmen fis-sussidjarjetà u li l-poter jinżel għand in-nies. Bil-kontra ta’ dak li għamel dan il-Gvern f’dawn is-sitt snin.

Bl-istess mod jiftaħar li ser ikun qed jippubblika manifest elettorali għal kull lokalità, qisu din xi ħaġa ġdida. Dan meta l-Partit Nazzjonalista huwa l-unika partit li ilu jippubblika manifest elettorali għal kull lokalità sa mit-twaqqif tal-Kunsilli ħamsa u għoxrin sena ilu!

Il-Partit Nazzjonalista mhux ser iħalli dan il-qerq u dawn l-attakki negattivi jfixkluh. Ser inkomplu nniedu proposti fuq proposti, kemm fil-qafas tal-liġijiet Ewropej biex in-nies ikunu jafu fuqiex ser jiffukkaw il-Membri Parlamentari Ewropej Nazzjonalisti, kif ukoll fil-qafas lokali. Li hu żgur hu li l-kandidati kollha tagħna ma ġew imwegħda xejn; ġew imwegħda biss appoġġ sħiħ mill-Partit biex iwettqu ħidmiethom favur ir-residenti u favur il-lokalitajiet tagħna. Il-Partit Laburista ma jistax jgħid l-istess, għax ċert li jekk taraw il-lista ta’ kandidati fil-lokalitajiet tagħkom, taraw li kull fil-maġġoranza kbira tagħhom impjegati jew ma’ xi Ministeru, jew ma’ xi Awtorità, jew ma’ xi kumpanija parastatali. Ħarġu għal Kunsill biss biex jaraw kif ser jiggwadanjaw huma, u mhux għax għandhom għal qalbhom il-lokal tagħhom.

Għax l-eżempju jkaxkar. Meta l-mudell tiegħek fil-Partit ikun qed jisraq €5,000 kuljum u qisu ma ġara xejn, bilfors li l-kandidati l-oħra ħa jaspiraw biss biex jippruvaw jagħmlu xi ftit bħalu. Għax la ma ġara xejn lilu, ċerti li mhu ħa jiġri xejn lilhom.

Dan l-artiklu deher fil-ħarġa tal-Mument tal-Ħadd 04 ta' Mejju 2019

Flimkien għal Pajjiżna

2019-04-24T13:56:00.002+02:00

Din il-ġimgħa tnediet uffiċċjalment il-kampanja elettorali għall-elezzjonijiet tal-Parlament Ewropew u dawk tal-Kunsilli Lokali ta’ Mejju 2019. Elezzjonijiet li għalihom il-Partit Nazzjonalista qed jippreżenta għaxar kandidati għall-Parlament Ewropew, u 295 kandidat għall-Kunsilli Lokali. 28% ta’ dawn il-kandidati huma nisa, waqt li 23% huma żgħażagħ taħt il-35 sena. Wieħed tajjeb isemmi wkoll li 155 minnhom qatt ma servew fil-Kunsilli Lokali.

Dawn huma elezzjonijiet importanti. Huma elezzjonijiet li għalkemm ma jibdlux il-Gvern tal-pajjiż, jistgħu jwasslu biex il-Gvern ibiddel id-direzzjoni. U għandna għalxiex inbiddlu d-direzzjoni.

Pajjiżna qed jaqla’ daqqa wara l-oħra li tnawwarlu r-reputazzjoni tiegħu. Rapporti mill-Moneyval, mill-Kummissjoni Ewropea, mill-Kummissjoni Venezja, mit-Transparency International, mir-Reporters Without Borders, minn istituzzjonijiet finanzjarji stabbiliti, kollha jsemmu l-ħsara li qed issir lil Malta mill-korruzzjoni u l-kultura tal-impunità, kultura li ddaħħlet biss biex Keith Schembri, Konrad Mizzi, Joseph Muscat u ta’ madwarhom ikunu jistgħu jagħmlu li jridu mingħajr mal-ġustizzja tkun tista’ tilħaqhom.

Apparti l-ħsara li dan kollu qed jagħmel lir-reputazzjoni ta’ pajjiżna, u allura r-riskju fuq l-impjiegi u setturi vitali bħal dak finanzjarju, din il-korruzzjoni qed tiswa lil pajjiżna €725 miljun fis-sena. Li jfisser kważi €2,000 għal kull persuna li hawn tgħix f’Malta.

Kemm jista’ jsir ġid bihom dawn il-flus. Kemm jistgħu jingħataw iktar mediċini b’xejn lil dawk li qed ibatu. Kemm jistgħu jingħataw iktar mediċini b’xejn lill-anzjani, li ħafna minnhom spiċċaw f’riskju ta’ faqar. Kemm jista’ jsir aktar biex titjieb il-pensjoni, biex tissaħħaħ l-edukazzjoni, biex jitjieb is-servizz tas-saħħa. Kemm jista’ jsir aktar biex iseħħ investiment tant bżonnjuż f’sistema ta’ trasport tal-massa bħal metro, li l-Partit Nazzjonalista issa ilu li preżenta pjani konkreti u studjati għaliha sentejn. Kemm jista’ jsir aktar biex jiġi miġġieled il-prekarjat u jitjiebu l-kundizzjonijiet tal-ħaddiema. Kemm jista’ jsir aktar biex jiġu mgħejjuna ż-żgħażagħ li ma jistgħux jixtru l-ewwel proprjetà. Kollha problemi li tkattru u kibru mhux b’kumbinazzjoni, iżda minħabba l-mudell ekonomiku xejn sostennibbli li għażel il-Gvern biex ikabbar l-ekonomija.

Mudell ekonomiku li mhux biss qed ifaqqar lill-ħaddiema u liż-żgħażagħ, iżda li qed ifaqqar ukoll il-valuri tagħna, qed ifaqqar l-identità tagħna, u qed ifaqqar l-ambjent u l-karattru Malti.

Il-Partit Nazzjonalista diġa’ preżenta numru ta’ proposti li jistgħu jgħinu biex jiġu indirizzati dawn il-problemi, u ser ikompli jagħmel dan fix-xhur li ġejjin. Mhux biss proposti fuq livell nazzjonali, iżda anke proposti għal kull lokalità f’Malta u f’Għawdex.

Il-proċess biex jitfasslu dawn il-proposti ilu issa li nbeda xhur. Fil-lokalità tiegħi tal-Gudja, fejn qed nikkontesta l-elezzjoni tal-Kunsill Lokali, ilna ħafna li bħala Kumitat Sezzjonali fassalna numru ta’ proposti li jistgħu jtejbu l-ħajja tar-residenti fir-raħal tagħna. M’għamilniex dan waħedna, iżda għamilnieh wara numru ta’ diskussjonijiet mat-tesserati, u anke man-nies fi djarhom.

Għalhekk, f’din il-kampanja ser inkunu qed immorru għand in-nies bi pjan u bi proposti pożittivi. Proposti li juru li l-kandidati tal-Partit Nazzjonalista ser ikunu verament il-vuċi tagħkom, u li b’vot lilhom mhux biss tkunu qed tagħżlu programm li jtejjeb il-kwalità tal-ħajja tagħkom, iżda tkunu qegħin ukoll tibagħtu messaġġ lill-Gvern biex ibiddel id-direzzjoni u jerġa’ jibda jimpurtah minn dak li għaddej minnu ċ-ċittadin.

Dan l-artiklu deher fil-ġurnal in-Nazzjon tal-Erbgħa 24 ta' April 2019