மானிடன்

One Hundred Years of Solitude - Part -2 -True form of Art ♥️

2026-08-08T13:13:05.736+05:30

முதல் பகுதி போல இரண்டாம் பகுதியும் அருமை. முதல் 3 அத்தியாயங்கள் விருவிருப்பாக செல்கின்றன. மற்றவை மெதுவாக நகர்ந்தாலும் ஆர்வம் குறையவில்லை. உலகின் மிக முக்கியமான நாவலை, மிக கவனமாக, நேர்த்தியாக உருவாக்கியிருக்கிறார்கள் என நினைக்கிறேன். நாவலை இன்னும் வாசிக்கவில்லை. வாசித்தவர்கள், இந்தத் தொடரில் இருக்கும் குறைகள் மற்றும் போதாமைகளை தெரிவிக்கலாம்.

இசை மனதிற்கு மிகவும் நெருக்கமாக இருக்கிறது. இசை ஒரு உலகலாவிய மொழி என்பது உண்மை தான். லத்தின் அமெரிக்க இசையை தேடிக் கேட்கும் ஆர்வத்தை இந்தத் தொடர் உருவாக்கி இருக்கிறது. நிறைய இடங்களில் இசை அற்புதமாக இருந்தது. ஒளிப்பதிவும் சிறப்பு. அந்த கதைக் களத்தை அப்படியே திரையில் காண்பிக்க நிறையவே உழைத்திருக்கிறார்கள். ஆகஸ்ட் 25 இறுதி பகுதி வருவதற்கு முன் மீண்டும் இந்தத் தொடரை பகுதி ஒன்றிலிருந்து பார்க்க வேண்டும்.

அழகியல் மட்டுமே கலையாகாது. அழகியலுடன் அரசியலும் சேரும் போது கலையாகிறது. அரசியல் , திரை முழுவதும் இருக்கிறது. வளர்ச்சி என்று நாம் பெருமையாக சொல்லிக் கொள்ளும் ஒன்று உள்ளே நுழைந்தவுடன் நாம் எவ்வளவு விசயங்களை இழக்கிறோம் என்பதை தெளிவாக விளக்குகிறது. வளர்ச்சியால் நாம் பெறுவதை விட இழப்பது அதிகம். குறிப்பாக அடிப்படை மனித உணர்வுகள். வளர்ச்சியின் வேகம் அதிகரிக்க அதிகரிக்க மனித மனங்கள் சுருங்கிக் கொண்டே வருவதை நிகழ்காலத்திலும் காணலாம்.

அதிகாரம் யார் கையில் இருக்கிறது, அது எந்த எல்லை வரை செல்கிறது என்பதை இந்த One Hundred Years of Solitude மீண்டும் மீண்டும் வெளிப்படுத்துகிறது. ஒரு இயற்கையோடு இணைந்து வாழும் இனக்குழுவில் நுழையும் அரசு என்ற அமைப்பும், மதம் என்ற அமைப்பும் எவ்வாறு ஆதிக்கம் செலுத்துகின்றன என்பதையும் இதில் காணலாம்.

இந்த கதைக்களம் அப்படியே இந்தியா போன்ற நாடுகளுக்கும் அப்படியே பொருந்துகிறது. மிகப்பெரிய அளவிலான குழு இந்தப் படைப்பை உருவாக்கி இருக்கிறது. அனைவருக்கும் வாழ்த்துக்கள் 🎉

கொலம்பிய எழுத்தாளரான கேப்ரியல் கார்சியா மார்க்வெஸ் (Gabriel García Márquez)- ன் மாய யதார்த்த (Magical Realism) படைப்பான இந்த One Hundred Years of Solitude ( தனிமையின் நூறு ஆண்டுகள் ) ஒரு முக்கியமான படைப்பு. இந்த நாவலை வாசிக்க வேண்டும். முடிந்தவரை இந்த தொடரையாவது ஒரு முறை பார்க்க வேண்டும்.

This is a true form of Art ♥️

மேலும் படிக்க :

ONE HUNDRED YEARS OF SOLITUDE - FANTASTIC EXPERIENCE ❤️

EXTRAORDINARY ATTORNEY WOO - FEEL GOOD SERIES !

SEX EDUCATION - NETFLIX SERIES !

வெற்றி வாகை சூடியது ஸ்பெயின் கால்பந்து அணி !

2026-07-26T06:40:53.084+05:30

அர்ஜென்டினா இறுதிப்போட்டிக்கு சென்றதையே உலகக்கோப்பை வென்றது போல கொண்டாடிவிட்டார்ள், உலக அர்ஜென்டினா கால்பந்து ரசிகர்கள். தொடர்ந்து எகிப்து மற்றும் இங்கிலாந்து அணிகளுக்கு இடையிலான போட்டிகளில் பின்னடைவிலிருந்து மீண்டு வெற்றி பெற்றது, அவர்களை பெருமகிழ்ச்சி கொள்ளச் செய்தது.

மற்றொரு புறம் கோப்பையை வெல்லும் என கணிக்கப்பட்ட பிரான்ஸ் அணியை எளிதாக வென்று இறுதியில் நுழைந்திருந்தது, ஸ்பெயின் அணி. அர்ஜென்டினா அணி மெஸ்ஸியை சுற்றியே விளையாடியது பலமாகவும் இருந்தது, பலவீனமாகவும் இருந்தது. இறுநிப் போட்டியில் அர்ஜென்டினா என்ன திட்டத்துடன் விளையாடியது என்று சுத்தமாக விளங்கவில்லை. தற்காப்பு ஆட்டம் முழுதாக பயனளிக்கவில்லை. பாதி களத்திலெயே சுருங்கிப்போனது , அர்ஜென்டினா.

ஸ்பெயின் விளையாடியது மிகவும் நேர்த்தியான மட்டும் கட்டுக்கோப்பான ஆட்டம். அதனாலேயே வெற்றி பெற்றது. தொடர்ந்து அர்ஜென்டினாவின் கோல் கீப்பர் மார்டினஸ், கோலாக மாறக் கூடிய பந்துகளை தீவிரமாக தடுத்துக்கொண்டே இருந்தாலும் தொடர்ந்து பந்தை பாக்ஸிற்குள் அனுப்பிக் கொண்டே இருந்தது ஸ்பெயின் அணி. எந்நேரத்திலும் கோல் விழலாம் என்ற சூழலே நிலவியது. இறுதியில் அது தான் நடந்தது. அர்ஜென்டினா கோல் கீப்பர் மார்டினஸ் கால்களுக்கு வரும் பந்தை எளிதாக பாஸ் செய்யக்கூட ஸ்பெயின் விரர்கள் விடவில்லை. அவரிடமிருந்து பந்தைப் பறிக்கவே முயற்சி செய்தனர். அதே நேரம் ஸ்பெயின் கோல்கீப்பர் அருகில் கூட அர்ஜென்டினா வீரர்கள் செல்லவில்லை. இரண்டாம் பாதியின் தொடக்கத்தில் மட்டும் இரண்டு மூன்று முறை அவரை நெருங்கினர். அணியின் வயதும் ஒரு காரணம் என விளங்கியது.

ஸ்பெயின், போட்டி முழுக்கவே பந்தை தனது கட்டுப்பாட்டுக்குள் வைத்திருந்தது. தொடர்ந்து மிக எளிதாக பந்தை அர்ஜென்டினா அணி வீரர்களிடமிருந்து கால்பற்றியது. மெஸ்ஸி மட்டுமல்ல மற்ற யாரின் கால்களுக்கும் பந்து செல்லவில்லை. தாக்குதல் பாணி ஆட்டத்தில் சிறந்த அணியான அர்ஜென்டினா ஆட்டத்தின் ஏதாவது ஒரு கட்டத்தில் தாக்குதல் பாணி ஆட்டத்தை கையில் எடுத்திருந்தால் கூட நிச்சயம் வென்றிருக்கும், தடுப்பாட்டத்தால் தோற்றிருக்கிறது. ஸ்பெயின் அளவிற்கு அர்ஜென்டினா கோல் வாய்ப்புகளை பெற்றிருந்தால் நிச்சயம் நாலைந்து கோல்கள் போட்டிருக்கும்.

மொத்தத்தில் மிகச்சிறப்பான ஆட்டத்தை வெளிப்படுத்திய ஸ்பெயின் அணி கோப்பையை வென்றிருக்கிறது. அர்ஜென்டினா இன்னும் கொஞ்சம் தீவிரமாக விளையாடியிருந்தால் போட்டி இன்னும் சுவாரசியமாக இருந்திருக்கும். இந்தத் தொடரில் சுவாரசியமான சுற்று Round 32 தான். சின்ன அணியோ, பெரிய அணியோ யார் வெல்வார்கள் என்று கணிக்க முடியாமலேயே இருந்தது. ஆட்ட இறுதி வரை ஒரு பரபரப்பு இருந்தது. அந்த பரபரப்பு அதன் பிறகு நடந்த போட்டிகளில் இல்லை.

கேபோ வெர்டே அணி தான் இந்த உலகக்கோப்பையை பார்க்க காரணம். அர்ஜென்டினா அணிக்கு எதிராக கேபோ வெர்டே அடித்த ( Sidny Lopes Cabral )இரண்டாவது கோல் தான் இந்தத் தொடரின் சிறந்த கோல்.

வாழ்த்துகள் கேபோ வெர்டே !

வாழ்த்துகள் ஸ்பெயின் !

மேலும் படிக்க :

கேபோ வெர்டேவிற்கு அன்பும் நன்றியும் !

இறுதிப் போட்டியில் அர்ஜென்டினா !

2026-07-16T15:39:51.132+05:30

ஸ்பெயின் அணி கூட இறுதிப்போட்டிக்கு தகுதி பெறும் என்று சிலராவது கூறியிருப்பார்கள். ஆனால் அர்ஜென்டினா இறுதிக்கு தகுதி பெறும் என்று சிலர் கூட நம்பவில்லை. நம்பிக்கை இல்லாதது ஒரு பக்கம் இருந்தாலும் அர்ஜென்டினா அணி மீதான வெறுப்பும், மெஸ்ஸி மீதான வெறுப்பும் தான் அதிகமாக இருந்தது. ஆனால் இதையெல்லாம் கடந்து இறுதிக்கு வந்து நிற்கிறது மெஸ்ஸியின் அர்ஜென்டினா .

கேபோ வெர்டே , எகிப்து ஆகிய இரண்டு அணிகளையும் மிகுந்த போராட்டத்திற்கு பிறகே வென்றது, அர்ஜென்டினா. ஸ்விட்சர்லாந்திற்கு எதிரான ஆட்டம் அவ்வளவு சிரமமாக இல்லை. ஆனால் இங்கிலாந்திற்கு எதிரான ஆட்டத்தில் அனல் பறந்தது. முதல் பாதியில் நிறைய தள்ளு முள்ளுகள். இங்கிலாந்து முதல் கோல் போட்டவுடன் அதை தக்க வைக்க தடுப்பாட்டதில் ஈடுபட்டது. இந்தத் தொடரில் அர்ஜென்டினா எம்.ஜி.ஆர். மாதிரி மூனு தடவை அடிச்ச பிறகு திருப்பி அடிப்பது மாதிரி முதல் கோல் எதிரணி போட்டுவிட்டால் போதும் தீயாக விளையாடுவார்கள். இந்தப் போட்டியிலும் அப்படியே.

மெஸ்ஸிக்கு எதிராக பாதுகாப்பு அரண் அமைப்பது கடினம் என்று மீண்டும் ஒரு முறை நிரூபிக்கப்பட்டுள்ளது. அர்ஜென்டினாவை வெல்ல வேண்டுமானால் தொடர்ந்து கோல் அடிப்பதில் கவனம் செலுத்த வேண்டும். தற்காப்பு ஆட்டம் மெஸ்ஸி &கோ-விற்கு எதிராக செல்லுபடியாகாது. கடந்த சில போட்டிகளிலும் இந்தப் போட்டியிலும் பாக்ஸிற்குள் எத்தனை பேர் இருந்தாலும் அர்ஜென்டினா வீரர்கள் நுழைய இடமே இல்லையென்றாலும் அர்ஜென்டினா கோல் அடித்தது, வென்றது. காரணம் மெஸ்ஸி. கார்னர் கிக்கில் மட்டுமல்ல களத்தில் வேறு இடத்தில் இருந்தாலும் பந்தை பாக்ஸிற்குள் அனுப்புவதில் மெஸ்ஸியே சிறந்தவர்.

இங்கிலாந்து வீரர்கள் பாக்ஸை முழுமையாக ஆக்கிரமித்ததால் அர்ஜென்டினாவின் பெர்னாண்டஸ் வெளியிலிருந்தே கோலடிக்க முயன்றார். முதல் சில முயற்சிகள் தோல்வியடைந்தாலும் இறுதியாக மெஸ்ஸியிடமிருந்து பாஸைப் பெற்று அர்ஜென்டினாவிற்கான முதல் கோலை அடித்தார். இறுதியில் மெஸ்ஸி பந்தை பாக்ஸிற்குள் அனுப்ப மார்டினஸ் அதை தலையால் முட்டி வெற்றி கோலாக மாற்றினார். கால்பந்து ஒரு கூட்டு விளையாட்டு. இதை உணர்ந்து தான் மெஸ்ஸி தானே எல்லா கோல்களையும் அடிக்க வேண்டும் என நினைக்காமல் கோல் வாய்ப்புகளை தொடர்ந்து உருவாக்குகிறார். களத்தில் மெஸ்ஸி காட்டும், நிதானம், அமைதி தான் இவ்வளவு ரசிகர்களை பெற்றுக் கொடுத்திருக்கிறது. மெஸ்ஸியின் காலத்தில் மெஸ்ஸியே சிறந்த ஆட்டக்காரர்.

அர்ஜென்டினாவின் ஆட்ட வியூகமும் அவர்களுக்கு கை கொடுத்தது.மற்ற போட்டிகள் போலிலில்லாமல் நிறைய மாற்று ஆட்டக்காரர்கள் களமிறக்கப்படது நல்ல பலனைக் கொடுத்தது. எகிப்து போட்டிக்குப் பிறகு பின்களத்தை அர்ஜென்டினா கொஞ்சம் வலுப்படுத்தியிருக்கிறது. இல்லையெனில் இன்னும் பல கோல்கள் விழுந்திருக்கும். கேபோ வெர்டே , எகிப்து போட்டிகள் போல எளிதாக அர்ஜென்டினாவின் பாக்ஸிற்குள் எதிரணியினர் நுழைய முடியவில்லை. இதை இன்னும் தீவிரமாக்கினால் மட்டுமே இறுதியில் வெல்ல முடியும்.

முதல் பாதியில் எதிரணியினர் கொலடிக்காமல் இருந்தாலோ, ஒரு கோல் அடித்திருந்தாலோ, இரண்டு கோல் அடித்திருந்தாலோ கவலை கொள்ளாமல் இரண்டாம் பாதியில் நாம் தான் போட்டியில் வெல்ல வேண்டும் கங்கனம் கட்டிக்கொண்டு ஆடுவது தான் அர்ஜென்டினாவின் பாணியாக இருக்கிறது. இறுதி போட்டியில் ஸ்பெயின் முதல் கோலை அடிக்காது என நம்புவோம்.

எப்படி பார்த்தாலும் இரண்டு சிறந்த அணிகள் இறுதிப் போட்டியில் களமிறங்குகின்றன. குழு விளையாட்டில் எந்த அணி சிறப்பாக செயல்பட போகிறதோ அந்த அணியே வெல்லும்.

மூன்றாம் இடத்திற்கான போட்டியும் சுவாரசியமாகவே இருக்கப் போகிறது. இங்கிலாந்தா ? பிரான்ஸா ? . பார்ப்போம்.

மேலும் படிக்க:

கேபோ வெர்டேவிற்கு அன்பும் நன்றியும் ♥️

2026-07-07T08:09:06.957+05:30

Round 32 ஆரம்பித்ததிலிருந்தே ஒரு எதிர்பார்ப்பு இருந்தது. தொடக்கப் போட்டிகளில் சிறப்பாக ஆடிய கேபோ வெர்டே ( Cabo Verde) -கும் எப்போதும் சிறப்பாக விளையாடும் அர்ஜென்டினா (Argentina )-விற்கும் நடக்கும் போட்டி தான் அது. மற்ற போட்டிகளையோ அல்லது Highlights களையோ தொடர்ந்து பார்த்து வந்தாலும் இந்தப் போட்டியின் மீதான ஆர்வம் குறையவில்லை. சொல்லப் போனால் கேபோ வெர்டே தான் இந்த உலக்கோப்பையை பார்க்கத் தூண்டியது. தொடக்க சுற்று போட்டிகள் எதையும் பார்க்கவில்லை. Josimar José Évora Dias எனும் இயற்பெயருடைய வொசின்ஹா (Vozinha ) என செல்லமாக அழைக்கப்படும் கேபோ வெர்டேயின் கோல் கீப்பரால் தான் இந்த உலக்கோப்பை தொடரை Round 32 முதல் பார்க்கத் தொடங்கினேன்.

அந்த எதிர்பார்ப்பு வீண்போகவில்லை. மிகவும் சிறப்பான ஆட்டத்தை வெளிப்படுத்தியது கேபோ வெர்டே. Very Disciplined Game .கேபோ வெர்டே அணி வீரர்களின் ஆட்டத்தில் ஒரு ஒழுங்கு இருந்தது. அதிலும் பின்கள வீரர்கள் 4 பேர் களத்தில் எந்த இடத்தில் இருந்தாலும் ஒரே நேர்கோட்டில் விளையாடினர். திரையில் பார்க்க அவ்வளவு அழகாக இருந்தது. கால்பந்து விளையாட்டைப் பார்ப்பது அவ்வளவு சுவாரசியமாக இருக்கிறது. இந்தியாவிலும் தொடர்ந்து கால்பந்து ஒளிபரப்பில் முக்கியத்துவம் கொடுத்தால் கிரிக்கெட் மீதான ஆர்வம் சற்றே குறைய வாய்ப்பிருக்கிறது.

எவ்வளவு திறமையான வீரர்களை கொண்ட அணியாக இருந்தாலும் சூழ்நிலை கைக்கொடுக்கவில்லை என்றால் அன்றைய நாள் அவர்களுடைய நாளாக இருக்காது. ஒரு சிறிய தவறு கூட போட்டியின் முடிவை மாற்றி விடுகிறது. அதே போல வேகம் மிக முக்கியமாக இருக்கிறது. பந்தைக் கடத்துவதிலும் கோல் அடிப்பதிலும் வேகத்தைக் காட்டுபவர்களே வெற்றியாளர்களாக இருக்க முடிகிறது. பொதுவாகவே கோல் கீப்பர்கள் கோலைத் தடுக்க கையாளும் முறைகள் மேன்மையடைந்து இருக்கிறது. கோல் கீப்பர் வேகம் மட்டுமல்ல விவேகத்தையும் கடைபிடிக்க வேண்டிய அவசியமிருக்கிறது.

நிறைய போட்டிகளில் எதிரணி முதல் கோல் போட்டாலே துவண்டு விட்டனர். ஆனால் கேபோ வெர்டே துளியும் துவளவில்லை அர்ஜென்டினா முதல் கோல் போட்டு முன்னிலை பெற்றால் இவர்களும் முதல் கோல் போட்டு ஆட்டத்தை சமநிலைக்கு வந்தனர். அர்ஜென்டினா இரண்டாவது கோல் அடித்து முன்னிலை பெற்றால் மீண்டும் கேபோ வெர்டே ஒரு கோல் போட்டு மீண்டும் ஆட்டத்தை சமப்படுத்தியது. அர்ஜென்டினாவின் இரண்டாவது கோல் சிறப்பானது. அதை விட சிறப்பானது கேப் வெர்டேவின் இரண்டாவது கோல் ( S. Lopes Cabral ) .அற்புதமான ஒன்று.

மெஸ்ஸியின் கார்னர் கிக் உதவியுடன் அர்ஜென்டினா போட்ட மூன்றாவது கோலும் அதிர்ஷ்டத்தால் கிடைத்தது தான். கேபோ வெர்டே வீரர்களின் மீது பட்டுத்தான் உள்ளே விழுந்தது. அதன் பிறகும் கேபோ வெர்டே சளைக்காமல் போராடியது. நேரம் குறைவாக இருந்ததால் லாங் சாட்களை அடித்தது. அவை கோலாக மாறவில்லை . ஆட்ட இறுதியில் கோல் கம்பத்தின் அருகிலும் ஒரு வாய்ப்பு தவறவிடப்பட்டது. கேபோ வெர்டே மீண்டும் ஒரு கோலடித்து ஆட்டம் மீண்டும் சமநிலைக்கு வந்து பெனால்டி ஷூட் அவுட் வரை போட்டி சென்றிருந்தால் இன்னும் சுவாரசியமாக இருந்திருக்கும். மொத்தத்தில் சிறப்பான ஆட்டம்.

கேபோ வெர்டேவிற்கு அன்பும் நன்றியும் வாழ்த்துக்களும் 🎉

மேலும் படிக்க :

என் உடல் என் மூலதனம் - போப்பு !

காதில் விழுந்த கதைகள் - கி.ராஜநாராயணன் !

Sukhamano Sukhamann - அழகோவியம் ♥️

2026-06-23T08:20:17.446+05:30

மலையாள திரையுலகிலிருந்து மற்றுமொரு மனிதம் பேசும் படைப்பு. எப்போதாவது கிடைக்கும் தனிமை என்பது இனிமை. துணைக்கு உறவோ, நட்போ இல்லாத தனிமை மிகக் கொடுமையானது. அந்தத் தனிமையைச் சுற்றியே இத்திரைப்படம் நகர்கிறது.

சக மனிதர்களை தனித்து விடாத வழக்கம் இன்றும் பழங்குடியின மக்களிடையே இருக்கிறது. நாகரீக மனிதர்கள் என்று சொல்லிக்கொள்ளும் நம்மிடம் தான் இல்லை. ஏதோ ஒரு காரணத்தால் ஏதோ ஒரு மனிதரை தனிமைப்படுத்தி அழகு பார்க்கிறோம். சந்திக்கும் மனிதர்கள் அனைவரிடமும் ஆதாயத்தை தேடும் வழக்கம் அதிகரித்து இருக்கிறது. ஆதாயம் கிடைக்காது என தெரிந்த மனிதரை ஒதுக்கி வைத்து விடுகிறோம்.

வெவ்வேறு சூழல்களால் தனிமையைச் சந்திக்கும் மூன்று பேர்களுடைய கதைகளைத்தான் இத்திரைப்படம் பேசுகிறது. அதில் கொஞ்சம் கற்பனையை ஏற்றி சுவாரசியமாக , நகைச்சுவையைச் சேர்த்து ரசிக்கும்படி எடுத்திருக்கிறார்கள்.

பொதுவாகவே மலையாளத் திரைப்படங்கள் மனிதர்களின் ஆதார மனித உணர்வுகளை நுணுக்கமாக பேசுபவை. இந்தத் திரைப்படமும் அப்படியே. "இவுங்க மட்டும் எப்படி இப்படியெல்லாம் ஒரு கதைக் கருவை தேர்ந்தெடுக்கிறாங்க" என்ற ஆச்சரியம் இந்தத் திரைப்படம் பார்க்கும் போதும் தோன்றியது.

அதிலும் Kudassanad Kanakam வரும் காட்சிகள் கலகலப்பு. போகிற போக்கில் சிரிக்க வைத்துவிட்டு போய் விடுகிறார். மொத்தத்தில் எதிர்பாராத நல்ல அனுபவம்.

இயக்குநர் மற்றும் படக்குழுவினருக்கு வாழ்த்துகள் 🎉

மேலும் படிக்க:

மதிலுகள் ❤️

JANA GANA MANA - பாசிச எதிர்ப்பு சினிமா !

என் உடல் என் மூலதனம் - போப்பு !

2026-04-04T22:24:00.002+05:30

'உடம்பை வளர்த்தேன், உயிர் வளர்த்தேனே' என்ற திருமூலரின் வழி வந்தவர்கள்தான் நாம். நாம் எல்லோருமே நமது உடல் குறித்த கவனம் இல்லாமல் வாழவே உலகவணிகமயமாக்கல் நம்மை பழக்கப்படுத்தியிருக்கிறது. ஒவ்வொரு நாளும் நாம் , நமக்கே தெரியாமல் இயற்கையோடு இயைந்த வாழ்விலிருந்து விலகிக்கொண்டே இருக்கிறோம். உதாரணமாக இருபது ஆண்டுகளுக்கு முன்பு இருந்ததை விட பல நவீன கருவிகளை நாம் பயன்படுத்துகிறோம். அந்தக் கருவிகளை பயன்படுத்துவதால் நேரமும் மிச்சம், பணமும் மிச்சம் என்று சொல்லிக்கொள்கிறோம். ஆனால் யதார்த்தத்தில் நேரமும் மிச்சமாகவில்லை, பணமும் மிச்சமாகவில்லை.

வாழ்க்கை குறித்து நாம் வகுத்து வைத்திருக்கும் விசயங்களை மறுபரிசீலனை செய்ய வேண்டிய காலகட்டத்தில் வாழ்கிறோம். இப்படியான சூழலில் நமது உடல் குறித்தான அக்கறை நமக்கு கண்டிப்பாக தேவை என வலியுறுத்துகிறது, போப்பு எழுதிய இப்புத்தகம். நாம் நமது உடலை மதிப்பதில்லை , நமது உடல் சொல்வதைக் கேட்பதில்லை என்று பேச ஆரம்பித்து எவ்வாறு உடலுடன் நெருங்குவது என்பதையும் இப்புத்தகம் விளக்குகிறது.

குளித்தல் என்பது உடலில் சேர்ந்துள்ள வெளி அழுக்குகளை நீக்குவதற்கான செயல்பாடு மட்டுமல்ல, உடலில் தோன்றியுள்ள அதிகப்படியான வெப்பத்தை நீக்குவதும்தான் என்கிறார், போப்பு. ஆரோக்கியமான விதவிதமான குளியல் முறைகள் பற்றி இப்புத்தகத்திலும் விளக்குகிறார். அனைவரும் காலை அல்லது மாலை வேளைகளில் நடைபயிற்சி மேற்கொள்வது அவசியம் எனவும், அந்த நடை பயிற்சியை உங்கள் உடலுடன் பேசுவதற்கான செயல்பாடாக மாற்றிக் கொள்ளுங்கள் என்றும் போப்பு கூறுகிறார்.

உடலில் கழிவுகள் தேங்குவதால்தான் பல நோய்கள் தோன்றுகின்றன, என்கிறார்‌, போப்பு. இரவுத் தூக்கம் என்பது கழிவுநீக்கச் செயல்பாடு. தினமும் இரவில் நமது உடல் உறுப்புகள் மராமத்து வேலைகளில் ஈடுபடுகின்றன. நமது உடலில் ஏற்படும் சின்னச்சின்ன குறைபாடுகளே நமது உடலே இரவுத் தூக்கத்தின் மூலம் சரி செய்து விடுகிறது, என்று விளக்குகிறார். இரவுத் தூக்கம் தடைபடும்போது கழிவுநீக்கச் செயல்பாடும் தடைபடுகிறது.

நவீன வாழ்க்கை என்று சொல்லிக்கொள்ளும் தற்போதைய வாழ்க்கை முறையில் நமது தூங்கும் நேரம் மிகுந்த பாதிப்பைச் சந்தித்திருக்கிறது. மின்சாரம் வராத காலகட்டம் வரை 'முன் தூங்கி முன் எழுவது'-தான் நமது வாழ்க்கை முறையாக இருந்தது. இன்று வரை நமது உடலும் அதற்கே பழக்கப்பட்டிருக்கிறது. ஆனால் நாம் இப்போது ' பின் தூங்கி பின் எழுகிறோம்'. அதானால் உருவாகும் சிக்கல்களையும் எதிர்கொள்கிறோம். இப்போதும் முன் எழுபவர்கள் சுறுசுறுப்பாக இருக்கின்றனர். பின் எழும் நாம் சோம்பேறிகளாகிவிட்டோம்.

இரவு 9 மணி முதல் காலை 5 வரை உறக்கத்திற்கான நேரம் என்றாலும் நாம் இரவு 10 மணிக்காவது தூங்க ஆரம்பித்து காலை 6 மணிக்குள் எழுவது அவசியமாகிறது. எப்படி இருந்தாலும் இரவு 11 மணி முதல் அதிகாலை 4 மணி வரை நாம் ஆழ்ந்த தூக்கத்தில் இருப்பது கட்டாயம். அந்த நேரத்திலும் நாம் விழித்திருப்பதன் மூலம் நமது உடலில் கழிவுகள் நீங்குவதற்கு பதிலாக, சேர்ந்து நோயாக மாறுகிறது, என்கிறார்,போப்பு. நமது ஆரோக்கியத்திற்கும் தூக்கத்திற்கும் நெருங்கிய தொடர்பிருக்கிறது.

'பசித்துப் புசி', ' அளவிற்கு மிஞ்சினால் அமிர்தமும் நஞ்சு' இந்த இரண்டு விசயங்களையும் நாம் கடைபிடிப்பதேயில்லை. இன்றைய இயந்திர வாழ்வில் பொறுமையாக சாப்பிடுவதற்கான நேரத்தைக்கூட நாம் உருவாக்கிக்கொள்ளவில்லை. வேறு வேலைகளுக்கு கொடுக்கும் முக்கியத்துவம் நாம் உண்ணும் உணவிற்கும், உண்ணும் நேரத்திற்கும் கொடுப்பதில்லை. பசித்த பிறகே உணவு உண்ணும் வழக்கம் முன்பு பரவலாக இருந்தது. இப்போது இப்பழக்கம் வெகுவாக குறைந்துவிட்டது. மிகச்சிலரே பசித்த பிறகு உண்ணும் வழக்கத்தைக் கொண்டிருக்கின்றனர்.

எல்லோருக்குமான உணவை உறுதி செய்ய முடியாத சூழலே நிலவுகிறது. அது ஒரு பெரும் அரசியல், ஏகாதிபத்திய அரசியல். எது எளிதில் செரிமானமாகும் உணவு, எது எளிதில் செரிமானமாகாத உணவு என்றெல்லாம் நாம் பிரித்துப் பார்ப்பதில்லை. நமது பணிகளுக்கு மத்தியில் கிடைக்கும் உணவை சாப்பிட பழகிவிட்டோம். அதே போல பசித்தாலோ பசிக்காவிட்டாலோ குறிப்பிட்ட நேரத்திற்கு சாப்பிடும் பழக்கத்தையும் உருவாக்கிக் கொண்டோம். அவ்வளவு எளிதில் இதிலிருந்து விடுபடமாட்டோம் என்றாலும் கொஞ்சம் கொஞ்சமாக பசித்தவுடன் சாப்பிட பழக வேண்டும்.

எந்த உணவு சாப்பிடுவது ? இதுவும் பெரிய அரசியல். சமூக ஊடகங்களில் லட்சக்கணக்கான வீடியோக்கள் இருக்கின்றன. எந்த மாறுதலுக்கும் உட்படாத நேரடியாக சாப்பிடக்கூடிய இயற்கை உணவுகளுக்கு முன்னுரிமை அளிக்க வேண்டும் என்கிறார், போப்பு. பழங்களை எந்த அளவிற்கு அதிகமாக எடுத்துக்கொள்ள வேண்டுமோ அந்த அளவிற்கு எடுக்கலாம், என்கிறார்.‌ உணவின் ஊடாக சாப்பிடுவதற்கு பதிலாக ஒரு நேர உணவாக, குறிப்பாக இரவு நேர உணவாக பழங்களை உண்ணலாம் என்று பரிந்துரைக்கிறார். மொத்தத்தில் இயற்கையோடு இணைந்த உணவே நம் உடலுக்கு ஏற்றது. ஆனால் இப்போது நாம் உண்பதோ இயற்கையிலிருந்து விலகிய பதப்படுத்தப்பட்ட உணவுகளைத்தான். நாம் குடிக்கும் தண்ணீர் கூட மாறுதல் அடைந்த பிறகே பயன்படுத்துகிறோம். மாற்று வழிகள் நமக்கு தெரிய வருவதில்லை.

உணவு சார்ந்த விசயங்களில் மாற்றங்களை கொண்டு வருவது மிகவும் சவாலான காரியமாகவே இருக்கிறது. ஆரோக்கமற்றது என்று தெரிந்தும் உண்கிறோம். ஆரோக்கியமுள்ளது என்று அறிந்தும் உண்ண மறுக்கிறோம். நாம் வாழும் பகுதிகளில் விளைந்த உணவுப்பொருட்களை ஏற்றுக்கொள்ளும் அளவிலேயே நமது உடல் இருக்கிறது. ஆனால் நாம் இவற்றை ஒதுக்கிவிட்டு 'சத்தானது' என வணிக நிறுவனங்கள் விளம்பரப்படுத்துவதற்கு முக்கியத்துவம் கொடுக்கிறோம். அந்த உணவு சத்தானதாக இருந்தாலும் ஏதோ ஒரு நாட்டில் விளைந்த பொருட்களைக் கொண்டு தயாரிக்கப்பட்ட உணவை ஏற்றுக்கொள்ளும் அளவில் நமது உடல் இல்லை.

நாம் வெப்ப மண்டலப்பகுதியில் வாழ்கிறோம் என்பதை மறந்துவிட்டு வேகவைத்த , நீர்த்த உணவுகளை தவிர்த்துவிட்டு எண்ணையில் பொறித்த உணவுகளை அதிகம் உண்டு செரிமானமாகாமல் தவித்துக்கொண்டு இருக்கிறோம்.

" இயற்கை சார்ந்து வாழ்வோம்.

வாழ்வில் நிறைவு காண்போம்.

வாழ்வை முழுமை செய்வோம்."

என்று இந்த ' என் உடல் என் மூலதனம் ' புத்தகத்தை நிறைவு செய்கிறார்,போப்பு .

'காயமே இது மெய்யடா' , 'உணவுக்கு முதல் வணக்கம் ', ' என் உடல் என் மூலதனம் ' என போப்பு அவர்கள் எழுதிய உடல்நலம் சார்ந்த மூன்று புத்தகங்களை வாசித்த பிறகும் அவர் கூறியதில் மிகவும் சிலவற்றை மட்டுமே கடைபிடிக்க முடிந்திருக்கிறது. இரவு 10 மணியிலிருந்து 10.30க்குள்ளாக தூங்கப்பழகியாச்சு. ஆனால் காலையில் 6 மணிக்குதான் எழ முடிகிறது. 5 மணியிலிருந்து 5.30க்குள்ளாக எழுந்திருக்கப் பழக வேண்டும். அவர் சொன்ன குளியல் முறைகளில் சில பயன்பாட்டில் உள்ளன. உணவு சார்ந்த விசயங்களில் சிறிய மாற்றத்தைக்கூட உருவாக்க முடியவில்லை. ஆனால் முயற்சி தொடர்கிறது. எது எப்படியோ நாம் நல்லதொரு வாழ்வை வாழ நமது உடலையும், மனதையும் முறையாக பேண வேண்டும்.

மேலும் படிக்க :

உணவுக்கு முதல் வணக்கம் - போப்பு !

காயமே இது மேய்யடா - போப்பு !

2026-03-31T15:15:00.001+05:30

சரியான நேரத்தில் வாசிக்க கிடைத்த சரியான புத்தகம். தற்போதைய நமது வாழ்க்கை முறை, உடல்நலம் குறித்தான நிறைய சந்தேகங்களையும், குழப்பங்களையும் உருவாக்குகிறது. நமது உடல் குறித்தான பிரக்ஞையே நம்மிடம் இல்லை. உடலை மட்டுமல்ல உள்ளத்தையும் நாம் பேணி காக்க தவறிவிடுகிறோம். இப்படியான சூழலில், தோழர் போப்புவின் இந்தப் புத்தகம் நமது உடல் குறித்தான ஒரு குறுக்குவெட்டு பார்வையை முன்வைக்கிறது.

தி இந்து தமிழ் நாளிதழின் ' நலம் வாழ' இணைப்பிதழில் வெளியான கட்டுரைகளின் தொகுப்பு இந்நூல். அந்த கட்டுரைகளின் மூலமே போப்பு அவர்கள் அறிமுகம். அதன் பிறகு முகநூலில் தேடிப்பிடித்து நண்பராக சேர்ந்தாச்சு. உலகின் மிகப்பெரிய தொழிற்சாலை என்று மனித உடலைச் சொல்லுவார்கள். அது முற்றிலும் உண்மை. அமேசான் காடுகளில் இன்னமும் கண்டுபிடிக்கப்படாத உயிரினங்கள் இருப்பது போல நமது உடலிலும் இன்னமும் விடுவிக்கப்படாத புதிர்கள் இருக்கின்றன. உலகவணிகமயமாக்கலுக்கு பிறகான நமது வாழ்க்கை முறையால் நமது உடல் பெரிய அளவில் இன்னல்களைச் சந்தித்து வருகிறது. உடல் வெளிப்படுத்தும் சமிக்கைகளை கவனத்தில் எடுத்து செயல்பட வேண்டியது அவசியம் என இப்புத்தகம் வலியுறுத்துகிறது.

நமது உடல் குறித்தான நிறைய புரிதல்களை இந்நூலை வாசிப்பதன் மூலம் தெரிந்து கொள்ளலாம். போப்பு அவர்கள் சொல்லியிருக்கும் அனைத்தையும் எல்லோராலும் இன்றைய வாழ்வில் செயல்படுத்த இயலாத சூழலே நிழவுகிறது. அவர் கூறியிருப்பதில் கால்வாசியை நாம் நடைமுறைப்படுத்தினால் கூட அது இந்த நூலின் வெற்றிதான். அவர் முக்கியமாக குறிப்பிடுவது இரவில் கண்டிப்பாக 10 மணிக்குள் தூங்க வேண்டும் என்பதுதான். இது எல்லோருக்கும் சாத்தியமா என்று தெரியவில்லை. சாத்தியமுள்ளவர்கள் இதை நடைமுறைபடுத்துவதன் மூலம் நற்பலன்களைப் பெற முடியும். அதே போல காலையில் 6 மணிக்குள் எழுவதும்.

நமது உடலைப் பொறுத்தவரை இதுவரை பழக்கப்படாத எதுவும் அந்நியப் பொருள்தான். நாம் பயன்படுத்தும் பற்பசை, சோப்பு , சாம்பு மற்றும் பிற பொருட்கள் எவ்வளவு உயர்வானதென்று நாம் கருதினாலும் அவை நமது உடலின் இயல்பிற்கு எதிராக செயல்படுவதை விளக்குகிறார். அதே போல அதிக வாசனையுள்ள உணவோ அல்லது அதிக வாசனையுள்ள அழகுசாதனப் பொருட்களோ நமது உடலுக்கு அதிக தீங்குகளை விளைவிப்பதையும் குறிப்பிடுகிறார்.

மொத்தத்தில் நாம் தற்போது வாழும் வாழ்க்கை முறை நமது சூழலுக்கும் நமது உடலுக்கும் பொருந்தாத வாழ்க்கை முறைதான். இயற்கையின் ஒரு பகுதியான மனித இனம் இயற்கையோடு இணைந்த வாழ்வியல் முறைக்கு திரும்புவதுதான் ஒரே தீர்வாக இருக்க முடியும். நடைமுறையில் இது எந்த அளவிற்குச் சாத்தியம் என தெரியவில்லை. ஆனால் ஓரளவிற்கு சிக்கலில்லாத வாழ்க்கையை மனித இனம் இப்பூமியில் வாழ இதை விட்டால் வேறு வழியும் இல்லை.

இவ்வளவு தகவல்களையும் " நமது முன்னோர்கள் ஒன்றும் முட்டாள்களில்லை " என்ற பாணியில் முன்வைக்காமல் உடலின் இயக்கத்தை விளக்குவதன் மூலம் முன் வைப்பதால் இந்நூல் நம்பகத்தன்மையை ஏற்படுத்துகிறது. எப்படி " கேளுங்கள் மனம் சொல்வதை ..." என்று சொல்கிறமோ அதே போல உடல் சொல்வதையும் நாம் கேட்க வேண்டியது அவசியமாகிறது. நமது உடலுக்கு நேரும் பெரிய பாதிப்புகள் கூட அவை சிறிய பாதிப்புகளாக இருந்த போது உடல் வெளிப்படுத்திய சமிக்கைகளை நாம் கண்டுகொள்ளாமல் விட்டதுதான் காரணம் என்கிறார், ஆசிரியர்.

ஒரு படைப்பின் வெற்றி என்பது அந்தப் படைப்பை வெளிப்படுத்திய படைப்பாளியின் மற்ற படைப்புகள் நோக்கி நகர வைப்பதுதான். அந்த வகையில் இந்தப் படைப்பு வெற்றி பெற்றிருக்கிறது. தோழர் போப்புவின் மற்ற நூல்களையும் வாசிக்க வேண்டும்.

நதி போல தனது வாழ்க்கையை வாழும் போப்பு அவர்களுக்கு வாழ்த்துகளும் நன்றியும்!

( பிப்ரவரி 11 2022 )

மேலும் படிக்க:

உணவுக்கு முதல் வணக்கம் - போப்பு !

நாகரீகக் கோமாளி என்.எஸ்.கிருஷ்ணன்!

உணவுக்கு முதல் வணக்கம் - போப்பு !

2026-03-29T22:22:00.005+05:30

திரைகடலோடியும் திரவியம் தேடுகிறோமோ இல்லையோ ? தெரியாது. ஆனால் உணவை தேடி உண்ணும் பழக்கம் நம்மிடம் இருக்கிறது. அப்படித் தேடி உண்ணும் உணவு இயற்கையோடு இணைந்ததாக உடலுக்கு உகந்ததாக இருக்க வேண்டும் என்பதை தோழர் போப்பு இந்தப் புத்தகத்தின் மூலம் சொல்கிறார்.

நமது உடல் ஆரோக்கியத்திற்கு நல்லதல்ல என்று தெரிந்தே நாம் பயன்படுத்தி கொண்டிருக்கும் உணவு பொருட்களுக்கு மாற்றான உணவு பொருட்களைப் பற்றி விளக்குகிறார். பாலுக்கு மாற்றாக தேங்காய்பால் , ராகிபால், பருத்திபால் போன்றவற்றை முன் வைக்கிறார். தேங்காய்பாலின் முக்கியத்துவத்தை பல இடங்களில் குறிப்பிடுகிறார். அதே போல சர்க்கரை நோயும் நிலையான நோயல்ல என்பதையும் பல இடங்களில் குறிப்பிடுகிறார் ( ஏன் அப்படி சொல்கிறார் என்பதற்கான விளக்கம் இப்புத்தகத்தில் இல்லை ).

நமக்கு அருகில், அந்தந்த பருவங்களில் கிடைக்கும் பழங்களை உண்பதன் அவசியத்தை விளக்குகிறார். பழங்களை இணை உணவாக உண்பதை விட முழு உணவாக, அதிலும் இரவு நேர உணவாக உண்பது நல்ல பலனளிக்கும் என்கிறார். உடைத்த பருப்புகளை விட பயறு வகைகள் உடலுக்கு நல்லது என்கிறார். உப்பு, காரம், புளி இப்போது நாம் பயன்படுத்தும் அளவை விட குறைவாக பயன்படுத்துவது நல்லது என்றும் குறிப்பிடுகிறார்.

இதெல்லாம் நடைமுறைக்கு சாத்தியமா என ரொம்ப யோசிக்காமல் சாத்தியமுள்ள சிலவற்றையாவது மாற்ற முயற்சி செய்வோமே. மாற்றம் ஒன்றுதானே மாறாதது. அவர் குறிப்பிடுவதில் பெரும்பாலானவை நமது கண்ணில் படுபவை என்பதுதான் கவனத்தில் கொள்ள வேண்டிய விசயம். அதிலும் முக்கியமாக இயற்கைக்கு நெருக்கமானது. மாற்றம் உருவாக நமது மனதில்தான் இடம் கொடுக்க வேண்டும். சவர்மா நம்ம ஊர்ல எந்தக் கடையில் கிடைக்கிறது என தேடி உண்ண ஆரம்பித்து விட்டோம். மிகச்சிறிய ஊர்களில் கூட இப்போது சவர்மா கிடைக்க ஆரம்பித்துவிட்டது. என்னென்னமோ கலந்து செய்யப்டுகிற சவர்மாவை ருசி பார்ப்பதுடன் இயற்கைக்கு நெருக்கமான உணவுப் பொருட்களை ருசி பார்க்கவும் நாம் முன்வர வேண்டும்.

எப்படிப் பார்த்தாலும் ஏதோ ஒரு உணவை உண்ணத்தான் போகிறோம். அந்த உணவு இயற்கைக்கு நெருக்கமாக இருப்பதில் எந்தக் குறையும் இல்லை. நம்மில் பெரும்பாலானோர் தினமும் காலையில் டீயோ , காபியோ குடிக்கத்தான் போகிறோம். ஒரு நாள் காலையில் தேங்காய்பால் குடித்துதான் பார்ப்போமே. நல்ல மாற்றம் தெரிந்தால் வாரத்தில் ஒரு நாளோ ,இரண்டு நாளோ குடிக்க வேண்டியதுதான். பிடிக்கவில்லை என்றால் விட்டுவிட வேண்டியதுதான். இது போலவே மற்ற உணவு பொருட்களும். பருப்புக்கு மாற்றாக பயறுகள், உண்ணும் பழங்களின் அளவை அதிகரிப்பது என்று முயற்சித்து பார்க்க வேண்டியதுதான்.

இந்தப் புத்தகத்தை வாசிக்கும் போது போப்பு என்ற மனிதரையும் கூடவே சேர்த்து வாசிக்கிறோம் என்ற உணர்வு உருவாவதை தடுக்க முடியாது. போப்பு அவர்கள் ஒசூரில் ஒரு நல்ல உணவகம் நடத்தினார் என்பது இசை விமர்சகரான ஷாஜியின் நேர்காணல் மூலமே தெரிய வந்தது. அவர் ஒரு சிங்கப்பூர்வாசியாகவும் இருந்திருக்கிறார் என்பதை இப்பத்தகத்தின் மூலம் அறிந்து கொள்ள முடிகிறது. போப்பு அவர்களின் பதிவுகளிலிருந்து இயற்கை தொடர்ந்து அவதானித்து வருபவர்களால் இப்படித்தான் எழுத முடியும் என்பதை உணரலாம்.

தமிழ்நாட்டில் இருக்கும் உணவகங்களில் எந்த ஊரில் எந்த உணவகம் சிறந்தது என்ற பட்டியல் போப்புவிடம் இருக்கிறது. அதை அவரிடமிருந்து நாம் பெற வேண்டும்.

மேலும் படிக்க :

காதில் விழுந்த கதைகள் - கி.ராஜநாராயணன் !

தெய்வம் என்பதோர்... - தொ.பரமசிவன் !

புரட்சியாளர் டாக்டர்.அம்பேத்கர் ஒரு சகாப்தம் !

2026-01-24T21:26:00.001+05:30

(12-10-2020) இதுவரையிலுமான 12 பகுதிகளும் பார்த்து முடித்தாகிவிட்டது. தொலைக்காட்சியில் பார்க்க வாய்ப்பு கிடைத்தது ஒரே ஒரு பகுதி தான். மீதி எல்லாம் 'Zee 5' செயலியில் தான். ஆரம்ப பகுதிகள் பார்க்கும் போது பொறுமையை சோதிக்கும் அளவிற்கு அதிக அளவிலான விளம்பரங்கள் வந்தன. இவ்வளவு சிரமபட்டு பார்க்கனுமா என்று கூட தோன்றியது. ஆனால் தொடரைப் பார்ப்பதை நிறுத்தவில்லை.இந்த வாரம் விளம்பரங்களே இல்லை. அதனால் ஒரே மூச்சில் நான்கைந்து பகுதிகள் கூட பார்க்க முடிந்தது.

தீண்டாமையின் கோர முகம் ஒவ்வொரு பகுதியிலும் தோலுரித்து காட்டப்படுகிறது. பீமாக நடித்திருக்கும் குட்டிப் பையன் நிறைய இதயங்களை வென்றுவிட்டார். அவருக்கு தமிழில் பின்னணி குரல் கொடுத்தவரையும் பாராட்டியே தீர வேண்டும். " பச்சமண்ண என்னா பாடு படுத்தியிருக்கானுக " என்று தொடரைப் பார்க்கும் பெண்கள் தங்களுக்குள் பேசிக் கொள்கிறார்கள். இதுவரை தொலைக்காட்சி தொடர் பார்க்கும் மக்களுக்கு பழக்கமில்லாத சாதிய ஏற்றத்தாழ்வுகள் இந்தத் தொடரில் காண்பிக்கப்படுகின்றன. பல இடங்களில் மிகவும் அழுத்தமாகவே காட்சிகள் விரிகின்றன.

கல்வி எவ்வளவு முக்கியம் என்பதையும் கடந்த காலங்களில் சாதியின் பெயரால் கல்வி எவ்வாறு மறுக்கப்பட்டது என்பதையும் இந்தத் தொடரைப் பார்க்கும் இன்றைய தலைமுறை கொஞ்சமேனும் தெரிந்து கொள்ளும். கல்வி ஒன்று மட்டுமே பிரிவினையை முற்றிலுமாக அழிக்கும். கல்வி ஒன்று மட்டுமே எல்லோரையும் சமநிலைப்படுத்தும். அதனால்தான், சமத்துவத்திற்கு எதிரான பார்ப்பனியம் புதிய கல்விக்கொள்கையைக் கொண்டு வருகிறது. கல்வியும், வாய்ப்பும் அனைவருக்கும் கிடைக்கக்கூடாது என பார்ப்பனியம் விரும்புகிறது. இதை முறியடிப்பது பார்ப்பனியத்திற்கு எதிரான மக்கள் மற்றும் இயக்கங்களின் கைகளில்தான் இருக்கிறது.

இந்த ஒரு தொடர் எல்லாவற்றையும் மாற்றி விடுமா ? தெரியாது. ஆனால் இத்தொடர் மக்கள், தங்களவில் சிறிதளவிலேனும் மாற நிச்சயம் தயார்படுத்தும்.

நாயகத்துதிபாடலுக்கு எதிரானவர், அம்பேத்கர். ஆனால் அவரது தொடரே நாயகத்துதிபாடல் மனநிலையில் உருவாக்கப்பட்டிருக்கிறதோ என்ற ஐயம் உருவாகும் விதத்தில் தொடர்ந்து காட்சிகள் இடம்பெறுகின்றன. இது ஒன்றே தவிர மற்ற எதுவும் உறுத்தலாக இல்லை. மற்றபடி நடிகர்கள் தேர்வு, ஒளிப்பதிவு, இசை, வடிவமைப்பு என எல்லாம் சிறப்பாகவே உள்ளன. தமிழில் உரையாடல் எழுதியிருக்கும் தோழர் கவிதா பாரதி அவர்களுக்கு வாழ்த்துகள் . காட்சிகளுடன் ஒன்றிப் போக வசனங்கள் உதவுகின்றன. நேரடியாக வசனங்கள் எழுதுவதை விட , மொழி மாற்றம் செய்யும்போது , அவர்களின் வாயசைப்பிற்கு ஏற்றவாறு வசனங்கள் எழுதுவது சிரமமானது. ஒரளவு சிறப்பாகவே தோழர் கவிதா பாரதி அவர்கள் பணியாற்றியிருக்கிறார். எந்தவிதமான வாயசைப்பிற்கும் எப்படிப்பட்ட வசனமும் எழுதும் அளவிற்கு தமிழ் மொழி செழுமை நிறைந்தது என்பதையும் நாம் நினைவில் கொள்ள வேண்டும்.

(24-01-2021) மதவாத வலதுசாரிகளின் ஆட்சியில் தினமும் எதிர்மறை விசயங்களே மக்களுக்கு பரிசாக கிடைத்துக் கொண்டிருக்கும் சூழலில் தொடர்ந்து வாழ்வதற்கான நம்பிக்கையை நாம் யாரிடமிருந்தாவது அல்லது எதனிடமிருந்தாவது பெறுவது அவசியமாகிறது. எனக்கு அப்படியான நம்பிக்கையைக் கொடுத்துக் கொண்டிருப்பது ஜீ தமிழ் தொலைக்காட்சியில் ஒளிபரப்பாகி வரும் 'புரட்சியாளர் டாக்டர்.அம்பேத்கர் ஒரு சகாப்தம் ' எனும் இத்தொடர். இன்று வரை (24-01-2021) ஒளிபரப்பப்பட்டிருக்கும் 49 பகுதிகளையும் பார்த்தாச்சு. பெரும்பாலும் Zee5 செயலியின் உதவியுடன்தான் பார்த்திருக்கிறேன்.

ஒரு மொழிபெயர்ப்புத் தொடரை அதுவும் ஒரு வாழ்க்கை வரலாற்றுத் தொடரை இவ்வளவு சுவாரசியமாக கொண்டு செல்வது என்பது மிகவும் சவாலானது. பெரும் உழைப்பு கொடுக்கப்பட்டே இத்தொடர் உருவாக்கப்பட்டு வருகிறது. ஒரு வெப் சீரியல் போலவே இத்தொடரை அணுகலாம். இது வரை பார்க்காதவர்கள் கூட இனிமேல் Zee5 செயலியின் உதவியுடன் பார்க்க ஆரம்பிக்கலாம். சமத்துவத்தை விரும்பும் எவரையும் இத்தொடர் ஏமாற்றாது. இத்தொடரை அப்படியே தமிழில் மொழிபெயர்த்து கொடுப்பது என்பதும் மிகவும் சவாலான பணிதான். அந்தப் பணியும் சிறப்பாகவே நடந்து வருவதை உணர முடிகிறது. சமூக நீதி பேசும் உரையாடல்களை தோழர் கவிதா பாரதி அவர்கள் எழுதி வருகிறார். மொழிமாற்றுத் தொடர் என உணர முடியாத அளவிற்கு மிகவும் பொருத்தமான அதே சமயம் அனல் தெறிக்கும் வசனங்கள் தொடர்ந்து இடம் பெறுகின்றன. பின்னணி இசையும் குறிப்பிடத்தக்க அளவில் இருக்கிறது. நாயகத் துதிபாடலை மிக கடுமையாக எதிர்த்த அம்பேத்கரின் கதாப்பாத்திரம் மட்டும் நாயகத்துதிபாடல் மனநிலையில் அணுகப்பட்டிருப்பது மட்டுமே தொடர்ந்து சிறு நெருடலாக இருந்து வருகிறது. மற்ற சிக்கல்கள் எதுவும் தென்படவில்லை.

தீண்டாமையை கடைபிடிக்கும் சாதிய ஆதிக்க மனநிலையை தெரிந்து கொள்வதுடன் கூடவே சமத்துவம், கல்வியின் முக்கியத்துவம்,பெண் கல்வி, குடும்ப அமைப்பு, குழந்தை வளர்ப்பு, சமூக நீதி, நன்னெறிகள் என பல விசயங்களை உள்ளடக்கிய அடர்த்தியான தொடராகவே இத்தொடர் ஒளிபரப்பாகி வருகிறது. வரும் காலங்களில் பெரியார் பற்றியோ அல்லது வேறு யாரைப் பற்றியுமோ தொடர் எடுக்க இருப்பவர்களுக்கு டாக்டர்.அம்பேத்கர் பற்றிய இத்தொடர் நிச்சயம் உதவி செய்யும்.இந்தத் தொடரை தொடர்ந்து பார்ப்பவர்களுக்கு ஒருவித உத்வேகத்தையும் ,நம்பிக்கையையும் இத்தொடர் தொடர்ந்து கொடுத்து வருகிறது.

சாதித் தலைவராக சுருக்கப்பட்ட ஒரு மாமேதையை கொஞ்சமேனும் மக்களின் மனங்களில் பதிய வைக்க இத்தொடர் உதவி வருகிறது. நீ டாக்டர் ஆக வேண்டும், இஞ்சினியர் ஆக வேண்டும் என்று குழந்தைகளை கேட்டு பழக்கப்பட்ட குடும்பங்களில் ' நீ படிச்சு அம்பேத்கர் மாதிரி அறிவாளி ஆகனும்' என்ற குரல் கேட்க ஆரம்பிப்பது எவ்வளவு பெரிய சாதனை. அதைத்தான் இத்தொடர் நிகழ்த்தி வருகிறது. சமத்துவத்தை நோக்கிய பாதை என்பது மிகவும் நீண்டது. அந்த சமத்துவப் பாதையில் இத்தொடர் நம்மை பயணிக்க வைக்கிறது.

கொரோனா அலையில் மிகவும் முக்கியத்துவம் வாய்ந்த இந்தத் தொடரும் பாதியில் அடித்துச் செல்லப்பட்டு விட்டது. இப்போது மீண்டும் தொடர்ந்தாலும் மகிழ்ச்சி தான்.

மேலும் படிக்க :

பெரியார் ஒருவரே !

ஜே.சி.குமரப்பா பிறந்தநாள் (ஜனவரி 4) !

பொங்கல் - ஒரே அர்த்தமுள்ள பண்டிகை !

2026-01-17T11:06:00.002+05:30

" இந்திய நாட்டு விவசாயம் என்பது வெறும் மண் மட்டும் சார்ந்ததல்ல. மண் , மனிதர், மாடு இந்த மூன்றும் சேர்ந்தது தான் நம் நாட்டு விவசாயம் "

- ஜே.சி.குமரப்பா

இந்திய நாட்டு விவசாயத்திலிருந்து மாட்டைப் பிரிக்கவே முடியாது. இன்றைய விவசாயத்தில் பாரம்பரிய மாடுகள் அழிந்து கலப்பின மாடுகள் ஆக்கிரமித்திருந்தாலும் கூட மாடுகளை விவசாயத்திலிருந்து நீக்க முடியாது. பாரம்பரிய மாடுகள் நாளெல்லாம் உழைத்தன. "மாடாய் உழைத்தும் என்னத்தை கண்டோம் " என்ற அங்காலாய்ப்பும் இருந்தது. இன்றைய கலப்பின மாடுகளுக்கு எந்தவித உழைப்பும் இல்லை. இன்று "மாடாய் உழைக்கிறேன்" என்று சொன்னால் எந்த வேலையும் செய்யாமல் இருப்பது என்ற பொருளாகிவிடும். டிராக்டர் இந்தியாவில் அறிமுகம் செய்யப்பட்ட போது ஜே.சி.குமரப்பாவால் சொல்லப்பட்டது தான் மேலே உள்ள வாசகம். இதனுடன் இன்னொன்றும் சொன்னார். அது, " டிராக்டர் சாணி போடுமா ?" என்பது தான். இதை சாதாரண கேள்வியாக கடந்து போய்விட முடியாது. பசுமைப்புரட்சி, வெண்மைப்புரட்சி என்று சொல்லப்பட்டவை ஏற்கனவே இருந்த உற்பத்திமுறை பாரம்பரியத்தை அழித்து மனிதர்களுக்கு தீங்குகளை மட்டுமே கொடுத்திருக்கிறது. மண்ணை அழித்தது பசுமைப்புரட்சி, மாடுகளை அழித்தது வெண்மைப்புரட்சி. எத்தனையோ விதமான கருவிகள் அறிமுகம் ஆன பிறகும் விவசாயமும், விவசாயப் பரப்பும் அதிகரிக்கவில்லை; மக்களின் ஆரோக்கியமும் மேம்பட வில்லை. இந்த புரட்சிகள் அனைத்தும் மக்களின் ஆரோக்கியத்தை அழிக்க வந்த எமன்கள்.

இப்போதும் விவசாயத்தை மீட்டெடுக்க ஒரே வழி தான் இருக்கிறது. அதுவும் ஜே.சி.குமரப்பா சொன்னது தான். உணவுப் பயிர்களுக்கு முன்னுரிமை தரும் தன்னிறைவு வேளாண்மைக்கு முன்னுரிமை தருவது தான் அது. இதில் நெல்லையும்,கரும்பையும் சேர்க்க முடியாது. இவை இரண்டும் ஆலைப்பயிர்கள். அதுவும் இல்லாமல் இவற்றை உற்பத்தி செய்வதற்கு தண்ணீரும் அதிகம் தேவை. அப்படியே உற்பத்தி செய்தாலும் அரசின் உதவியுடன் ஆலை முதலாளிகள் நிர்ணயிப்பது தான் விலை. இது ஒரு அடிமை விவசாயம் என்றே சொல்லலாம். நெல்லையும், கரும்பையும் விட நம் உடலுக்கு அதிக ஆரோக்கியத்தைத் தரும் எத்தனையோ பயிர்கள் இருக்கின்றன.அவற்றை உற்பத்தி செய்வதற்கு தண்ணீரும் அதிகம் தேவைப்படாது. பொதுவாகவே விவசாயம் என்பது பணப்பயிர்களை உற்பத்தி செய்வதுதான் என்ற நிலை உருவாகிவிட்டது. பணப்பயிர்களை உற்பத்தி செய்யும் போது உரிய விலை கிடைக்காத போது பெரிய இழப்பு ஏற்படுகிறது. இவை எல்லாவற்றுக்கும் தனது விரிவான ஆய்வுகள் மூலம் சரியான தீர்வுகளை அப்போதே சொல்லிவிட்டு போயிருக்கிறார், ஜே.சி.குமரப்பா. உண்மையிலேயே ஜே.சி.குமரப்பா ஒரு தீர்க்கதரிசி தான்.

விவசாயத்திலிருந்து கிடைக்கும் அனைத்தும் மனிதர்களும், மாடுகளும் எடுத்தது போக மீதி மண்ணுக்கே கொடுக்கப்படுகிறது.நாம் கொண்டாடும் பண்டிகைகளில் பொங்கல் மட்டும் தான் உண்மையிலேயே ஒரே அர்த்தமுள்ள பண்டிகை.பல்வேறு காரணங்கள் சொல்லப்பட்டாலும் பொங்கல் ஒரு அறுவடைத் திருவிழா. பெரும்பாலும் பொங்கல் மண்ணிலேயே வைக்கப்படுகிறது. பூமியில் இருக்கும் சக்திகளில் சூரிய சக்தியே முதன்மையானது. பூமியில் புதியது என்ற ஒன்று உண்டென்றால் அது தினமும் பூமியின் மீது விழும் சூரிய கதிர்கள் மட்டுமே. மற்றவை அனைத்தும் பூமியில் ஏற்கனவே இருப்பவை தான். ஏற்கனவே பூமியில் இருப்பதிலிருந்து ஏதோ ஒன்றை உருவாக்கி நம் மன திருப்திக்காக புதியது என அழைத்துக் கொள்கிறோம். அப்படிப்பட்ட பேராற்றல் உள்ள சூரியனுக்கு நன்றி சொல்கிறோம். இன்றும் விவசாயத்தைக் காப்பாற்றி வருவது மாடுகள் போன்ற கால்நடை வளர்ப்பு வருமானம் தான். அப்படிப்பட்ட மாடுகள் ,ஆடுகளுக்கு பொங்கல் வைத்து நன்றி செலுத்துகிறோம்.

பொங்கலில் சாதி , மதங்களுக்கு துளியும் இடமில்லை. அதுமட்டுமில்லாமல் பொங்கல் ஒரு சூழியல் பண்டிகை. வடக்கிலிருந்து திணிக்கப்பட்ட திபாவளி, விநாயகர் சதுர்த்தி போன்ற மற்ற பண்டிகைகள் போல சுற்றுச்சூழலுக்கு எந்தப் பாதிப்பும் பொங்கல் பண்டிகையால் உருவாவதில்லை. தமிழ் புத்தாண்டாக கொண்டாடுவதற்கு எல்லாவித சிறப்புகளும், நியாயமான காரணங்களும் பொங்கல் பண்டிகைக்கு இருக்கிறது. ஒரு வேளை தற்போதைய அரசு பொங்கல் பண்டிகையை மீண்டும் தமிழ் புத்தாண்டாக அறிவிக்குமானால் முன்பை விட பெரும்பாலானோர் தற்போது ஆதரிப்பார்கள். தமிழ் சமூகத்தில் ஊடுருவியிருக்கும் பார்ப்பன ஆதிக்கத்தை வேரறுத்தாலே போதும் எல்லாம் சரியாகி விடும்.

தமிழர் என்றொரு இனமுண்டு. தனியே அதற்கோர் குணமுண்டு !

பொங்கல் தமிழர்களின் அடையாளம் !

தமிழ்நாடு வாழ்க !

மேலும் படிக்க :

உணவிற்கான உள்நாட்டுப் போர் ?

தக்காளியும் விவசாயியும் பின்னே கார்ப்பரேட்களும் !

ஜே.சி.குமரப்பா பிறந்தநாள் (ஜனவரி 4) !

2026-01-04T15:41:00.001+05:30

'இயற்கையோடு இயைந்த உற்பத்தி முறைதான் இயற்கை ஆதார வளங்களை சிதைக்காது’ என்று சொன்னவர் தான் ஜே.சி.குமரப்பா. தொழிற்புரட்சி என்ற பெயரில் இயற்கையை அழித்துவிட்டு தான் இப்போதெல்லாம் உற்பத்தியே தொடங்குகிறது. குறைந்த தொழிலாளர்களைக் கொண்டு அதிக உற்பத்தி என்பது செல்வம் ஒரே இடத்தில் குவியவே வழிவகுக்கும் என்று அப்போதே சொல்லியிருக்கிறார். அது தான் தற்போது நடந்து கொண்டிருக்கிறது.

காந்திய பொருளாதாரம் என்பது கீழிருந்து மேல்நோக்கிய வளர்ச்சியை அடிப்படையாகக் கொண்டது. தற்போதைய வளர்ச்சி என்று சொல்லப்படுவது இதற்கு அப்படியே எதிரானதாக இருக்கிறது. எல்லோரையும் உள்ளடக்கிய சூழலைப் பாதிக்காத மிகச்சிறந்த பொருளாதார மாதிரியை ஜே.சி.குமரப்பா உருவாக்கினார். ஆனால் இந்த மாதிரியை இதுவரை பதவியில் இருந்த எந்த அரசும் கண்டுகொள்ளவில்லை. முன் எப்போதையும் விட ஜே.சி.குமரப்பாவின் பொருளாதார மாதிரிக்கான தேவை தற்போது தான் அதிகமாக இருக்கிறது. இனிவரும் அரசுகளாவது ஜே.சி.குமரப்பாவின் பொருளாதார மாதிரியை செயல்படுத்த முன்வர வேண்டும். தேர்தல் அறிக்கையில் இந்த விசயம் இடம்பெறும் வகையில் அரசியல் கட்சிகளுக்கு நாம் நெருக்கடி கொடுக்க வேண்டும்.

ஜே.சி.குமரப்பா மாதிரி ஏன் தேவை என்பதற்கு ஒரு சின்ன உதாரணம் சொல்ல வேண்டுமென்றால் தற்போதைய பிளாஸ்டிக் தடையால் நிறைய குறு முதலீட்டாளர்கள் பாதிக்கப்பட்டிருக்கிறார்கள். இயற்கையோடு இயைந்த தொழிலில் அவர்கள் முதலீடு செய்திருந்தால் இந்த பாதிப்பு உருவாகியிருக்காது. இது முதலீட்டாளர்களின் தவறு என்பதை விட அரசின் தவறு என்பது தான் பொருத்தமாக இருக்கும். சிறியதே அழகு என்பது தான் குமரப்பாவின் பொருளாதார மாதிரி.

விவசாயத்துறையிலும் குமரப்பாவின் சித்தாந்தங்கள் நடைமுறைப்படுத்தப்பட்டிருந்தால் இன்று விவசாயம் இந்த அளவிற்கு மோசமான நிலையை அடைந்திருக்காது. தன்னிறைவு வேளாண்மைக்கு தான் முக்கியத்துவம் கொடுக்க வேண்டும் என்று தொடர்ந்து குமரப்பா கூறி வந்தார். ஆனால் தொடர்ந்து அதிக தண்ணீர் தேவைப்படும் பணப்பயிர்களுக்கு முக்கியத்துவம் கொடுத்ததன் விளைவைத் தான் தற்போது அனுபவித்து வருகிறோம். இப்போதும் விவசாயத்தை மீட்பதற்கு குமரப்பாவின் விவசாய சிந்தனைகளே தேவை. தன்னிறைவு வேளாண்மை மட்டுமே விவசாயத்தையும், விவசாயிகளையும் காப்பாற்றும்.

" அறம் சாராத பொருளாதார அமைப்பு மனசாட்சிக்கு விரோதமானது. மனிதன் வெறும் பணம் திரட்டும் யந்திரமல்ல. அறமற்ற பொருளாதாரம் உயிரற்ற உடல்தான் " என்றார்,ஜே.சி.குமரப்பா. அறமற்ற பொருளாதாரம் தான் நம் காலத்தின் மிகப்பெரிய எதிரி.

" முன்னேற்றம் என்பது இயற்கையில் பொதிந்துள்ள அறிவையும், உண்மையையும் தேடி உணர்ந்து, மனிதருடைய தேவைகளைப் பூர்த்தி செய்வதற்காக இயற்கையை உபயோகிப்பது " என்பதுதான் ஜே.சி.குமரப்பாவின் நிலைப்பாடு.

ஜே.சி.குமரப்பாவின் பொருளாதார, விவசாய சிந்தனைகளே இன்றைக்கு தேவை.

ஆம். ஜே.சி.குமரப்பா ஒரு மறக்கப்பட்ட தீர்க்கதரிசி !

மேலும் படிக்க :

நாகரீகக் கோமாளி என்.எஸ்.கிருஷ்ணன்!

எக்காலத்திற்குமான கலைஞன் !

மலேசியா வாசுதேவன் - உன்னத குரலோன் !

மண்டோவும் கட்டக்கும் !

2026-01-03T07:46:00.003+05:30

நந்திதாதாஸ் இயக்கியிருக்கும் திரைப்படம், மண்டோ. சதக் ஹசன் மண்டோ என்ற பெயர் மட்டுமே தெரிந்திருந்த நிலையில் அவரின் வாழ்வு பற்றிய புரிதலை இத்திரைப்படம் உருவாக்கியிருக்கிறது. மண்டோவின் கலை சார்ந்த உணர்வுகளை நமக்கு கடத்த முயன்று, அதில் வெற்றியும் பெற்று விடுகிறார், இயக்குநர். பம்பாய் என்ற நகரத்திற்கும் மண்டோவிற்கும் உள்ள பிணைப்பு அழுத்தமாகவே பதிவு செய்யப்பட்டிருக்கிறது. பம்பாய் நகரம் பிடித்திருந்த போதிலும் மதவாதத்தால் வெளியேற வேண்டிய நிலை. லாகூரில் வசித்தாலும் பம்பாயின் நினைவுகளே அவரை ஆக்கிரமிக்கின்றன.

" என் கதைகளை உங்களால் தாங்கிக் கொள்ள முடியவில்லை என்றால் நம்முடைய காலத்தினை தாங்கிக் கொள்ள முடியவில்லை என்றே அர்த்தம். என் கதைகளில் தவறு என்று சொல்லப்படுவன எல்லாம் உண்மையில் அழுகிப் போன இந்த சமூக அமைப்பைத்தான் குறிக்கிறது " என்கிறார், சதத் ஹசன் மண்ட்டோ. இதன் மூலம் படைப்புகள் சார்ந்த தெளிவான பார்வை அவருக்கு இருந்ததை அறிய முடிகிறது.

இத்திரைப்படத்தை பார்த்துக் கொண்டிருக்கும் போதே இவரைப் போன்ற மனிதர் ஒருவர் அறிமுகம் ஆனாரே அவர் யாராக இருக்கும் என்ற குழப்பம் இருந்தது. திரைப்படம் முடிந்த பிறகு தான் அந்த ஆளுமை நினைவிற்கு வந்தார். அவர், ரித்விக் கட்டக். படச்சுருள் வெளியிட்ட ரித்விக் கட்டக் பற்றிய சிறப்பிதழில் கட்டக் பற்றி தெரிந்துகொள்ள முடிந்தது. கட்டக் பற்றி எழுத்து மொழியில் வாசித்ததை , திரைமொழியில் பார்த்தது போலவே இருந்தது மண்டோ திரைப்படம். இருவருக்கும் அவ்வளவு ஒற்றுமைகள்.

இருவருமே மதவாதம் உருவாக்கிய பிரிவினைகளால் பெரிதும் பாதிப்புக்குள்ளானவர்கள்.இருவரின் படைப்புகளிலும் பிரிவினையின் தாக்கங்கள் அதிகமாகவே இருக்கும். இருவருமே மதுப்பழக்கத்திற்கு அடிமையானவர்கள், அதற்காக சிகிச்சையும் எடுத்துக் கொண்டவர்கள். இருவராலுமே குடும்பத்தை சரிவர கவனிக்க முடியவில்லை. இருவருக்கும் அவர்களது நண்பர்களே அவர்களின் படைப்பாளுமையை அடையாளம் கண்டு ஆதரித்தார்கள். படைப்பு மனமே இருவரையும் ஆட்டுவித்திருக்கிறது. இருவருமே படைப்பிற்கு தங்களை அர்ப்பணித்தவர்கள். மண்டோ எழுத்தாளர், கட்டக் திரைப்பட இயக்குநர் அவ்வளவு தான் வித்தியாசம். இருவருமே நல்ல படைப்பாளிகள். இருவருமே உன்னத கலைஞர்கள்.

( 2019 )

மேலும் படிக்க :

FANDRY - மனதிற்கு நெருக்கமான படைப்பு !

AMAR SINGH CHAMKILA ❤️❤️❤️

MAHARAJ - வடக்கிலிருந்து ஒரு வெளிச்சம் 👍

சாய்ராட் - கலையின் அரசியல் !

2026-01-01T23:22:00.001+05:30

மக்களையும் மக்களுக்கான அரசியலையும் காட்சிகளின் வழியே மிகச்சிறப்பாக வெளிப்படுத்தியிருக்கிறார் , இயக்குநர் , நாகராஜ் மஞ்சுளே. ஒவ்வொரு காட்சியிலும் சமூகத்தின் முகம் அப்பட்டமாக காட்டப்படுகிறது. முதல் பாதியில் காட்டப்படும் காதல் காட்சிகள் அவ்வளவு அழகியலுடன் படம்பிடிக்கப்பட்டுள்ளன. அதிலும் ஸ்லோமோஷன் காட்சிகள் தனித்து நிற்கின்றன.  காதல் காட்சிகளை எவ்வளவு முறை திரைகளில் பார்த்தாலும் நமக்கு திகட்டுவதேயில்லை. இத்திரைப்படத்தின் காதல் காட்சிகளும் அப்படி தான். பார்த்துக் கொண்டே இருக்கலாம்.  கதாநாயகி ரிங்கு , இந்தத் திரைப்படத்தில் பெரிய பங்களிப்பை செய்திருக்கிறார். அவரது உடல்மொழியும் அற்புதம். பாடல்களும் ரசிக்கும்படியாக காட்சிப்படுத்தப்பட்டுள்ளன.

காதலுக்கு எதிரான சாதிய வெறி அழுத்தமாக பதிவுசெய்யப்பட்டுள்ளது. காதலுக்கு எதிர்ப்பு தெரிவியுங்கள் ;வீட்டை விட்டு துரத்துங்கள். பரவாயில்லை. ஆனால் சாதி மாறி காதலித்ததால் எவ்வளவு காலம் ஆனாலும் அவர்களை கொன்றால் தான் வெறி அடங்கும் என்பதை ஏற்றுக்கொள்ளவே முடியாது. இதுபோன்ற திரைப்படங்கள் சாதியத்திற்கு எதிராக எதிர்மறையில் இருந்தே குரல் கொடுக்கிறது. அப்படியில்லாமல் சாதிய படிநிலைகளைத் தாண்டி காதல் செய்பவர்களை இரு குடும்பமும் ஏற்றுக்கொள்ளும் வகையில்  நேர்மறையில் காட்சிப்படுத்தப்படும் படங்களுக்கும் தேவையிருக்கிறது.

காதல் என்பது இயல்பான ஒன்று , அந்தக் காதலுக்கு சாதி தடையில்லை என்பதை பொருத்தமான காட்சிகளின் மூலம் வெளிப்படுத்தலாம். ஒருவருக்கு இரண்டு பெண்பிள்ளைகள் என்று வைத்துக் கொள்வோம்.  அதில் ஒரு பெண்ணுக்கு பெற்றோர் பார்த்து சொந்த சாதிக்குள் மணமுடித்து வைக்கின்றனர். ஆனால் அந்தப் பெண் கொடுமைப்படுத்தப்படுவது போலவும் , மற்றொரு பெண் காதலித்து சாதி மாறி திருமணம் செய்து கொண்டு நன்றாக இருப்பது போலவும் காட்சிப்படுத்தினால் ஒரு நேர்மறையான மனமாற்றம் நிகழுமே.

சாதிவெறியை முன்னிலைப்படுத்தும் திரைப்படங்கள் இப்போதும் எடுக்கப்படும் சூழலில் சாதிவெறிக்கு எதிரான படங்களின் தேவையும் அதிகரித்திருக்கிறது. அந்த வகையில் இந்த சாய்ராட் முக்கியத்துவம் பெறுகிறது. சகமனிதனை மனிதனாக மதிக்க கற்றுத் தருவது தான் கலையின் தேவை. கலைஞர்கள் என்று தங்களைச் சொல்லிக் கொள்பவர்கள் இதை மனதில் கொள்ள வேண்டும்.

கலை  மக்களுக்கானது. அழகியல் மட்டும் கலை அல்ல . அழகியலுடன் அரசியலும் பேசும் கலை தான் முழுமையானது. சாய்ராட் ஒரு முழுமையான கலைப்படைப்பு.

காதல் என்பது சலிக்காத ஒன்று.  இதுவரை எத்தனையோ விதமான காதலைத் திரையில் பார்த்திருப்போம். மீண்டும் திரையில் காதலைப் பார்க்கும் போதும் நாம் சலிப்படைவதேயில்லை. அதிலும் இத்திரைப்படத்தில் காதல் காட்சிகள் படமாக்கப்பட்டிருக்கும் விதம் அற்புதம். கதாநாயகி ரிங்குவின் முகபாவங்களும் , வசனங்கள் உச்சரிக்கும் விதமும் அவ்வளவு அழகு. ரிங்குவின் நடிப்பு இத்திரைப்படத்திற்கு பெரிய பலம்.

ஒவ்வொரு காட்சியிலும் சமூக ஏற்றத்தாழ்வுகள் அப்பட்டமாக படம்பிடிக்கப்பட்டுள்ளன.காதல் வீட்டில் தெரிந்த பிறகு கடைசிவரை ஒருவிதமான பதைபதைப்பு இருந்து கொண்டே இருக்கிறது. படத்தின் இறுதிக்காட்சியில் அந்தக் குழந்தையை பக்கத்து வீட்டுக்கார பெண் அழைத்துச் செல்லும் போதே படத்தின் முடிவு தெரிந்து விடுகிறது. வீட்டின் வாசலில் போடப்பட்ட முழுமைடையாத கோலத்தைப் போல அவர்களின் வாழ்வும் முழுமை பெறவில்லை.

நமது இந்திய தேசத்தில்  படிப்பறிவு சதவீதம் அதிகரித்து கொண்டிருக்கும் விதத்தில் சாதியப்பாகுபாடுகள் குறையவில்லை. பல்வேறுவிதமான அதிகாரங்கள் மக்களைக் கட்டுப்படுத்தும் தேசத்தில் போராட்டங்களின் மூலமும் , கலையின் மூலமுமே  நமது எதிப்பை வெளிப்படுத்த முடியும். நாகராஜ் மஞ்சுளே , சாதியத்தின் மீதான கோபத்தை , எதிப்பை வலுவாக திரைமொழியில் பதிவு செய்திருக்கிறார்.

சாதியம் ஒழியட்டும். சகமனிதனை மனிதனாக மதிப்பதை நோக்கி நம் சமூகம் நகர்வதற்கான ஒரு படியை இத்திரைப்படம் எடுத்து வைத்திருக்கிறது.
மேலும் படிக்க :

FANDRY - மனதிற்கு நெருக்கமான படைப்பு ! 
AMAR SINGH CHAMKILA ❤️❤️❤️

MAHARAJ - வடக்கிலிருந்து ஒரு வெளிச்சம் 👍 

ஏ.ஆர்.ரஹ்மான் எனும் ரசனைக்காரன் !

2025-12-29T16:22:00.006+05:30

ஒரு பெரிய இடைவெளிக்குப் பிறகே ரஹ்மானின் இசையைக் கேட்கிறேன் ( கேட்கிறேன் என்று சொல்ல முடியாது , ரசிக்கிறேன் என்று தான் சொல்ல முடியும் ). ரஹ்மானை ' ரோஜா ' விலிருந்து கேட்பது தான் வழக்கம்.தற்போதும் அப்படியே. இப்போது 'பாய்ஸ்' போய்க் கொண்டிருக்கிறது. இசையில் படிப்படியாக எவ்வளவு பரிமாணங்கள்.வியப்பாக இருக்கிறது. மாறி வந்த வாழ்க்கை முறையும் , இயக்குநர்களும் காரணம் தான் என்றாலும் அந்த பரிமாணங்களை இசையில் கொண்டு வந்ததில் ரஹ்மானின் பெரும் உழைப்பு இருக்கிறது.

ஆணுக்கும் பெண்ணுக்குமான நெருக்கத்தை மிக நெருக்கமாக இசையில் கொண்டு வந்திருக்கிறார். இருவருக்குமான அன்பை , காதலை , ஊடலை, கூடலை , பிரிவை, மகிழ்ச்சியை ,துயரத்தை , கொண்டாட்டத்தை என அனைத்தையுமே இசையால் கோர்த்திருக்கிறார். ஒரு தனியறையில் காதல் ததும்ப ததும்ப உருக ரஹ்மானின் இசையே ஏற்றது.

ரசனையான பாடல் வரிகள் , அதற்கேற்றவாறு வருடவோ , துள்ளவோ செய்யும் இசை, ஓரளவிற்கு பொருத்தமான கலவையான குரல் என நம்மை வேறு உலகத்திற்கு அழைத்துச் செல்கிறார். முன்னெப்போதும் ரஹ்மானின் இசை இந்த அளவிற்கு வசீகரிக்கவில்லை. காரணம் என்னவென்றும் தெரியவில்லை. என்னவாக இருந்தால் என்ன இந்த மார்கழி மாத கூதலுக்கு இதமாக இருக்கிறது ரஹ்மானின் இசை.ஒவ்வொரு திரைப்படத்தின் பாடல்களும் தனி ஆல்பம் போலவே இருக்கின்றன.

ரசனைக்காரனின் ரசனையை ரசித்திருப்போமாக!

( 2017 )

மேலும் படிக்க :

எஸ்.ஜானகி : தென்னிந்திய திரையிசையின் தனிப்பெரும் தலைவி !

மலேசியா வாசுதேவன் - உன்னத குரலோன் !

காதில் விழுந்த கதைகள் - கி.ராஜநாராயணன் !

2025-12-23T16:06:00.001+05:30

இருபத்திஒன்றாம் நூற்றாண்டின் தொடுதிரை வாழ்விலிருந்து விலகி புத்தகங்களை வாசிக்க நேரம் ஒதுக்குவது சவாலானதாகவே இருக்கிறது. புத்தகங்களை வாசிக்க ஆசை இருந்தாலும் தினசரி வாழ்வு தரும் அழுத்தங்கள் நம்மை அனுமதிப்பதில்லை. இதையெல்லாம் கடந்துதான் வாசிக்க வேண்டியுள்ளது. இன்றைய நெருக்கடிகளுக்கு மத்தியிலும் வாசிப்பைத் தொடருபவர்கள் திறமையானவர்கள்.

கடந்த ஜுலை மாதத்தில் வேடசந்தூர் கிளை நூலகத்தில் நியூ செஞ்சுரி பதிப்பகம் சார்பாக புத்தகக் கண்காட்சி நடைபெற்றது. கலந்து கொள்ளும் போதே " ஏற்கனவே வாங்கிய புத்தகங்களே வாசிக்காமல் கெடக்குது. இதுல இவரு புதுசா வேற புத்தகம் வாங்கக் கிளம்பி வந்துட்டாரு " என்று உள்மனது எச்சரித்தது. அதனால் உடனே வாசிக்கக் கூடிய எளிய புத்தகங்களை வாங்க வேண்டும் என்று முடிவு செய்தே தேடல் தொடங்கியது. தேடலில் சிக்கியவை ' காதில் விழுந்த கதைகள்' மற்றும் ' சிறுவர் நாடோடிக் கதைகள் '. இந்த இரண்டு புத்தகங்களும் வாசித்து முடிக்கப்பட்டுவிட்டன. இந்த இரண்டு புத்தகங்களும் கொடுத்த நம்பிக்கையில்தான் அக்டோபர் மாதத்தில் நடந்த திண்டுக்கல் புத்தகக் கண்காட்சியில் கூடுதலாக புத்தகங்கள் வாங்கப்பட்டன.

'Don't judge a book by its cover ' என்பதற்கு உதாரணம் இந்த ' காதில் விழுந்த கதைகள் ' புத்தகம். இந்தப் புத்தகம் இந்தளவிற்கு வசீகரிக்கும் என எதிர்பார்க்கவில்லை. கதைகள் என்றாலே வசீகரமானதுதான். அதிலும் நமது மண் சார்ந்த கதைகள் இன்னமும் வசீகரமானவை. அந்த அட்டகாசமான மொழிநடை கூடுதல் குதூகலம். பொதுவாகவே நாம் எல்லோருமே கதைகள் கேட்க எப்போதும் தயாராகவே இருக்கிறோம். கதைகளை பார்க்க விரும்புகிறோம்; கேட்க விரும்புகிறோம்; வாசிக்க விரும்புகிறோம்; பேச விரும்புகிறோம். கதைகள், காற்றைப் போல எங்கும் நிறைந்திருக்கின்றன.

பாரததேவி மற்றும் கழினியூரான் இவர்கள் சேகரித்த கதைகளுடன் தான் சேகரித்த கதைகளையும் சேர்த்து இந்நூலை தொகுத்து நமக்குக் கொடுத்திருக்கிறார், கி.ராஜநாராயணன். இந்தத் தொகுப்பில் உள்ள கதைகள், வாசிக்க சுவாரசியமாக இருப்பதுடன் எந்த கட்டுக்குள்ளும் அடக்க முடியாததாக இருக்கின்றன. தினம் ஒரு கதையாக வாசித்து முடிச்சாச்சு. ஒன்றுக்கும் மேற்ப்பட்ட கதைகள் வாசிக்க நேரமிருந்தாலும் நாளுக்கு ஒரு கதை என்றே நாட்கள் கடந்தன. ஒவ்வொரு நாளும் அடுத்த கதை எப்படி இருக்கும் என்ற ஆவலுடன்தான் புத்தகம் கையிலெடுக்கப்பட்டது. அந்த அளவிற்கு ஒரு கதையே வாசிப்பிற்கான நிறைவைக் கொடுத்தது. இதற்கு முன்பு அப்படி வாசித்தது தேவதச்சன் கவிதைகளைத்தான். ஒரு நாளிற்கான நிறைவை அவரது ஒரு கவிதையே நிறைவு செய்தது.

தமிழ் நிலத்தில் இன்னமும் தீவிரமாக கொண்டாடப்பட வேண்டியவை கி.ராஜநாராயணனின் படைப்புகள். அவர் சேகரித்து கொடுத்த நாட்டார் கதைகளுக்காகவே நாம் அவரைக் காலமெல்லாம் கொண்டாட வேண்டும். நாட்டார் பாலியல் கதைகள் அடங்கிய தொகுப்பான ' வயது வந்தவர்களுக்கு மட்டும் ' ஒரு முக்கியமான தொகுப்பு. இப்போது வாங்கிய ' சிறுவர் நாடோடிக் கதைகள் ' தொகுப்பும் சிறப்பாகவே இருந்தது. மற்ற மொழிபெயர்ப்பு சிறார் கதைகளை விட இந்தத் தொகுப்பில் இருந்த சிறார் கதைகள் குழந்தைகளுக்கு மிகவும் பிடித்திருந்தன. அது தான் தாய்மொழியின் சிறப்பு.

எது எப்படியோ தொடுதிரை வாழ்விலிருந்து கொஞ்சமேனும் விலகி வாசிப்பை நோக்கி திருப்பியிருக்கிறார், கி.ரா. இதைத் தொடர வேண்டும். அதுதான் இப்போதைய தேவையாக இருக்கிறது. பார்க்க வேண்டிய திரைப்படங்களின் பட்டியல் வேறு நீண்டுகொண்டே போகிறது. அதையும் கொஞ்சம் கவனிக்க வேண்டும்.

மொத்தத்தில் Worth to read 👍

மேலும் படிக்க :

எது கலாசாரம் - கி.ரா...!

நாகரீகக் கோமாளி என்.எஸ்.கிருஷ்ணன்!

பட்டுக்கோட்டை கல்யாணசுந்தரம் - அறந்தை நாராயணன்!

துயர் 😥

2025-11-22T08:38:00.002+05:30

தூரத்தில் இருந்து கேட்டாலும்

துயர் மிக்கதாக இருக்கிறது

மரம் அறுபடும் சத்தம்

மேலும் படிக்க :

கவிதைகள்

தானந்தன கும்மி கொட்டி... !

2025-11-03T14:58:00.003+05:30

ஒரு பாடல் வெற்றி பெற்றால் அதிகபட்ச புகழைப் பெறுவது பாடகர்களாகவே இருப்பார்கள். அதனால்தானோ என்னவோ பாடல் தொடங்குவதற்கு முன்னரான தொடக்க இசையிலேயே தனது ராஜாங்கத்தை நடத்தி முடித்து விடுகிறார், நம் இளையராஜா. இந்தப் பாடலின் தொடக்க இசையும் அவ்வளவு அற்புதமாக உருவாக்கப்பட்டுள்ளது. பாடல் முழுவதும் இசை தொடர்ந்தாலும் சரணங்களின் இடையில் ஒலிக்கும் மெல்லிய புல்லாங்குழல் இசை இப்பாடலை மேலும் மெருகேற்றுகிறது.

மலேசியா வாசுதேவன், எஸ்.ஜானகி பற்றி சொல்ல வேண்டியதில்லை. எப்போதும் போல தங்களின் சிறப்பான பங்களிப்பைக் கொடுத்துள்ளனர். இவர்களின் குரல்கள் நம்மை எப்போதும் வசீகரிக்க இவர்களின் தெளிவான தமிழ் உச்சரிப்பும் ஒரு காரணம். கேட்க கேட்க திகட்டாத குரல்கள். காலமெல்லாம் நாமும் கேட்டுக்கொண்டே இருக்க வேண்டியதுதான். " மலேசியா வாசுதேவனால் மட்டுமே எஸ்.ஜானகியின் குரலுக்கு ஈடு கொடுத்து பாட முடிந்திருக்கிறது " என்று தனது கட்டுரையில் குறிப்பிட்டிருக்கிறார், இசை விமர்சகர் ஷாஜி. அது என்னவோ உண்மைதான்.

இந்தப் பாடலை ரசிக்கும்படி எழுதியிருப்பவர், பிறைசூடன். சிறந்த பாடலாசிரியருக்கான மாநில விருதை மூன்று முறை பெற்றிருந்தாலும் அதிகம் கவனம் பெறாத பாடலாசியர்களில் ஒருவராகவே இருந்திருக்கிறார். நிறைய வெற்றிப்பாடல்களைக் கொடுத்திருக்கிறார்.

'மீனம்மா மீனம்மா...'(ராஜாதிராஜா),

'நூறு வருசம் இந்த மாப்பிளையும் பொண்ணும்தான்...'( பணக்காரன்),

'சோளப் பசுங்கிளியே...'( என் ராசாவின் மனசிலே),

' ஆட்டமா தேரோட்டமா...'( கேப்டன் பிரபாகரன் ),

'இதயமே இதயமே...(இதயம்),

‘என்னைத் தொட்டு அள்ளிக்கொண்ட...'( உன்னை நெனச்சேன் பாட்டுப் படிச்சேன்),

' புன்னைவனப் பூங்குயிலே...' ( செவ்வந்தி) இன்னும் பல வெற்றிப் பாடல்களை எழுதியிருக்கிறார்.

All time favourite combo :

இளையராஜா + மலேசியா வாசுதேவன் + எஸ்.ஜானகி = ❤️❤️❤️

மேலும் படிக்க :

பட்டுவண்ண ரோசாவாம் ...!

எஸ்.ஜானகி : தென்னிந்திய திரையிசையின் தனிப்பெரும் தலைவி !

மேற்குத் தொடர்ச்சி மலை சிறப்பிதழ்!

2025-10-30T08:05:00.001+05:30

நாயகத் துதிபாடல் தான் தமிழ் சமூகத்தை தொடர்ந்து சீரழித்து வருகிறது. " ஊருக்கு ஒரு லீடர் , ஆளுக்கொரு கொள்கை , அவனவனுக்கு ஒரு டசன் பட்டினி பட்டாளம் " என்ற 'இரத்தக்கண்ணீர் ' -ல் இடம்பெற்ற எம்.ஆர்.ராதாவின் வசனம் இன்றும் பொருந்துகிறது. சினிமா மட்டுமல்ல அரசியல், ஆன்மீகத்திலும் இதே நிலை தான். ஒரு குறிப்பிட்ட மனிதரை தலைவராக ஏற்றுக் கொள்வதில் தவறில்லை. ஆனால் நீங்கள் ஏற்றுக் கொண்டதற்காக அந்தத் தலைவர் எது சொன்னாலும் சரி என்று முட்டுக் கொடுப்பது தான் ஆபத்தானது. மனிதர்கள் தங்களின் செயல்கள் மூலமே அடையாளம் காணப்பட வேண்டும். படைப்புகளின் மூலமே படைப்பாளியை கண்டடைய வேண்டும். இங்கே கவனத்தில் கொள்ள வேண்டியது செயல்களையும் , படைப்புகளையும் தானே ஒழிய மனிதர்களையும், படைப்பாளிகளையும் அல்ல. ஒரு நல்ல செயலை செய்ததற்காக அந்த மனிதர் செய்யும் எல்லா செயல்களையும் ஏற்றுக்கொள்வதும் , ஒரு நல்ல படைப்பைக் கொடுத்ததற்காக அந்த படைப்பாளியின் அனைத்து படைப்புகளையும் கொண்டாடுவதும் முட்டாள்தனம்.

'பாலிடிக்ஷ் தெரியாத பயலுகளெல்லாம் பாலிடிக்ஷ் பத்தி பேசறானுக ' என்ற எம்.ஆர்.ராதா தான் மீண்டும் நினைவிற்கு வருகிறார். வாரத்திற்கு ஒரு அரசியல் தலைவர் தமிழகத்தில் உதயமாகிறார். அதிலும் இந்த ரஜினி , கமல் பேசுவதெல்லாம் மகா மட்டமாக இருக்கிறது. பெரியாரின் கொள்கைகளை கடைப்பிடிப்பதாக சொல்லும் திமுக , திக வையும் விமர்சிக்க வேண்டியது அவசியமாகிறது. ஏனென்றால் அங்கேயும் நாயகத் துதிபாடல் தான் இருக்கிறது. அரசியல் மக்களுக்கானது. மக்களுக்கான அரசியல் மாநிலத்திலும் இல்லை , மத்தியிலும் இல்லை. ஆயிரம் விமர்சனங்கள் இருந்தாலும் மக்களுக்கான அரசியலை தொடர்ந்து பேசி வருவது இடதுசாரி இயக்கங்கள் மட்டுமே. தமிழகத்தில் இடதுசாரி இயக்கங்கள் பலவீனமானதற்கு எம்.ஜி.ஆர். தான் காரணம் என்கிறார்கள். எந்த வகையில் பாதிப்பை உருவாக்கினார் என்று தெரியவில்லை. எம்.ஜி.ஆரின் அதிமுக-வோடு கூட்டணி அமைத்தது தான் இடதுசாரி இயக்கங்கள் பலவீனமானதற்கு காரணமாக இருக்கலாம். தற்போதும் தமிழகத்தில் மக்களின் பிரச்சனைகளுக்கு முதலில் குரல் கொடுக்கும் இயக்கங்களாக இடதுசாரி இயக்கங்கள் தான் உள்ளன. மக்களோடு மக்களாகத் தான் இருக்கிறார்கள் , மக்களுக்காகத்தான் இயக்கங்கள் நடத்துகிறார்கள், மக்களுக்காகத்தான் போராடுகிறார்கள் , ஆனால் அரசியல் நிலைப்பாடு என்ற ஒன்றை எடுக்கும்போது மட்டும் மக்களின் மனநிலைக்கு எதிராக எடுக்கிறார்கள். அது தான் மக்களை ஒட்டவிடாமல் செய்கிறது.

காலத்துக்கேற்ற மாற்றங்கள் இடதுசாரி இயக்கங்களில் நிகழ வேண்டியது அவசியமாகிறது. இந்தியாவின் இடதுசாரி இயக்கங்கள் தங்களின் வேற்றுமைகளை களைந்து ஒன்றிணைய முன் வர வேண்டும். உலகமயமாக்கலும் , வலதுசாரி இயக்கங்களும் வலுவடைந்து வரும் சூழலில் இடதுசாரி இயக்கங்களும் தங்களை வலுப்படுத்திக் கொள்ள வேண்டியது அவசியமாகிறது. தமிழகத்தில் ஒரு இடதுசாரி சட்டமன்ற உறுப்பினர் கூட இல்லாமல் இருப்பது இடதுசாரி கொள்கைகளை ஆதரிக்கும் மக்களுக்கு அவமானமாக இருக்கிறது. இடதுசாரி இயக்கங்கள் பதவிக்கு வந்தால் என்னவெல்லாம் செய்ய முடியும் என்பதற்கான தற்கால உதாரணம் , கேரளம். அவ்வளவு ஏன் தமிழகத்தில் கடந்த முறை இடதுசாரிகள் சட்டமன்ற உறுப்பினர்களாக இருந்து தற்போது வேறு கட்சிகளை சேர்ந்தவர்கள் சட்டமன்ற உறுப்பிர்களாக இருக்கும் தொகுதி மக்களைக் கேட்டாலே வித்தியாசம் தெரிந்துவிடும்.

இந்த சூழலில் இருந்து தான் வெளிவந்திருக்கும் 'மேற்குத் தொடர்ச்சி மலை' திரைப்படத்தின் முக்கியத்துவத்தை பேச வேண்டியிருக்கிறது. முதலில் இத்திரைப்படத்திற்கு சிறப்பிதழ் கொண்டு வந்த படச்சுருளுக்கு நன்றி. இத்திரைப்படத்தை பார்த்த ஒவ்வொருவருக்கும் ஏதோ ஒரு விதத்தில் சலனம் உருவாகியிருக்கும். எளிய மக்களின் வாழ்க்கையை அவர்களின் இயல்பு மாறாமல் பதிவு செய்வது அவ்வளவு எளிதானதல்ல. தனது திட்டமிடப்பட்ட உழைப்பால் இதை சாத்தியமாக்கி இருக்கிறார் , லெனின் பாரதி. இந்த இதழில் இடம்பெற்ற அனைத்து கட்டுரைகளும் இந்தத் திரைப்படம் அவர்களுக்கு உருவாக்கிய மனப்பதிவுகளாக அமைந்திருந்தன. இந்த இதழில் இடம்பெற்ற மேற்குத் தொடர்ச்சி மலை திரைப்படத்தில் நேரடியாக பங்குபெற்ற ஒளிப்பதிவாளர் தேனி ஈஸ்வரின் நேர்காணலும் , இயக்குனர் லெனின் பாரதியின் விரிவான நேர்காணலும் முக்கியமானதாகிறது.

வசனம் எழுதிய ராசி தங்கதுரை மற்றும் படத்தொகுப்பாளர் காசி விஸ்வநாதன் அவர்களின் மனநிலையையும் பதிவு செய்திருந்தால் இன்னும் நன்றாக இருந்திருக்கும். ஏனெனில் இத்திரைப்படத்தின் வசனம் மிகவும் முக்கியமான ஒன்று. படத்தொகுப்பு எனும் போது லெனின் பாரதி சொன்னது போல 99 நிமிடங்கள், இரண்டு மணி நேரம் மற்றும் 3 மணி 20 நிமிடங்கள் என மூன்று அளவுகளில் படத்தின் தன்மை மாறாமல் சுருக்க வேண்டிய சவால்கள் குறித்தும் தெரிந்து கொண்டிருந்திருக்கலாம். எந்த இதழும் அதற்கான பக்கங்களை அதுவே தேடிக்கொள்ளும் என்று சொல்வார்கள். அந்த வகையில் இதை குறையாகவும் பார்க்க வேண்டியதில்லை.

லெனின் பாரதி இத்திரைப்படத்தை உருவாக்கிய விதம் மிகவும் முக்கியமானது. ஏனெனில் இங்கே நிறைய கதைகள் அறைக்குள்ளேயே எழுதப்பட்டு , அரங்குகளிலேயே தான் படமாக்கப்படுகின்றன. அப்படியே கதைக்களத்தில் எடுத்தாலும் அம்மக்களின் உணர்வுகள் பிரதிபலிக்கப்படுவதில்லை. இதற்கு முன்பும், சமீப காலங்களில் கூட மலையையும் , மலையை ஒட்டிய நிலப்பரப்பையும் கதைக்களமாக வைத்து பல படங்கள் வெளிவந்திருந்தாலும் அவை இயல்பாகவும் இல்லை, அம்மக்களின் உணர்வுகளை வெளிப்படுத்துவதாகவும் இல்லை.

லெனின் பாரதி , இத்திரைப்பட உருவாக்கத்தின் ஆரம்பத்தில் இருந்தே ஒவ்வொன்றையும் திட்டமிட்டே செயல்பட்டதால் அவருக்கு இது சாத்தியமாகியுள்ளது. இத்திரைப்படத்தின் வசனங்களே இன்னும் நெருக்கமாக உணர வைக்கிறது. திண்டுக்கல் மாவட்டத்தைச் சேர்ந்தவன் என்றாலும் இந்த திரைப்படத்தின் பல சொல்லாடல்கள் எங்கள் பகுதியிலும் உண்டு. ஒளிப்பதிவு நமது கவனத்தை மாற்றாமல் பார்த்து கொள்கிறது. மற்ற படங்களில் பின்னணி இசை மட்டுமே செய்யும் வேலையை இப்படத்தில் ஒளிப்பதிவும் இசையுடன் சேர்ந்து செய்திருக்கிறது.இதுவரை பார்த்த தமிழ் திரைப்படங்களில் 'சிவப்பு மல்லி' திரைப்படத்திற்குப் பிறகு கம்யூனிச கொடிகளை திரையில் பார்த்த திரைப்படமாக இதுவே இருக்கிறது. இடதுசாரி சிந்தனையுடன் படமெடுக்கவே இங்கே ஆட்கள் குறைவு. தங்கள் நிலப்பரப்பை தாண்டி வாழ்பவர்களின் நிலையை இன்னமும் தமிழ் சினிமா வெளிப்படுத்தவில்லை. விவசாயிகளின் வாழ்க்கையையும் , மீனவர்களின் வாழ்க்கையையும் அவர்கள் சந்திக்கும் இன்னல்களையும் அவர்களின் நிலையிலிருந்து அவர்களின் உணர்வுகளை வெளிப்படுத்தும் வகையில் இன்னமும் திரைப்படங்கள் வெளிவரவில்லை. ஆனால் தமிழக மக்கட்தொகையில் விவசாயிகளும் , மீனவர்களுமே அதிகம். இப்படி ' மேற்குத் தொடர்ச்சி மலை ' திரைப்படத்தை அது முன் வைக்கும் அரசியலைத் தாண்டி பேசுவதற்கு நிறைய காரணங்கள் இருக்கின்றன.

'மேற்குத் தொடர்ச்சி மலை ' திரைப்படம் மீது எனக்கும் விமர்சனங்கள் உண்டு. படத்தின் பின் பகுதியில் ஏன் கழிவிறக்கத்தை உருவாக்க வேண்டும். ஈரானிய திரைப்படங்கள் எளிய மக்களின் வாழ்க்கையைத் தான் அதிகமும் வெளிப்படுத்துகின்றன. ஆனால் அங்கே எளிய மனிதர்களுக்கே உரித்தான பாசாங்கற்ற அன்பு தான் முன்னிலைப்படுத்தப்படுகிறது. மேற்குத் தொடர்ச்சி மலையிலும் அன்பிற்கு குறைவில்லை தான். ஆனால் கழிவிறக்க மனநிலை உருவாகாமல் தடுத்திருந்திருக்கலாம். இந்த வாழ்வு தரும் எவ்வளவு பெரிய இழப்புகளையும் அநாயசமாக கடந்து செல்வதுடன் , அந்த வாழ்க்கையை கொண்டாடுபவர்கள் தான் எளிய மனிதர்கள். அப்படியான மனநிலை தான் அவர்களின் நீடித்த மகிழ்ச்சிக்கு காரணமாக இருக்கிறது. அந்த எளிய மனிதர்களின் வாழ்க்கையையும் உலகமயமாக்கல் பாதிக்கவே செய்திருக்கிறது ,அதை மறுப்பதற்கில்லை. நிலத்தை அடைவதை தாண்டியும் வாழ்க்கை இருக்கிறது என்று காண்பித்து இருக்கலாம்.

இந்த பூமியின் ஒவ்வொரு நிமிடமும் உழைக்கும் மக்களின் உழைப்பால் தான் நகருகிறது. இதை யாராலும் மறுக்க முடியாது. ஆனால் உழைக்கும் மக்களின் நிலை இன்னமும் மேம்படவில்லை. தொழிற்சங்கங்கள் வலுவிழந்தது தான் முக்கிய காரணமாக இருக்கிறது. அரசு வேலை செய்பவர்களுக்கு இருப்பது போன்ற வலிமையான தொழிற்சங்கங்கள் மற்ற உழைக்கும் மக்களுக்கு இல்லை. அமைப்பு சார்ந்த தொழிற்சங்களாலேயே இன்றைய முதலாளிகளையும் , அரசையும் எதிர்கொள்ள முடியவில்லை. சமீபத்திய யமாகா போராட்டம் ஒரு உதாரணம். தங்களின் உழைப்பை கூலியாக பெறும் ஒவ்வொருவரையும் அமைப்பிற்குள் கொண்டு வர வேண்டியது அவசியமாகிறது. அவர்களின் பணி பாதுகாப்பையும் உறுதி செய்ய வேண்டும். தற்போது அரசு வேலையில் மட்டுமே பணிப்பாதுகாப்பு இருக்கிறது.அரசு ஊழியர்களுக்கான குறைந்தபட்ச மாத ஊதியம் ஏறக்குறைய 20,000 என இருக்கிறது. மற்றவர்களுக்கான குறைந்தபட்ச மாத ஊதியமாக 10,000 என்ற அளவிற்கு கூட இன்னமும் உயரவில்லை. சம வேலைக்கு சம ஊதியம் என்பது இன்னமும் சாத்தியமாகவில்லை. விலைவாசி என்பது எல்லோருக்கும் ஒன்று தானே. உழைக்கும் மக்கள் விசயத்தில் கேரளமே முன்னோடி மாநிலமாக இருக்கிறது.

வணிக நிறுவனங்கள், தனியார் பள்ளிகள் மற்றும் இன்னும் பல இடங்களில் பணியாற்றுபவர்கள் வேலை இல்லாத போதும் கூட உட்கார்வதற்கு அனுமதிக்கப்படுவதில்லை. திரைப்படங்களும் , சின்னத்திரையில் ஒளிபரப்படும் தொடர்களிலும் ஆண்டான் அடிமை மனநிலையையே பிரதிபலிக்கிறார்கள். வர்க்க பேதங்களை கேள்வி கேட்பதற்கு பதலாக அவை இயல்பானதாக சித்தரிக்கப்படுகின்றன. சாலையில் செல்லும் போது, சரக்கு வாகனங்களில், ஏற்றப்பட்ட சரக்குகளின் மீதமர்ந்து பயணிப்பவர்களையும், கூலி வேலைக்காக சேர் ஆட்டோவிலோ, சரக்கு வாகனத்திலோ நெருக்கிப்பிடித்து செல்லும் உழைக்கும் மக்களையும் காணும் போது மனம் குற்றவுணர்வடைகிறது. இப்படி இந்த திரைப்படம் உருவாக்கிய சலனங்கள் அதிகம். லெனின் பாரதி , இத்திரைப்படத்தை திரையரங்கோடு விட்டுவிடாமல் வேறு தளங்களுக்கும், பள்ளி , கல்லூரிகளுக்கும் கொண்டு செல்ல இருப்பது மகிழ்ச்சிக்குரியது. அடுத்து வெளிவர இருக்கும் 3மணி 20 நிமிடங்கள் வடிவத்தைக் காண ஆவலுடன் காத்திருக்கிறோம்.

மேற்குத் தொடர்ச்சி மலை படக்குழுவிற்கு வாழ்த்துகள் !

30-10-2018

மேலும் படிக்க :

ஜமா - கலையின் கலை !

அயலி - அசலான தமிழ்மண்ணின் படைப்பு !

சலில் சௌதுரி 100 - மதுரை !

2025-10-03T14:59:00.004+05:30

27-09-2025 அன்று கலைஞர் நூற்றாண்டு நினைவு நூலகத்தில் ஓவியர் ரவி பேலட் மற்றும் அமெரிக்கன் கல்லூரி பேராசிரியர் பிரபாகர் அவர்களின் ஒருங்கிணைப்பில் இவ்விழா சிறப்பாக நடைபெற்றது. நமது சூழலில் சலில் சௌதுரி என்ற பெயருடன் எப்போதும் நமக்கு நினைவிற்கு வருபவர் இசை விமர்சகர், ஷாஜி . ஷாஜிக்கு சலில் சௌதுரி போல நாம் எல்லோருமே ஏதோ ஒரு இசைக்கலைஞரை மற்ற கலைஞர்களை விட தீவிரமாக கொண்டாடுபவர்களாகவே இருக்கிறோம். ஒவ்வொருவருக்கும் ஒவ்வொருவர் பிடித்தமானவராக இருப்பார். அந்த வகையில் நான் தீவிரமாக கொண்டாடும் இசைக்கலைஞர், மலேசியா வாசுதேவன் ❤️.

ஷாஜி அவர்களுடனான நட்பின் தொடக்கமே மலேசியா வாசுதேவன் அவர்களை கௌரவப்படுத்தும் விதமாக சென்னையில் நடைபெற்ற அவரது இரண்டாவது நூலான ' இசையின் தனிமை ' நூல் பற்றிய கலந்துரையாடல் நிகழ்வுதான் ( 18-09-2010). அப்போதிருந்து இந்த நட்பு தொடர்கிறது. இதற்கும் மலேசியா வாசுதேவன் நிகழ்விற்கு பிறகு சலில் சௌதுரி நிகழ்வில் தான் நேரில் சந்தித்துக் கொள்கிறோம். 15 ஆண்டுகள் இடைவெளி. நிகழ்விற்கு வந்திருப்பதை தெரிவிக்காமல் அரங்கத்தின் நடுவில் அமர்ந்திருந்தாலும் அடையாளம் கண்டுகொண்டு மேடையிலேயே நினைவுகூர்ந்தார்.

நண்பர் புஹாரி ராஜா அவர்களையும் முதன் முதலாக நேரில் சந்திக்கும் வாய்ப்பு கிடைத்தது. யாரும் அடையாளப்படுத்தாத, யாரும் கண்டுகொள்ள விரும்பாத விளிம்பு நிலை மனிதர்களை தொடர்ந்து தனது ' Buhari Junction YouTube channel ' மூலமாக பதிவு செய்து வருகிறார். சமூகத்திற்கு ஏதாவது செய்ய வேண்டும் என்று நாமெல்லாம் நினைக்க மட்டுமே செய்கிறோம். புஹாரி ராஜா போன்றவர்கள் தான் அதை செயல்படுத்துகின்றனர். முன்பே அறிமுகமில்லாத நபராக இருந்தாலும் நான் பேசுவதை பொறுமையாக கேட்டுக் கொண்டிருந்தார். பேச்சின் இடையில் " நீங்க மளிகை கடையில் உட்கார்ந்து இருக்கீங்க, நான் கறிக் கடையில் உட்கார்ந்து இருக்கேன் அவ்வளவு தான் வித்தியாசம்" என்று கூறியது அவரது பெருந்தன்மையை வெளிப்படுத்தியது. மளிகைக் கடையில் இருந்தாலும் தனிப்பட்ட எழுத்து, வாசிப்பு, இசை, சினிமாவுடன் முடிந்துவிடுகிறது. உங்களைப் போல சமூகத்துடன் நேரடி தொடர்பில் இல்லை தோழர். உங்களது பணி மிகப்பெரியது. நீங்கள் நினைத்தபடி எல்லாம் சிறப்பாக அமைய வாழ்த்துகள் புஹாரி ராஜா அவர்களே ❤️

பிராபாகர் ஐயா அவர்களின் கலகலப்பான அறிமுக உரையுடன் விழா தொடங்கியது. ஐயா குறிப்பிட்டது போல 'இசை விமர்சகர் ஷாஜி ' என்ற அவதாரத்தை நாங்கள் ரொம்பவே மிஸ் பண்ணுகிறோம். " உங்களுக்காக என்ன வேணா செய்யுங்க எல்லாவற்றையும் ஆதரிக்கிறோம். ஆனால் அப்பப்போ எங்களுக்காக இசை குறித்தும் ஏதாவது எழுதுங்க" என்று ஷாஜி அவர்களை அவரின் இசை எழுத்தின் ரசிகர்கள் சார்பாக கேட்டுக் கொள்கிறோம்.

உண்மையிலேயே எதிர்பார்த்ததை விட அதிகம் பேர் கலந்து கொண்ட நிகழ்வாக இந்நிகழ்வு அமைந்தது. ஷாஜி அவர்களை தூக்கத்தில் எழுப்பி சலில் சௌதுரி குறித்து பேச சொன்னால் கூட மட மடவென பேச ஆரம்பித்து விடுவார் என நினைக்கிறேன். ஷாஜி பேசிய ஒவ்வொரு முறையும் உற்சாக மிகுதியிலேயே பேசினார். சலில் சௌதுரியின் இசை நுணுக்கங்கள் குறித்தும் அவரது வாழ்வு குறித்தும் இன்னும் நெருக்கமாக ஷாஜியின் பேச்சின் ஊடாக தெரிந்து கொள்ள முடிந்தது.

சிறப்பு அழைப்பாளர்களாக பங்கேற்ற உஷா ராஜ் அவர்களும் மற்றும் சனில் ஜோசப் அவர்களும் சிறப்பாக பாடி சலில் சௌதுரியின் இசைக்கு பெருமை சேர்த்தனர். விழாக் குழுவில் இருந்த ரவி பேலட் அண்ணன், ஷாஜியின் நெருங்கிய நண்பராக இருந்தும் ஒன்றை மறந்து விட்டார். நிகழ்விற்கான அழைப்பிதழில் இசை விமர்சகர், எழுத்தாளர் & நடிகர் என்று மட்டும் போட்டுவிட்டு, ஷாஜி அவர்கள் பாடுவது போன்ற ஒரு ஒளிப்படத்தையும் போட்டுவிட்டு அவரின் புதிய அவதாரமான பாடகர் என்பதை சேர்க்க மறந்துவிட்டார். ஆம் இசை விமர்சகர் ஷாஜி அவர்களுக்கு பாடவும் தெரியும். சலில் சௌதுரிக்காக எந்த அவதாரத்தையும் எடுக்க ஷாஜி தயாராகவே இருக்கிறார். சலில் சௌதுரி குறித்தான அவரது ஆசைகள் அனைத்தும் நிறைவேறட்டும்.

கலைஞர் நூற்றாண்டு நூலக அரங்கமும் சிறப்பாக இருந்தது. நல்ல ஒலித்தரத்தில் நல்ல இசையைக் கேட்க முடிந்தது. உஷா ராஜ் அவர்கள், இசை மீது தீரா ஆர்வம் கொண்டவராக இருக்கிறார். தான் பாடவில்லை என்றாலும் மற்றவர்கள் பாடும் பாடலையும் கூடவே சேர்ந்து வாயசைத்துக் கொண்டிருந்தார். சனில் ஜோசப் அவர்களின் குரலும் கேட்பதற்கு நன்றாக இருந்தது. தங்களது பணிகளுக்கு இடையிலும் ஷாஜிக்காகவும், சலில் சௌதுரிக்காகவும் மதுரை நிகழ்வில் கலந்து கொண்ட இந்த இருவருக்கும் பார்வையாளர்கள் சார்பாக நன்றியைத் தெரிவித்துக் கொள்கிறோம்.

இசைக்கு எல்லைகள் கிடையாது என்பது இந்த AI காலத்திலும் தொடர்ந்து நிரூபனமாகி வருகிறது. இந்த நிகழ்வில் இதுவரை கேட்காத நிறைய சலில் சௌதுரி அவர்களின் பாடல்களைக் கேட்க முடிந்தது. ' ஓணப் பூவே.. பூவே.. ' என்ற மலையாள பாடல் பாடி முடிக்கப்பட்ட பிறகு முன் வரிசையில் அமர்ந்திருந்த ஒரு சிறுவன் மீண்டும் அந்தப் பாடலை ' ஒணப் பூவே .. பூவே.. ' என பாடிக் கொண்டிருந்தான். அதைக் கேட்க மிகுந்த மகிழ்ச்சியாக இருந்தது. இந்த கால குழந்தைகள் காதை ஒரு 'வலி' பண்ணும் அனிருத் பாடல்கள் மட்டுமே கேட்பார்கள் என்ற பிம்பம் உடைந்தது. தவறு நம்மிடமும் இருப்பது போலவே தோன்றுகிறது. நமக்கு பிடித்த இசையை நாம் தொடர்ந்து கேட்கும் போது ஏதோ ஒரு தருணத்தில் அந்த இசையை குழந்தைகளும் கேட்க ஆரம்பிப்பார்கள் என நினைக்கிறேன்.

ஷாஜி அவர்கள் மீண்டும் மீண்டும் சொன்னது போல சலில் சௌதுரியின் ஒரே டியூனாக இருந்தாலும், வெவ்வேறு இடங்களில் மீண்டும் பயன்படுத்தினாலும் அந்த பாடலும் வெற்றிப் பாடலாக அமைவது தான் சலில்தாவின் திறமைக்கு எடுத்துக்காட்டு. இந்த நிகழ்வில் கலந்து கொண்ட அனைவருமே சலில் சௌதுரி குறித்து கூடுதலாக எதையாவது தெரிந்து கொண்டுதான் அரங்கத்தை விட்டு வெளியேறி இருப்பார்கள். குறைந்தபட்சம் இப்படி ஒரு இசையமைப்பாளர் இந்தியாவில் வாழ்ந்திருக்கிறார் என்றாவது அறிந்திருப்பார்கள்.

நிகழ்வு முடிந்த பிறகு தீவிரமான அரசியல் பேசும் ஓவியங்களை தொடர்ந்து வரையும் ரவி பேலட் அண்ணன் அவர்களையும் முதன் முதலாக நேரில் சந்திக்கும் வாய்ப்பு அமைந்தது. எங்களுக்காக அவர் ஓவியங்கள் வரைந்திருந்தாலும் நேரில் சந்தித்ததில்லை. மிகவும் அக்கறையுடன் விசாரித்தார். அவரது ஒவ்வொரு வார்த்தையிலும் அன்பே நிறைந்திருந்தது. மகிழ்வான தருணம்.

ஷாஜி அவர்களை இவ்வளவு உற்சாக மிகுதியில் இதற்கு முன்பு பார்த்ததில்லை. " தம்பி, நீயே இப்ப தான் இரண்டாவது தடவை நேரில் பார்க்கிறதா சொன்ன. இதுல பல தடவ நேரில் பார்த்த மாதிரி பேசுற" என்று நீங்கள் சொல்வது காதில் விழுகிறது. அவரிடம் பல முறை பேசியதிலிருந்து குறிப்பிடுகிறேன். நமது மனதிற்கு பிடித்தமானவர்களைப் பற்றி பேசும் போது தான் நம்மால் சலிப்பே இல்லாமல் மணிக்கணக்காக பேச முடியும். அப்படித்தான் சலில்தா பற்றி ஷாஜி பேசுகிறார் என நினைக்கிறேன்.

சலில் சௌதுரியின் இசையைப் பற்றி ஒரே வரியில் சொல்ல வேண்டுமென்றால் ' சொல்லில் அடங்காத இசை' என்ற ஷாஜி அவர்களின் முதல் புத்தகத் தலைப்பைத் தான் குறிப்பிட வேண்டியிருக்கும். அதனால் தான் சலில்தாவால் மொழிகள் கடந்தும் வெற்றிப்பாடல்களை கொடுக்க முடிந்திருக்கிறது.

" இன்னிசை மட்டும் இல்லையென்றால்... " நம் வாழ்வு இன்னும் சிக்கலாகவே இருக்கும். இசையுடன், கலையுடன் கூடவே இயற்கையுடன் இந்த வாழ்வை வாழ்ந்து முடிப்போமாக !

அந்த சனிக்கிழமை மாலையை சிறப்பானதாக மாற்றிய அனைவருக்கும் நன்றி 🙏

#SalilChowdhury

#salilchowdhury100

மேலும் படிக்க :

மலேசியா வாசுதேவன் - உன்னத குரலோன் !

CHAT WITH CHEN - அலெக்ஸ் - நேர்காணல் ❤️

Stress Buster - மன அழுத்தத்திலிருந்து விடுபட !

2025-09-24T08:34:00.003+05:30

நவீன வாழ்வு நாள்தோறும் நெருக்கடிகளைக் கொடுத்துக்கொண்டே தான் இருக்கிறது. நாம் சந்திக்க நேரும் நெருக்கடிகளை தவிர்க்க முடியாது. ஆனால் அவற்றிலிருந்து விரைவாக வெளியேறலாம். எந்த நெருக்கடிக்கான தீர்வும் அந்த நெருக்கடிக்குள் இருப்பதில்லை. அந்த நெருக்கடிக்கு வெளியிலிருந்து அணுகுவதன் மூலமே அந்த நெருக்கடியைக் கடக்க முடியும். எந்த ஒன்று நெருக்கடியிலிருந்து நம்மை வெளியே கொண்டு வந்து அந்த நெருக்கடியை கடக்க உதவுகிறது என்பதை கவனத்தில் கொள்ள வேண்டும்.

எல்லாவித நெருக்கடிகளையும் ஒரே மாதிரியாக நம்மால் கடக்க முடியாது. எதுவெல்லாம் நெருக்கடியிலிருந்து நம்மை வெளியேற உதவுகிறதோ அதுவே அதிகம் நினைவில் இருக்கும் ,அதுவே அதிகம் கொண்டாடப்படவும் செய்யும். இயற்கை ஒரு மாபெரும் ' Stress Buster ' ஆக இருக்கிறது. இயற்கையை நெருக்கமாக கவனிப்பதன் மூலமே இந்த வாழ்வு தரும் அழுத்தத்திலிருந்து வெளியேறலாம். நாம் செல்லும் பாதையின் ஊடாக கடந்து செல்லும் ஒரு பறவையின் நிழலுக்கு கூட நம் மனநிலையை மாற்றும் வல்லமை இருக்கிறது. இயற்கையின் ஒவ்வொரு செயல்பாடும் கவனிக்க வேண்டியதே. மழை ஒரு கொண்டாட்ட மனநிலையை எல்லோருக்கும் கொடுக்கிறது. மனதை சாந்தப்படுத்துகிறது. மழை பெய்யும் நேரத்தில் ஏதாவது செய்ய மிகவும் பிடிக்கிறது. மழைக்கு முந்தைய மனநிலையும் பிந்தைய மனநிலையும் வேறு வேறாகவே இருக்கின்றது. மழை மட்டுமல்ல , சூரியன் ,நிலவு , வானம் , மலை,மரம் ,செடி,கொடி,பூ ,காய் ,கனி , பறவைகள் ,விலங்குகள் என இயற்கையின் ஒவ்வொன்றுமே தனித்துவத்துடன் இயங்குகின்றன. இதை கவனிப்பதன் மூலமே நமக்கான சமாதானங்களைப் பெற முடியும்.

இயற்கைக்கு அடுத்ததாக கலை இருக்கிறது. பாடல்கள் கேட்டல் ,புத்தகம் வாசித்தல் ,எழுதுதல், திரைப்படங்கள், பயணங்கள் என ஏதோ ஒன்றை செய்வதன் மூலம் நமக்கான நெருக்கடிகளை விரட்ட முடியும். இதுவும் கடந்து போகும் என்பது எல்லாவற்றுக்கும் பொருந்தக்கூடியது தான். கடந்த போக எது துணை புரிகிறது என்று பார்க்க வேண்டும். இன்றைய சூழலில் இளையராஜாவும் ,வடிவேலுவும் இல்லையென்றால் நமக்கு பைத்தியமே பிடித்துவிடும். அந்த அளவிற்கு இந்த இருவரும் தமிழ் சமூகத்தை ஆக்கிரமித்துள்ளனர். தினசரி வாழ்க்கையின் ஊடாக நமக்கு பிடித்தமான ஒன்றைச் செய்யவும் நேரம் ஒதுக்க வேண்டியது அவசியமாகிறது. பொழுதுபோக்கு என வகைப்படுத்தினாலும் அதைச் செய்யும் போது நமக்கு மகிழ்ச்சி உண்டாக வேண்டும். அதானால் தான் ஆக்கப்பூர்வமான பொழுதுபோக்கை குழந்தைகளுக்கு அறிமுகப்படுத்துவது முக்கியமானதாகிறது.

மனம் விட்டு பேசுவதன் மூலமும் நெருக்கடியை கடக்கலாம். இன்றைய சூழலில் சரியான புரிதல் இல்லாதவர்களிடம் மனம் விட்டு பேசுவது மேலும் நெருக்கடியையே உருவாக்குகிறது. இன்னொரு மனிதரின் மனக்குறைகளை கேட்பதற்கு கூட நேரமில்லாமல் ஓடிக்கொண்டே இருக்கிறோம். மிகவும் சிறிய காரணங்களுக்காக நிகழும் தற்கொலைகள் அதிகரித்துள்ளன. அதுவும் குழந்தைகளைக் கொன்றுவிட்டு தாங்களும் சாவது என்பது அதிகரித்து வருகிறது. அவர்கள் வாழ்வதற்கான நம்பிக்கையை நாம் கொடுக்கவில்லை. சமூகம் என்ற அமைப்பில் நிகழும் தற்கொலைகளுக்கு நாமும் மறைமுக காரணம் தான்.எல்லா மனிதர்களும் வாழ்வதற்கான நம்பிக்கையை சமூகம் கொடுக்க வேண்டும். மனித மனம் விசித்திரமானது தான். எப்போது எப்படி நினைக்கும் என்று தெரியாது தான். தற்கொலைகள் எங்குமே தான் நிகழ்கின்றன. ஆனால் தற்கொலைக்கான காரணங்கள் ஆராயபட வேண்டியவை, விவாதிக்கப்பட வேண்டியவை. எந்தச் சூழலிலும் அந்த எண்ணம் வராத வாழ்க்கையை வழி நடத்துவது தான் முக்கியமானதாகிறது. மரணம் எல்லோருக்கும் பொதுவென்றாலும் அது தானாய் நிகழ வேண்டும்.

இயற்கையையும், கலையையும் கொண்டாடுவதன் மூலமே வாழ்க்கையையும் கொண்டாட முடியும் !

மேலும் படிக்க:

பாலியல் சுரண்டல்கள் ஒழியட்டும் !

மனிதம் பரவட்டும் !

Chat With Chen - அலெக்ஸ் - நேர்காணல் ❤️

2025-09-12T08:49:00.007+05:30

Chat With Chen ரொம்பவே விரும்பி பார்க்கும் ஒரு நிகழ்ச்சி. பங்கு பெறும் ஒவ்வொருவரையும் அவர்களின் மனம் திறந்து பேச வைக்கிறார், ஷாஜி. மனம் சோர்வாக இருக்கும் போது Chat With Chen தொடரில் இருக்கும் ஏதேனும் ஓர் நேர்காணலைக் காண்பது வழக்கம். அதனாலேயே முழுவதும் பார்க்க வாய்ப்பிருந்தாலும் இன்னும் பலரின் நேர்காணல்கள் பார்க்கப்படாமலே இருக்கின்றன. இடையில் எப்பவாவது ஒரு புது நேர்காணலை காண்பது வழக்கம். அப்படி உடனே பார்த்தது தான் அலெக்ஸ் அவர்களின் நேர்காணல்.

நாம் எல்லோருக்குமே இசை பிடிக்கும். அது எந்த மாதிரியான இசை என்பது மட்டும் தான் வித்தியாசம். இசையை, இசைக்கலைஞர்களை அங்கத உணர்வோடு அலெக்ஸ் அணுகும் விதம் தான் எல்லோருக்கும் பிடித்திருக்கிறது. இசையை அங்கத உணர்வோடு அணுகியவர்கள் சமீபத்தில் நம் சூழலில் இல்லை. நம்மில் பெரும்பாலானோர்களுக்கு டைமிங் காமெடி ரொம்பவே பிடிக்கும். இசையுடன் டைமிங் காமெடியும் கலந்தால் இன்னும் சுவாரசியம் தானே. அந்த இடத்தில் தான் அலெக்ஸ் ஜெயிக்கிறார்.

நம்மில் பெரும்பாலானோர், நமக்கு பிடித்த வேலையைச் செய்வதில்லை அல்லது அப்படி பிடித்த வேலையைச் செய்ய முயற்சிப்பதும் இல்லை. பிழைப்பிற்காக கிடைத்த வேலையைச் செய்பவர்களே அதிகம். கிடைத்த வேலையைச் தொடர்ந்து செய்து கொண்டிருக்கும் போது ஏதோ ஒரு காலகட்டத்தில் நமக்கும் தோன்றியிருக்கும், " இந்த வேலையை விட்டுவிட்டு நமக்கு பிடித்த வேலையைச் செய்ய வேண்டும்" என்று. ஆனால் அதற்கு முக்கியத்துவம் தராமல் பிழைப்பிற்கான வேலையை தொடர்ந்து செய்பவர்களே அதிகம். பிடித்த வேலையை செய்வதற்காக கிடைத்த வேலையை விட்டவர் தான், அலெக்ஸ். இவரைப் போல உலகெங்கும் உதாரணங்கள் நிறைய உள்ளன.

Prime Video -ல் வெளியான அவரது ' Alex in Wonderland ' அற்புதமான நிகழ்ச்சி. தமிழ் திரையிசை ரசிகர்கள் அனைவரும் ரசித்து பார்த்த நிகழ்ச்சி. இசை விமர்சகர் ஷாஜிக்கு பிறகு மலேசியா வாசுதேவன் அவர்களை பொதுவெளியில் முன்னிலைபடுத்திய நிகழ்ச்சியாக அது அமைந்தது. அதற்கு காரணம் நம்மை போல் அவரும் ஷாஜியின் ' மலேசியா வாசுதேவன் மகத்தான திரைப்பாடகன்' கட்டுரையை படித்ததின் பிறகான பாதிப்பில் தான் இதைச் செய்திருக்கிறார் என்பது இந்த நேர்காணல் மூலமாக தெரிய வருகிறது. அலெக்ஸ் பங்கு பெற்றதாக சொல்லும் ஷாஜி அவர்கள் ஒருங்கிணைத்த மலேசியா வாசுதேவன் நிகழ்வில் பங்கேற்கும் வாய்ப்பு சென்னையில் இருந்த போது எனக்கும் அமைந்தது. அது ஒரு அற்புதமான நிகழ்வு.

ஒவ்வொரு மனிதரின் வாழ்வும், கேட்கும் நமக்கு கதை தான். கதை கேட்பது என்பது நமக்கு சலிப்பதேயில்லை. அதனால் தான் இத்தகைய நேர்காணல்கள் நம்மை ஈர்க்கின்றன. அலெக்ஸ் பற்றி நமக்குத் தெரியாத நிறைய விசயங்களை இந்த நேர்காணல் மூலமாக நாம் தெரிந்து கொள்ளலாம். அலெக்ஸ் இந்த இடத்தை அடைவதற்கு நிறைய உழைத்திருக்கிறார். நிறைய பயிற்சிகள் செய்திருக்கிறார். எத்தனையோ நடிகர்கள், தொழில்நுட்ப கலைஞர்கள் உழைப்பில் உருவாகும் எத்தனையோ திரைப்படங்கள் நமக்கு சலிப்பைத் தருகின்றன. தனிமனிதனாக 2 , 3 மணி நேரம் நமக்கு சலிப்பில்லாமல் ஒரு நிகழ்ச்சியைக் கொண்டு செல்வது ரொம்பவே பெரிய விசயம்.

Amazon நிறுவனத்தின் Prime Video இவரது புதிய மேடை நிகழ்ச்சியான ' Alexperience ' நிகழ்ச்சியை வாங்க மறுத்த சூழலில் மற்ற இடங்களிலும் முயற்சி செய்தும் பலனளிக்காததால் தானே ஒரு பதிய OTT தளத்தை உருவாக்கி அதில் இந்த Alexperience நிகழ்ச்சியை கடந்த செப்டம்பர் 5-ம் தேதி வெளியிட்டு இருக்கிறார். அந்த OTT ன் பெயர் ANBA TV. இதுவும் ரொம்பவே பெரிய விசயம். இதிலும் அலெக்ஸிற்கு வெற்றி கிடைக்கட்டும்.

மொத்தத்தில் நல்லதொரு நேர்காணல் ❤️

மேலும் படிக்க :

நான் உங்கள் வீட்டு பிள்ளை - பூவை செங்குட்டுவன் !

மனிதர்கள் - குற்றமுடைய நெஞ்சு குறுகுறுக்கும் !

நான் உங்கள் வீட்டு பிள்ளை - பூவை செங்குட்டுவன் !

2025-09-02T08:43:00.002+05:30

'புதிய பூமி' திரைப்படத்தில் இடம்பெற்ற "நான் உங்கள் வீட்டு பிள்ளை..." என்ற பாடல் வாலி அல்லது கண்ணதாசன் எழுதியிருப்பார் என்று நினைத்தால் இப்பாடலை எழுதியிருப்பவர், பூவை செங்குட்டுவன் ❤️. அதிகளவில் பக்திப்பாடல்கள் எழுதியிருக்கிறார். அவற்றில் பெரும்பாலானவை பெருவெற்றி பெற்ற பாடல்களாக இருக்கின்றன. இப்பாடலும் பக்தி பாடல்தான், நாயக பக்திப்பாடல் .

" நான் உங்கள் வீட்டுப் பிள்ளை
இது ஊர் அறிந்த உண்மை
நான் செல்லுகின்ற பாதை
பேரறிஞர் காட்டும் பாதை

காலம்தோறும் பாடம் கூறும்
மாறுதல் இங்கே தேவை
ஏழை எளியோர் துயரம் போக்கும்
செயலே எந்தன் சேவை

இதயம் என்பது ரோஜாவானால்
நினைவே நறுமணமாகும்
எங்கே இதயம் அங்கே வாழும்
அன்பே என்னை ஆளும்

கோவில் என்றால் கோபுரம் காட்டும்
தெய்வம் உண்டு அங்கே
உள்ளம் என்றால் உயர்ந்து காட்டும்
எண்ணம் வேண்டும் இங்கே

பிறந்த நாடே சிறந்த கோவில்
பேசும் மொழியே தெய்வம்
இதை மறந்திடாமல் வாழ்ந்து வந்தால்
கோபுரமாகும் கொள்கை

உனக்கொரு பங்கும்
எனக்கொரு பங்கும்
உலகில் நிச்சயம் உண்டு
ஒவ்வொரு மனிதன் உழைப்பினாலும்
உலகம் செழிப்பதுண்டு

எது வந்தாலும் ஏற்றுக் கொண்டால்
துணிவே துணையாய் மாறும்
இளையோர் கூட்டம் தலைமை தாங்கும்
பூமியே புதிய பூமி
இளையோர் கூட்டம் தலைமை தாங்கும்
பூமியே புதிய பூமி "

பூவை செங்குட்டுவன் இயற்றிய மற்ற பாடல்கள்...

தாயிற் சிறந்த கோயிலுமில்லை (அகத்தியர்)

ஏடு தந்தானடி தில்லையிலே (ராஜராஜ சோழன்)

இறைவன் படைத்த உலகை (வா ராஜா வா )

ராதையின் நெஞ்சமே (கனிமுத்துப்பாப்பா)

காலம் நமக்கு தோழன் (பெத்த மனம் பித்து)

காலம் எனக்கொரு (பௌர்ணமி),

வானம் நமது தந்தை (தாகம்)

திருப்பரங்குன்றத்தில் நீ சிரித்தால் (கந்தன் கருணை)

ஆடுகின்றானடி தில்லையிலே (கந்தன் கருணை)

திருப்புகழைப் பாட பாட (கௌரி கல்யாணம்)

வணங்கிடும் கைகளில் (கற்பூரம்)

வணக்கம் சிங்கார (காதல் வாகனம்)

திருநெல்வேலி சீமையிலே (திருநெல்வேலி)

//உனக்கொரு பங்கும்
எனக்கொரு பங்கும்
உலகில் நிச்சயம் உண்டு
ஒவ்வொரு மனிதன் உழைப்பினாலும்
உலகம் செழிப்பதுண்டு

எது வந்தாலும் ஏற்றுக் கொண்டால்
துணிவே துணையாய் மாறும்
இளையோர் கூட்டம் தலைமை தாங்கும்
பூமியே புதிய பூமி// ❤️

மேலும் படிக்க :

ஆலோலங் கிளி தோப்பிலே தங்கிடும் கிளி தங்கமே... !

காதல் வானிலே... காதல் வானிலே...-பிரித்தி உத்தம்சிங் ❤️

மதிலுகள் ❤️

2025-07-30T16:21:00.002+05:30

எந்த இலக்கிய படைப்பாக இருந்தாலும் அதைத் திரைப்படமாக எடுப்பது சவாலான விசயம். மம்முட்டியும் ,அடூர் கோபாலகிருஷ்ணனும் இணைந்து இந்தச் சவாலில் வென்றிருக்கிறார்கள், 1990ல். உண்மையிலேயே இந்தத் திரைப்படத்தைக் காண்பது அலாதியான அனுபவம். 'மதிலுகள்' என்ற இந்த வைக்கம் முகமது பஷீரின் குறுநாவலை நீங்கள் வாசித்து இருந்தாலும், வாசிக்கவில்லை என்றாலும் கூட இந்தத் திரைப்படம் உங்களுக்கு நிச்சயம் பிடிக்கும்.

படமாக்கப்பட்ட விதம் அற்புதம். இப்படி ஒரு சிறை இருந்தால் நாமும் சென்று அங்கு தங்கி விடலாம் என தோன்றும் அளவிற்கு காட்சிகளை படம்பிடித்து இருக்கிறார் இயக்குநர், அடூர் கோபாலகிருஷ்ணன் அவர்கள். பஷீரின் எழுத்துகள் பாசாங்கில்லாதவை. சக மனிதர்கள் மீதான அன்புதான் அவரது பேசுபொருள். அப்படிப்பட்ட எழுத்தை திரையில் கொண்டுவருவதற்கு நிறைய உழைக்க வேண்டியிருந்திருக்கும், உழைத்திருக்கிறார்கள்.

மம்முட்டி ஒரு தேர்ந்த நடிகர். எந்த மாதிரியான கதாப்பாத்திரத்திலும் தன்னை பொருத்திக் கொள்ளும் திறமையுடையவர். கடந்த இரண்டு மூன்று ஆண்டுகளில் வெளிவந்த திரைப்படங்களிலும் கூட நாம் இதைக் காண முடியும். பஷீர் எனும் ஆளுமையை திரையில் கொண்டு வர நிறைய மெனகெட்டிருக்கிறார். பஷீராக மட்டுமே திரையில் தெரிய உழைத்திருப்பது நன்றாகவே தெரிகிறது. மம்முட்டி இப்போது இந்தத் திரைப்படத்தைப் பார்த்தால் கூட திரும்பவும் இப்படியான சூழலில் மீண்டும் நடிக்கவே விரும்புவார். இத்திரைப்படம் படமாக்கப்பட்ட இடம் அவ்வளவு அழகானது.

பஷீர்- நாராயணி பகுதி எல்லாம் கவிதை. நாராயணி குரல் ' எந்தோ.. ' என தொடங்குவது இப்போதுவரை காதில் கேட்கிறது. 2023ல் வெளிவந்த ' மகாராணி ' திரைப்படத்தில் கூட இப்படியான ஒரு பகுதி இருக்கும். ராணி கதாப்பாத்திரத்தின் குரலை மட்டுமே திரைப்படத்தின் இறுதிகாட்சி வரை நம்மால் கேட்க முடியும். இறுதியில் மட்டுமே ராணியின் முகம் தெரியும். ஆனால் நாராயணியின் முகம் இன்று வரை நமக்கு தெரியவே தெரியாது. அந்த ராணி கதாபாத்திரமும் உரையாடலை ' எந்தோ டா..' என்றே தொடங்கும். இந்தக் கதாப்பாத்திரத்திற்கு ' மதிலுகள்- நாராயணி ' ஒரு முன்மாதிரிமாக இருந்திருக்கக்கூடும். சக மனிதர் மீதான நேசத்திற்கு, அன்பிற்கு, காதலுக்கு மதில் கூட தடையாக இல்லை.

எல்லோரையும் நல்லவர்களாக, எல்லாவற்றிலும் நல்லதை மட்டுமே காணக் கூடியவர்களாக, எதையும் எதிர்கொள்பவர்களாக இருக்கும் வைக்கம் முகமது பஷீர், பிரபஞ்சன் போன்றவர்களின் மனங்கள் நமக்கெல்லாம் வாய்க்க வேண்டும்.

ஒரு மென்மையான திரையனுபவத்திற்கு 'மதிலுகள்' திரைப்படத்தைக் காணலாம். YouTube -ல் காணக்கிடைக்கிறது.

மேலும் படிக்க :

மனிதர்கள் - குற்றமுடைய நெஞ்சு குறுகுறுக்கும் !

மனோரதங்கள் (MANORATHANGAL ) ❤️

மனிதர்கள் - குற்றமுடைய நெஞ்சு குறுகுறுக்கும் !

2025-07-23T14:53:00.002+05:30

"மனிதன் ஒரு மகத்தான சல்லிப்பயல்" என்ற ஜி.நாகராஜனின் கூற்று எக்காலத்திற்கும் பொருந்தக்கூடியது. அப்படியான மனிதர்களின் சல்லித்தனத்தை இத்திரைப்படம் பேசுகிறது. மதுபோதையால் நிகழும் குற்றங்கள் நாளுக்குநாள் அதிகரித்து வருகின்றன. ஆனால் ஆளும் அரசுகள், குற்றங்கள் எதுவுமே நடக்காதது போலவே நடந்து கொள்கின்றன. மது விற்பதோ , மது குடிப்பதோ குற்றமில்லை. ஆனால் அது இன்னொரு தனி மனிதரை பாதிக்கும் போது குற்றமாகிறது. மது விற்பனையை தீவிரமாக கண்காணிப்பது போலவே அதனால் குற்றங்கள் நிகழாமல் தடுக்க உரிய நடவடிக்கைகளை எடுப்பதும் அரசின் கடமைதான். அப்படியான ஒரு அரசு இன்னும் தமிழ்நாட்டில் அமையவில்லை.

என்னதான் மனிதர்கள் குடும்பமாக, சமூகமாக இயங்கினாலும் சுயநலம் தான் மனிதர்களின் அடையாளம். எவ்வளவு நெருங்கிய உறவாக இருந்தாலும், நண்பர்களாக இருந்தாலும் பிரச்சனை என்று வரும் போது பெரும்பாலும் சுயநலமாகவே சிந்திப்பார்கள்.

அப்படியான நண்பர்கள் மது போதையால் நடந்து கொள்ளும் விதமும் அதனால் உருவாகும் சிக்கல்களும், அவர்களின் சுயநலமான மனநிலையும், சல்லித்தனமும்தான் இந்த ' மனிதர்கள் ' திரைப்படம்.

தெரிந்தோ தெரியாமலோ குற்றம் நிகழ்த்தப்பட்ட பிறகு அதிலிருந்து எப்படியாவது தப்பித்துக் கொள்ளவே மனிதர்கள் விரும்புகிறார்கள். அதற்காக அவர்கள் எந்த எல்லைக்கும் செல்லக்கூடியவர்களாகவும் இருக்கிறார்கள். குற்றம் நிகழ்த்தப்படுவதற்கு முன்பு அவர்களது வாழ்வு எப்படி இருந்ததோ அதே வாழ்வை குற்றம் நிகழ்ந்த பிறகும் அடைய விரும்புகிறார்கள். நண்பர்களுக்குள் நிகழும் குற்றமும் அதன் பிறகான அவர்களின் மனநிலையும் திரையில் காட்சிகளாக விரிகின்றன.

Crowd Funding மூலம் இப்படிப்பட்ட ஒரு திரைப்படத்தை எடுப்பதற்கு முதலில் துணிச்சல் வேண்டும். நல்ல முயற்சி. நடிப்பதற்காக தேர்ந்தெடுக்கப்பட்டவர்களும் தங்களது பணியைச் சிறப்பாக செய்திருக்கிறார்கள். இசையும் ஒளிப்பதிவும் சிறப்பாகவே அமைந்திருக்கின்றன. இரவு நேர கிராமச் சாலைகளையும் விதவிதமான கோணங்களால் அழகாக காண்பித்து இருக்கிறார் , ஒளிப்பதிவாளர். கார் சக்கரங்களை படம் பிடித்த விதமும் அழகு. இரவில் படம் பிடித்திருந்தாலும் மற்ற காட்சிகளை விட தொடக்க காட்சியும் இறுதி காட்சியும் ரொம்பவே இருட்டாக இருந்தன. இதைக் கொஞ்சம் கவனத்தில் கொண்டிருக்கலாம். ஒரு வேளை , தொடக்கத்திலும் இறுதியிலும் மனிதர்களின் இன்னும் இருட்டான பக்கங்களைச் சொல்வதால் கூடுதல் இருட்டாக இருக்கட்டும் என்று விட்டுவிட்டார்களோ என்னவோ.

பேச்சு வழக்கும் கதை நிகழும் களமான திண்டுக்கல் பகுதியைச் சார்ந்ததாக இருக்க வேண்டும் என்பதில் கவனம் செலுத்தியிருப்பது தெரிகிறது. அதே போல இது தானாக நிகழ்ந்த குற்றமா அல்லது வேண்டுமென்றே நிகழ்த்தப்பட்ட குற்றமா? என்ற சந்தேகத்தையும் கடைசி வரை கொண்டு சென்றிருக்கிறார், இயக்குநர், ராம் இந்திரா.

'குற்றத்தை மறைத்தல்' என்ற வகைமையில் இதற்கு முன்பும் நிறைய திரைப்படங்கள் வந்திருக்கின்றன. ஆனால் அவற்றில் பெரும்பாலானவை நகைச்சுவையை முன்வைத்த திரைப்படங்களாகவே இருக்கின்றன. இதே பின்னணியில் ஒரு சீரியஸ் திரைப்படமாக, மனிதர்களின் அக உணர்வுகளை, மன ஓட்டத்தை வெளிப்படுத்தும் ஒரு திரைப்படமாக நாம் ' மனிதர்கள் ' திரைப்படத்தை அணுகலாம். இயக்குநர் மற்றும் குழுவினருக்கு வாழ்த்துகள் 🎉

Aha மற்றும் SunNext OTT தளத்தில் காணக்கிடைக்கிறது.

மேலும் படிக்க:

ஜமா - கலையின் கலை !

AMAR SINGH CHAMKILA !

அக்கமகாதேவி !

2025-07-10T23:20:00.004+05:30

விகடன் தடம் -ல் வெளியாகியிருக்கும் அக்கமகாதேவியைப் பற்றிய பெருந்தேவியின் கட்டுரை கவனிக்க வேண்டிய ஒன்றாகும். பெண்களை அடிமையாகவே நடத்தும் இந்து சமய மரபில் இப்படி ஒரு பெண் வெளிப்பட பசவண்ணரின் இயக்கம் தான் முக்கியமான காரணமாக இருந்திருக்கிறது. உண்மைக்கு நெருக்கமில்லாத எதுவும் வீண் தான்.வசனங்களால் வளர்க்கப்பட்ட பசவண்ணரின் இயக்கம் உண்மைக்கு நெருக்கமானதாக நடைமுறைக்கு பொருத்தமில்லாததை புறந்தள்ளும் இயக்கமாக இருந்திருக்கிறது. தூமைத் தீட்டு , சாவுத் தீட்டு , குழந்தைப் பேறுத் தீட்டு , சாதித் தீட்டு, வைதவ்யம் எனப்படும் கைம்பெண் கோலம் போன்ற ஐந்து தீட்டுகள் பசவண்ணரின் இயக்கத்தினரால் (சரணர்கள் ) புறந்தள்ளப்பட்ட தீட்டுகள் ஆகும். இந்த இயக்கம் 12ம் நூற்றாண்டில் உருவானதாகச் சொல்லப்படுகிறது. 12ம் நூற்றாண்டிலேயே இந்த அளவிற்கு தெளிவு இருந்திருக்கிறது. இந்த தீட்டுகள் இன்றும் தொடர்வது வெட்கக்கேடு. இன்றைக்கும் இந்த ஐந்து தீட்டுகளும் இந்து சமயத்தில் தீவிரமாக பின்பற்றப்படும் தீட்டுகளாகவே உள்ளன. இந்த ஐந்து தீட்டுகளை ஒதுக்கிவிட்டாலே நிறைய மாற்றங்கள் நிகழும்.

முள்ளை முள்ளால் எடுப்பது போல ஆன்மீகத்தை , ஆன்மீகத்தால் வெல்ல முடியும் என்ற நம்பிக்கையை பசவண்ணரின் இயக்கம் நமக்கு கொடுக்கிறது. ஒவ்வொரு மதத்திலும் பின்பற்றப்படும் நடைமுறைக்கு ஒவ்வாத அயோக்கியத்தனங்களை வேரறுக்க இன்னொரு ஆன்மீக இயக்கம் தோன்ற வேண்டும். பகுத்தறிவுவாதிகளும் ஆசிரமங்கள் தொடங்க வேண்டும்.

அக்கமகாதேவியை பெருந்தேவி அணுகியிருக்கும் விதம் தனித்துவமானது. ஆண்டாளைப் போல அக்கமகாதேவியும் சென்னமல்லிகார்ச்சுனன் மீது மையல் கொண்டிருந்தார் என்றாலும் அவரது வாழ்க்கை பெரும் கலாச்சார உடைப்பு. அவரை ஒரு பெண்ணியவாதியாகவே பெருந்தேவி அணுகுகிறார். ஆடை களைதல் என்ற ஒன்றின் மூலமே நிறைய உடைப்புகளைச் செய்திருக்கிறார். இவ்வளவு வலிமை வாய்ந்த, எந்தவித நிர்பந்தத்திற்கும் கட்டுப்படாத, பாலினம் கடந்த சுதந்திரமான பெண் இன்றும் சாத்தியமா ? என்று தெரியவில்லை என்கிறார், பெருந்தேவி. இன்றும் பெண்களுக்கான பொதுவெளி என்பது ஆண்களுக்கான பொதுவெளி போல இல்லை. பெரும்பான்மையோருக்கு பொதுவெளியே இல்லை என்பது தான் உண்மை.

இந்த மாதிரியான வரலாற்று நிகழ்வுகள் கவனம் பெரும் போது நிகழ்கால வாழ்வில் நிறைய திறப்புகள் நிகழ சாத்தியமிருக்கிறது.

(10-07-2018 அன்று முகநூலில் எழுதிய பதிவு )

மேலும் படிக்க :

நாகரீகக் கோமாளி என்.எஸ்.கிருஷ்ணன்!

பட்டுக்கோட்டை கல்யாணசுந்தரம் - அறந்தை நாராயணன்!