സസ്നേഹം അര്‍ജുന്‍

എന്നെ ഞാനാക്കിയ നീ..

noreply@blogger.com (Arjun Bhaskaran) — Sun, 10 Sep 2023 02:52:00 +0000

എന്റെ കഥയിൽ നിറഞ്ഞ നിന്റെ കണ്ണുനീർ മായ്ചത്‌ എന്നിലെ ഇന്നലെകളെയായിരുന്നു..

ഇളംവിരലുകളാൽ മിഴികൾ തുവർത്തി നീ വീണ്ടുമൊരാവർത്തി കൂടി നോക്കി,

വെള്ളാരംകണ്ണിലെ നീലനീർത്തടത്തിനടിയിൽ എന്നിലെ ഇന്നിനെ ഞാൻ കണ്ടു,

തുളുമ്പാൻ വെമ്പിനിന്ന കണ്ണുകളിൽ നിന്നും സ്നേഹത്തിന്റെ ഉറവകളാ കൺപീലികളിൽ മുത്തു ചാർത്തി,

ആ പളുങ്കുമണികളിൽ ഞാനെന്റെ നാളെകളും, ഭാവിയും കണ്ടു..

വിരൽതുമ്പ്‌ വിരൽതുമ്പിൽ ഉരസിയനേരം നിന്നിൽ ഞാൻ എന്നെ കാണുകയായിരുന്നു..

എന്നെ ഞാനാക്കിയ നീയെന്റെ കണ്ണിലൊരുപിടി സ്നേഹക്കടലായ്‌ വിടരുന്നുണ്ടായിരുന്നു

കറുത്തവൻ

noreply@blogger.com (Arjun Bhaskaran) — Thu, 04 Jun 2020 03:31:00 +0000

പണ്ട്,

കറുത്ത നാട്ടിലെ നീല കടൽ.. സുന്ദരമായ കടൽ,

ഈ കടലിലൂടെയാണ് പടിഞ്ഞാറൻ കാറ്റിൽ തട്ടിത്തെറിച്ച് പായ്‌വഞ്ചികൾ എത്തിയത്..

ഉച്ചിയിലെ സൂര്യൻ ചെമപ്പ് പടർത്തുന്ന വെളുത്ത മുഖമുള്ളവരെ കണ്ടതും അന്നാണ്.

കാലങ്ങൾക്കിപ്പുറം കറുത്തവനും കുടുംബവുമിന്ന് കടൽക്കരയിലാണ്.

കുഞ്ഞു തിരകൾ, തെളിഞ്ഞ ആകാശം, ഓടിനടക്കുന്ന ഞണ്ടുകൾ..ഒന്നും ആസ്വദിക്കാനാകുന്നില്ല.

കൈകാലുകളിലും, കഴുത്തിലും ചങ്ങലയാണ്..

മണൽപ്പുറത്ത് ഉറപ്പിച്ച വലിയ മരക്കുറ്റികളിൽ പൂട്ടിയിട്ടിരിക്കുന്നു..

വെള്ളം കിട്ടാതെ ചുണ്ടുകൾ പിടയ്ക്കുന്നുണ്ടായിരുന്നു..വിശന്ന് വയർ ഒട്ടിയിരിക്കുന്നു.. കരയരുതെന്നു അടുത്തിരുന്ന ചാട്ടവാർ പിറുപിറുത്തു.

കപ്പലിലെ ഇരുണ്ടറയിലായിരുന്നു യാത്ര..കൈകളിൽ പങ്കായപിടിയായിരുന്നു.. ക്ഷീണിച്ചു മലരുമ്പോൾ ചാട്ടയടിയായിരുന്നു ഭക്ഷണം..

പലകുറി ജീവനുകൾ സമുദ്രം പൂകി, അവർ ഭാഗ്യവാന്മാർ..

ബാക്കിയുള്ളവർ വെള്ളനാട്ടിൽ വീതം വച്ചെടുത്ത പേരില്ലാത്ത അടിമകൾ..

രാപകലില്ലാതെ പണിയെടുത്തും, കൊല്ലപ്പെട്ടും, പീഡിതരായും, അപമാനിതരായും ദശാബ്ദങ്ങൾ..

ഇന്നലെ,

ഉയർന്ന മുഷ്ടികൾ തച്ചുടയ്ക്കപ്പെട്ടെങ്കിലും ഉയർന്നുയർന്നു കൊണ്ടേയിരുന്നു..

അടിമത്തവും, വർണ-വിവേചനവും തൂത്തെറിഞ്ഞതായി നിയമം കടലാസിൽ എഴുതിയടുക്കി വെച്ചു.

പോലീസ് അകമ്പടിയാൽ ഒരു കറുത്തകുഞ്ഞ് വിദ്യാലയമുറ്റത്തെത്തി..

ജീവിതം മെല്ലെ മെല്ലെ തളിരിട്ടു..

പ്രതീക്ഷകൾ, എല്ലാ നിറങ്ങളും ഒരു പോലെ തെളിയുന്നൊരു പുലർകാലചിത്രത്തിലേക്ക്..

ഇന്ന്,

വെളിച്ചത്തിലേക്ക് എത്താൻ ശ്രമിക്കുന്ന ഫ്ലോയിഡുമാരും,

പകൽ വെളിച്ചത്തിൽ വർണ്ണവെറി നിറച്ച ചൗവിനുകളും..

കടൽ കയറ്റി കൊണ്ട് വന്നവർക്ക് തന്നെ ഫ്ലോയിഡുമാർ ഭീകരജീവികളാണ്, കള്ളനാണ്, ജീവിക്കാൻ അവകാശമില്ലാത്തവരാണ്..

ഫ്ലോയിഡുമാരെ ഇരകളാക്കാൻ കപടഭയം നടിക്കുന്നവരാണ്..

അവരുടെ പേടികളിൽ കൊല്ലപ്പെടുന്ന കറുത്ത പുഴുക്കൾ, ഫ്ലോയിഡുമാർ..

കാലിനടിയിൽ, ഞെരിഞ്ഞമർന്ന്, അവസാനശ്വാസവും പൊഴിച്ച്!

നാളെ,

മണ്മറഞ്ഞ പായ്ക്കപ്പലിൻ ഇരുൾ വഴിയിൽ ചങ്ങലക്കൂട്ടങ്ങൾ കിലുങ്ങുന്നത് നിങ്ങളുടെ കാതുകളിൽ മുഴങ്ങിക്കൊണ്ടേയിരിക്കും..

നിങ്ങൾ ഊറ്റിയ അതിജീവനശ്വാസങ്ങളാൽ ഈ ലോകമൊരിക്കൽ നിറയും..

മായ്ക്കാൻ ശ്രമിച്ചിട്ടും മായാത്ത ചരിത്രങ്ങൾ തികട്ടി തികട്ടി വരും..

കറുത്ത നാട്ടിൽ നിന്നും കവർന്നു കൊണ്ട് വന്ന വിറയാർന്ന മുഖങ്ങൾ ഇരുട്ടിൽ സ്വപ്നങ്ങളിൽ തെളിഞ്ഞു വരും..

വെടിയുണ്ടകൾ തിമിർത്തു പെയ്താലും, കാൽമുട്ടുകൾ ഞെരിഞ്ഞമർന്നാലും കറുത്ത കരങ്ങൾ പറന്നുയർന്നു കൊണ്ടേയിരിക്കും..

ഒരിക്കൽ.. എന്നെങ്കിലുമൊരിക്കൽ എല്ലാ നിറങ്ങളും കൂട്ടിയൊരു ചിത്രം മെനഞ്ഞെടുത്ത് നീ നിന്നോട് തന്നെ ചോദിക്കും..

"കറുത്ത ചിത്രങ്ങളെ പ്രണയിച്ച ഞാനെന്തിനീ കറുത്ത പ്രാണനുകൾ കവർന്നെടുത്തൂ"

പ്രശ്ചന്ന വേഷ മത്സരങ്ങൾ

noreply@blogger.com (Arjun Bhaskaran) — Mon, 10 Jun 2019 13:22:00 +0000

നവോദയ ജീവിതത്തിലെ ഹോസ്റ്റലുകൾ തമ്മിലുള്ള മത്സരപരിപാടികൾ എന്നും ഒരു ഹരം ആയിരുന്നു. മാസാമാസം നടക്കുന്ന യൂണിറ്റ് ടെസ്റ്റ് പരീക്ഷകളിൽ ഈ ഹരത്തിൻറെ പകുതിയെങ്കിലും കാട്ടിയിരുന്നെങ്കിൽ പല വിഷയങ്ങളിലും പലരും തോറ്റു പോവുക പോലുമില്ലായിരുന്നു. പത്താം ക്ലാസ് കടന്നതിനു ശേഷം നാടകങ്ങളും, നൃത്തങ്ങളും ആയിരുന്നു അരങ്ങു വാണിരുന്നതെങ്കിൽ അല്പം കൂടെ വർഷങ്ങൾ പിന്നോട്ട് പോയാൽ എന്നും അരങ്ങു കീഴടക്കിയിരുന്നത്

പ്രശ്ചന്ന വേഷ മത്സരങ്ങൾ ആയിരുന്നു. തൊണ്ണൂറുകളിലെ അങ്ങനെയൊരു ദിവസം. വൈകുന്നേരത്തെ പ്രശ്ചന്നവേഷമത്സരത്തിനു ഞാനും പേര് കൊടുത്തിട്ടുണ്ട്. തിലക് ഹൗസിന് വേണ്ടി ജീവൻ മരണ പോരാട്ടം നടത്താൻ തന്നെ കച്ചകെട്ടിയിറങ്ങുകയായിരുന്നു ഞങ്ങൾ. വൈകുന്നേരത്തോടടുപ്പിച്ച് സ്ഥലത്തെ പ്രധാന മെയ്ക്കപ്പ്മാൻ ഷൈജു എസ് .പി (നവോദയൻ ആണോ ഇനീഷ്യൽ നിർബന്ധമാ) ഏട്ടൻ എന്റെ ശരീരത്തിൽ താജ്‌മഹൽ പണിയാൻ തുടങ്ങി. ഒരു കുഷ്ഠരോഗി ആക്കാൻ ആയിരുന്നു ഉദ്ദേശം. വിരലുകൾ മടക്കി പിടിക്കണം. മാസാമാസം കിട്ടുന്ന പെപ്‌സിഡന്റ് ടൂത്ത് പേസ്റ്റും ചെമന്ന നിറവും ചേർത്ത് മുഖത്തും ശരീരത്തിലും ഉണ്ട ഉണ്ടയായി പിടിപ്പിച്ച് അവിടെയും ഇവിടെയും കുറച്ചു പഞ്ഞി ചെമന്ന നിറത്തിൽ മുക്കി ഒട്ടിച്ച് എന്നെയൊരു അലവലാതി ഷാജി ആക്കി മാറ്റി. ഇനി സ്റ്റേജിന്റെ ഒരു വശത്ത് നിന്ന് നിലത്ത് കൂടെ ഇഴഞ്ഞിഴഞ്ഞു മറുവശം ചേരണം. ബാക്ഗ്രൗണ്ടിൽ 'ചില്ലുമേടയിൽ ഇരുന്നെന്നെ കല്ലെറിയല്ലേ ' എന്ന ഗാനം. മറ്റുള്ളവർ പേപ്പർ ചുരുട്ടി കല്ല് പോലെ സ്റ്റേജിന്റെ പിറകിൽ നിന്നും എറിയും. ചുരുക്കത്തിൽ ജഡ്ജ് ചെയ്യുന്നവർക്ക് അയ്യോ പാവം, ഒരു സമ്മാനം കൊടുത്തേക്കാം എന്ന് തോന്നിപ്പിക്കാൻ ഉള്ള സൈക്കോളജിക്കൽ മൂവ്. പരിപാടി തുടങ്ങി. രാമൻ ഹൗസിലെ ഹംസക്കുട്ടി 'ശവം ' ആയി വേഷമിട്ടു തകർത്തു. സുഭാഷ് ഹൗസിലെ ജയറാം മെല്ലെ കടന്നു വന്നു. ശരീരം മുഴുവൻ കറുത്ത നിറം പൂശി, വെള്ള നിറത്തിൽ ഒരു അസ്ഥികൂടം ശരീരത്തു വരച്ചു ഒരു ഹൊറർ ആയി അരങ്ങിലേക്ക്. എം പി ഹാളിലെ (പരിപാടികൾ നടക്കുന്ന ഹാൾ) എല്ലാ വെളിച്ചവും അണഞ്ഞു. സ്റ്റേജിനു മുകൾ വശത്തു തൂങ്ങി കിടക്കുന്ന രണ്ടു ബൾബുകൾ തുരുതുരാ മിന്നാൻ തുടങ്ങി. മലയാളം യക്ഷികഥയിലെ പ്രേതങ്ങളെ പോലെ ജയറാം ശരീരം ചലിപ്പിക്കാൻ തുടങ്ങി. മിന്നുന്ന വെളിച്ചവും, ശരീരത്തിന്റെ ആട്ടവും ഒരു സ്ലോ മോഷൻ എഫ്ഫക്റ്റ് കാണികളുടെ കണ്ണുകൾക്ക് നൽകി. പിറകിൽ ചേട്ടന്മാരുടെ മൈക്കിലൂടെയുള്ള പ്രേത-അട്ടഹാസങ്ങളും കൂടിയായപ്പോൾ പരിപാടി വൻ വിജയമായി. ഒന്നാം സ്ഥാനം അവിടേക്കു പോകുമെന്ന് ഞങ്ങൾക്കും ഏതാണ്ട് ഉറപ്പായി. കയ്യടി വാങ്ങി ജയറാം പോയി. പിന്നാലെ ഒരു കുഷ്ഠരോഗി ഇഴഞ്ഞിഴഞ്ഞു സ്റ്റേജിന്റെ അപ്പുറമെത്തി. പരിപാടി കഴിഞ്ഞു ഹോസ്റ്റലിൽ പോയി പേസ്റ്റും, ചെമന്ന നിറവും, പഞ്ഞിയും ഒക്കെ കളഞ്ഞു മറ്റു പരിപാടികൾ കാണാനായി വീണ്ടും എം പി ഹാളിലേക്ക്.

എം പി ഹാളിന്റെ പിറകിലൂടെ നടന്നു വരുമ്പോൾ ഒരു ചെറിയ ആൾക്കൂട്ടം. ഒന്ന് രണ്ടു ആളുകൾ പിറകിലെ വെള്ളം ശേഖരിക്കുന്ന ടാങ്കിനു മുകളിൽ നിന്ന് ബക്കറ്റിൽ വെള്ളം കോരി താഴെ നിൽക്കുന്ന ആരുടെയോ തലയിൽ ഒഴിക്കുന്നുണ്ട്. അടുത്തെത്തിയപ്പോൾ ആള് ജയറാം ആണ് . ചുറ്റും ചേട്ടന്മാർ നിന്ന് ചകിരിയൊക്കെ ഇട്ട് ഉരയ്ക്കുന്നു . മണ്ണെണ്ണയുടെ മണം!!

എന്താ പ്രശ്നം??

കരച്ചിലിന്റെ വക്കിൽ നിന്ന് അവൻ ഉറക്കെ പറയുന്നുണ്ടായിരുന്നു.' ഈ ചെങ്ങായിമാർ ഇരുമ്പിന് അടിക്കുന്ന ഇനാമൽ പെയിൻറ് എടുത്ത് എൻറെ മേത്തടിച്ചെടാ'

ശരീരത്തിലെ ഇനാമൽ ഒഴുകി പോകുന്നതിന്റെ കൂടെ ആ ഒന്നാം സമ്മാനത്തിന്റെ സന്തോഷവും ഒലിച്ചു പോകുന്നത് കാണാമായിരുന്നു.

എവിടെയാണ് നമുക്ക് പിഴയ്ക്കുന്നത്?

noreply@blogger.com (Arjun Bhaskaran) — Fri, 15 Sep 2017 21:03:00 +0000

ഇത് പോലൊരു സെപ്റ്റംബർ 2003 ഇൽ അന്നത്തെ കേന്ദ്ര ആരോഗ്യ കുടുംബ ക്ഷേമ മന്തിയായിരുന്ന സുഷമാ സ്വരാജ് രണ്ടു കുരുന്നുകളെ സ്നേഹത്തോടെ ചേർത്ത് പിടിച്ചു. ബെൻസൺ എന്നും ബെൻസിയെന്നും പേരുള്ള രണ്ടു കുട്ടികൾ. ഒരു സമൂഹത്തിനു മുഴുവൻ ഒരു സന്ദേശം നല്കുന്നതിനായിരുന്നു അത്.

ഒരു പതിറ്റാണ്ടോളം വാർത്തകളിൽ നിറഞ്ഞു നിന്നിരുന്നു ഇവർ. എയിഡ്സ് ബാധിതരായി മരിച്ച സി.കെ ചാണ്ടിയുടെയും, പ്രിൻസിയുടെയും മക്കൾ. മൂന്നും, അഞ്ചും വയസായിരുന്നു അവർക്ക്. മാതാപിതാക്കളിൽ നിന്നും പകർന്നു കിട്ടിയ എയിഡ്സ് എന്ന 'മഹാ'രോഗവുമായി സമൂഹത്തിലേക്കിറങ്ങേണ്ടി വന്ന ഈ പിഞ്ചുകുഞ്ഞുങ്ങളെ കാത്തിരുന്നത് തിക്തമായ അനുഭവങ്ങളാണ്. എയിഡ്സിനെ കുറിച്ച് അധികമൊന്നും ജ്ഞാനമില്ലാതിരുന്ന പൊതുസമൂഹം അവർക്ക് കൈത്താങ്ങാവുന്നതിനു പകരം എല്ലാത്തിൽ നിന്നും അവരെ അകറ്റാൻ മത്സരിക്കുകയാണ് ചെയ്തത്. ഈ കുട്ടികൾ പഠിക്കുന്ന വിദ്യാലയങ്ങളിൽ തങ്ങളുടെ കുട്ടികളെ പഠിപ്പിക്കില്ല എന്ന മറ്റു മാതാപിതാക്കളുടെ സമീപനം അവരുടെ പഠനം പോലും മുടങ്ങുന്ന അവസ്ഥയെത്തി. വിദ്യാലയങ്ങൾ അവരെ ഏറ്റെടുക്കാൻ മടിച്ചു. അന്നത്തെ മുഖ്യമന്ത്രി ശ്രീ. എ.കെ. ആന്റണിക്ക് കുട്ടികളുടെ മുത്തശ്ശൻ ആയ ഗീവർഗീസ് ഒരു നിവേദനം നൽകുകയും ആദ്യ ഘട്ടമെന്ന നിലയിൽ ഒരു സ്വകാര്യ അദ്ധ്യാപകനെ വീട്ടിലിരുന്നു പഠിപ്പിക്കാൻ ഏർപ്പാട് ചെയ്യുകയും, പരീക്ഷകൾ വേറെ വേറെയിരുത്തി എഴുതിക്കുകയും ചെയ്തു. പിന്നീട് ഗവൺമെന്റ് മുൻകൈ എടുത്ത് എയിഡ്സ് ബോധവത്കരണ ക്ളാസുകൾ എടുക്കുകയും ഒരു വിദ്യാലയം ഇവരെ പഠിപ്പിക്കാൻ തയാറാവുകയും ചെയ്തു. ബെൻസി പത്താം തരത്തിൽ എത്തിയപ്പോൾ ഈ ലോകം വിട്ടു പോവുകയും ചെയ്തു.

വർഷങ്ങൾക്കിപ്പുറം മറ്റൊരു പെൺകുട്ടി വാർത്തയിൽ നിറയുന്നു. തിരുവനന്തപുരം ക്യാൻസർ സെന്ററിൽ നിന്നും രക്തം സ്വീകരിക്കുകയും എയിഡ്സ് എന്ന രോഗം ഏറ്റുവാങ്ങുകയും ചെയ്തൊരു ഒൻപതു വയസുകാരി. ആശുപത്രി അധികൃതർ അത്തരം ഒരു സാധ്യത തള്ളിക്കളയുന്നുണ്ടെങ്കിലും രക്തബാങ്കുകളിൽ ഇത്തരം ഒരു സാധ്യത തള്ളിക്കളയാൻ കഴിയില്ല എന്നാണു ഭാരതത്തിലെ ഒരു വർഷം മുൻപ് വരെയുള്ള കണക്കുകൾ സൂചിപ്പിക്കുന്നത്. എയിഡ്സ് എന്നത് പ്രാരംഭ ഘട്ടത്തിൽ തന്നെ കണ്ടുപിടിക്കാവുന്ന പലതരം സാങ്കേതികവിദ്യകളും വർഷങ്ങൾക്ക് മുൻപ് തന്നെ നിലവിൽ ഉള്ളപ്പോൾ ഇത്തരം ഒരു വീഴ്ച ഉണ്ടാകുന്നത് തികച്ചും അസ്വസ്ഥത ഉണ്ടാക്കുന്നതാണ്. 2016 സെപ്‌തംബറിലെ നാഷണൽഎയിഡ്സ് കൺട്രോൾ ഓർഗനൈസേഷന്റെ (NACO) കണക്കനുസരിച്ച് 2234 കേസുകളാണ് ഇതേ രീതിയിൽ ഒന്നര വർഷത്തിനുള്ളിൽ റിപ്പോർട്ട് ചെയ്യപ്പെട്ടിട്ടുള്ളത്. അതായത് രക്തബാങ്കുകളിൽ നിന്ന് രക്തം സ്വീകരിച്ച ഇത്രയും ആളുകൾക്ക് എയിഡ്സ് ബാധ ഉണ്ടായി. ഉത്തർപ്രദേശിൽ (361 ), ഗുജറാത്ത് (292), മഹാരാഷ്ട്ര (276)ഡൽഹി (264)അങ്ങനെ അങ്ങനെ കേരളത്തിൽ (29) എത്രയെത്ര കേസുകൾ. ബഡ്ജറ്റിൽ നീക്കിയിരിപ്പ് കുറവായതിൻറെ പേരിൽ എയിഡ്സ് ബോധവത്കരണ പ്രവർത്തനങ്ങൾ ഗവണ്മെന്റ് കുറച്ചു .ഇത്തരം തെറ്റുകൾ ഉണ്ടാക്കിയ ആശുപത്രികൾക്കെതിരെയും, ജോലിക്കാർക്കെതിരെയും യാതൊരു വിധ നടപടികളും എടുക്കുകയും സർക്കാരിന്റെ ഭാഗത്ത് നിന്നും ഉണ്ടായില്ല. കൃത്യമായ രീതിയിൽ നിരീക്ഷണങ്ങളും, തെറ്റുപറ്റിയവർക്കെതിരെ ശക്തമായ നടപടികൾ എടുക്കുകയും ചെയ്യാൻ സർക്കാരോ, അനുബന്ധ അതോറിറ്റികളോ ശ്രമിച്ചിരുന്നെങ്കിൽ കുറച്ചെങ്കിലും മാറ്റങ്ങൾ ഉണ്ടാകുമായിരുന്നു. ഇതൊരു വശം.

തങ്ങൾക്ക് തെറ്റു പറ്റിയിട്ടില്ല എന്ന ആശുപത്രിയുടെ വാദം ശരിയെന്ന് സമ്മതിക്കുകയാണെങ്കിൽ എന്താകാം ഇത്തരം ഒരു തെറ്റു പറ്റാനുള്ള കാരണം? ഒന്നുകിൽ രക്തം നൽകിയ ആളിന് അതിനെ കുറിച്ച് അറിവുണ്ടായിരിക്കില്ല. അതുമല്ലെങ്കിൽ അറിഞ്ഞിട്ടും പുറത്ത് പറയാനുള്ള വൈമനസ്യം അല്ലെങ്കിൽ ഭയം. രണ്ടാണെങ്കിലും ഒരാൾ രക്തം ദാനം ചെയ്യാൻ വരുമ്പോൾ അവരുടെ ലൈംഗീക ജീവിതത്തെ കുറിച്ച് വ്യക്തമായ ധാരണ ഉണ്ടാക്കിയെടുക്കാൻ ഉതകുന്ന ഒരു ചോദ്യാവലി രക്തദാതാവിനു നൽകുകയും, രക്തദാതാവ് ഭയമില്ലാതെ അതിനെ കുറിച്ച സത്യസന്ധമായി എഴുതാൻ തയാറാകുകയും ചെയ്യുന്നതാണ് ഒരുപാട് പ്രശ്നങ്ങൾ ഒഴിവാക്കാനുള്ള ഏറ്റവും പ്രധാനമാർഗം . സത്യസന്ധമായ തുറന്നു പറച്ചിലുകൾ ഇല്ലാത്തിടത്തോളം ഇത്തരം നിർഭാഗ്യമുഹൂർത്തങ്ങൾ ഉണ്ടായിക്കൊണ്ടേയിരിക്കും. ഒരു ചെറിയ പാകപ്പിഴ ഉള്ള അനുഭവജ്ഞർക്ക്, ശേഷമുള്ള ടെസ്റ്റുകൾ കൂടുതൽ കാര്യക്ഷമമായി നടത്താനും വ്യക്തമായ റിപ്പോർട്ട് ലഭിക്കാനും എളുപ്പമാകും.

എന്തിനും സമൂഹം മേൽക്കൈ എടുക്കേണ്ടതുണ്ട്. ക്യാൻസർ പോലെ, പ്രമേഹം പോലെ ജീവിതകാലം നീണ്ടു നിൽക്കുന്ന, ശരീരത്തിനെ അൽപ്പാൽപ്പമായി തളർത്തുന്ന ഒരു രോഗം മാത്രമായി എയിഡ്സിനെയും കാണണം. ലൈഗീകതയിലൂടെയും, ഒരു തലമുറയിൽ നിന്നും മറ്റൊരു തലമുറയിലേക്കും ഈ രോഗം പരക്കുമെന്നും, സ്പർശനത്തിലൂടെയോ, ഒരു നോട്ടത്തിലൂടെയോ, സംസാരത്തിലൂടെയോ ഇത് പരക്കില്ലെന്നും ഈ സമൂഹം മനസിലാക്കേണ്ടത് അനിവാര്യമാണ്. അത്തരം രോഗബാധിതർക്ക് അവർക്കാവശ്യമായ പിന്തുണ കൊടുക്കുകയും, അവർ സമൂഹത്തിന്റെ ഭാഗമാണെന്നു അവരെ ബോധ്യപ്പെടുത്തുകയും അവരെ ചേർത്ത് പിടിക്കുകയുമാണ് ഒരു പരിഷ്കൃതസമൂഹം ചെയ്യേണ്ടത്. എങ്കിൽ മാത്രമേ രോഗവിവരം അറിയുന്നവർ രക്തദാനം പോലുള്ള സംരംഭങ്ങളിൽ അവരുടെ അവസ്ഥ വെളിപ്പെടുത്താൻ ധൈര്യം കാണിക്കുകയുള്ളൂ. അങ്ങനെയേ ഇത്തരം തെറ്റുകൾ ആവർത്തിക്കപ്പെടാതിരിക്കൂ.

മൂന്നര കോടി ജനങ്ങളെ ബാധിച്ചിട്ടുള്ള, 2016 ഇൽ മാത്രം പത്തുലക്ഷം ആളുകളുടെ ജീവൻ എടുത്ത ഈ രോഗം തടയുക എന്നത് മാത്രമല്ല മറിച്ച്, തെറ്റായ മേൽനോട്ടം വഴി എയിഡ്സ് എന്ന അസുഖം പകരുന്നതിനു മറ്റൊരു മാർഗം എന്ന രീതിയിൽ നമ്മുടെ രക്തദാനബാങ്കുകൾ വളരുന്നു എന്ന ആശങ്കയെ തുടച്ചു നീക്കാൻ കൂടി വേണ്ടിയാണ് ആ മാറ്റം.

പി.സി. അഥവാ നമ്മളെ കാണുന്ന കണ്ണാടി

noreply@blogger.com (Arjun Bhaskaran) — Mon, 14 Aug 2017 10:36:00 +0000

നീ ഇരന്നു വാങ്ങിയതല്ലേ പെണ്ണേ ഈ 'ഇര'യെന്ന പട്ടം?
കോടതി പറഞ്ഞാൽ മാത്രമെങ്ങനെ നീ ഇരയാകും?
ഞാൻ ജനം, ഞാൻ തീരുമാനിക്കും ആര് വേട്ടക്കാരൻ ആരിര !!
നീ പോകുന്ന വഴികളിലെന്നും കാത്തിരുന്ന് നിന്നെ ആക്രമിക്കാൻ ശ്രമിച്ചൊരു വേട്ടക്കാരൻ എങ്ങനെ കുറ്റക്കാരൻ ആകും?
ഒരേ വഴിയിലെന്നും സഞ്ചരിച്ച നീയല്ലേ കുറ്റക്കാരി ?
നിന്റെ ഗൂഢാലോചനയിൽ പഴിയേറ്റുവാങ്ങാൻ വിധിക്കപ്പെട്ടവൻ !

വീണ്ടും വീണ്ടും ഞാൻ ചോദിക്കട്ടെ എന്താണവൻ ചെയ്ത തെറ്റ്?
ഒത്തുകിട്ടിയപ്പോൾ നിന്നെ കടന്നു പിടിച്ചതോ?
അതെങ്ങനെ വേട്ടക്കാരൻറെ കുറ്റമായി?

അവർ നഗ്നയാക്കിയെങ്കിലുമെന്തേ നിനക്കിറങ്ങിയോടാമായിരുന്നില്ല?
കത്തിമുനയിലാണെങ്കിലും നീയത് ചെയ്യണമായിരുന്നു...
നിന്നെ രക്ഷിക്കാൻ മൊബൈൽ ക്യാമറയും തുറന്ന് നിരവധി ആങ്ങളമാർ പുറത്ത് നിൽക്കുന്നുണ്ടായിരുന്നു.

അവർ നിന്നെ ഇരയാക്കിയെന്നു നീ വാദിക്കുന്നു..
നീ എങ്ങനെ ഇരയാകും? നിനക്ക് ജീവനില്ലേ എങ്ങനെ നീയൊരിരയാകും?

നീയൊരു മണ്ടി , പീഡിതയായെന്നു കളവു പറഞ്ഞു പൊലീസിന് പരാതി നല്കിയവൾ, പിറ്റേന്നാൾ തന്നെ ജോലിക്ക് പോയവൾ, തളരാൻ മടിച്ചവൾ

നീയെങ്ങനെ ഇരയാകും? അവർ മുറിച്ചെടുത്ത ഒരിറ്റ് മാംസം നീ തെളിവായി ഞങ്ങളെ കാണിക്കുമോ?
നിൻറെ ജനനേന്ദ്രിയം തുളച്ച ഒരു തുരുമ്പു കമ്പി കാണിക്കുമോ? ഇല്ലെങ്കിൽ നീയെങ്ങനെ ഒരിരയാകും?
നീ ചെറുപ്പമാണ് , ഇരകൾ എങ്ങനെ എന്നറിയാത്ത പ്രായം..
ഞങ്ങൾക്കെല്ലാം അറിയാം , പെണ്ണിന്റെ മാനം തുടയിടുക്കിലാണ്. അവിടെ മാത്രം ..
അവിടെയെത്താത്തതൊന്നും നിന്നെ ഇരയാക്കില്ല.
മറ്റെല്ലാം ഞങ്ങളുടെ അവകാശമാണ്. ഞങ്ങളുടെ കണ്ണുകൾ നിന്നെ നോക്കാനാണ് , കൈകൾ നിന്നെ കടന്നു പിടിക്കാനും. അതെങ്ങനെയൊരു കുറ്റമാകും ?

ഗൂഢാലോചന നടത്തി രാത്രി ഇറങ്ങി നടക്കുന്ന, ഞങ്ങൾക്കിഷ്ടമില്ലാത്ത വസ്ത്രം ധരിക്കുന്ന, പ്രതികരിക്കുന്ന നീയല്ലേ വേട്ടക്കാരി? അവൻ പാവം ഒരിര..

ഇത് കേട്ട് ഞാൻ അവനോടൊപ്പമാണെന്ന് നീ തെറ്റിദ്ധരിക്കരുത് മകളെ..
എനിക്ക് നിന്നോട് ഇഷ്ടമാണ്..
ഇഷ്ടം മാത്രമാണ് ..ഞാൻ ഇരയോട് കൂടെയാണ്..

പ്രണയലേഖനം

noreply@blogger.com (Arjun Bhaskaran) — Tue, 30 Dec 2014 22:25:00 +0000

1.കർട്ടൺ

ഓരോ പുലരിയിലും നിന്നേക്കാൾ മുന്നെയെന്റെ മുഖത്തെ തഴുകാൻ എത്തുന്ന കുളിർക്കാറ്റിനെയും,
പ്രകാശിപ്പിക്കാൻ എത്തുന്ന സൂര്യകിരണത്തെയും തടയാൻ കിടപ്പുമുറിയിലെ ജനലണിയുന്ന മൂടുപടം

2.ഇഷ്ടം

എന്നെ നുള്ളുമ്പോളറിയാതെ നിന്റെകണ്ണിൽ പൊടിയുന്ന ചന്തമുള്ള നനവ്‌ ഇഷ്ടം..

3.സമയം

നീയടുത്തില്ലാത്തപ്പോൾ സദാ അടുത്തിരിക്കുകയും..
നീയടുത്തുള്ളപ്പോൾ ഓടിയൊളിക്കുകയും ചെയ്യുന്ന വികൃതികുഞ്ഞ്‌

4.വീട്‌

നിന്റെ പ്രാണനാൽ ചുവരുകളും, ലാളനത്താൽ മേൽക്കൂരയും,ശ്വാസത്താൽ വർണ്ണങ്ങളും, ശാസനകളാൽ വാതിലുകളും, പ്രാർത്ഥനകളാൽ വേലിയും തീർത്ത്‌ ഞാൻ വസിക്കുന്നയിടം

5.മഴ

എന്നിലെ വിഷാദങ്ങളെ നീരാവികളാക്കി
നിൻഹൃദയഭിത്തികളാൽതടഞ്ഞുനിർത്തി
കൈകളാൽ എന്മുഖം കോരിയെടുത്ത്‌, എന്നിലേയ്ക്ക്‌ പെയ്തിറക്കിയ സ്നേഹത്തുള്ളികൾ

6.തീ

ഏത്ര തണുപ്പിലും ചൂടുപകരുന്ന നിൻപ്രണയം

7.മഴവില്ല്

നമ്മളൊന്നിച്ചു കിനാവുകൾ കൊണ്ട്‌ നെയ്ത ഏഴുവർണ്ണങ്ങളുള്ള കുപ്പായം

8.മറവി

നിന്റെയോർമ്മകൾ മുകളിലെത്താൻ
ഞാൻ ഉന്തിത്തള്ളി, ഇടിച്ചമർത്തിയ ഒരായിരം ഇന്നലെകൾ

9.ചില്ലുകൾ

നമുക്കിടയിൽ കണ്ണുകൾ കണ്ണാടിയായപ്പോൾ തറയിൽ ചാടി ആത്മഹൂതി ചെയ്തവൻ ബാക്കിവെച്ച സ്ഫടികകൂമ്പാരങ്ങൾ

10.നിലാവ്‌

അകലെയിരുന്ന് നീലത്താളിൽ നക്ഷത്രങ്ങൾ കൊണ്ട്‌ ഞാൻ നിനക്കെഴുതിയ പ്രണയലേഖനം

കാറ്റില്‍ പറക്കുന്ന ചുംബനങ്ങള്‍

noreply@blogger.com (Arjun Bhaskaran) — Thu, 06 Nov 2014 17:34:00 +0000

സദാചാരവാദികളെ..പരസ്പരം സ്നേഹത്തോടെ(കാമത്തോടെയല്ല) സഹജീവികളെ പുണരൂ...സൗഹൃദചുംബനങ്ങൾ നൽകൂ..അതിന്റെ ഊഷ്മളത തിരിച്ചറിയൂ. ഒരു ചെറുചുംബനം മനുഷ്യരെ തമ്മിൽ ഇണക്കിച്ചേർക്കുന്നത്‌ അനുഭവിച്ചറിയൂ..
ഉമ്മ എന്നു കേൾക്കുമ്പോൾ എതിർക്കുന്നവരുടെ മനസിൽ തീർച്ചയായും കിടപ്പറയിൽ ഇണയുടെ മേൽ ആവേശം തീർക്കാൻ കാട്ടിക്കൂട്ടുന്ന കാമചുംബനങ്ങളെ ഓർമ്മ വരുന്നുണ്ടാകൂ. കുഞ്ഞായിരിക്കുമ്പോൾ സകലബന്ധുക്കളിൽ നിന്നും ഉമ്മകൾ ഏറ്റുവാങ്ങി.അൽപം വലുതാകുമ്പോൾ കുഞ്ഞുങ്ങൾക്കും, അമ്മയ്ക്കും അച്ഛനും ഉമ്മ നൽകി, പിതാവോ മാതാവോ ആയതിനു ശേഷം കുഞ്ഞുങ്ങൾക്കും ഉമ്മ നൽകുന്ന ഒരു ശരാശരി മലയാളിക്ക്‌ ഉമ്മ കൗമാരത്തിൽ ഒരു അശ്ലീലമാകുന്നത്‌ എന്തിനാണ്‌? പാശ്ചാത്യരാജ്യങ്ങളിൽ പരസ്പരം ചുംബനങ്ങൾ നൽകിയാണ്‌(ലിപ്‌ ലോക്ക്‌ അല്ല) അഭിവാദ്യം ചെയ്യുന്നത്‌. അറബ്‌ രാജ്യങ്ങളിൽ പുരുഷന്മാർ പരസ്പരം പുണർന്നും ചുംബനം നൽകിയും അഭിവാദ്യം ചെയ്യാറുണ്ട്‌. കൃസ്തീയ മതപുരോഹിതന്മാർ കൈകളിൽ മുത്തിയും, ഹിന്ദുമതത്തിൽ പുണർന്നും നെറുകയിൽ ചുംബിച്ചും അനുഗ്രഹങ്ങളും അഭിവാദ്യവും ചൊരിയാറുണ്ട്‌.
തനിക്കിഷ്ടപ്പെട്ടയാളുടെ കൂടെ കൈകൾ കോർത്ത്‌ നടക്കാനും, സ്നേഹചുംബനം നൽകാനും എന്തിനാണ്‌ മറ്റുള്ളവരുടെ സമ്മതം എടുക്കേണ്ടത്‌? പലരും ഇന്നീ പരിപാടിയിൽ പങ്കെടുക്കുന്ന പെൺകുട്ടികളുടെ ഭാവിയെ കുറിച്ചും, അവരുടെ മാതാപിതാക്കളെയും കുറിച്ചോർത്ത്‌ വേവലാതിപ്പെടുന്നു. ദാരിദ്ര്യത്തിൽ മൂടി, ചൊവ്വാദോഷത്തിൽ മൂടി, സ്തീധനകച്ചവടത്തിൽ കുരുങ്ങി ഒരുപാടു പെൺകുട്ടികളും മാതാപിതാക്കളും സമൂഹത്തിൽ എന്തുച്ചെയ്യണമെന്നറിയാതെ കുരുങ്ങിക്കിടക്കുന്നു. ഈ സദാചാരവാദികൾ അവരുടെയൊക്കെ പ്രശ്നങ്ങൾ തീർക്കുക. ഒരു പെൺകുട്ടിക്ക്‌ അല്ലെങ്കിൽ പുരുഷനു അവരുടെ ജീവിതം എങ്ങനെ പോകണം എന്നു തീരുമാനിക്കാനുള്ള അവകാശമുണ്ട്‌. അതിൽ.കൈക്കടത്താൻ ആർക്കും അവകാശമില്ല. അതിന്റെ വരും വരായ്കകളും, നല്ലതും ചീത്തയും അവർ തന്നെ അനുഭവിച്ചു കൊള്ളും. അതല്ല സദാചാരക്കമ്മിറ്റികൾക്ക്‌ അതിൽ ഇടപെട്ടെ തീരു എന്നുണ്ടെങ്കിൽ ഉമ്മ മാത്രമല്ല മറിച്ച്‌ ഒരു കുട്ടി ജനിക്കുമ്പോൾ മുതൽ എല്ലാകാര്യങ്ങളും ഏറ്റെടുത്ത്‌ നടത്തുക.
എല്ലാ പോസ്റ്റുകളിലും സായിപ്പന്മാർ എന്തോ അശ്ലീലജീവികൾ എന്ന രീതിയിൽ കുറിപ്പുകൾ പടച്ചുവിടുന്ന പോൺസിനിമകളിൽ മാത്രം വിദേശികളെ കണ്ടു ശീലിച്ച അണ്ണന്മാരെ കാണാം. എന്ത്‌ എപ്പോൾ എങ്ങനെ ചെയ്യണമെന്ന് മറ്റാരേക്കാളും നന്നായി ഇവിടെയുള്ളവർക്കറിയാം. എല്ലാത്തിനുമുള്ള സ്വാതന്ത്ര്യം ഇവിടെയുണ്ടെങ്കിലും ഇവിടെയാരും പറന്നുനടന്ന് എല്ലാവർക്കും ഉമ്മകൾ നൽകുന്നില്ല. പലരും പറയുന്ന പോലെ പബ്ലിക്‌ സെക്സും ഇല്ല. ഉമ്മകൾ ഇവിടെ സ്നേഹത്തിന്റെ അടയാളങ്ങൾ മാത്രം..മനുഷ്യർ മനുഷ്യർക്ക്‌ ചാർത്തുന്ന സൗഹൃദചിഹ്നങ്ങൾ.
ചുംബനത്തിൽ ശ്രദ്ധിച്ച്‌ ഊർജ്ജം ചെലവാക്കാതെ..പൊതുകക്കൂസുകൾ വൃത്തിയാക്കാത്തതിനെ എതിർക്കുക..പൊതുസ്ഥലത്ത്‌ പുകവലിക്കുന്നവരെ താക്കീത്‌ ചെയ്യുക..മുറുക്കിത്തുപ്പുന്നവരെക്കൊണ്ട്‌ തന്നെ അവിടം വൃത്തിയാക്കിക്കുക, ബസിൽ സ്ത്രീകളുടെ സമ്മതമില്ലാതെ അവരെ തൊട്ടുഴിയുന്നവർക്ക്‌ മുന്നറിയിപ്പ്‌ നൽകുക..മദ്യപിച്ച്‌ ലക്കുക്കെട്ട്‌ പൊതുവഴിയിൽ അസഭ്യം പറയുന്നവരെ എതിർക്കുക..
അതെല്ലാം വിട്ട്‌ ആർക്കും ഒരുപദ്രവും ചെയ്യാത്ത ചുംബനങ്ങളെ വെറുതെ വിടുക. അവയങ്ങനെ പാറിപ്പാറിനടക്കട്ടെ..കാറ്റിലൂടെ പ്രണയസൗഹൃദസന്ദേശവുമായി..

ജീവിതം തിരയുന്നവർ!

noreply@blogger.com (Arjun Bhaskaran) — Thu, 21 Nov 2013 21:25:00 +0000

നല്ല നെല്ലുകുത്തരി കഞ്ഞിയും, കപ്പപ്പുഴുക്കും, ഒരൽപം മുളക്‌ ഞെരടിയതും മുളകരച്ച മത്തിക്കറിയും വിട്ട്‌ ധമനികളിൽ കൊഴുപ്പും, നിണത്തിൽ മധുവും, തലച്ചോറിൽ മദവുമുള്ള ജീവിതം തിരയുന്നവർ!

മനസിൽ പൊട്ടിയ ലഡു

noreply@blogger.com (Arjun Bhaskaran) — Thu, 21 Nov 2013 13:56:00 +0000

മഞ്ഞ്‌ മെല്ലെ കിനിഞ്ഞിറങ്ങുന്നു. എന്നത്തേയും പോലെ രണ്ടു ബ്രെഡും കടിച്ചുപറിച്ച്‌ ബസ്‌ സ്റ്റോപ്പിലേയ്ക്ക്‌ ഞാൻ നടന്നു. ചെവിയിൽ വലിയ ഹെഡ്‌ സെറ്റ്‌ തിരുകിയിട്ടുണ്ട്‌.സ്റ്റോപ്പിൽ ഞാൻ മാത്രം.

"നീ മണിമുകിലാടകളാടിയുലഞ്ഞൊരു മിന്നൽ. ..."

ചെവിയിൽ മലയാളത്തിന്റെ മണിമുഴക്കം. ഞനും മെല്ലെ മൂളാൻ തുടങ്ങിയിരുന്നു. ചെവിയിൽ സ്പീക്കർ വെച്ച്‌ പാട്ടിനൊപ്പം മൂളുമ്പോൾ പലപ്പോഴും യേശുദാസിന്റെ ശബ്ദവും എന്റെ ശബ്ദവും ഒരുപോലെ എനിക്ക്‌ തോന്നാറുണ്ട്‌!

"ഞാനില്ലയെങ്കിൽ നിൻ ഹൃദയവർണ്ണങ്ങളുണ്ടോ...
നീയില്ലയെങ്കിൽ എൻ പ്രണയവർണ്ണങ്ങളുണ്ടോ.."
ഞാൻ മൂളൽ നിർത്തി കൂടെ പാടാൻ തുടങ്ങി.
"അത്രമേലൊന്നാണു നമ്മൾ. ......)))))))))))))"

എന്റെ മുന്നിലൂടെ സൈക്കിൾ ചവിട്ടി പോകുകയായിരുന്ന മധ്യവയസ്കൻ പെട്ടെന്ന് സൈക്കിൾ സഡൻ ബ്രേക്ക്‌ ഇട്ടുനിർത്തി.!!!

"പടച്ചോനെ പണിപാളിയോ? ? ഈ ജെർമ്മൻ ആളുകൾക്ക്‌ ഒരു ശീലമുണ്ട്‌ എവിടെ കലകാരന്മാരെ കണ്ടാലും പിടിച്ചു നിർത്തി യൂറോ കൊടുക്കും. ഇനി എനിക്ക്‌ യൂറോ തരാൻ വല്ലോമാണോ. മനസിൽ പൊട്ടിയ ലഡു ഒരുവശത്ത്‌ വെച്ചിട്ട്‌ എന്താ എന്ന ഭാവത്തിൽ ഞാൻ ഹെഡ്‌ സെറ്റ്‌ മാറ്റി.

"ആർ യു ആൾ റൈറ്റ്‌? ?ഈസ്‌ എവെരിതിംഗ്‌ ഫൈൻ??"

ഇളിഭ്യത നിറഞ്ഞ എന്റെ മുഖത്ത്‌ നോക്കി ഒരു ആക്കിയ ചിരി ചിരിച്ച്‌ സൈക്കിളുകാരൻ യാത്ര തുടർന്നു.

സച്ചിൻ

noreply@blogger.com (Arjun Bhaskaran) — Sat, 16 Nov 2013 08:54:00 +0000

സച്ചിൻ താങ്കൾ ഒരു ജനതയെ, രാഷ്ട്രത്തെ, ലോകത്തെ മനസിലാക്കിച്ചിരിക്കുന്നു..
ഒരു ദൈവമുണ്ടാവാൻ, ഒരു മതമുണ്ടാകാൻ, ജനഹൃദയങ്ങളിൽ ചേക്കേറാൻ ഒരു ഗീതയുടെയും, ബൈബിളിന്റെയും, ഖുറാന്റെയും ആവശ്യമില്ല..
വെറും ഇരുപത്തൊന്നു യാർഡ്‌ വലിപ്പമുള്ളൊരു പിച്ചും, ഒരു ക്രിക്കറ്റ്‌ ബാറ്റും മാസ്മരികത തീർക്കാൻ കഴിയുന്ന കൈകളും, പിന്നെ അഹങ്കാരമില്ലാത്തൊരു മനസും മതിയെന്ന്!
താങ്കൾ ക്രിക്കറ്റിൽ നിന്നും മാത്രമെ വിരമിക്കുന്നുള്ളൂ.. ഞങ്ങളുടെ ഹൃദയത്തിന്റെ ശ്രീകോവിലിൽ ഒരു ദൈവമായി എന്നുമുണ്ടാകും താങ്കളും താങ്കൾ ചരിത്രത്താളുകളിൽ എഴുതിച്ചേർത്ത അപരാജിത നിമിഷങ്ങളും..
നന്ദി സച്ചിൻ.. തീർച്ചയായും ഭാവിയിൽ ഭാരതം ഏതെങ്കിലും ടീമിനു മുന്നിൽ പ്രതിസന്ധിയിലാകുമെങ്കിൽ ലക്ഷോപലക്ഷം ജനങ്ങൾ ഒരേ മനസോടെ ഈ വാക്കുകൾ ഉരുവിടും..
"സച്ചിനുണ്ടായിരുന്നെങ്കിൽ... "

പഴയ ഓട്ടോ

noreply@blogger.com (Arjun Bhaskaran) — Thu, 22 Aug 2013 17:49:00 +0000

ഇന്ന് ഒരു ഒന്നരമണിക്കൂർ ഓട്ടോയാത്രയുണ്ടായിരുന്നു. തിമിർത്ത്‌ പെയ്യുന്ന മഴയിലൂടെയതിങ്ങനെ കുലുങ്ങി കുലുങ്ങി..
ഒരു പഴയ ഓട്ടോ. പഴയതെന്നു വെച്ചാൽ വളരെ പഴകിയത്‌! പെയിന്റ്‌ ഇളകാത്ത ഒരു ഭാഗവും അതിനുണ്ടായിരുന്നില്ല. മുകളിൽ ചോർച്ച അടയ്ക്കാനാണെന്ന് തോന്നുന്നു ഒരു അഴുക്കുപുരണ്ട നീല ടാർപ്പായ തിരുകി വെച്ചിരിക്കുന്നു. ഇരുവശത്തേയും കർട്ടനുകളുടെ അവശിഷ്ടം മുകളിലെ തുരുമ്പു കാർന്നുതിന്നാൻ തുടങ്ങിയ കമ്പിയിൽ ശേഷിച്ചിട്ടുണ്ട്‌. ഡ്രൈവർ ചാരിയിരിക്കുന്ന സീറ്റിൽ പുറത്തേയ്ക്ക്‌ തള്ളിനിൽക്കുന്ന ഒരു കഷണം പ്ലൈവുഡും അൽപം സ്പോഞ്ചും! വണ്ടിയൊന്നു ബ്രേക്കിട്ടാൽ ഞാൻ ഇരിയ്ക്കുന്ന സീറ്റ്‌ മുന്നോട്ടു നിരങ്ങിനീങ്ങും. കൈകൾകൊണ്ട്‌ വീണ്ടുമത്‌ പിന്നിലേയ്ക്ക്‌ ചേർത്തു നിർത്തി വീണ്ടും ഞാനതിൽ ഇരിപ്പു തുടരും. റോഡിന്റെ കുഴികളിലും, ഹമ്പുകളുടെ മേലും ചാടിയോടുമ്പോൾ തകരപാട്ടകളുടെ ഞരക്കം കൃത്യമായി കേൾക്കാമായിരുന്നു. പൊട്ടിയ കണ്ണാടിയിൽ വയസായ ഡ്രൈവറുടെ മുഖം ഇടയ്ക്കിടെ മിന്നിമറഞ്ഞു.

ഇത്രയൊക്കെ കുറവുകൾ ഉണ്ടായിട്ടും ആ ഓട്ടോയോട്‌ എനിക്കൊരു പുശ്ചവും തോന്നിയില്ല. മറിച്ച്‌ പ്രത്യേകമായൊരു ഇഷ്ടം..

ഈ കുറവുകളെയെല്ലാം മറികടക്കുന്നൊരു ഘടകം എന്നെ വല്ലാതെ സ്വാധീനിച്ചിരുന്നു..!
മറ്റൊന്നുമല്ല,

"രണ്ടുകാലും പാടെ തളർന്നിട്ടും നിരത്തിലിറങ്ങി തെണ്ടാതെ ഒരു ഓട്ടോ ഓടിച്ച്‌ ആ അദ്ധ്വാനം കൊണ്ട്‌ തന്റെ കുടുംബത്തെ പോറ്റാനുള്ള ആ ദൃഢനിശ്ചയം"

റംസാന്‍ നല്‍കുന്ന തിരിച്ചറിവുകള്‍

noreply@blogger.com (Arjun Bhaskaran) — Wed, 10 Jul 2013 15:20:00 +0000

കോളേജ് ജീവിതത്തില്‍ നോമ്പെടുക്കല്‍ സാധാരണയായിരുന്നു. മതപരമായി എന്ന് പറയാന്‍ കഴിയില്ല. കാരണങ്ങള്‍ പലതായിരുന്നു. പ്രധാനമായും സൗഹൃദങ്ങള്‍, പിന്നെ സുഹൃത്തുക്കള്‍ ഭക്ഷണം കഴിക്കുമ്പോള്‍ അതിനൊരു ഐക്യം പ്രഖ്യാപിക്കല്‍, പിന്നെ നോമ്പ് തുറയില്‍ പങ്കെടുക്കല്‍ അങ്ങനെ പലതും! രാവിലെ ബാങ്ക് കൊടുക്കുമ്പോള്‍ എഴുന്നേറ്റാല്‍ എനിക്കാരു ഭക്ഷണം വിളമ്പാന്‍? പലപ്പോഴും വീട്ടില്‍ നോമ്പ് എടുക്കുന്ന കാര്യം പറഞ്ഞാല്‍
"ഒന്ന് പോയെ ചെക്കാ"
എന്നാകും അമ്മയുടെ മറുപടി.

എന്ത് ചെയ്യാന്‍ എന്‍റെ മുസ്ലിം സുഹൃത്തുക്കള്‍ എല്ലാം അതിരാവിലെ എഴുന്നേറ്റ് ഭക്ഷണവും കഴിച്ച് വീണ്ടും കിടന്നുറങ്ങി എഴുന്നേറ്റ് ക്ലാസ്സില്‍ വരുമ്പോള്‍ പച്ചപ്പട്ടിണിയായി ഈ ഞാനും ഉണ്ടാകും ക്ലാസ്സില്‍. ഒരു തുള്ളി വെള്ളം പോലും കഴിക്കാതെ. പിന്നെ തട്ടി മുട്ടി പകല്‍ കഴിച്ചു കൂട്ടും.പിന്നെ വൈകുന്നേരം വീട്ടിലേക്ക് ഓടും. അവിടെ ഉച്ചത്തെ ചോറും കറിയും കാത്തിരിക്കുന്നുണ്ടാകും .അത് കഴിച്ചെന്നു വരുത്തും. ആ സമയം കൂട്ടുകാര്‍ നല്ല പത്തിരിയും കോഴിക്കറിയും അടിച്ചു കേറ്റുന്നതു സ്വപ്നവും കാണും.

പിന്നെ പിന്നെ ആ സ്വഭാവമെല്ലാം മാറി. മൂന്നാല് ദിവസം കഴിഞ്ഞപ്പോള്‍ ഒരു ദിവസം വൈകീട്ട് വീട്ടിലെത്തിയപ്പോള്‍ എന്നെയും കാത്ത് പത്തിരിയും, കോഴിക്കറിയും!! അപ്പുറത്തെ വീട്ടിലെ ഉമ്മൂട്ടി താത്ത ഞാന്‍ നോമ്പ് എടുക്കുന്നുണ്ടെന്നു അടുക്കള പരദൂഷണങ്ങളിലൂടെ അറിഞ്ഞ് എനിക്ക് വേണ്ടി കൊണ്ട് വെച്ചതാണത്രേ! പിന്നീട് ആ പതിവ് താത്ത തുടര്‍ന്നു. അയല്‍വാസികളുടെ നോമ്പ് തുറകള്‍ക്കും ഞാന്‍ അതിഥി ആയി. കൂട്ടുകാരും ഇടയ്ക്കൊക്കെ വിളിക്കാന്‍ തുടങ്ങി. ഇരുപത് ഇരുപത്തിയൊന്നു നോമ്പുകള്‍ ഒക്കെ ഞാന്‍ നോക്കിയിട്ടുണ്ട്.

എന്തായാലും റംസാന്‍ കൊണ്ട് എനിക്ക് പല ഗുണങ്ങളും ഉണ്ടായിട്ടുണ്ട്. രണ്ടു നേരം ഭക്ഷണം കഴിക്കാത്തവന്റെ അവസ്ഥ മനസിലായി. ഭക്ഷണത്തോട് ഉള്ള ആര്‍ത്തി നഷ്ടപ്പെട്ടു. ഒരു പിടി നല്ല മനുഷ്യരെ മതങ്ങള്‍ക്കപ്പുറം ഹൃദയത്തോട് ചേര്‍ത്തു.അത് കൊണ്ട് തന്നെ പലരും

"ഓര് മാപ്പളമാരാ അവരോട് സംസാരിക്കണ്ട, കൂട്ടുകൂടണ്ട "

എന്നൊക്കെ പറയുമ്പോള്‍ ധൈര്യമായി മനസ്സില്‍ കളങ്കമില്ലാതെ എനിക്ക് ഇങ്ങനെ പറയാന്‍ സാധിച്ചിട്ടുണ്ട്.

"അവര്‍ മനുഷ്യരാണ്. നമ്മെ പോലെ ചെമന്ന രക്തവും, തുടിക്കുന്ന ഹൃദയവുമുള്ള മനുഷ്യര്‍."

**************************
എല്ലാവര്ക്കും ഒരു നല്ല റംസാന്‍ മാസം ആശംസിക്കുന്നു.

ചന്തമില്ലെങ്കിലെന്താണമ്മെ

noreply@blogger.com (Arjun Bhaskaran) — Wed, 26 Jun 2013 06:50:00 +0000

അമ്മേ എനിക്കിനി പൊട്ടുവേണ്ട
ചന്തം തരുന്നൊരു കുപ്പായവും
കണ്ണിലെഴുതും മഷിക്കറുപ്പും
പിന്നിയിടുന്ന മുടിയിഴയും
കാതിൽ, കഴുത്തിലരയിൽ, കണങ്കാലിലാഭപരത്തുമാഭരണം വേണ്ട!
മാർദ്ദവമേറും പുറംതൊലിയും
ചോരതുടിക്കുമീ ചുണ്ടിണയും
മാതൃത്വമേകുമീ മാറിടവും
കഥകൾ പറയുന്ന കണ്ണുകളും
വേണ്ടെനിക്കെന്നുരിയാടിയിട്ടാ-മുഖപത്രത്തിലേക്കവൾ
ഊളിയിട്ടു.
അസ്ഥികൂടമാകണമെനിക്ക്‌
മാംസമില്ലാത്ത, ചന്തമില്ലാത്ത
മുഴുത്തമാറും, ചന്തിയുമില്ലാത്ത
ആരും കണ്ടാൽ അറപ്പുതോന്നുന്നൊരു പെണ്ണസ്ഥിക്കൂടം!
ചന്തമില്ലെങ്കിലെന്താണമ്മെ

ചുണ്ടും, മുലയും കടിച്ചുപറിക്കുന്ന,
മാംസത്തീയിലുരസി സ്ഖലനം നടത്തുന്ന
മടിയിലിരുത്തി താലോലിച്ച്‌ ലിംഗം തിരുകുന്ന കാട്ടാളജന്മങ്ങൾ
മാറ്റിനിർത്തില്ലേയമ്മതൻ പൊന്നിനെ ഒരു വട്ടമെങ്കിലും വേദന നൽകാതെ??

#79 വയസുള്ള കാരണവർ ഇന്നലേയും ഒരു കുഞ്ഞിനു മേൽ പരാക്രമം നടത്തി

ചിത്രം

noreply@blogger.com (Arjun Bhaskaran) — Wed, 19 Jun 2013 15:59:00 +0000

കാർമ്മേഘങ്ങൾ മഴത്തൂവലുകൾകൊണ്ടീ
ഇളം മൺകടലാസിലൊരു ചോക്കളേറ്റ്‌ ചിത്രം വരച്ചു.

മുറ്റമടിക്കുമ്പോഴമ്മയുപേക്ഷിച്ച ഈർക്കിലിൻ തുണ്ടുകൾ ചിത്രത്തിനൊരു ചട്ടക്കൂടു തീർത്തു.

കരിയിലകൾ തീർത്ത വെളുത്തു നനുത്ത പത ചട്ടയിൽ പൂക്കളും പതിപ്പിച്ചു.

ഇന്നു പുലർന്നൊരു വെയിൽ മ്യൂസിയത്തിൻ ഏതൊ കോണിലാ ചിത്രം ഓടിയൊളിച്ചു.

വായനാദിനം പ്രത്യേക അനുസ്മരണം

noreply@blogger.com (Arjun Bhaskaran) — Tue, 18 Jun 2013 19:47:00 +0000

വായന തുടങ്ങിയിട്ട്‌ കൃത്യമായി ഇരുപത്തിനാലു കൊല്ലങ്ങൾ ആയി. അമ്മയുടെ നഴ്സറിയിലെ അ, ആ, ഇ,ഈ,... അക്ഷരമാലാ പുസ്തകത്തിൽ തുടക്കം. ഒന്നാം ക്ലാസ്സിൽ പഠിക്കുമ്പോൾ വീടിനു പുറകിലെ റഷീദ്‌ ഇക്ക മുടങ്ങാതെ തന്നിരുന്ന ബാലമംഗളമായിരുന്നു വായനയിലേക്ക്‌ കൂടുതൽ അടുപ്പിച്ചത്‌. ബാലമംഗളത്തിലെ ഡിങ്കനും, മലർവ്വാടിയിലെ പൂച്ചപ്പോലീസും, പൈ ലി ചേട്ടനും, പൂമ്പാറ്റയിലെ കിഷ്കുവും ആയിരുന്നു അന്നത്തെ ഹീറോകൾ. പിന്നീട്‌ ബാലരമയിലേക്ക്‌ ചുവടു മാറ്റിയപ്പോൾ മായാവിയും, ഡൂഡുവും ചമതകനും, കപീഷും, ഇൻസ്പെക്ടർ ഗരുഡും, മന്ത്രിയുടെ തന്ത്രങ്ങളും പ്രിയപ്പെട്ടവയായി. സൂപ്പർ ഹീറോകളായി ഫാന്റവും, നമ്പോലനും, പക്രുവും കൂടെയുണ്ടായിരുന്നു. സയൻസ്‌ പഠിക്കുന്നതിനു മുൻപേ ഞാൻ ആരാധിച്ചിരുന്ന രണ്ട്‌ ശാസ്ത്രജ്ഞന്മാർ ലൊട്ടുലൊടുക്കും, ഗുൽഗുലുമാലുമായിരുന്നു.
നാലാം ക്ലാസിൽ പഠിക്കുമ്പോൾ ആയിരുന്നു വായനയുടെ തലം മാറിയത്‌. അടുത്ത വീട്ടിലെ ദീപുവേട്ടനും, ദീപ്തിച്ചേച്ചിയും യൂറീക്ക മുടങ്ങാതെ തരും. കൂടാതെ കൊച്ചു കൊച്ചു നോവലുകൾ(ബാലസാഹിത്യങ്ങൾ) വായിക്കാൻ തുടങ്ങിയതും അവിടെ നിന്നു തന്നെ. നമ്പീശൻ ചേട്ടനും, ഹേമച്ചേച്ചിയും ഒരുപാടു പുസ്തകങ്ങൾ തരികയും വായനാശീലത്തെ പ്രോത്സാഹിപ്പിക്കുകയും ചെയ്തു. ക്രിസ്തീയപുസ്തകങ്ങൾ വായിക്കുന്നത്‌ കന്യാസ്ത്രീമഠം നടത്തുന്ന വായനശാലയിൽ നിന്നാണ്‌. ഇലിയഡും, പ്രോമിത്യൂസും, ഒഡീസിയും, ഹെർക്കുലീസും, അഥീന ദേവിയും, സ്യൂസുമെല്ലാം സുഹൃത്തുക്കൾ ആയത്‌ അവിടെ വെച്ചാണ്‌.

കുമാർ ചാച്ചന്റെ വീട്ടിലെ അലമാരകൾ ആണ്‌ വായനയുടെ മഹാസാഗരം എനിക്ക്‌ മുന്നിൽ തുറന്നിട്ടത്‌. പുരാണങ്ങൾ, ഐതീഹ്യമാല, ഷെർലൊക്ക്‌ ഹോംസ്‌, ബഷീർ, ചുള്ളിക്കാട്‌, മുകുന്ദൻ എന്നിങ്ങനെ ഒരു കൂട്ടം പുസ്തകങ്ങൾ വായിച്ചു തീർത്തത്‌ അവിടെ നിന്നാണ്‌. നല്ലൊരു കലാകാരനും, എഴുത്തുകാരനുമായ ചാച്ചന്റെ തെരഞ്ഞെടുത്ത പുസ്തകങ്ങൾക്ക്‌ വായനാമാധുര്യം ഉണ്ടായിരുന്നു.
കാലങ്ങൾ കടന്നു നവോദയ വിദ്യാലയത്തിലെ വായനശാല... പലഭാഷകളിൽ പുസ്തകങ്ങൾ മനസിൽ ഇടം നേടി. ഇപ്പോഴും നെറ്റിലൂടെയും, ബ്ലോഗുകളിലൂടെയും വായന സഞ്ചരിച്ചുക്കൊണ്ടേയിരിക്കുന്നു.

ഒരു കഥ പറയാം

noreply@blogger.com (Arjun Bhaskaran) — Tue, 04 Jun 2013 19:09:00 +0000

ഡിഗ്രി കാലഘട്ടത്തില്‍ ആണ് ഞാനും നാട്ടുകാരനായ ഒരു സുഹൃത്തും കൊച്ചിയില്‍ പി എസ് സി പരീക്ഷ എഴുതാന്‍ പോയത്. അടുത്തൊക്കെ പരീക്ഷാ കേന്ദ്രം ഉണ്ടെങ്കിലും കൊച്ചി കാണാനുള്ള ആശയില്‍ അവിടെ തന്നെ പരീക്ഷാകേന്ദ്രം കൊടുത്തു.അതിരാവിലെ നാലുമണിയോടെ ബസില്‍ കയറി. പരീക്ഷ ഒന്‍പതു മണിക്ക്. ഏകദേശം ഏഴരയോടെ എറണാകുളം കെ എസ് ആര്‍ ടി സി ബസ് സ്റ്റേഷനില്‍ എത്തി. പ്രകൃതിയുടെ വിളി തുടങ്ങിയിരുന്നു. ബസ്‌ സ്റ്റാന്‍ഡില്‍ ഉള്ള ശോചനാലയത്തില്‍ തന്നെ കയറി. അതിരാവിലെ ആയതിനാല്‍ നല്ല തിരക്ക്. കിട്ടിയ രണ്ടു മുറികളില്‍ ഞങ്ങള്‍ ഇരച്ചു കയറി. അല്പം കഴിഞ്ഞ് ഞാന്‍ പുറത്തിറങ്ങി പല്ലൊക്കെ തേക്കാന്‍ തുടങ്ങി. ഉള്ളില്‍ പോയ സുഹൃത്തിനെ കാണാന്‍ ഇല്ല. വെളിയില്‍ നില്‍ക്കുന്ന തമിഴന്‍ നല്ല തെറിവിളി തുടങ്ങിയിരുന്നു. വാതിലിലും തട്ടാന്‍ തുടങ്ങി. അളിയന്‍ ഇറങ്ങുന്ന ലക്ഷണം ഇല്ല. ഞാന്‍ ഉടുപ്പെല്ലാം ഇട്ടു മുടിയൊക്കെ ചീകിയപ്പോഴേക്കും സുഹൃത്ത് ഓടിയിറങ്ങി വന്നു.

"ഡാ വേഗം വാ..നമുക്ക് പോകാം"

"എന്താടാ" ഞാന്‍ ചോദിച്ചു.

"നീ വാ " അവന്‍ എന്‍റെ കയ്യും പിടിച്ച്, ഉടുപ്പൊക്കെ കുത്തി കയറ്റി പുറത്തേക്ക് ഓടി. കിട്ടിയ ഓട്ടോയില്‍ ചാടിക്കയറി പിന്നെ ശ്വാസം ആഞ്ഞു വലിച്ചു.

"എന്താടാ എന്തുണ്ടായി??" ഞാന്‍ ചോദിച്ചു.

അവന്‍ എന്‍റെ മുഖത്തേക്ക് ദയനീയമായി നോക്കി.

ഫ്ലാഷ് ബാക്ക്
*************************************************
സുഹൃത്ത് കയറിയ മുറിയില്‍ അബദ്ധവശാല്‍ ഉണ്ടായിരുന്നത് യൂറോപ്യന്‍ ക്ലോസറ്റ്..ജീവിതത്തില്‍ ഇന്നേവരെ ഇന്ത്യന്‍ ക്ലോസറ്റ് അല്ലാതെ ഒന്നിലും കാര്യം സാധിച്ചിട്ടില്ലാത്ത പാവം എന്ത് ചെയ്തെന്നോ?
ഭിത്തിയില്‍ തൂക്കിയ ഫ്ലെഷ് ടാങ്കില്‍ കൈകുത്തി ഒരുകാല്‍ യൂറോപ്യന്‍ ക്ലോസറ്റിന്റെ ഒരു വശത്ത് ചവിട്ടി ഇന്ത്യന്‍ ക്ലോസറ്റ് സ്റ്റൈലില്‍ ഇരിക്കാന്‍ ആയി ഒരു കയറല്‍! ഫ്ലെഷ് ടാങ്കും , കഥാനായകനും താഴെ. മുക്കാല്‍ മണിക്കൂര്‍ നേരത്തെ അധ്വാനത്തില്‍ അത് എങ്ങനെയൊക്കെയോ ഭിത്തിയില്‍ പുള്ളിക്കാരന്‍ അമര്‍ത്തി വെച്ച് ജീവനും കൊണ്ട് രക്ഷപ്പെട്ടതാണ്.

"ഹി ഹി ഇപ്പൊ അണ്ണന്‍ ഭിത്തിയില്‍ ഫ്ലെഷ് ടാങ്ക് ഫിറ്റ്‌ ചെയ്യുന്നുണ്ടാകും " അളിയന്‍ ചിരിക്കുന്നു.

"നീ പബ്ലിക്‌ സര്‍വീസ് കമ്മീഷന്‍ എക്സാമിനേഷന് വന്നതോ, പബ്ലിക്‌ സര്‍വീസ് ക്ലോസേറ്റ് എക്സാമിനേഷന് വന്നതോ???" ഞാനും ഒട്ടും കുറച്ചില്ല

തേങ്ങാപ്രണയം

noreply@blogger.com (Arjun Bhaskaran) — Thu, 30 May 2013 06:28:00 +0000

പ്രണയികളായ രണ്ട്‌ തേങ്ങകൾ..
അരിവാളിൻ വെട്ടേറ്റ്‌,

കാതങ്ങൾ താണ്ടിയൊടുക്കം മൺകട്ടയിൽ തലയടിച്ച്‌ മൃതമായ്‌

ശവങ്ങൾ എടുത്തുയർത്തി കാരിരുമ്പിൻ മുനയായ്‌ ദേഹവും കുപ്പായവും വേർത്തിരിച്ചു

കമിതാക്കളുടെ ദേഹങ്ങൾ കൊത്തിയരിഞ്ഞ്‌ പൊരിവെയിലിലും,

കുപ്പായങ്ങൾ തല്ലിചതച്ച്‌ വെള്ളത്തിനടിയിലും

വെട്ടേറ്റിട്ടും, തലതല്ലി മരിച്ചിട്ടും
പൊരിവെയിലിൽ കരിഞ്ഞുണങ്ങിയിട്ടും, വെള്ളത്തിൽ മുങ്ങി ചീഞ്ഞു നാറിയിട്ടും
അവർ വേർപ്പിരിഞ്ഞില്ല

ആ പ്രണയം മരിച്ചില്ല

ഒരു തുടം വെളിച്ചെണ്ണയായും,
ഒരു മുഴം കയറായും അവരിന്നും
വേർപ്പിരിയാതെയൊന്നായ്‌ കഴിയുന്നു.

അമിതാബ് ബച്ചന്‍ജിയുടെ സമ്മാനം!!!

noreply@blogger.com (Arjun Bhaskaran) — Thu, 09 May 2013 08:48:00 +0000

ഇന്ന് ഞാന്‍ വളരെ സന്തോഷവാന്‍ ആണ്. സാക്ഷാല്‍ അമിതാബ് ബച്ചന്‍ ജി , ഞാന്‍ വരച്ച അദ്ദേഹത്തിന്‍റെ ഛായാചിത്രം അദ്ദേഹത്തിന്‍റെ ഫേസ് ബുക്ക് പേജിലെ "ഫാന്‍സ്‌ കോര്‍ണറില്‍" ചേര്‍ത്തിരിക്കുന്നു.

https://www.facebook.com/AmitabhBachchan/app_417057188384660

ചിന്തകൾ

noreply@blogger.com (Arjun Bhaskaran) — Fri, 03 May 2013 15:33:00 +0000

ചിന്തകൾ തൊട്ടാവാടിക്കൂട്ടങ്ങൾക്കിടയിലൂടെ ഇഴഞ്ഞിഴഞ്ഞ്‌ നീങ്ങുന്നു.

ചിന്തകളിൽ മുള്ളുകൾ തീർക്കുന്ന വേദനയുള്ള പോറലുകൾ.

പുറത്തിറങ്ങാൻ കഴിയാത്ത വിധമേതോ തൊട്ടാവാടിയുടെ വേരുപടലത്തിൽ
കാലുകൾ കുരുങ്ങിയിരിക്കുന്നു.

തൊട്ടാവാടിപൂക്കളുടെ ഗന്ധത്തിൽ ശ്വാസം നിലയ്ക്കുന്നത്‌ പോലെ.

എത്ര തലോടിയിട്ടുമുറങ്ങാതെ കണ്ണടയ്ക്കാതെ അവയെന്റെ ചിന്തകളെ വേദനിപ്പിച്ചുകൊണ്ടേയിരിക്കുന്നു

ഭാവിയിലേക്ക് അല്പം ചിന്ത

noreply@blogger.com (Arjun Bhaskaran) — Thu, 02 May 2013 07:15:00 +0000

ബാല-കൌമാര പീഡനങ്ങള്‍ വര്‍ദ്ധിച്ചു വരുന്ന ഈ സാഹചര്യത്തിലെങ്കിലും അച്ഛനമ്മമാര്‍ സദാചാരബോധം അല്പമെങ്കിലും ഇറക്കിവെക്കാന്‍ മനസ്സ് കാണിക്കണം. പീഡനം നടത്തിയവര്‍ക്കെതിരെ ശിക്ഷയ്ക്ക് അലമുറയിടുന്ന ജനത അതെ ഉത്സാഹം കുഞ്ഞുങ്ങളുടെ ബോധവല്കരണത്തിലും കാണിക്കണം. തീര്‍ച്ചയായും തെറ്റ്, ശരി എന്ന രണ്ടു വാക്കുകളുടെ അര്‍ത്ഥം ഉള്‍ക്കൊള്ളാന്‍ കഴിയുന്ന പ്രായം മുതല്‍ (അത് ലൈംഗീകതയുടെ തെറ്റ്, ശരി എന്നല്ല ഉദ്ദേശിച്ചത്) ഇത്തരം ബോധവല്‍ക്കരണങ്ങള്‍ തുടങ്ങണം. ലൈംഗീകത എന്താണ് എന്ന് കുഞ്ഞുങ്ങളെ പറഞ്ഞു പഠിപ്പിക്കേണ്ട ആവശ്യം ഇല്ല. അത് അതെന്താണ് എന്ന് അറിയിക്കേണ്ട പ്രായമാകുമ്പോള്‍ വ്യക്തമായി പറഞ്ഞു കൊടുക്കാം.

പ്രാഥമികമായി വേണ്ടത് ഇങ്ങനെ ചെയ്യുന്നത് തെറ്റാണ്. അതിനു അനുവദിക്കാന്‍ പാടില്ല, എന്ന രീതിയില്‍ ഉള്ള ഒരു ചിന്ത കുട്ടികളില്‍ വളര്‍ത്തിയെടുക്കുക എന്നത് തന്നെയാണ്. അതിനു പ്രധാന പങ്കു വഹിക്കാന്‍ കഴിയുന്ന വ്യക്തി അമ്മ തന്നെയാണ്. മറ്റുള്ളവര്‍(അത് പരിചിതര്‍ ആയാലും അപരിചിതര്‍ ആയാലും) ഇന്ന ശരീരഭാഗങ്ങളില്‍ തൊടുന്ന, തലോടുന്ന പ്രവണത തെറ്റാണ് എന്നും, അങ്ങനെ ആരെങ്കിലും ചെയ്യുകയോ ചെയ്യാന്‍ പ്രേരിപ്പിക്കുകയോ ചെയ്‌താല്‍ ഉടന്‍ അറിയിക്കണം എന്നും (അത് പിതാവായാലും, അമ്മാവന്‍ ആയാലും, അയല്‍വാസി ആയാലും, അദ്ധ്യാപകന്‍ ആയാലും) കുഞ്ഞുങ്ങളെ ധരിപ്പിക്കണം. അല്പം കൂടി മുതിര്‍ന്നവര്‍ ആണ് കുട്ടികള്‍ എങ്കില്‍ ലൈംഗീകത എന്താണെന്നും, അത് ആരോഗ്യപരം ആകുന്നത് എപ്പോള്‍ എന്നും, ആരോഗ്യപരം അല്ലാത്ത പെരുമാറ്റങ്ങള്‍ എങ്ങനെയൊക്കെ എന്നെല്ലാം വ്യക്തമായി അവര്‍ക്ക് പറഞ്ഞു കൊടുക്കണം. അതൊരു കിടപ്പറ രഹസ്യം ആണെന്നും കുഞ്ഞുങ്ങള്‍ അറിഞ്ഞാല്‍ മോശം ആണെന്നും ഒരിക്കലും വിചാരിക്കരുത്.

"പഠിക്കൂ..പഠിക്കൂ" എന്ന് നാഴികയ്ക്ക് നാല്പത് വട്ടം പറയുന്നതിനിടയില്‍ മറ്റൊരു പ്രധാനകാര്യം ശ്രദ്ധിക്കേണ്ടതുണ്ട്. കുട്ടികള്‍ക്ക് വാര്‍ത്തകള്‍ വായിക്കാനും, കാണുവാനും സമയം വേണ്ടുവോളം നല്‍കണം. ഇന്ന് സമൂഹത്തില്‍ എന്തെല്ലാം തരത്തില്‍ കുഞ്ഞുങ്ങള്‍ ചൂഷണം ചെയ്യപ്പെടുന്നു. ഏതെല്ലാം മാര്‍ഗത്തില്‍ ആപത്തില്‍ പെടാം എന്നതിനെ കുറിച്ചെല്ലാം കുട്ടികളില്‍ വളരെ എളുപ്പത്തില്‍ ഒരു അവബോധം ഉണ്ടാക്കിയെടുക്കാന്‍ മാധ്യമങ്ങള്‍ക്കാവും. എങ്ങനെ ടെക്നോളജി മനുഷ്യനെ ദോഷമായി ബാധിക്കുന്നു എന്നും മറ്റുമുള്ള വിവരങ്ങളും കുട്ടികള്‍ക്ക് ഇതില്‍ നിന്നും ലഭിക്കും.
********************************************************
"എന്താമ്മേ സെക്സ്?? എന്ന ചോദ്യത്തിന് "കുഞ്ഞുവായില്‍ നിന്നും വരുന്ന വര്‍ത്തമാനം കേട്ടില്ലേ. സ്കൂളില്‍ പോയി പെണ്ണ് കേടു വന്നു " എന്ന് പറയുന്നവര്‍ ആണ് ഭൂരിഭാഗം മാതാപിതാക്കളും.

"എങ്ങനെയാ ഞാന്‍ ഉണ്ടായേ" എന്ന് ചോദിക്കുന്ന കുട്ടികള്‍ക്ക് മിക്ക മാതാപിതാക്കളും പറയുന്ന മറുപടി ഊഹിക്കാമോ??"
അതിങ്ങനെയാണ്..
"അമ്മ ഒരു കുരു വിഴുങ്ങും. അത് മുളച്ച് നീയുണ്ടായി.എന്നിട്ട് ഓപ്പറേഷന്‍ ചെയ്ത് വയറിലൂടെ പുറത്ത് എടുത്തു.അങ്ങനെയാണ് മോന്‍ ഉണ്ടായത് :-)"

വാൽ

noreply@blogger.com (Arjun Bhaskaran) — Sun, 28 Apr 2013 07:02:00 +0000

കല്യാണം കഴിഞ്ഞ പെണ്ണുങ്ങളും അപകടത്തിൽ പെടുന്ന പല്ലികളും ഉപേക്ഷിക്കുന്ന ഒന്നാണു "വാൽ"

അത്ഭുതമെന്നു പറയട്ടെ കല്യാണപ്പെണ്ണിനും, പല്ലിക്കും മുളയ്ക്കുമത്രെ ഒരു പുതുവാൽ!

മരണക്കവിത

noreply@blogger.com (Arjun Bhaskaran) — Mon, 22 Apr 2013 13:55:00 +0000

1. ഓരോ മരണത്തിനും നിണത്തിന്‍റെ-

രൂക്ഷഗന്ധം ഉണ്ടത്രേ.

2. അത് കൊണ്ടാകാം നിണമുണ്ടാക്കുന്ന"മണ"വും,

നിണമുണ്ടാകുന്ന "രണ"വും

3. ചേര്‍ന്ന് "മരണം" ഉണ്ടായത്!!

രണ്ടാം ഖണ്ഡികയില്‍

*നിണമുണ്ടാക്കുന്ന മണം = നിണത്താല്‍ ഉണ്ടാകുന്ന മണം.

*നിണമുണ്ടാകുന്ന രണം= രണത്താല്‍ നിണം ഉണ്ടാകുന്നു.

ഇന്നിന്റെ കാഴ്ചകൾ

noreply@blogger.com (Arjun Bhaskaran) — Wed, 17 Apr 2013 13:08:00 +0000

മരം വെട്ടിയും, മണ്ണു ചെത്തിയും, വെള്ളം വറ്റിച്ചും വിറ്റത്‌ നിങ്ങൾ..

തണലില്ലാതെ,പാർക്കാൻ ഇടമില്ലാതെ, ദാഹിച്ചുണങ്ങി കരയുന്നതും നിങ്ങൾ!

വിഷു വിശേഷങ്ങള്‍

noreply@blogger.com (Arjun Bhaskaran) — Fri, 12 Apr 2013 17:40:00 +0000

വിഷു ഇങ്ങെത്തി. ഓര്‍മകളില്‍ വിഷുവിനു "കണികാണല്‍,കൈനീട്ടം, പടക്കം പൊട്ടിക്കല്‍ എന്നിങ്ങനെയാണ് ഞാന്‍ അര്‍ഥം കൊടുത്തിരിക്കുന്നത്. പണ്ട് വിഷുവിനു നാട്ടില്‍ പോകാറുള്ള ഒരു പതിവുണ്ടായിരുന്നു. അതിരാവിലെ വീട്ടിലെയും, തറവാട്ടിലെയും കണികള്‍ കണ്ട് കൈനീട്ടങ്ങള്‍ അച്ഛന്റെ അടുത്ത് നിന്നും അമ്മയുടെ അടുത്ത് നിന്നും, കുട്ടച്ചന്റെ അടുത്ത് നിന്നും അച്ഛച്ഛന്റെ അടുത്ത് നിന്നും കൈപറ്റിയതിനു ശേഷമേ പോകൂ. നാട്ടില്‍ പോയാല്‍ അമ്മ വീട്ടുകാരില്‍ നിന്നും കൈനീട്ടം കയ്യോടെ വാങ്ങാം!!
ഒരിക്കല്‍ നാട്ടില്‍ പോയപ്പോള്‍ ചേട്ടന്‍ ഒരു കഥ പറഞ്ഞു. തൊട്ടപ്പുറത്തെ ചെമ്പ് ഫാക്ടറിയില്‍ ജോലി നോക്കുന്ന ബീഹാറികള്‍ക്ക് വിഷു ആഘോഷിക്കാന്‍ ഒരു ആശ!
പടക്കങ്ങള്‍ ഒക്കെ വാങ്ങി കൊണ്ട് വന്ന് രാത്രി ആഘോഷം തുടങ്ങി. പൂത്തിരികളും, മത്താപ്പൂക്കളും, ചക്രങ്ങളും രാത്രിയില്‍ വര്‍ണങ്ങള്‍ തീര്‍ത്തു.
കൂട്ടത്തില്‍ ഒരുത്തന്‍ ഓലപ്പടക്കം പൊട്ടിക്കാന്‍ തയാറെടുത്തു. മണ്ണെണ്ണ വിളക്ക് ഇടതു കയ്യില്‍ പിടിച്ച് ഓലപ്പടക്കങ്ങള്‍ ഓരോന്നായി കത്തിച്ച് എറിയാന്‍ തുടങ്ങി. ഇടയ്ക്ക് ഒരു പടക്കം കത്തിച്ച് ഒരേറ്. എന്നിട്ട് പൊട്ടാന്‍ കാത്തു നിന്നു.

"പടക്കം പൊട്ടി പക്ഷെ കത്തിച്ച് എറിഞ്ഞ പടക്കമല്ല. കയ്യിലിരുന്ന പടക്കം"!!!!
*********************************
കഥയിങ്ങനെ...

ബീഹാറി പടക്കം കത്തിച്ചു. വെപ്രാളത്തില്‍ വലിച്ചെറിഞ്ഞത് "ഇടത് കയ്യിലെ മണ്ണെണ്ണവിളക്ക്" . പടക്കം കയ്യിലിരുന്നു പൊട്ടി.

ഇതൊരു തമാശയായി പറഞ്ഞു നടന്നെങ്കിലും ആഘോഷങ്ങളില്‍ അപകടങ്ങള്‍ ശ്രദ്ധിക്കുമല്ലോ. നല്ലൊരു അപകടരഹിതമായ വിഷു ആശംസകള്‍ :-)

ചില ഐ പി എല്‍ സ്കൂള്‍ വട്ടുകള്‍ !!!

noreply@blogger.com (Arjun Bhaskaran) — Thu, 11 Apr 2013 14:19:00 +0000

ഇത് ഞങ്ങളുടെ പണ്ടത്തെ കൌണ്ടി ഗ്രൌണ്ട്. ബാറ്റ് ചെയ്യുന്നത് ഞാനും

ഐ പി എല്‍ കൊണ്ട് പിടിച്ചു നടക്കുകയാണ്. വീറോടും, വാശിയോടും കൂടെ മത്സരിക്കുന്ന ടീമുകള്‍. ഇരുപത് ഓവറിലേക്ക് ചുരുക്കിയ ക്രിക്കറ്റ്. ഇപ്പോള്‍ ക്രിക്കറ്റ്‌ ജീവിതത്തിന്‍റെ ഭാഗം അല്ലെങ്കിലും പണ്ട് വളരെ പണ്ട് ഒരു ഹോസ്റ്റലന്‍ ആയിരുന്ന കാലത്ത് ഇത് ഒരു ലഹരി തന്നെ ആയിരുന്നു.

ക്രിക്കറ്റ്‌ ഒന്ന്
***************
അഞ്ച് ഓവറും, പത്ത് ഓവറുമൊക്കെയായിരുന്നു ശരാശരി ദൈര്‍ഘ്യം. കുളിക്കാനും, അലക്കാനും പോകുന്നതിനു തൊട്ടു മുന്നേയുള്ള ചുരുങ്ങിയ സമയത്ത് കളിക്കുന്ന ക്രിക്കറ്റിനു ഞങ്ങള്‍ "കൌണ്ടി" എന്നാണു പേരിട്ടിരുന്നത്. പിച്ചിനു കഷ്ടി ആറേഴു മീറ്റര്‍ നീളം. പന്ത് ചുമ്മാ ഇട്ടു കൊടുക്കും. ചില സ്പിന്നര്‍മാര്‍ പന്ത് കുത്തി തിരിക്കുന്നതിലൊക്കെ അഗ്രഗണ്യന്‍മാര്‍. ബാറ്റ്സ്മാന് മുന്നില്‍ മൂന്നു ബൌണ്ടറികള്‍ കാണും. റണ്‍സ് എടുക്കാന്‍ ഓടേണ്ട ആവശ്യമൊന്നുമില്ല. ഏറ്റവും അടുത്ത വര പന്ത് മറികടന്നാല്‍ ഒരു റണ്‍സ്. അടുത്ത വര രണ്ടു റണ്‍സ്. ഏറ്റവും അകലെയുള്ള വര കടന്നാല്‍ നാല് റണ്‍സ്. പന്ത് ആ വരയ്ക്ക് മുകളിലൂടെ പൊക്കിയടിച്ചാല്‍ ഔട്ട്‌!
ചുറ്റും പന്ത് പിടിക്കാന്‍ ഫീല്‍ഡില്‍ ആളുകള്‍ ഉണ്ടാകും. ചില കളികളില്‍ ഒരു പിച്ചു ചെയ്ത് പിടിച്ചാലും ഔട്ട്‌ ആയിരുന്നു. തൊട്ടു പുറകിലെ ചുമര്‍ ആയിരുന്നു സ്റ്റംപ്. പന്ത് അതില്‍ തട്ടിയാലും ഔട്ട്‌.

ക്രിക്കറ്റ്‌ രണ്ട്:
**************
ഗ്രൗണ്ടില്‍ ഇറങ്ങാതെ ശരീരത്തില്‍ ഒരു പൊടി പറ്റാതെ കളിക്കുന്നതായിരുന്നു ഇത്. കൂടുതലും പഠിക്കേണ്ട സമയങ്ങളില്‍ ആയിരുന്നു ഈ കളി കളിച്ചിരുന്നത്. ഒരു ടെക്സ്റ്റ്‌ ബുക്കും, ഒരു നോട്ട് ബുക്കും ഉണ്ടെങ്കില്‍ ആര്‍ക്കും ഒറ്റയ്ക്കും, ഇരട്ടയ്ക്കും കളിക്കാം.
ബുക്കില്‍ ആദ്യമായി രണ്ടു ടീമുകളുടെ പേരുകള്‍ എഴുതുന്നു. പതിനൊന്നു കളിക്കാരുടെയും പേര്.
ബാറ്റിങ്ങിന് രണ്ടു പേരെ നിശ്ചയിക്കുന്നു. പിന്നെ ടെക്സ്റ്റ്‌ ബുക്ക്‌ മറിക്കുന്നു. എന്നിട്ട് വരുന്ന പേജിലെ ഇടതു വശത്തെ അക്കങ്ങള്‍ നോക്കുന്നു. ഉദാഹരണത്തിന് 2,4,6,8,0 എന്നിവയാണ് വരിക. അതല്ല 22, 24, 26, 28,30 ആണ് വരുന്നതെങ്കില്‍ ഒറ്റയുടെ സ്ഥാനം പരിഗണിക്കണം. ഇതില്‍ 8 വന്നാല്‍ ഔട്ട്‌ ആയി കണക്കാക്കും. 0 വന്നാല്‍ റണ്‍സ് ഇല്ല. ബാക്കിയെല്ലാം റണ്‍സ്. ഉദാഹരണത്തിന് സച്ചിന്‍ ബാറ്റ് ചെയ്യുന്നു എങ്കില്‍ ഒരു റണ്‍സ് കിട്ടിയാല്‍ അടുത്ത ബാറ്റ്സ്മാന്‍ ആകും അടുത്ത ബോള്‍ നേരിടുക.

വാല്‍കഷണം:
**************
രണ്ടു കളികളും വട്ടന്മാര്‍ക്ക് പറഞ്ഞിട്ടുള്ളതാണ് എങ്കിലും ആ കാലഘട്ടത്തില്‍ മനസിന്‌ ഒരുപാട് ആശ്വാസം തന്നവയാണ് ഇവ രണ്ടും. ഇനിയും വട്ടു കളികള്‍ ധാരാളം. അത് പിന്നൊരിക്കല്‍!!