கிறிஸ்தவ வாலிபர் உலகம்

இயேசு நூறு மடங்கு ஆசீர்வாதம் தருகிறவர்

2022-08-08T22:31:00.001-07:00

ஈசாக்கு தேவனுக்கு கீழ்படிந்து தேவன் சொன்ன தேசத்துக்கு சென்ற போது தேவன் அவன் கையின் பிரயாசத்தை ஆசீர்வதித்தார் அவனை துரத்திவிட்ட ராஜா அவனை தேடி வந்து அவனோடு உடன்படிக்கை பண்ணி கொண்டான், அவன் ஜசுவரியவனாகி வரவர விருத்தியடைந்தான், மகா பெரியவனானான் என்று வேதம் சொல்லுகிறது, ( ஐசுவரியமும் கனமும் உம்மாலே வருகிறது, தேவரீர் எல்லாவற்றையும் ஆளுகிறவர், உம்முடைய கரத்திலே சத்துவமும் வல்லமையும் உண்டு, எவரையும் மேன்மைப்படுத்தவும் பலப்படுத்தவும் உம்முடைய கரத்தினால் ஆகும்.

1 நாளாகமம் 29:12.கர்த்தர் தரித்திரம் அடையச்செய்கிறவரும்,ஐசுவரியம் அடையப்பண்ணுகிறவருமா யிருக்கிறார். அவர் தாழ்த்துகிறவரும் உயர்த்துகிறவருமானவர்.1 சாமுவேல் 2:7)

இன்றைக்கு சிலர் புதிய உடன்படிக்கையில் வெறும் ஆவிக்குறிய ஆசீர்வாதம் மாத்திரம் தான் உண்டு என்று தவறாக வாதிடுவார்கள் இப்படி சொல்கிறவர்கள் ஜசுவரியவான்களாக இருப்பார்கள்.ஆனால் தேவனுடைய ராஜ்ஜியத்தை முதலாவது தேடுகிறவர்களுக்கு எல்லாம் கூட கொடுக்கப்படும் என்று இயேசு கிறிஸ்து சொன்னார். ஆனால் இன்றைக்கு உலக ஆசீர்வாதங்களுக்காக மாத்திரமே அநேகர் தேவனை தேடுகிறார்கள். தேவனுக்கு காணிக்கை கொடுக்கிறார்கள் ஆனால் தங்கள் இருதயத்தை அவருக்கு கொடுப்பதில்லை. இப்படி இம்மைக்கான உலக ஆசீர்வாதத்தை மாத்திரம் தேடுவீர்களென்றால் எல்லா மனிதர்களை காட்டிலும் பரிதபிக்கபட்டவர்களாக ஆவீர்கள் என்று வேதம் நம்மை எச்சரிக்கிறது. தேவன் ஈசாக்கை பார்த்து நான் உன்னோடே கூட இருந்து என் ஊழியக்காரனாகிய ஆபிரகாமினிமித்தம் உன்னை ஆசீர்வதித்து உன் சந்ததியை பெருக பண்ணுவேன் என்றார்.ஆபிரகாம் தேவனுக்கு கீழ்படிந்து தேவனுடைய நீதியையும் நியாயத்தையும் கைக்கொண்டபடியினாலே தேவன் அவன் சந்ததியை ஆசீர்வதித்தார். (ஆபிரகாம் என் சொல்லுக்குக் கீழ்ப்படிந்து, என் விதிகளையும், என் கற்பனைகளையும்என் நியமங்களையும், என் பிரமாணங்களையும் கைக்கொண்டபடியினால், நான் உன் சந்ததியை வானத்தின் நட்சத்திரங்களைப்போலப் பெருகப்பண்ணி, உன் சந்ததிக்கு இந்தத் தேசங்கள் யாவையும் தருவேன். உன் சந்ததிக்குள் பூமியிலுள்ள சகல ஜாதிகளும் ஆசீர்வதிக்கப்படும் என்றார். ஆதியாகமம் 26:4,5)

( கர்த்தர் ஆபிரகாமுக்குச் சொன்னதை நிறைவேற்றும்படியாய் அவன் தன் பிள்ளைகளுக்கும், தனக்குப் பின்வரும் தன் வீட்டாருக்கும்: நீங்கள் நீதியையும் நியாயத்தையும் செய்து, கர்த்தருடைய வழியைக் காத்து நடவுங்கள் என்று கட்டளையிடுவான் என்பதை அறிந்திருக்கிறேன் என்றார். ஆதியாகமம் 18:19)

இன்றைக்கு பிள்ளைகள் ஆசீர்வதிக்கபடாததற்க்கு முக்கிய காரணம் பிதாக்கள் செய்யும் பாவம்.இவர்களும் சத்தியத்தில் நடப்பதில்லை தங்கள் பிள்ளைகளையும் சத்தியத்தில் நடத்துவதில்லை.பக்தியுள்ள சந்ததியை உருவாக்க தேவன் நமக்கு பிள்ளைகளை தந்திருக்கிறார். இன்றைக்கு சத்தியத்தை அறிந்து கொண்டு துணிகரமாக பாவம் செய்து கொண்டிருப்பவர்களின் சந்ததிகளின் வாழ்க்கையில் நியாயத்தீர்ப்பு வெளிப்படுகிறது. தேவன் பிதாக்களுடைய பாவத்தை பிள்ளைகளுடைய மடியில் சரிகட்டுகிறார் என்று வேதம் எச்சரிக்கிறது.எனவே பிதாக்கள் நிதியையும் நியாயத்தையும் காத்து நடக்கும் போது பிள்ளைகள் ஆசீர்வதிக்கப்படுவார்கள்.அன்றைக்கு தாழ்மையில் இருந்த நேரத்தில் தேவனை தேடினவர்கள் தேவன் அவர்களை ஆசீர்வதித்து உயர்த்திய போது தேவனை தேவனை தேடுவதை விட்டு விட்டு பணத்தை நம்பி அதன் மேல் நம்பிக்கை வைத்து தேவனை மறந்து போனார்கள்.இன்றைக்கு பணமும் ஜசுவரியமும் வந்தவுடன் எல்லாம் நான் சம்பாதித்தது என்று பெருமையினால் அநேக காரியங்களை செய்கிறார்கள்.ஜீவனத்தின் பெருமை புல்லின் பூவை போல அழிந்துவிடும் என்று வேதம் நம்மை எச்சரிக்கிறது.(என் சாமர்த்தியமும் என் கைப்பெலனும் இந்த ஐசுவரியத்தை எனக்குச் சம்பாதித்தது என்று நீ உன் இருதயத்தில் சொல்லிக்கொள்ளாமலும் இருக்க எச்சரிக்கையாயிரு.உபாகமம் 8:17)

என் ஜனங்கள் இரண்டு தீமைகளைச் செய்தார்கள், ஜீவத்தண்ணீர் ஊற்றாகிய என்னை விட்டுவிட்டார்கள், தண்ணீர் நிற்காத தொட்டிகளாகிய வெடிப்புள்ள தொட்டிகளைத் தங்களுக்கு வெட்டிக் கொண்டார்கள். எரேமியா 2:13)என்று தேவன் சொல்கிறார்.

இன்றைக்கு பணமும் பொருளும் வந்தவுடன் தேவனை விட்டு விலகி துணிகரமாக உலக ஆசை இச்சைகளின் படி வாழ்கிறவர்களின் பிள்ளைகளுடையவாழ்க்கையில் ஆசீர்வாதங்களுக்கு பதிலாக சாபங்களும் குறைவுகளும் நிழலிடுகிறது.உன் தேவனுடைய வேதத்தை மறந்தாய், ஆகையால் நானும் உன் பிள்ளைகளை மறந்து விடுவேன்.(ஓசியா 4-6.)என்று தேவன் எச்சரிக்கிறார்.

பிரியமானவர்களே உங்கள் பிள்ளைகளின் ஆசீர்வாதம் உங்கள் கைகளில் தான் இருக்கிறது எனவே சத்தியத்தை கேட்கிறவர்களாக இராமல் அதன்படி நடக்கிறவர்களாக ஜாக்கிரதையாக இருங்கள்.இன்றைக்கு நீங்களும் உங்கள் சந்ததிகளும் ஆசீர்வதிக்கப்படும் படிக்கு தேவனுக்கு பிரியமில்லாத உங்கள் முரட்டாட்டங்களிலிருந்து மனம் திரும்புங்கள். பிறரை ஏமாற்றி அபகரித்த பணத்தை சகேயு திரும்ப கொடுத்தது போல உடனடியாக திரும்ப கொடுங்கள். இன்றைக்கு உங்களை நிதானித்து அறியுங்கள்,உங்கள் தொழிலில் உண்மையுள்ளவர்களாக இருங்கள். பண விஷயங்களில் நேர்மையுள்ளவர்களாக இருங்கள், நீங்கள் சம்பாதித்த பணம் மற்றும் சொத்துகளில் நம்பிக்கை வைக்காதீர்கள். மனித புயபலத்தை நம்புகிறவன் சபிக்கப்பட்டவன் என்று வேதம் சொல்கிறது. உன்னை போல பிறனை நேசி, உனக்கு தீமை செய்கிறவனுக்கு நன்மை செய் என்று இயேசு கிறிஸ்து சொன்ன சத்தியத்துக்கு விரோதமாக பிறனுக்கு அநியாயம் செய்யாதீர்கள், நீங்கள் செய்யும் அநியாயத்தின் விளைவுகள் உங்கள் வாழ்க்கையிலும் உங்கள் பிள்ளைகள் வாழ்க்கையிலும் தொடர்ந்து வரும்.நீங்கள் எதை விதைக்கிறீர்களோ அதையே அறுப்பீர்கள், பிறருக்கு நியாயக்கேடு செய்தால் உங்களுக்கும் அப்படியே செய்யப்படும்.நீங்கள் செய்யும் எல்லா காரியங்களிலும் உண்மையுள்ளவர்களாகவும் நீதியுள்ளவர்களாகவும் பரிசுத்தமுள்ளவர்களாக இருக்கும் போது ஆபிரகாமின் நீதியினிமித்தம் ஈசாக்கு ஆசீர்வதிக்கப்பட்டது போல உங்கள் பிள்ளைகளும் ஆசீர்வதிக்கப்படுவார்கள்.தாழ்வில் நம்மை நினைத்தவரை துதியுங்கள்.

அதாவது உங்களை ஒன்றுமில்லாமையிலிருந்து உயர்த்தினவரை எக்காலத்திலும் முழு இருதயத்தோடு அன்பு கூறுங்கள். ஒருவன் என் மேல் அன்பாயிருந்தால் என் கற்பனைகளுக்கு கீழ்ப்படிவான் என்று இயேசு சொன்னார். இந்த உலகத்தில் தேவன் உங்களுக்கு கொடுத்த நாள்களில் நன்மை செய்து உங்கள் பிள்ளைகளுக்கு ஆசீர்வாதத்தை சேர்த்து வையுங்கள். (தீமைக்குத் தீமையையும், உதாசனத்துக்கு உதாசனத்தையும் சரிக்கட்டாமல், அதற்குப் பதிலாக, நீங்கள் ஆசீர்வாதத்தைச் சுதந்தரித்துக்கொள்ளும்படி அழைக்கப்பட்டவர்களென்று அறிந்து, ஆசீர்வதியுங்கள். 1 பேதுரு 3-9.

2020 - ம் ஆண்டு வாக்குத்தத்த செய்தி

2020-01-01T10:00:00.000-08:00

உன்னை அதிசயங்களைக் காணப்பண்ணுவேன் (மீகா 7:15)

அனைவருக்கும் என் இனிய புத்தாண்டு நல்வாழ்த்துக்களை தெரிவித்துக்கொள்கிறேன் அருமையானவர்களே! புதிய நாட்களில் பல எதிர்பார்ப்போடு காணப்படுகிற நமக்கு தேவன் உன்னை அதிசயங்களை காணப்பண்ணுவேன் என்ற வாக்கு பண்ணுகிறார்.நடப்பதற்க்கு அரிதானகாரியங்களைத் தான் நாம் அதிசயம் என்கிறோம். ஆம் , உங்கள் வாழ்க்கையில் நடக்கவே இயலாது என்ற காரியத்தை தேவன் செய்யப்போகிறார். என் குடும்பத்தில் இது நடக்கவே நடக்காது என்கிற காரியத்தை தேவன் செய்யப்போகிறார். உங்கள் தொழிலிலும் நிச்சயம் அதிசயத்தை காணச் செய்யப்போகிறார். நான் வாழ்க்கையில் தேவனுடைய அற்புதத்தை பெற என்ன செய்ய வேண்டும் என கேட்கிறீர்களா? தொடர்ந்து படியுங்கள்.

1.கார்மேலின் நடுவிலே வாசமாயிருக்கிறவர்களுக்கு அதிசயங்களைக் காணப்பண்ணுவார். {மீகா 7:14}

கார்மேல் என்பதற்கு கனித்தோட்டம் என்று பொருள்படும். பாலஸ்தீனா நாட்டில் அமைந்துள்ள இந்த மலை நாடு செழிப்பான தோட்டங்களால் நிறைந்திருந்தது. தேவனுடைய சபையும் ஒரு தோட்டமாகும். அது கனிகள் நிறைந்த தோட்டமாகும். இந்த தோட்டம் தேவனுடைய கிருபையாகிய நீரூற்றுகள் உள்ளதும் பரிசுத்த ஆவியானவரின் நிறைவாகிய தென்றல் காற்று வீசும் இடமாகும். ஆகையால் இங்குள்ள கனிகள் வாசனையுள்ளதும் ருசியுள்ளதும் ஆரோக்கியமுள்ளதும், ஜீவனைக்கொடுக்கக் கூடியதுமாகும். ஆகவே இந்த கனித் தோட்டமாகிய சபையில் உலகத்திலிருந்து வேறுபட்டு வந்து வாசம் பண்ணுவது வாழ்க்கையில் அதிசயங்களை காண ஏதுவானது ஆகும். பாருங்கள் ! இரட்சிக்கப்படுகிறவர்களை கர்த்தர் அனு தினமும் சபையிலே சேர்த்துக் கொண்டு வந்தார்{அப் 2:47} என்று இவ்வசனம் கூறுகிறது. இது நாம் சபையில் வாசம் பண்ணுவதின் முக்கியம் அறிந்து கர்த்தராகவேநம்மை சபைக்குள் கொண்டு வந்ததைக் கூறுகிறது.

நாம் சபைக்குள் வந்தால் மாத்திரம் போதாது. நாம் சபைக்குள்ளேயே வாசம் பண்ண வேண்டுமாம். ஆதிசபையார் எவ்விதம் சபையோடும் இணைந்திருந்தனர்? ஆதி சபையார் அப்போஸ்தலருடைய உபதேசத்திலும், அந்நியோந்நியத்திலும் அப்பம் பிட்குதலிலும் ஜெபம் பண்ணுவதிலும் உறுதியாய் தரித்திருந்தனர். {அப் 2:42} சபையோடு அவர்கள் பிணைக்கப்பட்டிருந்தனர். நாளுக்கொரு சபை, நாளுக்கொரு கூட்டம் என்று அலையவில்லை ஆகையால், ஆதி சபை தேவனுடைய அதிசயங்களை கண்டது. சபை கூடுதலை முக்கியமாய் எண்ணி, சபையில் நடைபெறும் கூட்டங்களிலே உண்மையாய் பங்கு பெற்று . சபையின் ஊழியங்களோடு இணைந்து ஊழியம்செய்து கிறிஸ்துவின் சரீரமாகிய சபைக்கு உண்மையாயிருப்போமானால், தேவன் நம் வாழ்க்கையில் நிச்சயம் அதிசயங்களைக் காணச் செய்வார்.

2. தேவனுடய உரிமைச் சொத்தாய் இருப்பவர்களுக்கு அதிசயங்களைக் காணப்பண்ணுவார் {மீகா 7:14}

தேவன் தம்முடையவர்களை மிகவும் நேசிக்கிறார். தம்முடையவர்களை தம்முடையவர்களாகவே

இருக்க எதிர்பார்க்கிறார். இந்நாட்களில் விசுவாச துரோகம் எங்கும் தலை விரித்து ஆடும் நிலை உள்ளது இப்படிபட்ட நிலையில் நாம் தேவனுக்கு உண்மையாயிருக்க வேண்டியது மிக அவசியமாகும். இஸ்ரவேல் தேசம் பாவத்தில் மூழ்கியிருந்த போது கர்த்தருக்காக வைராக்கியமாக இருந்த தேவனுடய மனிதனாகிய எலியாவின் வாழ்க்கையில் தேவன் செய்த அதிசயமான காரியத்தைப் பாருங்கள். கர்த்தராகிய இயேசு கிறிஸ்துவையன்றி, வேறெந்த தெய்வங்களுக்கு கையெடுக்காமலும், பணத்திற்க்காக, உலக ஆசை இச்சைகளுக்காக, கர்த்தரை விட்டு பின்வாங்காமல் எலியாவைப் போன்று கர்த்தருக்கு வைராக்கியமாய் இருப்போமானால், அவருடைய உரிமைச் சொத்தாய் மாத்திரம் இருப்போமானால் நிச்சயம் உங்கள் வாழ்க்கையிலே தேவன் அதிசயங்களைக் காணப்பண்ணுவார்.

3.தேவனுடைய மேய்ச்சலை மேய்கிற ஜனத்திற்கு அதிசயங்களைக் காணப்பண்ணுவார் {மீகா 7:14}

கர்த்தர் நம்மை மேய்க்கிறவர்.புல்லுள்ள இடங்களில் மேய்க்கிறவர். தேவனுடைய சத்தியமே நமது மேய்ச்சலாகும். ஆகவே நாம் தேவனுடய சத்திய வசனத்தை வாசிக்க வேண்டும். ஆடுகள் மேய்ந்த பின் தனியே அமர்ந்து மேய்ந்ததை அசைபோடும்.

அது போல நாம் வாசித்த சத்தியவசனங்களை தியானம் செய்ய வேண்டும் , சங்கீ 1:2,3- கூறுவதை பாருங்கள். கர்த்தருடைய வேதத்தில் பிரியமாயிருந்து. இரவும் பகலும் அவருடைய வேதத்தில் தியானமாயிருக்கிற மனுஷன் பாக்கியவான். அவன் நீர்க்கால்கள் ஓரமாய் நடப்பட்டு தன் காலத்தில் தன் கனியைத் தந்து, இலையுதிரா மரத்தைப் போலிருப்பான். அவன் செய்வதெல்லாம் வாய்க்கும் , ஆம் , நாம் வேதத்தை வாசித்து தியானிக்கும் போது நடப்பதென்ன? நமக்குள் தேவனுடய வார்த்தை, தேவன் மேலுள்ள விசுவாசத்தை அளவில்லாமல் பெருகச் செய்யும். அப்படி பெருகும் விசுவாசம் நமது வாழ்க்கையில் தேவனுடய அதிசயங்களைக் காணச் செய்யும். தேவனுடைய பிள்ளைகளே! கர்த்தருடைய சரீரமாகிய சபையில் ஐக்கியமாயிருங்கள். தேவன் ஒருவருக்கே உரிய உரிமை சொத்தாய் உங்களை ஒப்படையுங்கள்.தேவனுடய வசனத்தை இரவும் பகலும் வாசித்து தியானியுங்கள். உங்கள் வாழ்க்கையில் தேவன் அதிசயங்களைக்காணப் பண்ணுவார்.

கடனே இல்லாத வாழ்க்கை

2019-09-14T14:00:00.000-07:00

ஒருவரிடத்திலொருவர் அன்புகூருகிற கடனேயல்லாமல், மற்றென்றிலும் ஒருவனுக்கும் கடன்படாதிருங்கள். - (ரோமர் 13:8).

கிறிஸ்துவை சொந்த இரட்சகராக ஏற்றுக் கொண்ட நாம் ஒவ்வொருவரும் பண விஷயத்தில் உண்மையுள்ளவர்களாயிருக்க வேண்டும். இது வேதம் நமக்குக் கூறும் அறிவுரையாகும். அதிலும், 'ஒன்றிலும் ஒருவருக்கும் கடன்படாதிருங்கள்' என்றும் வேதம் நமக்கு கட்டளை கொடுத்திருக்கிறது. உலகம் கூறுவது என்னவென்றால், 'இன்று வாங்கி நாளை செலுத்துங்கள்' என்று. ஆனால் 'இன்று சேமித்து நாளை வாங்குவதே' உத்தமமானது.

.
         சமீபத்தில் ஒரு முக்கியமான இடத்தில் ஒரு கடை விற்பனைக்கு வந்தது. அதை வாங்கும்படி ஒரு குடும்பத்தினர் தீர்மானித்தனர். அதன் விலையை விசாரித்தபோது, அது 90,00,000 என்று தெரிய வந்தது. அந்த இடம் மிகவும் முக்கியமான இடத்தில் இருந்ததால் எப்படியாவது அதை வாங்க வேண்டும் என்று கணவர் ஒரு பேங்கில் போய் கடன் கேட்டார். அந்த பேங்க் ஆட்கள், உங்களிடமுள்ள சொத்து, பத்திரம் எல்லாவற்றையும் காட்டுங்கள் என்று சொல்லி, சொந்த வீடு இருந்ததால் அந்த வீட்டிற்கு வந்து அதன் அளவை அளக்க தொடங்கினார்கள்.
.
அந்த குடும்பத்தினர் கர்த்தருக்கு பயப்படுகிறவர்களாக இருந்தபடியால், அந்த மனைவி, கர்த்தரிடம் அதை குறித்து விசாரிக்க ஆரம்பித்தார்கள். 'இயேசப்பா, இந்த வீடு நீர் கொடுத்த வீடு, அதில் கண்டவர்கள் எல்லாம் வந்து அளவு எடுத்து கொண்டிருக்கிறார்களே, கணவரோ அத்தனை பணம் கொடுத்து அந்த கடையை வாங்க வேண்டும் என்று அதற்காக முயற்சி செய்து கொண்டிருக்கிறார், உமக்கு சித்தமில்லை என்றால் இதை நிறுத்திப்போடும்' என்று ஜெபித்தார்கள். நம் தேவன் பேசும் ஆண்டவரல்லவா? அன்றைய தின வேத வாசிப்பில் (அவர்கள் தினமும் நீதிமொழிகள் ஒரு அதிகாரத்தை வாசிப்பது வழக்கம்) கர்த்தர் அவர்களோடு பேசினார், 'கையடித்து உடன்பட்டு, கடனுக்காகப் பிணைப்படுகிறவர்களில் ஒருவனாகாதே. செலுத்த உனக்கு ஒன்றுமில்லாதிருந்தால், நீ படுத்திருக்கும் படுக்கையையும் அவன் எடுத்துக்கொள்ளவேண்டியதாகுமே' (நீதிமொழிகள் 22:26-27). இந்த வார்த்தைகளை படித்த உடன் அந்த சகோதரிக்கு தேவனுடைய சித்தம் என்னவென்று புரிந்து விட்டது. கடன் வாங்க வேண்டாம் என்று கர்த்தர் சொல்லுகிறார் என்பதை அறிந்து கொண்டார்கள். அந்த இடத்தை வாங்குவது கர்த்தருடைய சித்தம் அல்ல என்பதையும் புரிந்து கொண்டார்கள்.
.
            ஆனால் கணவரோ முழு மூச்சோடு அதை வாங்க வேண்டும் என்று பேங்கிற்கும் வீட்டிற்கும் அலைந்து கொண்டிருக்கிறார், அவரை எப்படி தடுப்பது என்று நினைத்தவர்களாக ஜெபித்தார்கள். அடுத்த நாள், கணவர், மனைவியிடம், 'இன்று கணவனும் மனைவியுமாக அழைத்து பேங்க் மேனேஜர் பேசுவார், அதன்பின் அவர்கள் கடன் தருவார்கள்' என்று கூறினார்.
.
மனைவிக்கு தேவன் இப்படி வசனம் சொல்லியிருக்கிறார் என்று சொல்ல பயம், ஏனென்றால் கணவர் மிகவும் அதற்காக முயற்சி எடுத்துக் கொண்டிருக்கிறார் என்று. அவர்கள் ஜெபித்து, 'நாளை ஆண்டவரே அந்த பேங்க் மேனேஜர் பேசும்போது, நீர் தடுத்து விடும்' என்று சொல்லி ஜெபித்து விட்டு, அடுத்த நாள் போனார்கள்.
.
                 அவர்கள் பேசி கொண்டிருக்கும்போதே, வீட்டை அளந்து பார்த்த ஒருவர், 'பத்திரத்தில் இருக்கும் அளவிற்கும், எழுதி இருக்கும் அளவிற்கும் வித்தியாசம் இருக்கிறது, ஆகவே அதை சரி செய்து முடிக்காமல் கடன் வழங்க முடியாது' என்று கூறினார். அதை கேட்ட கணவருக்கு மிகவும் கோபம். 'இத்தனை நாட்கள் நான் இங்கு வந்து போய் கொண்டிருக்கிறேன், அப்போதெல்லாம் நீங்கள் ஒன்றும் சொல்லவில்லை, இப்போது கடன் தரும் நேரத்தில் இப்படி சொல்கிறீர்கள்' என்று. அப்போது மனைவி சொன்னார்கள், 'கர்த்தருடைய சித்தம் நாம் கடன் வாங்கி அந்த கடையை வாங்குவது அல்ல, கர்த்தர் அதை குறித்து என்னிடம் நேற்றே பேசி விட்டார்' என்று நடந்ததை கூறினார்கள். கணவரும் அதை கேட்டு, 'நேற்றே நீ ஏன் என்னிடம் சொல்லவில்லை' என்று கேட்டார். அதற்கு மனைவி, 'நேற்றே சொல்லியிருந்தால் நீங்கள் நம்பியிருக்க மாட்டீர்கள், இன்று தேவனே அதை நிறுத்திப் போட்டார் பாருங்கள்' என்றார்கள். இது உண்மை சம்பவம். ஆம், நம் தேவன் நாம் கடன் வாங்குவதை விரும்புகிற தேவன் அல்ல. 'கையடித்து உடன்பட்டு, கடனுக்காகப் பிணைப்படுகிறவர்களில் ஒருவனாகாதே. செலுத்த உனக்கு ஒன்றுமில்லாதிருந்தால், நீ படுத்திருக்கும் படுக்கையையும் அவன் எடுத்துக்கொள்ளவேண்டியதாகுமே' என்று நம்மை கடன் வாங்காதபடி எச்சரிக்கிற தேவனாயிருக்கிறார்.
.
       மட்டுமல்ல, அவர் நமக்கு வாக்குதத்தம் செய்திருக்கிறார், 'நீ அநேகம் ஜாதிகளுக்குக் கடன்கொடுப்பாய், நீயோ கடன் வாங்காதிருப்பாய்' (உபாகமம் 28:12) என்று. இந்த வாக்குதத்தத்தை நாம் தினமும் அறிக்கையிட்டு, என்னை ஒருபோதும் கடன் வாங்காதிருக்க உதவி செய்யும் என்று ஜெபிக்க வேண்டும்.

.
தவிர்க்க முடியாது ஒரு அவசரத்திற்க்கு நீங்கள் யாரிடமாவது பணத்தை கடன் வாங்கிளானல், அதை எவ்வளவு சீக்கிரம் திரும்ப செலுத்த முடியுமோ அவ்வளவு சீக்கிரமாய் செலுத்தி விடுங்கள். ஒரு குறிப்பிட்ட தேதியில் பணத்தை திரும்ப செலுத்துவதாக வாக்கு கொடுத்துவிட்டு, அது முடியவில்லையென்றால் கடன்பட்டவரிடம உங்களை தாழ்த்தி மன்னிப்பு கேளுங்கள். பணத்தை திரும்ப செலுத்த மேலும் அவகாசம் தரும்படி வேண்டிக் கொள்ளுங்கள். இவ்வாறு செய்யாமல், வசதியான நேதர்தில் திரும்ப செலுத்தலாம் என எண்ணுவது அநீதியான செயலாகும்.

          ஒருவேளை கடன் கொடுத்தவர் எங்கிருக்கிறாரென்று தெரியவில்லை என்றால், அந்த பணத்தை தேவப்பணிக்கென்று கொடுத்து விடுங்கள். ஏனென்றால் இந்த பூமியின் சகல நிறைவும், முடிவாய் கர்த்தருக்கே சொந்தமாகும் (எண்ணாகமம் 5:8). ஆம், இது போன்ற பணத்தை நாம் நம்மிடம் வைத்திருக்க கூடாது. ஏனென்றால் நியாயமாய் நமக்கு சொந்தமாயிராத பணம் நம்மிடம் இருக்குமென்றால் அதில் சாபமே தங்கியிருக்கும்.
.
         மேலும் கடந்த காலங்களில் நாம் தவறான முறையில் பெற்றுக் கொண்ட எல்லா பணத்தையும் திரும்ப செலுத்த வேண்டும். முழுவதுமாக செலுத்தி தீர பல வருடங்கள ஆனாலும் அது ஒரு பொருட்டல்ல, இவ்விதமாய் திரும்ப செலுத்துவதை சகேயு தீர்மானித்த அடுத்த கணமே அவனுடைய வீடு இயேசுவால் ஆசீர்வதிக்கப்பட்டது. நீங்கள் இவ்வித தீர்மானங்களை எடுக்கும்போதே உங்களுடைய வீடும் இவ்விமாய் ஆசீர்வதிக்கப்படும். உங்களுடைய கடன் ஏராளமாய் இருப்பதால் நீங்கள் சோர்ந்து போகத் தேவையில்லை. உங்களால் எவ்வளவு முடியுமோ அது மாதத்திற்கு பத்து ரூபாயானாலும் அதை தீரும்ப செலுத்த ஆரம்பித்து விடுங்கள். நீங்கள் எல்லவற்றையும் கொடுத்து தீர்த்து விட்டீர்களா என்பதின்படியல்ல, உங்களால் முடிந்த அளவு திரும்ப செலுத்த நினைக்கும் உங்கள் மன விருப்பத்தை கொண்டே தேவன் உங்களை ஏற்றுக் கொள்வார்.
.
           ஆம், பிரியமானவர்களே, நாம் பண விஷயத்தில் தேவனுக்கு முன்பாகவும், மனிதருக்கு முன்பாகவும் உண்மையாயிருக்க இன்றே தீர்மானிப்போம். ஒருவன் பண விஷயத்தில் உண்மையுள்ளவனாக இருந்தால் மற்ற காரியங்களை அவனை நம்பி நாம் ஒப்படைக்க முடியும். அப்படிப்பட்ட உண்மை நம்மில் இருந்தால் தேவன் நம் குடும்பத்தை நிச்சயமாக ஆசீர்வதிப்பார். ஆமென் அல்லேலூயா!
.

இருக்க நல்ல ஒரு வீடு தந்தீர்

வாழ தேவையான வசதி தந்தீர்

கடுமையாக தினம் உழைக்க வைத்தீர்

கடனே இல்லாமல் வாழ வைத்தீர்

.
நன்றி தகப்பனே

நன்மை செய்தீரே

ஜெபம்

எங்கள் அன்பின் பரலோக தகப்பனே, நீ அநேகம் ஜாதிகளுக்குக் கடன்கொடுப்பாய், நீயோ கடன் வாங்காதிருப்பாய் என்ற வாக்குதத்தம் எங்கள் ஒவ்வொருவரின் வாழ்க்கையிலும் நிறைவேறட்டுமையா. நாங்கள் கடன் வாங்காமலே குடும்பத்தை நடத்தும்படியான கிருபையையும் ஞானத்தையும் தருவீராக. கடன் வாங்கி அதை செலுத்த முடியாமல் தவிக்கும் ஒவ்வொருவருக்காகவும் ஜெபிக்கிறோம். அதை எப்படியாவது திரும்ப செலுத்தி முடிக்க வேண்டும் என்ற எண்ணத்தை அவர்களுக்கு கொடுத்து, கொஞ்ச கொஞ்சமாக அதை செலுத்தி முடிக்க கிருபை செய்யும். அநியாயமாய் சம்பாதித்த பொருள் ஒன்றும் ஒருவரிடமும் இல்லாமல், அதை திரும்ப செலுத்திவிட கிருபை செய்வீராக. பண விஷயத்தில் உண்மையாய் நடந்து கொள்ள கிருபை செய்வீராக. எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

கிறிஸ்துமஸ் வாழ்த்து செய்தி-2018

2018-12-25T00:01:00.000-08:00

கிறிஸ்துவுக்குள் பிரியமானவர்களே,

உலக இரட்சகர், உலக மக்கள் அனைவரின் இரட்சிப்பின் அதிபதி ஆண்டவர் இயேசு கிறிஸ்துவின் நாமத்தில் அன்பின் கிறிஸ்துமஸ் மற்றும் 2019 புத்தாண்டு நல்வாழ்த்துகள்.

நாம் பிறந்த நாள் கொண்டாடும் ஒருவரை – அது நம் குழந்தைகளோ, பெற்றோரோ, குடும்பத்தினரோ அல்லது நண்பர்களோ – யாராக இருந்தாலும் அந்த நாள் முழுவதும் அவர்களை மகிழ்ச்சியாக வைத்திருக்க நம்மால் இயன்ற எல்லாவற்றையும் செய்வோம் அல்லவா. இந்த கிறிஸ்துமஸ் நன்னாள் காணக்கூடாத தேவனாகிய கர்த்தர் நமக்காக இந்த பூமியில் இயேசு கிறிஸ்துவாக இறங்கி வந்த நன்னாளை, கிறிஸ்து பிறப்பு நாளாக கொண்டாடும் நாம், நம் ஆண்டவராகிய இயேசு கிறிஸ்துவை, அவர் தம் அன்பின் உள்ளத்தை சந்தோஷப்படுத்த வேண்டியது எவ்வளவு அவசியம். ஒரு வேளை நாம் அப்படி செய்யாமற்போனால் இந்த கொண்டாட்டமே வீணும், அர்த்தமற்றதும் ஆகிப்போகாதா?

அப்படியானால், நாம் ஆண்டவர் இயேசு கிறிஸ்துவை எப்படி சந்தோஷப்படுத்துவது? பரிசுத்த வேதம் கீழ்கண்டவாறு கூறுகிறது: லூக்கா 15:7 –ல் "அதுபோல, மனந்திரும்ப அவசியமில்லாத தொண்ணூற்றொன்பது நீதிமான்களைக்குறித்துச் சந்தோஷம் உண்டாகிறதைப்பார்க்கிலும் மனந்திரும்புகிற ஒரே பாவியினிமித்தம் பரலோகத்தில் மிகுந்த சந்தோஷம் உண்டாயிருக்கும் என்று உங்களுக்குச் சொல்லுகிறேன்."

ஆண்டவர் இயேசுவின் அன்பின் உள்ளம், இன்னும் இரட்சிக்கப்படாமல் நரகத்தை நோக்கி ஓடிக்கொண்டிருக்கிற கோடான கோடி மக்களை நினைத்து பரிதபிக்கிறது, கண்ணீர் வடிக்கிறது. நம் பரம தகப்பனாகிய நம் ஆண்டவரின் கண்ணீரை துடைத்து, அவர் உள்ளத்தை மகிழ்விப்பது அவருடைய பிள்ளைகளாகிய நம் கடமை அல்லவா?

பரிசுத்த வேதத்தில் ஆண்டவர் இயேசு தாமே கூறின இந்த இரண்டு உவமைகளை சற்றே சிந்தித்து பார்ப்போம்:

நூறு ஆடுகளில் காணமற்போன ஒரு ஆட்டை பற்றின உவமை (லூக்கா 15:4-6)
தந்தையை பிரிந்து சென்று, சீரழிந்து அதன் பின் மனம் திருந்தி தந்தையிடம் திரும்பிய மகன் (லூக்கா 15:11-32)

இந்த இரண்டு உவமைகளின் மூலமாக ஆண்டவர் தம் அன்பின் உள்ளத்தை நமக்கு வெளிப்படுத்துகிறார். காணமற்போன ஒரு ஆட்டை கண்டு பிடித்ததோடு மட்டுமல்லாமல் அதை அன்போடு தம் தோளில் சுமந்து வீடு கொண்டு சேர்த்து அதை கண்டு பிடித்த மகிழ்ச்சியை எல்லோரிடமும் வெளிப்படுத்தும் ஆண்டவர் இயேசுவின் அன்பின் உள்ளத்தை சற்றே நம் கண்முன் கொண்டு வந்து தியானிப்போம். அடுத்ததாக மனம் திருந்தி தன்னிடம் திரும்பிய மகனை தூரத்திலே வரக்கண்ட பொழுதே, அவன் தன்னிடம் வந்து சேரும் வரை காத்திராமல், அன்பின் மனதுருக்கத்தோடு வழியிலேயே ஓடிச் சென்று கட்டியணைத்து முத்தம் செய்யும் அன்பின் உள்ளத்தையும் சற்றே தியானிப்போம்.

என்றும் மாறாத களங்கமற்ற இதே அன்பினால் தானே நம்மையும் இரட்சித்து தம் பிள்ளைகளாக்கி நம்மை என்றென்றும் நேசிக்கிறார். இந்த அன்பின் உள்ளத்தை மகிழ்விக்க நாம் கிறிஸ்து இயேசுவின் இரத்தத்தினால் பெற்ற இரட்சிப்பை அவரை அறியாத மற்றவர்களுக்கும் கொண்டு சேர்க்க வேண்டுமே. பிதாவாகிய தேவனுடைய இரட்சிப்பின் திட்டத்தை நிறைவேற்ற, பிதாவின் சித்தத்திற்கு தம்மையே முற்றிலும் அர்ப்பணித்து சிலுவையில் தம்மையே பலியாக தந்த தேவகுமாரனாம் ஆண்டவர் இயேசு கிறிஸ்துவுக்கு நாம் நன்றியறிதலுள்ளவர்களாகவும் இதை செய்ய வேண்டுமே.

பரிசுத்த வேதத்தில் ஆண்டவர் இயேசு கூறிய மற்றுமொரு உவமையில் (லூக்கா 16:19-31) ஆபிரகாம் – லாசருவைப் பற்றி ஆண்டவர் கூறியதை போலவே, ஒருவேளை நம்மிடத்திலே நம் நண்பர்களோ, உறவினர்களோ, குடும்பத்தினரோ அல்லது நாம் வசிக்கும் இடத்தில், அலுவலகத்தில் நம்மை சுற்றி இருப்பவர்களோ, நம்மிடம் " எத்தனையோ வருடங்கள் ஒன்றாக இருந்தோமே, ஒருவரை ஒருவர் அறிந்திருந்தோமே. ஒரு முறையாவது இயேசுவைப் பற்றி என்னிடம் கூறி இருந்ததால் நானும் இரட்சிக்கப்பட்டு இந்த நித்திய நரக அக்கினிக்கு தப்பி பரலோகம் வந்து இருப்பேனே " என்று கதறினால் நாம் அவர்களுக்கு என்ன பதில் சொல்ல முடியும்? தயவு செய்து சிந்திப்போம், ஆண்டவர் இயேசுவின் விலைமதிப்பில்லா இரட்சிப்பை மற்றவர்களுக்கும் கொண்டு சேர்ப்போம். அவர்களும் தேவ ராஜ்யம் வந்தடைய ஆத்தும பாரத்தோடு, கண்ணீரோடு தேவனிடத்தில் கதறுவோம். ஆண்டவர் இயேசு கிறிஸ்துவின் இரண்டாம் வருகை மிக அருகில் வந்து விட்டதே.

தேவனுடைய பரிசுத்த ஆவியானவரை பெற்று வேத வார்த்தையின் படி எருசலேமிலே (நம் குடும்பகளில்), யுதேயாவிலே (நாம் வசிக்கும் இடங்களிலே), சமாரியாவிலே (கர்த்தரை அறியாத மக்கள் நடுவிலே), மற்றும் உலகெங்கும் கிறிஸ்து இயேசுவின் உண்மையான சாட்சிகளாக வாழ்ந்து நம் இரட்சிப்பின் அதிபதி ஆண்டவர் இயேசு கிறிஸ்துவின் உள்ளத்தை மகிழ்வித்து அவர் நமக்கருளிய இரட்சிப்புக்கு நன்றியறிதலுள்ளவர்களாக (கொலோ 3:15) இருப்போம்.

"தப்பிப்போன மார்க்கத்தினின்று பாவியைத் திருப்புகிறவன் ஒரு ஆத்துமாவை மரணத்தினின்று இரட்சித்து, திரளான பாவங்களை மூடுவானென்று அறியக்கடவன்." (யாக்கோபு 5:20)

அதிசீக்கிரத்தில் மீண்டுமாய் பூமிக்கு வரப்போகும் நம் கர்த்தராகிய இயேசு கிறிஸ்து தாமே இதை நாம் செய்து நிறைவேற்ற நமக்கு சகல கிருபைகளையும், தம் ஆவியானவரின் அளவற்ற அபிஷேகமும் அருளி, நமக்குள் இருந்து செயல்படுவாராக. நம்மை தாம் என்றும் வாசம் பண்ணும் பரிசுத்த ஆலயமாக முடிவு வரை காத்து தம் ராஜ்யம் கொண்டு சேர்ப்பாராக.

உன்னதத்திலிருக்கிற தேவனுக்கு மகிமையும், பூமியிலே சமாதானமும்,

மனுஷர்மேல் பிரியமும் உண்டாவதாக ... (லூக்கா 2:14)

அனைவருக்கும் இனிய கிறிஸ்து பிறப்பு மற்றும் 2019 புத்தாண்டு நல் வாழ்த்துக்கள்

நன்மை செய்யுங்கள்

2018-08-23T07:44:00.000-07:00

நன்மை செய்யும்படி உனக்குத் திராணியிருக்கும்போது, அதை செய்யத்தக்கவர்களுக்குச் செய்யாமல் இராதே [நீதிமொழிகள்:3:27].

வேதம் கூறுகிறது நசரேயனாகிய இயேசுவைத் தேவன் பரிசுத்த ஆவியினாலும் வல்லமையினாலும் அபிஷேகம்பண்ணினார்; தேவன் அவருடனேகூட இருந்தபடியினாலே அவர் நன்மைசெய்கிறவராயும் பிசாசின் வல்லமையில் அகப்பட்ட யாவரையும் குணமாக்குகிறவராயும் சுற்றித் திரிந்தார் [அப்போஸ்தலர்:10:38].

நன்மை செய்ய மனுஷன் கொண்டிருக்கும் ஆசையே தயை. சகலவற்றையும் அனுபவித்து எல்லாம் மாயை என்று ஆராய்ந்து பார்த்த சாலொமோன் ராஜா கூறுகிறார் மகிழ்ச்சியாயிருப்பதும் உயிரோடிருக்கையில் நன்மை செய்வது- மேயல்லாமல் வேறொரு நன்மையும் மனுஷனுக்கு இல்லையென்று அறிந்தேன். கிறிஸ்தவர்களாகிய நாம் எப்படியாய் நன்மை செய்ய வேண்டும் என வேத வசனங்களின் வாயிலாக தியானிப்போம்.

தீமையை விட்டு விலகி நன்மை செய்

தீமையை விட்டு விலகி நன்மை செய்; என்றென்றைக்கும் நிலைத்திருப்பாய் [சங்கீதம்:37:27]. அப்போஸ்தலனாகிய யோவான் கூறுகிறார் நீ தீமையானதை பின்பற்றாமல் நன்மையானதை பின்பற்று, நன்மை செய்கிறவன் தேவனால் உண்டாயிருக்கிறான். தீமை செய்கிறவன் தேவனைக் காணவில்லை [யோவான்:3:11]. கர்த்தராகிய இயேசுகிறிஸ்து வரப்போகிற நன்மைகளின் பிரதான ஆசாரியராய் வெளிப்பட்டு தம்முடைய சொந்த இரத்தத்தினாலே பாவிகளான நமக்கு நித்திய மீட்பை உண்டு பண்ணினார். அவருடைய நாமத்தின் மேல் விசுவாசம் வைத்து மறுபடியும் பிறந்தவர்களாகிய நாம் தேவனை வெளிப்படுத்தும்படி தீமையை விட்டு விலகி நன்மை செய்ய வேண்டும். நாம் தீமையை தீமையினால் வெல்லாமல் நன்மையினால் வெல்ல முயற்சிக்க வேண்டும். இதற்கு எடுத்துக்காட்டாக நாம் தாவீது ராஜாவை சொல்லலாம். அவர் தன்னை பகைத்து கொலை செய்ய பின்தொடர்ந்த சவுல் ராஜாவை, கொலை செய்ய தருணங்கள் கிடைத்த போதும் தேவன் என்னை பாதுகாப்பார் என்ற விசுவாசித்து நன்மையே செய்தார். அதை கண்ட சவுல் ராஜா நீ என்னைப் பார்க்கிலும் நீதிமான்; நீ எனக்கு நன்மை செய்தாய்; நானோ உனக்கு தீமைசெய்தேன். நீ எனக்கு நன்மைசெய்ததை இன்று விளங்கப்பண்ணினாய்; கர்த்தர் என்னை உன் கையில் ஒப்புக் கொடுத்திருந்தும், நீ என்னைக் கொன்றுபோடவில்லை என்று சொல்லி தாவீதை குறித்து சாட்சிகொடுக்கிறார். நம்முடைய வாழ்க்கை பயணம் எப்படியாய் இருக்கிறது
அன்பானவர்களே நாம் செய்யும் ஒவ்வொரு செயலும் நன்மையானதாக முடிகிறதா அல்லது பிறருக்கு தீமையை விளைவிக்கிறதா என்று நாம் சிந்தித்து செயல்பட வேண்டும். பவுலடியார் கூறியதை போல நாம் நன்மையை செய்ய விரும்பினாலும் நம்முடைய மாம்ச சரீரத்தினால் தேவனுடைய ஆவிக்கு கீழ்படியாமல் விரும்பாத தீமையை செய்கிற தருணங்கள் உண்டு. நமக்கு தீங்கு செய்தவர்களுக்கு நாம் தீமை செய்யும் போது தேவனால் உண்டாயிருக்கிறவன் என்ற நற்சாட்சியை இழந்து தேவனை அறியாத மற்ற மனுஷர்களின் சுபாவத்தை வெளிப்படுத்துகிறோம். ஒவ்வொரு நாளும் நம்முடைய இரட்சிப்பு நிறைவேற பிரயாசபட வேண்டும். நாம் நன்மைக்கு ஞானிகளும் தீமைக்கு பேதைகளுமாயிருக்க கற்றுக்கொள்ள வேண்டும்[ரோமர்:16:19]. தேவனுடைய கரத்தில் நம்மை முழுமையாய் அர்ப்பணிப்போம்.பரிசுத்த ஆவியானவர் தாமே நம்மோடு கூட இருந்து நம்மிலுள்ள தீமையை அகற்றி நன்மையான பாத்திரமாய் நம்மையும் மாற்றுவார்.

ஜீவனை அடையும்படி நன்மைசெய்

வேதம் கூறுகிறது பிரேதக்ககுழிகளிலுள்ள அனைவரும் அவருடைய சத்தத்தை கேட்குங் காலம் வரும்; நன்மை செய்கிறவர்கள் ஜீவனை அடையும்படி எழுந்திருக்கிறவர்களாகவும், தீமை செய்கிறவர்கள் ஆக்கினையை அடையும்படி எழுந்திருக்கிறவர்களாகவும் புறப்படுவார்கள் [யோவான்:5:58,59]. அதாவது இயேசுவின் இரத்தத்தினால் மீட்கப்பட்டு தேவனுடைய நீதியை நிறைவேற்றி நன்மை செய்த நீதிமான்கள் நித்திய ஜீவனை சுதந்தரிப்பார்கள். ஒரு ஆஸ்தியுள்ள வாலிபன் இயேசுவிடம் வந்து “நித்திய ஜீவனை சுதந்தரித்து கொள்ள எந்த நன்மையை செய்ய வேண்டும்?” என்ற கேட்ட போது இயேசு கூறினார் “நீ உனக்குள்ளதை விற்று தரித்திரருக்கு கொடு, அப்பொழுது பரலோகத்தில் உனக்கு பொக்கிஷம்” உண்டாயிருக்கும் என்றார். இயேசு கிறிஸ்து அவனிடம் ஐசுவரியத்தின் மேல் உள்ள பற்றை விட்டுவிட்டு அதை தேவனுடைய ராஜ்ஜியம் கட்டப்படும்படிக்கு தரித்திரருக்கு கொடு என்றார். இந்த வாலிபன் ஐசுவரியத்தின் மேல் மிகுந்த பற்றுதலாய் இருந்தபடியால் அவனால் அவரை பின்பற்ற முடியவில்லை[மத்தேயு:19:16-30]. நித்திய ஜீவனை சுதந்தரிக்கும்படி நாம் எதை இழக்கிறோமோ அதுவே நாம் செய்யும் நன்மையாயிருக்கிறது.

கர்த்தரை நம்பி நன்மை செய்

கர்த்தரை நம்பி நன்மை செய் [சங்கீதம்:37:3]. நன்மை தீமை அறியத்தக்க விருட்சத்தின் கனியை புசித்த மனுஷன் நன்மை தீமை அறியத்தக்கவனாய் நம்மில் ஒருவரைப் போலானான் என்று தேவன் கூறினார். நாம் செய்வது நன்மையா தீமையா என நம்மால் அறிந்து கொள்ள முடியும். வேதம் கூறுகிறது ஒருவன் நன்மை செய்ய அறிந்திருந்தும் அதை செய்யாமற்போனால் அது அவனுக்கு பாவமாயிருக்கும்[யாக்கோபு:4:17]. தன்னை நேசிக்கிறவர்களுக்கு மட்டுமே நன்மை செய்வது இன்றைய உலக இயல்பு. நம்முடைய பகைவர்கள் சத்துருக்களுக்கு நன்மை செய்ய நமது மனது ஒத்துழைப்பதில்லை.ஆனால் இயேசுகிறிஸ்து கூறுகிறார் உங்களை பகைக்கிறவர்களுக்கும் உங்கள் சத்துருக்களுக்கும் நன்மை செய்யுங்கள். உங்களுக்கு நன்மை செய்கிறவர்களுக்கே நீங்கள் நன்மை செய்தால், உங்களுக்குப் பலன் என்ன? பாவிகளும் அப்படிச் செய்கிறார்களே. இப்படி செய்வதினால் நீங்கள் பரலோகத்திலிருக்கிற பிதாவின் புத்திரராய் இருப்பீர்கள்.அதுமட்டுமல்ல உன்னதமானவரின் பிள்ளைகள் எனபடுவீர்கள் என வேதம் கூறுகிறது. அவர் தீயோர் மேலும் நல்லோர் மேலும் தமது சூரியனை உதிக்கப்பண்ணி நீதியுள்ளோர்மேலும் அநீதியுள்ளோர்மேலும் மழையை வருஷிக்கப் பன்னுகிறார்.நம்முடைய தேவன் துரோகிகளுக்கும் நன்றிமறந்தவர்களுக்கும் நன்மை செய்கிற தேவன். [மத்தேயு:6:44,45; லூக்கா:6:33-35]. இயேசு கிறிஸ்து தன்னை பிடித்து மரணத்திற்கு ஒப்புக்கொடுக்க வந்த போர்சேவகனின் வேலைகாரனான மல்குஸின் வெட்டப்பட்ட காதை சொஸ்தமாக்கினார். வேதம் கூறுகிறது “உன்னிடத்தில் நீ அன்புகூருகிறது போலப் பிறனிடத்திலும் அன்புகூருவாயாக” என்ற ராஜரீக பிரமாணத்தை நாம் நிறைவேற்றினால் நன்மை செய்கிறோம் [யாக்கோபு:2:8]. ஆவியானவரின் ஆளுகைக்கு நம்மை முற்றிலும் ஒப்புக்கொடுத்து கிறிஸ்துவின் அன்பு நம் உள்ளத்தில் ஊற்றபடும் போது மட்டுமே நாம் எல்லோரையும் நேசித்து நன்மை செய்ய முடியும்.

சோர்ந்து போகாமல் நன்மை செய்

அப்போஸ்தலராகிய பவுல் கூறுகிறார் நன்மைசெய்கிறதில் சோர்ந்துபோகாமல் இருப்போமாக; நாம் தளர்ந்துபோகாதிருந்தால் ஏற்றகாலத்தில் அறுப்போம் [கலாத்தியர்:6:9,10]. நமக்கு கிடைக்கும் சமயத்திற்குதக்கதாய் யாவருக்கும் விசேஷமாக விசுவாச குடும்பத்தார்களுக்கும் நன்மை செய்யக்கடவோம். விதவைகளை கணம் பண்ணி அவர்களுக்கு நன்மைகள் செய்வது தேவனுக்கு முன்பாக பிரியமாய் இருக்கிறது [1தீமோத்தேயு:5:4]. கிறிஸ்தவர்களாகிய நாம் குடும்பத்திலும் சமுதாயத்திலும் வறுமையில் வாடுவோருக்கும் ஏழை எளியர்வர்கள் திக்கற்ற பிள்ளைகளுக்கும் இயன்ற உதவிகளை செய்ய வேண்டும். ஏனென்றால் வேதம் கூறுகிறது நன்மை செய்யவும் தானதர்மம் செய்யவும் மறவாதிருங்கள்;இப்படிப்பட்ட பலிகளின்மேல் தேவன் பிரியமாயிருக்கிறார் [எபிரெயர்:13:16]. இயேசு கிறிஸ்துவின் சிங்காசன நியாயதீர்ப்பில் நீதிமான்கள் நித்திய ஜீவனையும் சபிக்கப்பட்டவர்கள் நித்திய ஆக்கினையும் அடைவார்கள். இந்த நீதிமான்களைப் பார்த்து இயேசு “பசியாயிருந்தேன், எனக்குப் போஜனங்கொடுத்தீர்கள்; தாகமாயிருந்தேன் என் தாகத்தைத் தீர்த்தீர்கள்.. மிகவும் சிறியவராகிய என் சகோதரரான இவர்களில் ஒருவனுக்கு நீங்கள் எதைச் செய்தீர்களோ, அதை எனக்கே செய்தீர்கள் என்று மெய்யாகவே உங்களுக்குச் சொல்லுகிறேன் என்பார் என வேதம் கூறுகிறது. உலகத்தில் இயேசுவின் அன்பை வெளிப்படுத்தும் விதமாக ஏழை எளியோர்க்கு நன்மை செய்ய வேண்டும். அதோடு நின்றுவிடாமல் புறஜாதியாரை தேவனுடைய ராஜ்ஜியத்திற்கு ஆயத்தப்படுத்தி அவர்கள் ஆத்துமாக்களுக்கு நன்மை செய்கிறவர்களாயும் நாம் மாற வேண்டும். ஆவிக்குரிய பிரகாரமாக நாம் பார்க்கும் போது இயேசுவின் தாகத்தை தீர்ப்பதும் அவருடைய பசியை ஆற்றுவதும் அவருடைய ராஜ்ஜியத்திற்கு ஆத்துமாக்களை ஆதாயம் செய்வதை குறிக்கும். ஏனென்றால் பாவிகளை இரட்சிக்கவே இயேசு கிறிஸ்து உலகத்திற்கு வந்தார். அவர் உலகத்தில் வாழ்ந்த போது தம்மிடம் உதவிநாடி வந்த ஜனங்களுக்கு உதவி செய்ததோடு உன் பாவங்கள் மன்னிக்கப்பட்டது இனி பாவம் செய்யாதே என கூறியதை நாம் வேதத்தில் காண்கிறோம். இயேசு கிறிஸ்து சரீரபிரகாரமான சுகத்தையும் ஆவிக்குரிய சுகத்தையும் ஜனங்களுக்கு அளித்தார். எனவே நாமும் சோர்ந்து போகாமல் நன்மைகள் செய்வதோடு நின்றுவிடாமல் அவருடைய ராஜ்யத்திற்கு ஜனங்களை ஆயத்தப்படுத்துவோம்.

கிறிஸ்துவுக்குள் பிரியமானவர்களே வேதம் கூறுகிறது நன்மைசெய்யும்படி உனக்குத் திராணியிருக்கும்போது, அதை செய்யத்தக்கவர்களுக்குச் செய்யாமல் இராதே [நீதிமொழிகள்:3:27]. கிறிஸ்தவர்களாகிய நாம் நம்மிலுள்ள தீமைகளை அகற்றி விட்டு நன்மை செய்ய வேண்டும். எந்த சூழ்நிலையிலும் எவ்விடத்திலும் கிறிஸ்துவை பிரதிபலிக்கும் வண்ணம் எல்லாருக்கும் நன்மைகளை செய்வோம். நாம் பிறருக்கு நன்மைகள் செய்தாலும் பல நேரங்களில் அவர்கள் நமக்கு தீமை செய்ய கூடும். இப்படிப்பட்ட பாடுகள் அடையும் போது பொறுமையோடு சகிக்க வேண்டும். அது தேவனுடைய சமூகத்தில் பிரீதியாயிருக்கிறது. நாம் ஏதோ ஒரு உதவியை செய்வது மட்டும் நன்மையல்ல. ஒரு சகோதரன் இடகிறதற்காவது தவறுகிறதற்காவது பலவீனப்படுகிறதற்காவது ஏதுவாய் ஒன்றும் செய்யாமலிருப்பதும் நன்மையே. சாலொமோன் ராஜா நன்மை தீமை இன்னதென்று வகையறுக்க ஞானமுள்ள இருதயத்தை தேவனிடம் கேட்டார்.அது தேவனின் பார்வைக்கு உகந்த விண்ணப்பமாய் இருந்தது. தேவனுடைய பாதத்தில் அமர்ந்து நன்மை தீமை வகையறுக்கதக்க ஞானமுள்ள இருதயத்தை தாரும் என மன்றாடுவோம். நாம் உயிரோடிருக்கும் காலம் வரை நம்மால் இயன்ற நன்மைகளை பிறருக்கு செய்வோம். தேவன் நம் ஒவ்வொருவரையும் இரட்டிப்பான நன்மையினால் நிறைத்து ஆசீர்வதிப்பாராக. ஆமென்.

கிறிஸ்துமஸ் வாழ்த்து செய்தி-2017

2017-12-25T00:00:00.000-08:00

கிறிஸ்துவுக்குள் பிரியமானவர்களே,

உலக இரட்சகர் இயேசு கிறிஸ்துவின் நாமத்தில் உங்கள் அனைவருக்கும் என் அன்பின் கிறிஸ்துமஸ் மற்றும் புத்தாண்டு நல்வாழ்த்துகள்.

இருப்பவர்கள் இல்லாதவர்களோடு பகிர்ந்து கொள்ளும் நாளே கிறிஸ்துமஸ். சில குழந்தைகள் தங்கள் கல்வி ஆண்டு முடிந்தவுடன் பயன்படுத்தாத நோட்டுபுத்தகங்களின் எழுதாத பகுதிகளையெல்லாம் சேர்த்து, அவற்றை புதிய நோட்டுகளாக தைத்து ஏழை மாணவர்களுக்கு கொடுக்கிறார்கள்.

இவ்விதமே ஒவ்வொருவரும் தன்னிடம் உள்ளதை பகிர்ந்து கொண்டு, எல்லோரும் இந்த கிறிஸ்துமஸ் விழாவை சிறப்பாக கொண்டாடினால் கிறிஸ்து நம்மில் பிறப்பார். வெறும் கொண்டாட்டங்களை ஆண்டவர் வெறுக்கிறார். ஆமோஸ் 5:21-ல் உங்கள் திருவிழாக்களை நான் வெறுத்து அருவருக்கின்றேன்” என்று ஆண்டவரே கூறுகின்றார்.

“ஆண்டவருடைய வார்த்தைக்குக் கீழ்படிவதே எல்லாப்பலிகளை விட மேலான பலியாகும்” என்று 1 சாமு 15:22 கூறுகிறது.

லுாக் 6:38-ல் இயேசு, “கொடுங்கள்; உங்களுக்குக் கொடுக்கப்படும்” என்று கூறுகிறார். நாம் எதைப் பிறருக்கு கொடுக்கிறோம்?

இலவசமாய் பெற்றுக் கொண்டீர்கள், இலவசமாய் கொடுங்கள் “ என்ற வசனத்தின்படி நாம் ஆண்டவரிடமிருந்து இலவசமாய் பெற்றுக் கொண்ட நம் தாலந்துகளைப் (பணம்) பிறருக்காக செலவு செய்ய வேண்டும். நம்முடைய நேரத்தைப் பிறருக்காக செலவு செய்ய வேண்டும். எல்லாவற்றிற்கும் மேலாக நாம் மன்னிப்பைக் கொடுக்க வேண்டும்.

மத். 18:35-ல் இயேசு, “உங்களுள் ஒவ்வொருவரும் தம் சகோதர சகோதரிகளை மனமார மன்னிக்காவிட்டால் விண்ணுலகில் இருக்கும் என் தந்தை உங்களை மன்னிக்க மாட்டார்” என்று கூறுகிறார். எனவே நம் எதிரிகளை மன்னித்து அவர்களை நேசித்தால் அதுவே சிறந்த கிறிஸ்துமஸ் கொண்டாட்டம்.

கர்த்தரது அளவற்ற கிருபையினால், நாம் கிறிஸ்துமஸ் பண்டிகையை கொண்டாடுகிறோம். ருஷா வருஷம் கிறிஸ்துமஸ் பண்டிகையை ஆவலோடு எதிர்பார்க்கிறார்களே தவிர, கிறிஸ்துமஸ் பண்டிகை, நமக்கு கொடுக்கும் போதனைகளை பெரும்பாலானோர் கற்றுக் கொள்வதில்லை. இந்த பண்டிகையின் போது மூன்று விஷயங்களை நாம் சிந்திப்போம்.

கன்னி மரியாள் நமது ஆண்டவருக்குத் தாயானவர் என்றாலும், அவர் மன்னன் அகுஸ்துராயனால் பிறப்பிக்கப்பட்ட கட்டளைக்கு கீழ்ப்படிந்து நாசரேத்திலிருந்து பெத்லகேம் சென்றார். தேவன், தமது அடியாளுக்காக இந்த கட்டளையை நிறுத்தவில்லை. அச்சமயம் கன்னி மரியாள் நிறைமாத கர்ப்பவதி. ஆகவே, இரண்டு மாதம் கழித்து ராயன் இந்த உத்தரவை போடும்படி தேவன் நியமித்திருக்கலாம்.

ஆனால், அவ்வாறு அவர் செய்யவில்லை. கன்னி மரியாளும் தனது உரிமைக்காக வாதாடவில்லை. கோவேறு கழுதையில் 90 மைல் சவாரி செய்ய வேண்டியிருந்தது. தமது குமாரனை பெற்றெடுக்கும் தாயாருக்காக ஒரு ரதத்தைக் கூட தேவன் ஏற்பாடு செய்யவில்லை.

தங்குவதற்கு சத்திரத்தில் கூட இடம் தரவில்லை. மாட்டுத் தொழுவத்தில் தான் இடம் கொடுத்தார். அதற்காக மரியாளும் வாதாடவில்லை.

நம்மில் அனேகர், “தேவன் எனக்கு பண வசதி கொடுக்கவில்லை, பதவி கொடுக்கவில்லை,” என்றெல்லாம் முணுமுணுப்பது உண்டு. ஆனால் நாம் இங்கு காண்பது என்ன? பரிசுத்த மரியாளுக்கு பேறு கால சமயத்தில் உதவி செய்ய ஒருவரும் இல்லை. தாயே, பிள்ளையைப் பெற்றெடுத்து துணிகளில் சுற்றி முன்னணையிலே கிடத்தியதாக பார்க்கிறோம்.

நமது வீட்டில் பிள்ளை பிறந்தால் அதை நமது பணக்கார நண்பர்களுக்குச் சொல்லி அனுப்புவோம். பெரிய பதவியில் உள்ளவர்கள், பணக்காரர்கள் வந்து பார்க்க வேண்டும் என்று ஆசைப்படுவோம். அதை பெருமையாக நாலு பேரிடம் சொல்லிக் கொள்வோம். ஆனால், தேவன் தமது ஒரே பேறான குமாரன் பிறந்ததை சாதாரண எளிய மேய்ப்பருக்குச் சொல்லும்படி செய்கிறார். அவர்கள் வந்து பார்த்ததை ஒரு கவுரவமாக நினைத்தார்.

மனிதகுலம் ரட்சிக்கப்பட வேண்டுமானால், தேவகுமாரன் தமது மகிமையுள்ள தெய்வீக மேன்மையை தியாகம் செய்து, பூலோகத்தில் மனிதனாகப் பிறக்க வேண்டும். எல்லோரும் காணவும், பழகவும் வேண்டுமானால் எளிய குடும்பத்தில் பிறக்க வேண்டும்.

மனுக்குலம் எளிமையை, துன்பத்தைச் சகிக்கும் தன்மையை, பிறரது அநியாயங்களைப் பொறுமையாக ஏற்றுக் கொள்ள வேண்டுமானால் அவர்களுக்கு முன்மாதிரியாக வேண்டும். கிறிஸ்துமஸ் பண்டிகை கற்றுக் கொடுக்கும் தாழ்மையை, எளிமையை, தியாக சிந்தையை இந்த

கிறிஸ்துமஸ் பண்டிகையில் ஏற்றுக் கொள்வோம்.

அனைவருக்கும் இனிய கிறிஸ்து பிறப்பு மற்றும் புத்தாண்டு நல் வாழ்த்துக்கள்

சிலுவையில் இயேசு கூறிய ஏழு வார்த்தைகள்

2017-04-14T06:11:00.000-07:00

இயேசு கிறிஸ்து இப்பூவுலகில் அவதரித்த வரலாறு சரித்திரச் சான்றுபடி கி.மு. 4-5 என்று கணக்கிடப்பட்டுள்ளது.

இயேசு சுமார் 33 1/2 ஆண்டுகள் இவ்வுலகில் வாழ்ந்தார். அவர் பிறந்த நோக்கத்தின்படி மனித வாழ்க்கைக்கு உதவாத எல்லாவித தீய சக்திகளையும், மூட மத கோட்பாடுகளையும், ஆதிக்க போக்கையும் எதிர்த்தார். மக்களிடையே பல அதிசயங்களை செய்தார். இம்மாய உலக வாழ்வை விட தேவனுடைய ராஜ்யத்தை தேட மக்களிடையே போதித்தார்.

பரலோக இராட்சியத்தின் வழிகளை அன்றிருந்த அரசும், யூத மதவாதிகளும் ஏற்க மறுத்தனர். மாறாக இவர் மேல் பழி சுமத்தி சிலுவையில் அறைய திட்டமிட்டனர். அந்த நாட்களில் கொடூர செயல் புரிந்த குற்றவாளிகளை சமூகத்தில் மிகக் கேவலமாக நடத்த வேண்டுமானாலும் சிலுவையில் அறைவதை வழக்கமாகக் கொண்டிருந்தனர்.இதன்படி தங்கள் மனம் நிறைவடைய இயேசு கிறிஸ்துவை சிலுவையில் அறைந்தனர். அவர் சிலுவையில் அறையப்பட்டு உயிர் விடுமுன் 7 வார்த்தைகளைச் மொழிந்தார்.

இயேசு சிலுவையில் அறையப்பட்ட நிலையில், சிலுவை மரத்தில் தொங்கிக் கொண்டிருக்கும்போது பேசியவைகள் அவருடைய சிலுவை மொழிகள் என அழைக்கப்படுகின்றன. இயேசுவின் சிலுவை மொழிகள் சுவிஷேசப் புத்தகங்களில் குறிப்பிடப்பட்டுள்ளன.

1) மன்னிப்பு

முதல் வார்த்தையில், இயேசு தம்முடைய சத்துருக்களுக்காக பிதாவிடம் பரிந்து பேசினார்.

"பிதாவே, இவர்களுக்கு மன்னியும், தாங்கள் செய்கிறது இன்னதென்று அறியாதிருக்கிறார்களே" (லூக்கா 23 : 34)

இயேசு, “தந்தையே, என்னைக் கொல்கிற இந்த மக்களை மன்னித்தருளுங்கள். அவர்கள் செய்துகொண்டிருப்பதை அவர்கள் அறியாமல் இருக்கிறார்கள்” என்றார்(.லூக்கா 23:34)

2) இரட்சிப்பு

இரண்டாவது வார்த்தையில், இயேசு மனந்திரும்பின கள்ளனுக்காகப் பேசினார்

"இன்றைக்கு நீ என்னுடனே கூடப் பரலோகத்திலிருப்பாய் என்று மெய்யாகவே உனக்குச் சொல்லுகிறேன்" (லூக்கா 23 : 43)

இயேசு அவனை நோக்கி, “கவனி, நான் சொல்வது உண்மை. இன்று நீ என்னோடு சேர்ந்து பரலோகத்திலிருப்பாய்” என்றார்.(லூக்கா 23:43)

3) அரவணைப்பு

மூன்றவது வார்த்தையில், இயேசு தன் தாயாகிய மரியாளுக்காக பேசினார்

தம்முடைய தாயை நோக்கி : "ஸ்திரியே! , இதோ, உன் மகன் என்றார்". சீடனை நோக்கி : "இதோ உன் தாய் என்றார்" (யோவான் 19 : 26-27)

இயேசு அவருடைய தாயைப் பார்த்தார். அவரால் பெரிதும் நேசிக்கப்பட்ட சீஷனையும் அங்கே பார்த்தார். அவர் தன் தாயிடம், “அன்பான பெண்ணே, அதோ உன் மகன்” என்றார். 27 பிறகு இயேசு தன் சீஷனிடம், “இதோ உன்னுடைய தாய்” என்றார். அதற்குப்பின் அந்த சீஷன் இயேசுவின் தாயைத் தன் வீட்டிற்குத் தன்னோடு அழைத்துச் சென்றான்.யோவான் 19:26-27

4) தத்தளிப்பு

நான்காவது வார்த்தையில், இயேசு உலக மனிதர்களின் பாவங்கள் அனைத்தும் தன் மேல் வரும் நேரத்தில் தன்னைவிட்டு எடுப்பட்டதன் பிதாவின் பிரசன்னத்திற்காய் பேசினார்

ஒன்பதாம் மணி நேரத்தில் இயேசு: ஏலீ! ஏலீ! லாமா சபக்தானி, என்று மிகுந்த சத்தமிட்டுக் கூப்பிட்டார்; அதற்கு என் தேவனே! என் தேவனே! ஏன் என்னைக் கைவிட்டீர் என்று அர்த்தமாம். (மத்தேயு 27 : 46)

சுமார் மூன்று மணியளவில் இயேசு உரத்த குரலில் , “ஏலி ஏலி லாமா சபக்தானி” என்று கதறினார். இதன் பொருள்,, “என் தேவனே, என் தேவனே, ஏன் என்னைக் கைவிட்டீர்?” [a] என்பதாகும்.(மத்தேயு 27:46)

5) தவிப்பு

ஐந்தாவது வார்த்தையில், இயேசு தன்னுடைய ஆவிக்குரிய தேவையைக்குறித்து மனிதகுலத்தின் ஆத்தும இரட்சிப்பின் திட்டத்தைக்குறித்து பேசினார்

எல்லாம் முடிந்தது என்று இயேசு அறிந்து, வேதவாக்கியம் நிறைவேறத்தக்கதாக : "தாகமாயிருக்கிறேன் என்றார்" (யோவான் 19:28)

பின்பு எல்லாம் முடிந்தது என்பதை இயேசு அறிந்தார். வேதவாக்கியம் நிறைவேறும்பொருட்டு அவர், “நான் தாகமாயிருக்கிறேன்” என்றார்.(யோவான் 19:28)

6) அர்ப்பணிப்பு

ஆறாவது வார்த்தையில், இயேசு தான் பூமிக்கு மனிதனாய் பிறந்த நோக்கத்தை, பிதாவின் அநாதி திட்டத்தை முடித்ததை குறித்து பேசினார்

இயேசு காடியை வாங்கின பின்பு, "முடிந்தது" என்று சொல்லி தலையை சாய்த்து ஆவியை ஒப்புக்கொடுத்தார் (யோவான் 19 : 30)

இயேசு காடியைச் சுவைத்தார். பிறகு அவர், “எல்லாம் முடிந்தது” என்றார். இயேசு தன் தலையைச் சாய்த்து இறந்துபோனார்.(யோவான் 19:30)

7) ஒப்புவிப்பு

ஏழாவது வார்த்தையில், இயேசு மனிதகுலத்திற்காய், அவர்களின் பாவபரிகாரியாய் தன்னையே ஜீவ பலியாக ஒப்புகொடுத்து மரித்தார்

இயேசு, பிதாவே உம்முடைய கைகளில் என் ஆவியை ஒப்புவிக்கின்றேன் என்று மகா சத்தமாய்க் கூப்பிட்டு சொன்னார், இப்படி சொல்லி ஜீவனை விட்டார். (லூக்கா 23:46)

இயேசு, “பிதாவே, என் ஆவியை உம்மிடம் தருகிறேன்” என்னும் வார்த்தையுடன் இறந்தார்.(லூக்கா 23:46)

இது நமக்காகவும்,நம் ஜனத்துக்காகவும் துக்கப்படும் வேளை.இரட்டை கிழித்து சாம்பலில் உட்காராவிட்டாலும் வேத வசனம் சொல்கிறபடி நம் இருதயங்களை கிழித்து நம் மக்கள் மேல் வரப்போகும் கோபாக்கினைகளுக்கு தேவன் ஜனங்களை காக்கும் படி திறப்பிலே நின்று அவருக்கென்று கதறகூடிய ஆத்துமாவை ஆணடவர் தேடிக்கொண்டிருக்கிறார். கண்முன்னால் அழிந்துகொண்டிருக்கும் இத்தனை கோடி ஜனங்களுக்கு நாம் என்ன் பதில் ஆண்டவருகு சொல்லப்போகிறோம். நாம் சிந்திப்போம் ,ஆண்டவருக்காக எதையாகிலும் சாதிக்கிறவர்களாக அவரிடம் நம்மை ஒப்புக்கொடுப்பதே அவரின் சிலுவையை தியானிப்பதின் உண்மையான அர்த்தம் ஆகும்.

சிலுவையை சுமப்பதற்கான தகுதிகள்

2017-04-12T07:27:00.000-07:00

வேதம் சொல்லுகிறது, ஒருவன் என் பின்னே வர விரும்பினால் அவன் தன்னைத்தான் வெறுத்து தன் சிலுவையை அனுதினமும் எடுத்துக் கொண்டு என்னைப் பின்பற்றக்கடவன்– லூக்கா 9:23

தகுதிகள்:

தகுதி 1: கிறிஸ்துவின் சிந்தை இருக்க வேண்டும் [ பிலி 2:5 ]

தகுதி 2: தன்னை வெறுமையாக்க வேண்டும் [ பிலி 2:7 ]

தகுதி 3: கீழ்ப்படிதல் வேண்டும் [ பிலி 2:8 ]

தகுதி 4: தாழ்மை வேண்டும் [ பிலி 2:8 ]

தகுதி 5: உலகத்தின் ஆசை இச்சைகளை விட வேண்டும் [ கலா 5:24 ]

முன்னுரை:

நாம் ஒரு உலக வேலைக்கு செல்ல வேண்டுமானால் அந்த ஸ்தாபனத்தில் நடத்துகிற நேர்முகத்தேர்வில் வெற்றி பெற வேண்டும், அப்பொழுதுதான் நமக்கு அந்த வேலை கொடுக்கப்படும் என்பதில் சந்தேகமேயில்லை. நேர்முகத்தேர்வுக்கு செல்வதற்கு முன்னால் நமக்கு சில தகுதிகள் அந்த நிறுவனத்தினரால் நியமிக்கப்படும் அந்த தகுதிகள் இருக்கிறவர்கள் மட்டுமே அந்த வேலைக்கு தகுதியுள்ளவர்களாக மாறுகிறார்கள். இதேபோலத்தான் கிறிஸ்தவ வாழ்க்கையும் அமைகிறது. சிலுவைபாடுகள் என்கிற தகுதிஇல்லாமல் எந்த ஒரு கிறிஸ்தவ வாழ்க்கையும் கிடையாது. இந்த தகுதி அதாவது சிலுவையின் பாடுகள் யார் யாரிடம் எல்லாம் இருக்கிறதோ? அவர்கள் மட்டுமே கிறிஸ்து ஆயத்தப்படுத்தி வைத்திருக்கிற விருந்துக்கு அனுமதி சீட்டை பெற முடியும் என்பது மெய் ஆகும்.

இந்த விருந்திற்கு முன்பாக நாம் சிலுவையை இந்த உலகத்தில் வாழும் வரை சுமக்கவேண்டும். இது ஒரு லேசான காரியம் இல்லை. இது நம்முடைய வாழ்க்கையில் காண்கிற ஒருவன் கழுத்தில் அணிந்து பயணம் செல்வது போலல்ல, இதற்கென சிலதகுதிகள் உண்டு என்பதை நாம் வேதத்தை வாசிக்கும் போது புரிந்து கொள்ள முடிகிறது. இப்படிப்பட்ட தகுதிகளை நம்முடைய ஆண்டவராகிய இயேசு கிறிஸ்து இந்த உலகத்தில் மனுஷகுமாரனாய் வந்த போது பெற்றிருந்தார்.

ஆகவேதான் பிதாவானாவர் இயேசுவை எல்லாவற்றிற்கும் மேலாக உயர்த்தினார் என்றுபார்க்கிறோம் [ பிலி 2:9,10,11 ]

இதற்கு காரணமான அதாவது ஆண்டவராகிய இயேசு கிறிஸ்துவின் உயர்வுக்குக் காரணமான தகுதிகளை வேத விளக்கத்துடன் பின்வருமாறு பார்க்கலாம்.

1. முதல் தகுதி: கிறிஸ்துவின் சிந்தை நம் ஒவ்வொருவருக்கும் வேண்டும் [பிலி 2:5]

கிறிஸ்துவின் சிந்தை என்பது தன்னுடைய இஷ்டப்படி செய்யாமல் தன்னை அனுப்பினவரின் சித்தத்தின்படி செய்வதே ஆகும் [ யோவான் 4:34 ]

பாருங்கள் ஆண்டவராகிய இயேசு கிறிஸ்துவின் ஆத்துமா மரணத்துக்கேதுவான துக்கங்கொண்டிருந்தது, அப்பொழுது அவர் ஜெபம் செய்வதற்கு சென்றார், எப்படியென்றால் அப்பா பிதாவே இந்தப் பாத்திரத்தை என்னிடத்திலிருந்து எடுத்துப் போடும் ஆகிலும் என்சித்தத்தின் படியல்ல உம்முடைய சித்தத்தின்படியே ஆகக்கடவது என்றார் [ மாற்கு 14:34-36 ]

இயேசு கிறிஸ்து நினைத்திருந்தால் தனக்கு விரோதமாய் வந்தவர்களை ஒரேநிமிஷத்தில் அழித்திருக்க முடியும் ஆனால் அவரோ தேவதிட்டம் வீணாய் போய் விடக்கூடாது என்பதிலே குறிக்கோளாய் இருந்தார். இப்படிப்பட்ட சிந்தயைத்தான் அப்.பவுலும்கொண்டிருந்தார், பாருங்கள் அவர் தேவனால் சந்திக்கப்பட்ட போது அவர் சொன்ன ஒருபதில் தேவனே நீர் என்ன செய்ய சித்தமாயிருக்கிறீர் என்று கேட்டார்.

நாம் எப்படியிருக்கிறோம் கிறிஸ்துவின் சிந்தை நம்மிடம் இருக்கிறதா என்று யோசித்துப்பாருங்கள் ஏனென்றால் இன்று அனேகர் அதாவது கிறிஸ்துவுக்குள் நாங்கள் வந்துவிட்டோம் ஆகவே இன்னன்ன காரியங்களை தேவனுக்கென்று செய்வோம்.அதுமட்டுமல்லாமல் தேவனுக்காக மரிக்க வேண்டுமானலும் அதற்கு தயாராகஇருக்கிறேன் என்று பலவிதமான பொருத்தனைகளை செய்வதுண்டு. நாட்கள் செல்லசெல்ல அல்லது உலகத்தின் பாடுகள் நம்மை நெருக்கும் போது எல்லாவற்றையும் மறந்துவிட்டு மறுபடியும் பழைய வாழ்க்கைக்கு செல்லுகிற விசுவாசிகளையும் ஊழியக்காரர்களையும் நாம் இன்றைய நாட்களில் அதிகம் பார்க்க முடிகிறது. இதற்குக்காரணம் எல்லாவற்றையும் தேவன் திட்டம் செய்வதற்குப் பதிலாக இவர்களே எல்லாதிட்டங்களையும் பட்டியல் இடிவதே ஆகும்.

இனிமேலாவது சிலுவையை சுமக்க வேண்டுமானால் சிலுவையின் சொந்தக்காரராகிய இயேசு கிறிஸ்துவின் சிந்தையை அணிந்து கொள்வோம். அப்பொழுது மாத்திரமே சிலுவையில் இருக்கிற இயேசுவை நம்மால் பார்க்க முடியும். ஆகவே மனுஷருக்குப் பிரியமாயிருக்க விரும்புகிறவர்களாகப் பார்வைக்கு ஊழியஞ்செய்யாமல் கிறிஸ்துவின் ஊழியக்காரராக மனபூர்வமாகத் தேவனுடைய சித்தத்தின்படி செய்யுங்கள் –எபேசியர் 6:6.

2. இரண்டாது தகுதி: நம்மை வெறுமையாக்க வேண்டும் [ பிலி 2:7 ]

பெறுமையாக்குதல் என்பது தன்னுடைய மதிப்பு பூஜ்ஜியம் என்பது காண்பிப்பதே ஆகும்.பாருங்கள் வேதம் சொல்லுகிறது,

பூமியும் அதின் நிறைவும் கர்த்தருடையது என்றும் [ 1கொரி 10:26 ] லும்

வானங்கள் கர்த்தருடையது பூமியும் கர்த்தருடையது என்று சங்கீதம் 89:11 லும்கர்த்தராகிய இயேசு கிறிஸ்து எவ்வளவு பெரிய செல்வந்தர் என்பதை உணர்ந்து கொள்ளமுடிகிறது. ஆனால் அவரோ தம்முடைய ஜனங்கள் குறைவுடனும், பாவத்தின்நோயுடனும் ஒவ்வொரு நாளும் கஷ்டப்படுவதைப் பார்த்த தேவன் தம்மையே வெறுமையாக்கி இறங்கி வந்தார் என்று சங்கீதம் மற்றும் பிலிப்பியர் அதிகாரத்தை நாம்படிக்கும் போது அறிந்து கொள்ள முடிகிறது.

இத்தகைய காரியத்தை நாம் பலவிதமான பாத்திரங்களில் பார்க்க முடிகிறது.எப்படியென்றால் தாவீது ராஜாவைப் பாருங்கள் அவர் இஸ்ரவேல் மற்றும் யூதருக்குராஜாவாய் இருந்த போதிலும் அவர் சொன்ன ஒரு காரியம்,

இப்படி மனபூர்வமாய்க் கொடுக்கும் திராணி உண்டாவதற்கு நான் எம்மாத்திரம் என்ஜனங்கள் எம்மாத்திரம்? எல்லாம் உம்மால் உண்டானது உமது கரத்திலே வாங்கிஉமக்குக் கொடுத்தோம் [ னாளாகமம் 29:14 ]

அடுத்ததாக, அப்.பவுல் தான் யூதமார்க்கத்தில் ஒரு பெரிய பதவியில் எல்லாரும்மதிக்கத்தக்க நிலையில் வாழ்ந்து கொண்டிருந்த அவர் தேவனால் சந்திக்கப்படுகிறார்.இதோ எல்லாவற்றிற்கு தன்னை தலைவனாக காண்பிக்க விரும்பிய பவுல் சொன்ன ஒருகாரியம், எனக்கு லாபமாயிருந்தவைகளெவைகளோ அவைகளைக் கிறிஸ்துவுக்காக நஷ்டமென்று எண்ணினேன் என்று பிலிப்பியர் 3:7ல் தம்முடைய வெறுமையை அப்.பவுல் வெளிப்படுத்துவதைப் பார்க்கிறோம்.

மேலும், அப்.யோவான் அதாவது ஆண்டவராகிய இயேசு கிறிஸ்துவுக்கு அன்பாய் இருந்தசீஷன் இந்த அப்போஸ்தலராகிய யோவான் ஆவார். இப்படிப்பட்ட செல்வாக்கைப் பெற்றிருந்த யோவான் சொல்லும் பதிலைப் பாருங்கள்.

அவர் [இயேசு கிறிஸ்து] பெருகவும் நான் சிறுகவும் வேண்டும் [ யோவான் 3:30 ]

நாமும் இவர்களைப் போல வெறுமையாய் இருக்கிறோமோ? அல்லது எனக்கு அந்த வரம்இருக்கிறது அல்லது என்னிடம் தேவ வல்லமை இருக்கிறது நான் தொட்டால் எல்லாரும்விழுகிறார்கள் அல்லது நான் ஜெபித்தால் எல்லாரும் சொஸ்தமாகிறார்கள் என்றுசொல்லிக் கொண்டிருக்கிறோமா? யோசித்துப் பாருங்கள். நாம் நம்மை வெறுமையாக்கினால் மாத்திரமே தேவனால் இந்த பாத்திரத்தில் ருசியுள்ள திராட்சரசத்தை நிரப்ப முடியும் என்பதை மறந்து விடாதீர்கள். வேதம் சொல்லுகிறது, ஆகையால் நான் என்னை அருவருத்து தூளிலும் சாம்பலிலும் இருந்து மனஸ்தாபப்படுகிறேன் – யோபு 42:6

3. மூன்றாவது தகுதி: கீழ்ப்படிதல் உள்ளவர்களாக இருக்க வேண்டும் [ பிலி 2:8 ]

வேதம் சொல்லுகிறது, நம்முடைய ஆண்டவராகிய இயேசு கிறிஸ்து சிலுவையின் மரணபரியந்தமும் கீழ்ப்படிந்தவராகக் காணப்பட்டார் [பிலி 2:8]

இந்த வசனத்தின் உட்பொருளைக் கவனித்துப் பார்ப்பீர்களானால் ஒரு காரியம் நமக்குதெரிய வரும் அது என்ன வென்றால் அவர் இந்த உலகத்தில் மனுஷகுமாரனாய் வந்ததுமுதல் பிதாவுக்குக் கீழ்ப்படிந்தவராகக் காணப்பட்டார். ஆகவேதான் அவர் இப்படியாக சொல்லுகிறார்.

நான் என் சுயமாய் ஒன்றும் செய்கிறதில்லை நான் கேட்கிறப்படியே நியாயந்தீர்க்கிறேன்.எனக்குச் சித்தமானதை நான் தேடாமல் என்னை அனுப்பின பிதாவுக்குச் சித்தமானதையேநான் தேடுகிறபடியால் என் தீர்ப்பு நீதியாயிருக்கிறது. [ யோவான் 5:30 ]

இன்று அனேகருடைய தீர்ப்பு நீதியாய் இல்லாமல் இருப்பதற்கு காரணம் அவர்கள் தேவனுக்குக் கீழ்ப்படியாத காரணத்தினால்தான் என்பதை இந்த இடத்தில் சுட்டிக்காட்ட விரும்புகிறேன்.

1.பாருங்கள்,சவுல் தேவனுக்குக் கீழ்ப்படியாமல் போனதினால் அவன் பாவத்திற்குள்ளாக சாத்தானால் அனுமதிக்கப்பட்டான் [ 1சாமு 15 ஆம் அதிகாரம் ]

2.அடுத்ததாக, உசியா ராஜா தேவனுக்குக் கீழ்ப்படியாததினால் அவன் தன்னுடைய நெற்றியில் வெண்குஷ்டத்தை பெற்றுக் கொண்டு ராஜாவின் ஸ்தானத்திலிருந்து வெளியேற்றப்பட்டான்.

3.யோனா தேவனுடைய சத்தத்திற்குக் கீழ்ப்படியாத காரணத்தினால் மீனின் வயிற்றிற்குள் இராப்பகல் மூன்று நாள் இருந்தான் [ யோனா 1:17 ]

இப்படியாக அனேக உதாரணங்களை நாம் பார்க்க முடிகிறது, நாம் எப்படியிருக்கிறோம் ம்முடைய ஆண்டவராகிய இயேசு கிறிஸ்து சொன்ன எல்லா வார்த்தைகளுக்கும்கீழ்ப்படிந்து வாழ்கிறோமா? அல்லது சவுலைப் போல சாக்கு போக்கு சொல்லிக் கொண்டுஇருக்கிறோமா? சிந்தித்துப் பாருங்கள், வேதம் சொல்லுகிறது. கர்த்தருடைய சத்தத்திற்குக் கீழ்ப்படிகிறதைப் பார்க்கிலும் சர்வாங்க தகனங்களும் பலிகளும் கர்த்தருக்குப் பிரியமாயிருக்குமோ? – 1சாமு 15:22 அதுமட்டுமல்லாமல், மேலும் தேவனுக்குக் கீழ்ப்படிகிறதே அவசியமாயிருக்கிறது என்று,அப்போஸ்தலர் 5:29 லும், நாம் கீழ்ப்படிதல் எவ்வளவு முக்கியமானது என்பதை அறிந்துகொள்ள முடிகிறது.

4. நான்காவது தகுதி: தாழ்மை ஒவ்வொருவருக்கும் வேண்டும் [ பிலி 2:8 ] வேதம் சொல்லுகிறது, நம்முடைய ஆண்டவராகிய இயேசு கிறிஸ்து கடைசி வரைக்கும் தம்மை தாழ்த்தினார்என்று பிலி 2:8ல் பார்க்கிறோம்.

மத்தேயு முதல் யோவான் வரை வாசிக்கும் போது தேவனுடைய பிறப்பு முதல்அவருடைய மரணம் வரை இந்த தாழ்மையை நாம் பார்க்க முடிகிறது. எல்லாவற்றிற்கும் சொந்தக்காரர் ஒரு மாட்டுத் தொழுவத்தில் வந்து தங்குவதை நம்மால் வேதத்தில்வாசிக்க முடிகிறது.

பாருங்கள், தனக்கு விரோதமாய் எத்தனை பொய்யான குற்றச்சாட்டுகளை சொன்னபோதிலும் அவர் ஒன்றும் பேசாமல் தாழ்மையாக இருந்தார் என்று வேதம் சொல்லுகிறது.பாருங்கள் சங்கீதக்காரன் எழுதும் போது அவர் சொன்ன ஒரு காரியம் அவர் [ ஆண்டவராகிய இயேசு கிறிஸ்து ] வானத்திலும் பூமியிலுமுள்ளவைகளைப் பார்க்கும் படி தம்மைத் தாழ்த்துகிறார் [சங் 113:6] , நம்மை உண்டாக்கின தேவனிடம் இவ்வளவு தாழ்மையிருக்கும் போது நம்மிடம் எவ்வளவு இருக்க வேண்டும் என்பதை சிந்தித்துப் பாருங்கள்.

தாழ்மை குணம் என்றால் என்ன?

தன்னை எந்த ஒரு இடத்திலும் அதாவது நான் என்கிற வார்த்தையை எந்த ஒருஇடத்திலும் பயன் படுத்தாமல் இருப்பதே ஆகும்.

நம்முடைய ஆண்டவராகிய இயேசு கிறிஸ்து எத்தனை விதமான அற்புதங்களையும் செய்த போதிலும் அவர் எல்லாரிடத்திலும் சொன்ன ஒரு வார்த்தை என் பெயரை எங்கும்சொல்ல வேண்டாம் என்பதாகும். பிதாவின் நாமம் மாத்திரம் மகிமைப்படுமபடியாகஎல்லாவற்றையும் செய்தார். ஆனால் இன்றைய கிறிஸ்தவர்கள் என்ன செய்கிறார்கள் தங்களுடைய கூட்டத்தில் ஒரு அற்புதம் நடந்து விட்டால் உடனே தன்னுடைய பெயரைமிகவும் விளம்பரப்படுத்துவதை நம்மால் பார்க்க முடிகிறது, இதற்குக் காரணம் என்னவென்றால் இவர்கள் இயேசு கிறிஸ்துவை அறிய வேண்டிய விதத்தில் அறியாமல் இருப்பதே காரணம் ஆகும்.

வேதம் சொல்லுகிறது, கர்த்தருக்கு முன்பாக தாழ்மைப் படுங்கள் அப்பொழுது அவர்உங்களை உயர்த்துவார் – யாக்கோபு 4:10

5. ஐந்தாவது தகுதி: உலகத்தின் ஆசை இச்சைகளை விட வேண்டும் [ கலா 5:24 ]

வேதம் சொல்லுகிறது, கிறிஸ்துவினுடையவர்கள் தங்கள் மாம்சத்தையும் அதின் ஆசை இச்சைகளையும் லுவையில் அறைந்திருக்கிறார்கள் – கலா 5:24 இத்தகைய காரியத்தை நம்முடைய ஆண்டவராகிய இயேசு கிறிஸ்து மனுஷகுமாரனாய்வந்த போது தன்னுடைய வாழ்க்கையில் வெளிப்படுத்துவதை நாம் பார்க்க முடிகிறது,எப்படியென்றால் எல்லா சோதனைகளிலும் ஆண்டவராகிய இயேசு கிறிஸ்து ஜெயம்எடுத்துக் கொண்டு வரும் போது பிசாசானவன் அவரை எப்படியாவது தன் வழிக்குக்கொண்டு வர வேண்டும் என்று முயற்சி செய்கிறான், பாருங்கள் மறுபடியும் பிசாசு அவரை மிகவும் உயர்ந்த மலையின் மேல் கொண்டு போய்உலகத்தின் சகல ராஜ்ஜியங்களையும் அவைகளின் மகிமையையும் அவருக்குக்காண்பித்து, நீர் சாஷ்டாங்கமாய் விழுந்து என்னைப் பணிந்து கொண்டால்இவைகளையெல்லாம் உமக்குத் தருவேன் என்று சொன்னான். அப்பொழுது இயேசுஅப்பாலே போ சாத்தானே என்று சொல்லி அவனைக் கடிந்து கொள்வதை நாம் மத்தேயு4:8 லிருந்து 10 வரை வாசிக்கும் போது மேலே சொல்லப்பட்ட வசனத்தின் படி இயேசுகிறிஸ்து தம்முடைய வழ்க்கையை அமைத்திருந்ததை நாம் வேதத்தை வாசித்து தெரிந்துகொள்ள முடிகிறது.

இன்று நம்மால் ஏன் ஒரு வெற்றியுள்ள கிறிஸ்தவ வாழ்க்கையை வாழமுடியவில்லையென்றால் நம்மிடத்தில் இருக்கிற உலக ஆசையே, இந்த ஆசைதான்நம்மை பாவத்திற்குள்ளாக நடத்தி நம்மையும் தேவனையும் பிரிக்கிற ஒரு சுவராகமாறுகிறது என்று யாக்கோபு 1ம் அதிகாரத்தில் வாசிக்கிறோம்.

ஆகவேதான் அப்.பவுல் இந்த உலக ஆசை தன்னைத் தீட்டுப்படுத்தக்கூடாதுஎன்பதற்காகத்தான் அவர் தன்னை சிலுவையில் அறையுண்டவராக உலகத்திற்குக் காண்பித்துக் கொடுக்கிறார். எனவே தான் அவருடைய சுவிசேஷ பணியில் இந்தஉலகத்தால் அதாவது பிசாசினால் ஒருபோதும் ஜெயம் எடுக்க முடியவில்லை என்பதைநாம் ரோமர் அதிகாரத்தையும் கலாத்தியரையும் வாசிக்கும் போது இத்தகையவிஷயத்தை அறிந்து கொள்கிறோம்.

வேதம் சொல்லுகிறது, உலகத்திலும் உலகத்திலுள்ளவைகளிலும் அன்புகூராதிருங்கள் ஒருவன் உலகத்தில் அன்பு கூர்ந்தால் அவனிடத்தில் பிதாவின் அன்பில்லை

ஏனெனில் மாம்சத்தின் இச்சையும் கண்களின் இச்சையும் ஜீவனத்தின் பெருமையுமாகிய உலகத்திலுள்ளவைகள் எல்லாம் உலகத்தினால் உண்டானவைகள் [1யோவான் 2:15,16] எனக்குப் பிரியமான தேவனுடைய பிள்ளைகளே நாம் இவ்வளவு காலம் இந்த உலகத்தைசுமந்து வந்தது போதும் இனிவருகிற நாட்களில் பரலோகத்திற்கு நம்மை கொண்டுசெல்லுகிற சிலுவை பயணத்தை மேற்கொள்வோம்.

கர்த்தராகிய இயேசு கிறிஸ்து நம் ஒவ்வொருவரையும் தம்முடைய சிலுவைத் தழும்புகளால் ஆசீர்வதிப்பாராக.

இளைப்பாறுதல் தரும் சிலுவையின் நிழல்

2017-04-06T15:00:00.000-07:00

தேவனே, உம்முடைய கிருபை எவ்வளவு அருமையானது! அதினால் மனுபுத்திரர் உமது செட்டைகளின் நிழலிலே வந்தடைகிறார்கள். - (சங்கீதம் 36:7).

வெயிலின் கொடுமையை தாங்க முடியாமல் ஒரு முட்செடியின் கொஞ்ச நிழலில் ஒரு கருநாகம் தனது வாலின் துணையுடன் தன் வயிறு வெப்பத்தினால் பாதிக்காதபடி நின்று கொண்டிருந்தது. அதன் நிழல் சற்று கீழே விழுந்தது. அந்த நேரம் நிழலுக்காக தவித்து, திரிந்த தவளை அந்த நிழலை கண்டு சந்தோஷமாக ஓடி வந்தது. ஓரக்கண்ணால் தவளையை பார்த்த கருநாகம் அதை என்ன செய்திருக்கும்? அது நம் அனைவருக்கும் தெரிந்ததே!

வேதத்திலே உவமைகள் மூலமாக தேவன் நமக்கு அநேக காரியங்களை

தெளிவுப்படுத்துவதை நாம் வாசித்திருக்கிறோம். நியாயாதிபதிகள் 9-ம் அதிகாரத்திலுள்ள ஒரு உவமை இவ்வாறு கூறுகிறது.

எல்லா மரங்களும் தங்களுக்கு ஒரு ராஜாவை ஏற்படுத்தும்படி ஒலிவ மரத்திடம் சென்றன. ஆனால் ஒலிவ மரமோ அந்த அழைப்பை மறுத்து 'என்னிலுள்ள கொழுமையை விட்டுவிட்டு அரசாளப் போவேனோ' என்றது. இரண்டாவதாக அத்திமரமும், மூன்றாவதாக திராட்சை செடியும் அந்த அழைப்பை நிராகரித்தன. முடிவில் முட்செடியானது, மரங்களை பார்த்து '

நீங்கள் என்னை உங்களுக்கு ராஜாவாக அபிஷேகம் பண்ணுகிறது மெய்யானால் என் நிழலிலே வந்தடையுங்கள். இல்லாவிட்டால் என்னிலிருந்து அக்கினி புறப்பட்டு லீபனோனின் கேதுரு மரங்களை பட்சிக்கக்கடவது' என்றது. பாருங்கள் முட்செடிக்கு வந்த பெருமையை! முட்செடி என்பது, சாபத்தின் சின்னம். மனிதன் பாவம் செய்தபோது பூமி முள்ளையும், குருக்கையும் முளைப்பித்தது. இதன் அடையாளமாகவே இயேசுகிறிஸதுவுக்கு முட்செடி சூட்டப்பட்டதையும் நினைவிற்கொள்வோம்.

இன்றும் மனிதர்கள் நிழலைத்தேடி அலைகின்றனர். வாழ்க்கையின் நெருக்கங்களும், கசப்புகளும் அவர்களை இளைப்பாறும்படி நிழல் எங்கே உண்டு என கண்களை சுழல விடுகின்றனர். அவர்களை சிற்றின்பமும், சினிமா, குடி, போதை, ஆண், பெண்; நண்பர்களின் உறவு விபச்சாரம் போன்ற முடிசெடியின் நிழல்கள் அனைத்தும் வாவென்று அழைக்கின்றன.

அந்த சிறிய நிழலுக்காக மனிதன் அதன் கீழ் ஒதுங்கி, இறுதியில் அந்த தவளையை போல் அவைகளால் விழுங்கப்பட்டு, மடிந்து போகிறான். அநேக சகோதரிகள், நிழலை தேடி அலையும்போது, சில ஆண்கள், அவர்களிடம் சற்று அன்பு காண்பித்தவுடன், உடனே அதுதான் நித்திய நிழல் என்று நினைத்து, தங்களையே அவர்களிடம் ஒப்படைத்து விடுகிறார்கள். அதனால் தங்கள் வாழ்வை கானல் நீராக்கி, கண்ணீரோடு வாழ்கின்ற சகோதரிகள் எத்தனை பேர்! வேண்டாம், அப்படிப்பட்டதான முட்செடியின் நிழலில், தவளையைப்போல் மாட்டி கொண்டு, கருநாகங்களுக்கு இரையாக வேண்டாம்,! அதுபோன்ற முட்செடிகளின் நிழலினால் ஒருபோதும் நமக்கு மெய்யான இளைப்பாறுதல் தர முடியாது. ஆனால் அவை தரும் சற்றுநேர இன்பம் முழு எதிர்கால வாழ்வையும், இருண்டதாக்கிவிடும். மன உளைச்சல்கள், குற்ற உணர்வுகள், குடும்பத்தால் புறக்கணிப்பு, கண்ணீர் போன்றவையெல்லாம் முட்செடியின் நிழலை தேடி

நாடி செல்பவர்களுக்கு அது கொடுக்கும் பரிசுகள்! இதை வாசிக்கும் அன்பு சகோதரிகளே, தயவு செய்து, உங்கள் வாழ்க்கை விலையேறப்பெற்றது, கர்த்தரால் கொடுக்கப்பட்டது, நீங்கள் கர்த்தர் கொடுக்கும் அன்பான வாழ்வை பெற்று, சந்தோஷமாக வாழும்படி அழைக்கப்பட்டிருக்கிறீர்கள், ஆகவே முட்செடியின் நிழலில் தயவுசெய்து தஞ்சமடையாதீர்கள்!

பிரியமானவர்களே, நாம் இளைப்பாறும்படியாக ஒரு மரத்தின் நிழல் ஆயத்தமாக உள்ளது. அதுதான் சிலுவையின் நிழல். சிலுவையின் நிழலிலே தேவன் நமக்கொரு மேன்மையான இளைப்பாறுதலை வைத்திருக்கின்றனர்.

அங்கு சாய்ந்து கொள்ள அவரது தோள்கள் உண்டு. அவர் தரும்

இளைப்பாறுதல் உலகத்தாலும், உலகத்தின் பணத்தாலும், பெயராலும்,

புகழாலும், தர முடியாத நிரந்தரமான இளைப்பாறுதல்! அதை நாம் நாடுவோமானால், வேதனையில்லாத ஆசீர்வாதத்தை பெற்று கொள்ள முடியும். முட்செடி நெருக்கி போடும் முன்பு சிலுவையின் நிழலில் வந்தடையுங்கள். அவர் உங்களை காத்து கொள்வார். ஆமென் அல்லேலூயா!

சிலுவையின் நிழலில் அனுதினம் அடியான்

சாய்திளைப்பாறிடுவேன் - ஆஆ

சிலுவையின் அன்பின் மறைவில்

கிருபையின் இனிய நிழலில்

ஆத்தும நேசரின் அருகில்

அடைகிறேன் ஆறுதல் மனதில்

பாவபார சுமையதால் சோர்ந்தே

தளர்ந்ததென் ஜீவியமே - ஆஆ

சிலுவையண்டை வந்ததனால்

சிறந்த சந்தோஷம் கண்டதனால்

இளைப்படையாது மேலோகம்

ஏகுவேன் பறந்தே வேகம் - சிலுவையின்

ஜெபம்

எங்களை அதிகமாய் நேசித்து வழிநடத்தும் நல்ல தகப்பனே, முட்செடியின் நிழலை நிரந்தர நிழல் என்று நினைத்து, அதில் நின்று தங்களையே இழந்து நிற்கிற ஒவ்வொருவருக்காகவும் உமது சமுகத்தில் ஜெபிக்கிறோம் தகப்பனே, தயவாய் அவர்கள் மேல் இரக்கமாயிரும். அவர்கள் தங்கள் தவறை உணர்ந்து, மனந்திரும்ப கிருபை செய்யும். உலகின் எந்த சிற்றின்பங்களாகிய நிழலும் இளைப்பாறுதலை தர முடியாது என்பதை உணர்ந்து, சிலுவையின் நிழலில் வந்தடைய கிருபை செய்யும். அவர்களை மன்னித்து ஏற்று கொள்ளும். சிலுவையின் நிழலில் சாய்ந்திளைப்பாற கிருபை செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

உன்னை ஆசீர்வதிப்பேன் - 2017

2017-01-02T04:23:00.002-08:00

என் நாமத்தைப் பிரஸ்தாபப்படுத்தும் எந்த ஸ்தானத்திலும் உன்னிடத்தில் வந்து, உன்னை ஆசீர்வதிப்பேன். – (யாத்திராகமம் 20:24).

கர்த்தராகிய இயேசுகிறிஸ்துவின் நாமத்தில் ஒவ்வொருவருக்கும் எங்களது இதயம் நிறைந்த புத்தாண்டு வாழ்த்துக்களை தெரிவித்து கொள்கிறோம். கடந்த வருடம் முழுவதும் நம்மை கண்ணின் மணியைப் போல காத்து, எந்த குறைவுமின்றி நடத்திய தேவனுக்கு இருதயத்தின் ஆழத்திலிருந்து நன்றிகளை செலுத்துகிறோம். புதிய வருடத்தையும் கர்த்தர்தாமே ஆசீர்வதித்து, கடந்த வருடத்தை காட்டிலும் இந்த வருடத்தில் இன்னும் அதிகமாக கர்த்தருக்கென்று வாழ, அவருக்கென்று ஊழியம் செய்ய ஒவ்வொருவரையும் எடுத்து பயன்படுத்துவாராக. ஆமென் அல்லேலூயா!

இந்த வருடத்தின் வாக்குதத்த வசனமாக என் நாமத்தைப் பிரஸ்தாபப்படுத்தும் எந்த ஸ்தானத்திலும் உன்னிடத்தில் வந்து, உன்னை ஆசீர்வதிப்பேன் (யாத்திராகமம் 20:24) என்று நமக்கு கொடுத்திருக்கிறார். அல்லேலூயா! இந்த வாக்குதத்தம் நம் ஒவ்வொருவர் வாழ்விலும் ஆம் என்றும் ஆமென் என்றும் நிறைவேறுவதாக.

நம்மை ஆசீர்வதிப்பதே கர்த்தருக்கு பிரியம் என்றாலும், ஒவ்வொரு ஆசீர்வாதத்திற்கும் ஒரு நிபந்தனை கர்த்தர் வைத்திருப்பது நாம் அறிய வேண்டிய ஒன்றாகும். இந்த இடத்தில் என் நாமத்தை பிரஸ்தாபப்படுத்தும் எந்த ஸ்தானத்திலும் உன்னிடத்தில் வந்து உன்னை ஆசீர்வதிப்பேன் என்று வாக்குதத்தம் செய்தாலும், ஆங்கில வேதத்தில் in all places where I record my name I will come unto thee, and I will bless thee என்று குறிப்பிடப்பட்டுள்ளது. அதாவது அவர் சொல்லும் இடத்தில் நாம் அவருடைய நாமத்தை பிரஸ்தாபிக்கும்போது, அங்கு அவர் வந்து நம்மை ஆசீர்வதிக்கிறார். சபைகளில், அவரை ஒருமனதோடு கூடி வந்து ஆராதிக்கும் இடங்களில், அவர் வந்து நம்மை ஆசீர்வதிக்கிறார். ஆகையால் சிலர் சபை கூடுதலை விட்டுவிடுவது போல நாமும் விட்டுவிடாதிருப்போமாக!

‘மண்ணினாலே பலிபீடத்தை எனக்கு உண்டாக்கி, அதின்மேல் உன் ஆடுகளையும் உன் மாடுகளையும் சர்வாங்க தகனபலியாகவும் சமாதானபலியாகவும் செலுத்துவாயாக; நான் என் நாமத்தைப் பிரஸ்தாபப்படுத்தும் எந்த ஸ்தானத்திலும் உன்னிடத்தில் வந்து, உன்னை ஆசீர்வதிப்பேன்’ என்று வசனத்தின் ஆரம்பித்தில் வாசிக்கிறோம். நாம் மண்ணென்று கர்த்தர் நினைவுகூறுகிறார். மண்ணால் உருவாக்கப்பட்ட நாம் மண்ணுக்கே திரும்புவோம் என்பதை அறிந்திருக்கிறோம். ஆகையால் மண்ணால் உருவாக்கப்பட்ட நாம், கர்த்தரின் நாமத்தை பிரஸ்தாபம் செய்வதற்கு முன்பு, அல்லது அவருடைய நாமத்தை ஆராதிப்பதற்கு முன்பு, நம் சரீரத்தினால் பலிபீடத்தை செய்து, அதாவது நம்மை சுத்திகரித்துகொண்டு, செப்பனிட்டு, நம்முடைய ஸ்தோத்திர பலிகளை சர்வ அங்கமும் பலியாக அவருக்குமுன் படைக்க வேண்டும். அப்படியே நம்முடைய ஸ்தோத்திர பலிகளை செலுத்த வேண்டும். அப்படி செய்யும்போது அவர் நம்மை வந்து ஆசீர்வதிக்கிறார்.

துன்மார்க்கருடைய பலி கர்த்தருக்கு அருவருப்பானது என்று வாசிக்கிறோமே! பாவம் செய்துவிட்டு வந்து நாம் ஆராதித்தால் நம்முடைய பலிகளை அவர் ஏற்று கொள்வதில்லை, அதனால் ஆசீர்வாதமும் நமக்கு கிடையாது. ஆகையால் சுத்திகரிக்கப்பட்டவர்களாக நாம் ஏறெடுக்கும் ஸ்தோத்திர பலிகளை அவர் பிரியமாக ஏற்றுகொண்டு, நம்மை அந்த இடத்தில் வந்து ஆசீர்வதிக்கிறார். அந்த ஆசீர்வாதத்திற்கு பாத்திரவான்களாக நாம் நம்மை ஆயத்தப்படுத்தி அவரை துதிப்போமாக! நாளையும் இந்த கட்டுரை தொடரும். ஆமென் அல்லேலூயா!

ஆசீர்வதிக்கும் தேவன்

தம் ஆசீர் பொழிந்திடும் நேரம்

பெருக்கத்தை அளித்திடும் தேவன்

நம்மை பெருக செய்வார் இவ்வருடம்

பெலத்தின்மேல் பெலனே

கிருபையின்மேல் கிருபை

மகிமையின்மேல் மகிமை

பரிசுத்தம் பரிசுத்தமே – என் வாழ்வில்

ஜெபம்: எங்கள் அன்பின் பரலோக தகப்பனே, இந்த புதிய வருடத்தை காண செய்த உம்முடைய மகத்தான கிருபைக்காக நன்றி செலுத்துகிறோம். அற்புதமான உம்முடைய வாக்குதத்தத்திற்காக உமக்கு கோடி நன்றிகள் ஐயா. மண்ணாகிய எங்கள் சரீரத்தை கர்த்தராகிய இயேசுகிறிஸ்துவின் இரத்தத்தால் சுத்திகரித்து, செப்பனிட்டு, பரிசுத்தமுள்ள இருதயத்தோடு கர்த்தரை துதிக்கும்போது, அதை ஏற்று கொண்டு வாக்குதத்தத்தின்படி எங்களை ஆசீர்வதிக்கிறதற்காக உமக்கு நன்றி செலுத்துகிறோம். பரிசுத்தமாய் எங்களை காத்து கொள்ள கிருபை செய்தருளும். இயேசுகிறிஸ்துவின் இணையற்ற நாமத்தில் ஜெபிக்கிறோம் நல்ல தகப்பனே ஆமென்.

நான்கு ஆவிக்குரிய விதிகள் என்ன

2016-10-03T14:13:00.000-07:00

          இயேசுகிறிஸ்துவின் மேலுள்ள விசுவாசத்தின் மூலமாக கிடைக்கக்கூடிய இரட்சிப்பின் நற்செய்தியை பகிர்ந்துகொள்கிறதற்கான ஒரு வழியே நான்கு ஆவிக்குரிய பிரமாணங்கள் ஆகும். இது நற்செய்தியில் உள்ள முக்கியமான தகவலை நான்கு கருத்துக்களில் சொல்லும் எளிய ஒரு வழிமுறை ஆகும்.

          நான்கு ஆவிக்குரிய விதிகளில் முதலாவது என்னவெனில், “தேவன் உன்னை நேசிக்கிறார். அவர் உன் வாழ்க்கைக்கு ஆச்சிரியமானதொரு திட்டம் வைத்திருக்கிறார்" என்பதாகும். “தேவன் தம்முடைய ஒரேபேறான குமாரனை விசுவாசிக்கிறவனெவனோ, அவன் கெட்டுப்போகாமல் நித்திய ஜீவனை அடையும்படிக்கு, அவரைத்தந்தருளி இவ்வளவாய் உலகத்தில் அன்பு கூர்ந்தார்" என்று யோவான். 3:16 கூறுகிறது. “நானோ அவைகளுக்கு ஜீவன் உண்டாயிருக்கவும் அது பரிபூரணப்படவும் வந்தேன்." என்று இயேசு வந்த காரணத்தை யோவான்10:10 நமக்கு தருகிறது. தேவனுடைய அன்பிலிருந்து நம்மை பிரிப்பது எது? ஒரு பரிபூரணமான வாழ்க்கையை நாம் பெறமுடியாதபடி தடுப்பது எது?

          நான்கு ஆவிக்குரிய விதிகளில் இரண்டாவது என்னவெனில், "பாவத்தினால் மனுக்குலம் கறைபட்டுவிட்டது. ஆகவே தேவனிடமிருந்து மனுக்குலம் பிரிக்கப் பட்டுவிட்டது. அதன் விளைவாக நாம் தேவன் நம் வாழ்க்கைக்கு வைத்திருக்கும் ஆச்சரியமான திட்டத்தை அறிந்துகொள்ள முடியாமல் போய்விட்டது" என்பதே. "பாவத்தின் சம்பளம் மரணம்" என்று ரோமர்6:23 பாவத்தின் விளைவுகளைக் கூருகிறது. "எல்லோரும் பாவம் செய்து தேவமகிமையற்றவர்களானார்கள்" என்று கூறி ரோமர் 3:23 அதை உறுதிப்படுத்துகிறது. தேவன் தம்மோடு மனிதன் ஐக்கியப்படும் படி அவனை உண்டாக்கினார். மாறாக மனிதன் பாவத்தை உலகத்துக்கு கொண்டுவந்துவிட்டான். அதினால் தேவனிடமிருந்து பிரிக்கப்பட்டபின் தேவன் நம்மிடமிருந்து எதிர்பார்த்த அந்த நல்ல உறவை நாம் பாழாக்கிக்கொண்டோம். இதற்கு தீர்வு என்ன?

          நான்கு ஆவிக்குரிய விதிகளில் மூன்றாவது என்னவெனில், " இயேசுகிறிஸ்து மாத்திரமே நம்முடைய பாவத்திற்கு பரிகாரமாக தேவன் கொடுத்தது ஆகும். இயேசுகிறிஸ்துவின் மூலமாக நம்முடைய பாவங்கள் மன்னிக்கப்பட்டு தேவனோடு உள்ள உறவை மீண்டும் பெற்றுக்கொள்ள முடியும்" என்பதே. "நாம் பாவிகளாய் இருக்கையில் கிறிஸ்து நமக்காக மரித்ததினாலே, தேவன் நம்மேல் வைத்த தமது அன்பை விளங்கப்பண்ணுகிறார்" என்று ரோமர் 5:8 கூறுகிறது. இரட்சிக்கப்படுவதற்கு நாம் எதை அறிந்து, விசுவாசிக்கவேண்டுமென்று 1கொரிந்தியர்15:3-4 பின்வருமாறு தெரிவிக்கிறது:" கிறிஸ்துவானவர் வேதவாக்கியங்களின்படி நமது பாவங்களுக்காக மரித்து அடக்கம் பண்ணப்பட்டு, வேத வாக்கியங்களின்படி மூன்றாம் நாளில் உயிர்த்தெழுந்தார்." யோவான்14:6 ல் "நானே வழியும், சத்தியமும், ஜீவனுமாயிருக்கிறேன் என்னாலேயல்லாமல் ஒருவனும் பிதாவினிடத்தில் வரான்" என்று கூறி இயேசு இரட்சிப்புக்கு நானே வழியென்று தன்னைப் பற்றி பறைசாற்றினார். இந்த இரட்சிப்பு என்ற ஆச்சர்யமான பரிசை எப்படி நான் பெற்றுக்கொள்ளமுடியும்?

          நான்கு ஆவிக்குரிய விதிகளில் நான்காவது என்னவெனில், " இரட்சிப்பின் ஈவைப்பெற்றுக்கொள்வதற்கும், தேவன் நமக்காக வைத்திருக்கிற அந்த ஆச்சரியமான திட்டத்தை அறிந்துகொள்வதற்கும் இயேசுகிறிஸ்துவே இரட்சகர் என்று அவர் மீது னம் விசுவாசத்தை வேண்டும்" என்பதே. "அவருடைய நாமத்தின் மீது விசுவாசமுள்ளவர்களாய் அவரை ஏற்றுகொண்டவர்கள் எத்தனைபேர்களோ அத்தனைபேர்களும் தேவனுடைய பிள்ளைகளாகும்படி, அவர்களுக்கு அதிகாரம் கொடுத்தார் என்று யோவான் 1:12 இதை குறிப்பிடுகிறது "கர்த்தராகிய இயேசுகிறிஸ்துவை விசுவாசி, அப்பொழுது நீயும் உன் வீட்டாரும் இரட்சிக்கப்படுவீர்கள்" என்று அப்போஸ்தலர் 16:31 இதை மிகவும் தெளிவாகக் கூறுகிறது. நாம் தேவனுடைய கிருபையினால் மாத்திரமே, விசுவாசத்தின் மூலமாக மட்டுமே, இயேசுகிறிஸ்துவில் மாத்திரமே இரட்சிக்கப்பட முடியும்.(எபேசியர் 2:8,9)

           இயேசு கிறிஸ்துவை உங்கள் இரட்சகராக நீங்கள் ஏற்றுக் கொள்ள விரும்பினால், பின்வரும் வார்த்தைகளை தேவனிடம் கூறுங்கள்.. இந்த ஜெபத்தை சொல்வது உங்களை இரட்சிக்காது. கிறிஸ்துவில் உள்ள நம்பிக்கையே இரட்சிக்கும். இந்த ஜெபமானது தேவன் மீதான உங்கள் விசுவாசத்தை அவரிடம் வெளிப்படுத்தவும் உங்கள் மன்னிப்புக்கு தேவையானவற்றை அருளினதற்காக நன்றி சொல்வதற்குமான ஒரு வழி மாத்திரமே. "தேவனே நான் உமக்கு விரோதமாய் பாவம் செய்திருக்கிறேன் என்பதையும், தண்டனைக்குரியவன் என்பதையும் நான் அறிந்திருக்கிறேன். ஆனால் இயேசு கிறிஸ்துவில் உள்ள விசுவாசத்தின் மூலமாக நான் மன்னிக்கப்படும்படிக்கு எனக்குரிய தண்டனையை அவர் சுமந்தார். இரட்சிப்புக்காக நான் எனது நம்பிக்கையை உம்மில் வைக்கிறேன். நித்திய வாழ்வின் பரிசாகிய உம்முடைய அதிசயமான கிருபைக்கும், மன்னிப்புக்கும் உமக்கு நன்றி! ஆமென்!"

          நீங்கள் இங்கு உள்ளவற்றை வாசித்ததினால் கிறிஸ்துவுக்காக வாழும்படி ஒரு தீர்மானம் எடுத்து இருக்கிறீர்களா? அப்படி எடுத்து இருந்தால், தயவு செய்து கீழே உள்ள “நான் இன்று இயேசுவை ஏற்றுக்கொண்டேன்” என்ற பட்டனை கிளிக் செய்யவும்

இயேசு கிறிஸ்துவின் உயிர்ப்பு

2016-03-26T04:19:00.001-07:00

வாரத்தின் முதல் நாள் விடியற்காலையில் மகதலேனா மரியாவும் வேறொரு மரியாவும் கல்லறையைப் பார்க்கச் சென்றார்கள். திடீரென ஒருபெரிய நிலநடுக்கம் ஏற்பட்டது.

ஆண்டவரின் தூதர் விண்ணகத்திலிருந்து இறங்கி வந்து கல்லறையை மூடியிருந்த கல்லைப் புட்டி அதன் மேல் உட்கார்ந்தார். அவருடைய தோற்றம் மின்னல் போன்றும் அவருடைய ஆடை உறைபனி வெண்மை போன்றும் இருந்தது.

அவரைக் கண்ட அச்சத்தால் காவல் வீரர் நடுக்கமுற்றுச் செத்தவர் போலாயினார். அப்பொழுது வான தூதர் அப்பெண்களைப் பார்த்து, நீங்கள் அஞ்சாதீர்கள்; சிலுவையில் அறையப்பட்ட இயேசு வைத் தேடுகிaர்கள் என எனக்குக் தெரியும். அவர் இங்கே இல்லை; அவர் கூறியபடியே உயிருடன் எழுப்பப்பட்டார் என்றார் (மத் 28:1-6).

இறந்த பின் தானாக உயிர்த்தொழுவது இறைவனுக்கு மட்டுமே சாத்தியமாகும் மாபெரும் காரியம் ஆகும். மனிதரால் சாக முடியும். ஆனால் உயிர்த்தெழ முடியாது. அதனால் தான் இயேசு கிறிஸ்துவின் உயிர்ப்பு அவரது இறைத்தன்மையின் அடையாளமாக விளங்குகின்றது. அதுவே நமது நம்பிக்கையின் ஆதாரம். மூலைக்கல்.

அதனால்தான் திருத்தூதர் பவுல், கிறிஸ்து உயிருடன் எழுப்பப்படவில்லை என்றால் நாங்கள் பறைசாற்றிய நற்செய்தியும் நீங்கள் கொண்டிருக்கிற நம்பிக்கையும் பொருளற்றதாயிருக்கும் என்று கூறினார். (1 கொரி 15:14).

இறப்பதும் இறந்தவரை புதைப்பதும் சாதாரணமான காரியம்தான். ஆனால் கல்லறையில் காவல் இருப்பது அபூர்வமான காரியம். இயேசு இறந்து விட்டார் என்று உறுதி செய்த பின்னரும், அவரை அடக்கம் செய்த கல்லறைக்கு முத்திரையிட்டு காவல் வீரரைக் கொண்டு கருத்தாய்க் காவல் செய்ய ஏற்பாடு செய்த பின்னரும் கூட தலைமைக் குருக்களுக்கும் பரிசேயர்களுக்கும் ஐயம் நீங்கவில்லை.

அவர்கள் போய்க் கல்லறையை மூடியிருந்த கல்லுக்கு முத்திரையிட்டு, காவல் வீரரைக் கொண்டு கருத்தாய்க் காவல் செய்ய ஏற்பாடு செய்தார்கள். (மத் 27:66).

இயேசுவின் சீடர்கள் எல்லாம் முடிந்துவிட் டது என்று நினைத்து அஞ்சி நடுகினர். வாரத் தின் முதல் நாள் காலையில் இயேசு உயிர்த்தெழுந்த பின்பு அவர் முதலில் மகதலேனா மரியாவுக்குத் தோன்றினார்.

அவரிடமிருந்துதான் அவர் ஏழு பேய் களை ஓட்டியிருந்தார். மரியா புறப்பட்டுச் சென்று இயேசுவோடு இருந்தவர்களிடம் இதை அறிவித்தார். அவர்கள் துயருற்று அழுது கொண்டிருந்தார்கள்.

அவர் உயிரோடு இருக்கிறார் என்றும் மரியா அவரைக் கண்டார் என்றும் கேட்டபோது அவர்கள் நம்பவில்லை. (மாற் 16:9-11).

அன்று வாரத்தின் முதல் நாள். அது மாலை வேளை. யூதர்களுக்கு அஞ்சிச் சீடர்கள் தாங்கள் இருந்த இடத்தின் கதவுகளை மூடிவைத்திருந்தார்கள். அப்போது இயேசு அங்கு வந்து அவர்கள் நடுவில் நின்று, உங்களுக்கு அமைதி உரித்தாகுக! என்று வாழ்த்தினார். (யோவா 20:19).

இயேசு வெற்றிபெற்ற வீரரைப் போல் அல்ல உயிர்த்தெழுந்தும் உயிர்த்தெழுந்தபின் காட்சியளித்ததும். அவர் சீடர்களுக்குத்தான் காட்சியளித்தார். அவர் தம்மைச் சிலுவையில் அறைந்தவர்களிடம் அவர்களைப் பழிவாங்கச் செல்லவில்லை. பிலாத்திற்கோ தலைமைக் குருக்களுக்கோ செல்லவில்லை. பிலாத்திற்கோ தலைமைக் குருக்களுக்கோ பரிசேயர்களுக்கோ காட்சியளித்து அவர்களை அச்சுறுத்தவும் இல்லை.

நண்பர்கள் தங்களுக்குள் உரையாடுவது போல் அவர் சீடர்களிடம் பேசினார். சீடர்கள் இவ்வாறு பேசிக்கொண்டிருந்த போது இயேசு அவர்கள் நடுவில் நின்று உங்களுக்கு அமைதி உரித்தாகுக என்று அவர்களை வாழ்த்தினார்.

பின்னர் அவர் அவர்களிடம், உண்பதற்கு இங்கே உங்களிடம் ஏதேனும் உண்டா? என்று கேட்டார். அவர்கள் வேகவைத்த மீன் துண்டு ஒன்றை அவரிடம் கொடுத்தார்கள். அதை அவர் எடுத்து அவர்கள் முன் அமர்ந்து உண்டார். (லூக் 24:36-43).

தாம் அன்பு செய்பவர்களின், தம்மை அன்பு செய்பவர்களின் கவலை ஐயம் நீக்கவே ஆண்டவர் அவர்கள் முன் தோன்றினார். உலகு தரும் அமைதியைப் போன்றதல்ல ஆண்டவர் இயேசு தரும் அமைதி.

சுமை சுமந்து சோர்ந்திருப்பவர்களுக்கும் துன்புறுவோர்க்கும் அவர் தரும் அமைதி! இதை எவராலும் அழிக்க முடியாது!

உயிர்ப்புப் பெருவிழா கொண்டாடும் வேளையில் உயிர்ப் பின் வல்லமையும் மாட்சிமையும் நமது வாழ்விலும் விளங்க வேண்டும். நம்முள் குடிகொள்ளும் தீமையின் சக்திகளை நாம் புறக்கணிக்க வேண்டும், நம்மைவிட்டு வெளியேற்ற வேண்டும். அப்போதுதான் உயிர்ப்பின் அருள் நமக்குக் கிடைக்கும்.

தீமை நிலைக்காது என்பதைத்தான் இயேசுவின் உயிர்ப்பு வெளிப்படுத்துகின்றது. தீய சக்திகள் கட்டியெழுப்பிய கல்லறை தகர்ந்தது. அவை உருவாக்கிய பாறைகள் பிளந்தன.

அவ்வாறு தீமையை அடித்தளமாகக் கொண்ட அனைத்தும் அழியும் உண்மையை நிரந்தமாகக் கல்லறையில் அடைத்து வைக்க முடியாது. இதைத் தான் இயேசுவின் உயிர்ப்பு வெளிப்படுத்துகின்றது.

சாவுக்குப்பின் வாழ்வு உண்டு என்பதையும் இயேசு கிறிஸ்துவின் உயிர்ப்பு வெளிப்படுத்துகின்றது. மனித வாழ்வு சாவோடு முடிவதில்லை. மாறாக அது அழியாமையை அடையும் நிலை வாழ்வுக்குச் செல்லும்.

திருத்தூதர் பவுல் பின்வருமாறு போதிக்கின்றார். இறந்தோர் உயிர்த்தெழும் போதும் இவ்வாறே இருக்கும். அழிவுக்குரியதாய் விதைக்கப்படுவதும் அழியாததாய் உயிர் பெற்று எழுகிறது.

மதிப்பற்றதாய் விதைக்கப்படுவது மாண்புக்குரியதாய் உயிர் பெற்று எழுகிறது. வலுவற்றதாய் விதைக்கப்படுவது வல்லமையுள்ளதாய் உயிர்பெற்று எழுகிறது. மனித இயல்பு கொண்ட உடலாய் விதைக்கப்படுவது ஆவிக்குரிய உடலாய் உயிர்பெற்று எழுகிறது. மனித இயல்பு கொண்ட உடல் உண்டென்றால் ஆவிக்குரிய உடலும் உண்டு. மறை நூலில் எழுதியுள்ளபடி, முதல் மனிதராகிய ஆதாம் உயிர்பெற்று மனித இயல்புள்ளவர் ஆனார். கடைசி ஆதாமோ உயிர்தரும் துய ஆவியானார்.

முதல் மனிதர் களிமண்ணால் ஆனவர், அவர் மண்ணிலிருந்து வந்தவர். இரண்டாம் மனிதரோ விண்ணிலிருந்து வந்தவர். மண்ணைச் சார்ந்த மனிதர் போலவே மண்ணைச் சார்ந்த யாவரும் இருப்பர். விண்ணைச் சார்ந்த மனிதர் போலவே விண்ணைச் சார்ந்த யாவரும் இருப்பர்.

எனவே நாம் மண்ணைச் சார்ந்தவரின் சாயலைக் கொண்டிருப்பதுபோல விண்ணைச் சார்ந்தவரின் சாயலையும் கொண்டிருப்போம்.

(1 கொரி 15:42-49).

இறந்த பின் நாம் மண்ணைச் சார்ந்தவரின் சாயலைக் களைந்துவிட்டு விண்ணைச் சார்ந்தவரின் சாயலைக் கொண்டிருப்போம் என்று திருத்தூதர் பவுல் போதிக்கின்றார்.

மனித வாழ்வு இம்மண்ணுலகோடு முடிவதில்லை என்றும் விண்ணக நிலைவாழ்விற்கான ஆயத்தம்தான் மண்ணுலகில் நடக்கிறது என்றும் நமது வேதம் போதிக்கின்றது.

இதை நாம் முழு. இதயத்தோடு ஏற்றுக்கொள்வோம். உலகு சார்ந்த இச்சைகளையும் நாட்டங்களையும் சிலுவையில் அறைவோம். அப்போது இயேசுவின் உயிர்ப்பில் பங்கு கொள்ளும் நற்பேறும் நமக்குக் கிடைக்கும்.

கிறிஸ்து இயேசுவுக்கு உரியவர்கள் தங்கள் ஊனியல்லை அதன் இழி வுணர்ச்சிகளோடும் இச்சைகளோடும் சேர்த்துச் சிலுவையில் அறைந்துவிட்டார்கள் (கலா 5:24).

ஆசீர்வாதத்தின் தேவன்

2015-09-21T01:57:00.000-07:00

என் ஆலயத்தில் ஆகாரம் உண்டாயிருக்கும்படித் தசமபாகங்களையெல்லாம் பண்டசாலையிலே கொண்டு வாருங்கள்; அப்பொழுது நான் வானத்தின் பலகணிகளைத் திறந்து, இடங்கொள்ளாமற்போகுமட்டும் உங்கள்மேல் ஆசீர்வாதத்தை வருஷிக்கமாட்டேனோவென்று அதினால் என்னைச் சோதித்துப் பாருங்கள் என்று சேனைகளின் கர்த்தர் சொல்லுகிறார். - (மல்கியா 3:10).

.
ஹென்றி பி. கிரோவெல் (Henry P. Crowell ) என்பவர், ஒரு பெரிய பணக்கார குடும்பத்தை சேர்ந்தவர் என்றாலும், அவரது சிறு வயதில் காசநோயினால் பாதிக்கப்பட்டார். அதினால் அவர் பள்ளியை விட வேண்டி இருந்தது. அவர் ஒரு நாள், டி.எல் மூடி பிரசங்கியாரின் செய்தியை கேட்க நேர்ந்தது. அப்போது அவர் தீர்மானித்தார், ‘என்னால் பிரசங்கிக்க முடியாது. ஆனால் சிறந்த தொழிலதிபராக முடியும், ஆண்டவரே, உமக்கு சித்தமாயிருந்தால், நான் ஆரம்பிக்கும் தொழிலில் நல்ல லாபம் அடைய உதவி செய்யும், நான் அதிலிருந்து உமக்கு உண்மையாக உம்முடைய ஊழியத்தை தாங்குவேன்' என்று பொருத்தனை செய்தார்.

வைத்தியர்களின் ஆலோசனைப்படி, அவர் இருந்த இடத்தை விட்டு வெளியே ஏழு வருடங்கள் இருந்த பின்பு முற்றிலும் சுகமானார். பின் ஓஹியோ (Ohio) என்னுமிடத்தில் Quaker Mills என்னும் சிறிய ஓட்ஸ் தயாரிக்கும் ஆலையை ஆரம்பித்தார். பத்து வருடங்களுக்குள் அமெரிக்காவின் ஒவ்வொரு வீட்டிலும் ஓட்ஸ் (Oats) காலை உணவாக மாறியது. அவரும் தன் தசமபாகத்தை பத்தில் ஒரு பங்காக ஆரம்பித்து, படிப்படியாக உயர்ந்து 70 சதவீதம் தேவனுடைய ஊழியத்திற்கு கொடுக்க ஆரம்பித்தார். இன்றும் Quaker Oats உலகமெங்கும் பரவி, அநேகர் பயன்படுத்துகிறார்கள். ஒரு மனிதனின் உண்மையினால், அவனுடைய செய்கைகளையும் தொழிலையும் கர்த்தர் ஆசீர்வதித்தார்.

ஒரு வாலிபன் தொழிலை ஆரம்பித்து தோல்வியை கண்டான். அப்போது அவனுடைய நண்பன் அவனிடம், ‘நீ கர்த்தரை முதலாவது வைக்காவிட்டால், உன் தொழிலால் பயனில்லை’ என்று கூறினான். அப்போது அந்த வாலிபன், ‘என்னுடைய (Cheese) சீஸ் செய்யும் தொழிலில் நான் தேவனை என் பங்காளராக சேர்த்து கொள்கிறேன். அவர் சொல்கிறபடி நான் அவருடன், அவருக்காக உழைப்பேன் என்று தீர்மானித்தவனாக, தன் லாபம் எல்லாவற்றையும் கர்த்தருக்கென்று கொடுத்தபோது, அவனுடைய சீஸ் வியாபாரம் செழித்தோங்கியது. அது யார் என்று கேட்கிறீர்களா? Kraft Cheese Company - யின் முதலாளி J.L. Kraft தான் அவர்.

இப்படி, கர்த்தருக்கு கொடுத்து, ஆசீர்வதிக்கப்படடவர்களின் எண்ணிக்கை சொல்லி முடியாது. தசமபாகம் கொடுப்பதால் நமக்கு ஆசீர்வாதமே ஒழிய குறைவு ஒரு நாளும் வராது. எத்தனையோ உதாரணங்களை சொல்லி கொண்டே போலாம். நீங்கள் தசம பாகம் கொடுக்கிறீர்களா? என் சம்பளமே மிக குறைவு, நான் அதில் எப்படி கர்த்தருக்கு கொடுப்பது என்று யோசிக்கிறீர்களா? கொடுத்து பாருங்கள்.

உங்கள் களஞ்சியஙகள் நிரம்பி வழியும்படி இடமில்லாமற் போகுமட்டும் கர்த்தர் உங்களை ஆசீர்வதிப்பார். கடன் மேல் கடன், நான் என்ன செய்வது என்று எனக்கு தெரியவில்லை, எப்படி அடைப்பது என்று திணறி கொண்டு இருக்கிறீர்களா? உங்கள் சம்பளத்தில் கர்த்தருக்கென்று முதலில் தசமபாகத்தை எடுத்து கொடுங்கள், உங்கள் கடன் சீக்கிரமாய் முடிந்து போவதை காண்பீர்கள். சம்பளம் வந்தவுடனே அவனவன் வந்து பிடுங்கி கொண்டு போகிறான் என்று சொல்கிறீர்களா, தசமபாகத்தை எடுத்து வைத்து விட்டு மற்றதை கொடுங்கள். கர்த்தர் சொல்கிறார், இதனால் என்னைச் சோதித்துப் பாருங்கள் என்று. செய்துதான் பாருங்களேன், ஹென்றி கிரோவெல் போல 70 சதவிகிதம் கொடுக்கும் கிறிஸ்தவராய் நீங்கள் மாறிவிடுவீர்கள். தங்கள் இயலாமையிலிருந்து கர்த்தருக்கென்று கொடுத்து, மில்லினர்களாக மாறின எத்தனையோ பேருண்டு. கோல்கேட் பேஸ்ட் நிறுவனர் திரு கோல்கேட் அவர்கள், J.C. Penny நிறுவனர் திரு J.C. Penny அவர்கள்...

சரி, கொடுப்பது என்று இப்போது நீங்கள் தீர்மானித்திருப்பீர்களானால் யாருக்கு கொடுப்பது என்ற கேள்வியும் வரும். ‘என் ஆலயத்தில் ஆகாரம் உண்டாயிருக்கும்படித் தசமபாகங்களையெல்லாம் பண்டசாலையிலே கொண்டு வாருங்கள்’ என்று தேவன் சொல்கிறார். நீங்கள் செல்லும் ஆலயத்திற்கு கொண்டு கொடுக்க வேண்டும். தேவன் தம் சுய இரத்தத்தால் சம்பாதித்த சபை, அதிலே அவருடைய ஆசீர்வாதம் விளங்குகிறபடியால் அங்கு உங்களுடைய தசமபாகம் செல்ல வேண்டும். உங்களுடைய ஆத்மீக ஆகாரத்தை நீங்கள் அங்கு பெற்று கொள்கிறபடியால் அங்கு உங்களுடைய தசம பாகம் கொடுக்கப்பட வேண்டும்.

பின், வட இந்தியாவில் தங்கள் உயிரையும் பொருட்படுத்தாமல் உண்மையாய் ஊழியம் செய்கிற ஒவ்வொரு ஊழியங்களையும் உங்கள் மன விருப்பத்தின்படி தாங்கலாம்.

தேசத்திலே நிலத்தின் வித்திலும் விருட்சங்களின் கனியிலும், தசமபாகம் எல்லாம் கர்த்தருக்கு உரியது; அது கர்த்தருக்குப் பரிசுத்தமானது (லேவியராகமம் 27:30). ஆகையால் கர்த்தருக்குரியதை கர்த்தருக்கே கொடுப்போம். முதலாவது நம்மை அவருக்கு கொடுப்போம், பின் நம்முடையதை அவருக்கு கொடுப்போம் கர்த்தர் நம்மை இடம் கொள்ளாமல் போகுமட்டும் ஆசீர்வதிப்பார். கர்த்தருடைய வார்த்தை அப்படி சொல்கிறது, அப்படியே செய்யும். ஆமென் அல்லேலூயா!

என்ன கொடுப்பேன் என் இயேசுவுக்கு

என் வாழ்வில் செய்த நன்மை ஏராளமே

ஏராளம் ஏராளம் ஏராளமே

கர்த்தர் செய்த நன்மைகள் ஏராளமே

ஜெபம்

எங்களை இடம் கொள்ளாமற் போகுமட்டும் ஆசீர்வதிப்பேன் என்று ஆசீர்வதிக்கிற நல்ல கர்த்தரே, உம்மை துதிக்கிறோம். முதலாவது எங்களையும் பின் எங்களது தசமபாகங்களையும் உமக்கு கொடுக்க எங்கள் ஆததுமாக்களை ஏவியருளும். அதன் மூலம் ஆசீர்வாதங்களை பெற்று உமக்கென்று சாட்சியாக ஜீவிக்க கிருபை செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

பிள்ளைகளை தேவனுக்குள் வளர்த்தல்

2015-05-07T06:57:00.001-07:00

இயேசு அவர்கள் முகமாய்த் திரும்பி: எருசலேமின் குமாரத்திகளே, நீங்கள் எனக்காக அழாமல், உங்களுக்காகவும் உங்கள் பிள்ளைகளுக்காகவும் அழுங்கள். - (லூக்கா 23:28).

நம் தேவன் குடும்பத்தை உருவாக்கினவர், குடும்பத்தை நேசிப்பவர். குடும்பமாக தேவனை ஆராதிப்பது தேவனுடைய சித்தமும், திட்டமுமாகும். பிள்ளைகள் தேவனுடைய ஈவாக இருக்கிறார்கள். பெற்றோர்களை விட தேவன் நம் பிள்ளைகள் மேல் அதிக கரிசனை உடையவராக இருக்கிறார்.

இயேசுகிறிஸ்து தமக்கு பின் வந்த திரளான கூட்டத்தை பார்த்து, ஒரு சிறு பிள்ளையை தூக்கி, நீங்கள் மனம் திரும்பி பிள்ளைகளை போலாகாவிட்டால் பரலோக ராஜ்யத்தில் பிரவேசிக்க முடியாது என்று பிள்ளைகளை எடுத்துக் காட்டாக நிறுத்தினார்.

வேதத்திலே பிள்ளைகள் மூலம் நடந்த அற்புதங்கள், பிள்ளைகள் பெற்ற சுகம், பெற்றோருக்கு எப்படி தங்கள் பிள்ளைகளை வளர்க்க வேண்டும் என்கிற ஆலோசனைகளை குறித்து நாம் வாசிக்கிறோம். உதாரணத்திற்கு, ஐந்து அப்பம், இரண்டு மீன்களை தன்னலமாக தன்னோடு வைத்துக் கொள்ளாமல், கர்த்தரிடம் கொடுத்த போது, அது ஐயாயிரம் பேருக்கு மேல் சாப்பிடும்படியாக ஆசீர்வதிக்கப்பட்டது, யவீருவின் மகள் உயிரோடு எழுப்பப்பட்டது, சிம்சோனை எப்படி வளர்க்க வேண்டும் என்று அவருடைய பெற்றோருக்கு கொடுக்கப்பட்ட ஆலோசனைகள் என்று சொல்லி கொண்டே போகலாம்.

தேவன் பெற்றோர்கள் தங்கள் பிள்ளைகளுக்காக ஜெபிக்க வேண்டும் என்று விரும்புகிறவர். வேதத்தில் அப்படி ஜெபித்த அநேகரை குறித்து நாம் பார்க்க முடியும். தண்ணீரின்றி தன் பிள்ளை சாவதை பார்க்க முடியாமல் கதறிய ஆகார், தன் வயிற்றிலிருந்த இரட்டை பிள்ளைகளை குறித்து தேவனிடம் விசாரித்த ரெபேக்காள், தன் பிள்ளைகளை ஆசீர்வதித்த யாக்கோபு, பிறக்க போகிற பிள்ளையை வளர்க்க கற்று கொடுக்கும்படி ஜெபித்த மனோவா, மலடியான தனக்கு பிள்ளை வேண்டி கண்ணீர் வடித்த அன்னாள், தன் பிள்ளையின் உயிருக்காக உபவாசித்து இராமுழுவதும் தரையிலே விழுந்த கிடந்த தாவீது, தன்னுடைய பிள்ளைகளின் பாவத்திற்காக சர்வாங்க தகன பலிகளை செலுத்தின யோபு, புதிய ஏற்பாட்டில், பிசாசினால் கொடிய வேதனைப்பட்ட தன் பிள்ளைக்காக நாய்க்குட்டியை போல தன்னை தாழ்தின கானானிய ஸ்திரீ, என்று அநேகரை குறித்து பார்க்கிறோம்.

பிரியமானவர்களே நாம் நம் பிள்ளைகளுக்காக ஜெபிக்கின்றோமா? பேருக்கு என் பிள்ளையை ஆசீர்வதியும் என்று சொல்லி, ஒரு வரியில் ஜெபித்து விட்டு போகின்றோமா? அவர்களின் இரட்சிப்பிற்காக ஜெபிக்கின்றோமா? அவர்களின் சுக வாழ்விற்காக ஜெபிக்கின்றோமா?

வரப்போகிற காலம் மிகவும் கொடுமையாக இருக்க போகிறது. கிறிஸ்தவ பிள்ளைகள் கர்த்தருக்காக எழும்பி நிற்க முடியாதபடி அவர்களை துன்புறுத்தப்படும் காலங்கள் வரலாம். ஆனால் அவர்கள் விசுவாசத்தில் வழுவி போய் விடாதபடி நாம் அவர்களுக்காக ஜெபிக்க வேண்டும். கர்த்தரை மாத்திரம் அவர்கள் உறுதியாக சிறுவயதிலிருந்தே பிடித்து கொண்டால் என்ன தான் சூழ்நிலைகள் வந்தாலும் அவர்கள் அந்த விசுவாசத்திலிருந்து மாற மாட்டார்கள் என்பது உறுதி.

அதற்காக நாம் அவர்களை சிறுவயதிலிருந்தே கர்த்தருக்குள் வளரும்படி நாம் முயற்சிகள் எடுக்க வேண்டும். ஜெபிக்கவும், வேதம் வாசிக்கவும் கற்று தரவேண்டும். அதற்கு நாம் அவர்கள் முன்பாக ஜெபிக்கவும், வேதம் வாசிக்கவும் வேண்டும். நாம் செய்யாவிட்டால் நம் பிள்ளைகள் ஆயிரம் முறை வேதத்தை படி என்று சொன்னாலும் செய்ய மாட்டார்கள்.

சிறுவயதிலிருந்தே பிள்ளைகளை கர்த்தருக்குள் வாழும்படி பழக்கி விட்டால் அவர்கள் வாலிபர்களாகும்போது, கர்த்தருக்குள் உறுதியாக இருப்பார்கள். நாம் அவர்களுக்காக மற்றவர்களிடம் என் பிள்ளைக்காக ஜெபியுங்கள், அவர்களுடைய இரட்சிப்பிற்காக ஜெபியுங்கள் என்று கண்ணீர் விட வேண்டியதில்லை.

சிறுவயதில் பிள்ளைகள் தங்களை போன்ற பிள்ளைகளோடு என்ன பேசுகிறார்கள், அசுத்தமான வார்த்தைகள் பேசுகிறார்களா? என்றெல்லாம் நாம் கவனிக்க வேண்டும். சில பிள்ளைகளின் வாயில் பொய்யும், கெட்ட வார்த்தையும் சரளமாக புறப்பட்டு வரும். அவற்றை ஆரம்பத்திலேயே கண்டிக்காவிட்டால், பின்னால் வருத்தப்பட வேண்டி வரும். வீட்டில் பெற்றோர் கெட்ட வார்த்தை பேசினால், பிள்ளை சீக்கிரம் கற்று கொண்டு அதே வார்த்தையை வெளியில் பேசும். ஆகையால் பிள்ளைகள் முன்பு என்ன பேசுகிறோம் என்பதை குறித்து நாம் ஜாக்கிரதையாக இருக்க வேண்டும்.

கர்த்தருக்குள் வளருகிற பிள்ளைகள் பெற்றோர் சொல்லாமலேயே அருமையான காரியங்கள் செய்வது உண்டு. எனக்கு தெரிந்த அருமையான ஊழியரின் மகள், தனக்கு கிடைக்கும் இரண்டு ரூபாய், மூன்று ரூபாய் போன்ற பாக்கெட் மணியை சேர்த்து வைத்து, ஒரு குறிப்பிட்ட அளவு சேர்ந்ததும், அந்த பணத்தில் வேதாகமத்தை வாங்கி, பக்கத்தில் உள்ள புறமத பிள்ளைகளுக்கு கொடுத்தாள். இத்தனைக்கும் அந்த குடும்பம் பணக்கார குடும்பமும் இல்லை. ஆனால் கர்த்தருடைய ஊழியத்தை உண்மையாக குடும்பமாக செய்கிறவர்கள். பெற்றோர் கர்த்தருக்காக செய்கிற காரியங்களை பார்த்து பிள்ளை தானாக கர்த்தருக்காக தன் சிறுவயதிலேயே நிற்க ஆரம்பித்து விட்டாள்.

சிறுவயதிலிருந்தே நம் பிள்ளைகளை கர்த்தருக்கு ஒப்புக்கொடுத்து. கர்த்தருக்குள் வளர்ப்போம், நாமும் சாட்சியின் ஜீவியத்தை செய்வோம். அதை காணும் பிள்ளைகள் அவர்களும் கர்த்தருக்கும் வளருவார்கள். கர்த்தருக்கென்று சாட்சியாக ஜீவிப்பார்கள். ஆமென் அல்லேலூயா!

இயேசுவின் குடும்பம் ஒன்று உண்டு

அன்பு நிறைந்திடும் இடம் உண்டு

உயர்வுமில்லை அங்கு தாழ்வுமில்லை

ஏழை இல்லை பணக்காரன் இல்லை

இராஜாதி இராஜா இயேசு

என்றென்றும் ஆண்டிடுவார்

இன்பம் உண்டு சமாதானம் உண்டு

வெற்றி உண்டு துதிப்பாடல் உண்டு

இராஜாதி இராஜா இயேசு

என்றென்றும் ஈந்திடுவார்

ஜெபம்

எங்கள்அன்பின் பரலோக தகப்பனே, நீர் கிருபையாய் எங்களுக்கு கொடுத்த ஒவ்வொரு பிள்ளைகளுக்காகவும் உமக்கு நன்றி செலுத்துகிறோம். எங்கள் பிள்ளைகளை நீரே காத்து கொள்வீராக. அவர்கள் சிறுவயதிலிருந்தே கர்த்தருக்கு பயப்படும் பயத்திலும், கீழ்படிதலிலும் வளர கிருபை செய்யும். நல்ல நண்பர்களையும், நல்ல பழக்கங்களையும் கற்று கொள்ள கிருபை செய்யும். உம்மை சிறுவயதிலிருந்தே பற்றி கொண்டு வளர கிருபை செய்யும். பிள்ளைகளை எப்படி கர்த்தருக்குள் வளர்க்க வேண்டும் என்பதை பெற்றோருக்கு கற்றுதாரும். அவர்களும் பிள்ளைகளுக்கு முன்பாக சாட்சியாக வாழ கிருபை செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

கர்த்தரால் கனம் பெறுதல்

2015-01-02T02:47:00.000-08:00

நீ என் பார்வைக்கு அருமையானபடியினால் கனம்பெற்றாய். - (ஏசாயா 43:4).

கர்த்தராகிய இயேசுகிறிஸ்துவின் இனிய நாமத்தில் அன்பின் புத்தாண்டு வாழ்த்துக்களை தெரிவித்துக் கொள்கிறோம். கடந்த வருடம் முழுவதும் கர்த்தர் நம் ஒவ்வொருவரின் வாழ்விலும் செய்த எண்ணில்லாத நன்மைகளையும் மட்டற்ற கிருபைகளையும் நினைத்துப் பார்த்து கர்த்தருக்கு உள்ளத்தின் ஆழத்திலிருந்து நன்றி சொல்கிறோம். எங்களுக்கு புதுவருட வாழ்த்துக்களை அனுப்பிய ஒவ்வொருவருக்கும் எங்களது நன்றிகளை தெரிவித்துக் கொள்கிறோம்.

இந்த புது வருடமும் நம் அனைவருக்கும் மிகுந்த ஆசீர்வாதமானதாக, நற்கனி கொடுக்கிற வருடமாக, குடும்பத்திற்கும், சபைக்கும், சமுதாயத்திற்கும் நன்மை நிறைந்த வருடமாக அமையும்படி ஜெபிக்கிறோம். புது வருடத்தின் ஆசீர்வாதங்கள் நம் அனைவரோடும் என்றும் இருப்பதாக.

இந்த புதிய வருடத்தின் வாக்குதத்தமாக, 'நீ என் பார்வைக்கு அருமையானபடியினால் கனம்பெற்றாய்' என்று அருமையான வாக்குதத்தத்தை கர்த்தர் கொடுத்திருக்கிறார். அல்லேலூயா!

நாம் கர்த்தருடைய பார்வைக்கு அருமையாயிருப்போமானால், இந்த உலகத்தில் கர்த்தரால் நாம் கனம் பெறுவோம்.

தானியேல் தீர்க்கதரிசி அடிமையாக பாபிலோனுக்கு கொண்டு செல்லப்பட்ட போதிலும், 'அப்பொழுது ராஜாவாகிய நேபுகாத்நேச்சார் முகங்குப்புற விழுந்து, தானியேலை வணங்கி, அவனுக்குக் காணிக்கை செலுத்தவும் தூபங்காட்டவும் கட்டளையிட்டான்' (தானியேல் 2:46) என்று வேதத்தில் வாசிக்கிறோம். எப்படி ஒரு அடிமையானவரை ஒரு சாம்ராஜ்யத்தின் அதிபதி முகங்குப்புற விழுந்து வணங்க முடியும்? ஏனென்றால் தானியேல் அந்த இராஜாவின் சொப்பனத்தையும் அதன் அர்த்தத்தையும் சொன்னபடியினால் அவன் ஆச்சரியப்பட்டு அப்படி செய்தான்.

தானியேலினால் எப்படி சொப்பனத்தையும், அதன் அர்த்தத்தையும் சொல்ல முடிந்தது? அவர் கர்த்தரோடு இணைந்து இருந்தபடியால், கர்த்தருக்கு மிகவும் பிரியமானவராக இருந்தபடியால் கர்த்தர் தானியேல் கேட்டவுடன் அவருக்கு பதிலைக் கொடுத்தார்.....நாம் தேவனோடு இருப்போமானால், கர்த்தருக்கு பிரியமானவர்களாக இருந்தால் நம்முடைய நிலைமை அடிமையின் வாழ்வைப் போல இருந்தாலும், தேவன் ஏற்ற வேளையிலே நம்மை உயர்த்தி, இராஜாக்களும் நம்முன் விழுந்து பணியும்படி செய்வார்! அல்லேலூயா!

'மனத்தாழ்மையுள்ளவனோ கனமடைவான்' (நீதிமொழிகள் 29:23) என்று வேதம் கூறுகிறது. நம்மிடம் வெளிப்படையான தாழ்மை அல்ல, மனத்தாழ்மையுள்ளவர்களாக, கர்த்தருக்கு முன்பாக நம்மை தாழ்த்துகிறவர்களாக, அவர் காணும்போது நாம் தாழ்மையுள்ளவர்களாக இருக்கும்போது அவர் நம்மை கனம் பண்ணுகிறார். வேதம் கூறவில்லையா? 'தாழ்மையுள்ளவனுக்கு அவர் கிருபை அளிக்கிறார்' என்று! கர்த்தர் நம்மை எந்த நிலையில் உயர்த்தும்போதும் நாம் மனத்தாழ்மையுள்ளவர்களாக இருப்போம். அப்போது தேவன் நம்மை மற்றவர்களுக்கு முன்பாக இன்னும் அதிகமாக கனம் பண்ணுவார்.

இன்னும் கர்த்தருக்கு ஊழியம் செய்கிறவர்களை கர்த்தர் கனம் பண்ணுவார் (யோவான் 12:26) கர்த்தரை கனம் பண்ணுகிறவர்களை கர்த்தர் கனம் பண்ணுவார் (1சாமுவேல்2:30) என்று இன்னும் எத்தனையோ காரியங்ளை சொல்லிக் கொண்டே போகலாம்.

ஒருமுறை இராஜாவாகிய அகாஸ்வேரு 'ஆமான் உள்ளே வந்தபோது, ராஜா அவனை நோக்கி: ராஜா கனம்பண்ண விரும்புகிற மனுஷனுக்கு என்னசெய்யப்படவேண்டும் என்று கேட்டான்; அதற்கு ஆமான், என்னையன்றி, யாரை ராஜா கனம்பண்ண விரும்புவார் என்று தன் மனதிலே நினைத்து, ராஜாவை நோக்கி: ராஜா கனம்பண்ண விரும்புகிற மனுஷனுக்குச் செய்யவேண்டியது என்னவென்றால், ராஜா உடுத்திக்கொள்ளுகிற ராஜவஸ்திரமும், ராஜா ஏறுகிற குதிரையும், அவர் சிரசிலே தரிக்கப்படும் ராஜமுடியும் கொண்டுவரப்படவேண்டும். அந்த வஸ்திரமும் குதிரையும் ராஜாவுடைய பிரதான பிரபுக்களில் ஒருவனுடைய கையிலே கொடுக்கப்படவேண்டும்; ராஜா கனம்பண்ண விரும்புகிற மனுஷனை அலங்கரித்தபின், அவனைக் குதிரையின்மேல் ஏற்றி, நகரவீதியில் உலாவும்படி செய்து, ராஜா கனம்பண்ண விரும்புகிற மனுஷனுக்கு இப்படியே செய்யப்படும் என்று அவனுக்கு முன்பாகக் கூறப்படவேண்டும் என்றான்' (எஸ்தர் 6:6-9) என்று வேதத்தில் வாசிக்கிறோம்.

ஆமான் இராஜா தன்னைத்தவிர யாரை கனம் பண்ணப்போகிறார் என்று இந்த காரியங்ளை சொன்னான். இந்த உலகத்திலும் கர்த்தர் அற்ற மற்றவர்கள் தங்களுக்குத்தான் கனம் வரப்போகிறது என்று நினைத்துக் கொண்டு காரியங்களை செய்கிறார்கள். 'ஆனால் அப்பொழுது ராஜா ஆமானை நோக்கி: சீக்கிரமாய் நீ சொன்னபடி வஸ்திரத்தையும் குதிரையையும் கொண்டுபோய், ராஜ அரமனையின் வாசலிலே உட்கார்ந்திருக்கிற யூதனாகிய மொர்தெகாய்க்கு அந்தப்பிரகாரம் செய்; நீ சொன்ன எல்லாவற்றிலும் ஒன்றும் தவறாதபடி பார் என்றான்' (எஸ்தர் 6:10) என்று சொல்வதைப் பார்க்கிறோம். ஆம் கர்த்தருடைய பிள்ளைகளுக்குத்தான் கனம் மகிமை எல்லாமே! ஒருவேளை மற்றவர்கள் நினைத்துக் கொள்ளலாம், என்னை விட கனம் பெற யார் மேலானவர்கள் என்று! ஆனால் நாம் கர்த்தருடைய பிள்ளைகளாய் அவருடைய பார்வைக்கு அருமையானவர்களாக இருந்தால் நமக்குத்தான் கர்த்தர் அந்த கனத்தை கொடுப்பார்! அல்லேலூயா!

இந்த புதிய வருடத்தில் கர்த்தரால் கனம் பெறுகிறவர்களாக, அவருடைய பார்வைக்கு அருமையானவர்களாக நம் வாழ்க்கை அமையட்டும்;. அப்போது இந்த அருமையான வாக்குதத்தம் நம் வாழ்விலும் ஆம் என்றும் ஆமென் என்றும் நிறைவேறும். ஆமென் அல்லேலூயா!

ஜீவத்தண்ணீராம் எந்தன் நல்ல கர்த்தரே

ஜீவ ஊற்றினால் என்னை நிறைத்திடுமே

கனி தந்திட நான் செழித் தோங்கிட

கர்த்தரின் கரத்தில் நித்தம் கனம் பெற்றிட

ஊற்றுத் தண்ணீரே எந்தன் தேவ ஆவியே

ஜீவ நதியே என்னில் பொங்கி பொங்கி வா

ஆசீர்வதியும் என் நேச கர்த்தரே

ஆவியின் வரங்களினால் என்னை நிரப்பும்

ஜெபம்

எங்கள்அன்பின் பரலோக தகப்பனே, அப்பா நீர் கடந்த வருடம் முழுவதும் எங்களுக்கு பாராட்டின எல்லா கிருபைகளுக்காகவும் உமக்கு கோடானுகோடி ஸ்தோத்திரங்கள் ஐயா. இந்த புதிய வருடத்தையும் காணும்படி கிருபை செய்தீரே உமக்கு ஸ்தோத்திரம். இந்த புதிய வருடத்திலும் உம்முடைய வாக்குதத்தத்தின்படி உம்முடைய பார்வைக்கு அருமையானவர்களாக, உம்மால் கனம் பெறுகிறவர்களாக நாங்கள் மாறும்படி எங்கள் வாழ்க்கை அமையும்படியாக தேவன் எங்களுக்கு உதவி செய்வீராக. உலக ஜனங்களை பார்க்கிலும் உம்மை நேசிக்கிற உம் ஜனங்களை அவர்கள் இருக்கும் இடங்களில் உயர்த்துவீராக. மற்றவர்களுக்கு முன்பாக அவர்களை கனப்படுத்துவீராக. அதற்கேற்ற வாழ்க்கை எங்களில் காணப்படட்டும் ஐயா. எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

கர்த்தருடைய நாள் வருகிறது! ஆயத்தமா?

2014-09-11T11:30:00.000-07:00

சமீப காலமாக சென்னை வானிலை ஆராய்சசி மையத்தின் செய்திகளையும், அடிக்கடி திரு ரமணன் அவர்களும், சென்னையின் வானிலை குறித்து இன்று இடியுடன் கூடிய மழை பெய்யும் என்று கூறுவதை கேட்டிருக்கிறோம். கடலோர மீனவர்கள் கடலுக்குள் செல்ல வேண்டாம் என்று எச்சரிப்பதையும் கேட்டிருக்கிறோம்.

அமெரிக்காவில் கத்ரினா, ஐசக் போன்ற புயல்கள் தாக்கும்போது, உடனே ஜனங்களுக்கு எச்சரிக்கை விடுத்து, கடலோரத்தில் குடியிருக்கிறவர்கள், உடனே காலி செய்து, வேறு இடங்களுக்கு செல்லும்படி அறிவுறுத்தப்படுகிறார்கள். அதை கேட்ட மக்கள் பீதியடைந்து உடனே தங்கள் இடங்களை விட்டு பெட்டி படுக்கைகளுடன் வேறு இடம் செல்கிறார்கள்.
.

சுனாமி இந்தோனேஷியாவில் தாக்கியதும், சுனாமி எச்சரிக்கை என்று அடிக்கடி மக்கள் எச்சரிக்கப்பட்டு, கடலோரத்தில் குடியிருப்பவர்கள் பத்திரமாக மேல் மட்டத்திற்கு செல்ல வேண்டும் என்று அறிவுறுத்தப்படும்போது, அவர்கள் உடனே அப்படி செல்கிறார்கள். ஏனென்றால் ஒவ்வொருவருக்கும் தெரியும், தாங்கள் அப்படியே இருந்தால், சுனாமி வந்து எல்லாவற்றையும் வாரி கொண்டு போகும் என்று.

இப்படிப்பட்ட எச்சரிப்புக்களுக்கு உடனே செவி கொடுக்கும் மக்கள், கர்த்தரின் பயங்கரமான நாள் வருகிறது என்று சொல்லும்போது, அதற்கு மட்டும் தங்கள் செவியை விலக்கி, கீழ்ப்படிய மறுக்கிறதை நாம் கண்கூடாக கண்டு கொண்டிருக்கிறோம். வெளிப்படுத்தின விசேஷத்தில் தேவ கோபாக்கினையின் ஏழு முத்திரைகள், ஏழு எக்காள நியாயத்தீர்ப்புகள், ஏழு கோப கலசங்கள் என்று இந்த உலகத்தில் கைவிடப்பட்டவர்களின் மேல் ஊற்றப்பட இருக்கிற தேவ கோபாக்கினைக்கு தப்பும்படி, கிருபையின் நாட்களில் கர்த்தரை ஏற்று கொள்ளும்படி அறிவுறுத்தப்பட்டும், தங்கள் இருதயத்தை கடினப்படுத்தி கொண்டிருக்கும் மக்கள் எத்தனை எத்தனை பேர்?

கர்த்தருடைய நாள் இரவிலே திருடன் வருகிறவிதமாய் வரும்; அப்பொழுது வானங்கள் மடமட என்று அகன்றுபோம், பூதங்கள் வெந்து உருகிப்போம், பூமியும் அதிலுள்ள கிரியைகளும் எரிந்து அழிந்துபோம் என்று வேதம் தெளிவாக கூறியும், தேவ கோபாக்கினை வரும்போது இந்த உலகத்தில் என்னென்ன நடக்க இருக்கிறது என்று தெளிவாக வேதத்தில் கூறப்பட்டிருப்பதை அறிந்தும், உணர்வில்லாதவர்களாக, உலக வாழ்க்கை உல்லாசமாக அனுபவித்து கொண்டிருக்கும் மக்கள் எத்தனை பேர்?

பிரியமானவர்களே, உலகம் அக்கினிக்கு இரையாக வைக்கப்பட்டிருக்கிறது. காலம் இனி செல்லாது, கர்த்தரின் வருகை மிகவும் சமீபமாயிருக்கிறது. உலகத்தின் அக்கிரமம் நாளுக்கு நாள் பெருகி கொண்டே இருக்கிறதை நாம் ஒவ்வொரு நாளும் செய்தித்தாளில் பார்த்து கொண்டிருக்கிறோம். வேதத்தில் எழுதப்பட்டிருக்கிற தீர்க்கதரிசனங்கள் நிறைவேறி முடியும் காலத்தில் நாம் வாழ்ந்து கொண்டிருக்கிறோம்.

தேவ கோபத்திற்கு நாம் தப்பித்து கொள்ள வேண்டும் என்றால் நாம் வந்தடையத்தக்க புகலிடமாக, கன்மலையாக கிறிஸ்து ஒருவரே நமக்கு வழியாக இருக்கிறார். அவரிடத்தில் வருகிறவரை புறம்பே தள்ளாதவர், அவரிடத்தில் நம் பாவங்களை அறிக்கை செய்து, அவரை நாம் சொந்த இரட்சகராக ஏற்றுக் கொள்ளும்போது, வரும் கோபத்திற்கு தப்பி, அவரோடு கூட நாம் என்றென்றும் நித்திய காலமாக பரலோகத்தில் வாழ முடியும்.

இந்த எச்சரிப்பின் சத்தத்திற்கு நாம் செவிகொடாமற் போனால், ஏழு முத்திரைகள், ஏழு எக்காள நியாயத்தீர்ப்புகள், ஏழு கோப கலசங்கள் வழியாக சென்று, அந்திக்கிறிஸ்துவின் காலத்தில் மகா உபத்திரவ காலத்தில் அவனுடைய முத்திரையை தரித்துக்கொண்டு, அவனுக்கு அடிமையாக, நித்திய நித்தியமாக நரக அக்கினியில் வேதனைப்பட வேண்டி வரும். தேவன் அன்பாகவே இருக்கிறார். ஆனால், அவருடைய சத்தத்திற்கு நாம் கீழ்ப்படியாமற் போகும்போது, அவராலும் நம்மை காப்பாற்ற முடியாத நிலை ஏற்பட்டு போகும். இன்றே இரட்சண்ய நாள், கர்த்தரை ஏற்றுக்கொண்டு, அவரோடு கூட என்றென்றும் பரலோகத்தில் வாழும்படி நம்மை ஒப்புக்கொடுப்போமாக! கர்த்தர் சீக்கிரம் வருகிறார்! அநேக பரிசுத்தவான்கள் ஆயத்தம்! நீங்கள் ஆயத்தமா? மேகங்களின் மீது அவர் வரும்போது, அவருக்கு எதிர்கொண்டு சென்று அவரோடு என்றென்றுமாய் வாழுவோமாக! மாரநாதா! ஆமென் அல்லேலூயா!

இந்த மேகங்களை கடந்து

மோட்ச நாடு சேர்ந்திடுவோம்

இயேசுவோடு வாழ்ந்திருப்போம்

இயேசுவோடு மகிழ்ந்திருப்போம்

.
மாரநாதா அல்லேலூயா
மாரநாதா அல்லேலூயா
.
நம் மீட்பு மிக சமீபம்
தலைகளை உயர்த்திடுவோம்
மணவாளன் இயேசு வருகின்றார்
மகிமையில் சேர்ந்திடுவோம்

ஜெபம்

எங்கள் அன்பின் பரலோக தகப்பனே, கர்த்தரின் வருகை மிக சமீபமாய் இருப்பதால், தேவ எச்சரிப்பின் சத்தத்திற்கு ஒவ்வொருவரும் கீழ்ப்படியும் கிருபையை கொடுப்பீராக. எச்சரிப்பை அலட்சியப்படுத்தி, கிறிஸ்துவின் வருகையில் கைவிடப்பட்டு போய் விடாதபடி, அந்திக்கிறிஸ்துவின் மகா உபத்திரவ காலங்களில் வாதிக்கப்படாதபடி, இரட்சண்ய நாளாகிய இன்றே இரட்சிக்கப்பட கிருபை செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

சுமக்க முடியாத சிலுவை

2014-08-18T03:54:00.000-07:00

              அப்பொழுது, இயேசு தம்முடைய சீஷர்களை நோக்கி: ஒருவன் என்னைப் பின்பற்றி வர விரும்பினால், அவன் தன்னைத் தான் வெறுத்து, தன் சிலுவையை எடுத்துக்கொண்டு என்னைப் பின்பற்றக்கடவன். மத்தேயு 16:24.

           ஒரு மனிதன் கர்த்தரிடம், 'ஆண்டவரே, நான் சுமக்கிற இந்த சிலுவை மிகவும் பாரமாயிருக்கிறது. என்னால் இதற்கு மேல் சுமக்க முடியவில்லை' என்று வருத்தப்பட்டு கொண்டான். அப்போது கர்த்தர், 'சரி மகனே, என்னோடுகூட வா' என்று அந்த மனிதனை அழைத்து கொண்டுபோய், சிலுவைகள் நிறைய இருந்த ஒரு அறைக்குள் கொண்டு சென்று, 'உன் சிலுவையை இங்கே வைத்து விட்டு, அங்கு தெரியும் கதவின் வழியாக சென்று, உன்னால் தாங்ககூடிய அளவு உள்ள சிலுவையை தெரிந்தெடுத்து கொள்' என்று கூறினார். அந்த மனிதனும், தன் சிலுவையை    இந்த பக்கத்தில் வைத்துவிட்டு, மற்ற கதவின் வழியாக உள்ளே சென்றான். அங்கு விதவிதமான சிலுவைகள் இருந்தன. சில பாரமானதாக, சில உயரமானதாக, சில தூக்க முடியாததாக   இப்படி அநேக சிலுவைகள் அங்கு இருந்தன. கடைசியில் தூரத்தில் ஒரு சிறிய சிலுவை அவன் கண்களில் பட்டது. உடனே, அந்த மனிதன், ஆண்டவரிடம், 'ஐயா, இந்த சிலுவை எனக்கு போதும், இதை   நான் எடுத்து கொள்கிறேன்' என்று கூறினான். அப்போது ஆண்டவர், 'மகனே, அந்த சிலுவை நீ முதலில் கொண்டு வந்த அதே சிலுவைதான்' என்று கூறினார்.

           சில வேளைகளில், நாமும் கூட அப்படித்தான் நினைக்கிறோம். நான் படுகிற மாதிரி பாடுகளை யாரும் பட மாட்டார்கள். நான் தான் பெரிய சிலுவையை சுமந்து கொண்டு இருக்கிறேன் என்று நினைத்து கொள்கிறோம். ஆனால் தேவன் சொல்லுவார், 'மகனே, நீ நினைக்கிறதுதான் அப்படி, ஆனால் உன்னை விட பல விதத்தில் பல மடங்கு சோதிக்கப்பட்ட மக்கள் தங்கள் சிலுவையை சுமந்து சென்று இந்த உலகத்தை ஜெயித்திருக்கிறார்கள். ஆகையால் நீ கலங்காதே' என்று சொல்வார்.

          இயேசு தம்முடைய சீஷர்களை நோக்கி: ஒருவன் என்னைப் பின்பற்றி வர விரும்பினால், அவன் தன்னைத் தான் வெறுத்து, தன் சிலுவையை எடுத்துக்கொண்டு என்னைப் பின்பற்றக்கடவன்' என்று கூறினார். இந்த வசனத்தின்படி, இந்த உலகத்தில் இருக்கிற ஒவ்வொருவருக்கும் ஒவ்வொரு சிலுவை உண்டு. ஒருவன் இயேசுவை பின்பற்ற விரும்பினால், சுகபோகமாக அல்ல, தங்கள் ஆசீர்வாதங்களை பின்பற்றி அல்ல, தங்களது சிலுவையை எடுத்து கொண்டு அவரை பின்பற்ற வேண்டும். உலகத்தில் உங்களுக்கு உபத்திரவம் உண்டு, ஆனாலும் திடன் கொள்ளுங்கள், நான் உலகத்தை ஜெயித்தேன் (யோவான் 16:33) என்று சொன்னவர், நாம் சிலுவையை தூக்கி சுமக்கும்போது, நம்மோடு கூட அவரும் சுமந்து வருகிறார்.

         நமக்காக அன்று பார சிலுவையை சுமந்த தேவனல்லவா அவர்? ஏற்கனவே அவர் சுமந்த விட்டபடியால், அதனுடைய வேதனைகளை அவர் அறிந்திருக்கிறார். நாம் சுமக்கிற சிலுவைகளாகிய பாடுகள், வேதனைகள், துக்கங்கள், நிந்தைகள், துன்பங்கள் எல்லாவற்றையும், அவர் ஏற்கனவே அனுபவித்திருக்கிறபடியால், நமக்கு எல்லாவிதத்திலும் உதவி செய்ய வல்லவராகவே அவர் இருக்கிறார்.

          ஒருவேளை இன்று, 'நான் மிகவும் பாரமான சிலுவையை (கஷ்டத்தை) சுமக்கிறேன்' என்று நீங்கள் எண்ணுவீர்களானால், உங்களை தேற்றி கொள்ளுங்கள். 'கர்த்தர்மேல் உன் பாரத்தை வைத்துவிடு, அவர் உன்னை ஆதரிப்பார், நீதிமானை ஒருபோதும் தள்ளாடவொட்டார்' (சங்கீதம் 55:22) என்று அவர் மேல் உங்கள் பாரத்தை வைத்து விடுங்கள். அவர் உங்களை ஆதரிப்பார், அவர் உங்களை விசாரிப்பார், அவர் உங்களை தேற்றுவார். நம்முடைய பாரங்களை சுமக்கிற தேவன் நமக்கு இருக்கும்போது, நாம் எதை குறித்தும் ஏன் கவலைப்பட வேண்டும்? மற்றவர்கள் முன் நாம் வெட்கப்பட ஒருநாளும் அவர் அனுமதிக்க மாட்டார். நீங்கள் ஒருவேளை வருத்தப்பட்டு கனமான சிலுவையை சுமந்து கொண்டிருந்தீர்களானால், கர்த்தராகிய இயேசு கிறிஸ்து கூறுவதை கேளுங்கள், 'வருத்தப்பட்டுப் பாரஞ்சுமக்கிறவர்களே! நீங்கள் எல்லாரும் என்னிடத்தில் வாருங்கள்; நான் உங்களுக்கு இளைப்பாறுதல் தருவேன்' (மத்தேயு 11:28). இப்படி ஆறுதலாய் சொன்ன ஒரே தெய்வம் இயேசுகிறிஸ்துதான். அவரிடத்தில் செல்லும்போது, அவர் நிச்சயம் உங்களுக்கு இளைப்பாறுதலை தருவார். அவர் வாக்கு மாறாதவர். ஆமென் அல்லேலூயா!

கர்த்தர் மேல் பாரத்தை வைத்துவிடு
கலங்கி தவிக்காதே
அவரே உன்னை ஆதரிப்பார்
அதிசயம் செய்வார்
நீதிமான் தள்ளாட விடமாட்டார்
நித்தமும் தாங்கி நடத்திடுவார்

                                                                       ஜெபம்
         எங்களை அதிகமாய் நேசித்து வழிநடத்தும் நல்ல தகப்பனே, உம்மை துதிக்கிறோம். நாங்கள் சுமக்க கூடாதபடி எங்களுக்கு இந்த உலகில் பிரச்சனைகள் அதிகம் உண்டு தகப்பனே, நாங்கள் பாரத்தை சுமந்து சுமந்து களைத்து விட்டோம் தகப்பனே, எங்களுக்கு இளைப்பாறுதல் வேண்டும் ஐயா. உம்மிடத்தில் வருகிறோம். எங்களது பாரத்தை உம்மேல் வைத்து விடுகிறோம். எங்களை ஆதரியும், எங்களுக்கு இளைப்பாறுதலை தாரும். எங்கள் சிலுவைகளை இலகுவாக்கும் தகப்பனே. நீர் அப்படி செய்வதற்காக உமக்கு நன்றி. எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

பரிசுத்த வேதாகமம் பகுதி-I

2014-03-19T02:49:00.000-07:00

பரிசுத்த வேதாகமம் ஏன் எழுதப்பட்டது?

"இயேசு தேவனுடைய குமாரனாகிய கிறிஸ்து என்று நீங்கள் விசுவாசிக்கும்படியாகவும், விசுவாசித்து அவருடைய நாமத்தினாலே நித்தியஜீவனை அடையும்படியாகவும், இவைகள் எழுதப்பட்டிருக்கிறது. "(யோவான்20:31). "தேவவசனத்தினால் உண்டாகும் பொறுமையினாலும் ஆறுதலினாலும் நாம் நம்பிக்கையுள்ளவர்களாகும்படிக்கு, முன்பு எழுதியிருக்கிறவைகளெல்லாம் நமக்குப் போதனையாக எழுதியிருக்கிறது."(ரோமர் 15:4). —

சிறு குறிப்புகள்

பைபிளில் உள்ள மொத்த புஸ்தகங்கள் - 66
அதிகாரங்கள் -1,189
வசனங்கள்                               -31,101
வாக்குத்தத்தங்கள்                        -1,260
கட்டளைகள் -6,468
முன் கணிப்புகள் -8,000 க்கும் அதிகம்.
நிறைவேறிய (தீர்க்கதரிசனங்கள்) -3,268 வசனங்கள்
இன்னும் நிறைவேறாத (தீர்க்கதரிசனங்கள்) -3,140
மொத்த கேள்விகள் -3,294
நீளமான பெயர்- -மகேர்-சாலால்-அஷ்-பாஸ் -(ஏசாயா:8:1)
நீளமான வசனம்                          -எஸ்தர்:8:9
சிறிய வசனம்-யோவான்:11:35 -(இயேசு கண்ணீர் விட்டார்.)
நடுவான புஸ்தகம்                        -மீகா மற்றும் நாகூம்
நடுவான வசனம்-சங்கீதம் 118:8 " -மனுஷனை நம்புவதைப்

                                        பார்க்கிலும், கர்த்தர் பேரில் பற்றுதலாயிருப்பதே நலம்."
நடுவான அதிகாரம்                        -சங்கீதம் 117
சிறிய அதிகாரம்                           -சங்கீதம் 117
பெரிய அதிகாரம்                          -சங்கீதம் 119 (176 வசனங்கள்)
பெரிய புஸ்தகம்                          -சங்கீதம் (மொத்தம் 150 அதிகாரங்கள்)
சிறிய புஸ்தகம்                           -3 யோவான்
எழுதியவர்கள்                            -40 பேர்
மொழிபெயர்க்கப்பட்டுள்ள மொழிகள்       -1,200 க்கும் மேல்

பழைய ஏற்பாடு உண்மைகள்:

மொத்த புஸ்தகங்கள்                      - 39
அதிகாரங்கள்                             -929
வசனங்கள்                               - 23,114
நடுவான புஸ்தகம்                        -நீதிமொழிகள்
நடுவான அதிகாரம்                        -யோபு 20
நடுவான வசனம்                          - 2 நாளாகமம் 20:17,18
சிறிய புஸ்தகம்                           -ஒபதியா
சிறிய வசனம்                             - 1 நாளாகமம் 1:25
நீளமான வசனம்                           -எஸ்தர் 8:9
பெரிய அதிகாரம்                           - சங்கீதம் 119
பெரிய புஸ்தகம்                           -சங்கீதம்

புதிய ஏற்பாடு உண்மைகள்:
மொத்த புஸ்தகங்கள்                      - 27
அதிகாரங்கள்                             - 260
வசனங்கள்                               - 7,957
நடுவான புஸ்தகம்                        - 2 தெசலோனிக்கேயர்
நடுவான அதிகாரம்                        - ரோமர் 8, 9
நடுவான வசனம்                          - அப்போஸ்தலரின் நடபடிகள் 27:17
சிறிய புஸ்தகம் - 3 யோவான்
சிறிய வசனம்: யோவான் -11:35
நீளமான வசனம்                          -வெளிப்படுத்தின விஷேசம் 20:4
பெரிய அதிகாரம்                          - லூக்கா 1
பெரிய புஸ்தகம்                          -லூக்கா.

வேதாகம நூல்கள்

2013-12-02T01:28:00.001-08:00

ஆதியாகமம்

பெயர் விளக்கம்:

எபிரேய மொழியில் ஆதியாகமம் 1:1 பெரேசித் (ஆதியிலே) என துவங்குகிறது. இதனுடைய பொருள் தொடக்கம். துவக்கமும் முடிவுமில்லாத இறைவனைத்தவிர மற்ற படைப்புகள் அனைத்தின் தொடக்கம் அல்லது ஆரம்பத்தை இப்புத்தகம் விளக்குவதால் இப்பெயர் பெற்றது. இதன் ஆங்கில பெயர் ஜெனிசிஸ் (புநநௌளை) கிரேக்க வார்த்தையான ஜெனசாஸ் மூலம் உருப்பெற்றது.

ஆசிரியர்:

இப்புத்தகத்தின் குறிப்புகளிலிருந்து நான்கு விதமான பகுதிகள் அல்லது பிரிவுகள் (யெகோவா, ஏலோகிம், ஆசாரியர், உபபந்தம்) இணைத்திருப்பதை காணமுடிகிறது அதாவது நான்குவிதமான மூலங்கள் (Source) இப்புத்தகத்தை தொகுக்க பயன்படுத்தப்பட்டுள்ளன. இவை சற்று ஒன்றுக்கொன்று வேறுபாடானவை. இதை அடிப்படையாகக் கொண்டு இந்நூலின் ஆசிரியர் யார் என்பதைக் குறித்து பல்வேறு கருத்துக்கள் நிலவினாலும் யூதர்களும், கிறிஸ்தவர்களும் பொதுவாக மோசே இந்நூலை தொகுத்தவர் அல்லது எழுதியவர் என்பதை ஏற்றுக்கொள்ளுகின்றனர்.

காலம்:

உலகம் உருவான நாள்முதல் சுமார் கி.மு. 1800 ஆண்டுவரையுள்ள சம்பவங்களை ஆதியாகமம் தெரிவிக்கின்றது.

வரலாற்றுச் சம்பவங்களின் அடிப்படையில் மோசேயின் காலம் ஏறத்தாழ சரியாக கூறமுடியும். 1இராஜாக்களின் புத்தகத்தில் (6:1) சாலமோன் அரசாண்ட 4ம் வருடம், அதாவது இஸ்ரவேலர் எகிப்திலிருந்து புறப்பட்டுச் 480 வது வருடம் எருசலேம் தேவாலயக் கட்டடப்பணி ஆரம்பமானது. சாலமோன் நாலாவது ஆட்சி ஆண்டு சுமார் கிமு. 966. எனவே 1446 வது ஆண்டு மோசே வழிநடத்துதல் பணியை மேற்கொண்டார். இப்புத்தகத்தை மோசே எழுதியிருப்பாரானால் 40 வருட வனாந்திர வாழ்க்கையின் கடைசியில் இந்நூலை எழுதியிருக்ககலாம் எனக் கருதப்படுகிறது.

பின்னணி:

ஆதியாகமம் 1-38 அதிகாரங்களில் காணப்படும் நாகரீகம், படைப்பு, வம்சவரலாறு, ஜலப்பிரளயம், புவியியல், மக்களின்-யாத்திரை, ஆடுமேய்த்தல், நிலம் சம்மந்தமான காரியங்கள் அகியவை மெசபட்டோமிய வாழ்க்கைக்கு மிக ஒத்துக் காணப்படுகிறது. இவற்றில் நடைபெற்ற பெரும்பான்மையான சம்பவங்கள் மெசபட்டோமியாவில் நடைபெற்றதாகவே காணப்படுகிறது. ஆசிரியர் மனிதனின் முதல்;வீடான ஏதேன் தோட்டத்தை இப்பகுதியாகவே காண்பிக்கிறார். பாபேல் கோபுரம் கட்டப்பட்டதும், ஆபிரகாம் பிறந்த இடம், ஈசாக்குக் பெண்கொண்டது, யாக்கோபு 20 வருடங்களாக வாழ்ந்தது ஆகியவை இப்பகுதியை மையமாகக் கொண்டது.

39-50 அதிகாரங்கள் எகிப்திய பாரம்பரியத்தை விளக்கக்கூடியதாக அமைகிறது.

நோக்கமும் – செய்தியும்:

ஆதியாகமம் படைப்பின் முழுவிபரத்தையும் தெளிவாக்குகிறது. தேவன் படைப்பின் காரணராகவும், படைப்பின் சிகரமாக மனிதனை தன்னுடைய சாயலின்படி படைத்ததையும், அவர்களுக்கு முழு சுதந்திரம் கொடுத்து உலகை ஆசீர்வதித்ததையும் தெரிவிக்கிறது. முதல் படைப்பான ஆதாம், ஏவாள் என்பவர்கள் கீழ்படியாமல் தேவனுக்கு விரோதமாக பாவம் செய்து அதற்கு தன்டனையாக சாபத்தை பெற்றுக்கொண்டதையும் விளக்குகிறது. எனினும் இறைவனை செய்லாற்றுகிறவராகவே சித்தரிக்கிறது. இரட்சிப்பின் ஆரம்பமாக இறைவன் ஒரு நபரை, குடும்பத்தை வம்சத்தை தெரிந்து கொண்டு, உலகத்திற்கு ஆசீர்வாதத்தை கொடுக்க விரும்புவதை தெரிவிக்கிறது. பல கடவுள் வணக்கதிற்கு வழிதவறிய மக்களை ஒரு கடவுள் வணக்கத்திற்;கு நேராக வழிநடத்தியதை விவரிக்கிறது.

ஆதியாகமத்தில் தொடக்கங்கள்

1. ஆதியாகமம் 1:1-25 உலகத்தின் தொடக்கம்

2. ஆதியாகமம் 1:26-2:25 மனித குலத்தின் தொடக்கம்

3. ஆதியாகமம் 3:1-7 பாவத்தின் தொடக்கம்

4. ஆதியாகமம் 3:8-24 இரட்சிப்பு உறுதிமொழியின் தொடக்கம்

5. ஆதியாகமம் 4:1-15 குடும்ப வாழ்வின் தொடக்கம்

6. ஆதியாகமம் 4:16-9:29 மனிதன் உண்டாக்கிய நாகரீகத்தின் தொடக்கம்

7. ஆதியாகமம் 10-11 உலக நாடுகளின் தொடக்கம்

8. ஆதியாகமம் 12-50 எபிரேய மக்களின் தொடக்கம்

__________________________________________________________________________

யாத்திராகமம்

பெயர் விளக்கம்:

யாத்திராகமம் என்ற கிரேக்க சொல்லுக்கு புறப்பாடு அல்லது வெளிவழி எனப்பொருள் (எபிரேயர் 11:22) ஆதியாகமத்தில் காணப்படும் எல்லா தோல்விகளுக்கும் விடுதலையாக, எழுச்சிமிக்கதாக, இறைவன் மனிதனை காப்பதற்கு செயலாற்றுபவராக, மீட்பின் பணியைக் கூறுகிறது.

ஆசிரியர்:

யாத்திராகம புத்தகத்தின் ஆசிரியர் குறித்து பல கருத்துக்கள் நிலவினாலும் யாத்திராகமத்தில் உள்ள பல பகுதிகள் மோசே எழுதியதாக உறுதிப்படுகிறது. (17:14 24:4 34:27). மேலும் யோசுவா 8;:30ல் மோசேயின் நியாயப்பிரமாண புத்தகத்தில் எழுதியிருக்கிறபடி என குறிப்பிடுகிறதை வாசிக்கிறோம். புதிய ஏற்பாட்டிலும் இதற்கான குறிப்புகளைக் காணலாம். (உதா. மாற்கு 7:10, 12:26, லூக்கா 2:22-23)

காலம்:

உலக வரலாறு, எகிப்து சாம்ராஜ்யத்தின் மன்னன் பார்வோன் மூன்றாவது துத்மஸ் மற்றும் அவனது மகன் இரண்டாவது அமுன்ஹோதேப் காலத்தில் யூத மக்கள் அடிமைப்படுத்தப்பட்டதாக கூறுகிறது. இதைத்தொடர்ந்து வேத குறிப்பின்படி யாத் 1:11 ல் ராமசேஸ் என்னும் பெயர்கொண்ட பார்வோன் முதலாம் சேத்தி மற்றும் அவனுடைய மகன் இரண்டாம் ராமசேஸ் காலத்தில் இஸ்ர வேலர் எகிப்தின் அடிமைத்தனத்திலிருந்து விடுதலை பெற்றனர். வருடமாகும். பாரம்பரிய குறிப்பின் அடிப்படையில் கி.மு. 1446 ஆகும். இப்புத்தகத்தை மோசே எழுதியிருப்பாரானால் 40 வருட வனாந்திர வாழ்க்கையின் கடைசியில் இந்நூலை எழுதியிருக்ககலாம் எனக் கருதப்படுகிறது.

நோக்கமும் செய்தியும்:

யாத்திராகமம் பழைய ஏற்பாட்டில் இரட்சிப்பின் மேன்மையைக் கூறுகிற முன் நூலாக இருக்கிறது. இந்நூல் இருளும் துக்கமும் நிறைந்த நிலையில் தொடங்குகிறது. இருந்தாலும் மகிமையில் முடிகிறது. இந்நூல் இறைவன் அடிமையாக்கிய தம் மக்களைத் தம் அன்பினால் மீட்பதற்கு எவ்வாறு இறங்கி வந்தார் என்று தொடங்கி விடுதலையாக்கப்பட்ட மக்கள் மத்தியில் அவர் எவ்வாறு இறங்கிவந்தார் என்று கூறி முடிகிறது.

யாத்திராகமத்தில் இறைவன், தன் பெயர் (யாத்திராகமம் 3:14) குணாதிசயங்கள், இரட்சிப்பு, சட்டம் (நியாயப்பிரமாணம்) தான் வழிபடப்படவேண்டிய முறை ஆகியவற்றை வெளிப்படுத்துகிறார். முதல் உடன்படிக்கையின் நடுவரான மோசே தெரிந்தெடுக்கப்படுதல், ஆசாரியத்துவத்தின் ஆரம்பம் ஆகியவை குறிப்பிடப்பட்டுள்ளது.

இறைவன் வரலாற்றிற்கும் ஆண்டவராயிருந்து அற்புதங்களை செய்தது குறிப்பிடப்பட்டுள்ளது. இஸ்ரவேலருடைய துன்பங்கள் அல்லது எகிப்தியர் மீது வந்த வாதைகள் அவருடைய ஆளுகைக்கு உட்பட்டதே. பார்வோன், எகிப்தியர், இஸ்ரவேலர் அனைவரும் அவருடைய வல்லமையை கண்டனர். இறைவன் எகிப்திய தேவர்களுக்கெல்லாம் தேவன் என்பதை விளக்கும் புத்தகமாக இது அமைந்துள்ளது.

__________________________________________________________________________

தொடரும்.....

மேலும் விபரங்களுக்கு

__________________________________________________________________________

காட்சிக் கிறிஸ்தவர்கள்

2013-10-28T00:01:00.000-07:00

இன்று உலகில் காட்சிக் கிறிஸ்தவர்கள் அதிகரித்து விட்டனர்.

உள்ளத்திலே நாற்றம் வெளியே வாசனைச் சாயத்தை பூசிக் கொள்கின்றனர்.

உள்ளத்திலே கசப்பும் வெறுப்பும் பகையும், வெளியே brother என்றும் sister என்றும் கூறிக் கொள்கின்றனர்.

உள்ளத்திலே வெறுமை வெளியே ஆவியில் நிறைந்துள்ளதாக ஒரு வேஷம். ஆலயம் வந்தால் அந்நிய பாஷை வீட்டுக்கு போனால் தூஷண வார்த்தை சினிமா படமே பார்ப்பதில்லை ஆனால் அவர்களே மகா நடிகர்கள்.

இது ஒரு வகையான காட்சிக் கிறிஸ்தவர்கள்

மனுஷர் முன்பாக பரிசுத்தவானாக தன்னை காட்டிக் கொள்ளும் காட்சிக் கிறிஸ்தவர்கள்.

இன்னொரு வகையினர் உண்டு.

இவர்கள் கிறிஸ்துவின் பெயரைச் சொல்லி தங்களை காட்சிப்படுத்துகின்றார்கள்.

இவர்கள் ஆலயம் வருவது உடைகளையும் நடையையும் காட்சிப்படுத்த மேடையில் ஏறி பாடல்கள் படிப்பது குரல்வளத்தை காட்சிப்படுத்த. இசைக்கருவிகள் இசைப்பது இசைத் திறமையை காட்சிப்படுத்த “பிரசங்கங்கள் பல செய்வது தங்கள் அறிவாற்றலையும், பேச்சுத் திறமையும் காட்சிப்படுத்த வைப்பது எடுப்பது, போவது வருவது, ஜெபிப்பது படிப்பது எல்லாமே தங்களை காட்சிப்படுத்த

ஆண்டவர் பெயரை அடிக்கடி சொல்லிக் கொண்டாலும், எல்லாம் தங்களை காட்சிப்படுத்தவும், புகழடையவும் பிரபல்யமடையவுமே…

எல்லாருமல்ல ஒருசிலர்…

கிறிஸ்துவின் பிள்ளைகளே நீங்கள் எப்படி?

இதை வாசித்து விட்டு போவதல்ல முக்கியம், உன் செந்த வாழ்க்கையை இதனுடன் ஒப்பிட்டு தீர்மானி்…………..
GOD bless u
---------------------------------------By Robertdinesh.------------------------------
http://www.hichristians.com/2013/10/blog-post_13.html

கிறிஸ்துவுடனுள்ள அனுபவம்

2013-09-11T02:01:00.000-07:00

உலகத்திலே வந்த எந்த மனுஷனையும் பிரகாசிப்பிக்கிற ஒளியே அந்த மெய்யான ஒளி. - (யோவான் 1:9).

மாலை மயங்குகிற வேளையில் ஒரு சிறுவன் மிதிவண்டியில் சாலையில் சென்று கொண்டிருந்தான். அவன் வருவதை பார்த்த ஒரு போலீஸ்காரர் அவனது சைக்கிளை நிறுத்தி, 'தம்பி, டைனமோ லைட்டை எரிய செய்யாமல் ஏன் சைக்கிளை ஓட்டி வருகிறாய்?' என்று கேட்டார். உடனே அவன், 'இந்த சாலையின் இருபுறமும் அநேக விளக்குகள் எரிகின்றன. பட்டப்பகலை போல வெளிச்சமாக உள்ளது. என் சைக்கிளில் வெளிச்சமில்லாதது குற்றமா? என்றான். இதை கேட்ட போலீஸ்காரர் அவனை சாலையின் ஒரு ஓரமாக அழைத்து சென்று அவனது சைக்கிளின் பின் சக்கரத்திலிருந்த காற்றை பிடுங்கி விட்டார். 'காற்று எல்லா இடத்திலும்தான் உள்ளது. ஆனால் உன் சைக்கிளில் காற்று இல்லை என்றால் உன்னால் ஓட்டி செல்ல முடியுமா?' என்றார். இந்த காரியம் சிறுவனை கோபமடைய செய்தாலும் சற்று நேரத்தில் அது அவனை சிந்திக்க வைத்தது.

இதை வாசிக்கும் அன்பானவர்களே, உங்கள் உள்ளத்தில் ஒளி உண்டா? இருள் இருக்கும் இடத்தில் பாவமும் பயமும் குடி கொள்ளும். வேத புத்தகத்தில் இருள் பிசாசையும் அவனது பிள்ளைகளையும் குறிக்கிறது. அப்படியென்றால், ஒளியானவர் யார்? 'நான் உலகத்திற்கு ஒளியாக வந்தேன்' என்று இயேசு கிறிஸ்து கூறுகிறார். இந்த ஒளி குடும்பத்திற்கு மாத்திரமல்ல, குடும்பத்தின் அங்கத்தினர் ஒவ்வொருவருக்குள்ளும் காணப்பட வேண்டும். சிலர் கூறுவர், 'என் தாய் எப்போதும் எனக்காக ஜெபித்து கொண்டேயிருப்பார்கள்' என்று. அது நல்லதே, அனால் நீங்கள் ஜெபிக்கிறீர்களா? நீங்கள் குடும்பத்தினரோடு இணைந்து குடும்ப ஜெபம் செய்யலாம், ஆனால் தனிப்பட்ட விதத்தில் கிறிஸ்துவோடு தொடர்பு உங்களுக்கு உண்டா?

நாம் பரம்பரை கிறிஸ்தவ குடும்பத்தில் பிறந்ததால் பரலோகில் நமக்கென்று ஒரு இடம் கொடுக்கப்பட மாட்டாது. ஆலயம் செல்வதோ, பெற்றோரின் ஜெபமோ, மனைவியின் ஜெபமோ நம்மை சுத்தவானாக தேவன் முன் நிலை நிறுத்தாது. அவர்களின் ஜெபம் நிச்சயம் உங்களை தீங்கிலிருந்து பாதுகாக்கும். இரட்சிக்கப்பட வழியை திறக்கும். ஆனால தேவனோடு தனிப்பட்ட முறையில் உறவாடும் அனுபவம் நிச்சயம் வேண்டும். அதுவே நம்மை கறைதிரையற்றவர்களாக நிற்க செய்யும்.

பிரியமானவர்களே, உங்கள் பெற்றோரின் ஜெபத்தை மனைவியின் ஜெபத்தை நம்பி வாழ்ந்து கொண்டிருப்பவரா நீங்கள்? தாயும் பிள்ளையும் என்றாலும் வாயும் வயிறும் வேறு தானே, நம் வயிற்றிற்கு நாம் தானே சாப்பிட வேண்டும். அதுப்போலத்தான் தேவனோடுள்ள ஐக்கியமும், நம் சைக்கிளிலுள்ள குறையை சரி செய்யாமல் பிறரது வெளிச்சத்தையே நம்பி வாழ்வது நம்மை இக்கட்டான சூழ்நிலையில் கொண்டு போய் விட்டுவிடும். நாம் நமது குறைவுகளை மெய்யான ஜீவ ஒளியாகிய இயேசுவின் வார்த்தைகளால் சரி செய்து கொள்வோம். அதுவே எப்போதும் நம்மை பாவ படுகுழியிலிருந்தும், ஆவிக்குரிய வீழ்ச்சியிலிருந்தும் பாதுகாக்கும். இன்றே அவரோடு தனித்திருக்கும் தருணத்தை நியமியுங்கள். அவரது வார்த்தை உங்கள் கால்களுக்கு தீபமும் பாதைக்கு வெளிச்சமாயிருக்கும்.

உம்மோடு இருக்கணுமே ஐயா

உம்மைப் போல் மாறணுமே

உலகின் ஒளியாய் மலைமேல் அமர்ந்து

வெளிச்சம் கொடுக்கணுமே

...

ஓடும் நதியின் ஓரம் வளரும்

மரமாய் மாறணுமே

எல்லா நாளும் இலைகளோடு

கனிகள் கொடுக்கணுமே

ஜெபம்

எங்களை அதிகமாய் நேசித்து வழிநடத்தும் நல்ல தகப்பனே, மற்றவர்கள் எங்களுக்காக ஜெபித்து அல்ல, நாங்கள் ஒவ்வொருவரும் தனிப்பட்ட முறையில் உம்மோடு கூட இடைபடும்படியாக எங்களுக்கு உணர்த்தும் தேவனே. உம்மோடு தனித்து இருந்து ஜெபித்து, பரிசுத்த வாழ்க்கை வாழ எங்களுக்கு உதவி செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

எது ஐசுவரியம்?

2013-07-26T21:50:00.002-07:00

கர்த்தரின் ஆசீர்வாதமே ஐசுவரியத்தைத் தரும்; அதனோடே அவர் வேதனையைக் கூட்டார். - (நீதிமொழிகள் 10:22).

.
முழு உலகத்தையும் ஜெயித்த மகா வீரன் அலெக்ஸாண்டர் தான் மரிக்கும்போது, தன்னுடைய விருப்பத்தை தெரிவித்தார். அப்போது 'என்னுடைய மரித்த சரீரத்தை எடுத்துச் செல்லும்போது, என் கைகளை வெளியே வைத்து எடுத்துச் செல்லுங்கள். ஏனெனில் அதை காண்பவர்கள் யாவரும் அறியட்டும், நான் பிறக்கும்போது எதையும் கொண்டு வரவில்லை, மரித்த போதும் எதையும் கொண்டு போகப்போவதில்லை' என்று கூறினார்.

.
அநேக ஊழியர்கள் இந்த நாட்களில் ஆசீர்வாதங்களைக் குறித்து பிரசங்கிக்கின்றனர். அதற்கேற்ப வசனங்களை எடுத்துக் கூறுகின்றனர். அவர்கள் பேசும் கூட்டங்களுக்கு அதிகமான மக்கள் செல்கின்றனர். ஏனெனில் அநேகருக்கு ஆசீர்வாதங்கள் வேண்டும், செல்வாக்கு வேண்டும் என்கிற விருப்பம் உண்டு.
..பணமோ செல்வமோ இருப்பது தவறு என்று சொல்லவில்லை. பணமோ எல்லாவற்றிற்கும் உதவும் என்றும், ஆனால் பண ஆசையோ எல்லா தீமைக்கும் வேர் என்றும் வேதம் கூறுகிறது. பணம் இல்லாவிட்டால் ஒரு ஆளும் நம்மை மதிக்கப் போவதில்லை. ஆகவே பணம் முக்கியம், ஆனால் பண ஆசை இருப்பதோ தவறு.
சாலமோன் இராஜாவை பார்க்கும்போது தேவன் அவருக்கு ஏராளமான

ஐசுவரியத்தை கொடுத்திருந்தார் என்று பார்க்கிறோம்.

'ராஜா எருசலேமிலே வெள்ளியையும் பொன்னையும் கற்கள்போலவும், கேதுருமரங்களைப் பள்ளத்தாக்கில் இருக்கும் காட்டத்திமரங்கள்போலவும் அதிகமாக்கினான்' (2 நாளாகமம் 1:15) என்றுப் பார்க்கிறோம். இத்தனை ஐசுவரியங்கள் அவருக்கு இருந்தும், பிரசங்கி என்னும் வேதபுத்தகத்தில் எல்லாமே மாயை என்று புலம்புவதைப் பார்க்கிறோம். எல்லா ஐசுவரியமும்தான் இருக்கிறதே, வேறு என்ன வேண்டும்? ஏன் மாயை மாயை என்று புலம்ப வேண்டும்?.. அதேப்போல 'ஆபிராம் மிருகஜீவன்களும் வெள்ளியும் பொன்னுமான ஆஸ்திகளை உடைய சீமானாயிருந்தான்' (ஆதியாகமம் 13:2) என்று ஆபிரகாமைக் குறித்து வாசிக்கிறோம். 'ஆபிரகாமுக்கு உண்டான ஆசீர்வாதம் கிறிஸ்து இயேசுவினால் புறஜாதிகளுக்கு வரும்படியாகவும், ஆவியைக் குறித்துச் சொல்லப்பட்ட வாக்குத்தத்தத்தை நாம் விசுவாசத்தினாலே பெறும்படியாகவும் இப்படியாயிற்று' என்று எழுதியிருக்கிறபடி ஆபிரகாமுக்கு உண்டான ஆசீர்வாதத்தினால் =புறஜாதிகளாகிய நாம் இன்றளவும் ஆசீர்வதிக்கப்படுகிறோம். ஏன் சாலொமோனின் ஐசுவரியத்தைப் போல நாம் ஆசீர்வதிக்கப்படவில்லை? ஆபிரகாமின் ஆசீர்வாதத்தினால் ஆசீர்வதிக்கப்படுகிறோம்?..ஆபிரகாம் ஐசுவரிய சீமானாயிருந்தும், அதன் மேல் தன் கண்களை வைக்கவில்லை.

அவர் எல்லா ஐசுவரியத்திற்கும் சொந்தக்காரரான கர்த்தர் மேல் தன் கண்களை வைத்திருந்தார். அதனால் அவர் தேவனுடைய சிநேகிதன் என்று எண்ணப்பட்டார். அவருடைய ஆசை, விருப்பம், எல்லாமே தேவன் பேரில் இருந்தது. உலக ஐசுவரியத்தினால் தன்னை சீராட்டி, பாராட்டி அனுபவிக்காமல், தேவ உறவின் ஐசுவரியத்தினால் தன்னை பெலப்படுத்திக் கொண்டார்.
.சாலொமோனோ அப்படியிராமல், உலக ஐசுவரியங்கள் அத்தனையையும் அனுபவித்தார். ஆயிரம் பெண்களை மணந்து, அவர்கள் இராஜாவின்இருதயத்தை வழுவிப் போகச் செய்தனர். கர்த்தரை மறந்து, உலக ஐசுவரியத்தினால் மதிமயங்கி போனதினால், அது தரும் இன்பம் சிற்றின்பமாகவே இருந்தது. பேரின்ப நாதரின் இனிய சமுகத்தை அவர் இழந்து போனார். 'கர்த்தரின் ஆசீர்வாதமே ஐசுவரியத்தை தரும். அதனோடே அவர் வேதனையை கூட்டார்' என்ற பொன்னான வார்த்தையை அவர் அறியவில்லை. ஆகையால் அவருடைய ஐசுவரியம் அவருக்கு வேதனையை தந்தது. கர்த்தர் ஐசுவரியத்தை கொடுத்தார்.

ஆனால் தம் ஆசீர்வாதத்தை அதனோடு தரவில்லை. ஆகவே அது வேதனையை தந்தது. ஆதனால் அவர் அனுபவித்த ஒன்றும் அவருக்கு நிம்மதியையும், சந்தோஷத்தையும், சமாதானத்தையும் தரவில்லை. அதனால் எல்லாமே மாயையாக அவருக்கு தோன்றிற்று. பிரியமானவர்களே, இஸ்ரவேலை ஆசீர்வதிப்பதே கர்த்தருக்கு பிரியம்.

ஆவிக்குரிய இஸ்ரவேலராகிய நம்மை ஆசீர்வதிப்பதே கர்த்தருக்கு பிரியம். அதற்குப்பின்னே எனக்கு அது வேண்டும் என்று நாம் அலையத் தேவையில்லை. 'முதலாவது தேவனுடைய ராஜ்யத்தையும் அவருடைய நீதியையும் தேடுங்கள், அப்பொழுது இவைகளெல்லாம் உங்களுக்குக்கூடக் கொடுக்கப்படும்' (மத்தேயு 6:33) என்று வாக்களித்தவர் நாம் அவருடைய இராஜ்யத்தையும் அவருடைய நீதியையும் தேடும்போது, நமக்கு எல்லா ஐசுவரியத்தையும் கூட்டித்தருவார். ஆனால் நாம் கர்த்தரோடு இல்லாதபடி நாம் அனுபவிக்கும் எந்த ஐசுவரியமும் மாயையே. ஆனால் கர்த்தரோடு நாம் இருந்து அவர் கொடுக்கும் ஐசுவரியத்தினால் நாம் மதிமயங்கி போகாமல், அவரது சமுகத்தை வாஞ்சிப்போமானால் அது நிச்சயமாகவே ஆசீர்வாதத்தை தரும். அதனுடனே வேதனை இராது. ஆமென் அல்லேலூயா!

திரண்ட ஆஸ்தி உயர்ந்த கல்வி

செல்வாக்குகள் மிகவிருப்பினும்

குருசை நோக்கி பார்க்க எனக்கு

உரிய பெருமை யாவும் அற்பமே

விந்தை கிறிஸ்தேசு இராஜா

உந்தன் சிலுவை என் மேன்மை

ஜெபம்

எங்கள்அன்பின் பரலோக தகப்பனே, உலக ஆஸ்தியையும், ஐசுவரியத்தையும் தருபவர் நீரே. ஐசுவரியத்தையும் கனத்தையும் கொடுப்பவர் நீரே. நீர் கொடுக்கும் ஐசுவரியங்களின் மேல் எங்கள் கவனமும் கண்களும் செல்லுமானால் அவைகளினால் எங்களுக்கு வேதனைகள் பெருகுமே. நாங்கள் அவற்றின் மேல் எங்கள் கவனத்தை செலுத்தாதபடி, அவைகளை தரும் உம்மீது எங்கள் கவனமும், உம்மோடு நாங்கள் உறவாடவும் அதன் மூலம் அவற்றை அனுபவிக்க கிருபை செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

கர்த்தரையே நம்பிடுவோம்

2013-06-07T05:03:00.002-07:00

கர்த்தரை நம்புகிறவர்கள் என்றென்றைக்கும் அசையாமல் நிலைத்திருக்கும் சீயோன் பர்வதத்தைப்போல் இருப்பார்கள். - (சங்கீதம் 125:1).

.
ஒரு நாள் கடலிலே மீன் பிடிக்க சென்ற அந்தோனியின் படகு ஒரு சுழலில் சிக்குண்டதில் அவன் மரித்து போனான். அவனது மகனும் மீன் பிடிக்க சென்ற போது விஷ மீன் தாக்கி மரித்து போனான். இப்பொழுது பேரன் மீன் பிடிக்க செல்ல வலைகளை வாங்கி படகை ஆயத்தப்படுத்தி கொண்டிருந்தான். இதை கண்ட ஒருவர், 'உன் தாத்தாவும் அப்பாவும் கடலுக்குள் சென்று இறந்து போனார்கள். நீயும் செல்கிறாயே, உன் உயிர் மேல் உனக்கு ஆசையில்லையா?' என்றார். இவர்கள் இருவரது சம்பாஷணைகேட்டு கொண்டிருந்த ஒரு பெரியவர், அவரிடம், ' உன் தாத்தா எப்பொழுது இறந்தார்?' என்று கேட்டார். அதற்கு அவர், என் தாத்தா தூங்கும்போது இறந்தார்' என்றார். 'ஆம், உன் அப்பாவும் தூங்கும்போது நெஞ்சுவலி வந்து தானே இறந்தார். ஆகவே நீயும் அப்படி நினைத்து தினமும் தூங்காமல் இருக்கிறாயா?' என்று கேட்டார். பதிலே பேசவில்லை மற்றவர். 'அவன் மீன் பிடிக்க செல்கிறேன் என்றால் திரும்பி விடுவேன் என்ற நம்பிக்கையில் தான் செல்கிறான்' என்றார்.

இவ்வுலகில் வாழும் ஒவ்வொருவரும் ஒரு நம்பிக்கையில்தான் வாழ்கின்றனர். சிலர் தங்கள் செல்வாக்கில் நம்பிக்கை வைக்கின்றனர். சிலர் தங்கள் கல்வி, ஞானம் இவற்றில் நம்பிக்கை வைக்கின்றனர். சிலர் தங்களிடமுள்ள சொத்து, பதவியில் நம்பிக்கை வைக்கின்றனர். இன்னும் சிலர் மூட நம்பிக்கை மீது தங்கள் நம்பிக்கையை வைத்து பயந்து வாழ்கின்றனர். இப்படி விதவிதமாய் மனிதன் ஒவ்வொன்றின் மீதும் வைக்கும் நம்பிக்கை அவ்வப்போது ஏமாற்ற்தையும், பயத்தையும் கொண்டு வரும். சூழ்நிலை மாறும்போதும், மனிதனின் மனநிலை மாறும்போதும் நம்பிக்கை இழந்து விடுவோம்.

ஆனால் நமது நம்பிக்கையை கன்மலையாம் தேவன் மேல் வைக்கும்போது, அது அசையாது. வேதத்திலே தேவனுடைய தாசனாகிய தாவீது அநேக முறை 'கர்த்தாவே நாம் உம்மை நம்பியிருக்கிறேன்' என்று கர்த்தர் மேல் உள்ள நம்பிக்கையை கூறி, தன்னை திடப்படுத்தி கொள்கிறார். எப்பக்கத்திலும் சத்துருவினால் நெருக்கப்படுகிற அவருக்கு தன்னையும் அறியாமல் பயம் வரும்போதும், 'நான் பயப்படுகிற நாளில் உம்மை நம்புவேன் என்றும், 'தேவனை நம்பியருக்கிறேன். நான் பயப்படேன்' என்றும் கூறுகிறார். ஒரு ராஜாவே தன் படை பலத்தையோ, பண பலத்தையோ நம்பாமல் தன் முழு நம்பிக்கையையும் தேவன் மேல் வைத்திருப்பாரானால், நாம் ஏன் இன்னும் நம் பிள்ளைகளையும், மற்ற மனிதர்களையும், செல்வாக்கையும், சொத்து சுகங்களையும் நம்பி, அவ்வப்போது பயந்து புலம்ப வேண்டும்?

பிரியமானவர்களே, உங்கள் நம்பிக்கை எதன் மேல் உள்ளது? வயதான பின் என் பிள்ளைகள் என்னை கவனித்து கொள்வார்கள் என்று அவர்களை நம்புகிறீர்களோ? என் கடன் பாரத்தை என் பெற்றோர் கொடுக்கும் சொத்தின் மூலம் சரி செய்து கொள்ளலாம் என்று அவர்களை நம்புகிறீர்களோ? நான் வேலை பார்க்கும் கம்பெனி ஒரு பிரச்சனையும் இல்லாதது, ஆகவே எனக்கு எந்த பண கஷ்டமும் வராது என்று உங்கள் கம்பெனியை நம்புகிறீர்களோ? என் படிப்பிற்கு யாரும் கூப்பிட்டு வேலை கொடுப்பார்கள் என்று படிப்பை நம்புகிறீர்களோ? நான் உடலுக்கு கேடு விளைவிக்காத உணவையே உண்கிறேன், நல்ல உடற்பயிற்சி செய்கிறேன், என் ஆரோக்கியத்திற்கு எந்த கேடும் வராது என்று உங்கள் பெலனை நம்புகிறீர்களோ? ஒரு சகோதரன் முப்பத்தைந்து வயதானவர், நன்கு உடற்பயிற்சி செய்து உடலை கட்டு கோப்பாக வைத்திருந்தார். அளவான குடும்பம், நல்ல வேலை, சரியான உணவு எல்லாம் இருந்தும், ஒரு நாள் கடைக்கு போய் சாமான்களை வாங்கி வந்தவர், 'நெஞ்சு வலி, கொஞ்சம் தண்ணீர் கொண்டு வா' என்று தன் மகனிடம் சொல்லி, அவன் தண்ணீர் கொண்டு வருவதற்குள் அவர் உயிர் பிரிந்து விட்டது, பக்கத்தில் வைத்தியர் இருந்து, அவர் வந்து CPR செய்தும் எந்த பலனும் இல்லாமல் அவர் சிறு பிள்ளைகளை அனாதையாக விட்டு மரித்து போனார். ஆம், நாம் நம்பியிருக்கிற காரியங்கள் எல்லாம் ஒரு நாள் நம்மை விட்டு போகலாம், கைவிட்டு விடலாம். ஆனால் 'கர்த்தரை நம்புகிறவர்கள் என்றென்றைக்கும் அசையாமல் நிலைத்திருக்கும் சீயோன் பர்வதத்தைப்போல் இருப்பார்கள்'. நம் நம்பிக்கையை கர்த்தர் மேல் வைப்போமா? நாம் எதுவும் நிலைத்திராத காரியங்கள், மனிதர்கள் மேல் நம் நம்பிக்கையை வைக்கும்போது, பிரச்சனைகள் வரும்போது நாம் அசைந்து போகிறவர்களாக மனம் பதறி நம்பிக்கையற்றவர்களாக மாறி விடுவோம். ஆனால் கர்த்தர் மேல் நம் நம்பிக்கையை வைக்கும்போது, பர்வதத்தை போல எந்த பிரச்சனை வந்தாலும் அசையாதவர்களாக, கர்த்தரை உறுதியாய் பற்றி கொண்டு பயமின்றி வாழ முடியும். கர்த்தரை நம்புகிறவன் பாக்கியவான் (நீதிமொழிகள் 16:20), கர்த்தரை நம்புகிறவனோ செழிப்பான் (நீதிமொழிகள் 28:25) என்று பார்க்கிறோம். ஆகவே நம்மை செழிக்க வைக்கிற, நம்மை பாக்கியவானாய் மாற்றுகிற கர்த்தர் மேல் நம் நம்பிக்கையை வைப்போம். அவர் நம்மை ஆசீர்வதிப்பார். ஆமென் அல்லேலூயா!

கர்த்தரை நம்பினோர் பேறுபெற்றோர்

சீயோன் மலைபோல் உறுதியுடன்

அசையாமல் இருப்பார்கள்

...

கர்த்தரை நேசித்து அவர் வழியில்

நடக்கும் மனிதர் பேறுபெற்றோர்

உழைப்பின் பயனை உண்பார்கள்

நன்மையும் நலமும் பெறுவார்கள்

ஜெபம்

எங்களை அதிகமாய் நேசித்து வழிநடத்தும் நல்ல தகப்பனே, எங்கள் நம்பிக்கையே நீர்தான் ஐயா. உம்மையன்றி நாங்கள் எதில் மேல் நம்பிக்கை வைத்தாலும் அதினால் எந்த பயனும் இல்லையே தகப்பனே. உலகத்தின் காரியங்களில் நாங்கள் எங்கள் நம்பிக்கையை வைக்காமல், உம்மேல் எங்கள் முழு நம்பிக்கையையும் வைத்து, சீயோன் மலை போல் அசையாமல் வாழும்படி எங்களுக்கு கிருபை தாரும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.

கிறிஸ்தவர்கள் காதலிப்பது சரியா? தவறா? ஓர் அலசல்

2013-03-19T00:47:00.004-07:00

கிறிஸ்துவுக்குள் மிகவும் பிரியமானவர்களே, ஆண்டவராகிய இயேசு கிறிஸ்துவின் நாமத்தில் அன்பின் வாழ்த்துக்கள்... இன்றைய சமுதாயச் சூழ்நிலையில் காதல் என்பது வாலிபப் பிள்ளைகள் மத்தியில் ஒரு நாகரீக அடையாளமாகவும், பொழுதுபோக்காகவும், பருவக்கோளாரினால் உண்டான மோகமாகவும் பரவலாக இருக்கிறது. அது சரியா? தவறா? என்று வேதவெளிச்சத்தில் தியானிப்போம்..

காதல் என்றால் என்ன?

அதற்கு முன்னால் காதல் என்றால் என்னவென்று சற்று நிதானிப்போம்.. தேவன் நமக்குக் கொடுத்திருக்கும் அன்பு என்ற சுபாவமும், பாலுணர்வு என்ற சுபாவமும் கலந்து எதிர்பாலர்கள் மீது உண்டாகும் ஒருவித ஈர்ப்பே பொதுவாக நம்முடைய தமிழ் சமுதாயத்தில் காதல் என்ற வார்த்தை கற்பிக்கப்படுகின்றது. கனவனைக் காதலிப்பது, மனைவியைக் காதலிப்பது, மணம் செய்துகொள்ளப்போவோரைக் காதலிப்பது. உடன் பணியாளரைக் காதலிப்பது, உடன் படிப்போரைக் காதலிப்பது. பக்கத்து வீடு, அடுத்தவீடு எதிர் வீடு பக்கத்து ஏரியா, மற்றும் இனையக் காதல் என்று பட்டியல் நீண்டுகொண்டே போகலாம்..

உலகத்தின் பார்வையில் காதல்

உலகத்தின் பார்வையில் காதல் என்பது ஆரோக்கிய மனப்பான்மையில் பொதுவில் சரியானதாகவே பார்க்கப்படுகின்றது. ஒருவருக்கொருவர் சரியான புரிதலில் வரும் காதல், சாதி மதம் இனம் மொழி பொருளாதார வேறுபாடுகள் கடந்து வெற்றிபெறுகின்றன, சில தோல்வியும் அடைகின்றது. ஆனால் பொதுவாகப் பார்த்தால் காதல் என்பது அனைவராலும் ஏற்றுக்கொள்ளப்பட்ட ஒரு சமூக செயல்பாடே என்று அனைவராலும் அங்கீகரிக்கப்பட்டிருக்கிறது

கிறிஸ்தவக் காதல்

இந்த உலகத்தில் வாழ்ந்து கொண்டிருக்கின்ற கிறிஸ்தவர்களாகிய நாம் இந்த உலத்தின் போக்கோடு எளிமையாக காதலில் காதலில் விழுந்துவிடுகின்றோம். அல்லது காதலில் விழத் தூண்டப்படுகின்றோம்.. பலர் உலகத்தார் போலவும், சிலர் ஆலயத்தில் வாலிபர் கூடுகை, ஞாயிறு பள்ளி, ஜெபக்குழுக்கள், பாடகர் குழு என்ற எல்லாவற்றிலும் தேவ நாம மகிமைக் கென்று கூடுவதைக் காட்டிலும் எதிர்பாலரைக் கவரவேண்டும் என்ற வாஞ்சையில் கூடுவோர் அனேகம் பேர்.

இதிலும் ஆண்டவர் தரிசனத்தில் அந்தப் பெண்ணைக் காட்டினார், இவன் கிறிஸ்துவுக்குள் சரியாக இருக்கின்றான், ஆகவே இவன் என் வாழ்க்கைத் துனையாக வரவேண்டும் என்று காதலுக்கு ஆவிக்குரிய சாயம் பூசி அதை ஆண்டவருக்குச் சிந்தம் என்று சொல்ல முயல்கிறோம்.

காதலைக் குறித்து கிறிஸ்தவம் என்ன சொல்லுகின்றது,

கிறிஸ்தவம் கனவன் மனைவிக்கு இடையிலான அன்பு கூறுதலை கனமானது, பரிசுத்தமானது, என்று விவரிக்கிறது, தன் சொந்த சரீரமாக பார்க்கவும் பராமரிக்கவும், நடத்தவும் சொல்லியிருக்கிறது, ஆனால் அது கனவன் மனைவிக்கு இடையிலான காரியமே அல்லாமல் திருமனத்திற்கு முந்தைய அல்லது திருமனத்திற்கு பிந்தைய காதலை விமர்சித்து எதுவும் சொல்லப்படவில்லை. அப்படியானால் காதலிப்பது சரியா தவறா என்று எப்படி அறிந்துகொள்வது என்ற குழப்பம் தேவையில்லாதது, இதை அடுத்துவரும் பத்திகள் தெளிவாக விளக்கும்.

காதலிக்கும்போதான மனோபாவம்,

நம்மில் எல்லோருமே நிச்சயமாக காதல், அல்லது எதிர்பாலின ஈர்ப்பு என்ற ஏதாகிலும் ஒன்றையாவது நம்முடைய ஏதோ ஒருவகையில் கடந்து வந்திருப்போம், அந்தக் கால கட்ட மனோபாவம் இன்றைய வாலிபப் பிள்ளைகளுக்கு விளக்கிச் சொல்லவேண்டுவதில்லை. அவர்களைப் பார்க்க வேண்டும், பேசவேண்டும், போனில் பேச வேண்டும், மெசேஜ் அனுப்ப வேண்டும், பேஸ்புக்கில் சேட்டவேண்டும், எப்போதும் அவர் நினைவாகவே இருக்கவேண்டும், என்று தோண்றிக்கொண்டே இருக்கும். இதை யாருமே மறுக்க மாட்டீர்கள் என்று நம்புகிறேன். ஒருவேளை இப்படிபட்ட உணர்வுகள் எனக்கு ஏற்பட்டதில்லை ஆனாலும் நான் உயிருக்குயிராக காதலித்தேன், காதலிக்கிறேன், என்று சொல்வீர்களாயின் நிச்சயம் ஏதோ கோளாறு உடனடியாக வைத்தியரைப் பார்க்கவும். அல்லது பொய் சொல்கிறீர்கள் என்று பொருள். இந்த மனோபாவம் பொதுவாக பதின் பருவம் மற்றும் 20களின் தொடக்கங்களில் 99% மனிதர்களுக்கு நிச்சயமாக இருக்கும், இருந்திருக்கும். அந்த வயதினரை மனதில் வைத்தே இந்தக் கேள்வி கேட்கப்பட்டிருக்கிறது என்பதை மனதில் நிருத்தவும்.

காதலிக்கும் மனோபாவமும் கிறிஸ்தவமும்,

மேற்சொன்ன மனோபாவத்தை வேத வெளிச்சத்தில் ஆராயவேண்டியது மிகவும் அவசியம், காரணம் இந்த மனோபாவம் காதலிப்போரை தற்கொலை, கொலை, கீறிக்கொள்ளுதல், காதலிக்க மறுப்போரை, அல்லது பிரிந்தோர் மீது தாக்குதல் நடத்துதல் போன்ற தீய செயல்களைச் செய்ய ஊக்கமளிக்கிறது என்று அறிய வேண்டியது எதார்த்த உண்மையாகும். இது மிக மிக அரிதாக அங்கொன்றும் இங்கொன்றுமாக நடக்கிறதாக இருந்தாலும், இந்த மனப்பான்மை இயேசு கிறிஸ்துவின் எதிர்ப்பார்ப்புகளில் ஒன்றை நம்மையும் அறியாமல் மீறும்படி செய்து விடுகின்றது.

கிறிஸ்துவின் எதிர்பார்ப்புக்கு முரன்படும் காதல் மனப்பான்மை

என்னிலும் அதிகமாய் நேசிக்கிறவன் மற்றவர்களை நேசிப்பவன் எனக்குப் பாத்திரன் அல்ல.(மத்தேயு 10:37) என்று ஆண்டவராகிய இயேசு கிறிஸ்து நேரடியாகவே சொல்லியிருக்கிறார். இன்று எத்தனை தேவ பிள்ளைகள் தன் காதலரின் மேல் கிறிஸ்துவைக் காட்டிலும் அதிகமாக நேசித்து பைத்தியமாக இருக்கின்றீர்கள்? என்ற கேள்வியை உங்கள் இருதயத்தில் கேட்டால் இல்லையில்லை நான் இயேசுவைக் காட்டிலும் குறைவாகவே என் காதலரை நேசிக்கிறேன் என்று சொல்லக்கூடும், ஆனால் ஒருவர் உங்களிடம் வந்து தேவன் அவர் உனக்கு சித்தமில்லை என்று சொல்லச் சொல்வதாகக் கற்பனை செய்து கொள்ளுங்கள், அந்தச் சூழ்நிலையில் அவர்களை விட்டு விட உங்கள் முழு இருதயமும் சம்மதிக்குமா? ஒருவேளை அப்போது சரி என்றாலும், ஒருநாள், ஒருவாரம், ஒருமாதம் கழித்து எடுத்த முடிவு தவறோ என்ற எண்ணம் உருவாகுமா? உருவாகாதா? என்று நிதானித்துப் பார்த்தால் நிச்சயம் இல்லை என்றுதான் மனசாட்சிக்கு உண்மையான பதில் வரும். ஆகவே தேவனுடைய இடத்தை திருடும் திருடனின் திட்டமே காதல் என்பதை அறிந்துகொள்.

தேவ பிள்ளையைக் காதலிக்கலாமா?

நல்லக் கேள்வி பொதுவாக காதலிப்பவர்கள் நான் நல்ல விசுவாசியான பிள்ளையைத்தான் காதலிக்கிறேன். நாங்கள் திருமணம் செய்து கொண்டு ஆண்டவருக்கென்று ஊழியம் செய்வோம் என்று சொல்லித் தங்களைத் தாங்களே ஏமாற்றிக்கொள்ளக்கூடும். உண்மை என்னவெனில், முன்பே சொன்னது போல சுய இச்சைக்கு தேவ சாயல் பூசும் முயற்சி இது, வெளிப்படையாகச் சொல்வதானால் ஆண்டவரே இவனை(அ) இவளை எனக்கு மனைவியாகத் தாரும் என்று சுய சித்தத்தை தேவசித்தமாக மாற்ற போராடி ஜெபித்து தேவனுடைய விருப்பத்தைக் காட்டிலும் சுய விருப்பத்திற்கு எப்பாடு பட்டாவது தேவனை சம்மதிக்கச் செய்துவிட வேண்டும் என்ற கேவலமான சுயநலம் அதில் அடங்கியிருக்கிறது என்பதை நாம் அறிந்துகொள்ள வேண்டும். உங்களிடம் யாராவது நீ கிடைக்க வேண்டும் தேவனிடத்தில் மன்றாடி கேட்டுக்கொண்டேன் அதனால் தான் நீயும் சம்பதித்திருக்கிறாய் என்று சொல்வார்களாயின் தேவ திட்டம் என்ற போலியான போர்வையில் உங்கள் மீதுள்ள மோகத்தால் தங்கள் சுய திட்டத்தை நிறைவேற்றிக் கொண்டிருக்கிறார்கள் என்று எளிமையாக அறிந்துகொள்ளலாம். அப்படி யாராவது உங்களை ஏமாற்றியிருப்பார்களாயின் அதில் நீங்கள் ஏமாற்றப்பட்டிருக்கிறீர்கள் உடனே அதை விட்டு வெளியேறவும், அது சாத்தானின் திட்டம்..

காதலின் உண்மை முகம்.

தற்காலக் காதல்கள் இரகசிய பாலுறவு வரை சென்று திருமணத்துக்கு முந்தைய கற்பமாதல், கருக்கலைப்பு போன்றவற்றைச் செய்து விபச்சாரம், மனுச கொலைப்பாதகம் போன்ற பாவத்தைச் செய்யக் காரணமாகி விடுகிறது. நீ கருக்கலைப்பு செய்திருக்கின்றாயா? அப்படியெனில் நீ கொலைப்பாதகனாய் இருக்கின்றாய், கருக்கலைப்புக்குக் காரணமாய் இருந்திருக்கின்றாயா நீயும் கொலைப்பாதகனே உனக்குள் நித்திய ஜீவன் இல்லை என்று வேதம் சொல்லுகிறது ஆம் நீ அதற்கு மன்னிப்புப் பெறாமல் நிச்சயம் பரலோகம் போகமாட்டாய் நரகத்துக்குத்தான் போவாய் இதை வேதம் தெளிவாக(I யோவான் 3:15) சொல்லியிருக்கிறது. இது போன்ற சமூக அவலங்களுக்குக் காரணமாகும் காதல் தேவையா?

மனுசனை நம்புதல் காதலின் குணம்

காதலிப்பவர்கள் தன் துணையின் வார்த்தைகளை அதிகமாக நம்பியிருப்பார்கள், நான் உன்னைக் காலத்துக்கும் வைத்துக் காப்பாற்றுகிறேன், உயிருள்ளவரை நேசிப்பேன், என்றெல்லாம் மனித வாக்குறுதியை நம்பி தன் இருதய இச்சைக்கு வலிமை தேடிக்கொள்கிறார்கள், ஆனால் வேதமோ நாசியிலே சுவாசமுள்ள மனுஷனை நம்புவதைவிட்டுவிடுங்கள்; எண்ணப்படுவதற்கு அவன் எம்மாத்திரம்.(ஏசாயா 2:22) என்று எதிர்க்கேள்வி கேட்கிறது, அதே போல எந்த மனுஷனும் பொய்யன் என்றும் சொல்வோமாக.(ரோமர் 3:4) என்றும் நமக்குக் கற்பித்திருக்கிறது, அப்படியானால் நாம் நம் காதல் துனையின் பொய் வார்த்தைகளை நம்புகிறோம் என்றுதானே அர்த்தம்? உன் வாழ்நாளெல்லாம் உன்னோடு உனக்காக நானிருப்பேன் என்று உன் கைகளைப் பிடித்துக் கொண்டு சொல்பவன் திருமணமாகி வரும்போது விபத்தில் அடிப்பட்டு சாகமாட்டான் என்று உனக்கு எப்படித்தெரியும்? காரணம் உன்னால் மனிதனுடைய முகத்தை மட்டுமே பார்க்க முடியும் என்பதை நினைவில் நிறுத்து..

பொய்யனின் உச்சகட்ட ஏமாற்றும் திட்டமாக காதல் மாறக்கூடும்

தேவ பிள்ளையைக் காதலிக்கலாம் என்று சொல்லுகிறவர்கள் பொதுவாக அந்த குறிப்பிட்டவரின் வேத வாசிப்பு, ஜெபம் போன்றவற்றைப் பார்த்து நம்பி ஏமாறக்கூடும் ஏனெனில் அடுத்தவரைக் கவரவேண்டும் என்ற திட்டத்தில் போலியாக அந்த நபர் நடிக்கக்கூடுமே? மேலும் மகா மோசடியான ஒன்றும் இதில் அடங்கியிருக்கிறது, கிறிஸ்தவனல்லாதவன் ஒருவன் வந்து காதலிப்பதாகச் சொன்னால் உடனே இந்த விசுவாசி என்ன செய்வார் தெரியுமா? நீ கிறிஸ்தவனாகு என்று போதிக்கும் அவனும் இவர் மீதுள்ள கிறக்கத்தில் கிறிஸ்தவனாகும் சடங்காச்சாரமான ஞானஸ்நானம் போன்ற வற்றைச் செய்துவிட்டு வந்து திருமணம் செய்து காரியம் ஆனவுடன் தன் பழைய வேலையைக் காட்ட ஆரம்பித்துவிடும் இப்படி பலருடைய வாழ்க்கை ஏமாற்றம் கண்டிருக்கிறது என்பது கசப்பான உண்மையாகும்...

அப்படியானால் என்னதான் செய்வது?

எனக்கன்பான தேவ பிள்ளையே.. உன்னுடைய பாலுணர்வைக் கொடுத்தவர் ஆண்டவர், மேலும் அவர் உன்னைத் தனிமையாக இருப்பது நல்லதல்ல என்று உனக்கு ஏற்ற துனையை உனக்கு நிச்சயம் ஏற்படுத்தியிருப்பார். அவர் சகலத்தையும் அதினதின் காலத்தில் நேர்த்தியாய் செய்து முடிப்பவர் என்று வேதம் சொல்லுகிறது, பிறந்த குழந்தைக்கு ஒரு தாய் அரிசி சாதம் கொடுக்கத் துணிவாளோ? அப்படியே உனக்கான தகுதிவரும் வரை தேவன் தரமாட்டார் என்பதை நினைவில் கொள். நீ தேடி அலைந்தால் அதனால் வரும் துன்பத்திற்கு நீதான் ஆளாகவேண்டும் என்பதை நினைவில் கொள். இது எப்படியாகும்? என் சூழ்நிலைகள் எல்லாம் எனக்கு எதிராக இருக்கின்றதே? என்று சூழ்நிலைகளுக்கு அடுத்த நெருக்கத்தில் தவிக்கக்கூடும் கலங்காதே, கர்த்தர் மேல் திட நம்பிக்கையாயிரு.. நீ அறியாததும் நினைத்துக் கூடப் பார்க்காத வழியில் தேவன் செயல்பட ஆரம்பிப்பார். கடினமானதுதான் ஆனாலும் அவரிடத்தில் காத்திரு, அதைத்தவிர சரியான வழி எதுவும் இல்லை என்பதை நினைவில் கொள்.

காதலிலிருந்து தப்பிப்பது எப்படி?

காதல் முன்பே சொன்னது போல காதல் நம்முடைய சமுதாய அமைப்பில் பழகிப்போன அங்கீகரிக்கப்பட்ட ஒன்றாக இருந்தாலும், தேவ பிள்ளைகளாகிய நாம் எல்லாக் காவலோடும் நம்முடைய இருதயத்தைக் காத்துக்கொண்டு தப்பிக்க முடியும், எந்த ஒரு காதலும் நினைவுகளின் திரட்சியால் தான் வலிமையாகும், ஆகவே அதுபோன்ற நினைவுகளுக்கு இடம் கொடுக்காதே, அந்த நினைவுகளைத் தூண்டும் நண்பர்களோடு சேராதே, சுருக்கமாக உன் மனதில் காதல் குறித்த நினைவுகளுக்கு இடம் கொடுக்காமலிருந்து ஜெபத்தில் உறுதியாய் இருப்பாயாகின் நிச்சயம் காதலிலிருந்து தப்பிக்க முடியும்...

முடிவாக..

காதல் என்பது உலகத்தின் பார்வையில் எப்படிப்பட்டதாக இருந்தாலும், கிறிஸ்தவத்தின் பார்வையில் தவறே.. என்று சொல்லி இந்தப்பதிவை நிறைவு செய்கிறேன் நன்றி

By:
http://www.bibleuncle.com

துதியின் வல்லமை

2012-12-07T20:05:00.003-08:00

அவர்கள் பாடித் துதிசெய்யத் தொடங்கினபோது, யூதாவுக்கு விரோதமாய் வந்து பதிவிருந்த அம்மோன் புத்திரரையும், மோவாபியரையும், சேயீர் மலைத் தேசத்தாரையும், ஒருவருக்கு விரோதமாய் ஒருவரைக் கர்த்தர் எழும்பப்பண்ணினதினால் அவர்கள் வெட்டுண்டு விழுந்தார்கள். - (2நாளாகமம்-20:22).

நாம் ஒவ்வொருவரும் நமக்கு பிரியமானவர்களை புகழுகிறோம். சிலர், தஙகள் மேல் இருக்கும் அதிகாரிகளை புகழுவார்கள், சிலர் தங்கள் துணைவர்களை புகழுவார்கள், சிலர் தங்கள் பிள்ளைகளை புகழுவார்கள். ஆனால் நாம் கர்த்தரை புகழுகிறோமா? அவரைத் துதிக்கிறோமா?

ஒரு ஆலயத்தில் போதகர் சபையை நடத்திக் கொண்டு இருந்த போது, மூன்றுப் பேர் நடுஆராதனையில் அலட்சியமாக வந்து அமர்ந்தனர். போதகர் செய்தி வேளையை ஆரம்பித்தபோது, அவர்களில் தலைவனாகக் காணப்பட்டவன் எழுந்து நின்று, ‘போதகரே, நீர் பேசுகிற காரியங்களை நீர் முதலில் விசுவாசிக்கிறீரா?’ என்றுக் கேட்டான், அதற்கு அவர் பதிலளித்து விட்டு, தன் செய்தியைத் தொடர்ந்தார். திரும்பவும் ஐந்து நிமிடங்கள் கழித்து அவன் திரும்பவும் எழுந்து, வேறுக் கேள்வியைக கேட்டான். அதற்கு போதகர், ‘நீர் கேட்ட கேள்விக்கு ஆராதனை முடிந்தவுடன் பதிலளிக்கிறேன் இப்போது உட்காரும்’ என்றுக் கூறினார். திரும்பவும் ஐந்து நிமிடங்கள் கழித்து, அவன் வேறுக் கேள்வியைக் கேட்டவுடன், போதகருக்கு புரிந்து விட்டது, இது ஆவிக்குரிய போர் என்று. உடனே, ‘உன்னை இயேசுவின் வல்லமையுள்ள நாமத்தில் கடிந்துக் கொள்கிறேன் இந்த ஆலயத்தை விட்டு வெளியேப் போ’என்றுக் கடிந்துக் கொண்டார்.

அதைக் கேட்டவுடன் மற்ற இருவரும் ஆலயத்தை விட்டு வெளியேப் போனார்கள். ஆனால் அந்த மனிதனோ, திரும்ப பேச ஆரம்பித்தான், அப்போது போதகர், தனது ஆலயத்தின் மூப்பர்களை நோக்கி, ‘இந்த மனிதனை வெளியே அனுப்புங்கள்’ என்றுக் கட்டளைக் கொடுத்தார். அவர்கள் அந்த மனிதனை நெருங்கவும், அவன் கெட்ட வார்த்தைகளாலும், மற்ற வார்த்தைகளாலும் தூஷிக்க ஆரம்பித்தான். அப்போது யாரும் எதிர்பாராதவாறு சபையார் எல்லாரும் எழுந்து நின்று தேவனை சத்தமாய் துதிக்க ஆரம்பித்தார்கள். அந்த சத்தத்தை அவன் கேட்டானா இல்லையோ, அவன் குழம்ப ஆரம்பித்து, சபையை விட்டே ஓட ஆரம்பித்தான். எல்லாம் அமைதியானபோது, போதகர் தனது சபையில், ‘தேவன் துதியின் வல்லமையை நாம் அனைவரும் அறிய வேண்டும் என்பதற்காகவே இந்தக் காரியத்தை அனுமதித்தார்’ எனக் கூறினார்.

நமது போராட்ட வேளையிலும், தேவனை நாம் துதிக்க கற்றுக் கொள்ள வேண்டும். துதியினால், தேவ பிரசன்னத்தையே நாம் இந்த பூமியிலேக் கொண்டு வர முடியும். துதியின் மத்தியில் வாசம் பண்ணுகிற தேவன் நம் தேவன். கேரூபீன்களும் சேராபீன்களும் ஓயாமல் புகழ்ந்துப் பாடிக் கொண்டிருக்கும் துதிகளின் மத்தியில் அவர் வாசம் பணணுகிறவர். அவர் நாம் துதிக்கும் வேளையில் இறங்கி வந்து, நம்மை ஆசீர்வதிக்கிறார். ‘தம் நாமத்ததை பிரஸ்தாபம் பண்ணும் எந்த இடத்திலும் வந்து ஆசீர்வதிப்பேன்’ என்றவர் துதிக்கிற நம்மை நிச்சயமாக ஆசீர்வதிப்பார். நமது தேவைகளை சந்திப்பார்.

துதியின் சத்தத்தில் சத்துரு வாசம் பண்ண முடியாது. உங்களுக்கு பிரச்சனைகள் வரும்போது, நீஙகள் தேவனை துதிக்க ஆரம்பியுங்கள். உங்கள் பிரச்சனை தானாக மாறுவதை காண்பீர்கள். உங்கள் வாழ்க்கையில் துன்பங்களினாலும், உயிருக்குயிரானவர்களை இழந்ததினாலும் துக்கத்தோடு இருக்கிறீர்களா? அதிலிருந்து வெளியே வரவே முடியவில்லை என்றுச் சொல்கிறீர்களா? தேவனை துதிக்க ஆரம்பியுங்கள், உங்கள் சோர்வுகள், துக்கங்கள் மறைய ஆரம்பிக்கும். சீயோனிலே துயரப்பட்டவர்களைச் சீர்ப்படுத்தவும், அவர்களுக்குச் சாம்பலுக்குப் பதிலாகச் சிங்காரத்தையும், துயரத்துக்குப் பதிலாக ஆனந்த தைலத்தையும், ஒடுங்கின ஆவிக்குப் பதிலாகத் துதியின் உடையையும் கொடுக்கவும், அவர் என்னை அனுப்பினார்; அவர்கள் கர்த்தர் தம்முடைய மகிமைக்கென்று நாட்டின நீதியின் விருட்சங்களென்னப்படுவார்கள். - (ஏசாயா 61:3) என்ற நாம் வாசிக்கிறோம். ஆம், அவர் நமக்கு ஒடுங்கின ஆவிக்குப் பதிலாக துதியின் உடையைக் கொடுத்திருக்கிறார்.

அவரை துதிக்க துதிக்க துயரம் நீங்குவதையும் கிருபை பெருகுவதையும் கண்கூடாக காண்பீர்கள். ஆகவே துதிப்போம், சாத்தானை ஜெயிப்போம். துதிக்கு முன்பாக ஒரு எரிகோ கோட்டையால் நிற்க முடியவில்லை. துதிக்கு முன்பாக, எதிரிகள் புறமுதுகிட்டு ஓடினர். துதிக்கு முன்பாக, எதிரிகள் ஒருவருக்கொருவர் வெட்டுண்டு விழுந்தார்கள். துதிக்கு முன்பாக சாத்தான் நிற்க முடியாது. அவன் வெட்கப்பட்டு ஓடுவான். துதிப்போம் சாத்தானை மேற்கொள்வோம் ஆமென் அல்லேலூயா!

விழுகுது விழுகுது எரிகோ கோட்டை

எழும்புது எழும்புது இயேசுவின் படை

துதிப்போம் சாத்தானை ஜெயிப்போம்

துதிப்போம் தேசத்தை சொந்தமாக்குவோம்

ஜெபம்

எங்களை நேசிக்கிற நல்ல தகப்பனே, துதியின் வல்லமை அறிந்த விசுவாசிகள், சத்துருவின் மேல் வெற்றியை எடுத்ததைப்போல நாங்களும், துதித்து துதித்து சாத்தானின் மேல் வெற்றி எடுக்க கிருபைச் செய்யும். இயேசுவின் படையாக எழும்பி துதித்து, ஜெபித்து தேசத்தை உமக்கு சொந்தமாக்க கிருபைச் செய்யும். ஒவ்வொருவர் வாழ்விலும் இருக்கும் சத்;துருவின் போராட்டங்களை, துதியினால் மேற்கொள்ள, வெற்றி எடுக்க ஒவ்வொரு விசுவாசிக்கும் கிருபைச் செய்யும். எங்கள் ஜெபத்தை கேட்டு எங்களுக்கு பதில் கொடுப்பவரே உமக்கே நன்றி. இயேசு கிறிஸ்துவின் நாமத்தில் ஜெபிக்கிறோம் எங்கள் ஜீவனுள்ள நல்ல பிதாவே ஆமென்.