ՕԳՆԵՆՔ ՄԻՄՅԱՆՑ ԽՈՀԱՆՈՑՈՒՄ

Fish Salad / Ձկով Սալաթ

2018-01-28T08:50:00.001+04:00

Այս սալաթը եղբորս՝ Հայկի, սիրելի սալաթն է, քանի որ միշտ ինքն է պատրաստել ու հյուրասիրել մեզ,անպայման պետք է պատրաստվի մայոնեզով, հանկարծ չփորձեք նույնը պատրաստել թթվասերով ու պատրաստեք նախօրոք՝ ուտելուց 1օր կամ 5-6 ժամ առաջ․․․

ԲԱՂԱԴՐՈՒԹՅՈՒՆ

1․ 1 միջին սիգա ձուկ կամ հում ձկան ֆիլե/այլ ձկով չեմ փորձել, երևի նույնպես համեղ կլինի՝ օրինակ իշխանով կամ կարմրախայտով/՝ մոտ 0,5-0,8 կգ

2․ 6 միջին գազար

3․ 2 սոխ

4․ 300գ մայոնեզ

5․2ճգ բուսայուղ

աղ, սև պղպեղ

1․ Նախ եփում ենք ձուկը՝ աղով, ձկան ջուրը չենք թափում։

2․ Քերում ենք գազարը, կտրատում սոխը՝ միջին մեծության, ու բուսայուղով տապակում թավայի մեջ՝ այնքան, որ գազարը մի փոքր գույնը փոխի՝ մոտ 5-7 րոպե, ավելացնում ենք մի պտղունց աղ։

3․ Վերցնում ենք խորը մեծոտ ափսե ու սկսում ենք մեջը տեղադրել մեր սալաթը։ Գազարը կիսում ենք 3 մասի՝ մի փոքր էլ ձևավորման համար, մի մասը լցնում եք ափսեյի հատակին։

4․ Ձկանը ազատում ենք փշերից, ու կիսում 2 հավասար մասերի․1մասը դասավորում ենք գազարի վրա՝ վրան լցնում 2-4 ճաշի գդալ եփած ձկան ջուրը։

5․ Այնուհետև վրան քսում մայոնեզի մի շերտ, հետո նորից գազարի շերտը, ձկան շերտը՝ չենք մոռանում ձկան ջուրը, մայոնեզ ու վերջում էլի գազարի վերջին շերտը, վրան քսում ենք մայոնեզ, ձևավորման համար մի փոքր գազար եմ եզրերին լցնում ու մեր սալաթը պատրաստ է։ Այն փակում ենք դնում սառնարանը և համտեսում կամ հաջորդ օրը կամ գոնե 5-6 ժամ հետո։

ԲԱՐԻ ԱԽՈՐԺԱԿ

Hot / Կծու <Օստռի>

2015-09-08T02:28:00.002+05:00

Սա վրացական հրաշալի ուտեստ է, որը հենց կոչվում է կծու և հենց անվանումը մեզ հուշում է, որ այն շատ կծու է ու միաժամանակ շատ համեղ:Այս ուտեստը վրացիները պատրաստում են հատուկ կավե ամանի` կեցիի մեջ, կեցիի մեջ շատ ավելի արագ ու համեղ է ստացվում <Օստռին> և մատուցելուց շատ յուրահատուկ շքեղ տեսք է հաղորդում սեղանին...

ԲԱՂԱԴՐՈՒԹՅՈՒՆ

0.5կգ տավարի փափուկ միս
2բ մսի արգանակ
50գ բուսայուղ
3 գլուխ սոխ
4 քաղցր պղպեղ` կանաչ և կարմիր
1 կծու պղպեղ
3 լոլիկ
1 ճաշի գդալ վրացական համեմունք աջիկա
2-3 պտղունց Խմելի-Սունելի
սև պղպեղ
2պճեղ սխտոր
5 ճյուղ համեմ

1. Նախ կտրատում ենք միսը մանր-մանր, եփում ենք

2. Կտրատում ենք սոխը, թավայի մեջ լցնում ու մի փոքր տապակում, ավելացնում ենք միսը, լցնում ենք արգանակը:

3. Սկսում ենք կտրատել պղպեղները, ավելացնում մեր մասսային ու եփում մոտ 10 րոպե:

4. Ավելացնում ենք քերած լոլիկը կամ տոմատի մածուկը, աջիկան,Խմելի-Սունելին, սև պղպեղը ու նոր միայն ստուգում աղը ու հարկ լինելու դեպքում ավելացնում, քանի որ աջիկան աղի է լինում. եփում ենք ևս 5 րոպե:

5. Ավելացնում ենք ճզմած սխտորն ու կտրատած համեմը ու հեռացնում կրակից:

ԲԱՐԻ ԱԽՈՐԺԱԿ

Sharlotka Apple Pie / Շառլոտկա Խնձորի Բլիթ

2015-06-17T06:31:00.002+05:00

ԲԱՂԱԴՐՈՒԹՅՈՒՆ

Խմոր
125 գրամ կարագ կամ մարգարին
300գրամ ալյուր
1 ճաշի գդալ շաքարավազ
1 պտղունց աղ
1 ձվի դեղնուց
2 ճաշի գդալ սառը ջուր

Միջուկ
4-5 խնձոր

Կրեմ

1 բաժակ կաթ
1 բաժակ շաքարավազ
1 ճաշի գդալ ալյուր կամ օսլա
0.5 թեյի գդալ դարչին

1. Կարագը կամ մարգարինը անցկացնում ենք քերիչով, ավելացնում ալյուրը ու լավ շաղախում: Այնուհետև ավելացնում ենք ձվի դեղնուցն ու ջուրը ու լավ հունցում: Հունցելուց հետո այն դնում ենք սառնարանը` մոտ 30 րոպե:

2. Հաջորդը պատրաստում ենք կրեմը: Դրա համար շաքարավազն ու ալյուրը լավ խառնում ենք, ավելացնում կաթը, միատարր զանգված ստանալով` այն լցնում ենք հաստ հատակով կաթսայի կամ թավայի մեջ ու ցածր կրակի վրա դնում: Կրակին անընդհատ խառնում ենք, մինչև եռալը, այն պնդանալու է և բլբլթա, այդ ժամանակ հեռացնում ենք կրակից, ավելացնում ենք դարչինը և թողնում սառչի:

3. Մեր սառած խմորը հանում ենք ու գրտնակում` ջեռոցի տարայից բոլոր կողմերից 5-7 սմ ավելի մեծ: Տարայի հատակն ու եզրերը կարագով կամ բուսայուղով պատում ենք ու խմորը տեղադրում մեջը:

4. Խնձորները մաքրում ենք կեղևից և բարակ-բարակ կտրատում, այնուհետև շարում տարայի մեջ` ինչպես նկարում է:

5. Սառած կրեմը լցնում ենք խնձորներով դասավորած խմորի մեջը և ավելորդ խմորներով ձևավորում:

6. Թխում ենք նախապես 180 աստիճան տաքացրած ջեռոցում այնքան, մինչև մեր բլիթի երեսը կարմրի:

ԲԱՐԻ ԱԽՈՐԺԱԿ

Hut Cake / Խրճիթ Տորթ

2015-02-10T20:06:00.000+04:00

Այս խրճիթ տորթը անիմանալի համեղ է, սա կսիրեն այն մարդիկ, ովքեր սիրում են քաղցր կրեմի ու անհամ խմորի համադրությունը: Հետո իր միջուկի հաշվին համն ավելի հետաքրքիր է դառնում...Պատմելու փոխարեն ավելի լավ է սարքենք միասին :))

ՄԵԶ ԱՆՀՐԱԺԵՇՏ Է

ԽՄՈՐԻ ՀԱՄԱՐ
250գ կարագ կամ մարգարին
1 բաժակ մածուն կամ թթվասեր
1թեյի գդալ սոդա
1ճաշի գդալ քացախ
3-4 բաժակ ալյուր

ՄԻՋՈՒԿԻ ՀԱՄԱՐ
Միջուկի համար կարող եք օգտագործել նաև լոխում, ընկույզի, բալի, խաղողի մուրաբա կամ կտերը հանած խուրմա, չիր, չամիչ և այն ինչ Ձեր երևակայությամբ կսազի

500գ Դդումի մուրաբա
500գ գիլասի մուրաբա
1/2 բաժակ մանրացրած ընկույզ

ԿՐԵՄԻ ՀԱՄԱՐ
200 գ կարագ
1 տուփ եփած խտացրած կաթ

ՋՆԱՐԱԿԻ ՀԱՄԱՐ
2 ճաշի գդալ շաքարավազ
2ճաշի գդալ կակաո
3 ճաշի գդալ կաթ
30 գրամ կարագ

1. Առաջին հերթին պատրաստում ենք խմորը, փափկեցնում ենք կարագը, ավելացնում ենք մածունը` նախապես մեջը լցնելով սոդան ու քացախը, ալյուրը և ստանում ենք փափուկ խմոր, այն ծածկում ենք պոլիէթիլենային ծածկույթով ու դնում 1 ժամ սառնարանը:

2. Մինչ կսառչի խմորը. մենք պատրաստում ենք Խրճիթի միջուկը` Երկար երկար կտրատում ենք մեր մուրաբայի հատիկները, եթե լոխում է, ուրեմն լոխումը, ընկույզը, եթե
գիլասի մուրաբա է, ապա քամիչի մեջ ենք լցնում հատիկները ու քամում ենք:

3. 1 ժամը լրանալուն պես մեր խմորը հանում ենք սառնարանից և բաժանում ենք 15 հավասար գնդիկների: Մեկը թողնում ենք գրտնակելու համար, մնացածը դնում ենք նորից սառնարան:

4. Խմորը բացում ենք 8-10 սմ լայնությամբ և Ձեր ջեռոցի թավայի երկարությամբ և մեջը տեղադրում ենք մեր միջուկը ու փակում: Ստացվում է երկար ձող, տեղադրում ենք միանգամից թավայի մեջ ու
միացնում ենք տաքանալու մեր ջեռոցը:

5. Նույն գործողությունը կատարում ենք սառնարանում
տեղակայված բոլոր գնդերի
հետ: Եթե Ձեր միջուկը մի քանի բաղադրամասերից, ապա ամեն մի ձողիկի մեջ լցոնեք միայն մի տեսակը` հատիկների հետ նաև ընկույզը:

6. Երբ թավան լցվում է ձողերով, այն դնում ենք 200 աստիճան տաք ջեռոցի մեջ:
7. Ջեռոցից ձողերը կհանեք այն ժամանակ, երբ նրանք աննշան կկարմրեն:

8. Երբ բոլոր ձողերը պատրաստ են, անցնում ենք կրեմի պատրաստմանը: Թուլացրած կարագին քիչ-քիչ ավելացնում ենք խտացրած կաթը և խառնելով ստանում միասեռ զանգված:

9. Սառը ձողերից 5-ը հատը շարում ենք իրար կողք և վրան քսում կրեմ: Երկրորդ հարկի վրա շարում ենք 4 ձող, երրորդին` 3, չորրորդին ` 2 և վերջինին` 1: ԵՎ ամբողջ խրճիթը ծածկում ենք կրեմով:
10. Պատրաստում ենք ջնարակ` համեմատած թույլոտ և ծորացնում խրճիթի վրա: Մեր խրճիթը կարելի է կտրել և համտեսել 3 ժամից:

ԲԱՐԻ ԱԽՈՐԺԱԿ

Fish Filets Poached in White Wine with Mushrooms / Սնկով և Գինով Եփած Ձուկ

2014-07-20T08:10:00.000+05:00

Եթե այս ճաշատեսակի պատրաստելուց առաջ ես լսեյի ձկան և սնկի համերի համադրության մասին, հաստատ կմտածեյի դրանք անհամատեղելի են, բայց արի ու տես, որ այդպես չէ :)

Եվ դա ես գտա սիրելի Ջուլիա Չայլդի մոտ. մնացեք մեզ հետ

ԲԱՂԱԴՐՈՒԹՅՈՒՆԸ /6 հոգու համար /

400 գրամ սունկ

1-1,3 կգ ձկան ֆիլե /մեր դեպքում իշխան էր/

150 գրամ կարագ

4 ճյուղ կանաչ սոխ

1 գլուխ սոխ

1 գազար

3/4- բաժակ սպիտակ չոր գինի կամ 1 1/2 բաժակ գինու քացախով հագեցած ջուր

2 ճաշի գդալ ալյուր

150- 200 գրամ թթվասեր

մի քանի կաթիլ լիմոնի հյութ

1/4 բաժակ հոլանդական պանիր

աղ, սև պղպեղ

1.Նրանց համար, ովքեր չունեն պատրաստի ձկան ֆիլե,

լվանում ենք ձուկն ու հեռացնում կաշին, եթե ցանկանում եք թողնել ձուկն առանց փշերի, ապա զգուշությամբ հեռացնում եք ողնաշարից, բայց ես թողել էի փշերը, դրանք ուտելուց մեծ դժվարություն չներկայացրեցին: Ստանում ենք տափակ կտորներ, ինչպես նկարում է:

2. Սոխը կտրատում ենք և 20 գրամ կարագի հետ դնում 5սմ խորությամբ տարայի մեջ: Ձկան կտորները համեմում ենք աղով և սև պղպեղով ու դնում սոխի վրա: Վրան լցնում ենք 30 գրամ կտրատած կարագը,գինին կամ քացախով հագեցած ջուրը, ծածկում ենք տարան ու դնում տաքացրած ջեռոցը և եփում 10-20 րոպե, եթե պատառաքաղը հեշտությամբ մտնում է մսի մեջ, ուրեմն այն պատրաստ է:

3. Սոխն ու գազարը կտրատում ենք ու տապակում թավայի մեջ մոտ 3 րոպե, այնուհետև ավելացնում ենք սունկը և տապակում 2-3 րոպե` առանց կարմրացնելու, վերցնում ենք կրակից և համեմում աղով ու պղպեղով:

4. Սնկի մասսան լցնում ենք ջեռոցից հանած ձկան վրա ու քամում ենք հեղուկը խորը հատակով թավայի մեջ: Այն դնում ենք կրակին ու հասցնում եռման աստճանի, ավելացնում ենք մնացած կարագը, ալյուրը, թթվասերը և լիմոնի մի քանի կաթիլ, համեմում ենք աղով ու պղպեղով ու լավ խառնում, որ ստացվի միասեռ սոուս:

5. Սոուսը լցնում ենք մեր ձկան վրա, վրան լցնում ենք քերած պանիրը, փակում ենք տարան ու դնում ջեռոցը 5-7 րոպե:

ԲԱՐԻ ԱԽՈՐԺԱԿ

Macaroni with Broccoli & Mushroom / Բրոկոլիով ու Սնկով Մակարոն

2014-06-29T22:54:00.003+05:00

Այս մակարոնը բրոկոլիի հետ չտեսնված նուրբ է ու համեղ /իհարկե եթե սիրում եք բրոկոլի և սունկ/: Նկարները նայելիս հասկացա, որ էլի եմ ուզում ուտել իրենից :))))

Բաղադրությունը 4-6 հոգու համար

500գ մակարոն /ցանկալի է տափակ սպագետիներից և ցանկալի է իտալական/
300-400գ բրոկոլի
300գ-400գ սունկ
Կես տրցակ կանաչ սոխ
200գ պանիր
100գ սերուցք կամ թթվասեր
աղ և սև պղպեղ

1. Եփում ենք մակարոնը և քամում:

2. Մակարոնի եփվելու ընթացքում քիչ ջրով եփում ենք
նախօրոք կտրատած սունկը:

3. Երբ ջուրը համարյա քաշվել է, ավելացնում ենք կտրատած
սոխը ու բրոկոլին, աղև սև պղպեղը և եփում ենք մոտ 5-10 րոպե, այնքան, որ զգանք բրոկոլին փափկել է ու եփված է:

4. Ավելացնում ենք սերուցքն ու քերած պանիրը, թողնում ենք կրակին այնքան, որ պանիրը հալվի, ավելացնում ենք կարագը ու վերցնում կրակից, կամ մատուցում եք առանձին մակարոնի հետ կամ էլ խառնում եք ու մատուցում մեկ սկուտեղի մեջ և վայելում ենք մեր նրբահամ մակարոնը:

ԲԱՐԻ ԱԽՈՐԺԱԿ

Mushroom Soup With Cheese / Պանրով Սնկապուր

2014-04-27T06:34:00.004+05:00

Այս սուպը շատ համեղ է և հագեցնող շատ փոքր քանակից:

ԲԱՂԱԴՐՈՒԹՅՈՒՆ /6 Անձի համար/

0,5կգ սունկ
150գ բլղուր
1 գլուխ սոխ
3լ ջուր
200-300գ հալած պանիր
80-100գ կարագ
2 ճյուղ համեմ կամ սամիթ

1. 3լ ջուրը կաթսայի մեջ լցնել և հասցնել եռման աստճանի:

2. Կտրատել սունկը և սոխը, լվանալ բլղուրը և եփել եռացող ջրում մոտ 30 րոպե:

3. Երբ տեսնեք, որ սունկը եփված է 1 բաժակ սուպի հեղուկից լցնել առանձին ամանի մեջ, լցնել այնտեղ հալած պանիրը և հարիչով հարել: Իմ պանիրը "янтарь " ֆիրմայի հալած պանիրն էր, որից օգտագործեցի 4 տուփ:

4. Հարած պանրի զանգվածը լցնել սուպի մեջ և լավ խառնել, թողնել մինչև եռալը, ավելացնել կարագը և կանաչին ու վերցնել կրակից: Կարագը ես վերջում եմ լցնում սուպերին, որպեսզի չկորչեն թանկագին վիտամինները:

ԲԱՐԻ ԱԽՈՐԺԱԿ

Mayonnaise / Մայոնեզ

2013-04-27T06:52:00.001+05:00

Մայոնեզ պատրաստելուց հետո ես էլ ոչ մի անգամ մայոնեզ չեմ գնել, և նրանով է հարմար պատրաստելը, որ կարող ես նրան տալ նախընտրածդ համը: Մայոնեզ պատրաստելն առաջին հայացքից թվում է, թե շատ բարդ է, բայց դա կախված է, թե ինչով են պատրաստում` ավելի շուտ խառնում մայոնեզը:

ԲԱՂԱԴՐՈՒԹՅՈՒՆ /500գ մայոնեզ պատրաստելու համար/

2 ձու
1/2 թգ աղ
1/3 թգ մանանեխ
1ճգ քացախ կամ լիմոնի հյութ
50գ ձիթապտղի բուսայուղ
400գ արևածաղկի բուսայուղ

Նախ նշեմ, որ մայոնեզ պատրաստում են հարիչով /mixer/, մեկ այլ հյութի հարիչով /блендер/ և ձեռքի հարիչով /ручной блендер/ հայերենով բոլորը հարիչներ են կոչվում: Նշեմ, որ ամենահարմարն ու արագը պատրաստվում է ձեռքի հարիչով:

1. Ձեռքի հարիչով /ручной блендер/ մայոնեզ պատրաստելիս

Այն պատրաստելու համար պետք է ընտրել նեղ, խորը տարա, ինչպես նկարում է: Տարայի մեջ լցնում ենք նախ ձուն, այնուհետև մյուս բաղադրամասերը, հարիչի գլխիկը դնում ենք ձվի դեղնուցի վրա ու միացնում կոճակը: Հենց արդեն 10 վայրկյանից կտեսնեք ինչպես է տարայի հատակում առաջանում մայոնեզ: Հարիչը վերև և ներքև եք սկսում բարձրացնել և իջեցնել և կարելի է ասել 1-2 րոպեից մեր մայոնեզը
պատրաստ է: Համտեսեք մայոնեզը, և եթե ինչ որ բաղադրամաս կուզեիք ավելացնել, ապա ավելացրեք և նորից մի փոքր հարեք:

2. Հարիչով /mixer/մայոնեզ պատրաստելիս

Լցնում ենք բոլոր բաղադրամասերը բացի բուսայուղից, հարիչի առավելագույն չափով հարում ենք, այնուհետև հարիչի արագությունը իջեցնում ենք նվազագույն աստիճանի ու մասսայի վրա ավելացնում ենք բուսայուղը շատ բարակ շիթով, ու ամբողջ ընթացքում հարում ենք, մայոնեզը պատրաստ է դառնում մոտ 10 րոպեից: Համտեսեք մայոնեզը, և եթե ինչ որ բաղադրամաս կուզեիք ավելացնել, ապա ավելացրեք և նորից մի փոքր հարեք:

3. Հյութի հարիչով /блендер/ մայոնեզ պատրաստելիս

Լցնում ենք բոլոր բաղադրամասերը բացի բուսայուղից և հարում, այնուհետև ավելացնում ենք բուսայուղը շատ բարակ շիթով, ու հարում, այս հարիչով պատրաստելիս բարդությունը կայանում է նրանում, որ պատրաստված մայոնեզի մասսան, որը լցվող բուսայուղը սոսնձի նման կպցնում է իրար ու մայոնեզ դարձնում, կպչում է հարիչի պատերին ու պետք է պատրաստելու ընթացքում պատերից դեպի կենտրոն տանել: ԵՎ մայոնեզը պատրաստ կլինի մոտ 10 րոպեից: Համտեսեք մայոնեզը, և եթե ինչ որ բաղադրամաս կուզեիք ավելացնել, ապա ավելացրեք և նորից մի փոքր հարեք:

Cabbage Salad With Pea / Կաղամբով Սալաթ Կանաչ Ոլոռով

2013-04-27T05:45:00.000+05:00

ԲԱՂԱԴՐՈՒԹՅՈՒՆ

1 նոր թարմ կաղամբի գլուխ /մոտ 300գ/
3 գազար
200գ. կանաչ ոլոռ
կես տրցակ կանաչ սոխ
5 ճյուղ համեմ
200գ մայոնեզաղ
աղ, սև պղպեղ

1. Նախ կաղամբի միջուկը հեռացնում ենք, այն իր մեջ հավաքում է հողի բոլոր վնասակար նիտրատները, այնուհետև կտրատել կաղամբը:

2. Քերիչով անցկացնել գազարը, կտրատել սոխը, ավելացնել ոլոռը, համեմել աղով և սև պղպեղով, վերջում ավելացնել մայոնեզ:

ԲԱՐԻ ԱԽՈՐԺԱԿ

Cabbage Salad / Կաղամբով Սալաթ

2013-04-27T05:23:00.000+05:00

Գարնան հաճելի թարմությունը ավելի շատ զգալու համար հարկավոր է հաճախ պատրաստել նոր, թարմ կաղամբով սալաթ:
ԲԱՂԱԴՐՈՒԹՅՈՒՆ

1 նոր թարմ կաղամբի գլուխ /մոտ 300գ/
3 գազար
5 կարմիր բողկ
5 խնձոր
3ճգ քացախ կամ լիմոնի հյութ
3 ճգ բուսայուղ
5 ճյուղ համեմ
աղ, սև պղպեղ

1. Կաղամբը կտրատել

2. Քերիչով անցկացնել գազարն ու խնձորը

3. Կտրատել կարմիր բողկը

4. Բոլորը միասին խառնել, ավելացնել ըստ ճաշակի համեմունքներն ու բուսայուղը, համեմը և մեր սալաթը պատրաստ է:

ԲԱՐԻ ԱԽՈՐԺԱԿ

Roast Chicken With Vegetables

2013-02-16T17:14:00.000+04:00

Այս տապական շատ նուրբ ու հետաքրքիր համ ունի, որին լրացնում է բանջարեղենը. ես արդեն մի քանի անգամ պատրաստել եմ այս ճաշատեսակը, և ամեն անգամ ինձ թվում է, թե բանջարեղենը քիչ է ստացվել (չնայած դրան, որ ամեն անգամ ավելի ու ավելի եմ ավելացնում քանակը): Առանձնահատուկ է հավը ոչ միայն իրեն համեմած համեմունքներից այլ նաև մարինացման եղանակից, որի շնորհիվ հավը հավասարաչափ ձեռք է բերում նույն համը:

Բաղադրությունը (6-8 հոգու համար)

Մարինացման համար
1 հավ (1.2-1.8 կգ)
1բ (200գ) աղ
1բ (200գ) շաքարավազ
1-1.5լ ջուր

Բանջարեղեն
6-8 (800գ-1կգ) կարտոֆիլ
5-8 (500գ) գազար
3-4 գլուխ միջին սոխ
1.5 տրցակ (500-600գ) նեխուրի (քյարավուզի) կոթեր
1թեյի գդալ համեմի սերմ
1թեյի գդալ անիսոնի սերմ
0.5 թեյի գդալ աղացած սև պղպեղ
3 ճաշի գդալ բուսայուղ
աղ ըստ ճաշակի և անհրաժեշտության

1. Հավը մարինացնելու համար վերցնում ենք խորը թաս, որը կծածկի մեր հավին, ավելացնում ենք շաքարավազն ու աղը և խառնելով լուծում ջրում, այնուհետև մեր նախապես լավ լվացված հավը դնում ենք նրա մեջ, եթե ջուրը քիչ լինի ավելացրեք այնքան, որ հավը համարյա ծածկվի: Դրանից հետո ծածկեք այն պոլիէթիլենային շերտով ու դրեք սառնարանը ուղիղ 1 ժամ, եթե դուք անալի եք սիրում պատրաստել կամ հավը կտրատել եք կամ փոքր է չափով, ապա 40 րոպե թողեք սառնարանում:

2. Մինչ հավը կմարինացվի պատրաստեք բանջարեղենը` կտրատեք նեխուրի կոթերը, սոխը, գազարը և կարտոֆիլը:

3. Համեմելու համար պատրաստենք մեր համեմունքները: Վերցնում եք համեմի, անիսոնի սերմերը, ավելացնում սև պղպեղ և աղացով միասին աղում, իսկ եթե պատրաստի աղացած ունեք, ապա ուղղակի խառնեք իրար:

4. Կտրատած գազարը, սոխն ու նեխուրը ջեռոցի թավայի կենտրոնում լցրեք, համեմունքը բաժանեք 4 մասի և համեմունքի 1/4 մասով համեմեք, ավելացրեք նաև աղ, բայց մի փոքր սովորականից քիչ, քանի որ հավի ջուրը եփվելուց թափվելու է բանջարեղենի վրա ու կարող է աղի ստացվել:

5. Այնուհետև համեմունքի մյուս 1/4 մասով համեմեք կարտոֆիլը` ավելացնելով աղ և 2 շաչի գդալ բուսայուղ:

6. Մնացած համեմունքով պատել հավը դնել թավայի կենտորնում լցված բանջարեղենի վրա, վրան լցնել 1 ճաշի գդալ բուսայուղը:

7. Հավի շուրջը շարել կարտոֆիլը և դնել 220-250 աստիճան տաքացրած ջեռոցում մոտ 1 ժամ, հավի և կարտոֆիլի կարմրելուց ինքներդ էլ կզգաք, թե երբ է պատրաստ: Մատուցել տաք վիճակում:

ԲԱՐԻ ԱԽՈՐԺԱԿ

Gutap / Գուտապ Կամ Կանաչեղենով Բլիթ

2012-03-14T00:23:00.002+04:00

Այս բլիթներին կարելի է նաև անվանել Ժենգյալով հաց, սակայն այդպես չենք անվանում, քանի որ այստեղ օգտագործված են երևանցիներին հասանելի կանաչեղենի տեսակներ, իհարկե որոնք կարելի է փոփոխել ըստ նախասիրության ու ձեռքի տակ եղածի:

ԲԱՂԱԴՐՈՒԹՅՈՒՆԸ

Խմոր
4 բաժակ ալյուր
1 բաժակ գոլ ջուր
0.25 թեյի գդալ խմորիչ
աղ

Միջուկ
3 կապ բազուկի ճավ
2 կապ մաղադանոս
2 կապ համեմ
2 կապ կանաչ սոխ
2 կապ հազար
2 կապ թարխուն
աղ, կարմիր և սև պղպեղ
լիմոնի աղ /թրթնջուկի փոխարեն/

1. Ալյուրը լցնում ենք լայն թասի մեջ, գոլ ջրի մեջ լցնում ենք խմորիչը, խառնում ենք այնքան, որ լուծվի, ավելացնում ենք մի փոքր աղ և լցնում ալյուրի վրա, այն լավ խառնում ենք, ծածկում ու դնում մի կողմ, որ հանգստանա, 1 ժամից այն ուռած կլինի մի հատ ձեռքով նստացնում ենք այն, հետո նորից թողնում 1 ժամ մնա, որից հետո յն պատրաստ է:

2. Մինչ մեր խմորը կհանգստանա մենք մանրամասն լվանում ենք ողջ կանաչեղենը, դնում սրբիչի վրամ,որ լավ քամվի, որից հետո կտրատում ենք և խառնում միմյանց, ավելացնում լիմոնի աղն ու համեմունքներն ըստ ճաշակի:

3. Այնուհետև խմորը հունցում ենք, գրտնակում կլոր մոտ 30 սմ տրամագծով, մեջտեղում լցնում ենք մջուկը:

4. Փակում ենք այն, ինչպես նկարում է ու դնում 200 աստիճան ջեռոցի մեջ:

5. Երբ կարմրում են մեր բլիթները, հանում ենք ջեռոցից այն արդեն պատրաստ է: Շատ համեղ է այն ուտել կարագով, տաք վիճակում ճեղք ենք անում ավելացնում կարագ և համտեսում:

ԲԱՐԻ ԱԽՈՐԺԱԿ

Chicken Balls / Հավե Գնդիկներ

2012-03-13T23:32:00.001+04:00

Այս հավե գնդիկները պատրաստել է Սաթենիկը, այն շատ յուրօրինակ է և տոնական:

ԲԱՂԱԴՐՈՒԹՅՈՒՆԸ

1 հավի դոշ
0.25 բաժակ աղացած ընկույզ
50 գրամ հոլանդական քերած պանիր
1 ձու
50 գրամ բուսայուղ
1 գունդ շերտավոր խմոր
1 ճաշի գդալ քունջութ
սունելի խմելի
սև պղպեղ
1 պտղունց չոր ծիտրոն

1. հավի դոշը կտրատում ենք ու եփում: Եփելուց հետո մանրացնում ենք ու վրան ավելացնում համեմունքներն ըստ ճաշակի, քերած պանիրը, ընկույզը, ձուն և մի լավ խառնում, որ ստացվի միասեռ զանգված:

2. Ստացված զանգվածից սարքում ենք ոչ մեծ գնդիկներ: Թավայի մեջ լցնում ենք բուսայուղը և գնդիկները մի փոքր տապակում ենք, որպեսզի կեղևապատվեն:

3. Կարմրացրած գնդիկների վրա ենք փաթաթում բարակ կտրատած շերտավոր խմորը` ինչպես նկարում է:

4. Այնուհետև վրան քսում ենք մնացած կես ձուն, ցանում ենք քունջութ և եփում 200 աստիճան ջեռոցում, այնքան մինչև կկարմրեն մեր գնդիկները:

ԲԱՐԻ ԱԽՈՐԺԱԿ

Jam Roll / Ջեմով Ռուլետ

2012-03-06T20:57:00.002+04:00

Այս Ռուլետի պատրաստումը շատ մատչելի է ու շատ արագ, մանավանդ ձմռան ամիսներին պահածո ջեմերի վերջացնելու լավ միջոց է :)))

ԻՆՉ Է ՀԱՐԿԱՎՈՐ?

3 խոշոր կամ 4 միջին ձու
1/2 բաժակ շաքարավազ
1 ճաշի գդալ մեղր
1ճաշի գդալ քացախ
1թեյի գդալ սոդա
2 ճաշի գդալ բուսայուղ կամ 50 գրամ կարագ
1 բաժակ ալյուր

Միջուկ
ցանկացած տեսակի ջեմ 400գրամ
կամ կակաոով ջնարակ /глазурь/
կամ ցանկացած տեսակի կրեմ
կարելի է նաև կրեմի հետ տեղադրել հատապտուղներ կամ կտրատած մրգեր

1. խորը թասի մեջ կոտրել 3 ձուն և շաքարավազի հետ հարել, ավելացնել մեղրը, գդալի մեջ լցնել քացախը, վրան ավելացնել սոդան և լցնել մասսայի վրաավելացնել բուսայուղը ու ամենավերջում ալյուրը:
2. Ջեռոցի թավայի վրա քսել բուսայուղ կամ կարագ ու խմորը լցնել մեջը, հավասարաչափ տարածել, ապա թխել 180-200 աստիճան ջեռոցում:

3. Մոտ 5 րոպեից այն պատրաստ է լինում, երբ երեսը կարմրում է, ուրեմն եփված է, հանեք ջեռոցից:

4. բահիկով խմորի տակը առանձնացրեք թավայից ու այն շուռ տվեք թաց սրբիչի վրա:

5. Այս ժամանակ գործեք հնարավորինս արագ, վրան հավասարաչափ քսեք ջեմը և սրբիչի օգությամբ փաթաթեք: Ձևավորման համար կարող եք վրան ցանել մի փոքր շաքարի փոշի, կամ ջնարակով պատել:

ԲԱՐԻ ԱԽՈՐԺԱԿ

Chocolate Glaze / Շոկոլադե Ջնարակ /глазурь/

2012-02-20T00:38:00.001+04:00

Այս ջնարակը /глазурь/ հիշեցնում էր Էսկիմո պաղպաղակին պատված շոկոլադե շերտը:

ԲԱՂԱԴՐՈՒԹՅՈՒՆԸ

1 մաքուր շոկոլադ /դառը շոկոլադի դեպքում ավելացրեք 0.5 բաժակ շաքարավազ/
1ճաշի գդալ կակաո
0.4 բաժակ կաթ
50 գրամ կարագ

1. Կաթը լցնում եք հաստ հատակով տարայի մեջ ու ավելացնում կտորների բաժանած շոկոլադը: Շոկոլադի հալչելուց ավելացրեք կակաոն ու կարագը ու լավ հարեք մինչ եռալը, հենց եռա վերցրեք կրակից ու թողեք սառչի:

2. Ջնարակը քսում եք խմորի շերտի վրա տաք վիճակում, եթե շերտը արդեն սառն է; Կամ սառած վիճակում տաք խմորի շերտի վրա: Իսկ կրեմի շերտի վրա քսելու համար թողնում եք այն սառչի այնքան, որ մատով հպվելուց շատ աննշան գոլ լինի ու դեռ հասցրած չլինի պնդանալ, լցնում ենք մեր հարթ քսած կրեմի վրա ու զգուշությամբ տարածում ողջ տորթի վրա:

Custard / Եփած Կրեմ /Ձվով/

2012-02-20T00:21:00.002+04:00

Այս կրեմը կարելի է օգտագործել շերտավոր խմորների ու բիսկվիթի դեպքում:

ԲԱՂԱԴՐՈՒԹՅՈՒՆԸ

3 ձվի դեղնուց
1 բաժակ կաթ
1բաժակ շաքարավազ
1 ճաշի գդալ ալյուր կամ օսլա
150 գրամ կարագ
1 պտղունց վանիլին

1. Շաքարավազն ու ձվի դեղնուցները լավ հարում ենք, ավելացնում ալյուրը, նորից հարում, այնուհետև ավելացնում ենք կաթը, միատարր զանգված ստանալով` այն լցնում ենք հաստ հատակով կաթսայի կամ թավայի մեջ ու ցածր կրակի վրա դնում: Կրակին անընդհատ խառնում ենք, մինչև եռալը, այն պնդանալու է և բլբլթա, այդ ժամանակ հեռացնում ենք կրակից և թողնում սառչի:

2. Երբ սառում է եփված կրեմի զանգվածը, կարագը թասի մեջ լավ հարում եք և գդալ առ գդալ ավելացնում եփվածը, վերջում ավելացրեք վանիլինը:

Eskimo Cake / Տորթ Էսկիմո

2012-02-20T00:10:00.004+04:00

Այս տորթը շատ համեղ է և յուրահատուկ կրեմ ունի, այն շատ թեթև ու արտասովոր էր, իսկ գլազուրի հետ իսկապես հիշեցնում էր Էսկիմո պաղպաղակը:
Ես այն պատրաստեցի կլոր տարայի մեջ, քանի որ իմ փոքրիկի 3 ամսեկանի պատվին էր և ես պիտի տորթի վրա մոմեր շարեի, բայց սա ավելի ճիշտ է պատրաստել ջեռոցի ուղղանկյունի թավայի մեջ, որ հավասարաչափ կտորների բաժանելը հեշտ լինի:

ԲԱՂԱԴՐՈՒԹՅՈՒՆԸ

Խմորի համար /սովորական կակաոով բիսկվիթ է/

4ձու
3ձվի սպիտակուց
1 բաժակ շաքարավազ
2 բաժակ մածուն
1,5 թեյի գդալ սոդա
3 ճաշի գդալ կակաո
50 գրամ կարագ կամ բուսայուղ
2-3 բաժակ ալյուր

Կրեմ

3 ձվի դեղնուց
1,5 բաժակ կաթ
1,5 բաժակ շաքարավազ
1,5 ճաշի գդալ ալյուր կամ օսլա
250 գրամ կարագ
1 պտղունց վանիլին

Ջնարակ /глазурь/

100գ մաքուր շոկոլադ
1ճաշի գդալ կակաո
0.4 բաժակ կաթ
50 գրամ կարագ

1. 4 Ձվերը 1բաժակ շաքարավազի հետ հարում ենք, մածունի մեջ լցնելով սոդան` ավելացնում ենք մասսային, այնուհետև կակաոն, բուսայուղը կամ կարագը: Այնուհետև կրեմի համար նախատեսված 3 ձվի դեղնուցներն առանձնացնում ենք սպիտակուցներից ու դնում մի կողմ, իսկ սպիտակուցները 0,5 բաժակ շաքարավազով պատրաստում ենք բեզե ու քիչ-քիչ խառնում խմորին, որից հետո միայն ավելացնում ենք ալյուրը. մասսան պետք է լինի թթվասերից մի փոքր թանձր: Այս չափի խմորը նախատեսված է ջեռոցի մեծ թավաների կամ 28-30սմ տրամագծով կլոր թավայի համար:

2. Յուղում կամ ձեթում եք թխվելիք թավան կամ յուղաթուղթը և խմորի զանգվածը լցնում մեջը: Թխեք 180-200 աստիճան տաքությամբ ջեռոցում մոտ 30 րոպե:

3. Բիսկվիթը երբ ուռչում է, լուցկու կամ ատամի մաքրիչի միջոցով ստուգեք, եթե այն բոլոր կողմերից եփված է, հանեք ջեռոցից և առանձնացրեք թավայից քանի դեռ չի սառչել, եթե յուղաթղթի վրա եք եփել, ուրեմն արագ տաք վիճակում պոկեք թուղթը և դրեք մի կողմ խմորը սառչի:

4. Կրեմի պատրաստման համար շաքարավազն ու ձվի դեղնուցները լավ հարում ենք, ավելացնում ալյուրը, նորից հարում, այնուհետև ավելացնում ենք կաթը, միատարր զանգված ստանալով` այն լցնում ենք հաստ հատակով կաթսայի կամ թավայի մեջ ու ցածր կրակի վրա դնում: Կրակին անընդհատ խառնում ենք, մինչև եռալը, այն պնդանալու է և բլբլթա, այդ ժամանակ հեռացնում ենք կրակից և թողնում սառչի:

5. Երբ սառում է եփված կրեմի զանգվածը, կարագը թասի մեջ լավ հարում եք և գդալ առ գդալ ավելացնում եփվածը, վերջում ավելացրեք վանիլինը:

6. Ամբողջ կրեմը հաստ շերտով /մոտ 0.5 սմ/ քսեք մեր սառած բիսկվիթի շերտի վրա, հարթ լինելու համար վերցրեք երկար դանակ և հակառակ կողմով հարթացրեք կրեմը:

7. Ջնարակի /глазурь/ պատրաստման շատ եղանակներ կան տարբեր համերով, սակայն այս մեկը հիշեցնում է հենց էսկիմո պաղպաղակի շոկոլադե ջնարակի համը: Կաթը լցնում եք հաստ հատակով տարայի մեջ ու ավելացնում կտորների բաժանած շոկոլադը: Շոկոլադի հալչելուց ավելացրեք կակաոն ու կարագը ու լավ հարեք մինչ եռալը, հենց եռա վերցրեք կրակից ու թողեք սառչի:

8. Երբ մեր ջնարակը սառչում է այնքան, որ մատով հպվելուց շատ աննշան գոլ լինի ու դեռ հասցրած չլինի պնդանալ, լցնում ենք մեր հարթ քսած կրեմի վրա ու զգուշությամբ տարածում ողջ տորթի վրա:

ԲԱՐԻ ԱԽՈՐԺԱԿ

Mushroom & Chicken Risotto / Հավով ԵՎ Սնկով Ռիզոտտո

2012-02-19T21:59:00.003+04:00

Այս Ռիզոտտոն ես եմ մոգոնել, իհարկե վստահ եմ, որ իտալական խոհանոցում այսպիսին հաստատ կա: Վաղուց ուղեղումս պտտվում էր այս ուտեստի պատրաստման եղանակը, իմ Ռիզոտտոների ցանկում կա տորթ Ռիզոտտո բանջարեղեններով, սա նույնի հավով և սնկովի տարբերակն է:
ԲԱՂԱԴՐՈՒԹՅՈՒՆԸ

0.5-0.7 կգ սունկ
0.5 կգ հավի դոշ կամ հավի փափուկ միս
2-3 բաժակ բրինձ
70-100 գրամ անալի պանիր
100 գրամ բուսայուղ
50 գրամ կարագ
3 միջին սոխ
2 ճաշի գդալ թթվասեր
աղ և սև պղպեղ

1. Սնկերից առանձնացրեք ոտիկները, 3 հատ մեծ սունկ վերցրեք և մեծ-մեծ կտրատեք, որից հետո տապակեք թավայում այնպես, որ երկու կողմը գեղեցիկ կարմրի, հանեք սնկի կտորները և դրեք մի կողմ:

2. Մնացած սունկը կտրատեք և եփեք 1 բաժակ ջրով ու աղով` ըստ ճաշակի: Այդ ընթացքում հավը կտրատեք բարակ-բարակ, և թավայի մեջ լցնելով բուսայուղը, տապակեք` երբեմն-երբեմն խառնելով:

3. Երկու սոխերը կտրատեք ու ավելացրեք հավին, այնուհետև կիսաեփ սունկը քամեք /սնկաջուրը պահեք բրնձի համար/ ու ավելացնելով հավի հետ սկսեք լավ տապակել, այնպես, որ հավի կտորները եփվեն ու կարմրեն սնկի հետ միասին:

4. Երբ զգաք, որ լավ տապակել եք հավն ու սունկը, ավելացրեք թթվասերը և լավ խառնելով վերցրեք կրակից:

5. Մնացած մեկ սոխը մանր կտրատեք, խորը կաթսայում լցրեք 50 գրամ բուսայուղ և ավելացրեք կտրատած սոխը ու դրեք ցածր կրակին: Սնկի ոտիկները կլոր-կլոր կտրատեք ու ավելացրեք սոխի վրա, մի փոքր տապակելուց հետո ավելացրեք լվացած բրինձը ու խառնելով կրակին թողեք 2-3 րոպե, որից հետո ավելացրեք սնկաջուրը մեկ բաժակ բրնձին երկու բաժակ ջուր ձևով, եթե քիչ լինի սնկաջուրը ավելացրեք եռացրած ջուր և սկսեք եփել բրինձը սովորական եղանակով` անպայման համտեսեք ու հարկ եղած դեպքում ավելացրեք աղ:

6. Երբ զգաք, որ բրինձը եփվել է, ավելացրեք վրան քերած պանիր և լավ խառնելով վերցրեք կրակից:

7. Իմ հյուրերը արդեն վաղուց սպասում էին իմ ուտեստին, այդ իսկ պատճառով ես չկարողացա իսկական տորթի նման տապակել և մատուցվող ափսեի մեջ բրնձի խյուսը տորթի նման լցրեցի ու մեջտեղում անցք թողեցի, լցրեցի միջուկը, իսկ նախապես տապակած սնկի կտորներով էլ ձևավորեցի տորթ փլավս: Բայց դուք կարող եք պատրաստել իրական ձևով, դա է, ջեռոցի խորը տարայի հատակին շարեք ձեր նախապես տապակած սնկերի կտորները, լցրեք բրնձի փլավը կաթսայի եզրերին ու մեջտեղում թողեք անցք, որտեղ էլ լցնում եք միջուկը, զանգվածի վրա դնում եք կարագի կտորներ և դնում 180 աստիճան ջեռոցում` մոտ 10-15 րոպե: այնուհետև հանելով տարան պտտում եք մատուցվող ափսեի մեջ ու մատուցում այն: Նայեք մանրամասն այստեղ
http://liloart.blogspot.com/2010/09/risotto-cake.html#more

As a Sacivi / Համարյա Սացիվի

2012-02-14T23:58:00.001+04:00

Այս Ճաշատեսակն անվանել եմ համարյա Սացիվի, որովհետև ես եմ այն մոգոնել: Այն հիշեցնում է Սացիվին, բայց ունի մի առավելություն, այն շատ արագ է պատրաստվում:

ԲԱՂԱԴՐՈՒԹՅՈՒՆԸ

1կգ հավի դոշ կամ 1 հավի փափուկ մասերը
2-3 սոխ
5 պճեղ սխտոր
0.5 բաժակ ընկույզ
1 ճաշի գդալ ալյուր
50 գրամ կարագ կամ բուսայուղ
2 բաժակ հավի արգանակ
1թեյի գդալ սունելի, խմելի
1 թեյի գդալ դեղին ծաղիկ
0.25 թեյի գդալ կարմիր կծու և սև պղպեղ
աղ ըստ ճաշակի

1. Առաջին հերթին լվանալ ու եփել հավի դոշը կամ հավը ու մանրացնել, եթե հավ է, ապա փափուկ մսերը ազատել ոսկրերից ու կտրատել ոչ շատ մանր մասերի:

2. Այնուհետև խորը թավայի մեջ լցնել բուսայուղը կամ կարագը ու դնել կրակին, ավելացնել մանրացրած հավը ու տապակել, մինչև մի փոքր կարմրելը` մոտ 10 -15 րոպե:

3. Մինչ հավը կտապակվի սխտորը ճզմել և սոխը շատ մանր կտրատել կամ սխտորի հետ միասին աղալ մեքենայի ամենամանր մետաղացանցով: Հավի մասսային ավելացնում եք սոխն ու սխտորը և շարունակում տապակել 2-3 րոպե:

4. Տապակելուց հետո ավելացնում եք 1.5 բաժակ արգանակն ու մանրացրած ընկույզը և շարունակում թողնել ցածր կրակի վրա եփվի` մոտ 10 րոպե: Որից հետո ավելացնում ենք բոլոր համեմունքները, ստուգում աղի քանակությունը, որովհետև հավը եփելիս աղով են եփում:

5. 0.5 բաժակ արգանակին ավելացրեք 1 ճաշի գդալ ալյուր ու լավ հարեք, որ լուծվեն, ստացվում է մածուցիկ խմորի նման մասսա, այն լցրեք մեր հավի զանգվածի վրա ու մի լավ խառնեք: Մեր զանգվածը սկսելու է պնդանալ ու այդ ժամանակ արդեն պատրաստ է մեր ուտեստը: Այն մատուցեք սառը վիճակում, այդպես համերն ավելի են սրվում:

ԲԱՐԻ ԱԽՈՐԺԱԿ

Peas balls / Սիսեռով կոլոլակներ

2012-01-11T22:25:00.003+04:00

Սա շատ հեշտ պատրաստվող ճաշատեսակ է կամ աղցան: Հարմար է պատրաստել նաև պասի ժամանակ: Կարելի է մատուցել ապուրների և փլավների հետ:

Բաղադրությունը

1-1,5 բաժակ սիսեռ
1/5 բաժակ մանր աղացած բլղուր
1-1,5 ճ.գ. ալյուր
աղ, սև պղպեղ, սոխ, ռեհան, տոմատի մածուկ:

1.Նախապես եփում ենք սիսեռը և թրջում բլղուրը:

2. Սիսեռը մաքրում ենք թեփիկներից և աղում սոխի հետ միասին: Աղացած սիսեռին ավելացնում ենք բլղուրը, համեմունքները, ալյուրը: Ըստ ճաշակի կարելի է համեմել նաև ռեհանով: Պատրաստում ենք կոլոլակներ:

3. Խորը տարայի մեջ եռացնել ջուրը, մի քիչ աղ անել և շատ զգույշ գնդիկները դնել մեջը և եփել մոտ 3 րոպե:

4. Պատրաստել տոմատով սոխառած: Ավելացնել մի քիչ ջուր և մեջը տապակել մեր գնդիկները եփելուց և սառելուց հետո: Մատուցել և տաք, և սառը վիճակում:

ԲԱՐԻ ԱԽՈՐԺԱԿ

Pumpkin soup / Դդումով ապուր

2011-11-02T20:43:00.003+04:00

Ներկայացնում եմ դդումով ապուրի շատ պարզ բաղադրատոմս:

Բաղադրությունը /2 բաժին/

300 գրամ դդում

1 պճեղ սխտոր

1 փոքր գլուխ սոխ

1/4 թեյի գդալ կոճապղպեղ (имбирь, ginger)

բուսական յուղ

5-7 ճյուղ մաղադանոս

աղ

սև պղպեղ

1. Սխտորը և սոխը քերիչով մանրացնել և բուսական յուղով տապակել:
2. Մի քիչ տապակելուց հետո ավելացնել կտրտած դդումը և կես բաժակ ջրով շոգեխաշել:Եփել 15.-20 րոպե:

3.Ընթացքում ավելացնել աղ, պղպեղ և կոճապղպեղ:

Եփելուց հետո այն տրորել կամ բլենդեռով խփել, որպեսզի դառնա խյուս:

Վերջում ավելացնել կտրատած կանաչին:

ԲԱՐԻ ԱԽՈՐԺԱԿ

Potato Cake / Կարտոֆիլե տորթ

2011-10-15T16:35:00.002+05:00

Այս ուտեստը շատ արագ և հարմար է պատրաստելը, դրան գումարած յուրահատուկ է:
Այն կանվանենք կարտոֆիլե տորթ /իհարկե անվանումը հենց նոր հորինեցի/: Նշեմ, որ այս ուտեսետի հեղինակը իմ լավ ընկերներից մեկի մայրն է` Սաթենիկի տիկին Գոհարը:
ԲԱՂԱԴՐՈՒԹՅՈՒՆԸ
3 կարտոֆիլ
2 սմբուկ
300-400 գրամ սունկ
0.5 բաժակ ընկույզ
6 ճաշի գդալ թթվասեր
1 սոխ
7 ճյուղ թարմ սամիթ
3ճաշի գդալ կետչուպ
0.5 բաժակ բուսայուղ
աղ և սև պղպեղ

1. Այս ուտեստ-աղցանի համար մէզ անհրաժեշտ են շերտեր, որ կպատրաստենք կարտոֆիլից:Ամեն շերտի համար նախատեսված է 1 կարտոֆիլ որ կանցկացնենք քերիչով ու կտապակենք:

2. Սմբուկը, սունկը կտրատում ենք մանր խորանարդների,սոխեռայով տապակում:Վրան ավելացնում ենք մանրացրած ընկույզը: Համեմում ենք թարմ սամիթով, աղ պղպեղով:

3. Վերադառնանք շերտերին.

Առաջին շերտի վրա բարակ շերտով քսում ենք կետչուպ, վրան ավելացնում սմբուկից ու սնկից պատրաստված լցոնը, այնուհետեվ վրան դնում ենք տապակած կարտոֆիլի երկրորդ շերտը, որի վրա քսում ենք թթվասեր ու նորից լցոնը:Նույնկերպ վարվում ենք երրորդ շերտի հետ, վերջում ձևավորում ենք ըստ ճաշակի:

ԲԱՐԻ ԱԽՈՐԺԱԿ

Rabbit-Maltese / Ճագար Մալթյան Ձևով

2011-10-07T18:04:00.005+05:00

Այս ճաշատեսակը պատրաստելու համար ամենևին էլ անհրաժեշտ չէ ճագարի մսով պատրաստել, այն շատ համեղ կլինի նաև հավի, սագի, հնդկահավի և այլ սպիտակ մսերով:

ԲԱՂԱԴՐՈՒԹՅՈՒՆԸ

1 ճագար մոտ 1.5-2 կգ
5 միջին կարտոֆիլ
4 գազար
4 քաղցր պղպեղ
1 բաժակ չոր սպիտակ գինի կամ 2 գդալ քացախ 1 բաժակ ջրի հետ
0.5 բաժակ սերուցք կամ թթվասեր
2 պճեղ սխտոր
4 գդալ բուսայուղ
5 ճաշի գդալ ալյուր
4 դափնու տերև
8 հատիկ սև պղպեղ
4 հատիկ բահար
2 հատիկ մեխակի սերմ
1 պտղունց չորացրած ծիտրոն
1 պտղունց անիսոնի սերմ
5 ճյուղ մաղադանոս
աղ` ըստ ճաշակի

1. Վերցնում ենք նապաստակը, լավ լվանում, վրայից հեռացնում ճարպերը և վրայի թաղանթը: Այնուհետև կտրատում ենք բաժնաչափերի:

2. Երկրորդ քայլում մսի կտորները համեմում ենք աղով ու թաթախում ալյուրի մեջ, որից հետո տապակում բուսյուղով և ճագարի ճարպով, բարձր կրակի տակ յուրաքանչյուր կողմը 3-5 րոպե, այնքան, որ մսի կտորների 2 կողմը կարմրի:

3. Կարմրացրած մսի կտորները դարսել խորը և հաստ հատակ ունեցող կաթսայի մեջ, ավելացնել, դափնու տերևները, սխտորը, ծիտրոնը, բահարը, անիսոնի սերմերը, սև պղպեղը, մեխակը, վրան լցնել գինին կամ քացախով ջուրը և եփել 1.5 ժամ ցածր կրակի տակ: Ընթացքում կհետևեք եփվող մսին, եթե հեղուկը պակասի, կավելացնեք մսի արգանակ կամ ջուր: 1.5 ժամ հետո կավելացնեք սերուցքը կամ թթվասերը ու կշարունակեք եփել ևս 10 րոպե:

4. Մինչ կեփվի մեր միսը, մեծ-մեծ կտրատեք կարտոֆիլը և տապակեք կարմրացրած մսի նույն թավայի և յուղի մեջ, երբ զգաք, երբ կարտոֆիլը կիսահում է դարձել, ավելացրեք կտրատած սոխը, գազարը, պղպեղը և միասին շարունակեք տապակել 10-15 րոպե, որից հետո ավելացրեք մաղադանոսը:

5. Արդեն եփված միսը հանեք կաթսայից, մնացած սոուսի վրա լցրեք բանջարեղենը և եփեք 20 րոպե, այնուհետև ավելացրեք միսը շարունակեք եփել ևս 5 րոպե և մեր ճագարը պատրաստ է:

ԲԱՐԻ ԱԽՈՐԺԱԿ

Ajab Sandal / Աջաբ Սանդալ

2011-08-05T18:47:00.005+05:00

Այս սուպի կամ ավելի շուտ ճաշի անվանումը չգիտեմ ինչ առնչություն ունի սանդալի հետ, այն ամառային հիմնական ճաշերից է, որը պատրաստվում է համարյա ամեն անգամ տարբեր ձևերով /այսինքն տանը եղած բանջարեղեններով/: Կարելի է եփել և հավի կամ տավարի, ոչխարի մսով, բամիայով և այլն:

ԻՆՉ Է ՀԱՐԿԱՎՈՐ

3-4 կարտոֆիլ
1 սմբուկ
1 դդմիկ
1-2 քաղցր կանաչ պղպեղ
200 գրամ կանաչ լոբի
2-3 լոլիկ
0.25 կապ խառը կանաչի
2-3 ճաշի գդալ բուսայուղ
1-2 գլուխ սոխ
1-2 պճեղ սխտոր

1. Կտրատում ենք բոլոր բանջարեղենները, կանաչին:

2. Կտրատած բանջարեղենը շերտ շերտ դասավորում ենք կաթսայի մեջ, վրան լցնում ենք այնքան ջուր կամ մսի արգանակ, որ բանջարեղենները ծածկվեն ավելացնում ենք բուսայուղը: Ապա դնում ենք կրակին եփվելու մոտ 40-60 րոպե: Հենց եռա պարունակությունը ավելացրեք աղ, երբ զգաք, որ բոլոր բանջարեղենները եփել են, ավելի շուտ կարտոֆիլը, ապա վերջ մեր ճաշը պատրաստ է:

ԲԱՐԻ ԱԽՈՐԺԱԿ

Cherry Pie / Բալով Բլիթ

2011-07-19T11:24:00.002+05:00

Այս Բալով բլիթը շատ հետաքրքիր է, իհարկե մեզ` հայերիս համար, քանի որ մենք սովոր ենք պատրաստել և ուտել ավելի խմորայինը գերակշռող քաղցրավենիքներ, այս բլիթի խմորը շատ համեղ է ու թեթև, ինչպես նաև ողջ բլիքթը միասին վերցրած:

Ինչ է հարկավոր

Խմորի համար
125 գրամ կարագ կամ մարգարին
300գրամ ալյուր
1 ճաշի գդալ շաքարավազ
1 պտղունց աղ
1 ձվի դեղնուց
2 ճաշի գդալ սառը ջուր

Միջուկի համար
300-400 գրամ կտերը հանած բալ կամ մուրաբա
200գրամ թթվասեր
1 ձու և խմորի պատրաստաման համար մնացած սպիտակուցը
1 բաժակ շաքարավազ
2 ճաշի գդալ օսլա
1 պտղունց վանիլ

1. Կարագը կամ մարգարինը անցկացնում եք քերիչով, ավելացնում ալյուրը ու լավ շաղախում: Այնուհետև ավելացնում եք ձվի դեղնուցն ու ջուրը ու լավ հունցում: Հունցելուց հետո այն դրեք սառնարանը` մոտ 30 րոպե:

2. Նախ հանում եք բալի կտերը ու դնում մի կողմ:

3. Մեր սառած խմորը հանում եք ու գրտնակում ջեռոցի տարայից բոլոր կողմերից 5-7 սմ ավելի մեծ: Տարայի հատակն ու եզրերը կարագով կամ բուսայուղով պատեք ու խմորը տեղադրեք մեջը, ինչպես նկարում է:

4. Այնուհետև խմորի վրա հավասարապես լցրեք բալը:

5. Թթվասերը լցրեք խորը, կրեմի պատրաստման համար նախատեսված թասի մեջ, ավելացրեք շաքարավազը, ձուն, օսլան, վանիլը և լավ հարեք. լավ կլինի էլեկտրական հարիչով:

6. Ստացված միասեռ զանգվածը լցրեք բալի վրա ու խմորի եզրերով ծածկեք` նրան տալով մի փոքր ձև այն դրեք արդեն 180 աստիճան տաքացրած ջեռոցում:

7. Մեր բլիթը կեփվի մոտ 40 րոպե, այնքան մինչև կզգաք, որ խմորի եզրերը կարմրել են, հանեք բլիթը ջեռոցից և թողեք սառչի: Այնուհետև դրեք սառնարանը ու մատուցեք 2-3 ժամ հետո:

ԲԱՐԻ ԱԽՈՐԺԱԿ