दिलकुमार तमाङ डट ब्लागस्पोर्ट डट कम

दमिनी सिहं प्रकरण अब के होला ? अभियुक्तलाई फासी !!

2012-12-31T03:41:00.000-08:00

१६ डिसेम्बरमा भारतको राजधानी मा चल्ने एउटा बसभित्र ६ जना मान्छेरूपी दानवहरुबाट पाशविक तरिकाले एउटी २३ बर्षे युवतीको इज्जत लुटिएको समाचार जब बाहिर आयो,

सारा दिल्लिबासी हरु ओर्लिएर सडकमा आए। मृत्युदण्ड र अझ मध्य-पुर्व मा जस्तो कठोर सजाय को माग राखेर केटाकेटी, युवा-युवति, विधार्थी, व्यापारी, पत्रकार, धनि -गरिब सब आन्दोलन मा ओर्लिए। संसदमा अवाज उठ्यो। एक प्रहरी हवल्दार र एक पत्रकार ले ज्यान गुमाउनु पर्यो । प्रधानमन्त्री मनमोहन सिंहले जनतालाई संयमता अपनाउनका लागी सम्बोधन गर्नु पर्यो।

चर्चित खेलाडी देखि अमिताभ बच्चन, सलमान खान जस्ता कलाकारले समेत दोषीहरुलाई मृत्युदण्ड र जेलमै पिटी पिटी मार्नु पर्ने जस्तो अभिव्यक्ति दिए। यतिले नपुगेर तिहार जेलमा समेत यी पशुहरुमध्ये एकलाई त्यहाका अरु कैदीहरुले पिटेर “मलमुत्र” खान बाध्य पारे जसले गर्दा प्रशाशनले तिनीहरुलाई अर्कै “सेल” मा सार्न बाध्य भए। ती युवतीको उपचार हुँदाहुँदै सिंगापुरको अस्पतालमा मृत्यु भएपछि दिल्लीका साथै अरु सहरहरुमा पनि सर्वसाधारण आन्दोलनमा सरिक हुदैछन। यतिको व्यापक र “आक्रोशित ” जनसहभागिता वावजुद आन्दोलन शान्तिपूर्ण रहनु भनेको सो आन्दोलन कुनै राजनैतिक पार्टीको स्वार्थको लागी नभएर विसुद्ध नागरिक समाजको अगुवाइमा आम जनता स्वस्फुर्त उर्लेर आएको आन्दोलनको रुपमा लिन सकिन्छ। एउटा कुरा के प्रष्ट छ भने अब भारतीयहरु यस्ता अपराधलाई “अर्को तथ्यांक” को रुपमा स्विकार्न कदापि तयार छैनन्।

यो प्रकरणमा न्यायपालिकाले विगत जस्तो अपराधीलाई फेभर गर्ने किसिमको केहि बर्षको कारागार सजाय मात्र तोक्न सजिलो पक्कै हुने छैन। अहिले सबैजना अदालतले के निर्णय गर्छ र सोको लागी सहजिकरण गर्न सरकारले वा संसदले कानूनमा कस्तो संशोधन लेराउछ- सोको व्यग्र प्रतिक्षामा छन । यदि मृत्युदण्ड फैसला भएमा त्यसको विरुद्दमा बोल्न वा पुनरावेदनमा जान कुनै मानव अधिकार आयोग वा अरु निकाय जनताको “रौद्र” मुड छिछोलेर अगाडी आउने सम्भावना न्यून छ। यौन हिंसाका घटनालाइ महिलाहरुको अशोभनीय “लवाई” संग जोडेर हेर्ने र बलात्कार हुँदा महिलालाई बढी दोष दिने समाजले यसपाली भने यस्तो बेतुकको तर्क गर्ने हिम्मत गर्न सकेका छैनन् ।

पुष्पकमल दाहाल 'प्रचण्ड' लाई फाइवर्ग युनिर्भसीटी जर्मनी बाट खुल्ला पत्र

2012-10-03T10:26:00.000-07:00

नेपाललाई स्टेटम्यानको खाँचो छ । माओवादीको पहिलो श्रेणीका नेता सरकारमा जाँदैनन् देशलाई दिशा दिने नीति र नेतृत्व दिन लाग्नेछन्’,

म एउटा मध्यम वर्गको नेपाली युवक । म जन्मिएको ११ वर्षपछि तत्कालीन नेकपा माओवादीबाट जनयुद्धको उद्घोष भएको थियो । जनयुद्धको रापले सेकिएको समाजमा हुर्कँदा धेरै नयाँ चिजहरू अनुभव गर्न पाएँ । संस्कृतिले जोडेको समाजलाई कसरी राजनीतिले छिन्नभिन्न बनाउँदो रहेछ भन्ने देखें अनि समाज परिवर्तन गर्न हिँडेकाहरू स्वयम् परिवर्तन भएको दुर्लभ चित्र पनि देख्न पाएँ ।

विगत केही वर्षयता देखिँदै आएको घटनाक्रमका बारेमा हजुरहरूलाई धेरै पहिलेदेखि एउटा खुलापत्र लेख्छु भन्ने सोच्दै थिएँ तर, आज बल्ल साइत जुरेको छ । सकेसम्म सिलसिला मिलाएर लेख्ने मेरो प्रयास रहने छ । समयक्रमसँगै एकपछि अर्को घटना घटित हुँदैगए । यतिधेरै कुरा परिवर्तन भए कि लेखेर साध्यै छैन । हजुर अनि हजुरको सिंगो पार्टी जनयुद्धको भूमिगत जीवनबाट सार्वजनिक जीवनमा प्रवेश गर्‍यो । संविधानसभा निर्वाचनमा हजुरहरू स्वयंले समेत कल्पना नगर्नुभएको विश्वाश नेपाली जनताले गरे । फलस्वरूप हजुरहरूको पार्टी मुलुककै ठूलो पार्टीका रूपमा स्थापित भयो । संविधानसभा निर्वाचनपछि बनेको पहिलो गणतान्त्रिक सरकारको नेतृत्व हजुरले नै गर्नुभयो । यो सबै चकत्कार देखेर दुनियाँ जिल परेको थियो । सामान्यभन्दा सामान्य नेपाली जनताले सोचेका थिए परिवर्तनको अनुभूति गर्ने दिन अब टाढा छैन, तर त्यो एउटा मृगतृष्णामा रूपान्तरण हुँदा अधिकांश नेपालीको मन रोएको छ । अनि दुनियाँ फेरि जिल परेको छ यो अर्को चमत्कार देख्दा । विश्वासघात भएपछि विश्वास गर्नेको गल्ती त पक्कै भएको होइन होला । करबि चारवर्षअघि जति हुनुपर्छ रामशाहपथतिरबाट एउटा कारगेडसहितको सवारी लावालस्करसहित आउँदैरहेछ । कारगेडको बीचमा कालो रङको जर्मन बेञ्ज कारको पछिल्लो सिटमा मोटो जुँगा भएको मोटै कदको गमक्क परेर फुलेफुले जस्तो गरेर बसेको एउटा पुरुष र दुब्लो कद कि एक महिला थिए । त्यो पुरुष हजुर हुनुहुँदोरहेछ । अनि त्यो सवारी त्यो लावा लस्कर, त्यतिबेला भर्खर राज्यशक्तिबाट च्युत गरिएको शाही परिवारको शाही सवारीसित तुलना गरें मलाई लाज लागेर आएको थियो हजुरजस्तो सर्वहारा वर्गको नेताले राजा महाराजाको जस्तो अशोभनीय ढाँचा पारेको देखेर । त्यत्ति नै बेला मेरो मनमा चिसो पसेको थियो परिवर्तन मृगतृष्णा हुन सक्छ भनेर नभन्दै भयो पनि । मजस्ता धेरैको कल्पना थियो, सार्वजनिक यातायातमा हाम्रा नेताहरु हिंडेको हेर्ने (कम्तिमा पनि मओवादी नेताहरू) जसरी नेता हुनुअघि हिँड्ने गर्थे, हजुरको कारगेडले कुल्चिएर लग्यो ति कल्पनालाई । मजस्ता धेरैले अझै बिर्सेंका छैनन हजुरले ‘नेपाललाई स्टेटम्यानको खाँचो छ । माओवादीको पहिलो श्रेणीका नेता सरकारमा जाँदैनन् देशलाई दिशा दिने नीति र नेतृत्व दिन लाग्नेछन्’, भनेर दिएको आफ्नै सर्वजनिक अभिव्यक्तिलाई । ‘क्रान्तिको आवश्यकताले गर्दा भन्ने तुरूपले छोपेर माओवादीका प्रथम श्रेणीका नेताहरू सरकारमा गए अनि हजुर आफू नै प्रधानमन्त्री हुनुभयो । मेरो आशय माओवादीका शीर्ष सरकारमा जान हुन्नथ्यो भन्ने पटक्कै होइन । तर सवाल केहो भने जाने नै भएपछि पहिला जाँदैनौ भन्नुको के औचित्य हुन्थ्यो र ? यसैले होला हामीले एउटा नयाँ पार्टीबाट थुप्रै पुराना पार्टीकाजस्तै थप एक अध्यक्ष पायौं । तर देशले राजनेता पाएन । तपाइँको पार्टी कता जादै छ ? मजस्ता धेरैलाई यो प्रश्नले बारम्बार सताउँछ । मिडियामा आउने अधिकांश सानाठूला तस्करीमा एउटा न एउटा माओवादी नेताकार्यकर्ताको नाम मुछिएकै हुन्छ । सुरुसुरुमा त मिडियाले पूर्वाग्रही भएर एकतर्फी समाचार दियो । बद्नाम गराउन खोज्यो र तपाइँहरूकै भाषामा भन्नुपर्दा माओवादीलाई घेराबन्दी गरियो भनेर चित्त बुझ्थ्यो । तर त्यसको न खण्डन आउँछ न त आन्तरिक अनुसन्धानको जानकारी नै । हुन त अब आन्तरिक अनुसन्धान गरिसाध्य छैन, कहाँबाट सुरु गर्ने, माथिबाट कि तलबाट ? सक्नेले जुटेर कमाएकै छन्, कमाउँदै छन, नसक्ने फुटेर गए । टोलटोलका गुण्डाहरू आज एउटा न एउटा संगठनको सदस्यता लिएर युद्ध सरदार बनेका छन् । यसले मओवादी पार्टीलाई कहाँ पुर्‍याउँछ हजुरले नै ख्याल गर्नुभएको छ होला । तर नेपाललाई भने ढिलोचाँडो अपराधको संस्थागत विकास र राजनीतिको अपराधिकरकै दिशामा पुर्‍याउँछ, पुरानो बिहारजस्तै । हिजो जुन बाटो अन्य पार्टीले समातेका थिए र जुन बाटोको माओवादीले सधैं विरोध गर्‍यो । आज तीव्र गतिमा माओवादीस्वयम्, त्यही बाटोमा अग्रहसर भएको छ ।

मजस्ता धेरै तिनछक त त्यतिबेला परेका थियौँ । जतिबेला हजुर कि आफ्नै नातिनी सेन्ट म्यारिज स्कुलमा पढ्नुहुन्छ भन्नेकुरा बीबीसी नेपाली सेवामार्फता सुनियो । अचम्म त केछ भने मओवादी विद्यार्थी संगठन घोक्रो फुट्ने गरी निजी विद्यालय बन्द गर भन्दै हिँडिरहेको छ । जब कि आफ्नै नेताका छोराछोरी महंगा निजी विद्यालयमा पढिरहेका छन् । सायद यही रहेछ हजुरहरुले भन्ने गरेको जनवादी शिक्षा । राष्ट्रको शिक्षाको मेरुदण्ड निजी विद्यालय हुनैसक्दैनन् । यो साँचो कुरा हो । संसारभरिका अधिकांश पुँजीवादी मुलुकमासमेत शिक्षामा राज्यको लगानी र नियन्त्रण उल्लेख्यरुपमा हुनेगर्छ र बहुसंख्यक विद्यार्थी सरकारी शिक्षालयमै जान्छन् । माओवादी नेताका दर्शन र व्यवहारमा यति ठूलो भिन्नता हुनसक्छ भन्ने म कल्पना पनि गर्न सक्दिन । यदि तपाइँहरु आफैं आफ्नो दर्शनअनुसारको व्यवहार गर्न सक्नुहुन्न, आफ्ना छोराछोरीलाई सरकारी विद्यालयमा पढाउन सक्नुहुन्न भने अरुका छोराछोरीलाई निजी विद्यालयमा नपढ र निजी शिक्षालय बन्द गर भन्ने हजुरहरुसित कुनै नैतिक अधिकार छैन । जनताले कल्पना गरेका थिए नेताका छोराछोरी पनि अब सर्वसाधारणका छोराछोरीसरह सरकारी विद्यालय जानेछन् । अनि त्यतिखेर सरकारी विद्यालयको गुणस्तर बढ्नेछ, तर पहिलो गाँसमै ढुङगा लागेजस्तो भयो । माओवादी शिक्षामन्त्री दीनानाथ शर्मा यही हो हामीले भन्ने गरेको जनवादी शिक्षा भन्दै हिड्नुभएको छ ।

हिजोभन्दा आज, आजभन्दा भोलि धेरै माओवादी नेता कार्यकर्ताको जीवनशैली प्रकाशको गतिमा परिवर्तन भएको देख्न पाइएको छ । निजी टेलिभिजन, रेडियो, पत्रिका, अस्पताल, बैंकलगायतमा लगानी गर्ने हैसियतमा धेरै माओवादी नेता पुगिसके यो कुरा जनताबाट एउटा सियोसमेत नलिनु भन्ने चिनियाँ क्रान्तिका नायक माओका खास अनुयायी भन्न रुचाउने माओवादीहरु नै जानुन् । जनयुद्ध अन्ततः धनयुद्धमा परिणत भएको छ । माओवादीका सामान्यभन्दा सामान्य नेतासेमत आजभोलि महँगो मोबाइल बोक्छन, महँगो गाडी चड्छन् । सर्वहारा पार्टी अहिले हेर्दाहेदै सबैभन्दा धेरै गाडी भएको पार्टी हुनपुगेको छ । माओवादी नेताका रोजाइमा आजकल महँगा होटल र क्याफेहरू पर्ने गर्छन् । यो देख्दा अचम्म लाग्छ । हजुरलाई हेक्का छ कि छैन माओवादी नेताका यि मोबाइल, आइफोन, आइप्याड मात्र लिलामीमा बेच्ने हो भनेपनि कम्तिमा एउटा सुविधासम्पन्न स्वास्थ्यचौकी बन्छ । गाडी र घरका त कुरा नगरौँ । अवस्था यस्तो क छि कमिसन नआउने ठाउँमा माओवादी भेट्नै गाह्रो, कमिसन आउने ठाउँमा माओवादीबाट बच्नै गाह्रो । यो् क्रान्तिको आवश्यकता भन्ने कुरापनि विचित्रको हुँदोरहेछ । हुन त जोगी बन्न कोसैले राजनीति गर्ने होइन र माओवादी भन्ने बित्तिकै झुत्रेझात्रे नै हुनुपर्छ भन्ने पक्कै होइन । तथापि, सर्वहारा वर्गको अग्रदस्ता दाबी गर्ने पार्टीमा वर्ग उत्थान हुनु नपच्ने विषय हो भनेर स्मरणमात्र गराएको हुँ । मजस्ता धेरैको कल्पना थियो, माओवादी नेताहरुले क्युवामा चे गुएभाराले गरेजस्तो मजदुरहरूसित सधैं सम्भव नभए पनि कम्तिमा महिनामा एकदिन श्रम गर्ने छन् । कल्पनामा एउटा मजदुर आफ्नै नेतासित एकदिन, एकघण्टा वा एकमिनट नै किन नहोस्, सँगै काम गर्न पाउँदा कतिधेरै उर्जाले भरिएको देखिन्थ्यो होला ? यी सब कल्पनामै सीमित भएका छन् ।

हेर्दाहेर्दै अधिकांश माओवादी नेता चिल्ला भए, भुँडी हेर्दा खान्दानी व्यापारीजस्तै देखिन थाले बिडम्बना श्रम र माओवादी नेताबीचको दूरी कहिल्यै घटेन । बरु बढेको बढ्यै भइरहृयो । ‘संसारभरका मजदुरहरू एक होऔँ’, भन्ने नाराको मुन्तिर मजदुरले मजदुर कुटेको दुर्लभ दृश्य माओवादीको मजदुर संगठनमा देख्न पाइयो । लाजले सबै भुतुक्कै भए । कर छलेर अकुत सम्पति जोडेका राष्ट्रघाती व्यापारी अहिले माओवादी नेताका नजिकका विस्वाशपात्र भएका छन । अध्यक्ष कमरेड स्वयंले कति गन्हाएका व्यापारीका घरमा गएर खाना खानुभएको छ । कुन नैतिकताले दिन्छ हजुरहरुलाई व्यापारीको घरघर चाहार्न । विभिन्न शक्ति केन्द्रसित हुने वार्ताका मध्यस्तकर्ता आजकल व्यापारी हुनथालेका छन् । संसारमा सबैभन्दा छिटो वर्ग र चरित्र परिवर्तन गर्नसक्ने व्यापारी हुन्, जसले सधैं आफ्नो लगानीको प्रत्युत्तर नाफामा खोज्छन् ढिलो होस् या चाँडो । अलिकति संघीयताको कुरागर्न मनथियो हजुरसित । जातीय संघीयता के साँच्चै हजुरले भनेजस्तै नेपालको सबै संकट मोचनको अचुक ब्रम्हास्त्र हो, कि यो पनि राजतन्त्र फालेपछि नेपालका सबै समस्या स्वत? समाधान हुन्छन् भनेर नारायणहिटी दरबारका शाहको ठाउँमा लैनचौर दुतावासका सुद, प्रशाद, मेहता र मुनी ल्याएर राखेजस्तो हो ? जर्मनी, स्विट्जरल्यान्ड अमेरिकाको संघीयताको सफल उदाहरण दिने तपाइँहरुले गहिराइमा पुगेर बहुआयामिकरुपले त्यहाँको समाजको बनोट र आर्थिक स्थितिको हाम्रो मुलुकसँग तुलना गर्नुभएको पक्कै होला । विश्व भू-राजनीतिको संवेदनशील स्थानमा रहेको हाम्रो मुलुकले के संघीयता धान्नसक्छ ? त्यो पनि आत्मनिर्णयको अधिकारसहितको जातीय संघीयता ? हजुरजस्तो विश्वलाई चमत्कार गरेर देखायौं भन्नेले रुवान्डा, बाङलादेश र योगोस्लाभियाका बारेमा पनि पक्कै जानकारी राख्नुभएकै होला । मान्छे उचाल्नु र अनुशासनमा राखेर नियम/कानुनअनुसार हिँडाउन सक्नु दुई भिन्न कुरा रहेछन । यी दुईबीच ठूलो फरक हुँदोरहेछ । लगभग एउटा क्रान्ति गरेजत्तिको फरक । हजुरहरुलाई स्वीकार्न अप्ठेरो भएको मात्रै हो, नढाँटी भन्नुपर्दा हजुरहरु आफैंले उठाएको यो जातीयता र संघीयताको मुद्धा कस्तो गलगाड भएको छ । दुनियाँका अगाडि झुठो बोल्न सकिन्छ तर ऐनाका अगाडि उभिएर आफ्नै अनुहारमा हेरेर झुटो बोल्न सकिँदैन । अझ नाङ्गै ऐना अगाडि उभिँदा । प्रायः विकसित मुलुकहरू अहिले बहुभाषिक, बहुसास्कृतिक अनी मश्रित समाजको निम्ति किन लागि रहेका छन हजुरहरुले मनन् गर्नुभएको छ ? राजनीतिक संस्कारको विकास हुननसक्नु हाम्रा लागि ठूलो बिडम्बना भयो । राजनीतिक पार्टीको सदस्यता अथवा राजनीतिक सक्रियताको अर्थ नियमकानुन सबैभन्दा माथि भन्ने गलत अर्थ लाग्नथाल्यो । यही एउटा गल्ती पुराना राजनीतिक दलहरुले गरेका थिए । जसको फलस्वरप मओवादीले जनताको बेजोड सहनुभूति पाएको हो । आज फेरि माओवादी त्यही गल्ती गर्दैछ, पुराना दलभन्दा पनि द्रुत गतिमा ।

हजुरहरुले पनि थुप्रैपटक खुलामञ्चमा चर्को भाषण गर्नुभयो । प्रतिक्रियामा चर्को तालीका गड्गडाहट पाउनुभयो तर हजुरहरूले जनतासामु यथार्थ ओकल्न सक्नुभएन । हाम्रो राजनीतिको रोगलाई जनतासामु ल्याइदिन सक्नुभएन । हजुरहरुले भन्न सक्नुभएन, उद्योगका मजदुर साथीहरु काम नगरी खान पाइन्छ भनेर यदि हाम्रो पार्टीमा लाग्नुभएको हो भने गलत हुनुहुन्छ । यातायात मजदुर साथीहरू हाम्रो पार्टीमा लाग्नुको अर्थ मनलाग्दो भाडा उठाउनपाउनु भन्ने होइन, व्यापारी महोदयहरु नेताको नजिकहुनु र राजनीतिक दल र तिनका भातृ संगठनलाई चन्दा दिनुको अर्थ राज्यलाई कर बुझाउनुपर्दैन भन्ने होइन । शक्षक साथीहरुलाई पनि भन्नुभएन हाम्रो पार्टीमा लाग्नुको अर्थ शिक्षालयको मर्यदाविपरीत बढी राजनीतिक गतिविधि अनि शैक्षिक थोरै शैक्षिक गतिविधि गर्दा पनि तलब पाइन्छ भन्ने पटक्कै होइन । कर्मचारीलाई बुझाउन सक्नुभएन हाम्रो पार्टीमा लाग्नुको अर्थ ढिलो कार्यालय गएर छिटो र्फकन पाइन्छ भन्ने होइन । विद्यार्थीलाई पनि भन्न सक्नुभएन हाम्रो पार्टीमा लाग्नुको अर्थ पढ्दैनपढी परीक्षामा पासभइन्छ भन्ने कदापि होइन । गल्ती यहाँनेर भएकोरहेछ अध्यक्ष महोदय, हाम्रो पार्टीमा लाग्नुको अर्थ कर्म गर्दागर्दै समान अवसारबाट वञ्चित हुनुभयो भने शोषणमा पर्नुभयो भने एक्लै हुनुहुन्न हामी छौ । भन्ने हो तर कर्तव्य बिर्सिएर अधिकार मात्रै खोज्नु कदापि होइन भनेर बुझाउन सक्नुभएन हजुरहरुले । हजुरहरुले सम्पत्तिको समान वितरणबाट हो वा अवसरको समान वितरण र उपलब्धताबाट समाजवाद खोजेको हो भनेर बुझाउन हजुरहरु असफल भएकै हो । म ठोकुवाका साथ भन्नसक्छु । परिवर्तित राजनीतिक परिवेशले जन्माएको बाध्यात्मक अवस्थामा अचानक हजुरहरुको पार्टीतर्फ बढेको एउटा ठूलो भिड देखेर हजुरहरु आवश्यकताभन्दा धेरै उचालिनुभएकै हो । स्वार्थको भारी बोकेर लम्केको त्यो अवसरबादी नवमाओवदीको भिडले अहिले हजुरहरुको पार्टीलाई यसरी घेरेको छ, कि त्यसलाई चिर्न हजुरहरुको पार्टीभित्र अर्को जनयुद्ध चाहिएको छ । त्यो अवसरवादी भिडले हिजो पञ्चायतलाई, पूराना राजनीतिक दललाई अनि राजा ज्ञानेन्द्रलाई पनि यसरी नै घेरेको थियो । जसको नतिजा हामी सबैको सामु छ । समग्र पार्टी पंक्तिमा अजय सुमार्गीपथले प्रचण्डपथलाई विस्थापन गर्‍यो भन्ने आवाज उठ्न थालेको छ । अब अलिकति मलाई सहिद अनि घाइते परिवारका कुरा गर्नुछ हजुरसित । हजुरहरुले उठाएका राजनीतिक मुद्दालाई सफल बनाउन थुप्रै आमाहरुले आफ्ना छोराछोरी हासीँहाँसी हजुरहरुलाई सुम्पिए । हजुरहरु पार्टी हेर्डक्वाटर जोगाउन भन्दै मुनीको मुन्तिर परजिवी भएर बस्दा आधारइलाकाको परालमा सल्कन नसकेको जनयुद्धको फिलिंगोलाई देशै भरिको फराकिलो जंगलमा डँढेलो बनाउने तिनै आमाका छोराछेारीहरु थिए ।

आज यो लामो कालखण्डपछि कति आमाका छोराछोरी फकिर्एर आए कतिका मरेर गए कतिका गुमनाम भए, कतिका अंगभंग भए । घरमामूली नहुँदा, कलकलाउँदो उमेरको छोरा नहुँदा, बूढेशकालका लागि भनेर जोगाएर हुर्काएका सन्तान अंगभंग भएर जिन्दगीभरि तिनको स्याहार सुसार गर्नुपर्दा कस्तो हुन्छ होला ? मैले कहिले अनुभव गरेको छैन, मेरा बा आमा, दिदी बहिनी, दाजुभाई दुरुस्त हजुरको परिवारमाजस्तै सकुशल छन । हजुरहरुका सन्तान निजी विद्यालयमा पढिरहँदा हजारौं सहिद, घाइते र बेपत्ताका छोराछोरीले सरकारी विद्यालयसम्म देख्नपाएका छैनन् । अरु त अरु विदेशबाट आउने छात्रवृत्तिका कोटामासमेत हजुर नेताहरुकै छोराछोरी पढ्नजान थालेका रहेछन । हजुरहरु थापाथलीको नभिर्क अस्पतालमा उपचार गराउन जाँदा सहिद, घाइते र बेपत्ताका परिवारले सामान्य स्वास्थ्यचौकीमा समेत उपचार पाएका छैनन । कुरागरी साध्य छैन, मर्ने त मरेर गए बाँच्नेको कन्तबिजोग भएको छ । हजुरहरु त ‘रुँदारुँदै हाँस्ने र हाँस्दाहाँस्दै रुनसक्ने” मान्छे, । शोकलाई शक्तिमा बदल्नसक्ने मान्छे” तर कहाँ सबै आमाहरुसित त्यस्तो खुबी हुन्छ र कमरेड ? हजुरहरुले आफ्नो कपालमा लगाउनुभएको जेल क्रान्तिको आवश्यकता हुँदोरहेछ भोकभोकै, उपचार र शिक्षा नपाएर तड्पिएका सहिद र घाइते परिवारको बिजोग क्रान्किा लागि त्याग ।

म चिच्याएर भन्छु हजुरहरुले सुनेपनि नसुने पनि यस्तो त्याग स्वीकार्य नहोस् कसैलाई पनि । खै कसलाई के भन्ने, सपना देख्नु अपराध भयो , विश्वाश गर्नु अपराध भयो । हजुरहरुको यो नैतिक पतन अनि राजनीतिक स्खलनले हजुरहरुलाई त फाइदै पगुको होला । तर वामपन्थी आन्दोलन कम्तिमा ५० वर्ष पछाडि धकेलिएको छ र बद्नाम भएको छ । न्यायप्रेमी जनताका लागि योभन्दा ठूलो धोखा केही हुँन सक्दैन । अबको २५ वर्षपछि केका लागि सम्झने हजुरहरुलाई ? जवाफ दिनुस् नेपाली जनतालाई कि हामीले योयो गरेका छौँ र यसका लागि सम्भिmनू भनेर । समाजवादको सपना देखाउनेहरुको विपना यस्तै हुन्छ कमरेड ? आफ्ना मान्यताहरु कति सहीछन भनेर अरुसित सोध्नुपर्दैन आफ्ना जीवनमा आफूले कति गर्नसक्छु भनेर मूल्याङ्कन गर्दा हुन्छ । व्यक्तिगत लोभलालचाले हजुरहरुको जयजयकार गर्नेहरु अनि हजुरहरुले गर्ने गलत क्रियाकलापलाई पनि सही भनेर प्रचार गर्नेहरुले हजुरहरुलाई निस्चयनै धृतराष्ट्र बनाउँछन अनि मुलुकलाई लालनोकरशाहीले भरिएर अन्ततः टुक्राटुक्रामा विघटित पूर्वसोभियत संघजस्तै । लाखौंको सहादतले स्थापित लेनिनको समाजवादी सोभियतसंघ विघटन हुँदा लगभग कुनै रक्तपात र प्रतिकार नै भएन यसको मुख्य कारण न त विश्व बैंक थियो । न त अन्तर्राष्ट्रिय मुद्राकोष र अमेरिका नै थिए । मुख्य कारण त सोभियत संघभित्रको लालनोकरशाही प्रवृत्ति थियो भन्ने कुरा दुनियाँलाई थाहा छ । हिजो लालनोकरशाही प्रवृत्तिको कमी थियो माओवादीभित्र आज नारायणकाजी श्रेष्ठ र अजय सुमार्गीहरुले त्यो कमी पुरा गरिदिएका छन । प्रभुका कुरा, संविधानका कुरा, शान्तिका कुरा, निर्वाचनका कुरा, सेनाका कुरा, ४० बुँदेका कुरा, राष्ट्रियताका कुरा, साम्राज्यवाद, विस्तारवादका कुरा, १० वर्षमा नेपाललाई स्विट्जरल्यान्ड बनाउने भन्दै स्विट्जरल्यान्ड हेर्न आउने काइते कुरा । कुरै कुरा कुरै कुरा ………. कुर हरु अरु कति हो कति बाँकी रहेछन ।

हेर्नु न सिलसिला मिलाएर हजुरहरुलाई एउटा पत्र लेख्छु भनेको थिएँ के भयो के भयो, सपनाहरुको क्रमभङ्ग हुँदा यस्तैहुँदो हो शायद” । अनिल बार्बेको थ्याङ्क यू मिस्टर ग्ल्याड, आमा उपन्यासको छोरा अथवा त्यो उक्रैनी उपन्यासका हरफबाट यथार्थमा आउँदा सादय हजुरहरुजस्तै हुँदाहुन आखिर हजुरहरुजस्तैले कल्पना गरेका पात्रे परे तिनीहरु पनि । खुला राजनीतिमा ढिलोचाँडो सबैको स्वखलन हुनेरहेछ भनेर मान्नु पर्ला अबदेखि । बोकाको टाउको देखाएर कुकुरको मासु मौका मिल्दा सबैले बेच्दा रहेछन देखियो केही गुनासो रहेन । संसदीय व्यवस्था अजिवको हुँदोरहेछ, यो व्यवस्थामा जति नै क्रान्तिकारी नेता छिराए पनि निस्कने एउटै गोत्रका हुँदारहेछन् । सबै वाग्ले ,जोशी, खड्का र गुप्ताहरु । ‘सुकाइदे गाडभन्दा थापाइ दे गाड’ भन्ने एउटा उखान छ नि त्यस्तै समस्या श्रीजनाका लागि त अरु पार्टीहरु नै काफी छँदैथिए नि, जनताले माओवादी पालेको त समस्या समाधानका लागि थियो । ‘केके न गर्ला झैं गरेर आएको थियो, केही नगरी गयो’ भनेजस्तै भएको छ अहिले । मजस्ता धेरै जो राजनीतिका विद्यार्थी होइनन् जसले कुनै ठेली घोकेका पनि छैनन् । तिनले जनयुद्धको व्याकरण, माक्र्सवादको श्रृजनात्मक प्रयोग, क्रान्तिको आवश्यकता र जगत तपाइँहरुलेजस्तो दुरुस्त नबुझेका पनि हुनसक्छन् । तर मजस्ता धेरैले के बुझे यो कालखण्डमा भने क्रान्ति अनि सिद्धान्तको कुरा गर्नुभन्दा महत्वपूर्ण र कठिन त्यसलाई व्यवहारमा लागू गर्नुहुँदोरहेछ नि कागजमा लेखिएर थन्किने मिथक सिद्धान्तभन्दा दैनिक जीवनमा जनतलाई राहत महसुस हुने सानोभन्दा सानो कदम पनि समाजवाद हो, जुन हजुरहरुबाट अपेक्षा गरेका थिए तर पुरा भएनन । यदी यही गति दिशामा माओवादी रहने हो भने ‘वस्तुको उपयोगीताले त्यसको उपयोग मूल्य निर्धारण गर्दछ’, भन्ने कार्ल माक्र्सको उक्तिजस्तै जनताले हजुरहरुको पनि मूल्य निर्धारण गर्नेछन् । अनि जनताको विद्रोह गर्नपाउने अधिकारलाई संस्थागत गरेर अहिले मृत्यु शैय्यामा रहेको दस्तावेजलाई कुनैदिन जनताले आफ्नो रक्षाका लागि प्रयोग गर्नेछन् हजुरहरुकाविरुद्ध भन्ने कुरामा मजस्ता धेरै विस्वश्त छन -जुन व्यवहारमा देखिन पनि थालेसक्यो । तसर्थ ढिलो अझै भएकोछैन समयले नेटो अझै काटेको छैन चेतना होस् कमरेड ।

हजुरहरुको शुभचिन्तक

सुवर्णबाबु सापकोटा (हाल फाइवर्ग युनिर्भसीटी जर्मनी)

आनन्दीदेबीका अध्यक्ष श्याम सुन्दर गुप्ता अपहरण काण्डमा पक्राउ

2012-01-16T05:00:00.000-08:00

काठमाडौ, २ माघ । नेपाल सदभावना पार्टी आनन्दीदेबीका अध्यक्ष एवम सभासद श्याम सुन्दर गुप्तालाई आज प्रहरीले ब्यापारी पवन संघाई अपहरण काण्डमा संलग्न भएको आरोपमा पक्राउ गरेको छ । भैरहवा स्थित उनको निवासबाटै प्रहरीले गुप्तालाई आज अपरान्ह ४ बजे पक्राउ गरेको उनका छोरा कैलास गुप्ताले जानकारी दिए ।

अपराध अनुसन्धान महासाखा हनुमान ढोकाको आग्रहमा रुपन्देही प्रहरीले उनलाई पक्राउ गरेको हो । पक्राउ गरे लगत्तै उनलाई प्लेन चढाएर काठमाडौ ल्याईएको छ । उनलाई अहिले हनुमान ढोकामा राखिएको छ । प्रहरी स्रोतले संघाई अपहरण् काण्डको योजना र रकमको बाडफाडमा सभासद गुप्ताको संलग्नताको आशंका गरेको छ । केही समय अघि राजधानीको डिल्ली बजारबाट अपहरणमा पनि झण्डै दुई सात पछि भारतमा करोडौ रुपमा फीरौती बुझाएर संघाई अपहरण मुक्त भएका थिए ।

धादिंग जिल्लामा तनाब / प्रहरी द्वार ७ राउण्ड हवाई फाएरिङ

2012-01-16T03:52:00.000-08:00

धादिङ, माघ २- गएको शनिबार धादिङबेसीमा मृत फेला परेका एक प्रहरी जवानका विषयमा उच्चस्तरीय छानबिन हुनुपर्ने माग गर्दै तामाङ समुदायले आज सोमबार दिउँसो विरोध प्रदर्शन गरेपछि जिल्ला सदरमुकाममा तनाव उत्पन्न भएको छ।

पोष्टमार्टमको रिपोर्ट आउनु अगावै हत्या भएको हुन सक्ने आशंकामा तामाङ समुदायले धादिङबेसी बजार बन्द गराउनुका साथै सदरमुकाममा चल्ने सवारी आवागमन ठप्प पारेका हुन्।प्रहरीविरुद्ध नाराबाजी गर्दै बजार बन्द गराई विरोधमा उत्रिएका प्रदर्शनकारीलाई नियन्त्रणमा लिन प्रहरीले सात राउन्ड अश्रुग्याससमेत प्रहार गरेको छ।धादिङकै झार्लाङ गाविस घर भएका प्रहरी जवान दलबहादुर तामाङ निलकण्ठ उच्च माविको प्राङगणमा रहेको रुखमा शनिबार झुन्डिएर मृत अवस्थामा फेला परेका थिए। उनी सिन्धुपाल्चोक जिल्लामा खटिएका थिए।

मृत्युको कारण खुल्न सकेको छैन। शव स्थानीय मुचुल्का पश्चात् पोष्टमार्टमका लागि जिल्ला प्रहरी कार्यालय धादिङमा राखिएको छ। शवको पोष्टमार्टम रिपोर्ट आउन बाँकी रहेको जिल्ला प्रहरी कार्यालय धादिङले जनाएको छ।

देवघाट मेला भर्ना गएका २ महिलाको मृत्यू

2012-01-15T07:19:00.001-08:00

चितवन, माघ १ - माघे संक्रान्ति मेला भर्न देवघाट आउने क्रममा दुई महिलाको मृत्यु भएको छ । आइतबार बिहान कालीगन्डकी नुहाउँन जाँदा नदीमा डुबेर एक महिलाको मृत्यु भएको हो । मृत्यु हुनेमा पश्चिम चितवनको जगतपुर बस्ने ६५ वर्षीया साहिली मगर भएको जिल्ला प्रहरी कार्यालय चितवनले जनाएको छ ।

पानीमा डुबेर अचेत भएकी मगर लाई उद्धारकर्मीले तत्काल उपचारका लागि भरतपुर तर्फ ल्याउँदै गर्दा बाटोमा मृत्यु भएको प्रहरीले जनाएको छ । मृतकको शबलाई पोष्र्टमार्टमका लागि भरतपुर अस्पतालमा राखिएको छ ।

त्यस्तै, देवघाट मेला भर्न जाने क्रममा शनिबार राति ट्याक्टरबाट खसेर एक महिलाको मृत्यु भएको छ । मृत्यु हुनेमा भरतपुर नगरपालिका १२ वस्ने ५० वर्षकी फुलमाया गुरुङ रहेको जिल्ला प्रहरी कार्यालय चितवनले जनाएको छ । ट्याक्टरबाट खसेर घाइते भएकी गुरुङको उपचारका लागि अस्पताल ल्याउदै गर्दा बाटोमा मृत्यु भएको हो । भरतपुरको राईनोतालबाट देवघाट जाने क्रममा रामनगर जंगलको कच्चीबाटोमा राति २ बजे ना३त ७५० नम्वरको ट्याक्टरबाट गुरुङ खसेकी थिएन् । दुई दिनदेखि देवघाटमा भक्तजनको निकै घुइँचो छ ।

युवा नेता गगन थापालाई सात समुन्द्र पारी बाट खुल्ला पत्र

2012-01-13T16:33:00.000-08:00

आदरणीय सभासद् तथा युवानेता गगन थापाज्यू,

झण्डै तीन करोड जनताको ढुकढुकीको नेतृत्व गरी राख्नुभएका तपाईंप्रति जनताको आशा र भरोसा दुवै छ । राजनीतिक दलका नेताहरुले दिनदिनै साख गुमाउँदै गएको वर्तमान परिप्रेक्ष्यमा तपाईंप्रति भने जनताको सदासयता र विश्वास उर्लंदो छ । तपाईंजस्तो राष्ट्रको होनहार सच्चा राष्ट्रवादी युवा नेतालाई दूरदराजबाट कलमीपत्र लेख पाउनु मात्र पनि ठूलो सौभाग्य ठान्दै यो पत्र लेख्दै छु । प्रसंग झण्डै एक महिनाअगाडि नेपालस्थित एक टेलिभिजन च्यानलमार्फत तपाईंले अमेरिकालगायत विभिन्न विदेशी मुलुकमा बसोबास गरिरहेका नेपालीहरुप्रति लक्षित तपाईंका अभिव्यक्ति । हुन त तपाईंद्वारा अभिव्यक्त ती विचारहरु सच्चा राष्ट्रवादले ओतप्रोत छन्, त्यसमा दुईमत छैन । तर, मुलुकको एउटा सभासद् त्यसमा पनि तपाईंजस्तो होनहार युवा नेताले विदेशमा बस्ने नेपालीलाई गैरनेपालीको दृष्टिकोणबाट हेर्न खोजेको हो कि ? वा विदेशमा बस्ने झण्डै ३० लाख जनतालाई बिरानो ठान्नुभएको हो ? यस्तै आशंका भित्रैबाट सात समुद्रपारि बसेर श्रम बेचिरहेका म जस्ता श्रमजीवीहरुको असन्तुष्टिका कारण पत्र लेख्न बाध्य भएको छु ।

सर्वप्रथम त नेपालमा शान्तिसुरक्षा छैन, नेपालमा आर्थिक अवसर छैन, सामाजिक अवसर छैन, भविष्य सुनिश्चित छैन भन्दै भटाभट विदेश पलायन हुनेहरुमाथि एकाएक तपाईं खनिनुभएको देख्दा अचम्मित मात्र होइन छक्क परेको छु । अर्को कुरा, नेपाल निर्माण गर्छ भनेर जनताका अगाडि शपथ लिएका तपाईंजस्ता सौभाग्यशाली नेताहरुका क्रियाकलापमा खबरदारी गर्नु, तपाईंहरुका चित्त नबुझ्दा उक्त क्रियाकलापको आलोचना गर्नुलाई एक्काइसौं शताब्दीमा तपाईंजस्तो आशालाग्दो नेताले विदेशमा बस्ने नेपालीले हामीलाई गालीगलौज गर्ने, अर्ती उपदेश दिने हाम्रो आलोचना गर्ने भन्दै तपाईंप्रति विदेसिएका नेपालीहरुले अन्याय गरेको तपार्इंको वजनदार बोली सुन्दा कुटुक्क मन कुँडियो । समाजशास्त्रमा स्नातकोत्तर तपार्इंलाई नेपालको भूगोल, नेपालको अर्थतन्त्रदेखि वातावरण र राजनीतिका ज्ञाता तपाईंलाई ग्लोबलाइजेसनको प्रभावले हजारौं अमेरिकन भारतमा काम गर्न पुगेका छन् भने लाखौं भारतीय नागरिक अमेरिकामा बस्छन् भन्ने पनि अवश्य थाहा होला ।

आर्थिक सम्पन्नतामा अमेरिकालाई चुनौती दिइरहेको चीनका लाखौं जनता अमेरिकामा बस्छन् भने जुन देशका २५ प्रतिशत जनताको आयस्रोत दैनिक १ डलर २५ सेन्ट छैन, त्यो देशका जनतालाई विदेश पलायन हुनुहुन्न भनेर तपाईंको राष्ट्रवादले बोल्ला तर यथार्थमा केही योजना पनि भइदिए यी प्रवासी नेपालीहरु हर्षित हुने थिए र नेपालमा आई बस्न तयार हुने थिए, सभासद ज्यू । देशको प्रतिव्यक्ति आय १०४९ अमेरिकी डलर छ, जुन देशमा झाडापखाला लागेर जीवनजलको अभावमा मात्र पनि सयौं मानिस मृत्युवरण गर्न बाध्य छन् । त्यो देशको नागरिकलाई आफ्नै भूगोलभित्र सीमित राख्नका लागि खोइ त तपाईंले आफ्नो दायित्व निर्वाह गरेको ? खोइ त संविधान निर्माण गर्नुभएको ? कमसेकम बेलामा संविधान निर्माण गरेको भए त जति पलायन हुनु थियो भए, अरु नागरिकले पलायनको बाटो अपनाउने थिएनन् । संविधान निर्माणको ढोका विदेशमा बस्ने नेपालीले त पक्कै बन्द गरेका छैनन् त ? लोकतन्त्रको लडाईंमा चावहिल चोकमा कयौं पटक कुर्लनुभएका तपाईंलाई जनताले ठूलो विश्वास गरेका छन् । संविधानसभामा तपाईं प्रतिनिधि भएर जानुभयो भने पक्कै पनि केही परिवर्तन हुनेछ, अन्य राजनीतिज्ञभन्दा तपाईंका मत केही फरक हुनेछन् र परिवर्तनको संवाहक हुनेछ भन्ने जनताको अपेक्षा थियो । तर, के गर्नु चार–चार पटक म्याद थप हुँदासम्म तपाईं पनि त्यही कित्तामा उभिएको आज जनता टुलुटुलु हेर्न बाध्य छन् ।

कोही पनि नेपाली सौख पूरा गर्न मात्र आफ्नो भूगोल नाघेर विदेशी भूमि सिञ्चित गर्न जाँदैन र जानुहुँदैन आफ्नै माटोलाई पसिनाको मोल दिनुपर्छ । अवश्य पनि सुन्दर छन्, यस्ता पवित्र विचारहरु तर के गर्नु सभासद्ज्यू विकट गाउँमा दिनभर खोरिया खन्दा–खन्दा पेटभरि खान नपाउने धेरै जनता छन्, हामीसँग । दाल, चामल, नुनतेल, लत्ताकपडा अनि ज्वरो आउँदा सिटामोल त किन्नुप¥यो नि होइन र ? यस्ता दैनिक उपभोग्य वस्तुहरु फोस्रो राष्ट्रवादको बार्टर सिस्टममा नेपालभित्र खरिद गर्न पाइने भए अवश्य पनि ती ३० लाख जनता आफ्नै माटो सिञ्चित गर्न फर्कने थिए ।

संविधानसभा चुनाव सम्पन्न भएको झण्डै चार वर्ष पुग्न लाग्यो । ४४ महिनामा ५१ हजार प्रतिव्यक्ति, प्रतिमहिना ६०१ सभासद्ले तलबभत्ता थाप्दा मोटामोटी १ अर्ब ३४ करोड ८६ लाख ४४ हजार राज्यले खुवाइसक्यो, संविधान निर्माण हुन सकेको छैन । तर, यसबीचमा एक जना सभासद् निस्किएनन्, जसले म तलबभत्ता लिन्न भनेर । न्यूयोर्क राज्यका मेयर माइकल ब्लुमवर्ग तलबभत्ता जे भने पनि जम्मा १ डलर लिन्छन् । त्यो पनि अमेरिकी कानूनअनुसार सित्तैमा काम गर्न नमिल्ने भएका कारण । जबकि उनको अफिसियल तलब १ लाख ९५ हजार अमेरिकी डलर हो । तर, भन्नुहोला ब्लुमवर्गजस्तो हामी कहाँ धनी हो र ? भनेर । धनसम्पत्तिले कसैलाई पुग्दैन, असीमित चाहना हुन्छन् । यसको बारेमा तपाईं पनि राम्रै ज्ञाता हुनुहुन्छ । जुन देशको कुल गार्हस्थ उत्पादन १२ बिलियन अमेरिकी डलर छ, त्यो देशका सभासद्ले मात्र प्रतिमहिना तीन करोड तलबभत्ता लिने गर्दछन् तर जनताको अवस्था त्यस्तो छ, भासद्ज्यू । अनि कसरी सम्भव होला तपाईंले भनेजस्तो विदेश जानुभएन, यहीभित्र अवसर खोजी गर्नुप¥यो भनेर, के सम्भव होला र ? सबै जनता तपाईंजस्ता भाग्यमानी हुँदैनन्, सभासदज्यू, जो जन्मँदै इञ्जिनियरको छोरो भएर जन्मियो ।

सबै जनाको भाग्य त्यस्तो हुँदैन, जसले तपाईंले जस्तो सुविधासम्पन्न सिद्धार्थ वनस्थलीबाट शिक्षा हासिल गर्न पाओस् । विद्यालयको अनुहार नै देख्न नपाएका लाखौं जनता छन्, हामीसँग । यस्ता जनताले विदेश जाने मौका पाए भने … ? बन्दोबस्त र वातावरण त निर्माण गरिदिनोस् अनि त्यसपछि तपाईंले भन्नै पर्दैन, आफैं रोकिन्छ सबै नेपाली त्यही सीमारेखाभित्र । राज्यले वार्षिक १०० मिलियन अमेरिकी डलर लगानी गरेको एक लाख पाँच हजार सेनालाई त काम दिन सकिराख्नुभएको छैन, उत्पादनमूलक क्षेत्रमा खटाउन सक्नुभएको छैन । अनि किन धिक्कार्नु हुन्छ सुन्दर सपना सजाएर विदेशमा कर्म गर्न जानेहरुलाई सभासद्ज्यू, यो अलि न्याय भएन कि ? हुन त तपाईंका अभिव्यक्तिहरुबाट प्रष्ट भइसकेका छन्, विदेशमा बस्ने नेपालीले हामीलाई खबरदारी किन गर्ने, किन अर्ती उपदेश दिने भनेर । तर पनि क्षमा माग्दै मनमा नअडिएर यो पत्र लेख्दैछु ।

सभासद्ज्यू, अर्को कुरा डीभी परेर अमेरिका जाने नेपालीले आजदेखि मैले नेपाली नागरिकता त्याग गरें, म अमेरिकन भएँ, भन्ने खुसियालीमा नातागोता आफन्त बोलाएर भोजभतेर गर्छ भने तपाईंको अर्को अभिव्यक्ति पनि त्यति जायज देखिँदैन । सभासद्ज्यू डीभी पर्नु भनेको नेपालको नागरिकता त्याग गर्नु अवश्य पनि होइन । यति लामो समयदेखि नेपालमा सञ्चालित अमेरिकी सरकारको कार्यक्रमका बारेमा तपाईंसम्मलाई राम्रोसँग जानकारी नहुनु दुःखद् कुरा हो । डीभी परेपछि नेपालीहरु अमेरिकामा कानूनसम्मत तरिकाले बस्न, काम गर्न पाउँछन् । त्यति मात्र हो, ऊ नेपाली नागरिक नै हुन्छ, उसले अमेरिकी नागरिकता ग्रहण नगरेसम्म । तपाईंहरु जस्तै नीतिनिर्माताले निर्माण गरेको कार्यक्रमअन्तर्गत नेपालमा जस्तो घरघरमा र चौतारी तथा बुथमा गएर नागरिकता बाँड्ने चलन अमेरिकामा छैन सभासद्ज्यू । कुनै पनि कानुनी प्रावधान पूरा गरेर यदि उक्त व्यक्तिले नागरिकता लिन चाहेमा अमेरिकी नागरिक हुन सक्छ न कि तपाईंले भनेजस्तो डीभी प¥यो, म अमेरिकी नागरिक भएँ, त्यो होइन सभासद्ज्यू । डीभी परेर खुसी हुनुलाई तपाईंले नेपालको नैतिक धरातल कहाँ छ, त्यो प्रष्ट भएको बताउनुभएको छ । महिनामा ५ हजारको जागिर नपाएर रुमल्लिएको बीए पास युवालाई डीभी प¥यो भने किन खुसी नहोस् । लगानी गर्न पुख्र्यौली सम्पत्ति छैन, बैंकले ऋण दिन्न, भएको सम्पत्ति पढाइमा लगानी गर्दै सक्यो, राज्य उदासिन छ, नेताहरुलाई मोजमस्ती नै छ, कसले जिम्मा लिने त्यस्ता युवाको ? सभासद्ज्यू । अनि त्यस्तो युवा डीभी परेर खुसी नहोस् ? बाँच्नु त प¥यो नि सबै जना होइन र ? तपाईंको उक्त अभिव्यक्ति नेपालमा डीभी आवश्यक छैन भन्नेतर्फ इंगित छन्, जस्तो लागेको छ । कतै यस्तो नहोस् कि बाँदरले आफ्नो घर पनि बनाउँदैन अरुको घर पनि बाँकी राख्दैन । कमसेकम रेमिट्यान्सकै भरमा चलेको राज्यलाई केही भरथेग त भएको छ ।

नेपालीहरु विदेश गएर बस्नै हुन्न, गएर बसे पनि नेपालको आर्थिक, सामाजिक, राजनैतिक प्रणालीमाथि टीकाटिप्पणी गर्ने उनीहरुको हक अधिकार छैन भन्ने अभिव्यक्ति भन्दा पनि अझ चोटिलो अर्को अभिव्यक्तिका बारेमा चर्चा नगर्नु अझै अन्याय हुनेछ । त्यसैले पत्र अलि लामो नै भए पनि उक्त प्रसंग कोट्याउने अनुमति माग्दछु ।नेपालीहरु विदेश जाने भनेको नेपालमा भएको झिटीगुण्टा समेत बेचेर जाने हो । उनीहरु विदेश गएपछि स्थायी नागरिक भएर बस्ने हो । उसले सम्पत्ति जोड्दा पनि त्यहीँका लागि जोड्छ । देशमा वर्षको ५० मिलियन डलर त भारतीय र ब्रिटिस सेनामा काम गरेका सिपाहीको कारण भित्रिन्छ । मिलियन डलर प्रत्येक महिना खाडी मुलुकलगायत यूरोप, अमेरिका, अष्ट्रेलियालगायतका देशहरुमा बसेका नेपालीहरुका कारण भित्रिन्छ । मुलुकको अर्थतन्त्रको ठूलो हिस्सा रेमिट्यान्सकै कारण चलेको विश्व बैंकको रिपोर्ट सार्वज्निक भएका छन् । तर, म अचम्मित भएको छु कि सभासद्ज्यूलाई भने किन महसुस भएन, विदेशमा बस्ने नेपालीहरुको नेपालप्रतिको योगदान । देशको अर्थतन्त्रमा ठूलो टेवा दिँदै आएका प्रवासी नेपालीहरुको अझ ठूलो योगदान सामाजिक क्षेत्रमा छँदैछ । क्यालिफोर्नियाको लस एञ्जलसमा बसेर पोखरा र डोल्पामा विद्यालय निर्माण गर्ने तारा गुरुङ अनि न्यूयोर्कमा बसेर भोजपुरको तिवारी भञ्ज्याङमा विद्यालय निर्माण गर्ने लीला राईजस्ता कयौं व्यक्तित्व विदेशी भूमिलाई मलजल गरे पनि साँचो माया भने स्वदेशलाई नै गरेका छन् । तारा गुरुङ र लीला राई त सानो उदाहरण मात्र हुन् । हामीसँग हजारौं यस्ता उदाहरण छन्, जसले प्रवास बसाइँकै क्रममा स्वदेशलाई योगदान दिएका छन् । सभासद्ज्यू भन्दा अलि तीतो हुन सक्छ, मुलुकको एउटै मात्र अन्तर्राष्ट्रिय विमानस्थल जहाँबाट तपाईं स्वयम् पचासौं पटक विदेश भ्रमण गर्नुभयो होला । तर, दैलोमा बसेर तपाईंहामी सबैलाई गिज्याउने थोत्रा ट्रली फेर्नसमेत ती विदेशी नेपालीहरुको संगठन पुग्नुपर्ने कस्तो विडम्बना थियो । यो एउटा उदाहरण मात्र हो । राजनैतिक योगदानको कुरा गर्नुहुन्छ भने लोकतान्त्रिक आन्दोलनले स्थापित गराएको तपाईंलाई त अमेरिकामा बस्ने नेपालीहरुले अझ ऋणी बनाएका छन् । नेपालस्थित टेलिभिजन च्यानलबाट प्रवासी नेपालीहरुप्रति तपाईंको अभिव्यक्ति सुनेका नेपाली कांग्रेसका महासमिति सदस्य आनन्द विष्टले अत्यन्त नमीठो मान्दै लोकतान्त्रिक आन्दोलनमा अमेरिकाबाट पु¥याएको योगदानको स्मरण मलाई समेत गराए ।

सभासद्ज्यू, तपाईंहरु कुनै दिन बाटो बिराएको बटुवाझैं रत्नपार्क र बागबजारमा ३०÷३५ को संख्यामा आन्दोलनमा रुमल्लिइरहँदा तपाईंहरुलाई दुनियाँले खिल्ली उडाउँथ्यो । त्यतिबेला तपाईंहरुको आन्दोलनको न जनतालाई चासो थियो, न अन्तर्राष्ट्रिय जगतलाई । त्यस्तो विषम परिस्थ्तििमा त्यही अमेरिकामा बस्ने नेपालीहरुले १८ वटा ¥याली संयुक्त राष्ट्रसंघ र ह्वाइटहाउस अगाडि प्रदर्शन गरेका थिए । तत्कालीन राजतन्त्रको विरुद्धमा पहिलो बिगुल अमेरिकामा बस्ने नेपालीहरुले फुकेका थिए । त्यति मात्र होइन, संसारभरिका मानवअधिकारवादी संगठन र युरोपियन युनियनलाई घचघच्याउने काम गरेका थिए । त्यसपछि मात्र नेपालमा आन्दोलन अर्को चरणमा प्रवेश गरेको थियो । त्यसपछि तपाईं गणतन्त्रवादी नेता हुनुभएको थियो ।

अन्त्यमा,

अनि कसरी छैन विदेशमा बस्ने नेपालीको योगदान नेपालप्रति ? विदेशमा बस्दैमा विदेशी नागरिक बन्नुपर्छ भन्ने केही छैन । नेपालीहरु विदेश पलयान भएकै कारण नेपालको यो दुर्दशा भएको हो भन्ने मलाई लाग्दैन । तपाईंहरुजस्ता राजनीतिज्ञमा फोस्रा राष्ट्रवाद मात्र देखिएको कारण राजनीतिज्ञमा इमानदारिता, नैतिकता दुवै नभएका कारण र व्यक्तिगत स्वार्थको कारण मुलुकको यो अवस्था आएको हो भन्ने हाम्रो ठम्याई छ । त्यसैको परिणाम विदेश पलायनको बाटो रोज्न बाध्य भएका हुन् नेपालीहरु । त्यसैले सभासद्ज्यू, माईक अगाडी बोल्दा अलि ध्यान पु¥याउनु भयो भने तपाईको बढ्दो राजनीतिक प्रभावमा ब्रेक लाग्नेछैन ।

चलचित्र समाजले अन्तरास्ट्रिय कार्यशाला दोलखामा गर्ने

2012-01-13T16:25:00.000-08:00

चलचित्र निर्देशक समाजले आफ्नो दोस्रो अन्र्तराष्ट्रिय कार्यशाला दोलखामा गर्ने भएको छ । राष्ट्रिय तथा अन्र्तराष्ट्रिय चलचित्रका कथा लेखक तथा निर्देशकहरुको मात्र सहभागीता रहने कार्यशाला ७ दिनसम्म सञ्चालन हुने नेपाल चलचित्र निर्देशक समाजका अध्यक्ष केपी पाठकले जानकारी दिए ।चलचित्रका कथाकार तथा निर्देशकहरु राजधानी लगायतका सहरी क्षेत्रमा कोठामा बसेर कथा लेखन गर्दा वास्तविक जनजीवनसग मेल नखाने भएकाले धेरै निर्देशकहरु राजधानी बाहिर कार्यक्रम गर्न लागिएको उनले बताए ।

कार्यशाला गोष्ठि आउदो माघ २७ देखि फागुन ३ गतेसम्म चरिकोट वा जिरीमा हुने उनले जानकारी दिए । कार्यशालामा भाग लिन नेपाली चलचित्र निर्देशकहरु सहित भारतीय, चिनीया,कोरियाली, युरोपियत र अमेरिकन ख्याती प्राप्त ७० भन्ल्दा बढी चलचित्र निर्देशकहरुको सहभागीता रहने उनले बताए । यसको पहिलो अन्र्तराष्ट्रिय कार्यशाला ;चितवनको मेघौलीमा भएको थियो ।अन्य उद्योग सरह चलचित्र उद्योगको पनि महत्व भएकाले यसमा उल्लेख भएका ठाउको चर्चा पाउने र त्यहा पर्यटन विकासका लागि महत्वपूर्ण हुने समाजका कार्यकारीणी सदस्य मनोज पण्डितले बताए ।

विगतमा नेपाली चलचित्र छायाङकनका लागि पोखरा, पाल्पा लगायत ठाउ रोजाइमा परे तापनि राजधानीको नजिकै रहेको र प्राकृतिक सौन्दर्यले भरिपूर्ण दोलखा आगामी दिनका लागि निर्देशकको छनौटको स्थान हुने उनले बताए ।कार्यशाखा अवधीमा विहान बेलुका स्थानीय समाजको अध्ययन गर्ने र ६ वटा साना चलचित्र छायाङकन गरी प्रदर्शन गरिने उनले बताए । कार्यशालाले दोलखाका पर्यटकीय क्षेत्रको अन्र्तराष्ट्रिय चर्चा पाउने उनले बताए ।

यसबाट वार्षिक १० वटासम्म चलचित्र दोलखाका विभिन्न ठाउमा छायाङ्कन हुन सक्ने उनले बताए ।आयोजकले चरिकोटमा बुधबार आयोजित अन्र्तक्रिया कार्यक्रममा वरिष्ठ कलाकार मदनदास श्रेष्ठको संयोजकत्वमा स्थानीय व्यवस्थापन समिति समेत गठन गरेको छ ।स्थानीय समितिमा दोलखा सक्रिय राजनैतिक दल, जिविस, होल व्यवसायी, उद्योगवाणिज्य संघका प्रतिनिधि सहभागी छन् ।

एस पि खरेल को बढुवा रोक्न जुलुस / एउटा असल व्यक्तिले धेरैलाई असर पार्दो रहेछ

2012-01-12T16:44:00.000-08:00

वीरगन्ज, पुस २९ - प्रहरी उपरीक्षक (एसपी) रमेश खरेलको बढुवा हुने समयमा दुई दिनयता वीरगन्जमा विरोध प्रदर्शन भइरहेको छ । भ्रष्टाचारविरुद्ध शून्य सहनशीलता आत्मसात् गरी ६ महिना जिल्लामा प्रहरी प्रमुखको कार्यभार सम्हालेका एसपी खरेलले सीमा क्षेत्रमा हुने संगठित तस्करी र अपराधविरुद्ध आक्रामक कारबाही थालेका छन् ।

पूर्वराज्यमन्त्री तथा सभासद करिमा बेगमले विरोध जुलुसको अगुवाइ गरेकी छन् । फोरम लोकतान्त्रिककी नेतृ बेगमले प्रहरी प्रशासनले गरिबमाथि दमन गरेको आरोप लगाउँदै विरोध अभियान थालेको बताइन् । बुधबार निस्केको पहिलो जुलुसमा छाडा चौपायालाई उपमहानगरपालिकाले प्रहरीको सहयोगमा नियन्त्रणमा लिई जगंलमा छाडेको भन्दै उनले आक्रोश पोखिन् । सडकको दायाँ र बायाँ अव्यवस्थित तरकारी तथा फलफूल बिक्रीमा रोक लगाइएकामा उनको आपत्ति छ । पटकपटक सूचना जारी गर्दासमेत चौपायाधनीले अटेर गरेकाले प्रहरीको सहयोग लिएको उपमहानगरपालिकाका कार्यकारी अधिकृत शिवदत्त भट्टराईको भनाइ छ ।

छाडा चौपायाका कारण ट्राफिक व्यवस्थापन तथा आवागमनमा समस्या परेको ट्राफिक प्रमुख लक्ष्मणसिंह ठकुरीले बताए । उनले भने, 'यसले दिनहुँ दुर्घटना निम्त्याएको थियो ।' मगंलबार राति मात्र मुरलीचोकमा मोटरसाइकलमा ठोक्किँदा गाई मरेको थियो । घटनामा मोटरसाइकल चालक प्रजय सिंहको दाहिने खुट्टा भाँचिएको प्रहरीेले जनाएको छ ।झन्डै ३ करोडको लागतमा निर्माण हुन लागेको तरकारी बजारका लागि अव्यवस्थित रूपले तरकारी तथा फलफूल बिक्रेतालाई उक्त क्षेत्रबाट हटाएको उनले बताए । 'तरकारी र फलफूल बिक्रीका लागि नगरपालिकाले घन्टाघरअगाडि बिपी उद्यानमा स्थान छुट्याएको छ,' उनले भने । प्रहरी उपरीक्षकको बढुवा लाइनमा कार्य सम्पादनमा अब्बल ठहरिएका एसपी खरेलविरुद्धको जुलुसमा उनका प्रतिद्वन्द्वीमध्येका दुई एसपीले बढी चासो लिएको पाइएको छ । बिहान जुलुस निस्किनुअघि र साँझ आफू निकटस्थसँग निरन्तर फोन सम्पर्कमा रहेको स्रोतको दाबी छ । गत कात्तिकमा वीरगन्ज आएका गृहमन्त्री विजयकुमार गच्छदारले सहरदेखि गाउँसम्मको कार्यक्रममा एसपी खरेलजस्ता अधिकृत ७५ जिल्लामा जन्माउने घोषणा गरेर ताली खाएका थिए । वीरगन्ज उद्योग वाणिज्य संघमा उद्योगीसँगको भेटमा उनले एसपी खरेलको मनोबल बढाउन सुरक्षासम्बन्धी भेला यहाँ राखिएको बताएका थिए ।

गत मंगलबार स्थानीय राजनीतिक दलको अगुवाइमा वीरगन्जमा निस्केको जुलुसले एसपी खरेलको विरोधमा नाराबाजी गरेको थियो । उपमहानगरपालिका-१७ स्थित एक कठ्ठा ऐलानी जग्गा व्यक्तिगत बनाउन प्रहरी प्रशासनले संरक्षण गरेको भन्दै विरोध जुलुस निस्केको थियो । कांग्रेस, एमाले, माओवादी र मधेसवादी दलका स्थानीय नेतृत्वले जुलुस अगुवाइ गरेका थिए । पछिल्लो ६ महिनामा भएका परिवर्तनलाई नजिकबाट नियालिरहेका एमाले सचिवालय सदस्य अरविन्द सिंहका अनुसार विरोध जुलुस स्थानीय प्रहरी प्रशासनप्रतिको भँडास मात्र हो । उनले भने, 'एकजना इमानदारले धरैलाई समस्यामा पार्दो रहेछ ।' विरोध जुलुस धेरैका लागि अपत्यारिलो बन्यो । जुलुसमा सहभागीमध्येका एक पर्सा कांग्रेस सभापति सुरेन्द्र चौधरीले एसपी खरेलको विरोधमा नाराबाजी नगरेको बताए । 'जुलुसमा विभिन्न स्वार्थका मान्छे थिए,' उनले भने, 'हामी कानुनी शासनको पक्षधर हौँ ।' जग्गाधनीले लालपुर्जासहित भोगचलनका लागि प्रशासनमा निवेदन दिएकाले सुरक्षा प्रदान गरेको प्रहरी उपरीक्षक रमेश खरेलले बताए । उनले भने, 'स्वामित्वको विवाद जुलुसले हैन, अदालतले फैसला गर्ने हो ।' यसअघि जिल्लामा नेताहरूको दबाबमा प्रहरीले काम गर्दै आएकामा साहले भोगचलन गर्न पाएका थिएनन् । आन्दोलनको अगुवाइ गरिरहेका स्थानीय रामनारायण कुर्मीले ऐलानी जग्गा व्यक्तिगत बनाउन प्रहरीले सहयोग गरेकाले विरोध गरेको बताए ।

'राजनीतिक दलको नभएर जनताको नोकर हुँ,' भन्ने एसपी खरेलको कार्यशैलीप्रति दलहरू असन्तुष्ट बनेका छन् । कांग्रेस, एमाले, माओवादी, फोरमलगायत पार्टीको आडमा आपराधिक गतिविधिमा संलग्न नेता र तस्करलाई एसपीले थुनेका छन् । एसपी खरेल आएदेखि पर्सावासीले सुरक्षा अनुभूति पाउनुको साथै छोटी भन्सारमा राजस्व वृद्धि, सवारी चालक अनुमतिपत्रमा कडाइ, त्रिभुवन विश्वविद्यालयद्वारा सञ्चालित परीक्षामा समेत उल्लेखनीय सुधार भएका छन् ।

भिन्न दलका भिन्नै कुरा तर कांग्रेस एउटैको २ वटा कुरा

2012-01-12T16:28:00.000-08:00

काठमाडौं, पुस २८ - स्विट्जरल्याण्डमा मिश्रि त प्रणालीको शासकीय स्वरुपमा प्रमुख राजनीतिक दलहरुसँग आफूहरुले पनि सहमति जनाएको कांग्रेस नेता अर्जुन नरसिंह केसीले स्पष्ट पारेका छन् ।संसदीय दलका नेता रामचन्द्र पौडेलले स्विट्जरल्याण्डमा कुनै पनि सहमति नभएको बताएको केही घण्टामै केसीले रिपोर्टर्स क्लवको साक्षात्कारमा केसीले ज्यूरिचमा प्रत्यक्ष निर्वाचित राष्ट्रपतीय शासन प्रणालीमा पार्टीको तर्फबाट आफूले सहमति गरेको बताएका हुन् । ज्यूरिक सहमतिप्रति आफू र कांग्रेस प्रतिबद्ध रहेको उनले बताए ।

'ज्यूरिकमा सहमति भएकै हो । त्यसमा हामि प्रतिबद्ध छौ तर अहिले सहमतिमा भएका अन्य विषयलाई छाडेर शासकीय स्वरुपमा मात्रै काग्रेसले सहमति गरेर पछाडी फर्कियो भन्नु न्याय संगत हुँदैन,' उनले भने, 'सबै सहमतिलाई प्याकेजमै कार्यान्वयन गरौ हामि शासकीय स्वरुपमा प्रत्यक्ष निर्वाचित राष्ट्रपतीय शासन प्रणाली मान्न तयार छौं ।' केसीले ज्यूरिच सहमतिमा सेना समायोजन, सत्ता साझेदारी र संविधान निर्माणका विषयलाई ४५ दिनभित्र पुरा गर्ने कार्यतालिकासहित सहमति भएकोमा अन्य कुनै पनि सहमति कार्यान्वयन नगरी केवल शासकीय स्वरुपलाई मात्रै अगाडि ल्याएर कांग्रेसलाई घेर्ने काम भएको आरोप लगाए ।

केसीले भएका सहमतिका अधिकांश बुँदा माओवादीले कार्यान्वयन नगरेको अवस्थामा सहमति डेट एक्सपायर औषधी र कपाली तमसुक बनेको ठोकुवा गरे । उनले भने, 'सहमति प्याकेजमै कार्यान्वयन हुनु पर्छ । राष्ट्रपति मात्रै भनेर हुँदैन ।'केसीले अन्य दलले आरोप लगाएजस्तो कांग्रेसले प्रचण्ड राष्ट्रपति हुने देखेर राष्ट्रपतीय ब्यवस्थाको विरोध नगरेको स्पष्ट पार्दै निर्वाचन भएमा पहिलो चरणमा कसैले पनि ५१ प्रतिसत मत पाउन नसक्ने र त्यसपछि हुने दुईजनाको निर्वाचनमा कांग्रेसले नै विजय हात पार्ने दावी गरे । उनले कांग्रेसले कुनै ब्यक्तिलाई हेरेर भन्दा पनि निरंकुतालाई रोक्न मात्रै राष्ट्रपतीय पद्धतिको विरोध गरेको बताए ।

माओवादी स्थायी समिति सदस्य लिलामणी पोख्रेलले ज्यूरिचमा समायोजन र बहुलबादमा माओवादी रिर्जवेसन रहेको बाहेक कसैको पनि असहमति नरहेको भन्दै कांग्रेसले अहिले आएर भएको सहमतिलाई डेट एक्सपाइयर औषधी भन्न नहुने तर्क गरे । उनले भने, 'ज्यूरिच सहमतिलाई डेट एक्सपायर औषधी र कपाली तमसुक भन्ने हो भने सात बुँदे सम्झौता,छ बुँदे सम्झौता, प्रधानमन्त्रीको प्रतिबद्धता सबै त्यस्तै भईसके अनि अहिले डेट एक्सपायर भएको सम्झौता कार्यान्वयन गराउन दवाव दिने उद्देश्यले किन १६ दलको मोर्चा बनाउनु पर्‍यो ।'

उनले सहमति र सम्झौताहरु कहिले पनि कपाली तमसुक नहुने भन्दै कांग्रेस संविधान निर्माणमा अवरोध गरेर शान्ति प्रक्रियामात्रै टुङग्याएर माओवादी कमजोर बनाउने षडयन्त्रमा लागेका आरोप लगाए । पोख्रेलले नेपालमा संसदीय प्रणाली असफल भइसकेकोले अब त्यस्तो ब्यवस्था सम्भव नभएको दावी गर्दै स्वयं स्व. गिरिजाप्रसाद कोइरालाले रत्नपार्कको आन्दोलनमा संबोधन गर्दा हामिले संसदीय ब्यवस्था मानेर गल्ति गरेछौं भनेर भनेको स्मरण गराए ।

माओवादी अध्यक्ष प्रचण्ड राष्ट्रपति बन्ने देखेर कांग्रेसले राष्ट्रपतीय शासन प्रणालीको विरोध गरेको दावी गर्दै अहिलेसम्म सबै कुरा माओवादीनै छाडेर सहमति भएको शासकीय प्रणालीमा भने माओवादीले सम्झौता नगर्ने बताए । यद्यपि उनले मिश्रित शासन प्रणालीमा भने सहमति बन्न सक्ने विश्वास ब्यक्त गरे । उनले भने, 'कांग्रेस शान्ति र संविधान चाहँदैन । माओवादी फुट्न खोज्दा खुसी हुने र मिल्न लाग्दा आत्तिएर १६ दलको मोर्चा बनाउने कामबाट स्पष्ट भइसकेको छ ।' एमाले नेता रघुवीर महासेठले एमाले कार्यकारी प्रमुख प्रत्यक्ष निर्वाचित हुन पर्ने पक्षमा रहेको भन्दै कार्यदलमा सहमति गरेर कांग्रेस पछि हट्नुले कांग्रेस संविधान निर्माणमा गम्भीर छैन भन्ने प्रष्ट भएको आरोप लगाए ।

उनले संसदीय ब्यवस्थामा प्रधानमन्त्री उठ्ने वित्तिकै सरकार बचाउने ध्यानमा लाग्नु पर्ने भएकोले कुनै पनि काम हुन नसकेको भन्दै प्रत्यक्ष निर्वाचित कार्यकारीको ब्यवस्था गरेर त्यसलाई निरकुंश हुन नदिन संविधानमा स्पष्ट ब्यवस्था गर्नु पर्ने तर्क गरे । महासेठले प्रजातन्त्रको विकल्प नभए पनि शासकीय स्वरुपमा प्रसस्त विकल्प भएको भन्दै काग्रेस र माओवादीले मेरो गोरुको बाह्रै टक्का गरेर शान्ति र संविधान निर्माणको काम रोकेकोक आरोप लगाए ।

मधेसी जनअधिकार फोरम नेपालका अध्यक्ष उपेन्द्र यादवले राष्ट्रप्रमुख र कार्यकारी एकै ब्यक्ति हुनु पर्ने भन्दै राष्ट्रपतिको निर्वाचन मिति निश्चित तोकेर, मन्त्री परिषदको काम संसदमार्फत अनुमोदन गराउने र महाअभियोग लगाउने ब्यवस्था गरे त्यसले राष्ट्रपतिलाई निरंकुश हुन नदिने तर्क गरे । उनले संसदहरु सरकारमा जान नपाउने ब्यवस्था गरेर खरिद विक्री नहुने ब्यवस्था पनि गर्नु पर्ने तर्क गरे । उनले भने, 'संसदले नै सरकार बनाउने र संसदनै सरकारमा जाने ब्यवस्थाले शक्ति सन्तुलन हुन सकेन ।'

वीरका डाक्टरले फोडे प्रशासनको ढोका

2012-01-12T08:41:00.000-08:00

काठमाडौं, २८ पुस

सामान्यतः डाक्टरहरू बिरामीको उपचारमा तल्लीन हुन्छन् । तर, चिकित्सा विज्ञान राष्ट्रिय प्रतिष्ठान -न्याम्स), वीर अस्पतालका डाक्टर भने तोडफोडमा समेत उत्रेका छन् । त्यो पनि अनुपस्थित समयमा पनि उपस्थित भएको हाजिर गर्न पाउनुपर्ने अडानमा । वीर अस्पताल रेडियोलोजी विभागका डाक्टरले बुधबार अस्पताल प्रशासन कार्यालयको ढोका नै तोडफोड गरेका हुन् । तोडफोडमा उत्रनुको कारण थियो- समयमा उपस्थित नभएपछि हाजिरीमा लागेको रातो मसीले अनुपस्थित जनाइनु । अस्पताल प्रशासनले रेडियोलोजी विभागमा कार्यरत डाक्टर तथा कर्मचारी कार्यालय समयमा अनुपस्थित भएको पाएपछि उनीहरूको हाजिरमा रातो लगाएको थियो । प्रशासन प्रमुख अर्जुन गौतमले मंगलबार गरेको छड्केमा लगातार चार/पाँच दिनसम्म कार्यालय समयमा अनुपस्थित भएका डाक्टर तथा कर्मचारीको हाजिरमा रातो लगाएको बताए ।

अनुपस्थित समयलाई पनि 'कार्यालयमा आएको' मानिनुपर्ने भन्दै डाक्टरले प्रशासनमा तोडफोड गरेको गौतमले जानकारी दिए । उनका अनुसार रेडियोलोजी विभागका डाक्टर तथा कर्मचारीले प्रशासनमा लगाइएको ढोका नै फुटाएका छन् । a'अफिस समयमा लगातार अनुपस्थित हुने अनि एकै दिन आएर हाजिर गर्ने गुनासो आइरहेको थियो,' प्रशासन प्रमुख गौतमले भने, 'त्यही गुनासोका आधारमा छड्के गर्दा विभागीय प्रमुखसहित अन्य कर्मचारी अनुपस्थित देखेर हाजिरमा रातो लगाइएको थियो । तर, उनीहरूले त्यसैलाई निहुँ बनाएर प्रशासनको ढोका फुटाए ।' उनले प्रशासनले रेडियोलोजी विभागलाई पटक-पटक हाजिरका विषयमा जानकारीसमेत गराएको बताए ।

प्रशासनमा तोडफोड गर्नेमा रेडियोलोजी विभागका प्रमुख डा. केबी रावलसहितको टोली रहेको प्रशासनका कर्मचारीले बताए । उनीहरूले प्रशासनको ढोका पूर्ण रूपमा फुटाएका छन् । 'रेडियोलोजी विभागको छड्के गर्दा विभागीय प्रमुखसहित अन्य कर्मचारी अनुपस्थित भएकाले हाजिरमा रातो लगाइएको हो,' प्रशासन प्रमुख गौतमले भने, 'तर उनीहरूले हाम्रो हाजिरमा किन रातो लगाएको भन्दै उल्टै प्रशासनमा तोडफोड गरे ।'अस्पतालको प्रशासनमा गरिएको तोडफोडबारे रेडियोलोजी विभागका चिकित्सक तथा कर्मचारीले विभागमा प्रशासनले हस्तक्षेप गरेकाले तोडफोडमा उत्रेको दाबी गरेका छन् । विभाग प्रमुख डा. रावलले उपस्थित भएका रेडियोलोजीका कर्मचारीको हाजिरमा समेत प्रशासनले रातो लगाएर हस्तक्षेप गरेकाले आक्रोशमा तोडफोड गरेको बताए । उनले विभागीय प्रमुखलाई नसोधी सोझै प्रशासनले हस्तक्षेप गरी हाजिरमा रातो लगाएको र कार्यालय समयमा प्रशासनमा ताला लगाएर बसेकाले तोडफोड गरेको दाबीसमेत गरे ।

'अस्पतालमा अन्य थुप्रै विभाग छन्, तर प्रशासनले हाम्रै विभागमा मात्र किन पटक-पटक हस्तक्षेप गरिरहेको छ? डा. रावलले भने, 'विभागीय प्रमुखलाई कुनै जानकारी नै नदिई सोझै हस्तक्षेप गर्ने अनि अफिस समयमा प्रशासनमा ताला लगाएको देखेर आक्रोशित मुडमा तोडफोड गरियो ।'प्रशासनले विभागमा कुनै हस्तक्षेप नगरिएको जनाएको छ । ४३ जना कर्मचारी रहेको विभागमा जनशक्ति हुँदाहुँदै पनि बिरामीले समयमा नै एक्स-रेलगायतका सेवा पाउन नसक्ने, रिपोर्ट नपाउनेजस्ता गुनासा आइरहेकाले अधिकारभित्र रहेर नै छड्के गरिएको गौतमले बताए ।

अस्पतालका कर्मचारीका अनुसार डा. रावलले तोडफोडका विषयमा निर्देशकलाई स्पष्टीकरण लेखेर बिहीबार बुझाउने भएका छन् । प्रशासनमा कार्यरत कर्मचारीले तोडफोडमा संलग्न चिकित्सकलाई कारबाहीको मागसहित अस्पतालका निर्देशकलाई उजुरीसमेत दिएका छन् । रेडियोलोजी विभाग र प्रशासनबीच यसअघि पनि पटक-पटक विवाद भइरहने गरेको अस्पतालका कर्मचारीले बताएका छन् ।

हिउँमा चिप्लिएर ए को मृत्यू १ बेपत्ता

2012-01-12T08:21:00.000-08:00

खाँदबारी, पुस २८ - संखुवासभाको सिमावर्ती किमाथांका र हटिया गाविसको विचमा पर्ने छेसुम्बाडाँडामा हिउँमा चिप्लिएर एक जनाको मृत्यु भएको छ । अर्का एक जना वेपत्ता भएका छन् । चेपुवा गाविस ३ गुठी गुम्बाका ३४ वर्षीय छुवाङग ल्होमी भोटेको मृत्यु भएको हो । मृतक ल्होमीको शव बिहीबार हटिया र किमाथांका गाविसका स्थानीयले फेला पारेका छन । उनको सव छेसुम्बाडाँडाको ओरालोमा भेटिएको हटियाका पूर्व गाविस अध्यक्ष वाङदावी भोटेले बताए ।

ल्होमीसंग अर्का नाम खुल्न नसकेका हटियाका एकजना स्थानीय भने वेपत्ता भएको प्रहरीले जनाएको छ । बुधबार हटियाबाट किमाथांका जाने क्रममा छेसुम्बाडाँडा नजिक हिउँमा उनीहरु दुवैजना बेपत्ता भएका थिए । एकसाता लामो परेको हिमपात पछि घाम नलागेकाले हिउँ पग्लन सकेको छैन । हटियावाट किमाथांका आवतजावत गर्ने बाटोभरी हिउँ भएको वाङदाबीले बताए । बेपत्ताको खोजी गर्न प्रहरी र स्थानीय सक्रिय भएर लागिपरेको प्रहरीले जनाएको छ । मृतक छुवाङको शव भने पोष्टमार्टमका लागि खाँदबारी ल्याईने भएको छ । घटनास्थल सदरमुकाम खाँदबारीवाट ५० कोष टाढा छ । त्यहाँ पुग्न ५ दिन पैदल हिड्नु पर्छ ।

महिला मृत अवस्थामा

संखुवासभाको खाँदबारी १३ स्थित अरुण नदीमा एक महिलाको मृत अवस्थामा फेला परेको छ । तुर्केपुल मुनी खाँदबारी १ स्थित खोरण्डेमा डेराबस्दै आएकी ३१ बर्षीय कबिता गुरुङ शेर्पा मृत अवस्थामा भेटिएको प्रहरीले जनाएको छ । उनको सब जिल्ला अस्पताल खाँदबारीमा पोष्टमार्टमका लागि राखिएको छ ।

प्रचण्ड र बैद्य मिलन प्रति भट्टराई सशंकित

2012-01-12T08:13:00.001-08:00

माओवादी अध्यक्ष प्रचण्डले जनविद्रोहमा जोड दिइरहेको असन्तुष्ट खेमालाई साथ लिन गरेको प्रयासले प्रधानमन्त्री बाबुराम भट्टराईलाई सशंकित तुल्याएको छ।उनको त्यस्तो शंका मेटाउन प्रचण्ड आफ्ना पक्षका नेताहरुका साथ प्रधानमन्त्री निवास वालुवाटार पुगेका थिए।दुई पक्षीय छलफलमा सहभागि प्रधानमन्त्रीका प्रमुख राजनीतिक सल्लाहकार देवेन्द्र पौडेलले भने, "सरकार, शान्ति प्रकृया र संविधान लेखनबारे केही आशंका पैदा भएका थिए, त्यसैबारे छलफल भयो।"विपक्षि दलहरुले चर्को असन्तुष्टी देखाइरहेकै बेला सरकारको विकल्प खोजिरहेको असन्तुष्ट खेमासँगको छलफललाई अध्यक्ष प्रचण्डले केहीदिन यता तीव्र बनाएका थिए।

दायाँबायाँ

ती छलफलहरुमा प्रधानमन्त्री भट्टराई पक्षलाई सामेल गराइएको थिएन।सल्लाहकार पौडेलका अनुसार प्रचण्डले विकल्प विना आफूहरु नयाँ सरकारको पक्षमा नरहेको स्पष्टिकरण दिएका थिए।जारी केन्द्रिय समिति बैठकमा उपाध्यक्ष मोहन वैद्य पक्षले जनविद्रोहमा जोड दिइएको फरक प्रस्ताव पेश गरेको थियो।पार्टीलाई फुटबाट जोगाउन भन्दै प्रचण्डले उनीहरुसँग हात मिलाउन शान्ति र संविधानमा जोड दिइएको प्रतिवेदनलाई स्थगित गरी नयाँ प्रस्ताव पेश गर्दैछन्।तर नयाँ प्रतिवेदन शान्ति र संविधानको मुल उद्देश्यबाट दायाँबाँया बहकिन नहुनेमा आफूहरुले जोड दिएको प्रधानमन्त्रीका सल्लाहकार पौडेलले बताए।

विश्वस्त

प्रचण्डले पनि त्यसप्रति आफ्नो दृढता जनाएको पौडेलको भनाई थियो।तर जवाफबाट आफूहरु केही आश्वस्त भए पनि पूर्ण विश्वस्त नभइसकेको भट्टराई पक्षका नेताहरुले जनाएका छन्।त्यसैबारे बुधवार हुने पार्टी उच्च नेताहरुको बैठकमा हुने प्रचण्डको नयाँ एकता प्रतिवेदन बारेको छलफलबाट थप प्रष्ट हुने उनको भनाई छ।

राति बीर अस्पतालमा आकस्किक सेवा मा खचाखच तर कसरी ?

2012-01-11T16:38:00.000-08:00

काठमाडौं, पुस २८ - वीर अस्पतालको आकस्मिक कक्षमा मध्यराति थाम्नै नसक्ने भीड बढेको छ । ट्राफिक प्रहरीले रातको १० बजेदेखि तीन बजेसम्म उपत्यकामा मदिरा पिएर सवारी चलाउनेको जाँच गर्न थालेपछि अस्पतालको आकस्मिक कक्ष खचाखच भएको हो । भीड र हल्लाखल्लाले उपचार गराइरहेका बीरामीलाई अफ्ठेरो परेको छ । राति खटिएका डाक्टरसमेत भीड थाम्न हम्मे-हम्मे परेको बताउँछन् ।

'मध्यराति आकस्मिक कक्ष हेर्न एक/दुई जना मात्र डाक्टर खटिएका हुन्छन्,' वीर अस्पतालका आकस्मिक विभाग प्रमुख धु्रवप्रसाद सिंहले भने, 'एकैपटक ठूलो संख्यामा मदिरा सेवन गरेकाको हूल अस्पतालमा छिर्दा डाक्टरलाई भीड थाम्नै मुस्किल पर्छ ।'उनका अनुसार दैनिक ५०/६० जना जति सवारी चालकलाई ट्राफिक प्रहरीले ल्याउने गरेका छन् । 'एक दिनमा ९६ जनासम्म आएको तथ्यांक छ ।'

अस्पतालको आकस्मिक कक्षमा २२ शय्या मात्र छन् । रातमा आएका मानिसलाई बसाएर जाँच्नेसम्म व्यवस्था नहुँदा भीड र होहल्ला बढेको एक डाक्टर बताउँछन् । जसले गर्दा अस्पतालमा उपचार गरिरहेका बिरामीमा रातको समयमा डाक्टरको ध्यान पुग्न छाडेको हो । डाक्टर र नर्सले आएका मानिसको जाँच गर्दागर्दै आफूहरूलाई हेर्न नभ्याएको पुरानो बानेश्वरबाट आई आकस्मिक कक्षमा मंगलबार राति बसेका ३१ वर्षे मनबहादुर तामाङले भने, 'छोरोको भर्‍याङबाट लडेर टाउकोबाट रगत बगिरहेको छ तर डाक्टरलाई उपचार गर्ने फुसर्दै छैन ।'

ट्राफिक प्रहरीले जाँच गरेपछि मदिरा सेवन गरेको पाइएमा डाक्टरी रिपोर्टका लागि नजिकैको सरकारी अस्पताल लाने गरेका हुन् । उपत्यकाभरका सरकारी अस्पतालमा जाँच गराउने भए पनि रातको मुख्य केन्द्र मानिने ठमेल, लाजिम्पाट, दरबारमार्ग, नयाँसडकबाट वीर अस्पताल नजिक पर्ने भएकाले अधिकांशलाई त्यहीं लाने गरिएको महानगीय ट्राफिक प्रहरी महाशाखाका प्रमुख गणेशराज राईले जानकारी दिए । उनका अनुसार महाराजगन्ज टिचिङ अस्पताल, पाटन र भक्तपुरमा जाँच गर्ने गरिएको छ । दिनहुँजसो ५०/६० को हाराहारीमा मदिरा सेवन गरेका चालकहरू अस्पताल पुर्‍याए पनि विशेष चाडपर्वमा बढी हुने उनले बताए ।

अरनिको यातायातमा भाडा दर मनपरी ढंगले उठाइदै

2012-01-11T16:27:00.000-08:00

पुस २७ - सिन्डिकेटले यात्रुलाई कति ठगी गर्छ भन्ने अर्को उदाहरण खोज्नुपरे तामाकोसी-मन्थली रुटलाई हेर्नुपर्छ, जहाँ बन्दै गरेको सडकमा अनुमति नलिई बढी भाडा असुलेर यातायात सेवा दिँदै आएका व्यवसायीले अहिले कालोपत्रे भइसके पनि भाडा घटाएका छैनन् । बरु उल्टो बढाएर यात्रुलाई 'अघोषित' ठगी गरिरहेका छन् । यो रुटमा पहिले कच्ची बाटो हुँदा यातायात व्यवसायीले प्रतिकिलोमिटर २ रुपैयाँ लिदै आएका थिए । पक्की भएपछि घट्नुपर्नेमा व्यवसायीले बढाएर अहिले प्रतिकिलोमिटर २ रुपैयाँ ८० पैसा पुर्‍याएका छन् । जब कि सरकारले पक्की सडकको भाडा प्रतिकिलोमिटर १ रुपैयाँ ७० पैसा निर्धारण गरेको छ ।

'पक्की सडकमा यति धेरै भाडा लिनु उपभोक्तामाथिको ठगी हो,' यात्रु एवं स्थानीय बासिन्दा लोकेन्द्र कार्की भन्छन्, 'यो मुलुककै सबैभन्दा बढी भाडा तिर्नुपर्ने रुट होला, सरकारले अनुगमन गर्नु जरुरी छ ।'यो रुटमा अरनिको यातायात सेवा समितिका सवारी सञ्चालित छन् । त्यसो त यो व्यवसायीको संस्थाले अन्य रुटमा पनि सरकारले तोकेको भाडा मात्र लिने गरेको रेकर्ड कहीँ छैन । अरनिको राजमार्गमा एकछत्र राज गरिरहेको यो संघले काठमाडौं-मन्थलीको भाडामा पनि निर्धारित भन्दा अत्यधिक बढी लिने गरेको छ । काठमाडौं-मन्थलीको १ सय ९० किलोमिटरका लागि साढे ५ सय रुपैयाँ लिँदै आएको छ । जब कि सरकारी दर अनुसार ३ सय २३ रुपैयाँ मात्र हुनुपर्ने हो । 'बाटो सजिलो भएपछि भाडा घटाउनुपर्नेमा उल्टै बढाएर लिन थालेको छ,' रामेछाप उद्योग वाणिज्य संघका उपाध्यक्ष जेएन दाहाल भन्छन्, 'यो भेगमा अरनिकोको मनोमानी छ, अन्य रुटमा पनि यात्रुलाई ठग्ने काम भइरहेको छ । यसरी राज्य कमजोर भएको फाइदा उठाएर सर्वसाधारण ठग्न मिल्दैन ।'

मन्थली मात्र हैन, अरनिकोले जिल्लाका विभिन्न १८ स्थानमा सवारी चलाएको दाबी गर्दै उच्च भाडा असुल्दै आएको छ । रामेछापको गुम्देलसम्मको यात्राका लागि ९ सय ५५ रुपैयाँ भाडा तोकेको छ । यो स्थान काठमाडौंदेखि २ सय ४२ किलोमिटर मात्र टाढा छ । 'व्यवसायीले निर्धारण गरेको भाडादर निकै बढी छ,' असल शासन परियोजना रामेछापका संयोजक रमेश ढुंगेलले भने, 'यसको पुनरावलोकन गर्नु जरुरी छ ।' समितिले डिलक्स सुविधायुक्त सुपर चलाएको दाबी गरेर उक्त भाडा असुल गर्दै आएको छ ।

यसैबीच यात्रुसँग बढी भाडा असुल गरेको गुनासो आएपछि जिल्ला प्रशासन कार्यालयले समितिसँग भाडा दर माग गरेको छ । प्रजिअ बलभद्र गिरीले समितिलाई पत्राचार गर्दै तत्काल समितिको भाडा दर उपलव्ध गराउन आग्रह गरेका छन् । 'भाडा दर मागेका छौं,' गिरीले भने, 'दररेट आएपछि बढी असुलेको भए कारबाही गर्छौं ।'

दोलखा काटाकुटी सेरोफेरो: चिनिया हरुले गोर्खाली भूमिमा आएर ताण्डब नाँच देखाए

2012-01-11T08:51:00.000-08:00

दोलखा काटाकुटी सेरोफेरो: चिनिया हरुले गोर्खाली भूमिमा आएर ताण्डब नाँच देखाए

चिनिया व्यक्तिहरु द्वारा अदालत मा तोडफोड

2012-01-11T08:13:00.000-08:00

नेपालमा गुण्डागर्दी गर्न के नेपालीहरुको कमि थियो र ! युथफोर्स, वाइसीएल, नेविसंघ नामधारी पार्टीको खोल ओढेका गुण्डाहरु प्रशस्तै छन्। त्यतिले नपुगी जेलभित्रै गोली हान्नेदेखि बीच सडकमा गोली हान्नेसम्मका आयातीत भारतीय अपराधी पनि देखेकै हौँ हामीले। अब हुँदाहुँदा चाइनिजहरुको नि गुण्डागर्दी देखाउने थलो हुन पुगेछ नेपाल, हे दैव ! के साह्रो नेप्रिएका हौ यिनीहरु त ! अर्काको देशको राजधानी जस्तो ठाउँमा विदेशी नागरिकहरु हुल बाँडेर अदालतमा तोडफोड गर्ने अनि प्रहरीलाई ढुङ्गा हानी दोहोरो झडप गर्ने ! मुलाहरु उनीहरुको देशमा प्रदर्शनको ‘प’ उच्चारण गर्न पाउँदैनन्, त्यहाँको रिस हाम्रो देशमा पोख्न आएका हुन् कि कसो ?

कुरो के पर्‍यो ?

कुरो यसो हो। अस्ति शनिबार भक्तपुरको जगातीमा एकाबिहानै चार बजे तीन वटा गाडीमा खासातिर हिँडेका चिनियाँ नागरिकबाट ९७ हजार २२३ अमेरिकी डलर र करिब ११ लाख नेपाली रकम फेला पर्‍यो। महिला र पुरुष गरी नौ जना चिनियाँ पक्राउ परेका थिए। शरीरको विभिन्न ठाउँमा लुकाइएको रहेछ डलर उनीहरुको। पर्यटक भिसामा नेपाल आएका उनीहरु नेपालको गैरकानुनी बजारबाट संकलन गरेको डलर चीनको गैरकानुनी बजार लैजाँदै गरेको भन्दै छानबिन भइरहेको थियो। यो सम्बन्धमा छानबिन आन्तरिक राजस्व कार्यालयले गर्छ। उसले अनुसन्धानका लाषि म्याद थप गर्न हिजो साँझ पक्राउ परेकाहरुलाई जिल्ला अदालत भक्तपुर लगेको थियो। अब सुरु भयो फिल्मी शैली।

उनीहरुलाई प्रहरीले अदालतमा के ल्याएको थियो, पाँच वटा गाडी रोकिए एकपछि अर्को। झण्डै ४० जना चिनियाँ नागरिकको हुल झर्‍यो त्यसबाट। अदालतभित्रै छिरे उनीहरु। आफ्ना अभियुक्त साथीलाई तानेर भगाउन खोजे। तर सकेनन्। अनि अदालतको रजिस्ट्रार कक्षमा तोडफोड गरे। भित्र रहेकाहरुले झ्यालको सिसा, टेबुललगायत तोडफोड गरे। बाहिर रहेकाहरुले ढुङ्गा हाने। । प्रहरीले पनि लठ्ठी हानेर प्रतिकार गर्‍यो। दोहोरो झडप भयो। ढुङ्गा हान्ने दुई जना चिनियाँलाई प्रहरीले समात्न भ्यायो। अरु तितरबितर भए। पाँच प्रहरी र दुई चिनियाँ घाइते भए झडपमा।

यत्तिकैमा पक्राउ परेका दुई जनालाई छुटाउन फेरि चाइनिजहरु आउँछन् भन्ने सूचना आयो। त्यसपछि त भक्तपुरमा सुरक्षासम्बन्धी आपतकालीन बैठकै बस्नुपर्‍यो र सुरक्षा व्यवस्था कडा बनाउनु पर्‍यो।पक्राउ परेकालाई भने जिल्ला अदालतले सात दिनको म्याद थप गरेको छ। अनि ढुङ्गा हान्नेहरु नि? ठूला देशको ठूलै चाला। अरुको देशमा नेपाली यसरी पक्रेको भए के हुन्थ्यो? नेपालमा चाहिँ के भयो ? समातेको केही समय मै चिनियाँ दूतावासका कन्सुलरलाई लगेर बुझाइयो। हाम्रो देशका पुलिस घाइते भएको त के मतलब र ! अदालतमा भएको तोडफोड के मतलब र ! कानुन सानुन चिनियाँ दूतावाससामु लम्पसार ! अझ ती ढुङ्गा हान्नेहरुलाई ससम्मान बुझाएर रेड स्यालुट नै पो ठोके कि !

अब ती डलरसहित पक्राउ परेकालाई नि छाड्न दबाब आइरहेको छ रे। स्रोत नखुलेको डलर बोकेर हिँड्न नपाइने नेपाली कानुन थाहा भएन रे उनीहरुका नागरिकलाई। यस्तो पनि कुनै तर्क हो ? थाहा भएन भन्दैमा पाइन्छ र। भरे कुनै चाइनिजले हत्या गर्ला र हत्या गर्नुहुन्न भन्ने कानुन थाहा छैन भन्ला रे, छाड्ने उसलाई पनि? फेरि अवैध रुपमा लगिरहेको हैन, वैध रुप मै हो भन्ने उनीहरुलाई लागेको भए किन चाहिँ गुप्ताङ्ग र स्तनमा लुकाएर राखेको रे नि डलर ? सँधै भारतको प्रभावका बारेमा मात्र छलफल, विवाद र बहस गरिरहनेहरुलाई चीनको राजनीतिक मात्र हैन, अपराधीहरुको प्रभाव पनि कति साह्रो बढेको रहेछ भनेर यो घटनाले झसङ्ग पारिदिएको हुनुपर्छ।

प्रचण्ड ले कठोर विकल्प उठाउँदै किरण निकट भए

2012-01-11T06:40:00.000-08:00

काठमाडौ, पुस २७ - पार्टीभित्र मोहन वैद्य पक्षसँग 'निर्णायक संघर्ष' मा उत्रिएका माओवादी अध्यक्ष पुष्पकमल दाहाल एकाएक किन उनीहरूसँगै एकता गर्न अग्रसर भए ? फुटको संघारमा पुगेको पार्टीलाई जोगाउनु त एउटा उद्देश्य होला, अर्को कारणचाहिँ यसबीचमा प्रमुख प्रतिपक्षी कांग्रेससँग बढेको दूरी पनि हो ।

दाहालसामु दुइटा विकल्प थिए: शान्ति र संविधानको प्रक्रियामा कांग्रेस, एमालेसँग लचिलो भई वैद्य पक्षलाई टाढा हुत्याउने कि शान्ति/संविधानमा कडा नीति लिएर उक्त समूहलाई फुट्नबाट जोगाउने । उनले दोस्रो अपि्रय बाटो रोजे, जसले गर्दा लडाकु व्यवस्थापन र संविधान लेखन कार्य प्रभावित भएको छ ।नेपाली सेनामा समायोजन गरिने कमान्डरलाई कुन तहसम्मको दर्जा दिने र संसदीय वा राष्ट्रपतीयमध्ये कस्तो पद्धति रोज्ने भन्नेमा कांग्रेससँग मतभेद बढेलगत्तै दाहाल वैद्य पक्षसँग नजिक पुगेका हुन् । यसअघि उनी पार्टी फुट्ने जोखिम मोलेरै भए पनि शान्ति/संविधानको प्रक्रिया टुंग्याउन अगाडि सरेका थिए, तर शान्ति/ संविधानका विषयमा 'सम्झौता' होइन 'समर्पण' नै गर्नुपर्ने, अनि पार्टीसमेत फुट्ने राजनीतिक नोक्सानी देखेपछि दाहाल वैद्यसँग नजिकिन बाध्य भएको उनीनिकट स्रोतहरूको भनाइ छ ।

यसअघि लडाकु वर्गीकरणको सफलतासँगै शान्ति प्रक्रिया सकारात्मक ढंगले अगाडि बढ्दै थियो । तर जब लडाकु कमान्डरहरूले सेनामा उपरथीसहित ४ सय ४३ अधिकृत चाहिने माग अगाडि सारे, त्यसले कांग्रेस, एमालेलाई सशंकित तुल्यायो । त्यो वास्तवमा लडाकुको मागमात्र थियो, जसलाई माओवादी नेतृत्वले आधिकारिकता नदिए पनि अस्वीकार नगरेकाले अन्य दलमा चिसो पस्यो ।स्रोतहरूका अनुसार आन्तरिक छलफलमा लडाकुलाई एउटा सहायकरथी (ब्रिगेडियर ) सम्म दिन सकिने सहमति भएको थियो, तर शंका बढेपछि कांग्रेसले मेजरभन्दा माथिको पद नदिने अडान लियो । यता सातवटै डिभिजनका लडाकु कमान्डरहरूले माओवादी अध्यक्ष दाहाललाई भेटी प्रस्तावित सैनिक महानिर्देशनालयको मुख्यालयको नीति-निर्माण गर्ने तहमै आफ्नो प्रतिनिधित्व हुनुपर्ने (कम्तीमा ब्रिगेडियर पाउनुपर्ने) दबाब दिए । सेनामा गएपछि दिइने 'बि्रजिङ कोर्स' छोटो अवधिको हुनुपर्ने, महानिर्देशनालयमा सेना र लडाकुसँगै प्रहरीको पनि ३० प्रतिशत प्रतिनिधित्व हुनुपर्नेलगायत विषयमा पनि माओवादी-कांग्रेसबीच मतभेद उब्जिसकेको थियो । त्यसपछि स्वैच्छिक अवकाशमा जाने लडाकुलाई शिविरबाट निकाल्न माओवादीले आनाकानी गरेपछि शंका अरू थपियो ।

असर संविधानसभामा देखापर्‍यो । विवाद समाधान उपसमितिमा शासकीय स्वरूपको विषयलाई लिएर भएको समझदारीबाट कांग्रेस पछि हट्यो । दाहाल नेतृत्वको उपसमितिमातहत गठित कार्यदलले दिएको सुझावअनुरूप प्रत्यक्ष निर्वाचित राष्ट्रपति र संसद्-निर्वाचित प्रधानमन्त्री रहने मिश्रति प्रणालीमा दलहरू औपचारिक सहमतिनजिक पुगेका थिए । तर त्यसमा राष्ट्रपतिलाई कम अधिकार राखिएको भन्दै माओवादीले असन्तुष्टि जनायो भने माओवादीको व्यवहारबाट तर्सेको कांग्रेस निर्वाचक मण्डलबाट राष्ट्रपति छानिने प्रस्तावसहित संसदीय पद्धतितर्फै फर्कियो ।

अहिले कांग्रेस नेताहरूलाई गम्भीर आशंका छ: माओवादी पहिले संविधान घोषणा गराएर शान्ति प्रक्रिया लम्ब्याइरहन चाहन्छ र लडाकु शिविर उठाउन चाहँदैन । ती शिविरमा घाइते तथा अपांग लडाकुलाई राख्नुपर्ने प्रस्तावबाट त कांग्रेस नेतृत्व अरू सशंकित छ । यता माओवादीचाहिँ लडाकु समायोजन प्रक्रियालाई 'भर्ती' जस्तो बनाइने र पुरानै संसदीय व्यवस्थातर्फ आफूहरूलाई धकेलिने त्रासबाट गुजि्ररहेको छ । त्यस्तो अवस्थामा पार्टीभित्र वैद्य नेतृत्वको अनुदारवादी धार हावी हुने जोखिम संस्थापन पक्षले देखेको छ । शान्ति प्रक्रियाको मुख्य विवाद पद निर्धारणको प्राविधिक विषय भएकाले त्यसमा सेनासमेतको राय लिई मध्यमार्ग खोज्न गाह्रो छैन, राजनीतिक इच्छाशक्ति भएमा । त्योभन्दा ठूलो विवादचाहिँ शासकीय स्वरूपलाई लिएर छ, जसले नयाँ संविधानको मार्ग निर्धारण गर्नेछ । अहिले न कांग्रेस राष्ट्रपतीय प्रणालीमा जाने सम्भावना छ, न त माओवादीले संसदीय व्यवस्था स्वीकार्ने अवस्था देखिन्छ ।

बीचको बाटो राष्ट्रपति-प्रधानमन्त्री दुवैबीच कार्यकारी अधिकार बाँडफाँड गर्ने प्रणाली बन्न सक्छ, तर त्यस्तो 'खिचडी व्यवस्था' ले संविधान लागू भएको पहिलो दिनबाटै समस्या निम्त्याउने जोखिम छ । त्यस्तो अवस्थामा शासकीय स्वरूपको मध्यमार्ग जनताबाट प्रत्यक्ष निर्वाचित प्रधानमन्त्री बन्न सक्छ ।

किरण र प्रचण्ड एक भए बाबुराम कै सरकारलाई राष्ट्रिय सरकार बनाउने

2012-01-10T16:36:00.000-08:00

माओवादीका दुई पक्षबीच शान्ति र संविधानका लागि एक भएर जाने सहमति भएपछि पार्टीमा देखिएको विवाद हाललाई टरेको छ। माओवादी पदाधिकारीको सोमबार बसेको बैठकले पार्टी अध्यक्ष पुष्पकमल दाहाल 'प्रचण्ड’ र उपाध्यक्ष मोहन वैद्यले केन्द्रीय समितिमा प्रस्तुत गर्नुभएका प्रतिवेदनलाई छलफलमा लैजाने र शान्तिप्रक्रिया संविधान निर्माण एवम् जनसंघर्षका लागि एक भएर अगाडि बढ्ने निर्णय गरेको हो। माओवादी केन्द्रीयसमिति बैठकमा प्रस्तुत भएका दुवै प्रतिवेदन थाती राखी दुवै पक्षलाई मान्य हुने गरी जनपरिचालनको कार्ययोजना केन्द्रीय समिति बैठकमा लैजाने सहमति संस्थापन र वैद्य पक्षबीच भएको छ।

पार्टीका उपाध्यक्ष नारायणकाजी श्रेष्ठले शान्ति र संविधानका लागि व्यापक जनपरिचालन गर्ने कार्ययोजना बैठकमा लैजाने र पार्टीभित्रका विवादलाई बहस गर्दै महाधिवेशनमा टुंग्याउने सहमति भएको जानकारी गराउनुभयो। शान्ति र संविधानविरुद्ध षड्यन्त्र भए जनसंघर्षमा जानसमेत दुवै पक्षबीच सहमति भएको छ। आन्तरिक विवादका कारण अन्य पार्टीले आफ्नो पार्टीलाई ट्रुपमा पार्न खोजेको आशंका गर्दै पार्टी एक भएर अगाडि नबढे जनताको पक्षमा जनसंविधान नबन्ने खतरा देखिएको विश्लेषण बैठकले गरेको छ। पार्टीको आगामी कार्यदिशाका बारेमा बहस चलाउँदै जाने तर हाल जनसंविधान निर्माण र शान्तिप्रकि्रयालाई पहिलो प्राथमिकतामा राखेर अघि बढ्ने सहमति दुवै पक्षबीच भएको नेताहरुले बताएका छन्।

प्रचण्ड पक्ष र मोहन वैद्यबीचको विवाद चुलिएपछि माओवादी पार्टी फुट्ने नै हो कि भन्ने आशंका बढिरहेको थियो। पदाधिकारी बैठकको सहमतिले फुट्ने स्थितिबाट पार्टी जोगिएको तर आन्तरिक विवाद पूरै समाधान भने भइनसकेको सचिव सीपी गजुरेलले बताउनुभएको छ। वैद्य पक्षका नेता गजुरेलले भन्नुभयो- 'पार्टी विभाजित त हुँदैन तर भविष्यमा नेतृत्व सच्चिन भने तयार हुनुपर्छ।’ एक भएर अगाडि नबढे शान्ति र संविधानमा गम्भीर खतरा उत्पन्न हुने देखिएकाले पनि मूल विषयमा एक भएर जाने सहमति भएको उहाँले स्पष्ट पार्नुभयो।

त्यसै गरी प्रचण्ड पक्षका नेता हरिबोल गजुरेलले शान्ति र संविधानका पक्षमा पार्टी बिनाविवाद एकमतले अगाडि बढ्ने तर त्यसमा षड्यन्त्र भए जनसंघर्षमा जान तयार रहने निर्णयसमेत पदाधिकारी बैठकले गरेको जानकारी गराउनुभएको छ। वैद्य पक्षको जनविद्रोहमा जाने नीति र संस्थापनपक्षको जनविद्रोह तत्काल आवश्यक छैन भन्ने दुवै कुरालाई मिलाएर हाललाई यस्तो सहमति पदाधिकारी बैठकले गरेको बताइएको छ। पदाधिकारीको निर्णय केन्द्रीय समितिको बैठकमा लगी अनुमोदनसमेत गराइने भएको छ। माओवादी बैठकले संविधान निर्माणबाट नेपाली कांग्रेस पछि हटेका कारण शान्ति र संविधान निर्माणप्रक्रिया संकटमा परेको निष्कर्षसमेत निकालेको छ।

त्यसै गरी बैठकले शान्ति र संविधानका लागि जनपरिचालन कार्यक्रम गर्ने निर्णय पनि गरेको छ। परिचालनका कार्यक्रम तय गरी केन्द्रीय समितिको बैठकमा पेस गर्न पार्टीअध्यक्ष पुष्पकमल दाहाल 'प्रचण्ड’ लाई जिम्मेवारी दिइएको छ। प्रचण्डनिवास नयाँबजारमा बसेको बैठकले अन्य राजनीतिक दलहरुसँग परामर्श गर्ने तथा आवश्यकताअनुसार लचिलो पनि हुँदै जाने बताएको छ। तर परिवर्तनमुखी संविधान निर्माण र सहमतिबमोजिम शान्तिप्रक्रिया अगाडि नबढाइए पार्टी झुक्न नसक्नेतर्फसमेत सचेत गराइने निर्णय पनि सँगसँगै गरेको बताइन्छ।

यता सोमबार सिंहदरबारमा बसेको कांग्रेस-एमालेसहितका १६ दलको बैठकले संविधान निर्माण र शान्तिप्रक्रियामा माओवादी पछि हटेको भन्दै सहमतिबमोजिम अगाडि बढ्न माओवादीलाई विशेष आग्रह गर्ने निर्णय गरेको छ। माओवादीकै कारण शान्तिप्रक्रिया र संविधान निर्माण संकटमा परेको निष्कर्ष ती दलको छ। आज फेरि बस्ने नेताहरुको बैठकले दुवै पक्षलाई मान्य हुने समाधान पत्ता लगाउने र पछि बस्ने केन्द्रीय समिति बैठकमा सो सहमतिलाई लगिने भएको छ।

नेपाली कांग्रेसका केन्द्रीय सदस्य डा. रामशरण महतले प्रधानमन्त्री डा. बाबुराम भट्टराईविरुद्ध अविश्वासको प्रस्ताव ल्याउने तयारी शुरु गरिएको जानकारी दिनुभएको छ।रिपोर्टस्र क्लबमा सोमबार बोल्दै उहाँले प्रधानमन्त्रीले पदमा बस्ने नैतिक हैसियत गुमाइसकेकाले बहुमत जुट्नेबित्तिकै अविश्वासको प्रस्ताव ल्याउने बताउनुभयो। अविश्वास प्रस्तावका लागि दलहरुबीच छलफल भइरहेको जानकारी दिँदै उहाँले अवस्था यस्तै रहेमा अविश्वास प्रस्ताव ल्याउनुको विकल्प नरहेको बताउनुभयो।डा। महतले सातबुँदे सहमतिमा सेना समायोजनसम्बन्धी सम्पूर्ण कुरा स्पष्ट भएको अवस्थामा माओवादीले अहिले आएर सहमतिविपरीत पहिला दर्जा निर्धारण र ६ हजार ५ सयभन्दा बढी समायोजन रोजेका लडाकूहरुलाई के गर्नेलगायतका बखेडा झिकेर शान्तिप्रक्रिया रोकेको आरोप लगाउँदै शान्तिप्रक्रियालाई माओवादीले दुहुनो गाई बनाएको टिप्पणी गर्नुभयो।

'सातबुँदेअनुसार लडाकूले सेनाको व्यक्तिगत मापदण्ड पूरा गर्छ कि गर्दैन अहिले नै यो पद र ऊ पद भन्न मिल्छ ?’ -उहांको प्रश्न थियो।सहमति गर्ने र कार्यान्वयन नगर्ने माओवादीको पुरानै चरित्र दोहोरिएको भन्दै फाइदा हुँदा सम्झौता गर्ने र अरु बेला कार्यान्वयन नगर्ने माओवादी चरित्र स्पष्ट भएको दाबी गर्दै महतले माओवादी लडाकूको हैसियत सेनाको रुपमा नस्वीकारिएकाले सेनाको समूगत समायोजन कुनै पनि हालतमा हुन नसक्ने बताउनुभयो। प्रत्यक्ष निर्वाचित राष्ट्रपतीय पद्धति नभए शान्तिप्रक्रिया अवरुद्ध हुन्छ भन्नु शान्तिप्रक्रियालाई बार्गेनिङ कार्ड ब्लाकमेलिङको उपकरण र कामधेनु गाई बनाउनुभएको भन्दै महतले त्यॊ कांग्रेसका लागि स्वीकार्य नभएको बताउनुभयो।'सार्वभौमसत्ता एक व्यक्तिमा होइन संसद्मा हुनुपर्छ’ उहाँले भन्नुभयो- 'राष्ट्रपति पद्धतिमा निरकुंशता हुन्छ भन्ने कुरा बंगलादेश पाकिस्तान फिलिपिन्स ल्याटिन अमेरिकी र अधिकांश अफ्रिकी मुलुकमा भएको घटनाले प्रस्ट बनाइसकेको छ।’

डा. महतले शहीद गेटबाट त्रिभुवनको सालिक हटाउने निर्णय इतिहासलाई मेट्ने षड्यन्त्र भएको भन्दै ७ सालको आन्दोलनमा त्रिभुवनले साथ लिएकाले कांग्रेसले उनलाई सम्मान गर्ने बताउनुभयो। 'इतिहासलाई इतिहासकै रुपमा हेरिनुपर्छ इतिहास मेटन पाइँदैन’ उहाँले भन्नुभयो- 'नेपालमा राणा शासनको पनि इतिहास छ त्यसलाई मेट्न पाइँदैन। रुसमा अझै जारका सालिक छन् चीनमा छन्।’

हुम्लामा ३ फिट हिउँ पर्यो तापक्रम माइनस १० डिग्री

2012-01-10T16:28:00.000-08:00

तीनदिनदेखि परेको हिउँले उच्च हिमाली जिल्ला हुम्लाको सदरमुकाम सिमीकोटका बासिन्दा मर्कामा परेका छन् । सिमीकोटमा हिउँ ३ फिट जमेको छ । गएको शनिबारदेखि लगातार परेको हिउँ अहिलेसम्म नरोकिएको बरगाउँका छिरिङ लामाले जानकारी दिनुभयो ।बाक्लो हिउँ परेका कारण त्यहाका बासिन्दालाई एक स्थानबाट अर्को स्थानमा जान समेत कठिनाई भएको छ । लगातार परेको हिउँले घरबाट बाहिर निस्कन समेत मुस्किल परेको लामा बताउनु हुन्छ ।

हुम्लामा हिउँ परे पछिको दृश्य

स्थानीयले घरमा खाना पकाउनका लागि चाहिने पानी ल्याउन धारामा जानसमेत नसकेको र आँगनमा जमेको हिउँ पगालेर खान बाध्य छन् । हिउँले जिल्लाका अधिकांश कार्यालयसमेत बन्द छन् । चिसो धेरै बढेकाले कार्यालयमा बसेर काम गर्न समस्या परेको जिल्ला प्राविधिक कार्यालयका देवी ऐडीले बताउनुभयो । उहाँका अनुसार निरन्तर रुपमा हिउँ परेका कारण चिसोले हात नै नचल्ने भएपछि कर्मचारी कार्यालयमा आउन नसकेका हुन् ।

हिउँका कारण जिल्लामा सञ्चालित स्नातक तहको परीक्षामा समेत समस्या भएको छ । चिसोले हात नै नचल्ने भएपछि परीक्षामा सोचेअनुसार परीक्षा दिन नसकेको स्नातक तह दोस्रो वर्षका परीक्षार्थी कालीबहादुर थापाले गुनासो गर्नुभयो । यसैगरी, जिल्लामा परेको भारी हिमपातले प्रवेशिका परीक्षाको तयारीका लागि ट्युसन पढिरहेका विद्यार्थी समेत प्रभावित भएका छन् । बिहान ७ बजे बेलुका ६ बजेसम्म अङ्ग्रेजी, गणित, विज्ञान र ऐच्छिक गणितको ट्युसन पढ्ने विद्यार्थीलाई समेत समस्या भएको अङ्ग्रेजीको ट्युसन पढाइरहेका मानसरोवर उच्च माध्यमिक विद्यालयका शिक्षक अमरबहादुर शाहीले बताउनुभयो ।

हिउँका कारण जिल्लाको एकमात्र यातायातको माध्यम हवाई सेवासमेत ठप्प भएको छ । हवाई सेवा ठप्प हुँदा जिल्लामा नेपालगन्ज, सुर्खेतदेखि आयात गरिने सामग्रीको समेत ढुवानी हुन नसकेपछि सामानसमेत नपाइने हुन थालेको छ । जिल्लाको हवाई मैदानमा कालोपत्रे गरेको भए पनि अबको एक हप्तासम्म हवाई सेवा सुचारु हुन नसक्ने सिमीकोट हवाई उड्डयन कार्यालयका प्रमुख टेकबहादुर पातलीले जानकारी दिनुभयो । उहाँका अनुसार जिल्लाको तापक्रम माइनस १० डिग्रीसम्म पुगेको छ ।

जिल्लाका अधिकांश गाविसमा परेको हिउँले सिमीकोट, बरगाउँ, डाँडाफया, ठेहे, स्याँडा, लिमी, मुचु, रायालगायत झण्डै एक दर्जनभन्दा बढी गाविस धेरै प्रभावित भएका छन् । एकाएक चिसो बढेपछि जिल्लाको जनजीवन समेत प्रभावित भएको छ भने हिमपातले मुगु, जुम्ला, डोल्पा र कालीकोटका केही गाविसमा समेत प्रभाव पारेको छ ।

सडक बिस्तार मा समस्या /गुलेली प्रहार गर्ने स्थानीय को चेतावनी

2012-01-09T08:03:00.000-08:00

२०३३ सालमा लागू भइसकेको मापदण्ड अनुसार सडकको बीचभागबाट निश्चित दूरीभित्र बनेका घरटहराहरु भत्काउने क्रम तीव्र बनाइरहेको तपाईँहरुलाई थाहै होला। यसलाई डोजर आतंक भन्दै भत्काउने सूचिमा आफ्नो घर परेकाहरु आन्दोलित भएका छन्। लाजिम्पाटदेखि नारायणगोपाल चोक हुँदै बुढानिलकण्ठ सडकमा सबैभन्दा धेरै र ठूल्ठूला घरहरु यसमा पर्ने भएका छन्। नारायणगोपालचोक–बुढानिलकण्ठ सडक विस्तारमा घरटहरा भत्कन लागेपछि पीडितहरुले समिति नै बनाएका छन् र हिजो पत्रकार सम्मेलन गरी घरेलु हतियारबाट प्रतिकार गर्ने चेतावनी पनि दिएका छन्। घरेलु हतियार ? कस्तो ?? समितिका सदस्य तथा स्थानीयवासी कृष्णप्रसाद पौडेलले हिजो पत्रकार सम्मेलनमा भने, ‘तीन सय गुलेली तयार पारेका छौँ।’

पौडेलले भने, ‘आफ्नो गाँस र बासको रक्षाका लागि तीन सय गुलेली तयार पारेका छौँ र घरजग्गा नै जाने अवस्था भयो भने ‘मर्नुभन्दा बौलाउनु जाति’ भन्ने उखानलाई आत्मसात् गर्दै विरोधमा उत्रिन्छौँ।’ एकीकृत नेकपा (माओवादी) नेतृत्वको सरकार जनतालाई आतङ्कित बनाउने र सडक विस्तारका नाममा स्थानीय बासिन्दालाई उठिवास गर्ने योजनामा रहेको उनले आरोप लगाए। समितिले सरकारलाई मालपोत, घरजग्गा कर, व्यवसाय कर तिर्दै आएको घरलाई भत्काउन सरकारले डोजर पठाएर आतङ्क मच्चाउन खोजे त्यसको कडा प्रतिकार गर्ने चेतावनी दिएको छ।

कडा प्रतिकार र गुलेली तयार जस्ता शब्दले घर भत्काउन डोजर लिएर आए गुलेली हानेर भगाउन खोज्ने दृश्य देखिने अनुमान गर्न सकिन्छ। उनीहरुलाई कङ्ग्रेस सभासद नरहरि आचार्यले समेत साथ दिइसकेका छन्। गएको साता संसदमा विशेष समय लिएर बोल्दै आचार्यले डोजर आतंकको विरोध गरेका थिए। समितिको प्रश्न छ- सरकारी मापदण्डअनुसार महानगरपालिकाद्वारा नक्सा पास गरी घर बनाएकालाई अतिक्रमणकारी र विकास विरोधीका रूपमा लिई बनाइएका घरहरू भत्काउनु कतिको न्याय हो ?

तर घर भत्काउनेहरुको तर्क भने फरक छ। २०३३ सालमा ऐन लागू हुनअघि बनेको घरलाई मात्र मुआब्जा दिने अरुलाई दिनुनपर्ने उनीहरु बताउँछन्। सडक विभागका कानुनी सल्लाहकार खगेन्द्र चापागाइँ भन्छन्- ”ऐन लागु भइसकेपछि तोकिएको कुनै पनि स्थानमा घर बनेको छ भने स्वतः गैरकानुनी हुन्छ। तर, लागु हुनुअघि नै बनेको ठहर हुन्छ भने त्यस्तालाई मुआब्जाको हकदार मानेका छौं। ऐन लागु भइसकेपछि तोकिएको कुनै पनि स्थानमा घर बनेको छ भने स्वतः गैरकानुनी हुन्छ। तर, लागु हुनुअघि नै बनेको ठहर हुन्छ भने त्यस्तालाई मुआब्जाको हकदार मानेका छौं।

बाबुराम सरकार कमजोर / अबिश्वासको प्रस्ताब आउन सक्ने

2012-01-09T07:42:00.000-08:00

काठमाडौं, पुस २५ - कांग्रेस केन्द्रीय सदस्य रामशरण महतले प्रधानमन्त्री बाबुराम भट्टराईविरुद्ध अविश्वासको प्रस्ताव ल्याउने बताएका छन । प्रधानमन्त्रीले पदमा बस्ने नैतिक हैसियत गुमाइसकेको दाबी गर्दै उनले बहुमत जुट्ने वित्तिकै अविश्वासको प्रस्ताव ल्याउने खुलासा गरे । अविश्वासको प्रस्ताव ल्याउनेबारे दलहरुवीच छलफल भइरहेको भन्दै बताउँदै सोमबार रिपोर्टर्स क्लवको साक्षात्कारमा महतले अहिलेकै अवस्था जारी रहे अविश्वास प्रस्ताव ल्याउनुको विकल्प नरहेको धारणा राखे ।

महतले सात बुँदे सहमतिमा सेना समायोजन सम्बन्धी सम्पूर्ण कुरा स्पष्ट भएको अवस्थामा माओवादीले अहिले आएर सहमति विपरीत पहिला दर्जा निर्धारण र ६ हजार ५ सय भन्दा बढी समायोजन रोजेका लडाकुहरुलाई के गर्ने लगायतका बखेडा झिकेर शान्ति प्रक्रिया रोकेको आरोप लगाउँदै शान्ति प्रक्रियालाई माओवादीले दुहुनो गाई बनाएको दावी गरे । उनले भने, 'सात बुँदे अनुसार लडाकुले सेनाको ब्यक्तिगत मापदण्ड पुरा गर्छ कि गर्दै न अहिलेनै यो पद र उ पद भन्न मिल्छ ?'उनले सहमति गर्ने र कार्यान्वयन नगर्ने माओवादीको पुरानै चरित्र दोहोरिएको भन्दै फाइदा हुँदा सम्झौता गर्ने र अरुबेला कार्यान्वयन नगर्ने माओवादी चरित्र स्पष्ट भएको दावी गरे । महतले माओवादी लडाकुको हैसियत सेनाको रुपमा नस्विकारिएकोले सेनाको समूगत समायोजन कुनै पनि हालतमा हुन नसक्ने ठोकुवा पनि गरे ।

माओवादीले गरेको सशस्त्र द्वन्द्व इतिहासकै सबैभन्दा महंगो बनेको दाबी गर्दै महतले २० अर्ब रुपैयाँ खर्च, विकास निर्माणमा अवरोध, लोकतन्त्रमा अवरोध र हजारौको ज्यानको मुल्य चुकाएको आरोप लगाए । उनले भने, 'अहिलेसम्म भएका कुनै पनि शसस्त्र द्वन्द्वमा सहभागीले यत्रो पुरस्कार पाएका थिएनन् ।' महतले युद्ध गरेबापत पैसा माग्नेले देशको लागि, परिवर्तनको लागि युद्ध गरेको नठहर्ने समेत ठोकुवा गरे । उनले प्रत्यक्ष निर्वाचित राष्ट्रपतीय पद्धति नभए शान्ति प्रक्रिया अवरुद्ध हुन्छ भन्नु शान्ति प्रक्रियालाई बार्गेनिङ कार्ड, ब्लाकमेलिङको उपकरण र कामधेनु गाई बनाउनु भएको भन्दै त्यो कांग्रेसको लागि स्वीकार्य नभएको स्पष्ट पारे ।

डा महतले सहिद गेटबाट त्रिभुवनको सालिक हटाउने निर्णय इतिहासलाई मेट्ने षड्यन्त्र भएको भन्दै ७ सालको आन्दोलनमा त्रिभूवनले साथ लिएकोले काग्रेसले उनलाई सम्मान गर्ने बताए । 'इतिहासलाई इतिहासकै रुपमा हेहिरनु पर्छ । इतिहास मेटन पाइँदैन,' उनले भने, 'नेपालमा राणाशासनको पनि इतिहास छ, त्यसलाई मेट्न पाइँदैन । रुसमा अझै जारका सालिक छन्, चीनमा छन् ।'

2012-01-08T20:52:00.000-08:00

धेरै लामो अबधि पछी म फेरी यस ब्लग मा उपस्थित भएको छु

माओवादी शिविरले ९ करोड ८६ लाख विद्युत महसुल बुझायो

2011-08-11T08:47:00.000-07:00

नवलपरासी, श्रावण २६
- सरकारी कार्यालयको सिको गर्दै लामो समयदेखि विद्युत महसुल नबुझाएको देशभरीको माओवादी लडाकु शिविरले ९ करोड ८६ लाख महसुल बुझाएको छ ।
ऊर्जा मन्त्री गोकर्ण बिष्टले सरकारी कार्यालयको लाइन काट्ने घोषणा गरेपछि झस्किएको माओवादी लडाकुको नेतृत्वले सबै शिविरको महसुल प्राधिकरण केन्द्रीय कार्यालयमा बुझाएको हो । सबै मुख्य शिबिर र सहायक शिविरहरुको गरेर कुल ९ करोड ४३ लाख बक्यौतामध्ये गत बैशाख सम्मको महसुलमा जरिवाना थप गरेर रकम बुझाएको हो ।
प्राधिकारण केन्द्रीय कार्यालयको लेखाशाखाले महसुल भुक्तानी भएको जानकारी दिएको हो । माओवादी शिविर नजिकका बिद्युत प्राधिकरण कार्यालयलाई प्राधिकरण केन्द्रीय कार्यालयले महसुल बुझाई सकेकोले तत्काल उनीहरुको लाइन नकाट्नु भन्ने मौखिक आदेश बुधवार दिएको हो ।
नवलपरासीस्थित माओवादी चौथो डिभिजनले बुझाउन पर्ने करिब ९९ सय लाख रुपैयाँ मध्ये अधिकांश रकम बुझाई सकेको जानकारी पाएको विद्युत प्राधिकरण क्षेत्रीय कार्यालय बुटवलका बरिष्ठ लेखा अधिकृत प्रेम पौडेलले जानकारी दिए ।
उनले शिविरको गत बैशाखदेखि यताको महसुल असुल्न बाँकी रहेको र त्यो पनि छिट्टै बुझाउने आश्वासन पाएको जनाए ।

पूर्व राजपरिवारले प्रयोग गर्दै आएको रत्न मन्दिरको पनि लाइन काटियो

2011-08-11T08:45:00.000-07:00

कास्की, श्रावण २६ -
विद्युत प्राधिकरण पोखरा शाखाले महसुल नतिर्ने पूर्व राजपरिवारले प्रयोग गर्दै आएको रत्नमन्दिर, हिमागृह र कल्पना सिनेमा हलको लाइन काटेको छ ।
बक्यौता बुझाउन अनुरोध गर्दा अटेर गरेपछि ०६७ पुष देखि रत्नमन्दिर र हिमागृहले १ लाख ३३ हजार र कल्पना सिनेमा हलले गत जेठदेखि ५१ हजार रुपैया महसुल नतिरेपछि प्राधिकरणले बिहीबार लाइन काटेको हो ।
अघिल्लो दिन करिव एक दर्जन सरकारी कार्यालयको लाइन काटेको प्राधिकरणले महशुल नतिरेका आधा दर्जन सरकारी कार्यालयका लाइन काट्ने भने पनि दोस्रो दिन भने रत्नमन्दिर र हिमागृहको मात्रै लाइन काटेको छ ।
महसुल नबुझाउने सेती बाँध, सेती डेस्लेटिन मेसिन, पश्चिमाञ्चल क्षेत्रीय अस्पताल कोल्ट स्टोर क्षेत्रीय अदालतको लाइन काट्ने भने पनि काटिएन । महसुल तिर्ने भनेर पत्र आएपछि अन्य कार्यालयको लाइन नकाटिएको प्राधिकरणले जनाएको छ ।

'प्रचण्डलाई नभने मैले कसलाई भन्ने ?' शुशिल कोईराला

2011-08-11T08:41:00.000-07:00

काठमाडौं, श्रावण १८ -
कांग्रेस सभापति सुशील कोइरालाले ठूलो पार्टीका नाताले शान्ति प्रक्रियाको जिम्मेवारी माओवादीमै रहेको दोहोर्‍याएका छन् ।
राजधानीमा बुधबार कांग्रेस मोरङ-काठमाडौं सम्पर्क मञ्चले आयोजना गरेको कार्यक्रममा माओवादी अध्यक्ष पुष्पकमल दाहालले 'जिम्मेवारी माओवादीकोमात्र हो भन्नु गलत हो' भनेपछि उनको यस्तो प्रतिक्रिया आएको हो ।
'माओवादी ठूलो पार्टी पनि हो र शान्ति प्रक्रियाको एउटा पक्ष पनि,' उनले भने, 'शान्ति प्रक्रिया सुरु गर्ने गिरिजाबाबु हुनुहुन्न, अब यसको नेतृत्व प्रचण्डजीले लिनुपर्छ भनेको हुँ, तपाईंलाई नभने मैले कसलाई भन्नु ?'
कोइरालाले पूर्वप्रधानमन्त्री गिरिजाप्रसाद कोइरालाले सुरु गरेको शान्ति प्रक्रिया दाहालले पूरा गरे उनलाई जनताले महान् नेता बनाउने उल्लेख गरे । 'गिरिजाबाबुले सुरु गर्ने काम पूरा गर्ने काम त गर्नुभो,' उनले भने, 'अब तपाईंले पूरा गर्नुस्, तपाईंलाई जनताले महान् नेता बनाउनेछन्, यस्तो अवसर कमै नेतालाई मात्र प्राप्त हुन्छ, जुन जिम्मेदारी तपाईंले पाउनुभएको छ ।'
दाहालले भाषण गर्दा लामो समय ताली बजेकोप्रति लक्षित गर्दै उनले भने, 'तपाईंले आश्वासन दिंदा त त्यति लामो समय ताली बज्यो, अब कमसेकम शान्ति प्रक्रिया पूरा गर्ने आँट गर्नुस् जसरी गिरिजाबाबुले हामीलाई, पार्टीलाई बिर्सिएर काम सुरु गर्नुभएको थियो ।'