معتز نادى - زى الفل

كل عام و انتم

2010-08-26T12:32:00.000+02:00

ربنا يكرمك و يكرمنا و تبقى من أصحاب المناطق الدافئة التي تعتمد على أرقام خرافية لا يصل إليها سوى عدد محدود من المصريين.

و مناسبة هذا الكلام أننا فى شهر المسلسلات أقصد النفحات و قد وصل إجمالي تكلفة إنتاج المسلسلات لعام 2010 بحسب المواقع الالكترونية و الإخبارية و المنتديات إلى 750 مليون جنيه مصري و اللهم أعلم السنين الجاية يوصلوا كام.

"اللهم لا حسد"..هذا تعليقى أما تعليق عديد من الناس فى المواقع الالكترونية على هذا الرقم بأنه كان كافيا لمساعدة القراء و توفير العديد من فرص العمل و الشقق السكنية و غيرها من أحلام البسطاء.

ما علينا تخيل أننى ذهبت لإجراء الكشف الطبى على عيوني بعد شهر رمضان و طبعا ستسألنى ما علاقة المسلسلات بعيونك يا أخي.. هو أنت غاوي تتعبنا معاك؟

معلش يا سيدى و لا تزعل.. أصل الحكاية اننى ارتدى نظارة و أنا فى الثانية من عمرى (أمد الله فيه بالصحة و العافية) يا ريت تقول أمين.

بالتالي فانا مضطر كل ستة أشهر أن اكشف على عيوني حتى أغير مقاس عدسات نظارتي شافاك الله و عافاك.

و ذهبت للطبيب و وجدت العيادة مليئة على الأخر.. شباب و كبار ..نساء و أطفال و على كل شكل و لون لدرجة أن التمرجى المحترم أخبرني أننى لن أستطيع الكشف إلا بعد شهرين فالحجز كومبليت.

"يا نهار ابيض..شهرين ليه يعنى؟".

هكذا كانت كلماتى ترد على أخينا التمرجى فأخبرنى أن الدنيا من كام يوم كانت رمضان و كل سنة و أنت طيب و كلام غريب مالوش مثيل ما أقدرش أقول حاجة عنه.

و بالفعل اتجهت إلى طبيب آخر طالما الأمل ضاع فى أن اكشف هذا اليوم او حتى هذا الأسبوع لكن شهرين..كتير و الله.

و ما أن دخلت للعمارة التي تتواجد فيها عيادة طبيبنا المبجل حتى وجدت زحام من الناس أمام باب الأسانسير ليس للصعود فيه و لكن للجلوس امامه فى انتظار دورهم فى الكشف.

و لك أن تعرف أن العيادة تقع فى الدور السادس و من الأول لغاية السادس الناس تقابلك فى كل مكان.

على السلالم جالسون و داخل العيادة مكدسون و أنا لا أجد لقدمي مكانا أستطيع فيه الوقوف و أن أخذ و أدى فى الكلام مع أخينا التمرجى الذى صرخ فى الجميع بالهدوء راجيا منهم الانتظار حتى مطلع العيد الكبير و الحجز عبر التليفون و الكشف بأولوية الحجز.

و طبعا يشكو الناس الذين تواجدوا بالعيادة بجانبي و استطاعوا أن يعبروا جحافل الناس المرصوصة من الدور الأول حتى السادس إلى أن وصلنا للعيادة و طبيعة الشكوى أن رقم الدكتور مشغول دائما و طمأنهم الباشتمرجى بان الدكتور سوف يقدم لهم خطوطا تشبه أرقام الدليفرى فى المطاعم و ستكون جاهزة خلال أيام.

الحمد لله خرجت من العيادة و ساعتي ليست فى يدي لكنى تذكرت اننى نسيتها فى بيتنا.

لا أعرف ماذا أفعل؟ هل أذهب لعيادة ثالثة أم انتظر حتى مطلع العيد الكبير؟

أعود فأذكر نفسي أن الأرقام مشغولة لكن أطمئن نفسى انه جارى تركيب خطوط من أم خمس أرقام "خلال أيام" و أنطق حرف الميم كما قاله التمرجى ممممم.. "خلال أيامممم".

هذه الأمر البسيط أدى لحدوث أزمة عويصة تكلمت عنها الصحف و تناقلتها وكالات الأنباء العالمية و أصبح الأمر ظاهرة خطيرة تحتاج إلى تدخل كبير.

فأطباء العيون عندهم مرضى اللهم صلى ع النبى على عددهم زى الرز.

و أول كشف يصيبك فيه الدور بعد أربعة شهور و لو كنت تعرف الباشتمرجى و أكرمته -(بلاش تقول رشوة حاكم ده اللي سايد و أوعى تفهمنى صح)- فسيكون دورك بعد ثلاثة أشهر، أينعم خفض لك شهرا لكن احمد ربنا يا أخي و لا أنت كده مش عاجبك و كده مش عاجبك؟

المهم أن المشكلة تفاقمت و خرجت المظاهرات فى البلاد تطالب بتوفير عيادات للناس فالعيون تحتاج لمن يطيب خاطرها و ساعتها لو ما حصلش كما تقول احدى اللافتات:هتتشال العنين من كلام المحبين.

و حاكم إحنا شعب "حبيب" بتشديد الباء الأولى و تسكين الثانية وقتها سيق حال الشعراء و المغنين و الملحنين و تنقرض العيون من لغة الأغاني و صعب ساعتها تقول مثل الست:عينى ع العاشقين.

أو كما يقول محبو تمورة:عنيا بتحبك.

باختصار الأزمة كبيرة و مفيش مكان للكشف على العيون الأمر الذى أدى لخروج مسئول كبير أوى فى التليفزيون ليحدثنا عن هذه الأزمة.

ابتسم سيادته خلال المؤتمر المذاع مباشرة على الهواء و ألقى بيانه علينا بعد أن دخل بإطلالة بهية صحبتها نداءات و هتافات تشكر فى حضرته الذى قال:

"السيدات و السادة، اخوانى و اخواتى الكرام، كل عام و انتم بخير و كل عام و نحن معا لا يفرق شملنا احد.

لقد اتفقنا دائما أن نعمل سويا فى اليسر و العسر و لا تقف أمام مسيرتنا أي عقبة إلا و قهرنا هذه الصعاب بروح أكتوبر العظيمة و سوف نجنى الثمار فرحين بمستقبل باهر مشرق لبناتنا و أبنائنا.

أيها الإخوة و الأخوات لقد ظهرت فى البلاد أزمة يراها البعض كبيرة بسبب الزحام على عيادات أطباء العيون و أرى أن ....".

يصمت المسئول الكبير ثم يلملم الأوراق التي يقرأ منها و يعود للميكروفون مرة أخرى قائلا:"إيه رأيكم نتكلم من غير لف و دوران و بعيد عن الورق؟".

و صفق الحضور بشدة و تجددت الهتافات المؤيدة لهذا التغيير الكبير فالمسئول يخرج لطمأنتنا و الرد علينا وقت الأزمة و هذا حدث جلل ناهيك عن أن المؤتمر حضره الكبار و العامة من الناس المتضررين فى البلد ثم يقرر سيادته الخروج عن المألوف و الحديث بعيدا عن الأوراق يا لها من مفاجأة عظيمة.

"اخوانى رجاء الهدوء من فضلكم".

يقاطعه أحدهم بالهتاف "عنينا رجعت لينا بعدا ما ظهرت قدام عنينا".

"يعنى بتشوف و مفيش ازمة" ينطق المسئول بكلماته و القاعة تغرق فى الضحك.

"شوف خفة دمه" تخرج هذه الكلمات وسط دخان كثيف خارج من نغاشيش حنفى المجاور لمقعدى بالقهوة و الشيشة ترافقه فى فمه.

"شكرا شكرا" و يلوح المسئول بيده للحضور حتى يلتزموا الهدوء (خليها الصمت و انت و اللى تفهمه) و ساد الهدوء فى القاعة.

"اخوانى ببساطة كده احنا الأيام اللى فاتت كنا فى شهر كريم عدى علينا هوا ما لحقناش نحس بأيامه و لياليه الحلوة غير كده كانت دايما فى شكوى منغصة حياتكم انا عارف و هى مشكلة انقطاع التيار الكهربى و ظهرت تصريحات من المختصين إن دي سياسة تخفيف أحمال و إننا ما نقدرش نبلغ الناس بمواعيد قطع النور و عارف انكم بتقولوا طيب ازاى و احنا بنوزع كهربا و غاز ع الخلق الى جنبنا و احنا غرقانين فى الضلمة؟".

يصفق الحضور و تدوى الهتافات شاكرة المسئول على شعوره بمعانتهم.

يشير إليهم المسئول بالهدوء و ابتسامته لا تفارقه ثم يكمل حديثه قائلا:"انا عندي ليكم دراسة من جامعة سيدنى الاسترالية بتقول فيها بالحرف إن بقاء الأطفال لوقت طويل خارج المنزل بالهواء الطلق يقيهم من الإصابة بقصر و ضعف البصر".

تسود الهمهمات فى القاعة و يتساءل حنفى و هو جالس بالقهوة "و إحنا مالنا و مال العيال؟"،صحيح اللى يمشى..... و لا بلاش اقولك اللى قاله حنفى حاكم احنا فى رمضان.

"طبعا انتم مستغربين ليه أنا بتكلم عن الدراسة..الحكاية و ما فيها إننا لقينا مسلسلات كتير اوى فى رمضان و كنا كل ما نمشى فى حتة يطلع لنا مسلسل، تفتح الحنفية ما تلاقيش مية بس تلاقى مسلسل و تروح ع التلاجة تلاقى مسلسل مش كده و لا ايه؟".

و "الله معاك حق" صوت الهتافات فى القاعة.

"فاحنا قلنا لازم نواجه المشكلة دى مش عشان خاطر دفع عجلة الانتاج او عبور الأزمة الاقتصادية..لأ لأ..اطمنوا احنا بعدنا عن منطقة الخطر..احنا اللى خايافين منه ساعتها ان المسلسلات تضيع وقتكم و تفضلوا قاعدين قصاد التليفزيون و كل واحد كانه مسلسل بإيده بجنزير مربوط فى التليفزيون".

تصفيق حاد فى القاعة و فحمتين يطلبهم حنفى فى القهوة لأن سيادته عاجبه.

"هدوء يا جماعة من فضلكم..طبعا عارفين ان كتر الفرجة تعلم.. زى المثل ما بيقول لكن اللى قال المثل نسى يقولكم ان رمضان جه فى شهر اجازة و العيال قاعدة و الجو حر و الناس مأنتخة و مريحة و بالتالى اتفرجوا و ضعف نظرهم و ده سبب الأزمة الموجودة دلوقتى".

صمت فى القاعة و لا تصفيق و لا هتافات.

"عارف انكم هتقولوا يا سلام يعنى الكام ساعة قصاد التليفزيون هتعمل كده و واحد يقولى انت ضيعت وقتنا و واحد تانى هيكتب حجة البليد و واحد تالت يرسم و نكتة تطلع و كلام كتير من الشكل ده،لكن احنا وفقا لسياستنا اللى اتفقنا عليها و هى مصلحتكم عملنا دراسة بقى زى بتوع جامعة استراليا و الدراسة دى كانت على الناس اللى انقطعت عنهم الكهربا.....(أصوات تتعالى فى القاعة بالإضافة لعلو قرقرة شيشة حنفى)....سكوت من فضلكم،خلينا اقول لكم ان الناس اللى انقطعت عنهم الكهربا ما طاقوش يقعدوا فى البيت من الحر و سابوا بيوتهم و بعدوا عن التليفزيون و الحمدلله هما الناس اللى ما اشتكوش من ازمة ضعف النظر ولا قصر و لا طول و لا حاجة خالص و ده يؤكد كلام دراسة صحابنا فى استراليا زى ما قلت لكم و بكده يبقى عرفنا الأزمة و سببها و حلها إيه".

تصفيق فى القاعة مش عارف على إيه كما يقول حنفى و دخان الشيشة يتطاير من فمه.

"عشان كده قطع الكهربا كان فى مصلحتكم و فى نفس الوقت ما تشغلوش بالكم الانتخابات بتاعة المجلس الموقر ع الأبواب و طبعا هيبقى فى ظبط و ربط فى قرارات العلاج و هنعالج الناس بما يرضى الله".

و طبعا لأن حنفى قد عمر طاسته و ذهب فى دنيا أخرى فقال:"أكيد هما اللى قصدوا يذيعوا المسلسلات عشان زى ما الدراسة قالت نظر اللى بيتفرج يضعف لأنه قاعد فى بيته و طبعا ساعتها هيروح للدكتور و هيبقى مشتاق انه يدخل أوضته و يكشف و يشوف الهلالات المرسومة على لوحة الدكتور و طبعا مش هيلاقى مكان .

فيوم الانتخابات يروح ينتخب مع ان نظره ضعيف و يومها هيكون مشتاق و قلبه يتمنى اى هلال يشوفوا عشان يثبت لنفسه ان لسه نظره بخير و ساعتها يروح معلم عليه و يخرج و تبقى خير و بركة للكل".

يسحب حنفى نفسا طويلا بعد هذا الكلام ثم يتجه لمتابعة المسئول الذى كان فى ختام حديثه"و نتمنى إن ربنا يبعد عنا الأزمات و كل عام و انتم.......".

لقد انقطعت الكهرباء قبل أن يكمل المسئول كلمته و لا تنسى أنني قلت لك تخيل.

انتهى العرض

2010-08-23T00:11:00.000+02:00

بصفتي شاهد عيان على أحداث تلك الواقعة أكتب إليكم تقريري راغبا من العدالة أن تأخذ مجراها.

لقد ذهبت قبل أيام من الشهر الكريم إلى أحد المحال الشهيرة أو لنسميه سوبر ماركت لشراء لزوم الياميش و المكسرات أدام الله عليكم الخير و البركات.

و ما أن دخلت كان السوبر ماركت يمتلأ على أخره و طوابير في كل قسم.

نعم طوابير لا تعد و لا تحصى بقسم اللحوم و قسم الدواجن و الطيور و مثلها فى قسم الياميش و مثلها فى قسم الجبن و الألبان و بارك الله فيما رزق.

و حضر فى الطابور الذى وقفت فيه رجلين يبدو أنهما صحبة معا منذ زمن.

فالأول سمين أسمرانى اللون و الثاني صديقه ابيض و بنظارة و نحيل.

المهم أن الاثنين سلما على بعضهما البعض أثناء دخولي من باب السوبر ماركت و بعد السلامات أوشكت الصداقة على الانتهاء.

فالكل راح يجرى للحاق بالطابور قبل أن ينتهى العرض.

ففضلة خيركم كان بالسوبر ماركت عروضا بمناسبة الشهر الكريم لكنها كانت تنتهي فى لمح البصر من كثرة الطلب عليها.

و كلما ذهبت لقسم وجدت الاثنين الصديقين أمامي فى الطابور.

و نسيت أن أذكركم أن النحيل صاحبنا اخبر صديقه السمين أنه سيسبقه لأنه خفيف كالريشة و العملية محتاجة خفة.

لكن يشاء السميع العليم أن أجد فى قسم اللحوم صاحبنا السمين واقفا و من ورائه صاحبنا النحيل ثم أنا ثالثهم و ما أن يصل صديقنا أسمرانى اللون السمين لأول الصف حتى يطلب من الجزار ما يريده من العرض و ما أن يقطع الجزار لحمته و كبدته من خروفنا و عجلنا المصون، حتى يقابل الجزار صديقنا السمين بابتسامة تعلن عن انتهاء العرض.

و يندب النحيل حظه بينما يتفاخر السمين بانتصاره الأول فى قسم اللحوم و لحاقه بالعرض.

-و لو ..ورينى هتعمل ايه فى قسم الطيور.

هكذا قالها صاحبنا النحيل و وجهه فى احمرار و لا لون البطيخة.

و انشغلت عنهما بالذهاب لقسم لعب الأطفال ممنيا نفسى بشراء لعبة لطفلتى فى المستقبل و ما ان أنتهيت من هذا الحلم وجدت قدماى تسير بى إلى قسم الدواجن و الطيور.

و وجدت صاحبنا السمين يسبق النحيل داخل الصف و أنا ثالثهم و استمع للسمين قائلا:سبقتك يا حلو.

و يحمر وجه النحيل و يكاد الغيظ يفتك بعروقه الظاهرة لكنه يبتسم ابتسامة صفراء و يخبره أن الأقسام مازالت موجودة و الجايات أكثر.

و يصل صاحبنا السمين إلى أول الصف واقفا كملك مظفر يطلب طلباته من الديوك و الفراخ و الدبابيس و كله من خيرات الله و مصحوب ببركات العرض الذى تراه حشود الجماهير المصطفة فى الطابور موفرا.

و ما أن يحصل السمين على مراده حتى يبتسم صاحبنا البائع و يعلن فى وجه الجميع دون كلام بأن العرض انتهى معلقا ذلك على لافتة عريضة ولا لافتات حبايبنا فى المجلس.

و احمد الله على أن العرض انتهى هو الأخر فهذا معناه أن جيوبي لا تزال فى دفيء.

و يدفعني الزحام إلى السير بجوارهما مستمعا لحديثهما الذى بدأه صاحبنا أسمرانى اللون السمين قائلا:

-غلبتك يا حلو و مرتين.

*ليه هو احنا بنلعب طاولة ع القهوة؟

-و حياتك أحلى من الطاولة.

*هنيالك يا عم..بس ما تنساش لسه فى أقسام تانية و العملية محتاجة خفة.

-أما نشوف.

و طبعا لا أخفيك سرا أن الحديث تطرق يهما إلى أن النحيل لن يستطيع الشراء إلا وفقا للعرض و مثله السمين لأن ما معهما من نقود لن يكفى أو سيجعلهم طوال الشهر غارقين فى الطعام و جيوبهم صحراء جرداء لا نقود فيها.

فالناس تشترى و تشترى و تشترى من أجل رمضان و كأنها لن تأكل مرة أخرى.

المهم ذهبنا لقسم الياميش و المكسرات و ما أدراك من جوز و لوز و قمر الدين و بندق و فستق و عين جمل و فتح عينك تأكل ملبن.

الزحام يسير بنا بسرعة السلحفاة و وصلنا إلى الطابور المنتظر فهناك عرض لا يقاوم و سعره مهاود جدا و النحيل صاحبنا لم يستطع تخطى الزحام.

بينما السمين استطاع أن يضع هؤلاء على يمينه و الآخرين على يساره و هو يتقدم كفارس مغوار يضع على التروللى فراخه و لحومه و بعد قليل سيشرفهما ما لذ و طاب من المكسرات.

و حدث ما حدث زميلنا فى المقدمة و من بعده النحيل و أنا فى صحبتهما ثالثا.

و يغنى السمين و هو فى الطابور:مرتين و لحقت العرض.

طبعا يغنى السمين و أخينا النحيل يتطلع إليه بغيظ شديد ثم يطلب منه أن يكف عن الغناء.

يستجيب السمين و يتجه للتصفير على لحن أغنيته الجديدة:مرتين و لحقت العرض.

و يصل السمين لأول الطابور يزن ما يشاء من ياميش و مكسرات و زبيب و جوز هند و ما يندرج تحت بند العرض.

و كما حدث فى المرتين السابقتين تظهر لافتة مكتوب عليها:انتهى العرض" و أسفلها يقف البائع بابتسامته و يرد عليه السادة المصفوفون داخل الطابور بكل اللعنات و السباب لأنهم خرجوا من الطابور بلا ورك فرخة أو حتة لحمة أو شوية ياميش.

و مضى النحيل بجواري حزينا لا يعرف ماذا يفعل؟

هل يعود لزوجته هكذا وهى التي طلبت منه يحصل على كل ما جاء بالعرض و لا يترك اى طعام أو شراب إلا و حصل عليه.

شرد صاحبنا النحيل بوجهه النحيف و الحزن يكاد يفتك به فالسمين بوزنه هذا استطاع أن يندس بين صفوف الجماهير و يصل إلى أول الطابور يشترى ما يريد أما النحيل فيخرج من كل طابور بتروللى فارغ.

و انتهى السباق المحموم بانتصار صاحبنا السمين فى كل الأقسام الموجودة بالسوبر ماركت.

حيث نظر السمين لعربته مفتخرا بنفسه كشمشون الجبار الذى استطاع أن يعبر يهد كل الطوابير و يتحدى الزحام ليشترى ما يريد و كله تبع العرض .. كله تبع العرض.

هكذا يغنى و يصفر بينما يشاركه النحيف ابتسامة صفراء تدل على الغضب.

و من فرط فرحة السمين استعان بتليفونه المحمول و طلب رقما.

-ألو.. مصطفى؟ازيك يا درش؟ رمضان كريم عليك.

و بدأ صاحبنا يحكى له ما فعله فى كل قسم و تسابقه مع أخينا النحيل نحيف الوجه الذى فشل فى شراء أى شىء.

ثم أنهى المكالمة و طلب رقما آخر و إذا به يطلب صديقا ثانيا يحكى له ما سماه بالفضيحة العالمية، ثم طلب صديقا ثالثا و رابعا و خامسا و حكى لهم نفس الحكاية و بطولاته فى الوصول لأول صف فى الطابور من أجل اللحوم و الياميش و الطيور.

و يبدو أن هؤلاء الأصدقاء على علاقة مشتركة بالسمين و النحيل معا لأن أخينا السمين عندما كان ينهى المكالمة كان يخبر النحيل بأن الذى كان معه على التليفون يرسل له السلام.

فكان صاحبنا النحيل ينتفخ وجهه بالدماء و يبتسم ابتسامة مرتعشة و طول الوقت يمسح العرق عن وجهه الشاحب شحوب الموت، و يبين له أن غير مكترث بالأمر حيث يصمت ولا يرد عليه.

و طلب السمين رقما آخر و لكن اكتشف أن صاحبه أغلق هاتفه كما تقول الست صاحبة الصوت المسجل.

-يا خسارة كان نفسي ألاقى عبده فاتح تليفونه عشان أقوله.

توقف فجأة السمين عن سيره بعد ان وضع تليفونه فى جيبه ثم قال للرجل النحيف:مراتك موجودة فى البيت؟

-و ده عشان إيه بقى؟

-عشان أكلمها و احكى لها، و ألا اسيبك تروح تطنط زى عفريت العلبة و تقول انك اشتريت كل حاجة من العرض و انا ما عرفتش اعمل حاجة؟

-و مين قالك هعمل كده؟

-أنا عارف انك هترجع تلف على قسم قسم و تشترى غصب عنك و بسعر خارج العرض.

و اخذ صاحبنا السمين يضرب الأرقام على الموبايل و تنحى على جانب بعيد عثر عليه وسط الزحام كى يعرف أن يكم زوجة صاحبنا النحيل لكن القدر لم يمهله.

فقد أخذ الرجل النحيف زجاجة كازوزة من الموضوعة فى الثلاجة داخل السوبر ماركت و ضغط عليها بقوة، لحظة من التردد وإذا به يرفعها و يرسلها كصاروخ نحو الرجل السمين.

كان منظرا بشعا جدا حيث سقط الرجل على الأرض و الدماء تسيل على وجهه،و انفضت جموع الزحام و صريخ من السيدات.

و لعل هذا هو السبب فيما حدث للرجل النحيف الذى رأيته يرتعش و يقع على الأرض باكيا كطفل صغير.

ذلك هو تقريري عن الحادث، أهديه للقضاء العادل لكي يحيط بالظروف الكاملة للحادث، لعله يقتنع بأن الرجل النحيف لم يتعمد قتل الرجل البدين فيطبق عليه ما يسمى بالعقوبة المخففة، أنا شخصيا اعتقد أن الرجل البدين يستحق ما جرى له، فقد استمع لزن زوجته و اشترى لها ما لذ و طاب فى رمضان رغم انه سيأكل مرة واحدة فى اليوم وليس ثلاث مرات كبقية الشهور، و بدلا من أن يشعر بحكمة الصيام و يتعرف على معاناة الفقير و هو بلا طعام راح يتسلى و يسرف كغيره من الواقفين معه داخل هذا السوبر ماركت أو غيره، فما رأيك أنت؟

شوف الكرم

2010-08-22T23:27:00.002+02:00

اسمى هلال رمضان تذكرت نفسى و أنا افترش على الرصيف بضاعتى من العرقسوس و السوبيا و التمر هندى المعتبر من الظهر و حتى آذان المغرب.

أينعم الشمس حارقة و الهواء ساخن إذا كان موجودا فى الأساس لكن أملى كان كبيرا و الحمدلله فى رب العالمين أن أبيع كل ما معى من اكياس للزبائن المارين أمامى سواء بأقدامهم أو بسياراتهم.

و انتظر بالساعة و الساعتين و الثلاث ساعات لا احد يعبرنى و كأننى صينى لا يجيدون التعامل معه.

مع إن الصيني و تابعته الصينية اصبح يتفاهم معنا في بيوتنا و لا كأنه عايش فى مصر من أيام مينا و تحتمس.

و تلاقى أخينا الصينى معاه بضاعة من الابرة للصاروخ و يدخل عليك بابتسامة شبه جاكى شان و قبضة يد على نقودك و لا قبضة بروسلى.

حقا الله يقسم الأرزاق على من يشاء و هاأنذا أقترب من الساعة الثانية و انا أقف امام أكياسى حبايبى منتظرا عابر سبيل يدفع فأسلمه حقه من التمر او السوبيا أو حتى العرقسوس.

و نظرت للسماء وجدتها خالية من أى سحب سوداء فنحن فى عز الحر لكن السماء مليئة بسحب الرحمة الالهية التى يتمناها الصائمون و يسعون للحصول عليها.

نزلت ببصرى إلى الطريق فوجدت السيارات فارهة تعبر و تعبر و الناس مبسوطة بداخلها لا أدرى هل انبساطهم لأن السيارة تجرى و المرور غير متوقف بتاتا أم لأنهم على عزومة كبيرة فرحين و من فرط الفرحة لا يصدقون انهم سيوفرون يوما دون اى نقود مدفوعة فى شهر العزومات.

و تأتى الرياح بما لا تشتهى السفن، فما ستوفره في طعام سوف تدفعه في حلويات تدخل بها على صاحب عزومتك مقدما له البسبوسة و الكنافة و كل ما تجود به خيرات طبق الحلويات.

اقترب من الساعة الثالثة و الأكياس امامى انظر إليها لا أعرف هل يريد الله ان يعلمنى الصبر و الانتظار كما انتظر ان يضرب المدفع أم أن الرزق المكتوب لم يحن موعده بعد؟

ها هى تقترب و لها لون صافى أبيض و طلة بهية و كم تمنيت ان اكون فى صحبتها بل حتى أكون من احد أفرادها فهي مع أناس كثيرين و لكننى لم اغضب و حمدت الله و قلت مسيرى يوم أكون وياها.

لا تغضب يا اخى و لا تقل اللهم إنى صائم و أرجوك لا تفهمنى على غير صواب فأنا احدثك عن سيارة عزيزة علىّ أتمنى من الله أن يكون لى نصيب فى قيادتها و امتلاكها.

نزل من سيارتنا العزيزة صاحبها و اقترب منى و قرر الشراء.

يا بركة دعاك يا امه الرجل يسألنى بكم هذا و يشير إلى ذاك و بعد السؤال و الجواب اشترى ما اراد و ذهبت ثلاثة اكياس إلى البطون التى اختارها الكريم و تبقى لى تسعة،و الله حى الرابع جاى.

باقى على المدفع ثلاثة ساعات وانا لا أزال واقفا و الأكياس امامى بعت منهما ما كتب الله لى.

فجأة عبرت الرصيف المقابل أمامى فتاة و ما أدراك ما هذه الفتاة.

فصاحبة ملحمة "بوس الواوا" الغنائية لا تقارن بها، فكل ما تفعله صاحبة هذه الملحمة و كل ما ترتدينه من ملابس كاشفة اكثر مما هى خافية ما وراءها يعتبر محتشما بالنسبة للفتاة التى تعبر الآن.

و حضرت الفتاة فى وجود سعيد صاحب المزاج العالى الذى أشاح لى بيده مهنئا بالشهر الكريم لكنه ما أن رأى الكتكوتة حتى قرر ان يقف لجوارى حتى يستطيع الرؤية بوضوح كما يسعى الناس لرؤية الهلال.

يرى سعيد هذه الفتاة مستقيمة و ثابتة على مبدأها فهى لم تغير من طبيعة ملابسها و بهرجتها على وجهها و مهرجان الطماطم المنتشر على خدودها و العيون ملقاة فى أحضان ما تطلق عليه الفتيات "اى لينر" و "اى شادو" و أه يا مزة.

اتفقنا على ايه؟ لا تغضب فهذا رأى سعيد الذى يبرر كلامه بان البنات فى رمضان من غير المحجبات يتجهن إلى قراءة القرآن و الصلاة فى المساجد و حضور التراويح و التحجب مع بنطلونات كما يقول صاحبنا:زى العسل يدوب ما تفرقش عن جسمها حاجة.

و يدوب يخلص رمضان و صاحبتك تروح رايحة الجامع القريب أو بالأخص المليان ناس و تصلى العيد و وشها مش سادة زى القهوة لكن عليه خيرات الله من ألوان الطيف.

و تعدى الصلاة و بعدها روح يا حجاب إلى دولابك و اشوفك العام القادم و سلملى على بقية السنة.

و الله بتقول حكم يا سعيد و رغم ما يهفك عليه مزاجك و تشربه لكن و أنت متسلطن كلامك درر.

فالبنت بحجابها فى الشهر ده بس و من غيره بقية السنة و غيرها من البنات بحجاب و لبس زى الفل و ع الموضة فى رمضان و غيره.

يبقى العيب على اللى فى البيت تفتكر كده يا سعيد؟

سعيد .. سعيد .. سعيد.

لكن تركنى سعيد و أخذ يبحلق فى السنيورة و هاهى تقترب منا اكثر فبعد أن عبرت الرصيف عطفت على أحد المحال تشترى ما تريد.

و يبدو اننا فى قائمتها الان..فتح عينك العرقسوس و التمر و السوبيا فى قائمة مشترواتها و لست انا يا سيد.

اشترت الانسة ثلاثة اكياس و وشها حلو عليا فهناك صف يسير وراءها و كل يمشى و كانه لا ينظر إليها بتاتا،لكن لا يهمهم بضاعتى ،فقد ظننت أنهم سيسيرون على دربها و يشترون لكن عشم إبليس فى الجنة.

و لأننى افترش فى الشارع فاقترب الناس المصفوفين وراءها من بضاعتى حتى يملوا عنيهم كويس من السنيورة و يطلع واحد خفيف يقولك:بنسلى صيامنا.

رغم ان هذا الصيام الذى تصوصو منه عصافير بطونهم يحتاج إلى ما يرويهم من اكياسى لكن الانسان يذهب أحيانا للشر بيده لكن الخير ينتظره و لا يسعى إليه.

اشترت السنيورة و أنا انتظر المدفع و أمامى ستة اكياس يا ترى يا هل ترى من سيكون صاحب الفرصة القادمة؟

و لكن يبدو أن الفرصة القادمة لن تذهب للبطون لكنها ذاهبة بعون المولى للرأس.

إنها رأس أخينا الذى كان سائرا وراء السنيورة و لأن لسانه لم يصم كباقى حواسه فتفوه بكلمة بسيطة عابرة و قال:عايزين نفطر سوا يا جميل.

عادى الراجل مجدع ملو هدومه عزم و شيمته الكرم فهو يطبق قول الشاعر الذى قال:

يا ضيفنا لو جئتنا لوجدتنا
نحن الضيوف وأنت رب المنزل.

شوف الكرم يا خى لكن حظه إن خطيبها أو بالأحرى واحد متكلم عليها لمح الأفندى الكريم و رنه علقة محترمة.

و ما بين يهديك يرضيك و رمضان كريم و الله اكرم و صلوا ع النبى.

اخينا يجرى و عم الكريم زى الفرخة قدامه طاير لغاية ما وصولوا عندى و صاحبنا يلف و ده يلف وراه من حول الترابيزة السعيدة.

و اه يا زمن كنت مخبيلى ده كله فين؟

كيس طار من ايد صاحبنا فى وش الأفندى و طبعا لأنه كريم فرد عليه بكيسين و انا وسطهم أحوش و الناس معايا.

و عنها و المدفع ضرب و الناس هديت صحابنا و رمضان كريم و أكياسى ع الأرض و الحمدلله

يا مائدة ما تمت

2010-08-22T23:23:00.001+02:00

أعلنها المفتى في التليفزيون و قالها بصوته الرخيم "غدا هو أول ايام الشهر الكريم".

و فرح كل الجالسين على القهوة و هنأوا بعضهم البعض و تلألأ حي الحسين بالأنوار و بدأ الكل يعد عدته لعزومة أول يوم إفطار.

و لأنني على فيض الكريم و أحمد الله كثيرا على نعمه التي لا تعد و لا تحصى فقد قررت أن أشارك المساكين في طعامهم و أكون بجوارهم على مائدة الرحمن.

فأنا و الحمد لله من محدودي الدخل كما تنعتني الحكومة دائما و بالتالي فأنا أولى بالمعروف، فاللحمة و كل ما لذو طاب من المحمر و المشمر أراه جميعا على شاشة التليفزيون الذى لا يبخل على بشيء من أول كليبات الهشك بشك إلى مائدة الطعام المحملة بأكل يكفى الجيران و جيران الجيران، فأصبح التليفزيون كما أراه ملاذا للعازب و الجائع.

المهم تناولت السحورو صليت الفجر و نزلت إلى عملي بالمدرسة أجلس على (التختة) ثم أعود لبيتي و طبعا لايوجد تلاميذ لأننا في شهور الإجازة و بحكم القوى نضطر الذهاب للمدرسة حتى تكون مفتوحة للطلاب لممارسة نشاطهم الرياضي و الثقافي و كأن هؤلاء الطلاب يموتون حبا ولديهم شوقا و لوعة للمدرسة و لولا الامتحانات و الحضور و الغياب لما عتبوها من أساسه.

المهم مضت ساعات الانتظار داخل المدرسة سريعا و قررت أن أصلى الظهر و أن ابحث عن موائد الرحمن وبجوار مسجد عتيق بحي الحسين وجدت المائدة مزدحمة بالأبيض و الأسود و الأحمر والأخضر و كل ما لذ و طاب من الوان ليست بطعام يا سيدي و لكنها لأناس جلسوا على المائدة من قبل آذان العصر بجلبابهم و قمصانهم يشمرونها في انتظار المدفع.

و عرفت أنني لن أكون مع هؤلاء الضيوف لأن الذى سبق سيأكل و يشرب ما يريد، وعنها قررت البحث عن مائدة أخرى و وجدتها فعلا مصفوفة بالكراسى و الترابيزات مفروشة بأطباق فارغة و يبدو ان الطعام سيشرفها قرب المغرب.

و يا سعدك يا هناك فلم ألف و أدور السبع دوخات و وصلت للمائدة سريعا و لكن ما يأتي سريعا يذهب سريعا فالمائدة أتضح أنها ليست مائدة.

أه و الله هى ليست مائدة و لكنها مائدة.. يا سيدى صبرك عليا هى ليست مائدة رحمن و لكنها مائدة لمطعم كباب و كفتة.

و حياتك كباب و كفتةو غفلت عيني عن رؤيته من كثرة الدخان أبو رائحة نفاذة تجعلك تسرح بخيالك الواسع بطبق مليان سلطة طحينة و بجواره طبق طرشى بلدى و كام رغيف عيش من اللى قلبك يحبهم وصوابع الكفتة و معاه الكباب على الطرب تفتح شهيتك و لا ملك الغابة.

و صحوت على صوت صبى المحل:يا أستاذ أتفضل المنيوم.

و بابتسامة بلهاءتشبه ابتسامة الموناليزا فزعت من نطقه و قوله:المنيوم!!

-أيوه يا أستاذالمنيوم.

كررها لى و أنا ابتسمو أسأله:هى الموائد بقت بمنيو؟! دى حاجة فل و الله.

-أيوه يا استاذ طول عمرها كده.

و يبدو اننى غبت عن موائد الرحمن منذ زمن لدرجة اننى فرحت باننى سأكون مثل ملوك العصور الفانية أطلبما أشاء من طعام و أجد ما لذ و طاب من نساء كأيام العصر العباسى فأجده على الفور فى التو و اللحظة.

و ما أن نظرت للمنيومأقصد المنيو.. اكتشفت اننى أجلس على مائدة محل للكباب و الكفتة و عرفت من الصبى أن الطلبات بفلوس و مفيش حاجة لله.

فتركت المكان باحثا عن مائدة اخرى و أخبرت الصبى أننى قرب المغرب ان شاء الله سوف أطل عليه و فى نفسى اقول لما يبقى معايا نقود (بالهبل).

تعبت قدماى من كثرةاللف فكل الموائد مزدحمة بالناس و حمدت الله ان الخير كثير و يكفى من الحبايب ملايين.

و حتى المائدة التى كانت مزدحمة قبل صلاة العصر ظننت انهم سيذهبون إلى الصلاة لكننى فوجئت بانهم صلواجماعة بجوار المائدة و اصبح الشارع مغلقا كمثل أيام صلاة الجمعة.

و كما اخبرتكم من مائدة لمائدة يا قلبى لا تحزن الكل موجود مشرف و منور و انا على قدمى من صباحية ربنا نفسى أجد مائدة واحدة توحد ربنا و الناس لم يجلسوا جميعا على كل كراسيها.

مائدة واحدة بس يبقى لى مكان فيها حتى و لو اقف على قدمى.

يا فرج الله ياما أنتكريم يا رب..فى مائدة هناك تبحث عن فرد ليكمل عدد الجالسين و لم اصدق نفسى فقدماىتسير بسرعة و لا سرعة سيارات سباقات (الفورميلا وان).

و على مهلك يا شوماخرأقصد يا هلال و جلست شاكرا صاحب المائدة و اقترب موعد الاذان و ضرب المدفع اخيرا وبدا كل يدعو فى سره عدا الجالس بجوارى الذى اعلنها صراحة قائلا:يا رب الزمالك ياخدالدورى.

عنها و تناول وجهى لكمة قوية ولا لكمة تايسون فى زمانه و كان مكانها من المفترض وجه أخينا الذى وقف يدعو للزمالك و هو يدعى وأنا انضرب و انقلبت المائدة على الرجل لأنه جلس وسط مشجعين من الشياطين الحمر و ساد الهرج و المرج و ضاعت عليا فرصة الفطار و الحمدلله.

الفائزون فى برناتمج عصير الكتب

2010-06-15T01:54:00.000+03:00

بلال فضل يعلن أسماء الفائزين فى البرنامج و من بينهم معتز نادى

http://www.youtube.com/watch?v=49d8PvjMFxM

وداعا الولد الشقى

2010-05-10T21:13:00.000+03:00

لا يعرف الإنسان قيمة الشىء إلا عندما يفقده.

إنها حقيقة مع الأعزاء الذين نفقدهم و الذين ينورون حياتنا بتعاملاتهم و كلماتهم و مشاعرهم.

و من هؤلاء الأعزاء لدى الكاتب الكبير محمود السعدنى الذي اعتبره أستاذى الذى تعلمت منه الكتابة.

محمود السعدنى الذى كان يكتب ببساطة و يتحدث ببساطة و يجعلك تسبح فى أوراق كتبه و أنت تشعر بالمتعة و المعرفة.

محمود السعدنى الذى كتب للبسطاء من الناس فقد كان معبرا بقلمه عن أهل البلد من الطبقة الدنيا يحكى لنا التاريخ من الحواري و المدن بأسلوب شيق سلس يجعلك مهتما بكل أعماله.

محمود السعدنى الذى يقدم لك الابتسامة فى أعماله و يسرد لك الواقع بلغة ابن البلد رحل عن عالمنا بعد صراع طويل مع المرض عن عمر يناهز الثالثة و الثمانين.

لقد صدق الكتاب و النقاد عندما وصفوه بأنه جحا المصري على مسرح الحياة فهو حالة فريدة فى أعماله التى يعبر فيها عن الناس الموجودين بالمقاهي و على المصاطب بالقرى بكلمات بديعة سهلة تذهب إلى القلب و يرتاح لها العقل.

و لم يكن كاتبا فقط بل كان مقدما بارعا فى برنامجه الشهير "على القهوة" بالتليفزيون المصرى.

من لا يعرف محمود السعدنى فلن يستطيع التخلي عن صداقته عبر قراءة كتبه التى غاص فيها مع فهلوة ابن البلد المصري و دخل فى حياة الصياع و الضائعين و المحتالين و النصابين و الحرفيين و المعدمين.

مع محمود السعدنى تستطيع ان تسافر لأى مكان فكتاب مثل "بلاد تشيل و بلاد تحط" يحكى فيه عن أمريكا و اليابان و البرتغال و هونج كونج و غيرها من الدول التى تشعر بوجودك معه فى زيارتها بكلمات قريبة منك سهلة فى القراءة و المسمع بعيدا عن أى صعوبة.

و كتبه الرائعة هى كنز بالنسبة لى عندما قرأتها مثل: (الموكوس فى بلاد الفلوس) و (أمريكا يا ويكا) و (وداعا للطواجن) و غيرها من الأعمال الأدبية البديعة و ايضا رواياته مثل القضية و ايضا مذكراته التى تشرح لك تاريخ الصحافة المصرية خلال الحقبة الملكية و الجمهورية و يجعلك تعرف خبايا بلاط صاحبة الجلالة و التى كتبها فى أجزاء ثلاثة بعنوان (مذكرات الولد الشقى).

الولد الشقى صنع مجد العديد من الصحف و المجلات مثل روزاليوسف و صباح الخير.

كان ساخرا و مؤرخا و يظهر ذلك فى عمله الرائع "مصر من تانى" هذا الكتاب الذى أدعوك عزيزى لقراءته و انت معه كسبان كسبان.

فكتاب "مصر من تانى" يحكى لك تاريخ مصر المحروسة و لكن ليست بوجهة نظر المؤرخين الذين يرون الحكام على حق و ان الشعب فى غاية الوقاحة و الاجرام.

فهذا الكتاب يجعلك تعرف الماضى الحقيقى لمصر مع الحرافيش من العمال و الفلاحين.. هذا الكتاب الذى يقول فى مقدمته:

"سنبدأ على بركة الله و أرجو أن ننتهى على بركة الله أيضا، و نسأل المولى العزيز التوفيق للوصول الى الحقيقة و الكشف عن المستور و ان نكون عند حسن الظن و على مستوى العمل الكبير و نطلب من الله أن يبعدنا عن ايدى العسس و أن يخفينا عن أعين البصاصين و أن يحيينا صياعا و يميتنا صياعا و يحشرنا يوم القيامة فى زمرة الذين هم على باب الكريم.

طوبى للصياع .. و طوبى للمتشردين.. و طوبة للبصاصين و المخبرين"

هكذا جاءت مقدمته فى كتاب "مصر من تانى" و مهما قلت فإن الكلمات تعجز عن وصف الراحل أستاذى محمود السعدنى الذى غاب بجسده عن عالمنا لكن روحه فى اعماله و كتبه تبقى معنا.

كل سنة و أنت طيب يا ريس

2010-05-10T21:07:00.001+03:00

82 شمعة أطفيهم يا ريس فى عيد ميلادك و السرور يملأ قلبى لشخصك الكريم و لا أجد "تورتة" تعبر عن امتنانى لهذا اليوم ليس لأننى بلا نقود و لكن لأن الشمع كثير و ربنا يزيد و يبارك فى عمرك يا ريس.

وحشتنا يا ريس و كنا ننتظرك فى عيد العمال كى تخطب فينا و أثناء كلامك الرصين يخرج احد العمال بصوته من بعيد قائلا: المنحة يا ريس..

فتبتسم سيادتك و تقرر المنحة و بعدها يعلو التصفيق الحاد و يدوى داخل القاعة.

و لكن هذه المرة غبت يا ريس و بالتالى لم نسمع كلمة "المنحة" بجانب هذا الصوت الذى ينادى من عند رصيف مجلس الشعب و يطالب بزيادة الأجور و توفير الحد الأدنى و إعطاء العمال حقوقهم و توفير العمل للمعاقين و طلبات كثيرة يا ريس و كلهم أمل إن حضرتك توافق عليها بعد ما راحت الحكومة فى "شربة ميه" و دخلت فى مشكلة تلو الأخرى من غاز لأنابيب لسولار و كأن البلد تشتهر بمهنة الحاوى الذى يحب النار و يخرجها من فمه و لهذا حدث النقص فى السولار و الأنابيب .. وقرب قرب قرب.

عفوا سيادة الرئيس وصلنا إلى أزمة اللحوم فالشعب نجح فى المقاطعة حسب أحدث الإحصاءات بنسبة 52% و هل هذا عن قناعة منهم أم لضيق اليد؟ .. الله أعلم.

كل سنة و أنت طيب يا ريس الامتحانات على الأبواب و الدروس الخصوصية تشتاق لهذا التوقيت و جيوب الأهالي تنتظر أي شيء ينفخ فى صورة جيوبهم حتى يدفعون ثمنها و يجعله عامر يا ريس.

لا أعرف سوى الشكر لمن يكرمني آخر كرم مثل سيادتك و اقدم لك كل الشكر الذى لا أملك غيره و معه الستر و الصحة والعافية و الشرف و حب الوطن و القناعة و غيرها من صفات المدينة الفاضلة.

و أتمنى من سيادتك نظرة للناس المطحونين محدودى الدخل و ذلك لأنهم من فرط سعادتهم أراد البعض منهم أن يحضر حتى شرم الشيخ كى يهنئك لكن العين بصيرة و الايد قصيرة و بالتالى فهم يوجهون لك كل التحية على خروجنا من مطبات الخطورة فى ظل الاوضاع المتدهورة بالمنطقة.

كفاية علينا الأمان يا ريس و كفاية وجودك معانا ينور حياتنا و كل سنة وسيادتك بخير و وفقك الله و سدد خطاك مرفوعا برايات النصر حاملا العزة لمصر.

نسيت أقولك يا ريس إن شريط (أبو الليف) مكسر الدنيا يا ريت لو تسمح اشغله فى بيتنا وقت حفلة عيد الميلاد المعمولة على شرف سيادتك.

حبيبك محدود الدخل

عايز اشرب يا كبير

2010-05-10T21:05:00.001+03:00

" يا تبر سايل بين شطين يا حلو يا أسمر “... هكذا غنى العندليب بصوته مغردا للنيل.

لكن يبدو أن النيل في خطر عندنا في مصر و لا نريد تهويل المسألة لكن الموضوع يتلخص فى اتجاه دول المنبع لتوقيع اتفاقية منفردة بعيدا عن دولتي المصب مصر و السودان بشان حصة الأفراد فى مياه النيل خاصة بعد فشل اجتماعات الوزراء الأفارقة بشرم الشيخ.

و المتابع للأمر سيكتشف العجز فى معالجة الأزمة و سيجد أن أي مشكلة تحدث لابد من تدخل الرئيس مبارك لحلها .و حسنا فعل عندما أرسل وزير الخارجية فى زيارة لدول المنبع الأفريقية مزودا برسالة تحث على التعاون بشان موضوع مياه النيل.

إننا لا نملك فى مصر سوى مياه النيل و تصبح مصر عاجزة بلا عكاز لو جفت مياه النيل و منعت دول المنبع وصولها إلينا.

المشكلة هنا فى بعدنا عن أفريقيا و تركنا الأمور تجرى حسب الأهواء.

فلم نعد نعرف افريقيا إلا وقت كأس الأمم الافريقية و فى الوقت نفسه تغرس إسرائيل نفسها فى كل المناطق الحيوية التى ترتبط بمصر و خصوصا نهر النيل بعد تعاونها فى بناء سد مع اثيوبيا من شأنه أن يقلل وصول المياه لمصر و السودان.

و خرج علينا الدكتور مفيد شهاب ليقول: أن أمن مصر المائى مسألة حياة أو موت.

و فى مجلس الشعب خرج النواب يدعون إلى حلول دبلوماسية مع دول المنبع حتى لا تضار حصتنا من مياه النيل.

و السؤال لماذا غابت مصر عن أفريقيا لكنها حاضرة فى المباريات؟

و لماذا نثور وقت مباراة كما حدث مع الجزائر و نسكت على مفيش فى موضوع حيوي يخص الزراعة و الصناعة و خدمات المستشفيات و كل ما هو لازم و ضروري للإنسان.

أعلم ان هناك مناطقا بلا مياه و تعيش على أقل القليل و لكن تخيل لو أصبحنا بلا مياه النيل، فكيف يكون الحال؟

ستزدهر صناعة المياه المعدنية و سنوفر المال الذي ندفعه للسباك و سنعود للاستحمام كما كانت عليه الطبيعة فى الماضي و يصبح الحوض مجرد تحفة أثرية كآلات الزراعة عند الفراعنة.

إنها سخرية القدر و أخشى ان أراها.

فبانتهاء النيل تنتهي حضارة لكن الأمل فى ان نجد حلا و ان نحب هذه البلد و ان بتعد عن اللحظات الأخيرة و أن نتحرك و نحن مستعدين حتى لا نصبح كالمعذبين و نطالب بالمياه قائلين: أحد أحد.

و وقتها لن يستطيع أى رصيف أن يتحمل هذا العدد الكبير الذى يطالب بأبسط حقوقه الآدمية معلقا لافتة كبيرة مكتوب عليها: عايز اشرب يا كبير.

و وقتها لن تكون هناك مياه للكبير أو الصغير.

وضع مؤلم ان تعيش بلا مياه لكن المؤلم ان تعيش و حقك مسلوب.

صباح الخير يا سينا

2010-05-10T21:03:00.000+03:00

"السلام عليكم و رحمة الله و السلام لنا جميعا بإذن الله".

هكذا بدأت كلمات الرئيس الراحل انور السادات فى خطابه امام الكنيست الاسرائيلى و انتهت كلماته بعودة سيناء محررة بالسلام و هو يقف ثابتا يفاوض إسرائيل بقوة لا بمنطلق ضعف.

كم كنت أتمنى أن أكون من جيل الحروب الأربع كي أشاهد شجاعة الأبطال من جنود و مدنيين و عسكريين و أمهات تترك أبنائها فداء للوطن و آباء يزرعون الشجاعة فى نفوس ابنائهم من أجل العزة و الكرامة.

هؤلاء الأبطال الذين رفعوا رأس مصر و أعادوا لها كرامتها التى أبدا لن تضيع طالما كنا نقوم بالفعل و ليس الشعارات الرنانة على شاكلة "المصريين أهمه" أو "أمجاد يا عرب أمجاد" و غيرها من اغانى عبده حريقة على رأى الراحل العظيم الدكتور مصطفى محمود.

لقد وقفنا ستة أيام لم نحارب إسرائيل.

طائراتنا ضربت على الأرض جنودنا ينسحبون بلا أى خطط لقد عاش الجنود فى فوضى.

و لكن هل أصبحت أقدامنا في الرمال بعيدة عن الحركة مشلولة لا تعرف الصمود؟

لقد خرجنا من عدوان 1967 مدركين أن القوة لا تحتاج إلى شعارات و لكنها تحتاج إلى ردع و فعل.

خرجنا من ستة أيام إلى سنوات الاستنزاف و طلقاتنا هى التى تتكلم و ليس لساننا هو الذى يقول.

انتظرنا و صبرنا صبرا جميلا حتى جاءت اللحظة الحاسمة التي شاءت لها السماء ان تعلن فيها بسالة و شجاعة مصرية فى القضاء على الجيش الذى لا يقهر كما كان يظنون و لكن القوة كما تفيد فهى تجعل المغرور كالأعمى.

انتصرنا فى الحرب خلال ستة ساعات و بقى لنا السلام بالمفاوضات حتى نحرر كل أراضينا و ليت العرب استجابوا للسادات.

لأنهم يسعون الآن إلى كل ما دعاهم إليه فى الماضى لكن من يستخدم صوته العالى فهو لا ينتبه لحاضره و بالتالى يفقد مستقبله.

حاربنا و فاوضنا و استعدنا أراضينا.

لكننا خرجنا بشهداء و أبطال يستحقون منى التحية.

بل يستحقون مننا جميعا التقدير و الاحترام لنهم ضحوا بدمائهم من اجلنا و تركوا زوجاتهم من اجل مصر و دافعوا عن ترابها حتى تعيش كل ام مرفوعة الرأس و يشعر كل أب بعزته و كرامته.

تحية لكل أبطال هذا النصر العظيم بدالية من الزعيم الراحل أنور السادات و الرئيس مبارك و المشير ابو غزالة و اللواء عبد الغنى الجمسى و غيرهم من كبار القادة.

تحية لكل الجنود الشجعان الذين لم يخافوا من رصاصة أو طلقات مدافع أو صواريخ طائرات لأن قلوبهم كانت تردد اسم مصر و تحتمي بترابها.

تحية لمحمد عبد العاطى صائد الدبابات و تحية لأول شهيد وضع العلم بمجرد عبوره لخط بارليف فرحا بانتصار مصر و أسعده الله بشهادته.

إن السلام يحتاج لقوة تحميه و لا يجب أن نقف عند حدود التحية و التقدير و لكن يجب الاهتمام بسيناء و وضعها ضمن إطار التنمية الشاملة المصرية لأنها خط دفاعى حصين يمكن منه الاستفادة بموارد عدة تقلل الضغط من الكثافة السكانية بالعاصمة و كذلك يمكن الاستفادة من كنوز سيناء و الدعوة إلى تعميرها و تنميتها بصورة فعلية و ليس شعارات.

و رجاء ألا يكون الانتباه لها و قت الاحتفالات و الانتصارات فكما ارتوت أرضها بدماء الشهداء فعلينا كأحياء ان نرويها بالتعمير.

أكرر تحياتى إلى الشهداء و الأبطال و أهدى إسرائيل أغنية " و صباح الخير يا سينا.. رسيتى فى مراسينا ".

كلام ضد الرصاص

2010-05-10T21:00:00.000+03:00

“ إنني أستطيع أن أعطيك قلبي.. فأصبح عاشقا. أعطيك طعامي.. فأصبح جائعا. أعطيك ثروتي. فأصبح فقيرا. أعطيك عمري.. فأصبح ذكرى. و لكنى لا أستطيع أن أعطيك حريتي. إن حريتي هي دمائي، هى عقلي، هي خبز حياتي. إنني لو أعطيتك إياها فإنني أصبح قطيعا شيئا له ماض و لكن ليس أمامه مستقبل “.

هكذا جاءت كلمات الراحل محمود عوض فى كتابه (أفكار ضد الرصاص) الذي يجسد قضايا متمردين ثاروا بكلماتهم و دفعوا ثمنها لسنوات طويلة.

و أرى أننا نعيش الآن في واقع يشجع إطلاق الرصاص على المتظاهرين ليس بدعوة من النظام و لكنها من أحد نواب مجلس الشعب.

هؤلاء النواب الذين يمشون بالأغلبية و الموافقة، وقفوا يطالبون بردع كل من تسول له نفسه فى الخروج بمظاهرات و كأنهم ليسوا بنواب للشعب و لكنهم نواب للمصالح.

فهذا الحكم القاضي بإعدام حرية التعبير و المظاهرات هو حكم إعدام.

فأي محكمة عندما تقرر إعدام مجرم فإنها لا تقصد تصحيح الجريمة و القضاء عليها و إنما تقصد أن تحذر الآخرين من سلوك مرتكب الجريمة.

إذن ففي دعوة إطلاق الرصاص دعوة لتكميم الأفواه و التحدث بلغة من يرضى عنهم النواب فقط. فمن هم الشعب أم ماذا؟

أحب الحرية و أعشق هواها و أتمنى أن يمارسها الصغير و الكبير بمسئولية لا بهمجية.

لكن عندما نقتل الحرية فنحن ندعو للجبن أن يعيش خالدا. فالجبن يتحقق بإعدام الحرية، و الشجاعة تتحقق بانتشار الحرية. و السؤال هنا هل نحن فى خندق الجبن أم في عرين الشجاعة أم أننا لا نعرف طريقنا أم ماذا؟

لم أدخل طوال حياتى فى مظاهرات و كل علاقتي بها مجرد تعبير عن الرأى لا يخرج عن حدود النظام لأن من يدعو لمثل هذه التظاهرات هو إنسان يملك العقل معبرا عن رأيه و ليس مخربا لوطنه.

إن الكل يعيش تحت سلطة من هو أعلى منه و التعبير عن الرأي في مظاهرة لا يشكل خطورة طالما كان العقل يدير رأسها لا الخراب يركب رأسها.

و هل التعبير عن الرأي جريمة يعاقب عليها أصحابها بالتعرض لإطلاق الرصاص؟

و هل نواب مجلس الشعب يحبون مصر أكثر من المتظاهرين و هل يجب أن نطلق الرصاص على أهلنا و نوزع القبلات و الابتسامات على أعداءنا.. هل هذه هي السياسة؟

إذن هذه سياسة تريد المواطن شجاعا فى مواجهة عدوه، جبانا فى مواجهة حاكمه.

سياسة تدعو المواطن ليكون جبانا فى مواجهة ماضيه، شجاعا فى مواجهة مستقبله.

و أتذكر الماضى فى ثورة 1919 و التى راح فيها شهداء من المصريين برصاص الانجليز فى المظاهرات فهل تحب ان تسمع عن ضحايا مصريين برصاص مصريين؟

لك الله يا مصر فهى بلد العجائب، النائب ليس مع الشعب، و الشعب لا يهمه سوى قوت يومه، و النخبة من المثقفين تريد الإصلاح و كل بوجهة نظره.

و هذه (الخلطة) العجيبة ليس لأن الذي بناها كان أصله “حلواني".

و لكن الموضوع و ما فيه أننا نسير بمبدأ إما أن نقنع الناس بما نقوله أو نضربهم بالرصاص، و هذا ليس على مستوى السياسة و لكن على مستوى حياتنا نحن نرى من هو ضدنا أنه يكرهنا و لا نحترم ثقافة الرأى.

و عندي شك أصبح يقينا عندما كان القدير محمود يس يحتفظ برصاصته فى فيلمه ( الرصاصة لا تزال فى جيبي ) و ذلك حتى يأتى اليوم و تستخدم ضد من يلعب الشيطان فى رأسه و يقرر الخروج فى مظاهرة.

شم الفسيخ

2010-04-05T02:22:00.000+02:00

وسط رائحة قالبة البيت كله من أول الشارع اكتب إليك و رائحة الفسيخ و الرنجة منتشرة و لا رائحة العروسة يوم فرحها.

و ما بين الفسيخ و الرنجة يظهر السردين و البطارخ و لا طعم لكل هؤلاء دون البصل الأخضر الصابح و كام رغيف عيش طرى من اللى بتحبهم الست الوالدة و تاكل و تسلملى على الأنتخة.

يوم شم الفسيخ أو شم النسيم أو الرنجة أو سميه زى ما تحب نصرف عليه على حسب قول المواقع الالكترونية الاخبارية مليار و 500 مليون و شوية و اللى يحب يدخل المزاد يشرفنا.

ربنا يزيد و يبارك للتجار أصحاب الأسماك فصدق رسولنا الكريم عندما قال أن تسعة أعشار الرزق فى التجارة و اللهم لا حسد فأنا من صغرى أتمنى أن أكون تاجرا و لكن تاجر شنطة و هبقى اقولك على السبب بعدين؟

سيبك بقى من جو السمك ده و تعالى نخرج بقى.

شوارع زحمة و جناين فيها البشر زى النمل المتجمع على علبة سكر و النسيم اللى مفروض حضرتك تشمه كله فسيخ و رنجة.

لا و رد و لا ياسمين زى أعمامنا الفراعنة ما قالوا زمان و بيحتفلوا بعيد "شموش" ثم تحول فى اللغة القبطية إلى شم النسيم.

و أصبح العيد عيدا للمصريين من نسل أجدادنا الفراعنة و الفسيخ هو هو .. و البصل زى ما هو.. بس الناس مش هي هي و الجناين مش زى ما هى و الزحمة دى مالهاش مثيل خصوصا فى أعيادنا.

و كعادتنا نحب الفرحة كما جاءت أغنية " العيد فرحة "، و لكن لو فكرت تخرج فبلاش لأن مش هتحس بأى نسيم مجرد روائح سمكية و لا عطور باريس فى مهرجان كان.

و يبدو أن ضحايا الحشيش جاء لهم "شم" النسيم إنقاذا لعدم وجوده و ربما فكروا فى عمل وقفات احتجاجية لكن يأتى النسيم بما لا تشتهيه من روائح فلا الحشيش موجود و لا النسيم موجود.

و بمناسبة الزحمة العظيمة فى هذا اليوم المفترج النسيمى سأذكر لك ما حدث لى و أنا صغيرا.

فقد قرر الوالد و الوالدة و انا على مشارف الرابعة أن نذهب إلى الحدائق عشان أشم النسيم و خرجنا لحديقة الحيوان فكانت مليئة بأمة لا اله الا الله فتركناها و ذهبنا للأورمان فكانت بها ناس ياما ولا سوق الجمعة وسواء الحيوان أو الأورمان فلا مكان لصريخ ابن يومين من الزحمة.

و لم ييأس والدى و ساعدته أمى فى إصدار قرار عائلى رقم 3 بالذهاب لحديقة الفسطاط و كالعادة كانت الحديقة مليئة بجمهور غفير و لا الجمهور اللى راح للبرادعى يوم رجوعه و استناه فى المنصورة.

مضى يوم النسيم من حديقة لحديقة فى زحمة مواصلات و حركة كعابى و لم نأكل الفسيخ و لا الرنجة و قرر الوالد إصدار فرمان بمنع خروج العائلة فى العطلات و الأعياد و عدنا للمنزل ليلا و قررنا العشاء و شمينا السيم فى البيت.

و كل سنة و انت طيب و بلاش تكتر فى الفسيخ و الرنجة لأن العمر مش بعزقة و افتكر حكمته " لقمة هنية تكفى مية ".

نسيت اقولك أن فى ناس بتحب تلون البيض و عامة هو غالى سواء ابيض او احمر بس لو لونت بيضة متنسانيش بواحدة.

كدبة ابريل

2010-03-31T02:08:00.002+02:00

لأننا نستقبل شهر أبريل في بداية أيامه فلابد من الترحيب به و ذكر مجموعة من الخيالات التى تتناسب معه.

فهو شهر معروف بالكذب و يطلق على أى حاجة أونطة فيه اسم (كدبة أبريل) و لهذه المناسبة حبيت أهديلك حبة منهم:

· طوابير بالعشرات من البنى ادمين على محلات الجزارة و عربيات الفول واقفة لا بتهش و لا بتنش من قلة الزباين.

· كل مصر نظيفة "من الزبالة".

· مركز شباب الجزيرة ياخد الدورى.

· إنشاء جامعة الدكتور زويل و افتتاحها و نشر أول أبحاثها فى كبرى المجلات العلمية العالمية.

· لجنة "الحكام" ينصلح حالها في اتحاد "الكوسة".

· إصدار قانون محاكمة الوزراء.

· تنفيذ مشروع "ممر التنمية و التعمير" للدكتور فاروق الباز.

· حل الصراع الفلسطينى الفلسطينى.

· الولايات المتحدة الأمريكية و روسيا يتخليان عن أسلحتهما النووية.

· التعليم المصري بخير.

· حل القضية الفلسطينية و تفعيل قرارات كل القمم العربية بجد مش ع الورق.

· اعتراف اسرائيل بكل مجازرها ضد الفلسطينيين.

· كل مصر متعلمة.

· الدكتور البرادعى هو المرشح القادم و ليس المحتمل لانتخابات الرئاسة المصرية.

· إنشاء نقابة للإعلاميين.

· اختفاء الطوابير من المستشفيات الحكومية.

· مصر تعيش فى سيولة مرورية مريحة بلا أى زحام.

· التزام ركاب المترو بأبواب الصعود و النزول.

· سواق التاكسى يقف لك و يوصلك مطرح ما انت عايز.

· الناس كلها مبسوطة.

· الناس كلها زعلانة.

· انخفاض نسبة العنوسة فى مصر و قلة معدلات الطلاق.

· الشباب المصرى يمتلك وظائف بمرتبات خيالية يحسده الأمريكان عليها.

· إلغاء حالة الطوارىء.

· لا إهمال فى المستشفيات.

· الدروس الخصوصية في ذمة الله.

· إقامة حفل تكريم لكل باحث علمي خدم مصر.

· شيوخ الفضائيات المتشددين يمتنعون عن الظهور على الشاشات.

· مصر تصعد لكأس العالم.

· دويتو غنائى بين عمرو دياب و محمد منير.

· اختفاء كرومبو في ظروف غامضة.

· مصر تعتمد فى اقتصادها على صناعتها الوطنية دون أى معونات خارجية.

· خدمة العملاء بالشركات تقرر الرد على المتصلين دون تشغيل أغانى للانتظار.

· الناس ماشية بسلام على كل رصيف فى مصر من غير أى اشغالات.

· تعديل مواد الدستور.

· الحزب الوطنى يفقد جميع المقاعد فى مجلس الشعب.

· صناعة أول سيارة مصرية كاملة.

· الجرائد القومية بتنقل الحقيقة كلها.

· الجرائد الخاصة بتنقل الحقيقة كلها.

· كل الناس صادقة.

· اختفاء الشيشة من المقاهى المصرية.

· الصرف الصحى واصل لكل حتة فى مصر.

· انقطاع الكهرباء فى جاردن سيتى و مصر الجديدة لأكثر من مرة فى اليوم.

· المواصلات فى مصر فاضية و مش لاقية حد يركبها.

· إغلاق موقع الفيس بوك.

· مفيش فقير فى مصر.

· هيفاء وهبى تقرر ان تبوس الواوا لكل مختل عقلى يرى زوجته شبه الهيفا.

· لا أطفال شوارع فى مصر.

· الشعب المصرى يعادل الفرنسيين فى قراءة 10 كتب سنويا.

· زيارة البرادعى للريس لتهنئته بالعودة من ألمانيا سالما.

· المستشار جودت الملط يعلن براءة الحكومة من أية مخالفات.

· أحمد عز يرفض احتكار أدوار البطولة.

· الكدب مالوش رجلين لأنه مش موجود أصلا.

· اللى نفسه فى حاجة يعملها.

· اللى تحبها تتجوزها.

· اللى تحبيه يسعدك.

ملحوظة يا عزيزى أخر نقطتين بصدق مش كلامى.. و أشوفك على خير..و ادعيلى بس من قلبك.

طفوا النور

2010-03-27T01:13:00.000+02:00

أكتب إليكم الآن باحثا عن النور السعيد في حياتنا فهل هو موجود أم أن الحياة أصبحت مظلمة من كثرة ما نراه و نسمعه و نعيشه؟

الحياة مليئة بالمتناقضات فلا يوجد شىء فى هذه الدنيا يطغى على الآخر فالخير أمامه الشر و الجمال يلازمه القبح و الذل يواجه الكرامة و الأهلى ينافسه الزمالك.

أحمد الله على اختراع الكهرباء الذي سهل لنا الحياة و أضاء لنا الكون و أصبح لدينا التليفزيون و الراديو و الانترنت و المطابع و المخترعات المفيدة جميعها و التى تعمل بالكهرباء.

و لولا الكهرباء لما كان هناك علاج لمن ضاع عقله و لولا الكهرباء لما كان هناك دم لمن يحتاجه بالمستشفيات و لولا الكهرباء لما كنت أنت تقرأ المكتوب.

Earth Hour أو ما يطلقون عليه ساعة الأرض دعوة كى يتذكر الناس ضرورة ترشيد استهلاك الكهرباء و ذلك بإطفاء الأنوار لمدة ساعة لحماية الكوكب الأزرق من الاحتباس الحرارى الذى نعانى منه الآن فى مصر.

و بمناسبة الاحتباس الحراري و الجو البارد الحار الذى أصبحنا نعيش فيه فإنني أتعجب من كتب المدرسة التى كانت تشير إلى أن جو مصر معتدل صيفا و دافىء شتاء.

و ينطبق هذا الجو على من يمتلك قدرة مالية على الذهاب للمصيف فى المدن الساحلية و الجلوس بالشهور فى الشاليهات و الذهاب لقضاء الشتاء فى الأقصر و أسوان أو أن الكريم أعطاه ميزة السكن فى تلك المناطق المذكورة.

فجو مصر خصوصا فى القاهرة أصبح جوا لا يطاق فهو حار جدا و بارد جدا و لا اعتدال إلا فى نظر السائحين الذين يتمتعون بصحة تجعلهم يرتدون أخف الملابس فى الشتاء عندنا و أنت تمشى بجوارهم مرتديا كوفية طابقة على زمارة رقبتك و جاكت عايم فيه و ما وراء الجاكت كان اعظم.

نعود سريعا لموضوع ساعة الأرض تخيل أننا نطفىء فى حياتنا السىء و لا نسلط عليه الضوء فهل سينتشر بيننا لأننا لا نواجهه أم انه سيموت لأننا لا نهتم به؟

و هذا ما يدفعنا للحديث عن فكرة نصف الكوب و انظر للكوب كله و لا تنظر للفارغ فقط.

إيه رأيك لو تخيلنا ساعة مظلمة و نحن بلا أضواء بعيدا عن أي هالات أو ظلال.

تخيل فى هذه الساعة المظلمة أنك لا ترى رغم نعمة البصر التى منحها الله إليك لكن أحيانا ترى القلوب و تعمى الأبصار.

هل نحن نرى أم مجرد مشاهدين لما يدور حولنا دون أن كون لنا دور و لو حتى بالكلام و أضعف الإيمان.

تخيل أن ساعة مظلمة يمكن أن تغير حياتك تجعلك تفكر فى ترك المساوىء و الاتجاه نحو الأفضل.

ساعة مظلمة تحاسب فيها نفسك و تقرر التغيير من أجل المصلحة العامة و ليس من أجلك أنت.

ساعة مظلمة تفكر فى الآخرين الذين حرمهم الله من نور البصر لكنهم حمدوا الله و قدموا لنا النماذج العظيمة كالدكتور طه حسين.

ساعة مظلمة تعرف فيها أن هناك من لا يجد طعاما أو شرابا و لا يرى ليلا لعدم وجود الكهرباء و يشترى ملابسا جديدة كل فين و فين، و خالص تحياتى لمن تنقطع الكهرباء لديه دوما او محروم منها بالأساس فهو أول من يشارك فى ساعة الأرض دون دعوة من أحد.

ساعة مظلمة عندما تقترب من نهايتها تسعى وقتها لأن لا ترى كل فاسد لا يستحق الوجود فى الحياة و ما أكثرهم.

ساعة مظلمة لحماية الكوكب الأزرق و ساعة مظلمة أخشى أن ننسى فيها الوقفة المصرية بحيث يستغل البعض هذه الساعة فى زيادتنا واحد و ربنا يزيد و يبارك.

حالة زهق

2010-03-25T23:53:00.002+02:00

فيها ايه لو عملت كشف حساب لنفسك سواء يومي أو أسبوعى أو حتى سنوى، تشوف فيه زعلت مين؟ ضايقت مين؟ عملت إيه يفرحك؟

اى حاجة عدت عليك شوف حصلك إيه و اتصرفت ازاى؟

بينى و بينك من صغرى بحس انى ممكن أموت بدري بدري بس جه فى بالى إننا دايما نذكر الميت بعد موته بكل الصفات الحلوة أو الوحشة على حسب سيرته في الدنيا.

تعالى ناخد الجانب الحلو و أسألك ليه دايما نهتم بالميت بعد ما يبعد عننا و نذكر محاسنه لكن و هو عايش ما نجيبش سيرته.

يا ترى إيه الفايدة لما يكون على حياة عينه عايش و ما حدش فاكره بكلمة حلوة و بعد ما يموت نقعد نتكلم و نقول و نعيد و نزيد و نحكى و لا قصص ألف ليلة و ليلة.

مش البنى آدم ده ساعات تيجى عليه حالة زهق مش عارف يتكلم مع مين و لو اتكلم مع حد بيرتاح له و بلسانه (يلوش) فى اللى بيرتاح معاه!!

غريبة دي.. تتكلم بأى كلام مع القريب منك و من جواك فاكره هيستحملك..لكنه مش بيستحمل كلامك لو معجبهوش.

يعنى تتكلم و انت فاكر انه هيرضى بكلامك و هو يسمعك و فاكر انك هتقول اللى يرضيه و كل واحد و عشمه و ما حدش عارف يرضى التانى!!

لخبطة .. صح؟

تعالى لموضوعنا اشمعنا نفتكر الميت لما نمشى و نعرف قيمته بجد لما يروح و لما يكون جنبنا مش بنفتكره بكلمة حلوة؟

طب ايه رايك لو لقيت البنى ادم ده ذات نفسه رافض انك تقول عليه كلمة حلوة و هو عايش لان بكلامك و انت بتسرد اللى عمله فاكر انك كده (بتفوّل) عليه و يقولك: فال الله و لا فالك يا شيخ.

مشكلة صح؟

بس أقولك أنا عندى أعرف كل حاجة و أنا عايش و اشوف الناس بتقول إيه بالحلو و الوحش عليا أحسن ما أموت و معرفش و لا حاجة.

بس نعمل ايه؟

ما هى كل حاجة محتاجة لحل و احنا بندور عليه و لا البحث عن مرتكب جرائم يكشفها المفعوص كرومبو.

لو عرفت الحل يا بختك..لأن التوهان حاجة بايخة اوى.

ما تزعلش منى..شكلي عكننت عليك و أنت متعود منى تيجى تضحك و تمشى، و ممكن تقعد تعلق و تاخد و تدى.

بس النهارده العملية ملخبطة يا صديقى ما تزعلش بقى لازم نتفق احنا سوا ع الحلوة و الحادقة.

لحمة يا دنيا لحمة

2010-03-25T00:23:00.001+02:00

مش عارف ابتدى منين؟

الموضوع و ما فيه إن اللحمة وصل سعرها لفوق عقبال أملتك سعرها 60 جنيه.

الأسعار طالعة فى العلالى و ما حدش عارف هو الغلاء عندنا بس و لا دى حالة عالمية؟

طبعا فى ناس هيخرجوا بتصريحات و يقولك دي أزمة عالمية بمعنى إنه "كاس و داير على الكل".

على عينى و على راسى إن الأسعار الغالية لكن هو مفيش مرة نسمع إن فى حاجة رخصت؟

ولا بس النفوس بترخص؟

اللحمة مصدر بهجة و سعادة من الكفتة إلى الطرب إلى البوفتيك إلى ما شاء الكريم حاجة أخر منجهة.

لو بصيت لعلاقة شعبنا باللحمة هتلاقي رباط مقدس بين الطرفين يظهر فى مواقف زى:

· لو واحد حصلت له حاجة فرحته و كان ربنا كارمه و مقتدر علطول يدبح و يفرق على الغلابة.

· لو واحدة عاملة "ندر" لله و اتحقق لها المراد، علطول تفرق عيش و لحمة.

دى حاجة بسيطة كتبت منها على ما قسم اللى افتكرته.

بمناسبة موضوع اللحمة فى ناس شايفة إنه مش ضرورى نشترى لحمة لأن الحياة مش هتقف عندها و ممكن نعوض بفراخ و سمك وكله عند الشعب بروتينات من خيرات الله و بارك العظيم فيما رزق.

فنهر النيل حتت منه مفتوحة على صرف صحى و الفراخ عندها انفلونزا بس الحالة و الحمدلله مستقرة.

فيها إيه يا سيدى لو ماكلتش لحمة و لا فراخ و لا سمك و زيك زى الغلابة تقضيها فول و طعمية؟

طيب لو بحسبة بسيطة سانودتش الفول بــ"جنيه" و الطعمية شارحه، تخيل بقى لو أسرة بسيطة فقيرة في الفلوس عزيزة فى النفوس قرروا يفطروا و يتغدوا و يتعشوا فول و طعمية بجانب بقى سلاطتهم،شوف هيدفعوا قد إيه؟

و ده أكل "فقايرى" يعنى لا "ذفر" و لا يحزنون.

سيبك بقى من اللحمة و من الفول و الطعمية و إيه رأيك لو بقيت نباتى يعنى تعيش على النباتات لا لحوم و لا حاجة؟

و منها تريح معدتك من التحمير و المسبك و تريح جيبك إلى حين نزول أسعار اللحمة إلى قواعدها سلامة.

تصدق بالله الموضوع محير، لا إحنا عارفين نشترى اللحمة و لا نقاطع الجزارين و لا نبقى نباتيين؟

طبعا اللى هيشترى ده أكيد عايش فى و مترفه و عنده عربية و أملاك.

و فيه هيشترى لأن العيال نفسهم فيها و فيه هيريح دماغه و يشوف حظك اليوم و ساعتها هيكون مكتوب (لحمة فى الطريق إاليك).

لا تندهش فستكون اللحمة كالمفاجأة و يا خوفى يا بدران لا تقعد اللحمة تطلع بسعرها لحد ما تبقى زى جرام الدهب و ساعتها لا بيوت هتتفتح و لا هيبقى فيه ستات بيوت شاطرة تعرفهم من طعم "الفتة".

نرجع لموضوعنا يا ترى تحب تعوض اللحمة بالفول و الإجابة هتلاقيها فى كلام عمنا (أحمد فؤاد نجم) حيث قال:

· عن موضوع الفول واللحمة صرح مصدر قال مسئول
إن الطب اتقدم جدا والدكتور محسن بيقول
إن الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن إن اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث إن انتو عقول العالم والعالم محتاج لعقول
ما رأى جنابك وجنابهم فيه واحد مجنون بيقول
إحنا سيبونا نموت باللحمة وانتو تعيشوا وتاكلوا الفول .

أظن مفيش بعد الكلام تتأكد من الرباط المقدس مع اللحمة .

نسيت أقولك إن بعضهم قال إن سبب ارتفاع سعر اللحمة هو إن (وديع) و (تهامى) لموا كل اللحمة اللى فى السوق عشان خاطر فيلم "لحم رخيص". . و لحمة يا دنيا لحمة.

تتربى فى عزك يا ريس

2010-03-15T23:18:00.001+02:00

10 أيام يا ريس عدوا علينا من غيرك و كأنهم 100 سنة لكن شافاك الله و عافك و يرجعك لنا بالسلامة من ألمانيا.

البلد هنا تمام التمام يا ريس و الطلبة بتوعنا فى الثانوية بيمتنحوا امتحانات بعضها اتسرب و البعض منها جت فيها أسئلة من خارج الترم الأول بس سيادتك دى امتحانات (تجريبة) يعنى مفيش قلق منها.

بالنسبة لمرض النقرس يا ريس فهو ممكن يختفى من عندنا لأن بعد سفر سيادتك اللحمة وصلت لــ 60 جنيه الكيلو و لسه مدخلناش فى مواسم أعياد و لا يحزنون.

الغريب بقى إن بعد ما حضرتك سافرت حصلت أزمة سولار و اختفى، عشان ما حدش يستغل فرصة غياب حضرتك و يولعها بس الحمدلله جت الولعة فى اللحمة.

بخصوص أحزاب المعارضة فهي عملت مؤتمر فى فندق كبير و قررت المعارضة تدخل معارضة مع المعارضة و مفيش برادعى سيادتك على أجندتهم.

بخصوص البرادعى فقد أعلن معارضته لسياسة القمع ضد مؤيديه بالفيوم و قرر النائب العام فى غياب سيادتك فتح تحقيق لهذه الوقائع و ده دليل إن ماحدش فوق القانون.

نسيت أقولك يا ريس إن البرادعى فى كوريا و حسن شحاتة وافق على اللعب مع كوريا مباراة ودية "يا محاسن الصدف".

بمناسبة سيرة الكورة فالدورى مولع و الأهلى الأول و الزمالك و الاسماعيلى بيتنافسوا معاه بس المشكلة فى لجنة الحكام سيادتك و بيقولوا انه بيجامل الشرطة.

حبيت أأكد على حضرتك يا ريس إن الحالة ميسورة و الناس عارفة تتجوز تانى و تالت و هتلاقى سيادتك خبر يفرحك لما تعرف إن عم احمد اللى عدى الــ 100 سنة ربنا يديله الصحة اتجوز للمرة التالتة و بيفكر سعادتك فى الرابعة و كله بأمر الله .

عم أحمد ساكن فى سوهاج.

فى برنامج جديد ظهر يا ريس اسمه (مصر النهارده) بدل برنامج (البيت بيتك) و فى انتظار مكالمة من حضرتك للبرنامج عشان نطمن عليك يا ريس.

(وديع و تهامى).. طبعا حضرتك مش فاكرهم يا ريس بحكم مشاغلك الكتيرة .. كان الله فى العون، المهم إن وديع و تهامى هيعملوا فيلم بعد سلسلة إعلاناتهم على قناة ميلودى و دى حاجة كويسة المهم ما نشوفش على الأفيش عبارة "للكبار فقط" اللى بتزعل حبايبنا.

خبر بقى عن الدكتور زويل خاص بعرض فيلم عن قصة حياته هيكتبه بلال فضل و يتبنى انتاجه الدكتور أحمد بهجت وعقبال ما حد يتبنى مشاريع الدكتور زويل العلمية.

الانترنت مرشح يا ريس للحصول على جائزة نوبل للسلام و فى نفس الوقت فى تقرير بيقول إن المصريين الأوائل عربيا و الــ23 عالميا فى الدخول على شبكة الفيس بوك لازم يحولوا الجايزة علينا، يا ريت يا ريس مش كفاية مفيش كأس عالم يبقى نروح السويد و ناخد نوبل.

الشباب يا ريس قايمين بمظاهرات عشان المسجد الأقصى فى كل جامعة بمصر و الأمن مستتب و كله تمام و بمناسبة سيرة النت.. فى حملة على الفيس بوك لمقاطعته من اجل نجدة الأقصى و ربنا يحميه من اى هدم يا رب و اللينك الخاص بالجروب مكتوب مع الرسالة عشان لو تحب تشارك فيها يا ريس

الأمور هنا مستقرة وكله علي ما يرام، الحمد لله الدكتور ماجد جورج أعلن إن مصر كلها هيكون فيها مياه نقية فى 2015 و ده شرف كبير للحكومة ننتظر حدوثه.

أسف يا ريس لو كنت طولت عليك و ترجع لنا بالسلامة إن شاء الله و يا ريت سيادتك توصل تهانينا للأستاذ جمال بمناسبة مولودته فريدة و تتربى فى عزك يا ريس.

نظرة يا ست

2010-03-08T20:27:00.000+02:00

العبد لله يشهد و يبصم و يختم بصوابعه العشرة إن المرأة نصف المجتمع و فاكهة الدنيا و ما ينفعش يعدى يوم المرأة العالمي من غير ما نكتب حاجة للست.

لقد اهتم سبحانه و تعالى بالمرأة و ذكر سورا في القرآن باسمها كالنساء و مريم.

و صدق أفلاطون و قال " لو أن الحقيقة صبغت امرأة لأحبها جميع الناس".

فهي إذن مخلوق عظيم الأهمية لأن الجميع يحبه و يقول أوسكار وايلد "إن النساء وجدن لكى نحبهن".

و عظمة المرأة تكمن فى كونها الأم و الأم مدرسة إجازتها يوم الجمعة.

و يرى كاتب المقال أن الست مش محتاجة لفكرة البحث عن المساواة لأنها عايشاها و تعالى نحسبها بالورقة و القلم و نشوف.

عندما يأتي شهر مارس تحتفل المرأة بيومها العالمي و الرجل ليس له يوم احتفالي أو حتى مولود صغير كده يفرح فيه.

عندما تتجه لمكان عملك و فجأة تلاقى نفسك قصاد المترو و الباب بيقفل بس ما تقدرش تدخل لأن العربة مخصصة للسيدات و ساعتها تنتظر المترو اللى بعده يا رجل.

عندما تشاهد الأفلام تجدها تؤكد على صدق النساء من اسمها زى "الستات ما يعرفوش يكدبوا"، حتى الأغاني و البرامج طلعت علينا بـ "الست دي أمي" و جوائز الأوسكار اكتسحتها النساء يعنى شمال يمين تلاقى واحدة ست.

سيبك من كل ده بس ممكن تضيف شوية بهارات و توابل عشان الطبخة تطلع كويسة فإذا أردت أن تعذب أحدا فاتركه مع المرأة و هى ذاهبة لشراء ما يخصها و تأكد انك ستعود خالى الجيب منزوع القوة بس شايل شىء و شويات و لا حاجة فيهم تبعك غير فلوسك اللى دفعتها يا سيد.

عفوا ذكرت فى البداية أن الموضوع عن المساواة التي تطالب بها المرأة رغم أنها عايشة و متهنية 24 قيراط من بداية ظهورها يعنى شوفناها ملكة و وزيرة و قاضية و اميرة و بنت الايه لتامر حسنى.

طيب تعالى يا سيدى أعرفك على حكمة بتقولك: إن الله عندما اراد خلق حواء من أدم لم يشأ أن يخلقها من عظام قدميه عشان ما يدوسش عليها و لم يخلقها الله من عظام رأسه حتى لا تسيطر عليه و إنما خلقها الكريم من ضلوعه لتكون مساوية له قريبة من قلبه.

أظن يا ستى مالكيش حجة و لا تقولى بقى محرومة من حقوقك و لا مصدومة.

يعنى يا بنت الناس عندك عربيات باسمك فى المترو و مقاعد فى البرلمان بتاعتك و مجلس قومى على اسمك ده غير عيد الأم اللى أنكتب باسم ست الحبايب و اسم الراجل بس يظهر وقت شراء الهدايا و ادفع يا بابا .. يا عينى يا بابا.

ربما تظهر المساواة بين الرجل و المرأة عند دخول الحمامات العامة حيث نجد واحدة للرجال فقط و أخرى للسيدات فقط.

سيدتي العزيزة اعتقد أن الرجل لا يوجد شىء مسمى على اسمه و ربما سنسمع عن مظاهرات للرجال تنادى بالمساواة ده حتى ربنا كفل للستات حقها و قال ( الرجال قوامون على النساء ) و معنى كلمة قوام فى اللغة خــدام و لو عايزين تتأكدوا أسألوا الشيخ خالد الجندى.

و عيشي حياتك يا ست بس نظرة للغلابة لو سمحت.

نسيت أقولك كل سنة و انتى طيبة فى شهر مارس من اول يوم المرأة لحد عيد الأم و ما تنسيش كاتب هذا المقال يتم عشرين فى هذا الشهر.

فكر بعقلك

2010-03-06T03:29:00.000+02:00

تمام لما تكون مستنى حاجة تحصلك و فجأة توصلك مفاجأة لا ع البال و لا ع الخاطر.

الكل يتحدث عن التغيير و لا كأنه تغيير لاعب داخل مباراة للمنتخب.

البرادعى يريد التغيير و لكن ينتظر تفويض الشعب، و الشعب يريد التغيير و لكن هل يريد البرادعى حقا أم أن الفكرة هى مجرد الخلاص من الواقع بواقع جديد؟

الناس تتحدث عن مكانة البرادعى الخارجية فى الوكالة الدولية للطاقة الذرية و على الجانب الآخر يمتلك الرئيس مبارك مكانة داخلية تعود إلى عمله بالجيش المصرى و تولى منصب النائب عهد الرئيس الراحل أنور السادات إذن فهو أقرب للداخل من الخارج.

هذا يدعو لفكرة المفاضلة و الاختيار و لكن الموضوع لا يقف على شخص فالأمر يعتمد بشكل كلى على الشعب الذي هو مصدر القوة لأي مجتمع.

الشعب هو المالك لزمام الأمور و لو صلح صلح الوطن كله و الرسول الكريم يقول"كما تكونون يولى عليكم".

فى إشارة المصطفى عليه الصلاة و السلام تأكيد لمبدأ عدالة الشعب فالحاكم مرآة لشعبه.

إذا كانت معاملاتنا قائمة بالصلاة ع النبى و قول إن شاء الله و لا إله إلا الله عند غلق سماعة التليفون أو توديع من نتحدث معهم فلماذا نرى الفساد و الجرائم ؟

ستقول لى أن الفساد عند الناس الكبار و لكن ليس الفساد ليس فى المال و امتلاك الأراضي إنما الفساد فساد القلوب.

فساد قلوب تعتمد على التواكل قلوب تعتمد على الاستكانة قلوب لا تحترم الكبير و لا تعطف على الصغير يكفيك أن تركب أي وسيلة نقل عامة و تجد منتهى الفوضى فى عدم الاهتمام بالمرضى أو كبار السن و توفير أماكن لجلوسهم، ستجد من يصفر و آخر ينظر للشباك و أخرى لا تسمع لا ترى لا تتكلم.

قلوب تعيش على النسيان و الدليل يحدث ما يحدث و تتكلم فيه و يفوت يوم و لا يومين لا حس و لا خبر فى انتظار موضوع آخر.

إلى رجل الشارع العادي الذى يثور من أجل التغيير هل فكرت أن تنادى و تتمسك بدعوة الدكتور زويل لإنشاء جامعة علمية بمصر؟

أليس التعليم هو الأهم حتى ندخل فى سباق دول الغرب الذين كما قال عنهم الدكتور مصطفى محمود فى برنامجه (العلم و الايمان) إنهم يسبقوننا بسنوات و نحن نتحرك كالنسانيس.

هل البلد واقفة على التغيير ؟

طيب الريس شفاه الله و عافاه يجرى يعالج الآن بألمانيا و الوضع الحالى لا يسمح للبرادعى بأن يكون رئيسا طبقا لمواد الدستور و إذا ظل بلا حزب فلن يستطيع الترشيح و هذا وفقا لنصوص الدستور.

و هل لو لم يصبح البرادعى رئيسا سيكمل الشعب مسيرة التغيير أم ينتظر قرب كل موسم انتخابى و يدعو للتغيير منتظرا المنقذ الذى لن يأتي إلا برضا الشعب.

عزيزي إذا كنت ترى التغيير إصلاحا لكل الأمور و منها الصحة و التعليم فالحكمة تقتضى أن يكون التغيير فى نفوس الشعب لأن من يحب البلد لا ينشغل بقضية واحدة تاركا الباقى بل عليه أن يغير كل ما حوله و يكون مخلصا فى عمله حتى و لو بسيطا وقتها يتحدث فيما يريد.

العلاج يكمن فى مواجهة عيوبنا لأننا نلعن العيوب بكثرة و نمدح الإيجابيات بإسراف دون أن نعطى للحقيقة اهتمام.

التغيير ليس فى شخص و لكن التغيير فى تفكير مجتمع وقتها يستطيع أن يكون فى مصاف المتقدمين فى شتى المجالات.

وداعا البيت بيتك

2010-02-26T19:47:00.001+02:00

لم اكن أتخيل أن يأتى اليوم و اقرأ خبر نعى برنامجى المفضل (البيت بيتك) و لكن دوام الحال من المحال و هذه سنة الكون.

(البيت بيتك) بدأ فى شهر رمضان الكريم و كانت أولى حلقاته فى 15 أكتوبر 2004 التى قدمتها الإعلامية القديرة ليلى رستم و أصبح البرنامج عامرا بالمذيعين مثل منى الشرقاوى، تامر أمين، شافكى المنيرى، جاسمين طه زكى، إنجى أنور و غيرهم.

و على طريقة نظرية التطور ظل التحسين مستمرا فى مقدمى البرنامج حيث تم اختيار كل من محمود سعد، وتامر أمين وجاسمين طه زكى، وياسمين عبد الله، وشريف عبد الرحمن لتقديم برنامج يناقش كافة قضايا المجتمع المصرى و يجعلك تشعر وقت مشاهدته بأن البيت "بيتك".

و ظهر أيضا معتز الدمرداش و أسامة منير لفترة قصيرة بالبرنامج إلى أن تم الاستقرار على محمود سعد و تامر امين حتى انضم إليهما خيرى رمضان.

لقد كان البرنامج من أفضل برامج التليفزيون المصري في ظل وجود القنوات الخاصة التى أكلت الجو ببرامجها المتنوعة إلى أن حدثت طفرة قنوات النيل و لا تزال المنافسة مستمرة بين الخاص و الحكومى.

(البيت بيتك) ظهر متنوعا بفقراته يناقش القضايا بحرية كبيرة لم نكن نراها بالتليفزيون المصرى الحكومى و التف حول البرنامج الفلاح و العامل و ربات البيوت و المثقف و الطالب و الطفل و الغنى و الفقير وبقى البرنامج بيت لكل المصريين.

و كعادة البعض فلم يتركوا البرنامج فى حاله سواء بتسميته (البيض بيضك) أو (الغيط غيطك) أو (الشقة شقتك) لكن البرنامج ظل بيتا لكل المصريين.

و نجاح البرنامج يعتمد على الجنود المجهولين من فريق الإعداد الذين لا يظهرون طوال الحلقة إلا بما جمعوه من أخبار و معلومات و ترتيبات للأفكار و اللقاءات فلولاهم لما اكتمل نجاح البرنامج.

و لأن الجواب بيبان من عنوانه فعنوان البرنامج يظهر فى شخصية و هيبة مقدمه (محمود سعد).. الذى له طلة بهية يومى السبت و الأربعاء من كل أسبوع و كان الواحد بيتفرج ع البرنامج و مش بيحس بالوقت.

ده غير قربه من البسطاء فى فقرة المشاكل التى كان يجمع فيها المال و يقدم المساعدات للمحتاجين بأسلوب راق دون تجريح لمشاعرأحد و يستحق عن جدارة أن يكون عمدة الاعلاميين لبساطته و تلقائيته الشديدة التى تظهر مع الشيخ خالد الجندى عندما يخاطبه بلغة عم محمد و الست بهية، لغة الناس العادية عشان الرسالة توصل لصاحبها مفهومة من غير اى لبس فى الموضوع، لهذا يستحق الإعلامى القدير ابن البلد المجدع "محمود سعد" أن نسمع له سلام مربع لقربه الدائم من الجمهور.

و لا ننسى تحية إطلالة تامرأمين المشهود بثقافته العالية و ثقته بنفسه فى عرض الموضوعات.

أما الوجه البشوش خيرى رمضان الذى تراه باسما حتى و هو غير مبتسم -(ابقى شوف كده و انت تاخد بالك)-جعل البيت بيتك قصة بسيطة بيعيشها مع الناس و بسلاسة أسلوبه يقدر يوصلك كل اللى انت عايزه.

لا أزال حزينا على رحيل (البيت بيتك) لكنى انتظر البرنامج الجديد الذى لم يستقر على اسمه بعد و كان افضل لو كان الجمهور الذى ارتبط بالبرنامج لست سنوات أن يختار بنفسه الاسم دون ان يفرضه احد عليه و اقترح ان يكون البيت (بيتكم).

أتمنى أن يكون البرنامج سواء مصر النهارده أو هنا القاهرة أن يكون متميزا مثل قرينه حتى لا نشاهده و نقول بحسرة الله يرحم "البيت بيتك".

روتــــانا زمــــان

2010-02-21T18:51:00.000+02:00

هو الناس بتتغير للأسوأ ولا الأفضل؟

عزيزي القارىء إن كنت لا تقرأ الصحف فأرجوك أن تطالعها ستجد صحفا بها عناوين تدل على رفاهية البلد و السعادة الغامرة اللى هتنزل من عين الناس و ستجد صحفا اخرى بها عناوين تجعل البلد سوداء و الحالة بايظة و حاجة لا تسر عدو و لا حبيب.

نصدق مين؟

افتح صفحة الحوادث هتلاقى جرائم غريبة زى أب يقتل أولاده و ينتحر، ام تقتل ابنتها بمساعدة عشيقها، انتحار، سرقة ، لدرجة وجود جرائم عشان ربع جنيه.

هو احنا بقينا متوحشين؟ و لا عايشين فى حالة من المهلبية ؟

أى حاجة نعملها و أى حاجة ممكن نسمعها و اى حاجة ممكن نشوفها و مبقتش غريبة.

يعنى عندك مثلا البنت تمشى فى الشارع تتعاكس، محترمة مؤدبة برده تتعاكس زيها زى اللى لبسها كأنه مش عليها.

الشوارع مش نضيفة زبالة هنا و زبالة هناك و بقت طايلة الغنى قبل الفقير، لدرجة إننا اعتمدنا على الأجانب عشان يلموا الزبالة لكن لا زبالة اتشالت و لا شوارع نضفت.

فين الجار بتاع زمان؟

كنت تشوف فى الأفلام الجار يساعد جاره و يتكلم معاه من البلكونة و الشباك "لازق" فى الشباك و معاه فى الفرح و الحزن.

فين الصحاب؟

دلوقتى لو لقيت صاحب يبقى كنز و الباقى معرفة عشان مصلحة.

فين الأناقة فى الملابس و المظهر؟

الموضوع بس عايز تناسق، يعنى البنات مثلا تلاقيها كلها شبه بعض من بنطلونات و "باديهات" و كأنهم شغالين فى مكان واحد، الواحدة حتى لو سايبة شعرها يا إما منكوش يا إما حتة واحدة، لا تسريحة و لا يحزنون إلا وقت الأفراح و الليالى الملاح، ده غير اللبس اللى واسع جدا جدا جدا الللى مش هتشوفه إلا نادرا.

طبعا الصبيان من الشباب نفس الحال ما بين بنطلون ساقط و شعر "كنيش" زى احمد مكي، مع العلم إن احمد مكى لابس باروكة، و كله كوم و النضارات السودا اللى تلاقى الشاب لابسها بالليل و كأن الشمس طالعة، ده غير بقى مجاملات الأفراح ما بين سجائر و رقص ولا دينا و فيفى عبده و هز يا وز.

الناس معادن بتبان فى الشدائد و قول للزمان ارجع يا زمان.

بجد بحسد الناس بتوع زمان فى افلام الأبيض و الأسود، شوف الشوارع نضيفة إزاى، شوف الجيران بتحب بعضها إزاى، شوف الناس بتخلص فى عملها إزاى؟

شوف أناقة الملابس و فساتين السيدات و الأغانى الجميلة و الكلمات المبدعة و الروعة التى ليس بعدها روعة.

لقد كانوا مبدعين رغم قلة الإمكانيات و لكن ماذا ينقصنا؟

بالحق لو هتقولى زمان عددهم قليل و الأحوال مريحة هقولك إنهم عاشوا أيام الحروب و الزيادة ممكن تبقى فايدة و شوف الصين و الهند.

رغم حزنى على امتلاك روتانا زمان لأكثر من 1000 فيلم مصرى إلا أننى ادعوك لمشاهدتها كى ترى الناس المصريين كيف كان حالهم و ساعتها يمكن ربك يكرم و نبقى احسن من زمان.

فالفن المصرى دائما رائع يحمل في طياته تاريخ الأمة ما بين أفلام يوسف وهبى، أنور وجدي، إسماعيل يس و ما بين غناء أم كلثوم و عبد الحليم، شادية و نجاة وهؤلاء على سبيل المثال و ليس الحصر.

نفسنا نشوف الحلو فى أيامنا و ما يبقاش ذكرى بنترحم عليها.

يا برادعــــى

2010-02-19T03:35:00.000+02:00

أنت ركبت طيارة قبل كده؟

الحكاية و ما فيها إن السؤال خطر على بالى وقولت الواحد كل يوم يركب مواصلة شكل ما بين أوتوبيس و ميكروباص و لو ربنا كرمه و الجيب "عمران" يركب تاكسى.

بس فى عقل بالى قلت: استنى يا واد..لو نفسك تركب طيارة ما تزعلش يمكن التذاكر غالية "حبتين" و الواحد طبعا مشغول.

بس لقيت الحل اللى منه أمسك "العصاية من النص" و قررت فى يوم الإجازة أروح المطار الصبح بدرى عشان أشوف الطيارة و هى نازلة و بالمرة يبقى شوفتها على حقيقتها بدل ما بسمع صوتها فوق سطوح البيت و بشوفها فى التليفزيون ع السريع.

المهم جهزت نفسى ليلتها و قررت أن أتنحى تماما و نهائيا عن التليفزيون عشان انام بدرى و اصحى بدرى و أشوف الطيارات من صباحية ربنا.

لكن دوام الحال من المحال عرفت إن الدكتور البرادعى ناوى يزور البلد فى نفس اليوم اللى هروح فيه المطار أتفرج على الطيارات و أعيش و اندمج معاها و لا روايات "شكسبير" و "نجيب محفوظ".

و لأن الواحد بيسمع الكلام من صغره و مش بيحب البهدلة فقلت بلاش أروح اليوم ده.

و طبعا لأنى مش بحب الزحمة و عايز أتفرج على "رواقة" و أتأمل فى الطيارة و هى نازلة و أشوف احتكاك "العجلات" بالأرض اللى يرجعنى لحصص العلوم بتاعة زمان.

مخبيش عليك و أقولك الصراحة عشان ما تقولش عليا إنى بضحك عليك او خايف اتكلم.

بص يا سيدي.. بصيت؟

طيب يا ريت تركز و خلى الكلام ده سر.

بينى و بينك و على بلاطة أنا مش عايز اروح المطار فى اليوم اللى هيشرفنا فيه الدكتور البرادعى.. عارف ليه؟

يا سيدى هحكيلك أنت مستعجل ليه متخافش مش هعطلك.

القصة و ما فيها إن "المنتخب" من كام يوم رجع من انجولا بالكأس الغالية و الناس خرجت تستقبل الأبطال و تغنى لهم و تهتف لهم وكانوا مبسوطين، لدرجة سهروا الليل بطوله فى الشوارع فرحانين و خرجوا ع المطار من صباحية ربنا عشان يكونوا فى شرف استقبال المعلم "شــحاتة" و رفاقه.

بس بصراحة اليوم ده أنا كنت غايب عشان كان عندى امتحان و طبعا نمت اليوم ده مرعوب و خايف إن المعلم ياخد خبر يومها بغيابى عن شرف استقباله.

و طبعا بعد ما اعترفت لك بالحقيقة يا سيدي.. يا ريت تقدّر ظروفى لأن مش معقولة أسيب الامتحان و أروح للمنتخب !!

و طبعا لو المعلم خد خبر إني رحت المطار يوم الجمعة هيفتكر إنى رايح عشان استقبل الدكتور البرادعى و أكون فى شرف انتظاره و استقباله.

قولى بقى ايه الحل؟

أروح المطار و المعلم يزعل منى و لا أقعد فى بيتنا و اروح فى يوم تانى؟

شوفت بقى يا سيدى الحيرة اللى انا فيها مش عارف أمشى و مش عارف استنى.

أقولك عشان محدش يزعل هروح يوم تانى و تبقى بصرة.. لا شوفت ده و لا شوفت ده.

ختاما.. نسيت أقولك على حاجة مهمة جدا بالنسبة لى و مرتبطة بموضوع الطيارة و المطار و يا رب تفرحك.

لقيت فى البلكونة طيارة كبيرة قمت طيرتها من البلكونة عشان اتسلى يوم الجمعة و ماما ساعتها شافتنى و قالتلى:من يومك بتحب الطيارات يا واد.. ده أنت حتى ركبتها و انت عندك 3 شهور و احنا مسافرين.

طبعا سمعت كلام الحاجة و حسيت إنى عايز أسمع سلام يا برادعـــى.

أنت اسمك إيه ؟

2010-02-16T18:52:00.000+02:00

الساعة الثانية صباحا و الجو ممطر شديد البرودة، خطوات أقدام على السلم مع "صرخات واحدة على وش ولادة".

صاحبنا يسمع الصراخ و يقرر فتح الباب بعد أن ترك كتبه المعتاد على قراءتها فى آخر الليل حتى يرى من الصارخ على السلم؟

الزوجة تنزل ببطء تشعر بآلام الوضع تمسك فى ذراع زوجها وتتألم و تقع عيونهما على "جارهما" الذى يقرر مساعدتهما و توصليهما إلى المستشفى فى هذا الوقت المتأخر الذى تخلو فيه القاهرة "الساهرة" من المواصلات فى هذا الطقس البارد.

يذهب الثلاثة للمستشفى و تلد الأم و تعود لها البسمة بعد رؤية طفلها السعيد و من فرحة الزوج يسأل جاره عن اسمه حتى يسمى ابنه على اسمه.

....

صاحبنا يقود سيارته العزيزة التي اشتراها والده كهدية له و لذكرياتها القديمة معه يرفض صاحبنا التفريط فيها و لكن دوام الحال من المحال و تفعلها "زوبة" – اسم السيارة – و تتعطل، ولأن زوبة محتاجة "زقة" فقد طلب من أحد المارة ان يساعده حتى "تقوم" سيارته و يصل لمشواره.

و بعد محاولات عديدة حتى "يرمى" صاحبنا و تسير السيارة، دار صوت المحرك و رفع صاحبنا يده من خارج شباك السيارة سائلا الذى ساعده عن اسمه و دعى له و عرض عليه أن يوصله فى طريقه.

المشهدان السابقان مصريان، لا تجدهما فى مكان آخر يتمتع بالطيبة و الحب و الشهامة بل و توجد المشاهد الكثيرة التي يظهر فيها المصري بنخوة أهل البلد يمد "يده" لمساعدة غيره حتى و لم يكن يعرفه.

ربما لحظات قصيرة لكنها قوية المعنى و للأسف مهددة بالانقراض لأن الواحد أصبح يفضل نفسه عن الآخرين و ينسى من حوله و لا يعلم أن الضرر الواقع على غيره هو بالضرورة واقع عليه.

لقد اصبح التفكير عند البعض بمبدأ "يللا نفسى" و ده "حلو" و ده "وحش" و ما تتعاملش مع ده و ما تشتريش من ده.

الموضوع مش فزورة.. الموضوع إن البلد دى قايمة على المسلمين و المسيحيين.

لو بصيت على الحال هتلاقيه مش بيفرق ما بين مسلم و مسيحى.

أزمة أنابيب البوتاجاز كانت على المسلم و المسيحي، أزمة الأسعار على المسلم و المسيحي، أزمة أنفلونزا الخنازير، كارثة السيول و غيرها من الأزمات كلها على المسلم و المسيحى.

زحمة المواصلات و حوادث الميكروباصات على المسلم و المسيحي.

فرحة الناس بالمنتخب على المسلم و المسيحي، زيادة العلاوة و الدعم يفرح الكل بها سواء مسلم أو مسيحي.

المشكلة ممكن تكون فى اهتمامنا بأى موضوع وقت ما بيحصل، لكن الأهم إننا نعرف مكان البلد هيكون فين لو سبنا كل من "هب و دب" يفرق بين المسيحى و المسلم و كأنهم مش مصريين.

مصر أم الدنيا و بلد الحضارة و مهد التاريخ و الكبير لازم يعرف إن اللى بيقع على "رجليه" بيبقى من غير عكازين و ما ينفعش البلد تمشى على "رجل" و تسيب "التانية".

لو رايح أى مكان و متعرفش حد يا ترى بيقولك ايه؟

بيسألك: أنت اسمك إيه ؟ و منين ؟ و ساكن فين ؟ و الكلام بيجيب بعضه.

الموضوع مش محتاج اقول إننا أخوات و الوطن للجميع لكن الأكيد سواء مسلمين أو مسيحيين.. كلنا مصريين.. بس يكون ده اللى في قلبك و تفكر بعقلك، و نيتك تبقى صافية.

رزق الهبل ع المجانين

2010-02-12T04:32:00.000+02:00

لو ناوى تتفرج ع التليفزيون خد معاك موبايلك و تليفونك و كام كارت شحن عشان تجاوب ع الأسئلة الجهنمية التى ستهطل عليك كالمطر بداية من كرومبو إلى بايرة و المطبخ و العربية و الأخت و الأهل و الأحباب و اللى يحب النبى يقول "هيييييه".

إلى هذا وصل الأمر ان تكون الأسئلة فى الأكل و إشى ملوخية و فراخ و إشى ناس مش لاقية تاكل (راجع تصريحات محافظ الأقصر).

إذا كانت الفلوس زى "الــرُز" فى يد أصحاب المسابقات و الشعب أصبح شغله الشاغل أن يمسك التليفون محمولا أو أرضيا ليتصل و يجرب حظه و هى ضربة حظ تخلص المسائل و تعمل النقلة.

و بالتالي لا تسأل عن إنتاج و جودة تعليم و تقدم و تطوير طالما أن الجيل الحالى يرى أن الكفاح و العرق و الجهد يكون بمجرد الضغط على زر التليفون و ألووووووووو يا أمم (الله يرحم توفيق الدقن).

و كان المجلس الموقر قد أعلن فى دورته الماضية بضرورة وضع ضوابط لهذه الإعلانات خصوصا بعد مشكلة كرومبو الشهيرة الذى تنافس على حقه ثلاثة اشخاص و فى ناس شايفة عددهم أربعة زى ما قال الشرع ( و زى ما قال الريس منتخبنا كويس ).

الأمر لا يتوقف فقط على الإعلانات بل يذهب إلى قنوات متخصصة فى عرض "مزز" حتى يسيل لعاب الأفندى و يجاوب على السؤال الخطير موووووت ( و متنساش تدوس على حرف "الواو" زى الكتكوتة ما بتنطق ).

و حتى لا نظلم البلد فإن موضوع المسابقات منتشر على مستوى العالم بل و تحقق هذه القنوات الترفيهية التى تعتمد عليها أعلى نسبة أرباح و لكن هناك توجد ضوابط للأمر و هنا توجد أموال تدخل فى جيوب أصحاب هذه المسابقات العبقرية و جزء يدخل فى جيوب شركات الاتصالات ( و كله بثوابه ).

لو تابعت هذه القنوات سترى العجب بعينه ويتكلم أشخاص في البرنامج للإجابة لكن تطلع فشنك و تبقى قاعد متجنن.. مش كفاية السؤال عبيط.. تبقى الإجابة أعبط (أتمنى وضع الأسئلة و الإجابات ضمن عجائب دنيا الفسكونيا الثامنة).

و طالما أننا شعب بيحب النكت و معروف عنه ( دمه خفيف ) فقد تفوق علينا الهنود حيث نشرت إحدى الصحف أن واحدة من هذه المسابقات ظل من يفوز بها يحمل نفس الاسم لدرجة أن اسم الفائز ظل كما هو 100 مرة دون تغيير لكن ربنا ستر و الناس خدت بالها.

طب الهنود عملوا عربية و سموها "تاتا" و دخلوا عالم البرمجيات و جهزوا خطة لدخول عالم العظماء فى الاقتصاد خلال العشر سنوات القادمة و عملوا برمجيات زى مايكروسوفت (عقبالنا يا رب).

المسابقات الكتيرة دليل رفاهية و الحياة بمبى و الناس بقى اللى بنشوفها أو بنسمع عن ظروفها الصعبة مش موجودة لأننا خلاص عدينا المرحلة دى و بقينا من كتر النعمة بنتصل و نجاوب و ناخد "صابونة" ( متخافش هديتك هتوصلك بس سيب عنوانك ).

لا احب التعميم و زى ما فيه الحلو.. فيه الوحش و عارف إن فى ناس عاقلة و واعية و عارفة إن الكلام ده ضحك ع الدقون ( و إنه رزق الهبل ع المجانين )، لكن مش عايز يجى الوقت و أجيال بعدنا تفتخر بحضارتنا فى ضرب الأرقام القياسية فى المسابقات الأونطة ( و الله يرحم الفراعنة ).

تحـــيا جمهورية الولـــيد

2010-02-10T22:21:00.001+02:00

لم نسمع عن قناة السويس إلا من خلال كتب التاريخ و كيف أن الخديو اسماعيل أعطى للأجانب امتيازات مجحفة على أراض مصرية لبناء هذا المشروع الذى جعل مصر منبعا للديون التى تعدت الملايين و كانت المبالغ خيالية فى هذا الوقت البعيد.

و يا من لم تشاهد قناة السويس و لم تحضر ما حدث فيها، فاليوم ترى ارض توشكى و قد أخذ منها الوليد ابن طلال ما يريد و حسب ما نشرته المصرى اليوم فإن أراضى الوليد لا تخضع للضرائب العقارية ورسوم رأس المال بل و يحصل على أقل سعر للكهرباء لا يستطيع الفقير الغلبان فى مصر أن يحصل عليه.

بل و أعطى العقد -الذى وقعه مع الحكومة المصرية- الحق له فى أن يزرع الأرض كيفما يشاء بل و لا يزرعها إطلاقا زى ما هو عايز .. الأرض أرضه !!

الوليد صاحب قنوات روتانا يبدو أنه اشتاق لقناة السويس و عقودها التى أعطت للأجانب اراض مصرية كما ذكرت و كأنها لا تخص البلد فى شىء فقد حصل جلالته على أكثر من 100 ألف فدان بسعر 50 جنيه للفدان، و على حكومتنا العظيمة أن تتكفل بالترفيه عن عماله بتوفير المياه و الكهرباء و يتم تسجيل العقود و غيره دون دفع أى رسوم.

و جاء ضمن شروط العقد أنه فى حالة المنازعات يعنى بالبلدى لو الحكومة و جلالة الأمير شدوا مع بعض علطول يلجأوا للتحكيم الدولى و كأن الأراضى اللى سيادته اشتراها خارج الحدود المصرية و لا تخضع لأحكام القضاء المصرى.

إن الامتيازات التى حصل عليها الأمير منها أنه معفى من الجمارك و البضائع المنقولة بالطائرات يا سعدك يا هناك يا وليد.

لماذا تمنح الامتيازات للمستثمرين الأجانب و العرب و لا تعطى نصف هذه الأموال للشباب؟

هل ننتظر بعد كل هذه الامتيازات أن يأتى اليوم و نرى هذه الأراضى المصرية تحت سلطة الأمير فقط ؟!

إن قناة السويس ظلت فى أيدى الأجانب سنين طويلة إلى أن جاء الزعيم جمال عبد الناصر و أعلن تأميم شركة قناة السويس شركة مساهمة مصرية.

فهل بعد كل هذا ياتى الرئيس مبارك و يعلن تأميم هذه الأراضى و إعادتها لمصر مع العلم بوجود تحكيم دولى و لا تزال قضية سياج التى دفعنا فيها دم قلبنا من 5 مليون إلى مبلغ يقل عن 60 مليون دولار بعد ما كسب قضيته فى المحاكم الدولية ضد الحكومة.

بعد هذا العقد نجد ان الأمير ليس أمامه سوى إعلان جمهورية الوليد على أرض توشكي، و على المقيمين حوله ترديد شعار(تحيا جمهورية الوليد).

و سيأتى اليوم الذى نجلس فيه لنقص و نروى لأطفالنا أن هذه الأراضى مصرية لكنها تعرضت للتشفير بسبب الوليد و لكننا فى انتظار البطل المغوار الذى سيقوم بفك الشفرات و يجعلنا نشاهد هذه الأراضى مرة أخرى و قد كتب عليها عمار يا مصر .. أرضك رجعتلك من تانى يا أرض النعم يا عظيمة.

المشكلة إن رئيس الوزراء كمال الجنزورى قالك أنه مشافش العقد و المشكلة كمان إن فى ناس كتير شايفة لكن لو قربت منها هتلاقيهم عميان.

هى دى بلدنا و لا بلد الغير .. هى مصر بتظهر وقت الكورة بس ؟!

و صدق اللى قال : مصر هى أمى لكن ربما ينظر الكبار إلى مصر بانها خالتهم لأنه محدش يقدر ياخد مكان الأم.

و ياللى بتفكر حقك يرجعلك عليك باللجوء إلى الكريم بالدعاء

و يا رب.......... .

ادعى باللى نفسك فيه.

الله يرحمك يا فالنتين

2010-02-10T22:20:00.002+02:00

يأتى عيد الحب فى كل عام حاملا نسمات حانية يضعها كل حبيب لمحبوبه فى نظرات و همسات و كلمات.

بصراحة من غير مجاملة مش عايز أكتب بقى بنظام الكتابة الناعمة و حين تنظر لعيناها و كلمتين حب من إياهم.

إيه رأيكم لو أتكلمنا فى عيد الحب عن أنه حلال و لا حرام؟ أكيد هتقول عليا إيه العكننة دى و إيه اللى مخلينى قاعد اقرا اللى هتكتبه.. ما ترسى على بر و تقول انت عايز تكتب ايه؟

حاضر يا سيدى من عنيا يا سيدتى هقولك إن شيوخ الفضائيات قالوا إن عيد الحب حرام و إنه دعوة للكفر و إن هناك أحديث شريفة للمصطفى عليه الصلاة و السلام فيما معناها أن الأعياد للمسلمين عيدين فقط هما عيد الأضحى و عيد الفطر.

و لأنني أحب أن يكون المجال لأهله في تخصصه فإني أرجو من هؤلاء الأفاضل أن يجيبوا و لماذا لا نقول على أعياد 6 أكتوبر و عيد تحرير سيناء أنهما أعيادا غير دينية و لا يصح التمسك بهما ؟

و بالطبع سترد على أن هذه مناسبات وطنية و قومية و يجب الزهو و الافتخار بها. و ماذا عن عيد الأم.. أليس هذا العيد عالمي و ابتدعه الغرب؟ و هل الأم تستحق منا يوما يتيما في السنة؟ و هل هذا يناسب ما جاء فى القرآن الكريم بــبر الوالدين معا ؟

رحم الله الشيخ محمد عبده العالم المستنير الذي سبق عصره و كان خير الناس فى توصيل منهج الإسلام الوسطي إلى الجميع.. بالفعل افتقده فى ظل سيطرة هؤلاء المشايخ على عقول البسطاء عبر الفضائيات.

أتعجب أن يكون هذا اليوم المسمى بعيد الحب هو يوم للإلحاد و الكفر، و إن كان يقتصر فى الفكر على انه علاقة حميمية بين الرجل و المرأة فإنه محترم طالما فى إطاره الشرعى. و ياريت تسيبك بقى من جو الأحمر فى الأحمر و الورود و الشيكولاتة و الدباديب و البراويز و غيرها من الهدايا التى لا تعد و لا تحصى.

إيه رأيك لو خلينا عيد الحب يوم الناس تتصافى و تتصالح مع بعضها جيران و صحاب و أهل و أحباب. يوم نشوف فيه الناس قلوبها صافية مش مجرد ابتسامات و أحضان و اللى فى القلب أسود و لا قرن الخروب.

يوم نشوف المحتاجين و نساعدهم و نطبطب على الفقراء و نسعدهم.

يوم نفرح فيه و نسعد بعضنا خصوصا و أن الفرحة قليلة عندنا و بتظهر يوم ما المنتخب يكسب و ده كل سنتين.

أظن لو عملنا كل ده فى حدود العرف و الدين و التقاليد و العادات مش هنغضب ربنا.

لماذا يقتل شيوخ الفضائيات السعادة؟ و لماذا لا يتصل شجيع من الجمهور و يسألهم عن حكم الدين فى بعض ضباط المرور المرتشين أو عن إهانات بعض الضباط فى الأقسام للمقبوض عليهم أو عن حكم الدين فى إجازات عيد الثورة و الشرطة..الخ من أعياد؟ و ممكن يقطعوا الخط لو يحبوا عن صاحب هذا السؤال.

طبعا حاسس إنك فى محاضرة و إن زقططة الفالنتين ضاعت عليك.. متزعلش حقك عليا و كل سنة و أنت طيب و افتكر تدعى لعم "فالنتين" اللى راح فى الكازوزة بسبب العشاق و كم من الجرائم ترتكب باسم الحب؟ و متنساش زى ما اتفقنا إنه عيد حب للجميع مش لوحدكم و بس.. و الله يرحمك يا فالنتين.