نسمة أمل..!

حلم العمر

2011-09-19T13:31:00.001+02:00

سنين عمال بحايل فيك يا حلم العمر

ومستنيك ودوقت المر

وبحلم إني أبقى معاك

وأمسك نفسي وقت لقاك .. من الخضة

ووقفتنا تكون قاعدة

تكون ملهاش ولا آخر

وننسى إن فيه آخر

وتتكرر

ونتأخر

وتبقى وقعتي مصيبة

منا وياك بكون خيبة

وطول مانت هنا معايا

أنا وياك ...

ولو طولت في الغيبة

هستناك

ياحلم العمر ..

مش كارهك

ومش فاهمك

ومش عارف هاروح على فين

يا حلم العمر

نورني ... وعرفني

ولو طولت في الغيبة

متقلقش ..

مهيش عيبة ..

ومستنيك

بس خد بالك

مفيش باقي كتير في العمر

اسلام منسي

29 - 4 - 2009

سري الكبير

2011-09-19T13:30:00.001+02:00

إنها السبب الأول في خطواتي في الطريق المؤدي الى عملي.. وفي اختياري لملابسي، ونوع العمل الذي أحبه، وطريقة تفكيري، واسلوبي فيها من اختيارها ايضا.

إنها هي.. بكل شقائها الممتع الصعب السخيف المتغير الرائع، انها من يتدخل في اختياراتي لشريكة حياتي وطريقة تعاملي مع البشر.

حياة... كلمة من أربع حروف، لكنها في أعماق كل شيء.

متوغلة في كل حركة وكل صوت وكل لون وكل لمسة وكل همسة.. بدونها لا يوجد معنى للكلام ولا الرسم ولا البناء ولا المعاملات..ولا ، ولا ، ولا...

هي التي تجعلني أكره مترو الانفاق.. وأعشق الاتوبيس وكل ما يتوغل وسط الناس، هي التي تجعلني أستمع الى حمزة نمرة ومنير وفيروز وبلاك تيما ومكي وكلاكيت ومسار اجباري وعلي الهلباوي و.. و.... و......

تجعلني بكل بساطة اقول "شكرا" لكل واحد كان سبب في أن يمنعني عن شئ "ميعاد ، وظيفة، طريق، فلوس،...." لأنها أقنعتني بها ... كونها هي، وأن "ربنا ما أخذ منك الا ليعطيك" وأنك "لازم تعمل اللي عليك" والبقية على قضاء الله، فان تدبيرك سيسعدك ولكن ما بالك بتدبير الله لك.

هي السبب في ابتسامتي وفي تأملي وفي نظرتي للمستقبل واحلامي وطموحي وافكاري.

ويجب أن تكون السبب في اختيارات أي فرد، أتعجب لما يحيا لمجرد الاستقرار و"العيشة الحلوة.. بيت وعيال ووظيفة حلوة وكة تبقى اتعشت يا برنس"...أين الحياة هنا

هو مستمتع.. ولكن نصف استمتاع.. هو مرتاح ولكن نصف راحة، هو "مريح دماغه"... هو "ربنا معاه"..

الحياة متعتها في تقلباتها، في الخسارة والربح في المعاناة والراحة، في الفشل والنجاح، في الهدوء والعصبية في "حبة فوق وحبة تحت"... في "ماشية يا معلم وبنحاول نعدلها"... في المعاناه على الوصول للقمة والمعاناة الاصعب في الحفاظ عليها.. في الفعل ورد الفعل... قال بيت وعيال ومصيف الساحل قال

الحياة.. لازم تتعاش.. واللي يكرهها ما يستاهلهاش

وده يا ناس.. سري.. سري الكبير

جزء من أغنية "أنا عندي سر" لـ بلاك تيما

كلمتنا

2011-09-19T13:29:00.000+02:00

في شهر 5 - 2008.. انضميت لكلمتنا بطريقة غريبة

وفي شهر 2 - 2009 بقيت مساعد مدير تحرير بمفاجأة كانت أجمل حاجة حصلت بالنسبة لي

اتعملت حاجات كتير جدا جوة المكان ده

صاحبت ناس كتير جدا فخور اني سلمت عليهم بس.. من أصغر واحد لأكبر واحد

ربنا قدرني اكون جزء من حياة ناس كتير أتمنى أكون كنت حاجة كويسة في حياتهم ومستقبلهم واديتهم ولو زقة لقدام

المكان الرائع ده ليه فضل كبير عليا... بتمنى النجاح والتوفيق لكل الناس فيه وبتمنى المكان ده يبقى أكبر وأكبر

بحب كل شبر فيه.. كل ذرة تراب لمست ايديا وانا بعمل حاجة جوة

كل نسمة هوا.. دخلت جوة جسمي وانا فيه

بحب كل كلمة اتقالت لي جواه

مبسوط باللي شفته في عيون الناس وانا ماشي

خصوصا مروة عوض

كلمتنا

أهم سلمة في حياتي.. يارب أقدر أكون صورة حلوة ليكي في كل مكان أروحه

انت .. مالك؟!

2011-07-14T00:21:00.001+02:00

انت مالك
حالي... مش زي حالك
ومافيش ما بيننا أي نقطة لـ اللقا
ولا أي حاجة سامحة لك!!
يبقى انت مالك؟

ألبس قصير أو اقص شعري
أكلم حسام أو الاغي خيري
آجي بدري ولا آجي وخري
انت مالك؟

ليه كل كلمة قلتها.. ألاقيك بتسأل عنها؟
ليه كل حاجة بحبها... بتحبها؟
انت... مالك؟
أكون في بالك؟
طب بس لما جريت عليك ورميت سؤالي
مطلعتش انت اللي في خيالي!
يبقى انت.. مالك؟
مش عاجبني برضه حالك..
بتلاحقني في كل حتة!!
وفـ كل سكة باشوف... خيالك
نفسي تيجي تقول لي حاجة
أي حاجة...
قول لي مثلا "هاتي ... حاجة؟"
أو أقول لك أحسن..
هات لي انت أي حاجة
نفسي افهم أي حاجة
نفسي أعرف انت عايز مني ايه؟
نفسي تيجي تقول لي حتى..
وانتي مالك؟

اسلام منسي
5-3-2010

جوة مني

2011-06-29T20:17:00.000+02:00

نقطة سودة في بحر واقف جوة مني

مية راكدة واقفة تروي زرع همي

جوة مني.. كل حاجة اتلخبطت

رحت رامي كل حاجة برة مني

يمكن أهدى..

يمكن أعرف ايه وليه وفين وامتى؟

ورغم ان الدمعة رافضة تنط مني

لسة حاسس ان ضحكي .. جوة مني

اسلام منسي

الاثنين 8-2-2010

بسال عليك

2011-06-06T23:33:00.000+02:00

بسأل عليك من بعيد لـ بعيد
وبتكلم كإني وحيد
هو احنا ليه بعدنا كدة ... ؟
وإيه اللى خلا القلب حديد

إيه اللى كان حاصل
وليه بقى فيه ما بيننا ميت فاصل

بسأل عليك والسؤال بيوجعني
وبمد إيدي بالكلام .... وبٌعدَك يرجعني

بسأل عليك
وكل مرة أقول هطمن
بسأل وبعرف.. ان الحالة بتتحسن
ياريتك فعلا تكون أجمل ...
ياريتك فعلا تكون أحسن
بسأل عليك
وكل يوم يجيني رد ..
مرة حلو .. ومرة سافر ..
ومرة بيته بيتهد !!!!
بسأل عليك
ويوم ردك ده يوم العيد
ياريتك بيه تطمني
ياريتك ...
ده القلق بيزيد ..
بسأل عليك من بعيد لبعيد
وبتكلم كإني وحيد

إسلام منسي
16-9-2008

ليك لوحدك

2011-06-05T23:00:00.001+02:00

الكلام كله طالع ليك لوحدك
والورود اللي في عيوني.. ليك لوحدك
والنجوم اللي في سمايا.. اعتبرهم تحت رجلك
والفؤاد اللي في ضلوعي
والحياة اللي في عيوني
والخطاوي اللي في دروبي
ليك لوحدك
يبقى بس ليه القسوة دي
وقلبك ليه مبقاش مطاوعك

كل ما اكتبلك جواب
ارجع امسح لون كلامي
واطفي نور الأوضة تاني
وارجع أبكي

أصلك انت اللي في حياتي جوة مني
أصلك انت اللي في ملامحي..
غصب عني

وغصب عني
كل ما أمسك قلمي تاني وارجع أكتب
أفتكر لون الكلام اللي هديته لواحدة غيري
وتيجي تكدب..

ارجع اطوي صفحة من بستان حنيني
وامسك الدمعة في عيوني
واقول لها ... إوعي مرة تنزلي
أوعي مرة تقبلي.. تبقي لوحدِك

كل ده كان ليك لوحدك
يبقى بس ليه القسوة ديا
وقلبك ليه لسة مطاوعك

22-2-2010

وبتأمل..

2011-04-04T13:51:00.001+02:00

وبتأمل في نني العين.. يسهرني

ياخدني من الحياة وهمومها

يباعد بيني وبين عقلي..

ويإسرني

وبسرح.. جوة لون شعرك

ألاقي الشط مش موجود

وانا غارق وبيدور على القشة

الاقي ايديكي تندهلي

لكنّي بغرق من اللمسة

طب أعمل ايه

بدوب من نظرة في عيونك

وبتوضى في لون شعرك

واروح غارق في لمسة إيد

واتوه جواكي وانساني

وانا اللي عقلي كان دفتر

تروح منه تواريخي .. وضاعت منه المواعيد

وبرجع تاني أتأمل واقول مالي

يضيع العمر..

وسيرتك تصبح الماضي

وصوتك يصبح الحاضر

وضحكة من شفايفك دول تصير أحلامي والآتي

يا مولاتي.. خديني في القصور عبدك

وانا ملكك..

تقولي عايزة م القمر حتة

أجيبلك نوره في هدية

وتبقى نظرتك ليا بكل العمر

وبحلم قلبي يبقى ليكي البيت

تباتي فيه وتتهني

ويبقى ليكي مملكتك

تنامي جوة شرياني

وتصحي ويا صوت نبضي

وتتوضي.. في دمي الحر

وتستني صلاة الضهر

تجيلك شمس نورها من صفا قلبي

تقولك بينا ندعيله

وتبقي عنيكي قنديله

ويبكي ف كفك المفرود.. وتبقى رموشك مناديله

ينام على قلبك الصافي

يبص لفوق يشوف رمشك

ويتأمل..في نني العين.. يقوم.. ساهر

ويرجع تاني يتوه في النني ويسافر

الواد ده مالوش حل

2011-03-30T16:23:00.001+02:00

وبغلط

2011-03-27T12:20:00.001+02:00

وبغلط... تاني واتسرع

في حب وكلمتين حلوين

ونظرة عين ما بتشبع

وبتكعبل...

في أول دمعتين مساكين

ولبداية الطريق برجع

لكن ايه اللي راح يحصل

باقولها في كل مرة عيوني بيينخِّوا

واقولها وقلبي متدمر

انا اللي بإيدي... برميني

عشان من نظرة بتأثر

وهعمل ايه؟.. وانا اللي قلبي متأصل

يحب يكون شريف دايما

مشاعره تصب بالمرمر

لكن يترد بالحنضل

وده الي الدنيا ماشية عليه

تقع وتقوم .. تقع وتقوم

وعارف اني يوم هاوصل

ده هو معاد ومتقدر

بتحمل

2011-03-27T12:19:00.000+02:00

وبتحمل

وباخد م الغرام سكة ما بتوصلش

وحاسس بإن طريقي مايتوهش

ورافض أفوق من اللي انا فيه

ورافض أقول أنا مقبلش

لا أنا واهم ولا فاهم

ولا عارف هيحصل ايه

لا أنا فايق من التوهة

ولا واعي بإيه اللي انا فيه

كتبت كتير عن الحيرة

وعن قلبي اللي مات م الخوف

كتبت كتير عن القلق اللي موت خيري جوايا

عن صمتي وعن كتبي وعن قلمي

وعن حبي وعن قلبي

وعن كل الحاجات اللي ما بتحسش

وعمري ما التقيت قلبك في وسط الزحمة بينادي

ولا حتى أخدتيني على الهادي

ولا نسيتي كلام قلته في ليل الخوف

ولا اتحَمِلتي يوم تشيليني على كتفك

كما عيل ومستني اللِعَب .. ملهوف

كإنه حرام عليكي تنادي على قلبي

كإنه حرام... تتحملي

استحملي

انا جايلك وشايل كل حب وود

ومحفظتي يادوب ع القد

وبتغدا بنظرة عين

وبتعشى بلمسة يد

انا الحب اللي عمرك يوم ما هاتقابليه

انا القلب الللي عمرك يوم ما تحلمي بيه

ومهما القلم هايكتب لك غرام عاشقين

انا اللي هاكون بلون بيه

ورغم التوهة جوايا لكن لسّاني بتحمل

وبمشيلك طريق ضلمة.. وبكمل

عشان نوصل لشط النور

وانا قلبي ماهوش مسحور

كل مافي الأمر إني بسكت.. وبتحمل

صباح الخير

2011-03-27T12:14:00.003+02:00

من وانا صغير بحلم بشكل شقتي اللي هعيش فيها، شقة كبيرة واسعة، مافيهاش فواصل ولا طرقات ولا إوض، هفصل الحمام بس علشان الخصوصية طبعا، عايز كل حاجة فيها واضحة، والشمس بتدخلها من أول ما بتطلع لغاية ما بتنام في المغرب.. شقة تكون في الدور الأخير من أعلى عمارة في المنطقة اللي هتكون فيها، ايا كانت المنطقة، مبهتمش بالحاجات دي قوي.

بحلم جنب حلمي بالشقة بحد يشاركني فيها، أي حد.. بابا، ماما، أخويا، حبيبتي، بس كان نفسي يبقى ليا أخت.. المهم حد معايا.. يبقى معايا بس علشان منساش الكلام، منساش المشاعر الحلوة أو الوحشة، لإن لو لوحدي فيه كلام مش هستخدمه وبالتأكيد مش هحسه زي "أعمل لي كوباية شاي معاك.. بس اظبط السكر بقى مش كل مرة يبقى دِلِع" أو "انا هنام أحسن تعبان قوي، متنساش تطفي النور".. وياسلام لما تغيب شوية وتلاقيه بيرفع سماعة التليفون يسألك "انت فين؟ ايه اللي أخرك؟ هو انت عايش لوحدك" وساعتها تقول في سرك "ياريتني كنت لوحدي علشان محدش يقعد يقول لي انت فين وبتعمل ايه؟".. كل الكلام ده وغيره هتنساه وهيختفي لو بقيت لوحدك، وهتنسى مشاعر الحب والكره والشوق، هتنسى قيمة كلمة.. "حمد الله على السلامة".

لو بقيت لوحدي مش هبقى مهتم بديكور الشقة ومش هيبقى زي منا بحلم.. أصلي علشان مش هنده على حد وأقول له "هات لي كوباية مية وانت جي".. فا بالتأكيد هحط التلاجة جنب التلفزيون وبالمرة البوتاجاز علشان محدش غيري هيقوم يعمل لي الشاي ولا يظبط لي "عشا" محصلش واشم فيه من ريحته، كنت هاحط السرير كمان جنب الكنبة اللي بقعد عليها وانا بتفرج على التلفزيون.. أصلي هبقى خايف أمشي في الشقة لغاية هناك.

كنت هحط مليون قفل على الباب وكنت هعمل جرس إنذار على الشبابيك والتليفون هيبقى جنب الغسالة اللي محطوطة على شمال التلاجة علشان ماقومش كتير، لو مكانتش حيطان الشقة كلها إزاز كنت هدهن الحيطان اللي لسة موجودة ابيض، علشان كل ما ابص عليها أحس ان لسة فيه خير.

كنت هرسم على الباب صورة واحد واقف وماسك في ايده شنطة علشان أحس ان في حد جي يسأل عليا وبيديني هدية، أصل انا بحب الهدايا قوي، وبحب كمان الزحمة، مبحبش أبقى لوحدي، علشان يبقى فيه عندي أوضة بابا وماما وأوضة أخويا ومطبخ زحمة بالكراكيب، مبحبش أنا التلفزيون يبقى جنب التلاجة ومبحبش التليفون يبقى جنبي علشان مفضلش كسلان قوي كدة، مبحبش أشرب الشاي كل مرة من إيدي لإنه هيبقى بنفس الريحة والذوق.. نفسي أقول لحد "انت ايه اللي أخرك النهاردة، واحس بغيظ وهو بيصحيني برخامة وانا معنديش شغل الصبح.. بس علشان يقول لي صباح الخير

زيي.. زيه

2011-03-27T12:12:00.000+02:00

زيي زيه.. شاب مصري

كل حلمه .. انه يحلم

يمشي ويا الفكرة حر

كل حلمه يبقى حر

قلبه.. حر

كلامه.. حر

عضم جسمه كله حر

زيي زيه..

حلم واحد...

ان مصر تبقى بكر ..

بنت ملهاش أي زي

وان حلمه يبقى قطر

قطر ما بيدهسش حي

حي بينا على الكفاح

حي بينا على الفلاح

حي بينا نقول كفاية لكل ظالم في البلدّ

كل واحد فكر انه في يوم يهد

زيي زيه.. زي كل واحد فيكوا نفسه

ييجي يوم ونقول كفاية

وآدي يوم قولنا كفاية

قلنا لأ

للي ظالم

واللي جاحد

واللي فاسد

واللي قاسي

واللي مش عارف مقاسي

آديه عرف.. إني وقت ما أقول له لأ

تبقى لأ.. زيي زيه

يبقى ليه يكلمني من طرف البيادة

لأ.. مابقتش عادة

زيي زيه

هو إحنا ليه دايما كدة؟

2011-03-27T12:11:00.003+02:00

هو احنا ليه دايماً كدة

متشعبطين في الأعمدة

متبعترين بين ده وده

نيجي نقول الكلمتين

تبدأ تنوح الأفئدة

هو احنا ليه دايمًا كدة

كلمتنا واقفة في حلقنا

والذكرى مش بتهزنا

والعين بتبقى مفتحة

بس مش بتقولنا

هو احنا ليه دايماً كدة

مربوط لسانّا

معطوب كلامنا

والفكرة مش بتحبنا

هو احنا ليه دايماً كدة

ملناش ملامح

والعقل سايح

والهم سارح جنبنا

هو احنا ليه دايماً .... كدة

أصلنا ... نتبرى منه

حلمنا بيغرق كإنه

مركب وتايه مننا

هو احنا ليه دايماً كدة

متوجهين

متهمشين

متزحزين عن حلمنا

متكتفين

متسكتين

متغميين عن بعضنا

متنكدين

متبهدلين

متعصبين على نفسنا

هو احنا ليه دايماً كدة

العنين فضحانا لكن!

قلبنا بقى حرف ساكن

والغرام بقى كدبة لما

حلمنا تاه في الأماكن

14-4-2009

بحبك ومش قلقان

2011-03-27T12:10:00.003+02:00

بحبك ومش قلقان
وراح اعشق عيونك دول بحُرية
ولو حواليكي ميت بركان
هعديهم...
وهاخد ايدك الناعمة في ايدية
ولو حاوطوكي بالأحزان
هاحبك برضه بعنيا
واعديكي...
واخرَج قلبك النونو من حُزنُه
وامِد ضلوعي لجفونك معدية

معاكي..
مش هاعيش الليل لوحديا
خلاص فاتت سنين الوحدة والاحزان
ومات الدمع في عيوني
وماتت ذكريات بايخة
في يوم كانت محاوطاني

بحبك حب مالهوش زي
حب مابيعرفش غير النور
ولو بيني وبينك سور
هعديلك..
وهاطلعلك من القمقم بقلب جسور

يا حب العمر.. ليكي العمر
وليكي الحب ..
وليكي كل ما في الكون

يا أحلى عيون
بحبك ومش قلقان
ومش فاكر من الأيام... غير صوتك
وكلمة قلتيهالي زمان
بحبك.. ومش قلقان

25-7-2009

هذا أنا...الثالثة واحتمال تبقى الأخيرة

2011-03-27T12:05:00.003+02:00

هذا أنا رقم 1

http://islam-mansy.blogspot.com/2011/03/blog-post.html

هذا أنا رقم 2

http://islam-mansy.blogspot.com/2011/03/2.html

ياريت كل اللي يشوف اللينكات دي يقراها قبل ما يكمل ويدخل في النوت دي

ها قريت؟

تقدر تنسى بقى كل كلمة فيها

تقدر تعتبر كل كلمة اتكتبت فيها كدب في كدب

أو أسهل لك.. اعتبرها اتمسحت ومش موجودة تاني

هتسألني ليه؟

هاقولك علشان اكتشفت في الفترة الأخيرة إن أنا معرفنيش

انا طلعت بكدب على نفسي طول الفترة دي - حياتي يعني- انا مش البني آدم اللي في النوتس اللي بكتبها بعنوان هذا أنا

مغرور

أناني

سلبي

عنيف

متكبر

غير مُضحي

كذاب

غير مراع لشعور الآخرين.. تحديدا أقرب الناس ليا

مابسمعش بقى لكلام حد ولا باخد رأي حد.. يعني أصلا ماشي بدماغي وكل اللي حواليا يولعوا بجاز

ماتتفاجئوش.. انا فعلا اكتشفت اني بني آدم مايتعاشرش

نبدأ كدة واحدة واحدة

أبويا وأمي.. أكتر اتنين في الدنيا تعبوا علشان يخلوني بني آدم محترم "ده لو كنت لسة محترم في نظركوا".. باختصار مابسمعش كلامهم.. أو على الأقل بسمعه لكن مابنفذوش.. طول الوقت متدايقين إني مابعملش اللي بيقولوا عليه وبتلكع وعيل ماليش لازمة في البيت وكإن البيت بالنسبة لي لوكاندة.. ومن صغري مابعرفش أرضي أبويا تحديدا.. يمكن أمي طيبة وبعرف أكل دماغها.. لكن أبويا عمري إلا فترات قليلة اللي عرفت أتفق معاه في حاجة

يبقى كدة أبويا وأمي مش طايقيني.. أبقى بني آدم مايتعاشرش ولا لأ.. مش بيقولوا اللي مالوش خير في أهله مالوش خير في الناس.. يبقى أنا بني آدم مايتعاشرش

تاني حاجة

أخويا.. تقريبا مبسألش عليه، وهو مسافر ومتغرب علشان يشيل نفسه ومايتعبش أهله ولا يتعبنا معاه ومستحمل الغربة علشان يعرف يعيش.. وفي المقابل مابيلاقيش مني أقل التقدير إني حتى أتصل بيه كل إسبوع ولو مرة أسأل عليه.. قد إيه أنا زبالة

بزمتكوا هايطيق يعيش معايا إزاي.. يبقى دي تاني حاجة تقول إني ماتعاشرش

تالت حاجة

أصحابي وقرايبي.. ماليش أصحاب دخلوا بيتي كتير أو ليا معاهم زكريات كتير... يتعدوا على الصوابع.. متأكد إنهم بيحبوني قوي وانا كمان والله.. بس بني آدم زي ما الناس بتقول عليا حبوب ومبتسم دايما واللي يشوفني مرة ماينسانيش وكل الكلام اللطيف ده بس تخيلوا حوالي 4 أو 5 من أصحابي اللي دخلوا بيتي قبل كدة.. رغم إن مافيش سبب لده والمناسبات اللي ممكن ييجوا فيها كتيرة

بس تقول ايه.. عيل زبالة ما بيدخلش أصحابه لبيته إلا ناس قليلة وكإنه خايف الناس تعرفه.. بالزمة ده بني آدم الناس تعيش معاه.. ده مابيطيقش حد يدخل له بيته

رابع حاجة

مش مستقر.. دايما بتنقل من حاجة لحاجة ومن موود للتاني بسرعة رهيبة.. يمكن أكتر مود ببقى فيه هو الصمت.. بس عدم الإستقرار سمة أساسية وده بيبان في الشغل وفي كل مكان مابقعدش في أي حتة ومابحبش أي حاجة على طول.. لازم تغيير، لازم على طول ترتيب أي حاجة حوليا يتغير.. مش بس في المكان .. في التصرفات كمان، في اللبس، في المشي، في اليوم.. مينفعش مسار اليوم بتاعي يفضل هو هو لمدة طويلة لازم يتغير.. حد يطيق كدة بالزمة.. أبويا وأمي في البيت بيتجننوا مني. ييجوا يجيبولي لبس مثلا.. ويبقوا عارفين إني بحب كذا، أول ما يجيبوه، أقول لهم شكرا بس مش هلبسه للأسف علشان مبحبوش.. ليه يابني هو إنت مش كنت عايزه من فترة.. معلش دلوقتي بحب كذا

خامس حاجة

أنا طلعت كذاب.. حتى في اللي بكتبه.. يمكن لإني إقتنعت من وانا صغير إن أعذب الشعر أكذبه.. لكن يا راجل في المقالات كمان

بصوا الحاجات دي

فالتضحية في حد ذاتها متعة ... أعتقد ان مجتمعنا إفتقدها في الأونة الأخيرة ..

إن المجتمع الذي يفتقد المتعة من الفضائل .. لا أعتقد أنه يستحق حرية الاستمتاع بنتائجها.

فإنك إن ضحيت لأجل "زميل، صديق، جار، أخ، .... إلخ" وهو لم يشعر بقيمة فعلتك ولم بادلك إياها عند الحاجة في موقف ما فهو اذن لا يستحق من الأساس التمتع بتضحيتك.

الحياة في كل فروعها تبادلات "حب بـ حب" ، "مال بـما يعادله من خدمة او مادة مشتراه" ، "خدمة بـ خدمة" ، "هجوم و دفاع" ، "ارتفاع وانخفاض" وأيضا "تضحية بأخرى".

فلنضحي جميعا ونتنازل بعض الشئ عن كبريائنا وتزمتنا في تعاملنا مع الآخرين ..

بس أنا طلعت مابضحيش ولا حاجة

بصوا دي كمان

فكرة التغيير برضه شايفها تستحق التفكير والتدقييق وابص الاول انا بتغير ليه ولمين وياترى التغيير ده كويس واللا لا فى العموم وياترى اتغير فى الاساس لنفسي واللا اتغير علشان حد معين عاوزني كدة.

انا عن نفسي بنصح دايما بالتغيير للاحسن ايا كان ايه السبب المهم نبقى احسن .... وتبقى فاهم انت بتتغير ازاي وليه؟

بس انا لما حد بيطلب مني أتغير.. في الغالب مابتغيرش

بعد كل اللي قلتهولكوا ده.. مش عارف هتصدقوني ولا لأ في أي حاجة

بس اللي أقدر أقولهولكوا.. ياريت كل واحد يتكلم ويقول أي حاجة.. محتاج لكل حرف هتكتبوه.. محتاج لأي حاجة تقول لي أنا أنهي بني آدم.. أنا مش عارف أي حاجة

وآسف لو كنت طولت عليكوا

هذا أنا...2

2011-03-27T12:02:00.002+02:00

عندما يأخذني الحنين والشوق لبلدي وأنا فيها.. هذا أنا

أحب أن اختار لي صفة الفراشة عندما يخيرونني بين الحيوانات لأختار ما يمثلني

هذا أنا

عندما أكون مثل الطفل في وسط أقراني الذين أحبهم، وأكون مثل الرجل وسط اقاربي، وأكون مثل الكهل وسط الأطفال، وأكون شابا يافعا وقت العمل
هذا أنا

عندما يأخذني الشوق لأقرب الناس إلي وأنا بين يديه .. هذا أنا

عندما أخاف على ومن أبي
عندما أربت على كتف أمي
عندما أؤدي واجبي نحو الاثنين
هذا أنا

عندما أصمت وقت الغضب
عندما أتحدث وقت الهدوء
هذا أنا

حينما أتحول في وقت ما كبراد الشاي
هذا أنا

حينما أعبث بداخلي عن شئ فقد وسط الزحام وأجده
هذا أنا

حينما لا تتأثر طبيعتي بأي شئ
هذا أنا

عندما أكره نفسي وبشدة
عندما ألومها على آداء حماقة أو تصرف أرعن
هذا أنا

عندما أحبني كوني أنا
وكون كل فرد آخر كما هو
هذا أنا

عندما أكون حالم وواقعي هذا أنا

عندما تتحكم فيّ مشاعري وأنا في الأساس عقلاني القرار هذا أنا

حينما أفعل عكس كل ما كتبت
هذا أنا.. لأني لست ملاك
لأني لست إنسان آلي وأكره تحولي إليه
لأني إنسان
هذا أنا

من يراني جليا أو يعرفني منكم
عليه أن يخبرني بما يرى
فما أحلى أن يعرف الإنسان نفسه
وما أروع من أن يضيف إليها ويطور فيها

كل واحد يدخل يقول شايف ايه صح هنا وايه غلط
م الآخر بقى
:D:D:D

اتكتبت 3/10/2009

هذا أنا...1

2011-03-27T12:01:00.002+02:00

عندما يتلاقى صوت سلمى الصباحي برقتها المدهشة واحساسها الفيروزي القوي بمعاني الكلمات
عندما استمع لكلمات علي سلامة التى تدهشني فى كل مرة اسمعها
وحين يلتقي صوت منير بنيل مصر الذي يجري فى دمي
ولما يتجلى الشعور داخلي فى خيلاء يحسد عليها حين سماع مكالمة من صديق او اخ او اخت لي لم تلد ايا منهم امي ليسأل علي
حين اشعر بفراق اخي كل ليلة رغم اننى يظهر علي عكس ذلك
وعندما يفزعني ابي بصوت عالي ليذكرني بشئ نسيت ان افعله
وحين تشعر بي امي وتفهمني من مجرد نظرة عين شاردة او فرحة فى ابتسامتي وتخفي علي هذا الشعور
حين استمتع بالنظر لصور حبيبتي التى دوما تفارقني قبل اي خطوة ايجابية
وعندما اتذكر احلى ذكريات مع اعز اصدقائي
وعندما استمتع بمشاكسات اختى اسراء
وحين تمتعني امى (بنور) بنظراتها التى يظهر منها انها تعرف عني تفاصيل الكلام وانا صامت
وحين تشجيني خالتي ( بنسمات) الكلمات حين اسمع صوتها
وعندما تظهر رجولتي فى الدفاع عن حق اختى الصغيرة الرقيقة
وحين تظهر طفولتي وانا العب مع كل من احب
وعندما يستثيرني شعور اعجاب بمبدع مثل اخي الكبير الناجح
او اختى الاكبر التى اشعر معها بمتعة الحديث الايجابي
انا ...
هو طفل يقطف وردة ويقف فى منتصف الطريق
مواجها كل متاعب الحياة بفطرية اما احسد عليها واما اعاتب عليها لبرائتي فى التعبير
.
دوما كنت اشعر باننى فراشة
واحب دائما هذا الوصف
.
كل من ذكرتهم فى هذه التدوينة احبهم بشدة
ادعوا من الله ان يديم علي نعمة هذا الحب

مكتوبة 6/12/2008

عندما يكون "توفيق" حاضراً

2010-02-02T09:07:00.004+02:00

انه "توفيق" الذي وإن حضر، يحضر معه الفرح والنجاح والانجاز، فوجوده يبعث على الطمأنينة والبسمة، ووجوده يمكن أن يجعل من الضعيف، قوي... ومن المتهالك إلى متشابك... والعكس صحيح، فيمكنه أن يحيل الذئب إلى حيوان أليف، ومن النسور إلى عصافير، ومن المتشابك إلى متهالك".

أتحدث هنا عن "توفيق".. وهو ليس بالغريب أو العجيب أو الجديد، ولكنه "توفيق الله"، ولأ أريد من كلماتي القادمة أن تقلل من أي إنجاز أياً كان، لكن إنها اعتراف بوجود القدر...

فأنا مقتنع أنه "من جد وجد"، ولن يغب التوفيق عنك في موقف إلا ولله حكمة في ذلك، فإذا إجتهدت وأديت كل المطلوب منك وفي النهاية لم يكن النجاح صديقك، إذن فهي مشيئة الله، وان حالفك النجاح فهي أيضاً مشيئة الله.

فعلى مدار ثلاث بطولات أمم إفريقية مصر هي البطل، وحالفها التوفيق في الثلاث بطولات، ولكن!!

هل مصر بالفريق الضعيف المتهالك الذي يمكن وبسهولة اختراقه أو حتى فريق متوسط وحصوله على بطولة هو انجاز لا يمكن أن يتكرر إلا في "المشمش"..

أعتقد ان الاجابة هي "لا"...

فدعونا نعطي لكل ذي حق حقه:

حسن شحاتة اجتهد منذ قدومه وهو فعلا من المدربين القادرين على التحكم في سير المباراة، قوي الشخصية، ويعرف امكانياته ويتعامل في حدودها، وهذه الخلطة يمكنك أن تطبقها على كل مدربي العالم الناجحين وستعرف النتيجة حتماً.

اللاعبين، اجتهدوا على مدار الثلاث بطولات باختلافهم وباختلاف الأسماء التي شاركت وحتى الاحتياطيون، فحالة الحب التي نراها بين مجموعة اللاعبين في كل بطولة هي ما تجعل من الأساسي والاحتياطي خليطاً واحدا متناسق القوام، فحينما تخرج جزء وتضع الآخر لا يختلف الطعم ولكن يمكن أن يختلف الاسلوب حسب سير اللقاء، فهذا هو ما صنعه شحاتة وأصبحت تخاف منه جميع الفرق "الجماعية في الآداء والتعاون بينهم"

أكتب هذا المقال ولا أنظر نحو اتحاد الكرة أو القضايا الفرعية التي تخص اختيارات اللاعبين.. فإتحاد الكرة أصبح عبارة عن "زير" إمتلأ بالمياه الراكدة.. ومن الصعب أن تخرج منه بكوب مياه نقي أو حتى تشير على نقطة فيه غير "عفنة".. اللهم إلا "هاني أبو ريدة" وحتى هذا الرجل أصبحت أتشكك فيه.

أما اختيارات اللاعبين فهي وان عابها شئ فهي مسئولية جهاز فني لا يحق لأي فرد في العالم الرجوع لقراراته.

على وجه آخر أود ذكر عيب نضح على السطح في كل هذه السنوات الستة والتي تمثل عُمر ولاية حسن شحاتة على الجهاز الفني، ألا وهي ان المنتخب لا يتألق إلا في البطولات المجمعة.. فمشكلة اللاعب المصري أنه لا يستطيع ان يفرق بين اسلوبه في النادي واسلوبه في المنتخب إلا لو كان تركيزه ينصب في المنتخب فقط أو في النادي فقط، اللهم إلا عددا قليلا من لاعبي مصر، وهو العيب الذي لا يمكن لشحاتة ولا غيره بمرد التمرد عليه أو الإغفال عنه.. فهو عيب أصيل في منظومة احترافية يشوبها الإهمال.

فكل هذه المنظومة لو تكاملت وغاب عنها "توفيق" أيضا لن تنجح... ودعونا نلقِ نظرة سريعة على مجموعة نتائج نجح فيها "توفيق"..

ففي بطولة أنجولا 2010 ... الهدف الثاني لأحمد حسن في نيجيريا، الهدف الأول في موزمبيق، الهدف الثاني في الكاميرون، خطأ حليش في تشتيت الكرة لتصل لمتعب ومن ثم لضربة جزاء وطرد مستحق... فكل هذه نتائج طبيعية لتوفيق الله.. ولكل مجتهدٍ نصيب.

إسلام منسي

هو انا بقيت كدة ليه؟

2009-11-17T19:26:00.002+02:00

كان بابا وانا صغير بيقولي خد صاحبك على عيبه، وكان يقصد بكدة ان ما دمت رضيت بيه صاحبك وهو فيه عيب معين ممكن تتجنب التعامل معاه فى العيب ده بس متخسروش.

ده لانى زمان كنت لما بلاقي واحد صاحبي مثلا بيعاكس بنت او بيشرب سجاير او بيعمل اي حاجة مش بتعجبني كنت ببعد عنه واقاطعه تقريبا... ونصيحة والدي دي خلتني اعرف اتعامل مع اصحابي واعرف اقرب منهم... وبدات بقى احاول اغير فيهم الحاجات دي وفيه منهم اللى كان بيقبل النصايح وفيه منهم اللى كان بيقولي انا كدة ومش هتغير وكنت برضى بيه زي ما هو برضه وبكمل حياتي معاه .

ولكن فكرة التغيير فضلت برضه فى دماغي ياترى لو قابلت حبيبتي وكان في حاجة فى تصرفاتها او فى طبيعتها مش عجباني لازم تتغير واللا برضه احبها كدة زي ما هيا

فيه فى الموضوع ده شوية نظريات بقى زي نظرية (( انا زي منا ومش هتغير علشان اي بني ادم )) ودي نظرية الواثق جدا فى نفسه، او اللى حاول يتغير قبل كدة علشان حد واتصدم فيه، فا قرر انه ميتغيرش نهائي علشان اي حد، ولو قلتله طبيعي اننا نحاول نرضي اللى بنحبهم، هتلاقي الاجابة فى وشك على طول "هو لما الحد ده حبني مش حبني زي منا كدة واللا كان شايفني حد تاني" ...

وفيه نظرية (( علشان حبيبي اعمل اي حاجة )) ودي اصحابها بيبقوا ناس طيبين وغالبا بتبقى تجاربهم قليلة حبتين وجواهم اتجاه لحب اللى حواليهم ومحاولة ارضائهم باي شكل.

وفيه بقى نظرية جبارة اصحابها واخدين مبدأ فظيع تحس انهم تجار مخدرات مثلا والنظرية دي اسمها ((هات وخد)) يعني م الاخر كدة لو هو مش موافق يتغير علشاني انا مش هتغير علشانه والحياه بطبيعتها هات وخد لازم الكل يقدم تنازلات مش واحد بس.. بس بيعيب الطريقة دي ان صاحبها مستني اللي قدامه يتغير في الأول، وللأسف لو كل واحجد استنى التاني يتغير الأول.. مافيش حاجة هتتغير.

بيني وبينكو كدة فيه فى كل نظرية من النظريات جزء سليم شويتين بس فكرة التغيير برضه شايفها تستحق التفكير والتدقييق وابص الاول انا بتغير ليه ولمين وياترى التغيير ده كويس واللا لا فى العموم وياترى اتغير فى الاساس لنفسي واللا اتغير علشان حد معين عاوزني كدة.

انا عن نفسي بنصح دايما بالتغيير للاحسن ايا كان ايه السبب المهم نبقى احسن .... وحاول تتغير

مبحبكيش!!!

2009-07-25T13:46:00.003+03:00

مبحبكيش!!!
مقدرش أقول مبحبكيش
مقدرش أكره لون عنيكي
ولا كلمة توصف حبي ليكي
مقدرش من غيرك أعيش

مبحبكيش!!!
مين ده اللي يقدر يوم يقولها
أو حتى يعرف معنى قولها
أو يوم يفكر إنه من غيرك يعيش

مبحبكيش!!!
فكرة مش على بالي خالص
ولو هاموت من غيرها
أحسن لي أموت.. بناقص

مبحبكيش!!!
مقدرش أقول مبحبكيش
مقدرش حتى في يوم أقولها
أو في يوم أحط فتلة في طرف نولها

مقدرش أتخيل حروف الكلمة ديا
أو حتى أجرح بيها ودنك
وابقى استاذ للأزية

مبحبكيش!!!
مقدرش أقول مبحبكيش

اسلام منسي 20-7-2009

الدوري المصري .... اشارة مرور

2009-05-25T18:46:00.003+03:00

الفترة دي اتعلمت طريقة جميلة جدا علشان اواجه بيها اي ظروف او تحديات تواجهني في حياتي، وهي اسمها "اشارة المرور" وللي مش عارف الطريقة، هي المقصود بيها انك تتعامل مع الموقف بإشارة المرور "الأحمر ثم الأصفر ثم الأخضر" وبطبيعة اشارة المرور الأحمر يعني تقف .. والأصفر يعني تفكر "تستعد" والأخضر يعني تاخد ردة الفعل "تتحرك"، ولقيت ان اشارة المرور دي هي أصلح تعليق على أهم دوري شفته لغاية دلوقتي.

الأحمر(حاجة لازم نقف قدامها)
- التحكيم ... بجد أكتر حاجة نرفزتني في الموسم ده .. واضح جدا صعوبة ماتشات كتير بس معتقدش ان فيه تحكيم بالمنظر ده في اي دوري في العالم حتى لو كان كل ماتشاته مصيرية
- اتحاد الكورة ... بجد واضح جدا جدا القرارات السريعة اللي بتثبت وجود تخبط اداري فظيع ... يعني ايه فجأة كدة نطبق قائمة الـ25 لاعب ونطبق دخول 5 لاعبين من تحت السن من الموسم الجاي.
- اتحاد الكورة تاني .. بس المرة دي سوء تطبيق الأجندة الدولية واللي وضح جدا في القرار الأخير في قرار معسكر المنتخب في عمان ومن قبلها في سرعة نهاية كاس مصر.
- انتخابات الأندية... اثبت المجلس القومي للرياضة انه فشل فشل زريع في ادارة انتخابات اي مركز شباب مش نادي كبير زي الزمالك.
- جمهور الزمالك... رغم اني بحب كل اصحابي الزملكاوية بسبب خفة دمهم ورجولتهم الا اني بختلف معاهم في اسلوب تفكيرهم علشان النادي، بجد الناس دي عاطفيين زيادة عن اللزوم، انا شايف انهم لازم يفكروا كتير قوي ويحسبوها جامد، مين الأصلح لإدارة النادي من المرشحين لمجلس ادارته، ومش مع كل فرقعة لأي لاعب في ماتش او حتى اتنين يمجدوه ويبقى هو المنقذ علشان هما كدة اللي بيدفنوه بإيديهم... ياريت بس يفكروا شوية ويلغوا قلبهم حبتين في التفكير.
- الصحافة الرياضية... تقريبا دي لازم تاخد الاشارة الحمرا على طول الخط لإنها اصبحت احسن وسيلة للإيقاع بين اللاعبين واثارة الشغب وسط الجمهور وتسخين الرأي العام في أي قضية. يارب ارحمنا...

الأصفر (حاجة محتاجين نفكر فيها كويس قوي)
- كيفية اعطاء الفرصة للشباب في الأندية... خطوة لازم اي نادي يفكر فيها كويس جدا يعني انا لا عاجبني ارتفاع عمر لاعبي الأهلي وعدم الدفع بالناشئين بنسب معقولة ولا موافق على التزام الاسماعيلي الدائم (رغم ظروفه) ببيع وشراء اللاعبين صغار السن -نفسي يحافظ شوية عليهم-.
- تنظيم مباريات الدوري وأجندة الأندية
- من أهم المواقف اللي محتاجة تفكير(مسئولين الأندية واتحاد الكورة بيبقوا بنفسهم المحللين بتوع مباريات الدوري والأندية) طبعا طبعا وأكيد هايكون فيه نسبة من عدم المصداقية والتعاطف.
- ازاي بقى اللي بيطلعوا في الفضائيات يناقشوا مشاكل الكورة في مصر هما أصلا اللي بيديروها أعتقد الموضوع ده محتاج وقفة وتفكير كبير قووووووووووي.
- حراس المرمى في مصر ... موضوع كبير محتاج وقفة
- ظهيري الجنب في مصر ... معتقدش ان المشكلة دي هاتتحل الا لو لعبنا 4-4-2 .
- اعتقد محتاجين ندي اهتمام أكبر بالناشئين واحترافهم من صغرهم.

الأخضر (حاجة بتحصل ومحتاجين انها تفضل وتتقدم كمان)
- أندية الشركات والجيش والشرطة ونجاحها... بجد انا فخور جدا بـ إنبي وبتروجت وحرس الحدود والجونة والداخلية والشرطة والجيش... استقرار وتقدم بخطى ثابتة وتنظيم على أعلى مستوى... ينقصهم فقط الشعبية ودي مش هاتحصل الا لو لعبو الاندية دي بإسم المحافظات التابعين ليها وعلشان كدة انا بحيي جدا جدا بتروجت انه أخد من السويس مقر ليه، وكمان الجونة متأكد من نجاحها الموسم الجاي بسبب ادارتها وجمهورها... يارب يستمروا ويكتسبوا شعبية يوم بعد التاني.
- التنافس القوي لآخر لحظة ... نفسي يفضل مستمر هو وروح الهجوم المنتشرة في الفرق كلها.
- التحول لدوري المحترفين ( بس يارب يتطبق كويس بقى )
- تطبيق 4-4-2 واللي اثبتت نجاح منقطع النظير في تجربة حرس الحدود السنة دي.
- محاولة جادة لتطبيق نظام الثواب والعقاب في جميع الاندية الصغير منها والكبير.
- الاعتماد على المدربين الشبان المنتشر اعتقد انها ظاهرة قوية وهي اللي اضفت روح الهجوم والاثارة على المباريات.

الدوري المصري السنة دي في مجمله خطوة كبيرة نحو التحول للاحتراف وده لإنه أظهر نقط كتير جدا غايبة عننا ومش موجودة ومحتاجينها وهو ده الاساس لأي حد بيحاول يتقدم وهو انه يعرف اخطاءه ونقط ضعفه وايجابياته... ان شاء الله اللي جاي أحسن.

اسلام منسي

ليه يا قلبي كل يوم بتحب واحدة

2009-05-20T22:09:00.001+03:00

مبقاش عندنا مانع اننا نعرف كل يوم بنت جديدة، ما دام ده بيزود قاعدة بيانات المزز عندك، علشان تقدر تتفشخر بيها قدام اصحابك وكدة، وتقولهم انا عندي يجي 100 بنت على الفيس بوك، او على الايميل، او مثلا عندك على التليفون ارقام تليفونات بنات قد ايه، او كام واحدة بيتصلو بيك.

مبقتش فارقة معاك تبقى بتحب، او ما بتحبش، المهم لو بنت جت فى طريقك ماتقولش للخير ابعد يا شيطان، لا... ده انت بتجيبه يقعد ياكل معاك، دلوقتي اي بنت بتضحكلك مبقاش ينفع تعديها بالساهل كدة... لا، لازم تضحكلها وتبصلها وتبصلك لغاية ما تجيب معاها م الاخر، وتظبط الاداء (مصطلح عرفته من صديق ... هههههههه).

سألت نفسي، هو ليه دايما عندنا شغف باننا نعرف بنات كتير، ولو بنت جت قدامي جميلة او مش جميلة قوي... يعني معقولة، مينفعش تفوت من تحت ايدي كدة (ده طبعا على اساس انى واد أمور ومقطع السمكة حتى ذيلها ..... اعرب ما تحته خط) وبصراحة ملقتش اجابة، يمكن لانى بحب البنات والقعدة معاهم، مع انى مقتنع ان وقفة الراجل بميت بنت بس للاسف فيه مضاد بيقولك (تيجي البنت يغور الراجل .... محمد هنيدي) طب اعمل ايه، سالت اصحابي ومعارفي ومنهم بنات طبعا، لقيت واحدة بتقولي "ده فراغ" قلتلها "ازاي يعني علشان انا مش لاقي حاجة اعملها" قالتلى "لا، فراغ عاطفي" قلتلها "طب ماهو انا بحب واحدة فعلا يبقى فين الفراغ العاطفي" قالتلي "تبقى فراغة عين" قلتلها "لا... انا مقصدش من معرفتي بيها كدة انا بتعرف عليها صداقة يعني" قالتلى "تبقى البنت اللى بتنحبها مش مدياك كل حاجة" وبعدها قفلت السكة وسألت واحد تاني قاللى "يابنى احنا منعرفش نعيش من غير بنات" قلتله "على اساس ان هما الميا واحنا ارض زراعية" قاللى "لا، علشان هما حوالينا فى كل حتة وبصراحة اوووز اوووز"،روحت قافل فى وشه وسالت واحد تاني عاقل ورزين وليه تجاربه فى الموضوع ده "قاللى يابني هي كدة قاعدة... بنت ضحكتلك، لازم تضحكلها، حسيت انك ممكن تظبطها، تبقى غبي لو مظبطهاش حتى لو ناوي تنفضلها بعد كدة".

بس بصراحة، قابلت بنى ادمين مش كدة خالص، بالعكس بيرفضوا الموضوع ده، وبيبقى الشخص ده قدر يلاقي الحب الحقيقي فى حياته، والبنت بصراحة مش مخلياه يبص بره، وهو كمان راضي ومقتنع، وقدر يبعد عن البنات اللى كان بيتعرف عليهم من باب الاخوة، ومنهم اللى بقوا اصحاب لحبيبته، ومن الاخر بقى، الموضوع بيبقى مجموعة ظروف نفسيه وعملية وبيئية، يعني الواحد لازم يبص للبيئة المحيطة بكل واحد، وعقليته هو ايه ، وعقلية اللى حواليه، وتصرفاتهم ومبادئهم وكل ده ليه تأثير كبير فى الموضوع، وبيفرق طبعا بين واحد والتاني حتى لو كانو من نفس العيلة، لان لكل واحد رأي وعقل ومبادئ ......

اسلام منسي

قهوة سادة ... مُرة

2009-04-28T11:26:00.002+03:00

لأول مرة أشرب قهوة بدون سكر (سادة) وأستمتع!، لأول مرة في حياتي أبكي وأنا أضحك، لأول مرة لا أجد ما يعبر عن ما أنا فيه من شعور، ماذا حدث؟ ... هل اختفت الكلمات أم ما أشعر به أكبر من أن أعبر به بمجرد أحرف وجمل ومعاني تخيطها مشاعري وأفكاري لتصنع حالة بكاملها أرتديها الآن، فذهني لا يستطيع التخلي عن هذه المشاهد التي تعبر عن مجتمع بأسره.

أجمع جميع الفنانين الكبار والجرائد والمواقع وكل من شاهد هذا العرض على أنه الأقوى، والأنجح في هذا العام ومنهم من أفرط في تعبيراته .. كل هذا كنت اقرأه وأشاهده وانا أعتقد انه من الممكن ان يكون كذلك، أن يكون عرضاً مسرحياً قوياً معبراً ، لا أختلف معهم في شئ، ولكن هذا كله قبل مشاهدتي له... بل إن التعبير الأقوى هنا هو معايشتهم لي في حالتهم، بل الأقوى أن أقول تصويرهم لحالة مجتمعنا، بل الأقوى أنهم عبروا عني وعن والدي وعن أقاربي وعن جيراني وأصدقائي و.... إلخ.

من بداية المسرحية ودخول الموسيقى التصويرية لها والتي تعبر جداً وحدها عن واقعنا وكأنها تربت على كتفك وتخبرك أنك هنا لا لتضحك وانما لتتعرف على واقع، ثم البداية ومشهد البكاء الذي أبكاني شخصياً من داخلي على كل تراثنا وعلى تاريخنا، وقوة التعبير عن مشاكلنا من تدهور اللغة والفن والمعمار والترابط العائلي مروراً بطابور "العيش" وبيع أنفسنا وتاريخنا ونظرة على من يهربوا للخارج بطرق غير مشروعة ومشكلة العنوسة وصعوبة الزواج وارتفاع الاسعار والحب الزائف وانهيار القيم والدين و ... و .... .

لم أستطع منذ البداية أن أصفق إلا في مرتين ولم ابتسم الا قليلاً رغم ان الكثير من حولي بدأت ضحكاتهم تتعالى مبدين إعجابهم بالمشهد الساخر أو بالممثل الفلاني، لكن كل هذا لم يكن في إهتمامي، قدر إهتمامي بالنظر على حال أمُة، أصبحت أمَة للمال، للفساد، للضياع، للإهمال، لنكران الجميل، كيف حدث هذا التحول، من أم كلثوم التي تلقبت بـ "الست" إلى "الست" الأغنية الشعبية التي يتغنى بها السكارى، من المعمار التاريخي الذي يعطيك صورة للبلد من مجرد نظرة للمبنى من الخارج أو للمنطقة ككل إلى مجرد مبنى مماثل لأي مبنى آخر .. غير معبر وبدون أي ذوق فني.

استطاع كل من في العمل أن يجعلني أبكي على حالنا، إستطاع أن يصور لنا الوضع ويضعه في معرض للوحات أمام أعين المتفرجين ليشاهدوا أنفسهم فيه، تخيل أن يرسمك شخص دون أن يراك...!!! هذا ما فعله خالد جلال، استطاع بالكلمات والإضاءة واختياره للفواصل الغنائية والبدلة السوداء ودموع الممثلين والاضاءة والموسيقى والأفكار التي يتجلى فيها إبداع كل من شارك في هذا العمل أن يرغمك على الإستمتاع بأمَّر كوب قهوة سادة على وجه الأرض.

اسلام منسي
20-4-2009

كيف جعلتني أحبها يا تهامي؟

2009-03-31T20:54:00.002+02:00

هيروبولس

منذ زمن بعيد وأنا كمواطن مصري أكن كره غريب لهذه البلدة الصغيرة على القناه على الرغم من معرفتي بقيمتها اثناء العدوان وحرب أكتوبر وتاريخها الحافل منذ نشأتها، ولكن لم يشفع كل هذا في ارثاء قواعد حبها في قلبي.

وهنا يأتي الدور البديع للأدب في هذا الزمن، جاءت رواية "هيروبولس" للكاتب محمد التهامي، لتبعث روائح الحب لبلدته العزيزة "هيروبولس" كما يود ان يطلق عليها طوال روايته.

كيف طور هو شعوري نحو هذه البلدة من مجرد معرفة لقيمتها لحب وعشق؟ اقسم لكم انه حتى هذه اللحظة لا أدري سبباً لتحولي والذي هو من الصعب جداً.

تهامي الرائع ، إستطاع منذ الأسطر الأولى للرواية أن يجذبني بطريقته المتفردة في سرد مواصفات الأشخاص والأماكن والبيئة المحيطة التي تؤثر فيهم، فأول سؤال طرق باب مخيلتي أثناء قراءتي كان (الناس اللي بالمواصفات دي والبيئة دي هتعمل إيه بعد كدة .. وياترى هيفضلوا كدة قدامي بنفس الصورة واللا هيحصل تطورات في الشخوص والأحداث هتجذبني) ... هذا وبالأخص أني لست بالقارئ الجيد للروايات عموماً.

وبالفعل أخذني عبر روايته لأحداث متنقلة أحياناً بسرعة تجعلك تشعر وكأنك تلهث ورائه في فيلم "أكشن" وأحيان أخرى تشعر بالرقة والنعومة وهدوء البال وصفاءه، وتنوعت الأحداث ومعها كان يتنوع إسلوبه الجذاب في الكتابة والتشويق والإمتاع، وكان أكثر ما جذبني للرواية هو التنقل السهل والسلس عبر الزمن وكأنه يأخذني عبر ممر ملئ بالصور من كل الأزمان ويقف معي ليشرحها ويفسرها بإسلوب مشوق وممتع ومفصل.

"هيروبولس" رواية تجمع بداخلها نبض شعب بأكمله وليس مجرد حالة لعائلة داخل محافظة متفردة من نوعها، فهذه هي عائلات مصر وهذه أحداث مصرية حقيقية، "هيروبولس" جمعت في داخلها الرومنسية والتاريخ والجغرافيا والعلاقات الإنسانية والسياسة والألم والتفاؤل والفرح والكآبة.

"هيروبولس" بحق رواية تستحق الإحترام .. لكاتب أتعلم منه كيف أن أكون محترما في زمن ندرت فيه هذه الصفة.

إسلام منسي