ನನ್ನ ವಿಚಾರಗಳು

ಆ ಕರಾಳ ರಾತ್ರಿಯ ನೆನಪಿನೊಂದಿಗೆ ಜೀವನ

2018-10-07T17:04:00.001+05:30

ಪ್ರತಿ ವರ್ಷ ಜೂನ್ 25 ಬಂತೆಂದರೆ ಆ ಕರಾಳ ರಾತ್ರಿಯ ಘನಘೋರ ದುರಂತಗಳು ಕಣ್ಣೆದುರಿಗೆ ಬಂದು ಧುತ್ತನೆ ನಿಲ್ಲುತ್ತದೆ. ಮನುಷ್ಯನ ವಾಕ್ ಸ್ವಾತಂತ್ರ್ಯ, ಪತ್ರಿಕಾ ಸ್ವಾತಂತ್ರ್ಯ, ನ್ಯಾಯಾಂಗ, ಕಾರ್ಯಾಂಗ ಗಳನ್ನು ನಿರ್ಬಂಧಿಸಿ ದೇಶದಲ್ಲಿ ತುರ್ತುಸ್ಥಿತಿ ಹೇರುವ ಮುಖಾಂತರ ವಿರೋಧ ಪಕ್ಷಗಳ ರಾಜಕೀಯ ನಾಯಕರನ್ನು ಏಕಾಏಕಿ ಬಂಧಿಸಿ ಕಾರಾಗೃಹಕ್ಕೆ ತಳ್ಳಿ ರಾತ್ರಿ ಬೆಳಗಾಗುತ್ತಲೇ ದೇಶ ನಿಶಬ್ಧವಾಗಿತ್ತು. ನಂತರದ ದಿನಗಳಲ್ಲಿ ಪೊಲೀಸರ ಮುಖಾಂತರ ಹಿಂಸಾತ್ಮಕ ದಮನಚಕ್ರ, ಸಂಘದ, ವಿರೋಧ ಪಕ್ಷಗಳ ಕಾರ್ಯಕರ್ತರ ಮೇಲೆ ನಿರಂತರವಾಗಿ ಹಿಂಸಿಸಿ ನೂರಾರು ಮಂದಿಯ ಮನೆಗಳು ನಿರ್ಗತಿಕವಾದವು. ಸಂಘದ ಕಾರ್ಯಕರ್ತರ ಮನೆಗಳಂತೂ ನರಕ ಸದೃಶವಾದವು. ಆಗಸ್ಟ್ 15, 1947 ಮಧ್ಯರಾತ್ರಿ ನಮಗೆ ಬ್ರಿಟಿಷರಿಂದ ಸ್ವಾತಂತ್ರ್ಯದೊರಕಿದ ದಿನ, ದುರಂತವೆಂದರೆ ಸ್ವಾತಂತ್ರ್ಯ ತೆಗೆದು ಕೊಂಡ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ ನ ಪ್ರಧಾನಮಂತ್ರಿ ಶ್ರೀಮತಿ ಇಂದಿರಾ ಗಾಂಧಿಯವರಿಂದಲೇ ಸಂವಿಧಾನ ಬಾಹಿರ ಸ್ವಾತಂತ್ರ್ಯ ಹರಣವಾಯಿತೆಂಬುದು ಐತಿಹಾಸಿಕ ದುರಂತವಾಯಿತು.

ಅಂದು ಜೂನ್ 25, 1975 ಸುಮಾರು ನಾಲ್ಕು ಗಂಟೆಯ ಸಮಯಕ್ಕೆ ಸಂಘದ ಸುಳ್ಯ ನಗರ ಕಾರ್ಯವಾಹಕರಾಗಿದ್ದ ಪುಟ್ಟಪ್ಪ ಜೋಶಿಯವರು ನಮ್ಮ ಮನೆಗೆ ಅಥಿತಿಯೋರ್ವರನ್ನು ಕರೆದುಕೊಂಡು ಬಂದರು. ಇವರು ಇನ್ನು ಮುಂದೆ ಸುಳ್ಯ ತಾಲೂಕಿಗೆ ಸಂಘದ ಪ್ರಚಾರಕರಾಗಿರುತ್ತಾರೆಂದು ಪರಿಚಯಿಸಿದರು ಮತ್ತು ನನ್ನ ಅಮ್ಮನನ್ನು ಪರಿಚಯಿಸಿದರು. ಉಭಯ ಕುಶಲೋಪರಿಯ ನಂತರ ನಾವು ಮೂವರು ಸುಳ್ಯದ ಪೇಟೆಯ ಕಡೆಗೆ ಬಂದೆವು. ಪ್ರಚಾರಕರು ಕಾರ್ಯಾಲಯಕ್ಕೂ ಜೋಶಿಯವರು ಅವರ ಮನೆಗೆ ಹೋದರು. ನಾನು ಏಳು ಗಂಟೆಯ ಹೊತ್ತಿಗೆ ಮನೆಗೆ ತಲುಪಿದೆ. ಮಳೆಗಾಲವಾದ್ದರಿಂದ ಬೇಗ ಊಟ ಮಾಡಿ ಮಲಗಿದೆ. ಮಾರನೆಯ ದಿನ ಬೆಳಗಾಗುತ್ತಲೇ ಜೋಶಿಯವರು ಮನೆಗೆ ಬಂದಿದ್ದರು. ದೇಶದಲ್ಲಿ ತುರ್ತು ಪರಿಸ್ಥಿತಿ ಜಾರಿಯಾಗಿದೆ ಸಂಘದ ನಿಷೇಧವಾಗಿದೆ. ಬಹಳ ಜಾಗರೂಕರಾಗಿರುವಂತೆ ಹೇಳಿ ಹೊರಟರು.

ನಾನು ಬೇಗನೆ ಪೇಟೆಗೆ ಹೋಗಿ ಪತ್ರಿಕೆಯನ್ನು ಕೊಂಡು ನೋಡಿದರೆ ಸಂಪಾದಕೀಯದ ಸ್ಥಳ ಕಪ್ಪಾಗಿ ಅಚ್ಚಾಗಿತ್ತು. ರಾತ್ರಿ 2 ಗಂಟೆಗೆ ಶ್ರೀಮತಿ ಇಂದಿರಾಗಾಂಧಿಯವರು ತುರ್ತುಪರಿಸ್ಥಿತಿಯನ್ನು ಘೋಸಿಷಿ ಜನರ ಮತ್ತು ಪತ್ರಿಕೆಗಳ ಮೂಲಭೂತ ಹಕ್ಕುಗಳನ್ನು ಕಸಿದುಕೊಂಡು ರಾಜಕೀಯ ವಿರೋಧಿ ಮುಖಂಡರನ್ನು ಬಂಧಿಸಿದ ಸುದ್ದಿಯೊಂದಿಗೆ ದಪ್ಪ ಅಕ್ಷರಗಳಲ್ಲಿ ಆರ್ ಯಸ್ ಯಸ್ ನ್ನು ನಿಷೇಧಿಸಿದ ಸುದ್ದಿ ಪ್ರಕಟವಾಗಿತ್ತು. ತುರ್ತುಪರಿಸ್ಥಿತಿಯ ಆ ಕರಾಳ ದಿನಗಳು ಅತ್ಯಂತ ಭಯಾನಕವಾಗಿದ್ದರೂ ಧೃತಿಗೆಡದ ಸಂಘದ ಕಾರ್ಯಕರ್ತರು ಆಗಸ್ಟ್ ಪ್ರಥಮ ವಾರದಲ್ಲಿ ಸರ್ವಾಧಿಕಾರದ ವಿರುದ್ಧ ಆ ಕರಾಳ ದಿನಗಳಲ್ಲಿ ನಡೆಯುತ್ತಿದ್ದ ಹಿಂಸಾತ್ಮಕ ದಮನ ಚಕ್ರದ ಸತ್ಯ ಸಂಗತಿಗಳನ್ನು ತಲುಪಿಸುವ ಸಲುವಾಗಿ ಕಹಳೆ ಎಂಬ ಪತ್ರಿಕೆ ಪ್ರಕಟವಾಗಿ ಕೈಸೇರಿತು. ಅಂದಿನಿಂದ ಭೂಗತರಾಗಿ ಕೆಲಸ ನಿರ್ವಹಿಸುತ್ತಿದ್ದ ಪುಟ್ಟಪ್ಪ ಜೋಷಿಯವರು ಒಂದುವರೆ ವರುಷದ ನಂತರ ಕಹಳೆ ಪತ್ರಿಕೆಯ ಪ್ರಿಂಟಿಂಗ್ ಮಷೀನ್ ಸಾಗಿಸುತ್ತಿದ್ದಾಗ ಬಂಧಿಯಾದರು ನಂತರ ಸ್ವಲ್ಪ ಸಮಯದ ನಂತರ ಬಿಡುಗಡೆಯಾದರು. ಪ್ರಚಾರಕರಾಗಿ ಬಂದಿದ್ದ ದು. ಗು. ಲಕ್ಷ್ಮಣ ರವರು ಭೂಗತರಾಗಿ ಸಂಘ ಕಾರ್ಯದಲ್ಲಿ ತೊಡಗಿದ್ದರು. ಹೊಸದಿಗಂತ ಪತ್ರಿಕೆಗೆ ಸಂಪಾದಕರಾಗಿ ಬಂದ ನಂತರ ಅವರ ಖಚೇರಿಯಲ್ಲಿ ನಾನು ಅವರನ್ನು ಭೇಟಿಯಾದೆ. ಸುಳ್ಯದ ಒಂದು ಭಾಗದ ಆಯ್ದ ಮನೆಗಳಿಗೆ ಪತ್ರಿಕೆ ತಲುಪಿಸುವ ಜವಾಬ್ದಾರಿಯನ್ನು ನಿರ್ವಹಿಸಿದೆ. ಪ್ರಸಕ್ತ ಪರಿಸ್ಥಿತಿಯನ್ನು ಎದುರಿಸಲು ಅದಾಗಲೇ ಜಯಪ್ರಕಾಶ್ ನಾರಾಯಣಜಿಯವರ ನೇತ್ರತ್ವದಲ್ಲ್ಲಿ ಜನ ಸಂಘರ್ಷ ಸಮಿತಿ ತುರ್ತುಪರಿಸ್ಥಿತಿಯನ್ನು ವಿರೋಧಿಸುವ ಕಾರ್ಯವನ್ನು ಆರಂಭಮಾಡಿತ್ತು. ಸುಳ್ಯದ ಪ್ರಥಮ ಸತ್ಯಾಗ್ರಹ 1976 ನವೆಂಬೆರ್ 9 ರಂದು ಶ್ರೀ ರಾಮ ಭಜನಾ ಮಂದಿರದಿಂದ ಆರಂಭವಾಗಿ 25 ಜನರ ತಂಡವನ್ನು ಪೊಲೀಸರು ಬಂಧಿಸಿ ದೈಹಿಕವಾಗಿ ಹಿಂಸೆಗೆ ಒಳಪಟ್ಟಿದ್ದರೂ ಯಾರು ಧೃತಿಗೆಡಲಿಲ್ಲ. ಯುವಜನ ಮೇಳದ ಅಂಗವಾಗಿ ಸುಳ್ಯದ ಹೈ ಸ್ಕೂಲಿಗೆ ಬಂದ ಅಂದಿನ ಕರ್ನಾಟಕ ಸರಕಾರದ ಕ್ರೀಡಾ ಸಚಿವರದ ಶ್ರೀ ವೀರಪ್ಪ ಮೊಯ್ಲಿ ಯವರು ಭಾಗವಹಿಸಿದ ಕಾರ್ಯಕ್ರಮದಲ್ಲಿ ಸತ್ಯಾಗ್ರಹ ನಡೆಸಿ 24 ಜನರ ಬಂಧನವಾಗಿತ್ತು. ಪೋಲಿಸ್ ಇಲಾಖೆಯು ನಮ್ಮೆಲ್ಲರನ್ನು ಹಿಂಸೆಗೆ ಒಳಪಡಿಸಿದ್ದಲ್ಲದೆ ಅವರ ಹೊಡೆತದಿಂದ ನನ್ನ ಬಲ ಕಿವಿಯ ತಮ್ಮಟೆ ಒಡೆದು ಕಿವಿ ಶಾಶ್ವತವಾಗಿ ಕಿವುಡಾಯಿತು. ನಮ್ಮ ತಂಡವು ಡಿ ಐ ಆರ್ ಕೇಸಿನಲ್ಲಿ 49 ದಿನಗಳ ಕಾಲ ಜೈಲುಶಿಕ್ಷೆಯನ್ನು ಅನುಭವಿಸಿ ಆರೋಪ ಮುಕ್ತವಾಗಿ ಹೊರಬಂದೆವು. ಬಾಬಲುಬೆಟ್ಟು ವೆಂಕಪ್ಪ ಗೌಡರು ನಮ್ಮ ಪರವಾಗಿ ವಾದಿಸಿದ್ದರು.

1977ರ ನವೆಂಬರ್ ಕೊನೆಯ ವಾರ ಸ್ವಲ್ಪವೇ ಇರುವ ನಮ್ಮ ತೋಟಕ್ಕೆ ನಾನು ಮತ್ತು ಅಮ್ಮ ನೀರು ಹಾಕುತ್ತಿದ್ದೆವು. ಸುಮಾರು 11 ಗಂಟೆಯ ಸಮಯ ಪೊಲೀಸರೊಬ್ಬರು ಬಂದು ಬೇಗನೆ ಹೊರಟು ಬರುವಂತೆ ಸೂಚಿಸಿದರು. ಏನನ್ನು ಮಾತನಾಡದೆ ಅವರೊಂದಿಗೆ ಹೊರಟೆ. ಅಮ್ಮನ ಕಣ್ಣಲ್ಲಿ ನೀರಿತ್ತು. ಆದರೂ ಧೈರ್ಯ ಹೇಳಿ ಹೊರಟೆ. ರಸ್ತೆಯಲ್ಲಿ ಕಾರೊಂದು ನಿಂತಿತ್ತು, ಆಧಿಕಾರಿಯೊಬ್ಬರು ಕುಳಿತ್ತಿದ್ದರು ಹಾಗೂ ನನ್ನನ್ನು ಕುಳಿತುಕೊಳ್ಳುವಂತೆ ಹೇಳಿದರು. ಸುಮಾರು 1 ಘಂಟೆಯ ಕಾಲ ಪ್ರಶ್ನೆ ಗಳ ಸುರಿಮಳೆ...! ಪ್ರತಿಯೊಂದಕ್ಕೂ ನಿರ್ಭೀತಿಯಿಂದ ಉತ್ತರಿಸಿದೆ. ಸಂಘಕ್ಕೆ ಯಾಕೆ ಸೇರಿದ್ದೀ?? ಎಂದಾಗ “ಸಂಘ ಹಿಂದೂ ಸಂಘಟನೆ, ನಾನು ಹಿಂದೂ ಅದಕ್ಕಾಗಿ ಸಂಘದಲ್ಲಿ ಅಲ್ಪ ಕೆಲಸ ಮಾಡಿದ್ದೇನೆ”. “ಸಂಘ ನಿಷೇದ ಗೊಂಡಿದೆ”... ಎಂದರು. “ಈಗ ಸಂಘದ ಯಾವುದೇ ಚಟುವಟಿಕೆಗಳಲ್ಲಿ ನಾನು ಇಲ್ಲ” ಎಂದೆ. ಕಾರು ಮುಂದುವರಿದು ಪ್ರವಾಸಿ ಮಂದಿರಕ್ಕೆ ಬಂತು, ಅಲ್ಲಿ ಪುಟ್ಟಪ್ಪ ಜೋಷಿಯವರ ತಮ್ಮ ರಾಮಚಂದ್ರ ರನ್ನು ಪೊಲೀಸರು ಕರೆದುಕೊಂಡು ಬಂದಿದ್ದರು. ಒಟ್ಟಿಗೆ ಸೇರಿದಾಗ ಅವರ ಪ್ರಶ್ನೆಗಳ ಧಾಟಿಯೇ ಬೇರೆಯಾಗಿತ್ತು. “ಚಂದ್ರು ಟೈಲರ್ ನಿಮಗೆ ಗೊತ್ತೆ?” “ ಗೊತ್ತು”, “ನಾಲ್ಕು ದಿನಗಳ ಹಿಂದೆ ನಿಮ್ಮ ಮನೆಗೆ ಬಂದಿದ್ದ”... “ಹೌದು”. “ಅವನು ಇರುವ ಸ್ಥಳ ನಿಮಗೆ ಗೊತ್ತಿದೆ”. “ಇಲ್ಲ” ಎಂದೆವು ನಾವು. ಹೊರಗೆ ಮತ್ತೊಂದು ಕಾರೊಂದು ಬಂದು ನಿಂತಿತ್ತು. ಅದ್ರಲ್ಲಿ ಚಂದ್ರು ಟೈಲರ್ರವರ ಸಂಬಂಧಿಕರಿದ್ದರು. ಒಬ್ಬೊಬ್ಬರನ್ನೇ ಕರೆದು ಪೋಲಿಸ್ ಭಾಷೆಯಲ್ಲಿ ವಿಚಾರಿಸಿದರು ಉಪಯೋಗವಿಲ್ಲದಾಗ ಸಿಕ್ಕಸಿಕ್ಕಲ್ಲಿ ದನಗಳಿಗೆ ಬಡಿದಂತೆ ಬಡಿದರು. ನಾವು ನಿಂತಲ್ಲೇ ಗರಬಡಿದವರಂತೆ ನಿಂತಿದ್ದೆವು. ಆನಂದ ನಾಯಕ್, ಅಚ್ಚುತ್ತ ನಾಯಕ್, ಸುಂದರ ನಾಯಕ್ ಮೂವರಿಗೂ ಕೊಟ್ಟ ಹಿಂಸೆ ಅಸಹನೀಯವಾಗಿತ್ತು. ಅಷ್ಟಾದರೂ ಅವರ ಉತ್ತರ ಒಂದೇ ಆಗಿತ್ತು. “ಮನೆಗೆ ಬಂದದ್ದು ಹೌದು” “ಈಗ ಎಲ್ಲಿದ್ದಾರೆ ಎಂದು ಗೊತ್ತಿಲ್ಲ”. ಇದರಿಂದಾಗಿ ನಾವಿಬ್ಬರು ಪೋಲಿಸ್ ಕಾರ್ಯಾಚರಣೆಯಿಂದ ಬಚಾವಾದೆವು ಎಂದೆನಿಸುತ್ತದೆ.

ಉಳಿದವರನ್ನೆಲ್ಲಾ ಮನೆಗೆ ಕಳುಹಿಸಿ ಚಂದ್ರು ಎಲ್ಲೆಲ್ಲ ಹೋಗಿದ್ದಾನೆ ಅಲ್ಲೆಲ್ಲ ಹೋಗಿ ಅವನ ವಿಳಾಸ ತರಲು ಹೇಳಿದರು. 1000 ರೂಪಾಯಿಯ ಕಟ್ಟನ್ನು ಮೇಜಿನಮೇಲಿಟ್ಟರು. ಇದು ನಿಮ್ಮ ಖರ್ಚಿಗೆ ಎಂದರು. ನಾವು ಬೇಡವೆಂದೆವು. ನೀವು ಚಂದ್ರುವಿನ ವಿಳಾಸ ಪತ್ತೆ ಹಚ್ಚದಿದ್ದರೆ ನಿಮಗೆ ಬಿಡುಗಡೆ ಇಲ್ಲವೆಂದರು. ತಪ್ಪಿಸಿಕೊಳ್ಳುವ ಪ್ರಯತ್ನ ಮಾಡಬೇಡಿ ಎಂದರು. ನಾವೇನು ತಪ್ಪು ಮಾಡಲ್ಲಿಲ್ಲ ಪ್ರಯತ್ನವಂತೂ ಮಾಡುತ್ತೇವೆ ಎಂದೆವು. ನಾಳೆ ಸಂಜೆಯ ಒಳಗೆ ನೀವು ಹೋದ ವಿವರ ಕೊಡಬೇಕೆಂದರು. ಸುಮಾರು ಒಂದು ವಾರಗಳ ಕಾಲ ಪರಿಚಯವಿರುವವರಲ್ಲಿ ಹೋಗಿ ಬಂದು ವರದಿ ಮಾಡುತ್ತಿದ್ದೆವು. ಏಳನೇ ದಿನಕ್ಕೆ ಬಂದಾಗ ಪೊಲೀಸರು ಅಲ್ಲಿಂದ ಹೋಗಿದ್ದಾರೆ ಎಂದು ತಿಳಿಯಿತು. ಅವರೇ ಕೆ. ಯಲ್. ಏನ್. ರಾವ್ CIDಯ ಮುಖ್ಯಸ್ಥರಾಗಿದ್ದರು. ಅವರು ಪುತ್ತೂರು ತಾಲೂಕಿನ ಕಾವು ಎಂಬಲ್ಲಿಯ ನಿವಾಸಿಯಾಗಿದ್ದರು ಎಂದು ಪುಟ್ಟಪ್ಪ ಜೋಷಿಯವರು ಜೈಲಿನಿಂದ ಬಿಡುಗಡೆಯಾಗಿ ಬಂದ ನಂತರ ತಿಳಿಸಿದರು. ಇಷ್ಟಕ್ಕೂ ಚಂದ್ರು ಟೈಲರ್ ಕಲ್ಲಡ್ಕದ ಕೇಸಿನಲ್ಲಿ ಎರಡನೇ ಅಪರಾಧಿಯಾಗಿದ್ದರಿಂದ ಹುಡುಕುತ್ತಿದ್ದರು. 1990 ರಲ್ಲಿ 14 ವರ್ಷಗಳ ನಂತರ ಸುಳ್ಯಕ್ಕೆ ಬಂದು ಕೋರ್ಟಿನ ಮೊರೆಹೋಗಿ ಬಿಡುಗಡೆಯಾದರು.

ಆರ್ಥಿಕವಾಗಿ ಬಹಳ ಕಷ್ಟದ ದಿನಗಳಿದ್ದಾಗಲೇ, 1968ರ ಆಗಸ್ಟ್ ನಲ್ಲಿ ರಕ್ಷಾಬಂಧನ ಕಾರ್ಯಕ್ರಮಕ್ಕೆ ಕೊಡಿಯಾಲ ಬೈಲಿಗೆ ಸಂಪರ್ಕಕ್ಕೆಂದು ಬಂದ ಜೋಷಿ ಮತ್ತು ಚಂದ್ರು ಟೈಲರ್ರವರ ಮುಖಾಂತರ ನಾನು ಸಂಘದ ಸ್ವಯಂಸೇವಕನಾದೆ. ಕೆಲಸದ ಮನೆಗೆ ಬೆಳಿಗ್ಗೆ 7 ಘಂಟೆಗೆ ಹೋಗಿ ಸಂಜೆ 5 ಘಂಟೆಗೆ ಕೆಲಸಬಿಟ್ಟು 5 ರಿಂದ 6ರರ ತನಕ ಸಂಘದ ಶಾಖೆ, ನಂತರ ಮನೆಗಳ ಸಂಪರ್ಕ. ಇದು ನನ್ನ ಜೀವನದ ಅವಿಭಾಜ್ಯ ಅಂಗವಾಯಿತು. ಸುಮಾರು 13 ವರ್ಷಗಳ ಕಾಲ ನಿರಂತರ ಸಂಘದ ಶಾಖೆಯ ಕೆಲಸ ನಿರ್ವಹಿಸಿದೆ. ನಮ್ಮ ಶಾಖೆಯಿಂದ ಸ್ವಯoಸೇವಕರಾಗಿ ಗಂಗಾಧರ ವಾಗ್ಲೆ ಯವರು 7 ವರ್ಷಗಳ ಕಾಲ ಕೊಡಗು ಜಿಲ್ಲೆಯಲ್ಲಿ ಪ್ರಚಾರಕರಾಗಿ ಜವಾಬ್ದಾರಿ ನಿರ್ವಹಿಸಿದ್ದರು. ಹಾಗೆಯೇ ಪ್ರಕಾಶ ವಾಗ್ಲೆ ಯವರು ಸುಮಾರು 3 ವರುಷಗಳ ಕಾಲ ಮುಖ್ಯ ಶಿಕ್ಷರರಾಗಿ ಶಾಖೆಯನ್ನು ನಿರ್ವಹಿಸಿದ್ದರು ಮತ್ತು ರಾಧಾಕೃಷ್ಣ ವಾಗ್ಲೆಯವರು ಮುಖ್ಯ ಶಿಕ್ಷಕರಾಗಿ ಕಾರ್ಯ ನಿರ್ವಸಿದ್ದರು. ಪೂಜನೀಯ ಹೋ. ವೆ. ಶೇಷಾದ್ರಿಯವರು ನಮ್ಮ ಶಾಖೆಗೆ ದ್ವಜ ಪ್ರಧಾನ ಮಾಡಿದ್ದು ನನ್ನ ಜೀವನದ ಸೌಭಾಗ್ಯವೆನಿಸುತ್ತದೆ.

ಸುಮಾರು 15 ವರುಷಗಳ ಕಾಲ ಜನತಾ ಪಾರ್ಟಿ BJPಯಲ್ಲಿ ಸಕ್ರಿಯನಾಗಿ ಕೆಲಸ ನಿರ್ವಹಿಸಿದೆ. ಇದೇ ಸಮಯದಲ್ಲಿ 1 ವರುಷ ಕಾಲ ವಯಸ್ಕರ ರಾತ್ರಿ ಶಾಲೆಯೊಂದನ್ನು ನಡೆಸಿದೆ. ಆರಂಭದಲ್ಲಿ ಸುಮಾರು 15 ಜನ ವಯಸ್ಕರಿದ್ದು ಕೊನೆಗೆ ಜೀರ್ಣವಾಗುತ್ತಾ ಬಂದು 5 ಜನ ಉಳಿದುಕೊಂಡರು ಮತ್ತು ಅವರಿಗೆ ವಯಸ್ಕರ ಶಿಕ್ಷಣ ಮಂಡಳಿಯಿಂದ ಕಲಿಕೆಯ ಪ್ರಮಾಣ ಪತ್ರಗಳನ್ನು ದೊರಕಿಸಿಕೊಟ್ಟೆ. ಇದರಲ್ಲಿ ಗುರುವ ಮತ್ತು ಬಾಬು ಎಂಬವರಿಗೆ ತೋಟಗಾರಿಕಾ ಇಲಾಖೆಯಲ್ಲಿ ಸರಕಾರಿ ನೌಕರರಾಗಿ ಕೆಲಸ ದೊರಕಿತಲ್ಲದೆ ಭಡ್ತಿ ಹೊಂದಿ ನಿವೃತ್ತರಾಗಿದ್ದಾರೆ. 1983 ರಲ್ಲಿ ಬಾಕಿಲ ಉಕ್ಕ್ರಪ್ಪ ನವರು ಸುಳ್ಯ ದಿಂದ BJP ಯಲ್ಲಿ ಆಯ್ಕೆಯಾದಾಗ ಭಾಷಣಗಾರರ ಕೊರತೆ ತುಂಬಾ ಇತ್ತು. ಅನಿವಾರ್ಯವಾದಾಗ ನಾನೇ ಭಾಷಣಕಾರನಾಗಿದ್ದೆ. ಅದೇ ಸಮಯಕ್ಕೆ ಸುಳ್ಯ ಪುರ ಸಭೆಯ ಚುನಾವಣೆ ಘೋಷಣೆಯಾಗಿತ್ತು. ಕಾಂಗ್ರೆಸ್ ನ ಭದ್ರಕೋಟೆಯಲ್ಲಿ ನಾನು, ಎಂ. ಚೆನ್ನಕೇಶವ ಗೌಡ ಶೇರ್ಕಜೆ ಮತ್ತು ಜಿ. ವಿ. ಕೃಷ್ಣ ಪ್ರಥಮ ಬಾರಿಗೆ ಆಯ್ಕೆಯಾಗಿ ಬಂದೆವು. ಮಿಲಿಟರಿ ಗ್ರೌಂಡ್ ಎಂಬ ಸ್ಥಳದಲ್ಲಿ ಬಡವರಿಗೆ ಹಂಚಲು ತಹಶೀಲ್ದಾರರು ಮಂಜೂರು ಗೊಳಿಸಿದ 10 ಎಕರೆ ಸ್ಥಳವು ನಮ್ಮ ವಾರ್ಡಿನದಾಗಿದ್ದು ತಲಾ 5 ಸೆಂಟಿನಂತೆ ಆಳತೆ ಮಾಡಿ ಗಡಿಗುರುತು ಹಾಕಿ ನಾವೇ ನಿಂತು ಮಾಡಿದ ಜನವಸತಿಗೆ ಜಯನಗರ ಎಂದು ನಾಮಕರಣವಾಯಿತು. ಇಂದು ಜನನಿಬಿಡ ಪ್ರದೇಶವಾಗಿ ಬೆಳೆದು ನಿಂತಿರುವುದನ್ನು ನೋಡಿದರೆ ಆಶ್ಚರ್ಯವನ್ನುಂಟುಮಾಡುತ್ತದೆ.

ಆನಂತರ ಬಿಜೆಪಿಯ ಯಶೋಗಾಥೆ ಆರಂಭವಾಯಿತೆಂದೆ ಹೇಳಬೇಕು. ಸುಳ್ಯ ಸಿ ಎ ಬ್ಯಾಂಕ್ ಕಾಂಗ್ರೆಸಿನ ಬಹುದೊಡ್ಡ ಅಡ್ಡೆಯಾಗಿತ್ತು. ಇಡೀ ತಾಲೂಕಿನ ಎಲ್ಲಾ ಗ್ರಾಮಗಳನ್ನು ನಿಯಂತ್ರಿಸುವ ಶಕ್ತಿಕೇಂದ್ರ ವಾಗಿ ಕಾರ್ಯಾಚರಿಸುತ್ತಿತ್ತು. ಅದನ್ನು ಕೈವಶ ಮಾಡಲು ತೀರ್ಮಾನಿಸಿದ ನಾವು ಪ್ರತಿವರ್ಷ ಸದಸ್ಯರನ್ನು ಸೇರಿಸುವುದು, ಚುನಾವಣೆ ಬಂದಾಗ ಸ್ಪರ್ಧಿಸಿ ಸಮೂಲ ಸೋಲುವುದು. ಈ ಮಧ್ಯೆ ಎ ಎಸ್ ವಿಜಯ ಕುಮಾರ್ ಆಯ್ಕೆಯಾದುದು ಇಡಿ ಚುನಾವಣೆ ಗೆದ್ದಷ್ಟು ಸಂತಸವಾಗಿತ್ತು. ಮುಂದುವರೆದ ಹೋರಾಟದ 3 ನೇ ಚುನಾವಣೆಯಲ್ಲಿ ಕಾಂಗ್ರೆಸ್ಸಿಗೆ ಒಂದೇ ಒಂದು ಸ್ಥಾನ ದೊರಕದೆ ಅದರ ಅವಸಾನವಾಯಿತೆಂದೇ ಹೇಳಬಹುದು. ಶೇ. 90 ಭಾಗ ಸಹಕಾರ ಸಂಘಗಳು 85 ಭಾಗ ಗ್ರಾಮ ಪಂಚಾಯತಿಗಳು ಇಂದಿನವರೆವಿಗೂ ನಮ್ಮ ಕೈಯಲ್ಲೇ ಉಳಿದಿರುವುದು ಸಂತೋಷವೆನಿಸುತ್ತದೆ.

ನಾನು ನನ್ನ ವೈಯಕ್ತಿಕ ಜೀವನವನ್ನು 1996ರಕ್ಕೆ ಆರಂಭಿಸಿದೆ. ಅದಾಗಲೇ 4.5 ಲಕ್ಷ ಸಾಲ ಮೀರಿಹೋಗಿತ್ತು. ಜೀವನಕ್ಕೆ ದಾರಿಯೇ ಕಾಣದಾದಾಗ ರಾಜಕೀಯ ಕ್ಷೇತ್ರದಿಂದ ದೂರವಾಗದೆ ಬೇರೆ ದಾರಿಯೇ ಇರಲಿಲ್ಲ. ಪೂರ್ವ ಜನ್ಮದ ಪುಣ್ಯದ ಫಲವೋ ಎಂಬಂತೆ ನನ್ನ ತಂದೆಯವರ ಸ್ನೇಹಿತರು ಆಗಿದ್ದ ಶ್ರೀ.ವಿಟ್ಟಲ ನಾಯಕ್ ರವರು 2 ಬಸ್ ನಿಲ್ದಾಣದ ಮಧ್ಯೆ ತಾವೇ ನಡೆಸುತ್ತಿದ್ದ ಸಣ್ಣ ಗೂಡoಗಡಿಯನ್ನು ತನ್ನ ಅನಾರೋಗ್ಯದಿಂದ ನಡೆಸಲು ಕಷ್ಟವಾಗುತ್ತದೆ, ನೀನೆ ಈ ಅಂಗಡಿಯನ್ನು ನಡೆಸು ಎಂದರು. ಸಾಲದಿಂದ ಜರ್ಜರಿತನಾಗಿದ್ದ ನನಗೆ ಏನೂ ಮಾಡಲು ತೋಚದಾದಾಗ ಅವರೇ ಹಣವನ್ನು ನೀಡಿ ಎಲ್ಲವನ್ನು ಬಿಟ್ಟು ವ್ಯಾಪರದಲ್ಲೇ ಮನಸ್ಸುಕೊಟ್ಟು ದುಡಿದರೆ ಉದ್ಧಾರ ಆಗುತ್ತೀಯ ಎಂದರು. ನನ್ನ ಆತ್ಮೀಯ ಮಿತ್ರರಾಗಿದ್ದ ಸುಳ್ಯದ ಹೋಟೆಲ್ ಉದ್ಯಮಿ ಶ್ರೀ ಜಯಂತ ಕೆದಿಲಾಯರ ಹತ್ತಿರ ಅಂಗಡಿಯ ಪ್ರಸ್ತಾಪವನ್ನು ಇಟ್ಟೆ. ಕೂಡಲೇ ಅವರು ಅಂಗಡಿ ಮಾಡಿಕೊಳ್ಳುವಂತೆ ಹೇಳಿದರು. ಈ ಹಿಂದೆ ಅಂಗಡಿ ಮಾಡಿ ಸೋತ ಕಾರಣಗಳನ್ನು ಮುಂದಿರಿಸಿದೆ. ಅದಕ್ಕವರು ವ್ಯಾಪಾರದಲ್ಲಿ ಯಾರು ಸೋಲಲು ಸಾದ್ಯವಿಲ್ಲ ದೌರ್ಬಲ್ಯಗಳನ್ನೂ ಮೀರಿ ಧೃಡನಿರ್ಧಾರದಿಂದ ವ್ಯಾಪಾರ ಮಾಡಿದರೆ ಸೋಲು ಸಾಧ್ಯವೇ ಇಲ್ಲ. ಸಣ್ಣ ಉದಾಹರಣೆಗೆ ಉತ್ತರ ಕಂಡುಕೊಳ್ಳುವಂತೆ, ಅತೀ ಸಣ್ಣ ಆದರೆ ಅತೀ ಕ್ಲಿಷ್ಟಕರವಾದ ಒಂದು ಸಂಗತಿಯನ್ನು ನನ್ನ ಮುಂದಿರಿಸಿದರು.

1 ರೂಪಾಯಿ ಬಿಸ್ಕೆಟ್ ತಂದು 90 ಪೈಸೆಗೆ ಮಾರಿದರೆ ನಷ್ಟವಾಗುತ್ತದೆ. ಅದೇ ಬಿಸ್ಕೆಟ್ ನ್ನು 1 ರೂಪಾಯಿ 10 ಪೈಸೆಗೆ ಮಾರಿದರೆ 10 ಪೈಸೆ ಲಾಭ ಬರುತ್ತದೆ. ಆ 10 ಪೈಸೆಯನ್ನು ನೀವು ಜೀವನದಲ್ಲಿ ಹೇಗೆ ವಿನಿಯೋಗಿಸುತ್ತೀರಿ ಎನ್ನುವುದರ ಮೇಲೆ ಬದುಕು ನಿರ್ಧಾರಿತವಾಗುತ್ತದೆ ಎಂದರು. ಅವರ ಮಾತಿನಿಂದ ಮೆದುಳು ಒಂದರೆಗಳಿಗೆ ಸ್ತಬ್ಧವಾದಂತಾಯ್ತು. ಆ ದಿನ ಅವರ ಮಾತೇ ತಲೆಯಲ್ಲಿ ಗಿರಕಿ ಹೊಡೆಯುತ್ತಿದ್ದಾದರೂ ಉತ್ತರ ಕಂಡು ಹಿಡಿಯಲಾಗಲಿಲ್ಲ. ಬೆಳಗ್ಗಿನ ಜಾವ ಜೀವನವನ್ನು ಹಿಂತಿರುಗಿ ನೋಡಿದೆ. ಸ್ವಯಂ ಸೇವಕನಾಗಿ ಸಂಘದಲ್ಲಿ ಕಲಿತ ಶಿಸ್ತು, ಸಂಯಮ, ಧ್ಯೇಯ ನಿಷ್ಠೆಗಳು ಜಾಗ್ರತಗೊಂಡವೆಂದೇ ಹೇಳಬೇಕು. 10 ಪೈಸೆ ಖರ್ಚು ಮಾಡುವ ಕುರಿತು ಒಂದು ಗಟ್ಟಿ ನಿರ್ಧಾರಕ್ಕೆ ಬಂದೆ. ನನ್ನ ಎರಡು ಜನ ಗಂಡು ಮಕ್ಕಳ ವಿದ್ಯಾಭ್ಯಾಸಕ್ಕೆ 2 ಪೈಸೆ, 3 ಪೈಸೆ ಸಾಲಕ್ಕೆ, 2 ಪೈಸೆ ಅಂಗಡಿ ಅಭಿವೃದ್ಧಿಗೆ, 2 ಪೈಸೆ ಮನೆಗೆ, ೧ ಪೈಸೆಯನ್ನು ನನ್ನ ವೈಯಕ್ತಿಕ ಖರ್ಚಿಗೆಂದು ಕಾಗದದಲ್ಲಿ ಬರೆದುಕೊಂಡು ನೋಡಿದಾಗ ಬೆಳಗ್ಗಿನ ಜಾವ ಆಗಿತ್ತು. ಅದನ್ನು ಅವರಿಗೆ ತೋರಿಸಿದೆ, ವ್ಯಾಪಾರ ಎಂಬ ಕರ್ತವ್ಯದ ಮೇಲೆ ನಂಬಿಕೆಯನ್ನಿಟ್ಟು ತಪಸ್ಸನ್ನಾಚರಿಸಿದರೆ 100 – 1000ದ ದಾಮಾಶಯದಲ್ಲಿ ನಿತ್ಯ ಸಂಜೆಗೆ ಸಂಬಂಧಪಟ್ಟ ಖಾತೆಗಳಿಗೆ ತನ್ನದಲ್ಲದ ಹಣವೆಂದು ಕೂಡುತ್ತ ಬಂದರೆ ನಿಮ್ಮ ಜೀವನ ಯಶಸ್ವಿಯಾಗುತ್ತದೆ ಎಂದರು. ಅಂದಿನಿಂದ ಸುಮಾರು 16 ವರುಷಗಳ ಕಾಲ ಗೆಳೆಯರು, ಸಂಬಂಧಿಕರು, ಹುಟ್ಟು ಸಾವು, ಮದುವೆ ಮುಂಜಿ, ವೈಯಕ್ತಿಕ ಆಕಾಂಕ್ಷೆಗಳು, ರಾಜಕೀಯ ಕ್ಷೇತ್ರ ಎಲ್ಲವನ್ನೂ ತ್ಯಜಿಸಿ ಉದ್ದೇಶ ಸಾಧನೆಗೆ ಮಾಡಿದ ಪ್ರಯತ್ನದಿಂದ ಸ್ವಂತ ಕಾಲ ಮೇಲೆ ನಿಲ್ಲಲು ಸಾಧ್ಯವಾಯಿತು.

ಇಂದಿಗೂ ಸರಿಯಾಗಿ ಕಾರ್ಯಾಚರಿಸದ ಸುಳ್ಯಕ್ಕೆ ಶಾಪವಾಗಿಯೇ ಉಳಿದ ಒಳ ಚರಂಡಿ ಯೋಜನೆ ನನ್ನ ಬದುಕನ್ನೇ ಕಿತ್ತು ಸುಳ್ಯವನ್ನೇ ಬಿಟ್ಟುಬಿಡಬೇಕಾಗಿ ಬಂದಿರುವುದು ನನ್ನ ಜೀವನದ ಅತ್ಯಂತ ನೋವಿನ ದುಃಖಕರ ಘಟನೆಗೆ ನಾಂದಿ ಹಾಡಿದವರು ನಾವೇ ತನುಮನಧನ ಸಂಪೂರ್ಣ ಸಮಯವನ್ನು ಕೊಟ್ಟು ಬೆಳೆಸಿದ ಬಿ.ಜೆ.ಪಿ. ಯ ಕೆಲ ಕಾರ್ಯಕರ್ತರೆಂದು ಹೇಳಲು ಅತ್ಯಂತ ನೋವಾಗುತ್ತದೆ. ಇಡೀ ವ್ಯವಸ್ಥೆಯ ವಿರುದ್ಧ ನನ್ನನ್ನು ನಾನೇ ರಕ್ಷಿಸಿಕೊಳ್ಳಲು ಮಾಡಿದ ಹೋರಾಟಕ್ಕೆ ಸೋಲಾಗುದರಿಂದ ನನಗಿದ್ದ ಅಲ್ಪ ಸ್ವಲ್ಪ ಸ್ಥಳದಲ್ಲಿ ಒಂದಷ್ಟು ಭಾಗ ಸರಕಾರದ ಕೈ ವಶವಾದಾಗ ಅತ್ಯಂತ ದಯನೀಯ ನೋವಿನಿಂದ ಉಳಿದ ಸ್ವಲ್ಪ ಜಮೀನನ್ನು ಮಾರಾಟ ಮಾಡಿ 2006 ಕ್ಕೆ ನನ್ನ ಕುಟುಂಬ ಸಮೇತ ಸುಳ್ಯಕ್ಕೆ ವಿದಾಯ ಹೇಳಬೇಕಾಗಿ ಬಂದಿರುವುದು ನೆನೆಸುವಾಗ ಹೃದಯ ಭಾರವಾಗಿ ಇಂದಿಗೂ ಕಣ್ಣೀರು ಬರುತ್ತದೆ. ಇಷ್ಟಾದರೂ ಸಹ ಸಂಘ ನನ್ನನ್ನು ಧ್ಯೇಯ ನಿಷ್ಟತೆಯಿಂದ ವಿಮುಖನಾಗದೆ ಉಳಿಸಿದೆ. ಸ್ವಯಂ ಸೇವಕನಾಗಿ, ಬಿ.ಜೆ.ಪಿ ಯ ನಿಷ್ಠನಾಗಿ ಉಳಿಯುವಂತೆ ಮಾಡಿದೆ. ಸ್ವಾತಂತ್ರ್ಯ ಹರಣದ ಆ ಕರಾಳ ರಾತ್ರಿಯ ನೆನಪುಗಳ ನೆನಪಿನಂಗಳಕ್ಕೆ ಜಾರಿದಾಗ ನನ್ನ ಇಡೀ ಜೀವನದ ಸಂಕ್ಷಿಪ್ತ ಭಾಗ ಅಕ್ಷರಗಳಾಗಿ ಮೂಡಿ ಬಂತು.

ಧನಂಜಯ ವಾಗ್ಲೆ

ಪುತ್ತೂರು

ಮೋದೀಜಿಯವರ ಹುಲಿಯ ಮೇಲಿನ ಸವಾರಿ

2016-12-18T11:17:00.000+05:30

     125 ಕೋಟಿ ಜನರಿರುವ ದೊಡ್ಡ ದೇಶದ ಅರ್ಥವ್ಯವಸ್ಥೆಯನ್ನು ಬುಡಮೇಲು ಮಾಡಿ ಬಡವರನ್ನಾಗಿಸಿ, ಧನಿಕರನ್ನು ಧನಿಕರನ್ನಾಗಿಸಿದ ವ್ಯವಸ್ಥೆಯಲ್ಲಿ ರಾಜಕಾರಣಿಗಳು, ರಿಯಲ್ ಎಸ್ಟೇಟ್ ದಂಧೆಕೋರರು, ತೆರಿಗೆ ವಂಚಕರು, ಹವಾಲ ದಂಧೆಕೋರರು, ದೇಶದಲ್ಲಿರುವ ಅರ್ಧಕ್ಕಿಂತ ಹೆಚ್ಚು ತೆರಿಗೆ ವಂಚಕ ಯನ್.ಜಿ.ಓ. ಗಳು ಪಾಕಿಸ್ತಾನ ಪ್ರಾಯೋಜಿತ ಕಳ್ಳನೋಟು ದಂಧೆಕೋರರು, ಪ್ರತಿಯೊಂದು ಕೆಲಸಕ್ಕೂ ಲಂಚಕ್ಕೆ ಕೈಯೊಡ್ಡುವ ಲಂಚಕೋರರು, ತೆರಿಗೆ ವಂಚಕ ವ್ಯಾಪಾರಿಗಳು ಕೋಟಿಕೋಟಿ ಹಣ ಮನೆಯಲ್ಲಿ ಸಂಗ್ರಹಿಸಿಟ್ಟ ಕಾಳಧನಿಕರು, ಸ್ವಾತಂತ್ರ್ಯವನ್ನು ಸ್ವೇಚ್ಛಾಚಾರವೆಂದುಕೊಂಡು ರಾಷ್ಟ್ರದ್ರೋಹಿಗಳನ್ನು ಹೀರೋಗಳಂತೆ ಬಿಂಬಿಸಿದ ಬೆರಳೆಣಿಕೆಯ ಮಾಧ್ಯಮಗಳೂ ಸೇರಿದಂತೆ ಹಣಗಳಿಸುವ ಚಿಂತೆಯೊಂದೆ ಇದ್ದವರಿಗೆ ನವಂಬರ್ 8 2016 ರ ರಾತ್ರಿ ಎಂಟು ಗಂಟೆಯ ನಂತರ ಕರಾಳ ದಿನಗಳಾಗಿವೆ.
     ನವೆಂಬರ್ ಎಂಟರ ರಾತ್ರಿ 8 ಗಂಟೆಗೆ ದೇಶವನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ ಶ್ರೀ ನರೇಂದ್ರ ಮೋದಿಯವರು 500 ಮತ್ತು 1000 ಮುಖ ಬೆಲೆಯ ನೋಟುಗಳು ಈ ಕ್ಷಣದಿಂದಲೇ ಮೌಲ್ಯ ಕಳಕೊಂಡಿವೆ ಎಂದು ಘೋಷಣೆ ಮಾಡಿದರು. ಜನಸಾಮಾನ್ಯರಿಗೆ ತೊಂದರೆಯಾಗದ ರೀತಿಯಲ್ಲಿ ಮುಂದಿನ ಡಿಸೆಂಬರ್ 30 ರ ತನಕ ನ್ಯಾಯಯುತವಾದ ಹಣ ಬದಲಾಯಿಸಲು ಅವಕಾಶವಿದೆ ಎಂದು ಸಾರಿದರು. ಕಾಳಧನಿಕರಿಗೆ ರಂಗೋಲಿ ಅಡಿಯಲ್ಲಿ ತೂರಲು ಅವಕಾಶವಿಲ್ಲದಂತೆ 2 ದಿನಗಳ ಬ್ಯಾಂಕ್ ವ್ಯವಹಾರಗಳನ್ನು ನಿರ್ಬಂಧಿಸಲಾಯ್ತು. ಕೇವಲ 70 ನಿಮಿಷಗಳ ತಮ್ಮ ಭಾಷಣದಿಂದ ಉಳ್ಳವರನ್ನು ಬಡವರನ್ನು ಸಮಾನವಾಗಿಸಿ ಮುಂದಿನ ದಿನಗಳಲ್ಲಿ ದೇಶದ ದಿಕ್ಕನ್ನೇ ಬದಲಾಯಿಸುವ ನಿರ್ಧಾರ ಕೈಗೊಂಡರು.
    ಸ್ವಾತಂತ್ರ್ಯಾನಂತರ 70 ವರ್ಷಗಳ ಸುದೀರ್ಘ ಅವಧಿಯಲ್ಲಿ ದೇಶ ಸಂಪತ್ ಭರಿತವಾಗಿ ಪ್ರಜೆಗಳೆಲ್ಲರು ಸಮಾನವಾಗಿ ನೆಮ್ಮದಿಯಿಂದ ಇರಬೇಕಾಗಿತ್ತು. ದುರಾದೃಷ್ಟದಿಂದ ಆರ್ಥಿಕ ಅಂತರಗಳು ಜಾಸ್ತಿಯಾಗುತ್ತಲೇ ಹೋಯಿತು. ಜತೆಗೆ ಭಯೋತ್ಪಾದನೆ ವ್ಯವಸ್ಥೆಯನ್ನೇ ಬುಡಮೇಲು ಮಾಡಲು ಹವಣಿಸುತ್ತಿತ್ತು. ಕಾಳಧನಕ್ಕೂ ಭಯೋತ್ಪಾದನೆಗೂ ಹತ್ತಿರದ ಸಂಬಂಧಗಳನ್ನು ಅರಿತ ಪ್ರಧಾನಿಗಳು ತೆಗೆದುಕೊಂಡ ನಿರ್ಧಾರ ಸಮಯೋಚಿತವಾಗಿದೆ. ಇದರ ಫಲ ಗೋಚರವಾಗುತ್ತಿದೆ. ಬುರುಹಾನ್ ವಾನಿಯ ಹತ್ಯೆಯ ನಂತರ ಕಾಶ್ಮೀರ ಕಣಿವೆ ಹೊತ್ತಿ ಉರಿಯತೊಡಗಿತ್ತು. ಅಲ್ಲಿ ಹಾಕಿದ ಕರ್ಫ್ಯೂ ಇಂದಿನ ತನಕ ತೆಗೆದೇ ಇಲ್ಲ. ಆದರೂ ನವೆಂಬರ್ 9 ರಿಂದ ಸೈನಿಕರಿಗಾಗಲೀ ಪೋಲೀಸರಿಗಾಗಲಿ ಅಲ್ಲಿ ಕಲ್ಲು ಹೊಡಿಯುವವರೇ ಇಲ್ಲವಾಗಿದ್ದಾರೆ. ದೈನಂದಿನ ಚಟುವಟಿಕೆಗಳು ಪುನ: ಆರಂಭವಾಗಿವೆ. ಶಾಲಾ ಕಾಲೇಜುಗಳು ಆರಂಭವಾಗಿವೆ. ಜನತೆ ಶಾಂತವಾಗಿದೆ ಎಂದರೆ ಭಯೋತ್ಪಾದಕರಲ್ಲಿ ನೋಟಿಲ್ಲ. ಆದ ಕಾರಣ ಅವರಿಗೆ ಊಟದ ಚಿಂತೆ ಶುರುವಾಗಿದೆ. ಪ್ರತ್ಯೇಕವಾದಿ ಗಿಲಾನಿ ಮನೆಯಲ್ಲಿ 32 ಕೋಟಿಗೂ ಹೆಚ್ಚು ಜಪ್ತಿ ಮಾಡಿದ ವರದಿಗಳಿವೆ. ಇದು ಮೋದಿಯವರ 56 ಇಂಚಿನ ಎದೆಗಾರಿಕೆಯ ಫಲವೆಂದೇ ಹೇಳಬೇಕಾಗಿದೆ.
     ಮೋದಿ ಎಂಬ ಎರಡಕ್ಷರದ ಆ ವ್ಯಕ್ತಿಯನ್ನು ಒಮ್ಮೆ ತಿರುಗಿ ನೋಡಿ, ಅಧಿಕಾರ ವಹಿಸಿದ ದಿನದಿಂದ ಇಂದಿನ ತನಕ ಒಂದೆ ಒಂದು ರಜೆ ಪಡೆಯದೇ ತನ್ನ ಪ್ರಖರ ರಾಜತಾಂತ್ರಿಕ ನಡೆಯಿಂದ ಪ್ರಪಂಚದ ಬಲಾಡ್ಯ ರಾಷ್ಟಗಳು ಇಂದು ಭಾರತದತ್ತ ತಿರುಗಿ ನೋಡುವಂತೆ ಮಾಡಿದ ಮೋದಿಯವರ ನಡೆ ಸಾಮಾನ್ಯವಾದ್ದೇನು ಅಲ್ಲ. ತತ್ವ ಮತ್ತು ಸಿದ್ಧಾಂತಗಳ ಒಂದು ಆದರ್ಶವೇ ಮೋದಿ ಎಂಬ ವ್ಯಕ್ತಿ. ತನಗೆ ಸರಕಾರ ನೀಡಿದ ಸಂಬಳದ ವಿನ: ಒಂದೆ ಒಂದು ರುಪಾಯಿಯನ್ನು ಮುಟ್ಟದೇ ತನ್ನ ದೈನಂದಿನ ವೆಚ್ಚವನ್ನು ತಾನೇ ಭರಿಸಿದ (ಶಾಸ್ತ್ರೀಜಿ ಹೊರತು ಪಡಿಸಿ) ವರನ್ನು ಭಾರತ ಕಂಡಿದೆಯೇ?...
     ಭಾರತದ ರಾಜಕೀಯ ವ್ಯವಸ್ಥೆಯನ್ನು ತನ್ನ ಹಿಡಿತದಲ್ಲಿ ಇಟ್ಟುಕೊಂಡಿದ್ದ ಕಪ್ಪು ಕುಳಗಳು ಕೆಲವು ಮಾಧ್ಯಮದ ಮುಖ್ಯಸ್ಥರು ಕೆಲವು ಧಾರ್ಮಿಕ ಮುಖ್ಯಸ್ಥರೆನಿಸಿಕೊಂಡವರೇ ಆಡಳಿತಕ್ಕೆ ಬಂದ ಎಲ್ಲಾ ಸರಕಾರಗಳನ್ನು ತಮಗೆ ಬೇಕಾದಂತೆ ನಡೆಸುತ್ತಿದ್ದರು. MLA ಯಾರಾಗಬೇಕು, MP ಯಾರಾಗಬೇಕು. ಗೆದ್ದನಂತರ ಯಾರು ಮಂತ್ರಿಯಾಗಬೇಕು ಯಾರಿಗೆ ಯಾವ ಖಾತೆ ನೀಡಬೇಕು ಎಂದು ಒತ್ತಡ ಹಾಕಿ ನಿರ್ಧರಿಸುತ್ತಿದ್ದ ಮೇಲ್ಸ್ತರದ ಕುಳಗಳನ್ನು (ಸ್ವಪಕ್ಷೀಯರು ಸೇರಿದಂತೆ) ಒಂದೇ ಏಟಿಗೆ ಕಾನೂನು ಎಲ್ಲರಿಗೂ ಒಂದೇ ಎಂಬುದನ್ನು ಪರಿಚಯಿಸಿದರು. ಕಾಳಧನಿಕರ ನಿದ್ದೆಗೆಡಿಸಿ ದೇಶದ ನಾಗರಿಕರೆಲ್ಲ ಸಮಾನರು ಎಂದು ಮನವರಿಕೆ ಮಾಡಿಕೊಡುವಲ್ಲಿ ಯಶಸ್ವಿಯಾದರು.
     ಮೋದಿಯವರ ಪ್ರಭಲ ರಾಜಕೀಯ ವಿರೋಧಿ ಮೋದಿಯವರ ಹೆಸರು ಕೇಳಿದರೆ ಉರಿದು ಬೀಳುತ್ತಿದ್ದ ಬಿಹಾರದ ಮುಖ್ಯಮಂತ್ರಿ ನಿತೀಶ್ ಕುಮಾರರು ಹೀಗೆ ಹೇಳುತ್ತಾರೆ “ಪ್ರಧಾನಿ ಮೋದಿಯವರು ಹುಲಿಯ ಮೇಲೆ ಸವಾರಿ ಮಾಡುತ್ತಿದ್ದಾರೆ. ಅವರ ಉದ್ದೇಶವನ್ನು ಅರಿತು ನಾವೆಲ್ಲರೂ ಬೆಂಬಲಿಸಬೇಕಾಗಿದೆ” ಎಂದು. ಎಷ್ಟೊಂದು ನಿಜವಾದ ಮಾತು ಅಲ್ಲವೇ. ಅವರ ನಿರ್ಧಾರದಿಂದ ಕಪ್ಪು ಕುಳಗಳ ಮಿದುಳು ಕಾರ್ಯಾಚರಿಸುತ್ತಿಲ್ಲ. ಭಯೋತ್ಪಾದಕರಿಗೆ ಹೊಟ್ಟೆಗೆ ಅನ್ನ ತಿನ್ನಲೂ ಸಣ್ಣ ನೋಟು ಸಿಗದಾಗಿದೆ. ಹವಾಲ ದಂಧೆಕೋರರಿಗೆ ದಾರಿಕಾಣದಾಗಿದೆ. ನಕ್ಸಲರಿಗೆ ಊಟಕ್ಕೆ ಅನ್ನವೇ ಸಿಗದಾಗಿದೆ. ಕಾಳಸಂತೆಕೋರರಿಗೆ ವ್ಯವಹರಿಸಲು ದಾರಿಕಾಣದಾಗಿದೆ. ರಾಶಿ ರಾಶಿ ಹಣ ಕೂಡಿಟ್ಟವರ ಜಂಘಾ ಬಲ ಉಡುಗಿ ಹೋಗಿದೆ. ನೋಟುಗಳನ್ನು ರಾಶಿ ಹಾಕಿ ತರಗೆಲೆಗೆ ಬೆಂಕಿ ಕೊಟ್ಟಂತೆ ಸುಡುತ್ತಿದಾರೆ. ವಿದ್ಯಾಕ್ಷೇತ್ರವನ್ನು ವ್ಯಾಪಾರವನ್ನಾಗಿಸಿದ ಓರ್ವರು ತಮ್ಮ ನೌಕರರಿಗೆ ಮುಂಗಡ ಸಂಬಳ ನೀಡಲು ಮುಂದಾದಾಗ ನೌಕರರು ತಿರಸ್ಕರಿಸಿದರು. ಕೊನೆಗೆ ಎಲ್ಲರೂ ಕಾರು ತೆಗೆದುಕೊಳ್ಳಿ ಎಂದು ದುಂಬಾಲು ಬಿದ್ದರು. ನೌಕರರು ತಿರಸ್ಕರಿಸಿದಾಗ ದಾರಿಕಾಣದೆ ರಾತೋರಾತ್ರಿ ತನ್ನಲ್ಲಿ ಪೇರಿಸಿಟ್ಟ ಹಣದ ಕಟ್ಟುಗಳನ್ನು ಸುಟ್ಟು ಹಾಕಿದರೆಂದು ಯಾರೋ ಮಾತನಾಡಿದಾಗ ಕೇಳಿ ತಿಳಿಯಿತು. ಸ್ವಪಕ್ಷೀಯರು ಸಹಿತ ದೇಶದ ಎಲ್ಲಾ ರಾಜಕೀಯ ಕುಳಗಳನ್ನು ಬೆತ್ತಲಾಗಿಸಿ ಜೀವಂತ ಶವಗಳಂತೆ ನಡುಬೀದಿಯಲ್ಲಿ ನಿಲ್ಲಿಸಿದರಲ್ಲಾ ಮೋದಿಜಿ ನಿಜವಾಗಿಯೂ ಹುಲಿಯ ಮೇಲೆ ಸವಾರಿ ಮಾಡುತ್ತಿದ್ದಾರೆ. ಇದರಲ್ಲಿ ಗುರಿತಲುಪಿದರೆ ದೇಶದ ಕೋಟ್ಯಂತರ ಜನರಿಗೆ ಸಮಾನತೆ ದೊರೆಯುತ್ತದೆ. ಇಲ್ಲದೆ ಹೋದರೆ ಕಳೆದ 70 ವರ್ಷಗಳಿಂದ ದೇಶವನ್ನು ಕೊಳ್ಳೆಹೊಡೆದ ಕುಬೇರರು ಅರ್ಥಾತ್(ಬಕಾಸುರ ಸಂತತಿ) ಯವರು ಗೆಲ್ಲುತ್ತಾರೆ. ಮೋದಿಯವರ ಜತೆಯಲ್ಲಿ ದೇಶ ಸೋಲುತ್ತದೆ.
     ದೇಶದ ನೈಜ ಬದಲಾವಣೆಯ ಹರಿಕಾರರಾದ ಮೋದಿಜಿಯವರ ಹುಲಿಯ ಮೇಲಿನ ಸವಾರಿ ಕೊನೆ ಮುಟ್ಟುವಂತೆ ನಾವೂ ನೀವೂ ಬೆಂಬಲಿಸಿದರೆ ಬಡವರಿಗೆ ಸಮಾನತೆ ಸಂಪಾದನೆಯಾಗಬಹುದು. ಸೂರಿಲ್ಲದವರಿಗೆ ಸೂರೊಂದು ದೊರಕಬಹುದು. ಬಡವರೂ ತಮ್ಮ ಮಕ್ಕಳಿಗೆ ಒಳ್ಳೆಯ ವಿದ್ಯೆ ನೀಡಬಹುದು. ಬೆಲೆಗಳು ಕಡಿಮೆಯಾಗಿ ಸಂಪಾದನೆಯಲ್ಲಿ ಉಳಿತಾಯ ಮಾಡಬಹುದು. ಉದ್ಯೋಗ ವಂಚಿತ ಯುವಕರಿಗೆ ಒಳ್ಳೆಯ ಉದ್ಯೋಗ ದೊರಕಬಹುದು. ನಿರುದ್ಯೋಗಿಗಳಿಗೆ ಕಡಿಮೆ ಬಡ್ಡಿಯಲ್ಲಿ ಸಾಲ ದೊರಕಿ ಸ್ವಉದ್ಯೋಗಿಗಳಾಗಬಹುದು. ಈ ರೀತಿಯ ಬದಲಾವಣೆಯ ಹೊಸ ಭಾರತವನ್ನು ಕಾಣುವ ಮೋದಿಜಿಯವರ ಕನಸಿಗೆ ಜೀವ ತುಂಬಲು ನಾವು ನೀವೆಲ್ಲರೂ ಕೈಗೆ ಕೈ ಜೋಡಿಸಿ ಗುರಿತಲುಪಲು ಸಹಕರಿಸೋಣ...
ಧನಂಜಯ ವಾಗ್ಲೆ

ಪುತ್ತೂರು

ರಾಜ ತಾಂತ್ರಿಕತೆಯ ಮಾಂತ್ರಿಕನೆಂಬ ಮೋದಿ

2015-08-30T10:08:00.003+05:30

ಮೇ 26 ಅಭೂತಪೂರ್ವ ಯಶಸ್ಸಿನೊಂದಿಗೆ ಭಾರತದ ಪ್ರಧಾನಿಯಾಗಿ ಶ್ರೀ ನರೇಂದ್ರ ಮೋದಿಯವರು ಅಧಿಕಾರ ವಹಿಸಿ ಒಂದು ವರ್ಷ ಪೂರ್ತಿಗೊಳಿಸಿದ ದಿನ. ಈ ಕುರಿತು ದೇಶಾದ್ಯಂತ ಭಾರೀ ಚರ್ಚೆಗಳು ಆರಂಭವಾಗಿದೆ. ವಿರೋಧ ಪಕ್ಷಗಳು ತಮ್ಮ ಹಳೆಯ ಹಳಸಲು ಬಾಯಿಗಳಿಂದ ತಿರುಳಿಲ್ಲದ ಟೀಕೆಗಳನ್ನು ಮಾಡುತ್ತಿದೆ. ಬಹುಶ: ಸಂಸತ್ತಿನಲ್ಲಿ ಒಂದು ಪ್ರಭಲ ವಿರೋಧ ಪಕ್ಷವೇ ಇಲ್ಲದಿರುವುದು ಪ್ರತಿಪಕ್ಷಗಳು ಮರೆತಂತೆ ಕಾಣುತ್ತಿದೆ. ಹೀಗಾಗಿಯೇ ತಾರ್ಕಿಕವಲ್ಲದ ಬಾಲಿಶ ಆರೋಪಗಳನ್ನು ಮಾಡುತ್ತಿದೆ.

ಕಾಂಗ್ರೆಸ್ಸಿನ ಉಪಾಧ್ಯಕ್ಷರು ಮೋದಿಜೀ ಯವರ ಸರಕಾರ ಸೂಟುಬೂಟಿನ ಸರಕಾರ ಎಂದು ತುಂಬಾ ಗೇಲಿ ಮಾಡುವ ರೀತಿಯಲ್ಲಿ ಮಾತನಾಡುತ್ತಾರೆ. ಬದಲಾಗಿ ಶ್ರೀ ಮೋದಿಜೀ ಯವ ರ 365 ದಿನಗಳ ಸರಕಾರ ಮಾಡಿರುವ ಕೆಲಸ ಎಲ್ಲಿ ತಪ್ಪಿದೆ ಅದನ್ನು ಸರಿಪಡಿಸಲು ತಮ್ಮಲ್ಲಿರುವ ಯೋಜನೆಗಳೇನು ಎಂದು ನಿರ್ದಿಷ್ಟವಾಗಿ ಹೇಳುವ ಬದಲು ತಾವು ಮಾತನಾಡುವ ಸಭೆಯ 15-20 ನಿಮಿಷಗಳ ಭಾಷಣದಲ್ಲಿ ಈ ರೀತಿಯ ಬಾಲಿಶ ಟೀಕೆಗಳಿಗೆ ಮೀಸಲಾಗಿರುವುದನ್ನು ಕಾಣುತ್ತೇವೆ.ಬದಲಾಗಿ ಸರಿಯಾದ ದಿಕ್ಕಿನಲ್ಲಿ ದೇಶವನ್ನು ಹೇಗೆ ಮುನ್ನಡೆಸಬಹುದು ಎಂದು ಮಾತನಾಡಿದರೆ ಕಾಂಗ್ರೆಸ್ಸಿನ ಘನತೆಯಾದರೂ ಹೆಚ್ಚೀತು.

ಅಚ್ಛೆ ದಿನ್ ಬಂದಿದೆಯೇ ಎಂದು ಪ್ರತಿಯೊಂದಕ್ಕೂ ಕೇಳಲಾಗುತ್ತಿದೆ. ಒಂದು ರೈಲು ಒಂದು ಬಸ್ಸು ಬರುವುದು ತಡವಾದರೂ ಅಚ್ಛೆ ದಿನ್ ಬಂತಾ ಎಂದು ವಿರೋಧ ಪಕ್ಷಗಳು ಕುಹಕವಾಡುತ್ತಿವೆ. 40 ವರ್ಷಗಳ ಹಿಂದೆ ಕಾಂಗ್ರೆಸ್ ಪಕ್ಷ ಹಾಕಿದ ಘೋಷಣೆ “ಗರೀಬಿ ಹಠಾವೋ” ಕುರಿತು ಕಾಂಗ್ರೆಸ್ಸಿಗರು ಸಹಿತ ವಿರೋಧ ಪಕ್ಷಗಳು ಜತೆಗೆ ಮಾಧ್ಯಮಗಳು ಸಹಿತ ಯಾರೂ ಮಾತನಾಡುತ್ತಿಲ್ಲ ಏಕೆ? ಕೇವಲ 365 ದಿನಗಳ ಕುರಿತು ಋಣಾತ್ಮಕವಾಗಿ ಚರ್ಚಿಸಲಾಗುತ್ತಿದೆ. ಈ ಹಿಂದೆ ದೀರ್ಘಾವಧಿ ಅಧಿಕಾರ ನಡೆಸಿದ ಕಾಂಗ್ರೆಸಿನ ಕುರಿತು ಯಾವ ಚರ್ಚೆಗಳೂ ನಡೆಯುತ್ತಿಲ್ಲವೇಕೆ?

ಹೆಚ್ಚು ಕಡಿಮೆ 60 ವರ್ಷಗಳಿಂದ ಈ ದೇಶವನ್ನಾಳಿದ ಕಾಂಗ್ರೆಸ್ಸಿಗೆ ಶ್ರೀ ನರೇಂದ್ರ ಮೋದಿಯವರ ಸರಕಾರವನ್ನು ಟೀಕಿಸುವ ನೈತಿಕತೆಯಾದರೂ ಎಲ್ಲಿದೆ.. ಕಾಂಗ್ರೆಸ್ಸಿನ ಜನಪ್ರಿಯ ಘೋಷಣೆಗಳ ಯಶಸ್ಸಿನ ಕುರಿತು ಕಾಂಗ್ರೆಸ್ ಪಕ್ಷದಿಂದ ಒಂದು ವಿವರವಾದ ವರದಿಯನ್ನು ಭಾರತೀಯರು ನಿರೀಕ್ಷಿಸುತ್ತಿದ್ದಾರೆ. ಗರೀಬಿ ಹಠಾವೋ ಗೆ ಮೊದಲು ಭಾರತದಲ್ಲಿ ಎಷ್ಟು ಗರೀಬರಿದ್ದರು, ಇಷ್ಟೊಂದು ದೀರ್ಘಾವಧಿಯ ನಂತರ ಎಷ್ಟು ಗರೀಬರನ್ನು ಮೇಲೆತ್ತಿದ್ದೀರಿ ಎಂಬ ವಿವರಣೆಯನ್ನು ಕಾಂಗ್ರೆಸ್ ಬಹಿರಂಗ ಪಡಿಸಿದರೆ ಜನರಿಗೆ ತಿಳಿದು ಆನಂದವಾದೀತು.

ಕಾಂಗ್ರೆಸ್ಸಿನ ಗರೀಬಿ ಹಠಾವೋ ಘೋಷಣೆಯ ಪೊಳ್ಳುತನ ತಿಳಿಯಲು ಕರ್ನಾಟಕ ರಾಜ್ಯ ಒಂದೇ ಸಾಕಾದೀತು. ಒಂದು ವರದಿಯಂತೆ 1911 ರ ಜನಗಣತಿಯಂತೆ ರಾಜ್ಯದಲ್ಲಿ ಒಟ್ಟು 1.46ಕೋಟಿ ಕುಟುಂಬಗಳಿದ್ದವು. ಇದರಲ್ಲಿ ಕರ್ನಾಟಕ ಸರಕಾರ ಧರ್ಮಾರ್ಥವಾಗಿ ಅಕ್ಕಿ ಹಂಚುವ ಅಂತ್ಯೋದಯ, ಬಿ.ಪಿ.ಎಲ್. ಮುಂತಾದ ಗರೀಬರ ಸಂಖ್ಯೆ ನೋಡಿದರೆ ಅಚ್ಚರಿಯಾಗುತ್ತದೆ. 1-10ಕೋಟಿ ಕುಟುಂಬಗಳು ಬಡತನ ರೇಖೆಗಿಂತ ಕೆಳಗಿನವರೆಂದು ಧರ್ಮಾರ್ಥ ಸಿಗುವ ಆಹಾರ ಯೋಜನೆಯೊಳಗೆ ಬಂದಿದ್ದಾರೆಂದೂ, ಇನ್ನೂ ಒಂದಷ್ಟು ಲಕ್ಷ ಕುಟುಂಬಗಳೂ ಬರಲು ಬಾಕಿಯಾಗಿವೆ ಎಂದು ಆಹಾರ ಸಚಿವರ ಹೇಳಿಕೆಯಿಂದ ತಿಳಿಯುತ್ತದೆ. ದೀರ್ಘಾವಧಿ ರಾಷ್ಟ್ರವಾಳಿದ ಕಾಂಗ್ರೆಸ್ ಎಷ್ಟು ಗರೀಬರನ್ನು ಹಠಾವೋ ಮಾಡಿದೆ ಎಂದು ತಿಳಿದುಕೊಳ್ಳಲಾರದಷ್ಟು ಭಾರತೀಯರು ಮೂರ್ಖರೇನೂ ಅಲ್ಲ. ಇದಕ್ಕಾಗಿಯೇ ಕಾಂಗ್ರೆಸ್ ಪಕ್ಷವನ್ನು ಎಲ್ಲಿ ಕೂರಿಸಬೇಕೋ ಅಲ್ಲೇ ಕೂರಿಸಿದ್ದಾಗಿದೆ.

ಮೋದಿ ಜೀ ಯವರು ಧರಿಸಿದ ಸೂಟು ಒಂದು ವಾರದ ಒಳಗೆ ಗುಜರಾತಿನಲ್ಲಿ ಹರಾಜಿಗಿಟ್ಟರೆ 1-41 ಕೋಟಿಗೆ ಹರಾಜಾಗಿ ಆ ಹಣ ಗಂಗಾ ಶುಧ್ಧೀಕರಣಕ್ಕೆ ಬಳಕೆಯಾಗುತ್ತದೆ.( ಲಾಲ್ ಬಹದ್ದೂರ್ ಶಾಸ್ತ್ರಿ ಗಳನ್ನು ಹೊರತುಪಡಿಸಿ) ಈ ಹಿಂದಿನ ಪ್ರಧಾನಿಗಳು ತಾವು ಹೇಳಿದಂತೆ ನಡೆದಿದ್ದರೆ ದೇಶದಲ್ಲಿ ಮತ್ತು ಕರ್ನಾಟಕದಲ್ಲಿ ಇಷ್ಟೊಂದು ಗರೀಬರಿರಲು ಸಾಧ್ಯವಿತ್ತೆ? ಕಾಂಗ್ರೆಸ್ ಪಕ್ಷವೇ ಸ್ಪಷ್ಟಪಡಿಸಬೇಕಾಗಿದೆ. ಬೋಪೋರ್ಸ್, ಕಲ್ಲಿದ್ದಲು, ಗಣಿ, ತರಂಗಾಂತರ ಹಂಚಿಕೆ , ಕ್ರೀಡೆಯನ್ನೂ ಬಿಡದೆ ಸೂಟುಕೇಸಿನ ಆಡಳಿತ ನಡೆಸಿದ ಕಾಂಗ್ರೆಸ್ಸಿಗೆ ಮೋದೀಜಿಯವರು ಸರಿಯಾಗಿಯೇ ಹೇಳಿದ್ದಾರೆ. ಸೂಟುಕೇಸಿನ ಸರಕಾರಕ್ಕಿಂತ ಸೂಟುಬೂಟಿನ ಸರಕಾರವೇ ಉತ್ತಮವೆಂದು ಹೇಳಿರುವುದು ಸಕಾಲಿಕವಾಗಿದೆ.

ಸರ್ಕಾರ ಸಾಲಮಾಡಿ ಧರ್ಮಾರ್ಥ ಅಕ್ಕಿ ಕೊಡುವುದಕ್ಕೂ ಭಾರತದ ಮುಂದಿನ ಯುವ ಪೀಳಿಗೆಗೆ ಅಚ್ಚೆದೀನ್ ಕೊಡುವುದಕ್ಕೂ ಅಜಗಜಾಂತರ ವ್ಯತ್ಯಾಸವಿದೆ. ಪ್ರಧಾನಿಯಾಗಿ ಮೋದಿಜಿಯವರು ಅಧಿಕಾರಕ್ಕೆ ಬಂದ 6 ತಿಂಗಳಿನಲ್ಲಿ ಪ್ರಪಂಚವೇ ಬೆಕ್ಕಸಬೆರಗಾಗಿ ಭಾರತದತ್ತ ನೋಡುವಂತೆ ಮಾಡಿದ ಭಾರತದ ರಾಜತಾಂತ್ರಿಕ ಚಾಣಕ್ಯ ನೀತಿಯ ಈಗಿನ ಭಾರತ ಎನ್ನುವ ಸಂಗತಿ ವಿಷಕಾರುವ ವಿರೋಧ ಪಕ್ಷಗಳಿಗೆ ಅರಗಿಸಿಕೊಳ್ಳಲಾಗುತ್ತಿಲ್ಲ.

ಕಾಂಗೈ ನ 80 ಜನ ಎಂ.ಪಿ. ಗಳು ನರೇಂದ್ರ ಮೋದಿಜಿಯವರಿಗೆ ವಿಸಾ ನೀಡಲು ನಿರಾಕರಿಸುವಂತೆ ಅಮೇರಿಕಾ ದೇಶದ ಮೇಲೆ ಒತ್ತಡ ಹಾಕಿದಾಗ ಅಮೇರಿಕಾದಮ್ತಹ ದೈತ್ಯರಾಷ್ಟ್ರ ಮೋದೀಜಿಯವರಿಗೆ ವಿಸಾ ನೀಡಲು ನಿರಾಕರಿಸಿದಾಗ ಸಂತೋಷಪಟ್ಟು ಬೆನ್ನು ಚಪ್ಪರಿಸಿಕೊಂಡ ಕಾಂಗೈಗಳ ನದೇ ಇತಿಹಾಸದಲ್ಲಿ ಪ್ರಶ್ನಾರ್ಹವಾಗಿಯೇ ದಾಖಲಾಗಿದೆ.

ಕೇಂದ್ರ ಸರಕಾರದ ಜನ್ ಧನ್ ಯೋಜನೆಯ ಅಡಿಯಲ್ಲಿ ಕೇವಲ ಮೂರೇ ತಿಂಗಳಿನಲ್ಲಿ 12ಕೋಟಿಗೂ ಹೆಚ್ಚು ಖಾತೆಗಳನ್ನು ತೆರೆದು ಜಗತ್ತೇ ನಿಬ್ಬೆರಗಾದಾಗ, ಬೇರೆ ದೇಶಗಳು ಅದನ್ನೇ ನಕಲು ಮಾಡಿಕೊಂಡು, ಪ್ರಧಾನ ಮಂತ್ರಿ ಜೀವನ ಜ್ಯೋತಿ ಭೀಮಾ ಯೋಜನೆ, ಪ್ರಧಾನ ಮಂತ್ರಿ ಸುರಕ್ಷಾ ವಿಮಾ ಯೋಜನೆ, ಅಟಲ್ ಪಿಂಚಣಿ ಯೋಜನೆ ಕಡಿಮೆ ಅವಧಿಯಲ್ಲಿ 10 ಕೋಟಿಗೂ ಹೆಚ್ಚು ಜನ ನೊಂದಾಯಿಸಿಕೊಂಡಿರುವುದನ್ನು ಜನ ಕಲ್ಯಾಣಯೋಜನೆಗಳೆಂದು ಯಾಕೆ ಕೇಳಲಿಲ್ಲ. 365 ದಿನಗಳಲ್ಲಿ ಅಂತರಾಷ್ಟ್ರೀಯ ಮಟ್ಟದಲ್ಲಿ ಭಾರತ ಎಲ್ಲ ಹಂತಗಳಲ್ಲಿಯೂ ನಂಬರ್ 1 ಆಗುತ್ತಿರುವುದನ್ನು ಯಾಕೆ ಕೇಳಲಾಗುತ್ತಿಲ್ಲ.

ಮೋದೀಜಿ ಯವರು ಭಾರತದ ಗೌರವವನ್ನು ಪ್ರಪಂಚದಾದ್ಯಂತ ವಿಸ್ತರಿಸಿದನ್ನು ಗಮನಿಸಿದ ಅಮೇರಿಕಾ ವಿಸಾ ನೀಡುತ್ತೇವೆ ಎಂದು ಗೋಗರೆದಾಗಲೋ ಸತಾಯಿಸಿ, ಕೊನೆಗೂ ಭಾರತದ ಪ್ರಧಾನಿಯೋರ್ವರಿಗೆ ದೇಶೀಯ ಸಂಪ್ರದಾಯಗಳನ್ನು ಬದಿಗಿಟ್ಟು ಕೆಂಪು ಹಾಸಿನ ಸ್ವಾಗತ ನೀಡಿದರೂ, ಬಿಸಿನೀರನ್ನು ಹೊರತು ಏನನ್ನೂ ಸೇವಿಸದೆ ಅವರದೇ ದೇಶದ ನೆಲದಲ್ಲಿ ನಿಂತು 21 ನೆ ಶತಮಾನ ಭಾರತ ಶತಮಾನ ಎಂದುದ್ ಘರ್ಜಿಸಿದ್ದು ಭಾರತದ ಗೌರವವನ್ನು ಸೀಮಾತೀತವಾಗಿ ಹೆಚ್ಚಿಸಿದ ರೀತಿಯನ್ನು ಗಮನಿಸಿದರೆ ದೇಶದ ಹಿಂದಿನ ಪ್ರಧಾನಿಗಳು ಈ ರೀತಿ ನಡೆದುದನ್ನು ಇತಿಹಾಸದಿಂದ ಹುಡುಕಲು ಸಾಧ್ಯವೇ?

ವಿಶ್ವ ಸಂಸ್ಥೆಯಲ್ಲಿ ಭಾರತದ ಪ್ರಧಾನಿಗಳು ಎದ್ದು ನಿಂತು ಮುಂದಿನ ಜೂನ್ 21 ನ್ನು ವಿಶ್ವಯೋಗ ದಿನವನ್ನಾಗಿ ಮಾಡೋಣ ಎಂದರೆ ವಿಶ್ವ ಸಂಸ್ಥೆ 175 ಹೆಚ್ಚು ದೇಶಗಳು ದನಿಗೂಡಿಸುವಂತೆ ಮಾಡಿದ ರಾಜತಾಂತ್ರಿಕ ಹಿರಿಮೆ ಭಾರತದ್ದು ಎಂದರೆ ಇರುಸುಮುರುಸಾಗುವ ವಿರೋಧಪಕ್ಷಗಳಿಗೆ ಅರಗಿಸಿಕೊಳ್ಳಲಾಗುತ್ತಿಲ್ಲ.

ಭಾರತದ ಘನತೆಯನ್ನು ಪ್ರಪಂಚಕ್ಕೆ ಎತ್ತಿ ತೋರಿಸಿದ ರೀತಿಯನ್ನು ಒಮ್ಮೆ ಹಿಂದಿರುಗಿ ನೋಡುವಿರಾ... ಭಾರತ ಹಾವಾಡಿಗರ ದೇಶವೆಂದು ಭಾವಿಸಿದ್ದ ಅಂತಾರಾಷ್ಟ್ರೀಯರಿಗೆ ಭಾರತ ಹಾವಾಡಿಗರ ದೇಶವಲ್ಲ ಬದಲಾಗಿ ಕೈಯಲ್ಲಿ ಮೌಸ್ ಆಡಿಸಿ ಇಡೀ ಪ್ರಪಂಚವನ್ನೇ ಆಳಬಲ್ಲ ದೇಶವೆಂದು ಆಸ್ಟ್ರೇಲಿಯಾ ನೆಲದಲ್ಲಿ ನಿಂತು ಘರ್ಜಿಸಿದರಲ್ಲಾ.. ಭಾರತೀಯ ಯೋಗ ಪರಂಪರೆಗೆ ಜಗತ್ತೇ ತಲೆ ಬಾಗುವಂತೆ ಮಾಡಿದರಲ್ಲಾ, ಹಿಂಸೆಯಿಂದ ನಲುಗಿದ್ದ ಯೆಮೆನ್ ದೇಶದಿಂದ ಯಾವುದೇ ಸದ್ದುಗದ್ದಲವಿಲ್ಲದೆ 6,000 ಜನರನ್ನು ಹಾರಿಸಿಕೊಂಡು ಭಾರತ ಮತ್ತು ಇತರ ದೇಶೀಯರನ್ನು ಕರೆ ತಂದಲ್ಲಾ.. ಭಾರತಕ್ಕೆ ವಿಶ್ವ ಸಂಸ್ಥೆಯಲ್ಲಿ ಖಾಯಂ ಸದಸ್ಯತ್ವಕ್ಕೆ ಬಲಿಷ್ಠ ರಾಷ್ಟ್ರಗಳೇ ಒತ್ತಡ ತರುವಂತೆ ಮಾಡಿದರಲ್ಲಾ. 20 ರಾಷ್ಟ್ರಗಳಿಗೆ ಭೇಟಿ ನೀಡಿ ಭಾರತದ ನಿಲುವುಗಳನ್ನು ಸ್ಪಷ್ಟ ಪಡಿಸಿ ಅಂತರಾಷ್ಟ್ರೀಯ ಸಂಬಂಧಗಳನ್ನು ಸುಧಾರಿಸಲು ಹಗಲಿರುಳು ಶ್ರಮಿಸಿದರಲ್ಲಾ ಅಮೇರಿಕಾ ದೇಶದ ಅಧ್ಯಕ್ಷರನ್ನು ಭಾರತಕ್ಕೆ ಕರೆದು ಭಾರತದ ರೇಡಿಯೋದಲ್ಲಿ ಮಾತನಾಡಿಸಿದರಲ್ಲಾ. ಮೊತ್ತ ಮೊದಲ ಬಾರಿಗೆ ಚೀನಾ ಅಧ್ಯಕ್ಷರೊಬ್ಬರು ಶಿಷ್ಟಾಚಾರವನ್ನು ಬದಿಗೊತ್ತಿ ತಮ್ಮ ಹುಟ್ಟೂರಲ್ಲಿ ಸ್ವಾಗತಿಸುವಂತೆ ಮಾಡಿದರೂ ದೇಶಕ್ಕೋಸ್ಕರ ಹೋರಾಡುವ ಅವಕಾಶ ಸಿಗಲಿಲ್ಲ, ಕೊನೆಯ ಪಕ್ಷ ದೇಶಕ್ಕೊಸ್ಕರ ಬದುಕೋಣ ಎಂದು ಯುವಶಕ್ತಿಯನ್ನು ಎಚ್ಚರಿಸಿ ದೇಶಭಕ್ತಿ ಎಚ್ಚರಿಸುವಂತೆ ಮಾಡಿದ ರೀತಿ ನೋಡಿದಿರಾ... ಬಂಡುಕೋರರು ನಮ್ಮ ಸೈನಿಕರನ್ನು ಕೊಂದಿರುವುದನ್ನು ಮೌನವಾಗಿ ನೋಡಿ ಸಮರ್ಥ ಯೋಜನೆ ರೂಪಿಸಿ ನಮ್ಮ ಮೇಲೆರಗಿದ ನಿಮ್ಮ ಸ್ಥಿತಿ ನೆಟ್ಟಗಿರಲಾರದೆಂದು ನಮ್ಮ ಸೈನಿಕರ ಮುಖಾಂತರ ತೋರಿಸಿಕೊಟ್ಟು ರಾಜತಾಂತ್ರಿಕ ನೀತಿಯ ಮಾಂತ್ರಿಕತೆಯನ್ನು ಜಗತ್ತಿಗೆ ಸಾರಿದ ನರೇಂದ್ರ ಮೋದಿಯವರನ್ನು ಕಾಣುವ ರೀತಿ ಸಂಪೂರ್ಣ ಬದಲಾಗಬೇಕಾಗಿದೆ.

ಧನಂಜಯ ವಾಗ್ಲೆ

ಪುತ್ತೂರು

ಧರ್ಮ ದಂಡೋಸ್ಮಿ

2015-05-24T18:10:00.000+05:30

ಯದುವೀರ ಕೃಷ್ಣದತ್ತ ಜಯಚಾಮರಾಜೇಂದ್ರ ಒಡೆಯರ್ ಎಂದು ಪುನರ್ ನಾಮಕರಣಗೊಂಡ ಮೈಸೂರು ಸಂಸ್ಥಾನದ ಉತ್ತರಾಧಿಕಾರಿಯಾಗಿ ನೇಮಕಗೊಂಡ ದತ್ತು ಸ್ವೀಕಾರ ಕಾರ್ಯಕ್ರಮ ಪ್ರಜಾಪ್ರಭುತ್ವ ರೀತಿಯಲ್ಲಿ ಕೇವಲ ಖಾಸಗಿ ಕಾರ್ಯಕ್ರಮವೆ. ಆದರೂ ಆಹ್ವಾನವಿಲ್ಲದೆ ಬಂದ ಜನ ಸಾಗರ ನೋಡಿದರೆ ಸೋಜಿಗವೆನಿಸುತ್ತದೆ. ನಮ್ಮ ಕನ್ನಡದ ಟಿವಿ ಚಾನೆಲ್ ಗಳು ಸಮಾರಂಭದ ಎಲ್ಲಾ ಕಾರ್ಯಕ್ರಮಗಳನ್ನು ಚಾಚೂ ತಪ್ಪದೆ ಪ್ರಸಾರ ಮಾಡಿದುದನ್ನು ನೋಡಿದರೆ ಸ್ವಾತಂತ್ರ್ಯ ಬಂದು 68 ವರ್ಷಗಳು ಸಂದಿವೆಯೇ ಎಂಬ ಅನುಮಾನ ಮೂಡದೆ ಇರಲು ಸಾಧ್ಯವಿಲ್ಲ. ಕೇವಲ 300 ಜನ ಗಣ್ಯರಿಗೆ ಮಾತ್ರ ಆಹ್ವಾನ ನೀಡಿದ ರಾಜಮನೆತನದ ಕಾರ್ಯಕ್ರಮಕ್ಕೆ ಮೈಸೂರು ಸಂಸ್ಥಾನದ ಸುತ್ತಮುತ್ತ ಊರುಗಳಿಂದ ಮತ್ತು ವಿದೇಶಗಳಿಂದಲೂ ಬಂದ ಸಾವಿರ ಸಾವಿರ ಜನರ ಭಾವನೆಗಳನ್ನು ಅರಿಯುವಲ್ಲಿ ಕನ್ನಡ ಮಾಧ್ಯಮ ಸಫಲವಾಯಿತೆಂದೇ ಹೇಳಬೇಕು.

ಮೈಸೂರು ರಾಜಮನೆತನದ ಉತ್ತರಾಧಿಕಾರಿ ನೇಮಕದಲ್ಲಿ ಸ್ವಲ್ಪ ವಿವಾದದ ಅಲೆ ಎದ್ದಿದೆಯಾದರೂ ಮಹಾರಾಣಿಪ್ರಮೋದಾ ದೇವಿಯವರು ಸರಿಯಾದ ರೀತಿಯಲ್ಲೇ ಆಯ್ಕೆ ಮಾಡಿದ್ದಾರೆನಿಸುತ್ತದೆ. ಶ್ರೀ ಕಂಠದತ್ತರ ಉತ್ತರಕ್ರಿಯೆಯನ್ನು ನಡೆಸಿದ ಕಾಂತರಾಜೆ ಅರಸರನ್ನೇ ಆಯ್ಕೆ ಮಾಡಬಹುದೆಂಬ ಚರ್ಚೆ ಬಹಳವಾಗಿಯೇ ನಡೆದಿತ್ತು. ಕೊನೆಗೂ ಹಿರಿಯರಾದ ಮಹಾರಾಣಿಯವರ ಸಂಸ್ಥಾನದ ಸಾಂಪ್ರದಾಯಿಕವಾದ ಬೌದ್ಧಿಕ ನಡವಳಿಕೆಯ ಮಾರ್ಗದರ್ಶನದ ಮಾತುಗಳನ್ನು ಪಾಲಿಸಬಹುದೆಂಬ ನಿರೀಕ್ಷೆಯಿಂದ ಎಳೆಯ ಪ್ರಾಯದ ಯದುವೀರ ಅವರನ್ನು ಆಯ್ಕೆ ಮಾಡಿರುವುದು ಸಂಸ್ಥಾನಕೊಳಪಟ್ಟ ಜನರು ತುಂಬು ಹೃದಯದಿಂದ ಸ್ವಾಗತಿಸಿದ್ದಾರೆಂದರೆ ಅತಿಶಯೋಕ್ತಿಯೇನೂ ಅಲ್ಲ.

ಮೈಸೂರು ಸಂಸ್ಥಾನದ ಅರಸೊತ್ತಿಗೆ ಕಳೆದ 400 ವರ್ಷಗಳಿಂದಲೂ ಹೆಚ್ಚು ಚಾರಿತ್ರಿಕವಾಗಿ ಎಷ್ಟು ಜನಪ್ರಿಯವಾಗಿತ್ತು ಎನ್ನುವುದು ಆಮಂತ್ರಣವೀಯದೆ ಬಂದು ಸೇರಿದ ಸಾವಿರ ಸಾವಿರ ಜನರೇ ಸಾಕ್ಷಿ. ನಮ್ಮ ರಾಜಕಾರಣಗಳಿಗೆ ಅಸೂಯೆ ಹುಟ್ಟಿದರೂ ಆಶ್ಚರ್ಯಪಡಬೇಕಿಲ್ಲ. ರಾಜಕೀಯ ಸಮಾರಂಭಗಳಿಗೆ ಅಧಿಕಾರದ ಆಸೆ ತೋರಿಸಿ ಹಣಕೊಟ್ಟು ವಾಹನರೆಡಿಮಾಡಿ ಕರೆತಂದರೂ ಸಮಾರಂಭದಲ್ಲಿ ನಿಲ್ಲದ ಜನ ಮಹಾರಾಜರ ಮೆರವಣಿಗೆಯಲ್ಲಿ ತಮ್ಮ ಉತ್ತರಾಧಿಕಾರಿಯನ್ನು ನೋಡಲು ಮುಗಿಬಿದ್ದಾಗ ಪೊಲೀಸರು ಲಾಠಿ ರುಚಿತೋರಿಸಿದರೂ ಕದಲದೆ ಮೆರವಣಿಗೆಯುದ್ದಕ್ಕೂ ಸಾಗಿಬಂದ ಜನ ತಮ್ಮ ಮುಂದಿನ ಜನಾಂಗದ ಚಾರಿತ್ರಿಕ, ಧಾರ್ಮಿಕ, ಸಾಂಸ್ಕೃತಿಕ ರಾಯಭಾರಿಯನ್ನು ನೋಡಿ ಕಣ್ ತುಂಬಿಕೊಂಡು ಸಂತಸಪಟ್ಟರು.

ದತ್ತು ಸ್ವೀಕಾರಗೊಂಡು ಯದುವೀರ ಕೃಷ್ಣದತ್ತ ಜಯಚಾಮ ರಾಜೇಂದ್ರ ಒಡೆಯರ್ ರವರ ಹೆಗಲ ಮೇಲೆ ಬಹಳ ದೊಡ್ಡ ಜವಾಬ್ದಾರಿ ಬಿದ್ದಿದೆ. ಹಿಂದಿನ ರಾಜಪರಂಪರೆಯನ್ನು ಚಾರಿತ್ರಿಕ, ಧಾರ್ಮಿಕ, ಸಾಂಸ್ಕೃತಿಕವಾದ ಸತ್ ಸಂಪ್ರದಾಯಗಳನ್ನು ಜೀವನದಲ್ಲಿ ಪಾಲಿಸಿಕೊಂಡು ಬಂದು ಈ ಹಿಂದಿನ ಐತಿಹಾಸಿಕತೆಯ ಪರಂಪರೆಯನ್ನು ಮುಂದುವರಿಸಿ ಹಿಂದಿನಂತೆಯೇ ರಾಜಗುರುಗಳು ಪಟ್ಟವೇರಿದ ರಾಜತರ ತಲೆಯ ಕಿರೀಟದ ಮೇಲೆ “ಧರ್ಮ ದಂಡೋಸ್ಮಿ” ಎಂದು ಮೂರುಸಲ ಧರ್ಮದಂಡವನ್ನು ಮುಟ್ಟಿಸುತ್ತಿದ್ದರಂತೆ ಹಾಗೆಯೇ ತನಗಿಂತಲೂ ಮೇಲೆ ಧರ್ಮ ದಂಡ ವಿದೆ ಎನ್ನುವ ನಂಬಿಕೆಯಿಂದಲೆ ಯದುವಂಶ ಮೈಸೂರನ್ನು ಆಳಿದೆ ಮತ್ತು ಬಾರತದಲ್ಲಿ ಪ್ರಜಾಪ್ರಭುತ್ವ ಬರುವುದಕ್ಕೂ ಮೊದಲು ಒಂದು ಪ್ರಜಾ ರಾಜ್ಯ ಸ್ಥಾಪನೆ ಮಾಡಿ ನಡೆಸಿಕೊಂಡ ಹಿರಿಯರ ಮಾರ್ಗದರ್ಶನದಂತೆ ಸಾಂಸ್ಕೃತಿಕ ರಾಜಪರಂಪರೆಯ ವೈಭವವನ್ನು ಮುಂದಿನ ಜನಮಾನಸಕ್ಕೆ ಚಾಚೂ ತಪ್ಪದೆ ತಲುಪಿಸುವ ದೊಡ್ಡ ಜವಾಬ್ದಾರಿ ತಮಗೆ ಒದಗಿ ಬಂದಿದೆ. ಈ ಸಾಂಸ್ಕೃತಿಕ ರಾಯಭಾರಿತ್ವವನ್ನು ಮುಂದುವರೆಸಲು ಯದುವೀರರಿಗೆ ಸಾಧ್ಯವಾಗಲೆಂದು ಎಲ್ಲರ ಆಶಯ.

ಧನಂಜಯ ವಾಗ್ಲೆ

ಪುತ್ತೂರು

ಮಾತೃ ದೇವೋ ಭವ. ಕನ್ನಡದಲ್ಲಿ

2015-05-24T12:34:00.001+05:30

1975 ರ ಎಪ್ರಿಲ್ ನಲ್ಲಿ ಸುಳ್ಯ ತಾಲೂಕಿನ ಸಂಘದ ಪ್ರಚಾರಕರಾಗಿ ಬಂದವರು ದು.ಗು.ಲಕ್ಷ್ಮಣ ರವರು. ಜೂನ್ 26 ರಂದು ತುರ್ತು ಸ್ಥಿತಿ ದೇಶದ ಮೇಲೆ ಹೇರಲಾಯ್ತು. ದು.ಗು.ರವರು ಸುಮಾರು 24 25 ರ ತರುಣ. ತುರ್ತು ಸ್ಥಿತಿಯ ಆ ಕರಾಳ ಭಯಾನಕ ದಿನಗಳಲ್ಲಿಯೂ ಭೂಗತರಾಗಿ ಸಂಘದ ಕೆಲಸ ಮಾಡಿದವರು. ನಂತರ ಹೊಸದಿಗಂತ ಪತ್ರಿಕೆಯ ಸಂಪಾದಕರಾಗಿ ದುಡಿದವರು. ರಾಜ್ಯದಾದ್ಯಂತ ಅನೇಕ ಜಿಲ್ಲೆಗಳಲ್ಲಿ ಸಂಘ ಕಾರ್ಯ ಮಾಡಿದವರು.

ಸುಮಾರು 30 – 35 ವರ್ಷಗಳ ಕಾಲ ಸಾರ್ವಜನಿಕ ಜೀವನದಲ್ಲಿ ಕಂಡು ನೋಡಿ ಗಳಿಸಿದ ಅನುಭವದಿಂದ 16-05-2015ರ ಹೊಸದಿಗಂತದಲ್ಲಿ ಹೆತ್ತು ಹೊತ್ತವರು ಲಗ್ಗೇಜ್ ಗಳಾಗಿ ಬಿಟ್ಟರಲ್ಲಯ್ಯ ಎಂಬ ತಲೆಬರಹದಡಿ ಬರೆದ ಲೇಖನ ನಮ್ಮ ಸಮಾಜಕ್ಕೆ ಹಿಡಿದ ಕೈಗನ್ನಡಿಯಾಗಿತ್ತು. ಇಂದಿನ ಉದ್ಯೋಗದಲ್ಲಿರುವ ಗಂಡು ಹೆಣ್ಣುಗಳಿಗೆ ಈ ತೆರನಾದ ಭಾವನೆಗಳು ಹೆಚ್ಚುತ್ತಿರುವುದು , ವೃದ್ಧಾಶ್ರಮಗಳು ಹೆಚ್ಚುತ್ತಿರುವುದನ್ನು ನೋಡಿದರೆ ಅವರ ಮಾತು ಸತ್ಯವೆನ್ನಲೇ ಬೇಕಾಗುತ್ತದೆ.

ಜನ್ಮ ಕೊಟ್ಟವರನ್ನು ದೇವರಂತೆ ಕಾಣಬೇಕು ಎಂಬುದು ನಮ್ಮ ಸಂಸ್ಕೃತಿ ನಮಗೆ ಕಳಿಸಿದ ಪಾಠ. ಮಾತೃ ದೇವೋ ಭವ ಪಿತೃ ದೇವೋ ಭವ ಎಂದು ನಮ್ಮ ಪರಂಪರೆ ಹೇಳಿದ್ದು. ಆದರೆ ಕಾಲ ಬದಲಾದಂತೆ ಆಧುನಿಕತೆಯ ಅಟ್ಟಹಾಸ ಮೆರೆದಂತೆ ಜನ್ಮ ಕೊಟ್ಟವರು, ಹೆತ್ತು ಹೊತ್ತವರು ಮನೆಯ ಹಳೆಯ ಲಗ್ಗೆಜುಗಳಾಗಿ ಬದಲಾಗುತ್ತಿರುವುದು ಈ ಕಾಲದ ಒಂದು ವೈರುಧ್ಯ. ವಯಸ್ಸಾದ ನಿತ್ರಾಣಗೊಂಡ ತಂದೆ ತಾಯಿಯರನ್ನು ವೃದ್ಧಾಶ್ರಮಕ್ಕೆ ತಳ್ಳಿ ಪೀಡೆ ತೊಲಗಿತೆಂದು ನಿರಾಳರಾಗುತ್ತಿರುವುದು ಇನ್ನೊಂದು ವೈರುಧ್ಯ. ಆದರೆ ಹೆತ್ತು ಹೊತ್ತವರನ್ನು ಹಳೆಯ ಲಗ್ಗೆಜುಗಳಂಟೆ ಕಾಣುವವರು ಮುಂದೊಂದು ದಿನ ತಮಗೂ ಈ ಸ್ಥಿತಿ ಎದುರಾಗುವುದನ್ನು ಮರೆತಂತಿದೆ.

21 ನೆಯ ಶತಮಾನಕ್ಕೆ ಅಡಿಯಿಟ್ಟು ಆಧುನಿಕತೆಯಲ್ಲಿ ಮೈ ಮರೆತ ಯುವಕ ಯುವತಿಯರಿಗೆಲ್ಲ ಈ ಪ್ರಶ್ನೆ ಒಂದಲ್ಲ ಒಂದು ದಿನ ಕಾಡದಿರುವುದಿಲ್ಲ. ಕಾಲಬದಲಾದಂತೆ ಹೊಸಪೀಳಿಗೆಯವರಿಗೆ,ಸಂಸ್ಕಾರವಿಲ್ಲದೆ ನಡೆಯುತ್ತಿರುವ ಯುವ ಜನಾಂಗವನ್ನು ಒಮ್ಮೆ ನೋಡಿದರೆ ಮೇಲಿನ ಮಾತು ನೂರಕ್ಕೆ ನೂರರಷ್ಟು ಸತ್ಯವೆನಿಸುತ್ತದೆ.

ಆಗಿನ ಕಾಲದಲ್ಲಿ ನಾವು ಸಂಘವನ್ನು ಕಾಣುತ್ತಿದ್ದುದೇ ಸಂಘದ ಪ್ರಚಾರಕರಲ್ಲಿ. ಜೀವನದಲ್ಲಿ ಮರೆಯಲಾರದ ಅನೇಕ ಸಿದ್ಧಾಂತಗಳನ್ನು ಕಲಿತು ಜೀವನದಲ್ಲಿ ಅಳವಡಿಸಿಕೊಂಡಿದ್ದು ದು.ಗು.ಲಕ್ಷ್ಮಣ ಮತ್ತು ದಿವಂಗತ ಪುಟ್ಟಪ್ಪ ಜೋಷಿಯವರಲ್ಲಿ, ವಿದ್ಯಾವಂತನಲ್ಲದ ನನ್ನ ಜೀವನದಲ್ಲಿ ಅನೇಕ ಸಿದ್ಧಾಂತ ಬದ್ದತೆಗಳನ್ನು ಕಲಿಸಿದವರಲ್ಲಿ ನೆನಪಿನಲ್ಲಿ ಉಳಿಯುವಂತಹ ವ್ಯಕ್ತಿಗಳು.

ಅವರ ನಡೆನುಡಿ ಒಂದಾಗಿ ಸಿದ್ಧಾಂತಗಳಾಗಿ ಬದುಕಿದವರು. ಅವರಿಬ್ಬರ ಮಾರ್ಗದರ್ಶನಗಳು ನನ್ನ ಬಡ ಜೀವನದ ಏಳುಬೀಳುಗಳಲ್ಲಿ ಅನೇಕ ಸಲ ಸಂಕಷ್ಟಗಳಿಂದ ಪಾರುಮಾಡಿದ್ದಿದೆ. ಸಂಘದ ಧ್ಯೇಯಗಳು ಜೀವನದಲ್ಲಿ ಅಳವಡಿಸಿಕೊಂಡ ಬದ್ಧತೆಗಳು ಜೀವನದಲ್ಲಿ ನಾನೇ ಕಲಿತುಕೊಂಡ ದುಶ್ಚಟಗಳನ್ನು ಬಿಡಲು ನನ್ನ ಮನೋಬಲವನ್ನು ಹೆಚ್ಚಿಸಿದೆ. ಕುಡಿತ 4 ವರ್ಷ, ಎಲೆ ಅಡಿಕೆ ಹೊಗೆಸೊಪ್ಪು, ಹೆಚ್ಚುಕಮ್ಮಿ 25 ವರ್ಷ ಒಂದನ್ನು ಬಿಡಲು ಇನ್ನೊಂದು ಎಂಬಂತೆ ಬೀಡಿ ಬಿಡಲು ನಶ್ಯ, ನಶ್ಯ ಬಿಡಲು ಸಿಗರೇಟು. ಎಲ್ಲವನ್ನು ನಾನು ಕಲಿತ ಬಲವಾದ ಸಿದ್ಧಾಂತಗಳಿಂದಲೇ ಬಿಟ್ಟು ಎಲ್ಲ ದುಶ್ಚಟಗಳಿಂದ ಬಹಳ ದೂರ ಸಾಗಿ ಬಂದಿದ್ದೇನೆ.

ಪಿತೃ ದೇವೋ ಭವ ಅವರು ನನ್ನ ಹದಿನಾರರಲ್ಲಿ ತೀರಿಕೊಂಡರು. ನನ್ನ ಹೆತ್ತಮ್ಮ ಸಾಮಾಜಿಕ ಕಾರ್ಯಗಳಿಗೆ ಎಂದೂ ಅಡ್ಡಿ ಪಡಿಸಿದವರಲ್ಲ. ದು.ಗು., ಜೋಷಿ ಯವರ ನಿತ್ಯ ಸಂಪರ್ಕದಿಂದ ಅವರ ಗುಣ ನಡತೆಯಿಂದ ಅಮ್ಮ ಆನೇಕ ಸಲ ನನ್ನಲ್ಲಿ ಹೇಳಿದ್ದಿದೆ “ಮನೆ ಸಂಸಾರ ಕುಟುಂಬಗಳನ್ನು ಬಿಟ್ಟು ಬೇರಾವುದೋ ಉರಿನಲ್ಲಿ ಹಿಂದೂ ಎಂಬ ಸಂಸಾರವನ್ನು ಕಟ್ಟಿಕೊಂಡು ಸಮಾಜದ ಕೆಲಸ ಮಾಡುತಿದ್ದರಲ್ಲ” ಎಂದು. ದುಡಿದು ದುಡಿದು ಕಷ್ಟಪಟ್ಟ ಜೀವ ಅವರ ಕೊನೆಯ ದಿನಗಳಲ್ಲಿ ಬಹಳವಾಗಿ ನೊಂದಿದ್ದರು. ಎಲ್ಲ ಕೆಲಸಗಳಿಗೂ ಇನ್ನೊಬ್ಬರನ್ನು ಆಶ್ರಯಿಸಬೇಕಾಗಿತ್ತು. ಏಳು ವರ್ಷಗಳ ದೀರ್ಘ ಕಾಲ ಮಲಗಿದಲ್ಲೇ ಕಾಲ ಕಳೆಯ ಬೇಕಾಯಿತು.

ವಿದ್ಯಾವಂತನಲ್ಲದಿದ್ದರೂ, ಸೈದ್ಧಾಂತಿಕವಾಗಿ ನನ್ನನ್ನು ವಿದ್ಯಾವಂತನನ್ನಾಗಿ ಮಾಡಿದ ವ್ಯಕ್ತಿಗಳ ಜೀವನ ಮತ್ತು ಮಾರ್ಗದರ್ಶನದಿಂದ ಕಲಿತ ಪಾಠದಿಂದ ಲಗೇಜಾಗಿದ್ದ ನನ್ನ ಹೆತ್ತಮ್ಮನನ್ನು ದೀರ್ಘ ಸಮಯ ಕ್ಷಣ ಕ್ಷಣ ಕಾಳಜಿಯಿಂದ ಅವರ ದೈನಂದಿನ ಕೆಲಸವನ್ನು ಚಾಚೂ ತಪ್ಪದೆ ನಿರ್ವಹಿಸಿ ಎಪ್ರಿಲ್ 16 2013 ರಂದು ಬೆಳಗಿನ ಹೊತ್ತು ಕಾಫಿ ಕುಡಿಸಿದ ನನ್ನ ಕೈಯಲ್ಲೇ ತಲೆಯನ್ನಿಟ್ಟು ಇಹಲೋಕ ತ್ಯಜಿಸಿದರು.

ನಾವೂ ಮುಂದೊಂದು ದಿನ ಲಗ್ಗೇಜುಗಳಾಗಬಹುದೆಂಬ ದೂರದೃಷ್ಟಿ ಇದ್ದರೆ ನಮ್ಮ ಹೆತ್ತವರನ್ನು ಕಾಳಜಿಯಿಂದ ನೋಡಿಕೊಳ್ಳುವುದು ಅವರ ಅವಶ್ಯಕತೆಗಳನ್ನು ಪೂರೈಸುವುದು ನಮ್ಮ ಏಕಮಾತ್ರ ಕರ್ತವ್ಯವಾಗಬೇಕು. ಆಗ ಮಾತ್ರ ಮಾತೃ ದೇವೋ ಭವ ಪಿತೃ ದೇವೋ ಭವ ಎನ್ನುವ ಮಾತಿಗೆ ನಿಜವಾದ ಅರ್ಥ ಸಿಗಬಹುದು.

ಧನಂಜಯ ವಾಗ್ಲೆ

ಪುತ್ತೂರು

ಹುಟ್ಟುಹಬ್ಬದ ಸಾರ್ಥಕತೆ

2015-01-26T19:30:00.002+05:30

ಭಾರತೀಯ ಸಂಸ್ಕೃತಿಯಲ್ಲಿ ಹುಟ್ಟು ಹಬ್ಬಕ್ಕೆ ತನ್ನದೇ ಆದ ವೈಶಿಷ್ಟ್ಯತೆ ಇದೆ. ವೈದಿಕ ಸಂಸ್ಕಾರಗಳಿವೆ. ಅತೀ ವೇಗದಿಂದ ಬದಲಾಗುತ್ತಿರುವ ಈ ದಿನಗಳಲ್ಲಿ ನಾವು ನಮ್ಮ ಸಂಸ್ಕಾರ ಸಂಸ್ಕೃತಿಗಳನ್ನು ಮರೆತು ವಿದೇಶೀ ಸಂಸ್ಕೃತಿಗೆ ವಿವೇಚನೆಗಳಿಲ್ಲದೆ ಮಾರು ಹೋಗುತ್ತಿರುವುದು ನಮ್ಮ ಜೀವನದ ಗುರಿ ಏನು, ನಾವು ಯಾವ ಕಡೆಗೆ ಹೋಗುತ್ತಿದ್ದೇವೆ ಒಂದೂ ತಿಳಿಯದಂತಾಗಿದೆ.

ಇತ್ತೀಚಿನ ದಿನಗಳಲ್ಲಿ ಹುಟ್ಟುಹಬ್ಬ,ಮದುವೆ, ಮುಂಜಿಗಳಿಗೆ ಲಕ್ಷಾಂತರ ಖರ್ಚು ಮಾಡಿ ಕೇಕ್ ಕತ್ತರಿಸಿ ಉರಿಸಿದ ದೀಪವನ್ನು ಆರಿಸುವ ಪದ್ಧತಿ ಜರೂರಾಗಿ ಬೆಳೆಯುತ್ತಿದೆ. ಈ ರೀತಿಯ ಹುಟ್ಟುಹಬ್ಬವನ್ನು ಆಚರಿಸುವ ಸಂಸ್ಕೃತಿ ನಮಗೆ ವಿದೇಶಿಗರಿಂದ ಬಂತೆನ್ನುವುದಕ್ಕೆ ಪುರಾವೆ ಏನೂ ಬೇಕಾಗಿಲ್ಲ. ವಿದೇಶಿಯಾದುವುಗಳೆಲ್ಲ ನಮಗೆ ಬಹಳ ಪ್ರಿಯವಾಗುತ್ತವೆ. ವಿದೇಶಿ ಸಂಸ್ಕೃತಿಯನ್ನು ನಮ್ಮ ಜೀವನದಲ್ಲಿ ಆ ಮಟ್ಟಕ್ಕೆ ನಮ್ಮ ಮನಸ್ಸಲ್ಲಿ ಬಿತ್ತಿ ಬೆಳೆಸಿ ಹೋಗಿದ್ದಾರೆ.

ಹುಟ್ಟು ಹಬ್ಬವೆಂದರೆ ಮೋಜು ಮಸ್ತಿಗಳು ಇಂಗ್ಲೀಷ್ ಹಾಡುಗಳು ಇರಲೇ ಬೇಕಲ್ಲವೆ. ಗಂಡು ಹೆಣ್ಣುಗಳ ಬೇಧ ಭಾವವಿಲ್ಲದೆ ಕುಡಿದು ಕುಣಿದು ಕುಪ್ಪಳಿಸಿದರೆ ಮಾತ್ರ ಹ್ಯಾಪಿ ಬರ್ತ್ ಡೇ ಆಗುತ್ತದೆ. ಈ ರೀತಿಯ ಆಚರಣೆಗಳು ಭಾರತೀಯ ಸಾಂಸ್ಕೃತಿಕ ಪರಂಪರೆಯನ್ನು ನಾಶಗೊಳಿಸಿದ್ದೆ ಅಲ್ಲದೆ ಬೌದ್ಧಿಕ ದಿವಾಳಿತನವನ್ನು ಸೃಷ್ಟಿಸಿದೆ. ಅಷ್ಟೇ ಏಕೆ ನಗರ ಪಟ್ಟಣಗಳಲ್ಲಿ ಕ್ಲಬ್ ಬಾರ್ ಗಳಲ್ಲಿ ತಮ್ಮ ತಮ್ಮ ಕಾರುಗಳ ಕೀ ಬದಲಾಯಿಸಿಕೊಳ್ಳುವುದರೊಂದಿಗೆ ತಮ್ಮ ಸಂಸಾರಿಗಳನ್ನು ಬದಲಾಯಿಸಿಕೊಳ್ಳುವ ಘೋರ ಕೃತ್ಯಗಳು ನಡೆಯುತ್ತಿರುವುದು ನಮ್ಮ ಸಾಂಸ್ಕೃತಿಕ ಪರಂಪರೆಯ ಮೇಲೆ ನಡೆಯುತ್ತಿರುವ ಆಕ್ರಮಣ ಎಂದರೆ ತಪ್ಪಾಗಲಾರದು.

ಮಾತೃ ಸ್ವರೂಪಿ ಹೆಣ್ಣಿನ ಮೇಲೆ ಇಂದು ನಡೆಯುತ್ತಿರುವ ಕ್ರೂರ ದೌರ್ಜನ್ಯಗಳು ಕೊಲೆ ಸುಲಿಗೆಗಳ ಸುದ್ದಿಗಳು ಪತ್ರಿಕೆ ದೃಶ್ಯ ಮಾಧ್ಯಮಗಳಲ್ಲಿ ಬಂದಾಗ ಈ ಸುದ್ದಿಗಳು ಸಾಮಾನ್ಯವೆನ್ನುವಷ್ಟರ ಮಟ್ಟಿಗೆ ನಮ್ಮಲ್ಲಿ ವಿದೇಶೀ ಸಂಸ್ಕೃತಿಯ ಭ್ರಮೆಯನ್ನು ಹುಟ್ಟಿಸಿದೆ ಎಂದರೆ ತಪ್ಪಾಗಲಾರದು. ಈ ಭ್ರಮೆಗಳು ಕ್ರಮೇಣವಾದರೂ ಕಡಿಮೆಯಾಗಬೇಕಲ್ಲವೇ.. ನಮ್ಮ ಮೊಮ್ಮಕ್ಕಳ ಕಾಲವಾದರೂ ಸುಸಂಸ್ಕೃತವಾಗಿ ಅವರು ಬಾಳಿ ಬದುಕಬೇಕಲ್ಲವೇ.. ಅದಕ್ಕಾಗಿ ಪ್ರಯತ್ನವನ್ನು ನಾವೇ ಆರಂಭಿಸಬೇಕಲ್ಲವೇ.?

ಹುಟ್ಟುಹಬ್ಬವೆಂಬುದು ಒಂದು ಪವಿತ್ರ ವೈಯಕ್ತಿಕ ಆಚರಣೆ, ಇದನ್ನು ನಮ್ಮ ಎಳೆಯ ಮಕ್ಕಳಿಗೆ ನಾವೇ ನಮ್ಮ ಸಂಸೃತಿಯ ಹಿರಿಮೆಯನ್ನು ಆಚರಿಸಿ ತೋರಿಸಬೇಕಲ್ಲವೇ. ನಮ್ಮ ಮೊಮ್ಮಗಳ ಹುಟ್ಟು ಹಬ್ಬವನ್ನು ಒಂದು ಅರ್ಥಪೂರ್ಣ ರೀತಿಯಲ್ಲಿ ಆಚರಿಸಲು ಸಂಕಲ್ಪಿಸಿದ ನಾವು ಮನೆಯನ್ನು ಶುಚಿಗೊಳಿಸಿ ಸ್ನಾನಾದಿ ನಿತ್ಯ ಕರ್ಮಗಳನ್ನು ಪೂರೈಸಿ ಪಾಯಸದ ಅಡುಗೆಯನ್ನು ತಯಾರಿಸಿ, ಮಧ್ಯಾಹ್ನದ ಹೊತ್ತಿಗೆ ಮಗುವಿಗೆ ಹೊಸಬಟ್ಟೆ ತೊಡಿಸಿ, ಸ್ವಲ್ಪ ಚಿನ್ನವನ್ನು ತೊಡಿಸಿ ಸಿಂಗರಿಸಿ ನಮ್ಮ ಸೀಮೆಯ ಪುತ್ತೂರು ಮಹಾಲಿಂಗೇಶ್ವರನ ಸನ್ನಿಧಿಯಲ್ಲಿ ಶ್ರೀ ದೇವರಿಗೆ ಮಹಾಪೂಜೆಯನ್ನು ನೆರವೇರಿಸಿ ಸನ್ನಿಧಾನದಲ್ಲಿ ಮಗುವಿಗೆ ಆರೋಗ್ಯ ವಿದ್ಯಾಬುದ್ದಿ ಆಯಸ್ಸು ಶ್ರೇಯಸ್ಸಿಗಾಗಿ ಪುರೋಹಿತರು ಪ್ರಾರ್ಥಿಸಿ ಪ್ರಸಾದದ ನಂತರ ಮನೆಗೆ ಮರಳಿ ಮನೆದೇವರಿಗೆ ಯಥಾನುಶಕ್ತಿ ಪೂಜೆ ಮಾಡಿ ಮಂಗಳಾರತಿ ಬೆಳಗಿ ಮಗುವನ್ನು ತಾಯೊಂದಿಗೆ ಕುಳ್ಳಿರಿಸಿ ಸುಮಂಗಲಿಯರು ಅಕ್ಷತೆ ಹಚ್ಚಿ ಶೋಭಾನೆ ಹಾಡಿ ಆರತಿ ಬೆಳಗಿಸಿ ಹಿರಿಯರೆಲ್ಲ ಆಶೀರ್ವದಿಸಿದೆವು. ಎಲ್ಲರು ಒಟ್ಟಿಗೆ ಊಟ ಮಾಡಿದಾಗ ಒಂದು ಹೊಸ ಧನ್ಯತಾ ಭಾವ ಉಂಟಾಯಿತು. ಪ್ರತಿ ವರುಷ ಕೇಕ್ ಕತ್ತರಿಸಿ ದೀಪ ಆರಿಸುವ ಬದಲು ದೇವರಿಗೆ ಪೂಜೆ ಮಾಡುವ ವಿಧಾನವನ್ನು ಕಲಿಸಿದರೆ ಮುಂದೆ ಅವಳ ಮಕ್ಕಳಿಗೂ ಅವಳು ಅದನ್ನೇ ತಿಳಿಸಿ ನಮ್ಮ ಸಾಂಸ್ಕೃತಿಕ ಪರಂಪರೆಯನ್ನು ಉಳಿಸಿ ಬೆಳೆಸುವಂತೆ ನಮ್ಮೆಲ್ಲ ಮಕ್ಕಳು ಹುಟ್ಟುಹಬ್ಬವನ್ನು ಇದೇ ರೀತಿ ಆಚರಿಸಲು ಪ್ರೇರಣೆ ಉಂಟಾದರೆ ನಮ್ಮ ಮೊಮ್ಮಗಳ ಈ ವರುಷದ ಹುಟ್ಟು ಹಬ್ಬ ಸಾರ್ಥಕತೆಯನ್ನು ಉಂಟುಮಾಡುತ್ತದೆ.

"ಓಂ ಅಸತೋಮ ಸದ್ಗಮಯ

ತಮಸೋಮ ಜ್ಯೋತಿರ್ಗಮಯ

ಮೃತ್ಯೋರ್ಮ ಅಮೃತಂಗಮಯ"

.............

“ಅಸತ್ಯದಿಂದ ಸತ್ಯದ ಕಡೆಗೆ
ಕತ್ತಲಿನಿಂದ ಬೆಳಕಿನೆಡೆಗೆ
ಜಡತ್ವದಿಂದ ಚೈತನ್ಯದೆಡೆಗೆ” ಸಾಗೋಣ

.........

ಧನಂಜಯ ವಾಗ್ಲೆ

ಪುತ್ತೂರು

ಜಗತ್ತಿನ ಎಂಟನೇ ಅದ್ಭುತದಲ್ಲೊಂದಾಗುವ ಮೂರನೇ ರಂಗ

2015-01-13T17:38:00.000+05:30

ಲೋಕ ನಾಯಕ ಜಯಪ್ರಕಾಶ ನಾರಾಯಣರವರ ನೇತೃತ್ವದಲ್ಲಿ ಬೇರೆ ಬೇರೆ ಸಿದ್ಧಾಂತಗಳನ್ನು ಹೊಂದಿರುವ ಪಕ್ಷಗಳು ಒಂದೇ ಸೂರಿನಡಿ ಒಗ್ಗೂಡಿ ಜನತಾ ಪಕ್ಷ ಉದಯವಾಗಿ ತುರ್ತು ಪರಿಸ್ಥಿತಿಯ ವಿರುದ್ಧ ಹೋರಾಡಿ ಅಧಿಕಾರಕ್ಕೇರಿದ ಈಗಿನ ಹಳೆಯ ರಾಜಕಾರಣಿಗಳು ತಮಗೆ ಸಿಕ್ಕಿದ ಜನಾದೇಶವನ್ನು ಸರಿಯಾಗಿ ನಿಭಾಯಿಸಲಾರದೆ, ವೈಯಕ್ತಿಕ ಆಸೆ ಆಕಾಂಕ್ಷೆಗಳಿಗಾಗಿ ಜನತಾ ಪಕ್ಷವನ್ನು ಒಡೆದು ಬೇರೆ ಬೇರೆ ದಳಗಳಾಗಿ ತಮ್ಮ ತಮ್ಮ ಅಸ್ತಿತ್ವವನ್ನು ಉಳಿಸಿಕೊಂಡು ಕುಟುಂಬ ರಾಜಕಾರಣಕ್ಕೆ ನಾಂದಿ ಹಾಡಿದರು. ಸಮಾಜವಾದದ ನೆಲೆಯಲ್ಲಿ ಮುಲಾಯಂ ಸಿಂಗರು, ಜಾತಿಗಳ ದೃಷ್ಟಿಯನ್ನಿಟ್ಟುಕೊಂಡು ಆರ್.ಜಿ.ಡಿ. ಯ ಲಾಲೂ ಪ್ರಸಾದ್ ಯಾದವ್, ಜಾತಿ ಮತ್ತು ಅಲ್ಪ ಸಂಖ್ಯಾತರ ಪ್ರತೀಕವೆಂಬಂತೆ ಶರದ್ ಯಾದವ್, ನಿತೀಶ್ ಕುಮಾರ್, ಪ್ರಾಂತೀಯ ಪಕ್ಷವಾಗಿ ಮಾಜಿ ಪ್ರಧಾನಿ ದೇವೇಗೌಡರು. ಹೀಗೆ 75 ವರ್ಷಕ್ಕಿಂತಲೂ ಹೆಚ್ಚಿನ ಹರೆಯದ ನಾಯಕರು ಮೋದಿಜಿಯವರ ಸರಕಾರ ಬಂದನಂತರ ತಮ್ಮ ತಮ್ಮ ಅಸ್ತಿತ್ವದ ಕುರಿತು ಚಿಂತಿತರಾಗಿದ್ದಾರೆ. ತಮ್ಮೆಲ್ಲ ರಾಜಕೀಯ ಶಕ್ತಿಯನ್ನು ಒಂದುಗೂಡಿಸದೇ ಹೋದರೆ ಮುಂದಿನ ದಿನಗಳಲ್ಲಿ ತಮ್ಮ ತಮ್ಮ ಪಕ್ಷಗಳ ಹೆಸರುಗಳೇ ಉಳಿಯಲಾರವು ಎಂಬ ಆತಂಕ ಇರುವಂತೆ ಕಾಣುತ್ತದೆ. ಒಂದೆ ವೇದಿಕೆಯ ಮುಖಾಂತರ ತಮ್ಮ ಅಸ್ತಿತ್ವವನ್ನು ಉಳಿಸಿಕೊಳ್ಳಲು 75 ನೇ ಹುಟ್ಟುಹಬ್ಬ ಆಚರಿಸಿಕೊಂಡ ಮುಲಾಯಂ ಸಿಂಗರು ನೇತೃತ್ವ ವಹಿಸುವಂತೆ ಮಾತುಕತೆ ನಡೆಸಿದ್ದಾರೆ. ಹೀಗೆ ಒಂದುಗೂಡಿ ಸ್ವಲ್ಪ ರಾಜಕೀಯ ಶಕ್ತಿಯನ್ನು ಗಳಿಸಿಕೊಂಡರೆ ಮುಂದೆ ತಮ್ಮ ಸಂತತಿಯವರಿಗೆ ರಾಜಕೀಯ ವಾರಿಸು ಹಕ್ಕನ್ನು ಹಸ್ತಾಂತರಿಸುವ ದೂರಾಲೋಚನೆಯನ್ನು ಮಾಡುತ್ತಿರುವಂತೆ ಕಾಣುತ್ತದೆ.

ಕಾಂಗ್ರೆಸ್ ಪಕ್ಷ ಇತಿಹಾಸದಲ್ಲಿ ಮೊದಲ ಬಾರಿಗೆ ಲೋಕಸಭೆಯಲ್ಲಿ ವಿರೋಧ ಪಕ್ಷದ ಸ್ಥಾನವನ್ನು ಪಡೆಯಲು ಸಾಧ್ಯವಾಗದ ಹೀನಾಯ ಸ್ಥಿತಿಗೆ ಬಂದು ತಲುಪಿದೆ ಕುಟುಂಬ ರಾಜಕಾರಣದಿಂದ ಹೊರಬಾರದೆ ಕಾಂಗ್ರೆಸ್ ದೇಶದಲ್ಲಿ ಭಾರತೀಯ ಜನತಾ ಪಾರ್ಟಿಗೆ ಒಂದು ಪರ್ಯಾಯವಾಗಿ ಬೆಳೆಯಲಾರದು ಕಾಂಗ್ರೆಸ್ ನಲ್ಲಿ ಅನೇಕರು ಜಿ ಹುಜೂರ್ ನಾಯಕರು ಕುಟುಂಬ ರಾಜಕಾರಣ ಬಿಟ್ಟರೆ ತಮಗೆ ಉಳಿಗಾಲವಿಲ್ಲವೆಂದು ಭಾವಿಸಿದ್ದಾರೆ. ಇಂತಹ ನಿರಾಶಾದಾಯಕ ಸಮಯದಲ್ಲಿ ಹಳೆಯ ರಾಜಕಾರಣಿಗಳು ಮೂರನೇ ರಂಗ ಕಟ್ಟಲು ಹೊರಡಿರುವುದು ಕಾಂಗ್ರೆಸ್ಸಿಗೂ ಒಂದು ತಲೆನೋವಾಗಿ ಪರಿಣಮಿಸಿದೆ. ಇದರಿಂದ ಬಿ.ಜೆ.ಪಿ. ಗೆ ಹಾನಿಯಾಗುವುದಕ್ಕಿಂತ ಕಾಂಗ್ರೆಸ್ಸಿಗೆ ಹಾನಿ ಎಂದು ಇತ್ತೀಚಿನ ಚುನಾವಣೆಗಳು ಖಾತ್ರಿ ಪಡಿಸಿವೆ. ಕೇಂದ್ರದಲ್ಲಿ ಮೋದಿಯವರು ಅಧಿಕಾರ ಗದ್ದುಗೆಗೆ ಏರಿದ ನಂತರ ತಮ್ಮ ರಾಜಕೀಯ ಅಸ್ತಿತ್ವ ಜಾರುತ್ತಿರುವುದನ್ನು ಮನಗಂಡು ಹರಿದು ಹಂಚಿ ಹೋಗಿರುವ ಹಳೆಯ ಜನತಾ ಪರಿವಾರವನ್ನು ಒಂದುಗೂಡಿಸಿ ಉತ್ತರಭಾರತದಲ್ಲಿ ಬಿ.ಜೆ.ಪಿ.ಗೆ ಒಂದು ಪರ್ಯಾಯ ರಾಜಕೀಯ ಶಕ್ತಿಯನ್ನು ಹುಟ್ಟು ಹಾಕುವ ಪ್ರಯತ್ನದಲ್ಲಿ ಮಾಜಿ ಪ್ರಧಾನಿಗಳಾದ ಎಚ್. ಡಿ. ದೇವೇಗೌಡರು ಸಮಾಜವಾದಿ ಮುಖಂಡ ಮುಲಾಯಂ ಸಿಂಗ್ ಯಾದವ್ ಜೆ,ಡಿ.ಯು. ನ ಶರದ್ ಯಾದವ್, ನಿತೀಶ್ ಕುಮಾರ್ ಮುಂತಾದ ನಾಯಕರು ಒಟ್ಟು ಸೇರಿ ಜನತಾ ಪರಿವಾರವನ್ನು ಪುನ: ಪ್ರಬಲ ರಾಜಕೀಯ ಶಕ್ತಿಯನ್ನು ಹುಟ್ಟುಹಾಕಲು ಶತಾಯ ಗತಾಯ ಪ್ರಯತ್ನದಲ್ಲಿ ತೊಡಗಿಸಿಕೊಂಡಿದ್ದಾರೆ.

ಮೂರನೇ ರಂಗವೆಂಬ ನೀರಗುಳ್ಳೆಯಂತಿರುವ ಒಂದು ಕನಸಿನ ಸಾಮ್ರಾಜ್ಯದಲ್ಲಿ ತೇಲುತ್ತಿರುವ ಸನ್ಯಾಸ ಸ್ವೀಕರಿಸಿ ಹಿಮಾಲಯ ಸೇರಬೇಕಾದ ಹಳೆಯ ರಾಜಕಾರಣಿಗಳು ಹಿಂದೆ ಮಾಡಿರುವ ಪ್ರಯೋಗಗಳನ್ನೇ ಪುನ: ಪುನ: ಮಾಡುತ್ತಿರುವುದನ್ನು ನೋಡಿದರೆ ಹಳೆಯ ಮದ್ಯವನ್ನು ಹೊಸ ಬಾಟಲಿಯಲ್ಲಿ ತುಂಬಿದಂತೆ. ಅರವತ್ತರ ಮೇಲೆ ಅರುಳುಮರಳು ಎಂದಂತಾಗಿದೆ ಮೂರನೇ ರಂಗದ ನಾಯಕರ ಸ್ಥಿತಿ. ವಾನಪ್ರಸ್ತಾಶ್ರಮಕ್ಕೆ ಸೇರಬೇಕಾದ ಸಮಯದಲ್ಲಿಯೂ ರಾಜಕಾರಣಿಗಳು ತಮ್ಮ ಪ್ರಯೋಗವನ್ನಂತೂ ಬಿಡುವ ಸ್ಥಿತಿಯಲ್ಲಿ ಇರುವಂತೆ ಕಾಣುತ್ತಿಲ್ಲ. ಬಿಹಾರದಲ್ಲಿ ಒಂದುಗೂಡಿ ಪ್ರಯೋಗ ಮಾಡಿದ ನಂತರ ನಶೆ ಏರಿದಂತಾಗಿ ಸ್ವಲ್ಪ ಶಕ್ತಿ ತುಂಬಿಕೊಂಡ ಓಲ್ಡ್ ರಾಜಕಾರಣಿಗಳು ಮೋದಿಯವರಿಗೆ ಪರ್ಯಾಯವಾಗಲು ಹವಣಿಸುತ್ತಿರುವುದು ಜಗತ್ತಿನ ಎಂಟನೆ ಅದ್ಭುತದಲ್ಲೊಂದಾಗುವ ಕನಸು ಕಾಣುತ್ತಿದ್ದಾರೆ. ಅಲ್ಪಸಂಖ್ಯಾತರು ಬಹುಸಂಖ್ಯಾತರು ಎಂದು ಒಡೆದಾಳುವ ಆಧಾರದಲ್ಲಿಯೇ ರಾಜಕಾರಣ ಮಾಡುವ ಇವರು ದೇಶದಲ್ಲಿರುವ 35 ಕೋಟಿ ಯುವಜನಾಂಗಕ್ಕೆ ನಾಯಕರಾಗಲು ಸಾಧ್ಯವಿಲ್ಲವೆನ್ನುವುದು ಮುಂದಿನ ಚುನಾವಣೆಯಲ್ಲಿ ಸಾಬೀತಾಗಲಿದೆ.

2014ರ ರಾಜಕೀಯ ಘಟನೆಗಳನ್ನು ಅರಗಿಸಿಕೊಳ್ಳಲು ಜನತಪರಿವಾರವೆಂಬ ದಳಗಳು ಕಳೆದ 35 ವರ್ಷಗಳಿಂದ ಒಂದುಗೂಡಿ ವಿಘಟನೆಗೊಂಡಿರುವ ಉದಾಹರಣೆಯನ್ನು ಅಧಿಕಾರಕ್ಕೊಸ್ಕರ ಕಿತ್ತಾಡಿಕೊಂಡಿರುವುದನ್ನು ಭಾರತೀಯರು ನೋಡಿದ್ದಾಗಿದೆ. ಈ ಹಿರಿತಲೆಗಳಿಗೆ ಒಂದೇ ಚಿಂತೆ ಅದೇನೆಂದರೆ ರಾಜಕೀಯ ಅಸ್ತಿತ್ವವನ್ನು ಉಳಿಸಿಕೊಳ್ಳುವುದು ಅದನ್ನು ತಮ್ಮ ಸಂತತಿಯವರಿಗೆ ವರ್ಗಾಯಿಸುವ ಒಂದೇ ಚಿಂತೆಯಾಗಿದೆ. ಸೈದ್ಧಾಂತಿಕ ಬದ್ದತೆ ಇಲ್ಲದ ಈ ಪಕ್ಷಗಳು ಒಡೆದು ಚೂರಾಗಲು ಅಧಿಕಾರದ ಆಸೆಯೊಂದನ್ನು ಬಿಟ್ಟರೆ ಬೇರೆ ಕಾರಣಗಳೇ ಬೇಕಿಲ್ಲ. ಭಾರತೀಯರು ಇದನ್ನು ಬಹಳ ಚೆನ್ನಾಗಿ ಅರಿತಿದ್ದಾರೆ.

ಧನಂಜಯ ವಾಗ್ಲೆ

ಪುತ್ತೂರು

ಸಂಘ ಸಮಾಜದೊಂದಿಗೆ ಸಮರಸವಾದಾಗ

2014-12-21T17:33:00.000+05:30

ಕಳೆದ ವಿಜಯದಶಮಿಯ ದಿನ ನಾಗಪುರದಲ್ಲಿ ನಡೆದ ಸಂಘದ ಕಾರ್ಯಕ್ರಮ ಮೋಹನಜಿ ಭಾಗವತರ ಭಾಷಣವನ್ನು ರಾಷ್ಟ್ರೀಯ ಡಿಡಿ ಸುದ್ದಿವಾಹಿನಿಯು ನೇರಪ್ರಸಾರ ಮಾಡಿರುವುದು ಭಾರಿ ಚರ್ಚೆಗೆ ಗ್ರಾಸವಾಗಿದೆ. ದೇಶ ಯಾವುದೋ ದೊಡ್ಡ ದುರಂತದಲ್ಲಿ ಸಿಕ್ಕಿಕೊಂಡಿದೆ ಎಂಬಂತೆ ರಾಜಕಿಯನಾಯಕರು, ಬುದ್ದಿಜೀವಿಗಳೆನಿಸಿಕೊಂಡವರು, ಎಡವಾದಿಗಳು, ಕಾಂಗ್ರೆಸ್ಸ್ ಸಹಿತ ವಿರೋಧ ಪಕ್ಷಗಳ ಜನರು ದೃಶ್ಯಮಾಧ್ಯಮಗಳಲ್ಲಿ ಬಾಯಿಗೆ ಬಂದಂತೆ ಮಾತನಾಡಿ ತಮ್ಮ ಬೌದ್ಧಿಕ ದಿವಾಳಿತನವನ್ನು ಪ್ರದರ್ಶನ ಮಾಡಿದರು. ದೂರದರ್ಶನ ತನ್ನನ್ನು ಸಮರ್ಥಿಸಿಕೊಂಡಿತು. ಸಂಘ ಕಳೆದ 90 ವರ್ಷಗಳಿಂದ ತನ್ನದೇ ರೀತಿಯಲ್ಲಿ ಆಲದ ಮರದಂತೆ ವಿಶಾಲವಾಗಿ ಬೆಳೆಯುತ್ತಲೇ ಇದೆ. ಸಂಘವನ್ನು ತಿಳಿಯಬೇಕಾದರೆ ಸಂಘದ ಒಳಗೆ ಇದ್ದುಕೊಂಡು ತಿಳಿಯಬೇಕಲ್ಲದೆ ಹೊರಗಿನಿಂದ ನೋಡಿ ಮಾತನಾಡುವುದು ಬರೆ ಟೀಕೆಗಷ್ಟೇ ಸೀಮಿತವಾದಿತು.

ಇತ್ತೀಚಿಗೆ ಖಾಸಗಿ ಸುದ್ದಿವಾಹಿನಿಯೊಂದು ಬಿಜೆಪಿ ಆಡಳಿತಕ್ಕೆ ಬಂದನಂತರ ಸಂಘ ಭಾರೀ ಬೆಳವಣಿಗೆ ಕಾಣುತ್ತಿದೆ ಎಂದು ತನ್ನದೇ ಆದ ರೀತಿಯಲ್ಲಿ ಕಾರ್ಯಕ್ರಮ ಒಂದನ್ನು ಪ್ರಸಾರ ಮಾಡಿತ್ತು. ಆರ್ ಎಸ್ ಎಸ್ ಕುರಿತು ನಡುವಲ್ಲಿ ಎರಡು ಜನ ಕಾಂಗ್ರೆಸ್ ಮುಖಂಡರನ್ನು ಮಾತನಾಡಿಸಿತು. ಅವರು ಅದೇ ಹಳೆಯ ಗೋಬೆಲ್ ವಾದವನ್ನೇ ಹೇಳುತ್ತಾ ಹೋದರು. ಪ್ರಶ್ನೆಗಳಿಗೆ ಉತ್ತರಿಸಿದ ರೀತಿಯೇ ಹಾಗಿತ್ತು. ಓರ್ವ ಪತ್ರಕರ್ತರು ಸಂಘವನ್ನು ಹತ್ತಿರದಿಂದ ನೋಡಿದವರಂತೆ ಸಂಘದ ಧ್ಯೇಯ, ಕಾರ್ಯಕ್ರಮ, ಸಾಮಾಜಿಕ ಸೇವೆ ಮುಂತಾಗಿ ಅನೇಕ ಸಂಗತಿಗಳನ್ನು ವಾಸ್ತವ ಅಂಶಕ್ಕೆ ಹತ್ತಿರವಾದ ಮಾತುಗಳನ್ನಾಡಿದರು. ವಾಹಿನಿಯ ಸುದ್ದಿ ವಿಶ್ಲೇಷಕರು ಸಂಘದ ಬೇರೆ ಬೇರೆ ಕಾರ್ಯಕ್ರಮಗಳನ್ನು ತೋರಿಸುತ್ತ ಬಿಜೆಪಿಯ ಕರ್ನಾಟಕದ ರಾಜಕೀಯ ನಾಯಕರೆನ್ನಿಸಿಕೊಂಡ ಕೆಲವರು ಕಾರ್ಯಕ್ರಮದಲ್ಲಿ ಚಡ್ಡಿ ಹಾಕಿ ದಂಡ ಹಿಡಿದು ನಿಂತಿರುವ ದೃಶ್ಯಗಳನ್ನು ತೋರಿಸಿ ಸಂಘದ ಕಾರ್ಯಕ್ರಮದಲ್ಲಿ ಭಾಗವಹಿಸಿದರೆ ಬಿಜಿಪಿಯಲ್ಲಿ ಮುಂದೆಹೋಗಲು ಒಂದು ಸರ್ಟಿಫಿಕೆಟ್ ಸಿಕ್ಕಂತೆ ಎಂದು ಹೇಳಿರುವುದು ರಾಜ್ಯದ ಮಟ್ಟಿಗೆ ಸತ್ಯವೇನೋ ಎಂದು ಅನಿಸುತ್ತದೆ. ಅವರು ತೋರಿಸಿದ ನಾಯಕರಲ್ಲಿ ಒಬ್ಬರನ್ನೂ ಇಬ್ಬರನ್ನೋ ಹೊರತುಪಡಿಸಿದರೆ ಬೇರೆ ಯಾವ ನಾಯಕರು ಸಂಘದ ಹೊರಮೈ ನೋಡಿದವರೇ ವಿನಹ ಸಂಘದ ತತ್ವಗಳನ್ನು ಮೈಗೂಡಿಸಿಕೊಂಡವರಲ್ಲ. ಚಡ್ಡಿ ಹಾಕಿ ಕಾರ್ಯಕ್ರಮದಲ್ಲಿ ಎದುರಿಗೆ ನಿಂತು ತಮ್ಮ ರಾಜಕೀಯ ಬೇಳೆಬೇಯಿಸಿಕೊಳ್ಳಲು ಸಂಘವನ್ನು ಒಂದು ನಾವೆಯಂತೆ ಬಳಸಿಕೊಂಡು ಜನರೆದುರು ನಾಯಕರೆನಿಸಿಕೊಂಡರೆ ವಿನಹ, ಸಂಘದ ಧ್ಯೇಯ ತತ್ವನಿಷ್ಟೆ ಸಾಮಾಜಿಕ ಕಳಕಳಿ ಅಲ್ಲೇ ಬಿಟ್ಟು ಅಧಿಕಾರ ಬಂದಾಗ ದಂಧೆಯಲ್ಲಿ ತೊಡಗಿ ತಮ್ಮನ್ನು ಅಭಿವೃದ್ದಿಪಡಿಸಿಕೊಂಡವರೇ ಹೆಚ್ಚು. ರಾಷ್ಟ್ರೀಯ ಬಿಜೆಪಿ ಕರ್ನಾಟಕವೆಂದರೆ ಮಾತನಾಡಲು ಮುಜುಗರಕ್ಕೊಳಗಾಗುವಂತೆ ಮಾಡಿದರು. ಹೀಗೆ ಸಂಘವನ್ನು ತಮ್ಮ ಅನುಕೂಲಕ್ಕೆ ಬಳಸಿಕೊಂಡ ಬಿಜೆಪಿಯ ನಾಯಕರು ತಮ್ಮ ಮನಸ್ಥಿತಿಯನ್ನು ಬದಲಿಸಿಕೊಂಡು ಮುಂದೆ ಹೋದರೆ ರಾಜ್ಯಕ್ಕೆ ಒಳ್ಳೆಯದಾಗಬಹುದೇನೋ!

ಬಿಜೆಪಿ ಅಧಿಕಾರಕ್ಕೆ ಬಂದಾಗ ಮಾತ್ರ ಸಂಘ ಬೆಳವಣಿಗೆ ಕಂಡಿರವುದೆಂದು ಊಹಿಸುವುದು ಸರಿಯಾಗಲಾರದು. ಸಂಘ ಯಾವಾಗಲು ಸಮಾಜವನ್ನು ಸಂಘಟಿಸುತ್ತ ಸಮಾಜ ಸೇವೆಯ ಮುಖಾಂತರವೇ ಸಂಘ ಬೆಳೆದಿದೆಯೇ ವಿನಹ ರಾಜಕೀಯ ಅಧಿಕಾರಕ್ಕೂ ಸಂಘದ ಬೆಳವಣಿಗೆಗೂ ಯಾವುದೇ ಸಂಬಂಧವಿಲ್ಲ. ಸಂಘ ತುಳಿತಕ್ಕೆ ಒಳಗಾದಾಗ ಪುಟಕ್ಕಿಟ್ಟ ಚಿನ್ನದಂತೆ ಇನ್ನುಹೆಚ್ಚು ವೇಗವಾಗಿ ಬೆಳೆದಿರುವುದನ್ನು ಕಾಣಬಹುದು. 1925ರ ವಿಜಯ ದಶಮಿಯ ದಿನ ಡಾಕ್ಟರ್ ಕೇಶವ ಬಲಿರಾಂ ಹೆಡಗೆವಾರ್ ನೇತೃತ್ವದಲ್ಲಿ ಕೇವಲ 5 ಜನರಿಂದ ಆರಂಭವಾದ ಸಂಘ 90 ವರ್ಷಗಳ ಇತಿಹಾಸದುದ್ದಕ್ಕೂ ಅನೇಕ ಏಳುಬೀಳುಗಳನ್ನೂ ಎದುರಿಸಿ ಇಂದು ಬೃಹದಾಕಾರವಾಗಿ ದೇಶಾದ್ಯಂತ ಸರಿಸುಮಾರು 50 ಸಾವಿರ ಸಂಘ ಶಾಖೆಗಳ ಮುಖಾಂತರ ಪ್ರಪಂಚದಲ್ಲಿಯೇ ಒಂದು ಬೃಹತ್ ಸ್ವಯಂಸೇವಾ ಸಂಘಟನೆಯಾಗಿ ಬೆಳೆದುನಿಂತಿದೆ. ಕಳೆದ ವಾರ್ಷಿಕ ವರದಿಯಂತೆ ಸಂಘ ಪ್ರೇರಿತ ಸ್ವಯಂಸೇವಾ ಪ್ರಕಲ್ಪಗಳ ಸಂಖ್ಯೆ 1 ಲಕ್ಷದ 60 ಸಾವಿರ. ಈ ಆಧಾರದಲ್ಲಿಯೇ ಸಂಘ ಬೆಳೆಯುತ್ತಿದೆ ವಿನಹ ಬಿಜೆಪಿ ಅಧಿಕಾರಕ್ಕೆ ಬಂದಾಗ ಸಂಘ ಬೆಳೆಯುತ್ತಿದೆ ಎನ್ನುವುದು ಸರಿಯಾಗಲಾರದು.

ಡಾಕ್ಟರ್ ಜಿಯವರನ್ನು ಓರ್ವ ಕಾರ್ಯಕರ್ತರು ಹೀಗೆ ಕೇಳಿದರು “ಸಂಘ ದೇಶದಲ್ಲಿ ಎಲ್ಲಿಯ ತನಕ ಇರುತ್ತದೆ” ಎಂದು. ಡಾಕ್ಟರ್ ಜಿ ತಟ್ಟನೆ ಉತ್ತರಿಸಿದರು ಸಂಘ ಸಮಾಜದೊಂದಿಗೆ ಸಮರಸವಾದಾಗ ಸಂಘದ ಅವಶ್ಯಕತೆ ಇರಲಾರದು. ಊಹಿಸಿಕೊಳ್ಳಿ... ಕೇವಲ 5 ಜನರ ಶಾಖೆಯನ್ನು ಆರಂಭಿಸಿದ ಡಾಕ್ಟರ್ ಜಿಯವರಿಗೆ ಅದಮ್ಯವಾದ ವಿಶ್ವಾಸ 90 ವರ್ಷಗಳ ನಂತರವೂ ಅದೇ ತತ್ವ ಅದೇ ಸಿದ್ಧಾಂತದ ಆಧಾರದಲ್ಲಿ ಪ್ರಪಂಚದಲ್ಲಿರುವ ಹಿಂದುಗಳನ್ನು ಮೌನವಾಗಿ ಸಂಘಟಿಸುತ್ತ ತನ್ನ ಕಾರ್ಯವನ್ನು ಮುಂದುವರಿಸುತ್ತಿದೆ. ಸಂಘದ ಕಾರ್ಯ ಮಾಡುತ್ತ ಅದರಲ್ಲಿ ವಿರೋಧವನ್ನು, ಮಾಧ್ಯಮದಲ್ಲಿ ಉಪೇಕ್ಷೆಯನ್ನು ಕೊನೆಯಲ್ಲಿ ಸ್ವೀಕಾರಾರ್ಹತೆಯನ್ನು ಪಡೆಯುತ್ತದೆ ಎಂಬ ಡಾಕ್ಟರ್ ಜಿಯವರ ಮಾತು ಇಂದು ಎಷ್ಟೊಂದು ಸತ್ಯವಾಗಿದೆ ಎಂದು ಕಾಣಬಹುದಾಗಿದೆ. ಎಡವಾದಿಗಳಿಗೋ, ವಿಚಾರವಾದಿಗಳಿಗೋ ಚರ್ಚಾವಸ್ತುವಾಗಿದ್ದ ಸಂಘ ಪರವಾಗಿಯೋ ವಿರೋಧವಾಗಿಯೋ ಇಂದು ದೇಶಾದ್ಯಂತ ಚರ್ಚೆಯಾಗುತ್ತಿರುವುದು ನೋಡಿದರೆ ಸಂಘ ಸ್ವೀಕಾರ್ಹಹಂತಕ್ಕೆ ತಲುಪಿದೆ ಎಂದು ಅರ್ಥೈಸಬಹುದು ಮತ್ತು ಹತ್ತಿರದಿಂದ ಸಂಘಕಾರ್ಯದಲ್ಲಿ ತೊಡಗಿದವರಿಗೆ ಇದು ತಿಳಿದಿತು.

ಮೂರುವರ್ಷಗಳ ಹಿಂದೆ ಸಂಘದ ರಾಷ್ಟ್ರೀಯ ಪರಿಷತ್ತಿನಲ್ಲಿ ಭ್ರಷ್ಟಾಚಾರವನ್ನು ವಿರೋಧಿಸುವವರ ಜೊತೆಯಲ್ಲಿ ಸಂಘ ಸಂಪೂರ್ಣ ಶಕ್ತಿಯಿಂದ ಜೊತೆಗೂಡಿ ಹೋರಾಡುವ ನಿರ್ಧಾರ ಕೈಗೊಂಡಿತ್ತು. ಅದೇ ಸಮಯದ ಆಸುಪಾಸಿನಲ್ಲಿ ಅಣ್ಣ ಹಜಾರೆಯವರು ಭ್ರಷ್ಟಾಚಾರದ ವಿರುದ್ಧ ರಣಕಹಳೆ ಮೊಳಗಿಸಿದ್ದರು. ಸದ್ದಿಲ್ಲದೇ ದೇಶಾದ್ಯಂತ ಯುವಜನರು ಅಣ್ಣ ಹಜಾರೆಯವರ ಕೈಜೋಡಿಸಿದರು, ಚಳುವಳಿ ಒಂದನೇ ಹಂತ ಪೂರ್ಣಗೊಂಡಾಗ ಅಣ್ಣಾಜಿಯವರನ್ನು ಯಾರೋ ಕೇಳಿದರು ನೀವು ಸಂಘದೊಂದಿಗೆ ಕೈಜೋಡಿಸಿರುವಿರೇ ಎಂದು, ಆಗ ಅಣ್ಣಾಜಿಯವರು ಸ್ಪಷ್ಟ ಮಾತುಗಳಲ್ಲಿ ನನಗೂ ಸಂಘಕ್ಕೂ ಯಾವುದೇ ಸಂಬಂಧವಿಲ್ಲ ಸಂಘ ನನ್ನ ಚಳುವಳಿಯಲ್ಲಿ ಭಾಗವಹಿಸುವುದನ್ನು ನಾನು ಸಹಿಸುವುದಿಲ್ಲ ಎಂದು ಕಡ್ಡಿ ಮುರಿದಂತೆ ಹೇಳಿದರು. ಪರಿಣಾಮ ದೇಶವ್ಯಾಪಿ ಗ್ರಾಮ ಗ್ರಾಮಗಳಲ್ಲಿ ಹಬ್ಬಿದ ಭ್ರಷ್ಟಾಚಾರ ವಿರೋಧಿ ಹೋರಾಟ ಏಕಾಏಕಿ ತಣ್ಣಗಾಯಿತು.ಎರಡನೇ ಹಂತದಲ್ಲಿ ರಾಮಲೀಲ ಮೈದಾನದಲ್ಲಿ ಅಣ್ಣಾ ಜಿಯವರ ಚಳುವಳಿಯಲ್ಲಿ 15 ರಿಂದ 20 ಸಾವಿರಕ್ಕಿಂತ ಹೆಚ್ಚು ಜನ ಸೇರಲೇಇಲ್ಲ. ಚಳುವಳಿಯನ್ನು ನೋಡಿದವರು ಕೈ ಕೈ ಹಿಸುಕವಂತಾದುದು ಯಾಕೆಂದು ಊಹಿಸಿದರೆ ಸಂಘ ಏನೆಂದು ವಿಚಾರ ಮಾಡಬಹುದು.

ಭಾರತ್ ಮಾತಾ ಕೀ ಜೈ

ವಂದೇ ಮಾತರಂ

ಧನಂಜಯ ವಾಗ್ಲೆ

ಪುತ್ತೂರು

ಮಹಿಳೆಯರು ಹಗಲು ಧೈರ್ಯವಾಗಿ ಕರ್ನಾಟಕದಲ್ಲಿ ಓಡಾಡಲು ಸಾಧ್ಯವೇ?

2014-12-10T20:05:00.002+05:30

ಇತ್ತೀಚಿಗೆ ಮಡಿಕೇರಿಯಲ್ಲಿ ಮಾತನಾಡಿದ ಮಾನ್ಯ ಮುಖ್ಯಮಂತ್ರಿಗಳು ಗಾಂಧಿಯವರನ್ನು ಕೊಂದವರಿಗೆ ಅವರ ಹೆಸರು ಬಳಸುವ ನೈತಿಕ ಹಕ್ಕಿಲ್ಲ ಎಂದು ಹೇಳಿರುವುದು ಮಾಧ್ಯಮಗಳಲ್ಲಿ ವರದಿಯಾಗಿದೆ. ಮಾನ್ಯ ಮುಖ್ಯಮಂತ್ರಿಗಳು ಸಂವಿಧಾನದ ಮೇಲೆ ಪ್ರಮಾಣ ಮಾಡಿ ಈ ಸ್ಥಾನಕ್ಕೇರಿದ್ದಾರೆ ಎನ್ನುವುದು ಮರೆತಂತಿದೆ. ದೇಶದ ಸರ್ವೋಚ್ಛ ನ್ಯಾಯಾಲಯ ಕೊಟ್ಟ ತೀರ್ಪನ್ನೇ ತಿರುಚಿ ದೇಶದ ಪ್ರಧಾನಿಗಳಾದಿಯಾಗಿ ಬಿ.ಜೆ.ಪಿ. ನಾಯಕರು ಗಾಂಧೀಜಿಯವರನ್ನು ಕೊಂದವರೆಂಬ ಅರ್ಥ ಬರುವಂತೆ ಆರೋಪಿಸಿರುವುದು ಸಂವಿಧಾನಬದ್ಧವಾಗಿ ಆಯ್ಕೆಯಾದ ಮುಖ್ಯಮಂತ್ರಿಗಳಿಗೆ ಶೋಭೆ ತರುವ ಮಾತಂತೂ ಖಂಡಿತ ಅಲ್ಲ. ನಾಥೂರಾಮ್ ಗೋಡ್ಸೆ ಎಂಬ ವ್ಯಕ್ತಿ ಗಾಂಧೀಜಿಯವರನ್ನು ಕೊಂದನೆಂಬ ಆರೋಪ ಮಾತ್ರದಿಂದ ಬಿ.ಜೆ.ಪಿ.ಯವರನ್ನಾಗಲೀ, ಆರ್ .ಎಸ್.ಎಸ್ ನವರನ್ನಾಗಲೀ, ಸಂಘದಿಂದ ತಯಾರಾದ ದೇಶದ ಗಣ್ಯಮಾನ್ಯ ವ್ಯಕ್ತಿಗಳನ್ನಾಗಲೀ ಗಾಂಧೀಜಿಯವರನ್ನು ಕೊಂದ ಕೊಲೆಗಡುಕರೆಂದು ಸಾರಾ ಸಗಟಾಗಿ ಆರೋಪಿಸಿರುವುದು ಘನತೆವೆತ್ತ ಸ್ಥಾನದಲ್ಲಿ ಇರುವವರಿಗೆ ಗೌರವವಂತೂ ತರಲಾರದು.

ಪ್ರಧಾನಿ ನರೇಂದ್ರ ಮೋದಿಯವರು ಗಾಂಧಿಜಯಂತಿಯಂದು ಸ್ವಚ್ಛ ಭಾರತ ಅಭಿಯಾನವನ್ನು ಆರಂಭಿಸಿ, ತಾವೂ ಸ್ವಚ್ಛತಾ ಆಂದೋಲನದಲ್ಲಿ ಭಾಗವಹಿಸಿ ಇತಿಹಾಸ ಸೃಷ್ಟಿಸಿದ ರಾಷ್ಟ್ರೀಯ ಕ್ರಾಂತಿಕಾರಿಯಾದ ಒಂದು ಆಂದೋಲನದ ಹಿಂದಿನ ಉದ್ದೇಶವನ್ನು ಮರೆತು "ಕೇವಲ ಒಂದು ದಿನದ ಸ್ವಚ್ಛತೆಯಿಂದ ಸ್ವಚ್ಛ ಭಾರತವನ್ನು ಸಾಧಿಸಲಾಗದು" ಎಂದು ಪ್ರಧಾನಿಗಳ ಉದ್ದೇಶವನ್ನು ಟೀಕಿಸಿರುವುದು ನೋಡಿದರೆ ಮುಖ್ಯ ಮಂತ್ರಿಗಳು ಮಾತಿನಲ್ಲಿ ಹಿಡಿತ ತಪ್ಪಿದಂತೆ ಭಾಸವಾಗುತ್ತಿದೆ. ದೇಶದಾದ್ಯಂತ ರಾಷ್ಟ್ರಪತಿಗಳು, ರಾಜಕೀಯ ಮುಖಂಡರು, ಧಾರ್ಮಿಕ ಮುಖಂಡರು, ಸಾಮಾಜಿಕ ಮುಖಂಡರಾದಿಯಾಗಿ ಭಾರೀ ಸಂಖ್ಯೆಯಲ್ಲಿ ಯುವಕರು ಸಾಮಾನ್ಯ ಜನರೂ ಸ್ವ ಇಚ್ಚೆಯಿಂದ ಭಾಗವಹಿಸಿದನ್ನು ನೋಡಿದರೆ ಮುಖ್ಯ ಮಂತ್ರಿಗಳ ಮಾತನ್ನು ಅಳೆಯಲು ಸಹಕಾರಿಯಾದಂತಿದೆ. ಸರಕಾರ ಮತ್ತು ಮುಖ್ಯಮಂತ್ರಿಗಳು ಸ್ವಚ್ಛತಾ ಅಂದೋಳನದಲ್ಲಿ ಮನಪೂರ್ವಕವಾದ ಕೊಡುಗೆಯನ್ನು ನೀಡದೆ ಇದ್ದರೂ ಸ್ವಚ್ಛ ಭಾರತ್ ಆಂದೋಲನ ಕ್ರಮೇಣ ಯಶಸ್ಸಿನತ್ತ ಹೋಗುತ್ತಿರುವುದನ್ನು ನೋಡಿ ತಮ್ಮ ಅಸಮರ್ಥತೆಯ ಮನೋಭಿಲಾಷೆಯನ್ನು ಹೊರಗೆಡಹಿದಂತೆ ಭಾಸವಾಗುತ್ತಿದೆ.

ಮಹಾತ್ಮ ಗಾಂಧೀಜಿಯವರು ಭಾರತ ಸ್ವಚ್ಛವಾಗಬೇಕು, ತನ್ಮೂಲಕ ಭಾರತೀಯರು ರೋಗರುಜಿನಗಳಿಂದ ಮುಕ್ತರಾಗಬೇಕೆಂಬ ಸದುದ್ದೇಶದಿಂದ ದೇಶಕ್ಕೆ ಕೊಟ್ಟ ಕರೆ ಕಾಂಗ್ರೆಸ್ಸಿಗರು ತಿರಸ್ಕರಿಸಿದುದರ ಫಲವಾಗಿ ಸ್ವಾತಂತ್ರ್ಯ ಬಂದು 69 ವರ್ಷಗಳ ನಂತರವೂ ಭಾರತ ಕೊಳೆತು ನಾರುತ್ತಿದೆ ಯಾಕೆ? ಗಾಂಧೀಜಿಯವರ ಎಲ್ಲ ಮಾತುಗಳನ್ನು ಎಲ್ಲ ಸಿದ್ಧಾಂತಗಳನ್ನು ಸಮಾಧಿ ಮಾಡಿದ ಕಾಂಗ್ರೆಸ್ಸಿಗೆ ನಾಚಿಕೆಯಾಗಬೇಕು. ಸ್ವಚ್ಛತಾ ಆಂದೋಲನ ಮೋದಿಯವರದ್ದೇನೂ ಅಲ್ಲ ಅದು ಗಾಂಧೀಜಿಯವರ ಕರೆ ಎಂದು ಹೇಳಿರುವುದು, ಕಾಂಗ್ರೆಸ್ ಮತ್ತು ಕಾಂಗ್ರೆಸ್ ಸರಕಾರಗಳು ಸ್ವಚ್ಛತಾ ಆಂದೋಲನಕ್ಕೆ ಸಹಕಾರ ನೀಡದೆ ಹೋದರು ಮೋದಿಜಿಯವರು ದೇಶಕ್ಕೆ ಕೊಟ್ಟ ಕರೆಗೆ ಭಾರತೀಯರು ಮನ: ಪೂರ್ವಕ ಸ್ಪಂದಿಸಿ ಯಶಸ್ಸಿನತ್ತ ಮುನ್ನುಗ್ಗುತ್ತಿರುವುದನ್ನು ನೋಡಿ ತಮ್ಮ ಅಸಹಾಯಕತೆಯನ್ನು ತಡೆಯಲಾರದೆ ಈ ರೀತಿಯ ಋಣಾತ್ಮಕವಾಗಿ ಮಾತುಗಳನ್ನು ಹೇಳಿರುವಂತಿದೆ.

ಮಹಾತ್ಮಾ ಗಾಂಧೀಜಿಯವರು ಇನ್ನೊಂದು ಮಾತನ್ನು ಹೇಳಿದ್ದಾರೆ. ಮಹಿಳೆಯರು ಮಧ್ಯ ರಾತ್ರಿ ಏಕಾಂಗಿಯಾಗಿ ಸಂಚರಿಸಲು ಸಾಧ್ಯವಾದಾಗ ಮಾತ್ರ ಭಾರತಕ್ಕೆ ನಿಜವಾದ ಸ್ವಾತಂತ್ರ್ಯ ಸಿಕ್ಕಿದಂತೆ ಎಂದಿದ್ದಾರೆ. ಸ್ವಾಮೀ .. ತಮ್ಮ ರಾಜ್ಯದಲ್ಲಿ ಮಹಿಳೆಯರು ರಾತ್ರಿ ಓಡಾಡುವುದು ಹಾಗಿರಲಿ, ಹಗಲು ನೆಮ್ಮದಿಯಿಂದ ತಮ್ಮ ಕೆಲಸಗಳನ್ನು ಪೂರೈಸಿಕೊಂಡು ಮನೆಗೆ ಹಿಂದಿರುಗಬಹುದೆಂದು ತಮ್ಮ ಸರಕಾರ ನಿಜವಾದ ಭರವಸೆ ಕೊಡಲು ಸಾಧ್ಯವೇ? ಒಂದು ವೇಳೆ ತಾವು ಭರವಸೆ ಕೊಟ್ಟರೂ ಕರ್ನಾಟಕ ಜನರು ನಂಬುವ ಸ್ಥಿತಿಯಲ್ಲಿ ಇದ್ದಾರೆಯೇ? ಇದನ್ನು ತಮ್ಮ ಸರಕಾರದ ಗೃಹ ಮಂತ್ರಿಗಳೇ ಸಾಬೀತು ಪಡಿಸಬೇಕಾಗಿದೆ.

ಗೋಡ್ಸೆ ಭಾವಚಿತ್ರವನ್ನು ಆರ್.ಎಸ್.ಎಸ್. ಕಛೇರಿಗಳಲ್ಲಿ ಹಾಕಿದವರಿಗೆ ಗಾಂಧೀಜಿಯವರ ಬಗ್ಗೆ ಮಾತನಾಡುವ ಹಕ್ಕಿಲ್ಲ ಎಂದಿದ್ದೀರಿ... ತಾವು ಸರಿಯಾಗಿ ಪರೀಕ್ಷಿಸದೆ ಹೇಳಿದ ಮಾತೆಂದು ಭಾವಿಸಬೇಕಾಗುತ್ತದೆ. ಯಾಕೆಂದರೆ ಆರ್.ಎಸ್.ಎಸ್. ಕಛೇರಿಗಳಲ್ಲಿ ಗೋಡ್ಸೆ ಭಾವಚಿತ್ರ ಇರಲು ಸಾಧ್ಯವೇ ಇಲ್ಲ ಎಂದು ನಾನು ಖಚಿತವಾಗಿ ಹೇಳಬಲ್ಲೆ. ಯಾವಾಗ ಭಾರತೀಯ ಜನತಾ ಪಾರ್ಟಿ ದೇಶದ ಜನರ ಮನಸ್ಸನ್ನು ಗೆಲ್ಲಲು ತೊಡಗಿದೆಯೋ ಆಗೆಲ್ಲ ಕಾಂಗ್ರೆಸ್ ಹತಾಷವಾಗಿದೆ. ಗಾಂಧೀಜಿಯವರನ್ನು ಕೊಂದಿರುವುದು ಆರ್.ಎಸ್.ಎಸ್ ಎಂದು ಜನರಲ್ಲಿ ಬಿಂಬಿಸಿರುವುದು, ಗೋದ್ರಾ ಘಟನೆ ನೆನಪಿಸುವುದು, ಸಂಘಪರಿವಾರವನ್ನು ಮೇಲ್ವರ್ಗದ ಪುರೋಹಿತ ಶಾಯಿ ಎನ್ನುವುದು, ದಲಿತ ವಿರೋಧಿ ಮುಸ್ಲಿಂ ವಿರೋಧಿ ಎಂದು ಬಿಂಬಿಸುವುದು ಕಾಂಗ್ರೆಸ್ಸಿನ ಹಳೆಯ ಚಾಳಿಯಾಗಿದೆ ಎನ್ನುವುದು ಅರ್ಥವಾದ ನಂತರವೇ ಮಾನ್ಯ ಮೋದೀಜಿಯವರು ಪ್ರಧಾನಿಯಾಗಿದ್ದಾರೆ ಎನ್ನುವುದು ಕರ್ನಾಟಕದಲ್ಲಿ ಕಾಂಗ್ರೆಸ್ ನಾಯಕರು ಎಷ್ಟು ಬೇಗ ತಿಳಿದುಕೊಳ್ಳಲು ಸಾದ್ಯವೋ ಅಷ್ಟು ಕಾಂಗ್ರೆಸ್ಸಿಗೆ ಒಳ್ಳೆಯದಾಗುತ್ತದೆ.

ಮಹಾತ್ಮಾ ಗೊಂಧಿಜಿಯವರು ಕಾಂಗ್ರೆಸ್ಸಿನ ಸೊತ್ತು ಎಂಬಂತೆ ವರ್ತಿಸಲು ಆರಂಭಿಸಿ ಅವರ ತತ್ವಾದರ್ಶಗಳನ್ನು ಯಾವಾಗ ಮೂಟೆಕಟ್ಟಿ ಕಾಂಗ್ರೆಸ್ಸು ಸಮಾಧಿ ಮಾಡಲು ಆರಂಭಿಸಿತ್ತೋ ಅಂದಿನಿಂದ ಕಾಂಗ್ರೆಸ್ ಆಯಸ್ಸು ಕಡಿಮೆಯಾಗುತ್ತಾ ಬಂದಿರುವುದು ಈಗ ಇತಿಹಾಸ.

ಧನಂಜಯ ವಾಗ್ಲೆ

ಪುತ್ತೂರು

ಓ ಭಳಿರೇ ಸಮಾಜವಾದ

2014-12-06T16:06:00.000+05:30

ಉತ್ತರಪ್ರದೇಶದ ಮಾಜಿ ಮುಖ್ಯ ಮಂತ್ರಿಗಳು ಹಾಗೂ ಪ್ರಸಕ್ತ ಲೋಕಸಭಾ ಸದಸ್ಯರಾದ ಶ್ರೀ ಮುಲಾಯಂ ಸಿಂಗ್ ಯಾದವ್ ರವರ 75 ನೇ ಹುಟ್ಟುಹಬ್ಬ ಆಚರಿಸಿಕೊಂಡಿರುವ ರೀತಿ ಒಂದಷ್ಟು ವಿವಾದಕ್ಕೆ ಎಡೆ ಮಾಡಿಕೊಂಡಂತೆ ಕಾಣುತ್ತದೆ. ಹುಟ್ಟುಹಬ್ಬ ಆಚರಿಸಿಕೊಳ್ಳುವುದು ಅವರವರ ವೈಯಕ್ತಿಕ ವಿಷಯ. ಆದರೆ ಇಲ್ಲಿ ಸರಕಾರಿ ಯಂತ್ರವನ್ನು ಬಳಸಿಕೊಂಡದ್ದೆ ಅಲ್ಲದೆ, ಶಾಲೆಗೆ ರಜೆ ನೀಡಿ ವಿದ್ಯಾರ್ಥಿಗಳು ಸಮಾರಂಭದಲ್ಲಿ ಭಾಗವಹಿಸುವಂತೆ ಮಾಡಿ ಭರ್ಜರಿಯಾಗಿ ಹುಟ್ಟುಹಬ್ಬ ಆಚರಿಸಿಕೊಂಡ ಮುಲಾಯಂಸಿಂಗ್ ರವರು ಎಲ್ಲರ ಹುಬ್ಬೇರುವಂತೆ ಮಾಡಿದರು. ವೇದಿಕೆಯಲ್ಲಿ ತಮ್ಮ ಮಗ ಅಖಿಲೇಶ್ ಯಾದವ್ ರನ್ನು ಸರಕಾರದ ಆಡಳಿತ ವೈಖರಿಯ ಕುರಿತು ಬಹಳವಾಗಿ ಟೀಕಿಸಿರುವುದು, ತಾನು ಅದ್ದೂರಿಯಾಗಿ ಆಚರಿಸಿಕೊಂಡ ಹುಟ್ಟುಹಬ್ಬ ಮತ್ತು ಸರಕಾರಿ ಯಂತ್ರದ ದುರುಪಯೋಗದ ಕುರಿತು ಬಂದಿರುವ ಟೀಕೆ ಟಿಪ್ಪಣಿಗಳನ್ನು ಎದುರಿಸುವುದಕ್ಕಾಗಿ ಬಡಜನತೆಯನ್ನು ಮೆಚ್ಚಿಸಲು ವೇದಿಕೆಯಲ್ಲಿ ತಂದೆ ಮಗನ ನಿಷ್ಕ್ರಿಯ ಸರಕಾರದ ಕುರಿತು ಚಾಟಿಬೀಸಿರುವುದು ತಾನು ಹೊಡೆದಂತೆ ಮಾಡುವೆ ನೀನು ಅತ್ತಂತೆ ಮಾಡು ಎಂದು ಹೇಳಿಕೊಂಡು ಮಾಡಿದಂತೆ ಎನ್ನುವುದು ಮೆದುಲಿರುವವರಿಗೆಲ್ಲ ಅರ್ಥವಾದಿತು.

ಸಮಾಜವಾದದ ತಿರುಳನ್ನು ಅರೆದು ಕುಡಿದು ಲೋಕಕ್ಕೆಲ್ಲ ಭೋದಿಸುವ ಮುಲಾಯಂ ಸಿಂಗರು ಓದುವುದು ಶಾಸ್ತ್ರ ಇಕ್ಕುವುದು ಗಾಳ ಎಂಬ ನಾನ್ನುಡಿಯಂತೆ ಈಗ ಬೆತ್ತಲಗಿದ್ದಾರೆ. ತನ್ನ ರಾಜ್ಯದಲ್ಲ್ಲಿ ಬಡವರಿಗೆ ಉಳಿದುಕೊಳ್ಳಲು ಸೂರಿಲ್ಲ ಲಕ್ಷಾಂತರ ಜನರಿಗೆ ಒಂದು ಹೊತ್ತು ಸರಿಯಾಗಿ ಉಣ್ಣಲು ಆಹಾರ ಸಿಗದಿರುವ ರಾಜ್ಯದ, ಸಮಾಜವಾದದ ಪರಮೋಚ್ಹ ನಾಯಕರಂತೆ ಈತನಕ ಬಿಂಬಿಸಿ ಕೊಂಡಿದ್ದ ಮುಲಾಯಂ ಸಿಂಗರು ಜಗತ್ತೇ ನಿಬ್ಬೆರಗಾಗುವಂತೆ ಸಾರ್ವಜನಿಕ ಹಣದಿಂದ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿ ಕೊಂಡಿರುವುದು ಒಂದು ಚರ್ಚಾರ್ಹ ವಿಷಯವೇ ಆಗುತ್ತದೆ

ಇಂದಿನ ರಾಜಕೀಯ ಪಕ್ಷಗಳು ಅದರ ನಾಯಕರು ವೇದಿಕೆಗಳಲ್ಲಿ ಹೇಳುವುದೇ ಒಂದು ತಾವು ಮಾಡುವುದೇ ಒಂದು. ತಾವು ಮಾತ್ರ ಸಲ್ಪ ವಿಶೇಷದವರಂತೆ ಅವರ ನಡೆ ಜನರ ನಂಬಿಕೆಗೆ ಸಂದೇಹಾಸ್ಪದವಾಗುವಂತೆ ಮಾಡಿದೆ. ಅವರು ಏನು ಹೇಳಿದರೂ ಅದರ ಹಿಂದೆ ಸ್ವಾರ್ಥದ ವಾಸನೆ ಬಡಿಯುತ್ತದೆ. ಇಂದಿನ ರಾಜಕೀಯ ಜನರ ಬೂಟಾಟಿಕೆಯ ಜೀವನ ಕ್ರಮವೇ ತಾತ್ವಿಕವಾಗಿ, ತಾವು ನಶಿಸುವುದರ ಜತೆಗೆ ಜನರಲ್ಲಿರುವ ನಂಬಿಕೆಗಳನ್ನು ನಶಿಸುವಂತೆ ಮಾಡುವ ಈ ಪ್ರವೃತ್ತಿ ನಿಜಕ್ಕೂ ಭವಿಷ್ಯತ್ತಿಗೆ ಆಶಾದಾಯಕವೇನೂ ಅಲ್ಲ.

ಸಮಾಜವಾದಿ ಸಿದ್ಧಾಂತವೇ ಹಳ್ಳಿಗಳ ಉದ್ಧಾರ ಬಡವರ ಕಲ್ಯಾಣ ಸರ್ವಜನರೂ ಸಮಾನತೆಯಿಂದ ಬದುಕಬೇಕೆಂಬುದೇ ತತ್ವ. ದುರಾದೃಷ್ಟದಿಂದ ಉತ್ತರ ಪ್ರದೇಶದ ಗ್ರಾಮೀಣ ಜನರಿಗೆ ಸರಿಯಾದ ಸೂರುಗಳಿಲ್ಲ, ಹಳ್ಳಿಗಳಿಗೆ ಹೋಗಲು ಸರಿಯಾದ ಟಾರು ರಸ್ತೆಗಳಿಲ್ಲ, ಆಸ್ಪತ್ರೆಗಳು ಕಾಣಲು ಸಿಗುವುದೇ ಕಷ್ಟ. ನಿರುದ್ಯೋಗಿಗಳಿಗೆ ಉದ್ಯೋಗ ಕಬ್ಬಿಣದ ಕಡಲೆ ಕಾಯಿ. ಸಾಕ್ಷರತೆಯಂತೂ ಬಹಳ ಹಿಂದುಳಿದಿದೆ. ಸಮಾಜವಾದಿ ರಾಜ್ಯದಲ್ಲಿ ಅಭಿವೃದ್ಧಿಗೆ ಹಣ ಇಲ್ಲದೆ ಇದ್ದರೂ ಮೋಜಿಗೆ ಏನೂ ಕೊರತೆ ಇಲ್ಲ. ಈ ಪ್ರಪಂಚದಲ್ಲಿ ಹುಟ್ಟಿದ ಮೇಲೆ ಬದುಕಿ ಉಳಿದರೆ ಒಂದಲ್ಲಾ ಒಂದು ದಿನ 75 ವರ್ಷ ಆಗಲೇಬೇಕು. ಆದರೆ ಸಮಾಜವಾದ ಸಾರುವ ನಾಯಕರಿಗೆ ತಮಗೆ ತುಂಬಿದ ಆಯಸ್ಸನ್ನು ಪ್ರಪಂಚಕ್ಕೆ ಸಾರಿ ಹೇಳುವ ಹದಿಹರೆಯದ ಹುಮ್ಮನಸ್ಸು ಇವೆಲ್ಲವೂ ಜನರ ತೆರಿಗೆ ಹಣ ಬದಲೀ ರೊಪದಲ್ಲಿ ಉಪಯೋಗಿಸುವ ಮುಖಾಂತರ ಓ ಭಳಿರೆ ಸಮಾಜವಾದಿ ನಾಯಕ.

ಉತ್ತರ ಪ್ರದೇಶದ ಸಮಾಜವಾದದಲ್ಲಿ ಪುಂಗಿ ಊದುವವರಿಗೆ ಏನೂ ಕೊರತೆಯಿಲ್ಲ. ಇದರಲ್ಲಿ ಬಹುಬೇಗ ನೆನಪಾಗುವ ಹೆಸರು ಅಜಂ ಖಾನ್. ಮಾಧ್ಯಮದವರು ಇಷ್ಟೊಂದು ಅದ್ದೂರಿ ಕಾರ್ಯಕ್ರಮಕ್ಕೆ ಹಣ ಎಲ್ಲಿಂದ ಎಂಬ ಪ್ರಶ್ನೆಗೆ ಒಂದಷ್ಟು ತಾಲಿಬಾನಿನಿಂದ, ಒಂದಷ್ಟು ದಾವೂದ್ ಇಬ್ರಾಹಿಮ್ ನಿಂದ ಸ್ವಲ್ಪ ಅಬೂಸಲಿಂನಿಂದ ಮತ್ತು ಕೆಲ ಉಗ್ರಗಾಮಿಗಳಿಂದ ಎಂದು ಉಧಾಪೆಯ ಮಾತುಗಳನ್ನಾಡಿ ಸಮಾಜವಾದ ಎಂದರೆ ಏನೆಂಬ ಚಿತ್ರಣವನ್ನು ಸಲೀಸಾಗಿ ಆ ಮನುಷ್ಯ ತೆರೆದಿಡುತ್ತಾನೆ. ತಾನೊಬ್ಬ ಸಂವಿಧಾನಬದ್ಧ ರಾಜ್ಯದ ಸಚಿವನೆಂಬುದನ್ನು ಮರೆತು ಬಿಡುತ್ತಾರೆ. ಈ ಮನುಷ್ಯ ಹೇಳಿದ ಎಲ್ಲರೂ ಸಮಾಜವಾದಿ ಸಿದ್ಧಾಂತದ ನೇತಾರರೆ ಇರಬಹುದೇನೋ ಅಧಿಕಾರಸ್ತರು ಏನು ಹೇಳಿದರೂ ಅದನ್ನು ಪ್ರಶ್ನಿಸುವವರು ಇಲ್ಲದೆ ಇರುವುದರಿಂದಲೇ ಇಂತಹ ತಲೆಹಿಡುಕರು ನಮ್ಮನ್ನು ಆಳುವವರಾಗಿದ್ದಾರೆ. ಸಮಾಜವಾದಕ್ಕೆ ಇನ್ನೊಂದು ಹೆಸರೇ ಮುಲಾಂ, ಅಜಂ ಖಾನ್ ಎನ್ನುವುದು ಉತ್ತರ ಪ್ರದೇಶದ ದುರಾದೃಷ್ಟ.

ಧನಂಜಯ ವಾಗ್ಲೆ

ಪುತ್ತೂರು

ನೈಜ ಜಾತ್ಯಾತೀತತೆಯನ್ನು ಬಲಗೊಳಿಸುವ ಪಾಠಗಳು ಬರಬೇಕಾಗಿವೆ

2014-11-19T21:26:00.001+05:30

ಸ್ವಾತಂತ್ರೋತ್ಸವದ ದಿನ ಕೆಂಪುಕೋಟೆಯಿಂದ ಪ್ರಧಾನಿ ಮೋದಿಯವರು ಮಾಡಿದ ಭಾಷಣದಲ್ಲಿ ದೇಶದ ದೃಷ್ಟಿಯಿಂದ ನೋಡಿದರೆ ಅತೀ ಸಣ್ಣ ಆದರೆ ಸಮಾಜದ ಹಿತ ದೃಷ್ಟಿಯಿಂದ ಅಷ್ಟೇ ಮಹತ್ವಪೂರ್ಣವಾದ ಸಂದೇಶ ನೀಡಿ ದೇಶದ ಪ್ರತೀ ಶಾಲೆಗೂ ಮಹಿಳಾ ಶೌಚಾಲಯದ ಕುರಿತುಕೊಟ್ಟ ಹೇಳಿಕೆ ಕೆಲವರಿಗೆ ಅಪತ್ಯವೆನಿಸಿದರೂ ಮಹಿಳಾ ಹಿತದೃಷ್ಟಿಯಿಂದ ಅಷ್ಟೇ ಮಹತ್ವವಾದ ಹೇಳಿಕೆ ಎನ್ನುವುದರಲ್ಲಿ ಸಂಶಯವಿಲ್ಲ.

ಪ್ರದಾನಿಯವರ ಕರೆಗೆ ದೇಶದ ಉದ್ಯಮ ಪತಿಗಳ ಓಗೊಡುವಿಕೆಯೂ ಅಷ್ಟೇ ಮಹತ್ವಪೂರ್ಣವಾಯಿತು. ಲಕ್ಷಾಂತರ ಸಂಖ್ಯೆಯಲ್ಲಿ ಮೂಲ ಸೌಕರ್ಯದ ಜತೆಗೆ ಶೌಚಾಲಯ ಕಟ್ಟಿಸಿ ಕೊಡುವ ನಿರ್ಣಯವನ್ನು ಉದ್ಯಮಪತಿಗಳೂ ಕೈಗೊಂಡಿರುವುದು ಅಷ್ಟೇ ಮಹತ್ವಪೂರ್ಣವಾಗಿದೆ. ಸರಕಾರ ಕಟ್ಟಿಸಿ ಕೊಡುವ ಶೌಚಾಲಯಗಳಿಗಿಂತಲೂ ಉತ್ತಮವಾದ ಮತ್ತು ಹೆಚ್ಚು ಬಾಳ್ವಿಕೆಯ ಶೌಚಾಲಯಗಳು ನಿರ್ಮಾಣವಾಗಬಹುದೆಂದು ನಂಬಬಹುದು.

ಶಿಕ್ಷಕರ ದಿನದಂದು ಪ್ರಧಾನಿಯವರು ಮಕ್ಕಳ ಪ್ರಶ್ನೆಗೆ ಉತ್ತರಿಸುತ್ತ ಜಪಾನಿನಲ್ಲಿ ಶೌಚಾಲಯ ಸಹಿತ ಇಡೀ ಶಾಲಾ ಆವರಣವೇ ಮಕ್ಕಳೂ ಅಧ್ಯಾಪಕರು ಸೇರಿ ಸ್ವಚ್ಛ ಮಾಡುತ್ತಿರುವ ಅನುಭವ ಕಂಡೆ ಎಂದು ಹೇಳಿದ್ದಾರೆ. ಆದರೆ ದುರಾದೃಷ್ಠ ದಿಂದ ಭಾರತದ ಸ್ಥಿತಿಯೇ ಬೇರೆ. ಎಲ್ಲಾದರೂ ಕೆಲವು ಶಿಕ್ಷಕರು ಮಕ್ಕಳನ್ನು ಸೇರಿಸಿಕೊಂಡು ಶಾಲಾ ಅವರಣ ಶೌಚಾಲಯಗಳನ್ನು ಶುದ್ಧೀಕರಿಸಿದರೆ ಮಾಧ್ಯಮಗಳಲ್ಲಿ ಇಡೀ ದಿನಾ ಚರ್ಚೆಗೆ ಗ್ರಾಸವಾಗಬಹುದೇನೋ.. ಯಾಕೆಂದರೆ ಮೊದಲನೆಯದಾಗಿ ಪೋಷಕರು ಸೇರಿ ದೊಡ್ಡ ಪ್ರತಿಭಟನೆಗೆ ತೊಡಗದೆ ಇರಲಾರರು. ಸಣ್ಣ ಸಣ್ಣ ವಿಚಾರಗಳ ಬಗ್ಗೆಯೇ ಶಿಕ್ಷಕರ ವಿರುದ್ಧ ಪ್ರತಿಭಟಿಸುವ ನಾವು ಸ್ವಾತಂತ್ರೋತ್ತರ ಭಾರತದಲ್ಲಿ ನಾವು ಕಲಿತ ಶಿಕ್ಷಣದ ವ್ಯವಸ್ಥೆಯೇ ಹಾಗಿದೆ ಎನ್ನುವುದರಲ್ಲಿ ಅನುಮಾನವೇನೂ ಇಲ್ಲ. ಹಾಗೆಯೇ ಎಲ್ಲ ಶಿಕ್ಷಕರು ‘ ಗುರುರ್ ಬ್ರಹ್ಮ ಗುರುರ್ ವಿಷ್ಣು ಗುರುರ್ ದೇವೋ ಮಹೇಶ್ವರ:’ ಎನ್ನುವ ರೀತಿಯಲ್ಲಿ ಖಂಡಿತಾ ಇರಲಾರರು. ಹಾಗೆಯೇ ನೂರಕ್ಕೆ ನೂರು ಹೆತ್ತವರೂ ಅದೇ ರೀತಿ ಇರಬಹುದೆಂದೂ ಅಲ್ಲ, ಆದರೆ ನಮ್ಮ ಮಕ್ಕಳು ತಾವೇ ಉಪಯೋಗಿಸಿದ ಶೌಚಾಲಯವನ್ನು ಸ್ವಚ್ಛಗೊಳಿಸುವುದು ಅನೇಕ ಪೋಷಕರ ಘನತೆಗೆ ಕುಂದಾಗುವ ರೀತಿಯಲ್ಲಿ ಭಾರತದಲ್ಲಿ ವ್ಯವಹರಿಸುತ್ತಾರೆನ್ನುವುದಂತೂ ಸತ್ಯವೇ.

ಇಂತಹ ಒಂದು ಮನೋಸ್ಥಿತಿಯ ದುರಾದೃಷ್ಟದ ವ್ಯವಸ್ಥೆಗೆ ಕಾರಣ ಬಹಳ ಸ್ಪಷ್ಟವಾಗಿದೆ. ಕೇಂಬ್ರಿಡ್ಜ್ ನಲ್ಲಿ ಕಲಿತ ಮೊದಲ ಪ್ರಧಾನಿಯವರ ಸುತ್ತ ಮುತ್ತ ತಮ್ಮ ಲಾಭಕ್ಕಾಗಿ ಗಿರಾಕಿ ಹೊಡೆಯುತ್ತಿದ್ದ ಅವಿಚಾರವಾದಿಗಳು ಸ್ಟಾಲಿನ್, ಲೆನಿನ್ ಮತ್ತು ಮೆಕಾಲೆ ದೇಶೀಯ ಶಿಕ್ಷಣವನ್ನು ಬಿಟ್ಟು ಅಂತರಾಷ್ಟ್ರೀಯ ಶಿಕ್ಷಣದ ಪಾಠಗಳನ್ನು ಕೊಟ್ಟು 65 ವರ್ಷಗಳಲ್ಲಿ ತಯಾರಾದ ಮಹಾನ್ ಪ್ರಜೆಗಳು ನಾವಲ್ಲವೇ.. ಅಲ್ಲಿಂದಲೇ ಹೊರಟ ಶಿಕ್ಷಕರಲ್ಲಿ, ಪೋಷಕರಲ್ಲಿ ಇದಕ್ಕಿಂತ ಹೆಚ್ಚಿನದೇನನ್ನು ನಿರೀಕ್ಷಿಸಲು ಸಾಧ್ಯ? ಇದು ನಮ್ಮ ದೇಶದ ದೌರ್ಭಾಗ್ಯಕ್ಕೆ ಕಾರಣವೆಂದರೆ ತಪ್ಪಾಗಲಾರದು.

ಈ ದೃಷ್ಟಿಯಿಂದ ಮಕ್ಕಳಲ್ಲಿ ಸಂಭಾಷಣೆ ನಡೆಸಿದ ಮೋದಿಯವರು ದೇಶದಲ್ಲಿ ಅತ್ಯುನ್ನತ ಮಟ್ಟಕ್ಕೇರಿದ ಮಹಾನ್ ವ್ಯಕ್ತಿಗಳ ಜೀವನ ಚರಿತ್ರೆಯನ್ನು ಓದಲು ಪ್ರೇರೇಪಿಸಿದರು. ಇತಿಹಾಸವನ್ನು ತಿಳಿಯಲು ಪ್ರಯತ್ನಿಸುವಂತೆ ಮಕ್ಕಳಲ್ಲಿ ಉತ್ತೇಜನ ನೀಡಿರುವುದು ತುಂಬಾ ದೂರದೃಷ್ಟಿಯಿಂದ ಕೂಡಿದೆ ಎಂದೆನಿಸುತ್ತದೆ.

ಪ್ರಧಾನಿಯವರು ಸ್ವಾತಂತ್ರ್ಯೋತ್ಸವ ಭಾಷಣದಲ್ಲಿ ಹೇಳಿರುವಂತೆ ರಾಷ್ಟ್ರೀಯ ಯೋಜನಾ ಆಯೋಗವನ್ನು ರದ್ದುಗೊಳಿಸುವ ಮಹತ್ವಪೂರ್ಣ ತೀರ್ಮಾನದಂತೆ ಮಹಾನ್ ಇತಿಹಾಸಕಾರರು ಎಂಬ ಸಂಶೋಧನಾ ಗ್ರಂಥ ಬರೆದ ಶ್ರೀ ಅರುಣ್ ಶೌರಿ ಯವರ ಅಭಿಪ್ರಾಯದಂತೆ ಐತಿಹಾಸಿಕ ಸಂಶೋಧನಾ ಪರಿಶ್ ಕೂಡಾ ಏನೂ ಕಸುಬಿಲ್ಲದ ಆದರೆ ವಾಮಪಂಥೀಯರಿಗೆ ಜೀವನೋಪಾಯದ ಕೇಂದ್ರವಾದ ಮೇಲಿನ ಸಂಸ್ಥೆಗಳ ಮೇಲಿನ ನಿಯಂತ್ರಣದಿಂದ ಈ ವಾಮ ಪಂಥೀಯರು ತಮ್ಮ ಕಟ್ಟುಕಥೆಗಳನ್ನು ಬೆಳೆಸಿ ಹರಡಿದ್ದನ್ನು ನಾವು ಗಮನಿಸಿದ್ದೇವೆ. ದೇಶಹಿತಕ್ಕಾಗಿ ಅವರು ಈ ಸಂಸ್ಥೆಗಳನ್ನು ಬಳಸಲೇ ಇಲ್ಲ ಬದಲಾಗಿ ಪರಸ್ಪರ ಪದೋನ್ನತಿಗೆ ತಾವೆಲ್ಲ ಕಾಲಕಳೆಯಲು, ಮಜಾಮಾಡಲು ಬಳಸಿದರು. ಅವರು ಮಾಡಿದ ನಿಜವಾದ ಅಪರಾಧ ಎಂದರೆ ಇಡೀ ದೇಶದ ಜನರಲ್ಲಿ ವಿದ್ಯಾರ್ಥಿಗಳಲ್ಲಿ ಸ್ವರಾಷ್ಟ್ರ ದ್ವೇಷವನ್ನು ಹುಟ್ಟು ಹಾಕಿದ್ದು. ಇಂತಹ ನಿಯಂತ್ರಣವನ್ನು ಬಲವಾಗಿ ತಪ್ಪಿಸಬೇಕಾಗಿದೆ ಮತ್ತು ಸಮಸ್ಯೆಗಳನ್ನು ಎದುರಿಸಬೇಕಾಗಿದೆ.

ಆದರೂ ವಿದ್ಯಾಕ್ಷೇತ್ರಕ್ಕೆ ರಾಷ್ಟ್ರೀಯ ಪ್ರಜ್ಞೆ, ಶಿಸ್ತು, ಸಂಯಮ, ವೈಜ್ಞಾನಿಕ ವಿಕಾಸಗಳಂತಹ ನಡವಳಿಕೆಗಳ ಕುರಿತ ಪಾಠಗಳ ಜೊತೆಗೆ ವಿದ್ಯಾಮಂದಿರಗಳು ಮುಂದಿನ ಪೀಳಿಗೆಗೆ ಯಾವ ರೀತಿ ಇರಬೇಕೆಂದು ಗಂಭೀರವಾಗಿ ಚಿಂತಿಸಿ ದೀರ್ಘ ಸಮಯದ ನಂತರವಾದರೂ ಒಂದು ರಾಷ್ಟ್ರೀಯ ಶಿಕ್ಷಣ ನೀತಿಯನ್ನು ಜಾರಿಗೊಳಿಸಲು ಸರಕಾರ ಗಂಭೀರವಾಗಿ ಚಿಂತಿಸುವುದು ಅತೀ ಅವಶ್ಯವಾಗಿದೆ.

ದೇಶವೆಲ್ಲ ಹೆಮ್ಮೆ ಪಡುವ ಇತಿಹಾಸ ಸಂಗತಿಗಳನ್ನು ಹಾಗು ಪರಂಪರೆಯನ್ನು ಅಲ್ಲಗಳೆಯುವುದು, ಸಂಕುಚಿತವೂ ಹಿಂಸಾಪ್ರಧಾನವೂ ಆದ ಆಳ್ವಿಕೆಯನ್ನು ವೈಭವೀಕರಿಸುವುದೂ, ಸುಳ್ಳು ತುಂಬಿದ ತಮ್ಮ ಕಥನಗಳನ್ನು ಪ್ರಶ್ನಿಸುವವರನ್ನು ಕೋಮುವಾದಿಗಳೆಂದು ಜರೆಯುವುದೂ, ತಾಂತ್ರಿಕತೆ ಬಳಸಿ ಇತಿಹಾಸವನ್ನು ಬಣ್ಣಗೆಡೆಸಿ ಸರಕಾರಿ ಪೋಷಣೆಯ ಬಲದಿಂದ ದಶಕಗಳುದ್ದಕ್ಕೂ ಪ್ರಚಲಿತಗೊಳಿಸಿದ್ದಾರೆ. ( ಮಹಾನ್ ಇತಿಹಾಸಕಾರರು ) ಪುಸ್ತಕದಿಂದ ಇಂತಹ ನೀತಿಗೆಟ್ಟ ಜಾತ್ಯಾತೀತತೆಯನ್ನು ಜಾಡಿಸಿ ಸಂವಿಧಾನಬದ್ಧ ನೈಜ ಜಾತ್ಯಾತೀತತೆಯನ್ನು ಬಲಗೊಳಿಸುವ ಪಾಠಗಳು ಬರಬೇಕಾಗಿವೆ. ಆಗ ಮಾತ್ರ ಜಪಾನಿನಂತಹ ನಾಗರೀಕರನ್ನು ಭಾರತದಲ್ಲಿ ಕಾಣಲು ಸಾಧ್ಯವಾದೀತು.

ಧನಂಜಯ ವಾಗ್ಲೆ

ಪುತ್ತೂರು

ಸ್ವಚ್ಛ ಭಾರತದ ಕುರಿತು ವ್ಯಂಗ್ಯ

2014-11-16T12:40:00.003+05:30

“ಒಂದು ದಿನ ಗುಡಿಸುವುದರಿಂದ ಸ್ವಚ್ಛ ವಾಗುವುದಿಲ್ಲ, ಇದು ದಿನ ನಿತ್ಯ ಮಾಡಬೇಕಾದ ಕೆಲಸ” ಎಂದು ಸ್ವಚ್ಛ ಭಾರತದ ಕುರಿತು ವ್ಯಂಗ್ಯ ಭರಿತವಾಗಿ ನಮ್ಮ ರಾಜ್ಯದ ಮಾನ್ಯ ಮುಖ್ಯಮಂತ್ರಿಗಳು ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದನ್ನು ಪತ್ರಿಕೆಯಲ್ಲಿ ಓದಿದೆ. ಈ ಮಾತು ಪ್ರಧಾನಿ ಮೋದಿಜಿಯವರ ಸ್ವಚ್ಛ ಭಾರತದ ಕರೆಗೆ ಕೊಂಕಾಗಿ ಮಾತನಾಡಿರುವುದೆಂದು ಪ್ರತಿಯೊಬ್ಬರಿಗೂ ಅರ್ಥವಾಗುತ್ತದೆ. ನಮ್ಮ ರಾಜ್ಯದ ಮುಖ್ಯ ಮಂತ್ರಿಗಳು ಅಕ್ಟೋಬರ್ ಎರಡರಂದು ವಿಧಾನಸೌಧ ಮತ್ತು ವಿಕಾಸಸೌಧದ ಮಧ್ಯ ಸ್ಥಾಪಿಸಲಾಗಿರುವ ಮಹಾತ್ಮ ಗಾಂಧಿಯವರ ಪ್ರತಿಮೆ ಉದ್ಘಾಟನೆ ಮಾಡಿದ ಸಂದರ್ಭ ಉಪನ್ಯಾಸಕ್ಕೆಂದು ಬಂದ ಚಕ್ರವರ್ತಿ ಸೂಲಿಬೆಲೆಯವರಲ್ಲಿ ಆರ್.ಎಸ್. ಎಸ್. ನವರು ಗಾಂಧೀಜಿಯವರನ್ನು ಕೊಂದವರೆಂದೂ, ವಿಧಾನ ಪರಿಷತ್ತಿನನ ಸಭಾಪತಿಗಳಾದ ಮಾನ್ಯ ಡಿ. ಎಚ್. ಶಂಕರ ಮೂರ್ತಿಯವರನ್ನು ಆರ್.ಎಸ್.ಎಸ್. ನವರೆಂದೂ ಮನಸ್ಸಿಗೆ ಬಂದಂತೆ ಮಾತನಾಡಿದ್ದಾರೆ. ವೈಯಕ್ತಿಕವಾಗಿ ಮಾತನಾಡಿದರೆ ಅದು ಅವರ ಮನಸ್ಸನ್ನು ತೆರೆದು ತೋರಿಸಬಹುದಿತ್ತೋ ಏನೋ.. ಆದರೆ ರಾಜ್ಯದ ಮುಖ್ಯ ಮಂತ್ರಿಗಳಾಗಿ ಈ ರೀತಿ ಮಾತನಾಡಿದ್ದು ಆ ಸ್ಥಾನದ ಘನತೆಯನ್ನು ಹೆಚ್ಚಿಸಲಾರದು. ನ್ಯಾಯಾಂಗದ ತೀರ್ಪನ್ನೇ ತಿರುಚಿದ ಮಾತನ್ನೇ ಆಡಿದ್ದಾರೆ. ಇವು ಓಲೈಕೆಯ ಮಾತುಗಳೆಂಬುದು ಸ್ಪಷ್ಟ.

ಸ್ವಚ್ಛ ಭಾರತದ ಕುರಿತು ವ್ಯಂಗ್ಯವಾಗಿ ಕಾಂಗ್ರೆಸ್ ಪಕ್ಷದ ನಾಯಕರಾಗಿರುವ ಮಲ್ಲಿಕಾರ್ಜುನ ಖರ್ಗೆಯವರು “ಇದು ಹೊಸದೇನೂ ಅಲ್ಲ, ಇದು ಮಹಾತ್ಮಾ ಗಾಂಧಿಯವರು ಹೇಳಿರುವ ಕಾರ್ಯವನ್ನೇ ಮೋದಿಯವರು ಹೇಳಿದ್ದಾರೆ”ಎಂದಿರುವುದು ಕೂಡಾ ಅಚ್ಚರಿಯನ್ನು ಹುಟ್ಟು ಹಾಕುತ್ತದೆ. ನಮಗೆ ಸ್ವಾತಂತ್ರ್ಯ ದೊರಕಿದಾಗಿನಿಂದ ಮಹಾತ್ಮಾಗಾಂಧೀಜಿಯವರ ಸ್ವಚ್ಛ ಭಾರತದ ಕನಸನ್ನು ಒಂದು ದಿನ ಆಚರಿಸಿದ್ದೇವೆ. ‘ವೇದಿಕೆಗಳಲ್ಲಿ ಗಾಂಧೀಜಿ ಹೀಗೆ ಹೇಳಿದ್ದಾರೆ, ಇದನ್ನು ನೀವು ಪಾಲಿಸಿ’ಎಂದು ಹೇಳಿದ್ದೇವೆಯೇ ವಿನ: ‘ನಾನು ಮಾಡುತ್ತೇನೆ ನನ್ನ ಜೊತೆಯಲ್ಲಿ ನೀವು ಬನ್ನಿ’ ಎಂದು ತಪ್ಪಿ ಕೂಡಾ ಕಾಂಗ್ರೆಸ್ಸಿಗರು ಕರೆ ನೀಡಿಲ್ಲ ಮತ್ತು ಕಳೆದ 6 ದಶಕಗಳಿಂದ ಮಾಡಲಿಲ್ಲ. ಯಾರೂ ಈ ಕನಸಿಗೆ ಕೈ ಜೋಡಿಸದ ಕಾರಣ ಇಂದು ಪ್ರಧಾನಿ ನರೇಂದ್ರ ಮೋದಿಜಿಯವರು ಸ್ವಚ್ಛ ಭಾರತಕ್ಕಾಗಿ ‘ನಾನೂ ಸ್ವಚ್ಛ ಮಾಡುತ್ತೇನೆ, ನನ್ನೊಂದಿಗೆ ನೀವೂ ಬನ್ನಿ’ ಎಂದು ಕರೆ ನೀಡಿರುವುದೇ ಅಲ್ಲದೆ ದಿನದಿಂದ ದಿನಕ್ಕೆ ಜನರೂ ಕೂಡ ಸ್ವಚ್ಛತಾ ಕಾರ್ಯಕ್ಕೆ ಓಗೊಟ್ಟು ಕೈ ಜೋಡಿಸುತ್ತಿರುವುದನ್ನು ಕಾಣಬಹುದಾಗಿದೆ.

ಕ್ರಿಕೆಟ್ ದೇವರೆಂದೇ ಪರಿಗಣಿಸಲ್ಪಟ್ಟ ಸಂಸದ ಶ್ರೀ . ಸಚಿನ್ ತೆಂಡುಲ್ಕರ್ ಸ್ವತ: ಬೀದಿಗಿಳಿದು ಸ್ವಚ್ಛತಾ ಕಾರ್ಯದಲ್ಲಿ ಕೈ ಜೋಡಿಸಿದ್ದಾರೆ. ಅಷ್ಟೇ ಅಲ್ಲ ಪ್ರಧಾನಿಗಳನ್ನು ಭೇಟಿಯಾಗಿ ತನ್ನ ಕ್ಷೇತ್ರದಲ್ಲಿ ಒಂದು ಗ್ರಾಮವನ್ನು ದತ್ತು ಪಡೆದು ಸಂಪೂರ್ಣ ಗ್ರಾಮಾಭಿವೃದ್ಧಿಗೂ ಕೈ ಜೋಡಿಸುವುದಾಗಿ ಹೇಳಿರುತ್ತಾರೆ. ಹಾಗೆಯೇದೇಶದ ಬಹುದೊಡ್ಡ ಕೈಗಾರಿಕೋದ್ಯಮಿ ಅನಿಲ್ ಅಂಬಾನಿಯವರು ಕಾಣಲು ಅತೀ ಸಣ್ಣ ಆದರೆ ಪರಿಣಾಮದಲ್ಲಿ ಬಹುದೊಡ್ಡ ಕೆಲಸಕ್ಕೆ ಕೈ ಜೋಡಿಸಿರುವುದು ಎಲ್ಲರಿಗೂ ಪ್ರೇರಣೆ ಯಾಗುವಂತಿದೆ. ಸಾನಿಯಾ ಮಿರ್ಜಾರವರು ಸಹ ಸ್ವಯಂ ಪ್ರೇರಣೆಯಿಂದ ಸ್ವಚ್ಛತಾ ಅಂದೋಲನದಲ್ಲಿ ಪಾಲ್ಗೊಂಡಿರುವುದು ನಮ್ಮ ರಾಜ್ಯದ ಮುಖ್ಯ ಮಂತ್ರಿಗಳು ಕಣ್ಣು ತೆರೆದು ನೋಡಬೇಕಷ್ಟೇ . ಖರ್ಗೆಯವರಾದಿಯಾಗಿ ಕಾಂಗ್ರೆಸಿಗರು ಈ ಎಲ್ಲ ವಿಚಾರಗಳ ಕುರಿತಾಗಿ ಅಲ್ಲಸಲ್ಲದ ವಿಚಾರಗಳನ್ನು ಮಾತನಾಡುತ್ತ ಅಧಿಕಾರಕ್ಕಾಗಿ ಹಾತೊರೆಯುವುದರ ಬದಲು, ಕೇವಲ ಆದರ್ಶ ಮಾರ್ಗವನ್ನು ಮುಂದಿಟ್ಟುಕೊಂಡು ಕಾರ್ಯಪ್ರವರ್ತರಾಗಿ,ಮನ:ಪೂರ್ವಕವಾಗಿ ಕೈ ಜೋಡಿಸಿದರೆ ಆಡಳಿತ ನಡೆಸುವವರಿಗೆ ಒಂದಷ್ಟು ಅನುಕೂಲ ವಾಗಬಹುದೇನೋ.

“ಯಥಾ ರಾಜ ತಥಾ ಪ್ರಜಾ” ಎಂಬಂತೆ ಪ್ರಜೆಗಳು ಆಳುವವರನ್ನೇ ಅನುಸರಿಸುತ್ತಾರೆ. ಅವರೇ ಸರಿ ಇಲ್ಲದೆ ಪ್ರಜೆಗಳು ಸರಿಯಾಗಿರಬೇಕೆಂದು ಬಯಸುವುದು ಮೂರ್ಖತನವೇ ಸರಿ. ನಮ್ಮ ವ್ಯವಸ್ಥೆ ಗಬ್ಬೆದ್ದು ನಾರುತ್ತಿದೆ ನಿಜ ಆದರೆ ಬದಲಾವಣೆ ಕೂಡಾ ಅದರೊಳಗಿಂದಲೇ ಬರಬೇಕೆಂಬುದು ದೇಶದ ಕೆಲವರಿಗಾದರೂ ಅನಿಸುತ್ತಿರುವುದು ಆಶಾದಾಯಕವಾಗಿ ಕಾಣುತ್ತಿದೆ. ಪೇಟೆಗೆ ಬಂದು ಗುಟ್ಕಾ ತಿಂದು ಅಲ್ಲಲ್ಲಿ ಉಗುಳಿ ಮಾರ್ಗಕ್ಕೆ ಎಸೆಯಲಾರದ ದ್ವಂದ್ವದಲ್ಲಿರುವ ಸಾಮಾನ್ಯ ನಾಗರೀಕನೂ, ಚಾಕಲೇಟ್ ತಿಂದು ಅದರ ಕಾಗದವನ್ನು ಕೈಯ್ಯಲ್ಲಿ ಹಿಡಿದು ಸುತ್ತಲೂ ನೋಡುತ್ತಿರುವ ಮಗುವಿನ ಸ್ವಪ್ರಜ್ಞೆಯನ್ನು ನೋಡಿದರೆ ನಿಧಾನವಾಗಿಯಾದರೂ ಏನೋ ಬದಲಾವಣೆಯಾಗುವ ಆಶಾಕಿರಣ ಗೋಚರವಾಗುತ್ತಿರುವುದು ಶುಭ ಸಂಕೇತದಂತಿದೆ.

ಜೈ ಸ್ವಚ್ಛ ಭಾರತ್.

ಧನಂಜಯ ವಾಗ್ಲೆ

ಪುತ್ತೂರು

ಸ್ವಚ್ಛ ಭಾರತಕ್ಕೆ 2 ಘಂಟೆ ದಾನ

2014-10-23T16:28:00.002+05:30

ಮಹಾತ್ಮಾ ಗಾಂಧೀಜಿಯವರ ಕಲ್ಪನೆಯ ಸ್ವಚ್ಛ ಭವ್ಯ ಭಾರತ ನಿರ್ಮಾಣಕ್ಕೆ ಮತ್ತು ಪರಿಸರ ಸಂರಕ್ಷಣೆಗೆ ಭಾರತದ ಪ್ರಧಾನಿ ಶ್ರೀ ನರೇಂದ್ರ ಮೋದಿಯವರು ಸ್ವಚ್ಛ ನಿರ್ಮಲ ಭಾರತದ ಸಂಕಲ್ಪವನ್ನು ತೊಡುವಂತೆ ತಾವು ಸಹಿತ ರಾಷ್ಟ್ರೀಯ ಜನತೆಗೆ ಕರೆ ನೀಡಿರುವುದು ಸಂಧರ್ಬೋಚಿತವಾಗಿದೆ. ಈ ನಿಟ್ಟಿನಲ್ಲಿ ಭಾರತೀಯರಾದ ನಾವು ಈ ರಾಷ್ಟ್ರೀಯ ಕರೆಗೆ ಓಗೊಟ್ಟು ವಾರದಲ್ಲಿ 2 ಘಂಟೆ ಸಮಯವನ್ನು ದಾನ ಮಾಡಲು ಪ್ರತಿಜ್ಞೆತೊಡಬೇಕಾಗಿದೆ. ಬೇಕಾಬಿಟ್ಟಿಯಾಗಿ ವರ್ತಿಸುವ ಜನರಿಗೆ ತಿಳುವಳಿಕೆ ಮಾಡಿಸುವ ಮೂಲಕ ಸ್ವಚ್ಛ ನಿರ್ಮಲ ಭಾರತದ ನಿರ್ಮಾಣದ ಪ್ರಯತ್ನದಲ್ಲಿ ತೊಡಗಿಸಿಕೊಳ್ಳಬೇಕಾಗಿದೆ.

ಈ ಮಹಾಭಿಯಾನ ಕೇವಲ ಒಂದೇ ದಿನವಾಗಿರದೆ ಪ್ರತೀವಾರವೂ ನಡೆಯಲಿರುವುದರಿಂದ ನಾವು ಪ್ರತಿಯೊಬ್ಬರೂ ಈ ಕಾರ್ಯಕ್ರಮದ ಕುರಿತು ದಿನದಲ್ಲಿ ಕನಿಷ್ಠ 5 ಜನರಲ್ಲಿಯಾದರೂ ಮಾತನಾಡುವ ಮುಖಾಂತರ ಸ್ವಚ್ಛ ಭಾರತದ ಕುರಿತು ಪ್ರೇರೇಪಿಸಬೇಕಾಗಿದೆ. ಈ ಹಿಂದೆ ಸರಕಾರಿ ಪ್ರೇರಿತ ಕಾರ್ಯಕ್ರಮವಾದ ಮಕ್ಕಳ ಆರೋಗ್ಯದ ಕುರಿತ ಪೋಲಿಯೋ ಮುಕ್ತ ಭಾರತದ ಕುರಿತು ಒಂದು ಜನಾಂದೋಲನ ರೀತಿಯಲ್ಲಿ ನಡೆದ ಕಾರಣ ಈಗ ಭಾರತ ಪೋಲಿಯೋ ಮುಕ್ತ ಭಾರತವಾಗಿರುವುದು ನಮ್ಮ ಕಣ್ಣ ಮುಂದೆ ಇರುವ ಕಾರಣ ಜತೆಗೆ ಬಸ್ಸು ಆಸ್ಪತ್ರೆಗಳು, ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ಮಾಡುವುದು ಕೂಡಾ ನಿಧಾನವಾಗಿ ಯಶಸ್ವಿಯಾಗುತ್ತಿರುವುದು ಸಂತೋಷದಾಯಕವಾಗಿದೆ.

ಈ ನಿಟ್ಟಿನಲ್ಲಿ ಸರಕಾರಿ ಕಛೇರಿಗಳು, ಸ್ಥಳೀಯ ಆಡಳಿತ ಸಂಸ್ಥೆಗಳು, ಸಾರ್ವಜನಿಕ ಸಂಘ ಸಂಸ್ಥೆಗಳ ಸಹಯೋಗದೊಂದಿಗೆ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು ಕರಪತ್ರಗಳನ್ನು ಮುದ್ರಿಸಿ ಸಾರ್ವಜನಿಕರಿಗೆ ತಲುಪಿಸುವ ಸಲುವಾಗಿ ಸರಕಾರಿ ಕಛೇರಿಗಳು, ಸ್ಥಳೀಯ ಆಡಳಿತ ಸಂಸ್ಥೆಗಳು, ಅಂಗಡಿ, ಹೋಟೆಲ್ ಗಳು ವ್ಯಾಪಾರಿ ಸಂಸ್ಥೆಗಳು, ಬಸ್ ನಿಲ್ದಾಣ , ಬಸ್ಸುಗಳಲ್ಲಿ, ಸರಕಾರಿ ಆಸ್ಪತ್ರೆಗಳಲ್ಲಿ, ಸರಕಾರೇತರ ಆಸ್ಪತ್ರೆಗಳಲ್ಲಿ, ಶಾಲಾ ಕಾಲೇಜುಗಳಲ್ಲಿ, ವಿಶ್ವವಿದ್ಯಾಲಯ, ಗ್ರಾಮ ಪಂಚಾಯತ್, ಅಂಚೆ ಕಚೇರಿ, ಸಾರ್ವಜನಿಕ ಬ್ಯಾಂಕ್ ಗಳಲ್ಲಿ ಧಾರ್ಮಿಕ ಕೇಂದ್ರಗಳಾದ ದೇವಸ್ಥಾನ, ಚರ್ಚ್ ಮಸೀದಿಗಳಲ್ಲಿ ಮತ್ತು ಸಾರ್ವಜನಿಕರು ಸೇರುವ ಸ್ಥಳಗಳಲ್ಲಿ ಕರಪತ್ರಗಳ ಮುಖಾಂತರ ಜಾಗೃತಿ ಮೂಡಿಸಲು ಸಾಧ್ಯವಾದರೆ ಸ್ವಚ್ಛ ಭಾರತದ ಕನಸು ನನಸಾಗಲು ಕಷ್ಟವಾಗಲಾರದು.

ಎಲ್ಲೆಂದರಲ್ಲಿ ಕಸ ಬಿಸಾಡುವುದು, ಉಗುಳುವುದು, ಮಲಮೂತ್ರ ವಿಸರ್ಜಿಸುವುದು, ಪ್ಲಾಸ್ಟಿಕ್ ಗಳಲ್ಲಿ ದೊರೆಯುವ ತಿಂಡಿಗಳನನ್ನು ಸೇವಿಸಿ ಎಲ್ಲೆಂದರೆಲ್ಲಿ ಹಾಕುವುದು, ಪಾನ್ ಮಸಾಲ, ಗುಟ್ಕಾ, ಬೀಡಿ ಸಿಗರೇಟ್ ಎಳೆದು ತಿಂದು ರಸ್ತೆಗಳಲ್ಲಿ ಬಿಸಾಡುವುದು, ಈ ಕುರಿತ ಜನಜಾಗೃತಿಗೆ ವ್ಯಾಪಾರಸ್ತರೇ ಮುಂದೆ ಬರುವಂತೆ ಸ್ಥಳೀಯ ಆಡಳಿತಗಳು ಪ್ರಯತ್ನಿಸುವುದು, ವ್ಯಾಪಾರಸ್ತರು ಕಸ ಹಾಕಲು ತಮ್ಮಲ್ಲೇ ವ್ಯವಸ್ಥೆಗೊಳಿಸುವುದು ಮತ್ತು ಕಸ ರಸ್ತೆಗಲ್ಲಿ ಬಿಸಾಡದಂತೆ ಜನರಿಗೆ ಅವರೇ ಪ್ರೇರೇಪಿದರೆ ಪೇಟೆಯಲ್ಲಿ ಬೀಳುವ ಅರ್ಧ ಕಸ ವ್ಯವಸ್ಥೆಗೊಳಿಸುವಂತೆ ಮಾಡಬಹುದಾಗಿದೆ.

ವಿಶೇಷವಾಗಿ ಮೋದಿ ಜಿ ಯವರ ಗೆಲುವಿಗೆ ಸಹಕಾರಿಯಾಗಿ ಮನಪೂರ್ವಕವಾಗಿ ದುಡಿದ ಐಟಿಬಿಟಿ ಯಲ್ಲಿ ಕೆಲಸಮಾಡುವವರು ಮತ್ತು ಅಂತರ್ಜಾಲದಲ್ಲಿ ದುಡಿಯುವವರು ಮನಸ್ಸು ಮಾಡಿದರೆ ಅದ್ಭುತವಾದ ಕಾರ್ಯವನ್ನೇ ಸಾಧಿಸಬಹುದಾಗಿದೆ. ಒಬ್ಬರು 9*9 ರ ಗುಣಾಕಾರದಲ್ಲಿ ಅಂತರ್ಜಾಲದಲ್ಲಿ ತಿಳುವಳಿಕೆ ಮೂಡಿಸುವ ಮತ್ತು ಸ್ವತ: ತಾವೇ ಶುಚಿತ್ವದ ಕುರಿತು ಜಾಗೃತರಾದರೆ ಸ್ವಚ್ಛ ಭಾರತಕ್ಕೆ ತಮ್ಮದೇ ಆದ ಕೊಡುಗೆಯನ್ನು ಕೊಡಬಹುದಾಗಿದೆ.

ಅಮೇರಿಕಾ ಜಪಾನ್ ದೇಶಗಳು ಜನರ ತಿಳುವಳಿಕೆಗಳಿಂದಲೇ ಸ್ವಚ್ಛ ದೇಶಗಳಾಗಬಹುದಾದರೆ ಭಾರತ ಯಾಕೆ ಸ್ವಚ್ಛ ಭಾರತ ವಾಗಬಾರದು...ಈ ನಿಟ್ಟಿನಲ್ಲಿ ದೇಶವಾಸಿಗಳಾದ ನಾವು ಬದಲಾದರೆ ದೇಶ ಬದಲಾದೀತು. ಮಹಾತ್ಮಾ ಗಾಂಧಿ ಯವರ ಜಯಂತಿಯಂದು ಸಾಂಕೇತಿಕವಾಗಿ ಪುಷ್ಪ ನಮನ ಮಾಡಿ ರಜೆಯಂದು ಮಜಾ ಮಾಡುವ ಬದಲು ದೇಶದ ಅನ್ನ ತಿಂದು ಬದುಕುವ ನಾವು ವಾರಕ್ಕೆ 2 ಗಂಟೆಗಳನ್ನು ಮೀಸಲಿರಿಸಿ ನಮ್ಮ ಪ್ರಾಮಾಣಿಕ ಪ್ರಯತ್ನ ಮಾಡಿದರೆ ಬಾಪೂಜಿಯವರ ಸ್ವಚ್ಛ ನಿರ್ಮಲ ಭಾರತದ ಕನಸಿಗೆ ಪೂರಕವಾಗಿ ಕೆಲಸ ಮಾಡುವ ಮುಖಾಂತರ ಬಾಪೂಜಿಯವರಿಗೆ ನಿಜವಾಗಿ ನಾವು ಅತ್ಯುತ್ತಮ ಶ್ರದ್ಧಾಂಜಲಿ ಅರ್ಪಿಸಲು ನಮ್ಮನ್ನು ಪರಿವರ್ತನೆಗೆ ಒಳಪಡಿಸಿಕೊಳ್ಳುವ ಮುಖಾಂತರ ಪ್ರಾಮಾಣಿಕವಾಗಿ ಪ್ರಯತ್ನಿಸೋಣ.

ಧನಂಜಯ ವಾಗ್ಲೆ

ಪುತ್ತೂರು

ನಾಗರಿಕರ ಗುರುತಿನ ಪತ್ರದ ಕುರಿತು ನಿಮ್ಮ ಗಮನಕ್ಕೆ

2014-09-07T11:40:00.001+05:30

ರಿಂದ

ಕೆ. ಧನಂಜಯ ವಾಗ್ಲೆ

ಶಿವ ಕೃಪಾ 50 /12

A P M C Road

Puttur 574201

ದಕ್ಷಿಣ ಕನ್ನಡ

ಕರ್ನಾಟಕ ರಾಜ್ಯ

ರಿಗೆ

ಭಾರತ ಸರಕಾರದ ಆಧರಣೀಯ ಪ್ರಧಾನಮಂತ್ರಿಗಳು ಮಾನ್ಯ ಶ್ರೀ ನರೇಂದ್ರ ಮೋದಿಯವರ ಸಮಕ್ಷಮಕ್ಕೆ

ನವದೆಹಲಿ ಭಾರತ ಸರಕಾರ

1) ಆಧಾರ್ ಕಾರ್ಡನ್ನು ಸರಕಾರದ ಯಾವುದೇ ಯೋಜನೆಗಳಿಗೆ ಬಳಸಬಾರದೆಂದು ಹಿಂದಿನ UPA ಸರಕಾರಕ್ಕೆ ಸುಪ್ರಿಂ ಕೋರ್ಟ್ ನಿರ್ದೇಶನ ನೀಡಿರುವುದು ತಮ್ಮ ಗಮನಕ್ಕೆ ಈಗಾಗಲೇ ಬಂದಿರಬಹುದು. ಆಧಾರ್ ಕಾರ್ಡ್ ವಿತರಿಸುವಲ್ಲಿ ವಿವರಿಸಲಾಗದಷ್ಟು ಲೋಪದೋಷಗಳಾಗಿವೆ ಮತ್ತು ಸಾಕಷ್ಟು ಅವ್ಯವಹಾರಗಳು ನಡೆದಿವೆ. ದೇಶದ ನಾಗರಿಕರ ವೈಯಕ್ತಿಕ ಮಹತ್ವದ ದಾಖಲೆಗಳು ಹೊರದೇಶದ ಕಂಪನಿಗಳ ಕೈಯಲ್ಲಿ ಇರುವುದರಿಂದ ಇನ್ನು ದೊಡ್ಡ ದುರಂತವೆಂದು ಹೇಳಿರುವುದು ಯಾಕೆ ಎಂದು ತಮ್ಮ ನೂತನ ಸರಕಾರ ಗಂಭೀರವಾಗಿ ಚಿಂತಿಸಬೇಕೆಂದು ಮನವಿ ಮಾಡುತ್ತೇನೆ.

2) UPA ಸರಕಾರದ ಆತುರದಿಂದ ಆಧಾರ್ ಕಾರ್ಡಿಗೂ ಇನ್ನಿತರ ಸರಕಾರಿ ಸವಲತ್ತಿಗು ಜೋಡಿಸಲು ಕಡ್ಡಾಯವೆಂದು ಸರಕಾರದ ಎಲ್ಲ ಇಲಾಖೆಗಳ ಒತ್ತಡ ತಂತ್ರದಿಂದಾಗಿ ಆಧಾರ್ ಮಾಡಿಸಿಕೊಳ್ಳಲು ದೇಶದಾದ್ಯಂತ ಜನರು ಅನುಭವಿಸಿದ ಪಟ್ಟ ಪಾಡು ಹೇಳತೀರದು. ರಾತ್ರಿ 4 ಗಂಟೆಗೆ ಬಂದು ತಾಲೂಕು ಆಫೀಸ್ನಲ್ಲಿ ಅನ್ನ ನೀರು ಇಲ್ಲದೆ ಕಾದು ಬೆಳಗ್ಗೆ 11 ಗಂಟೆಗೆ ಬರುವ ಖಾಸಗಿ ಸಿಬ್ಬಂದಿ 60 ರಿಂದ 80 ಜನರಿಗೆ ಮಾತ್ರ ಟೋಕನ್ ಕೊಟ್ಟು ಉಳಿದವರನ್ನು ಮನೆಗೆ ಹೋಗಲು ಹೇಳದೆ ನಿಲ್ಲಲಿಕ್ಕೂ ಹೇಳದೆ ಹತ್ತಾರುಬಾರಿ ಬಂದು ಕೊನೆಗೆ 2,3,4 ತಿಂಗಳಲ್ಲಿ ಕಾರ್ಡುಗಳು ಸಿಕ್ಕಿದಾಗ ಆನೇಕ ಮಾಹಿತಿಗಳು ತಪ್ಪಾಗಿರುವುದು ಒಬ್ಬರ ಭಾವಚಿತ್ರ ಇನ್ನೊಬ್ಬರಿಗಾಗಿರುವುದೂ ಹೆಸರು ಜನ್ಮದಿನಾಂಕಗಳಲ್ಲಿ ವ್ಯತ್ಯಾಸವಾಗಿ ಆನೇಕ ನ್ಯೂನತೆಗಳಾಗಿವೆ. ಯಾಕೆಂದರೆ ಖಾಸಗಿ ಕಂಪನಿಗಳ ಬೇಜವಾಬ್ದಾರಿ ಸಿಬ್ಬಂದಿಗಳದಾಗಿರುವುದರಿಂದ.

3) ಒಟ್ಟು ವ್ಯವಸ್ಥೆಯನ್ನು ಆಧಾರ್ ಆಯೋಗ ಹೊರ ದೇಶದ ಖಾಸಗಿ ಕಂಪನಿಗಳಿಗೆ ಕೊಟ್ಟಿರುವುದು, ಅವರು ರಾಜ್ಯ ಜಿಲ್ಲೆ ತಾಲೂಕುಗಳಿಗೆ ಬೇರೆ ಬೇರೆ ಉಪಕಂಪನಿಗಳಿಗೆ ಕೊಟ್ಟು ಸಿಬ್ಬಂದಿಗಳಿಗೆ ಸರಿಯಾದ ಮಾರ್ಗದರ್ಶನವಿಲ್ಲದೆ ಎಲ್ಲ ಖಾಸಗಿ ಕಂಪನಿಗಳು ಬೇಕಾಬಿಟ್ಟಿ ಕೆಲಸಮಾಡಿರುವುದು ಒಂದು ಕಡೆಯಾದರೆ, ಇದೇ ಸಂದರ್ಭದಲ್ಲಿ ಹಣಮಾಡಲು ಏಜೆಂಟ್ ಗಳು ಸೇರಿ ಇಡಿ ಆಧಾರ್ ವ್ಯವಸ್ತೆ ಜನರಿಗೆ ಹೇಸಿಗೆ ಹುಟ್ಟಿಸುವಷ್ಟು ತೊಂದರೆಗಳಾಗಿವೆ. ಇಡೀ ದೇಶದ ರಾಜ್ಯ ಜಿಲ್ಲೆ ತಾಲೂಕುಗಳಲ್ಲಿ ಬೇಜಬ್ದಾರಿತನದಿಂದ ಜನರು ಅನಿಭವಿಸಿದ ಕಷ್ಟಗಳು ಪುನ: ಜನರಿಗೆ ಬಾರದಂತಾಗಲಿಗ ಎಂದು ಕಳಕಳಿಯಿಂದ ವಿನಂತಿಸುತ್ತೇನೆ.

4) ತೈಲದ ಮತ್ತು ಆಧಾರ್ ಆಯೋಗದ ಚಿತಾವಣೆಯಿಂದಾಗಿ ಬ್ಯಾಂಕ್ ಖಾತೆಗೆ ಸಬ್ಸಿಡಿ ಹಣ ವರ್ಗಾಯಿಸುದರ ಮೂಲಕ ಜನರನ್ನು ವಂಚಿಸಲಾಗುತ್ತಿತ್ತು. ನನ್ನ ವೈಯಕ್ತಿಕ ಅನುಭವವನ್ನು ಹೇಳುವುದಾದರೆ ಆಧಾರ್ ಸಂಖ್ಯೆ ಬ್ಯಾಂಕ್ ಖಾತೆಗೆ ಜೋಡಿಸಿ ಗ್ಯಾಸ್ ಬುಕಿಂಗ್ ಮಾಡಿದಾಗ ಒಂದು ಸಿಲಿಂಡರಿಗೆ 1072.50 + ಸರ್ವಿಸ್ ಚಾರ್ಜ್ ಸೇರಿ 20 ರೂಪಾಯಿ ಕೊಟ್ಟು ಖರೀದಿಸಿದೆ. 18 ದಿನಗಳು ನಂತರ ನನ್ನ ಖಾತಿಗೆ 435 ರೂ ಜಮಾಮಾಡಲಾಗಿದೆ ಎಂಬ ಮಾಹಿತಿ ಬಂತು ಅಂದರೆ 1092.50 ನಾನು ಕಟ್ಟಿರುವ ಹಣ, ನನಗೆ ಬಂದಿರವುದು 435 ಅಂದರೆ ನಾನು 119.50 ಹೆಚ್ಚು ಕೊಟ್ಟು ಖರೀದಿಸಿದಂತಾಯಿತು. ಈ ತಾರಾತಮ್ಯವಲ್ಲದೆ ಒಬ್ಬರ ಖಾತೆಗೆ ಒಂದೇ ಸಿಲಿಂಡರಿಗೆ ಎರಡುಸಲ ಹಣ ಜಮೆಯಾಗಿರುವುದು ಇದರಿಂದಾಗಿ ಬೇರೆಯವರು ಹಣ ಕಳಕೊಂಡಿರುವುದು ಗಮನಿಸಿದರೆ ಈಡಿ ಆಧಾರ್ ವ್ಯವಸ್ತೆ ಕುಸಿದಿದೆ ಮತ್ತು ಜನರಿಗೆ ಹೊರೆಯಾಗಿದೆ ಎಂಬುದನ್ನು ಪುನರ್ ವಿಮರ್ಶಿಸಬೇಕೆಂದು ಮನವಿಮಾಡಿಕೊಳ್ಳುತ್ತೇನೆ.

5) ದೇಶದಾದ್ಯಂತ ಗ್ಯಾಸ್ ಸಿಲಿಂಡರ್ ಗಳು ನಿಜವಾಗಿ ಸಿಗಬೇಕಾಗಿರುವವರಿಗಿಂತಲೂ ಹೆಚ್ಚು ದುರುಪಯೋಗ ಆಗಿದೆ ಮತ್ತು ಆಗುತ್ತಿದೆ ಎನ್ನುವುದು ಸೂರ್ಯ ಚಂದ್ರರಷ್ಟೇ ಸತ್ಯ, ಇದಕ್ಕೆ ಆಯಾಯ ರಾಜ್ಯ ಸರಕಾರಗಳು ಶಿಪಾರಸು ಮಾಡುತ್ತಿರುವ ಆಯಾಯ ಕ್ಷೇತ್ರದ MP, MLAಗಳು ತೈಲ ಕಂಪನಿಯ ಏಜನ್ಸಿಗಳು ಕಾನೂನು ಪರಿಪಾಲನೆಯ ದೋಷಗಳು ಮತ್ತು ಭಾರತದ ಯಾವುದೇ ಕಾನೂನಿಗೆ ಹೆದರದ ಪ್ರಜೆಗಳು, ಕೊಡುವ ದಾಖಲೆ ಪತ್ರಗಳು ಸರಿ ಎಂದೆನಿಸಿದರು ಸತ್ಯ ಮತ್ತು ಕಾನೂನಿಗೆ ಮೋಸ ಮಾಡುವ ರೀತಿಯಲ್ಲಿ ಭಾರತದಲ್ಲಿ ಯಾವುದೇ ದಾಖಲೆಯನ್ನು ಕಾನೂನಿನ ಭಯವಿಲ್ಲದೆ ಸೃಷ್ಟಿಸಲು ಸಾಧ್ಯವೆಂದು ಸಾಬೀತಾಗಿರುವುದು ತಪ್ಪಿದರು ಶಿಕ್ಷೆ ಆಗದಿರುವುದು ಪ್ರಭಲವಾದ ಕಾರಣವೆಂದರೆ ತಪ್ಪಾಗಲಾರದು.

6) ಗ್ರಾಹಕರ ಬ್ಯಾಂಕ್ ಖಾತೆಗೆ ನೇರ ಹಣ ವರ್ಗಾವಣೆಯಲ್ಲಿನ ಗೊಂದಲವು ಚುನಾವಣೆಯಲ್ಲಿ ವ್ಯತಿರಿಕ್ತ ಪರಿಣಾಮ ಬೀರಲಿದೆ ಎಂಬ ಖಚಿತ ಮಾಹಿತಿಯ ಹಿನ್ನಲೆಯಲ್ಲಿ ಹಿಂದಿನ UPAಸರಕಾರ 2014 ಜನವರಿ 30ರಂದು ಯೋಜನೆಯನ್ನು ಸ್ತಗಿತಗೊಳಿಸಲು ನಿರ್ಧರಿಸಿತ್ತು. ಆ ವೇಳೆಗಾಗಲೇ ದೇಶದ 18 ರಾಜ್ಯಗಳ 289 ಜಿಲ್ಲೆಗಳ ಗ್ರಾಹಕರಿಗೆ LPG ಸಬ್ಸಿಡಿ ಹಣವನ್ನು ನೆರವಾಗಿ ಬ್ಯಾಂಕ್ ಖಾತೆಗೆ ವರ್ಗಾವಣೆ ಮಾಡಲಾಗುತ್ತಿತ್ತು ಮತ್ತು ಗ್ರಾಹಕರ ಹಣ ವರ್ಗಾವಣೆಯ ಗೊಂದಲದಿಂದ ಜನರು ಕಂಗೆಟ್ಟು ಸರಕಾದ ವಿರುದ್ಧ ಕೋಪವಿಷ್ಟರಾಗಿರುವುದರಿಂದಲೇ NDAಯಾ ಪರವಾಗಿ ನಿಂತಿರುವುದನ್ನು ಮರೆಯಬಾರದೆಂದು ಜನರ ಬವಣೆಯನ್ನು ಅರ್ಥೈಸಿಕೊಳ್ಳಬೇಕೆಂದು ಕೇವಲ ಉನ್ನತ ಅಧಿಕಾರಿಗಳ ಸೂಚನೆಗಳನ್ನಷ್ಟೇ ಗಮನಿಸದೆ ಜನರ ಸಮಸ್ಯೆ ಗಳನ್ನೂ ಅರ್ಥೈಸಿ ಸದರಿ ಯೋಜನೆಯನ್ನು ಪುನರ್ ವಿಮರ್ಶಿಸಬೇಕೆಂ ದು ವಿನಂತಿ.

7) ಈಗಾಗಲೇ ಗೃಹ ಇಲಾಖೆಯ ಕುರಿತು ಮಾಧ್ಯಮಗಳಲ್ಲಿ ಪ್ರಕಟವಾದಂತೆ ದೇಶದ ನಾಗರೀಕತ್ವದ ಕುರಿತು ಗುರುತು ಪತ್ರ ನೀಡುವ 1955 ನೇ ಜನ ಪ್ರಾತಿನಿಧ್ಯ ಕಾಯ್ದೆಯ 20 ದಾಖಲೆಗಳಲ್ಲಿ ಒಂದನ್ನು ಕೊಟ್ಟರೆ ಸಾಕಾದೀತು ಎಂಬ ಮಾಹಿತಿ ಪ್ರಕಟವಾಗಿದೆ. ಇದರಲ್ಲಿಯೂ ಕಾನೂನಿನ ಒಳ ನುಸುಳಿ ನಾಗರೀಕತ್ವ ವ್ಯವಸ್ಥೆ ಕುಸಿಯುವ ಸಾಧ್ಯತೆ ಇರುವುದರಿಂದ, ನಾಗರೀಕತ್ವದ ಗುರುತು ಪತ್ರ ವಿತರಣೆಗಿಂತಲೂ ಮೊದಲು ಸಂಸತ್ತಿನಲ್ಲಿ ಪ್ರಬಲವಾದ ಕಾನೂನೊಂದು ರೂಪಿತವಾಗಲೇ ಬೇಕು. ನಾಗರೀಕತ್ವದ ಮಾಹಿತಿಯನ್ನು ಸಂಗ್ರಹಿಸಲು ರಾಷ್ಟ್ರೀಯ ಜನಸಂಖ್ಯೆ ಗಣತಿಯಂತೆ ಸರಕಾರೀ ನೌಕರರೆ ಮಾಡಬೇಕು. ಮನೆಮನೆಗೆ ಹೋಗಿ ಸಂಗ್ರಹಿಸುವ ಮಾಹಿತಿ ನೂರಕ್ಕೆ ನೂರರಷ್ಟು ಸರಿಯಾಗಿಸಲು ನೌಕರರೇ ಜವಾಬ್ದಾರರಾಗಿರಬೇಕು. ಲೋಪದೋಷಗಳಾದರೆ ಕೆಲಸ ಕಳೆದುಕೊಳ್ಳುವುದರ ಜೊತೆಗೆ 5 ವರ್ಷಗಳ ಜೈಲುವಾಸ ಮತ್ತು 5 ಲಕ್ಷ ದಂಡವಿಧಿಸುವಂತಿರಬೇಕು, ದೇಶದ ನಾಗರೀಕರು ಸಹ ಸುಳ್ಳು ಹೇಳಿಕೆಗಳನ್ನು ಕೊಟ್ಟಿರಿವುದು ಸಾಬೀತಾದರೆ ದಂಡ ಮತ್ತು ಜೈಲುವಾಸ ಕಡ್ಡಾಯವಾಗಿರಬೇಕು.

ಮಾಹಿತಿ ಸಂಗ್ರಹಿಸುವಾಗ ಓರ್ವ ಪ್ರಜೆ ಎಲ್ಲಿರುತ್ತಾನೋ ಅಲ್ಲಿಯೇ ಸಂಗ್ರಹಿಸಬಹುದು ಆದರೆ ಆತನಿಗೆ ನಾಗರೀಕತ್ವ ಸಾಬೀತಾಗಲೂ ಆತ ಹುಟ್ಟಿರುವ ಗ್ರಾಮದಲ್ಲಿಯೇ ಆತನ ಹುಟ್ಟಿರುವ ದಾಖಲಾತಿ,ಶಾಲಾ ದಾಖಲಾತಿ, ಸರಕಾರಿ ಆಸ್ಪತ್ರೆಗಳ ದಾಖಲಾತಿ ಅಲ್ಲಿಂದಲೇ ಪಡೆಯುವಂತಿರಬೇಕು. ಆತನು ಇರುವಲ್ಲಿನ ದಾಖಲಾತಿಯನ್ನು ಸಂಗ್ರಹಿಸಿ ಇಟ್ಟುಕೊಳ್ಳುವುದರ ಜತೆಗೆ ಒಂದು ಪ್ರತಿಯನ್ನು ಆತ ಹುಟ್ಟಿದ ಗ್ರಾಮಕ್ಕೆ ಮಿಂಚಂಚೆಯ ಮೂಲಕ ಸಂಗ್ರಹಕಾರರೆ ಕಳುಹಿಸಬೇಕು. ಮೇಲಿನ ದಾಖಲಾತಿಯನ್ನು ಸಂಗ್ರಹಿಸಲು ಸಾಧ್ಯವಾಗದೇ ಇದ್ದಲ್ಲಿ ಆತ ಹುಟ್ಟಿದ ಗ್ರಾಮ ಸರಪಂಚರು ಕಾರ್ಯದರ್ಶಿಗಳು ಓರ್ವ ಆ ಗ್ರಾಮದ ಅತ್ಯಂತ ಹಿರಿಯರು ಸೇರಿ ಸದರಿ ಮನುಷ್ಯ ಇಲ್ಲಿಯ ರಾಷ್ಟ್ರೀಯನೆಂದು ಸಮರ್ಥಿಸುವ ದಾಖಲೆಯನ್ನು ಒದಗಿಸುವಂತಿರಬೇಕು. ( ಆದರೆ ಸರಕಾರಿ ನೌಕರರಿಗೆ ಅನ್ವಯವಾಗುವ ಪ್ರಬಲವಾದ ಕಾನೂನು ಇವರಿಗೂ ಅನ್ವಯವಾಗುವಂತಿರಬೇಕು).

8) ಒಂದು ಗ್ರಾಮ ಒಂದು ಘಟಕವಾಗಿ ಪರಿಗಣಿಸಿ ನಾಗರೀಕತ್ವದ ಗುರುತು ಪತ್ರ ಕೊಡಲು ಸಾಧ್ಯವಾದರೆ ಸರಿಯಾದ ಮಾಹಿತಿಯಿಂದ ಆತನ ನಾಗರೀಕತ್ವ ಸಾಬೀತು ಮಾಡಲು ಸುಲಭ ಸಾಧ್ಯವಾಗಬಹುದು. ಗಣತಿ ಮಾಡುವಾಗ ನಾಗರೀಕನು ಎಲ್ಲೇ ಇದ್ದರೂ ಆತನ ಮಾಹಿತಿಯನ್ನು ಸಂಗ್ರಹಿಸಿ ಆತ ಎಲ್ಲಿ ಹುಟ್ಟಿರುವನೋ ಅದೇ ಗ್ರಾಮಕ್ಕೆ ಒಂದು ಪ್ರತಿ ರವಾನಿಸಿದರೆ ಆತನ ಎಲ್ಲ ದಾಖಲೆ 2 ಭಾಗದಲ್ಲಿ ಇರುವ ಕಾರಣ ಆತ ಹುಟ್ಟಿದ ಗ್ರಾಮದಲ್ಲಿ ದಾಖಲೆ ಸಂಗ್ರಹಿಸಲು ವಿಫಲನಾದರೆ ತನಗೆ ತಾನೇ ನಾಗರೀಕನಲ್ಲದವನು ಹೊರ ಹೋಗಲೇ ಬೇಕಾಗುತ್ತದೆ ಅಥವಾ ಅವನು ಯಾರೆಂದು ಪತ್ತೆ ಹಚ್ಚಲು ಸುಲಭ ಸಾಧ್ಯವಾಗುವುದರಿಂದ ಮೇಲಿನ ವಿಷಯಗಳನ್ನು ಗಂಭೀರವಾಗಿ ಕಾನೂನಾತ್ಮಕವಾಗಿ ವಿಮರ್ಶಿಸಬೇಕೆಂದು ವಿನಂತಿ.

9) ಇತ್ತೀಚಿನ ನನ್ನ ಒಂದು ಅನುಭವವೆಂದರೆ ಓರ್ವ ರಿಕ್ಷಾ ಚಾಲಕರು ತನ್ನ ರಿಕ್ಷಾವನ್ನು ಮಾರಿ ಯಾರದೋ ಭರವಸೆಯಲ್ಲಿ ಪ್ರವಾಸಿ ವೀಸಾದಡಿಯಲ್ಲಿ ದುಬಾಯಿ ಗೆ ಹೋಗಿದ್ದರು. ಅಲ್ಲಿ ಕೆಲಸ ಸಿಗದೇ ಇರುವ ಕಾರಣ ೨೯ ನೇ ದಿನಕ್ಕೆ ಅವರು ಅಲ್ಲಿಂದ ಹೊರಟು ಭಾರತಕ್ಕೆ ಹಿಂದಿರುಗಿದರು, ಇಷ್ಟು ಬೇಗ ಬಂದಿರುವುದಕ್ಕೆ ಕಾರಣ ಕೇಳಿದರೆ ದುಬೈಯಲ್ಲಿ ವೀಸಾ ಅವಧಿ ಮುಗಿದು ಒಂದು ದಿನ ನಿಂತರೂ ಬಂಧಿಸಿ ಜೈಲಿಗೆ ಕಳುಹಿಸುತ್ತಾರೆಂದರು. ದುರಾದೃಷ್ಟದಿಂದ ವೀಸಾ ಅವಧಿ ಮುಗಿದು ಹಲವಾರು ವರ್ಷಗಳೇ ಕಳೆದರೂ ಭಾರತದಲ್ಲಿನ ವ್ಯವಸ್ಥೆ ಅಂಥವರನ್ನು ಕಂಡು ಹಿಡಿದು ಅವರನ್ನು ಹೊರ ಹಾಕಲು ಸಾಧ್ಯವಾಗಿದೆಯೇ, ದೇಶೀಯ ಕಾನೂನನ್ನು ಜಾರಿಗೊಳಿಸುವವರಿಗೆ ಕಾನೂನುಗಳ ಭೀತಿಯ ಕೊರತೆ ಇದೆ ಎಂದೇ ಅರ್ಥವಲ್ಲವೇ ... ಆದುದರಿಂದ ಒಂದು ಪ್ರಬಲವಾದ ಮತ್ತು ಜೀವನ ಭೀತಿಯುಳ್ಳ ಕಾನೂನು ಜಾರಿಯಾಗದಿದ್ದರೆ ಈಗಿರುವ ನೂರಾರು ಕಾನೂನುಗಳಂತೆ ಇದು ಒಂದಾಗಬಾರದು. ಜೊತೆಗೆ ಕಾನೂನು ಮಾಡುವವರಿಗೂ ಕಾನೂನು ಜಾರಿಯಲ್ಲಿನ ಬದ್ಧತೆ ಇರುವಂತೆ ನೋಡಿಕೊಳ್ಳಬೇಕು. ಜಾರಿಗೊಳಿಸಿದ ಕಾನೂನು ಪರಿಪಾಲನೆ ಆಗಿದೆಯೇ ಇಲ್ಲವೇ ಎಂದು ಪರಾಮರ್ಶಿಸಲು ತಪ್ಪಿದರೆ ಶಿಕ್ಷೆಗೆ ಒಳ ಪಡುವಂತಿರಬೇಕು.

ಈತನಕದ ಎಲ್ಲಾ ಕಾನೂನುಗಳು ಜಾರಿಗೊಳಿಸುವಾಗಲೇ ಅದರಿಂದ ನುಸುಳಲು ದಾರಿಗಳು ಇರುವಂತಿವೆ. ಆದುದರಿಂದ ಒಂದು ಪ್ರತ್ಯೇಕವಾದ ಬಲಶಾಲಿಯಾದ ಅಂದರೆ ಶ್ರೀ ಮೋದಿಜಿ ಯವರ ಕಾನೂನೇ ಜಾರಿಯಾಗಬೇಕೆಂದು ಕೋರುತ್ತೇನೆ.

10) ದೇಶದಲ್ಲಿ ಸುಮಾರು 5 ಲಕ್ಷದ 40 ಸಾವಿರ ಗ್ರಾಮಗಳಿದ್ದು, ಹೆಚ್ಚು ಕಮ್ಮಿ ಗ್ರಾಮಕ್ಕೊಂದರಂತೆ ಅಂಚೆ ಕಛೇರಿಗಳಿದ್ದು ಆ ಗ್ರಾಮದ ಎಲ್ಲ ಕುಟುಂಬಗಳ ಪರಿಚಯವಿರುವುದರಿಂದ ಅಂಚೆ ಕಛೇರಿಗಳನ್ನೇ ಸರಕಾರಿ ಬ್ಯಾಂಕುಗಳನ್ನಾಗಿ ಪರಿವರ್ತಿಸಿ ಇಡೀ ದೇಶದ ಅಂಚೆ ಕಛೇರಿಗಳು ಮತ್ತು ಗ್ರಾಮ ಪಂಚಾಯತುಗಳನ್ನು ಬಲವಾದ ಅಂತರ್ಜಾಲದಿಂದ ಜೋಡಿಸಿದ ನಂತರವೇ ಕಾಲಾವಕಾಶವಾದರೂ ಸರಿಯಾದ ರೀತಿಯಲ್ಲಿ ದೇಶದ ನಾಗರೀಕತ್ವದ ಗುರುತು ಪತ್ರ ಕೊಡಲು ವ್ಯವಸ್ಥಿತವಾಗಿ ಪ್ರಯತ್ನಿಸಬೇಕೆಂದು ಮನವಿ ಮಾಡುತ್ತೇನೆ.

11) ಈಗಾಗಲೇ ಸುಮಾರು 15 ಕೋಟಿ ಬಡವರ್ಗದ ಜನರಿಗೆ ಒಂದು ಕುಟುಂಬಕ್ಕೆ 2 ಬ್ಯಾಂಕ್ ಖಾತೆಗಳನ್ನು ತೆರೆದು 5+5 ಸಾವಿರ ರೂಪಾಯಿಗಳ ಓವರ್ ಡ್ರಾಪ್ಟ್ ಮತ್ತು 1 ಲಕ್ಷ ರೂಪಾಯಿಗಳ ವಿಮೆಯನ್ನು ಕೊಡುವುದು ಕೂಡಾ ಆಶಾದಾಯಕವಾಗಿದೆ. ದೇಶದೆಲ್ಲೆಡೆ ಜನರಿಗೆ ಆರೋಗ್ಯ ಕೊಡುವ ಚಿಂತನೆ ಇನ್ನೂ ಬಲಗೊಳಿಸಿ ಪ್ರತೀ ನಾಗರಿಕನ್ನು ಒಳಗೊಂಡಂತೆ ಆದಾಯಕ್ಕೆ ಅನುಗುಣವಾಗಿ 50+100+200+300 ಮತ್ತು 500 ರ ಅನುಪಾತದಲ್ಲಿ ವಿಮಾ ಮೊತ್ತವನ್ನು ಏರಿಸಿ ದೇಶದ ಯಾವುದೇ ಸರಕಾರಿ ಅಥವಾ ಸರಕಾರಿ ನೊಂದಾಯಿತ ಖಾಸಗಿ ಆಸ್ಪತ್ರೆಗಳಲ್ಲಿ ತಕ್ಷಣವಾಗಿ ವಿಮಾ ಹಣ ದೊರಕುವಂತೆ ಮಾಡಿದರೆ ಜನತೆಗೆ ತುಂಬಾ ಅನುಕೂಲವಾಗಬುಹುದು. ಹಣ ಸಂಗ್ರಹಿಸುವ ಗುರಿ ಇರಿಸಿ ನಾಗರೀಕತ್ವದ ಗುರುತಿಸುವಿಕೆಯ ಸಂದರ್ಭದಲ್ಲಿ ಒಂದು ಕುಟುಂಬದ ಜಾತಿ ಪಂಗಡ ಒಳ ಪಂಗಡ ಮಾತೃಭಾಷೆ ಆಡು ಭಾಷೆ ಸ್ವಂತ ಮನೆ ಇದೆಯೇ ಇಲ್ಲವೇ..,ಆಸ್ತಿ ಇದೆಯೇ ಇಲ್ಲವೇ ಮೂಲಭೂತ ಕನಿಷ್ಠ ಸೌಕರ್ಯಗಳಾದರೂ ಇದೆಯೇ ಇಲ್ಲವೇ , ಆರೋಗ್ಯದ ಕುರಿತು ಸರಕಾರಿ ವೈದ್ಯಾಧಿಕಾರಿಗಳು ವ್ಯಕ್ತಿಯ ಆರೋಗ್ಯದ ಮತ್ತು ರಕ್ತದ ವರ್ಗೀಕರಣ ಮಚ್ಚೆ ಸಹಿತ ವ್ಯಕ್ತಿಯನ್ನು ಗುರುತಿಸುವ ರೀತಿಯಲ್ಲಿ ದಾಖಲೆಯನ್ನು ಕೊಡುವಂತಿರಬೇಕು. ರಾಷ್ಟ್ರೀಯರನ್ನು ಗುರುತಿಸುವ ಸಂದರ್ಭದಲ್ಲಿ ಸಾಧ್ಯವಾದರೆ ಆರೋಗ್ಯ ಮತ್ತು ರಾಷ್ಟ್ರೀಯ ಗುರುತುಪತ್ರ ಒಂದರಲ್ಲೇ ಸರಕಾರದಿಂದ ಸಿಗುವ ಎಲ್ಲ ಸೌಲಭ್ಯ ಮಾಹಿತಿ ಒಂದುಗೂಡಿಸಲು ಸಾಧ್ಯವಿದೆ. ಇದರಿಂದಾಗಿ ಈಗಿರುವ 20 -30 ಬೇರೆ ಬೇರೆ ದಾಖಲೆಗಳ ಬದಲಾಗಿ ಒಂದರಲ್ಲೇ ಎಲ್ಲವನ್ನು ವಿಲೀನಗೊಳಿಸಿದರೆ ರಾಷ್ಟ್ರೀಯ ಭದ್ರತೆ, ಆಂತರಿಕ ಭದ್ರತೆ, ಅರಾಷ್ಟ್ರೀಯರನ್ನು ಗುರುತಿಸುವಿಕೆ, ಕೊಲೆ ಸುಲಿಗೆ ದೌರ್ಜನ್ಯ ಮುಂತಾದ ಎಲ್ಲ ಕ್ರಿಮಿನಲ್ ಗಳನ್ನು ಸಹ ಗುರುತಿಸಲು ಗುಪ್ತಚರ ಇಲಾಖೆಗೆ ಅತ್ಯಂತ ಅನುಕೂಲವಾಗಬಹುದು. ಕೊನೆಯಲ್ಲಿ ಎಲ್ಲ ಇಲಾಖೆಗಳನ್ನು ಅಂತಿಮವಾಗಿ ಜೋಡಿಸಲು ಒಂದೇ ಗುರುತು ಪತ್ರದಡಿ ಸಾಧ್ಯವಾಗಬಹುದು.

1. ಈ ಎಲ್ಲ ಮಾಹಿತಿಗಳ ಜೊತೆಗೆ ವ್ಯಕ್ತಿ ಹುಟ್ಟಿದ ಗ್ರಾಮ ಪಂಚಾಯತಿನಿಂದ ಹುಟ್ಟಿದ ದಾಖಲೆ

2. ಶಾಲಾ ದಾಖಲಾತಿಯ ಪ್ರಮಾಣಪತ್ರ

3. ಪಡಿತರ ಚೀಟಿಯ ದಾಖಲಾತಿ

4. ಭೂಮಿ ಇದ್ದರೆ ಅದರ ದಾಖಲಾತಿ

5. ಮನೆ ಇದ್ದರೆ ಮನೆತೆರಿಗೆ ರಶೀದಿ

6. ಯಾವುದೂ ದಾಖಲೆ ಇಲ್ಲದಿದ್ದರೆ ಪಂಚಾಯತ್ ಅಧ್ಯಕ್ಷರು, ಕಾರ್ಯದರ್ಶಿಗಳು. ಓರ್ವ ಹಿರಿಯ ನಾಗರಿಕರು ಜೊತೆಗೂಡಿ ರಾಷ್ಟ್ರೀಯ ನೆಂಬ ಪ್ರಮಾಣಪತ್ರ ನೀಡಬಹುದು ಆದರೆ ಮೇಲಿನ ಕಾನೂನಿನ ಶಿಕ್ಷೆಗೆ ಒಳಪಡುವಂತಿರಬೇಕು. ಕನಿಷ್ಠ ಓರ್ವ ರಾಷ್ಟ್ರೀಯನು ಇಷ್ಟು ದಾಖಲೆಗಳನ್ನು ಒದಗಿಸಲೇಬೇಕು.

ಈ ದೀರ್ಘವಾದ ಮನವಿಯನ್ನು ಕೂಲಂಕುಷವಾಗಿ ಪರಿಶೀಲಿಸಬೇಕೆಂದು ಈ ಮೂಲಕ ತಮ್ಮಲ್ಲಿ ವಿನಯಪೂರ್ವಕ ವಿನಂತಿಸಿಕೊಳ್ಳುತ್ತೇನೆ.

ಸ್ಥಳ: ಪುತ್ತೂರು
ದಿನಾಂಕ;07-Sept-2014 ಇತಿ

ತಮ್ಮ ವಿಶ್ವಾಸಿ

ಧನಂಜಯ ವಾಗ್ಲೆ

ಪುತ್ತೂರು

ಇರಾಕ್ ಸಮಸ್ಯೆ - ಬೆಣ್ಣೆಯಿಂದ ಕೂದಲೆಳೆದಂತೆ!

2014-07-16T12:28:00.000+05:30

ಇರಾಕ್ ಅಜಿತ್ ಗೋವೆಲ್ ಕಾರ್ಯತಂತ್ರ ಯಶಸ್ವೀ ನರ್ಸ್ ಗಳ ಮುಕ್ತಿಯಲ್ಲಿ ನಮೋ ಜಾದೂ ಎಂಬ ದೊಡ್ಡ ಅಕ್ಷರಗಳ ಹೊಸದಿಗಂತವನ್ನು ನೋಡಿದ ತಕ್ಷಣ ಇಡೀ ವರದಿಯನ್ನು ಪೂರ್ಣವಾಗಿ ಓದಿದೆ. ದ.ಹಿಂದೂ ಆಂಗ್ಲ ಪತ್ರಿಕೆಯ ವರದಿಯನ್ನಾಧರಿಸಿದ ವರದಿಯಾಗಿತ್ತು.

ಇರಾಕ್ ಬಂಡುಕೋರರು ಅಲ್ಲಿನ ಸರಕಾರದ ವಿರುದ್ಧ ಬಂಡೆದ್ದು ಸರಿಸುಮಾರು ಮೂರು ಪ್ರಾಂತ್ಯಗಳನ್ನು ವಶಕ್ಕೆ ಪಡೆಯುವ ಜತೆಗೆ ಭಾರತೀಯ ಮೂಲದ 46 ನರ್ಸ್ ಗಳನ್ನು ಒತ್ತೆಯಾಳುಗಳಾಗಿ ಇಟ್ಟುಕೊಂಡಿದ್ದಾರೆ ಎಂಬ ವರದಿ ಇತ್ತು. ಜತೆಗೆ ಸೆರೆ ಸಿಕ್ಕ ಇರಾಕ್ ಸರಕಾರದ ಸೈನಿಕರನ್ನು ಸಾವಿರಾರು ಸಂಖ್ಯೆಯಲ್ಲಿ ಮಲಗಿಸಿ ಒಂದು ಭಾಗದಿಂದ ಇನ್ನೊಂದು ತುದಿಯತನಕ ಗುಂಡು ಹಾರಿಸಿ ಕೊಂದು ಹಾಕಿದ ಹೃದಯ ವಿದ್ರಾವಕ ದೃಶ್ಯಗಳು ಮಾಧ್ಯಮಗಳಲ್ಲಿ ಎಂತಹ ಕಠಿಣ ಹೃದಯಿಯನ್ನಾದರೂ ಮನ ಕರಗುವಂತೆ ಮಾಡಿತು.

ನಮ್ಮ ದೇಶದ 46 ದಾದಿಯರನ್ನು ಒತ್ತೆಯಾಳುಗಳನ್ನಾಗಿ ಇಟ್ಟು ಇತ್ತ ಭಾರತ ಅತ್ತ ಇರಾಕ್ ಸರಕಾರದ ಸಾಮರ್ಥ್ಯವನ್ನು ಅಳೆಯುತ್ತಾ ತಮ್ಮ ಬೇಳೆ ಬೇಯಿಸಿಕೊಳ್ಳಲು ರಕ್ತಪಿಪಾಸು ಬಂಡುಕೋರರು ಹವಣಿಸುತ್ತಿರುವಾಗಲೇ ನಮ್ಮ ಕೇಂದ್ರ ಸರಕಾರ -ನಿರಂತರವಾಗಿ ಇರಾಕ್ ಸರಕಾರದ ಸಂಪರ್ಕದಲ್ಲಿದ್ದೇವೆ, ದಾದಿಯರನ್ನು ಯಾವುದೇ ತೊಂದರೆ ಇಲ್ಲದೆ ಕರಕೊಂಡು ಬರುತ್ತೇವೆ ಎಂದು ವಿದೇಶಾಂಗ ಸಚಿವಾಲಯ ಆಗಾಗ ಭರವಸೆ ಕೊಡುತ್ತಲೇ ಇತ್ತು. ನಮ್ಮ ಯುದ್ಧ ನೌಕೆಯೊಂದು ಇರಾಕಿನ ಕಡೆ ಹೊರಟಿದೆ ಎಂಬ ವರದಿಯೂ ಬಂದಿತ್ತು. ಈ ಮಧ್ಯೆ ನಮ್ಮ ದಾದಿಯರ ಕಥೆ ಏನಾಗುತ್ತಿದೆ ಎಂದು ಯಾರಿಗೂ ತಿಳಿಯುತ್ತಿರಲಿಲ್ಲ.

ಇದ್ದಕಿದ್ದಂತೆ ದೃಷ್ಯಮಾಧ್ಯಮಗಳಲ್ಲಿ ಬ್ರೇಕಿಂಗ್ ನ್ಯೂಸ್ ಬರತೊಡಗಿತು. 46 ಜನ ದಾದಿಯರನ್ನು ಸುರಕ್ಷಿತವಾಗಿ ಕೇರಳಕ್ಕೆ ಕರೆತರಲಾಗುತ್ತಿದೆ, ಸ್ವತ: ಕೇರಳದ ಮುಖ್ಯ ಮಂತ್ರಿಗಳೇ ವಿಮಾನ ನಿಲ್ದಾಣದಲ್ಲಿದ್ದು ಅವರನ್ನು ಸ್ವಾಗತಿಸಿದರು. ಅರೆ ರಕ್ತಪಿಪಾಸುಗಳ ಬಂಧನದಲ್ಲಿದ್ದ 46 ಜನ ನರ್ಸ್ ಗಳನ್ನು ಹೇಗೆ ಕರೆತರಲಾಯಿತು ಎಂಬ ವಿವರ ಹೊಸದಿಗಂತ ಬಿಟ್ಟು ಬೇರಾವುದೇ ಪತ್ರಿಕೆಗಳಲ್ಲಿ ಬಂದಿರಲಿಲ್ಲ. ಮಾಧ್ಯಮಗಳು ಸಂದರ್ಶಿಸಿದಾಗ ನಮ್ಮನ್ನು ಚೆನ್ನಾಗಿ ನೋಡಿಕೊಂಡರು, ಚಹಾ ಬಿಸ್ಕತ್ತುಗಳನ್ನು ಕೊಟ್ಟು , ಜೀವ ಭಯವಿದ್ದರೂ ಸಹ ನಮ್ಮನ್ನು ಗೌರವಪೂರ್ವಕ ನೋಡಿಕೊಂಡಿದ್ದರು ಎಂದು ಒಬ್ಬರು ಹೇಳಿದರೆ, ಇನ್ನೊಬ್ಬರು ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಇರಾಕಿನ ಭಯೋತ್ಪಾದಕರನ್ನು ಭಯೋತ್ಪಾದಕರೆಂದು ಕರೆಯುವುದು ತಪ್ಪು ಅವರು ಅಲ್ಲಿನ ಸ್ವಾತಂತ್ರ್ಯ ಹೋರಾಟಗಾರರು ಎಂದು ಹೇಳಿರುವುದನ್ನು ನೋಡಿ, ಭಾರತ ಸರಕಾರದ ಕುರಿತು ಯಾರೊಬ್ಬರೂ ಒಂದೂ ಒಳ್ಳೆಯ ಮಾತನ್ನಾಡದಿರುವುದು ಸೋಜಿಗವನ್ನು ಉಂಟು ಮಾಡಿತು ಮತ್ತು ಇರಾಕಿನ ವ್ಯವಸ್ಥೆ ಏನಾಗುತ್ತಿದೆ ಎಂಬುದೇ ತಿಳಿಯದಾಗಿತ್ತು.

ಇದರ ಹಿಂದೆ ನರೇಂದ್ರ ಮೋದಿಯವರ ಚಾಣಕ್ಯತನ ಕೆಲಸ ಮಾಡಿರುವುದು ಮತ್ತು ಅಜಿತ್ ಗೋವೆಲ್ ರಂತಹ ಸಮರ್ಥ ಅಧಿಕಾರಿ ಅಲ್ಲಿನ ಅಪಾಯಕಾರಿ ಪರಿಸ್ಥಿತಿಯಲ್ಲಿಯೂ ಸಹ ನಮ್ಮ ದೇಶದ ಸೈನಿಕ ಕಮಾಂಡೋಗಳನ್ನು ಬಂಡುಕೋರರ ವೇಷದಲ್ಲಿ ಕಳುಹಿಸಿ ಸಂಧಾನಕಾರರಿಂದ ಸಂದೇಶ ಕಳುಹಿಸಿ ದಾದಿಯರ ಬಿಡುಗಡೆಗೆ ಪ್ರಯತ್ನಿಸಿ ಜಯಶೀಲರಾಗಿ ಬೆಣ್ಣೆಯಿಂದ ಕೂದಲನ್ನು ಎಳೆದಂತೆ ಸಲೀಸಾಗಿ ಅವರನ್ನು ಕರೆತರುವಲ್ಲಿ ಯಶಸ್ವಿಯಾದುದು ನಿಜಕ್ಕೂ ಪ್ರಶಂಸನೀಯ ಕಾರ್ಯವೆ.

ಹಿಂದೆ ಶ್ರೀ ವಾಜಪೇಯಿಯವರ ಎನ್.ಡಿ.ಎ. ಸರಕಾರವಿದ್ದಾಗ ಕಂದಾಹಾರ್ ವಿಮಾನ ಅಪಹರಣ ಮಾಡಿದ ಭಯೋತ್ಪಾದಕರ ಭಯಾನಕ ಕಥೆ ನಮಗೆ ತಿಳಿದೇ ಇದೆ. ವಿಮಾನದಲ್ಲಿ 150 ಕ್ಕಿಂತಲೂ ಹೆಚ್ಚು ಭಾರತೀಯರಿದ್ದರು. ಆದಿನ ಮಾನ್ಯ ವಾಜಪೇಯಿಯವರು ಭಯೋತ್ಪಾದಕರ ಆಟ ನಮ್ಮಲ್ಲಿ ನಡೆಯಲು ಬಿಡುವುದಿಲ್ಲ ಎಂಬ ಗಂಭೀರ ಎಚ್ಚರಿಕೆ ರವಾನಿಸಿದ್ದರು.

ಈ ಒಂದು ಹೇಳಿಕೆಯಿಂದ ಕಂಗೆಟ್ಟ ವಿರೋಧ ಪಕ್ಷಗಳು ಕೆಲವು ಮಾಧ್ಯಮಗಳ ಸಹಕಾರದಿಂದ ಇಡೀ ದೇಶದಲ್ಲಿ ವಾಜಪೇಯಿ ಯವರ ಮೇಲೆ ಮುಗಿಬಿದ್ದು ಕ್ಷಣಕ್ಷಣವೂ ಟೀಕಿಸಿದರ ಪರಿಣಾಮವಾಗಿ ಭಯೋತ್ಪಾದಕರ ಕೃತ್ಯಗಳಿಗಿಂತಲೂ ಹೆಚ್ಚಾಗಿ ವಿಮಾನದಲ್ಲಿದ್ದವರ ರಕ್ಷಣೆಗೆ ಒಟ್ಟು ಕೊಡುವಂತೆ ಸರಕಾರದ ಮೇಲೆ ಒತ್ತಡ ಹೇರಲಾಯಿತು. ವಿಮಾನದಲ್ಲಿದ್ದವರ ಸಂಬಂಧಿಕರನ್ನು ಒಟ್ಟುಗೂಡಿಸಿ ಶ್ರೀ ವಾಜಪೇಯಿಯವರ ಮನೆಯ ಮುಂದೆ ಸತ್ಯಾಗ್ರಹ ಮಾಡಿಸಿ ಭಯೋತ್ಪಾದಕರನ್ನು ಬಿಡಿಸಲು ಮಾಡಿದ ಒತ್ತಡ ತಂತ್ರ ಎಷ್ಟಿತ್ತೆಂದರೆ ಭಯೋತ್ಪಾದಕರನ್ನು ಬಿಡದೆ ಬೇರೆ ದಾರಿಯೇ ಇಲ್ಲದಂತೆ ಮಾಡಿದ ವಿಚಾರ ಎಲ್ಲರಿಗೂ ತಿಳಿದೇ ಇದೆ.

ಭಾರತೀಯರ ರಕ್ಷಣೆಗಾಗಿ ಭಯೋತ್ಪಾದಕರನ್ನು ಬಿಡುಗಡೆ ಮಾಡಿದ್ದು ಮಾನ್ಯ ವಾಜಪೇಯಿಯವರ ರಾಜಕೀಯ ಜೀವನದಲ್ಲಿ ಬಹುದೊಡ್ಡ ಯಾತನಾಮಯ ದಿನಗಳಾಗಿದ್ದವು. ಮುಂದಿನ ಚುನಾವಣೆಯಲ್ಲಿ ವಿರೋಧ ಪಕ್ಷಗಳು ಇದನ್ನೇ ಚುನಾವಣಾ ವಿಷಯವನ್ನಾಗಿಸಿ ವಾಜಪೇಯಿಯವರನ್ನು ಅಪರಾಧಿ ಸ್ಥಾನದಲ್ಲಿ ನಿಲ್ಲಿಸಿ ಚುನಾವಣೆ ಗೆದ್ದಿರುವುದು ಈಗ ಇತಿಹಾಸವಾಗಿದೆ.

ಆದರೆ ತಣ್ಣಗೆ ನಿಂತ ಶ್ರೀ ನರೇಂದ್ರ ಮೋದಿಯವರ ಈ ವ್ಯೂಹಾತ್ಮಕ ಕಾರ್ಯಕ್ಕೆ ಯಾರು ಕೂಡಾ ಒಂದು ಒಳ್ಳೆಯ ಮಾತುಗಳನ್ನಾಡದಿರುವುದು ಖೇದಕರ ಸಂಗತಿ. ಮಾಧ್ಯಮಗಳು ಕೂಡಾ ಕೇಂದ್ರ ಸರಕಾರ ದಾದಿಯರ ಒಂದು ಕೂದಲು ಸಹ ಕೊಂಕದೆ ಸುಖಾಂತ್ಯವಾಗಿ ಕರೆತಂದಿರುವುದು ಏನು ಮಹಾ ಸಾಧನೆ ಎಂಬಂತೆ ನಿರ್ಲಕ್ಷ್ಯ ತೋರಿರುವುದು ನಮ್ಮ ದೇಶದ ವೈಚಾರಿಕ ದುರಂತವೇ ಸರಿ.

ಶ್ರೀ ನರೇಂದ್ರ ಮೋದಿಯವರ ಭದ್ರತಾ ಸಲಹೆಗಾರರಾದ ಅಜಿತ್ ಗೋವೆಲ್ ಮತ್ತು ನಮ್ಮ ದೇಶದ ಸೇನೆಯ ಕಮಾಂಡೋಗಳು ಎಂತಹಾ ಅದ್ಭುತ ಕೆಲಸ ಮಾಡಿದ್ದಾರೆಂದರೆ ಸ್ವಲ್ಪಹೆಚ್ಚು ಕಮ್ಮಿಯಾದರೂ ಇಡೀ ವ್ಯವಸ್ಥೆಯೇ ಯಮರಾಜನ ಮನೆಯಾಗುತ್ತಿತ್ತು. ಇಷ್ಟೊಂದು ಸಾಹಸ ಮಾಡಿದ ಕೇಂದ್ರ ಸರಕಾರಕ್ಕೆ ಭದ್ರತಾ ಸಲಹೆಗಾರರಿಗೆ ಮತ್ತು ನಮ್ಮ ರಾಷ್ಟ್ರಭಕ್ತ ಸೇನೆಯ ಕಮಾಂಡೋ ಗಳಿಗೆ ನಮ್ಮ ಕೃತಜ್ಞತೆಯನ್ನು ಹೇಳದೆ ಹೋದರೆ ನಮ್ಮ ಮುಂದಿನ ಜನಾಂಗ ನಮ್ಮನ್ನು ಖಂಡಿತಾ ಕ್ಷಮಿಸಲಾರದು.

ನಮೋ ಭಾರತ ಮಾತಾ ಕಿ ಜೈ

ಧನಂಜಯ ವಾಗ್ಲೆ

ಪುತ್ತೂರು

ಬಜೆಟ್ ನ ಸಮಯಕ್ಕೆ ಇನ್ನೊಂದು ನೆನಪಿನೋಲೆ

2014-06-21T12:03:00.002+05:30

Read the article in English Here.

ರಿಂದ

ಕೆ. ಧನಂಜಯ ವಾಗ್ಲೆ

ಶಿವಕೃಪಾ , 50/12

ಎ .ಪಿ.ಯಂ.ಸಿ. ರೋಡ್

ಪುತ್ತೂರು. 574201

ಮೊಬೈಲ್: 9741344877

ರಿಗೆ

ಗೌರವಾನ್ವಿತ ಶ್ರೀ.ಡಿ.ವಿ.ಸದಾನಂದ ಗೌಡರು

ಭಾರತ ಸರಕಾರದ ರೈಲ್ವೆ ಸಚಿವರು

ರೈಲ್ವೆ ಸಚಿವಾಲಯ ಭಾರತ ಸರಕಾರ

ನವದೆಹಲಿ:110001

ವಿಷಯ :

1) ಮಂಗಳೂರು ಹಾಸನ ರೈಲ್ವೆ ಮತ್ತು ಹೊಸ ರೈಲು ಮಾರ್ಗದ ಜೋಡಣೆಯೊಂದಿಗೆ ನೆರೆರಾಜ್ಯಗಳ ಜೋಡಣೆ

2) ಪೂರಕವಾಗಿ ಪ್ರವಾಸೋದ್ಯಮದ ಬೆಳವಣಿಗೆ

3) ಶೈಕ್ಷಣಿಕ ಅಭಿವೃದ್ಧಿಗೆ ಪೂರಕ

4) ತುರ್ತು ಸಂದರ್ಭದಲ್ಲ್ಲಿ ರಕ್ಷಣೆಗಾಗಿ ನೌಕಾಪಡೆಯ ಬಳೆಕೆಗಾಗಿ

5) ಆರ್ಥಿಕತೆಯ ದೂರದೃಷ್ಟಿಯಿಂದ

6) ಧಾರ್ಮಿಕ ಕೇಂದ್ರಗಳ ಜೋಡಣೆ

7) ಹತ್ತಿರದಿಂದ ಮತ್ತು ಲಾಭದಾಯಕ ಬಂದರುಗಳ ಜೋಡಣೆ

ವಿಷಯ 1ರಂತೆ ಮಂಗಳೂರು ಹಾಸನ ಮೈಸೂರು ಬೆಂಗಳೂರು ರೈಲು ಸುಮಾರು 446 ಕಿಲೋಮೀಟರ್ ದೂರದಿಂದ ಜೋಡಣೆಯಾಗಿದ್ದು ಮಂಗಳೂರು ಬೆಂಗಳೂರು ಪ್ರಯಾಣ ಸುಮಾರು 13 ಗಂಟೆಗಳಾಗಿವೆ. ಪ್ರಯಾಣಿಕರ ಬೇಡಿಕೆಯಂತೆ ಪ್ರಯಾಣಿಕ ರೈಲುಗಾಡಿಗಳಲ್ಲಿ ಪ್ರಸಕ್ತ ಮಾರ್ಗದಲ್ಲಿ ಚಲಿಸಲು ಸಾಧ್ಯವಾಗುತ್ತಿಲ್ಲ, ಕಾರಣ ಮಂಗಳೂರು ಬೆಂಗಳೂರಿಗೆ ಮತ್ತು ಇತರ ರಾಜ್ಯಗಳ ಬಂದರುಗಳಿಗೆ ಸರಕು ಸಾಗಣೆಯ ರೈಲು ಮತ್ತು ಪ್ರಯಾಣಿಕ ರೈಲುಗಳನ್ನು ಓಡಿಸುವರೆ ಹಳಿಗಳ ಕೊರತೆ. ತಮಗೆ ಬಂದ ಮನವಿಗಳಂತೆ ಮಂಗಳೂರು ಹಾಸನ ಬೆಂಗಳೂರು ದ್ವಿಪಥಗೊಳಿಸುವಂತೆ ಒತ್ತಾಯಿಸಲಾಗಿದೆ ಎಂದು ಮಾಹಿತಿ ಇದೆ. ಆದರೆ ಪ್ರಸಕ್ತ ಮಾರ್ಗ ಘಾಟಿ ಮಾರ್ಗವಾಗಿದ್ದು ಸುಮಾರು 57 ಸುರಂಗ ಮಾರ್ಗಗಳ ಹತ್ತಾರು ಮೇಲ್ ಸೇತುವೆಗಳ ಮುಖಾಂತರ ಓಡುತ್ತಿರುವುದರಿಂದ ದ್ವಿಪಥಗೊಳಿಸಲು ಮತ್ತು ಸುರಂಗ ಮಾರ್ಗಗಳನ್ನು ಅಗಲೀಕರಣಗೊಳಿಸಲು 5 ವರ್ಷಗಳ ದೀರ್ಘಾವಧಿ ರಸ್ತೆಯನ್ನು ಮುಚ್ಚಬೇಕಾಗಬಹುದು ಮತ್ತು ದ್ವಿಪಥಗೊಳಿಸಲು ಆರ್ಥಿಕವಾಗಿ ಬಹಳಷ್ಟು ಹಣ ವೆಚ್ಚವಾಗಬಹುದೆಂದು ನನ್ನ ಅಭಿಪ್ರಾಯವಾಗಿದೆ ಮತ್ತು ಸಾರ್ವಜನಿಕರ ಪರವಾಗಿ ನಾನು ಈ ಹಿಂದೆ ಮಾಡಿರುವ ಮನವಿಯಂತೆ ಕಾಂಞಗಾಡ್ ಕುಲ್ಕುಂದ ಸುಬ್ರಹ್ಮಣ್ಯ ರಸ್ತೆಗೆ ಕೇರಳ ಗಡಿಯ ತನಕ ಸರ್ವೆಯಾಗಿದ್ದು ಅದಕ್ಕೆ ಪೂರಕ ಮತ್ತು ಅತೀ ಕಡಿಮೆ ವೆಚ್ಚದಲ್ಲಿ ಪುತ್ತೂರು,ಸುಳ್ಯ,ಬಡ್ಡಡ್ಕ,ಎತ್ತರಡ್ಕ,ಭಾಗಮಂಡಲ,ಮಡಿಕೇರಿ ಮತ್ತು ಕುಶಾಲನಗರ ಜೋಡಣೆಯಾದರೆ ಹೆಚ್ಚು ಜನವಸತಿಯಾಗಲೀ, ಹೆಚ್ಚು ಅರಣ್ಯವಾಗಲೀ ಕೇವಲ 2 ಕಿ.ಮೀ. ಸುರಂಗ ಮಾರ್ಗ ಮಾಡಿದರೆ ಭಾಗಮಂಡಲಕ್ಕೆ ತಲುಪುತ್ತದೆ. ಅಲ್ಲಿಂದ ಕುಶಾಲನಗರ ತನಕ ಸಮತಟ್ಟು ಪ್ರದೇಶವಾಗಿರುವುದರಿಂದ ಅತೀ ಕಡಿಮೆ ವೆಚ್ಚದಲ್ಲಿ ಸದರಿ ರಸ್ತೆಯನ್ನು ಕಲ್ಪಿಸಲು ಸಾಧ್ಯವಾಗುವುದೆಂದು ಅಂದಾಜಿಸಲಾಗಿದೆ.

ವಿಷಯ 2ರಂತೆ ಸದರಿ ರಸ್ತೆಯಾದರೆ, ಕೊಡಗು ಜಿಲ್ಲೆ ರಾಜ್ಯದಲ್ಲಿ ಅತೀ ಹೆಚ್ಚು ಪ್ರವಾಸೋದ್ಯಮಕ್ಕೆ ಪೂರಕವಾಗಿದೆ ಹಾಗೂ ಕಾಫಿ ಮತ್ತು ಉಪ ಬೆಳೆಗಳ ಸಾಗಾಣಿಕೆಗೆ ಮತ್ತು ಭಾಗಮಂಡಲ ತಲಕಾವೇರಿ ಮುಂತಾಗಿ ಪ್ರವಾಸೋದ್ಯಕ್ಕೆ ಅನುಕೂಲಕರವಾಗುವುದರ ಜೊತೆಗೆ ದ.ಕ.ಜಿಲ್ಲೆಯಲ್ಲಿ ಸಹ ಮಂಗಳೂರಿನಿಂದ ಕಾರವಾರ ತನಕ ಕರಾವಳಿ ಪ್ರದೇಶವಿದ್ದು ಹೆಚ್ಚು ಪ್ರವಾಸೋದ್ಯಮಕ್ಕೆ ಪರಿಣಾಮಕಾರಿಯಾಗಿ ಬಳಸಬಹುದಾಗಿದೆ. ಇದರಿಂದಲೂ, ಗೋವ ತನಕ ಪ್ರವಾಸೋದ್ಯಮ ಹೆಚ್ಚು ಪರಿಣಾಮಕಾರಿಯಾಗಲಿದೆ. ಇದರಿಂದ ಸರಕಾರಕ್ಕೆ ಹೆಚ್ಚಿನ ಆದಾಯಮೂಲ ಹುಡುಕಬಹುದಾಗಿದೆ.

ವಿಷಯ 3 ರಂತೆ ಶೈಕ್ಷಣಿಕವಾಗಿ ಮೈಸೂರು ಕೊಡಗು ಸುಳ್ಯ ಪುತ್ತೂರು ಮಂಗಳೂರು ಉಡುಪಿ ಮಣಿಪಾಲಗಳಲ್ಲಿ ನೂರಾರು ಶಿಕ್ಷಣ ಸಂಸ್ಥೆಗಳಿದ್ದು ಲಕ್ಷಾಂತರ ಜನರು ಬೇರೆ ಬೇರೆ ದೇಶಗಳ ವಿದ್ಯಾರ್ಥಿಗಳು ವಿದ್ಯಾರ್ಹತೆಗಾಗಿ ಬರುತ್ತಿರುವುದರಿಂದ ಈ ಪ್ರ- ಸ್ತಾಪಿತ ರೈಲ್ವೆಯ ರಸ್ತೆಯಿಂದ ವಿದ್ಯಾಕ್ಷೇತ್ರಕ್ಕೆ ಬಹಳಷ್ಟು ದೊಡ್ಡ ಕೊಡುಗೆಯನ್ನು ಕೊಡಬಹುದಾಗಿದೆ.

ವಿಷಯ 4 ರಂತೆ ರಾಷ್ಟ್ರರಕ್ಷಣೆಯ ದೃಷ್ಟಿಯಿಂದ ತುರ್ತು ಪರಿಸ್ಥಿತಿಯಲ್ಲಿ ರಕ್ಷಣಾ ಕ್ಷೇತ್ರಕ್ಕೆ ಕೂಡಾ ಸದರಿ ರಸ್ತೆಯನ್ನು ಬಳಸಬಹುದಾಗಿದ್ದು ಕಾರವಾರ ನೌಕಾ ನೆಲೆಯಿಂದ ಬೆಂಗಳೂರು ಚೈನೈ ವಿಶಾಖಪಟ್ಟಣ ಕೊಚ್ಚಿ ಮುಂತಾದ ಬಂದರುಗಳ ಸದುಪಯೋಗವನ್ನು ಬಳಸಬಹುದಾಗಿದೆ.

ವಿಷಯ 5 ರಂತೆ ಆರ್ಥಿಕವಾಗಿ ಕೂಡಾ ಪ್ರಸ್ತಾಪಿತ ರಸ್ತೆ ಮತ್ತು ಮಂಗಳೂರು ಹಾಸನ ಬೆಂಗಳೂರು ರಸ್ತೆಯನ್ನು ಸಂಪೂರ್ಣವಾಗಿ ಸರಕು ಸಾಗಣೆಗಾಗಿ ಬಳಸಿಕೊಂಡರೆ ಈಗಿನ ದುಪ್ಪಟ್ಟು ಲಾಭಗಳಿಸಬಹುದಾಗಿದೆ. ಪ್ರಸ್ತಾಪಿತ ರೈಲ್ವೆ ರಸ್ತೆಯಲ್ಲಿ ಸಹ 5 ರಿಂದ 6 ಪ್ರಯಾಣಿಕ ರೈಲುಗಳು ಓಡಾಡಿದರೆ ಈಗಿನ ದುಪ್ಪಟ್ಟು ಜನರಿಗೆ ಆರ್ಥಿಕವಾಗಿ ಲಾಭ ಆಗುವುದರ ಜತೆಗೆ ಉಳಿದ ಸಂದರ್ಭಗಳಲ್ಲಿ 6-10 ಸಾಗಾಣಿಕ ರೈಲುಗಳನ್ನು ಓಡಿಸಿ ರೈಲ್ವೆಗೆ ಹೆಚ್ಚಿನ ಲಾಭ ಬರುವಂತೆ ಮಾಡಬಹುದಾಗಿದೆ.

ವಿಷಯ 6 ರಂತೆ ಕೊಡಗಿನ ಇಗ್ಗುತಪ್ಪ, ಭಗಂಡೇಶ್ವರ, ತಲಕಾವೇರಿ, ಸುಳ್ಯ ಚೆನ್ನಕೇಶವ, ಸುಬ್ರಹ್ಮಣ್ಯ, ಪುತ್ತೂರು ಮಹಾಲಿಂಗೇಶ್ವರ, ಧರ್ಮಸ್ಥಳ, ವೇಣೂರು, ಮಂಗಳೂರಿನ ಮಂಗಳಾದೇವಿ , ಗೋಕರ್ಣನಾಥೇಶ್ವರ, ವೆಂಕಟರಮಣ ದೇವಸ್ಥಾನ, ಬಪ್ಪನಾಡು ,ಕಟೀಲು, ಹೊರನಾಡು, ಉಡುಪಿ, ಪಿಲಿಕುಳ ನಿಸರ್ಗಧಾಮ, ಆನೆಗುಡ್ಡೆ ಗಣಪತಿ ದೇವಸ್ಥಾನ , ಮುರುಡೇಶ್ವರ ,ಗೋಕರ್ಣ ,ಕೊಲ್ಲೂರು ಮುಂತಾದ ಹತ್ತಾರು ಧಾರ್ಮಿಕ ಪುಣ್ಯ ಸ್ಥಳಗಳ ಜೋಡಣೆಯೊಂದಿಗೆ ಕ್ಷೇತ್ರದ ಅಭಿವೃದ್ಧಿಗೂ ಪೂರಕವಾಗುವುದು. ಜತೆಗೆ ಮುಸ್ಲಿಂ ಧರ್ಮದ ಹಾಗೂ ಕ್ರೈಸ್ತ ಧರ್ಮೀಯರ ಹತ್ತಾರು ಪ್ರಾರ್ಥನಾ ಸ್ಥಳಗಳು ಸದರಿ ರಸ್ತೆಯಿಂದ ಅಭಿವೃದ್ಧಿಗೊಳ್ಳುವುದಲ್ಲದೆ ಭಕ್ತರಿಗೂ ಅತ್ಯಂತ ಅನುಕೂಲವಾಗುತ್ತದೆ.

ವಿಷಯ 7 ರಂತೆ ರೈಲ್ವೆ ಸಚಿವರು ಪ್ರಸ್ಥಾಪಿಸಿದಂತೆ ಮಂಗಳೂರು ಚೆನ್ನೈ ಕಾರಿಡಾರು ರಸ್ತೆಯನ್ನು ಇನ್ನೂ ವಿಸ್ತರಿಸಿ ಮಂಗಳೂರು – ಚನ್ನೈ, ಮಂಗಳೂರು – ಕೊಚ್ಚಿ, ಮಂಗಳೂರು – ವಿಶಾಖ ಪಟ್ಟಣ, ಮಂಗಳೂರು – ಮುಂಬೈ ಗಳಿಗೆ ಹತ್ತಾರು ತಾಸುಗಳ ಅವಧಿ ಕಡಿಮೆಯಾಗಿ ರೈಲ್ವೆ ಸಚಿವಾಲಯಕ್ಕೆ ಅತೀ ಹೆಚ್ಚಿನ ಲಾಭಗಳಿಸಬಹುದಾಗಿದೆ. ಅತೀ ಹತ್ತಿರದಲ್ಲಿ ಬರುವಂತೆ ಅಂದಾಜಿಸಿದ ಒಂದು ನಕ್ಷೆಯನ್ನು ಲಗತ್ತಿಸಿರುತ್ತೇನೆ. ಕೊನೆಯದಾಗಿ ಪ್ರಸ್ತಾಪಿತ ರೈಲು ರಸ್ತೆ ತಮ್ಮ ಅವಧಿಯಲ್ಲಿ ಸಾಧ್ಯವಾದರೆ, ಕೊಂಕಣ ರೈಲ್ವೆಯನ್ನು ನೆನಪಿಸಿದಾಗ ಹಿಂದಿನ ರೈಲ್ವೆ ಸಚಿವರಾಗಿದ್ದ ಮಾನ್ಯ ಜಾರ್ಜ್ ಫೆರ್ನಾಂಡಿಸ್ ರ ಹೆಸರು ನೆನಪಿಸಿಕೊಳ್ಳುವಂತೆ ತಾವು ಸದರಿ ರಸ್ತೆಗೆ ಮುಂದಿನ ಬಜೆಟ್ ನಲ್ಲಿ ಉಳಿದ ಭಾಗಗಳ ರಸ್ತೆಗೆ ಸರ್ವೇ ಮಾಡಲು ಪ್ರಸ್ತಾಪಿಸಿದರೆ ಮುಂದಿನ ತಮ್ಮ ಅವಧಿಯಲ್ಲಿ ಹುಟ್ಟೂರು ಬೆಳೆದೂರು ಸಂಬಂಧ ಬೆಳೆಸಿದ ಊರುಗಳಿಗೆ ರೈಲ್ವೆ ರಸ್ತೆ ನೀಡುವ ಮುಖಾಂತರ ತಮ್ಮ ಹೆಸರು ನೆನಪಿಸಿಕೊಳ್ಳಲು ಅನುವು ಮಾಡಿಕೊಟ್ಟಂತಾಗುತ್ತದೆ. ಈ ದೀರ್ಘವಾದ ಮನವಿಯನ್ನು ಸ್ವೀಕರಿಸಿ ಕಾರ್ಯ ಪ್ರವೃತರಾಗುವಂತೆ ಕೊಡಗು ಸುಳ್ಯ ಪುತ್ತೂರು ಜನತೆಯ ಪರವಾಗಿ ಪ್ರಾರ್ಥಿಸಿಕೊಳ್ಳುತ್ತೇನೆ.

ಇತಿ

ತಮ್ಮ ವಿಶ್ವಾಸಿ

ದಿನಾಂಕ : 16/06/2014

ಸ್ಥಳ : ಪುತ್ತೂರು

ಧನಂಜಯ ವಾಗ್ಲೆ

ಪುತ್ತೂರು

ಫಾರೂಕ್,ಓಮರ್,ಮಪ್ತಿ,ಆಜಾದರಿಂದ ಕಾಶ್ಮೀರದ ವಿಮುಕ್ತಿ

2014-06-09T09:55:00.001+05:30

ಹಿಮಾಲಯ ಭಾರತದ ಆತ್ಮವಿದ್ದಂತೆ.. ಕಾಶ್ಮೀರದ ಅತ್ಯಂತ ಎತ್ತರದ ಪರ್ವತ ‘ಕೈಲಾಸ’ ಸಾಕ್ಷಾತ್ ಶಿವನ ಆವಾಸ ಸ್ಥಳ,ಗಂಗೆಯ ಉಗಮಸ್ಥಾನ. ಭಾರತೀಯರ ನಂಬಿಕೆಯ ಪೂಜ್ಯ ಭಾವ ಕಾಶ್ಮೀರದಲ್ಲಿದೆ. ನಮಗೆ ಸ್ವಾತಂತ್ರ್ಯ ಸಿಕ್ಕಿದಾಗ ಪೂಜ್ಯ ಗುರೂಜಿ ಗೊಲ್ವಲ್ಕರ್ ಮತ್ತು ಮಾನ್ಯ ಸರದಾರ್ ವಲ್ಲಭಾಯಿಪಟೇಲರ ಪ್ರಯತ್ನದಿಂದಾಗಿ ರಾಜಾ ಹರಿಸಿಂಗರು ಕಾಶ್ಮೀರವನ್ನು ಭಾರತದ ಒಕ್ಕೂಟ ವ್ಯವಸ್ಥೆಗೆ ಜೋಡಿಸಿದರು. ದುರಾದೃಷ್ಟವಶಾತ್ ನೆಹರೂರವರ ಆತ್ಮೀಯ ಮಿತ್ರ ಶೇಕ್ ಅಬ್ದುಲ್ಲಾರ ಜೊತೆ ರಾಜಕೀಯ ಕಾರಣಗಳಿಗಾಗಿ ಸಂವಿಧಾನದಲ್ಲಿ ಕಾಶ್ಮೀರಕ್ಕೆ ವಿಶೇಷ ಸ್ಥಾನ ಕೊಡುವಂತಹ ೩೭೦ನೇ ವಿಧಿಯನ್ನು ಸಂವಿಧಾನದಲ್ಲಿ ಸೇರಿಸಿರುವುದರ ಪರಿಣಾಮವಾಗಿ ಭಾರತದ ಖಜಾನೆಯಿಂದ ಅವರು ಕೇಳಿದಂತೆ ಹಣವನ್ನು ಹರಿಸಲಾಯಿತು. ಆದರೆ ಅಲ್ಲಿ ಆರ್ಥಿಕಾಭಿವೃದ್ಧಿ ಆಗಲೇ ಇಲ್ಲ. ಕ್ರಮೇಣ ಶೇಕ್ ಅಬ್ದುಲ್ಲರಂತಹ ನಾಯಕರೂ ಸಹ ಪ್ರತ್ಯೇಕತಾ ವಾದವನ್ನು ಕಾಲಾಂತರದಲ್ಲಿ ಹರಿಯಬಿಟ್ಟ ಕಾರಣ ಶೇಕ್ ಅಬ್ದುಲ್ಲರನ್ನು ಜೈಲಿಗೆ ದೂಡಿ ರಾಷ್ಟ್ರಪತಿ ಆಡಳಿತವನ್ನು ಜಾರಿಗೊಳಿಸಿದ್ದನ್ನು ಇಲ್ಲಿ ನೆನಪಿಸಿಕೊಳ್ಳುವುದು ಉಚಿತವಾದೀತು.

ಕಾಂಗ್ರೇಸ್ಸಿನ ವಂಶಾಡಳಿತದ ಇನ್ನೊಂದು ಮುಖವನ್ನು ನಾವು ಜಮ್ಮು ಕಾಶ್ಮೀರದಲ್ಲಿ ಕಾಣಬಹುದು.ಶೇಕ್ ಅಬ್ದುಲ್ಲಾರಿಂದ ಹಿಡಿದು ಓಮರ್ ಅಬ್ದುಲ್ಲಾರವರೆಗೆ, ಪಿ.ಡಿ.ಪಿ ಯ ಮೊಹಮ್ಮದ್ ಮಫ್ತಿಯಿಂದ ಹಿಡಿದು ಗುಲಾಂ ನಬೀ ಆಜಾದರವರೆಗೆ ಎಲ್ಲರೂ ಜಮ್ಮು-ಕಾಶ್ಮೀರ ತಮ್ಮ ಸ್ವಂತ ಕುಟುಂಬದ ಆಸ್ತಿ ಮತ್ತು ವಾರೀಸು ಹಕ್ಕು ಎಂಬಂತೆ ವಾದಿಸುವುದನ್ನು ನೋಡಿದರೆ ಒಂದೇ ಸಂತತಿಯ ಆಡಳಿತ ನಡೆಯುತ್ತಾ ಬಂದಿರುವುದು ಸಹ ತಿಳಿದುಬರುತ್ತದೆ.

ಪ್ರಸ್ತುತ ದಿನಗಳಲ್ಲಿ ಕಾಶ್ಮೀರದ ಮುಖ್ಯಮಂತ್ರಿಗಳಾದ ಓಮರ್ ಅಬ್ದುಲ್ಲಾರವರು ಬಹಳ ಕೋಪಿಷ್ಟರಾಗಿ ಅಸಂಬದ್ಧವಾಗಿ ಮಾತನಾಡುತ್ತಾ ೩೭೦ನೇವಿಧಿಯನ್ನು ತೆರವುಗೊಳಿಸಬೇಕಾದರೆ ಸಂವಿಧಾನ ಕರ್ತರುಗಳು ಇರಲೇಬೇಕೆಂಬವಾದವನ್ನು ಹರಿಯಬಿಟ್ಟಿದ್ದಾರೆ. ಈ ಅಸಂಬದ್ದ ಹೇಳಿಕೆಗೆ ತಿರುಗು ಬಾಣದಂತೆ ಅವರ ತಾತ ಶೇಕ್ ಅಬ್ದುಲ್ಲಾ, ಮಾನ್ಯ ಗೌರವಾನ್ವಿತ ಬಾಬ ಸಾಹೇಬ್ ಬಿ.ಆರ್. ಅಂಬೇಡ್ಕರ್ ಹಾಗೂ ಅಂದಿನ ಪ್ರಧಾನಿಗಳಾಗಿದ್ದಂತಹ ಮಾನ್ಯ ಶ್ರೀ ನೆಹರೂರವರನ್ನು ಮತ್ತು ಇತರ ಸಂಬಂಧಪಟ್ಟ ಸದಸ್ಯರನ್ನು ಓಮರ್ ಅಬ್ದುಲ್ಲಾರವರೇ ಚರ್ಚೆಗೆ ಆಹ್ವಾನಿಸಬೇಕಾದ ಆವಶ್ಯಕತೆ ಈಗ ಅವರಿಗೆ ಜರೂರಾಗಿದೆ ಎಂಬುದನ್ನು ಭಾರತೀಯರು ಮನವರಿಕೆ ಮಾಡುವ ಅಗತ್ಯತೆ ಈಗ ಇಲ್ಲಿ ಎದ್ದು ಕಾಣುತ್ತಿದೆ.

ಒಂದು ಅಂದಾಜಿನ ಪ್ರಕಾರ ಭಾರತ ಸರ್ಕಾರ ವರ್ಷಕ್ಕೆ ಸುಮಾರು ಆರು ಸಾವಿರ ಕೋಟಿ ರುಪಾಯಿಗಳನ್ನು ಕಾಶ್ಮೀರಕ್ಕಾಗಿ ವ್ಯಯಿಸುತ್ತಿದೆ. ಬಹುಷಃ ಅದೇ ಹಣ ಭಾರತದ ಇತರ ರಾಜ್ಯಗಳಿಗೆ ಸಿಗುವುದಿದ್ದರೆ ಬಡವರೇ ಇರದ ರಾಜ್ಯಗಳನ್ನು ನಾವು ಈಗ ಕಾಣಬಹುದಿತ್ತು. ಈತನಕ ಜಮ್ಮು ಕಾಶ್ಮೀರದಲ್ಲಿ ಭಾರತ ಸರ್ಕಾರದ ಬೊಕ್ಕಸದಿಂದ ಶೇಕ್ ಅಬ್ದುಲ್ಲಾರವಂಶ ,ಹಾಗೆಯೇ ಮಫ್ತಿ ಮೆಹಬೂಬರ ವಂಶ ಆರಾಮದಾಯಕವಾಗಿ ಬೆಳೆದಿದೆ. ಈ ಕಾರಣಕ್ಕಾಗಿಯೇ ೩೭೦ನೇ ವಿಧಿಯ ಬಗ್ಗೆ ಕೇಂದ್ರ ಸರ್ಕಾರ ಪ್ರಸ್ತಾಪಿಸಿದ್ದಾಗಿನಿಂದ ಫಾರೂಕ್ ಅಬ್ದುಲ್ಲಾ ,ಮಫ್ತಿ ಮೊಹಮ್ಮದ್ ,ಗುಲಾಂ ನಬೀ ಆಜಾದ್ ರಂತಹವರೆಲ್ಲರೂ ಹೌಹಾರಿ ಬಿದ್ದಿದ್ದಾರೆ ಕಾರಣ ಇಂತಹ ಸುಯೋಗ ಭಾರತದ ಯಾವುದೇ ಇತರೇ ರಾಜ್ಯದ ಮುಖ್ಯ ಮಂತ್ರಿಗಳಿಗೆ ಸಿಗದೇ ಇರುವುದು.

ಫಾರೂಕ್ ಅಬ್ದುಲ್ಲಾರವರು ಚುನಾವಣೆಗೆ ಮುನ್ನವೇ ಮೋದಿಯವರ ಸರಕಾರ ಬಂದರೆ ಜಮ್ಮು ಕಾಶ್ಮೀರವನ್ನು ಪಾಕಿಸ್ತಾನಕ್ಕೆ ಸೇರಿಸುವ ಮಾತನ್ನಾಡಿದ್ದಾರೆ. ಜಮ್ಮು ಕಾಶ್ಮೀರ ರಾಜ್ಯವನ್ನು ಇವರ ಕುಟುಂಬಕ್ಕೆ ಉಂಬಳಿ ಸಿಕ್ಕಿದ ಹಾಗೆ ಮಾತನಾಡುವ ಇವರ ದುರಹಂಕಾರಕ್ಕೆಇಡೀ ದೇಶದಿಂದಲೇ ಪ್ರತಿಕ್ರಿಯೆಗಳು ಬರಬೇಕಾಗಿವೆ.

೩೭೦ನೇವಿಧಿಯ ಮುಖಾಂತರ ಸಿಕ್ಕಿದ ಸೌಲಭ್ಯವನ್ನು ಬಡ ಜನರಿಗೆ ತಲುಪಿಸುವ ಬದಲು ಲಕ್ಷಾಂತರ ಕಾಶ್ಮೀರಿ ಪಂಡಿತರನ್ನು ಹಿಂಸಿಸಿ ಪಲಾಯನಗೈಯ್ಯುವಂತೆ ಮಾಡಿ ಅವರೆಲ್ಲರನ್ನು ಬೀದಿಪಾಲು ಮಾಡುವ ಹೀನಾಯ ಕಾರ್ಯವನ್ನು ಕಾಶ್ಮೀರದ ಈವರೆಗಿನ ಸರಕಾರಗಳು ಯಾವುದೇ ಮುಲಾಜಿಲ್ಲದೇ ಮಾಡಿವೆ. ಹೆಚ್ಚು ಕಡಿಮೆ ಸುಮಾರು ನಾಲ್ಕು ಲಕ್ಷ ಕಾಶ್ಮೀರಿ ಪಂಡಿತರು ದೇಶದ ವಿವಿಧ ಪ್ರದೇಶಗಳಲ್ಲಿ ಹಾಗೂ ದೇಶದ ರಾಜಧಾನಿ ಎನಿಸಿಕೊಂಡಿರುವಂತಹ ನವ ದೆಹಲಿಯಲ್ಲಿಯ ಬೀದಿಬೀದಿಗಳಲ್ಲಿ ಕೂಡಾ ಕನಿಷ್ಠ ಜೀವನ ಸೌಲಭ್ಯಗಳಿಗಾಗಿ ಒದ್ದಾಡುತ್ತಿರುವ ದಯನೀಯ ಸ್ಥಿತಿಯನ್ನು ನೋಡಿದರೆ ಯಾವುದೇ ದೇಶಾಭಿಮಾನವಿರುವ ಭಾರತೀಯನಿಗೆ ನೆತ್ತರು ಕುದಿಯದೇ ಇರದು. ಕಾಶ್ಮೀರಿ ಪಂಡಿತರ ಕುರಿತು ಓಮರರಾಗಲಿ ಅಥವಾ ಈವರೆಗೆ ರಾಜ್ಯವಾಳಿದ ಇತರೇ ಯಾವುದೇ ನಾಯಕರುಗಳಾಗಲೀ ಅವರ ಸ್ಥಿತಿಯನ್ನು ಕುರಿತು ಒಂದೇ ಒಂದು ಮಾತನ್ನಾಡದಿರುವುದು ಅವರಿಗೆ ಕಾಶ್ಮೀರೀ ಪಂಡಿತರಿಗಿಂತಲೂ ಪಾಕಿಸ್ತಾನಿಯರ ಮೇಲೆ ಹೆಚ್ಚಾಗಿ ಒಲವಿರುವುದನ್ನು ಖಾತರಿ ಪಡಿಸುತ್ತದೆ.

ಕಾಶ್ಮೀರ ಕಣಿವೆಯಲ್ಲಿ ಕುಣಿದಾಡುತ್ತಿದ್ದ ಪ್ರತ್ಯೇಕತಾವಾದಿಗಳ ಅಟ್ಟಹಾಸಕ್ಕೆ ಭಾರತ ಸರಕಾರ ಓಟಿನ ಆಸೆಗಾಗಿ ದಿನೇ ದಿನೇ ನತಮಸ್ತಕವಾಗಿ ವರ್ತಿಸುತ್ತಿದೆ.ಇಂದು ಕಣಿವೆ ರಾಜ್ಯವಾಳಿದ ಅಬ್ದುಲ್ಲಾಗಳು ಎಷ್ಟು ಮುಂದುವರೆದಿದ್ದಾರೆಂದರೆ, ಕಾಶ್ಮೀರವನ್ನು ಪಾಕಿಸ್ಥಾನದೊಂದಿಗೆ ಜೋಡಿಸುವ ಮಾತನ್ನಾಡುತ್ತಿದ್ದಾರೆ .ಅದೃಷ್ಠವಶಾತ್ ಹೊಸ ಸರಕಾರ ಬಂದಿದೆ ಹಾಗೆಯೇ ೩೭೦ನೇ ವಿಧಿಯನ್ನು ರದ್ದುಗೊಳಿಸುವ ಕುರಿತು ಚರ್ಚಗೆ ಅವಕಾಶ ಮಾಡಿಕೊಟ್ಟಿದೆ. ಪ್ರಸಕ್ತ ಫಾರೂಕ್,ಓಮರ್, ಮಫ್ತಿಯವರ ಅತಿರೇಕದ ಮಾತುಗಳಿಗೆ ಅಂತ್ಯ ಹಾಡಲೇಬೇಕಾಗಿದೆ. ಕಾಂಗ್ರೆಸ್ ಮುಕ್ತ ಭಾರತವನ್ನು ಬದಲಾಯಿಸಿದ ಯುವಜನಾಂಗ ಫಾರೂಕ್ ,ಓಮರ,ಮಫ್ತಿ ಮೊಹಮ್ಮದ್ ಮುಕ್ತ ಕಾಶ್ಮೀರಕ್ಕಾಗಿ ಭಾರತೀಯರೆಲ್ಲರೂ ಒಂದುಗೂಡಿ ಈ ಒಂದು ಮಹತ್ಕಾರ್ಯಕ್ಕೆ ಮುನ್ನುಡಿ ಬರೆಯಲೇಬೇಕಾಗಿದೆ.

ಭಾರತದ ಸಮಸ್ತ ಜನತೆ ದೇಶದ ಗ್ರಾಮ ಗ್ರಾಮಗಳಲ್ಲಿ ೩೭೦ನೇವಿಧಿಯ ಕುರಿತು ಚರ್ಚಿಸಿ ಭಾರತ ಸರಕಾರಕ್ಕೆ ಒತ್ತಾಯಿಸಿ ಮನವಿ ಮಾಡುವ ಮೂಲಕ ‘ಜಮ್ಮು ಕಾಶ್ಮೀರ ಭಾರತದ ಅವಿಭಾಜ್ಯ ಅಂಗ’ ಎಂಬುವುದನ್ನು ಜಗತ್ತಿಗೆ ಸಾರಿ ಸಾರಿ ಹೇಳಬೇಕಾಗಿದೆ.

ಧನಂಜಯ ವಾಗ್ಲೆ

ಪುತ್ತೂರು

ಸಂಘ ಮತ್ತು ಜೀವನ

2014-05-17T00:11:00.001+05:30

ಸಾಮಾನ್ಯರಲ್ಲಿ ಸಾಮಾನ್ಯ ವ್ಯಕ್ತಿಯೊಬ್ಬರು ಅಸಾಮಾನ್ಯವಾಗಿ ಹೇಗೆ ಬೆಳೆಯಬಲ್ಲರು ಎಂಬುದಕ್ಕೆ ಬಹುಷ: ‘ಚಾಯ್ ವಾಲ ಶ್ರೀ ನರೇಂದ್ರ ಮೋದಿ’ಯವರನ್ನು ಹೆಸರಿಸಬಹುದೇನೋ.... ಬಡತನವಿದ್ದರೂ ವಿದ್ಯಾಭ್ಯಾಸದ ಜೊತೆ ಜೊತೆಯಲ್ಲಿ ಸಂಘದ ಸಂಪರ್ಕ ಮತ್ತು ಸಂಘ ಶಾಖೆಯಲ್ಲಿ ಕಲಿತ ಸ್ವಯಂ ಶಿಸ್ತು – ವ್ಯಕ್ತಿ ಮತ್ತು ಸಮಾಜದ ಜೊತೆಯಲ್ಲಿ ಸಂವೇದನಾ ಶೀಲರಾಗಿ, ನಿರಂತರ ಒಡನಾಟದಿಂದ ಸ್ವಯಂ ನಿಯಂತ್ರಣದಿಂದ ಶಿಸ್ತು ಬದ್ಧ ಜೀವನವನ್ನು ಹೇಗೆ ನಡೆಸಬಹುದು ಎಂಬುದಕ್ಕೆ ನರೇಂದ್ರ ಮೋದಿಯವರು ನಿದರ್ಶನವಾಗಬಲ್ಲರು.

ಕಲಿಕೆಯ ನಂತರ ತನ್ನನ್ನು ತಾನು ಸಂಘ ಕಾರ್ಯಕ್ಕೆ ಸಮರ್ಪಿಸಿಕೊಂಡ ಮೋದಿಯವರು ತನಗೆ ವಹಿಸಿದ ಸಮಾಜ ಸಂಘಟನೆಯ ಕೆಲಸವನ್ನು ತಪಸ್ಸಿನಂತೆ ತನ್ನ ಜೀವನದಲ್ಲಿ ಸಾಕಾರಗೊಳಿಸಿ ಹಂತ ಹಂತವಾಗಿ ಜವಾಬ್ದಾರಿಗಳನ್ನು ಅತ್ಯಂತ ಪ್ರಾಮಾಣಿಕವಾಗಿ ನಿರ್ವಹಿಸಿ ಸಂಘ ಮತ್ತು ಜೀವನ ಜೊತೆಜೊತೆಯಾಗಿ ಜೀವನದುದ್ದಕ್ಕೂ ಸ್ವಯಂ ನಿಯಂತ್ರಣ ಸಾಧಿಸಿ ಇಂದಿಗೂ ಶಿಸ್ತು, ಸಂಯಮ, ಸಮಯ ಪಾಲನೆ, ತಾನು ಸ್ವೀಕರಿಸಿದ ಧ್ಯೇಯದೊಂದಿಗೆ ರಾಜಿಯಾಗದೆ, ತನಗೆ ಸಿಕ್ಕ ಅವಕಾಶವನ್ನು ಸಮಾಜದ ಉನ್ನತಿಗೆ ಹೇಗೆ ಬಳಸಿ ಬದಲಾವಣೆ ತರಬಹುದು ಎಂಬುದಕ್ಕೆ ಶ್ರೀ ನರೇಂದ್ರ ಮೋದಿಯವರು ಒಂದು ಉದಾಹರಣೆ ಆಗಬಲ್ಲರು .

ಅರ್ ಎಸ್ ಎಸ್ ಎಂದರೆ ಉರಿದುಬೀಳುವ ಎಡವಾದಿಗಳು ಮತ್ತು ವಿಚಾರವಾದಿಗಳು ಎನಿಸಿಕೊಂಡವರು ಮತ್ತು ಮತೀಯ ಮೂಲಭೂತವಾದಿಗಳು ತಮ್ಮ ಮೂಗಿನ ನೇರಕ್ಕೆ ತಮ್ಮ ತಲೆಯಲ್ಲಿರುವ ಮೆದುಳನ್ನು ಸಾಧ್ಯವಿರುವಷ್ಟು ವ್ಯಯಿಸಿ ಅವಹೇಳನಕಾರಿಯಾಗಿ ಜನಮಾನಸದ ಮುಂದೆ ತೋರಿಸುವ ಕೆಲಸಗಳು ಕಳೆದ 88 ವರ್ಷಗಳಿಂದ ನಿರಂತರವಾಗಿ ನಡೆದೇ ಇದೆ. ಸಂಘದ ಹಿರಿಯರು ಒಂದು ಬೈಠಕ್ ನಲ್ಲಿ ಮಾತನಾಡುತ್ತಾ ಸಂಘ ವಿರೋಧಿಗಳಿಗೆ ಹೀಗೆ ಹೇಳಿದರು. “ದೊಡ್ಡ ಆನೆಯೊಂದನ್ನು ಮೂವರು ಕುರುಡರು ಹತ್ತಿರ ಬಂದು ಮುಟ್ಟಿದಾಗ, ಒಬ್ಬ ಕಾಲುಗಳನ್ನು ಹಿಡಿದು ತಡಕಾಡಿ ಆನೆ ಎಂದರೆ ಕಂಬದಂತೆ ಉರುಟಾಗಿದೆ ಎಂದು ನಿಶ್ಚೈಸಿದ. ಇನ್ನೊಬ್ಬ ಆನೆಯ ಹೊಟ್ಟೆಯನ್ನು ಮುಟ್ಟಿ ಕೈಯಾಡಿಸಿ ಆನೆ ಎಂದರೆ ಬಂಡೆಯಂತೆ ಇದೆ ಎಂದ. ಮಗದೊಬ್ಬ ಸೊಂಡಿಲನ್ನು ಹಿಡಿದು ಮೇಲಿನಿಂದ ಕೆಳಗಿನವರೆಗೆ ಕೈಯಾಡಿಸಿ ಆನೆ ಎಂದರೆ ಸಪೂರವಾಗಿದೆ ಅದನ್ನು ಬೇಕಾದಂತೆ ಬಗ್ಗಿಸಬಹುದು” ಎಂದನಂತೆ. ಹೀಗೆ ಆನೆ ಆನೆಯಾಗಿಯೇ ಉಳಿದು, ಮೂವರು ಗ್ರಹಿಸಿದ ಮನಸ್ಥಿತಿಯಂತೆ ತಿಳಿದು, ಸಂಘದ ಮೇಲೆ ಇಂದಿಗೂ ಸವಾರಿ ನಡೆದೇ ಇದೆ. ಆದರೆ ಕಳೆದ 88 ವರ್ಷಗಳಿಂದಲೂ ಭಾರತ ವಾಸಿಗಳನ್ನು ಒಂದೇ ಸೂತ್ರದಡಿ ಜೋಡಿಸುವ ತನ್ನ ಕೈಂಕರ್ಯದಲ್ಲಿ ಸಂಘ ತನ್ನಷ್ಟಕ್ಕೆ ತಾನೇ ತೊಡಗಿಕೊಂಡಿದೆ ಮತ್ತು ಯಶಸ್ಸನ್ನು ಪಡೆಯುತ್ತಾ ಮುಂದುವರಿಯುತ್ತಲೇ ಇದೆ.

ಶ್ರೀ ನರೇಂದ್ರ ಮೋದಿಯವರಂತಹ ನೂರಾರು ಸಜ್ಜನ ಕಾರ್ಯಕರ್ತರನ್ನು ತಯಾರಿಸಿ ದೇಶದ ಅನ್ಯ ಅನ್ಯ ಕ್ಷೇತ್ರಗಳಿಗೆ ಸಂಘ ಕೊಟ್ಟಿದೆ. ಮಾನ್ಯ ಶ್ರೀ ಶ್ಯಾಮ್ ಪ್ರಸಾದ್ ಮುಖರ್ಜಿಯವರಿಂದ ಹಿಡಿದು ಮಾನ್ಯ ವಾಜಪೇಯಿ,ಅಡ್ವಾಣಿಯವರವರೆಗೆ, ಮಾನ್ಯ ಥೇಅಂಗಡಿಯವರಿಂದ ಹಿಡಿದು ನಾನಾಜಿ ದೇಶ್ ಮುಖ್ ಮತ್ತು ಮಾನ್ಯ ನರೇಂದ್ರ ಮೋದೀಜಿಯವರವರೆಗೆ ಸಾವಿರಾರು ಸ್ವಯಂ ಸೇವಕರನ್ನು ತಯಾರಿಸಿಕೊಟ್ಟಿದೆ ಹಾಗೂ ದೇಶದ ಬೇರೆ ಬೇರೆ ಕ್ಷೇತ್ರಗಳಲ್ಲಿ ಕೆಲಸ ಮಾಡಲು ಕಳುಹಿಸಿಕೊಟ್ಟಿದೆ. ಸಂಘದ ಧ್ಯೇಯವೇ ಜೀವನ ಎಂದು ನಡೆದವರು ಮಾನ್ಯರಾಗಿಯೇ ಉಳಿದರು. ಪರಿಸ್ಥಿತಿಯ ಅಥವಾ ವಯೋಮಾನದ ದೆಸೆಯಿಂದ ಒಂದರೆಕ್ಷಣ ಧ್ಯೇಯವನ್ನು ಮರೆತವರು ಜನಮಾನಸದಿಂದ ದೂರಾದರು ಎನ್ನುವುದಕ್ಕಾಗಿ ಈ ಸಂದರ್ಭದಲ್ಲಿ ಸಂಘದ ಕುರಿತು ಪ್ರಸ್ತಾಪಿಸಬೇಕಾಯಿತು.

ಶ್ರೀ ನರೇಂದ್ರ ಮೋದೀಜಿಯವರು ಅಯೋಧ್ಯಾ ಆಂದೋಲನದಲ್ಲಿ ಮಾನ್ಯ ಅಡ್ವಾಣಿಜಿಯವರ ರಥಯಾತ್ರೆಯನ್ನು ಸುಸೂತ್ರವಾಗಿ ಸಂಘಟಿಸಿ ಮತ್ತು ಯಶಸ್ವಿಯಾಗಿ ಸಂಘಟಿಸುವ ಮೂಲಕ ದೇಶದ ಗಮನ ಸೆಳೆದರು. ನಂತರ ಅವರಿಗೆ ವಹಿಸಿದ ಬೇರೆ ಬೇರೆ ಜವಾಬ್ದಾರಿಗಳನ್ನು ಅತ್ಯಂತ ಕರಾರುವಕ್ಕಾಗಿ ಮತ್ತು ಯಶಸ್ವಿಯಾಗಿ ಪೂರೈಸುತ್ತ ಗುಜರಾತಿನ ಜವಾಬ್ದಾರಿಯನ್ನು ವಹಿಸಿಕೊಂಡು ಮೂರನೇ ಬಾರಿಗೆ ಗುಜರಾತಿನಲ್ಲಿ ಸರಕಾರವನ್ನು ರಚಿಸಿದ್ದೇ ಅಲ್ಲದೆ ತನ್ನ ರಾಜಕೀಯ ವೈರಿಗಳಿಗೆ ಅಭಿವೃದ್ಧಿಯ ಮುಖಾಂತರವೇ ಮೌನವಾಗಿ ಉತ್ತರಿಸಿದರು. ಇಂದು ಭಾರತೀಯ ಜನತಾ ಪಾರ್ಟಿಯ ಪ್ರಧಾನಿ ಅಭ್ಯರ್ಥಿಯಾಗಿ ಮತ್ತು ಅದಕ್ಕಿಂತಲೂ ಮೊದಲು ಆರೆಂಟು ತಿಂಗಳ ಕಾಲ ದೇಶದಾದ್ಯಂತ ಬಿರುಗಾಳಿಯಂತೆ ಸುಮಾರು ಮೂರು ಲಕ್ಷ ಕಿಲೋಮೀಟರ್ ಗಳಿಗಿಂತಲೂ ಹೆಚ್ಚಾಗಿ ಓಡಾಡಿ, , ಲಕ್ಷಾಂತರ ಜನರು ಸೇರಿದ ನಾನೂರಕ್ಕೂ ಹೆಚ್ಚು ರ‍್ಯಾಲಿಗಳನ್ನು ಉದ್ದೇಶಿಸಿ ಮಾತನಾಡಿದ್ದಲ್ಲದೇ ಬೇರೆ ಬೇರೆ ಇತರ ವ್ಯವಸ್ಥೆಗಳನ್ನು ಆಧರಿಸಿ ಸಾವಿರಾರು ಸ್ಥಳಗಳಲ್ಲಿ ಜನರನ್ನು ಮಾತನಾಡಿಸಿ ದಣಿವರಿಯದ ಮೋದಿಜೀಯವರು, ಯಶಸ್ವೀ ಸಂಘಟಕರಾಗಿ ವಿಶ್ವದೆತ್ತರಕ್ಕೆ ಬೆಳೆದು ನಿಂತಿರುವಲ್ಲಿ ಹಾಗೂ ಮೋದೀಜಿಯವರ ಶಿಸ್ತು ಬದ್ಧ ಕಾರ್ಯವೈಖರಿಯ ಹಿಂದೆ ಸಂಘವು ಬಲವಾಗಿ ನಿಂತಿದೆ ಎಂದು ಅರ್ಥೈಸಬಹುದಾಗಿದೆ.

ಇಡೀ ದೇಶ ಇಂದು ಬಹಳ ತುರ್ತಾಗಿ ಬದಲಾವಣೆಯನ್ನು ಬಯಸುತ್ತಿದೆ. ಜನರುಗಳ ಆಶಯದಂತೆ ಬದಲಾವಣೆಯಾಗಬೇಕಾದರೆ ದೇಶದ ಯುವಸಮೂಹ ಬಹಳ ಮುತುವರ್ಜಿಯಿಂದ ಮುಂದೆ ಬರಬೇಕಾಗಿದೆ ಮತ್ತು ತಮ್ಮ ವೈಯಕ್ತಿಕ ಬದುಕಿಗಿಂತಲೂ ದೇಶದ ಬದುಕೇ ತನ್ನ ಜೀವನದ ಧ್ಯೇಯವೆಂದು ತಿಳಿದು ಬಲಿಷ್ಠ ಹಾಗೂ ಸದೃಢ ರಾಷ್ಟ್ರ ನಿರ್ಮಾಣದ ಕಾರ್ಯದಲ್ಲಿ ಮುನ್ನುಗ್ಗಬೇಕಾಗಿದೆ . ಜನರು ಮತ್ತು ಆಡಳಿತ ಒಂದೆ ತೆರನಾಗಿ ಬದಲಾವಣೆ ಬಯಸಿದರೆ ಈ ಕಾರ್ಯವನ್ನು ಸಾಧಿಸಲು ಕಷ್ಟವೇನೂ ಆಗಲಾರದು.

ಇತಿಹಾಸವನ್ನು ಹಿಂತಿರುಗಿ ನೋಡಿದರೆ ಕಾಲಕಾಲದ ಬದಲಾವಣೆಗಳು ಯುವಸಮೂಹದಿಂದಲೇ ಆಗಿದೆ. ಹಿಂದೊಮ್ಮೆ ಜಪಾನ್ - ನಾಗಸಾಕಿಯು ಅಣುಬಾಂಬ್ ಸ್ಪೋಟದಿಂದ ಸಂಪೂರ್ಣ ನಾಶವಾದ ದೇಶ. ಆದರೆ ಇಂದು ಎಲ್ಲಾ ರಂಗಗಳಲ್ಲಿಯೂ ಬಲಾಡ್ಯ ದೇಶವಾಗಿ ರೂಪುಗೊಂಡಿದೆ. ಅಲ್ಲಿನ ಪ್ರತಿಯೊಬ್ಬ ನಾಗರಿಕ ಮತ್ತು ನಾಯಕ ಇಬ್ಬರಲ್ಲೂ ‘ದೇಶವೇ ಮುಖ್ಯ ಅನಂತರ ನಾನು’ ಎಂಬ ಭಾವನೆ ಇದ್ದುದರಿಂದಲೇ ಇಂದು ಜಪಾನ್ ಒಂದು ಬಲಿಷ್ಠ ದೇಶವಾಗಿ ಎದ್ದು ನಿಂತಿದೆ.

ಪ್ರಸಕ್ತ ವರದಿಗಳಂತೆ ಈ ಚುನಾವಣೆಯಲ್ಲಿ ಕೂಡ ಯುವಜನರ ನಿರ್ಧಾರದಂತೆ ಬದಲಾವಣೆಗಳಾಗುತ್ತಿದೆ ಎಂಬುದು ನಿಶ್ಚಿತವಾಗತೊಡಗಿದೆ. ಬದಲಾವಣೆ ಕೇವಲ ಸರಕಾರ ಬದಲಾಯಿಸುವುದರಿಂದ ಮಾತ್ರವೇ ಬದಲಾಗದು ಅದಕ್ಕಾಗಿ ಜನಸಮೂಹವು ಬದಲಾಗಬೇಕಾಗಿದೆ. ಈ ದೃಷ್ಟಿಯಿಂದ ಯುವ ಸಮೂಹ ಇಂದು ಒಂದು ಸಂಘಟಿತ ಶಕ್ತಿಯಾಗಿ ಭವಿಷ್ಯತ್ತಿನ ನಾಳೆಗಳಿಗಾಗಿ ಎದ್ದು ನಿಲ್ಲಿಸಬೇಕಾಗಿದೆ. ‘ಅಧಿಕಾರ ಸೇವೆಗಾಗಿಯೇ ವಿನಃ ಧನದಾಹಕ್ಕಲ್ಲ’ ಎನ್ನುವುದನ್ನು ಸಾಬೀತುಪಡಿಸಬೇಕಾಗಿದೆ.

ಕಾಶ್ಮೀರದ ರಾಜ್ಯಪಾಲರಾಗಿದ್ದ ಜಗಮೋಹನ್ ರವರು ಮಂಗಳೂರಿನಲ್ಲಿ ಹೇಳಿದ ಈ ಮಾತುಗಳು ಪ್ರಸ್ತುತವೆನಿಸುತ್ತಿದೆ. “ನಮ್ಮ ಕೊರತೆಯೆಂದರೆ ಸಂಘಟನೆಯಲ್ಲಿ ಮಾತ್ರ, ಏಕತೆ, ಸಮರ್ಪಣೆ, ಸಂಘಟನೆಯಂತ ವಿಷಯಗಳಲ್ಲಿ ನಾವು ಮಿಕ್ಕವರಿಗಿಂತಲು ಹಿಂದಿದ್ದೇವೆ ಎಂದುಕೊಂಡಿದ್ದೆ. ಆದರೆ ಈಗ ನಿಮ್ಮ ಸಂಘಟನೆಯು ಈ ಕೊರತೆಯನ್ನು ಸಮರ್ಥವಾಗಿ ನೀಗಿಸಿದೆ. ಇಂದು ನನ್ನ ಕಣ್ಣ ಮುಂದೆ ಕಾಣುತ್ತಿರುವ ಈ ಭವ್ಯ ದೃಶ್ಯದಲ್ಲಿ ಸಹಸ್ರಾರು ಸಂಖ್ಯೆಯಲ್ಲಿ ಒಂದುಗೂಡಿ ಬಂದಿರುವ ನಿಮ್ಮ ಒಬ್ಬೊಬ್ಬರಲ್ಲೂ ದೇಶ ಭಕ್ತಿ, ಶೃದ್ಧೆ, ಸಮರ್ಪಣಾ ಮನೋಭಾವ ಮತ್ತು ಸಂಕಲ್ಪ ಶಕ್ತಿಯಂತಹ ಶ್ರೇಷ್ಠ ಗುಣಗಳು ಕಾಣುತ್ತಿರುವುದು ನನ್ನ ಅನುಭವಕ್ಕೆ ಬರುತ್ತಿದೆ. ಇಂದು ನಮ್ಮ ರಾಷ್ಟ್ರ ಎದುರಿಸುತ್ತಿರುವ ಹಲವು ವಿಧದ ಸಂಕಟಗಳನ್ನು ಯಶಸ್ವಿಯಾಗಿ ನಿಭಾಯಿಸುವಲ್ಲಿ ನಿಮ್ಮ ಸಂಘಟನೆ ಐತಿಹಾಸಿಕ ಪಾತ್ರ ನಿರ್ವಹಿಸಬಲ್ಲುದು. ಇಂದಿನ ಸಮಾರಂಭವು ಭಾರತ ಎಚ್ಚರಗೊಳ್ಳುತ್ತಿದೆ ಹಾಗೂ ಈಗಾಗಲೇ ಎಚ್ಚರಗೊಂಡಿದೆ ಎಂಬ ಭರವಸೆ ಮೂಡಿಸುವಂತಹುದಾಗಿದೆ”. ಇವರ ಈ ಮಾತುಗಳಂತೆ ಮುಂದಿರುವ ಕಠಿಣ ಸವಾಲುಗಳನ್ನು ಎದುರಿಸಲು ಯುವಕರಿಂದ ಮಾತ್ರ ಸಾಧ್ಯ ಎನ್ನುವುದು ಮನದಟ್ಟಾಗುತ್ತದೆ.

ಭಾರತ ದೇಶ ಯುವಕರ ಸಮರ್ಪಣಾಭಾವ ಮತ್ತು ಸಂಘಟಿತ ಕಾರ್ಯಕ್ಕಾಗಿ ಕಾಯುತ್ತಿದೆ. ಭಾರತದ ಈ ಬೇಡಿಕೆಯನ್ನು ಪೂರೈಸಲು ಯುವ ಜನಾಂಗ ಭವಿಷ್ಯತ್ತಿನ ಭವ್ಯ ಭಾರತಕ್ಕಾಗಿ ಮುಂದೆ ಬರಲೆಂದು ಹಾರೈಕೆ.

ಧನಂಜಯ ವಾಗ್ಲೆ

ಪುತ್ತೂರು

ಲೋಕಸಭಾ ಚುನಾವಣೆ – 2014 (ದಕ್ಷಿಣ ಕನ್ನಡ)

2014-05-07T21:37:00.001+05:30

ದಕ್ಷಿಣಕನ್ನಡ ಲೋಕಸಭಾ ಚುನಾವಣೆ ಬಹಳ ಜಿದ್ದಾಜಿದ್ದಿನಿಂದ ಕೂಡಿದ್ದು, ಕಾಂಗ್ರೆಸ್ ಹಿರಿಯ ರಾಜಕಾರಣಿ ಶ್ರೀ. ಬಿ. ಜನಾರ್ಧನ ಪೂಜಾರಿಯವರು ಮತ್ತು ಬಿ.ಜೆ.ಪಿ.ಯ ಪ್ರಸ್ತುತ ಲೋಕಸಭಾ ಸದಸ್ಯರಾಗಿರುವ ಶ್ರೀ ನಳಿನ್ ಕುಮಾರ್ ಕಟೀಲ್ ರವರು ಚುನಾವಣಾ ಕಣದಲ್ಲಿ ಇತರ 12 ಜನ ಸ್ಪರ್ಧಿಗಳಿದ್ದರೂ ನೇರವಾಗಿ ಹಣಾಹಣಿ ಇರುವುದು ಕಾಂಗ್ರೆಸ್ ಮತ್ತು ಬಿ.ಜೆ.ಪಿ. ನಡುವೆ ಮಾತ್ರ. ಪ್ರಸ್ತುತ ಚುನಾವಣೆಯು ದ.ಕ ದಲ್ಲಿ ಪಕ್ಷಾಧಾರಿತ ಮತ್ತು ಸಿದ್ಧಾಂತಾರಾಧಿತ , ದೇಶದ ಭದ್ರತೆ ಮತ್ತು ಅಖಂಡತೆಯ ಮೇಲೆಯೇ ಚುನಾವಣೆ ನಡೆದಿದೆ. ನನ್ನ ಅಭಿಪ್ರಾಯದಂತೆ ಈ ಚುನಾವಣೆಯಲ್ಲಿ ಈ ಕೆಳಗಿನಂತೆ ಮತ ಹಂಚಿಕೆಯಾಗಬಹುದೆಂದು ಹಾಗೂ ನಳಿನ್ ಕುಮಾರ್ ಕಟೀಲ್ ರವರು ಸುಮಾರು 22,856 ಅಂತರದಲ್ಲಿ ಗೆಲುವು ಸಾಧಿಸಬಹುದೆಂದು ನನ್ನ ನಂಬಿಕೆ.

ಕರ್ನಾಟಕ ರಾಜ್ಯದಲ್ಲಿ ಸಹ 17 ಬಿ.ಜೆ.ಪಿ., 8 ಕಾಂಗ್ರೆಸ್ , 3 ಜೆ.ಡಿ.ಎಸ್ ಬರಬಹುದೆಂದು ನಿರೀಕ್ಷಿಸುತ್ತೇನೆ.

1. ಚಿಕ್ಕೋಡಿ - ರಮೇಶ್ ಕತ್ತಿ

2. ಬೆಳಗಾವಿ - ಸುರೇಶ್ ಅಂಗಡಿ

3. ಬಿಜಾಪುರ - ರಮೇಶ್ ಜಗಜಣಗಿ

4. ರಾಯಚೂರು - ಶಿವನ ಗೌಡ ನಾಯಕ್

5. ಬೀದರ್ - ಭಗವಂತ ಕೂಬಾ

6. ಬಳ್ಳಾರಿ - ಶ್ರೀರಾಮುಲು

7. ಹಾವೇರಿ - ಶಿವಕುಮಾರ್ ಉದಾಸಿ

8. ಧಾರವಾಡ - ಪ್ರಹ್ಲಾದ್ ಜೋಷಿ

9. ಉತ್ತರ ಕನ್ನಡ - ಅನಂತ ಕುಮಾರ್

10. ಶಿವಮೊಗ್ಗ - ಬಿ.ಯಸ್. ಯಡಿಯೂರಪ್ಪ

11. ಉಡುಪಿ ಚಿಕ್ಕಮಗಳೂರು - ಶೋಭಾ ಕರಂದ್ಲಾಜೆ

12. ಮೈಸೂರು - ಪ್ರತಾಪ್ ಸಿಂಹ

13. ಬೆಂಗಳೂರು ಉತ್ತರ - ಡಿ.ವಿ.ಯಸ್

14. ಬೆಂಗಳೂರು ದಕ್ಷಿಣ - ಅನಂತಕುಮಾರ್

15. ಬೆಂಗಳೂರು ಕೇಂದ್ರ - ಪಿ.ಸಿ. ಮೋಹನ್

16. ದಕ್ಷಿಣ ಕನ್ನಡ - ನಳಿನ್ ಕುಮಾರ್ ಕಟೀಲ್

17. ತುಮಕೂರು - ಬಸವರಾಜ್

ಕಾಂಗ್ರೆಸ್ ಪಕ್ಷ - 8

ಜೆ.ಡಿ.ಯಸ್ - 3

ಪ್ರತಿಕ್ರಯಿಸಿ.....

ಕೆ. ಧನಂಜಯ ವಾಗ್ಲೆ ,

ಪುತ್ತೂರು . ದ.ಕ.

ಪ್ರಜಾಪ್ರಭುತ್ವದ ಪ್ರಹಸನ

2014-04-15T16:16:00.000+05:30

ಜಗತ್ತಿನ ಬಹುದೊಡ್ಡ ಪ್ರಜಾಪ್ರಭುತ್ವವಾದಿ ದೇಶ ಭಾರತ. ಭಾರತೀಯ ಸಾರ್ವತ್ರಿಕ ಚುನಾವಣೆ ಎಂದರೆ ಅದು ಒಂದು ಧರ್ಮಯುದ್ಧದಂತೆ . ಸಂವಿಧಾನಶಿಲ್ಪಿ ಡಾ।ಬಿ.ಅರ್. ಅಂಬೇಡ್ಕರ್ ರವರ ಆಶಯದಂತೆ ಪಕ್ಷ ಪಕ್ಷಗಳ ಸಿದ್ಧಾಂತಗಳ ಮೇಲಿನ ಚರ್ಚೆಯಿಂದ ಮತದಾರರನ್ನು ಒಲಿಸಿ, ಸಮಾಜದ ಕಟ್ಟ ಕಡೆಯ ವ್ಯಕ್ತಿಗೆ ನ್ಯಾಯ ದೊರಕಿಸಿಕೊಡುವ ಉತ್ತಮ ಆಡಳಿತ ಕೊಡಲು ಐದು ವರ್ಷಗಳಿಗೆ ಜನರ ತೀರ್ಪಿನಂತೆ ಅಧಿಕಾರ ಕೊಡುವ ತಾತ್ವಿಕ ಒಂದು ಮಹಾಯುದ್ದವೇ ಚುನಾವಣೆ ಎಂದರೆ ತಪ್ಪಾಗಲಾರದು. ದುರಂತವೆಂದರೆ ಇತ್ತೀಚಿನ ವರ್ಷಗಳಲ್ಲಿ ಪ್ರಜಾಪ್ರಭುತ್ವದ ಆಶಯಗಳನ್ನು ಮರೆತು, ಚುನಾವಣೆ ಎಂದರೆ ವಯಕ್ತಿಕ ಟೀಕೆ-ಟಿಪ್ಪಣಿಗಳಿಗೆ ಮಾತ್ರ ಸೀಮಿತವಾಗಿ ತೀರಾ ಕಳಪೆ ಚರ್ಚೆಯಲ್ಲಿ ಮುಕ್ತಾಯವಾಗುತ್ತಿರುವುದು ನೋವಿನ ಸಂಗತಿ.

ಭಾರತೀಯ ಜನತಾ ಪಾರ್ಟಿಯ ಪ್ರಧಾನಿ ಅಭ್ಯರ್ಥಿ ಶ್ರೀ ನರೇಂದ್ರಮೋದಿಯವರ ವಯಕ್ತಿಕ ಜೀವನದ ಕುರಿತ ರಾಜಕೀಯ ನಾಯಕರು ಬಾಯಿಗೆ ಬಂದಂತೆ ಮಾತನಾಡಿ ತಮ್ಮ ಬೌದ್ಧಿಕ ದಿವಾಳಿತನವನ್ನು ಈ ಪ್ರಪಂಚಕ್ಕೆ ಸಾರುತ್ತಿರುವುದನ್ನು ನೋಡಿದರೆ ಮರುಕವೆನಿಸುತ್ತದೆ.

ಚುನಾವಣೆಯಲ್ಲಿ ಜನರ ನೂರಾರು ಸಮಸ್ಯೆಗಳಿಗೆ ನಮ್ಮ ಪಕ್ಷ ಬಂದರೆ ಏನು ಮಾಡುತ್ತದೆ , ನಮ್ಮ ಪ್ರಣಾಳಿಕೆಯಲ್ಲಿ ಏನು ಹೇಳಿದ್ದೇವೆ ,ಹಿಂದೆ ಅಧಿಕಾರ ನಡೆಸಿದ ಪಕ್ಷ ಏನು ಮಾಡಿದೆ,ಜನರಿಗೆ ಜೀವನಾಧಾರವಾದ ಅವಶ್ಯಕ ವಸ್ತುಗಳನ್ನು ಅತೀ ಕಡಿಮೆ ದರದಲ್ಲಿ ಸಿಕ್ಕಿದೆಯೇ , ಬ್ರಷ್ಟಾಚಾರ ರಹಿತ ಆಡಳಿತ ನೀಡಲಾಗಿದೆಯೇ,ದೇಶದ ಆಂತರೀಕ ಮತ್ತು ಬಾಹ್ಯಭದ್ರತೆಗೆ ಏನು ಮಾಡಲಾಗಿದೆ,ದೇಶದ ಆರ್ಥಿಕ ಶಕ್ತಿ ಹೇಗಿದೆ , ಜನರ ಆಶೋತ್ತರಗಳ ಕುರಿತು ತಮ್ಮ ಪಕ್ಷ ಏನು ಮಾಡುತ್ತದೆ…ಇತ್ಯಾದಿ ಚರ್ಚೆಗಳು ಮಾಡುವುದನ್ನು ಬಿಟ್ಟು ಶ್ರೀ ನರೇಂದ್ರಮೋದಿಯವರ ವಯಕ್ತಿಕ ಬದುಕಿನ ಕುರಿತು ಚರ್ಚೆಗೆ ಬಂದಿರುವುದು ಒಂದು ರಾಜಕೀಯ ದುರಂತವೆನ್ನಬಹುದು. ಇದು ಅಪ್ರಸ್ಥುತವಾಗಿದ್ದರೂ ಗಡ್ಡಮೀಸೆ ಹಣ್ಣಾದರೂ ರಾಹುಲ ರವರು ಇನ್ನೂ ಮದುವೆಯಾಗದೇ ಇರುವುದು ಕೂಡ ಚರ್ಚಾವಸ್ತುವಾಗಬಹುದೇನೋ?

ಯು.ಪಿ.ಎ 2009 ರ ಚುನಾವಣೆಯಲ್ಲಿ ನೂರು ದಿನಗಳಲ್ಲಿ ಬೆಲೆಗಳನ್ನು ಇಳಿಸುವಂತೆ ನೀಡಿದ ಭರವಸೆ ಏನಾಗಿದೆ ನೋಡೋಣ:

2009 2014

ಚಿನ್ನ 16000 30917

ಹಾಲು 21 34

ಪೆಟ್ರೋಲ್ 44.63 79.19

ಕನ್ನಡಪ್ರಭ 2.50 3.50

ಬಿ.ಮ್.ಟಿ.ಸಿ. ಪಾಸ್ 30 55

ಡಾಲರ್ 48 68.38

ಇಡ್ಲಿ-ವಡೆ 20 40

ಮಿನರಲ್ ವಾಟರ್ 10 20

ಟೀ- ಕಾಫೀ 07 15

ಗ್ಯಾಸ್ 325 423

(ಕೃಪೆ ಕನ್ನಡಪ್ರಭ )

ಕೊಬ್ಬರಿ ಎಣ್ಣೆ 80 160

ತೆಂಗಿನಕಾಯಿ 6 22

ಇಷ್ಟೇ ಅಲ್ಲದೆ ಆಧಾರ್ ಎಂಬ ನಿರಾಧಾರ ಯೋಜನೆಯಿಂದ ಜನತೆಯನ್ನು ಹೈರಾಣಾಗಿಸಿದರು. ಹಳ್ಳಿಯಿಂದ ಹಿಡಿದು ದಿಲ್ಲಿಯತನಕ ಶಾಪ ಹಾಕಿರುವುದು ಮರೆಯಲು ಸಾಧ್ಯವೇ ಇಲ್ಲ. ಬರೇ ಈರುಳ್ಳಿಗೆ 80ರೂಪಾಯಿಗೆ ಏರಿಸಿದ್ದಕ್ಕಾಗಿ ದೆಹಲಿ ಸರಕಾರವನ್ನು ಇಳಿಸಿರುವುದು ಗೊತ್ತೇ ಇದೆ. ಐದು ವರ್ಷಗಳಲ್ಲಿ ಶೇ. 50ರಷ್ಟು ಎಲ್ಲಾ ರಂಗಗಳಲ್ಲಿ ಬೆಲೆ ಏರಿಕೆಯಾದರೂ ಜನರು ಮರೆತಿರಬಹುದೆಂದು ಯು.ಪಿ.ಎ ಭಾವಿಸಿದಂತಿದೆ. ವಾಸ್ತವಿಕ ಚರ್ಚೆಗಳಿಂದ ದೂರ ಸರಿದು ಚಾರಿತ್ರ್ಯ ಹನನಕ್ಕೆ ತೊಡಗಿರುವುದು ಕಾಂಗ್ರೆಸ್ಸಿನ ದಿವಾಳಿತನ ಮತ್ತು ಯುದ್ದಕ್ಕೆ ಹೊರಡುವ ಮುನ್ನ ಶಸ್ತ್ರತ್ಯಾಗ ಮಾಡಿದಂತೆ ಭಾಸವಾಗುತ್ತದೆ .

ಈ ಚುನಾವಣಾ ಚರ್ಚೆಗೆ ಟೀಕೆ ಟಿಪ್ಪಣಿಗಳಿಗೆ , ಯು.ಪಿ.ಎ.ಯ ಶವಪೆಟ್ಟಿಗೆಗೆ ಕೊನೆಯಮೊಳೆ ಹೊಡೆಯಬೇಕಾಗಿದೆ. ಜನರು ಮುಂದಿನ 17ರಂದು ನಾವು ನಮ್ಮವರು ಬಂಧು ಬಳಗದವರಿಗೆ ಹೇಳಿ ಕಮಲದ ಗುರುತಿಗೆ ಮತ ಚಲಾಯಿಸುವ ಮುಖಾಂತರ ಸರಿಯಾದ ಉತ್ತರ ಕೊಡಲೇಬೇಕಾಗಿದೆ. ಪ್ರಜಾಪ್ರಭುತ್ವದ ಪ್ರಹಸನಕ್ಕೆ ಕೊನೆ ಹಾಡಲೇಬೇಕಾಗಿದೆ.

ಪ್ರತಿಕ್ರಯಿಸಿ.....

ಕೆ. ಧನಂಜಯ ವಾಗ್ಲೆ ,

ಪುತ್ತೂರು . ದ.ಕ.

ಪಕ್ಷಾಂತರ ಪರ್ವ !!!

2014-03-29T16:14:00.000+05:30

ಪಕ್ಷಾಂತರ ಪರ್ವ ಆರಂಭವಾಗಿದೆ...ಬಿಸಿಲಧಗೆಏರುತ್ತಿರುವಂತೆಯೇ ಚುನಾವಣಾ ಕಾವು ಏರತೊಡಗಿದೆ. ನಿನ್ನೆ ಮೊನ್ನೆಯವರೆಗೆ ಭಾರತೀಯ ಜನತಾ ಪಾರ್ಟಿಯನ್ನು ಮಾಧ್ಯಮಗಳಲ್ಲಿ ಅಡಿಯಿಂದ ಮುಡಿಯವರೆಗೆ ಹೊಗಳುತ್ತಿದ್ದವರಲ್ಲಿ ಕೆಲವರು ಪಕ್ಷ ಮತ್ತು ಧ್ಯೇಯ ನಿಷ್ಠೆಯ ಸಾಚಾತನವನ್ನು ಜನರೆದುರು ಬಿಚ್ಚಿಡುತ್ತಿದ್ದಾರೆ. ಕೆಲವರು ಬಿ.ಯಸ್.ವೈ.ಯವರನ್ನು ತೆಗಳುತ್ತಿದ್ದರೆ ಇನ್ನುಕೆಲವರು ಬಿ.ಜೆ.ಪಿಯ ಇತರ ನಾಯಕರ ಬಗ್ಗೆ ಆರೋಪ ಮಾಡಿ ತಮ್ಮ ಅಸ್ತಿತ್ವವನ್ನು ಉಳಿಸಿಕೊಳ್ಳುವುದಕ್ಕೆ ಜೆ.ಡಿ.ಎಸ್.,ಕಾಂಗ್ರೆಸ್ಸ್ ಆಫೀಸ್ ಗಳಲ್ಲಿ ದಂಬಾಲು ಬಿದ್ದು ಆಶ್ರಯ ಪಡೆಯುತ್ತಿದ್ದಾರೆ.

ಕುತೂಹಲವೆಂದರೆ ಮಂಗಳೂರು ವಿಧಾನಸಭೆ ಸದಸ್ಯರಾಗಿ ಲೋಕಸಭಾ ಕ್ಷೇತ್ರದಿಂದ 3 ಬಾರಿ ಸದಸ್ಯರಾಗಿ ಕೇಂದ್ರ ಸರಕಾರದಲ್ಲಿ ಹಣಕಾಸು ಸಚಿವರಾಗಿ ಕರ್ನಾಟಕದಲ್ಲಿ ಬಿ.ಜೆ.ಪಿ. ಯ ಸರಕಾರವಿದ್ದಾಗ ದೆಹಲಿಯ ವಿಶೇಷ ಪ್ರತಿನಿಧಿಯಾಗಿ ಪಕ್ಷ ಮತ್ತು ಸರಕಾರದಿಂದ ಏನೆಲ್ಲಾ ಸವಲತ್ತುಗಳನ್ನು ಪಡೆಯಬಹುದೋ ಅದೆಲ್ಲವನ್ನು ಪಡೆದು ಭಾರತೀಯ ಜನತಾ ಪಾರ್ಟಿಯನ್ನು ನಾನೇ ಕಟ್ಟಿ ಬೆಳೆಸಿದೆ ಎಂಬ ಮಾತನ್ನು ಮೊನ್ನೆ ಪಕ್ಷಾಂತರ ಮಾಡುವಾಗ ಹೇಳಿರುವುದನ್ನು ಕೇಳಿ ಆಶ್ಚರ್ಯವಾಯಿತು.

ಅವರು ಗೆಲ್ಲುವ ಮೊದಲೇ ಅಲ್ಲಿ ಪಕ್ಷವಿತ್ತೆ ಅಥವಾ ಅವರೇ ಕಟ್ಟಿ ಬೆಳೆಸಿ ವಿಧಾನಸಭಾ ಲೋಕಸಭಾ ಸದಸ್ಯರಾಗಿ ಆಯ್ಕೆಯಾದರೆ? ತಿಳಿಯುವ ಕುತೂಹಲ ನನ್ನಲ್ಲಿ ಉಂಟಾಯಿತು. ಜನಸಂಘ 1951 ರಲ್ಲಿ ಸ್ಥಾಪನೆ ಆದಂದಿನಿಂದ ಲಕ್ಷಾಂತರ ಜನ ಕಾರ್ಯಕರ್ತರು ತಮ್ಮ ಜೀವನವನ್ನೇ ಅದಕ್ಕಾಗಿ ಅರ್ಪಿಸಿ ಇಹಲೋಕ ತ್ಯಜಿಸಿದರ ಫಲವಾಗಿ ಇಂದು ಬಿ.ಜೆ.ಪಿ ದೇಶ ವ್ಯಾಪಿಯಾಗಿ ಬೆಳೆದು ನಿಂತಿದೆ. ಇಂತಹ ಒಂದು ಪಕ್ಷವನ್ನು ನಾನೇ ಬೆಳೆಸಿದೆ ಎನ್ನವ ಇವರ ಬೌಧ್ಧಿಕ ದಿವಾಳಿತನವನ್ನು ಏನೆನ್ನಬೇಕು ತಿಳಿಯದು. ತೃತೀಯರಂಗದ ಕುರಿತು ಬರೆದ ಲೇಖನಕ್ಕೆ ಓದುಗರೊಬ್ಬರು ಬರೆದ ಪ್ರತಿಕ್ರಿಯೆಗೆ ಇದನ್ನೆಲ್ಲಾ ಹೇಳಬೇಕಾಯಿತು.

1973 ರಲ್ಲಿ ಮಂಗಳೂರಿನ ನೆಹರು ಮೈದಾನದಲ್ಲಿ ಜನಸಂಘದ ಈಗಿನ ಉಡುಪಿ ಸೇರಿದಂತೆ ಸಮಾವೇಶ ನಡೆದಿತ್ತು. ಆಗಿನ ದಿನಗಳಲ್ಲಿ ಜನ ಸಂಘವೆಂದು ಎದುರು ಹೇಳಿಕೊಳ್ಳಲು ಹೆದರುತ್ತಿದ್ದ ಕಾಲದಲ್ಲಿ 2 ರಿಂದ 3 ಸಾವಿರ ಜನರನ್ನು ಸೇರಿಸಿದ್ದೇ ನಮಗೆಲ್ಲ ಬಹುದೊಡ್ಡ ಸ್ಫೂರ್ತಿಯಾಗಿತ್ತು.ಆಗಿನ ರಾಜ್ಯಾಧ್ಯಕ್ಷರಾದ ಎ.ಕೆ.ಸುಬ್ಬಯ್ಯನವರು ಪಕ್ಷಾಂತರದ ಕುರಿತು ಮಾತನಾಡುತ್ತಾ (ಮನರಂಜನೆಗಾಗಿ ಒಂದು ಕಾಲ್ಪನಿಕ ಕಥೆಯನ್ನು) ಹೀಗೆ ಹೇಳಿದರು. ಒಂದು ಊರಿನಲ್ಲಿ ಕತ್ತೆಯ ಮೇಲೆ ದೇವರ ಮೂರ್ತಿಯನ್ನು ಇಟ್ಟು ಜನರೆಲ್ಲಾ ಸೇರಿ ಮೆರವಣಿಗೆ ಮಾಡುತ್ತಿದ್ದರಂತೆ.ನಡುವಿನಲ್ಲಿ ನಿಲ್ಲಿಸಿ ದೇವರಿಗೆ ಹಣ್ಣು ಕಾಯಿ ಸಮರ್ಪಿಸಿ ಆರತಿ ಬೆಳಗಿ ಸಾಷ್ಟಾಂಗ ನಮಸ್ಕರಿಸುತ್ತಿದ್ದರಂತೆ, ಆಗ ಕತ್ತೆಗೆ ಅನಿಸಿತು ಜನರು ನನಗೆ ಅಡ್ಡ ಬೀಳುತ್ತಿದ್ದಾರೆ ನಾನ್ಯಾಕೆ ಈ ಮಣ್ಣಿನ ಮೂರ್ತಿ ಹೊರಬೇಕು ಎಂದು ಬೆನ್ನ ಮೇಲಿಂದ ಮೂರ್ತಿಯನ್ನು ಉರುಳಿಸಲು ನೋಡಿದಾಗ ದೇವರನ್ನು ಎತ್ತಿಕೊಂಡು ಜನರ ಮೆರವಣಿಗೆ ಮುಂದೆ ಸಾಗಿತು. ದೇವರಿಗೆ ಆರತಿ ಪೂಜೆ ಎಲ್ಲ ನಡೆಯುತ್ತಾ ಹೋಯಿತು , ಆದರೆ ಕತ್ತೆಗೆ ಯಾರೂ ನಮಸ್ಕರಿಸಲಿಲ್ಲ ಎಂದು ಜನರನ್ನು ನಗೆಗಡಲಲ್ಲಿ ತೇಲಿಸಿದರು. ಆಗ ಆ ಮಾತನ್ನು ತಮಾಷೆಗಾಗಿ ಹೇಳಿದರು. ಅದರಲ್ಲಿರುವ ಗೂಡಾರ್ಥ ಈಗಿನ ಪಕ್ಷಾಂತರಿಗಳಿಗೆ ಸೀದಾಸೀದಾ ಅನ್ವಯಿಸುತ್ತದೆ. ಹೀಗೆ ಪಕ್ಷ ಬಿಡುವವರ ಜತೆಯಲ್ಲಿ ಒಂದು ಕಾಗೆಯಾಗಲಿ ಗುಬ್ಬಚ್ಚಿಯಾಗಲಿ ಹೋಗಲಿಲ್ಲ ಎನ್ನುವುದು ಎಲ್ಲರಿಗೂ ತಿಳಿದೇ ಇದೆ.

ಪಕ್ಷವನ್ನು ಕಟ್ಟಿ ಬೆಳೆಸಿದ ಮಾನನೀಯ ಶ್ರೀ ಶ್ಯಾಮ ಪ್ರಸಾದ್ ಮುಖರ್ಜಿ , ಪಂಡಿತ್ ದೀನ್ ದಯಾಳ್ ಉಪಾಧ್ಯಾಯರು, ನಾನಾಜಿ ದೇಶಮುಖ್ ರು, ಕುಶಾಭಾವು ಠಾಕ್ರೆ, ಜಗನ್ನಾಥ ರಾವ್ ಜೋಷಿ ಬಾವು ರಾವ್ ದೇಶಪಾಂಡೆ ಮುಂತಾದ ಮಹಾನ್ ನಾಯಕರ ಮತ್ತು ಲಕ್ಷಾಂತರ ಕಾರ್ಯಕರ್ತರ ತ್ಯಾಗದಿಂದ ಬೆಳೆದ ಪಕ್ಷದಿಂದ ಪಕ್ಷಾಂತರ ಮಾಡುವುದೆಂದರೆ ಸ್ವಧರ್ಮೆ ನಿಧನಂ ಶ್ರೇಯ ಪರಧರ್ಮೋ ಭಯಾವಹ: ಎಂಬುದನ್ನು ಮರೆಯಬಾರದು. ಅಧಿಕಾರ ಸಿಕ್ಕಿಲ್ಲವೆಂದು ಪಕ್ಷ ಬಿಟ್ಟ ಬಲರಾಜ ಮುಧೋಕ್ ರಿಂದ ಹಿಡಿದು ಇತ್ತೀಚಿನ ವರೆಗೆ ನೂರಾರು ಜನ ಪಕ್ಷಾಂತರರ ಕಥೆಯ ವ್ಯಥೆ ನಮ್ಮ ಮುಂದೆಯೇ ಇದೆ.

ಪ್ರಸ್ತುತ ನಮ್ಮ ಮುಂದಿರುವ ಪ್ರಶ್ನೆ ಎಂದರೆ ದೇಶದ ಒಳಗಿನ ಮತ್ತು ಹೊರಗಿನ ವಿಚ್ಚಿದ್ರಕಾರಿ ಶಕ್ತಿಗಳನ್ನು ಮಟ್ಟ ಹಾಕಲು ದೇಶದ ನೂರಾರು ಸಮಸ್ಯೆಗಳಿಗೆ ಪರಿಹಾರ ಹುಡುಕಲು ನರೇಂದ್ರ ಮೋದಿಯವರಂತಹ ನಾಯಕತ್ವಕ್ಕೆ ಅಭ್ಯರ್ಥಿಗಳು ಯಾರು ಎಂದು ಯೋಚಿಸದೆ ಮುಂದಿನ 17 ರಂದು ಕಮಲದ ಗುರುತಿಗೆ ಮತಹಾಕುವ ಮತ್ತು ಇತರರಿಂದ ಹಾಕಿಸುವ ಪ್ರಯತ್ನ ಮಾಡಲೇ ಬೇಕಾಗಿದೆ. ಉಳಿದೆಲ್ಲ ಸಂಗತಿಗಳನ್ನು ಬದಿಗಿಟ್ಟು ಮುಂದಿನ ಜನಾಂಗಕ್ಕೆ ಭವ್ಯ ಭಾರತವನ್ನು ಮತ್ತು ಶ್ರೇಷ್ಠ ಭಾರತ ಉಳಿಸಿಕೊಡುವುದೇ ನಮ್ಮೆಲ್ಲರ ಜವಾಬ್ದಾರಿಯಾಗಿದೆ.

ಪ್ರತಿಕ್ರಯಿಸಿ.....

ಕೆ. ಧನಂಜಯ ವಾಗ್ಲೆ ,

ಪುತ್ತೂರು . ದ.ಕ.

ನರೇಂದ್ರ ಮೋದಿಯವರನ್ನು ಪ್ರಧಾನಿಯನ್ನಾಗಿಸಲು ಕರ್ನಾಟಕದ ಕೊಡುಗೆ

2014-03-22T21:56:00.001+05:30

ಶ್ರೀ ನರೇಂದ್ರ ಮೋದಿಯವರು ಮುಂದಿನ ಪ್ರಧಾನಿ ಆಗಬಹುದು, ಕೇಂದ್ರದಲ್ಲಿ ಅಧಿಕಾರ ಚುಕ್ಕಾಣಿ ಹಿಡಿಯಬಹುದು ಎಂಬುದು ಭಾರತದ ಬಹುತೇಕ ಮುದ್ರಣ ಮಾಧ್ಯಮಗಳು,ದೃಶ್ಯಮಾಧ್ಯಮಗಳು ಬೇರೆ ಬೇರೆ ಸಂಸ್ಥೆಗಳ ಸಮೀಕ್ಷೆಗಳು ಎಲ್ಲವೂ ಹೇಳುವಂತೆ ಎನ್.ಡಿ.ಎ.ಅಧಿಕಾರಕ್ಕೆ ಬರುವುದು ಬಹುತೇಕ ನಿಶ್ಚಿತವಾದಂತಿದೆ. ಕಳೆದ 15-16ರಂದು ಫೋನ್ ಮಾಡಿ ಓಟ್ ಮಾಡಿ ಎಂದು “ಸಮಯ” ಟಿ.ವಿ.ಯವರು ಸತತವಾಗಿ 30 ಗಂಟೆಗಳ ದೀರ್ಘಾವಧಿ ಮಾಡಿದ ಪ್ರಯತ್ನ ದೃಶ್ಯ ಮಾಧ್ಯಮದಲ್ಲೊಂದು ಇತಿಹಾಸವನ್ನೇ ಸೃಷ್ಟಿಸಿತು. ಇದರಲ್ಲೂ ಕರ್ನಾಟಕದಲ್ಲಿ ಬಿ.ಜೆ.ಪಿ. ಪ್ರಥಮ ಸ್ಥಾನಿಯಾಗಿ ಮೂಡಿಬಂದಿರುವುದು ಬಿ.ಜೆ.ಪಿ. ಕಾರ್ಯಕರ್ತರಲ್ಲಿ ಭಾರಿ ಹುಮ್ಮಸ್ಸೇನೋ ಬಂದಿದೆ, ಆದರೆ ಈ ರೀತಿಯ ವಾತಾವರಣದಿಂದ ನಮ್ಮ ಕಾರ್ಯಕರ್ತರು ನಿಷ್ಕ್ರಿಯರಾಗದಂತೆ ಎಚ್ಚರವಹಿಸುವುದು ತೀರಾ ಅಗತ್ಯವಿದೆ.

ನಾವು ಹೇಗೂ ಗೆಲ್ಲುತ್ತೇವೆ ಎಂದು ಮನೆ, ಮನೆ ವ್ಯಕ್ತಿ, ವ್ಯಕ್ತಿಗಳ ಸಂಪರ್ಕ ಮತ್ತು ಮತದಾನದ ದಿನದಂದು ನಮ್ಮ ಮತಗಳನ್ನು ಹಾಕಿಸುವ ಪ್ರಯತ್ನದಲ್ಲಿ ವಿಫಲರಾದರೆ ಶ್ರೀ ವಾಜಪೇಯಿಯವರ ಕಾಲದಲ್ಲಿ ಭಾರತ ಪ್ರಕಾಶಿಸುತ್ತಿದೆ ಎಂಬ ಘೋಷ ವಾಕ್ಯದಡಿ ಎನ್.ಡಿ.ಎ. ಕಳಪೆ ಸಾಧನೆ ಮಾಡಿ ಸೋತಿರುವುದು ನಮ್ಮೆಲ್ಲಾ ಕಾರ್ಯಕರ್ತರ ನೆನಪಿನಲ್ಲಿ ಉಳಿಯಲೇ ಬೇಕು. ಏಕೆಂದರೆ ಕಾರ್ಯಕರ್ತರು ಮಾಡುವ ಚುನಾವಣಾ ಕಾರ್ಯದಲ್ಲಿ ಸ್ವಲ್ಪ ಎಡವಿದರೂ ಗೆಲುವು ನಮ್ಮಿಂದ ದೂರಾಗಬಹುದು.

ನನ್ನ ಬಹಳ ಹಿಂದಿನ ಒಂದು ಅನುಭವವನ್ನು ಹಂಚಿಕೊಂಡರೆ ಒಳ್ಳೆಯದೇನೋ ಎಂದು ಅನಿಸುತ್ತಿದೆ. 1975ರ ತುರ್ತುಸ್ಥಿತಿಯ ನಂತರ 1977ರಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲಿ ಕಾರ್ಯಕರ್ತರ ಸಂಖ್ಯೆ ಕಡಿಮೆ ಇದ್ದರೂ ಸಹ ರಾತ್ರಿ ಹಗಲೆನ್ನದೆ ಊಟ ಕಾಫಿಯ ಪರಿವೆ ಇಲ್ಲದೆ ಮನೆ ಮನೆಯ ಸಂಪರ್ಕ ಮಾಡಿ ಚುನಾವಣೆಯ ದಿನ ಬೂತ್ ನ ಪಕ್ಕದಲ್ಲಿ ಗುಂಪುಕೂಡದೆ ಬರೇ 7-8ಜನರಿದ್ದು ಮತ್ತೆಲ್ಲಾ ಕಾರ್ಯಕರ್ತರು ವಾರ್ಡಿನ ಮನೆಗಳನ್ನು ಹಂಚಿಕೊಂಡು 3 ಗಂಟೆಯ ಒಳಗಾಗಿ ಒತ್ತಾಯದಿಂದ ಮತದಾರರನ್ನು ಹೊರಡಿಸಿ ಮತ ಹಾಕಿಸುವ ಪ್ರಯತ್ನದಲ್ಲಿ ಯಶಸ್ವಿಯಾಗಿದ್ದೆವು. ಆಗ ವಾಹನಗಳ ಸೌಕರ್ಯಗಳಿರಲಿಲ್ಲ, ಕಾಲ್ನಡಿಗೆಯೇ. ನಮ್ಮ ಮತದಾರರೊಬ್ಬರ ಮನೆಯಲ್ಲಿ 17 ಮತಗಳಿದ್ದುವು. ದುರಾದೃಷ್ಟಕ್ಕೆ ಮತದಾನದ ದಿನ ಬೆಳಿಗ್ಗೆ ಅವರ ತಾಯಿಯವರು ನಿಧನರಾಗಿದ್ದರು. ಅಲ್ಲಿನ ಅಂತಿಮ ಕಾರ್ಯಗಳು ಮುಗಿಯಲು ಬೇರೆ ಬೇರೆ ಕಡೆಗಳಿಂದ ಸಂಬಂಧಪಟ್ಟವರು ಬರಬೇಕಾಗಿತ್ತು, ನಾನೂ ಹೋಗಿದ್ದೆ. ಮೆಲ್ಲನೆ ಯಜಮಾನರನ್ನು ಹೊರಗೆ ಕರೆದು ಮನೆಯಲ್ಲಿ ನೋವಿನ ಛಾಯೆ ಇದೆ, ದೈವ ನಿಯಮ ಏನೂ ಮಾಡಲು ಸಾಧ್ಯವಿಲ್ಲ ಹೇಗೂ ಸಂಜೆಯವರೆಗೆ ಕಾಯಬೇಕು. ದೇಶದ ಸ್ಥಿತಿಯೂ ಗಂಭೀರವಾಗಿದೆ. ನೀವು ಇಬ್ಬರಿಬ್ಬರು ಹೋಗಿ ಮತಹಾಕಿ ಬನ್ನಿ ಎಂದು ಪರಿಸ್ಥಿತಿಯನ್ನು ವಿವರಿಸಿ ಹೇಳಿದೆ ಪರಿಣಾಮವಾಗಿ ಆ ಮನೆಯ 16 ಮತಗಳನ್ನು ಆಗಿನ ಜನತಾ ಪರಿವಾರಕ್ಕೆ ಹಾಕಿಸಿದೆ. ಸಂಜೆ ನಾನೂ ಕಾರ್ಯಕ್ರಮದಲ್ಲಿ ಭಾಗವಸಿದೆ. ಆ ವಾರ್ಡಿನಲ್ಲಿ 1350 ಮತಗಳಿದ್ದು 1120 ಮತಗಳು ಪೋಲಾಗಿದ್ದುವು. 885 ಜನತಾ ಪರಿವಾರಕ್ಕೆ ಬಂದಿದ್ದುವು. ಸ್ಥಳೀಯ ಸಂಸ್ಥೆಯ ಚುನಾವಣೆಯಲ್ಲಿ ಸುಳ್ಯ ಪುರಸಭೆಯಲ್ಲಿ ಏಕಚಕ್ರಾಧಿಪತ್ಯ ಅಧಿಕಾರ ನಡೆಸುತ್ತಿದ್ದ ಕಾಂಗ್ರೆಸ್ಸ್ ಗೆ ಎದುರಾಗಿ ಪ್ರಥಮ ಬಾರಿಗೆ ನಮ್ಮ ವಾರ್ಡಿನಿಂದ 3 ಜನರು ಜನತಾ ಪರಿವಾರದ ಕಾರ್ಯಕರ್ತರು ಪ್ರಚಂಡ ಜಯಗಳಿಸಿದರು. ಹೀಗೆ ಸತತವಾಗಿ 15 ವರ್ಷಗಳ ಹೋರಾಟದಿಂದ ಕಾಂಗ್ರೆಸ್ಸ್ ನ ಭದ್ರಕೋಟೆಗೆ ಲಗ್ಗೆ ಇಡುವುದರೊಂದಿಗೆ ನಮ್ಮ ಜಯ ವಿಧಾನಸಭೆ, ಲೋಕಸಭೆ, ನಗರ ಪಂಚಯಾತ್, ಗ್ರಾಮಾಂತರ 41 ಪಂಚಾಯತುಗಳಲ್ಲಿ 28 ಪಂಚಾಯತ್ ಗಳು, 38 ರಷ್ಟಿದ್ದ ಸಹಕಾರಿ ಸಂಘಗಳಲ್ಲಿ 20 ರಲ್ಲಿ ಪ್ರಸಕ್ತ ಅಧಿಕಾರದಲ್ಲಿರುವ ಬಿಜೆಪಿಯ ಬೆಳವಣಿಗೆಗೆ ನೂರಾರು ಕಾರ್ಯಕರ್ತರ ಅವಿರತ ಶ್ರಮ ಮತ್ತು ತನು ಮನ ಧನಗಳ ದಣಿವರಿಯದ ಪ್ರಯತ್ನದಿಂದಾಗಿ ಕಳೆದ ಕಾಂಗ್ರೆಸ್ಸ್ ನ ಬಿರುಗಾಳಿಯಲ್ಲಿ ಸಹ ಬಿಜೆಪಿಯೇ ಅಧಿಪತ್ಯ ಸಾಧಿಸಿದೆ.

ಹೀಗೆ ಕಾರ್ಯಕರ್ತರ ಅವಿರತ ಶ್ರಮವೇ ಬಿಜೆಪಿಯ ಬಂಡವಾಳವೆಂಬುದನ್ನು ಮರೆಯಬಾರದು. ಸಮಯ ಟಿವಿಯವರು ಕಾರ್ಯಕ್ರಮ ಸಾಧಿಸಿದ್ದನ್ನು ನಾವು ಸಾಧಿಸಬಹುದು. ಒಬ್ಬೊಬ್ಬ ಕಾರ್ಯಕರ್ತರು 10 ಜನರನ್ನು, ಆ 10 ಜನರು 10+10ರ ಗುಣಾಕಾರದಲ್ಲಿ ನೂರಾರು ಮನೆಗಳನ್ನು ಸಾವಿರಾರು ಮತದಾರರನ್ನು ಸಂಪರ್ಕಿಸಿ ಮುಂದಿನ 17 ರಂದು ನಮ್ಮ ನಮ್ಮ ಬೂತ್ ಗಳಲ್ಲಿ ಕನಿಷ್ಠ 75 ರಿಂದ 80 ರಷ್ಟು ಮತ ಚಲಾಯಿಸಲು ಸಾಧ್ಯವಾದರೆ ಕರ್ನಾಟಕದಿಂದ 18ರಿಂದ 20 ಲೋಕಸಭಾ ಸದಸ್ಯರನ್ನು ಕಳುಹಿಸುದರೊಂದಿಗೆ ಶ್ರೀ ನರೇಂದ್ರ ಮೋದಿ ಯವರನ್ನು ಪ್ರಧಾನಿಯನ್ನಾಗಿಸುವಲ್ಲಿ ಕರ್ನಾಟಕದ ದೊಡ್ಡ ಕೊಡುಗೆಯನ್ನು ಕೊಡಬಹುದು.

ಪ್ರತಿಕ್ರಯಿಸಿ.....

ಕೆ. ಧನಂಜಯ ವಾಗ್ಲೆ ,

ಪುತ್ತೂರು . ದ.ಕ.

ಏಕ್ ಭಾರತ್ ಶ್ರೇಷ್ಠ ಭಾರತ್ ಗೆ ಅಳಿಲ ಸೇವೆ

2014-03-08T10:47:00.003+05:30

ಬಿ.ಜೆ.ಪಿ. ಪ್ರಧಾನ ಅಭ್ಯರ್ಥಿ ಶ್ರೀ ನರೇಂದ್ರ ಮೋದಿಯವರ ಚಾಯ್ ಪೆ ಚರ್ಚಾ ಕಾರ್ಯಕ್ರಮ ಎಷ್ಟೊಂದು ಯಶಸ್ವಿಯಾಯಿತೆಂದರೆ ಕಾಂಗ್ರೆಸ್ ಮೈ ಪರಚಿಕೊಳ್ಳುವಂತಾಯಿತು. ಕಾಂಗ್ರೆಸ್ ಮೋದಿಯವರ ವಿರುದ್ಧ ಕೊಟ್ಟ ಹೇಳಿಕೆಯಿಂದ ಕಂಗಾಲಾದ ರಾಹುಲ್ ಗಾಂಧಿಯವರೇ ತಮ್ಮ ಕಡೆಯಿಂದ ಧರ್ಮಾರ್ಥ ಹಾಲು ವಿತರಿಸುವ ಯೋಜನೆಯೊಂದನ್ನು ಜಾರಿ ಮಾಡಬೇಕಾಗಿ ಬಂದಿರುವುದು, ಆ ಪಕ್ಷದ ಮುಖಂಡರ ಎಡಬಿಡಂಗಿತನದ ಪರಮಾವಧಿಯನ್ನು ತೋರಿಸುತ್ತದೆ. ಬಿಹಾರದ ಲಾಲೂಪ್ರಸಾದರೂ ಇದೇ ರೀತಿ ಅನುಸರಿಸುವುದನ್ನು ನೋಡಿದರೆ ಅವರಲ್ಲಿರುವ ಬೌದ್ಧಿಕ ದಿವಾಳಿತನವನ್ನು ತೋರಿಸುತ್ತದೆ. ಚಾ ಅಥವಾ ಹಾಲು ವಿತರಿಸುವುದರಿಂದ ತಮ್ಮ ಪಕ್ಷಗಳಿಗೆ ಮತಗಳು ಬರಬಹುದೆಂದು ಭಾವಿಸಿದಂತಿದೆ.

ನರೇಂದ್ರ ಮೋದಿಯವರ ಚಾಯ್ ಪೆ ಚರ್ಚಾ ಕಾರ್ಯಕ್ರಮದಲ್ಲಿ ಯುವ ಜನರ ಆಶೋತ್ತರಗಳ ಕುರಿತ ಪ್ರಶ್ನೆಗೆ ಮೋದಿಯವರು ರಾಷ್ಟ್ರೀಯ ದೂರದರ್ಶಿತ್ವ ಕುರಿತು ತಮ್ಮ ಚಿಂತನೆಗಳನ್ನು ಹಂಚಿಕೊಂಡರು. ದೇಶದ ಒಂದು ಸಾವಿರ ಸ್ಥಳಗಳಲ್ಲಿ ಏಕಕಾಲದಲ್ಲಿ ಚರ್ಚಾ ಕಾರ್ಯಕ್ರಮದಲ್ಲಿ ಲಕ್ಷಾಂತರ ಜನರು ಭಾಗವಹಿಸುವ ಜತೆಗೆ ಜನರ ನೇರ ಪ್ರಶ್ನೆಗಳಿಗೆ ಉತ್ತರಿಸಿದ ಕಾರ್ಯಕ್ರಮ ಯಶಸ್ವಿಯಾಗಿರುವುದನ್ನು ಕಂಡ ಮತ್ತಿಬ್ಬರು ನಾಯಕರ ಕಾರ್ಯಕ್ರಮ ಹಾಲು ಮತ್ತು ಚಾ ಧರ್ಮಾರ್ಥ ವಿತರಿಸುವುದಕಷ್ಟೆ ಸೀಮಿತಗೊಂಡಿತು.

ನರೇಂದ್ರ ಮೋದಿಯವರ ಹೆಸರು ಬಿ.ಜೆ.ಪಿ.ಯಿಂದ ಪ್ರಧಾನಿ ಸ್ಥಾನಕ್ಕೆ ಆಯ್ಕೆ ಆದಂದಿನಿಂದ ದಿನೇ ದಿನೇ ಜನಪ್ರಿಯವಾಗುತ್ತಿರುವುದು ಯಾರೇ ಅಲ್ಲಗಳೆದರೂ ಅವರು ಜನರ ಮನಸ್ಸನ್ನು ಗೆಲ್ಲುತ್ತಿರುವುದು ಹಗಲಿನಷ್ಟೇ ಸತ್ಯ. ಬರೇ ಜನಪ್ರಿಯರಾಗುವುದರಿಂದ ಮೋದಿಯವರು ಪ್ರಧಾನಿಯಾಗಲಾರರು.

ಸಾಮಾನ್ಯವಾಗಿ ದಕ್ಷಿಣಕನ್ನಡ ಜಿಲ್ಲೆಯಲ್ಲಿ ಮತದಾನದ ಪ್ರಮಾಣ ಶೇ.75ರಿದ 81 ಆಗಿದ್ದರೆ ಬೆಂಗಳೂರಿನಂತಹ ನಗರ ಪ್ರದೇಶದಲ್ಲಿ ಶೇ.45ರಿಂದ 46ಕ್ಕೆ ಹೆಚ್ಚಾಗಿತ್ತಿಲ್ಲ. ಈ ಏರುಪೇರುಗಳ ಕುರಿತು ಗಂಭೀರವಾಗಿ ಆಲೋಚಿಸಬೇಕಾಗಿದೆ. ಹೆಚ್ಚು ವಿದ್ಯಾವಂತರೂ, ಉದ್ಯೋಗವಂತರೂ ರಾಜಕೀಯವಾಗಿ ಹೆಚ್ಚು ವಿಶ್ಲೇಷಣೆ ಮಾಡುತ್ತಿರುವವರೂ ಮೋದಿಯವರನ್ನು ಮಾನಸಿಕವಾಗಿ ಹೆಚ್ಚು ಬೆಂಬಲಿಸುತ್ತಿರುವವರೂ ನಗರ ಪ್ರದೇಶದಲ್ಲೇ ಇದ್ದಾರೆ ಎನ್ನುವುದರಲ್ಲಿ ಸಂದೆಹವೇನೂ ಇಲ್ಲ. ಹಾಗೆಯೇ ವಿದ್ಯಾವಂತರೂ ಬುದ್ದಿವಂತರೂ ರಾಜಕೀಯದ ಕುರಿತು ಮತ್ತು ಆಡಳಿತದ ಕುರಿತು ನಕಾರಾತ್ಮಕವಾಗಿ ಮಾತನಾಡುವವರು ನಗರ ಪ್ರದೇಶದವರು. ಇವರಲ್ಲಿ ಹೆಚ್ಚಿನವರು ತಮ್ಮ ಮತ್ತು ಮನೆಯವರ ಹೆಸರನ್ನು ಮತದಾರರ ಪಟ್ಟಿಯಲ್ಲಿ ನೊಂದಾಯಿಸಿಕೊಂಡಿರುವುದೇ ಇಲ್ಲ. ನೊಂದಾಯಿಸಿಕೊಂಡರೂ ಮತದಾನದ ದಿನ ಮತ ಹಾಕಲು ಹೋಗುವುದೂ ಕಡಿಮೆಯೇ. ಏನಾದರೂ ನೆಪದಿಂದಲೋ, ಉದಾಸಿನತೆಯಿಂದಲೋ ಮತದಾನಕ್ಕೆ ಹೋಗುವುದೇ ಇಲ್ಲ. ಇನ್ನು ಕೆಲವರು ಯಾರು ಬಂದರೆ ಏನಂತೆ ನಾವು ರಾಗಿ ಬೀಸುವುದು ತಪ್ಪುತ್ತದೆಯೇ? ಎನ್ನುವ ಉದಾಸೀನ ಭಾವನೆ. ಇಂತಹವರೆಲ್ಲರನ್ನೂ ಮುಂದಿನ ಚುನಾವಣೆಯಲ್ಲಿ ನಿದ್ರೆಯಿಂದ ಎಬ್ಬಿಸಲೇ ಬೇಕಾಗಿದೆ.

ಕಾಲ ಇನ್ನೂ ಮಿಂಚಿಲ್ಲ. ಮೋದಿಯವರ ಪರ ಮಾತನಾಡುವವರು, ಅವರ ಪಕ್ಷವನ್ನು ಬೆಂಬಲಿಸುವವರು ಮಾತ್ರವಲ್ಲದೆ ದೇಶದ ಏಕತೆ, ಅಖಂಡತೆ , ಸಮಗ್ರತೆ ಮತ್ತು ದೇಶವನ್ನು ವಿನಾಶದ ಅಂಚಿನಿಂದ ಈಚೆಗೆ ತರಬೇಕೆಂದು ಬಯಸುವವರಲ್ಲಿ ಒಂದು ಕಳಕಳಿಯ ಮನವಿ-- ಚುನಾವಣೆಗೆ ಇನ್ನೂ ದಿನಗಳ ದೀರ್ಘಾವಧಿ ಇದೆ. ಈ ಮಧ್ಯೆ ತಮ್ಮ ಮತ್ತು ಮನೆಯವರ ಹೆಸರನ್ನು ಮತದಾರರ ಪಟ್ಟಿಯಲ್ಲಿ ಸೇರಿಸಲು ಅವಕಾಶ ಇದ್ದೇ ಇದೆ. ಇದರ ಸದುಪಯೋಗ ಜರೂರಾಗಿ ಮಾಡಿಕೊಳ್ಳಬೇಕಾಗಿದೆ. ಮುಂದಿನ ಚುನಾವಣೆ ಭವಿಷ್ಯದಲ್ಲಿ ಬದಲಾವಣೆಯ ಬಹು ದೊಡ್ಡ ಅವಕಾಶವಾಗಿದೆ. ಇದರಲ್ಲಿ ನಾವೇನಾದರು ಎಡವಿದರೆ ಮುಂದೆ ಚಿಂತಿಸುವ ಅವಕಾಶ ಕಡಿಮೆಯಾಗುತ್ತದೆ ಎನ್ನುವುದನ್ನು ಮರೆಯಬಾರದು.

ಒಂದು ಅನುಭವವನ್ನು ಹಂಚಿಕೊಳ್ಳಬೇಕೆಂದೆನಿಸುತ್ತದೆ. ದಕ್ಷಿಣಕನ್ನಡದಲ್ಲಿ ಸುಳ್ಯ ಹೊರತು ಪಡಿಸಿ ಮತ್ತೆಲ್ಲಾ ಸ್ಥಳೀಯ ಸಂಸ್ಥೆಗಳು ಕಾಂಗ್ರೆಸ್ ಪಾಲಾಗಿ ಫಲಿತಾಂಶ ಪ್ರಕಟವಾಗುತ್ತಿತ್ತು, ಅದೇ ಸಮಯಕ್ಕೆ ನಾನು ನನ್ನ ಸ್ವಂತ ಕೆಲಸಕ್ಕೆ ಪುತ್ತೂರು ತಾಲೂಕು ಆಫೀಸಿನಲ್ಲಿ ಕುಳಿತಿದ್ದೆ. ಅದೇ ಸಮಯದಲ್ಲಿ ಕಾಂಗ್ರೆಸ್ ಕಾರ್ಯಕರ್ತರೊಬ್ಬರು ಕೆಲಸದ ನಿಮಿತ್ತ ಬಂದವರು ನನ್ನ ಬಳಿಯೇ ಕುಳಿತರು. ಶಕುಂತಲಾ ಶೆಟ್ಟಿಯವರು ಅದಾಗಲೇ ಕಾಂಗ್ರೆಸ್ ಸೇರಿ ಸ್ವಲ್ಪ ಸಮಯವಾಗಿತ್ತಷ್ಟೆ, ನನ್ನ ಪಕ್ಕದಲ್ಲಿದ್ದ ಕಾಂಗ್ರೆಸ್ ಕಾರ್ಯಕರ್ತರಿಗೆ ಅದೇ ಹೊತ್ತಿಗೆ ಫೋನ್ ಕರೆ ಒಂದು ಬಂದಿತ್ತು. ಪುತ್ತೂರಿನ ಫಲಿತಾಂಶದದ ಕುರಿತು ಮತ್ತು ಇಡೀ ಜಿಲ್ಲೆಯ ಕುರಿತು ಮಾತನಾಡಿ ಅವರು ಆ ಕ್ಷಣದಿಂದಲೇ ಮುಂದಿನ ವಿಧಾನಸಭಾ ಚುನಾವಣೆಯ ಕುರಿತು ಪ್ರಚಾರಕ್ಕೆ ತೊಡಗಿಯೇ ಬಿಟ್ಟರು. ಅವರು ಮಲಯಾಳಿ ಭಾಷಿಕರಾಗಿದ್ದು ಅದೇ ಭಾಷೆಯಲ್ಲಿ ಹೇಳುತ್ತಿದ್ದರು. ನಿಘ್ಗಳ್ ಇಪ್ಪೊನ್ನೇ ತೊಡಗನೋ ಶಕು ಅಕ್ಕ ಬನ್ ಕಾಂಗ್ರೆಸ್ ಜೈಯಿಚ್ಚು . (ಶಕುಂತಲಾ ಶೆಟ್ಟಿ ಬಂದರು ಕಾಂಗ್ರೆಸ್ ಗೆದ್ದಿತು) . ನೀ ಪತ್ ಆಳಕ್ ಪರೆಯೋನೋ ಆ ಪತ್ತಾಳ್ ಪತ್ತಾ ಳ್ಕ್ ಪರೆಯೋನೋ ಇದೆ ಮಾತನ್ನು ಕನಿಷ್ಠ ಹತ್ತು ಸಲವಾದರೂ ಅವರು ಹೇಳಿದ್ದರು. ನನಗನಿಸಿತು ಕೇವಲ ಫೋನಿನ ಮುಖಾಂತರ ಕನಿಷ್ಠ 250 ಮನೆಗಳಿಗೆ ಸಂದೇಶ ತಲುಪಿಸುವ ಕೆಲಸ ಆಗಿಂದಲೇ ಅವರು ಮಾಡಿದ್ದರು ಎಂದು. ಪುತ್ತೂರು ಕಾಂಗ್ರೆಸ್ ಗೆಲುವಿನಲ್ಲಿ ಈ ರೀತಿಯ ಪ್ರಚಾರ ಅತ್ಯಂತ ಪ್ರಭಾವಿಯಾಗಿ ಕೆಲಸ ಮಾಡಿದೆ ಎಂದರೆ ಅತಿಶಯೋಕ್ತಿ ಆಗಲಾರದು.

ಮೇಲಿನ ಉದಾಹರಣೆ ಗಮನಿಸಿದರೆ ನಮ್ಮೆಲ್ಲರ ಉಳಿಕೆ ಸಮಯವನ್ನು ಅಂತರ್ ಜಾಲದ ಮುಖಾಂತರ, ಮೊಬೈಲ್ ಮುಖಾಂತರ, ನಮ್ಮ ನಮ್ಮ ಸಂಬಂಧಿಕರ ಮುಖಾಂತರ, ನಮ್ಮ ಗೆಳೆಯರ ಮುಖಾಂತರ ಒಬ್ಬೊಬ್ಬರಲ್ಲೂ ಮೋದಿಯವರ ಕುರಿತು ಮಾತನಾಡುವ ಮುಖಾಂತರ ಮೇಲಿನ 10+10 ಅಭಿಯಾನದ ಪ್ರಯತ್ನ ಜತೆಗೆ ಮತದಾನದಂದು ಒಂದೊಂದು ಮತವನ್ನು ಮೋದಿಯವರ ಕಮಲ ಗುರುತಿಗೆ ಹಾಕುವ ಮತ್ತು ಹಾಕಿಸುವ ಮುಖಾಂತರ ಏಕ ಭಾರತ್ ಶ್ರೇಷ್ಠ ಭಾರತ್ ಗೆ ’’ನಮ್ಮ ಒಂದು ಸಣ್ಣ ಅಳಿಲ ಸೇವೆ ‘’ ಇರುವಂತೆ ನೋಡಿಕೊಳ್ಳೋಣ. ಮೋದಿಯವರ ಹೆಲ್ಪ್ ಲೈನ್ ಉಪಯೋಗವನ್ನು ಪಡೆಯಬಹುದಾಗಿದೆ. 07820078200 –

ಪ್ರತಿಕ್ರಯಿಸಿ

ಕೆ. ಧನಂಜಯ ವಾಗ್ಲೆ ,

ಪುತ್ತೂರು . ದ.ಕ.

ತೃತೀಯ ರಂಗವೆಂಬ ಬಲೂನು

2014-02-18T21:10:00.002+05:30

ನಮ್ಮ ಕಡೆ ಹಳ್ಳಿಯಲ್ಲಿ ಗಾದೆಯ ಮಾತೊಂದಿದೆ "ಸೇರ್ ಟ್ ಕಪ್ಪೆ ದಿಂಜಾಯಿಲೆಕ್ಕೊ" ಅಂತ. ಸೇರ್ ಎಂದರೆ ಭತ್ತ ಅಳೆಯುವ ಮಾಪಕ. ಅದರಲ್ಲಿ ಕಪ್ಪೆಗಳನ್ನು ಅಳೆಯುವುದೆಂದರೆ ಒಂದು ಭಗೀರಥ ಪ್ರಯತ್ನವೇ ಸರಿ . ಯಾಕೆಂದರೆ ಒಂದು ಕಪ್ಪೆಯನ್ನು ಹಿಡಿದು ಸೇರಿಗೆ ಹಾಕಿ ಇನ್ನೊಂದು ಕಪ್ಪೆಯನ್ನು ಹಿಡಿದು ಹಾಕುವುದರೊಳಗಾಗಿ ಕಪ್ಪೆ ಸೇರಿನಿಂದ ಹಾರಿ ನೀರು ಸೇರುತ್ತಿತ್ತು ಹಾಗೆಯೇ ಸೇರು ತುಂಬಿಸಲು ಸಾಧ್ಯವಾಗುತ್ತಿರಲಿಲ್ಲ.

ಪ್ರತೀ ಚುನಾವಣಾ ಸಮಯದಲ್ಲಿ ಹಳೆಯ ರಾಜಕಾರಣಿಗಳನ್ನು ಒಂದೆಡೆ ಸೇರಿಸುವ ಪ್ರಯತ್ನಗಳು ಲೋಕನಾಯಕ ಜಯಪ್ರಕಾಶ ನಾರಾಯಣರ ಜನಾಂದೋಲನದ ನಂತರದ ದಿನಗಳಲ್ಲಿ ರಾಷ್ಟ್ರೀಯ ರಾಜಕಾರಣದಲ್ಲಿ ಬೇಕಾದಷ್ಟು ಸಲ ಬಂದು ಒಂದುಗೂಡಿ ಸೇರಿನಲ್ಲಿ ಕಪ್ಪೆ ತುಂಬಿಸಿದಂತೆ ಕೊನೆಗೆ ಎಲ್ಲರೂ ತಮ್ಮ ತಮ್ಮ ಅಸ್ತಿತ್ವಕ್ಕಾಗಿ ಪ್ರಯತ್ನಪಡುವ ತೀರಾ ಹಳೆಯ ತಲೆಗಳಲ್ಲಿ ಇನ್ನೂ ಜೀವಂತವಿರುವ ಒಂದು ರಾಜಕೀಯ ವ್ಯಾಧಿಯಾಗಿದೆ. ಅಂತಹ ಒಂದು ಪ್ರಯತ್ನ ಮುಂದಿನ ಚುನಾವಣೆಯಲ್ಲಿಯೂ ನಡೆಯುತ್ತಿರುವುದನ್ನು ಕಾಣುತ್ತೇವೆ. ಅವರ ಒಂದು ಘೋಷಣೆಯೆಂದರೆ ಪ್ರಜಾಪ್ರಭುತ್ವವಾದಿ ಜಾತ್ಯಾತೀತ ಶಕ್ತಿಗಳ ಒಂದುಗೂಡುವಿಕೆಗೆ ತಾವೇ ಅದರ ಗುತ್ತಿಗೆದಾರರಂತೆ ವರ್ತಿಸುವುದು.

ಪ್ರಧಾನಿ ಸ್ಥಾನಕ್ಕೆ ಕರ್ನಾಟಕದಿಂದ ಮಾಜಿ ಪ್ರಧಾನಿಗಳು ಒಬ್ಬರಾದರೆ , ಬಹುಷ: ತೃತೀಯ ರಂಗದಲ್ಲಿ ಅತೀ ಹೆಚ್ಚು ಸ್ಥಾನ ಗಳಿಸುವ ಜಯಲತಾ ಅವರೂ ತುಂಬಾ ಆಸೆಯಿಂದ ಇದ್ದಾರೆ. ಬಿ ಜೆ ಪಿ ಯಿಂದ ಪ್ರಧಾನಿ ಗಾದಿಗೆ ಮೋದಿಯವರನ್ನು ಆಯ್ಕೆ ಮಾಡಿದಾಗ ಉರಿದುಬಿದ್ದು ಸದ್ಯಕ್ಕೆ ಮೈ ಪರಚಿಕೊಳ್ಳುತ್ತಿರುವ ಬಿಹಾರದ ನಿತೀಶ್ ಕುಮಾರ್ ರೂ ಬಹಳ ಹಿಂದೆಯೇ ಪ್ರಧಾನಿ ಗಾದಿಗೆ ಕಣ್ಣಿಟ್ಟವರು. ಉತ್ತರ ಪ್ರದೇಶದ ಮುಲಾಯಂ ಸಿಂಗರಂತು ಪ್ರಧಾನಿ ಸ್ಥಾನದ ಕುರಿತು ಚುನಾವಣೆ ಬಂದಾಗಲೆಲ್ಲ ಕನವರಿಸುತ್ತಲೇ ಇರುತ್ತಾರೆ. ಉತ್ತರ ಪ್ರದೇಶದ ಮಾಯವತಿಯವರೂ ಪ್ರಧಾನಿ ಗಾದಿಗೆಅರ್ಹತೆ ಇಲ್ಲದವರೆನೂ ಅಲ್ಲ ಪಶ್ಚಿಮ ಬಂಗಾಳದ ಮಮತಾ ದಿದಿಯವರು ಈ ತನಕ ಪ್ರಧಾನಿಯಾಗುವ ಆಶಯ ವ್ಯಕ್ತಪಡಿಸಲಿಲ್ಲವೆಂದೆನಿಸುತ್ತದೆ. ಎಡ ಪಕ್ಷಗಳ ನಾಯಕರು ಮಹಾನ್ ಬುದ್ದಿವಂತರು. ಅವರು ಅಧಿಕಾರಕ್ಕೆ ಹಾತೊರೆಯುವುದಿಲ್ಲ. ಅಧಿಕಾರದಲ್ಲಿ ಇರುವವರನ್ನು ತಮಗೆ ಬೇಕಾದಂತೆ ಕುಣಿಸಿ ತಮ್ಮ ಬೇಳೆ ಬೇಯಿಸಿಕೊಳ್ಳು ವುದರಲ್ಲಿ ನಿಪುಣರು. ತೃತೀಯ ರಂಗದ ಪಕ್ಷಗಳ ಹೊಂದಾಣಿಕೆಯಂತೂ ಅರ್ಥವಾಗದ ವಿಷಯ ಎ.ಐ.ಎ.ಡಿ.ಯಂ.ಕೆ. ಇರುವಲ್ಲಿ ಡಿ.ಯಂ.ಕೆ. ಇರಲಾರದು. ಬಹುಜನ ಸಮಾಜವಾದಿ ಪಕ್ಷ ಇರುವಲ್ಲಿ ಸಮಾಜವಾದಿ ಪಕ್ಷ ಬರಲಾರದು. ಕಮ್ಯೂನಿಷ್ಟರು ಇರುವಲ್ಲಿ , ಮಮತಾದಿದಿಯವರು ಬರಲಾರರು. ಹೀಗೆ ಪರಸ್ಪರ ವಿರೋಧಾಭಾಸಗಳಿಂದ ಕೂಡಿದ ಪಕ್ಷಗಳು ಒಂದೇ ಸೂರಿನಡಿ ಹೇಗೆ ಒಂದುಗೂಡಿ ದೇಶದ ಜನರಿಗೆ ಉತ್ತರದಾಯಿತ್ವವಾಗಬಲ್ಲುದೋ.. ಕಾಲವೇ ಉತ್ತರಿಸಬೇಕು. ಚಂದ್ರ ಬಾಬು ನಾಯ್ಡು ತಮ್ಮ ಪಕ್ಷದ ಲಾಭನಷ್ಟದತ್ತ ಗಮನಿಸಬಹುದು. ಮಿಕ್ಕ ಪಕ್ಷಗಳ ಸ್ಥಿತಿಯೂ ಅದೇ ತರಹ ತಮ್ಮ ಬೇಳೆ ಬೇಯಿಸಬಹುದು. ತೃತೀಯ ರಂಗ ನಡೆದ ರೀತಿ ನೋಡಿದರೆ ಭವಿಷ್ಯವಂತೂ ಇಲ್ಲವೆ ಇಲ್ಲ.

ಬಿ.ಜೆ.ಪಿ ಎಂದರೆ ಮತೀಯವಾದಿ, ಕೋಮುವಾದಿ ಪಕ್ಷ. ಅಧಿಕಾರಕ್ಕೆ ಬರುವುದನ್ನು ತಪ್ಪಿಸಲು ಮತ್ತು ರಾಜಕೀಯವಾಗಿ ಅವರನ್ನು ಹೊರಗಿಡುವ ಒಂದೇ ಕಾರ್ಯಸೂಚಿಯಡಿ ಒಂದುಗೂಡುವ ಇವರು ಚುನಾವಣೆಯ ನಂತರ ತಮಗೆ ಸಿಕ್ಕಿದ ಸ್ಥಾನಗಳ ಮೇಲೆ ಪ್ರಧಾನಿ ಗದ್ದುಗೆಗೆ ಅರ್ಹತೆಯ ಆಧಾರದಲ್ಲಿ ಕಚ್ಚಾಡಿ ದೇಶದ ಜನತೆಗೆ ಮನರಂಜನೆ ಕೊಡುವುದರಲ್ಲಿ ಯಶಸ್ವಿಯಾಗುತ್ತಾರೆ.

ಒಂದೊಮ್ಮೆ ಸಂಪೂರ್ಣ ನಾಶವಾಗಿದ್ದ ಜಪಾನ್ ಅತೀ ಸಣ್ಣ ಅವಧಿಯಲ್ಲಿ ಎಷ್ಟೊಂದು ಅಭಿವೃದ್ಧಿ ಕಂಡಿದೆ. ಸ್ವಾತಂತ್ರ್ಯ ನಂತರ ದೀರ್ಘಾವಧಿ ನಮ್ಮನ್ನಾಳಿದ ಕಾಂಗ್ರೆಸ್ ಗೆ ನಾಚಿಕೆಯಾಗಬೇಕು ಯಾಕೆಂದರೆ 66 ವರ್ಷಗಳನಂತರವೂ ರಾಜೀವ್ ಗಾಂಧಿ ಆವಾಜ್ ಯೋಜನೆಯಿಂದ ಬಡ ಜನತೆಗೆ ಅರಮನೆಯಂತಹ ಮನೆಗಳನ್ನು ತೋರಿಸಿ ಮೋಸ ಮಾಡುವ ಜಾಹಿರಾತುಗಳಿಂದ ನಾವು ಪ್ರೇರಿತರಾದರೆ ನಿಜವಾಗಿ ನಾವು ಮುಂದೊಂದು ದಿನ ಪರಿತಪಿಸಬೇಕಾಗಬಹುದು.

ಭಾರತ ನೂರಾರು ಸಮಸ್ಯೆಗಳಿಂದ ಬೇಯುತ್ತಿದ್ದರೂ ಗುಜರಾತಿನ ಮರುಭೂಮಿಯಲ್ಲಿ ಬಂಗಾರದ ಬೆಳೆ ಬೆಳೆಸಿದಂತಹ ಗುಜರಾತ್ ನ್ನು ಇತರ ರಾಜ್ಯಗಳಿಗಿಂತ ಉತ್ತಮ ಪ್ರಗತಿಯತ್ತ ಕೊಂಡೊಯ್ಯುತ್ತಿರುವ ಶ್ರೀ ನರೇಂದ್ರ ಮೋದಿಯವರನ್ನು ಬೆಂಬಲಿಸುವ ಮೂಲಕ ಏಕ್ ಭಾರತ್ ಶ್ರೇಷ್ಠ ಭಾರತ್ ಎಂಬ ಘೋಷ ವಾಕ್ಯದಡಿ ಮುಂದಿನ ಚುನಾವಣೆ ಒಂದು ನಿರ್ಣಾಯಕ ಘಟ್ಟಕ್ಕೆ ತರುವಲ್ಲಿ ಪ್ರಜ್ಞಾವಂತರು ಪ್ರಯತ್ನಿಸಬೇಕಾಗಿದೆ.

ಧನಂಜಯ ವಾಗ್ಲೆ

ಪುತ್ತೂರು

ಆಮ್ ಆದ್ಮಿಯ ನಡೆ ಏನು?

2014-01-27T19:33:00.001+05:30

ಹೊಸ ವರ್ಷದ ಆದಿಯಲ್ಲಿ ದೆಹಲಿಯ ಆಮ್ ಆದ್ಮಿಗೆ ಸ್ವಾತಂತ್ರ್ಯಗಳಿಸಿದಷ್ಟೇ ಸಂತೋಷ , ಯಾಕೆಂದರೆ ಎಎಪಿಯ ಕೇಜ್ರಿವಾಲ್ ರ ನೇತೃತ್ವದ ಸರಕಾರದ ಸ್ಥಾಪನೆ. ಕರ್ನಾಟಕದಲ್ಲಿ ಸಿದ್ಧರಾಮಯ್ಯ ನೇತೃತ್ವದ ಸರಕಾರ ಬಂದ ದಿನವೇ ೧ರೂ.ಗೆ ೧ಕೆ.ಜಿ.ಅಕ್ಕಿ ನೀಡುವ ಘೋಷಣೆ ಯಂತೆ, ಕೇಜ್ರಿವಾಲರು ಅಧಿಕಾರ ವಹಿಸಿದ ಕೂಡಲೇ ದೆಹಲಿಯ ಆಮ್ ಆದ್ಮಿಗೆ ೨ ಕೊಡುಗೆಗಳನ್ನು ಘೋಷಿಸಿದರು. ೧) ಒಂದು ಮನೆಯ ಒಂದು ಮೀಟರ್ ಗೆ ದಿನಕ್ಕೆ ೬೨೦ ಲೀ. ನಂತೆ ತಿಂಗಳಿಗೆ ೨೦,೦೦೦ ಲೀ. ನೀರಿನ ಧರ್ಮಾರ್ಥ ಕೊಡುಗೆ. ೨) ತಿಂಗಳಿಗೆ ೪೦೦ ಯೂನಿಟ್ ವಿದ್ಯುತ್ ಬಳಕೆಗೆ ಅರ್ಧದಷ್ಟು ಸಹಾಯಧನ. ಇವೆರಡೂ ಪ್ರಯೋಗಾರ್ಥ ಮೂರು ತಿಂಗಳತನಕ ಮಾತ್ರ.

ಇಪ್ಪತ್ತು ಸಾವಿರ ಲೀ.ಗಿಂತ ಒಂದು ಲೀ.ಜಾಸ್ತಿಯಾದರೂ ಎಲ್ಲಾ ಬಳಕೆ ನೀರಿಗೂ ಶೇ. ೧೦ ಜಾಸ್ತಿ ವಸೂಲಿಯಾಗುತ್ತದೆ. ಅಂದರೆ ಒಂದು ಮನೆಗೆ ಒಂದು ಮೀಟರ್ ಗೆ ಅಂದರೆ ಒಂದೇ ಮೀಟರ್ ನಲ್ಲಿ ೩-೪ಮನೆಗಳಿದ್ದರೆ, ಅವರು ಹಿಂದಿಗಿಂತ ೨ಪಟ್ಟು ಹೆಚ್ಚುವರಿ ಹಣ ಕಟ್ಟಲೇಬೇಕಾಗುತ್ತದೆ. ಇನ್ನು ಕೊಳೆಗೇರಿಯಲ್ಲಿ ವಾಸಿಸುವ ನಿಜವಾದ ಆಮ್ ಆದ್ಮಿಗೆ ಮೀಟರೂ ಇಲ್ಲ, ನೀರೂ ಇಲ್ಲ. ಹಾಗೆಯೇ ವಿದ್ಯುತ್ ನ ಕಥೆಯೂ ಇದಕ್ಕಿಂತ ಭಿನ್ನವೇನೂ ಇಲ್ಲ. ದೆಹಲಿಯ ಆಮ್ ಆದ್ಮಿಗೆ ಈ ತಿಂಗಳ ಬಿಲ್ ಬರುವಾಗ ಅರಿವಾಗಬಹುದೇನೋ?

ಕಾಂಗ್ರೆಸ್ ಮತ್ತು ಬಿ.ಜೆ.ಪಿ ಒಂದೇ ನಾಣ್ಯದ ಎರಡು ಮುಖಗಳೆಂದು ಹೇಳುತ್ತಿರುವ ಎಎಪಿ ಭೃಷ್ಟಾಚಾರದಲ್ಲಿ ತುತ್ತತುದಿಯಲ್ಲಿರುವ ಕಾಂಗೈನ ಬೆಂಬಲ ಪಡೆದು ಅಧಿಕಾರಕ್ಕೆ ಬಂದಿರುವುದು ಜನರೆದುರು ಹೊಸ ತಂತ್ರಗಾರಿಕೆಯ ಮುಖವಾಡ ಧರಿಸಿ ಮತ ಹಾಕಿದವರಲ್ಲಿ ಅಧಿಕಾರ ಬೇಕೇ, ಬೇಡವೇ, ಎಂಬ ಪ್ರಶ್ನೆ ಕೇಳಿ ವೋಟಿಂಗ್ ಮಾಡಿಸಿರುವುದು ಎಎಪಿಯ ಅಧಿಕಾರ ದಾಹ ಎಷ್ಟಿದೆ ಎಂಬುದನ್ನು ತೋರಿಸುವುದರ ಜೊತೆಗೆ ಪ್ರಥಮ ನೈತಿಕ ಸೋಲನ್ನು ಜನರೆದುರು ತೆರೆದಿಟ್ಟಿದೆ.

ಅಧಿಕಾರಕ್ಕೆ ಬಂದ ಹದಿನೈದೇ ದಿನಗಳಲ್ಲಿ ಜನಲೋಕಪಾಲ್ ನೇಮಕ ಮಾಡುವ ಮಾತು ಕೊಟ್ಟ ಕೇಜ್ರಿವಾಲ್ ರು ಈಗ ಇನ್ನಷ್ಟು ಕಾಲಾವಕಾಶ ಕೇಳಿದ್ದಾರೆ. ಸಂವಿಧಾನದ ಮೇಲೆ ದೇವರ ಹೆಸರಲ್ಲಿ ಪ್ರಮಾಣವಚನ ಸ್ವೀಕರಿಸಿ ಕೇವಲ ಹದಿನೆಂಟು ದಿನಗಳಲ್ಲಿ ದೆಹಲಿಯ ಕಾನೂನು ಪಾಲಿಸಬೇಕಾದ ಕಾನೂನು ಸಚಿವರೇ, ಪೊಲೀಸರೊಂದಿಗೆ ಬೀದಿಕಾಳಗದಲ್ಲಿ ನಿರತರಾಗಿರುವುದನ್ನು ಮಾಧ್ಯಮಗಳಲ್ಲಿ ಕಂಡಿದ್ದೇವೆ. ಪೋಲೀಸರನ್ನು ವಜಾಗೊಳಿಸಲು ಆಗ್ರಹಿಸಿ ದೆಹಲಿ ಸರಕಾರವೇ ಬೀದಿಯಲ್ಲಿ ನಿಂತು, ಸಾಂವಿಧಾನಿಕ ಕರ್ತವ್ಯಗಳನ್ನೆಲ್ಲ ಮರೆತು ಗಣರಾಜ್ಯೋತ್ಸವದ ಕುರಿತು ಕೇವಲವಾದ ಮಾತುಗಳನ್ನಾಡಿ ದೆಹಲಿಯಲ್ಲಿ ೨ ದಿನಗಳ ಕಾಲ ನಡೆದ ಅರಾಜಕ ಸ್ಥಿತಿಯನ್ನು ನೋಡಿದರೆ ಎಎಪಿ ಯ ಪೊರಕೆ, ಭೃಷ್ಟಾಚಾರವನ್ನು ಗುಡಿಸಿ ಸ್ವಚ್ಛ ಮಾಡುವ ಬದಲು ಅಕ್ಷರಶ: ಸಂವಿಧಾನವನ್ನೇ ಪೊರಕೆಯಿಂದ ಗುಡಿಸುವುದನ್ನು ನೋಡಿದರೆ ಎಎಪಿ ಯ ಸೈದ್ಧಾಂತಿಕ ನಡೆಯ ಬಗ್ಗೆ ಆಮ್ ಆದ್ಮಿಗಳು ಗಂಭೀರವಾಗಿ ಚಿಂತನೆ ನಡೆಸಬೇಕಾಗಿದೆ.

ಎಎಪಿ ಒಂದು ರಾಜಕೀಯ ಪಕ್ಷವಲ್ಲ. ಬದಲಾಗಿ ಜನಸಾಮಾನ್ಯರಲ್ಲಿ ಸಾಮಾನ್ಯ ಜನರ ಒಂದು ಸಂಘಟನೆ. ನಮ್ಮಲ್ಲಿ ಯಾರೂ ನಾಯಕರಿಲ್ಲ, ಎಲ್ಲವೂ ಜನರಿಂದ ಜನರಿಗಾಗಿ ಜನರಿಗೋಸ್ಕರ. ಈಗಿನ ಎಲ್ಲ ವ್ಯವಸ್ಥೆಗಳನ್ನು ಬದಲಿಸಿ ಒಂದು ಹೊಸರೀತಿಯ ಆಡಳಿತ ನೀಡಲು ಹೊರಟಿರುವ ಎಎಪಿ ಎಂಬ ಸಂಘಟನೆ.

ಸ್ವಾತಂತ್ರ್ಯ ಹೋರಾಟಗಾರರು ಅತ್ಯಂತ ಸರಳರೂ, ಧ್ಯೇಯವಾದಿಗಳೂ, ನೈಜ ಜನಪರ ಕಾಳಜಿಯುಳ್ಳವರೂ, ನಿಷ್ಕಲ್ಮಶವಾದಿಯಾಗಿರುವ ಅಣ್ಣಹಜಾರೆಯವರ ಭೃಷ್ಟಾಚಾರ ವಿರೋಧಿ ಜನಾಂದೋಲನದ ಮಧ್ಯದಿಂದ ಕೇಜ್ರಿವಾಲ್ ಎಂಬ ಮಹತ್ವಾಕಾಂಕ್ಷಿ ಎದ್ದು ಬಂದು ಇಡೀ ಜನಾಂದೋಲನದ ಹಿಡಿತ ಸಾಧಿಸಿ ಅಣ್ಣಾಜಿಯವರ ಅಭಿಪ್ರಾಯವನ್ನು ಲೆಕ್ಕಿಸದೆ ರಾಜಕೀಯ ಸಂಘಟನೆಯಿಂದ ಆಂದೋಲನದ ಸಂಪೂರ್ಣ ಲಾಭ ಪಡೆಯಲು ಭೃಷ್ಟಾಚಾರ ವನ್ನು ಜಾಡಿಸಲು ಒಂದು ಪೊರಕೆ, ಮಹಾತ್ಮಗಾಂಧೀಜಿಯವರನ್ನು ಬಳಸಲು ಆಮ್ ಆದ್ಮಿ ಎಂಬ ಹೆಸರಿನ ಬಿಳಿಯ ಟೋಪಿ, ನಾವೆಲ್ಲಾ ಸಾಮಾನ್ಯ ಜನರಂತೆ ಸೈಕಲ್, ಆಟೋ, ರೈಲುಗಳಲ್ಲಿ ಓಡಾಡುವ ಆಮ್ ಆದ್ಮಿ ಎಂಬ ಹೊಸ ಆಸೆಯ ಭರವಸೆಯನ್ನು ಜನರಲ್ಲಿ ಮಾತಿನ ಮೋಡಿಯಲ್ಲಿ ಹುಟ್ಟಿಸಿ ಓಟು ಗಿಟ್ಟಿಸಿ ಆಡಳಿತಕ್ಕೆ ಬಂದ ಒಂದೊಂದು ದಿನವೂ ಒಂದೊಂದು ರೀತಿಯಲ್ಲಿ ಆಮ್ ಆದ್ಮಿ ಎಂಬ ಕೇಜ್ರಿವಾಲ್ ರ ಹೊರ ಮೈ ಪೊರೆ ಕಳಚಿ ಬೆತ್ತಲಾಗುತ್ತಿರುವುದನ್ನು ನೋಡಿ ಕೆಲವು ಒಳ್ಳೆಯ ಜನರು ಎಎಪಿ ಯಿಂದ ದೂರವಾಗುತ್ತಿರುವುದು ಅಚ್ಚರಿಪಡುವಂಥದ್ದೇನೂ ಇಲ್ಲ.

ಗಣರಾಜ್ಯೋತ್ಸವ ಎಂದರೆ ಬೂಟಾಟಿಕೆಯ ಆಡಂಬರದ ಆಚರಣೆಯೇ, ಹೊರತು ಅದು ಆಮ್ ಆದ್ಮಿಗೆ ನಿಜವಾದ ಸ್ವಾತಂತ್ರ್ಯ ಕೊಟ್ಟಿದೆಯೇ? ಎಂದು ಟಿ.ವಿ.ಚಾನಲ್ ಗಳ ಸ್ಟುಡಿಯೋದಲ್ಲಿ ಕುಳಿತು ಚರ್ಚಿಸುವ ಎಎಪಿ ಕಾರ್ಯಕರ್ತರು ಪೊರಕೆಯಿಂದ ಈಗಿನ ಸಾಂವಿಧಾನಿಕ ವ್ಯವಸ್ಥೆಯನ್ನು ಜಾಡಿಸಿ ಒಗೆಯುವ ಮಾತುಗಳನ್ನಾಡುತ್ತಿರುವ ಇವರು ಅರಾಜಕತೆಯನ್ನೇ ಪ್ರಚೋದಿಸುತ್ತಿರುವಂತೆ ಕಾಣುತ್ತಿದೆ.

ಆಪ್ ನ ಕೆಲವು ಮುಖಂಡರು ಕಾಶ್ಮೀರದಲ್ಲಿರುವ ಸೈನ್ಯವನ್ನು ವಾಪಾಸು ಕರೆತರುವ ಕನಸು ಕಾಣುತ್ತಿದ್ದರೆ ಇನ್ನು ಕೆಲವರು ಛತ್ತೀಸ್ ಘಡದಲ್ಲಿನ ಕೆಂಪು ಉಗ್ರರಾದ ಮಾವೋವಾದಿಗಳನ್ನು ಬೆಂಬಲಿಸುತ್ತಿದ್ದಾರೆ. ಇವರು ನಿಜವಾಗಿ ಭಾರತಕ್ಕೆ ಕೊಡುವ ಪರ್ಯಾಯ ವ್ಯವಸ್ಥೆ ಏನು ಎಂಬುದು ಇದುವರೆಗೂ ಸ್ಪಷ್ಟವಾಗಿಲ್ಲ. ದೆಹಲಿಯಲ್ಲಿನ ಎಎಪಿ ಯ ನಡೆ ನಿಜವಾಗಿಯೂ ಆತಂಕಕಾರಿಯಾಗಿದೆ. ಮಾವೋವಾದಿಗಳು ಆಪ್ ನ ಗುಪ್ತ ವ್ಯವಸ್ಥೆಯ ಮುಖಾಂತರ ಭಾರತೀಯ ಸಾಂವಿಧಾನಿಕ ವ್ಯವಸ್ಥೆಯನ್ನೇ ಬುಡಮೇಲು ಮಾಡುವ ಪ್ರಯತ್ನಗಳು ನಡೆಯುತ್ತಿವೆಯೇ? ಸಂಶಯ ಮೂಡುತ್ತಿದೆ.

ಸ್ವಾತಂತ್ರ್ಯಾನಂತರದ ಸಾಂವಿಧಾನಿಕ ವ್ಯವಸ್ಥೆಯೇ ಸರಿಯಿಲ್ಲ. ಎಲ್ಲವೂ ನಾವಂದುಕೊಂಡಂತೆ ಆಗಬೇಕೆಂದು ಎಎಪಿ ಬಯಸುವುದಾದರೆ ನೀವು ತರುವ ಬದಲಾವಣೆ ಯಾವ ರೀತಿ ಇರುತ್ತದೆ? ಮಾವೋ ಲೆನಿನ್ ರವರ ರೀತಿಯ ಆಡಳಿತವೇ? ಹಿಟ್ಲರ್ ನ ಸರ್ವಾಧಿಕಾರ ವ್ಯವಸ್ಥೆಯೇ ? ಅಥವಾ ದ್ವಿಪಕ್ಷೀಯ ವ್ಯವಸ್ಥೆಯೇ? ರಾಷ್ಟ್ರದ ಜನರಿಗೆ ಎಎಪಿ ಸ್ಪಷ್ಟವಾಗಿ ಹೇಳಬೇಕಾಗಿದೆ. ನಿಮ್ಮ ೨೦ ದಿನಗಳ ಆಡಳಿತ ನೋಡಿದ ನಂತರ ಜನರು ಕೇಳಿದ ಪ್ರಶ್ನೆಯಾಗಿದೆ.

ಧನಂಜಯ ವಾಗ್ಲೆ

ಪುತ್ತೂರು