LIFE GOES ON

MAKAMU WA RAIS AAGIZA SERA YA BIASHARA BUNIFU KUFUNGUA FURSA ZA KIUCHUMI KWA VIJANA

2026-10-19T22:23:34.510+03:00

Makamu wa Rais, Mhe. Deogratius Ndejembi, ametoa miezi sita kwa Wizara ya Viwanda na Biashara kuandaa sera mahususi ya biashara bunifu (startups), itakayowezesha vijana kupata mitaji, masoko na fursa za uwekezaji, ikiwa ni sehemu ya mkakati wa Serikali wa kuongeza ajira na kukuza uchumi unaotegemea ubunifu na teknolojia kuelekea Dira ya Taifa ya Maendeleo 2050.

Akifungua Wiki ya Biashara Bunifu (Startups Week) katika Kituo cha Kimataifa cha Mikutano cha Julius Nyerere (JNICC), Dar es Salaam, Ndejembi amezitaka Taasisi za Fedha kuweka mifumo rafiki ya mitaji badala ya kutegemea mikopo pekee, huku akielekeza Wizara ya Viwanda na Biashara kushirikiana na Ofisi ya Waziri Mkuu kuanzisha kituo cha pamoja cha ubunifu (Innovation Centre) kitakachowaunganisha vijana na wawekezaji wa ndani na nje ya nchi.

Amesema Serikali itaendelea kufungua fursa za kiuchumi kupitia asilimia 30 ya manunuzi ya umma yaliyotengwa kwa makundi maalumu na fedha za uwezeshaji zinazofikia Sh bilioni 200, huku akisisitiza Chama cha Biashara Bunifu Tanzania kushirikishwa kikamilifu katika maandalizi ya Sera hiyo.

Kwa upande wake, Waziri wa Viwanda na Biashara, Mhe. Judith Kapinga, amesema Wizara si polisi wala mgambo wa kufunga biashara, bali jukumu lake ni kuhamasisha, kulea na kukuza biashara bunifu. Ameahidi kuendelea kushirikiana na Sekta Binafsi kuboresha Sera na Sheria zinazoendana na mabadiliko ya teknolojia, huku TanTrade ikiendelea kutangaza bidhaa na ubunifu wa Watanzania katika masoko ya kimataifa.

Naye Mkuu wa Mkoa wa Dar es Salaam, Mhe. Albert Chalamila, ameahidi kuendelea kuunga mkono biashara bunifu ili kupanua fursa za ajira kwa vijana, huku Mwenyekiti wa Bodi ya Chama cha Bunifu Tanzania, Bw. Paul Makanza, akisema sekta hiyo imechangia kuzalisha takribani ajira 20,000 licha ya changamoto za mitaji na masoko.

Awali, Makamu wa Rais alitembelea maonesho ya wabunifu na wawekezaji, ikiwemo Benki ya NMB, mdhamini mkuu wa tukio hilo, ambayo imefanikiwa kufadhili biashara bunifu sita, huku nyingine tano zikiwa katika hatua za mwisho za uwezeshaji.

IPU yaisifu Tanzania kwa kuongeza uwakilishi wanawake bungeni

2026-10-08T16:55:35.527+03:00

Na Ripota wa TBN, Arusha.

Katibu Mkuu wa Umoja wa Mabunge Duniani (IPU), Mhe. Anda Filip, ameipongeza Tanzania kwa hatua iliyopiga katika kuongeza idadi ya ushiriki wa wanawake katika siasa na uongozi, na kueleza kuwa uzoefu wa Tanzania unaweza kuwa somo kwa mataifa mengine katika kujenga mifumo jumuishi ya kufanya maamuzi.

Akizungumza katika mahojiano maalumu yaliyofanyika Oktoba 7, 2026 wakati wa Mkutano wa 153 wa IPU unaofanyika Arusha, Filip amesema anavutiwa na namna Tanzania ilivyoongeza idadi uwakilishi wa wanawake katika Bunge la Jamhurin ya Muungano wa Tanzania, ambao kwa sasa umefikia zaidi ya asilimia 39.

Katika mkutano huo, Mhe. Filip amesisitiza kuhusu umuhimu wa kuhakikisha wanawake wanapata nafasi ya kushiriki kikamilifu katika michakato ya kisiasa na maamuzi ya kitaifa.

Filip amesema kupitia Dira ya Maendeleo 2050, Tanzani ina fursa ya kuimarisha ushiriki wa wanawake na vijana katika kujenga na kutekeleza ajenda za maendeleo ya muda mrefu, ili kuhakikisha vipaumbele vya taifa vinaendelea kutekelezwa na vizazi vijavyo bila kutegemea mabadiliko ya awamu za uongozi.

Katika mkutano wa IPU unaendelea jijini Arusha, Tanzania inawakilishwa na Wabunge nane ambapo kati ya hao, Wabunge wanne ni wananwake ikiwa ni sawa na asilimia 62.5 ya uwakilishi wa wanawake wanaoiwakilisha Tanzania katika Umoja wa Mabunge Duniani (IPU).

Wabunge hao wanawake ni Mheshimiwa Dkt. Pindi Chana, Mheshimiwa Dkt. Zeyana Hamid, Mheshimiwa Kiza Myeye, Mheshimiwa Mhandisi Fatma Rembo na Mhehimiwa Asha Feruzi.

Wabunge wengine waliopo IPU ambao ni wanaume ni Mheshimiwa. Dkt. Damas Ndumbaro, Mheshimiwa Elibariki Kingu na Mheshimiwa Rashid Shangazi, ambao idadi yao ni sawa na asilimia 37.2 ya uwakilishi wa wabunge wa Tanzania.

Mkutano wa 153 wa Umoja wa Mabunge Duniani ulianza tarehe 5 Oktoba, 2026 katika Kituo cha Kimataifa cha Mikutano Arusha (AICC) na unatarajia kuhitimishwa Ijumaa Oktoba 9, 2026. Mkutano huu umeshirikisha wajumbe zaidi ya 2000 kutoka mataifa mbalimbali.

Tanzania’s Parliament Ready to Learn from Its Peers - Bunge Secretary Baraka Leonard

2026-10-08T16:48:09.821+03:00

By TBN Reporter

Tanzania’s Parliament is ready to learn from other legislatures and share its own experience, Secretary to the Tanzania Parliament Baraka Leonard said today.

Speaking at a meeting of parliamentary secretaries held alongside the 153rd Assembly of the Inter-Parliamentary Union (IPU), which is under way at the Arusha International Conference Centre, Leonard said cooperation between parliamentary administrations helped institutions improve their work.

“We recognise that no Parliament knows everything. Our approach is to learn from others and share experiences,” he said.

Leonard said there was no single parliamentary system that could be considered best in every circumstance. Some countries have bicameral legislatures, while Tanzania has a unicameral Parliament. Such differences, he said, made professional exchange between parliamentary secretaries valuable.

“We are not meeting to decide which system is best, but to understand what works, why it works and what lessons we can take from it,” he said.

He said the forum offered an opportunity to learn how legislatures manage parliamentary procedure, preserve institutional continuity, support members of parliament and adapt to rapid change while remaining effective.

Tanzania’s Parliament was responding to shifts in public expectations, technological change and demands for greater transparency, Leonard said.

He cited the introduction of the e-Parliament system, which allows members of parliament to access documents online and carry out their work with fewer paper records.

The Parliament had also expanded public access to its proceedings, he said. Sessions are broadcast on Parliament television and through social media, enabling citizens to follow debates, including students and other members of the public.

Leonard welcomed delegates to Arusha, describing them as partners in the administration of parliamentary business. He said his team had worked to create a setting for professional exchange, learning and cooperation.

“Arusha has long been associated with diplomacy, dialogue, regional cooperation and international engagement,” he said. “This meeting also comes at an important time in the history of parliamentary institutions in Tanzania.”

BRELA YAWATAKA WASANII KURASIMISHA KAZI ZAO

2026-10-08T16:44:31.657+03:00

Na Seif Mangwangi, Michuzi TV, Arusha

WASANII nchini wametakiwa kubadili mtazamo na kuanza kuzitazama kazi zao za sanaa kama biashara kwa kuzirasimisha, kusajili majina ya biashara na kulinda miliki bunifu ili kuongeza fursa za kukuza shughuli zao na ushindani katika soko.

Wito huo umetolewa na Msaidizi wa Msajili Mkuu, Mkurugenzi wa Miliki Bunifu kutoka Wakala wa Usajili wa Biashara na Leseni (BRELA), Nassoro Mtavu, aliyewahimiza wasanii kutumia fursa zinazopatikana kupitia usajili na ulinzi wa kazi zao.

Mtavu ametoa kauli hiyo wakati akizungumza na wadau wa sanaa katika Tamasha la Arusha Artisan Festival linaloendelea katika viwanja vya General Tyre, Njiro jijini Arusha.

Amesema BRELA imejipanga kuwasaidia wasanii kuelewa taratibu za usajili wa biashara pamoja na masuala ya majina ya biashara, alama za biashara na miliki bunifu yanayoweza kuwa na mchango mkubwa katika maendeleo ya sekta ya sanaa.

Amesema ushiriki wa BRELA katika tamasha hilo unalenga kutoa elimu kwa wasanii na wafanyabiashara kuhusu umuhimu wa kurasimisha shughuli zao na kuhakikisha wanafanya biashara kwa kuzingatia matakwa ya sheria.

“Maonyesho haya yamekuwa fursa muhimu kwa wasanii na wafanyabiashara kupata elimu kuhusu namna ya kuendesha na kukuza shughuli zao kwa kuzingatia taratibu za kisheria,” amesema Mtavu.

Amesema wasanii wanapaswa kutumia nafasi hiyo kuuliza maswali na kueleza changamoto zinazowakabili katika shughuli zao ili kupata majibu na ushauri kutoka kwa wataalamu wa BRELA.

Kwa mujibu wa Mtavu, baadhi ya changamoto zinazowakabili wasanii zinaweza kutatuliwa iwapo wataongeza uelewa kuhusu usajili wa biashara, majina ya biashara, alama za biashara pamoja na namna ya kulinda miliki bunifu.

Amesema usajili wa shughuli za sanaa unaweza kuwasaidia wasanii kuwa na utambulisho rasmi wa kibiashara na hivyo kuongeza uwezo wao wa kutumia fursa mbalimbali zinazopatikana kwa wafanyabiashara waliosajiliwa.

Aidha, amesema ulinzi wa miliki bunifu ni muhimu kwa wasanii kwa kuwa kazi zao zinaweza kuwa na thamani kubwa kiuchumi na hivyo zinahitaji kulindwa dhidi ya matumizi yasiyoruhusiwa.

Mtavu amewataka wasanii kutumia mafunzo na huduma zinazotolewa na BRELA kama sehemu ya kujenga msingi imara wa biashara zao badala ya kutegemea kipaji pekee katika kuendesha shughuli zao.

Amesema msanii anayelinda kazi yake, anasajili shughuli zake na kuzingatia taratibu za kisheria ana nafasi kubwa ya kukuza thamani ya kazi zake na kufikia masoko mapana zaidi.

Ameongeza kuwa wasanii wanapaswa kutumia majukwaa kama Tamasha la Arusha Artisan Festival si kwa ajili ya kuuza na kutangaza kazi zao pekee, bali pia kujifunza namna ya kuzifanya kazi hizo kuwa biashara endelevu.

Amesema BRELA itaendelea kushirikiana na wadau wa sanaa kutoa elimu na kuwasaidia kuelewa huduma zinazotolewa na taasisi hiyo ili waweze kutumia ipasavyo fursa zilizopo.

Mtavu amewahimiza wasanii wengine ambao bado hawajar formalisha shughuli zao kuchukua hatua kwa kuanza mchakato wa usajili na kupata uelewa kuhusu namna bora ya kulinda kazi zao.

Amesema hatua hiyo itasaidia kujenga sekta ya sanaa yenye wasanii wanaoweza kutumia ubunifu wao kama chanzo cha ajira, kipato na biashara endelevu nchini.

SERIKALI YAITAKA CRDB KUONGEZA FURSA ZA KIUCHUMI KWA WANAWAKE, VIJANA

2026-10-06T01:08:58.589+03:00

Na Janeth Raphael - MichuziTv

Serikali imeitaka CRDB Bank kuongeza zaidi fursa za kiuchumi kwa wanawake, vijana na watu wenye ulemavu, kwa kuwawezesha kupata mitaji, mikopo na huduma za kifedha zitakazowasaidia kujikwamua kiuchumi na kukuza shughuli zao za uzalishaji.

Mkuu wa Mkoa wa Dodoma, Rosemary Senyamule, ametoa rai hiyo wakati wa maadhimisho ya Wiki ya Huduma kwa Wateja, ambapo amesisitiza umuhimu wa taasisi za kifedha kuendelea kuboresha huduma zao na kwenda hatua ya ziada ili kukidhi mahitaji ya wananchi.

Senyamule amesema taasisi za kifedha zina nafasi kubwa katika kuchochea maendeleo ya wananchi, hususan vijana na wanawake, kwa kuwawezesha kupata rasilimali zitakazowawezesha kushiriki kikamilifu katika shughuli za kiuchumi, ikiwamo kilimo na sekta nyingine za uzalishaji.

Amesema utoaji wa huduma bora haupaswi kuishia katika kuongeza idadi ya bidhaa au huduma, bali unapaswa kuzingatia namna taasisi zinavyoweza kurahisisha maisha ya wateja na kuwapatia suluhisho linaloendana na mahitaji yao.

“Ni muhimu kila mmoja wenu kuwa sehemu ya taswira na sifa ya taasisi hii. Jiulizeni ni huduma gani mpya inaweza kuanzishwa ili kwenda hatua ya ziada katika kuwahudumia wateja,” amesema Senyamule.

Ameongeza kuwa Wiki ya Huduma kwa Wateja inapaswa kuwa fursa kwa watumishi wa CRDB kujitathmini, kubaini maeneo yenye changamoto na kuweka mikakati ya kuboresha huduma ili kuhakikisha wananchi wanapata huduma kwa ufanisi na kwa wakati.

Kwa upande wake, Meneja Biashara CRDB Kanda ya Kati, Andrew Kihenzia, amesema benki hiyo inaendelea kufanya maboresho ya huduma, mifumo na bidhaa zake kwa lengo la kuwafikia wateja kwa urahisi zaidi na kuwapatia suluhisho zinazokidhi mahitaji yao.

Kihenzia amesema CRDB imeendelea kuweka mazingira wezeshi kwa vikundi vya wajasiriamali, wanawake na vijana kupata mikopo inayolenga kuwawezesha kuanzisha, kuendeleza na kupanua shughuli zao za kiuchumi.

“Tunatoa fursa kwa vijana na wanawake kuhakikisha wanainuka kiuchumi kupitia mikopo ya vikundi. Tunapoendelea kusherehekea Wiki ya Huduma kwa Wateja, tunaendelea kuboresha huduma zetu kila siku,” amesema.

Amesema CRDB pia inaendelea kushirikiana na Serikali katika kuboresha mifumo inayowawezesha wafanyakazi kupata huduma za kifedha na mikopo kwa urahisi, huku ikiendelea kupanua wigo wa huduma zake kupitia matawi na vituo mbalimbali ili kuwafikia wananchi wengi zaidi.

Kihenzia amesema kwa mwaka huu CRDB imetenga Shilingi bilioni 6.5 kwa ajili ya makundi maalum, akisisitiza kuwa fursa hizo zinapaswa kutolewa kwa uwazi na kuhakikisha zinawafikia walengwa wanaokusudiwa.

Amesema hatua hiyo ni sehemu ya dhamira ya benki hiyo ya kuhakikisha huduma za kifedha zinakuwa chachu ya uwezeshaji wa wananchi na kuongeza ushiriki wa makundi mbalimbali katika shughuli za kiuchumi.

Aidha, amesema kaulimbiu ya Wiki ya Huduma kwa Wateja ya mwaka huu, “Piga Hatua Mbele,” inaendana na dhamira ya CRDB ya kuendelea kuboresha huduma, mifumo na bidhaa zake ili kuongeza ufanisi na kuhakikisha wateja wanapata huduma zinazokidhi mahitaji yao.

Dkt. Tulia: Wanawake Washiriki Kikamilifu Katika Maamuzi

2026-10-05T23:02:38.132+03:00

Rais wa Umoja wa Mabunge Duniani (IPU), Mhe. Dkt. Tulia Ackson, akizungumza na wabunge wanawake katika Jukwaa la Wanawake wa Umoja wa Mabunge Duniani (IPU), Oktoba 5, 2026, katika ukumbi wa AICC, jijini Arusha.

Na Mwandishi Wetu - MAELEZO, ARUSHA,

Rais wa Umoja wa Mabunge Duniani (IPU), Dkt. Tulia Ackson, amezitaka nchi wanachama kuhakikisha usawa wa kijinsia hauishii katika kuongeza idadi ya wanawake, bali uwape ushawishi na madaraka katika ngazi za maamuzi.

Akizungumza katika Mkutano wa 153 wa IPU - Jukwaa la Wanawake katika Kituo cha Kimataifa cha Mikutano Arusha (AICC), Dkt. Tulia amesema katika kipindi chake cha uongozi IPU imefanya marekebisho ya Katiba na Kanuni zake kwa lengo la kuimarisha usawa wa kijinsia katika ngazi mbalimbali.

Amesema IPU pia imepitisha kwa mara ya kwanza Sera ya Kupinga Unyanyasaji katika Mikutano na Matukio, inayokataza aina zote za unyanyasaji, ikiwemo wa kingono, pamoja na kuweka mifumo ya kuripoti na kushughulikia vitendo hivyo.

Dkt. Tulia amesisitiza kuwa wanawake wanapaswa kuwa na nafasi ya kushiriki kikamilifu katika kufanya maamuzi, akisema, “Tunapaswa kuhakikisha kwamba usawa wa kijinsia unaenda sambamba na uwakilishi, ushiriki na fursa sawa za uongozi na kufanya maamuzi,” amesema Dkt. Tulia.

Aidha, amewataka washiriki wa mkutano huo kurejea katika nchi zao na kupeleka maazimio, mipango ya utekelezaji na mikakati ya usawa katika mabunge yao, huku wanaume wakishirikishwa kama wadau muhimu katika kufanikisha usawa huo.

Amesisitiza pia umuhimu wa kuwapa nafasi wanawake vijana, wanawake kutoka jamii zilizotengwa na wanawake wenye ulemavu kushiriki katika uongozi na kufanya maamuzi.

TTCL YAAHIDI KUENDELEA KUSIMAMIA MIUNDOMBINU IMARA YA MAWASILIANO NCHINI

2026-09-30T15:53:25.008+03:00

Na MWANDISHI WETU - ARUSHA

Shirika la Mawasiliano Tanzania (TTCL) limeendelea kuimarisha nafasi yake katika kuwezesha shughuli za Serikali kidijitali kwa kutoa huduma ya intaneti yenye uhakika na kuwekeza katika miundombinu ya mawasiliano inayosaidia utekelezaji wa shughuli za Serikali, taasisi na mashirika ya umma nchini.

TTCL imetoa huduma hiyo katika Kikao Kazi cha Wenyeviti wa Bodi na Wakuu wa Taasisi na Mashirika ya Umma (Chairpersons and CEOs Forum), kinachofanyika katika Kituo cha Kimataifa cha Mikutano Arusha (AICC), ambapo huduma ya intaneti imewawezesha washiriki kupata na kubadilishana taarifa kwa wakati, kufanya mawasiliano ya kidijitali na kutumia mifumo mbalimbali katika shughuli za kikao.

Kikao hicho cha siku tatu kimefunguliwa rasmi na Makamu wa Rais wa Jamhuri ya Muungano wa Tanzania, Mhe. Deogratius Ndenjembi, kwa niaba ya Rais wa Jamhuri ya Muungano wa Tanzania, Mhe. Dkt. Samia Suluhu Hassan, na kinawakutanisha Wenyeviti wa Bodi, Wakuu wa Taasisi pamoja na viongozi mbalimbali kujadili masuala ya kimkakati yanayohusu uongozi, uwajibikaji, utawala bora na uboreshaji wa utendaji wa taasisi na mashirika ya umma.

Akizungumza na vyombo vya habari mara baada ya kufunguliwa kwa kikao hicho, Mkurugenzi Mkuu wa TTCL, Bw. Moremi Marwa, amesema Shirika hilo litaendelea kuwezesha uchumi wa kidijitali kupitia uwekezaji na usimamizi wa miundombinu ya mawasiliano, huduma za kifedha za kidijitali na teknolojia zinazochochea maendeleo ya taifa.

Bw. Marwa amesema miundombinu ya mawasiliano ina nafasi muhimu katika kufanikisha malengo ya Dira ya Taifa ya Maendeleo 2050, hususan katika kukuza uchumi wa kidijitali na kuwawezesha wananchi, wafanyabiashara na taasisi kupata huduma kwa kutumia teknolojia za kisasa.

Ameeleza kuwa TTCL inaendelea kuwekeza na kusimamia miundombinu ikiwemo Mkongo wa Taifa wa Mawasiliano, minara ya mawasiliano na Kituo cha Taifa cha Kuhifadhi Data (National ICT Data Centre), ambayo inawezesha upatikanaji wa mawasiliano, uhifadhi wa taarifa na matumizi ya huduma mbalimbali za kidijitali.

Kwa mujibu wa Bw. Marwa, jukumu la TTCL ni kuhakikisha miundombinu hiyo inaendelea kujengwa, kuimarishwa na kusimamiwa kwa ufanisi ili huduma za mawasiliano zipatikane kwa uhakika na kusaidia shughuli za kiuchumi katika maeneo mbalimbali nchini.

Aidha, amesema TTCL inachangia kuwezesha miamala ya kifedha ya kidijitali kupitia huduma zake, huku ikiendelea kuunga mkono juhudi za kukuza ajira kwa vijana kupitia programu za mafunzo kwa vitendo na kuwashirikisha katika shughuli za mawasiliano ya simu pamoja na usambazaji wa huduma za intaneti kwa teknolojia ya faiba kupitia Mkongo wa Taifa wa Mawasiliano.

Akizungumzia matumizi ya Akili Unde (Artificial Intelligence – AI), Bw. Marwa amesema teknolojia hiyo inahitaji miundombinu imara ya mawasiliano pamoja na uwezo wa kutosha wa kuhifadhi na kuchakata data.

Amesema TTCL inaendelea kuboresha na kupanua uwezo wa Kituo cha Taifa cha Kuhifadhi Data ili kukidhi mahitaji yanayoongezeka ya huduma za kidijitali na teknolojia mpya.

Utoaji wa huduma ya intaneti katika kikao hicho unaakisi dhamira ya TTCL ya kuendelea kuwa mhimili wa mawasiliano nchini kwa kuiwezesha Serikali, taasisi na mashirika ya umma kupata miundombinu na huduma za mawasiliano zinazochochea ufanisi katika utendaji, ushirikiano na utoaji wa huduma kwa wananchi.

Kupitia uwekezaji katika miundombinu na uboreshaji wa huduma za mawasiliano, TTCL inaendelea kuchangia utekelezaji wa ajenda ya Mageuzi ya Kidijitali Tanzania kwa kuhakikisha teknolojia inatumika kuongeza tija, uwajibikaji na ufanisi katika shughuli za Serikali na uchumi kwa ujumla.

TRAMEPRO YATOA WITO WA MAZUNGUMZO YA DHARURA KUTATUA MGOGORO WA MADEREVA

2026-09-30T15:37:55.484+03:00

Dar es Salaam, Septemba 29, 2026 — Shirika la Dawa Asilia na Uhifadhi wa Mazingira Tanzania (TRAMEPRO) limetoa wito kwa Serikali, madereva, wamiliki wa mabasi na malori pamoja na wadau wengine kukutana haraka na kufanya mazungumzo ya kutafuta suluhu ya mgogoro wa usafirishaji nchini.

TRAMEPRO imesema kusitishwa kwa baadhi ya huduma za usafirishaji wa abiria na mizigo kumeathiri shughuli za wananchi katika maeneo mbalimbali, ikiwemo Dar es Salaam, Dodoma, Mwanza, Morogoro, Mbeya, Njombe, Ruvuma na Kilimanjaro.

Shirika hilo limeeleza kuwa sekta ya usafirishaji ni muhimu kwa uchumi na maisha ya wananchi, hivyo mgogoro ukiendelea unaweza kuathiri usafirishaji wa abiria, chakula, dawa, mafuta, mazao na bidhaa nyingine muhimu.

TRAMEPRO imeitaka , LATRA na mamlaka nyingine husika kuitisha kikao cha dharura, kusikiliza madai ya madereva na kuhakikisha hatua zinazochukuliwa zinafuata sheria na haki za pande zote.

Aidha, madereva wametakiwa kutumia njia za kisheria na za amani katika kuwasilisha madai yao, huku wamiliki wa mabasi na malori wakitakiwa kuheshimu haki, usalama na ustawi wa madereva.

TRAMEPRO imesisitiza kuwa haki ya dereva, mwajiri, abiria na mwananchi inapaswa kulindwa.“Haki ya mmoja isiwe sababu ya kuvunja haki ya mwingine.”

Taarifa hiyo imetolewa na Boniventura Ferdinand Mwalongo, Katibu Mkuu wa TRAMEPRO.

WATENDAJI WA UCHAGUZI WATAKIWA KUZINGATIA VIAPO

2026-09-30T15:36:04.157+03:00

Na. Mwandishi Wetu, Tabora

WATENDAJI wa uchaguzi wamesisitizwa kuheshimu viapo vyao na kutekeleza majukumu kwa kuzingatia Katiba, sheria na kanuni wakati wote wa utekelezaji wa majukumu yao.

Wito huo umetolewa na Mwenyekiti wa Tume Huru ya Taifa ya Uchaguzi, Mhe. Jaji wa Mahakama ya Rufaa, Jacobs Mwambegele leo tarehe 29 Septemba, 2026 mkoani Tabora wakati akifungua mafunzo ya watendaji wa uchaguzi.

Mafunzo hayo ni sehemu ya mchakato wa maandalizi ya uchaguzi mdogo wa ubunge kwenye Jimbo la Chamwino Halmashauri ya Wilaya ya Chamwino, Mkoa wa Dodoma na Kata 11 za Tanzania Bara unaotarajiwa kufanyika tarehe 04 Novemba, 2026.

“Ninawasisitiza kuheshimu viapo vyenu kwa nafasi mlizoteuliwa, tekelezeni majukumu yenu kwa kuzingatia Katiba ya Nchi, sheria za uchaguzi na kanuni zake, kanuni za maadili ya uchaguzi na maelekezo mbalimbali yanayotolewa na yatakayotolewa na Tume katika kipindi hiki cha uchaguzi,” amesema Jaji Mwambegele.

Amewaelekeza watendaji hao kuhakikisha kuwa wakati wote wa mchakato wa uchaguzi huo, wanavishirikisha kwa karibu vyama vyote vya siasa vyenye usajili kamili na wadau wengine wa uchaguzi katika maeneo yao kuhusu masuala ya kiuchaguzi ambayo wanastahili kushirikishwa.

Ameongeza kuwa watendaji hao wanapaswa kuvipatia vyama vya siasa orodha ya vituo vya kupigia kura ili kuviwezesha kupanga mawakala.

“Ni muhimu kwenu pia, kuhakikisha mnayatambua na kuyajua vyema maeneo ambayo uchaguzi utaendeshwa ikiwemo miundombinu ya kufika katika vituo vya kupigia kura,” amesema Jaji Mwambegele.

Amewaasa watendaji hao kuhakikisha kuwa pamoja na uzoefu ambao baadhi yao wanao katika uendeshaji wa uchaguzi, wanaepuka kufanya kazi kwa mazoea kwa kuwa kila uchaguzi unatofautiana na uchaguzi mwingine.

Jaji Mwambegele amewasisitiza watendaji hao kuhakikisha wanaajiri watendaji wa vituo wenye sifa, weledi, wanaojitambua na kuachana na upendeleo kwa ndugu na jamaa ambao hawana sifa za kufanya shughuli za uchaguzi.

“Mhakiki vifaa vya uchaguzi mnavyopokea kutoka Tume na kuhakikisha kila mkuu wa kituo anapata vifaa vyote vya uchaguzi vinavyohitajika mapema na kuhakikisha siku ya uchaguzi mnaweka utaratibu utakaowezesha kila kituo cha kupigia kura kufunguliwa saa 1:00 asubuhi,” amesema.

Mafunzo hayo ya siku tatu yanawajumuisha waratibu wa uchaguzi wa mikoa, wasimamizi wa uchaguzi, wasimamizi wasaidizi wa uchaguzi ngazi ya jimbo na kata, maafisa uchaguzi, maafisa ununuzi na wahasibu.

Kata 11 za Tanzania Bara zitakazofanya uchaguzi wa Udiwani ni Nonde iliyopo Halmashauri ya Jiji la Mbeya; Lugenge, Halmashauri ya Mji Njombe; Bargish, Halmashauri ya Mji Mbulu; Makole, Halmashauri ya Wilaya ya Muheza; Mwera, Halmashauri ya Wilaya ya Pangani na Oldonyosambu, Halmashauri ya Wilaya ya Ngorongoro.

Nyingine ni Igalula iliyopo Halmashauri ya Wilaya ya Uyui; Shelui, Halmashauri ya Wilaya ya Iramba; Mvumi, Halmashauri ya Wilaya ya Kilosa; Nyarero, Halmashauri ya Wilaya ya Tarime na Ilolangulu, Halmashauri ya Wilaya ya Mbogwe.

Mwenyekiti wa Tume Huru ya Taifa ya Uchaguzi, Mhe. Jaji wa Mahakama ya Rufaa, Jacobs Mwambegele akizungumza leo tarehe 29 Septemba 2026 mkoani Tabora wakati akifungua mafunzo ya watendaji wa uchaguzi kutoka Halmashauri ya Wilaya ya Chamwino mkoani Dodoma na Kata 11 za Tanzania bara.(Picha na INEC).

Sehemu ya washiriki ambao ni watendaji wa Uchaguzi kutoka katika Jimbo la Chamwino Mkoani Dodoma na Kata 11za Tanzania Bara wakifuatilia hotuba ya ufunguzi. (Picha na INEC).

Tanzania Bloggers Network na PSSSF Kuimarisha Ushirikiano Utoaji wa Elimu ya Hifadhi ya Jamii Tanzania

2026-09-08T22:41:26.630+03:00

Katika hatua inayolenga kupanua wigo wa utoaji wa elimu kwa umma, timu ya maofisa wa juu kutoka Mfuko wa Hifadhi ya Jamii kwa Watumishi wa Umma (PSSSF) imefanya ziara rasmi katika Makao Makuu ya Muda ya Tanzania Bloggers Network (TBN), yaliyopo Kijitonyama, Dar es Salaam, kwa ajili ya kufanya mazungumzo ya kimkakati na viongozi wa mtandao huo.

Mazungumzo hayo yalilenga kujenga ushirikiano wenye manufaa kwa pande zote mbili, hususan katika masuala ya habari, uelimishaji wa umma na usambazaji wa taarifa na maarifa sahihi kuhusu mifumo ya hifadhi ya jamii, pensheni pamoja na uwekezaji unaofanywa na PSSSF.

Akizungumza katika mkutano huo, Mwenyekiti wa TBN, Beda Msimbe, alisema mtandao huo uko tayari kutumia majukwaa yake kusimama kidete katika kutoa elimu na kusambaza taarifa sahihi kwa umma, hususan kupitia majukwaa ya kidijitali.

Hata hivyo, alisisitiza umuhimu wa wanachama wa TBN kupata mafunzo ya kina kuhusu shughuli, huduma na uendeshaji wa PSSSF, ili waweze kuwaelimisha wananchi kwa ufanisi na kwa usahihi zaidi.

“Ni muhimu kwanza sisi wanachama wa TBN kupata elimu ya kutosha kuhusu mfuko huu, ili elimu tutakayokwenda kuwapa wananchi iwe sahihi, yenye uelewa mpana na yenye tija,” alisema.

Kwa upande wake, Mkuu wa msafara wa PSSSF, Abdul Njaidi, alisema ziara hiyo imelenga kujenga uhusiano wa karibu na wadau wa sekta ya habari, pamoja na kuimarisha juhudi za kutoa elimu kwa jamii kuhusu masuala ya hifadhi ya jamii.

Njaidi aliwahakikishia viongozi wa TBN kuwa hoja na mapendekezo yote yaliyowasilishwa katika mkutano huo yatafanyiwa kazi, akisisitiza kuwa ushirikiano huo unalenga kuhakikisha wananchi wanapata uelewa mpana na sahihi kuhusu masuala ya pensheni na uwekezaji unaofanywa na PSSSF.

Naye Mdhamini wa TBN, Issa Michuzi, alisema mtandao huo wenye historia kubwa katika tasnia ya habari za mtandaoni unajivunia weledi na ufanisi katika kutekeleza majukumu yake.

Alisema TBN ipo kwa ajili ya kuhakikisha Tanzania inasomeka vyema katika medani za kidijitali, kwa kutoa taarifa zenye kujenga na kuchochea maendeleo ya taifa.

“Tunataka kuhakikisha Tanzania inasomeka vyema katika medani za kidijitali na kwamba taarifa zinazotolewa zinakuwa na mchango katika kuchochea na kutanua zaidi gurudumu la maendeleo ya taifa,” alisema Michuzi.

Kwa upande wake, Katibu wa TBN, Rahel Pallangyo, alisema mtandao huo uko tayari kutoa waandishi wake mahiri na kutumia majukwaa yake mbalimbali kuhakikisha wananchi wanapata taarifa sahihi, za kuaminika na zenye tija kwa jamii.

Alisema ushirikiano huo utasaidia kuongeza uelewa wa wananchi kuhusu masuala ya hifadhi ya jamii na kuwawezesha wadau mbalimbali kuelewa kwa kina huduma na fursa zinazotolewa na PSSSF.

Ushirikiano huo unatazamiwa kufungua ukurasa mpya katika matumizi ya vyombo vya habari vya mtandaoni katika kufikisha elimu ya hifadhi ya jamii kwa wananchi wengi zaidi nchini.

Katika mkutano huo, ujumbe wa PSSSF ulioongozwa na Abdul Njaidi ulihusisha pia maofisa Regina Kumba, Grayson Mgunda na Doreen Lyimo.

Kwa upande wa TBN, viongozi walioshiriki mkutano huo ni Mwenyekiti Beda Msimbe, Katibu Rahel Pallangyo, Mtaalamu wa Mawasiliano Cathbert Kajuna na Mdhamini wa TBN, Issa Michuzi.

Wakulima Kanda ya Kati wavuna na Mixx

2026-08-10T00:34:09.647+03:00

Wakulima wa Kanda ya Kati wanaotumia huduma za kifedha za Mixx by Yas kupitia vyama vya ushirika wameendelea kunufaika na malipo ya kidijitali na zawadi mbalimbali, hatua inayotajwa kuongeza usalama wa fedha, kuharakisha malipo na kuhamasisha uzalishaji wa mazao.

Akizungumza katika hafla ya Vuna na Mixx iliyofanyika wakati wa Maonesho ya Nanenane jijini Dodoma, Mtendaji Mkuu wa Tume ya Maendeleo ya Ushirika (TCDC), Dkt. Benson Ndiege, alisema ushirikiano kati ya Tume na Mixx umeleta mageuzi katika mfumo wa malipo kwa wakulima wanaouza mazao kupitia stakabadhi za ghala.

Alisema matumizi ya malipo ya kidijitali yameondoa changamoto zilizokuwa zikitokana na matumizi ya fedha taslimu, ikiwemo ucheleweshaji wa malipo na upotevu wa fedha, huku wakulima wakipokea fedha zao kwa usalama na kwa wakati.

"Malipo yanapowafikia wakulima kwa wakati yanawapa motisha ya kuongeza uzalishaji. Tumeona mabadiliko makubwa katika mfumo wa ushirika na ongezeko la mazao kutokana na kuimarika kwa huduma hizi," alisema Dkt. Ndiege.

Aliwataka wakulima wanaonufaika na mfumo huo kuwa mabalozi wa matumizi ya huduma za kidijitali ili kuwahamasisha wenzao kujiunga na mfumo huo, huku akiwapongeza maafisa ushirika na viongozi wa AMCOS kwa kuendelea kutoa elimu inayowasaidia wakulima kutumia huduma hizo kwa ufanisi.

Kwa upande wake, Meneja wa Biashara wa Mixx Kanda ya Kati, Bw. Charles Gasper, alisema kampuni hiyo imeendelea kushirikiana na Serikali na vyama vya ushirika kuhakikisha wakulima wanapata huduma za kifedha zilizo salama, rahisi na za haraka.

Alisema katika hafla hiyo Mixx iliwatunuku zawadi wakulima zaidi ya 25 kutoka Kanda ya Kati waliotumia huduma zake kupitia vyama vya ushirika, zikiwemo pikipiki, maguta na baiskeli, ikiwa ni sehemu ya kutambua mchango wao katika matumizi ya huduma za kifedha kidijitali.

"Tunaamini tukimwezesha mkulima, tunachangia ukuaji wa familia yake, jamii na uchumi wa taifa. Hivyo tutaendelea kushirikiana na wadau wa sekta ya kilimo kuhakikisha wakulima wengi zaidi wananufaika na huduma za Mixx," alisema Bw. Gasper.

Mrajis na Mtendaji Mkuu wa Tume ya Maendeleo ya Vyama vya Ushirika (TCDC), Dkt. Benson Ndiege (aliyevaa suti nyeusi), akikabidhi funguo za pikipiki ya kubebea mizigo, almaarufu 'Guta', kwa Bw. Imani Ndelias Mwampashe kutoka Chama cha Ushirika cha Mlowa kilichopo Mkoa wa Iringa. Chama hicho kiliibuka mshindi wa jumla wa kampeni ya Mixx by Yas ya “Vuna na Mixx” kwa Kanda ya Kati. Makabidhiano ya zawadi hiyo yamefanyika hivi karibuni katika Maonesho ya Kilimo ya Nane Nane jijini Dodoma.

NBC Yathibitisha Dhamira Utekelezaji wa Mpango wa Rais Samia, Yatoa Mikopo ya Makazi kwa Wakulima 57

2026-08-10T00:32:06.249+03:00

- Yaendelea kukabidhi Malori kwa Vyama vya Ushirika

Kufuatia hatua ya Serikali kukabidhi Shilingi bilioni 300 kwa taasisi saba za kifedha, ikiwemo Benki ya Taifa ya Biashara (NBC), kwa ajili ya kuwawezesha wanawake na vijana katika mnyororo wa thamani wa kilimo, benki hiyo imesisitiza utayari wake wa kutekeleza mpango huo kupitia suluhisho za kifedha bunifu na zinazokidhi mahitaji ya wakulima.

Akihitimisha Maadhimisho ya Maonesho ya Kilimo Nanenane 2026 yaliyofanyika katika Viwanja vya Dkt. John Malecela jijini Dodoma mwishoni mwa wiki, Rais wa Jamhuri ya Muungano wa Tanzania, Dkt. Samia Suluhu Hassan, alikabidhi mfano wa hundi yenye thamani ya Shilingi bilioni 300 kwa wakurugenzi wa taasisi hizo saba za kifedha, akisisitiza umuhimu wa kuongeza fursa za kifedha kwa makundi hayo ya kijamii ili yaweze kushiriki kikamilifu na kunufaika zaidi na fursa zinazotokana na sekta ya kilimo.

Akizungumzia utayari wa benki hiyo kutekeleza mpango huo, Mkurugenzi wa Huduma za Biashara wa NBC, Bw. Jacob Nangi, aliyemwakilisha Mkurugenzi Mkuu wa benki hiyo, Bw. Theobald Sabi, aliishukuru Serikali kwa kuendelea kuiamini NBC katika utekelezaji wa mipango mbalimbali ya uwezeshaji, hususan inayolenga vijana, wanawake na sekta ya kilimo.

Alisema NBC tayari imejipanga kutekeleza dhamira hiyo kwa kuendelea kubuni bidhaa na suluhisho za kifedha zinazokwenda sambamba na mahitaji ya makundi hayo.

“Pamoja na kuipongeza Serikali na Mheshimiwa Rais kwa hatua hiyo na kuona NBC inastahili kuwa mmoja wa wadau muhimu katika kufanikisha mpango huu, nisisitize utayari wetu wa kufanikisha mpango huu kulingana na malengo ya Serikali ya kuwasaidia vijana na wanawake nchini kushiriki na kunufaika kikamilifu na fursa mbalimbali zinazotokana na mnyororo mzima wa sekta ya kilimo,” alisema Bw. Nangi.

Akieleza hatua zinazochukuliwa na NBC kuthibitisha dhamira yake ya kuiwezesha sekta ya kilimo, Bw. Nangi alisema benki hiyo imeendelea kwenda hatua moja zaidi ya utoaji wa huduma za kawaida za kibenki kwa wakulima, kwa kubuni suluhisho zinazolenga changamoto na mahitaji mbalimbali yanayojitokeza katika mnyororo mzima wa thamani.

Katika kilele cha Maonesho hayo, NBC ilikabidhi rasmi malori 13 kwa Vyama Vikuu vya Ushirika vya RUNALI na Lindi Mwambao vya mkoani Lindi, na hivyo kufanya idadi ya malori yaliyotolewa na benki hiyo kwa vyama vya ushirika kufikia 28, baada ya kukabidhi malori mengine 15 kwa vyama vya TANECU na KACU mapema wiki iliyopita. Hatua hiyo inalenga kuongeza uwezo wa vyama hivyo kusafirisha mazao ya wakulima kwa ufanisi zaidi.

Benki hiyo pia ilikabidhi mkopo wa uboreshaji wa makazi kwa Bw. Emmanuel Nyambi Masanja, mkulima na mwanachama wa AMCOS ya Kasandalala, iliyopo Ushetu wilayani Kahama. Bw. Masanja ni miongoni mwa wakulima 57 waliowezeshwa na NBC kupitia mpango wa mikopo ya uboreshaji wa makazi kwa wakulima.

“Jitihada zote hizi zinaakisi mkakati wa NBC wa kwenda hatua moja zaidi ya utoaji wa huduma za kawaida za kibenki kwa wakulima. Tunataka kutoa suluhisho zinazogusa mahitaji muhimu katika mnyororo mzima wa thamani—kuanzia uzalishaji, upatikanaji wa mitaji, usafirishaji na uhifadhi wa mazao hadi kuboresha maisha na makazi ya wakulima,” aliongeza Bw. Nangi.

Akifafanua kuhusu uwezeshaji huo, Mkuu wa Idara ya Kilimo wa NBC, Bw. Raymond Urassa, alisema kati ya malori 13 yaliyokabidhiwa kwenye kilele hicho, 10 yamekwenda kwa RUNALI na matatu kwa Lindi Mwambao.

Alisema uwezeshaji huo unalenga kuongeza uwezo wa vyama hivyo kusafirisha mazao kwa ufanisi, kupunguza changamoto za usafirishaji na hatimaye kuongeza thamani inayobaki kwa wakulima.

“Tofauti na mkopo wa malori 15 mengine tuliyokabidhi kwa Chama Kikuu cha Ushirika cha Tandahimba na Newala (TANECU) na Chama Kikuu cha Ushirika Kahama (KACU) hivi karibuni, mkopo huu kwa RUNALI na Lindi Mwambao una thamani ya zaidi ya Shilingi bilioni 1.5, na unatarajiwa kuboresha ufanisi wa shughuli za ushirika na kuongeza uwezo wa wakulima kufikisha mazao yao kwenye masoko,” alisema Bw. Urassa.

Hafla ya makabidhiano hayo ilishuhudiwa na Mrajis wa Vyama vya Ushirika, Dkt. Benson Ndiege, ambaye alisema uwezeshaji huo unaendana na msisitizo wa Serikali wa kuimarisha ushirikiano kati ya taasisi za fedha na vyama vya ushirika kama njia muhimu ya kuwafikia wakulima wengi zaidi.

Dkt. Ndiege alisema ushirika una nafasi muhimu katika kuwaunganisha wakulima na taasisi rasmi za kifedha, hivyo kuwawezesha kushiriki kikamilifu katika uchumi rasmi na kupata huduma zinazokidhi mahitaji yao.

“Hatua hii inaonyesha upanuzi wa mtazamo wa huduma za kifedha kwa wakulima, ambapo mkulima haonekani tu kama mzalishaji wa mazao, bali pia kama mteja mwenye mahitaji ya kifedha yanayogusa ustawi wa familia yake na maisha yake kwa ujumla,” alisema.

Alisema ameguswa pia na mpango wa NBC wa mikopo ya uboreshaji wa makazi ya wakulima, akieleza kuwa mpango huo unaweza kusaidia kubadilisha mtazamo wa muda mrefu wa kutolipa kipaumbele suala la makazi bora kwa wakulima.

“Zaidi, kupitia mpango huu wa mikopo ya uboreshaji wa makazi, wakulima wengi watashawishika kuingia kwenye ushirika ili wanufaike na fursa hii. Pia watahakikishiwa maboresho ya makazi yao kwa sababu huduma inatangulia, kisha malipo yanafanyika baada ya mkulima kuuza mazao yake. Nawashukuru na kuwapongeza sana NBC kwa kubuni mpango huu,” alisema Dkt. Ndiege.

Kwa upande wao, viongozi wa vyama vya ushirika vilivyonufaika na uwezeshaji huo pamoja na mkulima aliyepokea mkopo wa uboreshaji wa makazi waliipongeza NBC kwa kuendelea kubuni bidhaa zinazolenga mahitaji halisi ya wakulima.

Mwenyekiti wa Lindi Mwambao, Bw. Ismail Nalinga, Mwenyekiti wa RUNALI, Bw. Odas Odas Mpunga, na mkulima Emmanuel Nyambi Masanja, walisema mfumo wa mauzo ya mazao kupitia vyama vya ushirika umeendelea kuimarika na hivyo kuvifanya vyama hivyo kuwa daraja muhimu kati ya wakulima na taasisi rasmi za fedha.

Bw. Mpunga alisema maboresho katika mfumo wa mauzo ya mazao kupitia vyama vya ushirika yameongeza uaminifu na kurahisisha upatikanaji wa huduma za kifedha kwa wakulima.

“Mfumo wa mauzo ya mazao kupitia vyama hivi vya ushirika umeziwezesha benki kama NBC kuwa na msingi unaotuwezesha kunufaika na huduma zao, hususani mikopo, kwa usahihi zaidi. Kwa msingi huo, sisi kama wakulima kwa sasa tumekaribiwa na taasisi za fedha kuliko wakati mwingine wowote,” alisema.

Mkurugenzi wa Huduma za Biashara wa Benki ya NBC, Bw. Jacob Nangi (kushoto) akikabidhi picha ya inayosadifu muonekano wa nyumba iliyofanyiwa maboresho kwa Bw. Emmanuel Nyambi Masanja (kulia), mkulima na mwanachama wa AMCOS ya Kasandalala, iliyopo Ushetu wilayani Kahama ambae ni miongoni mwa wakulima 57 waliowezeshwa na NBC kupitia mpango wa mikopo ya uboreshaji wa makazi kwa wakulima. Tukio hilo lilifanyika mwishoni mwa wiki kwenye Maadhimisho ya Maonesho ya Kilimo Nanenane 2026 yaliyofanyika katika Viwanja vya Dkt. John Malecela jijini Dodoma mwishoni mwa wiki. Wanaoshuhudia ni pamoja na Mrajis wa Vyama vya Ushirika, Dkt. Benson Ndiege pamoja na maofisa wengine wa benki ya NBC.

Akihitimisha Maadhimisho ya Maonesho ya Kilimo Nanenane 2026 yaliyofanyika katika Viwanja vya Dkt. John Malecela jijini Dodoma mwishoni mwa wiki, Rais wa Jamhuri ya Muungano wa Tanzania, Dkt. Samia Suluhu Hassan (katikati) alikabidhi mfano wa hundi yenye thamani ya Shilingi bilioni 300 kwa wakurugenzi wa taasisi saba za kifedha ikiwemo NBC akilenga kuongeza fursa za kifedha kwa wanawake na vijana waweze kushiriki kikamilifu na kunufaika zaidi na fursa zinazotokana na sekta ya kilimo.

Mkuu wa Idara ya Kilimo wa NBC, Bw. Raymond Urassa (wa pili kulia) akifafanua kuhusu huduma mbalimbali za benki hiyo mahususi kwa wakulima mbele Mrajis wa Vyama vya Ushirika, Dkt. Benson Ndiege pamoja na wadau wengine.

Mkurugenzi wa Huduma za Biashara wa Benki ya NBC, Bw. Jacob Nangi (wa pili kushoto) akimkabidhi mfano wa ufunguo wa gari Mwenyekiti wa chama cha ushirika cha Lindi Mwambao, Bw. Ismail Nalinga (wa pili), ikiwa ni ishara ya makabidhiano rasmi ya malori matatu (3) yaliyowezeshwa kupitia mkopo wenye riba nafuu kutoka Benki ya Taifa ya Biashara (NBC). Malori hayo yanalenga kuboresha usafirishaji wa mazao, kuongeza ufanisi wa shughuli za ushirika na kuimarisha kipato cha wakulima. Wanaoshuhudia ni pamoja na Mkuu wa Idara ya Kilimo wa NBC, Bw. Raymond Urassa (kulia) na Meneja wa Benki ya NBC tawi la Dodoma Bi Happyness Kizigira (kushoto)

Mkurugenzi wa Huduma za Biashara wa Benki ya NBC, Bw. Jacob Nangi (wa pili kushoto) akimkabidhi mfano wa ufunguo wa gari Mwenyekiti wa Chama cha Ushirika cha RUNALI, Bw. Odas Odas Mpunga (wa pili), ikiwa ni ishara ya makabidhiano rasmi ya malori kumi (10) yaliyowezeshwa kupitia mkopo wenye riba nafuu kutoka Benki ya Taifa ya Biashara (NBC). Malori hayo yanalenga kuboresha usafirishaji wa mazao, kuongeza ufanisi wa shughuli za ushirika na kuimarisha kipato cha wakulima. Wanaoshuhudia ni pamoja na Mkuu wa Idara ya Kilimo wa NBC, Bw. Raymond Urassa (kulia) na Meneja wa Benki ya NBC tawi la Dodoma Bi Happyness Kizigira (kushoto)

Mkurugenzi wa Huduma za Biashara wa Benki ya NBC, Bw. Jacob Nangi (katikati) akionyesha cheti cha kutambua ushiriki na udhamini wa benki hiyo kwenye Maonesho ya Kilimo Nanenane2026 yaliyofanyika katika Viwanja vya Dkt. John Malecela jijini Dodoma mwishoni mwa wiki. Wengine wanaoonesha ishara ya ‘Tunakuona mbali’ ni maofisa waandamizi wa benki hiyo.

Tunakuona mbali mkulima

Viongozi mbalimbali wa serikali waliapata wasaa wa kutembelea banda la NBC lilikuwepo kwenye Maonesho ya Kilimo Nanenane2026 yaliyohitimishwa katika Viwanja vya Dkt. John Malecela jijini Dodoma mwishoni mwa wiki.

Mwanachama wa TBN Veronica Mrema atajwa tuzo ya ISU Elihle 2026 - Afrika

2026-08-08T14:49:53.627+03:00

Na Mwandishi Wetu

Mtanzania Veronica Mrema , mwanachama wa Mtandao wa Mabloga Tanzania , TBN, anayeendesha jukwaa la kidijiti la M24 TANZANIA MEDIA ni miongoni mwa waandishi wa habari sita waliochaguliwa kuendelea na mchakato wa tuzo za ISU Elihle kwa mwaka 2026 Barani Afrika.

Veronica ametajwa katika orodha hiyo baada ya wazo lake la habari kuhusu watoto wanaoishi na ugonjwa wa Siko Seli kupitiwa, na kuonekana ni bora.

Jopo la majaji wa tuzo hizo limesema kulikuwa na mawazo 155 ambayo walipokea kutoka nchi mbalimbali za Afrika.

Hatua ya Veronica kutajwa kwenye tuzo hiyo inaongeza rekodi nzuri katika uandishi wa habari za afya na maendeleo na kuiweka Tanzania katika nafasi ya kuendelea kutoa waandishi wa habari wanaotumia kalamu zao kuibua changamoto za watoto na kuchochea mabadiliko yenye manufaa kwa jamii.

Kupitia wazo lake lililochaguliwa Veronica atafanya uchunguzi na kuibua simulizi kuhusu mzigo unaoongezeka wa ugonjwa wa Siko Seli miongoni mwa watoto nchini Tanzania, akiangazia kwa kina namna ugonjwa huo unavyoathiri maisha ya watoto, kuanzia afya zao, lishe, elimu, ukuaji wa kimwili, pamoja na ustawi wao wa kihisia na kisaikolojia.

Kwa mujibu wa takwimu za Wizara ya Afya, idadi ya watoto wanaozaliwa na ugonjwa wa Siko Seli nchini imeongezeka kutoka takribani watoto 8,000 hadi 14,000 kila mwaka, hali inayoifanya Tanzania kuwa miongoni mwa nchi zenye mzigo mkubwa wa ugonjwa huo Afrika na duniani.

Tanzania inatajwa kuwa miongoni mwa nchi tatu zenye idadi kubwa ya watoto wanaozaliwa na ugonjwa huo Barani Afrika kila mwaka huku ikishika nafasi ya nne duniani.

Pamoja na ukubwa wa tatizo hilo, bado kuna watoto bado hukumbana na changamoto za kuchelewa kugundulika, ukosefu wa huduma maalum za matibabu na uelewa mdogo wa jamii kuhusu ugonjwa huo.

Veronica atakusanya simulizi za watoto wanaoishi na Siko Seli, wazazi na walezi wao, wataalamu wa afya, wataalamu wa lishe pamoja na watunga sera, kwa lengo la kuonesha hali halisi ya maisha yao na kuibua suluhisho zinazoweza kuboresha afya na ustawi wa watoto hao.

Akizungumza baada ya kutangazwa kuwa mmoja wa washindi, Veronica amesema amepokea kwa heshima kubwa kutajwa katika orodha hiyo ya ISU Elihle.

"Ni fursa ya kuendelea kutumia uandishi wa habari kuleta mabadiliko chanya katika jamii.

"Kuchaguliwa miongoni mwa waandishi sita kutoka kazi 155 zilizowasilishwa ni heshima kubwa kwangu na kwa Tanzania. Lakini zaidi ya yote, ni nafasi ya kuhakikisha sauti za watoto wanaoishi na Siko Seli zinasikika.

"Ninaamini simulizi hizi zitasaidia kuongeza uelewa wa jamii na kuhimiza uwekezaji zaidi katika uchunguzi wa mapema, huduma za afya na lishe kwa watoto hawa," amesema.

Ameongeza atatumia uandishi wa habari unaozingatia ushahidi, takwimu na simulizi za wahusika ili kuonesha changamoto halisi zinazowakabili watoto wenye Siko Seli na kuibua mijadala itakayochochea maboresho ya sera na huduma za afya.

ISU Elihle Award inalenga kuhamasisha uandishi wa habari unaoweka watoto katikati ya simulizi na unaochochea mijadala yenye kuleta mabadiliko ya sera, uwajibikaji na hatua za kuboresha ustawi wa watoto barani Afrika.

Pamoja na Veronica Mrema wa Tanzania, washindi wengine wa ISU Elihle Award 2026 ni David Arome wa The Development Report (Nigeria) na Hind Fawzi wa Medina FM (Morocco), Rakiya Mohamed wa Blueprint (Nigeria), Wezzie Joy Gausi wa Times Group (Malawi) na Kelvin Tambo wa Capital Radio (Malawi).

Kupitia tuzo hiyo, washindi watapata fursa ya kutekeleza miradi yao ya uandishi kwa msaada wa wahariri na wataalamu wa uandishi wa habari, pamoja na ushauri wa kitaalamu (mentorship) ili kuhakikisha simulizi hizo zinafikia viwango vya juu vya ubora na kuleta athari chanya kwa jamii.

Katika hatua hii, pia watapewa kiasi cha R.10,000 ili kwenda kutekeleza miradi ya uandishi wa makala kulingana na mawazo yao ya habari ambayo waliyawasilisha katika mchakato huo wa kwanza.

Baadae kazi zao zitapitia mchakato wa awamu ya pili ambapo zitashindanishwa ili kupata washindi watatu bora, miongoni mwao.

NIDHAMU YA KIFEDHA YAWALIPA WAKULIMA; EFTA YAREJESHA TAKRIBANI SHILINGI MILIONI 100, YAFIKIA NPL YA ASILIMIA 1

2026-08-07T22:52:01.173+03:00

Mkurugenzi Mtendaji wa EFTA Bw Nicomed Bohay akizungumza na waandishi wa habari jijini Arusha wakati wa hafla ya kukabidhi hudhi za rejesho la asilimia hamsini.

Mkurugenzi Mtendaji wa Equity for Tanzania Limited (EFTA), Bw. Nicomed Bohay (kushoto), akimkabidhi Bi. Elimiti Mushi hundi ya rejesho la asilimia 50 ya riba kwa niaba ya mume wake, Bw. Elimiti Mushi (katikati), mmoja wa wakulima 37 walionufaika na Mpango wa EFTA wa Urejeshaji wa Asilimia 50 ya Riba (Interest Rebate Programme) baada ya kurejesha mkopo wake wa mashine za kilimo kwa wakati na kwa kuzingatia nidhamu ya kifedha. Kupitia mpango huo, EFTA imerejesha takribani Shilingi milioni 100 kama rejesho la riba kwa wakulima wanaotekeleza kwa uaminifu wajibu wao wa kurejesha mikopo kwa wakati.

Mkurugenzi Mtendaji wa Equity for Tanzania Limited (EFTA), Bw. Nicomed Bohay (kushoto), akimkabidhi Bw. Lawei Akonaay wa Babati, Mkoa wa Manyara (kulia), hundi ya rejesho la asilimia 50 ya riba baada ya kukamilisha marejesho ya mkopo wake wa mashine za kilimo kwa wakati na kwa kuzingatia masharti ya mkataba.

Mkurugenzi Mtendaji wa Equity for Tanzania Limited (EFTA), Bw. Nicomed Bohay (kushoto), akimkabidhi Bw. Sebastian Gwaltu wa Gehandu, Mkoa wa Manyara (kulia), hundi ya rejesho la asilimia 50 ya riba baada ya kukamilisha marejesho ya mkopo wake wa mashine za kilimo kwa wakati na kwa kuzingatia masharti ya mkataba.

Mkurugenzi Mtendaji wa Equity for Tanzania Limited (EFTA), Bw. Nicomed Bohay (kushoto), akimkabidhi Bw. Pascali Gwasma wa Katesh, Mkoa wa Manyara (kulia), hundi ya rejesho la asilimia 50 ya riba baada ya kukamilisha marejesho ya mkopo wake wa mashine za kilimo kwa wakati na kwa kuzingatia masharti ya mkataba.

Mkurugenzi Mtendaji wa Equity for Tanzania Limited (EFTA), Bw. Nicomed Bohay (kushoto), akimkabidhi Bw. Patrice Boay wa Katesh, Mkoa wa Manyara (kulia), hundi ya rejesho la asilimia 50 ya riba baada ya kukamilisha marejesho ya mkopo wake wa mashine za kilimo kwa wakati na kwa kuzingatia masharti ya mkataba.

Mkurugenzi Mtendaji wa Equity for Tanzania Limited (EFTA), Bw. Nicomed Bohay (katikati), akiwa katika picha ya pamoja na wawakilishi wa wakulima walionufaika na Mpango wa EFTA wa Urejeshaji wa Asilimia 50 ya Riba (Interest Rebate Programme) baada ya hafla ya kukabidhi hundi za rejesho la asilimia 50 ya riba iliyofanyika wakati wa Maonesho ya Nanenane 2026 jijini Arusha. Kupitia mpango huo, EFTA imerejesha takribani Shilingi milioni 100 kama rejesho la riba kwa wakulima 37, ikiwa ni kutambua nidhamu yao ya kifedha na marejesho ya mikopo kwa wakati.

Mkurugenzi Mtendaji wa Equity for Tanzania Limited (EFTA), Bw. Nicomed Bohay (katikati), akiwa katika picha ya pamoja na baadhi ya wafanyakazi wa EFTA kutoka Matawi ya Arusha na Moshi wakati wa hafla ya kukabidhi hundi za rejesho la asilimia 50 ya riba kwa wakulima walionufaika na Mpango wa EFTA wa Urejeshaji wa Asilimia 50 ya Riba (Interest Rebate Programme), iliyofanyika katika Maonesho ya Nanenane 2026 jijini Arusha. Kupitia mpango huo, EFTA imerejesha takribani Shilingi milioni 100 kwa wakulima 37 ikiwa ni kutambua nidhamu yao ya kifedha na marejesho ya mikopo kwa wakati.

Na Mwandishi wetu, Arusha

Equity for Tanzania Limited (EFTA) imewarejeshea wakulima 37 takribani Shilingi milioni 100 kama sehemu ya mpango wake wa Interest Rebate Programme, unaolenga kuwazawadia wateja wanaorejesha mikopo yao kwa wakati na kwa kufuata masharti ya mikataba yao.

Mpango huo, ambao umefanyika kwa miaka miwili mfululizo, umehusisha kurejeshwa kwa Shilingi milioni 43 kwa wakulima 15 mwaka 2025 na Shilingi milioni 53 kwa wakulima 22 mwaka 2026, na kufikisha jumla ya takribani Shilingi milioni 100 kwa wakulima 37.

Akizungumza katika hafla ya kukabidhi fedha hizo iliyofanyika kwenye banda la EFTA wakati wa Maonesho ya Nanenane 2026 jijini Arusha, Mkurugenzi Mtendaji wa EFTA, Bw. Nicomed Bohay, alisema mpango huo ni sehemu ya mkakati wa kampuni wa kujenga utamaduni wa nidhamu ya kifedha kwa wateja wake.

"Interest Rebate Programme ni zaidi ya kurejesha sehemu ya riba kwa wateja wetu. Tunataka kuwajengea wakulima utamaduni wa nidhamu ya kifedha kwa kuwaonyesha kuwa kulipa mkopo kwa wakati kuna manufaa ya moja kwa moja," alisema.

Alisema nidhamu ya marejesho iliyoonyeshwa na wakulima hao imechangia kwa kiasi kikubwa kuimarika kwa utendaji wa kampuni.

Kwa mujibu wa Bw. Bohay, hadi kufikia mwezi Juni mwaka huu, EFTA imefikia kiwango cha asilimia moja (1%) cha mikopo chechefu (Non-Performing Loans – NPL), kiwango ambacho ni miongoni mwa viwango vya chini zaidi katika sekta ya taasisi za fedha nchini.

Alieleza kuwa mafanikio hayo yana uzito mkubwa zaidi kwa kuwa EFTA inajihusisha na ufadhili wa mali zinazohamishika, zikiwemo matrekta, mashine za kilimo, magari ya biashara na vifaa vingine vya uzalishaji ambavyo kwa kawaida hubeba kiwango kikubwa zaidi cha hatari ya mikopo.

"Nidhamu waliyoionyesha wakulima hawa ndiyo imechangia EFTA kufikia kiwango hiki cha NPL. Hii inatuwezesha kuendelea kuwafikia wakulima wengi zaidi kwa huduma za ufadhili wa mashine na vifaa vya uzalishaji," alisema.

Mbali na kuwanufaisha wakulima hao kwa kurejeshewa sehemu ya riba, uwekezaji walioufanya kupitia mashine na vifaa vilivyofadhiliwa na EFTA umechangia kufunguliwa kwa zaidi ya ajira 300.

Ajira hizo zinahusisha madereva wa matrekta, waendesha mitambo, mafundi, waendeshaji wa mashine pamoja na vibarua wanaoshiriki katika shughuli mbalimbali za uzalishaji na uchakataji wa mazao.

Kupitia mashine hizo, wakulima wameongeza uzalishaji, kupunguza gharama za shughuli za kilimo na kuboresha thamani ya mazao yao.

Mmoja wa wanufaika wa mpango huo, Erimiti Mushi kutoka Arusha, alisema mashine aliyopata kupitia EFTA imemwezesha kuongeza uzalishaji na kuwahudumia wakulima wengine wanaohitaji huduma za kilimo cha mashine.

"Fedha tulizorejeshewa ni motisha kubwa kwetu. Zinathibitisha kwamba taasisi hii inathamini wateja wanaorejesha mikopo yao kwa wakati," alisema.

Naye Sebastian Gwaltu kutoka Katesh, mkoani Manyara, alisema ufadhili wa mashine za uzalishaji umemsaidia kuongeza ufanisi katika shughuli zake za kilimo kuanzia maandalizi ya mashamba hadi uchakataji wa mazao.

Alisema fedha alizorejeshewa kupitia mpango huo zitamuwezesha kuendelea kuwekeza katika shughuli zake za uzalishaji.

Mbali na hafla hiyo, EFTA imeendelea kutumia Maonesho ya Nanenane 2026 kuwaelimisha wakulima kuhusu fursa za kupata ufadhili wa matrekta, power tillers, mashine za uchakataji wa mazao na vifaa vingine vya uzalishaji vinavyosaidia kuongeza tija katika kilimo.

Katika maonesho hayo, mamia ya wakulima na wadau wa sekta ya kilimo wameendelea kutembelea banda la EFTA kupata elimu kuhusu huduma za kampuni hiyo na namna zinavyoweza kuwasaidia kukuza shughuli zao za kiuchumi.

Kwa mujibu wa EFTA, mpango wa Interest Rebate unaonyesha kuwa huduma za kifedha zinaweza kuwa zaidi ya utoaji wa mikopo. Kupitia kuhamasisha nidhamu ya marejesho, kampuni imeweza kurejesha takribani Shilingi milioni 100 kwa wakulima 37, kufikia kiwango cha asilimia 1 cha mikopo chechefu (NPL) na wakati huo huo kuchangia kuundwa kwa zaidi ya ajira 300 kupitia uwekezaji wa wakulima hao katika mashine na vifaa vya uzalishaji.

DMI YAWAHIMIZA VIJANA KUJIUNGA NA UBAHARIA, YATAJA FURSA ZILIZOPO

2026-08-06T09:51:15.737+03:00

Chuo cha Bahari Dar es Salaam (DMI) kimewahimiza vijana, hususan mabinti, kuchangamkia fursa za masomo katika sekta ya bahari, kikieleza kuwa wahitimu wa chuo hicho wana nafasi kubwa ya kupata ajira ndani na nje ya nchi kutokana na mahitaji makubwa ya wataalamu wa sekta hiyo.

Akizungumza na waandishi wa habari katika banda la DMI kwenye Maonesho ya Kilimo ya NaneNane Kitaifa yanayoendelea jijini Dodoma, Agosti 4, 2026, Mkufunzi Msaidizi wa chuo hicho, Baharia Jackline Lema, amesema ushiriki wa DMI katika maonesho hayo unalenga kutoa elimu kwa umma kuhusu kozi mbalimbali zinazotolewa na chuo hicho pamoja na fursa zilizopo katika sekta ya bahari.

Lema ameeleza kuwa wanafunzi wanaochagua kusoma ubaharia hawatajutia uamuzi wao, kwani taaluma hiyo ina fursa nyingi za ajira na maendeleo ya kitaaluma.

Amesema DMI inatoa kozi mbalimbali ikiwemo unahodha, uhandisi ikiwemo mafuta na gesi pamoja na fani nyingine zinazohusiana na sekta ya bahari, amebainisha kuwa mwitikio wa wanafunzi umeendelea kuongezeka kila mwaka, ambapo zaidi ya wanafunzi 2,000 walihitimu katika mwaka wa masomo 2025/2026, jambo linaloonyesha kuongezeka kwa uelewa wa jamii kuhusu umuhimu wa sekta hiyo.

Aidha, amesema DMI ni chuo cha serikali kinachopokea wanafunzi wanaokidhi vigezo vya udahili na kwamba dirisha la maombi ya ngazi ya cheti na diploma litafunguliwa rasmi Agosti 23, 2026, huku udahili wa shahada na uzamili ukiendelea kwa mwaka wa masomo 2026/2027.

Lema amesema wahitimu wa DMI hupata nafasi za ajira katika taasisi mbalimbali za serikali ikiwemo TASHICO, TASAC na TPA, kampuni za usafirishaji, kampuni za mafuta na gesi,kampuni za usafirishaji na baadhi ya maeneo mengine ya kazi ndani na nje ya Tanzania kulingana na mahitaji ya soko la ajira duniani.

Akizungumzia dhana iliyokuwepo hapo awali kuwa ubaharia ni taaluma ya wanaume pekee, amesema idadi ya wanawake wanaojiunga na fani hiyo imeongezeka kwa kiwango kikubwa, hali ambayo imeondoa mtazamo huo na kuonyesha kuwa wanawake wana uwezo mkubwa wa kufanya vizuri katika sekta ya bahari.

Pia ameeleza namna wanafunzi wa DMI wanavyopata vipaumbele na fursa mbalimbali za ufadhili wa masomo pamoja na mikopo ya Serikali inayoratibiwa na HESLB, Samia Scholarship kwa baadhi ya programu, mikopo ya Serikali ya Mapinduzi Zanzibar pamoja na METFUND kwa wanaosoma kozi zinazohusiana na ubaharia.

Amesisitiza kuwa wahitimu wa DMI wameendelea kuwa miongoni mwa wataalamu wanaohitajika zaidi katika soko la ajira la kimataifa, jambo linaloifanya sekta ya bahari kuwa chaguo bora kwa vijana wanaotafuta taaluma yenye ajira za uhakika na mchango mkubwa katika maendeleo ya uchumi wa Taifa.

TMDA YATOA ELIMU KUHUSU MATUMIZI SAHIHI YA DAWA ZA MIFUGO NA KUHAMASISHA UWEKEZAJI NANENANE DODOMA

2026-08-06T09:45:13.854+03:00

Mamlaka ya Dawa na Vifaa Tiba (TMDA) imesema ushiriki wake katika Maonesho ya Nanenane 2026 unalenga kutoa elimu kwa wananchi kuhusu matumizi sahihi ya dawa za mifugo, taratibu za udhibiti wa bidhaa za dawa na vifaa tiba, pamoja na kuhamasisha uwekezaji katika viwanda vya kutengeneza dawa za mifugo nchini.

Akizungumza katika mahojiano maalum yaliyofanyika kwenye banda la TMDA katika Maonesho ya Nanenane yanayoendelea kitaifa jijini Dodoma, Meneja wa TMDA Kanda ya Kati, Sonia Mkumbwa, amesema mamlaka hiyo imeona ni muhimu kushiriki maonesho hayo ili kuwafikia wadau wa sekta ya kilimo na mifugo pamoja na wananchi kwa ujumla.

Amesema TMDA ina jukumu la kudhibiti ubora, usalama na ufanisi wa dawa na vifaa tiba vinavyotumika kwa binadamu na mifugo, hivyo maonesho hayo ni fursa muhimu ya kutoa elimu kuhusu huduma na majukumu ya mamlaka hiyo.

“Moja ya majukumu yetu makubwa ni kutoa elimu kwa umma. Tunatumia maonesho haya kuwaeleza wananchi matumizi sahihi ya dawa za mifugo, pamoja na kushirikiana na taasisi nyingine za umma, sekta binafsi na wajasiriamali katika kuimarisha huduma za afya ya mifugo,” amesema.

Mkumbwa ameeleza kuwa, TMDA ndiyo mamlaka yenye dhamana ya kusimamia uingizaji wa dawa za mifugo nchini, ambapo kila bidhaa inapaswa kusajiliwa na kupata kibali kabla ya kuingizwa nchini.

Amesema kabla ya usajili, mamlaka hufanya tathmini ya kina ili kuhakikisha bidhaa hizo zinakidhi viwango vya ubora, usalama na ufanisi, hatua inayolenga kulinda afya ya mifugo na watumiaji wa bidhaa zinazotokana na mifugo.

Aidha, amewataka wafugaji, wafanyabiashara na wadau wote wa sekta ya mifugo kuhakikisha wanatumia dawa zilizosajiliwa na kufuata taratibu zilizowekwa na TMDA.

Mbali na udhibiti wa dawa na vifaa tiba, Mkumbwa amesema TMDA inaendelea kuhamasisha wawekezaji kuanzisha viwanda vya kutengeneza dawa za mifugo na vifaa tiba nchini ili kuongeza uzalishaji wa ndani na kupunguza utegemezi wa bidhaa kutoka nje.

Amebainisha kuwa mamlaka hiyo ipo tayari kuwapa wawekezaji mwongozo na ushauri katika hatua zote za uanzishaji wa viwanda, ikiwa ni sehemu ya kuunga mkono juhudi za Serikali chini ya Rais Dkt. Samia Suluhu Hassan za kuimarisha uchumi wa viwanda na kuongeza thamani ya uzalishaji wa ndani.

Kwa upande wa huduma za uchunguzi wa maabara, Mkumbwa amesema TMDA ina maabara yenye ithibati ya Shirika la Afya Duniani (WHO), zinazofanya uchunguzi wa dawa za mifugo na vifaa tiba ili kuhakikisha bidhaa zinazotumika nchini zinakidhi viwango vinavyotakiwa.

Amesema huduma hizo zinapatikana katika makao makuu ya TMDA jijini Dodoma na katika maabara zake zilizopo Dar es Salaam.

Mkumbwa ametoa wito kwa wananchi, wafugaji na wawekezaji kutembelea banda la TMDA katika Maonesho ya Nanenane ili kupata elimu, ushauri na huduma mbalimbali zinazotolewa na mamlaka hiyo.

“Afya ya mifugo ni msingi wa usalama wa chakula na afya ya binadamu. Hivyo ni muhimu kuhakikisha bidhaa zote zinazotumika kutibu mifugo zinakuwa salama, bora na zenye ufanisi,” amesema.

ZAIDI YA WATANZANIA 90 WANUFAIKA NA KAMPENI YA “IKIINGIA TU GOLI”

2026-07-28T17:04:34.556+03:00

Kampuni ya huduma za fedha kidijitali Mixx imewataka Watanzania kuendelea kutumia huduma zake huku ikitangaza kuwa droo ya mwisho ya kampeni ya "Ikiingia Tu Goli" itafanyika wiki ijayo, ambapo mshindi mmoja atajishindia Shilingi milioni 50.

Akizungumza wakati wa kukabidhi zawadi kwa washindi wa droo ya tisa ya kampeni hiyo inayofanyika kwa ushirikiano na Hisense, Mkuu wa Idara ya Makampuni na Washirika - Mixx, Bw. Justine Lawena, alisema kampeni hiyo imeendelea kuwahamasisha Watanzania kutumia huduma za kifedha kidijitali huku ikiwazawadia fedha taslimu na vifaa mbalimbali.

Katika droo hiyo, washindi 10 walipatikana, ambapo saba walijishindia Shilingi milioni moja kila mmoja, huku watatu wakijishindia vifaa vya Hisense. Lawena alisema hadi sasa kampeni hiyo imewazawadia zaidi ya Watanzania 90 tangu ilipoanza.

"Fainali za Kombe la Dunia zimekwisha, lakini fainali ya kampeni yetu ndiyo inafuata wiki ijayo. Hapo ndipo tutampata mshindi wa Shilingi milioni 50. Bado kila Mtanzania ana nafasi ya kushinda kwa kutumia Mixx Super App," alisema Lawena.

Alisema ili kushiriki droo ya mwisho, mteja anatakiwa kutumia Mixx Super App kufanya miamala kama kutuma na kupokea fedha, kulipa bili na kufanya malipo ya Serikali.

Lawena aliwataka wateja kuwa makini wanapopigiwa simu kutoka namba 100, akieleza kuwa hiyo ndiyo namba rasmi ya kuwataarifu washindi.

"Tunawakumbusha wateja kupokea simu kutoka namba 100. Usipoipokea unaweza kupoteza fursa ya kuthibitisha ushindi wako. Bado una nafasi ya kushinda kwa kuendelea kutumia Mixx Super App," alisema.

Mmoja wa washindi wa Shilingi milioni moja, Bw. David Kisusi, alisema ushindi huo umempa motisha zaidi kuendelea kutumia Mixx kutokana na urahisi na usalama wa huduma zake.

"Nimekuwa nikitumia Mixx kwa shughuli zangu za kila siku na ninaweza kulipia bili mbalimbali kwa urahisi kupitia simu yangu. Kinachonivutia zaidi ni usalama wa huduma hizi, kwani hata muamala unapokwenda kimakosa, kuna msaada wa haraka wa kuuzuia au kuurejesha," alisema Kisusi.

Kampeni ya "Ikiingia Tu Goli", inayofanyika kwa ushirikiano kati ya Mixx na Hisense, inalenga kuhamasisha matumizi ya huduma za kifedha kidijitali nchini huku mshindi wa mwisho akitarajiwa kujishindia Shilingi milioni 50.
Mkuu wa Idara ya Makampuni na Washirika wa Mixx, Justine Lawena (kushoto), akimkabidhi mfano wa hundi yenye thamani ya Shilingi milioni moja kwa Bw. David Kisusi, mmoja wa washindi wa kampeni ya "Ikiingia tu Goli", wakati wa hafla ya kukabidhi zawadi iliyofanyika katika ofisi za kampuni jijini Dar es Salaam mwishoni mwa wiki. Kampeni hiyo, inayoendeshwa kwa ushirikiano na Hisense, imefanikiwa kuwazawadia zaidi ya Watanzania 90 fedha taslimu na vifaa vya kielektroniki kwa kutumia huduma za kifedha kidijitali za Mixx, huku mshindi wa zawadi kuu ya Shilingi milioni 50 akitarajiwa kutangazwa katika droo ya mwisho wiki ijayo.

MAKAMU WA RAIS BALOZI DKT. NCHIMBI, ATEMBELEA UWANJA WA AFCON ARUSHA

2026-07-28T17:00:23.538+03:00

Makamu wa Rais wa Jamhuri ya Muungano wa Tanzania Mhe. Balozi Dkt. Emmanuel Nchimbi ametembelea na kukagua maendeleo ya ujenzi wa Uwanja wa Arusha, utakaotumika katika michuano ya Kombe la Mataifa ya Afrika mwaka 2027 (AFCON 2027), unaojengwa Jijini Arusha.

Makamu wa Rais amepongeza maendeleo ya ujenzi wa uwanja huo, ambapo amesema ni faraja kuona ahadi ya Rais wa Jamhuri ya Muungano wa Tanzania Mhe. Dkt. Samia Suluhu Hassan aliyoitoa ili kuvutia michuano hiyo kufanyika nchini Tanzania, inatakelezwa kikamilifu. Amemshukuru Mhe. Rais kwa kuendelea kutoa fedha ili kuhakikisha uwanja huo unakamilika kwa wakati.

Aidha, Makamu wa Rais ameishukuru Wizara ya Habari, Utamaduni, Sanaa na Michezo pamoja na mkoa wa Arusha, Wakandarasi na Mshauri Elekezi kwa kazi kubwa waliyofanya katika Uwanja huo.

Makamu wa Rais amewataka Viongozi wa Wizara pamoja na Mkoa wa Arusha kusimamia vema agizo la Rais Dkt. Samia Suluhu Hassan la kuhakikisha barabara zinazotumika katika kufika uwanjani hapo zinakamilika kwa wakati.

Awali Mkuu wa Mkoa wa Arusha Mhe. Amos Makala, amemueleza Makamu wa Rais, maendeleo ya ujenzi wa uwanja huo ambao umefikia asilimia 88, ukitarajiwa kukamilika ifikapo mwishoni mwa mwezi Agosti, 2026.

Uwanja wa Arusha, utakapokamilika, mbali na michezo, unatarajiwa kuwa kivutio cha utalii ukiwa umebeba alama ya Mlima Kilimanjaro, Madini ya Tanzanite na Bendera ya Taifa.

NMB YAMKABIDHI SIMBU SH MILIONI 10 KUMUANDAA KUSHAMBULIA DHAHABU SYDNEY MARATHON

2026-07-28T16:57:45.944+03:00

Na Mwandishi Wetu, Arusha

Benki ya NMB imekabidhi udhamini wa Sh10 milioni kwa mwanariadha wa Tanzania, Alphonce Simbu, ili kumsaidia katika maandalizi ya kushiriki mbio za TCS Sydney Marathon 2026 zitakazofanyika Agosti 30, 2026 jijini Sydney, Australia.

Udhamini huo unalenga kumpunguzia Simbu changamoto za kifedha wakati wa maandalizi, ili aweze kuelekeza nguvu zake zote kwenye mazoezi na kuiwakilisha Tanzania vyema katika mashindano hayo ya kimataifa.

Akimkabidhi Simbu hundi ya udhamini huo jijini Arusha, Meneja wa NMB Kanda ya Kaskazini, Baraka Ladislaus, alisema benki hiyo imeamua kuwa sehemu ya safari ya mwanariadha huyo kutokana na rekodi yake ya kuendelea kuipeperusha bendera ya Tanzania katika mashindano mbalimbali ya kimataifa.

Alisema NMB inaamini mchango huo utampa utulivu wa kufanya maandalizi yake bila vikwazo vya kifedha.

"Tunamwamini Simbu kwa sababu ameendelea kuiandikia Tanzania historia katika mchezo wa riadha. Tunaamini hata safari hii atafanya makubwa na kuendelea kulitangaza taifa letu," alisema Ladislaus.

Alimtakia Simbu maandalizi mema na mafanikio makubwa katika mashindano hayo.

Mbali na fedha hizo, NMB pia ilimkabidhi Simbu kadi ya benki pamoja na NMB Band, bangili ya malipo ya kidijitali inayotolewa kwa ushirikiano na Mastercard, ambayo itamwezesha kufanya malipo salama na kwa urahisi katika maeneo mbalimbali duniani yanayokubali Mastercard au Visa.

Kwa mujibu wa Ladislaus, huduma hiyo itarahisisha miamala ya kifedha ya mwanariadha huyo wakati wote wa safari na kipindi cha mashindano.

Akizungumza baada ya kupokea udhamini huo, Simbu alisema maandalizi yake yanaendelea vizuri na afya yake ipo katika hali nzuri huku akieleza kuwa analenga kutwaa medali ya dhahabu nchini Australia.

"Maandalizi yanaendelea vizuri na nina afya njema. Niko tayari kwa changamoto ya Sydney Marathon na nina imani kubwa ya kufanya vizuri. Lengo langu ni kurudi nyumbani na medali ya dhahabu," alisema Simbu.

Aliwataka Watanzania kuendelea kumuombea ili afanikiwe kutimiza ndoto hiyo na kuiletea nchi heshima.

Katika hatua nyingine, Rais wa Shirikisho la Riadha Tanzania (RT), Rogath Steven, alisema maandalizi ya wanariadha yanaendelea vizuri chini ya usimamizi wa shirikisho.

Alisema Simbu pamoja na mwanariadha Magdalena Shauri wamekuwa wakifanya mazoezi katika eneo la Ilboru, Arusha, kutokana na mazingira na hali ya hewa inayofanana kwa kiasi kikubwa na ile ya Sydney.

"Maandalizi yanaendelea vizuri na tuna imani kubwa na wanariadha wetu. Tunaamini Tanzania ina nafasi nzuri ya kupigania medali ya dhahabu katika mashindano hayo," alisema Steven.

TCS Sydney Marathon ni miongoni mwa marathon kubwa duniani na mwaka huu inatarajiwa kushirikisha zaidi ya wakimbiaji 40,000 kutoka mataifa mbalimbali. Mbio za kilomita 42 zitaanzia Miller Street na kumalizikia katika eneo la Sydney Opera House Forecourt.

Dkt. Mwigulu Nchemba Aongoza Washiriki Zaidi ya 13,000 NBC Dodoma Marathon; Shilingi Bilioni 1 Zakusanywa Kuokoa Maisha ya Mama na Mtoto

2026-07-28T16:51:29.808+03:00

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, leo ameongoza zaidi ya washiriki 13,000 katika mbio za NBC Dodoma Marathon 2026 zilizofanyika katika Uwanja wa Jamhuri jijini Dodoma, huku akiipongeza Benki ya Taifa ya Biashara (NBC) kwa kufanikisha ukusanyaji wa shilingi bilioni 1 zitakazotumika kuokoa maisha ya maelfu ya Watanzania kupitia miradi ya afya ya mama na mtoto.

Fedha hizo zitasaidia utekelezaji wa maeneo matatu muhimu ya kijamii ambayo ni kupunguza vifo vya akina mama na watoto wakati wa kujifungua, kugharamia upasuaji wa watoto wenye matatizo ya moyo, pamoja na kuimarisha huduma za upandikizaji wa uloto kwa watoto wanaoishi na ugonjwa wa selimundu (Sickle Cell).

Mbio hizo, ambazo zimeendelea kujijengea hadhi kama moja ya matukio makubwa zaidi ya michezo nchini, zilihusisha washiriki kutoka Tanzania na mataifa mbalimbali, huku zikishuhudia ushindani mkubwa kati ya wanariadha wa Tanzania na Kenya katika mbio za kilomita 21 na 42. Dkt. Nchemba, pamoja na viongozi mbalimbali wa Serikali, taasisi na sekta binafsi, walishiriki mbio za kilomita tano (5) kuhamasisha mazoezi na maisha yenye afya.

Akizungumza wakati wa hafla ya kukabidhi zawadi kwa washindi na wadau wa mbio hizo, Dkt. Nchemba alisema mafanikio ya NBC Dodoma Marathon yanaonesha jinsi ushirikiano kati ya Serikali na sekta binafsi unavyoweza kuleta matokeo yenye manufaa makubwa kwa jamii.

Alisema ongezeko la washiriki kutoka 1,500 mwaka 2020 hadi zaidi ya 13,000 mwaka 2026 ni ushahidi wa mwamko mkubwa wa Watanzania katika kushiriki michezo, kuzingatia afya zao na kuunga mkono shughuli za maendeleo kupitia michezo.

"NBC Dodoma Marathon imekuwa zaidi ya mashindano ya riadha. Leo ni jukwaa linalounganisha Watanzania na marafiki kutoka mataifa mbalimbali kwa lengo la kufanya jambo kubwa zaidi—kuokoa maisha. Nawahimiza Watanzania kujenga utamaduni wa kufanya mazoezi mara kwa mara ili kujikinga dhidi ya magonjwa yasiyoambukiza kama vile kisukari, shinikizo la damu, magonjwa ya moyo na figo," alisema Dkt. Nchemba.

Aidha alisema Serikali itaendelea kuboresha miundombinu ya barabara katika Jiji la Dodoma kwa kupanua na kuboresha barabara muhimu, hatua itakayorahisisha shughuli za usafirishaji na wakati huo huo kuongeza usalama wa washiriki wa mbio hizo katika miaka ijayo.

Waziri Mkuu pia aliutaka uongozi wa Mkoa wa Dodoma kuendelea kuziunga mkono mbio hizo kutokana na mchango wake mkubwa katika kukuza uchumi wa jiji hilo kupitia ongezeko la wageni, shughuli za utalii wa ndani, biashara za hoteli, migahawa, usafiri na huduma nyingine zinazochochewa na tukio hilo.

Awali, Mkuu wa Mkoa wa Dodoma, Bi. Rosemary Senyamule, alisema NBC Dodoma Marathon imeendelea kuwa kichocheo muhimu cha uchumi wa mkoa huo kwa kuongeza mzunguko wa fedha na kutoa fursa kwa wafanyabiashara wadogo na wakubwa kila mwaka.

Aliishukuru Benki ya NBC kwa kuendelea kuwa mshirika mkubwa wa maendeleo ya Mkoa wa Dodoma kupitia uwekezaji wake katika afya, michezo na maendeleo ya jamii.

Kwa upande wake, Mkurugenzi Mtendaji wa Benki ya NBC, Bw. Theobald Sabi, alisema mafanikio ya mbio hizo yanaakisi dhamira ya benki hiyo ya kuendelea kutumia biashara kama chachu ya kuleta maendeleo ya kijamii.

Alisema kati ya fedha zilizokusanywa, shilingi milioni 600 zimeelekezwa moja kwa moja katika utekelezaji wa malengo makuu ya NBC Dodoma Marathon kupitia taasisi tatu zinazotoa huduma muhimu za afya nchini.

Katika hafla hiyo, Dkt. Nchemba na Bw. Sabi walikabidhi hundi za misaada ambapo: Shilingi milioni 200 zilikabidhiwa Taasisi ya Benjamin Mkapa kwa ajili ya kupanua programu ya ufadhili wa wakunga ili kuboresha huduma za afya ya uzazi, Shilingi milioni 200 zilikabidhiwa Taasisi ya Moyo ya Jakaya Kikwete (JKCI) kwa ajili ya kugharamia upasuaji wa watoto wenye matatizo ya moyo na Shilingi milioni 200 zilikabidhiwa Hospitali ya Benjamin Mkapa kusaidia huduma za upandikizaji wa uloto kwa watoto wenye ugonjwa wa selimundu.

"Mafanikio haya yanatokana na dhamira yetu ya kuhakikisha mafanikio ya biashara yanaenda sambamba na ustawi wa jamii. Tunawashukuru washiriki wote, wadhamini na wadau mbalimbali waliochangia kufanikisha NBC Dodoma Marathon 2026. Ushirikiano huu umewezesha kuokoa maisha ya Watanzania wengi," alisema Bw. Sabi.

Alitoa shukrani maalumu kwa wadhamini wakuu wa mbio hizo akiwemo Sanlam Allianz, GSM Group, Vodacom Tanzania, Mamlaka ya Mapato Tanzania (TRA) pamoja na wadau wengine waliochangia mafanikio ya tukio hilo.

Katika mbio za kilomita 42 (Full Marathon) kwa upande wa wanaume, mwanariadha kutoka Kenya Edwin Koech aliibuka mshindi wa kwanza kwa kutumia muda wa saa 2:05:12, akifuatiwa na Vitalis Kibiwott aliyemaliza kwa saa 2:12:18.

Kwa upande wa wanawake, Agnes Ngolo wa Kenya alitwaa ushindi kwa kutumia muda wa saa 2:32:36, huku Jacinta Chepkoech, pia kutoka Kenya, akimaliza wa pili kwa muda wa saa 2:33:26.

Washindi wa nafasi ya kwanza hadi ya kumi walizawadiwa fedha taslimu, ambapo washindi wa kwanza wa mbio za kilomita 42 kwa wanaume na wanawake kila mmoja alijishindia Tsh milioni 11.5.

Katika mbio za kilomita 21 (Half Marathon) kwa wanaume, Bernard Geay wa Tanzania aliibuka mshindi wa kwanza kwa muda wa saa 1:02:46, akifuatiwa na Simon Kelenzoke wa Kenya (1:02:57), huku nafasi ya tatu ikichukuliwa na Michael Geay wa Tanzania kwa muda wa 1:02:59.

Kwa upande wa wanawake, Magdalena Shauri wa Tanzania aliibuka mshindi wa kwanza kwa muda wa 1:08:59, akifuatiwa na Doreen Chetzop wa Kenya aliyemaliza kwa muda wa 1:10:36.

Washindi wa kwanza wa mbio za kilomita 21 kwa wanaume na wanawake walijishindia Tsh milioni 5.5, huku washindi wa pili wakiondoka na Tsh milioni 2.5.

NBC Dodoma Marathon imeendelea kuthibitisha kuwa si tu tamasha kubwa la michezo nchini, bali pia ni jukwaa la kuhamasisha afya, kuunganisha jamii, kukuza uchumi wa Jiji la Dodoma na kuchangia moja kwa moja kuboresha huduma muhimu za afya kwa Watanzania.

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, (katikati) akimkabidhi mfano wa hundi yenye thamani ya Tsh milioni 200 kwa muwakilishi wa Taasisi ya Moyo ya Jakaya Kikwete (JKCI) (wanne kushoto) iliyotolewa na Benki ya NBC kwa ajili ya kugharamia upasuaji wa watoto wenye matatizo ya moyo kupitia mbio za NBC Dodoma Marathon zilizofanyika leo kwenye Uwanja wa Jamhuri jijini Dodoma. Wanaoshuhudia ni pamoja na Mkuu wa Mkoa wa Dodoma, Bi. Rosemary Senyamule (wa tatu kushoto), Mkurugenzi Mtendaji wa Benki ya NBC Bw Theobald Sabi (wa nne kulia), Mwenyekiti wa Bodi ya Wakurugenzi ya benki ya NBC , Dkt. Elirehema Doriye (wa pili kushoto), Mkurugenzi Mtendaji wa SanlamAllianz, wadhamini wakuu wa mbio hizo, Bw Julius Magabe (kushoto) na viongozi wengine kutoka serikalini na wadau wa mbio hizo.

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, (katikati) akimkabidhi mfano wa hundi yenye thamani ya Tsh milioni 200 kwa Mkurugenzi Mtendaji wa Hospitali ya Benjamin Mkapa, Profesa Abel Makubi (wa tatu kushoto) iliyotolewa na Benki ya NBC kwa ajili ya kusaidia huduma za upandikizaji wa uloto kwa watoto wenye ugonjwa wa selimundu (sicke cell)kupitia mbio za NBC Dodoma Marathon zilizofanyika leo kwenye Uwanja wa Jamhuri jijini Dodoma. Wanaoshuhudia ni pamoja na Mkuu wa Mkoa wa Dodoma, Bi. Rosemary Senyamule (wa pili kushoto), Mkurugenzi Mtendaji wa Benki ya NBC Bw Theobald Sabi (wa pili kulia), Mwenyekiti wa Bodi ya Wakurugenzi ya benki hiyo, Dkt. Elirehema Doriye (kushoto) na viongozi wengine kutoka serikalini na wadau wa mbio hizo.

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, (katikati) akimkabidhi mfano wa hundi yenye thamani ya Tsh milioni 200 kwa muwakilishi wa Taasisi ya Benjamin Mkapa Foundation (wanne kushoto) iliyotolewa na Benki ya NBC kwa ajili ya kwa ajili ya kupanua programu ya ufadhili wa wakunga ili kuboresha huduma za afya ya uzazi kupitia mbio za NBC Dodoma Marathon zilizofanyika leo kwenye Uwanja wa Jamhuri jijini Dodoma. Wanaoshuhudia ni pamoja na Mkuu wa Mkoa wa Dodoma, Bi. Rosemary Senyamule (wa tatu kushoto), Mkurugenzi Mtendaji wa Benki ya NBC Bw Theobald Sabi (wa nne kulia), Mwenyekiti wa Bodi ya Wakurugenzi ya benki ya NBC , Dkt. Elirehema Doriye (wa pili kushoto), Mkurugenzi Mtendaji wa SanlamAllianz, wadhamini wakuu wa mbio hizo, Bw Julius Magabe (kushoto) na viongozi wengine kutoka serikalini na wadau wa mbio hizo.

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, (wa tatu kushoto) akikabidhi mfano wa hundi yenye thamani ya sh mil 5.5 kwa mwanariadha kutoka Tanzania, Magdalena Shauri alieibuka mshindi wa kwanza (kwa upande wa wanawake) wa mbio za km 21 za NBC Dodoma Marathon, zilizofanyika leo kwenye Uwanja wa Jamhuri jijini Dodoma. Wanaoshuhudia ni pamoja na Mkurugenzi Mtendaji wa Benki ya NBC Bw Theobald Sabi (wa pili kulia) na viongozi wengine kutoka serikalini na wadau wa mbio hizo.

Waziri Mkuu wa Jamhuri ya Muungano wa Tanzania, Dkt. Mwigulu Lameck Nchemba, (kushoto) akikabidhi mfano wa hundi yenye thamani ya sh mil 11.5 kwa mwanariadha kutoka Kenya, Edwin Koech alieibuka mshindi wa kwanza (kwa upande wa wanaume) wa mbio za km 42 za NBC Dodoma Marathon, zilizofanyika leo kwenye Uwanja wa Jamhuri jijini Dodoma. Wanaoshuhudia ni pamoja na Mkurugenzi Mtendaji wa Benki ya NBC Bw Theobald Sabi (kulia)

Bridging the Gap: JAB to Partner with Bloggers Network on Training

2026-07-17T10:17:55.721+03:00

Tanzania Bloggers Network (TBN) Chairman Beda Msimbe (left) meets with the Journalism Accreditation Board’s Acting Director General, Advocate Patrick Kipangula, during their meeting at the Board’s offices in Dar es Salaam on 16 July 2026. The meeting followed TBN’s formal request for professional training for more than 200 bloggers on media law, journalistic ethics and the importance of accreditation.

By TBN Staff Writer

The Journalists’ Accreditation Board (JAB) has received a formal request from the Tanzania Bloggers Network (TBN) seeking training for its more than 200 members on the Media Services Act, journalism ethics, and the importance of obtaining professional accreditation.

The request was submitted on 16 July 2026, when TBN Chairman Beda Msimbe met with JAB’s Acting Director General, Advocate Patrick Kipangula, during discussions held at the Board’s offices in Dar es Salaam.

Speaking after the meeting, Advocate Kipangula said the Board had received the request and was ready to work with the network to help bloggers gain a deeper understanding of the Media Services Act, professional ethics, and the value of accreditation.

He said the training would begin with bloggers who are already accredited, aimed at strengthening their professionalism and understanding of their professional responsibilities, before extending to those who have not yet obtained accreditation.

“Those without accreditation will get the opportunity to be guided on the legal requirements for obtaining it, including the necessary qualifications required under the Media Services Act. Those who do not yet meet the required qualifications will be advised to pursue further education so they can meet the criteria for accreditation,” Advocate Kipangula said.

For his part, TBN Chairman Beda Msimbe said the training would help the network’s members carry out their duties in line with the law, ethics, and professionalism, while also contributing effectively to informing the public and promoting Tanzania through coverage of development initiatives being implemented across various sectors.

He added that the collaboration between the network and JAB would help build the capacity of bloggers and strengthen their contribution to the country’s media sector.

Background

The request marks a notable step in efforts to bring Tanzania’s growing community of digital content creators and bloggers into closer alignment with the formal regulatory framework governing media practice in the country.

The Media Services Act has, since its introduction, set out qualification requirements and ethical standards that traditional journalists are expected to meet, and the extension of similar guidance to bloggers reflects the increasing recognition of digital platforms as a significant source of public information.

TBN’s more than 200 members represent a wide cross-section of Tanzania’s online content creators, many of whom operate blogs, social media pages, and other digital platforms that reach large audiences, particularly among younger Tanzanians who increasingly turn to online sources for news and updates.

By prioritising already-accredited bloggers in the first phase of training, JAB appears to be taking a phased approach that rewards those who have already engaged with the formal accreditation process, while creating a clear pathway for others to follow.

The emphasis on further education for those who do not yet meet the qualification criteria suggests the Board intends the programme to be developmental rather than punitive, encouraging capacity-building rather than simply excluding non-accredited bloggers from practice.

Observers of Tanzania’s media landscape note that partnerships of this kind between regulatory bodies and digital media associations could help address longstanding tensions between traditional journalism institutions and the newer wave of online content creators, many of whom have historically operated outside formal press structures.

No specific date has yet been announced for when the training sessions will begin, though both JAB and TBN indicated their intention to move forward with the collaboration.

Further details on the training schedule, curriculum, and criteria for accreditation are expected to be announced in due course as the two organizations finalize the arrangements for the programme.

WANAHABARI WAHIMIZWA KUONGOZA MAPAMBANO YA MATUMIZI YA NISHATI SAFI YA KUPIKIA TANZANIA

2026-07-17T10:14:18.356+03:00

Na Janeth Raphael - MichuziTv

Waandishi wa habari na Maafisa Mawasiliano wa Serikali wametakiwa kutumia nafasi yao ya kuelimisha na kuhamasisha jamii kuhusu matumizi ya nishati safi ya kupikia ili kuunga mkono juhudi za Serikali za kufikia lengo la asilimia 80 ya Watanzania kutumia nishati hiyo ifikapo mwaka 2034.

Wito huo umetolewa Julai 16, 2026 mkoani Morogoro na Mkurugenzi Msaidizi kutoka Idara ya Habari – MAELEZO, Rodney Mbuya, wakati akifunga warsha ya kuwajengea uwezo Waandishi wa Habari na Maafisa Mawasiliano wa Serikali kuhusu uandishi na uhamasishaji wa masuala ya nishati safi ya kupikia.

Mbuya amesema Serikali ya Awamu ya Sita chini ya uongozi wa Rais Dkt. Samia Suluhu Hassan imeifanya ajenda ya nishati safi ya kupikia kuwa moja ya vipaumbele vya maendeleo kupitia Mkakati wa Taifa wa Matumizi ya Nishati Safi ya Kupikia wa miaka 10 (2024–2034).

Ameeleza kuwa pamoja na mafanikio yaliyopatikana ambapo matumizi ya nishati safi ya kupikia yamefikia asilimia 28.6 ya kaya nchini, bado kuna haja ya kuongeza juhudi za utoaji wa elimu kwa umma ili kuharakisha mabadiliko ya tabia na kuongeza matumizi ya nishati hiyo salama na rafiki kwa mazingira.

Amesisitiza kuwa vyombo vya habari vina nafasi muhimu katika kufikisha taarifa sahihi kwa wananchi, kuhamasisha mabadiliko ya mtazamo na kuibua mijadala yenye tija kuhusu faida za matumizi ya nishati safi ya kupikia kwa afya, mazingira na maendeleo ya kijamii.

Kwa upande mwingine, Bw. Mbuya ameipongeza Wizara ya Nishati, Shirika la Umoja wa Mataifa la Mfuko wa Maendeleo ya Mitaji (UNCDF) kupitia Mradi wa CookFund unaofadhiliwa na Umoja wa Ulaya, pamoja na wadau mbalimbali wa sekta ya nishati safi ya kupikia kwa kuandaa mafunzo hayo.

Amesema mafunzo hayo yatawajengea uwezo Waandishi wa Habari na Maafisa Mawasiliano wa Serikali kuandaa taarifa zenye ubora na zenye ushawishi, zitakazochochea wananchi wengi zaidi kukumbatia matumizi ya nishati safi ya kupikia na hivyo kuchangia utekelezaji wa ajenda ya Taifa ya nishati safi.

TANZANIA NA OMAN ZAIMARISHA USHIRIKIANO USIMAMIZI KUMBUKUMBU NA NYARAKA KIDIJITALI

2026-07-17T10:11:21.812+03:00

Na. Jawadu Kinyobwa – Dar es salaam

Serikali ya Jamhuri ya Muungano wa Tanzania imepokea vifaa vya kisasa vya Chumba cha Kanzi Data, vifaa vya Teknolojia ya Habari na Mawasiliano (TEHAMA) pamoja na miundombinu iliyoboreshwa ya mtandao kutoka Mamlaka ya Taifa ya Nyaraka na Kumbukumbu ya Sultanate ya Oman.Hatua hiyo inalenga kuimarisha usimamizi wa kumbukumbu na nyaraka za Serikali katika mfumo wa kidijitali, kuongeza usalama wa taarifa za Serikali, kuboresha upatikanaji wa nyaraka kwa wakati, kuimarisha uhifadhi wa muda mrefu wa kumbukumbu muhimu za taifa na kuongeza ufanisi katika utoaji wa huduma za umma.

Akizungumza Julai 15, 2026 jijini Dar es salaam, Waziri wa Nchi, Ofisi ya Rais – Menejimenti ya Utumishi wa Umma na Utawala Bora, Mheshimiwa Ridhiwani Jakaya Kikwete (Mb), amesema msaada huo ni ishara ya uhusiano wa kihistoria na ushirikiano imara uliopo kati ya Tanzania na Oman.
Mhe. Kikwete amesema makabidhiano hayo ni sehemu ya utekelezaji wa Hati ya Makubaliano ya Ushirikiano (MoU) iliyosainiwa mwaka 2012 kati ya Tanzania na Oman kuhusu usimamizi wa kumbukumbu na nyaraka.

“Ushirikiano huu unaakisi dhamira ya pamoja ya nchi hizo mbili katika kuendeleza mageuzi ya kidijitali, kuhifadhi urithi wa nyaraka za Taifa na kuongeza ufanisi katika utoaji wa huduma za umma. Uwekezaji katika miundombinu ya TEHAMA ni muhimu katika kuhakikisha uhalisia, uadilifu, usalama na uhifadhi wa muda mrefu wa kumbukumbu za umma sambamba na kulinda urithi wa taifa kwa manufaa ya vizazi vya sasa na vijavyo” amesema.

Kwa upande wake, Kiongozi wa Ujumbe na Mwenyekiti wa Mamlaka ya Taifa ya Nyaraka na Kumbukumbu ya Sultanate ya Oman, Dkt. Hamad Al-Dhawyani, amesema Oman itaendelea kushirikiana na Tanzania katika kuimarisha mifumo ya usimamizi wa kumbukumbu na nyaraka kupitia kubadilishana uzoefu, mafunzo ya kitaalamu, tafiti, uhifadhi wa kidijitali na utekelezaji wa miradi ya pamoja itakayowanufaisha wananchi wa nchi zote mbili.

Hafla hiyo imehudhuriwa na viongozi wa Serikali za Tanzania na Oman, akiwemo Balozi wa Sultanate ya Oman nchini Tanzania, Mheshimiwa Said Hilal Al-Shidhani, Balozi Abdallah Kilima kutoka Wizara ya Mambo ya Nje na Ushirikiano wa Afrika Mashariki pamoja na viongozi na watumishi wa Idara ya Usimamizi wa Kumbukumbu na Nyaraka.

JAB YAPOKEA OMBI LA KUTOA MAFUNZO KWA BLOGGERS ZAIDI YA 200

2026-07-17T10:08:25.865+03:00

Bodi ya Ithibati ya Waandishi wa Habari (JAB) imepokea ombi kutoka Mtandao wa Mabloga Tanzania (TBN) la kutoa mafunzo kwa wanachama wake zaidi ya 200 kuhusu Sheria ya Huduma za Habari, Maadili ya Uandishi wa Habari na umuhimu wa kupata ithibati.

Ombi hilo limetolewa leo, tarehe 16 Julai, 2026, na Mwenyekiti wa Mtandao wa Mabloga Tanzania, Bw. Beda Msimbe, alipokutana na Kaimu Mkurugenzi Mkuu wa JAB, Wakili Patrick Kipangula, katika mazungumzo yaliyofanyika katika ofisi za Bodi jijini Dar es Salaam.

Akizungumza baada ya mazungumzo hayo, Wakili Kipangula amesema Bodi imepokea ombi hilo na iko tayari kushirikiana na Mtandao huo katika kuwawezesha bloga kupata uelewa wa kina kuhusu Sheria ya Huduma za Habari, maadili ya taaluma pamoja na umuhimu wa kupata ithibati.

Amesema mafunzo hayo yataanza kutolewa kwa bloggers wenye ithibati ili kuimarisha weledi na uelewa wao wa majukumu ya kitaaluma, kabla ya kuendelea kuwafikia wale ambao bado hawajapata ithibati.

"Wale ambao hawana ithibati watapata fursa ya kuelekezwa kuhusu masharti ya kisheria ya kupata ithibati, ikiwemo umuhimu wa kuwa na sifa zinazotakiwa kwa mujibu wa Sheria ya Huduma za Habari. Wasio na sifa stahiki watashauriwa kujiendeleza kielimu ili waweze kukidhi vigezo vya kupata ithibati," amesema Wakili Kipangula.

Kwa upande wake, Mwenyekiti wa Mtandao wa Mabloga Tanzania, Bw. Beda Msimbe, amesema mafunzo hayo yatawasaidia wanachama wa chama hicho kutekeleza majukumu yao kwa kuzingatia sheria, maadili na weledi, sambamba na kuchangia kwa ufanisi katika kuhabarisha umma na kuitangaza Tanzania kupitia taarifa za maendeleo zinazotekelezwa katika sekta mbalimbali.

Amesema ushirikiano kati ya Mtandao huo na JAB utasaidia kujenga uwezo wa bloggers na kuimarisha mchango wao katika sekta ya habari nchini.

Zaidi ya Watu 8,000 Wapatiwa Matibabu ya Bure Arusha

2026-07-16T08:21:44.265+03:00

ZAIDI ya wananchi 8,000 kutoka Mkoa wa Arusha na maeneo mengine nchini wamepata huduma za uchunguzi na matibabu bila malipo katika siku mbili za kwanza za kambi maalumu ya afya inayofanyika jijini Arusha. Kambi hiyo ya siku saba ilianza Julai 13, 2026 na itahitimishwa Julai 19, ambapo wananchi wanapatiwa vipimo, ushauri wa madaktari bingwa, matibabu, dawa na rufaa bila malipo.

Kambi hiyo imeandaliwa na Ofisi ya Mkuu wa Mkoa wa Arusha kwa kushirikiana na Ofisi ya Mbunge wa Arusha Mjini, Paul Makonda, pamoja na Wizara ya Afya, hospitali za rufaa za kitaifa, taasisi maalumu za afya na hospitali binafsi. Katika siku ya kwanza wananchi 3,500 walihudumiwa, huku zaidi ya 4,500 wakipata huduma siku ya pili na kufanya jumla ya walionufaika kufikia zaidi ya 8,000.

Huduma zinazotolewa ni pamoja na vipimo mbalimbali vya afya, ushauri wa kitaalamu, matibabu, dawa na rufaa. Aidha, zaidi ya watu 50 walijitokeza kuchangia damu katika banda la Mpango wa Taifa wa Damu Salama, huku wagonjwa waliobainika kuhitaji matibabu ya kina wakipelekwa hospitalini kwa magari ya wagonjwa.

Akizungumza katika kambi hiyo, Makonda alimshukuru Rais Dkt. Samia Suluhu Hassan, Wizara ya Afya, madaktari, taasisi za afya na sekta binafsi kwa kuwezesha huduma za kibingwa kuwafikia wananchi wa Arusha na maeneo ya jirani. Alisema mafanikio hayo yametokana na ushirikiano mzuri kati ya Serikali, viongozi wa wananchi, hospitali za rufaa na wadau wa sekta ya afya.

Makonda alisema wananchi wengi wanaofika kambini hawana uwezo wa kumudu gharama za vipimo na matibabu katika mazingira ya kawaida, huku baadhi wakishindwa kuendelea na matibabu baada ya fedha zao kuishia kwenye vipimo vya awali.

Alieleza kuwa ingawa wananchi wanapata huduma hizo bila malipo, taasisi, hospitali, madaktari na wadau wameingia gharama kubwa za usafiri, vifaa vya uchunguzi, dawa, miwani, malazi, chakula na mahitaji mengine muhimu ili kuhakikisha huduma zinawafikia wananchi.

Aliwasihi wananchi wanaopewa dawa, miwani na maelekezo ya matibabu kuyafuata kikamilifu, akisisitiza kuwa dawa na huduma zote zilizotolewa zimegharimiwa na hivyo ni muhimu zitumike ipasavyo ili kuleta matokeo yaliyokusudiwa.

Pia aliwahimiza wafanyabiashara, wamachinga, waendesha bodaboda na bajaji pamoja na wananchi wengine kutenga muda wa kupima afya, akisisitiza kuwa huduma hizo zinapatikana kwa watu wote bila kujali wanakotoka, dini, kabila, chama cha siasa au hali yao ya kiuchumi.