मंडाण

निर्मल कुमार शर्मा री कवितावां

noreply@blogger.com (Unknown) — Fri, 5 Sep 2014 00:13:00 -0700

निर्मल कुमार शर्मा

*****************************

कवितावां- नुंवै पोत री

हुर्र

लाडूडाँ ज्यूँ भुरती ईंटा, पंजीरी ज्यूँ खिरती रेत
घेवर ज्यूँ छिदियोड़ी छातां, पापड़ ज्यूँ फड़फड़ता गेट
सीरे ज्यूँ पसरयोड़ी नालियाँ, डंकोली ज्यूँ बांका पेम्प
कच्चोडी ज्यूँ थोथी सड़काँ, सम्मोसे ज्यूँ तीखा रेम्प
अजब बनाई रचना, थांरी हुर्र बोलू
थानें इंजीनीयर बतलाऊँ, या हलवाई बोलूं !!

धुर्र

बिन हाथ लगाया, दरद जाण गया
परची मोटी करी तय्यार
जांच कराइ बार लैब स्यूं
रपट पढी ना एक भी बार
सात-आठ एक गोल्याँ लिख दी
पीवण री शीश्याँ दी चार
ठीक हुयो तो महिमा थांरी
मरग्यो तो मालिक री मार

अजब लगावो मजमो, थांरी धुर्र बोलूं
थानें डाक्टर बतलाऊँ, या मदारी बोलूं !!

फुर्र

कालो कोट अर धोळी टाई
हर कालिख री करो सफाई
करियावे चोरी डाले डाका
थें सदा रहो रक्षक याँका
गुंडा - हतियारा फिरे निडर
थांरी किरपा को ही है असर
कचैड़याँ रा थें राजा हो
टके सेर बिक़े बे खाजा हो
बाखड़ में दूध संभालो थें
खळ स्यूं भी तेल निकालो थें

अजब चलावो घाणी, थांरी फुर्र बोलूं
थांने वकील मैं बतलाऊँ, या कि तेली बोलूं !!

सुर्र

वर्दी रो मान टंग्यो खूँटयां
डंडे रो गज़ब रामो थें खेल
मुट्ठी गरम तो खूँ माफ़
नीं बदचलनी में भेजो जेल
दंगा ह्वे या हुवे कतल
बलवो ह्वे ठोकीजे निरबल
हर जुर्म री खबर रेवे थानें
या बात सारी दुनिया जाणे
पण गज री चाल सून आवो थें
जो पड़े दाब तो जांच करो
नीं, यूँ ही ऍफ़ आर लगावो थें

अजब जमाओ रुतबो, थांरी सुर्र बोलूँ
थानेदार कहूं, या, थानें गज गेलो बोलूँ !!

आदमी

आदमी रह्यो न देखो-देखो आज आदमी
आदमी ने खाय रह्यो, देखो आज आदमी !!

धरती बांटी, आभो बांटयो, बाँट डाल्यो नीर भी
धर्म री दीवार खींच, बांटयो मालिक पीर भी !
नैणा रे नीर री, पीर यो न बाँट सक्यो
खेंच डाल्यो लाश सूँ, कफ़न रो कोरो चीर भी !

मिनखपणों मानखे रो भूल गयो आदमी
आदमी ने खाय रह्यो, देखो आज आदमी !!
हाउडे सूँ डरतो चिपतो, भूल गयो छाती बा
भूल्यो संस्कार री, गुरां पढाई पाटी बा !
जायदाद बाप री, में सीर यो न भूल सक्यो
माँ-जाया दूर, भूल्यो माँ रे दूध री मिठास भी !

रिश्तां ने ताकड़ी में, तोल रह्यो आदमी
आदमी ने खाय रह्यो, देखो आज आदमी !!

जीवतां जिमायो कोनी, मरियां मौसर अनाप
ता जिन्दगी उघाड़े लारे, कर रह्या ओढावणी !
माल यूँ उडाय रह्या, ब्याव ज्यूँ मंड्यो है कोई
भूल रह्या है बगत री मार सूँ, बच्यो ना कोई!

झूठी बड़ाई में बड़ाई, खोय रह्यो आदमी
आदमी ने खाय रह्यो, देखो आज आदमी !!

सोवतो जगाणो सोरो, जागतो जगावे कौन
सूजतो भी खाड में, पड़े अहि तो बचावे कौन !
संस्कृति ने छोड़ के, मरजादा ने मरोड़ के
खुद मारे खुद री आतमा, तो बोलो फिर बचावे कौन !

निरमल बणेलो भाईयाँ, फिर आदमी कद आदमी
आदमी ने खाय रह्यो, देखो आज आदमी !!

विधाता बैरी भयो

जिण रे तल़े मिलती शीतळ छाया
फूल्या-फ़ल्या मैं, खेल्या-खाया
सूख्यो बो बट , लुटियो चैण
विधाता बैरी भयो !!

गोद्याँ सुलायो म्हाने, कान्धां झुलायो म्हाने
कोर काळजिये ज्यूँ, हिव चिपकायो म्हाने
फेरया यूँ आज देखो नैण
विधाता बैरी भयो !!

आंगली पकड़ म्हाने चलणो सिखायो
हर आपद सूँ लड़णो सिखायो
आज हुया निरमोही केण
विधाता बैरी भयो !!

जद भी करी हठ, म्हाने मनायो
हेज अणूथो ही, म्हापे लुडायो
आज रूस्या यूँ, बोले नी बैण
विधाता बैरी भयो !!

झेल्या सभी दुःख, खुशी सब बाँटी
सोवाँ मैं सुख सूँ, बे जग रातां काटी
आज सूत्या यूँ, खोले नी नैण
विधाता बैरी भयो !!

रचणा जो थांरी है, थां में समाणी
इतरो निठुर है थूं , या मैं नी जाणी
बिण सांझ ढल्यां आयी रैण
विधाता बैरी भयो !!

जिण रे तल़े मिलती शीतळ छाया
फूल्या-फ़ल्या मैं, खेल्या-खाया
सूख्यो बो बट , लुटियो चैण
विधाता बैरी भयो !!

ओम पुरोहित "कागद" री कवितावां

noreply@blogger.com (Unknown) — Wed, 30 Jul 2014 16:27:00 -0700

ओम पुरोहित "कागद"
****************
भोत अंधारो है

होया करै जेड़ो
है दिन
चोगड़दै पण भंवै
... साव अंधारो
सुरजी नै चिडावंतो !

कुण देखै सूई
जठै लुकग्या हाथ
दिखै ई नीं
खुद रै पगां रो कादो
भोत अंधारो है
थकां सुरजी !

है तो सरी सुरजी
आभै में पकायत
है कठै पण ठाह नीं
फिरग्या आडा
जळबायरा बादळिया !

इयां तो
ढबै नीं सुरजी
निकळसी एक दिन
बादळियां नै फटकार
पळपळावंतो
आभै रै सूंवै बिचाळै !

राजेश कुमार व्यास री कवितावां

noreply@blogger.com (Unknown) — Wed, 30 Jul 2014 16:26:00 -0700

राजेश कुमार व्यास
****************
दो कवितावां

रेतघड़ी

पून धोवै
धोरां मंड्या पगलिया
कीं नीं रैवे बाकी
रेतघड़ी
कण-कण
री करै गिनती
बित्यौड़े नै करती
मुगत।

कविता खोले किवाड़

अंधारै मांय
हाका करती
धमकावती आवै पून
चमके बैरण बीजळी
अर
धोरा उडावती
उपड़े है आंधी
बिण बादळ
बरसै मेह

उंडी आस
हियै री अकड़ सूं चालै सांस
साचाणी
अबखौ है मारग
म्हूं
धमीड़ा खावूं...
सिरजूं आखै जग री पीड़
कविता
खोले

आस रा किवाड़
अबखै बगत।

विनोद स्वामी री कविता

noreply@blogger.com (Unknown) — Wed, 30 Jul 2014 16:24:00 -0700

विनोद स्वामी

******************

आओ, म्हारो घर दिखाऊं

आओ,

म्हारो घर दिखाऊं

जिकै नै फोड़’र अब दूसर बणांऊं

क्यूं कै

अब इण रो जाबक जबाब है।

हरेक कड़ी रै नीचै

लगायोड़ै टग सूं लागै-

ओ भीसम री भांत अेक जोधो है

जिको कोई परण सूं बंध्यो

आपरा पिराण कोनी छोड सकै।

फेर ई मायत री भांत

म्हारी चिंता करै

म्हारो सिर पळूंसै।

लारली दियाळी नै ओ

लालड़ी माटी अर गोबर रै गारै सूं

इस्यो सींगरयो

जाणै कोई

कोडायलो बराती हुवै

अबकै चौमासै पछै

इण री गत इसी होगी

जाणै सै’र री बरात में

कोई सीधो-सो देहाती होवै।

लिप्योड़ो तो ओ

जाणै मा नैं

मुळक’र कैवै हो-

तू दुनिया री सैं सूं तकड़ी दरजी है।

पण

घर गेरती बरियां

म्हारी गत

बीमारी में दुख पांवतै मायत नै

गीता रो अध्याय सुणावण-सी ही।

सैं सूं पैली कस्सी

मंडेरी री ईंट पर पड़ी

जिकी फूटती-फूटती

आंगण री मुट्ठी में

बेल रो एक बीज देगी।

इणरै साथै ई

म्हारी निजरां सामी

कई चौमासा अर झड़ी

मंडेरी माथै

बेल बण पसरग्या।

पण

अचाणचक म्हैं देख्यो कै

दूर बैठी दादी री आंख्यां सूं

एक आंसू निसर्यो है।

म्हनै लाग्यो-

ओ

ईं घर री विदाई सारू गायोड़ो

सैं सूं तकड़ो मौन-गीत है।

म्हे राजी-राजी-सा

अणमणा-उदास-सा

घर सूं मकान तक री जातरा में

भोत दुख पाया।

साच्याणी म्हे

ईं नैं फोड़नो कोनी चावै हा।

पण कांईं करां,

भींता

नीचै-नीचै सूं

पैली कळी

फेर गारो माटी

अर फेर

पुस्ती तकात सूं नटगी।

रातूं

कडि़यां रा कटका निसरता

अर टाबर डरता।

डोरा-डांडां सूं

भूतणी तो कांईं ठाह भाज ई ज्यावै

पण

एक-एक कड़ी री

दो-दो धोबा दीमक किंयां मरै?

कटका जादा निसरै बिंया ईं

म्हारी धीरज री हद पर

धरम अर देवां पर भरोसै रा फूल

हिराळ मारण लाग ज्यावै

नेड़ै-तेडै़ री तो बात ई कांईं करां

दूर-दराज रै देवां री

सवामणी तकात कबूलीज्यै।

घरां

बखारी सूनी अर

आखां रा ठाठिया भरग्या

पण

घर री पार पड़ती कोनी दीसै ही।

ईं घर रै फूटण रो फेर

इतणो दुख क्यूं हो?

ईं रो सैं सूं मोटो कारण

ओ है कै-

म्हारै घर री मंडेरी अर भींत

जिकै रद्दै में मिलै

साळ में बो

फगत अेक रद्दो कोनी

जूनी नगरी है,

ईं री आपरी

एक सभ्यता अर इतिहास है।

ईं रद्दै में

चिडि़यां रा आलणां अर

तरेड़ां में छिपकलियां रा ईंडा है।

म्हारै सागै रैवतां

आं जिनावरां कदी

म्हानै कोई दुख कोनी दियो।

पण म्हे फगत

म्हारै घर नै

नूंवो बणावण सारू

आं रै घरां री

अणदेखी पर उतर आया हां।

म्हारै सामी पड़ी

एक छिपकली री कटेड़ी पूंछ

म्हानै

बकार-बकार कैवै ही कै-

आ बात आछी कोनी।

आळां रै एक जूनै जाळै में

डंड पेलती एक दूक्कड़ी

म्हानै चेतावणी-सी द्यै ही कै-

म्हारै घर रै हाथ लगा दियो तो

ठीक नहीं रैसी।

जद तक

छात अधेड़ी

एक चीड़ै अर चीड़ी

म्हारै असवाड़ै-पसवाड़ै बैठ

बेरो कोनी

म्हानै कितणी गाळां काढी।

भंवरा माटी में बड़ती

एक भीरड़ बरड़ाई,

कूंवाड़ रै कोचरै बड़तो

काळियो भूंड भड़क्यो,

सरदळ री ओट में

टांटियां रो छत्तो तणतणायो,

तरेड़ां में कसारियां

मूंछां फरकाई,

ऊंदरां बिलां सूं नाड़ काढ

ओळमो दियो।

जीव-जिनावरां में मची

इण खळबळी सूं लागै हो कै

म्हैं एक प्यारी-सी दुनियां में

इसी दखल दी है

जिकी सूं भोत खून-खच्चर होसी

अर

जिनावरां रो इतिहास

म्हानै मिनख नहीं

आपरो सैं सूं मोटो दुसमण कैसी।

छात पछै आळा-दियाळा

घर री बरसां पुराणी

एक-एक चीज

कस्सी री चोट सूं

मरती बगै ही।

अचाणचक

भींत सूं पड़्यै एक लेवड़ै

जाणै-

म्हारी यादां री

पुराणी बही रा पाना-सा खोल दिया।

कई पड़तां रै इण लेवड़ै में म्हानै

गाम रै खंदां सूं

तपती दुपारी में

लालड़ी माटी ल्यांवता

लुगायां रा झूलरा दीख्या।

जादा माटी चकण सूं

चणक पड़ेड़ी चमेलकी,

मजरोड़ पडे़ड़ी मीरकी दीसी।

दादी रो करेड़ो धोळक,

बुआ रो लगायोड़ो गारो,

गारै खातर मांग्योड़ो गोबर,

गोबर सूं नट्योड़ी पड़ौसण,

ईं बात सूं रूस्योड़ी मा,

मा सूं बात लेंवती सा’मली ताई,

ताई री चुगली सूं होयोड़ी राड़,

अर

राड़ में बेमतलब कूटीज्योड़ो म्हैं

लेवडै़ कानी देखतो रहग्यो।

घर दूसर बणायां पछै

म्हारो घर

घर कम

अर

एक मकान जादा होग्यो

घर अर मकान में

कांईं फरक होवै?

म्हैं कोनी जाणूं

पण

घर सूं गम्योड़ो

राखूंडो,

माटी में गुद्दी मिला’र

बणायोड़ो हारो,

बाखळ

कोरी रेत

म्हानै कठै सूं ई हेला मारै

जाणै घर

मकान रै नीचै दब्योड़ो कर्रावै।

भागीरथ कांकाणी री कविताचां

noreply@blogger.com (Unknown) — Wed, 20 Nov 2013 16:17:00 -0800

भागीरथ कांकाणी

ओळाव
----------------------
दुनिया की दादागिरी
को ठेको ले राख्यो है
अमेरीका।

शांती'र नाम दुनिया में
करे जुद्ध,लड़ाव देश के लोगा ने
एक दूजा स्यूं।

भेजै आपरी फौजा
देव नुवां-नुवां हथियार
अर शुरू करे एक अंतहीन जुद्ध।

आभै में कांवळा दाईं
उडावै हवाई जहाज
ठोड-ठोड फैंक ब़म।

बिना मिनखा
चाळबाळा हवाई जहाज
डरोण बरपाव कहर।

आग की च्यांरा कानी उठे
लपटा, धुंवारा उठै गुब्बार
दिन-रात हुवै धमाका।

चिखा अर चितकारा सुणीजे
चौफेर दिखै छत-बिछत
हुयोड़ी ळाशा।

गंदक दाई मरे मिनख
डरूं-फरुं लौग-लुगायां भागै
टूटयोड़ा घरा न छोड़।

चिरळी मारै घरां में
सुत्योड़ा टाबरिया
सुण र धमाका बामा रा।

बरसा न बरस चाळै
शांतीर नावं पर
अशांती रो जुद्ध।

मन में बैठ्या
दरिंदै ने तो कोई न कोई
ओळाव चाईजै।
०००

गाँव रो पीपळ
--------------------
गँवाई कुवै के
जिवणे पासै हो पीपंळ
अर पिपंल के पसवाड़े हो
सती दादी रो देवरो।

गौर-ईशर की सवारी जद
कूवै पर आंवती जणा गाँव री
छोरया-छापरया पींपळ रै हैठे
भैळी हुय र गीत गांवती।

नुवों ब्याव हुयोड़ो जोड़ो
सती दादी रै गठजोड़े की
जात देवण आंवतो जणा
पीपळ री छियां आशीष देवंती।

बैसाख के महीना में
भोरान-भोर गाँव री लुगायाँ
पीपळ सींचण ने आंवती
गट्ट पर बैठर कांण्या कैंवती
अर भजन गांवती।

टाबरिया रमता पीपळ की
छियाँ मांय दड़ी र गेडियो
अर लगाता लंम्बा-लंबा
दड़ी का टौरा जेठ-असाड
की गरमी रे मायं।

गौर के मंगरीयां पर पीपऴ
के निचे हुवंती नारा-गाड्या
री दौड़ अर देखतो पुरो गाँव
जीतबाळा ने सराता सगळा।

पण आज पिंपळ कौनी रियो
रेग्यो ळारे गट्टो अर बीरी यादां
आसीस रे ओळावै पीपळ देग्यो
आपरी समूची उमर गाँव ने।
००००

मौज मनास्या खेता में
-------------------------
मौज मनास्यां खेता मे !

धौरा माथै बाँध झुंपड़ो
दौन्यु रैस्या खेता में
सीट्टा मौरस्या मौरण खास्यां
खुपरी खास्यां खेता मे
मौज मनास्यां खेता मे !

खेजड़ळी पर घाल हिंडोळो
हिंडो हिंडस्या सावण में
खाट्टा मिट्ठा खास्या बोरिया
कांकड़ वाला खेता में
मौज मनास्यां खेता मे !

लीलै धान की मीठी सौरभ
गमकै की जद खेता में
अलगोजा पर मूमळ गास्या
धौरां वाला खेता मे
मौज मनास्यां खेता मे !

हेत प्रीत रा कांकड़ डोरड़ा
आपा खोलस्या खेता में
हाथ पकड़ कर कनै बैठस्यां
बाता करस्यां खेता मे
मौज मनास्यां खेता मे !

साख सवाई अबके हुसी
घोटां पोटां बाजरियाँ
सिट्या तोड़स्या कड़ब काटस्या
खळो काढस्यां खेता में
मौज मनास्यां खेता मे !
००००

झूम रही है बाजरियाँ
--------------------------
सोनल वरणा धोंरियाँ पर
मूँग, मोठ लहरावै रे,
मोरण, सीटा और मतीरा
मरवण रे मन भावै रे ।
रे देखो खेता में झूम रही है बाजरियाँ ।।

बरसे सावण - भादवो
मुलके मरुधर माटी रे ,
बणठण चाली तीजणया
हाथी हौदे तीज रे ।
रे देखो बागा में झूल रही है कामणियाँ ।।

होली आवे धूम मचाती
गूंजै फाग धमाल रे,
चँग बजावे, घीनड़ घाले
उड़े रंग गुलाल रे ।
रे देखो होली में नाच रही है फागणियाँ ।।

सरवर बौले सुवटा
बागां बोलै मोर रे,
पणघट चाली गौरड़ी
कर सोलह सिंणगार रे,
रे देखो पणघट पर बाज रही है पायलियाँ ।।

बिरखा रे आवण री बेल्या
चिड़ी नहावै रेत रे,
आज पावणों आवलो
संदेशो देव काग रे ।
रे देखो मेड़ी पर बोल रियो है कागलियो ।।
००००

भागीरथ कांकाणी रा ब्लॉग :
http://santamsukhaya.blogspot.in
http://kumkumkecheente.blogspot.in

कन्हैयालाल भाटी री कवितावां

noreply@blogger.com (Unknown) — Sun, 23 Oct 2011 01:10:00 -0700

कन्हैयालाल भाटी वर्षों से अनुवाक और मौलिक रचनाकार के रूप में सक्रिय हैं। हिंदी, राजस्थानी और गुजराती में परस्पर अनुवाद के माध्यम से जहां आपने विभिन्न रचनाकारों के बीच सम्मान प्राप्त किया है वहीं मौलिक लेखन के रूप में हिंदी और राजस्थानी भाषा में लिखी कहानियां-कविताएं भी पर्याप्त चर्चा में रही हैं। देश की तमाम पत्र-पत्रिकाओं में वर्षों से निरतंर रचनाएं और अनुवाद प्रकाशित, अनुवाद की अनेक पुस्तकें प्रकाशित। कई मान-सम्मान और पुरस्कार प्राप्त।

स्थाई संपर्क: कन्हैया लाल भाटी,

कुनी निवास, छिम्पों का मोहल्ला, गंगाशहर रोड, बीकानेर

00000000000000000000000000000000000000

आभो

ओ आभो

थे जाणो जित्तो

सूनो नीं है,

ओ तो समदर है-

ऊंधो पळटिज्योड़ो

जिण में तिरै

ठाह नीं किण री

बादळां नांव सूं नावां।

***

सूनयाड़

ओ सूनयाड़ म्हारै आंगणै

कठै सूं बापरियो

म्हैं अणमणो होय’र

आज माथो टेकूं

किण रै खवै

कठै है ऐड़ो कोई बेली-संगी

मांय सूं टूट्‌यां पछै

कदै-कदास हळको हुवण खातर

सांम्ही जाय’र काच रै

खुद सूं खुद बाथेड़ा कर’र

***

रेत

आखी रात

बरसतो रैयो आभौ

आखी रात

घुळती रैयी रेत।

आखी रात

पचतो रैयो हाळी

आखी रात

महकती रैयी रेत।

आखी रात

हाळी बीजतो रैयो बीज

आखी रात

उथळ-पुथळ मचावती रैयी रेत।

परभातियै तारै सूं

थोड़ो’क सांत हुयो आभो

परभातियै तारै सूं पैली

सुपनो देखती रैयी रात।

भखावटै-भखावटै

आय उमट्‌यो कागलां रो टोळो।

बैवती रैयी रेत

रेत अर पाणी रै साथै बैयग्या सगळा।

***

म्हैं रेत रो पंखेरू

नीं जाणै क्यूं

आज लखावै ओ जग

म्हनै छोड़’र एकलो

सूयग्यो हुवै

गैरी नींद में।

होळै-होळै चालती पून

म्हारै काणै मन में लखावै

जाणै उजाड़ जंगळ में

किणी मिंदर री फुरकती हुवै-

धजा !

राजकंवरो रो नौलखो

झपटो मार’र लेयगी चिलख

चिलख जिकी थोड़ी’क ताळ पैली

फुरूकै री जंगळ मांय

किणी री धजा दांई

राजकुंवरी री आंख्यां मांय

उपज्यो मून

चणचक खिंडगी कहूंक

एक-एक कर’र झड़ग्यो

सगळो जंगळ

अर बणग्यो मरुथळ।

सूनयाड़ अर मौत बिचाळै

कित्तो’क आंतरो

छटपटीजूं एकलो बण’र

म्हें रेत रो पंखेरू।

***

उडीक

ओ म्हारा बेली

थूं एक दिन चाणचकै

इण घोर रिंधरोही मांय

म्हारो हाथ छोड़ा’र

ठाह नीं कठै जाय’र लुकग्यो

सोच्यो तो म्हैं हो

पण थूं म्हारो ई उस्ताद निकळ्‌यो

म्हैं गुमग्यो म्हारै सूं का थारै सूं ।

म्हैं थनै हेलो पाड्‌तो

ओ म्हारा बेली....!

पड़ूतर में....

सूनी गूंग कटार ज्यूं

घुसगी म्हारै काळजै मांय

म्हैं हाल तांई अठै’ई बैठो हूं

थनै उडीकतो !

होळै-होळै आ रिंधरोही बदळती जाय रैयी है

सूख रैया है ऐ सगळा रूंख अर तळाव

छानो पड़ग्तो है पंखेरूवां रो हाको

हेताळुआं री रगां मांय थमग्यो है लोही

स्सै जणा चितबांगा हुयग्या

घर रै आगै कळलाटियो मचग्यो

थारै टाबरां अर बेलियां री आंख्यां सूं

आंसू थम कोनी रैया है

बां नै धीजो बधावां पण

अबै भरोसो नीं रह्‌यो म्हारां पर

म्हैं इण चितराम ने देख’र

साव सूनो हुयग्यो

अर म्हनै लखायो कै

ई रिंधरोही री हरियाळी खत्म होग्यी है

भींत्यां बण’र ऊभा है सगळा मारग

म्हनै होळै होळै घेर रह्‌या है।

लोही मांत बैवण लागग्यो है इकलापो

सांस में दावानळ री गंध घुळगी है

बखत थमग्यो है

रात अर दिन एकसा हुयग्या है

रोसणी अर अंधारो एक हुयग्यो है।

***

श्री कन्हैयालाल भाटी

श्याम सुंदर भारती री दोय कवितावां

noreply@blogger.com (Unknown) — Sun, 25 Sep 2011 15:11:00 -0700

आपां मिळिया?

यूं मिळिया आपां

म्हैं थां सूं मिळियौ

जकौ म्हैं नीं हौ

थां ई म्हां सूं मिळिया

जका थां नीं हा

मिळतां पांण

म्हैं तपाक सूं हाथ आगै कियौ

जकौ म्हां’रौ नीं हौ

थां ई झट हाथ लांबौ कियौ

जकौ थां’रौ नीं हौ

यूं आपां मिळ नै

दूजा-दूजा हाथ मिळाया

दूजी-दूजी मुळक पसारी

खिणखौळै चढिया

घणी सारी दूजी-दूजी बातां करी

इण भांत बार-बार

दूजा-दूजा आपां

एक-दूजे सूं मिळिया

आपां कदैई मिळिया ?

***

कविता अर जीवण

कवि उदास है/अणमणौ है/दुखी है

कवि नै सिकायत है

के लोग हिरदै विहूणा

संवेदणा हीण हुयगा है

के लोग आजकाल कविता नीं पढे

के लोगां रै जीवण सूं कविता अलोप हुयगी

कवि नै सिकायत है

पण बतावौ कवि

के कळी चढायोड़ा सबद

भासा रौ कपट-जाळ/छळ/आडंबर

हवाई क्रांति-विचार

थोथै दरसण रा धधकता अगनमुखी

अणजाणां बिंब/अपरोगा-ओपरा प्रतीक

अणमेळ मुहावरा

अरथ बायरी औळियां

के मगज री अंधारी गुफा सूं निकळता

विडरूप औरांगऊटांग

एब्स्ट्रेक्ट/अमूरतन

बतावौ कवि

आं में कठै है जीवण

सवाल है के

जीवण सूं कविता अलोप हुई है

के कविता सूं जीवण

कविता में जीवण नीं होसी

तौ लोग ‘जय हनुमान ज्ञान गुण सागर’ गाता रैसी

नै पोथियां ताक पे सजाता रैसी

जिण पानै माथै कविता छपसी

उण सूं हींग री पुड़िया बंधसी

***

शंकरसिंह राजपुरोहित री कवितावां

noreply@blogger.com (Unknown) — Wed, 31 Aug 2011 08:05:00 -0700

फोग रो गुरुमंतर

लूआं रा लपरका
अर
आंधी रा झपरकां सूं आयगी
फोग रै मूंडै फेफी,
फेरूं ई ऊभो है थिर
मरुधरा माथै
सींव रै रुखाळै सो अड़ीजंत।

तिरकाळ तावड़ै सूं
बुझावै आपरी तिरस
लीलीछम कूंपळा बण जावै
किणी ऊंट री जुगाळी
अर बीज बधावै-
रायतै रौ स्वाद।

मन में कठै है खोट ?
सींव रा रुखाळा ई लेवै
जिणरी ओट।

जोग लियोड़ो सो फोग
दुनिया नैं देवै
गिरस्थी चलावण रो गुरुमंतर
अर
संतां नैं सीख।

****

खेजड़ी री ख्यात

धोरा-धरती री धणियाणी
कै करसै री कांमण ?
वित्त-मवेषियां री मालकण मानूं
या मिनख रै थरप्योड़ा
थानां-भगवानां री छिंयां ?

पण कोनीं थूं पूगळ री मूमल
ना रूप री रंभा पदमण
किंया कैऊं रूठी-राणी ?
थूं तो है--
इमरती देवी रो इमरत,
झांसी री राणी ज्यूं
इण ऊबड़-खाबड़ आंगणै
ठौड़-ठौड़ ऊभी है थूं।

थारा खोखा बाजै--
जेठ री जळेबी,
ऊंट-बकरियां अर भेडां री
भूख मिटावै थारा लूंग,
मरुधरा रै मिनख री कल्पना रौ
साकार रूंख है थूं,
थारी छिदी-माड़ी छिंया में बैठ
चींतै बो--
सगळां रै सुख री कामना।

****

सत्यदीप री कवितावां

noreply@blogger.com (Unknown) — Mon, 16 May 2011 16:22:00 -0700

छेती
काल ही आज भी है
चुंच ने दाना
बीचे मोकळी
चुंच भागे
पान्ख्या फटकार
दाना साम्ही
न जोगी पून
फैंक दे और आगे
दाना चुंच री
पकड़ स्यु
पान्ख्या रो थाकनो
तपते तावड़े हांफ्नो
दाना रेसी कद ताई
सुपने रो सुवाद
छेती आज भी है
ही काल भी
बा दाना / बा मुहडा
जिका भेलप में है
एक दूजे री
पण
खावने स्यु पेल्या
मुहडा भिन्चिजे /तनीजे
एक दूजे साम्ही
मिनक्या ज्यू
खावे नी /ढ़ोल दे
दाना चोफेर /चोगड़ दे
कुण जाणे /स्यापित है
दाना /चुंच /मुहंडा
छेती काल भी ही
आज भी है
दाना /चुंच बिचाले
***

सुण बर्बरीक
जद जद लड़सी
धरती जाया
सुवारथा रा नरमेध
चाइजसी बाने
सचे झूट री /झूटे साच री
गवाही रा
छल छंद
तोड्सी लड़ाया तेवड नीया
रिश्ते रा सिगला तागा
पोमासी तन्ने
बलिदान रे समचे
देह त्याग सारु/काट लेसी
थारो सिर
टिका देसी ऊँचे डूंगर री
टेकरी माथे
ऐ नरमेध लड़ाका
ख्प्या पाछे मानखो
पुछ्सी आय तन्ने
संच रो सबूत
ओ सिग्लो नरमेध
टिक्यो है थारे कटे
सिर री गवाही माथे
सुण बर्बरीक
***

सर्रर्र्डका
(1)
साच
के सोच
गाजर आली
पुंगी
थारे हाथ
धिके जीते धिका
नीं तोड़ खा
(2)
आण बस
डांफे चढ़यो
क्यू आंख्या फाड़े
आ तो सदाई हुवै
लुंठै रो डोको
डांग फाड़ै
(3)
बाल्यो बासती
सेकन नै सिट्टा
चाब्या पेली सिलग गयो
गांव
राख़ में / राम कुचरा
(4)
नीं तपे तेज
ढकिज गयो आभो
काली पिळी रेत स्यु
आन्धारो हड हड हँसे
सूरज सिंझ्या पेली
थक्ग्यो
(5)
बाजे अन थक ढोल
गावे गीत कागला
अबे जीमसी
जमानो एकठो
टूट गया राम्तिया
रम्या पेली
***

डांखळा
(1)
गणेशजी रो बेटो हूँ सिमर के गणेशजी
उन्दरा ने लाडू देवू मेटन कलेश जी
थोड़ा थारा थोड़ा म्हारा
पोत उघाडन ने हारा
सुरसती ने भेंट है ऐ डंखला भालेस जी

(2)
ग्यान रो गुमारीयो हुया करता भाई जी
आखे दिन हांडता चिड़ता भोजाई जी
ढेलो नीं कमावता
ठाला बैठ्या खावतां
हथाया में बैठ बैठ ऊमर गमाई जी

(3)
नानी आलो धन पायो नित राड़ी छोगलों
बिना बातया राड़ रोप ओग लियो चोख्लो
रोज राखे घोचो
सोच रो हो ओछो
मावे क्यां में बापरो घिंटयाल हुयो फोगलो

(4)
साहब सूं सपनै में डरतो बाबू सुंदर तेलियो
बूट कोनी बाढ्तो मोकलो ही कैय लियो
डूजो कान धरियोड़ो हो
मांय लो मरियोड़ो हो
चरासण सुं जूत खाय रिटायर्मेंट लेलियो
***

बारै दुर्गन्ध मांय अमुझो
बारै दुर्गन्ध मांय अमुझो बंद करसी के खोलसी
जंग लाग्योड़ा ऐ दरुजा चर्ड़क चू तो बोलसी
कूड़े कथ स्यूं न्याय मिलैला
झूट रै कांटे साच तुलैला
न्याय रै आँख्या जद तक पटी
ताकरिया तो डोलसी जंग ......
ठडे सूं से ठाकर बनसी
बिना बात री मुन्छ्या तनसी
लूंठा री आ करड लड़ाई
जहर प्यालिया घोलसी जंग.......
धोला पिला गाभा धारया
पान करै मिनखा नै मारया
तने समझ के चोखो चारो
जाड बिचालै रोलसी जंग.......
समो बण्यो इसो कलिहारो
निबलो जीवे बैच जमारो
लूंठा डोको देय परा अब
नितरी छाती छोलसी जंग.....
***

भाटो भाटो भोमियो
भाटो भाटो भोमियो किण किण स्यूं डरू
किण रे चो डा बाकला किण रे पगां पडू
ठग ठाकर एखठा सींग तोल ऱ्या
दादोजी रै मुहं काका पीतर बोलऱ्या
बारलै भाचिडा टूटे दरूजा ऐ सहेर रा
सोधा टांगी बांस माथै लो आली पोलर्या
झोड़ रा झापिड लागै खुले म्हारे डील ने
कुमानसा रै बीच कई जबतो करू भाटो...
धोलती धिन्गानी फोज माजने ने पाड़ रेई
अड़वा भरोसे खेत खाय पूरो बाड़ रेई
नींद स्यूं नीं ओझकै किरसा री कोमड़ी
भींत नै भाचीड़ देय भीड़ पलो झाड़ रेई
पोतड़ा में पोत जावे किण री काण करू भाटो .....
लूट री है छुट अठै मच रेई रोल डट
गुलगुला उछाल देख चीला झंपे चटपट
भोपा री पंचायती ब्याव नै बिगाड़ नाख्यो
भानजा रे ब्याव में मासिया री सटपट
भैंस चुंगै बछड़ा पाडिया अरडावै है
बाळ दियो किसे ठिये च्याननो करू भाटो......
उजला तो कालमस आँख में खुबै
जोर कोनी पग्थ्ल्या कंकर चुभै
चालने तो चाल्ल्यु हद तोड़ डील री
पगा री रुखाली आला जुतिया खुबै
पैंडे री नीं थाह आँख्या में अंधारो है
पिंडी थक धूज रेई हंप्तो फिरू भाटो.......
***

हलू गलू रे भाई
हलू गलू रे भाई हलू गलू पुरो समदर तिन चलू
चुके मत चोहान लुट ले ओ सारो गुड गलू गलू
राम्तिया रिम्झोल करै बस साख बधावै पाटा री
बण निसरमा की नीं सोचै मन में फसतै फांटारी
दोया पासी डाम सामने बोल भायला कठै बलू हलू....
मारे पण रोवन नीं देवै मुहंडे पटी चेप परी
म्हारा बनगै म्हारा बेली बे म्हारे में भली करी
आगै भींत नै लारै गोधा बोल भायला कठै टलू हलू...
सालू सटै भैस मारदै बैच माजनो रात्यू रात
उंदर जान आपाने गटकै सिग्ली आ मिनक्या री ज़ात
ऐ बुगला साधू बन डोलै खाय माछली करै चलू हलू....
**

***********************************************

सत्यदीप

जन्म १ अप्रेल १९५८

वाणिज्य सनातक

प्रकाशन १- एक बूँद आंसू रो तर्पण १९८२

२- मांछल गंधा २००४

पुरस्कार

१-साहित्य सुधाकर सम्मान २००५, प्रवासी मारवारी यूवा सघ नेपाल

२- साहित्य सम्मान, ग्यान फौंदेशन बीकानेर

३-सहिया सम्मान लायन इंटर नॅशनल ग्रेटर

४-सहित्य सम्मान डॉ जयचाँद शर्मा समृति संस्था

५-संयोजन सम्मान आचर्य महाप्रज्ञ सम्मान समाहरोह समिति

६-संवाद सम्मान त्रिलोक शर्मा समृति संसथान

*************************************************

डॉ.राजेश कुमार व्यास री राजस्थानी कवितावां

noreply@blogger.com (Unknown) — Sat, 7 May 2011 17:44:00 -0700

डॉ.राजेश कुमार व्यास

झरै है सुर...
(पं. शिवकुमार शर्मा रै संतुर नै सुणती थकै)
-एक-
बैवै झरणौ
कळ-कळ
री आवाज साफ
सुणीजै
थौड़ी’क ताळ थमै
अर
फेरूं बैवै
कळ-कळ-कळ...
बुलबुला बणावै पाणी रा
हंसे, खिलखिलावै
गावै कोई गीत
घाटी रै सुनपण मांय
हरै
एकलोपण।
झरणै रै झरण सूं
भिगिज जावै मन
झरै पाणी रै सागै
घणकरा सोवणा अर
मन मोवणा सुर
सा रे ग म प ध नि सा
सा नि ध प म ग रे सा...।

-दो-
राग मधुवंती नै सुणती बैळा

सागर खावै छोळा
अेक लहर
दूजी...तीजी...चौथी...
अर
आगै सूं आगै लहर
सागर खावै छोळा
चोखी लागै
आवती अर
जावती लहर्या
हरैक लहर
भरै मांय रो खालीपण
मांय घिर्यौड़े अंधारै
रै सामीं
जगावै दिवळा
अर
करै है घणकरो उजास।
***
नूंवो आर्ट
(हंगरी के आर्टिस्ट इस्टवान के विडियो इन्स्टालेसन ने देखती थकै)
बै कैवे
देखो-
ओ साव नूवों आर्ट है
इनै
इन्स्टालेसन आर्ट री दीठ सूं परखौ।
म्हूं
इणगी-उणगी
सोधूं...
कीं निजर नीं आवै
बै फेरूं कैवे
ओ देखो इणरो विडियो
सामी आवै
घणकरा दरसाव
म्हूं कीं समझ नी पावूं
घणकरी थेपड़्यां
अेक सिंहासन सरीखी कुर्सी
उण पर उगाड़ो
नंग धड़ंग
कच्छौ पैर्यौडो
बैठ्यौ है
इन्स्टालेसन आर्ट रो आर्टिस्ट
विडियो मांय
निगै आवै
मुळकता छोरा
आर्टिस्ट पर थेपड़्या चिणता
आर्टिस्ट ढक लेवै अपणै आप नै
म्हूं चमगूंगो सूं देखूं
विडियो री पूरी फिलम।
किंया लाग्यौ ओ नूंवो आर्ट?
अबै
थे ही बताओ
कीं देवूं पडूतर
छेकड़
आर्टिस्ट खाली देखणे इ नीं
इ नये आर्ट पर
कीं लिखण नै
तेवड़ियो है।
***

बगत कदैई रूक्यौ है?
दोरो है
इण बगत
किरैई बारे में सोचणौ
अर
सोरी कठै रैयी है
बिना कारण करणी
किणी सूं मिळ’र हथायां
इन्टरनेट
केबल टीवी
अर
बजार जोवै बाट
बा देखो
भागती जा रैयी है ट्रेन
रूकण री नीं है बीनै अड़ी
बगत
किरैई खातर कदेई रूक्यो है?
***

कविता है अणहोणी सूं लड़न रो हथियार
इण सूं पैली के
सूख जावै
सगळा ही हरा रूंख
आभै सूं
बरसण लाग जावै खीरा
तारां री छिंया मांय
सूस्तावण लाग जावै सूरज
उजास करण लाग जावै जतन
अंधारै मांय लुकण रो
इणसू पैली के
भागण लाग जावै
उम्मीद री आस
अर
सूख जावै
आंख रो पाणी
आ
भरोसो राखते रचां
आपां कविता
सेवट
कविता है
अणहोणी सूं
लड़ण रो हथियार।
***

आंख में भी पाणी हो
दादी कनै
एक कठोती ही
उण रै मांय पाणी लेय‘र
बा
न्हावती
न्हाण रै बाद
बच्यौड़े पाणी सूं कपड़ा धोवती।
पाणी
फेरूं भी
बच जावतौ
दादी
घर आळा ने
सूंप देवती बो पाणी
ओ कैवते-
‘मसोता कर लो
ई पाणी सूं...’
दादी रो पाणी
कदै नीं खूटतो
तद
आंख में भी पाणी हो
सब दादी रो कैवणों मानता।
***

गणतंत्र दिवस के राज्य स्तरीय समारोह में मुख्यमंत्री श्री अशोक गहलोत सूचना एवं जनसम्पर्क अधिकारी अर लेखक कवि डॉ. राजेश कुमार व्यास नै उत्कृष्ट मौलिक लेखन खातर 10 हजार रूपये नकद पुरस्कार नै प्रशस्ति पत्र प्रदान कर सम्मानित कर्‌या।

जनकराज पारीक री कवितावां

noreply@blogger.com (Unknown) — Sat, 12 Mar 2011 15:16:00 -0800

गीत- ओळूं

ठेला-ठेल मची सड़कां पर,सुस्तांवण न कठै न ठांव ।

इण माया नगरी में आई , ओळूं थांरी म्हारा गांव ॥

मिनखपणै रो काळ अठै है,

पड़्यो प्रीत रो टोटो ।

ऊपर सूं है घणो फ़ूटरो,

मन रो माणस खोटो ॥

अठै तीख रो तपै तावडो़ , अठै कठै है बड़ री छांव ।

इण माया नगरी में आई , ओळूं थांरी म्हारा गांव ॥

अब झूरां बां धरकोटां पर,

झिरमिर पड़तो पाणी ।

लारै रै’गी सुख री घड़ियां,

करती गाणी - माणी ॥

अथै बजारां सुपना बिकग्या,भरी भीड़ में हरया दांव ।

इण माया नगरी में आई , ओळूं थांरी म्हारा गांव ॥

अठै भीड़ में फ़िरै भटकता,

बण्या लोग बिणज्यारा ।

अठै कठै "कासम" री का’णी

हुणतै रा हुंकारा ॥

अठै है गीत कठै पिणघट रा, अठै सुणौ कागां री कांव ॥

इण माया नगरी में आई , ओळूं थांरी म्हारा गांव ॥

***

म्हूं के बोलूं

म्हूं तो कुछ नीं बोलूं

म्हूं तो चुप हूं साहब,

बाहर सूं दीखूं-

भीतर सूं घुप हूं साहब ।

दड़ बोच्यां बैठ्यो हूं

डरतो तलवारां सूं-

मीठो खरबूजो हूं

कट जासूं धारां सूं ।

थे बळती तीळी माचस री

म्हूं तूडी़ रो कुप हूं साहब ।

थे म्हारी किस्मत रा मालक

थे कहदयो सो ठीक।

हुकुम-हज़ूरी गोल-चाकरी

म्हां हाथां री लीक,

चौकस-चतुर फ़ील्डर थे,अर

म्हूं सीदो सो गुप हूं साहब ।

***
श्री जनकराज पारीक

(17 सितम्बर, 1947)

30-मंडी ब्लोक,श्रीकरणपुर-335073,
जिला-श्रीगंगानगर,राजस्थान

वेद व्यास री कवितावां

noreply@blogger.com (Unknown) — Thu, 10 Mar 2011 16:18:00 -0800

राजस्थानी नव-गीत

तावडि़यै रा फ़ुलडा दीसै ऊजळा

पण बां पर लिखियोडी़ भाषा सांझ री ॥

कद तांईं नापांला इण आकास नै

ढाबां कींकर छीजंते विश्वास नै

बांधां कींकर नैणां री रंग डोरियां

चितरावां कींकर सुपनां री छोरियां

अळगै सूं दीसै आडावळ मोवता

पण बातां रा ब्याळू कोनी धापणां ।

कितरा दिन आंख्यां मां आखर ऊगसी

बिना ठिकाणै कागद कैयां पूगसी

बोली फ़िरियां सूं पलटै नीं भावना

राख सकै कितरा दिन कोई पावणा

सैंद-पिचाण काढण वाळा मोकळा

पण वां में सूं कुण-कुण सागै चालसी ।

घणां-घणां रा छपर चूवै मेव सूं

ऐकै सागै मांगरिया सै देव सूं

सगळा चावै लहरया पाळै चालणों

जूना-फ़ाट्या बेवारां नै पाळणो

चौघडि़यै मां बंद करो ना जूण नै

दुनिया री अरथावण पलटी जाय री ।

दुर्गादान सिंह गौड़ री कवितावां

noreply@blogger.com (Unknown) — Sun, 6 Feb 2011 14:35:00 -0800

गीत

बेटी

जद माँडी तहरीर ब्याव की, मँडग्या थारा कुल अर खाँप,

भाई मँड्यो दलाल्याँ ऊपर अर कूँळे मँडग्या माँ - बाप,

थोड़ा लेख लिख्या विधना ने, थोड़ मँडग्या आपूँ आप,

थँई बूँतबा लेखे कोयल! बणग्या नाळा नाळा नाप,

जाए सासरे जा बेटी, लूण -तेल ने गा बेटी/

सबने रखजे ताती रोटी अर तू गाळ्याँ खा बेटी-------

वे कह्वे छै-तू बोले छै, छानी न्हँ रह जाणै कै,

क्यूँ धधके छै कझली कझली, बानी न्हँ हो जाणै के,

मत उफणे तेजाब सरीखी, पॉणी न्हँ हो जाणै के,

क्यूँ बागे मोडी- मारकणी, स्याणी न्हँ हो जाणै के,

उल्टी आज हवा बेटी/ छाती बाँध तवा बेटी/

सबने रखजे-----------------------------

घणीं हरख सूँ थारो सगपॅण ठाम-ठिकाणे जोड़ दियो,

पॅण दहेज का लोभ्याँ ने पल भर में सगपॅण तोड़ दियो,

कुण सूँ बुझूँ कोई न्हॅ बोले, सबने कोहरो ओढ़ लियो,

ईं दन लेखे म्हँने म्हारो, सारो खून निखेड़ दियो,

वे सब सदा सवा बेटी/ थारा च्यार कवा बेटी/

सबने रखजे -----------------------------

काँच, कटोरा और नैणजल, मोती छै अर मन बेटी,

दोय कुलाँ को भार उठायाँ शेषनाग को फण बेटी,

तुलसी, डाब, दिया अर सात्यो, पूजा अर हवन बेटी

कतनो भी खरचूँ तो भी म्हँ, थँ सूँ न्हॅ होऊँ उरण बेटी,

रोज आग में न्हा बेटी/ रखजे राम गवा बेटी/

सबने रखजे -----------------------------

यूँ मत बैठे, थोड़ी पग ले, झुकी झुकी गरदन ई ताण,

ज्यां में मिनखपॅणों ई को न्हॅ, वॉ को क्यूँ ’र कश्यो सम्मान,

आज आदमी छोटो पड़ग्यो, पीड़ा होगी माथे स्वॉण,

बेट्याँ को कतनो भख लेगो, यो सतियाँ को हिन्दुस्तान,

जे दे थॅने दुआ बेटी/ वाँ ने शीश नवा बेटी/

सबने रखजेताती रोटी, अर तू गाळ्याँ खा बेटी।।

***

(आभार : श्री अतुल कनक)

प्रेमलता जैन री कवितावां

noreply@blogger.com (Unknown) — Sun, 6 Feb 2011 14:32:00 -0800

गीत

डायजिया का बोल सुणूँ जद

याँ होठाँ ने म्हँ सील्यूँ ऐ/ घुटक ज्हैर की पील्यूँ ऐ

डायजिया का बोल सुणूँ जद बीजळ नणदळ का -----

घणां लाड़ सूँ पाळी पोसी, दूध कटोराँ प्वायो,

रात रात भर गोद्याँ में ले बाबुल चाँद दिखायो,

बिना डायजे बण्यो अकारथ सारो लाड़ लड़ायो,

दुनिया भर की जूँठ माँजबो म्हारे पाँती आयो,

घुटी घुटी सी रहल्यूँ ऐ/ मन में पीड़ा सह ल्यूँ ऐ

डायजिया का बोल सुणूँ जद बीजळ नणदळ का -----

’’कठी मेल दी बाबुल जी ने सारी मूँड कमाई,

ज्याँ बीराँ पे तू गरबै छै, आछी नाक कटाई,

सासरियो चोखो यो मिलग्यो, लगी न्हँ कोड़ी- पाई,

हीरा सा बेटा के पल्ले भूखा घर की आई ’’

सासू का ताना सुण ल्यूँ ऐ, भाटा सा मन पे चुण ल्यूँ ऐ

डायजिया का बोल सुणूँ जद बीजळ नणदळ का -----

जेठाण्याँ का ओढ़स- डोढ़ज्ञा बोल काळज्ये साळै,

हरता फरता देवर जी भी घणीं मसखर्या राळै,

बैठ हथायाँ ससुरा बोले- ‘‘ पड़ी लखपति पालै’

थोड़ा होठा खुल्या- सायब का थापड़- थोल्या चालै,

रो’र बसकड़ा भर ल्यूँ ऐ/ घूँघट ने गीलो कर ल्यूँ ऐ/

डायजिया का बोल सुणूँ जद बीजळ नणदळ का -----

अणबोल्यो धन बणके बेट्याँ कद ताँई रह्वैगी,

छुरी कसायाँ की गरदन पे, कद ताँई सह्वैगी,

मरदाँ की नरमम करतूताँ, कद ताँई कह्वैगी,

कद समाज की ठेकेदारी, याँ ने उत्तर दैगी,

मूँण्डा ने म्हँ कील्यूँ ऐ/ बणीं जनावर जी ल्यूँ ऐ/

डायजिया का बोल सुणूँ जद बीजळ नणदळ का -----

***

(आभार : श्री अतुल कनक)

राकेश मूथा री कवितावां

noreply@blogger.com (Unknown) — Sat, 5 Feb 2011 14:39:00 -0800

नदी रेवेला ......

मने खबर है

मैं नी रेवुला

एक दिन

नी रेवेला वे सब जका मारे सागे है

इन खबर सू मैं उदास नी

खुश हूँ कि मारो खात्मो व्हेला

अर जोश सू भरियो

प्रीत फैलातो जाऊं हूँ

हेरेक री अंखियाँ मैं

प्रीत रो उजास देखू

आ प्रीत जतरी देर रेवेला

उतरी देर मैं रेवुला

शरीर रो काई है

शरीर तो बरसाती पाणी है

बरसाता मैं चढ़ेला

गर्मी मैं सुखेला

पिन नदी तो सुखी व्हेने भी

नदी .

***

बा रेत है ....

ओ धोरो काल तक लारले गाँव ताई हो

अबे कई बरसा सू

ओ अटे ही है इयान ही

बालू पी गियो पाणी

गिट गियो

धोरो रे सागे

उड़्गी प्रीत

अबे नी तो वे रातां है

नी चांदनी मैं मुलकती

धोरो रे लारे छिपती

मने बुलाती अर मने देख

भागती .........

बा रेत है ......

समय री आंधी मैं बह्गियो ....मारो वो टेम

मारे हिये मैं ठेर गियो ......

***

आ चाबी थाणे

इन आभे

हूँ उड़ सूं

खुद री जमीन

खुद रे नाव सू लेणे

थाणे बकारू

आज इन वेला

खाय थां सू ठोकर

मैं रोला नि करूं

पक्को करू हूँ खुद ने

जिको आड़ो थे केरियो है आज बंद

काले मैं उनने खोलुला

अर खुद रा ताला लगा

ने थारे सामी खुद री नजरां

ऊँची करुला

अर उन संचे ही सौंप दू ला

आ चाबी थाणे

हूँ मिनख रेवनी चावू हूँ

ने मिनख ही देखनी चावू ........

इन सारु

मिनाख्पनो तो मैं नी इ.

***

महेन्द्र मिश्रा री कवितावां

noreply@blogger.com (Unknown) — Mon, 24 Jan 2011 14:09:00 -0800

शहर
शहर...
जीभ कतरणी
मन में जहर।
काणी आंख्यां काजळ रेख
हिवड़ै काळख
उजळो भेख।
तूं सांपां में मिनख भाळै
भोळा, गेलो कोई और ई देख।

***

गाम
गाम
फूटेड़ो ठाम।
जिणरो का'ल ऊजळो
आज धूंधळो
सुंवारो....
बिकसी फूट रै दाम।
गाम
फूटेड़ो ठाम।

***

रूंख
रूंख...
आयो मेटतो
मिनख री भूख।
पण आ भूख
हाल हिड़कागी
अर साबता ही खा'गी।

***

आंसू
आंसू....
फगत खारो पाणी।
पण गावै मांयलो दुख
बिना बाणी।

***

बात
जीभ री करामात।
ओळ्यूं रा ओळमा
अर करै काळजै घात।
***

नार
घर रो सिणगार
चौकै रो च्यानणो
अर मुळकतो आंगणो।

***

पाणी
जूण रो धणी।
कुवां में सूख्यां
आंख्यां में संचरै
अर सिर में ढुळ्यां
मूंडै स्यूं उतरै।

***

खोटा करम उजाळो ना
बैठ काळजो बाळो ना,
खोटा करम उजाळो ना।

भाई-बीरां री बात करो थे,
कादो-कीचड़ उछाळो ना।

म्हारी पौळी थां सारू खुल्ली,
अठै कुंडो कोनी ताळो ना।

सीधी-सादी बात करां म्हे
म्हारै मनड़ै कोई काळो ना।

पाड़ोस्यां री भींतां कच्ची,
बड़भागी थे गाळो ना।

रोटी सारू राड़ माच री,
थे बातां में टाळो ना।

मिनख जमारो पाय भायला,
हाथां औसर गाळो ना।

घर-घर में गायां न बांधो,
खाणा गंडक पाळो ना।

***

महेन्द्र मिश्रा 21 सितंबर, 1968 नैं गांव बूचावास तहसील तारानगर जिला चूरू मांय जलम।

आजकाल राजकीय उच्च माध्यमिक विद्यालय, नोहर मांय प्राध्यापक (हिंदी) पद माथै सेवारत।
कानांबाती : 9413536388

गौतम अरोड़ा री कवितावां

noreply@blogger.com (Unknown) — Wed, 19 Jan 2011 14:21:00 -0800

बैत भर आकास

भीड़,

दिनो-दिन बधती भीड़

रोजीनां,

इण भीड़ मांय बध जावै सैंकड़ूं नुवां चैरा

पण फेरू भी

म्हैं

खुद नै इण भीड़ बिचाळै घणौ एकलौ समझूं

रोजीना करूं, म्हैं कोसिस

खुद नै इण भीड़ सूं न्यारौ करण री

अर इण भीड़ स्यूं न्यारौ व्हैय

पंख्यां पसार आभै में उडण री ।

पण

हर बार,

एक वजनदार हाथ रै जोरदार धक्कै सूं

म्हैं फेरू इण भीड़ भेळो कर दियो जावूं

तद देखूं

कै भीड़ फेरू कीं बधगी है ।

अर

आगै निकळ गिया फेरू कीं लांठा लोग

अर म्हैं पूगगौ पैली सूं भी लारै, घणौ लारै ।

पण

बार-बार, हर बार

उण धक्कै देवणियै हाथ नै म्हैं कैवूं

कै नीं चाइजै म्हनै उडण सारू लम्बो-चौड़ौ आकास

बस म्हनै दे द्यो इत्तो ई’ज

जिण में लेय सकूं सांस

राखौ ओ थांरौ पूरौ आभौ

अर राखौ पग पसारण सारू, आ सगळी उपजाऊ धरती

म्हरै सारू

म्हैं खुद जोय लेवूंला

म्हरौ

बैत भर आकास ।

***

कुण अर कठै

मून तोड़

सून सूं आंवती आवाजां

आभै गूंजता नारा

सागै होवण री घोसणा

अर नारा री आवाज सूं तेज

उण भरी हुंकार

बधग्यौ आगै, घणौ आगै

पीढ्यां री पीड़

झुकाय दी कमर

उम्मीदां रो बोझो

लड़खडायदियो पगां नै

पण सुपनां

लगोलग देंवता रैया धक्को

अर वो बावळो

कटतै पाण भी ल।दतो रैयो

नीं करी परवा, ताजै घावां री

पण आवाजां

सून में बेवण लागी मून धारलियो

अर नारा

कांई ठा कठै सूं आया कठै गया

खर खर री आवाजां व्ही

घाटी न्यारी व्हैय पड़गी नीचै

धीर आंख्यां जोयो लारै

लारै रैया फगत

सून अर मून

कुण हा वै

किण सारू हा

अर अबै है कठै ??

***

मुट्ठी भर सपना

केई बार

जद आप म्हारे दोळे व्हिया,

म्हे,

म्हारी मुट्ठी आभे सामी ताण,

आप सामी उभो व्हियो,

श्रीमान,

म्हारी आ कोशिश,

आपने हरावन के, डरावन सारु नी ही

आ तो ही फकत, की बचावन सारु ,

क्योक,

इन मुट्ठी में इज तो बंद है ,

म्हारा मुट्ठी भर सुपना

म्हारो बैत भर आकाश !

***

संगीता सिंह री कवितवां

noreply@blogger.com (Unknown) — Tue, 18 Jan 2011 14:35:00 -0800

गीत

चमचा री ख्यात