UN ORDENADOR NA ALCALDÍA DE FENE

A Dereita no Concello de Fene

2011-12-09T01:29:00.006+01:00

Warren Buffet , un dos máis ricos do planeta dixo hai pouco: “ a loita de clases existe e estámola gañando os máis ricos á conta dos pobres, porque somos os que a diriximos”
Unha parte da esquerda, despois da caída do muro e incluso antes, non solo abandona a loita de clases senón que se pasa de freada coqueteando cos métodos da dereita neoliberal. Simultaneamente a propaganda da dereita transforma medias verdades en verdades absolutas e mentiras en medias verdades.
Vencida e desarmada ideoloxicamente a sociedade o neoliberalismo móvese ás anchas. ¿Explica todo esto porque no concello de Fene, despois de 28 anos con alcalde do BNG e 4 anos do PSOE, pasa o PP a ser o partido máis votado? En parte si
Case 30 anos dan para producir cambios de calado que en Fene son profundos. Desde mediados dos anos 80 e principios dos 90 o desmantelamento do sector naval produce unha modificación substancial na estructura da poboación activa e no tecido empresarial. Nese contexto , mentres o PCE, o PTE-UC ( Partido dos Traballadores de España- Unidade Comunista) e o Bloque mobilizan á xente en contra, o goberno central do PSOE decreta a prohibición de construír barcos no estaleiro de Perlío. Á dereita faltáballe o descaro co que a conseguiría dotar Aznar, os comunistas viñan de sufrir unha excisión mentres que o PSOE tiña que capear o temporal da reconversión.
O Bloque tivo a intelixencia de liderar a oposición do Concello en contra da reconversión, se a esto lle engadimos a xestión de infraestructuras e servicios, a política cultural e educativa como dinamizadora da sociedade civil, a cooperación co movemento asociativo e a personalidade do alcalde Rivera Arnoso comprenderemos porque se mantivo case tres décadas no poder. Este éxito confunde aos do Bloque e cando a sociedade cambia non fan a lectura axeitada , instalados en certa rutina orientan as políticas en tres direccións: reivindicar que a factoría de ASTANO constrúa barcos ( o fracaso é obvio) , revitalizar un tecido asociativo esmorecente ( o éxito non acompaña) e a boa xestión; ate o punto de que unha das ideas forza do Bloque nas pasadas eleccións foi que o seu candidato era xestor
O PSOE coa victoria pírrica da reconversión industrial, a costa da perda de ideoloxía dos cidadáns, facilita o camiño á dereita. Pese a todo, debido a habilidade de Jorge Yáñez e o cansazo do Bloque, empeza o transvase de votos BNG ao PSOE, nos comicios do 2007 consegue a alcaldía que Iván Puentes non foi quen de manter
A victoria electoral da dereita en unha consecuencia da victoria ideolóxica, non é algo conxuntural, ven para se quedar. Se os partidos de esquerda queren alcanzar o poder teñen que se aplicar, sen demora, á tarefa de facer oposición rigorosa no Concello unida ao traballo de axitación social dos seus cadros e militancia na rúa, propiciando a reflexión colectiva encol do que a dereita fai onde goberna. Os veciños debemos ser conscientes de que a dereita que goberna o Concello pertence ao mesmo partido que empobrece aos pobres e que limita os servicios e a esquerda débenos dotar de instrumentos para este debate . Sexa quen sexa Gumersindo Galego, aplicará políticas de dereitas, polo tanto de recortes de servicios. Sexan que sexan os concelleiros do PP apoiarán políticas que en nada beneficiarán aos traballadores aos parados e aos pensionistas, algúns destes concelleiros incluso se creen que teñen dereitos especiais aparcando o onde lles peta que para eso son concelleiros. A dereita é así e nada nos faría sentir mellor que ver que no Concello hai unha oposición real ao PP

Pizarras, pizarriños, táboas cuneiformes e Iván Puentes encabuxado

2011-09-01T12:36:00.007+02:00

Cando íamos escribir sobre a dereita política no goberno de Fene, o ex alcalde máis novo de Fene, e portavoz do PSOE no Concello, séntese inxustamente atacado polo BNG. A estes do Bloque acordóuselles dicir que nos plenos, cremos que por unha cuestión de estética e de respecto á propia institución municipal, os concelleiros non deberían usar tabletas ou móbiles de cote. E manda truco na Habana! Como se encabuxou Iván Puentes! A xulgar polo que escribiu no twitter acusa aos do Bloque de censuradores e de atentar contra a liberdade de expresión. Basta ler este tweet “O BNG de Fene solicita que o Alcalde me prohiba twittear os plenos, se non ameazan con abandoar as sesións . Iso chamáse censura, non? e medo”, ou este outro “La solicitud del BNG de prohibición se extiende, quieren que se me prohiba tb el portátil. Llevaré los asuntos en tablillas cuneiformes...”, non esaxeramos.
Cada quen pode pensar que Iván Puentes se comporta como o neno cheo de meiró, ao que no patio do colexio lle quitan a pelota, ou polo contrario que ten razón. Nos empezamos dubidando, encabuxado ou non tería razón o ex alcalde? Saímos de dúbidas analizando o que Iván e os seus incondicionais escriben no twitter , a parroquia fiel está á altura, non defrauda. Entenderase que non reproduzamos o que pensan porque alguén podería pensar que estamos contribuíndo a propagar o “hooliganismo” na Rede. Como o sr Puentes sabe a escritura cuneiforme dos sumerios servía para transmitir ideas, non hai máis de cincuenta anos nas escolas do País usábanse pizarras e pizarriños, e con eso aqueles nenos transmitían ideas. Queremos supor, pola importancia que lle dá o sr Iván Puentes ao medio, que está convencido de que “ a mensaxe é o medio” e que a transparencia aumenta co aumento do uso das redes sociais. Humildemente discrepamos de esa idea, os medios son importantes para comunicar ideas, pero cando non hai ideas comunican ruído. Un consello, se nolo permite, ao Bloque de Fene: é loable a idea de que as institucións, que representan a cidadáns, merecen un respecto e a propia estética das reunións dos plenos contribúen ese respecto, agora ben, nas eleccións pasadas os cidadáns falaron e o problema foi que a dirección do PSOE de Fene non soubo ou non quixo interpretar correctamente a mensaxe e Iván Puentes e os seus seguen na mesma liña, por eso pensamos que o BNG non debe perder un minuto en tratar de convencer a Iván do que a moitos cidadáns nos parece que é o correcto, coidamos que o esforzo seria mais rendible no traballo de oposición rigorosa ao goberno do PP, e nós tamén nos teremos que aplicar o conto. Deixemos ao neno que xogue!

A esquerda no Concello de Fene

2011-08-15T01:42:00.002+02:00

Desde Almieiras ata Marraxón, quen soubera ver o voo de gaivotas e miñotos sabería adiviñar que o PSOE de Iván Puentes e de Noceda non ía gañar as eleccións municipais en Fene, incluso os que non sabíamos ler o voo de aves de mal agoiro estábamos de volta. Un ano antes das eleccións era un secreto a voces e, sen sermos o Oráculo de Delfos, ao ano de que o PSOE tivese a alcaldía alcumamos a Iván cariñosamente co sobre nome de “o breve”. No temos mérito ningún por acertar.

Iván Puentes empezou repetindo, por onde ía, que era o alcalde máis novo de Galicia e eso era certo, agora Galicia segue a ter outro que no é Iván como alcalde máis novo, desexamos de corazón que polo menos sexa o ex alcalde máis novo, de momento é o ex máis novo de Fene.

O problema de chegar a alcaldía non é tanto o traballo que hai por diante, que supoñemos difícil, como os males inherentes ao cargo: síndrome de Pigmalión e síndrome de Narciso. O primeiro é o máis perigoso, confundir a realidade imaxinada coa realidade real, Iván Puentes padeceuno en grao severo, confundiu a alcaldía co seu blog e o concello con Facebook, calquera que escoite os monólogos de Iván decatarase que o narcisismo tamén lle afectou, e non queremos ser mal pensados ao dubidarmos se ao mirarse no espello (como adoitaba facer a bruxa do conto) este lle dixera que Rivera Arnoso era máis importante ca el. Explicaría esto, en parte, que Iván levase a Rivera Arnoso diante dos tribunais?

Nas eleccións pasou o que pasou: O PP foi o partido máis votado con 6 concelleiros, o PSOE perdeu dous concelleiros pasando a 5 e o BNG mantense en 5, certo que con algúns votos menos ca o PSOE.

Temos un alcalde de dereitas porque con eses vimbios foi imposible tecer acordos para que o goberno municipal fora progresista, as feridas da experiencia de bipartito da lexislatura pasada non cicatrizaran e por enriba o Bloque, cando mira a lista do PSOE que ten que apoiar na investidura, sente que lle están metendo o dedo de Noceda nos ollos.

Humildemente cremos que o PSOE cometeu dous erros: o primeiro foi pensar que o Bloque estaba para darlle apoio sempre, si xa sabemos que hai acordos a nivel nacional que o Bloque non cumpriu, e o segundo non conseguir un alcalde progresista. Con franciscana humildade tamén dicimos que o BNG comete, ao noso entender, dous erros: o primeiro é considerar que os resultados das municipais foron malos ou non foron o suficientemente bos, o que posiblemente o levase a unha certa melancolía, cando a apreciación xeral é a contraria; o segundo erro foi non ser capaces de explicar porque non conseguiron que o alcalde fose progresista.

O resultado é que a alcaldía é do PP, que a mensaxe que se transmite para Galicia é que a esquerda non é capaz de poñerse de acordo e ademais o BNG e o PSOE ensaian un novo xeito de facer oposición ao PP: fanse oposición entre si.

Sen necesidade de ler o voo dos miñotos ou das gaivotas podemos saber o que pasará dentro de catro anos se a esquerda do Concello segue por este camiño: maioría absoluta para a dereita

Modernitos

2011-01-12T23:53:00.002+01:00

Modernitos, coquetos iles e elas, con blakberry ou iPod e demais aparellos de electrónica de consumo, repiten o que escoitan a os seus conselleiros áulicos, e non soamente o repiten de viva voz ou a través das redes sociais, se non que cren firmemente que todo a realidade está na pantalla, non miran fora: a modernidade é esta, predicaban urbi et orbe . Un coro de anxos cantores interpretando unha oda á socialdemocracia de cartón e no medio da festa chega a crise. A crise veu de fora! Aquí, en Portugal, en Londres ou nos USA veu de fora: de alfa centauro ou do quinto pino. Non hai culpables. Mentres tanto os fachas, perdón: os ultraconservadores, vomitan veleno diario. A nómina é ampla: Losantos J Pedro, Pío Moa, C Vidal, Bieito Rubido, C Davila, I Sansebastían, Ussia. E que fan os coquetos, eles e elas? Pois coller a blakberry ou iPod e escribir as súas cuítas: “PP caca, non se toca” e o tempo adiántanlle pola dereita guiados polos seus maiores e cando “PP caca nos se toca” entre na CASA todo estará en orde e os Fachas, perdón: fascistas, brindarán con champagne primeiro. Despois, con algunhas copas demais, non lles importará brindar con cava

O alcalde de Fene en Wikileaks

2011-01-05T20:47:00.003+01:00

Esta é unha transcripción aproximada do que din que apareceu en Wikileaks acerca do alcalde:

Pese a todo, pese a que minto pero sen me dar conta, pese a que nin eu nin o concelleiro de obras contestamos ás chamadas dos veciños, porque teño que facelo? ou é que non sabedes que se os veciños lles dás a man de seguida che pillan o brazo? como digo, pese a todo eu son o alcalde máis novo de Galicia, e eso si que doe verdade? Por eso aparecen tantos blogueiros resentidos. Que son un narcisista, por eso teño un blog ó meu nome con cinco fotos miñas na cabeceira, sí quintillizos, e qué? Son un narcisista socialista e este é un concepto que so unhas poucas cabezas privilexiadas poden entender. Foi a principios do ano pasado cando dixen que ía haber oito puntos de conexión a internet, gratuítos, no concello, este ano volvo a dicilo na véspera de Reis, e agardo poder dicir o mesmo para o 2012 e moitas máis cousas. Non todo se pode facer á carreira tal como queren os do Bloque ou os do PP que están sempre coa mesma matraca. Certo que debo unha explicación aos viciños e esa explicación que lles debo non lle la vou a dar, téñollela que dar so por que o diga a oposición e tres ou catro blogueiros? Non vos apuredes compañeiros que hai Iván para rato

Que os reis nos traian un novo alcalde. Amén

Desde oriente para Iván Puentes

2010-12-29T21:55:00.005+01:00

Caro Iván:
Baltasar está ate os “güevos” despois de ler a misiva e os camelos montaron unha que non vexas , joder tío o teu non ten remedio, mira que xa cho dixen o ano pasado, mira que “sos medio boludo”. Seica pensabas que o barrigudo de Papá Noel che ía sacar as castañas do lume, pero ti mira que es medio chaqueta de la! Non ves que non dás unha no cravo….falar falas polos cóbados, pero home tamén tes que facer algo e non se trata de escorrentar aos que non che bailan a auga, como fixeches con Yañez, Sestayo e Modesta, entre os máis famosos e con Noceda,entre os menos famosos, deixándoo nin vivo nin morto. Pero machiño, ti que demostras no teu blog unha cultura enciclopédica os meses pares e unha ignorancia enciclopédica os impares, debes saber que os teus compañeiros de partido tamén pensan. Aviado estaba PSOE, entón non habería partido, arre demo! A ver, xa sei que non queres perder a alcaldía, pero dime: que fixeches para que puideras ser alcalde outros catro anos? Temémonos que a resposta é que nin fixeches nin desfixeches. Lembras aquelo de “Sumando ideas”?, ti estiveches neso pero multiplicábalas por cero, ate a web que creastes se multiplicou por cero.Os restos,desas grandes ideas, a prezo de saldo, pódense mirar no Facebook ou no blog de Lage. Todo moi rebaixado. Como diría Rosendo Mercado “que animal”, (regalamosche a descarga da canción “Hasta de perfil” ) Pasácheste de voltas louvando a Mar Barcón Que vergoña! Como lle facías a pelota! Apoiaches ao teu amigo Lage fronte a Moreda e pasou o que pasou, por certo sabes que Moreda preside a Deputación e o Plan de Obras e Servizos está bloqueado en Fene. No Concello o que mellor funciona son os funcionarios pese a baixarlles o soldo. Beirarrúas rotas, contedores inservibles e buratos. O amaño da estrada dos institutos vai para catro anos e non se rematou. Onde van os trinta compromisos con Fene? seguramente que soterrados coma o parque debaixo da autoestrada. Estráñache que haxa algúns militantes que se deran de baixa? Estráñache que eses militantes estean tentando montar unha candidatura independente? E se xuntan as firmas necesarias e o conto vai para diante? Xa sei que tratas de resucitar a Noceda, a ver se o consegues. Non hai regalo! O único unha puta buxaina ( en políglota, como a ti che gusta: "puta peonza") para que te quedes embobado bailándoa se é que sabes

Rei Melchor de Oriente

Agardando a vez para lle dicir catro cousas

2010-12-23T12:27:00.007+01:00

O 2011 vai ser o último ano triunfal do rapaz, sabémolo polo voar das gaivotas. Ai os idus de marzo! E que di a súa carta astral? Onde está o seu ascendente? Se cadra está nun planeta que mudou a satélite. Os deuses van morrendo. Do líder de Fene so agardamos as bagoas, e no medio desta crise ninguén vai sentir os seus choros, ¿ninguén? bo alguén si. Nós si imos sentir as bagoas do Ivanciño, témoslle aprecio aínda que agora xa non sabemos se é socialdemócrata ou social liberal ou da triple A. Desde o 27 de xuño ata o 16 de decembro o neno estivo cavilando e chegou á conclusión que as folgas que poidan facer os sindicatos nos distintos estados non serven. Segundo o Ivanciño-analista-político os sindicatos deben superar as realidades nacionais e convocar unha folga xeral a nivel europeo. O tal Iván, coma un xogador de mus tolo, lanzando órdagos á grande, vaites vaites.. ou este rapaz é de outro planeta, quizás do planeta do Principiño, ou ten febre e está peor do que pensabamos.....O que el non sabe é que hai moitos que están agardando vez para dicirlle catro cousas. !Feliz ano 2011 dentro do que cabe, Ivanciño!

O tal Iván seica anda inspirado

2010-08-05T14:05:00.005+02:00

Sabemos que o Ivanciño está inspirado ¿Que terá o tal Iván? ¿será por eso que se multiplica no FENE SOCIALISTA ? ¿qué por canto se multiplica? Pois nin por un, ni por dous, nin por tres, nin por catro, nin por cinco, nin por seis....¡Multiplícase por sete! Sete fotos do líder na primeira páxina ¿Alguén dá máis..? O defunto Pepe Rubianes diría: "eso é unha cagada" . Síntoo meu ben admirado Pepe, eso é inspiración do noso líder. O Ivanciño enganchou a inspiración polo rabo, e arrastrado por ela imos ver do que é capaz, certo que ata o de agora por facer moito non fixo, algúns desagradecidos dicimos que nada pero de aquí en diante xa veremos do que é capaz. Nós facemos de tripas corazón, coas longas vacacións rematadas e o exército roxo vencido e desarmado, botamos un aturuxo para dicir que estamos aquí e que comezamos de novo, non coma a ave fenix senón coma o miñoto: esa rapaz con vista de aguia, oídos de lince e corpo de merlo grande. Saúdamos a todos empezando polos que nos queren mal, ¿qué sería de nós sen eles? e rematando polos que nos queren ben

Se os touros falaran....................

2010-08-01T17:57:00.006+02:00

Se os touros falaran non dirían o que se lle ocorreu ao debuxante, por chamarlle de algún xeito, dirían cousas ben peores. Xa sabemos que creadores do prestixio de Picasso, Hemingway ou Orson Welles, dun xeito ou outro, gabaron o toureo. E qué? O que dirían os touros se falasen non o reproduciriamos aquí en ningún caso para non termos problemas coa xustiza. Tampouco sabemos o que di o Ivanciño ao respecto, pero sabendo o que xa dixo Pepiño Blanco é fácil de adiviñar o que pode dicir o tal Iván. Saúde a todos e algún escorne para quen o mereza

Hello to everybody

2010-07-25T21:20:00.003+02:00

Rumbo de colisión

2009-08-04T02:06:00.008+02:00

Liberaron ao alcalde. ¡A foderse! E a dorna non é que vaia sen rumbo: navega vento en popa dereitiña cara os cantís. Algúns exemplos:
1 O líder indiscutible (en palabras de Pelouro ou Couce Pereiro ou Felipe do Muhiño , tres nomes distintos e una mesma persoa) pretende meter nos presupostos un PLAN F; o neno Ivanciño quere xogar a estadista emulando a ZP e o seu Plan E.
2 O tal Iván pretende ademais contar cunha partida xenerosa da que poida dispoñer para os investimentos municipais que considere, e xa se sabe ¡Obras son amores! Fagámonos dúas preguntas inocentes ¿Que competencias delegou o Pleno do Concello na Alcaldía? ¿Cando terá tempo a oposición para facer que o Pleno recupere as súas competencias?
3 Guindastre ou grúa: dispositivo mecánico que serve para retirar vehículos mal aparcados. O concello de Fene non ten guindastre, tampouco debe ter ordenanzas que regulen as taxas pola retirada de vehículos, eso si : retira vehículos ¿Como? ¡Eso nos
gustaría saber!
4 “Cueva” , en galego cova ou toco: habitáculo escavado na terra ou na rocha onde se esconden ou resgardan animais ou xente. Cova da loba, cova de Alí Baba. En Fene as malas linguas atribúenlle ao alcalde o dito “voy para la cueva” cando se dirixe á casa do Concello ¿?
5 Gripe A ¡Non agarde pola vacina! Inmunícese en Fene dándose unha volta a carón dos contedores da Avenida Naturais ¡ Inmunización ao instante!

6 (continuará)

Un alcalde medio astronauta

2009-07-20T12:24:00.011+02:00

Por moito que buscamos e rebuscamos nas hemerotecas non atopamos , ate o momento, ningún dato que poida confirmar a existencia no mundo mundial de un alcalde medio astronauta, agás o ínclito Iván Puentes, o único alcalde medio astronauta do mundo, o máis novo de Galicia, que acaba de comezar o terceiro ano triunfal ao fronte da Alcaldía de Fene ¿En que baseamos a afirmación de que o tal Iván é medio astronauta? Vexamos que fai o alcalde cando no Concello aparece un problema: "Houston, we have a problem" pronuncia mentalmente as verbas máxicas, agardando a que alguén lle poña remedio, e pensa "Houston: they all have a problem" . Son (somos) os de Fene, they all, os que teñen (temos) un problema. É un medio astronauta que viaxa polo espacio-tempo a piñón fixo e enfundado no traxe da política-pizza, confeccionado a partir de masa levedada con aromas dos esquerdistas de pensamento feble e mozarella do saldo de ideas das xuventudes socialistas. Calquera que pasee pola Avenida dos Naturais de Fene pode comprobar como se está transformando nunha paisaxe luar cos seus fermosos baches: os repugnantes da NASA están a rabexar de envexa. O alcalde traballando arreo no espacio sideral e aínda hai que se atreve a criticalo ¡Canta ingratitude! ¡Fene, gracias a o tal Iván, é unha potencia espacial! Ser medio astronauta non é o mesmo ca ser a metade dun astronauta, como ser medio parvo non é o mesmo ca ser a metade dun parvo e pese a todo aínda hai desagradecidos que pensan: Ivan, you are the problem

¡Gora San Fermín!

2009-07-08T23:18:00.008+02:00

FENEstrados, fenefoxas e feneconcello forman unha sorte de troika blogueira que analiza a política fenesa e nomeadamente as ocorrencias do ínclito Iván Puentes. Os que perpetramos a aventura de feneconcello empezamos en esto porque cando se nos ocorreu criticar ao MEGAlider, (ou TERAlider) deixando algún comentario en ivanpuentes.com resultou que os censuraba se non eran do seu agrado. Así foi como nos lembramos do que nos contaron da emisora a Pirinaica: ¡Aquí Radio España Independiente….estación Pirinaica! ¡Única emisora sin censura de Franco! Iván primeiro o censurador, o alcalde máis novo de Galiza, o case líder cósmico non permitía nin permite a crítica ¡Claro que os de feneconcello lle estamos agradecidos ao tal Iván! Moitas grazas Sr Alcalde: a censura deunos lectores e polo que se vé a vostede estao deixando sen eles. ¿Qué a que ven o debuxo? Si ben sabemos que vostede non foi correr diante dos touros, por a costa de Santo Domingo, Mercaderes ou Telefónica, pero como se fixo retratar facendo spinning para perder lastre, queríamos lle dar máis emoción ao conto poñendoo diante dun astado . E a cousa resulta: non somentes é vostede o máis novo de Galiza, senón que ademais nunca o collerá o touro, está comprobado, vostede practica o escapismo con extraordinaria maestría para agachase tras da barreira. Os seus marichis e palmeros berran ¡torero! ¡torero! cando lanza a idea de que os concelleiros fichen a entrada e saída na casa do Concello, cando imaxina o parque da Autoestrada, cando denuncia diante da fiscalía a Xosé María Rivera Arnoso. Pero vostede non sei se será torero o que sí é e escapista. Ningún dos grandes problemas do Concello ten forza dabondo para impedirlle que escape. Os espectáculos circenses perderon unha figura senlleira o que non deixa de ser unha perda para o circo e un desafortunado accidente para a política municipal. Non hai hoxe poesía porque corren malos tempos para a lírica . Saúdos aos amigos de FENEestrados e fenefoxas

Soneto con estrambote, dedicado ao alcaldiño de Fene

2009-07-02T18:20:00.006+02:00

O Ivanciño anda quentando a cadeira,
paseando a axenda dun lado pa outro,
el bótalle sempre as culpas ao outro
e está no despacho daquela maneira.

Se na beira rúa encontra un burato
con medio sorriso di quince palabras:
son algúns veciños, non gardan as cabras,
e máis os do Bloque que fan desacato

a estas alturas do primeiro terceto,
con moitos furados e o pacto rachado,
o grande Ivanciño coida que é perfecto.

¡Que risa veciños! xa chegou o cambio
atrasou dous anos por culpa do Bloque.
¡Fuxide buratos! En Fene hai recambio
-----------------------------------------------
eu son o alcalde, nunca me equivoco
sonvos moi listiño porque eu nada fago
e a culpa é do outro porque eu nada toco

O romance do alcalde: cantar de cego

2009-04-28T23:57:00.006+02:00

A xeito de cego veño
dos montes de Marraxón
a cantar o que xa cantan
deste alcalde de salón.

O máis novo de Galiza
e tamén de Ferrolterra
que contou moitas batallas
sen gañar nin unha guerra.

Era o mozo de Perlío,
un rapaz que prometía,
que se meteu no PSOE
e rematou na alcaldía.

Antes de chegar ao cargo,
para ser o rei da festa,
sen moita contemplación
escorrentou a Modesta.

De entre tódalas liortas
a maior foi con Sestayo
que terminou como acaba
a neve no mes de maio.

Gobernando no concello
poñen lle pleito a Rivera
entre el e a Secretaria
con unha carraxe severa.

Este rapaz ten ideas
e algunhas teñen “guasa”:
preguntade os de Sillobre
por ese parque de Audasa

Por enriba pasan coches,
porque é unha autoestrada,
e debaixo haberá un parque:
esto si que é foliada

No congreso do PSOE
non saíu moi ben parado
e os que ben o coñecen
din que anda cabreado

Non entrou na “ejecutiva”,
seica lles dixo el que non
pero a verdade do conto
é que vai sen ton nin son

Din que hai bagoas nas esquinas
polo chorar do Ivanciño
por perder o que perdeu
o gran Boabdil “el niño”

e aquí se acaba a historia
dun alcalde adulador
que xogou a ser de esquerdas
con artes de “trepador”

Este cantar de cego foi recollido no Monte de Marraxón, despois do congreso do PSOE no que o alcalde Iván non quixo continuar na ejecutiva, para entregarse en corpo e alma a alcaldía. Descoñecemos a música, cada quen que o cante como lle pete. Nós dedicámosllo ao alcalde para que o esforzo que fai por o benestar das veciñas e veciños de Fene lle sexa levadeiro

O cumpre anos do tal Iván: felicidades

2009-04-22T18:12:00.003+02:00

Son o máis novo de Galicia. Algúns din que o menos eficaz. ¡Qué ousados! Son gañas de amolar. Non dirían o que din se souberan o que eu levo feito por Fene. Traballo arreo na loita para frear a especulación do ladrillo: tramitar a licencia para un galiñeiro tárdase de catro meses a un ano. Son o Obama fenés e non se diga máis ¡Pensade que pasaría neste concello, e en plena crise, se non freamos a especulación! ¡Sí, tamén cos galiñeiros ! Se non fora por min e pola Secretaria estaríamos mergullados na burbulla dos galiñeiros. E falando de crise: téñoa acurralada. Eu soliño imaxinei o proxecto de Audasa Park. Ninguén me daba creto pero o proxecto está aí. Non vai haber quen pare a construcción do primeiro parque de Galiza debaixo dun viaducto da autoestrada. ¿Perigos? ¿Pode caer un coche do viaducto? ¡Vaia, vaia! Non confundamos: eso é o que lle da emoción. Por enriba marqueilles un gol pola escuadra a Audasa e a Fomento e ceden os terreos de forma gratuíta e indefinidamente. En precario: di a oposición. Pois non, porque agora está o meu amigo Pepe Blanco no ministerio de Fomento. Os de Sillobre botan fume ¡Xa o sei! Cando pasen as horas de lecer debaixo do autoestrada, comprenderanme e saberán que os meus desvelos non foron en van. Son humilde e a pesar de ser o máis novo non me importa cumprir anos e incluso permitín que unha rondalla fenesa me felicitase, o día do meu “cumple” cando estaba facendo o balance do meu primeiro bienio triunfal como o alcalde máis novo de Galiza.
Un tal Iván

Vaia morro que ten o tal Iván

2009-04-02T17:06:00.015+02:00

"Puentes reconoce que las licencias de obras menores tardan dos meses y las mayores cuatro aproximadamente" (La Voz de Galicia 31-3-2009).
V., un veciño do concello de Fene, leva agardando por unha licencia para cambiar catro "uralitas" 12 meses. Como nós non somos mal intencionados, líbrenos Deus de pensar que o Ivanciño faltou a verdade, e queremos buscarlle unha explicación a discrepancia entre o publicado e o que sostén V., barallamos as seguintes hipóteses:

La Voz non interpretou correctamente o que declarou o Ivanciño, pero esto é imposible: porque o rapaz estudiou publicidade e sabe como se ten que relacionar coa prensa
V. minte, pero esto tampouco pode ser, porque V. é un militante do PSOE de Fene e que se saiba este militante non minte
Cambiar "uralitas" non é unha obra menor, tampouco é unha obra maior. Conclusión cambiar "uralitas" É UNHA OBRA MAESTRA"
¿Canto tempo durará a paciencia dos veciños?

Negra sombra, burla negra e mofa

2009-03-24T10:45:00.007+01:00

A chumbeira da xusticia

non vin cousa somellante!

colle os peixes pequeniños

e deixa fuxi-los grandes!

Al LO LA LA LA LA

Agora sabemos quen foi o culpable do chapapote: o barco. Pero esto xa o dixera unha tal Ana Botella. E nós alporizándonos todos. Menos mal que a xuiza non encontrou motivos para imputar aos que fomos as manifestacións convocadas por Nunca Máis. ¿Como era aquelo de "mexan por nos e temos que dicir......"?

Un BNG con cafeina

2009-03-17T12:13:00.006+01:00

_ ¡Por favor! Un café con leite desnatado, moi corto de café...que sexa café, pero que pareza descafeinado, con sacarina e sen espuma
_¿Como dixeches?
_ Si home.Un café con centralidade: case non ten leite, case non ten café, case é descafeinado e ten sabor doce sen pisca de azucre.
_Eso nin é café nin rabo de gaita.
_ ¡Que va! É un café que acadará o poder en catro anos, porque non lle sentará mal a ninguén!
_ ¡Seguro! E tampouco será bo para ninguén

O BNG fai ben en analizar en profundidade os resultados electorais, fai ben se cadra en modificar estratexias, pero o obxectivo principal non pensamos que sexa recuperar o poder na Xunta. O obxectivo principal é dar resposta política , tanto desde o poder coma desde a oposición, e desde unha perspectiva nacionalista e de esquerdas, aos moitos e graves problemas que a maioría dos galegos e galegas teremos que afrontar. Estes días hai moito ruído, pero o ruído non lle debe impedir ao BNG interpretar os sinais que distintos sectores sociais están lanzando. Os partidos serven aos intereses da sociedade, certo, pero funcionan como intelectuais colectivos –Gramsci dixit- sendo esta función, de intelectual colectivo, fundamental para crear movementos dirixidos a conseguir políticas de cambio e transformación social
¿BNG descafeinado? ..¡Non, grazas!

Sumando ideas: Galicia políglota

2009-03-13T18:47:00.005+01:00

" ... Unha Galicia políglota, na que se eduque aos nosos fillos/as en galego e castelán". Non, a afirmación non é de Gloria Lago de Galicia Bilingüe, aparece no “ manifesto de reflexións e ideas para encarar unha nova xeira no Partido dos Socialistas de Galicia” . Unha gran idea de Galicia Bilingüe que os socialistas galegos asinantes do manifesto incorporan ao seu ideario. Entre os que encabezan as sinaturas non podía faltar o Alcalde de Fene, o ínclito Ivanciño. Pero ¿onde estudiaches ti home? Moitos estragos fixo LOXSE. Políglota: dise da persoa que coñece e é capaz de expresarse en varias linguas diferentes. Bilingüe: que usa dúas linguas. No teño dúbida de que no voso manifesto propón unha Galicia bilingüe, ou que é o mesmo unha Galicia diglósica. Diglosia: situación na que o individuo especializa cada lingua para funcións diferentes, especialmente cando unha delas se ve reducida a funcións socialmente inferiores

Este non é Anxo Quintana

2009-03-12T09:35:00.011+01:00

Non é Anxo Quintana , nin Feijó 09 licencia para mentir, nin Touriño, nin Torito, nin por suposto Espartaco, nin ten parecido con Kirk Douglas. Nunca podería estar nunha escola de gladiadores porque nunca quixo ser gladiador: quixo ser Craso. Nin a Kubrick se lle pasaría pola cabeza incluílo en ningún reparto. O Bloque tampouco o incluíu no reparto de O vento de Galicia: o Bloque perdeu e el gañou o 1 de marzo. Ah! o 1 de marzo concedéronlle a Feijó 09 licencia para mandar ¿Para mandar? Non, para facer o que lle mandasen

De riguroso loito: recargando Galicia

2009-03-10T21:48:00.010+01:00

Non estou de loito por Quin, que tanto me ten, el debería saber que só á dereita lle esta permitido ir en iate ¡Eslora, manga e foque para Feijó 09 licencia para mandar!
Non é ningún secreto que cazar en tempos de chapapote é actividade propia do ¿? ex franquista Fraga e do ex fraguista Cascos. “Acórdate do mar cando vaias a votar”, foi onte, coma quen di, e parece que pasara un século, como o Prestige afundira a carón do Nadal, e “saían hilillos de plastilina en estiramiento vertical”, houbo peticións aos reis magos para que nos agasallasen con toneladas de memoria. Tantas coma de chapapote, non foi así: non sabemos se porque memoria é un ben escaso, ou porque os reis magos son de dereitas. Algo non faría a esquerda, ou algo faría que non explicou ben ou todo o tecido de dereita, que ten moitísima Voz ( tal vez sexa máis acertado dicir Coz), tapou as explicacións dos avances políticos que impulsou a esquerda. Feijó 09 mentres tanto foi Recargando Galicia, xa non é que a recargara é que aos galegos nos vai saír o tiro pola culata. Só nos queda mirar ao futuro con certa tranquilidade porque se algo ten a dereita é que nas súas filas non hai corrupción ¿por qué? Por definición, así se recolle nos testos sagrados de FAES por eso nin Baltar nin Crespo nin Feijó 09 licencia para mentir son corruptos, nin o poderán ser nunca ¿Por qué? Por definición. Estou de loito porque unha política, principalmente a das consellerías do Bloque, tentou sentar as bases para que os recursos dos galgos sirvan ás necesidades dos galegos e esta política ¿ morre?

San valentín, día dos namorados

2009-02-17T22:36:00.005+01:00

Chegaron, uns din que en paracaídas e outros que en ala delta, o día de San Valentín. O Alcalde pasou un día moi, moi feliz. Non sabemos se nun rapto de inspiración lle dixo a Mar Barcón " hoxe quérote máis ca onte e menos ca mañá" ou tivo para ela algún lirismo baseado en “Love Story” do xeito de "amar significa non ter que dicir nunca: síntocho". A nós tamén nos conmove o namoramento e a felicidade de Iván e ademais desexamos que , tanto ao Ministro de Cultura como á Ministra de medio ambiente sen nos esquecer de Mar Barcón, tiveran unha boa estancia en Fene, e ata cando queiran deixarse caer de novo en paracaídas que case seguro será noutras eleccións.

Os administradores do blogue

O traxe novo

2009-02-10T00:02:00.004+01:00

Audasa park: Un parque debaixo da autoestrada

2009-02-05T17:42:00.003+01:00

O alcalde máis novo de Galicia, é dicir: o de Fene, ten que escoitar a protesta dos veciños e veciñas de Sillobre. Non queren un parque debaixo da Autoestrada. É unha magoa ¡Mira que son desagradecidos! ¡Co ben que quedaría unha placa a entrada do mesmo! Imaxinade a inscrición "Este parque inaugurouse sendo alcalde de Fene o Ilustrísimo sr. Ivan Puentes o breve..." . Fene pasaría a ser así o primeiro Concello de Galicia con un parque debaixo da autoestrada e os demais rabiando coa envexa ¡ É vostede un incomprendido sr Alcalde