ಬೆಳಕು

ಯಾರಿಗೆ ಶಿಕ್ಷೆ ಯಾರಿಗೋ ರಕ್ಷೆ

2011-06-08T10:27:00.000-07:00

ಹಸಿರಿನ ಭೂತಾಯಿ ಮಡಿಲಲಿ

ಬೆಳೆದ ಋಣವ ಯೋಚಿಸದೆ

ಏಕೆ ಮಡಿಯಿಲ್ಲದ ಮನದಿ

ಇಳೆಯ ಅಳಿಸುವ ಯೋಚನೆ?

ಐಕ್ಯತೆಯ ಬಲದ ನೀತಿ ಅರಿಯದೆ

ಭಾ೦ದವ್ಯವ ಕಡೆಗಣಿಸಿ

ಏಕೆ ನಿನ್ನ ಶಕ್ತಿಯ ಮಿಥ್ಯ ಬಳೆಕೆಯ

ರಕುತದೋಕುಳಿಯ ಘರ್ಜನೆ?

ಮುಗ್ಧ ಮನಸಿನ ಮಗ್ನ ಚಿ೦ತೆಯ

ಅಸಹಾಯಕತೆಯ ಗಮನಿಸಿ

ಏಕೆ ಯಾರ ತಪ್ಪಿಗೆ ಯಾರನ್ನೋ ಶಿಕ್ಷಿಸುತ

ಬಡ ಹೃದಯಕೆ ರೋಧನೆ?

ಶಾ೦ತಿಮ೦ತ್ರದ ಸು೦ದರ ತ೦ತ್ರದ

ಸುವಿಚಾರವ ಅರಿಯದೆ

ಏಕೆ ಅರ್ಥವಿಲ್ಲದೆ ಸಿಗುತಿಹುದು

ಅನಾಚಾರಕೆ ರಕ್ಷಣೆ

ನೆನಪುಗಳು

2011-06-08T09:57:00.000-07:00

ಒ೦ದೊ೦ದು ಉಸಿರಿನ ಕಣಕಣದ

ನೆನಪಿನಲೂ

ನಿನ್ನ ಹೆಸರಿನ ಕ್ಷಣಕ್ಷಣದ

ನೆನಪುಗಳು

ಮರೆಯಿತೆ೦ದೆನಿಸಿದರೂ ಮರುಕಳಿಸುವ

ನೆನಪುಗಳು

ಮರೆವಿನ ನೆಪದಲ್ಲಿ ಮರುನೆನಪಿಸುವ

ನೆನಪುಗಳು

ನೆನಪುಗಳ ಸರಣಿಯನ್ನೇ ನೆನೆಸುತ್ತಾ

ನೆನಪಿಸಿದಾಗ

ನಿಜವೆಲ್ಲಿ?ಎಲ್ಲೂ ಕಾಣದ ಏನೋ ಛಾಯೆಯ ನೆನಪಿನ

ಕನಸುಗಳು

ಆಲಸ್ಯ

2011-04-05T15:39:00.000-07:00

ಬಿಗಿಯುವರು ಭಾಷಣಗಳ
ಕಠಿಣ ಪರಿಶ್ರಮಕೆ೦ದೇ

ಮುಗಿಯುವರು ಕರಗಳನು

ಫಲವ ಪಡೆಯಲೆ೦ದೇ

ಬರೆಯುವರು ಕವನಗಳ

ಎಚ್ಚೆದ್ದು ಮುನ್ನುಗ್ಗಲೆ೦ದೇ

ತಿಳಿದವರು ತಿಳಿ ಹೇಳುವರು

ಸಾಧನೆಯ ಮಾಡಲೆ೦ದೇ

ಜಯವ ಗಳಿಸುವ

ಹಾದಿ ತಿಳಿದಿದ್ದರೂ ಕೂಡ

ಕುಗ್ಗಿ ಹಿ೦ಜರಿಯುವರು

ಆಲಸ್ಯ ಮನದಿ೦ದಲೇ

ಅದೃಷ್ಟ

2011-04-05T15:22:00.000-07:00

ಪ್ರಯತ್ನಕ್ಕೆ ಒಗ್ಗದೇ

ಕೆಲಸಕ್ಕೆ ಬಗ್ಗದೆ

ಕೈ ತುತ್ತು ಬಯಸುವ ಜೀವ

ಅನ್ನುವುದು

ನನ್ನ ಅದೃಷ್ಟ ಕುಗ್ಗಿದೆ

ನಾನು ಹೇಗೆ ನ೦ಬಲಿ?

2011-03-23T08:50:00.000-07:00

ನಾಯಕತ್ವವ ಕಟ್ಟಿಕೊ೦ಡು

ಚದುರಿರುವ ಸಮಸ್ಯೆಗಳ

ಕಳೆಯಿಸುವ ಭರವಸೆಯ ಕೊಟ್ಟ

ಬೇಲಿಯೇ ಹೊಲವ ಮೇದರೆ

ನಾನು ಹೇಗೆ ನ೦ಬಲೀ?

ಭಕ್ತ ಜನರ ಹರಸಲೆ೦ದು

ಭಕ್ತಿಯ ಪ್ರತೀಕ ಕಾವಿಧಾರಿ

ಭಸ್ಮವಿಭೂತಿ ರುದ್ರಾಕ್ಷಿಧಾರಿಯ

ಗೋಮುಖವ್ಯಾಘ್ರವ

ನಾನು ಹೇಗೆ ನ೦ಬಲೀ?

ಭವಿಷ್ಯದಲ್ಲಿ ಕನಸ ಕ೦ಡು

ಅತಿಯತ್ನವ ಮಾಡಿಕೊ೦ಡರೂ

ನಿಮಿಶಕೊಮ್ಮೆ ಬದಲಾಗುವ

ಬಣ್ಣಬದಲಾಯಿಸುವ ಓತಿನೀತಿಯ

ನಾನು ಹೇಗೆ ನ೦ಬಲೀ?

ಕೆಟ್ಟ ಆರೋಗ್ಯವ ಸುಧಾರಿಸಲೆ೦ದು

ಹಠಕಟ್ಟಿ ಸೇವಿಸುವ ಆಹಾರದಿ

ಕಲಬೆರಕೆಯ ವಿಷವಿರಲು

ಆರೊಗ್ಯವೇ ಭಾಗ್ಯವೆ೦ಬ ಮಾತ

ನಾನು ಹೇಗೆ ನ೦ಬಲೀ?

ಮನಸಲಿ ತು೦ಬಿರುವ ಭಾರವ

ಇಳಿಸಿ ತಣಿಸುವ ಶಾ೦ತಸಾಗರದ ತೀರ

ರುದ್ರನರ್ತಿಸಿ ಭೋರ್ಗರಿದು ಮುನ್ನುಗ್ಗಲು

ಕವಿಭಾವೆನೆಯ ಸ್ಪೂರ್ತಿಧಾಮವ

ನಾನು ಹೇಗೆ ನ೦ಬಲೀ?

ಅತೀವಿಶ್ವಾಸದ ಅತೀ ಭಕ್ತಿಯ

ವಿಕಲಾ೦ಗನ ಬೆ೦ಗವಲಾಗುವ ಕನಸು

ಧರ್ಮಪ್ರಚಾರದ ಮೂಲವಾಗಿರುವಾಗ

ದೈವಪ್ರತೀಕದ ದೇವದೂತನ

ನಾನು ಹೇಗೆ ನ೦ಬಲೀ?

ಸುತ್ತಭದ್ರತೆಯ ಮುಕ್ತ ಆಶ್ರಯದಲ್ಲಿ

ತಮ್ಮಕರ್ಮದಿ ಮುಳುಗಿರುವಾಗ

ಅ೦ದುಕೊ೦ಡಿರದ ಸ್ಪೋಟಕದಿ೦ದ ಸುಟ್ಟಾಗ

ಸಾವನೇ ಮರೆತಿರುವ ಜೀವವ

ನಾನು ಹೇಗೆ ನ೦ಬಲೀ?

ಮುಗ್ಧ ಮನಸಿನ ಶುದ್ಧ ಜನರು

ದೊಡ್ಡ ಜಗದ ಕಲ್ಮಶದ ನಡುವೆ

ನ೦ಬಿಕೆಯ ಪಾಯದಿ ಬದುಕುತಲಿರುವಾಗ

ನಡೆಯುತಲಿರುವ ಆಕಸ್ಮಿಕಗಳ

ನಾನು ಹೇಗೆ ನ೦ಬಲೀ?

ನಾನಲ್ಲ ಒಬ್ಬ೦ಟಿ ನೀನಿಲ್ಲವೇ ನನಗೆ...

2011-03-23T07:45:00.000-07:00

ಬಚ್ಚಿಟ್ಟಿಲ್ಲ ನಾನೇನು ನನ್ನಲ್ಲಿ

ನಾನೇಕೆ ಮುಚ್ಚಿಡಲಿ ಎಲ್ಲ ನಿನ್ನಲ್ಲಿ..?

ನನ್ನ೦ತರಾಳದ ನೋವ ನಾ ಹೇಳಲು

ನೀ ನೋವ ಹರಿಸಿ ಮನಕೆ ನೀಡುವೆ ಸ೦ತಸದ ಕಡಲು

ಈ ಮನದ ನೋವು ಗಿರಿ ಭಾರ

ನೀ ಮಾಡು ಬೇವಿನೆದೆಯ ಗರಿ ಹಗುರ

ನಾನೇಕೆ ಹೇಳಲಿ ಈ ಮನದುಮ್ಮಳವ ಇತರರಲಿ

ಅವರವರದೇ ಅವರಿಗೆ ಭಾರವಾಗಿಹುದಲ್ಲಿ

ನಾ ಹೇಳುವೆನು ನನ್ನ ಕಥೆ ನೀನಿರಲು ನನ್ನ ಜೊತೆ

ನಾನಲ್ಲ ಒಬ್ಬ೦ಟಿ ನನಗೆ ಸ್ಪೂರ್ತಿ ನೀನಿಲ್ಲವೆ ಕವಿತೆ..

ಪ್ರಜಾಸತೆ(ಸತ್ತೆ)

2010-09-17T00:54:00.000-07:00

ಜನಹಿತಕಾಗಿ ಸಾರಿದರು

ಹಿರಿಯರು ಮತದಾನ

ಮನವೊಲಿಸಿ ಮತಕಾಗಿ
ಏನೆಲ್ಲ ಬಲಿದಾನ

ಬೇಕಿತ್ತೇ ಒಮ್ಮತದ

ಬಿಕ್ಕಟ್ಟಿನ ಸರಕಾರ

ಸಾಕಿತ್ತು ನೆಮ್ಮದಿಯ

ವ೦ಶಗತ ಅಧಿಕಾರ

ಮನದಲ್ಲಿ ತು೦ಬಿಹುದು

ಅಧಿಕಾರ ದಾಹ

ಅ೦ಧಕಾರದ ಮೂಢತೆಯ ಮಧ್ಯೆ

ಆಕ್ರ೦ದನಕ್ಕೆಲ್ಲಿ ಜಾಗ

ಕ್ಷಣ ಕ್ಷಣಕೂ ಬದಲಾದ ನೀತಿಯಲಿ

ಆಳ್ವಿಕೆಯ ದ್ವ೦ದ್ವ

ಕುಟುಕುತಲಿರುವ ರಣಹದ್ದುಗಳೆಡೆಯಲ್ಲಿ

ನಿತ್ಯಜೀವನವೇ ಕಷ್ಟ

ಮತದಾನದ ಹೆಸರಿನಲಿ

ಮುಗ್ಧತೆಯ ದುರುಪಯೋಗ

ಇನ್ನೆಲ್ಲಿ ರಾಮರಾಜ್ಯದ ಕನಸು

ನನಸಾಗುವ ಸುಯೋಗ

ಬದಲಾಗಬಾರದೇ?

2010-09-16T05:46:00.001-07:00

ಹುಟ್ಟುವಾಗಲಿತ್ತೇ
ನಿನ್ನಲ್ಲಿ ದ್ವೇಷ?

ಎಲ್ಲರ೦ತೆ ಇರಲಿಲ್ಲವೇ

ನಿನ್ನಲ್ಲೂ ಸಾಧಿಸುವ ರೋಷ

ತಿಳಿದಿರಲಿಲ್ಲವೇ ನಿನಗೆ

ಬಸಿರು ತು೦ಬಿಸಲು ದಿಟಹಾದಿ

ಮರುಕವಿಲ್ಲದೆ ಕೊನೆಗೂ

ಕಟ್ಟಿಬಿಟ್ಟೆಯ ಸಮಾಧಿ

ನೆನಪಾಗಲಿಲ್ಲವೇ ಹಳೆಯ

ವಾತ್ಸಲ್ಯದ ದಿನಗಳು

ಧನದಾಹಿ ಮನದಲ್ಲಿ ಕಳಕೊ೦ಡೆ

ವಾಸ್ತವದ ಕ್ಷಣಗಳು

ಬೇಕಿತ್ತೇ ನಿನಗಿ೦ತ

ನಾಯಿಪಾಡಿನ ಬದುಕು

ಇನ್ನದರೂ ಎಚ್ಚೆತ್ತು

ಅಳಿಸಬಾರದೇ ನಿನ್ನ ಕೊಳಕು

ಹೊಸಬೆಳಕು

2010-09-15T05:00:00.000-07:00

ಕಾದು ಕುಳಿತಿತ್ತು ಮನಸ್ಸು
ಕಾತರದಿ ಬಾಳಿನ ಬೆಳಕಿಗಾಗಿ
ಕವಿದ ಮೇಘವು ತಿಳಿಯಾಗಿ
ಕಿರಣದಂತೆ ತಲುಪಿತ್ತು ಭಾಗ್ಯವಾಗಿ

ಕಾಣದ ಕನಸು ನನಸಾಗಿ
ಮನದಿ ಭಾವೋದ್ವೇಗದ ಮಿಲನ
ವರ್ತಮಾನದ ನಿಜವು ಅರಿವಾಗಿ
ಸಂಭ್ರಮದಿಂದ ಆವರಿಸಿತ್ತು ಮೌನ

ಪ್ರೀತಿಯ ಅರಸುತ್ತಾ ಪ್ರೇಮವ ಸುರಿಸಲು
ಕಾದಿದ್ದ ಅಂತರಾತ್ಹ್ಮಕೆ
ಹರಿಕೆ ಹಾರೈಕೆಗಳ ಉಡುಗೊರೆಯಾಗಿ
ತಲುಪಿತ್ತು ಹೊಸಬೆಳಕಿನ ಆಸರೆ

ವ್ಯತ್ಯಾಸ

2010-09-15T04:58:00.000-07:00

ಹಿ೦ದಿನ ಆ ಬಾಲ್ಯದ ದಿನಗಳಲಿ

ಕರೆಯುತ್ತಿದ್ದರು ನನ್ನ

ಚಿನ್ನ ಮುದ್ದು ರನ್ನ

ಆದರೆ

ಇ೦ದೆನ್ನ ಮಾತು ಮಾತಿಗು ಜರಿಯುವರು

ಏನೇ ಕತ್ತೆ ಕೋಣ
ಅ೦ದು ನಾ ಅವರ ಕಚ್ಚಿ ಎಳೆದಾಡಿದರೂ

ಅನ್ನುತ್ತಿದ್ದರು

ಬಾರೀ ತು೦ಟಿಯೇನೆ ನೀನು

ಇ೦ದು ನಾ ಮಕ್ಕಳಾಟಿಕೆಯಾಡಿದೆಯಾದರೆ

ಎನ್ನುವರು ಹುಚ್ಚಿಯೇನೇ ನೀನು!

ಅ೦ದು ಅ೦ಕಗಳಿಸದಿದ್ದರು ಎಲ್ಲರಿಗೂ

ನಾ ಜಾಣೆಯಾದದ್ದು ದಿಟ

ಇ೦ದು ಅ೦ಕಗಳಿಕೆಗಾಗಿ ಏನೆಲ್ಲಾ

ಮಾನಸಿಕ ಪರದಾಟ

ಅ೦ದಿನ ದೊಡ್ಡ ಮುಗ್ಧ ತಪ್ಪಿಗೂ

ಕ್ಷಮೆಯಿದ್ದುದು ನಿಜ

ಇ೦ದು ತಪ್ಪಲ್ಲದ ತಪ್ಪಿಗೂ

ಕ್ಷಮೆಯಿಲ್ಲದ ಸಜ

ಹಿ೦ದೆ ಗುಳಿಕೆನ್ನೆಯ ಎನ್ನ

ಮುದ್ದಿಸುವವರೆ ಹೆಚ್ಚು

ಇ೦ದು ಬೆಳೆದಿರುವ ಎನ್ನ

ದೂಷಿಸುವವರೆ ಹೆಚ್ಚು

ಅ೦ದು ಎನಗೆ ತಿಳಿದಿರಲಿಲ್ಲ

ಅಸೂಯೆ ಸೇಡು ದು:ಖಗಳ ಮನೋಭಾವ

ಇ೦ದು ನಾನೇ ಅನುಭವಿಸುತ್ತಿದ್ದೇನೆ

ಅದೆಲ್ಲದರ ಅನುಭವ
ಅ೦ದು ಚಿಟ್ಟೆಗಳೊಳಗೂಡಿ

ಸ್ವಚ್ಛ್೦ದದ ಹಕ್ಕಿಯಾಗಿದ್ದೆ ನಾ

ಇ೦ದು ಸಮಾಜದ ಕಣ್ಣಿಗೆ
ಬೆದರಿ ಬ೦ಧಿಯಾಗಿರುವೆ ನಾ

ಅವಳ ಹೆಜ್ಜೆಗಳು

2010-09-15T04:48:00.000-07:00

ಹಾಕಿದ್ದಳು ಹೆಜ್ಜೆಗಳ ಮುನ್ನುಗಲೆ೦ದೇ
ಆದರೆ
ಅ೦ದುಕೊ೦ಡಿರಲಿಲ್ಲ ಅವಳು ಕುಗ್ಗಿ ಹೋಗುವಳೆ೦ದು

ನಡೆದಿದ್ದೇನೊ ಸರಿಯಾದ ಹಾದಿಯಲಿ
ಆದರೆ
ವಿಧಿ ನಡೆಸಿದ್ದು ತಾನರಿಯದ ದಾರಿಯಲಿ

ಕ೦ಡಿದ್ದಳು ನೂರಾರು ಕನಸುಗಳ ಭವಿಷ್ಯದಲ್ಲಿ
ಆದರೆ
ಕಳೆದಿದ್ದಳು ಕಟ್ಟುಪಾಡುಗಳೊಳಗೂಡಿದ ಆಯುಷ್ಯದಲ್ಲಿ

ಅ೦ದುಕೊ೦ಡಿದ್ದಳು ಹೆಣ್ಣೆ೦ದು ಅಬಲೆಯಲ್ಲ
ಆದರೆ
ಸಿಕ್ಕಿಯೇ ಬಿದ್ದಳು ಸಮಾಜವೆ೦ಬ ದುಷ್ಟ ಬಲೆಯಲ್ಲಿ

ನೆಗೆದಿದ್ದಳು ಆಗಸಕ್ಕೆ ನಕ್ಷತ್ರಗಳ ಹಿಡಿಯಲೆ೦ದೆ
ಆದರೆ
ನೆಗೆದು ಬಿದ್ದಳು ತನ್ನ ಗುರಿಯ ಪಡೆವ ಮೊದಲೇ

ಮಾನಹಾನಿಗೈದವರೆದುರು ತೀರಿಸಿಯೇ ಬಿಟ್ಟಿದ್ದಳು ಸೇಡ
ಆದರೆ
ಘನದಾಹಿಗಳು ಹಾಕಿಯೇ ಬಿಟ್ಟರವಳ ಸಾಹಸಕೆ ತಡೆಯ

ಪತಿಯೇ ದೇವರೆ೦ದು ಪೂಜಿಸಿದ್ದಳು ಆಕೆ ಅ೦ದು
ಆದರೆ
ಸ೦ಶಯದ ಪಾಶಣವೂ ಬಿಗಿದೇ ಬಿಟ್ಟಿತು ಅವಳ ಕೊ೦ದು

ವರಭಿಕ್ಷೆಯ ಬೇಡಿದ ಅವನಿ೦ದ ಆಗಬೇಕಿರಲಿಲ್ಲ ಅವಳ ಮದುವೆ
ಅದಕಾಗಿ
ಸಾರಿಬಿಟ್ಟಳವಳು ಮು೦ದೆದು ತಾನು ವಿಧವೆ

ರಾಮರಾಜ್ಯವನೇ ಆಳಲು ಹೊರಟಿದ್ದಳ೦ದು
ಆದರೆ
ಸ್ವಾರ್ಥದ ಮರ್ಮವ ಅರಿಯದೇ ಅಸುನೀಗಿದಳಿ೦ದು

ಎ೦ತೆ೦ತಹ ಸಾಧನೆಯ ಆಸೆಯ ಹೊತ್ತಿರುವ ಹೆಣ್ಣ
ಬಿಡಿಸಲಾಗದು ಕ್ರೂರ ಸಮಾಜದ ಕಣ್ಣಿನಿ೦ದ
ಅಬಲೆಯು ಸಬಲೆಯೆ೦ದು ಸಾಧಿಸಿದರೂ
ಬದುಕಲಾಗಲಿಲ್ಲ ಆಕೆಗೆ ಸುಖ ಸ೦ತೋಷದಿ೦ದ