அவிழ்மடல்

எங்கள் அப்பன்

2019-11-13T22:13:00.000+05:30

2004 ஆம் ஆண்டு

என்னுடன் இயந்திரவியல் படித்த மாணவர்கள் அனைவராலும் இன்றும் எங்கள் சக தோழர் ஒருவர் "அப்பா" என்று அன்புடன் அழைக்கப்படுகிறார். அவரை அனைவரும் தந்தை என்று அழைக்கும் படி என்ன செய்தார்???

எல்லா வகுப்புகளையும் போல எங்கள் வகுப்பிலும் "மாப்ள பெஞ்ச்" உண்டு. அந்த பெஞ்சின் பிதாமகரே எங்க "அப்பன்" தான்!! (பெயர் வேண்டாம்.. பட்டப்பெயரான 'அப்பன்' என்றே வைத்துக் கொள்வோம்)

எங்கள் கணக்கு ஆசிரியர் விடுப்பில் சென்றிருந்தார். அவருக்குப் பதிலாக புதிதாய் ஒரு ஆசிரியர் வந்தார். வந்தவர் அப்போது தான் இளங்கலைப் பட்டம் பெற்று இருந்தார்.

எங்கள் வகுப்புக்கு வந்தவுடன், “நான் ரொம்ப ஸ்ட்ரிக்ட் ஆக்கும். என்கிட்ட ரொம்ப வாலாட்டாதீங்க" என்கிற ரீதியில் பேசினார். (அதை நாங்க யாரும் சட்டை செய்யவில்லை என்பது வேறு விஷயம்!)

நேரே பலகைக்குப் போய் ஒரு கணக்கைப் போடத் துவங்கினார். எப்போதும் போல எங்க மாப்ள "அப்பன்" பக்கத்தில் இருக்கும் நண்பனிடம் அரட்டை அடிக்க ஆரம்பித்தான்.

புதிதாய் வந்த ஆசிரியருக்கு வந்ததே கோபம்.. நேரே அப்பன்கிட்ட போய்..

"என்ன நினைச்சுக்கிட்டு இருக்க?? நான் B.Sc Maths முடிச்சுட்டு வந்து உங்களுக்குப் பாடம் எடுத்துக்கிட்டு இருக்கேன்!! உனக்கு விளையாட்டா போச்சா ?”

"...”

"நான் போடுற பிராப்ளம் எவ்வளவு கஷ்டமானது என்று தெரியுமா? “

"...”

"என்ன? நான் கேட்கிறேன்.. ஒண்ணும் சொல்லாம நீ பாட்டுக்கு நிக்கிற!! போ !! போர்ட்ல போய் இந்த கணக்கைப் போடு!”

அப்பன் தயங்கிக் கொண்டே போனான்.. அவரோ "போ !! நீ எப்படி ஆன்ஸர் கொண்டு வரன்னு பார்க்கலாம்!!” என்று கோபமாக விரட்டினார்....

அப்பன் பலகை அருகில் போனான். கணக்கைப் பார்த்தான். என்ன நினைத்தானோ, கடகடவென எழுதத் துவங்கினான்.

வேகமாக எழுதினான். பலகை நிரம்பியது. ஒரு பக்கத்தை அழித்த பின் மீண்டும் தொடர ஆரம்பித்தான்.. ஆசிரியர் மூக்கின் மேல் விரல் வைத்தார்.

கீழே உட்கார்ந்திருந்த எங்களுக்கோ சிரிப்பு வந்தாலும் சிரிக்க முடியவில்லை. ஏனெனில், அந்த கணக்கிற்கான விடை இரண்டு வரிகளில் வந்து விடும். அவனோ பலகையில் பக்கம் பக்கமாகஎழுதிக் கொண்டு இருந்தான் (இதில் விளக்கப்படமும், கிராப் ஒன்றும் வேறு).. ஆசிரியர் புல்லரித்துப் போய் பார்த்துக் கொண்டிருந்தார்..

மணி அடித்தது.. எல்லாரும் கிளம்ப தயாராக இருந்தும் அவன் விடவில்லை .. எழுதிக்கொண்டே போனான்.. ஆசிரியர்

" போதும் தம்பி.. உன்னைப் பத்தி ரொம்ப தப்பா நினைச்சுட்டேன்.. ஆனா , you are a gem of students “ என்றார்.

"பரவாயில்ல சார். விடுங்க!! இந்த பிராப்ளம் முழுசா முடிக்காம நான் வரமாட்டேன்" (??!!)

"போதும்பா!! இத ரொம்ப சிம்பிளா சால்வ் (Solve) பண்ணலாம்... நீ ரொம்ப கஷ்டப்படுற!!"

"தெரியும் சார்... ஆனா , எப்பவுமே கணக்கை வேற ஆங்கிள்ல இருந்து பார்க்கணும்"

"இது வெறும் 2 மார்க் பிராப்ளம். இத நீ எவ்வளவு பெருசா போட்டாலும் ரெண்டு மார்க் தான்”

“சார்!! மார்க் வாங்குறது பெருசில்லை... கான்செப்ட்ட நல்லா. புரிஞ்சுக்கணும். அதான் முக்கியம்!!"

"உன்னைப் போய்... ச்ச... சாரிப்பா!! ஆனாலும், ஒரு பிரண்டா அட்வைஸ் பண்றேன்!! எக்சாம்ல இவ்வளவு பெருசா போட்டு டைம் வேஸ்ட் பண்ணக் கூடாது!! என்ன ஓகேவா ?”

"ஓகே சார் ..”

ஆசிரியர் மிகவும் உணர்ச்சிவயப்பட்ட நிலையிலேயே வெளியேறினார். அவர் போய் விட்டார் என்பதை உறுதி செய்த பின் வகுப்பே சிரித்தது...

கடைசி வரை அவன் விடையை எழுதவில்லை !!

"மச்சான்!! எப்படி மச்சான்? ரெண்டே வரில ஆன்ஸர் வரும்!! அதை வச்சு ஒரு ஹவரையே (Hour) ஓட்டிட்ட!!"

"எவ்வளவோ செஞ்சுட்டோம்.. இதைச் செய்ய மாட்டோமா!!" என்றான் அப்பன் சிரித்துக் கொண்டே

இதன் காரணமாகவே, அவனுக்கு " Father of Dave's Theorem” (அவன் போர்டில் எழுதும் போதும், ஒரு Flow-வில், According to Dave's theorem என்று எழுதினான்.. அப்படி ஒரு தியரியைன்ற நாங்கள் கேட்டதில்லை … ) என்ற பட்டம் சூட்டப்பட்டு நாளடைவில் மறுவி, “அப்பன்" என்று நிலைத்தது!!

பி. கு:

"காதல் கொண்டேன்" படத்தில் வருவது போலவே உள்ளதே என்று யோசிப்பவர்களுக்கு....

இந்த காட்சியை செல்வராகவன் எங்களிடம் இருந்து தான் எடுத்திருப்பாரோ என்ற ஐயம் இன்றளவும் உண்டு.. இந்த சம்பவம் நடந்து சுமார் 8 மாதங்கள் கழித்து தான் "காதல் கொண்டேன்" திரைப்படமே வந்தது..

படத்தைப் பார்த்த அனைவரும், தனுஷ் கணக்கு போடும் காட்சியைப் பார்த்து விழுந்து விழுந்து சிரித்தோம்!!

பொங்கல் நல்வாழ்த்துகள்

2014-01-14T13:32:00.001+05:30

அன்பு நண்பர்களே,

'தை பிறந்தால் வழி பிறக்கும்'

அனைவருக்கும் என் இனிய பொங்கல் நல்வாழ்த்துகள்

( படங்கள்: விக்கிபீடியா)

நாட்டிலஸ் மூலமும் வட்டில் எழுதலாம்! (உபுண்டு)

2012-10-14T13:02:00.001+05:30

அண்மைக் காலங்களில், விரலிகளின் (USB Drive) பயன்பாடு அதிகரித்துள்ளது. எனினும், குறுவட்டு (CD) மற்றும் இறுவட்டு (DVD) ஆகியவற்றின் தேவை இன்னும் குறையவில்லை.

லினக்ஸ் பயனாளர்கள் பலரும் வட்டில் தரவுகளை எழுத பிராஸரோ (Brasero) , K3B போன்ற பயன்பாடுகளையே பயன்படுத்துகிறோம்.

ஆனால், நாம் அன்றாடம் பயன்படுத்தும் நாட்டிலஸ் கோப்பு மேலாளர் (Nautilus File Manager) மூலம் இதை எளிதாகச் செய்யலாம் தெரியுமா?

எப்படி செய்வது?

நாட்டிலஸ் மேலாளரில் மெனுப்பட்டியலில் உள்ள Go→Location என்பதற்குச் செல்லுங்கள்.

தோன்றும் முகவரிப்பட்டையில் (Address bar), burn:/// என்று உள்ளிட்டு Enter விசையை அழுத்துங்கள்.

உடனே, வட்டு உருவாக்கி (CD/DVD Creator) திறக்கும். அதில், தேவையான கோப்புகளை இடுங்கள்.

கோப்புகளை இட்ட பின், “Write To Disc” என்பதைச் சொடுக்குங்கள்.

திறக்கும் உரையாடல் பெட்டியில் (Dialog box), தகுந்த வட்டைத் தேர்வு செய்யுங்கள்.

வெற்று வட்டு எனில், Blank Disc என்பதைத் தேர்ந்தெடுங்கள்.
பிம்பமாக (Image) எழுத, Image File என்பதைத் தேர்வு செய்யுங்கள்.
ஏற்கனவே தரவு எழுதப்பட்ட வட்டு எனில், அதன் பெயரைத் தேர்வு செய்யுங்கள்.

கொஞ்சம் பொறுங்க.. 'Burn' ஐ அழுத்திடாதீங்க!! அடுத்து, பண்புகளை மாற்ற 'Properties' பக்கம் செல்லுங்கள்.
வரும் பக்கத்தில், பண்புகளைத் தகுந்தவாறு மாற்றுங்கள்.

எழுதும் வேகத்தை மாற்றலாம்.
மீண்டும் வட்டில் எழுதுவதற்கு வழிவகை செய்ய (Multi-seesion) , 'Leave the Disc Open' என்பதைத் தேர்ந்தெடுத்தல் அவசியம்.

பண்புகளை மாற்றிய பின்னர், 'Burn' பொத்தானைச் சொடுக்குங்கள்.
ஏற்கனவே பயன்படுத்தப்பட்ட வட்டு எனில், பழைய கோப்புகளை என்ன செய்வது என கேட்கும். அவற்றை வைத்திருக்க, 'Only Append' என்பதைத் தேர்ந்தெடுங்கள்.

சில நிமிடங்களில், உங்கள் வட்டு தயாராகி விடும்!!

பின் குறிப்பு:

இந்த முறை மூலம், தரவு வட்டுகளை (Data Disc) மட்டுமே உருவாக்க இயலும். ஒலி, ஒளி வட்டுகளை ( Audio/ Video Disc) உருவாக்க முடியாது.

நன்றி:

Burning a Data CD/DVD with Nautilus , கேரி ரிக்மண்ட் (Gary Richmond), Free Software Magazine

CD/DVD creation with Nautilus, The Gnome Journal

கணியம் இதழுக்காக எழுதப்பட்டது.

யாரது யாரது? (கண்ணை நம்பாதே #1 )

2012-09-09T23:20:00.003+05:30

கண்ணை நம்பாதே, உன்னை ஏமாற்றும்
நீ காணும் தோற்றம், உண்மை இல்லாதது

உங்கள் கண்களுக்குக் கொஞ்சம் விளையாட்டு காட்டுவோமா?

கீழ்காணும் படத்தில் தெரியும் பெண்ணின் மூக்கில் உள்ள சிவப்பு புள்ளியை தொடர்ந்து 30 - 40 வினாடிகள் உற்று நோக்குங்கள்.
கண்களை வேகமாக வெற்றிடம் நோக்கித் திருப்புங்கள் (சுவர் / வெள்ளைத் தாள் / புது தத்தல்)
கண்களை வேகமாக இமையுங்கள்.

இப்ப என்ன தெரிகிறது?

அந்தப் பெண் உங்கள் கண்களுக்குத் தெரிகிறாரா?

சரி, இந்த அதிசயம் எப்படி நிகழ்கிறது?

நீங்கள் கண்ட தோற்ற மயக்கம் ஒரு ஒளியியற்கண்மாயம் (Optical Illusion) ஆகும். இதற்கு 'எதிர்மறை பின் தோற்றம்' (Negative After Image) என்று பெயர்.

கண்களில் உள்ள ஒளி உணர்விகளின் (Photoreceptors) துணைக் கொண்டே வண்ணங்களின் கலவையான உலகினை நம் கண்கள் காட்டுகிறன (இவற்றைப் பற்றி பிறிதொரு நாள் பேசுவோம்.)

மேற்கண்ட படத்தைப் பார்த்த போது என்ன செய்தோம்? தொடர்ந்து ஒரே நிறத்தின் மீது கவனம் செலுத்தினோம் !!

ஒரே நிறத்தை (அலை நீளத்தை) அதிக நேரம் பார்த்துக் கொண்டேயிருந்தால், கூடுதல் வெளிப்பாடு (Exposure) காரணமாக, குறிப்பிட்ட ஒளி உணர்விகள் சிறிது நேரம் தங்கள் உணர்திறனை (Sensitivity) இழந்து விடும்.

உடனடியாக வெற்றிடத்தைப் பார்க்கும் போது, தங்கள் செயல் திறனை (தற்காலிகமாக) இழந்த உணர்விகள் மிகவும் மங்கி செயல்படுகிறன. பிற உணர்விகள் வழக்கம் போல செயல்படுகிறன.

பிற உணர்விகளின் உணர்திறன் அதிகமாகத் தெரிவதால், மூளை அவற்றைக் கொண்ட உருவத்தை நமக்குக் காட்டுகிறது. நாம் முன்பு பார்த்த படம் நேர்மாறான நிறங்களுடன் (inverted Colours) நமக்குத் தெரிகிறது.

தெரிந்த படம் இது தானே?

இன்னொரு விளையாட்டு:

இந்த கருப்பு பல்பை 20 - 30 வினாடிகள் உற்றுப் பாருங்க.. அப்புறமா, சுவற்றைப் பாருங்க!

என்ன? சுவற்றில் பல்பு எரியுதா?

கொசுறு:
என்ன ஆனாலும், நம்ம மூளை ரொம்ப கில்லாடி.. 'ஏதோ பிரச்சனை' என்று சில நுண்நொடிகளில் (Micro Second) கண்டறிந்து, சரி செய்து விடுகிறது... (இல்லையெனில், ஆயுள் முழுக்க அந்த செல் (Cell) அவுட் ஆக வேண்டியது!! )

நன்றி: விக்கிபீடியா, யாஹூ கேம்ஸ், Worqx, Omnivision, Patrick ,ஹாரி 2G, ப்ளாக்கர் நண்பன்

பதிவு எழுத கருவைத் தேற்றிக் கொடுத்த ஹாரிபாட்டர் அவர்களுக்கும், ப்ளாக்கர் நண்பன் அப்துல் பாசித் அவர்களுக்கும் என் மனமார்ந்த நன்றி!!

நம்ம கண்களுக்கு முதன்முதலில் சவால் விட்டு கண்கட்டு வித்தை காட்டியவர் மந்திரவாதி தான்!! இது போன்ற படங்களை நீங்களும் உருவாக்க வழி சொல்கிறார் நம்ம நண்பன்!! (
செயல் முறை விளக்கமும் உண்டு!)

டிஸ்கி:

சிலருக்கு இந்த வித்தை சரிவர வேலை செய்யாமல் போகலாம். அவர்களுக்காக: http://youtu.be/Pt3wGMcTG2E

கண்ணா... இது வெறும் டிரைலர் தான்..மெயின் பிச்சர் நீ இன்னும் பாக்கல... அது இனி தான்!!

இரட்டைச் சூரியன்களைச் சுற்றும் இரட்டைக் கோள்கள் (மெய்யாலுமே நம்புங்க!)

2012-08-30T17:57:00.001+05:30

ஒரு இனிய காலைப் பொழுதில் வானத்தில் இரண்டு சூரியன்களை பார்த்தால் எப்படி இருக்கும்?

உண்மையில் அப்படி இரு சூரியன்கள் தெரியும் கோள்கள் உண்டு!!

அமெரிக்காவில் உள்ள நாசா ஆராய்ச்சி நிறுவனத்தால் "உயிர் வாழ தகுதியான கோள்கள் தேடல்" என்ற ஆய்வுக்காக கெப்லர் (Kepler) என்ற விண்கலன் செலுத்தப்பட்டுள்ளது. அந்த கெப்லர் விண்கலம் கண்டறிந்தது தான் இந்த அதிசயத்தக்க உண்மை!!

ஒரு சூரியனைச் சுற்றும் கோள்களைக் கொண்ட சூரிய குடும்பங்களையோ (Multi-planet systems) , அல்லது இரு சூரியன்களைச் சுற்றும் ஒரே கோளையோ (Circumbinary planetary system) கொண்ட சூரிய குடும்பங்களையோ தான் இதுவரை கெப்லர் கண்டறிந்துள்ளது.

தற்பொழுது கெப்லர் கண்டறிந்துள்ள சூரிய குடும்பம் மிகவும் வினோதமானது!

அதில் இரண்டு சூரியன்கள் இருப்பது விசித்திரமல்ல! இரட்டைச் சூரியன்களை இரண்டு கோள்கள் சுற்றுவது தான் அதிசயம்!!

அந்த கண்கொள்ளாக் காட்சி எப்படி இருக்கும்? ஒரு ஓவியரின் கற்பனை இதோ:

என்ன நண்பர்களே? 'நம்பாதீங்க' படித்து படித்து இதை நம்ப மனம் மறுக்கிறதா?

ஆனா, மெய்யாலுமே இதை நம்பலாம்!!

இந்தத் தகவலை நாசா அதிகார்வப்பூர்வமாக வெளியிட்டுள்ளது.

அந்த அதிசய குடும்பத்திற்கு கெப்லர் 47 (Kepler 47) என்று பெயரிடப்பட்டுள்ளது. நம் பூமியில் இருந்து சுமார் 4900 ஒளிஆண்டுகள் தொலைவில் உள்ள சிக்னஸ் [Cygnus] நட்சத்திரக் கூட்டத்தில் உள்ளது!!
[4900 ஒளிஆண்டுகள் = 46 மத்தியம் கி.மீ = 4.6 லட்சம் கோடி கோடி கி.மீ!! {தவறாக இரு முறை கோடி என்று எழுதவில்லை!}]

கெப்லர் 47 குடும்பத்தில் உள்ள ஒரு நட்சத்திரம் நமது சூரியனின் அளவில் உள்ளது. ஆனால், அதன் ஒளி சூரியனைப் போல் அவ்வளவு பிரகாசமாக இல்லை. சூரியனுடன் ஒப்பிடுகையில், சுமார் 84% பிரகாசமாக உள்ளது.

மற்றொன்றோ, சூரியனில் மூன்றில் ஒரு பங்கு அளவில், 1% -க்கும் குறைவான பிரகாசத்துடன் உள்ளது. ஒன்றின் பாதையில் மற்றொன்று குறுக்கே வரும் போது, 7.5 (பூமி) நாட்களுக்கு ஒரு முறை கிரகணங்கள் ஏற்படுகிறன.

இரட்டை சூரியன்களுக்கு அருகில் உள்ள கெப்லர் 47 b (Kepler-47b) கோள் இவற்றைச் சுற்றி வர சுமார் 50 நாட்கள் எடுத்துக் கொள்கிறது. இது பூமியைப் போல மூன்று மடங்கு பெரிதாய் இருக்கிறது.

வெளியில் உள்ள கெப்லர் 47 c (Kepler-47c) நெப்டியூனின் அளவினை விட சிறிது பெரிதாய் இருக்கிறது (பூமியைப் போல 17 மடங்கு). இரு சூரியன்களைச் சுற்றி வர 303 நாட்கள் எடுத்துக் கொள்கிறது.

கெப்லர் 47 c உயிர் வாழத் தகுந்த தூரத்தில் (Habitable zone) இருந்தாலும், அது ஒரு வளிமப் பெருங்கோளாக (Gas giant) இருக்கலாம் என்று எண்ணப்படுகிறது. அப்படி இருப்பின், அங்கு உயிர்கள் வாழ வாய்ப்பில்லை. ஏனெனில், தண்ணீர் அடர்ந்த நீராவி வடிவத்தில் தான் இருக்கும். இதனைப் பற்றிய ஆய்வுகள் தொடர்கிறன.

"உயிர்களின் செல்ல கோளுக்கான தேடல்" இன்னும் தொடர்கிறது. நமது பூமியைத் தவிர வேறு எதையும் கெப்லர் கண்டறியுமா?
பொறுத்திருந்து பார்ப்போம்!!

ஆதாரம்: நாசா வலைத்தளம்

கொசுறு:

இதற்கு முன்பே, இரு சூரியன்களைச் சுற்றும் கெப்லர் 16 B என்கிற கோளைப் பற்றிய பதிவிற்கு: இரு சூரியன்களுடன் ஒரு கோள்- விண்வெளி அதிசயம்

கெப்லர் 16 கண்டறியப்பட்ட பின்னர், கெப்லர் 34, கெப்லர் 35, கெப்லர் 38 என மேலும் மூன்று இரட்டை சூரியகுடும்பங்கள் கண்டறியப்பட்டுள்ளன. கெப்லர் 47 நான்காவது ஆகும்.

4900 ஒளிஆண்டுகள் = 46 மத்தியம் கி.மீ = 4.6 லட்சம் கோடி கோடி கி.மீ!! {தவறாக இரு முறை கோடி என்று எழுதவில்லை!}

செவ்வாய் கிரகத்தில் இரட்டை சூரியன்கள் (நம்பாதீங்க - பகுதி 13)

2012-08-25T19:08:00.001+05:30

சமீபத்தில், நாசா அனுப்பிய கியூரியோசிட்டி தரையுளவி செவ்வாய் கிரகத்தில் வெற்றிகரமாக தரையிறங்கியதை அறிந்திருப்பீர்கள். கியூரியோசிட்டி படங்களாக எடுத்து தள்ளுவதாக ஏற்கனவே சொல்லியிருந்தேன்.

அப்படி அனுப்பிய படம் ஒன்றைப் பார்த்த நாசா விஞ்ஞானிகள் அதிர்ச்சியில் உறைந்தனர். பல வானியலாளர்கள் இதைப் பற்றி ஆராய்ச்சி செய்து கொண்டு இருக்கிறனர். படத்தைப் பார்த்தால் நீங்களும் ஆச்சரியப்படுவீர்கள்.

என்ன? ஆச்சரியமாக இருக்கிறதா?

செவ்வாய் கிரகத்தில் தெரியும் இந்த இரட்டை சூரியன்கள் தான் தற்போதைய சூடான சர்ச்சை (Hot topic).

என்னங்க? நீங்களும் ஆராயப் போறீங்களா?
கொஞ்சம் பொறுங்க!!

யாரோ சும்மா விளையாட்டுக்குச் செய்த படம்!!! இது தான் சமீப காலத்தில் அதிகமாக பரப்பப்படும் படம்.

உண்மை

படத்தின் பிண்ணனியில் இருக்கும் மலை / மேடு ஆகியவை மெய்யாலுமே செவ்வாயில் உள்ளவை தான். (நம்புங்க!!). இந்தக் காட்சியை நாசாவின் தளத்திலும் காணலாம்.

இந்தப் படம் கூட கியூரியோசிட்டி எடுத்ததல்ல! 2005 மே 19 அன்று மாலை (செவ்வாய்), நாசா அப்போது அனுப்பியிருந்த ஸ்பிரிட் தரையுளவி (NASA's Mars Exploration Rover Spirit ) எடுத்தது.

அப்ப அந்த இரட்டை சூரியன்கள்?

ஸ்டார் வார்ஸ் (Star Wars) பார்த்திருக்கீங்களா? (நானும் பார்த்ததில்லை!)
கதையில் இரு சூரியன்களைச் சுற்றும் டேட்டூஇன் (Tatooine) என்ற கிரகம் வரும்.
[Star Wars Episode IV: A New Hope" (LucasFilm, 1977)]

திரைப்படத்தில் வரும் காட்சி:

இப்ப புரியுதா ?

கண்ணா, இரண்டு சூரியனைப் பார்க்க ஆசையா? அப்ப நீங்க போக வேண்டியது கெப்லர் 16 B

நன்றி : Bad Astronomy , Hoax Slayer

நம்பாதீங்க தொடரின் அனைத்து பதிவுகளையும் காண: நம்பாதீங்க- தொடர்

இந்திய ரூபாயினைக் கணிணியில் உள்ளிடுவது எப்படி?

2012-08-15T18:40:00.001+05:30

நண்பர்களே,

அனைவருக்கும் எனது இனிய சுதந்திர திருநாள் வாழத்துகள்!!

இந்த இனிய நாளில், நமது இந்திய ரூபாயின் குறியீட்டைப் பற்றி அறிந்து கொள்வோமா?

இந்திய அரசு 15 ஜூலை 2010 அன்று தனது ரூபாய் பண மதிப்பைக் குறிப்பதற்கு என தனியே ஒரு சிறப்பு குறியீட்டைக் கொண்டு வந்தது. இதன் மூலம், ரூபாய் மதிப்பைப் பயன்படுத்தும் பிற நாடுகளிடம் (பாகிஸ்தான், இலங்கை, நேபாளம்) இருந்து தனது மதிப்பை வேறுபடுத்திக் காட்டியது.

கணிணிகளில் இந்திய ரூபாய்:

விண்டோஸ் (Windows Vista/ Windows 7) :

தற்போது யூனிக்கோடு எழுத்துருவில் (Unicode-6) இந்திய ரூபாய் நாணயம் இடம் பெற்றுள்ளது. எனவே, எல்லா எழுத்துருக்களிலும் (Font) ரூபாய் வடிவத்தை எழுதலாம்.
நிறுவுவதற்கு:
மைக்ரோசாப்ட் ஆதரவு பக்கம் சென்று, தகுந்த கோப்பைத் தரவிறக்கிக் நிறுவிக் கொள்ளுங்கள்.

எழுதுவதற்கு:

கீழ்காணும் வரிசையினை அடித்தால், இந்திய ரூபாய் வடிவம் கிடைக்கும்:
20B9 + Alt + x

விண்டோஸ் XP:

நிறுவுவதற்கு:

கொஞ்சம் பழைய வழி தான்..

முதலில், Foradian தளம் சென்று,கோப்பைத் தரவிறக்கிக் கொள்ளுங்கள்.
கோப்பினைப் பிரித்து (Extract), உள்ளிருக்கும் எழுத்துருவினை (Font) நிறுவுங்கள்.

எழுதுவதற்கு:

எழுத வேண்டிய இடத்தில், Rupee Foradian என்கிற எழுத்துருவினைத் தேர்ந்தெடுங்கள்.
தட்டச்சுப் பலகையில் இருக்கும் ` என்கிற பொத்தானை அழுத்துங்கள்.

லினக்ஸ்:

இந்திய ரூபாய் குறியீட்டு மாற்றத்தை முதன்முதலில் கணிணி பயன்பாட்டில் கொண்டு வந்தது உபுண்டு இயங்குதளம் தான் (விண்டோஸ் எல்லாம் பின்னால் தான்!!). உபுண்டு தனது 10.10 பதிப்பில் இந்த குறியீட்டைச் சேர்த்துக் கொண்டது. பின்னாளில், பெடோராவும் தனது 15 ஆம் பதிப்பில் ரூபாய் குறியீட்டைச் சேர்த்து கொண்டது.

ரூபாய் குறியீட்டை லினக்ஸ் இயங்குதளங்களில் எப்படி உள்ளிடுவது?

விண்டோஸ் இயங்குதளம் போல இதற்கென தனியே ஒரு எழுத்துருவினை நீங்கள் நிறுவ வேண்டிய கட்டாயம் ஏதும் இல்லை. எந்த எழுத்துருவையும் நிறுவாமலேயே, மிக எளிதாக இதைச் செய்து முடிக்கலாம்!!

கணிணி அமைப்புகள் (System Settings) மூலம் விசைப்பலகை இட அமைப்புகளுக்குச் (Keyboard Layout) செல்லுங்கள் .
அங்கு இருக்கும் Options (தேர்வுகள்) என்பதனைச் சொடுக்குங்கள்
"Adding currency signs to certain keys" என்பதில், "Rupee on 4" என்பதை தேர்வு செய்யுங்கள்
“Key to choose 3rd level” என்பதில், உங்களுக்கு தகுந்த விசையைத் தேர்வு செய்யுங்கள். (உ.தா: Right Alt)
அனைத்தையும் சேமியுங்கள்

அவ்வளவு தான்!! இனி நீங்கள் உங்கள் விருப்ப விசையை அழுத்தி "4” ஐ (நான் கூறிய உதாரணத்தில் Right Alt + 4) அழுத்தினால் அந்த இடத்தில் ரூபாயின் குறியீடு வந்துவிடும்.

கொசுறு:

படத்தில் இருப்பவரைத் தெரிகிறதா? என்ன அதுக்குள்ள மறந்துட்டீங்க?

இவர் தான் உதய குமார் - இந்திய ரூபாய்க்கு வடிவம் கொடுத்தவர்!!

டிஸ்கி:
இந்த கட்டுரையின் பிற்பகுதி (லினக்ஸ்) கணியம் இதழுக்காக (கணியம்- இதழ் 7) "லினக்ஸ் இயக்குதளங்களில் இந்திய ரூபாய்!" எழுதப்பட்டது. முற்பகுதி, கொசுறு, ஆகியவை பின்னர் சேர்க்கப்பட்டவை!

பிறிதொரு சமயத்தில் ரூபாய் பற்றிய மேலும் சுவாரசியமான தகவல்களுடன் சந்திப்போம்.

நன்றி: கணியம் இதழ், Youtube (காணொளி), Google படங்கள், விக்கிபீடியா.

நிலா அது வானத்து மேலே (நம்பாதீங்க - பகுதி 12)

2012-08-11T08:34:00.001+05:30

சூரிய உதயமும், மறைவும் காண்பதற்கு மிகவும் இனிமையாக இருக்கும்.படத்தில் நீங்கள் காண்பது, பூமியின் வட துருவத்தில் நிகழும் சூரிய அஸ்தமனம். நிலாவுக்கு நேர்கீழே சூரியனைக் காணலாம்!! கொஞ்சம் பொறுங்க.. வட துருவத்தில் நிகழும் சூரிய அஸ்தமனம் உண்மையில் இப்படித் தான் இருக்குமா?இங்கு அலசுவோம்!

சூரிய உதயமும், மறைவும் காண்பதற்கு மிகவும் இனிமையாக இருக்கும். பூமியின் வட துருவத்தில் நிகழும் சூரிய அஸ்தமனம் இப்படித் தான் இருக்கும்!!

இதைக் காண கண்கோடி வேண்டும்... பார்த்து மகிழுங்கள்... படத்தில் நிலாவுக்கு நேர்கீழே சூரியனைக் காணலாம்!!

என்ன நண்பர்களே!! சூரிய அஸ்தமனம் எப்படி? ரொம்ப நல்லா இருக்கா!!

ஆனால், இது உண்மை இல்லை!!

ஏன்? மேலும் படிங்க!!

உண்மை

உண்மையில் இப்படி இது ஒரு புகைப்படமே அல்ல... ஒட்டுவேலையோ என்று நினைக்கிறீர்களா? அதுவும் இல்லை...

இது இங்கா நீல்சன் (Inga Nielsen) எனும் ஓவியரால் வரையப்பட்ட அழகிய ஓவியம்!!
(படத்தின் கீழே பாருங்கள்.. கருப்பு பட்டியில் அவர் பெயர் இருக்கும்!!)

இது நாசாவால் "இன்றைய வானியல் படம்" என்று 2006 ஆம் ஆண்டு வெளியிடப்பட்டது!!

இப்படி ஒரு காட்சி பூமியில் ஏற்பட வாய்ப்பே இல்லை..

சரி, அப்ப வடதுருவத்தில் சூரிய அஸ்தமனம் எப்படி இருக்கும்?

பூமியில் இருந்து பார்த்தால் சூரியனும், நிலாவும் கிட்டத்தட்ட ஒரே கோணவிட்டம் (Angular Diameter) உடையவை..

சூரியனின் கோணவிட்டம் = 14 லட்சம் கி மீ/ 15 கோடி கிமீ = 0.00903

சந்திரனின் கோணவிட்டம் = 3474 கிமீ / 3.84 லட்சம் கிமீ = 0.00905

இதனால் தான், சூரிய கிரகணத்தின் போது சந்திரன் சூரியனை முழுதும் மறைத்தாலும், சூரியனின் ஒளி வளையம் (Corona) நமக்குத் தெரிகிறது.

எனவே, அங்கும் நமக்குத் தெரிவது போலத் தான் இருக்கும்!!

இன்னும் விரிவான ஆய்வுக்கு (ஆங்கிலத்தில்): An unreal picture of sunset at the north pole

நன்றி: கூகிள் படங்கள், Codecogs (Latex)

நம்பாதீங்க தொடரின் அனைத்து பதிவுகளையும் காண: நம்பாதீங்க- தொடர்

செவ்வாய் கிரகத்தில் கியூரியோசிட்டி தரையுளவி [Curiosity Rover]

2012-08-07T01:26:00.004+05:30

நாசா செவ்வாய் கிரகத்திற்கு அனுப்பிய கியூரியோசிட்டி தரையுளவி (Curiosity Rover) வெற்றிகரமாக செவ்வாய் கிரகத்தில் கால் பதித்தது. 06 ஆகஸ்ட் 2012 அன்று கேல் எரிமலைப்பள்ளத்தாக்கில்(Gale Crater) இறங்கியது. அதன் சிறப்பம்சம் என்ன? எப்படி செவ்வாயின் பரப்பை அடைந்தது? அதன் திட்டக் நோக்கம் என்ன? என்ன விதமான ஆய்வுகளை மேற்கொள்ளப் போகிறது? செவ்வாயில் உயிர்கள் இருப்பைப் பற்றி எதுவும் கண்டறியுமா?

சமீபத்தில், நமது 'பிளாகர் நண்பன்' அப்துல் பாஸித் அவர்கள் செவ்வாய் கிரகத்திலிருந்து பேஸ்புக் அப்டேட் என்கிற பதிவினை எழுதியிருந்தார். அதனைப் படித்து வெற்றிகரமாக செயல்படுத்தி விட்டனர் நாசா விஞ்ஞானிகள்.

நாசா செவ்வாய் கிரகத்திற்கு அனுப்பிய Curiosity என்கிற தரையுளவி (Rover) வெற்றிகரமாக செவ்வாய் கிரகத்தில் கால் பதித்ததாம்.

புது இடமாச்சே.. அங்கு போன அந்த வண்டி படமா எடுத்து தள்ளுதாம். அந்த படங்களை செவ்வாய் கிரகத்தில் இருந்து புதிது புதிதாக அப்லோட் செய்கிறதாம்.. அதாவது செவ்வாய் கிரகத்தில் இருந்து தனது ஸ்டேடஸை அப்டேட் செய்கிறதாம் (பேஸ்புக்கில் அல்ல!)!!

2011 ஜூலையில் நாசா தனது ஸ்பேஸ் ஷட்டில் (Space Shuttle) ஊர்திகளுக்கு ஓய்வளித்த பின்னர், விண்வெளித்துறையில் நாசாவின் ஆதிக்கம் ஒரு முடிவுக்கு வந்து விட்டதாக பலர் கருதினர். இதற்கு தனது செவ்வாய் பயணம் மூலம் நாசா தக்க பதிலடி கொடுத்திருக்கிறது.

செவ்வாய் அறிவியல் ஆய்வுக்கூடம் (Mars Science Laboratory - MSL):

செவ்வாய் கிரகத்தினை உயிர் வாழ்வதற்கான சாத்தியக் கூறுகளை ஆராய்வதே செவ்வாய் அறிவியல் ஆய்வுக்கூடம் என்கிற திட்டத்தின் நோக்கமாகும். இதற்காக கியூரியோசிட்டி (Curisoity)என்கிற பெயரில் பிரத்தியோகமாக வடிவமைக்கப்பட்ட தரையுளவி (Rover) பயன்படுத்தப்படுகிறது.

திட்டத்தின் காலம் 686பூமி நாட்கள் ஆகும்.

திட்டத்தின் குறிக்கோள்கள் (Mission Objectives):

1. உயிர் வாழ்தகுமை சாத்தியக் கூறுகள் (Biological Potential) குறித்த ஆய்வு

கரிமச் சேர்மங்கள் (Organic Compounds) இருப்பு மற்றும் தன்மை குறித்த அலசல்
உயிர் வாழ்க்கைக்குத் தேவையான வேதியியல் கூறுகளை ஆய்வு செய்தல் [கார்பன், ஹைட்ரஜன், நைட்ரஜன், ஆக்ஸிஜன், பாஸ்பரஸ், சல்பர்]
உயிர்கூறுகளின் இருப்பை (Bio-signatures of Life) அறிய முயலுதல்

2. செவ்வாய் கிரகத்தின் தட்ப வெப்பம் (Climate) குறித்த ஆய்வு

செவ்வாயின் காற்று மண்டலத்தின் பரிணாம வளர்ச்சியினை (Evolution of Martian atmosphere) அலசுதல்
நீர் மற்றும் கரிம வாயு (Carbon di oxide) ஆகியவற்றின் தற்போதைய இருப்பு, பகிர்மானம் மற்றும் சுழற்சி முறை குறித்து ஆராய்தல்.

3. செவ்வாய் கிரகத்தின் நிலவியல் (Geology) குறித்த ஆய்வு

செவ்வாயின் மேற்பரப்பின் வேதியியல் (Chemical), சம இயல் (Isotopic) மற்றும் கனிமவியல் (Minerology) பொதிவினைக் கண்டறிதல்
செவ்வாயில் உள்ள பாறை மற்றும் மண் உருவாகிய முறையினை அலசுதல்

4. மனித விண்வெளிப் பயணம் (Human Space Mission) குறித்த ஆய்வு

செவ்வாய் மேற்பரப்பின் கதிரியக்கத்தின் அகன்ற அலைக்கீற்றை (Broad Spectrum of Surface Radiation) குறித்த ஆய்வு

கியூரியோசிட்டி தரையுளவி (Curisoity Rover):

உலகிலேயே விண்வெளிக்கு அனுப்பப்பட்ட மிகப்பெரிய தரை ஊர்தி (Rover)
3 மீ நீளம் கொண்டது. மொத்த எடை 899 கிலோ
முதல் முறையாக சக்கரங்களைக் கொண்டே தரையிறக்கம் (Landing on Wheels)
செவ்வாயினை ஆய்வு செய்வதற்காக 10 கருவிகள் பொருத்தப்பட்டுள்ளது
6 தனி சக்கரங்களைக் கொண்ட ஸ்டியரிங் (இதன் மூலம் 360 டிகிரியும் சுழல முடியும்)
அணுசக்தி (Nuclear Power) மூலம் இயங்கும் கலன்

ஏவுதல் (Launch) :

ஏவுதளம்: கேப் கேனவரல் வான்படைத் தளம், புளோரிடா (Cape Canaveral Air Force Station, Florida)
ஏவுகலன்: Atlas V
ஏவப்பட்ட நாள்: 26 நவம்பர் 2011, சர்வதேச நேரம் (GMT) 15:00 (இந்திய நேரப்படி 20:30 மணி)
ஏவப்படும் போது விண்கலனின் எடை (Space Craft mass at Launch): 3893 கிலோ

பயணம் (Cruise):

விண்ணில் செலுத்தப்பட்ட MSL விண்கலன் செவ்வாயை நோக்கிய தன் பயணத்தைத் தொடர்ந்தது. 56.7 கோடி கிமீ தூரம் பயணம் செய்து செவ்வாய் கிரகத்தை அடைந்தது.

நெருங்குதல் (Approach):

2012 ஜூன் 22 அன்று விண்கலன் செவ்வாய் கிரகத்தைச் சென்றடைந்தது. செவ்வாயின் மையத்திலிருந்து 3500 கிமீ தூரத்தில் நிலைநிறுத்தப்பட்டது. தரையிறக்கத்திற்குத் தேவையான ஆயத்தங்கள் செய்யப்பட்டன

நுழைவு மற்றும் தரையிறக்கம் (Entry, Descent and Landing):

06 ஆகஸ்ட் 2012 அன்று விண்கலன் தனக்கு இடப்பட்ட முக்கிய பணியினைச் செய்தது.

தான் சுமந்து வந்த கியூரியோசிட்டி தரையுளவியினை (Curisoity Rover) பத்திரமாக செவ்வாய் கிரகத்தின் தரையில் இறக்கி விட்டது.

இந்த செயல் நான்கு கட்டங்களாக செயல்படுத்தப்பட்டது:

1. வழிப்படுத்தப்பட்ட நுழைவு (Guided Entry)
2. வான்குடை இறக்கம் (Parachute Descent)
3. ஏவுதல் மூலம் இறக்கம் (Powered Descent)
4. வான் பளு தரையிறக்கம் (Sky Crane)

விளக்கங்களுக்கு படத்தைப் பாருங்கள். மேம்பட்ட செயல் விளக்கம் (பெரிதாக்கிப் பார்க்கவும்):

இதில் முக்கிய விடயம்...

இதுவரை நாசா அனுப்பிய தரையுளவிகள் காற்றுப்பைகளின் (Airbags) துணை கொண்டு தரையிறக்கப்பட்டன.

முதல் முறையாக, ஊர்தியின் சக்கரங்களைக் கொண்டே தரையிறக்கம் (Landing on Wheels) செய்யப்பட்டதால், செயல் நடைபெற்ற 06:39 நிமிடங்களும் மிகப் பதட்டமானதாகவே கருதப்பட்டது.

இறக்கத்தின் போது, செவ்வாய் கிரகத்தின் மீது படிந்த தனது நிழலைப் படமெடுத்த ஊர்தி:

தரையைத் தொட தயார்!! (வரைபடம்)

06 ஆகஸ்ட் 2012 சர்வதேச நேரம் 05:31 (இந்திய நேரப்படி 11:01 மணி) அன்று, கேல் எரிமலைப்பள்ளத்தாக்கில் (Gale Crater), திட்டமிட்டப்படி வெற்றிகரமாக செவ்வாயின் மீது கால் பதித்தது Curiosity.

இனி.........

Curiosity இரண்டு வருடங்கள் செவ்வாய் கிரகத்தில் தனது ஆய்வுகளைத் தொடரும். இதனால், புதிய கண்டறிதல்கள் நிகழுமா? பொறுத்திருந்து பார்ப்போம்!

கொசுறு:

படத்தில் இருக்கும் 15 வயது சிறுமியின் பெயர் கிளாரா மா (Clara Ma). செவ்வாய் சென்ற Curisoity ஊர்திக்குப் பெயர் சூட்டியவர் இவர் தான்!!

2009 ஆம் ஆண்டு நாசா நடத்திய பெயர் சூட்டல் போட்டியில் "Curiosity" என்கிற பெயரைப் பரிந்துரை செய்து பரிசைத் தட்டி சென்றவர்.

தற்போது செவ்வாயில் இருக்கும் கலனில் இவரது பெயரும், கையொப்பமும் பொறிக்கப்பட்டுள்ளன.

குசும்பு:

இடது பக்கம் இருப்பது சமீபத்தில் செம ஹிட்டடித்த "நான் ஈ" ..

வலது பக்கம் இருப்பது? செவ்வாய் குறித்த ஆய்வில் ஈடுபடும் நாசா விஞ்ஞானிகள் மற்றும் ஆர்வலர்களின் லோகோ (Mart-ஈ-an)!!

'ஈ' சாரி.. இவற்றை ஒப்பிட்டு உங்கள் மனதில் எதுவும் தோன்றினால், அடியேன் பொறுப்பல்ல :D

டிஸ்கி:
இன்னும் எழுத ஆசை தான். எனினும், பதிவின் நீளம் கருதி முடிக்கிறேன்.
பதிவு மிகவும் நீண்டு போனதாக கருதினால் மன்னிக்கவும்!

நன்றி:

NASA - MSL Mission Page
Mars Science Laboratory
MSL Science Corner
Curiosity Takes Us Back to Mars
Why NASA's Mars Curiosity Rover landing will be "Seven Minutes of Absolute Terror"
Mars Rover Landing 2012 - Curiosity Landing Information
Mars Science Laboratory - Wikipedia
பிளாகர் நண்பன் (பதிவின் துவக்கம்!)

செவ்வாய் கிரகத்தில் இருந்து வந்த புதிய அப்டேட்:

கேல் எரிமலைப்பள்ளத்தாக்கு (Gale Crater)


மவுண்ட் ஷார்ப் (Mount Sharp) [3.4 கிமீ உயரமான மலை]

மேலும் பல படங்களைப் பெற தொடர்ந்து NASA - MSL Mission Page பக்கத்தில் இணைந்திருங்கள்!!

சூரியனைச் சுற்றி ஒளிவட்டம் (Halos)

2012-08-05T08:57:00.000+05:30

நண்பர் "கோவை நேரம்" ஜீவானந்தம் அவர்கள் தனது வலைப்பூவில் தான் வானில் கண்ட அதிசயம் பற்றி "வானில் ஓர் அதிசயம் என்கிற பதிவில் எழுதியிருந்தார்.

அது என்ன அதிசயம்? எப்படி நிகழ்கிறது? இங்கு பார்ப்போம்!!
(அப்பாடா!! நாமளும் ஒரு பதிவு தேற்றியாச்சு)

இந்த நிகழ்வு பரிவேடம் (Halo) என்று அழைக்கப்படுகிறது!!ஒளிவட்டம் என்றும் சொல்லலாம்! இது 22 டிகிரி (22º) ஹாலோ ஆகும்.

இவை சூரியனில் மட்டுமல்ல, நிலவைச் சுற்றியும் வரும்.!!

இது எப்படி ஏற்படுகிறது?

நமக்கு மேலே வானத்தில் சுமார் 5.5 கி.மீ உயரத்தில் உள்ள மேகங்கள் மென்னடுக்கு முகில் (Cirrostratus cloud) என்று அழைக்கப்படுகிறன. இவை பெரும்பான்மையாக பனித்துளிகளால் ஆனவை. இவற்றை வெறும் கண்ணால் பார்ப்பது அரிது.

மேகங்களில் உள்ள பனிக்கட்டிகள் அனைத்தும் அறுகோண (Hexagon) வடிவில் இருக்கும். மேலும், அவை அனைத்தும் அடுக்கி வைத்தது போல ஒரே வரிசையில் இருக்காது!! ஒவ்வொரு துகளும் ஒவ்வொரு திசையில் இருக்கும்.

சூரியனின் ஒளிக்கதிர்கள் பனித்துகள்களின் மீது விழும் போது, அவை சூரிய ஒளியை திசை திருப்புகிறன (refraction). நாம் இந்த காட்சியைப் பார்ப்பதற்குக் காரணம் சூரிய ஒளியின் பாதைக்கு ஓரளவு செங்குத்தாக இருக்கும் துகள்கள் தான்!!

ஒளிக்கதிர்கள் அவற்றின் வழியே போகும் போது, கதிர்கள் 21.7º - 50º திரும்புகிறன. செங்குத்தான எல்லா படிகங்களின் ஒளியின் கீற்றே நமக்கு ஒளிவட்டமாக தெரிகிறது!!

பெரும்பாலான கதிர்கள் 21.7º திரும்புகிறன. சில வேறு கதிர்கள், துகளின் நிலையைப் 50º வரை திரும்பும்.
எனவே, தான் உள் வளையம் (21.7º) மிகவும் பிரகாசமாகவும், வெளி வளையம் வெளிச்சம் குன்றியும் இருக்கிறது!

இன்னொரு விசயம் கவனித்தீர்களா?
வளையத்திற்கும் சூரியனுக்கும் இடையே இருட்டாக இருக்கிறது!!

அதன் காரணம், 21.7º கோணத்திற்குக் குறைவாக ஒளித்திருப்பல் இருக்காது (Refraction). ஒளி இல்லாத காரணத்தால் அந்த இடைவெளி இருட்டாக இருக்கிறது!!

டிஸ்கி:

1. அது என்னய்யா கணக்கு 21.7 டிகிரி (21.7º)
எல்லாம் இயற்பியல் தான்!!

பனித்துகளின் முறிவுக்குணகம் (Refracrive Index) n_prism = 1.31
காற்றின் முறிவுக்குணகம் n_medium= 1.00027
அறுகோணத்தின் ஒரு பக்கம் σ = 60º

இதில் உள்ளிட்டால், ஒளி திரும்பும் திசைக் கோணம் δ = 21.7º!!

2. நிலா ஹாலோக்கள் மழை வருகையைக் குறிப்பிடுகிறன. என்றாலும், அவை நம்மூர் வானிலை அறிக்கை போலத் தான்.. வரும்.. ஆனா, வராது!! (உண்மையை 'நிலவ'ன்பனிடம் தான் கேட்கணும்)

3. இதேபோல 46 டிகிரி, 90 டிகிரி ஹாலோக்களும் உண்டு.

நன்றி:

"கோவை நேரம்" ஜீவானந்தம் அவர்கள் (பதிவின் கரு மற்றும் படம்)
Atmospheric Optics , HyperPhysics , Florida Unversity (படம்), Code Cogs (LaTeX)

வருமான வரி கணக்கை இணையத்தில் தாக்கல் செய்வது எப்படி?

2012-07-28T18:08:00.001+05:30

ஜூலை இறுதி என்றாலே "சீக்கிரம் வருமான வரி கணக்கைத் தாக்கல் செய்ய வேண்டும்" என்கிற விழிப்பு அனைவரிடமும் இருக்கும். அதற்கென இருக்கும் படிவத்தை முழுதும் நிரப்புவது பெரும்பாடு தான்!!

இணையத்தை நாம் பல செயல்களுக்குப் பல வழிகளில் பயன்படுத்துகிறோம். இணையத்தில் மூலம் நமது வருமான வரிக் கணக்கை எப்படி தாக்கல் செய்வது (Efiling of income tax returns) என்பதை இந்த பதிவில் பார்ப்போம்.

வருமான வரி தாக்கல் செய்ய வேண்டிய இணைப்பு: https://incometaxindiaefiling.gov.in/

1. முதலில் தளத்திற்குச் சென்று உங்களுக்கு என்று ஒரு கணக்கு உருவாக்கிக் கொள்ளுங்கள்.

கணக்கை எப்படி உருவாக்குவது?

தளத்தில் வலது பக்கத்தில் இருக்கும் Login என்கிற பகுதியில் இருக்கும் Register என்பதைச் சொடுக்குங்கள்.
அடுத்து வரும் பக்கத்தில், உங்களது PAN எண்ணை இடுங்கள் (உங்களது PAN எண் தான் உங்களின் கணக்கு! (user id) )

அடுத்து வரும் பக்கத்தில், உங்கள் விவரங்களை உள்ளிடுங்கள்.உங்கள் PAN CARD விண்ணப்பப்படிவத்தில் கொடுத்தது போலத் தான் உங்கள் பெயர் இருக்க வேண்டும். கூடவே, மின்னஞ்சல் முகவரியும் அவசியம்.
உங்களிடம் எண்முறை சான்றிதழ் (Digital Cerificate) இருந்தால், அதனையும் பதிவு செய்யவும் (pfx file/ USB token)
செய்து முடித்த பின், உங்களுக்கு ஒரு மின்னஞ்சல் வரும். அதில் சென்று இணைப்பைச் சொடுக்கவும்.
உங்கள் கணக்கு தயார்!!

2. வருமான வரி தாக்கல் படிவத்தைத் தரவிறக்குங்கள்

உங்கள் கணக்கிற்குள் உள்நுழையுங்கள்
மேலே உள்ள Downloads --> AY 2012-13 என்பதில் செல்லுங்கள்
தகுந்த படிவத்தைத் தரவிறக்கிக் கொள்ளுங்கள் (Excel Utility) . அருகில் இருக்கும் உதவிக் கோப்பையும் (Help Manual) ஐயும் தரவிறக்கிக் கொள்ளுங்கள்!

குறிப்பு: நீங்கள் செய்யப்போவது தனிநபர் தாக்கல் (Individual) என்றால், மேலே கூறியதைச் செய்ய வேண்டிய அவசியம் இல்லை.
கீழே இருக்கும் இணைப்பைச் சொடுக்கி அவற்றைத் தரவிறக்கலாம்.

விண்ணப்பப் படிவம்:ITR-1
உதவிக் கோப்பு (ITR-I Help Manual)

3. விண்ணப்பப் படிவத்தை நிரப்புங்கள்.

இந்த Spread Sheet (Excel) படிவத்தில்Macro கள் மூலம் பல செயல்கள் நடப்பதால், Macro களைச் செயல்பாட்டில் (Enable Macro) வைக்கவும்.

படிவத்தில் உள்ள தொடர்புடைய பச்சை நிறக்கட்டங்களை மட்டும் நிரப்பவும்.
ஒவ்வொரு பக்கத்தையும் (Sheet) நிரப்பிய பின்னர் Validate என்பதனைச் சொடுக்கி எதுவும் விடுபட்டிருக்கிறதா என்று சரி பார்க்கவும்.
அதன் பின், அடுத்த பக்கம் (Sheet) செல்லவும்.
அனைத்தையும் உள்ளிட்ட பின்னர், முதல் பக்கம் வரவும்.
"Calculate Tax" என்பதனைச் சொடுக்கினால், படிவம் முழுதும் நிரப்பப்பட்டு விடும்.
அதன் பின், Generate XML என்பதனைச் சொடுக்கவும்
வரும் புதிய பக்கத்தில் "Save XML" என்பதனைச் சொடுக்கவும்
இப்போது உங்கள் தாக்கல் படிவத்தின் XML வடிவம் உங்கள் கணிணியில் இருக்கும்.

4. நிரப்பிய படிவத்தைத் தளத்தில் பதிவேற்றுங்கள்

உங்கள் கணக்கிற்குள் உள்நுழையுங்கள்
இடது பக்கத்தில் உள்ள "Submit Return" என்பதன் கீழே உள்ள Select Assessment Year --> AY 12-13 என்ற பக்கத்திற்குச் செல்லுங்கள்

வரும் பக்கத்தில், தகுந்த படிவ எண்ணைத் தேர்வு செய்யவும்.
உங்களிடம் எண்முறை சான்றிதழ் (Digital Cerificate) இருந்தால், "Do you want to digitally Sign the file" என்பதில் Yes கொடுக்கவும். இல்லையேல், "No" கொடுக்கவும்.
Digital Certificate இருப்பவர்கள் (Yes கொடுத்தவர்கள்) தொடர்புடையதைத் தேர்வு செய்யவும்.
அதன் பின் "Next" என்பதைச் சொடுக்கவும்

வரும் பக்கத்தில், உங்கள் கணிணியில் சேமிக்கப்பட்ட XML கோப்பைப் பதிவேற்றுங்கள்.
தற்போது நீங்கள் உங்கள் வருமான வரிக் கணக்கைத் தாக்கல் செய்து விட்டீர்கள்!!

5. ஒப்புகை (Acknowledgement) பெறுங்கள்

இருங்க.. கடமை முடிந்து விட்டது எனக் கிளம்பாதீங்க!!

எண்முறை சான்றிதழ் (Digital Cerificate) கொடுத்தவர்கள் ஒப்புகை படிவத்தை (Acknowledgement Form) சேமித்து/ அச்சிட்டு வைத்துக் கொள்ளுங்கள்
மற்றவர்கள் வந்த ஒப்புகை படிவத்தை (ITR-V) அச்சிட்டு, கீழ்காணும் முகவரிக்கு (120 நாட்களுக்குள்) அனுப்புங்கள். [அஞ்சல்/ விரைவு அஞ்சல் (Speed Post) மட்டுமே!]

முகவரி:

Income Tax Department – CPC,
Post Bag No - 1, Electronic City Post Office,
Bengaluru - 560100, Karnataka

அனுப்புபவர்கள் ஒப்புகைப் படிவத்தில் கையொப்பம் இட மறந்து விடாதீர்கள்!!

நீங்கள் தாக்கல் செய்த உடன் வரும் பக்கத்திலேயே, ஒப்புகைப் படிவத்தின் இணைப்பு இருக்கும். தவற விட்டவர்கள், உங்கள் கணக்கில் மேல் தத்தலில் உள்ள My Accounts--> My Returns சென்று தரவிறக்கிக் கொள்ளலாம்.

ஒப்புகைப் படிவம் கடவுச்சொல் கொண்டு பாதுகாக்கப்பட்டது.
கடவுச்சொல்: உங்கள் PAN எண் பிறந்த நாள்
(இடையில் Space வராது)

என்ன நண்பர்களே, இனி எளிதாக உங்கள் வருமான வரிக்கணக்கைத் தாக்கல் செய்து விடலாம் தானே?

டிஸ்கி:

தாமதமாக பதிவிட்டமைக்கு வருந்துகிறேன். இருந்தாலும், இன்னும் மூன்று நாட்கள் இருப்பதால், பெருவாரியானவர்கள் பயன்படுத்திக்கொள்ளலாம் என்ற நோக்கத்தில் பதிவிடுகிறேன்!!

வருமான வரிக் கணக்கைத் தாக்கல் செய்ய கடைசி நாள் ஜூலை 31!

படங்கள்: கூகிள் தேடல் மற்றும் கைமுறை (Self uploaded)

கணித்தமிழ் அமுதம் மறைவு

2012-07-25T20:33:00.000+05:30

வணக்கம் நண்பர்களே!!

இந்த பதிவினைப் பல நாட்கள் கழித்து வெளியிடுவதற்கு வருந்துகிறேன்.

நம் தாய்மொழியாம் தமிழ்மொழி பல நூற்றாண்டுகளாக பல்வேறு பரிணாமங்களுக்கு இடையே தொடர்ந்து வளர்ந்து வருகிறது. இந்த வளர்ச்சிக்குப் பலரும் பல வழிகளில் பங்காற்றினர்.

அன்று மன்னர்கள் சங்கம் வைத்து முத்தமிழை வளர்த்தனர். இன்றோ, பல கணிணியாளர்களும் மென்பொருட்கள் மூலம் கணித்தமிழை வளர்க்கிறனர். அவர்களுள் மிகவும் முக்கியமான ஒருவர் திரு. ஆண்டோ பீட்டர் அவர்கள்..

இந்த வலைப்பூவினைப் படிக்கிறீர்களே!! அதற்குக் காரணமே அவர் தான்.... தமிழ் எழுத்துருக்களை கட்டற்ற முறையில் (Open source) முதன்முதலில் இலவசமாக உருவாக்கி அளித்தவர் அவர் தான்.

1990 களில் கணிணி தமிழகத்தில் அறிமுகமாகிய போது, தமிழில் தட்டச்சு செய்வது அவ்வளவு எளிதான காரியமாக இல்லை. தமிழ் தட்டச்சு தெரிந்தவர்கள் மட்டுமே, அதற்கென உருவாக்கப்பட்ட கட்டண எழுத்துருக்களைக் கொண்டு எழுத வேண்டி இருந்தது.

அப்படிப்பட்ட சூழ்நிலையில் தன்னலம் பாராது, தான் உருவாக்கிய "அமுதம்" என்னும் எழுத்துருவினை இலவசமாக இணையத்தில் வெளியிட்டார் பீட்டர். எனவே, எழுத்துரு பலரைச் சென்றடைந்தது.

Tiff , Tam, Tab, Unicode முதலிய வகை தமிழ் எழுத்துருக்களை (font) உருவாக்கியதில் பெரும்பங்காற்றிவர் பீட்டர். இன்று "amma" என்று ஆங்கிலத்தில் தட்டச்சு செய்தால் "அம்மா" என்று தமிழில் எழுதும் படி செய்யும் பொனடிக் (phonetic) முறை உட்பட அனைத்து வகை விசைப்பலகை அமைப்புகள் உருவாக்கியதிலும் அவருக்கு பங்கு உண்டு.

அது மட்டுமா?

தமிழகத்தில் முதன்முதலாகப் பல்லூடகக் கல்வியை (Multimedia) அறிமுகப்படுத்திய பெருமை இவரையே சாரும்.

முதன்முதலில் "தமிழ்சினிமா" என்கிற தமிழ் இணைய இதழைத் துவங்கியதும் அவரே!!

கணித்தமிழ்ச்சங்கத்தை நிறுவிய ஆண்டோ பீட்டர் அவர்கள் சாப்டுவியூ (Softview) என்னும் மென்பொருள் நிறுவனத்தையும் நடத்தி வந்தார்.

தமிழ்க் கணினி குறித்த விழிப்புணர்வைத் தமிழர்களிடையே அதிகப்படுத்தியவர் ஆண்டோ பீட்டர் அவர்கள். கணித்தமிழுக்கு பெரும் பங்காற்றிய ஆண்டோ பீட்டர் அவர்கள் கடந்த சூலை 12 ஆம் நாள் (12-07-2012) அதிகாலை மூன்று மணியளவில் மாரடைப்பால் காலமானார்.

தமிழை வளர்க்க தமிழரிடம் தமிழில் பேசுங்கள்

இது தான் மறைந்த ஆண்டோ பீட்டர் அவர்களின் அறையை அலங்கரித்த வாசகம். இதனைப் பின்பற்றுவதே அன்னாருக்கு நாம் செய்யும் மரியாதை!!

இயன்ற அளவு தமிழைப் பயன்படுத்துவோம்..
கணித்தமிழ் பற்றிய விழிப்புணர்வை அளிப்போம்!!

அன்னாரது வலைப்பூ: கணியரசு
அவரைப் பற்றி விக்கிபீடியாவில் உள்ள கட்டுரை: ஆண்டோ பீட்டர்

Bigrock.in மூலம் தளம் வாங்கியவரா நீங்கள்? உங்கள் கவனத்திற்கு!!

2012-07-01T12:23:00.000+05:30

நண்பர்களே,

கடந்த வெள்ளி (29-06-2012) மாலை முதல் (எனக்குத் தெரிந்து!!) எனது வலைப்பூ தனது பிரதான தளத்தில் இருந்து (http://www.aalunga.in) திறக்கவில்லை..

அன்று மாலை ஒரு பதிவு எழுதி வெளியிட்டேன்.. Facebook, Twitter, Google Plus முதலியவற்றில் தானாக வெளியிட வகை செய்துள்ளதால், அங்கு வெளியாகிவிட்டன.

ஏனைய திரட்டிகளில் இணைக்கலாம் என்று தளத்திற்குச் செல்ல முனைந்த போது தான் பிரச்சனை புரிந்தது.

Firefox, Chrome இரண்டிலும் ஒரே நிலை தான். ஆனால், அலைபேசி மூலம் (opera mini) நன்றாக பார்க்க முடிந்தது. Feed மூலம் பதிவுகளைப் படிக்கவும் முடிந்தது. ஆனால், தளத்திற்குச் செல்ல முடியவில்லை.

அப்போது இருப்பில் (online) இருந்த "கற்போம்' பலே பிரபு அவர்கள் தனக்கு தளம் திறப்பதில் எந்த பிரச்சனையும் இல்லை என்றும் எனது தளம் நன்றாக தெரிவதாகவும் சொன்னார். சில வழிமுறைகளைச் சொன்னார். ஒன்றும் பலனளிக்கவில்லை.

ஆனால், தங்கம் பழனி அவர்களும், "அட்ராசக்க" செந்தில்குமார் அவர்களும் தங்கள் தளம் திறக்கவில்லை என்று சொன்னார்கள்.

ட்விட்டர் நண்பரான கூமுட்டை (@kuumuttai) அவர்களோ தனக்குத் தளம் நன்றாகத் தெரிவதாக சொன்னார்.

இதிலிருந்து சிலருக்கு தளம் தெரிவதும், சிலருக்கு தெரியாமல் இருப்பது புரிந்தது.

எனவே, Bigrock.in தளத்திற்கு ஒரு மின்னஞ்சல் அனுப்பினேன்..

Sir,
I am facing a problem in the domain..

I could not open my website on PC atleast for the past 20 hours. I get the error message "Cannot find the server". I have tried two browsers- Firefox 12 and Chrome 18. But, the results are same.
But, I could view the site through my mobile (Opera Mini).

Few of my friends, who purchased domain from Bigrock.in are also facing similar problem

I request you to kindly look into the issue and resolve it at the earliest

சில மணிநேரங்களிலேயே எனக்கு பதில் வந்தது.

Hello,

I have checked the details of your domain aalunga.in, I see that you have added the blogger records.

The records have been propagated,however, I would request you to check the steps for publishing from the blogger account.Refer following link to for blogger setup steps :

http://demomonkey.org/blogger/

However, there seems to be an issue with the BSNL network, wherein the customers are not able to view the website.

Incase you are BSNL customer, Kindly send us ping and tracert results from your system, we would get this checked.

Refer to the links below to run the ping and tracert results:
http://www.mediacollege.com/internet/troubleshooter/ping.html
http://www.mediacollege.com/internet/troubleshooter/traceroute.html

Since the issue is with their DNS resolver, we are waiting for them to make the appropriate changes.

Once they have made the changes, you would be able to browse your website from the BSNL connection, alternately you could try using another internet connection to browse your website.

Your patience and co-operation will be highly appreciated.

ஆக... பி எஸ் என் எல் (BSNL) நிறுவன வாடிக்கையாளர்களுக்கு மட்டும் இந்த பிரச்சனை இருப்பது தெரிகிறது.

பி எஸ் என் எல் இணைய இணைப்பு வைத்திருப்பவர்களுக்குத் Bigrock தளங்கள் தெரியவில்லை. பிறருக்குத் தெரிகிறன. அலைபேசி இணைப்பு எதுவாக இருந்தாலும் பிரச்சனை இல்லை.

BSNL வைத்திருப்பவர்களுக்கு இந்த பிரச்சனையில் இருந்து விடுபட மூன்று வழிகள் உள்ளன :

1. உங்கள் DNS Server எண்ணை கூகிள் DNS சர்வர் எண்ணிற்கு மாற்றுங்கள்..

Google DNS Server எண்கள்:

IPv4: 8.8.8.8 and/or 8.8.4.4.
IPv6: 2001:4860:4860::8888 and/or 2001:4860:4860::8844

இந்த மாற்றத்தை எப்படி செய்வது?

Windows இயங்குதளத்தில் இருப்பவர்கள் :

Control Panel செல்லுங்கள்
அங்கு Network and Internet போய் Network and Sharing Center என்பதற்குச் செல்லுங்கள்
அதில் Change adapter settings. என்பதனைச் சொடுக்குங்கள்
உங்களது இணைப்பைத் தெரிவு செய்யுங்கள் (Local/ Wireless). அதில் உள்ள "Properties" பக்கம் செல்லுங்கள்
அதில் Networking என்கிற டேப்பின் கீழே "This connection uses the following items" என்ற வரி இருக்கும். அதன் அடியில் உள்ள தகுந்த Protocol ஐத் தேர்வு செய்யுங்கள். [ Internet Protocol Version 4 (TCP/IPv4) அல்லது Internet Protocol Version 6 (TCP/IPv6)] . அதன் Properties பக்கம் செல்லுங்கள்
Properties பக்கத்தில் "Advanced" என்பதைச் சொடுக்குங்கள்
அதில் வரும் DNS என்கிற டேப் பக்கம் செல்லுங்கள்
DNS என்று இருக்கும் எண்களைக் குறித்து வைத்துக் கொள்ளுங்கள். பின்னர் அவை பயன்படலாம்.
அந்த எண்களை அழித்து விட்டு மேலே உள்ள Google DNS Server எண்களை உள்ளிடுங்கள்
அமைப்புகளைச் சேமியுங்கள்.
சேமித்த பின் இணைப்பை மீள்துவக்குங்கள் (Restart)
இணைப்பு வேலை செய்கிறதா என்று பாருங்கள்.
வேறு இணைப்புகள் இருந்தால் அவற்றுக்கும் இதைச் செய்யுங்கள்!

லினக்ஸ் இயங்குதளங்கள் :

லினக்ஸ் இயங்குதளங்களில் இருப்பவர்கள் மிகவும் சிரமப்படவேண்டியதில்லை. இந்த மாற்றத்தை மிக எளிமையாக செய்யலாம்..

System மெனுவில் Preferences --> Network Connections செல்லுங்கள்
உங்களது இணைப்பைத் தெரிவு செய்யுங்கள் (Local/ Wireless).
அதில் "Edit" என்பதைச் சொடுக்குங்கள்.
திறக்கும் பக்கத்தில், தகுந்த Protocol ஐத் தேர்வு செய்யுங்கள். [ Internet Protocol Version 4 (TCP/IPv4) அல்லது Internet Protocol Version 6 (TCP/IPv6)]
அதில் "Method" என்பதில் "Automatic (DHCP)" என்று இருந்தால், அதனை "Automatic (DHCP) addresses only" என்று மாற்றவும். வேறு எதுவும் இருந்தால் அதனை மாற்ற வேண்டாம். நேரடியாக அடுத்த Step போகவும்.
DNS Server என்பதில் மேலே உள்ள Google DNS Server எண்களை உள்ளிடுங்கள்
அமைப்புகளைச் சேமியுங்கள்.
இணைப்பு வேலை செய்கிறதா என்று பாருங்கள்.
வேறு இணைப்புகள் இருந்தால் அவற்றுக்கும் இதைச் செய்யுங்கள்

வேறு எந்த பிரச்சனையும் இல்லை..

இதன் மூலம் நீங்கள் வழக்கம் போல உங்கள் தளங்களை அணுகலாம். ஆனால், BSNL வைத்திருக்கும் வாசகர்கள் யாருக்கும் உங்கள் தளம் தெரியாது. எனவே, உங்கள் வாசகர்கள் (BSNL) சிலரை இழக்க நேரிடலாம்!

2. வேறு இணைய இணைப்புகளுக்கு மாறுங்கள்

இதற்கு நீங்கள் வேறு எதுவுமே செய்ய வேண்டியதில்லை. ஆனால், உங்கள் வாசகர்கள் (BSNL) சிலரை இழக்க நேரிடலாம்!

3. blogspot.com பக்கம் மாறிக்கொள்ளுங்கள்

Alexa முதலிய தள ரேங்குகள் அனைத்தும் காலியாகி விடும். Feedburner முதல் அனைத்திலும் blogspot.com என்றே இருக்கும் படி மாற்ற வேண்டும். எனினும், அதுவே நிலையாக இருந்தால், வேறு எந்த பிரச்சனையும் இல்லை.

எனது Feedburner முதலிய அனைத்திலும் blogspot.com என்றே இருக்கிறது (தமிழ்மணம் தவிர்த்து). எனவே, வாசகர்கள் யாருக்கும் எந்த பிரச்சனையும் வராது!!

நான் மூன்றாம் வழியைத் தற்காலிகமாகத் தேர்ந்தெடுத்திருக்கிறேன். (பிறரது பதிவுகளைப் படிப்பதற்காக முதலாவதும் உண்டு) .. டொமைன் முகவரியில் இருந்து blogspot பக்கம் திருப்பி விட முடியுமா என்று ஆராய்ச்சி செய்து கொண்டிருக்கிறேன்...
வெற்றி அடைந்தால் பகிர்கிறேன்!!

நியூட்டனின் இயக்க விதிகள்

2012-06-29T18:19:00.001+05:30

அறிவியல் படிக்கும் பலருக்கும் முதலில் நினைவில் கொள்ள வேண்டிய விடயம் நியூட்டனின் மூன்று விதிகள் தான்... விதிகள் எளிமை என்றாலும், அவற்றை நினைவில் கொள்வது மாணவர்களுக்குச் சற்று சிரமமான காரியம் தான்...

அவற்றை நினைவில் வைக்க எளிய வழியாய் உருவாக்கப்பட்டதே இந்த கதை!!

நியூட்டன் தன் மூன்று விதிகளையும் எப்படி கண்டுபிடித்து இருப்பார் என்பதனை இப்படி எல்லோருக்கும் எளிதாக புரியும் வண்ணம் சுருக்கமாக சொல்லலாம்
-------------------------------------------------------------------------------

ஒரு மாடு நடந்து போய்கொண்டு இருந்தது. நியூட்டன் அதை நிறுத்தினார்..மாடும் நின்றது.
உடனே முதல் விதி உதயமானது

ஒரு பொருளின் மீது வெளிப்புறவிசையொன்று செயல்படும் வரை எந்த ஒரு பொருளும் தனது ஓய்வு நிலையையோ அல்லது நேர்க்கோட்டில் அமைந்த சீரான இயக்க நிலையையோ மாற்றிக் கொள்ளாது
Every object continues in its state of rest, or of uniform motion in a straight line, unless compelled to change that state by external forces acted upon it

அதன் பிறகு தன் பலம் முழுவதையும் சேர்த்து மாட்டிற்கு ஒரு உதை கொடுத்தார் நியூட்டன்..மாடு மா (MA) என்று கதறியது..உடனே இரண்டாம் விதி பிறந்தது

பொருளின் உந்தம் மாறுபடும் வீதம் அதன்மீது செயல்படும் விசைக்கு நேர்த்தகவில் இருக்கும்

The Change of Momentum is directly proportional to the Force Applied

(அல்லது)

The acceleration a of a body is parallel and directly proportional to the net force F acting on the body, is in the direction of the net force

F = M A

சிறிது நேரத்தில் தன் கோபம் அனைத்தையும் சேர்த்துவைத்து நியூட்டனை மாடு உதை உதையென்று உதைத்தது..உடனே மூன்றாம் விதி கருவுற்றது

ஒவ்வொரு வினைக்கும் சமமான எதிர் வினை உண்டு.
For Every action, there is an equal and opposite reaction

இப்ப மூன்று விதிகளையும் ஒரு முறை நினைத்து பாருங்க!!

எளிதில் புரிந்ததா?

நன்றி: முகநூல் நண்பர் Anand Satheesh S R

தமிழ் பதிவர்களுக்கு ஒரு எச்சரிக்கை!!

2012-06-26T17:59:00.000+05:30

வணக்கம் நண்பர்களே...

வழக்கம் போல எனக்கு வந்த மின்னஞ்சல்களைப் பார்த்துக் கொண்டே இருந்தேன்! அதில் இணைய திரட்டியான தமிழ்10 தளத்தில் இருந்து ஒரு மடல் இருந்தது.

"Stenzer உங்கள் இடுகையில் கருத்து தெரிவித்துள்ளார்" என்று ..

'அடடா... நாம எழுதுறதையும் படிச்சு பார்த்து ஒருத்தர் கமெண்ட் சொல்லியிருக்காங்களே!' என்று ஆர்வமாக அஞ்சலை வாசித்தேன்!!!!

வணக்கம் aalunga,

தமிழ்10 தளத்தில் நீங்கள் பகிர்ந்த " அவிழ்மடலும் இனி..... பிளாக்கருக்கு நன்றி!" என்னும் இடுகைக்கு "stenzer "கருத்து தெரவித்துள்ளார் .

" ஹலோ செல்லம் என் பெயர் binta உள்ளது உங்கள் சுயவிவர மிகவும் அழகாக ஏனெனில் நான், இன்று உங்கள் சுயவிவரத்தை பார்த்தேன் நீங்கள் தெரிந்து கொள்ள ஆர்வமாக பெற, இங்கே என் மின்னஞ்சல் முகவரி (bintajaafar@yahoo.com) நான் நீங்கள் என் புகைப்படங்கள் அனுப்ப மற்றும் இன்னும் சொல்ல என்று என்னை ஒரு மின்னஞ்சல் அனுப்ப தயவு செய்து உள்ளது என் சுய பற்றி,. தூரம் நினைவில், நிறம், மதம் அல்லது பழங்குடி பிரச்சினையில்லை ஆனால் விஷயங்களில் மிகவும் நேசிக்கிறேன் இல்லை (bintajaafar@yahoo.com) எனக்கு மின் அஞ்சல். binta முத்தம் "

என்னய்யா இது? ஒன்றுமே புரியலையே!! ஒரு வேளை சொல்ல வந்த கருத்தை மொழிபெயர்த்து போட்டிருக்காங்களோ என்று அதை கூகிள் மூலம் மொழிபெயர்த்தேன்!!!
பதிலைப் பார்த்து அப்படியே ஷாக் ஆகிட்டேன்

Hello dear

My name is binta

Your profile is so cute, I saw your profile today, you may be interested to know, here is my email address (bintajaafar@yahoo.com) I send you my photos, please send an e-mail me and I have to tell them about my self. Remember distance, color, religion or tribe does not matter but love matters (bintajaafar@yahoo.com) E-mail me.

Kiss binta

அதிர்ச்சியில் தமிழ்10 தளத்தைச் சொடுக்கினேன். எனது பழைய பதிவில் கமெண்ட் இருந்தது. யாரோ செய்யும் சில்மிஷம் என்று உணர்ந்து அந்த Stenzer இன் சுயவிவரப்பக்கம் போனேன்..

அந்த Profile சொந்தகாரான் (ரி) எந்த பதிவையும் இடவில்லை... மொத்தம் 646 கமெண்ட் மட்டும் போட்டிருக்கிறான்(ள்).....

என்னைத் தவிர பலருக்கும் அதே கமெண்ட் போட்டிருக்கிறான்.. பலருக்கும் ஆங்கில மொழியாக்கத்துடன்!!!

சிலருக்கு Binta என்கிற பெயரிலும், சிலருக்கு Stella என்கிற பெயரிலும் போட்டிருக்கிறான்!!
இதில் Stella என்கிற பெயரில் எழுதும் போது, நல்ல தமிழில் எழுதியிருக்கிறான்!!

இந்த கயவன் இது போல கமெண்ட் கொடுத்த சில தளங்கள்: பிளாக்கர் நண்பன் , வீடு, வந்தே மாதரம், அட்றாசக்க, வெங்காயம், கோவைநேரம் , பிளேட்பீடியா, சென்னை பித்தன், வேர்களைத் தேடி

பதிவர்கள் சற்று எச்சரிக்கையுடன் இருக்கும் படி கேட்டுக்கொள்கிறேன்!!