猫魚看世界

自制臘鴨腎

2015-07-08T15:19:00.000-07:00

夏天又到啦, 係時候曬下臘鴨腎, 方法超簡單但需要少少耐性, 不過自家制食得安心, 少少工夫係值得既.

首先買新鮮同大隻既鴨腎, 洗乾淨同清晒肥膏後就用廚房紙抺乾.

預備一個玻璃密實盒同粗鹽, 把乾身既鴨腎一層層咁放入盒. 次序係最底放鹽, 跟住一層鴨腎一層鹽,.

記住最頂個層要係鹽, 之後蓋實放係雪櫃.

雪左一星期之後拎番出黎,D鹽會濕左咁, 因為佢吸左鴨腎D血水.

跟住要沖水, 盡糧把鹽沖走, 唔好比鹽痴係鴨腎既面度, 如果唔清乾淨就會變到好咸, 食落會有苦味.

之後放係筲箕隔水, 我就用洗沙律菜個轉盆fling 乾佢, 咁就可以拎出後園曬太陽啦.

曬最少5 日之後會變硬, 再曬多一個星期就可以用黎煲湯或者煲粥食啦.

我怕有烏蠅嬲唔衛生, 所以用雞蛋盒裝起放係室內窗口曬, 間唔中反轉下佢, 慢慢會變深色同有香味.

呢堆囇左3星期, 變到好硬好實同好香!! 大工告成!

蜂蜜薑茶－驅寒暖胃，美白減肥

2015-04-08T13:25:00.005-07:00

生薑蜂蜜茶的功效:
可以去斑，使皮膚白嫩光滑，面容紅潤。蜜糖薑茶適合體質虛寒人仕，比如怕冷，手腳冰凍，月經期間小腹冷凍，經痛。

營養價值：
薑茶有溫經散寒，驅寒暖胃，預防感冒的作用。薑含有豐富蛋白質、多種維生素、胡蘿蔔素、鈣、鐵、磷等。薑中所含的姜辣素進入體內後，有很強的抗氧化效果，可防止或減少脂褐素的沉積，預防老年斑。許多老年人的身體，尤其是臉部和手背佈滿了點點的褐斑，這就是體內自由基作用的結果。

蜂蜜中的營養成分很豐富，長期吃蜂蜜的人體內抗氧化物的水平會有很大的提高，可以使皮膚白嫩光滑，面容紅潤，還能防裂補血。

將蜂蜜與薑茶混合飲用還能起到減肥的作用。薑茶可調節生理平衡，而蜂蜜遇到生薑後，其減肥功效得以成分發揮，但需長期堅持飲用，但不可一次飲用過多。建議每天早上一杯，沖涼前一柸就可以。據書本記載的見證：連續喝兩個月飲用後，身體變溫暖，手腳冰冷的『怕冷症』體質明顯改善，體重可減輕約十公斤。皮膚變得細嫩。去掉多餘贅肉，腰圍變細。

製作方法：
將生薑切碎剁成糊狀，裝在杯子中，加入適量熱開水，浸泡5-10分鐘後後加入適量蜂蜜，攪拌均勻即可飲用。經期時飲用要注意不要用槐花蜂蜜，因為它是涼性的，要用棗花蜂蜜，益母草蜂蜜最好。

生薑其它妙用:
1.治面部暗瘡--早晚用熱薑水清洗面部，持續兩個月時間，暗瘡可消失或減輕，對皮膚乾燥也有很好效果。

2.治神經衰弱--每天空腹早晚各飲熱生薑可提神、補氣，持續飲用對神精衰弱、頭暈、煩躁等病症具有良好療效！

3.治醉酒--以熱薑水代茶飲用，可加速血液流通，消化體內酒精，還可加入適量蜂蜜可讓身體直接吸收以緩解醉酒。

4.生薑可以有效預防感冒，增強身體抵抗能力。

5.生薑茶在女性經期提前兩到三天飲用對消除不適和減輕痛經有很好的的效果。

蜂蜜飲用注意事項：
1：不可以用開水沖或高溫蒸煮蜂蜜，因為不合理的加熱，會使蜂蜜中的營養物質嚴重破壞，蜂蜜中的酶失活，顏色變深，香味揮發，滋味改變，食之有不愉快的酸味。高溫使蜂蜜特有的香味和滋味受到破壞而揮發，抑菌作用下降，營養物質被破壞，因此，蜂蜜最好使用60℃以下的溫開水或涼開水稀釋後食用，特別是在炎熱的夏季，用冷開水沖蜂蜜飲食，能消暑解熱，是很好的清涼保健飲料。

2：不宜與豆腐同食。豆腐味甘、咸，性寒，能清熱散血。與蜂蜜同食易導致腹瀉。同時蜂蜜中的多種酶類，豆腐中的多種礦物質、植物蛋白、有機酸等，二者同食不利於人體的生化反應。

3：不宜與韭菜同食。韭菜含維生素C豐富，容易被蜂蜜中的礦物質銅、鐵等離子氧化而失去作用。另外，蜂蜜可通便，韭菜富含纖維素而導瀉，容易引起腹瀉.

4：糖尿病人不能服用蜂蜜，每百克蜂蜜碳水化合物中葡萄糖約為35克，果糖40克左右，蔗糖約2克，糊精約1克。葡萄糖和果糖均為單醣，進入腸道後無需消化可直接被吸收入血，使血糖升高，蔗糖和糊精略經水解後即可被吸收，因此，蜂蜜的升血糖作用特別明顯。從這一點來看，糖尿病人是不能服用蜂蜜的。

5：蜂蜜不能盛放在金屬器皿中，以免增加蜂蜜中重金屬的含量。

月亮蝦餅

2014-01-14T11:22:00.001-08:00

最近係YouTube 度發現左楊桃美食網，入面介紹左好多簡單又好味既餸菜，比如彊蔥炒飯同埋本文介紹既月亮蝦餅。叫做月亮係因為佢用圓形既春卷皮做，成品就好似一個月亮咁！

做法超簡單，蝦去頭去殼去腸後用刀背壓成泥，之後用手拿散佢，順一方向搞至起膠，一定要同一個方向，之後落鹽糖雞粉胡椒粉䓤同少少生粉再搞一陣，就可以塗係軟身既春卷皮上，唔好太厚身，上面再放一張皮，用手㩒實佢，再用义係面度隨意义幾下，等煎既時間有位比空氣走，煎出黎就好靚啦！

另一變化係加豬肉碎，但係要煎耐少少！

燉蛋酒- steamed eggnog

2013-01-04T18:47:00.002-08:00

Eggnog - 蛋酒, 通常聖誕節左右就會係超市見到有得賣. 可以加落coffee, 或者voka, brandy 度飲, 本身甜甜地劑飲都可以. 不過佢有生雞蛋, 所以唔係人人都岩飲, 怕有細菌.

忽發奇想我就拎佢去燉, 扮燉蛋. 但係eggnog 本身唔夠蛋, 就咁燉會凝結唔到, 所以要加多一隻蛋, 唔駛落糖, 由咁加埋d 蛋酒包保鮮紙中火燉10分鐘搞掂. 出黎好香好滑添.

醫聖(医圣) 2天痘立消 + 消痘袪印暗瘡膏

2013-01-03T14:22:00.003-08:00

醫聖呢個品牌話就話係北京同仁堂出既, 不過已經比北京同仁堂係自家網站度貼左通告, 話係假冒同仁堂化妝品. 其實醫聖呢個品牌係一間中法合資深圳市星孜化妝品有限公司出架, 係產品個盒底寫得清清楚楚.

我之所以會買佢既產品係因為高登討論區度有人試過呢隻暗瘡產品話好得, 上網查過佢既成份話係全中草藥, 又只係幾拾蚊包埋郵費, 咁就諗住試下. 佢既主要成份如下:

靈芝（清毒.促循环）、川芎（活血化瘀）、側柏葉（凉血消炎）、珍珠（清斑减皺紋）、甘草（美白）、茯苓（清除自由基、抗氧化）、杏仁（補血養顏）當歸（活血）、细辛（祛風消炎）、苦参（抑菌）、冬瓜籽（美白）、薏仁（抑制色素）等。

用左三日之後面上既暗瘡真係收左好多，雖然都仲係紅, 但係就無再新發既暗瘡. 用左半支精華液同樽cream 之後已經好得8899, 大概係一個月既時間, 因為我只係夜晚用. 過程中冇拮同拿既感覺, 都冇難聞既化學品味, 佢樽cream 係有少少香味, 但係唔似化學合成既香味, 反而似樹木植物味. 係塊面有少少乾同甩皮, 訓之前搽番多少少保濕晚霜就ok 啦.

過左一個月後, 我就停左用呢套消痘袪印套裝, 因為佢太有效, 搞到我唔敢係咁用, 一黎怕佢成份有d 咩野, 二黎我怕皮膚習慣左d 藥性, 再爆暗痴個陣呢套野變左無效. 所以清晒d 舊暗瘡又無發新野既時候我就搽呢支痘立消做預防. 訓之前搽少少係成塊面, 尤其係易生暗瘡既下巴同額頭, 就係咁我塊面又變番滑滑啦. 係仲有暗瘡印要清, 不過好淡, 上左粉就唔覺.

係香港既係可以用淘寶買, 係海外呢就要aliexpress, 查tongrentang acne & scar spots. 我買個價係消痘袪印套裝cad $8.5 一套, 痘立消cad $8.5 一支, 全部包郵費.

杏仁酥皮條

2012-12-06T12:49:00.005-08:00

網上睇到人地整杏仁酥皮條好容易，咁我又走去試下。發覺真係好易整同好好食，基本上係唔會做唔到，除非你唔睇爐火，由佢焗燶。主要材料得三樣野，酥皮，糖同杏仁粒。需要一個焗爐，一個焗盤，牛油紙同埋少少既面粉。

酥皮我買現成，放係雪櫃下格度解凍一晚後就可以用啦，切一條條，大細自己預。放上鋪左牛油紙既焗盤上，唔駛涂油。跟住放糖係面，再放杏仁粒。放杏仁粒既時候要用少少力壓向酥皮，唔係杏仁粒會痴唔實。放入焗爐375F 大約15 分鐘，見到佢變到金黃金色就得啦。

成品

現成急凍酥皮

焗到中途

焗栗子 ﹣ mok 殼

2012-12-06T12:38:00.002-08:00

係超市見到好靚的栗子，又大粒又飽滿，忍唔住買左少少返黎整焗栗子。用水洗一洗之後就要界開粒栗子，唔係會焗焗下焗爆粒栗子。原來界開粒栗子都有少少學問，我試過用刀界十字，界直，界橫，同用較剪。最快手係用較剪剪一下，最慢最小心係用刀界十字。不過努力過係真係有收成架。用刀界十字係慢，但係焗完出黎粒栗子好易就甩到個殼同衣，不費吹呼之力。但係用較剪就咁剪一下個d，焗完出黎整成分鐘都未整甩個殼，仲會整到粒栗子散晒。真係一分耕耘一分收穫。

有朋友教我下次焗之前洒d 砂糖，咁焗完會又甜又易整甩個殼同衣。下次試！

French Verbes Conjugaison - Primaire groupe et deuxième groupe

2012-11-25T20:24:00.000-08:00

今日同大家分享我既法文常用動詞表 (french verb), 第一同第二類先.

1^er Groupe – ER

	Parler	Aimer
Je/J’	Parle	Aime
Tu	Parles	Aimes
Elle/Il/On	Parle	Aime
Nous	Parlons	Aimons
Vous	Parlez	Aimez
Elles/Ils	Parlent	Aiment

Spéciaux 1^er Groupe

	Manger	Voyager
Je	Mange	Voyage
Tu	Manges	Voyages
Elle/Il/On	Mange	Voyage
Nous	Mangeons	Voyageons
Vous	Mangez	Voyagez
Elles/Ils	Mangent	Voyagent

	Appeler	Jeter
J’/Je	Appelle	Jette
Tu	Appelles	Jettes
Elle/Il/On	Appelle	Jette
Nous	Appelons	Jetons
Vous	Appelez	Jetez
Elles/Ils	Appellent	Jettent

	Envoyer	Nettoyer
J’/Je	Envoie	Nettoie
Tu	Envoies	Nettoies
Elle/Il/On	Envoie	Nettoie
Nous	Envoyons	Nettoyons
Vous	Envoyez	Nettoyez
Elles/Ils	Envoient	Nettoient

	Acheter	Préférer
J’/Je	Achète	Préfère
Tu	Achètes	Préfères
Elle/Il/On	Achète	Préfère
Nous	Achetons	Préférons
Vous	Achetez	Préférez
Elles/Ils	Achètent	Préfèrent

	Commencer
Je	Commence
Tu	Commences
Elle/Il/On	Commence
Nous	Commençons
Vous	Commencez
Elles/Ils	Commencent

2^e Groupe – IR

	Finir	Choisir
Je	Finis	Choisis
Tu	Finis	Choisis
Elle/Il/On	Finit	Choisit
Nous	Finissons	Choisissons
Vous	Finissez	Choisissez
Elles/Ils	Finissent	Choisissent

Plus de verbes : Réussir, grandir, maigrir et grossir

Mario Badescu 免費試用品- 暗瘡皮膚

2012-11-25T20:19:00.001-08:00

Mario Badescu 呢個品牌唔上網專登search 都唔知佢既好, 好處係佢唔單止價錢平, 對暗瘡好有效之餘仲有得試過岩先買. 點樣試過岩先買? 去佢網站做份問卷, 分析下自己皮膚係咩類型同有咩問題之後, 佢地就會免費郵寄一d 覺得岩你用既試用品比你, 等你試過覺得好先買. 無錯, 係唔駛錢, 郵費都唔駛.

相入面就係我收到既試用品, 有cleanser, toner, exfoliating scrub, moisturiser, eye cream, 專門針對暗瘡皮膚既drying cream 同埋drying mask.

仲有一張recommended products list, 有兩支推介既產品寫明冇贈送到. 不過送既野都唔細支, 尤其係盒face scrub 同盒drying mask.

朝早用既產品: Enzyme cleaning gel, Special cucumber lotion, collagen moisturiser SPF15, Hyaluronic Eye cream. 首先講支洗面gel, 用黎落妝唔得, 但係朝早用黎洗面就ok, 唔覺得乾, 又唔會淋. 支toner 就無咩特別. eye cream 好輕身, 反而要講下支moisturiser, 冬天用都夠保濕, 但係又唔heavy. 反正我用完後皮膚無差左.

夜晚用既產品: Strawberry Face Scrub, Drying Mask, 仲有支drying cream 無影到. Face scrub 有士多啤利杍去死皮,用完塊面又真係幾滑,輕輕力死皮都去得七七八八! 一定要推介比暗瘡皮膚既就係佢個drying cream 同drying mask, 前著訓之前搽係暗瘡位過夜, 就算係大大粒既石頭瘡都可以3 日就收晒, 係仲有少少共起, 不過比起平時要個幾星期先收到咁細粒, 支drying cream 算好有效, 唔好既係佢會hi 到成張被同枕頭都係, 同埋佢搽左係白色一達. 支drying mask 就搽成面, 用完暗瘡都出少左, fu 完無覺得塊面好乾, 唯一投訴係去唔到暗瘡印.

再黎Google Nexus 7 Case

2012-11-14T18:12:00.003-08:00

自從上次係dealextreme 度訂左個白色機套, 就想要個黑色既, 可惜同款既賣晒, 咁唯有訂第二個款. 今次呢個款比較斯文, 質地都可接受, 唔係硬壳款, 而係四隻角度有條橡筋套住.

問題就出係呢度啦. Nexus 7 既右上側就有一列制, 即係power, volume 既control. 套好部機之後, 條橡筋就會阻住左呢三個第, 好難先掂到. 不過都有方法解決, 就係唔套右上角個條橡筋, 其實剩番個三條橡筋都張部機套得好實, 唔係問題. 想買可以click here, US$7 有找.

另一個套係一個袋, 方便我張部機連個白色硬機壳成部放入去, 咁放係手袋拎出街都唔怕比鎖匙整花部機.

想買呢個袋可以click here, US$ 5 都唔駛, 仲包郵費添.

Fondue Folie - 鬼佬火煱

2012-11-10T19:26:00.002-08:00

如果去Quebec 旅行既話，繼smoke meat, poutine 之後就要試下 fondue ﹣ 即係鬼佬火煱。今日介紹呢間餐廳係專食火煱，由頭盤到甜品都係火煱形式，係個湯底唔一樣者。間野係Sherbrooke, quebec, 叫 fondue folie. 如果無預約就要5 點幾到，唔係週未一定無枱，因為起碼食兩個半鐘，傾下野飲下酒既話無三個鐘都唔駛走。

Fondue Folie Sherbrooke, Quebec 既 table setting, 中間紅色個舊野就係食主菜用既爐.

Fondue Folie Menu，好多選擇，記憶中好似係得法文，可以去之前上佢個網站睇下個menu 先，又或者去到問d 侍應。

Fondue folie 內的其中一角，裝修雅緻，環境舒適

Entrée - Fondue formage Suisse

其中一個湯，唔記得名。

Entrée ﹣ 有面包同pickle

主菜 ﹣ 自己選四款醬汁同兩款肉／海鮮，我選左鴕鳥肉（autruche) 同帶子 (pétoncles), 跟蔬菜同薯仔，湯底係牛肉洋蔥湯（Bouillon de bœuf et oignons)

呢個係鹿肉(wapiti) 同野牛 (bison)，無錯，佢個menu 係有好多野味，呢個都係quebec 菜既特色。遺留左既野味係野豬（Sanglier)。

強烈建議帶子，好甜好鮮！

甜品 ﹣ folie à l'érable, 楓糖火煱跟新鮮什果粒同棉花糖，仲有左下角個細細蛋榚仔。

甜品 ﹣ folie au chocolat noir, 黑朱古力火煱。

最後飲柸咖啡或茶，滿足！

又滑又爽既生滾豬潤粥

2012-10-26T08:41:00.003-07:00

生滾豬潤粥

之前試過自己煲豬潤粥，唔識處理d 豬潤，搞到出晒血水，煲粥既顏色變到深啡色同稀晒，唔好食。上網參考左其他人既做法，有d 就先出水，有d 就用油黎撈一撈，有d就用白醋加水浸，我今日就試用白醋加水浸既方法，切好一片片豬潤之後就用水洗乾淨，跟住用加一兩茶匙既白醋，洗完後豬潤都濕濕地，就唔駛再加太多水。10 分鐘後倒左d 醋水，再用水沖下，加油撈下。白粥煲好之後就可以大火放豬潤落去滾啦。記住一放左之後就好熄火，搞散d 豬潤，咁佢地就會熟架啦。最後加彊絲就得啦。

白粥

豬潤，用白醋浸10分鐘後倒掉醋水，加油。

如果覺得個白粥唔夠味，可以加少少雞粉，又或者一開始用清雞湯黎煲個粥，想健康d 既話就加乾元貝，細粒個d 都得架啦，又多樣野咬下。

Needle felting a cat using cat hair 用猫毛做小手工

2012-10-20T22:20:00.002-07:00

買左一本書話用猫毛黎整一d 小手工, 發覺好易整同好好玩. 本書叫Crafting with Cat Hair: Cute Handicrafts to Make with Your Cat, 入面仲有教整小袋仔, 書套同掛畫. 呢排亞猫甩好多毛, 今日我就試整封面個隻手指公仔. 書入面既指示好清楚, 跟住一步步黎做唔駛一個鐘已經整好啦.

大概係第三四個steps之後, 個公仔差唔多成型啦.

搞左一個鐘, 終於整完啦. 仲有猫毛多, 所以我就整多個波. 呢個係個背面, 正面未整到, 因為冇買細珠仔黎做眼.

當猫遇上自己既猫毛 -- 聞下, 咬下, 抱下.

DIY Stained glass window panal - 彩色玻璃拼花窗

2012-10-20T19:58:00.000-07:00

近排愛上整stained glass, 參加左社區既一個工作坊，一星期3 個鐘，經過年幾既努力，就整左3 個 copper foiled projects.

Stained glass project 1 - finished product

Stained glass project 2 - finished product

Project 3 stained glass- finished product

又平又靚既Google Nexus 7 Case - DealExtreme

2012-10-11T07:13:00.000-07:00

等左Google 出佢個nexus 7 既case 好耐, 但係都未出, 唯有周圍搵下, 又上網睇下. 發覺kindle fire 既套無錯係岩nexus 7, 但係最少都30 幾蚊, 仲要d 制既位唔係岩晒. 上網見到 dealextreme 有少量專係比nexus 7 既套, 仲要係10 蚊有找包運費, 咁就試下買一個. 雖然要等一兩個星期, 但係收到件貨之後好满意.

包裝

角位壓左 "Google Nexus 7" 呢幾個字

背面既入面- 即係掂住你部機背個一面. 質地都算軟熟

背面既外面

好輕易就放到部機入去, fit 晒d 位

側邊制位 - d 位其實好fit, d 膠邊位都好滑手, 摸上手唔會介到.

機底制位

睇清楚d, 機背speaker 位都有預到, 唔會好似kindle fire d 套咁cover 左個speaker

另一功用: 個套仲可以做一個stand, 斜斜地放係大比度睇岩晒., 好似下圖咁啦.

想買呢個套, 可以click here . 黑色既係here , 值得一提既係個套有粒磁石, 即係好似ipad 既 smart cover 咁. 當部tablet 係standby mode 既時候, 打開個cover 既話, 部機會自己wake up, 合番埋個cover, 就會自己sleep.

< 利益申報: 用上面條link 買野, 我會有積分, 大約你買$100 野, 我有10 個points, 10 個points 可以換$1 既野, 唔該各位呀! 其實DealExtreme 仲有好多Iphone 5 既case賣, 兩三蚊有找. >

薑汁紅糖淡奶黑涼粉

2012-09-16T19:44:00.001-07:00

黑涼粉就係細個係街市d 婆婆伯伯賣一大磚既黑色涼粉, 近年已經好少見到有得賣. 要食涼粉一係去糖水鋪或者係食罐頭, 網上都有教人點樣去藥材鋪買涼粉草自家整. 猫魚今日就介紹另一個方法, 就係用粉開, 好似整啫哩咁, 可以自己調教個質感, 水d 定傑d 試多幾次就好易控制到.

制成品: 薑汁紅糖淡奶黑涼粉

材料好簡單, 就係呢盒即食涼粉, 我呢盒係星湖牌, 一盒有12小包, 一包開到大約300ml 水.

即食涼粉包

做法超簡單, 先用少少溫水搞溶左d 粉, 跟住倒滾水落去, 一邊倒一邊搞, d 粉本身係咖啡色, 搞到咁上下佢會變左黑色. 要搞到d 粉溶晒, 咁食落先唔會有粉粒. 搞好放埋一邊等佢變涼, 大約30分鐘, 就算唔放入雪櫃佢自己都會凝固.

室溫下凝固既即食黑涼粉

食既時候加薑汁紅糖同淡奶就食得啦. 無薑汁紅糖可以自己窄少少薑汁, 等無咁寒涼.

太古薑汁紅糖

緊急去又紅又痛既暗瘡--飲食篇

2012-09-16T19:44:00.000-07:00

最近飲得咖啡多, 又壓力大, 搞到額頭同下巴係咁出暗瘡, 雖然唔大粒但又紅又痛, 仲要一出出好多粒, 一堆仔咁. 不嬲都會出一兩粒仔暗瘡, 平時唔理佢一兩日都會收乾, 唔會係咁標粒粒, 不過今次係三四日都唔收, 仲越出越多, 搞到塊面仲好敏感.

唔想再樣衰落去同要去更多既暗瘡疤, 我好認真咁安排自己呢兩日既飲食同護膚. 主要就係保濕同消炎, 外用同內服.

飲食:
1. 飲好多好多既水. 停飲咖啡, 汽水.
2. 飲竹蔗茅根煲羅漢果水, 用冰糖調味. 有馬蹄既可以加埋落去. 我煲左一大樽2公升, 大約一日就飲左1/3.

竹蔗茅根煲羅漢果水

3. 食一大碗百合蓮子雪耳糖水, 熱食.

百合蓮子雪耳糖水

4. 食涼粉, 黑色個隻, 加薑汁紅糖同淡奶食.

涼粉加彊糖同淡奶

4. 食白粥做主餐, 怕佢無味唔想食就加d 乾元柱調味. 盡量唔好食其他野.
5. 食vitamin C, B+ 同omega 3, 跟份糧食就得啦.

外用:
1. Clay mask, 咩品牌都得啦. 洗完面後用佢黎fu 一陣. 跟住搽番toner, 保濕既lotion, 同埋搽少少既茶樹油係額頭同下巴. 覺得皮膚乾就再搽番d 保濕lotion.
2. 開加濕機. 唔好比皮膚太乾, 太乾就會出油, 咁就再衰d. 唔好再搽d 油淋淋既cream , 唔係有排都未好.

蓮子百合雪耳糖水

2012-09-16T19:18:00.000-07:00

呢個糖水好清好潤, 臨訓前食都唔會覺得好濟, 而且仲好易煲.

蓮子,百合,雪耳

首先要浸左d 材料, 大約一個鐘左右就淋啦. 蓮子浸淋左後好容易就去到芯, 緑色個條芯唔要得, 唔係會燥熱.

未去芯既蓮子

浸淋左既蓮子

跟住就係雪耳要去左個掟, 整散佢, 細細朵易入口. 有d雪耳係煲完都唔淋既, 係爽口既, 有d 就會煲完變到好淋好滑, 買個陣唔清楚就問下老闆. 同埋有黃色同白色, 我偏向黃色個隻, 感覺少d 漂染劑. 圖中個朵係黃色既.

大朵雪耳

百合

煲一兩個鐘, 最後加冰糖調味就得啦.

制成品: 蓮子百合雪耳糖水

生蛇(胞疹) - 抗戰篇

2012-09-14T15:05:00.000-07:00

胞疹即係老一代講即生蛇，雖然未至於生一圈就會死，但係個種痛同痕係真係好煩人. 尤其係生係塊臉上, 就更加令人難受. 生係嘴唇度就

其實好多人身上都有呢種 Shingles virus, 佢既真身咪就係細細個出既水痘 chicken pox 囉. 好番之後就會lay 埋係神經線, 但抗抵力差時就會走出黎再折磨你. 生係嘴唇度個d cold sore 唇瘡都關佢事.

對付就黎想發既cold sore, 一感覺到有嘴唇有少少紅同桔就即刻用呢支Blistex medicated lip ointment 潤唇膏黎搽, 就算桔桔既感覺無左, 都仲要keep 住搽多一兩日. 同時食vitamin C 提高身體抵抗力. 再嚴重d 又或者cold sore 已經發緊, 有腫同水泡仔既話, 就用呢支Abreva cream, 可以幫到快d 好.

如果係生係身體其他部位, 比如臉, 腰, 搽呢d 藥膏係無效架. 只可以食vitamin C 提高抵抗力, 如果食高劑量既話會幫到快d 好番, 但係小心副作用係肚瀉. 如果生蛇既面積好多同發得好勁, 就一定要去睇醫生, 最有效既始於都係西藥Valaciclovir.

由上而下: Valaciclovir, Blistex medicated lip ointment, Abreva cold sore treatment

生蛇好番之後都要keep 住保養自己, 唔好比佢咁易覆發. 除左做多d 運動, 食清淡些, 仲可以食L-Lysine. Genestra 個隻就係capsule 裝, 比較易吞, 同埋佢係全植物提煉既, 所以係Finest nutrition 既四倍價錢, 同一個劑糧計. Finest nutrition 個隻係tablet 裝, 要預備一柸大水飲先吞到, 不過佢一粒等於Genestra 兩粒既劑糧. 食左一個月後, 平時好易番發既cold sore 都冇再返黎搵我. 係好有效既supplement.

L-Lysine, 預防生蛇,唇瘡好有效.

Kombucha scoby - 紅茶菌

2012-08-08T09:54:00.003-07:00

係網上睇完有關紅茶菌(Kombucha) 既資料覺得好有趣, 既可以保健, 又可以自己動手整好味既飲料, 所以就去左有機既超市買左呢幾支紅茶菌返黎自己培養啦. 我買既係本地出既紅茶菌, 叫"Rise Kombucha", 個玻璃樽可以留番第時入樽用. 佢有四隻味, 兩種大細 355ml 同1L, 買細支就得啦.

原理其實就係化學實驗既發酵 (fermentation), 不過因為買番黎既紅茶菌菌量太小, 所以要先做培養菌種(cell culture), 跟住先可以拎去發酵. RISE Kombucha 個網站上有詳細步驟教人點樣自己培養出紅茶菌, 我就唔係度再重覆啦. 重要既係注意溶器既清潔, 我係用滾水洗個溶器, 等佢涼番先倒支RISE Kombucha 落去, 網站話用布, 不過我無乾淨既布, 所以用廚房抺手紙代替, 對摺厚厚地就算啦. 用既玻璃樽就係好立克粉既樽, 樽口岩岩夠大放到隻手入去, 唔好浪費麻.

養菌 - 倒一支355ml 紅茶菌茶到乾淨既玻璃樽

養菌第一天.

養菌第四天

係第四日已經有少少菌膜係表面形成, 但係未夠厚, 要再等多幾日.

養菌第六日

到第六日, 菌膜形成左薄簿既一塊, 邊位有少少摺疊, 係因為移動既時候搖到入面既水, 所以唔好成日移動佢.

養菌第八日

過左一個星期啦, 見到面面有層白白地色既野嗎? 再厚多一兩培就可以用黎發酵啦.

Google Nexus 7 - 影相篇2

2012-08-02T08:59:00.002-07:00

同大家分享下用"Camera Launcher for Nexus 7" 影出黎既相既效果, 用黎擺上網就ok, 係大mon 度睇就已經起晒牙,微粒好粗下.

柴

金桔樹

薰衣草

Google Nexus 7 ﹣ 影相篇

2012-08-01T18:14:00.003-07:00

Google 新出既平板電腦 Nexus 7 16G 都只係賣 CAD＄299，計埋稅同郵費＄320有找，對於我黎講好抵。Nexus 7 個 monitor 係真係好sharp，而且部tablet 都run 得好順好快。一開盒就已經pre-set 左我 Google 個 account, 入左passport 之後就可以synchronize 晒我google account 既野，包括calendar, gmail, google drive，youtube, 基本上平時要用既野都幫你synchronize 晒，好貼心。Synchronized 後仲會送＄25 google play credit, 比你上去買apps, 買書，好貼心。

聽落好似乜都好，但係佢個shipping 真係好麻煩，由place order 到收到足足一個星期，而且仲要用UPS，由美國ship過黎。開頭都諗緊UPS 個brokerage & duty fee 會唔會好貴，好彩唔駛比。同埋部機係唔包earphone架，我諗住係包埋架。呢個都唔係太大問題，最大問題係佢無影相個app，一開機都唔知點用佢個front 1.2 Mega Pixels camera 黎自拍。不過只要google 一下，就好快搵到解決辦法。

方法就係download 呢個"Camera Launcher for Nexus 7" app, 免費既，可以影相，拍片同埋影panorama pictures.

腐竹雞蛋糖水

2012-07-30T21:11:00.000-07:00

夏天天氣酷熱,特別鐘意飲冰凍飲品. 不過成日飲氣水凍檸茶都唔係辦法, 糖份又高又無益. 唯有煲下糖水雪凍飲, 扮下健康.

腐竹雞蛋糖水飲落同豆漿差唔多, 不過仲有口感, 因為有未溶既腐皮同雞蛋花可以食下. 仲有心機既話仲可以加白果同薏米. 腐竹由黃豆做成, 有豐富植物性蛋白質, vitamin B1, B2 同纖維, 可以降血脂,降血壓, 不過有痛風(尿酸)既人就應該小心食用.

今日用既係香港元朗出既圓枝腐竹皇, 半包就夠煲半煲仔, 包裝上寫用加拿大黃豆精制, 不含有害化學物, 不含漂白劑, 仲要一煲即焾. 而事實上煲緊時係有好香豆味, 同埋煲半個鐘左右已經溶得7788. 最後加冰糖同雞蛋就搞掂啦.

圓枝腐竹皇

腐竹雞蛋糖水

港式雲吞

2012-05-30T14:58:00.001-07:00

太懷念香港既雲吞, 今日走去超級市場買左雲吞皮, 係薄身個隻, 再買埋材料, 就返屋企包雲吞啦.
賣相都唔錯掛? 以下既分糧夠整張相入面咁多既雲吞, 大約有40 隻咁上下啦.

材料:
肥豬肉碎 --- 150g
蝦 --- 150g , 大約有10 幾隻咁上下
蛋-- 一隻
大地魚碎--- 少少

調味料:
生抽-- 1 茶匙
糖-- 1/2 茶匙
生粉-- 1 茶匙
胡椒粉-- 少少
凍滾水-- 2 茶匙

我個人偏好肥既豬肉碎, 覺得食落會滑好多. 而大地魚碎呢, 就係秘訣啦. 超級市場有時都有大地魚乾賣既, 買左返黎呢要白鑊煎, 唔好落油唔好落水, 煎到兩面都脆身同聞到香味呢, 就得啦. 仲熱既時候呢就整碎佢, 凍左就可以放入玻璃瓶度備用啦.

做法:
1. 豬肉碎順時針, 一個方向攪至起交. 大約5, 6 分鐘.
2. 加入調味料醃30 分鐘
3. 蝦去嗀去腸, 切細粒, 順時針一個方向攪至少少起交, 大約10 分鐘, 其間可以加入少少凍滾水.
4. 加入豬肉碎, 輕輕拌勻
5. 蛋打勻, 放小碗內.

6. 包雲吞, 我係用蛋汁黏合雲吞皮既.

自家制牛肉乾

2012-05-30T14:25:00.004-07:00

方法超級容易,而且味道同質感都唔錯, 好有肉汁同咬感.

牛肉碎 -- 1 lb
胡椒粉 --- 少許
生抽 --- 2 湯匙
老抽--- 2 湯匙
糖--- 2 湯匙
蜜糖-- 2 茶匙
五香粉 -- 1/2 茶匙
米酒- 1 湯匙

1.牛肉洗淨, 順時針打至起絞, 加入調味料.
2. 預備一個長身既焗盤, 放牛油紙係底.
3. 加已調味既牛肉係焗盤上, 用湯匙把牛肉壓扁, 平均分佈.
4. 放通風處吹乾, 大約三,四小時.
5. 放入己預熱焗爐中 (100C, 210F), 焗約30 分鐘至乾身.

猫魚看世界

自制臘鴨腎

蜂蜜薑茶 － 驅寒暖胃，美白減肥

月亮蝦餅

燉蛋酒- steamed eggnog

醫聖(医圣) 2天痘立消 + 消痘袪印暗瘡膏

杏仁酥皮條

焗栗子 ﹣ mok 殼

French Verbes Conjugaison - Primaire groupe et deuxième groupe

Mario Badescu 免費試用品- 暗瘡皮膚

再黎Google Nexus 7 Case

Fondue Folie - 鬼佬火煱

又滑又爽既生滾豬潤粥

Needle felting a cat using cat hair 用猫毛做小手工

DIY Stained glass window panal - 彩色玻璃拼花窗

又平又靚既Google Nexus 7 Case - DealExtreme

薑汁紅糖淡奶黑涼粉

緊急去又紅又痛既暗瘡--飲食篇

蓮子百合雪耳糖水

生蛇(胞疹) - 抗戰篇

Kombucha scoby - 紅茶菌

Google Nexus 7 - 影相篇2

Google Nexus 7 ﹣ 影相篇

腐竹雞蛋糖水

港式雲吞

自家制牛肉乾

蜂蜜薑茶－驅寒暖胃，美白減肥