C'est Moi

Dirang Apple Huan Thlalak Tlemazawng

2011-09-19T18:59:00.012+05:30

Kan chhungkua in apple huana la kal ngailo tih takah Bomdila aṭangin Dirang (42 kms vela hla) khua phur taka panin kan thawkchhuak a. Vanneihthlak takin a enkawltupa ber hi Nepali mah ni se Mizorama-a piang leh seilian a lo ni a, Mizo ṭawnga kan lo ri nak nak chu hria in, "Mizo in ni elo?" tiin min rawn zawt chat a. Zotlanga piangin Arunachalah kum 40 chuang zet a lo khawsa tawh hi a lo ni a. Tichuan, ngampa leh inti neitu takin huan chu kan han fang ta vela; a hmunah chuan duhtawka lawh leh ei phal ani bawka a nuam angreng phian.

Pu Gopal Limbu (Kum 64 mi)

August thla kha an rah vanglai niin Septemberah chuan an lo rem ṭep tawh

An inbul ami hi an la lo hman lova

A hring hi perthei ang si, thlum thur suk ani. A sen aiin a tui zawk

'Star Crimson' apple - Arsi ang deuh a an det ṭhet hi

'Copper Four' apple - A hnun bulah kil li a neih avangin (A thur ber awm e)

'Grafting' hmangin apple chi li a kungah hian a ṭo tir

'Grafting' na hnuhma

Kumkhatah ton 80 tharin, a hmunah chuan kg 1 cheng 40 zelin an hralh

Feet 7300 ani bawka a vawt vur, vur a tlakin feet 4 a chhah te ani ṭhin awm e (Dirang khua pawh a lang vau vau alawm)

Bumla

2011-04-11T08:47:00.017+05:30

Bumla hi Tawang atanga 35 kms vel niin DC leh Army Commandant te phalna lehkha lak hmasak phawt loh chuan tlawh maitheih anilo a. Tin, a awmna hmun hi 21, 000 ft (Above MSL) bawr vel anih avangin tlailamah a luhna vengtu sipai ten an khar tawh thin a – Chhun dar 12 hnulamah hichuan khua a chhe tawh tlangpuiin vur a tla tawh thin. A awmna hmun hi Line of Actual Control (LAC) tiin hriat ani a; McMahon Line kha China in a pawmloh em avanga 1962 Sino-Indian War pawh kha irhchhuak ani reng a (Post hmasa lamah tlemazawng chu ka thailan tawh kha). Tawang District hrim hrim pawh hi China in a ram angah a la ngai a, mahse tunah rih chuan ui sual huai angin an inthathen rih a.

India in China sipaite a lo chiau au na hmun (Landscape ah ka dah lova a fiah vak lo)

Ramri panna kawng (Hnai viaua lang si a san em avangin a kalchak chi loh)

Lungpui hi ramri atan an pawm tawpa, 'Rock of Peace' an vuah bawk (India atanga thlalak ani)

Bumla ah hian India sipaite inkulh in a piah lawkah, 20 kms bawr vel a hla ah, China sipaite Lee Camp ah an inkulh ve thunga. Indo peih sa at a inralring chunga inep e ti lo chuan an intlawhpawh viau thung – China sipaite August ni 15 ah India a lo lut in an lawmpui a, India sipaite te China ah October ni 1 ah an zuk lut ve thung. Hemi bakah Border Personnel Meetings May 1999 atanga khan neih reng ani tawh bawk. China sipaite chuan India cigarette, pawisa, leh Old Monk Rum an duh hle an tih tak kha mawle – Teh daih chuan ka ti rilru !! [A hnuaia thlalak pathumte hi China ramchhung atanga lak anni].

China in India sipaite a lo chiau au na hmun

Entlangin China ho awmna a lang thei viai viai

Tlangpawng hi hmunsangber lai - 'Shiv Linga' (China hoin a hmingah engtak vuah ve ang maw)

Mean Sea-Level (MSL) atanga a san tawh em avangin a hmun pawh a vawt tawh hle a; thlasik ah -25 degree celcius te niin nipui lai pawn zan boruak chu -5 degree celsius ah a tla daih theia. A vawh chu thuhran ni se 18, 000 ft chunglam hi tlanglawn thiam tena ‘Death Zone’ – Oxygen tlem tawh na – ti a an sawi anih tawh avangin hriselna tha vervawr tan pawh han pawngpaw zuam chi ani hauhlo mai. High Altitude Sickness – Luhai thut, thawchham, chauh thut, hnar thi etc etc – neih hi thil namai anilo a. Kan Probation laia Uttaranchal-a trekking kan kal tum a Dehradun sikul naupang hmel pawl vek tawh 14, 700 ft atanga mule (Sabengtung leh tlangram sakawr te chi thlahpawlh) chunga an rawn phurh thlak hlawp hlawp kha ka la theihnghilh miah lo – Dam hrisel chhuak leh tak maw ??

Bumla hnuai deuh a India sipaite chenna

6th Dalai Lama leh Urgeling Gompa

2011-02-15T11:50:00.009+05:30

Urgeling khua a Lama Tashi Tenzin leh Tsewang Lhamo te fapa Sanje Tenzin hi kum 1683 March ni 1 khan lo piangin Monpa Hnam zinga Dalai Lama hmasaber ani awm e. Kum 1688 khan kum 5 mi lek niin 5^th Dalai Lama, kum 1682 a boral ta, thlaktu atana hmuhchhuah ani a. Amaherawhchu, sakhuana lama inrelbawlna a buai loh nan leh Lhasa a Potala an la sakzawh loh avangin Nankartse khua, Tibet ah, kum sawm lai thuhruk ani phawt a. Kum 1697 khan Lobsang Yeshi, 5^th Panchen Lama, an China lal phalna a lak hnuah 6^th Dalai Lama atan a puangzar a, a hming pawh Tsangyang Gyatso tih put tir nghal ani bawka.

Urgeling Gompa (Tawang atanga km 5 a hla ani)

A chhung

Dalai Lama nihna bansan ngam chiah silovin Potala chhunga Buddhist puithiam nunphung kha ning ve tak niin a chanchin hi ziak ani a. Puan inah chengin zanlamah mipangai anga inthuamin Lhasa khawpui kawthlerah zu, sa, leh nula chenin a hun tamzawk a hmanga. Thu leh hla erawh a thiamin, hla lenglawng leh lengzem a phuahte kha tun thlengin Tibet ah an la lar ani awm e.

A nunphung hi chhuanlama hmangin Lhazang Khan-a, Khosut Mongols lal leh China ram lal thianpa, ni bawk chuan Tibet runin 6^th Dalai Lama hi tan inah a khunga. Kum 1706 June ni 28 khan a nihna hlihsakin Ngawang Yeshey Gyatso-a chu 6^th Dalai Lama ah a puanga. Hemi kum vek November ni 15 ah Tsangyang Gyatso-a, Beijing pan mek chu, Kokonor khua a thlenin a chanchin hriatzui a ni ta lova. Buddhist sakhua ngaihdanin thi mai lova piangnawn leh tura ngaih vang emawni tun thlengin Potala ah hian thlanlung neilo in a la awmreng ani awm e.

A tianga tuihnar a vuakchhuah (Damna tiin an la thin)

Tawngtai in nitin a kal hual an ti (Thinghnah sen tla a awm chuan damna tiin an la leh bawk)

Ni tla tur a thlir ve voh voh thin ka ring

Rani Khua

2011-01-25T16:04:00.009+05:30

Rani khua hi Pasighat (15 kms.) leh Ruksin (20 kms.) inkara awm leh Adi (Padam/Pudum) ho chennna khua ani a. Amaherawhchu hmanlai atanga an insakdan an la chhawmnun zel avangin ka va tlawh ve a, kal a manhla hle bawkin ka hria. A ram a zawl thabawka leilet hmunte tha in ei leh in lamah an hniaghnarin an ngaihtuah awmloh hlea. Thusawi thiamlo ang deuha tlak duah loin thlalakte hi han ring tawp mai ila.

Palm hnah inchung chihnan an hmang

Ran luh loh nan (Mihring zawk kan lawn kut kut)

Kan Pi-i hian inlengah min sawma

Kan Pi-i hian thinfak an ngah hle mai

Helai hi nipuiah inlengte kawmnan an hmang thin

Tapchhak hi a lailiah an dah thin (An mut hual bakah chhungkua inkawmna ani)

Etkuing(Ekaum) - Vawk in

Kumsung - an rohlu dahna

Kan Pi-i (A felin kawm a nuam ngei mai)

Ka Pi- i hi Catholic niin a phusa ber pawl ani a. A fapa naupangzawkin Bangalore-a BE a zawh ni ah Bike eksident avangin a boralsan a, a tuarna in khawvel thil lungkham a nei meuh tawh lo. Adi (Minyong, Padam, Pasi, Galo, Bori, Boka, Milang, Pangge) ho hi an felin Pasighat bawr khu ka zin tawh na ah nuam ka la tihberna hmun ani. An tawng pawh tlemazawng chu ka thiam ve hman : -

Inkolo Giyan/Kolol (Padam)/Yolo Inre (Galong)/Okolon Giyan (Miri/Mishing) - Khawnge (i kal dawn)
Ipeng - Tuaium
Ingo - Sangha
Ronyang - Bekang
Isi - Tui
Aipe gilanka - Tluang takin kal rawh u
Aipe Ai - Mangtha
Apin - Chaw (Achin in Galong)
Ambin - Buhfai.

Ka Fapa Chanchin Tlemazawng

2010-12-21T15:15:00.005+05:30

Kan driver Chandana nen hian eng engemaw neuh neuh hi an sawi ve fo maia, a hnuah ka hrechhawng veleh ziah bawka. Tumkhat a sikul bang a rawn hlimchhuak hle ani awma, Chandana’n a zawhin, “Ka thianpa Gautam Sharma a Birthday ania, sweets min pe teuh a” ti pahin, “Chandan bhaiya, an pe ve na che nge” ? tiin a zawt let a. Ani lahin tihian a chhang maia, “Aaaa..Sikul Birthday chu chhota bachcha chauhin an lawm alawm, keichu ka lian tawh a”. Lucas-a a ngawi ta vang vanga, in thlen dawnah, “Pataa nahin Kyun diya, mein bhi big boy huin (Ngatinge min pek bik ka hre miahlo mai, mipa naupang liantak ka ni tawh asin mawle)” a ti bauh bauh ani awm e.

Kum 2 bawr vel a nih laia Montessori sikula an Principal khan he car hi a neih vang khan emawni a rilruah hian a khatliam tlat pek a. Tuition turin tumkhat ka thlah na ah, “Papa, Chandan bhaiya nen Hyundai i10 kan lei dawn”. “Okay....A that chu. Pawisa i nei emia” ?. “Chandan bhaia in ICICI ah pawisa a neia kan pahnihin kan lei dawn”. Ka nuih a za hle nachungin ka sawichhuak lemlo a, mahse a hnu deuh lawkah an lei tak thu hlim deuhin (ka office a rawn tlawh tumin) min hrilh a. Chandana ka zawhchianin, “Office bulah pakhat a lo inhung kher a, ka leiah a ngai ngawt alawm mawle. ICICI ah pawisa i nei renga i lei dawnin min hrilh ve lo tiin a la nuar lehnghala” tiin min hrilhfiah a.

Tumkhat Chandana nena an ice cream ei pawh a kawr a ti bal deuh a. Chandan’an, “Ei fimkhur deuh rawh, anih loh chuan i kawr kha a bal vek mai ang” tiin a hrilh a. “A bal tawh tho alawm” a lo tisam et a. “Awww...a balh chuan ka suksak che a ngai dawn asin” tiin a lo fiam let ve leh zeuh a. Ani lah chuan rihlut in, “Aap ladki hein kya/Hmeichhia i ni emia ( kawr suk i tuma)” !! Tun atangin a MCP dawn e tih dawn chuan keimah loh ang takin a Nu hi pangpar a hlan nitin peih ang lawi si a !!

Nimin tlai Masi chakkhai kan lam hawng pawh kan hma ah IRB Bolero khalhtupa in U-Turn a la hleithei lo a, rei ngial kan nghak ta tihah Lucas-a ning tawngkhawng tawh chu a dakchhuaka, “Gaadi U-turn karna nahin aata hein kya, Bhaiti (Motor u-turn dan i thiam nangea, Unaupa)” a lo ti hman pek a !! Sikula an inthlah pawh scooter khalh khan a rawn su teuh hle ani awma; Driver in, “Horn ka hmeh tuarh tuarh kha i hre nangea”? ti a a zawh kha , “Ka hrelo a” thiamchantum ran in a ti deuh haw ani awm e. An zinga a te ber Lucasa-a pek chuan, “Mein soona tha (Kei chuan ka hria)” a lo ti khauh a, buaina a tawp nghal tawh bawk.

Hmanzan kan mu tur pawh, “Mama, santa Claus hi kan inah a rawn kal ve dawn em”? tiin a zawt phawng a [Khawilai atanga a hriat tehreng emawni, kan hrilh ngai der siloa. Sikula a thiante nena an titi na lamah a hre fuh ve niberin kan ring ta]. A Nu in, “Aw, rawn kal dawn e. Mahse good boy i nih a zantin i tawngtai loh chuan a rawn kal lo ang” a tih chu, “Eeee...Mizo nge Hindi tawngin ka tawngtai dawna”?. ”Mizo chuan Mizo tawngin kan tawngtai thin alawm” “Okay..” ! Tichuan thu chungin a bei ve ta malh malh a, a chah ngunber pawh Hotwheels Battle 45 – Thlengdawh ah thlaksak ngei ngei tur zingah pawh No. 1 em em list ah kan dahthlap. Amaherawhchu, a duh dang pakhat ‘Snowman’ kan siamsak thei dawn lo tlat..ha ha ha...Kumin atang hian Christmas boruak a chenchilh ve tan ta e.

Life is never dull with my dear son Lucas. Tlawmngai taka min chhiarsak tute zawng zawng Masi leh Kumthar chibai vek ule. (“New Year ah 6 years old ka ni angem” tih hi mit zawt chamchi bawk tak e).

Jaswantgarh Tlawh Thu

2010-09-27T21:19:00.021+05:30

Taimakna leh suangtuahna tlakchham avanga hun reitak chawlh hnuah hei ka rawn tharthawh leh hram e!! Hun reife ngaihtuah hnuah Jaswant Rawat-a leh Jaswantgarh tlawh thu, naupanlaia Mizo tawng ngeia chhiar tawh, tawite han tarlan zeuh hi tha in ka hre tlat a. Amaherawhchu, Sino-Indian War of 1962 a thilthleng daih tawh leh a tam zawkin inhriat tawh hnu anih avangin thlalak lampangah tuan la zawk bawk ila.

Jaswantgarh hi Bomdila atanga Tawang i rawn chuangchho ve anih phawt chuan kawngdunga awm anih avangin hmuh hmaih chi anilo a. Tin, Jang khua leh Sela Pass inkara awm anih avangin Sela Lake/Dil (14, 000 feet) ah chawl ngei ngei bawk ang che – Vanduaithlak taka lungphu thalo nei i nih chuan awmrei lutuk lo la, mi hrisel pangai tan pawh hetiang vela sangah chuan thawk a har deuh tawhin chauh mai a awlsam riau!!

Sela pan na kawngSang veivawi tawh khawp maiSela Lake/Dil

Helai hmun atanga tlanthla zelin Nuranang kawrhruam kan thlengthla leh a, ram leilung mawi lutuk tak mah ni se sipai hmunpui anih tawh miau avangin thlalak vel a remchang tawh lo fu a. Nuranang luite fim kak mai, luang ri hak hak, kam a tiauchhum bawhpawt chiai, leh tuma la khawih danglam loh, Cedar leh Fir kung tawibuk leihlawih thlir pah a tlanphei zel zawng alo danglam takmeuh e – A tak ngeia hmu ve lo te tana han ziahthiam mai chi pawh anilo! Tin, rilruah hei hi a lo langnghal bawk a, “Helai ram leilung mawi elkhen tak mai hi thisenin a lo bual ve hrep thei ani maw.Aaaaa....Mihring zet hizawng!!”?

Nuranang Kawrhruam luh tan na

Nuranang fin tu

Nuranang lui

Chutia ngawirenga mahni suangtuahna khawvel chen delh delha ka awmlai chuan Jaswantgarh kan lo thleng daih tawh hi lo niin, mel 14 lai kha niin ka hre bawk si? Zi mar uan uan chunga zunram te thiarzawh hnuah muangmarin coffee sa vervawr kan han lem leh te te phawt a; helaia sipaite siam ve mai mah ni se a tui ema hahchawlh pah-a a chhehvel thlirnan a remchang hle in ka hria. Tichuan, a tak a hmuh ve ka chak thin em em Jaswantgarh chu, taksa kham a reh deuh tawk bawk a, fangkual turin kan panphei ta a.

A luhna

Nuranang kawrhruam hawizawngin

Jaswantgarh War Memorial hi Rifleman No. 4039009, 4^th Garhwal Rifle - Baba Jaswant Singh Rawat, Maha Vir Chakra (Posthumous) hriatreng na na an din ani a. A chhungah hian a lim, a sipai thuamhnaw hluite, a sana, a mutbu leh thildang dangte an la kim biai maia. Hei hi 19^th Garhwal Corps sipai 6 ten nileng zankhua in hetiang hian an la vil renga – Zing thingpui dar 4:30 a pek, tukthuan zing dar 9 a pek, zanriah tlai dar 7 a pek, thawhlehni a mutbu thlaksak, a lehkhathawn dawn te zingkar a senghawi sak, a pheikhawk nawhtlet, inbual nan tuilum chhawpsak etc etc. An sawidan thuthangah chuan a mutbu hi zanlama mutna hnu niawm tak hian tuktin siamfel a ngai tihte, leh inbual niawm tak thawm bualinah a rik san san thute anni hlawm a. A hrang han ti dawn ila a thi angah an la ngai hauh siloa – Tun thlengin Honorary Captain (NCO atanga kai hi an awmthei em aw) anga hlawh thlatin lak bakah chawlh pawh sipai pangai ang thlapa pek ala ni e!!

A lim

A Khum lu lampang

A Khum mawng lampangLeave sanction memo

Sawrkar thuziakah chuan helai hmunah hian, Jang khua atanga lo tlehthla mek, China sipaite kha darkar 72 ngawt a thiante pahnih nen an lo dang a. Mahse, thu diktak chu hetiang hian ani zawk e, “Sela khua ami Monpa nula nen an inngaizawng thina, he a bialnu nen hian darkar 72 ngawt China sipaite kha an lo dangchar theia. Amaherawhchu, a bulhnaia awm Monpa thenkhatin mipahnih chauh annih thu China sipaite an hrilh tak avangin an hualbet ngam ta chauh a. Silaimu an kahruah vek hnuah Jaswant-a hi an man a, tichuan he in an sakna hmun ngeiah hian an khaihlum ta a. Tin, a bialnu erawh man aiah tiin ral lehlam kham atanga zuangthla in a famchang ve thung a”. An sawizel danah pheichuan varak (Golden Duck Species) nupa kumtin Sela Dil rawn chenchilh ziahte hi an thlarau ani e an ti bawk – Thawnthu hi inhrilhchhawn zel chuan a unhlun duh riauin ka hria!! Jaswant-a tanhmun tawp na bunker pathumte pawh hmuh theihin an la awm nghe nghe a. A inpumpekna chawimawinan MVC tangkapui mai bakah ‘Battle Honour Nuranang (1962)’ hlan ani bawka, hetianga indona hmun hmingchawi meuh a zah entirnana inhlan hi kha indona ah khan amah chauh ani.

An indo dan kalhmang

Bunker pathum zinga pakhat chu (Jang Khua a lang viai viai)

Fir thingbuk hnuaiah din vauh vauh pahin a piah hmuhphak maia thil awmte ka thlirkual vela - Bunker, a bialnu zuanthlakna Nuranang kawrh thuk laitak leh tlangpang bungvut, Jang khua, leh Nuranang kawrhruam. Hemite pahnih huaisennate, ngaihsannate, vanduaina tih nate, leh khawngaihnate rilruah a rawn awm chuai chuai a. Hringnun parmawina thlahlel rual la niin duh ni selang zawng tlanbona hun leh hmun a han tam tehreng nen!! An thiante insiamremnan leh inhnuhdawhnan hun siamsak turin an nunna pek an thlang ta zawk a, an ruang lah Nuranang kawrhruam thuk tak maiin awmdun remtilo niawm takin a han thenhrang leh ta nghal nen. An inpekna hi a thlawn nilo mahse hmangaihna a vanduai leh mihuaisen pahnihte chanchin leh sulhnu hian ka hnuk a ti ulhin takzet ani – Khawvel piah ah tuma tihbuai phak tawh lohna hmunah hlimtea an la awmdun zel ka beisei!!

A bialnu zuanthlakna kham langin

Ziro Diary

2010-04-14T18:56:00.022+05:30

Ziro hi Lower Subansiri District Headquarter leh mihring 50, 000 bawr vel chenna khua niin a lar angreng khawp mai. Khawhlui pawl tak, 1897 daih tawha British ho lo tlawhpawh tawh, anih bakah tunhma a District pali te – Upper Subansiri, Lower Subansiri, Papum Pare, leh Kurung Kumey - rorelna hmunpui thin ani bawk. He District san zawng hi feet 5538 atanga 8000 inkar ani tlangpui.

Nyishi Hnam hian tamber nihna an hlawh a, a State pumpui zawnga chhut pawhin an tamber tak e – District 5 ah an inzarpharh tlata. Mahse Ziro leh a bul hnaivai ah hian Apatani Hnam an bit thung a; amaherawhchu an tlemtham in 26, 000 thuartham vel chauha chhiar anni. Ziro hi New Ziro/Hapoli leh Old Ziro/Hari Village a awma, mahse kms 5 lek a inhlat leh khaw inzawm thawhthang anni mai e. A hmasa zawk hi khawthar leh sawrkar hmunpui niin a ziaawm angreng hle.

San lamah 5131.23 atanga 5157.48 feet ni mahse Ziro hi tlang leh tlang inkara phaizawl zaupharh duai leh leilet neih theihna hmun thatak niin hmsawnna kawng tamtak ah hmalak mek ani. A chhehvel tlangpanga farkung hringdup chhumin a bawh pawt chiai han thlir pheichuan ramdang mite a hip nachhan hi a hranahraia suangtuah a ngailo awm e.

Hetiang khawpa ram tha Hnam tlemzawkin an han chang daih mai hi engemawni danglamna tak an nei ani phawt ang? Donyi-Polo leh Kristianna Sakhua ah Nyishi ho nen an thuhmun tihloh ah chuan danglamna an lo nei tehreng mai :-

Wet Rice Cultivation: An luidung neihchhun hi hmasang atang tawhin kutlawngin tuikawngte siamin phairama an buhchin dan angin an ching ve thlap a. He tuikawng hian khawl nilo ‘Pressure’ hmangin leilet te hnianghnar tawkin tun thlengin tuiin a la chawm thei a. Tin, engkimah ran chhawr/khawl hman anih bawk loh avangin UNESCO pawhin ‘World Heritage Site’ a puan a tum mek ani.

Hmunsanga awm leh rawmvawt tih takah buhphun hi February ah ti tanin October ah buhvuak/buhseng ani thung a. Hemi bakah hian May thla atangin tuikawngah - Pakho/Hetey - sangha te khawi in July-September velah eikhawp an tling leh a, sangha tui tak ni a sawi ani leh bawk.

Mak danglam tak mai chu an mipate hian thingphurh leh zu in bak tih han tum miah lo a, engkim an hmeichhiate hian an thawk vek a – Khawvawt hnuaia tui dai renga thawk anni bawka Apong, an Zu taivawn hi, nilengin an in e an ti alawm. Tin, July thla hian buh thar tam nan leh hnamtin te tana malsawmna anih nan Kut angreng deuh Dree an hmang thin bawk. Englekhawle he hmun pilril tak mai hi a intodelh tawk ngawtin ka hria !! (Thlalak hmasaber hi '60's bawr vela sipai hmunpui an rauhsan tak atanga hmeh ani e, a bul lawk ah hian Helipad a awm, Khua a thim lek lek tawhin a vawt bawka a mawi lo khawp mai).

Old Ziro: Rualu leh nunhlui ngaite bak an cheng tawh meuh lo, an fate hi neinung tak tak leh hmun hranga in leh loh ngialghet tak nei vek anni. Adi ho nen hian lekhazir uar hmasapawl niin sawkar milian, an tlem ang hu ngaihtuain, an tam nek. Kawng lehlama ngaihtuah leh chuan an hmanlai nunphung humhalh anih rualin mikhual tlawhtu an hmuhhnem phah leling zawk.

An insakdan hi a mak dangdai khawp mai - A dungzawngin an sei em em bakah insirial leh inep thapin kawngpuidung khatah an tlar dula. Hmanlai in run thinlai kha chuan a tangkai fu anga, mahse kangmei laka inven a har hlea sawi ani. Tlangau in zantin mut hun awm velah mei timit vek turin a au thin ani awm e.

Mahni kawt theuhah ban sang tak – Babo an tih mai - an phuna, a khawpum tan pakhat an nei hrang leh a. Hei hi Lapang bulhnaiah an phun thin – Lapang hi thingphek dawhsan leh khawtlang rorelna (Bulyang/Gaon Puras) atana an thutkhawmna hmun ani. Kum li danah Myoko, kutpui ani leh mai ang chu, an hman laiin lapang leh babo hi inkarthlakin a thar an sa thin.

Chi: Pipute hunlai atang daih tawhin chi - Tapyo - hi meivap atanga siamdan an lo thiam tawh ani awm e, Iodine a awm sa avangin awrpuar an nei ngailo bawk. Piputen chhawchhi leh chi Bengali ho an inthleng pui lai leh Pu Laldenga rualu ten an chhandan ngaihtuahin nuih a za deuh reuh.

Tattooing: An ching tawh lo nain upa lam deuh hmuhtur an la tam mai. An mipate ten an khabeah T chhut laiin an hmeichhiaten hmai tihran leh hnarbeh an uar thin hle. An sawidanin an hmeichhiate hi an hmeltha bika, hnamdangin an run phah fo a, chuvanga an lanchhiat na na chin tan ani awm e. A dik maithei ani, thangtharte kan nupa a kan hmuhdanin – Hleitling leh fu ke dik, hmaifang tha leh hmaitung, leh ngosen lampang anni tlangpui.

Hnammawl zeta hmuhtum khan ngaihsanna tamtak neiin Ziro ka chhuahsan ta anih chu. Hengho lak atang hian Mizote hian zirtur tamtak kan nei maithei ani. Mahse thlanlung an tihdan leh mithi phum dan (Puanin an tel tawp) atang hian an hnam hnufualna tlemazawng a langin ka hria.

Itanagar Diary

2010-02-27T17:50:00.011+05:30

Insawn buai nen hnathawhna thlak nen, heng te hi kan chanchin tlangpui ani e. Lucas-a hian helaia awm hlen tur ah hian a inngai ngailo niberin a lang, thuisawi tawp apiangin Kulkhut-a kan kir leh hun tur hi min zawt ziah mai. a. Kan chanchin a tlangpui in : -

A Nu nena an titi na: Tum khat a Nu nen a naupanlai thlalak endunin a Nu chuan, "Baby/Nausen i nih lai ami anih hi, ka pum atang a rawnchhuak i ni" a tih chu a hrethiam lo anih hmel e. Heti hian a chhanga, "Baby ka ni ngailo, Big Boy ka ni thin" tiin. Ni thum hnuah a Nu hnenah, "Min ei zo emia" a ti ta a, a Nu in,"Engvangin nge ka ei zawh ringawt ang che" a tih chuan, "Kurkure ka eiin ka pumah a awm vek a, keipawh i pum a ka awm anih chuan min eizo vek anih chu" a ti a.

Michelle leh Foxy a tehkhin na: Kan uite hming hi Foxy tiin kan phuah a, a beng a tun avang leh a khan tawi chi anih vang ber ani. Michelle-i hi kan Nupa a uluk taka Malsawmtluangi tih zulzuia kan phuah, hmeichhe naupang kum 2 mi leh Lucas-a laichin unau ani. Kan uite hian Lucas-a hi chhaih pahin a se ner ner peih hle a, a laichin unau nu lahin a thinrim apiangin seh a tum bawk nen. Tumkhat chu a Nu hnenah heti hian a sawi, "Foxy chu Dog ani a min seh thin, Michelle baby pawhin min seh thin, Mama Michelle baby chu Dog ani".

Thlai chungchang: Huan enkawltu fel tak Doley Rana, Assamese tribal, kan neia. Hill Miris ti a hriat ni mahse helaia chuan Nyshi Tribes ah an intulut a, hemi te Hnam hi sawichhawn takah chuan awm awl eitui leh suahsual rawngbawl ani mai e. Niminpiah atangin inrawng hnawih kan buaipui tan a, a taima in a fel angreng fu. Huan enkawl a taima in thlai chi theh a peih fu a, tumkhat chu kan Nu in minpuak fang thlangra khat nisa a uluk taka, kan eitur nena a hisap lawk, a pho ro chu a remna laia apianga tuh turin a pe a. Ani lah chuan thlai tiak awm tawh na hmun apiang leh a enkawl na hmun tinah lo tuh niin, kumin chu mimpuak eitlak ni lemlo kan thar tam dawn viauin a ang. A bang lah chu bawngek nen a lo chawhpawlh lehnghal a, ei leh chi hi anilo reng reng.

Hemi te Nupa hi kan khawngaihin kan duhsak hle a, min dil nasa bawka midang ai awhin kan han thawhtir ti ve a. Mahse le an Nupa in ka office Toilet an tifai thiamlo pek anih chu. Tihtak meuhin zaizirin ka han zirtir ngiala, an hre theilo lutuk ningin an hmuh lai in ka tifai ta a, tuna chin ah thiam tak maw ??? Ka awm hma a awm pa in thingpui lum tura a tirh pawhin engkim a telh dik vek, mahse a tawp ah Nimbu tamtawk a sawr ani awm e, kan puilo tlang khawp mai.

Thil sawitlak deuh te: Repuplic Day ah Governor in thingpui in tura min sawmna ah kan Nupa in kan kal, CM pa chawhlui kil turin ka kal bawk. A bak chu kan hotute zahpah lo takin Itanagar a Dak Inpui sakna tur sum ka sawichhuak, Kan Department Secretary leh Board Member hma ah ka tawng na deuh ni tur ani, kan hotunu in ngaihdam dil turin min phut a mahse ka dil lemlo. Tin, kan sazu var vulh an pung hle - Hmanzan ah pakhatin no panga a nei a, zaninah pakhatin nau a vei mek.

CM Bungalow

Governor chenna

A Tawpah Chuan

2009-12-11T14:57:00.005+05:30

Hun reife ring fân chung meuh a kan lo nghahhlelh em em chu a taka lo thlengin, N-E posting chu ka hmu ve ta ngeia. Mizoram hmulo mah ilang kan hlimin kan phur tlâng hle, rawn awm duh an awmlo bawka Pathianin rem a tih chuan hmuh hun a la awm ngei ang tiin kan inhnemchawpa. Engle khawle Kulkhut hi ka hne tawh ani ber mai e, duh avanga awm lah kan ni hek lo, insawn buai kan huphurh vânga awm kan nimah zawk e.

Kawng lehlamah chuan Kulkhut hi phairama lehkha zirtura chhuah hmasak ber tum a, bul ka tanna ani ve tlat mai - July ni 23, 1990 ah khân ka Pa nen he Khua hi kaltlangin Maharastra kan pan tak e. Thanghnih liam zet zawt hnuah N-E ka let leh na tur Khua ani leh dawna, December ni 23 kher ani lehpeka - Heihi tum vang pawh anilo, kan hotunu berin ka chhuah a phal ni anih vâng zawk ani. Thlatira chhuah ka dil pawhin, "Recruitment hi zo fel phawt rawh" a ti mauh maia, kan inhrawn rei ve tawha min ring thawkhat tawh hle ni tur ani !!

Kum sawmhnih lai liam tawh mahse khami ni kha thlirlet in, kan Pafa ve maiin - Kut ruak ve tak leh hmalam hun awmzel tur hre miahlo lehnghâl kha kan ni a. Tunah zawng nupui fanaute neiin kan ri haw bung bung dawn ta anih hi. Heng kum kal ta zawng zawnga min venghim tu leh kutbenga min haw tir lo tu, Pathian chungah lawmthu sawisen loh ka ba ani. Kei tluka malsawmna thlawn leh chhiarsen loh dawng hi an tambik kher lo ang. Mahse mihring ve mai chuan mahni a kan in hâi kuak emaw tih mai hi a awl leh thin, he leia kan damchhung hian Pathian bei hi vawi engzât tak tidawng thin ang i maw !! Kan fate tih ni se chuan kan hrawk zing awm teh e...Ka tawngkam thiamin a daih tawh lo bawka, he lampang chu sawithui tawh lo mai teh ang !!

Tichuan, rokhawlhna te a awmloh chuan ni 23 tlai khian Itanagar chu thlen kan inbeisei a. Mu leh mal awmloh na Khua hi chhuahsan thuai thuai a, heng te hi hmuh hlân kan nghakhlel ani, an lo hlu vet vet em mai: -

"Lui luang ri hawk hawk te
Vân dumpawl, thiang leh fai kuk te
Mit tlin chin chin a ngaw hringdup te
Zana arsi pe un mai te"
(Sâmah sâm luat a awmlo an tih kha)

Home Sweet Home, Kolkata

Hun Kaltawh Thlirlet Na

2009-10-21T17:30:00.007+05:30

Hmanni thlalâk hluite ka haichhuak vela, rinai takin ka lo nghah daih mai a. Kum te a lo liamin hmel tepawh alo dang ve ta deuhin ka hria, mahse thil lawmawm ber erawhchu a vâng zawngin ka la thang miah lo hi ani. Ka Batchmate pui leh thenawm pa reng hi a kiar tha tawh mai a, ala upat bik loh tehreng nen.

Tichuan, ngaihtuahna te a kal thui zela, thiante nena inhmuhkhawm hnuhnun ber kha 2003 daih alo ni reng tawh mai a. Thlalâkte ka bihchian hnu in thlaleh, training tur avanga, inhmuhkhawmna ah kan zavai in kan kim theih dawn ta lo ani tih ka hrechhuak leh a. Hnadang thawk leh te chu thuhran nise, kan zingah pakhatin min boralsan tâk vâng ani zawk e.

Sikkim a Trekking tum

Kan zinga ka kawmngeih ber leh ka roommate zeuh tawh thin, Tlangval Shihoi Bokato Sema, chuan 5th January 2005 khân, Assam Circle zawm tirh leh Quarter hmuh hma siin, he khawvel hi min chawlhsan a. Chanchin ka hriat tirh chuan 'Lungphu chawl' an ti bawk si a, min thawngin mak pawh ka ti hle a. 'Foundation Course', Mussoorie ah lah khan 'Cross Country Record' reitak lo awm tawh tichhetu leh 'Excer' peih deuh ani bawk si a !! A peihzia chu Bangalore a 'Probation' kan neih lai (A hnuaia ding zinga dinglam ami nen hian) pawhin 'Inspcetion Quarter' chhungah tlânna a awmloh avanga inchhunga tlân zar zar thin kha ani a.

Sitting (L-R): S. Bokato Sema leh Keimah

Fiamthu thiamtak leh Pathian mi deuh ani bawk e, tlaiah hian 'Tennis' kan khel dun ziah a - Kan khelh hnuhnun ber khan 6-4, 6-3 in ka chak tak e, zanriah ei dawnah, "Man, you can still run like a twenty years old" min ti nghe nghe a. Vaiho zinga kil ve lo in, kan pahnih in ka kildun zing hle - Vawksa kha a ruk te in kan eizing khawp mai !! Mahni hnathawna hmun tur theuha kan liam hnu khân a hnathawhna, Puri (Orissa), atangin January 2004 khân min rawn tlawha.

Kei ka la parawl bawka, kan pahnih in rawngte bawl in kan titi tui hle a - Ka bialnu, tuna kan Nu, chanchinte thlengin tui takin kan sawidun a. Chhunah Howrah Station atangin Seerampoore kan pan a, a nau Pastor zirzote ni ropui tak chu kan va hmanpuia. Zanlamah kan thianpa tho, Kekhrievor Kevichusa, te inah zanriah kan ei a - Kan hawng tlai bawka, in neitute ei hnuah kan ei pek a. A tukah a kalna turah motorin ka thlalhliama, mahse kan inhmuh tawp na ani tihchu kan hrelo ve ve in ka ring. A kum leh zing thawhhlima, JNU-a a thianpa leh tunah IFS ni ta Robert Shetkintong Dilbung- an, a boral thu phone-a min rawn hrilh zet kha chu hrilh a hai duh ngei mai !!

Hun reife chu ka mumangah ka hmu fo a, min be lemlo in a thinrim hmel em em thina. Mahse a hmingchawi ngeia 'Running Trophy' kan buatsaih hnu leh kan hotu tena an chhiarchhuah tura a chanchin - Rajesh-a, IP &T Service, rawn chunga - kimchang thei angber a ka han thawn hnu khân, ka hmu leh ta ngai miahlo thung. Kum alo liama, thlalak en ngaihloh nen, thiante lakah ka leibat ka tlingta tawh emawni te ka inti thin. Mahse ka thian kawmngeihte zingah chuan tun thlengin ka la chhiara, nui chunga ngaihtuah chhuah châng ka nei zeuh zeuh thin.

Mahse hei inhmuhkhawm alo hnaia, ka rilruah hun kal tawhte a rawn thar leha, kan inkawm laite kha ka mitthla leh thin. Pindan khat kan luahdun laia zingkâr class kaltur hmanhmawh em em laia, a insingsa rei thin lutuk ka hauh thin leh thildang dang ani deuhber e. A kalna hmunah a hlim ngei ka beisei in, hlim taka kan inkawm thin laite kha a hriatchhuah ve ngei ka ring ve bawk e. Inhmuh leh hma loh zawng hlim takin le, thianpa Bokato.

Ruahtui Leh A Behbawmte

2009-10-05T15:21:00.013+05:30

Kumdang ang lo takin kumin chu ruahtui a la tla ve hle in, khua pawh a vawt ve sawt khawp e. Nipui laia thlâi chin/tuh chi in tuar hle mahse thlasik a chin/tuh chi chuan an tuar vak dawn lo in a ang hle mai. Hmanni nikhat ruahsur ringawt khan Kulkhut 'Rainfall Deficit' atangin 'Surplus Rainfall' ah a lehlin tir hlauha, vanneihthlâk takin lei hniam deuha awm veng thenkhat - Behala, Lake Gardens, leh Dum Dum - te tui tlingin a tibuai lo hlauh a, a lawmawm thawkhat e (Ka mi leh sâte an tam ve bawka).

Ruahmal khat atangin tuifinriat zaupui mai chauh hi a lo chhuak awkawng lo e. Zing 'Walk' pah a nungcha leh thlâipâr ka hmuh thenkhat tepawh hian nuam an tiin, keimah ang chiahin - he Khawvel ruahtui malsawmna tello a awmtheih loh na hi - a mawina leh a nawmna chendân mawlh an buaipui vein ka hria.

Raindrops

Raindrop (Kan Varendah atangin)

Raindrop (Kan puan zâr na ah te)

Paldâi rah

Daidep (An damchhung nite hi a reilo hle)

Phung-Chengkawl (@chepa an a ti)

Thingkung Pâr Leh Pangpâr Thenkhat

2009-09-23T13:00:00.008+05:30

Post tur a vâng ema, Thingkung pâr leh Pangpâr hi han ti ve leh ringawt ila. Ka tuina lampang chu ani lemlo na in, a vawikhata vawikhat chu a awmthin e an tih kha. Ka rilrua rawn lang chu, "Zingah sava ten Pathian an fâk a, Pangpârin a ropui zia an lantir a....." tih ani daih.

Thingkung pâr

Thingkung pâr tho

Thingkung pâr bawk

Pangpâr ve thung

Pangpâr bawk (Mawi ka ti deuh reuh)

Chuai mai a (Communist pâr anih hmel e)

Pariat Ziah Kan Zir Ve Dân

2009-09-08T15:35:00.010+05:30

Naupang lehkha zirtir hi ka peih em em hranpa loh avangin a Nu hian a vil deuhber thina. Hmanni Office atanga ka thlengphei chu kan bang, chhuak tawh tur ni a inrin avanga kan hnawih that tir peih tawh loh, chu a lo râng buai mai a. Ka hmuh vawikhatna anih avangin ka bihchiang deuha, ka fapa kutchhuak ngei mai ani tih hairual lohin a hriat nghâl mai a. Amah ka zawh lahin, "Wall kha ka colouring alawm, a mawi tiraw" a ti thena, Ka hâh deuh avangin, "Aw, I thiam lutuk" ti a ka chhâng chu a lawm hmel khawp mai lehnghala.

Zanriah ei laia Nu ka zawh chuan, "Number zawng zawng a ziakthiam tawha, mahse no. 8 ah hian a tâng tlata. Hei hmânni deuh atang khan a thiam thara" tiin min hrilha. Ka rilruah, "Huiha, kan bang hi lehkhaphek atan a hmang ani maw" tih a rawn lang nghâla. Mahse ka ngaihtuah thui deuh hnuah, "E, a pawi leh lo, a rilruah no. 8 in hmun a luakhat ve hle anih dawn hi" tih hi a rawn lang ta zawka. Inchhunga crayons pencil nena a teikual pahin a ziak zel aniang, hawina lam apiangah a râng ruai mai..Lolzzz....

Bedroom ah te

Dining Table bulah te

A hnuaia mi hi nizana a siam ania, intithei taka kan nupa min hmuh ani nghe nghe. Vanneihthlâk takin a poster colour hmangin bang a hnawih râng lo hrama, a lawmawm thawkhat e - Nalh taka frame sak tur ani.........

Abstract painting (I guess)

Hatgachia Khua

2009-09-02T12:13:00.030+05:30

Hnathawhna avang hian hmun hmuh miah loh tur te hi kan hmu leh hlawl thin, mahse hun rei hnua hnungna vei tur ringawta Office-a files khawih nilen ai chuan a nuam zawk fe ti ila ka daw lemlo ang. Thilthar engkim ka lâwm ti dawn ila, hla hluite hi ka hlutin ka ngaina ang lawi si a - Boruak tharlâm deuh han tawn zeuh zeuh hi a nuam tizawk mai teh ang. Niminah khân khaw thar, han tih lemah Kulkhut piantirh a ta awm tawh pawh ani mahna le, tlawhna hun ka neih hlauh a. (Sawithui loin thlalak han tarlang mai ila).

Hetiang Inhmun hi ka awt ve ani

A piah hi engtin tak chhungkhat ang maw

Leihlawn hi Lirthei in an zawh ka hmu

Pi leh Pute hunlai ami niawm tak ani

Sangha zawrh tur phur aniang

Thirsakawr neichin

Naupanlai ka hrechhuak zawk
Khaw tawntirh/daifem

Bengali ho insakdan diktak

Hmuh loh na a va han rei ta em

An khaw Sâmdala anih hmel mange

He thingtlang khua hi New Town/Rajarhat piah deuha awm niin an eizawnna ber, leilet a kut hnawthawh, chu tih riral deuh vek ani ber tawh a. Hmasâng ata an mahni chawmtu ber leh an kawtchhuah maia awm thin, leilet zau tak tak te kha, ah khân khawpui thar a ding luah tawh hlawm. Phal takin nge tih luihna avanga an hralh tih hi chhut tham fe ani - Tun hnai maia lâr Vedic Village pawh kha politician ho remtihna leh misual hmanga vauna hlaua, hralhlo theilo dinhmuna awmte chanchin hlirin a kat nuk si a.

An khaw sir mai

A piah leh deuh ah

New Town khaw thar chu

New Town kawngpui dung (Haw lam)

New Town kawngpui dung (Kal lam)

Kolkata Metro Rail/Flyover - An sak mek

Rajarhat kawngpui - Haw lampang

Rajarhat kawngpui -Kal lampang

Engle khawle khawpui thangzel chu dan rual ani siloa, mahse anlo thandan thuruk tenawm tak tak erawh zawng he khawvela kan awmchhung chuan hmuntin ah a tam hlein ka ring. Rurban Landscape diktak (Rural-Urban Landscape ah chuan ram ruak a inkârah a awm thin) piaha thingtlang khawnuam ve tak ka la hmutheia a lawmawm letling zawk. Tun atanga kum 5 hnuah kal leh ngat ilang chuan Hatgachia Khua hi a awm tawh meuhin ka ringlo, a hnuailam a ka thlalak târ ah khian chhunluh in a awm tawh ngei ang. A mi chengte hi hmuh ka inbeisei tawh loh rual rualin, engtin tak eizawng ang maw tih ka suangtuah nghal bawk. Khawvela mihring tam ber na dawttu he Ram ah hian engkim mai hi tihtheih niin thil tithei tute kut hian a va han ban thui tak em !!

Prawns

2009-08-11T12:14:00.009+05:30

Nimin chhungte rawn zin chu prawns min rawn hawn teuha a tihchi ngei mai, helama pakhat cheng sawmthum man chi freeezer-a han dah im em chu a nawmdân a dangdai tlat. Siamdân chi hrang hrang a awma, mahse Mangalore Prawn Pickle hi an tluklo deuh vekin ka hria. Post hnawhkhah nan hetianga siamdan hi kan vawmbei mai mai teh ang.

Hei hi mamawh hmasak ber

A kawchhung chiah tihfai in a kawr hi hîk lo ila, chuan butter leh eng ilo tâh maitur. Chumi hnuah sahriak tlemte in reilote ur leh ani maia. A kawr hîh loh a that nachhan chu a hmin hnuah a tî hi a phawng hlawl theia, tichuan hapui leh pumpui tahhriam ani leha........

Telhtur kimchanga telh leh

Hapui tah hriam ani leha

Kan Tân July Ni 19 Khi

2009-07-13T13:52:00.049+05:30

Kum li lâi a vei ta dêr mâi, khami tûk ang rênga, hlimna leh hlauhthawn rukna avanga, helhhawlha taka ka awmdân ang kha ka la hre ngai hauhlo e. Chawlh ka la bawka tukthuan pawh eitha fumfe hleilo in ka liamphei vat a. Ka kalna tur pawh ka thleng hmâ khawp mai, dâr 9:30 atangin nghâkhlel tak leh hlauthawng tak chungin patlinga pumpa kha kan ding khup ta zûi a. Mahni kuta han chinfel chi lah nilo chu, ka mi chân te kha ka nghâk ta ngawt ngawt a. Chumi chhapah zan hmasa lama mutmu hmuh meuh loh avâng tepawh ani chêk ang chu, mutchhuak leh riltam avangin ka ni deuh muai muai lehnghala.

Minit khat lek pawh damchhung daih ani an tih kha maw, ngeni ka Khawlhring dawhtheih lohna mizia (Ka Nu hi Khawlhring Hnam ani) kha a chhuak zawk aw - Hun kha kalmuang ti lutukin ka vei sek mai a. A tawpa tawpah chuan kawngkhar a rawn inhawng ta hlawl a, ka hming ngeiin min rawn au ta lauh lauh mai a. Lo beisei rûk leh tawngtaina a chham ang ngeiin chanchin lawmawm tak leh Ka nupui pawh engkim a that thu min hrilh ta mial mial a. Hlimna avanga rilru zângkhâi takin 'Incubator' awmna lam ka panphei ta nghal a. Tichuan, Pathian malsawmna avanga he khawvel, July 19, 2005 zing dâr 10:58 a, min rawn hmuhpui ve tu kan fapa - Lucas Vanlalhriata Chhangte - chu ka mit ngeiin ka hmuve theita a.

Hâng thelthawl tak leh sam ngah fa hi ani reuha, mahse fu-ke kim a neih avangin lungawi lohna ka nei hauhlo - Pâ tak tak ka ni ve tawh tlat alawm, naupiang 38 zinga mipa awmchhun kha ani bawk nen. Chanchintha Luka hmingchawia phuah niin, a Mizo hming hi a Christian hming nena inzul tura saksak ani e. A hming hi ka Ni ina a pian hmâ daih tawha a alo phhuah tawh anih avangin a pu nghala - Mizo dânah chuan rual u hmu hmasaber tuten hming an phhuah thin, ralkhat atanga hming inphuahsak hi thianglo anga ngaih ani. Chuvangin ka Pâ pawhin, rokhawlhna avanga a rawn kal theih tâk loh avangin, mipa lak atanga a 'Tu' neih hmasakber chu hming a phuahsak thei ta biklo a. Amaherawhchu, Ka piantirh ata min awm tleitu ka Ni hming phuahsak hi tha kan ti em em tho mai.

Mahni inluma kan han lut leh chiah chu le, naupang ber ve ve innei tih takah nausen enkawl dan kan lo hre tlem dûn khawpa, mahse eng titih in emawni inzir chho chungin kan tithei ve naw naw zela. Nu leh Pa nih hi thil awlai tak zawng alo nilo phawt mai, han nih ve meuh chuan hriatloh lûat avanga insit châng a tam duh khawp mai. Thinthi thiapa mutmu tuah a vângin, Lucas-a nawmsam loh deuha, laina hnaivai awmlo nen, mangan nikhua châng pawh a awm thin tehmeuh mai - Zirtur hlirin hmalam hun hi a intiang urh chu ani ber e. Bengali 'Ayah' rawih mai aia mahni kut ngeia chawilen kan tum bawk si a, a tawi zawngin kan buai nupa thin ani ti mai teh ang - Nausen nena inkungkaihna siamna thaber chu mahni ngei inhnimhnaih hmasak tir hi ani.

Pathian zârah naute thangduang tak leh tlei tak ani chho reuh a, thlaruk a tlinchhoh chin atang phei chuan a keyboard hmet ri tleng tlengin tuktin zing dâr 5 bawr velah min tiharh ziah ta mai a. A pianchampha hmasaber kha chu a hrelo tawp ang le, mahse a dawt lehte pahnih kha chu a hre riairuai in ka ring. A thiante pianchampha lawm chânga thil te te rawn hum haw tat kha nuam a tih thin em avangin Montessori, a sikul kalna thinah, tumhnih ngawt chu kan lawmsak nghe nghe a. Kum khat leh thla sarih anih in Montessori Sikul ah kan luhtir a, malkhalh leh puitling pahnih kâra seilian chho ta chuan naute leh naupang dang te a nuihzat tan tlat vâng ani deuh ber e. Sikulah pawh a harh chungchuan avangin hremna a tawk zing khawp mai, class an lâk lai han bihrûk châng te hian a thu hle hle hmuhtur kha a vâng thin reih rawih khawp tak e. Mahse tunah zawng a changkang deuh ta bawka, eng engemawni thiamthar hi a rawn nei ve leh nawlh thin - A bik takin 'Swimming Class' an neih tum hichuan sawitur a nghah thin hle.

Tuntum chu a duhzawng kimchang taka a sawitheih tawh vâng leh a tawngkam thiamthar - "I love surprises and gifts" - tih a hmanzin tâk em avangin hnunglam atanga sabarh kan tum deuh a. Hlimhmel tak leh lawm deuh maia kan biang an fawp tur mawlh han suangtuah in, khawvelah hian engdang mah min awh/ngaih tir lo e, a manhlâ ve hrim hrim dawn tlatin kan hria. Damte a chung Pathian venhimna leh malsawmnate dawngin, kum tam te lo liamin tumawngbeng pawh lo ni mahila, hemi ni kher hi chu kan hlimber leh manghilh ngai loh tur ani - An advance Happy Birthday to you, Dear Lucas. May there be many more in the years to come by, albeit the Almighty's blessings.

B'Day urlawk ni

A nuam tihber na hmun - McDonald's

A hlim khawp mai

Rabindra Sarobar Lake

2009-07-06T16:02:00.028+05:30

Ruah a sûr ta bawka rilru a kalding leh thei ta deuh. Tukin pawh office kalkawng tluanin ruahsûr in traffic a ti tawt hle na a, hla ngaihtlâk pahin dawhthei takin ka thu ve hle hle thei ta - Khawlum zual lai ang khân thaw a pik em em tawh lo. Mahni lirthei sil peihloh tân pawh tukin zing kha chu hlimna tham ani reng ani. Amaherawhchu khua a duai deuh tâk avanga ziahtur lampanga luangliam nghâl chu ka ni hauhlo thung.

Reife inngaihtuah hnuah 'Sermon' tlachawp ring thin ang deuhin, " Ka thlalâk neihte hi pholang ila, tichuan ziahtur a awm mahna" tih kha ka rilruah a rawn lang ta a. Thupui pakhat siamna khawp chu ka lo kawl ngei maia, mahse duh aiin thlalâk a tam mah mah ani. Mahni inhnemchawpin, "Aaa....Thupuifun lemlo mahse a cheimawina a tamphawt chuan mi mit tal a ti tlai mahna" tiin ka ziak tan ta a.

Tuktin hriselna thazawk duh avanga kan insawizawina hmun 'Rabindra Sarobar Lake' vaukam hi ka vawmbei ta thawr ani. Mizote hian hetiang hi kan peihloh mai bakah tarlam phei tihserha tak an nei niin ka hria, tlâi khaw hnuah leh loh theiloh chinah ti ve leuh leuh hi kan ni tlângpui. Inkhelhna hmunpuia kal lemloh pawhin mahni hriselna tawktur vela han tih ve hram hram hi upat hnuah kan hlawkpui an ti bawka, kei - Hun reife chhung chhangchhiat avanga lo chawl tawh - vawksa leh bawngsa tui ti ve deuha hian kan tharthawh leh hnuhnawh a. Tihtirh chuan inchhirin zingkar-a duhtawka mut siai siai theihlai kha a thlahlel awmthin ngawt mai.

Luh tanna kawng

Zing Nichhuak engmawi tak

Vaiho hian an peih khawp mai

Inkar nitin chu an hrisel viau ang
Vei lampang Dil

Ding lampang Dil (An infin)

Luhna atangin Km 1.5 vel ani tawh ang

Mahse hun alo rei deuha kawngchhuka tlân ang vel ani ta e. Tukin phei chu labrador thâu kung mai, meter 10 vel lek kal hnua bawh tum mai thin, leh a pu pawh ruahmal a tlâk vang emawni phûr takin an kal toh toh lehnghala. Hmuh than an tam tawh tehreng nena kan hmel ang pu chu Chinese pa, tarlam tawh, chiah hi ka hmu thin. Englekhawle chu chu thuhran lo nise, he hmun hi Kulkhut nuam ka tih ve nachhan pakhat chu tling reng reng. Varendah atanga a lan mawi nate, chilchhâk phak leka a awm mai nate, leh thildang dang vâng te hian min hipna tak a nei tlata.

Thingkung a tam khawp mai

Thutna tur a tam tho bawk

Khawthim dawna sava chi hrang hrang an riahna hmun pana an han hram chuah chuah te, hmuh leh hriat ngailoh thingkung mak tak tak han hmuh te, naupang intihhlimna hmun hrang hrangte, sangha khawina hmunte, lemchanna hmunte, lawngkar inzirna hmun leh rawih maitheih lawnglengte, cricket leh football khelh nate, leh thil hrang hrang awmte hi mit titlai khawp anni in ka hria. A bik takin a hmun hi a zau bawka chhungkua-a han vah khawthawn hi nuam tak ani, nipui lai ngat phei chuan tihchi tak niin ka hria. Dil thlir paha lungmuang tak leh engto nei miahlo a han thut ho dial dial hi nuam tak ani. Kan khua ilo zin anih chuan he hmun hi tlawh ve ngei i tum dawn nia, khawi hmuna pawh hi han vahzau deuh chuan hmun nuamtak tak hi khawima laiah hian alo inthukru thin.

Bengal Rowing Club (Kolkata chu ka dinna bulah)

Kalna tura an siam thenkhat

Malsawm Ruahtui Kan Châk e

2009-06-30T11:07:00.011+05:30

Kumin chu khawkheng hian boruak a tih uap chuarh dân hi a hreawm khawp mai. Tuktin mai ruah a sûr dawn em tiin vanlam kan thlir doh doh reng mai. Chhum a lo dum deuh khup châng chuan hlim takin hnathawhna lamah hian kan liam phei a, mahse min bum leh thin. Kan thlir zing bawk aniang chu ka fapa meuh pawhin thlirchhoh dauh dauh pahin, "Ruah a sûr ang, Papa" a ti ve bauh bauh thin.

Hemi ni hian a sûr ve teh khiah

Hemi ni hian a sûr lo tlat

A chhan leh vâng chu tunlai mithiamten an sawi châmchi a, hrânghlui ho sawidân takah, "Pafa in ngai an awm aniang" han ti ve ngawt ila dikna chin te pawh a awm mahna le. A pawimawh ber zawk chu thlai chin leh buh tuh nghawng khawpin ruahtui a tlem mai ang tih hi ani. Chumi chhapah thlasik laia chin chi thlai hrang hrangte tân tui khuapna hmunah te tui a tamtawk angem tihte pawh ngaihtuah tham fe ani - Current awmloh tur chu thuhran nise. Thilman zawng a pung dawn khawp mai !!

Kan kawtthler atangin

A mawi mai bakah a tuihmel riau

Mahse kawng lehlam takah chuan vân dumpawl ruih mai leh chhum vâr han hmuh nikhua tepawh hi nawmna chin a awm ve tlat thin - Khua a thiangin a mawi thin hle. Ka fapa pawhin, "Blue sky, white clouds" tih tawngkam a hmang zing ve tawh khawp mai, kan inzirtir tirh kha chuan, "Anilo e" tih pahin building pawl leh vâr a kawk ziaha - Hmâ kan sawn chu ani phawt mai.

Parva te hian nuam an ti

Hetiangah hi chuan a sûr ngailo

Chungleng sava tepawh hian engto an neih em em bik loh hi. Khuanu rorel ang zelin lungkham neilo in a mawina hi han thlir zel phawt ila, a hun takah chuan ruahhtui pawh a rawn tla ve mai ang. Mahni tawn ang zel hi nuam han ti thiam phawt ila, hringnun pawh hi a nuam zel ngai e. Ka post zawhrual chiahin ruah a sûr nghal e, a va han hlimawmin hmuh a va han nuam kher em.

Thisen Kan Pe

2009-05-21T14:58:00.008+05:30

Tukin chu thla hmasa atanga kan lo tumlawk tawh angin 'Blood Donation & Health Check-Up Camp' kan huaihawt a. Congress Party thlazâr hnuaia 'Trade Union ' awm, FNPO, ina a khâikhawm pasarihte zinga mi NUPE tena an kumtin tih thin ani. Blood Bank-ah te hian thisen a tamtawk lo nimai loin hrithalo vei tamtakin , ruihtheih leina tur leh sumtuak nana, an hman thin avangin ka phurpui hlea. A lehlam pawl, Left ho bel, NFPE leh a khâikhawm pakua-te pawhin an ti ve tho mai. Mahse Blogspot ka siam hnuah hian an la tih ve loh avangin ka sawi tello mai ange.

Pu Rajiv Gandhi-a hming in

Pu Rabindranath Tagore-a hlâte rimawi nen

Dawhsân (Pawn-ah chiah phal ani)

Thisen pekna hmun hi kan Department Building Kankurgachi (Kâkurgachi ti a lamtur) ah ani. Nikum lam, unit 65 hmuhtum, aiin kan hlawhtlin lehzual ngei kan beisei a. Hlawkna awm miahlo leh mahni duhthu ngeia pek tum vek anni ngei, mahse Doctor ten an hriselnate an enfiah hmasa vek thung. Tin, 'Free Medical Check-Up' rawn kal apiangte leh duhte tân tihsak nghal ani bawk. Doctor-te pawh hi anmahni duhthu-a rawn inpe anni vek bawka. Thisen pek khawmte hi Linton Street hmunpui pakhat-ah enfiah leh vek anni bawk ang.

Hawnna neih hnuah thisen an pek tan ani

Tupawh he chhinchhiahna hi pek anni

Duhthusam angin a hmun hi a nuam lemlo na-a; ka hote hi thiltha ti an nih avangin ka chhuang ve hle - Chhinchhiahna Batch leh Hmehkan Bel pakhat theuh an pek anni hlawm bawk (A senso erawhchu Sawrkar sum nilo, anmahni thawhlawm tlingkhawm atanga tum ani). Zing dâr 11:30 velah ka Office ka thlengve hman hrama mahse inchhirna ka neihloh mai bâkah Pu Rabindranath Tagore a hlaphhuahte hi 'Instrumental' chuan an lo nalh hlawm hle - Neih ve ngei ka tum ang.

Aizawl Diary: Inchawina Hmunpui

2009-04-24T15:32:00.013+05:30

Aizawl han chuankâi meuh chu boruak a lo thiangin a lo dâi nuam bik khawp mai !! Zothlifim han dawn heuh heuh hnuphei chuan phairam lum leh uap churh a ngaihawm loh khawp mai bawk a. Zan lam lek phei chu tihthan loh em em, hritlân hlauh vâng leh vawt tih avângin, puanlum sin deuh hlun a ngai leh thin. Ka lo kalna Kulkhut nen chuan Hremhmun leh Vânram tehkhin tum ang deuh niberin ka hria.

Mahse tuktin chawhma pel thak thaka chhuah a han ngaih meuh chuan, "Aizawl Khawpuia thil dangdai deuh hmuh châkna kha" rilrua ah a lo lang ta tlata. Han len khawthawn tum deuh apianga Chaltlâng/Ramhlun kawngpui zawh phei purh leh Zârkawt kawngdung, phairam ang maia tawt, hmuh fo kha ka peih tawh bawk siloa - Heng kawtthlerah te hian hmuhnawm ti em ema han kalna chhantur ka hre em em lo bawk ani !! Berawtlâng leh Ripans lah, nuam hle mahse, duhtakte tello chuan ka tân engtihna mah ani bawk siloa. Zan lamah lâh thawm riva a reh hma avangin LPS leh Zonet a hla thlante thlir leh tlawk tlawk kha hnapui ber ani leh maia.

Vanneihthlâk takin unaupa in thil dangdai deuh awmna hmun min hrilh hlauha, mit ngeia hmuh ve ka châk rilru ta tlat mai a. Engdang nilo in Arpa Insualtirna leh Sum Inchawina Hmuna hmelhmang han lantir thu mai ani. Mahse naupanlai atanga thil hmuhnawm ka tih pawl anih avangin kal châkin ka za zek zek thunga. Police ten an khap tih ka hriat atang lek phei chuan hmuloa Kulkhut kir leh ka tum ta lo bur a. Chawlhni Inkhawm bân hnua tan thin ani bawka, thilsual ti em emah ka in ngailo phawt bawk.

A ni chu a rawn thleng ta ngeia, mahse Zemabawk lamah hna tul ka neih avangin kal hmasak phawt a ngaia. Hmanhmawh taka ka tihtur ka tihzawh hnuah Bawngkawn, Helipad lam panin kan tlânchho ta nghal vat a. A ruka thilti anni bawka a hmun pawh rinai takin a lo biru a - Thui fe kan lawn chhoh hnuah pal hungna chhe fâ bulah kan ding ta a. Amaherawhchu, a hun an lo thlâk daih niin - Chawlhni nilo in Inrinni ah an lo sawn daih tawh hi a lo ni a !!

Eng titih in emawni a hmun neitupa a biak lumlâm theih hram a - Kan han lût chiah chu 'Luhman' an khawn thin niawm tak ani, dawhkân leh thing thutthlengsei pahnih ka hmu tlata. Mipakhatah Cheng 10 zel pêk angai thin tiin thu ka dawnga, a tlângpuiin mi 200 vel pûngkhawm thina sawi ani bawk. Heng sum tlingkhawm hi In neitupa in a hmun a pêk avângin a huikhawm vek bawk. Rawn pûngkhawmte hi Zârkawt mihausa te anni tlângpui in, mahni Arpa theuh an rawn chhawm bawk.

Mahni Arpa theuh kha, bawm an siamah Cheng 50 chawiin an khung phawta, tichuan inchona chu tan ani thin. Incho tanna hi a sâng khawpin an sawia, Cheng 50,000 atanga tiamchin awmlo thlenga tihsân theihzel anni. Arpa neitute theuh, thutna hmunbik an siamah an thutfel hnuah, insualna hi tan ani thin bawk. Ka tehkhin ber chu Gladiator Film a Arena an siam kha ani, mahse a danglamna chu darkâr chanve Arpa te hian hâhchawlhna hun an nei. A entute pawn an tan lam lamah sum an dâhkham theia, mahse an Arpa te an inhneh tawk chuan mahni sum theuh an lakir thei thung. Police te pawn ngaihkhat ah ngaiin lehlam an hawisan mai ani awm bawk.

Arpa te hi a tlângpuiin Burma arpa sual huai - Vângnu leh Taichiat anni. Intihhlimna mak dangdai tak leh sum vawrhvirna turu tak niin ka hria. A taka ka hmuh theihloh erawhchu pawi ka ti hle. Engtin tak ran nghaisa duhlo pawl leh Sawrkarin ngâi ang maw, Chawlhkâr tina huaihawt ani bawk si a !!

A luhna

Luhman pêkna

Arpa dahna bawm

An insual tir na (Thisen a la kâi nengnung)

Vângnu (Arpa sual huai)

Taichiat (Arpa sual huai)

Sulhnu Hluite Tlawh Thu

2009-03-31T11:03:00.015+05:30

March thlatir khân tum loh deuh maiin Delhi ka zu chuang chhuak leh ngawt peka - Tuntum chu West Bengal Circle a kan hotunu ber 'Contempt of Court' vanga 'Arrest Warrant' pek theih mai anih vanga min kaltir ani e. 'Consumer Forum Case' anih avangin 'Supreme Court' lam nilo deuh 'Patiala House Court' lamah ka tuan thunga. "India Gate hmuh a khât tawh bawka a ziaawm dawn hi kan ti deuh a", mahse a rei tual tuala Lawyer pa hmel kha kan hne nghal pang a.

Mahse vanneihthlâk takin ka sulhnu hlui chhuikir thei turin hunawl ka neih hlauh maia - Metro te Mall Road a lo thleng ve tawh bawk nen (Ka chhuahsan dawn khân an ti tan eih eih kha ania). Tichuan kan va thlengphei ta ngeia, Mall Road pawh a hmel alo danglam ta hle mai. Amaherawhchu DU Campus chhûng tak chu englem a danglam tehchiamna ka hmu lem hleilo a. Hindu/St. Stephen's/Ramjas/Delhi School of Economics/KMC in rina kawng phei chu a lo tlahniam tawh hle zawk a.

Ka hmuh châk ber Kirori Mal College leh Hostel kan thleng phei chu ka rilrua ah, "Bihari pâ, Namo kan tih mai, leh a tehawm pâ Bangladesh mi in ngeihlo lutuk thin - An insual thelh ngai ziah kha" a rawn lang hmasa ber a. A dawta, "Kennedy Singh-a, Metei, zai thiamlo zet mai ina corridor pheia 'ISwear, I Swear....' (A bâk hrelo chu) a ti chuai raih raih lai te" leh "Kan cook huaisen zet Mahesh-a, Uttarakhand mi, in thlenga Jat palian zet, ka thianpa ni bawk, Kadian-an a hnekna lo indan zar zar vanga thleng a kawih chhiat vek te" kha ka ngaihtuah let a, a rukin ka khi phei vur vur a. Thawveng hlir awmkhawm kan ni bawka kan lo hoin kan lo hlimtlâng thei thin ngawtin ka hria - A bik takin Mess Secretary in chawhmeh a tih tuiloh emaw, a tih tui deuha 'Mess Bill 'tam vanga General Body Meeting hma a Voucher/Challan a mal te te a a chhiarchhuah lauh lauh lai te kha aw !! Hostel Warden lah rawn lut tha ngam bawk lo, a lo va han thulo mai mai tak e aw - Kan luhchilh fo lehnghala, mahse mamawh ni kha chuan nui sângin !!

Pawi ka tih deuh mai chu kan football field, nitina kan lo khelh ve na thin, kha Commonwealth Games thlen an tum avanga an lo tihchhiat vek khân ka rilru a tina hle mai. Hostel-a awmten Mauritius ho kan khelhpui apianga, "Corner tih aia 'koniak, Koniak' " antih thinte, Concert en a kan lâm mup mup lâi te, leh Inter-College Basketball a mahni College theuh tana kan au chel chul lâi te kha a ri lawn leh tawh ngai tawh dawn loh avangin. Kan kumtin 'Annual Ritual' - Ramjas Hostel a N-E mi leh Bihari ho - Exam hnai tawh si mahse kumtluana chhiar talo mangang insual buai va thelh ngai ziah te kha chu anla ti em ang chu. Hemite hi an turu thin riau alawm, Warden in Film thalo chhuah awih tawh loh a ti vei khanglanga - A kawt a full volume in an chhuah siah tak kha mawle. A sim hminhmak an ti bawk !! An thingpui zuarpa lah an batral sak deuhthawh reng nen !!

Ho viau hlawm e tilo chuan khâng kan zirpuite kha tunah chuan an puitling tawh hlawm khawp mai. Hna puitling deuh deuh thawkin nupui fanau annei deuh vek tawh e. Ka zirpui Premchand Meena pawh India Railways Account Service hmui in a awm tawh nghe nghe. English kha a va han thiamlo ve tak e aw - Hindi/English Dictionary nen notes kha a siam ve tlauh tlauh thina. Hmangaihna lâh kha anla na em em khawpa - Kan classmate, Delhi mi leh a duh em em, kha biahthu a thisen ngatin zuk ziak vel a, an inneih phah chuang tawp silo !! Rajiv Roka, Sikkimese mi, thawveng fâ thin pawh kha tunah chuan Gangtok ah B.Ed zirtirtu zuk ni ve rân tawha. Arunachal ho kha chu, an ram a la changkâng lo bawka, an zawh rualin hna an hmu zel a. Thianpa 'Chhotu Ram' a pawn DU a Lecturer hna a thawk tawh bawk a - Ani kha chu a inla serious ve thei khawp mai. 'Cool' hi antum ve thei khawpa, mahse nula pakhat lakah tih loh chuan - A hming chu sawilo mai ang..he he he. Bihari ho kha an inziak tling deuh vek a, Jat ho kha chu l'Farming' lamah an lut deuh vek thung.

PG ah pawh khan kan la ho reng nachungin kan ziaawm deuh hlek tawh zawk. Mizo paruk lâi kan awma - Thawhlehni, sa hmeh loh ni, a sa man chawitur kha Carrom Board khelin Inrinni ah kan chingfel tlângpui thin. 'Pui Dula Renthlei 'of Lunglei a ngaihawm thin khawp mai,"Sawhthing an zai dip" hla, ama phhuah ngei, guitar nena an perh thin kha chu 'Mizo Blues' diktak ani ve ngawtin ka hre thin. "Nunhlui te ngaiin ka au ruai" han ti em tur chuan tunah hian ka hlim zawh mahin ka inhre si a chuvangin - Khâng hunlai boruak, engto neih miah loh lâi, mualliam ta hi a ngaihawm ve thin khawp mai tiin kan tlip mai ange.

KMC luhna (kan hmang meuhlo)

KMC Hostel

KMC leh Kamla Nagar kalpawhna

Chawlhlawk laia kan thutna thin

Delhi School of Economics, PG ka zirna

PG Men's Hostel kawt

University of Delhi, Administrative Building luhna pakhat

Hrânghlui Nen Kan Inkawm

2009-03-03T13:38:00.019+05:30

Vawiin chu hepa hi a lo lenglut hlawl mai a, Bengali ho hi thil sawisel leh thil dil lamah Hnam taima tak annih avangin , "Engtak chu duh ang maw" ka ti rilru nghâl ngawt pek a. Bengali lungnilo tih lungawi harsat zia hrelo tân chuan, "Thlarawka" pawh min ti maithei mahse min tlawhtu zawng zawngte hi nuisânga chhuahtir leh hi ka nitin hna pakhat ve ania.

Tihdân thin angin thutna kawhhmuh pahin, "Enge ka tihsak theih ang che" tiin ka zawt a. "Hei 6th Pay hnuah hian ka Pension hlawh hi an tipung loa" tiin min chhâng a. Kum sawmruk pel fel erh awrh anih dawn - Anni ho kha chu kan tihfelna a rei tawha - hi ti rilru nauh nauh chungin a kum zah ka han zawt leh a. "Kum 81 ka ni" ti a min han chhang zet chu min barakhaih chiang hle, a thothang a la tha fu si a - A rawn len ni lah ni a sat mai bakah a uap churh lehnghala.

Tichuan endân danglam tawh tak chungin kan ti ti chho zel a. 1st May, 1928 ni a lo piangin kum 1949 khân P&T ah hna tluang taka a thawh hnuin 4th June, 1986 ni a chawlhsan hi a lo ni renga. Hrânghlui diktak kawm ka ni bawk a, a hna kan zawh tawh hnu pawhin, dilchhut leh chipchiar takin thil ka zawt chho zel a. Kan ram puipa Mahatma Gandhi an Kulkhut tlawh tuma a kut chelh chunga a car chuanna a um ngar ngar thute, Netaji Subhas Chandra Bose a leh a unaute chanchin te, Hmanlai a Kulkhut a faizia thute, CPM ten West Bengal State hnufual an nih tir dân te, leh thil dang dangah te kan pakai chho zel a.

Kan thusawi zawng zawnga ka bengverh ber erawhchu khawvlel a thlirdan leh a invawnfel dan kha a ni. "Engkim hi hlim leh lawm taka dawnthiam zel leh nitin insawizawina neih hi tun thlenga ka hriselna chhan a ni" a tih khân ka rilru a khawih hle. Mizo chu ni se tar awmin a awm daih tawh awm si a, mahse kan Pu a kha chu a la harhin a thothang pawh a la zang veh vawh khawp mai. A tawi zawngin a lu a zawh mai bâkah mihring mihrinna ah pawh pa vântlâng chunglam a ni. A fanu hi Doctor niin tunah CMO hna a chelh mek a, a Fapa pawh IIT, Kharagpur chhuak niin US a a hna bânsanin a Pa a enkawl turin tunah Tata Company zawm a ni a. A kum ang zât hi Pathian khawngaihna zârah dam mah ila amah ang hi ka ni phâk ve angem aw !!

Pu Sisir Kumar De (Kum 81)

Thomas Wall Clock

N.B. Min tlawh nachhan chu 6th Pay hnuah kum 80 chunglam tân 20% of Pension hisâpa tihpun sak an nih vâng a ni. Hmanlai Kulkhut thlalak pek min tiama ka lawm angreng hle. A chunga Wall Clock ka târlan hi early 1800's ah British ho siam a ni a, mahse a la tha khawp mai. Kan Pu a nen hian thilhlui mah ni se an neulo dun khawp mai.

Leng Khawthawng

2009-02-20T16:47:00.019+05:30

Kulkhut chhuahsan hlân ngawt hi tunlai chu ka rilruah a cheng tlat mai a. A mihring chengte leh a Khua a hi ka ning thawkhat niin ka hre ber mai - Kawng chep lutuk leh motor ri bengchheng lutuk hian ka ngaihtuahna te hi a tibuai pha hial emawni ka ti deuh rum rum thin. Nupui-fanau ka neihna Khua mah nise min han hipna tak tak hi a nei ngailo ti mai teh ang. Sawrkar hnathawk tân lek phei chuan a ninawm lehzualin ka hria - Engkim mai hi a kal loh dân tur ang hlir hian a kal roh a, thil engmah hi a awlsam zawng leh midang ten antih ang hian a kal tak tak thei meuhlo ani berin ka hria.

Boruak thianghlim leh hmun reh deuh hleka awm ve huntur thlahlel taka thlir hi ka titheih awmchhun chu a ni mai. Arsi pe un thei khawpa zân boruak thiang kek kawk hmuh lohna pawh a rei thawkhat tawh alawm le. Phairam , châkkhai leh eng ilo lam nana nuamzawk fe hian, ka ngaihna hi nitin mai in a bo tial tial in ka hria. Kei chauh emaw ka tih laiin kan Nu pawn a lo ning thawkhat tawh hle hi a lo nia. Tichuan Kulkhut khaw pawnah kan chhungkua in, pan lam nei lemlo in, kan chhuak ve ta rawih a.

Mahse vanneihthlâk takin thui pawh kan tlân hmain he khaw tetakte hi kan va pawh hlauh mai a. A khua tawntir ah thingpui dawr chhe fâ, luite kam chunga ding, hi a lo awm vân a. Mahse eitur kan zawh in samosa, helama singra antih bâk englem anlo zuar lo lehnghala - Chupawh chu minit 15 a la ang an la tizhui avangin kan kalsan ta a. Pawnlam mi an rawn luh khât dawn vei nen an hlawklo ngawt ang. An eizawna ber chu thlai chin - Bawkbawn, leh Balhla - leh ran vulh - Bawng, Lawi, leh Kel - hi a lo ni a.

Han sawithui teh duahtur chu a awm lo khawp mai. A hmun a thawven em avangin min ti harh sawng sawngin tih bâk chu. Hemi bâkah hian an la thingtlâng deuha an nunzia leh nundan a awhawm hlein ka hre leh bawk. Kan hawg lam chu kan ipik rei tawh bawka hnar atanga saihlit lâk chhuah antih ang vel niin kan inhria.

An Khaw Luhna

Thingpui Dawr chu
Huan - Bawkbawn an ching mek

Bawng/Lawi In - Buhpawl pawh an tiang urh

Khawchhung - Ha hipa han sawitur a awmlo

Sahuan ah Ka Kal

2009-02-06T11:34:00.024+05:30

Laina hnaite Kulkhut an rawn chuankai tawh hi chuan Victoria Memorial leh Alipore Zoo tlawh ziah hi, helama kan thil tihpui te zingah chuan , matheilo a awm ngei ngei tura ngaihruat nghal a ni mai. Vawi engzat chiah nge kan tlawh tawh hlawm ang aw !!! Hun thawl tak an neih phei hi chuan Birla Planetarium, Science City, NICCO Park, leh Aquatica te hi kal a ngai leh bawka - Thawmhnaw lampang leipui chu thu hran. A hmuna chenchilh tân chuan ninawm lamah a kal zawh mah, mahse an hmuhve châk em em han fanpui vel hi a nuamin thil hlawhtling tak tihpui angah a inngaih theih hlauh bawk si. Tour guide ah hian tang ila kan hnehsawh tawh viau in a rinawm.

Hmanni deuh hlek khân Victoria Memorial, Alipore Zoo, leh Aquatica ah kan leng khawthawng leha. A hmasa leh a hnuhnung ber te hi chu a ropui e tih leh a nuam e tih bâk han sawithui lehtur dang em em ka hrelo. Mahse a laita ber khi ngaihtuahna a tithui duh khawpin ka hria. Khawvela mifing hmasa - Mesopotamia, Egypt, leh China - rama awmte khân sahuan angreng deuh annei tawha ziak a ni ngei e. Amaherawhchu Zoo, Zoological Gardens lamtawina, diktak lo pianchhuahna chu London Zoo, 1828 a an din atang khân ziak lan a ni thung. Antum ber pawh tourist hmuh nan, intihhlim nan, ramsa humhalh nan leh inthlahchhawn tir nan, leh inzir nan te ani.

Ka thil han hmuhte ngaihtuah kirin ramsa humhalhna leh inthlahchhawn tih lampangah chuan an hlawhtling lo hlein ka hria. Lehlamah chuan mipui pungkhawm tân chuan hmuhnawm pakhat chu a tling ve khawp mai, tam lah kan tamin tawt pawh kan tawt khawp mai. Mahse a chhungah ramsa zawng zawng te kha TV a kan thlir thinte nena han khaikhin chuan an zuai tlatin ka hria. Jail tâng leh Drugs ching ho nunkham tawh ang hrimin an nguaiin an dawldâng (Hrisel lo) tlat - English tawngkama Zombie antih ang deuh vek kha anni tlângpui. Han inthlahchhawn tir ta ngatin an chhenna thin diktak ah chhuahchhin se chuan kâr khat pawh an daih turah ka ngai hlawmlo. Heihi humhalhna anga kan ngai anih chuan kan kawng lo zawh tawh sa hi let lehin, a bul atanga kan tan that leh a ngaiin ka ring.

Kan nihna hi inthlakthleng se, keini hian tuna an chan ang hi han chang ve ni ngat ila chuan kan râk chel chul ang mawle. Khamkhawp chaw kan hmulo anga - kan duhzawng ei chu khawilam - anni ang hian tuarchhel takin reitak chu kan damin ka ring hauh lo mai. Kristian naupang hlabu a ," Mihring chauh lo chu zirtir an ngailo" tih kha thil dik chu a lo nih hi le - Ramsa te chuan an mahni duhtawk bâk engmah an khawih lo a, mahse keini mihring bawk hian thil reng reng hi kan duhâm leh rilru chhiat vang hian kan tichingpen leh thin. A pawiber zawk chu hmun chungnung ber changtu kan nih avanga thil kalsual tawh sa pawh lehlam kan hawisan duh tlat hi a ni.An chenna te tichhe loin an awmdân ngaite hian awmtir ila humhalh chu kan ni mai in ka hria.

A pul dawn niberin ka hria

An ân vak hian an inhrosa an ti

Sangha a vân hmel khawp mai
An puar nge an chau aw
Engtak ngaihtuah ang maw

Khatiang Hun Kha Kan Thleng Ve Ta Chiah

2009-01-23T15:47:00.013+05:30

Tunlai chu kan fapa, kum thum leh achanve mi, Sikul kaina tur hlir hi rilrua a cheng tlat pek a. Kan nupa a, nausen anih laia, kan lo lei sa Kolkata School Directory hi kan chinglet hneh hlein ka hria. English Medium ho zawng kan han thlang phawt a, a dawt a West Bengal Board hnuaia mi kan paih leh a - Tichuan CBSE leh ICSE hnuaia mi hlir kha thlangchhuakin, lehkhabu phek chhinchhiahna sen ngat nen phek tinah kan thil zel a. Hna zualpui chu kan zo thawkhat anih hi mawle ti chungin kan han innuih leh rih thin a. Kan Nu leh Pa te khan hetiangin an ti ve angem aw tih kan sawidun zing hle.

Ka hnathawh lai hi sawn theih reng dinhmuna awm anih avangin Central Board ah ngei kal se kan ti deuha. Central Sikul a nih chuan, quota kan neih bawka, laklawh deuhin hmundangah pawh min sawn mahse a pawl ngaia a su leh theih mai dawn a. Mahse CBSE nge ICSE thazawk tihah hian kan buai leh thin - Thenkhatin ICSE an tih lain a thenin CBSE an ti leha, a bo theih map map khawp mai. Engle khawle kan awmna hnaih apiang a tha a ni mai tiin thu kan titawp ta a - CBSE hnuaia mi an lo ni ngeia. A pawi hranpa em em lo e Kulkhut kan chhuahsan hnai tawh tho e tiin nimin khân kan chhungkua in, phur takin admission form lachhuak turin , kan tleh phei ta ham ham a.

Lucas-a pawh a phur khawp mai - Mal khalh tih taka puitling emaw a intih thin avanga kum khat leh thla sariha Kindergarden luhtir tawh kha ania - Yaas School ka kal duh tawh, I love schooool tiin thawhhlim atang khan a au chelchul tawha. Kendriya Vidhyalaya leh Army Public School hi kan hnaih berte anni. A hmun pawh a nuamin a fai khawp mai - Sipai ho nge nge engkim hi a nihdan tur ang thlapin an tithei zel, amaherawchu rawngrut ho leh lubawk chin an hah ngawt ang - âk zat hnih hnuailam chin tân khawilai hmun mah hi a nuam tak tak thei ngailo.

Naupang ho chawlhlawk lai tak kan nangching palha, an bengchheng ngei mai - Lucas a lah an inkhel a han zawm ve leh nghal mai peka. Mahse vanduaithlak takin Preparatory class a lut turin kum li leh achanve chauh an lo phal a . A Birth Certificate - Helamah chuan Kolkata Municipal Corporation pek chhuah chiah an pawma, computerised vek a ni bakah cheng za chawiin copy khat zel a lâkchhuah theih reng - an en vang vang hnua Lucas-a an han thlek leh thin 'Pumrua leh thluak chuan a tlin mahse kum in a tlinlo ti niawm ziazangin'. February thlatawpah kum li leh a chanve a tlin chuan kan pe thei ang an ti ta a - Pathian ningawt lo tân chuan kum khat han punbelh tir chu thiltheih ni hek lo le, lunghnur takin kan haw leh a.

A ngaite in a sikul luhna pangaia kan han kaltir leh dawn chu a ni phawt mai. Hmabâk hi a la ko teh e, Nursery em pawh a la thlen hma atangin chhungkua in kan buai chu a ni si a le !! Mahse le hetiang hun thleng ve thei tur a Pathianin min veng hi a lawmawm e - Naute chumchiap a nih laite kha Hmanlai angin kan sawi ve thei ta.