ഏര്‍ളി ബ്ലോഗര്‍ | eB

എന്‍റെ കന്നി(ശരിക്കും കര്‍ക്കിടകത്തിലാ) യുഎസ് പര്യടനം

noreply@blogger.com (Berly Thomas | ബെര്‍ളി തോമസ്) — Tue, 03 Aug 1982 23:43:00 +0000

സത്യം പറഞ്ഞാല്‍ അച്ചാച്ചന്‍റെ കൂടെ അമേരിക്കേല്‍ വരെ പോയപ്പോഴാണ് അവിടുത്തെ കാര്യങ്ങളൊക്കെ മനസ്സിലായത്. രാജ്യം കൊള്ളാം. മൊത്തം സെറ്റപ്പുകളും കൊള്ളാം. വിമാനത്തിനാണ് പോയത്. വയസ് മൂന്നേ ഉള്ളൂ എന്നതിനാല്‍‍ ടിക്കറ്റ് എടുക്കേണ്ടി വന്നില്ല. നല്ല സ്ഥലം. റീഗന്‍ എന്നൊരു ചേട്ടനാണ് അവിടെ പ്രസിഡന്‍റ്. റീഗല്‍ തുള്ളിനീലം എന്നു കേട്ടിട്ടുണ്ട്. അതിന്‍റെ മുതലാളീടെ അനിയനോ മറ്റോ ആയിരിക്കും. ആര്‍ക്കറിയാം.

അച്ചാച്ചന് അവിടെ മിനിയാപ്പോലിസിലും കാലിഫോര്‍ണിയയിലും എസ്റ്റേറ്റുണ്ട്. അച്ചാച്ചനൊക്കെ അല്ലെങ്കിലും എന്തും ആവാമല്ലോ. മിനിയാപ്പോലിസിലെ എസ്റ്റേറ്റ് ബംഗ്ലാവില്‍ എന്നെ വിട്ടിട്ട് അച്ചാച്ചന്‍ നേരേ കാലിഫോര്‍ണിയയിലേക്കു വിട്ടു. ബംഗ്ലാവില്‍ വച്ചാണ് ഞാനാദ്യമായി സത്യം പറ‍ഞ്ഞാല്‍ കളര്‍ ടിവി കാണുന്നത്. വീട്ടിലുള്ളത് ബ്ലാക് ആന്‍ഡ് വൈറ്റ് ആണ്. അതില്‍ ദൂരദര്‍ശനെന്നു പറയുന്ന ഒരു സാധനമാണ് കിട്ടുന്നത്. ഇത് കൊള്ളാം. സംഗതി നല്ല രസമുണ്ട്. അതിന്‍റെ കുറച്ച് ഞാന്‍ റെക്കോര്‍ഡ് ചെയ്ത് വച്ചിരിക്കുന്നത് ഇവിടെ കാണാം. അവിടുത്തെ 5 മണി വാര്‍ത്ത പിടിച്ചതാണ്.

അവിടുന്ന് പ്രസിഡന്‍റ് റീഗനെ കാണാന്‍ വേണ്ടി അച്ചാച്ചന്‍റെ കൂടെ പോയി. അവിടെ ചെന്നപ്പോള്‍ ഫിലിപ്പീന്‍സുകാരനായ ഏതോ ഒരു മാര്‍ക്കോസേട്ടനും കെട്ടിയോള്‍ ഇമെല്‍ഡയും മൂപ്പരുടെ അടുത്ത്. അവരാണെങ്കില്‍ അച്ചാച്ചനെ കണ്ടതും ചാടി വീണു. റീഗന്‍ ‍ഞെട്ടി. അച്ചാച്ചന് ഇന്ത്യക്കും തായ്‍വാനും പുറമേ അമേരിക്കയില്‍ മാത്രമേ എസ്റ്റേറ്റുള്ളൂ എന്നാ റീഗന്‍റെ വിചാരം. ഫിലിപ്പീന്‍സിലെ 20,000 ഏക്കര്‍ എസ്റ്റേറ്റില്‍ ഇമെല്‍ഡ ചേച്ചി വന്നു പോകാറുണ്ടെന്നു പറഞ്ഞ് അച്ചാച്ചന്‍റെ പേരിലുള്ള ചില ആരോപണങ്ങള്‍ വീട്ടില്‍ ഞാനും കേട്ടിട്ടുള്ളതല്ലേ.

എന്തായലും അവരുടെ കൂടെ ചായേം വടേം കഴിച്ച് അടുത്ത ദിവസം ഞങ്ങള്‍ മടങ്ങി. ന്യൂയോര്‍ക്കിലിറങ്ങി എനിക്കൊരു നിക്കറു വാങ്ങിത്തന്നു. അവിടുന്ന് ഞാനൊരു മാസിക കണ്ടു വാങ്ങിച്ചു. പ്ലേബോയ് എന്നാണ് പേര്. കളിക്കുന്ന പ്രായത്തിലുള്ള ബോയ്സിനുള്ളതാണെന്ന് പേരില്‍ തന്നെയുണ്ടല്ലോ. ചൂടു പോകാതെ അതും നിങ്ങളെ കാണിച്ചേക്കാം. ലിതാണ് ലത്.

നാളെ ഞങ്ങള്‍ ഇന്ത്യയിലേക്കു മടങ്ങും.അമേരിക്ക കാണാന്‍ വന്ന പ്രധാനമന്ത്രി ഇന്ദിരാ ഗാന്ധിയും നാളെ ഞങ്ങള്‍ പോകുന്ന ഫ്ളൈറ്റിലാണ് പോകുന്നതെന്നു കേള്‍ക്കുന്നു. ശല്യമാകും. എനിക്കാണെങ്കില്‍ മുടി വെട്ടിയ പെണ്ണുങ്ങളെ കണ്ണെടുത്താല്‍ കാണരുത്. സഹിക്കുക തന്നെ. നമ്മളൊക്കെ പ്ലേബോയ്സ് ആയിപ്പോയില്ലേ..

ആരും കാണാത്ത സംഗതി

noreply@blogger.com (Berly Thomas | ബെര്‍ളി തോമസ്) — Thu, 29 Jul 1982 20:52:00 +0000

ഉടനെ ഇറങ്ങാന്‍ പോകുന്ന ജെയിംസ് ബോണ്ട് പടം ഒക്ടോപ്പസിയുടെ പോസ്റ്റര്‍ കേരളത്തിലാദ്യമായി നിങ്ങള്‍ക്കു മുന്നിലവതരിപ്പിക്കുന്നു ഞാന്‍. അമേരിക്കേലുള്ള എന്‍റെ അമ്മായി വഴി സംഘടിപ്പിച്ചതാണ്. കപ്പലില്‍ സംഗതി കയറ്റി അയച്ചെന്നു പറഞ്ഞെങ്കിലും ഇത്ര വേഗം കിട്ടുമെന്നു വിചാരിച്ചില്ല. എല്ലാവരും കാണൂ...

ഇന്ന് ഹോളിവുഡിലെ അഭിനയപ്രതിഭയായ റോജര്‍ മൂര്‍ ബോണ്ടേട്ടനായി അഭിനയിക്കുന്ന ഈ സിനിമ ജെയിംസ് ബോണ്ട് സീരിസിലെ പതിമൂന്നാമത്തെ പടമാണ്. മുറ്റ് പീസായ മൗദ് ആഡംസാണ് നായിക.

പ്രിയങ്കയും കനിഹയും വളരട്ടെ...

noreply@blogger.com (Berly Thomas | ബെര്‍ളി തോമസ്) — Thu, 29 Jul 1982 08:47:00 +0000

ഹും. ഞങ്ങളുടെ എസ്റ്റേറ്റിലെ കരിയില തൂക്കി വാങ്ങിക്കൊണ്ടു പോകുന്ന വടക്കേ ഇന്ത്യക്കാരന്‍ ചോപ്ര വന്നിരുന്നു. കരിയിലയൊന്നും ഇല്ലെന്നു പറഞ്ഞു. അപ്പോളാണ് അയാള്‍ പറഞ്ഞത് അയാള്‍ക്ക് ഒരു കുഞ്ഞുണ്ടായെന്ന്. പെങ്കൊച്ചാണെന്നും പറഞ്ഞു. പ്രിയങ്ക എന്നു പേരിട്ടേക്കാന്‍ ഞാനാണ് പറഞ്ഞത്. അവളൊക്കെ വളരട്ടെ, നമ്മളൊക്കെ വളര്‍ന്ന് ഒരു ലെവലാകുമ്പോഴേക്കും നല്ല പീസുകള്‍ വേണമല്ലോ. കൊച്ചിന്‍റെ ഫോട്ടോ ചോപ്രച്ചേട്ടന്‍ കാണിച്ചതനുസരിച്ചാണെങ്കില്‍ ലവള്‍ ഫാവിയില്‍ ഒരു മിസ് വേള്‍ഡോ ഹിന്ദി സിനിമാ നടിയോ പോലും ആയേക്കും. പ്രിയങ്കാ ചോപ്ര എന്നാകുമ്പോള്‍ നല്ല പേരാണ്. ആ പേരിട്ടതിന്‍റെ ക്രെഡിറ്റ് എനിക്കിരിക്കട്ടെ.ങ്ഹാ, നാളെ അവളൊക്കെ എന്നെ ഓര്‍ത്തിരുന്നാലായി, ഇല്ലെങ്കിലായി.

അപ്പുറത്തെ എസ്റ്റേറ്റിലെ വാഴയിലയെല്ലാം വാങ്ങാന്‍ വരുന്ന പാണ്ടിക്കാരന്‍ സുബ്രഹ്മണ്യത്തിനും കഴിഞ്ഞയാഴ്ച ഒരു പെങ്കൊച്ചുണ്ടായി. ഈ ഗേള്‍സിനെയെല്ലാം കൂടി ഞാനെങ്ങനെ മാനേജ് ചെയ്യുമെന്നാ. എന്തായാലും അവള്‍ക്കു കനിഹ എന്നു പേരിട്ടേക്കാന്‍ ഞാന്‍ പറഞ്ഞു. കൊച്ചുങ്ങളൊക്കെ വളരട്ടെ, വല്ല സിനിമയിലോ മറ്റോ അഭിനയിക്കട്ടെ, ഞാന്‍ വരുന്നുണ്ടെടീ..!!

ഈ നവംബറില്‍ ഏഷ്യന്‍ ഗെയിംസ് ഡല്‍ഹിയില്‍ വച്ചു നടത്തുമെന്ന് സര്‍ക്കാര്‍ പറയുന്നു. ഇന്ത്യയില്‍ വച്ചാദ്യമായാണ് ഒരു കൊള്ളാവുന്ന പരിപാടി നടത്തുന്നത്. ഇവന്മാരിതൊക്കെ എങ്ങനെ നടത്തുമോ ആവോ ? കുളമാക്കാതിരുന്നാല്‍ മതിയായിരുന്നു. പി.ടി.ഉഷയൊക്കെ ഓടിപ്പഠിക്കുന്നുണ്ടോ ആവോ ? നബാര്‍ഡ് എന്നു പറയുന്ന ഒരു സാധനം സര്‍ക്കാര്‍ ഉണ്ടാക്കിയിട്ടുണ്ട്. പാവങ്ങളെയൊക്കെ കൊള്ളയടിക്കാനുള്ള സര്‍ക്കാരിന്‍റെ സൂത്രമാണെന്നാണ് മെമ്പര്‍ പറയുന്നത്. നമ്മള്‍ കോടീശ്വരന്‍മാരായതുകൊണ്ട് രക്ഷപെട്ടു!

ഹാപ്പി ബര്‍ത്‍ഡേ ടൂ മീ..!!

noreply@blogger.com (Berly Thomas | ബെര്‍ളി തോമസ്) — Sun, 07 Mar 1982 23:01:00 +0000

ഇന്ന്, എനിക്കു മൂന്നു വയസ്സായി. ഇങ്ങനെ പോയാല്‍ അടുത്ത വര്‍ഷം നാലു വയസ്സാകുന്ന ലക്ഷണമാണ്. പിറന്നാള്‍ ആശംസയറിയിച്ച് എലിസബത്ത് രാജ്ഞി കമ്പിയടിച്ചിരിക്കുന്നു. ക****ട മോള്‍ക്ക് ഒന്നിവിടം വരെ വന്നുപോയാലെന്താ ? വല്ല കേക്കോ, മറ്റോ കൊണ്ടു വന്നു തരികയുമാകാമായിരുന്നു.

മൂന്നാറിലെ 400 ഏക്കര്‍ വിട്ടുകൊടുക്കുമോ എന്നു ചോദിച്ച് മുഖ്യമന്ത്രി കരുണാകരന്‍ വന്നിരുന്നു. അയാള്‍ ഒരു സംഭവമാണ്. പക്ഷെ, പൊളിറ്റിക്കലി അത്ര പോര. എന്‍റെ ഒരൂഹം ശരിയാണെങ്കില്‍ മിക്കവാറും അങ്ങേരടെ മന്ത്രിസഭ രാജി വയ്‍ക്കേണ്ടി വരും. പിന്നെ ഇലക്ഷന്‍. അതു കഴി‍ഞ്ഞാലും മൂപ്പര് തന്നെയാവും മുഖ്യമന്ത്രി. നടക്കട്ടെ, നമ്മള്‍ ഏജ് ഓവറാകുന്നതുവരെയല്ലേയുള്ളൂ ഈ കളി.

ഒരു സിനിമ കാണണമെന്നു കുറെ നാളായി വിചാരിക്കുന്നു. ഷീലയുടെ ബാക്കിനിട്ട് നസീറങ്കിള്‍ തല്ലുന്നത് കണ്ടു മടുത്തു. സഹിക്കുന്നതിനൊക്കെ ഒരു പരിധിയില്ലേ ? തിയറ്ററിലിരിക്കുന്നവന്‍ എത്ര കൈവീശിയിട്ടും കാര്യമുണ്ടോ. കെ.ജി.ജോര്‍ജിന്‍റെ യവനിക നാളെ റിലീസ് ചെയ്യുമെന്നു കേള്‍ക്കുന്നു. പാപ്പനെ വിളിച്ചു പറ‍ഞ്ഞിട്ട് മഹാറാണിയില്‍ പോയി കാണണം.

തല്‍ക്കാലം ഇത്രയും മതി. ഞാനീ ബ്ലോഗും യൂണികോഡും ഒക്കെ ഉണ്ടാക്കിയിട്ടെന്തു കാര്യം. ഇതൊക്കെ കണ്ടുപിടിച്ച് മറ്റേ അലവലാതികള്‍ വായിക്കാന്‍ പരുവത്തിലാകണമെങ്കില്‍ ഇനീം പത്തിരുപതു കൊല്ലം കൂടി കഴിയണം. കഷ്ടം തന്നെ! ലോകം നമ്മുടെയത്ര ഫാസ്റ്റ് അല്ലാതെ പോയാല്‍ വല്ലാത്ത ബോറടി തന്നെ !