ཚེ་འབར།

བཙོན་ཁང་བཞུ་སྣོད་ཏུ་གྱུར་སོང་།

2013-12-27T01:01:00.000-08:00

----ཌེས་མཱོན་ཊུ་ཊུ་ཡིས་མཱན་ཌེ་ལ་གླེང་བ།

For 27 years, I knew Nelson Mandela by reputation only. I had seen him once, in the early 1950s, when he came to my teacher-training college to judge a debating contest. The next time I saw him was in 1990.

ལོ་ངོ་ཉི་ཤུ་རྩ་བདུན་ཙམ་ལ་ངས་ནེལ་སཱོན་མཱན་ཌེ་ལ་མཆོག་གྲགས་པ་ཁོ་ནར་བརྟེན་ནས་ངོ་ཤེས་བྱུང་། གཅིག་དགུ་ལྔ་བཅུའི་ནང་དུ་ཁོང་ངའི་དགེ་ཐོན་སློབ་གྲྭར་བགྲོ་གླེང་ཞིག་གི་སྐབས་གཟུར་དཔང་བར་ཕེབས་སྐབས་ཐེངས་ཤིག་མཇལ་མྱོང་ཡོད། ངས་ཁོང་མཇལ་བ་ཐེངས་རྗེས་མ་དེ་གཅིག་དགུ་དགུ་ཅུའི་ལོར་རེད།

When he came out of prison, many people feared he would turn out to have feet of clay. The idea that he might live up to his reputation seemed too good to be true. A whisper went around that some in the ANC said he was a lot more useful in jail than outside.

ཁོང་བཙོན་ཁང་ནས་ཕྱིར་ཐོན་དུས་མི་མང་པོ་ཞིག་གིས་ཁོང་གིས་སྔོ་ལོ་འཕྱར་མི་ཡོང་ངམ་སྙམ་པའི་ཞེད་སྣང་བྱེད་མྱོང་། སྐབས་དེར་ཁོང་གིས་སྙན་གྲགས་དེ་རྒྱུན་བསྲིངས་ཐུབ་ངེས་རེད་སྙམ་པའི་ལྟ་ཚུལ་དེ་བདེན་པར་རློམ་ཁག་པོ་རེད། ཨ་ཧྥི་རི་ཀའི་རྒྱལ་ཡོངས་སྲིད་དོན་ཚོགས་པའི་ཚོགས་མི་འགས་ཁོང་བཙོན་ཁང་ཕྱི་རུ་ཡོད་པ་ལས་ནང་དུ་ལུས་ན་བེད་སྤྱོད་ཆེ་བ་འདུག་ཅེས་བརྗོད་ཡོད་རབས་ཀྱི་སྐད་ཆ་ཞིག་ཀྱང་ཁྱབ་སོང་།

When he did come out, the most extraordinary thing happened. Even though many in the white community in South Africa were still dismissing him as a terrorist, he tried to understand their position. His gestures communicated more eloquently than words. For example, he invited his white jailer as a VIP guest to his inauguration as president, and he invited the prosecutor in the Rivonia trial to lunch.

ཡིན་ཡང་ཁོང་ཕྱིར་ཐོན་རྗེས་བྱུང་མ་མྱོང་བའི་གནས་ཚུལ་ཞིག་བྱུང་སོང་། ལྷོ་ཨ་ཧྥི་ཀའི་མི་རིགས་དཀར་པོའི་ཚོགས་པ་མང་པོས་དེ་དུས་སུའང་ཁོང་འཇིགས་སྐུལ་རིང་ལུགས་པར་བརྩི་མིན་ལ་མ་ལྟོས་པར་ཁོང་གིས་ཁོ་ཚོའི་གནས་བབ་རྒྱུས་ལོན་གནང་ཐབས་གནང་ཡོད། ཁོང་གི་གནང་ཕྱོགས་དེ་བརྒྱ་བཤད་སྟོང་བཤད་པ་ལས་ཀྱང་གོ་བརྡ་ཡག་བར་འཕྲད་སོང་། དཔེར་ན་ཁོང་གིས་ཁོང་བཙོན་དུ་འཇུག་མཁན་མི་རིགས་དཀར་པོའི་མི་དེ་ཁོང་གི་སྲིད་འཛིན་ཁྲི་འདོན་མཛད་སྒོར་གལ་ཆེའི་སྐུ་མགྲོན་དུ་གདན་འདྲེན་ཞུས་པ་དང་། རི་བོ་ནི་ཨ་རུ་ཁོང་ཁྲིམས་མུན་དུ་འཇུག་མཁན་དེ་གུང་ཚིགས་སུ་གདན་དྲངས་པ་ལྟ་བུ་རེད།

What incredible acts of magnanimity these were. His prosecutor had been quite zealous in pushing for the death penalty. Mandela also invited the widows of the Afrikaner political leaders to come to the president's residence.འདི་དག་ནི་ཅི་འདྲའི་ཁོང་ཡངས་དཀྱེལ་ཡངས་ཀྱི་གནང་སྟངས་ཤིག་རེད་ཨང་། ཁོང་ཁྲིམས་མུན་དུ་འཇུག་མཁན་དེ་ཁོང་དམར་གསོད་བྱེད་དགོས་པར་སྐུལ་མ་བྱེད་མཁན་དོ་གལ་ཆེ་བ་ཞིག་རེད། མཱན་ཌེ་ལ་མཆོག་གིས་ད་དུང་ཨ་ཧྥི་ར་ཀའི་སྲིད་དོན་མགོ་ཁྲིད་འདས་པོ་དག་གི་ཆུང་མ་ཚོའང་སྲིད་འཛིན་གྱི་བསྡད་གནས་སུ་མགྲོན་འབོད་གནང་ཡོད། Betsie Verwoerd, whose husband, HF Verwoerd, was assassinated in 1966, was unable to come because she was unwell. She lived in Oranje, where Afrikaners congregated to live, exclusively. And Mandela dropped everything and went to have tea with her, there, in that place.

༡༩༦༦ ལོར་དམར་གསོད་བཏང་བའི་སྲིད་དོན་པ་བེར་ཝོར་ཌའི་ཆུང་མ་བྷེ་ཚེ་ལགས་གཟུགས་ཕུང་མི་བདེ་བའི་རྐྱེན་པས་ཕེབས་ཐུབ་མེད། ཁོ་མོ་ཨ་ཧྥི་རི་ཁ་བ་རྣམས་གནས་བསྡད་བྱ་སའི་གྲོང་ཨོ་རཱན་ཇེ་ལ་སྡོད་ཀྱིན་ཡོད། མཱན་ཌེ་ལ་ལས་དོན་ཡོངས་རྫོགས་བསྐྱུར་ནས་ས་དེ་རུ་ཁོ་མོ་དང་མཉམ་དུ་ཇ་འཐུང་བར་ཕེབས་ཡོད།

He had an incredible empathy. During the negotiations that led up to the first free elections, the concessions he was willing to make were amazing. Chief Buthelezi wanted this, that and the other, and at every single point Madiba would say: yes, that's OK. He was upset that many in the ANC said Inkatha was not a genuine liberation movement. He even said that he was ready to promise Buthelezi a senior cabinet position, which was not something he had discussed with his colleagues. He did this to ensure that the country did not descend into a bloodbath.

ཁོང་ལ་གཞན་ལ་བསམ་ཤེས་བྱེད་པའི་ནུས་པ་ངོ་མཚར་བ་ཞིག་ཡོད། རང་དབང་གི་འོས་བསྡུར་བྱེད་པར་ཞི་མོལ་བྱེད་སྐབས་ཁོང་གིས་ཁེ་དབང་སྤྲད་པ་དེ་ཚོ་ཧ་ལས་པ་རེད། དཔོན་བྷུ་ཐེ་ལེ་ཛིས་འདི་དགོས་དང་དེ་དགོས་སོགས་དགོས་འདུན་བཏོན་པ་ཚང་མར་ཁོང་གིས་འགྲིག་དང་འགྲིག་ཅེས་བཀའ་ལན་གནང་ཡོད། ཨ་ཧྥི་རི་ཀའི་སྲིད་དོན་ཚོགས་པའི་ཚོགས་མི་མང་པོས་ཨིན་ཀ་ཐ་དེ་རང་དབང་གི་ལས་འགུལ་ངོ་མ་ཞིག་མ་རེད་ཅེས་པར་ཁོང་བློ་ཕམ་ཚད་མེད་བྱུང་ཡོད། ཁོང་གིས་ཁོང་གི་ལས་རོགས་རྣམས་དང་གྲོས་བསྡུར་བྱས་མེད་ནའང་བྷུ་ཐེ་ལེ་ཛིས་བཀའ་ཤག་ཏུ་གོ་གནས་མཐོ་གྲས་ཤིག་དགོས་ལབ་ཀྱང་ཁས་ལེན་བྱེད་པར་གྲ་སྒྲིག་ཡོད་ཅེས་གསུངས་ཡོད། ཁོང་གིས་འདི་དག་གནང་དོན་ནི་རྒྱལ་ཁབ་ཁྲག་གི་རྒྱ་མཚོར་མི་བྱིངས་བའི་ཆེད་དུ་རེད། He said of the Afrikaners: you can very well understand how they must be feeling. He reached out to them using the symbol of the South African rugby team, the springbok, which was excoriated by many black people as a symbol of Afrikaner power.

ཁོང་གིས་ཨ་ཧྥི་རི་ཀ་བ་རྣམས་ལ་ཁྱེད་རྣམས་ཀྱིས་ཁོང་ཚོས་ཚོར་བ་ཤེས་ཐུབ་ངེས་ཅེས་གསུངས་ཤིང་། མི་ནག་པོ་མང་པོས་ཨ་ཧྤི་རི་ཀའི་སྟོབས་ཤུགས་ཀྱི་མཚོན་རྟགས་སུ་བརྩི་མི་འདོད་པའི་ལྷོ་ཨ་ཧྥི་རི་ཀའི་རྐང་སྤོལ་གྱི་མཚོན་རྟགས་རུག་བྷ་ཨི་བེད་སྤྱོད་དེ་ཁོང་ཚོར་བཅར་ཡོད།

Rugby was the white man's sport, especially for Afrikaners, and Mandela's master stroke at the World Cup final was when he strode on to the turf wearing his Springbok jersey.རུག་བྷ་ཨི་ནི་མི་རིགས་དཀར་པོའི་རྩེད་མོ་རེད། ཨ་ཧྥི་རི་ཀ་བ་སྤྱི་དང་ཡང་སྒོས་མཱན་ཌེ་ལ་མཆོག་གིས་འཛམ་གླིང་རྩེད་འགྲན་ཆེན་མོར་རླབས་ཆེན་གྱི་བྱ་བ་ཞིག་བྱས་པ་ནི་ཁོང་བལ་སླས་སྟོད་ཐུང་ཞིག་བསྣབས་ནས་རྩེད་ཐང་དུ་གོམ་ཞེང་ཆེན་པོས་ཕེབས་པ་དེ་རེད།Almost any other political leader would have seemed gauche, but he carried it off with aplomb. སྐབས་དེར་སྲིད་དོན་གྱི་མགོ་ཁྲིད་སུ་ཞིག་ཡིན་ཡང་རྐང་ལག་འཁོབ་གྱུར་ཡོད་སྲིད་ཀྱང་ཁོང་ནི་གདེང་ཚད་ཡོད་པའི་ཐོག་ནས་ཕེབས་ཡོད།The whole arena, which was probably 99% white, mostly Afrikaner, erupted into cries of "Nelson! Nelson!"་It was extraordinary. And who would have believed that in the townships they would be celebrating a rugby victory?བརྒྱ་ཆ་གོ་དགུ་ཙམ་ཨ་ཧྥི་རི་ཀ་བ་མི་རིགས་དཀར་པོ་ཡིན་པའི་རྩེད་ར་དེར་ “ནེལ་སཱོན། ནེལ་སཱོན”ཅེས་པས་སྒྲས་ཁེངས་ཡོད། དེ་ནི་སྤྱིར་བཏང་ཞིག་ག་ལ་ཡིན། གྲོང་རྡལ་ཚོར་རུག་བྷ་ཨིའི་རྒྱལ་ཁ་སྲུང་བརྩི་བྱ་སྲིད་བསམ་པ་ཞིག་སུའི་བློ་ལ་འཁོར་ཡོད་རྒྱུ་ཡོད།

Of course I saw him angry. After the Boipatong massacre, in 1992, in which 42 people died, the ANC pulled out of negotiations, and he was quite livid. He claimed the intelligence services had warned [the president] FW de Klerk something untoward was going to happen, that there was collusion between the security forces and Inkatha. I don't know whether De Klerk ignored that warning. Madiba said it was clear black lives meant nothing.

༡༩༩༢ ལོར་བྷོའི་པ་ཏོང་རྡེབ་གསོད་བྱུང་སྟེ་མི་བཞི་ཅུ་ཞེ་གཉིས་ལྷག་ཙམ་གྲོངས་སྐབས་ངས་ཁོང་ཐུགས་ཁྲོས་པ་མཐོང་བྱུང་། ཨ་ཧྥི་རི་ཀའི་རྒྱལ་ཡོངས་སྲིད་དོན་ཚོགས་པས་ཞི་མོལ་བྱེད་མཚམས་བཞག་ཡོད་ཅིང་། ཁོང་གདོང་མདོག་སྨུག་པོར་ཆགས་འདུག ཁོང་གིས་གསུངས་ན་གསང་བའི་ལས་ཁུངས་ཀྱིས་སྲིད་འཛིན་FW ཌེ་ཁེ་ལེར་ཁ་ལ་ཉེན་རྟོག་ཁང་དང་ཨིན་ཀ་ཐའི་བར་དུ་གསང་བའི་འབྲེལ་བ་འདུག་ཅེས་ཉེན་བརྡ་བཏང་ཡོད་ཅེས་གསུངས། ཌེ་ཁེ་ལེར་ཁས་ཉེན་བརྡ་དེ་སྣང་མེད་བཏང་བ་ཡིན་ནམ་མིན་ང་ལ་གསལ་ཁ་མེད། ཁོང་གིས་ང་ཚོ་མི་རིགས་ནག་པོའི་མི་ཚོའི་འཚོ་གནས་ལ་སྙིང་པོ་མི་འདུག་གསུངས་བྱུང་།

Another time, he told me that when he and De Klerk were at the Nobel peace prize ceremony in Oslo, something had upset him greatly. There was a group singing Nkosi Sikelel' iAfrika, regarded as the anthem of the liberation struggle, and De Klerk and his wife talked through the singing; they didn't show respect.

ཡང་སྐབས་གཞན་ཞིག་ཏུ་ཁོང་གིས་ང་ལ་ཁོང་དང་ཌེ་ཁ་ལེར་ཁ་གཉིས་ཨོ་སི་ལོ་རུ་ནོ་བྷེ་ཞི་བདེའི་གཟེངས་རྟགས་ཀྱི་མཛད་སྒོར་བཅར་སྐབས་ཁོང་བློ་ཕམ་སྐྱེ་གཞིའི་གནས་ཚུལ་ཞིག་བྱུང་གསུངས། དེར་རུ་ཁག་ཅིག་གིས་ནི་ཀོ་སི་སི་ཀེ་ལེལ་ཨ་ཧྥི་རི་ཀ་ཞེས་པའི་རང་དབང་འཐབ་རྩོད་ཀྱི་གླུ་གཞས་དེ་གཏོང་བཞིན་པའི་སྐབས་ཌེ་ཁེ་ལེར་ཁེ་དང་ཁོའི་ཆུང་མ་གཉིས་གླུ་དེ་མ་རྫོགས་བར་དུ་སྐད་ཆ་བཤད་ནས་བསྡད་པ་ལས་གུས་ཞབས་གཏན་ནས་བྱས་མ་སོང་གསུངས།

But his anger was never greater than his patience or forgiveness. People say, look at what he achieved in his years in government – what a waste those 27 years in prison were.ཡིན་ཡང་ཁོང་གི་ཁོང་ཁྲོ་དེ་ཁོང་གི་བཟོད་བསྲན་དང་དཀྱེལ་ཡངས་ལས་ཆེ་བ་ཞིག་མ་རེད། མི་ཚོས། ཁོང་གིས་གཞུང་བསྐྱངས་པའི་རིང་གི་བྱས་རྗེས་ལ་གཟིགས་དང་། ལོ་ངོ་ཉི་ཤུ་རྩ་བདུན་བཙོན་ཁང་དུ་བསྐྱལ་བ་དེ་ནི་ཅི་འདྲའི་གྱོང་གུན་ཞིག་རེད་ཨང་ཟེར་མོད། I maintain his prison term was necessary because when he went to jail, he was angry. ངས་བལྟས་ན་ཁོང་གི་བཙོན་གྱི་དུས་སྐབས་དེ་ནི་ཡོད་དགོས་ངེས་རེད་སྙམ། གང་ལགས་ཤེ་ན་ཁོང་བཙོན་དུ་འགྲོ་དུས་ཁོང་ཁྲོ་ཟ་ཡོད་ལ། ལྟོས་ས་ལྟོས་འཇོག་གིས་ཁོང་ལོ་ཤིན་ཏུ་གཞོན་པ་དང་དྲན་བདེན་ལམ་ནོར་དུ་ཁྲིད་པའི་མྱོང་བ་ཞིག་ཀྱང་བྱུང་བ་རེད། He was relatively young and had experienced a miscarriage of justice; he wasn't a statesperson, ready to be forgiving: he was commander-in-chief of the armed wing of the party, which was quite prepared to use violence.སྐབས་དེར་ཁོང་སྲིད་སྐྱོང་མི་སྣ་ཞིག་མ་རེད་ལ། ཁོང་ལ་གུ་ཡངས་བཏང་བའི་བསམ་བློའང་མེད། དེ་དུས་ཁོང་ནི་དྲག་སྤྱོད་སྤེལ་བར་ནམ་ཡང་གྲ་སྒྲིག་ཡོད་པའི་སྲིད་དོན་ཚོགས་པའི་དམག་སྤྱི་ཆེན་མོ་རེད།

The time in jail was quite crucial. Of course, suffering embitters some people, but it ennobles others. Prison became a crucible that burned away the dross. People could never say to him: "You talk glibly of forgiveness. You haven't suffered. What do you know?" Twenty-seven years gave him the authority to say, let us try to forgive.

བཙོན་གྱི་དུས་ཚོད་ནི་བཞུ་བྱེད་ཀྱི་སྣོད་རེད། དེས་མི་ཁ་ཤས་ཇེ་སྡུག་ཏུ་བཏང་སྲིད་ཀྱང་མི་ཁ་ཤས་ཇེ་བཟང་དུ་གཏོང་གི་ཡོད། བཙོན་ཁང་ནི་སྙིགས་མ་རྣམས་འཚིག་པར་བྱེད་པའི་སྣོད་དེ་གྱུར་སོང་། མི་ཚོས་ཁོང་ལ་ “ཁྱེད་ཀྱིས་ལས་སླ་པོས་གུ་ཡངས་སྐོར་བཤད་ཀྱི་འདུག་སྟེ། ཁྱེད་སྡུག་པོ་མྱངས་མྱོང་མེད་པས། ཁྱེད་ཀྱིས་ག་རེ་ཧ་གོ” ཅེས་ལབ་ཐབས་མེད།

ལོ་ངོ་ཉེར་བདུན་གྱིས་ཁོང་ལ་ང་ཚོས་གུ་ཡངས་དཀྱེལ་ཡངས་བྱེད་ཅེས་བརྗོད་ཆོག་པའི་དབང་ཆ་སྤྲད་ཟིན།

One of the greatest traumas of his life is what happened between him and Winnie. He really loved Winnie. Soon after he came out of jail, I invited them for a Xhosa meal. And as they sat there, you can't imagine anyone more besotted. The hurt was deep. It's marvellous that he found Graça. But you feel a little sad, because Winnie went through so much, and it would have been a perfect ending to a fairytale had they lived happily ever after.

ཁོང་གི་མི་ཚེའི་གས་ཁ་ཞིག་ནི་ཁོང་དང་ཝི་ནི་གཉིས་ཀྱི་བར་དུ་ཅི་ཞིག་བྱུང་བ་དེ་རེད། ཁོང་ཝི་ནི་ལ་ངོ་མ་ཤིན་ཏུ་དགའ་མྱོང་། ཁོང་བཙོན་ལས་གྲོལ་རྗེས་ངས་ཁོང་གཉིས་ཤོ་སའི་གསོལ་ཚིགས་ཤིག་ལ་གདན་འདྲེན་ཞུས་པ་ཡིན། ཁོང་གཉིས་དེར་བསྡད་དུས་ཁོང་གཉིས་ལས་བརྩེ་དུང་གིས་མྱོས་པ་གཞན་ཞིག་བློ་ངོར་འཆར་དཀའ། ཡིན་ཡང་དེ་ནི་ཤིན་ཏུ་ན་ཟུག་ཆེ་བ་ཞིག་ཏུ་གྱུར་སོང་། ཁོང་གིས་གྷ་ར་ཁ་རྙེད་པ་དེ་ཤིན་ཏུ་དགའ་འོས་པ་ཞིག་རེད། ཡིན་ཡང་ཝིན་ནིས་དཀའ་ངལ་ཆེན་པོ་མྱངས་ཡོད་པས་སེམས་སྐྱོ་དགོས་པ་ཞིག་ཀྱང་རེད། ཁོང་གཉིས་ཀྱིས་མི་ཚེ་ལྷག་མ་དེ་དགའ་སྤྲོའི་ངང་བསྐྱལ་ཡོད་ན་དེ་ནི་ལྷ་སྒྲུང་དེའི་མཇུག་བསྡུ་སྟངས་ལེགས་ཤོས་སུ་གྱུར་ཡོད་ངེས།

The most fitting memorial to Mandela is to make a success of what he helped to establish. He was clear that, ultimately, no one is indispensible. He was a great one for stressing that he was a loyal member of the ANC, and that no one was bigger than the movement. But, of course, we know better.

མཱན་ཌེ་ལ་མཆོག་ལ་རྗེས་དྲན་ཞུ་སྟངས་ཡག་ཤོས་དེ་ཁོང་གིས་གང་མགོ་བརྩམས་ཡོད་པ་དེ་མཇུག་བསྐྱང་རྒྱུ་དེ་རེད། ཁོང་གིས་གསུངས་གསལ་བཞིན་མཐའ་མར་མི་སུའང་མེད་དུ་མི་རུང་བ་མ་རེད། ཁོང་གིས་ཁོང་ནི་ཨ་ཧྥི་རི་ཀའི་རྒྱལ་ཡོངས་སྲིད་དོན་ཚོགས་པའི་ཚོགས་མི་རྣལ་མ་ཞིག་ཡིན་ལ་ལས་འགུལ་ལས་གལ་ཆེ་བའི་མི་སྣ་སུ་ཡང་མེད་གསུང་མཁན་གྱི་སྐྱེས་བུ་རླབས་ཆེན་ཞིག་རེད། ཡིན་ཡང་ང་ཚོས་གསལ་བོར་ཤེས་ཀྱི་ཡོད།

Anyone, anywhere in the world, who gets to be a leader knows that here is the benchmark. And they must ask themselves: how do I measure up?

འཛམ་གླིང་གི་ས་ཆ་གང་དུ་དབུ་ཁྲིད་བྱེད་འདོད་པའི་མི་སུ་ཞིག་ཡིན་ཡང་འདིར་ཚོད་ཤིང་ཡོད་པ་ཤེས་ཡོད་ངེས། ཁོང་ཚོས་རང་ཉིད་ལ་ངས་ཇི་ལྟར་ཚོད་འཇལ་ལམ་ཞེས་འདྲི་རྒྱུ་དེ་གནད་ཀྱི་དོན་པོ་རེད།

Desmond Tutu is an archbishop emeritus and human rights activist

ཌས་མོན་ཊུ་ཊུ་ནི་ཡེ་ཤུའི་བླ་ཆེན་ཞིག་དང་འགྲོ་བ་མིའི་ཐོབ་ཐང་གི་ལས་འགུལ་བ་ཞིག་ཡིན།

རྗེ་ཙོང་ཁ་པ་ལ་ཕུལ་བའི་སྙན་ངག་ཚན་པ་གཉིས།

2013-12-27T00:17:00.002-08:00

ཙོང་ཁ་པ།

ཙོང་ཁ་པ།

དུས་རབས་འགའི་ཡར་སྔོན་དུ།

ཁྱེད་ཉིད་བཞུད་ཟིན་འདུག

སྙན་གྲགས་དང་མཛད་རྗེས།

ད་དུང་། སློབ་ཚོགས་གྲངས་མེད་ཅིག་བཞག་ནས་བཞུད་ཟིན་འདུག

ངས། དུས་རབས་འདིའི་སོར་མཚམས་ནས།

ད་གཟོད། གོམ་སྒྲ་དེ་ཐོས་བྱུང་།

ཡིན་ཡང་། དེ་ལ་ཅི་འདྲའི་བར་ཐག་རིང་ཨང་།

-----《བརྩེ་བས་ལྟེམས་པའི་ལོ་ཟླ》ལས།

ལོ་ངོ་བརྒྱ་དང་དེའི་ཡང་ཡར་སྔོན་ཞིག་ཏུ།

ཙོང་ཁ་པ།

ལོ་ངོ་བརྒྱ་དང་དེའི་ཡང་ཡར་སྔོན་ཞིག་ཏུ།

ཁྱེད་ཀྱིས་དད་འདུན་གྲངས་མེད་ཀྱིས་བཀྱག་པའི་ཞབས་ཟུང་སྤོས་ནས་ཕེབས་སོང་།

བསླབ་ཚོགས་གྲངས་མེད་ཀྱི་སྡུག་ཡུས་བསྣམས་ཏེ།

སྐྱེ་འགྲོ་གྲངས་མེད་ཀྱི་སྐྱོ་ངལ་ཁྱེར་ནས་ཕེབས་སོང་།

ཤུལ་དུ་ལུས་པ་ནི་ལེགས་བཤད་པོ་ཏི་བཅོ་བརྒྱད་ཀྱི་མཛེས་སྡུག་ཁོ་ན།

ཙོང་ཁ་པ།

ལོ་ངོ་བརྒྱ་དང་དེའི་ཡང་ཡར་སྔོན་ཞིག་ཏུ།

ཁྱེད་དབུས་ལམ་རིང་མོ་བརྒྱུད་པའི་སྐབས་དེར།

ཁྱེད་ནི་གྲྭ་རྐྱང་དཀྱུས་མ་ཞིག་སྟེ།

མདུན་ནས་སྐོར་མཁན་གྱི་བསླབ་ཚོགས་མེད་ལ།

རྒྱབ་ནས་སྐྱེལ་མཁན་གྱི་འཁོར་འབངས་མེད་པར་གྲགས།

ཡིན་ཡང་། ཁྱེད་བདེན་དོན་ལ་སྙེག་ཉིན་དེ་ནས།

འཇིག་རྟེན་ན་ལེགས་བཤད་སྟོང་གི་མེ་ཏོག་བཞད་ཅིང་།

བརྩོན་འགྲུས་དང་འབད་པ་སྟོང་གི་ཞབས་རྗེས་བཞག་སོང་།

ཙོང་ཁ་པ།

ལོ་ངོ་བརྒྱ་དང་དེའི་ཡང་ཡར་སྔོན་ཞིག་ཏུ།

ཁྱེད་མེས་པོ་ཚོར་བགྲོ་གླེང་གནང་དུ་ཕེབས་ཉིན་དེར།

ངས་སྙན་ངག་གི་མཆོད་མེ་འདི་བསྒྲོན་ཏེ།

འཇིག་རྟེན་ན་ནད་མུག་ཞི་བའི་སྨོན་ལམ་འདེབས།

འཇིག་རྟེན་ན་དམག་འཁྲུགས་འཇགས་པའི་གསོལ་བ་འདེབས།

------《གྲོག་མ་》ལས།

ཁྱེད་རང་ཁུ་སིམ་མེར་བུད་སོང་འདུག ཁུ་སིམ་མེར་ཡོང་བ་བཞིན་དུ།

2013-12-23T03:46:00.000-08:00

དགུན་གྱི་གྲང་རླུང་ཤིན་ཏུ་རྩུབ་པའི་དུས་ཚིགས་འདིར།

ཁྱེད་རང་ཁུ་སིམ་མེར་བུད་སོང་འདུག ཁུ་སིམ་མེར་ཡོང་བ་བཞིན་དུ།

ཁྱེད་ཀྱིས་ང་ལ་རྟགས་དང་མཚན་མ་ཙམ་ཡང་མ་བཞག་པར་བུད་སོང་འདུག

ཁྱེད་ཀྱིས་ལམ་དུ་རྐང་རྗེས་ཙམ་ཡང་མ་བཞག་པར་བུད་སོང་འདུག

ཁྱེད་ཀྱིས་རང་སྦྱོང་བྱ་སའི་སྤང་ལྗོངས་དང་། དཔེ་ཁང་།

ཁྱེད་ཀྱིས་འདྲིས་ཤིང་གཤིབ་པའི་གྲོགས་ཕོ་མོ་དག

སྔར་བཞིན་གནས་ཚུལ་ཅི་ཡང་མ་བྱུང་བ་ལྟར་གནས་མོད།

ཁྱེད་གཅིག་པུ་ཁུ་སིམ་མེར་གང་ཞིག་ཏུ་བུད་སོང་བ་ཡིན།

ང་ལ་གྲང་འཁྱག་གྱི་ཚོར་བ་རུམ་གང་བསྐྱུར་ནས།

ང་ལ་ཁེར་རྐྱང་གི་སྣང་བ་འགོག་མེད་བཞག་ནས།

ཁྱེད་རང་མེད་ན་ང་ནི་སུ་ལའང་མི་མཁོ་བའི་ཁྲེས་པོ་རྡོག་ཅིག

ཁྱེད་རང་མེད་ན་ང་ནི་གང་དུའང་བཞག་མི་ལོ་བའི་ཅ་དངོས་ཚོམ་ཞིག

དེ་བས་ཁྱེད་ཁོ་ན་ངའི་བདག་པོ་བྱེད་པར་འོས་མོད།

ཅིའི་ཕྱིར། ཁྱེད་རང་ཁུ་སིམ་མེར་གང་ཞིག་ཏུ་བུད་སོང་བ་ཡིན།

སེར་ཆེན་མེ་ཏོག་གིས་དཔྱིད་ཀྱི་ལྷ་མོ་བསུ་བའི་དུས་ཚིགས་གང་དེར།

ཁྱེད་རང་སླར་ཡང་ངའི་འཇིག་རྟེན་དུ་ཕེབས་སྲིད་དམ།

༢༠༡༣ ༡༡ ༢༨

ཉིན་ཞག་གི་ཐ་མག (སྙན་ཚོམ།)

2013-12-16T19:45:00.001-08:00

སྙིང་གཏམ།

སྙིང་གཏམ་ཚིག་གསུམ་བཤད་ན།

ཁྱེད་མེད་དུས།

ངའི་སེམས་པ་སྟོང་ལྷོང་ལྷོང་གི་ཚོར་བས་གང་ཞིང་།

ཀླད་པར་ན་བུན་ཞིག་འཐིབ་འོང་སྟེ།

ཅི་ཡང་འཆར་རྒྱུ་མེད་པར་འགྱུར་འགྲོ།

དེར་མ་ཟད། དུས་ཚོད་ཀྱི་ཤོག་ལྷེ་དབྱི་རྒྱུ་ནི།

ཅི་ལས་ཀྱང་དཀའ་བ་འདུག་གོ་བུ་མོ་ལགས།

༢༠༡༣ ༨ ༡༨

ཉིན་ཞག་གི་ཐ་མག

ཁྱེད་མེད་པའི་ཉིན་ཞག་གི་ཐ་མག་འདི།

དབུགས་ཐེངས་གཅིག་གིས་འཐེན་རྗེས།

མཚོ་མོ་བཞིན་གྱི་ཁྱེད་ཀྱི་པང་ཁུད་དུ་ལོག་ནས།

མཐའ་དང་ཟད་དུ་མེད་པའི་བརྩེ་བའི་རྐྱལ་ལ་རོལ་འདོད།

༢༠༡༣ ༨ ༢༠

ཆར་དུས་ཀྱི་སྙན་ངག

ཆར་པ་འདི་སེམས་ཚོར་གྱིས་བྱུར་བུར་གཏམས་པའི་ཚུལ་གྱིས་ལུད་འོང་དུས།

དྲག་རླུང་འདི་ཡ་ཆུང་གི་སྡུག་བསྔལ་གང་ཞིག་ལྟར་ལྡང་འོང་དུས།

ངས། ཉིད་འོད་ཀྱིས་ཁྱབ་པའི་གངས་རི་ལྟར་གྱི་ཁྱེད་ཀྱི་འཛུམ་མདངས་དེ་སྙིང་ཁར་སྒོམ་བཞིན་ཡོད།

༢༠༡༣ ༨ ༢༡

ཟླ་འོད་འོག་ཏུ་ལི་པེ་ལ་བྲིས་པ།

2013-12-12T07:29:00.000-08:00

ལོ་དང་ཟླ་བའི་ས་རྡུལ་གྲངས་མེད་ས་གཞིར་འཐོར་བའི་མར་ལོག་ཏུ།།

ཁྱེད་ཀྱིས་བསིལ་ཆང་གྲོགས་སུ་བསྟེན་ཏེ་སྙན་ངག་བྲིས་པའི་ཐག་རིང་ཏུ།།

ང་ཡིས་གཅིག་པུར་ཟླ་བའི་འོག་ཏུ་གློག་ཀླད་ཁ་སྒོ་ཕྱེ་བྱས་ཏེ།།

སྙན་ངག་པ་ཁྱེད་ཡོད་པའི་ཁུལ་གྱིས་ཁ་བརྡ་ལན་ཞིག་བྱེད་པར་འདོད།།

ཁྱེད་ཀྱིས་ལྦུ་ཆང་གྲོགས་སུ་བསྟེན་ཏེ་སྙན་ངག་ལྷ་མོའི་སྒོ་གླེགས་བརྡུང་།།

ང་ནི་བརྩེ་བའི་འཆིང་དུ་ཐོགས་ཏེ་སྙན་ངག་ལྷ་མོར་སྨེ་ངག་བཏོན།།

ངེད་གཉིས་བར་དུ་འདྲ་ས་མང་མོད་མི་འདྲ་སའང་ཤིན་ཏུ་མང་།།

འདྲ་བ་ཁོ་ན་ཚེས་བཅུ་ཟླ་བ་འཛུམ་ཞལ་དང་བཅས་འཆར་བ་ཉིད།།

ཁྱེད་ཀྱི་རིགས་གཅིག་སྤུན་ཟླ་རྣམས་ནི་སྟོབས་དང་རྒྱུ་ཡིས་དྲེགས་པ་ཡིས།།

ང་ཡི་ཉེས་མེད་སྤུན་ཟླ་གྲངས་མེད་བསད་པའམ་དེ་མིན་ས་མཐར་སྤྱུགས།།

ང་ཡིས་དེ་རིང་སྙན་ངག་འདིའང་གཞན་ཡུལ་རྐང་པ་བཅས་ཏེ་བྲིས།།

འདི་དག་བསམས་ན་ང་ཡིས་ཁྱེད་ལ་སྙན་ངག་མཆོད་པ་ཕུལ་དོན་མེད།།

ཁྱེད་ལ་ཆང་གིས་ངར་ཤུགས་བྱིན་པས་སྙན་ངག་ལྷ་མོ་དགའ་འབོད་བྱས།།

ང་ནི་བརྩེ་བས་མནར་གཅོད་བཏང་བས་སྙན་ངག་ལྷ་མོ་གདུང་འབོད་བྱས།།

མི་ཡི་རིགས་སམ་རང་གི་རིགས་ཀྱི་ལས་དབང་རི་མོར་མི་འགོད་པར།།

ཁྱེད་དང་ང་ཡི་གཤིས་ཀ་ལགས་མོད་དེ་ལ་དོན་སྙིང་ཆེར་ཨེ་འདུག །

འཐུངས་ཤིག་འཐུངས་ཤིག་སྙན་ངག་པ་ལགས་ལྦུ་ཆང་གང་པོ་མཉེས་དག་གནོངས།།

ང་ནི་བརྩེ་བའི་ཆང་གིས་བཟི་ནས་ར་རོར་གྱུར་ཏེ་ཡུན་རིང་སོང་།།

དཀར་གསལ་ཟླ་བའི་གྲོགས་དན་དང་བཅས་དེ་རིང་ཆང་གིས་བཟི་བར་བྱེད།།

ཤིན་ཏུ་སྦགས་པའི་མི་ཡུལ་འདི་ནས་སྙིང་པོ་འཚོལ་སྟངས་འདི་ཙམ་ཉིད།།

༢༠༡༣ ༡༢ ༡༢

ང་རང་ལྟ་བུའི་ཉིན་ཞིག

2013-11-26T01:22:00.001-08:00

------ཁྱེད་རང་རྨི་ལམ་དུ་མཇལ་རྗེས།

རླུང་བུ་ཞིག ཁྱེད་དྲན་བཞིན་པའི་ངའི་སེམས་པ་ལྟར།

འཁྱག་ཤུར་ཤུར་ལྡང་བྱུང་།

གནམ་རྒན་མོས་ཀྱང་། བརྩེ་བའི་གཟེབ་ཏུ་ཚུད་པའི་ཁོ་བོ་ལྟར།

གདོང་གནག་ཐུབ་ཚོད་ཅིག་གནག་རྗེས།

མིག་ཆུ་ལྟ་བུའི་ཆར་ཐིགས་འགའ་གཏོར་མོད།

ལོ་ཉེས་བྱུང་ཟིན་པའི་ཞིང་པ་ཚོར།

ཆར་ཐིགས་འགའ་དེས་ཅི་ཞིག་བྱ་ཨང་།

(ཁྱེད་དང་ཞིང་པ་ཚོ་མི་མཚུངས་ནའང་།)

ངའི་མིག་ཆུ་ཁྱེད་ལ་ཕན་ཐོགས་མེད་པ་ཇི་བཞིན།

ཉི་མ་སེར་པོ་དེས། ཁྱེད་བསྐྱུར་མི་ཐུབ་པའི་ངའི་སེམས་པ་ལྟར།

གོམ་པ་དལ་བར་དལ་བུར་སྤོས་ནས།

གནམ་ས་འདྲེས་མཚམས་སུ་སླེབས་འདུག་མོད།

དེ་ནས་ཕར་བཞུད་མི་འདོད་པར།

ངའི་སེམས་ཀྱི་ཆག་གྲུམ་བཞིན།

ཆ་ཤས་ཡོངས་རྫོགས་ས་རུ་ཟགས་ཀྱིན་འདུག

མཐའ་མར་སེར་ཐིག་ཅིག་ལས་ཅི་ཡང་མཐོང་དུ་དབེན།

ང་རང་ལྟ་བུའི་ཉིན་མོ་འདིར།

ང་ཕྱི་བ་ཞིག་ལྟར་སྤྱིལ་བུ་ཆུང་ཆུང་འདི་རུ་འཛུལ་ནས།

ཁྱེད་ཀྱི་སྐྲ་ལོ་ལྟ་བུའི་མུན་པ་དེས་སེམས་ཀྱི་རི་མོ་ཡོད་ཚད་གསུབ་པར་སྒུག་ཡོད།

༢༠༡༢ ༦ ༡༥

ང་ཁྱེད་ལ་དགའ་བ་དེ་དགའ་བ་གང་ལས་ཀྱང་ལྷག

2013-11-18T19:50:00.002-08:00

གཉིད་མི་ཁུག་པའི་མཚན་མོ་འདིར།
ངས། ང་མི་གྲག་པའི་བུ་མོ་ཁྱེད་དྲན།

སྟོང་འདང་གི་ཁྲོད་ནས།

ངེད་གཉིས་ཀྱིས་མཁར་གཞིས་བརྩིགས་ཤིང་བུ་ཕྲུག་བཙས་ཏེ།

ཁྱིམ་ཚང་ཞིག་གི་དབུ་ཁྱུད་བྲིས།

ངེད་གཉིས་ཀྱི་བར་དུ་འགལ་རྐྱེན་གྱི་ཕུང་པོ་སྤུངས་སྲིད་པ་དང་།

སྡུག་བསྔལ་གྱི་བང་རིམ་བརྩེགས་སྲིད་པ།

ངའི་སྟོང་འདང་གི་ཡོལ་གོར་ན་མེད།

ང་ཁྱེད་ལ་དགའ་བ་དེ་དགའ་བ་གང་ལས་ཀྱང་ལྷག་པས།

ངེད་གཉིས་ཀྱི་མདུན་ལམ་ནི།

སྐར་ཚོགས་བཀྲ་བའི་དོ་དགོང་གི་ནམ་མཁའ་བཞིན།

ཆེས་གསལ་ལ་གུ་ཡངས་པ་ཞིག

སྟོང་འདང་གི་ཁྲོད་ནས་ངས་དེ་ལྟར་དྲན།

བུ་མོ་ལགས།

ད་ལྟ་ནི་མཚན་གུང་ཡོལ་ཟིན་མོད།

ང་རྟོག་བཏགས་ཀྱི་འཇིག་རྟེན་འདི་ནས་ཕྱི་ལོག་མི་འདོད།

ངས་ཁྱེད་ལ་སྐད་ཆ་ཞིག་བཤད་འདོད་པ་ནི།

ང་ཁྱེད་ལ་དགའ་བ་དེ་དགའ་བ་གང་ལས་ཀྱང་ལྷག

༢༠༡༢ ༣ ༢༣

སྙིང་རྗེ་མེད་པའི་བུད་མེད་མཛེས་མ།

2013-11-18T18:58:00.002-08:00

^{La belle dame sans mercy*}

ང་ཅི་ཙམ་ཁྱེད་ལ་ཉེ་བར་བཅར་ཐབས་བྱས་ཀྱང་།

ཁྱེད་དང་རྒྱང་རིང་དུ་གྱེས་འགྲོ་བ་འདི་ཅི།

ངས་ཁྱེད་མེ་ཏོག་ཅིག་ཏུ་བསམས་ནས།

ལག་པ་ཕར་ལ་བསྲིངས་མོད།

ཁྱེད་ནི་འཇའ་ཚོན་ཞིག་དང་འདྲ་བར།

ལག་ཏུ་ཡེ་ནས་འཛིན་ཐབས་མ་བྱུང་།

ངས་ཁྱེད་ཀྱི་ཕྱོགས་སུ་བསྐུར་བ་ནི།

འཛུམ་དཀར་དང་དྲོད་ཁོལ་ཁོ་ན་ཡིན་མོད།

ཁྱེད་ཀྱི་ཕྱོགས་ནས་བསིལ་རླུང་འཇམ་པོ་ཞིག་ཀྱང་ལྡང་ཏེ་མ་བྱུང་།

སེམས་པ་འདི་རླུང་འཚུབ་ཀྱིས་བདས་པའི་ཤོག་ཧྲུལ་ལྟར།

ཁྱེད་ཀྱི་ཕྱོགས་སུ་སྤུར་ཐེངས་རེ་རེར།

ཁྱེད་ཀྱི་ཡོད་ཚད་ནི་མཛེས་སྡུག་གི་ཉིང་བཅུད་དུ་འདོད་ཡོད་པས།

བུ་མོ་ལགས། སེམས་པར་ནག་ཐིག་མ་ཕབ་རོགས།

ང་ཅི་ཙམ་ཁྱེད་ལ་ཉེ་བར་བཅར་ཐབས་བྱས་ཀྱང་།

ཁྱེད་དང་རྒྱང་རིང་དུ་གྱེས་འགྲོ་བ་འདི་ཅི།

༢༠༡༢ ༤ ༤

____________

*འདི་ནི་ཕན་རན་སིའི་སྙན་ངག་ཅིག་གི་ཁ་བྱང་ཡིན་ཞིང་དབྱིན་ཇིའི་སྙན་ངག་པ་ཇོན་ཀི་ཙིས་(John Keats)དེ་ལས་གཡར་བར་གྲགས། དོན་ནི་ “སྙིང་རྗེ་མེད་པའི་བུད་མེད་མཛེས་མ་”(beautiful woman without mercy)ཡིན།

གཤིས་བཟང་མ།

2013-11-09T05:05:00.000-08:00

།

---- ཁྱེད་ཀྱི་སྙན་ངག་ལ་མཉན་རྗེས།

རྨི་ལམ་མ་ཡིན་པའི་རྨི་ལམ་གྱི་ཞིང་ཁམས་ནས།

ངས་སྡུག་བསྔལ་མ་ཡིན་པའི་སྡུག་བསྔལ་གཞན་ཞིག་མྱོང་།

ད་ལྟ། ངས་སུ་ཡང་མི་དྲན་པར།

ཁྱེད་ཁོ་ན་སེམས་ཀྱི་ཁང་བཟང་དུ་བཞེངས་ནས།

བདུག་པ་ལྟ་བུའི་སེམས་ཚོར་གཞན་ཞིག་མེ་རུ་སྦར་གྱིན་ཡོད།

ཡོན་ཆབ་ལྟ་བུའི་སྐྱོ་གདུང་གཞན་ཞིག་ཆུ་རུ་བཞུར་གྱིན་ཡོད།

གཙང་པོའི་ཚུར་རོལ་ནས།

གྱེས་བརྡ་ལན་གསུམ་བྱས་པ།

ཁྱེད་ཀྱིས་མཐོང་ཡོད་མི་སྲིད་ཀྱང་།

གཙང་པོའི་ཕ་རོལ་ནས།

དགྱེས་འཛུམ་ལན་གཅིག་བྱས་པ།

གསལ་བར་མཐོང་སོང་བུ་མོ་ལགས།

ཁྱེད་ཀྱི་སྙན་ངག་ལ་ཉན་དུས།

ངའི་སེམས་པ་ཆུ་རུ་གྱུར་ནས་གང་ཞིག་ཏུ་བཞུར་བར་རྩོམ།

ཁྱེད་ཀྱིས་དྲན་གདུང་གླེང་དུས།

ངས་ཡ་ཆུང་དམ་ལ་འཐགས་ཤིང་མིག་མཐའ་བརླན་གྱིས་བཟུང་།

གཤིས་བཟང་མ། རིགས་བཟང་མ།

ཡ་ཆུང་སེམས་ཀྱི་གསེར་ཟོ་རུ་བརྩེ་བའི་འོ་མ་འཁྱིལ་བའི་དུངས་སེམས་ཅན་མ།

༢༠༡༢ ༩ ༢༡དགོང་མོར།

ཆམ་ནད་གླུ་རུ་གྱེར་བ།

2013-10-17T20:59:00.000-07:00

ཝཱ་ཎའི་གནམ་གཤིས་མཛེས་མའི་སེམས་ཁམས་འདྲ་བས།།

ཁ་སང་དྲོ་ལ་དེ་རིང་འཁྱག་པར་གྱུར་འདུག །

ང་ནི་གླེན་པ་གནམ་གཤིས་ཡིད་ཆེས་བྱས་ཏེ།།

དེ་རིང་ཆམ་ནད་ལྕི་མོས་ལུས་པོ་མནར་སོང་།།

ཁ་སྣའི་བུ་ག་ལུད་པའི་ཕུང་པོས་ཁེངས་ཤིང་།།

ལུས་པོ་འགུལ་སྐྱོད་དཀའ་བ་རྒ་བས་མནར་འདྲ།།

ཁ་སང་མཛངས་མས་སྤྲད་པའི་ན་ཟུག་ལས་ཀྱང་།།

དེ་རིང་ཆམ་ནད་ལྕི་མོའི་ཟུག་གཟེར་སྡུག་བྱུང་།།

སྔོན་མ་ཆུང་དུས་ཨ་མའི་པང་ནས་འཚོ་དུས།།

འཁྱག་ནའང་ལྟོགས་ནའང་ན་ནའང་དཀའ་ལས་ཁག་ནའང་།།

ཨ་མ་ཞེས་ནི་མགོན་དུ་འབོད་དུ་ཡོད་ཀྱང་།།

ས་མཐར་ཤི་ནའང་ཨེ་ཞེས་འབོད་མཁན་དཀོན་འདུག །

བསམ་ཞིང་བསམ་ན་ལུས་འདིར་སྙིང་པོ་མི་འདུག །

དལ་འབྱོར་དོན་ཡོད་བྱ་བའི་ལྷ་ཆོས་བྱེད་འདོད།།

ཡིན་ཡང་ཨ་ཧོ་ང་ནི་གླེན་པ་ངོ་མ།།

ད་དུང་འཕྱོར་མོ་དེ་ལ་བརྩེ་དུང་ཆགས་འདུག །

དགུན་གྱི་གྲང་རླུང་ངར་མས་ལུས་ཕུང་བཤགས་ཤིང་།།

སེམས་སོང་བུ་མོ་དེ་ཡིས་སེམས་པ་བཤགས་པས།།

ད་ནི་ལུས་སེམས་ཆག་ཧྲུག་ས་འདིར་ལུས་ཀྱང་།།

ཡུན་རིང་འཚོའམ་འཚོའང་དོན་ཞིག་ཡོད་དམ།།

འཕྱོར་མོས་སེམས་ལ་སྡུག་གི་ཁུར་བོ་བསྣན་པས།།

གཡུ་འབྲུག་སྔོན་མོའི་མཇུག་མར་འཇུ་དགོས་འཁེལ་སོང་།།

ཆམ་པས་ལུས་ལ་ན་ཟུག་དྲག་པོ་བསྐྱེད་པས།།

རྒྱ་སྨན་བོད་སྨན་རིས་སུ་བསྐོར་དགོས་འཁེལ་སོང་།།

སེམས་སོང་བུ་མོ་ཆམ་པའི་རིམས་ནད་མིན་ཡང་།།

སེམས་ཀྱི་བུ་ག་སྡུག་གི་ལུད་པས་ཁེངས་སོང་།།

ཆམ་རིམས་འདི་ནི་གཤིས་བཟང་མ་དེ་མིན་ཡང་།།

ལུས་ཀྱི་སེམས་པར་ཟུག་གཟེར་སྡུག་བསྔལ་བསྐྱིལ་བྱུང་།།

ས་མཐར་འཁྱམ་པའི་ལོ་ཟླ་འདི་དག་ནང་དུ།།

ཨ་མ་དྲན་པའི་དུས་ཤིག་ད་བར་མི་དྲན།།

འཕྱོར་མོའི་ཕྱོགས་སུ་འཕྲིན་པ་བསྐུར་བའི་གྲངས་ཀ །

ཚངས་པས་བརྩིས་ཀྱང་ལྷ་ཆེན་ངལ་བའི་རྒྱུ་རེད།།

སྐྱོ་འོ་སྐྱོ་འོ་བུ་རུལ་ང་ནི་སྐྱོ་འོ།།

སྡུག་གོ་སྡུག་གོ་གླེན་པ་ང་ནི་སྡུག་གོ །

འཇིག་རྟེན་དཀར་ངོགས་འདི་ནས་ང་ལས་སྡུག་པ།།

བརྒྱ་བྱིན་མིག་སྟོང་ལྡན་པས་རྙེད་པར་མི་འགྱུར།།

ཕལ་སྐད་གསོང་པོས་གླུ་ཞིག་གྱེར་བ་འདི་ལ།།

ཉམས་མགུར་མཚན་གྱིས་བརྒྱན་ན་མི་རུང་མོད་ཀྱང་།།

ཕལ་པའི་ཉམས་ལ་འདི་ལས་མི་འོང་འདུག་པས།།

གློག་ཀླད་ཤེལ་ངོར་ཤར་མར་འཐག་འདོད་བྱུང་སོང་།།

༢༠༡༣ ༡༠ ༡༧ཆམ་ནད་ཀྱིས་མནར་བའི་ཉིན་ཞིག་ལ་སྐད་གསོང་མཐོན་པོས་གྱེར་བ་འདིས་ནད་པ་ཀུན་དྲག་གྱུར་ཅིག

གནམ་རྒན་མ་ངུས་ངུས་པས།

2013-10-14T05:09:00.001-07:00

གནམ་རྒན་མ་ངུས་ངུས་པས།

ད་ནི་ངའི་མིག་ཆུའང་རྫོགས་སོང་བར་འདྲ།

གཡུ་འབྲུག་སྔོན་མོའི་མཇུག་མར་འཇུས་འཇུས་པས།

ད་ནི་མགོ་བོའང་གཟེར་བྱུང་།

བུ་མོ་དེ་གང་དུ་བུད་སོང་། ལྷ་མོ་དེ་གང་ལ་ཆས་སོང་།

བརྩེ་བ་རུམ་གང་ཉར་བའི་བུ་མོ་ཡ། ཁྱེད་གང་དུ་ཡོད།

༢༠༡༣ ༡༠ ༡༤ཆར་པ་རྫོགས་རྒྱུ་མེད་པ་ཞིག་བབས་རྗེས།

ཆར་པའི་ཁྲོད་ཀྱི་ཁེར་ལབ་ཐན་ཐུན།

2013-10-14T04:50:00.003-07:00

།

ཆར་པས་གཙེས་པའི་བྱེའུ་ཆུང་ཁེར་རྐྱང་དེ།

སྐམ་ལ་རེ་བའི་ལོ་མ་སྐྱ་བོ་དེ།

ཆར་ཆུ་ལ་སུན་པའི་ཤིང་སྡོང་ཁེར་རྐྱང་དེ།

ཨ་མ་ཕྱི་རོལ་དུ་བུད་སོང་ཞིང་། ནང་དུ་ཁྱིམ་མི་གཞན་མེད་པའི་བྱིས་པ་ཁེར་རྐྱང་དེ།

རོགས་ལོ་རྔོན་པས་བསད་སོང་བའི་ཡུ་མོ་ཁེར་རྐྱང་དེ།

ཤུགས་རིང་ནར་ནར་གྱིས་རང་གི་མཛའ་བོར་སྒུག་བཞིན་པའི་བུ་མོ་ཁེར་རྐྱང་དེ།

གཡུ་འབྲུག་སྔོན་མོའི*་མཇུག་མ་ནས་འཇུ་བཞིན་སྐྱོ་འཛུམ་ཞིག་དང་ལྷན་དུ་ལུས་པའི་སྙན་ངག་པ་ཁེར་རྐྱང་དེ།

མྱོས་ཆུ་ཤེལ་དམ་འགའ་སྟོང་པར་བཏང་ནས་དགོད་འཚེར་འཚེར་སྡོད་ཡོད་པའི་གསར་བུ་ཁེར་རྐྱང་དེ།

འདི་དག་ཡོད་ཚད་ཀྱིས་དར་ཟབ་ལས་ཀྱང་འཇམ་ཞིང་།

ཨ་མ་ལས་ཀྱང་བྱམས་ལ།

ཆུང་འདྲིས་ལས་ཀྱང་མཛའ་བའི་རོགས་པ་ཞིག་ལ་སྒུག་ཡོད།

༢༠༡༣ ༡༠ ༡༤ཉིན་ཆར་ཆེན་ཞིག་བབས་རྗེས།

*གཡུ་འབྲུག་སྔོན་མོ་ཞེས་པ་ནི་དུ་བའོ།།

དྲག་ཆར་ཞིག་གི་རྗེས་སུ།

2013-10-12T22:49:00.000-07:00

ཁྱེད་མཚོ་བྱུང་ལྷ་མོར་སྤྲུལ་ནས།

ང་ལ་སྙན་ངག་གི་དངོས་གྲུབ་གནང་བྱུང་།

ངས་རང་སེམས་ཀྱི་ཕུག་པ་རུ།

འཇའ་ཚོན་གྱི་དར་ཐག་ལ་འཇུས་ནས།

རང་ཉིད་ནི་འཇིག་རྟེན་ཐོག་གི་མི་སྐྱིད་ཤོས་དེ་ཡིན་སྙམ།

དྲག་ཆར་དེའི་འཇིགས་པས་ང་དངངས་པར་རྩོམ་དུས།

ང་ལ་ཁོད་ཡངས་པའི་ཆར་གདུགས་ཤིག་གི་རེ་འདོད་ཅི་འདྲའི་ཆེ་ཨང་།

ཡིན་ཡང་། སྒྱུ་འཕྲུལ་གྱི་གར་ལ་ཐོགས་པ་མེད་པའི་ཁྱེད།

ཆུ་འཁྱག་ཕོར་བ་གང་དུ་སྤྲུལ་ནས།

ངའི་བྲང་ཁ་ནས་བཞུར་ཏེ།

ངའི་གློ་སྙིང་མཆིན་གསུམ་བརླན་པར་བསྒྱུར་སོང་། གྲང་མོར་བསྒྱུར་སོང་།

ཐུགས་རྗེ་ཆེ། ངའི་འབྲི་མར་གྱི་སེམས་པར་རྣོ་དབལ་གྱི་རལ་གྲི་སྣུན་མཁན་གྱི་སྐྱེས་བུ་བཀའ་དྲིན་ཅན།

ཐུགས་རྗེ་ཆེ། ང་དོང་རིམ་པ་དགུའི་རྨོངས་གཉིད་ལས་བསླངས་བར་མཛད་མཁན་གྱི་སྐྱེས་བུ་ལྷག་བསམ་ཅན།

ཐུགས་རྗེ་ཆེ། ངའི་ད་བར་ཉར་བའི་ནོར་བུ་དེར་རྡོའི་རིན་ཐང་ལས་མེད་པར་ཤེས་སུ་འཇུག་མཁན་གྱི་སྐྱེས་ བུ་ཤེས་རབ་ཅན།

ཐུགས་རྗེ་ཆེ། ངའི་དབང་རྩ་ཡོངས་སུ་སྦྲིད་སྨན་མ་ཡིན་པའི་བཟི་ཁབ་གཞན་ཞིག་རྒྱག་མཁན་གྱི་འཚོ་བྱེད་ བཀའ་དྲིན་ཅན།

ཐུགས་རྗེ་ཆེ། རང་ཉིད་ཀྱི་ངོ་གདོང་དངོས་སུ་ང་ལ་སྟོན་མཁན་གྱི་བུ་མོ་ལགས།

འབྲུག་སྒྲ་འཇགས་ཟིན།

དྲག་ཆར་ཆད་ཟིན།

གནམ་ངོ་ཐང་ཟིན།

འཛམ་གླིང་གི་ཉི་ཟླ་སྔར་བཞིན་འཆར་ནུབ་བྱེད་ཅིང་།

དུས་ཚོད་འཁོར་ལོ་སྔར་བཞིན་གཡས་སུ་འཁོར་བཞིན་ཡོད།

༢༠༡༣ ༡༠ ༡༢ ཉིན།

ཆར་དུས་ཀྱི་སྙན་ངག

2013-10-09T08:25:00.000-07:00

The poem of monsoon

(translated into English by the author along with Lobsang Wangdue and done some poetic brushes by Lobsang Wangdue)

ཁྱེད་ཀྱིས་མགོ་བོ་གཞོགས་སུ་དཀྱོགས་ཤིང་ལག་ཏུ་དཔེ་དེབ་བཟུང་གྱུར་ཏེ།།

གཡེང་བ་སྤངས་ནས་བློ་རིག་སྒྲིམ་བཞིན་དཔེ་ཆ་ཀློག་པར་འབད་པའི་སྐབས།།

ཁོ་བོས་སྐད་ཅོར་ཆུང་ཚགས་ཀྱིས་ཀྱང་ཁྱེད་ལ་གནོད་པ་མི་བྱེད་ཕྱིར།།

དཔེ་ཁང་ཧྲིལ་བོའི་སྒེའུ་ཁུང་ཡོངས་རྫོགས་དམ་པོར་འདོན་ལ་བརྩོན་པར་མོས།།

When you bend your head on one side, with a book in your hand, and try to get engrossed in your reading, I want to shut all the windows to make sure that nothing disturbs you.

ཁྱེད་ཀྱིས་འཛུམ་མདངས་ལྷུག་པར་གྲོལ་བཞིན་གྲོགས་པོ་ཚོ་དང་མོལ་བའམ།།

ཡང་ན་ཤེས་བྱ་རིག་གནས་ཐོག་ལ་བགྲོ་གླེང་ལྷུག་པོར་བྱེད་པའི་སྐབས།།

ཁོ་བོས་སྲུབ་ཇ་གར་པོ་ཞིག་གམ་ཡང་ན་རྒྱ་ཇ་མངར་མོ་ཞིག །

ཁྱེད་དང་གྲོགས་པོ་ཚོ་ལ་དྲངས་ཏེ་རྣམ་དག་སེམས་འདི་མཚོན་ན་བསམ།།

When you, smilingly, engage yourself in chat with friends, or converse on enlightening topics, I want to offer butter and sweet tea to you all to the testament of my sincerity.

ཡིན་ཡང་ཆར་པ་དྲག་ཏུ་བབས་ཏེ་ས་གཞི་ཡོངས་རྫོགས་བརླན་པའི་སྐབས།།

ཁོ་བོའི་སྙན་ངག་བྲི་སའི་དེབ་འདིའང་བརླན་པར་གྱུར་ཏེ་ཞིག་སོང་ན།།

ཁྱེད་ཀྱི་རང་སྦྱོང་བྱ་སའི་སྤངས་ལྗོངས་ཆར་ཆུས་སྦངས་ཏེ་མདོག་ཤོར་ཡང་།།

ཁོ་བོས་ཆར་པར་སྡིགས་པ་ཙམ་ལས་བྱེད་ཐབས་ལེགས་པ་གཞན་མ་རྙེད།།

But alas! The downpour dampened the soil in the process, she drenched even my paper on which I pen down my poems, and I found myself cursing the rain for spoiling the prairie where you study every day.

ནམ་ཞིག་ལ་ངེད་གཉིས་ཀྱིས་འཚོ་བའི་ཆར་གདུགས་གཅིག་གི་འོག་ཏུ་ཆར་གཡོལ་བྱ་སྲིད་དམ།

2013-10-06T03:31:00.000-07:00

ངས་དུས་ཡུན་རིང་པོ་ཞིག་གི་རྗེས་སུ་སླར་ཡང་རྟོག་བཏགས་ཀྱི་ཞིང་ཁམས་ཤིག་ཡིད་མཁར་བཞེངས།

ཞིང་ཁམས་དེར་ཁྱེད་ཀྱིས་ལྗང་མདོག་གི་སྟོད་ཐུང་ཞིག་དང་སྔོ་མདོག་གི་ཕྱུ་པ་ཞིག་གྱོན་སྟེ།

ཤིན་ཏུ་བག་ཡངས་ཀྱིས་རྒྱུ་ཞིང་།

སུའང་ཡིད་སེམས་གཡོ་བར་བྱེད་པའི་འཛུམ་མདངས་དེས་ཞིང་ཁམས་དེར་མཛེས་སྡུག་གཞན་ཞིག་བསྣན་འདུག

ངས་ལག་གཡས་སུ་པིར་ཞིག་ཐོགས་ནས་ལག་གཡོན་པས་འགྲམ་པ་སྐྱོར་བཞིན།

མཛེས་སྡུག་ལྡན་པའི་ཞིང་ཁམས་དེར་ད་དུང་ཅི་ཞིག་ཁ་སྣོན་བྱེད་དགོས་མིན་ལ་མནོ་བསམ་གཏོང་བཞིན་པའི་སྐབས།

གློ་བུར་དུ་འབྲུག་སྒྲ་འཇིགས་སུ་རུང་བ་ཞིག་དང་ལྷན་དྲག་ཆར་ཞིག་བབས་པས།

ཞིང་ཁམས་དེའི་བྱ་བྱེའུ་ཚོགས་ཀྱང་རང་རང་གི་ཚང་ཕྱོགས་སུ་འཕུར་སོང་།

སྐབས་དེར་ངེད་གཉིས་ཀྱང་ཆར་གདུགས་གཅིག་གི་འོག་ཏུ་ཆར་གཡོལ་བྱེད་བཞིན་ཡོད།

“ནམ་ཞིག་ལ་ངེད་གཉིས་ཀྱིས་འཚོ་བའི་ཆར་གདུགས་གཅིག་གི་འོག་ཏུ་ཆར་གཡོལ་བྱ་སྲིད་དམ།”

ངས་ཆར་གདུགས་ཀྱི་ཡུ་བ་ནས་ཡང་བཟུང་ཞིག་བྱས་ཏེ་དེ་ལྟར་དྲིས།

“ གལ་སྲིད་་་་་་་”

སྐབས་དེར་ཕྱི་རོལ་དུ་དངོས་སུ་དྲག་ཆར་ཞིག་བབས་པས་ང་རྟོག་བཏགས་ཀྱི་འཇིག་རྟེན་དེ་ལས་སླར་ལྡང་དགོས་བྱུང་།

༢༠༡༣ ༡༠ ༦གཟའ་ཉི་མར་དྲག་ཆར་ཞིག་བབས་རྗེས།

བརྡ་སྤྲོད་བསླབས་ཆེས་པའི་ཉེས་དམིགས།

2013-08-24T19:52:00.000-07:00

བརྡ་སྤྲོད་བསླབས་ཆེས་པའི་ཉེས་དམིགས།

----བཙན་བྱོལ་བའི་རིག་གནས་སློབ་གསོ་མདོར་ཙམ་གླེང་བ།

བཙན་བྱོལ་དུ་འབྱོར་ནས་ལོ་ངོ་བཅུ་ཕྲག་ལྔ་ཙམ་སོང་རྗེས་རང་རེའི་མི་རིགས་སློབ་གསོས་བརྒྱུད་པའི་ལམ་བུ་ལ་ཕྱིར་བལྟས་ཤིག་སློག་སྐབས་དེ་འདྲ་ཡིད་ཚིམས་པ་ཞིག་མ་རེད། དེ་བས་བསམ་ཡོད་བསམ་མེད་ཚང་མས་སློབ་གསོའི་གནས་བབ་འདི་བསྒྱུར་དགོས་པའི་བསམ་ཚུལ་འཆང་གིན་ཡོད་ལ། འབུམ་རམས་པ་བློ་བཟང་སེང་གེ་མཆོག་སྲིད་ཁྲིར་ཕེབས་དུས་ཀྱང་ཤེས་ཡོན་ནི་ཁོང་གི་དམིགས་གཏད་གཙོ་བོ་ཡིན་པའི་བསྒྲགས་གཏམ་སྤེལ་གནང་ཡོད།

དེ་ལ་༧གོང་ས་རྒྱལ་བ་ཐམས་ཅད་མཁྱེན་པས་ཀྱང་དུས་ནས་དུས་སུ་བཀའ་གནང་ཡོད་པ་དཔེར་ན། གཅིག་དགུ་

དྲུག་ཅུའི་ནང་དུ་ “དེང་སྐབས་མི་ཞིག་ཐུག་མ་ཐག་ཡེས(yes)་ནོ་(no)ཟེར་བ་དེ་དག་ཕར་བལྟས་ན་གནད་འགག་ཆེན་པོ་མེད་པ་འདྲར་མཐོང་ཡང་དོན་དུ་ནང་སྙིང་རུལ་འགྲོ་གིན་ཡོད”ཅེས་གསུངས་ཡོད་ལ་བོད་ཕྲུག་དག་ལ་ཟུར་དུ་སློབ་གྲྭ་བཙུགས་པའི་དགོས་པའང་མི་རིགས་རང་གི་རིག་གནས་དང་ཡུལ་གོམས་གཤིས་ལུགས་བཅས་པ་བདག་བཟུང་བྱེད་ཆེད་དུ་རེད། ༧གོང་ས་མཆོག་གིས་ཉེ་བའི་ཆར་ཡང་ཚན་རིག་དང་། རྩིས་རིག སྤྱི་ཚོགས་རིག་གནས་བཅས་པ་བོད་ཡིག་ཏུ་ཁྲིད་དགོས་པའི་དགོངས་ཚུལ་བཏོན་ཡོད་ཀྱང་ལག་ལེན་བཀར་ཐུབ་མེད་པའི་སྐོར་ལ་བཀའ་སློབ་གནང་ཡོད།

མི་རིགས་སློབ་གསོའི་གནས་བབ་སྤྱི་དང་ཡང་སྒོས་སློབ་མ་རྣམས་ཀྱི་བོད་སྐད་ཡིག་གི་གནས་བབ་འདི་འདྲ་སྐྱོ་བོ་ཆགས་དོན་ལ་དོ་སྣང་ཅན་མང་པོས་དགོངས་ཚུལ་འདྲ་མིན་བཏོན་ཡོད་ལ། ཚགས་ཤོག་ཅིག་ཏུ་ཟླ་བ་ཚེ་རིང་ཞུ་བ་ཞིག་གིས་སློབ་མ་རྣམས་ཀྱི་བོད་སྐད་ཡིག་གི་ཆུ་ཚད་སྐྱོ་བོ་ཆགས་དོན་ནི་ཕྲུ་གུ་ཆུང་དུས་ཡིག་གཟུགས་མི་འདྲ་བ་གཉིས་གསུམ་བསླབས་ཏེ་ཕྲུ་གུ་མགོ་འཐོམས་པར་བྱས་པས་རེད་ཅེས་དགོངས་ཚུལ་བཏོན་གནང་འདུག དེ་ལ་གནས་ལུགས་ཡོད་སྲིད་ཀྱང་ངས་ནི་ཡིག་གཟུགས་འདྲ་མིན་བསླབས་པས་སྐད་ཡིག་གི་ཆུ་ཚད་མཐོ་རུ་འགྲོ་མི་ཐུབ་པའི་རྒྱུ་མཚན་མ་མཐོང་། དེ་ལས་ལྡོག་ཏེ་ཡིག་གཟུགས་འདྲ་མིན་ལ་བྱང་སོང་ན་ཕྲུ་གུའི་སྐད་ཡིག་གི་ཆུ་ཚད་མཐོར་འདེགས་བྱེད་པར་ཕན་པ་མི་དམན་པ་ཞིག་མེད་དམ་སྙམ། ཡང་གྲོགས་པོ་ཞིག་གིས་བོད་ཕྲུག་རྣམས་ལ་ཆོས་དང་འབྲེལ་བའི་གཏམ་རྒྱུད་མང་པོ་བཤད་པས་བོད་ཡིག་ལ་དོ་སྣང་ཡལ་སོང་བ་རེད་ཅེས་གསུངས་མོད། དེའང་བློ་ཕྱོགས་གཅིག་པའི་གཏམ་ཙམ་ལས་གནས་ལུགས་དངོས་དེ་མ་རེད་འདོད།

ངས་བལྟས་ན་བོད་ཕྲུག་དེ་དག་བོད་ཡིག་ལ་གོ་བ་མི་ཆགས་པ་དང་རྩོམ་ཡིག་གི་འགྲོ་སྟངས་མི་ཤེས་པར་གྱུར་བའི་རྒྱུ་གཙོ་བོ་དེ་བརྡ་སྤྲོད་བསླབས་ཆེས་པས་རེད་འདོད། དེའང་ང་རང་བཙན་བྱོལ་གྱི་སློབ་གསོ་མྱངས་དང་མྱོང་བཞིན་པའི་སློབ་མ་ཞིག་ཡིན་པའི་ངོས་ནས་བཤད་ན་གལ་སྲིད་ངས་སློབ་གྲྭའི་སློབ་ཚན་ལས་གཞན་དུ་རང་ཉིད་ཀྱིས་འབད་འབུངས་མ་བྱས་པ་དང་། སློབ་གྲྭའི་སློབ་གསོ་ལ་བློ་གཏོད་མ་བཅོལ་བར་“ཁྲིམས་འགལ་”གྱིས་མཁས་པ་རྣམས་ཀྱི་བརྩམས་ཆོས་ལ་མ་མཇལ་ཚེ་དེ་རིང་གི་རྩོམ་ཡིག་འདིའང་འབྲི་མི་ཐུབ་པ་གདོན་མི་ཟ། དེའི་རྒྱུ་མཚན་ནི་སློབ་གྲྭ་རུ་སློབ་ཆུང་འཛིན་གྲྭ་བཞི་བ་ནས་མགོ་བརྩམས་ཏེ་རྩོམ་སྒྲིག་པ་རྣམས་ཀྱིས་བརྩམས་པའི་སྡེབ་སྦྱོར་ཉེས་ཤིང་བརྗོད་བྱའི་དབུལ་བའི་རྩོམ་ཡིག་འགའ་ཕུད་གཞན་བརྡ་སྤྲོད་ཤ་སྟག་ལས་བོད་གངས་ཅན་ལ་མིང་དུ་གྲགས་པའི་མཁས་དབང་རྣམ་པའི་བརྩམས་ཆོས་མཇལ་བའི་སྐལ་བ་མེད། དེ་ལ་ཁོ་བོའི་གྲོགས་པོ་ཞིག་གིས་རྩེད་མོ་དང་བཅས་ “སུམ་ཅུ་པ་སྦྱངས་ཏེ་ལོ་ངོ་སུམ་ཅུ་འདས་སོང་སྟེ་ད་དུང་བོད་ཡིག་ལ་གོ་བ་ཆགས་མ་སོང་”ཞེས་གསུངས་པ་ནི་ད་ལྟའི་ང་ཚོའི་རིག་གནས་སློབ་གསོ་ལ་སྡོམ་ཆེན་པོ་ཞིག་གྱུར་འདུག་དྲན། ཞིབ་ཏུ་སོམས་དང་། ང་ཚོས་འཛིན་གྲྭ་བཞི་བ་ནས་ལེགས་བཤད་ལྗོན་དབང་ལ་བསླབས་ཤིང་འཛིན་གྲྭ་བརྒྱད་པ་ནས་སླར་ཡང་སི་ཏུའི་ཞལ་ལུང་ལ་བསླབས། དེའི་རྗེས་སུ་ཡང་སི་ཏུའི་འགྲེལ་ཆེན་ལ་སློབ་བཞིན་ཡོད། དེ་གསུམ་ཀའི་དོན་ནི་སུམ་ཅུ་པ་ཡིན་ཞིང་སུམ་ཅུ་པའི་ནང་དུ་གསུང་བཞིན་པའི་བརྡ་སྤྲོད་ཀྱི་འགྲོ་སྟངས་མང་པོ་ཞིག་ནི་བོད་སྐད་རྣལ་མ་ཤེས་མཁན་ཞིག་ལ་ཆེད་དུ་བསླབས་མི་དགོས་པར་སྣང་། ལྷག་པར་དུ་རྟགས་འཇུག་དུ་གསུངས་པའི་བརྡ་མང་པོ་ཞིག་ནི་དུས་ཀྱི་དབང་གིས་ཕན་མེད་དུ་གྱུར་ཟིན་ལ་ཕན་ཐོགས་ཡོད་པ་དེ་རྣམས་ལས་མང་པོ་ཞིག་ནི་བོད་ཡིག་འབྲི་ཀློག་ཤེས་ཙམ་ནས་ཤེས་པར་འགྱུར་བ་དཔེར་ན། མིང་གཞི་གཉིས་སམ་གསུམ་སྦྲེལ་ལམ།། དེ་ལ་དབྱངས་ཀྱི་གཞི་ལྡན་ཡང་།། ཞེས་སོགས་སྐྱོར་སྦྱོང་བྱེད་མི་ཤེས་པའི་བོད་ཕྲུག་ཅིག་གིས་ཀྱང་བོད་ཡིག་འབྲི་ཀློག་ཤེས་ཙམ་ནས་ཀ་ན་རོ་ཀོ་ཁ་ཀོཁ་ཅེས་མི་འབྲི་བ་སུ་ལའང་གསལ།

སུམ་རྟགས་གཉིས་ལས་གཞན་ད་དུང་སློབ་ཆེན་སོགས་སུ་མ་ལོང་མ་ཤུགས་ཆེན་པོ་ཁྲིད་བཞིན་ཡོད་ལ་ཚིག་གི་ཉམས་བསྟན་སྟངས་སོགས་དགོས་པ་མང་པོ་ཞིག་གིས་མེ་ལོང་མ་དེ་མཐའ་གཅིག་ཏུ་དོར་བྱ་ཞིག་མ་རེད། འོན་ཀྱང་དུས་ཀྱི་འགྱུར་བ་དང་བསྟུན་ནས་སློབ་དུས་གཅིག་ལ་ཉུང་ངུ་ཙམ་ཁྲིད་པ་ལས་སློབ་དུས་ཧྲིལ་བོ་བུད་མེད་མཛེས་མ་དང་། པདྨ། ཟླ་བ་སོགས་རྒྱལ་སྤྱིའི་མཛེས་མ་འགྲན་བསྡུར་ལྟར་གཅིག་གི་དཔེ་རུ་གཅིག་བཞག་སྟེ་རྫོགས་བཞིན་པ་འདི་ནི་སློབ་གསོའི་གོལ་ལམ་ཞིག་ཏུ་མཐོང་།

ང་ཚོ་མང་པོ་ཞིག་གིས་ཤེས་གསལ་ལྟར་དབྱིན་ཡིག་ཏུ་སློབ་མ་རྣམས་ལ་བརྡ་སྤྲོད་ཀྱི་རྣམ་བཞག་རྒྱས་པོ་མི་ཁྲིད། སློབ་འབྲིང་དུ་བརྡ་སྤྲོད་ཀྱི་རྣམ་བཞག་ཅུང་ཁྲིད་པ་ལས་སློབ་ཆེན་དུ་གཏན་ནས་མི་ཁྲིད། དབྱིན་ཡིག་སྐད་ཡིག་གཉིས་པ་ཡིན་པའི་ང་ཚོས་ཀྱང་བརྡ་སྤྲོད་ཀྱི་རྣམ་བཞག་རྒྱས་པོ་མི་སྦྱོང་བར་དབྱིན་ཡིག་ཏུ་རྩོམ་ཡིག་འབྲི་ཐུབ་པ་དང་སྐད་ཆ་ཤོད་ཐུབ་པར་འགྱུར་འགྲོ་གིན་ཡོད། དེའི་རྒྱུ་ཅིའམ་ཞེ་ན་ངས་ནི་ཐེ་ཚོམ་མེད་པར་དེ་ནི་སློབ་མ་རྣམས་ལ་སློབ་ཆུང་སྐབས་ནས་བཟུང་མིང་དུ་གྲགས་པའི་མཁས་པ་རྣམས་ཀྱི་གསུང་རྩོམ་མཇལ་བཅུག་པ་དང་སློབ་མ་སོ་སོར་རང་ངོས་ནས་རྩོམ་ཡིག་འབྲི་སྦྱོང་བྱེད་དུ་བཅུག་པ་དེས་རེད་ཅེས་སྨྲ་བར་འདོད།

བཙན་བྱོལ་གྱི་སློབ་གསོ་མྱངས་མྱོང་མཁན་གཞན་ལའང་བསམ་ཚུལ་དེ་འདྲ་ཡོད་པར་འདྲ་སྟེ་དབྱིན་ཡིག་ཏུ་རྩོམ་ཡིག་འབྲི་མཁན་བསྟན་འཛིན་ཉིན་བྱེད་ཀྱིས་“དགེ་ཆོས་ཀྱི་རྗེས་འཇུག་པ་དོན་གྲུབ་རྒྱལ་གྱི་ལས་དབང་ཡང་གཅིག་མཚུངས་རེད། ཁོང་གི་སྙན་ངག་དང་།སྒྲུང་ཐུང་། ལོ་རྒྱུས་བརྩམས་ཆོས་ཚང་མ་བོད་པའི་སློབ་མ་རྣམས་ལ་རྒྱུས་མེད་དུ་གྱུར་ཡོད། ང་རང་སྒེར་གྱི་མྱོང་བ་ནི་ཁོ་བོ་དྷི་ལིའི་གཙུག་ལག་སློབ་གཉེར་ཁང་ནས་སློབ་གྲྭ་ཐོན་ཏེ་ལོ་འགའ་ཕྱིན་པའི་རྗེས་སུ་སཱ་ར་མཐོ་སློབ་ཏུ་འགྲོ་དུས་བོད་ནས་ཕེབས་པའི་སློབ་མ་ལོ་གཞོན་འགའ་ཞིག་གི་བཀའ་དྲིན་འོག་ད་གཟོད་ཁོང་གི་བརྩམས་ཆོས་མཇལ་ཐུབ་སོང་། གལ་ཏེ་ངས་བརྩམས་ཆོས་དེ་དག་ན་སོ་གཞོན་དུས་བཀླགས་ཡོད་ཚེ་རང་གི་བོད་ཡིག་གི་ཆུ་ཚད་དང་བོད་ཀྱི་རྩོམ་རིག་གི་གོ་རྟོགས་ཡར་རྒྱས་ཕྱིན་ཡོད་པ་གཏན་འཁེལ་རེད་བསམས་པའི་ཚོར་འདུ་དྲག་པོ་བྱུང་།”ཞེས་གསུངས་འདུག ཡང་ཁོང་གིས་ “བོད་ཀྱི་མཁས་པ་རྣམས་ཀྱི་རྩོམ་ཡིག་ནི་བོད་ཕྲུག་རྣམས་ལ་གཏེར་གྱི་ཚུལ་དུ་སྦས་ཏེ་བཞག་ཡོད”ཅེས་སྡོམ་ཚིག་བཀོད་གནང་འདུག

ངས་མཐའ་མར་ཞུ་འདོད་པ་ནི་ང་ཚོས་ལམ་ནོར་ལྡོག་ཤེས་བྱས་ཏེ་ལེགས་བཤད་ལྗོན་དབང་དང་དཀའ་གནད་གསལ་བའི་མེ་ལོང་སོགས་བརྡ་སྤྲོད་ཀྱི་གཞུང་ཉུང་ཤས་ཤིག་བསླབས་ཏེ་སི་ཏུ་འགྲེལ་ཆེན་སོགས་བརྡ་སྤྲོད་ཀྱི་གཞུང་ཆེན་རྣམས་བརྡ་སྤྲོད་ཐོག་རིགས་གཅིག་རྐང་འཛིན་གནང་མཁན་ཚོ་ལས་སློབ་མ་བྱིངས་ཀྱིས་སློབ་མི་དགོས་པར་བྱས། ད་ལྟ་ཁྲིད་བཞིན་པའི་ས་སྐྱ་ལེགས་བཤད་སོགས་ཀྱི་སྟེང་དུ་ད་དུང་ར་མ་ནའི་རྟོགས་བརྗོད་སོགས་གཏམ་བརྗོད་གྲགས་ཅན་དང་། འཕགས་བསྟོད་སོགས་སྙན་ངག་གྲགས་ཅན། མི་ལའི་རྣམ་མགུར་སོགས་ལྷུག་རྩོམ་གྲགས་ཅན་མང་པོ་ཁྲིད་དགོས་པས་མི་ཚད་དེང་གི་མི་རིགས་རིང་ལུགས་པའི་ལྟ་བ་ལྡན་པའི་མཁས་པ་དཔེར་ན། དགེ་འདུན་ཆོལ་འཕེལ་དང་། དོན་གྲུབ་རྒྱལ་སོགས་ཀྱི་བརྩམས་ཆོས་རྣམས་ཀྱང་དངོས་སུ་ཁྲིད་པ་དང་། དེང་གི་བོད་ཀྱི་རྩོམ་པ་པོ་གཞན་གྱི་རྣམས་ཀྱི་སྒྲུང་གཏམ་དང་སྙན་ངག་རྣམས་ཀྱང་དངོས་སུ་ཁྲིད་པའམ། ཡང་ན་དགེ་རྒན་རྣམས་ཀྱི་ལམ་སྟོན་འོག་སློབ་གསེང་དུ་ཀློག་པར་བསྐུལ་བ། སློབ་ཆུང་དང་སློབ་འབྲིང་སློབ་མའི་སེམས་ཁམས་དང་འཚམས་པའི་བརྙན་དེབ་འདྲ་མིན་དཔར་དུ་བསྐྲུན་ཏེ་བོད་ཡིག་གི་དེབ་འབེལ་འབེལ་ལྷུག་ལྷུག་བཟོ་བ་བཅས་བྱེད་ན་ན་གཞོན་སློབ་མ་རྣམས་ཀྱི་རིག་གནས་ཀྱི་ཆུ་ཚད་ལ་གནམ་ས་བླ་འོག་བསྒྱུར་བ་ལྟ་བུའི་འགྱུར་བ་ཡོང་བར་ཐེ་མི་ཚོམ།

གྲོགས་བློ་བཟང་ཆོས་གྲགས་ལགས་དང་བགྲོ་བ།

ཁ་ཉིན་རང་གིས་ཡུན་རིང་སེམས་སུ་བཙོ་སྦྱངས་བྱས་པའི་ལྟ་ཚུལ་རྣམས་རི་མོའི་ལམ་དུ་བཀོད་དེ་དྲ་ཐོག་ཏུ་སྤེལ་བར་སློབ་གྲོགས་བློ་བཟང་ཆོས་གྲགས་ལགས་ཀྱིས་དེ་ལ་དགོངས་ཚུལ་དཔེ་མེད་ཅིག་གསུངས་འདུག་པས། དེ་རིང་དེ་ལ་ལེགས་གསོལ་ཞུ་བ་དང་ཆབས་གཅིག་རང་གི་འདོད་ཚུལ་འགའ་ཡང་ཞུ་འདོད་བྱུང་།

གྲོགས་པོ་ལགས་ཀྱིས་གསུངས་པ་བཞིན་སྒྲ་སྙན་ལ་མ་བསླབ་པར་འཆད་རྩོད་རྩོམ་ལ་འཇུག་རྒྱུ་ཟེར་བ་ནི་ཤིན་ཏུ་དཀའ་བ་ཁོ་བོས་ཀྱང་འདོད་ལ། སྒྲ་སྙན་བསྐྱུར་ཏེ་མྱུར་ལམ་ཞིག་འཚོལ་ཟེར་བ་ནི་མི་སྲིད་པ་ཞིག་ཡིན་པ་སུ་ལ་གསལ་ཆ་མེད།

ཡིན་ཡང་ངས་སྨྲ་བཞིན་པ་ནི་བོད་ཕྲུག་རྣམས་ཀྱིས་བརྡ་སྤྲོད་བྱེ་བྲག་པ་ཞིག་གི་ཐོག་ཏུ་ལོ་ངོ་མང་པོ་ཞིག་བཏང་སྟེ་མཁས་པ་རྣམས་ཀྱི་རྣམ་དཔྱོད་ཀྱི་འོད་ཁྱིམ་ལས་ཐོན་པའི་བརྩམས་ཆོས་གསེར་གྱི་རི་འདྲ་བ་དག་མཇལ་ཁ་ཙམ་ཡང་ཞུ་རྒྱུ་མ་རྙེད་པས་ན་བརྗོད་བྱ་གདམ་གསེས་བྱེད་མི་ཤེས་ཤིང་རྗོད་བྱེད་ཚིག་གི་སྦྱོར་བ་ཙམ་ལའང་རྨོངས་པའི་ད་ལྟའི་གནས་སྟངས་སུ་གྱར་བ་རེད་ཟེར་བ་ཡིན་པ་ལས། “སྒྲུང་དེབ་དང་སྙན་དེབ་འགའ་ཞིག་”བསླབས་ཏེ་སྐྱིད་ཉལ་བརྒྱབ་ན་ “རྩོམ་ཡིག་སྤུས་ལྡན་”རེ་འབྲི་ཐུབ་པར་འགྱུར་བར་ “ངས་མིག་བཙུམས་ཏེ་བཤད་ཐུབ་”ཟེར་བ་མིན།

བསམ་བློ་ཞིབ་མོ་ཐོངས་དང་། དང་པོ་ང་ཚོས་སུ་རུ་ར་དུ་ན་ལ་ཏུ་ཟེར་བ་ལྟ་བུའི་གོ་མ་ཐག་ཏུ་ཇི་ལྟར་འཇུག་ཚུལ་དང་ཅིའི་ཕྱིར་འཇུག་ཚུལ་རྣམས་གསལ་བར་བསྟན་པའི་གཞུང་ཞིག་ལ་བསླབས། ཡང་བསྐྱར་དང་པོ་ཉིད་ལ་དང་པོ་སྟེ།། གསུམ་ལྔ་བཅུ་ལ་ཅ་དང་སྦྱར།། ཟེར་བ་ལྟ་བུའི་གབ་ཚིག་ལྟ་བུའི་གཞུང་ཞིག་ལ་ཨུ་ཚུགས་སྒོས་བསླབས་ཀྱི་ཡོད་མོད། དེ་གཉིས་ཀར་ལེགས་པར་བསླབས་ཟིན་རྗེས་ཁྱེད་ལ་ཐོབ་པའི་བློ་བསྐྱེད་རྡོག་རྡོག་པོ་ནི་རྗེས་འཇུག་སའི་རྗེས་སུ་ལ་དོན་གྱི་ཕྲད་སུ་ཐོབ་པ་ལྟ་བུའི་གཞུང་དང་པོ་དེར་བསླབས་དུས་ནས་ངག་ལ་བྱང་ཞིང་ཡིད་དུ་འཇགས་ཟིན་པ་དེ་ལས། གནམ་ས་བླ་འོག་བསྒྱུར་བའི་ཚན་རིག་གི་ཤེས་བྱ་ཐོབ་མེད་ཅིང་། རྟེན་གཅིག་ལ་སངས་རྒྱས་ཀྱི་ས་ཐོབ་ཐུབ་པའི་ནང་བསྟན་གྱི་ཤེས་བྱ་ནི་དེ་བས་ཐོབ་མེད། ཡིན་ཡང་དུས་ཚོད་ནི་རི་གཟར་གྱི་རྦབ་ཆུ་ལྟར་ཐུར་དུ་རྒྱུགས་པས་ལེགས་བཤད་ལྗོན་དབང་ལ་བསླབས་དུས་ཀྱི་ཞལ་བཞིན་གཞོན་ཤ་དོད་པོ་དེ་སི་ཏུའི་འགྲེལ་ཆེན་ལ་སློབ་དུས་གཉེར་མ་མང་ཞིང་ཨ་ར་སྟུག་པོ་ཅན་ཞིག་ཏུ་གྱུར་ཟིན་པས་མ་ཚད། སྔོན་མ་ཁྱེད་ཀྱིས་ལེགས་བཤད་ལྗོན་དབང་ལ་བསླབས་དུས་ཀྱི་ཞལ་བཞིན་གཞོན་ཤ་དོད་པོ་དེ་འདྲ་བ་ཁུར་བའི་སློབ་མ་གྲངས་མེད་ཀྱིས་ཁྱེད་ལ་རེ་བའི་མིག་ཟུང་ཅེར་ནས་ཡོད། སྐབས་དེར་ཐོན་དུས་ཁྱེད་ལ་ཁྱད་འཕགས་ཀྱི་སྒྲུང་གཏམ་ཟེར་བ་ཅི་ཞིག་ཡིན་པ་ཁྲིད་དུ་མེད་ལ། འཛམ་གླིང་རྩོམ་རིག་དགའ་ཚལ་དུ་གྲགས་པ་འབར་བཞིན་པའི་བརྩམས་ཆོས་ཤིག་ངོ་སྤྲོད་བྱེད་རྒྱུ་ནི་རི་བོང་རྭའི་རྗེས་ཀྱི་མི་སྲིད་པ་དེ་རེད། རྒྱུ་མཚན་ནི་ཁྱེད་ལ་སྐད་ཡིག་སློབ་ཟེར་བ་ནི་བརྡ་སྤྲོད་སློབ་ཟེར་བ་ཡིན་ཞིང་དེའང་བོད་ཀྱི་བརྡ་སྤྲོད་ཀྱི་བརྒྱ་ཆ་བརྒྱད་ཅུ་ཙམ་ལས་འཁོད་མེད་པའི་སུམ་རྟགས་གཉིས་སློབ་ཟེར་བ་ཡིན། དེ་བས་ཁྱེད་ཀྱིས་ལོ་གཞོན་སློབ་མ་དག་གི་སྙན་འཇོག་གསེར་གྱི་སྒོ་མོ་རུ་རང་ལ་མངའ་བའི་བརྡ་སྤྲོད་བྱེ་བྲག་པ་དེའི་རྩམ་ཕྱེ་ཉུང་ངུ་དེ་ལྡུག་པ་ལས་ཐབས་ཅི། ལོ་ངོ་འགའི་རྗེས་སུ་སློབ་མ་མང་ཤོས་བརྡ་སྤྲོད་ཟེར་ན་མགོ་ན་བར་བྱས་ཤིང་། མི་རིང་བར་བོད་ཡིག་ཟེར་ན་མགོ་ན་བར་བྱས། ཉུང་ཤས་ཤིག་ལྷག་པ་རྣམས་ཁྱེད་དང་དཔར་ཁུངས་གཅིག་ཏུ་དཔར་བའི་ཚ་ཚ་བཞིན་གྱུར་བས་ཁོ་ཚོས་ཁྱེད་ཀྱིས་བརྒྱུད་པའི་ལམ་བུ་དེ་བརྒྱུད། དེ་ནས་ག་ལེར་ཁོ་ཚོས་ཀྱང་ཁྱེད་ཀྱི་རྣམ་ཐར་བསྐྱངས། འདི་ནི་བཙན་བྱོལ་བོད་མིའི་རིག་གནས་སློབ་གསོ་རེད།

ཡང་གྲོགས་པོ་ལགས་ཀྱིས་མཁས་པའི་གསུང་རྩོམ་མཇལ་ན་སྐད་ཡིག་གི་ཆུ་ཚད་མཐོར་འདེགས་བྱེད་པར་མི་ཕན་པའི་སྒྲུབ་བྱེད་དུ་གདན་སའི་གྲྭ་བ་རྣམས་ཀྱི་རིག་གནས་ཆུ་ཚད་དྲངས་གནང་བ་ནི་ཞྭའི་དཔེ་ལྷམ་དུ་བཀོད་པ་ལས་གནས་ལུགས་ཀྱིས་བྱུར་བུར་གཏམས་པའི་གཏམ་ཞིག་ཏུ་ཁོ་བོས་མི་འདོད། རྒྱུ་མཚན་ནི་མཁས་པའི་གསུངས་ལ་ཞིབ་ཚགས་སྒོས་འཇུག་མཁན་རྣམས་ཀྱི་རིག་གནས་ཀྱི་ཆུ་ཚད་ནི་སྔོན་གྱི་མཁས་པ་རྣམས་ཀྱི་དོ་ཡར་ཡོང་བ་འདུག་ཅེས་བརྗོད་ཆོག་པར་ཡོད། ཡིན་ཡང་དོན་མི་གོ་བར་བློ་འཛིན་བྱེད་མཁན་དང་། ཁྱབ་ཐལ་ཤེས་པ་ཙམ་གྱིས་ཡིད་ཚིམས་ཏེ་ཚིག་གི་སྒྱུ་རྩལ་ལ་སྣང་མེད་བྱེད་མཁན། སུམ་རྟགས་སྙན་གསུམ་གྱི་ “ཁྲིད་”ཞུ་བ་ཁོ་ན་རིག་གནས་སྦྱངས་བར་རྩི་བ་ལས་གཞན་གྱི་སྙན་ངག་དང་སྒྲུང་གཏམ་ཀློག་པ་ནི་དུས་ཚོད་འཕྲོ་བརླག་ཏུ་རྩི་མཁན་རྣམས་ཀྱི་རིག་གནས་ཆུ་ཚད་སྐྱོ་བ་རྒྱུ་མཚན་དུ་བྱས་ནས་མཁས་པའི་གསུང་ལ་ཐོས་བསམ་བྱས་ཀྱང་རིག་གནས་ཡར་རྒྱས་འགྲོ་བར་མི་ཕན་ཞེས་པ་ནི་མ་རུང་བའི་གཏམ་མོ།།

ཡང་གྲོགས་པོ་ལགས་ཀྱིས་སྔོན་གྱི་སྐྱེས་ཆེན་རྣམས་ཀྱིས་ཀྱང་སྒྲ་སྙན་ལ་མཁས་པར་བསླབས་ཏེ་འཆད་རྩོད་རྩོམ་ལ་ཞུགས་པ་ཡིན་པས་ང་ཚོས་ཀྱང་དེ་དེ་བཞིན་དུ་བྱ་དགོས་གསུངས་པ་ལ་ལན་གཉིས་ཡོད། དང་པོ་ནི། སྔོན་གྱི་མཁས་པ་རྣམས་ང་ཚོ་བཞིན་སྒྲ་དང་སྙན་ངག་ཁོ་ན་སྦྱངས་ཏེ་ལོ་ངོ་བཅུ་གཉིས་བཅུ་གསུམ་བཞུགས་མེད། ཁོང་ཚོ་ནི་སྐྱེས་ཐོབ་ཀྱི་ཤེས་རབ་ལྡན་ལ་བརྩོན་པའི་རྟ་ཕོར་བཞོན་པ་ཤ་སྟག་ལགས་པས་སུམ་རྟགས་གཉིས་ལ་མགོ་འཁོར་ཏེ་ལོ་ངོ་དེ་འདྲ་མང་པོར་བསྡད་ཅེས་བཤད་ན་བསྟོད་པ་མི་འགྲོར་སྨད་པ་འགྲོ་ཉེན་ཡོད། གཉིས་པ་ནི། སྔོན་གྱི་མཁས་པ་རྣམས་ཀྱིས་རང་རང་གི་སྐབས་བབ་ཀྱི་སྦྱང་བྱའི་གཞུང་ཙམ་དོན་དུ་གཉེར་ནས་བཞུགས་པ་མིན་པར་མཁས་གྲུབ་གོང་མ་རྣམས་ཀྱི་གསུངས་རྩོམ་གྱི་ཚིག་དོན་གཉིས་ལ་ཐོས་བསམ་བྱེད་ཀྱིན་ཡོད་པར་མ་ཟད། ཚིག་སྦྱོར་ཚུལ་ལ་མཁས་པའི་ངག་གི་དཔལ་ནི་རིན་ཆེན་གསུམ་གྱི་ཡ་གྱལ་དུ་བགྲང་འདུག་པས་གྲོགས་པོ་ལགས་ཀྱི་རྒྱུ་མཚན་དེ་བརྡ་སྤྲོད་བྱེ་བྲག་པ་ཞིག་ལ་ཡང་སྐོར་བསྐྱར་སྐོར་བྱེད་པ་ལས་མཁས་པའི་རྣམ་དཔྱོད་ཀྱི་རྩལ་ལས་ཐོན་པའི་བརྩམས་ཆོས་རྣམས་ཡལ་བར་དོར་བའི་ད་ལྟའི་བཙན་བྱོལ་བོད་མིའི་སློབ་གསོའི་གྲོགས་སུ་མི་འགྱུར་བར་སྙམ།

མཐར་ངེད་གཉིས་ཀྱི་བགྲོ་གླེང་འདི་བརྒྱུད་བཙན་བྱོལ་བའི་རིག་གནས་སློབ་གསོ་ལ་ཁ་དོག་གསར་བ་ཞིག་སྣོན་ཐུབ་པའི་རེ་འདུན་ཞུ།

བོད་ཀྱི་སྤྲུལ་སྐུ་རྗེས་མ་ཡིན་སྲིད་དམ། ངོ་མ་ཡིན་ནམ།

2013-05-01T19:20:00.000-07:00

འབུམ་རམས་པ་བསྟན་འཛིན་རྡོ་རྗེས་བརྩམས། འཇམ་དབྱངས་གྲགས་པས་བསྒྱུར།

འཇམ་དབྱངས་ནོར་བུས་བརྩམས་པའི་“བོད་ཀྱི་སྤྲུལ་སྐུ་རྗེས་མ་ཡིན་སྲིད་དམ། དབུས་བོད་མིའི་སྒྲིག་འཛུགས་ཀྱི་རྩ་ཁྲིམས་དང་འབྲེལ་བའི་རྩོད་རྙོག་དང་། མགོ་འཐོམས། ལྐོག་ཇུས་ཀྱི་སྐོར།”ཞེས་པའི་རྩོམ་ཡིག་འདིའི་ནང་དུ་བོད་ཀྱི་སྤྱི་ཚོགས་ཀྱི་སྲིད་བྱུས་དང་། དབུ་ཁྲིད་སྟངས། མང་གཙོ་བཅས་ཀྱི་སྐོར་ལ་བསམ་ཚུལ་གནད་འགག་ཅན་འགའ་འཁོད་འདུག ཐོག་དང་པོར་ངས་ང་ཚོའི་ད་ལྟ་དང་མ་འོངས་པར་འབྲེལ་བའི་བརྗོད་གཞི་རྣམས་ཀྱི་ཐོག་བགྲོ་གླེང་བྱེད་འདོད། དེ་ནི་མང་གཙོའི་ལམ་ལུགས་ཀྱི་ནང་དུ་ལས་ཀ་ཚགས་ཚུད་པོ་ཡོང་བ་དང་ཐག་གཅོད་བྱེད་ཕྱོགས་ཀྱི་ཐད་གལ་ཆེན་པོ་ཆགས་ཡོད། རྩོམ་ཡིག་འདི་དང་འབྲེལ་ནས་གླེང་ན་ངས་གནད་དོན་འགའ་ཞིག་གི་ཐོག་ལྟ་ཕྱོགས་མ་འདྲ་བའི་སྒོ་ནས་བགྲོ་གླེང་བྱས་ཡོད།

དང་པོ། རྩོམ་པ་པོས་ “མི་དམངས་ཀྱི་དྲན་པ་དེ་ཐུང་ཐུང་ཡོད་ཙང་། མི་ཚང་མས་རང་རང་ལ་དྲན་གསོ་གཏོང་དགོས་པ་ཞིག་ལ་བློ་བཟང་སེང་གེ་ལགས་ནི་ ༢༠༡༡ ལོའི་ཟླ་ ༤ ཚེས་ ༢༦ ཉིན་བཀའ་བློན་ཁྲི་པའམ་བཙན་བྱོལ་བོད་གཞུང་གི་སྲིད་བློན་དུ་འོས་འདེམས་བྱས་པ་རེད། དེ་ལས་ལྷག་པ་མ་རེད་ལ་དེ་ལས་དམན་པའང་མ་རེད། བོད་ཀྱི་སྲིད་བློན་ནམ་ཁྱེད་ཚོ་མང་པོ་ཞིག་འབོད་པར་དགའ་བའི་བཀའ་བློན་ཁྲི་པ་ཙམ་ཞིག་རེད།”ཅེས་དྲན་གསོ་བྱས་ཏེ་བློ་བཟང་སེང་གེ་ལགས་ཀྱིས་རང་ཉིད་“ སྲིད་སྐྱོང་། མང་གཙོའི་ལམ་ནས་འོས་འདེམས་བྱས་ཤིང་༸གོང་ས་སྐྱབས་མགོན་ཆེན་པོ་མཆོག་གི་སྲིད་ཀྱི་ཤུལ་འཛིན་པ།”ཡིན་པར་འདོད་པ་དེ་བཀག་འདུག

ཡིན་ཡང་རྒྱུ་མཚན་ལྡན་པའི་ཐོག་ནས་བཤད་ན་འབུམ་རམས་པ་བློ་བཟང་སེང་གེ་ལགས་ཀྱིས་༸གོང་ས་མཆོག་ནས་བརྒྱུད་པའི་ལོ་རྒྱུས་ཀྱི་བྱུང་རིམ་ལྡན་པའི་སྲིད་ཀྱི་དབུ་ཁྲིད་ཀྱི་གོ་གནས་དེ་ཁྲིམས་མཐུན་ཞིག་དགོས་པ་རྩོད་གནང་བ་རེད།

དེ་ལས་ལྷག་པ་ཞིག་མ་རེད་ལ་དེ་ལས་དམན་པ་ཞིག་ཀྱང་མ་རེད། ཡིན་ཡང་རྩོམ་པ་པོས་སྲིད་སྐྱོང་གི་སྲིད་ཀྱི་དབུ་ཁྲིད་ཀྱི་གོ་གནས་དེ་ལོ་རྒྱུས་ཀྱི་ཐོག་ནས་ཁྲིམས་མཐུན་ཡིན་མིན་ཐོག་གནད་དོན་སློང་བཞིན་པར་འདྲ། སྟབས་མ་ལེགས་པ་ཞིག་ལ་ཁོས་ “ཁོ་༸གོང་ས་མཆོག་གིས་ལོ་འགའི་སྔོན་དུ་གསུངས་མྱོང་བའི་མ་འདས་སྤྲུལ་སྐུ་དེ་ཨེ་རེད(༸གོང་ས་མཆོག་གིས་ཁོང་ཉིད་མ་འདས་སྔོན་ནས་ཁོང་དང་མཚུངས་པ་གཞན་ཞིག་ངོས་འཛིན་བྱེད་ཆོག)”ཅེས་སོགས་ཀྱི་དྲི་བ་དྲིས་ཏེ་སྲིད་སྐྱོང་ལ་འཕྱ་དམོད་དང་སྔོན་དཔོག་ནོར་འཁྲུལ་ཅན་བྱས་འདུག

རྩོམ་པ་པོས་ད་དུང་བཤད་དོན། “གལ་སྲིད་སྲིད་སྐྱོང་ “༸གོང་ས་མཆོག་གི་སྲིད་ཀྱི་ཤུལ་འཛིན་པ་ཡིན་པ་”དང་ད་དུང་ཁོས་གཞུང་འབྲེལ་ཐོག་ནས་ཆོག་མཆན་སྤྲད་ཟིན་པའི་རྣམ་ཐར་རང་བཞིན་གྱི་གློག་བརྙན་དེའི་ནང་དུ་གསལ་བ་ལྟར་“བོད་ཀྱི་སྤྲུལ་སྐུ་རྗེས་མ་”དེ་ཡིན་སྲིད་ན་ང་ཚོ་ནི་སྲིད་བློན་སྲིན་འཛིན་དུ་བསྒྱུར་བ་ལས་ཀྱང་ཟབ་པའི་བཅའ་ཁྲིམས་ཀྱི་རྫབ་དོང་ཞིག་ཏུ་ལྷུང་ཡོད། སྲིད་བློན་སྲིད་འཛིན་དུ་བསྒྱུར་བ་འདིའང་དཀའ་རྙོག་ཅིག་ཡིན་ནའང་འདིས་བཅའ་ཁྲིམས་ལ་གཞི་མི་བཅོལ་བར་མཚན་ཉིད་རིག་པར་གཞི་བཅོལ་བའི་ལམ་ལུགས་ཞིག་ལ་འདྲི་འོས་པའི་ཆོས་ལུགས་ཀྱི་དྲི་བ་རྣམས་འདྲུད་ཡོང་གི་མ་རེད།”

༸གོང་ས་སྐྱབས་མགོན་ཆེན་པོ་མཆོག་གིས་འོས་བསྡུའི་ལམ་ནས་བདམས་པའི་དབུ་ཁྲིད་ལ་སྲིད་ཀྱི་དབང་ཆ་གནང་སྟེ་ཁོང་གི་སྔོན་རབས་པ་འགའ་ཞིག་གི་རྗེས་སུ་བཟུང་ནས་ཆོས་ཀྱི་དབུ་ཁྲིད་ཁོ་ན་གནང་གི་ཡོད། ལོ་རྒྱུས་རང་བཞིན་གྱི་ཐག་གཅོད་འདི་གནང་སྟེ་ཁོང་གིས་༸རྒྱལ་བ་ལྔ་བ་ཆེན་པོ་ནས་བཅུ་བཞི་པ་ཆེན་པོའི་བར་དུ་གནས་ཡོད་པའི་སྲིད་གཞུང་དང་དགོན་པ་དེའང་ཁ་ཁ་གནང་བ་རེད། སྤྱི་ཚོགས་དང་སྲིད་དོན་གྱི་འགྱུར་བ་གསར་བ་འདི་དྲངས་ཟིན་པར་སོང་མ་འདས་སྤྲུལ་སྐུ་ཞེས་པ་ད་ལྟ་དང་མ་འོངས་པའི་སྲིད་སྐྱོང་ངམ་སྲིད་ཀྱི་དབུ་ཁྲིད་དང་འབྲེལ་བ་ཆགས་དོན་མེད། དེར་མ་ཟད་༸གོང་ས་མཆོག་གིས་ཁོང་གི་མ་འོངས་པའི་ཡང་སྲིད་ཀྱི་ཐོག་ཐག་གཅོད་བྱེད་པར་བྲེལ་བ་མེད་ཅེས་གསལ་བར་གསུངས་ཟིན། དུས་རན་པ་དང་དགོས་མཁོ་བྱུང་བར་གཟིགས་སྐབས་ཁོང་གིས་གང་བདམས་པ་དེ་བོད་དང་བོད་མིའི་ཆོས་ཀྱི་དབུ་ཁྲིད་ཁོ་ན་རེད། རྩོམ་པ་པོས་འབུམ་རམས་པ་བློ་བཟང་སེང་གེའི་སྐོར་གྱི་དངོས་བྱུང་གློག་བརྙན་<<ཕྱི་མི། བོད་ཀྱི་སྤྲུལ་སྐུ་རྗེས་མ་ཡིན་སྲིད་དམ>>ཞེས་པར་གཞི་བཅོལ་ཏེ་ཆོས་དང་སྲིད་ཀྱི་གནད་དོན་རྣམས་མཉམ་དུ་བསྲེས་འདུག ངས་ཤེས་ཚོད་བྱས་ན་བོད་ཀྱི་སྤྲུལ་སྐུ་རྗེས་མ་དེ་འབུམ་རམས་པ་བློ་བཟང་སེང་གེའི་དབུ་ཁྲིད་དང་འབྲེལ་བ་ཡོད་མི་སྲིད། དེ་བས་གློག་བརྙན་བཟོ་བསྐྲུན་པ་རྣམས་ཀྱིས་དངོས་བྱུང་གློག་བརྙན་དེའི་མིང་གི་སྐོར་ལ་བསྐྱར་དུ་བསམ་ཞིབ་ཅིག་གནང་ན་ངོ་མ་མཁས་པ་རེད།

གཉིས་པ། རྩོམ་པ་པོས་༸གོང་མཆོག་གིས་ཕྱི་ལོ་ཉིས་སྟོང་བཅུ་གསུམ་ལོའི་ཕྱི་ཟླ་གསུམ་པའི་ཚེས་ཉེར་དགུ་ཉིན་རྒྱ་གར་བྱང་ཕྱོགས་ཀྱི་ས་ལུ་ག་རར་གསུང་ཆོས་སྐབས་སུ་གནང་བའི་གསུང་བཤད་དེའི་ཐོག་དོགས་སློང་བྱས་འདུག དེའང་རྩོམ་པ་པོས་བཤད་དོན། “༸གོང་ས་མཆོག་གིས་ཁོང་གི་མི་མང་རྣམས་ཀྱིས་ཁོང་ལ་དད་པ་བྱེད་ཀྱིན་ཡོད་གསུངས་པ་བདེན་པ་བདེན་རྐྱང་རེད། ཡིན་ཡང་ཁོང་གི་གསུང་ཕྱི་མ་སྟེ་ “ང་ལ་ལས་འགན་ཡོད་”གསུངས་པ་དེ་ཁོང་ལ་བོད་ཀྱི་སྤྱི་ཚོགས་སུ་“དབང་ཆ་མཐོ་ཤོས་དེ་ཡོད་”གསུངས་པ་དང་གཅིག་ཡིན་ལ། ལྷག་པར་དུ་དབུ་མའི་ལམ་གྱི་གནད་དོན་གྱི་ཐོག་ཁོང་གིས་དེ་གསུངས་པ་དང་ཁྱད་མི་འདུག་སྟེ་སྲིད་བྱུས་ལ་འགྱུར་བ་གཏོང་མི་ཆོག་པའི་རྣམ་འགྱུར་བསྟན་ཡོང་གི་འདུག” འདིར་ཡང་རྩོམ་པ་པོས་༸གོང་ས་མཆོག་གི་གསུང་བཤད་དེ་ལ་དོགས་སློང་བྱས་པར་རྒྱུ་མཚན་ཅི་ཡང་མི་འདུག༸གོང་ས་མཆོག་གིས་སྲིད་ཀྱི་དབང་ཆ་གཏད་ཟིན་རྗེས་ནས་སྲིད་དོན་གྱི་གསུང་བཤད་གནང་བ་ལས་གཡོལ་གང་ཐུབ་གནང་གི་ཡོད་ལ། གསར་འགོད་པ་རྣམས་བོད་ཀྱི་སྲིད་དོན་དབུ་ཁྲིད་གསར་བ་སྲིད་སྐྱོང་མཆོག་གི་ཕྱོགས་སུ་མངགས་ཀྱིན་ཡོད། ཁོང་གིས་ཁོང་གི་དམ་བཅའ་གསུམ་པོ་དེ་གསུང་བཞིན་འཛམ་གླིང་མི་མང་ལ་ཁོང་བོད་ཀྱི་སྲིད་ཀྱི་མགོ་ཁྲིད་མིན་པ་དང་། བོད་མི་མང་གིས་ཁོང་ལ་དད་པ་ཚད་མེད་བྱེད་པས་ན་ཁོང་ནི་དེ་དག་གི་མགྲིན་ཚབ་པ་ཡིན་པ་དང་། ཁོང་ཉིད་བོད་མི་ཡིན་པས་ན་འགན་ཁུར་ཡོད་པའི་སྐོར་བཅས་གསལ་བར་གསུང་གིན་ཡོད། དེ་བས་ཁོང་གིས་བོད་དང་བོད་མིའི་ཕྱོགས་སུ་ལས་འགན་ཡོད་པ་ཚོར་བ་ལྟར་ད་དུང་ཁོང་ལ་“ལས་འགན་ཡོད”པ་རེད། འདི་བསྐྱར་བཅོས་བྱས་ཏེ་ “ད་དུང་སྲིད་ཀྱི་དབང་ཆ་མཐོ་ཤོས་དེ་ཡོད་”ཅེས་བྲི་སའི་གནས་ཤིག་མེད་ལ་བྲི་བྱ་དེའང་ནོར་བ་རེད། ཁོང་གིས་སྲིད་ཀྱི་དབང་ཆ་ཆ་ཚང་འོས་བསྡུའི་ལམ་ནས་བདམས་པའི་དབུ་ཁྲིད་ལ་གནང་ཟིན་པར་མ་ཟད། འཛམ་བུ་གླིང་གིས་དེ་ཤེས་ཏེ་བློ་ཁོག་དང་གཞན་ཕན་ཅན་གྱི་ཐག་གཅོད་དེ་དང་བྱ་བ་དེ་ལ་བསྔགས་བརྗོད་ཀྱང་གནང་གིན་ཡོད།

རྩོམ་པ་པོས་ད་དུང་གླེང་དོན། “གལ་སྲིད་དེ་ལྟར་ཡིན་པ་དང་ཏཱ་ལའི་བླ་མ་རྒན་ཡོལ་གནང་རྗེས་ཀྱི་ “ལོ་གཉིས་”ཀྱི་ནང་དུ་ཁོང་གི་སྲིད་བྱུས་དེ་ལམ་ལྷོང་བྱུང་ཡོད་མེད་ཀྱི་ཐོག་བགྲོ་གླེང་ལྷུག་པོ་ཞིག་བྱེད་མ་ཐུབ་ན་བོད་མི་བཙན་བྱོལ་བ་རྣམས་ལ་མང་གཙོ་ཡོད་པའི་གཏམ་དེ་ནི་གད་མོ་སློང་བྱེད་ཅིག་ཏུ་

གྱུར་བ་རེད། འདི་རྒྱ་ནག་གཞུང་གིས་རྟག་ཏུ་ཏ་ལའི་བླ་མ་ཁུངས་བཙུན་མིན་པ་དང་གཞུང་དྲང་མིན་པའི་སྐྱོན་བརྗོད་བྱེད་པ་དེ་ངོ་མ་ཡིན་པའི་བདེན་དཔང་ལྟ་བུར་གྱུར་འདུག གང་ལགས་ཤེ་ན་ཝོལ་སི་ཁྲི་རི་ཁྲི་དུས་དེབ་ཐོག་ཏུ་འདི་ལྟར་བཀོད་འདུག ‘རྒྱ་ནག་གཞུང་གིས་ཏཱ་ལའི་བླ་མ་རྒན་གཡོལ་ཞུས་པ་དེ་ནི་རྒྱལ་སྤྱིའི་ཚོགས་སྡེ་ཁག་ཡིད་དབང་འཕྲོག་ཕྱིར་འཁྲབ་པའི་གཡོ་སྒྱུ་ཞིག་ལ་བརྩི་གིན་ཡོད།’ ” རྩོམ་པ་པོས་༸གོང་ས་མཆོག་གིས་ཁོང་གི་སྲིད་བྱུས་དབུ་མའི་ལམ་དེ་ཉིད་ལམ་ལྷོང་ཡོད་མེད་ཀྱི་ཐོག་ལ་བགྲོ་གླེང་ལྷུག་པོ་ཞིག་གནང་མི་ཐུབ་པའི་ཆེད་དུ་བར་གྱང་ཞིག་བསླངས་འདུག་བསམ་པར་འདྲ། འདི་ནི་རྩོམ་པ་པོས་བཤད་པའི་ཆོ་མེད་པའི་སྐད་ཆ་ཆེས་སྡུག་ཤོས་དེ་ཡིན་ངེས། ༸གོང་ས་མཆོག་ནི་མཐའ་མར་བོད་ཀྱི་གནད་དོན་བོད་མི་ཚོས་ཐག་གཅོད་ཀྱིན་ཡོད་ལ་ཁོང་ནི་གནད་དོན་དེའི་ཐོག་ཕྱི་གསལ་ནང་གསལ་ཡིན་གསུང་མཁན་དེའི་ཡན་ན་མེད་པ་དེ་རེད། ༸གོང་ས་མཆོག་གིས་དབུ་མའི་ལམ་གྱི་ལྟ་བ་དེའི་གྲོས་མགོ་བཏོན་ཡོད་ཀྱང་དེ་ནི་བོད་མི་མང་གི་སྐུ་ཚབ་ཚོས་ཚོགས་ཆེན་དང་སྤྱི་འཐུས་ཚོགས་ཏེ་གྲོས་མོལ་ལེགས་པར་བྱས་རྗེས་རྒྱལ་ཁབ་ཀྱི་སྲིད་བྱུས་སུ་བཟུང་བ་རེད། གལ་སྲིད་ང་ཚོ་བོད་པ་རྣམས་གནད་དོན་འདི་འདྲ་བའི་ཐོག་ལ་བགྲོ་གླེང་ལྷུག་པོར་བྱེད་མ་ཐུབ་ཚེ་ང་ཚོ་འཆུག་པ་རེད། ང་ཚོས་འདི་ལ་གདོང་ལེན་བྱེད་དགོས། རྩོམ་པ་པོས་འདོད་པའི་ལྡོག་ཕྱོགས་ཏག་ཏག་སྟེ་བོད་རིགས་འདུས་སྡོད་ཀྱི་ས་ཁུལ་ཁག་ཏུ་བོད་དོན་ཐོག་བགྲོ་གླེང་བྱེད་པ་མང་པོར་མཐོང་རྒྱུ་ཡོད།

ཉེ་དུས་ཚོགས་པའི་བོད་རྒྱལ་ཡོངས་རང་བཙན་ལྷན་ཚོགས་དང་རྡ་སར་ཚོགས་པའི་རང་བཙན་ཚོགས་འདུ། ནུབ་ཕྱོགས་སུ་སྨྲ་བརྗོད་རང་དབང་ལ་བདེན་དཔང་བྱེད་པ་དང་ང་ཚོར་གལ་གནོད་ཆེ་བའི་གནད་དོན་རྣམས་ཀྱི་ཐོག་རང་དབང་ངང་གྲོས་མོལ་བྱེད་ཀྱིན་ཡོད། དེར་མ་ཟད་སྤྱི་འཐུས་ཀརྨ་ཆོས་འཕེལ་གྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་ནང་དུ་རང་སྒེར་གྱིས་རང་བཙན་ལ་འཛིན་པའི་ལྟ་ཚུལ་བརྗོད་པ་འདི་དག་གིས་སྨྲ་བརྗོད་རང་དབང་དང་རང་དབང་དེ་བདག་སྲུང་བྱེད་བཞིན་པ་མཚོན་གིན་མི་འདུག་དམ།

༸གོང་ས་མཆོག་གིས་ང་ཚོའི་ཤིན་ཏུ་རིང་བའི་ལོ་རྒྱུས་ཀྱི་ཆེས་དཀའ་ཁག་ཅན་གྱི་དུས་སྐབས་སུ་གཞོན་ནུའི་དུས་ནས་རྒན་པོའི་དུས་བར་དུ་བོད་དང་བོད་མིར་ཞབས་ཕྱི་བསྒྲུབས་ཡོད་ཅིང་། ཁོང་གིས་ང་ཚོར་གནང་བའི་མང་གཙོ་སྟེ་རྩོམ་པ་པོས་ངོས་འཛིན་ཐོབ་ཡོད་པའི་ཕྱིར་བཞག་དངོས་པོ་དེ་གཅིག་པུ་ང་ཚོས་ཚོད་གཞི་གཅིག་གིས་ཕྱིར་སྤྲོད་ཐབས་བྲལ་བའི་ལེགས་སྐྱེས་ཤིག་རེད།༸གོང་ས་མཆོག་གིས་བོད་ཀྱི་སྤྱི་ཚོགས་དང་། ངོ་བོ། ལེགས་བྱང་། བོད་དོན་བཅས་གནས་པའི་ཕྱིར་དུ་བློས་བཏང་ཚོད་མེད་གནང་ཡོད་ལ། ལེགས་སྐྱེས་གྲངས་མེད་ཕུལ་ཡོད་ནའང་། ཕྱིར་དེའི་ཚབ་དུ་ཅི་ཡང་སྦྱིན་དགོས་པའི་རེ་བ་གནང་གིན་མེད། ༸གོང་ས་མཆོག་གིས་ཁོང་གི་འོས་འགན་གྱི་སྐལ་བ་ལས་ལྷག་པ་ཞིག་གནང་ཡོད་པས་ད་མི་རིགས་ཀྱི་གནད་དོན་ཁ་ལོ་བསྒྱུར་རྒྱུ་དེ་ང་ཚོའི་ལས་འགན་རེད། བོད་ཀྱི་མ་འོངས་པ་དེ་༸གོང་ས་མཆོག་གི་ཕྱག་ཏུ་མེད་པར་བོད་མི་ཚོའི་ལག་ཏུ་ཡོད། ལྷག་པར་དུ་གཞོན་སྐྱེས་ཚོའི་ལག་ཏུ་ཡོད།

༸གོང་ས་མཆོག་གིས་ང་ཚོའི་ཆེད་དུ་གང་གནང་བ་རྣམས་བཀའ་དྲིན་རྗེས་སུ་དྲན་པའི་ཐོག་ནས་ང་ཚོ་རང་ཉིད་ཀྱི་སྐལ་བ་དེ་བསྒྲུབ་པའི་དམ་བཅའ་འཇོག ལྟ་ཚུལ་སྣང་མང་གི་ལམ་ནས་བོད་དོན་ལ་གོ་རྟོགས་ངེས་ཤེས་འཕེར་བ་ཞིག་སྐྱེས་པ་དེར་གཞི་བཅོལ་ནས་བྱ་བ་སྒྲུབ་པ་དང་ཐག་གཅོད་གནང་བ་སོགས་གནང་ཐུབ་ཚེ་དེ་ནི་ཐབས་ལམ་ཡག་ཤོས་སུ་མཐོང་ངོ་།།

ང་ཧ་ལས་སོང་།

2013-04-29T02:02:00.000-07:00

བོད་མི་མང་སྤྱི་འཐུས་བློ་བཟང་ཡེ་ཤེས་ཀྱིས་བརྩམས།

འཇམ་དབྱངས་གྲགས་པས་བསྒྱུར།

རྒྱ་ནག་གཞུང་གིས་བོད་ལ་བཙན་འཛུལ་བྱས་པའི་ལོ་ངོ་བཅུ་ཕྲག་འགའི་རིང་༸གོང་ས་མཆོག་འཛམ་གླིང་ཞི་བདེ་སྐྲུན་མཁན་གྱི་མཚན་སྙན་རྒྱས་བཞིན་པར་ཁ་གཏོད་གཅོག་ཕྱིར་དང་། ཁྲིམས་འགལ་གྱིས་བོད་ལ་བཙན་འཛུལ་བྱས་པ་དེ་ཁྲིམས་མཐུན་བྱ་ཕྱིར། བླ་ན་མེད་པའི་དབུ་ཁྲིད་༸གོང་ས་སྐྱབས་མགོན་ཆེན་པོ་མཆོག་ལ་རྒྱུན་མི་ཆད་པར་མཚན་སྨད་བྱེད་བཞིན་ཡོད། སྐྱོན་བརྗོད་འདི་དག་ལ་བདེན་པའི་ཆ་ཅུང་ཟད་ཀྱང་མེད་ལ་འཛམ་གླིང་གི་སྐྱེ་བོ་རྣམས་ལའང་མགོ་སྐོར་བཏང་ཐུབ་མེད་མོད། ཡིན་ཡང་འཛམ་གླིང་ས་ཁུལ་གང་སར་གནས་པའི་བོད་མི་རྣམས་ཁོང་ཚོའི་འཐབ་རྩོད་ཀྱི་ཆེས་དཀའ་ཚེགས་ཅན་གྱི་དུས་སྐབས་ལ་ཁོ་ཚོ་བྱམས་ཀྱིས་སྐྱོང་བར་མཛད་པའི་བླ་ན་མེད་པའི་དབུ་ཁྲིད་ཁོང་ལ་གཞི་མེད་བསྙོན་འཛུགས་ཀྱིས་སྐྱོན་བརྗོད་བྱས་པར་ཁོང་ཁྲོ་དང་བློ་ཕམ་ཚད་མེད་ཡོང་གིན་ཡོད།

ཉེ་བའི་དུས་ནས་བཟུང་འཇམ་དབྱངས་ནོར་བུའི་ཕྱོགས་ནས་ཀྱང་སྐྱོན་བརྗོད་དང་མཚན་སྨད་མང་དུ་བྱུང་བ་དེས་བོད་མི་རྣམས་ལ་སེམས་ཁྲལ་གྱི་མཐོ་རླབས་གཞན་ཞིག་འཕྱུར་དུ་བཅུག་ཡོད། ཁོང་གིས་ཉེ་དུས་བྲིས་པའི་རྩོམ་ཡིག་༼བོད་ཀྱི་ཡང་སྲིད་རྗེས་མ་ཨེ་༽ཞེས་པའི་ནང་དུ་༸གོང་ས་སྐྱབས་མགོན་ཆེན་པོ་མཆོག་ལ་གཞི་མེད་ཀྱི་བསྙོན་འཛུགས་དང་དྲང་བདེན་མིན་པའི་གཏམ་མང་དུ་སྨྲས་འདུག་པ་དེ་དག་གིས་ང་ཧ་ལས་ཤིང་ཧོན་འཐོར་བར་བྱས་བྱུང་། རྩོམ་ཡིག་དེའི་ནང་དུ་ཁོས་༸གོང་ས་སྐྱབས་མགོན་ཆེན་པོ་མཆོག་གིས་ཉེ་ཆར་དབུ་མའི་ལམ་གྱི་གྲུབ་འབྲས་དང་སྲིད་བྱུས་དེའི་དགོས་པ་བཅས་ཀྱི་ཐོག་གནང་བའི་བཀའ་སློབ་དེ་དག་ནི་ “སྲིད་བྱུས་དེ་ལ་འགྱུར་བ་གཏོང་མི་ཆོག་ཚུལ”་ཡིན་ལུགས་དང་༸གོང་ས་མཆོག་གིས་“ད་དུང་བོད་ཀྱི་སྤྱི་ཚོགས་ཀྱི་སྲིད་ཀྱི་དབང་ཆ་མཐོ་ཤོས་དེ་འཛིན་བཞིན་ཡོད་པའི་”བསམ་ཚུལ་བཏོན་འདུག

འཇམ་དབྱངས་ནོར་བུ་ལགས་ཀྱིས་བོད་ཀྱི་སྤྱི་ཚོགས་སུ་མང་གཙོ་ཚད་ལྡན་ཡོད་མེད་ལ་དོགས་པ་བྱེད་བཞིན་བཤད་དོན“གལ་སྲིད་དེ་ལྟར་ཡིན་པ་དང་ཏཱ་ལའི་བླ་མ་རྒན་ཡོལ་གནང་རྗེས་ཀྱི་ལོ་གཉིས་ཀྱི་ནང་དུ་ཁོང་གི་སྲིད་བྱུས་དེ་ལམ་ལྷོང་བྱུང་ཡོད་མེད་ཀྱི་ཐོག་བགྲོ་གླེང་ལྷུག་པོ་ཞིག་བྱེད་མ་ཐུབ་ན་”བོད་མི་བཙན་བྱོལ་བ་རྣམས་ལ་མང་གཙོ་ཡོད་པའི་གཏམ་དེ་ནི་དགོད་མོ་སློང་བྱེད་ཅིག་ཏུ་གྱུར་བ་རེད་ཟེར། འདི་རྒྱ་ནག་གཞུང་གིས་རྟག་ཏུ་༸གོང་ས་མཆོག་ལ་ཁུངས་བཙུན་མིན་པ་དང་གཞུང་དྲང་མིན་པའི་སྐྱོན་བརྗོད་བྱེད་པ་དེ་ངོ་མ་ཡིན་པའི་བདེན་དཔང་ལྟ་བུར་གྱུར་འདུག གང་ལགས་ཤེ་ན་ཝོལ་སི་ཁྲི་རི་ཁྲི་དུས་དེབ་ཐོག་ཏུ་འདི་ལྟར་བཀོད་འདུག “རྒྱ་ནག་གཞུང་གིས་ཏཱ་ལའི་བླ་མ་རྒན་གཡོལ་ཞུས་པ་དེ་ནི་རྒྱལ་སྤྱིའི་ཚོགས་སྡེ་ཁག་ཡིད་དབང་འཕྲོག་ཕྱིར་འཁྲབ་པའི་གཡོ་སྒྱུ་ཞིག་ལ་བརྩི་གིན་ཡོད།”

འཇམ་དབྱངས་ནོར་བུས་མི་འདོད་པའི་ངང་ད་དུང་བཤད་དོན “དེ་བས་༸གོང་ས་མཆོག་གིས་བསམ་ཚུལ་གསུང་པར་ཨུ་ཚུགས་བྱས་ན་མང་གཙོའི་རང་བཞིན་ལྡན་པའི་བགྲོ་གླེང་ཞིག་ཡོང་ཐབས་བྲལ་བ་རེད།” ༸གོང་ས་མཆོག་གིས་བོད་དོན་ཐོག་དགོངས་ཚུལ་འདོན་མི་ཆོག་པའི་བསམ་ཚུལ་དེ་ནི་བོད་བཙན་བྱོལ་གཞུང་གི་བཅའ་ཁྲིམས་དང་འགལ་བ་རེད། ཅིའི་ཕྱིར་ཞེ་ན་བཅའ་ཁྲིམས་ཀྱི་དོན་ཚན་དང་པོ་སྤྱིའི་ལམ་སྟོན་ཞེས་པར་༸གོང་ས་མཆོག་ནི་ཆོས་ལུགས་ཀྱི་དབུ་ཁྲིད་ཡིན་པར་མ་ཟད་རང་དབང་གི་མགྲིན་ཚབ་དང་། སློབ་སྟོན་པ། བོད་ཀྱི་ཆིག་སྒྲིལ་གྱི་མཚོན་རྟགས་བཅས་ཡིན། ཁོང་གིས་དུས་ནས་དུས་སུ་བོད་ཀྱི་འཐབ་རྩོད་དང་། རིག་གཞུང་། ཆོས་ལུགས། བོད་ཀྱི་ཁེ་ཕན་བཅས་ཀྱི་ཐོག་ལ་དགོངས་ཚུལ་ངེས་པར་དུ་གསུང་དགོས་ཞེས་འཁོད་ཡོད།
ད་དུང་དྲན་གསོ་གཏང་དགོས་པ་ཞིག་ལ་བོད་མི་ས་ཡ་དྲུག་གིས་༸གོང་ས་མཆོག་བོད་རྒྱལ་ཁབ་དང་མི་མང་གི་ཆོས་སྲིད་གཉིས་ཀྱི་དབུ་ཁྲིད་དུ་བཞུགས་དགོས་ཞེས་གསོལ་བ་ཕུར་ཚུགས་སུ་བཏབ་དང་འདེབས་བཞིན་ཡོད།

འཇམ་དབྱངས་ནོར་བུས་རྩོམ་མཇུག་བསྡུ་སྐབས་བཤད་དོན། “དེ་བས་༸གོང་ས་མཆོག་ལ་ཁོང་གི་མང་གཙོའི་མཚན་མཐོང་མི་ཆག་པ་བྱེད་དགོས་པ་དང་ཁོང་གི་རྟག་བརྟན་འགྱུར་མེད་ཀྱི་ལྟ་བ་དབུ་མའི་ལམ་དེ་ཉིད་དེ་ལམ་ལྷོང་མི་ཡོང་བའི་རྐྱེན་རྩར་མི་འགྱུར་བ་བྱེད་དགོས་པའི་སྐུལ་མ་བྱེད་རྒྱུ་གལ་ཆེན་པོ་ཆགས་ཡོད། དབང་ཆ་ལས་བབས་པ་དེ་༸གོང་ས་མཆོག་སྐུ་སྒེར་གྱི་ཐུགས་འདོད་ཡིན་པ་བཤད་མི་དགོས་པ་རེད། ཡིན་ཡང་སྐུ་ཚེ་གང་བོར་བདག་ཉར་གནང་བའི་གཞུང་གི་གོ་གནས་མཐོ་ཤོས་ལས་རྒན་གཡོལ་ཞུ་བའི་སྐབས་ཐོག་དང་པོར་ཁོང་ལ་མི་བདེ་བ་ཞིག་དང་། སེམས་ཁྲལ་གྱི་གཞི་ཞིག བསམ་བློ་གཉིས་པ་ཞིག་གཏང་དགོས་པ་བཅས་གྱུར་ཡོད་ཀྱང་སྲིད།”

ངའི་ལོ་ཚོད་ཀྱི་གཞོན་སྐྱེས་མང་པོ་ཞིག་སྐུ་ཞབས་འཇམ་དབྱངས་ནོར་བུ་ལགས་ཀྱི་ཉམས་ཞིབ་དང་སྲིད་དོན་གྱི་རྩོམ་ཡིག་ལ་བརྟེན་ནས་འཚར་བ་རེད་ལ། རྩོམ་ཡིག་དེ་དག་ནི་རྒྱ་ནག་གི་རྫུན་བཤད་ལ་ནུས་པ་ལྡན་པའི་ལན་ཞིག་ཡིན་པར་མ་ཟད། དེ་དག་གིས་མི་རིགས་རིང་ལུགས་ཀྱི་ལྟ་བ་གང་མཐོར་སྤེལ་བ་དང་རྒྱལ་ཁབ་ཀྱི་དོན་དུ་འཐབ་རྩོད་བྱེད་པའི་སྤོབས་པ་དང་གདེང་ཚོད་སྦྱིན་པར་བྱེད་ཀྱིན་རེད། ཡིན་ཡང་༸གོང་ས་མཆོག་ལ་སྐྱོན་བརྗོད་ཞུ་བཞིན་པ་འདི་དག་ནི་༸གོང་ས་མཆོག་གི་རང་ཉིད་ཡལ་བར་དོར་བའི་བློས་གཏོང་དང་དབུ་ཁྲིད་ལ་དྲང་པོ་མིན་པར་མ་ཟད། བོད་མི་རྣམས་ཀྱི་ཆིག་སྒྲིལ་དང་འཐབ་རྩོད་ལ་གནོད་པའི་ལས་ཤིག་རེད། འདི་དག་ནི་༸གོང་ས་མཆོག་གིས་བོད་མི་རྣམས་དང་བོད་དོན་འཐབ་རྩོད་ལ་བཅངས་པའི་བཀའ་དྲིན་རྗེས་སུ་དྲན་སྟངས་མ་རེད།

དེ་བས་ངས་ནི་ཁོས་ད་ཐེངས་དང་དེ་སྔར་༸གོང་ས་མཆོག་ལ་སྐྱོན་བརྗོད་ཞུས་པ་དེ་དག་དང་ལེན་ཞུ་ཐུབ་པ་མི་འདུག དེ་ལས་ལྡོག་ཏེ་གཞི་མེད་ཀྱི་མཚན་སྨད་དང་སྐྱོན་བརྗོད་འདི་དག་གིས་ང་ངོ་ཚ་བར་བྱས་བྱུང་ལ་བོད་ཀྱི་གཞོན་སྐྱེས་མང་པོ་ཞིག་ཀྱང་བློ་ཕམ་དང་ཡིད་ཆད་ཀྱི་གནས་སུ་བསྐྱལ་ཡོད་པར་གདོན་མི་ཟ། དོན་དུ་༸གོང་ས་མཆོག་ལྟ་བུའི་རང་དབང་དང་མང་གཙོ་ལ་དགའ་བའི་དབུ་ཁྲིད་ཅིག་ང་ཚོར་ཐོབ་པ་དེ་གཟི་བརྗིད་དང་སྤོབས་པ་རུ་སྒོམ་འོས། བོད་མི་ཡོངས་དང་འཛམ་གླིང་གི་མི་མང་རྣམས་དོན་དངོས་འདིའི་བདེན་དཔང་རེད། ད་ནས་བཟུང་ང་ཚོ་དྲང་བདེན་ལ་གཞོལ་ཞིང་ཉེན་ཁ་ཆེ་བའི་འཐབ་རྩོད་ཀྱི་རྒྱང་བསྐྱོད་འདིར་སླར་ཡང་རྙོག་ཟིང་མི་སློང་། ང་ཚོ་༸གོང་ས་མཆོག་དང་བོད་མིའི་སྒྲིག་འཛུགས་ཀྱི་འོག་ཏུ་ཆིག་སྒྲིལ་ངང་གནས། བོད་རྒྱལ་ལོ།།

Robert Frost quotes རོ་བྷེ་ཊ་ཧྤ་རོ་སི་ཊིའི་འཁོལ་ཚིག

2013-03-03T03:38:00.000-08:00

The brain is a wonderful organ; it starts working the moment you get up in the morning and does not stop until you get into the office
ཀླད་པ་འདི་ཡན་ལག་ཡ་མཚན་ཅན་ཞིག་རེད། ཞོགས་པར་ལངས་པ་དང་འདིས་ལས་ཀ་བྱེད་མགོ་འཛུགས་ཤིང་ལས་ཁུངས་སུ་མ་སླེབས་བར་དུ་མཚམས་མི་བཞག
A mother takes twenty years to make a man of her boy, and another woman makes a fool of him in twenty minutes.
ཨ་མ་ཞིག་ལ་མཚོན་ན་རང་གི་བུ་དེ་མི་ཆ་ཚང་བར་བྱེད་པར་ལོ་ཉི་ཤུ་ཙམ་འགོར་མོད། བུད་མེད་གཞན་ཞིག་གིས་ཁོ་རྨོངས་པར་བྱེད་པར་སྐར་མ་ཉི་ཤུ་ལས་མི་འགོར།
Two roads diverged in a wood and I - I took the one less traveled by, and that has made all the difference.
ནགས་གསེབ་ནས་ལམ་གཉིས་ཕྱོགས་སོ་སོར་བསྲིངས་འདུག ངས་མི་དེ་ཙམ་སོང་མེད་པའི་ལམ་དེ་བདམས་པ་ཡིན། དེས་ལེགས་པའི་གྲུབ་འབྲས་འདི་རྣམས་བྱུང་བ་རེད།
Half the world is composed of people who have something to say and can't, and the other half who have nothing to say and keep on saying it.
འཛམ་གླིང་ཕྱེད་ཀ་དེ་ཅི་ཞིག་བཤད་རྒྱུ་ཡོད་ཀྱང་བཤད་མི་ཐུབ་པའི་མིས་གྲུབ་འདུག་ཅིང་། ཕྱེད་ཀ་གཞན་དེ་ཅི་ཡང་བཤད་མེད་ཀྱང་མཚམས་མེད་པར་ཤོད་བཞིན་པའི་མིས་གྲུབ་འདུག
A bank is a place where they lend you an umbrella in fair weather and ask for it back when it begins to rain.
དངུལ་ཁང་ནི་གནམ་གཤིས་ཡག་དུས་ཁྱེད་ལ་ཆར་གདུགས་གཡར་ཞིང་། ཆར་མགོ་བཙུགས་པ་དང་ཆར་གདུགས་ཕྱིར་ཁུར་འགྲོ་བའི་ས་ཆ་ཞིག་རེད།
Poetry is when an emotion has found its thought and the thought has found words.
ཚོར་བས་བསམ་བློ་རྙེད་ཅིང་། བསམ་བློས་ཐ་སྙད་རྙེད་པ་ལ་སྙན་ངག་ཅེས་འབོད།

བཟི་ཞིག

2013-02-26T09:24:00.000-08:00



ཆར་ལེས་བྷོ་ཌེ་ལེར་གྱིས་བརྩམས། ལུའུ་སི་སིམ་སཱོན་གྱིས་དབྱིན་ཡིག་ཏུ་བསྒྱུར། འཇམ་དབྱངས་གྲགས་པས་བོད་ཡིག་ཏུ་བསྒྱུར།
ཁྱེད་རྟག་ཏུ་བཟི་བར་འོས། དེ་ནི་ཁྱེད་ལ་ཡོད་པའི་ལམ་བུ་གཅིག་པུ་དེ་རེད། ཁྱེད་ཀྱི་སྒལ་བ་གཅོག་པར་བྱེད་ཅིང་། ཁྱེད་ས་ལ་སྦྱོར་བར་བྱེད་པའི་དུས་ཚོད་ཀྱི་ལྗིད་ཚོད་འཇིགས་པོ་དེ། ཚོར་མི་འདོད་ན། ཁྱེད་མུ་མཐུད་དུ་བཟི་བར་འོས། འོན་ཀྱང་ཅི་ཞིག་གིས་བཟིའམ་ཞེ་ན། ཆང་ངམ་སྙན་ངག ཡང་ན་དགེ་བ་སོགས་ཁྱེད་ཀྱི་འདོད་པ་བཞིན་གདམ་ཆོག གང་ལྟར་ཁྱེད་བཟི་བར་བྱེད་དགོས།

མཚམས་ཤིག་ལ། ཕོ་བྲང་ཞིག་གི་སྐས་འཛེག་ཐོག་གམ་ཡུར་བ་ཞིག་གི་འགྲམ་རྩྭ་ལྗང་ཁུའི་ཁྲོད། ཡང་ན་ཁེར་རྐྱང་གི་གདུང་བས་གྲང་ཤུར་ཤུར་བྱེད་པའི་ཁྱེད་ཀྱི་ཉལ་ཁང་གང་རུང་ནས་ཁྱེད་གཉིད་ལས་སད་བྱུང་ན། བཟི་ཅུང་དྭངས་ཡོད་པའམ་དྭངས་ཡག་གྱུར་ཟིན་ཀྱང་སྲིད་པས། དེ་དུས་ཁྱེད་ཀྱིས་རླུང་བུ་དང་། རྦ་རླབས། སྐར་མ། བྱ། ཆུ་ཚོད་བཅས་ཏེ། འཕུར་བཞིན་པ་དེ་ཚོར། སྨྲེ་ངག་འདོན་བཞིན་པ་དེ་ཚོར། རིལ་བཞིན་པ་དེ་ཚོར། གླུ་ལེན་བཞིན་པ་དེ་ཚོར། གཏམ་ཤོད་བཞིན་པ་དེ་ཚོར། ད་ལྟ་དུས་ཚོད་ཅི་ཙམ་ལ་སླེབས་ཡོད་པའི་སྐོར་སྐད་ཆ་དྲིས་དང་། རླུང་བུ་དང་། རྦ་རླབས། སྐར་མ། བྱ། ཆུ་ཚོད་བཅས་ཀྱིས་ཁྱེད་ལ་ “ད་ལྟ་ནི་ར་བཟི་བའི་དུས་ལ་སླེབས་ཡོད། ཁྱེད་དུས་ཚོད་ཀྱི་བྲན་གཡོག་བྱེད་མི་འདོད་ན་བཟི་ཞིག མུ་མཐུད་དུ་བཟི་ཞིག ཆང་ངམ་སྙན་ངག ཡང་ན་དགེ་བ་བཅས་ཁྱེད་ཀྱི་འདོད་པ་གང་ཡོད་པ་དེའི་ཐོག་བཟི་ཞིག” ཅེས་ལན་འདེབས་ངེས་སོ།།

Be Drunk

by Charles Baudelaire

translated by Louis Simpson

You have to be always drunk. That's all there is to it—it's the only way. So as not to feel the horrible burden of time that breaks your back and bends you to the earth, you have to be continually drunk.

But on what? Wine, poetry or virtue, as you wish. But be drunk.

And if sometimes, on the steps of a palace or the green grass of a ditch, in the mournful solitude of your room, you wake again, drunkenness already diminishing or gone, ask the wind, the wave, the star, the bird, the clock, everything that is flying, everything that is groaning, everything that is rolling, everything that is singing, everything that is speaking. . .ask what time it is and wind, wave, star, bird, clock will answer you: "It is time to be drunk! So as not to be the martyred slaves of time, be drunk, be continually drunk! On wine, on poetry or on virtue as you wish."

སྨོན་འོས་པའི་བླ་སྲོག

2013-02-15T07:32:00.002-08:00

—-དགེ་འདུན་ཆོས་འཕེལ་དང་དོན་གྲུབ་རྒྱལ་གཉིས་ལ་ཅུང་ཙམ་དཔྱད་པ།

བསྟན་འཛིན་ཉིན་བྱེད་ཀྱིས་བརྩམས། འཇམ་དབྱངས་གྲགས་པས་བསྒྱུར།

མི་རིགས་ཤིག་གི་ཚེ་སྲོག་དེ་མི་རིགས་དེའི་ལོ་རྒྱུས་དང་། རིག་གནས། རྩོམ་རིག ཆོས་ལུགས། སྒྱུ་རྩལ་བཅས་ཀྱི་ཐོག་གནས་ཡོད། འདི་ཚོ་རྒྱ་གར་ནང་གི་བོད་ཀྱི་སློབ་གྲྭ་ཁག་ཏུ་སློབ་ཀྱིན་ཡོད་མོད། བོད་པའི་སློབ་མ་དེ་དག་གི་དོ་སྣང་བྱེད་སྟངས་ལ་བལྟས་ཏེ་བཤད་ན་ཡར་སྐྱེད་ཆེན་པོ་ཕྱིན་མེད། འདིའི་རྒྱུ་རྐྱེན་གཅིག་ནི་ང་ཚོས་སློབ་མ་དེ་དག་ལ་རང་གི་བསམ་བློ་ཡར་རྒྱས་འགྲོ་བའི་ཐབས་ལམ་ཞིག་བརྒྱུད་ནས་སློབ་ཁྲིད་བྱེད་མ་ཐུབ་པས་རེད། ང་ཚོའི་སློབ་མ་དེ་དག་ལ་དྲི་བ་འདྲི་བའི་སྐུལ་མ་བྱེད་ཀྱིན་མེད།

ང་རང་ཆུང་ངུའི་དུས་སུ་ཕ་མ་གཉིས་ཀྱིས་མཆོད་བཤམས་ནང་གི་ལྷ་སྐུ་རྣམས་ཀྱི་ཁྲོད་དུ་བཞག་ཡོད་པའི་རྒྱལ་བ་རིན་པོ་ཆེའི་རང་རྣམ་ངོས་ཀྱི་ཡུལ་དང་ངོས་ཀྱི་མི་དམངས་ལ་བལྟས་མྱོང་བ་དྲན་གསོས་ཀྱིན་འདུག དེབ་དེའི་ནང་དུ་༸རྒྱལ་བ་རིན་པོ་ཆེ་དང་མའོ་གཉིས་ཀྱིས་བཞིན་འཛུམ་གྱིས་ཁེངས་ནས་ཕན་ཚུན་ཁ་གཏགས་སྤྲོད་རེས་གནང་བའི་བརྙན་པར་འདུག གཅིག་དགུ་བརྒྱད་ཅུའི་ནང་དུ་བོད་དེ་རིག་གནས་གསར་བརྗེའི་གཏོར་བཤིག་ལས་ཐར་ཡོད་མོད། དེ་དུས་བོད་ཀྱི་སྲོལ་རྒྱུན་དང་འབྲེལ་བ་ཀུན་གཏོར་བཤིག་བཏང་ཟིན།

དེའི་རྐྱེན་པས་ངའི་དགེ་རྒན་དང་། ཕ་མ། གཞན་ཡང་སྤྱི་ཚོགས་ཧྲིལ་པོས་ང་ལ་མའོ་ནི་གདོན་འདྲེ་དང་༸གོང་ས་མཆོག་ནི་ལྷ་ཡིན་པ་བཤད་བྱུང་། འདི་ནི་ང་ཚོའི་རྒྱ་ནག་གི་རྫུན་པ་དང་གཉའ་གནོན་ལ་འགྲེལ་བཤད་བྱེད་སྟངས་ཤིག་རེད། ཡིན་ཡང་རྗེས་སུ་ངས་ང་ཚོའི་བཤད་ཚུལ་འདི་དག་ལ་ཚོད་ངེས་ཅན་ཞིག་ཡོད་པ་ཤེས་བྱུང་། གོང་དུ་བཤད་པ་བཞིན་ངས་ལྷ་དང་འདྲེ་གཉིས་ཐུག་སྟེ་འཛུམ་མདངས་སྟོན་རེས་བྱེད་བཞིན་པར་འགྲེལ་བཤད་བྱེད་མ་ཤེས། ང་ལ་ཕ་མ་དང་དགེ་རྒན་རྣམ་པར་དྲི་བ་འདི་འདྲི་བའི་བློ་ཁོག་མ་རྙེད། ལྷན་སྐྱེས་སུ་གནས་པའི་ཞེད་སྣང་ཞིག་གམ། ངོ་ཚ་ཞིག ཡང་ན་ཞན་ཆ་ཞིག་གིས་ང་ལ་དེ་ལྟར་བྱེད་པར་འགོག་རྐྱེན་བྱས་བྱུང་།

དེ་བཞིན་སློབ་གྲྭའི་ནང་དུ་ཁྲིད་བཞིན་པའི་ཆོས་འབྱུང་དེ་དག་གི་ནང་དུའང་སྒྱུ་འཕྲུལ་དང་། གནའ་བོའི་རྟོག་སྒྲུང་། ཡ་མཚན་ཅན་གྱི་བྱུང་བ་བཅས་འཆད་བཞིན་ཡོད་ལ། ད་དུང་མིག་བཙུམས་ཐེངས་གཅིག་ལ་རྒྱ་མཚོ་བརྒལ་ནས་འཕུར་ཐུབ་པའི་དྲང་སྲོང་གི་སྒྲུང་ཡང་འཆད་ཀྱིན་ཡོད། ང་ཚོ་སློབ་ཕྲུག་རྣམས་ལ་མཚོན་ན་སྒྲུང་དེ་དག་ཤིན་ཏུ་སྙན་པོ་འདུག ཡིན་ཡང་མི་བདེ་བ་ཞིག་ཡོད་པ་ནི་དགེ་རྒན་དག་གིས་སྒྲུང་དེ་དག་དངོས་ཡོད་ཡིན་པར་ཡིད་ཆེས་བྱེད་པར་མ་ཟད། ང་ཚོ་ལའང་སྒྲུང་དེ་དག་མིའི་བསམ་བློའི་རྟོག་འཆར་རྣམས་ངར་སྐྱེད་ཕྱིར་ཆེད་དུ་བཟོས་པའི་སྒྲུང་མིན་པར་དངོས་ཡོད་ཡིན་པར་ཡིད་ཆེས་བྱེད་དུ་བཅུག ཡིན་ཡང་ཁོ་ཚོས་ང་ཚོ་ཕལ་ཆེ་བར་གནད་དོན་འདིའི་ཐོག་ཨུ་ཚུགས་བྱེད་ཐུབ་མེད།

འདིའི་གྲུབ་འབྲས་ནི་ལེགས་པོ་ཞིག་མ་རེད་དེ་སློབ་ཕྲུག་མང་པོ་ཞིག་འཚར་ལོངས་བྱུང་སྐབས་བོད་སྐོར་གྱི་སྒྲུང་ལ་དོ་སྣང་བརླག་འགྲོ་གིན་ཡོད། ང་ཚོས་རང་གི་འཚོ་བ་དང་ཁོ་ཚོའི་བར་དུ་མཚུངས་ཆོས་རྙེད་ཐབས་བྲལ་འདུག གང་ལགས་ཤེ་ན་ཁོ་ཚོས་མི་རང་ག་བའི་བརྩེ་དུང་དང་། ཐོབ་ཤོར། སྐྱོ་གར་བཅས་འཆད་ཀྱིན་མི་འདུག གཅིག་བྱས་ན་འདིས་བོད་ཕྲུག་རྣམས་ཀྱིས་སྔ་མོ་ནས་བོད་ཡིག་སློབ་ཚན་བཀླག་པ་མཚམས་བཞག་སྟེ་དབྱིན་ཇིའི་སྒྲུང་རིང་རྣམས་ཀློག་བཞིན་པར་འགྲེལ་བརྗོད་ཅིག་བྱེད་ཀྱིན་ཡོད་ཀྱང་སྲིད། རྡ་ས་རུ་གསུམ་བཅུའི་དུས་དྲན་སྐབས་སུ་མགོ་ཁྲིད་རྣམས་ཀྱིས་སྲིད་དོན་གྱི་གཏམ་བཤད་བྱེད་དུས་བོད་ཕྲུག་བུ་མོ་ཞིག་གིས་ཨི་མི་ལི་བ་རོན་ཊའི་རླུང་དམར་གྱི་མཐོ་ཚད་ཀློག་པ་མཐོང་བ་ནི་རྒྱུན་ལྡན་རེད། ཐེངས་ཤིག་བོད་ཀྱི་སྲིད་དོན་པ་གྲགས་ཅན་ཞིག་གིས་སློབ་ཕྲུག་རྣམས་ཀྱིས་ཁོང་གི་གསུང་བཤད་ལ་དོ་སྣང་སྤྲོད་ཀྱིན་མེད་པའི་སྐོར་གྱི་ཚོགས་གཏམ་ཞིག་བཏང་བ་ངས་ད་ལྟའང་དྲན་གསོས་ཀྱི་འདུག

ང་ཚོས་རང་ཉིད་ལ་དྲི་བ་ཞིག་འདྲི་དགོས་པ་ནི། བོད་ཀྱི་གཏམ་རྒྱུད་ཡོད་ཚད་སྒྱུ་འཕྲུལ་དང་། གནའ་བོའི་རྟོག་སྒྲུང་། ཡ་མཚན་ཅན་གྱི་བྱུང་བ་བཅས་རེད་དམ། ང་ཚོ་ལ་མིའི་དངོས་བྱུང་གཏམ་རྒྱུད་འབྲི་མཁན་གྱི་བོད་རང་གི་རྩོམ་པ་པོ་ཡོད་དམ། དེ་འདྲའི་རང་དབང་གི་སྐད་སྒྲ་སྒྲོག་ཅིང་བོད་ཀྱི་སྤྱི་ཚོགས་ལ་ཤུགས་རྐྱེན་སྤྲོད་མཁན་གྱི་རྩོམ་པ་པོ་ནི་ཉིན་མོའི་སྐར་མ་བཞིན་ཉུང་ཉུང་རེད་ལ་ངས་ཤེས་པ་ནི་སྐྱེས་བུ་གཉིས་ཁོ་ན་ཡིན།
སྐྱེས་བུ་དང་པོ་དེ་ནི་དགེ་འདུན་ཆོས་འཕེལ་ཞུ་བ་དེ་རེད་ལ། ཁོང་ནི་བོད་རང་བཙན་རྒྱལ་ཁབ་ཏུ་སྤྱི་ལོ་གཅིག་དགུ་སུམ་ཅུའི་ནང་དུ་གྲགས་པ་འབར་བའི་མི་སྣ་ཞིག་ཡིན། ཁོང་ནི་སྙན་ངག་པ་དང་། ལོ་ཙཱ་བ། མཁས་པ། རྒྱལ་རབས་སྨྲ་བ། རི་མོ་བ། ས་ཁམས་རིག་པ་བ། མཚན་ཉིད་རིག་པ་བ། སྲིད་དོན་གསར་བརྗེ་བ་བཅས་རེད། བོད་རིག་པ་བ་མཁའ་རྨེའུ་བསམ་གཏན་ལྟར་ན་ཁོང་ནི་ལྷ་སའི་རྡོ་རིང་དང་ཏུའུ་ཧུན་ནས་ཐོན་པའི་ཡིག་ཆ་རྙིང་བར་ཞིབ་འཇུག་བྱས་ཏེ་བོད་ཀྱི་ལོ་རྒྱུས་ལ་ཉམས་ཞིབ་བྱེད་མཁན་དང་པོ་དེ་ཡིན་འདུག དེ་ལྟར་བཤད་སྐབས་ཁོང་ནི་ཚན་རིག་དང་མཐུན་པར་ཞིབ་འཇུག་བྱེད་མཁན་གྱི་རྒྱལ་རབས་སྨྲ་བ་དང་པོ་དེ་རེད། ང་ཚོ་ཕལ་ཆེ་བར་ཁོང་ཆ་རྒྱུས་ཡོད་མོད། ཡིན་ཡང་མང་པོ་ཞིག་གིས་ཁོང་གི་བརྩམས་ཆོས་ཀློག་མྱོང་ཡོད་མི་སྲིད།

དགེ་འདུན་ཆོས་འཕེལ་ལགས་ཀྱི་ཁྱད་ཆོས་གཙོ་བོ་ནི་ཁོང་བོད་ཀྱི་ལོ་རྒྱུས་དང་། རིག་གནས། སྲོལ་རྒྱུན་བཅས་ལ་ཤིན་ཏུ་མཁས་ཀྱང་ང་ཚོ་མང་པོ་ཞིག་ལྟར་ཁོང་དེ་དག་ལ་མགོ་འཁོར་ནས་བཞུགས་མེད། ཁོང་གིས་བོད་ཀྱི་སྲོན་རྒྱུན་དང་རིག་གནས་ལ་གུས་བཀུར་ཞུ་མོད། ཡིན་ཡང་དེ་དག་གི་མ་ལྡེང་བའི་ཆ་དང་ཡར་རྒྱས་གཏོང་དགོས་ཀྱི་ཆ་ལ་དཔྱད་བརྗོད་ཤུགས་ཆེན་སྤེལ་ཅིང་། རིག་གནས་ཤིག་གནས་པའི་དགོས་པ་ནི་དེ་སྲོག་ལྡན་གྱི་མི་རྣམས་ལ་མཁོ་བའི་སྲོག་ལྡན་གྱི་དངོས་པོ་ཞིག་ཡིན་པ་དེ་ཡིན་པ་ལས། “བདག་ཉར”་བྱེད་དགོས་པའི་དངོས་པོ་རང་ག་བ་ཞིག་མིན་པར་འདོད། རྒྱུ་མཚན་དེས་ཁོང་ཐག་རིང་གི་ས་ཆ་རྒྱ་གར་དང་སིང་གྷ་ལ་བཅས་ལ་བོད་ཀྱི་སྲོན་རྒྱུན་མ་ཡིན་པའི་རིག་གནས་ལ་སྦྱངས་ཕྱིར་ཕེབས་ཤིང་ཕྱིའི་རིག་གནས་མང་པོ་བོད་ཡིག་ཏུ་བསྒྱུར་བ་བཅས་གནང་བ་རེད།

ངས་བལྟས་ན་ཁོང་ནི་༸རྒྱལ་བ་རིན་པོ་ཆེས་བཙན་བྱོལ་དུ་འབྱོར་རྗེས་བོད་ཀྱི་སློབ་ཕྲུག་རྣམས་སྲོལ་རྒྱུན་དང་དེང་རབས་རིག་གནས་གཉིས་ཀར་བྱང་ཆུབ་པར་ཡོང་ཕྱིར་ཐོག་དང་པོར་སློབ་གྲྭ་བཙུགས་པའི་དམིགས་ཡུལ་གྱི་དཔེ་མཚོན་ངོ་མ་དེ་རེད། དགེ་ཆོས་ལགས་ཀྱིས་འབོལ་རྩོམ་གྱི་ལམ་ནས་སྙན་ངག་བྲིས་ཡོད་པས་མི་དཀྱུས་མ་ཚོས་ཀྱང་ཁོང་གི་སྙན་ངག་རྣམས་ལས་སླ་བོས་གོ་ཐུབ། ཁོང་བོད་བརྒྱུད་ནང་བསྟན་དང་དགོན་པའི་སྲོལ་རྒྱུན་བཅས་ལ་ཡིད་སྨོན་བྱེད་མཁན་ཞིག་ཡིན་མོད། དེ་དག་ལ་རྨོངས་དད་བྱེད་མཁན་ཞིག་མིན། དཔེར་ན་ཁོང་གི་སྐྱོན་བརྗོད་སྙན་ངག་ཅིག་ཏུ་གལ་སྲིད་མི་ཚང་མ་གྲྭ་བ་བྱས་སོང་ན་སངས་རྒྱས་འཁྲུངས་པར་མི་འགྱུར་ཞེས་དགོངས་ཚུལ་བཏོན་ཡོད། རྒྱ་གར་དང་སིང་གྷ་ལ་བཅས་སུ་ཕེབས་དུས་བཏབ་པའི་ཟིན་ཐོ་རྣམས་ཧ་ལས་དགོས་པ་ཞིག་རེད། ཟིན་ཐོ་དེ་དག་ལས་མི་སུ་ཡིན་ཡང་རུང་མི་རིགས་གང་ཞིག་ཏུ་གཏོགས་ཀྱང་ཆོག་ཁོང་ནི་མཁས་པ་ཞིག་ཡིན་པ་རྟོགས་པར་འགྱུར་བ་གདོན་མི་ཟ།

མཁས་པ་གཞན་དེ་ནི་སྤྱི་ལོ་བརྒྱད་ཅུའི་ནང་དུ་བྱུང་བ་ཞིག་རེད། ཁོང་གི་མཚན་ལ་དོན་གྲུབ་རྒྱལ་ཞུ་ཞིང་ཁོང་ནི་མཁས་པ་དང་། སྙན་ངག་པ། ལོ་ཙཱ་བ། བསམ་བློ་བ། རྒྱལ་རབས་སྨྲ་བ། གཞུང་རྒོལ་བ་བཅས་རེད། ཁོང་གི་གྲུབ་འབྲས་རླབས་ཆེ་ཤོས་དེ་ནི་བོད་ཀྱི་སྙན་ངག་དེ་དནྜིའི་མེ་ལོང་མའི་འཆིང་བས་བཅིངས་པའི་སྲོལ་རྒྱུན་གྱི་བཀག་རྒྱ་ལས་འགོང་པར་བྱས་པ་དེ་རེད། ཁོང་གི་སྙན་ངག་ལང་ཚོའི་རྦབ་ཆུ་དང་རྐང་ལམ་ཕྲ་མོ་གཉིས་ཀྱིས་བོད་ཆོལ་ཁ་གསུམ་གྱི་གཞོན་སྐྱེས་རྣམས་ལ་བག་ཆགས་ཟབ་མོ་བཞག་ཡོད།

ཁོང་གི་བརྩམས་ཆོས་རྣམས་ཀྱིས་བོད་མི་རྣམས་རྣམ་རྟོག་གི་ལྕགས་སྒྲོག་ལས་ཐར་བར་བྱས་ཏེ་དཀྱེལ་ཡངས་དང་། གསར་གཏོད། དེང་རབས་བཅས་ཀྱི་གཞུང་ལམ་ཐོག་གོམ་པ་སྤོ་དགོས་པར་སྐུལ་བ་རེད། ཁོང་ནི་དགེ་ཆོས་ཀྱི་རྗེས་ནས་ནང་བསྟན་རིག་གནས་དང་རྒྱ་མིའི་དམར་ཤོག་རིང་ལུགས་བཅས་ཀྱི་ལྟ་བ་བརྒལ་ཏེ་བོད་རང་གི་སྐད་སྒྲ་ངོ་མ་ཞིག་རྙེད་ཐབས་ལ་འབད་མཁན་གྱི་གཞོན་སྐྱེས་སྙན་ངག་པ་དང་པོ་དེ་རེད། བློ་ཕམ་པ་ཞིག་ལ་བོད་ཤར་ཕྱོགས་ཁུལ་དུ་རང་ལུས་མེར་བསྲེགས་གནང་བཞིན་པའི་གྲྭ་བ་རྣམས་དང་མཚུངས་པར་དོན་གྲུབ་རྒྱལ་ཡང་རང་ལོ་སོ་གཉིས་ཐོག་རང་ཤི་བརྒྱབས་པ་རེད། ཁོང་གི་གྲོགས་པོ་ཚོས་ཟེར་ན་དེ་ནི་“བོད་རིགས་སྤུན་ཟླ་རྣམས་རྨོངས་གཉིད་ལས་དཀྲོག་ཕྱིར་རེད།”ཟེར།

དོན་གྲུབ་རྒྱལ་དགེ་ཆོས་ཀྱི་ལྟ་བ་ལ་དགའ་བ་དེ་སྟེས་དབང་ཞིག་མ་རེད། ཁོང་གི་གྲོགས་པོ་དང་ལས་རོགས་རྡོ་རྗེ་རིན་ཆེན་གྱིས་བཤད་ན་དོན་འགྲུབ་རྒྱལ་གྱིས་རྟག་ཏུ་ཀློག་པའི་དེབ་གཅིག་ཡོད་པ་ནི་ཏུའུ་ཧུན་ཡིག་རྙིང་ལ་གཞི་བཅོལ་ནས་བྲིས་པའི་དེབ་ཐེར་དཀར་པོ་རེད། ཁོང་གིས་ལས་ཁུངས་སུ་ལས་ཀ་མི་བྱེད་པའི་སྐབས་དང་ཡང་ན་ཕྱི་རོལ་དུ་འཆམ་འཆམ་དུ་འགྲོ་དུས་འོག་གི་སྙན་ངག་འདི་འདོན་པར་ཤིན་ཏུ་དགའ་ཟེར།

ཡ་མཚན་ཐམས་ཅད་ཐན་ལྟས་ཉིད་དུ་ལྟ།།
ཆོས་ཀྱི་རྒྱལ་ཁབ་ཊི་བེ་ཊི་ཡི་སྲོལ།།
འདི་ནི་ད་ལྟའི་བར་དུ་རང་རེའི་སྲོལ།།
ཀུན་ལ་ཕན་པའི་ཡ་མཚན་དངོས་པོ་དང་།།
ཀུན་ལ་གནོད་པའི་ཐན་ལྟས་འབྱུང་པོ་རྣམས།།
གྲི་དངོ་རྣོ་བའི་རལ་གྲི་སོ་གཉིས་ལྟར།།
གཅིག་གི་རྗེས་སུ་གཅིག་གིས་སླེབས་པ་ཉིད།(བོད་པོད་མ་རྙེད་པས་རང་གི་བློ་ཐོག་ཏུ་ཡོད་པ་རྣམས་བྲིས་ཤིང་ཤློ་ཀ་ཐ་མ་དེ་དབྱིན་ཡིག་ཐད་བསྒྱུར་བྱེད་དགོས་བྱུང་།)

ཁོང་གིས་མིག་དཔེ་བལྟ་སའི་རྩོམ་པ་པོ་གཞན་ཞིག་ནི་ལུའུ་ཞུན་རེད། དོན་གྲུབ་རྒྱལ་གྱིས་ཀྱང་རྒྱ་ནག་རྩོམ་རིག་གི་ཡབ་ཆེན་དུ་འབོད་པའི་རྩོམ་པ་པོ་ཁོ་ལྟར་བོད་མི་རྣམས་ཀྱི་ཆག་གྲུམ་ཐེབས་པའི་ཚེ་སྲོག་ལ་གསོས་སྨན་དགོས་པར་འདོད། དོན་གྲུབ་རྒྱལ་གྱིས་དེ་ལྟ་བུའི་སྨན་དེ་ནི་བོད་གངས་ཅན་ལྗོངས་ཨེ་ཤ་ཡ་དཀྱིལ་མའི་དོ་སྣང་བྱེད་དགོས་སར་གྱུར་དུས་ཀྱི་བཙན་པོ་རྣམས་ཀྱི་ལྟ་བ་ལ་ཡོད་པར་འདོད།

དེང་སང་བོད་ནང་དུ་རྩོམ་པ་པོ་ཁོང་གཉིས་གཞོན་སྐྱེས་ཤེས་ཡོན་ཅན་དང་སློབ་གྲྭ་ཆེན་མོ་བ་རྣམས་ཀྱི་བློ་སྟོབས་ཀྱི་འབྱུང་ཁུངས་སུ་གྱུར་ཡོད་ཅིང་། རྒྱ་ནག་བཙན་རྒྱལ་རིང་ལུགས་ཀྱི་གཤུ་གཞོག་ལ་ཁ་གཏོད་པའི་ཤེས་ཡོན་པའི་སྡེ་སྟེ་གཞོན་སྐྱེས་སྙན་ངག་པ་དང་། མཁས་པ། རྩོམ་པ་པོ་བཅས་ཀྱི་བརྩམས་ཆོས་ལ་ཁོང་གཉིས་ཀྱི་ཤུགས་རྐྱེན་ཐེབས་ཡོད་པ་གསལ་བོ་རེད། བཙོན་དུ་བཞུགས་པའི་རྩོམ་པ་པོ་ཐེའུ་རང་དང་མེ་ལྕེ། རོལ་མོ་བ་གཡུ་འབྲུག་བཅས་ལ་དགེ་ཆོས་དང་དོན་གྲུབ་རྒྱལ་གཉིས་ཀྱི་ཤན་ཤུགས་ཐེབས་ཡོད། ད་དུང་དགེ་འདུན་ཆོས་འཕེལ་གྱི་མཚན་འདོགས་པའི་སྒྱུ་རྩལ་བའི་ཚོ་ཁག་དེ་འདྲའང་ཡོད། བཙན་བྱོལ་ཁུལ་དུ་ནི་ཤེས་ཡོན་ཅན་སྐྱ་སེར་སུ་ཡིན་ཡང་ཁོ་ཚོའི་རྩོམ་ཡིག་ཏུ་ཁོང་གཉིས་ཀྱི་ཚིག་འཁོལ་བའམ་ཁོ་ཚོའི་ཁང་པའི་ནང་དུ་ཁོང་གཉིས་ཀྱི་འདྲ་པར་སྦྱར་བ་གང་སར་མཐོང་རྒྱུ་ཡོད། དེ་བས་བོད་རྒྱལ་ཁབ་ཇི་སྲིད་གནས་པ་དེ་སྲིད་དུ་ང་ཚོའི་སྤྱི་ཚོགས་ལ་རྩོམ་པ་པོ་ཁོང་གཉིས་ཀྱི་ལྟ་བས་ཤན་ཤུགས་ཐེབས་ངེས་ཞེས་བརྗོད་ནའང་སྒྲོ་བཏགས་སུ་མི་འགྱུར་སྙམ།

དེ་ལྟར་ལགས་མོད་ཀྱང་བཙན་བྱོལ་བོད་པ་མང་པོ་ཞིག་ཁོང་གཉིས་ཀྱི་བརྩམས་ཆོས་ལ་ཆ་རྒྱུས་ཆེན་པོ་མེད། དེའི་རྒྱུ་མཚན་གཅིག་ནི་དེ་རྣམས་སློབ་གྲྭར་མ་བསླབས་པས་རེད། ངས་དྲན་ཚོད་ལྟར་ན་ང་ཚོས་དགེ་ཆོས་ཀྱི་དེབ་དཀར་ཁོ་ན་སྦྱངས་མྱོང་ཡོད། དེབ་དེའི་ནང་གི་ཁོང་གི་རྒྱལ་ཞེན་གྱི་སྐད་སྒྲ་གཅིག་པུས་དེ་ནི་ལོ་རྒྱུས་རིག་པའི་འབྱུང་ཁུངས་གལ་ཆེན་ཞིག་ཡིན་པ་བསྟན་ཡོད། དེ་ལས་གཞན་འཛམ་གླིང་ཁྱོན་ཡོངས་ཀྱིས་གོ་ཐུབ་པའི་ཁོང་གི་སྙན་ངག་ཚུད་པའི་སྒྱུ་རྩལ་ལྡན་ལ་རིག་པས་ཕྱུག་ཅིང་འཛམ་གླིང་སྐྱེ་བོ་ཚང་མར་ཕན་ཐོགས་ཆེ་བའི་ཁོང་གི་བརྩམས་ཆོས་རྣམས་སློབ་མ་དཀྱུས་མ་རྣམས་ལ་གཏེར་གྱི་ཚུལ་དུ་སྦས་ཏེ་བཞག་ཡོད།

དགེ་ཆོས་ཀྱི་རྗེས་འཇུག་པ་དོན་གྲུབ་རྒྱལ་གྱི་ལས་དབང་ཡང་གཅིག་མཚུངས་རེད། ཁོང་གི་སྙན་ངག་དང་། སྒྲུང་ཐུང་། ལོ་རྒྱུས་བརྩམས་ཆོས་ཚང་མ་བོད་པའི་སློབ་མ་རྣམས་ལ་རྒྱུས་མེད་དུ་གྱུར་ཡོད། ང་རང་སྒེར་གྱི་མྱོང་བ་ནི་ཁོ་བོ་དྷི་ལིའི་གཙུག་ལག་སློབ་གཉེར་ཁང་ནས་སློབ་གྲྭ་ཐོན་ཏེ་ལོ་འགའ་ཕྱིན་པའི་རྗེས་སུ་སཱ་ར་མཐོ་སློབ་ཏུ་འགྲོ་དུས་བོད་ནས་ཕེབས་པའི་སློབ་མ་ལོ་གཞོན་འགའ་ཞིག་གི་བཀའ་དྲིན་འོག་ད་གཟོད་ཁོང་གི་བརྩམས་ཆོས་མཇལ་ཐུབ་སོང་། གལ་ཏེ་ངས་བརྩམས་ཆོས་དེ་དག་ན་སོ་གཞོན་དུས་བཀླགས་ཡོད་ཚེ་རང་གི་བོད་ཡིག་གི་ཆ་ཚད་དང་བོད་ཀྱི་རྩོམ་རིག་གི་གོ་རྟོགས་ཡར་རྒྱས་ཕྱིན་ཡོད་པ་གཏན་འཁེལ་རེད་བསམས་པའི་ཚོར་འདུ་དྲག་པོ་བྱུང་།

རྩོམ་ཐུང་འདི་མཇུག་མ་བསྡུས་སྔོན་ལ་ང་རང་ཆུང་དུས་སུ་བློ་ལ་ཡང་ཡང་འཁོར་མྱོང་བའི་དྲི་བ་ཞིག་དྲན་གསོ་གཏོང་འདོད་བྱུང་། བོད་ཡིག་དགེ་རྒན་ཚོས་ང་ཚོར་བོད་ཀྱི་རིགས་རྒྱུད་ནི་ཕ་སྤྲེའུ་བྱང་ཆུབ་སེམས་དཔའ་དང་མ་བྲག་སྲིན་མོ་གཉིས་འདུས་པ་ལས་བྱུང་བ་རེད་ཅེས་བསླབས་དུས་ངའི་སེམས་སུ་སྤྲེའུ་ཞིག་གིས་ཚོར་བ་མེད་པའི་བྲག་ཞིག་དང་རྩེད་དགར་རོལ་ནས་བུ་ཕྲུག་དྲུག་ཇི་ལྟར་སྐྱེད་ཐུབ་བམ་དྲན། གོང་དུ་མགོ་འཛུགས་དུས་བཤད་པ་བཞིན་ངས་དྲི་བ་འདི་དགེ་རྒན་རྣམ་པར་ག་ལ་འདྲི་ཕོད་དེ་འདི་ནི་ལོག་ལྟའི་དྲི་བ་ཞིག་ཡིན་པས་མི་ཚོད་ཆགས་སྲེད་ཀྱི་སྐོར་ཡང་འདྲེས་ཡོད། དེ་བས་ངའི་བསམ་པར་འདིའང་བོད་ཀྱི་ལོ་རྒྱུས་སྐོར་གྱི་གཏམ་རྒྱུད་གཞན་རྣམས་དང་འདྲ་བར་བོད་ཀྱི་མཁས་པ་རྣམ་དཔྱོད་ཅན་ཞིག་གིས་བརྩམས་པའི་རྟོག་སྒྲུང་ཞིག་ཡིན་ངེས་སྙམ།

ཁོ་བོ་མཚར་ལོངས་བྱུང་རྗེས་ཌཱར་ཝིན་གྱི་འགྲོ་བ་མིའི་འཕེལ་རྒྱས་ཀྱི་མཚན་ཉིད་རིག་པའི་གཞུང་དུ་མི་ནི་སྤྲ་ལས་བྱུང་བ་བཤད་པ་མཐོང་སྐབས་ད་གཟོད་སྤྲེའུ་བྱང་ཆུབ་སེམས་པའི་སྐོར་དེ་བོད་རང་གི་རྣམ་དཔྱོད་ལས་ཐོན་པའི་བརྩམས་ཆོས་རླབས་ཆེན་ཞིག་ཡིན་པ་ཤེས་བྱུང་མོད། བྲག་སྲིན་མོའི་སྐོར་དེས་ད་དུང་ཁོ་བོ་མགོ་རྨོངས་པར་བྱེད་ཀྱི་འདུག མཁས་དབང་དུང་དཀར་བློ་བཟང་འཕྲིན་ལས་དང་དོན་གྲུབ་རྒྱལ་གྱི་བརྩམས་ཆོས་ནང་དུ་བྲག་སྲིན་མོ་ཞེས་པའི་བྲག་དེ་སྤྲ་ཞེས་པ་འགྱུར་བ་རེད་ཅེས་གསུངས་འདུག་པས་ཁོ་བོ་མི་རབས་སྔོན་མ་དག་གི་རྣམ་དཔྱོད་ལ་དགའ་དད་ཆེ་རུ་སོང་།

ད་སྤྲེའུ་ཞིག་དང་སྤྲ་ཞིག་འདུས་པ་ལས་བོད་ཀྱི་མིའུ་གདུང་དྲུག་བྱུང་ཞེས་པ་དེར་གོ་རྒྱུ་འདུག དེར་མ་ཟད་འདི་ནི་བོད་དུ་ནང་ཆོས་ངོ་མ་འཕྲོད་པའི་དུས་ཡུན་རིང་པོ་ཞིག་གི་གོང་ནས་བོད་ཀྱི་མི་རབས་སྔོན་མ་ཚོའི་རྣམ་དཔྱོད་ལས་ཐོན་པའི་བོད་རང་གི་ལྟ་བ་ཞིག་རེད། ཕ་སྤྲེའུ་དེ་བྱང་ཆུབ་སེམས་དཔའ་ཡིན་པ་དང་མ་དེ་བྲག་སྲིན་མོ་ཡིན་པའི་ལྟ་ཚུལ་དེ་ནང་པའི་ལོ་རྒྱུས་སྨྲ་བ་ཚོས་རྟོག་བཟོ་གནང་བ་ཞིག་རེད།

ང་རང་ལ་ཉམས་མྱོང་བྱུང་བ་གཞིར་བཞག་སྟེ་བཤད་ན་བོད་ཀྱི་མཁས་པ་དང་། ཤེས་ཡོན་པ། རྩོམ་པ་པོ་སོགས་ཀྱི་བརྩམས་ཆོས་ལ་ཀློག་པ་པོར་ཚོར་བ་སྦྱིན་པ་དང་རྨོངས་གཉིད་ལས་སློང་བའི་ནུས་པ་ངོ་མ་འདུག ཁོང་ཚོས་ང་ཚོར་བསམ་བློ་གཏོང་བ་དང་དྲི་བ་འདོན་པར་རོགས་བྱེད་པར་མ་ཟད། བོད་རང་གི་རྣམ་དཔྱོད་ཀྱིས་ཚན་རིག་དང་མཐུན་པར་ལྟ་ཐུབ་པ་དང་བརྩམས་ཆོས་རླབས་ཆེན་གྲུབ་ཐུབ་པའི་སྤོབས་པ་སྦྱིན་གྱིན་འདུག དེ་ལས་ཀྱང་གལ་ཆེ་བ་ཞིག་ལ་དེ་ཚོས་སོ་སོ་རང་ཉིད་མི་རིགས་ཐ་དད་པ་ཞིག་ཡིན་པར་བསྒྲུབ་ཆེད་བོད་ཀྱི་རྩོམ་རིག་དང་ལོ་རྒྱུས་སྦྱོང་བར་དགའ་སྣང་སྦྱིན་གྱིན་འདུག

བོད་ཀྱི་སྲོལ་རྒྱུན་སྙན་ངག་དང་དེང་རབས་སྙན་ངག་ལ་དཔྱད་པ།

2013-01-14T18:55:00.001-08:00

སྔོན་གླེང་།
བོད་ཀྱི་སྲོལ་རྒྱུན་སྙན་ངག་དང་དེང་རབས་སྙན་ངག་གཉིས་ནི་རང་རྐྱ་ཐུབ་པའི་སྙན་ངག་གསར་རྙིང་གཉིས་ཡིན།འདི་གཉིས་ལ་རང་རང་གི་ཁྱད་ཆོས་དང་རང་རང་གི་དགེ་མཚན་གྱིས་གཏམས་ནས་ཡོད།སྲོལ་རྒྱུན་སྙན་ངག་ལ་ཆ་མཚོན་ན་ཚིག་སྦྱོར་བཟང་ཞིང་བཅད་མཚམས་གསལ་བས་རོལ་དབྱངས་ཀྱི་ཉམས་ལྡན་པར་བྱས་ཤིང་།སྒྲ་རྒྱན་རེ་ཟུང་ལ་སྒྲིག་ཁྲིམས་ཅུང་དམ་པ་ཕུད་སྙན་ངག་བྱིངས་ནི་རྒྱ་དཀར་ནག་དང་ཕྱི་གླིང་སོགས་ཀྱི་སྙན་ངག་ལས་རང་དབང་ཆེ་བ་ཡོད།
བོད་ཀྱི་དེང་རབས་སྙན་ངག་ལས་རང་མོས་སྙན་ངག་ནི་ཕལ་པའི་ཐ་སྙད་དང་ཕལ་པའི་ཚིག་སྦྱོར་བཀོལ་ཏེ་འབྲི་ལ།སྙན་ངག་པའི་དབུགས་ཀྱི་འདེག་འཇོག་ལྟར་ཚིག་གི་གཅོད་མཚམས་ཕྱེ་བས་ཚིག་གི་གཅོད་མཚམས་ལ་འདི་ཡིན་གྱི་ཚད་འཛིན་མེད།ཕྱི་ནང་གི་རིང་ལུགས་ཡོངས་རྫོགས་ཀྱི་དགེ་མཚན་སྤྱོད་ཅིང་།འཇིག་རྟེན་གྱི་དངོས་པོ་ཡོངས་རྫོགས་བརྗོད་བྱར་བཟུང་ཡོད།
ཉམས་ཕུན་སུམ་ཚོགས་པའི་སྙན་ངག་གསར་རྙིང་འདི་གཉིས་ལ་འདི་ལེགས་དང་དེ་ཉེས་ཞེས་དབྱེ་བ་ཕྱེ་དགོས་པ་མ་མཐོང་ཡང་།རང་གི་བློས་བཅོག་ཚད་ཀྱིས་དཔྱད་པ་ཞིག་བྱེད་འདོད་པ་ལགས།

ཅི་ཞིག་ལ་བོད་ཀྱི་སྲོལ་རྒྱུན་སྙན་ངག་ཟེར།

སྤྱིར་སྲོལ་རྒྱུན་སྙན་ངག་ལ་རྩོམ་ལུས་ཀྱི་ཆ་ནས་བཅད་ལྷུག་སྤེལ་མ་དང་།བརྗོད་བྱའི་ཆ་ནས་ཆོས་དང་འཇིག་རྟེན་སོགས་དབྱེ་བ་མང་དུ་ཡོད་པར་སྣང་མོད།དེང་ཡོངས་གྲགས་སུ་གོ་བ་ལེན་སྟངས་ལྟར་འདིར་ཡང་སྲོལ་རྒྱུན་སྙན་ངག་ནི་རྩོམ་ལུས་ཚིགས་བཅད་ཡིན་ཞིང་དཔེ་གཟུགས་གབ་སོགས་ཀྱི་རྒྱན་གྱིས་བརྒྱན་པ་དག་ལ་བྱའོ།།

སྲོལ་རྒྱུན་སྙན་ངག་བོད་དུ་དར་བའི་རྒྱུ་རྐྱེན།

སྲོལ་རྒྱུན་སྙན་ངག་ནི་སྙན་གཞུང་མེ་ལོང་བསྒྱུར་བའི་སྔ་གཞུག་ནས་བོད་དུ་དར་ཞིང་དེ་སྐབས་ཀྱི་མཁས་པ་ཚོས་དགའ་བསུ་ཆེན་པོས་དང་དུ་བླངས་བས་བོད་ཡུལ་ཀུན་ཏུ་ས་ཁྱབ་རྡོ་ཁྱབ་དུ་སོང་།འདི་ལ་རྐྱེན་མང་པོ་ཡོད་པར་སྙམ་ལ་གཙོ་བོ་ནི་སྐབས་དེར་བོད་དུ་སྙན་གཞུང་ཚད་ལྡན་ཞིག་མེད་པས་སྐབས་དེའི་སྙན་ངག་འབྲི་ཚུལ་གྱིས་མཁས་པ་ཚོ་ཡིད་ཚིམས་ཀྱི་མེད།དེ་བས་དཔེ་གཟུགས་གབ་སོགས་རྒྱན་གྱི་རྣམ་བཞག་ཕུན་སུམ་ཚོགས་པར་བསྟན་ཅིང་སྐྱོན་ཡོན་གྱི་རྣམ་དབྱེ་ཞིབ་ཚགས་པོར་ཕྱེ་བའི་སྙན་གཞུང་གསར་བ་མེ་ལོང་མ་ལ་དགའ་བསུ་ཚད་མེད་ཐོབ་པ་དང་།དེ་སྔའི་མགུར་དུ་གྲགས་པའི་བཙན་པོའི་སྐབས་ཀྱི་སྙན་ངག་དང་ཕྱིས་ཀྱི་གྲུབ་ཆེན་རྣམས་ཀྱི་ཉམས་མགུར་དུ་གྲགས་པའི་སྙན་ངག་རྣམས་ལ་སྡེབ་སྦྱོར་ཉམས་པའི་སྐྱོན་སོགས་སྐྱོན་མང་ནས་བགྲང་ནས་དགག་བཞག་བྱས་པ་རེད།
རྐྱེན་གཞན་ཞིག་ནི་སྐབས་དེར་རྒྱ་གར་ནས་བསྒྱུར་བའི་ནང་ཆོས་ཀྱིས་བོད་ཀྱི་མཁས་པ་རྣམས་ལ་ཤན་ཆེན་པོ་ཐེབས་ཡོད།འཚེ་མེད་ཞི་བ་སོགས་བརྗོད་བྱ་ཙམ་གྱིས་ཤན་ཆེན་པོ་ཐེབས་པའི་མི་ཚད་རྩོམ་འགྲོས་དང་རྗོད་བྱེད་བཀོལ་ཚུལ་སོགས་ལའང་བོད་ཀྱི་མཁས་པ་ཚོས་དགའ་མོས་ཆེན་པོ་བྱེད་བཞིན་ཡོད།དེ་བས་རྩོམ་འགྲོས་དང་རྗོད་བྱེད་བཀོལ་ཚུལ་བཀའ་བསྟན་གི་གཞུང་དང་ཆུ་ལ་ཆུ་བཞག་ཏུ་སོང་བའི་མེ་ལོང་མར་བོད་ཀྱི་མཁས་པ་ཚོས་དགའ་མོས་ཆེན་པོ་བྱེད་པ་དེ་རྒྱུ་མཚན་ལྐོག་གྱུར་ཞིག་མ་རེད།

བོད་ཀྱི་སྲོལ་རྒྱུན་སྙན་ངག་གི་ཁྱད་ཆོས།

གོང་དུ་བཤད་པ་ལྟར་སྲོལ་རྒྱུན་སྙན་ངག་དང་གནའ་བོའི་སྙན་ངག་བར་རྗོད་བྱེད་ཀྱི་ཆ་ནས་ཁྱད་པར་ཆེན་པོ་ཡོད་མོད།བརྗོད་བྱའི་ཆ་ནས་གནམ་ས་བླ་འོག་བསྒྱུར་བ་ལྟ་བུའི་འགྱུར་བ་ནི་མ་བྱུང་བར་འདྲ་སྟེ་སྲོལ་རྒྱུན་སྙན་ངག་པ་རྣམས་ཀྱི་བརྗོད་བྱ་ཕལ་ཆེ་བའང་དེ་སྔ་དག་གི་དང་མཚུངས་པར་འདིར་སྣང་སྲིད་པའི་འཁོར་བ་ལ་སྙིང་པོ་མེད་ཚུལ་དང་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་དགོས་ཚུལ་སོགས་ཡིན་འདུག དེའི་རྒྱུ་མཚན་ནི་སྲོལ་རྒྱུན་སྙན་ངག་པ་རྣམས་ཀྱང་དེ་སྔའི་སྙན་ངག་པ་རྣམས་དང་མཚུངས་པར་ཆོས་པ་ཡིན་ཞིང་། སྙན་ངག་ཀྱང་ཆོས་ཀྱི་ཆོ་ག་སྒྲུབ་བྱེད་ཀྱི་ལག་ཆ་ཙམ་ལ་བརྩིས་པས་ཡིན་པར་སྙམ།འཛམ་གླིང་རྩོམ་རིག་ལོ་རྒྱུས་ལ་ཞིབ་ཏུ་བལྟས་ན་དེ་ནི་དེ་འདྲ་ཧངས་སངས་དགོས་པ་ཞིག་མ་ཡིན་ཏེ་མི་རིགས་གང་ཞིག་གི་རྩོམ་རིག་གི་མགོ་ཁུངས་འཚོལ་དགོས་ཚེ་ཆོས་ལ་ཐུག་འགྲོ་ཞིང་།རྩོམ་རིག་གིས་ཆོས་ལུགས་དར་སྤེལ་ལ་ཞབས་ཏོག་སྒྲུབ་པ་ནི་རྒྱུན་ལྡན་རེད།ཡིན་ཡང་ལོ་ངོ་བརྒྱ་ཕྲག་བརྒལ་བར་ཆོས་ལུགས་རྐྱང་བའི་སྙན་ངག་ལས་འཇིག་རྟེན་ཕལ་པའི་སྐྱིད་སྡུག་གི་འཚོ་བ་སྙན་ངག་ཏུ་མ་འཁོད་པ་ནི་ཕངས་པའི་གནས་ཡིན་ལ།དེ་འདྲ་བ་ནི་མི་རིགས་གཞན་གྱི་རྩོམ་རིག་ལོ་རྒྱུས་སུ་ཤིན་ཏུ་མཐོང་དཀོན་པ་ཞིག་ཀྱང་ཡིན།
ཡིན་ཡང་སྲོལ་རྒྱུན་སྙན་ངག་ཏུ་འཇིག་རྟེན་ཕལ་པའི་སྐྱིད་སྡུག་གི་འཚོ་བ་གཏན་ནས་མ་འཁོད་པའང་མ་ཡིན་ཏེ་ཕྱིས་ཀྱི་སྲོལ་རྒྱུན་སྙན་ངག་པ་རྣམས་དུས་ཀྱི་དབང་གིས་འཇིག་རྟེན་པ་རྣམས་དང་འབྲེལ་འདྲིས་དམ་ཟབ་ཏུ་གྱུར་ཅིང་།སྙན་ངག་ཀྱང་ལྷ་བླ་མར་བསྟོད་པའི་ལག་ཆ་ལས་གཞན་རང་གི་དགའ་སྐྱོ་ཆགས་སྡང་སོགས་མཚོན་བྱེད་དུའང་བཀོལ་བར་སྙམ།དཔེར་ན་ཤར་གངས་རི་མ་ལས།
རང་བསྟན་པ་འཛིན་པར་ཁས་ལེན་བཞིན།།
གཞན་བསྟན་འཛིན་དགྲ་བོའི་དྭངས་མར་འཛིན།།
ཚུལ་འདི་ལ་སྐྱོ་བ་གཏིང་ནས་སྐྱེ།།
ཞེས་ཐར་པ་ལ་བསྟོད་པ་དང་འཁོར་བར་སྨད་པ་ཙམ་མིན་པར་དུས་རྒྱུན་དུ་འབྱུང་བཞིན་པའི་དོན་རྐྱེན་ཞིག་བྲིས་པ་སྟེ་ཆོས་པའི་གཟུགས་བརྙན་འགའ་ཞིག་ཆོས་པ་གཞན་རྣམས་ལ་སྡང་ཞིང་སྡིགས་པའི་ཚུལ་སྙན་ངག་ཏུ་བཀོད་པའོ།།
ཡང་འཕགས་བསྟོད་ལས།
སྟོབས་དང་ལྡན་རྣམས་རང་འདོད་ལྷུར་ལེན་ཕན་ཚུན་རྩོད་ཅིང་དམན་ལ་འཚེ།།
དམན་པ་རྣམས་ནི་རྟག་ཏུ་འཁོལ་ཞིང་གྱི་ནའི་ཟས་ཀྱང་རྙེད་པར་དཀའ།།
ཞེས་པ་ལྟ་བུར་མཚོན་ན་སྐབས་དེའི་བོད་ཡུལ་དུ་འབྱུང་བཞིན་པའི་དོན་རྐྱེན་ལ་སྦྱར་བ་སྟེ་སྙན་ངག་འདི་རྩོམ་དུས་ནི་བོད་དུ་རྒྱལ་པོ་ལྷ་བཟང་གི་བཙན་འཛུལ་མཇུག་བསྒྲིལ་ཐུབ་ཙམ་བྱུང་ཞིང་།ཕོ་ལྷ་བས་རྒྱལ་འཚོང་བྱས་ཏེ་རྒྱ་ནག་གོང་མར་མགོ་འདོགས་ཀྱི་ལས་ངན་རྩོམ་པའི་སྐབས་དང་འཁེལ་བས་བོད་ཡུལ་དུ་རྡབ་གསིག་ཚད་མེད་ཡོང་བཞིན་ཡོད།ཟིང་འཁྲུག་དེ་དག་ལས་སྡུག་གྱོང་མྱོང་མཁན་ནི་མི་མང་ཕལ་པ་ཡིན་པ་བཤད་ཅི་དགོས།(འདི་གཉིས་ནི་དཔེ་མཚོན་ཙམ་ལས་སྲོལ་རྒྱུན་སྙན་ངག་ཏུའང་འདི་འདྲ་བ་ཤིན་ཏུ་མང་།)

ཅི་ཞིག་ལ་བོད་ཀྱི་དེང་རབས་སྙན་ངག་ཟེར།

བོད་ཀྱི་དེང་རབས་སྙན་ངག་དར་དུས་ནི་བོད་དུ་ཆོས་སྲིད་ཀྱི་འགྱུར་བ་མང་ཞིང་ཕྱིའི་རིག་གནས་ཀྱི་ཤན་ཤུགས་ཆེ་བའི་དུས་སྐབས་སུ་འཁེལ་ཡོད།སྐབས་དེའི་གཞོན་སྐྱེས་ཚོ་སྲོལ་རྒྱུན་སྙན་ངག་ལ་རྐང་བརྟན་པོར་ཚུགས་རྗེས་ཕྱིའི་རིག་གནས་ནང་འདྲེན་བྱེད་པར་ཁ་ཕྱོགས་ཤིང་སྐབས་དེར་རྩོམ་ཚུལ་འདི་ཉིད་ཀྱང་དང་དུ་བླངས།
བོད་ཀྱི་དེང་རབས་སྙན་ངག་ནི་སྲོལ་རྒྱུན་སྙན་ངག་ལས་རྣམ་པའི་ཆ་ནས་རྒྱ་ཆེ་ཞིང་།བརྗོད་བྱའི་ཆ་ནས་ཁོད་ཡངས་པས་འདིའོ་ཞེས་བཤད་དུ་མི་བཏུབ་པ་ཞིག་རེད།
དེའང་སྤྱི་བརྟོལ་ཙམ་དུ་དབྱེ་ན་རྩོམ་ལུས་ལ་རང་མོས་དང་ཚིགས་བཅད་གཉིས་སུ་དབྱེ་བ་དང་།དེའང་རྐང་པ་དོ་མི་མཉམ་པ་ལ་རང་མོས་ཟེར་ཞིང་།ཚིགས་སུ་བཅད་པ་ལ་བཅད་གསར་སྙན་ངག་ཏུ་འབོད་སྐད།
བརྗོད་བྱའི་ཆ་ནས་ཤིན་ཏུ་ཁོད་ཡངས་པས་འདི་ཡིན་ཞེས་ཁ་མཚོན་གཅད་དཀའ།

1.བཅད་གསར་སྙན་ངག

བཅད་གསར་སྙན་ངག་ཏུ་འབོད་པའི་དེང་རབས་སྙན་ངག་གི་རིགས་འདི་ནི་དེ་སྔར་བོད་དུ་དར་མ་མྱོང་བ་ཞིག་ནི་མ་རེད་འདོད།རྩོམ་ལུས་ནི་མེ་ལོང་མའི་རྒྱན་གྱིས་མ་སྤྲས་པའི་འབོལ་རྩོམ་དག་དང་མཚུངས་ལ།བརྗོད་བྱ་ནི་གཅིག་ཏུ་མ་ངེས།
དཔེར་ན་བཅད་གསར་སྙན་ངག་ཏུ་འདོད་པའི་དགེ་ཆོས་ཀྱི་སྙན་ངག
ཐོས་བརྩོན་ཤེས་པ་ཅན་གྱི་ཉམ་ཆུང་གི་ཁ་སྟབས།།
བླུན་པོ་ནོར་རྐྱལ་ཁུར་བའི་དབང་ཤེད་ཀྱིས་བཅོམ་ཞིང་།།
ཆོས་ཚུལ་བཀུར་བསྟིའི་བཞུགས་གྲལ་གོ་ལོག་ཏུ་བསྡེབས་ནས།།
སེང་གེ་ཁྱི་ཡི་གཡོག་ཏུ་གྱུར་ཚུལ་འདི་སྐྱོ་བ།།
ལྟ་བུ་ནི་སྲོལ་རྒྱུན་སྙན་ངག་ཁྲོད་དུ་གང་སར་མཐོང་རྒྱུར་ཡོད།

2 རང་མོས་སྙན་ངག

སྤྱིར་བོད་ཀྱི་རྩོམ་འབྱུང་ལོ་རྒྱུས་སྟེང་དོན་གྲུབ་རྒྱལ་གྱི་སྙན་ངག་«ལང་ཚོའི་རྦབ་ཆུ»ནི་རང་མོས་སྙན་ངག་དང་པོ་དེ་རྩི་བཞིན་ཡོད་ལ་དོན་གྲུབ་རྒྱལ་རང་མོས་སྙན་ངག་གི་སྲོལ་འབྱེད་མཁན་དུ་རྩི་བཞིན་ཡོད་མོད།དེང་གི་ན་གཞོན་ཚོའི་ཁྲོད་ན་«ལང་ཚོའི་རྦབ་ཆུ»རང་མོས་སྙན་ངག་ཚད་ལྡན་དུ་མི་འདོད་མཁན་མང་སྟེ།མི་རབས་གསུམ་པའི་དེ་སྔའི་མགོ་ཁྲིད་སྐྱབས་ཆེན་བདེ་གྲོལ་གྱིས་ “«ལང་ཚོའི་རྦབ་ཆུ»དེ་དེ་སྔར་རྦབ་ཆུ་ཡིན་མོད།ད་ལྟ་རྐ་ཆུར་གྱུར་འདུག་”ཅེས་ཟུར་ཟ་གནང་ཡོད་པ་དང་།མི་རབས་གསུམ་པའི་དེ་སྔའི་མགོ་ཁྲིད་ཁྲི་སེམས་དཔས་ “་གྱེར་འདོན་སྙན་ངག«ལང་ཚོའི་རྦབ་ཆུ»སོགས་ཀྱིས་དུས་རབས་དེ་དང་ལོ་རབས་དེ་ལས་འགན་རྫོགས་ཟིན་པས་ན། སྐབས་དེའི་སྙན་ངག་ཏུ་འབོད་པ་དེ་དག་ནི་ང་ཚོའི་དེང་གི་སྙན་ངག་དང་གཏན་ནས་མི་འདྲ་ལ།ཡང་ན་འདྲ་མི་སྲིད་ལ་འདྲའང་མི་རུང་།དེ་བཞིན་དུ་ང་ཚོ་མི་རབས་འདིའི་སྙན་ངག་གསར་རྩོམ་གྱི་ཐོན་ཁུངས་སུ་ཅིས་ཀྱང་མི་འགྱུར་རོ།།ཞེས་«ལང་ཚོའི་རྦབ་ཆུ»ནི་གྱེར་འདོན་སྙན་ངག་ཙམ་ལས་རང་མོས་སྙན་ངག་ཚད་ལྡན་ཞིག་མིན་པ་དང་དེ་ནི་ཁོ་ཚོ་སྟེ་དེང་གི་ན་གཞོན་རྣམས་ཀྱི་གསར་རྩོམ་གྱི་ཐོན་ཁུངས་སུ་འགྱུར་མི་སྲིད་པར་འདོད་ཡོད།
རང་མོས་སྙན་ངག་ལ་འབྲི་སྟངས་མི་འདྲ་བ་སྣ་ཚོགས་ཡོད་ལ།སྔ་མ་སྔ་མ་ལས་ཕྱི་མ་ཕྱི་མ་ལེགས་པའི་ཁ་གཡང་སྒྲོག་གི་ཡོད།ལྷག་པར་དུ་དེང་གི་མི་རབས་གསུམ་པ་ཞེས་པའི་སྙན་ངག་པའི་ཚོགས་པ་ཞིག་ཡོད་པར་ཁོ་ཚོས་ཁོ་ཚོ་ནི་དེང་རབས་སྙན་ངག་པ་དངོས་ཡིན་ལ་གཞན་ཡོད་ཚད་ནི་སྲོལ་རྒྱུན་སྙན་ངག་པ་རུ་འདོད་དེ་དེ་སྔའི་ཚོགས་པ་དེའི་ཚོགས་གཙོ་སྐྱབས་ཆེན་བདེ་གྲོལ་གྱིས་གསུངས་དོན། “གསལ་པོར་བཤད་ན་མི་རབས་གསུམ་པ་ཚོས་མེ་ལོང་མའི་ལུགས་དང་།དོན་གྲུབ་རྒྱལ་གྱི་ལུགས།འཇུ་སྐལ་བཟང་གི་ལུགས་བཅས་སྙན་ངག་གི་ལམ་ཀ་དེ་གསུམ་པོ་སྲོལ་རྒྱུན་སྙན་ངག་ཏུ་ངོས་འཛིན་ཞིང་ཁོ་ཚོ་རང་གིས་འབྲི་བཞིན་པ་དེ་ད་གཟོད་སྙན་ངག་གསར་བར་རྩི་བཞིན་ཡོད།”
ལོ་རབས་བརྒྱད་ཅུ་དགུ་བཅུའི་ནང་གི་རང་མོས་སྙན་ངག་པ་ཕལ་ཆེ་བའི་སྙན་ངག་དག་ལ་བལྟས་ན་ཚིགས་སུ་བཅད་མ་བཅད་ཙམ་ལས་བསམ་བློ་གཏོང་སྟངས་དང་ཐ་སྙད་བཀོལ་སྟངས་སོགས་མེ་ལོང་མའི་ལུགས་དང་མཐུན་ཕྱོགས་མང་ལ།སྙན་ངག་ནི་བསྟོད་པ་བྱེད་སྤྱད་དང་ཁ་གཡང་སྒྲོགས་བྱེད་བཅས་སུ་བཀོལ་བས་སྲོལ་རྒྱུན་སྙན་ངག་གི་ཤན་ཤུགས་ཆེན་པོ་ཐེབས་ཡོད།ཡིན་ཡང་དེང་གི་དུས་སུ་རྣམ་པ་དེ་དག་གཏན་ཡལ་དུ་གྱུར་ནས་སྙན་ངག་ནི་མི་སྒེར་གྱི་དགའ་སྐྱོ་ཆགས་སྡང་སོགས་མཐོང་བའི་མེ་ལོང་ལྟ་བུ་ཞིག་ཏུ་གྱུར་ཅིང་།རྒྱུ་མཚན་དེས་པདྨ་དང་།ཀུ་མུད།འབིགས་བྱེད་རི་བོ།ཙནྡན་སོགས་ཆ་རྒྱུས་མེད་པའི་དངོས་པོ་དག་གིས་སྙན་ངག་ཏུ་གོ་གནས་ཡོངས་སུ་ཤོར་ཞིང་།མེ་ཏོག་དང་།སྤྲིན་དཀར།འབྲོང་གཡག་སོགས་ཐུན་མོང་གི་ལོངས་སྤྱོད་དག་ལའང་གོ་གནས་ཆེན་པོ་ཐོབ་མེད།དེ་ཚོའི་ཚབ་ཏུ་ཞིང་གྲོང་དང་།སྡོད་ཁང་།གོས་ཐུང་།རོ་སྒམ།ཆང་སོགས་མི་སྒེར་འབའ་ཞིག་གི་ཐོབ་བྱ་རྣམས་ཀྱིས་སྙན་ངག་ཏུ་“སྒེར་གཅོད”བྱེད་བཞིན་ཡོད།

མཇུག་གི་གཏམ།

རྩོམ་ཐུང་འདི་བྲིས་ཏེ་མཇུག་ཏུ་སླེབས་དུས་ངས་སྙན་ངག་གསར་རྙིང་གཉིས་ལ་གཅིག་ཤོས་ལེགས་ཤིང་གཅིག་ཤོས་ཉེས་སོ་ཞེས་སྡོམ་ཚིག་འགོད་མི་འདོད་ལ།སྙན་ངག་རྩོམ་ཚུལ་གསར་བ་ཞིག་བྱུང་བ་དེས་སྔ་མ་རྣམས་རྨེག་མེད་དུ་བཏང་བ་རེད་མི་འདོད།དེས་ནི་སྔ་མ་རྣམས་རྨེག་མེད་དུ་བཏང་བའི་ཚབ་ཏུ་དེ་རྣམས་ཕུན་སུམ་ཇེ་ཚོགས་སུ་བཏང་བར་རེད་འདོད་ཡོད།དེ་བས་རྙིང་བར་འཐོམས་ཤིང་གསར་བ་འབུར་འཇོམས་བྱེད་པ་རྩོམ་རིག་གི་གཤེད་ཡིན་ལ།གསར་བར་ཞེན་ཁུལ་བྱས་ཏེ་རྙིང་བ་རྩ་མེད་བཏང་བའང་རྩོམ་རིག་གི་གོལ་ལམ་ཞིག་ཏུ་འདོད་ཡོད།
རྩོམ་རིག་ནི་མིའི་རིགས་ཀྱི་བློ་གྲོས་ཀྱི་ཉིང་ཁུ་ཡིན་ཕྱིར་འཛད་མཐའ་ཡོད་མི་སྲིད་ལ་དེ་རིང་གི་གསར་བ་མང་པོ་ཞིག་སང་ཉིན་རྙིང་བར་གྱུར་འགྲོ་ཞིང་།ཁ་སང་གི་རྙིང་བ་མང་པོ་ཞིག་ལ་དེ་རིང་སྲོག་གསར་དུ་ཞུགས་མི་ཆོག་པ་ཅི་ལ་ཡོད།དེ་བས་དུས་སྔ་ཕྱིའི་ཆ་ནས་སྙན་ངག་གི་རིན་ཐང་འཇལ་བ་དང་།གསར་རྙིང་གི་ཆ་ནས་སྙན་ངག་གི་དགེ་མཚན་གླེང་བ་ནི་བཞད་གད་ཀྱི་གནས་སོ།།
མཇུག་ཏུ་ཞུ་འདོད་པ་ཞིག་ནི་བོད་ཀྱི་སྙན་ངག་གསར་རྙིང་གི་ཁྱད་པར་རྩོམ་ཐུང་ཞིག་གིས་འབྲི་མི་ཚར་ཞིང་།བོད་ཀྱི་སྙན་ངག་གི་དགེ་མཚན་ཁོ་བོ་ལྟ་བུ་ཞིག་གིས་བརྗོད་ཐུབ་པ་ཞིག་མིན་མོད།འདིར་སེམས་ལ་གང་དྲན་ཤོག་དཀར་ཏུ་ཕབ་པ་འདིས་བོད་ཀྱི་རྩོམ་རིག་གི་ཟུར་ཞིག་མངོན་ཡོད་པའི་རེ་འདུན་ཞུ།
__________
ཟུར་བལྟས་དཔེ་དེབ་དང་དྲ་བ།
༡མཆོད་མེ་བོད་ཀྱི་རྩོམ་རིག་དྲ་བ།
༢ན་གཞོན་གསར་བའི་དྲ་བ།
༣དགེ་ཆོས་དྲ་བ།
༤ཆོས་སྤྱོད་ཉེར་འཁོར་ཕྱོགས་བསྡེབས།(དགེ་ལུགས་དཔར་མ།)
༥ནགས་ཀློང་ཁུ་བྱུག་འདུ་གནས།

གཟི་མདངས་ཅན་དུ་འཁྲུངས་ཤིང་སྙིང་རྗེ་ལྡན་པར་འཁྲུངས།

2013-01-14T08:00:00.000-08:00

Born glamorous, born compassionate

Author Chetan Bhagat writes exclusively for TOI about his meeting with the Dalai Lama.

རྩོམ་པ་པོ་ཆེ་ཏཱན་བྷ་ག་ཏས་རྒྱ་གར་དུས་བབ་ལ་ཏཱ་ལའི་བླ་མ་མཆོག་དང་མཇལ་བའི་སྐོར་བྲིས་པ།

Mumbai is a city known for its glamour events. Glittering film premieres, snazzy award ceremonies and flamboyant fashion shows occur round the year. In fact, the advertising tagline of the Bombay Times you hold is "born glamorous".
མུའུ་བྷེ་ནི་ཁྲ་ཁྲ་ཟིང་ཟིང་གི་ལས་ཀའི་ཐོག་སྐད་གྲགས་ཡོད་པའི་གྲོང་ཁྱེར་ཞིག་རེད། བཀྲག་མདངས་ལྡན་པའི་གློག་བརྙན་ཁྱབ་སྒྲོགས་དང་། མཛེས་སྡུག་ལྡན་པའི་ལེགས་སྐྱེས་འབུལ་བའི་དུས་སྟོན། ཚོན་མདངས་རྣམ་པར་བཀྲ་བའི་གྱོན་གོས་དཔེ་གསར་སྟོན་མོ་བཅས་ལོ་ལྟར་ཚོགས་བཞིན་ཡོད་པས། བྷོམ་བྷེ་དུས་བབ་ཀྱི་ཁྱབ་སྒྲོགས་སྟེགས་བུ་ནི་ “སྐྱེས་བ་ཉིད་ནས་གཟི་མདངས་དང་ལྡན་པ”རེད།

in the city of glitz, one could wonder if an event by a spiritual leader would have any impact. And yet, the Dalai Lama's event would go down as one of the best events of the year. For many events manage the razzmatazz, but few actually manage to touch you.

མང་པོ་ཞིག་གིས་རྒྱས་སྤྲོས་ཆེ་བའི་གྲོང་ཁྱེར་གྱི་ནང་དུ་ཆོས་ལུགས་ཀྱི་དབུ་ཁྲིད་ཅིག་གི་བྱ་བས་ཤུགས་རྐྱེན་ཐེབས་ཐུབ་བམ་དྲན་སྲིད་མོད། ཏཱ་ལའི་བླ་མ་མཆོག་གི་ལས་འགུལ་ནི་ལོ་འདིའི་ལས་འགུལ་ལེགས་ཤོས་ཤིག་ཏུ་གྱུར་སོང་། གང་ལགས་ཤེ་ན་ལས་འགུལ་མང་པོ་ཞིག་གིས་ཡིད་སེམས་འགུག་ཐབས་བྱེད་མོད་ཡིད་དུ་འཐད་པ་ནི་རེ་གཉིས་ཙམ་རེད།

I had had sleepless nights after saying yes to Pritish Nandy's invitation to moderate a session with His Holiness the Dalai Lama. And yet, one glance at His Holiness and all my nervousness evaporated. It didn't feel like I was meeting one of the world's top religious leaders, it felt like I was meeting a friend. Funnily enough, everyone else felt the same.

ངས་པ་རི་ཊི་ཤ་ནཱན་དི་ལ་༸གོང་ས་ཏཱ་ལའི་བླ་མ་མཆོག་དང་ལྷན་དུ་ཚོགས་རྒྱུའི་འདུ་ཚོགས་དེར་བཅར་བའི་མགྲོན་བསུ་ཁས་ལེན་ཞུས་རྗེས་གཉིད་མི་ཁུག་པའི་མཚན་མོ་འགའ་བསྐྱལ་དགོས་བྱུང་།
ཡིན་ཡང་༸གོང་ས་མཆོག་ལ་མིག་ལྟ་ཐེངས་ཤིག་གིས་སེམས་འཚབ་རྣམས་གཙང་ཡལ་དུ་བུད་སོང་། ང་འཛམ་གླིང་གི་ཆོས་ལུགས་དབུ་ཁྲིད་ཅིག་དང་ འཕྲོད་བཞིན་པའི་ཚོར་བ་མི་སྦྱིན་པར་རང་གི་གྲོགས་པོ་ཞིག་དང་ཐུག་བཞིན་པའི་སྣང་བ་སྦྱིན་བྱུང་། ཡ་མཚན་པ་ཞིག་ལ་མི་གཞན་རྣམས་ལའང་ཚོར་བ་དེ་རང་བྱུང་འདུག

Perhaps it was the Dalai Lama's child-like sincerity. Or the fact that he didn't talk to people from a pedestal, but became one of them. He joked and laughed. He referred to himself as 'nothing extraordinary.' He mentioned how Desmond Tutu once teased him that he was too mischievous and not holy enough for a Dalai Lama.
གཅིག་བྱས་ན་དེའི་རྐྱེན་ཏཱ་ལའི་བླ་མ་མཆོག་གི་བྱིས་པ་ལྟ་བུའི་སྤྱོད་ཚུལ་ཡ་རབས་དེའི་ཡིན་སྲིད་ལ། ཡང་མིན་ན་ཁོང་གིས་འཕང་སྟེགས་མཐོ་བོ་ཞིག་གི་སྟེང་ནས་མི་རྣམས་ལ་གསུང་བཤད་མི་གནང་བར་ཁོ་ཚོ་དང་མཉམ་གཅིག་ཏུ་བསྡད་པ་དེས་ཡིན་སྲིད། ཁོང་གིས་མཚར་གཏམ་གསུངས་སོང་ལ་དགོད་མོ་དགོད་གནང་སོང་བར་མ་ཟད། ཁོང་རང་ཉིད་ “དཀྱུས་མ་མ་ཡིན་གང་ཡང་མིན་”ཚུལ་གསུངས་སོང་། ད་དུང་ཁོང་གིས་ཌེས་མཱོན་ད་ཊུ་ཊུས་ཁོང་ལ་རྙེད་བརྐོས་ཏེ་ཁོང་བསྟན་བཤིག་ཚ་བས་ཏཱ་ལའི་བླ་མ་འདྲ་བོ་མི་འདུག་ཅེས་གསུངས་མྱོང་བའི་སྐོར་ཡང་གསུངས་སོང་། He also spoke what he felt was right and in the best interest of people. For how many religious heads have you heard advocating scientific methods; or saying that 'in order to be compassionate, you don't have to be religious'. Compassion is caring for the pain of others. Dalai Lama's simple message — We ourselves can be happier and more peaceful, if we show compassion. This compassion extends not only to humans, but also to animals.
ཁོང་གིས་རང་ཉིད་ཀྱིས་གང་ལེགས་པོ་མཐོང་བ་རྣམས་དང་མི་མང་གི་བློ་དང་བསྟུན་ནས་གསུངས་གནང་སོང་། ཆོས་ལུགས་མགོ་ཁྲིད་ཅིག་གིས་ཚན་རིག་གི་ཐབས་ལམ་ལ་རྒྱབ་སྐྱོར་བྱེད་པའམ་ “བྱམས་པ་བྱེད་པར་ཆོས་པ་ཡིན་མི་དགོས”ཟེར་མཁན་བྱུང་མྱོང་ཡོང་ངམ། ཏཱ་ལའི་བླ་མ་མཆོག་གི་གསུང་འཕྲིན་སྟབས་བདེ་ཤོས་ནི་འདི་ལྟར། བྱམས་པ་བྱེད་པ་ནི་གཞན་ལ་སེམས་ཁུར་བྱས་པ་ལ་ཟེར། གཞན་ལ་བྱམས་པ་སྒོམ་ན་ང་ཚོ་རང་ཉིད་སེམས་སྐྱིད་པོ་དང་ཞི་བ་ཆགས་ཀྱི་རེད། བྱམས་པའི་སེམས་དེ་འགྲོ་བ་མི་ཙམ་ལ་མ་ཡིན་པར་དུད་འགྲོ་རྣམས་ལའང་ཁྱབ་ཐུབ་དགོས།
Many spiritual and religious gurus render advice. Yet, with His Holiness there is an instant connect. He doesn't preach. He merely speaks what he feels. When he speaks about inner peace, you feel his inner peace. When he talks about happiness, you see joy in his eyes. As a result, everyone in the audience was transfixed.
ཆོས་ལུགས་མགོ་ཁྲིད་མང་པོས་བསླབ་བྱ་རྒྱག་གི་ཡོད་མོད། ༸གོང་ས་མཆོག་གི་བཀའ་སློབ་དེ་མུ་དང་བང་རིམ་ལྡན་ཤོས་ཤིག་ཏུ་འདུག ཁོང་གིས་ཆོས་བཤད་གནང་གི་མི་འདུག ཁོང་གིས་རང་ཉིད་ཀྱིས་གང་དགོངས་པ་རྣམས་གསུང་ཀྱིན་འདུག ཁོང་གིས་བདེ་སྐྱིད་ཀྱི་སྐོར་གསུང་དུས་ཁོང་གི་སྤྱན་ལས་བདེ་སྐྱིད་མཐོང་གི་འདུག དེ་བས་ཚོགས་ཞུགས་པ་ཚང་མ་ཡིད་སེམས་ཁུགས་ཏེ་གྲག་མེད་འགུལ་མེད་དུ་གྱུར་སོང་། He doesn't take fixed positions. He doesn't impose absolute solutions. Even in the case of compassion towards animals, he didn't talk about shunning all animal products or becoming vegetarian. 'The fishermen's livelihood depends on catching fish,' he said. In fact, the Dalai Lama is not completely vegetarian, something he admitted right at the start. What he suggests is reducing animal product consumption, and wherever possible avoid unnecessary cruelty. Such a pragmatic approach connects with people better and leads to more change, than utopian absolutes.

ཁོང་དཀྱིལ་དཀྲུང་དུ་བཞུགས་ཀྱི་མི་འདུག་ལ་མི་ཚོ་ལ་བཀའ་གཏོང་བ་སོགས་ཀྱང་གནང་གི་མི་འདུག དུད་འགྲོ་ལ་སྙིང་རྗེ་སྒོམ་སྟངས་གསུང་དུས་ཀྱང་དུད་འགྲོ་ལས་བྱུང་བའི་ཅ་དངོས་ཡོངས་རྫོགས་དགག་དགོས་པ་དང་དཀར་ཟས་སྐྱོང་མཁན་གཙང་མ་འགྱུར་དགོས་པ་བཅས་གསུང་གིན་མི་འདུག ཁོང་གིས་“ཉ་བ་རྣམས་ལ་མཚོན་ན་འཚོ་བ་ཉ་ལ་བསྟེན་གྱི་ཡོད་པ་རེད”གསུངས་སོང་། དོན་ངོ་མར་ཏཱ་ལའི་བླ་མ་ཁོང་ཉིད་ཀྱང་དཀར་ཟས་རྐྱང་པ་སྐྱོང་མཁན་མིན་ཞེས་དང་པོ་ནས་ཞལ་བཞེས་གནང་སོང་། ཁོང་གིས་དུད་འགྲོ་ལས་བྱུང་བའི་ཅ་དངོས་རྣམས་གང་ཐུབ་ཐུབ་ཉུང་དུ་གཏོང་བ་དང་མི་དགོས་པའི་རྩུབ་སྤྱོད་རྣམས་སྤང་དགོས་པའི་དགོངས་ཚུལ་འདོན་གྱིན་འདུག ཁ་ཡོད་ལག་ཡོད་ཀྱི་བྱ་བ་འདི་ལྟ་བུ་རྣམས་རླབས་ཆེན་དུ་འབོད་པའི་སྟོང་བཤད་དག་ལས་མི་མང་ལ་ཕན་ཐོགས་ཆེ་བ་འདུག་ལ་འདི་ལྟ་བུས་འགྱུར་བ་མང་ཙམ་གཏོང་ཐུབ་ཀྱི་འདུག In a city that manufactures and sells dreams, and where fakeness and apathy are common elements of everyday life, the Dalai Lama's visit served as a soothing balm. It is reassuring to know that someone who talks relentlessly about compassion and love, is still heard worldwide. It is heartening to know that despite all the injustices and evil we see around us, someone like His Holiness exists and is followed by millions for his positive thoughts. His impact tells you no matter how evil, fake or apathetic the world gets; humanity will always have hope. His Holiness didn't just visit Mumbai. He blessed Mumbai. Many have tried to cultivate hate in our city. He was one of the rare few, who came and planted the seeds of compassion and love. Let us tear away the weeds of hate, and make what he planted blossom. Let us not only be born glamorous, but also be born compassionate.

རྨི་ལམ་བསྐྲུན་ཞིང་རྨི་ལམ་བཙོང་བ་དང་རྫུན་པ་དང་བཏང་སྙོམས་ཉིན་རེའི་འཚོི་བའི་ཆ་ཤས་སུ་འགྱུར་བཞིན་པའི་གྲོང་ཁྱེར་དེ་ལ་ཏཱ་ལའི་བླ་མ་མཆོག་ཕེབས་པ་ནི་རྨ་ཁ་གསོ་བའི་འབྱུག་སྣུམ་ལྟ་བུར་གྱུར་སོང་། ངལ་བ་ཁྱད་དུ་བསད་དེ་བྱམས་པ་དང་བརྩེ་བ་གླེང་བཞིན་པའི་སྐྱེས་བུ་ཞིག་གི་གསུང་སྐད་དེང་གི་དུས་སུའང་འཛམ་གླིང་ཁྱོན་ཡོངས་སུ་ཁྱབ་ཐུབ་པ་ནི་དགའ་འོས་པ་ཞིག་རེད། ང་ཚོའི་གཡས་གཡོན་དུ་དྲང་བདེན་མ་ཡིན་པ་དང་སྡུག་རྩུབ་ཀྱིས་ཁེངས་ནའང་༸གོང་ས་མཆོག་ལྟ་བུའི་སྐྱེས་བུ་ཞིག་བཞུགས་ཡོད་པ་དང་། མི་མང་ས་ཡ་མང་པོས་ཁོང་གི་གསུང་བརྩི་གིན་ཡོད་པ་དེ་ནི་དགའ་འོས་པ་ཞིག་ཅི་ལ་མིན། ཁོང་གི་ཤུགས་རྐྱེན་དེས་ཅི་ཞིག་བསྟན་གྱིན་ཡོད་ཟེར་ན་འཛམ་གླིང་འདི་སྡུག་པོ་དང་། རྫུན་པ། བྱིངས་རྨུགས་ཅན་ཏུ་ཇི་ལྟར་འགྱུར་ཡང་མིའི་རིགས་ལ་ནམ་ཡང་རེ་བ་ཡོད་པ་བསྟན་པ་རེད། ༸གོང་ས་མཆོག་མུའུ་བྷེ་རུ་ཕེབས་པ་ཙམ་མ་ཟད་མུའུ་བྷེ་བྱིན་གྱིས་བརླབས་སོང་། མི་མང་པོ་ཞིག་གིས་ང་ཚོིའི་གྲོང་ཁྱེར་དུ་ཞེ་སྡང་འདེབས་པར་བྱེད་མོད། ༸གོང་ས་མཆོག་ནི་བྱམས་པ་དང་བརྩེ་བའི་ས་བོན་སྐྲུན་མཁན་གྱི་སྐྱེས་བུ་ཉུང་ཤས་ཁྲོད་ཀྱི་གཅིག་རེད། ང་ཚོས་ཞེ་སྡང་གི་རྩྭ་ལྡུམ་གཙང་ཕྱགས་བྱས་ཏེ་ཁོང་གིས་བཏབ་པའི་ས་བོན་དེ་ལ་འབྲས་བུ་སྨིན་པར་བརྩོན། ང་ཚོ་སྐྱེས་པ་ཉིད་ནས་ཁྲ་ཁྲ་ཟིང་ཟིང་ཅན་ཙམ་མིན་པར་སྐྱེས་པ་ཉིད་ནས་བྱམས་སྙིང་རྗེ་ཅན་ཞིག་བྱེད།

**དྲ་གྲོགས་བསྟན་འཛིན་ཉིན་བྱེད་ལགས་ཀྱིས་བསྒྱུར་རྩོམ་འདིའི་ཐོག་བསམ་ཚུལ་རླབས་ཆེན་མང་པོ་གནང་བར་ཐུགས་རྗེ་ཆེ་ཞུ།

པོ་ཏ་ལ་ལ་ཕུལ་བ།

2012-12-31T11:36:00.002-08:00

པོ་ཏ་ལ།
ཐམས་ཅད་རུལ་མྱགས་སུ་སོང་བའི་ཤུལ་དུ།
ཁྱེད་གཅིག་པུ་མཐོ་སྒང་གི་ཡང་རྩེ་ནས་འགྲེང་བ་གོ་བས་དགའ།

སྤུན་ཟླ་གྲངས་མེད་ཀྱི་ཚེ་སྲོག་དུས་ཚོད་ཀྱི་རླུང་བུས་ཁུར་ཞིང་།
ང་ཚོའི་མང་པོ་མང་པོ་ཞིག་དུས་ཚོད་ཀྱི་ཡོལ་བས་སྒྲིབ་དུས།

ཁྱེད་གཅིག་པུ་དུས་ཚོད་ཀྱི་ས་རྡུལ་མ་གོས་པ་གོ་བས།
ང་ཚོ་སྟེ་ཕྱི་ཡུལ་དུ་ལོ་གསར་པ་སར་བཞིན་པའི་ཁྱེད་ཀྱི་བུ་ཕྲུག་འཁྱམ་པོ་དག་དགའ་བྱུང་།

ལོ་ངོ་འདི་དག་གདོན་འདྲེ་ཞིག་དང་འདྲ་བར།
ང་ཚོའི་ཡོད་ཚད་ལ་སྤྲང་ལག་འཆང་ནས་སོང་ཞིང་།
ང་ཚོའི་ཡོད་ཚད་སྦགས་བཙོག་བསྒྱུར་ཏེ་སོང་བས།
ང་ཚོ་ལ་དྲི་མའི་མ་གོས་པའི་ཅ་དངོས་མང་པོི་ལུས་མི་འདུག

དེ་བས། དུས་ཚོད་ཀྱི་བསླུ་བྲིད་དུ་ཚུད་མི་ཉན།
དུས་ཚོད་ཀྱི་བསླུ་བྲིད་ལས་འགོངས་དགོས། གོ་ཨེ་བྱུང་། ང་ཚོའི་ཨ་མ་ལྟ་བུའི་ཡིད་འོང་མ།

༡༠༡༣ ༡ ༡ ཞོགས་པ་ཆུ་ཚོད་00:11ལ་དྲ་ཐོག་ཏུ་ཐད་ཀར་གཏགས་ཏེ་བཏང་།

I FEEL HOPELESS

2012-12-17T22:51:00.001-08:00

LOBSANG WANGDUE

When i conjure up the tears of my mother,

Living far far away,

I feel hopeless,

When i see the greying hairs of my mother,

Entering into her twilight,
I feel hopeless,

When i hear the brothers and sisters

In our own backyard getting murdered,

Without doing anything harmful,

I feel hopeless,

When i see the scenes

Where our proud countrymen burn themselves alive,

With us on their mind,

I feel hopeless.