வேர்கள்.

மறைமலை நகர் ரயில்வே ஸ்டேஷன் ..அமாசானில் இன்று...

2020-01-06T20:22:00.003+05:30

இலக்கியம் பேசு ..அரசியல் அகற்று !56

2020-01-05T14:22:00.001+05:30

05 01 1911 பதிவு .
இனிய இலக்கிய சொற்பொழிவாளர் நெல்லை கண்ணன் தாங்கட்கு

50 களில் திராவிட இயக்கங்கள் கையிலெடுத்த ஆயுதங்களான பகுத்தறிவு சிந்தனைகளும் தாய் மொழி பற்றும் என்னை பெரிதும் ஈர்த்தன. இன்னும் சொல்லப் போனால் சிந்தனைத் திறனையும் மொழியின் சுவையையும் முதல் முதலில் ஊட்டியவர்கள் அவர்கள்தாம்.இன்று அவர்கள் வேண்டுமானால் கலைஞரின் சந்ததியைப்போல் திசை தவறி பயணித்திருக்கலாம்.

மாற்றான் தோட்டத்து மல்லிகைக்கும் மணமுண்டு என்ற அண்ணாவின் வரிகளுக்கேற்ப பின்நாளில் எந்த பாகுபாடுமின்றி பேச்சும் எழுத்தும் எங்கெல்லாம் மதிக்கப்படுகிறதோ அங்கெல்லாம் என் பார்வை படர்ந்தது.

அப்போது நீங்கள் காங்கிரஸ் பேரியியக்கத்தில் இருந்தீர்கள் என்று நினைக்கிறேன். நீங்கள் நிகழ்த்திய ஒரு சிலசொற்பொழிவுகளையும் பட்டிமன்ற விவாதங்களையும் வியப்போடு கேட்டவன் நான்.நீங்கள் விவரித்த புராணச்சுவைகள்கூட என் தமிழ் கருதி என் பகுத்தறிவுச் சிந்தனைகள் குறுக்கே வந்ததில்லை.இலக்கியங்களையும் புராணங்களையும் பேசுவதைப்போல தான் சார்ந்து நிற்கும் கட்சிகளுக்கும் அதன் தம் தலைவர்களின் நேர்மைக்கும் வாதிடுவது எத்தகைய சிக்கல்களை ஏற்படுத்தும் என்பதை அறிந்தவன் நான். அதன் பொருட்டே வாழும் தலைவர்களின் சித்திரங்கள் நம் வரவேற்பரைக்கு என்றும் ஏற்றதல்ல என்று இன்றும் நம்புகிறவன் . அவர்கள் அத்தனைபேரும் ஒருநாள் தங்கள் ஆடைகளை மாற்றி நம் முகங்களில் முழுமையாக கரிபூசக்கூடும்

என்பதை உணர்ந்திருக்கிறேன்.அதைப்போல கட்சிகளில் இருக்கும் போது கட்சிகளின் முடிவகளுக்கு செவி சாய்த்தே ஆக வேண்டும்.அது இயலமற் போனது துரதிஷிடம்தான்.

இயல்பாகவே மிகுந்த தன்னம்பிக்கையும் தமிழ்ச்செறுக்கும் நிறைந்த குணம் உங்களை இன்று தனித்திருக்க தங்களுக்கு உதவியிருக்கிறது என்று கருதுகிறேன்.

உங்களுக்கு காங்கிரஸ் இயக்கத்தின்பால் இருக்கின்ற மாறா பற்றை என்னால் உணரமுடிகிறது.அதே

சமயம் அந்த பல்லக்கு தூக்கிகளின் கூத்தை உங்களால் சீரணிக்க முடியவில்லை என்பதையும் அறிந்திருக்கிறேன்..கடந்த சில நாட்களாக நீங்கள தொடர்ந்து எழுதியும் பேசியும் வருகிற கருத்துக்கள் ஒவ்வொன்றையும் படித்தே வருகிறேன்.இவையனைத்தும் நீங்கள் எந்த தளத்தில் நிற்கிறீர்கள் என்பதை அறிவிக்காவிடினும் எந்த தளத்திலிருந்து பேசுகிறீர்கள் என்பதை என்னால் உணரமுடிகிறது.

கலைஞர் மீதும் திமுக மீதும் தங்களுக்கேற்பட்டிருக்கிற அறச்சீற்றமோ அல்லது சாதாரண சீற்றமோ

வரிக்கு வரி வெடித்துச் சிதறுகிறது.அதே சமயம் நீதி தேவதை ஜெயலலிதாவுக்காக உங்கள் மேலான யோசனைகளையும் அவ்வப்போது வாரி வழங்கி புராண காலத்து கண்ணனையும் சரித்திர சாணக்கியனையும் விஞ்சியிருக்கிறீர்கள்.வைகோவுக்காக கவிபாடிய கரிசனம் வியப்பளித்தாலும்

அதுவும் ஜெயாவுக்காக என்றறிந்தபோது தங்கள் சாணக்கியம் துர்வாசர் சோ வையே மிஞ்சியதை உணர்கிறேன்.

அப்படி நீங்கள் எழுப்பும் கூற்றுதான் என்ன.

திமுக ஊழலின் ஊற்றுக் கண்ணாகி விட்டது.திமுக வில் வாரிசுகளின் ஆதிக்கம் நிறைந்திருக்கிறது.கலைஞரின் வாரிசுகள்இந்த மண்ணையே சுரண்டுகிறார்கள்.இலவசங்களை வாரியிறைத்து பாமரமக்களின் வாழ்க்கையே நாசமாக்குகிறார்கள்.

பெரும்பாலும்

நடுத்தர வர்கத்தினரும் பத்திரிக்கைகளும் எழுப்புகிற இவைகளைத்தான் நீங்களும் எதிரொலிக்கிறீர்கள். இவையனைத்திலும் உண்மையே இல்லையென்று வாதிட நான் வரவில்லை.

நீங்கள் அதிமுக வுக்காக வாக்கு கேட்கவில்லை என்றாலும் அதற்கான அடித்தளத்தை ஏற்படுத்துகிறீர்கள் என்பதை மறுக்கமுடியாது.

திமுக வெளியேற்றப்பட்டால் ஆட்சியில் அமரப்போவது கம்யூனிஸ்ட் பாண்டியனா.அல்லது அமையப்போவது உங்கள்

கனவு காமராஜர் ஆட்சியா.

அந்த அணியை திரும்பி நோக்குங்கள். கம்யூனிஸ்ட் உட்பட அந்த அணியில் ஊழலற்ற இயக்கம் ஏதேனும் உண்டா.எந்த அணியில் குடும்ப அரசியல் நுழைவு தவிற்கபட்டிருக்கிறது.இலவசங்களை ஏற்காத அரசியல் இயக்கங்கள் இருக்கிறதா.பாட்டாளி வர்கத்தின் அடையாளம் என்று சொல்லப்படுகிற கம்யூனிஸ்ட்கள் உட்பட ஊழலற்ற அமைப்புக்கள் எதனையும் காணமுடியுமா? வாரிசுளே அற்ற கட்சிகள் எதுவும் இந்த மண்ணில் உண்டா ?வாரிசுக்கு எதிரான மூதறிஞர் இராஜாஜியையும் பேரறிஞர் அண்ணாவையும் இன்னும் எத்தனை காலங்களுக்கு நாம் சொல்லிக்கொண்டிருக்கப் போகிறோம்?ஓட்டுக்கு இலவசங்களை அறிவிக்காத கட்சி எதுவும் கண்களுக்கு புலப்படுகிறதா.

இந்த பாமரமக்கள்தானே ஏறதாழ பத்தாண்டுகள் ஜெயிடம் ஆட்சிப் பொறுப்பை ஒப்படைத்தார்கள்.அநத காலங்களில் அவர் இந்த மண்ணுக்கும் மொழிக்கும் ஆற்றிய சாதனை அடையாளங்கள் எதனையும் காட்ட முடியுமா. அவர் இந்த மக்களின் ஒவ்வொரு பிரிவிற்கும் இழைத்த அவலங்கள் தாமே மிஞ்சின.இறுதியில் 63 கோடிக்கு கணக்கு சமர்ப்பித்ததுதானே நிகழ்ந்தது.

திருக்குவளையில் இருந்து துண்டோடு வந்த கலைஞரைப் பார்த்தவர்கள் தேர்தலுக்கு காப்புத்தொகை செலுத்த கைவளையலை அடகுவைத்ததாக ஜெ எழுதியதை படிக்காமல் போனது வியப்பானது இல்லையா.

இன்றைய கலாச்சார சூழலில் ஊழல்கூட எதார்த்தம் என்று கொள்ளலாம்.அதே சமயம் மக்களின் வாக்குகளைப்எ பெற்று ஆணவத்தையும் அகங்காரத்தையும் முன்னுறுத்தி பொய்யும் புரட்டும் கலந்த அரசை எப்படி அனுமதிப்பது. பிரதமர் மன் மோகன் சிங் , வாஜ்பாயி ,ஜஸ்வந் சிங் , ஆளுநர் சென்னா ரெட்டி முதல் இனறைய கடைசி தா பாண்டியன் வரை அவரை சந்திக்க நேர்ந்த அனுபவங்கள் எத்தனை.

கூலித்தொழிலாளர்களுக்காக குரல் கொடுப்பதாக கூறிக் கொள்ளும் கம்யூனிஸ்ட் இயக்கங்கள் கூட இன்று ஊழலில் பேசப்படவில்லையா?

திமுகவில் ஊழலே இல்லை என்று பேச எந்த காரணமும் என்னிடத்தில் இல்லை.அதே சமயம் வேறு ஒரு ஊழலற்ற ஒரு இயக்கம் இருப்பதாகவும் எனக்குத்தோன்றவில்லை.

திமுகவில் வாரிசுகள் கட்சியில் முக்கியத்துவம் பெற்றிருப்பது உண்மை.அதே நேரத்தில் வாரிசுகளற்ற ஒரு கட்சியும் இந்த மண்ணில் இருப்தாக எனக்கு தெரியவில்லை.ராஜீவ் காந்தியை காங்கிரஸ் மாலை போட்டு தேர்ந்தெடுத்தது போல் அந்தந்த கட்சியின் உறுப்பினர்கள் கவனத்தில் கொள்ள வேண்டிய கவலை.இடையில் ஓநாய்களுக்கு வேலை இருப்பதாக தோன்றவில்லை.

அதனையும் தாண்டி திமுக ஒரு இயக்கமாக இயங்குகிறது. கூட்ங்களாக அல்ல.

திமுக மக்களையும் மற்றவர்களையும் மதிக்கிறது. இன்றைய சூழலில் மின் வெட்டு ஒன்றைத்தவிற

மக்கள் தேவைகளுக்கு குறையொன்றும் இருப்பதாக தெரியவில்லை.ஊடகங்கள் எதிரொலிப்பதைப்போல் ஊழல்கள் இருக்கலாம். அதை சி. பி .அய்யும் நீதிமன்றங்களும் கவனித்துக்கொள்ளும் . புலனாய்வு இதழ்களும் சுப்ரமணி சாமியும் ஒத்துழைக் கக்கூடும்.

எந்த எழுத்தும் பேச்சும் நிமிர்ந்து நிற்க உண்மையான சிந்தனைகள் அடிப்படையாக அமைய வேண்டும். நாவலராய் திழ்ந்த நெடுஞ்செழியன் காணாமற் போனது அதனால்தான்.

அதுபோல.உங்கள் கவிதைக் கூட்டுக்குள் இந்த அரசியல் அசிங்கங்கள் தேவைதானா.

உங்கள் பேச்சும் எழுத்தும் அசாத்தியமானது.உங்களால் குறுகியகட்சிக் கட்டுப் பாட்டுக்குள்

நீடிக்க முடியாது என்றே கருதுகிறேன்.எத்தனையோ எழுத்துச் சிற்பிகளும் பேச்சு வல்லுநர்களும்

அரசியல் அகற்றி தமிழாய் வாழ்வதைக்காண்கிறேன். அன்னைத் தமிழுக்கு அணி சேற்க உங்கள் எஞ்சிய வாழ்க்கை உதவட்டும். இலக்கியம் பேசுக. அரசியல் தவிற்க.

சென்னையிலிருந்து பாண்டியன்ஜி.
இடுகை 0052

குற்றமும் தண்டனையும் !

2020-01-05T11:30:00.002+05:30

ஆந்திர மாநிலத்தில் இளம் பெண் மருத்துவர்ஒருவர் பாலியல் கொடுமைக்குள்ளாக்கப் பட்டு உயிரோடு கொளுத்தப் பட்ட நிகழ்வும் அதனைத்தொடர்ந்து அந்த நான்கு குற்றவாளிகளைக் காவல் துரையினர் என் கவுண்டரில் வேட்டையாடிய நிகழ்வும் இந்த தேசத்தையே அதிர்வுக்குள்ளாகியிருக்கிறது.

சட்டத்தை தங்கள் கைகளில் எடுத்துகொண்ட அந்த காவல் ஆய்வாளரை பொதுமக்களும் பத்திரிக்கைகளும் பெரிதும் போற்றிக் கொண்டாடியிருக்கிறன..

சமூகவலைதளங்களும் ஊடகங்களும் அவர்களின் செயலை பெரிதும் மெச்சியிருக்கின்றன.

குற்றவாளிகளுக்கு கொடுக்கப்படும் தூக்கு தண்டனை அறவே ஒழிக்கப்படவேண்டுமென்ற கோரிக்கைகளுக்கும் மனித உரிமைகள் சார்ந்த இயக்கங்களின் செயல்பாடுகளுக்கும் இந்த நிகழ்வு பெரும்பின்னடைவை ஏற்படுத்தியிருக்கிறது என்பது உண்மைதான்.

என்னைப்பொறுத்தவரை அந்த குற்றவாளிகளுக்கு தரப்பட்ட தண்டனை சரியானதுதான் என்றாலும்.அதை நிறைவேற்றுகிற உரிமை ஒரு அரசு ஊழியருக்கு இல்லை என்பதுதான். குற்றவாளிகள்

தப்பிக்க முயன்றபோது தற்காப்புக்காக சுட்டுக் கொன்றோம் என்ற அவர்களுடைய வாக்குமூலமே அவர்கள் சட்டத்தைத் தாண்டி செயல்பட்டுவிட்டார்கள் என்பதை உணர்த்தும்.

இந்த நிகழ்வில் மக்களின் மகத்தான மகிழ்வுக்கும் ஊடகங்களின் ஒத்திசைவுக்கும் தலையாய காரணம் எதுவாக இருக்க முடியும்.

கடந்த காலங்களில் தமிழகமெங்கும் இருண்ட இரவுகளில் அல்ல ,பட்ட பகல்வெளிகளில் பேரூந்து நிலையம் , ரயில்வே நடைமேடைகள் , ஜனத்திரள்மிக்க கடைவீதிகள் என்று மக்கள் மிகுதியாக நடமாடுகின்ற பல்வேறு இடங்களில் புசிக்கின்ற விலங்குகளை வெட்டி சாய்ப்பது போல் பூப்போன்ற சக மனிதர்கள் வெட்டி சாய்க்கப்பட்டதை பார்த்திருக்கிறோம்..அதற்கு காரணமான அத்தனை குற்றவாளிகளும் இன்னமும் வெளியேதான் வட்டமடித்துக் கொண்டிருக்கின்றனர்..அவர்கள் மீது குற்ற வழக்குகள் பதியப்பட்டாலும் நீதிமன்றங்களில் விசாரணை மாதக்கணக்காக வருடக்கணக்காக நீண்டு கொண்டே இருக்கிறது. இந்த மந்த நிலையே மக்களிடம் பெரும் வெறுப்பையும் மிகுந்த சலிப்பையும் ஏற்படுத்தியிருக்க்கூடும்..

இதற்கு என்ன செய்யலாம்.

வழக்குகளை விரைந்து முடித்து குற்றவாளிகளுக்குஏற்ற தண்டனையை நிறைவேற்றுவதே வழியாக இருக்க முடியும். அதற்கான முயற்சிகளை ஆந்திர அரசு எடுத்திருக்கிறது.

இதே மாதிரியான ஒரு நிகழ்வைத்தான் மறைமலை நகர் ரயில்வே ஸ்டேஷன் குறுநாவல் பேசுகிறது

கண்ணெதிரே நிழும் ஒரு கொடூரத்தை கண்டும் காணாமல் கைகட்டி நிற்பவனே கொரைகாரனைவிட கொடியவன் என்று இந்த குறு நாவலில் பேசுகிறர் தண்டாயுதம்..

இந்த நாவலைப்பொறுத்தவரை ஆசிரியர் குறுக்கீடுஅறவே இல்லை.நிகழ்வுகளைச் சொல்லி பெரும்பாலான தகவல்களை வாசகர் சிந்தனைக்கே வழிவகுத்திருக்கிறேன்.

இந்த குறு நாவலின் மூலம் உங்கள் உள்ளங்களை தொட்டுவிட முயன்றிருக்கிறேன். அவ்ளவுதான்..

லிங்கை க்ளிக் செய்யவும்.

மறைமலை

நகர்ரயில்வே

ஸ்டேஷன்: குறு நாவல்

(Tamil Edition) Kindle Edition

Follow the Author

Pandian G

வெரும் 19 ரூபாய் மட்டுமே. !

2020-01-03T11:06:00.001+05:30

Villavan Kothai

36 mins

2020 ஜனவரி 17

கிண்டில்கவுண்டவுன் டீல்.
மறைமலை நகர் ரயில்வே ஸ்டேஷன்.வருகிற 17 ஜனவரி 2020 லிருந்துஇரண்டொரு தினங்களுக்கு விலைகுறைப்பு.
வெரும் 19 ரூபாய்க்கு கிடைக்கிறது
எளிய கருவை மனதிற் கொண்டு உங்கள் உள்ளங்களை தொட்டுவிட முயற்சி செய்திருக்கிறேன். நீங்கள் வாங்கும் ஒவ்வொரு படியும் அமாசான் தர வரிசைப்பட்டியலில் அதற்கான இடத்தை நிர்ணயிக்கும். நன்றி நண்பர்களே.

மறைமலை நகர் ரயில்வே ஸ்டேஷன்.

2020-01-03T10:45:00.002+05:30

வணக்கம் !

இனிய நண்பர்களே ! அமாசான் அறிவித்திருந்த pen to publish 2019 போட்டிக்கான
இறுதி நாள் முடிந்திருக்கிறது. அமாசான் தர எந்திரம்  சுழன்று  பொறுக்கி எடுக்கும் மின்நூல்களை இனி இரண்டு
எழுத்துலக வல்லுநர்கள் ஆய்வு செய்யப்போகிறார்கள்.இந்தப்போட்டியில்
வென்று விடக்கூடுமென்ற பெரும் நம்பிக்கையெல்லாம் என்னிடத்தில் இல்லை.இருந்தாலும் நான் உட்படுத்திய மூன்று புத்தகங்களுக்குமே மதிக்கத்தக்க இடங்களை  நீங்கள் தந்திருப்பது எனக்கு மகிழ்வே. கடந்த இரண்டு மாதங்களில் ஏறதாழ முன்னூற்றுக்கு மேற்பட்ட படிகள் தரவிறக்கப்
பட்டிருக்கின்றன..இருந்தாலும் அதற்கான கருத்துரைகள்தான்
கிட்டவில்லை.அபரிதமான கருத்துரைகளின் அளவைக் கட்டுப்படுத்த
அமாசான் பெரும் கட்டுபாடுகளை விதித்திருப்பது கூட ஒரு காரணமாக இருக்கக்கூடும்
கருத்துரைகளை கையாளுவதில் இருக்கும் சிரமம்.இன்னும் ,என் நண்பர்கள் பலருக்கு இலவசப்பிரதியை தரவிறக்குவதில் கூட பெருங் குழப்பம்.

பரவாயில்லை.  

மேற்சொன்ன வாய்ப்பை நழுவ  விட்டவர்களுக்கு அமாசான் நிறுவனம் கவுண்டவுன்
டீல் என்று வருகிற 17 ஜனவரி 2020 லிருந்து சில நாட்களுக்கு அறிவித்திருக்கிறது. அப்போது மறைமலை நகர் ரயில்வே ஸ்டேஷன்
நூலுக்கான விலை ரூபாய்
பத்தொன்பது  என்று
அறிவித்திருக்கிறது. 

இணைய நண்பர்கள் 

வேர்கள் வலைதள நண்பர்கள். 

முக நூல் நண்பர்கள் 

அத்தனை பேரும் ஒரு படி தரவிறக்க
வேண்டுகிறேன். கருத்துரைக்கான
அமாசானின் கெடு ஏற்கனவே முடிவடைந்து விட்டாலும் நீங்கள் கருத்துரை இட்டால் நான்
மகிழ்வேன். இன்றைய சூழலில் ஒரு புத்தகத்துக்கு நீங்கள்
கொடுக்கும் பத்தொன்பது ரூபாய் ஒரு பொருட்டாக இருக்க முடியாது. முடிந்தவரையில் புத்தகத்தை வாங்கி மறைமலைநகர் ரயில் நிலையம் புத்தகத்துக்கான
இடத்தை நீங்களே நிர்ணயிங்கள்.

நன்றி மீண்டும் வருவேன்.

வில்லவன் கோதை

9884127328

02 ஜனவரி 2020  கீழே காணும் முகவரியை க்ளிக் செய்யுங்கள்.

மறைமலை நகர் ரயில்வே ஸ்டேஷன்: குறு நாவல் (Tamil Edition) 29 Sep, 2019   

ஒரு வேண்டுகோள் !

2019-12-17T22:31:00.000+05:30

வணக்கம்.

அமாசான் அறிவித்திருந்த

pen to publish 2019 க்கான புத்தகவருகை ஒருவழியாக முடிவுக்கு வந்திருக்கிறது.எத்தகய மதிப்பீடுகளை முன் வைத்து அமேசான் தரநிர்ணய எந்திரம் புத்கங்களை வரிசைப்படுத்தப் போகிறதோ விளங்கவில்லை. இறுதி முடிவுகளை இரண்டு எழுத்துலக பழைமையும் புதுமையும் இணைந்து அறிவுக்கக்கூடுமென்று அறிவித்திருக்கிறார்கள்.

பதினாலு வயதிலேயே பத்திரிக்கைகளில் எழுதிய அனுபவம் உண்டென்றாலும் மின்வாரியப்பணி கிடைத்தபிறகு எல்லாம் நின்று போயிற்று. பணியிலிருந்து விடுபட்ட போதுதான் என்னை நான் புதுப்பித்துக் கொண்டேன்.அரசியல் சமூகம் இலக்கியம் சார்ந்த துறைகளில் அடிக்கடி மூக்கை நுழைத்து அவ்வப்போது புனைவுகளையும் எழுதி வந்தேன் இயல்பிலேயே. பகுத்தறிவு சார்ந்த எண்ணங்களையும் திராவிட சிந்தனைகளையும் பெற்றிருந்த நான் எப்போதுமே பொழுதைப் போக்குகின்ற எந்த எழுத்தையும் எழுதியதில்லை மூடநம்பிக்கைகளுக்கும் சமூக சிந்தனைக்கெதிரான கருத்துகளுக்கும் செரிவைட்டும் எழுத்துக்கள் என் அடையாளமில்லை..

இந்தப் போட்டிக்காக மூன்று மின்புத்தகங்களை பதிப்பித்திருக்கிறேன். அந்தப்புத்தகங்கள் மூன்றும் அமேசான் வரிசையில் மணிக்குமணி தங்கள் இடங்களை மாற்றிக் கொண்டு வருவதைப் பார்க்கிறேன்.

எது இப்படி இருந்தாலும் இந்த நகர்வுகள் அத்தனையும் உங்களையன்றி அணுவளவும் அசைந்திடாது என்பது நிச்சயம்.

இந்த புத்தகங்கள் இந்த ஒரு வாரத்தில் மட்டும் ஏரத்தாழ நூற்றி தொண்ணுற்றைந்துக்கு மேற்பட்ட படிகள் தரவிறக் கப்பட்டிருப்பது பெரிதும் மகிழ்ச்சியே

தரவிறக்கி வாசித்த நண்பர்கள் தங்கள் உள்ளுணர்வுகளை அவசியம் amazon review வில் வெளிப்படுத்த வேண்டும். ஒருபோதும் உங்களிடம் நான் தேவைக்கதிகமான நட்ச்சத்திரங்களை கேட்கமாட்டேன்.ஒன்றுக்குகூட தகுதியற்றதாகத் தோன்றினால் மறுபடியும் மறுபடியும் உங்களிடம் வருகிறேன். நன்றி.!.

வில்லவன்கோதை ( பாண்டியன்ஜி)

1 மறைமலை நகர் ரயில்வே ஸ்டேஷன். ( குறு நாவல் )

2 மனப்போக்கு ( MENTALITY ) சிறு கதைகள்

3 எதர்க்காக அழுதான் ? ( குறு நாவல் )

ருசித்துப் பாருங்கள் !

2019-11-26T17:23:00.002+05:30

மறைமலை நகர் ரயில்வே ஸ்டேஷன்.

குறு நாவல்

ஒரு காலத்தில் அமைதிப்பூங்காவாகத் திகழ்ந்த தமிழ் நாடு இப்போது கொலை வெறிக்கூடமாகத் திகழ்கிறது. பொருளாதார விளிம்பை ஏரத்தாழ தொட்டு விட்ட இந்தச் சமூகம் இப்போது மாறுபட்டு சிந்திக்கத் தொடங்கி விட்டதே தலையாய காரணமாகக் கருதுகிறேன்.

மரண தண்டனைக் கெதிராக போராடுகிற ஒரு மனிதனைக் அவன் கண்ணெதிரே காணுகின்ற ஒரு கொடூரம் அவனை மிருகமாக்கி விடுகிறது.

இதைத்தான் இந்த குறு நாவல் பேசுகிறது.

அவசியம் படியுங்கள். உங்கள் உணர்வுகளை

REVIEW ல் வெளிப்படுத்துங்கள்

கீழே உள்ள நூலின் லிங்கைக் க்ளிக் செய்யுங்கள்.
வில்லவன்கோதை

மறைமலை நகர் ரயில்வே ஸ்டேஷன்: குறு நாவல் (Tamil Edition) 29 Sep, 2019

குத்தூசி ! ( ருசித்துப் பாருங்கள் ! )

2019-11-26T17:19:00.000+05:30

உயிர் வதை என்ற சிறுதைத் தொகுப்பு இப்போது

கிண்டில் மின் பதிப்பாக வந்திருக்கிறது.

கொல்லாமை

வாழ்வுரிமை

விதைக்கப்பட்ட விதைகளே முளைக்கும்

சுற்றுச் சூழலின் வலிமை

என்ற புள்ளிகளை மையமாக்க்கொண்டு எழுதப்பட்ட ஐந்து சிறுகதைகள் இந்த நூலில் இடம் பெற்றிருக்கிறது.

இந்த நூல் வருகிற 29 , 30 , நவம்பர் 2019 ல் அமேசானில் விலையின்றி தரவிறக்கி படிக்கக் கிடைக்கிறது. உலகெங்குமுள்ள என்னுடைய இணைய நண்பர்கள் இந்த வாய்ப்பை பயன்படுத்தி எனக்கு மேலும் எழுத ஊக்கமளிக்க வேண்டுகிறேன.

தரவிறக்க கிழேயிருக்கும் மின்நூல் முகவரியைக் க்ளிக் செய்யவும்.

--- வில்லவன் கோதை.

உயிர் வதை: சிறுகதைத் தொகுப்பு (1) (Tamil Edition)
by pandian g

நண்பர்களுக்கு முக்கிய செய்தி !

2019-11-12T22:25:00.002+05:30

படத்தை க்ளிக் செய்யவும்

இனிய நண்பர்களுக்கு..
வருகிற நவம்பர் 16 , 17 மற்றும் 18 2019 தேதி களில் என்னுடைய மின்நூல் மறைமலை நகர் ரயில்வே ஸ்டேஷன் விலையின்றி எளிதாக தரவிறக்கி வாசிப்பதற்கு அமாசான் விற்பனைத் தளத்தில் கிடைக்கிறது.( இங்கே உள்ள முகப்புப்படத்தை மௌசால் mouse கிளிக் செய்தால் நீங்கள் அமாசான் தளத்துக்கு போய்விடலாம்.) இந்த வசதியை பயன்படுத்தி படித்து கருத்துகளை அருள்கூர்ந்து பகிருமாறு கேட்டுக்கொள்கிறேன்
இனிய
வில்லவன் கோதை

2019-10-24T21:58:00.003+05:30

விழாக்கால விருந்து.

எனது இரண்டாவது மின் நூல் மனப்போக்கு கீழ்கண்ட தேதிகளில் தமிழ் வாசகர்கள் ரசனைக்கு விலையில்லாமல் எளிதாக தரவிறக்கி வாசிப்பதற்கு அமாசான் தளத்தில் கிடைக்கிறது.

கைபேசி டேப்ளட் கணினி போன்ற சாதனங்களை கையாளுபவர்கள் இந்த மின் நூலை இலகுவாக படித்திடலாம்.

கூகுள் ப்ளே ஸ்டோரில் அமேசான் கிண்டில் ரீடரை இலவசமாக தரவிறக்கி கொள்ளலாம்.தங்கள் படிக்கின்ற வசதிக்கேற்ப நீங்களே எழுத்துருவை மாற்றி அமைத்துக்கொள்ள கிண்டில் ரீடரில் வழியிருக்கிறது.

ஆயிரக்கணக்கான மின் நூல்களை எப்போதும் எந்த பயணத்திலும் வாசிக்க கிண்டில் ரீடர் ஒரு வரப்பிசாதம்.

அதற்குப்பிறகு கீழே உள்ள நூலை க்ளிக் செய்வதன் மூலம் எளிதாக அமேசான் தளத்துக்கு போய்விடலாம்.அங்கு பணம் செலுத்தி வாங்குவது போலவே 28 , 29 , அக்டோபர் 2019 ல் ஜீரோ விலைக்கு வாங்கும்போது அந்த நூல்கள் எளிதாக உங்கள் கிண்டில் நூலகத்துக்கு வந்துவிடும். இந்த வாய்ப்பை பயன்படுத்தி இந்தப்புத்தகத்தை வாசிக்க முடிந்தவர்கள் தங்கள் உணர்வுகளை ஆங்கிலத்தில் அதே தளத்தில் review வாக வெளிபடுத்துங்கள்.

வினை எதுவாக இருந்தாலும் மகிழ்வேன்.

பதிலும் அளிக்கிறேன்.நன்றி.

your

villavan kothai

2019-10-04T17:38:00.001+05:30

எனது முதல் மின் புத்தகம்.

இனிய நண்பர்களே

என்னுடைய குறு நாவல் மின் பதிப்பொன்று அமாசான் கிண்டில்

இபுக்ஸ் வரிசையில்வெளியாகியிருக்கிறது.

ஏறதாழ 0.5 டாலர் ( இந்திய மதிப்பில் ரூபய் 50 ) மதிப்பிலிருக்கும் அந்தப்புத்தகத்தை நீங்கள் வாங்குவதன் மூலமும் அதுபற்றிய கமண்டுகளை அமாசான் கிண்டில் தளங்களில் வெளிபடுத்துவதன் மூலம் ஏதோ ஒரு வகையில் சோம்பியிருக்கும் எனக்கு புதிய ஊக்கத்தைக்கொடுக்கக்கூடும்.

அதேசமயம் அமாசான் அறிவித்திருக்கும் பென் டு ப்பளிஷ் போட்டியில் எனக்கு ஒரு இடத்தையும் நிர்ணயிக்கும்..

இணையதளங்களையும் சமூக ஊடகங்களையும் கையாளத்தெரிந்தவர்கள் கிண்டில் இ ரீடர் அப்ளிகேஷனை தரவிரக்கம் செய்து கொண்டு கைபேசி டேப்ளட் கருவிகளிலும் எளிதாக வாசிக்கலாம். நன்றி வணக்கம்.

கீழே உள்ள படத்தை க்ளிக் செய்வதன்மூலம் அமாசான் தளத்தை அடையலாம்.

#Amazon

AMAZON.IN

மறைமலை நகர் ரயில்வே ஸ்டேஷன்: குறு நாவல் (சிறு கதைகள் Book 3) (Tamil Edition)

சென்னை புறநகர் ரயில் நிலையமொன்றில் ஒரு மாலைப்ப¼...

தமிழர்தம் கம்பீரம் !

2018-07-14T20:28:00.002+05:30

தமிழகத்தின் தென்பகுதி.

வணிகச்சந்தைக்குப் பெயர் பெற்ற விருதுநகர்.

தொள்ளாயிரத்து மூன்று , ஜூலை பதினைந்து

மிகமிகத் தாழ்த்தப்பட்ட சமூகத்தைச்சார்ந்த ஒரு சாமான்ய குடும்பத்தில் பிறக்கிறது ஒர் அபூர்வக்குழந்தை. பிற்காலத்தில் காங்கிரஸ் பேரியக்கத்துக்கும் இந்தத் தமிழ் மண்ணுக்கும் தன்னை அர்ப்பணித்துக் கொண்டு வரலாற்று ஏடுகளில் தன்னைத்தானே எழுதிக்கொள்ளப்போகிறது என்ற தகவலை அன்று எந்தச்சோதிடனும் கணித்திருக்க முடியாது.

குலதெய்வம் காமாட்சியின் திருப்பெயரை குழந்தைக்குச் சூட்டுகிறது அந்தக்குடும்பம். தாயார் சிவகாமி அம்மாளோ பெற்ற மகனை ராசா , ராசா என்று செல்லமாக அழைக்கிறார். காலப்போக்கில் காமாட்சி என்ற திருப்பெயர் காமராசாவாகிறது..

விருதுநகர் சத்திரிய வித்யாலயாவில் ஆரம்பக்கல்விக்கு சேர்க்கப்பட்ட காமராஜ் ஆறாம் வகுப்புக்கு மேல் வாசிக்க முடியாமற் போயிற்று. இளம்வயதிலேயே தந்தையை இழக்கிறார்.பள்ளிப்படிப்பற்றபோது வியாபாரம் பழகத் தாய்மாமன் நடத்திய துணிக்கடைக்கு அனுப்பப்படுகிறார். அதையும் கடந்து அடுத்தடுத்து குறுக்கிட்ட எந்தவேலைகளும் அவருக்கு நிலைக்காமற் போயிற்று.

தேசமே வெள்ளையர் ஆதிக்கத்தில் அடிமையுற்றிருந்த காலம்.

நாடெங்கும் விடுதலை வேட்கை புயலாக வீசிற்று. தேசப்பிதா காந்தியின் தென்னிந்திய வருகை காமராஜரின் வாழ்வில் ஒரு திருப்புமுனையை ஏற்படுத்திற்று.

அண்ணலின் விருப்பத்திற்கிணங்க கதராடைகளை அணியத் துவங்குகிறார் காமராஜர்.வெள்ளையர்க்கெதிரான தமிழககாங்கிரஸ் தலைவர்களின் சூராவளிப் பிரச்சாரம் காமராஜரின் முழுநேர அரசியல் நகர்வுக்கு அடிகோலுகிறது. தான் குருவாக ஏற்றுக்கொண்ட

தீரர் திருமயம் சத்தியமூர்த்தியின் எழுச்சிமிக்க உரைகள்

காமராஜரை அவர்காலடியில் கொண்டுசேர்க்கிறது. காங்கிரஸ் கட்சியில் காமராஜரின் தன்னலமற்ற உழைப்பு சத்தியமூர்த்திக்கு மகிழ்வூட்டுகிறது.

பதினாறு பதினேழு வயதிலேயே அவரது முழுநேர அரசியல் வாழ்வு தொடங்கிவிட்டது. தொள்ளாயிரத்து முப்பதில் ராஜாஜி தலைமையில் வேதார்ணியம் உப்பு அள்ளும் போராட்டம்.

காமராஜர் கைதாகி கல்கத்தா அலிகார் சிறைவாசம்.

தொள்ளாயிரத்து நாற்பதில் விருதுநகர் வெடிகுண்டு வழக்கில் கைதாகிறார் . சிறையில் இருந்தே விருது நகர் நகராட்சித்தலைவர் தேர்தலில் வெற்றி பெறுகிறார். ஒன்பதுமாத சிறைக்குப்பிறகு வன்முறையற்ற நிரபராதியாக வெளியே வருகிறார்.

நாற்பத்திரெண்டில் ஆகஸ்ட் புரட்சி.

அதில் பங்கேற்ற காமராஜருக்கு மூன்று ஆண்டுகள் கடுங்காவல், தேசவிடுதலைக்காக தொடர்ந்து போராட்டங்கள் சத்யாகிரகங்கள்.

தொள்ளாயிரத்து முப்பதிலிருந்து நாற்பத்தியேழுவரை மாறிமாறி சிறைவாசம். விருதுநகரிலும் காங்கிரஸ் பேரியக்கத்திலும் காமராஜர் ஒரு தவிர்க்க இயலாத அடையாளமாகிறார்.

நாற்பத்தியேழில் தேசம் விடுதலையுற்றபோது அந்த ஆனந்தத்தைக் கொண்டாட அவர் தலைவர் சத்யமூர்த்தி இல்லை. ஓடோடிச்சென்று அவர்வீட்டு வாயிலில் தேசியக்கொடியை ஏற்றி சுதந்திரத்தைக் கொண்டாடுகிறார்.

மூதறிஞர் ராஜாஜி முதல்வராகிறார். ஐம்பத்துமூன்றில் ராஜாஜியின் குலக்கல்வித்திட்டத்திற்கேற்பட்ட பேரெதிர்ப்பு ராஜாஜியின் விருப்பத்துக்கு மாறாக காமராஜரை ஒரு தமிழ்ப்புத்தாண்டில் தமிழ்நாட்டின் முதல்வராக்குகிறது.

எண்ணி எட்டே எட்டு அமைச்சர்கள்.!

தன்னையெதிர்த்து ராஜாஜியின் நல்லாசியுடன் போட்டியிட்ட சி சுப்ரமணியம் அவர்களையும் அவரது சகாவான பக்தவசலம் அவர்களையும் தன் அமைச்சரவையில் அரவணைத்துக்கொள்கிறார்.

அதுமட்டுமல்ல. தேர்தலில் காங்கிரசையே எதிர்த்துப் போட்டிட்டு திமுகவின் ஆதரவோடு வெற்றிபெற்ற காங்கிரஸ்கார்களான ராமசாமிப்படையாச்சி , மாணிக்கவேலு நாயக்கர் இருவரையும்கூட அமைச்சர்களாக்கி அரசுக்கும் கட்சிக்குமான இடர்களைக் களைகிறார். சாதியப் பேய்கள் தலைவிரித்தாடிய அந்த காலத்திலேயே பரமேஸ்வரன் என்ற தாழ்த்தப்பட்டவருக்கு அறநிலையத்துறையைக் கொடுத்து தனக்கிருந்த பகுத்தறிவையும் ராஜதந்திரத்தையும் வெளிப்படுத்துகிறார்.

ஆறாம் வகுப்பைத்தாண்டாத காமராஜருக்கு தமிழ் ஆங்கிலம் இந்தி மட்டுமின்றி வேறு சில மொழிகளும் பழக்கமாயிற்று. .பள்ளிக்கல்வி அவருக்கு கிட்டாமற் போனாலும் படிக்கவேண்டிய நூல்களை படிக்கத்தவறியதில்லை. எப்போதும் கற்றவர்களை தன்னோடு சோர்த்துக்கொண்டது அவரது வெற்றியின் ரகசியம் என்றே கருதுகிறேன். .

நாடு விடுதலைபெற்று குடியரசானபோது வெள்ளையர் ஆட்சியில் சுரண்டப்பட்ட தேசத்தை செதுக்கவேண்டிய பொறுப்பு மத்திய அரசிற்கு இருந்தது.

புதிய ஐந்தாட்டுக்கான திட்டங்கள் வரையப்பட்டன .

காமராஜர் தமிழககாங்கிரஸ் இயக்கத்தில் தன்னிகரற்ற தலைவராக விளங்கினார். மத்தியிலும் அவர் கட்சியே ஆட்சியில் இருந்ததால் ஐந்தாண்டுத்திட்டங்களில் தமிழகத்தின் பங்கு கணிசமாக அதிகரித்தது.

விவசாயத்துக்குப் பெரிதும் முக்கியத்துவம் அளித்த மத்தியஆட்சியில் தமிழகத்தில் பத்துக்கும் மேற்பட்ட நீர்ப்பாசன திட்டங்கள் வெற்றிகரமாக நிறைவேற்றப்பட்டன. அடுத்தடுத்து வந்த ஆட்சிகள் அதற்கு மேற்பட்ட திட்டங்களை நிறைவேற்றியிருந்தாலும் மக்கள் இன்னமும் ஆண்டுக்கு ஆண்டு அவர் பணிகளையே நினைவிற்கொண்டிருப்பது அவர் பெற்றிருந்த சாதனை.

மின்சார உற்பத்திக்குக் குந்தா நீர்மின்திட்டங்களும் , அனல் மின் நிலையங்களுக்கு ரஷ்ய நாட்டின் உதவியோடு துவக்கப்பெற்ற நெய்வேலி அனல் மின்நிலையமும் முக்கியமானவை. தொழில்துறையைப் பொறுத்தமட்டில் பாரத மிகுமின் நிறுவனம் நெய்வேலி பழுப்பு நிலக்கரி நிறுவனம் மணலி சிபிசிஎல் எண்ணை சுத்திரிப்பு நிறுவனம் கிண்டி மருத்துவ உபகரணங்களுக்கான தொழிற்சாலை, மேட்டூர் காகித ஆலை உதகமண்டலத்தில் நிழற்படச்சுருள் தயாரிக்கும் தொழிற்சாலை அரவங்காடு வெடிமருந்து தொழிற்சாலை

பெரம்பூர் ரயில்பெட்டி தொழிற்சாலை

இப்படி அத்தனையும் அவர் காலத்தில் ஏற்பட்டவை.

தொழில்துறையில் இன்றும் சீராக இயங்கிக் கொண்டிருக்கும் பெரும்பாலான பொதுத்துறை நிறுவனங்கள் அவர் காலத்தில் கிடைத்தவை.. தமிழகத்தில் நிறைவேற்றப்பட்ட பெரும்பாலான திட்டங்கள் ஏறதாழ அறுபது ஆண்டுகள் கடந்தபின்னும் உறுதியாக நின்று இன்றும் காமராஜர் நிர்வாகத்தை நினைவூட்டுகிறது

ஆளும் அதிகாரம் கட்சிக்குக் கிடைத்தபோது அரசு எந்திரங்களை முடிக்கிவிட காங்கிரஸ் இயக்கத்தின் தலைவர்கள் எல்லாம் ஆட்சியில் பங்கேற்கிறார்கள்.

அதேசமயம் தேசவிடுதலைக்குக் காரணமாய் இருந்த காங்கிரஸ் பேரியக்கம் தனிமைப்படுகிறது.

ஆட்சிக்கட்டிலில் இளைஞர்களுக்கு வழிவிட்டு முதுபெரும் தலைவர்கள் கட்சியைக்காக்க தயாராகவேண்டுமென்ற திட்டத்தைமுதன் முதலில் முன்வைக்கிறார் காமராஜர். அப்படியொரு திட்டத்தை பண்டித நேரு ஏற்கிறார்.

காமராஜரே எல்லாருக்கும் முன்மாதிரியாக முதன்மந்திரி பொறுப்பில் இருந்து விலக முதுபெரும் இந்தியத்தலைவர்கள் எல்லாம் காங்கிரசை காக்க காமராஜரைப்பின் தொடர்கின்றனர்.. அறுபத்திமூன்றில் ஏற்பட்ட அத்தகைய சிந்தனை கே – ப்ளான் என்று அரசியல் நோக்கர்களால் பெரிதும் பேசப்பட்டது.

அதே ஆண்டில் பாரதப்பிரதமர் பண்டிதநேரு மரணமுற்றபோதும் அறுபத்தியாறில் லால்பகதூர் சாஸ்த்ரி எவரும் எதிர்பாராமல் ரஷ்ய நாட்டின் தாஷ்கண்டில் மறைவுற்ற போதும் சரியான காய்களை நகர்த்திக் காங்கிரசின் மிகப்பெரிய சிக்கலைத் தவிர்த்தவர் பெருந்தலைவரே.

அறுபத்தியேழில் தமிழகம் முழுதும் வீசத்தொடங்கிய திராவிடச்சூராவளி பெருந்தலைவர் காமராஜரையும் விட்டுவைக்க வில்லை. தமிழகச் சட்டமன்றத்தேர்தலில் திமுகவின் மேடைப்பேச்சும் சாதீயக் கட்டமைப்புகளும் சொந்த ஊரிலேயே காமராஜரைத் தோற்கடிக்கிறது தொடர்ந்து வந்த கன்யாகுமரி நாடாளமன்ற இடைத்தேர்தலில் மகத்தான வெற்றி பெற்று டெல்லிப்பட்டணம் போகிறார்.

அடுத்து நேருவின் மகளோடு ஏற்பட்ட மனக்கசப்பு சிண்டிகேட் காங்கிரஸ் என்ற தனிக்கட்சி தோன்றுதர்க்குக் காரணமாகிறது. எழுபத்தைந்தில் இந்திராகாந்திக்கு நெருக்கடி ஏற்பட்டபோது அவர்பிரடனப்படுத்திய நெருக்கடி நிலை தேசத்தையே அதிர்வுக் குள்ளாக்குகிறது. தேசியத்தலைவர்கள் அத்தனைபேரும் இரவோடு இரவாகச் சிறைப்படுத்தப் படுகின்றனர. பெருந்தலைவர் காமராஜர் மனமொடிந்து போகிறார்

தமிழ்நாடு கலைஞர் கருணாநிதியின் இரும்புக்கர அரவணைப்பில் இருந்த நேரம். நெருக்கடிநிலையின் நீண்ட கரங்கள் தமிழகத்தை எட்டாதிருந்த சமயம்.

வரப்போகும் விடுதலை நாளில் எல்லாம் சரியாகுமென்று நம்பியிருந்த காமராஜர் முதுபெருந்தலைவர் ஆச்சாரிய க்ருபளானியும் கைது செய்யப்பட்டார் என்றபோது பெரும் அதிர்ச்சிக்குள்ளானார்

அதே ஆண்டு அக்டோபர் இரண்டில் காந்தி பிறந்தநாளன்று இந்தக் கருப்பு காந்தி நம்மிடமிருந்து விடைபெற்றுக்கொள்கிறார். கொட்டும் மழையில் பெருந்தலைவரின் பூத உடலுக்கு தோள் கொடுத்து கலைஞர்தான் கடைசியாக விடை கொடுக்கிறார்.

இந்தக் காமராஜரின் ஆட்சியைத்தான்

இப்போதெல்லாம் மீண்டும் மீண்டும் கொண்டு வருவோம் என்று பெருவாரியான குரல்கள் தேர்தலுக்குதேர்தல் உயர்ந்து ஒலிக்கிறது. ஆனால் இந்தமுறை வித்தியாசமான இன்னொரு நிகழ்வையும் காண்கிறேன்.

வழக்கமாக இதுபோன்ற வாக்குறுதிகளை காங்கிரஸ் பேரியக்கமேதேர்தலுக்கு தேர்தல் முன்வைக்கும். ஆனால் இந்த முறை வேறுசில கட்சிகள்கூட இந்தச் சொற்களை உரக்கப் பேசுகிறது.

காங்கிரஸ் பேரியக்கம் தமிழகத்தில் திராவிடக்கட்சிகளிடம் ஆட்சியைப் பறிகொடுத்து ஏறத்தாழ ஐம்பது வருடங்களுக்கு மேல் கடந்து விட்டது. அந்தக் கட்சியின் தலைவர் காமராஜரோ இந்த மண்ணில் மறைந்து நாற்பது வருடங்கள் ஓடிவிட்டது. இந்த நிலையிலும் இப்படியொரு சிந்தனையை இந்தக்கட்சிகள் பரவலாக வாக்குறுதியாகச் சொல்லப்படுவதும் அதையும் இன்றைய தலைமுறை பெரும்கனவுகளாக எதிர்நோக்குவதும் இயல்பாக நிகழக்கூடியதல்ல. அதர்க்கான அடிப்படை காரணம் என்னவாக இருக்க முடியும்.

பார்க்கலாம்.

தென்னிந்தியாவைப் பொறுத்தவரை காலங்காலமாக மாறிமாறி ஆண்டு வந்தவர்கள் குறுநிலமன்னர்கள். அவர்கள் காலங்களில் எப்போதோ சிலசமயம் பொற்கால ஆட்சி நிகழ்ந்ததாக வரலாறு பேசுகிறது. தம்மக்களுக்குத் தேவையான சகல வசதிகளையும் செய்துகொடுத்த எந்தக்குறுநிலமன்னனும் தம்குடிமக்களுக்குக் கல்வியைப் போதித்ததாக வரலாறு இல்லை.

நவீன திட்டங்கள் அப்போதுதான் நமக்கு முதன்முதலாக அறிமுகமாயிற்று. அவற்றில் அவர்கள் அறிமுகப்படுத்திய கல்விமுறை முதன்மையானது.

வெள்ளையரின் கொள்ளையில் சிதறிக்கிடந்த இந்த மண்ணைச் சீரமைத்துத் தான் பயிலாத கல்வியின் ருசியை எப்பாடு பட்டாயினும் எம்மக்களுக்குக் காட்டிவிட்டால் இந்தத்தேசம் எப்படியும் முன்னுக்கு வந்துவிடக்கூடுமென்று காமராஜர் நம்பினார். முதலமைச்சராகப் பதவியேற்றவுடன் ராஜாஜியின் கல்விக்கொள்கையால் மூடப்பெற்ற ஏழாயிரம் பள்ளிகளைத் திறந்து மேலும் இருபத்தேழாயிரம் பள்ளிகளைத் திறக்க உத்தரவிட்டார்.

தமிழகமெங்கும் பள்ளிகள் பரவலாகத் திறக்கப்பட்டு விட்டாலும் மாணவர் சேர்க்கை உயர்ந்துவிடவில்லை. அறுபதுகளில் நிகழ்ந்த ஒரு நிகழ்வு இந்தச் சிக்கலை எளிதில் விடுவிக்கிறது.

ஒருமுறை பொதுநிகழ்ச்சியொன்றில் கலந்துகொண்டு தன் சகாவான தொழிலமைச்சர் வெங்கட்ராமனுடன் திரும்பிக் கொண்டிருந்தார். இடையே குறுக்கிட்ட ரயில்வே க்ராசிங்கில் அவர்கள் காத்திருக்க நேரிட்டது. அப்போது ஒரு சிறுவன் கையில் ஒரு கம்புடன் மாடுகளை விரட்டிக்கொண்டிருந்தான்.

‘’ தம்பி நீ பள்ளிகொடம் போவலியா...ஓங்க ஊர்லதான் சர்க்கார் பள்ளிக்கொடம் தொறந்திருக்காங்களே ‘’

அவன் தோளைப்பிடித்து அன்பாக வினவுகிறார் காமராஜ்.

‘’ நான் பள்ளிக்கொடம் போனா சோத்துக்கு என்னய்யா பண்ணுவன் ரெண்டு மாடுமேச்சா ஒருவேள சோறாவது கெடைக்கும். ‘’

என்றவாறே மெல்ல நகர்கிறான் அந்தச் சிறுவன்.

காமராஜரின் முகம் மாறுகிறது.

‘’ அவன் சொல்றதும் ஞாயந்தாண்ணே.... இந்தப் பிள்ளைகளுக்கு ஒருவேளை சோறுபோட்டா எப்படியும் படிப்போட ருசியை காட்டிடலாம். வெங்கட்ராமன் அதுக்கு ஒரு திட்டம் வேணுமிண்ணே. ‘’

வெங்கட்ராமன் மெல்லிதாகப் புன்னகைக்கிறார். முதலமைச்சரின்இந்தச் சிந்தனை எத்தனை சிறுபிள்ளைத்தனமானது என்று அவர் கருதியிருக்கக்கூடும். சென்னை ஆயிரம்விளக்குப் பகுதியில் இதுபோன்றதொரு திட்டம் நீதிக்கட்சிகாலத்தில் தொடங்கி நடத்தப்பட்டது அவர் நினைவுக்கு வந்தது

ஆனால் தமிழ்நாடு முழுதுமா..

அவருக்குச் சாத்தியம் என்று தோன்றவில்லை.

‘’ ஸ்டேட் முழுதுமா .நாட் பாசிபிள் சார். சட்டத்ல எடமில்ல.’’

அவசரம் அவசரமாகக் குறுக்கிட்டார் உடன்வந்த ஒர் உயரதிகாரி.

‘’ என்னண்ணே. நான் புள்ளைங்களுக்குச் சோறுபோடனுமிண்ணு சொல்றேன் .நீ சட்டம் பேசிறியே. சட்டத்த யாருபோட்டா. யாருக்காகப் போட்டீங்க. செய்யரத்துக்கான வழிய பாருண்ணேன். ’’ கண்கள் சிவக்க பொரிந்து தள்ளுகிறார் காமராஜர்.

அடுத்தச் சில வாரங்களில் ஒருசில பள்ளிகளில் அவசரம் அவசரமாகத் துவக்கப்பெற்ற மதிய உணவுத்திட்டம் மெல்லமெல்ல விரிவாக்கப் பட்டுப் தமிழகம் முழுதும் நிறைவேற்றப்படுகிறது.அடுத்தடுத்துவந்த ஆட்சிகளும் இந்தத் திட்டத்தைப் பல்வேறு வடிவங்களில் விரிவாக்கி இன்று குழந்தைகளுக்கு இன்றியமையாத சத்துணவு திட்டமென்று பள்ளிகளில் செயல்படுத்தி வருகிறது.

தமிழ்நாட்டு குழந்தைகளின் கல்விக்கு இருந்த இடையூறை உணவுப்பிரச்சனையை நீக்கி படிப்பில் ருசி காட்டியவர் காமராஜரே.

பள்ளிகளில் வெரும் ஏழு விழுக்காடாக இருந்த மாணவர் வருகை அவர் காலத்தில்தான் முப்பத்தேழு விழுக்காடாயிற்று. பள்ளிகளின் வேலைநாட்கள் நூற்றுயெண்பதிலிருந்து இருநூறாக உயர்த்தப்பட்டதும் அவருடைய காலத்தில்தான்.அனைத்து தொடக்கப்பள்ளி , உயர்நிலைப்பள்ளி ஆசிரியர்க்கு ஓய்வூதியம் கிடைக்க வழிசெய்தவர் காமராஜரே.

அவர் முதல்வரான பிறகு அரசு விருந்தினராக அயல் தேசத்திலிருந்து வந்த பெண்மணி ஒருவர் காமராஜரிடம் எழுப்பிய வினா இப்போது நினைவுக்கு வருகிறது.

‘’ மிஸ்டர் காமராஜ் நீங்க ஏன் இன்னும் திருமணம் செய்துகொள்ளவில்லை ‘’

‘’ மேடம் எங்கதேசத்தில் திருமண வயதுக்கு வந்த பெருவாரியான சகோதரிகளுகளுக்கே இன்னமும் திருமணம் ஆகாமலிருக்கு. ‘’

பெருந்தலைவரின் பதில் அந்த அம்மையார் சற்றும் எதிர்பாராதது. இந்த மண்ணின் மக்களோடு இந்தமனிதர் எத்தனை கலந்து நிற்கிறார் என்றுணர்ந்து நெகிழ்ந்து போகிறார்.

அண்ணல் காந்தியின் எளிமையை முழுமையாக கடைபிடித்தவர் காமராஜ். அதேசமயம் பண்டித நேருவின் உலகளாவிய விருப்பங்கள் இந்ததேசத்து மக்களுக்கு கிடைக்கவேண்டுமென கருதியவர் .பெருந்தலைவர். காமராஜரின் கால்த்தடங்கள் படாத சிற்றூர்கள் தமிழகத்தில் இல்லையென்றே சொல்லலாம். வெயில் புயல் மழை வெள்ளம்

வேட்டியைத் தூக்கிப்பிடித்து நடை நடை நடைதான்.

ஒவ்வொன்றையும் நேரில் ஆய்வு செய்து காரியத்தை முடித்த தலைவர் காமராஜ். அவரைப்பொறுத்தவரைச் சட்டங்கள் மக்களுக்காகவே. சட்டத்தின் வரைவுகளை வெருமனே சொல்லி அவர்களுக்குக் கிடைக்கவேண்டிய நலன்களை எவரும் தடுத்துவிடக்கூடாதென்பதில் அவர் எப்போதுமே உறுதியாக நின்றார். அவரது வாழ்வில் எல்லா தருணங்களிலும் நிகழ்ந்த நிகழ்வுகள் இதைத்தான் பரைசாற்றுகின்றன.

இன்னொருமுறை .அவருடைய சகோதரி பேரன் கனகவேல் மருத்துவக்கல்லூரி ஒன்றில் சேருவதற்குத் தாத்தாவின் பரிந்துரைக்கு வந்திருந்தார்.

‘’ கனகவேலு ! மெடிக்கல் காலேஜில சேர சர்க்கார் கமிட்டில்லாம் வெச்சிருக்கு .அத அவுங்கதாண்ணே முடிவு பண்ணணும். ஒனக்கு தகுதி இருந்தா நிச்சியம் கெடைக்கும். இல்லேண்ணா கோயமுத்தூர்ல அக்ரில சேந்துக ‘’

தங்கள் தலைவரின் இந்தப்பதில் சூழ்ந்திருந்தோர்க்குப் பெருவியப்பைத் தந்தது. இதே தலைவரின் இன்னொரு செயல் -

தஞ்சை மாவட்டத்திலோ கோவையிலோ சுற்றுப்பயணம் மேற் கொண்டபோது மருத்துவக்கல்லூரி பரிந்துரைக்கான விண்ணப்பம்ஒன்று அவர் பார்வைக்கு வருகிறது.

மருத்துவக்கல்லூரியில் சேருவதென்பது அன்று பிராமணர்களுக்கே உரியதாயிருந்த காலம்.. முன்னதாக நீதிக்கட்சி ஆட்சியில்தான் விண்ணப்பத்திலிருந்த அந்தப்பகுதி நீக்கப்பட்டதைப் படித்திருக்கிறேன்.விண்ணப்பத்தைப் புரட்டிப்பார்த்த காமராஜர் சற்றும் சிந்தனையின்றி அவனுக்கான பரிந்துரையில் கையெழுத்திட்டு கொடுக்கிறார்

இதுபற்றி வினவியபோது

‘’ கீழ பாத்தில்ல.. அவுங்கப்பன் கைநாட்டு வச்சிருக்காண்ணே. அது ஒண்ணு போதாதா ‘’

என்றவாறே நடக்கிறார் தலைவர்.

உறவுகளில் இருந்து எத்தனை விலகி மக்களை நெருங்கியவர் காமராஜ்.

தன்னுடைய நெடும் பயணத்தில் உற்றார் உறவினருக்கு ஒருபோதும் இடமில்லை என்பதில் உறுதியாயிருந்தவர். வயது முதிர்ந்த பெற்றதாயைக் கூடத் தன்னோடு இணைத்துக்கொள்ளாமல் ஒர் எளிமையான வாழ்க்கைக்குப் பழக்கியவர் காமராஜ். அரசியல் ரீதியாக காங்கிரஸ் இயக்கத்தை எதிர்த்து நின்ற திராவிட இயக்கம் காமராஜரின் தன்னலமற்ற வாழ்வை ஒருபோதும் கைநீட்டிக் குற்றம் சாட்டியதில்லை.கடைசி வரையிலும் அவரை மறந்ததுமில்லை.

தொண்ணூறு வயதிலும் பச்சைத்தமிழன் காமராசருக்காக தமிழகத்தின் தெருத்தெருவாக அலைந்தவர் தந்தை பெரியார். தந்தை பெரியார் செய்ய நினைத்ததை செய்துமுடித்தவர் தலைவர் காமராஜர்.

முதன்முதலாக சென்னை மாநகராட்சியை திமுக கைப்பற்றிய போது காங்கிரஸ் தலைவர் காமராஜருக்கு அண்ணாசாலையில் வெண்கலச்சிலை எழுப்பி திமுக கொண்டாடியது நினைவுக்கு வருகிறது. காமராஜரை அரசியல் ரீதியாக கடுமையாக விமர்சித்தாலும் அவர் வாழ்ந்தபோதும் மறைந்தபோதும் அவரை போற்றிக் கொண்டாடியது கலைஞர் அரசுதான்.

தமிழர்தம் கம்பீரத்துக்கு அடையாளமாக திகழ்ந்த காமராஜரின் கடைசிக்காலம் அத்தனை சுவாரஸ்யமாக இல்லை. கப்பலோட்டிய தமிழன் வா உ சியின் கடைசி நாட்கள்தாம் என் நினைவுக்கு வருகிறது.

பத்தாண்டுகளுக்குக்குமேலாக காங்கிரஸ்கட்சிக்கு தலைவரகவும் பன்னிரண்டு ஆண்டுகளுக்கு குறையாமல் தமிழ்நாட்டுக்கு முதலமைச்சராகவும் இருந்த காமராஜ் உயிர் பிரிந்தபோது அவர் கையில் இருந்ததென்னவோ நூற்று அறுபது ரூபாய்தானாம். அசையும் சொத்துக்களையோ அசையா சொத்துக்களையோ எதனையும் அவர் விட்டுச்செல்லவில்லை. தனக்கென நேரடியான எந்த உறவுகளையும் அவர் ஏற்படுத்திக்கொள்ளவில்லை. நம்புங்கள்.

இப்படியொரு தன்னலமற்ற அரசியல் தலைவர் இனி காண்பதர்க்குகிடைப்பாரா. அரசியல்வாதிக்கான அர்த்தம் அவரோடு போய்விட்டதாகவே கருதுகிறேன்.

காந்திக்கப்பறம் காமராஜ் என்றுதானே இன்னமும் தமிழ்நாட்டில் சொல்லிக்கொண்டிருக்கிறார்கள்.

---------------------------------------------------------------------------------------

தமிழருவி மணியன் தேர்ந்தெடுத்து வல்லமை இணைய இதழில் பிரசுரிக்கப்பெற்றது.

2018-02-02T18:00:00.000+05:30

மென்மைக்கு ஒரு விருது 1

வில்லவன் கோதை

மதிப்பிற்குறிய மூத்த பத்திரிக்கையாளர் திரு மாலன் நாராயணனுக்கு இந்த ஆண்டுக்கான பாரதீய பாஷா விருது கிடைத்திருக்கிறது.

கொல்கத்தாவை மையமாக கொண்டு இயங்கும் இந்திய மொழிகள் சார்ந்த ஒரு தன்னார்வு நிறுவனம் இந்த விருதை கொடுத்து சிறப்பித்திருக்கிறது..

ஜெயகாந்தன்

அசோக மித்திரன்

பிரபஞ்சன்

சிவசங்கரி

இந்திரா பார்த்த சாரதி

வைரமுத்து

என்ற இலக்கிய ஜாம்பவான்கள் வரிசையில் திரு மாலனும் இணைகிறார்.

ஏறதாழ நாற்பது ஆண்டுகளுக்கு மேலாக அரசியல் இலக்கியம் பத்திரிக்கை ஊடகம் சார்ந்த பல்வேறு துறைகளில் தொய்வின்றி இயங்கிவருபவர்

திரு மாலன்.

இருபதுக்கு மேற்பட்ட மெல்லிய உணர்வுகள் சார்ந்த நூல்களை எழுதியவர். தொலைகாட்சி ஊடகங்களிலும் அவர் தொடர்ந்து இயங்குபவர். சாகித்ய அகாதமி போன்ற மொழிகள் சார்ந்த பல்வேறு அமைப்புகளிலும் அவருடைய ஆளுமை இடம்பெற்றிருந்தது.. அவருடைய அரசியல் கருத்துகளில் மாறுபட்ட எண்ணங்களை கொண்டிருந்தாலும் நெடுங்காலமாக திரு மாலனை நேசிப்பவன் நான் .நிதானமான வன்மமற்ற அவருடைய சொற்களே இதற்கு தலையாய காரணமாக இருக்கக் கூடுமென்று கருதுகிறேன்.அவர் நெடுநாட்கள் நோயற்று வாழ நெஞ்சம் நிறைய வாழ்த்துகிறேன்.

கொஞ்சம் தேனீர் !

2017-03-07T20:36:00.001+05:30

வில்லவன்கோதை

தேனீர் தயாரிக்கும்போது தேயிலையை குறித்த நேரத்துக்கு மேல் கொதிநிலைக்கு தள்ளக்கூடாதென்பதை காலம் காலமாக நம்பிக்கொண்டிருப்பவன் நான்..தூளின் நிறம் இறங்கிய பின்னும் கலவையை கொதிக்கவைப்பது நிக்கோட்டின் என்ற ஒவ்வாமைக்கு வழிவகுப்பதாகும். இன்று பெரும்பாலான தேனீர்கடைகளில் தேயிலையையும் பாலும் ஒன்றாக கொதித்துக்கொண்டேதான் இருக்கிறது. வீடுகளில்கூட இப்போதெல்லாம் இந்த முறையையே கையாளுகிறார்கள்.தயாரிப்பதர்க்கு எளிதாகவும் தேனீரின் தன்மை கனமானதாகவும் இருப்பது ஒரு காரணமாக இருக்கக்கூடும் .

தொள்ளாயிரத்து ஐம்பத்தெட்டில் முதன்முதலாக சென்னைக்கு வந்தபோதுதான் இந்த தேனீரின் ருசி எனக்கு கிட்டிற்று. இதற்கு முன் நான் பிறந்து வளர்ந்த தஞ்சை மாவட்டத்தைச்சேர்ந்த ஆலத்தம்பாடியிலும் திருத்துப்பூண்டியிலும் கூட தேனீர்கடைகள் இருந்தன.அப்போதெல்லாம் இந்த ருசியை அறிவதற்கான வாய்ப்பே எனக்கு ஏற்பட்டதில்லை .தேனீர்குடிப்பவர்கள் காலிகள் என்றும் கயவாளிகள் என்றும் எனக்கு போதித்திருந்தார்கள்.கிராமங்களில் இரட்டை குவளை முறை இருந்தாலும் தேனீர்கடைகள் கள்ளுகடைகளைப்போல ஊருக்கு வெளியேதான் இருந்தது அங்கே தேனீர் குடிப்பவர்கள் அனைவருமே தலித் இனத்தைச் சார்ந்தவர்களாகவும் தாழ்தப்பட்ட வகுப்புக்குரியவர்களாகவுமே இருந்தார்கள்.

பெரும்பாலும் தேனீர் குடிப்பவர்கள் உழைப்பாளிகளாக இருந்தார்கள் என்பதை சென்னைக்கு வந்த பிறகே உணர்ந்தேன்

சென்னையில் ஆங்காங்கே விதம்விதமான தேனீர்கடைகள். தேனாம்பேட்டை எல்டாமஸ் – அண்ணா சாலை முனையிலிருந்த அன்னாளைய ஹோட்டல் ஏஷியாவில் கிடைத்த தேனீர் இன்றும் நினைவில் நிற்கிறது. சென்னை நகரில் இரானி என்ற பெயரில் இயங்கிய சின்னசின்ன வட இந்திய கடைகளில் கிடைக்கும் தேனீரும் குட்டி சமோசாவும் மறக்க முடியாதவை.சாலையோரக்கடைகளில் காச்சிய வெறும் பாலில் துளி நிறம் கலந்து கொடுக்கப்பட்ட தேனீருக்கு சைனா டீ என்று சொன்னார்கள்.

அந்த இரண்டு வருடங்களில்

தேனீரின் சுவை முழுமையாக அறியப்பட்டுவிட்டாலும் மீண்டும் திருத்தருப்பூண்டிக்கே திரும்பிபோது தேனீர் குடித்ததாக நினைவில்லை.

பின்நாளில் மின்வாரியப் பணியிலிருந்த போது ஒருநாளைக்கு ஆறு ஏழுமுறைகள் எனக்கு தேனீர் தேவைப்பட்டது .எளிதாக கிடைக்காத இடங்களில் தேனீரை தவிர்த்ததும் உண்டு. இந்த எண்ணிக்கை ஓய்வுக்குப்பிறகு மூன்றாக குறைந்ததென்னவோ உண்மை. உடல் ரீதியாகவும் உள ரிதியாகவும் ஏற்படுகிற சிந்தனைகள் குறைந்து போனதே இதர்க்கான காரணமாக இருக்கக்கூடும்.

இப்போது நான் வசிக்கும் இந்த சென்னை புறநகரில் இரண்டரொரு கடைகளில் மட்டுமே நான் விரும்பியபடி தேனீர் கிடைக்கிறது. மற்ற கடைகளில் எல்லாம் ஒரே கலவைதான்.

மறைமலைநகர் பேரூந்து நிறுத்தத்துக்கு இணையான சர்வீஸ சாலையில் இயங்கிவரும் அய்யன் தேனீர்கடை என்னுடைய இப்போதைய தேர்வு.

நல் வாழ்த்துக்கள் !

2017-01-13T22:06:00.000+05:30

காலம் வைத்த முற்றுப் புள்ளி .

தை முதன் நாளை தமிழர்தம் புத்தாண்டின் தொடக்கமாகவும் காலம்காலமாக கொண்டாடப்படும் பொங்கல் பெரு நாளாகவும் கொண்டாடிக் களிக்கின்ற அத்தனை பேருக்கும் என் நெஞ்சார்ந்த நல் வாழ்த்துகளை தெரிவித்துக் கொள்கிறேன்.

வீடுகளில் கூட பேரிழப்புகள் நேர்ந்து விட்ட போதும் புதுப் பொங்கல் வைக்கின்ற முதன் நாளை வாழ்வில் தவிர்த்துவிடக்கூடாது என்று காலம் காலமாய் சொல்லக் கேட்டிருக்கிறேன்.

காலச்சுழற்சியில் வரிசையாக வருகிற எத்தனையோ கொண்டாட்டங்கள் நம் கைநழுவிப்போயிருக்கின்றன. தனிப்பட்ட அக வாழ்வின் நிகழ்வுகளும் அல்லது புற சம்பவங்களும் இதற்கான காரணங்களாக இருக்கக்கூடும்.

தமிழகமே என்றுமில்லாத வரட்சியின் பிடியில் இன்று சிக்கித் தவிக்கிறது. என் சொந்த மாவட்டத்தில் கொத்து கொத்தாக விவசாயத் தோழர்கள் ஒவ்வொரு நாளும் உயிரை மாய்த்துக்கொண்டு வருகிறார்கள். விவசாயத்தைத் தவிற வேறெதுவும் அறிந்திராத கடைசி தலைமுறை அடுத்தடுத்த இழப்புகளை எதிர் கொள்ளும் திறனின்றிஅதிர்வுகளிலும் தற்கொலையிலும் தங்கள் வாழ்வை முடித்துக்கொண்டிருக்கிறார்கள்.தங்களை நம்பிஇன்னும் இரண்டு மூன்று ஜீவன்கள் மிச்சமிருப்பதையும்கூட உணராத சூழல்கள் அவர்களுக்கு இருந்திருக்கிறது.

இதற்கெல்லாம் தலையாய காரணம் இயற்கை அடுத்தடுத்து ஏமாற்றி விட்டது என்பது மட்டுமல்ல.

தீதும் நன்றும் பிறர் தர வாரா…என்றுதானே என்றோ சொல்லிவிட்டு போயிருக்கிறார்கள்.

கடந்த காலங்களில் இயற்கைக் சூழல்களை நாம் எதிர் கொண்ட விதமும் , காலாகாலங்களில் நாம் மேற்கொள்ளவேண்டிய கடமைகளை நினைவிற் கொள்ளாமையும் இதற்கெல்லாம் தலையாய காரணமாக கருதுகிறேன்.

மழை கொட்டத்துவங்கிய போது குடையை தேடி அலைகின்ற நிலையும் மின்சாரம் அற்று இருள் சூழ்ந்துவிட்டபின் தீக்குச்சியை எண்ணிப்பாற்பதும் நம்முடைய இயல்புதானே.

அணையின் நீர் இருப்பு குறைந்தபோதே அதற்கான முயர்ச்சிகளை மேற்கொள்ளாத அரசு நம்முடைய அரசு . முடக்கப்பட்டு மூலையிலே எறியப்பட் தமிழர் கலாச்சாரம் சல்லிக்கட்டை மீட்டெடுக்க அதே ஜனவரியில் தீவிரம் காட்டுவதும் நம் அரசுதானே. ஜனநாயக கட்டமைப்பில் பேசித்தீர்க்கவேண்டிய எத்தனையோ ஆதார சிக்கல்களை சட்டப்படி தீர்ப்பேன் என்று வீம்பு பேசியது எத்தனை வேடிக்கை நீதிமன்றம் எழுதுகின்ற தீர்ப்புகளுக்கெல்லாம் கட்டுப்படுகிற பழக்கத்தை நாமெல்லாம் மறந்து வெகுநாளாயிற்று. இதில் சட்டப்படி என்ன கிடைக்கப்போகிறது.

எல்லாருக்கும் கல்வி கிடைத்துவிட்டால் ஜனநாயகம் தழைத்துவிடும் என்றெல்லாம் நம்பினோம். இன்னும் ஓட்டுக்கு பணம் வாங்குகிற பெருந்தன்மையை நாம் விட்டுவிடவில்லை. இதற்கேற்ற தலைவர்கள் தான் நம்மை வழிநடத்தும் வாய்ப்பை பெறுவார்கள் என்பதுதானே உண்மை.

ஜனநாயகத்தில் கூட்டங்கள்தாமே முடிவுகளை மேற்கொள்ளுகின்றன. அதை வழிமொழிந்து போவதைத்தவிற வேறு வழியில்லை.அதற்காக கிடைத்திருக்கிற ஜனநாயகத்தை விட்டு விலகிடவும் முடியாது.

இப்போதுகூட கிடைத்த ஓட்டுகளை இழந்துவிடக்கூடாதென்ற பெரு நோக்கில் சல்லிக்கட்டில் அத்தனை கட்சிகளும் ஒருசேர தமிழ் கலாச்சாரம் பேசவில்லையா…சட்டப்படி தீர்ப்பை பெறுவோம் என்றவரெல்லாம் சட்டத்தை தாண்டப்போவதாக சத்தியம் செய்யவில்லையா.

தீராத முடிவுகள் என்று எதுவுமில்லை.. காலம் பொறுமையிழக்கும்போது கண்டிப்பாக எதற்கும் ஒரு முற்றுப்புள்ளி வைக்கத்தவறுவதே இல்லை.

இந்த டிசம்பரில் அப்படித்தான் ஒரு முற்றுபுள்ளி அழுத்தமாக வைக்கப்பட்டிருக்கிறது.

பொறுத்திருப்போம்.

வாழ்த்துக்களும் வணக்கங்களும்.

வில்லவன்கோதை

13 ஜனவரி 2017.

மரங்களோடு ஒரு மல்யுத்தம் !

2016-12-25T22:16:00.000+05:30

( சென்னை புற நகரொன்றில் வார்த்தின் ஜல்லிக்கட்டு

வில்லவன்கோதை

கடந்த டிசம்பர் பன்னிரண்டாம் தேதி காலை எட்டு மணியளவில் நூங்கம்பாக்கம் தனியார் மருத்துவமனை ஒன்றிற்கு மருத்துவ ஆய்வுக்காக போகவேண்டியிருந்தது. அதற்கான முன் பதிவும் இணையத்தில் செய்திருந்தேன். அதற்கு முந்தய நாட்களில் அனேகமாக வரப்போகிற வார்த் புயலை அடையாளம் காட்டி வானிலை ஆய்வு மையம் தொடர்ந்து எச்சரிக்கைகள் விடுத்து வந்தது. ஒருவகையில் வானிலை ஆய்வு மையம் மிரட்டி வந்தது என்று கூட சொல்லலாம்.

இரண்டு நாட்களுக்கு முன்னால் ஆந்திரத்தை நோக்கி அவசரமாக விரைந்து சென்றதாக சொல்லப்பட்ட வார்த் புயல் என்ன காரணத்தாலோ பின்னோக்கி நகர்ந்து டிசம்பர் பன்னிரண்டாம் ஆம் தேதி காலை சென்னையைத் தாக்கக்கூடுமென்று குறிப்பான அறிப்புகள் அடுத்தடுத்து வரத்துவங்கிற்று. இது மாதிரியான சமயங்களில் வழக்கமாக உறக்கத்தில் இருக்கும் நம் மாநில அரசுகூட இந்த வார்த் புயலை எதிர்கொள்ள காத்திருந்ததாக கேள்வியுற்றேன். இந்த வருட ஆற்காடு பஞ்சாங்கத்தில் கூட இப்படியொரு இயற்கைச் சீற்றத்திற்கான அறிகுறியை முன்னதாகவே கணித்திருந்தார்கள் என்றெல்லாம் ஒருசிலர் சொல்லிக் கொண்டிருந்ததையும் அறிந்திருந்தேன். இருந்தபோதும் இதையெல்லாம் நான் பெரிதாகக் கொள்ளவில்லை. எப்போதுமே எதிலும் மெய்ப்பொருள் காண்கின்ற ஜாதியைச் சேர்ந்தவன் நான்.

பெரும்பாலான நாட்களில் சென்னை நகரெங்கும் மழை கொட்டோ கொட்டென்று கொட்டிய போதும் இந்த புறநகர் பகுதிகளில் சுள்ளென்று வெயிலெரித்ததை நான் பார்த்திருக்கிறேன். அது மட்டுமல்லாமல் சமீபத்தில் வரப்போகிறது , இதோ வந்துவிட்டது என்றெல்லாம் வானிலை வல்லுனர்களால் கூர்ந்து நோக்கப்பெற்ற நடா புயல் கடைசியில் வராமலேயே வலுவிழந்து போனதையும் பார்த்திருந்தேன்.

நாளை காலையில் மழையும் காற்றும் இயல்பாக இருந்தால் திட்டமிட்டபடி நூங்கம்பாக்கம் போகலாம்... பேரன் கவினையும் இரண்டு கிலோமீட்டருக்கு அப்பாலிருக்கும் பள்ளிக்கு தைரியமாக அனுப்பிவைக்கலாம். ஒருவேளை வானிலை ஆய்வு மையம் சொன்னதுபோல காற்றழுத்த தாழ்வு மண்டலம் தகறாறு எதற்கும் முற்பட்டால் பிறகு பார்த்துக்கொள்ளலாம் என்ற முடிவுடன் படுக்கைக்கு போனேன்.

மறுநாள் காலை பொழுது விடிந்தபோதும் பெரிதாக பேசப்பட்ட விருந்தாளி வார்த்தின் வருகைக்கான எந்த அறிகுறியும் இந்த புறநகரில் தென்பட்டு வில்லை.அதேசமயம் சென்னை நகரின் பல பகுதிகளில் பலத்த சூரைக்காற்றுடன் பெருமழை பொழிவதாக தொலைக்காட்சி செய்திகள் தெரிவித்துக்கொண்டிருந்தன.

மணி பதினொன்றாயிற்று.

வார்த்தின் வருகைக்கான அறிகுறிகள் ஏதாவது தென்படுகிறதா என்று அறிய வாசலுக்கு வந்து ஆகாயத்தை ஆராய்த்தபோது எங்கிருந்தோ இரண்டு தண்ணீர்த்துளிகள் முகத்தில் விழுந்து சிதறியது. இதுவரை பளிச்சென்றிருந்த வானம் மெல்ல மெல்ல நிறம் மாறி மங்கத்தொடங்கிற்று. மண்ணின் மணத்தோடு மெலிய காற்றும் முகத்தில் படர்ந்தது. அடுத்த ஒரு மணிநேரத்தில் உடல் முழுதும் எதிர்பாராத குளுமை பரவியதையை உணர்ந்தேன்.

பகல் மணி பன்னிரண்டைத் தாண்டிற்று. இங்கொன்றும் அங்கொன்றுமாக சிதறிய மழைத்துளிகள் மாறி இப்போது பரவலாக பூமழை பொழியத்துவங்கிற்று நிச்சயமாக இது வார்த்தின் வருகைக்கான முன்னறிவிப்புதான் என்று என் உள் மனது உணர்ந்தது. இருந்தாலும் ஒரு வீரியமான புயலுக்கு இங்கே சாத்தியமில்லை என்றே நான் எண்ணினேன்.

இதற்கிடையே மாலை மூன்று மணியளவில் சென்னை நகரை சின்னாபின்னமாக்கி வார்த் புயல் ஒரு வழியாக கரையை கடந்து விட்டதாக தொலைக்காட்சி செய்திச்சானல்கள் தெரிவித்தன. அதனுடைய தாக்கம் அடுத்த சிலமணிகளில் காஞ்சிபுரம் திருவள்ளூர் மாவட்டங்களில் கடுமையாக எதிரொலிக்கக் கூடுமென்ற கூடுதல் எச்சரிக்கையும் தரப்பட்டது.

நேரம் செல்லச்செல்ல பூமழை பேய் மழையாக மாறி சூரைக்காற்றுடன் சேர்ந்து கொண்டது. வீதியெங்கும் ஒரு ஓரமாக ஒதுங்கி நின்றிருந்த பசுமையான மரங்கள் காற்றின் தீவிரத்துக்கு ஈடு கொடுத்து நின்றன. வீட்டிற்கு எதிர் திசையில் உயர்ந்து நின்றிருந்த ஒற்றைத் தென்னைமரம் சூரைக்காற்றின் வேகத்துக்கு ஏற்ப தலை விரித்தாடிற்று.

காங்ரீட் வீதிகளில் மழைநீர் நிரம்பி வீடுகளின் வாயிற்படிகளில் ஏறத்துவங்கின. மணி அய்ந்தைத் தொட்டபோது வீட்டையொட்டிய தெற்குவீதியிலிருந்த லேத் ஷாப் செல்வம் கதவைத்தட்டினார்.

‘’ மரம் ரொம்ப ஆடுது . என்னேரமும் வீட்டின் மேல் சாயலாம் கொஞ்சம் கவனமா இருங்க..’’

மழை நீர் சொட்ட சொட்ட குடையுடன் நின்றிருந்த செல்வம் நினைவூட்டினார்.

சற்றும் எதிர்பாராத பேரதிர்ச்சி எங்கள் முகங்களை தொற்றிக்கொண்டது.. அப்போதுதான் வீட்டின் வலதுபுறம் சுவற்றையொட்டி உயர்ந்து ஒய்யாரமாய் நின்றிருந்த அந்த பெரும்மரத்தை பார்த்தோம். இரண்டடி அகலமும் தொண்ணூரடி உயரமும் கொண்ட அந்த மரம் பரவலாக கிளைபரப்பி அந்த நாற்சந்திக்கே குடைபிடித்து நின்றது. ஏறதாழ நாற்பது வருஷத்துக்கு மேலாக எத்தனையோ பெரும் புயல்களுக் கெல்லாம் ஈடு கொடுத்து கம்பீரமாக நின்றிருந்த அந்த பெரும் மரம் இந்த வார்துக்கு பதில் சொல்ல முடியாமல் கிழக்கும் மேற்குமாக அசைந்து கொண்டிருந்தது. எந்த நேரத்திலும் அது எங்கள் கட்டிடத்தின் மேல் சாயக்கூடும் என்று எண்ணியபோது விட்டிலிருந்த ஒவ்வொருவரையும் பீதி கைப்பற்றிக்கொண்டது. வீட்டின் முதல் தளத்தில் குழத்தை சித்தார்த்துடன் ஒரு இளம் குடும்பம் வாடகைக்கு இருந்தது. இரண்டாவது தளத்தில் இருந்த இன்னொருகுடும்பம் அதிர்ஷ்ட்டவசமாக சமீபத்தில்தான் காலி செய்திருந்தது. வாயிலை ஒட்டியிருந்த ஒரு கண்ணாடிக்கதவை லேசாக திறந்து மரத்தின் அசைவுகளை உன்னிப்பாக கண்காணிக்க ஆரம்பித்தேன்.

நேரம் செல்லச்செல்ல காற்றின் பேயாட்டம் குறைந்தபாடில்லை. மேற்தளங்களின் கண்ணாடிக்கதவுகள் காற்றின் விருப்பத்திற்கேற்ப படார் படார் என்று மோதி பேரொலி எழுப்பின.

மணி ஆறைக்கடந்தபோது சாலையின் எதிர் திசையில் நின்றிருந்த ஒதிய மரம் ஒன்று எதிர்பாராத பேரிரைச்சலோடு தெருவின் குறுக்கே சாய்ந்தது

அடுத்த அரை மணிநேரத்தில் வீட்டை ஒட்டி ஆடிக்கொண்டிருந்த வானளாவியமரமும் தன் பிடிமானத்தை இழந்து ஹோ வென்ற பெருஞ் சத்தத்தோடு கிழக்கே சாய்ந்த போது , எங்கள் அடுக்கு மாடிக்கட்டிடம் அப்படியே தாங்கிக்கொண்டது. மண்ணுக்கு அடியே பரவிக்கிடந்த அதனுடைய பரந்த வேர்கள் முழுவதும் வெளிப்பட்டு தன் இயலாமையை காட்டிற்று. ஒருவழியாக முடிவுக்கு வந்த ஒரு பெருந்தோல்வியை கண்ணெதிரே கண்டபிறகு சற்று பயந்தெளிந்து படுக்கைக்கு போனோம்.

முழுமையான உறக்கம் எளிதாகவில்லை.ஏதேதோ சிந்தனைகள் நினைவைக்கிளற கண்விழித்தபோது மணி நான்காயிருந்தது. வார்த் புயல் தன் ஆட்டத்தை முடித்துக்கொண்டு மேற்கே நகர்ந்திருக்க வேண்டும்.

வாயிலுக்கு வந்து வானத்தை நிமிர்ந்து பாத்தேன். இந்த நகரில் அடர்ந்த மரங்களிடையே ஆகாயம் எப்போதுமே கண்களுக்கு சாத்தியப்பட்டதில்லை.ஆனால் இன்று வானம் வெட்ட வெளியாய் கண்களுக்கு பட்டது. அளவில் மிகப் பெரிதான வழக்கத்தைவிட மிகப்பிரகாசமான முழு நிலவு மேல் திசையில் காணப்பட்டது. மரங்கள் வரிசை வரிசையாக கோலோச்சிய இந்த மறைமலை நகரியம் மொட்டை கோபுரங்களின் பெரு நிழல்களாக காட்சி தந்தது. எதை எதையோ தனிப்பட்ட முறையில் இழந்துவிட்டதைப்போன்ற உணர்வுடன் படுக்கையில் புறண்டேன்.

மீண்டும் கண்விழித்தபோது பொழுது புலர்ந்திருந்தது.

வாயிலுக்கு வந்தேன்

‘’ என்ன தாத்தா ஒரே பாரஸ்ட் மாறி இருக்குது.’’

என்னைத்தொடர்ந்து ஓடிவந்த பேரன் கவின் என்னைப்பற்றிக்கொண்டான்.அடர்ந்த பெருங்காடுகளை அவன் சுட்டி டிவியில்தான் பார்த்திருக்க வேண்டும்.

வீட்டுக்கு தென்மேற்கே நின்றிருந்த வான்முட்டும் மரமும் சரியாக கிழக்கு பக்கம் வாழ்ந்திருந்த இன்னொரு மரமும் வார்த் புயலிடம் தங்கள் தோல்வியை ஒப்புக்கொண்டிருந்தன.அந்த இரு மரங்களும் வீதியின் இரு புறமும் கால்வைத்து இறங்குதற்கு கூட இடமின்றி பரந்த கிளைகளை பரப்பி சடலமாக கிடந்தன. எதிர் வரிசையில் இருந்த வணிக நிறுவனங்கள் எதுவும் எளிதாக கண்களுக்கு புலப்படவில்லை. குறுக்கும் நெடுக்குமாக தாறுமாறக கிடந்த அந்த பெருங்கிளைகளுக்கிடையே புகுந்து புகுந்து போன ஒருசில இளைஞர்களையும் சிறுவர்களையும் பார்த்தேன். நகரின் பல்வேறு சாலைகளிலும் இதே நிலைதான் என்பது அவர்களது உரையடல்கள் உணர்த்திற்று.

ஊரே வாய்மூடி அமைதியில் உரைந்திருந்தது. பெரும்பாலான மின்கம்பங்கள் முறிந்து அலுமினிய கம்பிகள் விழுந்துகிடந்த மரக்கிளைகளுக்கு பாதுகாப்பாக இறுகிக்யிருந்தன. தெரு திருப்பத்தில் உயரத்தில் உட்கார்ந்திருந்த உயர் அழுத்த மின்மாற்றி ஒன்று தலைகுப்ற சிதறிக்கிடந்தது.அடுக்கு மாடிகளின் உயரத்திலிருந்த தண்ணீர்த்தொட்டிகளின் காங்ரீட் மூடிகள் வீதிகளோரத்தில் வீசப்பட்டிருந்தன.

கடைவீதிகளில் வணிக விளம்பர தட்டிகள் தூக்கி வீசப்பட்டு எங்கெங்கோ உயரத்தில் தொங்கிக்கொண்டிருந்தன. விடாது மூன்று மணி நேரத்துக்கு மேலாக தொடர்ந்து சுழற்றியடித்த சூறாவளி இந்த எழில் நகரத்தை சின்னா பின்னமாக்கியிருந்ததைப் பார்த்தேன்.

மணி ஒன்பதை எட்டியபோது வலது பக்கத்து வீதியைச்சேர்ந்த ஓய்வு பெற்ற அரசு மருந்தாளுனர் ஸ்டான்லி ராமச்சந்ரன் ,தெரு இளைஞர்களைத் திரட்டி வாகனங்கள் வந்து போவதற்கான வழியை முதன்முதலாக ஏற்படுத்தினார். அதனைத்தொடர்ந்து செய்வதறியாத நின்றிருந்த வேறு பல இளைஞர்களும் நடுத்தர வயதினரும் தங்களை இணைத்துக்கொண்டனர். துண்டுதுண்டாக வெட்டப்பட்ட கிளைகள் ஓரங்களில் ஒதுங்கின. பிறகுதான் இந்த நான்கு முனை சந்திப்பில் மெல்ல மெல்ல வாகனங்கள் ஊடுருவ முற்பட்டன.

அதற்கு பிறகே அரசு ஊழியர்கள் முன்னாள் நகரத்துணைத்தலைவர் திரு ஜெ சண்முகம் தலைமையில் களத்துக்கு வந்தனர் அடுத்த நாள் ஈரோடு நகரிலிருந்து பத்துக்கு மேற்பட்ட நகராட்சி ஊழியர்கள் குழுவாக ஒரு வாகனத்தில் வந்திறங்கினர். நாகப்பட்டணத்தில் இருந்தும் மயிலாடுதுறையிலிருந்தும் மின்வாரிய ஊழியர்கள் வந்திருந்தனர்

.சர்…சர்ர்ர் என்று மரக்கிளைகள் வெட்டப்படும் சப்தமும் படார் என்று பெருங்கிளைகள் துண்டாக முறிந்து விழும் ஓலமும் அன்று இருட்டும் வரை கேட்க முடிந்தது.மஞ்சள் வண்ணம் பூசிய ஜேபிசி எந்திரங்கள் மட் படக் என்ற ஒலிகளை எழுப்பிக்கொண்டு இங்குமங்கும் சரிந்துபோன மரங்களோடு போராடிக்கொண்டிருந்தது. அறுக்கப்பட்ட மரத்துண்டுகளையும் நெடிய மின்கம்பங்களையும் எங்கிருந்தோ வந்த க்ரேன்கள் இங்கும் அங்கும் சுமந்து திரிந்தன இரும்புக்குதிரைகளாக வர்ணிக்கப்பெறும் லாறிகள் மரத்துண்டுகளையும் பெருங்கிளைகளையும் அள்ளி அள்ளி எங்கோ கொண்டுபோய் கொட்டின.இத்தனை பெரிய பட்டாளம் கைவசம் இருந்தபோதும் இந்த நகரியம் இயல்புக்கு வர ஒரு வாரத்துக்கு மேலாயிற்று. ஏறதாழ ஏழு நாட்களுக்குப்பிறகே மின் இணைப்பும் தொலைபேசி இணைப்புகளும் தரப்பட்டன. இடையிடையே லாரிகளில் நிரப்பப்பட்ட குடிநீர் தெருவுக்கு தெரு வழங்கியதை மறக்க முடியாது.

இந்த வார்த் புயலைப்பொறுத்தவரை இங்கு உயிச்சேதம் என்று எதுவும் ஏற்பட்டு விடவில்லை.மக்கள் பெரும்பாலும் பாதுகாப்பாகவே இருந்திருக்கிறார்கள் வீதிகளில் திரியும் விலங்கினங்கள் எங்கெங்கோ தஞ்சமடைந்து தங்களை காத்துக் கொண்டிருக்கின்றன. மண்ணிற்கும் மனிதற்கும் இன்னும் எத்தனையோ உயிரினங்களுக்கும் அரனாக நின்றிருந்த வகைவகையான மரங்கள்தாம் தங்கள் பிடிமானத்தை இழந்து வீதியில் சரிந்திருக்கின்றன. மின் கம்பங்களும் மின்மாற்றிகளும் கடுமையாக தாக்கப்பட்டபோது மக்களின் இயல்பு வாழ்க்கை பெரிதும் கேள்விக்குறியாகிற்று. இந்த நகரிலிருந்த ஏராளமான பறவைகள் தங்கள இருப்பிடத்தை இழந்து தடுமாறிய காட்சி கொடூரமானது.

மரங்களின் வீழ்ச்சியைப்பற்றி பேசும்போது பல்வேறு கருத்துக்கள் வைக்கப்படுகின்றன. பாரம்பரிய மரங்களைத்தவிர்த்து மாற்று மரங்களை தெரிவு செய்ததுதான் இந்த பேரழிவுக்கு காரணம் என்று சொல்லப்பட்டது.பாரம்பரிய மரங்களைப் போன்ற ஆழமான ஆணி வேர்களை இத்தகைய மரங்கள் பெற்றிருக்காவிட்டாலும் வேறு பல சிறப்புகள் இந்த மரங்களுக்கு இருப்பதாகவே நினைக்கிறேன். பாரம்பரிய மரங்களைக்காட்டிலும் எளிதாகவும் விரைவாகவும் வளரக்கூடியவை இந்த மரங்கள்.சாலையோரங்களிலும் குறுகிய வீதிகளிலும் எழிலான தோற்றத்துடன் நிற்ககூடியவை. பெரும்பாலும் குறுகிய தெருக்களில் இவற்றுக்கு எந்தவொரு ஆபத்தும் நேர்ந்து விடுவதில்லை.இந்த சூரைக்காற்றுக்கு பலியான பெரும்பாலான மரங்கள் நாற்பத்தைந்து ஆண்டுகளுக்கு மேலானவை என்பதை பார்க்கவேண்டும்

இந்த பெருந்துயர் நிகழ்ந்தபோது அரசியல் கட்சிகளின் மக்கள் பிரதிநிதிகள் யாரும் பதவிகளில் இல்லை. இருந்தபோதும் இந்த துயர் துடைப்பு பணிகளில் அவர்களின் பங்கு மகத்தானது.

இந்த பகுதியை பொறுத்தவரை குறிப்பாக முன்னாள் நகர்மன்ற துணைத்தலைவர் பதவியிலிருந்த திரு ஜெ சண்முகத்தின் செயல்பாடுகள் போற்றத்தக்கவை.வார்த் புயல் கரைகடந்த நேரத்திலிருந்து ஒவ்வொரு நாளும் காலையிலிருந்து இரவு வரை அவர் ஆற்றிய களப்பணி அவர் சார்ந்திருந்த இயக்கம் கர்வம் கொள்ளத்தக்கது. அவருடைய அற்புதமான களப்பணியை இரண்டாம் முறையாக கண்கூடாக பார்த்தேன். இதற்கு முன்னால் அவரால் இங்கே அமைக்கப்பெற்ற நேர்த்தியான காங்ரீட் சாலைகள் குறிப்பிடத்தக்கது. பிற மாவட்டங்களில் இருந்து வந்த அரசு ஊழியர்களை ஒருங்கிணைத்து இந்த நகரியத்தை இயல்பு நிலைக்கு கொண்டுவந்த அவருடைய களப்பணி போற்றுதற்குறியது.

ஆளும் கட்சியைச்சேர்ந்தவர்களும் இந்த மீட்புப்பணிகளில் தங்களை இணைத்துக் கொண்டிருந்தது மகிழ்வான செய்தி.அதே சமயம் வீதிவீதியாய் வந்து வெற்றி பெற்ற இந்த தொகுதியின் சட்டமன்ற பிரதிநிதியை இந்த இக்கட்டான தருணத்தில் காணமுடியாமற் போனது துரதிஷ்டம்.

மக்கள் பணியில் பதவி என்பது நாம் மேலணிகின்ற துண்டுக்கு சமமானது. அதே சமயம் நாம் ஏற்றிருக்கிற சமுதாயப்பணியோ இடுப்பில் இறுயிருக்கும் வேட்டிக்கு நிகரானது. என்று பேற்றிஞர் அண்ணா சொல்லுவார்.

பதவியற்ற போதும் சில கழகக்கண்மணிகள் இப்போது ஆற்றியிருக்கிற பணிக்கு தலைதாழ்த்த விரும்புகிறேன்.
- 25 12 2017

தாத்தா பாட்டிகளை கொண்டாடிய தனியார் பள்ளி !

2016-10-23T12:18:00.004+05:30

வில்லவன் கோதை

“ வர்ற பிரைடே நீங்களும் உமாம்மாவும் கண்டிப்பா மீட்ங்குக்கு வரணுமுண்ணு மேம் சொல்லிட்டாங்க. ஷேவ் பண்ணிட்டு அழகா ரெடியாவுங்க. “

என்னுடைய நான்குவயது நிரம்பப்பெறாத பெயரன் கவின் இரண்டு மூன்று நாட்களாக தொடர்ந்து நினைவூட்டிக்கொண்டிருந்தான்.

எனக்குத்தெரிந்து பெரும்பாலான தனியார் பள்ளிகளில் மாதத்திற்கொருமுறை பெற்றோர்களை எல்லாம் அழைத்து தங்கள் இயலாமையை குழந்தைகள் மீது பெரும் குறையாக பேசுவதைக் கேட்டிருக்கிறேன்.

ஏறதாழ வாழ்வின் விளிம்பு நிலைக்கே நகர்ந்து விட்ட எங்களை ஏன் இவர்கள் அழைக்கிறார்கள் என்ற இயல்பான எண்ணம்தான் எனக்குள்ளும் ஏற்பட்டது. வயது முதிர்ந்தவர்க்கு இப்போதெல்லாம் எல்லாரும் உபதேசிப்பதைப்போல

இருப்பதை அப்படியே ஏற்றுக்கொள்ளுங்கள்.

என்ற ரீதியில் அமைதியான வாழ்வுக்கு ஏதாவது ஆலோசனை சொல்லப்போகிறார்களோ என்னவோ.

இப்படித்தான் நான் எண்ணிப்பார்த்தேன்..

ஒருவழியாக பெயரன் கவின் குறிப்பிட்ட அந்த வெள்ளிக்கிழமையும் ( 21 அக்டோ 2016 ) வந்தது. குழந்தையின் கட்டளையை தவிர்க்க மனமின்றி சர்வ லட்சணமாக காலை எட்டரை மணிக்கே சிங்கப்பெருமாள் கோயில் மகேந்ரா நகரியத்துக்கு பயணமானோம்.

அது மகேந்ரா உலகளாவிய கல்விக்கூடம்,

ஏறதாழ ஐந்து ஏக்கர் நிலப்பரப்பில் இரண்டாயிரத்து ஏழில் எல்கேஜி வகுப்புடன் துவக்கப் பெற்று இருந்த இந்த கல்விக்கூடம் இன்று பன்னிரண்டாம் வகுப்புவரை சி பி எஸ் சி பாடதிட்டத்தில் வளர்ச்சியுற்றிருக்கிறது. பச்சைப் பசேலென்ற சூழலில் இயற்கையான காற்றோட்டமும் மிகுதியான வெளிச்சமும் நிறைந்த விசாலமான வகுப்பறைகளுடன் இந்த கல்விக்கூடம் விரிந்து கிடக்கிறது. உள் , வெளி விளையாட்டுத் திடல்கள் , இருவேறு நூலகங்கள் , சோதனைக்கூடங்கள் , கணினி அறைகள் , உரையாடல் அரங்கம் என்று ஒவ்வொன்றையும் இயற்கைச் சூழலுடன் அற்புதமாக வடிவமைத்திருக்கிறார்கள்

நான்கைந்து நாட்களாக வெள்ளிக்கிழமையை நினைவூட்டிய என் பெயரன் கவின் புத்தக பையை எளிதாக முதுகில் சுமந்து வளைந்து கிடந்த நெடிய வராண்டாவை கடந்து தன் வகுப்பறையை எட்டும்வரை கண்ணிமைக்காமல் பார்த்து நின்றேன்.

இடையே குறுக்கிட்ட அன்பான வரவேற்பிற்கு பிறகு அத்தனை தாத்தா பாட்டிகளும் குளிரூட்டப்பெற்ற விசாலமான அரங்கொன்றில் அமர்ந்தோம்.

இன்று நிகழ்ந்த கலந்துரையாடலில் இனம் மொழி கடந்து ஏறதாழ நூற்று ஐம்பதுக்கு மேற்பட்ட தாத்தா பாட்டிகள் ஒருசேரக் குழுமியிருந்த காட்சி என் நினைவுகளைக் கிளறியது.

இறை வணக்கத்துடன் நிகழ்வுகள் துவங்கிற்று.

உங்களுடைய அத்தனை நினைவுகளையும் ஒருகணம் ஒதுக்கிவைத்து இன்றைக்கு இரண்டுமணி நேரம் எங்களோடு மகிழ்வாக கலந்திருங்கள்

எங்கள் எல்லாரையும் மூன்று மொழிகளில் அன்போடு வரவேற்ற பள்ளியின் முதல்வர் திருமதி நிர்மலா கிருஷ்ணன் தன்னுடைய உரையின் இறுதியில் தாத்தா பாட்டிகளிடம் இப்படியொரு வேண்டுகோளையும் வைத்தார்

அதனைத் தொடர்ந்து ஐம்பதுக்கு மேற்பட்ட பள்ளி மாணவர்கள் வழங்கிய கலை நிகழ்ச்சிகள் ஒன்றன் பின் ஒன்றாக மேடையில் அரங்கேறிற்று. ஆடல் பாடல் ஓரங்க நாடகம் என்று மும்மொழிகளில் வெளுத்து விளாசினர்.

இதிலும் ஒன்றைக் கவனிக்கவேண்டும் தமிழ் இந்தி பாடல்களில் பெரும்பாலும் ஐம்பது அறுபதின் தாக்கம்தான் இன்றைக்கும் முன் நின்றது.

எழுபத்தி நான்கு வயதை எட்டிய ஒரு பெண்மணி ( அவரும் நிகழ்வுக்கு தொடர்ந்து வரும் ஒரு பாட்டிதான் ) இடுப்பைச்சுழற்றி சுழற்றி இளமையோடு இரண்டு பாடல்களுக்கு தொடர்ச்சியாக நடனமாடியது நினைவில் நீங்காத காட்சி. பலத்த கரகோஷத்தோடு வரவேர்ப்பை பெற்றது என்பதையும் குறிப்பிடவேண்டும்.

அதனைத்தொடர்ந்து தாத்தாக்களும் பாட்டிகளும் ஒவ்வொருவராக தங்கள் நினைவுகளை ஒலிப்பெறுக்கி வாயிலாக பகிர்ந்து கொண்டனர். அவர்களில் பெரும்பாலோர் இப்படியொரு நிகழ்வு தாங்கள் எதிர்பாராதது என்பதையும் சொல்லத் தவறவில்லை

.நான்கய்ந்து ஆண்டுகளாக தொடர்ந்து நிகழ்ந்து வரும் இந்த தாத்தா பாட்டிகளின் கொண்டாட்டம் ஒவ்வொருமுறையும் அந்த பள்ளியின் வளர்ச்சியைப் போலவே விரிவடைவதை கேட்க முடிந்தது.

அதனைத் தொடர்ந்து தாத்தா பாட்டிகளை ஓடி விளையாட வைத்து இளமை நினைவுகளை புதுப்பிக்க உதவினார்கள் அந்த பள்ளியின் மாணவச்செல்வங்கள்.

மணி பதினொன்றைத் தாண்டியபோது அத்தனை பேருக்கும் இனிப்போடு உணவு வழங்கி உபசரித்தார்கள் பள்ளியின் பேரக்குழந்தைகள்.

இறுதியில் கலைநிகழ்சிகளில் தூள் கிளப்பிய மாணவச்செல்வங்கள் தரையில் விழுந்து வணங்க அத்தனை தாத்தா பாட்டிகளும் கரம் உயர்த்தி வாழ்த்திய

காட்சி நெஞ்சை நெகிழவைத்த ஒன்று.

உங்களுக்கு உடல் சார்ந்த , மனம்சார்ந்த உபாதைகள் எத்தனை இருந்தாலும் அவ்வப்போது கசப்பான மருந்துகளை உட்கொண்டாவது இந்த குழந்தைகளுக்காக இன்னும் நீங்கள் உயிர் வாழுங்கள்

உருக்கமான வேண்டுகோளுடன் விழாவை நிறைவு செய்தார் ஒர் ஆசிரியை.

எல்கேஜி பயிலும் என் பெயரன் கவின் வகுப்பு முடிவுக்கு வந்து சக குழந்தைகளோடு தொடர்வண்டியைப்போல் அணிவகுத்து அந்த நீண்ட வராண்டாவில் வந்து கொண்டிருக்கிறான் நடந்ததையெல்லாம் வரிசைப்படுத்தி நான் அவனுக்கு சொல்லவேண்டும்

நானும் என் மனைவியும் அதற்காக காத்திருக்கிறோம்.

21 10 2016

மேடையில் மலர்ந்த காதற் பொதுமறை !

2016-02-03T21:02:00.001+05:30

வில்லவன் கோதை

மேடைப்பேச்சைக் கேட்பதில் இருந்த ஆர்வம் எப்போதுமே மேடையேறுவதில் இருந்ததில்லை. அதற்கான மனநிலையையும் இதுவரை நான் ஏற்படுத்திக்கொண்டதேயில்லை. எனது கடந்து போன வாழ்க்கையில் வெறும் ஐந்தாறுமுறை பல்வேறு நிர்பந்தங்களால் மேடையேறியபோது அல்லது ஏற்றப்பட்டபோது வெறும் கடமையைச் செய்து இருக்கைக்கு வந்தவன். அந்தச் சாதுரியமான வித்தையை வசப்படுத்திக்கொள்ள முயலாதவன்.
இத்தனைக்கும் பள்ளி நாட்களில் எப்போதாவது நடந்தேறும் இலக்கியக் கூட்டங்களுக்காக ஆவலோடு காத்திருக்கும் விரல்விட்டு எண்ணக்கூடிய மாணவர்களில் நான் ஒருவன்.
ஐம்பதுகளில் இருந்து ஏறத்தாழ எழுபதுவரை மேடைப்பேச்சே வாழ்க்கையின் சுவாரஸ்யம் என்று கருதிய காலம். அப்போதெல்லாம் சென்னை நகர வீதிகளில் தினந்தோறும் அரசியல் சொற்பொழிவுகள் கனல்கக்க பொழிந்து கொண்டிருக்கும். மேடைப்பேச்சுகளின் பொற்காலம் என்று சொல்லலாம். மேடைப்பேச்சுகளில் முக்கியமாக எனது விருப்பம் திராவிட இயக்கத்தின் பகுத்தறிவு சிந்தனைகள் தாம் என்றாலும் காங்கிரஸ் கம்யூனிஸ்ட் இயக்கங்களின் பேருரைகளையும் விரும்பிக்கேட்டவன். அதுமட்டுமல்லாமல் வாழ்வியல், இலக்கியம் சார்ந்த கூட்டங்களையும் நான் விட்டு வைக்கவில்லை. பள்ளிநாட்களில் தேனாம்பேட்டை எல்டாமஸ் சாலை பாலசுப்ரமணியர் திருக்கோயிலில் நிகழ்ந்த கி வா ஜெகனாதனுடைய தொடர் சொற்பொழிவுகள் இன்றும் நினைவில் நிற்கிறது.
இவையெல்லாம் இன்று நான் பெற்றிருக்கிற விரிந்த பார்வைக்கு ஏற்பட்டுவிட்ட அடித்தளம் என்று நம்புகிறவன்.
கடந்த மாதம் ஒரு வெள்ளிக்கிழமை 22- 01- 2016 மாலை நேரத்தில் சென்னை பாம் குரோவ் நட்சத்திர விடுதியில் நேர்த்தியான குளிரூட்டப்பட்ட அரங்கொன்றில் நண்பர் காவிரி மைந்தனின் காதல்பொதுமறை என்ற நூல் வெளியிடப்பெற்றது. பல்வேறு அறிஞர் பெருமக்களும் புலம் பெயர்ந்த தமிழார்வலர்களும் திரண்டிருந்த அந்த நிகழ்வில் நானும் கலந்து கொண்டேன்.
நூல் வெளியீட்டு விழாக்களிலே ஒரு புதுமையாக காவிரிமைந்தனின் காதல்பொதுமறை வெளியிடப்பெற அதன் பெருமைபேசும் பேராசிரியை வைகைமலர் எழுதிய இரண்டு ஆய்வு நூல்களும் அந்த அரங்கத்தில் கைகோத்துக்கொண்டன.
நெடுந்தொலைவில் இருந்து வந்திருந்த தமிழார்வலர்கள் அறிஞர் பெருமக்கள் காவிரி மைந்தனையும் அவர் நூலைப்பற்றியும் தங்கள் எண்ணங்களைப் பகிர்ந்து கொண்டார்கள். பெரும்பாலான வல்லமை இணைய ஆஸ்தான எழுத்தாளர்கள் மேடையேறி தங்கள் சகாவுக்கு வாழ்த்துக்களைத் தெரிவித்துக்கொண்டார்கள். என் நண்பர் பழனிசாமிகூட மேடையேறி இயல்பாகப் பேசி இறங்கினார்.
அன்று நடந்த புத்தக வெளியீட்டு விழாவில் நானும் கலந்துகொண்டு ஒரு நூலுக்கு மதிப்புரை தரவேண்டுமென்று நண்பர் காவிரி மைந்தன் சொன்னபோது அதிர்வுற்றேன். பக்கம்பக்கமாக எழுதத்தெரிந்த எனக்குப் பத்து நிமிடம் பதற்றம் தவிர்த்துப் பேசமுடியும் என்ற நம்பிக்கையின்மைதான்.
உங்களால் முடியும் என்ற காவிரிமைந்தனின் குரலுக்கு பணிகிறேன்.
வேறுவழியின்றி பேச்சுக்கு ஆதாரமாக நிரம்பக் குறிப்புகள் கைவசம் இருந்தாலும் தொடர்ந்து பேசமுடியும் என்ற நம்பிக்கையின்மையால் பேச்சை வெகுவாக சுருக்கிக்கொண்டு இருக்கையில் அமர்ந்தேன்.
வெகு சிறப்பாக நிகழ்ந்த அந்த விழா நிறைவான நேர்த்தியான சிற்றுண்டியுடன் முடிவுக்கு வந்தது.
இன்னொன்றையும் நான் குறிப்பிடவேண்டும்.
நான் எண்ணுகிற பேசுகிற எழுதுகிற அத்தனையுமே சமூக அவலங்களை மையமிட்டே இருக்கும் அதில் காதலுக்கு என்றும் இடமளித்ததாக நினைவில்லை. காதலை மனிதவாழ்க்கையின் ஒரு அங்கமாகக் கருதுகிறேன்… அதுதான் வாழ்க்கையென்றோ அதுமட்டும்தான் இலக்கியம் என்றோ நான் கருதியதில்லை.
எப்படியோ மேடையில் மலர்ந்த நண்பர் காவிரி மைந்தனின் காதற் பொதுமறை என் நினைவுகளைக் கிளறியது

__________________________________________________

வல்லமை இணைய இதழ் நன்றி !

2016-02-01T12:08:00.003+05:30

வல்லமைக் கவிஞர்!…

பெருவை பார்த்தசாரதி

இப்பொழுதெல்லாம், எந்த ஒரு அழைப்பிதழையும் கொடுப்பதற்கும், அவ்வளவாக யாரும் நேரில் வருவதில்லை. அலைபேசியில் அழைப்பிதழின் நகல் வந்தவுடன், என்ன சார்?.. அழைப்பிதழ் வந்ததா!..கண்டிப்பாக குடும்பத்துடன் வந்துவிடுங்கள்!.. என்கிற அன்பான வேண்டுகோளுடன் முடிந்துவிடுகிறது.

இப்படித்தான், கவிஞர் ரவிச்சந்திரன் எழுதி வெளியிடும் “காதல் பொதுமறை” என்கிற நூலும், இந்த நூலை அது வெளிவருவதற்கு முன்பே ஆய்வு செய்து இரண்டு ஆய்வு நூல்களாக வெளியிடுபவர் முனைவர் வைகை மலர் அவர்களும் என்பதை அலைபேசியில் வந்த அழைப்பிதழ் மூலம் அறிந்தேன்.

“நூல் வெளியீட்டு விழா” அழைப்பிதழை பார்த்தவுடன், ஒரு மகிழ்ச்சியான விஷயம், வல்லமை மின் இதழில் எழுதிவருகின்ற பலருடைய பெயருக்கு முன்னால், “வல்லமை” என்கிற அடைமொழியோடு அச்சடிக்கப்பட்டிருந்ததோடு மட்டுமல்லாமல், அவர்களை மேடைக்கு அழைக்கும்போதெல்லாம், அரங்கமெங்கும் “வல்லமை” என்கிற வார்த்தை எதிரொலித்தது பலரையும் ஆச்சர்யப்படுத்தியது. விழா முடிந்தவுடன், புதிதாக வந்திருந்தவர்கள் சிலர், என்னிடம் சிலர் வல்லமை என்பதற்கு விளக்கம் கேட்க, அவர்களுக்கு இந்த மின் இதழின் சிறப்பை நான் எடுத்துரைத்தேன்.

தொகுப்புரை வழங்கிய தொகுப்புரை வழங்கிய கவிஞர் ஜோதிபாசு அவர்கள், விழாவின் முதல் பேச்சாளராக, “வல்லமை தமிழ்தேனி” என்று அழைக்க, அவரும், மிகச் சுருக்கமாக தனது உரையை முடித்துக் கொண்டார், அடுத்து வந்தது “வல்லமை புகழ் – பேராசிரியர் நாகராஜன்”, வழக்கம்போல் தனக்கே உரிய பாணியில் நகைச்சுவையோடு கூடிய பேச்சு, அரங்கத்தில் சிரிப்பொலி, அதற்கடுத்து “வல்லமை வில்லவன் கோதை”, நிறைய குறிப்புகளுடன் சற்று அதிக நேரம் கவிஞரின் நூல் பற்றிப் பேசினார், அடுத்து நட்சத்திரப் பேச்சாளர் என்று அழைக்க, பல வித சிரமங்களையும் பாராமல் பெங்களூருவிலிருந்து வந்த “வல்லமைப் பேச்சாளர் ஷைலஜா”, நூல் பற்றிய மதிப்பீட்டை வாசித்தார். கடைசியாகப் பேச வந்தவர் “வல்லமை ஆதிரா முல்லை” மகிழ்ச்சியாகப் பேசினார்.

இடையே அடியேனுக்கும் ஒரு சிறுபங்கு, நான் கவிஞர் ரவிச்சந்திரனோடு நெருங்கிப் பழகிய அனுபவங்களை மட்டும் விழாவில் பேசினேன். தவிர்க்க முடியாத காரணங்களால், வல்லமை நிறுவனர் திரு அண்ணா கண்ணன் அவர்களும், தலைமை ஆசிரியர் திருமதி பவளசங்கரியும் விழாவிற்கு வரமுடியவில்லை என்பதை அறிந்து கொள்ள முடிந்தது.

இந்த விழாவில் இரண்டு சிறப்பம்சத்தை இங்கே குறிப்பிட விரும்புகிறேன்.

ஒன்று..

ஒரு நூல் வெளிவருவதற்கு முன்பே, அதைப் பற்றிய இரண்டு ஆய்வு நூல்கள் சேர்ந்து வெளிவருவது இதுவே முதல் முறை. இந்த இரண்டு ஆய்வு நூல்களையும் முனைவர் வைகை மலர் அவர்கள் எழுதி வெளியிட்டிருந்தார்கள்.

இன்னொன்று…

ஆங்கில நூல்களுக்கு இணையாக, தரமான முறையில் அச்சிடப்பட்டு வெளிவரும் காதல் பற்றிய தமிழ் நூல் என்பதை தலைமை உரை ஆற்றிய திரு ஜானகிராமன் தெளிவுபடுத்தினார்.

விழாவின் நிறைவாக ஏற்புரை ஆற்ரிய காவிரிமைந்தன் அவர்கள், “தனக்கு ஏற்பட்ட சொல்லோட்டம்தான்” இந்த நூலை எழுதுவதற்கு உறுதுணையாக இருந்தது என்பதைக் குறிப்பிட்டார்.

இதற்கு முன் நான் குறிப்பிட்டிருந்த கவிஞர் ரவிச்சந்திரன்?..யார் அவர் என்று நினைக்கின்ற வேளையில், கவிஞர் காவிரிமைந்தனின் இயற்பெயர் ‘ரவிச்சந்திரன்’ என்பதை அறியாதவர் அறிந்துகொள்ளலாமே!.

அழைப்பிதழில் அச்சிட்டிருந்த அனைத்து நபர்களும் அருமையாக கவிஞரின் இதர நூல்கள் பற்றியும், அயல் நாட்டில் அவர் ஆற்றிவரும் பணிகள் பற்றியும், கவிஞரைப் பற்றிய சொந்தக் கருத்துக்களையும் மேடையிலே நயம்பட எடுத்துரைத்தார்கள்.

இவ்விழாவில் புலவர் ஆறுமுகம் பேசுகையில் ஒரு முத்தான கருத்தைப் பலர் முன்னிலையிலும் வைத்ததை நான் மிகவும் ரசித்தேன். அதாவது நாம் எந்த விழாவைக்கொண்டாடினாலும், அதில் இடம்பெற்றிருக்கக்கூடிய நாயகனை மட்டுமே புகழுகிறோமே தவிர, இச்சாதனையின் பின்னால் இருக்கக்கூடிய, அவருக்கு உறுதுணையாய் இருந்த அவரின் மனைவியைப் பற்றி ஒரு வரி கூடச் சொல்லுவதில்லை என்று சொன்னதோடு, கவிஞர் குடும்பத்தினர் அனைவரையும் மேடைக்கு அழைத்துப் பாராட்டினார்.

நூல் வெளியீட்டு விழாவில் பேசிய அனைவரும், மிகச் சுருக்கமாக தனது உரையை முடித்துக் கொண்டாலும், மாலை ஆறு மணிக்குத் தொடங்கிய விழா, இரவு 10 மணி வரையிலும் சுறுசுறுப்பாக இயங்கி, பூரி, ஊத்தப்பம், கிச்சடி, இனிப்பு என்று தட்புடலாக இரவு விருந்து நடந்து முடிந்தது.

தற்போது கவிஞர் காவிரிமைந்தன் வல்லமையோடு இணைந்து புதிய எழுத்தாளர்களையும், புதிய போட்டிகளையும் நடத்தி தமிழுக்கு முக்கியத்துவம் கொடுத்து வளைகுடா நாடுகளிலும் வல்லமையின் புகழைப் பரப்பிவருகிறார்.

தற்போது, சென்னையில் நடந்த தனது சொந்த நூல் வெளியீட்டு விழாவிலும், வல்லமை அன்பர்களுக்கு வாய்ப்பளித்தற்கு, அனைவரும் வல்லமையின் மடலாடலில் நன்றி தெரிவித்திருக்கிறார்கள் என்பது, இங்கே குறிப்பிடத்தக்கது.

வளைகுடா நாடுகளில், வானலை வளர்தமிழ், தமிழ்த்தேர், கண்ணதாசன் தமிழ்சங்கம் போன்ற வற்றின் மூலம் தமிழர்களை ஒன்றிணைத்து, பல விழாக்களை நடத்திவருவதன் மூலம் தமிழர்களையெல்லாம் ஒன்றிணைத்து, ஊக்குவித்து வருவது, அங்கே பணிபுரியும் தமிழ் ஆர்வலர்களுக்கு நன்றாகத் தெரியும்.

தற்போது, தனது தமிழ்பணியில் சிறிதளவை வல்லமையோடு இணைத்துக் கொண்ட கவிஞர் காவிரிமைந்தன் எத்துணையோ பட்டம் பெற்றிருந்தாலும், இன்றிலிருந்து, தலைப்புக்கு ஏற்றவாறு, அவரை…

“வல்லமைக் கவிஞர்”

என்று நாம் அழைத்தாலென்ன!..

நன்றி வல்லமை இணைய இதழ்

2016-01-14T08:59:00.003+05:30

தமிழர்தம் கம்பீரம் !

2015-10-03T14:06:00.001+05:30

வில்லவன்கோதை

தமிழகத்தின் தென்பகுதி.

வணிகச்சந்தைக்குப் பெயர் பெற்ற விருதுநகர்.

தொள்ளாயிரத்து மூன்று , ஜூலை பதினைந்து

விருதுநகர் சத்திரிய வித்யாலயாவில் ஆரம்பக்கல்விக்கு சேர்க்கப்பட்ட காமராஜ் ஆறாம் வகுப்புக்குமேல் வாசிக்க முடியாமற் போயிற்று. இளம்வயதிலேயே தந்தையை இழக்கிறார். பள்ளிப்படிப்பற்றபோது வியாபாரம் பழகத் தாய்மாமன் நடத்திய துணிக்கடைக்கு அனுப்பப்படுகிறார். அதையும் கடந்து அடுத்தடுத்து குறுக்கிட்ட எந்தவேலைகளும் அவருக்கு நிலைக்காமற் போயிற்று.

தேசமே வெள்ளையர் ஆதிக்கத்தில் அடிமையுற்றிருந்த காலம்.

நாடெங்கும் விடுதலைவேட்கை புயலாக வீசிற்று. தேசப்பிதா காந்தியின் தென்னிந்திய வருகை காமராஜரின் வாழ்வில் ஒரு திருப்புமுனையை ஏற்படுத்திற்று. அண்ணலின் விருப்பத்திற்கிணங்க கதராடைகளை அணியத் துவங்குகிறார் காமராஜர்.

வெள்ளையர்க்கெதிரான தமிழககாங்கிரஸ் தலைவர்களின் சூராவளிப் பிரச்சாரம் காமராஜரின் அரசியல் வாழ்வுக்கு அடிகோலுகிறது. தீரர் திருமயம் சத்தியமூர்த்தியின் எழுச்சிமிக்க உரைகள் காமராஜரை அவர்காலடியில் கொண்டுசேர்க்கிறது. காமராஜரின் தன்னலமற்ற உழைப்பு சத்தியமூர்த்திக்கு மகிழ்வூட்டுகிறது.

பதினாறு பதினேழு வயதிலேயே அவரது முழுநேர அரசியல்வாழ்வு தொடங்கிவிட்டது. தொள்ளாயிரத்து முப்பதில் ராஜாஜி தலைமையில் வேதார்ணியம் உப்பு அள்ளும் போராட்டம். கைதாகி கல்கத்தா அலிகார் சிறைவாசம். தொள்ளாயிரத்து நாற்பதில் விருதுநகர் வெடிகுண்டு வழக்கில் கைதாகிறார் . சிறையில் இருந்தே விருது நகர் நகராட்சித்தலைவர் தேர்தலில் வெற்றி பெறுகிறார். ஒன்பதுமாத சிறைக்குப்பிறகு வன்முறையற்ற நிரபராதியாக வெளியே வருகிறார்.

நாற்பத்திரெண்டில் ஆகஸ்ட் புரட்சி. காமராஜருக்கு மூன்று ஆண்டுகள் கடுங்காவல், தேசவிடுதலைக்காக தொடர்ந்து போராட்டங்கள் சத்யாகிரகங்கள்.

நாற்பத்தியேழில் தேசம் விடுதலையுற்றபோது அந்த ஆனந்தத்தைக் கொண்டாட அவர் தலைவர் சத்யமூர்த்தி இல்லை. ஓடோடிச்சென்று அவர் வீட்டு வாயிலில் தேசியக்கொடியை ஏற்றி சுதந்திரத்தைக் கொண்டாடுகிறார்.

எட்டே எட்டு அமைச்சர்கள்.!

அதுமட்டுமல்ல. தேர்தலில் காங்கிரசையே எதிர்த்துப் போட்டிட்டு திமுகவின் ஆதரவோடு வெற்றிபெற்ற காங்கிரஸ்கார்களான ராமசாமிப்படையாச்சி , மாணிக்கவேலு இருவரையும்கூட அமைச்சர்களாக்கி அரசுக்கும் கட்சிக்குமான இடர்களைக் களைகிறார். சாதிப்பேய்கள் தலைவிரித்தாடிய அந்த காலத்திலேயே பரமேஸ்வரன் என்ற தாழ்த்தப்பட்டவருக்கு அறநிலையத்துறையைக் கொடுத்து தனக்கிருந்த பகுத்தறிவையும் ராஜதந்திரத்தையும் வெளிப்படுத்துகிறார்.

தமிழ் ஆங்கிலம் இந்தி மட்டுமின்றி வேறு சில மொழிகளையும் அவர் நன்கு அறிந்திருந்தார் .பள்ளிக்கல்வி அவருக்கு கிட்டாமற் போனாலும் படிக்கவேண்டிய நூல்களை படிக்கத்தவறியதில்லை. எப்போதும் கற்றவர்களை தன்னோடு சோர்த்துக்கொண்டது அவரது வெற்றியின் ரகசியம் என்றே கருதுகிறேன். .

புதிய ஐந்தாட்டுக்கான திட்டங்கள் வரையப்பட்டன .

காமராஜர் தமிழக காங்கிரஸ் இயக்கத்தில் தன்னிகரற்ற தலைவராக விளங்கினார். மத்தியிலும் அவர் கட்சியே ஆட்சியில் இருந்ததால் ஐந்தாண்டுத்திட்டங்களில் தமிழகத்தின் பங்கு கணிசமாக அதிகரித்தது.

விவசாயத்துக்குப் பெரிதும் முக்கியத்துவம் அளித்த மத்தியஆட்சியில் தமிழகத்தில் பத்துக்கும் மேற்பட்ட நீர்ப்பாசன திட்டங்கள் வெற்றிகரமாக நிறைவேற்றப்பட்டன. அடுத்தடுத்து வந்த ஆட்சிகள் அந்த திட்டத்தின் மதகுகளையே ஆண்டுக்கு ஆண்டு திறந்து இன்னமும் சாதனை பேசிக் கொண்டிருக்கின்றன.

மின்சார உற்பத்திக்குக் குந்தா நீர்மின்திட்டங்கள் மேட்டூர் மின் நிலையங்கள் ரஷ்ய உதவியோடு துவக்கப்பெற்ற நெய்வேலி அனல் மின்நிலையம் முக்கியமானவை. தொழில்துறையைப் பொறுத்தமட்டில் பாரத மிகுமின் நிறுவனம் நெய்வேலி பழுப்பு நிலக்கரி நிறுவனம் மணலி சிபிசிஎல் எண்ணை சுத்திரிப்பு நிறுவனம் கிண்டி மருத்துவ உபகரணங்களுக்கான தொழிற்சாலை, மேட்டூரில் காகித ஆலை உதகமண்டலத்தில் நிழற்படச்சுருள் தயாரிக்கும் தொழிற்சாலை அரவங்காடு வெடிமருந்து தொழிற்சாலை பெரம்பூர் ரயில்பெட்டி தொழிற்சாலை அத்தனையும் அவர் காலத்தில் ஏற்பட்டவை.

ஆட்சி அதிகாரங்கள் கட்சிக்குக்கிடைத்தபோது அரசு எந்திரங்களை முடிக்கிவிடக் காங்கிரஸ் இயக்கத்தின் தலைவர்கள் எல்லாம் அரசில் பங்கேற்கிறார்கள். அதேசமயம் தேசவிடுதலைக்குக் காரணமாய் இருந்த காங்கிரஸ் இயக்கம் தனிமைப்படுகிறது. ஆட்சிக்கட்டிலில் இளைஞர்களுக்கு வழிவிட்டு முதியவர்கள் கட்சியைக்காக்க தயாராகவேண்டுமென்ற திட்டத்தை முன்வைக்கிறார் காமராஜர். அப்படியொரு திட்டத்தை பண்டித நேரு ஏற்கிறார்.

காமராஜரே எல்லாருக்கும் முன்மாதிரியாக முதன்மந்திரி பொறுப்பில் இருந்து விலகி வழிகாட்டுகிறார். முதுபெரும் இந்தியத்தலைவர்கள் எல்லாம் காங்கிரசை காக்க காமராஜரைப்பின் தொடர்ந்தனர். அறுபத்திமூன்றில் ஏற்பட்ட அத்தகைய சிந்தனை கே - ப்ளான் என்று அரசியல் நோக்கர்களால் பெரிதும் பேசப்பட்டது.

அறுபத்திநான்கில் பண்டிதநேரு மரணமுற்றபோதும் அறுபத்தியாறில் லால்பகதூர் மறைந்தபோதும் சரியான காய்களை நகர்த்திக் காங்கிரசின் மிகப்பெரிய சிக்கலைத் தவிர்த்தவர் பெருந்தலைவரே.

அறுபத்தியேழில் தமிழகம் முழுதும் வீசத்தொடங்கிய திராவிடச்சூராவளி காமராஜரையும் விட்டுவைக்கவில்லை. தமிழக சட்டமன்றத்தேர்தலில் திமுகவின் மேடைப்பேச்சும் சாதீயக் கட்டமைப்புகளும் சொந்த ஊரிலேயே பெருந்தலைவரைத் தோற்கடிக்கிறது தொடர்ந்து வந்த கன்யாகுமரி நாடாளமன்ற இடைத்தேர்தலில் மகத்தான வெற்றி பெற்று டெல்லிப்பட்டணம் போகிறார்.

அடுத்து நேருவின் மகளோடு ஏற்பட்ட மனக்கசப்பு சிண்டிகேட் காங்கிரஸ் என்ற தனிக்கட்சி தோன்றுதர்க்குக் காரணமாகிறது. எழுபத்தைந்தில் இந்திராகாந்திக்கு நெருக்கடி ஏற்பட்டபோது அவர் பிகடனப்படுத்திய நெருக்கடி நிலை தேசத்தையே அதிர்வுக் குள்ளாக்குகிறது. தேசியத்தலைவர்கள் அத்தனைபேரும் இரவோடு இரவாகச் சிறைப்படுத்தப் படுகின்றனர். காமராஜர் மனமுறிந்து போகிறார் தமிழ்நாடு கலைஞர் கருணாநிதியின் இரும்புக்கர அரவணைப்பில் இருந்த நேரம். நெருக்கடிநிலையின் நீண்ட கரங்கள் தமிழகத்தை எட்டாதிருந்த சமயம்.

வரப்போகும் விடுதலை நாளில் எல்லாம் சரியாகுமென்று நம்பிய காமராஜர் முதுபெருந்தலைவர் ஆச்சாரிய க்ருபளானியும் கைது என்றபோது பெரும் அதிர்ச்சிக்குள்ளானார்

இந்தக் காமராஜரின் ஆட்சியைத்தான்

இப்போதெல்லாம் மீண்டும் மீண்டும் கொண்டு வருவோம் என்று பெருவாரியான குரல்கள் தேர்தலுக்கு தேர்தல் உயர்ந்து ஒலிக்கிறது. ஆனால் இந்தமுறை வித்தியாசமான இன்னொரு நிகழ்வையும் காண்கிறேன்.

வழக்கமாக இதுபோன்ற வாக்குறுதிகளை காங்கிரஸ் பேரியக்கமே தேர்தலுக்கு தேர்தல் முன்வைக்கும். ஆனால் இந்தமுறை வேறுசில கட்சிகள்கூட இந்தச் சொற்களை உரக்கப் பேசுகிறது.

காங்கிரஸ் பேரியக்கம் தமிழகத்தில் திராவிடக்கட்சிகளிடம் ஆட்சியைப் பறிகொடுத்து ஏறத்தாழ ஐம்பது வருடங்களுக்குமேல் கடந்து விட்டது. அந்தக் கட்சியின் தலைவர் காமராஜரோ இந்த மண்ணில் மறைந்து நாற்பது வருடங்கள் ஓடிவிட்டது. இந்த நிலையிலும் இப்படியொரு சிந்தனையை இந்தக்கட்சிகள் பரவலாக வாக்குறுதியாகச் சொல்லப்படுவதும் அதையும் இன்றையதலைமுறை பெரும்கனவுகளாக எதிர்நோக்குவதும் இயல்பாக நிகழக்கூடியதல்ல. அதர்க்கான அடிப்படை காரணம் என்னவாக இருக்க முடியும்.

பார்க்கலாம்.

அவர்களுக்குப்பிறகு வந்த ஆங்கிலேயர் இந்தநாட்டின் சகல வளங்களையும் மாறிமாறிச் சுரண்டினர். இருந்தபோதும் அவர்களுடைய தேவைக்காக அவர்களுடைய நிர்வாக வசதிக்காக இந்தத்தேசத்தில் ஏற்படுத்தப்பட்ட கட்டமைப்புகள் நவீன திட்டங்கள் நமக்கு முதன்முதலாக அறிமுகமாயிற்று. அவற்றில் அவர்கள் அறிமுகப்படுத்திய கல்வி முதன்மையானது.

ஒருமுறை பொதுநிகழ்ச்சியொன்றில் கலந்துகொண்டு தன் சகாவான தொழிலமைச்சர் வெங்கட்ராமனுடன் திரும்பிக்கொண்டிருந்தார். இடையே குறுக்கிட்ட ரயில்வே க்ராசிங்கில் அவர்கள் காத்திருக்க நேரிட்டது. அப்போது ஒரு சிறுவன் கையில் ஒரு கம்புடன் நின்றிருந்தான்.

அவன் தோளைப்பிடித்து அன்பாக வினவுகிறார் காமராஜ்.

என்றவாறே மெல்ல நகர்கிறான் அந்தச் சிறுவன்.

காமராஜரின் முகம் மாறுகிறது.

வெங்கட்ராமன் மெல்லிதாகப் புன்னகைக்கிறார். முதலமைச்சரின் இந்தச் சிந்தனை சிறுபிள்ளைத்தனமானது என்று அவர் கருதியிருக்கக்கூடும். சென்னை ஆயிரம்விளக்குப் பகுதியில் இதுபோன்றதொரு திட்டம் நீதிக்கட்சிகாலத்தில் தொடங்கி நடத்தப்பட்டது அவர் நினைவுக்கு வந்தது

ஆனால் தமிழ்நாடு முழுதுமா..

அவருக்குச் சாத்தியம் என்று தோன்றவில்லை.

‘’ ஸ்ட்டேட் முழுதுமா நாட் பாசிபிள். சட்டத்ல எட்டமில்ல சார் ‘’

அவசரம் அவசரமாகக் குறுக்கிட்டார் உடன்வந்த ஒர்உயரதிகாரி.

‘’ என்னண்ணே. நான் புள்ளைங்களுக்குச் சோறுபோடனுமிண்ணு சொல்றேன் .நீ சட்டம் பேசிறியே. சட்டத்த யாருபோட்டா. யாருக்காகப் போட்டீங்க. செய்யரத்துக்கான வழிய பாருண்ணேன். ’’

கண்கள் சிவக்க பொரிந்து தள்ளுகிறார் காமராஜர்.

அடுத்தச் சில வாரங்களில் ஒருசில பள்ளிகளில் அவசரம் அவசரமாகத் துவக்கப்பெற்ற மதிய உணவுத்திட்டம் மெல்லமெல்ல விரிவாக்கப் பட்டுப் பரவலாகத் தமிழகம் முழுதும் நிறைவேற்றப்படுகிறது. அடுத்தடுத்துவந்த ஆட்சிகளும் இந்தத் திட்டத்தைப் பல்வேறு வடிவங்களில் விரிவாக்கி சத்துணவு திட்டமென்று செயல்படுத்தி வருகிறது. தமிழ்நாட்டு குழந்தைகளின் கல்விக்கு இருந்த இடையூறை நீக்கி படிப்பில் ருசி காட்டியவர் காமராஜரே.

வெரும் ஏழு விழுக்காடாக இருந்த மாணவர் வருகை அவர் காலத்தில்தான் முப்பத்தேழு விழுக்காடாயிற்று. பள்ளிகளின் வேலைநாட்கள் நூற்றுயெண்பதிலிருந்து இருநூறாக உயர்த்தப்பட்டதும் அவருடைய காலத்தில்தான். அனைத்து தொடக்கப்பள்ளி , உயர்நிலைப்பள்ளி ஆசிரியர்க்கு ஓய்வூதியம் கிடைக்க வழிசெய்தவர் காமராஜரே.

அவர் முதல்வரான பிறகு அரசு விருந்தினராக அயல்தேசத்திலிருந்து வந்த பெண்மணி ஒருவர் காமராஜரிடம் எழுப்பிய வினா இப்போது நினைவுக்கு வருகிறது.

‘’ மிஸ்டர் காமராஜ் நீங்க ஏன் இன்னும் திருமணம் செய்துகொள்ளவில்லை ‘’

அண்ணல் காந்தியின் எளிமையை முழுமையாக கடைபிடித்தவர் காமராஜ். அதேசமயம் பண்டித நேருவின் உலகளாவிய விருப்பங்கள் இந்ததேசத்து மக்களுக்கு கிடைக்கவேண்டுமென கருதியவர் .

காமராஜரின் கால்த்தடங்கள் படாத சிற்றூர்கள் தமிழகத்தில் இல்லையென்றே சொல்லலாம். வெயில் புயல் வெள்ளம் மழை

வேட்டியைத் தூக்கிப்பிடித்து நடை நடை நடைதான்.

ஒவ்வொன்றையும் நேரில் ஆய்வு செய்து காரியத்தை முடித்த தலைவர் காமராஜ். அவரைப்பொறுத்தவரைச்சட்டங்கள் மக்களுக்காகவே. சட்டத்தின் வரைவுகளை வெருமனே சொல்லி அவர்களுக்குக் கிடைக்கவேண்டிய நலன்களை எவரும் தடுத்துவிடக்கூடாதென்பதில் உறுதியாக நின்றார். அவரது வாழ்வில் ஒவ்வொரு தருணங்களிலும் நிகழ்ந்த நிகழ்வுகள் இதைத்தான் பரைசாற்றுகின்றன.

தஞ்சை மாவட்டத்திலோ கோவையிலோ சுற்றுப்பயணம் மேற் கொண்டபோது மருத்துவக்கல்லூரி பரிந்துரைக்கான விண்ணப்பம் ஒன்று அவர் பார்வைக்கு வருகிறது.

மருத்துவக்கல்லூரியில் சேருவதென்பது அன்று பிராமணர்களுக்கே உரியதாயிருந்தது. முன்னதாக நீதிக்கட்சி ஆட்சியில்தான் விண்ணப்பத்தில் அந்தப்பகுதி நீக்கப்பட்டதைப் படித்திருக்கிறேன். விண்ணப்பத்தைப் புரட்டிப்பார்த்த காமராஜர் கையெழுத்திட்டு கொடுக்கிறார்

இதுபற்றி வினவியபோது

‘’ கீழ பாத்தில்ல.. அவுங்கப்பன் கைநாட்டு வச்சிருக்காண்ணே. அது போதாதா ‘’

என்றவாறே நடக்கிறார் தலைவர்.

உறவுகளில் இருந்து எத்தனை விலகி மக்களை நெருங்கியவர் காமராஜ்.

தன்னுடைய நெடும் பயணத்தில் உற்றார் உறவினருக்கு ஒருபோதும் இடமில்லை என்பதில் உறுதியாயிருந்தவர். வயது முதிர்ந்த பெற்றதாயைக் கூடத் தன்னோடு இணைத்துக்கொள்ளாமல் ஒர் எளிமையான வாழ்க்கைக்குப் பழக்கியவர் காமராஜ். அரசியல் ரீதியாக காங்கிரஸ் இயக்கத்தை எதிர்த்து நின்ற திராவிட இயக்கம் காமராஜரின் தன்னலமற்ற வாழ்வை ஒருபோதும் கைநீட்டிக்குற்றம் சாட்டியதில்லை.

தொண்ணூறு வயதிலும் பச்சைத்தமிழன் காமராசருக்காக தமிழகத்தின் தெருத்தெருவாக அலைந்தவர் தந்தை பெரியார். தந்தை பெரியார் செய்ய நினைத்ததை செய்துமுடித்தவர் காமராஜர்.

முதன்முதலாக சென்னை மாநகராட்சியை திமுக கைப்பற்றிய போது காங்கிரஸ் தலைவர் காமராஜருக்கு அண்ணாசாலையில் வெண்கலச்சிலை எழுப்பிக்கொண்டாடியது நினைவுக்கு வருகிறது. காமராஜரை அரசியல் ரீதியாக கடுமையாக விமர்சித்தாலும் அவர் வாழ்ந்தபோதும் மறைந்தபோதும் அவரை போற்றிக் கொண்டாடியது கலைஞர் அரசுதான்.

தமிழர்தம் கம்பீரத்துக்கு அடையாளமாக திகழ்ந்த காமராஜரின் கடைசிக்காலம் அத்தனை சுவாரஸ்யமானாக இல்லை. கப்பலோட்டிய தமிழன் வா உ சியின் கடைசி நாட்கள்தாம் என் நினைவுக்கு வருகிறது.

பத்தாண்டுகளுக்குக்குமேலாக காங்கிரஸ்கட்சிக்கு தலைவரகவும் பன்னிரண்டு ஆண்டுகள் தமிழ்நாட்டுக்கு முதலமைச்சராகவும் இருந்த காமராஜ் உயிர் பிரிந்தபோது அவர் கையில் இருந்ததென்னவோ நூற்று அறுபது ரூபாய்தானாம். அசையும் சொத்துக்களையோ அசையா சொத்துக்களையோ எதனையும் அவர் விட்டுச்செல்லவில்லை. தனக்கென நேரடியான எந்த உறவுகளையும் அவர் ஏற்படுத்திக்கொள்ளவில்லை. நம்புங்கள்.

இப்படியொரு தன்னலமற்ற அரசியல் தலைவர் இனி காண்பதர்க்கு கிடைப்பாரா. அரசியல்வாதிக்கான அர்த்தம் அவரோடு போய்விட்டதாகவே கருதுகிறேன்.

---------------------------------------------------------------------------------------

தமிழருவி மணியன் தேர்ந்தெடுத்து வல்லமை இணைய இதழில் பிரசுரிக்கப்பெற்றது.

அந்தப் ( ஜனநாயகப் ) படுகொலைகள் இனி நடக்காது !

2015-07-05T13:49:00.000+05:30

கலைஞர் கருணாநிதி நேர்காணல் - சமஸ்

இந்த 92 வயதிலும் வாழ்க்கையை விறுவிறுப்பாக வைத்திருக்கிறார் முன்னாள் முதல்வர் கருணாநிதி. அரசுக்கு எதிரான அறிக்கைகள், ‘முரசொலி’க்கான கட்டுரைகள், ‘ராமானுஜர்’ தொடருக்கான கதை வசனம், இடையிடையே வந்து செல்லும் கட்சிக்காரர்களுடனான சந்திப்புகள்… இவ்வளவுக்கு நடுவிலும் வாசிக்கிறார். “இது இல்லாமல் முடியாது” என்கிறார் சிரித்துக்கொண்டே. மேஜையில் இருக்கும் ஜெயமோகனின் ‘அறம்’, தேவிபிரசாத் சட்டோபாத்தியாயாவின் ‘இந்திய நாத்திகம்’ இரு புத்தகங்களும் வாசிப்பில் இருப்பதை உணர்த்துகின்றன. கருணாநிதியின் 80 ஆண்டு கால அரசியல் வாழ்க்கையில், ஜனநாயகத்துக்கு அவர் அளித்த மிகப் பெறுமதியான பங்களிப்புகளில் ஒன்று நெருக்கடிநிலையின்போது அவர் நடத்திய எதிர் அரசியல். நெருக்கடிநிலையின் 40 ஆண்டுகளுக்குப் பின் இந்தியா தன் கருப்புப் பக்கங்களைத் திரும்பிப் பார்க்கும் தருணத்தில், தன்னுடைய ஞாபக அடுக்குகளிலிருந்து அந்த வரலாற்றின் பக்கங்களைப் புரட்டுகிறார் கருணாநிதி.

நெருக்கடிநிலை அறிவிப்பு வெளியான காலகட்டம் இப்போது நினைவில் இருக்கிறதா?

அதை எப்படி மறக்க முடியும்? 1975 ஜூன் 12 அன்று நான் தஞ்சை மாவட்டம், முத்துப்பேட்டையில் சுற்றுப்பயணத்தில் இருந்தேன். அன்றுதான் அலகாபாத் உயர் நீதிமன்றத் தீர்ப்பு வெளியானது. பிரதமர் இந்திரா ரேபரேலி தொகுதியிலிருந்து மக்களவைக்குத் தேர்ந்தெடுக்கப்பட்டது செல்லாது என்று நீதிபதி ஜக்மோகன்லால் சின்ஹா தீர்ப்பளித்தார். செய்தியாளர்கள் என்னிடம் இது தொடர்பாகக் கேட்டார்கள். “இந்தியாவின் மிகப் பெரிய கட்சி காங்கிரஸ். உலகின் மதிக்கத் தக்க மிகப் பெரிய நாடு இந்தியா. மத்திய அரசில் இருப்பவர்கள் முடிவெடுக்கும்போது இதை எண்ணிப் பார்த்து முடிவெடுக்க வேண்டும். ஏனென்றால், இப்போது அவர்கள் எடுக்கும் எந்த முடிவும் இந்தியாவின் எதிர்கால அரசியலில் ஒரு முன்மாதிரியாக இருக்கும்” என்று கூறினேன்.

அலகாபாத் நீதிமன்றத் தீர்ப்பின் அமலாக்கத்தை நிறுத்திவைக்க இந்திரா அரசு உச்ச நீதிமன்றம் சென்றது. ஜுன் 23 அன்று அந்த முயற்சி பின்னடைவைச் சந்தித்த பிறகு, ஜூன் 25 அன்று இரவு அரசு நெருக்கடிநிலையைக் கொண்டுவந்தது. இந்திராவே மறுநாள் காலையில் வானொலியில் இதைத் தெரிவித்தார்.

நெருக்கடிநிலை அறிவிப்புக்குப் பின் உங்கள் உடனடி எதிர்வினை என்ன?

முன்னதாக, அலகாபாத் நீதிமன்றத் தீர்ப்பு வெளியானதுமே பிரதமர் பதவி விலக வேண்டும் என்று எதிர்க்கட்சிகள் குரல் கொடுத்தன. பிரதமரின் ராஜிநாமாவை வலியுறுத்தி ஒரு பெரும் போராட்டத்துக்குத் திட்டமிடப்பட்டு, எதிர்க்கட்சிகளின் சார்பில் மக்கள் போராட்டக் குழு ஒன்று அமைக்கப்பட்டது. மொரார்ஜி தேசாய் தலைமையிலான இந்தக் குழுவின் ஆலோசனைக் கூட்டத்துக்குத் திமுகவும் அழைக்கப்பட்டிருந்தது. இதனிடையேதான் நெருக்கடிநிலை பிரகடனப்படுத்தப்பட்டது. நெருக்கடிநிலை அறிவிப்பு வெளியானதுமே நாட்டின் ஜனநாயகத்தைப் பாதுகாக்க வேண்டிய பெரும் கடமை எம் முன் வந்திருப்பதை உணர்ந்துகொண்டோம். உடனடியாக எதிர்வினையாற்றினோம். அதாவது ஜுன் 27 காலை 11 மணிக்கெல்லாம் கட்சியின் தலைமைச் செயற்குழுவைக் கூட்டி கண்டனத் தீர்மானத்தை நிறைவேற்றிவிட்டோம். அன்று விடியற்காலை 4 மணிக்கே எழுந்து, நானே என் கைப்பட அந்தக் கண்டனத் தீர்மானத்தை எழுதினேன்.

அந்த நாட்களில் உங்களை மோசமாகப் பாதித்த விஷயம் எது?

எவ்வளவோ இருக்கின்றன என்றாலும், கருத்துச் சுதந்திரத்தின் மீதான தாக்குதல்கள்தான் என்னை ரொம்பவும் பாதித்தன. ‘முரசொலி’ மூலமாகத்தான் என்னுடைய கருத்துகள் தினமும் செல்கின்றன என்பதால், அதைக் குறிவைத்தார்கள். பத்திரிகையில் வெளியிடும் செய்திகள், கட்டுரைகள் எதுவானாலும் தணிக்கை அதிகாரிக்கு அனுப்பி அனுமதி பெற வேண்டும். ஒரு பக்கக் கட்டுரையை அச்சுக் கோத்து அனுப்பினால், தணிக்கை என்ற பெயரில் திரும்பி வரும்போது அவற்றில் நாலைந்து வரிகளே மிஞ்சியிருக்கும். கழகத் தோழர்கள் பிடித்துச் செல்லப்படுவார்கள்; சிறையில் வதைக்கப்படுவார்கள். எதையும் எழுத முடியாது. அதேசமயத்தில், அரசு ஆதரவு பத்திரிகைகள் மூலம், என் மீதும் கட்சியினர் மீதும் தனிப்பட்ட அவதூறுகள் அவிழ்த்துவிடப்பட்டன. எட்டு வயது நிரம்பிடாத கனிமொழிக்கு வங்கியில் எண்பதாயிரம் இருப்பதாக எழுதுவார்கள். ஆதாரங்களோடு மறுத்து ‘முரசொலி’யில் எழுதினால் அவற்றையும் வெட்டிவிடுவார்கள். ஒருகட்டத்தில் கருணாநிதி என்ற பெயரில் எதுவுமே எழுத முடியாத சூழல் ஏற்பட்டது. ரொம்பவும் இது காயப்படுத்தியது என்றாலும், நானும் ஓயவில்லை. போராட்டம் என்றால், அதில் இரண்டில் ஒன்று பார்த்துவிடுவதில் எப்போதும் நான் சளைப்பதில்லை. நான் கரிகாலன் ஆனேன். ‘கரிகாலன் பதில்கள்’ என்ற புதிய பகுதியைத் தொடங்கி எழுத ஆரம்பித்தேன்.

அப்போதுதான் பத்திரிகையும் கையுமாக வீதியில் இறங்கினீர்கள் அல்லவா, இப்படி இரண்டில் ஒன்று பார்க்கும் பிடிவாதக் குணம் எங்கிருந்து வந்தது?

அம்மா, அப்பா… அப்புறம் அன்றைக்குத் தொடங்கி என்னை விரட்டிக்கொண்டிருக்கும் சாதியப் பாகுபாடுகள். ஆமாம், சாதியப் பாகுபாடுகள் என் மீது போட்டிருந்த விலங்குகளை உடைக்க வேண்டும் என்றால், அயராத போராட்டம்தான் அதற்கு ஒரே வழி என்பதைத்தான் என்னுடைய வாழ்க்கை எனக்குச் சொல்லிக்கொடுத்தது.

இன்றைக்கும் சாதியப் பாகுபாடுகள் உங்களை விரட்டுகின்றனவா? எப்படிச் சொல்கிறீர்கள்? 45 வயதிலேயே நீங்கள் முதல்வராகிவிட்டீர்கள். கிட்டத்தட்ட கடந்த 50 ஆண்டுகளாக நீங்கள் ஒரு உயர்ந்த இடத்தில் இருக்கிறீர்கள். நீங்கள் உங்களுக்கு மேல் அணுகிக்கொண்டிருப்பவர்களெல்லாம் தேசிய அளவிலான தலைவர்கள். அவர்களிடமெல்லாமும்கூட சாதியரீதியிலான பார்வையை எதிர்கொள்வதாகச் சொல்கிறீர்களா?

ஆமாம். அவர்களில் பலரிடமும்கூட சாதியப் பாகுபாட்டை மிகத் தெளிவாக உணர்ந்திருக்கிறேன். திமுக மீதான பலரின் காழ்ப்புணர்வுக்குப் பின்னணியிலும்கூட என்னைப் போன்ற ஒரு எளியவன் தலைமையில் அது இயங்குவதைத் தாங்கிக்கொள்ள முடியாத ஆற்றாமை இருப்பதை உணர்ந்திருக்கிறேன். எவ்வளவு உயரம் போனாலும் இங்கு சாதியம் பின்னின்று நடத்தும் அரசியலை உணர்ந்திருப்பதால்தான் சமூகநீதிக்காக எவ்வளவு தூரம் செல்லவும் நாங்கள் தயாராக இருக்கிறோம். எவ்வளவோ காரியங்களைச் செய்திருந்தாலும், இந்தியாவில் வகுப்புவாரிப் பிரதிநிதித்துவத்தை வலியுறுத்தி வெற்றி கண்டதைப் பெரிய சாதனையாக நாங்கள் நினைப்பதும் அதனால்தான்.

உங்களிடம் உள்ள சமூகநீதி தொடர்பான இந்தப் பிரக்ஞை அடுத்த தலைமுறை திமுகவினரிடமும் இருக்கிறதா?

இன்றைக்கு ஊற்றப்படுகின்ற தண்ணீரும், தொடர்ந்து இடப்படுகிற உரமும் எதிர்காலத்தில் நிச்சயமாகப் பயன்படும் என்ற நம்பிக்கை எனக்கு உண்டு.

நெருக்கடிநிலைக் காலகட்டத்துக்கு முன்பே இந்திரா காந்தியின் பேச்சுகள் / நடவடிக்கைகளில், திமுக மீதான ஒரு கசப்புணர்வு இருந்திருப்பதை உணர முடிகிறது. பின்னாளில், திமுகவைத் தடைசெய்ய வேண்டிய இயக்கமாகக்கூட இந்திரா கருதியிருக்கிறார். இத்தனைக்கும் 1971 தேர்தலில் இந்திரா காந்தியுடன் கூட்டணி உறவுகொண்டே திமுக போட்டியிட்டிருக்கிறது. உறவு கசப்படைய என்ன காரணம்? முன்னதாக மொழிப்போர் அனுபவங்கள், சுயாட்சிக் கொள்கை போன்ற விஷயங்கள் ஏதேனும் திமுகவிடம் அவருக்கு ஒவ்வாமையை உருவாக்கியிருந்தனவா?

மொழி விவகாரம், மாநில சுயாட்சி விவகாரம், சோஷலிச அடிப்படையிலான திட்டங்கள், ஒடுக்கப்பட்ட மக்கள் நலன்களில் காட்டிய தொடர் அக்கறை, வடக்கு - தெற்கு பாகுபாட்டு அணுகுமுறையில் எங்களுக்கு இருந்த விழிப்புணர்வு, சர்வ வல்லமை படைத்த மத்திய அரசை எதிர்த்துத் துணிச்சலாக அறைகூவல் விடுக்கும் அணுகுமுறை இப்படி எவ்வளவோ விஷயங்கள் காரணமாக திமுக தொடர்ந்து குறிவைக்கப்பட்டிருக்கிறது. திமுக ஒரு தேச விரோத சக்தி என்கிற அளவுக்கு கருத்துகளை விதைப்பதிலும், அவற்றை வளர்ப்பதிலும் எங்களுடைய இயக்கத்தின் தொடக்கக் கால எதிரிகள் தொடர்ந்து ஈடுபட்டுவந்தார்கள். டெல்லியின் அதிகார மையத்தை மட்டும் அல்லாமல் நாடு முழுவதுமே இப்படியான ஒரு எண்ணத்தை உருவாக்குவதில் அக்காலகட்டத்தில் அவர்கள் மெல்ல மெல்ல வெற்றி கண்டார்கள் என்றுதான் சொல்ல வேண்டும்.

அண்ணாவின் மறைவுக்குப் பின், திமுக சாய்ந்து ஓய்ந்துவிடும் என்று பலர் மனக்கணக்கு போட்டார்கள். திமுகவோ மேலும் வலுப்பெற்று வளர்ச்சி அடைந்தது. இது தாங்கிக்கொள்ள முடியாததாகப் பலருக்கும் இருந்தது. இந்த நிலையில்தான் திமுகவிலிருந்து நண்பர் எம்ஜிஆர் பிரிந்தார்.

நாம் கொஞ்சம் வெளிப்படையாகவே பேசலாம். திமுகவைப் பலவீனப்படுத்த எம்ஜிஆரை இந்திரா காந்தி பயன்படுத்திக்கொண்டாரா?

இந்திராவின் மனதில் சிலர் ஊன்றிய விஷ விதை தொடர்ந்து வளர்ந்த வண்ணம் இருந்தது. அதனால், திமுகவை ஒதுக்கவும், ஓரங்கட்டவும், பலவீனப்படுத்தவும் என்னென்ன ஆயுதங்கள் வலிய வந்து அவர் கைகளில் விழுந்தனவோ அவை எல்லாவற்றையுமே அவர் பயன்படுத்திக்கொண்டார் என்பதுதான் உண்மை. அத்தகைய கருவிகளில் ஒன்றாக எம்ஜிஆரும் டெல்லிக்கு வாய்த்தார்.

எம்ஜிஆர் தானாகவே பிரிந்து சென்று தனிக் கட்சி தொடங்கினாரா அல்லது பிரிக்கப்பட்டு ஊக்குவிப்பும் உற்சாகமும் கொடுக்கப்பட்டாரா என்பதற்கு இன்றுவரை உறுதியான ஒரு பதில் கிடைக்கவில்லையே?

இந்தியாவின் கட்டுப்பாடற்ற தீவுகள் என்று தமிழகத்தையும் குஜராத்தையும் ஒருமுறை குறிப்பிடுகிறார் இந்திரா காந்தி. அப்படி என்ன கட்டுப்பாடுகளை அப்போது தமிழகம் மீறியது? இதுவரை வெளியே சொல்லாத இந்திராவின் நெருக்கடிகள், நிர்ப்பந்தங்கள் ஏதும் இருக்கிறதா?

தமிழகத்தில் திமுகவும் குஜராத்தில் ஸ்தாபன காங்கிரஸும் அப்போது ஆட்சியில் இருந்தன. ஜனநாயகத்தைக் காப்பாற்ற எந்த விலையையும் தரத் தயாரான அரசுகளாக அவை இருந்தன. இதை இந்திராவால் ஜீரணிக்க முடியவில்லை. வெளியே பலருக்குத் தெரியாத இன்னொரு காரணம்: தமிழகத்தில் இந்திரா காங்கிரஸுடன் ஸ்தாபன காங்கிரஸ் இணைவதற்கு நான் தடையாக இருக்கிறேன் என்ற எண்ணத்தை இங்குள்ள சிலர் இந்திராவிடம் விதைத்து தூபம் போடும் முயற்சியில் வெற்றியும் பெற்றிருந்தனர்.

ஆனால், எந்த இந்திராவைப் பற்றி இப்படியெல்லாம் சொல்கிறீர்களோ, அதே இந்திராவுடன்தான் அடுத்த தேர்தலில் திமுக கூட்டணி சேர்ந்தது. இன்றளவும் விமர்சிக்கப்படும் இந்த முடிவை நோக்கி உங்களை எது தள்ளியது?

டெல்லியில் 1977-க்கும் 1980-க்கும் இடையில் நடந்த ஆட்சியினால் ஏற்பட்ட எதிர்மறையான விளைவுகளே அந்த முடிவை நோக்கித் தள்ளியது. இந்தியாவுக்கு ஒரு நிலையான ஆட்சி வேண்டும் என்ற அடிப்படையில்தான், “நேருவின் மகளே வருக; நிலையான ஆட்சியைத் தருக” என்று கூற வேண்டிய நிலைக்கு திமுக வந்தது.

நெருக்கடிநிலையின்போதுதான் ஆட்சியை இழந்தீர்கள். கட்சி ஏராளமான கைதுகளையும் பிரிவுகளையும் சந்தித்தது. திமுகவிலிருந்து பிரிந்த எம்ஜிஆர் பெரிய அளவில் வளர்ந்தார். உங்கள் அரசியல் வாழ்வின் மிக நெருக்கடியான காலகட்டம் என்று அதைச் சொல்லலாமா?

நெருக்கடிகள் நிறைய இருந்தன என்றாலும், வாழ்வின் மிக நெருக்கடியான காலகட்டம் என்று நெருக்கடிநிலைக் காலகட்டத்தைக் குறிப்பிட முடியாது. அண்ணா மறைந்தபோது உருவானதுதான் பெரும் நெருக்கடி. அண்ணாவால் சில லட்சியங்களை வென்றெடுப்பதற்காக உருவாக்கப்பட்ட இந்த இயக்கத்தைக் கட்டிக் காப்பாற்றி, முன்னெடுத்துச் செல்ல வேண்டிய பொறுப்பு என் மீது விழுந்ததைவிடவும் பெரிய நெருக்கடி ஏதும் இல்லை.

நெருக்கடிநிலைக்குப் பெரிய விலை கொடுத்த இயக்கங்களில் ஒன்று திமுக. ஆனால், தமிழகத்தில் தேர்தலில் அதற்கான பலன்களை அப்போது திமுகவால் அறுவடை செய்ய முடியவில்லை. என்ன காரணம்? நெருக்கடிநிலையின் கொடூரச் சூழலைப் போதிய அளவுக்கு மக்களிடம் கொண்டுசேர்க்க திமுக தவறிவிட்டதா அல்லது நெருக்கடிநிலைச் சூழலையும் தாண்டி திமுகவின் ஆட்சி மீது அப்போது இருந்த அதிருப்தியா?

இரண்டுமே தவறு. சோதனைகளை எதிர்கொள்ளும் இயக்கங்களும், தலைவர்களும் அவற்றுக்கான பலன்களை நிச்சயமாகப் பெறுவார்கள் என்பதை அரசியலில் அறுதியிட்டுச் சொல்ல முடியுமா என்ன? இரண்டாம் உலகப் போரில் பிரிட்டனின் வெற்றிக்குக் காரணமாக இருந்த வின்ஸ்டன் சர்ச்சில், அடுத்து நடைபெற்ற தேர்தலில் என்னவானார்? இந்தி ஆதிக்கத்துக்கு எதிராக தமிழகத்தில் நடந்த மிகப் பெரிய போராட்டத்தை நீங்கள் அறிந்திருப்பீர்கள். பலர் தீக்குளித்தும், துப்பாக்கிச் சூட்டுக்கு இரையாகியும் மாண்டனர். ஆயிரக்கணக்கானோர் சிறை சென்றனர். ஆனால், அதையொட்டி நடந்த தருமபுரி தொகுதிக்கான மக்களவைத் தேர்தலில் திமுக தோல்வி அடைந்தது.1962 தேர்தலில் காஞ்சிபுரத்தில் அண்ணாவும் 1967 தேர்தலில் விருதுநகரில் காமராஜரும் தோல்வியடைந்தார்களே, என்ன காரணம்? தேர்தல் வெற்றி - தோல்வி என்பது எப்போதும் வாக்காளர்களின் மனநிலையைச் சார்ந்தது. அந்த மனநிலை ஏன் அப்படி இருந்தது என்பதற்கு, தர்க்கரீதியாக துல்லியமான - சரியான காரணங்களை யாராலும் சொல்ல முடியாது.

தேசிய அரசியல் நோக்கி நீங்கள் நகர்வதற்கான வாய்ப்புகள் அந்தக் காலகட்டத்தில் உருவாகியிருக்கின்றன. அப்போது டெல்லி நோக்கி நகர்ந்திருந்தால், இன்றைக்கு முலாயம் சிங் யாதவ், லாலு பிரசாத் யாதவ்போல தேசிய அரசியலில் ஓர் இடத்தைப் பிடித்து வைத்துக்கொண்டேகூட மாநில அரசியலையும் கைக்குள் வைத்திருந்திருக்கலாம். நீங்கள் ஏன் போகவில்லை?

என்னுடைய சிந்தனையும் செயலும் எப்போதும் ‘தமிழ் - தமிழர் - தமிழ்நாடு’ என்ற எல்லைக்குள்ளேயே சுழன்றுகொண்டிருக்கின்றன. இங்கேயே செய்ய வேண்டிய காரியங்கள் இன்னும் ஆயிரமாயிரம் இருக்கும்போது, தேசிய அரசியல் எண்ணம் எப்படி வரும்?

ஆனால், அப்போது தொடங்கி இப்போது வரை தேசிய அரசியலில் ஒரு வலைப்பின்னலை திமுகவால் உருவாக்கவே முடியவில்லை. இன்றளவும் திமுகவின் பெரிய பலவீனங்களில் ஒன்றாகவே இது நீடிக்கிறது. இதை உணர்ந்திருக்கிறீர்களா?

உணர்ந்திருக்கிறோம். அதைச் சரிசெய்வதற்கான முயற்சி களிலும் ஈடுபட்டிருக்கிறோம்.

நெருக்கடிநிலை போன்ற சூழல்கள் உண்மையில் கூட்டாட்சித் தத்துவம் இங்கு எவ்வளவு வலுவிழந்திருக் கிறது என்பதற்கும், மாநிலங்களின் உரிமைகள் எவ்வளவு துச்சமானவையாக அணுகப்படுகின்றன என்பதற்கும் உதாரணங்கள். தேசியவாதத்தின் பெயரால், சுதந்திரத் துக்குப் பின் மாநிலங்களின் உரிமைகள் பறிக்கப்படுவது நாளுக்கு நாள் அதிகரித்துக்கொண்டேதான் இருக்கிறது. தேசிய அரசில் கூட்டணி ஆட்சியில் திமுக பங்கேற்றிருந்த காலகட்டங்களிலெல்லாம் இது தொடர்பாக ஏதேனும் முயற்சிகளை மேற்கொண்டிருக்கிறீர்களா? அவற்றுக்கு தேசிய அரசுகளின் எதிர்வினை என்ன?

மாநிலங்களின் உரிமைகள் நாளுக்கு நாள் தேய்ந்து கொண்டே வருவதை உணர்ந்துதான் 40 ஆண்டுகளுக்கு முன்பே, ‘மாநிலத்தில் சுயாட்சி, மத்தியில் கூட்டாட்சி’ என்ற முழக்கத்தை திமுக முன்வைத்தது. எப்போதுமே இது தொடர்பாக நாங்கள் பேசிவந்திருக்கிறோம். 1970 மார்ச் 21 அன்று டெல்லியில் நடைபெற்ற தேசிய வளர்ச்சிக் குழுக் கூட்டத்தில், “மாநிலங்களுக்கு ஏன் அதிக அதிகாரங்கள் தரப்பட வேண்டும்?” என்று நான் பேசியதை தேசிய அளவில் பல கட்சிகள் ஆதரித்துப் பேசின. நாட்டிலேயே முதன்முதலாக 1974-ல் மாநில சுயாட்சித் தீர்மானத்தைத் தமிழகச் சட்ட மன்றத்தில்தான் நிறைவேற்றினோம். அப்போது தொடங்கி இப்போது வரை எங்கெல்லாம், எப்போதெல்லாம் வாய்ப்புக் கிடைக்கிறதோ அங்கெல்லாம், அப்போதெல்லாம் மாநிலங்களின் மேலதிக உரிமைகளுக்கான முயற்சிகளை மேற்கொள்ளவே செய்கிறோம். தேசிய அரசுகளின் எதிர்வினைகள்தான் எல்லோருக்கும் தெரியுமே?

இந்தியா இன்னொரு நெருக்கடிநிலையை எதிர்கொள்ளும் வாய்ப்பு இருக்கிறதா? இன்னொரு முறை அப்படியான ஜனநாயகப் படுகொலை நடத்தப்படாமல் இருக்க இந்தியா செய்ய வேண்டியது என்ன?

அப்படிப்பட்ட வாய்ப்பிருப்பதாக நான் நினைக்கவில்லை. நெருக்கடிநிலையால் பாதிக்கப்பட்டவர்கள் மட்டும் அல்ல; அதைக் கொண்டுவந்தவர்களும் பின்னாட்களில் அதன் கடுமையான விளைவுகளை எதிர்கொள்ளவே செய்தார்கள். எனவே இன்னொரு முறை அந்த ஜனநாயகப் படுகொலையை நடத்தலாம் என்று யாரும் கனவிலும்கூட நினைத்துப் பார்க்க மாட்டார்கள் என்று உறுதியாக நம்புகிறேன்.

நெருக்கடிநிலை கற்றுக்கொடுத்த பெரிய பாடம் என்ன?

அண்ணா அடிக்கடி சொல்வார், “இடையறாத விழிப்புணர்வே, ஜனநாயகத்துக்கு நாம் தரும் விலை” என்று. அந்த உண்மையே, அனுபவரீதியாகக் கற்றுக்கொண்ட பெரிய பாடம்.

திமுகவின் அடையாளமாக அந்நாட்களில் அறியப்பட்ட போர்க் குணம் மிக்க உறுதியான எதிர் அரசியலை இன்று பார்க்க முடியவில்லை. இது தலைமுறை மாற்றத்தின் விளைவா அல்லது கால ஓட்டத்தின் சிதைவா?

திமுகவின் போர்க் குணம் குறைந்துவிடவில்லை; என்றைக்கும் அது குறையவும் குறையாது. இன்றைக்கும் ஜனநாயகத்துக்குப் பாதகமான ஒரு நடவடிக்கை எடுக்கப் பட்டால், திமுகவிடமிருந்து அந்தப் போர்க் குணத்தை நீங்கள் பார்க்கவே செய்வீர்கள்.

முந்தைய கேள்வியின் தொடர்ச்சியாகவே இந்தக் கேள்வியைக் கேட்கிறேன். ஆர்.கே.நகர் தொகுதியில் ஜெயலலிதாவை எதிர்த்துப் போட்டியிடுவதில்லை என்று திமுக எடுத்த முடிவு எந்த அளவுக்குச் சரியானது?

வியூகரீதியில் அது எத்தனை சரியானது என்பதைப் பின்னாளில் பார்ப்பீர்கள்.

வெவ்வேறு காலகட்டங்களில் வெவ்வேறு பிரச்சினைகள் உங்கள் அரசியலை உந்தித் தள்ளியிருக்கின்றன. இந்த 92 வயதில், இன்றைய காலகட்ட அரசியலில் உங்களை உந்தித் தள்ளக் கூடிய பிரச்சினை எது?

திராவிட இயக்கத்தை எப்படியும் வீழ்த்த வேண்டும் என்று எண்ணிச் செயல்படும் சக்திகள். அவற்றை எப்படி வேரோடு களையலாம் எனும் எண்ணமே ஒவ்வொரு நாளும் கண் விழிப்பதிலிருந்து என்னை இப்போது உந்தித் தள்ளுகிறது!

நன்றி தி இந்து 05 07 2015

பெரம்பலூருக்கு அருகில் . . .

2015-07-03T21:29:00.002+05:30

வில்லவன் கோதை

சென்னை திருச்சி நெடுஞ்சாலை.

கடந்த திங்கட்க்கிழமை ( 30 ஜூன் 2015 ) காலை பத்து மணியிருக்கும்.!

உச்சி வெயிலின் கொடூரமான தாக்கம் தொடக்கத்திலேயே புலப்பட்டுவிட்டது.

பெரம்பலூரிலிருந்து தெற்கு நோக்கி பதினைந்து கிலோமீட்டர் தொலைவு தினந்தினம் நெடுஞ்சாலை விபத்துகளுக்கு குறைவற்ற பாடாலூருக்கு முன்னால் குறுக்கிட்ட மேம்பால இறக்கம். சாலையின் வலது புறத்தில் இடையே குறுக்கிட்ட ஒரு சின்னஞ்சிறு கிராமத்தின் பாதுகாப்புக்காக எழுப்பப்பெற்ற இறக்கமான தடுப்புச்சுவர். இன்னொருபக்கம்சாலையின் இருபகுதிகளை பிரிக்கும் மையத்தரைப்பகுதி. நீண்டு கிடக்கும் அந்த மணற்பரப்பில் வரிசையாக சீரான இடை வெளியில் ஊன்றப்பட்ட ஒலியை உறிஞ்சும் தன்மைகொண்ட அரளிச்செடிகள்.

இந்த கொடும் வெயிலில் அவைகளின் தீராத தாகத்துக்கு நீர் வார்க்கும் தண்ணீர் லாறியொன்று மெல்ல ஊர்ந்து கொண்டிருந்தது.

வெகுதூரத்தில் பயணிகள் எவருமற்ற நெடுந்தூர சொகுசுப்பேரூந்து

ஒன்று இடதும் வலதுமாக மாறி மாறி ஒருவித மயக்கத்தில் பயணித்து வந்து கொண்டிருந்தது.

அதேசமயம் –

உலோக உலர்சாம்பல் நிற போர்டு டைட்டான் வகை காரொன்று சீரான வேகத்தில் சொகுசுப்பேரூந்தை நெருக்கமாக அணுகிற்று.

ஒரு கடிகார பெண்டுலத்தைப்போல மாறி மாறி பயணித்த அந்த சொகுசுப்பேரூந்து சற்றும் எதிர்பாராமல் திடீரென்று இடது ஓரமாக நகர்ந்து மெல்ல ஊர்ந்து கொண்டிருந்த தண்ணீர் லாறியின் மேல் மோதிற்று. எதிர்பாராத தாக்குதலால் நிலைகுலைந்து போன தண்ணீர் லாறி முன்னோக்கி நகர்ந்து சாலையின் குறுக்கே நிலைகொண்டது. சொகுசுப்பேரூந்தின் மீது மோதுவதைத் தவிர்த்த டைட்டான் கார் வலதுபக்கம் திரும்பி குறுக்கே கிடந்த லாறியில் பட்டு நின்றது.

கண்ணெதிரே நிகழ்ந்த தாக்குதலைக்கண்ட டைட்டான் காரை ஓட்டியவர் இடதுபுறமாக ஒடித்து அழுத்தமாக பிரேக்கைக்கொடுத்து வண்டியை நிறுத்தினார்.

கிராமத்துக்கு பாதுகாப்பாக எழுப்பப்பட்டிருந்த தடுப்புச்சுவரில் நெருக்கி நின்றது கார்.இடிபட்ட வேகத்தில் காரின் கதவுகள் திறக்க வழியின்றி இறுகிற்று.

முன்னால் தள்ளப்பட்ட லாறியின் பின்பகுதி கடுஞ்சேதத்துக்குள்ளாயிற்று. விபத்தை ஏற்படுத்திய சொகுசுப்பேரூந்தோ முற்பகுதி முழுதும் உருக்குலைந்து போயிற்று. பேரூந்தை ஓட்டிய ஓட்டுனர் கால்கள் இரண்டும் இடிபாடுகளில் சிக்கி நசுங்கி மீளமுடியாமல் தவித்தார்.

சாலை முழுதும் விபத்துக்குள்ளான வண்டிகளின் எரிபொருள் எண்ணையும் தண்ணீரும் கலந்து பரவலாக ஓடத்துவங்கிற்று.அந்த சுட்டெரிக்கும் வெயிலில் மனிதர்களே காணக்கிடைக்காத அந்த பிரதேசத்தில் ஆண்களும் பெண்களுமான ஒரு ஜனத்திறள் ஈசல்களைப்போல முற்றுகையிடுகிறது.

வலதுபுற தடுப்புச்சுவரில் நெருக்கி கதவுகள் திறக்க இயலாது நின்றுபோன டைட்டான் காரில் இருந்தவர்கள் கைகளாலும் தலைகளாலும் கண்ணாடியை மோதி வெளியேற முயன்றனர்

சாலையில் ஓடும் எண்ணைக்குழம்பு ஒருவகை பீதியைக்கிளப்ப கூடியிருந்த ஜனத்திறள் கற்களால் கண்ணாடியை உடைத்து தவம் இருந்து பெற்ற பிள்ளை இரண்டரை வயது கவினை வெளியேற்றி மீண்டுமொரு நற்பிறப்பை ஏற்படுத்தினர்.

பின்னர் கதவுகள் திறக்கப்பெற்று காரில் பயணித்தவர்கள் வெளியேறினர்.வண்டிக்கு ஏற்பட்ட சேதங்களைத்தவிற வண்டியிலிருந்த அனைவருக்கும் ஒரு சில உடல் பிடிப்புகளைத்தவிற பெரிதான வேறு பாதிப்புகள் இல்லை.இருந்தபோதிலும் -

குழந்தை கவின் உட்பட வண்டியிலிருந்த அனைவருமே மனதளவில் ஒருவித அழுத்தத்தை உணர்ந்தனர்.

இந்த வண்டியில் பயணம் செய்தவர்கள் எனது மனைவி உமா , எனது இரண்டு மணமான மகள்கள் கவிதா ( மாலதி ) , சவீதா , எனது பேரன் இரண்டரைவயது கவின். டைட்டான் காரை ஓட்டியவர் எனது இளைய மருமகன் மோகன் பாபு. அத்தனைபேருமே திருச்சியில் ஒரு மகிழ்வான நிகழ்வில் கலந்து கொள்ள சென்றவர்கள்.

அடுத்த அரைமணியில் பெரம்பலூரில் இருந்த எனது மூத்த மருமகன் பாலகிருஷ்ணன் தகவல் அறிந்து அவரது நண்பர்களோடு வந்தார். நிகழ்ந்து முடிந்த விபத்தில் எங்கள் பங்கு விவாதிக்கப்பெற்று சிக்கல் முடிவுக்கு வந்தது.விபத்தில் மூன்றாம் நபரான நாங்கள் பிரச்சனைகளிலிருந்து எழுத்துமூலம் வெளியேறினோம்.

இரண்டரைமணி நேரத்துக்கு மேலாக போக்குவரத்து தடைபட்டு ஏராளமான வண்டிகள் காத்திருக்க வேண்டியதாயிற்று.

இங்கே ஒன்றை அவசியம் குறிப்பிடவேண்டும்

எதிர்பாரத விபத்துகளுக்கேற்ப நவீன வகை சாப்ட்வேர்களுடன் வடிவமைக்கப் பெற்றிருந்த போர்டு டைட்டான் க்ளாசிக் வகை காரின் செயல்பாடு இந்த சூழலில் போற்றத்தக்கது.

‘’ லாறியின் வலது முனை காரின் ஏ பில்லரில் மோதியபோது ஏதோ நடக்கப்போகிறது என்பதை உணர்ந்தேன். உள்ளேயிருந்தவர்களுக்கு

பயப்படாதீங்க என்று எச்சரிக்கை செய்துவிட்டு வண்டியை வலது பக்கம் ஒடித்து அழுத்தமாக ப்ரேக்கை பிரயோகித்தேன். நினைத்த்தைப்போலவே சாலையின் வலது பக்க தடுப்புச்சுவரில் நெருக்கி வண்டி நின்றது.

சாலைமுழுதும் வழிந்தோடிய எண்ணைக்குழம்பும் அடிபட்ட லாறியை ஆயில் டேகங்கர் என்று கருதியதாலும் முதன்முதலாக பயம் என்ற சொல்லை அந்த கணத்தில் உணர்ந்தேன் .உள்ளேயிருந்த குழத்தை பெண்கள் நினைவுக்கு வர காரின் கண்ணாடியை உடைக்க நினைத்தேன்.

வெளிப்புற வெளிச்சத்தாலும் வண்டி தீப்பிடிக்க்க்கூடுமென்ற அச்சத்தாலும் டைட்டான் எழுப்பிய எச்சரிக்கை என்னால் கவனிக்க இயலாமற்போயிற்று.

இருந்தபோதும் இரண்டு வண்டிகளின் இடிபாடுகளில் நாங்கள் சிக்க நேரிட்டுவிட்டது துரதிஷ்டம். ‘’

மிகுந்த சோர்வோடு சொன்னார் என் இளைய மருமகன் மோகன் பாபு.

‘’ அந்த கடும் வெயிலிலும் எங்கிருந்தோ திரண்டு வந்த அந்த ஜனத்திறள் எங்கள்மேல் காட்டிய அன்பும் அரவணைப்பும் மறக்கமுடியாதது.! ‘’

என்கிறார் என் மூத்தமகள் மாலு

‘’ நான் வணங்கும் தெய்வமே எங்களை காத்தது .! ‘’

இது என் மனைவியின் நம்பிக்கை.

என்வாழ்வில் எத்தனையோ இடற்களை சந்தித்த எனக்கு இந்த தகவல்கள் அருகிலிருந்தும் என் நலன் கருதி உனக்கு தரப்படாமல்போயிற்று.

அதே சாலையில் அடுத்த நாள் வேறொரு வண்டியில் நாங்கள் பயணித்தபோது விபத்து நிகழ்ந்த இடத்தை பார்வையிட்டேன்.ஒன்றோடொன்று மோதி முகங்களை இழந்த ஒரண்டு வண்டிகளும் சாலையோரத்தில் கேட்பாறற்று சிதறிக்கிடந்தன. இரண்டரைமணி நேரத்துக்கு மேல் தடைபட்டுக்கிடந்த அந்த நெடுஞ்சாலை அத்னையும் மறந்து இப்போது சீறாக இயங்கிக்கொண்டிருந்தது . மனிதர்கள் வாழ்வும் அப்படித்தான் !

‘’ கண்ணாடிய தொறக்காதப்பா . பஸ்சு உள்ளார வந்துடும் ‘’.

அந்த பயணத்தில் குழந்தை கவின் பேசியது அவன் அவைகளை இன்னும் மறந்துவிடவில்லை என்பதை உணர்த்திற்று. அன்றைய திருச்சி பதிப்பு நாளிதழில் வண்ணப்படத்தோடு இந்த விபத்து பேசப்பட்டது.

விபத்துக்கள் எப்போதும் தானாக நிழ்வதில்லை என்று நம்புபவன் நான்.

மன்னிக்கப்பட்ட தருணங்கள் பெரும்பாலும் அடுத்த கட்ட நகர்வுகளுக்கு ஒரு எச்சரிக்கை என்றே கருதுகிறேன்.

இது ஒரு கெட்ட நேரம்.

கருணையால் உயிர் பிழைத்தோம்

இப்படித்தான் ஒவ்வொருவரும் பேசினர்.

இவையெல்லாம் என்னைப் பொறுத்த வரையில் தர்கத்தை தாண்டியவை என்றே கருதுகிறேன்.

கடவுளின் குழந்தைகள் !

2015-06-16T13:05:00.005+05:30

இன்று என் மூத்த பேரன் சிபி பாலகிருஷ்ணன் தனது பதினாறாவது அகவையை எளிமையாக நினைவுகூர்ந்தான்.அந்த மகிழ்வூட்டும் தருணங்களில் நெஞ்சம் நிறைந்த நல் வாழ்த்துக்களை அவனிடம் பகிர்ந்து கொண்டோம்.

இந்த மகிழ்வின் தொடர்ச்சியாக நேற்று மாலைப்பொழுதில் ஒரு குழந்தைகள் காப்பகத்துக்கு சென்றிருந்தோம். துறையூர் நெடுஞ்சாலையில் செஞ்சேரி – செட்டிக்குளம் திருப்பத்தில் அந்த குழந்தைகள் உண்டு உறைவிடப்பள்ளி இருந்தது.பதற்றமான போக்குவரத்தற்ற சாலையின் ஓரத்தில் விசாலமான பரந்த இடத்தில் அந்த வித்யாஸ்ரமம் நிறுவப்பட்டிருந்தது. குழந்தைகள் ஓடியாடி விளையாடுதற்கும் கூடி ஒன்றாக உண்பதற்கும் தனித்தனியே உறங்குதற்கும் விசாலமான அறைகள் நிறைந்திருந்தன. குழந்தைகள் தனித்து உறங்கத் தேவையான அடுக்கடுக்கான கட்டில்களையும் பார்த்தேன்.

இதற்கான ஒட்டுக்கட்டிடங்கள் தனலட்சுமி சீனுவாசன் கல்வி நிறுவனங்களின் கொடையென்று சொன்னார்கள்.நாங்கள் சென்றிருந்தபோது ஓரு ஆசிரியையும் உணவு தயாரிக்க ஐந்தாறு ஆண் ஊழியர்களையும் பார்த்தோம்.

அரசாங்கத்தின் எல்லாருக்கும் கல்வியென்ற திட்டத்தின் கீழ் இந்த வித்யாஸ்ரம்ம் அங்கீகரிக்கப்பட்டு எட்டாம் வகுப்புவரை தனித்தனி அறைகளில் முறையான கல்வியும் கற்பிக்கப்படுகிறது.இதற்கென வரும் ஆசிரியைகளுக்கான ஊதியமும் அரசே வழங்குகிறது.

மூன்றிலிருந்து பதினைந்து வயதுக்குட்பட்ட நூறு குழந்தைகளை அந்த குடிலில் பார்த்தோம்.

இந்த குழந்தைகள் அனைவருமே எயிட்ஸ் நோய்களுக்காளான பெற்றோர்களிடமிருந்து பிரித்தெடுத்து பாதுகாக்கப்படுகிறவர்கள்.

திருச்சியில் வாழும் மனிதநேயமிக்க ஒரு மருத்துவ த்தம்பதிகள் இந்த குடிலை ஏற்படுத்தி நிராயுதபாணியாக கைவிடப்பட்ட குழந்தைச் செல்வங்களை காத்து வருவதாகச் சொன்னார்கள்.குழந்தைகளுக்குத் தேவையான மருத்துவ சோதனைகளையும் தொடர்ந்து செய்துவருகிறார்களாம்.தனியார் உதவிகள் அவ்வப்போது இந்த காப்பகத்துக்கு கிடைத்தாலும் எதனையும் எதிர்பாராமல் ஏழு ஆண்டுகளாக இந்த சேவையை தொடர்வதாக சொன்னார்கள்.

எட்டாம் வகுப்பைத்தாண்டிய குழந்தைகள் விருப்பப்படியே இந்த உறைவிடத்திலிருந்து மேற்கல்விபயில அரசுப்பள்ளிகளுக்கு அனுப்பப்படுகின்றனர் .தொண்ணூறு விழுக்காடு மதிப்பெண் பெற்று பாலிடெக்னிக் ஒன்றில் சேர்ந்திருந்த ஒரு மாணவனையும் பார்த்தேன்.

கடவுளின் குழந்தைகள் இவர்கள்தான் என்று தோன்றிற்று.

பொழுது சாய்ந்த மாலை நேரத்தில் நாங்கள் சென்றபோது அந்த குழந்தைகள் வரிசை வரிசையாக அமர்ந்து எங்களுக்கு அன்பான வரவேற்பளித்தனர்..அந்த பிஞ்சு உள்ளங்களைப் பார்த்த அந்த கணங்கள் என்ன காரணத்தாலோ எங்கள் மகிழ்வை கலைத்தன. குழந்தைகள் விரும்பிக்கேட்டிருந்த பென்சில் பேனா நோட்டுப்புத்தகங்கள் கிரீம் ரொட்டிகள் கடலைத்துண்டுகள் ஆகியவற்றை எனது மருமகன் பாலகிருஷ்ணன் அனைவருக்கும் வினியோகித்தார். மகிழ்வோடு பெற்றுக்கொண்ட அந்த குழந்தைகள் இன்னும் என்னன்ன வேண்டும் என்பதை உரிமையோடு அவரிடம் கேட்டது எங்களை பெரிதும். மகிழ்வுக்குள்ளாக்கிற்று.

சென்னையிலிருக்கும் எனக்கு இந்த தனியார் குழந்தைகள் காப்பகங்களோடு ஏற்பட்ட தொடர்பு அத்தனை மகிழ்வூட்டுவதாக இருந்ததில்லை.அந்த நிலையில்

நாங்கள் சென்றிருந்த இந்த காப்பகம் மிகுந்த மனநிறைவைத்தந்தது என்றே சொல்லவேண்டும்.

முடிவில் ஒன்றை சொல்லியே ஆகவேண்டும்.

தாத்தா எனக்கு பிறந்த நாளென்று இங்கே சொல்லிவிடாதீர்கள்.!

முதன் முதலாக அந்த குழந்தைகளை கண்ணுற்றபோது . . .என் பேரன் சிபி சொன்ன வார்த்தைகள் என் நெஞ்சை பெரிதும் நெகிழவைத்தது .அவனது முகத்தில் ஏதோவொரு குற்ற உணர்வு இழையோடியதைப்பார்த்தேன்.

_____________________________________________________________________

பெரம்பலூருக்கு அருகில் வாழும் நண்பர்கள் வசதியும் வாய்ப்பும் இருந்தால் ஒருமுறை அந்த குழந்தைகளை பாருங்கள்.

- பெரம்பலூரிலிருந்து வில்லவன்கோதை

விழித்துக்கொண்ட ஒரு சமூகம் !

2015-06-11T12:54:00.000+05:30

இரண்டு நாட்களுக்கு முன் ( 07 06 2015 ) ஒரு குடும்பச்சூழலில் கும்பகோணத்துக்கு முன்னால் இருக்கும் திருப்பனந்தாளுக்கு சென்றிருந்தேன். ஒரு காலத்தில் பேரூந்திலிருந்து இறங்கியதுமே இந்த ஊரின் பெரும்பகுதியில் உயரமான இடங்களில் சிவ சிவ என்ற எழுத்துக்கள் கண்களில் படுமாறு காட்சி தரும்.

பாடல் பெற்ற இந்த சிவ தலத்தில் ஆங்காங்கே கருவிழிகள் நீர் உகுக்கும் அவலச் சுவரொட்டிகள் பரவலாக ஒட்டப்பட்டிருந்தன. இப்போதெல்லாம் நான் வாழுகின்ற ஊரிலும் பயணிக்கிற பிரதேசங்களிலும் இதுபோன்ற மரண அறிவுப்புகளை தினந்தினம் நிரம்ப பார்க்கிறேன். ஏற்கனவே அறிமுகமற்ற ஊர்களில்கூட சுவரொட்டிகளில் இருப்பவர்கள் யாராக இருக்கக்கூடுமென்று அறிந்து கொள்கிற ஆவலும் எனக்குள் இருந்திருக்கிறது.

இதற்கு முன்னால் அந்தந்த கிராமத்தின் கடைநிலை ஊழியர் ஒருவர் பரையடித்து இந்த துயரத்தகவலை தெருவெங்கும் சுமந்து வருவார். இறந்துபோனவரின் இயல்பான அடையாளங்களை சொல்லி அவரது இறுதி யாத்திரை நிகழுப்போகும் நேரத்தையும் ஊராருக்கு பரையடித்து சொல்லுவர்.

மாற்றங்கள் நொடிக்கு நொடி நிகழ்ந்து கொண்டேயிருக்கின்றன.

இன்று நெடுந்தூரம் பரவிக்கிடக்கிற உறவுகளுக்கும் நட்புகளுக்கும் இப்போதெல்லாம் கைபேசிகள் கண நேரத்தில் தகவல்களை சொல்லிவிடுகிறது. இரவோடு இரவாக இறந்தவரின் முகங்களோடு அச்சிட்ட கண்ணீர் சுவரொட்டிகள் தெருமுனையெங்கும் ஒட்டப்பட்டுவிடுகிறது. இன்றெல்லாம் இறந்தவர் எவரும் ஒருபோதும் ரகசியமாக விடை பெற்றுவிட முடியாது.

நான் மேற்கொண்ட பயணத்தில் என் கண்களுக்கு பட்ட இந்த சுவரொட்டி என்னை ஒருவகையில் ஈர்த்தது. அதில் காணப்பட்ட வாசகங்கள் என் நினைவுகளைப்பெரிதும் கிளறிற்று.

ஏறதாழ நாற்பது வருடங்களுக்கு முன்னால் இதே திருப்பனந்தாள் கடைவீதியில் ஒரு துணிக்கடை வாயிலில் சாதாரண தையல் எந்திரத்தோடு வாழ்க்கையைத் துவக்கியவர் தலித் சமூகத்தைச்சார்ந்த திரு டீ எம் மணி. இயல்பாக பகுத்தறிவு சிந்தனைகள் கொண்ட மணி காலப்போக்கில் தந்தை பெரியார் டாக்டர் அம்பேத்கார் சிந்தனைகளில் ஐக்கியமாகிறார். சுயமரியாதை சமூக விழுப்புணர்ச்சி அற்றுக்கிடந்த தலித் சமூகத்தை தட்டி எழுப்பி சாதி இந்துக்களின் அடக்குமுறையை எதிர்க்கிறார். தன் வாழ்நாளின் பெரும்பகுதியை தலித்திய சமூகத்திற்காக போராடிய திரு மணி தனக்குப்பின்னாலும் தன் போராட்டங்கள் தொடர நீலப்புலிகள் என்றொரு இயக்கத்தையும் தோற்றிவைத்திருக்கிறார்.

தந்தை பெரியார் சொன்னது போல பாபாசாகிப் அம்பேத்கர் செய்தது போல இரண்டு ஆண்டுகளுக்கு முன்னால் தன்னுடைய தலித்தியஅடையாளத்தை உதறி இஸ்லாத்தை தழுவுகிறார் .பிறக்கும்போது தலித்தாக பிறந்த

திரு டீ எம் மணி இறக்கும்போது

உமர் பரூக் காய் ஆக ஒரு இஸ்லாமியனாக இறந்திருக்கிறார். அவர் பெற்றெடுத்த மூன்று புத்திரர்களில் இளையவன் ஒருவனும் தந்தை வழியில் இந்து மதத்தை ஒதுக்கியிருக்கிறான்.

இறுதி காலம்வரை தலித்திய சமூகத்துக்காக போராடிய மணியின் மறைவுக்கு தலித்திய சமூகமே திரள்கிறது.

‘’உமர் இப்போது ஒரு இஸ்லாமிய சகோதரர். எங்கள் சக தோழரை எங்கள் மத வழக்கப்படியே நல்லடக்கம் செய்வோம் நீங்கள் எல்லாரும் இந்த நல்லடக்கத்தில் அமைதியாக கலந்து கொள்ளலாம். மலர் மாலைகள் .ஆரவாரம் ஆர்பாட்டம் அருள் கூர்ந்து எதுவும் வேண்டாம் !

- - - திரண்டெழுந்த தலித்திய சமூகத்துக்கு திருப்பனந்தாள் இஸ்லாமிய தலைவர் அறிவிக்கிறார்

கண்ணீரோடு விடை கொடுக்கிறது அந்த சமூகம்.

இந்தத் தகவல்களை நான் பயணித்த அம்பாசிடர் காரின் அந்த ஊரைச்சேர்ந்த ஓட்டுநர் என்னோடு பகிர்ந்து கொண்டார்.. இந்த தகவலின் உண்மைத்தன்மையை அறிய மேலும் இரண்டு சாதி இந்துக்களிடம் பேசினேன். தலித்துகளிடையே உமர் ஏற்படுத்திய விழிப்புணர்ச்சி அதன் விளைவாக தலித்துகளிடையே ஏற்பட்டுவிட்ட மாற்றங்களை பட்டியலிட்டனர்

தங்களுக்கு நிகரான சுபாவமும் மிகுந்த ஒழுங்கீனமும் இப்போது ஏற்பட்டுவிட்டதை உரத்த குரலில் பேசினர்.தங்கள் செய்துவந்த விவசாயத்தொழில் இவர்களின் விழிப்புணர்வால் நசிந்து போனதை சொன்னனர்.அன்றாட வேலைகளுக்குகூட ஆட்கள் இல்லாமற்போனதை குறையாகக் குறிப்பிட்டனர்.

ஒருசமூகம் எத்தனை காலங்களுக்கு உறக்கத்திலிருக்க முடியும். காலங்காலமாக கொண்டிருந்த தங்கள் தலைமைப்பண்புகள் பறிபோனது இவர்களை பதறச்செய்கிறது. வேறென்ன..

வில்லவன் கோதை

11 06 2015

என் முகநூல் சித்திரங்கள் 05

வேர்கள்.

மறைமலை நகர் ரயில்வே ஸ்டேஷன் ..அமாசானில் இன்று...

இலக்கியம் பேசு ..அரசியல் அகற்று !56

குற்றமும் தண்டனையும் !

மறைமலை

நகர்ரயில்வே

ஸ்டேஷன்: குறு நாவல்

(Tamil Edition) Kindle Edition

Follow the Author

வெரும் 19 ரூபாய் மட்டுமே. !

மறைமலை நகர் ரயில்வே ஸ்டேஷன்.

ஒரு வேண்டுகோள் !

ருசித்துப் பாருங்கள் !

குத்தூசி ! ( ருசித்துப் பாருங்கள் ! )

உயிர் வதை: சிறுகதைத் தொகுப்பு (1) (Tamil Edition) by pandian g

நண்பர்களுக்கு முக்கிய செய்தி !

எனது முதல் மின் புத்தகம்.

தமிழர்தம் கம்பீரம் !

கொஞ்சம் தேனீர் !

நல் வாழ்த்துக்கள் !

மரங்களோடு ஒரு மல்யுத்தம் !

தாத்தா பாட்டிகளை கொண்டாடிய தனியார் பள்ளி !

மேடையில் மலர்ந்த காதற் பொதுமறை !

தமிழர்தம் கம்பீரம் !

அந்தப் ( ஜனநாயகப் ) படுகொலைகள் இனி நடக்காது !

பெரம்பலூருக்கு அருகில் . . .

கடவுளின் குழந்தைகள் !

விழித்துக்கொண்ட ஒரு சமூகம் !

உயிர் வதை: சிறுகதைத் தொகுப்பு (1) (Tamil Edition)
by pandian g