ഈ-ലോകവും... ഞാനും.

അണികളെ... നിങ്ങൾ ക്യൂവിലാണ് ....

2018-02-20T10:08:00.000+04:00

ഓ ഇനി എത്ര നേരം ഈ ക്യുവിൽ നിൽക്കണം ആവോ ??? മറ്റുള്ളവർ കേൾക്കാനെന്നപോലെ ഉറക്കെയുള്ള ഒരു ആത്മഗതം കേട്ടാണ് ഫൈസൽ തിരിഞ്ഞു നോക്കിയത് .നാലഞ്ചു പേർക്ക് പിറകിലായി ജയകൃഷ്ണൻ."ഇവൻ ഇവിടെയെത്തിയോ.." ദേഷ്യം ഇരച്ചു കയറിയ മുഖത്തോടെ അവൻ പിറുപിറുത്തു.ഒരു കൂട്ടുകാരനായല്ല കൂടെപ്പിറപ്പായാണ് അവനെ താൻ കരുതിയത് .പക്ഷേ ..അവൻ തന്നെ ഇങ്ങനെ ചെയ്യുമെന്ന് സ്വപ്നത്തിൽ പോലും കരുതിയില്ല .

ഒരു പരുങ്ങലോടെ ജയകൃഷ്ണൻ ഫൈസലിന്റെ അടുത്തേക്ക് വന്നു."അളിയാ സോറി അപ്പോഴത്തെ ഒരു ദേഷ്യത്തിന് ...അവന്മാരൊക്കെ പിരി കേറ്റിയപ്പോ ഞാൻ അറിയാതെ ചെയ്തു പോയതാ ...."

"സാരമില്ലെടാ ..എന്നാലും ഒന്നാം ക്ലാസ് മുതൽ നമ്മൾ ഒരുമിച്ചു പഠിച്ചതല്ലേ.ഒരുമിച്ച് നടന്നതല്ലേ.എന്നിട്ടും നിനക്ക് എങ്ങനെ തോന്നി ...?" ഉത്തരം പ്രതീക്ഷിച്ചില്ലെങ്കിലും ഫൈസൽ ദുർബലമായ ശബ്ദത്തിൽ ചോദിച്ചു." എന്നാലും.... നിനക്ക് എന്റെ മുഖത്തു വെട്ടുമ്പോൾ കൈ പോലും വിറച്ചില്ലേ ...ഹൊ ..അമ്പത്തൊന്നു വെട്ടുകൾ....ആലോചിക്കുമ്പോൾ എനിക്ക് പോലും ദേഹം വിറയ്ക്കുന്നു ..."

"കിട്ടാൻപോകുന്ന പണത്തേക്കാളും.. പാർട്ടിക്കാർക്കിടയിലെ സ്‌ഥാനം ..നേതാക്കളുടെ അഭിനന്ദനം ... ഇതൊക്കെ ആലോചിച്ചപ്പോൾ അന്ന് കൂട്ടുകാരൻ എന്നതിനേക്കാൾ നീ എനിക്ക് എതിർ പാർട്ടിയിലെ ഒരു ശല്യം മാത്രമായി തോന്നിപ്പോയി..."ഒരു നിമിഷം ജയകൃഷ്ണൻ എന്തോ ആലോചിച്ചു നിർത്തി..

"അപ്പൊ അങ്ങനെ തോന്നി... പക്ഷേ പിറ്റേന്ന്  മുതൽ നിന്നെയോർത്തു നീറി നീറിയാണ് ഞാൻ കഴിഞ്ഞത്.നിന്റെ അമ്മയുടെയും ഭാര്യയുടെയും കരച്ചിൽ ...അത് മറ്റുള്ളവർ പറഞ്ഞു അറിഞ്ഞപ്പോൾ ...ആത്മഹത്യ ചെയ്താലോ എന്ന് പോലും തോന്നി ...എന്തായാലും അതിന്റെ ആവശ്യം വന്നില്ല ..നമ്മുടെ കൂട്ടുകാരൻ ബിനീഷും നിന്റെ കുറെ പാർട്ടിക്കാരും  കൂടി വന്നു ഇന്നലെ എനിക്കുള്ള ടിക്കറ്റും തന്നു....എന്റെ ദേഹത്തു അവരും  വെട്ടി അമ്പത്തൊന്ന് ...ആ സമയത്തു ..അളിയാ ..നിന്റെ മുഖമായിരിന്നു എന്റെ മുന്നിൽ  "

ഒരു വിതുമ്പലോടെ സംസാരം നിർത്തിയ ജയകൃഷ്ണൻ തുടർന്നു ..."ഇപ്പൊ എന്നെയും വീട്ടുകാരെയുമോർത്ത് അവനും കരയാൻ തുടങ്ങിക്കാണും....എന്നെ വെട്ടാൻ അവനു കിട്ടിയ ആരോഗ്യത്തിൽ എന്റെ അമ്മ വിളമ്പിയ ആഹാരം കൂടി  ഉണ്ടായിരുന്നല്ലോ..."

അവന്റെ   കണ്ണിൽ ഉരുണ്ടുകൂടിയ കണ്ണീരിൽ നിറഞ്ഞതു നിസ്സഹായതയോ നിരാശയോ എന്നറിയില്ല പക്ഷേ അത് ഫസലിനും  ഉള്ളു പിടയുന്നതായിരുന്നു..പെട്ടെന്ന്  ഒരു ഞെട്ടലോടെ..വിഹ്വലതയോടെ അവൻ  പിറകിലേക്ക് തിരിഞ്ഞു നോക്കി..ആ ആൾക്കൂട്ടത്തിൽ ബിനീഷിന്റെ മുഖം അവൻ തിരഞ്ഞു.ഹാവൂ അവൻ ഇത് വരെ എത്തിയിട്ടില്ല ... അവന്റെ അമ്മയ്ക്കും പെങ്ങൾക്കും ആകെയുള്ള ആശ്രയം അവനാണ്.

"ഇന്നലെ വരെ നമ്മൾ ഫൈസലും  ജയകൃഷ്ണനുമായിരുന്നു. ഇന്ന് നമ്മൾ രക്തസാക്ഷിയും ബലിദാനിയും...നിനക്ക് വേണ്ടി ബക്കറ്റു പിരിവ് അവിടെ തകൃതിയായി നടക്കുന്നുണ്ട് ....ഇനി എന്റെ പേര് പറഞ്ഞു ഞങ്ങടെ ലോക്കൽ നേതാക്കൾക്ക് കേന്ദ്ര നേതാക്കളോട് വില പേശി വിഹിതം വാങ്ങണം ...ഞങ്ങൾക്ക് പിരിവു തരാൻ നാട്ടുകാർക്ക് ഇപ്പോഴും മടിയാണല്ലോ."ജയകൃഷ്ണന്റെ വാക്കുകൾ ഫൈസലിനെ ചിന്തയിൽ നിന്നുണർത്തി.

ഹാ ..എന്തായാലും നിന്റെ  സഖാവ് ഗൾഫിലെ കടമൊക്കെ തീർത്തു എന്നാ കേൾക്കുന്നത് .നേതാവും മക്കളും ഒക്കെ ഇന്ന് ദുബായിൽ അടിച്ചു പൊളിക്കുന്നുണ്ട്.എന്റെ  നേതാവ് ഇനി കറങ്ങാനുള്ള പുതിയ സ്‌ഥലം തിരക്കി ഗ്ലോബ് തിരിച്ചുകൊണ്ടിരിക്കുന്നു.എന്നാലും ..അതിലൊരു പങ്കു നമ്മുടെ പേരിലുള്ള പണപ്പിരിവിൽ നിന്നായിരിക്കും എന്ന് ആലോചിക്കുമ്പോൾ....ഇവർക്ക് വേണ്ടിയായിരിന്നല്ലോ അല്ലെങ്കിൽ ഇവർ കാണാൻ വേണ്ടിയായിരുന്നല്ലോ..നമ്മൾ തമ്മിലടിച്ചത്...

"ഈ തിരിച്ചറിവ് കഴിഞ്ഞയാഴ്ച നമുക്ക് രണ്ടുപേർക്കുമുണ്ടായിരുന്നെങ്കിൽ വീട്ടുകാരെയും നാട്ടുകാരെയും വിട്ട് ഇന്ന് എങ്ങോട്ടെന്നറിയാത്ത ഈ യാത്രയ്ക്ക് ഊഴം കാത്തു നിൽക്കേണ്ടി വരില്ലായിരുന്നു".നിരാശയോടെ ഫൈസൽ പറഞ്ഞു നിർത്തി .

കുറച്ചു സമയത്തിന് ശേഷം ......

ഒടുവിൽ രണ്ടുപേരും ആ വാഹനത്തിൽ അടുത്തടുത്ത സീറ്റുകളിൽ ഇരിപ്പുറപ്പിച്ചു .പെട്ടെന്ന് ..അടുത്ത് വന്നിരുന്ന ആളെ കണ്ടു രണ്ടു പേരും ഞെട്ടി ..തങ്ങളുടെ ആത്മാർത്ഥ സുഹൃത്തായിരുന്ന സുലൈമാൻ ..

ഡാ ... സുലൈമാനെ ...

ഐ ആം നോ സുലൈമാൻ...ഐ ആം ജിഹാദി ...അൽ ജിഹാദി..

നീ... സിറിയയിൽ ആട് മേയ്‌ച്ചു ജീവിക്കാൻ പോയതല്ലേ...

ഡാ ഫൈസലേ .....ആ ഉസ്താദ് എന്നെ ചതിച്ചതാ ..സിറിയയിലേക്കെന്നും പറഞ്ഞു ആദ്യം ഉഗാണ്ടയിലേക്കാ കൊണ്ട് പോയത്. പിന്നെ അവിടെ വച്ച് പരിചയപ്പെട്ട വേറൊരു ഉസ്താദ് പറഞ്ഞു ...ഭൂമിയിൽ ആട് മേയ്ച്ചു നടക്കുന്നതിലും നല്ലത് സ്വർഗ്ഗത്തിലെത്തി ഹൂറിമാരോടൊത്തു ജീവിക്കുന്നതാണെന്ന് ...അങ്ങനെ ഞാൻ അഫ്ഗാൻ വഴി ബോബെയിലെത്തി... ഒരു ബോംബും പൊട്ടിച്ചു ഇപ്പൊ ഇവിടെയുമെത്തി ..ഇനി സ്വർഗത്തിൽ നല്ല അടിപൊളി ജീവിതം ജീവിക്കണം ..പരലോക ജീവിതത്തിൽ മദ്യപ്പുഴയിൽ ഞാൻ നീരാടും...

അല്ല സുലൈമാനെ ....ഇതൊക്കെ നിനക്ക് ഹറാമല്ലെ....

അതൊക്കെ ഒൺലി ഇൻ ഇഹലോകജീവിതം...പരലോകത്തു ഒരു ഹറാമും ഇല്ല ...ഹാ..

"ഓ ഇവന്റെ മണ്ടത്തരം ഇതുവരെ മാറിയില്ലേ ...."രക്തസാക്ഷി ബലിദാനിയുടെ ചെവിയിൽ പിറുപിറുത്തു .

"ഉവ്വാ... അവനെക്കാൾ ബുദ്ധിമാന്മാരായതുകൊണ്ടാണല്ലോ നമ്മൾ രണ്ടുപേരും അവന്റെ തൊട്ടടുത്ത് തന്നെ വന്നിരിക്കുന്നത്..." ബലിദാനിയുടെ മറുപടി കേട്ട് ഇരുവരും പൊട്ടിച്ചിരിച്ചു.

അങ്ങനെ ഭൂമിയിൽ മറ്റൊരിടത്തു അവരുടെ കുടുംബങ്ങൾ.. കണ്ണീരോടെ... മറ്റുള്ളവരുടെ ദയവിൽ... ജീവിതത്തെ നോക്കി പകച്ചു നിൽക്കുമ്പോൾ.. പുതിയ ജന്മത്തിലേക്കോ പുതിയലോകത്തിലേക്കോ എന്നറിയാതെ ബലിദാനിയും രക്തസാക്ഷിയും ജിഹാദിയും ഒരുമിച്ച് അവരുടെ യാത്ര തുടങ്ങി ....

ശുനകന്റെ ലവ് ജിഹാദ്

2013-09-29T21:10:00.004+04:00

നിലാവ് തെളിഞ്ഞു നിന്ന രാത്രിയിൽ തെരുവോരത്തെ ചവറ്റുകൂനക്കരികിൽ തൊട്ടുരുമ്മിയിരിക്കുകയായിരുന്നു ജിമ്മിയും ആമിനയും. "ജിമ്മീ എന്റെ ഏതു ഭാഗമാണ് നിനക്കേറ്റവും ഇഷ്ടം?" ന്യു ജെനറേഷൻ കാമുകിയുടെ ചോദ്യം കേട്ട് അവൻ ഒന്നു ഞെട്ടി .മനസ്സില് വന്ന ഉത്തരം വിഴുങ്ങി അവൻ പറഞ്ഞു."പ്രിയേ ..ഉച്ചിഷ്ടം മണ്ണിട്ട്‌ മൂടാനും ശരീരം നക്കി വൃത്തിയാക്കാനും ഉള്ള നിങ്ങളുടെ ശീലമുണ്ടല്ലോ,ഞങ്ങളുടെ ശുനകവർഗ്ഗത്തിൽ ഒറ്റയൊന്നിനുമില്ല .അതാ നിന്നെ എനിക്കിഷ്ടമായത്." ആ ഉത്തരത്തിനു മറുപടിയായി അവൾ തന്റെ വാലു കൊണ്ട് അവനെ സ്നേഹപൂർവ്വം തഴുകുക മാത്രം ചെയ്തു.

അപ്പോൾ അവരെച്ചുറ്റി ആ ചവറ്റുകൂനയ്ക്കു ചുറ്റും മാത്രം കാണുന്ന ഒരു കാറ്റ് വട്ടം കറങ്ങുന്നുണ്ടായിരുന്നു,കൂടെ മദ്യശാലയ്ക്കടുത്തു നിന്ന് വന്ന കുറച്ചു ശ്വാനന്മാരും .അതിൽ നേതാവെന്നു തോന്നിച്ചവൻ മുരണ്ടു. "നമ്മുടെ സമുദായത്തിലെ പയ്യനെ വശീകരിച്ചു കൊണ്ട് പോകുവാൻ ആ പൂച്ചകൾ മനപ്പൂർവം അയച്ചിരിക്കുകയാ അവളെ .പകരം വീട്ടിയില്ലെങ്കിൽ നമ്മൾ പട്ടികളാണെന്നു പറഞ്ഞിട്ട് കാര്യമില്ല"കേട്ട് നിന്ന പട്ടികൾ ആവേശപൂർവ്വം ഓരിയിട്ടു.എല്ലാവരും ഒരുമിച്ചു ആ കമിതാക്കളുടെ മുകളിൽ ചാടിവീണു.

കുടുംബശ്രീക്കാർ സർക്കാരിനെതിരെ സമരത്തിലായിരുന്നതിനാൽ അഞ്ചാറു പട്ടികൾ കടിച്ചു കീറിയ ആ പൂച്ചയുടെ ശരീരം ദിവസങ്ങളോളം ആ ചവറ്റു കൂനയിൽ കിടന്നു.അവൾക്കു വേണ്ടി ഹർത്താല് നടത്താനും മെഴുകുതിരി കത്തിക്കാനും ആരുമുണ്ടായിരുന്നില്ല. .പൂച്ചകൾക്ക് ഫേസ് ബുക്കിൽ പോസ്റ്റിട്ടു പ്രതിഷേധിക്കാനും അറിയില്ലായിരുന്നല്ലോ....

സംഘികളേ.. സുടാപ്പികളേ.. ഫേസ്ബുക്ക് വിളിക്കുന്നു!.

2013-08-29T18:08:00.000+04:00

നവ മാധ്യമങ്ങളുടെയും ഇന്റർനെറ്റ്‌ ലഭ്യതയുടെയും വികാസത്തോടെ നമ്മുടെ ശ്രേഷ്ട ഭാഷ മലയാളത്തിനു ലഭിച്ച ചില പുതിയ പദങ്ങളാണ് സംഘി ,സുടാപ്പി,കമ്മി തുടങ്ങിയവ.കുറച്ചുനാൾ മുൻപ് പുറത്തുവന്ന ചെത്ത്,അടിപൊളി ,പോലെ നിരുപദ്രവകാരികളല്ല ഈ വാക്കുകൾ.സൈബർ ലോകത്ത് കൂടി മത പ്രചരണം നടത്തുന്ന മൂത്ത പണ്ഡിതന്മാർ സ്വയം എടുത്തണിയുന്നതും എതിരാളിക്ക് ചാർത്തിക്കൊടുക്കുന്നതുമായ വിശേഷണങ്ങൾ ആണ് ഇവ.എന്നാൽ സ്വന്തം മതത്തിന്റെ സംരക്ഷകരാണെന്നു സ്വയം കരുതുന്ന ഇവർ വാസ്തവത്തിൽ അറിഞ്ഞോ അറിയാതെയോ സമൂഹത്തിൽ മതസ്പർദ്ധ വളര്ത്തുകയാണ് എന്നതാണ് വാസ്തവം .അന്യ മതങ്ങളുടെ ഏതെങ്കിലും നേതാക്കൾ അവരുടെ യോഗത്തിൽ പ്രസംഗിച്ച വാചകങ്ങളോ അവരുടെ മുഖ പത്രങ്ങളിൽ വരുന്ന വാർത്തകളോചുരണ്ടി പൊതു വേദിയിൽ ഉന്നയിച്ചു വമ്പൻ ചർച്ച നടത്തുക എന്നതാണ് ഇവരുടെ പ്രധാന സൈബർ മതപ്രവർത്തനം. അതോടു കൂടി തങ്ങൾക്കു ശത്രുവായി സങ്കൽപ്പിക്കാൻ പുതിയ ആളുകളെക്കൂടി വിശ്വാസികൾക്ക് നല്കുന്നു.ശത്രുതാപരമല്ലാതെ സഹിഷ്ണുതയോടെയുള്ള വാർത്തകൾ ഒരിക്കലും ഇവരുടെ കണ്ണിൽപ്പെടാറില്ല എന്ന് തോന്നും.നിരന്തരമുള്ള പോസ്റ്റുകൾ കാണുമ്പോൾ.

ആദ്യകാലങ്ങളിൽ മതപരമായ പോസ്റ്റുകളെന്നത് വിശേഷ ദിവസങ്ങളിലെ ആശംസകളായും വചനങ്ങളായും അങ്ങേയറ്റം 'ഫോട്ടോഷോപ്പ്' വഴിയുള്ള അത്ഭുത ചിത്രങ്ങളും മാത്രമായിരുന്നു.പക്ഷേ ഇപ്പോൾ ഫേസ്ബുക്കിന്റെ സ്വാതന്ത്ര്യം മനസ്സിലാക്കിയ മത തീവ്രവാദികൾ തങ്ങളുടെ പ്രവർത്തനങ്ങൾ ഏകോപിപ്പിക്കാനും സമാനമനസ്ക്കരെ തെരഞ്ഞെടുക്കാനും സംഘടിപ്പിക്കാനും ഉപ യോഗിക്കുന്നത് കൂടാതെ സാധാരണ വിശ്വാസികളും ദൈവത്തോട്(?) സംവദിക്കാനുള്ള മാധ്യമമായി ഇതിനെ ഉപയോഗിക്കുന്നതാണ് വിചിത്രം .തങ്ങളുടെ മതത്തിൽപ്പെട്ടവർ ഇവിടെയും അവിടെയും പീഡിപ്പിക്കപ്പെടുന്നു ...ആ മതം ഭീകരവാദികളുടെതാണ്..അവരെ സൂക്ഷിക്കണം...അതാ ചിലർ മതം മാറ്റാൻ ഇറങ്ങിയിരിക്കുന്നു...നമ്മുടെ ദൈവത്തെ അതാ മറ്റവന്മാർ കളിയാക്കുന്നു..ഇതൊക്കെയായി പിന്നീടുള്ള വെളിപാടുകൾ.ഇപ്പോൾ അതും കടന്നു മറ്റു മതങ്ങളുടെ ആചാരങ്ങളെയും ചിഹ്നങ്ങളെയും വെറുതെ കളിയാക്കുക അതുവഴി പ്രകോപനം സൃഷ്ടിക്കുക എന്ന നിലയിലെക്കെത്തിയിരിക്കുന്നു.ഇതെല്ലാം സ്വന്തം ദൈവത്തിന്റെ പ്രീതി പിടിച്ചുപറ്റാനും ഭാവിയിലെ സ്വർഗരാജ്യം ഉറപ്പു വരുത്താനുമാണെന്നതാണ് തമാശ .എന്നാൽ മതങ്ങളുടെ വലിപ്പച്ചെറു പ്പങ്ങളെക്കുറിച്ചു വാചാലരാകുന്ന ഇവർ സ്വന്തം മതത്തിന്റെ മുല്യങ്ങൾ മറ്റുള്ളവർക്ക് മനസ്സിലാക്കിക്കൊടുക്കുന്ന ഒരു വരിയോ ലേഖനമോ പ്രസിദ്ധപ്പെടുത്തുകയും ചെയ്യുന്നില്ല .
ഒരു ഹിന്ദുവിന് അവന്റെ മതത്തിലെ ദൈവസങ്കൽപ്പത്തെക്കുറിച്ച്, അല്ലെങ്കിൽ വേദങ്ങളും ഉപനിഷത്തുക്കളും പുരാണങ്ങളും നല്കുന്ന വിജ്ഞാനം, പൊതു സമൂഹത്തിനു മുന്നിലവതരിപ്പിച്ചു അവരിൽ ആ മതത്തെക്കുറിച്ച് അവബോധമുണ്ടാക്കാൻ കഴിയും.അതുപോലെ ഒരു മുസ്ലിമിനു തന്റെ വിശുദ്ധ ഗ്രന്ഥത്തിലെ ആശയങ്ങളും വിശദീകരണങ്ങളും മറ്റുള്ളവരിലേക്ക് എത്തിക്കാനും ഇത്തരം മാധ്യമങ്ങൾ ഉപയോഗിക്കാം.ഇത്തരം കാര്യങ്ങൾ തെറ്റില്ലാതെ വിശദീകരിക്കണമെങ്കിൽ ശരിയായ രീതിയിൽ നേടിയ അറിവ് സ്വന്തം മതത്തെക്കുറിച്ച് ഉണ്ടായിരിക്കണമല്ലോ?ഇതിനു മെനക്കെടാൻ വയ്യാത്ത മതവാദികളാണ് മുസ്ലിമിന്റെ താടിയും തൊപ്പിയും ബുർഖയുമൊക്കെ അലട്ടുന്ന ഹിന്ദുവായും ഹിന്ദുവിന്റെ വിഗ്രഹാരാധനയും കുറിയും ശിവലിംഗവുമൊക്കെ ബുദ്ധിമുട്ടായി തോന്നുന്ന മുസ്ലിമായുമൊക്കെ ഫെസ്ബുക്കിലും മറ്റും അവതരിക്കുന്നത്.പരസ്പരം ബാധിക്കാത്ത മതനിഷ്ടകളെ എന്തിനിവർ പരിഹസിക്കാൻ മാത്രം എതിർക്കുന്നു?എന്നാൽ ഏതെങ്കിലും മതത്തിൽപ്പെട്ടവർ അതതു മതങ്ങളിലെ അനാചാരങ്ങളെ എതിർത്താൽ അവർ സന്ഘി ചാരൻ ,സുടാപ്പി ചാരൻ,ഉത്തിവാദി,കമ്മി ...എന്തെല്ലാം വിശേഷണങ്ങൾ.

അസഹിഷ്ണുത മുഖമുദ്രയാക്കിയ ഇന്നത്തെ സമൂഹത്തിൽ മതാന്ധത ബാധിച്ച കുറുക്കന്മാർക്ക് അല്പജ്ഞാനികളായ വിശ്വാസികളെ എങ്ങനെയും ഉപയോഗിക്കാൻ കഴിയും എന്നത് പല കലാപങ്ങളുടെയും കാരണങ്ങൾ തിരയുമ്പോൾ മനസ്സിലാക്കാം..തെറ്റിദ്ധാരണ പരത്താൻ മാത്രം മാധ്യമങ്ങളെ ഉപയോഗിക്കുന്നവരിൽ നിന്ന് വിശ്വാസികളെ രക്ഷിക്കാൻ കഴിയുക അതതു മതങ്ങളിലെ അറിവുള്ളവർക്ക് മാത്രമാണ്.ആദ്യം സ്വന്തം മതത്തിലേയും മറ്റു മതങ്ങളിലെയും നന്മകളെ ഒരു പോലെ അംഗീകരിക്കാനും പോരായ്മകൾക്കെതിരെ സമചിത്തതയോടെ പ്രതികരിക്കാനും വിമർശനങ്ങളെ സഹിഷ്ണുതയോടെ നേരിടാനുമായിരിക്കണം ആചാര്യന്മാർ പഠിപ്പിക്കേണ്ടത്.എല്ലാ മതങ്ങളുടെയും ദൈവം ഒന്നാണെന്ന് മനസ്സിലാക്കാൻ കഴിയുന്നില്ലെങ്കിലും മറ്റുള്ളവരെ നശിപ്പിക്കാൻ പറയുന്ന ഒരു അധമനല്ല തന്റെ ദൈവമെന്നെങ്കിലും വിശ്വാസികൾക്ക് ബോധ്യപ്പെട്ടിരുന്നെങ്കിൽ.....

ഗള്‍ഫിലെ അടിമയും മിനിഗള്‍ഫിലെ ഉടമയും

2012-07-17T08:39:00.000+04:00

വിദേശങ്ങളിലേക്ക് കുടിയേറി നരകയാതനകള്‍ സഹിച്ചു നാടിനും വീടിനും വേണ്ടി സ്വന്തം ജീവിതം മറന്ന അനവധി പ്രവാസജീവിതങ്ങള്‍ കേരളത്തിന്‍റെ എഴുതപ്പെടാതെ പോയ ചരിത്രങ്ങളാണ്.മരുഭൂമിയിലെ പൊള്ളുന്ന ചൂടില്‍ ഭാഷപോലുമറിയാതെ തൊഴിലുടമയുടെ ആട്ടും തുപ്പും ക്രൂരതയും അനുഭവിച്ച ഒരു തലമുറയുടെ പിന്മുറക്കാര്‍ക്ക് ഇപ്പോള്‍ അവിടത്തെ മാറിയ തൊഴില്‍ സാഹചര്യം-തൊഴിലവസരങ്ങള്‍ കുറഞ്ഞെങ്കിലും ശക്തമായ നിയമങ്ങളുടെ സംരക്ഷണം - തെല്ലൊന്നുമല്ല ആശ്വാസം പകരുന്നത്.ഈ മാറ്റത്തിന് കാരണമായത്‌ അവകാശ സമരങ്ങളോ പണിമുടക്കുകളോ അല്ല, സ്വന്തം സമ്പദ് വ്യവസ്ഥയില്‍ ഈ തൊഴിലാളികളുടെ പ്രാധാന്യം മനസ്സിലാക്കിയ അവിടത്തെ ഭരണാധികാരികളുടെ ദീര്‍ഘവീക്ഷണവും നിയമങ്ങള്‍ നിര്‍മ്മിച്ച്‌ നടപ്പിലാക്കാനുള്ള അവരുടെ ഇച്ഛാശക്തിയും മാത്രമാണ്.അതുപോലെതന്നെ ദൃശ്യമാധ്യമങ്ങളുടെ വരവോടെ സ്വര്‍ണ്ണ ചെയിനും കൂളിംഗ് ഗ്ലാസ്സും ടേപ്പ് റിക്കാര്‍ഡറുമായി വര്‍ഷങ്ങള്‍ക്കിടെ പറന്നിറങ്ങുന്ന പ്രവാസിയുടെ യഥാര്‍ത്ഥ ചിത്രം മനസ്സിലാക്കിയ നാട്ടുകാര്‍ ഇന്ന് അവന്, അയക്കുന്ന ദിര്‍ഹത്തിന്‍റെ വിലയ്ക്കനുസരിച്ചുള്ള വലിപ്പം മാത്രമേ നല്കുന്നൂമുള്ളൂ.എങ്കിലും രൂപയുടെ മൂല്യമിടിയുമ്പോള്‍ കടം വാങ്ങിയെങ്കിലും അവന്‍ 'തള്ളി'വിടുന്ന പണം വിലകൂടിയ വസ്ത്രങ്ങളും ആഭരണങ്ങളും വാഹനങ്ങളും മുന്തിയ ഭക്ഷണ ശീലങ്ങളുമായി ബന്ധുക്കള്‍ ആഘോഷിച്ചു തീര്‍ക്കുമ്പോള്‍, പ്രവാസം ഒരു തുടര്‍ക്കഥയായി,ജീവിതത്തിന്‍റെ നല്ലഭാഗം മണല്‍ക്കാടുകളില്‍ ഹോമിക്കേണ്ടി വരുന്ന പതിനായിരങ്ങള്‍ ഇന്നും ഗള്‍ഫ്‌ നാടുകളിലുണ്ട്.

വിദേശത്തേക്ക് വിമാനം കയറുന്ന മലയാളിയുടെ അതേ സ്വപ്നങ്ങളുമായി കേരളത്തിലേക്ക് കുടിയേറുന്ന എണ്ണം ഇന്ന് വളരെയധികം കൂടിയിട്ടുണ്ട്.സ്വന്തം നാട്ടില്‍ കിട്ടുന്നതിനേക്കാള്‍ കൂടുതല്‍ കൂലി എന്ന വാഗ്ദാനം തന്നെയാണ് ഈ 'മിനി ഗള്‍ഫും' അവര്‍ക്ക് നല്‍കുന്നത്.പക്ഷേ നിര്‍ഭാഗ്യവശാല്‍ എഴുപതുകളിലെ ഗള്‍ഫിലെ മലയാളികളുടെ അവസ്ഥയ്ക്ക് സമാനമാണ് ഇന്ന് ഉത്തരേന്ത്യയില്‍ നിന്നും മറ്റുമെത്തുന്ന തൊഴിലാളികള്‍ക്ക് കേരളത്തില്‍ നേരിടേണ്ടിവരുന്നത്.മണിക്കൂറുകള്‍ക്കു വിലയില്ലാത്ത ജോലിസമയവും പ്രാഥമികാവശ്യങ്ങള്‍ക്ക് പോലും സൌകര്യങ്ങളില്ലാത്ത താമസസ്ഥലവും മുതലാളിമാരുടെയും ഇടനിലക്കാരുടെയും ചൂഷണവും പീഡനവും എല്ലാം സമാനം.അന്ന് അപരിഷ്കൃതരായ അറബികള്‍ക്കിടയിലേക്കാണ് മലയാളികള്‍ എത്തപ്പെട്ടതെങ്കില്‍ ,അവകാശസമരങ്ങളുടെയും സോഷ്യലിസത്തിന്‍റെയും നാടായ കേരളം എന്ന വികസിത ഭൂവിലെ പരിഷ്കൃതരെന്നു സ്വയം ഭാവിക്കുന്ന സമൂഹത്തിലേക്കാണ് ഈ അന്യ സംസ്ഥാന തൊഴിലാളികള്‍ എത്തപ്പെടുന്നത് .അവര്‍ക്കു നേരെയുണ്ടാകുന്ന ക്രൂരതകള്‍ക്ക് എതിരെ ശബ്ദിക്കാന്‍ ഇവിടെ ഒരു തൊഴിലാളി പ്രസ്ഥാനവും മുന്നിട്ടിറങ്ങുന്നതായി കാണുന്നില്ല.ജോലി മറ്റുള്ളവര്‍ ചെയ്യട്ടെ ..കൂലി നമ്മള്‍ വാങ്ങാം .. എന്ന ശീലവും കണക്കുകൂട്ടലുമാകാം ഇതിനു പിന്നില്‍.

പ്രവാസത്തിന്‍റെ എല്ലാ പ്രശ്നങ്ങളും മനസ്സിലാക്കിയ ഒരു സമൂഹം പക്ഷേ വിദേശത്ത് നിന്നും റബ്ബറില്‍ നിന്നും കിട്ടുന്ന 'അനര്‍ഹമായ' സമ്പാദ്യത്തില്‍ വളര്‍ന്ന് ഉപഭോഗ സംസ്കാരത്തിന്‍റെയും സ്വാര്‍ത്ഥതയുടെയും പ്രതിരൂപങ്ങളായി മാറുകയാണിന്നു കേരളത്തില്‍... ..ഇവര്‍ക്ക് കുപ്പി തുറന്നു കിട്ടിയ അടിമഭൂതങ്ങളാണ് ഈ മറുനാടന്‍ തൊഴിലാളികള്‍... മനുഷ്യരെന്ന പരിഗണനയെങ്കിലും ഇവര്‍ക്ക് നല്‍കാന്‍ മടിക്കുന്നവര്‍ ഓര്‍ക്കേണ്ടത് ഈ അപരിഷ്കൃത തൊഴിലാളി സമൂഹം നമ്മുടെ നാട്ടിലുണ്ടാക്കിയേക്കാവുന്ന സാമൂഹിക പ്രശ്നങ്ങളെക്കുറിച്ചാണ്.തിരിച്ചറിയല്‍ രേഖകളുടെ അഭാവവും നിയമങ്ങളെക്കുറിച്ചുള്ള അജ്ഞതയും ഇവരെ എത്തിക്കുന്നത് കുറ്റകൃത്യങ്ങളുടെ മേഖലയിലേക്കാകും. വിസയും പാസ്പോര്‍ട്ടും ഒന്നും ബാധകമല്ലാത്തതിനാല്‍ എന്തും ചെയ്തു എങ്ങനെയും തിരിച്ചു പോകാന്‍ ഇവര്‍ക്ക് കഴിയും.മോഷണം ബലാല്‍സംഗം എന്നീ മേഖലകളില്‍ ഇവരില്‍ ചിലര്‍ കഴിവ് തെളിയിച്ചു കഴിഞ്ഞു.നമ്മുടെ രാഷ്ട്രീയ ശിങ്കങ്ങളുടെ ശിക്ഷണം കിട്ടിയാല്‍ ഇനി ക്വട്ടേഷന്‍ പരിപാടി കൂടി പഠിച്ചെടുത്തേക്കും. ഇത്തരം അരാജകത്വത്തിലേക്ക് നമ്മുടെ നാട് വഴുതി വീഴാതിരിക്കാന്‍ ഈ തൊഴിലാളികള്‍ക്ക് ആധികാരികമായ തിരിച്ചറിയല്‍ രേഖയും മെച്ചപ്പെട്ട തൊഴില്‍ സാഹചര്യങ്ങളും നിര്‍ബന്ധമാക്കേണ്ടത് ഭരണകൂടങ്ങളുടെ പ്രധാന ചുമതലയാണ്.ഇന്നത്തെ കേരളത്തിന്‍റെ സാമൂഹ്യാവസ്ഥയില്‍ മറുനാടന്‍ തൊഴിലാളികളുടെ പ്രയത്നമില്ലാതെ ഇവിടത്തെ നോക്കുകൂലിക്കാരെക്കൊണ്ടുമാത്രം വികസനം എത്തിക്കാം എന്നത് വ്യാമോഹം മാത്രമാണ്.

വാല്‍ക്കഷ്ണം:ആടുജീവിതവും ഗദ്ദാമയുമൊക്കെ കേരളീയ പശ്ചാത്തലത്തില്‍ ഏതെങ്കിലും ബംഗാളികള്‍ എഴുതുന്ന കാലം വിദൂരമല്ല.

പുതിയ പുതിയ രുദ്രാക്ഷ മാഹാത്മ്യങ്ങള്‍

2012-06-25T17:20:00.000+04:00

ജാതിവ്യവസ്ഥയും അനാചാരങ്ങളും കണ്ടു ഒരിക്കല്‍ സ്വാമി വിവേകാനന്ദന്‍ കേരളത്തെ വിളിച്ചത് ഭ്രാന്താലയമെന്നായിരുന്നു.ശ്രീ നാരായണഗുരുവും അയ്യങ്കാളിയും വി ടി ഭട്ടതിരിപ്പാടും നയിച്ച സാമൂഹ്യപരിഷ്കര്‍ത്തന പ്രസ്ഥാനം വക്കം അബ്ദുള്‍ഖാദര്‍ മൌലവിയും മന്നത്ത് പദ്മനാഭനും ആദ്യകാല കമ്മ്യുണിസ്റ്റ് പ്രവര്‍ത്തകരും ത്യാഗപൂര്‍ണ്ണമായ നിസ്വാര്‍ത്ഥ പ്രവര്‍ത്തനങ്ങളിലൂടെ മുന്നോട്ടു കൊണ്ടുപോയപ്പോള്‍ ആ ദുഷ്പ്പേര് ഒരു പരിധി വരെ മാറ്റിയെടുക്കാന്‍ കഴിഞ്ഞു.പക്ഷെ പതിറ്റാണ്ടുകള്‍ക്കിപ്പുറം 'ദൈവത്തിന്റെ സ്വന്തം നാടായ' കേരളം വീണ്ടും ജാതിമത ചിന്തകളുടെയും അന്ധവിശ്വാസങ്ങളുടെയും അനാചാരങ്ങളുടെയും കാര്‍മേഘത്താല്‍ മൂടപ്പെട്ടുകൊണ്ടിരിക്കുന്നു.അറിവിന്‍റെയും ചിന്താശേഷിയുടെയും പ്രകാശം മറഞ്ഞുകൊണ്ടിരിക്കുന്നു എന്ന സത്യം സമ്പൂര്‍ണ്ണ 'സാച്ചരതയും ' ഉയര്‍ന്ന ജീവിത നിലവാരവും അവകാശപ്പെടുന്ന ഒരു സമൂഹം ഇനിയും മനസ്സിലാക്കിയിട്ടില്ല.രാഷ്ട്രീയത്തെയും മതങ്ങളെയും നയിക്കുന്ന നവലിബറല്‍ നേതാക്കള്‍ക്കും മാധ്യമങ്ങള്‍ക്കും ഇക്കാര്യത്തില്‍ ഒരുപോലെ പങ്കുണ്ട്.മത രാഷ്ട്രീയ തത്വങ്ങളെ സ്വന്തം താല്‍പര്യങ്ങള്‍ക്കനുസരിച്ച്‌ വളച്ചൊടിച്ചു പ്രചരിപ്പിക്കുക എന്നതാണ് ഇന്ന് സംഭവിച്ചുകൊണ്ടിരിക്കുന്നത്.

സഞ്ജയന്‍റെ 'രുദ്രാക്ഷ മാഹാത്മ്യം ' എന്ന കഥ വായിക്കാത്ത മലയാളികള്‍ ചുരുക്കമായിരിക്കും.വെറുതെ കിട്ടിയ രുദ്രാക്ഷത്തെ അത്ഭുത സിദ്ധിയുള്ളതെന്നു പരസ്യം ചെയ്തു വിറ്റു പണക്കാരായ രണ്ടു പേരുടെ കഥ പറഞ്ഞ ആ മഹാന്‍റെ ദീര്‍ഘദര്‍ശിത്വം ഇന്നും പ്രസക്തമാകുന്നു.'മതമില്ലാത്ത ജീവന്' സംഭവിച്ച ദുരവസ്ഥ ഈ കഥയ്ക്ക്‌ വരാതിരുന്നത് അന്നത്തെ കേരളീയരുടെ മാനസികാരോഗ്യം വെളിപ്പെടുത്തുന്നുവെന്നത് ഒരു പ്രധാന കാര്യമാണ്.ഇതൊക്കെ പഠിച്ചു വളര്‍ന്ന ഒരു തലമുറയാണ് ഇന്ന് വലം പിരി ശംഖും ഏലസ്സും രുദ്രാക്ഷവും (!)വാങ്ങാന്‍ മത്സരിക്കുന്നത്,ടെലി മാര്‍ക്കെറ്റിങ്ങിലും പത്രപ്പരസ്യത്തിലും വീണു പോകാന്‍ മാത്രം സാമാന്യ ബോധം ഇല്ലാത്തവരായി മാറിയിരിക്കുന്നത്.ചാത്തന്‍ സേവ മുതല്‍ അറബി മാന്ത്രികം വരെ പരസ്യം നല്‍കി ഇരകളെ കാത്തിരിക്കുകയാണ്.ലൈംഗികോത്തേജന മരുന്നുകള്‍ പോലെ ഇവയുടെയും ആശ്വാസം അബദ്ധം പറ്റിയവര്‍ പുറത്തുപറയില്ല എന്നതു തന്നെ.ഇത്തരം തട്ടിപ്പുകാരുടെ മറ്റൊരു രൂപമാണ് ആള്‍ദൈവങ്ങളും പ്രവാചകന്മാരും സുവിശേഷകന്മാരുമായി വിലസുന്ന ചിലര്‍.ബിസിനസ്സിലും മറ്റും പൊളിഞ്ഞു കുത്തുപാളയെടുത്ത സായിപ്പന്മ്മാരെ വിസയെടുത്ത് കൊണ്ടുവന്ന് ശിഷ്യന്മാരാക്കി കാട്ടി ഈ ദൈവങ്ങള്‍ ഇന്റര്‍നാഷണല്‍ പ്രസ്ഥാനങ്ങളായി സ്വയം പ്രഖ്യാപിക്കപ്പെടുകയാണ്.ഇവറ്റകളുടെ ശിഷ്യന്മാരായി ഇതുവരെ തൊലിവെളുത്തവന്മാരല്ലാതെ കറുത്ത വിദേശികളെ കണ്ടിട്ടുണ്ടോ? .തോക്ക് സ്വാമിയും സന്തോഷ്മാധവനും നിത്യാനന്ദയുമൊക്കെ പിടിയിലായിട്ടും അവരുടെ ശിഷ്യന്മ്മാരുടെ എണ്ണത്തിന് കുറവൊന്നും വന്നിട്ടില്ല.വിശുദ്ധ ഗ്രന്ഥ ങ്ങളിലെയും പുരാണങ്ങളിലെയും കഥകളും യോഗയും എടുത്താണ് ഇവര്‍ കച്ചവടത്തിനിറങ്ങിയിരിക്കുന്നത്.ഇത്തരം വിഷയങ്ങളില്‍ അപാരമായ അറിവുള്ള ധാരാളം പേരുള്ള നമ്മുടെ നാട്ടില്‍ ആള്‍ക്കൂട്ടം തട്ടിപ്പുകാരിലേക്ക് മാത്രം അടുക്കുന്നത് 'ദൈവാംശം','അനുഗ്രഹം' തുടങ്ങിയ പ്രലോഭനങ്ങള്‍ കൊണ്ട് മാത്രമല്ലേ?

പുരാണ സീരിയലുകള്‍ വന്നതോടു കൂടി ദൈവ ഭയം കുറഞ്ഞത്‌ കൊണ്ടാണോ(ദൈവങ്ങളുടെ തമ്മിലടിയും കുശുമ്പും കുന്നായ്മയുമാണല്ലോ അവയുടെ പ്രമേയം.)അതോ ആധുനികരെന്ന മനോഭാവം മുതലെടുക്കാനാണോ എന്നറിയില്ല ഇപ്പോള്‍ തട്ടിപ്പുകാര്‍ മതവും ശാസ്ത്രവും കൂട്ടിക്കുഴച്ചാണ് പ്രയോഗം.അന്തരീക്ഷത്തിലൂടെ വരുന്ന 'കോസ്മിക്' കിരണങ്ങളെ 'ആഗിരണം' ചെയ്തു 'ഊര്‍ജം' നല്‍കുന്ന വിവിധയിനം രത്നക്കല്ലുകളാണ് ഇന്ന് ജൂവലറികളുടെ പ്രധാന വരുമാനമാര്‍ഗം. ഒന്ന് വാങ്ങിയുപയോഗിച്ചാല്‍ പിന്നെ വെച്ചടിവെച്ചടി കേറ്റമായിരിക്കും(കച്ചവടക്കാരന്..അല്ല പിന്നെ...)അഥവാ ഇനം തെറ്റിയെങ്ങാനും രത്നം ധരിച്ചാല്‍ അവന്‍റെ കാര്യം കട്ടപ്പൊക(അവനു അങ്ങനെ തന്നെ വേണം).വിപരീതഫലമുണ്ടാകുമത്രേ!(ഇതാണ് രണ്ടു മുഴം നീട്ടിയുള്ള ഏറു .ഫലം കിട്ടിയില്ലെങ്കില്‍ പറയാന്‍ കാരണം കിട്ടിയല്ലോ).സ്വര്‍ണ്ണം ഏതെങ്കിലും കിരണങ്ങളെ 'ആഗിരണം' ചെയ്യുന്നതായി അറിയാത്തത് കൊണ്ടാവും സ്വര്‍ണ്ണം വാങ്ങാന്‍ ഒരു പ്രത്യേക ദിവസം തന്നെ അവതരിച്ചിരിക്കുന്നത്. അക്ഷയ ത്രിതീയ!ഏറ്റവും കൂടുതല്‍ പരസ്യം കിട്ടുന്ന കാര്യമായതിനാല്‍ മാധ്യമങ്ങള്‍ക്കും വളരെ സന്തോഷം.

റിയല്‍എസ്റ്റേറ്റ് വ്യവസായം കേരളത്തില്‍ തഴച്ചു വളര്‍ന്നപ്പോള്‍ പൊടിതട്ടിയെടുക്കപ്പെട്ട ഒരു ശാസ്ത്രമാണ് 'വാസ്തു'.നല്ല വിലയുള്ള വീടോ വസ്തുവോ വിലയില്ലാത്തതാക്കാനും വീട്ടുകാരെ ഓടിക്കാനും പ്രേതബാധയെക്കാള്‍ ഇപ്പോള്‍ ഉപയോഗിക്കുന്നത് വാസ്തു ദോഷം എന്ന പുതിയ തന്ത്രമാണ്. എന്തെങ്കിലും പ്രശ്നങ്ങള്‍ ജീവിതത്തില്‍ ഉണ്ടാകാത്തവരില്ല.അതിനു കാരണം വര്‍ഷങ്ങളായി തങ്ങള്‍ സുഖമായി താമസിച്ചുവന്ന വീടാണെന്നു 'വാസ്തു വിദഗ്ധര്‍' പറഞ്ഞു തരുമ്പോള്‍ വീട്ടുകാര്‍ക്ക് കിട്ടുന്ന 'ആശ്വാസം' പറഞ്ഞറിയിക്കാന്‍ പറ്റില്ല.പിന്നെ തങ്ങളുടെ വീടാകും അവരുടെ പ്രധാന ശത്രു.പൊളിച്ചുപണിയുക,വില്‍ക്കുക എന്നിങ്ങനെയാകും പ്രതികാര നടപടികള്‍.പ്രതികാരം നടത്തി പുതിയ ലാവണം കണ്ടെത്തുമ്പോഴേക്കും പുതിയ പ്രശ്നങ്ങള്‍ വന്നിരിക്കും എന്നത് വേറെ കാര്യം.ഭൂമിശാസ്ത്രപരമായി കാറ്റും വെളിച്ചവും വെള്ളവും ലഭിക്കുന്ന രീതിയിലുള്ള കെട്ടിട നിര്‍മ്മാണം മാത്രമാണ് വാസ്തു ശാസ്ത്ര തത്വം എന്നത് സൌകര്യപൂര്‍വ്വം മറക്കപ്പെടുന്നു,ഇവിടെ പോസിറ്റീവ് എനെര്‍ജിയും കോസ്മിക് കിരണങ്ങളും തിരുകിക്കയറ്റി ദോഷങ്ങള്‍ വര്‍ണ്ണിക്കുകയാണ് ആധുനിക വിശ്വകര്‍മ്മാക്കള്‍.

ഉദാരവല്‍ക്കരണത്തിന്‍റെ ഇക്കാലത്ത് മതങ്ങളും പുതിയ കമ്പോളങ്ങള്‍ തേടുകയാണ്.മകരജ്യോതി എന്ന പേരില്‍ പ്രചരിപ്പിക്കപ്പെട്ട തട്ടിപ്പ് പുറത്തായിട്ടും അത്ഭുതത്തോടെ കുന്നിന്മുകളിലേക്ക് പ്രവഹിക്കുന്ന ജനലക്ഷങ്ങളും (ശബരിമല ദര്‍ശനത്തിനു പോകുന്നവരെയല്ല ഉദ്ദേശിച്ചത്)തുറന്നു വച്ചിരിക്കുന്ന ചാനല്‍ ലൈവുകളും സൂചിപ്പിക്കുന്നത് ദൈവത്തിന്‍റെ പേരില്‍ എന്ത് തട്ടിപ്പും നടത്താം എന്നല്ലേ?മുംബെയില്‍ കുരിശില്‍ നിന്ന് ജലപ്രവാഹമെന്ന പേരില്‍ പണപ്പിരിവ് നടത്തിയവര്‍ അത് കാപ്പിലരി ആക്ഷന്‍ എന്ന ശാസ്ത്ര പ്രതിഭാസമെന്നു തെളിയിച്ച വ്യക്തിയെ മതനിന്ദ ആരോപിച്ചു ജയിലിലടപ്പിക്കാനാണ് ശ്രമിച്ചത്.ഇതിനെതിരെ പ്രതികരിച്ചു 'നരകത്തില്‍ പോകാന്‍' ഒരു വിശ്വാസിക്കും ധൈര്യമില്ലല്ലോ?ഈ നാട്ടില്‍ത്തന്നെ ഒരു മാന്യദേഹം ഒരു 'മുടി'യുമായി തന്‍റെ സാമ്പത്തിക ദൌത്യം വിജയകരമായി പൂര്‍ത്തീകരിച്ചു കൊണ്ട് ലോകം ചുറ്റുന്നു. ഇന്റര്‍നെറ്റും ഫേസ്ബുക്കും വ്യാപകമായ ഇക്കാലത്ത് മതപ്രചാരണങ്ങള്‍ക്ക് പുതിയ പുതിയ രീതികളാണ് ഇവര്‍ പ്രയോഗിക്കുന്നത്.പണ്ട് പത്രത്തില്‍ വന്നിരുന്ന "ഉദ്ദിഷ്ടകാര്യത്തിന് ഉപകാരസ്മരണ:വി.യൂദാസ്ലീഹായെ ... "എന്ന് തുടങ്ങുന്ന പരസ്യങ്ങളും "ഇത് ചുരുട്ടിക്കൂട്ടിക്കളഞ്ഞ ഗോപാലനെ ആന ചവിട്ടിക്കൂട്ടി .അത് കൊണ്ട് നൂറു കോപ്പിയെടുത്ത്..."എന്ന നോട്ടീസുകളും ഓര്‍മ്മയില്ലേ?ഇന്ന് സ്ഥിതി മാറി.ദൈവങ്ങള്‍ തക്കാളിയിലും ഉരുളക്കിഴങ്ങിലും നേരിട്ടിറങ്ങി പരസ്യപ്രവര്‍ത്തനം നടത്തുകയാണ്(അറ്റ്ലസ് രാമചന്ദ്രനെ ആണ് ദൈവങ്ങള്‍ മാതൃകയാക്കിയിരിക്കുന്നത്‌ എന്ന് തോന്നുന്നു.പരസ്യചെലവ് കുറയ്ക്കാമല്ലോ.പിന്നെ അഡോബ് ഫോട്ടോഷോപ്പിനും നന്ദി) ഫേസ്ബുക്കില്‍ ലേഡീസ് പ്രൊഫൈല്‍ കഴിഞ്ഞാല്‍ ഏറ്റവും കൂടുതല്‍ ലൈക്കും ഷെയറും കിട്ടുന്നത് ഇത്തരം പോസ്ടുകള്‍ക്കാണെന്നതാണ് വാസ്തവം(വെറുതെ കിട്ടുന്ന അനുഗ്രഹമല്ലേ അങ്ങ് വാങ്ങിയേക്കാം അല്ലേ?).ഭാവിയില്‍ ദൈവങ്ങള്‍ സ്വന്തമായി ഫേസ്ബുക്ക് അക്കൌണ്ട് തുടങ്ങി അനുഗ്രഹം ലൈക്കുകളായി അയച്ചുകൊടുക്കുന്ന കാലം വരുമായിരിക്കും.

ഇവിടെ ഏറ്റവും ചിന്തനീയമായ വസ്തുത ജീവിക്കാന്‍ വകയുള്ള ഇടത്തരക്കാരും ബിസിനസ് രാഷ്ട്രീയ കലാകായിക രംഗങ്ങളില്‍ പ്രവര്‍ത്തിക്കുന്ന പണക്കാരുമാണ്‌ ഈ തട്ടിപ്പുകളിലും വിശ്വാസങ്ങളിലും എളുപ്പം വീണു പോകുന്നതെന്നതാണ്.അടുത്തു നില്‍ക്കുന്നവനെക്കാള്‍ വലുതാകണമെന്ന അത്യാഗ്രഹവും പണം കാരണമുള്ള മനസമാധാനമില്ലായ്മയുമാണ് ഇവരെ യഥാര്‍ത്ഥത്തില്‍ ഈ ചങ്ങലയിലെ കണ്ണികളാക്കുന്നത്.അന്നന്നത്തെ അധ്വാനം കൊണ്ട് ആഹാരം വാങ്ങാന്‍ ശ്രമിക്കുന്ന പാവങ്ങള്‍ കൂടിയാല്‍ ഒരു ലോട്ടറിടിക്കറ്റ് വരെ മാത്രമാണ് എത്തുന്നത്. അപൂര്‍ണ്ണമായ മത പഠനവും ശാസ്ത്ര പഠനവും ഈ ദുരവസ്ഥയുടെ മറ്റു കാരണങ്ങളാണ്.ഇതെല്ലാം അറിയാമെങ്കിലും മതനിഷേധി എന്ന പേര് പതിയാതിരിക്കാന്‍ വേണ്ടി വായടച്ചിരിക്കുന്നവര്‍ സ്വന്തം മതത്തിന്‍റെയും സമൂഹത്തിന്‍റെയും ശവക്കുഴി തോണ്ടാന്‍ സഹായിക്കുകയാണെന്നോര്‍ക്കുക.

ദാസനും വിജയനും കണ്ണൂരില്‍

2012-06-14T21:33:00.000+04:00

രാജപ്പന്‍ തെങ്ങുംമൂട് ഉദയന്‍റെ കയ്യില്‍ നിന്ന് തട്ടിയെടുത്ത തിരക്കഥ ഞാന്‍ മോഷ്ടിച്ചെടുത്തതില്‍ നിന്നും ചില പേജുകള്‍.

സീന്‍ 52
രാത്രി.
വിജയന്‍റെ വീട്.കട്ടിലില്‍ കിടക്കുന്ന ദാസനും വിജയനും (കട്ടില് മാത്രം കാണിക്കുക.വീടിന്‍റെ പടം സ്ക്രീനില്‍ വരാതെ നോക്കണം)

ദാസന്‍:എടാ വിജയാ...

വിജയന്‍:എന്താടാ ദാസാ?

ദാസന്‍:എടാ ..നമുക്കെന്താ ഈ ബുദ്ധി നേരത്തെ തോന്നാഞ്ഞത്?

വിജയന്‍:ഏതു ബുദ്ധി ?

ദാസന്‍:ഇതുപോലെ ക്വട്ടേഷന്‍ സംഘത്തെ ഏല്‍പ്പിക്കുന്ന ബുദ്ധി!

വിജയന്‍:ദാസാ..ഓരോന്നിനും അതിന്‍റേതായ സമയമുണ്ട് മോനെ..
ഇനി നമുക്കാ തടി സുനിയേം അന്ധേരി കോരയേം വിളിച്ചു ഒരു പാര്‍ട്ടി കൊടുക്കണം ..

ദാസന്‍:പിന്നേ ..കോരേടെ മോടെ കല്യാണപ്പാര്‍ട്ടിക്ക് പോയതിന്‍റെ ബഹളം ആ കെളവനും ചാനലുകാരും നിര്‍ത്തിയിട്ടില്ല! ഇനി അവന്മാരെ കണ്ട ഭാവം പോലും വേണ്ട!

വിജയന്‍:എന്നാ വേണ്ട .ഇപ്പൊ ഒരെണ്ണം അല്ലേ തീര്‍ന്നുള്ളൂ ..അത് നാലായി,പത്തായി,നൂറായി,ആയിരമായി...കുലംകുത്തികളില്ലാത്ത ലോകം..ഹോ..നമുക്കങ്ങു സുഖിക്കണം....

ദാസന്‍:ആഹാ..തീര്‍ന്നവന്‍റെ വീട്ടുകാരുടെ കരച്ചിലു കേള്‍ക്കാന്‍ തന്നെ എന്തൊരു സുഖം...എന്തൊരു സംഗീതാത്മകം..ആഹാ..

വിജയന്‍:ഐശ്വര്യത്തിന്‍റെ സൈറന്‍ മുഴങ്ങുന്നത് പോലുണ്ട്.അല്ലേ?
ദാസന്‍:ഈശ്വരാ രക്ഷിക്കണേ...

വിജയന്‍:പതുക്കെപ്പറ..നമുക്ക് ഈശ്വരനൊന്നും ഇല്ലെന്നറിയില്ലേ?

പെട്ടന്ന് വെളിച്ചം അണയുന്നു.സ്ക്രീനില്‍ ഇരുട്ട് മാത്രം..എന്തോ തട്ടിവീഴുന്ന ശബ്ദം.

ദാസന്‍:ശ്ശെ ...പവര്‍ക്കട്ടിന്റെ സമയത്ത് മാത്രം വരുന്ന ആ കള്ളിപ്പൂച്ച എത്തിയിട്ടുണ്ട്.

സീന്‍ 53
പകല്‍
ഓഫീസ് റൂം
ഓഫീസിലിരുന്നു ടിവി കാണുന്ന ദാസനും വിജയനും.ടിവിയില്‍ വാര്ത്താവായനക്കാരന്‍റെ കഥകളി.

"പ്രധാന വാര്‍ത്തകള്‍..ചന്ദ്രന്‍ വധക്കേസില്‍ മുഖ്യ പ്രതി തടി സുനിയും അന്ധേരി കോരയും പിടിയില്‍.ഗൂഡാലോചനയുടെ ചുരുളഴിയുന്നു...ദാസനും വിജയനും പോലിസ് നിരീക്ഷണത്തില്‍...."

(പേടിച്ചരണ്ട ദാസന്‍റെ മുഖം ക്ലോസപ്പില്‍ .ഒരു നിമിഷം നിശബ്ധത.ക്യാമറ വീണ്ടും ടിവിയിലെക്കെത്തുമ്പോള്‍ പരസ്യം)

"സണ്ണീ ...എനിക്കെന്തെങ്കിലും പുളിയുള്ളത് തിന്നാന്‍ തോന്നുന്നു..."

ദേഷ്യത്തോടെ ടിവി ഓഫ്‌ ചെയ്യുന്ന വിജയന്‍: അവളുടെ ഒരു പുളി തീറ്റി..മനുഷ്യനിവിടെ തീ തിന്നു കൊണ്ടിരിക്കുമ്പോഴാ....ഡാ ദാസാ ..നീയല്ലേ പറഞ്ഞത് ആരും പിടിക്കില്ല എന്ന്? ഇപ്പൊ എന്തായി?

ദാസനും ദേഷ്യത്തില്‍:നീയല്ലേ അന്ന് സി ബി ഐ ക്കാരോട് പറഞ്ഞത് ഇവിടെ മാത്രമല്ല പിടി അങ്ങ് ടെല്ലീലുമൊണ്ടെന്നു?ടെല്ലീം ബംഗാളും പോയിട്ട് തോട്ടുമുക്കില്‍പ്പോലും പിടിയില്ലെന്നു ഇപ്പോഴാ മനസ്സിലായത്‌.അച്ചു അമ്മാവന്‍ അന്നേ പറഞ്ഞതാ..നിന്‍റെ കൂടെ കൂടിയാല്‍ ചൊമന്നവനും നാറുമെന്ന്‌.!

വിജയന്‍: ഡാ...ഡാ..നീയത്രയ്ക്ക് ചൂടാവണ്ട...എന്തായാലും നീ വെറും ലോക്കല്‍ കമ്മിറ്റിയും ഞാന്‍ പീബിയുമാ..അത് മറക്കണ്ട!...നികൃഷ്ട ജീവീ..കുലംകുത്തീ....

ദാസന്‍ :പീബീന്നു വച്ചാല്‍ ഇങ്ങേരെ പോക്കറ്റിലല്ലേ ..(പിറുപിറുക്കുന്നു)പ്രകാശം പരത്തുന്നവനേ...... അങ്ങനെ മണിയാശാനും പണിയായി.എന്തൊക്കെയായിരുന്നു..വെടിവെച്ചുകൊന്നു..കുത്തിക്കൊന്നു...തല്ലിക്കൊന്നു...ഹോ.

വിജയന്‍:എടാ ദാസാ..നമുക്കീ നാടുവിട്ടാലോ?

ദാസന്‍:എങ്ങോട്ട്?

വിജയന്‍:മലപ്പൊറത്തെക്ക്‌ ...അവിടെ നമുക്കൊരാളുണ്ട്....പണ്ട് ക്യാനഡാ യിലേക്ക് വിസ ശരിയാക്കിത്തന്ന കുഞ്ഞാപ്പ.

സീന്‍ 54
തിരയൊഴിഞ്ഞ കടല്‍തീരം...ഒരു ബക്കറ്റിലെ വെള്ളം മാത്രം അലയടിച്ചുകൊണ്ടിരിക്കുന്നു.അതില്‍ നോക്കിയിരിക്കുന്ന കുട്ടിയില്‍ നിന്നും ക്യാമറ ദൂരേക്ക്‌ നോക്കി നില്‍ക്കുന്ന ദാസനെയും വിജയനെയും ഫോക്കസ് ചെയ്യുന്നു.അവരുടെ അടുത്തേക്ക് വരുന്ന കുഞ്ഞാപ്പ.

കുഞ്ഞാപ്പ :ബാലകൃഷ്ണാ ...കൊച്ചുകള്ളാ..

വിജയന്‍(അമ്പരപ്പോടെ):ഇത് ഞാനാ...വിജയന്‍.

കുഞ്ഞാപ്പ:യ്യോ..ഇതെന്‍റെയൊരു സ്ഥിരം ഡയലോഗാണ് പുള്ളേ...ന്താ ഇന്‍റെ..പ്രശ്നം?മലപ്പൊറത്തെക്ക്‌ വരണം.. ല്ലേ? ദേ ..ആ കാണുന്നത് കാലിഫോര്ണിയെലേക്ക് ചരക്കു കേറ്റാന്‍പോന്ന ഉരുവാണ്‌. നിങ്ങക്ക് രണ്ടാക്കും വേണ്ടി വേണങ്കില് ഞമ്മളിത് മലപ്പൊറം കടപ്പൊറം വഴി തിരിച്ചുവിടാം...

അടുത്ത് കെട്ടിയിട്ടിരിക്കുന്ന കൊതുമ്പു വള്ളത്തിലേക്ക്‌ ക്യാമറ തിരിക്കുക.(നിര്‍മ്മാതാവേ കപ്പല് കാണിക്കണമെങ്കില്‍ ചെലവു കൂടും പറഞ്ഞേക്കാം)

ദാസന്‍:ഉമ്മന്‍ പോലീസിന്‍റെ കയ്യില്‍പെട്ടാലോ?

കുഞ്ഞാപ്പ:അതിനു പോലീസിന്‍റെ മൂക്കിനകത്തേക്കല്ലാലോ..നിങ്ങള് പോണത്.പോലീസും കില്ലിസ്സും ഇല്ലാത്ത ഒരുപാട് കടപ്പൊറം മലപ്പൊറത്തൊണ്ട്.അത് കുഞ്ഞാപ്പൂനു നല്ലപോലറിയാം. ങ്ങളൊരൊറ്റക്കാര്യം ചെയ്‌താല്‍ മതി.വെള്ളത്തോപ്പീം പച്ച ബെല്‍റ്റും കരുതണം .കരപറ്റ്യാലൊടന്‍ വെള്ള ബനിയന്റേം ലുങ്കീടേം കൂടെ അതെടുത്തിട്ടോളീന്‍.പിന്നെ അത്യാവശ്യം ചെല വാക്കുകള് ഞാനിപ്പം പഠിപ്പിച്ചു തരാം..ഒന്നൂല്യാ...അസലാമു അലൈക്കും....വലൈക്കും ഉസലാം...

ദാസന്‍:ഇയ്യാള് നമ്മളെ വലയ്ക്കുമോ?

കുഞ്ഞാപ്പ: ല്ലെടാ ശെയ്ത്താനേ ...ആരേലും ചോയ്ച്ചാല് ..കുഞ്ഞാപ്പൂ കാ ദോസ്ത് ..കുഞ്ഞാപ്പൂ കാ ദോസ്ത് ..എന്ന് പറഞ്ഞാ മതി ..ബാക്കിയൊക്കെ ഞമ്മളേറ്റു.പിന്നെ അവിടെച്ചെന്നു ഐസ്ക്രീം ..ചാക്ക്..റൌഫ് .എന്നൊന്നും മിണ്ടിയേക്കല്ല് ...അതൊക്കെ മുട്ടന്‍ ചീത്തവാക്കുകളാ...

വിജയന്‍:അപ്പൊ എല്ലാം പറഞ്ഞപോലെ കുഞ്ഞാപ്പാ ...

ദാസന്‍:കുഞ്ഞാപ്പ ഞമ്മടെ ദൈവാ ...കുഞ്ഞാപ്പ ഞമ്മടെ ദൈവാ ..

കണ്ണു തുടച്ചു നില്‍ക്കുന്ന കുഞ്ഞാപ്പുവിന്‍റെ അടുത്തേക്ക് വരുന്ന ഐസ്ക്രീം വില്‍പനക്കാരന്‍റെ അവസ്ഥ പ്രേക്ഷകനിലേക്ക് വിട്ടുകൊണ്ടു
കൊതുമ്പു വള്ളത്തിലേറി തുഴഞ്ഞു പോകുന്ന ദാസന്‍റെയും വിജയന്‍റെയും പിന്നില്‍ ജ്വലിച്ചു നില്‍ക്കുന്ന ചുവന്ന സൂര്യനിലേക്കു ക്യാമറ പതുക്കെ തിരിയുമ്പോള്‍ എഴുതിക്കാണിക്കണം "ശുഭം"

(നിര്‍മ്മാതാവിന്‍റെ കയ്യില്‍ കാശ് ബാക്കിയുണ്ടെങ്കില്‍

മലപ്പുറത്ത്‌ ഇറങ്ങുന്ന ദാസനെ നായിക കല്യാണം കഴിക്കുന്നതായി തിരുവനന്തപുരത്തെക്കൊരു ക്ലൈമാക്സും വിജയനെ കല്യാണം കഴിക്കുന്നതായി കണ്ണൂരേക്കൊരു ക്ലൈമാക്സും കടല് നീന്തി വന്നു കുഞ്ഞാപ്പ കെട്ടുന്നതായി മലപ്പുറത്തേക്കൊരു ക്ലൈമാക്സും എടുത്തു വച്ചാല്‍ നന്നായിരിക്കും.)

സ്ഥലത്തെ പ്രധാന പരോപകാരികള്‍

2012-06-11T03:19:00.000+04:00

ചാനലുകാരും രാഷ്ട്രീയക്കാരും ചേര്‍ന്നവതരിപ്പിച്ച നെയ്യാറ്റിന്‍കര റിയാലിറ്റി ഷോ അവസാനിച്ചു.ശെല്‍വരാജ് എന്ന പുതിയ സൂപ്പര്‍സ്റ്റാറിന്‍റെ (പ്രിഥ്വിരാജ് ക്ഷമിക്കുക ഇതു മറ്റൊരു സുപ്പര്‍സ്റ്റാര്‍ രാജ് ആണ്) ഉദയം കണ്ട ഈ ഷോയുടെ ഫലം പതിനഞ്ചാം തീയതി വരുമ്പോള്‍ അഴിമതി നടത്താനുള്ള പുതിയ അവസരവും MLA ക്വാര്‍ട്ടേഴ്സില്‍ ഒരു ഫ്ലാറ്റും സമ്മാനമായിക്കിട്ടുന്നതാര്‍ക്കെന്ന കാര്യവും എലിമിനേഷന്‍ റൌണ്ടില്‍ പുറത്തായ ജനങ്ങള്‍ക്ക്‌ കാണാം .എന്തിനാണ് നമ്മള്‍ വോട്ടു ചെയ്യേണ്ടതെന്ന ചോദ്യത്തിനു രാഷ്ട്രീയക്കാരില്‍ നിന്ന് കിട്ടിയ ഉത്തരം കാലുമാറ്റത്തിനും വഞ്ചനക്കുമെതിരെ,കൊലപാതകരാഷ്ട്രീയത്തിനെതിരെ,ഭൂരിപക്ഷ സമുദായത്തിന്മേലുള്ള പീഡനത്തിനെതിരെ എന്നിങ്ങനെയായിരുന്നു.ഈ മണ്ഡലത്തിലെ ജനകീയ പ്രശ്നങ്ങളിളിടപെട്ടു നിയമസഭയില്‍ നിയമനിര്‍മ്മാണ പ്രക്രിയയില്‍ പങ്കെടുത്തു നാടിനു നന്മ ചെയ്യുന്ന ഒരു ജനപ്രതിനിധിയെ തരാം എന്ന് ആരും പറഞ്ഞില്ല.ഉത്സവത്തിനു അമ്പലത്തിലും പള്ളിയിലും പോകുന്ന ആവേശത്തില്‍ പോളിംഗ് ബൂത്തില്‍ ക്യൂ നിന്ന് വോട്ടു ചെയ്തു മടങ്ങിയ പൊതുജനവും ഇത്തരം ചോദ്യോത്തരങ്ങള്‍ക്കു സമയം കണ്ടെത്തിയതായി തോന്നുന്നില്ല.അല്ലെങ്കില്‍ ഏതവന്‍ ജയിച്ചാലും കഞ്ഞി കുടിച്ചു കഴിയണമെങ്കില്‍ സ്വയം അധ്വാനിച്ചു വക കണ്ടെത്തണമെന്ന തിരിച്ചറിവാകാം കാരണം.

ചന്ദ്രശേഖരന്‍ വധം ഒരു രാഷ്ട്രീയ ക്രൂരതയായി ചര്‍ച്ച ചെയ്ത സമൂഹത്തിലേക്കാണ് വണ്‍.. ടൂ... ത്രീ ...പതിമൂന്ന്‌ എന്നു പറഞ്ഞു മണിയാശാന്‍റെ കടന്നുവരവ്.ബാറ്റ്മാന്‍ സീരീസില്‍ ഹീത്ത് ലെട്ജെര്‍ അനശ്വരമാക്കിയ വില്ലന്‍ ജോക്കറിനെപ്പോലെ പാര്‍ട്ടിക്കാരെയും ചാനലുകാരെയും ഞെട്ടിച്ചു ആശാന്‍റെ നാക്ക് വ്യതിചലിച്ചപ്പോള്‍ സഹായ സഹകരണ കൊലപാതകങ്ങളുടെ പുതിയ പഴയ കഥകളാണ് പുറത്തു വന്നത്.ചാനലുകള്‍ ഇവിടെ അവതരിക്കുന്നതിനു മുന്‍പേ മണ്മറഞ്ഞ അഞ്ചേരി ബേബിയും ബാലുവും നാല്‍പ്പാടി വാസുവും ജയകൃഷ്ണന്‍ മാഷുമൊക്കെ ശവമാടം പൊളിച്ചിറങ്ങി ഇടതന്‍റെയും വലതന്‍റെയും താമരക്കാരുടെയുമൊക്കെ ഉറക്കം കെടുത്താനിറങ്ങിയിരിക്കുകയാണ്.എങ്കിലും മാധ്യമങ്ങള്‍ എത്രനാള്‍ പ്രധാന വാര്‍ത്തയാക്കും എന്നതനുസരിച്ചിരിക്കും ഇവരുടെയൊക്കെ പുതിയ ജീവിതം.അല്ലെങ്കില്‍,കണ്ടാല്‍ പരസ്പരം കടിച്ചു കീറാന്‍ നില്‍ക്കുന്നവര്‍ക്ക് ചാണ്ടിച്ചന്‍റെ താറാവുകറിയും കുഞ്ഞാപ്പയുടെ ബിരിയാണിയും കഴിച്ചു ഒരു അത്താഴപ്പാര്‍ട്ടിയിലൂടെ മുക്കിക്കളയാവുന്ന ചെറിയ പ്രശ്നം മാത്രമാണ് ഈ ശവക്കുഴി തോണ്ടല്‍ .

ഇപ്പോള്‍ മണിക്കെതിരെ പ്രസംഗത്തിന്‍റെ പേരില്‍ കേസെടുത്ത പോലീസ്സ് തന്നെയാണ് ജഡ്ജി കൈക്കൂലി വാങ്ങുന്നതു കണ്ടെന്നു പറഞ്ഞ സുധാകരനെതിരെയും കേസെടുത്തത്.എന്നിട്ടെന്തായി?ഒരു സഖാവും അതിനെക്കുറിച്ചു ഇപ്പോള്‍ സൂചിപ്പിക്കുന്നതു പോലും ഇല്ല .തെരഞ്ഞെടുപ്പു കാലത്ത് മാത്രം പ്രത്യക്ഷപ്പെടുന്ന മറ്റു ചില പ്രതിഭാസങ്ങളാണ് ലാവലിന്‍,ഐസ്ക്രീം,റൌഫ് തുടങ്ങിയവ.കയ്യാമം വച്ച് നടത്തപ്പെടും എന്ന് പറഞ്ഞവര്‍ അധികാര സ്ഥാനങ്ങളില്‍ തുടരുകയും കയ്യാമം വയ്പ്പിക്കും എന്ന് പറഞ്ഞയാള്‍ ഇപ്പോള്‍ കയ്യാമത്തിനരികെയുമായതും പരോപകാരത്തിന്‍റെ മറ്റൊരു ഉദാഹരണമല്ലേ?മൂന്നാറിലും മതികെട്ടാന്‍ മലയിലുമൊക്കെ നൂറുകണക്കിന് ഏക്കര്‍ സ്ഥലം വെട്ടിപ്പിടിച്ച മലയോര കൊണ്ഗ്രസ്സുകാര്‍ക്കും മണിയന്മാര്‍ക്കുമൊക്കെ വിഷമം വയനാട്ടിലെ രണ്ടരയേക്കറിനെക്കുറി ച്ചാണ്.നിയമത്തിന്‍റെ ബുള്‍ഡോസ്സറു മായിറങ്ങുമെന്നു പറഞ്ഞ തിരുവഞ്ജൂരിന്‍റെ പൊടിപോലുമില്ല കണ്ടുപിടിക്കാന്‍ എന്ന് പറയേണ്ടി വരുന്നു.
സ്കൂളും കോളേജും കോഴ്സുമെല്ലാം വാരിക്കോരി നല്‍കി സമുദായ നേതാക്കള്‍ക്ക് കച്ചവടം നടത്താന്‍ സഹായം ചെയ്യുന്നതില്‍ റബ്ബും റബ്ബര്‍ ജോസഫും പോളിറ്റ് ബേബിയുമൊക്കെ ഒരു പോലെ മത്സരിക്കുകയായിരുന്നല്ലോ. പരോപകാരത്തിന്‍റെ എളമരം ചാണ്ടി കഥകള്‍ പറയുന്ന ടൈറ്റാനിയത്തിലെ അഴിമതിക്കും ഇന്നെന്തു സംഭവിച്ചു.അവിടെ ദ്രവിച്ചു കൊണ്ടിരിക്കുന്ന യന്ത്രസാമഗ്രികള്‍ ജനാധിപത്യത്തിന്‍റെ നാണക്കേടായി നമുക്ക് മുന്‍പില്‍ നില്‍ക്കുന്നു.അച്ചുമ്മാനും ഐസ്സക്കും അന്നുണ്ടാക്കിയ കോലാഹലങ്ങള്‍ കണ്ടു മുഖ്യമന്ത്രി ക്കുപ്പായം തുന്നിച്ച ചെന്നിത്തലയോ വോട്ടിട്ട് ഇവരെയൊക്കെ ജയിപ്പിച്ചുവിട്ട പോതുജനമാണോ വിഡ്ഢിയായതെന്നു പരിശോധിക്കേണ്ടിയിരിക്കുന്നു.അഴിമതി കാട്ടി ജയിലു കണ്ട ഒരു പിള്ളേച്ചന്‍ രക്തത്തില്‍ ഇരുമ്പു കൂടുന്ന ഒരു മഹാരോഗം പിടിപെട്ടു ഗുരുതരാവസ്ഥയില്‍ ഇപ്പോള്‍ സുഖമായി നമുക്കിടയില്‍ വിലസുന്നതും ഈ പരസഹായ ക്കമ്മിറ്റികള്‍ നമുക്ക് കാട്ടിത്തന്നു.(അദ്ദേഹത്തിന്റെ രക്തത്തിലെ ഇരുമ്പു കൊണ്ടാണ് പൂജപ്പുരയിലെ കമ്പികളുണ്ടാക്കിയതെന്നും പറയാന്‍പറ്റാത്തിടത്ത് കേറ്റാന്‍ പറ്റിയ പാരകള്‍ പണിയാന്‍ ആ ഇരുമ്പ് പഷ്ടാനെന്നും ചില ദ്രോഹികള്‍ പറഞ്ഞു നടക്കുന്നുണ്ട് കേട്ടോ).

സ്വന്തം ജോലിയോട് ആത്മാര്‍ഥതയുള്ള ചില ഉദ്യോഗസ്ഥരെങ്കിലും ഇപ്പോഴും ഉള്ളതു കൊണ്ട് ഭരണയന്ത്രം പതുക്കെയാണെങ്കിലും തിരിഞ്ഞുകൊണ്ടെയിരിക്കുന്നു.ഇടയ്ക്കിടയ്ക്ക് ജനസമ്പര്‍ക്കം എന്ന റിയാലിറ്റി ഷോ നടത്തി ജനങ്ങളെ പറ്റിക്കാമെന്ന മുഖ്യന്‍റെയും കൂട്ടരുടെയും തന്ത്രത്തിന് എത്രനാള്‍ ആയുസ്സുണ്ടാകും.ഇതുവരെ തുടങ്ങാത്ത ബുള്ളറ്റ് ട്രെയിനിന്‍റെയും അതിവേഗ പാതയുടെയും പടം കാണിച്ചു വാര്‍ഷികപരസ്യം മിനിട്ടിനു മിനിട്ടിനു നല്‍കുന്നത് ജനങ്ങളെ പറ്റിക്കാനോ അതോ ചാനലുകാര്‍ക്ക് വരുമാനമുണ്ടാക്കിക്കൊടുക്കാനുള്ള പുതിയ പരസഹായ പ്രവര്‍ത്തനമാണോ എന്നു നമ്മളാണ് ചിന്തിക്കേണ്ടത് .കാരണം പൊതുജനം കഴുതയെന്നു പറയുന്നത് ഈ രാഷ്ട്രീയക്കാരും മാധ്യമങ്ങളും ചേര്‍ന്നാണ്!

ചെകുത്താന് സ്നേഹപൂര്‍വ്വം ദൈവം

2012-06-05T23:46:00.000+04:00

" ഈ മെയില്‍ വിവാദത്തില്‍ ചോര്‍ത്തപ്പെട്ട ഒരു രഹസ്യ സന്ദേശം ഇവിടെ ഫോര്‍വേഡ് ചെയ്യുന്നു . ഇതെഴുതിയ ദൈവം എന്ന ആളുടെ പേരിലെ മത തീവ്രവാദ ബന്ധം ഇതുവരെ തെളിയിക്കപ്പെടാത്തതിനാല്‍ വിവാ ദങ്ങളുണ്ടാകില്ലെന്നു പ്രതീക്ഷിക്കാം".

------------------------------------------------------------------------------------------------------------------------------

From:daivam@email.com

To:chekuthaan@aamail.com

പ്രിയ സ്നേഹിതാ...താങ്കള്‍ക്കു സുഖമല്ലേ?

                 ആശയപരമായ ചില തെറ്റിദ്ധാരണകള്‍ മൂലം ഞാന്‍ താങ്കളെ ഇത്രനാളും അകറ്റി നിര്‍ത്തിയതില്‍ ക്ഷമിക്കുക.ഈ പ്രപഞ്ചത്തില്‍ ഏറ്റവും മോശക്കാരന്‍ താങ്കളാണെന്ന് കരുതിയ എനിക്ക് തെറ്റ് പറ്റിയെന്നു ഭൂമിയിലെ എന്‍റെ അനുയായികള്‍ എന്നു പറഞ്ഞു നടക്കുന്നവരുടെ ചെയ്തികള്‍ കണ്ടപ്പോള്‍ മനസ്സിലായി.എന്‍റെ പേരില്‍ അവര്‍ അവിടെ പല മതങ്ങള്‍ ഉണ്ടാക്കിയപ്പോള്‍ എന്‍റെ മാര്‍ഗം അതിവേഗം ബഹുദൂരം കൂടുതല്‍പ്പേരില്‍ എത്തുമെന്ന് ഞാന്‍ കരുതി.പക്ഷെ ...മതപണ്ഡിതന്മാര്‍ എന്ന കൂട്ടര്‍ എന്‍റെ പ്രതീക്ഷകളെല്ലാം തെറ്റിച്ചു.യേശു ,നബി,കൃഷ്ണന്‍ തുടങ്ങിയ പ്രവാചകരിലൂടെ ഞാന്‍ നല്‍കിയ പ്രമാണങ്ങള്‍ അവരവരുടെ സ്വാര്‍ത്ഥ താല്പര്യങ്ങള്‍ക്ക് വേണ്ടി വളച്ചൊടിച്ചു വ്യാഖ്യാനം നല്‍കുകയാണ് ഇക്കൂട്ടര്‍ ചെയ്തത്.ആദ്യം തന്നെ ഞാനൊരു കൈക്കൂലിക്കാരനും സ്വജനപക്ഷപാതിയുമാണെന്നു അവര്‍ പറഞ്ഞു പരത്തി.ക്ഷിപ്രകോപവും ക്ഷിപ്രപ്രസാദവും ആണ് എന്‍റെ സ്വഭാവമെന്നു പറഞ്ഞു സംഭാവനകള്‍ വാരിക്കൂട്ടി.സ്വര്‍ഗത്തിന്‍റെയും നരകത്തിന്‍റെയും മരണാനന്തര ജീവിതത്തിന്‍റെയും പേര് പറഞ്ഞു ആളുകളെ ഭീഷണിപ്പെടുത്തിയും പ്രലോഭിപ്പിച്ചും സ്വന്തം മതത്തിലേക്ക് ആളെക്കൂട്ടി ശക്തികാണിക്കാന്‍ അവര്‍ ശ്രമിച്ചു.
                  മറ്റൊന്ന് പൊതുസ്ഥലങ്ങളും പാതയുമൊക്കെ കയ്യേറി അവയ്ക്ക് മുന്‍പില്‍ വലിയ ഭണ്ടാരങ്ങള്‍ നിരത്തി നടത്തുന്ന കച്ചവടം. ലക്ഷക്കണക്കിനു പേര്‍ താമസിക്കാനൊരു കൂരയില്ലാതെ ചൂടും തണുപ്പുമേറ്റു മരിച്ചു വീഴുന്ന ഭൂമിയിലാണ് ഈ കയ്യേറ്റവും മണിമന്ദിരങ്ങളും!വാഹനങ്ങളില്‍ നിന്നും ഭണ്ടാരത്തിലേക്ക് ചില്ലറകള്‍ വലിച്ചെറിഞ്ഞു വണങ്ങി മനുഷ്യര്‍ പോകുമ്പോള്‍ അവരിലെ "പിച്ചക്കാര്‍" എന്ന കൂട്ടരിലൊരുവനാണോ ഞാനെന്നു ചിന്തിച്ചിട്ടുണ്ട്.കുരിശില്‍ നിന്ന് വെള്ളമിറ്റിച്ചും തക്കാളിയില്‍ വചനങ്ങളെഴുതിവച്ചും വിഗ്രഹ രൂപത്തില്‍ പാല്‍കുടിച്ചും പരസ്യം ചെയ്യുന്ന കോര്‍പ്പറേറ്റ് മുതലാളിയാണ് ഞാനെന്നു വരുത്തിത്തീര്‍ക്കാന്‍ ചിലര്‍ ശ്രമിക്കുന്നു.എന്‍റെ കാലടിപ്പാടെന്നും മുടിയെന്നും കണ്ണീരെന്നും പറഞ്ഞു പുതിയ പുതിയ വിപണന സാധ്യതകളാണ് അവര്‍ തുറക്കുന്നത്.വലം പിരി ശംഖെന്നും രുദ്രാക്ഷമെന്നും പറഞ്ഞു മറ്റു ചിലര്‍.അതുകൊണ്ട് അബദ്ധത്തില്‍പ്പോലും എന്‍റെ മുടിയോ നഖമോ ഭൂമിയില്‍ വീഴാതെ ഞാന്‍ ശ്രദ്ധിക്കാറുണ്ട്.
                 മറ്റൊരു കാര്യം സ്ത്രീകളുടെ ഉടുപ്പിലും നടപ്പിലും നിബന്ധനകള്‍ വയ്ക്കുന്ന ഒരു മെയ്ല്‍ ഷോവനിസ്റ്റാണ് ഞാനെന്നുള്ള കള്ള പ്രചരണം .അതില്‍ ഓരോ മതങ്ങളും മത്സരിക്കുകയാണ്.വിശുദ്ധ ദിനങ്ങളില്‍ തലയറ്റു വീഴുന്ന കോഴിയുടെയും ആടിന്‍റെയും വെയിലേറ്റു വാടുന്ന ആനകളുടെയും ശാപം...ഹോ ...പലപ്പോഴും ഉറക്കം കൂടി കെടുത്താറുണ്ട്.ആ വെള്ളി മൂങ്ങകള്‍ പരാതിയുമായി വന്ന ദിവസം ഞാന്‍ നാണക്കേട്‌ കൊണ്ട് ചൂളിപ്പോയി.എന്‍റെ പേരില്‍ നേര്‍ച്ചയും ബലിയും നടത്തി പങ്കിട്ടു വെജ്ജും നോണ്‍ വെജ്ജും മദ്യവുമൊക്കെ ഭക്തിപുരസ്സരം അകത്താക്കുന്ന മനുഷ്യരുടെ വിഡ്ഢിത്തം പലപ്പോഴും ഒരു തമാശയായി തോന്നിയിട്ടുണ്ട്.പ്രാര്‍ത്ഥിക്കാന്‍ മാത്രമല്ല തിന്നാനും വേണ്ടേ ഓരോരോ കാരണങ്ങള്‍...!

                   മാലിന്യം കൊണ്ട് വീര്‍പ്പു മുട്ടുന്ന ഗംഗാ നദി മുതല്‍ പമ്പാ നദി വരെയുള്ളവയുടെ നിലവിളി ഇപ്പോഴും എന്‍റെ കാതില്‍ അലയടിക്കുന്നു.ജീവജാലങ്ങള്‍ക്ക് കുടിക്കാനും ദേഹശുദ്ധി വരുത്താനും വളരാനും ഞാന്‍ കൊടുത്ത ജലാശയങ്ങള്‍ ശവങ്ങളും വെണ്ണീറും വസ്ത്രങ്ങളും മുതല്‍ മലം വരെ നിറച്ചു പുണ്യ നദിയായി കൊണ്ടാടുകയാണല്ലോ.വ്യവസായ വികസനത്തിന്‌ വേണ്ടി അവര്‍ ജലവും പരിസ്ഥിതിയും മലിനമാക്കിയപ്പോള്‍ അത് വികസനം എന്ന് തള്ളിയ എനിക്ക് എന്‍റെ പേരില്‍ നടത്തുന്ന ഈ മലിനീകരണം ന്യായീകരിക്കാന്‍ വാക്കുകള്‍ കിട്ടുന്നില്ല.
                എന്നെ ഏറ്റവും കൂടുതല്‍ ചിരിപ്പിച്ചത് എന്നെക്കാള്‍ ശക്തിയുണ്ടെന്ന് ജനങ്ങളെ വിശ്വസിപ്പിച്ചു സര്‍വ്വസുഖങ്ങളോടെ വാണരുളുന്ന സൊ കാള്‍ഡ് ആള്‍ദൈവങ്ങളും അവരുടെ അനുയായികളുമാണ്‌.(ആഡംബരത്തിലെങ്കിലും അവര്‍ എന്നേക്കാള്‍ മുകളിലാണ് കേട്ടോ!) ശൂന്യതയില്‍ നിന്ന് ഭസ്മവും മാലയും ആപ്പിളുമൊക്കെ എടുക്കുന്ന ഇവര്‍ക്ക് ഒരു ചാക്ക് അരി ശൂന്യതയില്‍ നിന്ന് വരുത്തി പട്ടിണി ക്കാര്‍ക്ക് കൊടുത്തു കൂടെ?ത്രികാല ജ്ഞാനികളായി ചമയുന്ന ഇവര്‍ക്ക് ഭൂകമ്പവും സുനാമിയുമൊക്കെ മുന്‍കൂട്ടിക്കണ്ട് ജനങ്ങളെ രക്ഷിക്കാമായിരുന്നു.തെരുവ് സര്‍ക്കസുകാര്‍ക്കു പോലും സാധ്യമായ മാജിക്കുകള്‍ സുവര്‍ണ്ണ സിംഹാസനത്തിലിരുന്നു ഇവര്‍ കാണിക്കുമ്പോള്‍ വാ പൊളിച്ചു കൂടെ പോകുന്ന മനുഷ്യര്‍ക്ക്‌ ഞാന്‍ നല്‍കിയത് വിവേചന ബുദ്ധി തന്നെയായിരുന്നോ എന്ന് സംശയമുണ്ട്‌.അതിലേറെ രസകരം സ്വന്തം അച്ഛനമ്മമാരെ ചവിട്ടിപ്പുറത്താക്കി വൃദ്ധമന്ദിരങ്ങളിലും തെരുവിലും ഉപേക്ഷിച്ചു അധ്യാപകരെ പരിഹസിച്ചു നടന്നിട്ട് സമാധാനം തേടി ആള്‍ദൈവങ്ങളെ കുമ്പിടുന്നവരെ കാണുമ്പോളാണ്.

                 അടുത്ത വീട്ടിലെ പട്ടിണിയും രോഗവും കണ്ടില്ലെന്നു നടിച്ചു അമ്പലങ്ങളും പള്ളികളും സംഭാവന കൊണ്ട് മൂടി എന്‍റെ അനുഗ്രഹത്തിന് കാത്തു നില്‍ക്കുന്ന അവരറിയുന്നില്ല..എന്‍റെ അനുഗ്രഹം സഹജീവികളെ സഹായിക്കുന്നവരിലാണെന്ന്.എന്നെത്തേടി ആരാധനാലയങ്ങളില്‍ തിരക്കു കൂട്ടി ചവിട്ടു കൊണ്ട് വീഴുന്ന അവരറിയുന്നില്ല, എന്നെ തേടേണ്ടത് സ്വന്തം മനസ്സിലാണെന്ന്.ഞാനുമായി സംവദിക്കാനുള്ള സ്വകാര്യം മാത്രമാണ് മതങ്ങളെന്നു മനസ്സിലാക്കാനും ,ആള്‍ക്കൂട്ടത്തിന്‍റെ മതങ്ങളല്ല വ്യക്തികളുടെ മതബോധവും ശുദ്ധിയുമാണ് എന്നിലേക്കുള്ള എളുപ്പവഴിയെന്നും അറിയിക്കാന്‍ ഞാന്‍ പരാജയപ്പെട്ടതായി തോന്നുന്നു.അതു കൊണ്ട് സ്നേഹിതാ.... ഈ ഭൂമിയും അവിടത്തെ മനുഷ്യരെയും ഞാന്‍ താങ്കള്‍ക്കു തരുന്നു.താങ്കളുടെ സമാധാന ജീവിതം കണ്ടു അസൂയ തോന്നിയതു കൊണ്ടോ താങ്കള്‍ക്കു പാരവെക്കാനോ അല്ല ഞാനീ അഭ്യര്‍ത്ഥന നടത്തുന്നത്.എന്‍റെ സദുദ്ദേശത്തെ തെറ്റിദ്ധരിക്കില്ലെന്ന വിശ്വാസത്തോടെ....

യുവേര്‍സ്   ഫൈത്ത്ഫുളി,

ദൈവം (ഒപ്പ്)

സിനിമ -മലയാളം തമിഴ് ന്യൂ ജെനറേഷന്‍

2012-06-03T02:37:00.000+04:00

മലയാളത്തില്‍ പുതുമുഖ ചിത്രങ്ങള്‍ക്കും പരീക്ഷണ ചിത്രങ്ങള്‍ക്കും ഇത് സന്തോഷത്തിന്‍റെകാലമാണെന്ന് തോന്നുന്നു.തിരശീലയിലും പുറകിലും പുതിയ പേരുകള്‍ ഉയര്‍ന്നു കേട്ടു തുടങ്ങി. .പുതിയ തലമുറയിലെ സിനിമാപ്രവര്‍ത്തകര്‍ വിജയാരവം മുഴക്കുമ്പോള്‍ ന്യൂ ജെനറേഷന്‍ സിനിമ അല്ലെങ്കില്‍ മള്‍ട്ടിപ്ലെക്സ്‌ സിനിമ എന്നിങ്ങനെ പുതിയ വാക്കുകള്‍ കൂടി മാധ്യമങ്ങളില്‍ നിറയുന്നു . 2010 ല്‍ രഞ്ജിത് ശങ്കറിന്‍റെ 'പാസഞ്ചര്‍' എന്ന ചിത്രം തുടങ്ങി വച്ച മാറ്റം ട്രാഫിക്കും സാള്‍ട്ട് ന്‍ പെപ്പറും കടന്നു 22 ഫീമയില്‍ കോട്ടയത്തിലെത്തി നില്‍ക്കുമ്പോള്‍ സൂപ്പര്‍താര സങ്കല്‍പ്പത്തിലും ഇളക്കം തട്ടിതുടങ്ങിയിരിക്കുന്നു.സംവിധായകന്‍റെയും തിരക്കഥാകൃത്തിന്റെയും പേരില്‍ വീണ്ടും സിനിമകള്‍ ശ്രദ്ധിക്കപ്പെടാന്‍ തുടങ്ങിയതില്‍ രാജേഷ്പിള്ളയും ആഷിക് അബുവും അനൂപ്മേനോനും മാത്രമല്ല ഒരുകാലത്ത് സുപ്പര്‍താരങ്ങള്‍ക്ക് വേണ്ടി അമാനുഷ കഥാപാത്രങ്ങള്‍ സൃഷ്‌ടിച്ച രഞ്ജിത് കൂടി പലേരി മാണിക്യവും ഇന്ത്യന്‍ റുപ്പിയുമൊക്കെ നല്‍കി തന്‍റേതായ സ്ഥാനമുറപ്പിച്ചു .മീശ പിരിച്ചിറങ്ങിയ തംബുരാക്കന്മാരെയും കോപ്രായം കാണിക്കുന്ന അറുപതിലെത്തിയ അവിവാഹിത യുവത്വങ്ങളെയും സ്നേഹപൂര്‍വ്വം നിരസിക്കാന്‍ പ്രേക്ഷകരും പതുക്കെപ്പതുക്കെ ശീലിച്ചു തുടങ്ങിയിരിക്കുന്നു. പക്ഷേ ,സ്വാധീനശക്തിയുള്ള ഒരു മാധ്യമമെന്ന നിലയില്‍ ഈ നവ സിനിമകള്‍ മലയാളി സമൂഹത്തെ എങ്ങനെ കാണുന്നുവെന്നത് പ്രാധാന്യമര്‍ഹിക്കുന്ന ഒരു വിഷയമാണ്.

മലയാളികളെക്കാള്‍ അതി വൈകാരികതയെ മനസിലേറ്റിയ തമിഴ് സമൂഹത്തിലേക്കു ബാലയുടെ വിക്രം ചിത്രമായ സേതുവിലൂടെയും അമീറിന്‍റെ റാം,പരുത്തിവീരന്‍ തുടങ്ങിയവയിലൂടെയും നവ സിനിമ കടന്നുവന്നത് അവരുടെ ആ വൈകാരികമായ ബലഹീനത മുതലെടുത്തുകൊണ്ട് തന്നെയായിരുന്നു.സുബ്രമണ്യപുരവും മൈനയും അങ്ങാടിതെരുമൊക്കെ സാധാരണക്കാരുടെയും താഴെതട്ടിലുള്ളവരുടെയും കഥ ഇതിവൃത്തമാക്കിയപ്പോള്‍ അതിനു കേരളത്തിലും സ്വീകാര്യത കിട്ടി.രജനി ചിത്രങ്ങളിലെ തായ് തങ്കച്ചി പാശത്തിനു പകരം ഭ്രാന്തമായ പ്രണയവും സുഹൃത്ബന്ധങ്ങളും വിഷയമാക്കുകയായിരുന്നു ഈ പുതു തലമുറ ചിത്രങ്ങള്‍.എന്നാലും പരിശുദ്ധ പ്രണയവും സ്വന്തം ഭാഷയോടും ആചാരങ്ങളോടുമുള്ള ആഭിമുഖ്യവും മുറുകെപ്പിടിച്ചുകൊണ്ടായിരുന്നു അവയിലെ കഥാപാത്ര സൃഷ്ടികള്‍.

പക്ഷേ ഇന്നത്തെ മലയാള സിനിമയുടെ കഥയും കഥാപാത്രങ്ങളും കാണുമ്പോള്‍ കേരളമെന്നത് ഏതോ പടിഞ്ഞാറന്‍ രാജ്യമാണെന്ന് തോന്നിപ്പോകുന്നു.പ്രേമം എന്നതു എന്തോ വൃത്തികെട്ട സംഭവമാണെന്നും ആണും പെണ്ണും തമ്മില്‍ ശാരീരികമായ ബന്ധം മാത്രം മതി (അന്യന്‍റെ ഭാര്യയാണെങ്കില്‍ വളരെ നല്ലത്)എന്ന 'പുരോഗമനചിന്തയും' സ്ത്രീ സ്വാതന്ത്ര്യമെന്നത് വെള്ളമടിക്കാനും പയ്യന്‍റെ ചന്തിക്ക് നോക്കി കമന്‍റ്ടിക്കാനും കാര്യം കാണാന്‍ സ്വന്തം ശരീരം ഉപയോഗിക്കാനുമുള്ള സ്വാതന്ത്ര്യം ആണെന്നും ഇതൊക്കെയുന്ടെങ്കില്‍മാത്രമേ നമ്മളും മെട്രോ മലയാളിയാകൂ എന്നും ഉത്ഘോഷിക്കുന്ന ഈ മാറ്റം എന്തിന്‍റെ സൂചനയാണ്?ഇനി ഇതൊക്കെതന്നെയാണോ മലയാളി?

മലയാളത്തില്‍ കഴിഞ്ഞ കാലത്ത് അധമ സഞ്ചാരങ്ങളെയും അവിഹിത ബന്ധങ്ങളെയും സാഹിത്യത്തിന്‍റെ മധുരം പുരട്ടി കഥ പറഞ്ഞ സിനിമാക്കാരനായിരുന്നു പദ്മരാജന്‍.തൂവാനത്തുമ്പികള്‍ പ്രിയപ്പെട്ട ചിത്രമായിക്കാണുന്നവരെ ആകര്‍ഷിച്ചത് അതിലെ ശുഭാപര്യവസായിയായ അവിഹിത ബന്ധമല്ലാതെ മറ്റെന്താണ് ?അതേസമയം ഭരതന്‍ ചിത്രങ്ങളില്‍ യാഥാര്‍ത്യത്തിന്‍റെ കയ്പ്പ് നിറഞ്ഞ ബന്ധങ്ങളായിരുന്നു കാണാന്‍ കഴിഞ്ഞത്.അക്കാലത്തെ ന്യൂ ജെനറേഷന്‍ സിനിമകളായിരുന്നു ഇരുവരുടേതും.ഈ രണ്ടു പ്രതിഭകളുടെ അനുകരണം അല്ലേ പദ്മരാജന്‍ ചിത്രങ്ങളുടെ മോഡേണ്‍ പതിപ്പായ മലയാള സിനിമയും പഴയ ഭരതന്‍ സിനിമയുടെ പതിപ്പെന്നു തോന്നിപ്പിക്കുന്ന പുതിയ തമിഴ് സിനിമയും .

എങ്കിലും മേല്‍പ്പറഞ്ഞ ഒരു തമിഴ് സിനിമയും "കോപ്പി" എന്ന പേരുദോഷം കേള്‍പ്പിച്ചില്ല എന്നു മാത്രമല്ല അത് അവര്‍ക്ക് മാത്രം ചെയ്യാന്‍ പറ്റുന്ന സിനിമകളാവുകയും ചെയ്തു.ഉദാഹരണത്തിന് മൈന,അങ്ങാടി തെരു ,ആഴകര്‍സാമിയിന്‍ കുതിരൈ തുടങ്ങിയ ചിത്രങ്ങളുടെ കഥ എത്രത്തോളം ലളിതവും എന്നാല്‍ വ്യത്യസ്ഥവുമായിരുന്നു?എന്നാല്‍ മലയാളത്തിലെ നവ സിനിമകളില്‍ പാസഞ്ചര്‍,സാള്‍ട്ട് ന്‍ പെപ്പര്‍, ഇന്ത്യന്‍ റുപ്പി എന്നിവയല്ലാതെ അടിച്ചുമാറ്റലിന്‍റെ ചരിത്രം ഇല്ലാത്ത എത്ര പടങ്ങളുണ്ട് ?കൊക്ക്ടയ്ല്‍,ചാപ്പകുരിശു,ബ്യൂട്ടിഫുള്‍,ഗുലുമാല്‍,അന്‍വര്‍ തുടങ്ങി മലയാളത്തിന്‍റെ പുതിയ അഭിമാനങ്ങളൊക്കെ അമേരിക്കേന്നും അര്‍ജെന്ടീനേന്നും കൊറിയേന്നുമൊക്കെ പെറുക്കിക്കൊണ്ടുവന്ന മാലിന്യങ്ങ ളാണന്നു മനസ്സിലാകുമ്പോള്‍ (ലേലം എന്ന സിനിമയിലെ ഈപ്പച്ചന്‍റെ ഭാഷയില്‍ പറഞ്ഞാല്‍ ജനുസ്സിന്‍റെ കൊണം...എല്ലാത്തിന്‍റെയും തൊലി വെളുവെളാന്നാ...പിന്നെ ..പൂച്ചേടെ ജാതി കണ്ണും..)എന്തോ ഒരു നിരാശ.കടമെടുക്കാത്ത ഭാവനയും പ്രതിഭയും കൊണ്ട് നമ്മളെയും മറ്റു ഭാഷക്കാരെയും വിസ്മയിപ്പിക്കാന്‍ ഈ പുതിയ സിനിമാക്കാര്‍ക്ക്‌ കഴിയുമെന്ന് പ്രതീക്ഷിക്കാം.(അതുവരെ എനിക്കവരോട് തിരുമേനി നേരത്തെ പറഞ്ഞതാ...ഇറവ..ഇറവ..ഇറവറന്‍സ്....ബഹുമാനക്കുറവ് !)

മാലിന്യമുക്ത കേരളം.....നടക്കാത്ത നല്ല സ്വപ്നമോ?

2012-05-31T00:41:00.000+04:00

പുതിയ കുട പുതിയ ബാഗിനുള്ളില്‍ മടക്കിവച്ച് തോരാതെ പെയ്യുന്ന പുതുമഴ നനഞ്ഞു കൂട്ടുകാരോടൊപ്പം സ്കൂളില്‍ നിന്ന് മടങ്ങിയിരുന്ന ബാല്യം ജൂണ്‍ മാസക്കാഴ്ചകളായി ഓര്‍മയില്‍ സൂക്ഷിക്കുന്ന എല്ലാവര്‍ക്കുമായി ചില അലോസരപ്പെടുത്തുന്ന കാര്യങ്ങള്‍ പറയട്ടെ ? .പുതു മണ്ണിന്‍റെ ഗന്ധം നിറച്ചു വഴിയരുകിലൂടെ മഴച്ചാലുകള്‍ കാലുകളെ തഴുകിപ്പായുമ്പോള്‍ തടയണ കെട്ടാനും കൂട്ടുകാരുടെ ദേഹത്തേക്ക് വെള്ളം തെറിപ്പിച്ചു ഓടിപ്പോകാനും കഴിഞ്ഞിരുന്ന ആ ബാല്യം ഇന്ന് സാധ്യമാണോ? ഇന്ന് മഴക്കാലത്ത് വഴി നിറഞ്ഞൊഴുകുന്ന(റോഡരികിലൂടല്ല) കറുകറുത്ത കൊഴുത്ത ദ്രാവകത്തെ സ്പര്‍ശിക്കാന്‍ ഏതു ബാലകുതൂഹലത്തിനാകും?ഒരു ചെറു മഴ പോലും പുഴയാക്കുന്ന നമ്മുടെ തെരുവുകള്‍ക്ക് ആരാണ് ഉത്തരവാദികള്‍?

അശാസ്ത്രീയവും അഴിമതി നിറഞ്ഞതുമായ നഗരആസൂത്രണ പരിപാലന പദ്ധതികള്‍ കേരളം പോലെ പ്രബുദ്ധരെന്നു സ്വയം വിശേഷിപ്പിക്കുന്ന ഒരു സമൂഹത്തിനു അപമാനമായി നിലകൊള്ളുന്നു. ചെറിയ ചെറിയ മാലിന്യ സംസ്കരണ പ്ലാന്‍റുകള്‍ നിര്‍മ്മിച്ചാല്‍ വലിയ വലിയ അഴിമതികള്‍ നടത്താന്‍ പറ്റാത്തതു കൊണ്ട് രാഷ്ട്രീയക്കാരുടെയും ഉദ്യോഗസ്ഥരുടെയും ആശയങ്ങളില്‍ എപ്പോഴും വലിയ പദ്ധതികള്‍ മാത്രം വരുകയും ഭാവിയില്‍ അത് ഒരു പ്രദേശത്തിന്‍റെയാകെ കണ്ണീരും അമര്‍ഷവുമായി മാറുകയും ചെയ്യുന്നു.വിളപ്പില്‍ശാലയിലും ലാലൂരിലുമൊക്കെ രാഷ്ട്രീയം നോക്കി അഭിപ്രായം പറഞ്ഞു ചേരി തിരിയുമ്പോള്‍ നാം ഭാവിതലമുറയ്ക്ക് നല്‍കുന്ന സന്ദേശമെന്താണ്? മാലിന്യ നിര്‍മാര്‍ജനം സര്‍ക്കാരിന്‍റെ മാത്രം ചുമതലയാണെന്ന് പറഞ്ഞ്‌ ഒഴിഞ്ഞുമാറുന്ന നമ്മളോരോരുത്തര്‍ക്കും ചിലത് ചെയ്യാന്‍ കഴിയില്ലേ ?ലക്ഷക്കണക്കിന്‌ അനുയായികളെ നിരത്തി പ്രകടനം നടത്താന്‍ കഴിയുന്ന മത രാഷ്ട്രീയ സംഘടനകള്‍ക്ക് അത്രയും ആളുകളെ ഒരു ദിവസം ഉപയോഗിച്ചാല്‍ ഒരു നഗരം ശുചിയാക്കാന്‍ എത്ര സമയം വേണം?

മാലിന്യ നിര്‍മ്മാര്‍ജനം വീടുകളില്‍ നിന്നല്ലേ തുടങ്ങേണ്ടത്? സീരിയലുകളുടെയും റിയാലിറ്റി ഷോകളുടെയും കണ്ണീര്‍ക്കാഴ്ച്ചകളില്‍ സമയം കൊല്ലുന്ന വീട്ടമ്മമാര്‍ക്ക് (ഫെമിനിസ്റ്റുകള്‍ ക്ഷമിക്കുക ) വീട്ടു മുറ്റത്തോ ബാല്‍ക്കണിയിലോ ഒരു ചെറിയ പച്ചക്കറിത്തോട്ടം ഉണ്ടാക്കിയാല്‍ അരി,മീന്‍,പച്ചക്കറി എന്നിവ കഴുകിക്കഴിഞ്ഞ വെള്ളവും അടുക്കളയില്‍ നിന്നുള്ള ആഹാരാവശിഷ്ടങ്ങളും മറ്റും അതിനുള്ള വളമായി ഉപയോഗിക്കാം.വീട്ടില്‍ കോഴിയും പശുവുമൊക്കെയുള്ളത് അപരിഷ്കൃതമായി കാണുന്നവരോട് അവയെ വളര്‍ത്താനെന്തായാലും പറയുന്നില്ല!സൂപ്പര്‍മാര്‍ക്കറ്റില്‍ നിന്നും പ്ലാസ്റ്റിക്ക് കവറുകള്‍ നിറയെ സാധനങ്ങളും കുപ്പിയിലാക്കിയ വെള്ളവുമായി ഷോപ്പിംഗ്‌ നടത്തിയിറങ്ങുന്ന ആധുനിക മലയാളിക്ക് കയ്യിലൊരു സഞ്ചിയുമായി ചന്തയില്‍ പോയിരുന്ന കാലം ഓര്‍മയില്‍ പോലും ഇല്ലാതായി.കടയിലേക്കിറങ്ങുമ്പോള്‍ ഒരു പ്ലാസ്റ്റിക്‌ ബാഗെങ്കിലും കയ്യില്‍ കരുതുക എന്നത് പ്ലാസ്റ്റിക്ക് ഉപയോഗം കുറയ്ക്കാന്‍ ഒരാള്‍ക്ക്‌ ചെയ്യാവുന്ന ഏറ്റവും ചെറിയ കാര്യമാണ് .

ബസ് സ്റ്റാന്ടിലും റോഡിലും വെള്ളത്തില്‍ നീന്തുന്നവരുടെയും ആശുപത്രിത്തിണ്ണയില്‍ പനിപിടിച്ചു കിടക്കുന്നവരുടേയും പടം പിടിച്ചു പ്രൈം സ്ലോട്ട് നിറയ്ക്കാന്‍ മാധ്യമപ്പട ഇറങ്ങുന്നതിനു മുന്‍പേ ശുചീകരണപ്രവര്‍ത്തനങ്ങള്‍ തുടങ്ങാന്‍ ഭരണക്കാര്‍ക്ക് തോന്നാനും അവരെക്കൊണ്ടു അത് തോന്നിപ്പിക്കാന്‍ ജനകീയകൂട്ടായ്മകള്‍ ഉണ്ടാകാനും ഈ മഴക്കാലത്തിനു മുന്‍പെങ്കിലും സാധിക്കട്ടെ എന്നാശിക്കുന്നു . എന്തായാലും ഒരു മഴകൊണ്ട്‌ നിശ്ചലമാകുന്ന തലസ്ഥാന നഗരത്തിനും കേരളരാഷ്ട്രീയത്തിൽ മതമാലിന്യം വിതറി അധികാരത്തിലേറി എവിടെയോ സ്വന്തം കച്ചവടങ്ങളുമായി കഴിയുന്ന അഞ്ചാം (മാലിന്യ)മന്ത്രിക്കും രാഷ്ട്രീയ മാലിന്യം പരത്താൻ മാത്രം മാധ്യമങ്ങളിൽ എത്തുന്ന നഗരസഭാ മേയർക്കും നഗരത്തിലെ പ്രതികരണ ശേഷി നഷ്ടപ്പെട്ട പൊതുജനങ്ങൾക്കും പ്രത്യേകം എന്റെ നല്ല നമസ്കാരം സമർപ്പിച്ചുകൊണ്ടു നിർത്തുന്നു ....

വാല്‍ക്കഷ്ണം:

" ബിവറേജ് ഷോപ്പിന്‍റെ മുന്‍പില്‍ നിന്നും ക്യു ജെനറല്‍ ഹോസ്പിറ്റലിന്‍റെ മുന്‍പിലേക്കും മാറാന്‍ സാധ്യതയുള്ള ഒരു മഴക്കാലം കൂടി വരുന്നൂ .....കരുതിയിരിക്കുക!".

മണി വരുന്നേ… മണി!

2012-05-26T11:56:00.002+04:00

ചന്ദ്രശേഖരന്‍ വധവുമായി ബന്ധപ്പെട്ടു പാര്‍ട്ടിയുടെ നിരപരാധിത്വം തെളിയിക്കുവാന്‍ നേതാക്കള്‍ പെടാപ്പാട് പെടുമ്പോള്‍ വിചിത്രമായ ഒരു അവകാശവാദവുമായി സിപിഎം ഇടുക്കി ജില്ലാസെക്രട്ടറി എം മണി എത്തിയിരിക്കുന്നു .രാഷ്ട്രീയ പ്രതിയോഗികളെ ഇതിനു മുന്‍പും തങ്ങള്‍ കൊന്നിട്ടുണ്ടെന്ന് അഭിമാനപൂര്‍വം തട്ടിവിട്ടിരിക്കുകയാണ് .തങ്ങള്‍ എങ്ങനെയാണ് പട്ടിക തയ്യാറാക്കിയതെന്നും ആരെയൊക്കെ എങ്ങനെ കൊന്നുവെന്നതും വിദ്വാന്‍ രസകരമായി അവതരിപ്പിച്ചിരിക്കുന്നു.പാര്‍ട്ടിക്കുണ്ടായ നാണക്കേടിന്‍റെ ആഴം വീണ്ടും കൂട്ടാന്‍ മണിമുഴക്കി ഹംസഗാനം പാടിയെത്തിയിരിക്കുന്ന ഇത്തരം സഖാക്കള്‍ എന്താണ് ഉദ്ദേശിക്കുന്നതെന്ന് മനസ്സിലാകുന്നില്ല.

പാര്‍ട്ടിയെ തകര്‍ക്കാന്‍ അമേരിക്ക അയച്ച ചാരന്മാരാണോ ഇപ്പോള്‍ പാര്‍ട്ടിയുടെ തലപ്പത്തിരിക്കുന്ന പിണറായി മുതല്‍ മണി വരെയുള്ള പ്രകാശം പരത്തുന്നവരെന്നു പരിശോധിക്കാന്‍ ചൈനയില്‍ നിന്നോ ക്യുബയില്‍ നിന്നോ അല്ലെങ്കില്‍ "പോളണ്ടില്‍" നിന്നോ CID കളെ ഇറക്കേണ്ടി വരുമെന്നാണ് തോന്നുന്നത് . ഇത്തരക്കാരെ തെരഞ്ഞെടുക്കാനാണോ കോടികള്‍ ചെലവഴിച്ചു പാര്‍ട്ടി കോണ്ഗ്രസ് നടത്തിയതെന്ന് അണികള്‍ ഇനിയെങ്കിലും ചിന്തിക്കണം.ഇവരെ പുറത്താക്കാന്‍ കേന്ദ്രത്തിലിരിക്കുന്ന കാരാട്ടിനെപ്പോലുള്ള 'കൊഞ്ഞാണ'ന്മാര്‍ക്കു(സുധാകരന്‍ സഖാവിന്‍റെ പ്രയോഗമാന്നേ) കഴിയില്ലെങ്കില്‍ പ്രതികരിക്കാന്‍ സാധാരണ പ്രവര്‍ത്തകര്‍ക്കെങ്കിലും കഴിയണം.

തുറുപ്പുഗുലാന്‍ എന്ന ചിത്രത്തില്‍ വില്ലന്മാര്‍ ചെയ്ത കൊലപാതകത്തെക്കുറിച്ചു കൊച്ചിന്‍ ഹനീഫയുടെ മണ്ടനായ കഥാപാത്രം വിളിച്ചുപറയുന്ന ഒരു രംഗമുണ്ട് .മണിയുടെ ഇന്നത്തെ ശരീരഭാഷ അതോര്‍മ്മപ്പെടുത്തുന്നു.കൊന്നുവെന്നു പരസ്യമായി വിളിച്ചുപറഞ്ഞ ഈ മഹാനെ അറസ്റ്റുചെയ്യാന്‍ ധൈര്യമുള്ള ഒരു പോലീസുകാരനും ഇവിടില്ലെന്നു വരുന്നതു കേരളജനതയുടെ ഗതികേട് അല്ലാതെ മറ്റൊന്നുമല്ല.

സര്‍ദാര്‍ജീടെ ഡയറിക്കുറിപ്പുകള്‍

2012-05-24T01:15:00.002+04:00

സര്‍ദാര്‍ജീടെ ഡയറിക്കുറിപ്പുകള്‍
----------------------------------------------------------------------------------------------------------------------------

23/05/2012

"വെന"സ്ഡേ

ഓംഅമേരിക്കായ നമഹ

ഇന്നലെ ...ങ്ങടെ മന്ത്രിസഭേടെ മൂന്നാം പിറന്നാളായിരുന്നു.അടിപൊളി പാരട്ടിയാര്‍ന്നു അറേഞ്ചു ചെയ്തത്. .മദാമ്മെടേം മക്കടേം ബ്രേക്ക് ഡാന്‍സും യാദവന്മാരുടെ സംഘ നൃത്തവും കലക്കി ..അറിയാതെ ഞാനും ഒന്ന് തുള്ളിപ്പോയി.ആ ബംഗാളി പെണ്ണുമ്പിള്ള വരാഞ്ഞത് നന്നായി. അവക്ക് ഈ യൂത്തിന്‍റെ പരിപാടീന്നു കേട്ടാലെ ചൊറിച്ചിലാ..ഒരുമാതിരി കാട്ടുജാതി പോലെ.

മ്ടെ അംബാനിക്കൊച്ചുങ്ങളും ടാറ്റാഭായിം ഒക്കെ കൊണ്ടുവന്ന സമ്മാനങ്ങളിടാന്‍ സ്വിസ് ബാങ്കില്‍ ഇനീം അക്കൗണ്ട്‌ തരാക്കണം .

ഇനി ..മ്മ്ടെ വക ഒരു സമ്മാനം ല്ലാര്‍ക്കും കൊടുക്കണം. മ്ടെ അംബാനി മോന് പ്രത്യേകിച്ചും.
പെട്രോളിന്‍റെ വെല ..... മ്ണി കൂട്ടിയാലോ? കഴിഞ്ഞാഴ്ച കണ്ടപ്പോഴും ആ പാവം പെട്രോള് കമ്പനിക്കാര് നെഞ്ഞത്തടിച്ചു നിലവിളിക്കുന്നത് കേട്ടതാ ..പുവര്‍ ഫെല്ലോസ്.... കറങ്ങിയടിക്കാനും കളിക്കാനുമൊന്നും കാശില്ല പോലും. കഷ്ടം. ആ സങ്കടം കേട്ടു ഹൃദയം പൊട്ടിപ്പോയി...

അപ്പൊ... മ്ടെ ...സാധനത്തിന്‍റെ വെല ....കൂടില്ലേ?....ജനം ഇളകില്ലേ? ഭരണം പോവില്ലേ ?........മ്മ്മം....ഹാ... ഹാ... ഹാ... എക്കണോമിക്സ് പഠിച്ച എന്നോടാ കളി ...മ്മള് മദാമ്മേന്‍റെ കണക്കെഴുത്ത് നിര്‍ത്തി ഒബാമേന്‍റെ കണക്കെഴുതാന്‍ പോകും.

ന്നാലും ആ ഒബാമ്മ മോന്‍ വിളിച്ചപ്പോഴുണ്ടായ രോമാ൯ജം... മ്ടെ രാജ്യത്തു ഇംഗ്ലീഷ് അറിയാവുന്ന ഏക സര്‍ദാര്‍ജി ....ന്മ്ള്‍ ആയോണ്ട് എല്ലാം മനസ്സിലായി. കഴിഞ്ഞ ജന്മത്തില്‍ അവന്‍ ...ന്‍റെ മോനോ അച്ഛനോ ആയിരുന്നിരിക്കണം.

രോമാ൯ജം കൊണ്ടെനിക്കെഴുതാന്‍ മേലാ ...ബാക്കി നാളെ .......

ശൂ (ഒപ്പ്)
-----------------------------------------------------------------------------------------------------------------------------

ഏതോ ഒരു ചാണ്ടിച്ചന്‍റെ....അന്തര്‍ഗദ്ഗദം

അത് വീണ്ടും സംഭവിച്ചു ...കുറച്ചു ദിവസമായി ചില അടക്കം പറച്ചിലുകള്‍ ...ചില കൂടിയാലോചനകള്‍..ചാണ്ടിച്ചനു അന്നേ ഒരു പന്തികേട്‌ തോന്നിയതാ. അത് സംഭവിച്ചേക്കുമെന്നു ഒരു ഉള്‍വിളി....
....ന്നാലും ഒരു പ്രതീക്ഷ.... മ്മടെ പൊന്നുമോന്‍ ശെല്‍വരാജ് ഓട്ടമല്‍സരത്തിനു പോയ സമയമല്ലേ? മോന്‍ ചത്താലും മരുമോളുടെ കണ്ണീരു കണ്ടാ മതിന്നു കരുതുന്ന ഇടതന്മാരെപ്പോലെയല്ല ങ്ങടെ മദാമ്മേം കൂട്ടരും.ച്ചിരി സമയം കൂടി കിട്ടൂന്നാ കരുത്യേ .. ..ആ രമേശനേം കൊണ്ട് എത്രവട്ടം ദില്ലീപ്പോയി മൂക്കര്‍ജീടേം സര്‍ദാര്ജീടേം കാലും വാലുമൊക്കെ കഴുകീതാ.. ന്‍റെ.. പാറേ മാതാവേ .. ഇനീപ്പോ മറ്റേ കെളവനും കൂട്ടരും തൊടങ്ങും ...രാജി വെക്കേ.... രാജി വെക്കേ.....അങ്ങേരെ ക്ലബ്ബിന്‍റെ പ്രസിദേന്തി സ്ഥാനത്തൂന്നു മാറ്റി അവിടെ കേറിയിരിക്കാന്‍ കളിച്ചകളി... നിക്കും ആ മൂന്നാന്‍ ജോര്‍ജിനും മാത്രമറിയാം.

ഇതിപ്പോ ..ആ നെയ്യാറ്റിന്കരേലെ മാമാന്മാരോട് ..ന്താ പറയ്യാ..ആ കണ്ണൂരെ ചേട്ടന്മാര് സഹായിച്ചു ലോറന്സ് ചെക്കന്‍റെ കാര്യം ഒതുക്കിയതാ ..പിന്നെ ആ രായകോവാലണ്ണന്‍..വയസ്സുകാലത്ത് ങ്ങേര്‍ക്കെന്തിന്‍റെ കേടാ ..എവിടെ മത്സരമുണ്ടോ കേറി പേരുകൊടുക്കും. കഴിഞ്ഞ മാസമാ ശെല്‍വന് സീസിയിട്ടൊരു വണ്ടി വാങ്ങിക്കൊടുത്തത് .അതിന്‍റെ പേരില്‍ ...ന്തൊക്കെ അപവാദാ.... കേട്ടെ... ഇനീപ്പോ... അതിനു പെട്രോളിനുള്ള കാശും ആ മൊത്തമൂറ്റു വാങ്കീന്നെടുക്കണമല്ലോ?അല്ലെങ്കി ..മൂന്നാന്‍ ജോര്‍ജിനോടു വണ്ടി തിരിച്ചെടുക്കാന്‍ പറയാം ...
-----------------------------------------------------------------------------------------------------------------------------

ചന്ദ്രശേഖരനെ കൊല്ലിച്ചതാര് ?

2012-05-22T20:07:00.001+04:00

കേരളത്തില്‍ രാഷ്ട്രീയ കൊലപാതകങ്ങള്‍ പുത്തരിയല്ല.മരിച്ചവരുടെ കുടുംബാംഗങ്ങളുടെ നിശബ്ദ വേദനയില്‍ മാത്രം ഒതുങ്ങുന്ന സംഭവമായി ,ഒരു വൈകുന്നേരത്തെ ചാനല്‍ ചര്‍ച്ചയില്‍ ചൂട് പിടിപ്പിക്കുന്ന വാഗ്വാദങ്ങളായി മാത്രം ഒടുങ്ങുന്ന ആ മരണങ്ങളില്‍ അവസാനത്തെതായിരുന്നു ഷുക്കൂര്‍ വധം.അതി നിഷ്ടൂരമായ വിചാരണ ക്കൊലപാതകമായിട്ടും പ്രാദേശികമായ ചില പ്രതിഷേധങ്ങളല്ലാതെ കേരളമൊട്ടുക്കു അതൊരു 'വെറും സാധാരണ' രാഷ്ട്രീയ പകപോക്കല്‍ മാത്രമായാണ് കണ്ടത്.ശുക്കൂറിനെപ്പോലുള്ള യുവാക്കളെ എതിരാളികളുടെ കാറ് തടയാനും മന്ത്രിസ്ഥാനത്തിന് വേണ്ടി പ്രകടനം നടത്തിക്കാനും 'കറിവേപ്പില' പോലെ (അഭിസാരിക അല്ല)ഉപയോഗിച്ച് ഉപേക്ഷിക്കുന്ന സ്വന്തം മുന്നണിക്കാര്‍ക്ക് പോലും ആ മരണത്തില്‍ വലിയ താല്പ്പര്യമുള്ളതായി തോന്നിയില്ല. പക്ഷെ ചന്ദ്രശേഖരന്‍ വധം കേരളത്തില്‍ അങ്ങോളമിങ്ങോളം ചര്‍ച്ചാവിഷയമായത് അദ്ദേഹത്തിന്‍റെ മുഖത്തേറ്റ അന്‍പത്തിരണ്ടു വെട്ടുകള്‍ കൊണ്ട് മാത്രമായിരുന്നില്ല . 'കമ്മ്യുണിസ്റ്റ്കേരളത്തി'ല്‍ ഉണ്ടായ അപചയങ്ങളെ കമ്മ്യൂണിസ്റ്റ് പാതയിലൂടെത്തന്നെ നേരിട്ട ധീര രക്തസാക്ഷിത്വം കൊണ്ട് കൂടിയായിരുന്നു.

കിനാലൂര്‍ മുതല്‍ ആറന്മുള വരെ എത്തി നില്‍ക്കുന്ന ജനകീയ പ്രക്ഷോഭങ്ങള്‍ അലോസരപ്പെടുത്തുന്ന ഒരു കൂട്ടുകെട്ട് ഏറാമലയിലെ രാഷ്ട്രീയത്തിനു പുറകിലുണ്ടെന്ന് മുന്‍പേ വന്ന റിപ്പോര്ട്ടുകളായിരുന്നു മുസ്ലിം ലീഗിനും സിപിഎം നും ഒരുപോലെ പ്രിയപ്പെട്ടവരായ ചില (വിദേശ)വ്യവസായ പ്രമുഖരുള്‍പ്പെടെയുള്ള ഒരു സംഘത്തിനു അവരുടെ വ്യവസായ താല്‍പ്പര്യങ്ങള്‍ സുഗമമായി നേടിയെടുക്കാന്‍ വേണ്ടിയാണ് 2005ല്‍ ജനതാദളുമായി പഞ്ചായത്ത് വച്ചുമാറാന്‍ തീരുമാനിച്ചതെന്നു തോന്നിയ പാര്‍ട്ടി അണികള്‍ അതിനെ പരസ്യമായി ചോദ്യം ചെയ്‌തു പുറത്തു വന്നപ്പോള്‍ "വിഘടന വാദികളും പ്രതിക്രിയാ വാദികളും 'റാടിക്കലായ ചിന്താസരണിയുടെ ഒരു അന്തര്‍ധാരയായിരുന്നു ഏറാമലയില്‍ സംഭവിച്ചത്" എന്ന മട്ടില്‍ പ്രസംഗിച്ചുനടന്നവര്‍ക്ക് ജനഹിതം മനസ്സിലാക്കാന്‍ കഴിഞ്ഞില്ല. പുറത്ത്‌ പോകുന്നവര്‍ യു ഡി എഫ്‌ പാളയത്തിലെത്തുമെന്നും അപ്പോള്‍ കുലംകുത്തികളെന്നു വിളിച്ചു അവഹേളിച്ചു അണികളുടെ മുന്നില്‍ പിടിച്ചു നില്‍ക്കാം എന്ന് കരുതിയ സഖാക്കള്‍ക്കും മുന്‍പ് പറഞ്ഞ വ്യവസായ താല്പര്യക്കാര്‍ക്കും കനത്ത പ്രഹരമായി ഒറ്റക്ക് പോരാടാന്‍ തീരുമാനിച്ച ചന്ദ്രശേഖരനും കൂട്ടരും .

വ്യവസായികളുടെയും സമുദായ നേതാക്കളുടെയും 'കളിത്തോഴനായി അറിയപ്പെടുന്ന ഒരു കേന്ദ്ര മന്ത്രിയുടെ ഇപ്പോഴത്തെ ഇടപെടലുകളും ഈ കേസ്സ് കൊണ്ട് ഏറ്റവും പ്രയോജനം ലഭിക്കുമായിരുന്ന മതേതര മതപ്പാര്‍ട്ടിയുടെ നിസ്സംഗ ഭാവവും
വി എം സുധീരനെയും ടി എന്‍ പ്രതാപനെയും പോലുള്ള കോണ്‍ഗ്രസ് നേതാക്കള്‍ക്ക് പോലും ന്യായികരിക്കാന്‍ കഴിയുന്നില്ല.റ്റി പി വധക്കേസ് ചില കുട്ടി സഖാക്കളുടെ മാത്രം പ്രതികാരമാണെന്നു വരുത്തിതീര്‍ക്കേണ്ടത് സിപിഎം നേതാക്കളുടെ മാത്രം ലക്ഷ്യമല്ലെന്നു തോന്നിപ്പിക്കുന്ന പുരോഗതിയാണ് ഇപ്പോള്‍ അന്വേഷണവുമായി ബന്ധപ്പെട്ടു കാണുന്നത്. 35000 രൂപയ്ക്കു ഒരാളെ കൊല്ലാന്‍ ഇത് ക്വട്ടേഷന്കാരുടെ ഡിസ്കൌണ്ട് സമയം വല്ലതുമാണോ എന്നറിയില്ല . എന്തായാലും മാധ്യമങ്ങളുടെയും ജനങ്ങളുടെയും ജാഗ്രത പുതിയ വിഷയങ്ങളിലേക്ക് തിരിയുന്നതിന് മുന്‍പേ ഈ വിഷയത്തിലെ രാഷ്ട്രീയ -വ്യാവസായിക താല്‍പര്യങ്ങളെ പുറത്തു കൊണ്ടുവരാന്‍ പോലീസിലെ തന്തക്കു പിറന്നവന്മാര്‍ക്ക് കഴിയട്ടെ എന്ന് പ്രതീക്ഷിക്കാം

NB:"ചോരച്ചാലുകള്‍ നീന്തിക്കയറി" പടുത്തുയര്‍ത്തിയ പ്രസ്ഥാനം ഒരു കമ്മ്യൂണിസ്റ്റിന്‍റെ ചോരച്ചാലിലൂടെ ഒലിച്ചു പോകാതിരിക്കാനും ഈ കേസ്സിന്‍റെ യാഥാര്‍ത്ഥ്യം പുറത്തു വരേണ്ടതാണ്.

വീണ്ടും വി എസ് ( We Yes)

2012-05-20T15:20:00.008+04:00

നിലവിലുള്ള സംസ്ഥാന നേതൃത്വത്തില്‍ മാറ്റം വേണമെന്നും ഈ രീതിയില്‍ രാഷ്ട്രീയപ്രവര്‍ത്തനം തുടരാന്‍ ആഗ്രഹിക്കുന്നില്ലെന്നും വിഎസ് അച്യുതാനന്ദന്‍ പാര്‍ട്ടി നേതൃത്വത്തെ അറിയിച്ചതായി റിപ്പോര്‍ട്ട്. പാര്‍ട്ടി ജനറല്‍ സെക്രട്ടറി പ്രകാശ് കാരാട്ടിനും സിതാറാം യെച്ചൂരിക്കുമാണ് കത്ത് അയച്ചിട്ടുള്ളത്.ഈ നീക്കത്തിലൂടെ കേരള രാഷ്ട്രീയത്തില്‍ ജനങ്ങളുടെ മനസ്സറിയുന്ന ജനനായകന്‍ തന്നെയാണ് താനെന്നു വി എസ് വീണ്ടും തെളിയിച്ചിരിക്കുന്നു.

ഒന്ന് കിട്ടിയാലേ നീയൊക്കെ നന്നാവൂ അല്ലേ...കുടുംബം മുടിക്കാനിറങ്ങിയവന്‍....പാര്‍ട്ടിയില്‍ നിന്നും സാധാരണക്കാര്‍ അകന്നു പോകുന്നുവെന്ന് മനസ്സിലാക്കാനുള്ള സാമാന്യബുദ്ധി കുലംകുത്തികളുടെ പേരുപറഞ്ഞു അണികളുടെ വായ്മൂടാന്‍ ശ്രമിക്കുന്ന പിണറായിക്കില്ലെങ്കിലും ധീരമായ വിപ്ലവപ്രവര്‍ത്തനങ്ങളിലൂടെ സിപിഎം രൂപീകരിക്കാനും വളര്‍ത്താനും ജീവിതം ഉഴിഞ്ഞുവച്ച സഖാവിനു എത്രകാലം പ്രതികരിക്കാതിരിക്കാന്‍ കഴിയും? പാര്‍ട്ടി എന്തോ തീപ്പന്തം കത്തിക്കുമെന്ന് പറഞ്ഞ വിജയേട്ടന്‍ ഇനി തലയ്ക്കു തീ പിടിച്ച പോലെ പായുന്നത് കാണാം.

ഭാരവാഹിത്വം നല്‍കി പിടിച്ചുനിര്‍ത്തിയിരിക്കുന്ന കുറച്ചു പിണിയാളുകളെ വച്ചു പാര്‍ട്ടി നേതൃത്വത്തെയും സഖാക്കളെയും ഹൈജാക്ക് ചെയ്തു തുടരാമെന്ന് ഇനി കരുതേണ്ട. സ്വന്തം രക്തസാക്ഷിത്വ ത്തിലൂടെ ടി പി ചന്ദ്ര ശേഖരന്‍ കൊളുത്തിവിട്ട വിപ്ലവജ്വാല കെടാതെ സൂക്ഷിക്കേണ്ടത് യഥാര്‍ത്ഥ കമ്മ്യൂണിസ്റ്റിന്‍റെ ചുമതലയാണെന്ന ബോധം വി എസ്സിന് മാത്രമല്ല ഉള്ളതെന്ന് കോഴിക്കോട്ടെ സിപിഎം അനുഭാവികളുടെ കൂട്ടായ്മ തെളിയിച്ചു കഴിഞ്ഞു. വി എസ്സിന്‍റെ ഇന്നത്തെ നീക്കത്തിന്‍റെ ഉദ്ദേശം എന്തായാലും അത് സിപിഎം അണികള്‍ക്ക് ഒരു പുതിയ ദിശാബോധം നല്കുമെന്നു ഉറപ്പാണ്.

പാര്‍ട്ടിക്കുള്ളില്‍ നിന്നുകൊണ്ട് കമ്മ്യൂണിസത്തില്‍ നിന്നുള്ള വ്യതിചലനങ്ങളെ എതിര്‍ക്കുന്നതിനെ അധികാരമോഹവും ധൌര്‍ബല്യവുമായി ചിത്രീകരിക്കുന്നവര്‍ക്ക് ഇനിയെന്താണ് പറയാനുള്ളതു. എന്തായാലും നാളെ മുതല്‍ അരുണ്‍ കുമാറിന്‍റെ മക്കാവു യാത്രയും സോമന്‍റെ വയനാട്ടിലെ രണ്ടേക്കര്‍ ഭൂമിയുമൊക്കെ വാര്‍ത്തയില്‍ നിറയുന്നത് കാണാം .

വാല്‍ക്കഷ്ണം :-ഇനിയും ഇതൊക്കെ കെളവന്‍റെ രാഷ്ട്രീയ നാടകമാണെന്ന് വിളിച്ചു കൂവുന്നവര്‍ക്ക് ഒരു " നല്ല നമസ്കാരം" മാത്രം.

കള്ളച്ചിരിയുടെ ഒരു വര്‍ഷം

2012-05-18T14:02:00.002+04:00

എങ്ങനെയുണ്ടാശാനേ..????

ഉമ്മന്‍ചാണ്ടി സര്‍ക്കാര്‍ (UDF സര്‍ക്കാര്‍ അല്ല! ) ഒരു വര്‍ഷം പിന്നിടുന്നു.ഈ ഭരണം എന്താണ് കേരളത്തിന്‌ നേടിത്തന്നത്? 21 മന്ത്രിമാരില്‍ എത്രപേരെ ജനങ്ങള്‍ക്ക്‌ ഓര്‍മ്മിച്ചെടുക്കാന്‍ കഴിയും?നമ്മുടെ നികുതിപ്പണം തിന്നു കൊഴുക്കുന്ന ഇവര്‍ക്ക് നിങ്ങള്‍ എത്ര മാര്‍ക്ക് കൊടുക്കുന്നു? കുഞ്ഞാലിക്കുട്ടിയും മാണിയും ചേര്‍ന്നു നിശബ്ധമായി നടത്തുന്ന അഴിമതികള്‍ പുറത്തുകൊണ്ടു വരാന്‍ മാധ്യമങ്ങള്‍ക്ക് പോലും ധൈര്യമില്ലാതെ പോകുന്നതെന്തു കൊണ്ടാണ് ?

അനക്ക് ബെച്ചിട്ടൊണ്ട്..ഒരെട്ടിന്‍റെ പണി !

ഭരണ തലത്തില്‍ അതിവേഗം ജനങ്ങളില്‍ നിന്ന് ബഹുദൂരം അകന്നു പോവുകയാണ് ഈ മന്ത്രിസഭ. ഇനിഒരിക്കല്‍ക്കൂടി പാര്‍ടിയുടെ മുഖ്യമന്ത്രി ആകാന്‍ കഴിയില്ല എന്നറിയാവുന്ന ഉമ്മന്‍ ചാണ്ടി അധികാരം നിലനിര്‍ത്താന്‍ നട്ടെല്ല് വളച്ചു മുസ്ലിം ലീഗ് നേതാക്കളുടെയും സുകുമാരന്‍ നായ രുടേയും മുന്‍പില്‍ കുമ്പിട്ടു കിടക്കുന്ന ദയനീയ കാഴ്ചയാണ് നിലവില്‍ .മെട്രോ റെയില്‍ പദ്ധതിയില്‍ നിന്നും ഡല്‍ഹി മെട്രോയെ ഒഴിവാക്കാന്‍ നടത്തിയ നീക്കങ്ങളും അതിന്‍റെ അക്കൗണ്ട്‌ സ്വന്തക്കാരന്‍റെ ബാങ്കിലാക്കിയതും മാത്രം മതി ഈ മുഖ്യമന്ത്രിയുടെ വികസന നയം (സ്വന്തം പോക്കെറ്റിന്‍റെ മാത്രം വികസനം ) മനസ്സിലാക്കാന്‍.കേസ്സുകളില്‍ നിന്ന് രക്ഷപെടാന്‍ നടക്കുന്നതിനിടയില്‍ ചാണ്ടിക്കും കുഞ്ഞാലിക്കക്കും എവിടെ ഭരിക്കാന്‍ സമയം ?

പട്ടയം നാട്ടുരാജാവ്

ചാണ്ടി വീഴുമ്പോള്‍ മുഖ്യമന്ത്രിയാകാമെന്നുള്ള ചെന്നിത്തലയുടെ മോഹം 'അതിമോഹമാണ് മോനെ രമേശാ...' എന്ന മട്ടില്‍ തിരുവന്ജൂരിനു ശിഖണ്ടി മന്ത്രി സ്ഥാനം നല്‍കി ചാണക്യ തന്ത്രങ്ങള്‍ മെനയാന്‍ P C ജോര്‍ജിനെപ്പോലുള്ള രാഷ്ട്രീയ ബ്രോക്കര്‍മാരുടെയും മനോരമയെപ്പോലുള്ള മഞ്ഞപ്പത്രങ്ങളുടെയും സഹായം യഥേഷ്ടമുണ്ടായിരുന്നു.ജനസമ്പര്‍ക്ക പരിപാടി എന്ന പേരില്‍ സാധാരണക്കാരുടെ കണ്ണില്‍പ്പൊടിയിടാന്‍ ആടിയ നാടകത്തിനു വേണ്ടി ചെലവാക്കിയ കോടികളോ?

മൂന്നാന്‍ ജോര്‍ജ്

ബാലകൃഷ്ണപിള്ളയെ ജയിലില്‍ നിന്ന് പുറത്തിറക്കിയ സംഭവം മുതല്‍ ജനങ്ങളുടെ മുഖത്ത് ആഞ്ഞടിച്ചു തുടങ്ങിയ ചാണ്ടിച്ചനും കൂട്ടരും അവസാനം ശെല്‍വ രാജിനെ വിലക്കെടുത്തു വീണ്ടും സ്ഥാനാര്‍ത്ഥിയാക്കി ജനങ്ങളുടെ മുഖത്ത് കാര്‍ക്കിച്ചു തുപ്പി കളിയാക്കുകയാണ് . എങ്കിലും ഗണേഷിനെയും ഷിബു ബേബി ജോണിനെയും പോലെ എന്തെങ്കിലും ചിലത് ജന നന്മക്കു വേണ്ടി ചെയ്യുന്നവരും ഈ മന്ത്രിസഭയിലുണ്ടെന്നു മറക്കുന്നില്ല .

ലൈറ്റ് ഏമിറ്റിംഗ് ഡയോഡ്സ്(LED)-ഗ്രീന്‍ടെക്നോളജി

2012-05-16T02:49:00.001+04:00

ഗ്രീന്‍ടെക്നോളജി എന്ന പദം അന്താരാഷ്ട്ര രംഗത്തു ഇന്ന് വളരെയധികം ചര്‍ച്ച ചെയ്യപ്പെടുന്ന ഒരു വിഷയമാണ്. പരിസ്ഥിതിക്ക് കോട്ടം വരുത്താത്ത രീതിയില്‍,ഊര്‍ജ നഷ്ടത്തെ കുറച്ചുകൊണ്ട് നിര്‍മ്മാണ,വിനിയോഗ പ്രവര്‍ത്തനങ്ങളെ നിജപ്പെടുത്താന്‍ ശ്രമിക്കുന്ന ഈ ശാസ്ത്രശാഖ അനുദിനം വളര്‍ന്നുകൊണ്ടിരിക്കുകയാണ്.ചൂട് കുറയ്ക്കുന്ന പെയിന്‍റുകളും,മണലും സിമെന്റും ഉപയോഗിക്കാതെയുള്ള വീട് നിര്‍മാണവും ,ബാറ്ററി കാറുകളുമൊക്കെ ഈ ചുവടുവെപ്പിന്‍റെ ഭാഗമാണ് . ഇതൊക്കെ ടെക്നിക്കല്‍ കാര്യങ്ങളാണെന്ന് കരുതി തള്ളിക്കളയണ്ട .നമുക്കും നമ്മുടെ വീട്ടിലും പരിസരത്തും ചില മാറ്റങ്ങള്‍ വരുത്തി പരിസ്ഥിതിക്കും അതുവഴി ഭാവി തലമുറയ്ക്കും നിലനില്‍പ്പിനുള്ള ഒരു കൈസഹായം നല്‍കാന്‍ കഴിയും .ഈ വിഭാഗത്തില്‍ നമുക്ക് പ്രയോജനകരമായ ചില സാങ്കേതിക മുന്നേറ്റങ്ങളെ പരിചയപ്പെടാം .

ലൈറ്റ് ഏമിറ്റിംഗ് ഡയോഡ്സ്(LED)

വിദ്യുച്ചക്തിയുടെ കരുതലോടുള്ള ഉപയോഗത്തിന്‍റെ പ്രാധാന്യം ഏവര്‍ക്കുമറിയാം പക്ഷെ അത് പാലിക്കാന്‍ ആരും ശ്രദ്ധിക്കാറില്ല (പുകവലിയും മദ്യപാനവും ആരോഗ്യത്തിനു ഹാനികരമാണന്നെല്ലാ വര്‍ക്കുമറിയാം... പക്ഷേ....) . സാധാരണ ഏറ്റവും കൂടുതല്‍ പാഴാക്കപ്പെടുന്ന ഊര്‍ജമാണ് വിദ്യുച്ചക്തി. പ്രകാശ സംവിധാനങ്ങള്‍ക്ക് വേണ്ടിത്തന്നെയാണ് അതിലേറെയും ഉപയോഗിക്കുന്നതും.അവിടെയാണ് LED യുടെ പ്രസക്തി ഉദിക്കുന്നത്. ബള്‍ബുകള്‍ മുതല്‍ ടെലിവിഷന്‍ വരെ ഇന്ന് LED ടെക്നോളജി ഫലപ്രദമായി ഉപയോഗിക്കുന്നു.

മറ്റു തരത്തിലുള്ള ബള്‍ബുകളെ അപേക്ഷിച്ചു LED ബള്‍ബുകള്‍ക്കുള്ള ചില പ്രത്യേകതകള്‍

LED ഖരാവസ്ഥയിലുള്ള ( a form of solid-state lighting) പ്രകാശ സ്രോതസ്സാണ് . ഇന്‍കാന്‍റ്‌സെന്‍റ് , ഫ്ലൂറസെന്‍റ് ബള്‍ബുകള്‍ (നമ്മടെ ബള്‍ബും ട്യൂബു ലൈറ്റും ) ഫിലമെന്റ്റോ വാതകങ്ങളോ നിറച്ച ഗ്ലാസ് ട്യൂബുകളാണെങ്കില്‍ LED ഉണ്ടാക്കപ്പെട്ടിരിക്കുന്നത് ചൂട് കടത്തിവിടാവുന്ന പ്രതലത്തില്‍ സ്ഥാപിക്കപ്പെട്ട ചിപ്പുകളുടെ ചെറിയ പൊതികള്‍( capsules) അല്ലെങ്കില്‍ ലെന്‍സ്‌ ആയിട്ടാണ്.എന്തിനധികം ..നമ്മുടെ പ്രിയപ്പെട്ട CFL ബള്‍ബുകളിലുപയോഗിക്കുന്ന മാരകമായ മെര്‍ക്കുറി പോലുള്ള മൂലകങ്ങള്‍ നശിക്കാത്തവയാണ്(മെര്‍ക്കുറി കേറ്റി അയലത്തുകാരന്‍റെ പ്ലാവ് ഉണക്കുന്ന വിദ്യ ചില വിരുതന്മാര്‍ ചെയ്യുന്നത് കണ്ടിട്ടില്ലേ).

3 mm മുതല്‍ 8 mm വരെ മാത്രം നീളമുള്ള LED കള്‍ ഒറ്റയായും ഒന്നിലേറെ ഒരുമിച്ചും ഉപയോഗിക്കാം .അതിനാല്‍ മറ്റു ബള്‍ബ്കള്‍ക്ക് ഉള്ള സ്ഥലപരിമിതി ഇതിനില്ല .

സാധാരണ ബള്‍ബുകള്‍ ഫിലമെണ്ട് പൊട്ടി നശിക്കുമ്പോള്‍ ഇവ കാലക്രമേണ മങ്ങുക മാത്രം ചെയ്യുന്നു. അതിനാല്‍ LED യുടെ കാലാവധി വളരെയധികമാണ് .(Typical lifetime is defined as the average number of hours until light falls to 70 % of initial brightness, in lumens)

സാധാരണ ബള്‍ബുകള്‍ ഊര്‍ജം താപരൂപത്തില്‍ വേസ്റ്റ് ആക്കുമ്പോള്‍ LEDs തണുത്തു തന്നെ നില്‍ക്കും .ഒരു സാധാരണ ബള്‍ബ് 90 % ഊര്‍ജം താപമാക്കി വേസ്റ്റ് ആക്കുന്നു .ഒരു CFL 80 % ഊര്‍ജം താപമാക്കുമ്പോള്‍ LED താപനഷ്ടം 20% ത്തോളം മാത്രമാണ്.

LEDs പ്രകാശം ഒരു നിശ്ചിത ദിശയില്‍ ല്‍ മാത്രം നല്‍കുന്നു .അതേസമയം ഇന്‍കാന്‍റ്‌സെന്‍റ് , ഫ്ലൂറസെന്‍റ് ബള്‍ബുകള്‍ എല്ലാ ദിശയിലും പ്രകാശം നല്‍കി ഊര്‍ജം നഷ്ടപ്പെടുത്തുന്നു .

LED യില്‍ ഗ്ലാസ് ഭാഗം ഇല്ലാത്തതിനാല്‍ vibration ,breakage തുടങ്ങിയ പ്രശ്നങ്ങളില്ല .

സ്വിച്ചിട്ടാല്‍ ഉടന്‍ തന്നെ പൂര്‍ണ പ്രകാശം നല്‍കുന്ന LED കള്‍ ട്യൂബുകളെപ്പോലെ മിന്നിമിന്നി ഊര്‍ജം നശിപ്പിക്കുന്നില്ല .

ഒരു താരതമ്യ പഠനം

-----------------------------------------------------------------------------------------------------------------------------

കൂടുതല്‍ വിവരങ്ങള്‍ക്ക്

http://apps1.eere.energy.gov/buildings/publications/pdfs/ssl/led_advantage.pdf

---------------------------------------------------------------------------------------------------------------------------

What are LEDs?

LED stands for light-emitting diode. LEDs are small light sources that become illuminated by the movement of electrons through a semiconductor material. LEDs can be integrated into all sorts of products to provide white and colored light, such as flashlights, light bulbs, and integrated light fixtures.

Low-Powered LEDs

LEDs used to draw attention to something, such as an exit sign,
a green power button on a computer, or a red blinking
light on a video camera.

High-Powered LEDs

LEDs used to illuminate an area. ENERGY STAR qualified LED lighting uses multiple illuminator LEDs inside a fixture to produce white light.

What is Solid-State Lighting?

Many tiny LEDs are used in
each fixture.

LEDs are part of a family of lighting technologies called Solid-State lighting. This family also includes OLEDs (Organic Light Emitting Diodes). OLEDs (pronounced OH-leds) consist of sheets of carbon-based compounds that glow when a current is applied through transparent electrodes. While not yet market ready, OLEDs will function like a thin film on a wall or ceiling that illuminates a room. Like LEDs, OLED technology is advancing rapidly.
Solid-State lighting (SSL), most commonly seen in the form of Light Emitting Diodes (LEDs), has the potential to revolutionize the efficiency, appearance, and quality of lighting as we know it.
The U.S. Department of Energy estimates that rapid adoption of LED lighting in the U.S. by 2027 could;

Deliver savings of about $265 billion.
Avoid 40 new power plants.
Reduce lighting electricity demand by 33% in 2027.

How are LED lighting products different from other lighting, like fluorescent or incandescent?

LEDs emit light in a specific direction, whereas an incandescent or fluorescent bulb emits light — and heat — in all directions. For direct lighting applications LED lighting uses both light and energy more efficiently.
For example, an incandescent or compact fluorescent (CFL) bulb inside of a recessed can will waste about half of the light that it produces, while a recessed down light with LEDs only produces light where it’s needed — in the room below.
Incandescent bulbs create light by passing electricity through a metal filament until it becomes so hot that it glows. Incandescent bulbs release 90% of their energy as heat.
In a CFL, an electric current is driven through a tube containing gases. This reaction produces ultraviolet light that gets transformed into visible light by the fluorescent coating (called phosphor) on the inside of the tube. A CFL releases about 80% of its energy as heat.
LED lighting products use light emitting diodes to produce light very efficiently. The movement of electrons through a semiconductor material illuminates the tiny light sources we call LEDs. A small amount of heat is released backwards, into a heat sink, in a well-designed product; LEDs are basically cool to the touch.

LED lighting, when designed well, can be more efficient, durable, versatile and longer lasting than incandescent and fluorescents lighting.

LED lighting, when designed well, can be more efficient, durable, versatile and longer lasting than incandescent and fluorescents lighting.

Basic parts of LED lighting

LED lighting starts with a tiny chip (most commonly about one square millimeter) comprised of layers of semi-conducting material. LED packages may contain just one chip or multiple chips, mounted on heat-conducting material called a heat sink and usually enclosed in a lens. The resulting device, typically around 7 to 9 mm on a side, can be used separately or in arrays. LED devices are mounted on a circuit board, which can be programmed to include lighting controls such as dimming, light sensing and pre-set timing. The circuit board is mounted on another heat sink to manage the heat from all the LEDs in the array. The system is then encased in a lighting fixture, architectural structure, or even a “light bulb” package.

Aren’t all LED lights highly efficient and long-lasting?

After less than a year of use, a poorly designed LED product can flicker, shift in color, look dim, offer uneven light, or continue to use power when turned off, among other problems.

Not necessarily. LEDs have been efficient and long lasting as indicator lights in electronics for years, but using LEDs to create stable white light for general lighting presents new challenges. The key to success is smart design. To qualify for ENERGY STAR, LED lighting products must pass a variety of tests to prove that the products will display the following characteristics:

Brightness is equal to or greater than existing lighting technologies (incandescent or fluorescent) and light is well distributed over the area lighted by the fixture.
Light output remains constant over time, only decreasing towards the end of the rated lifetime (at least 25,000 hours or 22 years based on use of 3 hours per day).
Excellent color quality. The shade of white light appears clear and consistent over time.
Efficiency is as good as or better than fluorescent lighting.
Light comes on instantly when turned on.
No flicker when dimmed.
No off-state power draw. The fixture does not use power when it is turned off, with the exception of external controls, whose power should not exceed 0.5 watts in the off state.

Bad design can lead to a wide range of problems, some immediately observable and some not. Poorly designed products often come with exaggerated claims while failing to deliver on the quality specifications above.
Choose ENERGY STAR qualified LED fixtures to ensure the products you purchase perform well.

Happy Hours

2012-05-11T19:32:00.000+04:00

"മരുഭൂമിയിലെ വിരസനിമിഷങ്ങളില്‍ മരുപ്പച്ചപോലെ ഒരു ജീവിതക്കാഴ്ച ....അജ്മാനിലെ ബാച്ച്ലര്‍ താവളത്തില്‍നിന്നും......."

മെയ്‌ ദിന ചിന്തകള്‍

2012-05-01T12:10:00.002+04:00

1886 മെയ്‌ 1 നു ചിക്കാഗോ തെരുവീഥിയില്‍ ഒത്തുകൂടിയ ജനങ്ങളുടെ സമരാഗ്നി ഇന്ന് വാള്‍സ്ട്രീറ്റ് പ്രക്ഷോഭത്തിലെത്തി നില്‍ക്കുമ്പോള്‍ സമര പശ്ചാത്തലം മാത്രം മാറുന്നില്ല.അടിച്ചമര്‍ത്തപ്പെട്ടവന്റെ അമര്‍ഷം കൂടുതല്‍ ശക്തിയോടെ ജ്വലിക്കുന്നത് വീണ്ടും മുതലാളിത്വത്തിന്റെ ഉറക്കം കെടുത്തുന്നു.പക്ഷെ ഉദാരവല്കരണത്തിന്റെ ഫലമായി തുറക്കപ്പെട്ട കച്ചവട മായക്കാഴ്ച്ചകള്‍ക്ക് മുന്നില്‍ മതിമറന്നു നില്‍ക്കുന്ന ഇന്ത്യന്‍ സമൂഹം ഈ ദിനത്തിന് എന്തു പ്രാധാന്യം കല്പ്പിക്കുമെന്നു കരുതണം?

തൊഴിലാളി എന്ന് കേള്‍ക്കുമ്പോള്‍ ദളിതന്‍ എന്ന വാക്കുണ്ടാക്കുന്ന മനംപുരട്ടലോടെ മുഖം ചുളിക്കുന്ന ആധുനിക 'പ്രോഫെഷനലുകള്‍ തങ്ങളും ആ വിഭാഗത്തിലുള്ളവരാനെന്നത് മറക്കുകയും സമരങ്ങള്‍ നേടിത്തന്ന അവകാശങ്ങള്‍ ആവോളം ആസ്വദിക്കുകയും സമരങ്ങളെ തമസ്കരിക്കുകയോ പരിഹസിക്കുകയോ ചെയ്തു പ്രായോഗികവാദി ചമയുകയുമാണ് ചെയ്യുന്നത് .
മെയ്‌ ദിനം വിപ്ലവ പാര്‍ട്ടികള്‍ പോലും ചടങ്ങിനു വേണ്ടി മാത്രം ആചരിക്കുന്ന ഈ കാലത്ത് അക്ഷയ ത്രിതീയയും വാലെന്റ്ന്‍സ് ഡേയും മുന്‍ഗണന നേടുന്നത് കച്ചവട മാഫിയയുടെയും മാധ്യമ മാഫിയയുടെയും മാത്രം ശ്രമഫലമെന്നു കരുതാനാവില്ല . സമൂഹത്തിന്റെ മാറുന്ന മുഖം കാണിക്കുന്ന കണ്ണാടികളാണ് ഈ പ്രവണതകള്‍.പക്ഷെ നേഴ്സുമാരുടെ കാര്യത്തില്‍ സംഭവിച്ചത് പോലെ ഗതികെട്ടാല്‍ വീണ്ടും യാഥാര്ത്യതിലേക്ക് തിരിച്ചു വരാന്‍ കഴിയുമെന്ന് കാലം തെളിയിച്ചിരിക്കുന്നു .

...............................................................................................................

പൊളി ....ട്രിക്ക്സ്.......

2012-04-30T11:01:00.002+04:00

പൊളി ....ട്രിക്ക്സ്.......

രാഷ്ട്രീയത്തില്‍ മിടുക്കന്മാര്‍ ആകാന്‍ ചില പൊടിക്കൈകള്‍ .....

ആമുഖമായി നമുക്ക് ചില പൊതു തത്വങ്ങള്‍ പഠിക്കാം

1.ഏപ്പോഴും ഒരു കൂട്ടം മണ്ടന്മാരെ നക്കാപ്പിച്ച സഹായം നല്‍കി കൂടെ നിര്‍ത്തണം. കാറില്‍ വന്നിറങ്ങുമ്പോള്‍ മുദ്രാവാക്യ സംഗീതം മുഴക്കാനും എതിര്‍ ഗ്രൂപുകരുടെ കാലു തല്ലി ഒടിക്കാനും മുണ്ട് പറിക്കാനുമൊക്കെ ഉപയോഗപ്പെടും (ഉമ്മന്‍ ചാണ്ടി,മുരളീധരന്‍ )

2. ഏതെങ്കിലും മത സാമുദായിക സംഘടനയുമായി അടുത്ത ബന്ധമുണ്ടെന്നു വരുത്തിതീര്‍ക്കണം .പല തരത്തിലുള്ള വിലപേശലുകള്‍ക്കും അത് ഉപകാരപ്പെടും (രമേശ്‌ ചെന്നിത്തല ,കുഞ്ഞാലിക്കുട്ടി )

3.മാധ്യമ പ്രവര്‍ത്തകരോട് വെളുക്കെ ചിരിച്ചു കൊണ്ട് തമാശയും കള്ളവും ഉളുപ്പില്ലാതെ പറയാനും പരിശീലനം നേടുക.(പി സി ജോര്‍ജ് )

4.വികസനം.... വികസനം....അതിവേഗം ....ബഹുദൂരം..സുതാര്യത..... തുടങ്ങിയ ചില വാക്കുകള്‍ പ്രസംഗത്തില്‍ എടുത്തിട്ടലയ്ക്കുക..പ്രസംഗത്തില്‍ മാത്രം.... .ജനങ്ങളുടെ കണ്ണില്‍ പൊടിയിട്ടു പൊതുമുതല്‍ കട്ടുമുടിക്കാന്‍ അത് സഹായിക്കും.(ഉമ്മന്‍ചാണ്ടി )

5.സ്വന്തം പാര്‍ട്ടിയില്‍ ഉള്ള ശല്ല്യങ്ങളെ ആദ്യം വെട്ടിനിരത്താന്‍ മറക്കല്ലേ.....(പിണറായി )

കൂടുതല്‍ വിവരങ്ങള്‍ക്കും വിജ്ഞാനങ്ങള്‍ക്കും മുകളില്‍ സൂചിപ്പിച്ച വ്യക്തികളെ പിന്തുടരുക

(തുടരും ....)

2009-10-03T21:44:00.000+04:00

നമസ്കാരം......സ്വാഗതം .........