கோவை கமல்

அண்டைநாட்டு மீனவனின் அழுகுரல் கேக்கலையோ ?

2015-02-11T14:16:00.002+05:30

அண்டைநாட்டு மீனவனின் அழுகுரல் கேக்கலையோ?

கடலில் வழி தெரியவில்லை என்று பதில் வருகிறது ...தொப்புள் கொடிகளின் வலைகளைக் கிழித்தாயே என்ற கூக்குரலுக்கு ! அனுதாப வார்த்தைகளில் குற்ற உணர்வு இல்லை !திருத்திக் கொள்கிறோம் என்று வரவில்லை ...பேசித் தீர்த்துக் கொள்ளலாம் என்கின்றனர் !

அடுத்தவன் சோற்றில் கை வைப்பது அழகல்ல ! நமக்கான எல்லைகளை நாமே வகுத்துக் கொள்ளவேண்டும் ! தவறு நடந்திருந்தால் காரணமானவர்களை எச்சரித்து சரியான வழியில் பாடு பார்க்கச் செய்தல் வேண்டும் !

மறுபடியும் இலங்கை ராணுவம் தொல்லை தர, நாமே காரனமாகிவிடக்கூடாது !

ஆமாம் ....பொங்கும் ஈழ வியாபாரிகள் ஏன் வாய்மூடி இருக்கின்றனர் ?
நேர்மை உறங்கக் கூடாது ! யாரிடம் தவறு இருந்தாலும் கண்டிக்கனும் !

தில்லி வாலா

பங்காளிகள் குலசாமி கும்பிடுவதைப் போல், கட்சிப் பொதுக்குழு மீட்டிங் நடத்துவதைப் போல் ...இருக்கப் போகுது தில்லி அசெம்பிளி !

பொழுது போகறதுக்கு பைவ் ஸ்டார் சாப்பிடும் ரமேஷ் சுரேஷ் உடன் மகேஷ் என மூன்று தாமரைக்கட்சி உறவு முறைகள் வேறு !

தொப்பித் தலையர்கள் இனி சாலையில் தர்ணா கிரானா என சுற்றாமல் , கூரைக்குக் கீழே இருந்து வேலை செய்யட்டும் ! நாடகம் போட்டது போதும் ..ஆக்ஷன் நடக்கட்டும் !

பெருமாள்சாமியின் பேயாட்டம் !

கருத்துச் சொல்லி கந்தலாகிப் போனார் ...நம்ம நடைப் பயிற்சி வீரர் பெருமாள்சாமி !
தேர்தலில் அடுத்தவன் மட்டையாகிப் போனதைப் பார்த்து ஆனந்தம் இருந்தால் அதை அடக்கமாக ரசிப்பது தான் முத்துன அரசியல்வாதிக்கு அழகு !

அதை விட்டுட்டு "சீரியல் மாமியார்" கணக்காக...வாய்க்கு வந்தபடி பேசியதை தமிழக் மக்கள் ரசிக்கவில்லை , என்பதை இணையத்தில் கழுவி ஊற்றியதை வைத்து அறிந்து கொள்வாராக ! நாம் எத்தனை முறை சாணிக் குளியல் போட்டோம் என்பதை மறக்க முடியுமா ?

உலகக் கோப்பை கிரிக்கெட்த் திருவிழா !

ஆஸி அணியின் 9வது பேட்ஸ்மேன் கூட அதிரடி ஆட்டம் ஆடும்போது , இந்திய அணியினரின் முன்னணி மட்டைவீரர்களும் திணறுவதைப் பார்க்கும்போது ..
எதையும் எதிர்பார்க்காத இந்திய ரசிகர்கள் , ஜாலியாக பொழுதை கழிக்க விருக்கிறார்கள் !

நம்ம ஆட்டக்காரங்க கவனம் எல்லாம் ஐபிஎல் 8 ன் மீதே !
நமது கவனமெல்லாம் டிவியில் காட்டப்படவிருக்கும் ஆஸி நியுசி அழகுப் பெண்கள் மீதே !

ஸ்ரீ ரங்கா யாருக்கு பொங்கல் தருவார் ?

கேட்டவருக்கு தருவார் ! மற்றவருக்கு பேதி மருந்து தருவார் ! இந்தத் தேர்தலால் புதிதாகக் கட்டப்பட்ட "யாத்ரி நிவாசம் " பிரபலமாகி விட்டது ! கோவிலுக்கு போகவர 60ரூ ஆட்டோ வாடகை ..இப்போது செயல்படும் மெஸ் இன்னும் எத்தனை நாட்களுக்கோ ?

வெயில் அதிகரிக்கத் துவங்கி விட்டது !
ஏசிகள் உறுமத் துவங்கி விட்டன!
கரண்டுத் தொல்லை பயமுறுத்துகிறது !

அதோ ..வருகிறதே வசந்தகாலம் ..இள வேனிற் காலம் !

பேச்சு... பேச்சாகத்தான் இருக்கணும்!

2014-07-17T13:37:00.000+05:30

பேச்சு... பேச்சாகத்தான் இருக்கணும்!
பேசி முடிச்ச பின்னாடியும்!

பேசறதுக்கு முன்னாடி பல வகை பிரயோகங்கள் முனைப்புகள் இருக்கலாம்..
இல்லாமலும் இருக்கலாம்..ஆனா பேச ஆரம்பிச்சுட்டா..பேச்சோடு மட்டுமே முடிக்கணும்!
நாளைக்கு மறுபடியும் பேசிக்கிறது போல ...நம்ம பேச்சின் போக்கு அமையணும், அமைச்சுக்கணும்!
அந்த பக்குவம் நமக்கு இல்லைன்னா...பேசறதுக்கே உட்காரக் கூடாது!

விவாதம்னு ஏதாவது வந்தால்...முதல்லே விவாதம் செய்ய வந்த ஆளைப் பாருங்க...அவங்களோட தீவிரத்தன்மையை முதல்ல கணிச்சு வெச்சுக்கங்க! வார்த்தைகளை எண்ணி எண்ணி பேசுங்க! கோபம் வரும்..வந்தா வார்த்தைகள் சிதறும்! கோபத்தைக் கட்டி மேய்க்கிறதுல தான் நம்ம வெற்றி அடங்கி இருக்கு!

வட இந்தியர்கள் பொதுவாக வணிகர்கள்..பேச்சே சத்தமாக, சண்டைக்கு வருவது போல இருக்கும்! ஆனா...மணிக்கணக்கா பேசினாலும், பேச்சோடு முடிந்து போகும்! அதுக்கு மேல சேதாரம் இருக்காது!

ஆனா..நம்மாளுக பேசிக்கிட்டா காயத்தோடு தான் (மனசு...சிலசமயம் உடம்பும்) எழுந்திருக்காங்க! பக்குவம் வரணும்!

ஒரு கட்டதுக்குள் எல்லைக்குள் இருந்து பேசறவங்க கிட்ட..நீங்க என்ன தான் அன்பாக பணிவாக பேசினாலும் எடுபடாது!

பேச்சு ஏன் தோல்வி அடையுதுன்னா...நாம நெனைக்கிறது பேசறது மட்டுமே சரின்னு, ஒரு தரப்போ இல்லை ரெண்டு மூணு தரப்பிலும் நெனச்சிட்டா போதும்!

என்ன பிரச்சனை ஆனாலும் கடைசியா முடிக்கப்படறது பேச்சு வார்த்தைகளில் தான்! சோ...அந்த பேச்சு வார்த்தையே பிரச்சனை ஆகிவிடக் கூடாது!பேசறவங்க எல்லோரும் எல்லா நேரத்துலயும் ஒரெ மாதிரி பேசறது இல்லே! பேச்சு திசை மாறிடுச்சுன்னா...பேச்சை முறிச்சுக்கக் கூடாது! நேரங்காலம் தள்ளிப் போட்டு , இடத்தை மாற்றி பேசலாம்!

இல்லை .ஆசையை கோபத்தை நம்ம ஆதங்கத்தை, இழப்பை,எரிச்சலை வடிகாலாக்கியேத் தீரணும்னால்...நேரடியா முகத்துக்கு எதிராக பேசறதை தவிர்க்கணும்! கவுண்டமணிஅண்ணன் நாட்டாமைலே சொல்ற மாதிரி..செல்போன் வழியாக பேசிக்கறது கொட்டறது நல்லது!

கடைசியாக ஒன்று! அக்கம்பக்கம் பார்த்து ஆளைப் பார்த்து நேரங்காலம் வசதிகளைப் பார்த்து ...பேசறது நல்லது! அதே மாதிரி நம்மளை பாதிக்காத விஷயத்துக்கு, பேச்சை வளர்ப்பது சரியல்ல!

ஆத்திரம் கொண்டவனிடம் அமைதியாகவே பேச வேண்டும்!

முட்டாளை பேச விட்டுவிட வேண்டும்!
அறிவாளிகளை பேச வைக்க வேண்டும்!

எப்பங்க பேசலாம்?

உயிரைக் காட்டுவாயா?

2014-05-04T12:29:00.001+05:30

ஏதோவொரு கணத்தில், எல்லோருள்ளும் இந்தக் கேள்வி எழாமல் இருந்திருக்காது!
அதுவும் ஒரு மரணநிகழ்வில், சோகத்தின் அருகில் துணை நிற்கும் போது!

சிலமணி நேரம் மனிதத் தன்மையின்...உச்சத்தில் நாம் உலவும் காலமும் அதுவே! மறுபடியும் குளித்து முடித்த பின்பு ...மீண்டும் பழைய நிலைக்கு அதாவது சகஜநிலைக்கு வந்துவிடுகிறோம்!

ஏதொ ஒரு துளிர்ப்பில், பிறப்பில் கூட...கேள்விகள் மெல்ல தலை தூக்கும்!

எங்கே வந்தாய்...
எங்கே செல்கிறாய்...
உயிரே?!

ஒன்று சேரும்போதும் விலகும் போதும் இதே உணர்வுகள்!

உயிர் எங்கில்லை...அசையும் அனைத்திலும் இருக்கிறது...!.அசையாதவைகளின் மௌனசாட்சிகளோடு !

எந்த வடிவில் இருக்கிறது? எப்படி இருக்கிறது?
ஏன் வருகிறது? எங்கே போகிறது?
பதில் வேண்டுமா..?

அதோ தெரிகிறது பார் அந்த உயரத்தில்..
மலைமுகட்டில்...உச்சாணியில்!
போ..போ ..உடனே போ!
மெல்ல எழுந்து போ..நடந்து போ!
முகட்டிற்கு ஏறிப்போ!

கண் இருட்டுகிறதா...
நாக்கு வறளுகிறதா...
கால் தள்ளாடுகிறதா..
பூமி நழுவுகிறதா...
தலை சுற்றுகிறதா...
மூச்சு இறைக்கிறதா?

உச்சத்தை அடைந்து விட்டாயா...
சுற்றும் முற்றும் பார்
என்ன தெரிகிறது
எல்லாமே தெரியும்...!

ஒரு நியதி தெரியும்
கட்டுப்பாடு தெரியும்
இயக்கம் தெரியும்
உண்மை புரியும்!

அமைதி தெரியும்

ஆதில் அடங்கி இருக்கும்

ஆர்ப்பரிப்பு உணரும்!

இப்போது

இதயத்தின் படபடப்பு குறைந்திருக்கும்

வழியும் வேர்வை அடங்கியிருக்கும்

சுவாசம் சீராகி இருக்கும்...

இப்போது புரிந்திருக்குமே...ஆம் அதே தான்!

குளிராக உள்ளே சென்று, நம்மை இயக்கி

வெப்பமடைந்து வெளியேறுகிறதே அதே தான்!

பஞ்சபூதத்தின் பிரத்யேக அம்சமான..

அந்த வாயுவே தான்

காற்றே தான் !

அண்டவெளியில் இருக்கும்

அதுவே பரமாத்மா!

நம்மில் வந்தால்

அதுவே ஜீவாத்மா!

சுப்புசாமி கோபுசாமி !

2014-01-27T19:19:00.002+05:30

பொறந்த குழந்தை...அஞ்சு வருசமானதும்

ஒண்ணாம் வகுப்பில் சேர்க்கணும்!

சமைஞ்சபையனை .. .அஞ்சு வருஷமாச்சும்

பொத்திபொத்தி வளக்கணும்!

மாஸ்டர் டிகிரிக்கு...அஞ்சுவருஷமாச்சும்

காலேஜுல சேர்ந்து படிக்கணும்!

சுதந்திர தேசம்னா..அஞ்சுவருஷமானதும்

தேர்தல் நடத்திப் பார்க்கணும்!

நாலு மாசத்துல தேர்தல் வரப்போது ங்கறதை

நாலு மாசத்துக்கு முன்னாடி இருந்தே..

மீடியாக் காரன் கதறிட்டு நாட்டுக்கு

உடுக்கை அடிச்சு உலுப்பி சொல்லிட்டிருக்கான்!

மார்ச் மாசத்துல முடியுற நிதிஆண்டு வருமானவரிக்கு. ..

செப்டம்பர்லே அட்வான்ஸ்டேக்ஸ் கட்டுற கதையா,

2014 எலக்ஷனுக்கு, 2013லேயே

கூட்டணி கும்மாளங்களுக்கு, கும்மாங்குத்துக ஆரம்பிச்சிட்டாங்க!

தேர்தலுக்கு நாலு மாசம்..அதுக்கப்புறம் ரெண்டு மாசம்..நமக்கெல்லாம் நல்ல செய்தித் தீனி, கருத்து திணிப்பு எல்லாம் கிடைக்கும்! அதென்ன தேர்தலுக்கு அப்புறம்..ஆமாங்கண்ணோவ்! யாருகிட்ட மெசாரிட்டி இருக்கப் போவுது?

யாரோ..ஜெயிக்கட்டும்..ராசாவாகட்டும், நமக்கு அது கவலை இல்லை, இன்ட்ரஸ்டும் இல்லே! எப்படியும் "பெவிகால் ஜாயிண்ட்"கள் தான் ஆளப் போவுது...இதுல நமக்கு எதுக்கு சைடு பேக்கிங்?(அணி ஆதரவு)

கண்ணை மூடிட்டு...நம்ம சனநாயகக் கடமைக்கு, சாவடிக்குள்ளே புகுந்து, பட்டனை ஒரே ஒரு தடவ,தடவிட்டு வந்துடணும்! அதுக்கு சாட்சியா..ஆபீசருங்க பொட்டு வெச்சு, மரியாதை செஞ்சு அனுப்புவாங்க!

என்ன உளறிட்டு இருக்குறே...சொல்ல வந்ததை சுருக்கால சொல்லிட்டு போய்யானு, நீங்க கடுப்பாகிறது எனக்கு கேக்குது!

இன்னும் ஆறு மாசத்துக்கு, நடக்குற அரசியல் கூத்துக்கதைக்களுக்கு எல்லாம் "ஜெர்க்" ஆகி..யாருகிட்டயும் விவாதம்,சச்சரவு எல்லாம் செஞ்சுக்காம...ஜாலியா எடுத்துக்கிட்டு எஞ்சாய்" செஞ்சுக்கிடுங்க...என்ன நாஞ்சொல்றது?

ஒவ்வொரு தேர்தல்லேயும், ஏமாளியாக்கப்படற நம்ம கோபுசாமி அண்ணன்...இந்த தடவ, வெளியூர் ஆட்டக் காரங்களோட வேகமா போயி, காண்ட்ராக்ட் போட்டுட்டார்! முதல்ல எல்லோரும், சந்தோசப்பட்டாங்க..பெருசா விமர்சிக்கல!

அப்புறம் மெதுவா..ஆரம்பிக்கறாங்க மீடியாக்காரங்க! என்னான்னு?

கோபுசாமி அண்ணே...அந்த வெளியூரு ஆட்டக்காரங்க, மடியிலே சுப்புசாமின்னு" ஒரு பூனைய செல்லமா உட்கார்ந்துட்டு இருக்கே...பாக்கலையா?

அதை கிட்ட வெச்சுக்கிட்டு, எப்படி "தேர்தல் சகுனம்" பாத்துக்கிடுவீங்கனு, கேள்வியா கேக்கறாங்க..சீண்டிப் பாக்குறாங்க!

எப்படி சமாளிக்கப் போறாரோ..நம்ம கோபுசாமி அண்ணன்! இதுக்கு இடையிலே, நம்ம அரேபியசாமி கட்சிக்காரங்க வேற..கோபு அண்ணனை நெருக்குறாங்க! கோபுஅண்ணன் புதுசா கண்டிராக்ட் செஞ்ச ஆளுக, ஆட்டக்காரங்க மட்டுமில்லையாம்! பில்டிங் டெமாலிஷும் சைடு பிஸினஸாசெஞ்சிட்டு இருக்காங்களாம்...அதனால அவங்களோட நீங்க சேரக்கூடாதுனு சொல்றாங்க!

ஆனாப் பாருங்க..நீங்க அவங்களோட சேரலைனா, எங்களோட 13 சத வாக்குகளும், உங்களுக்கே, அப்படின்னு மட்டும் சொல்ல மாட்டாங்களாம்!

கோபு அண்ணே..சிறந்த பார்லிமெண்டேரியன், சிறந்த பேச்சாளரான நீங்க...கண்டிப்பா தேர்தல்லே நிக்கணும்! கூட்டணி இல்லைன்னா யாராலும் ஜெயிக்க முடியாது, அரசாளமுடியாதுனு வந்துட்டப்புறம்...நீங்க ஒண்ணும் பயந்துக்கிடாதீங்க!

கண்ணாலம்னு..போயாச்சுனா, அங்கே எல்லா "கவிச்சிக்"காரங்களும் வரத்தான் செய்வாங்க! குறுக்கநெடுக்கா திரிவாங்க! காதுல படறமாதிரி குசலம் பேசுவாங்க! வேடிக்கையிலும்,மோளசத்தத்திலேயும் கவனத்தை வெச்சு, சபையில மருவாதி வாங்கிக்கணும்!

சுப்புசாமி அண்ணே! உங்களுக்கு கவர்னர் போஸ்ட் கிடைக்குமுங்க...வாலை கவனமா சுருட்டி வையுங்க! வாய் பதனம் கட்டாயம்!

இப்போ போயிட்டு நாளான்னிக்கு வர்றனுங்கோ! கொசுக்கடி தாங்க முடிலை..!

ஆடையின்றி பிறந்தோமே...!

2014-01-08T13:29:00.000+05:30

தொல்லையின்றி பிறந்தோமா...?!

பிறக்கையில், வளர்கையில் தாய்க்கு தொல்லை தந்தோம்!

கல்விக்கு தந்தையையும்,
கலவிக்கு துணையையும்,
வளமாய் வாழ உடன்பிறப்புகளையும்,
வெளியே உறவுகளையும்,
வயோதிகத்தில் பிள்ளைகளையும்...
நோகடித்து விடுகிறோம்!

மழையின்றி சபிக்கப்பட்ட தமிழ்நாடு!

ஆயிற்று இரண்டு வருடம்...மழைப் பொழிவைக் கண்டு! அவ்வப்போது சிறு தூறல்கள் வந்து ஆவலைக் கிளப்ப முயன்று தோற்று விட்டன!
விவசாயி விட்டு விட்டான்....நம்பிக்கையை அல்ல! விவசாயத்தை!
30ல்..20 மாவட்டங்களில் தை மாசியிலேயே தண்ணீர் பஞ்சம் வந்துவிடும் போலிருக்கு!
வாழ்க எல் -நினோ ! இயற்கையின் சித்து விளையாட்டு!

ஆயாசப்படுத்துகிறது கூட்டணி அனுமானங்கள் !

தேர்தல் வருடம்...! மீண்டும் அதே முகங்கள்..அதே ஆசைகளுடன்..ஆனால் முகமூடிகளை வேஷங்களை கோஷங்களை சற்று மாற்றி போட்டு !
அதிகார வெறி... பணவெறி இரண்டும் கூட்டணி அமைத்து, சாதி/மத வெறியாக பரிணமித்து உள்ளது!

எவன் எவனோட சேர்ந்தா ...நமக்கென்ன!
எவன் கிட்ட இருந்து எவ்வளவு ஓட்டுலஞ்சம் கிடைக்கும்...இலவசம் எவ்வளவு கிடைக்கும்..இது தாண்டா மக்கள்!

புகை விலகியதாம்...இளைஞர்களை விட்டு!

33 லிருந்து, 23 சதமாகக் குறைந்துள்ளதாம்..இந்த பத்தாண்டில்..இளைஞர்களிடையே புகைக்கும் பழக்கம் ! வாழ்த்துக்கள்...ஒருவேளை பெண்சிநேகம் கிடைப்பது எளிதாகிப் போனதால், இது நடந்தேறி இருக்குமோ? எதுவானால் என்ன..நல்லது நடந்தால் சரி!

ஆம் ஆத்மி..

இந்திப் பெயரில் ஒரு இயக்கம்! அவசரத்தில் பிறந்து..அதிரடியாக வளர்ந்து வருகிறது இதுவரை விசில் அடிச்சான் குஞ்சுகளுக்காக அதிரடி பேட்டிங் செய்துவரும் கேஜரிவால், அடங்குவாரா இல்லை அடக்கப்படுவாரா..இல்லை விஸ்வரூபம் எடுப்பாரா?

எதாவது ஒரு மாற்றுசக்தி வேண்டும்...நிதானித்து நீண்ட கால திட்டங்கள் அடிப்படையில் முயற்சிப்பது நலம்! கூடவே பிரகாஷ் காரத்தையும் இணைத்துக் கொள்ளலாம்..அவர் சீன அபிமானத்தை விட்டு வந்தால்!

நடிகனுகளுக்காக சண்டை!

ஓயல..ஓயல..ஓயாது! அஜித்/விஜய் படங்கள்..டீசர்கள்..டிரெயிலர்கள்..தியேட்டர்கள் என அடிச்சிக்கிறானுகோ..! 70 அடிக்கு கட் அவுட், பாலாபிஷெகம்..அட ராமசாமி..எங்கேப்பா இருக்குறே!

எந்த ஆக்டரு படத்துக்கு, பிளாக்லே அதிக விலைக்கு டிக்கெட் விக்குதுனு எல்லாம் பேசிக்கிறானுவோ...கெரகம் பிடிச்சவனுக!

நாய்க்கு பட்டுக்குஞ்சம்னு பேராம்!

கொடூரன் ராஜபட்சிக்கு..பாலஸ்தீனத்தில் பாராட்டு, விருது, வீதிக்கு அவனோட பேரு! இதுவரைக்கும் இஸ்ரேல் தான் இலங்கைக்கு உதவுது..அப்படிங்கிற அவப்பெயரை துடைக்க, தமிழ் மக்களைக் கொன்னது சரிதான்னு, முஸ்லீம் நாடும் கிளம்பிடுச்சு!

பாலஸ்தீனத்துக்கு எந்திரிச்சு நிக்கவே வக்கில்லையாம்...இதுலா இலங்கைக்கு சப்போர்ட்டு வேற! நல்ல இருங்கடா?!

ராகுலை பிரபலப்படுத்த காங்.திட்டம்!

கோடி கோடியா செலவு செய்யப் போறாங்களாம்! தங்கச்சியம்மா பிரியங்காளுக்கு வேற சலங்கை கட்டி, மேடையில இறக்கிவிட்டு இருக்காங்க!

பையனை பிரபலப் படுத்தொணும்னா ஒரே வழி..டெய்லி ஷேவிங் செய்யச் சொல்லுங்க...ஒரு கண்ணாலத்தை செஞ்சு வெச்சீங்கண்ணா..பக்குவம் வந்துடும்! அஞ்சு வருஷம் ரெஸ்ட் எடுத்துட்டு மறுபடியும் வாங்க! பை பை..கலாய்ச்சி பை!

வைகோ அண்ணாச்சி!

அவரும் எத்தனை நாள் ..நடந்து கிட்டே இருப்பாரு!? பாஜகவோட நின்னு ஜெயிக்கணும்! மத்திய மந்திரி ஆகணும்! இலங்கையை மிரட்டணும்! கனவு காண்றதில் தப்பில்லை ..அது எங்க இஷ்டம்! கல்லைக் கீழே போடுங்க!

சர்க்கரைப் பொங்கல் செய்யும் முறை ..பாரம்பரிய முறையில் !

பொங்கல் பரிசு!

அடுத்த வருஷமாவது..குடும்பத் தலைவருக்கு குஷிப்படுத்த ஒரு குவாட்டரும், குடும்பக் குழந்தைகளுக்கு சத்து கூட்ட ஒரு கோழியும் கொடுத்தா நல்லா இருக்கும்!

அதிகாரம் கவனிக்குமா?

எத்தனை நாள் தான் ஒரே ஸ்டைல்லே எழுதறது?

மாற்றம் தேவை..அதனால் ஒரு கன்னி முயற்சி !

நல்ல கருத்தா சொன்னீங்கனா...சந்தோசம்,மகிழ்ச்சி!

சாராயமும் புகையும் எண்ணெயுமே ...ஸ்வீட் ராஸ்கல்ஸ்!

2013-11-23T15:24:00.000+05:30

உலகின் இரண்டாவது புராதானத் தொழில்... சாராயக் கண்டுபிடிப்பு தான் ! புகை கூட நெருப்பு கண்டு பிடிச்சதுக்கு அப்புறம் தான் வந்திருக்கும்!

அழுகுன பழக்குவியல்களில், தென்னைப்பூக்களில் இருந்து நொதிச்சு வந்த ரசத்தைக் ருசித்துப் பார்த்ததில் இருந்து சாராயம் பிறந்து விட்டது!

சோமபானம் சுராபானம் எல்லாம் புராண மதுபானங்கள்...

கள்ளு சாராயம் எல்லாம் புராதன பானங்கள்!

நம்மாளுகளோட கண்டுபிடிப்பை பாருங்க..!

கரும்பு மொலாஸஸில் இருந்து தயாரிக்கப்படும் ரம் போன்ற வகைகள் சாப்பிட்டால் "சுகர்" வந்துடுமாம்!

மால்ட்டில் இருந்து பெறப்படும் விஸ்கி சாப்பிட்டால், கொலஸ்ட்ரால் வருமாம்!

ஜின்.,வோட்கா சாப்பிட்டா..அல்ஸர் வருமாம்!

திராட்சை ரசமான "பிராந்தி" சாப்பிட்டா மட்டும் இதயத்துக்கு நல்லதாம்!

எல்லாமே கெடுதல்கள் தான்...ஆல்கஹால் தான்! விலை கம்மியான சரக்குகளில் தரம்குறைவான ஆல்கஹால் கலந்திருக்கும் அவ்வளவுதான்!

மது குடிக்க வேண்டாமுனு சொல்ல வரலை! சொன்னாலும் உதைக்க தான் வருவாங்க! எப்படி டேமேஜ் கம்மியா, சாப்பிடலாமுனு சில டிப்ஸ்!

1. கூட்டம் சேர்ந்துட்டு அடிப்பதைக் குறையுங்கள்

2. ஒரு சில நண்பர்களுடன் மட்டுமே "குடிநட்பு" வெச்சுக்கோங்கோ

3. குறைஞ்ச பட்சம் 15 நாளுக்கு முன்னாடி சியர்ஸ் சொல்லாதீங்க!

4. நல்லா "டைலூட் செஞ்சுக்கோங்கோ! 1:4

5. ஒரு மணி நேரத்துக்கு ஒரு லார்ஜ் தான்,

லிவர் ஃப்ரெண்ட்லி ஆல்கஹால் ட்ரிங்கிங் !\

6. மேக்ஸிமம் 3 லார்ஜ்கள், ஒரு நாளைக்கு!

7. முட்டை வெள்ளை, பாதாம், பிஸ்தா, சாலட்கள்,

பழங்கள் சைட் டிஷ் என சாப்பிடுங்கள்!

ஆல்கஹால் ஒரு "ஸ்ட்ரெஸ் பஸ்டர்" தான்! ஆனால், அதிகமாச்சுனா லிவரை..ஹார்டை பர்ஸ்ட் செஞ்சிடும்!

போன தலைமுறையை விட ...இந்த ஜெனரேஷன்ல ஸ்மோக்கிங்" கம்மிதான்! மெயின் ரீஜன்..குடலைப் புடிங்கி எடுக்கத் தோணும்..நாத்தம் தான்! அப்புறம் இன்னொரு முக்கியாமான விஷயம்...கிஸ்ஸிங் அதிகமானது தான்!

ட்ராவலிங் ஜாப்களில் இருக்கும் நண்பர்களின், பொழுது போக்கே இதுதான்! அவங்க தான் முயற்சி எடுக்கணும்!

ஆம்பளைக, பொம்பளைகன்னு வகை தொகை இல்லாம, விரும்பி சாப்பிட்டு நோய்கள் வாங்கிக்கிடறது..."டிரான்ஸ் ஃபேட்" அதிகம் இருக்கிற எண்ணெயால் செய்யுற, ஃபாஸ்ட்ஃபுட்"கள் தான்!

பத்து மில்லி எண்ணெயில்ல் சுமார் 100 தேவை இல்லாக் கலோரிகள், உடம்புல ஏறுது! உழைக்க மறந்தோம்னா கொழுப்பா மாறுது!

அளவா எடுத்துக்குவோம்...!

அருமையா வாழ்வோம்...!

100.அகண்ட திராவிடம் ! சீமாந்திராவை தமிழகத்துடன் இணைத்து விட்டால்..!

2013-10-08T12:24:00.000+05:30

சுப்ரமணியம் சுவாமியை தமிழக அரசியலில் தவிர்க்க முடியாது! யார் விரும்பினாலும் விரும்பாவிட்டாலும், அவர் பேச்சும்,வேலையும் ஏதாவது ஒரு மாற்றத்தை உண்டு பண்ணிக்கிட்டே இருக்கும் !

அடுத்து நம்ம "சோ" ராமசாமி சார் ! பல முகங்களைக் கொண்ட அவர், மறைமுகமாக எடுக்கும் அவதாரம்.."பவர் பாலிடிக்ஸ்" ! இவர் என்ன செய்யப் போறேன்னு பேச மாட்டார்..! என்ன செஞ்சார்னு தான், பேசப்படும் !

புதுசா தமிழருவி மணியன்..கிளம்பி இருக்கார் ! தமிழகத்தில்
மூன்றாவது அணி அமைச்சே தீருவேன்னு, ஒத்தைக்காலில் சுழல்கிறார்...விமரிசனங்களைக் கண்டு கொள்ளாமல்!

எப்பவாச்சும் வாய்ஸ் கொடுக்கிற டீம்லே...ரஜினி சார்,
வீரமணி அய்யா, தோழர் தாபா, மருத்துவர் அய்யா ...
இப்படி நெறைய தலை'ங்க,பெரிய தலைக்கட்டுக, இருக்காங்க!

இவங்க எல்லோரும் நமக்கு வாத்தியாருக மாதிரி!
எல்லோரையும் கும்புட்டுகிட்டு, சிலபல கருத்துகளை,
தமிழ் அரசியல் உலகத்துக்குக் கொடுக்கலாமுனு இருக்கேன்!

பக்கத்து ஸ்டேட் ஆந்திராவே.., பத்திட்டு எரியுது, பதறுது..
மாநிலப்பிரிவினை பிரச்சனையாலே !

நாம ஓரத்துல குந்திக்குனு, பல்லு குத்திக்குட்டு இருக்காம...
நோம்பி கும்பிட நேரம் வந்தாச்சு !
ஏன்னா...இது ஒரு திராவிடப் பிரச்சன'ங்கிறது ..
ஞியாபகத்துலே வரணும்!
திராவிடத்துலே நாம தானே
அப்பா...அண்ணன்...அய்யா எல்லாமே !

நாமளே சும்மா இருக்காலாகுமா?
அப்புறம் எப்படி திராவிடத் தலைமைன்னு
சொல்றது?

இது ஏதோ கட்சிக்காராளை சுதி ஏத்துறதுன்னு நீங்க நெனைச்சா..
கம்பெனி அதுக்கு பொறுப்பாகாது!
ஒவ்வொரு தமிழனும் திராவிடத் தலைவன் தான்!
மறுக்கமுடியாத உண்மை!
ஏன்னா...திராவிடம் என்கிற வார்த்தையை தமிழரைத் தவிர,
வேறு எந்த ஸ்டேட் மக்களும் 'யூஸ்" செய்யறதில்லை!
ஸோ...எல்லோரும் இந்நாட்டு மன்னருகங்கிறது மாதிரி...இப்படி!

இந்த ஆந்திராக் காரனுக கிட்டே, நமக்கு தீர்க்க வேண்டிய

கணக்கு ஒண்ணு, 1950களில்லே இருந்து இருக்கு !

மொழிவாரி மாநிலம் பிரிச்சப்போ, ஒவ்வொரு ஏரியாவா

மதராஸ் ஸ்டேட்லே இருந்து,

ஆல் ப்ளடி அதர் லேங்குவேஜ் திராவிடியன்ஸ்,

கவர்ந்து கிட்டுப் போயிட்டாங்க !

அப்போ..திஸ் பேட் ஆந்திரியன்ஸ் செஞ்ச

கழிச்சடைத் தனம், கொஞ்சநஞ்சமில்லை !

மதராஸ் மனதே'ன்னு, பொட்டி ஸ்ரீராமுலுன்னு ஒருத்தர்...

ரியலா உண்ணாவிரதம் எல்லாம் இருந்து, செத்துப் போனார்!

அப்பவும் இப்படித்தான் ஆந்திரேயன்ஸ்

ரொம்ப கந்திரித் தனமா ஆடுனாங்க!

நம்ம ராஜாஜி அய்யா தான்,...

"குறை இன்றும் இல்லை...மறை மூர்த்திக் கண்ணா'னு,

பெருமாள் கிட்டே சொல்லிட்டு, திருப்பதியைக் கொடுத்திட்டு,

மதராஸை நேரு கிட்டே பேசி, வாங்கிட்டு வந்தார்னு

பெரிசுக சொல்லிட்டு இருப்பாங்க!

அவங்க அடிச்சுகிட்டு, இருக்கும்போது தான் நமக்கு சான்ஸ்!

திராவிடப் பெருசுக யாராச்சும்..வாயத் தொறந்து பேசியே ஆகணும்!

அகண்ட திராவிடம் அமைக்கறதுக்கு, இதுவே நல்ல வாய்ப்பு!

எனவே, "

தெலுங்கானா பிரிவினையைப் பற்றி,

கவலை வேண்டாம் ..

சீமாந்திரக் கூடப் பொறப்பே !

அண்ணனோடு இணைந்து கொள்ளுங்கள்"

என 32 சானலிலும்..அறைகூவல் விடுக்க நேரம் வந்துடுச்சு!

கைவிட்டுப் போன திருப்பதியும் நமக்கு கிடைச்சிடும் !

மெட்ராஸ்க்கு முதலீடுகள் மேலும் அதிகரிக்கும்!

ரியல் எஸ்டேட் பெருகும்!

தென் பெண்ணை, கிருஷ்ணா..ஏன் கோதாவரித்

தண்ணீரெல்லாம், நமக்குக் கிடைக்கும்!

மதராஸ் மனதே எனும் அவர்களின், கனவும் நிறைவேறும் !

கீழ்பாக்கத்துல வீடு பார்த்துட்டான் போலன்னு,

நீங்க நெனைக்கிறது எனக்கு கேட்குது!

என்ன செய்ய...100 வது பதிவு போடணும்னு,

நானும் நம்ம வாசகர்கிட்ட ரொம்ப நாளா,

கருத்து கேட்டுகிட்டே இருந்தேன்! யாரும் கண்டுக்கலை..

இப்போ படிச்சுட்டு அனுபவியுங்க !

100 தடவை டைப் அடிச்சதுக்கே ..இந்த ஆட்டமான்னு
கேக்காதீங்க ..பாஸ்! நம்மகிட்டெ அறிவுசரக்கு
அவ்வளவுதான் என்று செருக்கோடு கூவிக் கொல்கிறேன்!

ஆதரவளித்துக் கொண்டிருக்கும் அனைத்து பெரியவர்களுக்கும்,
கோவை ப்ளாக்கர்ஸ் அணியினருக்கும்,
படித்தும் படிக்காமலும் செல்லும் பார்வைநட்புகளுக்கும்...கும்புட்டுக்கிறனுங்கோவ்!

ஆந்திராவை மூணா உடைச்சா..அடுத்த கோரிக்கை தமிழ்நாடு ?

2013-07-12T12:12:00.001+05:30

அவ்வப்போது அடக்குமுறை தண்ணீர் ஊற்றி

அணைத்தாலும் ,

தெலுங்கானா தீக்கங்கு முழுதும் அடங்காது

உள்ளே எரிந்து கொண்டே

இருக்கிறது..

எரிமலை போல !

ஏன் மாநிலப் பிரிவினைக் கோரிக்கை எழுந்தது

என்பது எல்லாம் பழங்கதை !

இரண்டாகப் பிரிக்கலாமா என கமிஷன் போட்டு ,

ஆராய்ந்த போது ,மூன்றாகப் பிரிக்கலாம்

என ஆலோசனை சொல்லப்பட்டு

செம ரகளை தான் போங்கோ !

ஹைதரபாத் தலையாக தெலுங்கானா ...

விஜயவாடா தலைஊராக சர்க்கார்..

கடப்பா தலைநகரமாக ராயலசீமா ..

இந்தி பேசும் வடமாநிலங்களை எளிதில் பிரித்தனர் !

ஆந்திரா விஷயத்தில் தடுமாறுகின்றனர் ..!

செய்திகள் வரும் போக்கைப் பார்த்தால் ஆந்திரமாநிலப்

பிரிவினை இறுதி கட்டத்தை நெருங்கி விட்டதைப் போல்

தோன்றுகிறது ! எந்த நேரத்திலும் அறிவிப்பு வரலாம் !

ஆந்திர மாநிலப் பிரிவினை செய்தி உறுதி ஆனாலும் ,

செயல்படுத்த சிலபல ஆண்டுகள் ஒதுக்குவார்கள் என

நம்பப்படுகிறது !

ஆந்திரா பிரிவினை உறுதி என்றால்

அடுத்து மேலும் சில மாநிலங்கள் வரிசையில் உள்ளன !

முதலாவது ...மராட்டியம்

பிறகு குஜராத் ....ம்ம்ம் நம்ம ஆளுக

சும்மா இருப்பாங்களா ..சேர்த்திகுவோம் !

குஜராத்தில் சௌராட்டிரம் மற்றும் மராட்டியத்தில் விதர்பா

என ஏற்கனவே பேச்சு ஓடிட்டு இருக்கிறது !

இங்கேயும் சிலபல கட்சித்தலைங்க்க வடக்கு தெற்கா

பிரிக்கணும் னாங்க ! கொங்குநாடு வேணும் னாங்க !

அவங்களுக்கு எல்லாம் உடனே அவசர வேலை வந்திடும் !

இருக்கவே இருக்கு காரணங்கள் :

1. எங்கள் பகுதி முன்னேறவில்லை !

2. எங்களுக்கு ஆட்சியில் அதிகாரத்தில்

பங்கு கிடைப்பதில்லை !

3. இரண்டாக வேண்டாம் ..முன்றாக பிரி !

போராட இங்கு விஷயமா இல்லை ..!

இது எல்லாம் நடந்திடும் னு சொல்லலை !

நடக்க வாய்ப்பு இல்லைன்னு சொல்ல முடியலை !

அப்படி இங்கே பிரச்சனை ..கோரிக்கை எழுந்தால்

எவ்வாறு விஷயங்கள் ஓடும் என சில கற்பனைகள் !

1. சக ட்விட்டர் சொன்னது :

காவிரிக்கு வடக்கு, தெற்காக பிரிப்பது !

2. சேர ,சோழா , பாண்டிய , பல்லவ நாடுகள் !

3. வன்னிய,கொங்கு , பாண்டிய நாடுகள் !

அனுமானங்கள் சிலசமயம் உண்மையாக

நடந்திடில் ரசனை மிக்கதாய் மாறிடும் வாய்ப்பு !

பொறுத்திருந்து பார்ப்போம்.. என்ன தான் ஆகும் என்று !

ஆடி மாத வாழ்த்துக்கள் !

எதுக்கா..?

இது கடா விருந்து மாசமன்றோ ..அசைவர்களுக்கு!

விரத மாதமன்றோ ...பெண்டிருக்கும், ஆன்மீகருக்கும் !

எனக்குப் பிடித்த பாடல் அது உமக்கும் பிடிக்குமே !

எஸ்டேட் அருவிகள்...குற்றாலம் !

2013-07-11T12:04:00.000+05:30

இனிது..இனிது
குளியல் இனிது..!
காக்கையும்
குருவியும்
சொல்லித் தந்தது!
மூன்று மாத கோடையில்
நாடே வெந்தது..!
தவறாமல் பருவமழை
பொழியவே வந்தது..!

உயிருக்குள் நனைக்கும்...குளிரால்
ஸ்பா..ஸ்பா...ஸ்பா !
உலகில் கிடைக்கும் குற்றால
ஸ்பா..ஸ்பா..இயற்கை ஸ்பா..!

ஆனியிலும் ஐப்பசியிலும்
நட்புகளுடனும்
ஆடி கார்த்திகையில்
உறவுகளுடனும்
கூடி குதூகலிக்க
குற்றாலமே..
கொண்டாட்டமே !

இதற்கிடையே
குரங்கு அருவியும்
ஒகேனக்கல்லும்
இடை இடையே !

மலைஅருவிகளின்
குளுமை..புத்துணர்ச்சி
ஆற்றருவிகளில் இல்லை!

இவ்வருடம் தென்பாண்டி நட்புக் குருவிகள்
அழைப்பு விடுக்க...மாருதி ஏறி பயணித்தோம்!
காலைப் பயணம் மாலை குற்றாலம் சேர்த்தது!
அதிகக் கூட்டம்
ஓடினோம் தேடினோம்
சத்திரம் கிடைக்காமல்
அல்லாடினோம்!

அறை வாடகைகள்
அருவியின் உயரம் பெற்று
ஆயாசம் தந்தது!

ஐந்தருவி செல்லும் வழியில்

புத்தம்புது குடியிருப்பு ஒன்றில்

பேரம் படிந்தது..!

வழக்கம்போல முன்னிரவு நேரம்

பழையகுற்றால அருவியில் கழிந்தது..!

பத்தரை மணிக்கும் பார்டர் கடையில்

கம்பிகேட் தாண்டி கூட்டம் வழிந்தது..!

காலையில் தென்காசி ராஜ்மெஸ்ஸின்

அருமையான டிபன்கள்

முடிச்சிட்டு வாகனத்தில் அமர்ந்தது...!

பயணித்து அறைக்குள் சென்று

காலிவயிறுகளில் அடைந்தது..!

எந்த அருவியில் இன்று என்று கூடிப் பேசினோம்..

உள்ளூர் காளை ஒன்று பொதுக்குளியல் வேண்டாம்..

ஏகாந்தக் குளியல் தான் ஆனந்தம் என்றது..!

பிரானூர் மாப்பிள்ளை ராஜாபாய்

எஸ்டேட் அருவிகளுக்கு செல்லுங்கள்

என ஆணையிட்டார்...

குண்டாறு அணைக்கு கைநீட்டி!

அவர்கடையிலே சுடச்சுட பிரியாணிகள்..

அன்று முதல் போணி..நம் நால்வர் கூட்டணி!

செங்கோட்டையில் இடதுபுறம்

ஐந்துகல் தொலைவில்

குண்டாறு அணை...!

சொந்த வாகனங்கள் அதோடு நிறுத்தம்!

மலை மேல் கரடுமுரடான பாதையில்

ஜீப் கார் பயணம்..!

முதல் அருவி அரசு அருவி..இலவசக் குளியல்!

அதுவரை நடந்தும் வரலாம்..பெண்களும் கூட!

அதற்கு மேலாக பாதையில்
ஆடி உலுக்கிச் சென்றால்..
அரைமணி நேரம் இரண்டுகல் தூரம்
அடுத்து அடுத்து இரண்டு அருவிகள்..
ஆர்ப்பாட்டமில்லா அருவிகள்..
ஏகாந்தமாக..
ஒரு சமயத்தில் ஒரு குழு மட்டுமே!
கொண்டாடத் தடை ஏதுமில்லை!

மலையில் இருக்கும் எஸ்டேட்களுக்கு சொந்தமானவை..!
கூட்டத்தைக் குறைக்க வேண்டி
அனுமதியும் வெகுமதியும் தேவை!
வண்டிக்கும் குளியலுக்கும்
இரண்டாயிரம் வரை தேவை..!
ஒரு குழுவிற்கு..!
சுமார் எட்டுநபர் வரை!
அல்லது ஒரு வாகனத்தில் வருபவர்க்கு!

பிரதான அருவிக் குளியல் அளவு
இல்லை எனினும்
பிரமிப்பூட்டும் அனுபவம் நிச்சயம்..!

முடிந்தால் சென்று வாருங்கள்..!
குழுவாகச் செல்வது நல்லது..!

தங்கம்..வெள்ளி தள்ளாட்டம் எப்போ முடியும் ?

2013-04-12T21:52:00.000+05:30

தங்கம் மேலிருந்து சுமார் 15 சதமும், வெள்ளி சமீபத்திய உயரத்திலிருந்து
30 சதமும் குறைந்து உள்ளது..இது குறித்து என்னுடைய பழைய பதிவைப் பார்க்கவும் !

http://rammy-rammys.blogspot.com/2013/02/blog-post.html

இது தங்கம், வெள்ளி வாங்கும் நேரமா?

தங்கம்..வெள்ளி இன்னும் சரியுமா..இல்லை வாங்க ஆரம்பிக்கலாமா..என்று கேட்போருக்கு, மீண்டும் சொல்லிக் கொள்ளுகிறேன்...S.I.P (Systematic Investment Plan) முறையில் அனைத்து விலைகளிலும்..சிறிது சிறிதாக நமது வருமானத்திற்கு ஏற்ற அளவில் வாங்கலாம்..

நீண்ட கால சப்போர்ட் நிலையை..இரண்டு உலோகங்களும் உடைத்து கீழே இறங்குகின்றன..புதிய சப்போர்ட் நிலை எங்கே..என்பது பெரிய கேள்விக்குறியே !

இந்திய மதிப்பில் ..இன்னும் 10 சத அளவிற்கு விலைகள் குறையலாம்..என உலோகசந்தை வல்லுஞர்கள் சொல்லுகிறார்கள்! ஃபிஸிகல், கோல்ட் ஈடிஃப்..இரண்டு முறைகளில் நீண்டகால் முதலீடு செய்யலாம் ! எம்ஸிஎக்ஸ் டெரிவேடிவில் விளையாட அனுபவம் வேண்டும்...நமக்கெல்லாம் அது ஒத்துவராது..! தில்லும், பணமும் உள்ளவர்கள் விளையாட்டு அது! அதன் பக்கம் செல்லாமல் இருப்பது மன/பண ஆரோக்கியம் !

இந்த ஏப்ரல் முடிய கீழ்முகத்திலேயே இருக்கும் என சொல்லுகிறார்கள். அமெரிக்க மதிப்பில் தங்கம் சப்போர்ட் 1470, 1410, 1340..அதிகபட்சம் 1240 டாலர்கள்/ஒரு அவுன்ஸுக்கு, என எதிர்பார்க்கிறார்கள் ! வெள்ளி அதிகபட்சம் 22 அமெரிக்க டாலர்கள் வரை வரலாம் என எதிர்பார்க்கிறார்கள் !

பார்க்கலாம்..என்ன நடக்கிறது என்று !

Disclaimer : சந்தையில் நிலவும் சூழலைப் பொறுத்து.அவ்வப்போது வரும் வல்லஞர்களின் கட்டுரைகளில் இருந்து எடுக்கப்பட்ட குறிப்புகளின் மொழிபெயர்ப்பு தொகுப்பே இது..! என்னுடைய கருத்துகள் ஏதுமில்லை..!இந்த கட்டுரை வியாபாரம் செய்வதற்க்காக அல்ல..! வியாபாரமும்,விளைவுகளும் வியாபாரிகள் பொறுப்பு.! எனக்கும் விளைவுகளுக்கும் இஞ்சித்தும் சம்பந்தமில்லை..சந்தை நிலவரத்தை அவரவர்களே கணித்து வியாபாரம் செய்யுமாறு கேட்டுக் கொள்ளப்படுகிறது !

கனகமும்..ஸ்வர்ணமும் ஐஸ்வர்யங்கள்

1வது 6வது சேர்க்கைக்கு..நுழைவுத் தேர்வு தேவையா ?

2013-04-03T18:05:00.000+05:30

இந்த வெயிலுக்கு இருக்கிற "பிரச்சனைகள்" போதாதா..?
நீ ஏன்யா ஆவி எடுக்கிறே..என்கிறீர்களா?

மழையில்லாமல் மாசடைந்திருக்கும் காற்றுவெளியில்..
இரவியின் கதிர்கள்..பூமியை நெருங்க..நெருங்க
வீரியம் கொண்டு தாக்குவதால்..
ஏற்கெனவே எண்ணை காணாத சிரசின் உள்ளே ஊடுருவி..
"நுரைடப்பா"வை, இளகச் செய்து விடுவதால்..
பற்பல கேனத்தனமான எண்ணங்கள் வெளிப்படுகின்றன..!

அதில் இதுவும் ஒன்று !

இப்போதான் மிகவும் சிரமப்பட்டு, தொழிற்கல்விக் கூடங்களுக்கான மாணவர் சேர்க்கைக்கு..எம்ஜியார் கொண்டு வந்த.."நுழைவுத் தேர்வு" பேயை அடிச்சு விரட்டி இருக்கோம்...ஏன் புதுசா.."பூதத்தை"க் கிளப்பி விடறேன்னு..பல்லைக் கடிக்கிற சத்தம் நல்லாவே கேட்குது !

கருவில் சிசு உருவாகிடுச்சு..கன்ஃபர்ம்னு டாக்டரம்மா..பச்சைக்கொடி காட்டியதும்..அப்பனாகப் போறோமுனு பயபுள்ளைக்கு ஒரே சந்தோஷம்..மகிழ்ச்சி !

எல்லாமே..சில மணி நேரம் தான் !

மெல்ல மனைவி தான் ஆரம்பிப்பாள்..."

ஏனுங்க ரொம்ப வலிக்குமா..அப்படிம்பாள்!

இப்பதான் "சிசேரியன்", "பெயின்லெஸ் டெலிவரி" வந்துடுச்சே!

டேய் ..பேடிக்கண்டா ..என்பார் நம்ம நாயகன் !

சேரனையும்..மோகன்லாலையும் மனசில் வெச்சு !

மனசாறும் மனைவி..மெல்ல இதழ் விரிச்சு

குழந்தைக்கு என்ன பேருங்க வைக்கலாம்..ம்பா!

சொக்கிடுவான் நம்மாளு..ஒரே புல்லரிப்பா இருக்கும்..

ஒரு அரைமணி நேரம் "டிஸ்கஸன்" நடத்தியும்...

முடிவு எடுக்கமுடியாது..! தள்ளிப் போட்றுவாங்க !

பாலாகட்டும், பீராகட்டும் அதிகமா குடிச்சா..

ஆட்டம் கொஞ்ச நேரம் தான்..

அப்பாலிக்கா வாந்தி பேதி ஆகிற கணக்கா..

அவனோட அளவு மீறுன சந்தோஷகிணத்துல

கல்லைத் தூக்கி வீசுவா..பாருங்க!

'ஏனுங்க..கொளந்தைய எந்த ஸ்கூல்ல சேர்க்கலாம்?

அவ்வளவுதான்..சினிமா எடுக்க ஆரம்பிச்சு 80 வருஷமானாலும்...

இப்ப வந்த" விதேசி" படத்திலேயும் ..சோகக் காட்சியில் "ஷெனாய்" ஊதுறமாதிரி...ஆயிரம் சோககீதங்கள் காதுல கேட்குது !

வாயடைச்சுப் போயிடுவான்,..அதுக்கப்புறம் பாருங்க ஒரே சிந்தனைதான்..குழந்தை பொறந்து, பள்ளிக்கூட சீட் வாங்கற வரைக்கும்.".நெத்தியிலே பொட்டு வெச்சு"ன்னு மனசுக்குள் ஆயிரம் சிந்தனைகள் டேன்ஸ் ஆடும் !

அடடா..புருஷனை "சேது"வாக்கிட்டோமேன்னு..பொண்டாட்டிக் காரி முழிச்சுக்குவா, பேக்கானுக்கு வழியும் சொல்லிக் கொடுப்பா!

ஏனுங்க..அந்த "கேக்கே மேக்கே"பப்ளிக் ஸ்கூல்ல..லச்சரூவாயக் கொடுத்தா..2017எல்.கேஜிஅட்மிஷன் போட்றுவாங்களாம்! பக்கத்துவீட்டு பரிமளா தான் சொன்னா! அவ போயி பணத்தைக் கட்டி..அட்வான்ஸ் புக்கிங்" செஞ்சுட்டாளாம் என்பாள் !

மனைவி சொல்லே மந்திரம்னு கேட்டீங்க..பொழச்சுக்குவீங்க..இல்லைன்னா..எல்கேஜி அட்மிஷனுக்கு..நாயா..பேயாத் திரியணும்..நெறைய ஸ்கூல்களிலே..கண்துடைப்பு என்ட்ரன்ஸ்,இன்டர்வியூ எல்லாம் நடக்கும்..மாட்டிட்டு முழிக்கணும்..சொல்லிட்டேன் !

இதைப் போல பெற்றோர்கள் படும் அவஸ்தைக்கு ..ஒரே தீர்வு.."கேட்" போன்ற பொது நுழைவுத் தேர்வு முறை !குழந்தைகளுக்கு ! கேஜி வகுப்புகளில் நன்றாக பயிற்சி அளித்தால்..நுதேர்வை எளிதில் எழுதிவிடலாம் !

வாங்கி இருக்கும் மார்க்குகள் அடிப்படையில், பல பள்ளிகளுக்கு விண்ணப்பிக்கலாம்...அந்த அந்த பள்ளிகளுக்கு வந்திருக்கும் விண்ணப்பங்களின், மதிப்பெண்களின் அடிப்படையில்..வரிசைப் பட்டியல் போடப்பட்டு.."அட்மிஷன்" கொடுக்கலாம்! சேர்வது ..அல்லது வேறு பள்ளியை தேர்ந்தெடுப்பது என்பது " பெற்றோரின் விருப்பத்துக்கு விட்டு விடலாம் !

ஆறாம் வகுப்பிலும் இந்த முறையையே கொள்ளலாம்..!

காரணம் பெரும்பாலான பெற்றோர்கள் வேறு பள்ளிகளுக்கு தங்கள் செல்வங்களை மாற்றும் சமயம் அது !

இது என் மேலான யோசனை...!

திரியைக் கொளுத்தி போட்டாச்சு..என்ன நடக்குதுன்னு பார்க்கலாம்!

வெயிலோடு வெளையாடி..வெயிலோடு உறவாடி !

மாணவர் போராட்டத்தை ..கூத்தாடிகள் கண்டுகொள்ளவில்லையே?

2013-03-14T07:14:00.001+05:30

கூத்தாடிகள் எனும் பதம் கொச்சையானதாக இருக்கலாம்..ஆனால் அது ஒவ்வொரு முறையும் மக்களின் எதிர்பார்ப்புக்கு மாறாக, கலைஞர்கள்..குறிப்பாக திரைத்துறையைச் சார்ந்தவர்கள்..செயல்படும்போது அல்லது எந்த செயலிலாவது ஈடுபடாமல் இருக்கும் போது..அவர்களை குறை சொல்வதற்காக..ஏவப்படும் பதம் !

கூத்து என்பது பாடிக் கொண்டும்..பாவனை செய்து கொண்டும்..கதை சொல்வது..! இது முதலில்..மந்தைகளிலும்,சந்தைகளிலும் ..மக்களின் நடுவே "ஓரங்க நாடகமாக" நடத்தப்பட்டது..! பிறகு கொட்டகை மற்றும் திறந்தவெளி மேடைகளில் ஏற்றப்பட்டது..கூத்தாடிகளும் நடிகர்கள் எனப்பட்டனர்..!
பின்னர் திரைக்குப்பின் ஒளிந்து கொண்ட பின்னர்..இருள் கொட்டகையில் மட்டுமே அவர்கள் தென்பட்டதால்..நட்சத்திரங்களாயினர் !

தமிழக மக்களுக்கு அடிக்கடி காணக் கிடைக்காததால்...திரைக் கலைஞர்கள்.."கடவுளா"கினர்..கொண்டாடப்பட்டனர்.!

எதைத் தின்றால் பித்தம் தெளியும்..எதை உபயோகப்படுத்தினால் நமக்கு ஆட்சி கிடைக்கும் ..என அலைந்து கொண்டிருந்த பிழைப்பு அரசியல்வாதிகள்..மக்களின் கவர்ச்சி மோகத்தை கணக்கிலிட்டு..அரசியலில் சினிமாக்கலைஞர்களை நுழைத்தனர்..!

அது ஆயிற்று..சற்றேறக்குறைய அறுபது ஆண்டுகள்..சற்றேனும் குறையவில்லை..சினிமா மோகம் ! இனியும் அரை நூற்றாண்டு காலம், இது தொடருமோ எனும் நிலையே.காணப்படுகிறது !

திரைகலைஞர்களில் எதிர்கால திட்டங்களோடு சிலரும், கட்டாயத்தால் பலரும் ..மக்களின் பிரச்சனைகளுக்கு..குரல் கொடுப்பதும்..போராட்டங்களில்,போலி ஆதரவு கொடுத்து..கடனே என்று கலந்து கொள்வதும்..கண்கொள்ளாக் காட்சி மட்டுமல்ல..ரசிக சிகாமணிகள் பெருமைபட்டுக் கொள்ளும் அற்பவிஷயங்களும் கூட !

தற்போது ஈழவிடியல் வேண்டி நடை பெற்று வரும் இந்திய நடுவண் மற்றும் இலங்கை அரசுகளுக்கு எதிரான ..மாணவர் சமுதாய தொடர் போராட்டங்களுக்கு..திரைக்கலைஞர்கள் எந்தவித ஆதரவும் தராமல் "சிவனே" என்று இருப்பதால் ..கடுப்பான..ரசிக சிகாமணிகள்..தங்கள் கடவுள்களை.." கூத்தாடிகள்" என வர்ணித்து..இணைய சமூகங்களில் ..பொங்கி,கும்மி அடித்து..கழுவி ஊற்றி வருகின்றனர் !

கலைஞர்கள் பொதுவாக..எளிதில் உணர்ச்சிவசப்படக் கூடியவர்கள்..தங்கள் துறைப் பிரச்சனைகளுக்கே..அவர்களால் தீர்வு காணமுடியாமல்.எங்கெங்கோ..அடித்துபிடித்து..அலைந்துதிரிந்து கொண்டு..தங்கள் பிழைப்பை நடத்தி வருகின்றனர்..!

அவர்கள் வந்து "குரல்" கொடுக்கவில்லை என புலம்பித் திரிகிறது ஒரு கூட்டம்! !

சமுதாயத்தின் ஒரு அங்கம் தான் "திரைக் கலைஞர்கள்" அவர்களுக்கு கிடைத்திருக்கும் குறைந்த அளவிலான..நட்சத்திரவெளிச்சத்தில்..நடித்து அவர்கள் பொருள் தேடி செல்லட்டும் ! அவர்களை நாம் போராட்டங்களுக்கு அழைக்க வேண்டாம்.. அவர்கள் முன்னெடுத்து சென்று தான் நாம் போராட வேண்டும் என்ற நிலை இனி வேண்டாம் !

அரசியல் ஆதரவே வேண்டாம் எனும்போது..கூத்தாடிகள் ஆதரவு நமக்கெதற்கு?

கூத்தாடிகள் எனப்படும் திரைக்கலைஞர்கள் நம்மை மகிழ்விக்க மட்டுமே...அறிவுறுத்தலுக்கோ, வழிநடத்தவோ அல்ல என்பதை நினைவில் ஏற்று..!

இனியும் நமக்கான ..நம்மை ஆளும் தகுதி வாய்ந்த தலைவர்களை..திரைக் கொட்டகையின் இருளில் சென்று தேடும் தன்மை வேண்டாம் !

இருளில் தேடினோம்..விடியவே இல்லை !

சண்டைக்கு வாரீயளா...மச்சான் !

2013-02-19T12:17:00.000+05:30

பொத்தி பொத்தி ..தாயாரால் மராட்டிய சிவாஜி போல் வளர்க்கப் பட்டான் .அவன் ! காரணம் பலகாலம் பேறு இன்றி..தவமிருந்து பிறந்தவன் என்பதால்..அதீத கவனம் !

தெரு விளையாட்டில் பங்கேற்க அனுமதி இல்லை..! காயம் பட்டுவிடுவான் என்பதற்காக..!
உறவினர் வீடுகளுக்கு விடுமுறையில் பெற்றோர் கூடவே சென்று..தங்கி திரும்ப வேணும் !

அதீத கட்டுப்பாடும்..கண்காணிப்பும்..விரும்பியவண்ணம் பெறாமை, ஏமாற்றத்தை தந்து..வளர்த்தெடுத்தது..அவனுள் கோபத்தை !

கண்காணிப்பு படிப்படியாக..குறைந்து..படித்து, வருவாய் ஈட்ட ஆரம்பித்தவுடன், அனைத்து குடும்ப பொறுப்புகளையும், அவன் மீது சுமத்தி விட்டு...அவன் வழிகாட்டுதலை விரும்பத் தொடங்கி விட்டது..குடும்பம் !

இவ்வளவு நாளாக...சிறுகனலாக அவனுள் இருந்த..கோபம்..இப்போது வெடித்து அகம்/புறமெங்கும்..பரவத் தொடங்கிவிட்டது !

தொழிற்சாலையில், உறவு /நட்பு வகையறாக்களில் அவனது கோபம் ..பிரசித்தம் !

இவனது பலமும்..பலவீனமும் கோபமே என்றாகி விட்டது..!
பலத்துக்கு காரணம் அவனது நேர்மையும்..தொழில்பக்தியும்..!
பலவீனத்திற்கு காரணம்...இடம்பொருள் அறியா கோபம் !

திருமணமாகியும்..கோபம் குறையவில்லை..கூடவே சண்டைகளும் வந்துவிட்டது..காரணம் வந்த மகாராணி அம்மா..இவனை விட..கோபக்காரி !

இப்போதெல்லாம்..அவன் கோபப்பட்டால்..மகன் மட்டுமே பயப்படுகிறான்..அல்லது பயப்படுவதைப் போல நடிக்கிறான்..!
பெற்றோர் கண்டுகொள்வதில்லை..! மகளோ..நீ ஒரு டம்மி பீஸ்ஸுப்பா'' என்கிறாள்.. கோபப்பட்டால் காமெடியா இருக்குன்னு சொல்றாள் !

சக ஊழியர்கள் / நட்புகள் / உறவுகள்....கோபம் உங்களுக்கு சூட்'டாகலை என்கிறார்கள்..எப்படின்னா.. திருப்பி பேசுவதில்லை ! அவனும் எத்தனை நேரம் தான் கத்துவான் ! சாந்தமாகிட்டான் !

இதெல்லாம் எப்படி சாத்தியமாச்சுன்னு கேக்கறீங்களா?
அவனுக்கு வயசாகிட்டே வருது !
வீட்டுக்காரம்மா..குழந்தைகளின் பலம் கொண்டுவிட்டதால்..சிரித்துக் கொண்டே கேட்கிறார்..

சண்டைக்கு வாரீயளா...மச்சான் !

கடவுள் எந்த மதமய்யா?

2013-02-15T13:07:00.000+05:30

கேட்டுட்டானே ..அந்தக் கேள்வியெ !

கேட்கும்போதே குழப்பம் தீரலே !

பளீரென்ற கேள்வி.!.இடுப்புக்கச்சையில் கைவைத்து நிறுத்தி முகத்தை நிமிர்த்தி..கண்ணோடு கண் நோக்கி ..பதிலை தராமல் செல்லமுடியாத நிலையில் ...பளீரென்ற பிரகாசத்துடன் ..கேட்கப்பட்டக் கேள்வி !

கடவுள் எந்த மதமய்யா?

என்ன பதில் சொல்லுவாய்..எப்படிச் சொல்லுவாய்?
கேள்வியே தவறா...இல்லை கேட்டதா?

உன்னைக் கேள்வி கேட்டதில் என்ன தப்பு?

முப்பத்துமுக்கோடி என்கிறாய்..முப்பெருந்தேவியர் என்கிறாய்..! ஆதித்தொழில் செய்யும் அவர்தம் கணவர்களைக் கடவுள் என்கிறாய் !

திகம்பரம் வேறு..சரணம் ..கச்சாமி வேறு என்கிறாய்!

ஆப்ரகாமிய தேவதூதர்களை வணங்குகிறாய்..!

புரியாத மொழியில் மந்திரம் போட்டும்

பூ போட்டும்..

சாம்பிராணி, வத்தி,பத்தி,விளக்கு எரிவிக்கிறாய்!

பாவப்பட்ட சிற்றுயிர் பிராணிகளை பலி இட்டு மகிழ்கிறாய்..!

இது போக உலகெங்கும் குல,குடும்ப சாமிகள் வேறு..கோடிக்கணக்கில்!

சாமி உண்டென்றால்..அது ஒன்றென்றால்

அகில லோகம் பூரா ஒரே ரூ(அரூ)பமாகத்தானே இருக்கணும்?

எதுக்கு இத்தினி கோலம்..

ஊருக்கு ஒரு வேஷம்?

இதுல எந்த சாமி

பெருசு..சிறுசுன்னு பலம் காமிச்சுக்க

வெட்டிக்கிறீங்க..

குண்டு வெச்சுக்கிறீங்க...

குடியை எல்லாம் கெடுக்கிறீங்க..?

சரி..இப்ப சொல்லு ..எல்லாம் வல்லவன்..எந்த மதம்?

திடீரன்று மடக்கப்பட்டவன்..நிதானித்து பதில் சொல்ல ஆரம்பித்தான்!

"படைத்தவனை யாரும் பார்த்ததில்லை...ஆனால்

இப்படித்தான் இருப்பான் என்று..

நாங்களே அவனைப் படைச்சோம்..தேவதூதன்னு

சொல்லி வந்தவங்க..எங்க பெரியவங்க உதவியோடு !

காரணம் ..நாங்க பஞ்சபூதங்களையும்..காலத்தையும்

பார்த்து ..ரொம்ப ஆச்சரிய்ப்பட்டோம்..!

இயற்கைன்னு சொல்லுவீங்களே ..அதைதான் !

அடையாளம் வேணுமில்ல..நாங்க படைச்சதுக்கு..பேரு வெச்சோம்..

பொறவு நடந்ததுதான் ..எல்லாருக்கும் தெரியுமே..!

சண்டை எதுக்குன்னு கேக்கறீங்க...பாருங்க

எங்களுக்கு வேற வேலை இல்லை..உலக்மே சுபிட்சமா இருக்கு!

பொழுது போகணுமில்ல..அதான் நீயா..நானா'ன்னு

கேட்டுக்கிட்டு இருக்கோம்..அடிச்சுபுடிச்சு..அடிதடி பண்ணிட்டு !

கடவுள் எந்த மதமய்யான்னு...

இப்ப நீ கேக்குற..தெளிவாச் சொல்றேன்..சூதானமா கேட்டுக்கோ..!

கடவுள் எங்க மதம்..!

இங்க இருக்கிற எல்லாரையும் கேட்டுக்கொ ...யாரும் மாத்திச் சொல்லமாட்டாங்க..!

ஏன்னா..அதுதான் உண்மை !

உண்மையான தீவிரவாதியை சந்தித்தேன்!

2013-02-12T19:57:00.001+05:30

வாதம்..உடலில் ஒருமுறை வந்தால் வீடுபேறு அடையும் வரை விட்டுப் போகாது ! வாயால் வாதம்...செய்தால் ஏதாவது ஒரு இடத்திலாவது..நெஞ்சாகட்டும்..மூஞ்சியாகட்டும் ரணமாக்காமல் போகாது !

ஆக..வாதம் என்றாலே பாதிப்பு என்று தானே அர்த்தம்..?

வாதத்திற்குக் காரணம் ..தடை..அல்லது அடைப்பு..மேலும் எதிர்ப்பு ! சீராக ஓடுவது/கிடைப்பது ஏதாவது ஒரு காரணத்தால் தடுக்கப்பட்டால் அல்லது திருப்பப்பட்டால்..ஏற்படும் !

தனக்கு இயல்பான, இஷ்டப்பட்ட செயல்..மாறுபடும் போது வாதம் பிறக்கிறது..!

ஏமாற்றம் வாதாடத் தூண்டுகிறது..! வாய்வாதம் ..மிதவாதம் ..எனப்படுகிறது ! சிலசமயம் வைத்தியம் பார்க்கப்பட்டு..ஓரளவு அதோடு மேலும் பரவாமல் நிறுத்திவிடலாம்..! இதுதான் பொதுவாக ..நடப்பது..! பொங்கிவிட்டு ..வலிதீர்ந்ததும்..காலம் எனும் மருந்திட்டு கோணல்களை..சற்று நேராக்கலாம்!

அடுத்து அறுவை சிகிச்சை..அது தான் "தீவிர வாதம்" !

அப்படிப்பட்ட ஒருவனைத் தான் இன்று ஒரு மலையோர பயணத்தில் சந்தித்தேன் !

தடாலடியாக முன்னே வந்து நின்றான்..அவன் ! அவன் கண்களில் ..தீர்க்கம்..ஏதோ அடைய வேண்டும் என்ற வெறியுடன் !அவன் பின்னே ஒரு பெண்..சற்று வயதான தோற்றம்..கவலையும்..கோபமும் அவள் கண்களில்..!

அவனாக வரவில்லை..எங்கள் முன் ஏறக்குறைய இழுத்து..தள்ளப்பட்ட நிலையில் ! பெரும்பாலும் ..கிராம இளைஞர்களே தீவிரவாததால் அதிகம் பாதிக்கப்படுகின்றனர்!

என் நண்பனுக்கு ..அந்தப் பையன் ஏதோ தூரத்து உறவு போல! வயதான பெண்மணி அவனின் தாயாராம் ! மிகுந்த பதட்டத்தில் இருந்தார் அந்த அம்மணி!

எந்த நேரத்தில்..எங்கிருந்து ஆபத்து வருமோ என்று பரபர ப்புடன் காணப்பட்டார்..அப்பெண்மணி!"இவன்கிட்ட எப்படியாவது எடுத்துச் சொல்லி..அங்கெ இருந்து விடுவிச்சு..நீதான் காப்பாத்தணும்..நீ சொன்னாத்தான் இவன் கொஞ்சமாவது கேப்பான்" என்று நண்பனிடம் சொன்னார் அந்தத் தாய்!

இன்னும் பதினஞ்சு நாளில் இவனுக்கு கல்யாணம்..அவனோ ஒரே பிடிவாதமா அங்கேயே இருக்கான் ! எப்படி கல்யாணம் செய்யறது..ஒரே பையன் வேற..! வெளியில தெரிஞ்சா அசிங்கமாயிடும் ! குடும்ப கவுரவம் போயிடும்..! நீதான் ஏதாச்சு செய்யணும் ! பொண்ணு வீடு வேற பெரிய இடம்..ஆனாலும் ரொம்ப கோவக்காரங்க..ஒண்ணு கிடக்க ஒண்ணு ஆயிடப் போவுது !' என்றார்.!

என்னாசும்மா'ன்னு நாங்க கேக்கவும்..சட்டைய கழட்டுடா'ன்னு..பையன் கிட்ட சொல்ல ..உடம்பு பூரா கீறல்கள்..பிளேடால் கீறி ஆறியும்..ஆறாமயும் ! சட்டப் பாக்கெட்க்கு நேர் பின்னாடி.. " ஜெனிதா"ன்னு..டாட்டூ..முஞ்சிலடிச்ச மாதிரி தெரிஞ்சது !

அம்மா செல்லம்..மாசம் முப்பதாயிரம் சம்பளம்..ஒரு பைசா விட்டுக்கு கொடுக்கிறதில்ல..முக்காவாசி சம்பளத்தையும் அந்த பொண்ணுக்கே செலவு செஞ்சிருக்கான் ! போதலைன்னா..அம்மாக்கரி கிட்டயும் வாங்கிட்டுப் போயிருக்கான்!

பொண்ணு ரொம்ப லட்சணமாம்..பையன் தீவிரவாதி ஆகிட்டான்! மூணு வருஷ லவ்வாம்! இவன் தான் "டாட்டு" குத்தி இருக்கான்.அவளோ"பிரெண்டாத்தான் நெனைச்சேன்'னு வசனம் பேசிட்டு நாமத்தையும் போட்டுட்டு..அமெரிக்கா போயிட்டா ! இவனால மறக்க முடியலை !

இப்போ பிரச்சனை என்னன்னா .."டாட்டூ" வை அழிக்கணும்..கல்யாணத்துக்கு முன்னாடி..காயத்தையும் ஆத்தணும் ! எந்த டாக்டர் கிட்ட போறதுன்னு நாங்க பேசிட்டு இருந்தப்போ..அதுவரைக்கும் பேசாம ..நின்னுட்டு இருந்த அந்த தீவிரகாதல்வாதி" ராஸ்கல் கேட்டானே.ஒரு கேள்வி !

"அண்ணோவ்..இந்த பேர் அப்படியே நெஞ்சுல இருக்கட்டும்..மேல வேணும்னா ஒரு பூ மாதிரி போட்டு மறைச்சிட்டா என்ன'ன்னு !"

நெஞ்சுக்குள்ள அவளை எழுதி வெச்சேன் ...! அவன் !

காதல் ஒருவழிப்பாதை பயணம்..! நாங்கோ !

அனைவருக்கும் அட்வான்ஸ் காதலர் தின வாழ்த்துக்கள்!

இது தங்கம், வெள்ளி வாங்கும் நேரமா?

2013-02-11T22:13:00.000+05:30

கண்களை சுட்டி இழுக்கும்..ஆனால் ஆடம்பர உலோகங்கள் அல்ல அவை ! முதலீடு செய்தால்..வருவாயை அள்ளித் தருபவை ! அவசரத்துக்கு ஆபத்துக்கு "நண்பன்" போல கைகொடுப்பவை !

பத்து வருடங்களில் சுமார் ஐந்து மடங்கு ..அதாவது 500 சதம் வருவாயை கொடுத்திருக்கின்றன ! இனி எங்கே செல்லும் ?

30 வருட ஏறுமுகக் காலத்தில் ..காளைசந்தையில் இவ்விரு உலோகங்களும் ஏறுநடை போடுகின்றன ! இனியும் 5 முதல் 7 வருட காலத்திற்கு இது தொடரும் என கணிக்கிறார்கள் வல்லுஞர்கள்!

பங்கு சந்தையும்..உலோக சந்தையும் உலகளாவை ஆகிவிட்டன ! நியூயார்க்..லண்டன் உலோகச் சந்தைகள் முக்கியமானவை ! ஐரோப்பிய, அமெரிக்கப் பொரு ளாதாரமும் முக்கியமானது..விலைகளை நிர்ணயிப்பதில் ! உலோகச்சந்தை வலுவாக வேண்டுமெனில் அமெரிக்க டாலருக்கு எதிராக "யூரோ" வலுவாக வேண்டும்!

சீன..இந்தியப் பொருளாதார மந்தமும்..ஆபரண உலோகவிலை உயர்வை தடுத்து வைத்திருக்கிறது ! காரணம்..இந்தியாவில் தங்க இறக்குமதி வரி ..சன்னமாக உயர்த்தி வருகிறார்கள்! மேலும் இந்திய ரூபாயின் மதிப்பு நிலையிலாமல் ஏறி இறங்குவதால்..நகைத்தொழில்..ஏற்றுமதி பாதிக்கப்பட்டுள்ளது !

வேகமாக மேலே வந்து கொண்டிருந்த தங்கவிலை சற்றே..இளைப்பாறி வருகிறது என்றே சொல்லலாம்..அடுத்த பாய்ச்சலுக்கு முன் ! இந்த வருடம் கணிசமாக உயரும் என்று எதிர்பார்க்கிறார்கள்..! அதற்கு முன்னர் இன்றைய விலையிலிருந்து 5 முதல் 15 சதம் வரை இந்திய விலைகளில் வீழ்ச்சி இருக்கும் என்றும்..பயப்பட வேண்டியதில்லை..அது ஒரு வாங்கும் வாய்ப்பாக அமையும் என்றும் வல்லுஞர்கள் உரைக்கிறார்கள்!

எதிர்வரும் மத்திய பட்ஜெட்டின் தாக்கம் இந்திய பங்கு மார்க்கெட்டிலும்..தொடர்ச்சியாக இந்தியரூபாயின் மதிப்பிலும் கணிசமாக இருக்கும் ! பங்கு மார்க்கெட் உயர்ந்தால்..ரூபாயின் மதிப்பு அதிகபட்சமாக 10 சதம் அளவில் குறைய வாய்ப்பிருக்கிறதாம்! இதெல்லாம் மத்திய கால அளவில் எதிர்பார்க்கப்படும் மாற்றங்கள்..! ஒரே நாளிலோ..ஒரே வாரத்திலோ நடக்காது!

நியூயார்க் சந்தையில் தங்க விலை டாலரில் + டாலருக்கு இந்தியரூபாய்..இரண்டும் சேர்ந்தே ..இந்தியாவில் விலையை நிர்ணயம் செய்கின்றன..! நொடிக்கு நொடி ஏறி ..இறங்குகிறது !

எல்லா விலையிலும் வாங்கணும்..கீழே இறங்கினால் கொஞ்சம் சேர்த்து வாங்கலாம் ! காசுகளாகவும்,,கோல்ட் ஈ.டி.பண்டிலும் வாங்கலாம்! வேண்டும் போது நகைகளாகவோ..பணமாகவோ மாற்றிக் கொள்ளலாம்!

மொத்த முதலீட்டில் மூன்றில் ஒரு பாகம் தங்கம்,வெள்ளியில் போடலாம் !

Disclaimer : சந்தையில் நிலவும் சூழலைப் பொறுத்து.அவ்வப்போது வரும் வல்லஞர்களின் கட்டுரைகளில் இருந்து எடுக்கப்பட்ட குறிப்புகளின் மொழிபெயர்ப்பு தொகுப்பே இது..! என்னுடைய கருத்துகள் ஏதுமில்லை..!இந்த கட்டுரை வியாபாரம் செய்வதற்க்காக அல்ல..! வியாபாரமும்,விளைவுகளும் வியாபாரிகள் பொறுப்பு.! எனக்கும் விளைவுகளுக்கும் இஞ்சித்தும் சம்பந்தமில்லை..சந்தை நிலவரத்தை அவரவர்களே கணித்து வியாபாரம் செய்யுமாறு கேட்டுக் கொள்ளப்படுகிறது !

கனகமும்..ஸ்வர்ணமும் ஐஸ்வர்யங்கள்!

கூடார வல்லியன்று பால்சோறு தின்னும் கும்மாளம் !குதூகலம் !

2013-01-10T13:14:00.001+05:30

கண்ணனின் அன்பை வேண்டி..மார்கழி மாதம் முதற்கொண்டு அதிகாலை விழித்து,நாட்காலையில் நீராடி ..நெய்யுண்ணோம் ..பாலுண்ணோம்..மலரும் மற்ற மை அலங்காரமும் செய்யோம் ..பொல்லாங்கு பேசமாட்டோம் ..என வைராக்கியம் பூண்டு ..மாயனின் பல்வேறு லீலைகளை சொல்லி பாடி மகிழ்ந்து ..நோன்பிருந்த நம் பாவைகள்..விரதநாட்கள் முடியும் தருவாயில் ..

கூடாரை வெல்லும் சீர் கோவிந்தன் ..கொடுத்த பரிசாக எண்ணி ..சூடகமும்..தோள்வளையும் ..தோடும்.செவிப்பூவும் சூடி அலங்காரமிட்டு புது ஆடைகள் அணிந்து ..

பால்சோறு மூட நெய் பெய்து முழங்கை வழிவார !

அனைவரும் கூடி இருந்து கொண்டாடி மகிழும் நாளே .." கூடாரவல்லி " எனும் திருநாள் ! மார்கழி 27ம் நாள்!

இந்த பால்சோறு என்றால் என்ன ..என்று பார்ப்போம் !

இதுவும் ஒருவகை சர்க்கரைப் பொங்கல்தான் !

பாலிலேயே செய்யப்படும் சர்க்கரைப் பொங்கல் !இதன் இன்னொரு பெயர் " அக்காரவடிசல்" !

எவ்வாறு செய்வது என்பது குறித்த காணொளி ..இங்கு இணைக்கப்பட்டுள்ளது !

இதை செய்து காண்பிப்பவர் ஸ்ரீ ரங்கம் ராது மாமி ! இணைய உலகில் மிகவும் பிரபலமானது ..இவரது பல படைப்புகள் ! புது மணப்பெண்களுக்கும் ..சமைத்து சாப்பிடும் ஆண்களுக்கும் ..இவரது காணொளிகள் மிகவும் உதவி செய்கிறது ! யூ-ட்யூபில் தரவிறக்கம் செய்து கொள்ளலாம் !

இரண்டு பகுதிகளாக காணொளிகள் கிடைக்கும்,,கண்டு செய்து உண்டு மகிழுங்கள் ! அற்புதமாக இருக்கும் ! ஸ்ரீரங்கம் கோவிலில் தாயார் சந்நிதியில் அபூர்வமாகக் கிடைக்கும் !

பார்க்க இயலாதவர்களுக்காக !

தேவையான பொருட்கள் :

1.பச்சரிசி - 1 கப்

2.பாசிப்பருப்பு - கால் கப்

3. பால் - 1 லிட்டர்

4.நெய் - 150 மில்லி

5.உடைத்த வெல்லம் - 1 கப்

6.அஸ்கா சர்க்கரை - 1 கப்

(தண்ணீர் 2 கப், முந்திரி பருப்பு, ஏலக்காய் போடி, குங்க்குமப்பூ ..!)

செய்முறை:

1.முந்திரியை நெய்யில் வறுத்து தனியே வைக்கவும்.

2.வாணலியில் பாதி நெய்+பச்சரிசி+பாசிப்பருப்பு சேர்த்து சிறிது நேரம் வறுக்கணும்.

3.பால் 4கப் +தண்ணீர் 2கப் அதில் சேர்த்து 5நிமிடம் வேகணும்!

4.மொத்தக் கலவையை குக்கருக்கு மாற்றி 5,6 விசில் வரை வேகணும்!

5.மீண்டும் கலவையை வாணலிக்கு மாற்றி மீதி நெய் + பால் 2கப் சேர்த்து கொதிக்கனும். 5-7 நிமி

6. வெல்லம்+சர்க்கரை சேர்த்து அடிபிடிக்காமல் கிளறணும்.

7.கெட்டியாகும் போது நெய்+முந்திரி +குங்க்குமப்பூ +ஏலக்காய் போடி சேர்த்து இறக்கிவிடலாம்

8.ஆறினால் கெட்டியாகி விடும் !

பள்ளி வேலைநேர மாற்றம் ! இனி 10மாதங்களும் பாவைநோன்பே!

2013-01-08T11:49:00.001+05:30

அடி..வெள்ளையம்மா வந்ததடி உன் காளைக்கு ஆபத்து.! கட்டபொம்மன் பட வசனம் இது!

பள்ளி வேலைநேர மாற்றம் பற்றிய திட்டம் குறித்து ஊடகங்களில் செய்தி வந்ததும்..அதை அறிந்ததும் என் மனதில் ஓடிய எண்ணமே அது !

பெருகி வரும் மக்கள் கூட்டத்தில்..பள்ளிச் சிறார்களும், கல்லூரி கண்மணிகளும்..வேலைக்குச் செல்வாரோடு..காலை வேளைகளில் ..சாலையை பகிர்ந்து கொள்ள வேண்டிய கட்டாயம் ! அதனால் அவதிகள்..ஆபத்துகள்..இழப்புகள்!

குளிர் மிகுந்த வடமாநிலங்களில் காலை 7 மணிக்கு...சீருடை அணிந்தவாறு குழந்தைகள் கல்விச்சாலைக்கு நிதானமாகச் செல்வதை ..பல வருடங்களுக்கு முன்னரே ..கண்டிருக்கிறேன்..வியந்தும் இருக்கிறேன் !

ஏழரை மணித்திட்டம் என்னவோ..ஏழரைசனீஸ்வரர் வந்து தாக்கியதைப் போல அலறுகிறார்கள்...வீட்டம்மணிகளும்..வாத்தியார்களும் !

வேலைக்குச் செல்லும் அம்மணியருக்கு..நேரத்திலேயே எழுந்திருப்பது பழகி இருக்கும்! வீட்டம்மணிகள் தான் பாவம்..அவர்களோட "ரொடீன்" எல்லாம் மாறிடும்னு பயப்படராங்க !

கர்மம் புடிச்ச டிவி சீரியல்களை விட்டொழிச்சீங்கன்னா...சீக்கிரம் தூங்கி..விழிக்கலாம்! உடலுக்கும்..மனசுக்கும் ஆரோக்யம் ! இதை என்னமோ தியாகம்னு எல்லாம் நினைக்க வேண்டாம்..! பரிகாரமா பகல்லே ரொம்ப நேரம் கிடைக்கும்.ஹாயா பொழுதைக் கழிக்கலாம்!

ஒரு அஞ்சு.அஞ்சரைக்கு எந்திரிச்சா போதும்..குழந்தைகளை எழுப்பிவிட்டு..சுடுதண்ணி போட்டு..பிறகு குக்கர் வெச்சா..சாப்பாடு ரெடி.! சமையலுக்கு அரை மணிநேரம்..இன்னொரு குக்கர்ல இட்லி வெச்சா..மூணு இட்லி சாப்டுட்டு..தயிர்சாதம் பாக்ஸ்லெ ஸ்கூலுக்கு!

ஆறே முக்காலுக்கு எல்லாம் பஸ்/வேன்/ஆட்டோ வர்றதுக்கு ரெடி ஆயிடலாம் !

ரெண்டு மாசம் சிரமமாயிருக்கும்..அப்புறம் பழகிடும் !

அடுத்ததாக..நம்ம குரு'க்களைப் பார்க்கலாம்..! சம்பள உயர்வு அறிவிப்பைத் தவிர...மற்ற எல்லா அறிவுறுத்தலுக்கும் அவங்க ஆதரவு கிடைக்கிறது..எதிர்பார்க்கவியலா சமாச்சாரம் !

ஸ்கூலுக்குப் பக்கத்துலேயே வீடு பார்த்துக்கோங்கோ..அவ்வளவு தான் சொல்லமுடியும்!

பெத்தவங்களுக்கும் அதே அட்வைஸ் தான்..! பக்கத்துல இருக்குற ஸ்கூல்லெ பசங்களை சேர்த்துவிடுங்க ! அமெரிக்காவுல அந்த அந்த ஏரியாஸ்கூல்ல தான் சேர்க்கிறது..ஓரளவு கட்டாயம் !

அரசுக்கு ஒரு கோரிக்கை..எல்லா ஸ்கூல்லேயும் கட்டாய 'கேன்டீன்" வசதியும்,, அதிக அளவு " பாத்-ரூம்" வசதியும் அவசியமா செஞ்சு தரணும் !

அரசுப்பள்ளி/ கல்லூரிக்குன்னுத் தனியா ஸ்பெஷல் பேருந்துகளை இயக்கணும்..தனியார் பள்ளிகளுக்கு போக்குவரத்தில் தொடர்ந்து அதிகக் கண்காணிப்பும் அவசியம்!

பயப்படாதீங்க..மக்களே ! அருமையான திட்டம் !

பழைய காலம் மாதிரி 10 மணிக்கு முன்னாடி தூங்கப் போயிடுங்க..! காலை 5 மணிங்கிறது அதிகாலை அல்ல..'அதி உன்னத வேளை' ந்னு நெனைங்க..!

மத்தியான சாப்பாட்டுக்கு புள்ளைங்க வீட்டுக்கு வந்திடும்..படிக்க/விளையாடன்னு அதுங்களுக்கு ரொம்ப நேரம் கிடைக்கும்.!

மத்தபடி பாதுகாப்பு கவனிப்பு.,..பத்திரம் எல்லாம் ரொம்ப ஜாஸ்தியா அவங்களுக்குக் கிடைக்கும்! உங்க சுகத்தை கொஞ்சம் ஒதுக்கி வையுங்க..அவ்வளவு தான்!

இனி..எல்லா நாளும் பாவை நோன்புதான்..ஆண்டாள் நாச்சியாரின் வழியில் நாமும் செல்வோம்!

வீட்டாம்பிளைகளா..கொஞ்சம் உங்க உதவியும் தேவை..மறந்திடாதீங்க! ரெண்டு மாடுகளும் இழுத்தாதான் குடும்ப வண்டி நகரும் !

சங்கரமடம் அவ்வளவு இளக்காரமா ஆகிடுச்சா..மிஸ்டர் நல்லதம்பி !

2013-01-05T12:49:00.000+05:30

முதல்ல அப்பா சொன்னாரு..அப்புறம் புதுவாரிசு ஆனந்தவிகடன்ல பதில் போட்டாரு..ஏமாந்து எரிச்சலான முதல் வாரிசு பேப்பர்காராளுக்கு அறிக்கை கொடுக்குறாரு!

என்னென்னு?

எங்க கட்சி ஆபீசு சங்கர மடமா' ந்னு?

ஒவ்வொருத்தரும் ஒவ்வொரு ஆங்கிள்லே சொல்றாங்கொ..ஆனா பாருங்க ..ஒரே வாக்கியமா சொல்றாங்கோ! இதைத்தான் " ப்ளட் இஸ் திக்கர் தென் வாட்டர்' நு சொல்றதா?

தானாடாவிட்டாலும் தன் நாவாடும்' என்பதும் இதே தானோ?

குதுரை ஆதீனத்தை விடுங்க..சொருணகிரி தான் கடைசி ஆதீனமா இருக்க ட்ரை பண்றார்..கூடிய சீக்கிரம் அறநிலையத்துறை நாட்டுக்கு அர்ப்பணிச்சிடும் !

மத்த ஆதீனமாகட்டும்..மடமாகட்டும்..சர்ச்..மசூதி எங்க பார்த்தாலும்..அடுத்த பட்டம் பெரும்பாலும் பழைய பட்டத்தின் வாசமே இல்லாத இடத்தில் இருந்துதான் வர்றாங்க..!

அதுவும் இன்னார் தான் அடுத்த வாரிசுன்னு தெளிவா..சொல்லிடுவாங்க! அப்படியே சொல்லாம போய்ட்டாலும்..அடுத்த பட்டம் கட்றதுல பெரிய கலாட்டா எல்லாம் இருக்காது !

அப்படி ஏந்தான் கூட்டமா சேர்ந்து அப்படி ஒரு கேள்வி கேக்கறீங்களோ?

சரி..சங்கர மடம் இல்லை ..உங்க கட்சி...வேறென்ன?

வேறென்ன..பிரவேட் லிமிடெட் கம்பெனியா..இல்லை பார்ட்னர்ஷிப் கம்பெனியா?

பப்ளிக் லிமிடெட் கம்பெனின்னு சொல்லமுடியாது! லிமிடெட் பப்ளிக்கை தானே உள்வட்டத்தில் அனுமதிக்கிறீங்க?

தேவே கவுடா, முலயாம் சிங் யாதவ், காஷ்மீர் அப்துல்லா..குடும்பத்துல இப்படியா பப்ளிக்கா வெட்டு குத்து நடக்குது..கமுக்கமா முடிச்சுக்கல்ல!

எம்ஜிஆரு தெளிவா செங்கோலைக் கொடுத்து காமிச்சாரே..யார் வாரிசுன்னு! அந்தத் தெளிவு இத்தனை நாள் கழிச்சாவது உங்க கட்சிக்கு வந்ததேன்னு சந்தோஷப்பட்டா..வாரிசு இல்ல..சங்கர மடமான்னு கேள்வி வேற கேக்கிறீங்க !

உங்க சண்டைக்கு சங்கரமடத்தை எதுக்கு இழுக்கிறீங்க?

சரி..சங்கர மடம் இல்லைன்னு நாங்க..அதாவது மாக்களாகிய தமிழ் மக்கள் சொல்லணும்னா..அண்ணனும் வேண்டாம்..தம்பியும் வேண்டாம்...ஒரிஜினல்திராவிட போராட்ட வாரிசு வைகோ இருக்காருல்ல ..அவரைக் கூப்பிட்டு ஒப்படைச்சிடுங்க !

அமெரிக்காவிற்கே ரூ28ஆயிரம் கடன் கோடி கொடுத்த கோவை !

2013-01-02T13:41:00.001+05:30

கோவைக்கே தனிப் பெருமை உண்டு ! யாராலும் எளிதில் நினைக்க..நிகழ்த்த முடியா காரியங்களை 'ஜஸ்ட் லைக் தட்' டாக செய்து முடிப்பது !

பாசிட்டிவா சொல்லனும்னா 'பார்முலா 1 கார் பந்தய வீரரை உருவாக்கியது ; அரசாங்க ஆதரவு அதிகமில்லாமலேயே பஞ்சு மற்றும் இயந்திர தொழிலில் முன்னேறியது என பலப்பல !

எங்க ஊர் ஆளுங்க மூளையை..எக்சிபிஷன்ல வைக்கலாம்..! அப்படி நெளிவா ..சுளிவா கோளாறா எந்த காரியமும் செய்வாங்க !
ஜி.டி.நாயுடு பத்தி சொல்லித் தான் தெரிய வேண்டுமென்பதில்லை !

செஞ்ச வேலையின் தகுதிக்கு ஏற்றமாதிரி...பாராட்டும் கிடைக்கும் ..!
சிலசமயம் ஜென்மாந்திர ஜெயிலும் கிடைக்கும் !

அரசுக்குப் போட்டியாக ரூபாய் நோட்டு அடிச்சு மாட்டிக்கிட்ட பெரும்புள்ளிக எல்லாம் வசிச்ச ஊர் கோவை ! கவுண்டமணி கூட ஒரு படத்துல ,செந்திலைப் பார்த்து " ஏண்டா..கோயமுத்துர்ல பொறந்துட்டு அம்பது பைசாவா அடிக்கிறது ..ஊரு பேரக் கெடுக்காதிங்க-ன்னு ' அலப்பரை பண்ணுவாரு !

சுமார் முப்பது நாப்பது வருஷமா ..கோயமுத்தூர் காரங்களை ..மத்த ஊர்காரங்க கிண்டல் பண்றதுக்கு 'நோட்டு அடிக்கிற பசங்க' ன்னு தான் சொல்றது ..! ஏதோ சிலர் செஞ்சதுக்கு உரே பழி சுமந்தது !

அந்த தீராப் பழியை எளிதில் துடைத்தெறிந்து விட்டனர்..கோவை மக்கள் சிலர் ! அப்படி என்ன காரியம்னா ..அமெரிக்காவுக்கே கடன் கொடுத்திருக்காங்க ! அதுவும் எவ்வளவு ? ஒன்றல்ல ..நூறல்ல ..பல்லாயிரம் கோடி .!

.ரூ 28 ஆயிரம் கோடி !

அமெரிக்காவுக்கு பொருளாதாரப்பசி ! மசாலா கபே ' படத்துல வர்ற சிவா சொல்ற மாதிரி .."யார் பணம் கொடுத்தாலும் வாங்கிக்குவாங்க ..கடனா "!

நம்ம பக்கத்து நாடு சீனா இருக்குது தானே ! அமெரிக்காவுல அந்த நாட்டு அரசாங்கம் வெளியிடும் கடன் பாண்டு பத்திரங்களை ..சீனா மிச்சமிருக்கும் அந்நிய செலவாணி பணத்தை வெச்சு ..வாங்கிப போடும் ..வருஷம் கொஞ்சமா ! இப்போதைக்கு சுமார் ஒரு டிரில்லியன் அமெரிக்க டாலர் பொறுமான அளவிற்கு அமெரீக்காவுக்கு சீனா கடன் கொடுத்திருக்கு !

இதைக் கண்டு கேட்டு ..மனம் பொறுக்காத கோவை பங்குச்சந்தை அன்பர் ஒருவர் ..இந்தியாவின் மனம் காக்க ,சென்னை தனியார் வங்கி மூலம் ..பணம் அனுப்பி அமெரிக்க கருவூல .கடன் பத்திரங்கள் வாங்கியுள்ளார் !

(US treasury Bonds)

http://tamil.oneindia.in/news/2013/01/02/tamilnadu-5-bn-us-bonds-seized-from-tn-stock-broker-167205.html

கோவை இவ்வளவு நாளாக சுமந்து வந்த "கள்ள நோட்டுப் பழி ' துடைக்கப்பட்டு ' குபேரபுரி ' எனும் புதுப்பட்டம் வந்து சேர்ந்தது மிகவும்

மகிழ்ச்சியாகவும் ..பெருமையாகவும் இருக்கிறது !

ஃபாலோ- அப் !

06/01/2013

$5-bn US bonds seized from TN stock broker

http://www.indianexpress.com/news/-5bn-us-bonds-seized-from-tn--stock-broker/1053200/

முதலில் வந்த செய்திகள் கொடுத்த பெருமையின் ஆயுள்..விட்டில் பூச்சி போல சிலநாட்கள் தான் போலும் ! மேற்கொண்டு வரும் தகவல்கள்..அந்தப்பத்திரங்கள் போலியாக இருக்குனென்ற கருத்தைச் சார்ந்து வருகின்றன. போலி என்று நிரூபணமானால்..குபேரபுரி" எனும் பெருமை தகர்ந்து..ப்ராடுபுரி" என்பதே நிலைத்து விடும் வாய்ப்பு உள்ளது!

தற்கொலை பூமியாகும் தஞ்சையில்...!

2012-12-25T19:08:00.000+05:30

தற்கொலை பூமியாம் தஞ்சையில்..ஆறுகளில் சில இடங்களில் தடுப்பணைகளில் சிறிது நீர் தேங்கி உள்ளது..இனி இரண்டு வாரங்கள் சென்றால்..அவையும் ஆவியாகிவிடும்!அதுவும் மேல் ஆயக்கட்டுகளில் தான் இந்த நிலை!..நாகை..திருவாரூர் போன்ற வடிகால் பகுதிகளில் வயல்வெளிகளில் நிஜமாகவே மாடுகள் மேய்ந்து வருகின்றன!

அந்த சோகத்தைப் படம் எடுக்க மனம் சிறிதும் ஒத்துழைக்கவில்லை..!

தஞ்சை விவசாய மக்கள் ஏற்கெனவே சிறுகடன் வலையில் சிக்கித் தவிப்பவர்கள்! பயிர் செத்ததால்..கடன் பயங்கரம் வட்டியுடன் வந்து கண்முன்னே கூத்தாடுவதால்..வழி தெரியாமல் உயிர்கள்செத்துக் கொண்டிருக்கின்றன..தவணை முறையில் !

மக்கள் சந்திப்பு..அவசியம் தேவை..இக்கணம்!
அரசு மறுக்க, மண்ணின் மைந்தன் பேனாவில் மட்டுமே கண்ணீர் வடிக்க, எதிர்க்கட்சி இயங்காமல் இருக்க.அம்மக்களை சந்தித்து ஆறுதல் சொல்லுவது யார்?

எப்போதும் " மிஸ்ஸிங் டைமிங்" போராட்டப் புயல் தலைவர்!
தஞ்சை தரணி தண்ணீர் இன்றி காய்கிறது. அங்கு சென்று மக்களை சந்திக்கலாமே!

தானைத் தலைவர் தன் படைப்பரிவாரங்களைக் கொண்டு..தில்லியிடம் பேசி..நிவாரணங்களைப் பெற்றுத் தரலாமே !

ஆள்வோர் அரசு இயந்திரங்களை முடுக்கி விட்டு..பயிர்கடன், டீசல் மானியம், போன்ற மற்ற உதவிகளை செய்யலாமே..முழுவீச்சில் !

சுனாமி, வெள்ளம் போல மழைஇன்மையும் அதனால் வரும் பஞ்சமும் ..ஒரு பேரிடர் தான்!
தஞ்சை விவசாயிகள் நம்பிக்கை இழந்துவிட்டனர்....!

நாங்கள் இருக்கிறோம்..நம்பிக்கை இழக்காதீர் என தஞ்சைவிவசாயிகளை மட்டுமல்ல..தமிழக விவசாயிகள் அனைவருக்கும் ஆறுதல் கூற வேண்டிய கடமை..மத்திய, மாநில ஆள்வோருக்கு உண்டு!

விவசாயத் தற்கொலைகள் தடுக்கப்பட வேண்டும்..அது நம் முதல்வர் கையில் தான் இருக்கிறது..! விதைத்த செலவையாவது மானியமாகக் கொடுத்தேயாக வேண்டும்!

இந்த தடவை நாம் விவசாயியைக் கைவிட்டோமானால் ..விவசாயமே செத்துவிடும்..!

நம்பிக்கையுடன் காத்திருக்கும் தமிழக விவசாயிகள்!

வைகுண்ட வாசனின் மார்கழி ஏகாதசித் திருவிழா !

2012-12-21T13:16:00.000+05:30

2012ல் டிசம்பர் 23ம் தேதி..வைகுண்ட ஏகாதசி..ஞாயிறு காலை ஆரம்பித்து..24ம் தேதி திங்கள் காலை நிறைவுறுகிறது ! பெரும்பாலான வைணவத் தலங்களில் ஞாயிறு இரவு முழுக்கக் கொண்டாட்டங்கள்.திங்கள் அதிகாலை சொர்க்கவாசல் திறப்பு !

விரதம் மேற்கொள்பவர் ஞாயிறு காலையில் ஆரம்பித்து..ஞாயிறு இரவு கண்விழித்து..திங்கள் அதிகாலை வைகுண்ட வாசல் கடந்து..திங்கள் மாலை வரை விரதம் தொடர்ந்து அரிசியை பின்னமாக்கி சமைத்து சாப்பிட்டு விரதம் முடிக்க வேண்டும் ! ( ஒரு பட்டரிடம் அறிந்தது )

விரதகாலம் பால்பழம் அருந்தலாம்..நீராகரம்..சிறிது சிறிதாக அருந்திக் கொண்டே இருக்க வேண்டும் ! திட உணவை முடிந்தவரை தவிர்க்க வேண்டும் ! ( புதிதாக இருப்பவர்கள் ..முடியவில்லை எனில் வெங்காயம் போடாமல் உப்புமா சாப்பிடலாம் )

பூலோக சொர்க்கமாம் திருவரங்கத்தில் கூட்டம் அலை மோதும். கடந்த சில வருடங்களாக கட்டணதரிசன முறை அமல்படுத்தப்பட்டு, சிறப்பாக நடைபெறுகிறது. வரிசைதான் என்றாலும், நேரம் எடுத்துக்கொண்டாலும், எளிதில் தரிசனம் கிடைக்கிறது.!

உற்சவர் ஆயிரங்கால் மண்டபத்தில் எழுந்தருளி இருப்பது அழகு..!ஆடல்..பாடல்கள் அங்கு அரங்கேறிய வண்ணம் இருக்கும்!

திருப்பதியில் மிகுந்த பக்தர்களை எதிர் பார்த்து ஏற்பாடுகள் நடக்கின்றன ! திருவல்லிக் கேணியில் சுமார் 5 லட்சம் பேர் வருவார்கள் என எதிர்பார்க்கப் படுகிறது !

திருவரங்கன் திருவடியே சரணம்!

நீ ..நீ நடிகனாகவே இரு! தலைவனாக வேண்டாம்..!

2012-12-10T20:42:00.002+05:30

வந்தாரை வாழவைக்கும் எல்லா தேசமும்..
வந்தாரையும் கொண்டாடும் தமிழ்தேசம் !

தலைவன் என்று பேரும் சூட்டும்..
திலக'மிட்டு முடி'யும் சூட்டும்!

அரிமாயனை கும்பிடுவர் எம்மக்கள்..
திரைமாயரை நம்பிடுவர் அம்'மாக்கள்!

நிழல் போலே நிஜத்திலும்
இருக்கிறாய்..சரி!
இருப்பாய்..
என்றெண்ணி
நிஜமாகவே உன் நிழல்போல்
எம்மக்கள்!

உள்ளூர் சாதித் தலைவர்கள் சலித்தவேளையில்
வெளிச்சமிட்டு வந்த மேனனின்
புன்னகையில் மயங்கி..
மகுடம் சூட்டி மகிழ்ந்தனர் எம்மக்கள்!
அம்மக்கள் பெற்றமக்கள்
அதே வழியில் ராசனாக்க
ராயரை எண்ணி எண்ணி
இருந்த வேளையில்
உனக்கும் ஆசை வந்து வந்து
போகப் போக
வானத்து சந்திரனானாய்..
ரசிகனின் கண்மூடி கண்மூடி ரசித்தாய்!

நீ ஒரு ஆலமரம்..
உன்னோடு வளரலாம்
என உளறித் திரிந்தோர்க்கு
பேரன்கள் பிறந்துவிட்டனர்..!

கலை பொதுவல்ல..அது சுயம்..லாபம் !
அரசியல் பொது..அது பளு..தொல்லை !
என முடிவெடுப்பதற்கு
அறுபது அகவைகள்
கடந்து விட்டன!

ஐந்து வருடம் ஒருமுறை "வாய்ஸ்" மலர்வது
மகாமகத்தையும்..குறிஞ்சிக்கும் ஒப்பானது!

காவிரியில் துவைக்கப்பட்ட உன் சட்டை
உன் மறுபிறவியில் மன்னிக்கப்பட்டு விட்டது!

நதிநீருக்கு நீ அளித்த கோடி..
கரைந்துவிட்டது நதிகளின் சங்கமத்தில் ஓடி!
மகள்களின் திருமணத்தில் நீ அளித்த விருந்து..
பீமராஜனாம் ரசிகர்களுக்கு பெரு மருந்து!

எல்லா வயசுலயும் உண்டு..

எல்லா அமைப்பிலும் உண்டு..

எல்லா தேசத்திலும் உண்டு..

அவை உன் திரைநடிப்பெனும் பூவை

சுவைக்க சுற்றும் வண்டுகள்!

அவற்றுக்குத் தேனை அள்ளித்தா!

அறிவுரை எனும் கஷாயம் வேண்டாம்!

உன்வழி அதுதான்...

ஆம்..தனிவழி!

அதுவே பெருவழி..

வேண்டாம் உனக்கு வேற்று படுகுழி..!

நீ

தலைவனாக வேண்டாம்..

தாரகையாகவே இருந்து கொள்!

வாழிய பல்லாண்டு..!
வாழிய ஐஸ்வர்யங்களுடன்..!
வாழிய புகழுடன்!

காதலில் ஏது கள்ளம்..களவுதானே காதல்!

2012-11-29T23:01:00.000+05:30

பிரமிக்கிறோம்...
ஆனந்த அலை பரவுகிறது..
மீண்டும் அண்மைக்குத் தூண்டுகிறது...
ஆம்...
நாம் காதலிக்க ஆரம்பித்துவிட்டோம்!

காதல் ஒரு அழகான வார்த்தை..
காதலைப் போலவே!

காதலுக்கு இருட்டு தேவையில்லை...
வெளிச்சமே காதலைக் கொண்டுவரும்!

காதலுக்கு ஒலி தேவையில்லை....
கண்கள் மட்டுமே போதும்!

காதலுக்கு அறிமுகமும் சிலசமயம் தேவைப்படும்..
அது இங்கு பாசாங்கு எனப்படும்..!

காதல் என்பது அன்புஇல்லை..பாசமாகாது..
வேணும்னா பிரியம்னு வெச்சுக்கலாம்!

காதல் வயதறியாது..
ஈர்ப்பையே அறியும்!

காதல் புரிந்து கொள்ளாது..
ஆனால் காதல்காரரைத் தேடித் தவிக்கும்!

ஒருமுறை மட்டும் மலர்வதில்லை காதல்..
ஓராயிரம்முறை மலரும் ஆண்களுக்கு மட்டும்!
ஒரு'முறை'யோடு வருவது மட்டும் காதல் இல்லை..!
முறை மாறுவதும் காதலாகும் இங்கு!

காதல் கைதொடும்..தோள்படும்..பெரும்பாலும் படர்வதில்லை!
காதல் படர்ந்தால் கா..ஆமாகிவிடும்!

காதல் கண்களில் பிறந்து ..
பழக்கத்தில் வளர்ந்து
காலத்தில் மலர்ந்து
கல்யாணத்தில்
மணக்கிறது..
அன்றே மரிக்கிறது
காமம் பிறக்கிறது..
குடும்பம் தழைக்கிறது!

காதல் ஜெயிக்கும்னு ..ஜெயிக்கணும்னு
சொல்லிக் கேள்விபட்டிருப்பீங்க..!
ஜெயிக்கிறதுன்னா..கல்யாணத்துல முடியறது!
பெத்தவங்க சம்மதத்தோடோ..இல்லாமலோ!

காதல் தெய்வீகமானதாம்...ஆம்
காதலிப்பது பிறர் கண்களுக்குத் தெரியாதவரையில்!

காதலில் ஏது கள்ளம்...
களவுதானே காதல்!

காதல் என்பது உறவற்றது...
உறவானால் அங்கு பெயர் மாறிவிடும்!

காதலில் ஆபத்தில்லை...பிரியம் மட்டுமே!
காதல் இங்கும் எங்கும் என்றும் புனிதமானதே...!

காதல் என்றும் வாழும்..வாழ்க!

பராசக்தியில் சர்ச்சைக்குரிய வசனங்களை நீக்க வேண்டுமா?

2012-11-16T14:08:00.001+05:30

ஜனங்க நாளுக்கு நாள் ரொம்ப தொட்டாசிணுங்கியா மாறிட்டு வர்றாங்க..!இதுதான் பரிணாம வளர்ச்சியான்னு கேக்கணும்னு தோணுது..! ஆனா பாருங்க இந்த வார்த்தை தான் கைஇடுக்கிலெ சிக்கிட்டு..எழுத வரமாட்டீங்குது !

மதம்.., சாதி..,மொழி ..அபிமானம் ரொம்பவே ஜாஸ்தி ஆயிட்டு! பெட்ரோல் குண்டுல வந்து நிக்குது..! ஒத்த சினிமாவ உருப்படியா உடமாட்டிங்குது! பதிவு..கீச்சுல திட்டிக்கிறாங்க..குழாயடி சண்டை வேற..ஜெயிலுக்கு அனுப்பிச்சு பவரக் காட்றாங்க..!

இஷ்டத்துக்கு பேசுறாங்க..எழுதுறாங்க..சினிமா காட்றாங்க..! அது சுதந்திரம்..பேச்சுரிமைனு சொல்லிக்கிறாங்க..! உடனே எதிர் கோஷ்டி..க்ருப்பா வந்து பொரண்டு உருண்டு ரகளை செஞ்சு..அவங்களோட போராட்ட உரிமையை டெமான்ஸ்ட்ரேட்' செஞ்சுக் காமிக்கிறாங்க!

பலமான க்ரூப் அப்போதைக்கு ஜெயிக்குது..!அடிவாங்குனவங்க காயத்தையே உத்து உத்து பாத்து கிட்டு வெறியேத்திக்கிறாங்க..! சந்தர்ப்பம் வர்ற வரைக்கும் கருவிட்டு இருக்காங்க!

காரணம் நம்ம தேசத்தோட பல வண்ணக் (வர்ணாசிரம) கலாச்சாரம் தானுங்க!

இனிமே இங்க பொதுவா கூட ஒரு நியாயத்தை ..யோ'சிக்காம சொல்லமுடியாது போல!

கதையிலே..பாட்டுலே..படத்துலே பேரு வைக்கிறதுக்கு எல்லாம் சண்டைக்கு வர்றாங்க! நாகப்பா..நாகலிங்கம்..மாரினு நம்பியார் எத்தனை தடவ கூப்பிட்டு இருப்பாரு!

கதாப்பாத்திரத்துக்கு பேரு வைக்கிறதை கண்காணிக்க தனியா சென்ஸார் போர்டு அதிகாரிகளைப் போடணும்..!

திரைக்கதை மொதல்லயே எழுதிட்டு ஒரு ஆயிரம் காப்பி எடுத்து..எல்லா மத..சாதி..கட்சி..,மொழி..இனம்..,சங்கம்..அரசு ஆபீஸ்களுக்கு கூரியர் செஞ்சு "என்னோசி" வாங்கிட்டுத்தான் வேலையத் தொடங்கணும்..அதுக்குள்ள உனக்கு வயசாயிடுமா!..உருப்படியா பொழைக்கணுமா .வேணாமா?

தேனிகய்னா ரெடி..தெலுகு படத்துனால..அந்த ஊர் பிராமணர் கொதிச்சுப் போய் போராட்டம் எல்லாம் செஞ்சிருக்காங்க..இங்க துப்பாக்கி பட்ற பாடு எல்லாத்துக்கும் தெரியும்!

இன்னொரு அரங்கேற்றமோ ..சாவித்திரியோ... பாரதி கண்ணம்மாவோ, அலைகள் ஓய்வதில்லையோ..தட்டத்தின் மறையத்து வோ..இனி எடுக்கப்படும் சமீப சாத்தியம் ஒரு கேள்விக்குறியே!

கொடூர..மோசமான கேரக்டர்களுக்கு இனி எந்தப் பெயர் வைத்தாலும் எதிர்ப்பார்கள்..! காண்பிக்கப்படும் சம்பவங்கள், தோரணைகள், பழக்கவழக்கங்களில் எந்த மத..சாதி சாயல் வராமல் பார்த்துக் கொள்ள வேண்டிய கட்டாயத்தில் திரைத் துறையினரும்..கதாசிரியரும்!

ஜெயம் படத்தில் மோசம் போகும் பெண்பாத்திரத்திற்கு " அலங்காரம்"னும்..கலகலப்பில் மொக்கை வில்லனுக்கு ' வெட்டுப்புலி"னும் பேரு வெச்சமாதிரி..புயலுக்கு ஆப்பிரிக்க பேரு வெக்கறமாதிரி ரோசணை செஞ்சுத்தான் வைக்கணும்!

வைக்கப்புல்லு..மண்ணாங்கட்டி, திருகாணி,,தலைகாணி..,திருவாத்தான்..,வரிப்புலி..,வண்டுருட்டி..,மாதிரி பேரு வெச்சிங்க..தப்பிச்சீங்க!

திரைப்படங்கள்.. மக்களால் தேர்ந்தெடுக்கப்படும் அரசினால் நியமிக்கப்படும் தணிக்கைத்துறை சான்று பெற்று வரும்போதே அங்கீகரிக்கப்பட்டு விட்டது என்றுதானே அர்த்தம்!
மறுபடியும் ..உணர்வுகளின் அடிப்படையில் மாற்றம் கோருவதோ..நீக்கக் கோருவதோ..கல்ச்சுரல் போலீஸிங்..என ஆகிவிடுமே!

இந்நிலை தொடர்ந்தால்..வேறு வழியில்லை..எல்லாக் கோட்டையும் அழிங்க..முதல்ல இருந்தே நான் 50 பரோட்டா சாப்பிடறேன் கதையாக...பராசக்தியில் இருந்துதான் ஆரம்பிக்கணும்! அந்தப்படத்தில் வரும் மத சம்பந்தமான வசனங்களை நீக்குவதில் இருந்து ஆரம்பிக்க வேண்டும் ..சுத்தப்படுத்தலை!

என்னவோ போங்க..! ஆனா ஜாலியா எடுத்துக் கோங்க..!