Corner

එයාලටත් පණහයිලු!!!

2011-04-16T20:05:00.000+05:30

අපටත් අවුරුද්දක් පිරෙන මේ කාලෙ අද කතා කරන්න හිතුවේ 50 වෙනි සංවත්සරය සමරන කට්ටියක් ගැන කියන්න. ඒ කවුරුවත් නෙවෙයි අපි හැමෝම දන්න හඳුනන Disney සමාගම. ඒගොල්ල 50ස් වෙනි සංවත්සරය සැමරුවෙ අවුරුදු වලින් නම් නෙවෙයි, එයාලගෙ 50ස් වෙනි සජීවිකරණ සැකිලි රූ චිත්‍රපටය නිර්මාණය කරලා. මේ වෙනකොට එයාලා ඉතාමත් අනර්ඝ සජීවිකරණ නිර්මාණ 50ක් මේ ලෝකෙට දායාද කරල දීල තියනවා. Disney cartoon වල කියුම් කෙරුම් ගැන ඉතින් වැල්වටාරම් කියන්න උවමනා නෑනේ. පොඩි කාලෙ ඉඳන්ම අපිත් හොඳට දන්න දෙයක්නෙ ඒක.

මේ තමයි නියම වැඩකාරයො

මේ 50ස් වෙනි නිර්මාණය ගැන කියනවනම්.... ඇත්තටම කියන්න වචන නෑ. ඒ තරමටම ආකර්ෂණීයයි. ප්‍රේමය, ත්‍රාසය, කුතුහලය, කොමඩි මේ හැම දෙයකින්ම මේක අංග සම්පූර්ණ කතාවක්. සුරංගනා කතාවක්. අහ්!!! ගීත.... ඒ ගැන නොකියා කොහොමද.. මේතාක් නිකුත් වෙච්ච සෑම Disney නිර්මාණයකම සුවිශේෂ දෙයක් වුනේ ගීත.. මේ කතාවටත් ඒක එහෙමමයි. දැන් ඉතින් කාට කාටත් තෙරෙනවනෙ මොකක් ගැනද මේ කියාගෙන එන්නෙ කියලා. ඔව්! ඔව්! ඒ ගැන තමයි. අර දිග...ම් දිග කොණ්ඩයක් තියන කතාව. නමින්ම කිව්වොත් Rapunzel. අහ්! වැරදුනා. මුලදි මේ නම කිව්වත් පස්සෙ ඒ නම වෙනස් වුනා Tangled විදිහට, release කරද්දි. මොකද කිව්වොත් Rapunzel කියල දැම්මොත් ඕකට වහ වටෙන්නෙ කෙලි පොඩිත්තියො ටික විතරයිනෙ. කොලු ගැටව් ටිකත් අල්ලගන්න ඕන හන්දා Rapunzel කියන කෙලි නම අයින් කරලා Tangled කියන දෙපැත්තටම කැපෙන නම යොදාගත්තා. කොහොමද marketing strategies???

කතාව නම් දැනටමත් වගේ හැමෝම බලල ඇති. දැකලා නැතිනම් අදම ගිහිල්ල නැරඹිය යුතු කතාවක්. මොකද කතාව කියන්න නම් නෙවී දැන් මේ හදන්නේ. ඩේව්වරු විදිහට අපට වැදගත් වෙන්නෙ කතාව හදපු හැටි මිසක කතාවෙ වුනේ මොකද්ද කියන එක නෙවීනෙ. කතාව හැදුවෙ කොහොමද කියල අහනකොට හැමෝම ඇහුවෙ මේ වගේ දිග...ම දිග කොණ්ඩයක් ආම්බන් කලේ කොහොමද කියලා. ඇත්තටම මේ කණ්ඩායම මේ සඳහා හිසකෙස් පිළිබඳ විශේ‍ෂඥවරියක පවා ගෙන්වුවා. කොම්පියුටරයක් ඇතුලෙ කොණ්ඩයක් ආම්බන් කරන එක එච්චර ලේසි පහසු කාරණාවක් නම් නෙවෙයි. හිසකෙස් වල තියන රිද්මය සහ දීප්තිය ඒ ආකාරයටම අරගෙන තියන හැටි දැක්කා නේද.

ඊළඟ කාරණාව තමයි emotions. මේ කතාව CGI වුනත් අනුරූ සකස් කරන්න අනුගමය කරලා තියෙන්නෙ සාම්ප්‍රදායික ක්‍රමවේදයන් වුණු තෙල් සායම් චිත්‍ර සහ පැන්සල් කටු සටහන්. ඒ හරහා තමයි මේතරම් සාර්ථක මුහුණු හැඟීම් ප්‍රකාශනයක් නිර්මාණය කරන්න පාදක වෙලා තියෙන්නෙ.

ඇත්තටම මේ සජීවිකරණ නිර්මාණය ආධුනික ඩේව්වරුන්ට නම් අධ්‍යාපනික තෝතැන්නක්. මොකද කියනවනම් 50ස් වෙනි නිර්මාණය කියන්නෙ එසේ මේසේ දෙයක් නෙවීනෙ. ඊට පෙර කරපු සෑම නිර්මාණයකින්ම හොඳ පළපුරුද්දක් ලබාගෙන ලස්සන වැඩක් කරල තියනවා කියලා කියන්න පුළුවන්. ඒ හන්දම තමයි මෙය නිර්මාණය කරපු ආකාරය පිළිබඳව, විශෙෂයෙන්ම චරිත පිළිබඳව පොතක් පවා මුද්‍රණය කරලා තියෙන්නෙ. කියෙව්වාට පාඩු නෑ. අපි ගිහින් එන්නම්....!!!

Art of Tangled [The Book]

අපිටත් දැන් අවුරුද්දයි...

2011-04-16T15:22:00.002+05:30

ඒ දවස් වල අපි මෙහෙමයි...

මේ අලුත් අවුරුද්දේ අපේ අඩවියට අවුරුද්දකුත් ලැබුවා. පසුගිය අප්‍රේල් 14 වෙනිදා, අපේ අඩවියේ ආරම්භයේ සිටන් මේතාක් අපිත් එක්ක එකතු වෙලා හිට්ය සියලුම ඩේව්වරුන්ට අපගේ ස්තූතිය මේ මොහොතේ පිරිනමනවා. ඒ වගේම අපිත් එක්ක අත්වැල් බැඳන් ඉන්න ඩේව්වරු 17 දෙනාටත් අපගේ ස්තූතිය හිමිවෙනවා. ඒක අපිට ලොකු හයියක්.

අවුරුද්දක් තිස්සේ මේ අඩවිය පවත්වාගෙන යන්න ඉවහල් වුනේ ඔබ ලබාදුන් ප්‍රතිචාරය. ඒ ලබාදුන් සහයෝගය මේ ලබන අවුරුද්දේත් එලෙසම ලැබෙයි කියල අපි උදක්ම බලාපොරොත්තු වෙනවා.
තමන් දන්න දේවල් පුළුපුළුවන් හැටියට බෙදාහදා ගන්න එක අපේ යුතුකම. නැද්ද??? ඉතින් ඒකම තමයි අපිත් කරන්නේ. අපේ අඩවියට පය ගහපු කිසිම කෙනෙක් හිස් අතින් ගිහිල්ල නැහැයි කියලයි අපි හිතන්නේ. මේ පළවුනු හැම ලිපියකින්ම අපිත් ඩේව්වරුන්ගේ ලෝකයේ සෑහෙන දේවල් දැන කියාගත්ත(head fake කියන්නේ අන්න ඒකට තමයි).

නිර්මාණයක් ඔන්න ඔහේ මාරෙට බලනවට වඩා එහි ඇතුල් ලෝකය බලන්න කැමති අයට අපේ අඩවියේ සෑම වෙලාවකම දොර ඇරල තියෙන්නේ. ඔබට තියෙන්නේ බය නැතුව ඇතුල් වෙන්න පමණයි. එසේනම් ආයෙත් දවසක හමුවෙමු.
එතෙක් ඔබට ජයග්‍රාහි අවුරුද්දක් ප්‍රාර්ථනා කරනවා. ගිහින් එන්නම් !!!

හොලිවුඩයේ මැජික්කරු

2011-04-10T17:28:00.000+05:30

නම කිව්වොත් ඉතින් වැඩි අඳුන්වා දීමක් ඕනා වෙන්නෙ නෑ. කවුද මේ, මොනාද කළේ කින්ද මන්ද මේ හැම දෙයක්ම අපිටත් වඩා හොඳින් දන්නව කියල මට විශ්වාසයි. ඒත් ඉතින් කොහොමද කළේ කියලා වැඩි දෙනෙක් හොයල බලන්නේ නෑනේ. ඒ ගැන හොයන්න තමයි අපි ඉන්නේ.

Steven Spielberg

අපි මීළඟට අඳුනගන්න යන සිනමාකරුවා.

වචනයේ පරිසමාප්ත අර්ථයෙන්ම විශිෂ්ට නිර්මාණකරුවෙක්. මොකද්ද මේ කියන විශිෂ්ටත්වය?? ඔහුගේ විශිෂ්ටත්වයේ පසුබිම ටිකක් හොයලා බලන එක වටිනවයි කියලා අපි හිතනවා

භය වෙන එකත් සෙල්ල්ලම් වැඩක් නෙවෙයි

කුඩා කාලයේ පටන්ම ඔහු ටිකක් බියසුළු පුද්ගලයෙක්. කළුවරට බය නැත්තෙ කවුද. බය ගැන ඔහු දක්වන්නේ මේ වගේ අදහසක්.

“I still have pretty much the same fears I had growing up, I've carried them with me right through my life until now. And I'm not sure I want to give those up because I think a lot of those insecurities are fuel for the stories that I tell.” He is still deathly afraid of flying on planes and riding on an elevator, as well as being in any closed-in spaces. But, it is these kinds of fears that he uses to drive his films.

ඇත්තටම කිව්වොත් බය වෙන එකත් එක විදිහක වාසියක් වගේ නේද....

අත්දැකීම් හරි වටිනවා

අත්දැකීම් කියන දේ බොහොම වටිනවා. අපේ අනාගතය තීරණය කරන්නේ අත්දැකීම්. කුඩා අවදියේ පටන් ඔහුට ලැබුනු අත්දැකීම් බොහොමයක්ම ඔහුගේ නිර්මාණ වල සැබෑ තීරකයෙක් වුනා.

Loneliness is also a common thread throughout such Spielberg movies as E.T. and A.I. “I always felt alone for some reason,” said Spielberg. “My mom had her agenda, my dad his, my sisters theirs. E.T., which certainly defines loneliness from my own perspective, is a lot about how I felt about my mom and dad when they finally got a divorce.” Instead of succumbing to the pain he felt and resigning himself to a life of isolation, Spielberg decided to use these events and insecurities to get ideas for his films.

කොච්චර නෑ කිව්වත් සෑම නිර්මාණයක් පිටුපසම ගැබ් වෙලා තියෙන්නෙ, ප්‍රකාශනය වෙන්නේ කාගේ හරි අත්දැකීමක්. Spielbergගේ කතා ගත්තත් ඒක එහෙමම තමයි.

ආසාවන් ලුහුබැඳීම

අසාවන් කියන්නේ හරි පුදුමාකාර දෙයක්. ජීවිතය වෙනස් කරන්න ආසාවකට පුළුවන්. ඔහුගේ ජීවිතය අමුතුම ලොවකට ගෙනියන්න මේ ආසාවට පුළුවන් වුනා.

“The only time I’m totally happy is when I’m watching films or making them,” says Spielberg.
It was only by engaging in his interests and following his enthusiasm that Spielberg was able to become the success that he is today. “I like the smell of film,” he says. “I just like knowing there’s film going through the camera.” His passion for every aspect of film making drove him to try to achieve the best he could, and indeed, he did.

කරන වැඩේ මොක වුනත් ලැදියාවෙන් ආසාවෙන් කරනවනම්, එයින් හදවතට ආමන්ත්‍රණය කරන්න පුලුවන් නම් ඒක අනිවාර්යෙන්ම සාර්ථක වෙනවා. ඒක තමයි Spielbergගේ විශිෂ්ටත්වයේ රහස

අද ඔහු හැමෝම දන්න අඳුනන වැදගත් පුද්ගලයෙකු වුනත් කුඩා කල නම් අනෙක් හැම විශිෂ්ටයෙකු වගේම සමාජයීය වශයෙන් ලැජ්ජාසුළු කුළෑටි, නමුත් නිර්මාණශීලි කොලුගැටයෙක්. මොකද්ද මේ වෙනසට හේතු වුනේ.

ඇත්ත දැන ගන්න නම් අනිවාර්යෙන්ම මේ link එක ක්ලික් කරන්න ඔබ කැමති වේවී.

කතා කීමේ කලාව

2011-03-23T22:37:00.000+05:30

පසු ගිය ලිපියෙන් අපි ශ්‍රේෂ්ඨ ලෝක සිනමාකරුවෙකුගෙ කතා බහකට එකතු වුනා මතක ඇතිනෙ. ඔහුගේ විශේෂත්වය විදිහට අපි දකින්නේ ඔහුගේ සෑම සිනමා නිර්මාණයක් පිටුපසම දැවන්ත පර්යේෂණාත්මක ගවේශණ චාරිකවක් එකතු වෙලා තිබ්බ එකයි.

ඉතින් ඔහුගේ කතා බහෙන් ලැබිච්ච පන්නරය හන්දම මේ ගවේෂණ ගැන පොඩ්ඩක් හොයා බලන්න අපට හිතුනා. ඉතිහාසය හාරවුස්සන්න කැමති කාට වුනත් මේ ගැන පොඩ්ඩක් හොයා බලන එක වටිනව. මේ සෑම ගවේෂණයක්ම ඔබට Discovery නාලිකාව ඔස්සේ දැක බලාගන්න පුළුවන්.

තේරෙනවා නේද Cameron කියන්නේ කොයිවගේ දැනුම් උල්පතක්ද කියලා.

ඉතින් Titanic චිත්‍රපටයේ සාර්ථකත්වයේ රහස මොකද්ද.

ඔහු එය නිර්මාණය කරන්න කලින් මුහුදුබත් වුනු සත්‍ය නෞකාවේ ඇණ මුරුච්චියේ ඉඳලම පර්යේෂණ කරලා තිබ්බා. ගොඩ ඉඳගෙන එහෙම නෙවී, අඩි දාස් ගානක් වතුර යටටම බැහලා. ඉතිහාසය කියන්නේ රස කර කර විඳින්න පුළුවන් පුදුමාකාර දෙයක්. Titanic නැවේ අංග සම්පූර්ණ ඉතිහාසය ගවේෂණය කරපු නිසා ඔහු කලේ එතනට හැමෝම කැමති රසවත් flavor එකක් යොදපු එකයි. Flavor එක මොකද්ද කියලා ඉතින් අමුතුවෙන් කියන්න ඕනා නෑනෙ. ටයිටැනික් විතරක් නෙවේ, ඔහුගේ Avatar, Alien වගේ මේ හැම නිර්මාණයක්ම මේ වගේ දැවත්න දිගුකාලීන ගවේෂණ වල සාර්ථක ප්‍රතිඵල. ඇත්තටම James Cameron කියන්නේ හදාරන්න වටින පුද්ගලයෙක්.

කතාවකට වස්තු බීජයක් හොයන එක ලේසි පහසු වැඩක් නෙවේ. ඒකනෙ අපේ රටේ කතා කලාවෙ හැමදාම බොළඳ ඒකාකාරි කතා බිහිවෙන්නෙ. මේ බොළඳ එකාකාරි බව මොකද්ද කියලා කියන එක ඉතින් හැමෝම දන්න ප්‍රසිද්ධ රහසක්නේ. සෑම නිර්මාණකරුවෙකු තුලම දක්ෂ ගවේෂකයෙක් සිටිය යුතුයි. ඒක තමයි අපි විශ්වාස කරන එකම දේ. ඒක තමා සාර්ථක නිර්මාණයක මුල. ඒක තමයි කතා කීමේ කලාවේ ආරම්භය.

ලිපිය අවසාන කරන්න කලින් ලංකාවේ පොළව පය ගහල ඉන්න සිනමා ගවේෂකයො ගැනත් සඳහන් නොකලොත් ඒක ලොකු අඩුපාඩුවක්නේ. මෙහෙම කිව්වට ඉතින් මතක් කරන්න පුළුවන් අතේ ඇඟිලි ගානටත් අඩු පිරිසක්. හැමදාම බිහිවෙන අපේ කතා කලාවේ කාලෙකට හරි වෙනසක් ඇති කරනවට එතුමන්ලට බොහොමයක් පින්.

පරිකල්පනය, කුතුහලය හා ආරම්භය...

2011-03-17T22:02:00.000+05:30

කාලෙකට පස්සෙ ආවා වුනත් බොහොම වැදගත් මාතෘකාවක් අරගෙන තමයි ආවෙ. ඊටත් වඩා විශේෂ දෙයක් ඔබට අහන්න සලස්වලා සැබෑ ලෝකය තුල ඇති අලුත් ලොකයක් ගැන වෙනස් විදිහකට අලුත් විදිහට හිතන්න අත් වැලක් සපයන්න තමයි අද මූලික අරමුණ.

" පරිකල්පනය, කුතුහලය හා විශිෂ්ට නිර්මාණයක ආරම්භය... "

අපේ රටේ විශිෂ්ට නිර්මාණයක් හොයාගන්නව කියන එක අද කාලෙ හරියට ලාහෙට ගෙම්බො අල්ලනවා වගේ වැඩක් තමයි. ඔලුවෙ හොඳ වස්තු බීජයක් හට ගන්න නම් ඔය කිව්ව පරිකල්පන ශක්තියයි, කුතුහලයයි දෙකම ඕනා කරනවා. ඔව්වා ඉතින් අලුතින් ඔබ්බලා කරල ගන්න පුළුවන් දේවල් එහෙම නෙවී, ඇතුලතින්ම එන්න ඕනා. මෙව්වා උපතින්ම පිහිටපු කට්ටිය එක්ක ආස්ස‍රයට වැටුනොත් ඔබට මේ දේවල් වල තියන ශක්තිය හොඳට මැන ගන්න පුළුවන්. ඉතින් අපි ඒකට අවස්ථාවක් ලබා දෙන්නයි මේ හදන්නෙ. ආධුනිකයො විදිහට මේ වගේ වෙනස් විදිහට හිතන පතන විශිෂ්ට නිර්මාණකරුවො හොඳට දැන හඳුනගෙන ඉන්න ඕනනෙ. ඔන්න අපි පළමු පියවර තිබ්බා...

අපි අඳුන ගන්න පළමු නිර්මාණකරුවා

James Cameron: Before Avatar ... a curious boy

James Cameron කියන්නෙ අපි හැමෝම හොඳාකාරවම දන්න විශිෂ්ට නිර්මාණකරුවෙක්. අපිට මේ වටිනා කියන කතාබහ අහන්න ලැබුනේ TED සම්මන්ත්‍රණ අතරෙ තිබිලා. බොහොම වැදගත් කතාබහක් හන්දා හැමෝම අතරෙ බෙදාගන්න ඕනයි කියලා හිතුනා. මේ කතාව අහලා අපට ලැබුණු පන්නරයම ඔබටත් ලැබුනා නම් ඒක තමයි අද මාතෘකාවෙ අභිප්‍රාය වුනේ.

ප්‍රබන්ධයෙන් ඔබ්බට...

2010-11-03T21:17:00.000+05:30

මතකද මේ දර්ශනය. Minority Report බලපු කෙනෙකුට නම් අමතක වෙන්න විදිහක් නෑ. මේ පරිගණක මුහුණත තමයි එහි අඩංගු වෙලා තිබ්බ ප්‍රධානතම සංකේතය. මොකද Minority Report කිව්ව ගමන් කාට කාටත් එක පාරට මතක් වෙන්නෙ Tom Cruise හා මේ මුහුණත හන්දා. එදා දෘෂ්‍ය ප්‍රයෝගයක් ලෙසින් එළි දැක්කට දැන් මේක යථාර්තයක් බවට පත් වෙලා. ඒ ආරංචිය අරගෙන තමයි අද අපි ආවෙ.

මේක යථාර්තයක් බවට පත් කිරීමෙ වැඩේට අත ගහලා තියෙන්නෙ Oblong Industries කියන ආයතනයයි. එයාලගෙ g-speak ව්‍යාපෘතිය මඟින් තමයි මේ නිර්මාණය කරලා තියෙන්නෙ. g-speak කියන්නෙ අවකාශීය මෙහෙයුම් පද්ධතියක් ( spatial operating environment - SOE) වගේ දෙයක්. ඔන්න අපි නොකීවයි කියන්න එපා, මේක තමයි ඉස්සරහට GUI කලාවෙ අනාගතය වෙන්නෙ. ළඟදීම මූසිකයටයි, යතුරු පුවරුවටයි ටටා කියන්න සිද්ද වේවි.

අපි කිව්වෙ බොරුද!! කියමු බලන්න..

අපි මේ කතාවට Minority Report කතාව ගාව ගත්තෙ හේතුවක් ඇතිව. මොකද කියනවනං මේ චිත්‍රපටයට ව්ද්‍යා උපදේශකවරුන් විදිහට වැඩ කරලා තියෙන්නෙ මේ g-speak වලම කෙරුම්කාරයො තමයි. (ඉතින් මේක යථාර්තයක් වෙන එක අහන්නත් දෙයක් යෑ) මේ පද්ධතිය ප්‍රධාන වශයෙන් සැකසිලා තියෙන්නෙ DLP(Digital Light Processing) ප්‍රොජෙක්ටරයකින් සහ පරාවර්තක ගුලිකා සහිත සුවිශේෂ අත්මේස් යුගලයකින් සහ අතෙහි චලනයන් අල්ලා ගැනීමට අධෝරක්ත කැමරා කට්ටලයකින්. මේකට මේ අභිනය තාක්ෂණය (gesture technology) උදව් කරගන්න හන්දා තමයි 'g' ඒ කියන්නෙ 'gesture කතා කරයි' කියන නම දාලා තියෙන්නෙ.

ප්‍රබන්ධයක් යථාර්තයක් කරනවා කියන්නේ ලේසි පහසු වැඩක් නෙවෙයි. ඒ හන්දයි ප්‍රවෘත්ති විකාශ වලින් පවා මේකට විශාල තැනක් ලැබුනේ. ඉහළ දැක්වෙන්නෙ ඒවගේ අවස්ථා දෙකක්.

මේ කෙරුම්කාරයා තමයි John Underkoffler සහ ඔහුගේ කට්ට්ය. TED සම්මන්ත්‍රණයේදි ඔවුන් කරපු මේ ඉදිරිපත් කිරීම අනිවා බලන්නයි කියලා මේ ගැන උනන්දුවක් තියන හැමදෙනාටම කියනවා. GUI තාක්ෂණය එදා ඉඳන් මේ දක්වා ආපු හැටි ඔවුන් අපූරුවට පැහැදිලි කරලා දෙනවා.

AR හෙවත් Augmented Reality

2010-11-02T23:38:00.000+05:30

ඔන්න ඉතින් පහුගිය් දවසක අපිත් ගියා UCSC එකේ තිබුන ifo++ ප්‍රදර්ශණය බලන්න.අපේ සහෝදර සහෝදරියො ගොඩාක් මහන්සි වෙලා හිත් ඇදගන්න නිර්මාණ රාශියක් හදල තිබුනා.ඇත්තටම ඒ ප්‍රදර්ශණය යමක් ඉගෙනගන්න කැමති අයට ඉතාමත් වැදගත් වුනා.මම මේ ලිපියෙන් කියන්න යන්නෙ ඒ ප්‍රදර්ශණය ගැන නම් නෙවේ.ඒකෙ තිබිච්ච අපෙත් හිත් ඇදී ගිය ප්‍රදර්ශණ මාතෘකාවක් වන Augmented Reality ගැන.

ඔන්න ඉතින් පොඩි අදහසක් ගන්නත් එක්ක මේ video එක බලමුකො.

එකේ තිබුනේ මොනවගේ දෙයක්ද කියල තෙරෙන්නෙ නැතුව ඇති සමහර විට.ඒකෙ තිබුනෙ වෙබ් කැමරාවක් ඉදිරියේ විශේෂ ආකාරයේ පොතක් පෙරලගෙන යන අයුරුයි.ඒ කියන්නෙ අර තිබුන ත්‍රිමාණ වස්තු එකක්වත් පසුව කරපු සංස්කරණයකින් එකතු කරපුවා නෙවෙයි.කොහොමද එහෙම කලේ??? අන්න ඒ ප්‍රශ්නයට උත්තරයක් දෙන එක තමයි අපි මේ ලිපියෙන් කරන්න බලපොරොත්තු වෙන්නෙ.

Augmented Reality සංකල්පය කියන්නෙ කලින් තිබුන අතත්‍ය යථාර්තය (Virtual Reality) කියන සංකල්පයට හාත්පසින්ම ප්‍රතිවිරුද්ධ දෙයක්.Virtual Reality හි දී අපි කරන්නේ සැබෑ ලෝකය හා සමාන ආකාරයෙන් ත්‍රිමාණ වස්තු මැවීමට උත්සහ කිරීමයි නමුත් Augmented Reality හි දී අපි සැබෑ ලෝකයේ යම් තැනක නොතිබෙන වස්තු ත්‍රිමාණ ලෙස සැබෑ ලෝකයේ මැවීමට උත්සහ කරනු ලබනවා.ඉතින් මේ උත්සහය අද ඊයේ පහල වූ දෙයක් නම් නෙවෙයි.ක්‍රමක්‍රමයෙන් දියුණුවෙලා තමයි අද මේ තත්වයට පැමිණිලා තියෙන්නෙ.

AR Toolkit එක පාවිච්චි කරලා ඔයාලටත් ලේසියෙන්ම මේක අත්හදා බලන්න පුලුවන්.මෙහිදී අපිට අවශ්‍ය වෙනවා කැමරාවකට පහසුවෙන් හඳුනා ගත හැකි රටාවක්.එම රටාව හඳුනා ගෙන ඊට සාපේක්ෂව ත්‍රිමාණ වස්තුවක් දර්ශණය කිරීම තමයි මේ මඟින් කරනු ලබන්නේ.ඒ සඳහා පරිගණක වැඩසටහනක් යොදාගනු ලබනවා.මේ වැඩසටහනට කලින් එම රටාව ඇතුලත් කර තිබිය යුතුයි.එවිට පමණයි එම වැඩසටහනට අදාල ත්‍රිමාණ රූපය දර්ශණය කිරීමට හැකියාව ලැබෙන්නේ.

මෙන්න මේ වගේ එකක් තමයි රටාව විදියට යොදාගන්නෙ

ජංගම දුරකථන වල්ටත් AR...

අත්හදා බලන්න කැමති අයට...

http://weblog.mrinalwadhwa.com/2009/04/13/augmenting-reality/

වැඩිදුර විස්තර සඳහා මේ video එකත් බලන්න.

ගේම් වලට කැමති අය අනිවාර්යෙන් මේ ටිකත් බලලම යන්න...

http://gamesalfresco.com/2008/03/03/top-10-augmented-reality-demos-that-will-revolutionize-video-games/

මෙන්න තවත් යෙදීම් ටිකක්...

http://www.bannerblog.com.au/news/2009/06/35_awesome_augmented_reality_examples.php

ඉතින් මේ වගේ දියුණු තාක්ෂණයත් එක්ක අනාගත ලෝකය කොච්චර වෙනස් වෙයිද කියල හිතාගන්න පුලුවන්ද?

ඩයිනෝ

2010-10-29T22:14:00.000+05:30

ඩයිනසෝරයො ගැන කතා කරනකොට ඕනම සිනමා ලෝලියෙකුට මතක් වෙන්නේ Steven Spielbergගෙ Jurrasic Park. ඒකෙ ජනප්‍රියතාවය කොච්චර වුනාද කියනවානම් Jurrasic Park කතාංග තුනක් දක්වාම නිර්මාණය වුනා. 4 වෙනි කතාවත් ළඟ ළඟම එනවයි කියලා ආරංචියක් නම් තියනවා. මේ ජනප්‍රියතාවයට ප්‍රධාන හේතුවක් වුනේ මේකෙ මුල්ම චිත්‍රපටය CGI(computer-generated imagery) කලාවෙ හා දෘෂ්‍ය ප්‍රයෝග කලාවෙ ප්‍රධාන සන්ධිස්ථානයක් වීමයි.

අපි අද කතා කරන්න යන්නෙ Jurrasic Park වල ප්‍රධානම නළුවො වෙච්ච ඩයිනසෝරයො නිර්මාණය වුනු හැටි ගැන තමයි.

Animatronics. මේ ප්‍රයෝගය තමයි ප්‍රධාන වශයෙන් ඒ සඳහා භාවිතා කළේ. ඒ කියන්නේ ඉලෙක්ට්‍රොනික රූකඩ. එහෙමත් නැතිනම් කාර්මීකරණය කළ ජීවීන්. රොබෝල කිව්වත් වරදක් නෑ. පොත්ත ඇත්ත හමක් වගේ වුනාට මදේ යකඩ ගොඩක් විතරයි. මේවගේ නළු නිළි කැලක් නිර්මාණය කරන එක එච්චර ලේසි පහසු වැඩක් නෙවී. ඉංජිනේරු ශිල්පය, ඉලෙක්ට්‍රොනික ශිල්පය ගැන සෑහෙන දැනුමක් අවශ්‍ය වෙනවා. ඒ වගේම මේවා ජීවමානව නිර්මාණය කරන එක තමයි ලොකුම දක්ෂකම. අනික් කාරණය කැමරාව ඉස්සරහ රංගනය කරන්න පුළුවන් තාලෙ වැඩකාරයෙක් වෙන්නත් ඕනා. රංගනය කිව්වෙ දුවන්න පනින්න එහෙම නෙවෙයි. ඔය පොඩ්ඩක් ඇඟ ඔලුව එහාට මෙහාට හරවන ඒවා, කට අරින එවා වගේ දේවල්.


Animatronics භාවිත කරමින් රූපගත් කළ දර්ශනයක්

Stop Motion සහ Go Motion. මේ තමයි භාවිත කරපු අනික් ප්‍රයෝග. මේවා පුංචි ඩයිනසෝර බෝනික්කො එක්ක කරන සෙල්ලම්. මේවට නම් ඉලෙක්ට්‍රොනික කෑලි නෑ. ඒත් නම්‍යශීලි වෙන අමුද්‍රව්‍ය වලින් තමයි මේ බෝනික්කො හදලා තියෙන්නෙ. කරන්න තියෙන්නෙ කැමරාව ඉස්සරහ මේ බොනික්කො රඟපාවන එක තමයි.

Go Motion රූපගත කිරීමක්

Jurrasic Park බලපු ගොඩ අය හිතන්නේ මේ ඩයිනසෝරයො ඔක්කොම මෘදුකාංග වලින් නිර්මාණය කරපු 3D models කියලා. නමුත් දැන් සමහරක් ඒවා එහෙම නෙවී කියල ඔයාලට තේරෙනවා ඇති. මෙතනින් බලා ගන්න පුළුවන් ඒ සමහරක් ඒවා මොනවද කියලා.

මේ චිත්‍රපටය ලෝක සිනමාවේ කොච්චර වැදගත් සලකුණක් වුනාද කියනවානම් ඒක හදපු හැටි ගැන වාර්තා වැඩසටහන් පවා නිර්මාණය වුනා. මෙහි ඉතුරු කොටස් ටිකත් බලන්න පුළුවන් නම් ඒක ගොඩක් වැදගත් වේවි.

ඩිජිටල් matte painting

2010-10-28T22:44:00.000+05:30

මේක මෙහෙම කිව්වට සිනමාවට අලුත් දෙයක් නෙවී. 1900 බර ගණන් ඉඳලම මේක පාවිච්චි උනා. හැබැයි 'ඩිජිටල්' කෑල්ල නැතුව.

සිනමාවේ Matte Painting නිර්මාණය කරන්න නමක් දිනාගත්තු ආයතනයක්

painting යන වචනයෙ කියවෙන විදිහටම මේකෙන් කරන්නෙ සිතුවම් කිරීමක් තමයි. හරියටම කියනවනම් පසුබිම් සිතුවම් කිරීමක්. ඕනම නිර්මාණයක සාර්ථකත්වයට, පසුතලය කියන්නෙ රංගනය වගේම මොහොම වැදගත් සාධකයක්. ඒකයි හැම සිනමා නිර්මාණයකම වගේ පසුතල වැඩ කටයුතු සඳහා වෙනම ඒකකයක් ඉන්නේ. අපිට හදාගන්න අමාරු, වියදම් වැඩි පසුබිම් පරිසරයක් මොකක් හරි තලයක සිතුවම් කරලා ඒක පසුබිමින් තියලා ජවනිකාව රූපගත කරන එක තමයි මේකෙන් කරන්නේ.

Photoshop Matte Painting

පරිගණක චිත්‍රණ කලාව ආවත් එක්කම වගේ ඒ කියන්නේ 80 දශකයේදි ඉඳන් වගේ මේ සිතුවම ඩිජිටල්කරණය වුනා. ඒ කියන්නෙ පසුබිම computer graphics(CG) මඟින් අඳින්න, composite කරන්න පටන් ගත්තා. එතකොට කරන්න තියෙන්නෙ අපි CG වලින් ඇඳ ගත්තු චිත්‍රය පසුබිමට ගලපලා අලෝලා හැඩ වැඩ කරන්න විතරයි.

Digital Matte Painting Artist

Matte painting කියන්නෙ වෙනම කලාවක්. මේ ශිල්පය ප්‍රගුණ කරලා වෘත්තීමය matte painter කෙනෙක් වෙන්නටත් පුළුවන්.අපි වර්ණහරණය කරලා, match moving කරලා, එළිය අඳුර ගලපලා පසුබිමක් දාන්න යනකොට මේ කලාව දැනගෙන තියන එක ගොඩක් ප්‍රයොජනවත් වෙනවා.

මෙතන්ට ගීයොත් බලාගන්න පුළුවන් ලොකයේ matte painting artistලගෙ නියම වැඩ කිඩ ටිකක්. එතන තියන Lord of the Rings චිත්‍රපටයෙ matte painting එක බලන්න අමතක කරන්න එපා.

VFX දහයයි !!!!!

2010-10-28T20:33:00.000+05:30

ඔන්න අපි ජයග්‍රාහි VFX දස වෙනි කඩුල්ල පසු කරා. ඒ කියන්නෙ අපි දැනට ඩිජිටල් ඇස් බැන්ඳුම් ක්‍රම 10ක් ඔයගොල්ලන්න්ට අරගෙන ඇවිල්ල තියනවා. ඒ හැම එකක්ම දැනට VFX කර්මාන්තයේ නිතර භාවිතා වෙන සහ ජනප්‍රියම ඇස් බැන්ඳුම්.

vfx කලාකරුවන්ගේ (එකම)සමාජය

ඔයාලගෙ නිර්මාණයකට එහෙම VFX පාවිච්චි කරන්න හිතාගෙන ඉන්නවා නම් පූර්ව නිශ්පාදන අවස්ථාවෙ ඉඳලම හොඳ සැලසුමක් ඇතිව මේ කටයුත්ත කරන්න. ඒත් 80%කම වගේ වැඩ කරන්න තියෙන්නෙ පසු නිෂ්පාදන අවස්ථාවෙ.

VFX එහෙමත් නැතිනම් visual effects අද ඊයෙ ආපු දෙයක් නෙවී. 1900 බර ගණන් වල ඉඳලම ලෝක සිනමාවෙ පාවිච්චි වුනා විවිධ ක්‍රම වලින්. ඒක ඩිජිටල්කරණය වුනේ 80 දශකයේ පරිගණක චිත්‍රණ කලාව ප්‍රචලිත වුනායෙන් පස්සෙ කියන්න පුළුවන්.

සිය වසරක VFX සිනමාව

පුළුවන්ද අඳුන ගන්න මේකෙ අඩංගු වෙලා තියන සිනමා නිර්මාණ. පසු කාලිනව ආපු ගොඩක් දෙවල් නම් මෙතන නෑ. 80%ක්වත් අඳුනගන්න පුළුවන් නම් ඔබ සැබෑ හපනෙක්.

ටයි මාමා සහ අපේ කාටූන්

2010-10-26T23:34:00.000+05:30

කාලෙකට පස්සෙ පුංචි විවේකයක් ලැබිලා ඔන්න රූප පෙට්ටිය ඉස්සරහ ඉඳගත්තා.නරක වෙලාව.ඒක පොඩි එවුන්ගෙ ටයිම් එකලු .මොනා කරන්නද ඔන්න ඔහේ වාඩි වෙලා බලන් හිටියා. පොඩි එකාලට පෙන්නන දේවල් දැක්කම ඇස් වලට කඳුලු එනවා අප්පා. උන්ට එවා පෙන්නලා 'සිය රට දේ සිරි සැප දේ' කියලා කොහොම උගන්නනවද මන්දා. කිසිම හැඩයක් නැති කාටූන් එකක්, කිසි ලජ්ජාවක් නැතිව පිටරට නාලිකාවකින් උස්සන් ඇවිල්ල, ඒකට සිංහල වචන ටිකක් කවලා, අපේ රටේ ළමයින්ට ලොක්කො වගේ පෙන්නන්වා . (අපි හැඩයක් නැහැයි කිව්වේ අඩු තාක්ෂණික පහසුකම් යටතේ එ තරමටම දෙයක් කරන්න පුළුවන් කට්ටිය ලංකාවෙත් ඉන්න හන්දා.) ඒවායෙන් පොඩි එකාලට උගන්නන්න හදන කතාව නම් හොඳයි, වරදක් කියන්න නෑ. ඒත් අපේ රටේ නිර්මාණකරුවන්ට මේ කරන අපහාසය කොහොම ඉවසන් ඉන්නද. කරන්න කවුරුත් නැත්තන් තව කමකුත් නෑ. ඒත් මේ ගෙඩි පිටින් ඉන්දැද්දී...

අපිත් පොඩි කාලෙ බොහොම ආසාවෙන් ටයි මාමාට පිංසිද්ද වෙන්න පිස්සු පූසා, දොස්තර හොඳ හිත, හා හා හරි හාවා වගේ කාටූන් බැලුවා. ටයි මාමා නොහිටින්න නැත්තන් අපි තාමත් ගෙඩි පිටින්ම ඉංගිරිස් කාටූන් බලනවා. ඒ කාලෙ හැටියට ටයි මාමා කලේ අලුත් දෙයක්. අලුත් තාක්ෂණයක් ලංකාවට හඳුන්වලා දුන්නා හඬ කැවීම කියලා. ඒ විතරක් නෙවී ඒකට සීමාවක් ඇතිව විධිමත් පාලනයකුත් ගෙනිච්චා. දැන් කාලෙ වගේ හැම මඟුලටම සිංහල කවන්න ගියේ නෑ. හිතන්න ඒ කාලෙ පිස්සුවෙන් වගේ බලපු 'රොබින් හුඩ්' හඬකවලා තිබ්බා නම්..

ටයි මාමා සමඟ ඔෂීන්

ටයි මාමා හඬ කැවීම හඳුන්වලා දීල දැන් අවුරුදු කීයක් ගත වෙලාද. ඒත් තාමත් අපේ රූපවාහිණී ඇත්තන්ට එතනින් ඉස්සරහට යන්න උවමනාවක් නෑ වගේ. අපිත් ඉතින් ටයි මාමා ආපහු රූපවාහිණියට එනකන් බලා ඉන්නවා අලුත් දෙයක් රූප පෙට්ටියෙන් දැක ගන්න. ඒත් ඒ දවස කවදා ඒවිද.........

දොස්තර හොඳහිත

පිස්සු පූසා

( ප. ලි : මේ වෙලාවෙ මතක් කරන්න ඕනා අපේම කියලා කාටූන් චිත්‍රපට කලාවක් ගොඩනගන්න මහන්සිවෙන ගිවන්ත අර්ථසාද් මහත්මයව. අපි කලින් දවසකත් ඒ ගැන පුංචි සඳහනක් කලා මතක ඇතිනෙ. ඒ වගේම මට මතක හැටියට 'අපේ කාටූන්' කියලා පර්යේෂනාත්මක මට්ටමේ වැඩසටහන් පෙළකුත් ගියා පීටර් කියලා හාදයෙකුත් එක්ක එක්තරා නාලිකාවක. අපේ දෙයක් කියලා ඉතින් කට ඇරලා කියන්න පුළුවන් සොච්චං ටික හරි කියන්න ඕනානෙ, ඒකයි මතක් කලේ )

HD ගැන තොරතුරු බිඳක්

2010-10-25T23:56:00.004+05:30

දැන් හැමතැනම කනට ඇහෙන වචනයක් තමයි මේ HD (High-Definition) කියන්නෙ.දැන් පරිගණක මොනිටර් පමණක් නෙවේ රූපවාහිනී පවා HD වෙලානෙ.කොටින්ම කියතොත් අලුතෙන් ආපු iPhone 4 එකේ HD video පටිගතකිරීමේ හැකියාව පවා තියෙනවා.එක නිසා අපි මේ ලිපියෙන් HD video ගැන විතරක් කතාකරන්නම්කො.ඇත්තටම HD video කියල කියන්නෙ සාමාන්‍ය resolution එකට වඩා වැඩි එහෙමත් නතිනම් standard-definition (SD) video වලටයි.සරල වශයෙන් මේ resolution වර්ග 2ක් තියෙනවා.

720p : 1,280×720 pixels
1080p : 1,920×1,080 pixels

අපිට විකිපීඩියා එකෙන් එම resolution පහසුවෙන් බලාගත හැකි ඡයාරූපයක් ලබාගැනීමට හැකිවුනා.

පහත වගුවෙන් දැක්වෙන්නේ ඒ පිලිබඳ තවත් විස්තරයි.

ඇත්තටම HD ගැන තාක්ෂණික වශයෙන් නම් වැඩි විස්තරයක් නැහැ.Resolution ගැන තමයි ඉතින් කියන්න තියෙන්නෙ.වැඩිපුරම තියෙන්නෙ ඒවගෙ යෙදීම් තමා.ඒ ගැන පස්සෙ ලිපියකින් කියන්නම්. මෙන්න මේ තැන් වලින් ඔයගොල්ලන්ට වැඩිපුර විස්තර හොයාගන්න පුලුවන්.

http://www.microsoft.com/windows/windowsmedia/howto/articles/understandinghdformats.aspx

http://www.adobe.com/products/premiere/pdfs/hdprimer.pdf

DirectX සහ OpenGL

2010-10-25T22:49:00.002+05:30

ඔන්න අද අපි කතා කරන්න යන්නෙත් Graphic සම්බන්ධ දෙයක් ගැන තමයි.ඔයගොල්ලන්ට් පරිගණක මෘදුකාංග පාවිච්චි කරන ගොඩ්ක් වෙලාවට් මේ DirectX සහ OpenGL කියන වචන අහන්න දකින්න ලබිල ඇති.Game ගහන අය නම් ඉතින් අනිවාර්යයෙන් අහල තියෙන බව විස්වාසයි.එත් ඔය කවුරුහරි මේව මොනවද?මොකටද මේව තියෙන්නෙ?මොනවද මේවගෙන් කෙරෙන්නෙ කියල හොයල බලුවද?

අපි එහෙනම් DirectX වලින් පටන්ගමුකො.DirectX කියන්නෙ සරලවම කිව්වොත් Windows උඩ දුවන API ( Application Programming Interface) ගොනුවක්.මෙමඟින් multimedia වලට අදාල (විශේෂයෙන්ම පරිගණක ක්‍රීඩා සහ රූපණ මාධ්‍ය වලට අදාල ) කාර්යය පාලනය කිරීම කරනු ලබනවා. Direct3D, DirectDraw, DirectMusic, DirectPlay, DirectSound යන එවා මේ API වලට උදාහරණ කීපයක් ලෙස දැක්විය හැකියි.ඔයාලට පේනව ඇති මේ හැම එකකම Direct කියන වචනෙ මුලට තියෙනව.ඉතින් ඔය Direct කියන වචනෙ මුලට දාල විචල්‍ය වෙන වච්නය වෙනුවට 'X' අකුරත් එකතු කරල ගොනුවෙ නමට DirectX කියල දාල තියෙනවා.මයික්‍රොසොෆ්ට් ආයතනය මඟින් නිකුත් කරල තියෙන අලුත්ම සංස්කරණය තමයි DirectX 11 කියන්නෙ.

දැනට ක්‍රියාකාරී තත්වයේ තියෙන හැම මෙහෙයුම් පද්ධතියකම පාහේ DirectX සඳහා ප්‍රයෝජනවත් වන පුංචි මෘදුකාංගයක් තියෙනවා.නමින් DirectX Diagnostic Tool (dxdiag.exe) වෙන ඒක තියෙන්නෙ තමන්ගෙ වින්ඩොස් folder එකේ system32 කියන folder එකෙයි.උදාහරණයක් විදියට කිවුවොත් "C:\Windows\System32\dxdiag.exe".හොයාගන්න අමාරුනම් වඩාත්ම ලේසි විදිය තමා run window එකේ dxdiag කියල ට්යිප් කරන එක.ඒකට ගිහින් ඔයාලගෙ දෘඩාංග මෙහෙයුම් පද්ධතියෙ තියෙන DirectX එක්ක ගැලපෙනවද කියල සහ එවගෙ නොගැලපීම් තියෙනව නම් ගැටලු නිරාකරණය කරගන්නත් උදවු ගන්න පුලුවන්.

හරි එහෙනම් අපි දැන් OpenGL ගැන බලමු.OpenGL (Open Graphics Library) 1992 දී Silicon Graphics ආයතනය විසින් නිපදවන ලද්දක්.මෙයත් DirectX වගේම 2D හා 3D ග්‍රැෆික් සඳහා විශේෂිත වූ API එකක් වන අතර DirectX ට වඩා මෙහි විශේෂත්වය වන්නේ මෙය පරිගණක මෙහෙයුම් පද්ධතිය තුල පමණක් නොව වෙනත් මෙහෙයුම් පද්ධති තුලද භාවිතා කිරීමට ඇති හැකියාවයි.OpenGL නිර්මාණය කර ඇත්තේ "C" පරිගණක භාෂාව උපයෝගී කරගෙන නිසා DirectX වලට වඩා OpenGL වල දෘඩාංග සහයෝගය වැඩියි.දැනට OpenGL අලුත්ම සංස්කරණය වන්නේ OpenGL 4.1 සංස්කරණයි.

Gamersලට නම් මේ DirectX සහ OpenGL, System requirements වල ඕනතරම් හම්බුවෙලා ඇති.උදාහරණයක් විදියට ලඟදි නිකුත් උන Mafia 2 පරිගණක ක්‍රීඩාවේ අවම requirements ටික තමයි මේ.

OS: Windows XP/Vista/7
Processor: Intel Core 2 Duo @ 3.0 GHz / AMD Athlon 64 X2 3600+Memory: 1.5 Gb
Hard Drive: 8 Gb free
Video Memory: 512 Mb
Video Card: nVidia GeForce 8600 / ATI Radeon HD 2600
Sound Card: DirectX Compatible
DirectX: 9.0c
Keyboard
Mouse
DVD Rom Drive

මේ විස්තර ටික දැනට ඔයගොල්ලන්ට ප්‍රමාණවත් කියල හිතනවා.වැඩිදුර විස්තර සඳහා පහත ලින්ක් වලට ගිහින් බලන්න.ආයෙ අලුත් ලිපියකින් හමුවෙමු.

http://www.microsoft.com/games/en-us/aboutgfw/pages/directx.aspx

http://www.opengl.org/

http://en.wikipedia.org/wiki/Comparison_of_OpenGL_and_Direct3D

3D සහ අපේ ඇස්

2010-10-24T21:42:00.000+05:30

තාක්ෂණය කියන දේත් එක්ක හෙනහුරා වැදිච්ච වැදගත් ශරීර අංගයක් තමයි අපේ රත්තරං ඇස් දෙක. ඉතින් තාක්ෂණය එක්ක ගණුදෙනු කරන ඇත්තො තම තමන්ගේ ඇස් දෙක ගැන බොහොම පරිස්සම් වෙන්න ඕන. විශේෂයෙන්ම ඩේව්ලා. මොකද එයාලා ඇස් දෙක වහගෙන මවපු හීන හැබැ කරගන්න ඇස් දෙක ඇරගෙන පැය ගානක් පරිගණකය ඉස්සරහ එල්ලිලා ඉන්න හන්දා. අපි කියන්න ආපු කාරණාව නම් ඒක නෙවී. ඔහොම ඉන්න කෙලින්ම කාරණාවට බහින්නම්.

පහුගිය කාලෙ ලොකු රැල්ලක් කරලියට ආවනේ ත්‍රිමාණ රූපවාහිණිය කියලා. Avatar ආවට පස්සෙ මම හිතන්නෙ ලංකාවේ කොයි කා අතරත් ඒ ගැන කතා බහට ලක් උනා. ඒත් එක්කම පොඩි හාහූවක් ගියා මේවා ඇස් වලට නම් හොඳ ආරංචියක් නෙවී කියලා. අපිත් ඉතින් හොයලා බැලුවා මේ ගැන. කාරණේ නම් ඇත්ත. මේ වගේ විශේෂ කණ්ණාඩියක් පැළඳගෙන ත්‍රිමාණත්වය රස විඳපු බොහෝ දෙනෙකුට ඊට පස්සෙ ඇසේ පීඩාවක්(eye strain), හිසේ කැක්කුමක් හටගෙන තියනවා. මොකද කියනවා නම් මේ ත්‍රිමාණත්වය මවාගන්න ඇස් දෙකයි, මොළයයි ලොකු වෙහෙසක් ගන්න හන්දා. අපි ඒක කොහොමද සිද්ද වෙන්නෙ කියලා කලින් ලිපියකින් කිව්වනේ.

R U ready 4 3D I strain

දැන් ඉතින් මේක කියෙව්වම බය වෙන්න එපා. සාලෙ ඉස්සරහ තියන රූප පෙට්ටිය බිහි වුණු කාලෙත් මෙහෙමම කිව්වනෙ. සීමාවන් යොදාගෙන නිවැරදි ආකාරයට පාවිච්චි කලොත් ඇසේ පීඩාව අවම කරගන්න පුළුවන්. ඒ වගේම තාක්ෂණය දියුණු වෙනවත් එක්කම මේ දේවල් වළක්වගන්නත් පුළුවන් වේවි. ඒක හන්දා ත්‍රිමාණ රූපවාහිණි යන්ත්‍රයක් මිලදී ගන්න තීරණය කරනවනම් හරි, කණ්ණාඩියක් දාගෙන 3D චිත්‍රපයටයක් බලන්න යන්න හිතුවා නම් හරි, 3D ක්‍රීඩාවක් ගහන්න කල්පනාවක් ආවා නම් හරි, මේ දේවල් ගැන පොඩ්ඩක් සැලකිලිමත් වෙන එක නුවණට හුරුයි. නැත්තන් ඉතින් රත්තරන් ඇස් දෙකට දෙයියන්ගෙම පිහිටයි!!!

"Avatar Headache" අඩු කරගන්න විදිහ

GPU computing ගැන අහල තියෙනවද?

2010-10-23T20:51:00.002+05:30

GPU Computing ගැන කතාකරන්න කලින් GPU එකක් කියන්නෙ මොකක්ද කියල දන්නෙ නැති අය ඇතිනෙ.අන්න එ කට්ටිය අපි කලින් පලකරපු මේ ලිපිය කියවල ආවා නම් අදහසක් ගන්න පුලුවන් වේවි.

ඔයාල හැමෝම දන්නවා ඇතිනෙ දැනට එන CPU වල cores කීපයක් තියෙන බව.ඔය Dual core, Quad core කියල එන්නෙ එවා තමයි.ඒ වගෙම කලින් ලිපි කියෙව්වා නම් ඔයලා දන්නව NVIDIA අලුත්ම GPU (Graphics Processing Unit) එකක පුංචි cores (CUDA cores) ගොඩක් තියෙනවා කියලා.උදාහරණයක් කිවුවොත් NVIDIA - GeForce GTX 480 GPU එකක CUDA (Compute Unified Device Architecture) cores 480 ක් තියෙනවා.

ඉතින් GPU Computing කියන්නෙ මෙන්න මේ GPU සාමාන්‍ය ඉංජිනේරු සහ විද්‍යාත්මක පරිගණක කටයුතු සඳහා යොදාගැනීමයි.මෙහි අරමුණ වනුයේ CPU එක සහ GPU එක අන්තර් සහයෝගයෙන් යුතුව විවිධාකාර පරිගණක කටයුතු වල නිරතවීමේ හැකියාවක් ඇතිකිරීමයි.පරිගණක මෘදුකාංගයක අනුක්‍රමික කොටස CPU එක මඟින් කිරීමත් ගණනය අතින් කඩිනම් විය යුතු කොටස GPU එක මඟින් ත්වරණය කිරීමත් මෙහි ආකෘතියයි.GPGPU (General Purpose computing on the Graphics Processing Unit) කියල කියන්නෙත් මේ GPU Computing වලටම තමයි.

ඇත්තටම කියන GPU Computing කියන එක කරලියට ආවෙ මොන හේතුවක් නිසාද?හේතුව තමයි පහුගිය කාලය තිස්සෙ CPU වල ගණනය කිරීමේ හැකියාවට වඩා GPU වල ගණනය කිරීමේ හැකියාව වැඩිවීම. පහළ තියෙන ප්‍රස්තාරය දැක්කම GPU සහ CPU අතර පරතරය කොච්චරද කියලා ඔයාලට තෙරෙනවා ඇති.

NVIDIA , ATI කියන්නෙ GPU හදන සමාගම්. Intel කියන්නෙ CPU හදන සමාගමක්

පහළ තියෙන්නෙ Intel Core i7 CPU එකක් සහ NVIDIA GTX280 GPU එකක් අතර සංසන්දනයක්.ප්‍රස්තාරයෙන් කියන්නෙ CPU එකට වඩා කී වාරයක් GPU එකේ හැකියාව වැඩිද කියල.එක තැනක 14.9 වාරයක් GPU එක වැඩියි කියල ඔයාලට පේනවා ඇති.

ඉතින් ඔන්න ඔය හේතු නිසා ගැන ඉස්සරහට GPU Computing ගොඩක් කතා වේවි.මේ වගේ ලිපි වලින් ඔයගොල්ලන්ට ඉස්සරහට එන තාක්ෂණය ගැන අවබෝධයක් ලබා දෙන එකයි අපේ අරමුණ.වැඩිදුර විස්තර දැනගන්න ආස නම් පහළ තියෙන link වලට ගිහින් බලන්න.

http://www.gpucomputing.net

http://en.wikipedia.org/wiki/GPGPU

මොකක්ද මේ Stereoscopy?

2010-10-22T23:40:00.003+05:30

දිවි ච්ලන රූප ප්‍රක්ෂේපණ තාක්ෂණය එහෙමත් නැත්තම් Stereoscopy කියල කියන්නෙ අපි හොඳට දන්න 3D කියන එකමද?ඇත්තටම නැහැ.3D වලදි කරන්නෙ තෙවන මානය මවා පෙන්නීමක් විතරයි.නමුත් ඇත්ත 3D පෙන්නන්න නම් අපිට අඩුම වශයෙන් පින්තූර 2ක් වත් ඕන වෙනවා.එහෙම වෙන්නෙ අපිට ඇස් 2ක් පිහිටල තියෙන නිසා.

ත්‍රිමාණ පින්තූර පෙන්නන්න පුලුවන් විදි කීපයක් තියෙනවා.ඒවා තමයි ද්විමාන යුගල විදියට ත්‍රිමාණ දර්ශකයක් ඔස්සේ හෝ පරිගණක තිරයක් ඔස්සේ නිරූපනය කිරීම.උන්නත රූප(anaglyph) බලන්න නම් ත්‍රිමාණ කණ්නාඩි වුවමනා වෙනවා.මෙම ත්‍රිමාණ කණ්නාඩි රතු-නිල් හෝ රතු-කොල පැහැයෙන් යුතු වෙනවා.

මෙන්න මේවගේ රූපයකට තමා උන්නත රූපයක් කියන්නෙ.පෙනවා නේද සාමාන්‍ය විදියට බලනකොට බොඳ වෙලා පේන හැටි?

පහළ තියෙන්නෙ කියන Stereoscope කියන උපාංගයයි.එකෙන් පුලුවන් ද්විමාන යුගල පින්තූර ත්‍රිමාණවිදියට බලන්න.


Stereoscope

Stereoscope එකට දාන ද්විමාන යුගල ඡායාරූපයක්

ත්‍රිමාණ ඡායාරූප ගන්න පාවිච්චි කරන digital camera එකක්

ඔන්න එහෙනම් ඔයගොල්ලන්ට Stereoscopy ගැන යම්තාක් දුරට අවබෝධයක් එන්නැති කියල හිතනවා.ඔයගොල්ලන්ගෙ අදහස් දක්වනවා නම් අපි ගොඩාක් අගයකොට සලකනවා.තවත් ලිපියකින් හමුවෙමු.

ඩේව් වරුන්ගේ සුපිරි ආයුධය - තෙවන කොටස

2010-10-22T16:37:00.003+05:30

අපිට මේ ලිපියත් ලියන්න හිතුනෙ දැනට වෙළඳ පලේ තියෙන සුපිරි Graphic card කීපයක් දකින්න ලැබුනු නිසයි.ඔයගොල්ලො අපේ කලින් ලිපිය කියව්වා නම් උනන්දුවක් අතිවෙන්න ඇති නේද කොහොමද වඩාත් හොඳ Graphic card එකක් තෝරගන්නෙ කියල?එහෙනම් අපි දැනට තියෙන හොඳම කීපයක් ගැන කියන්නම්.එක අලුතින් එකක් ගන්න කෙනෙක්ට ලොකු උදව්වක් වේවි.

Graphic card නිෂ්පාදනයේ ඉදිරියෙන්ම ඉන්න සමාගම් 2ක් තමයි NVIDIA සමාගම AMD සහ සමාගම.

ඔවුන්ගේ ප්‍රධාන නිෂ්පාදන 2 වන්නේ NVIDIA GeForce සහ ATI Radeon යන දෙකයි.එම සමාගම් වලින් තමයි නිෂ්පාදනය වෙලා තියෙන්නෙ දැනට ලෝකයේ තියෙන හොඳම Graphic card දෙක.අන්න ඒ 2 ගැන විස්තරයක් තමයි අපි දැන් ඔයගොල්ලන්ට කියන්න යන්නෙ.

NVIDIA - GeForce GTX 480 :

ඔන්න අපි NVIDIA එකෙන්ම පටන්ගත්තා.NVIDIA - GeForce GTX 480 කියන්නෙ GeForce 400 series එකේ දැනට තියෙන අලුත්ම නිෂ්පාදනය.ඔවුන් මේක හඳුන්වන්නෙ දැනට ලෝකයේ තියෙන වේගවත්ම තනි GPU එක කියලා.මේකට යොදාගෙන තියෙන්නෙ Fermi 100(GF100) කියල අතිශය වේගවත් GPU එකක්.ඔන්න ඔයගොල්ලන්ගෙ කුතුහලය යන්නත් එක්ක මෙකෙ specifications ටිකක් දාන්නම්කො.

CUDA Cores : 480
Graphics Clock (MHz) : 700
Standard Memory Config : 1536 MB GDDR5
Memory Bandwidth (GB/sec) : 177.4
Memory Interface Width : 384-bit
Texture Fill Rate (billion/sec) : 42
Microsoft DirectX : 11
OpenGL : 4.1
Maximum Digital Resolution : 2560x1600

පුදුම වෙන්න දෙයක් නෑ නේද මේක වේගවත්ම එක වීම ගැන.මේක දැන් ලංකාවෙත් මිලදී ගන්න
පුලුවන්.මිල දැක්කම නම් ඉතින් කියවෙන්නෙ "පිස්සු හැදෙනවා" කියල තමයි.

ATI Radeon HD 5970

මේ ඉන්න කලින් කෙනාගෙ වෙලඳපළ තරඟකාරයා.මෙකේ නිෂ්පාදකයින් කියන්නෙ මෙක අදට තියෙන වේගවත්ම ව්‍යාපාරික Graphic card එක කියලා.කොහොමද NVIDIA - GeForce GTX 480 එකත් වේගවත්ම එක නම් මෙකත් වේගවත්ම එක වෙන්න?හොඳට බලන්න අපි උඩදි "තනි" කියන වචනෙ පාවිච්චි කලා.ඔව් ඔයගොල්ලො හිතුව විදිය හරි.මේක "තනි" GPU එකක් නෙවෙයි. Hemlock XT වර්ගයේ GPU 2ක් මේකට පාවිච්චි කරල තියෙනවා.එහෙනම් මේකේ specification ටිකකුත් බලලම ඉමුකො.

Engine clock speed : 725 MHz
Memory : 2 x 1,024MB GDDR5
Memory bandwidth : 256.0 GB/sec
Texel fill rate (bilinear filtered): 116 Gigatexels/sec
Microsoft DirectX : 11
OpenGL : 3.2
Maximum Digital Resolution : 2560x1600

එහෙනම් මෙ විස්තර ටික ඔයාලට ගොඩක් ප්‍රයොජනවත් වෙන්නැති කියල හිතනවා.ඔයගොල්ලො අලුතෙන් Graphic card එකක් ගන්න යනව නම් ඉහත දක්වපු සුපිරි Graphic card වලට සාපෙක්ෂව ඔයාට තීරනයක් ගන්න පුලුවන් වේවි.මේ ලිපි පෙළ මෙතනින් හමාර කරනවා.අයෙත් තව අලුත් ලිපියකින් හමුවෙමු.

Toy Story ඇතුල් කතාව

2010-10-22T15:29:00.000+05:30

ලොකු කුඩා කවුරුත් ආසාවෙන් බලපු ලස්සන කාටූනයක්. ඒක කොච්චර ජනප්‍රිය උනාද කියනවනම් ප්‍රේක්ෂක ප්‍රතිචාර අනුව කථාංග තුනක් දක්වාම නිර්මාණය වුනා. අපි හදන්නෙ මේ Toy Story කතාව දිග අරින්න නෙවී. ඒකෙ ඇතුල් කතාව කියන්න.

මොකද සජීවිකරණ ඉතිහාසයේ වැදගත් සන්ධිස්ථානයක් තම්යි 1995 නොවැම්බර් 22, ඒ කියන්නෙ Toy Story මුලින්ම පිට වුනු දවස. ගොඩක් දෙනා Toy Story බලලා තිබ්බට මේ කතාවෙ විශේෂත්වය දන්නෙ නෑ. Toy Story කියන්නෙ මුළුමනින්ම CGI(Computer Generated Imaginary) තාක්ෂණය යොදාගෙන පරිගණක භාවිතයෙන් නිපදවපු ලෝකයේ පළමුවෙනි සජීවිකරණ චිත්‍රපටය.

Disney සමාගමත් එක්ක ඇතිකරගත්ත ගිවිසුමක් අනුව Pixar Animation Studios වලින් තමයි මේක හැදුවේ. මේකෙ අධ්‍යක්ෂක John Lasseter මීට කලින් හදල තිබ්බ Tin Toy කෙටි චිත්‍රපට දැකලා තමයි Disney සමාගමට මේ වැඩේට අත ගහන්න හිතුනේ. Tin Toy කියන්නේ Toy Story ආරෙටම යන සෙල්ලම් බඩු කතාවක්. ඇත්තටම Toy Story කියන්නේ අවුරුද්දෙන් දෙකෙන් කරපු නිර්මාණයක් නෙවී. අවුරුදු ගානක මහන්සියක ප්‍රතිඵලයක්. 1995 එළි දක්වන්න කලින් කරපු පර්යේෂනාත්මක දර්ශන අන්තර්ජාලයේ ඕන තරම් හොයාගන්න පුළුවන්.

1995 - Toy Story වල සාර්ථකත්වයෙන් පස්සෙ තමයි, දිගට හරහට සජීවිකරණ චිත්‍රපට බිහිවෙන්න පටන් ගත්තෙ.

ඩේව් වරුන්ගේ සුපිරි ආයුධය - දෙවන කොටස

2010-10-22T00:55:00.033+05:30

ඔන්න ඩේව් වරුන්ගේ සුපිරි ආයුධය ගැන ලියන දෙවන කොටස.පළමු කොටස බලපු නැති අයට මෙතනින් බලන්න පුලුවන්.

ඔයගොල්ලො ඉතින් සල්ලි දීලා Graphic card එකක් ගත්තට එක වැඩ කරන්නෙ කොහොමද කියල හොයල බලන්න වැඩිය උනන්දු වෙන්නෙ නැතුව ඇති නේද?මේ ලිපියෙන් අපි කියන්න යන්නෙ Graphic card එකක ලක්ෂණ, අංගෝපාංග හා එවායේ තාක්ෂණය ගැනයි.සාමාන්‍යයෙන් Graphic card එකකින් කරන්නෙ පරිගණකය මඟින් දර්ශණය කල යුතු දත්ත process කිරීමයි.මම 'සාමාන්‍යයෙන්' කියන වචනය පාවිච්චි කලේ එක හෙතුවක් උඩ.මොකද දැන් අලුතෙන් Intel අයතනය මඟින් නිෂ්පාදනය කරන i3, i5 සහ i7 කියන processors වල graphic processing කරන්නෙත් ප්‍රධාන processor එකෙන් වීම නිසයි.

ඔයගොල්ලො නිකමට හරි හිතුවද 1010 (ද්විමය සංඛ්‍යා) විදියට දෘඩ තැටිය තුල ගබඩා කරගන්න දත්ත අපි රස විඳින චිත්‍රපටියක් විදියට මොනිටරයේ දර්ශණය කරන්නෙ කොහොමද කියල?එහෙනම් අපි Graphic card එක ඇතුලට පොඩ්ඩක් ගිහින් බලමු.

GPU (Graphics Processing Unit) :

මේක තමයි Graphic card එකේ හදවත. ගොඩක් Graphic card එක හා සමාන GPU පාවිච්චි කරනවා.නමුත් ඒවගෙ වේගය සහ හැකියාව තීරණය වෙන්නෙ ඒකට සම්බන්ධ කරන අනික් උපාංග මතයි.බැලූ බැල්මට පෙන්නෙ processor එකක් වගේ නේද?ඉතින් එහෙම වෙන්න එපැයි මෙකෙන් නොවැ graphic processing කරන්නෙ.

GDDR - Graphics Double Data Rate memory :

GDDR කියන්නෙ Graphic card සතුව තියෙන මතකයටම තමයි.උදාහරණයක් විදියට පරිගණකයක තියෙන මතකය විසින් කරන දේ වගේ දෙයක් තමයි මෙයත් කරන්නෙ.නමුත් GDDR නිපදවලම තියෙන්නෙ Graphic cards සඳහා පමණක් පාවිච්චි කරන්නයි.එක නිසා මෙයා සාමාන්‍යය RAM එකට වඩා ටිකක් වෙනස්.GDDR වල version ගනනාවක්ම තියෙනවා.පහළ තියෙන ලින්ක් වලට ගිහින් වැඩිදුර විස්තර බලාගන්න පුලුවන්.

CUDA - The Compute Unified Device Architecture :

CUDA කියන්නෙ NVIDIA ආයතනය මඟින් සොයාගත් පරිගණක ක්‍රමලේඛයක්.මේ සොයාගැනීම මඟින් ඔවුන්ගේ Graphic card වල සමාන්තර processing හැකියාවක් ඔවුන් විසින් ඇතිකරනු ලබුවා.එම හේතුව නිසා දෘශ්‍ය කේතීකරණය(video encoding), rendering වගේ වැඩ කටයුතු වඩාත් අඩු කාලයකින් කරගන්න පුලුවන් වෙනවා.

PhysX :

Ageia සමාගම විසින් PhysX මූලිකවම නිපදවුනේ graphic processing ත්වරණය කරන පරිපථයක් සහ මෘදුකාංගයක් හැටියටයි.නමුත් 2008 දී NVIDIA සමාගම මගින් Ageia සමාගම මිලදීගත් නිසා NVIDIA Graphic cards වල PhysX අන්තර්ගත කෙරුනා.ඔන්න ඔහොමයි PhysX කියන තාක්ෂණය ප්‍රසිද්ධියට පත්වුනේ.මෙම තාක්ෂණය මඟින් සංකීර්ණ භෞතික විද්‍යාත්මක ආදර්ශනයන් පරිගණක සජීවීකරනයේදී හා පරිගණක ක්‍රීඩා නිපදවීමේදී යොදාගැනීමට ඉඩකඩ සලසා දෙනවා.

Crossfire සහ SLI :

මෙමඟින් කියන්නෙ Graphic cards එකකට වඩා වැඩිය සම්බන්ධ කරගන්නා ආකාරයයි.AMD සමාගම මඟින් Crossfire තාක්ෂණයත්, NVIDIA සමාගම මඟින් SLI තාක්ෂණය ත් හඳුන්වල දීල තියෙනවා.ඒවා සම්බන්ධ කරගන්නා ආකාරය නම් එකිනෙකට වෙනස්.පහත රූප වලින් දැක්වෙන්නේ එවා සම්බන්ධ කරන අකාරයයි.

Crossfire

SLI

ඉතින් එහෙනම් අපි Graphic card එකේ ඇතුලත බලලත් ඉවරයි.ඔයාලට දැනගන්න ඔන මොනාහරි තවත් තියෙනව නම් ඒ ගැන අදහස් දක්වන්න.අයේ තවත් ලිපියකින් හමුවෙමු.

Planar Tracking

2010-10-21T21:53:00.000+05:30

Imagineer Systems

Video composting වලදි බහුලව භාවිතා වෙන VFX එකක්. නැති දේවල් ඇති දේවල් කරන්නත්, ඇති දේවල් නැති දේවල් කරන්නත් මේකට පුළුවන්. විශාල ගොඩනැගිලි වල රූපවාහිනි දර්ශන තිර එල්ලන්නෙත් දිලිසෙන මතුපිටකින් මූණ බලන්නෙත් මේ ක්‍රමයෙන්. අපි කලින් දවසක කතාකරපු match-moving ක්‍රමය මේකට ගොඩක් සමානයි. වෙනසකට තියෙන්නෙ වර්ණහරණ පසුබිමක් නැතුව දර්ශන තලයේම තියෙන සලකුණක් මඟින් මතුපිටක් track කිරීම සිදුකරන එකයි.

උදාහරණයක් විදිහට මෙහෙම සීන් එකක් හිතන්න. අනාගත ලොකේ ජනාකීර්ණ වීදියක පුළුල් රූපවාහිනි තිර සහිත ගොඩනැගිලි. කොහොමද මේවගේ තැනක ඇවිදින මිනිහෙක් රූපගත කරන්නෙ. කවදාකවත්ම මිලියන ගානක් වියදම් කරල ගොඩනැගිල්ලක රූපවාහිනි තිර එල්ලන්න හිතන්න එපා. vfx තියෙන්නෙ ඒකට තමයි. අපිට පුළුපුළුවන් විදිහට පහසු location එකක මේක රූපගත කරල අඩු වැඩිය පුරවන්න පරිගණකයට භාර දෙන එක තමයි හොඳම වැඩේ.

Mocha for Adobe After Effects

මේකයි කරන්න තියෙන්නෙ. රූපගත කරපු දර්ශනය අපේ editing tool එකට ලබාදීල ගොඩනැගිල්ලෙ අදාල සෘජුකෝණස්‍රාකාර කොටස track කරන්න කියල මෘදුකාංගයට අඳුන්වල දෙනවා. ඊළඟට ඒ කොටසට අපි වෙනම අරගත්තු පුළුල් රූපවහිනි තිරයක් අලවන එකයි කරන්න තියෙන්නෙ. එතකොට කැමරාව කොච්චර චලනය වීගෙන ගියත් රූපවාහිණි තිරය තියෙන්නෙ ඒ ගොඩනැගිල්ලෙම තමයි. ඊට පස්සෙ ඉතින් මේකට අඩුම කුඩුම දාල පොඩ්ඩක් ලස්සන කරලා තාත්වික කරලා ගන්නයි තියෙන්නෙ.

රෙදි මතුපිටක් උනත් track කරන්න පුළුවන්

මේ වෙනකොට අපි tracking ජාති තුනක් ගැන කතා කරලා තියනවා.

Motion Tracking
Match Moving
Planar Tracking

මතකද ??? මතක් වෙන්නත් එක්ක මේවා එක්ක ටිකක් අතපත ගාල වැඩ කරලා බලන්න මේක උදව්වක් කරගන්න.

ඩේව් වරුන්ගේ සුපිරි ආයුධය - පළමු කොටස

2010-10-21T15:53:00.002+05:30

DAVE (Digital Animation and Visual Effects) ලෝකයේ සුපිරි ආයුධයක් ගැන තමයි අද මම කියන්න යන්නෙ.මේක සුපිරි වෙන තරමට වැඩ කරගන්න එක පහසු වෙන එක තමයි වෙන්නෙ.මේ ආයුධය තමයි Graphics Card එක.ප්‍රධාන වශයෙන්ම වර්ග 4ක් විතර අඳුර ගන්න පුලුවන්.ඉතින් ඒ 4 ගැන තාක්ෂණික කරුණු ටිකක් කියන්නයි අපි අදහස් කලේ.

1. Integrated එහෙමත් නැතිනම් OnBoard Graphic Cards:

මේ තියෙන්නෙ On board වර්ගයේ graphic processing unit එකක්

ගොඩක් වෙලාවට අපි ගාව තියෙන සෑම පරිගණකයකම පාහේ මේ වර්ගයේ graphic processing unit එකක් තියෙනවා.අනිත් එවට සපේක්ෂව මෙකෙ හැකියාව සහ ධාරිතාවය ගොඩක් පහළ මට්ටමකයි තියෙන්නෙ.මෙමඟින් බහුලවම පාවිච්චි කරනු ලබන්නේ පරිගණකයෙහි ප්‍රධාන මතකයයි.එයින් යම්කිසි ඉඩ ප්‍රමණයක් graphic processing සඳහා වෙන්කරගනු ලබනවා.මේකක් තියාගෙන graphic වැඩ කරන්න හිතනව කියන්නෙ හරියට දුන්නයි ඊතලයි අරගෙන හමුදා මෙහෙයුමකට ගියා වගේ වැඩක් තමයි.

2. PCI Graphic Cards :

PCI වර්ගයේ graphic cardඑකක්

PCI වර්ගයේ graphic card පාවිච්චි වෙන්නෙ පරිගණකයේ මව් පුවරුවේ තියෙන PCI slots සඳහායි.මේක නම් දැනට ගොඩක් යල් පැන ගිය තාක්ෂණයක් වෙලා.ගොඩක් වෙලාවට මෙවා තවමත් ඉතුරු වෙල තියෙන්නෙ පරණ පරිගණක වල තමයි.හබැයි ගොඩාක් පරිගණක වල නම් අනිවාර්යෙන් PCI slot නම් පිහිටල තියෙනවා.ඒ කියන්නෙ slots ගැන කරදර නොවී PCI graphic card එකක් පාවිච්චි කරන්න පුලුවන් කියන එකයි.

3.AGP Graphic Cards :

AGP වර්ගයේ graphic cardඑකක්

AGP කියන්නෙ accelerated graphics port කියන එකයි.PCI වගෙම මේ AGP graphic cards වලටත් නම වැටිල තියෙන්නෙ ඒක සවිකරන port එක අනුවයි.AGP card එකකට 1x,2x,4x හා 8x වශයෙන් වේග 4ක් තියෙන්න පුලුවන්.ඔබගේ graphic card එක 8x උනත් මවු පුවරුව සහයෝගය දක්වන වේගයෙන් තමා එක වැඩ කරන්නෙ.විවිධ තාක්ෂණික හේතු නිසා AGP graphic cards PCI-Express තරම් වෙගවත් නැහැ.

4. PCI-Express Graphic Cards :


PCI-Express වර්ගයේ graphic card එකක්

දැනට තියෙන වේගවත්ම වගේම ධාරිතාවයෙන් වැඩිම graphic cards නිකුත් වෙලා තියෙන්නෙ මේ වර්ගයෙන් තමයි.ඉහත දක්වපු PCI සහ AGP වගේම වලිනුත් බොහෝ වෙලාවට ප්‍රධාන මතකයෙන් ඉඩ ගැනීමෙන් වැළකී සිටිනවා.නමුත් මතකයෙන් යම් ප්‍රමාණයක් සහයෝගයෙන් පාවිච්චි කරන එවත් නැතුවම නෙවෙයි.මේවගෙ ධාරිතාව 1gb පවා ඉක්මවා ගිහින් තියෙනවා.එක නිසා අලුතෙන් graphic card එකක් ගන්නවා නම් අලුත්ම තක්ෂණයෙන් යුතු PCI-Express වර්ගයේ එකක්ම ගන්න කියලයි අපි නම් කියන්නෙ.

මවු පුවරුවක PCI,AGP,PCI-E slot පිහිටලා තියෙන විදිය ගැන සටහනක්

මේ තියෙන්නෙ graphic card slot වල ප්‍රමාණයන්

ඉතින් graphic card වර්ග ගැන මේ විස්තර ඇති කියල හිතනවා.graphic card වල තියෙන අංගෝපාංග ගැන වඩිදුර විස්තර අරගෙන තවත් ලිපියකින් හමුවෙමු.

වෙස් මාරුව

2010-10-20T22:30:00.000+05:30

Bachna Ae Haseeno - Title song

මතකද ඒ රූප පෙළ ???

ඒ වගේ රූප රාමු පෙළක් සුමටව ගලපගත්තෙ කොහොමද? මෙහෙම කරනවට තමයි කියන්නෙ Morphing කියලා. මේක රූපගත කරන එක නම් ටිකක් විතර අමාරු වැඩක්. ඒකට මිනින්දෝරු ශිල්පය ටිකක් විතර ඕන කරනවා.

මේක කරන්නෙ බොහෝවිට වර්ණහරණ සංකල්පය යොදාගෙන. නැතිනම් එකම පසුතලය අරගෙන වැඩේ කරන්නත් පුළුවන්. අපි එක් පුද්ගලයෙක් අරගෙන අපේ පසුතලයේ තියලා අදාළ ජවනිකාව රූපගත කරනවා. මේ වෙලාවෙ එයාගෙ හැම පිහිටුමක් ගැනම ආධාරක වල උපකාරයෙන් සෑහෙන අවධානයෙන් තමයි ඉන්නෙ. ඊළඟට කලින් දර්ශනය අවසන් කරපු පිහිටුමෙන් ආරම්භ වෙන විදිහට වෙස් මාරුවක් දාලා ඊලඟ දර්ශනය රූපගත කරනවා. මේ විදිහට දර්ශන වාර කිහිපයක් අරගෙන අපේ Morphing tool එකට ලබා දෙන්නයි තියෙන්නෙ.

මේ ඇස්බැන්ඳුමට නම් ගණං මිනුම් ගැන සෑහෙන්න සැලකිලිමත් වෙන්න වෙනවා. දර්ශන පෙළ සුමටව ගලාගෙන යන්න පිහිටුම් ගැන සෑහෙන අවබෝධයක් තියෙන්න ඕනා. නැත්තන් ඉතින් ගැස්සිලි පද්දිලි ඇතිවෙන්න පුළුවන්. පිහිටුම, ස්ථානගත වීම ආදි මේ හැම දෙයක්ම සටහන් කරගෙන තියාගන්න වෙනවා. ඒකයි ගොඩක් වෙලාවට ආධාරක වල පිහිට පතන්නෙ.

ටූල් එකේදි කරන්න තියෙන්නෙ morphing points සලකුණු කරල ලින්ක් කරන එකයි. ඒකියන්නෙ පළමු දර්ශනයෙ අවසාන පිහිටුමෙයි, ඊලඟ දර්ශනයෙ පළමු පිහිටුමෙයි morph කළයුතු ස්ථාන මොනාද කියල අඳුන්වල දෙන එක. හරියටම කියනවනම් පළමු දර්ශනයේ කට තියෙන තැන දෙවන දර්ශනයේ කට තියන තැන එක්ක වගේ. එතකොට මෘදුකාංගයට පුළුවන් පළමු දර්ශනයෙ අවසාන රූප රාමුවයි, ඊලඟ දර්ශනයෙ පළමු රූප රාමුවයි අතර තව රූප රාමු ටිකක් උත්පාදනය කරලා ඒ දෙක අතර වෙනස සුමට කරන්න. මේ linking points වැඩි වෙන්න වැඩි වෙන්න සුමට බවත් වැඩි වෙනවා.

Morphing points

Flash වගේ 2D Animation Tools එක්ක වැඩ කරල තියනවනම් shape tweening කියන දේ හොඳට පුරුදු ඇතිනෙ. අන්න ඒවගේ දෙයක් තමයි මෙතනත් සිද්ද වෙන්නේ. Flash වගේම 3D Max වගේ 3D modeling Tools වලිනුත් මේ වැඩේ කරන්න පුළුවන්. එවගේම video/photo editing tool වලින් නිශ්චල ඡායා රූප අතරත්, වීඩියෝ අතරත් මේ වෙස් මාරුව කරන්න පුළුවන්. නිශ්චල ඡායාරූප සඳහා නම් මේක එච්චර අමාරු නැ. උත්සහ කරලා බලන්න.

නිශ්චල ඡායාරූප සඳහා

කවුද DAVE ?

2010-10-19T22:21:00.003+05:30

ඩේව්වරුන්ගේ අඩවිය කිව්වම මේ ක්ෂේත්‍රයේ (Digital Animation and Visual Effects) නොඉන්න ගොඩක් දෙනෙක් අහපු දෙයක් තමයි කවුද මේ ඩේව් කියන්නෙ, කාටද මේ ඩේව් කියන්නෙ, මොකද්ද මේ ඩේව් කියන්නෙ කියලා. Dave කියන්නෙ ලෝක සම්මත වචනයක් මිසක් අපි හදාගත්තු දෙයක් නෙවෙයි. Digital Animation and Visual Effects. බලන්න මේ වචන ටික. දැන් තේරෙනවද ?

Digital Animation, නැත්නම් පරිගණක සජීවිකරණය. ඒ කියන්නෙ හරියට මොනාටහරි පණ දෙනවා වගේ වැඩක්. ත්‍රිමාණ තලයට හරි ද්විමාණ තලයට හරි ජීවයක් ලබා දෙන්න පුළුවන් නම් ඒකට තමයි animation කියලා කියන්නෙ. දැකල තියනවනේ රූකඩ වලට පණ දෙනවා. මෙතනදි වෙනස තියෙන්නෙ මේක පරිගණකයක් භාවිතයෙන් කරන එකයි. Visual Effects හෙවත් ඩිජිටල් ඇස් බැන්ඳුම. දැකල ඇතිනෙ මැජික්කාරයන්ගේ මැජික්. ඇස් රවට්ටන සෙල්ලම් දාන එකයි එයාලගෙ දක්ෂකම වෙන්නෙ. මේක පරිගණකයෙන් කරාම තමයි ඩිජිටල් ඇස් බැන්ඳුමක් වෙන්නෙ.

ඉතින් මේ ක්ෂේත්‍රයට අඩිය තියපු ඕනම කෙනෙක්ට කෙටියෙන් කියන්නෙ dave කෙනෙක් කියලා. ඒකයි අපිත් කිව්වේ මේක ඩේව්වරුන්ගේ අඩවිය කියලා. ඔය චිත්‍රපටයක් එහෙම බලනකොට කාරිය කීයෙන් කීදෙනාද හිතන්නෙ ඕක කොහොමට හදන්න ඇද්ද කියලා. ඩේව්වරයෙක් වෙන්න පළමුවෙනි සුදුසුකම තමයි එහෙම හිතෙන එක. එහෙම හිතන පතන අයට එකතුවෙන්න තමයි අපේ අඩවිය තියෙන්නෙ.

අපේ අඩවියේ නමට මූලික සංකල්පය ආපු විදිහත් මතක් කරන්නම්කො.

මේ ඕනම ඩේව්වරයෙක්ගෙ සිහින පාසලක්. Universal Studios සමඟ ඒකාබද්ද වෙලා හැදිච්ච ඉස්කොලයක්. ඔය Pixar, Dreamworks වගේ තැන් වලට ඩේව්වරු බිහි කරන ප්‍රධාන තැනක් තමයි මේක. (ඇමරිකාව පැත්තෙ සවාරියක් ගහන්න ලැබිච්ච දවසක පොඩ්ඩක් එබිලා බලන්න. ඒ වගේම Universal Studios පැත්තෙ රවුමක් යන්නත් අමතක කරන්න එපා.) මේකෙ ඉගනගත්තු ඩේව්වරුන්ගෙ demo reels බලලා ඔයාලටත් මොනා හරි දෙයක් ඉගන ගන්න පුළුවන් වීවි.

ඉතින් දැන් තේරෙනවා නේද DAVE කියන්නෙ මොකද්ද කියලා....

පිරිස් පිටපත්

2010-10-17T22:26:00.000+05:30

ඔබ හිතන්නෙ කොහොමද මේක රූපගත කරන්න කොච්චර විතර නළු නිලියන් පිරිසක් යොදාගන්න ඇද්ද? 1,000ක් ! 10,000ක්. මෙච්චර ගානකට කන්න බොන්න දෙන්න! සල්ලි ගෙවන්න! ඇඳුම් පැළඳුම් මස්සන්න!! කට්ටියවම පාලනය කරන්න. පිස්සූ හැදෙයි!!!!

ඔබ මෙහෙම හිතුවනම් ඔබට වැරදිලා. මේ වැඩේට ඔච්චර කට්ටියක් ඕන කරන්නෙ නෑ. 50කින් 20කින් විතර වැඩේ shape කරගත හැකි. කොහොමද කරන්නෙ කියල කිව්වොත් ඉතින් පරිගණකයෙ පිහිට තමයි.

මේන්න ඉන්න ඇත්තම කට්ටිය

Crowd Duplication. මෙහෙමයි මේ වැඩේ කරන්නෙ. ඉස්සල්ලාම අපේ පිරිස යොදාගෙන අදාල ජවනිකාවේ කොටස් කිහිපයක් විවිධ ඉරියව් වලින් රූපගත කරනවා . සමහර වෙලාවට මේ වෙලාවෙදි අපි කලින් දවසක කතාකරපු chroma key effect එකත් භාවිතා වෙනවා. ඊලඟට මේ කොටස් අපෙ editing tool එකට ඇතුල් කරලා ඒකෙ කියන විදිහට කපල කොටල වැඩේ කරන්න තියෙන්නෙ.

වර්ණහරණය සහිත

ගොඩක් මෘදුකාංග වල තියන පොදු පියවරයන් විදිහට කිව්වොත් මෙහෙමයි මේක සිද්දවෙන්නෙ. ඉස්සල්ලාම වීඩියො දර්ශන කොටස් ඇතුළු කරාම අපේ පිරිස ඉතුරු වෙන විදිහට පසුබිම වර්ණහරණය කරනවා.

වර්ණහරණය රහිත

පසුබිම එච්චරම වැදගත් නෙවී නම් වර්ණහරණය භාවිතා නොකර මේක කරන්නත් පුළුවන්.

ඊලඟට මේ පිරිස් කොටස් සියල්ලම දාර වලින් select කරගෙන එකම රූප රාමුවක් යටතට ලස්සනට ගලපනවා හරියට එතන 5,000ක් 10,000ක් ඉන්නවා වගේ..

වම දකුණ මාරු කරවලා, පාට වෙනස් කරවලා, පොඩ්ඩක් එහාට මෙහාට කරකවලා, ලොකු කරෝලා, පොඩි කරෝලා, මේ ඉන්නෙ එකම කට්ටියක් නෙවී කියල බලන කෙනෙක්ව අන්දන්න ඒ කට්ට්යවම copy & paste කර කර එයාලට එක එක වැඩ කැලි දාන්න පුළුවන්.

ඊළඟට මේකට අපේම කියපු පසුබිමක් එකතු කරාම ඕන ඔට්ටුවක් ආයෙ ඉතින් කාටවත් කියන්න බෑ මෙතන ඉන්නෙ එකම කට්ට්යක් කියලා.

ලංකාවෙත් මේ වැඩේ කරපු වෙළඳ දැන්වීම් නම් ඕන තරම් තියනවා. මිනිස්සුන්ගෙන් ලංකාවක් හදද්දි , සෙනග පිරිච්ච වේදිකා හදද්දි, ක්‍රීඩාගාර හදද්දී පොඩ්ඩක් බලන්න මේ VFX එකත් ප්‍රොයෝජනයට අරගෙනද නැත්තම් ලොකු කට්ටක් කාගෙන ලොකු සෙනගක් එකතු කරගෙනද ඒව හදල තියෙන්නෙ කියලා.

3D crowd සඳහා

කැමරාකරණය වියදම් අධික වැඩක් උනාම crowd duplicating වැඩේ 3D modeling වලින් කරන්න වෙනවා. මිලියන ගානක සෙනගක් එකතු කරගන්න උවමනා උනාම මේක තමයි හොඳම විසඳුම වෙන්නෙ. Lord of the rings වගේ කතන්දර වල කරල තියෙන්නෙ ඒ වගේ දෙයක්.

Match moving

2010-10-16T15:48:00.001+05:30

වර්ණහරණයත් එක්ක බැඳුනු අනිත් VFX එක. අපි දිග කතාවක් කියල එදා මගදි නැවත්තුවෙ. ඒ පොස්ට් එකට හොඳ ප්‍රතිචාර ලැබුණු නිසා ඔන්න ඉක්මන්ටම මේ කතාවත් පළ කරන්න හිතුවා. මේක 2D හා 3D අංශ දෙකෙන්ම කරන්න පුළුවන්. කැමරා චලනයක් තියන chroma key වීඩියෝ එකක් තාත්විකව නිර්මාණය කරන්න නම් අනිවාර්යයෙන්ම මේ දේ උවමනා වෙනවා. මේක උදාහරණයකින්ම කියන්නම්කො.

හිතන්න අපිට ඕන කරනවා මැජික්ලන්තයක පාරක ඇවිදින පුද්ගලයෙක්ගෙ දර්ශනයක්. මේකට green screen කරපු පසු බිමක් අපිට තියනවා. අපිට උවමනායි මේ පසුබිමේ එහා කොනේ ඉඳන් මෙහා කොනට ඇවිදින පුද්ගලයෙක් රූපගත කරන්න ඒ දර්ශනයට. කැමරාවෙන් කැමරා කරන්න පුළුවන් සීමිත කොටසක් විතරයිනේ. ඒක හන්දා කැමරා චලනයක් කරන්න වෙනවා පුද්ගලයා focus කරගෙන එහා කොනේ ඉඳන් මෙහා කොනට . ඊලඟට chroma key කරල අපේ මැජික්ලන්ත පසුබිම එකතු කරනවා. ඔන්න ඔතනදි තමයි මේ වැඩේ වෙන්නෙ.

අපි මෙතනදි මැජික්ලන්ත පසුබිම විදිහට යොදාගන්නෙ නිශ්චල ඡායාරූපයක්, වීඩියෝ පටයක් නැත්තන් ත්‍රිමාණ පසුතලයක්. මිනිහව චලනය කරපු කැමරාවකින් රූපගත කරපු දර්ශනයක් නිසා අනිවාර්යයෙන්ම ඒකට ගැලපෙන විදිහට පසුතලය ගලපන්න ඕනා. මිනිහ කොච්චර ඇවිද්දත් පසුබිම ඒකමනම්, මිනිහ පොළවට උඩින් අඩි තියනවනම් 'චා'නෙ නේද.

අන්න ඒ ගැලපීමට තමයි Match moving භාවිතා කරන්නෙ. ඒකෙන් පුළුවන් කැමරාවෙ චලනයන් අල්ලගන්න. මේ වැඩේ manually කරන්නත් පුළුවන්. ඒත් කැමරාවෙ චලන වේගය, කෝණය වගේ දේවල් නිකන් බලලා කියන්න අමාරුයි නෙ. ඒක හන්දා ඒ වැඩේ පරිගණකයටම භාර දෙනවා. අපිට කරන්න තියෙන්නෙ green screen පසුබිමේ සලකුණු දාලා පරිගණකයට ඒ වැඩෙ කරන්න උදව් වෙන එක විතරයි. මේ සලකුණු වලට තමයි කියන්නෙ tracking markers කියලා.

නිල්පාට පසුබිමේ තිත් තිත් පේනවද

මේ සලකුණු වල වර්ණය, හැඩය, පිහිටුම ගැන ටිකක් සැලකිලිමත් වෙන්න ඕනා. වර්ණය ගැන කිව්වොත් මතකනෙ, අපිට chroma key වල ප්‍රධාන වර්ණ දෙකක් තිබ්බ කියලා.ඉතින් අපි පසු තලයට නිල් ගත්තොත් සලකුණු ටික කොළ පාටින් ගහන්න පුළුවන්.නැත්තන් ඒකෙ අනික් පැත්ත කරන්නත් පුළුවන්. හැබැයි මේ වැඩේ පොඩි කොස්සක් තියනවා. focus එක out උනාම කැමරා වල වර්ණ අවුල් තිබ්බොත් සලකුණු වල දාර වල වර්ණය එහෙම වෙනස් වෙන්න පුළුවන් . එතකොට chroma key කරනකොට ටිකක් විතර කරදර වෙන්න වෙනවා. ඒක හන්දා ගොඩක් අය කරන්නෙ screen එකෙ වර්ණයෙන් brightness එක වෙනස් සලකුණු ගහන එකයි. ඊළඟට හැඩය ගත්තොත් ඒකත් වැදගත් කාරණයක්. මේකට ගොඩක් වෙලාවට යොදා ගන්නෙ මුළු ඇති හැඩයක්. (ඒ කියන්නෙ කතිරයක් හරි කොටුවක් හරි ත්‍රිකෝණයක් හරි වගේ දෙයක්). එතකොට ඒකෙන් පරිගණකයට පුළුවන් කැමරා කෝණය එහෙම අඳුනගන්න. ඊලඟට මේ සලකුණු පිහිටුම් කරන ආකාරය ගැන කිව්වොත් ගොඩක් වෙලාවට ප්‍රධාන සලකුණු පිහිටුම් කරන්නෙ grid එකක් විදිහට. කුඩා සලකුණු අහඹු විදිහට පිහිටුම් කරනව close up දර්ශන වලට අවශ්‍ය වෙන හන්දා.

Green screen with tracking markers

ඉතින් මේ වීඩියෝ එක අපේ chroma key editing tool එකට ලබා දුන්නම එයාල අපි ලකුණු කරපු තැන් අඳුන ගෙන(නැත්තම් අපි අඳුන්නලා දීලා) අපේ පසුබිමේ ඊට අදාල තැන link කරගන්නවා (නැත්තම් අපි link කරල දෙනවා) . දැන් ඉතින් කැමරාව කොච්චර චලනය උනත් එතන්ට අදාළ පසුබිම තමයි පේන්න තියෙන්නෙ. අපි මේ කිව්වෙ අපි දන්න basicම basic ටික විතරයි පුංචි නිර්මාණයක් කරන්න. මීට අමතරව තව තව දේවලුත් සලකලා බලන්න තියනවා මහා ප‍රිමාණයෙන් කරනවනම්.

tracking සහිත දර්ශන තලය

Green Screen, Tracking Markers එක්ක පොඩ්ඩක් සෙල්ලම් කරලා අත්හදා බලන්න මෙන්න මෙතනින් පුළුවන්.

වර්ණ හරණය වගේම camera tracking කියන දේත් දැන් කාලෙ ගොඩක් video editing tools වලින් කරගන්න පුළුවන්. Shake, Adobe After Effects, Discreet Combustion වගේ මෘදුකාංග වලින් 2D tracking කරන්න පුළුවන්. 2D වගේම 3D tracking වලටත් මෘදුකාංග තියනවා. 3D පසු තලයක් එක්ක ගණුදෙනු කරන්න 3D Max, Maya, Blender, Light wave වගේ මෘදුකාංග වලත් මේ පහසුකම ලබා දීලා තියනවා.

tracking කියන දේ green screen නැතුව කරන්නත් පුළුවන්. ඒ අපේ දර්ශනයෙ තියන object එකක් අල්ලගෙන. ඒත් ඒක තව VFX එකක්. පස්සෙ කියන්නම්