حــواديـــت بنـــوتـة مصـــريــة

أمي

2022-10-23T19:52:00.005-07:00

مهو أكيد هاتجيلي في الحلم وتطبطب عليا مهو مفيش غيرها كان بيطبطب ويحن أمي يا حبيبة القلب والروح يا من تركتيني في ظلام من الليل وظلام النهار وحشتيني و وحشني أحس الدفا وأحس الحنان الخذلان وجعني كتير وألم بعد ألم يا أمي وحشني حضنك ودعواتك لأخواتي وحشني قلبك النضيف و وجهك الضاحك وحشتني الطيبة في كلامك ربنا يرحمك يا أعز ما فقدت يا أحن الناس عليا يا حضن وقت الزعل و وقت الجرح من خلق الله .

يا صافي وبرئ يا قلبي

2022-05-26T19:08:00.005-07:00

مش ممكن يكون حد بيسمع فيروز وبيحب البحر ويكون حد مش نقي مش ممكن تتجمع الصفات الحلوة الهادية غير في حد صافي وبرئ

اهو كلام وخلاص

2021-02-21T17:11:00.005-08:00

أنا من الناس اللي مبتهونش عليها العشرة بسهولة بس مع الوقت مبقيتش حابة اتعامل مع اي حد اساسا من كتر هوان الناس وتقلبهم الدايم حاجة توجع القلب وترهق الاحساس من غير الناس دي تحلى الحياة بلا هم

خطواتي الاولى في عالم الابتكار والتصنيع

2021-02-18T17:56:00.006-08:00

فضفضه

2021-02-16T06:27:00.001-08:00

وهو يعني لما تحن ليهم هيفيد بإيه الحنين لناس اتخلو عنك وقت ضعفك عارفين انك حبيتهم وبرضو جرحوك خلي المشاعر النبيله جواك تطردهم للابد وخلي ثقتك بنفسك وبالعالم تزيد الحب للاقوياء الانقياء واللي باعك مسيرة يدوق نفس الكاس والدوائر تدور وترجع الإبتسامة يا صديقي وترجع معاها الحياة من تاني توعدك بالفرح كالعادة خليك فيك من حنية قلبك ومتختصرش الحياة في ناس انانيه باعو طيبة قلبك وشهامتك معاهم حياتك مش هتقف على اللي خرج منها ابدا الدنيا بتجدد ومع كل حلم جديد ناس جديدة تشبهم ويشبهوك

يا بكرة ياللي جاي إتأخرت كدا ليه

2020-11-27T18:28:00.005-08:00

انا بكتب هنا من ٢٠٠٩ كان عمري ٢١ سنه وطول الوقت كنت بلمح في كتاباتي عن الغايب المنتظر الشخص اللي هيشاركني أوقاتي الحلوة وهيهتم بأشيائي البسيطة جدا ذي انه يجاملني ويقولي مدونتك جميلة زيك يا حبيبتي تخيلو معايا ان المدونة بتاعتي دي اللي يمكن بالنسبة لمدونات كتير حواليها ولا حاجة لكنها جزء مني ومن روحي وشخصيتي هنا بكون بعيدة عن كل الصداع والحياة العملية أكتشفت بعد مرور ١١ عام على مدونتي إنها أغلى ما أملك على الأنترنت المكان الوحيد اللي بلاقي فيه نفسي وبيسعدني وبيحررني من قيودي ومن ضغوط حياة ، نفسي المرة الجاية اكتب عن اللي هيشاركني حياتي واتكلم مع القمر عنه وارسم صورته واكتب عنه وعن حبه ليا ،الحتة الحلوة الناقصة في حياتي اللي هتكمل فرحتي وتونس وحدتي وهتاخدني معاها فوق عند القمر ، مش هنكون ابدا صورة وبرواز مش لايقين على بعض بالعكس هيحبني ذي ما انا بعفويتي وجدعنتي وهيهتم اوي بقلبي ومشاعري عشان غاليه عندي اوي أنا متاكدة انه هيعمل كدا أنا إحساسي دايما مبيكدبش متأكدة إن في الطريق فرحة كبيرة وحب حقيقي أستنيته من وقت كبير وإني هرجع تاني أشوف القمر بيضحك وأنا سهرانه معاه وبسمع صوت حبيبي .

والحلم اللي بدايته بحبك تبقى نهايته وداع !

2020-11-16T06:45:00.004-08:00

هو عيب اني ارتاح

عيب !

العيب هو التخلي ..انك تتخلي عن شخص كان راسم مستقبله كله معاك، وأنه عمره ما خذلك وأنه كان بيفكرلك قبل ما بيفكر لنفسه ، كل هدفه في الحياة أنه ينجح مشروع بدأتوه مع بعض وللأسف اول ما المشروع نجح جبتله بديل وقدمت نجاح المشروع ده للبديل علي طبق من دهب .

سيبهم لربنا

2020-10-10T18:19:00.000-07:00

سيبهم لربنا ربي قادر يرزقهم اضعاف اضعاف ما شعرت به من ألم وخيبة آمال بسببهم ، يعتقدون أن الأمور تندرج كلها تحت مسمى أسمه النصيب وهل نصيبنا من الوجع والاهانه ممن كان يدعون الحب والوفاء لنا نصيب !؟ وأنا قررت إني أمسحهم من ذاكرتي وابدلهم بذاكرة حديثة مليئة بناس وحياة غير قاسية وتركتهم لحكم ربي فهو عظيم الانتقام ، أعلم إنني أكتب هنا ولم يرى أحد كلماتي ولم يشعر أحد بوجعي ولكن ربي أعلم بعض الناس وإن كنت لا أرهم بشر من الأساس يتخيلون إن برحيلهم ينتهي كل شئ ولم ولن يفكرون ولو لحظة إن هناك من يدعو عليهم قد تكون ظالم ولا تشعر بألم المظلوم وهو عندك هين ولكن عند ربي عظيم ،هسيبكم لربنا وسأمضي مع الحياة وأسعى ولن أنسى وعد الله لي ( والله لأنصرنك ولو بعد حين ) ربما أنت أو أنتي تعيش حياتك الان وبكل بساطة لم يخبرك ضميرك بظلم شخص لكن دعوة المظلوم ستصلك في يوم من الايام ويرد الله الحق ، وتنطوي الايام الصعبه ويبدلها ربي بكل سعادة فالصبر جنة المؤمن فما بالك بالصبر على الظلم ، أتقو يوما ترجعون فيه إلى الله .

وإيه يعني !!

2020-07-22T20:09:00.000-07:00

على فكرة هو عادي جدا اننا نحب ناس ويطلعو في النهاية فنكوش الاهم من كل دا هو اننا حبينا الحب دا نعمة عظيمة من ربنا مش اي حد ربنا بيدهاله عشان الحب محتاج صدق والصادقين حبايب ربنا اللي قلوبهم كلها خير ، عشان كدا عااااادي جدا لما نلاقي ناس مش عارفه تحب ببساطة دول نشفق عليهم لانهم مقدروش يحسو ولا يعيشو بطاقة وحيوية الحب ،جايز ياللي هتقرا كلامي تشوفني بنت خيالية او من زمن تاني جايز اكون وانت بتقرا كلامي دا رسمتلي صورة بنت ساذجة مش فاهمة حاجة عن الحياة وبرغم اني عكس كل خيالاتك واني بنت ناجحة في شغلها وطموحة وحاجات كتير كدا حلوة فوق بعضها إلا إني مش ساذجة انا بس مش قادرة اتخيل ان في ناس بتعرف تعيش من غير الحب والعطاء والخير ، انا كتيررر اتجرحت وكلهم من ناس بحبهم ولكني عمري ما هفقد الامل مهما كان انا اصلا عايشة بقلبي البسيط دا اللي كله حياة وعلى رأي منير ومستحيل يا حزن راح تسكن ، انا عارفه ياللي في بالي انك محبتنيش وان ذي ما العقل والمنطق والمشاعر بتحكم انك متستهلش حتى اذكرك ف كلماتي لكني هذكرك عند ربي وفوضت امري كله لله ،ومش ممكن اندم على اي حاجة عملتها عشانك ومتقدرتش واتقابلت بجحود وبرود وبجرح مشاعر حد طيب وخلوق ذي عموما يا صاح الغياب يا صاحب القلب القاسي اعلم إن كل ساقي سيسقى بما سقى ولك مثل ما فعلت يوما ، اما انا فهكون دايما محبة للحياة وهفضل احب للابد لان طاقة الحب اقوى مليون مرة من طاقة الكره اللي ف قلوبكم اللي اذتوني بيها هتهزمكم وهتهزم اي ريح عاتيه وستستمر الحياة وستمر كل الخيبات وسيبقى الحب للابد .

فضفضه

2020-06-24T19:32:00.005-07:00

ليه اكتر ناس بنقرب لهم بالحب والخير بيخونو العهد معانا ليه مبيطلعوش في الاخر حبايب حققيين ليه بيظلمو قلوبنا الطيبة معاهم ليه بيبعدو وهما عارفين اننا بنحبهم ليه اناننين بيفكرو في نفسهم وبس انا مش مسامحهم على كل لحظة بكيت فيها بسببهم

انا مش مسامحه..

2020-06-11T06:04:00.002-07:00

صباح الخير يا حياة
صباح بصوت فيروز بتغني لي عن الشتا وانا في حر يونيو يعني يا فيروز لا نسمة هوا بارد لطيف يبهجني ولا حبيبي اللي غاب غلبه الحنين ورجع...

"بيقولوا الوقت بيقتل الحب"
أيوة يا فيروز اتفق معاكي في الكلام ده، الوقت فعلا مش بس بيقتل الحب ده بيقتل كل البدايات الحلوة وبينهي كل الوعود اللي كنا بنقول عليها عهود ل أخر العمر...
انا بحبك انتي يا فيروز عشان كل الصباحات اللي كانت بتبتدي بصوتك كنت بحلم بيها بيه وهو راجع من بعد سفر وغياب.. راجع ليا يقولي خلاص مفيش فراق تاني يا أيوش، بس طال السفر والغياب بقى للأبد.. وزي ما بتقولي يا فيروز

"يا حبيبي شو نفع البكى"
وانا مش مسامحة يا فيروز... لا سامحت في ظلمه ليا ولا في قلبي اللي بردان من الوحدة.. أنا بس بقيت بتسرق من الدنيا ومن الأيام والضحكة اللي مكانتش بتفارقني ضاعت بين البكا ع كل الحاجات اللي حلمت انها تكمل بالفرح ومكملتش.

"لا إنت حبيبي، قصتنا الغريبة ضيعها الهوا"...
يناير 2019 انا مكنتش منتظرة حد وقتها يدخل حياتي الهادية، كنت مكتفية بوحدتي و بفيروز وأغاني الشتا وبهجة الهوا اللطيف وأنا بأكل عصافيري الصغيرين كل فجر يوم جديد...إنت ليه جيت وقتها بكل اللهفة والحب اللي من كتر ما كنت بتحكي عنه أنا صدقته؟.. حقيقي بسألك ليه جيت، ليه سرقت ضحكتي ليه بدلت فرحي لحزن.

"أمس انتهينا يا صاحب الوعد"
انتهت القصة وكان الوداع ابتسامات مبللة بالدمع حينا وبالذكرى أحيانا.. يعني ايه ممكن تمحي إنسان من حياتك بكلمة، يعني ايه تكسر الفرحة وتقتل كل التفاصيل اللي جمعتك بنصف قلبك، إزاي بتقدر تجمع بين حنين الحب في لهفة البدايات وبين قسوة الفراق.

"علموني حبك ولاموني"
شوفتي يا روز قديش كنت بحب اغنية علموني، كنت دايما مقتنعة إن الاهتمام هو أكسجين الحب.. مع اعتياد وجودك في حياتي واهتمامك في البداية إتعلمت أحبك... اتعلق بيك أكتر لحد ما لاموني على الحب ده وقالولي بالنهاية "احنا منعرفش اللي كان بينكم إيه".

" رجعت الشتوية"
شهور وهنغني تاني يا فيروز القلب، يرجع الشتا وترجع ضحكتي.. ويدووب الألم، ونرجع تاني نحلم... نفس الحلم يا قلبي، نصي التاني الرومانسي، والمشي تحت المطر معاه ولهفة أول لقا، أنا عارفة مهما طال الميعاد لينا لقا في النصيب أيها المجهول الجميل... إنت موجود أنا متأكدة، نصي التاني اللي بيكملني اللي موجود بمكان ما بالعالم... هرجع تاني انتظر وكلي أمل إن الميعاد قرب وهتتلاقى ضحكتها وأصالح دنيتي بيك.

توته...

2020-05-04T12:15:00.000-07:00

أنا جيت علشان أسمع حواديتك

- حواديتى!.. بس دى مش مهمه!

- أنا عايز أسمع حواديتك اللى مش مهمه!

❤️وفجأة وفي غمضة عين تلاقي اللي يحب دنيتك ويقبلك ذي ما انت كدا يحبك بصدق ويخاف يوجعك! ويقدر نقاء قلبك، ميملش منك ولا من حواديتك اللي مش مهمه؟ يا صديقي لا تحلم فسوف يرحلون ويخذلو قلبك فالبدايات رائعة والنهايات حدث ولا حرج 💔 سوف يقتلون أجمل ما فيك ويقولون عنك الكثير ثم يرحلون بكل هدوء

خلاص بقى ولا يهمك

2020-04-02T18:21:00.000-07:00

أنا من هنا بعلن إنتصارك وإنك نجحت وبجدارة في إن أنت تسرق ضحكتي أوقات النهايات الحزينة بتعلمنا إزاي نخلق من الألم الفرح، عشان بتخلينا نفكر قد إييه إتباعنا بسهوله على ناس كانو بيقولو إنهم حبايبنا، أنا بعلن إنتصارك إنك قدرت تقنع نفسك إنك كرهت كل شئ فيا كمل طريقك وأمشي خلاص أطمن شلتك من قلبي وتفكيري ومتنساش في كل مرة تيجى سيرتي إنك تحكي للناس قد إييه أنا جيت عليك ومتنساش كمان تحكي ليهم عن الوعود والشقا والفستان الأبيض واليوم اللي كان هيجمعنا وتختم معاهم بكلمة إنها متستهلش وإنها تستاهل اللي حصلها من جرح قلبها وإنك أنت ملاك وإنك تستاهل الانسب والاقوم وإن بعدك عني رحمة واللي هاتيجي بعدي متنساش تقولها إن كل العيوب فيا انا قابله بنسيانك ولجحودك ونكرانك على حبي اللي كان مني واللي هيصبرني إنك من السهل تلاقي الانسب والاقوم لكن عمرك ما هتلاقي الحب، ومش هعاتبك خلاص تاني وأنا ربنا هيعوضني وهفرح من تاني وهرجع أضحك تاني، خلاص بقى ولا يهمك.

يا صافي وبرئ يا قلبي..

2020-03-31T17:49:00.000-07:00

لا أحد يعرف كم عذبتها الحياة ، الأقارب والأصدقاء ، لم يراها أحد وهيا تتهاوى فى حُطام أحلامها ، لم يسمع أحد صرخات روحها وهيا فى غرفتها بعد منتصف الليل ..

لم يشاهدها أحد وهيا تنكسر وتحاول إستعادة قوتها من فرط الألام والضغوط ،

جميعهم كانت نظرتهم لها عابره ،

لا أحد يعلم كم مره تعلق قلبها بأشخاص وفى النهايه رحلوا عنها ، كم مره خذلها ،، أشخاص ؛ أصدقاء ؛ أقارب ،،

كانت تؤمن بهم ، أحلامها التى حُطمت لا يعرفها أحد

أنين قلبها الذى كان يلتهمها لم يسمعه أحد ، نوبات حزنها وإكتئابها والخوف الملعون ذلك الذى جعلها تبتعد عن الناس لن يفهمه أحد

لا أحد يعرف أن قلبها البارد كان مفعم بالحب لولا الفقدان ،

لا أحد يعرف أن عزلتها تلك بسبب إحساسها بالغربه وهيا معهم ،

نظرتهم سطحيه وتقديراتهم خلت من عُمق ما هيا عليه ؟....

دعيهم يقولون فليحترق العالم المهم أن تكونى بخير ،

دائماً وأبداً .....متزعليش يا أيوش

ولسه قلبي لم يتعب من المشاوير

2020-03-14T00:25:00.001-07:00

وطول عمري بحاول اللاقي مكان وسط الناس وعمري ما لقيت دايما يا حساباتي بتطلع غلط يا حظي بيوديني ع محطة بعييييييدة عن أحلامي لكن المهم هنا إني بفضل أنا الشخص الوحيد اللي بيطبطب ويصبر نفسه ويقولها معلش وتبتدي رحلة إني برضو أحاول اللاقي اي مكان وسط الناس عشان بس مبقاش وحيدة وترجع تلف الدايرة وارجع لوحدي من تاني وكإن الوحدة هيا الطريق المرسوم وانا مش عاوزة اعترف إنه طريقي الأفضل في هذة الدنيا

الفهم الدرجة الأكبر من الحب..

2020-03-10T20:23:00.000-07:00

- بحبك ..

- تقصد هتتحملني ؟

- مش فاهم !

- أنا كلي عيوب !..

- أنتِ جميلة .

- مش جميلة أنا عصبية ومتسرعة وساعات بكون غبية وخوافة .. أنا بزعل وبسكت وببعد ومش بعاتب، أنا صعب تفهمني وتعرف مالي لأن أنا مبقتش عارفة مالي ؟

أنا منطفية وكئيبة وحزينة ودمي تقيل وتعبانة وبصدع ديمًا الصداع بيقفلي يومي بيخليني أقولك بكرهك وأنا مش بكرهك، مش اجتماعية ومبحبش الأختلاط وبغييير أوووي وبقفل على إللي بيحبوني بترباس وهخنقك ومش هتعرف تتنفس، أنا بعيط ومش بتكسف من ده ممكن أعيط في الشارع قدام الناس أو وأنا باكل أو وأنا بضحك حتى، أنا مش ببدأ هتحسني باردة مع أني مش كده بس معنديش طاقة أبدا أي حاجة فاهم .. أنا بطيئة وإللي عاوزني لازم يتحمل ويحاول معايا مرة وأتنين وعشرة وميزهقش لإني بخاف أسلم قلبي لشخص، أنا منطوية ومنعزلة وروحي مش حلوة ولا حاجة روحي متبهدلة حزن وكسر خاطر وخذلان…

وعيوب كتير، أنا صندوق أسود مقفول أرجوك متفتحوش لإنك هتجرب وأنا هحاول أديك فرصة عشاني لإني محتجاها يمكن أكون أحسن .. يمكن تكون أنت المختلف إللي روحي مستنياه، بس أنت هتزهق وأنا هفتح صندوقي عالفاضي ومش هينوبني غير الوجع …

- خلصتي ؟

- أيوة هتمشي صح ؟

- هنمشي صح ..

- لوحدك ؟

- لوحدنا ..

- شيل النون !

- لاء ..

- ليه ؟

- لإني بحبك ..

- تقصد هتتحملني ؟

- مش شايفك عبء .. ينفع أطمنك ؟

- طمني ماشي

# فيلم خلي بالك من عقلك 🌸❤

يدوب هوانا ورود ووعود

2019-12-13T14:39:00.002-08:00

الفراق كان امر حاتمي والذكريات كانت مصيرنا والليلة اللي اكتمل فيها القمر كانت النهاية ودايما كدا كل شتا لسه بنحن وبنشتاق يا حبايبنا يا اغلى الناس يا دنيا غاليه وعمر غالي، التفاصيل هي اللي بتكون الأحداث وتفاصلنا معاكم دايما بتنبض بالحب ومع صوت محمد محي لسه بشوفكم ومع منير وعامر وتفاصيل تانيه كتير مع الفل والورد والياسمين لسه باقية يا حبايبنا وفيروز بتفكرني بأهل الغرام ومع اول لهفة لقاء بينا ومع نظرة الحب المستحيل تتكرر مع جبر خواطرنا لسه فاكرة ولسه باقية ومع كل قطرة مياة مطر في الشتا لسه فاكرة حبكم للإحساس دا وعلى العهد باقيه رغم الزحام وتغيير الوجوه لسه جوايا فاكر لو حتى كملنا وعدينا.

حلم برئ

2019-11-14T20:12:00.000-08:00

طول عمري بنت راضية وأبسط الأشياء تفرحني وأحلامي
مش كبيرة طول عمري بحلم أقابل الغايب اللي هيفرح قلبي الصغير اللي هيتقبلني بجنوني وعصبيتي وقلبي الحنون اللي مشكلته كلها انه حنون وعفوي لا بيرتب ولا بيخطط عشان يسرق لحظات فرح من غيرة طول عمري ببص نظرة عطاء لكل اللي حواليا وبتمنى لغيري ذي ما بتمنى الخير لنفسي أنا أرق ما يكون وأحلامي بريئة.

الكلمة الحلوة بتفرق

2019-08-27T03:39:00.001-07:00

دا أنا الكلمة الحلوة تبسطني عمر، فكرة إنك تجبر خاطر الناس دي مش فكرة هينه ابدا إنك تسعد حد مستني منك إنه يحس بفرحة دي مش قليلة دي تساوي عند ناس كتير عمر أيوة الكلمة الحلوة بتفرق ووبتبدل وشوش وتبدل حياة، الدنيا مش مستهلة وابسط الناس واكرمهم هتلاقيهم جابرين للخواطر وحنينين في كلامهم ورفقاء دائمين للحب والود.

عشان بحبك أنا

2019-06-01T22:29:00.000-07:00

تفتكر إن بعد كل حبنا دا ينفع اكون شخص عادي في حياتك وانت كل حياتي تفتكر مشاعرك دي كافية أوي لحد شايفك دنيته بلاش أنانيه أنت عارف إنها بتحبك بلاش قسوة عليها بلاش تحسسها إنها أخر كل حاجة هيا، عارف يا كل العمر إنها بتكلمك كل يوم وعنيها مخبية حنين وكلام مينفعش يكون غير ليك لو كنت في يوم تحس كنت هتعرف من عيونها كل اللي متقاليش..

دايما ع بالي

2019-04-15T07:15:00.000-07:00

دايما كدا الناس الحلوة بتبقى ذكريات بس

الناس الورق..

2018-08-27T20:46:00.002-07:00

الوحدة أرحم بكتيرر من عالم المنافقين الوحدة دفء وسلام نفسي للصادقين.

وحشتني دنيتي

2018-07-29T03:09:00.002-07:00

هو عمر الحب إيه السنين مش كل حاجة اما يوم واحد جميل يوم جميل بيساوي عمر .
من 2009 وانا بدون وانا عارفة اني مش كاتبة ولا حاجة انا حد بيحب يعبر عن اللي جواه وخلاص وعارفة اني الحاجات اللي كتبت عنها كانت كتير ابسط من ان حد ياخد باله منها لكن مع الوقت حبيت اني اكتب كانت في ناس جميلة الله يمسيهم بالخير كانت بتشجعني وبتقنعني اني عندي موهبة كنت بفرح بكلامهم اوي وبشكرهم لانهم كانو سبب اني احب نفسي اكتر واثق فيا اني بعرف اكتب المدونة كانت الشيء الوحيد اللي بهتم به دلوقتي نستها ويمكن من سنين انا اتغيرت كتير واتغيرت نظرتي ومبقتش بسعادة زمان حاسة ان في حاجة سرقة مني فرحتي ولاني شخص مش بيستسلم حاولت كتير بس مش قادرة ارجع بحيوية وروح آيه اللي كانت بتكتب هنا في نفس المكان انا فقدت حاجات كتير اوي وللاسف استسلمت للحزن في وقت ما.

الحب يا جماعة بيغير كل المشاكل نفسي حبايبي اللي كانو يقروا كلامي دا عشان يعرفو انهم وحشوني اوي ووحشني اعرف أخبارهم ووحشني اهتمامهم وإيمانهم بيا انا بيكم كنت مبسوطة انا عمري ما قدمت غير الخير انا اصلا قلبي طيب اوي وبيسامح انا فعلا محتاجكم معايا يا رب ترجعولي

العابر كما الوهم الجميل...

2018-05-09T21:24:00.001-07:00

في ظل إنشغال الجميع عنها وفي ظل إنكسارتها وأحزانها قررت الجميلة تهزم اليأس بالحب والأبتسامة قررت تكون بطلة حواديت جميلة حتي لو ماكنش في بطل هيشاركها حدوتتها دخلت جوه دولابها وخرجت منه فستان أنيق ورقيق ذي ملامحها لبسته وهي في قمة سعادتها رغم انها لوحدها ومع زحمة الشوارع مشيت ودابت بين الناس قابلها الورد اشترته من احساسها بالسعادة تخيلت ان كل الناس في الشارع بتبتسم ليها ومعجبه بأناقتها إحساسها الداخلي بالحب ظهر للناس بسرعه وشافت الحياة والناس ولأول مرة من سنين بشكل مختلف الظاهر إن إيمانها بالحب هيرجع تاني واتسامحت مع قلبها وقررت تعطف وتطبطب عليه وتحبه وفي وسط الزحمة يمر العابر الجميل عشان يكمل يومها بدعوة حلوة روحي يا بنتي ربنا يرزقك باللي بتحبيه ويرزقه بيكي ضحكات عاليه منها أنا مش بحب ولا حد بيحبني ضحك وأستغرب أزاي وانتي كلك حب وملامحك كلها سعادة مستحيل..!! ، ردت وقالت أدعيلي ومشيت البنوته وفي قلبها أمل أن دعوة العابر تتحقق وفي نفسها قالت الحب مش دايما محتاج لبطل كفايه أوي اني اكون النهاردة بطلة حواديت جميلة .

الفستان ربيع 2012

2017-10-06T20:41:00.001-07:00

"ده جميل خالص..تحويش بسيط من المصروف و هقدر أشتريه" ... فضلت أقول لنفسي طول وقفتى قدام الفاترينة وأنا بتفرج عليه كان حلو جدا هو ده اللي في خيالي بالظبط زي فستان سنووايت الواسع المبهج بتصميمه اللي زي فساتين أميرات الحواديت اللي بحبها ... هدخل أتفرج عليه وأعرف إذا كان ممكن أحجزه خطوات صغيرة كنت جوه المحل وعيني على الفستان اللي بره لما سألت البنت اللي في المحل "هو الفستان ده في منه مقاسي ؟ " البنت إبتسمت وقالت" أخر فستان من الموديل ده اللي موجود على فكرة وتقريبا مقاسك " طلبت منها إني أحجزه رفضت قالتلي ممكن تيجي بكرة تشتريه عادي ... خرجت من المحل وعيني بتلمع على الفستان لما مشيت و وصلت البيت حكيت لآختي عنه وطلبت منها إنها تديني فلوس أشتريه قبل ما يتباع ، تاني يوم كنت هناك وأنا بدفع الفلوس زي الطفل الصغير اللي فرحان بهدية جميلة كان بيتمناها من وقت ... وهنا بقى تبتدي حدوتة فستاني الجميل اللي متلبسش غير مرة واحدة ومن وقتها وهو كل ما أفتح الدولاب أتحاشى إن عيني تيجي عليه وأفتكر ....

مارس 2012:
الآيام كانت وقتها جميلة وأنا منتظره الحدث الجميل اللي في حياتي اللي هيخليني أنتظر البس فستان عمري لآول مرة حكون بطلة حدوتة جميلة الفستان كل يوم الصبح ألبسه قدام المرايا أشوف نفسي فيه وأنا كلي سعادة كل يوم يعدي يقل وزني عشان أكون أحلى فيه وتكتر سعادتي بيه ..

يوليو 2012:
فيروز كانت بتغني أحنا والقمر جيران في اليوم ده كنت زي العروس اللي جهزت كل شيء جميل عشان تليق بالفستان كل ما الميعاد يقرب وتقل الدقائق والثواني قلبي كان بيدق بسرعة من الفرحه ...لأول مرة أبقى فرحانة جدا كده ..مش عارفة ليه وقتها من كتر الفرحة كنت خايفة ..هو ليه الناس لما بتفرح بتخاف ..! كنت مقتنعة إن الخوف هو أنتيم الفرح منين ما يروح الفرح يواجهه الخوف ,الخوف من إن الفرح يهرب مننا...