مدونة تلفزيون الهلال السوداني

الهلال يصعق فريق كهرباء أثيوبيا بثلاثية تراوري ونزار وبشه

2013-02-03T13:47:00.001+03:00

صفحة الهلال | كتب : بدر الدين بخيت

حقق فريق الهلال السوداني الفوز في تجربته الإعدادية الرابعة خلال معسكره بإثيوبيا على فريق الكهرباء بنتيجة 3-1 في مباراة جرت صباح اليوم على الإستاد الوطني بالعاصمة الإثيوبية أديس أبابا.
...
تقدم الهلال بهدف عن طريق المهاجم تراوري مستفيدا من الركلة الركنية من مدثر كاريكا في الدقيقة 41, وفي الشوط الثاني عادل فريق الكهرباء النتيجة في الدقيقة 60, قبل أن يضيف الهلال هدفين عن طريق نزار حامد من مجهود فردي في الدقيقة 78, ومحمد أحمد بِشَّة في الدقيقة 86.

وكان الهلال قد لعب الشوط الأول بتشكيلة أجرى عليها المدير الفني غارزيتو كل التغييرات في الشوط الثاني, عدا خليفة الذي استبدل في الشوط الأول.

وضمت التشكيلة: جمعة في حراسة المرمى, وثلاثي الدفاع سيف مساوي, سينكارا(عبد الرحمن كايا), وعبد اللطيف بويا, وفي خط الوشط كل من عمر بخيت, خليفة (دومينيك),نزار حامد وإيكانجا, أما في خط الهجوم فلعب الثلاثي بكري عبد القادر(إبراهيما سانيه وخرج بدوره ليدخل مكانه بشة) ,وفي الهجوم لعب مدثر كاريكا وتراوري.

هذا وقد نجا مهاجم فريق الهلال السنغالي إبراهيما سانيه من حالة بلع لسانه التي قد تؤدي للوفاة مباشرة وذلك عقب سقوطه على أرضية الملعب الوطني بالعاصمة الإثيوبية أديس أبابا خلال مباراة ودية جمعت بين الهلال السوداني وفريق الكهرباء الإثيوبي صباح اليوم.

وسقط اللاعب في الدقيقة 80 وأربك الجميع وهرع إليه بسرعة شديدة حارس مرمى الهلال الدولي المعز محجوب الذي بدأ أولا محاولة إسعافه وتدخل الجهاز الطبي للنادي وأخرج اللاعب من الحالة, وعلى الفور إستبدله المدير الفني للهلال غارزيتو الفرنسي ولم يكمل المباراة.

المصدر: صفحة الهلال بالفيسبوك

الهلال يخسر أولى تجاربه الإعدادية بالهضبة الاثيوبية

2013-01-24T12:34:00.001+03:00

انتهت قبل قليل مباراة الهلال الاعدادية ضد سان جورج الاثيوبي بخسارة الهلال نتيجة المباراة بهدفين مقابل هدف، سجل سان جورج في منتصف الشوط الأول ليعادل سانيه النتيجة مع انطلاقة شوط المباراة الثاني وبعدها يضيف سان جورج هدفه الثاني والذي انتهت عليه المباراة.
بدأ غارزيتو المباراة بتشكيلة ضمت كل من بهاء الدين في حراسة المرمى، فداسي ، سامي، صالح الأمين، دومنيك، كايا، محمد أحمد، سيدي بيه، بكري المدينة، محمد عبد الرحمن وابراهيما سانيه.
أجرى المدرب خمسة تبديلات بخروج كل من بهاء الدين، سامي عبد الله، محمد أحمد، بكري المدينة، ومحمد عبد الرحمن ودخول جمعه جنارو، خليفة، ايكانغا، مهند الطاهر، بشه وعبده جابر.

ابراهيما سانييه يصل الخرطوم ويشارك في المران المسائي واكانقا يلحق بالركب اليوم

2013-01-14T05:32:00.000+03:00

وصل محترف الهلال السنغالي ابراهيما سانييه صباح امس الي الخرطوم بعد انتهاء اجازته السنوية التي قضاها مع اسرته بالسنغال وقد شارك المهاجم سانييه الذي عاد بدوافع كبيرة في التدريب المسائي الذي اجراه الفريق بملعب وزارة الخارجية بكافوري وظهر بمردود بدني جيد اكد جاهزيته للانطلاقة بقوة مع الفريق في الموسم الكروي الجديد.

المصدر: قوون

سنكارا وتراوري يبصمان رسميا للهلال

2013-01-14T05:30:00.002+03:00

وقع الثنائي المحترف البوركيني سنكارا والمالي محمد تراوري امس رسميا في كشوفات الهلال بالاتحاد العام لكرة القدم بعد وصول شهادتي نقلهما الدولية وذلك بحضور دكتور حسن علي عيسي مساعد الرئيس والعقيد حسن محمد صالح مدير العلاقات العامة بالنادي وسكرتير المكتب مهيار وقد ابدي الثنائي سعادتهما باكتمال تسجيلهما رسميا في الكشوفات الزرقاء ووعدا بتقديم عصارة جهدهما من اجل بداية قوية في مشوارهما الاحترافي الجديد.

المصدر: قوون

على بركة الله : صور انطلاقة اعداد سيد البلد صباح اليوم

2013-01-12T14:04:00.000+03:00

بسم الله وعلى بركة الله

نتمناه عام الانجازات لفرقة الهلال ان شاء الله

المصدر : عمر كدودة / المنتدى الرسمي

الهلال والمريخ هموم مشتركة..

2013-01-09T04:27:00.005+03:00

لقاء كل يوم / رمضان أحمد السيد

{ والشغل الشاغل لجماهير الهلال والقراء هذه الايام امران لا ثالث لهما بالنسبة للهلال وموضوع واحد للمريخ!! في الهلال والسؤال المسيطر علي الساحة مصير الثنائى وماذا تم بخصوصهما؟!

{ والامر الثاني موضوع المدرب ووصوله وتوقيع العقد معه.. في المريخ الاهتمام بمصير الثنائي اكرم وعلاء الدين خاصة بعد التناول الاعلامي والدخول في مواد قانون العقوبات الاماراتي!!!

{ ونبدأ بالاخير وكنا عبر رسائل او خدمة قوون المباشرة قد طمانا المريخاب ـ وحمدلنا ـ السلامة بانهاء الازمة واطلاق سراح الثنائي بعد ان استلم الشاكي او المضروب او المعتدي عليه مبلغ خمسة وثلاثين الف درهم وكان اول من بلغنا الخبر وبحكم علاقاته بالامارات وهو يصل البلاد للتو قطب الهلال الشاب خالد العباسي!! ومن المنتظر ان يكون علاء الدين قد وصل مع الساعات الاولي من صباح اليوم وكان قد تلقي اتصالات من زملائه للاطمئنان عليه علي راسهم قائد المريخ هيثم مصطفي.

{ بالنسبة للهلال فان اهتمام الجماهير الهلالية بالثنائي المحترف واوراقه يؤكد الحرص علي فريق الكرة واكتماله قبل انطلاقة الموسم الكروي ولكن بعد عرض التشكيلات وخيارات المدرب في اللاعبين وتوفر عناصر الخبرة بجانب 4 محترفين علي مستوي اثنين من القدامي واثنين من الجدد قد طمأن الجماهير وكونه الفيفا وهي تطلب من الوكيل الاوراق والبلاغ وكل ما هو متعلق بالحادث الذي تعرض له وحال دون المشاركة او المساهمة في ارسال البيانات عبر السيستم كلها تنبيء بالاخبار السارة ونتمني ذلك.

{ والامر الهلالي الثاني هو المتعلق بالمدرب وبالفعل وعلي حسب ما اشرنا في زاوية الامس فقد وصل مع الساعات الاولي لصباح الامس هذا في حد ذاته خبر سار يحسم ويقفل ملف هذا المدرب من كونه سيحضر ام لا كما كان يتردد!! ويبقي الامر الاخر او الجزئية المهمة في التعاقد معه والذي سيتولاه رئيس النادي شخصيا السيد الامين محمد البرير ونتمني ان يكلل بالنجاح في وجود صاحب الملف الخاص بتعاقدات المحترفين د حسن علي عيسي عضو المجلس.

لا توجد ميزانيات للقمة؟؟!!:

{ العمل الاداري وخاصة المالي والميزانيات يجب الا يسير بصورة عشوائية علي الاقل في اكبر ناديين في البلاد الهلال والمريخ وهما يشاركان افريقيا في البطولة الكبري.

{ لم نسمع بميزانية وضعت وحددت تتابع سير الاعداد والاستحقاقات والمعسكرات والسفر الخارجي للمباريات وغيره وكم المطلوب وما هو الموجود.. وكم يبلغ العجز، ومن اين سيغطي كل ذلك؟!!

وماهي الخطط والمشاريع العاجلة لعمليات الانقاذ والتدعيم!! وهل توجد مديونيات!!

علي الاقل الاقطاب والحادبين والدولة يجب ان تكون في الصورة حتى تكون هناك مساهمة مقدرة، اما حكاية رزق اليوم باليوم. فمع الولوج لعالم الاحتراف فانها لاتجدي.

لحن الختام

{ نجوم الصف الثاني في الهلال بدءا بالحارس بهاء الدين والمدافعين صالح الامين وخليفة وفداسي ونجوم الوسط محمد أحمد والشغيل وبشة. وثنائي الهجوم عبده جابر وبكري المدينة يحتاجون لتمارين مكثفة وتأهيل سريع حتى يكونوا في الموعد لدخول التشكيلة الاساسية خاصة وازدحام برنامج الموسم والمشاركات الخارجية وارتباطات القوميين مع مباريات للمنتخب وتحوطا للاصابات والاخفاقات ، لانريد لمستوى الاحتياطي ان يكون اقل مستوى من الاساسيين باي حال من الاحوال.

{يا سلام على بطولة الخليج.. قوة وحماس واثارة ومستويات رفيعة. الهدف أو الاهداف تاتي في الزمن القاتل.. وياخوفي على البحرين المنظم بعد تعادله مع عمان وخسارته من الامارات ومواجهته القادمة مع قطر هي التي ستحدد تأهله كثاني للمجموعة أم لا وربما يلعب فارق الأهداف دورا في الامر بعد تأهل الامارات من فوزين على قطر والبحرين. واقتراب قطر من خسارة من الامارات وفوز علي عمان. وللبحرين وعمان نقطة واحدة لكل. والعماني سيختم مبارياته في المجموعة بالامارات المتصدر!! لقاء البحرين وقطر سيكون نهائيا مبكرا للبطولة.. ومعركة لاتعرف انصاف الحلول.

د.شداد : قضية ثنائي الهلال المحترف في يد الفيفا

2013-01-09T04:25:00.003+03:00

اكد د. كمال شداد الخبير العالمي لدي الفيفا صعوبة التكهن بقرار الفيفا حول ثنائي الهلال المحترف سيدي بيه ودومنيك مشيرا الي ان النظام الجديد (السيستم) لم يكن معمولا به ابان فترتنا بالاتحاد العام وهو نظام جديد بالاتحاد الدولي لكرة القدم (الفيفا) وهو نظام خاص بالاندية ولم يشهد حالات مماثلة.. لذا يصعب التوقع او التكهن بقرار الفيفا حول ثنائي الهلال المحترف وعلي جماهير الهلال الصبر
والترقب وهي ايام قلائل وتتضح الامور.. والامر الان بيد لجنة شئون اللاعبين بالفيفا وهي التي تفتي وتقرر بشأن هذا الموضوع وهو شأن اداري بحت..لذا يصعب توقع قرار اللجنة بالرفض أوالقبول.

المصدر : قوون

يوسف محمد يغادر لبلاده غاضبا ويهدد الهلال

2013-01-09T04:24:00.003+03:00

غادر محترف الهلال النيجيري يوسف محمد مطلوق السراح الخرطوم صباح امس متوجها لنيجيريا بعد ان انتظر الهلال خلال الفترة الماضية بعد انتهاء الموسم الكروي ولم يحصل علي مستحقاته بطرف الهلال البالغة مائتين وخمسين الف دولار بعد ان رفض التسوية بخصوص مستحقاته المالية مع الهلال وكان يوسف محمد قد خاطب الاتحاد العام لكرة القدم حول متبقي مستحقاته وقال انه سيلجأ للفيفا للحصول علي حقوقه بالقانون مؤكدا انه سيغادر الي نيجيريا ومنها لاوربا لدراسة عرض احتراف من احد الاندية الاوربية

غارزيتو يصل ويطالب بمساعد سنغالي ولجنة برئاسة البرير للتعاقد معه

2013-01-09T04:23:00.003+03:00

طلب مدرب الهلال الفرنسي غارزيتو عقب وصوله امس من اعضاء مجلس ادارة نادي الهلال بمساعد مدرب سنغالي يعاونه في تحضيرات الهلال وقد تحفظ معظم اعضاء المجلس على طلب غارزيتو وفضلوا ان يكون مساعد المدرب وطنيا لاسباب كثيرة تحوطا لاي طارئ وتمسكوا بالمدرب العام حمد كمال واعتبروا طلب المدرب غارزيتو عبئا جديدا على الهلال.

المصدر: قوون

لقاء رئيس نادي الهلال الأمين البرير على قناة النيلين

2013-01-04T15:11:00.002+03:00

فوز كرار التهامي نائباً للرئيس و بحر اميناً عاماً لنادي الهلال

2012-12-31T22:15:00.000+03:00

كرار التهامي

الفريق محمد بحر

أنتهت في حوالي الساعة التاسعة من مساء اليوم عملية فرز اصوات الناخبين في الجمعية العمومية التكميلية لمجلس الهلال حيث فاز كرار التهامي بمنصب رئيس نادي الهلال السوداني ، وكذلك الفريق محمد أحمد بحر بمنصب الأمين العام للنادي بفارق شاسع عن منافسيهم حيث بلغت أصوات الناخبين للتهامي 212 صوت والفريق بحر 216 صوت ، فيما حاز كل من الصادق مهدي 5 أصوات ، التجاني على الحسن 5 أصوات.

على مجلس البرير واعلامه ان‮ ‬يكون أكثر جرأة وشجاعة ويعترف بالفشل‮

2012-12-28T07:46:00.003+03:00

لقاء كل يوم / رمضان أحمد السيد

حدث ولا حرج‮!!!‬
‮{ ‬الناطق الرسمي‮ ‬للهلال الذي‮ ‬ملأ الدنيا وشغل الناس لا اتحدث هنا عن خطاب شطب هيثم مصطفي‮ ‬وانما سهرنا معه حتي‮ ‬الساعات الاولي‮ ‬من الصباح وهو‮ ‬يلاحق سكرتير اتحاد الكرة بمنزله ويقول انه اتي‮ ‬بالبشريات لجماهير الهلال لنتفاجأ ويتفاجأ الجميع بان الامر برمته لم‮ ‬يكن سوي‮ ‬مجرد محاولات اظنها وعلي‮ ‬النحو والواقع الذي‮ ‬نعيشه قد اصيبت بالفشل الذريع بدليل ان الهلال بالامس استفاد من خانة لومامي‮ ‬السنغالي‮ ‬وسجل مكانه مشطوب ومعطوب المريخ الشغيل‮.‬
‮{ ‬وبدلا من ان‮ ‬يرمي‮ ‬مجلس واعلام البرير باللائمة علي‮ ‬اتحاد الكرة عليه ان‮ ‬يكون اكثر جرأة وشجاعة ويحمل الامر برمته لمجلس الهلال والذي‮ ‬كثرت جلطاته في‮ ‬فترة وجيزة لو كان هناك نوع من الحياء لما بقي‮ ‬عضو في‮ ‬المجلس حتي‮ ‬الان بما فيهم الرئيس،‮ ‬والذي‮ ‬اضاع معظم وقته وزمنه وسهره حتي‮ ‬الساعات الاولي‮ ‬من الصباح مع المحترفين وابداء الرغبة وفلاشات الكاميرا‮ ‬ليؤكد بانه موجود ويمكن ان‮ ‬يقتحم مكاتب الاتحاد بعد عملية هيثم مصطفي‮ ‬بدلا من ان‮ ‬يضطلع بما هو اهم ويتابع عملية الاجراءات الرسمية‮.‬
‮{ ‬وانه بحق لامر مؤسف ونحن ندخل عالم الاحتراف ونقع في‮ ‬مثل هذه الاخطاء الساذجة‮!‬
‮{ ‬ورغم الاخطاء‭ ‬‮ ‬القاتلة من ادارة الهلال الا ان اتحاد الكرة هو الاخر لا ندري‮ ‬الاسباب او المبررات التي‮ ‬تجعله‮ ‬يقصر فترة التسجيلات او التعاقدات او ربط موضوع السيستم مع الفيفا بعشرين‮ ‬يوما فقط في‮ ‬حين ان معظم الدول ان لم‮ ‬يكن كلها‮ ‬يستفيد من الشهر كاملا ـ‮ ‬ثلاثون‮ ‬يوما ـ ولا ندري‮ ‬سببا‮ ‬يجعل اتحاد الكرة لا‮ ‬يضيف الاسبوع الاخير لمعالجات المشاطيب مع المحترفين وهو‮ ‬يعلم الكثير من المشاكل والعقبات علي‮ ‬نحو ما حدث في‮ ‬فترات سابقة‮!!!‬
‮{ ‬الطريف او الغريب في‮ ‬الامر ان الاتحاد‮ ‬يقال بانه درب الاندية خاصة التي‮ ‬تمثلنا على المستوى الخارجي‮ ‬على هذا‮ ‬السيستم‮!!‬
‮{ ‬نعود للهلال ولجزئية اخري‮ ‬ورئيس الهلال عبر قناة الشروق‮ ‬يقول بانهم ملتزمون باتفاقية الجنتلمان ولن‮ ‬يسجلوا اي‮ ‬لاعب‮ ‬يشطبه المريخ‮!!‬
وهاهو‮ ‬يسجل الشغيل‮!!‬
ألم‮ ‬يكن من الاجدر ان‮ ‬يحتفظ بلاعبيه هيثم وعلاء ويلجأ لمعالجات تربوية بدلا من ان‮ ‬يكون الهلال هو الخاسر من العقاب على نحو ما‮ ‬يحدث الآن وهو‮ ‬يسجل الشغيل المهموم بعملية‮ ‬غضروف لاندري‮ ‬متى سيكون لائقا بعدها‮ ‬يشارك رسميا‮. ‬خاصة اذا ما ارتبط تسجيله بالفترة التكميلية وعودة المحترفين بعد توفيق الاوضاع مع السيستم‮.‬
‮{ ‬اراد الهلال ان‮ ‬يضحى بمحترف على امل ان‮ ‬يكسب محترفين وفي‮ ‬حالة الفشل وعدم تجاوب الفيفا سيكون كسب الشغيل‮!! ‬هذا هو المنطق في‮ ‬حين أن خانة الشغيل‮ ‬يمكن ان‮ ‬يملأها‮ ‬اكثر من ‮٤ ‬لاعبين في‮ ‬كشف الهلال‮.‬
‮{ ‬وفي‮ ‬النهاية مع كل موسم جديد للتسجيلات تتكرر الاخطاء ولا حياة لمن تنادي‮!‬
‮ ‬لحن الختام‮:‬
‮{ ‬يعتقد مجلس الهلال أن الاحداث المريخية سببها شطب الشغيل والاعتراض عليه من كثيرين لذلك بادروا بتسجيله على اساس ضربة للمريخ‮.‬
ومن الواضح ان الهلال لن‮ ‬يستفيد منه،‮ ‬وسبق ان سخر منه اعلام الهلال كثيراً‮.. ‬واذا كان البعض‮ ‬يردد انه سيخصص لمراقبة هيثم مصطفى فمن قال بان هيثم مصطفى سيلعب ضد الهلال‮!! ‬ولماذا هذا التناقض اذا كان مستواه الفني‮ ‬وتقدم العمر بشطبه من الهلال فهل هو في‮ ‬حاجة لمن‮ ‬يراقبه؟
‮{ ‬يقول الطيب ابراهيم وهو‮ ‬يرد على سكرتير المريخ عصام الحاج والبحث عن لقب لهيثم مصطفى بالقول‮: ‬كان اسمه سيدا‮. ‬وفي‮ ‬المريخ نقترح عليه‮ (‬سيبا‮)!!‬
‮{ ‬ويقول خالد احمد الطاهر من ام ضوابان بان خليفة هيثم مصطفى هو هيثم‮. ‬فلا‮ ‬يوجد هيثمان في‮ ‬السودان والقارة السمراء والوطن العربي‮.‬
‮{ ‬معقولة الهلال‮ ‬يشطب هيثم ويسجل اللاعب الذي‮ ‬كان‮ ‬يراقبه‮!! ‬هذا هو لسان حال الكثيرين‮!!‬

‮{ ‬في‮ ‬هذا المجلس اي‮ ‬شئ معقول‮!! ‬ونص وخمسة‮..‬

يا سلك فريقكم بقوا كلو (معاجين) اسنان

2012-12-28T07:35:00.002+03:00

وان طال السفر / محمد عبد الماجد

من بين العبارات الجميلة ..والفلسفية والعميقة لشاعر الشعب محجوب شريف ..عندما حملنا اوراقنا اليه ...نسأله عن (جرح) الانفصال ...يوم ان فصلنا (سياسيا) بين الشمال والجنوب ...قوله لنا في اجابة عميقة : ( اجتماعيا نحن فشلنا في خلق تواصل والفة وعشرة بين الشمال والجنوب ...لذا كان طبيعيا ان يحدث الانفصال..لم يكن الانفصال نتاج صراع سياسي فقط).
صمتنا في حضرته ...طمعا في المزيد من التوضيح ..والتفسير...نعرف ان محجوب شريف يوصل (المعلومة) خدمة ديلفري..لي عند الباب.
يبسط الاشياء ..ويقدمها ليستوعبها كل الناس.
عاد محجوب شريف ..واكد قوله بهذا الشرح الوافي وقال : ( لو دخلت حمام أي اسرة شمالية سوف تجد في (جحور) الحمام وشباكه، وبين الحائط والماسورة ..مجموعة من (فرش الاسنان) ...سبعة او عشرة (فرش اسنان)...هذه الفرش هى قراءة طبيعية لزيارات تقوم بها الاسر لبعضها البعض).
فرش اهل البيت تظل تمارس (سواكها) اليوم ..اما فرش الزائرين ..تظل مهجورة ..ومثبتة على الجدران..(مجرد ذكري لزول جاء وفات).
صمتنا ...وكان صمتنا يعني ان يزيد محجوب شريف في توضيحه ..وفلسفته اكثر.
اضاف محجوب شريف : (يعني اذا زارك صديقك (عثمان) وبات معاك (خميس وجمعة) في البيت ..سوف يشتري (فرشة اسنان) ويتركها في الحمام عندما يذهب ..وكذا الحال ..تفعل خالتك التى قدمت من البلد ..وقعدت معاكم اسبوع ..ونفس الشيء يحدث من (خالد) الذي جاء ليستخرج (جنسية) ، سيترك (الفرشة) ويغادر...وايمن الذي يريد ان يخرج جواز سفر سوف يفعل نفس الشيء ...وهدي التى تأتي من الداخلية لزيارات عمها في كل شهر).
يذهبوا اولئك الزائرين ..وتبقى (فرش اسنانهم) في البت تذكر عن تواصلهم وزياراتهم.
وانت نفسك قد تذهب ..وتبيت برة البيت ..وتشتري ليك (فرشة اسنان) تسوك بيها ..وتخليها قبلها وترجع.
اذن هذه (الفرش) ...هى عناوين لزيارات الخميس والجمعة ...وهى تباعا قد تكون لخالتك وسلوي وخالد وعثمان وايمن ، صاحبك وقريبك ..وزميلك في العمل او في الدراسة.
الفرشة الحمراء حقت عثمان ..والخضراء حقت خالد ..والبيضاء حقت ايمن ..وهكذا.
قال محجوب شريف ذلك ثم اضاف ..قائلا ...انا ما حصل دخلت لي (حمام) اسرة شمالية ..وقالوا لي الفرشة دي فرشة (جون) او فرشة (مايكل)..او (ميري)...هم يقولون دائما ..دي فرشة عمر ود خالتنا ..ودي فرشة تهاني زميلة اماني في الجامعة..الخ.
عندها عرفت ماذا يقصد محجوب شريف بقوله الذكي هذا ...والذي يشير فيه ان التداخل بين الشماليين والجنوبيين قد يكون في السوق او في العمل او في النادي ..لكن على النطاق الاسري وداخل البيوت هو غير موجود ..لذا حدث الانفصال..لأن الالفة الاسرية بين الشمال والجنوب (معدومة).
الحديث عن (فرش الاسنان) هذا ..ذهبت اليه ..تذكيرا ..بقول سابق للعزيز بابكر سلك ...الذي شبه ذات يوم فيصل العجب بـ ( صباع المعجون) ...وقال ان العجب متل ( صباع المعجون) الذي كلما ظننته خلص ...عصرته طلع ليك منه (معجون).
قدر ما تقول كمل ..تلقي فيه حاجة ..(دا العجب).
يا سلك العجب ...ما خليتو فيه حاجة..ضغطوه ضغط شديد.
أي حاجة ممكن تسفيدوا منها ...من فيصل العجب دا عملتوها.
زي الحبشي العندو (ديك) ضبحو ....عمل كرعينو (كوارع)..وشد لحمتو (شوربة)...وعمل رأس الديك (باسم)..والمصارين والكبدة والفشفاش ...عملها (ام فتفت)...ريش الديك عملوا (سيوتر) في البرد دا ...والدم حق ضبيحة الديك ..(جير) بيه الصالون.
يعني ما في حاجة طلعت (اف) من الديك دا.
دا قبل ما يضبحوا ..عمل صوتو (العوعاي) نغمة في موبايلو.
اقول حاجة مبالغة كدا.
الزول دا ...قبل ما يضبح الديك (حلبو).
يعني البقي والما ببقي طلعو من (الديك) دا.
ناس المريخ ...هسع (العجب) ما خلوا فيه حاجة.
وبابكر سلك ...لسع (ساكي) الحكاية دي ...عاوز يطلع ليه شيء من المعجون دا.
يا سلك بعد كدا ..إلا تعمل (المعجون) دا خاتم.
ما فيه شيء تاني.
طبعا نحن في الهلال ...ما بنصل للمرحلة دي ..(المعجون) بنجدعو من يصل النص.
المعجون بنجدعو بي حالو.
حكاية عصر المعجون دي ..ما عندنا.
المريخاب ..(قلق) ..ما خلوا فيه حاجة ...قلق اعاروه ..ورجعوه ..وشطبوه.
أي فكرة كدا ..تختر ليكم في الباك ...عملوها في (قلق).
قلق مشي يلعب في الاهلي عطبرة ..يا ناس عطبرة ...(انتوا ناسنا) ..قلق دا تاني والله إلا (يعلق) ليكم على المباريات..او يحلل ليكم (الكورة) في تلفزيون عطبرة.
معجون قلق دا ما فيه الحبة.
عشان الموضوع يبقى ليكم واضح.
الشيشية ذاتها ما خلت ليها حاجة في صباع المعجون دا.
المريخاب ..ما زي الهلالاب ...(المعجون) يخلوه بي حالو.
المعجون اذا نشف ..وانتهى ...ما تجدعه ..يمكن تحتاج ليه يوم ..ويفك حيرتك.
لا سيما ان الدنيا ..(برد)...وما في زول بقدر يمشي (الدكان) في السقط دا ...لذلك (لف واعصر) المعجون ..واشرطه كمان ..بطلع ليك معجون قدر حق السواك.
عندنا زول في الحلة ..زي المريخاب ديل ...(المعجون) وقت ينتهي ..بعصرو بالزردية.
ما بخلي فيه شيء.
تلقى قاعد الصباح بصارع ليك في (المعجون) ...تقول في حلبة مصراعة.
تشبيه بابكر سلك ...جميل ورائع ...ويثبت ان (الدهن) فعلا في العتاقي.
نتفق مع بابكر سلك في ان فيصل العجب فعلا زي صباع المعجون ..قدر ما تقول انتهى تلقى فيه حاجة.
وان كنت اقول ان فيصل العجب بعد انتقال هيثم مصطفى الي المريخ سوف ينزل درجة من (المعجون) وسيصبح (مسواك) شجرة حنة او نخيل ساكت ..وهو بذلك ادني من (مسواك) الاراك.
العجب اكتر من كدا يا سلك عاوزين تطلعوا منو شنو؟.
اخر حاجة فيه ...عملها في تسجيل هيثم مصطفى وعلاءالدين يوسف ...وصل معاه الاتحاد حضر التسجيل ورجع.
العجب تاني إلا تخلوه للحاجات دي.
كابتن تشريفي ساكت.
المريخ الان ...وعلى نسق تشبيه الاخ بابكر سلك بقى كله (معاجين).
بقى دكان بتاع جميلة لمعاجين الاسنان.
الوصيف بقى كل معاجين.
المريخ بقى فيه اكتر من معجون.
بداية من فيصل العجب المعجون (ابومرجيحة)...مرورا بمعجون عصام الحضري (44) سنة معجون ابوالهول....نهاية بمعجون (فييرا)...نهاية بمعجون (البرنس).
معجون فيصل العجب (ابومرجيحة) على ما يبدو كدا ..بقى ما فيه حاجة ..خلاص انتهى ..عشان كدا ..المعجون دا ح يقعد في (الكنبة).
المسألة دي بالنسبة ليكم واضحة طبعا.
واحتمال كمان يستغنوا عن هذا المعجون دا نهائي في يونيو القادم ..عشان صلاحيته انتهت ...(أي ان يونيو القادم هو التاريخ الذي سيصبح فيه فيصل العجب في حل من تعاقده مع المريخ).
يعني يا سلك ..معجون (ابومرجيحة) دا ...لو عصرتوه تاني ...يمكن (يسممكم) عديل كدا ...لأن صلاحيته انتهت.
وضحت النقطة دي.
معجون (ابوالهول)...الشهير تجاريا باسم عصام الحضري ...العصر ما بطلع منو حاجة.
لكن (الدولار)..ممكن يجيب منو شيء.
المعجون دا ..بجي منو بالدولار.
بعيدين الحضري دا لو العصر ..بجيب منو شيء ...كان ناس الاهلي المصري ما فكوه.
المصريون ...(المعجون) بفكوه بعد ما ينشف.
فييرا ...طبعا 3 سنوات مع المريخ و6 سنوات مع الهلال ...يعني برضو بقى (معجون).
هيثم مصطفى ...ما عاوزين نتكلم عنو.
لكن يا سلك ...كلام ليك كدا ...(باسكال) ذاتو بقى (معجون).
فريقكم دا يا بابكر ...الاتسوك في الشوط الاول ...اتسوك ..والما اتسوك ..يقنع ساكت.
ملحوظة : غايتو...اطمئنوا ...ما في (تسوس) بصيب المريخ.
هوامش
تاني الواحد وقت يدخل مباراة للمريخ ..يقول للزول الجنبو ..الاطول منو ..اسمع عليك الله شوف لي (كنبة) المريخ دي فيها كم (معجون).
ولمن يقوم لاعب يسخن ....الزول القصير يقول للزول الطويل : اسمع (المعجون) البسخن دا منو؟.
ولمن المريخ يسجل هدف...عليك الله شوف لي الهدف دا جابو ياتو (معجون).
المنافسة بين (المعاجين) في الموسم الجديد في المريخ ح تكون شديدة.
من هو اكثر معجون مقاوم للتسوس؟.
وما هو المعجون الذي يمكن ان يجعل اسنانك اكثر (بياضا)....بياض وإلا بلطي.
خلاص ما تزعلوا ...عشان انتوا مريخاب ...ما هو المعجون الذي سوف يجعل اسنانك اكثر (صفارا).
في البيت ...جني وجن (المعجون) البروح.
وجني وجن الشافع البيلعب بالمعجون.
قالوا ناس الهلال امس سجلوا ليهم (معجون) جديد.
ان شاءالله خير.
معجون عنده (غضروف) كمان.
منو الكان بصدق ...هيثم مصطفى يمشي المريخ ...والشغيل يجي الهلال.
البرير ..يكون عاوز يثبت الموقف شوية ...عارف هيثم مصطفى دا ما بتمسك إلا بالشغيل.
عشان كدا جابوا ليه (معجون) اصلي كدا.
معجون مجرب قبل كدا.
معقولة ..ناس البرير ديل يفاوضوا سيدي بيه ..ويسجلوا (الشغيل).
دا زي الفلهمة العورة ..والحوامة بالبطارية في ليلة كمال القمر.
اخر السوق ...الهلال عنده خانات فاضية ..في اوقات الشدة دي ..البرير لو لقى (عمك تنقو) ذاتو بسجلو.
الحافلة وقت تكون قايمة ..بتموها بي أي زول.
ان شاءالله زول ما يكون ماشي.
على العموم ..نتمنى لنصر الدين الشغيل النجاح في الهلال ..والشفاء من (الغضروف).
الحاجة التى يتميز بها ىالشغيل ...هي الروح القتالية ..والحماس الذي يلعب به.
يعني ممكن (يفور) النص شوية.
تاني ما عاوزين أي زول يحوم بي هناك.
ما عاوزين نشوف أي (معجون).
في الموسم الجديد ...الواحد لو قعد يتابع ليه مباراة قمة بين الهلال والمريخ ...إلا يكون ذاكرتو قوية.
لو دقس ..او سرح ساكت في المباراة ..بلخبط الكيمان.
الباشا وهيثم مصطفى وعلاءالدين يوسف وكلتشي في المريخ ..وبهاءالدين والشغيل في الهلال.
مباريات القمة في الموسم القادم عاوزات ذاكرة قوية..وبديهة حاضرة.
اقل حاجة ..بتطلع برة الشبكة.
يا ناس المريخ في الموسم الجديد الاحمر حقكم دا ..دبلوه ..عشان الواحد ..ما يلخبط.
ناس المريخ عاملين فيها عندهم (وفاء)...اللاعب يصاب في كشوفاتهم ..يشطبوه ..لا يعالجوه ..لا يكلموه ...لا يزوره ساكت.
هسع عليكم الله الشغيل دا ما اتقطع معاكم قطيع.
الزول دا ضربو كم (لغم) في سبيل المريخ.
في النهاية تشطبوه بالشكل دا ..وفي المستشفي ...ما تمشوا تزروه.
هسع يا ربي البرير فاكر نفسو ..رد الصاع صاعين لي ناس المريخ.
شكلو فاكر كدا.
اقول ليكم حاجة ...موضوع (المعاجين) دا انا ما بخلي ..برجع ليه تاني.
بكرة ان شاءالله ح اكتب ليكم عن (سيدا) الجديد ..نصرالدين الشغيل!!.
عاجل : تاني ما اشوف لي مريخابي بشكي من (التسوس).

شافوا مصلحتهم وأنا شفت مصلحتى ..الهلال فاوضني بعد شطبي مباشرة وهذه رسالتي لجمهور المريخ

2012-12-28T07:33:00.001+03:00

تعرضت للإهمال بصورة كبيرة من المريخ .. ومافى زول يزعل من التانى وبس
لم أكن أتوقع شطبي بعد العملية الجراحية التي دفعت تكاليفها من جيبي
كنت صريحا معهم .. بأننى إذا حصلت على عقد مناسب فى (باقى اليوم) سأقوم بالتسجيل ولن انتظر
اجرت صحيفة الزاوية الالكترونية حوارا مثيرا مع مشطوب المريخ ولاعب الهلال الجديد نصر الدين الشغيل كشف من خلاله اللاعب الكثير المثير حيث اشارت الصحيفة بأنها إستطاعت الوصول الى اللاعب عقب خروجه مباشرة من مكتب الامين البرير رئيس نادى الهلال وقبل التوجه الي الاتحاد العام للتسجيل في كشوفات الهلال ...وخرجت منه بهذا الحوار
الشغيل تعرضت للاهمال من المريخ
فى الحقيقة تعرضت للإهمال بصورة كبيرة من المريخ ولم أكن أتوقع ذلك على الإطلاق العملية الجراحية التى خضعت لها كان المجلس والجهاز الفنى والطبى يعرف أنها مقرره لى من شهر رمضان وكنت أقوم بتأجيلها دائما مفضلا مصلحة المريخ على صحتى ومستقبلى الكروى وعندما أردت اجراء العملية عقب انتهاء الموسم تهرب منى المجلس ولم يقم أحد بالسؤال عنى أو دفع تكاليف العملية للمستشفى ودفعتها من جيبى الخاص
قلت لهم : ساسجل ولن انتظركم
فقط مولانا أزهرى ودكتور أسامه الشاذلى أخطرانى فى المستشفى أن المريخ سيقوم بإخلاء خانتى وسيقوم بمعاملتى مثل اللاعب المسجل فى الكشوفات فى الأشهر المقبله تمهيدا للعودة فى شهر يونيو ولكنى كنت صريحا معهم بأننى إذا حصلت على عقد مناسب فى (باقى اليوم) سأقوم بالتسجيل ولن انتظر
لست غاضباً ولكنهم تجاهلوني وشافوا مصلحتهم وانا شفت مصلحتي
لالالا لست غاضبا هم تجاهلونى وفضلوا مصلحتهم على كل شئ يربطنى بهم وفى النهاية انا لاعب محترف وواجبى ان أعرف مصلحتى أيضا فى الأخير هم شافوا مصلحتهم وأنا شفت مصلحتى مافى زول يزعل من التانى وبس
اصبركيف اكثر من كدا ؟؟
أنا أصبر كيف ومافى زول سأل منى بعد طلعت البيت إلا قبل يومين بس تخيل بعد كل هذه السنوات فى المريخ لا احد يهتم بى وأنا الذى أصبت فى الملعب وأرتدى شعار المريخ وماهو الضمان للعودة وهناك مدرب جديد قد يكون له رأى سلبى فى الشغيل وقد لايحتاج الى خدماتى فى شهر يونيو لن أنتظر على سراب وانا لاعب محترف كما قلت لك
اسرار مفاوضات الهلال؟
منذ أن تم شطبى من المريخ مباشرة بواسطة عدد من الأشخاص لا اعرفهم فقط اعرف عثمان الدحيش هو صديقى ولاعب سابق ولم أرفض الفكرة وطلبوا منى فرصة لتوفيق أوضاعهم والاتصال بى مرة أخرى وأمس إتصلوا على وأخبرونى بأن ألتقى بهم اليوم وفعلا إلتقيت بالرئيس البرير قبل قليل فى مكتبه واتفقنا على كل شئ سريعا وسيتم التوقيع
هذا رايي في البرنس وفييرا
ماهو رأيك فى انتقال هيثم وعلاء للمريخ؟
هما لاعبان كبيران واتمنى لهما التوفيق
نحن في عصر الاحتراف
هل إنتقالك للهلال رد فعل؟ هذا إحتراف لاعلاقة له بأى شئ أخر ..ربما تكون الظروف ساعدت على ذلك وأنا لم اخطط لشئ هذا قدرى وأنا راض به تماما فقط أدعو لى بالتوفيق
رسالة من الشغيل لجماهير المريخ
عشت بينكم أياما جميله لن تنسى ولكن الإدارة والظروف فرقوا بيننا وهذه كرة القدم أهم شئ أننى خرجت بإحترام ودون مشاكل وهذا عهدى مع الكرة وسيرتى جيده فى المريخ والوسط الرياضى.. امنياتى بالتوفيق ودعواتكم

الفاضل التهامي‮ ‬يسحب ترشيحه من منصب نائب الرئيس امس

2012-12-28T07:32:00.001+03:00

المفوض‮ ‬يؤكد اكتمال الاستعدادات ووضع ضوابط امنية مشددة ... لجنة الاشراف تزور مقر الانتخابات علي‮ ‬الطبيعة
تسلمت مفوضية تسجيلات الشباب والرياضة بولاية الخرطوم امس بمقرها ببحري‮ ‬رسميا انسحاب عضو الجمعية العمومية الطارئة لنادي‮ ‬الهلال الفاضل التوم التهامي‮ ‬من الترشيح لمنصب نائب الرئيس ليصبح عدد المنسحبين ثلاثة مرشحين عبدالمنعم‮ ‬ابوالقاسم من منصب نائب الرئيس وعماد الدين سيد محمد بخيت من منصب الامين العام وحسب جدول اجراءات الجمعية العمومية الطارئة الذي‮ ‬اصدرته لجنة الاشراف برئاسة مولانا الريح وداعة الله والاستاذ عبدالمنعم انور الفكي‮ ‬عضو المفوضية الولائية ومقرر اللجنة وعضوية اخرين سيتم نشر الكشف ا لنهائي‮ ‬للمرشحين للمنصبين‮ ‬يوم‮ ‬غد السبت باستاد الهلال بامدرمان ومقر المفوضية ببحري‮ ‬والذي‮ ‬بلغ‮ ٤ ‬مرشحين فقط‮ ‬بعد انسحاب ‮٣ ‬مرشحين والكشف النهائي‮ ‬مايلي
اولا منصب نائب الرئيس
ترشح الصادق مهدي‮ ‬ضرار والدكتور كرار التهامي
ثانيا منصب الامين العام
ترشح التجاني‮ ‬علي‮ ‬الحسن والفريق شرطة محمداحمد بحر
واما الجمعية العمومية الطارئة‮ ‬المخصصة لانتخاب نائب الرئيس والامين العام فقد تحدد لها الرابعة من عصر الاحد القادم باستاد الهلال بامدرمان وبخصوص انسحاب المرشح الفاضل التوم المهدي‮ ‬بعد قفل باب الطعون وسحب الترشيحات وحسب لائحة قانون يئات الشباب والرياضة بولاية الخرطوم لعام‮ ‬2008‮ ‬فانه‮ ‬يحق للمرشح سحب ترشيحه قبل بداية الاقتراع والتقدير متروك للجنة الاشراف علي‮ ‬الجمعية العمومية وكذلك فان الانسحاب امس ايضا حدث قبل‮ ‬48‮ ‬ساعة من نشر الكشف النهائي‮ ‬للمرشحين‮.‬
ضوابط مشددة
اكد مولانا زكريا‮ ‬يونس مفوض تسجيل الهيئات الشبابية‮ ‬والرياضية بولاية الخرطوم اكتمال كافة الترتيبات لانعقاد الجمعية العمومية الطارئة بمجلس ادارة نادي‮ ‬الهلال في‮ ‬الرابعة من عصر الاحد القادم باستاد الهلال بامدرمان وقال في‮ ‬تصريح خاص لقوون امس ان اجراءات الجمعية العمومية تسير علي‮ ‬حسب جدول الاجراءات الذي‮ ‬اصدرته لجنة الاشراف موضحا ان اللجنة قامت امس بزيارة تفقدية الي‮ ‬استاد الهلال لمعاينة مقر الانتخابات علي‮ ‬الطبيعة لتأمينه بالترتيب والتنسيق مع الجهات الامنية والشرطية لتامين الجمعية العمومية الطارئة وناشد المفوض الولائي‮ ‬عضوية نادي‮ ‬الهلال‮ ‬التي‮ ‬يحق لها المشاركة في‮ ‬الجمعية العمومية الحضور الي‮ ‬الاستاد لممارسة حقهم الديمقراطي‮ ‬تاكيدا لاهلية وديمقراطية الحركة الرياضية واضاف ان الجمعية العمومية الطارئة التي‮ ‬تشرف عليها‮ ‬المفوضية تاتي‮ ‬تنفيذا لقرار لجنة الاستئنافات للهيئات الشبابية والرياضية بولاية الخرطوم الصادر بتاريخ‮ ‬29‮ ‬نوفمبر الماضي‮ ‬والذي‮ ‬وجه المفوضية بعقد جمعية‮ ‬عمومية طارئة لاكمال مجلس ادارة نادي‮ ‬الهلال الحالي‮.

المصدر: قوون‬

خطأ الحضري ...مزمز ميرندا

2012-12-27T06:11:00.001+03:00

وان طال السفر / محمد عبد الماجد

< عندنا زول في الحلة اسمو (ابودمغة)...ابودمغة دا زول ما ساهل ...الحلة كلها بتشكر فيه.
< زول قديم ..من زمن (الحافلة) كان بكون فيها (مقعد) واحد..وزمن تذكرة باص الجريف ممكن توديك (فرانكفورت) ...الدنيا كانت بي خيرها.
< ما في زول بسألك ...ولا في زول بقول ليك الساعة كم؟.
< ولاية الخرطوم دي زمان كانت شمال حدها نهر النيل الازرق ...جنوبا السكة الحديد ...شرقا جامعة الخرطوم ..وغربا استاد الخرطوم.
< الموضوع انتهى على كدا ...ما في كلام كتير ...ولا فى جرجرة.
< هسع الحكاية اتلخبطت ...استاد الخرطوم بقى شرق ...وسوبا بقت قلب الخرطوم.
< زمان (سوبا) دي ما بتمشي ليها إلا تكون ضامن ليك (جمعة) قدامك ...هسع تمشي وتجي في 5 دقائق.
< ما عارف ..نحن سكنا برة البلد ..وإلا كمان سوبا بقت جوة...والا الحاصل شنو بالظبط كدا.
< ولاية الخرطوم هسع ..تسافر ..سفر ...بعد اربعة يوم طيران ..تكتشف انك لسه في حدود ولاية الخرطوم.
< هسع ما تشر لينا الموضوع في ولاية الخرطوم...خليك احسن مع ابودمغة.
< ابو دمغة دا كان زول صعب النوع القدر ما يلقى ليه (شافع) حايم في الشارع ..بثبتو ليك..وبقول ليه يا ود ماشي وين في انصاص الليالي دي؟...لو لاقهو (الصباح)..بقول ليه كلامو دا (ماشي وين في انصاص الليالي دي؟).
< عشان كدا من الساعة سبعة صباحا ...ما في (شافع) بحوم ليه في الشارع.
< ما في زول بقدر يقول فيه كلمة...زول (جنب) ...ما بقصر في أي حاجة...اى حتة فيها (جوطة) بتلقى بتصدر الموقف هناك.
< ابو دمغة دا ...كان لو حصلت ليك أي حاجة ..بتلقى اول زول (دافر) ..قدام الناس.
< الواجب ما بتلفت فيه...وبندولو شايلو في جيبو ..بس ما تقول عندك صداع.
< لو عاوز تجيب ليه (نفسيات)..قول ليه ما شفتك في عزاء ود السارة.
< يزعل ..ولونو يقلب...ويسل سكينو من ضراعو.
< اظن كدا ..اني قلت ليكم قبل كدا الزول دا صعب..(لو جاه مسكول بالغلط ساكت ..شكلتو بدور).
< ما بتفاهم.
< لو في زول مات ...تلقى غاطس لي نصو في (ود اللحد)..مكفكف العراقي والسروال..وقافل الموبايل.
< والفراش لو ما رفعوه ..ما بتزحزح من الصيوان.
< الموية الناقصة بتمها ...الكرسي الطاشي بجيبو...والسكر ان كمل بجيبو.
< زول واجب بس.
< ابودمغة دا ..كان لو حصلت ليك أي حاجة ...(بدفر) ليك خروف قدامو ..وبفتح الباب وبجيك داخل.
< سماية ...كرامة ..عرس ...عودة من سفر ...اي حاجة بتحصل ليك بجيك ناطي بي خروفو.
< ما عندو مناسبة بمشي ليها بدون (خروف).
< الخروف دا اقل حاجة يمكن ان يقدمها ليك.
< كيلو ..ونص كيلو ...وكراع ..دي ما عندو ...ولا في حساباتو.
< ابودمغة دا من (الخروف) ولي فوق.
< الزول (ابودمغة) دا ..بدون مناسبة كدا ..ذكرني ليك ..عصام الحضري (44) سنة.
< ما عارف العلاقة شنو؟....ما تسألوني شن جاب لي جاب.
< انتوا يمكن تشوفوا ما في علاقة بين عصام الحضري ...وابودمغة دي.
< يمكن تضايقو من المقارنة دي؟
< لكن بوقع ليكم الكلام ..وبشرحو ليك.
< وإلا اقول ليكم اشرحو ليكم ليه ...انت في زول فيكم طالبني (كلمة).
< بعدين انا مع (البرد) دا ..ذاتو ما فايق لي شرح.
< الحمدلله لقيت لي (مناسبة)..اسألكم ..انتوا (البرد) النزل فجأة دا شنو؟.
< ما خلينا حاجة للروس ...تقول في (موسكو).
< بقى ما عندنا أي فرق من الروس.
< لكن خلوني اشرح شوية.
< مش مرات بتمشي العيادة ..تحجز ..وتقعد مع الجماعة تنتظر دورك.
< ومش مرات بتلقى ليك زول قاعد في العيادة ..وبتابع في الكشف زي المسلسل التركي.
< انت بكل حسن نية تفتكر الزول دا حاجز.
< تمشي تسألو تقول ليه : انت دورك الكم؟.
< يقول ليك ابدا انا ما حاجز ...لكن منتظر لي زول.
< يا زول الجابرك على (البرد) دا شنو؟.
< يا ود الناس عليك الله وقت انت ما حاجز مالك ومال التلتلة دي؟...يمين نحن الواحد لو ما اتمكن من المرض ..ما بمشي ليه لي دكتور.
< عندنا زول لو ما موتوه عديل ..ما بمشي ليه لي دكتور ...جنو وجن الدكاترة.
< تمشي ليك لي دكتور ..لي حاجة بسيطة كدا ..يقول ليك ...لازم نشيل (الطوحال).
< في الساهلة ..والصعبة بشيلوا (الطوحال).
< انا ما عارف الدكاترة ديل مشكلتهم شنو مع (الطوحال).
< هسع الطوحال دا ...ما موضوعنا.
< عشان ما الف وادور ليكم كتير..بدخل ليكم في الموضوع.
< انتوا الزول إلا يجيكم عديل كدا.
< (أختير الخطأ الذي أرتكبه عصام الحضري حارس مرمي المريخ السوداني وقائد المنتخب المصري خلال مباراة فريقه مع ليوبار الكونغولي بذهاب الدور قبل النهائي ببطولة الكونفيدرالية الأفريقية بين أغرب الأخطاء التي رصدها موقع »تي أن« الأرجنتيني في تقرير له عن أغرب أخطاء عام 2012 .الموقع علق على خطأ الحضري الذي إختاره بين تسعة أخطاء هي الأغرب في 2012 بقوله :« أسطورة الكرة المصرية عصام الحضري أحيا كرة ميتة لتصبح هدفا سخيفا في مرماه بعد خطأ مربك ». يذكر أن ، هذا الهدف كان سبباً في إقصاء المريخ من الكونفيدرالية الأفريقية بعدما فشل الفريق في تحقيق نتيجة تعوض خسارته في الكونغو بهدفين لهدف).
< خد مزمز ميرندا.
< الحضري قبل هذه الخطأ..قال عاوز يعمل ليه انجاز مع المريخ ..ويشيل ليه بطولة خارجية.
< ونحن صدقنا ..قلنا الزول دا كبير في السن ..ما بتكلم ساكت..(برضو العمر ليه احكام).
< وقال الحضري ...ان البطولة الوحيدة التى لم يحققها في مسيرته الرياضية هى الفوز بالكونفدرالية.
< قلنا ممكن ...الحضري دا حارس كبير.
< اها الحضري طلع ليه بي (غلطة) ...الفيفا ..سجلت ليه الخطأ ..والمواقع العالمية رصدته ضمن ابرز اخطاء في العالم سنة 2012م.
< شفتو الزول وقت يعمل ليه (فضيحة) تظل هذه الفضيحة ملازمه طول العمر.
< الجماعة نسوا كل انجازات الحضري ..(3 بطولات امم افريقية)..واحسن حارس في القارة الافريقية في 3 بطولات امم ..والكثير من الانجازات القارية والمحلية مع الاهلي المصري.
< الناس نسوا كل الحاجات دي ..ومسكوا ليك في (الغلطة) الوقع فيها الحضري ..في اخر عمرو.
< يعني يا الحضري طلعت ليك بانجاز (سلبي) مع المريخ ...وتداولت غلطتك في المواقع ..وكانت موضوعا لكل الناس للسخرية والضحك على (سذاجة) هذا الحارس العجوز ..الذي وقع في (خطأ)..لاعب سلة ما بقع فيه.
< المريخاب طبعا ممكن يقولوا الموضوع دا ..طلعوه هلالاب (الارجنتين)....اصلو قالوا الارجنتين ديل نصهم بشجع (ميسي) في برشلونة ..والنص التاني بشجع الهلال.
< عشان كدا غلطة الحضري دي ...خلتهم ينشقوا من الضحك.
< غايتو مجلس المريخ ..(ما تبقى منو)..مفروض يعمل ليه لجنة تحقيق طوالي مع عصام الحضري.
< عصام الحضري حرم المريخ من الفوز ببطولة الكونفدرالية التى كان المريخ قريبا منها لولا الخطأ الذي وقع فيه الحارس المصري العجوز وكان السبب الرئيس في ان يخرج المريخ من امام فريق متواضع.
< الشيء الغريب ..الحضري جابوه عشان المريخ يشيل بطولة ...الحضري قام طلع المريخ من البطولة.
< الحكاية دي زي (الكديسة) البتجيبها في البيت عشان (الفئران)..تقوم تلقى الكديسة بقت ليك مشكلة جديدة فى البيت مع الفئران.
< يوم تلقاها شربت اللبن ..ويوم تلقاها اكلت اللحمة ..والفئران ...تدخل وتطلع قدام (الكديسة).
< اعلموا لجنة تحقيق مع الحضري... موضوع (الغلطة) التى كانت ضمن ابرز الاخطاء في عام 2012م ..مفروض ما تمر ساكت.
< مش الزول دا بصرف (17) الف دولار في الشهر.
< اسألوه ..والله 17 الف دولار ..لو كان بيأخذها (غفير) مدرستنا ..(عمرو 71 سنة) ما كان بدخل فيه هدف بالشكل دا.
< يا ود الناس ..ممكن اسأل سؤال.
< اسأل.
< هسع (ابودمغة) دخلو شنو بالكلام دا.
< ملحوظة : قلت ليكم ما فاضي للشرح في (البرد) دا.
هوامش
< عبدالله حسن عيسي ومتوكل ..رفضا (العدول) عن الاستقالة.
< اول مرة الجماعة ديل يتمسكوا بكلتمهم كدا.
< المريخاب طبعا بحبوا (التحنيس).
< ح يقعدوا يحنسوا في الجماعة كدا ..لمن السنة تنتهي.
< مفروض المفوضية تشوف شغلها.
< يعني ح نقعد ننتظر عبدالله حسن عيسي لمن يرجع عن استقالته.
< الزول دا ..كلامو واضح ..قال ما بسحب استقالته.
< هاشم ملاح ..ظهوره في الفضائيات دائما بكون (خصما) عليه.
< يا هاشم ...عليك الله ..من مصلحتك تاني اعتذر من أي لقاء تلفزيوني.
< كفاية علينا (عسقلاني) واحد.
< ما تبقوا لينا كلكم (عسقلانيات).
< سادومبا الذي يتمناه الاهلي المصري بكل تاريخه وبطولاته ..فرط فيه مجلس ادارة نادي الهلال.
< فرطنا في سادومبا ..وقعدنا ننتظر رد الفيفا.
< هسع لو سادومبا في كشف الهلال ما كان الزول دا طمنا شوية.
< عصام الحاج دا ..بفرتك المريخ.
< الزول دا ماشي كويس في (الفرتكة)..تصريحاته ذاتها فيها الكثير من التجني والسخرية من الاخرين.
< متوكل احمد علي ..مفروض تضموا لرابطة من روابط الهلال.
< الزول دا قنع من المريخ ..ونفسو مرقت.
< فيصل العجب ..عقده بنتهي في يونيو.
< والعجب قال ما بقعد (كنبة).
< يلا ورونا الحكاية دي بتتعاملوا معاها كيف؟.
< عشان اديكم طرف الخيط..اهلي شندي بدأ مفاوضات مع فيصل العجب.
< المريخاب بحترموا رموز الهلال ..وبهينوا في رموز المريخ.
< لو كنتوا عاوزين تكرموا فيصل العجب ..كان تعيدوا تسجيلو في التسجيلات الماضية.
< بالمناسبة بلة جابر ذاتو قال ما بقعد كنبة.
< وموسي الزومة ..برضو قال ما بقعد.
< تاني ما في زول بقعد ليكم كنبة.
< ما معقول تلعبوا ولاد الهلال ..ناس الباشا وكلتشي واكرم وهيثم وفييرا ..وتقعدوا اولادكم في الكنبة.
< بل اولاد المريخ ..قلق والشغيل ..بيلعبوا الان في الاهلي عطبرة.
< عاملين فيها عندهم وفاء.
< والله انتوا الوفاء ما بتعرفوا تمنحوه إلا لي اولاد الهلال.
< ما بتعرفوا قيمة اللاعب إلا اذا لعب في الهلال.
< عصام الحاج دا ..زي ما قلت ليكم ح يبقي براه فى مجلس المريخ.
< ح يكون زي بوابة عبدالقيوم.
< عصام الحاج قدر على جمال الوالي ..وقدر على عبدالله حسن عيسي ..واتسنتر
في مجلس المريخ براهو.
< حتى متوكل احمد علي الذي كان يمكن ان يسبب له (ضيق)..اتخلص منو.
< عصام الحاج دا كان قعد شوية ..بحول نادي المريخ الي (صالحة).
< عاجل : الحضري مرتب ديسمبر دا مفروض (دولار) ما تدوه.

البرنس يسلم لجنة تأهيل مسجد الهلال مساهمته امس

2012-12-27T06:09:00.001+03:00

تحصلت «قوون» على معلومات مؤكدة مساء امس تفيد بان كابتن الهلال السابق هيثم مصطفي قد قام بتسليم لجنة تأهيل مسجد الهلال مساهمته التي اعلن عنها في وقت سابق للجنة. فيما سيغادر اللاعب الخرطوم خلال الساعات القادمة للاراضي المقدسة وذلك لاداء مناسك العمرة ببيت الله العتيق وزيارة الروضة الشريفة بالمدينة المنورة قبل العودة للخرطوم والانضمام لانطلاقة اعداد الفريق.

المصدر: قوون

م. احمد ادم تعرض للاصابة في رأسه والضرب من المعتصمين بنادي الهلال

2012-12-27T06:07:00.002+03:00

دون بلاغا بقسم الصناعات بام درمان في عدد من الاسماء:
تعرض المهندس احمد ادم عضو مجلس ادارة نادي الهلال للاصابة في رأسه والضرب من قبل جماهير الفريق المعتصمة بدار النادي عندما سجل زيارة للنادي برفقة لجنة اعمار مسجد نادي الهلال لبحث احتياجات العمل في المسجد بعد استلامها للشيكات التي تبرع بها كابتن الفريق السابق هيثم مصطفي لاعب المريخ الحالي ليتفاجأ احمد ادم بهجوم من قبل المعتصمين الذين حاولوا الفتك به ليتم انقاذه بواسطة عربة تم تهشيم زجاجها من الخلف وقام احمد ادم بتدوين بلاغ في قسم الصناعات ام درمان في بعض الاسماء التي شاهدها وقال انه يعرف عددا كبيرا من المعتصمين الذين هاجموه وتسببوا في اصابته وفور سماعه الخبر قام رئيس الهلال الامين البرير وهاشم ملاح الامين العام المكلف ود عباس طبيب الفريق وعدد من اقطاب الهلال والاعلاميين بزيارة احمد ادم في قسم الصناعات ام درمان وقد وجه الامين البرير رئيس نادي الهلال بضبط الدخول للنادي منذ اليوم وطالب بمنع اي عضو لم يحمل عضوية النادي سارية المفعول بعدم الدخول الي دار النادي وقال البرير حتي الذين يدخلون دار النادي بالعضوية سيتم كتابة بياناتهم التي تحتوي علي اسم العضو ورقم تلفونه وعنوان سكنه.

المصدر: قوون

رئيس الاتحاد المالي يرفض اكمال انتقال سيدي بيه للهلال

2012-12-27T06:05:00.000+03:00

في تطور مثير للاحداث اكد مصدر اعلامي من داخل مقر الاتحاد المالي لكرة القدم ان قصة انتقال المحترف عمر سيدي بيه لاعب استاد مالي للهلال صحيحة بوصفه لاعب مطلق السراح ولم يجدد مع فريقه السابق استاد مالي الذي قام بمخاطبة الاتحاد المالي الذي قال لاجهزة الاعلام المالية ان اللاعب سيدي بيه يعتبر لاعب استاد مالي ولم نرسل كرته الدولي للهلال حتي يوفق اوضاعه مع النادي الذي ينتمي له اللاعب لان اسمه مسجل ضمن كشوفات فريق استاد مالي وقال مسئول العلاقات الدولية بالاتحاد المالي سيلمانو ان هناك ما يثبت ان اللاعب سيدي بيه لاعب لاستاد مالي رغم ان اللاعب لم يجدد خدماته لفريقه ومن حق الهلال ان يحسم امر انتقال اللاعب بواسطة الوكيل او نادي استاد مالي وقال ان مشكلة الهلال حلها سيكون بيد الوكيل الذي احضر اللاعب للهلال مع ناديه السابق او اللجوءللاتحاد الدولي الفيفا.

المصدر: قوون

بعد هيثم وفييرا وانهيار المجلس ..المريخاب فاضل يعيّنوا ليهم (عسقلاني)

2012-12-26T04:50:00.001+03:00

وان طال السفر/ محمد عبد الماجد

قلنا في كتابات سابقة ..ان المريخ الوصيف او (الضل) ..يسير على خطوات الهلال ، ويعيد انتاج كل الاشياء الجميلة في الهلال لكن بتشويه واضح.
زي الطالب البشف (يبص) ، من الطالب القاعد جنبو الاجابة الصحيحة ..وبنقل أي حاجة في ورقة اجابة زميله بما في ذلك اسمه ورقم جلوسه.
خاصة في امتحان الانجليزي.
ما بخلي حاجة.
في زول بشف (رقم الجلوس).
ناس المريخ عملوها.
وهذا هو المريخ (الضل) يؤكد ما نقول ..ويثبت يوم بعد يوم انه نسخة مشوهة من الهلال.
وان كنا نقول ان الهلال لا توجد منه نسخة مشوهة.
الهلال جميل ..اينما كان.
المريخ بعد ان وقع في كشوفاته هيثم مصطفى ..يكذب ..ولا يتجمل ، وان ظنوه تجملا. والتشبه بالهلال فلاح كما يقول الاستاذ يس عمر حمزة.
المريخاب وصلوا حد انهم اصبحوا يقلدونا حتى في (عدم شرعية) المجلس ..عليكم الله في هوس اكتر من كدا.
انتوا يا مريخاب ...فاكرين (عدم الشرعية) دي حاجة سمحة؟.
ديل في مشاكلنا بقلدونا.
والله عدم الشرعية حاجة ما حلوة....وحاجة كدا ..بتقطع المصارين ...(ليس من الضحك بالتأكيد).
ناس همد ديل يكونوا فاكرين عدم الشرعية دي فيها (اراضي)...قايلنها (باسطة).
وإلا يكون فاكرين (عدم الشرعية) دي بوزعوا معاها (سكر).
دي زي الزول الصحي الصباح ..لبس قميصو (المشخط) ..داك ..وطلع من البيت.
في اثناء طلوعه من البيت ..لقي ليك (صف) طويل واقف قدام احد المؤسسات الكبرى.
زولكم ما كضب ..مشى وقف في (الصف) دا...قال في نفسو ..الناس ديل ما بقيفوا في (صف) ساكت.
يكون بوزعوا (جداد) مشوي في الصف دا..(طبعا انا ما محتاج اقول ليكم زولكم دا كان في هذا الوقت الصباحي نفسو في جداد مشوي).
ولا عاوز المح ليكم ..تلميح ساكت.
قال بينو وبين نفسو : اكيد في حاجة سمينة في المركز دا.
وقف واتسنتر في الصف ..وبقى كمان يوقف في الناس.
بقى في صفو بنظر ..يا زول امشي قدام ..اقفل الصف هناك ..يا جماعة ما تخلوا زول يدخل ساكت...يا شباب صفكم بالطريقة دي ما بمشي ..سدوا (الفرقات).
يلا مشي ..ادتونا (البرد).
زولكم وقت قرب للباب ..قال اخير يعرف حاجة ..قال للزول القدامو ..اسمع انت (الصف) دا صف شنو؟.
الزول الواقف قدامو قال ليه دا صف (الجلد) ..اي زول واقف في الصف دا مقررة عليه عشر جلدات...انت جاي من وين؟..ما عارف حاجة..انت بتقيف ساكت.
فاكرها (تأشيرة) للسعودية!!.
موش مفروض زولكم بعد ما عرف المعلومة دي يتخارج من الصف دا ..وينكشح.
زولكم ما انكشح .. صلح نظارتو (تقول طلب فول ) ، وقال للزول الواقف قادمو احسن اقيف وانجلد عشر جلدات ..عشان الجماعة ديل ..بكرة بزيدوا الحكاية.. بدل عشر جلدات بعملوها عشرين ..احسن الزول يخلص.
والله الناس ديل ما مضمونين.
زمان (الكبريتة) كان فيها مية عود.
هسع (الكبريتة) بقت زي المشروع فيها (عود) واحد ..تقول عاوزين يزرعوه.
الغريبة بعد ازمة الغاز والحصل في (الكبريت) ...الجماعة ديل الي الان بغنوا في (النار ولعت).
النار دي ح يولعوها بي شنو؟..مع (كبريتكم) البقى فيها (قشة) واحدة.
الموضوع دا والله لا بخصنا لا من بعيد لا من قريب ...ولا عندنا معاه قضية ...تولع ما تولع بي طريقتهم.
حكاية التقليد ..دي بذكرني بي حاجات عابرة كدا.
زول مشي ليه (مطعم)...جر ليه كرسي وقعد ...(زي ما أي زول يمشي ليه مطعم ويجر الكرسي ويقعد فيه)...ويكورك ..قبل أي حاجة يا ولد تعال نضف التربيزة دي.
زولكم نادي الجرسون طلب ...(عدس).
الزول القاعد جنبو في نفس التربيزة قال للجرسون ..عليك الله جيب لي معاك (عدس) برضو.
في زول بقلد ليه زول في (عدس)...نحن العدس عند (ايمان لندن) مكجننو.
الله يقطع سنين العدس ..محل ما يكون.
الزول ضرب العدس ..قبل ما العدس يكمل ..كورك للجرسون ..وقال ليه عليك الله جيب لي نص فرخة مشوية.
الجرسون قبل ما يرجع من التربيزة ..الزول القاعد جنبو رفع رأسو ..وقال للجرسون عليك الله جيب لي معاك برضو نص فرخة ، وتكون مشوية كمان.
ما طبيعي تكون (مشوية) ..يعني ح تكون بتقرأ (طب).
ضرب نص الفرخة ..الزول (الاصلي) تاني كورك للجرسون وقال ليه جيب لي عليك طلب (كمونية)...قال النشوف الزول دا بقلدني في (الكمونية) دي ..وإلا الموضوع دا كلو (صدفة) ساكت.
صاحبكم قبل ما الجرسون يرجع ..قال للجرسون : وانا كمان جيب لي معاك طلب (كمونية).
الله ..الله ..الله ..دي الحكاية مقصودة بقأ.
الزول (اتجوغر) ..واكل الكمونية ...ونادي تاااني الجرسون وقال ليه جيب لي (نيفة).
اصلها بايظة ..بايظة.
الزول الجنبو ..برضو طلب (نيفة).
اسمع مع (النيفة) جيب لي كوارع.
الزول برضو قال عاوز مع (النيفة) كوارع.
المسكين ..ضرب (النيفة) ..وضرب (الكوارع) ..وما قدر يتحلى من الزول المارضو دا.
قال في نفسو ..(في السر) يعني بينو وبين نفسو ..يا ربي (احلي) هنا وإلا امشي (احلي) في البيت؟.
زولكم القاعد جنبو ..قال ليه احسن نمشي نحلي في البيت.
اها ..في (تقليد) اكتر من كدا.
ناس المريخ شغالين معانا بالنظرية دي ..(التحلية) بقلدونا فيها.
والله انا لو رئيس نادي الهلال ..كنت جبت لي عشرة (رباطة) وسجلتهم في كشوفات الهلال ..وشطبتهم في اليوم التاني...عشان تسجلوهم ..وكشفكم يبقى كلو (رباطة) يا مريخاب.
يا جماعة ..انتوا دي سمعتوا بيها ..حصل قابلتكم؟.
حصل في نادي قلد ليه نادي في (الاستقالات).
ناس المريخ ..عملوها ..بقوا اليوم والتاني واحد فيهم (يستقيل).
كل ما نصحي الصباح ..نسمع ليك بي واحد استقال من المريخ.
استقالاتكم دي العاقبة تحصل في مجلس الوزراء.
نحن في الهلال عندنا نائب الرئيس ابومرين (استقال) ...المريخ فيه نائب الرئيس عبدالله حسن عيسي برضو (استقال).
دا يقولوا عليه شنو؟.
زي الحفلة البتكون بالنور الجيلاني في البرد دا ..يمين ما تفهم أي حاجة..بتاع العشا ..كل ما يمر فيك ..تنزل ليك صحن...تقول شغال في الميناء.
عندنا الامين العام للهلال الكاروري (استقال) ..عندهم في المريخ الرئيس جمال الوالي (استقال).
طبعا الحتة دي عاوزة ليها شرح.
تلقاكم قلتوا ليه ..ما استقال في المريخ الامين العام زي ما استقال في الهلال الامين العام..طول ما المريخ ..بقلّدوا الهلال ..وبشيلوا منو الحاجة بي ضبانتها.
والموضوع بعد ما ابينو ليكم ..سوف يظهر ليكم بوضوح ..لأن هناك تفسير وتعليل منطقى ..يتمثل في ان الامين العام في الهلال ..بعادل رئيس في نادي المريخ.
هسع الدولار بساوي كم جنيه؟.
اسكتوا خلوه ساكت ...ما عاوزين نقفل نفسكم ساكت.
عندنا قريبنا ..برة البلد ...كل ما يقول راجع البلد اجازة ..يسمع بارتفاع الدولار يخلي الرجعة.
الزول دا عرسو ..كل سنة بأجلو سنة ...تقول عرسو دا واضعاه اللجنة المنظمة للدوري الممتاز ....كل مرة يأجلو.
على العموم عشان جمال الوالي بس ..نحن ح نجاملكم..لأن (المشجع) في الهلال بعادل (رئيس) في المريخ.
عملنا ليكم تخفيضات 10%.
لكن يا مريخاب عشان ما تتحرجوا في (البرد) دا ..نزلنا ليكم في القيمة.. خاصة ان رئاسة الهلال يشغلها الان الامين البرير.
الاحراج في البرد ...زي الزول الببيع ليه (تلج) في هذه الايامات فى موسكو.
في زول في حلتنا ..بقوم ..كل يوم الصباح ...من دغش بدري..وبمشي ليه لي تلاجة تلج ..وبقول للولد ..اسمع يا ولد عندك تلج.
الولد طبعا في البرد دا ..بقول ليه : لا ابدا ما في تلج.
زولكم كل صباح بمشي للولد ويسألو من (التلج).
يوم الولد ...قال والله انا إلا اشوف نهاية الزول دا شنو؟...قام اشتري ليه لوح (تلج) ووضعو في التلاجة.
اول ما الزول جاء الصباح وسألو ..وقال ليه : اسمع في تلج.
الولد قال ليه : ايوا في تلج.
عمكم قام ليك فيه ...قال ليه ..عليك الله هسع دي عملية تعملها ...هسع دا برد يجيبوا فيه (تلج).
هسع موضوع التلج دا ...خليه ..واصل لينا في الموضوع الاساسي ..ما تبقى زي سواق الحافلة ..اول ما يتحرك من الموقف بكون بتكلم ليك عن (برشلونة) وميسي وفرق الـ (16) نقطة من ريال مدريد ...واول ما تصل المحطة الاخيرة ..تلقى سواق الحافلة بتكلم ليك عن (التوب) الاشتراه اول امس للمدام...وعن رسوم الجامعة للبنت الكبيرة.
نظام شنو؟....نظام الحالة بقت واحدة ...ودخلنا في المواضيع الاسرية.
نرجع للاستقالات.
العضو المحترم عصام كرار في الهلال براهو بساوي ليه 7 اعضاء في المريخ.
عشان الحساب ..يبقى ليكم واضح.
ما عاوزين غلاط.
عصام كرار بساوي متوكل احمد علي ومحمد الريح وجمال الكيماوي و4 همد..والموضوع دا برضو جاملناكم فيه.
المريخاب ..انتهوا من موضوع (الاستقالات)..ودخلوا لينا في حتة (المجلس غير شرعي).
والله مجلسكم دا من يوم ما جاء ...حسيت ليك انو المجلس دا ما شرعي.
ما عارف ليه جاني الاحساس دا؟.
نفس الجدل الدخل فيه الهلالاب ..دخل فيه المريخاب ...شرعي ..ما شرعي ...النظام الاساسي وقانون الرياضية ..وابو القوانين.
محمد الشيخ مدني ..طبعا لو في صالون وقع ساكت ...بفتي ليك فيه.
يطلع ليك النظام الاساسي للفيفا...ولوائح الاتحاد المحلي لكرة القدم في الخرطوم.
ما عارف دخل (الصالون) باللوائح دي شنو؟.
الفيلم دا نحن دخلناه.
شاهدناه بكل هذه التفاصيل.
شفناه.
الحاجات دي كلها مرت علينا.
نحن هسع قاعدين نضحك عليكم ..عشان انتوا بتكرروا في نفس الاخطاء.
عصام الحاج بقى زي (الباب) الواقف براهو ..زي الامين البرير في الهلال.
عصام الحاج بقى زي بوابة عبدالقيوم.
والمواضيع دي طبعا كلها محركها جمال الوالي.
جمال الوالي في الاول كان عاوز ناس عصام الحاج وازهري وداعة الله يستقيلوا ...يوم ان قرر المجلس صرف النظر عن تسجيل البرنس وفييرا.
عصام الحاج وازهري وداعة الله (شفوت)..فوّتوا على جمال الوالي الفرصة.
قام جمال الوالي قال احسن اهد المجلس من الجهة التانية.
جمال الوالي جاب ناسو تاني وقال ليهم قرروا تسجيل هيثم مصطفى وفييرا ..وبالطريقة دي يمكن ان يستقيل عبدالله حسن عيسي والحاج زيدان ومحمد الريح ومتوكل ..يقوم المجلس يفقد شرعيته.
شفتوا جمال الوالي مشغل ومحرك الحاجات كيف؟.
حالتو دي (مستقيل).
المضحك في الامر ..ان هناك محاولات لعودة همد وجمال الكيماوي.
همد وجمال الكيماوي ..ممكن يرجعوا تاني بعد انتهاء التسجيلات.
خلاص ايام الدفع راحت.
يا همد ...انت زولنا ..اوعي تتمقلب.. لسع في قروش طالبها النادي الكاميروني من محترف المريخ الكاميروني مكسيم ..ما تتمقلب ساكت.
عليكم الله هسع مكسيم دا اسم محترف وإلا اسبير.
انتوا الناس ديل بتجيبوهم من وين؟.
اصبر شوية يا همد ..لمن الصورة تتضح بشكل واضح.
قالوا ليك محمد الريح عضو مجلس المريخ المستقيل ..قلبو انقطع في التسجيلات.
عصام الحاج ..البظهر كل اسبوع في التلفزيون ...في التسجيلات (قرش) ما دفعو.
عصام الحاج اكتفى بالظهور (الانيق) في التلفزيون.
شفتوا كيف؟.
ناس يدفعوا ..وناس يظهروا.
هسع بعد الاستقالات ..وبعد منوال (المجلس غير شرعي)..والمفوضية تتدخل ..والوزير يرجئ التدخل في استقالات المريخ.
المسلسل التركي ..الذي شاهدناه في الهلال ..هسع بنشاهد فيه في المريخ.
ما عاوز اقول ليكم فى النهاية (البطل) بموت..زي ما حصل في الهلال!!.
ما عاوز اخرب ليكم الحلقة الاخيرة.
لكن الحاجة البقولها ليكم.
هسع يا ناس المريخ ح يعينوا ليكم (عسقلاني).
عسقلاني ..زي عسقلاني الهلال.
موش انتوا بتقلدونا ..فاكرين ...الحكاية ساكت كدا.
الموضوع فيه (عسقلانيات) يا مريخاب.
ما تفرحوا ساكت.
باقي نحن ..عشان تكونوا عارفين ... أي حاجة عندنا بي نظام.
وبعد ما يعيّنوا ليكم (عسقلاني) ...العسقلاني بتاع المريخ ح يطلع ..ويتكلم ليكم كلام سمح.
في الكلام ما بتلفت.
العسقلاني حقكم يا مريخاب ح يقول ليكم ..ح نعمل توأمة مع ريال مدريد ..وح نطبق نفس النظام.
اصلو الناس البتجيبهم المفوضية ..وتعينهم ..بكونوا بي نفس الملامح.
وح يقعد يتكلم ليكم عن الاحتراف ..والنظام العالمي الجديد.
ما تشتغلوا بالكلام دا.
نحن (العسقلاني) العينوه في الهلال طلع بتاع كلام وشو... ساكت.
عشان كدا ..ما تضيعوا وقتكم ساكت.
الحاجات دي حافظنها حفظ.
بمناسبة الاستقالات دي....في واحد قال لي ناس اهلي شندي ديل عاوزين (فييرا)...عشان يستقيلوا اعضاء من مجلس الاهلي شندي.
قلت ليه لكن لو فييرا مشي الاهلي شندي ح يستقيلوا ثلاثة فقط من مجلس اهلي شندي ...والمجلس ما بفقد شرعيته.
الموضوع دا إلا تجيبوا ليه (البرنس)...لو عاوزين مجلس الاهلي شندي يفقد الشرعية.
انتوا فاكرين فقد الشرعية ...موضوع ساهل.
الموضوع دا ..ما لعب ...الموضوع دا فيه مفوضية ولجنة الاستئانفات.
الموضوع دا ما بقدر ليه إلا هيثم مصطفى.
تاني.
والله هيثم مصطفى دا لو دخل مجلس الوزراء ..بريحنا ليك من نص الوزراء ديل.
ومجلس الوزراء ذاتو ببقى غير شرعي.
استفيدوا من الحتة دي.
وما تقعدوا تصنقعوا لينا ساكت وتعليقايتكم كلها تبقى في (البرد).
في السودان ..ما تسمعوا الكلام دا ...ما في (برد) بكتل ليه زول.
ملحوظة : وإلا في زول عندو كلام تاني.
هوامش
دموع سادومبا ...هي الاخرى تثبت ما يرتكبه الامين البرير في الهلال.
محترف يبكي ..وجماهير معتصمة ..وتسجيلات مهددة بالانهيار.
اقل حاجة هو ان يخرج سادومبا بصورة جميلة ..وبعد ان يستلم حقوقه كاملة ..ليعطي انطباع جميل عن الهلال.
سادومبا ...يجب ان تكرمه روابط الهلال وان تودعه وداعا يليق بهذا النجم الخلوق ..والذي قدم مواسم اكثر من رائعة مع الهلال وكان هدافا للابطال وهدافا للكونفدرالية.
نتمنى ان يتكرر سادومبا الف مرة في الهلال.
الحمدلله ان قطب الهلال الكاردينال ..قام بالواجب ..ومنح سادومبا حقوقه كاملة.
لا نرحب ان يخرج احد من الهلال بأسي او وجع ...حتى الخارجين الي المريخ.
دموع سادومبا ..اثبتت ان الهلال جميل ..ورائع ..وان جماهير الهلال قادرة على ان تمنح الالفة ..والانس.
يختلف الهلال عن كل الاندية في العالم ..بجماهيره الرائعة.
في كل الظروف ....لا اخشى على الهلال في ظل هذه الجماهير الوفية والمخلصة والواعية.
رهاننا دائما وابدا على الجماهير.
تسجيلات الهلال باذن الله وتوفيقه سوف تكتمل.
ولكن الوقوع في مثل هذه الاخطاء ...امر غير مقبول ...كما ان الجماهير لم تعد تستحمل مثل التهور.
سيدي بيه اهلو لقبوه (الساحر)...وان شاءالله سوف يكون هذا المحترف اضافة حقيقية للهلال.
لا نخاف على الهلال إلا من مجلس الادارة.
السنة دي في المريخ ح نفقد (وارغو).
غايتو الحاجة العملها وارغو... عبدالجبار الما بعرف يلعب كورة ما عملها.
عبدالجبار دا جنسو شنو كمان ..وعمل شنو؟.
ناس الهلال ديل الي الان ما اتحركوا ..وما عرفنا برنامجهم الاعدادي.
ناس المريخ برنامجهم طلع ...وحتى المباريات الودية عرفوها.
ناس خالد بخيت ديل ...ما يتحركوا.
اعملوا ليكم همة شوية.
الموسم الفات عملتوا لينا الموسم كلو مشاكل مع هيثم مصطفى ...اها الموسم دا ما عندكم أي عذر.
الاضافات الجديدة لكشف الهلال تحتاج لمعسكرات طويلة حتى يتم التجانس والتآلف بين المجموعة ككل.
من الاشياء الجميلة ...والتى لم يضع لها حساب ...هي عودة محمد احمد بشة لكشوفات الهلال.
بشة ان شاءالله سوف يكون اضافة كبيرة لوسط الهلال.
دفاع الهلال طبعا بقى ما فيه أي مشكلة.
بس غارزيتو دا مفروض يرجع بدري ...ويشوف شغلو.
بالمناسبة ..خايف غارزيتو يرجع ما يلقي هيثم مصطفى ..يقوم يعمل ليه مشكلة من البواب.
الزول دا ما بقعد من غير مشاكل.
وخايف كمان وقت يعرف انو هيثم مصطفى مشى المريخ ..يقوم يشاكل الحلة كلها.
شد حيلك ساكت يا غارزيتو.
السنة الفاتت مبارياتك كلها كانت ضد هيثم مصطفى.
هسع هيثم مصطفى بقى ضدك بالجد ...جد.
لو حصل أي تعطيل او خلل ادي لعدم اكتمال تسجيل أي محترف من محترفي الهلال ..يمكن ان تحدث كارثة.
يمكن ذلك ان ينسف الموسم بحاله.
جماهير الهلال ..ما بتحتمل أي خطأ تاني.
لا من المجلس ...لا من الاتحاد العام لكرة القدم السوداني.
ما عاوزين أي لخبطة.
الجماهير معتصمة.
انت يا مجدي شمس الدين ما عارف الكلام دا.
ما تقعد تصرح فينا ساكت.
لموا تصريحاتكم عليكم.
يعني انتوا الا يجبوا ليكم (ليما).
بالمناسبة ...الاحداث الاخيرة ..نستنا نودع ليما ...(تقول سايق ليه عربية باسطة).
نفسي استوعب ..بلة جابر وموسي الزومة ح يلعبوا مع هيثم مصطفى كيف؟.
المعادلة دي (رياضيا) ما بتجي.
هيثم دا في المريخ ..لبسوه شعار براهو ...عشان ما تخربوا ليه كورتو.
بلة جابر الي الان ما استوعب حكاية تسجيل هيثم مصطفى في المريخ ...عاوزنو يستوعب تمريراته.
يا بلة دي فرصتك ..السنتين دي ممكن تقرأ فيها طب.
سلك ذاتو قالوا الايامات دي بضرب في (الباسطة) ويكتب.
زمان كان مكتول بـ (فتة العدس).
ومعاوية الجاك ..قالوا غيّر تلفونو.
والله (الخلعة) ما سمحة بعد العمر دا.
زمان كنا بنقول ليكم الفرق كبير بين هيثم مصطفى وفيصل العجب..انتوا كنتوا بتقعدوا تغالطوا.
مزمل ابوالقاسم عمل حوار مع هيثم مصطفى بعد 24 ساعة اربع صفحات.
العجب المسكين ...عملوا معاه حوار (330) كلمة بي التلفون ايام كان في المخبأ السري.
والعجب ذاتو الوقت داك لو ما كان عاوزو الهلال ...ما كان في زول اشتغل بيه.
قالوا ليك ..هيثم مصطفى في المريخ ...بضع برنامج الزيارة لعبدالله حسن عيسي ..ولنادي المريخ ..ومتوكل.
هو البحدد البرنامج.
وبعتذر كمان على كيفو.
انتوا وين ضفر؟.
اقطع (ضراعي)..ان كان ضفر فاهم حاجة.
عاجل : كورتكم يا ناس المريخ بقت زي الزول البياكل (العصيدة) بالشوكة والسكين.

لا طعون في المرشحين للعمومية الطارئة لمجلس الهلال

2012-12-26T04:46:00.001+03:00

يتم في الثالثة من ظهر اليوم بمقر مفوضية تسجيل الهيئات الشبابية والرياضية بولاية الخرطوم ببحري قفل باب الطعون في الكشف المبدئي للمرشحين لمنصب نائب الرئيس والامين العام لمجلس ادارة نادي الهلال الحالي ضمن جدول اجراءات الجمعية العمومية الطارئة المخصصة لانتخاب المنصبين والمحدد لها الرابعة من عصر الاحد القادم باستاد الهلال بام درمان وفي اليوم الاول لفتح باب الترشيحات امس وحتي الثالثة ظهرا لم تتسلم اي طعون في المرشحين ويتوقع ان يشهد اليوم طعونا او انسحابات للمرشحين وتحدد لنشر الكشف النهائي للمرشحين يوم السبت القادم باستاد الهلال بامدرمان ومقر المفوضية ببحري وقد بلغ الحجم الكلي للعضوية والتي يحق لها حضور الجمعية العمومية والانتخاب 566 عضوا يمثلون الكشف المبدئي للعضوية والذي تم اعتماده كشفا نهائيا للعضوية نسبة لعدم تقديم اي طعون في الفترة المحددة لتقديمها حسب جدول الاجراءات الصادر من المفوضية الولائية اما النصاب القانوني للجمعية فهو نصف الاعضاء زائد واحد في اليوم الاول للجمعية حسب النظام الاساسي لنادي الهلال لعام 2008 وهو النصاب القانوني 284 عضوا وكما اشرنا سابقا في حالة عدم اكتمال النصاب في اليوم الاول للجمعية ستكون الجمعية الثانية بثلث الاعضاء 189 عضوا واذا استمر المسلسل ستكون الجمعية العمومية الثالثة باي عدد من الاعضاء

سادومبا يغادر مستشفى رويال كير امس

2012-12-26T04:43:00.002+03:00

غادر محترف الهلال الزيمبابوي مطلق السراح ادوارد سادومبا مستشفي رويال كير في ساعة متاخرة من مساء امس بعد ان زارها اللاعب عصر امس بسبب وعكة صحية عارضة قضي بسببها اكثر من خمسساعات وسط اهتمام كبير من الاطباء وادارة الهلال بقيادة الامين البرير علي زيارة اللاعب سادومبا ومعتز البرير وقطب الهلال اشرف الكاردينال ومعلا وخالد النقر ووكيل اللاعب ابو بكر مصطفي للاطمئنان علي صحة اللاعب وتكفل معتز البرير بنثريات علاج اللاعب سادومبا الذي شكر الجميع.

المصدر: قوون

الكاردينال يلتقي سادومبا ويطالبه بسحب الشكوى

2012-12-26T04:41:00.001+03:00

التقى صباح امس قطب الهلال الكبير اشرف سيد احمد الحسين الكاردينال بمنزله بقاردن سيتي محترف الهلال الذي انتهت فترة قيده في كشوفات الفريق ادوارد سادومبا في وجود وزير الثقافة والاعلام الدكتور احمد بلال عثمان وعدد من اقطاب الهلال حيث تحدث معه الكاردينال عن المشكلة التي دعته لتقديم شكوى في مواجهة مجلس ادارة نادي الهلال للجنة اللاعبين غير الهواة التابعة للاتحاد الرياضي السوداني لكرة القدم والتي لخصها سادومبا في مطالبته برواتب شهر نوفمبر ونصف راتب شهر ديسمبر لأن عقده مع الهلال انتهى في 15 ديسمبر الماضي وقد طلب منه الكاردينال سحب الشكوى لان جماهير الهلال تحبه وسوف يحل له هذه الاشكالية بعد الجلوس مع الاستاذ الامين البرير رئيس مجلس ادارة نادي الهلال مساء اليوم »امس« وقد وافق سادومبا على سحب الشكوى وقال انه لم يكن يود مقاضاة الهلال ولكن الظروف حتمت عليه ذلك وقد كان طوال اكثر من ثلاثة اسابيع يحافظ علي اسم ورسم نادي الهلال ولم يفصح بمعاناته على الرغم من ان كل المحترفين الذين يلعبوا بالدوري السوداني قد عادوا الي بلادهم لقضاء عطلة اعياد الميلاد وبقى هو وحيداً لأن مجلس الادارة لم يف بحقوقه.
وقد علمت قوون ان قطب الهلال اشرف الكاردينال يسعى لاعادة سادومبا الى كشوفات نادي الهلال في يونيو المقبل وسوف يجلس مع الاستاذ ابوبكر مصطفى وكيل اللاعب.

المصدر : قوون

علي الأمين: اللجنة غير مسئولة عن ظروف وملابسات ثلاثي الهلال المحترف

2012-12-24T08:54:00.002+03:00

مهمتنا حفظ خانات المحترفين بانديتهم فقط.. وهذه قصة سيدي بيه ... مصير السنغاليين والمالي بين الهلال واتحاد الكرة والفيفا
الاستاذ علي الامين المدير التنفيذي لاتحاد الخرطوم والعضو الفاعل في عدة لجان بالاتحاد العام هو احد ابرز الشخصيات التي تمكنت من فرض نفسها خلال الفترة الطويلة التي عمل بها باتحاد الخرطوم حيث استطاع علي الامين ان يلفت الانظار اليه لمجهوداته الكبيرة ونجاحه اللافت في اي عمل يوكل اليه ونجح نجاحا كبيرا في اكبر المهام التي تشكل هاجسا مستمرا للاتحاد العام الا وهي تسجيلات وانتقالات اللاعبين الموسمية .. قوون حاورت علي الامين رئيس لجنة التسجيلات باتحاد الكرة لهذا الموسم وطرحت عليه العديد من التساؤلات الخاصة بفترة تسجيلات وانتقالات اللاعبين الرئيسية وماهي حقيقة عدم اكتمال اجراءات ثلاثي الهلال المحترف الثنائي دومنيك والمامي اضافة الي المالي عمر سيدي بيه.
اللجنة وفقت في مهمتها
في بداية حديثه قال رئيس لجنة التسجيلات باتحاد الكرة الحمد لله الذي وفقنا ومعي اعضاء اللجنة المخلصين في اداء المهمة بتفان ويسر حيث تعاملت مع التسجيلات بطريقة احترافية وبشكل محايد.
لماذا الهجوم علي اللجنة؟
واوضح علي الامين انه لايعرف ماهو سر الهجوم على لجنة التسجيلات بسبب قضية ثلاثي الهلال المحترف مؤكدا انه ليس صحيحا ان لجنة التسجيلات مسئولة مسئولية تامة عن هذا الامر باعتبار ان الاندية هي المعنية بتعاقداتها واعني تحديدا الاندية التي تتعامل مع النظام الالكتروني للاتحاد الدولي لكرة القدم الفيفا وهذا النظام ليس عملية معقدة وصعبة اطلاقا لان هناك اداريين بالاندية التي تتعامل مع نظام الفيفا بانتقالات اللاعبين تم تأهيلهم بواسطة الاتحاد العام ويؤدون مهامهم بكفاءة عالية مثل اندية الهلال والمريخ والخرطوم الوطني والاهلي الخرطومي.. اما بخصوص الاندية التي لاتتعامل بنظام الفيفا والحديث لعلي الامين رئيس لجنة التسجيلات فان تعاملها يتم مباشرة مع اتحاد الكرة حيث يقوم الاخ عصام شعبان الموظف المختص في هذا المجال بمساعدتها في اكمال اجراءات تعاقدات لاعبيها المحترفين مع الاتحاد الدولي لكرة القدم - الفيفا -
مهمة اللجنة حفظ الخانة للمحترف
واضاف رئيس لجنة التسجيلات هناك نقطة مهمة يجب توضيحها وهي ان مهمة لجنة التسجيلات حفظ خانة اللاعب المحترف في كشف ناديه حيث يحضر اللاعب امام اللجنة لكتابة اقرار ابداء الرغبة للتعاقد مع ناديه الجديد ويمكن للجنة اكمال اجراءات تعاقده مع ناديه اذا طلب النادي ذلك.
قصة ثلاثي الهلال
وسألنا الاستاذ علي الامين عن حقيقة ازمة ثلاثي الهلال المحترف السنغاليين دومنيك والمامي والمالي عمر سيد بيه.. فاجاب قائلا ليس لدي معلومات عن ظروف وملابسات هذه القضية التي اثارها الاعلام ان كانت صحيحة ام لا ولكن ما استطيع تاكيده ان السنغاليين دومنيك والمامي حضرا كل بمفرده مع مسئولين بنادي الهلال قبل نهاية الفترة المحددة للانتقالات لابداء الرغبة بالانضمام لنادي الهلال اما اللاعب الثالث وهو المالي عمر سيد بيه فقد اخطرنا بوصوله الساعة الثانية بالطائرة من بلاده بعد نهاية الزمن المحدد لقفل شباك الانتقالات وهو الساعة الثانية عشرة منتصف ليلة الخميس الماضي وبعد حضوره امامنا قام بكتابة اقرار ابداء رغبته في اللعب لنادي الهلال وهو اجراء عادي جدا ولايشكل مخالفة قانونية وفي اعتقادنا ان نادي الهلال قام بتقديم طلب تسجيل اللاعب عبر النظام الالكتروني للاتحاد الدولي الفيفا خلال الفترة المسموح بها للانتقالات باتحاد الكرة خاصة ان الفيفا لديه معرفة تامة ببداية انتقالات اللاعبين ونهايتها في كل اتحاد وطني منضوي تحت لوائه بما في ذلك السودان.
الحل عند الهلال والاتحاد
واخيرا سالنا رئيس لجنة التسجيلات باتحاد الكرة هل يمكن معالجة ازمة تعاقد ثلاثي الهلال المحترف؟ ام سيظل الامر معلقا بين نادي الهلال واتحاد الكرة والفيفا؟ فرد علي الامين قائلا اجابة هذا السؤال اذا حدث هذا الاشكال كما يتردد في وسائل الاعلام لدي نادي الهلال واتحاد الكرة والفيفا.

المصدر: قوون

سادومبا يشكو الهلال لاتحاد الكرة والفيفا

2012-12-24T08:52:00.005+03:00

تقدم المحترف الزيمبابوي ادوارد سادومبا بشكوي للاتحاد العام مطالبا بحقوقه طرف نادي الهلال متمثلة في مرتب شهر نوفمبر بالاضافة لايجار الشقة والعربية وقد وجه محاميه الموجود بزيمبابوي بتقديم الشكوي للفيفا.

المصدر: قوون