inkymoos

கொரோனாவுடன் பழகுவோம் வாருங்கள்

2020-04-13T09:58:00.000+05:30

இன்று உலகமே கதிகலங்கியிருப்பது புதிதாக தோன்றம் பெற்றிருக்கும் உயிர்கொல்லியான கொரோனா வைரஸினால் என்றால் மிகையாகாது, இந்த உயிர்கொல்லி பலரது உயிர்களைக் காவுகொண்டாலும் பல நல்லவிடயங்களை இந்த மானிடர் சமூகத்தில் விதைத்துள்ளது என்று சொல்வதில் தவறில்லை என்றே நினைக்கின்றேன். இந்த உயிர்கொல்லி வைரஸ் நம்மிடம் தொற்றாமலும் தொற்றியவர்களிடமிருந்து ஏனையவர்கலுக்கு பரவாமலும் இருக்க சில் ஆலோசனைகளை முன்வைக்கிறேன்

01. கொரோனாவை நாம் நிறுத்த முடியாது

எதிர்வரும் வருடத்திற்குள் இது எங்களில் பொரும்பாலானோருடன் பழகியிருக்கும், இதனைக் குறைப்பதற்கு மருத்துவத் துறையில் உள்ளவர்கள் தங்களால் இயலுமான முயற்சிகளைச் செய்துகொண்டுதான் இருக்கின்றனர், இடைப்பட்ட காலங்களில் வரும் இழப்புக்கள் ஈடுசெய்ய இயலாதவை, மருத்துவ சமூகத்தினர் அவர்களால் இயலுமான முயற்சிகளை அர்ப்பணிப்புடன் செய்கின்றனர் இதில் ஈடுசெய்ய முடியாத அளவு அனுபத்திலும், திறமையிலும் சிறப்புத்தேர்ச்சி கொண்ட மருத்துவ சமூகத்தினரின் இழப்புக்களும் இடம்பெறத்தான் செய்கின்றன

02. இந்த புதிய நண்பரான கொரோனா வைரசின் உறவினைக் குறைக்க முடியும்

வைரசிஸ் யாருடன் ஒட்டி உறவாடி இருக்கின்றதோ அந்த நபருடனான நமது உறவினைத் துண்டிப்பதன் மூலம் இந்த வைரஸ் நம்முடன் நண்பராவதினை தடுத்துக்கொள்ளலாம்/ குறைத்துக்கொள்ளலாம். கட்டித் தழுவுதல், கை குழுக்குதல், முத்தமிடல் , கைகளைக் கொண்டு முகத்தைத் தடவுதல், உடல் உறுப்புக்களைத் தொடுதல் போன்ற செயல்களைத் தவிர்ப்போமாக இருந்தால் இந்த வைரஸ் நண்பரின் தொடர்பிலிருந்து எம்மை பாதுகாத்திடலாம்

03. வைரஸ் நண்பரை அளவோடு ஆதரிக்க முற்கூட்டிய தயாரிப்புகள்

வைரஸ் நண்பர் எப்போது எம் தேசத்துக்கு வந்துவிட்டார் என்று நாம் அறிந்த காலப்பகுதியிலிருந்து எமது உடல் ஆரோக்கியத்தில் நாம் அதிக அக்கரை செலுத்தும் போது வைரஸ் நண்பரை வாசற்கதவிற்கப்பால் வைத்து அனுப்பிவிட முடியும் , நல்ல தூக்கம், நோய் எதிர்ப்பு சக்தியுள்ள உணவுகளின் நுகர்வு, ஓய்வு, உடற்பயிற்சி என நம்மை நாம் பழக்கப்படுத்திக்கொள்ளும் போது வைரஸ் நண்பர் தானாகவே எம்மிடம் வருவதற்கு வெட்கப்படுவார், இவைகளுக்கு நாம் அதிக பணம் செலுத்த வேண்டிய அவசியமும் கிடையாது.

04. நண்பரை உயிர் நண்பராகக் கொள்ளல்

வைரஸ் நண்பர் யாருடன் ஒட்டி உறவாடி இருக்கின்ராறோ அவர், குறித்த கொரோனா வைரஸ் நண்பரை தன் உயிர் நண்பனாகக் கருதி அவரை யாருக்கும் விட்டுக்கொடுக்காமல், பாதுகாத்து வருவாராக இருந்தால் இந்த புதிய கொரோனா வைரஸ் நண்பர் எம் சமூகத்தில் ஏனையவர்களிடம் ஊடுருவாமல் இருப்பார்.

05. இரகசியத்தை வெளிப்படுத்தலும் தைரியப்படலும்

குறித்த வெளிநாட்டு நண்பர் தன் இல்லம் வந்துள்ளார் என்பதனை அயலவர்களுக்கும் ஏனைய நண்பர்களுக்கும் வெளிப்படுத்துவதன் மூலம் நண்பர் என்ன நோக்கத்துக்காக வந்துள்ளார் என்பதனை கண்டறிய முடியும்,

மேலும் இவ் இரகசியத்தை வெளிப்படுத்தும் நபருக்கு ஏனையவர்கள் அவருக்கான தைரியத்தையும் பொருளாதார பலத்தையும் வழங்குவதன் மூலம் இக் குறிப்பிட்ட நண்பர் வேறு யாருடைய இல்லங்களுக்கு வந்திருந்தாலும் அவர்கள் மறைக்காமல் வெளிநாட்டு நண்பர் பற்றி தெரியப்படுத்துவார்கள்

06. உணர்ச்சிகளைக் கட்டுப்படுத்தல்

சரி வெளிநாட்டு நண்பர் பற்றி ஏனையவர்களுக்கு தெரியப்படுத்தியாச்சு, ஆகவே நாம் நம் நண்பரோடு மட்டும் உறவினைப் பேணிக்கொள்வதுடன், ஏனைய உறவுகளுடன் உடல் தொடர்பற்று குரல் தொடர்புகளைப் பேணிவருவது சிறந்தது, மேலும் சமூக தளங்களில் வெளிநாட்டு நண்பர் தொடர்பாக ஆராய்ந்து மனதிற்கும் உடலிற்கும் தைரியத்தை ஏற்படுத்திக்கொள்ள வேண்டும், குளிர்பானப் பிரியராக நாம் இருந்தால் நம் நண்பரின் நிலை கருதி குளிர்பானத்தை தவிர்ப்பது நல்லது அதற்குப் பகரமாக அதிகமாக இளஞ்சூடு / சூடான நீரினை நாம் அருந்துவதுன் மூலம் நண்பரைத் திருப்திப்படுத்த முடியும்

07. எங்களுக்கு வேண்டும் என்பதை விட எனக்கு வேண்டும் என்று சிந்திப்பது

இங்கு நாம் சுயநலவாதியாக இருப்பது நல்லது, வெளிநாட்டு நண்பர் அழைப்பில்லாமல் வந்து போன இல்லங்கள் தவிர்த்து ஏனையவர்கள் எனக்கு உயிர் வேண்டும் எனும் எண்ணப்பாட்டுடன் செயல்படுவது நன்று, எல்லோரும் என்னைக் காப்பாற்றுங்கள் காப்பாற்றுங்கள் என்று கூச்சலிடுவதை விட என்னை நான் காப்பாற்றிவிட்டேன் என்று சொல்வதில் தான் இந்த நண்பரின் திருவிளையாடல் தோற்றுப்போய்விட்டது என்பது புலப்படும்.

08. அச்சம் தேவையில்லை

வெளிநாட்டு நண்பர் தொடர்பில் உலகளவில் பேசப்பட்டாலும் நாம் அவர் தொடர்பில் அச்சம் கொள்ளத் தேவையில்லை, அச்சம் மிகப்பெரிய கொலைகாரன் ஆகவே நாம் குறித்த முன்னேற்பாட்டுகளுடன் வெளிநாட்டு நண்பரை வரவேற்வேற்கத் தயாராக இருப்போமேயானால் தேவையில்லாத அச்சங்களைத் தவிர்த்து தைரியத்தையும் மன அமைதியையும் பெறலாம்.

விதி என்ற ஒன்று எப்படி எழுதப்பட்டுள்ளதோ அப்படியே நடக்கும்

ஆரோக்கியமும் ஓய்வுநேரமும்

2017-03-03T23:30:00.000+05:30

இறைவனால் எமக்கு கொடுக்கப்பட்ட மிகப்பெரிய அருட்கொடைகளில் ஆரோக்கியம், ஓய்வு நேரம் மிகவும் பிரயோசமனாகப் பயன்படுத்தப்பட வேண்டியவை. இப்போதிருப்பவர்களில் பெரும்பாலானவர்களிடம் வினவினால் நேரமில்லை, நேரம் போதாது என்பதே பதிலாகும்.

ஒருவருக்கு ஓய்வுநேரமும் ஆரோக்கியமும் இணைந்து கிடைக்கும் காலம் வெகு சொற்பம், நிலையற்ற , நிம்மதியற்ற இந்த உலகிற்காக இரவு பகல் பாராது எமது பெறுமதியான வினாடிகளை செலவளிக்கின்றோம். பலர் என்ன நோக்கத்திற்காக வினாடிகளை செலவிட்டனரோ அதனை அடையுமுன்னரே மண்ணில் புதையுண்டு போகின்றனர். ஆக, இவ்வுலகில் செலவளிக்கப்படும் வினாடிகள் எமக்கு மிகப் பிரயோசனம் தரக்கூடியவைகளுக்குச் செலவளிக்கப்படுமாக இருந்தால் நன்று.

உடல் தெம்பாக இருக்கும் நிலையில் எம்மில் பலருக்கு ஓய்வுநேரம் கிடைப்பதில்லை, வாழ்வின் அந்திம பகுதியில் உடலின் ஆரோக்கியத்திற்காக பலர் ஓய்வெடுக்கின்றனர். உடல்நலமற்று நன்மையான விடயங்களையும் ஓடி ஆடி செய்ய முடியாமல் படுக்கையில் கிடக்கும் போது உடல் தெம்பாக இருந்த காலப்பகுதியில் செய்யப்பட்ட நன்மையான விடயங்களுக்கு கிடைத்த கூலியில் சற்றும் குறைவில்லாமல் அதே போன்ற கூலி இறைவனிடமிருந்து கிடைத்துக்கொண்டேயிருக்கும் என்பதை மறந்தவர்களாக எமது ஆரோக்கியமுள்ள இளமைப்பருவத்தை இவ்வுலகிற்காக வீணடிக்கிறோம் என்பது கவலையே...

இவ்வுலகில் எமக்கு வாக்களிக்கப்பட்ட மூச்சுக்களின் எண்ணிக்கை மிகச் சொற்பம் அதையும் அறிந்தவன் இறைவன் ஒருவனே, வாக்களிக்கப்பட்ட மூச்சுகளில் ஆரோக்கியமான மூச்சுக்களின் எண்ணிக்கை கேள்விக்குறியே... இளமைப்பருவ மரணங்கள் இவ்வுலக மூச்சுக்களின் எண்ணிக்கைக்கு சாட்சியாயிருக்கின்றன.

ஓய்வு நேரம் கிடைக்கும் கிடைக்கும் என ஓய்வு நேரத்தை எதிர்பார்த்துக்கொண்டிருந்தால்... அது தள்ளாடும் வயதிலோ அல்லது கிடைக்காமலோ போய்விடும். நாளைய நாளை கேள்விக்குறியோடு எத்ரிபார்க்கும் நாம் நன்றே செய் அதை இன்றே செய் எனும் மூத்தோர் கூற்றுக்கிணங்க புலரும் ஒவ்வொரு பொழுதிலும் நம் மரணத்தின் பின்னும் நம்மை வந்தடையக்கூடிய நன்மையான விடயங்களைச் செய்வோமாகவிருந்தால் மறுமை வாழ்வு பற்றிய கவலையிலிருந்து ஓரளவுக்கேனும் விடுபட்டுக்கொள்ளலாம்.

வல்ல இறைவன் அவன் விரும்பும் நல்ல காரியங்களை அதிகம் அதிகம் செய்யக்கூடியவர்களாக நம் அனைவரையும் ஆக்குவானாக ... ஆமீன் !

2017.03.03

நூல் வெளியீடும் பாடசாலை நண்பர்கள் ஞாபகப் பகிர்வுகளும்

2016-11-24T12:11:00.000+05:30

நண்பன் கவிஞர் அகமது ஃபைசல் இன் #வலது_கால்_புன்னகை கவிதை நூல் இன்ஷா அல்லாஹ் நாளை பிற்பகல் 3.30 மணியளவில் இடம்பெறவிருக்கின்றது

நண்பருக்கு வாழ்த்துக்கள்

எல்லோரும் கட்டாயம் வருகைதருமாறு நண்பன் சார்பாக அழைக்கின்றேன்

வெளிநாடுகளில் வியர்வை சிந்தும் நட்புகளுக்காக…

2016-11-18T00:30:00.000+05:30

சில நிமிடங்கள் தாமதியுங்கள் – சிந்தியுங்கள்

தனக்காகவும் தங்களது குடும்பங்களுக்காகவும் அயராது வெளிநாடுகளில் பாடுபடும் நண்பர்களே நீங்கள் அங்கு ஹலாலான முறையிலேயே பொருளீட்டுகின்றீர்கள் என்று நல்லெண்ணம் வைக்கின்றேன். நீங்கள் உங்களுடைய இரத்தத்தை வியர்வையாக்கி, மிகவும் சிரமத்துக்கு மத்தியில் பல இன்னல்களைச்சகித்து பல வருடகாலமாக பொருளீட்டுகின்றீர்கள், நல்லது உங்களுடைய அப்படியான ஹலாலான பொருளீட்டலில் அல்லஹூத்தாலா பறகத்தையும் அபிவிருத்தியையும் ஏற்படுத்த வேண்டும்.

நீங்கள் அப்படி சிரமப்பட்டு பொருளீட்டி சிறிதளவு பணத்தை சேமித்து இனிமேல் வெளிநாடு வந்து உழைக்கக் கூடாது இப்படியான சிரமங்கள் படக்கூடாது இனிமேல் சொந்த நாட்டில் ஏதாவது ஒரு தொழிலில் முயற்சி செய்வோம் எனும் நோக்கத்துடன் நீங்கள் சேமித்த பணதுடன் தாயகம் திரும்புகின்றீர்கள். தாயகம் திரும்பிய நீங்கள், வெளிநாடுகளில் சிரமப்பட்டு ஹலாலாக உழைத்த பணத்தை இங்கிருக்கும் புரோக்கர்களுக்கு இலஞ்சமாகக் கொடுத்து ஏதாவது ஒரு அரச தொழில் பெற எத்தனிக்கின்றீர்கள், தொழில் பெற்றும் இருக்கின்றீர்கள் இவ்விடத்தில் தான் நீங்கள் சிந்திக்க வேண்டும்.

நீங்கள் இவ்வளவு நாளும் சிரமப்பட்டு ஹலாலாக உழைத்து உங்கள் இரத்தத்தை ஹலாலாக்கிவிட்டு இலஞ்சமெனும் ஹராமிற்குள் தங்களை நுழைத்து இவ்வளவு நாளும் பட்ட கஷ்டத்திற்கும் அல்லாஹ்விடத்தில் பலனில்லாமல் செய்கின்றீர்களே ! சிந்திக்க வேண்டாமா !

நீங்கள் இலஞ்சம் கொடுத்து பெற்றுக்கொண்ட தொழில் மூலம் பெறும் ஒவ்வொரு நன்மையும் இந்த துன்யாவில் மட்டும்தான் அதைக் கொண்டு ஆஹிராவில் எந்த பலனும் கிடைக்காது என்பதை அறிஞர்கள் உலமாக்களை அனுகி தெளிவுபடுத்திக்கொள்ளுங்கள்.

இலஞ்சமாகக் கொடுத்து பெற்றுக்கொண்ட தொழிலில் இருக்கும் போதே மௌத்தாகிப் போனால் உங்களின் நிலை என்னவென்று சிறிதும் சிந்திக்கவில்லையா

இப்படியான தொழில் மூலம் பெற்றுக்கொண்ட சம்பளத்தை உங்கள் குடும்பத்துக்காக செலவு செய்து நீங்கள் மட்டுமல்லாமல் உங்களது மனைவி பிள்ளைகளினது இரத்தத்தையும் ஹராமாக்குகின்றீர்களே !

அரச தொழில்தான் வேண்டுமென்றால் போட்டிப்பரீட்சைகள், நேர்முகப்பரீட்சைகளுக்குத் தோற்றி அரச விதிமுறைகளுக்கு உடன்பட்டு தொழிலொன்றைப் பெற்றுக்கொள்ளுங்கள். ஒன்றை மட்டும் தெரிந்துகொள்ளுங்கள் அரச தொழில் பெற்ற எத்தனையோ பட்டதாரிகள் அரச தொழிலை உதறிவிட்டு வெளிநாடுகளிலும் சொந்த நாட்டில் சுய தொழில்களிலும் ஈடுபட்டிருகின்றார்கள்.

ஆகவே சிந்தியுங்கள் ஹலாலான பொருளாதாரத்தை ஈட்டுங்கள் எங்கள் இரத்தம் சுத்தமாக இருந்தால் இன்ஷா அல்லாஹ் எங்களுடைய துஆக்களுக்கு உடன் பதில் கிடைக்கும்.

என் வீட்டில் சுனாமி

2016-11-08T12:31:00.000+05:30

நான்
நம் பக்கத்து வீட்டாரிடமும்
இரண்டு வீட்டிற்கப்பாலுள்ள
மாமாவிடமும்
தெரு சந்தியில் இருக்கும் நம்
கடைசி தங்கச்சியிடமும்
அடுத்த தெருவில் இருந்த
மதினியிடமும்
உங்க பாஸ்போர்ட் தேடி உங்க
மாமியார் வீடு செல்ல,
பாஸ்போர்ட் எதற்கு
மாமி வினவ
மாமியிடமும் தகவல் சொன்ன போதும்

ஏன் தொலைபேசியில்
தகவல் கேட்ட இளைய மச்சானும்
சகோதரியும்…

கொழும்பிலிருந்து வந்துகொண்டிருக்கும்
உங்களைப் பற்றி நீங்கள் ஆசையாய்
தங்கும் மர்கசில் மசூரா செய்யும் போது
கூடியிருந்தவர்கள்…

இவர்களெல்லாம் விம்மியும்
கதறியும் கண்ணீர் விட்ட போதும்
என் கண்களில் வராத கண்ணீர்
நேற்று உங்கள் கப்ரு அருகினில்
சென்ற போது வந்ததே
அகவையொன்றின் பின் வடிந்த
என் கண்ணீரின் அர்த்தம் எதுவோ ?
நானறியேன் காக்கா

ஞாயிறொன்றில்தான் சுனாமி
துவட்டியது நம்மூரை
சென்றவருடம் இதே திகதி
ஞாயிறாய் இருக்க நம்
வீட்டில் சுனாமி

அன்று நானழவில்லை
வானம் அழுதது
நான் ஓட்டிய மோட்டார்
சைக்கிள் தடுமாறியது,
கைகள் நடுங்கியது

ஊரிலே மௌத்து நிகழ்வதுண்டு
ஊரே மௌத்தாகிப் போனது அன்று

உங்களை வேனிலிருந்து
மெதுவாகத் தூக்கியெடுத்தார்கள்
வேனுக்குள் உம்மா அழுதாங்க
வெளியில ஊர் அழுதது
நீங்கள் புன்னகையுடன்
ஆழ்ந்து உறங்கினீர்கள் உங்கள்
வதனம் முத்தத்தால் நனைந்தது
ஊரிற்கு நீங்கள் செய்தது நல்லவையல்லவோ

கட்டாரிலிந்து கடைசி நானா
வருமட்டும் காத்திருந்தோம்
உங்களைக் கப்ருக் குழியில் வைக்க
நானாவும் வந்தார் நா தழுதழுக்க
அழுதார்,

குர் ஆனை சுமந்தவர்கள் தான்
உங்களைச் சுமந்தார்கள்
உங்களுக்காக தொழுதார்கள்
துஆ கேட்டார்கள்
நீங்கள் எல்லாவற்றையும்
அமைதியாக பார்த்துக்கொண்டிருந்தீர்கள்

நீங்கள் பயணித்த பாதை
அல்லாஹ்வுடையது
உங்கள் மௌத்தும் அவன் பாதையிலேயே
இன்ஷா அல்லாஹ் நீங்கள்
சுவர்க்கத்திலிருப்பீர்கள்
ஆதலால் நானழவில்லை
என் கவலையெல்லாம் நம்
வாப்பாவைப் பற்றித்தான்
அவர் இன்றும் அழுதுகொண்டிருக்கிறார்

உங்களுக்கொன்று தெரியுமா காக்கா
நேற்றும் நம் பள்ளித் தலைவர்
அழுதார், பக்கத்தில் நின்றவரும்
அழுதார்

காதல் துளி

2016-11-07T03:30:00.000+05:30

வீதியில் விழத் தவறிய மழைத்துளி
என்னோடு பயணிக்கின்றது
பேரூந்தில்,
சுற்றிலும் குளிர்
எனக்கும் மழைத்துளிக்குமான
நெருக்கம் குளிரை
இதமாக்கியது
உறவுகொண்டுவிட்டேன்
மழைத்துளியுடன்.
இப்போது எங்களுக்கு குழந்தைகள்
இரண்டு,
மண்வெட்டியுடையோர்
மழை தேடி
என் குழந்தைகளை அழைக்கின்றனர்
வெளியே வந்த நான்
குழந்தைகள் வேட்டைக்கு என்கிறேன்
காட்டில் உரத்த மழை...

சமூகத்தின் மூத்த பிரஜை

2016-10-21T12:51:00.000+05:30

சமூகத்தின் மூத்த பிரஜை எனும் அந்தஸ்த்தைக் கொடுத்து எனது தந்தையை கௌரவித்திருக்கின்றார்கள் அரச சமூக சேவைகள் திணைக்களத்தினர்

எனது தந்தையுடன் சேர்ந்து இந்த கௌரவம் இன்னும் சிலருக்கும் வழங்கப்பட்டது

அனைவரையும் வாழ்த்துகின்றேன்

உதிரியாய் ஒரு தூக்கம்

2016-10-19T12:54:00.000+05:30

நேற்றிரவு உறங்க
நினைத்து
மரணித்துவிட்டேன்
நான் மரணித்ததையறியாத
உறவுகள் வழமைபோல்
காலைத் தேனீருக்காய் எனை
எழுப்புகின்றனர்
மரணித்ததை நிரூபிக்கும்
நிர்ப்பந்தத்தில் நான் ...
யாரோ சிலர் நல்லவர்களுக்கு
மரணமில்லையென்று
பேசிக்கொள்வது
என் காதுகளில் ஒலிக்கிறது...

25 டொலர் அதி வேக கணனி

2016-09-23T13:56:00.002+05:30

எல்லாமுமே கணனி மயப்படுத்தப்பட்டிருக்கும் இந்த நவீன உலகில் நாளுக்கு நாள் தொழில்நுட்ப வளர்ச்சி வேகமாகிக்கொண்டேயிருக்கின்றது. வளர்ந்துகொண்டேயிருக்கும் தொழில்நுட்பத்திற்கு தகுந்தாற் போல் நம்மை நாமும் வளர்த்துக்கொள்வதென்பது தவிர்க்க முடியதவொன்றாக இருக்கின்றது. இப்படி தொழில்நுட்பத்திற்கு இணைந்ததாக நம்மை நாம் மாற்றிக்கொள்ளுதல் சாத்தியமாவது அதிக வருமானமீட்டும் வர்க்கத்தினரிடம் மட்டுமேயாகும். பண முதலைகளாகக் காணப்படும் இவர்கள் உலகில் அறிமுகப்படுத்தப்படும் பெரும்பாலான தொழில்நுட்ப வளர்ச்சிகொண்ட சாதனங்களை அறிமுகமானவுடனேயே பயன்படுத்தி அதன் நன்மைகளை தாம் மட்டும் நுகர்ந்துகொண்ட பின் சமூக தளங்களிலும் தங்களுடைய இணைய பக்கங்களிலும் அதன் நன்மைகள், இலகுதன்மைகள் பற்றி பதிவிடுகின்றனர். குறைந்த வருமானமீட்டும் வர்க்கத்தினரோ இவர்களின் பின்னூட்டங்களைப் பார்த்து பெருமூச்சு விடுவதுடன் நிறுத்திக் கொள்வர்.

கணனி பாவிக்கும் எமக்குப் பல வகையான மென்பொருட்களையும் நிறுவவேண்டும் எனும் ஆசையில் கிடைத்த மென்பொருட்களையெல்லாம் நிறுவுவோம், அப்படி நிறுவிய மென்பொருட்களில் சில அதிர்ஷ்டவசமாக எந்தவித பிரச்சனைகளுமின்றி தொழிற்படும், ஆனால் பெரும்பாலான மென்பொருட்கள் நிறுவப்பட்ட பின் கணனியின் வேகம் குறைதல், எந்த வித இயக்கமுமின்றி கணனியிருத்தல், அடிக்கடி கணனி ரீ ஸ்ட்ராட் ஆகுதல் என தொல்லை கொடுக்க ஆரம்பிக்கும். இத் தொல்லைகளுக்குப் பிரதான காரணம் நாம் நிறுவிய மென் பொருட்கள் நமது கணனிக்கு பொருத்தமானதாக இல்லை என்பதனாலேயேயாகும். இந்த பென்பொருட்களைப் அவசியம் பாவிக்க வேண்டுமாகவிருந்தால் எம்மிடமிருக்கும் கணனியில் ரெம், ஹார்ட் டிஸ்க் போன்றவற்றில் சில மாற்றங்களைச் செய்ய வேண்டும் அல்லது புதிதாக ஒரு கணனி வாங்க வேண்டும். அதிக வருமானம் கொண்டவர்களுக்கு இம் மாற்றங்களைச் செய்வது இலகு, சாதாரண வருமானமீட்டுபவர்களுக்கு இன்றைய விலைவாசியைப் பொருத்தவரைக்கும் இது கொஞ்சம் சிரமமானதுதான்.

அதிக செலவில்லாமலும் கணனியின் மெமோரியில் மாற்றங்கள் செய்யாமலும் நமக்குத் தேவையான மென்பொருட்களை நிறுவி கணனியினை பாவிப்பதற்கு அறிமுகப்படுத்தப்பட்டிருக்கும் சாதனம் தான் இந்த 25 டொலர் கணனி. இந்த சாதனத்தின் அறிமுகத்தினால் அதிகமாக பயன் பெறப் போவது நடுத்தர வருமான வர்க்கத்தினரே.

25 டொலர் கணனி : உண்மையில் இது ஒரு கணனி அல்ல, இது ஒரு பென் ட்ரைவ் போன்ற ஒரு சாதனம் இந்த சாதனத்தை கணனியில் சொருகிய பின் எமது கணனியினை ஒரு முறை ரீ ஸ்டார்ட் செய்தால் முன்னர் இருந்த வேகத்தை விட பல மடங்கு வேகமாக நமது கணனி இயங்க ஆரம்பிக்கும் என்று சொல்கின்றார்கள் இதனை சந்தைக்கும் அறிமுகப்படுத்தியிருக்கும் Xtra PC நிருவகத்தினர். நான்கு வகையான விலைகளில் கிடைக்கக் கூடியதாக தயாரித்திருக்கும் இந்த சாதனத்தின் அதி கூடிய விலை 80 டொலர்களாகும். ஒவ்வொரு விலைக்கும் தகுந்தாற் போல் அதன் வேகம் மற்றும் ஸ்டோரேஜ் அளவு என்பன மாறுபட்டுக் காணப்படுகின்றது. மேலும் இந்த சாதனம் பொருத்தமான முறையில் இயங்கவில்லையென்றால் நம்முடைய பணத்தை மீளத் தருவதாகவும் குறிப்பிடுகின்றனர்.

இணையப் பாவனை, வீடியோ பார்த்தல், ஈமெயில் வசதிகள், சமூக தள வசதிகள், ஒன்லைன் வியாபாரம், கேம்ஸ் என சாதாரணமாக நாம் செய்யும் வேலைகளை இந்த சாதனத்தைக் கொண்டு வேகமாகவும் சிரமமின்றியும் செய்துகொள்ள முடியும். மேலும் இதனை ஹார்ட் டிஸ்க் இல்லாத மற்றும் ஹார்ட் டிஸ்க் பழுதடைந்த கணனிகளிலும் பொருத்தி இதனைப் பயன்படுத்த முடியும் என்பது கூடுதல் நன்மை. எதுவாயினும் மாதம் பதினைய்யாயிரம் சம்பளம் எடுக்கும் சாதாரண ஒருத்தர் திருப்தியான முறையில் கனனி பாவிக்கும் வகையில் இந்த தொழில்நுட்பம் வளர்ந்தால் போதும்.

மேலதிக தகவல்களை இந்த இணையதள முகவரியில் பெற்றுக்கொள்ளலாம் https://www.xtra-pc.com/

பதுமராகம் ஒரு பார்வை

2016-08-08T10:58:00.000+05:30

பொதுவாக நாவல்களில் அதிகளவு நாட்டமில்லை, தமிழகம் ஓரளவுக்குப் பழக்கப்பட்டிருந்தாலும் எனது தேசத்து நாவல்களில் பதுமராகம் புதிதாக சுவைக்கும் நாவல், நாவல் கையில் கிடைத்த தினம் அட்டைப்படம், அதற்கடுத்ததாய் உள்ள நாவல் பற்றிய தகவல்கள் அடங்கிய இரண்டு பக்கங்களையுமே சுவைக்க முடிந்தது, அட்டைப்படத்தைப் பார்த்தவுடனேயே உள்ளே இருக்கும் சரக்கு எப்படியாய் இருக்கும் என்பதைப் புரிந்துக்கொள்ள முடிந்தது. பின்னர் இரண்டு நாட்களின் பிற்பாடு நாவலை சுவைக்க ஆரம்பித்தேன், பெரிதாக நாட்கள் தேவைப்படவில்லை, சுவைக்க ஆரம்பித்த தினத்திலேயே ருசி கண்டேன், அத்தினமே சுவைத்துத் தீர்த்தேன்.

நான் அறிந்த, அனுபவித்த வகையில் இலங்கையில் பெண்கள் இலக்கியத்தினுள் புரள்வது அரிது, அதிலும் இஸ்லாமிய பெண்கள் திருமணமாகும் வரையில் அல்லது ஏதாவது ஒரு பொறுப்பினை சுமக்கும் வரையில் தான் இலக்கியத்தோடு பயணித்திருக்கின்றார்கள். நிறைய பெண்கள் பத்திரிகைகளோடு மட்டும் தங்கள் இலக்கிய உறவினை மட்டுப்படுத்தியிருக்கிறார்கள், அவர்கள் மத்தியில் பதுமராகம் அதுவும் நாவல் வடிவில் வெளிவந்திருப்பது மிகவும் பாராட்டப்பட வேண்டியதொன்று, நூலாசிரியர் வாழும் சூழலே இப்படியான ஒரு நாவலை பிரசவிக்க காரணமாக இருந்திருக்க வேண்டும். இலங்கையில் நூலாக்கத்திற்கு பெருமளவில் காசைக் கரைக்கவேண்டி வேதனைமிகு நிலையும் உண்டென்பது கூடுதல் தகவல்.

நாவலின் உயிர் மிகவும் அவசியமானதொன்று, பொதுவாக கிழக்கு மண்ணைப் போர்த்தியிருக்கும், பெண்களைப் பெற்றவர்களைப் பீடித்திருக்கும் இதுவரை காலமும் யாராலும் குணப்படுத்த முடியாத நோய்களான சீதனம், பெரிய வீடுகட்டி மாப்பிள்ளை எடுத்தல் போன்றவைகளை அலசிச் செல்கின்றது, கிழக்கு மண் இந் நோயின் விளைவுகள் பற்றி அடிக்கடி சிறுகதைள், குறும்படங்கள், கவிதைகள், பட்டிமன்றங்களில் விழிப்புணர்வு செய்துகொண்டேயிருக்கின்றது, அப்படியான ஒரு விழிப்புணர்வுகளில் ஒன்றுதான் பதுமராகமும்.

எனக்குப் பழக்கப்பட்ட மொழிநடையில் நகர்வதால் புரிந்துகொள்ள சிரமப்படவேண்டிய அவசியமிருக்கவில்லை, காதல் என்றாலே கஸ்டம்தான் , கிழக்கு மண்னின் காதல் ரொம்பவே கஸ்டம், அதிலும் கிழக்கு மண்ணில் அக்கா தங்கையுடன் பிறந்திருந்தால் அவனுக்கு காதல் எட்டாக்கனி. அப்படியாக அக்கா தங்கையுடன் ஒரு சாதாரண குடும்பத்தில் பிறந்த ஹரீஸ் அவனுடைய காதல் என நகர்கிறது நாவல் என்று சாதாரணமாகச் சொல்லிவிட்டு இப் பார்வையை நிறுத்திக்கொள்ள எனக்கு நாட்டமில்லை, இன்னும் கொஞ்சம் ஆழமாக அலச ஆசைகொள்கிறேன்.

நாவலின் உயிர் ஹரீஸ்- நூர்ஜஹான் காதலாக இருந்தாலும் அந்தக் காதலுக்குள்ளேயே கதையை நகர்த்திச் செல்லாமல் தாய்ப் பாசத்துக்கென தத்தளிக்கும் ஹஸ்னா எனும் குழந்தையில் ஆரம்பித்து, தனது அண்ணியின் சூழ்ச்சியினால் தன் ஆசைகளைத் தொலைத்து சாச்சாவிற்கு இரண்டாம் தாரமாகியிருக்கும் சாமிலாவின் சிரமங்கள், முதல் மனைவியை இழந்து தன் குழந்தை ஹஸ்னாவிற்காகவே வாழும் சாச்சா இரண்டாம் தாரத்தினால் அனுபவிக்கும் இன்னல்கள், தன் பிள்ளையை நல்ல இடத்தில் திருமணம் செய்து கொடுக்க சிரமப்படும் உதுமான், தன் குடும்ப நலன் கருதி கட்டார் சென்றிருக்கும் ஹரீஸ், ஹரீஸின் உயிர்த் தோழன் முஜீப், ஹரீஸ் - நூர்ஜஹான் காதலுக்காக மூஜீப் எதிர்கொள்ளும் சங்கடங்கள், ஹரீஸிற்கு சாதகமாய் ஆறுதலாய் அமைந்த கட்டார் நண்பர்கள், ஹரீஸையே நினைத்து காலத்தை போக்கும் நூர்ஜஹான், இடியப்ப குமரி என பல பரப்புகளுக்குள் சென்று பல விடயங்களை அலசுகின்றது வெருமனே கிட்டத்தட்ட 200 பக்கங்களைக் கொண்ட பதுமராகம்.

சீனத்தும்மாவின் மூத்த மருமகன் றாசீக்கினால் ஹரீஸ் குடும்பத்துக்குக் கொடுக்கப்படும் தொல்லைகள் கிழக்கைப் பொருத்தவரைக்கும் நிஜம். இப்படியான மருமகன்களினால் இன்றும் பல பெண்களைப் பெற்ற பொற்றோர்கள் தன் பிள்ளைகளின் வீடுகளுக்குச் செல்லாமல் தங்களுக்கென தனித்துவமான வசிப்பிடங்களை நாடுவதோடு தான் பெற்ற பிள்ளைகளோடு தொடர்பில்லாமலும் இருக்கின்றனர் இவ்விடத்தில் நாவலுக்கு உரத்துப் பேச சந்தர்ப்பம் கொடுத்திருக்கலாம், அதே போல் கட்டாரில் சீதனம் பற்றிய பேச்சுக்களை இன்னும் கொஞ்சம் அழுத்தமாக்கியிருக்கலாம். நாவலால் சமூகத்துக்குச் சொல்லப்படும் செய்தியாக கட்டார் உரையாடல்களை நான் கருதுகின்றேன், ஆதலால் இன்னும் அழுத்தம் அவசியப்படுகின்றது. ஹரீஸ்- நூர்ஜஹான் காதல் ரொம்ப அழகு, ஒரு சில இடங்களில் அடுத்து இதுதான் நடக்கப் போகின்றது என்பதை இலகுவாக அறியமுடிந்தாலும் ஆசிரியரின் கதை நகர்தல் இன்னும் விருவிருப்பைத் தூண்டுகிறது.

இன்னும் கொஞ்சம் கறிவேப்பிலை, மிளகு, அஜினமோட், ரம்பை, குருமா சேர்த்திருந்தால் நல்லதொரு சினிமா ஏற்படுத்தும் பாதிப்பை என்னுள் உணர்ந்திருப்பேன்.

இது அவசர உலகு, வாசிப்பு குறைந்துவருகின்றது, திருக்குறள் போல சொற்ப வரிகளில் பல ஆழமான அர்த்தமுள்ள விடயங்ளைச் சொல்லக் கூடிய அளவுக்கு நவீன திருவள்ளுவர்கள் தோன்றியுள்ள இந்தக் காலப்பகுதியில் அதற்கு இசைவான வாசர்களும் மலிந்து காணப்படுகின்றனர், இப்படியான சோர்ட் அண்ட் சுவீட் காலப்பகுதியில் நாவல்கள் பெரும் சாவால்களே, சுட்டிக்காட்டப்பட வேண்டிய ஒரு சில தவறுகள் இருந்தும் அவைகளை இங்கு நான் வெளியிட விரும்பவில்லை, தனிப்பட்ட ரீதியில் நூலாசிரியரிடம் சொல்வது ஆரோக்கியமானது என்றே கருதுகின்றேன். பிழைகளைச் சுட்டிக்காட்டி விமர்சனம் செய்யுமளவுக்கு நான் இன்னும் வளரவில்லை என்பது கூடுதல் தகவல் :)

நூல் : பதுமராகம் - நாவல்
நூலாசிரியர் : இறக்காமம் பர்சானா றியாஸ்
தொடர்புகளுக்கு : farsana.ba@gmail.com
விலை - 700/-

அதாவுல்லா காக்கா நீங்க எங்களுக்கு வேணும் காக்கா

2016-08-02T10:26:00.001+05:30

உங்கள் அதிகாரம் சதிகாரர்களால்
சமாதியாகிட்டதே என்றெண்ணி
அகங்காரம் கொண்டாடும் அடிமட்ட‌
அதிகாரிகளுக்கு
காலம் பதில் சொல்லும் காக்கா,
அரங்கினையும், சுற்றியுள்ளைவையையும்
அழங்கரித்த‌ உங்கள்
பெனர்கள், இன்றும் அழுதுகொண்டிருக்கின்றன,
ராஜகுமாரன் தரிசனம் பார்த்து....

பிரதான தெரு முழுக்க கட்சியினைப்
பிரதிபலிக்கும் கொடிகளுக்கு
நீங்கள் கொடுத்த கதாநாயக பாத்திரத்தை இன்று
கருங்கொடியில் யாரால் கொடுக்க முடியும் ?
அக்கரையில் சக்கரையாய்
சேர் ஊருக்கு வாரார் என்று சொல்லி
அடிக்கடி
உங்களுக்குக் கிடைக்கும் வரவேற்புகளும்
பேன்ட் இசைப்புக்களும்.... இனி
எம் காதுகளில் என்றுதான் ஒலிக்குமோ ?

நான் அக்கரையான் இல்லை
ஆனால் உங்களில் அக்கறை கொண்டவன்
உங்கள் அக்கறையால் எங்கள் வாழ்வு
சக்கரையாய் இனித்ததே...
நீங்கள் செய்தவைகளில் சொற்பமேனும்
சாணக்கியங்கள் செய்த மறுப்பேதேனோ ?
இனிமேலும் செய்யுமா ? தெரியாதே ...
வேலைகள் உங்களைக் கணதியாக்கிய போதும்
வேலாவேளைக்கு எட்டிப் பார்ப்பீரே எங்கள் ஊரையும்
இன்று நீங்களின்றி வெறுமையாய் கருங்கொடி ?

தோலுக்கு மேல் வளர்ந்தவர்களையெல்லாம்
தோழனாய் கொண்டீரே, தொழில் கொடுத்தீரே
இன்று
மொத்தக் குடும்பமும் உங்கள் தோழனாய்...
தொழில் பெற்றவர்க்கெல்லாம் தொல்லை
கொடுக்க வந்தனரே... தோல்வியில் துவண்டனரே

வருமானம் பெருக்க தென்னையிடுங்களென்று
தெனாவட்டாய் சொன்னீரே இன்று
தென்னையும் இல்லாமல் தொண்டையில்
தண்ணீரும் இல்லாமல் நாங்கள்... :(

நீங்கள் கவனத்தில் கொள்ளத் தவறிய ?
ஒன்று கருங்கொடி வெறுமையில் கிடக்கும் போது
கவனிக்கப்பட்டு வெள்ளை பூசப்படுகிறதே...
தட்டிக்கேட்க நாதியில்லையென்றெண்ணி
தடுமாற்றமின்றித் திரிகின்றனரோ சதிகாரர்கள்.
சதிகாரர்களுக்கெல்லாம் சதிகாரன் ஒருவன்
இருக்கின்றான் என்பதை மதி பேதலித்தவர்கள்
மறந்ததேனோ ?

எங்களுக்கு நீங்கள் வேணும் காக்கா

அன்புடன் அக்கறைத் தம்பி

யாசித்தல்...

2016-07-27T11:16:00.001+05:30

இது எனதெழுத்து
புரிந்துகொள்ள பலருக்கு
வருடங்கள் பலவாகலாம்
சிலருக்கு தாசாப்தங்களுமாகலாம்
இன்னும் சிலரோ முன்ஜென்மத்தில்
பழக்கப்பட்டிருப்பர்

எழுத்துக்கும் எனதான்மாவுக்கும்
தொப்புள் தொடர்பிருக்கின்றது
தடித்த எழுத்துக்களில்
சொல்லின், ஆன்மாவை உயிர்ப்பிக்க‌
எழுத்துக்களை நான் சுவைக்க வேண்டும்
எழுத்துகளை மட்டுமே...

சமயங்களில் எழுத்துகள்
எட்டாக்கனியாகின்றன எவ்வளவும்
முயற்சித்தும், ஹ்ஹ்ஹ்ம்ம்ம்ம்
இதோ இப்போது நான்
எழுதுவதைப் போன்று.... அப் பொழுதுகளில்
எனதான்மாவே என்னை பழிக்கும்,
கேவலமாய், நக்கலாய் எனை விளிக்கும்.

பின்னிரவு எழுத்துக்கள்
எப்போதுமே எனக்கு சாதகமானவை
அவ்வெழுத்துக்கள் வீரியம்,
காதல் நிறைந்தவை , வேசமிட தயங்குபவை

அவசரமாக வெகு அவசரமாக‌
எழுத்துக்களைச் சுவைக்க வேண்டிய நிர்ப்பந்தம்
இச் சமயம் சுயநலமில்லை, சுக நலமில்லாத‌
ஒரு ஆன்மாவுக்காக... என் சுவைத்தலின்
விரைவு அப் பிரிதான்மாவின் இருத்தல்.
இணைந்து ஓர் பின்னிரவும் அவசியப்படுகின்றது
என் பகல் பொழுதுகள் பின்னிரவுகளை
கொள்ளையிட்டுச் செல்கின்றன...!

புரியாமல் புரிகிறது....!

2016-06-22T13:20:00.000+05:30

விழியுனுள் விழியாக உனைவைத்து
உன் விழிநீர் சிந்தாமல் பார்த்திட
காத்திருக்கிறேன் இன்னுமொரு
முடிவில்லா வாழ்க்கையை எதிர்பார்த்து

முடிவில்லா வாழ்க்கைதேடி
மூலதனமாய் என் வாழ்வையிட்டு
முழு வாழ்வையும் இழந்துவிட்டேன்
கிடைக்கவில்லை முடிவில்லா வாழ்க்கை

இனிமேலும் இழப்பதற்கு
எதுவுமற்றவனாய் திரும்புகிறேன்
கதவோரத்தில் காத்திருக்கிறாய்
உன் வாழ்வுதந்து எனை மீட்க

எனக்காக உயிரையே தருவதாக
கூறிச் செல்கிறாய்
உன்னுயிர் என்னிடமிருக்க
புரிந்துகொண்டேன்
நீ புலம்புவது பொய்யென

நானேதும் உனக்காக செய்ததில்லை
நீயோ எனக்காக எதனையும் செய்கிறாய்
சொல்லிவிடு நீ யார்...? காதலியா...?
இல்லை என் அன்னையா...?

என் அச்சங்கள்...!

2016-05-04T15:35:00.001+05:30

ஒழிந்திருக்கும் என் அச்சங்களில் கலந்திருக்கிறது பெறுமதி மறந்த உனைப்பற்றிய நல விசாரணைகள், ஒரு நாள் உச்சபட்ச என் தைரியத்தை ஆயுதமாய் பாவிக்க நினைத்து, என் மீதான உன் புரிதல், அக்கறை, நேசிப்பைப் பற்றி உரையாடுகின்றேன், நீயோ அலட்சியப்படுத்தியவளாய் நடைபோடுகின்றாய், இன்னும் சொல்லப் போனால் நான் உன்னிடம் பேசும் போது உன் முகத்தைக் கூட தெளிவாகப் பார்க்கவில்லை, ஏதோ பின் இரவுக் கனவுகளில் தோன்றும் உருவமாய் அன்று நீ தோன்றியாய்
திடீரென ஏதோ என் மனதில் தோன்ற முன்னைய தினம் உன்னுடன் பேசியதை மீட்டுகிறேன், நான் பேசிய எதுவொன்றுக்கும் நீ பெறுமதியிட்டதாய் தோன்றவில்லை, ஆனால் நீ மிகவும் கெட்டிக்காரி, மரியாதை தெரிந்தவள், பிறரிடம் பிழையாக பாவணை செய்பவள் அல்ல என உன் தோழியிடம் வம்பு செய்த போது தெரிந்துகொண்டேன், உன்னிடம் பேசும் போது என் ஆசைத் தோழன் முத்தலிபும் என்னுடன் இருந்தான், நிச்சயமாக நாம் பேசிக் கொண்டது கனவுதான், ஏனெனில் என் ஆசைத் தோழன் ஆத்மா சாந்தியடைந்து அகவையொன்று அழிந்துவிட்டது...

கனவிலும் உன் முகம் காண ஏனிந்த அச்சமெனக்கு...

என் அச்சங்களை மறைப்பதற்கு முயற்சிக்கிறேன், சிரமப்படுகிறேன்.... என்னைப் போன்றவர்கள் யாராவது இருக்கிறார்களா என அகிலம் முழுவதும் அலசுகிறேன் ஆலோசனை கேட்க, எனக்கு யாராவது தெம்பான வார்த்தைகளைப் பொழிந்து உற்சாகம் தரமாட்டார்களா என ஏங்குகின்றேன், வேறு ஏதாவது வழிமுறைகள் இருக்கிறதா, சிந்திக்கிறேன், எனக்கு என் அச்சம் தொலைக்க வேண்டும், உன் முகத்தை ஒரு கனமாவது நான் நேருக்கு நேர் பார்க்க வேண்டும், மூன்றாவது என்ன, நான்காவது, ஐந்தாவது உலக யுத்தங்களை நடத்தியாவது உனை நான் காண வேண்டும், உனைப் பிடித்திருக்கிறது என்ற வார்த்தையை உதிர்க்க வேண்டும்,

எனக்கு நம்பிக்கையிருக்கிறது என்றாவது ஓர் நாள் என் அச்சம் தொலைந்துவிடும், அன்று என்னுடன் நட்பாகுவர் சிலர், அவர்கள் தான் என் நம்பிக்கைக்குரிய நட்புகளாகவும் பின் நாட்களில் மின்னுவார்கள், ஏனெனில் இன்று எனைப் பற்றி, என் குறைகள், என் பலவீனங்களை அறிந்து எனைக் கேலி, கிண்டல், செய்பவர்களும் வார்த்தைகளால் எனை அதிகம் காயப்படுத்தியவர்களும் அவர்களே.... எனைப்பார்த்து அவர்கள் நகைக்கும் ஒவ்வொரு சந்தர்ப்பத்திலும் நினைத்துக் கொள்வேன் முத்தலிப் இல்லாத குறையை நீங்கள் தான் நிறப்பிவைப்பீர்கள் என, முத்தலிப் என் மூச்சாக இருந்தான், ஆரம்பத்தில் முத்தலிபும் எனை கிண்டல் செய்தவன், பிழையாக வழி நடத்தியவன்தான், பின் நாட்களில் எப்படியவன் என்னுள் நுழைந்தான், அவனுக்கு நான் எப்படி உயிர்த் தோழனானேன் என்பதையெல்லாம் நினைத்தால் நீண்டதொரு வறட்சியின் பின் பொழிந்த மழைக்கு வானத்தை எட்டிப்பார்க்கும் பச்சைப் புற்களாகிவிடுகின்றது மனசு ம்ம்ம்ம்ம்ம்ம்ம்ம்ம்ம் நிறுத்திக் கொள்கிறேன் முத்தலிப் புராணத்தை இன்னும் அவனைப் பற்றி சொல்லிச் சென்றால் நாளைக்கு அழுவதற்கு கண்களில் நீர் இருக்குமோ தெரியவில்லை....

என் அச்சத்தை மறைப்பதற்கு பெரிதும் முயற்சிக்கிறேன், நாய்கள் எப்பவுமே எனக்கு அச்சத்தையூட்டுபவைகள், பகல் வேளைகளிலும் நாய்கள் நடமாடும் பகுதிகளுக்குச் செல்வதில்லை, அச்சத்தைப் போக்க எடுத்த விசித்திரமான முயற்சிகளிலொன்று இராப் பொழுதுகளில் தன்னந்தனியாக நாய்கள் நடமாடும் பகுதிகளில் உலா வருவது, விசித்திர முயற்சியின் உச்சமெதுவென்றால் இரவில் உலா வரும்போது கைகளில் கற்கள், தடிகள் போன்ற பாதுகாப்பு சாதனங்கள் எதுவும் வைத்துக்கொள்வதில்லை , ஒரு முறை உலா செல்லும் போது வேற்றுக் கிரக ஜீவன் ஒன்றுடன் சண்டையிடவேண்டியேற்பட்டது அது எனக்குள் புது உற்சாகத்தையும் ஏற்படுத்தியது வேற்றுக்கிரக ஜீவன் என் பால்யகால வில்லன் சலீமின் தோற்றத்தில் இருந்தது தான் என் உற்சாகத்துக்குக் காரணம். பால்யத்தில் பரிசாகக் கிடைத்த ஏதோவொன்றைப் பங்கிட்டுக் கொள்வதில் தளிர்விட்ட பகையது, இன்றும் தொடர்கிறது, சலீமின் பலம், பலயீனம் நான் அறிந்ததே அவனை முகம்கவிழச் செய்வது அவ்வளவு சிரமமல்ல, ஆனால் அவன் என்னை ஜென்ம விரோதியாகக் கருதி எனை எதிர்ப்பதற்கென்றே ஒரு கூட்டத்தை தன்னுடன் வைத்திருக்கின்றான் அவர்களை நினைத்தால் தான் பேதியாகின்றது......

என்னதான் ஆபத்து நிறைந்த செயல்களில் ஈடுபட்டு என்னை பன்படுத்தினாலும் அவள் முன் அவ் ஆபத்துக்களெல்லாம் சிதரிவிடுகின்றன, அவள் முகத்தைப் பார்ப்பதற்கே திரானியற்றுப் போகின்றேன், எனக்குள் வளர்த்துக் கொண்ட தன்னம்பிக்கைகள் செயலிழந்து தைரியம் கொண்டவன் போன்று பாசாங்கு செய்கின்றேன், என் முழு கவனத்தையும் ஓர் நிலைப்படுத்துகின்றேன், வழமையாக அவள் வரும் வழியில் காத்திருந்து எப்படியாவது அவளை எதிர்கொள்ள வேண்டுமென்று தீர்மானமெடுத்துவிட்டது மனது, இனி தேகம் தாயாராவதுதான் மிகுதி, வீட்டிலிருந்து ஆடையகம், ஆடையகமிருந்து வீடு இந்த இரண்டு சந்தர்ப்பங்கள் தான் உண்டு அவள் பார்வை என் மேல் விழுவதற்கும் என் பார்வை அவள் மேல் படர்வதற்கும், அவள் பயணிக்கும் பாதையோ நிழலறியாது, பாலைவனத்தில் தெரியும் பச்சை மரமாய் தெருவோரத்தில் அமைந்திருக்கும் பெரியதொரு மாமர நிழல் மாத்திரமே பேசிக்கொள்வதற்கான சந்தர்ப்பத்தை தரக்கூடியது, மழை கண்டு பல அகவைகள் கடந்துவிட்ட எனதூரில் மழை கொடுக்கும் இன்பத்தின் சிறுபகுதியைத் தரக்கூடியது என ஒரு காலத்தில் பேசப்பட்டது இந்த மாமரம், தொடர்ச்சியான சுக்கிரனின் சூட்டினால் இலைகள் தளர்ந்து ஒரே சமயத்தில் நூறுபேருக்கு நிழல் கொடுத்த மரம் தற்போது போசாக்கின்மை காரணமாக இருபது பேருக்கு நிழல் கொடுக்கக் கூடிய நிலைக்குத் தள்ளப்பட்டிருக்கிறது, ஆனாலும் அப்பாதையை பயன்படுத்துபவர்கள் மாமர நிழலை சுவைக்க, சுவாசிக்கத் தவறுவதில்லை அவளும் தவறுவதில்லை.

நல்ல இருக்குடா, பார்க்கலாம், ஹீரோ புதுசுதான் ஆனா அட்டகாசமான நடிப்புடா மச்சான் எனக் கூறி நண்பனால் சிபாரிசு செய்யப்பட்ட ஏதோ ஒரு புதிதாய் வெளிவந்த தமிழ் சினிமாவில் இராப் பொழுதைக் கழித்ததில் என்னவளின் காலை தரிசனத்தை இழந்துவிட்டேன், வேலை முடிந்து வரும்வரையில் மாமர நிழலில்தான் நேரத்தைப் போக்க வேண்டும், நேரம் போக்குவது சிரமமல்ல, மாமரத்தையொட்டியிருக்கும் அகன்ற பாழடைந்த பொதுக்கிணற்றுக் கட்டில் குந்திக்கொண்டு எதையாவது சிந்தித்தவாரே கொண்டக் கடலை சாப்பிட்டுக்கொண்டிருந்தால் நேரம் போவதே தெரியாது, இந்த உப்புச் சப்பில்லா சிந்தனை, கொண்டக் கடலை சாப்பிடுதல், இரண்டும் என் பிரியங்களைச் சேரும், வீட்டிலிருக்க பிடிக்காவிட்டால் முத்தலிபின் வீட்டுக்குச் செல்வேன் அல்லது இந்தக் கிணற்றுக் கட்டை கொண்டக் கடலையுடன் தரிசிப்பேன் இதுதான் முத்தலிப் உயிருடன் இருக்கும் வரை வழமை, முத்தலிபின் இழப்பின் பின் கிணற்றுக் கட்டையே வாடிக்கையாக்கிவிட்டேன். இந்தக் கிணற்றடியில் வைத்துத்தான் தளிர் விட்டது அவளின் மீதான என் பார்வைகள்...

வாழ்வின் அந்திம காலத்திலிருக்கும் அந்த மாரமத்தில் வருடத்திற்கு ஒரு முறை சில காய்கள் கிடைக்கும், கல்லடி படுவதை கடவுளின் வரமாகக் கொண்டவைகள்தான் தெருவோர மரங்கள், இந்த மரமும் மனிதப் பிஞ்சுகளின் கல்லடிக்குத் தன் பிஞ்சுகளையும் இழந்துகொண்டே போகின்றது, அப்படி சில மனிதப் பிஞ்சுகளின் கல்லடியில் கிடைத்த சில மாம்பிஞ்சுகளை, அச் பிஞ்சுச் சிறார்களை மிரட்டி அவள் கொள்ளையிட்டுச் செல்லும் போதுதான் முதன் முதலில் அவளைப் பார்தேன், ஆஹா, ஓஹோ, போட்டுச் சொல்லுமளவிற்கு அழகில்லை அவள், கருப்பழகி எனைக் கவர்ந்த அழகி, கருப்பாக இருந்தாலும் கலையாக இருக்கனும்மென்பார்கள், கலையாக அவள் தெரிந்தால் எனக்கு,

என் நாடி, நரம்பு, ஹோர்மோன்கள்.... எல்லாம் துரிதமாய்ச் செயல்பட்டு அவள் பற்றிய தகவல்களைத் திரட்டின, என் வீட்டிலிருந்து ஒரு நான்கு தெரு தொலைதூரத்தில் தான் அவள் வீடு இருக்கிறது, அவள் வீடென்றால் சொந்தவீடில்லை, வாடகை வீடுதான், வெளியூரிலிருந்து இங்கு பிழைப்புக்காக வந்திருக்கிறார்கள், அவளும் அவள் ஆசை அம்மாவும் தான் வீட்டில், அனைத்துத் தகவல்களும் அவள் தோழி, ஒரு வகையில் என் தூரத்துச் சொந்தமாயிருந்து, என்னவளுக்காய் நெருங்கிய சொந்தமாக்கிக் கொண்ட மரியமிடமிருந்து பெற்றுக்கொண்டவைகள்.

நானும் முத்தலிபும் பலமுறை அவளிடம் பேச முயற்சித்திருக்கிறோம், ஏனோ தெரியவில்லை சந்தர்ப்பங்கள் எதுவும் சரியாக அமையவில்லை, சந்தர்ப்பம் என்று சொல்வதை விட என் அச்சங்கள் என்னை அனுமதிக்கவில்லை என்றே சொல்லலாம், பெண் நட்புகள், முன்னாள் காதலியின் வாசணைகளை இதுவரை நுகராததால், இது புது அனுபவமாக இருந்தது, எனக்கும் முத்தலிபுக்கு இடையேயான நெருங்கிய நேசத்தில் இடைவெளி எழ சந்தர்ப்பமிருந்தால் அதற்கு என் அச்சங்களே காரணமாய் அமையும், அந்தளவுக்கு என் அச்சங்களோடு முரண்படுவான் முத்தலிப்.

பெண்கள் கூட்டமொன்று என் திசை நோக்கி வந்துகொண்டிருந்தது, வழமையில் கொஞ்சம் பெரிதாக, இன்னும் ஒரு மணி நேரத்திற்குப் பிறகுதான் ஆடையகப் பெண்கள் கூட்டம் வெளியேரும், இன்று ஒரு மணி நேரம் முன்னாடி பெண்கள் கூட்டம் ? யாரும் வெளியூர் திருமணம், வைத்தியசாலை சென்றிருப்பார்கள் அவர்களாக இருக்குமென்றெண்ணினேன், ஆனால் கூட்டம் எனை நெருங்க அது ஆடையகத்தில் வேலை செய்யும் ஒரு சில பெண்கள் என அடையாளம் காண முடிந்தது, அக் கூட்டத்தினுள் என்னவளும், மரியமும் இருந்தனர். இது என்ன சோதனை இன்னும் ஒரு மணி நேரமிருக்கிறது இன்னும் கொஞ்சம் தயார் படுத்திக்கொள்ளலாம் என்றிருந்தேன் அதற்குள் ??? எல்லாம் அவன் செயல் என் அச்சத்திற்கு அவன் புறமிருந்து வந்திருக்கும் சவால், எப்படியோ இன்று அவளிடம் பேசிவது என்ற தீர்மானத்திலிருந்து மனசு சற்றும் பிசகாமல் இருந்தது,

கூட்டம் மாமரத்தை நெருங்கிவிட்டது, நானும் கிணற்றடியிலிருந்து சன்று நகர்ந்து மாமரத்தை அண்டிவிட்டேன், வழமைக்கு மாற்றமாக என்னவள் மரநிழலை சுவைக்க மறுத்து மரத்தையும் தாண்டிச் சென்றுகொண்டிருக்கின்றாள், என்ன இது இன்று எல்லாமுமே மாற்றமாக இருக்கிறது, சில வேளை என்னவளுக்கு சுகயீனமாக இருக்குமோ ? எனைத் தாண்டிச் செல்லும் மரியமை அழைத்து என்னவளுடன் பேச வேண்டுமென்றேன், மரியமுக்கு என்னவள் மீதான என் பிரியம் ஏற்கனவே தெரிந்ததே அதானால் பிரச்சனைகள் எதுவுக்கும் விதையிடாமல் என்னவளிடம் சென்று விடயத்தை எத்திவைக்கிறாள், மரியமுடன் பேசிக்கொண்டே நடந்தவள் நடை வேகத்தை சற்றுத் தளர்த்துவதை ஒரு இருபதடி தூரத்திற்குப் பின்னால் நின்று அவதானித்துக் கொண்டிருக்கிறேன். நடையின் வேகம் இன்னும் தளர்ந்து ஏனைய பெண்கள் தொடர்ந்து முன்னோக்கிச் செல்ல என்னவளும்,மரியமும் ஓரிடத்தில் நின்று விடுகின்றனர்,

இதுதான் சந்தர்ப்பம் என்னவள் எனக்கென சில நிமிடங்களை ஒதுக்கிவிட்டாள் என நினைத்தவனாக, முப்பதடி தூரத்தில் நிற்கும் அவளிடன் பேசுவதற்கு கால்கள் நகர்ந்துகொண்டிருக்க மனசு மூவாயிரம் மடங்கு வேகத்தில் படபடக்கின்றது, என்னுள் ஏற்பட்ட படபடப்புகள், அச்சங்கள் அனைத்தையும் ஒரு ஓரமாய் வைத்துவிட்டு என்னவளை அண்மித்து, சென்ற வேகத்திலேயே உன்னைப் பிடித்திருக்கிறது என்றேன், என்னவளிடமிருந்து எந்தவித எதிர்ப்போ, முகச்சுழிப்போ எழவில்லை, உதட்டிலிடுந்து எழுந்த சிறு புன்னகையைத் தவிர, புன்னகைத்தவாரே முன்னோக்கி நகர்கிறாள் கூடவே மரியமும் நகர்கிறாள். எதுவும் சொல்லாமல் செல்கிறாளே என என் மண்டை கணமானது, சுகயீனமில்லாததால் அவளால் ஆர்ப்பாட்டம் செய்ய முடியாமல் செல்கிறாளா ? அல்லது மரியம் அவளிடம் என்னைப் பற்றி ஏலவே சொல்லியிருப்பாளா ? பிடிக்காமல் இருந்திருந்தால் முறைத்திருப்பாளே...! சில வேளை நாளை ஏதும் திட்டம் வைத்திருப்பாளோ ? தெரியவில்லை, அவள் நகர்கிறாள், அவளது புன்னகை என் மனதிலிருந்த சுமையொன்றை குறைத்த திருப்தியில் நான் அதே இடத்தில் நின்றுகொண்டிருக்கிறேன்.

வலது தோற்பட்டையில் பலமான அடி விழ திடீரென திரும்பிப் பார்க்கிறேன் அருகில் காதர் வாய் நிறையப் பற்களுடன் இவன் இப்படித்தான் ரொம்ப நாளைக்குப் பிறகு யாரையாவது சந்திக்கக் கிடைத்தால் கைலாகு செய்வதை விட தோற்பட்டை, முதுகு போன்றவைகளில் அடித்து அதிர்ச்சி கொடுப்பதுதான் இவன் வேலை, முத்தலிபின் இழப்பின் பின் கொழும்புக்குச் சென்றவனை இன்றுதான் பார்க்கிறேன், எங்களுக்குள்ளான நல விசாரணைகள் தொடர்ந்தன.... நடையும் தொடர்ந்தது, என் மனமோ என்னவளின் பின்னாலேயே சென்றுவிட்டது. மனசு இன்னும் இலேசகவிருந்தது தெருவில் செல்லும் போது புதிதாக ஒரு உலகத்தினுள் செல்வது போன்றிருந்தது, கண்களில் தென்படுபவர்களெல்லாம் மனித ஜாதியில் மிக உயர்ந்த பண்பு, பாசம் கொண்டவர்களாகத் தெரிகிறார்கள், இவ்வளவு நாட்களாக ஏன் இவை எனக்குத் தென்படவில்லை, குழந்தைகளிடம் செல்ல விளையாட்டுக்களில் மனம் ஒன்றித்துப் போய்விடுகிறது ஏன் இவ்வளவு காலமும் நான் பித்துப் பிடித்தவனைப் போன்றிருந்தேன், என்னவள் என்னுள் ஆழமாகிவிட்டதனாலா ?

இஞ்சியுடன் தேநீர் பருகினால் நன்றாக இருக்குமென்றெண்ணி இருவரும் அருகில் தென்பட்ட கடையிலுள் நுழைந்தோம், கடை அமைந்திருந்த இடத்தில் கட்டடம் எதுவுமே இல்லாததுபோன்றே இந்த நிமிடம் வரை உணர்ந்திருந்தேன், புதிதாக கட்டிடம் கட்டி யாரோ கடைதிறந்திருக்கிறார்கள் போல என நினைத்தவாற கடையிலுள் நுழைந்து என்ன நானா கட புதுசாயிருக்குது எப்ப திறந்த என்று கேட்டேன், தேநீர் தயாரித்துக் கொண்டிருந்தவன் என்னை முறைத்துப் பார்க்கிறான், இப்போது தானே எண்ணியிருந்தேன் இவ்வுலகம் அழகானது இவ்வளவு நாளும் ரசிக்க மறந்துவிட்டேன், இவன் ஏன் இப்படி முறைக்கிறான் என்றெண்ணியவனாக, அருகிலிருக்கும் சுவரைப் பார்க்கிறேன், லத்தீப் பாக்கி 135 ரூபா என சரியாக ஒரு வருடத்திற்கு முன்னரான திகதியொன்றையிட்டு கரியினால் எழுதப்பட்டிருந்தது...!

அருகிலிருக்கும் மேசை மீதிருந்த இன்றைய நாளிதழை, வாடைக் காற்றும் வாசிக்க ஆரம்பித்திருக்கின்றது போல, பக்கம் பக்கமாக புரட்டிக்கொண்டே செல்கின்றது காற்று, காற்று பத்திரைகையை வாசித்துவிட்டு தூக்கியெறிந்துவிடுமோ என்றெண்ணி ஓடிப்போய் பத்திரிகையைப் பிடிக்கிறேன், கையில் அகப்பட்ட பக்கதில் பெரிய எழுத்துகளில் 2020 இல் உலகம் அழியுமா என பெரியதொரு கேள்விக்குறியுடன் செய்தியொன்று காணப்பட்டது,

இன்று நள்ளிரவுடன் 2019 வருடம் கழிகிறது....

(கற்பனைகள்)

என் வீட்டுக் குழந்தைகள்

2016-03-03T13:44:00.000+05:30

எனக்கென
ஏற்பாடு செய்யப்பட்ட நாட்களில்
சில மணி நேரங்களை
யாரோ சிலர் களவாடிவிட்டனர்
யாரை சந்தேகிப்பது ?

திருப்திப்பட்டுக் கொள்கிறேன்
களவாடியதாய் சந்தேகித்த
என் மணி நேரங்களுடன்
என் வீட்டிலுள்ளவர்கள் பேசிக் கொண்டும்
விளையாடிக்கொண்டுமிருக்கின்றனர்
தூரமாய் நின்று வேடிக்கை பார்க்கிறேன்
நிமிடங்களில் சில
என்னைப் பார்த்து புன்னகைக்கின்றன...

மரியாதைக்குரிய SSP மஜீட் ஐயா அவர்களுக்கு

2015-08-01T16:48:00.000+05:30

நான் பெரிதும் மதிக்கும், அன்பு வைத்திருக்கும் எனது மரியாதைக்குரிய SSP மஜீட் ஐயா அவர்களுக்கு, உங்களை விட வயது, அனுபவம், சிந்தனை, பலம் என அனைத்திலும் பலயீனமான தொண்டன் எழுதும் மடல் இது...

நீங்கள் விளையாட்டு, பாதுகாப்பு ,அரசியல் என பல அவதாரங்களில் மிகவும் திறமையாக செயற்பட்டுள்ளீர்கள் என்பதற்கு உங்களைப்பற்றி எனது வாப்பாவினதும் மூத்தப்பாவினதும் வயதையொத்தவர்கள் சொல்லக் கேட்டுள்ளேன். இன்னும் உங்களைப் பற்றியும் உங்களது பெருமைகள், சேவைகள் பற்றியும் வெளியூரிலிருக்கும் எனது நண்பர்களின் வாப்பாக்கள் பேசவும் கேட்டிருக்கிறேன். இதனால் தான் என்னவோ உங்கள் மீதான பிடிப்பு சிறுவயதுமுதல் இன்றுவரை குறையாமல் இருக்கின்றது...

எமதூர் அரசியல் தலைவர்களில் நின்றும் நீங்கள் சற்று வித்தியாசமானவரும் திறமையானவரும் கூட, இரவுகளில் விழித்திருப்பதற்காக தொண்டர்களுக்கு மது, சிகரட், என எவ்வளவோ வீணான செலவுகளின் மூலம் அரசியல் இலாபம் தேடும் தலைவர்கள் மத்தியில் ,வீண் செலவுகளைத் தவிர்த்து நீங்கள் செய்யும் அரசியலோ தனி அழகு... இருந்தும் உங்களுக்கு முறையான அங்கீகாரத்தை எமதூர் மக்கள் இன்னும் வழங்காமலிருப்பது எனக்கு மிகவும் கவலையும் வேதனையுமளிக்கிறது...

எத்தனையோ பிரபலமான தலைவர்கள் இருக்கும் போது, ஏதாவது ஒரு பிரச்சனை/ சிக்களுக்கான தீர்வை வேண்டி உங்களை நாடி ஏழை பொதுமக்கள் வரும்போது அவர்களிடம் எதையும் எதிர்பாராமல் கூடிய சீக்கிரத்தில் அவர்களின் பிரச்சனைக்கான தீர்வினைப் பெற்றுக்கொடுக்க நீங்கள் எடுக்கும் முயற்சிகளை வார்த்தைகளால் சொல்ல இயலாது... அப்படி உங்களை நாடி வந்தவர்களின் பிரச்சனைகள் தீர்க்கப்படாமல் இருப்பதும் மிக மிக அரிதே...

இருந்தும் எமதூர் மக்கள் உங்கள் மீது திருப்தியடையவில்லை என்பது நிதர்சனமான உண்மை, அவர்கள் உங்களைப் பற்றி சில பல குறைபாடுகளை முன் வைக்கின்றார்கள், அதிலும் பிரதானமானவை உங்களுடைய பண மற்றும் உடலசைவுகள் பற்றியவை, நிச்சயமாக வீண், கெட்ட விடயங்களுக்காக பணத்தை இறைத்துத்தான் அரசியல் செய்ய வேண்டுமென மக்கள் விரும்பினால் அப்படியான அரசியலில் நீங்கள் முதலீடு செய்ய வேண்டாம், நாளை மறுமையில் எப்படி உழைத்தாய் எப்படி செலவுசெய்தாய் என்ற கேள்விக்குபதில் சொல்ல வேண்டிய கட்டாயத்தில் நாமெல்லோரும் இருக்கின்றோம்.

உடலசைவில் முதலாவதாக ,நீங்கள் ஊரில் இருப்பது மிகக் குறைவு: இதற்கு நீங்கள்தான் சிறந்த தீர்வொன்றை சொல்ல வேண்டும் தலைவனென்பவன் பொறுப்புகளை ஆடையாயுடுத்தியிருப்பவன் என்பது உண்மை, நீங்கள் மட்டும் தான் தலைவன் உங்களுக்கு மட்டும்தான் பொறுப்புகள் உண்டென்று எடுத்துக்கொள்கிறீர்களா.... அக்கரையூரிலும் தலைவனொருவன் இருக்கிறான் அவன் கொழும்பிலும் இருக்கிறான் சொந்த ஊரிலும் இருக்கிறான், ஆனால் நீங்களோ ஆட்சியின் பின் கொழும்பில் மட்டும்தானே இருக்கின்றீர்கள்... நான் சித்தமிழந்தவன் பேசுகிறேன் என்று எண்ணிக்கொள்ளாதீர்கள் அப்படி நினைத்தால் ஊரிலிருக்கும் அனைவரையும் சித்தமிழந்தவர்களாக்கிவிடுவீர்கள்....

இரண்டாவது, உங்களுடைய தேர்தல் பிரச்சார முறைமை : ஊரின் பிரதானமான அமைப்புகளான, உலமாசபை, பள்ளிவாசல் நிருவாகங்கள், வர்த்தக சங்கள், இளைஞர் அமைப்புகள், கிராம அபிவிருத்தி அமைப்புகள், சமூக சேவை அமைப்புகளின் ஆலோசனையுடன் உங்களது பிரச்சார நடவடிக்கையை ஆரம்பித்திருக்க வேண்டும் என்பது பலருடைய ஆதங்கம், எங்கள் ஊரவர் வேட்பாளராக நிறுத்தப்பட்டிருக்கும் போது எங்களது வாக்கு அவருக்கே சென்றடைய முயற்சிப்போமென்று அவர்கள் கூறி உறுதியளித்திருப்பார்கள் காலம் இன்னுமுள்ளது முடிந்தால் அவர்களை சந்தித்து உரையாட முயற்சிசெய்யுங்கள்

அரசியலென்பதும் ஒரு வகை முதலீடுதான், வீடு வீடாகச் சென்று வயதானவர்கள், நோயாளிகள், சிறுபிள்ளைகள், இளைஞர்கள் என எல்லோருடைய தலைகளையும் கோதி அரசியல் செய்யும் எத்தனையோ தலைவர்களைப் பார்த்திருக்கிறேன், மூத்தம்மா மார்களுக்கு வெத்திலை பாக்கு நறுக்கிக் கொடுத்து அவர்களுடன் உரையாடி அரசியல் செய்த தலைவர்களும் இருக்கிறார்கள். உள்ளூராட்சி தேர்தலுக்கே வீடுவீடாகச் சென்று வாக்களிக்கக் கோருபவர்கள் இருக்கும் இக் காலகட்டத்தில் ஒரு பாராளுமன்றத் தேர்தலுக்கான வேட்பாளர் நீங்கள் இதுவரை வீதிக்கு இறங்காமல் இருப்பது பெரும் கவலையைத் தருகின்றது.

உங்களுடன் சதா நேரமும் இருப்பவர்கள் உங்களுக்கு சிறந்தொரு வாக்குவங்கியாக செயற்படுபார்கள் என்று தவறாக எண்ணிவிடாதீர்கள், ஊருக்குள் கதை வேறு.... தினமும் நான் சந்திக்கும் ஒவ்வொருவரிடமும் உங்களுக்கு வாக்களிக்கக் கோருகிறேன்... அவர்களோ என்னை நோக்கி விடையளிக்க முடியாத பல வினாக்களைத் தொடுக்கின்றார்கள், சின்னப் பயள் நான் எப்படி அக் கடினமான வினாக்களுக்கு விடை சொல்லுவேன்... மறுபடியும் சொல்கிறேன் ஊருக்குள் கதை வேறு

இன்று நடந்த சம்பவத்தை எண்ணி, முஸ்லிம் காங்கிரசுக்கு இங்கு இடமில்லை, எல்லோரும் நமக்குத்தான் வாக்களிக்க வேண்டும் / வாக்களிப்பார்கள் என்று தவறாக நினைத்துவிடாதீர்கள், காங்கிரஸ் தலைவர் மீது கொண்ட வெறுப்பின் வெளிப்பாடே தவிர மற்றப்படி ஒன்றுமில்லை.

என் அன்புக்குறியவரே தயவுசெய்து நிலைமைகளை அலசி ஆராய்ந்து ஒழுங்கான முறையில் திட்டமிட்டு .... இன்னும் எவ்வளவோ சொல்லலாம் மூத்தவர் , அனுபவம் நிறைந்தவர் நீங்கள் மக்கள் விரும்பும் சிறந்ததொரு பிரச்சார நடவடிக்கையை முன்னெடுங்கள் நான் / நாங்கள் உங்களுடன் கைகோர்க்க காத்திருக்கிறோம்...

இப்படிக்கு

உங்களைத் தலைவனாகப் பார்க்க ஆசை கொண்ட தொண்டன்....

இரண்டு வகை மனிதர்கள்...

2015-06-17T16:16:00.000+05:30

மனிதர்கள் யாவரும் ஒரே பண்புகள், ஒரே சிந்தனைகள் கொண்டவர்கள் கிடையாது, அப்படியிருந்தால் இவ்வுலகத்தில் சுவாரஷ்யம் என்பது இல்லாமல் போய்விடும். குறுகிய கால இவ்வுலக வாழ்க்கையை சந்தோஷமாகவும், ஏனையவர்களுக்குப் பிடித்ததாகவும் பிரயோசனமுள்ளதாகவும் வாழும் போதுதான் இவ்வுலக வாழ்வில் ஒரு பிடிப்பு ஏற்படுகின்றது. சிலர் இப்படித்தான் வாழவேண்டும் என தங்களுக்குள் ஒரு வரைமுறையை ஏற்படுத்தி வாழ்கின்றனர். இப்படிப்பட்டவர்கள் தங்களது அன்றாட செயற்பாடுகளுக்கென ஒரு வடிவத்தை/உருவத்தை/முறைமையை ஏற்படுத்தி அதன்படிதான் செயற்படுவார்கள். இவர்களை அவதானிக்கும் போது இவர்களின் உடையுடுத்துதல் அல்லது உணவு உண்ணுதல் அல்லது பிறரிடம் அனுகுதல்,பழகுதல் இன்னும் பிற கொடுக்கல் வாங்கல்கள் என ஒவ்வொரு செயற்பாடுகளும் மிகவும் நாகரீகமானதாகவும், தூய்மைத்தன்மை கொண்டதாகவும் இருக்க வேண்டுமென்பதற்காக அதிக சிரத்தையெடுத்துக் கொள்வார்கள்.

குடும்பம் , உறவினர்களிடத்தில் உறவாடுதல், குழந்தைகளுக்கென நேரம் ஒதுக்குதல், நண்பர்கள் சந்திப்பு, டீவி, சினிமா இன்னும் பிற பொழுதுபோக்குகள், அதிகாலையில் தூக்கத்தை விட்டெழல், இரவில் நித்திரைக்குச் செல்லல் என ஒவ்வொன்றையும் நேர அடிப்படையிலேயே செயற்படுத்துவார்கள். இன்னுமிவர்கள் தங்கள் சந்தோஷம், துக்கம், பாராட்டுதல் போன்ற உணர்வுகளை வெளிப்படுத்துவதுக்குக் கூட தான் இருக்கும் சூழலை அவதானிக்கக் கூடியவர்களாக இருப்பர்.

மேலுமிவர்கள் தங்களது எதிர்கால செயற்பாடுகள் பற்றி மிகவும் துள்ளியமாகத் திட்டமிட்டு செயற்படுவார்கள். இப்படிப்பட்டவர்களின் பெரும்பாலான திட்டமிடல்கள் வெற்றியை நோக்கியே நகர்ந்து செல்லக் கூடியதாகவிருக்கும். மேலும் இவர்களது சமூகத்துடனான தொடர்பினை நோக்கும் போது குறிப்பிட்ட ஒரு வகையினரோடுதான் இவர்கள் தொடர்புவைத்திருப்பார்கள் அதுவும் அவர்களின் தொழில் அந்தஸ்து அல்லது படிப்போடு தொடர்புடையதாகவேயிருக்கும்.

இப்படியானவர்கள் தாங்கள் சந்தோசமாக இருப்பதாக சமூகத்தின் ஏனைய படிகளில் இருப்பவர்களுக்குக் காட்டிக்கொள்வார்கள். உண்மையும் அதுதான் அவர்களுக்கென அவர்கள் கீறிக்கொண்ட வட்டத்தினுள் அவர்கள் வாழும்போது அதைவிட சந்தோஷம் வேறொன்றுமில்லை. அவர்களின் வாழ்வை இப்படியாக அமைத்துக்கொள்வதில் அவர்களுக்கு கொள்ளை சந்தோஷம், அப்படி வாழ்வது ஒரு வகை சுவாரஷ்யத்தைத் தருகிறதென்றால், இன்னுமொரு வகையினர் இருக்கின்றார்கள்

இவர்கள் எப்படி வாழ்ந்தாலும் சரிதான் எனும் கொள்கை கொண்டவர்களாக இருப்பார்கள், இவர்களது அன்றாட செயற்பாடுகளில் தூய்மைத்துவம் என்பது குறைவாகவிருக்கும். இவர்களிடத்தில் தங்களுக்கென ஒரு முறையான கொள்கையிருக்காது, தான் திட்டமிட்ட செயற்பாடுகளை செயற்படுத்தி சமயங்களில் பாதியிலேயே விட்டுவிடுவார்கள், எல்லோரிடத்திலும் மிகவும் சாதாரணமாகப் பழகுவார்கள், இவர்களின் வீடு இவர்கள் வசிக்கும் அறைகளை நோட்டமிட்டால் பொருட்களெல்லாம் சிதறி ஒரு ஒழுங்கற்ற முறையில், இன்னும் சொல்லப் போனால் இப்போதைய இளைஞர்களின் அறைகளைப் போன்று காணப்படும்.

முன்னர் கூறிய வகையினருக்கு முற்றிலும் மாறுபட்டதாகவே இவர்களது நடத்தைகள் இருக்கும். இன்னும் சமூகத்தில் சகல தரப்பினர்களிடத்திலும் தொடர்புவைத்திருப்பார்கள். பல சுவாரஷ்யமான நினைவுகளுக்கு சொந்தக்காரர்களாக இருப்பார்கள். இவர்களின் வாழ்வில் பிறர் சொல்லிக்கொள்ளுமளவுக்கு முன்னேற்றமென்பது இருக்காது ஆனால் இவர்களுக்குள்ளாகவே முன்னேற்றமைடந்திருப்பார்கள்,லைப்ரரி, இணையம் போன்றவற்றில் நேரமிடுவது குறைவாகவேயிருக்கும், ஆனாலும் புராதண, சமகால உலக நடப்புக்களில் பரீட்சையில் தேறுமளவுக்கு தெரிந்துவைத்திருப்பார்கள்.

இவர்கள் வசிக்குக் அறை, மொபைல் போன், கொம்பியூட்டர், பேர்பியூம், ஸ்லீப்பர்ஸ் போன்றவற்றை யார் வேண்டுமானும் பாவிப்பதற்கு அனுமதிப்பார்கள். அரசியல், சமூக சேவை போன்றவற்றில் அதிக ஈடுபாடு கொண்டவர்களாக இருப்பார்கள். மேலும் வீண்விரயத்துக்குப் பெயர்போன இவர்களின் வாழ்வும் மிகவும் சந்தோசமானதாகவிருக்கும், முரண்பாடு கொண்ட இரு வகை மனிதர்களின் செயற்பாடுகள் ஒன்றாகவிருந்த போதிலும் அதை செயற்படுத்தும் விதத்தில் தான் வித்தியாசங்கள் இருக்கின்றன. இந்த வித்தியாசங்கள்தான் வாழ்வினை சுவாரஷ்யமானதாக்குகின்றது. மேலும் இரு வகையினரும் தாங்கள் இருப்பது போன்றே வாழ்வின் இறுதிவரை இருந்தால் பிரச்சனையில்லை, இரண்டாம் வகையினர் முதல் வகையினர் போன்று நேரம் மற்றும் ஒழுங்கு முறையில் அமைந்த (தூய்மைத்தன்மையான) செயற்பாடுகளைச் தன் வாழ்வில் கொண்டுவருவதற்கும், முதல் வகையினர் இரண்டாம் வகை போன்று சமூகத்தோடு ஒன்றித்து வாழ்வதற்கும் முயற்சிக்கும் போதுதான் பிரச்சனைகள் எழுகின்றன. அப் பிரச்சனைகளும் வாழ்வை சுவாரஷ்யமாக்குமென்பது வேறுவிசயம்.

இவ்விரண்டு வகையினரும் ஒரே குடும்பத்தில், ஒரே விட்டில் வாழ்ந்தால் இன்னும் சுவாரஷ்யமாகவிருக்கும்.

சைக்கோயிசம்

2015-02-09T11:14:00.000+05:30

கொஞ்ச நாட்களாகவே நம்ம நட்புகளெல்லாம் கம்பு நிஷா பத்தியே பேசிட்டுத் திரியிராங்க, யார்ரா இவள் புதுசா இருக்காளே நடிகை கிடிகையாக இருப்பாளோ என்னுட்டு அவளப்பத்தி விசாரிச்சா கம்பு நிஷா இல்லையாம் அது கம்மியூனிசமாம். சரி சரி அது கம்மி யூனிஃபார்மோ, கம்மி யூரினோ எப்பிடியோ இருந்திட்டுப் போகட்டுமே நம்ம பாட்டுக்கு நாம இருப்பம் எதுக்கு வம்பு என்னுட்டு இருந்தப்போ டீவில தளபதி இட்லி வடையோட கம்மியூனிபார்மை ச்ச்ச்சீ கம்மியூனிசத்தைப் பத்தியும் சொல்லிட்டுருந்தாரு. அட சாப்பாட்டு ஐட்டம் புதுசா அறிமுகப்படுத்தியிருக்கான்கள் போல என்னு நினைச்சிட்டு, நம்ம பயல்தான் ஹோட்டல் வச்சிருக்கானே அவனுக்கிட்ட விசாரிச்சு இன்னைக்கு ஒரு புடி புடிச்சிட வேண்டியதுதான் என்னு நினைச்சி போனப் போட்டு கம்மியூனிஷம் இருந்தா இரண்டு பார்சல் அனுப்பி வை மச்சான் என்றேன்.

என்னைய விட்டுட்டு தனியா தண்ணி போட்டிருக்காயாடா லூசுப் பயல என்னு திட்ட ஆரம்பிச்சுட்டான். இல்ல மச்சான் சீரியஸ்சாத் தான் சொல்லுறேன். ஏதோ புது ஐட்டம் போல மச்சான் உன் ஹோட்டல்ல இல்லாட்டியும் பக்கத்துலயாவது வாங்கி அனுப்பு இங்க தளபதி சும்மா கிழி கிழினுன்னு கிழிக்காரு இட்லி வடையோட சேர்த்துன்னேன். லூசுப் பயலே அது சாப்பாட்டு ஐட்டமில்லடா இது இது தான் இப்பிடி இப்பிடித்தான் என்றெல்லாம் சொல்லிட்டே போனான். அவன் சொன்னதுல கம்மியூனிசம் என்றா தண்ணி போட்டவனும் தண்ணி போடுற இடத்துல இருக்கிறவனும் பேசுற மேட்டர் என்கிறதைத் தவிற வேற எதுவும் புரியல்ல :(

சரி சரி யார் யாரோவெல்லாம் கம்மியூனிசம் பத்திப் பேசுறாங்க நாம கொஞ்ச வித்தியாசமா யோசிச்சு சைக்கோயிசம் பத்தி பேசுவோம் மச்சி நைட்டுக்கு செட்டாவு என்றான். பல பல பல்லானா விடயங்களோட நைட்டு அவன் ரூமுக்குப் போனா நீ என்ன சைக்கோவாடா கம்மியூனிஷம் பத்திப் பேசுற என்னு கைய நீட்டிட்டான். டேய் மச்சி கம்மியூனிசத்த விட்டுடு சைக்கோ என்றெல்லாம் சொல்லிடாத தளபதி வேற கம்மியூனிசம் பத்திப் பேசியிருக்காரு, பிரச்சனையாகிடும். இந்த சைக்கோயிசம் பத்திச் சொல்லேன் புதுசா இருக்குதே என்றேன். நான் சொன்னாலும் சொல்லாட்டியும் நீ சைக்கோதான் மச்சி என்னு என்னுல இருந்தே ஆரம்பிச்சிட்டான். எப்பிடிடா என்றேன் மண்டைய சொறிஞ்சிகிட்டே... பேஸ்புக்குல எவ்வளவோ ஸ்ட்டேஸ் போட்டிருக்கேன், எவ்வளவு விடயங்கள சேர் பண்ணியிருக்கன் ஒன்னுக்காச்சும் லைக், கமண்ட் போட்டிருக்கயா நீ, இப்பிடி லைக் போடாம உம்முனு சைலண்டா எப்போதுமே ஆன்லைன்ல இருந்துட்டு யாராச்சும் ஒரு பொண்ணு ம்ம்ம்ம் பொண்ணு பேர்ல இருக்கிறவங்க ஸ்மைலி ய ஸ்டேட்டசாப் போட்டாலும் விழுந்து விழுந்து லைக்கும் கமண்டும் போடுவியே இது ஒரு வகை சைக்கோதான் மச்சி என்னுட்டான். பாவிப் பயல் லைக் கிடைக்காம ரொம்பத்தான் பாதிக்கப்பட்டிருக்கான் போல.

ஃபேக் ஐடிலதான் வருவான், வந்தவுடனேயே இந்துக்களுக்கும், இஸ்லாமியர்களுக்கும் ஏசுவான், கிரிஸ்டியனா இருப்பானோ என்னு நினைச்சா அடுத்த ஸ்டேட்டசுல கிரிஸ்டியன்களையும் கிண்டலடிச்சு எழுதுவான். இப்பிடி ரொம்பக் கொழப்புவான், எப்பவுமே மதவாதிகளுக்கும் இறை நம்பிக்கை கொண்டவர்களுக்கு கொஞ்சகாலம் ஏசிட்டே திரிவான் அப்புறமா சைலண்டாகிடுவான். வந்த தடயமே இருக்காது. இவனும் சைக்கோதான். இந்த விதி பேஸ்புக்கிற்கு மட்டுமில்ல எல்லா சமூக தளங்களுக்கும் பொருந்தும்னு வேற சொல்லுறான்.

இந்த சமூக தளங்கள எடுத்துக் கொண்டா நிறையச் சொல்லிக் கொண்டே போகலாம் மச்சி, ஒரு பிரபல மொன்றோட நட்பு வச்சிக் கொண்டா கொஞ்சம் நல்லா இருக்குமே என்னு நினைச்சு சமூக தளங்கள்ல இருக்கிற பிரபலங்கள ஃபலோ பண்ணுவோம், இல்லாட்டி ப்ரெண்ட் ரிகுவஸ்ட் குடுப்போம் அதுதானே வழமை , அதுதானே ஒலக வழக்கம். (நம்ம ரிகுவஸ்ட்ட ஒரு 6 மாதத்துக்குப் பின்னாடிதான் அவங்க அக்ஸப்ட் பண்ணுவாங்க அது வேற விசியம்.) அவங்க என்ன செய்வாங்க நம்மள யார் யாரெல்லாம் ஃபலோ பண்ணுறாங்க, யார் யாரோடெல்லாம் நாம் நட்பு வச்சிருக்கிறோம் என்றெல்லாம் பார்க்காம தங்களை பிஸியான ஆளாக் காட்டிக் கொண்டேயிருப்பாங்க, அவங்க போடுற மொக்கைக்கெல்லாம் லைக்ஸ், ரிட்வீட் ... சும்மா அள்ளும். அவங்க கூட ப்ரெண்டா இருக்கிற இன்னொரு பிரபலமோ, அல்லது பிரபலமாகத் துடிக்கும் ஒருத்தனோ நல்லதா, கருத்தா, நாலு போருக்கு பிரயோசனமானதா ஏதாவது போட்டா அதுக்கு எந்தவித ரியாக்ஸனும் அவங்களிட மிருந்த வரவே வராது. இப்படிப்பட்ட பிரபலமும் சைக்கோதான், இப்படிப்பட்ட பிரபலமோட கூட்டு வச்சிருக்கிற நாமளும் சைக்கோதான் மச்சி என்னுட்டு இரண்டு பாட்டில் பீரக் காலி பண்ணிட்டான்.

நான் சொல்லுற அடுத்த விசயத்தை நீ கூட அவதானிச்சிருப்ப, அனுபவிச்சிருப்ப அதாவது, பஸ் ட்றாவல் பண்ணும் போது பஸ்ஸில நிறைய இருக்கைகள் காலியா இருக்கும் அப்பிடி இருக்கும் போதும் ஒருத்தன் வந்து ஒரு பொண்ணுபக்கத்துல போயி நிற்பான் சான்ஸ் கிடைக்கும் போது அது பக்கத்துல உட்காரவும் செய்வான், இன்னும் கொஞ்சப் பேரு இருக்காங்க பஸ்ஸு சரியான சனநெரிசலா இருக்கும் ஒத்தக் காலவச்சே நிற்கிறத்துக்கு மிகவும் சிரமப்படுவாங்க. ஆனா நம்மாளு யாரையும் கவனியாம காதுல ஹெட்செட்டை மாட்டிக் கொண்டு குனிஞ்ச தலையோட போன்ல ஆராய்ச்சி செஞ்சிட்டு சீட்டுல இருப்பான். ஆராய்ச்சில மூழ்கினவன் பக்கத்துல நெறமாசக் கர்ப்பிணி நிற்கிறது கூட தெரியமாட்டா அந்தளவுக்கு அவனோட ஆராய்சி பிஸியானதா இருக்கும். ஏதோ ஞானம் வந்தவன் போல திடீர்னு கொஞ்சம்போல தலையத் திருப்பி சுத்து முற்றும் பார்ப்பான் பார்த்திட்டு அவனுக்கு இரண்டு சீட்டுக்கு முன்னாடி இல்லாட்டி பின்னாடி நிக்கிற சுமாரான பிகரப் பார்த்து இருக்கப் போறீங்களா என்னு கேட்பான். அந்தப் பொண்ணு ஓரளவுக்கு மனச்சாட்சியான பொண்ணா இருந்தா என்ன செய்யும் பக்கத்துல இருக்கிற கர்ப்பிணிப் பெண்ண உட்காரச் சொல்லிக் கேட்டு இவனுக்கு பல்பு வாங்கிக் கொடுக்கும். அப்பிடி இல்லாமல் மனசுல ஒரு வித கறல் கொண்ட பெண்ணா இருந்தா, நம்மாளு கொடுத்த சீட்டுல வந்து உக்காந்துக்கும், இப்படியான பொண்ணு பையன் எல்லாருமே சைக்கோதான் மச்சி.

அட எதுக்கு நம்ம அங்க இங்க நடக்கிறத சொல்லிக்கொண்டு, நம்ம கேங்குலயே பல சைக்கோக்கள் இருக்கிறானுகளடா என்றான், என்ன மச்சி சொல்லுற என்னையச் சைக்கோ எண்ட , மனசக் கல்லாக்கிக் கொண்டு ஒத்துக் கொண்டேன், இப்போ நம்ம கேங்கையே சைக்கோ எங்கிற முடிவா என்னதாண்டா சொல்ல வர்ர என்றேன் நான்,

இல்ல மச்சான் நம்ம கேங்குல மொத்தம் எத்தன பேரு இருப்போம் என்றான். எனக்குப் பிடிக்காத ஒரு சில எதிரி நண்பர்களக் கூட்டிக் கழிச்சி ஒரு 20 பேர் என்றேன். ஆ... அந்த இருபது பேரும் ஒவ்வொரு நாளும் சந்திக்கிறோமா என்று கேட்டான், எப்பிடிடா கொஞ்ச பேர்தான் வெளியூர்ல இருக்கானுகளே பின்ன எப்பிடி சந்திக்க முடியும், ஏதாவது விசேசமென்றா மட்டும்தானே சந்திக்கலாம் அதுலயும் ஒன்னு இரண்டு பேர் மிஸ்ஸாவானுகள் என்றேன். இப்ப மேட்டருக்கு வாரேன் என்றான், எப்பயாவது ஒரு நாளைக்குத்தானே நாம எல்லோரும் சந்திச்சி சந்தோசமா இருக்கிறோம். அப்பிடி சந்திக்கும் போது நம்மல்ல இரண்டு மூனு பேர் நம்மளோட இருக்கிற மாதிரியே இருந்துகொண்டு போனையே பார்த்துக்கொண்டும் போனிலேயே பேசிக்கொண்டும் இருப்பானுகளே அவதானிச்சிருப்பாயே என்றான். அட நம்ம கனேசு , குமாரு,... போன் பைத்தியங்கள் அவனுகளையா சொல்லுறாய் என்றேன்.

ஆமா... ஆமா... இந்த கனேசு, குமாரப் போன்றவங்க நம்ம கேங்குல மட்டுமில்லாம வயது வித்தியாசமின்றி அனைத்து குறூப்புலயும் இருப்பாங்க, இவங்களால குறூப்ல இருக்கிற மத்தவங்களுக்கு பெரிசா எதுவும் ஆகிறதில்ல அவங்க வருவாங்க அவங்க பாட்டுக்கு போன நோண்டிட்டு இருப்பாங்க பின் எல்லாரும் கிளம்புறப்போ அவங்களும் கிளம்பிடுவாங்க, இவங்களும் ஒரு வகை சைக்கோதான் மச்சி என்றான் நீண்டதொரு பெருமூச்சு விட்டுக் கொண்டே :(

ஹம்ம்ம்ம் .... என்னத்தச் சொல்ல கருத்துச் சுதந்திரம் மண்டையில் பட்ட எல்லாத்தையும் சொல்லுறான் அவன் சொல்லுறதப் பார்த்தாலும் நியாயமாத்தான் இருக்கு, இப்பிடியே விட்டா இரவைக்கு நம்மல தூங்க விடமாட்டான் மிச்சமிருக்கிற மிக்ஸர அப்பிடியே நான் சாப்பிட்டு வாமச்சி மணி மூனாவது போய்ப்படுப்போமென்றேன், எங்க, அவன் எழும்பனுமே...
நமக்கு முன்னாடியே அவன் தூங்கிட்டான் போதையில....

ரொம்ப நாளாவே ட்ராப்ட்ல இருந்த பதிவு இன்னைக்கு முடிச்சாச்சு.... இந்தப் பதிவைப் பார்த்திட்டு கடைசில என்னையும் சைக்கோ என்று சொல்லுவீங்க என்பது மட்டும் உண்மை :))))

கொஞ்சம் கிறுக்கு ரொம்பவே இருக்கு ...

2015-01-26T11:28:00.000+05:30

யாரும் எதிர்பாராத அசாதாரண நிகழ்வாக அச் சம்பவம் நடந்துவிடுகிறது. மிகச் சிறந்த ஜோசியக் காரர்களால் கூட துளியளவும் சிந்திக்க முடியாததாக அச் சம்பவம் அமைந்துவிட்டது. இனிமேல் போலி சாமியார்களுக்கு இப் பூமியில் வாழப்பிடிக்குமோ தெரியவில்லை.பல தசாப்தங்களின் பின் சாதனை ஒன்று பதியபடும் யாரோ ஒரு மாணவன் பரீட்சையில் பெற்ற குறைந்த மதிப்பெண்கள். தெருவோர மரநிழலில் சலூன் கடை வைத்திருந்தவர்கள் சொந்தமாக வாங்கிய நிலங்களில் குளிரூட்டிய அறைகளில் முடிவெட்டி முகச்சவரமும் செய்துவிடுவார்கள். ஒவ்வொரு நாட்டு அரசாங்கத்தினதும் வருவாயீட்டும் பிரதான மூலமாக சலூன் தொழில் மாறிவிடும்.

அன்பின் அடையாளமான பரிசுப் பொருட்கள் வியாபாரத்தில் முதலீடு செய்தவர்கள் மூலைகளில் குந்திக்கொண்டு வயிற்றுப் பசியார வழிதேடி சிந்திப்பார்கள். காக்காய் கலரில் இருப்பவர்களை கத்தரினா கைFப் ரேஞ்சுக்கு கொண்டுபோய்விடும் அழகுசாதன நிலையங்கள் ஆள் அரவமற்றுக் கிடக்கும் ஆடையகங்களும் அமைதியாகக் கிடக்கும், போன் கடைகளும் ரீசார்ஜ் கடைகளும் ஆளாளுக்கு முகத்தை திருப்பித் திருப்பி பார்த்துக் கொண்டிருப்பார்கள், குடும்பங்களில் யாராலும் மாற்ற முடியாத வரலாற்று நிகழ்வாயிருந்த மாமியார் மருமகள் சண்டை இனிமேல் கிடையவே கிடையாது.

குழந்தைகள் பாவம், அழுமூஞ்சியாய் எப்போதுமே திரியும். வழமையில் சின்னதாய் ஒரு சண்டையின் பின் பாடசாலை செல்லும் குழந்தைகள் இனிமேல் உலக மகா யுத்தமொன்றை புரிந்துவிட்டுத்தான் பாடசாலைக்குப் போவார்கள். யுத்தம் என்றதும் தான் நினைவுக்கு வருகிறது இனிமேல் ISIS அமைப்பு யாதொரு பெண்னையும் சீண்டவில்லை, பாதுகாப்பாக அப் பெண்ணின் தாய் தேசம் அனுப்பி வைத்துள்ளோம் என்று அறிக்கையிட முடியாது. டெல்லி பேரூந்துகளில் இனிமேல் எந்தப் பெண்களும் பலாத்காரப்படுத்தப்பட மாட்டார்கள். நித்தியானந்தாவும், கடாபியும் பாக்கியம் பெற்றவர்களாக இனிவரும் காலங்களில் இளைஞர்களால் நோக்கப்படுவார்கள்.

சினிமாவையே நம்பியிருந்தவர்கள் சீனீ மூட்டை தூக்கும் நிலமைக்கு வந்துவிடுவார்கள், கவிஞர்கள் கருப்பொருள் தேடி செவ்வாய் கிரகம் சென்றும் வெரும்கையும் வீசிய கையுமாக திரும்பிவருவார்கள், தன் பத்தினித் தனத்தை நிரூபிக்க இனி எந்தவொரு பெண்ணும் எந்தவொரு நகரத்தையும் எரிக்கவேண்டிய அவசியம் ஏற்படாது, ஆண்களுக்கு நிகரான உரிமை பெண்களுக்கும் அவசியம் எனும் கோரிக்கைகளும் பதாகைகளும் திடீரென குறைந்துவிடும், ஜேசுதாஸ் இனிமேல் கவலையில்லாமல் தன் எண்ணப்பாடுகளை வெளியிடலாம் எந்தவொரு எதிர்ப்பும் இராது, ஆண்களின் வாழ்வைச் சீரழிக்கும் மது, மாது , சூது எனும் வரிசையிலிருந்து மாது தூக்கப்பட்டுவிடும், மாது தூக்கப்பட்டால் ஏனைய இரண்டும் நீடிக்க வாய்ப்பில்லை, ஆகவே எல்லா ஆண்களும் தூய்மையானவர்களாக மாறிவிடுவார்கள்.

கிளியோபற்றா முதல் கிளியோசியக்காரன் பொன்டாட்டி வரை பெண்களையும் பெண்களின் அழகையும் பெண்டியம் கொம்பியூட்டரில் பாதுகாப்பாக வைப்பதிலேயே இளைஞர்களது பொழுது கழிந்துவிடும், அசினோ, நயனோ ஏன் தெருமுனையின் செருப்புத்தைக்கும் முனியம்மாவின் புகைப்படமும் அதிகூடிய தொகைக்கு ஏலம்விடப்படும், இரண்டு அல்லது மூன்று மாதங்கள் ஏன் பல வருடங்களுக்குப் பிறகு கைக்குட்டைகள் கழுவப்படலாம், சரவணன் மீனாட்சி, கஸ்தூரி, சிந்து பைரவி வடிவில் வரும் கண்ணீருக்கு இனி சக்தி கிடையாது அழுவதற்கு யாரும் இருக்கமாட்டார்கள்.

பேஸ்புக்கில் கமண்டுகளும் லைக்குகளும் திடீரென குறைந்துவிடும், ஃபேக் ஐடிகளில் இனி எவரும் வலம் வர மாட்டார்கள், யூடியூப் தன் பெயருடன் சேர்த்து ஆபாசமான வார்த்தையையோ அல்லது தன் லோகோவில் ஆபாசமான படமொன்றையோ இணைத்துக்கொள்ளத் தீர்மானிக்கும் அந்த அளவிற்கு யூடியூபில் ஆபாசமான வீடியோக்களுக்கு ஹிட்ஸ் அள்ளிக் கிடைக்கும், இரவு முழுக்க போனிலும் , சமூக தளங்களிலும் கடலை போடுவது இல்லாமல் போனாலும் ஆண்கள் அலுவலகங்களுக்கு நேரத்தோடு செல்வது குறைந்துவிடும். ஆனாலும் எந்தவித டென்சனும் இல்லாமல் அலுவலகங்களில் ஆண்கள் தன் கடமையில் சிந்தனையைக் குவிப்பார்கள்.

ஐயோ சம்பவம் என்னவென்று சொல்லாமல் இப்படியே சொல்லிக் கொண்டு போன எப்பூடி என்று கல்லைத் தூக்காதீங்க, இவ்வளவு சொல்லியும் அச்சம்பவம் என்னவென்று கொஞ்சமேனும் அனுமானிக்க முடியாதவர்களாக என் நட்புகள் இருக்கமாட்டார்கள், இருந்தும் அச் சம்பவம் என்னவென்று சொல்லிவிடுகிறேன்.

உலகத்தில திடீரென பெண்களனைவரும் மறைக்கப்பட்டோ, அழிக்கப்பட்டோ விட்டார்கள். பெண்கள் இனி பலநூற்றாண்டுகளுக்கு உலகத்தில் தோன்ற வாய்ப்பில்லையென்று தலைசிறந்த அறிவியலாளர்கள், ஞானிகள், மதகுருக்கள் எல்லோரும் ஒருமித்துச் சொல்லிவிட்டார்கள். அதனால் தான் நான் மேலே சொன்ன மாற்றங்கள் ஏற்பட்டு உலகம் ஒரு சீரான நிலைமையில் இயங்கிக் கொண்டிருக்கும் போது,

சுமார் பத்து வருடங்களுக்குப் பின் மீண்டும் ஒரு சம்பவம் நடக்கின்றது, உலகின் எங்கோ யாருமே கேள்விப்படாத எந்த வித தொழில் நுட்ப வசதிகளுமற்ற ஒரு சேரிப் பிரதசேத்தில் சாதாரண வனப்புக் கொண்ட ஒரு பெண் வசிப்பதாக உலகமக்கள் கேள்விப்படுறார்கள். இந் நிலையில் உலகின் நிலை ? அப் பெண்ணின் நிலை ?

கொஞ்சம் கிறுக்கு ரொம்பவே இருக்கு ...

எழுத்தின் நிலை...

2015-01-21T09:13:00.002+05:30

மிகவும் பழமைவாய்ந்த நாளொன்றில் தோற்றமே யறியா உறவொன்று கூறிய வார்த்தை என் ஆழ் மனதில் மிக ஆழத்தில் ஆதலால் நான் அவ் வார்த்தையாய் மாற நிகழ்காலத்திலும் முயற்சிக்கிறேன், எதிர்காலத்திலும் முயற்சித்துக் கொண்டேதானிருப்பேன் என்பதை என் கூண்டுக்குள் நுழையும் வரை உணரவில்லை.

காரிருளை வானம் போர்த்திக் கொண்ட நாளொன்றில் பச்சை நிற தென்னங் கீற்றுகளிடையே நான் கண்ட காட்சியும் அவ் வார்த்தை போன்றே என் ஆழ்மனதில் பதிந்துவிட்டது. காட்சியை விபரித்தால் வார்த்தை நிஜமாகிடும் என்ற பேராசையில் காட்சியை விபரிக்க என் கூடு சேர்கிறேன். முதுரையால் செய்யப்பட்ட கதவுகளையும் யன்னல்களையும் கொண்டது என் கூடு, இறுதி தசாப்தத்தின் பின் என் கூண்டினுள் நுழைகிறேன். பல போராட்டங்களின் பின் என்னை அனுமதிக்கும் கதவு இன்று எந்தவித எதிர்ப்பும் தெரிவிக்காமல் திறந்துகொண்டது.

சிலந்திகள் கலவரம் செய்த இடம் போன்று தோற்றமளித்தது என் கூடு. சென்றமுறை நான் இட்ட கட்டளையை துடைப்பம் செய்ததாகத் தெரியவில்லை. துடைப்பத்தை நோக்கினேன், தோல்கள் சுருங்கி வயிறு முதுகோடு ஒட்டியதாக ஒரு மூளையில் மயங்கிய நிலையில் கிடந்தது. என்றோ ஒரு நாள் அருந்திய ஃபண்டா போத்தல் என் மேசை மீது அங்குமிங்கும் அசைந்தவாறு காணப்பட்டது. அருகில் சென்றதும் அசைவை நிறுத்திய ஃபண்டா போத்தல் எனைப்பார்த்து ஒரு கேலிப் புன்னகை உதிர்த்துவிட்டு மீண்டும் அசையத்தொடங்கியதை என் கரம் கொண்டு நிறுத்தி மீதியாய்ருந்த ஃபண்டாவை துடைப்பத்தின் மீது தெளித்தேன்.

என் கூண்டினுள் என் கருத்துகள் , செயற்பாடுகளுக்கு ஆமா போடுவது துடைப்பம் மட்டும் தான். அதனால் எனது எல்லா எண்ணங்களையும் துடைப்பதிடம் மட்டுமே சொல்லிவந்தேன். எப்போதுமே என் சொல்லுக்கு மாற்றம் செய்யாததும் கூட துடைப்பம் மட்டும் தான். எத்தனை நூற்றாண்டுகள் இறந்தாலும் களைப்போ இறப்போ நெருங்க முடியாவண்ணம் மிகவும் சக்திவாய்ந்த பொருட்களைக் கொண்டுதான் துடைப்பத்தை செய்தேன். துடைப்பம் இப்படி உணர்விழந்து கிடப்பதற்குக் காரணம் அவைகளாகத் தான் இருக்க முடியும். நாசமாப் போனவைகள் என் மீது ஏன் இவ்வளவு வெறுப்போ அவைகளுக்கு,

ஃபண்டா துளிகள் துடைப்பத்தின் மீது பட்டதும் நீண்ட கால வறட்சியை அனுபவித்த நிலத்தில் திடீரெனப் பெய்த மழையின் பின் வளரும் பசுமையான புற்களைப் போல புத்துணர்ச்சி பெற்று துள்ளிக் குதித்து எழுந்து கொண்டது துடைப்பம். அருகில் நான் இருப்பதைக் கண்டதும் தலை குனிந்து கொண்டது. முன்னரைப் போன்று வன்முறை இல்லாமல் என் விசாரணை தொடங்கியது. விசாரணையில் அவைகளின் சூழ்ச்சியில் துடைப்பம் மாட்டிவிட்டது என்பதை தெரியமுடிந்தது.

அவைகள் பற்றி விசாரித்தேன். என் கூண்டினுள் விருந்தாளிகளுக்கென்று சில போதை பானங்கள் இருக்கும், அவைகளுக்கு அப் பானங்களை கொஞ்சமேனும் சுவைத்துப் பார்க்க வேண்டும், ஆனால் நான் அனுமதிப்பதில்லை. கூண்டிற்குள்ளான என் வருகை நீண்ட நாட்களானதால் பானத்தில் சிறிதளவை சுவைத்துவிட்டு, சுவையறிந்த பின் மிகுதியை தங்களுக்குள் பிரித்துக் கொள்வதில் ஏற்பட்ட முரண்பாட்டில் பானம் தரையில் சிதறியதால், வெறுமனே வேடிக்கை மட்டும் பார்த்துக் கொண்டிருந்த தரைக்கு போதை தலைக்கேறி தரை இறந்துவிட்டதாகவும் அதன் பின் அவைகள் ஒன்றையொன்று முகம் நோக்காமல் திரும்பிக் கொண்டதாகவும் துடைப்பம் கவலைப்பட்டது.

கதவு சிரமமின்றி திறந்துகொண்டபோதே நான் புரிந்துகொண்டிருக்க வேண்டும் அவைகள் ஒற்றுமையாக இருந்திருந்தால் கதவை திறக்கவிடாமல் என்னைச் சோர்வடையச் செய்திருக்கும். அவைகளை நோக்கினேன் நான் வந்தது கூட புரியாமல் முகங்களை திருப்பிக் கொண்டிருந்தன. சில வேளை என்னை ஒரு உயிராக கருதாமலும் இருக்கலாம் .

அவைகளைச் கண்டிக்குமளவு எனக்கு அவகாசம் தர மறுக்கிறது என் ஞாபக சக்தி. இன்னும் சிறிது நேரத்துக்குள் என் கனணிக்கு நான் கண்ட காட்சியை சொல்லியேயாகவேண்டும். கனணியை நோக்கினேன் பூஞ்சல் வெளிச்சம் கனணி இருக்கும் இடத்தை காட்டியது. அப் பூஞ்சல் வெளிச்சம் கூட கனணியில் இருந்துதான் வெளியாகிறது. கனணியின் திரைமுழுவதும் தூசுகளும் புளுதியும் நிறைந்திருந்தன. துடைப்பத்தை திரும்பிப் பார்த்தேன் மிக வேகமாக செயற்பட்டு கனணி திரையை சுத்தம் செய்ததில் துடைப்பம் பழைய வலுவான நிலையில் இருப்பதை ஊர்ஜீதப்படுத்திக் கொண்டேன்.

கனணி திரையில் என் பார்வையைக் குவித்தேன். பத்து வருடங்களுக்கு முன்னர் நான் பாவித்த அதே ஃபயர் ஃபாக்ஸ் உலாவி இறுதியாக ப்ளாக்கர் போஸ்ட் பகுதியில் நான் எடிட் செய்த போஸ்ட்டுடன் திறந்திருந்து. அருகில் பேஸ்புக், ப்ளாக்கர் ப்ரிவீவ், கூகுள் சேர்ச் டேப்புகளும் திறந்திருந்தன. இணைய இணைப்பும் செயற்பாட்டிலேயேயிருந்தது. போஸ்ட் பகுதிக்குச் சென்று புதிய போஸ்ட் ஒன்றினை எடிட் செய்வதற்காக தயாராகினேன். சிந்தனையை ஓர் நிலைப்படுத்தி கண்ட காட்சியை ஞாபகத்திற்குக் கொண்டுவந்தவனாக கீபோடில் தட்ட ஆரம்பித்தேன்.

கீபோடில் விரல்கள் பட்டதும் நுளம்புகள் விழித்துக் கொண்டன. எது நடந்தாலும் பரவாயில்லை என்று என் மனதில் உள்ளவைகளை கனணியிடம் சொல்லிக் கொண்டிருந்தேன். நுளம்புகளும் என்னை விட்டதாக தெரியவில்லை என் கால்கள், காதுகள் என புகுந்து விளையாடிக் கொண்டிருந்தன. நுளம்புகளின் சூழ்ச்சி போதாதென்றூ ஒரே ஒரு ஈ என் மூக்கின் உச்சி, முகம் , கைகள் என உணர்ச்சியற்றுப் போன இடங்களுக்கு உணர்ச்சி கொடுத்துக் கொண்டிருந்தன.

எப்படியோ கண்ட காட்சியில் அரைவாசியை பதிவாக்கியாச்சு,இன்னும் அரைவாசி உள்ளது அதில் முடிவுப் பகுதியும் முக்கியமானது. இதற்கிடையில் மிகுதி அரைவாசிப் பகுதிக்குமானவைகள் முழுவதும் மறந்துவிட்டன. மிகுதிப் பகுதியை நிறைவு செய்து, முழுப் பதிவொன்றினை போஸ்ட் செய்து நீயும் ஒரு எழுத்தாளன் தான் என்கின்ற அவ் வார்த்தையை மெய்ப்பிப்பது எப்படியென்று தீவிரமாக சிந்திக்கலானேன். நீண்ட காலத்திற்குப் பின் ஆழமாக சிந்திப்பதாலும் ஆழ் உறக்கம் கொண்டு வெகு நாட்களானதாலும் சிந்தனையில் ஆழ்ந்தவாறே தூங்கியேவிட்டேன்.

யாரோ சிலரின் பேச்சுச் சப்தம்கேட்க கண்விழித்துக் கொண்டேன், எனைச் சுற்றி , நான் இருந்த கதிரை, என் கணனி என எல்லா இடமும் சிலந்தி வலை பிண்ணப்பட்டிருப்பதை அவதானிக்க முடிந்தது. வெகு காலம் உறங்கியுள்ளேன் என்பதை எனக்கெழுந்த பேய்ப் பசியுணர்த்தியது. என்ன நடந்திருக்கும் என்பதைச் சிந்திக்கலானேன். மெய் மறந்த உறக்கத்தில் எனது தலை எனக்கருலிருந்த சுவர் மீது பட்டதும் உடனே சுவர்கள் தங்கள் முகங்களைத் திருப்பி நான் வந்திருப்பதை உணர்ந்து என் தலையை வருடி எனக்கு ஆழ்ந்த உறக்கத்தை வரவைத்திருக்கின்றன. இப்படியே ஒவ்வொரு முறையும் அவைகள் செய்வதனால், எனக்குள் இருக்கும் கற்பனைகளும் காட்சிகளும் மறைந்துவிடுகின்றன.

இம்முறையும் என்னால் அவ் வார்த்தையை நிஜப்படுத்த முடியாமல் போய்விட்டது, அடுத்த காட்சிகளும் கற்பனைகளும் என்னுள் எழ இன்னும் எத்தனை வருடம் போகுமோ தெரியவில்லை. அடுத்த முறை மிகவும் விழிப்பாக செயற்பட வேண்டும் என்று மனதில் திடம் கொண்டபோது, போ... போ... நீயெல்லாம் எழுத்தாளனாகி என்ன கிழிக்கப் போற என்று ஏளனமாக கேட்கின்றது மூலையில் குவித்து வைத்த அழுக்குச் சட்டைகளின் ஒன்று.

நட்பு

2015-01-06T10:47:00.001+05:30

ச்சே...

வெளியாகும் போது வானத்த ஒரு முறை பார்த்திருந்தால் இப்படி கண்ட இடத்துல ஒதுங்கிற அவசியம் ஏற்பட்டிருக்காது என்று மனதுக்குள் தன்னைத்தானே நொந்துகொண்டு அருகிலிருந்த பெட்டிக்கடை வாசலில் ஒதுங்கிக் கொண்டார் சகாயம் வாத்தியார்.

சகாயம் வாத்தியார் மாங்குடி பிரதேசத்தில் மிகவும் மரியாதை மிக்கவர் எந்த பிரச்சனைகளுக்கும் செல்வதுமில்லை தன் தொழில் காலத்தில் யாரையும் காயப்படுத்துமளவு செயற்பட்டதுமில்லை. பல முறை முயற்சி செய்தும் தோற்றுப் போன புகைப்பிடித்தலைத் தவிர வேறு கெட்டபழக்கங்கள் எதுவுமில்லாதவர். முப்பது வருஷம் ஆசிரியர் தொழிலில் அனுபவம் உள்ள சகாயம் வாத்தியாருக்கு அந்த முப்பது வருஷத்திலும் தன் மூன்று பிள்ளைகளுக்கும் படிப்பு தவிர வேறு எதையும் செய்யமுடியவில்லை.

மூத்தவன் சர்மிளனை அவரைப் போல வாத்தியாராக்கிவிட்டார், இளையவன் அனோஜன் இப்போதுதான் பல்கலைக்கழகத்தில் முன்றாவது வருடத்தில் இருக்கிறான், கடைசி கஸ்தூரி சகாயம் வாத்தியாரின் ஒரே ஒரு பெண் பிள்ளை. பார்ப்பதற்கு இப்போ இருக்கிற நயந்தாரா மாதிரி அழகானவள். அனைவரிடமும் நன்றாக பழகக் கூடியவள். உயர்தரக் கல்வியை முடித்துவிட்டு மேலதிக படிப்புக்காக தன்னை தயார் படுத்திக் கொண்டிருக்கிறாள். ஆண் பிள்ளைகள் இருவரும் வீட்டிலிருப்பது குறைவென்பதாலும் ஒரே ஒரு பெண் பிள்ளை கஸ்தூரி என்பதாலும் சகாயம் வாத்தியார் கஸ்தூரியிடமே அதிகமான நேரத்தையும் அன்பையும் பகிர்ந்து கொண்டார்.

மூன்று மாதத்திற்கு முதல் தான் ஆசிரியர் தொழிலிருந்து ஓய்வு பெற்ற சகாயம் வாத்தியார், தன் பென்சன் பணத்தைக் கொண்டும் மூத்தவன் சர்மிளன் பேரில் வங்கியில் ஒரு கடனெடுத்தும் கஸ்தூரிக்கு ஒரு வீட்டைக் கட்டி எப்படியாவது அவளது திருமணத்தை முடித்துவிட வேண்டும் என்றெண்ணி வங்கி அதிகாரியை சந்திக்க வெளியானவர்தான் அரை மணி நேரத்துக்கு முதல் இருட்டிவந்த கருமேகத்தை கவனிக்க தவறிவிட்டார் அதனால் தான் இந்தப் புலம்பல்.

மழை மெல்ல மெல்ல அதிகரிக்க அதிகரிக்க, பெட்டிக்கடை கூறை வழியாக வந்த மழைநீர் தன் மேல் படாமல் இருக்க மேலும் கடையின் சுவரோடு ஒட்டிக் கொண்டார் வாத்தியார். இரண்டு நிமிட கணதியான மழையின் பின்னர் சின்னதாய் ஒரு இடைவெளியைத் தந்தது காலநிலை ஆனாலும் குடையில்லாமல் வெளியில் செல்ல முடியாதவாறு இலேசாக மழை பெய்து கொண்டிருந்தது. தலையில் ஒரு பொலித்தீன் பையைப் போட்டவாறு சற்றுத் தொலைவில் சிறுவனொருவன் விரைவாக வாத்தியார் நின்றிருக்கும் பெட்டிக்கடை நோக்கி வந்துகொண்டிருந்தான். சிறுவன் கடையை அண்மிக்கவும் மழை மீண்டும் கணமாக பொழியவும் சரியாக இருந்தது.

மழை விடும்வரை பூட்டப்பட்டிருந்த பெட்டிக்கடையருகே வாத்தியாரும் சிறுவனும் ஒதுங்கவேண்டியதாயிற்று. பத்து நிமிடங்களுக்கு மேலாகியும் மழை குறைவதாகத் தெரியவில்லை. மழை ஆரம்பித்ததிலிருந்து மழை எப்போது விடும், மழை விட்டு நாம் போகும் போது அதிகாரி வீட்டிலிருப்பாரா , லோன் எப்ப கிடைக்கும், பென்சன் பணம் சீக்கிரமாகக் கிடைக்குமா என்றெல்லாம் பலதையும் சிந்தித்துக் கொண்டிருந்த வாத்தியாரின் கவனம் திடீரென சிறுவனின் பக்கம் திரும்பியது.

ஒரு பதின்னான்கு அல்லது பதினைந்து வயதுதானிருக்கும் அச் சிறுவனுக்கு. வாத்தியாரை வெறித்துப் பார்ப்பதும் பின் தன் இடுப்பை தடவிக் கொள்வதுமாக செயற்பட்டதுதான் வாத்தியாருக்கு சிறுவன் மேல் கவனம் திரும்ப காரணமாகவிருந்தது.வயதுக்கும் உடலுக்கும் சற்றும் பொறுத்தமில்லாத ஆடையுடுத்தியிருந்தான். கழுத்திலும் ஒரு பெரிய சங்கிலி தொங்கியது வலது கைகயில் கைக்குட்டயைச் சுற்றிக் கொண்டும் ஒரு முரடனைப் போல காட்சியளித்தான். முகத்திலிருந்த அரும்பு மீசை சற்றுப் பெரிதாக இருந்தால் அசல் முரடன் தான்.

பார்ப்பத்ற்கு வெளியூர்க்காரன் போலத் தெரிந்தாலும் போனவருடம் தன்னிடம் ஒன்பதாவது படித்த ஒரு மாணவனின் முகத்தோற்றத்தை போலிருந்தது வாத்தியாருக்கு அவனின் முகம் . சிறுவன் மீண்டும் தன் இடுப்பை ஒரு முறை தடவி வாத்தியாரையும் பார்த்தான். வாத்தியாரின் பார்வை சிறுவனின் இடுப்பை நோக்கிச் செல்ல இடுப்பிலிருப்பது ஏதோ ஒரு ஆயுதம் போல தென்படவும் வாத்தியாருக்குப் பயம் தொற்றிக் கொண்டது. தன் சேவைக் காலத்தில் யார் யாருக்கெல்லாம் அடித்திருக்கிறோம், யாரோடெல்லாம் கோபமாக பேசியிருக்கிறோம் என்றெல்லாம் வாத்தியார் சிந்திக்க ஆரம்பித்துவிட்டார். இடையில் இடைவிடாது பெய்யும் மழையையும் வைதுகொண்டார்.

எதுக்கும் இரண்டடி தள்ளி நிற்போம் என்றெண்ணி நகர்ந்தவரால் ஒரு அடிக்கும் குறைவான தூரம்தான் நகர முடிந்தது. இன்னும் ஒரு இன்ச் நகர்ந்தாலும் கொட்டோ கொட்டனக் கொட்டும் மழையில் முழுவதுமாக நனைந்துவிடுவார். ஏற்கனவே இடையிடையே வீசிய குளிர்ந்த காற்றின் மூலம் ஏற்பட்ட மழைச்சாரலினால் வேட்டி நனைந்திருந்தது.சிறுவனை ஓரக்கண்ணால் பார்ப்பதும் பின் வானத்தின் பக்கம் பார்வையைச் செலுத்தி எப்போது மழை விடும் என்று பார்ப்பதுமாகவிருந்த வாத்தியாரின் கையடக்கத் தொலைபேசி சினுங்கியது. இடுப்பில் பத்திரமாக வைத்திருந்த கைபேசியை எடுத்து அழைப்பது யாரென்று பார்த்து அழைப்பு வீட்டிலிருந்து வருகிறதென அறிந்தவுடன் பேச்சுத் தொடுத்தார். மறுமுனையில் கஸ்தூரி, குடையெடுத்துச் செல்ல மறந்ததையும் இப்போது இருக்குமிடம், குடை எடுத்து வரவா என்றெல்லாம் கேட்ட கஸ்தூரியிடம் இல்லம்மா இன்னும் கொஞ்ச நேரத்துல மழை விட்டுடும் நான் வந்துடுவேன் என்று சொல்லித் அழைப்பைத் துண்டித்தவரின் கண்கள் மறுபடியும் சிறுவனைத் தேடின.

இப்போது சிறுவன் இடுப்பினில் எதுவுமில்லாமலிருக்க, கைகளில் ஏதோ ஒரு சிறிய பொட்டலமொன்றை சிறுவன் பிரித்துக் கொண்டிருப்பதை வாத்தியார் கண்டுவிட்டார். வாத்தியார் தன்னைப் பார்த்துக் கொண்டிருப்பதையும் பொருட்படுத்தாமல் அவசர அவசரமாக பொட்டலத்தை பிரிப்பதிலேயே சிறுவன் குறியாக இருந்தான். பொட்டலம் சிறிதாக பிரிபட பொட்டலட்தினுள் இருப்பது என்னவென்று ஓரளவுக்குத் தெரிந்ததும் வாத்தியார் திகைத்துப் போய்விட்டார். ஒரு சின்னப் பயள் எப்படி இப்படியான பொருட்களையெல்லாம் கைகளில் வைத்துக் கொள்ள முடியும் , காலம் ரொம்பக் கெட்டுப் போச்சு, இவனுக்கு அப்பா அம்மா இல்லையா, இவனைப் இப் போக்கில் இன்னும் கொஞ்ச காலம் விட்டுவிட்டால் இவனின் எதிர்காலம் கேள்விக் குறியாகிவிடுமே என்றெல்லாம் சிந்தித்துக் கொண்டிருந்த வாத்தியாருக்கு சிறுவனின் அடுத்த நடவடிக்கை வியப்பையும் பயத்தையும் கொடுத்தது. சிறுவன் தான் கைகளில் வைத்திருந்ததை வாத்தியாரின் கழுத்துக்கு நேரே நீட்டிவிட்டான். சிறுவனின் உயரத்திற்கு வாத்தியாரின் கழுத்தளவுக்குத்தான் நீட்ட முடிந்தது இல்லாவிட்டால் முகத்துக்கு நேராகவே நீட்டியிருப்பான்.

சிறுவனின் திடீரென்ற இச் செயற்பாடு வாத்தியாரை நிலைகுழையச் செய்ததுடன் கோபத்தையும் அதிகப்படுத்தியது. ஆனாலும் வெளியில் பெய்து கொண்டிருக்கும் கணத்த மழை, மழையுடன் கூடிய குளிர்ந்த காற்று யாருமற்ற தனிமையான பெட்டிக் கடைச் சூழல் போன்றவற்றை கருத்தில் கொண்டு தனக்கு வந்த கோபத்தைக் கட்டுப்படுத்தி சிறுவன் நீட்டியதை வாங்கிக் கொண்ட வாத்தியார் சிறுவனிடமே தீப்பெட்டியையும் வாங்கி சிறுவன் நீட்டிய சிகரடை பத்தவைத்துக் கொண்டு சிறுவன் பற்றி தெரிந்துகொள்ள அவனிடம் பேச்சுத் தொடுத்தார்.

---- நட்புக்கு வயது வித்தியாசம் கிடையாதாம், அப்படி வயது வித்தியாசம் கிடையாத நட்பு வேர்விடுவது புகைவிடுவதில் தானாமே ----

ஆதலால் நாம் ஏழைகள்...

2014-07-10T12:49:00.001+05:30

உண்மையில் ஒரு நபரின் செல்வாக்கு அவரின் வழித்தோன்றல்கள் மற்றும் அவரிடமிருக்கும் சொத்து செல்வங்களின் நிலையைப் பொருத்துத்தான் அமையும் என்று சொல்வதில் தப்பில்லை என்றே கருதுகின்றேன். தனி நபரை மட்டுமல்லாது தேசத்தையும் ஏழை செல்வந்தன் என்று வகைப்படுத்தும் காலத்தில் இப்போது நாம் வாழ்ந்து கொண்டிருக்கின்றோம். வறுமையால் தற்கொலை செய்து கொண்டவர்களும் , தன் கௌரவத்தை பாராமல் தன்னுடைய படிப்புக்கு தகுந்த வேலை கிடைக்காததனால் குடும்ப சுமை போக்க ஹோட்டல்களில் தினக் கூலிக்கு வேலை செய்யும் இளம் பருவத்தினரும், அக்கா, தங்கைகளின் திருமணம் மட்டுமல்லாது இன்னும் கொஞ்சம் சொத்திருந்தால் வாழ்க்கை நன்றாக அமையும் என்றெண்ணி அயல் தேசங்களில் வெயில் பனி பாராது உழைக்கும் ஒவ்வொரு தம்பியும் அண்ணனும் சான்றாக இருக்கின்றார்கள் இந்த உலகு சொத்து செல்வங்களில் தான் தங்கியிருக்கிறது என்பதற்கு ஆதாரமாக.

தான் உழைத்த பணத்தைக் கொண்டு கடல்கடந்து சுற்றுலாச் செல்பவர்கள் கூட தாம் சுற்றுலாவைப் போக்கும் இடங்களில் பணம் திரட்ட ஏதும் வழியிருக்கின்றதா என்று நோட்டமிடுகின்றனர். பணம் தான் இங்கு அனைத்தையும் தீர்மானிக்கும் சக்தியாக இருந்துகொண்டிருக்கின்றது. இரவு - பகல், வெயில் - மழை,குளிர் பாராது உழைக்கும் பணத்தில் நாம் மிகுந்த அவதானத்துடன் இருக்க வேண்டும். நான் இங்கு சில விடயங்களை சொல்ல விரும்புகிறேன். நாம் இன்னும் பணக்காரர்களாகாததற்கு ம்ம்ம்ம்ம் நாம் இன்னும் ஏழைகளாக இருப்பதற்கு அவைகளும் காரணமாக இருக்கலாம்.

மேலதிக செலவுகள்

பண்டிகைக்கால செலவுகள், திடீர் சுகயீனம் காரணமாக ஏற்படும் செலவுகள் போன்றவற்றை இங்கு நான் மேலதிக செலவுகளாக சொல்லவில்லை. ஏனெனில் ஒவ்வொரு குடும்பத்திலும் இவற்றுக்கென்று சிறு சேமிப்பு இருக்கும் அதனைக் கொண்டு இத் திடீர் செலவுகளை ஈடு செய்ய முடியும். மாறாக வீட்டுக்கு வந்திருக்கும் சொந்த பந்தங்களுக்காக தேவைக்கு அதிகமான சிற்றூண்டிகள்,குடிபாணங்களை வாங்குவதும் பாவணையின் பின் மேலதிகமானதை வீசிவிடுவதும்,பகட்டுக்காக விலையுயர்ந்ததும் நாகரீகமானது என்றும் சொல்லப்படும் ஆடைகளை கொள்வனவு செய்வது, இரண்டு நாட்களின் பின்னர் அவைகளை உடுத்துவதைத் தவிர்ப்பதும், முக்கியமாக செல்பேசிக்காக செலவிடுவது மணிக்கணக்கில் பேசுவதும் அதற்காக ரீ சார்ச் செய்வதும் இவை போன்றவை.

போதிய அளவு சேமிப்பின்மை

குடும்பங்களில் ஏதோ சின்னதாக ஒரு சேமிப்பு இருக்கும். நான் முன்னர் குறிப்பிட்டது போல அவைகள் திடீரென ஏற்படும் செலவுகளுக்கு ஈடு செய்யப்படுவதால், பிள்ளைகளுக்கு பிரபல்ய பாடசாலைகளில் கல்வி கற்கும் வாய்ப்பு கிடைக்கும் போது அவ் வாய்ப்பு தவறப்படலாம். அல்லது பிள்ளைகளின் வேறு பல கல்லூரித் தேவைகளை பூர்த்தி செய்ய முடியாமல் போகலாம். அல்லது சேமிப்பின் அளவுக்கேற்ற வகையில் இலாபத்தில் சொத்தொன்று கொள்வனவு செய்ய வாய்ப்பிருந்தும் தவறப்படலாம். ஏனைய தேவைகளுக்கு கடன் பட வேண்டிய நிலையிலிருந்து தவிர்த்துக் கொள்ள சேமிப்பின் அளவில் கவனம் செலுத்துதல் அவசியமாகும்.

சிறந்த திட்டமிடல் இன்மை

திட்டமிடல் என்பதை விட எதிர்காலம் பற்றி போதிய தெளிவின்மை என்றே சொல்லலாம். நாட்டின் பொருளாதார நிலைமை குறிப்பாக பணவீக்க , பணச் சுருக்க நிலைமைகள் கருத்தில் கொள்ளப்படல் வேண்டும். எதிர்காலத்தில் குறிப்பிட்ட சொத்தொன்றை கொள்வனவு செய்வதற்குத் திட்டமிட்டிருந்தால் நாட்டுப் பணத்தின் தற்காலப் போக்கு பற்றிய தெளிவைப் பெற்று அதற்கு தகுந்தாற்போல் சொத்தின் பெறுமதியை நிர்ணயித்து கொள்வனவிற்கான அத்திவாரமிடல் வேண்டும். நாட்டில் பணவீக்கமிருப்பின் எதிர்காலத்தில் மேலதிக செலவு தவிர்க்க முடியாததாயிருக்கும். சொத்துக் கொள்வனவும் பகல் கனவாய் போய்விடும்.

பிந்திய முயற்சி

வங்கிகளிலோ அல்லது வேறு யாரிடமோ கடன் பெற்றிருப்பின் அக் கடனை அடைப்பதற்காக மட்டுமே தங்கள் வருமானத்தில் சிறு பகுதியை சேமிக்கும் பழக்கம் கொண்டிருத்தல் மேலும் சேமிப்பின் அவசியத்தை காலம் கடந்து உணர்ந்துகொள்ளல் இதனால் நமது சொத்துக் கொள்வனவு செய்யும் கனவும் தடைப்பட்டுச் செல்கின்றது. இன்னும் சந்தைக்குப் பொருத்தமற்ற இலாபமீட்டல் முயற்சிகளில் அல்லது சந்தைக்குப் பொருத்தமாயிருந்தும் நடைமுறைக்கு ஒப்பாகாத முயற்சிகளில் முதலீடு செய்தல்.

அதிர்ஷ்ட்டத்தை நம்பியிருத்தல்

பங்குச் சந்தைகளிலோ அல்லது பந்தயங்களிலோ சொற்ப தொகையை முதலீடு செய்துவிட்டு என்றாவது ஒரு நாள் நமக்கும் அதிர்ஷ்டம் கிட்டும் என்று இலவு காத்த கிளி போல அதிர்ஷ்ட்டத்தையே நம்பியிருத்தல். அதே போல தினமும் சேமிக்கக் கூடிய சந்தர்ப்பம் இருந்தும் அப் பணத்தினை லொட்டரி சீட்டுகளில் விரயம் செய்தல். பதவியுயர்வு அல்லது சம்பள உயர்வு கிட்டுமென நம்பியிருத்தல்

எல்லாமே விதி என்றிருத்தல்

ஏழையாகவே பிறந்திட்டோம் ஏழையாகவே செத்து மடிவோம் எல்லாமே விதி என்று சொல்லிக் கொண்டு பணமீட்டல் முயற்சிகளில் ஈடுபடாமல் இருத்தல். அல்லது நான் பணக்காரனாக வருவேன் என்று விதியில் இருந்தால் நான் பணக்காரன் ஆகிவிடுவேன் விதியில் இருக்கும் போது நான் ஏன் மற்றவர்களை தொந்தரவு செய்ய வேண்டும் என்று எந்த வித முதலீடுகளிலும் ஈடுபடாமல் இருத்தல்.

இவைகளைத் தவிர்த்து கடின உழைப்பும் கடின முயற்சியும் இருப்பின் ஏழை எனும் சொல் விரைவில் புழக்கத்திலில்லாமல் போய்விடும்.

கிறுக்குப் பயல் ஏதோ சொல்லிட்டுப் போறேன். தனியா என்னை புலம்ப விட்டுட்டு நீங்களும் ஓடிவிடாம ஏதாவது சொல்லிட்டுப் போங்க... :P

பொழுதுபோக்குகளும் புத்திசாலித்தனமும்

2014-07-03T11:38:00.001+05:30

பொழுதுபோக்கு இந்த வார்த்தைக்கு அடிமையாகாத மனிதன் இல்லையேன்றே சொல்லலாம். சிறு குழந்தை முதல் வயோதிபத்தை ருசித்துக் கொண்டிருப்பவர்கள் என எல்லோருக்குமே பொழுதுபோக்கு அவசியமானதாகவிருக்கின்றது. நீந்துதல், செஸ் விளையாடுதல், புத்தகம் படித்தல்,வீடியோ கேம்ஸ் விளையாடுதல், புகைப்படமெடுத்தல், நல்ல சினிமாக்களை பார்த்தல்,மீன் பிடித்தல், குழந்தைகளோடு பொழுதைக் கழித்தல் என இப்படி நீண்டதொரு பட்டியலை பொழுதுபோக்கினுள் அடக்கலாம் . இவற்றில் எது பிரயோசனமானது, அறிவை வளர்க்கக் கூடியது எது பிரயோசனமற்றது என்றெல்லாம் நாம் கவனிப்பது கிடையாது. காரணம் எப்படியோ எமது ஓய்வு நேரம் கழிந்தால் சரி என்ற எண்ணத்தில் நாம் இருப்பதனாலாகும்.

எம்மில் சிலர் தொலைக்காட்சிகளில் முகம் புதைத்தும், வீண் பேச்சுக்களிலும் தங்கள் ஓய்வு நேரங்களை விரயம் செய்கின்றனர் என்பதனையும் ஞாபகப் படுத்திச் செல்கின்றேன்.

நாம் உட்பட நமது குழந்தைகளுக்கு பிரயோசனமானதும் அறிவை வளர்க்கக் கூடியதுமான பொழுதுபோக்குகளைப் பற்றி அறிந்துவைத்திருந்தால் எதிர்காலத்தில் எமது நுண்ணறிவு, பொது அறிவை மேலும் வளர்த்துக் கொள்வதற்கு துணையாக இருக்கும். என்னடா இவன் பொது அறிவு , நுண்ணறிவு என்றெல்லாம் கதைக்கிறானென்று வேற மாதிரி என்னை எடை போட வேண்டாம். பொழுது போக்குக்குத் தான் எழுதுகிறேன். நாலு பேருக்கு உதவியதென்றால் சின்னதாய் ஒரு மனதிருப்தி கிடைக்கும். இங்க எல்லோரும் சொல்லுவாங்களே நாலு பேருக்கு நல்லது நடக்குமென்றால் எதுவும் செய்யலாமென்று அது போலதான் இதுவும் :). எமக்குப் பிரயோசனப்படுமென்று சொல்லப்படுகின்ற ஒரு சில பொழுது போக்குகளை குறிப்பிடுகிறேன்.

பிற நாட்டு மொழிகளைக் கற்றுக் கொள்ளுதல்

இது பொழுதுபோக்காக அமைவது மட்டுமல்லாமல் எமது மொழியியல் திறனை வளர்த்துக் கொள்ளவும் உதவியாய் இருக்கும். எப்போதுமே ஒரே கலாச்சாரம் ஒரே சமூகம் என்றில்லாமல் பல மொழிகளை அறிவதன் மூலம் அவ் மொழிகளைப் பேசக்கூடிய சமூகங்களின் பழக்கவழக்கங்கள், பண்டிகைகள், திருவிழாக்கள், வரலாறுகள் போன்றவற்றை எம்மால் அறிய முடிவதுடன் வித்தியாசமான ஒரு அனுபவத்தினையும் பெற்றுக் கொள்ளலாம். எமது குழந்தைகளுக்கு இந்த பொழுது போக்கின் நன்மைகளை எடுத்துச் சொல்லி குழந்தைப் பருவத்திலேயே பல மொழிகளில் தேர்ச்சி பெற்றவர்களாக அவர்களை மாற்றினால் அவர்களின் நட்பு வட்டம் கடல் கடந்ததாய் அமைந்து விடுவதுடன், பல மொழிகளிலுமுள்ள புத்தகங்களையும், வலைத்தளங்களையும் படிக்கக் கூடியதாய் இருக்கும்.

வீடியோ கேம்ஸ் விளையாடுதல்

குழந்தைகளுக்கு மிகவும் பிடித்த பொழுதுபோக்கும் சாதனமாக இவைகள் இருக்கின்றன. ஒரு வகையில் வாழ்க்கைப் பயிற்சி என்றே இதனை எடுத்துக் கொள்ளலாம். இதில் எல்லா வகையான கேம்ஸ் ளையும் சொல்ல முடியாது. உள்ளத்தில் வன்முறைகளைத் தோற்றுவிக்கக் கூடிய கேம்ஸ்களைத் தவிர்த்தல் நல்லது. எமது செயற்பாடுகள், பார்வை போன்றவற்றை ஒருங்கிணைத்து ஒரே இலக்கை நோக்கி பயணிப்பதற்கு ஏதுவாய் இவைகள் அமையும். புதிய சிந்தனைகள் ,மாற்றுவழிகள் போன்றவைகளை விரைவாக பெற்றுக் கொள்ளக் கூடியதாக இருக்கும்.

புதிர்கள்

புதிர்கள் பிடிக்காதவர்கள் யாருமேயில்லை. மிகவும் சுவாரஷ்யம் மிகுந்த பொழுதுபோக்கு. சிறு வயதுகளில் பத்திரிகைகளில் கண்டிருப்போம் குறுக்கெழுத்துப் போட்டியாக. சில வகைப் புதிர்கள் எரிச்சலூட்டக் கூடியவைகளாகவும் இருக்கும். அவைகளில் கொஞ்சம் அதிக கவனம் எடுப்போமேயானால் இறுதி வரை தீர்வு காணாமல் விட்டுச் செல்ல மனம் இடமளிக்காது. பிரயாணங்களின் போது நல்ல துணையாக இருக்கும் பொழுதுபோக்காக இருப்பது மட்டுமல்லாமல் எந்தவொரு விடயத்தையும் அதன் சாதக, பாதக விடயங்களை முன்னிறுத்தி அனுகுவதற்கு அடிப்படையாய் அமையும்.

நாணயங்கள் மற்றும் ஏனைய பொருட்களை சேகரித்தல்

நிச்சயமாக இன்னுமொரு சிறந்த பொழுதுபோக்காக இதை நான் கூறுவேன். எம்மைச் சுற்றியுள்ள உலகு பற்றி மேலும் பல சுவாரஷ்யமான தகவல்களைப் பெறக் கூடியதாக இருப்பதுடன் சில சமயங்களில் எதிர்கால வரலாற்றில் எமது பெயரை இடம் பெறச் செய்யக் கூடியதாகவும் அமைந்துவிடும். அரிய வகை நாணயங்கள், முத்திரைகள், மற்றும் பிற பொருட்களை சேகரிப்பதன் மூலம் அவை பற்றிய தகவல்களை தேடி அறிந்துகொள்ள முடிவதுடன் முன்னோர்களின் வரலாற்றுக்கு உயிரூட்டியதாகவும் அமைந்துவிடுகின்றது. அரிய பொருட்களை சேகரிக்கும் ஆசை மேலும் மேலும் அதிகரிக்குமானால் அது தொடர்பான மேற்படிப்புகளை படிப்பதனூடாக இந்த உலகத்தை அரச செலவுகளினூடே சுற்றிப் பார்க்கும் சந்தர்ப்பமும் கிட்டும்.

வாசிப்பு

சந்தேகத்திற்கிடமில்லாமல் மிகவும் அழகான பொழுதுபோக்காக வாசித்தலை எடுக்கலாம். கோடிக் கணக்கான புத்தகங்கள் பல மொழிகளிலும் உள்ளன. ஒரு மனிதன் இதுவரை இவைகளில் 1 வீதத்தையேனும் தன் வாழ்நாளில் வாசிக்கவில்லையென்றும் சொல்லப்படுகின்றது. நான் முதலாவதாக குறிப்பிட்டிருக்கும் பொழுதுபோக்கிற்கும் இதற்கும் நெருங்கிய தொடர்பிருக்கின்றது. நாம் சிறந்த மனிதனாக இருப்பதற்கு வாசித்தல் பிரதானமாய் அமைகின்றது. இந்த உலகோடு நாம் பேசக்கூடிய ஒரு ஊடகமாக வாசித்தலை கொள்ளலாம்.

கிறுக்குப் பயல் ஏதோ சொல்லிட்டுப் போறான் என்று விட்டு விடாமல். நீங்களும் ஏதாவது சொல்லிட்டுப் போங்களேன் :)

அருகில் யார் ?

2014-06-30T23:03:00.002+05:30

எல்லோருக்கும் வெற்றியடைதல் பிடிக்கும் வெற்றியை விரும்பாதவர்கள் எவருமிலர் என்றே சொல்லலாம். எதற்கும் முயற்சிக்காதவரை வெற்றியோ தோல்வியோ கிடைப்பதில்லை எனலாம். எல்லோர் வாழ்விலும் குறிக்கோள் அல்லது இலட்சியமென்று ஒரு மையப் புள்ளி இருக்கும். வாழ்வின் அனைத்துச் செயற்பாடுகளும் இந்த மையப் புள்ளியை பிரதானமாக வைத்தே நகர்த்தப்படுகின்றன. சிலர் மிக இலகுவாகவும், இன்னும் பலர் மிக சிரமத்தின் மத்தியிலும் இந்த மையப் புள்ளியை அடைந்துகொள்கின்றார்கள். பலர் மையப் புள்ளியை அடையாமலேயே இயற்கையெய்வதும் தவிர்க்கமுடியாததாய் அமைந்துவிடுகின்றது.

பிள்ளைகளின் இலட்சியத்தின் மீது அதிக சிரத்தையெடுப்பவர்களாக பெற்றோர்களே இருக்கின்றார்கள் என்பது உண்மை. தம் பிள்ளைகளின் ஒவ்வொரு அசைவையும் மிக நுணுக்கமாக அவதானித்து அதற்குத் தகுந்த அறிவுரைகளை வழங்குவதன் மூலம் தம் பிள்ளைகளை சாதனையாளர்களா மாற்றிவிடுகின்ற பெற்றோர்களும் இருக்கின்றார்கள். இப்படியான பெற்றோர்கள் தம் பிள்ளைகளிடத்தில் அடிக்கடி சொல்லும் மந்திர வார்த்தையாக நல்ல நண்பர்களோடு சேர்ந்து கொள் என்பதாகத்தான் இருக்கும். இங்கு பெற்றோர்கள் சொல்லும் நல்ல நண்பர்கள் என்பது சிந்தனை, இலட்சியம்,பழக்கவழக்கங்கள் போன்றவற்றில் தூய எண்ணம் கொண்டவர்களையாகும்.

சில சந்தர்ப்பங்களில் பெற்றோர்களில் சிலர் தம் பிள்ளைகளுக்கு நல்ல அறிவுரைகளைக் கூறிவிட்டுத் தாங்கள் அவற்றை கடைப்பிடிக்காமல் மனம் போன போக்கில் செயற்படுகின்றனர். இப்படியான பெற்றோர்களினால் பிள்ளைகள் தங்களது இலட்சியங்களை அடைந்துகொள்ளவதில் தாமதமாகின்றனர். நிச்சயமாக பெற்றோர்கள் இவ்விடத்தில் மிகவும் அவதானமாக இருத்தல் வேண்டும். பிள்ளைகள் சந்திக்கின்ற ஆசிரியர்கள், நண்பர்கள் மற்றும் ஏனையவர்களை விட பிள்ளைகள் மத்தியில் மிகவும் அருகிலும், அதிக நேரமும் இருப்பவர்கள் பெற்றோர்களே. தனக்குத் தேவையான அனுபவங்கள் மற்றும் அறிவுரைகளைக் பிள்ளைகள், ஆசிரியர்கள், நண்பர்கள் மற்றும் ஏனையவர்களிடமிருந்து கற்றுக் கொள்வதை விட பெற்றோர்களிடமிருந்து கற்றுக் கொள்ள அதிக வாய்ப்புக்கள் இருக்கின்றன. ஆகவே, பெற்றோர்கள் பிள்ளைகளுக்குச் சொல்லும் மந்திர வார்த்தைகளில் பெற்றோர்களே அதிகம் பத்தியம் காக்கவேண்டியவர்களாக இருக்கின்றனர்.

நாம் அடிப்படையிலேயே இன்னொருவர் சார்ந்துதான் வாழப் பழகிக் கொண்டோம். அதற்கு நாம் வசிக்கும் மற்றும் நமது பொருளாதார சூழல்களையும் காரணமாய்ச் சொல்லலாம். உதாரணத்திற்காக சொல்கிறேன் புதிதாக ஒரு பொருளை தமது நண்பன் வைத்திருக்கக் கண்டால் அது போன்ற ஒரு பொருள் தனக்கும் வேண்டுமென்று நம் குழந்தைப் பருவங்களில் நமது பெற்றோர்களை தொந்தரவு செய்திருப்போம். இப்போது எம் குழந்தைகள் எம்மைத் தொந்தரவு செய்கின்றன. இதனை நாம் சாதாரணமானதாக எடுத்துக்கொள்ள முடியாது. இதுவே நாமும் நமது பிள்ளைகளும் இன்னொருவர் சார்ந்து வாழப்பழகுவதற்கு அடிப்படையாய் அமைந்துவிடுகின்றது. சார்ந்து வாழ்தல் சரியா பிழையா என்பதற்கு தீர்வுகாண நான் விழையவில்லை. சார்ந்து வாழ்தல் என்பது வாழ்வில் அவசியமானதாகவிருந்தால் அது எப்படியிருக்க வேண்டும், யாரை நோக்கியதாக நம் சார்தல் இருக்க வேண்டும் என்பதையே பேசுகிறேன்.

மேலும் இருவர் பேசிக்கொண்டிருக்கும் போது எனக்கு தூக்கும் வருவது போன்று இருக்கின்றது என்று ஒருத்தர் அவ்விடத்தில் கூறினால், மற்றவரும் எனக்கும் கூட தூக்கம் வருவது போன்றுதான் இருக்கிறது என்று கூறி அவர்கள் பேசிக்கொண்ட விடயத்திற்கு முற்றுப் புள்ளி வைத்துவிடுவதனை நாம் காணலாம். இன்னும் இலேசாகச் சொல்வதென்றால் பேசிக் கொண்டிருக்கும் இருவரில் ஒருவருக்கு கொட்டாவி எழுமானால் மற்றவரும் அவருக்குப் போட்டியாக கொட்டாவி விடுவதனை நம் அன்றாட வாழ்வில் காண்கிறோம். இதுவும் ஒருவகையில் சார்தலே. இதனை இயற்கை என்று எடுத்துக் கொள்ளவும் முடியாது.

இரவு நேரங்களில் வாகணமோட்டும் சாரதிகள் உற்சாகமான, கலகலப்பாக பேசக் கூடிய யாரைவாது அருகில் வைத்திருக்க விரும்புவார்கள். இதன் மூலம் அசதி, பயணத்தின் தொலைவு, தூக்கம் என்பன சாரதிக்கு மறக்கடிக்கப்பட்டு பயணத்தை எவ்வித ஆபத்துக்களுமின்றி நிறைவுக்குக் கொண்டுவர முடியும். மாற்றமாக அமையுமாக இருந்தால் வாகணத்தில் பயணிக்கும் அனைவரும் ஆபத்தை எதிர்நோக்க வேண்டியிருக்கும். ஏனெனில், சாரதியும் எம் சமூகத்தைச் சேர்ந்தவராதலால் அவரின் சார்தலும் எமக்கு சமனானதே.

ஒரு சில ரூபாய்க்களை நோக்கமாகக் கொண்டு வாகணமோட்டும் சாரதிகள் தன் இலக்கு சரியாக நிறைவேற மிகவும் சிறந்த தெரிவுகளையே தம் அருகில் வைத்திருக்க விரும்பும் போது, வாழ்க்கையெனும் வாகணத்தையோட்டும் சாரதியாக நாம் ஒவ்வொருவரும் நமக்கு அருகில் எப்படிப்பட்டவரை வைத்திருக்க வேண்டுமென்பதனை தீர்மானிப்பதில் தெளிவாகவும் அவதானமாகவும் இருக்க வேண்டும்.

நமக்கென்று ஒரு மையப் புள்ளி இருக்கின்றது. அது சார்ந்துதான் நாம் வாழ்க்கையெனும் வாகணத்தை ஓட்டவிருக்கின்றோம். ஆகவே நமது மையப் புள்ளி சார்ந்தவர்களை நம் அருகில் வைத்துக் கொண்டால், வாழ்வு உற்சாகமாகவும் கலகலப்பாகவும் இருப்பதுடன், நமது இலக்கும் எவ்வித பிரச்சனைகளுமின்றி அடைந்துகொள்ளப்படும்.

கிறுக்குப் பயல் ஏதோ சொல்லிட்டுப் போறேன். தனியா என்னை விட்டுட்டு நீங்களும் ஓடிவிடாம ஏதாவது சொல்லிட்டுப் போங்க... :P

பேஸ்புக்கிற்கு ஒரு பகிரங்க மடல்

2014-03-24T10:48:00.000+05:30

அன்புள்ள பேஸ்புக்...

நானும் நீயும் கொண்ட நட்புக்கு வருடம் ஐந்து முடிவடையப் போகின்றது. இடைப்பட்ட இந்த காலத்தில் என்னால் செய்யப்பட்ட தவறுகளைப் புரிந்துகொண்டு அதனை உரிய நேரத்தில். உரிய இடத்தில் உரிமையுடன் சுட்டிக் காட்டி திருத்தச் சொல்லியிருந்தாய், நானும் திருத்திக் கொண்டேன் அதற்கு நான் கோடி நன்றிகளைச் சொல்கிறேன். நீ கூட எனக்குப் பிடிக்காத சில விடயங்களைச் செய்துகொண்டுதான் இருந்தாய். அவற்றை நான் பெரிதுபடுத்தவில்லை. நீ பிடிவாதக்காரன் உன் தவறுகளை உன்னிடமே சுட்டிக் காட்டுவதை விரும்பவுமாட்டாய் அதனை ஒரு போதும் நீ உள்வாங்கி கொள்ளவுமாட்டாய் என்று எனக்குத் தெரியும்.

உன் பழக்க வழக்கங்களைத் திருத்துவதாயின் உன்னைப் பற்றி உன் அப்பாவிடம் முறையிட வேண்டும். உன் அப்பாவோ சிடுமூஞ்சிக் காரர்.முன்பு ஒரு வருடம் எனது நண்பர்களை அதிகாமாக்க எண்ணி சில நண்பர்களுக்குக் கோரிக்கை விடுத்த போது, அது பிடிக்காத உன் அப்பா என்னை ஒரு வாரம் உன்னோடு பேசாமல் தண்டித்தது எனக்கு நன்றாக நினைவிருக்கின்றது. அதனாலும் மேலும் உன் அப்பாவோடு பேசக் கூடிய அளவுக்கு நன்றாக எனக்கு ஆங்கிலம் தெரியாது என்பதனாலும் நான் உன்னுடைய செயல்கள் பற்றி வாய்திறப்பதில்லை. இதனையே உனக்கு சாதகமாக்கிக் கொண்டு நீ மேலும் மேலும் என்னைக் கஷ்டப்படுத்துவது எனக்குப் பிடிக்கவில்லை.

புதியவர்களைக் காணும் வரைதான் பழையவர்கள் நட்பு என்று மனிதர்களுக்குள் சொல்லிக் கொள்வார்கள். இணை பிரியாமல் இணையமான உன்னோடு நான் கொண்ட நட்பையும் மனிதர்கள் நட்புக்குக் ஒப்பாக்கிக் கொண்டாய் என்பதற்கு ஆதாரமாக உன் அண்மைக்கால மாற்றங்கள் அமைந்திருக்கின்றது. நான் மனிதனாக இருப்பதனால்தான் என்னை உன்னிலிருந்து வேறுபடுத்திப் பார்க்கிறாய் என நினைக்கிறேன். ஆனால் நானோ உன்னையும் ஒரு உயிராகவே பார்க்கிறேன் என்பது மட்டும் உனக்கு இதுவரைகாலமும் புரியாமல் இருப்பதுதான் கவலையாகவிருக்கின்றது.

இனிமேலும் என்னால் பொறுமையாக இருக்க முடியாது. சகிக்க முடியாத உன்னுடைய சில செயல்களை உன் அப்பாவிடம் மட்டுமல்ல உன்னோடு நண்பர்களாக இருக்கும் ஒவ்வொருவரிடமும் சொல்லப் போகிறேன்.

முதலில்

உன் முதுகில் பதியப்படும் கருத்துக்கள், தகவல்களை வரிசைப்படுத்தியதாக அதன் கால ஒழுங்கு முறைக்கமைய அது பகிரப்பட்ட நேரத்தின் அடிப்படையில் எனக்குக் காண்பி. பழைய பதிவுகளை முன்னால் கொண்டுவந்து ஏன் கோபத்தை ஏற்படுத்துகிறாய். பழைய பதிவுகளைப் பகிர்கிறார்கள் என்பதற்காகத்தானே நான் பலரை இன்றுவரையும் என்னோடு நட்பாக்கிக் கொள்ளாமல் இருக்கிறேன்.இதைக் கூட நீ அறிந்துதானே இருக்கின்றாய்.

அடுத்து என் நண்பர்கள் இதனை விரும்பியிருக்கிறார்கள், இதற்குக் கருத்திட்டிருக்கிறார்கள் என்று எனக்கும் நான் இதனை விரும்பியிருக்கிறேன் இதற்கு கருத்திட்டிருக்கிறேன் என்று என் நண்பர்களுக்கும் சொல்லிக் கொண்டு திரியாதே. இதனால் பலருடைய எண்ணங்களை என்னால் படிக்க முடியாமல் இருக்கின்றது. மேலும் உன் புத்தியை சரிவர அறியாத புது நண்பர்கள் விரும்பும் அந்தமாதிரியான சமாச்சாரங்களையெல்லாம் எனக்கும் தெரியப்படுத்தாதே. உன்னுடைய இந்த கீழ்த்தரமான செயலால் பலர் உன்னோடு வாழ்நாளிலும் நட்பு வைப்பதில்லை என்ற முடிவிலிருக்கின்றார்கள்.

நீ வேகமானவன், எல்லோருடைய கருத்துக்களையும் காதுதாழ்த்தி கேட்கக் கூடியவன் என்பதற்காகத்தான் இன்றுவரை நான் உட்பட பல நண்பர்கள் உன் நட்பினை இழக்கவிரும்பாமல் உன் பின்னாலேயே சுற்றிச் சுற்றி வந்துகொண்டிருக்கிறோம். உன்னிடம் நாங்கள் அதிகம் எதிர்பார்ப்பது உன் சுறுசுறுப்பு மற்றும் நீ விரும்பும் புதுமைகளைத்தான். அப்படியிருக்க Top Stories எனும் ஒரு வகை வியாதியை நாங்கள் விரும்பாமலேயே எங்களுக்குத் தந்துவிட்டாய். இதனால் நீ பெற்ற இன்பம் என்னவோ? Top Stories இதன் மூலம் புளித்துப் போன தகவல்களை மூஞ்சிக்குக் முன்னாலேயே கிடத்திவிடுகின்றாய்.

அடுத்து ஏதாவது தவறுகளை நான் அறியாமல் செய்திருந்தால்... செய்திருந்தால் இல்லை செய்திருக்கிறேன் இனி செய்யவுமாட்டேன் என்றும் சொல்லவுமுடியாது. அப்படியான சந்தர்ப்பங்களின் போது மிருதுவான வார்த்தைப் பிரயோகங்களைக் கடைப்பிடித்து உரையாடு. எடுத்த எடுப்பில் நீ இந்தத் தவறைச் செய்துவிட்டாய் அதனால் உன்னை நான் இன்றிலிருந்து ப்ளாக் செய்துவிடுகிறேன் என்று பயமுறுத்தும் வார்த்தைகளைக் கூறி அடிவயிற்றில் புளியை கரைக்காதே.சென்ற வாரம் நான் பட்ட பாடு இருக்குதே... அப்பப்பா...

இன்னுமொன்று நானும் நீயும் நமது நண்பர்களும் ஆரம்ப காலங்களில் பேசிக்கொண்டவைகளை மீண்டும் நினைவூட்டிப் பார்க்க முடியாமல் ஞாபகசக்தி இழந்திருப்பதும் கவலையாகவிருக்கின்றது. எத்தனையோ பேருக்கு நல்லது செய்யும் உனக்கு இப்படி ஒரு பலயீனம் இருப்பது இதுவரை உன் அப்பாவுக்குத் தெரியாமல் இருப்பது உனக்கும் உன் அப்பாவுக்குமான உறவில் உள்ள விரிசல்களை காட்டுவதாய் அமைகின்றது. ஒரு முறை உன் குடும்ப வைத்தியர் தவிர்த்து பிறிதொரு வைத்தியரிடம் உன்னைப் பரிசோதனை செய்து பார்.

இறுதியாக உன்னுடைய ஆடைகள், உடலமைப்புக்கள் பற்றி சொல்லியாகவேண்டும். சென்ற வருடம் உன்னுடைய ஆடைகளும் நீ அலங்கரித்துக் கொண்ட விதங்களும் மிகவும் நன்றாகவிருந்தது. ஆனால் இந்தவருட உன்னுடைய அலங்கரிப்புக்கள் பிடிக்கவேயில்லை. என்ன மாதிரி இருக்கிறது. நீ ஒரு வெள்ளைக்கர வீட்டுப் பிள்ளை உன் ஆடை அலங்காரங்களில் நீ அதிகம் சிரத்தையெடுப்பது வரவேற்கத்தக்கது தான் அதற்காக மொக்குத் தனமாகவெல்லாம் அலங்கரித்து எங்களுக்கு வெறுப்பை உண்டுபண்ணாதே... சென்ற வருட அலங்கரிப்பில் என்ன குறை ? யார் கேட்டார்கள் நீ இப்பொது இந்தமாரித்தான் அலங்கரிக்க வேண்டுமென்று ?

ஆரம்பத்தில் நீ இருந்த விதமும் உன் அலங்கரிப்புகளும் தான் என்னை மிகவும் கவர்ந்தது. நீ பழையபடி மாறிவிடு உன் கர்வம் அகங்காரம் எல்லாவற்றையும் தூக்கியெறிந்துவிட்டு உன்னையே நம்பியிருக்கும் உன் நண்பர்களுக்காக ஒரு முறை மாறித்தான் பாரேன்...

இப்படிக்கு
உன் அன்பு
நண்பன்