பொடுசு

புத்தாடை - தீபாவளி ஸ்பெஷல்

2010-11-04T09:28:00.001+03:00

அதிகாலை உற்சாகமாய் வந்து சிறுவனை எழுப்பினாள் அம்மா, கிழக்குமுகம் பார்த்து உட்கார சொல்லி தலைக்கு எண்ணை வைத்து, கையில் சீயக்காய் கிண்ணத்தை கொடுத்து குளித்துவிட்டு வர சொன்னாள். உறங்கிக்கொண்டே மெதுவாய் தலையில் சீயக்காய் தடவிகொண்டிருந்தான் அந்த சிறுவன். அதை பார்த்து சிரித்த அவன் தந்தை பாய்ந்து வந்து தலைமுடியை இருகபிடித்து எண்ணை போகும்வரை தேய்த்து இதமான சுடுநீரை ஊற்றி குளிப்பாட்டி விட்டார் . தலையில் ஈரம் காயும் வரை துண்டால் துவட்டி விட்டு அந்த துண்டையே இடுப்பில் கட்டிவிட்டு செல்லமாக முதுகில் தட்டி ஓடு என்றார்.

துண்டோடு ஓடி சென்று சாமி படங்களுக்கு முன்னே சென்று நின்றால் புது துணி, பலகாரங்கள், பட்டாசுகள், இனிப்புகள், இவற்றோடு தலை வாழை இலையில் இட்லி,வடை, சர்க்கரை பொங்கல் குறிப்பாக அவனுக்கு பிடித்த சுழியம் அனைத்தும் தயாராக அவன் தாயாருடன் காத்துகொண்டிருந்தது. எப்பம்மா இதெல்லாம் செஞ்சிங்க என்று ஆச்சிரியமாய் கேட்ட அந்த சிறுவனுக்கு ஒரு புன்னகையை மட்டும் பதிலாக சொல்லிவிட்டு கையில் இருக்கும் கிண்ணத்தை அவனிடம் கொடுத்து அதில் இருக்கும் பச்சை நிற மருந்தை குடிக்க சொன்னாள். அது வெற்றிலை, சீரகம், இஞ்சி போன்ற சிலவற்றை அரைத்து செய்தது. பிடிக்காவிட்டாலும் புது துணி கையில் கிடைக்கும் வரை என்ன சொன்னாலும் கேட்பான் என்று அவன் தாய்க்கு நன்றாக தெரியும். மருந்தை குடித்துவிட்டு தனது புதிய துணிகளை எல்லா துணிகளுக்கும் மேலே வைத்து என்னுடையதுதான் முதலில் இருக்க வேண்டும் என்று தங்கையுடன் சண்டை போட்டுகொண்டிருந்தான்.

பூஜை தொடங்குகிறது, அப்போது ஒரு சரவெடியை சிறுவன் கையில் கொடுத்து வெளியில் சென்று வெடிக்க சொல்கிறார் அவன் தந்தை. பற்றவைக்க ஒரு கையில் ஊதுபத்தியும் மழை லேசாக பெய்துகொண்டிருந்ததால் மற்றொருகையில் குடையையும் பிடித்துக்கொண்டு ஈரமற்ற ஒரு இடத்தில வெடியை பற்றவைத்துவிட்டு வீட்டினுள் ஓடி செல்கிறான். பூஜைக்கான மணி சப்தமும் சரவெடி சப்தமும் இணைந்து ஒரு புது இசையாகவே அவன் காதில் ஒலிக்கிறது. தனது புதிய உடைகளை பார்த்துக்கொண்டே இருக்கை கூப்பி நின்றுகொண்டிருந்தான்.

எப்பம்மா பூஜை முடியும் என்று சிணுங்கலாக கேட்டவனிடம் முதலில் சாமியிடம் விழுந்து கும்பிட்டுவிட்டு அப்பாவிடம் ஆசிர்வாதம் வாங்கிவிட்டு வா என்றாள். ஒரு நொடியில் செய்துவிட்டு அப்பறம் என்றான், படைத்த இலையிலிருந்து சிறிது உணவை எடுத்து காக்காவுக்கு வைத்துவிட்டு வா என்றாள். பொறுமையை இழந்தவனாய் வெடுக்கென்று பிடுங்கி கொண்டு வேகமாக வெளியில் ஓடி கா கா என்று இரண்டு முறை கத்திவிட்டு அம்மா கொடுத்ததை வைத்து விட்டு வேகமாய் ஓடி வந்து துணிகளை எடுக்க சென்றான். அப்பா அம்மா காலில் விழுந்து எழுந்தான் நெற்றியில் விபூதி பூசி ஆசிர்வாதம் செய்தனர். புது துணிகளை அப்பாவிடமிருந்து பெற்றுகொண்டபோது அவன் மகிழ்ச்சி எல்லைகடந்துவிட்டது. பார்த்து பார்த்து ஆசை ஆசையாய் வாங்கிய புத்தாடை, ஒவ்வொரு நாளும் எதிர் பார்த்துக் கொண்டே இருந்த அந்த நிமிடம் பரவசமாய் தெரிந்தது அவனுக்கு.
புதிய ஆடை உடுத்தி ராஜநடை போட்டு அம்மா எப்படி இருக்கிறது, அப்பா என் உடை எப்படி இருக்கிறது என்று ஒவ்வொருவரிடமும் தனித்தனியாக கேட்டு பாராட்டுகளை பெற்றுக்கொண்டு ஆவலாக வெளியில் நண்பர்களை காண ஓட முற்பட்டவனை பிடித்து நிறுத்தினாள் அம்மா. சாப்பிட்டுவிட்டுத்தான் வெளியில் செல்ல வேண்டும் என்றாள். இனி அவனை யாராலும் தடுக்க முடியாது இருந்தாலும் தனக்கு பிடித்த சுழியத்தை இரண்டை வாயிலும் இரண்டை கையிலும் எடுத்து கொண்டு வேகமாக வாசலை தாண்டி எகிறி குதித்து ஓட.......... மழையில் பதமாக இளகி இருந்த களிமண்ணில் காலை வைக்க சறுக்கி கொண்டே சென்று சேற்றில் விழுந்தான். புத்தாடை ஒரு நிமிடத்தில் சேற்றாடை ஆனது.

தலையை தொங்க போட்டுக்கொண்டே விரக்தியாக வீட்டிற்குள் நுழைந்தவனிடம் தாய் சிரித்துகொண்டே சொன்னால் இதுக்குதான் இத்தனை நாளாய் தவியாய் தவித்துகொண்டிருந்தாயா? வழக்கம் போல் இந்த தீபாவளியும் பழைய துணியை போட்டுகொண்டு கொண்டாடு, நான் இதை இப்பதே துவைத்து காயபோடுகிறேன் என்று துணிகளை வாங்கி சென்றால். மாலை வரை வெளியே சென்று நண்பர்கள், உறவினர்கள் என்று எல்லோர் வீட்டிற்கும் சென்று ஆடி பாடி வெடிகளை எல்லாம் வெடித்து தீர்த்துவிட்டு, ஒரு துளி சேறு கூட படாமல் வீட்டினுள் சென்று கொடியில் கிடந்த புது துணிகளை தொட்டு பார்த்தான். மழை காலம் என்பதால் வீட்டின் உள்ளேயே காய போட்டிருந்ததால் இன்னும் ஈரம் இருந்தது. நாளை பள்ளிக்கு புத்தாடை அணிந்து செல்ல முடியாமல் போய்விடுமோ என்ற கலக்கத்தில் துணிகளை பார்த்துக்கொண்டே படுத்து உறங்கிவிட்டான்.

எனது பள்ளி பருவத்தில் ஒவ்வொரு தீபாவளிக்கும் எங்கள் வீட்டில் நடந்த காட்சிகள்தான் மேலே சொன்ன கதை அதில் வரும் சிறுவன் நானேதான். தீபாவளி என்றவுடன் என்மனக்கண்ணில் தோன்றி மறையும் காட்சிகளைத்தான் இங்கு கதையாக பதிவு செய்ய முயற்சித்துள்ளேன். இது போன்றொரு பாரம்பரியமான தீபாவளி கொண்டாடி பலவருடங்கள் ஆகிவிட்டது. உங்களுக்கும்தானே?

உங்கள் அனவருக்கும் பொடுசின் தீபாவளி நல் வாழ்த்துக்கள்.

உங்கள் வாழ்த்துக்களை கமெண்ட்ஸ் வாயிலாகவோ அல்லது ஓட்டு போட்டோ தெரிவிக்கவும் ப்ளீஸ்.

கடலுக்கு ஒரு மினியேட்சர் !!!

2010-11-01T07:50:00.000+03:00

துபாய் விமான நிலையம்

ஒவ்வொரு பயணம் என்பதும் ஒரு புதிய புத்தகம் படிப்பது போன்றது. புதிய மனிதர்கள், இடங்கள், அனுபவங்கள், ஆச்சரியங்கள், திருப்பங்கள், எதிர்பார்ப்புகள், சுவாரஸ்யங்கள் என எல்லாம் நிறைந்திருக்கும். எதார்த்தத்தை விரும்பும் எனக்கு எப்போதும் எங்காவது ஊர் சுற்றுவது என்றால் உற்ச்சாகமாக கிளம்பிவிடுவேன். அப்படி இருந்தும் சென்ற ஒரு வாரத்தில் மட்டும் சற்று அதிகமாகவே ஊர் ஊராக சுற்றிய சுற்றில் தலை சுற்றிவிட்டது (முதுகு தெரிஞ்சிதான்னு கேட்க கூடாது). கத்தார்லேர்ந்து ஆச்சாள்புரம் போயிட்டு வந்தேன் ஆனால் வழி எப்படின்னா...

RLIC டு தோஹா டு அபுதாபி டு துபாய் டு சென்னை டு ஆச்சாள்புரம் டு சென்னை டு துபாய் டு அபுதாபி டு துபாய் டு அபுதாபி டு தோஹா டு RLIC

சுருக்கமா சொன்னதுக்கே இவ்வளவு டு இன்னும் விளக்கமா சொன்னா எல்லாரும் தூங்கிடுவிங்கன்னு தெரியும் அதனால நேரா விஷயத்துக்கு போவோமா... இந்திய தொலைகாட்சி முதல் முறையாக என்பது போல் எனது வாழ்கை வரலாற்றில் முதல் முறையாக என்று சொல்லகூடிய விஷயங்கள் இம்முறை துபாயில் எனக்கு கிடைத்தது. அதற்கு காரணமான எனது அண்ணனுக்கு இந்த பதிவின் வாயிலாக நன்றியை தெரிவித்துக்கொள்கிறேன்.

துபாய்

அபுதாபி

இப்ப ஊர் சுத்த ரெடியா? அபுதாபியிலிருந்து காலை புறப்பட்டு முதலில் சென்றது உலகின் மிகபெரிய பண்கடை கட்டிடமான "துபாய் மாள்". இது எங்கே இருக்கிறது என்றால் உலகின் மிக உயரமான கட்டிடம் என்ற பெருமைவாய்ந்த புர்ஜ் அல் அராப் கட்டிடத்திற்கு கீழே பார்வையாளர்களுக்கான நுழைவாயிலாக அமைந்திருகிறது. என்னை தவிர மற்றவர்கள் புர்ஜ் அல் அராப் கட்டிடத்திற்கு மேலே ஏற்கனவே சென்று வந்துவிட்டதால் அன்று நாங்கள் சென்றது துபாய் மாளில் உள்ள மீன் காட்சியகம் மற்றும் கடல் வாழ் உயிரியல் பூங்கா ( Dubai Aquarium and Under Water Zoo).

துபாய் மாள் மேற்கூரை

கின்னஸ் உலக சாதனை புத்தகத்தில் இடம்பெற்றுள்ள இந்த மீன் காட்சியகம் உலகின் மிகபெரிய (acrylic) அக்ரலிக் கண்ணாடி பலகையை கொண்டு உருவாக்கப்படுள்ளது. (32.88 மீ அகலம் 8.3 மீ உயரம் 750 மி.மீ தடிமன்). இதில் முக்கியமான கவனிக்க வேண்டிய விஷயம் இந்த தொட்டியை சுற்றி முழுவதுமாக பக்கவாட்டில் மட்டுமல்லாமல் உள்ளேயும் அதாவது குகை போன்ற அமைப்பில் தண்ணீருக்கு அடியில் சென்று பார்ப்பது போலவும் தொட்டிக்கு மேலே சென்று பார்ப்பது போலவும் அமைந்திருப்பது கடலுக்குள் சென்று வந்த முழுமையான

அனுபவத்தை தந்தது. அந்த அனுபவத்தை முடிந்த அளவு புகைபடமாக கீழே கொடுத்துள்ளேன் உங்களுக்காக.

நடுவே காடு போன்ற அமைப்பில் ஒரு உணவகம்

பென்குயின்

இதுவும் ஒருவகை மீன்தான்

புகைபடங்களை பார்த்த பிறகு பதிவோட தலைப்பை ஏற்றுக்கொள்வீர்கள் என்று நம்புகிறேன்.

துபாய் மாளின் ஒரு பகுதிதான் இந்த மீன் காட்சியகம் இன்னும் பல விஷயங்கள் இங்கு பார்த்தோம் மேலும் கடைகள், உணவகங்கள், குழந்தைகள் விளையாட்டு இடம் என பொதுவான பண் கடை கட்டிடத்திற்கே உரித்தான அனைத்தும் இங்கும் இருந்தது .அடுத்ததாக நாங்கள் சென்றது ஒரு பூங்காவிற்கு கிரீக் பார்க். பூங்கா என்றவுடன் கொஞ்சம் புல்வெளி உட்கார அங்கங்கு சில நாற்காலிகள் என்ற மரபை மாற்றி பரந்து விரிந்த புல்வெளி, நீர் நிலை தேக்கங்களின் கரையில் விளையாடி மகிழலாம், சிறுவர்/சிறுமியர் விளையாட பல வகயான அமைப்புகள். எனது அண்ணன் குழந்தைகளுடன் விளையாடி கலைத்து போனது மட்டுமல்ல நாங்களும் குழந்தைகளாகவே மாறி போனோம்.மேலும் கேபிள் கார் பயணம் இங்கு சிறப்பான ஒன்று, நாங்கள் சென்றிருந்த நேரம் பழுதடைந்து விட்டதாம் மற்றுமொரு முதல் அனுபவத்தை தவறவிட்ட வருந்தம் எனக்கு. அனால் நாங்கள் அங்கு சென்றதற்கு முக்கியமான காரணமே வேறு,அது மேலும் ஒரு புதிய அனுபவம் எனக்கு. அதுதான் சீல் மற்றும் டால்பின் காட்சியகம்.

மீன் வகைகளில் மிகவும் புத்திசாலி டால்பின் என்று எங்கோ படித்ததை அனுபவபூர்வமாக உணர்ந்தேன். பயிற்சியாளர்கள் எழுப்பும் சிறு சப்தம் மற்றும் கை அசைவை புரிந்துகொண்டு சீல் மற்றும் டால்பின் செய்யும் சாகசங்கள் உண்மையில் மெய் சிலிர்க்க வைத்தது. குறிப்பாக டால்பின் அதிலும் மிக உயரத்தில் தொங்கவிடப்பட்டிருந்த பந்தை எகிறி சுழன்று வாலால் (கால் பந்து விளையாட்டில் சொல்லப்படும் சிசர் கட் போல) அடித்தது மீண்டும் மீண்டும் கண் முன் வந்து செல்கிறது.

பிறகு அங்கிருந்து புறப்பட்டு இரவு உணவை முடித்து விட்டு மீண்டும் துபாய் மாளிற்கு சென்றோம் (அடங்க மாட்டோம்ல..) அடுத்த சிறப்பு நிகழ்ச்சி எங்களுக்காக காத்திருந்தது fountain show. மாலை ஏழு மணி முதல் அரை மணி நேரத்திற்கு ஒரு முறை ஐந்து நிமிடங்களுக்கு நிகழ்த்தப்படும் ஒரு இனிமையான காட்சி. ரம்மியமான இசைக்கேற்ப தண்ணீர் நடனம், மகுடிக்கு எழுந்தது ஆடும் பாம்பை போன்று தண்ணீர் மேலே எழுந்து வளைந்து நெளிந்து ஆடுவதும் அதற்கேற்றார் போல் விளக்குகள் மின்னுவதும் பார்க்க இரண்டு கண்கள் போதவில்லை. இதே நேரத்தில் உலகின் மிக உயர்ந்த கட்டமான புர்ஜ் அல் அராப் கட்டிடத்தில் இருந்து நட்சத்திரங்கள் விழுவது போன்று மின்விளக்குகளின் விளையாட்டு வேறு. ஏற்கனவே நேரம் பத்து மணியை தாண்டி விட்டாலும் துபாயிலிருந்து அபுதாபி வரை திரும்பி செல்ல வேண்டியிருதாலும் மேலும் அரை மணி காத்திருந்து மீண்டும் ஒருமுறை அந்த தண்ணீர் நடனத்தை பார்த்துவிட்டுத்தான் சென்றோம்.

இப்படியாக ஒரு நாள் முழுவதும் புது புது அனுபவங்களுடன் மகிழ்ச்சியாக சென்ற மணித்துளிகளை முடித்த அளவு பதிந்துவிட வேண்டும் என்ற ஆசைதான் இந்த பகிர்வு. மீண்டும் வேற ஒரு நல்ல ஊர்ல சந்திப்போம்.

தானத்தில் சிறந்தது....

2010-10-19T07:25:00.000+03:00

நேற்று மாலை தொலைக்காட்சியில் சேனல்களை மாற்றிக்கொண்டே சென்றபோது ஏதோ ஒரு ஹிந்தி சேனலில் சற்று தானாக விரல் ஓய்வெடுக்க நின்றபோது ஒரு விளம்பரம் பார்த்தேன். இந்த பதிவை எழுதும் போது உண்மையில் அந்த விளம்பரத்தை பார்த்து நான்கு மணி நேரங்களுக்கு மேலாகிவிட்டது ஆனால் அந்த விளம்பரத்தை இதுவரை நானூறு முறைக்கும் மேலாக மனதில் ஓடவிட்டுருப்பேன். இப்படி ஒரு தாக்கத்தை ஏதோ ஒரு புரியாத உணர்வை இதுவரை நான் பார்த்த பலநூறு சினிமாக்களுள் ஒன்று கூட ஏற்படுத்தியதாக தோன்றவில்லை. ஒரு முறை பார்த்தவுடனே மனதில் பதியும் அந்த சின்ன குழந்தையின் முகம், வெறும் 48 வினாடிகளுக்குள் ஒரு மிகப்பெரிய விஷயத்தை அனைவராலும் எளிதில் புரிந்துகொள்ள கூடிய வகையில் அமைந்த உரையாடல் ஒரு நிமிடம் யாரையும் உணர்ச்சிவசப்படுதிவிடும்.

A better way of saying "get well soon"
Donate BLOOD

இரத்த தானம் பற்றிய விழிப்புணர்வுக்கான இந்த விளம்பரத்தை எடுத்த இயக்குனர் மற்றும் குழுவினர்க்கு எத்துனை வாழ்த்துக்கள் சொன்னாலும் தகும். வாழ்த்துக்கள்.....

இதோ அந்த விளம்பரம் உங்கள் பார்வைக்கு. ஹிந்தி தெரியாதவர்கள் ஆங்கிலத்தில் இருக்கும் சப்-டைட்டிலை பொறுமையாக படித்துக்கொள்ளவும்.

நன்றி youtube

நேரடியாக youtube ல் பார்க்க இங்கே கிளிக்கவும்

நானும் இரண்டு மூன்று முறை இரத்தம் கொடுத்திருக்கிறேன், ஆனால் மூன்று மாதங்களுக்கு முன்பு எனது தாயாரின் இருதய அறுவைசிகிச்சைக்கு இரத்தம் தேவைப்பட்டபோது, சில ஆண்டுகளுக்கு முன்பு எனக்கு மஞ்சள் காமாலை வந்திருந்ததால் இனி என் இரத்தத்தை யாருக்கும் பயன்படுத்த முடியாது என்று மருத்துவமனையில் அதிர்ச்சி செய்தி சொன்னார்கள். பிறகு எனது நண்பனின் ஏரியா கிரிகெட் டீமையே அழைத்து வந்து இரத்தம் கொடுத்து உதவினான். அவர்கள் அனைவர்க்கும் இந்த பதிவை காணிக்கையாக்குகிறேன்.

இந்த பதிவால் யாரேனும் ஒருவர் இரத்த தானம் செய்தாரேயானால் அது எனது வாழ்நாள் சாதனையாகவே கருதுவேன்.

மஞ்சள் காமாலை வந்தவர்கள் இனி வாழ் நாளில் இரதம் கொடுக்கவே முடியாதா??? விஷயம் தெரிந்தவர்கள் தயவுசெய்து சொல்லுங்க....

யார் அவள்?

2010-10-16T14:56:00.003+03:00

சமீப காலமாக எனது உறவினர்களுடனோ,நண்பர்களுடனோ எப்போது பேசினாலும் அவர்கள் எனக்கு பெண் பார்ப்பதை பற்றி அல்லது திருமணத்தை பற்றி பேசி என்னை ஒரு குழப்பமான நிலையில் விட்டுவிடுகிறார்கள்.

அப்போதெல்லாம் "பொண்ண நீ பாக்குறது இருக்கட்டும், பொண்ணு ஒன்ன பாத்துடபோது" என்ற கவுண்டமணி செந்திலிடம் கூறும் வசனம் நினைவில் வந்து போகும்.

கண்ணில் காட்சிகள் தோன்றிவிட்டால் கற்பனை தீர்ந்துவிடுமோ? என்ற பயத்தில் புலம்பிய சில புலம்பல்கள்......

கண்ணெதிரே கண்டதும் இல்லை...
கனவிலும் வந்ததில்லை...

ஆனால் - என்
கவிதைகளில் மட்டும் வாழ்கிறாள்!
யார் அவள்?

அவள் இல்லாமல்

என் கவிதைகளுக்கு அர்த்தம் இல்லை!
அவளை பற்றி

நான் சொல்லாதது கவிதைகளே இல்லை!

யார் அவள்?

கவிதை எழுத

உன்னை பற்றி சிந்திக்க வேண்டும்...

காதல் வர

உன்னை முதலில் சந்திக்க வேண்டும்...

சந்திக்கவும், சிந்திக்கவும் காத்திருக்கிறேன்!

யார் அவள்?

என் கவிதைகள் போலவே

என் தோட்டத்து மொட்டுகளும்

காத்திருக்கின்றன...

அவள் கூந்தலில் மலர்வதற்காக!

யார் அவள்?

கத்தார்-வில்லாஜ்ஜியோ

2010-10-02T10:35:00.001+03:00

கடந்த இரண்டு (1) (2) பதிவுகளில் கத்தாரை பற்றி கொஞ்சம் அதிகமாகவே அலசிவிட்டேன் போல.. (ஏன் சாயம் போயிடுச்சா?) இருந்தாலும் விடுவதாய் இல்லை.

அபுதாபி, துபாய் போன்ற நகரங்களில் உள்ள பல பண்கடை கட்டிடங்களுக்கு (ஷாப்பிங் மால்) சென்றிருக்கிறேன்.... பார்த்து வியந்தும் இருக்கிறேன். அனால் என்னை மிகவும் கவர்ந்த உண்மையில் ரசிக்கும் வகையில் கத்தாரில் இருந்த ஒரு பண்கடை கட்டிடத்தை பற்றிதான் இந்த பதிவில் நான் எடுத்த சில புகைப்படங்களோடு என் அனுபவத்தை உங்களுடன் பகிர்ந்துகொள்கிறேன். வாங்க உள்ள போலாமா..........

வில்லாஜ்ஜியோ - இதுதான் அந்த பண்கடை கட்டிடத்தின் பெயர். கட்டத்திற்கு வெளியே காலை, மாலை, இரவு, பகல், வெயில், வியர்வை, காற்று என எந்த காலநிலை வேண்டுமானலும் இருக்கலாம் ஆனால் உள்ளே வந்துவிட்டால் ஒரு இதமான குளிர், எப்போதும் மயக்கும் மாலை நேரம் போன்றதொரு ரம்மியமான வெளிச்சம். கட்டிடத்திற்கு உள்ளேதான் இருக்கிறோம் என்ற எண்ணம் சிறிதும் நமக்கு ஏற்படாதவாறு மேற்கூரையில் வானம் போன்றே வர்ணம் தீட்டப்பட்டிருப்பதே இந்த கட்டத்தின் மற்ற விஷயங்கள் சிறப்பாக தெரிவதற்கு அடிப்படை காரணமாக இருக்கும் என கருதுகிறேன். இதற்காக எவ்வளவு பாராட்டினாலும் தகும்.

ஐரோப்பிய மற்றும் இத்தாலிய கட்டிடக்கலையை முன்மாதிரியாக கொண்டு இக்கட்டிடம் வடிவமைக்கப்பட்டுள்ளது. அந்நாடுகளில் உள்ள வீதிகளை போலவே மிகவும் நேர்த்தியான முறையில் அமைந்துள்ளது மேலும் அழகு.

உள்ளே நுழையும் போதே புதிதாக ஒரு ஊருக்குள் செல்வது போன்று உணர்வும் வீதிகளின் இருபுறமும் வீடுகள் இருப்பது போன்ற அமைப்பும் அனைவரையும் மேலே பார்த்துக்கொண்டே நடக்க வைக்கிறது. (கிட்ட தட்ட பட்டிக்காட்டான் மிட்டாய் கடையை பார்ப்பது போல என்பார்களே அப்படிதான்)

வீதிகளின் நடுவே தார் சாலைகள் இருப்பது போல இங்கே அமைதியான நீரோடை, கட்டிடத்தின் அழகை முழுமை அடைய செய்கிறது எனலாம். படகு சவாரி செய்து கொண்டே இந்த கட்டத்தின் அழகை ரசிக்க முடியும்.

உலகின் பிரபலமான தலைசிறந்த அனைத்து கடைகளும் இந்த ஒரே கட்டிடத்தில் பார்த்துவிடலாம் (நம்ம பட்ஜட்டுக்கு பார்க்க மட்டும்தாங்க முடியும்)

எல்லா நாட்டு உணவு வகைகளும் கிடைக்கிறது என்பதை விட எல்லா நாட்டு மக்களும் ஒரே இடத்தில் அமர்ந்து அவரவர் முறைப்படி உணவு உண்பதை பார்ப்பதே ஒரு மகிழ்ச்சிதான். (நாங்க எப்பவுமே ஐஸ் கிரீம் மட்டும்தான்)

பனிக்கட்டி தளம் - சறுக்கு விளையாட்டு (ஸ்கேட்டிங்) செய்யலாம் என்னை போல் தெரியாதவர்கள் வேடிக்கை பார்க்கலாம். புதிதாக செல்வோருக்கு பயிற்சி கொடுக்க பயிற்சியாளர்கள் இருக்கின்றனர்.

இரவு நேர வானத்தை வர்ணம் தீட்டியிருக்கும் அழகை வர்ணிக்க வார்த்தைகள் என்னிடம் இல்லை. ஒவ்வொரு மைய பகுதியிலும் நாம் நின்று எவ்வளவு மெதுவாக பேசினாலும் அதன் எதிரொலி பலமுறை கேட்பது நம்மை பிரம்மிக்க செய்கிறது.

13 திரைகள் உள்ளடக்கிய திரை அரங்கம் 3D வசதியுடன் கூடியது.
130000 சதுர மீட்டர் பரப்பளவில் 220 கும் மேற்ப்பட்ட கடைகள் உள்ளன.
குழந்தைகளுக்காக தனியாக பல விளையாட்டுக்களுடன் கூடிய பகுதி உள்ளது.

இப்படி வசதிகள் பல இருந்தாலும் இக்கட்டிடத்தின் உள்ளே நாம் எத்தனை முறை சென்றாலும் இதன் அழகு மற்ற விஷயங்களை கவனிக்க விடுவதில்லை என்பதே உண்மை.

இப்போ உங்களுக்கு இந்த பதிவு பிடிச்சிதோ இல்லையோ கண்டிப்பா இந்த பண்கடை கட்டிடத்தை பிடிச்சிருக்கும்னு நினைக்கிறன். உங்கள் கருத்தை மறக்காம சொல்லிட்டு கீழே ஒரு ஓட்டு போட்டுட்டு போங்க. மீண்டும் இன்னொரு இடத்தில பார்ப்போம். வர்ர்ர்ர்ர்ர்டா........

கத்தார் - ஒரு அலசல்....2

2010-09-25T18:20:00.002+03:00

கத்தார் - ஒரு அலசல்....1 -ல் கத்தாரை பற்றிய ஒரு அறிமுகமும், 1940களுக்கு பிறகு கத்தாரின் வளர்ச்சியும் அதற்கு முக்கிய காரணமான இயற்கை வாயு மற்றும் எண்ணை வளத்தை பற்றியும் அதன் உற்பத்தி மற்றும் ஏற்றுமதி முறைகளையும் மேலும் பணிநிமிர்தமாக இங்கு வருவோர்கள் எதிர்கொள்ளும் சவால்களை முடிந்த அளவு சுருக்கமாக பார்த்தோம். இவ்வளவு பிரச்னைகள் இருந்தும் நானும், நம் நாட்டவரும், மற்ற நாடுகளை சேர்ந்த குறிப்பாக சொகுசானவர்கள் என நாம் கருதும் ஐரோப்பிய நாடுகளை சேர்ந்தவர்கள் இங்கே ஓடி வருவது ஏன்???????????

இதற்க்கு பல காரணங்கள் சொல்லலாம், ஆனால் முதல் முக்கியமான காரணம் வருமான வரி கிடையாது என்பதே!!!! உலகிலேயே வரி இல்லாத/குறைந்த நாடுகள் வரிசையில் கத்தார் முதலிடம் வகிக்கிறது. வரி அதிகம் வசூலிக்கும் நாடுகளில் முதல் பத்து இடங்களை பார்த்தால் ஐரோப்பிய நாடுகள்தான் அதிகமாக உள்ளது. இதனால்தான் இவர்கள் இங்கு பணிபுரிய ஆர்வம் காட்டுகின்றனர். மேலும் ஐரோப்பிய பாஸ்போர்ட் வைத்திருந்தால் போதும் இங்கு படிப்பு, தகுதி, திறமை, அனுபவம் இரண்டாம் பட்சம்தான். நேராக மேனேஜர்தான்! அது கிளீனிங் வேலையாயிருந்தாலும் சரி இவங்கதான் கிளீனிங் மேனேஜர். அப்படி ஒரு மதிப்பு இங்க. நம்ம ஆளுங்க முழு கால்சட்டை அணிந்து சென்றாலும் உள்ளே செல்லமுடியாத சில இடங்களில் இவர்கள் அரை கால்சட்டை மற்றும் செருப்புடனே உள்ளே செல்லலாம். (நம்ம ஊர்லையே இந்த கொடுமையெல்லாம் இருக்கும்போது இது ஒன்னும் பெரிதல்ல!!!) இதில் கவனிக்க வேண்டிய ஒரு முக்கிய செய்தி இவர்களில் பெரும்பாலனோர் ஐரோப்பிய நாடுகளை சேர்ந்தவர்களாக இருப்பதில்லை. அதாவது பிறப்பால் இல்லாமல் வெறும் பாஸ்போர்டால் ஐரோப்பியர்கள் ஆனவர்கள். ஐரோப்பிய நாடுகளை சுற்றி இருக்கும் மற்ற நாடுகளில் இருப்பவர்கள் இங்கே உள்ளே சென்று (குறிப்பாக பிரான்ஸ் நாட்டை கூறலாம்) எப்படியாவது பாஸ்போர்ட் வாங்கி விடுவார்கள் அதற்கு பல வழிகள் கூறுகின்றனர். ஐரோப்பிய பாஸ்போர்ட் காரர்களுக்கு என தனி சம்பள நிர்ணயம் செய்கிறார்கள் பிறகென்ன ராஜ வாழ்க்கைதான். கத்தாரில் வரி கிடையாது என்பது இவர்களுக்கோ , மற்ற நாட்டவர்க்கோ பெரிய விஷயமாக இருக்கலாம் ஆனால் நமக்கு அதுவும் ஒரு சாதாரண விஷயம்தான்! ஏன்னா நாமதான் நம் நாட்டிலேயும் வரி கட்டுவதிலேயே! நம்மில் பலபேருக்கு இந்தியாவின் வரி சட்டங்களை பற்றி தெரியாது . அப்படியே தெரிந்துகொள்ள ஆசைபட்டாலும் வரி கட்டாமல் எப்படி ஏமாத்தாலம் என்பதைத்தான் கற்றுக்கொள்ள்வோம். (ஸ்ஸ்ஸ்ஸ்.... உண்மை சுடுது) அதனால் நம்மவர்களுக்கு அதையும் தாண்டி இருக்கும் சில காரணங்கள் இருக்க வேண்டும் அது என்ன?

தெற்கு ஆசிய நாடுகளை சேர்ந்தவர்கள் குறிப்பாக நம்மவர்கள் இங்கு வருவதற்கு காரணம் உலகறிந்ததே! குறைந்த பட்சம் ஏதாவது படித்துவிட்டு வருபவர்கள் -மக்கள் தொகை, வேலையில்லா திண்டாட்டம், படிப்புக்கு தகுந்த வேலை. வேலைக்கு தகுந்த சம்பளம் இப்படி ஒரு பக்கம் இருக்கிறது. இந்த பிரிவில் வருபவர்கள் தப்பித்தார்கள். எதிர்பார்த்த வேலை, கைநிறைய சம்பளம் சொகுசான வாழ்கை என்று கூறமுடியாவிட்டாலும் ஓரளவிற்கு அனைத்து அடிப்படை வசதிகளும் கிடைத்துவிடும். ஆனால் படிக்காமல் வறுமை, குடும்ப சூழல், அறியாமை போன்ற காரணங்களால் இங்கு வருபவர்களுக்கு இது பூலோக நரகம்தான். ஆனால் அப்படி வருவோர்களின் எண்ணிக்கைதான் மிக அதிகம் குறிப்பாக இந்தியர்கள். இதற்கு இவர்கள் ஐம்பதாயிரம், ஒரு லட்சம் என வட்டிக்கு பணம் வாங்கி ஏஜெண்டுகளிடம் கொடுத்து வருகிறார்கள். இருந்தும் சொற்ப சம்பளம், பல பேர்க்கு சொன்ன வேலை/சம்பளம் கிடைக்காது. 12 முதல் 16 மணி நேரம் வேலை. உணவு,தங்கும் இடம், போக்குவரத்து என ஆரம்பித்து இரண்டு அல்லது மூன்று ஆண்டுகள் சில இடங்களில் ஐந்து ஆண்டுகள் கழித்துதான் ஊருக்கு திரும்ப முடியும் என்பது வரை இவர்கள் படும் பாட்டை இது போல பத்து பதிவு போட்டாலும் பத்தாது.

"தோஹா" கத்தாரின் தலைநகரம் மட்டுமல்ல கத்தாரின் ஒரே நகரமும் கூட! இங்கு மட்டுமே பல அடுக்கு மாடி கட்டிடங்களை காணலாம் மற்றபடி இங்கொன்றும் அங்கொன்றுமாய் சில ஷாப்பிங் மால் இருக்கும். (ஷாப்பிங் மால்னா தமிழ்ல பண் கடை கட்டிடமாம் ரொம்ப சிரமப்பட்டு கண்டுபுடிச்சேன்). உள்ளநாட்டு மக்களில் 80% க்கும் அதிகமானோர் இங்குதான் வசிக்கின்றனர். வெறும் 132sq/km பரப்பளவில் மொத்த மக்கள் தொகையில் பாதிக்கும் மேற்பட்டோர் அதாவது ஏறத்தாழ பத்து லட்சம் மக்கள் இங்கேயே வசிக்கின்றனர் . மிச்சமிருக்கும் 11,305sq/km பரப்பளவில் கிட்டதட்ட ஏழு லட்சம் மக்களும், கட்டுமான பணிகளுமே நிறைந்ததுதான் கத்தார்.

கத்தாரில் பொது மக்களுக்கான போக்குவரத்து வசதியை பற்றி கட்டாயம் இங்கு சொல்லியாகவேண்டும். மூன்று வார்த்தையில் சொல்லிடலாம்... மொக்கை!மொக்கை!! மொக்கை!!! ஆம் தனக்கென வாகனம் இல்லாதவர்கள் வெளியில் செல்வதென்பது இயலாத ஒன்று. நகரத்திற்குள் ஓரளவு பரவாயில்லை ஆனால் மற்ற கிராமங்களில் இருப்பவர்கள், சைட்டில் இருப்பவர்கள் நிலைமை??? அவர்கள் பணி புரியும் கம்பெனி எப்பொழுது வண்டி அனுப்புகிறதோ தலைஎழுத்து அப்போதுதான் வெளியே செல்லமுடியும், தேவையானவற்றை வாங்க முடியும்.

பொதுவாக அனைத்து கம்பெனிகளும் வார கடைசி (அதாவது இங்கு வியாழ கிழமை மாலை தொடங்கி வெள்ளிகிழமை மாலை வரை) தோஹாவை நோக்கி பேருந்தை இயக்குவர், அவரவர் பணியாளர்களுக்கு மட்டும். ஆறு நாட்கள் அடைபட்டு கிடந்தவர்கள் திறந்துவிட்டால் அவ்வளவுதான் ஒவ்வொரு வெள்ளிகிழமையும் தோஹாவிற்கு திருவிழாகோலம் பூட்டி திக்குமுக்காட வைத்துவிட்டுத்தான் திரும்புவார்கள். அன்றைய நிலையில் பெட்டிகடைகளில் தண்ணீர் கிடைப்பதே கஷ்டம். இதுல சாப்பாடு பற்றி கேட்கவே வேண்டாம். நான் வெளியில் தங்கி இருந்தவரை பல வெள்ளி இரவு பட்டினிதான். கத்தார் என்றவுடன் இங்கு வசித்த பலருக்கு (எனக்கும்) இந்த பிரச்சனைதான் முதலில் ஞாபகம் வரும் என்பதற்கு போன பதிவின் கமெண்ட்ஸ் பகுதியில் ராஜ்குமார் அவர்களின் கமெண்ட்ஸ் ஒரு உதாரணம்.

இப்படியொரு நிலைமை இருந்தாலும் 2022 உலககோப்பை கால்பந்து போட்டியை நடத்துவதற்கான முயற்சியில் ஈடுபட்டுள்ளது கத்தார். வாழ்த்துக்கள் ஆனால் ஒரே ஒரு சந்தேகம், உதாரணதிற்கு ஒரு பத்தாயிரம் பார்வையாளர்கள் உலககோப்பை கால்பந்து போட்டியை காண ஒரு வாரத்திற்குள் வந்து குவிந்தார்கள் என்றால் அவர்களுக்கு தனித்தனியாக வாகனங்கள் ஏற்பாடு செயவார்களா? அல்லது அனைவரும் மைதானத்திலேயே படுத்துக்கொள்ள வேண்டியதுதானா? போகட்டும் அதற்கு இன்னும் ஒரு மாமாங்கம் இருக்கிறது அதற்குள் இவர்கள் என்ன வேண்டுமானாலும் செய்யலாம். மனமிருந்தால் மார்கம் உண்டு என்பார்கள் இவர்களை பார்த்தால் பணம் இருந்தால் மார்கம் உண்டு என சொல்ல தோன்றுகிறது எனக்கு.

சில முக்கியமான விஷயங்கள்:

உலகத்தின் ஒரு சில மன்னராட்சி நடைபெறும் நாடுகளில் கத்தாரும் ஒன்று.

H .H .Hamad bin Khalifa Al Thani

டிசம்பர்-18-1878 முதல் இன்று வரை அல்-தானி என்ற குடும்பத்தை சேர்ந்தவர்கள் ஆட்சி செய்து வருகின்றனர்.

ஒவ்வொரு ஆண்டும் டிசம்பர்-18 கத்தார் தினமாக (நேஷனல் டே) கொண்டாட படுகிறது.
இஸ்லாம் மதத்தை கடைபிடிக்கும் இவர்களின் தாய் மொழி அரபிக் ஆகும்.

எங்கு சென்றாலும் ஆண்களும் பெண்களும் தங்களது பாரம்பரிய உடை அணிந்து செல்வது ஒரு சிறப்பாக கூறலாம். (நாம எப்படி? எத்தனை பேருக்கு வேஷ்டி ஒழுங்கா கட்ட தெரியும்?)

வாயு மற்றும் எண்ணை வளங்கள் கண்டுபிடிக்கும் முன்பு வரை மீன்பிடித்தல் மற்றும் முத்து எடுத்தல் (ரஜினி படம் இல்லைங்க) இவைதான் இவர்களின் பிரதான தொழில்.

கிட்டத்தட்ட 1966 வரை இங்கு நம் இந்திய ரூபாய் நோட்டுகள்தான் (gulf rupees) புழக்கத்தில் இருந்திருக்கிறது.

தற்போது கத்தார் ரியால்ஸ் நடைமுறையில் உள்ளது (1QR = INR 12 ~ 13 )

ஒட்டகம் மற்றும் குதிரை ரேஸ் இங்கு பழமையான மற்றும் பிரபலமான விளையாட்டும் கூட.

2006 ம் ஆண்டு 15 ஆம் ஆசிய விளையாட்டு போட்டிகள் கத்தாரில் வெற்றிகரமாக நடைபெற்றது. இதற்காக பல புதிய விளையாட்டு மைதானங்கள் கட்டப்பட்டன.

2011 ம் ஆண்டிற்கான ஆசிய கால்பந்து போட்டிகள் இங்கு நடைபெறவுள்ளது.

கத்தார் ஒரு காலத்தில்......

இது போன்ற இன்னும் பல கத்தாரின் புகைப்படங்களை காண இங்கே க்ளிக்கவும்

கத்தாரை பற்றி நான் கேட்டு, படித்து, பார்த்து அறிந்துகொண்ட அனைத்தையும் உங்களுடன் பகிர்ந்துகொண்டேன். மறக்காமல் உங்கள் கருத்துக்களை என்னுடன் நீங்களும் பகிர்ந்துகொள்ளுங்கள்.

அடுத்த பதிவும் கத்தார பத்திதாங்க! இங்கு இருக்கும் ஒரு முக்கியமான பண் கடை கட்டிடம் அதாங்க ஷாப்பிங் மால் பற்றியது. உங்களுக்காக நானே எடுத்த சில புகைப்படங்களுடன்......

கத்தார் - ஒரு அலசல்....1

2010-09-16T16:43:00.013+03:00

கத்தார் வந்து மூன்று வருடங்கள் நெருங்கிவிட்டது. கத்தார் என்றவுடன் எனக்கு மட்டுமல்ல பொதுவாக (வெளி நாட்டில் வேலை செய்கிறேன் என்ற பேரில்) இங்கு வேலை செய்யும் என்போன்றவர்களுக்கு என்னென்ன விஷயங்கள் நினைவிற்கு வரும் என்பதை உங்களோடு பகிர்ந்துகொள்ள ஆசைபடுகிறேன்.

கத்தார் நம் தமிழகத்தில் உள்ள ஒரு சிறிய நகரத்தையும் ஒரு சில சிறு கிராமங்களையும் சேர்தாற்போல இருக்கும் ஒரு குட்டி நாடு. வெறும் பதினேழு இலட்சத்தை நெருங்கிகொண்டிருக்கும் மக்கள் தொகை இதில் 40 சதவீதத்திற்கும் அதிகமாக இந்தியர்கள் (என்னையும் சேர்த்து) வாழும் இல்லை இல்லை வேலை செய்யும் ஒரு நாடு. மேலும் உலகின் ஏறத்தாழ அனைத்து நாடுகளை சேர்ந்த மக்களும், 20 சதவீகிதம் உள்நாட்டு மக்களும் இந்த மக்கள் தொகையில் அடங்குவர்.

1940 களுக்கு முன்பு வரை ஏழை நாடுகளின் பட்டியலில் இருந்த கத்தார் தற்போது உலக பணக்கார நாடுகளின் வரிசையில் இரண்டாம் இடத்திற்கு அதிவேகமாக முன்னேறிவிட்டது!!!!. இதில் ஆச்சர்யப்பட எதுவும் இல்லை. ஆம் இயற்கை இந்நாட்டிற்கு அளித்த பரிசுதான்..... கடல் என்ற அற்புத விளக்குக்குள் அடைபட்டு கிடக்கும் இயற்கை வாயு மற்றும் எண்ணை வளம் என்ற பூதம். இன்று எந்த ஒரு நாட்டின் பொருளாதாரத்தையும் ஆட்டிபடைப்பது இந்த பூதம்தான். பிறகென்ன அற்புத விளக்குதான் கையில் கிடைத்துவிட்டதே எடுத்து தேய்த்தால் பூதம் வரும் (அதாங்க இயற்கை வாயு மற்றும் எண்ணை) வித்தா காசு வரும். ஆனால் அது அத்தனை சுலபமான காரியம் இல்லை. மேலோட்டமாக உங்களுக்காக......

Offshore Oil Plotform

Offshore Gas Platform

நம்ம ஊர்ல எண்ணை கிணறுன்னா ஏதோ வீட்டு பின்புறத்தில் இருக்கும் தண்ணீர் கிணறு போல இருக்கும்னு இப்பவும் பாதி பேர்க்கும் மேல கற்பனை செய்துகொண்டிருகிறார்கள். மேலே உள்ள படத்தில் இருக்கும் பணி மேடைகள்தான் கடலுக்கு அடியில் பூமியின் அடுக்குகளுக்கு இடையே நமக்கு தேவையான, தேவையற்ற, பல வாயுக்களுடன் கலந்து இருக்கும் இயற்கை வாயுவையோ அல்லது கச்சா எண்ணெயையோ வெளியில் எடுப்பதற்காக அமைக்கப்பட்டுள்ளது. இங்கிருந்து கரையில் இருக்கும் பணி தளங்களுக்கு குழாய்கள் மூலமாக எடுத்து சென்று பல்வேறு சுத்திகரிப்பு மற்றும் பல மாற்றங்களுக்கு உட்படுத்தி நீர்மமாக்கபட்ட இயற்கை வாயு (LNG) , LPG , பெட்ரோல், டீசல் அல்லது கச்சா எண்ணையாகவோ பெரிய பெரிய தொட்டிகளில் (storage tank) நிரப்புகின்றனர். கீழே உள்ள படங்களை பார்க்கவும்.

இந்த சைட்லதாங்க நான் மூன்று வருடமாக.... ம்கும் என்னத்த சொல்ல.

கொஞ்சம் நான் எடுத்த படங்களையும் பாருங்க...

One of the LNG sorage tank. Capacity : 140,000 m3

இந்த தொட்டிகளிளிருந்து பிரத்தியேகமான கப்பல்கள் மூலம் பிற நாடுகளுக்கு ஏற்றுமதி செய்யப்படுகிறது இப்படி.

இந்த படங்களை பார்க்கும் போதே ஓரளவிற்கு இது எத்தனை கடினமான காரியம் என்பதை புரிந்துகொண்டிருப்பீர்கள். (இதைதான் சும்மா வருவாளா சுகுமாரி தெரிஞ்சுகோடா சோமாறின்னு சொல்லுவாங்க). இதெல்லாம் எப்படி சாத்தியமாகிறது என்று யோசித்தால் அதற்கு தெளிவான ஒரு பதில்.... இயற்கை சக்தியை மிக லாவகமாக கையாள தெரிந்த மனித சக்திதான். ஆம் அதற்காகத்தானே உலகின் அனைத்து நாட்டை சேர்ந்த உழைப்பாளிகளும் இங்கு ஒன்று கூடி இருக்கின்றனர்.பல லட்சம் பேர்களின் உழைப்பு, பல ஆயிரம் பேர்களின் ரத்தம், பல நூறு பேர்களின் உயிர் இதுவே கத்தாரின் இந்த வளர்ச்சிக்கு முதல் படி என கூறினால் அது மிகையல்ல. பொதுவாக ஒரு நாட்டின் ஒரு சில இடங்களில் கட்டுமானபணிகள் நடக்கும் ஆனால் இங்கு எண்ணை மற்றும் இயற்கை வாயு உற்பத்தி/ஏற்றுமதி மற்றும் அதை சார்ந்த பணி தளங்களுக்கு (site) நடுவேதான் இந்த நாடே அமைந்திருக்கிறது. உலகிலேயே அதிக இயற்கை வாயு கிடைக்கும் நாடுகளின் தரவரிசை பட்டியலில் கத்தார் மூன்றாம் இடத்திலும் எண்ணை வளத்தில் பதிமூன்றாம் இடத்திலும் இருக்கிறது.(கவனிக்க: எண்ணை வளத்தில் மட்டும் இந்தியா இருபதாம் இடத்தில் இருக்கிறது. அப்டியா!!!!!!!).

ஒரு முறை இந்நாடிற்கு வேலைக்கு வந்துவிட்டால் போதும் சுற்றி சுற்றி எங்காவது வேலை வாய்ப்பு கிடைத்து கொண்டே இருக்கும், நாமே போதும் என்று ஊருக்கு போனால்தான் உண்டு. ஆனால் இதில் இருக்கும் ஒரு சில பிரச்சனைகள் என்னவென்றால்? முதலில் தட்ப வெப்பநிலை, சர்வ சாதாரணமாக 50oC வெப்பம் கூடவே காற்றின் ஈரப்பதம் என சொல்லகூடிய ஹுமிடிட்டி (humidity) 70%முதல் 80% வரை சேர்ந்து தாக்கும். அதாவது வெளியில் எந்த வேலையும் செய்யமால் அப்படியே இரண்டு மூன்று நிமிடங்கள் நின்றாலே மொத்த உடம்பும்,உடையும் வியர்வையில் நனைந்தே போய்விடும். சில நிமிடங்களில் நம் உடம்பில் உள்ள மொத்த தண்ணீரையும் உறிஞ்சி எடுத்துவிடும் எப்போது வேண்டுமானாலும் மயங்கி விழுந்துவிடும் நிலைக்கு தள்ளப்படுவோம். அதோடு முடிந்து விட்டதா? இல்லை!! மணல் காற்று அதிகமாக வீசும் காலங்களில் இன்னும் கொடுமை கண், காது, மூக்கு, வாய் என எல்லா வழியகவும் பொடி மண்ணை உள்ளே வாங்கிக்கொள்ள வேண்டும். பிறகு குளிர் இதிலும் எந்தவித குறையும் இல்லாமல் 7oC க்கும் குறைவாக அதுவும் நம்மை படுத்திவைக்கும். மூன்று அல்லது நான்கு மாதங்கள் மேற்சொன்ன எந்த பிரச்சனயும் இல்லாமல் ஓட்டிவிடலாம். இயற்கை படுத்தும் பாடு ஒருபுறம் இருக்க நாம் பணி புரியும் இடத்தின் தன்மைகேற்ப, பலதரப்பட்ட வாயுக்கள், கெமிக்கல், ஆசிட் போன்றவற்றை சுவாசித்துக்கொண்டே இருக்க வேண்டும். இதனால் ஏற்படும் பல பக்கவிளைவுகளின் தாக்கம் பக்காவாக பிற்காலங்களில் தெரியும். இவ்வளவு பிரச்னைகள் இருந்தும் நானும், நம் நாட்டவரும், மற்ற நாடுகளை சேர்ந்த குறிப்பாக சொகுசானவர்கள் என நாம் கருதும் ஐரோப்பிய நாடுகளை சேர்ந்தவர்கள் இங்கே ஓடி வருவது ஏன்???????????

அடுத்த பதிவில் பார்ப்போம்........கத்தார் - ஒரு அலசல்....2

குறிப்பு: உங்களுக்கு பிடிச்ச மாதிரி எழுதனும்னு ஆரம்பித்தேன் முடியாம உங்களுக்கு புரியற மாதிரியாவது எழுதுனும்னு போய்கிட்டே இருக்கேன் எப்படி இருக்குனு சொன்னா மேற்கொண்டு தொடர்வதர்ற்கு வசதியாக இருக்கும்

ரஜினி ரசிகர்கள் மட்டும்தானா? மற்ற ரசிகர்கள்?

2010-09-07T16:42:00.000+03:00

இந்த வாரம் தமிழகதின் அல்லது தமிழ் நாள்/வார/மாத இதழ்களின் முக்கிய செய்தி ரஜினியின் மகள் திருமண விழா, அதற்கு ரஜினி தனது ரசிகர்களை அழைக்கவில்லை இருந்தும் சென்றவர்களை உள்ளே அனுமதிக்கவில்லை, இதனால் வெகுண்டெழுந்த ரசிகர்களின் புலம்பல்கள், கடிதங்கள், எதிர்ப்பு வாசகங்கள், கண்ணீர் கதைகள் போதாத குறைக்கு ஏகப்பட்ட ஈமெயில் வேறு (எனக்கு ஒரே நாளில் பத்து பேரிடம் இருந்து). இதெல்லாம் படிச்சப்பதாங்க மல்லாக்க படுத்துகிட்டு எச்சில் துப்புவதுன்னா என்னான்னு புரிஞ்சிது. இந்த கடுப்புதாங்க செந்திலா இருந்த என்னை இப்படி கவுண்டமணி போல் ஒரு பதிவு போட தூண்டியது.

என்னடா விளம்பரம்! இந்த சினிமாகாரங்கதான் தனக்கு தானே போஸ்டர் அடிக்கிறது கட்-அவுட் வக்கிறதுன்னு செவுத்த நார அடிக்கிறானுங்க... அட எதுவுமே கிடைக்கலேன்னா பொறந்த நாள் கொண்டாடுரானுங்க... ஆன 35 வயசுக்கு மேல போகமட்டேன்கிரானுங்க.... ஏன் ஒலகத்துல இவனுங்க மட்டுந்தான் பொறந்தனுன்களா? நாமெல்லாம் வேஸ்ட்டா?

இப்புடி வெகுளிதனமா/முட்டாள்தனமா இன்னும் ஆட்கள் இருகிறார்களா என்ன? இல்லை ஊடகங்கள் மிகைபடுத்துகின்றனவா? உண்மை தெரியவில்லை! அப்படி அதில் ஐம்பது சதவீதம் உண்மை இருந்தாலும் அவர்களுக்கு என் ஆழ்ந்த அனுதாபங்கள். இவங்கள பத்தி சுருக்கமா சொல்லனும்னா, வேலி ஓரமா போனா முள் குத்தும்னு தெரிஞ்சும் அங்க போயி முள்ள அவங்களே மிதிசிட்டு, முள்ளு குத்திடுச்சின்னு முள்ளு மேல பழி போடும் கூட்டம். சாதாரணமா சொந்தக்காரன் நேரா வந்து (ஏன் காந்தியா வரகூடதா) பத்திரிக்கை வச்சாலும் அதுல பாக்கு பணம் ஒத்த ரூபா வைக்கலைன்னு கல்யாணத்துக்கே போகமட்டங்க, இவளவு ஏன் தன்னோட மகளோ, மகனோ வேற சாதி, மதம்னு எதாவது மாத்தி காதல் கலயாணம் பண்ணா கூட போகமட்டங்க. ஆனா தன்னோட குடும்பத்துக்கு எந்தவித சம்பந்தமும் இல்லாத ஒரு மூன்றாவது மனிதன் இல்ல இல்ல முப்பதாவது மனிதன் என்று கூட சொல்ல முடியாத ஒரு நடிகனின் படத்தை முதல் நாளோ,தொடர்ந்து பல நாட்களாக வெறித்தனமாய் பார்பதாலோ, கட் அவுட் வைப்பதாலோ, பாலபிஷேகம் செய்வதாலோ தான்தான் மிக சிறந்த ரசிகன் என்று தனக்கு தானே ஆஸ்கார் விருது கொடுத்துக்கொள்ளும் ஒரு ரசிகனிடம் என்னோட ஒரே கேள்வி இதுதாங்க, உண்மையிலேயே அந்த நடிகன் மற்றும் அவன் குடும்பம் நன்றாக வாழவேண்டும் என்ற ஒரே எண்ணத்துடன்தான் இதெல்லாம் செய்தேன் என்று நெஞ்சில் கைவைத்து சொல்லுங்கள் பார்காலம்?

கண்ணா! கீழ விழுந்தா இதே பால நாளைக்கு உனக்கு ஊத்துவாங்க, வ்வ்வர்ர்டா...

சில படங்களை முதல் நாள் முதல் காட்சியை பார்த்த அனுபவத்தில் சொல்கிறேன் ஒருக்காலும் அப்படி இருக்க வாய்ப்பில்லை. ரசிகர் மன்றகளுக்கு நடிகர்கலாலோ அல்லது வேறு எப்படியோ வரும் பணத்திற்காக இருக்கலாம் , நண்பர்களுடன் அல்லது ஏரியா கூட்டத்தினருடன் சேர்ந்துகொண்டு கும்மாளம் அடிக்கவும், பொது மக்களுக்கு இடையூறு செய்வதும், குடித்துவிட்டு ரகளை செய்வதுமாய் சுற்றி இருப்பவர்களிடம் மலிவு விளம்பரம் செய்யவும்தான் ரசிகன் என்ற போர்வையை போர்த்திக்கொள்கிரார்கள்.காசு கொடுத்து டிக்கெட் வாங்குவதால் மட்டுமே அந்த நடிகனுக்கு மாமனகவோ, மச்சானாகவோ அல்லது சொந்தகாரனாகவோ ஆயிட்டதா நெனச்சிகிட்டு அவங்க வீட்டுல நடக்குற கல்யாணத்துக்கு கூப்பிடல, காதுகுத்துக்கு கூப்பிடல, மஞ்சள் நீராட்டு விழாவுக்கு குச்சி கட்ட கூப்பிடலன்னு மனசு ஒடிஞ்சு, வாழ்க்கையே வெறுத்து, நொந்து நூலாயி தற்கொலை ரேஞ்சிக்கு யோசிச்சின்னா... உங்கள திருத்த ஒரு ரஜினி இல்ல ஒரு கோடி ரஜினி வந்தாலும் முடியாது.

பேசாம ஒவ்வொரு புதுப்படம் ரிலீஸ் ஆகுற நாட்களையும் அரசாங்க விடுமுறை தினமாக்கிடலாம்.

யார் என்ன சொன்னாலும் நாங்க இப்படிதான் எங்களை நாங்களே நொந்து மனசு ஒடிஞ்சு இந்த மாதிரில்லாம் புலம்புவதான் எங்கள் ரசிகர் மன்றங்களின் நோக்கம் என்பவர்களுக்கு மேலும் நீங்கள் எததெர்கெல்லாம் உங்களை நொந்து இன்புறலாம் என்பதற்கு என்னால் ஆன சில டிப்ஸ்.....

கமலஹாசனின் இதிஹாச ரசிகர்கள்,

மருதநாயகம் படத்தின் தொடக்க விழாவிற்கு தங்களை அழைக்கவில்லை என்று வெகுண்டெழுந்து எலிசபெத் ராணியை எதிர்த்து போர் தொடுக்கலாம்.

விஜயகாந்தின் வெறித்தனமான ரசிகர்கள்,

கூட்டணி அமைக்க தங்களை அழைக்கவில்லை என நொந்துகொள்ளலாம்.

விஜய்யின் நோயாளிகள் சாரி ரசிகர்கள்,

டாக்டர் பட்டம் வாங்கியும் தங்களுக்கு வைத்தியம் பார்க்க அழைக்கவில்லை என்று மனமுடைந்து விச ஊசி போட்டுக்கொள்ளலாம்.

அஜித்தின் அதிவேக ரசிகர்கள்,

F1 கார் பந்தயத்திற்கு தங்களை அழைக்கவில்லை என நொந்து 'தலை'யில் அடித்துக்கொள்ளலாம்.

தமிழக அரசின் இலவச தொலைகாட்சியில் கலைஞர் சேனலில் ஒளிபரப்பாகும் படங்களை மட்டுமே பார்க்கும் ரசிகர்கள்,

கலைஞர் குடும்பத்தினரின் படங்களுக்கு இலவச டிக்கெட் தந்து அழைக்கவில்லை என நொந்து தங்களுக்கு தானே கடிதம் அல்லது தந்தி அனுப்பிக்கொள்ளலாம். (சன் சேனல் ரசிகபெருமக்களும் இது பொருந்தும்).

MGR - ஜெயலலிதா நடித்த படங்களை மட்டுமே இன்னுமும் பார்த்துகொண்டிருக்கும் புரட்சி ரசிகர்கள்,
தேர்தலில் MLA சீட் கொடுக்கவில்லை என்று கொலைவெறி கொண்டு கொடைநாட்டில் போய் தற்கொலை செய்துகொள்ளலாம்.
மேலும் என்னோட ஃபேவரட்.......

கிங் பிஷர் பியர் மட்டுமே குடிக்கும் குடிமகன்ங்கள் ஹி ஹி ரசிகர்கள்,
தனது விமானத்தில் இலவசமாக அழைத்து செல்லாத மல்லையவை நொந்து கொள்ளலாம், மேலும் அவருக்கு போட்டியாக கள்ள சாராயம் காய்ச்சி நஷ்ட்டம் ஏற்படுத்தலாம்.

இது போல உங்களுக்கும் தெரிந்த வழிகளை கமெண்ட்ஸ் பகுதியில் கொடுக்கவும் இன்னும் பல ரசிகர்கள் பயன்பெறுவார்கள்.

நான் எங்கிருக்கிறேன்...!!!! - பாகம்-3

2010-09-06T07:28:00.000+03:00

பாகம்-1
பாகம்-2 ஒரு முறை படித்துவிட்டு தொடரவும்.

தொடர்பு எல்லையை விட்டு வெளியேறியவுடன் வேகத்தை இருமடங்கு அதிகமாக்கி பயணத்தை தொடர்ந்தனர், கிடைக்கும் தகவல்கள், படங்கள் போன்றவற்றை கவனமாக சேகரிக்க தொடங்கினர். இதுவரை யாராலும் நினைத்து கூட பார்க்கமுடியாத ஒரு பயணத்தை வெற்றிகரமாக மேற்கொண்டிருக்கையில், சில மணி நேரங்களில் புதியதோர் சூரிய குடும்பத்தை சென்றடைகிறது ஸ்பேஸ் க்ருசியர் ++. Dr.பொட்ஸ் மற்றும் குழுவினர் தங்களது பயணம் வெற்றிபெறும் தருணம் நெருங்கிவிட்டதாக உணர்கின்றனர். உற்சாகமாக ஒவ்வொரு கிரகத்தையும் ஆராய தொடங்குகின்றனர். அப்போது அந்த அதிசயம் அவர்கள் முன்னே உள்ள திரையில் ஒளிர்கிறது . ஆம் சற்று முன் அவர்கள் கடந்து சென்ற ஒரு கிரகத்தில் உயிர்கள் வாழ்வதற்கான தடயங்கள் தெரிகிறது. மகிழ்ச்சியில் யாருக்கும் கையும் ஓடவில்லை காலும் ஓடவில்லை, என்ன செய்வதென்றே புரியாமல் சில நிமிடம் ஒருவரை ஒருவர் பார்த்தபடி அசைவற்று நின்றனர். சிறிது நேரம் கழித்து சுய நினைவு வந்தவர்களாய் பரபரப்பாக செயல்பட துவங்குகின்றனர்.

ஸ்பேஸ் க்ருசியர் ++ ஐ திசை திருப்பி அந்த கிரகத்தை நோக்கி விரைந்தனர். அக்கிரகத்தை நெருங்கிவுடன் வேகத்தை குறைத்து சீரான ஒரு வட்ட பாதையில் சுற்றி வந்து விவரங்களை சேகரிக்க தொடங்கினர். ஒன்றின் பின் ஒன்றாக பல ஆச்சிரியங்கள் அவர்களை திக்குமுக்காட வைத்துவிட்டது. பூமியை போலவே உயிர்கள் வாழ்வதற்க்கான சூழல் மட்டுமல்ல, இதுவரை எந்த வித சிறு பாதிப்பும் இல்லாமல் முற்றிலும் புதியதாய் தோன்றிய பூமி போன்றே இருப்பது நம்ப முடியாத உண்மையாக அவர்களை மெய் சிலிர்க்க வைத்தது. இங்கே பல வகையான உயிரினங்கள் மட்டுமல்ல நம்மை போல் மனித இனமே இருக்ககூடும் என்ற Dr.பொட்ஸ்ன் கருத்து குழுவினரது வெற்றி களிப்பை இருமடங்காக்கியது. மேலும் இந்த கிரகத்தை பற்றிய விவரங்களை முழுமையாக சேகரிக்க ஸ்பேஸ் க்ருசியர் ++ ஐ அக்கிரகத்தில் தரை இரக்க முடிவு செய்கின்றார் Dr.பொட்ஸ்.

இனி அந்த புதிய கிரகத்தில்......

இங்கும் அதே ஆங்கில பாடல்? எந்த கிரகத்திற்கு போனாலும் விடாமல் இந்த பாடல் எனக்கு மட்டும் கேட்டாலும்! இந்த முறை கேட்பதற்கு சற்று இதமாக இருந்தது ஆனால் நமக்கு பாடலை விட அங்கே என்ன நடக்கிறது என்பதுதானே முக்கியம்.....

தரை இறங்கியவுடன் அந்த கிரகத்தின் தட்ப வெப்ப சூழல், ஆக்ஸிஜன் மற்றும் ஒவ்வொரு வாயுக்களின் அளவு, என பல தேவையான விழயங்களை ஆராய்ந்ததில் நம் பூமி பல கோடி யுகங்களுக்கு முன்பு இருந்தததை போலவே இருப்பதாக உறுதி செய்கின்றனர். மேலும் அந்த கிரகத்திற்கு எங் எர்த் (இளம் பூமி) என்று ஒரு பெயர் சூட்டுகின்றனர். ஸ்பேஸ் க்ருசியர் ++ ஐ விட்டு வெளியே பல மாதங்களுக்கு பிறகு வருகின்றனர். வழக்கமான விண்வெளி உடையை கழற்றிவிட்டு சாதாரணமாக சென்று கல், மண், தாவரங்கள், பூச்சிகள் போன்ற பல உயிர்களை எடுத்து சென்று பூமியில் ஆராய்ச்சி செய்வதற்காக சேகரிக்கின்றனர். சிறிது தூரம் கடந்து சென்று ஒரு ஆற்றங்கரையை அடைகின்றனர். இடிந்தும், மண்ணில் புதைந்து போனது போல் உள்ள சிறு சிறு மனித உருவ சிலைகளை பார்த்து ஆச்சிரியமடிகின்றனர். Dr.பொட்ஸ் சொன்னது போல் மனிதர்கள் அந்த கிரகத்தில் வாழ்ந்து உறுதியாகிறது. மேலும் கிடைத்த சில ஆதாரங்களின் பேரில் பல ஆண்டுகளுக்கு முன்பு அந்த ஆற்றில் ஏற்பட்ட மிகபெரிய வெள்ளத்தால் பலத்த சேதம் ஏற்பட்டிருக்கலாம், பலர் இறந்திருக்கலாம், மண் சுவர்களால் ஆன வீடுகள் கரைந்து, புதைந்து பேரழிவு ஏற்பட்டிருக்கலாம் என்று அவர்களுக்கு தெரியவருகிறது. அப்போது அங்கே சில மரத்தினால் சிறு பெட்டிகள் கிடைக்கிறது. இது நிச்சயம் இங்கே வசித்தவர்கள் போற்றி பாதுகாப்பாக வைத்திருந்த ஏதோ விலைமதிக்க முடியாத முக்கியமான பொருளாகத்தான் இருக்க வேண்டும் என்பது அந்த பெட்டியை தயாரித்திருந்த விதத்திலேயே அவர்களுக்கு உணர்த்தியது. அவற்றை திறக்க முயற்சித்து முடியாமல் போனதால் ஒரே ஒரு பெட்டியை மட்டும் கையில் எடுத்துக்கொண்டு ஸ்பேஸ் க்ருசியர் ++ ஐ நோக்கி திரும்பினர்.

அனைவரும் மிகவும் களைப்படைந்து விட்டனர். சிறிது ஓய்விற்கு பிறகு மீண்டும் ஆராய்ச்சியை தொடரலாம் என்றும், எப்படியாவது இன்னும் ஓரிரு நாட்களுக்குள் அங்கு வாழும் மனிதர்களை சந்திக்க வேண்டும், மேலும் சில தகவல்களை உறுதி செய்துவிட்டு பூமியை நோக்கி பயணத்தை தொடர்வது என முடிவு செய்தாகிவிட்டது. ஆனால் ஸ்பேஸ் க்ருசியர் ++ ஐ நெருங்கிய அவர்களுக்கு ஓர் பேரதிர்ச்சி காத்திருந்தது!! ஆம் அந்த வழியாக சென்ற ஏதோ ஓர் மிக பெரிய உயிரினம் ஸ்பேஸ் க்ருசியர் ++ ன் வெளிப்புறத்தை பலத்த சேதப்படுத்தி இருந்தது. உள்ளே என்ன நிலை என்பதை காண விரைகிறார் Dr.பொட்ஸ். உள்ளே பெருமளவு ஏதும் சேதாரம் இல்லை என்றாலும், மிகபெரிய அதிர்வு காரணமாக ஆங்காங்கே சில முக்கியமான பாகங்கள் பாதிக்கபட்டுள்ளதால் இனி காலம் தாமதிக்காமல் உடனடியாக புறப்பட்டு தகவல் தொடர்பு எல்லையை சென்றடைந்து விட வேண்டும் என்ற கட்டாயம். அவசர அவசரமாக ஒரு சில முக்கிய பழுதுகளை மட்டும் முடிந்த வரை சரி செய்து விட்டு பயணத்தை தொடங்கிவிட்டனர்.

இதோ தொடர்பு எல்லைக்குள் வந்தாகிவிட்டது, இந்திய விண்வெளி ஆராய்ச்சி மையத்திற்கு அனைத்து தகவல்களயும் ... கண்டு பிடித்த எங் எர்த் (இளம் பூமி) அங்கு சென்றடைவதற்கான கணக்குகள், தூரம், அந்த கிரகத்தின் சிறப்பு, ஆதாரங்கள், புகைப்படங்கள் என ஒன்று விடாமல் கொடுத்தாகிவிட்டது. மனித இனத்தை அழிவிலிருந்து காப்பாற்றும் முயற்சியில் வெற்றியடைந்து விட்டனர் Dr.பொட்ஸ் மற்றும் குழுவினர். Dr.பொட்ஸ்ஐ சாதனை நாயகன் என்றும் ஏன் கடவுள் என்றெல்லாம் கூட வர்ணிக்க தொடங்கிவிட்டனர். Dr.பொட்ஸ் பூமியை வந்தடையும் நாளுக்காக அனைவரும் காத்திருகின்றனர். சில மாதங்களுக்கு பிறகு ஒரு நாள் Dr.பொட்ஸ்ன் ஆராய்ச்சி மையத்தில் வழியனுப்ப கூடிய கூட்டத்தை விட பலமடங்கு மக்கள் கூட்டம் கூடியது. ஆம் இன்னும் சில நிமிடங்களில் ஸ்பேஸ் க்ருசியர் ++ தரை இரங்க போகிறது!!! மக்கள் அனைவரும் ஆச்சிர்யதுடனும், ஆர்வத்துடனும் கண்களை இமைக்காமல் கூட பார்த்துகொண்டிருக்கும் வேளையில் தரையை நெருங்குகிறது ஸ்பேஸ் க்ருசியர் ++ தரையை தொட்ட அடுத்த நொடியே பலத்த சத்தத்துடன் வெடித்து சிதறுகிறது. வெகு தொலைவிற்கு தூக்கி வீசபடுகிறார் Dr.பொட்ஸ், தலையில் பலத்த அடி அரை மயக்கத்தில் ரத்த வெள்ளத்தில் கிடக்கிறார்....

அப்போது மீண்டும் ஒலிக்கிறது அதே ஆங்கில பாடல் அனால் இந்த முறை எனக்கு மட்டும்மல்ல Dr.பொட்ஸ்க்கும் கேட்டிருக்க வேண்டும். பாடலை கேட்டு லேசாக அசைய முயற்சிக்கிறார் பாடல் கேட்கும் திசையை நோக்கி கைகளை துழாவுகிறார், கையில் ஏதோ ஒரு பெட்டி ஒன்று கிடைக்கறது, இது எங் எர்த்தின் ஆற்றங்கரையில் கிடைத்த பெட்டி நொறுங்கிய நிலையில் இதிலிருந்து அந்த பாடல் எப்படி கேட்கிறது கையை பெட்டியினுல் விட்டு ஏதோ ஒரு பொருளை எடுக்கிறார். லேசாக தலையை தூக்கி அது என்வென்று பார்த்தால்...........

ங்கொய்யால..... அது என்னோட கைபேசி!!
அப்ப அடிக்கடி கேட்ட அந்த பாட்டு?
என்னோட அலாரம் சத்தம்....
அப்ப மேல சொன்ன கதையெல்லாம்?
கனவு.....
அடடா ஆபீசிக்குலேட்டாயிடுச்சே! பரவால்ல......
ஆனா மெஸ் ஹால மூடிருப்பாங்களே......

"ஆஹா வடை போச்சே"

ஆக இந்த கதை மூலமாக (உள் மூலமா? வெளி மூலமான்னு? கேட்காதீங்க) என்ன சொல்ல வரேன்னா அடிகடி அலாரம் பாடலை மாத்திகிட்டே இருக்கணும் இல்லன்னா அந்த பாட்டு நமக்கு பழகிபோய்டும் மேலும். இதுமாதிரியான கனவோட சுகம்மா தூகம்தாங்க வரும். அப்பறம் அலாரத்தால பலாரம் போன கதைகள்ன்னு எதாவது என்ன மாதிரி பதிவு போட வேண்டியதுதான்.

நான் எங்கிருக்கிறேன்...!!!! - பாகம்-2

2010-08-30T07:44:00.002+03:00

பாகம்-1 - ஒரு முறை படித்துவிட்டு தொடரவும்.

அடிக்கடி கேட்கும் இந்த பாடலை என்னால் இன்னமும் கண்டுபிடிக்க முடியாதால் ஒருவேளை எனக்கு செலெக்டிவ் அம்னீஷியா வந்து விட்டதோ என்று ஆராயாமல் உடனடியாக Dr.பொட்ஸ்ன் ஆராய்ச்சி மையத்திற்கு செல்லுங்கள் .....

திட்டமிட்டபடி பயணத்தை தொடங்கும் நாள்.... பல்லாயிரகணக்கான மக்கள் "மனித இனத்தை காப்பாற்றுங்கள்" போன்ற வாசகங்கள் நிறைந்த பலகைகளுடனும் கோஷங்களுடனும் Dr.பொட்ஸ்ன் ஆராய்ச்சி மையத்தை சுற்றி கூடி ஆரவரமிட்டபடி தங்களையும் தங்கள் வம்சத்தினரையும் ஏன் மனித இனத்தையே காப்பாற்ற வழிவகுக்கும் இந்த பயணத்திற்கு குழுவினரை வழியனுப்ப ஆவலோடு காத்திருகின்றனர். Dr.பொட்ஸ் தனது குழுவினருடன் புறபடுவதர்க்கு தயாராகி கொண்டிருக்கையில் ஏதோதோ எண்ணங்கள் அவர்களை சிறிது கலக்கமடைய செய்கிறது பயணத்தின் அபாயங்கள் மற்றும் அதற்கான பாதுகாப்பு? கால அவகாசம் இல்லாமையால் இது வரை எந்த சோதனை பயணமும் செய்து பார்க்காத ஸ்பேஸ் க்ருசியர் ++?? பயணம் எத்தனை மாதங்கள் ஏன் ஆண்டுகள் வேண்டுமானாலும் தொடரலாம் அதுவரை மக்களின் நிலைமை??? தனது கட்டுபாட்டு தளத்தினுடனான அல்லது பூமியுடன் தொடர்பில் ஏதேனும் பிரச்சனை ஏற்ப்பட்டால்???? இவ்வாறு பல கேள்விகள்.... எல்லாவற்றிற்கும் நம்பிக்கை என்ற ஒரே பதிலுடன் பயணத்திற்கான கவுன்ட்டவுன் தொடங்குகிறது. ...............6..5..4..3..2..1..0 இதோ விண்ணை நோக்கி சீறிக்கொண்டு புறப்டுகிறது ஸ்பேஸ் க்ருசியர் ++ . புறப்பட்ட சில நொடிகளிலேயே பார்பவர்களின் கண்களை விட்டு மறைந்தது மட்டுமல்ல இந்த பூமியை விட்டே வெளியேறியது.

சற்றே அதிக புகையுடனும் சப்தத்துடனும் கிளம்பியதில் மீண்டும் ஒலித்த அதே பாடல் கேட்கவில்லை நான் அதில் கவனம் கொள்ளவும் இல்லை. மக்கள் ஆரவாரமிட்டபடி மகிழ்ச்சி கடலில் மூழ்கினர் இதை பார்த்து கொண்டிருக்கும் எனக்கு அந்த பாடல் ஒரு பொருட்டாக தெரியவில்லை?

இனி விண்வெளியில்...

ஒவ்வொரு நாட்டிற்குமான தனிதனி விண்வெளி ஆராய்ச்சி மையங்கள் சிறப்பாக செயல்பட்டுக்கொண்டிருந்தாலும் நவீன வசதிகளுடன் புதுபிக்கப்பட்ட இந்தியாவிற்கான பிரத்தியோகமான விண்வெளி ஆராய்ச்சி மையத்தில் உள்ள தகவல் தொடர்பு கருவிகள் மட்டுமே இந்த ஆராய்ச்சிக்கு பயன்படுத்த முடியும் என்பதாலும், ஒருங்கிணைந்த உலக ஆராய்ச்சி மையத்தின் தலைமை கட்டுப்பாட்டு தளம் என்பதாலும் சில ஆண்டுகளாக இதில் ஆராயப்பட்ட முடிவுகளின் அடிப்படையிலேயே இந்த பயணம் தொடர்கிறது. இந்த ஸ்பேஸ் க்ருசியர் ++ ன் சூப்பர் பவர் பற்றி சொல்லிக்கொண்டே போகலாம் அவற்றுள் ஒன்று பயணிக்கும் போதே கடந்து செல்லும் கிரகங்களை படம் பிடித்து உடனுக்குடன் ஆராய்ச்சி மையத்திற்கு அனுப்பிவிடும், இவ்வாறாக அனுப்பப்படும் புகைப்படங்கள் மூலமாகவும் ஸ்பேஸ் க்ருசியர் ++ல் இருந்து அனுப்பப்படும் பல்வேறு சிக்னல்களின் உதவியுடனும் அந்தந்த கிரகங்களின் தன்மை, மனிதன் வாழ்வதற்கான சாத்தியகூறுகள், இயற்கை வளங்கள் என தேவையான அனைத்து விபரங்களையும் எளிதில் பட்டியல் இட்டுவிடலாம். இவ்வாறாக பல்வேறு ஆராய்ச்சி, தேடல்கள் மற்றும் எதிர்பாராத ஆச்சிரியங்கள், அதிசயங்கள் என பயணம் தொடர்ந்துகொண்டிருக்கிறது...!!!

அவ்வப்போது சரியான இடைவெளியில் அதே பாடல் என் கவனத்தை மீண்டும் மீண்டும் திசை திருப்பினாலும் என் சிந்தனை இந்த பயணத்தை பற்றியே இருந்தது....

பயணத்தில் சில மாதங்களுக்கு பிறகு ஒரு நாள்.....

வழக்கம் போல் Dr.பொட்ஸ் மற்றும் குழுவினர் கிடைக்கும் ஒவ்வொரு சிறு தகவலையும் இந்திய விண்வெளி ஆராய்ச்சி மையத்திற்கும், பூமியில் உள்ள தங்களது ஆராய்ச்சி மையத்திற்கும் தொடர்ந்து பகிர்ந்துகொண்டிருன்தனர். திருப்திகரமான எந்த ஒரு தீர்வும் இதுவரை கிடைக்காத நிலைமை, தகவல் தொடர்பு எல்லைக்கு வெளியே இன்னும் சில நொடிகளில் சென்றுவிடுவோம் என்பதை நன்கு அறிந்தாலும் பயணத்தை நிறுத்துவதாய் இல்லை. ஒருசில முக்கிய தகவல்களை ஆராய்ச்சி மையங்களுக்கு அனுப்பிவிட்டு தொடர்பு எல்லையை விட்டு வெளியேறியது ஸ்பேஸ் க்ருசியர் ++. மனித இனத்தை அழிவிலிருந்து காப்பாற்ற சரியான தீர்வு கிடைக்காமல் திரும்பபோவதில்லை என்ற மன உறுதியுடன் Dr.பொட்ஸ் மற்றும் குழுவினர் தொடர்பு எல்லையை விட்டு வெளியேற ஆராய்ச்சி மையகளில் ஒரே சலசலப்பு, இச்செய்தி எப்படியோ மக்களிடம் பரவிவிட அனைவரும் அதிர்ச்சியில் உறைந்துவிட்டனர், நானும்தான்... காரணம் இப்படி ஒரு பயணத்திட்டம் இருப்பதாக இதுவரை யாரிடமும் Dr.பொட்ஸ் தெரிவிக்கவில்லை. Dr.பொட்ஸ் எங்கு சென்றார்?, திரும்பி வருவரா?? எப்போது வருவார்??? அதுவரை மக்களின் நிலைமை????

என்ன கொடுமை சார் இது? இப்படி பல கவலைகளில் இருக்கும்போது அதே ஆங்கில பாட்டு கேட்குது, தேவைதானா? விடுங்க அத பத்தி அப்பறம் பார்காலம்...

ஸ்பேஸ் க்ருசியர் ++ ஆராய்ச்சி மையங்களுக்கான தொடர்பு எல்லையை விட்டு வெளியேறியதே தவிர நமது தொடர்பு எல்லையை விட்டு இன்னமும் வெளியரவில்லை வாருங்கள் தொடர்ந்து சென்று பார்ப்போம். பாகம் 3ல்.

அதுவரை தோன்றும் உங்கள் யுகங்களை பின்னூட்டத்தில் பதியவும்.

நான் எங்கிருக்கிறேன்...!!!! - பாகம்-1

2010-08-22T17:10:00.001+03:00

தூரத்தில் ஒரு பாடல் கேட்கிறது, எதோ ஒரு ஆங்கில பாடலாக இருக்கலாம் சரியாக காதில் விழவில்லை ஆனால் இது எனக்கு மிகவும் பரிட்சயமான இசை ..................., சுமார் எத்தனை நூற்றாண்டுகள் கடந்துசென்றிருக்கலாம் என்று நினைவில்லை நான்காம் உலகப்போர் முடிந்து பல நூறு ஆண்டுகளுக்கு மேலாகியும் போரில் பயன்படுத்தப்பட்ட அணு ஆயுதங்களின் தாக்கத்தால் இன்னமும் உயிர் பலிகளின் எண்ணிக்கை ஒருபுறம் தொடர்ந்து அதிகரித்துக்கொண்டே இருக்கிறது, நவீனத்துவத்தின் பயனாக ஓசோன் படலத்தை ஓய்வெடுக்க செய்தாகிவிட்டது, புவி வெப்பமயமாதலின் தாக்கம் அண்டார்டிக் பகுதியில் உள்ள பனிக்கட்டிகளை மட்டுமல்ல குளிர்சாதன பெட்டிகளில் உள்ள ஐஸ் கட்டிகளையும் முற்றிலுமாக உருக செய்துவிட்டது, மேலும் நிலநடுக்கம், சுனாமி, எரிமலை வெடிப்பு என தொடர்ச்சியாக இயற்கை சீற்றங்கள் பூமியை புரட்டிபோட்டுகொண்டிருந்தது. சுத்தமான காற்று, நிலம், நீர் என்று மனித இனத்தின் அனைத்து வாழ்வாதாரங்களும் குறைந்துவிட்டது. மேலும் தினம் தினம் புதியதாய் உண்டாகும் கொடிய நோய்களினால் கூட்டம் கூட்டமாக மக்கள் மரணத்தை வரவேற்க தயாராகிவிட்டனர்.சொற்ப எண்ணிக்கையில் எஞ்சி இருக்கும் மனித இனத்தை காப்பாற்ற வேண்டிய கட்டாயத்தில் உலக நாடுகள் ஒன்று பட்டு பல வழிகளை ஆலோசிதுக்கொண்டிருந்த தருணம்.... மீண்டும் தூரத்தில் அதே ஆங்கில பாடல் இம்முறையும் என் காதில் சரியாக விழவில்லை!!!!!!!!! போகட்டும்.................

அழிவின் எல்லையில் இருக்கும் சிலகோடி மக்களையாவது காபற்றிவிடவேண்டும் என்ற ஆதங்கத்துடன் உலக நாடுகளின் தலைவர்களும், விஞ்ஞானிகள், அறிஞர்கள், மத பெரியோர்கள் என பலரும் தங்களின் எண்ணங்களை வெளிபடுத்துகின்றனர். புதன், செவ்வாய், வியாழன் என இத்துனை நூற்றாண்டுகளில் கண்டுபிடிக்க பட்ட அனைத்து கிரகங்களுக்கும் செல்வதற்கான சாதக பாதகங்களை விவாதிடுகின்றனர். ஏற்கனவே பல கிரகங்களிலும் சென்று குடியேறிய மக்கள் முடிந்தவரை அந்த கிரகங்களிலும் சுற்றுப்புழ சூழலை பூமியை விட மோசமான நிலைமைக்கு மாற்றி விட்டு பூமியை நோக்கி திரும்பிகொண்டிருக்கும் இந்த காலகட்டத்தில் மீண்டும் அதே கிரகங்களுக்கு செல்வது என்பது நிரந்தர தீர்வாக இருக்காது என்பதால் கையில் இருக்கும் கடைசி வாய்ப்பும் நழுவி விட்டதே என அனைவரது முகத்திலும் ஒரு பயம் கலந்த சோகம் தெரியும் போது......... என் காதில் மீண்டும் அதே பாடல் அதே இசை கேட்கிறது, ஏற்கனவே பலமுறை கேட்டது போல் இருக்கிறதே!!!!!!!!!!!அதை விடுங்கள்.................

தொடர்ந்து பல நாட்களாக இடைவேளை இன்றி நடைபெற்ற ஆலோசனை கூடத்தின் ஒரு நாள் பலநாடுகளை சேர்ந்த ஒரு விஞ்ஞானிகள் குழு சற்றே உற்சாகத்துடன் பேச ஆரம்பிகிறது. மிக அதிக பொருட்செலவில் பல விஞ்ஞானிகள் பல ஆண்டுகள் உழைத்து உருவாக்கிய ஒரு இயந்திரத்தை பற்றியது. இயந்திரம் என்பதை விட அது ஒரு அதிசய வாகனம் என்பதே சரி. அக்குழுவின் தலைவர் இந்த விவாதத்தில் பங்கேற்றிருக்கும் பல இந்தியர்களுல் ஒரே தமிழன் Dr.சர். பொட்ஸ் (பல டாக்டர் பட்டங்கள் பல நாடுகளின் உயரிய விருதுகள், பல ஆண்டுகள் தனது கண்டுபிடிபுகளுக்காக தொடர்ச்சியாக நோபல் பரிசை வாங்கிக்கொண்டே இருப்பவர் உங்கள் அனவருக்கும் தெரிந்த சாட்ச்சாத் நம்ம "பொடுசு" தாங்க)
தங்களது புதிய கண்டுபிடிப்பான ஸ்பேஸ் க்ரூசியர் ++ ஐ பற்றி விவரிக்கலானார்.
நேனோ, நானோ, நோநோ, ஏனோ, தானோ என பல டெக்னாலஜிகலை பயன்படுத்தி உருவாக்கிய இந்த வாகனமானது ஒளியின் வேகத்தை அசாதாரணமாக ஓவர் டேக் செய்துவிடும் எந்த கிரகத்திற்கும் சில நாட்களிலோ அல்லது சில மாதங்களிலோ எளிதில் சென்று வந்து விடலாம் முக்கியமாக காற்று, நீர், நெருப்பு, வெப்பம் என எந்த ஊடகதிளிருந்தும் தேவையான எரிபொருளை தானே பிரித்து எடுத்துக்கொள்ளும் என்பதால் ஆண்டுகணக்கில் கூட இதில் பயணம் மேற்கொள்ளல்லாம் என்பதே இதன் சிறப்பு என்று கூறி முடிப்பதற்குல் சுற்றிருப்பவர்கள் வியப்பில் கைதட்டி ஆரவரமிட ஆரம்பித்தனர்... இப்போதும் அந்த ஆங்கில பாடல் பின்னனியில் ஒலிப்பது கேட்கிறது, ஒலித்துகொண்டே இருக்கிறது ஏன் எனக்கு மட்டும் இந்த பாடல் ஒரு சரியான இடைவேலையில் கேட்டுக்கொண்டே இருக்கிறது என்று யோசிப்பதற்குல்............. Dr.பொட்ஸ் பேச்சை தொடர்கிறார்....

ஸ்பேஸ் க்ரூசியர் ++

ஸ்பேஸ் க்ரூசியர் ++ல் தனது குழுவினருடன் விண்வெளியில் பல சூரிய குடும்பங்களுக்கு அப்பால் இதுவரை யாரும் முயற்சி செய்திடாத ஒரு கிரகத்தை சென்று ஆராயபோவதாகவும் அதில் மனித இனம் வாழ்வதற்கான சாத்தியகூறுகள் இருக்க வாய்ப்பு இருக்கலாம் என்றும் இந்த ஆராய்ச்சிகாகவே தங்கள் வாகனம் உருவாக்கப்பட்டதாகவும் தெரிவிக்க, மேலும் இந்த பயணத்தை குறித்தும் ஆராய்ச்சி பற்றியும் இருந்த அனைவரது சந்தேகத்தையும் Dr.பொட்ஸ் பொறுமையாக தீர்த்துவைத்து தனது பயண திட்டத்தை முழுமையாக விளக்கியவுடன் அனைவரது முகத்திலும் சற்று நிம்மதி புன்னகை மலர்கிறது, நம்பிக்கை பெருமூச்சி அனைவரையும் ஆனந்தத்தில் மூழ்க செய்ய........................... ஒலிக்கிறது அதே ஆங்கில பாடல் இம்முறை சற்று அருகில் இன்னும் ஒரு முறை கேட்டால் நிச்சயம் கண்டுபிடித்துவிடுவேன் அது என்ன பாடல் எங்கிருந்து ஒலிக்கிறது என்பதை........!!!!!

Dr.பொட்ஸ் பயணத்தை தொடர்ந்தாரா? மனித இனத்தை அழிவிலிருந்து காப்பாற்றினாரா? ஏன் இடைஇடையே தொடர்ந்து எனக்கு மட்டும் ஒரு பாடல் கேட்டுக்கொண்டே இருக்கிறது அது என்ன பாடல்?

போன்ற கேள்விகளுக்கெல்லாம் பதில் கிடைக்கும் பாகம் - 2ல்

அதுவரை தோன்றும் உங்கல் யுகங்களை பின்னூட்டத்தில் பதியவும்.

சுதந்திர தின கொண்டாட்டம்

2010-08-15T08:24:00.004+03:00

எல்லோருக்கும் சுதந்திர தின வாழ்த்துக்கள். இன்று எதாவது ஒரு பதிவு சுதந்திர தினத்திற்காக எழுதிவிடவேண்டும் என்று ஆரம்பித்தேன் வெகுநேரமாக யோசித்தும் என்ன எழுதுவது என்றுதெரியவில்லை கண்மூடி மனதை வெற்றிடமாக்கி மீண்டும் மீண்டும் யோசித்ததில் ஒவ்வொரு பருவத்திலும் எப்படி சுதந்திர தினத்தை கொண்டாடினோம், மேலும் ஒருசில சுதந்திர போராட்ட தியாகிகளின் பெயர்கள் மட்டுமே மட்டுமே நினைவிற்கு வருகிறது வேறு எதுவும் உணர்ச்சிபூர்வமாக தோன்றவில்லை என்றாலும் பழைய நினைவுகள் நம் உணர்சிகளை கண்டிப்பாக தட்டி எழுப்பும் என்ற நம்பிக்கையுடன் தொடர்கிறேன்.

ஆரம்ப பள்ளிகளில் படிக்கும் போது (ஒன்று முதல் நான்காம் வகுப்பு வரை) அதிகாலையில் பள்ளிக்கு சென்றால் பள்ளி வாயிலில்தோரணங்கள், கோலங்கள், ஒலிபெருக்கியில் தேசபக்தி பாடல்கள் என்று ஒரு பரவச நிலையில் ஆடிக்கொண்டே உள்ளே சென்றால் தலைமை ஆசிரியரோ அல்லது ஊர் பெரியவர்கள் யாராவது ஒருவர் தேசிய கொடியை ஏற்றுவார் அதிலிருந்து பூ விழுவதை அதிசயமாக பார்த்து கைதட்டிவிட்டு வரிசையில் சென்றால் ஒரு பைசா மிட்டாய் (ஒரு பைசா நடைமுறையில் இல்லை என்றாலும் ஐந்து பைசாவிற்கு ஐந்து மிட்டாய் என்பதால்) ஆரஞ்சு, மஞ்சள், பச்சை போன்ற நிறங்களில் கைநிறைய அள்ளி கொடுப்பார்கள். ஐந்து அல்லது ஆறு மிட்டாயில் கை நிறைந்து விடும் உண்மையில் மனதும்தான். பிறகு நண்பரகளுடன் சிறிது நேரம் வியாயாடிவிட்டு வீட்டிற்கு சென்றுவிடலாம்.

நடுநிலை பள்ளிகள் (ஐந்து முதல் எட்டாம் வகுப்பு வரை) அதே அதிகாலை தோரணங்கள், கோலங்கள், ஒலிபெருக்கியில் தேசபக்தி பாடல்கள் என்பதெல்லாம் மாறிவிட்டது கொடி ஏற்றிவிட்டு ஐந்து பைசா மிட்டாய் (அதே மிட்டாய்தான் விலை ஏறிவிட்டது ) கைநிறைய கொடுப்பார்கள் ஆனால் பத்தாது!!!. பிறகு சுதந்திர போராட்டத்தை பற்றியோ அல்லது போராடியவர்களை பற்றியோ யாராவது பேசுவார்கள் அல்லது பேச்சு போட்டி, கட்டுரை போட்டி போன்றவை நடைபெறும் நானும் இவற்றில் பங்கேற்பதுண்டு யாராவது ஆசிரியர் எழுதி கொடுத்ததை மனப்பாடம் செய்து ஆவேசமாக செய்கையுடன் கையை நீட்டி பேசி பரிசுகளும் வாங்கியதுண்டு. உண்மையில் இப்போது எந்த தேசத்தலைவரின் வாழ்கை வரலாற்றை பற்றியும் ஞாபகம் இல்லை என்று எண்ணி மிகவும் வருத்தமடைகிறேன்.

ஒன்பது மற்றும் பத்தாம் வகுப்பு தேசிய மாணவர் படை (NCC) இல் இருபதால் சற்றே நெஞ்சை நிமிர்த்தி வரிசையை ஒழுங்குபடுத்துவது, சிறப்பு அணிவகுப்புகளில் கொடிக்கு வீர வணக்கம் செலுத்துவது, சாக்லேட் வழங்குவது (இப்போதெல்லாம் மிட்டாய் போய்விட்டது)என்று பொறுப்புகளுடன் சென்றது.

பதினொன்று பனிரெண்டாம் வகுப்புகள் தொலைகாட்சி பெட்டி எங்கள் வீடிற்கு வந்த புதிது தூர்தர்சனில் ஒளிபரப்பாகும் இந்திய இராணுவத்தினரின் அணிவகுப்பு மெய்சிளிர்க்கும் வண்ணம் பார்த்து ரசிப்பதோடு முடிந்துவிடும் (வேறு சேனல்கள் அப்போது எங்கள் ஊரில் கிடையாது) பள்ளிக்கூடம் போகலையான்னு கேட்டுடாதீங்க இப்பெல்லாம் பள்ளி நாட்களிலேயே அப்பப்ப எட்டி பார்துட்டு சினிமாவுக்கோ அல்லது சிதம்பரம் நடராஜர் கோவிலுக்கோ சென்றுவிடுவது வழக்கம்.

பாலிடெக்னிக் படிக்கும்போது சுதந்திர தினம் என்றால் ஒரு விடுமுறை அவ்வளவுதான். வேலைக்கு வந்த பிறகு ஆபிசில் பார்வேர்ட் இ-மெயில் மட்டும் இப்போது முதல் முறையாக ப்ளாக் வழியாக உங்களுடன்.

நான் எழுதிருக்கும் ஒவ்வொரு பத்தியின் அளவையும் பார்த்தாலே எந்த அளவிற்கு சுதந்திர தின கொண்டாட்டங்கள் என்னளவில் குறைந்துவிட்டது என்பதை உணர்வீர்கள். இது எனக்கு மட்டும்தான் பொருந்துமா? எனது நாட்டுப்பற்று இதைவைத்து குறைந்துவிட்டது என்பதா? உண்மையில் உங்கள் மனசாட்சியை தொட்டு யோசித்து சொல்லுங்கள் சுதந்திர தினம் என்றதும் உங்கள் நினைவில் வேறு என்னவெல்லாம் தோன்றுகிறது? என் கருத்து தவறா? என்னுடன் பணிபுரியும் சிலரிடம் நேரடியாக இதுபற்றி கேட்டு அவர்களின் கருத்தை பதிவு செய்யலாம் என்றிருக்கிறேன் பார்க்கலாம் எந்த அளவிற்கு என் கருத்தை மாற்றுகிறார்கள் என்பதை!!!!!!!! நீங்களும் உங்கள் எண்ணங்களை கமென்ட் பகுதியில் பதியுமாறு கேட்டுக்கொள்கிறேன்

அடுத்த சுத்திர தினத்திற்குள் கண்டிப்பாக யாரவது ஒரு தலைவரை பற்றியாவது படித்து அவரை பற்றி ஒரு பதிவாவது எழுதுவேன் என்று உறுதி எடுத்துக்கொள்கிறேன்.

பொடுசு

பெற்ற சுதந்திரத்தை சிறப்புடன் காப்பது நம் ஒவொருவரின் கடமை என்பதை உணர்ந்தவனாக.... மீண்டும் சுதந்திர தின வாழ்துக்களுடன்....

ஓடி விளையாடு பாப்பா - 1

2010-08-11T17:19:00.004+03:00

இப்போதெல்லாம் ஊருக்கு சென்றால் வீதிகளில் சிறுவர்கள் சிறுமியர்கள் யாரும்விளையாடுவதை காணமுடிவதில்லை அப்படியே ஒரு சில சிறுவர்களை பார்த்தாலும் கிரிக்கெட்டை தவிர வேறெதுவும் விளையாடுவதில்லை காரணம் இவர்களுக்கு படிப்பு விட்டால் டி.வி பார்ப்பது அதில் பிரபலமான ஒரு சில விளையாட்டுகளை தவிர மற்றவை தெரிவதில்லை. இன்னும் சில குழந்தைகளுக்கு விளையாட்டு என்பது கம்ப்யூட்டர், வீடியோ கேம்ஸ், அல்லது செல் போனில் ஆடுவது மட்டுமே என்றாகிவிட்டது.இது போன்ற காரனங்களால்தான் சிறு வயதிலேயே பார்வை கோளாறு, எடை கூடுதல், மனஅழுத்தம் (இப்படி அடுக்கிகொண்டே போகலாம்) இவையெல்லாம் ஏற்படுகிறது என்று மருத்துவ உலகம் தெரிவிக்கிறது. இவையெல்லாம் நமது மூத்த தலை முறையினரிடம் அவ்வளவு எளிதில் நெருங்கவில்லை அனால் நம்மைவிட இன்றைய இளைய தலைமுறையினர் வெகுவாக இது போன்ற பாதிப்புக்குள்ளாகின்றனர்என்பது மிகையல்ல.

ஆனா பொடுசு அப்படி இல்லைங்க, எப்ப பார்த்தாலும் தெருவுலதான் எதாவது விளையாடிகிட்டே இருப்பான் . மழை, வெயில், புழுதிக்காற்று என எந்த சூழலும் ஏன் யாருமே அவனுக்கு தடையாக இருந்ததில்லை.அப்படி அவன் விளையாடிய, தெரிந்த, பார்த்து ரசித்த இன்றளவில் நடைமுறையில் இருக்கிறதா என்று சந்தேகத்திற்கிடமான விளையாட்டுகளின் ஒரு பிளாஷ் பேக் இதோ..............

"பம்பரம்" (என்னது ம.தி.மு.க. சின்னமா ஹலோ பொடுசுக்கு அரசியல் தெரியாதுங்க) இன்றைக்கு பம்பரம் என்பது தொப்புளில் விட்டு விளையாடுவது என்ற நிலைமைக்கு தள்ளபட்டுவிட்டது (சின்ன கவுண்டர் படம் பார்க்காதவர்கள் பார்த்துவிட்டு மேலே தொடரவும்). ஒவ்வொரு சீசனுக்கும் ஒரு விளையாட்டு மாறிகிட்டே இருக்கும் பம்பர சீசன் ஆரம்பிச்சா ல கடைகளில் தனி செக்சனே திறந்து விடுவார்கள் விதவிதமான வண்ணங்கள், அளவுகளில் கிடைக்கும். இதன் எடை மற்றும் வடிவத்தை வைத்து நல்ல பம்பரத்தை தேர்ந்தெடுத்து அதற்கு ஏற்றாற்போல் ஆணி அடித்து கூர் அமைப்பதற்கே தனி திறன் வேண்டும். பிறகு என்ன சாட்டையை பம்பரத்தில் சுற்றி தலைக்கு மேலாக ஓங்கி தரையை நோக்கி குத்த வேண்டும் அவளோதான். பல விதிமுறைகளுக்கு உட்பட்டு வெற்றிபெறுபவர் தோற்றவரின் அல்லது தோற்ற அணியினரது பம்பரத்தை தனது பம்பரத்தின் ஆணியால் குத்தி (ஆக்கர்) உடைதுவிடுவர்கள். (அப்பறம் கடைல புது பம்பரம் எப்படி விக்கிறது). மேலும் செய்முறை விளக்கங்கள் தேவைபடுவோர் மீண்டும் மீண்டும் சின்ன கவுண்டர் படத்தை பார்த்து கற்றுக்கொண்டு பயன்பெறவும்.

"கோலி குண்டு" (குண்டுனோன்ன தீவிரவாதிங்க விளையாட்டுன்னு சொல்லகூடாது இது வேற "பளிங்கு") ட்ரவுசர் பாக்கெட்ல எப்பவும் ரெடியா இருக்கும். குறைந்தபட்சம் ரெண்டு பேர் சேர்ந்துட்டா போதும் உடனே சுவரோரத்தில் ஒரு "ப" வடிவ கட்டம் போட்டு சிறிய குண்டுகளை கட்டத்திற்குள் வீச வேண்டும் எதிராளி காட்டும் குண்டை கையில் உள்ள பெரிய குண்டால் குறிபார்த்து அடிக்க வேண்டும். இது போல பல விளையாட்டு முறைகள் உள்ளன. ஒரு முறை காசு வைத்து விளையாடி வீட்டில் மாட்டிக்கொண்டான் பொடுசு அப்பாவிடம் ஒரே ஒரு அறைதான் பிறகு பல ஆண்டுகளுக்கு பிறகு தாஜ்மஹால் சென்ற போதுதான் மீண்டும் பளிங்கு கற்களை பார்த்தான்.

"கிட்டி புள்ளு / கில்லி" இது பொடுசோட பேவரிட் (படம் இல்ல விளையாட்டு), கிரிக்கெட் விளையாட்டிற்கு கொள்ளு தாத்தாவாக கருதப்படுவது, எந்த வித முதலீடும் தேவையில்லை யார் வீட்டிலாவது உள்ள வேப்பமரம் அல்லது வேறு எதாவது ஒரு நல்ல மரத்தின் ஒன்றரை அடிஉள்ள நீளமுள்ள ஒரு குச்சி போதுமானது ஒரு அடி நீளத்திற்கு ஒரு துண்டும் கிட்டி என்பார்கள், ஆறு முதல் எட்டு இன்ச் உள்ள இருபுறமும் கூர்மையாக சீவப்பட்ட துண்டிற்கு புள்ளு என்றும் பெயர். கிட்டியால் புள்ளின் நுனியில் தட்டி எகிறசெய்து இருமுறை அல்லது மூன்று முறை கீழே விழாமல் தட்டிவிட்டு பிறகு தூரமாக அடிக்க வேண்டும் புல் விழும் இடத்திலிருந்து ஆரம்ப இடத்திற்கு உள்ள தூரத்தை கிட்டி அளவிலோ அல்லது புள்ளின் அளவிலோ ஸ்கோராக கேட்கவேண்டும் சந்தேகத்தின் பேரில் எதிராளி அளந்து கேட்ட அளவு இல்லையென்றால் நாம் அவுட் சரியான அளவு இருந்தால் ஆட்டத்தை தொடரலாம். இவ்வாறு தொடர்ந்து விளையாடி வெற்றிபெறும் பட்சத்தில் தோற்றவர் அல்லது தோற்ற அணியினர் மூச்சி விடாமல் கபடி கபடி என்பதுபோன்று புள் விழுந்த இடத்திலிருந்து ஆரம்ப கோடு வரை ஓடி வர வேண்டும் ஊருக்கு ஊர் விதி முறைகளும், பெயரும் மாறினாலும் போவோர் வருவோரின் மண்டையை உடைப்பதில் மட்டும் எல்லா ஊரிலும் ஒன்றுபட்டு இருப்பதே இந்த விளையாட்டின் தனி சிறப்பு எனலாம். (மேலும் இதன் சிறப்புகளை பார்த்திபனின் உள்ளே வெளியே பார்த்து தெரிந்துகொள்ளவும்)

மேலும் சில விளையாட்டுகளை பொடுசு மற்றுமொரு பதிவில் விளையாடுவான்.

தொடரும்......

உங்களின் மறக்கமுடியாத விளையாட்டு அனுபவங்கள் அல்லது இதுபோன்ற விளையாட்டுகளை பற்றி கமெண்ட்ஸ் பகுதியில் பகிர்ந்துகொள்ளுமாறு அனைவரையும் அன்புடன் அழைக்கிறேன்.

புடிச்சிருக்கு

2010-08-04T20:03:00.001+03:00

காலையில் நண்பர் ஒருவர் வேலைக்கு வரவில்லை என்னானதோ? விசாரிக்கலாம் என்று கைபேசியில் அழைத்தேன் தூக்கத்தில் இருந்தவரிடம்....

ஹலோ என்னாச்சி வேலைக்கு வரல எதாவது பிரச்சனையா?
ஆமாம் செந்தில் இடுப்பு புடுச்சிருக்கு
யார் இடுப்பு?
என்னோட இடுப்புதான்!
உங்க இடுப்பு உங்கள்ளுக்கு புடிச்சிருக்கு இதுல என்ன பிரச்சனை?
(தூக்கத்தில் ஏதும் புரியாமல் அமைதி காத்தவரிடம் தொடர்ந்தேன்)
எத்தனை நாளா உங்க இடுப்பு புடிச்சிருக்கு?
நேத்திலேர்ந்துதான்.....
அப்போ அதுக்கு முன்னாடி யார் இடுப்பு புடுச்சிருந்தது?

இப்படிதான் கடுப்பாயிருப்பாரோ?

புரிந்துகொண்டார் போல திட்டுவதற்கு ஆரம்பித்தார் அழைப்பை துண்டித்துவிட்டேன் பாவம் மீண்டும் தூங்கினாரோ என்னவோ.

ஆமாம் அப்படி நான் என்னத்த தப்பா கேட்டுட்டேன்???????

யாதும் ஊரே யாவரும் கேளீர்

2010-08-01T08:21:00.003+03:00

"யாதும் ஊரே யாவரும் கேளீர்" என்று தமிழ் கூறும் நல்லுலகம் உரைத்தாலும் நம் மனது கேட்பதாயில்லை. சொர்கமே என்றாலும் அது நம்ம ஊர் போல வராது என்பது யாராலும் மறுக்க முடியாத உண்மை. நாம் எங்கு சென்றாலும் எத்தனை காலம் ஆனாலும் பிறந்து வளர்ந்த ஊரின் பாரம்பரியம், பழக்கவழக்கங்கள், கலாச்சாரம் மற்றும் அன்றாட வாழ்கை முறை இவைதான் நம் அடிப்படையாக அமைகின்றன. சென்ற இடத்திற்காகவோ, வேலைக்காகவோ அல்லது வசதிகேற்ப மாற்றிக்கொள்ளும் வாழ்கை முறை என்பது போலியான முகமுடியை போன்றதே மாற்றிக்கொண்டே இருக்கலாம் அனால் வாழ்ந்ததற்கான ஆத்மார்த்தமான திருப்தியோ, அர்த்தமோ, சுவடுகளோ இருக்காது என்பது என் தனிப்பட்ட கருத்து.

கவனிக்க வாழ்கை முறை என்பது வேறு வாழ்கை தரம் என்பது வேறு, வாழ்கை தரத்தை மேம்படுத்துவதுதான் மனித வாழவின் ஆதாரம் அதற்கான தேடலும், முயற்ச்சியும்தான் நம் ஒவ்வொருவருடைய கடின உழைப்பிற்க்கும், முன்னேற்றத்திற்கும் காரணமாக அமைகிறது இல்லையேல் இன்னமும் நாம் கற்கால மனிதர்களாகவேதான் இருந்திருப்போம். ஆனால் நமது வாழ்கையின் தரம் வளர்ந்த வேகத்தில் சிந்தனையின் தரம் வளரவில்லை என்று சொன்னால் அது மிகையாகாது.

நல்ல சிந்தனையை வளர்த்துக்கொள்வதற்கு நமக்கு பெரிதும் உறுதுணையாய் இருப்பது நல்ல புத்தகங்களே. ஆனால் இன்றைய காலகட்டத்தில் நல்ல புத்தகங்களை அடையாளம் கண்டு அவற்றை தேடி வாங்கி படிப்பது என்பது அதனை எளிதான காரியமாய் எனக்கு தெரியவில்லை. குறிப்பாக மாணவ சமுதாயத்தினர் அதிலும் எங்கள் ஊர் போன்ற கிராமத்தில் இருப்பவர்களின் நிலைமை மிகவும் கவலைகிடமானதே. பாடப்புத்தகம் அதிலும் ஆசிரியர் சொல்லிகொடுப்பதை தவிர வேறு ஏதும் அவர்களுக்கு எட்டுவதில்லை. வீடுதோறும் இன்று தொலைகாட்சி பெட்டி வந்துவிட்டாலும் அவற்றின் செயல்பாடுகளும் அவற்றால் ஏற்படும் சமூக சீர்கேடுகளை பற்றியும் நான் உங்களுக்கு எடுத்துரைக்க வேண்டிய அவசியம் இல்லை.

இந்த பிரச்சனைக்கு குறைந்தபட்ச தீர்வாக நான் கருதுவது "நூலகங்கள்". நல்ல பல நூல்களை தொகுத்து எளிதாக அனைவரும் பயன்படுத்தும் வகையில் இருப்பதே நூலகத்தின் சிறப்பு மேலும் நூலகத்தின் பயன்பாடுகளை பற்றி இந்த ஒரு பதிவில் சொல்லிவிடமுடியாது. அப்படி ஒரு நூலகம் எங்கள் ஊரிலும் இருந்தது சில ஆண்டுகளுக்கு முன் அந்த நூலகத்தை முற்றிலுமாக மூடிவிட்டார்கள் அதற்காக எங்கள் ஊரில் யாரும் இதுவரை வருத்தபட்டதகவோ மீண்டும் நூலகம் திறப்பதற்கு சிறு முயற்சி எடுத்ததாகவோ எந்த தகவலும் இல்லை.

அனால் எப்படியோ சிரமப்பட்டு சுத்துப்பட்டு பத்னெட்டு பட்டியும் மகிழ்சியோட இப்ப எங்க ஊருக்கு தினமும் வந்துபோகும் வகையில் சில ஆண்டுகளுக்கு முன்பு திறந்தார்கள்!!! என்னென்னு புரியலையா? அதாங்க டாஸ்மாக். இப்போ எங்க ஊரே ஜகஜோதியாய் இருக்கு தினமும் சுற்றிவுள்ள பல ஊர்களிலுருந்தும் புதிது புதிதாய் ஆட்கள் வருவதும் போவதுமாய் இருக்கிறார்கள். இப்ப புரிஞ்சுதுங்க இந்த பதிவோட முதல் வாக்கியத்திற்கு அர்த்தம்.

தூக்கத்தில் புலம்புவேன்

2010-07-24T10:38:00.000+03:00

கண்டதும் காதல் என்பதில் எனக்கு நம்பிக்கை இல்லை
உன்னை பார்த்த பின் நம்புகிறேன்
கண்ண்டதும் கவிதை என்பதை.

நீ நடந்தால் உன் காலடி சுவடுகள் மண்ணில் பதிவதில்லை
வியந்தேன்! நீ எத்தனை மென்மையானவள் என்று.
நீ ஒரு பார்வைதான் பார்த்தாய் அதன் கணம் தாங்கமுடியவில்லை
உணர்ந்தேன்! நீ எத்தனை வலிமையானவள் என்று.

இந்த வருடம் சிறந்த பாடலுக்கான தேசிய விருது
உன் சிரிப்புக்குதான் என்றேன் மீண்டும் சிரித்தாய்
ஆஸ்காரும் உனக்குதானோ?

யுவன்

2010-07-21T19:41:00.000+03:00

என்னோட பெஸ்ட் பிரெண்ட் யாருன்னு கேட்டா கண்டிப்பா என்னோட IPODதாங்க. எப்பவும் என்கூடவே என் மூடுக்கு ஏத்தமாதிரி இசையை தரும் குறிப்பாக என்னை தினமும் தூங்கவைப்தே இதுதாங்க. 123musiq.com இது என்னோட ஆஸ்தான இனையதளம் புதிய பாடல்கள் அனைத்தும் உடனுக்குடன் கிடைக்கும். இதில் ரஹ்மான், இளையராஜா, யுவன் இவர்களது பாடல்களை காதிருந்தாவது டவுன்லோட் செய்துவிடுவது வழக்கம். இவர்களின் இசைக்காக மட்டுமல்ல இவர்களின் குரல் மற்றும் பாடும் ஸ்டைல் எனக்கு விருப்பமானவை. இதில் யுவன் பாடிய பாடல்கள் என்றால் நாளெல்லாம் கேட்டுக்கொண்டேயிருப்பேன். அதற்காக IPOD ல் நான் வைத்துள்ள ஒரு playlist ஐ உங்கலோடடு பகிர்ந்துகொள்ள விரும்புகிறேன். என் விருப்ப வரிசைப்படி

     பாடல்                                                  படம்
என் காதல்                                   புன்னகை பூவே
போகாதே                                     தீபாவளி
ஒரு கல் ஒரு கண்ணாடி   சிவா மனசுல சக்தி
என் காதல் சொல்ல              பையா
பொய் சொல்ல இந்த            ஏப்ரல் மாதத்தில்
நீதானே                                         சர்வம்
காற்றுகுள்ளே                           சர்வம்
கடலோரம் ஒரு                      குங்கும பூவும் கொஞ்சும் புறாவும்
என் கண்ணோடும்                 அறிந்தும் அறியாமலும்
இது காதலா                              துள்ளுவதோ இளமை
ஏதேதோ எண்ணங்கள்         பட்டியல்
நட்புக்குள்ளே                            சென்னை-28
உனக்ககதானே                         கட்டறது தமிழ்
யாரோடு யாரோ                     யோகி
தாக்குதே கண் தாக்குதே    பானா காத்தாடி
ஹோ ஷலா ஹோ               காதல் சொல்ல வந்தேன்
இறகை போலே                      நான் மகான் அல்ல
சொல் பேச்சு கேட்காத        தில்லாலங்கடி
கண்முன்னே எத்தனை         துள்ளுவதோ இளமை
வீடுதோறும் சச்சின்              சென்னை-28
ஏனோ என் கண்கள்               கள்வனின்  காதலி
கிளியோபாட்ரா                      உனக்காக எல்லாம் உனக்காக

இரவில் கண் மூடி தனிமையில் முடிந்தால் ஹெட் போனில் கேட்டுபாருங்கள் கண்டிப்பாக உங்களுக்கும் பிடிக்கும். குறைந்தபட்சம் நல்ல தூக்கமாவது கிடைக்கும்.

பொடுசு ஜோசியம்: இந்த வருடம் சிறந்த பாடலுக்கான தேசிய விருது கண்டிப்பாக "ராவணன்" படத்தில் வரும்" உசுரே போகுதே" (தமிழ்/ஹிந்தி) பாடலுக்குதான்னு   நான் சொல்லறேன் நீங்க?...............

முதல் பதிவு

2010-07-19T19:55:00.002+03:00

என் முதல் வணக்கம்,

எப்பொழுதாவது ப்ளாக் படிக்க மட்டுமே நேரம் கிடச்ச எனக்கு இப்ப கொஞ்சம் எழுதுவதற்கும் நேரம் கிடைச்சதால யோசிக்காம உடனே கடைய திறந்தாச்சி இனி காசு கொடுத்தாவது கஸ்டமர மடக்கிபோடனும். (எல்லாம் ஒரு விளம்பரம்தான்).

சரி என்ன, எப்படி, எதபத்தி, எவள்ளவு எழுதுறது ? (ஸ்ஸ்ஸ் இப்பவே கண்ண கட்டுதே). நாம ஏன் அத பத்தி யோசிக்கணும் என்ன வேணும்னாலும்,எப்படி வேணும்னாலும், எதபத்தி வேணும்னாலும், எவள்ளவு வேணும்னாலும் (என்னடா வேணும் உனக்கு) எழுதுவதர்க்காகதானே ப்ளாக் மத்ததெல்லாம் படிப்பவர்கள் ----------- (கோடு போட்ட இடத்துல என்ன எழுதனும்னு போக போக நீங்களே புரிந்துகொள்வீர்கள்).

"பொடுசு" என்னடா பேரு இதுன்னு எப்படியும் நண்பர்கள் கிண்டல் செய்வார்கள் (செய்யட்டுமே) என் வீட்டிலும், உறவினர்களையும் கேட்டால் இப்பவும் கண்ணை அகல விரித்து பல கதைகள் சொல்வார்கள் எப்படிபட்ட கேரக்டர் அவன்னு. எங்கள் வீட்டு எல்லா விசேஷங்களிலும் எல்லாரும் ஒன்னா சேர்ந்தா கண்டிப்பா இந்த கேரக்டர பத்தி பேசாம இருக்கமடாங்க (பில்டப் போதுமா).

எல்லை கடந்த பிடிவாதம், எப்பவும் விளையாட்டு, ஏகப்பட்ட கற்பனைகள், கோபம், சண்டை என்று இருந்தாலும் கொஞ்சம் படிக்கவும் செய்வான். படிபடியாக பொடுசுக்குள் இருந்து இந்த செந்திலை வெளியே எடுக்க என் குடும்பத்தினர் மிகவும் சிரமபட்டார்கள் என்பதை நான் ஒப்புகொண்டேயாகவேண்டும்.ஆமாங்க என்னை சின்ன வயசுல எல்லாரும் அப்படித்தான் கூப்பிடுவாங்க. இப்ப எப்படின்னு கேட்குறிங்களா இப்ப 5' 7" உயரம் 78 கிலோ எடை யாரும் அப்படி கூப்பிட முடியது அனால் என் அண்ணன்கள், அக்காக்கள் என்னை இப்பவும் பொடுசுன்னுதான் கூப்பிடுவாங்க ஆசையாய் (பாசம் கண்ணை மறைப்பதால் அவர்களுக்கு நான் வளர்ந்ததே தெரியவில்லைபோல - நல்லதுதானே).

பொடுசுக்குலேயிருந்த செந்திலதானே வெளியே எடுத்தார்கள் அனால் செந்திலுக்குள் எப்பவும் பொடுசு இருந்துகொண்டேதானே இருக்கான். அப்பப்ப மட்டுமே எட்டிபார்துக்கொண்டிருந்தவன் இனி பதிவுகள் வழியாக உங்களுடன் எப்போதும் உங்கள் ஆசிர்வாதத்துடன் வெளியதாங்க இருப்பான். (என்னடா உள்ளே வெளியேன்னு மங்காத்தாவா ஆடுற).

கை பிடித்து அழைத்து செல்வீர்கள் என்ற நம்பிகையுடன்....

பொடுசு