ቤተ ፍቅር

የተደረገልን /4/

2016-09-29T23:10:00.003-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ሐሙስ መስከረም 19 ቀን 2009 የጸጋ ዓመት

‹‹ቤዛነት››

መልሱ ላይ ጥያቄ

2016-09-26T22:37:00.002-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ሰኞ መስከረም 16 ቀን 2009 የጸጋ ዓመት

‹‹ፍቅርም እውነትም ማን ነው?››

ከቅርብ ዓመታት ወዲህ የመስቀል አደባባዩ ትልቁ ደመራ፤ ትንንሽ ደመራ ልጆች በየአካባቢው መታየታቸው እየተለመደ መጥቶአል፡፡ ይህ ሊሆን የቻለበትን ብንመረምር ደግሞ ብዙ ምክንያቶችን ልናገኝ እንችላለን፡፡ ነገር ግን ሁሉም ሰው በቀላሉ የሚያስተውለውን ለማየት ብንሞክር ሃይማኖታዊ መልክና ዓለማዊ መልክ ብለን በሁለት ልንከፍለው እንችላለን፡፡

ከእምነት ጋር በተያያዘ መጽሐፍ ቅዱሳዊ የመስቀሉን ቃል ይዞ ታሪካዊ የሆነውን ተዛምዶ በማስከተል በዓል የሚያደርጉትን ልብ ስንል፤ ከዚህ ውጪ የሆነው ደግሞ መጠጥ ማሻሻጫ፤ የሥጋን ጥያቄ በመንፈሳዊ ሽፋን ማርኪያ፤ ከአላፊ አግዳሚው ገንዘብ መሰብሰቢያ፤ መዝፈን መጨፈሪያ፤ ይህንንም የሚመስል ሁሉ ነው፡፡

ለዚህ ጽሑፍ የመጻፍ ግፊት ኃይል የሆነኝ ዛሬ ማለዳ በተንቀሳቀስኩበት አካባቢ ዓይኖቼ የተመለከቱት ጽሑፍ ነው፡፡ ምሽት ሊለኮስ አንድ መጠት ቤት ፊት ለፊት የተደመረ ደመራ ጉልላት ላያ፤ የተመሳቀለውን እንጨትና ጉንጉን አበባ ታኮ በነጭ ወረቀት በጥቁር እስክርቢቶ የተጻፈ ‹‹ፍቅርም እውነትም ማን ነው?›› የሚል ትልቅ ጥያቄ ላይ ዓይኖቼ አረፉ፡፡ አሥር ደቂቃ ቆሜ ብዙ አሰብኩ፡፡ ነገር ግን ቀለል አድርጌ ላየው በሞከርኩ ቁጥር ዙር እየከረረ፤ ነገሩ እየከበደ መጣብኝ፡፡ እናም ውስጤ ‹‹መልሱ ላይ ጥያቄ›› የሚል ርዕስ ተፈጠረ፡፡

ፍቅር እና እውነት በክርስትና ውስጥ እጅግ መሰረታዊ ነገሮች ናቸው፡፡ መንፈስ ቅዱስ በሐዋርያው ጳውሎስ በኩል ‹‹ . . በተጠራችሁበት መጠራታችሁ እንደሚገባ ትመላለሱ ዘንድ እለምናችኋለሁ›› ባለበት ክፍል ‹‹ . . እውነትን በፍቅር እየያዝን በነገር ሁሉ ወደ እርሱ ራስ ወደሚሆን ወደ ክርስቶስ እንደግ›› (ኤፌ. 4፡15) ይለናል፡፡ እውነት ያመንበት መሰረት ሲሆን፤ ፍቅር ደግሞ ያመነውን በተግባር የምንገልጥበት መንገድ ነው፡፡ እውነት ኖሯቸው ፍቅር የሌላቸው እውነቱን የብቻቸው ከማድረግ ጀምሮ ሌላውን ለመጉዳት ጭምር ሊያውሉት ይችላሉ፡፡ ፍቅር ኖሯቸው እውነቱ የሌላቸው ደግሞ ሚዛን በሌለው ፍቅር እውነትን እየረገጡ ይበድላሉ፡፡

ሐዋርያው በኤፌሶን መልእክት በመጀመሪያዎቹ ሦስት ምእራፎች ስለ መሰረተ እምነት (ጥሪ) ካስተማረ በኋላ በቀጣይ ሦስት ምእራፎች ማለት ከምእራፍ አራት በኋላ ለጥሪው እንደሚገባ መመላለስን ይመክራል፡፡ እንዲሁ በእውነተኛ ክርስቲያን ሕይወት፤ መጀመሪያ መሰረተ እምነቱን መረዳት፤ ሲቀጥል ደግሞ ያ እምነት የሚጠይቀውን ኑሮ በተግባር መኖር የተገባ ነው (እምነት ያለ ሥራ እንዲል)፡፡

ቅደም ተከተላዊ ፍሰቱ መቼም ቢሆን ከዚህ የተለየ አይደለም፡፡ ከዚህ የተነሣ በእያንዳንዱ በሚመጣው ዛሬ በእምነት የምናደርጋቸው ነገሮች በግድ የለሽነት የሚከወኑ ሊሆኑ ፈጽሞ አይችልም፡፡ ዳሩ ግን ተግባራዊ እውነታው በእኛ ዘንድ እንዲህ ነውን? የሚለው ጥያቄ የአንባቢውን መልስ በትህትና ይጠይቃል፡፡

‹‹ነገር ግን ዓለም ለእኔ የተሰቀለበት እኔም ለዓለም የተሰቀልሁበት ከጌታችን ከኢየሱስ ክርስቶስ መስቀል በቀር ሌላ ትምክህት ከእኔ ይራቅ›› (ገላ. 6፡14) ተብሎ እንደተጻፈ፤ እውነትና ፍቅር በክርስቶስ መስቀል ተገልጧል፡፡ እርሱ መድኃኒታችን ‹‹እኔ መንገድና እውነት ሕይወትም ነኝ፤›› ብሎናል፤ ደግሞ ‹‹ነፍሱን ስለ ወዳጆቹ ከመስጠት ይልቅ ከዚህ የሚበልጥ ፍቅር ለማንም የለውም›› (ዮሐ. 15፡13) ተብሏል፡፡ የክርስቶስ ተቃዋሚው መንፈስ (1 ዮሐ. 4፡3) ጠላት ዲያብሎስ ግን ዛሬም መልስ በሆነው ክርስቶስ ላይ ጥያቄን ይለጥፋል፡፡ መልሱን እንዲያደበዝዙ ልዩ ልዩ ብልሐቶችንም ይጠቀማል፡፡

‹‹ . . ለሞትም ይኸውም የመስቀል ሞት እንኳ የታዘዘ ሆነ፡፡›› (ፊል. 2፡8) ተብሎ እንደተጻፈ፤ በዔደን ገነት ለእይታ እንኳ መልካም በሆነው ሥፍራ (ዘፍ. 2፡8-17) ባለመታዘዝ (ዘፍ. 3፡1-8) ለወደቀው ሰው፤ ክርስቶስ በእንጨት ላይ ተሰቅሎ እርግማን በመሆን (ገላ. 3፡13)፤ በክቡር ደሙ ዋጅቶናል (1 ጴጥ. 1፡18፤19)፡፡ መስቀልን ከክርስትናው ጋር ያያዘው እውነትና ፍቅር ይህ ነው፡፡ እኛ ለእግዚአብሔር ያደረግነውን ሳይሆን እርሱ ለእኛ ያደረገውን የምናስተውልበት ነው፡፡ ከእኛ ያላይደለ ከእርሱ የሆነው ደግሞ ጸጋ ነው፡፡ የሰው የጽድቅና የሕይወት ትልቅ ጥያቄ ምላሽ ያገኘበት መንገድ መስቀል ላይ የሞተው ክርስቶስ ብቻ ነው፡፡

ክርስቶስ ያልተሰቀለበት፤ እሾሁ ወርዶ አበባ የተጎነጎነበት፤ ሐሞቱ ተረስቶ የማር ጠጅ የፈሰሰበት፤ በጅራፍ ጎመዱ ፈንታ ወርቅ ብር ያረፈበት፤ እውነት ተከልሎ ሥጋ የሚታይበት ይህ የሰው መስቀል ነው፡፡ ሐዋርያው ‹‹ከጌታችን ከኢየሱስ ክርስቶስ መስቀል በቀር . . ›› እንዳለ ልብ በሉ፡፡ እንዲህ ያለው መስቀል ላይ ዛሬም መልስ ሳይሆን ትልልቅ ጥያቄ አለ፡፡ ሰላም ማነው? እረፍት ማነው? ጽድቅ ማነው? ፍቅር ማነው? እውነት ማነው? . . ማነው? . . ማነው? . . ማነው?

ተወዳጆች ሆይ፤ አትሳቱ! ክርስቶስ የሌለበት መስቀል ጥያቄ ነው፡፡ ጠላት ክርስቶስን እያወረደ ዋጋ ተከፍሎ እንዳልተከፈለ የሚያኖርበትን ብልሐት ንቁበት፡፡ መልሱ ላይ ጥያቄ የሚያኖርበትን አመፁን በጽድቅ ተቃወሙት፡፡ በክርስቶስ ሞትና ትንሣኤ የተገለጠው የእግዚአብሔር ጸጋ ሰዎችን ሁሉ ያድናል (ቲቶ 2፡11)፡፡ ጸጋ ከሁላችሁ ጋር ይሁን!

የተደረገልን /3/

2016-09-16T00:29:00.001-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ሐሙስ መስከረም 6 ቀን 2009 የጸጋ ዓመት

መጽሐፍ ‹‹በኢየሱስ ክርስቶስም በሆነው ቤዛነት በኩል እንዲያው በጸጋው ይጸድቃሉ›› (ሮሜ 3፡24) ሲል፤ ክርስቲያን የጽድቅን ሥራ አይሠራም ማለት አይደለም፡፡ የጸደቀ ዛፍ ያለ ፍሬ ሊሆን እንደማይችል፤ ከሥሩ በግንዱ በኩል ቅርንጫፎች እየተመገቡ ያፈራሉ፡፡

‹‹ጻድቅ በእምነት ይኖራል ተብሎ እንደ ተጻፈ የእግዚአብሔር ጽድቅ ከእምነት ወደ እምነት በእርሱ ይገለጣልና›› (ሮሜ 1፡17) ተብሎ እንደተጻፈ፤ በእምነትና በጽድቅ ሥራ እያደግን፤ እርሱ ጽድቃችን ጌታ ኃጢአትን እንደሚጠላ ከበደል እየራቅን የምንኖር እንሆናለን፡፡ በክርስቶስ ሞትና ትንሣኤ ደኅንነትን ያገኙና ጽድቅ የሆነላቸው ሁሉ ኃጢአትን ባለማድረግ መርኅ ውስጥ እየኖሩ (1 ዮሐ. 2፡1)፤ በሚሆነው ድካማቸው በዳኑበት በዚያው ደም በንስሐ ይታጠባሉ (1 ዮሐ. 1፡7)፡፡

ሐዋርያው ጳውሎስ ሰዎችን ሁሉ የሚያድን የእግዚአብሔር ጸጋ እንደ ተገለጠ በተናገረበት ክፍል ‹‹ይህም ጸጋ›› በማለት የጸደቅንበት ያው ጸጋ በቀጣይ ተግባራዊ ኑሮአችንን በተመለከተ ምን እንደሚሠራ ያስረዳናል፤ ‹‹ኃጢአተኝነትንና ዓለማዊን ምኞት ክደን፤ የተባረከውን ተስፋችንን እርሱም የታላቁን የአምላካችንንና የመድኃኒታችንን የኢየሱስ ክርስቶስን ክብር መገለጥ እየጠበቅን፤ ራሳችንን በመግዛትና በጽድቅ እግዚአብሔርንም በመምሰል በአሁኑ ዘመን እንድንኖር ያስተምረናል፤ . . ›› (ቲቶ 2፡11-13)፡፡ በጸጋ የሆነው ጽድቅ፤ ጽድቅን በጸጋው በኩል እንድናደርግ የሚያስችለን ነው፡፡

ቅድስና

‹‹መቀደስ›› ማለት መለየት ነው፡፡ የዚህም መሠረቱ ቅዱሱ እግዚአብሔር ሆኖ፤ የምንቀደሰው ‹‹በእውነትህ ቀድሳቸው፤ ቃልህ እውነት ነው›› (ዮሐ. 17፡17) ተብሎ እንደ ተጻፈው በክርስቶስ ነው፡፡ ቅድስና በአዲስ ኪዳን መጻሕፍት ውስጥ በሁለት መንገድ ተገልጿል፡፡ አንደኛው ከሥፍራ አንጻር ያለው የክርስቲያኖች መቀደስ ሲሆን፤ ይህም በሐዋርያው ጴጥሮስ መልእክት ውስጥ ‹‹በመንፈስም እንደሚቀደሱ›› የተባለው ነው (1 ጴጥ. 1፡1-2)፡፡ ሁለተኛው ደግሞ በተግባራዊ ኑሮ መቀደስ ነው፡፡ ይህም ‹‹ትቀደሱም ዘንድ ፈልጉ›› የተባልነው ነው (ዕብ. 12፡14)፡፡

ሐዋርያው ጳውሎስ በቆሮንቶስ መልእክቱ መጀመሪያ ኢየሱስ ክርስቶስ ቅድስና እንደተደረገልን ተናግሯል፡፡ ከሰማያዊ ስፍራ አንጻርም ሆነ ከተግባራዊ የምድር ኑሮ አንጻር ሊኖረን የሚችለው ቅድስና መሠረቱ ክርስቶስ እንደ ሆነ በመጽሐፍ ቅዱስ የተቀመጠ ግልጥ አሳብ ነው (ዮሐ. 17፡17-19)፡፡ እያንዳንዱ የምእመናን የእለት ከእለት ኑሮ መለኮታዊ ሚዛን ክርስቶስ ነው፡፡ በመለኮት መንግሥት ሰው የሚጠበቅበት የቅድስና ልክ ‹‹ቅዱሱ የእግዚአብሔር ልጅ›› (ሉቃ. 1፡35) ክርስቶስ ኢየሱስ ነው፡፡

ቅዱስና ያለ ተንኮል፤ ነውርም የሌለበት፤ ከኃጢአተኞችም የተለየ የሆነው (ዕብ. 7፡26) መድኃኒታችን ኢየሱስ ክርስቶስ አንድ ጊዜ ፈጽሞ የእርሱን ሥጋ በማቅረብ እንደተቀደስን (ዕብ. 10፡10)፤ እንዲሁም የዘላለም ፍጹማን የሆንበትን ክርስቶስ የሆነልንን እንረዳለን (ዕብ. 10፡14)፡፡ ከእግዚአብሔር የቅድስና ባህርይ ጋር ከማይስማሙ ማንኛቸውም የአሁኑ ዓለም ነገሮች መለየት የሚቻለው በክርስቶስ ነው፡፡

ኃጢአተኛው የሰው ዘር በእግዚአብሔር ፊት ቅድስና የሆነውን ሁሉ ለማድረግ በራሱ አቅሙና ችሎታው የለውም፡፡ ዳሩ ግን ‹‹ለእውነትም በሚሆኑ ጽድቅና ቅድስና እንደ እግዚአብሔር ምሳሌ የተፈጠረውን አዲሱን ሰው ልበሱ›› (ኤፌ. 4፡24) እንደተባለ፤ በቅድስና የምንኖርበት መንገድ ግልጥ ተደርጎአል፡፡ እውነተኛ ምእመናን በክርስቶስ ሆነው ለእግዚአብሔር የሆነውን ቅድስና የሚለማመዱ ናቸው፡፡

ተወዳጆች ሆይ፤ ‹‹አብ በስሜ የሚልከው ግን መንፈስ ቅዱስ የሆነው አጽናኝ እርሱ ሁሉን ያስተምራችኋል፤›› (ዮሐ. 14፡25) እንደተባልን፤ በክርስቶስ ክርስቲያን የሆኑ ሁሉ በመንፈስ ቅዱስ ኃይል በቅድስና ይኖራሉ፡፡ ቅዱሱ መንፈስ በእኛ ውስጥ የመሥራቱ መሰረት ግን በክርስቶስ ላይ ያለን እውነተኛ እምነት ነው፡፡ ለዚህም የእግዚአብሔር ቃል በእጅጉ ያስፈልገናል (ሮሜ 10፡17)፡፡ ለምን እግዚአብሔር ቅድስናን በክርስቶስ እምነት አደረገው የሚል ልብ ቢኖር፤ አሁንም ‹‹ . . ሥጋን የለበሰ ሁሉ በእግዚአብሔር ፊት እንዳይመካ›› የሚል ነው፡፡

ከይሳኮር የሚበልጥ

2016-09-11T23:28:00.000-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

እሑድ መስከረም 1 ቀን 2009 የጸጋ ዓመት

ቀጣዩን (የሚሆነውን) የማወቅ ጉጉት በማንኛውም ሰው ውስጥ ያለ የጋራ ፍላጎት እንደ ሆነ ይስተዋላል፡፡ ምንም እንኳ ‹‹ነገ ለራሱ ይጨነቃልና፤ ለነገ አትጨነቁ፤ ለቀኑ ክፋቱ ይበቃዋል›› (ማቴ. 6፡34) ተብሎ በቅዱሱ መጽሐፋችን የተጻፈ ቢሆንም፤ ምድር ብርቱ ሠልፍ አላትና በክርስትናችንም እንዲህ የምናውቀውን ቃል መታዘዝ ጭንቅ ይሆናል፡፡ ደግሞ ቀጣዩ ምን ይሆን?፤ ኖሬ ምን ይገጥመኛል? የሚሉ ጥያቄዎች፤ ‹‹አይመጣምን ትተሽ ይመጣልን አስቢ›› አይነት አባባሎች . . ወዘተ፤ ሰው በቀጣዩ ላይ ያለው ሥጋት ከፍተኛ መሆኑን ያሳብቃሉ፡፡

በመጽሐፍ ቅዱሳችን የመጀመሪያ ክፍል ‹‹ያዕቆብ ልጆቹን ጠርቶ እንዲህ አለ፡- በኋለኛው ዘመን የሚያገኛችሁን እንድነግራችሁ ተሰብሰቡ፡፡›› (ዘፍ. 49፡1-28) ተብሎ ተጽፎአል፡፡ የብዙዎች አባት አብርሃም፤ ሳቅ የሆነውን ይስሐቅን ወለደ፤ እርሱ ደግሞ አሰናካይ የሆነውን ያዕቆብን ወለደ፡፡ ያዕቆብ ከእርሱ ከራሱ በሆነው ብልጣ ብልጥነት ብዙ ዘመኑን የደከመ ቢሆንም በጎልማስነቱ ጊዜ ከአምላክ ጋር ታገለ፤ አልቅሶም ለመነው (ሆሴ. 11፡4)፡፡ እግዚአብሔር ያዕቆብን ስሙን ለእግዚአብሔር የሚዋጋ ሲል እስራኤል አለው፡፡ ያዕቆብ ከእግዚአብሔር ጋር ትክክለኛ ግንኙነት ወደ ማድረግ የመጣው ከስሙ መቀየር ጋር ተከትሎ ሆነ፡፡ ይህም በቀጣይ ኑሮው ላይ ግልጽ ለውጦችን አምጥቶአል፡፡

መድኃኒታችን ኢየሱስ ለአገልግሎቱ ሾሞ፤ ታማኝ አድርጎ የቆጠረውን ሐዋርያ ጳውሎስ (1 ጢሞ. 1፡12) አስቀድሞ የነበረውን ስም በመቀየር (ሐዋ. 9)፤ ታናሽ የሚለውን የስም ፍቺ ይዞ ለጌታ ምርጥ ዕቃው ሆኗል፡፡ መጽሐፍ ቅዱስ ስምን ከተግባራዊ ባህርይ ጋርም ያያይዘዋል፡፡ በእርግጥም ዙሪያችንን አጥርተን ብናይ ስም በባህርይ ላይ ያለውን ተጽእኖ በግልጽ ልናይ እንችላለን፡፡ ሰው ዘመኑን በብዛት የሚሰማው የራሱን ስም ነውና፡፡ ወላጆች ለልጆች የስም ስያሜ ሲያወጡ፤ ልጆችም በወጣላቸው ስያሜ ሲጠሩ ማስተዋልና ለዚያ መጠንቀቅ ተገቢ ይሆናል፡፡

‹‹በኋለኛው ዘመን›› የሚለው ወደኋላ ያለፈውን ሳይሆን የፊቱን የሚያመለክት ጊዜ ጠቋሚ አገላለጽ ነው፡፡ በተመሳሳይ መንፈስ ቅዱስ በሐዋርያው ጴጥሮስ በኩል ‹‹በኋለኞች ዘመናት . . ›› (1 ጢሞ. 4፡1) ሲል እናነባለን፡፡ ይህም ጸሐፊው ከነበረበት ዘመን የወደፊቱን የሚያሳይ ሆኖ እናገኘዋለን፡፡ ያዕቆብ ወደ እርሱ ለተሰበሰቡት ለአሥራ ሁለቱ የእስራኤል ነገዶች ልጆቹ፤ የሚሆነውን ነገራቸው፤ ባረካቸውም፡፡ ስለ መጀመሪያ ልጁ ሮቤል ሲናገር ‹‹ . . እንደ ውኃ የምትዋልል ነህ አለቅነት ለአንተ አይሁን . . ›› ይለዋል፡፡ በሥነ አመራርና በአስተዳደር ክህሎት ትምህርቶች ውስጥ ከመጽሐፍ ቅዱስ የሚመዘዘው አንዱ ማጣቀሻ በዚህ ስፍራ ላይ ያነበብነው ነው፡፡ ‹‹እንደ ውኃ መዋለል›› መወሰን፤ መጨከን አለመቻልን ያመለክታል፡፡ ሰው ከግል ማንነቱ ጀምሮ፤ ቤተሰብና አገር እስከ ማስተዳደር የሚያልፍባቸው ውሳኔውን የሚጠይቁ ግልጽ የኑሮ መስመሮች ውስጥ ያልፋል፡፡ አግባብ የሆኑ ውሳኔዎችን ያለ መወሰን አንዱና ትልቁ ምክንያት ደግሞ እንደ ውኃ የሚዋልለው የሰው ባህርይ ነው፡፡

ተወዳጆች ሆይ፤ ውሳኔ ካልተሰጠባቸው ወረቀቶች ጀምሮ የውሳኔ ያለህ! የሚሉ ግንኙነቶች ምን ያህል ሊሆኑ እንደሚችሉ ጥቂት ለማሰብ ሞክሩ፡፡ ከአንዱ እጅ ወደ ሌላው እጅ ሲገላበጡ አፈር የመሰሉ ማመልከቻዎች፤ ከአንዱ አእምሮ ወደ ሌላው አእምሮ ሲመላለሱ የተረሱ ጉዳዮች፤ እንደ ውኃ በሚዋልሉ አለቅነት በማይገባቸው ሰዎች ጭምር የተበደሉ አይደሉምን?፤ የእውነት ዳኛ እግዚአብሔር (መዝ. 7፡11) ውሳኔዎቻችሁን በሚጠይቁ ነገሮቻችሁ ሁሉ ላይ መከናወንን ይስጣችሁ፡፡ ያዕቆብ እንዲሁ ለሌሎቹ ልጆቹ እየተናገረ በቁጥር 14 ይሳኮር ጋር ይደርሳል፡፡ ‹‹ይሳኮር አጥንተ ብርቱ አህያ ነው፤ በበጎች ጉረኖም መካከል ያርፋል፡፡ ዕረፍትም መልካም መሆኗን አየ፤ ምድሪቱም የለማች መሆንዋን፤ ትከሻውን ለመሸከም ዝቅ አደረገ፤ በሥራም ገበሬ ሆነ፡፡›› ይለዋል፡፡ ብርቱ፤ በበጎች መካከል ያረፈ፤ መልካም የሆነውን የተመለከተ፤ ለሸክም ዝቅ ያለ ገበሬ፤ ይሳኮር፡፡ ኦ! ይህ ምንኛ ደስ የሚል ማንነት ነው፡፡

ስለ ይሳኮር ልጆች ደግሞ ‹‹እስራኤልም የሚገባውን ያደርግ ዘንድ ዘመኑን የሚያውቁ ጥበበኞች ሰዎች የይሳኮር ልጆች አለቆች ሁለት መቶ ነበሩ፤ ወንድሞቻቸውም ሁሉ ይታዘዙአቸው ነበር፡፡›› (1 ዜና. 12፡32) እንደተባለ፤ በዚህ ክፍል ደግሞ የሚገባውን ስለ ማድረግ፤ ዘመንን ከማወቅና ከጥበብ ጋር ይሳኮር የተነሣበትን ሁኔታ እናያለን፡፡ ከሰው ቀጣዩን የማወቅ ፍላጎት ጋር በተያያዘ አብሮ የሚታሰበው ጉዳይ ሊሆንና ሊመጣ ላለው ነገር በቂ የሆነ ኃይልና ጥበብ የማግኘት ጉዳይ ነው፡፡ በአስቸጋሪ ሁኔታዎች ውስጥ ትክክለኛ መፍትሔ ይዞ የመገኘት ጉዳይ ለማንም የምንጊዜም አሳብ ነው፡፡

ከመጀመሪያው ንባብ ኃይልና ትህትና፤ ከሁለተኛው ንባብ ደግሞ እውቀትና ጥበብን በዋናነት ልንመለከት እንሞክራለን፡፡ ይሳኮር ‹‹አጥንተ ብርቱ አህያ›› ተብሏል፡፡ አህያ ስድብ ሳይሆን የአህያ ስሟ ነው፡፡ እርግጫውን ትተን ስሙን ከብርታት ጋር ማያያዝ ጥቅሱ የሚለውን በትክክል ለመረዳት አስፈላጊ ነው፡፡ ይሳኮር ተግባሩን እንደሚገባ ስለ ማድረግ፤ ወንድሞቹም እንዲሁ እንዲመላለሱ ብርቱና ኃያል ነው፡፡ ደግሞ ከኃይል ጋር ትከሻውን ለመሸከም ዝቅ ያደረገ ነበር፡፡ ኃይል በተሳሳተ መንገድ በተተረጎመባት የአሁኗ ዓለም፤ ኃይልን ከትህትና ጋር አስተባብሮ የሚገባውን በእግዚአብሔር ፊት ማድረግ መቻል በማንኛውም ዘመን የየዕለት ሁኔታዎች ውስጥ በድል የሚያሻግር ነው፡፡

ወደ አዲስ ኪዳን አሳብ ልውሰዳችሁ፤ ‹‹በዚህም ሥርዓት በሚመላለሱ ሁሉ ላይ በእግዚአብሔር እስራኤልም ላይ ሰላምና ምሕረት ይሁን›› (ገላ. 6፡16) ተብለናል፡፡ አሜን! ከቀደመው ኪዳን ክፍሎች ጋር ተጨማሪ የአሳብ ድልድይ ለመፍጠር ደግሞ ‹‹ዘመኑን እየዋጃችሁ በውጭ ባሉቱ ዘንድ በጥበብ ተመላለሱ›› (ቆላ. 4፡5) የሚለውን ምክር ልብ እንላለን፡፡ ሐዋርያው ጳውሎስ ጸጋ ከሕግ፤ ከመጠን ይልቅ እንደሚበልጥ በሞገተበት መልእክቱ እውነተኞች ክርስቲያኖችን ‹‹የእግዚአብሔር እስራኤል›› ሲል ይጠራቸዋል፡፡ ነገሩ ‹‹በግልጥ አይሁዳዊ የሆነ አይሁዳዊ አይደለምና በግልጥ በሥጋ የሚደረግ መገረዝም መገረዝ አይደለምና . . ›› (ሮሜ 2፡28) እንደተባለው ነው፡፡

በመጣው ዘመን እንዴት እንድንመላለስና የሚገባውን እንድናደርግ ለእግዚአብሔር እስራኤል ወንድሞቹ የሚታዘዙት ይሳኮር ወዴት አለ?ብለን መጠየቅ እንችላለን፡፡ መውጣት መግባታችንን በኃይልና በትህትና፤ ደግሞ በእውቀትና በጥበብ ይሆን ዘንድ በመካከላችን እንዲህ ያለ ማን አለ?ሰው ለራሱ እንኳ የሚበቃ ምክር ባጣበት በጽድቅ የሚመክር፤ መጨካከን የኑሮ ከፍታ በሆነበት የፍቅር ልብ የማያልቅበት፤ በዚህ ዓለም ጥበብ እሽቅድድም ብልጫ ሰው በተጠመደበት የሚበልጥ ጥበበኛ፤ የእውቀት ብዛት የተግባር ማነስ በሚታይበት በቃል በኑሮ የበረታ፤ ኃይል ለማንሣት ሳይሆን ለመጣል በሆነበት የሚያድን ኃይል፤ ትህትና እንደ መበለጥና መሞኘት በሚቆጠርበት ሁሉን የሚሸከም ማን ይሆን?

ተመሳሳይ ነገሮች መሐል ልዩ የሆነ አንድ እንደሚፈልግ ሰው ኃጢአት የሰውን ታሪክ ምንም ልዩ የማይገኝበት ተመሳሳይ አድርጎታል (ሮሜ 3፡23)፡፡ ዳሩ ግን ‹‹ . . በሥጋና በደም እንዲሁ ተካፈለ›› (ዕብ. 2፡14 እና 15) ተብሎ እንደተጻፈ፤ ሰው የሌለው ሁሉ ያለው ክርስቶስ ከኃጢአት በቀር እኛን መስሎ ወደዚህ ዓለም መጥቶአል (1 ጢሞ. 1፡15)፡፡ ወንድሞች ብሎ ሊጠራን ያላፈረው (ዕብ. 2፡13)፤ ፍጹም ሰውም የሆነው ወልድ ከይሳኮር የሚበልጥልን ዘመኑን የምናውቅበትና የምንመላለስበት ጥበብ፤ ትሁትና ኃይል ነው፡፡ ስለ ትህትና ቢሆን የባሪያን መልክ የያዘ፣ ራሱን ባዶ ያደረገ፣ ራሱን ያዋረደና ለመስቀል ሞት እንኳ የታዘዘ ነው (ፊል. 2፡7)፤ ደግሞ ስለ ኃይል ቢሆን እርሱ የኃይል ሁሉ ምንጭ ነው፡፡ ‹‹ኃይልን በሚሰጠኝ በክርስቶስ ሁሉን እችላለሁ›› (ፊል. 4፡13) ተብሎ እንደተጻፈ፤ በእያንዳንዱ ዘመን በመዋረድ ቢሆን በመብዛት፤ በመጥገብ ቢሆን በመራብ፤ በመብዛት ቢሆን በመጉደል ክርስቶስ ሁሉን የሚያስችል በቂ ኃይላችን ነው፡፡

‹‹ . . የተሰወረ የጥበብና የእውቀት መዝገብ ሁሉ በእርሱ ነውና፡፡›› (ቆላ. 2፡3) ክርስቶስ የዘመኑን መልክ የምንለይበት እውቀት፤ ለዚያም የሚሆን የኑሮ ጥበብ ነው፡፡ በዚህ ዓመት ደግሞ ምን ይሆን? በክርስቶስ ክርስቲያን ለሆኑ ጭንቀት ሊሆን አግባብ አይደለም፡፡ ለማዳን የሆነው የእግዚአብሔር ኃይል፤ ልጁ ኢየሱስ አለ (ሮሜ 1፡16፤ 1 ቆሮ. 1፡24)፤ የዋህ እና በልቡ ትሑት የሆነው የነፍሳችን ዕረፍት ከእኛ ጋር ነው (ማቴ. 11፡29)፡፡ ሰዎችን ሁሉ የሚያውቅ፤ ስለ ማንም ምስክር የማያሻው የእውቀት ጥግ ማወቃችን ነው (ዮሐ. 2፡23)፡፡ የዚህች ዓለም ጥበብ በእግዚአብሔር ፊት ሞኝነት እንደ ሆነ ግልጥ ያደረገልን ክርስቶስ ጥበባችን ነው (1 ቆሮ. 3፡18)፡፡ ስለዚህ ‹‹ . . የኃይሉ ታላቅነት ከእግዚአብሔር እንጂ ከእኛ እንዳይሆን ይህ መዝገብ በሸክላ ዕቃ ውስጥ አለን›› (2 ቆሮ. 4፡7)፡፡

‹‹ . . በዚያ በመካከላቸው እሆናለሁና፡፡›› (ማቴ. 18፡20) እንዳለን፤ ቤተ፡ ክርስቲያን በምድር እንደ ሕያው እግዚአብሔር መንግሥት የሚገባውን እንድታደርግ ወንድሞቹ የሚታዘዙት ክርስቶስ በመካከላቸው ነው፡፡ ዘመኑ እንደ ይሳኮር ባለው የአህያ ጉልበት አይታለፍም፤ ትከሻውን ለሸክም ዝቅ እንዳደረገው እንደ እርሱም ትህትናና ታታሪነት አይከናወንም፤ ደግሞም በዚያ እውቀት ሊታወቅና እንደዚያ ጥበብ ተጠበን ልናልፈው አንችልም፡፡ ዳሩ ግን የሚበልጠው በሰው መካከል ሰው ሆኖ መጥቶአል፡፡ ከእርሱ የሚበልጥ፤ እንደ እርሱም ያለ ወደፊት አይመጣም፡፡ ዘመኑን በክርስቶስ!

ለቤተ ፍቅር ቤተ ሰዎቻችን፤ እንኳን ለአዲስ ዓመት እግዚአብሔር አደረሳችሁ!

‹‹ . . . ስለ እኛ ደግሞ ጸልዩ፤›› /ቆላ. 4፡3/!

‹‹መስሚያው ጥጥ››

2016-09-05T23:27:00.003-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ሰኞ ነሐሴ 30 ቀን 2008 የምሕረት ዓመት

ከበርሃማው የመልክዓ ምድር ክልል አንዱ፤ ከጥቂት መልካሞች እንደ እድለኛ ያደኩበትን የድሮውን ሳስታውስ ከማረሳቸው ሰዎች መካከል የድጓ መምህር የኔታ ብርሃኑ አንዱ ነበሩ፡፡ ሰው ለእግዚአብሔር በማይታጭበት፤ በልዩ ልዩ ሱስ መጠመድ እንደ ነቄ በሚያስቆጥርበት፤ ለሕያው አምላክ ማድላት ፋራና ፈሪ በሚያሰኝበት መዝሙረ ዳዊት ሁለቴ ዘልቆ ማጠናቀቅ እንደ ብርቅ በሚታይበት ማኅበረሰብ፤ እንደተረዱት መጠን ለእግዚአብሔር አገልግሎት ወንዶችን ያቀርቡ ዘንድ የኔታ በትጋት ያስተምሩን ነበር፡፡

አንድ ቀን የሰኞ መስተጋብ ላዜም በተለመደው ሰዓት ወደ መቃብር ቤታቸው ስሄድ፤ በበሩ ትይዩ ባለው ሽቦ አልጋቸው ላይ በቁጭ አቀርቅረው ትልቅ መጽሐፍ ያነባሉ፡፡ ወደ ውስጥ ለመዝለቅ ፈቃዳቸውን በሚጠይቅ ዜማዊ አነጋገር የኔታ . . የኔታ . . እያልኩ በተደጋጋሚ ከስተውጪ ወደ ውስጥ ገርበብ ባለው ብረት በር በኩል እጣራለሁ፡፡

መልስ ለመጠበቅ በቂ እንደ ሆነ ያሰብኩት ሰዓት ሲያበቃ፤ ዝምታውን አቋርጬ፤ በሩን በትህትና ከፍቼ ወደ ውስጥ ገባሁ፡፡ የኔታ የእኔን እግር ተከትሎ እየጨመረ እየጨመረ የመጣውን የፀሐይ ብርሃን ሽቅብ እያዩ፤ ቁጭ እንድል በእጃቸው ጠቅሰውኝ ጥቂት ማንበባቸውን ቀጠሉ፡፡ የኔታን ከቁንጥጫና ከልምጭ ጋር ያያያዘው የልጅ አእምሮዬ ዓይኔን ቀና እንዲል ማዘዝ እየተሳነው አቀርቅሬ ቆየሁ፡፡

የኔታ ጉሮሯቸውን ጠርገው መጽሐፌን እንድገልጥ ትእዛዝ ሲሰጡ፤ ድምፃቸውን ተከትሎ ያሻቀበው ዓይኔ ሁለት ጆሮአቸው ላይ አረፈ፡፡ በዚያው ተመሳሳይ ጊዜ ሁለት እጆቻቸውን አንሥተው ከሁለት ጆሮአቸው ዘይት የተነከረ ጥጥ አወጡ፡፡ ጥያቄ ላዘለው ቁልጭ ቁልጭ የሚል ዓይኔ ምላሽ ሲሰጡ ‹‹ቅድም ያልሰማሁህ፤ መስሚያዬ ጥጥ ስለነበረ ነው›› አሉኝ፡፡ ቀበል አድርጌ፤ ‹‹ምነው! ታመው ነው?›› አልኳቸው፡፡ ‹‹አየህ ልጄ! ስታነብ ከልብህ አትሰማም፤ ስትሰማ ደግሞ ከውስጥህ አታነብም፡፡ ጥጡን ያደረኩት አሞኝ አይደለም፤ የታመመ ወሬ እንዳልሰማ ብዬ እንጂ፡፡ የማነበው መልካሙን ስለሆነ ክፉው እንዲሻማኝ አልፈቅድም፡፡

ጥጡን ዘይት ስለነከርኩት ደግሞ እምቢታዬ ተጨምሮ ምንም ሌላ አልሰማም፡፡ አንተም ነገ ታድጋለህ፡፡ መርጠህ መስማትን ዛሬ ጀምረህ ልብ አድርግ፡፡ በጆሮ የገባም ያረክሳል፡፡ አንተ ጮኸህ እያዜምክ እኔ ማረም ብጀምር አንተ ፈጥነህ ታቆማለህ፤ እንደዚያ ባይሆን ግን ስህተቱን ስትጮህ ትኖራለህ፡፡ . . ›› በመሐል የዘገዩት ተማሪዎች ወደ ውስጥ ሲገቡ እነርሱን እያዩ ‹‹እግዚአብሔር ከወሬ ስስትና መስገብገብ ይጠብቅህ፡፡›› ብለው መረቁኝ፡፡ በዚያው መማር ማስተማሩ ቀጠለ፡፡ /የኔታ እዚህ አዲስ አበባ መጥተው እንጦጦ ማርያም በድጓ መምህርነት ተቀጥረው ሲያገለግሉ ዓይናቸው ደክሞ ታመው ሞተዋል፤ ምክራቸው ግን ዛሬም ይታወሰኛል/፡፡

እንዲሁ ከሁለት ዓመት በፊት የስነ ልቦና ማማከር ሁለተኛ ድግሪ ትምህርቴን ስከታተል በክፍለ ጊዜው ሁሉ ‹‹ጥሩ አድማጭ ያልሆነ፤ መፍትሔ ፈላጊውን አይረዳውም›› የሚል ተደጋጋሚ አሳብ ወደ እኛ ሲወረወር ይታወሰኛል፡፡ እኔም እንደ ጌታዬ እንዲህ እል ነበር ‹‹ሰሚዎች ብዙዎች ናቸው፤ አድማጮች ግን ጥቂቶች››፡፡ ተወዳጆች ሆይ፤ መንደርደሪያው እንዳልረዘመባችሁ ተስፋ አደርጋለሁ፡፡ ደግሞ ቢሆንም በረራው ረዥም ስለሆነ በመልካም ትታገሱታላችሁ፡፡

ምድራችን ከአየር ብክለት ያልተናነሰ በድምጽ ብክለቶች እየተናጠች ነው፡፡ ዓለም በሰፋፊ መንገዶች ግን በጠበቡ አመለካከቶች፤ በተዋቡ ሕንጻዎች ግን ደግሞ በወየቡ አመሎች ተጨንቃለች፡፡ ሰዎች ብዙ ሰብስበው ጥቂት የማይደሰቱበት፤ ብዙ አውቀው ያነሰ የሚተገብሩበት፤ ብዙ ሙያ ጥቂት መፍትሔ የጠፋበት የዘመን ጭራሽ ላይ ነን፡፡ ሁሉም ‹‹ማጣሪያ›› የሚል የተለጠፈበት ይመስላል፡፡ ሰዎች ጨርሰው አውርተው ወሬ የሚዋሱበት ጊዜ ይመስላል፡፡ ጠቢቡ ‹‹ . . ዓይን ከማየት አይጠግብም፤ ጆሮም ከመስማት አይሞላም›› (መክ. 1፡8) እንዲል፡፡

ጠቢቡ በሌላ ስፍራ ‹‹ሰው የሰነፎችን ዜማ ከሚሰማ ይልቅ የጠቢባንን ተግሣጽ መስማት ይሻለዋል›› (መክ. 7፡5) ይለናል፡፡ በዚህ ክፍል ከሰነፎች ዘንድ ከሚመጣው የሚስብ ዜማ ይልቅ፤ ከጠቢባን የሆነው መራራ ተግሣጽ ሚዛን ደፍቷል፡፡ መጽሐፍ ቅዱስ ስለማናደርገው ሲነግረን፤ እንዲሁ ስለምናደርገው ደግሞ ይነግረናል፡፡ ሽሹ ሲለን ቅረቡት የሚለንን ማስተዋል አለብን፡፡

ታዘዙት ሲለን ደግሞ የምንቃወመውን መረዳት አለብን፡፡ በእግዚአብሔር ቃል ውስጥ አሉታውያን የሆኑ ግን መታዘዞች የሆኑትን ልብ እንላለን፤ ነቢዩ ‹‹በጽድቅ የሚሔድ . . ›› ብሎ ‹‹ . . ከመስማት ጆሮቹን የሚያደነቁር . . ነው›› (ኢሳ. 33፡15-16) ይላል፡፡ እዚህ ቦታ ላይ ለእግዚአብሔር መታዘዝ (በጽድቅ መሔድ) መስማት ሳይሆን አለመስማት ነው፡፡ በምንሰማው ውስጥ መታዘዝ እንዳለ ሁሉ ባለ ማድመጥ ውስጥም መታዘዝ አለ፡፡

በነቢዩ በኤርምያስ ደግሞ ‹‹እነሆ፤ ጆሮአቸው ያልተገረዘች ናት፤ ለመስማትም አይችሉም፡፡ እነሆ የእግዚአብሔር ቃል ለስድብ ሆኖባቸዋል፤ ደስም አያሰኛቸውም›› (ኤር. 6፡10) ተብሎ እናነባለን፡፡ እግዚአብሔርን መስማትን እምቢ ማለት ውድቀቱ በዘላለም ሞት የሚሰላ ነው፡፡ ከእግዚአብሔር የሆነውን ባለ መስማት ውስጥ በእያንዳንዱ ጊዜ ጥፋት አለ (ሐዋ. 3፡23)፡፡ መስማት እምነትን ያመጣል (ሮሜ 10፡17)፤ ትክክለኛውን እምነት በውስጣችን የሚያመጣው ግን እግዚአብሔርን ብቻ መስማት ነው፡፡

ሐዋርያው እውነተኛ የእምነት ልጁን ሲመክረው ‹‹ሕይወት የሚገኝበትን ትምህርት የማይታገሡበት ዘመን ይመጣልና፤ ነገር ግን ጆሮቻቸውን የሚያሳክክ ስለ ሆነ . . እውነትንም ከመስማት ጆሮቻቸውን ይመልሳሉ ወደ ተረትም ፈቀቅ ይላሉ›› (2 ጢሞ. 4፡4) ብሎታል፡፡ ጢሞቴዎስን በተመለከተ ጨምሮ ሲናገር ‹‹አንተ ግን ነገርን ሁሉ በልክ አድርግ፤ መከራን ተቀበል የወንጌል ሰባኪነትን ሥራ አድርግ አገልግሎትህን ፈጽም፡፡›› ይለዋል፡፡ ይህ ምንኛ የተወደደ በጽድቅ ያለ ምክር ነው!

እንግዲህ መስማትና አለመስማት ማስተዋልን የሚጠይቅ ነገር ሆኖ በቃሉ ውስጥ ቀርቦአል፡፡ ቤተ ሰዎቼ፤ ስለምትሰሙት ጠንቃቆች ልትሆኑ ያስፈልጋችኋል፡፡ በምታደምጡት እውነት ያልሆነ ላለመወሰድ ንቁዎች ሁኑ፡፡ በሐሰት ወሬ ነፋስ አትነዋወጡ፡፡ ክርስቶስ ‹‹በጎቼ ድምፄን ይሰማሉ፤ እኔም አውቃቸዋለሁ፤ ይከተሉኝማል . . ›› (ዮሐ. 10፡27) እንዳለ፤ እውነተኛ በጎች የእረኛቸውን እውነተኛ ድምጽ የመለየት ችሎታ ያላቸው ናቸው፡፡ ከዚህ ውጪ ለሆነው ግን እንደ የኔታ ጥጥ አርጉበት፤ ደግሞ ዘይት ይኑረው፡፡ በደንብ! በደንብ!

የማይረባንን የምናስቀርበት፤ ከሰማይ በሆነው ላይ ትኩረት የምናደርግበት፤ ወደ ቀኝም ወደ ግራም ላንል የምንጸናበት የጥጡ ላይ ዘይት በውስጣችንና በዘንዳችን የሚሠራው ‹‹ወደ እውነት ሁሉ የሚመራን መንፈስ ቅዱስ›› ነው (ዮሐ. 16፡13)፡፡ ጥጡ ደግሞ የቀለሙን ንጣት ወስደን ከቅድስና ጋር ልናያይዘው ይቻለናል፡፡ ‹‹በእውነትህ ቀድሳቸው፤ ቃልህ እውነት ነው›› (ዮሐ. 17፡17) እንደተባለ፤ የሚቀድሰውን እውነት በጆሮአችሁ ተቅጥቁት፡፡ ቃሉና መንፈሱ አይነጣጠሉም!

መልካሙን የምስራች የሚያነቡ ሁሉ እንደዚህ ዓለም ለሆነው ከንቱ መለፍለፍ ‹‹መስሚያቸው ጥጥ›› ነው፡፡ ወደ ውስጥ እንዲዘልቅ እንዲቆጣጠራቸው፤ በጎውን እንዲጋፋው፤ ቅዱሱን እንዲያረክሳቸው አይፈቅዱም፡፡ እንደነዚህ ያሉቱ ዘወትር የሚሰሙት ዓላቸው በዋጋ ከገዛቸው በቀር ማንም በቀላሉ ትኩረታቸውን አያገኝም፡፡ ኑሮአቸውም ከክፉው ሽሽግ ነው፤ የእጁም ዝርጋታ አይነካቸውም፡፡

መጽሐፍ ‹‹ከጋለሞታ ሴት ከንፈር ማር ይንጠባጠባልና . . ›› (ምሳ. 5፡3) እንደሚል፤ ‹‹ቃልህ ለጉሮሮዬ ጣፋጭ ነው፤ ከማርና ከወለላ ይልቅ ለአፌ ጣፈጠኝ፡፡›› (መዝ. 118፡103) ደግሞ እንደተባለ፤ ያኛው ማር፤ ይህን ወለላ ሊያራክሰው፤ አቻው ሆኖም ሊተካከለው፤ እውነቱን አሽሾ እርሱ ሊጣፍጥ እንደማይችል፤ ከሕያው እግዚአብሔር መስማትን አታስታጉሉ፡፡ ቤተ ሰዎቼ፤ ቃሉና መንፈሱ በሙላት ይኑርባችሁ!

ይቀጥላል -
‹‹ . . . ስለ እኛ ደግሞ ጸልዩ፤›› /ቆላ. 4፡3/!

የተደረገልን /2/

2016-08-31T23:31:00.003-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

እሮብ ነሐሴ 25 ቀን 2008 የምሕረት ዓመት

ተወዳጆች ሆይ፤ ጥበብ ለእናንተ ምንድነው? እውነተኛ ጥበብ መገኛው የት ነው? ጥበብን ስለ ማግኘት ልንከፍለው የምንችለው ዋጋ ስንት ነው? ባለፈው ክፍል ለእነዚህ ጥያቄዎች ምላሽ ለመስጠት የሚያስችሉ በቂ አሳቦችን አይተናል፡፡ ትክክለኛውን ጥበብ ጥበባችን አድርገን እንኖር ዘንድ ጸጋው ይርዳን፡፡

ጽድቅ

‹‹ሰማዮችን ቀድደህ ምነው ብትወርድ!›› (ኢሳ. 64፡1)፤ በቀደመው ኪዳን የነቢዩ የኢሳይያስ ብርቱ ጸሎትና መሻት ነበር፡፡ ይህንን ልመና ወደ እግዚአብሔር እንዲያቀርብ ምክንያት የሆነውን ነገር ስንመረምር ደግሞ ‹‹ሁላችን እንደ ርኩስ ሰው ሆነናል፤ ጽድቃችንም ሁሉ እንደ መርገም ጨርቅ ነው . . ›› (ኢሳ. 64፡6) ተብሎ ተጽፎ እናገኘዋለን፡፡ ኃጢአት በአንድ ሰው ወደ ዓለም ከገባበት (ሮሜ 5፡12) ጊዜ አንስቶ የሥጋ ለባሽ ሁሉ ብርቱ የጋራ ጩኸት ‹‹የጽድቅ ያለህ›› የሚል ነው፡፡

‹‹ከርኩስ ነገር ንጹሕን ሊያወጣ ማን ይችላል? አንድ እንኳ የሚችል የለም›› (ኢዮ. 14፡4)፤ ‹‹ንጹሕ ይሆን ዘንድ ሰው ምንድር ነው? ጻድቅስ ይሆን ዘንድ ከሴት የተወለደ ምንድር ነው?›› (ኢዮ. 15፡14) እንደተባለ፤ ደግሞ ነቢዩ ‹‹እግዚአብሔርን፡- አንተ ጌታዬ ነህ አልሁ፤ ከአንተ በቀር በጎነት የለኝም፡፡›› (መዝ. 15፡2) እንዳለ፤ የሰው መፍትሔ የደኅንነት አምላክ ከሆነው ከእግዚአብሔር ብቻ እንደ ሆነ ሲጠበቅ ኖረ (መዝ. 67፡20)፡፡

ወንጌላዊው ማርቆስ እንደጻፈው ‹‹ . . ሰማያት ሲቀደዱ መንፈስም እንደ ርግብ ሲወርድበት አየና፡- የምወድህ ልጄ አንተ ነህ በአንተ ደስ ይለኛል የሚል ድምፅ ከሰማያት መጣ›› (ማር. 1፡10)፡፡ እግዚአብሔር የነቢዩን ጸሎት የመለሰ ቢሆንም፤ ዳሩ ግን ልጁ ወደ ዓለም የመጣው በመለኮት የዘላለም አሳብና በተቀጠረ ዘመን ነው፡፡ መጽሐፍ ‹‹ነገር ግን የዘመኑ ፍጻሜ በደረሰ ጊዜ እግዚአብሔር ከሴት የተወለደውን ከሕግም በታች የተወለደውን ልጁን ላከ፤›› (ገላ. 4፡4) እንደሚል፤ የእግዚአብሔር ልጅ የሰው ልጅ ሆኗል፡፡

ተወዳጆች ሆይ፤ ጽድቅ በአንድ ሰው ወደ ዓለም ገባ፤ በጽድቅም ሕይወት፤ እንደዚሁም ሁሉ ጽድቅን ስላደረጉ (በክርስቶስ) ሕይወት ለሰው ሁሉ (ለሚያምኑ) ደረሰ (ሮሜ 5፡18-19)፡፡ ሐዋርያው ከጥበብ ቀጥሎ፤ በእግዚአብሔር እንመካ ዘንድ ክርስቶስ ጽድቅ እንደተደረገልን ይናገራል፡፡ መድኃኒታችን ኢየሱስ ክርስቶስ ሕግንና ነቢያትን ለመሻር የመጣሁ አይምሰላችሁ ባለበት ክፍል ‹‹ጽድቃችሁ ከጻፎችና ከፈሪሳውያን ጽድቅ ካልበለጠ ወደ መንግሥተ ሰማያት ከቶ አትገቡም›› (ማቴ. 5፡17-20) በማለት ተናግሯል፡፡ ሐዋርያው ጳውሎስ ደግሞ ‹‹አሁን ግን በሕግና በነቢያት የተመሰከረለት የእግዚአብሔር ጽድቅ ያለ ሕግ ተገልጧል፤ እርሱም ለሚያምኑ ሁሉ የሆነ በኢየሱስ ክርስቶስ በማመን የሚገኘው የእግዚአብሔር ጽድቅ ነው . . ›› (ሮሜ 3፡21) ይለናል፡፡

ከጻፎችና ከፈሪሳውያን ጽድቅ የሚበልጠው ጽድቅ በክርስቶስ የተገለጠው የእግዚአብሔር ጽድቅ ነው፡፡ ይህም የእምነት አባት ከሆነው ከአብርሃም ጀምሮ ለሚያምኑ ሁሉ የሆነው ‹‹በማመን የሚገኝ የእግዚአብሔር ጽድቅ ነው›› (ሮሜ 4፡3፤ ገላ. 3፡6)፡፡ እንዲህ ይሆን ዘንድ ደግሞ ‹‹እርሱንም (ክርስቶስ) እግዚአብሔር በእምነት የሚገኝ በደሙም የሆነ ማስተስሪያ አድርጎ አቆመው . . ›› (ሮሜ 3፡25)፡፡

በእግዚአብሔር ፊት ተቀባይነት እናገኝ ዘንድ ክርስቶስ ጽድቃችን ሆኗአል፡፡ ‹‹የእግዚአብሔርን ጽድቅ ሳያውቁ የራሳቸውንም ጽድቅ ሊያቆሙ ሲፈልጉ ለእግዚአብሔር ጽድቅ አልተገዙም›› (ሮሜ 10፡3) እንደተባለ፤ ዛሬም በጻፎችና በፈሪሳውያን ጽድቅ ከሰማያዊው ጥሪ ተካፋዮች ስለ መሆን የሚደክሙ ሁሉ ከክርስቶስ ተለይተው ከጸጋው የወደቁ ናቸው (ገላ. 5፡4)፡፡

ኃጢአትና ሞት ወደ ዓለም የገባው በአንድ ሰው እንደ ሆነ፤ እንዲሁ ሰው በሆነው ዳሩ ግን ከዚህ ከኃጢአተኛ ዓለም ባልሆነው፤ ከተቀደደው ሰማይ ለእኛ ጽድቅና ሕይወት ሊሆን በመጣው በእግዚአብሔር ልጅ ደኅንነት ሆኗል (ኤፌ. 2፡5)፡፡ ሥጋ የሆነውን ቃል፤ አባቱ በአንተ ደስ ይለኛል ብሎታል (ዮሐ. 1፡14)፡፡ ሰማይ ተቀዶ እንዲህ ያለ ድምጽ የመጣለት ሥጋ ለባሽ ምድሪቱ ላይ አልነበረም ወደፊትም የለም፡፡ ሰው ከኃጢአት በታች የኖረበት ዘመን እግዚአብሔር ፍጹም ደስ የሚሰኝበት ጽድቅ በሰው ውስጥ እንዳልተገኘና እንደማይገኝም በቂ ማሳያ ነው፡፡

ቤተ ሰዎቼ ሆይ፤ ለእግዚአብሔር ጽድቅ ተገዝታችኋልን? ወይስ የራሳችሁን ጽድቅ ስለማቆም ሕያው እግዚአብሔር ላይ ታምጻላችሁ? ‹‹የሚያምኑ ሁሉ ይጸድቁ ዘንድ ክርስቶስ የሕግ ፍጻሜ ነውና››፡፡ እምነት ከመስማት ነው፤ ቃሉን እመኑ፡፡ ለምን እግዚአብሔር ጽድቅን በእምነት አደረገው የሚል ልብ ቢኖር፤ ‹‹ . . ሥጋን የለበሰ ሁሉ በእግዚአብሔር ፊት እንዳይመካ›› መልስ ነው፡፡

ይቀጥላል -

‹‹ . . . ስለ እኛ ደግሞ ጸልዩ፤›› /ቆላ. 4፡3/!

የተደረገልን

2016-08-24T23:40:00.001-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

እሮብ ነሐሴ 18 ቀን 2008 የምሕረት ዓመት

ማንኛውም እውነተኛ ክርስቲያን ከእግዚአብሔር ጋር ያለውን ትክክለኛ ኅብረት ከእርሱ ዘንድ የተደረገለትን በማወቅና በማመን ይጀምራል፡፡ እንዲህ የማይጀመር መንፈሳዊ ኑሮ እግዚአብሔርን ተቀባይ ራሱን ደግሞ ሰጪ አድርጎ ይሰይማል፡፡ እግዚአብሔር በፊቱ ከምናሳያቸው ትጋቶች ሁሉ በላይ ከእርሱ ለእኛ ያደረገውን ማወቃችን በእጅጉ ደስ ያሰኘዋል፤ ክብርና ምስጋናንም ያመጣለታል፡፡ ‹‹ነገር ግን፡- የሚመካ በእግዚአብሔር ይመካ፤ ተብሎ እንደ ተጻፈው ይሆን ዘንድ ከእግዚአብሔር ዘንድ ጥበብና ጽድቅ ቅድስናም ቤዛነትም በተደረገልን በክርስቶስ ኢየሱስ የሆናችሁ ከእርሱ ነው፡፡›› (1 ቆሮ. 1፡30) ተብሎ እንደ ተጻፈ፤ እግዚአብሔር ያደረገው ሁሉ በእርሱ እንመካበት ዘንድ የተደረገ ነው፡፡

የቆሮንቶስ መልእክት መጀመሪያይቱ በቤተ፡ ክርስቲያኒቱ (ማኅበረ ምእመናን) የነበረውን መንፈሳዊ ችግር ለመፍታት እንደ መጻፉ፤ በመልእክቱ መጀመሪያ ምእራፍ መንፈስ ቅዱስ ይህንን አሳብ ማጻፉ የቀጣይ መፍትሔ አሳቦች ትልቅ መሠረት ነው፡፡ በእግዚአብሔር ላይ የማይደገፍ ሰው፤ ቢያንስ አንድ ሌላ የሚደገፍበት አለው፡፡ ሰው ከምንም ነገር ነጻ ቢሆን እንኳ፤ ከራሱ ግን ነጻ አይደለም፡፡ ሕያው የሆነ አምላካችን እግዚአብሔር ደግሞ በሌላው ቀርቶ በራሳችንም እንድንመካ አይፈቅድልንም፡፡ ‹‹ማንም እንዳይመካ ከሥራ አይደለም›› (ኤፌ. 2፡8) ተብሎ ተጽፎአልና፡፡

ምእራፍ አንድ፡ - በአሁኑ ዓለም የቤተ፡ ክርስቲያን መለየትና ምስክርነት፡፡

አከፋፈል፡ -

1. በጸጋው የተደረገልን፤ እንዲሁም የተሰጠን ዋስትና (1፡1-9)

2. ክርክርና መለያየት (1፡10-16)

3. የክርስቶስ መስቀልና የእግዚአብሔር ኃይል (1፡17-31)

ሐዋርያው ጳውሎስ በድካም ውስጥ ያሉትን የቆሮንቶስ ማኅበረ ምእመናን ‹‹ወንድሞች ሆይ፤ መጠራታችሁን ተመልከቱ›› (1 ቆሮ. 1፡26) በማለት ያሳስባቸዋል፡፡ ክርስትና ጥሪ ነው፡፡ በክርስቶስ ጸጋ (ገላ. 1፡6)፤ ወደ ልጁ ወደ ጌታችን ወደ ኢየሱስ ክርስቶስ ኅብረት (1 ቆሮ. 1፡9)፤ በቅዱስ አጠራር የጠራን እግዚአብሔር ነው (2 ጢሞ. 1፡9)፡፡ እርሱ ደግሞ የታመነ ነው (2 ቆሮ. 1፡18)፡፡

የቆሮንቶስ ቤተ፡ ክርስቲያን የተመሠረተችውም በዚሁ የእውነት ዓምድና መሠረት ነው (1 ጢሞ. 3፡15)፡፡ እኛ ከሰማያዊው ጥሪ (ዕብ. 3፡1) ተካፋዮች እንድንሆን፤ እግዚአብሔር የምንድንበትን ሙሉ ነገር ማድረግ አስፈልጎታል (ቲቶ 2፡11)፡፡ ‹‹ለገዛ ልጁ ያልራራለት ነገር ግን ስለ ሁላችን አሳልፎ የሰጠው . . ›› (ሮሜ 8፡32) እንደ ተባለ፤ ስለ ሁላችን ተላልፎ በተሰጠው በክርስቶስ (ሮሜ 4፡24-25) ከእግዚአብሔር ዘንድ ጥበብ፤ ጽድቅ፤ ቅድስና እንዲሁም ቤዛነታችንን አግኝተናል (ኤፌ. 1፡7)፡፡

እግዚአብሔር እውነተኛ አምላክ ነውና ያለው እንዲሆን ይጠይቀናል፡፡ ስለዚህም ‹‹ . . ተብሎ እንደ ተጻፈው ይሆን ዘንድ›› መታዘዝ ያስፈልገናል፡፡ ብዙ ሰው ‹የምኖረው የተጻፈልኝን ነው› ይላል፤ ዳሩ ግን መጽሐፍ ቅዱስ ልንኖረው የተጻፈልንን ውድ አሳብ በፊታችን ያቀርባል፡፡ ከዚህ የዘላለም አሳብና ምክር ውጪ የተጻፈልን ምን ሊሆን ይችላል? እናንተን በተመለከተ ከፈጠራችሁ አምላክ በቀር የእናንተ ሙሉ ነገር እውቀት ያለው ማንም እንደሌለ ካመናችሁ በእርግጥም የእርሱ እስትንፋስ የሆነውን ቅዱስ ቃል የሕይወት መመሪያችሁ ለማድረግ አትቸገሩም፡፡ ተወዳጆች ሆይ፤ እግዚአብሔር ለሰው ሁሉ የመከረውንና የገለጠውን ማስተዋል መቻል ያልተጻፈልንን ከመኖር ይጠብቀናል፡፡

ሰው በራሱ አልያም ከሰው በተደረገለት ፍጹም ሊረካ አይችልም፡፡ በአንድ መንገድ ጉድለታችሁን የሞላ ቢኖር፤ እርሱ ራሱ በሌላ ነገር ጎድሎ ታገኛላችሁ፡፡ ሐኪሙ የመሐንዲሱን እርዳታ እንደሚፈልግ፤ መሐንዲሱም የሐኪሙን እርዳታ ይፈልጋል፡፡ ትልልቅ የሚባሉ ተግባራትን የሚያከናውኑ ሰዎች የቤታቸውን በር እጀታ ብልሽት መጠገን አይችሉም፡፡ ደካማና የተናቀ የሚመስለው ሰው ግን ያንን ያስተካክለዋል፡፡

ስለዚህ ምድራችን የምንፈልገውን ሁሉ የምናገኝበት አንድ ቦታና ሰው የላትም፡፡ ዳሩ ግን ሁሉንም የሚያስፈልገንን መልካም የምናገኝበት አንድ የት ይሆን ያለው? ቤተ ሰዎቼ፤ ከእግዚአብሔር በተደረገልን የሚረካ ልብ ሊኖረን ያስፈልጋል (1 ዜና. 16፡10)፡፡ ‹‹በእርሱ የመለኮት ሙላት ሁሉ በሰውነት ተገልጦ ይኖራልና›› (ቆላ. 2፡9) ተብሎ እንደ ተጻፈው፤ ‹‹ . . ክርስቶስ ሁሉ ነው፤ በሁሉም ነው›› (ቆላ. 3፡11)፡፡

ጥበብ፡

እኛና የአሁኑ ዓለም በእያንዳንዱ ዛሬ ‹‹ሞኝ›› እየተባባልን መኖራችን በቃሉ የተገለጠ እውነት ነው፡፡ ‹‹የዚህች ዓለም ጥበብ በእግዚአብሔር ፊት ሞኝነት ነውና›› (1 ቆሮ. 3፡19-20)፤ እንዲሁም ‹‹ለፍጥረታዊ ሰው የእግዚአብሔር መንፈስ ነገር ሞኝነት ነውና›› (1 ቆሮ. 2፡14) ተብለናል፡፡ ዓለም እግዚአብሔር ፊት እና እግዚአብሔር በአሁኑ ዓለም ፊት በመካከላቸው ያለውን ግልጽ ልዩነት ማስተዋል ያስፈልጋል (ዮሐ. 17፡16)፡፡

ለሰው እጅግ አስፈላጊ ከሆኑ ነገሮች አንዱ ጥበብ ነው፡፡ በንግግር ቢሆን በማድረግ ጥበብ ልንሻው አስፈላጊያችን ነው፡፡ በብሉይ ኪዳን ኢዮብ ‹‹ጥበብ የምትገኘው ወዴት ነው? የማስተዋልስ ስፍራ ወዴት ነው?›› (ኢዮ. 28፡12) የሚል ትልቅ ጥያቄ ያነሣል፡፡ ፍለጋውን አቀርቅሮ ይጀምራል፤ ‹‹ . . በሕያዋን ምድር አትገኝም፡፡›› የፍለጋው የመጀመሪያ ውጤት ነበር፡፡ ደግሞ ቀና ብሎ ፍለጋውን ይቀጥላል፤ ‹‹ቀላይ፡- በእኔ ውስጥ የለችም ይላል›› በማለት ደግሞ የተባለውን ያስተጋባል፡፡

በምዝምዝ ወርቅ፤ በሰንፔር፤ በአልማዝ . . ጥበብ እንደማትገመት የሚነግረን ኢዮብ፤ በመጨረሻ ‹‹የጥበብ ዋጋ ከቀይ ዕንቁ ይልቅ ይበልጣል›› (ኢዮ. 28፡18) ይለናል፡፡ በዚህም እውነተኛ ጥበብ፤ ሰው እጁ ላይ ባለው ቁሳዊ ነገር፤ አልያም በራስ ድካምና ጥረት እንደማትገኝ እንረዳለን፡፡ አገልጋዩ ‹‹አይቴ ብሔራ ለጥበብ››፤ የጥበብ አገሯ ወዴት ነው? እያለ ይዞራል፡፡ ይወጣል ይወርዳል፤ ይቧጥጣል ይምሳል፤ ሽቅብ ቁልቁል፤ ቀኝ ግራ ብሎ ማረፊያ ያገኛል፡፡ ‹‹ጥበብሰ ውእቱ ኢየሱስ ክርስቶስ››፤ ጥበብ መድኃኒታችን ኢየሱስ ክርስቶስ ነው፤ ‹‹ . . የእግዚአብሔር ጥበብ የሆነው ክርስቶስ ነው›› (1 ቆሮ. 1፡24)፡፡

‹‹ጥበበኞች ነን ሲሉ . . ›› (ሮሜ 1፡22)፤ ሰው እግዚአብሔር ጥበብ ያደረገው ‹‹ጥበብ ነው›› ብሎ ካላመነ ውጤቱ ‹‹ . . ደንቆሮ ሆኑ›› የሚል ነው፡፡ ምድር በደምና በሥጋ ብልሃት ጭንቅን አትርፋለች፤ በልቡ የላይኛውን ጥበብ የሚከተል ግን እርሱ ምስጉን ነው፡፡ የሰውን ውድቀት ተከትሎ ሰው ያጣው አንዱ የእግዚአብሔር መልክ እውቀት/ ጥበብ ነው፡፡ ጌታችን ኢየሱስ ክርስቶስ ደግሞ ላጣነው ጥበብና እውቀት መለኮታዊ መፍትሔ ነው፡፡

ተወዳጆች ሆይ፤ ‹‹ . . ዓለም እግዚአብሔርን በጥበብዋ ስላላወቀች . . ›› (1 ቆሮ. 1፡21) ተብሎ እንደተጻፈው፤ ከሰማይ የሆኑ መለኮታዊ ምክሮችን በራስ ማስተዋል፤ ከዚህም ዓለም በሆን እውቀት መረዳት አይቻልም፡፡ ይህንን ጥበብ ስለ ማግኘትና በዚህ ጥበብ ስለ መመላለስ የሚያስብ ማንም ቢኖር ‹‹የጥበብ ዋጋ ከቀይ ዕንቁ ይልቅ ይበልጣል›› የተባለውን ልብ ይላል፤ እንግዲህ ይህ ጥበብ እንዴት ሊገኝ ይችላል? መልሱ፡- ‹‹በስብከት ሞኝነት . . ›› የሚል ነው፡፡ ‹‹እንግዲህ ያላመኑበትን እንዴት አድርገው ይጠሩታል? ባልሰሙትስ እንዴት ያምናሉ? ያለ ሰባኪስ እንዴት ይሰማሉ? . . እንግዲያስ እምነት ከመስማት ነው፤ መስማትም በእግዚአብሔር ቃል ነው›› (ሮሜ 10፡14-17)፡፡

ተወዳጆች ወዳጆቼ ሆይ፤ ለጉብዝናችሁ ቢሆን፤ ለትዳራችሁ፤ ለግንኙነቶቻችሁ ቢሆን፤ ለአገልግሎታችሁ፤ ክርስቶስ ጥበብ ነው፡፡ እምነት ደግሞ የዚህ ጥበብ ተጠቃሚዎች የምንሆንበት መንገድ ነው፡፡ የምናምንበት መሠረት ደግሞ ቃሉ ነው (የስብከት ሞኝነት)፡፡ ጥበብ የምትገኝበት መንገድ ለምን እንዲህ ብቻ ሆነ? ብሎ ለሚጠይቅ አእምሮ፤ መልሱ ‹‹ . . ሥጋን የለበሰ ሁሉ በእግዚአብሔር ፊት እንዳይመካ፡፡›› (1 ቆሮ. 1፡29) የሚል ነው፡፡

ይቀጥላል -

‹‹ . . . ስለ እኛ ደግሞ ጸልዩ፤›› /ቆላ. 4፡3/!

ሁለቴ የኔ ነሽ፡፡ (2)

2016-08-17T07:17:00.003-07:00

/ካለፈው የቀጠለ/

እሮብ ነሐሴ 11 ቀን 2008 የምሕረት ዓመት

ኤሎሂም የእርሱ ሥራ በሆነው ፍጥረት በኩል የጥበቡ ኃይል ብርታት ይገለጣል፡፡ ስለ ፍጥረት በተጻፈበት ክፍል ‹‹አቤቱ ሥራህ እጅግ ብዙ ነው፤ ሁሉን በጥበብ አደረግህ፤ ምድርም ከፍጥረትህ ተሞላች፡፡›› (መዝ. 103፡24) ተብሏል፡፡ ተወዳጆች ሆይ፤ እጁ ሠርታናለችና (ዘፍ. 2፡7) ስለ እኛ ሕያው እግዚአብሔር እጅግ የተመሰገነ ይሁን፡፡

ዓለም ከተፈጠረበት ይልቅ፤ የበደለው ዓለም የዳነበት የእግዚአብሔር ጥበብ እንደሚበልጥ ሲነገር ሰምታችሁ እንደ ሆነ አስባለሁ፡፡ የእግዚአብሔር የኃይሉ ታላቅነትና የብርታቱ ጉልበት የሚታይበትን ሁለተኛውን ታላቅ ጥበብ ስናነብ ‹‹እኛ ፍጥረቱ ነንና፤ እንመላለስበት ዘንድ እግዚአብሔር አስቀድሞ ያዘጋጀውን መልካሙን ሥራ ለማድረግ በክርስቶስ ኢየሱስ ተፈጠርን፡፡›› (ኤፌ. 2፡10) ተብሎ እናነባለን፡፡ ልብ በሉ! በዚህ ክፍል ላይ ያለው መፈጠር አስቀድሞ ካየነው የተለየና አዲስ ነው፡፡ መፍጠር የሚለውን ቃል በተመለከተ ግን በግሪኩ ተመሳሳይ ግስ የምናገኘው በሮሜው ባየነውና በዚህ በኤፌሶኑ ክፍል ብቻ ይሆናል፡፡

ብዙ ብልሽቶች እድል ከተሰጣቸው መሻሻል እንደሚያሳዩ፤ ደግሞም ለውጥ እንደሚያመጡ ሊታሰብ ይችላል፡፡ ዳሩ ግን የሞተ ሰው ወዴት ይሻሻላል? በስንት የትምህርት ክፍለ ጊዜስ ይለወጥ ይሆን? (ሮሜ 6፡23) ኃጢአት ሞትን ያመጣበት ሰው፤ እግዚአብሔርን ‹‹ከመፍጠር›› ያነሰ ነገር አልጠየቀውም፡፡ ስለዚህም መጽሐፍ ‹‹ማንም በክርስቶስ ቢሆን አዲስ ፍጥረት ነው›› (2 ቆሮ. 5፡17) ይለናል፡፡ አስተውለን ከሆነ በጠና ታመው፤ ወደ ሞትም አፋፍ ደርሰው የተመለሱ፤ የእግዚአብሔር ምሕረት እድል የሰጣቸው ሰዎች እንደ አዲስ ተፈጥረው እየኖሩ እንዳለ ሲሰማቸውና ሲያወሩ እንሰማለን፡፡ በእርግጥም በክርስቶስ አዲስ ፍጥረት የሆነ ሰው በእምነቱ ውስጥ ሊሰማው የሚችለው ነገር እንደዚሁ ነው፡፡

ደኅንነት አዲስ ፍጥረት የሆንበትን ስፍራ በእምነት መያዝ ነው (ገላ. 3፡26)፡፡ ይህም የክብር አባት እግዚአብሔር በልጁ በክርስቶስ ያደረገው ነው (ኤፌ. 1፡6፤21)፡፡ እግዚአብሔር ለመዳናችን በሠራው ሥራ ብቻውን ክብር ይወስዳል፡፡ ዛሬ ስለ ኃጢአታችን በሞተውና ከሙታን ተለይቶ በተነሣው፤ በማያልፍ የሕይወት ኃይል በሚኖረውና ወደፊት ጠላቶቹ የእግሩ መረገጫ በሚደረጉት በኢየሱስ የመለኮት ኃይልና መቻል ግልጥ ነው፡፡ ‹‹መቼም ቢሆን እግዚአብሔርን ያየው አንድ ስንኳ የለም፤ በአባቱ እቅፍ ያለ አንድ ልጁ እርሱ ተረከው›› (ዮሐ. 1፡18) ተብሎ እንደ ተጻፈ፤ ‹‹ለሚያምኑ ሁሉ የእግዚአብሔር ኃይል ለማዳን ነው›› (ሮሜ 1፡16)፡፡ ተወዳጆች ሆይ፤ ፍጥረታትን በመፍጠር ከተገለጠው የእግዚአብሔር ጥበብና ክንድ በላይ ለማዳን የሆነው ኃይሉ ተገልጧል (1 ጢሞ. 1፡15)፡፡

ሁሉ በእርሱና ለእርሱ የተፈጠረ (ቆላ. 1፡16)፤ ሁሉን በሥልጣኑ ቃል የደገፈ (ዕብ. 1፡3)፤ መጽሐፉን ይወስድ ዘንድ፤ ኅተሞቹንም ይፈታ ዘንድ የተገባው (ራዕ. 5፡9) ጌታ በመፍጠርም በማዳንም በእኛ ላይ ብቸኛው ባለ ሥልጣን እርሱ ነው፡፡ እንኳን አድኖን (አዲስ ፍጥረት)፤ ፈጥሮንም (አሮጌ ፍጥረት) ጉልበት ሁሉ ለእርሱ ይንበረከካል (መዝ. 144፡15)፡፡ ‹‹ጌታችንና አምላካችን ሆይ፤ አንተ ሁሉን ፈጥረሃልና፤ ስለ ፈቃድህም ሆነዋልና ተፈጥረውማልና ክብር ውዳሴ ኃይልም ልትቀበል ይገባሃል›› (ራዕ. 4፡11) እንደ ተባለ፤ እንዲሁ ደግሞ ‹‹የታረደው በግ ኃይልና ባለ ጠግነት ጥበብም ብርታትም ክብርም ምስጋናም በረከትም ሊቀበል ይገባዋል›› (ራዕ. 5፡12) ተብሎ ተጽፏል፡፡ መፍጠርም ማዳንም ከአንዱ ከእግዚአብሔር ብቻ ነው፡፡

ባለ ጥበቡ ጌታ ሆይ፤ ሁለቴ ያንተ ነን፡፡ ለምርጫችን ያልተውከን፤ ከላይ ወደ ታች መጥተህ የፈለከን፤ ለወዳጅ ከሚከፈለው በላይ ለጠላቶችህ የከፈልክልን፤ አዎ! በደላችን መተዉ ብቻው እንኳ በቂ ነበር፤ እንደ ጠላት አልቆጥራችሁም ብትለንም ይህ ከበቂ በላይ ነበር (ሮሜ 5፡10) ፤ ደግሞ ኩነኔውን አንስቻለሁ ብትለን ለእኛ እጅግ ከበቂ በላይ ነበር፡፡ አንተ ግን አልፈህ አደረክልን፤ የሚበቃውን ሳይሆን ግምታችን እንኳ የማይነካውን ወደ እኛ አቀረብከው ‹‹ልጆች ናችሁ›› አልከን፡፡ ኦ! ይህ ምንኛ ድንቅ ነገር ነው፡፡ ብዙ አሳዝነንህ ሳለ ጸጋህ ግን ‹‹ከመጠን ይልቅ በለጠ›› (ሮሜ 5፡20-21)፡፡ አባት ሆይ፤ ይህ ድምጽ ብቻ ያንበረክካል፤ ዓይን በዕንባ ሞልቶ በእግርህ ስር ያኖራል፤ ከዚህ ዓለም ልብህ ከሌለበት ነገር ሁሉ ይቀድሳል፤ አፍን በእልልታ ሞልቶ ከንፈሮችን በምስጋና ፍሬ ያደምቃል፡፡ እጅግ ተመስገን!

የተወደዳችሁ ሆይ፤ እግዚአብሔር የእጁ ሥራ ለሆነው ለፈጠረው፤ በኃጢአት ምክንያት ደግሞ ለሞተው ሰው ዳግም የራሱ ስለ ማድረግ ኃይሉንና ጥበቡን ተጠቅሞ እድል ሰጥቶናል፡፡ ሁሉን የሚችል አምላክ ምን ያህል ምክንያት እንዳሳጣን፤ እጃችንንም በአፋችን ላይ የምንጭንበትን እንዳደረ ታስተውላላችሁን? ‹‹ስለዚህም እግዚአብሔርን እያወቁ እንደ እግዚአብሔርነቱ መጠን ስላላከበሩትና ስላላመሰገኑት የሚያመካኙት አጡ . . ›› (ሮሜ 1፡21)፤ እንዲሁም ‹‹እኔ መጥቼ ባልነገርኋቸውስ ኃጢአት ባልሆነባቸውም ነበር፤ አሁን ግን ለኃጢአታቸው ምክንያት የላቸውም፡፡›› (ዮሐ. 15፡22) አልተባለምን? እግዚአብሔር ለታላቅነቱ ፍጻሜ የለውም፤ እጅግም የተመሰገነ ነው (መዝ. 144፡3)፡፡

እንግዲህ ከሰው ሁሉ ምክንያትን ትቆርጡ ዘንድ በዚህ ነገር እግዚአብሔርን ለመምሰል ራሳችሁን አስለምዱ፡፡ እግዚአብሔር ለፈጠረው እድል ከሰጠ፤ ዋጋ ከፍሎ ከሞት ካስመለጠ፤ በምሕረት እጁን ከዘረጋ፤ ኃይሉን ለማዳን ከተጠቀመ፤ እንዲሁ እኛም ላልፈጠርነው ግን እግዚአብሔር ለፈጠረው፤ ሲያልፍም ላዳነውና ሕይወት ለሰጠው ሰው ‹‹ሁለተኛ የእኛ›› ለማድረግ ጌታ ክርስቶስን እያየን ልንታዘዝ ያስፈልገናል፡፡ በቃሉ ያለው እውነትና መንፈሱ በቆሰላችሁበት በዚያ ቦታ ላይ እንደ ዘይት ይፍሰስ፡፡ በአንዱ ሕይወት በጌታችን በኢየሱስ ክርስቶስ ስም፤ አሜን፡፡
‹‹ . . . ስለ እኛ ደግሞ ጸልዩ፤›› /ቆላ. 4፡3/!

ሁለቴ የኔ ነሽ፡፡

2016-08-11T06:13:00.003-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ሐሙስ ነሐሴ 5 ቀን 2008 የምሕረት ዓመት

‹‹አንድ ትንሽ ልጅ በእጁ የሠራት ጀልባ ከዕለታት በአንዱ ቀን ተሰረቀችበት፡፡ እንዲህ ከሆነ ከብዙ ቀናት በኋላ፤ ዕቃ እያስያዘ ገንዘብ በሚያበድር ሰው ሱቅ በኩል ሲያልፍ ጀልባውን አያት፡፡ በደስታ ወደ ሰውየው ሮጦ ‹‹ያቺ የእኔ ትንሽ ጀልባ ናት›› አለው፡፡ ዕቃ አስይዞ አበዳሪውም ‹‹የለም፤ እኔ ስለገዛኋት የእኔ ናት›› ብሎ መለሰለት፡፡ ‹‹አዎ፤›› አለ ትንሹ ልጅ፤ ‹‹ግን የእጄ ሥራ ስለሆነች የእኔ ናት›› በማለት አስረዳው፡፡ ‹‹እንግዲያውስ›› አለ ዕቃ አስይዞ አበዳሪው፤ ‹‹ሁለት ዲናር ከሰጠኸኝ ልትወስዳት ትችላለህ›› አለው፤ ጀልባውን ዳግም የራሱ ለማድረግ በብርቱ የፈለገው ልጅ የተጠየቀውን ለመክፈል የጉልበት ሥራዎችን በመሥራት ገንዘቡን አገኘ፡፡

ከዚያም ወደ ሱቁ በመሔድ ገንዘቡን ከፍሎ ጀልባውን አስመለሰ፡፡ በመጨረሻም ጀልባውን በእጆቹ አቅፎ እየሳመ ‹‹አንቺ ውድ ትንሽ ጀልባ፤ እወድሻለሁ፡፡ አንቺ ሁለቴ የእኔ ነሽ፡፡ በፊት ሠራሁሽ፤ አሁን ደግሞ ገዛሁሽ›› አለ፡፡ /William Moses Tidwell, Pointed Illustrations (Kansas City, Mo.; Beacon Hill Press, 1951) P. 97/.

ከላይ ያነበብነው ታሪክ የወጣ ሲመለስ፤ የጠፋ ሲገኝ፤ የወደቀ ሲነሣ . . ያለውን ደስታና እርካታ ቆም ብለን እንድናስብ ይጋብዘናል፡፡ ሁሉም ነገር ላይ ‹‹የማይዘልቅ›› የሚል በተለጠፈባት የአሁኗ ዓለም የኑሮ ሥርዓት ውስጥ ባትጠፉ እንኳ የጠፋ ፈልጋችሁ እንደምታውቁ ግልጥ ነው፡፡ የተወደደው ባለ መድኃኒቱ ሉቃስ (ቆላ. 4፡14) በጻፈው የወንጌል ክፍል፤ ከዘኬዎስ መጎብኘት ጋር በተያያዘ ‹‹ኢየሱስም፡- . . የሰው ልጅ የጠፋውን ሊፈልግና ሊያድን መጥቶአልና›› /ሉቃ. 19፡9/ ተብሎ ተጽፎ እናነባለን፡፡ የሕያው እግዚአብሔር ልጅ መድኃኒታችን ኢየሱስ ክርስቶስ ‹‹ፈላጊም አዳኝም›› ነው፡፡

መጽሐፍ ቅዱስ የእግዚአብሔር የኃይሉ ብርታት የተገለጠባቸውን እና ለእርሱ ብቻ ምስጋና የሚመጣባቸውን በዋናነት ሁለት ታላቅ ጥበቦች ይነግረናል፡፡ በሮሜ 1፡20-21 ስናነብ ‹‹የማይታየው ባሕርይ እርሱም የዘላለም ኃይሉ ደግሞም አምላክነቱ ከዓለም ፍጥረት ጀምሮ ከተሠሩት ታውቆ ግልጥ ሆኖ ይታያልና›› የሚል ተጽፎ እናገኛለን፡፡ የመጽሐፍ ቅዱሳችን የመጀመሪያ ክፍል እግዚአብሔርን በሉዓላዊነቱና ሁሉን በመቻሉ በኩል የሚያቀርብ ነው፡፡ በዚህ ውስጥ ደግሞ ፍቅሩን ልብ እንላለን፡፡ ‹‹በመጀመሪያ እግዚአብሔር ሰማይንና ምድርን ፈጠረ፡፡›› /ዘፍ. 1፡1/፡፡ የኤሎሂም የመፍጠር ኃይልና ብርታት በቃል የተገለጠበት ስፍራ ነው፡፡ ‹‹ራሱን ያለ ምስክር አልተወም›› /ሐዋ. 14፡17/ እንደተባለ፤ ሥነ ፍጥረትና መግቦቱ የእግዚአብሔርን ኃይልና ጥበብ ይመሰክራሉ፡፡

አምላካችን በፍጥረቱና በመግቦቱ ይታወቃል፤ የምንልበት መሠረት ቅዱሱ መጽሐፍ ነው፡፡ ቀና ብለን የምንመለከተው ሰማይ፤ ከዚያም በላይ ያሉ ሰማያት፤ በውስጣቸው የያዙአቸው ፍጥረታት እግዚአብሔር የፍጥረት አስገኝና ባለቤት ስለ መሆኑ ይመሰክራሉ፡፡ ነቢዩ ‹‹ሰማያት ይነግራ ስብሐተ እግዚአብሔር፤ ወግብረ እደዊሁ ያየድዓ ሰማያት›› /መዝ. 18፡1/፤ ‹‹ሰማያት የእግዚአብሔርን ክብር ይናገራሉ፤ የሰማይም ጠፈር የእጁን ሥራ ያወራል›› ይለናል፡፡ ደግሞ ምድርን በተመለከተ ‹‹ለእግዚአብሔር ምድር በምልኣ፤ ወዓለምኒ ወኩሎሙ እለ ይነብሩ ውስቴታ››፤ ‹‹ምድርና ሞላዋ ለእግዚአብሔር ናት፤ ዓለምም በእርስዋም የሚኖሩ ሁሉ›› /መዝ. 23፡1/ ይላል፡፡

እግዚአብሔር ብቻውን ፈጣሪ ነው፡፡ ፍጥረት የእጁን ሥራ ያወራል፡፡ ይህም ከዓለም ፍጥረት ጀምሮ ከተሠሩት ታውቆ ግልጥ ሆኖ ይታያል፡፡ በላይ በሰማይ ፀሐይ፤ ጨረቃ፤ ከዋክብርት እግዚአብሔር የብርሃናት አባት እንደ ሆነ ምስክር ናቸው (ያዕ. 1፡17)፡፡ እርሱ ሰማያትን እንደ መጋረጃ የሚዘረጋቸው፤ እንደ ድንኳንም ለመኖሪያ የሚደኩናቸው፤ ልካቸውን በስንዝር የለካ፤ ዝናምን መስኮቶች ከፍቶ የሚያዘንም፤ ነፋሳትንም የሚያዝ ነው፡፡ በታች በምድር ሜዳ ተራራው፤ ሳርና ዛፎቹ፤ በመስፈሪያው ተሰብስቦ የተያዘው አፈር፤ በሚዛኑ የመዘናቸው ኮረብቶች ስለ እርሱ ይናገራሉ (ኢሳ. 40፡12)፡፡ የእግዚአብሔር ሁሉን ቻይነት ዓለምን ከምንም ወደ ሕልውና በማምጣቱ የታወቀ ነው፡፡

እግዚአብሔር የኢዮብን ጥያቄ በጥያቄ ሲመልስ ‹‹ምድርን በመሠረትሁ ጊዜ አንተ ወዴት ነህ? . . በላይዋስ የመለኪያ ገመድ የዘረጋ ማን ነው? . . የማዕዘንዋንስ ድንጋይ ያቆመ ማን ነው? . . ባሕርን በመዝጊያዎች የዘጋ ማን ነው? . . በውኑ ከተወለድህ ጀምሮ ማለዳን አዝዘሃልን? ለወገግታም ስፍራውን አስታውቀኸዋልን? . . ›› (ኢዮ. 38) ይለዋል፡፡ ያሕዌ የኃይሉ ታላቅነትና ግርማ የማይወዳደር ነው፡፡ ከእያንዳንዱ ፍጥረት ጀርባ ብርቱ የሆነው የአምላካችን ክንድ አለ፡፡ የተደረሰበት የታወቀው፤ ያልተደረሰበት የተሰወረው ሁሉ የአምላካችንን አምላክነት በግልጥ ይመሰክራሉ፡፡

እግዚአብሔርን አመስግኑት፡፡ ያልነበረውን የሚያመጣ፤ የነበረውንም የሚያሳልፍ ነውና ስለ መቻሉ አመስግኑት፡፡ ለሁሉ ውበት የሰጠ፤ ዳርቻና ወሰን ያበጀ፤ ሊያኖር ሊገድል ብቸኛ እርሱ ነውና አመስግኑት፡፡ ከፈጠረው ሁሉ አልቆ ሰውን በመልኩ በምሳሌው የፈጠረ እርሱ ነውና ስለ መውደዱ አመስግኑት፡፡ ተወዳጆች ሆይ፤ ነቢዩ ‹‹ግሩምና ድንቅ ሆኜ ተፈጥሬአለሁና አመሰግንሃለሁ፤ ሥራህ ድንቅ ነው፤ ነፍሴም እጅግ ታውቀዋለች›› (መዝ. 138፡14) እንዳለ፤ ይህ እውቀት ያላችሁ ፈጣሪያችሁን አመስግኑት፡፡

እግዚአብሔር ለኢዮብ መልስ ሲሰጥ ‹‹ያለ እውቀት በሚነገር ቃል፤ ምክርን የሚያጨልም ይህ ማነው?›› (ኢዮ. 38፡2) በሚል ብርቱ ጥያቄ ነበር፡፡ እግዚአብሔር መልስ የሆነ ጥያቄ እንዳለው ማወቅ ምንኛ ማስተዋል ነው፡፡ ብዙዎች መልስ የሚፈልጉላቸውን ጥያቄዎች በቅጡ አለማስተዋላቸው፤ በጥያቄዎቹ ውስጥ ያለውን መልስ ልብ እንዳይሉ ተጋርደዋል፡፡ እግዚአብሔር በፍጥረቱ ይታወቃል፡፡ ዛሬም ያለ ቅዱስ እውቀት በሚነገር ቃል ምክር እየጨለመ ነው፡፡ እግዚአብሔር ግን እንዲህ ይላል፡- ‹‹እንግዲህ እንደ ሰው ወገብህን ታጠቅ እጠይቅሃለሁ፤ አንተም ተናገረኝ››፡፡

ጥበበኛ የጥበብ ጥግ ያሕዌ ያለህና የምትኖር ሆይ፤ ከማወቃችን እጅግ ስለሚበልጠው ማወቅህ፤ ከምክራችን እጅግ ስለሚጠልቀው መካርነህት፤ ከብልሃታችን ስለሚጠበበው አደራረግህ ብዙ ክብር ላንተ ይገባሃል፡፡ መጻሕፍት ባይገለጡ፤ ጥቅሶች ባይጠቀሱ፤ ሰባኪ ባይቆም፤ ቃል ባይተረጎም አንተ ግን ፍጥረት ይጮህልሃል፡፡ ተራራው ከሜዳ፤ ሰማዩም ከትቢያ እየተቀባበለ ‹‹ሁሉን የሚችል ሠርቶናል›› ይሉሃል፡፡

- ይቀጥላል፡፡

‹‹ . . . ስለ እኛ ደግሞ ጸልዩ፤›› /ቆላ. 4፡3/!

መልእክት ፡ ኀበ ፡ ሰብአ ፡ ኤፌሶን፡፡ (2)

2016-05-30T06:22:00.000-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

የሐዋርያው ፡ የጳውሎስ ፡ መልእክት ፡ ወደ ፡ ኤፌሶን ፡ ሰዎች፡፡

ሰኞ ግንቦት 22 ቀን 2008 የምሕረት ዓመት

‹‹ወአርአየነ ምክረ ፈቃዱ በከመ ሥምረቱ›› (ኤፌ. 1፡9)!

v የጥናቱ መግቢያ

· የኤፌሶን ቤተ፡ ክርስቲያን የተመሰረተችው በሐዋርያው ጳውሎስ ሁለተኛ ሐዋርያዊ የአገልግሎት ጉዞ ነው፡፡

· ሐዋርያው በቆሮንቶስ ከተማ ለ18 ወራት ከነበረው የአገልግሎት ቆይታ በኋላ (ሐዋ. 18፡11)፤ ከጵርስቅላና ከአቂላ ጋር በመሆን ኤፌሶንን ጎብኝቷል (ሐዋ. 18፡18)፡፡

· ሐዋርያው በኤፌሶን የነበረው የመጀመሪያ ቆይታ ለአጭር ጊዜ የነበረ ሲሆን፤ ዳሩ ግን እንደሚመለስ ቃል ገብቶላቸው ነበር (ሐዋ. 18፡19-21)፡፡ ነገር አዋቂ፤ በመጻሕፍት እውቀት የበረታ፤ የጌታን መንገድ የተማረ፤ የዮሐንስን ጥምቀት የሚያውቅ፤ በመንፈስ የሚቃጠል፤ ስለ ኢየሱስ የሚናገርና በትክክል የሚያስተምር ለሆነው አጵሎስ ‹‹የእግዚአብሔርን መንገድ ከፊት ይልቅ በትክክል ገለጡለት›› የተባለላቸው ጵርስቅላና አቂላ በኤፌሶን ቆይተዋል (ሐዋ. 18፡24-26)፡፡

· ሐዋርያው በሦስተኛ ሐዋርያዊ ጉዞው ወደ ኤፌሶን የተመለሰ ሲሆን፤ በዚያም ለሦስት ዓመታት በአገልግሎት ቆይቶአል (ሐዋ. 19፡8-10፤ 20፡31)፡፡ አንደኛ እና ሁለተኛ የቆሮንቶስ መልእክታትን የጻፈው በእስያ ዋና ከተማ ከሆነችው ከኤፌሶን ነው (1 ቆሮ. 16፡8፤9)፡፡ በዚያ ብዙ ድንቅና ተአምራት በእርሱ በኩል ተከናውነዋል (ሐዋ. 19፡12)፡፡

· ሐዋርያው በእድሜው ማብቂያ ከኤፌሶን አስጠርቶአቸው ከመጡ ሽማግሌዎች (ባለ አደራ) ጋር በሚሊጢን እንደተገናኘ፤ ምክርና ማስጠንቀቂያ አዘል የስንብት መልእክት አስተላልፏል (ሐዋ. 20፡16-38)፡፡

· የኤፌሶን ቤተ፡ ክርስቲያን (ማኅበረ ምእመናን) በአዲስ ኪዳን ከአንድ በላይ መልእክት የተጻፈላት ብቸኛ ጉባኤ እግዚአብሔር ናት፡፡ ከዚህ መልእክት ሌላ የጌታችን የኢየሱስ ክርስቶስ ራእይ ቅዱስ ዮሐንስ ባየውና በጻፈውም መልእክት ውስጥ ተጠቅሳለች (ራእ. 2፡1-7)፡፡

ከሌሎቹ አብያተ ክርስቲያናት በበለጠ፤ በሐዋርያው ጳውሎስ፣ በሐዋርያው ዮሐንስ፣ በአጵሎስና በጢሞቴዎስ ትምህርትና ስብከት የተገለገለች ቤተ፡ ክርስቲያን (ማኅበረ-ምእመናን) ናት፡፡

· ሐዋርያው ጳውሎስ በቆላስይስ መልእክቱ ‹‹ይህችም መልእክት በእናንተ ዘንድ ከተነበበች በኋላ በሎዶቅያ ሰዎች ማኅበር ደግሞ እንድትነበብ አድርጉ›› (ቆላ. 4፡16) ብሎ የጻፈው የኤፌሶንን መልእክት መጥቀሱ እንደ ሆነ በሚታመነው መሠረት፤ ይህ መልእክት በእስያ ባሉ አብያተ ክርስቲያናት በዙር የተነበበ የእግዚአብሔርን ፈቃዱን ምስጢር መገለጥ የያዘ መልእክት ነው፡፡

በሰው ልብ ውስጥ የሌላውን ልብ የማወቅ ፍላጎት ከፍተኛ ነው፡፡ ምን እያሰብን እንዳለን ከመጠንቀቅ ይልቅ፤ ሌሎች ምን እያሰቡ እንደ ሆነ ለመረዳት መሞከር የብዙዎችን አቅም የጨረሰ የዘወትር ጥረት ነው፡፡ ማወቅ ስለምትፈልጉት ነገር ብጠይቃችሁ፤ ምን ያህል ዝርዝር ፍላጎቶች ሊኖሯችሁ እንደሚችሉ አብረን ካልገመትን በቀር ልኩ እናንተ ጋር የለም፡፡ ማንነቶቻችን በብዙ መሻቶች የተሞሉ ናቸው፡፡ ፍለጋውም እጅግ አድካሚ ነው፡፡ ቃሉ ግን ይለናል፤ እግዚአብሔርን የሚፈልግ ልብ ደስ ይበለው (መዝ. 104፡3)፡፡

ተወዳጆች ሆይ፤ ስለ እግዚአብሔር ያለን መረዳት ራሱ እግዚአብሔር በመንፈሱ በኩል በገለጠልን እውነት ላይ የተመሰረተ ነው፡፡ የኤፌሶን መልእክት ደግሞ ከዓለም መፈጠር አስቀድሞ በአብ በወልድና በመንፈስ ቅዱስ ልብ ውስጥ ያለው ቅዱስ ምክር ለእኛ ግልጥ የሆነበት መጽሐፍ ነው፡፡ ዓለም ሳይፈጠር፤ ከዘላለም ዘመናት በፊት የመለኮት እቅድ ምን መሆኑን ማወቅ ለሚወድ ልብ ሁሉ የእግዚአብሔር ልብ (አሳብ) በዚህ መልእክት የታወቀ ነው (በገለጠልን መጠን)፡፡

ሰው የልቡን የሚገልጠው ለሚወደው ነው፡፡ እርሱ እግዚአብሔር ወዶናል (ዮሐ. 3፡16፤ የዮሐንስ ወንጌል ቁልፍ ጥቅስ)፡፡ የእርሱ የሆነውን እንድናውቅም አድርጎናል፡፡ እግዚአብሔር ጅማሬን ብቻ ሳይሆን በፍጻሜው ምን ሊያደርግ እንዳለውም የተናገረ ነው፡፡ ብዙ እቅዶች ለሌሎች ሽሽግ ናቸው፡፡ ምክንያቱም ሰው ይሠጋል፤ ባልያዘው ነገም ይፈራል፡፡ ሰውን ያይደለው እግዚአብሔር (አብ ወልድ መንፈስ ቅዱስ) የልቡን አውጥቶ ሊነግረን የሰው ፊት አላየም፡፡ ያስከተለን መድረሻችንን ገልጦ ነው፡፡

በእርግጥ! የልቡን አሳብና ምክር ለገለጠው ሕያው እግዚአብሔር ሰው የእምነትና ፍቅር ምላሽ ሊሰጥ ይገባዋል፡፡ የአፋቸውን ሳይሆን የልባቸውን እንድናውቅ ለፈቀዱልን፤ ስውሩንም ነገራቸውን ለገለጡልን ለፍቅራቸው መሸነፋችን የሚጠበቅ ነው፡፡ ለተገለጠው የእግዚአብሔር የልብ አሳብ መታዘዝ አለመቻል የማይጠበቅ እንደ ሆነ አስተዋላችሁን? አዎ! በሙላት የእሽታ መንፈስ ሊኖረን የተገባ ነው፡፡

ሐዋርያው ጳውሎስ የኤፌሶንን መልእክት ለሚጽፍላቸው ማኅበረ ምእመናን፤ የክብር አባት የጌታችን የኢየሱስ ክርስቶስ አምላክ እርሱን በማወቅ፤ የጥበብንና የመገለጥን መንፈስ እንዲሰጣቸው (ኤፌ. 1፡17)፤ በሰማይና በምድር ያለ አባትነት ሁሉ ከሚሰየምበት ከአብ ፊት ይንበረከካል (ኤፌ. 3፡14፤15)፡፡ በመልእክቱ የመጀመሪያ ምእራፍ ‹‹የልባችሁ ዓይኖች ሲበሩ›› (1፡18፤19) ተብሎ እንደ ተጻፈ፤ የሰማይ ነገርን ሰው በራሱ የሚያስተውልበትና የሚሸከምበት አቅም የለውም፡፡ ሰዎች በተለምዶ ‹‹የበራለት›› እና ‹‹ያልበራለት›› የሚለውን መደልደያ የሚጠቀሙት ለዚህ ይሆናል፡፡

እግዚአብሔር ሰጪ ብቻ ሳይሆን የሰጠንን የምንሸከምበት አቅምም የሚሰጠን ነው፡፡ እኛ ምቹ የሆነውን ነገር እንኳ የእኛ በሆነው ማንነት በአግባብ ማስተናገድ የማንችል ደካሞች ነን፡፡ ሐዋርያው በሌላው መልእክቱ ‹‹ኃይልን በሚሰጠኝ በክርስቶስ ሁሉን እችላለሁ›› (ፊል. 4፡12) ያለው፤ አስቀድሞ ‹‹መዋረድንም አውቃለሁ፤ መብዛትንም አውቃለሁ . . . ›› ካለን በኋላ ነው፡፡ ምቾቶቻችንን እንኳ የምንሸከምበት ጉልበትና ኃይል ክርስቶስ ነው፡፡ በዚህ መጠላለፍ የሆነባቸው ብዙ ናቸውና፡፡

‹‹በክርስቶስ ለማድረግ እንደ ወደደ እንደ አሳቡ የፈቃዱን ምስጢር አስታውቆናልና . . ›› (ኤፌ. 1፡9) የሚለን ሐዋርያ እግዚአብሔር ያስታወቀንን እንድንረዳው ተንበርክኮ ይጸልያል፡፡ ወደዚህ ጥናት ስንመጣ ልናደርገው የተገባውን ትልቅ ነገር ከዚሁ የመልእክት ክፍል እንረዳለን፡፡ ቤተ ሰዎቼ፤ ከመጽሐፍ ቅዱስ ገፆች አብዛኛውን እንዳነበባችሁ፤ ብዙ ጉባኤያት ላይ እንደተሳተፋችሁ፤ ለመረዳትና ለመግለጥ የበረታችሁ እንደ ሆነ ቢሰማች፤ እውነቱ ግን የእግዚአብሔርን የዘላለም ምክርና አሳብ ልናውቅና ልንኖር የምንችለው በእርሱ ጸጋ ነው፡፡

የኤፌሶን ማኅበረ ምእመናን በክርስቶስ በማመን ክርስቲያን የሆኑና መንፈስ ቅዱስ በውስጣቸውና በዘንዳቸው የሚሠራ ናቸው፡፡ ዳሩ ግን ‹‹የጥበብንና የመገለጥን መንፈስ›› ሐዋርያው ይለምንላቸዋል፡፡ ቤተ ሰዎች እኛስ ይህ አያስፈልገንምን? እንደ ሐዋርያው በአባት ፊት ለመንበርከክ የሚሆን የልብ መነካት ይሁንላችሁ፡፡

ምእራፍ አንድ

ርዕስ፡- የመለኮት ዘላለማዊ አሳብና የልብ ምክር፡፡

አከፋፈል፡-

1. የመልእክቱ መግቢያ (ቁ. 1-2)

2. የተወደደ ምስጋና (ቁ.3)

3. የሕያው አብ ሥራ (ቁ. 4-6)

4. የሕያው ወልድ ሥራ (ቁ. 7-12)

5. የሕያው መንፈስ ቅዱስ ሥራ (ቁ. 13-14)

6. ለክብር አባት የቀረበ ምስጋናና ጸሎት (ቁ. 15-23)

ቤተ ሰዎቼ፤ ራሳችሁን እንዲህ ጠይቁ፡-

ü ስለ ኤፌሶን ከተማ ምን ታውቃላችሁ?

ü ሐዋርያው በከተማይቱ ሲያገለግል የገጠመው ፈተና ከምን ጋር የተያያዘ ነበር?

ü ዛሬ ወንጌልን በመስበክ አገልግሎት ቤተ ክርስቲያን ያለባት ተግዳሮት ያንጊዜ ከሆነው ጋር ያለው መመሳሰልና መለያየት ምን ይመስላል?

E-mail: bfb.tube@gmail.com ወይም facbook: Bete Fikir Fam ላይ ልትመልሱ ትችላላችሁ፡፡

‹‹ . . . ስለ እኛ ደግሞ ጸልዩ፤›› /ቆላ. 4፡3/!

ምስኪን ማነው?

2016-05-03T07:41:00.002-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ማክሰኞ ሚያዝያ 25 ቀን 2005 የምሕረት ዓመት

በክርስትና መሠረተ ትምህርት ውስጥ የ‹‹ትንሣኤ ሙታን›› አሳብ በእጅጉ አስፈላጊ ነው፡፡ ሐዋርያው ጳውሎስ በመንፈስ ቅዱስ ምሪት የመጀመሪያይቱን የቆሮንቶስ መልእክት ሲጽፍ በጊዜው መፍትሔ ከተሰጠባቸው ችግሮች አንዱ ‹‹ትንሣኤ ሙታን የለም›› የሚለው የአንዳንድ የቆሮንቶስ ክርስቲያኖች መረዳት ነው፡፡ የቆሮንቶስ መልእክት በምሕረቱ ባለ ጠጋ (ኤፌ. 2፡4) የሆነውን የእግዚአብሔርን ጸጋ የምናስተውልበት መጽሐፍ ነው፡፡ በመልእክቱ መግቢያ ‹‹በቆሮንቶስ ላለች ለእግዚአብሔር ቤተ፡ ክርስቲያን፤ በክርስቶስ ኢየሱስ ለተቀደሱት›› (1፡2) የሚለው አገላለጽ እግዚአብሔር በክርስቶስ ያሉትን ምእመናን ድካም የሚመለከትበትን የጸጋ ዓይን እንድናይ ያደርገናል፡፡

ምእራፍ 15፡

ርዕስ፡ - ትንሣኤ እርግጥ ነው!

.  የክርስቶስ ትንሣኤ ወንጌል (1-11)
.  ክርስቶስ ባይነሣ ስፍራችን (12-19)
.  ክርስቶስ እንደ በኩራት (20-28)
. ስለ ሙታን ትንሣኤ የቀረበ ተግባራዊ ማስረጃ (29-34)
.  ስለ አካል መነሣት የተሰጠ ትምህርት (35-49)
.  የጌታ መምጣትና በእርሱ በኩል ያለን ድል መንሣት (50-58)፡፡

ሐዋርያው በዚህ ምእራፍ የጌታችንን የኢየሱስ ክርስቶስ ትንሣኤ በተመለከተ ሁለት ማስረጃዎችን ያቀርባል፡፡ አንደኛ ቅዱሳት መጻሕፍትን ሲሆን፤ ሁለተኛ ደግሞ የዓይን ምስክሮችን ነው፡፡ ከዚህ በኋላ ‹‹እንዲሁ እንሰብካለን፤ እንዲሁም አመናችሁ›› (1 ቆሮ. 15፡11) በማለት ወደ ክርስትና የመጡበትን እውነት ያሳስባቸዋል፡፡ ሐዋርያው በአቴና ‹‹የኢየሱስንና የትንሣኤውን ወንጌል›› እንደ ሰበከ እናውቃለን (ሐዋ. 17፡18)፡፡ እርሱ ወደ ክርስትና፤ ሐዋርያም ሆኖ ወደ መሾም የመጣው ከሙታን በኩር ሆኖ የተነሣውን ጌታ ደማስቆ ላይ ከተገናኘ በኋላ ነው (ሐዋ. 9፡1-8፤ 1 ጢሞ. 1፡12)፡፡ በእርሱ በኩል ካልሆነ በቀር እንዲህ አይሆንም፡፡

ከትንሣኤ ጋር በተያያዘ በቆሮንቶስ ያለው ችግር ክብደት እንዲህ ተቀምጧል፤ ‹‹ትንሣኤ ሙታን ከሌለ ክርስቶስ አልተነሣም፤ ክርስቶስ ካልተነሣ ስብከታችን ከንቱ ነው፤ ስብከታችን ከንቱ ከሆነ እምነታችንም ከንቱ ነው፤ እምነታችን ከንቱ ከሆነ አገልጋዮቹ ሐሰተኞች ነን፤ እንዲህ ከሆነ ደግሞ እስካሁን ድረስ በኃጢአታችን አለን፤ በክርስቶስ አምነው ያንቀላፉትም ጠፍተዋል›› (ቁ. 12-18)፡፡ የክርስትናችን መሠረት የክርስቶስ ሞትና ትንሣኤ ነው (ሮሜ 4፡24-25)፡፡

‹‹ይህም ወንጌል . . ›› (ሮሜ 1፡3) ተብሎ እንደ ተጻፈ፤ ወንጌል በክርስቶስ ሞትና ትንሣኤ ለእኛ የመጣውን ትርፍ መረዳት ነው፡፡ ኢየሱስ ክርስቶስ እንደ ተነሣ፤ እንዲሁ እኛም እንነሣለን (1 ተሰ. 4፡14)፡፡ ሐዋርያው ክርስቶስ ስለ በደላችን አልፎ በመሰጠቱ፤ እኛንም ስለ ማጽደቅ ከሙታን በመነሣቱ ‹‹አብርሃምም እግዚአብሔርን አመነ፤ ጽድቅም ሆኖ ተቆጠረለት›› (ዘፍ. 15፡6) የሚለው ስለ እርሱ ብቻ ሳይሆን ስለ እኛም እንደ ሆነ ‹‹ለምናም ለእኛ ይቆጠርልን ዘንድ አለው›› (ሮሜ 4፡25) ይለናል፡፡

ተወዳጆች ሆይ፤ በሕያው እግዚአብሔር ተቀባይነትን ያገኘነው በክርስቶስ ሞትና ትንሣኤ ነው፡፡ ‹‹ሞት ድል በመነሣት ተዋጠ›› ተብሎ የተጻፈውም ቃል (1 ቆሮ. 15፡54) ፍጻሜን የሚያገኘው በዚህ መሠረት ነው፡፡ የሚበሰብሰው የማይበሰብሰውን ሲለብስ፤ ይህም የሚሞተው የማይሞተውን ሲለብስ ዜማችን ‹‹ሞት ሆይ መውጊያህ የት አለ? ሲኦል ሆይ ድል መንሣትህ የት አለ?›› የሚል ይሆናል (1 ቆሮ. 15፡53-57)፡፡ ሁል ጊዜ ከጌታ ጋር ወደ መሆን (1 ተሰ. 4፡17) ክብር የምንመጣበት ብቸኛው መንገድ ‹‹ከእርሱ ጋር አስነሣን›› (ኤፌ. 2፡6) እንደ ተባለ፤ በማመን ትንሣኤ ሕይወት መሆናችን ነው፡፡ ይህም በሚመጡ ዘመናት በክርስቶስ ኢየሱስ ለእኛ ባለው ቸርነት ከሁሉ የሚበልጠው የጸጋው ባለ ጠግነት ይታያል፡፡

በቆሮንቶስ ቤተ፡ ክርስቲያን ክርስቶስ እንደ ተነሣ ይሰበካል፤ ዳሩ ግን ‹‹ትንሣኤ ሙታን የለም›› የሚሉ ነበሩ፡፡ በእርግጥ ይህ ትልቅ አለማመን ነው፡፡ እንዲህ አስቡት፤ ‹የምስራች! ክርስቶስ ተነሥቶአል› ተብሎ ይሰበካል፤ ሰሚው ግን ‹በሞትና በመበስበስ ለሚደመደም ሕይወት› እያለ ይቆዝማል፡፡ የክርስቶስ መነሣት እንኳን መንፈሳዊውን፤ የሰዎችን ስነ ልቦናዊ ጥያቄም መልሷል፡፡ ሰዎች ከሞት በኋላ ያላቸውን የፍጹም ዕረፍት ሕይወት በማሰብ በተስፋና በደስታ እንደሚሞሉ፤ የአካላቸውን ትንሣኤ በማወቅ ደግሞ ለራሳቸው ያላቸው ምልከታና ጥንቃቄ ከፍተኛ እንደሚሆን የባህርይ ጥናቶች ይጠቁማሉ፡፡

ከማንኛውም ጥቅም በላይ የክርስቶስ ትንሣኤ በበለጠ ሁኔታ በሕይወት የመኖራችንን ቀጣይነት አረጋግጦልናል (ዮሐ. 11፡25)፡፡ በብሉይ ኪዳን ኢዮብ ‹‹አሁን በምድር ውስጥ እተኛለሁ፤ ማለዳ ትፈልገኛለህ፤ አታገኘኝም›› (ኢዮ. 7፡21) እንዳለ እናነባለን፤ ዳሩ ግን የሕያው እግዚአብሔር ልጅ ወደ ምድር ታችኛ ክፍል ወርዶ በሞቱ አግኝቶናል (ኤፌ. 4፡9)፡፡ የትኛውም መከራና ፈተና የማያስቀረው፤ ሞትን ድል ያደረገ የተባረከ ተስፋ አለን (ቲቶ 2፡112)፡፡ ጌታ ስሙ ይቀደስ!

ተወዳጆች ሆይ፤ ክርስቶስን ተስፋ ያደረጋችሁት ለምንድነው? ሐዋርያው የቆሮንቶስ ክርስቲያኖችን ያስጠነቅቃል፤ ‹‹በዚህች ሕይወት ብቻ ክርስቶስን ተስፋ ያደረግን ከሆነ ከሰው ሁሉ ይልቅ ምስኪኖች ነን›› (1 ቆሮ. 15፡19)፡፡ ከንፈር የምንመጥላቸውን፤ ፍርፋሪ የምንጥልላቸውን ምስኪን እንደ ሆኑ ቆጥረናቸው ኖረናል፡፡ አሁን ግን ከጊዜው ማጣት ባለፈ በዘላለም አምላክ ፊት ያለውን ምስኪንነት ልብ ማለት ያስፈልገናል፡፡ በክርስቶስ አምኖም ምስኪንነት እንዳለ ማስተዋል በእጅጉ ተገቢ ነው፡፡

ክርስትና በዚህ ዓለም ከሚኖረው መደላደል ያለፈ አጀንዳ ነው፡፡ እግዚአብሔር ሞሰብ ሙሉ እንጀራ እንዲሆንላቸው የሚፈልጉ ውስጣቸው እርሱን ያልጠገበ ናቸው፡፡ ልምጣ የማይል ያምጣ ክርስትና በዚህች ሕይወት ብቻ ክርስቶስን ተስፋ ያደረገ ነው፡፡ የእኛን ተስፋ በተመለከተ ‹‹እርሱም የሰጠን ተስፋ ይህ የዘላለም ሕይወት ነው›› (1 ዮሐ. 2፡24) ተብሎ ተጽፎአል፡፡ ክርስቶስ ተነሥቶአልና ሕያው ተስፋ አለን፡፡ ‹‹ኢየሱስ ክርስቶስ ከሙታን በመነሣቱ ለሕያው ተስፋና ለማይጠፋ እድፈትም ለሌለበት ለማያልፍም ርስት እንደ ምሕረቱ ብዛት ሁለተኛ የወለደን የጌታችን የኢየሱስ ክርስቶስ አምላክና አባት ይባረክ›› (1 ጴጥ. 1፡3)፡፡

ክርስቶስን በአሁኑ ዓለም ሕይወት ብቻ ሳይሆን ሊመጣ ባለውም ዓለም ሕይወት ተስፋ እናደርገው ዘንድ ተነሥቶአል፡፡ በቆሮንቶስ ትንሣኤ ሙታን የለም የሚሉ አንዳንዶች እንደ ነበሩ ስናነብ፤ ዛሬ ግን ትንሣኤ ሙታን የለምን በተግባር የሚኖሩ ብዙ ሰዎችን ማየት እንችላለን፡፡ ክርስቶስ ተንሥአ እሙታን፤ በዐቢይ ኃይል ወሥልጣን የምንል ዳሩ ግን በትንሣኤው ኃይል የማንመላለስ ከሆነ ከቆሮንቶስ አንዳንዶች የእኛ ብልጫው ምንድነው? ደስታችንም ሀዘናችንም ውስጥ ከሞት በኋላ ሕይወት እንዳለ ሊገለጥ ያስፈልገናል፡፡ መጥገብንም መራብንም፤ ችግርንም ምቾትንም የምንችልበት ኃይል ክርስቶስ (ፊል. 4፡12-13) ማስተዋልን ያብዛልን!

‹‹ . . . ስለ እኛ ደግሞ ጸልዩ፤›› /ቆላ. 4፡3/!

አፋችሁን አትክፈቱ!

2016-04-29T23:28:00.000-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

‹‹ኢከሰተ አፉሁ በሕማሙ›› እንዲል (ሐዋ. 8፡32)::

አርብ ሚያዚያ 21 ቀን 2008 የምሕረት ዓመት

የአዲስ ኪዳን መጻሕፍት ሁለተኛው ክፍል ‹‹የታሪክ ክፍል›› በመባል ይታወቃል፡፡ ይህም ከአገልጋዮቹ አንጻር ‹‹የሐዋርያት ሥራ››፤ ከሥራው ባለቤት አንጻር ደግሞ ‹‹የመንፈስ ቅዱስ ሥራ›› በመባል የሚታወቀው መጽሐፍ ነው፡፡ ‹‹ለድፍርስ መፍትሔው ምንጭ መውረድ ነው›› የማወቅ መመሪያዬ ነው፡፡ የክርስትናን መሠረተ ጅማሬ ለሥጋና ደም አሳብ ክፍተት በማይሰጥ መልኩ ቁልጭ ብሎ በምንመለከትበት በዚህ መጽሐፍ ውስጥ፤ በሞተውና ከሙታንም በተነሣው በክርስቶስ ክርስቲያን የሆኑቱ በኅብረት የተቀበሉትን (ቤተ፡ ክርስቲያን) የመጀመሪያውን ታላቅ መከራና ስደት እናነባለን፤ ከእስጢፋኖስ መገደል በኋላ (ከሐዋርያት ሥራ ም. 7)፡፡

ምእራፍ ስምንት ስደትና መከራውን (ክርስቶስ ስለ ጽድቅ የተቀበለውን መከራ መካፈል) ተከትሎ ወደ ይሁዳና ወደ ሰማርያ የሆነውን መበተን መርዶ በመንገር ይጀምራል፡፡ ይህንን ምእራፍ እንዲህ ከፍለን ልንረዳው እንችላለን፡ -

1. በክርስትና የመጀመሪያው ታላቅ መከራ (ከቁ. 1-3)

2. የተበተኑት ምእመናን ወንጌልን መስበካቸውና ፊልጶስ በሰማርያ (4-8)

3. የሰማርያው ጠንቋይ ሲሞን እና በዚያ የሆነው (9-24)

4. ወንጌል በሳምራውያን ብዙ መንደሮች መሰበኩ (ቁ. 25)

5. ፊልጶስና ኢትዮጵያዊው ጃንደረባ (26-40)

በሐዋርያት ሥራ መጽሐፍ ‹‹የእግዚአብሔር ቃል ግን ያድግና ይበዛ ነበር›› (ሐዋ. 12፡24) የሚለው፤ በክርስቲያኖች ላይ ከሆነው ታላቅ ስደትና መከራ በኋላ ከምናነባቸው ደስታን የሚሞሉ ቃላት መካከል አንዱ ነው፡፡ በዚህ መከራና ስደት ውስጥ ሳዉል የመሪነቱን ድርሻ እንደሚወስድ የምናውቅ ሲሆን (ሐዋ. 26፡10-11፤ 1 ቆሮ. 15፡9፤ ገላ. 1፡13)፤ ከተለወጠና ወደ ክርስትና ከመጣ በኋላ ግን ‹‹የእግዚአብሔር ቃል ግን አይታሰርም›› (2 ጢሞ. 2፡9) በማለት ለእምነት ልጁ ጢሞቴዎስ ጽፎለታል፡፡

የሕማም ሰው ደዌን የሚያውቅ (ኢሳ. 53፡3)፤ ከሙታንም በኩር (ቆላ. 1፡18) በሆነው የእግዚአብሔር ልጅ በማመን ለሆነው እውነተኛ ክርስትና የአሁኑ ዓለም ምላሽ ዛሬም እንዲህ ያለ ቢሆንም፤ ዳሩ ግን የእግዚአብሔር ቃል ማደግና መብዛቱ ፈጽሞ አይቆምም፤ ቃሉ አይታሰርምና፡፡ ‹‹የተበተኑትም ቃሉን እየሰበኩ ዞሩ›› (ሐዋ. 8፡4)፤ ምን ሰበኩላቸው? ለሚለው ‹‹ክርስቶስን ሰበከላቸው›› ተብለናል፡፡ አስቀድሞ ተሳዳቢና አሳዳጅ፤ አንገላችም የነበረው ሐዋርያ ጳውሎስ (1 ጢሞ. 1፡13)፤ በፊት ያጠፋው የነበረውን ሃይማኖት አሁን (ገላ. 1፡23) ‹‹እኛ ግን የተሰቀለውን ክርስቶስን እንሰብካለን›› (1 ቆሮ. 1፡23) በማለት ይሰብካል፡፡

ሐዋርያው ጴጥሮስና ዮሐንስም ‹‹በሳምራውያን በብዙ መንደሮች ወንጌልን ሰበኩ›› (ሐዋ. 8፡25) ተብለናል፡፡ ‹‹ይህም ወንጌል በሥጋ ከዳዊት ዘር ስለ ተወለደ እንደ ቅድስና መንፈስ ግን ከሙታን መነሣት የተነሣ በኃይል የእግዚአብሔር ልጅ ሆኖ ስለ ተገለጠ ስለ ልጁ ነው፤ እርሱም ጌታችን ኢየሱስ ክርስቶስ ነው›› (ሮሜ 1፡3)፡፡

በዚህ ምእራፍ ከሥልጣን አንጻር ሐዋርያ ያይደለ ከሰባቱ አንዱ የሆነ ፊልጶስ ከጌታ መልአክ እንደ ተነገረው ከኢየሩሳሌም (ሊሰግድ) ወደ ኢትዮጵያ (ግዛትን በተመለከተ አሁን የምናውቀውን ብቻ አይደለም) ይመለስ የነበረውን ጃንደረባ እንደተገናኘ እናነባለን፡፡ የንግሥት ህንደኬ አዛዥና በገንዘብዋ ሁሉ የሠለጠነ ይህ ሰው በሠረገላው ተቀምጦ የነቢዩን የኢሳይያስን መጽሐፍ ያነብ ነበር፡፡ ያነበው የነበረ የመጽሐፉ ክፍል፤

‹‹እንደ በግ ወደ መታረድ ተነዳ የበግ ጠቦትም በሸላቹ ፊት ዝም እንደሚል እንዲሁ አፉን አልከፈተም፡፡ በውርደቱ ፍርዱ ተወገደ፤ ሕይወቱ ከምድር ተወግዳለችና ትውልዱንስ ማን ይናገራል?›› የሚል ነበር፡፡

ፊልጶስ ወደዚህ ሰው የቀረበው ‹‹በእውኑ የምታነበውን ታስተውለዋለህን?›› የሚል ትልቅ ጥያቄ ይዞ ነው፡፡ ቅዱሳት መጻሕፍትን ማንበብና ማድመጥ ‹‹እምነት ከመስማት ነው›› (ሮሜ 10፡17) ለሚለው መመሪያ ትክክለኛው የመታዘዝ መንገድ ቢሆንም፤ ‹‹ማስተዋል›› ግን የመረዳት ቁልፍ ነው (2 ቆሮ. 4፡4)፡፡ መጽሐፍ ‹‹የማያስተውል ሕዝብ ነውና ስለዚህ ፈጣሪው አይራራለትም፤ ሠሪውም ምሕረት አያደርግለትም›› (ኢሳ. 27፡11) እንደሚል፤ ‹‹ጌታም በነገር ሁሉ ማስተዋልን ይስጥህ›› (2 ጢሞ. 2፡7) የሚለው ቡራኬ በእጅጉ ያስፈልገናል፡፡

ጃንደረባው ያነበው ከነበረው የመጽሐፍ ጥቅልል ጌታችን በአይሁድ ምኩራብ ‹‹የጌታ መንፈስ በእኔ ላይ ነው፤ ለድሆች ወንጌልን እሰብክ ዘንድ ቀብቶኛልና . . ›› (ሉቃ. 4፡17-19) የሚለውን ክፍል አንብቦአል፡፡ ይህም ከጌታችን አፍ ከሚወጣው ከጸጋው ቃል ጋር ተያይዞ ተብራርቶአል፡፡ ሰዎች ሁሉ ሊድኑና እውነቱን ወደ ማወቅ ሊደርሱ የሚወድ እግዚአብሔር (1 ጢሞ. 2፡3-4)፤ ሰዎች ሁሉ የሚድኑበትን ጸጋ እንደገለጠ እንረዳለን (ቲቶ 2፡11፤ ዮሐ. 3፡16፤ 1፡14)፡፡ ታዲያ ከኢየሩሳሌም አምልኮ የሚመለሰው ሰው በኢሳይያስ 53 አስቀድሞ በትንቢት የተነገረውን በአዲሱ ኪዳን ቀራንዮ ላይ በተግባር የተፈጸመውን (ኢሳ. 53 ገና ወደ ፊት ሊሆን ያለን ክስተት የሚያመለክት ትምህርት እንዳለው ሆኖ) ቤዛነታችንን ያነብ ነበር፡፡

እንግዲህ ለዚህ ጽሑፍ ርዕስ ያደረግነውን ያገኘነው ከዚሁ የንባብ ክፍል ነው፡፡ ‹‹ተጨነቀ ተሣቀየም አፉንም አልከፈተም፤ ለመታረድ እንደሚነዳ ጠቦት በሸላቶቹም ፊት ዝም እንደሚል በግ እንዲሁ አፉን አልከፈተም፡፡ . . ግፍን አላደረገም ነበር፤ በአፉም ተንኮል አልተገኘበትም ነበር›› (ኢሳ. 53፡7)፤ መጽሐፍ ሁሉ ኃጢአትን ሠርተዋል ባለበት ክፍል ‹‹ጉሮሮአቸው እንደ ተከፈተ መቃብር ነው፤ በመላሳቸውም ሸንግለዋል፤ የእባብ መርዝ ከከንፈሮቻቸው በታች አለ፤ አፋቸውም እርግማንና መራርነት ሞልቶበታል . . ›› (ሮሜ 3፡13) ይለናል፡፡ በዚህ ዓለም በዚህ መንገድ የሚከፈቱ አንደበቶችን ማሰብ እጅግ የሚረብሽ ነው፡፡ ከተከፈተ መቃብር እንደሚወጣው ደስ የማያሰኝ ጠረን የሕይወት አየር ብክለቶች ምንጫቸው እንዲህ ያለም ነው፡፡

መድኃኒታችን ኢየሱስ በክፉዎች ከበባ መካከል በሆነበት የሕማሙ ጊዜ በዝምታው ውስጥ የነበረውን የጽድቅ ጩኸት፤ ለሚሰማ ጆሮ በእውነት ላይ መደላደልን የሚሰጥ ነው፡፡ እርሱ መከራን ባፀናችበት ዓመፀኛ ዓለም፤ በሥና በደም ፊት ዓመፅን አልተናገረም፤ ዓመፅንም አላደረገም፡፡ ‹‹ኃጢአትን የሚያደርግ ሁሉ ዓመፅን ደግሞ ያደርጋል . . ኃጢአትን የሚያደርግ ከዲያብሎስ ነው፤ ዲያብሎስ ከመጀመሪያ ኃጢአትን ያደርጋልና፡፡ ስለዚህ የዲያብሎስን ሥራ እንዲያፈርስ የእግዚአብሔር ልጅ ተገለጠ›› (1 ዮሐ. 3፡4፤8) እንደተባለ፤ ስለ ኃጢአታች ‹‹በመከራው ታገሠ›› (ዕብ. 12፡2)፡፡

ጎሽ ለልጇ ስትል ተወጋች እንዲሉ፤ እርሱ ስለ እኛ ስለ በደላችን ተላልፎ የተሰጠ ነው (ሮሜ 4፡24፤ ዮሐ. 15፡13)፡፡ ሸላቾቹ ፊት ያለን በግ አስባችሁታል? የብሉይ ኪዳን መጻሕፍት ጥቅልል ሁሉም በአንድነት አንድ ጥያቄ ያቀርባሉ፤ ‹‹የመሥዋዕቱ በግ ወዴት ነው?›› (ዘፍ. 22፡7) የሚል፤ እንዲሁ የአዲስ ኪዳን መጻሕፍት ጥቅልል መልስ ይሰጣሉ፤ ‹‹እነሆ የዓለምን ኃጢአት የሚያስወግድ የእግዚአብሔር በግ›› (ዮሐ. 1፡29)፡፡ በዕብራውያን መልእክት ‹‹እነሆ በመጽሐፍት ጥቅልል ስለ እኔ እንደ ተጻፈ›› (ዕብ. 10፡7) ተብሎ እንደተነገረ፤ እያንዳንዱ የቅዱስ መጽሐፍ ጥቅልል ገጽ የሕያው እግዚአብሔርን ልጅ ከሰማይ በታች እንድንበት ዘንድ የሚገባን (ሐዋ. 4፡12) አድርገው ያቀርቡልናል፡፡

እርሱ ጌታ የዓለም መድኃኒት ለግፍና ለተንኮል አፉን አልከፈተም፡፡ ተወዳጆች ሆይ፤ በእውነትም በክርስቶስ ኢየሱስ እግዚአብሔርን እየመሰልን ልንኖር የምንወድ ከሆንን (2 ጢሞ. 3፡12) ክርስቶስ ስለ ጽድቅ የተቀበለውን መከራ እንካፈላለን፡፡ እንግዲያስ እርሱ አፉን ባልከፈተበት ስፍራ ላይ ዝምታን መልመድ ያስፈልገናል፡፡ በትክክለኛው ጊዜ፤ ትክክለኛ ቦታ ላይ፤ ትክክለኛ ነገር ማድረግ ‹‹ክርስቶስ ምን ያደርግ ነበር›› ብሎ መመላለስ ነው፡፡ ለለዓመፃ፤ ለስድብ፤ ለአድማ፤ ለማቁሰል፤ ለተንኮል . . ብዙ አፎች ይከፈታሉ፤ እናንተ ግን ከሚድኑት የሆናችሁ አፋችሁን አትክፈቱ (ስድብ አይደለም)፡፡

የሐዋርያት ሥራ መጽሐፍ ‹‹ፊልጶስም አፉን ከፈተ›› (ሐዋ. 8፡35) ይለናል፡፡ ጌታ ኢየሱስ እንደ በግ በሸላቾቹ ፊት ዝም ባይል ኖሮ፤ እስከ መስቀል ሞት ባይታዘዝ (ፊል. 2፡8) ፊልጶስ አፉን ምን ብሎ ይከፍት ነበር? ብለን ለማሰብ እንገደዳለን፡፡ በኢየሩሳሌም እንደ ዋና (አዕማድ) መስለው (ገላ. 2፡9) የሚታዩት ሐዋርያው ጴጥሮስና ዮሐንስ ‹‹እኛስ ያየነውንና የሰማነውን ከመናገር ዝም ማለት አንችልም›› (ሐዋ. 4፡20) እንዳሉ፤ ፊልጶስም የተናቀ፤ ከሰውም የተጠላ፤ የሕማም ሰው ደዌንም የሚያውቅ፤ ስለ መተላለፋችን የቆሰለ፤ ስለ በደላችንም የደቀቀ ስለ ሆነልን ኢየሱስ ወንጌልን ሰበከለት፡፡ አፍን ለዚህ መክፈት ምን ያህል የተገባ እንደ ሆነ ውጤቱ ያስረዳናል፡፡ ጃንደረባው ‹‹ኢየሱስ ክርስቶስ የእግዚአብሔር ልጅ እንደ ሆነ አምናለሁ›› አለ፤ ሁለቱም ወደ ውኃ ወረዱ፤ ‹‹አጠመቀውም›› (ቁ. 37-39)፡፡

በ34 ዓ/ም ክርስትና አዲስ ኪዳን ወደ አገራችን እንደ ገባ የምንተርክበት መጽሐፍ ቅዱሳዊ መሠረት በዚህ ክፍል ላይ ያለው ታሪክ ነው፡፡ አገልጋዩ ፊልጶስ የተናገረውን፤ ተገልጋዩ ጃንደረባ የሰማውን ወንጌል ልብ ስንል ‹‹ስለ ልጁ ስለ ኢየሱስ ክርስቶስ›› ነው፡፡ ‹‹ማንም ቢሆን የተለየውን ቢሰብክላችሁ የተረገመ ይሁን›› (ገላ. 1፡8-9)፡፡ በጃንደረባው ዘንድ የቃሉን ፍቺ የሚሻ ልብ መኖሩ፤ በዚህ ዓለም ነገር ባለ ሥልጣን ሆኖ ሳለ ለመስማትና በሙሉ ፈቃድ ለመቀበል የእሽታ መንፈስ ማሳየቱ ‹‹ታዳምጥ ዘንድ ጌታ ልብዋን ከፈተላት›› (ሐዋ. 16፡14) እንደተባለላት ልድያ ካልሆነ በቀር በሥጋና በደም አሳብ ይህ አይሆንም፡፡

እንኳን የሰዎችን መከራ ምቾታቸውን መሠረት ያደረግ ወደ አብ የሚያደርስ የምስራች ፈጽሞ የለም፡፡ ‹‹ኃጢአተኞችን ሊያድን ክርስቶስ ኢየሱስ ወደ ዓለም መጣ›› (1 ጢሞ. 1፡15) እንደተባለ፤ ለሰዎች ሁሉ የምንናገረው የምስራች የክርስቶስ ሞትና ትንሣኤ ነው (ሮሜ 4፡24-25)፤ ከዚህ ውጪ አፋችሁ እንዳይከፈት አብልጣችሁ ልትጠነቀቁ ያስፈልጋችኋል፡፡ ጃንደረባው ‹‹ደስ ብሎት መንገዱን ይሄድ ነበር›› (ቁ. 39)፤ በሕያው እግዚአብሔር ልጅ ከማመን የሚበልጥ ምን የደስታ ርዕስ አለ? እንዲህ ያለው ደስታ ይሁንላችሁ!

ቤተ ፍቅር፤ በቅርብም በሩቅም ላላችሁ ቤተ ሰዎቻችን መልካም በዓል እንላለን!

‹‹ . . . ስለ እኛ ደግሞ ጸልዩ፤›› /ቆላ. 4፡3/!

መልእክት ፡ ኀበ ፡ ሰብአ ፡ ኤፌሶን፡፡ (1)

2016-04-29T03:51:00.001-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

የሐዋርያው ፡ የጳውሎስ ፡ መልእክት ፡ ወደ ፡ ኤፌሶን ፡ ሰዎች፡፡

አርብ ሚያዚያ 21 ቀን 2008 የምሕረት ዓመት

‹‹ወአርአየነ ምክረ ፈቃዱ በከመ ሥምረቱ›› (ኤፌ. 1፡9)!

· የመልእክቱ ጸሐፊ፡ ሐዋርያው ቅዱስ ጳውሎስ

መልእክቱ የተጻፈበት ጊዜ፡ ከ61-63 ዓ/ም ባሉት ዓመታት

· መልእክቱ የተጻፈበት ቦታ፡ ሮም

በጊዜው የመልእክቱ ተቀባዮች፡ የኤፌሶን ቤተ፡ ክርስቲያን (ማኅበረ ምእመናን)

· የመልእክቱ ጭብጥ፡ የክርስቶስ ባለ ጠግነት በቤተ፡ ክርስቲያን

(The Orthodox study Bible)

ሐዋርያው በክርስቶስ እስር ሆኖ ከጻፋቸው መልእክታት የኤፌሶን መልእክት አንዱ ነው፡፡ ባለፈው ጥናታችን በሐዋርያው ለግለሰብ ከተጻፉት መልእክታት መካከል በእስር ቤት ሆኖ የጻፈውን የፊልሞናን መልእክት ማጥናታችንን እናስታውሳለን፡፡ እግዚአብሔር ቢፈቅድ፤ ቅዱስ መንፈሱም ቢረዳን ይህንን መልእክት ጨምሮ ሐዋርያው በእስር ቤት ሆኖ የጻፋቸውን ቀሪ መልእክታት እናጠናለን፡፡ በዚህ አጋጣሚ ባለፈው ጥናት ብዙ እንደ ተጠቀማችሁ፤ ወደ እግዚአብሔር ቃል ፊታችሁን ዘወር እንዳደረጋችሁ በአንድም በሌላ መንገድ ለገለጻችሁልኝ ስለ እናንተ እግዚአብሔርን አመሰግናለሁ፡፡

ተወዳጆች ሆይ፤ ‹‹ . . ሰው በጨለማ ስፍራ የሚበራን መብራት እንደሚጠነቀቅ ይህን ቃል እየጠነቀቃችሁ መልካም ታደርጋላችሁ›› /2 ጴጥ. 1፡19/ ተብሎ እንደ ተጻፈ፤ የእግዚአብሔርን ቃል መረዳትና መታዘዝ አካሄዳችንን ከእግዚአብሔር ጋር የምናደርግበት ትክክለኛ ሕይወት ነው፡፡ እግዚአብሔር እንደሚያይ እይታን የምናገኘው በቃሉ በኩል ነው፡፡ ሐዋርያው ‹‹የእግዚአብሔር ቃል ሕያው ነውና የሚሠራም . . ›› ካለ በኋላ በዚያው ንባብ ‹‹እኛን በሚቆጣጠር በእርሱ ዓይኖቹ ፊት . . ›› /ዕብ. 4፡12-13/ በማለት ቃሉን ከእግዚአብሔር እይታ ጋር ያስተሳስረዋል፡፡

የእግዚአብሔር ቃል ሲኖረን እንኳን ሌላውን ራሳችንን የምናይበት ማየት ሚዛኑ ልክ ይሆናል፡፡ የሰውን ፊት አይቶ በሚያደላው ዓለም መካከል የቃሉን ቱንቢ መያዝ ከብዙ ኪሳራ ይታደጋል፡፡ ለእኛ በጨለማ ስፍራ አጥርተን የምናይበት፤ ያለን ብቸኛ ብርሃን ‹‹ቃሉ›› ነው፡፡ የአምላካችንን ቃል በመጠንቀቅ መኖር ለእኛ የለመለመ መስክ፤ የእረፍት ውኃ ነው፡፡ መልካምነታችን ይህንን መሰረት ከማድረግ የወጣም ሊሆን አይችልም፡፡ የሰዎችን ስሜትና ፍላጎት በመጠንቀቅ በእግዚአብሔር ፊት መልካም የሆነውን ልናደርግ አይሆንም፡፡ የሰው መልካም ‹‹መርገም ጨርቅ›› (ኢሳ. 64፡6) ከሚል ያለፈ ማብራሪያ አልተሰጠውምና፡፡

የጠላታችንን የውጊያ ሜዳ በተመለከተ ‹‹ . . የክርስቶስ የክብሩ ወንጌል ብርሃን እንዳያበራላቸው የዚህ ዓለም አምላክ የማያምኑትን አሳብ አሳወረ›› /2 ቆሮ. 4፡4/ ተብለናል፡፡ ደግሞ ሐዋርያው በሌላ ስፍራ ‹‹ . . የልባችሁ ዓይኖች ሲበሩ . . ታውቁ ዘንድ . . ›› (ኤፌ. 1፡18) ይለናል፡፡ ፈታኙ እንዳይበራልን (እንዳናውቅ) በብርቱ የሚሠራው ክርስቶስን ነው፡፡ ‹‹እነሆ በመጽሐፍ ጥቅልል ስለ እኔ . . ›› (ዕብ. 10፡7) እንደተባለ፤ እናስተውለውና እናምነው ዘንድ በቅዱሱ የመጽሐፍ ጥቅልል የአባቱን ፈቃድ በሙላት በምድር የከወነ ልጅ ‹‹እኔ›› ያለው ኢየሱስ ክርስቶስ ነው፡፡

አለማወቃቸው እንደ ጎዳቸው በግልጥ የሚናገሩ ሰዎችን እንሰማለን፡፡ ዳሩ ግን ‹‹ምን አለማወቅ?›› ብለን ብንጠይቅ፤ የሚቆጩባቸው ነገሮች የዘላለምን ቀርቶ የጊዜውን ለማሻገር በራሳቸው ብቁ አይደሉም፡፡ ሰው ‹‹ዘላለም መሞትን›› ተሸክሞ ፊቱን ወደ ሕያው እግዚአብሔር ዘወር ማድረግ አለመቻሉ አስገራሚ ነው፡፡ የጊዜውን አለማወቅ ኪሳራው በጊዜው የሚሰላ ሲሆን የዘላለሙን አለመረዳት ደግሞ የሚያስከፍለው ዋጋ በዘላለም የሚሰላ ነው፡፡ ተወዳጆች፤ ቃሉን አጥኑ!

በኤፌሶን መልእክት በደኅንነታችን ውስጥ የአብ፤ ወልድና መንፈስ ቅዱስን አንድ አምላክ ሥራ፤ በክርስቶስ ለቤተ፡ ክርስቲያን የተገለጠውን በረከት፤ የበረከታችን መሰረት ክርስቶስ፣ የበረከታችን ስፍራ ሰማይ፣ የበረከታችን ዓይነት መንፈሳዊ እንደ ሆነ፤ ለተገለጠው የእግዚአብሔር ጸጋ የእኛን ትክክለኛ ምላሽ፤ በመንፈሳዊ ውጊያዎቻችን ላይ የእግዚአብሔርን ኃይል፤ የምናይበት እጅግ የሚያበረታ የመጽሐፍ ቅዱስ ክፍል ነው፡፡

ራሳችሁን እንዲህ ጠይቁ፡ -

· ቃሉን ለመስማት ምን ያህል የልብ ዝግጅት አለኝ?

· የሰማሁትን ቃል ከመጽሐፍ ቅዱስ ጋር ለማመሳከር ምን ያህል እተጋለሁ?

· ያልተረዳሁትን ለመረዳት ምን ያህል ፍላጎት አሳያለሁ?

‹‹ . . . ስለ እኛ ደግሞ ጸልዩ፤›› /ቆላ. 4፡3/!

መልእክት ኀበ ፊልሞና፡፡ (8)

2016-04-09T21:55:00.001-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ቅዳሜ ሚያዚያ 1 ቀን 2008 የምሕረት ዓመት

(መልእክት ወደ ፊልሞና)

‹‹እምጳውሎስ ሙቁሐ ለኢየሱስ ክርስቶስ፡ (ኤፌ. 3፡1)!››

No. 14-17, ‹‹While the master-slave relationship continues, it is transcended by brotherhood in Christ.›› /The Orthodox Study Bible; New Testament and Psalms New King James Version/.

‹‹አምኀከ ኤጳፍራስ ዘተጼወወ ምስሌየ በኢየሱስ ክርስቶስ፡፡››

‹‹በክርስቶስ ኢየሱስ ከእኔ ጋር የታሰረ ኤጳፍራ . . ››፡-

ሐዋርያው ጳውሎስ በዚህ መልእክት የስንብት ክፍል የጠቀሰው ሌላው የተወደደ አገልጋይ ኤጳፍራ ነው፡፡ ሐዋርያው ይህንን መልእክት የጻፈው በእስር ቤት ሆኖ እንደ መሆኑ፤ አብሮት ስለ ክርስቶስ የታሠረ ሌላውን አገልጋይ ይጠቅሳል፡፡ ባለፈው ጥናታችን ሐዋርያው ከእስር ተፈትቶ በፊልሞና ቤት ያለችውን ቤተ ክርስቲያን እንደሚጎበኛት ያለውን ተስፋ ለተወደደውና አብሮት ለሚሠራ ለፊልሞና ሲገልጽለት አይተናል፡፡

በእግዚአብሔር ቃል ውስጥ ስለ ኤጳፍራ የምናገኘውን ምስክርነት በመመልከት የእግዚአብሔር መንፈስ የሚያስተምረንን እንወስዳለን፡፡ በቆላስይስ መልእክት ‹‹ከተወደደ ከእኛም ጋር አብሮ ባሪያ ከሆነው ከኤጳፍራ እንዲህ ተማራችሁ፤ እርሱም ስለ እናንተ ታማኝ የክርስቶስ አገልጋይ ነው፡፡ ደግሞም በመንፈስ ስለሚሆን ስለ ፍቅራችሁ አስታወቀን፡፡›› (ቆላ. 1፡7-8) የሚል ምስክርነት በሐዋርያው ተጽፎ እናነባለን፡፡

ኤጳፍራ በቆላስይስ ቤተ ክርስቲያን ምስረታ የወንጌልን እውነት ቃል የሰበከ እና በእግዚአብሔር ፈቃድ ሁሉ ተረድተውና ፍጹማን ሆነው እንዲቆሙ ሁልጊዜ በጸሎቱ ስለ እነርሱ የሚጋደል የክርስቶስ ባሪያ ነው (ቆላ. 4፡12)፡፡ በሎዶቅያና በኢያራ ከተማም ስላሉቱ እጅግ ይቀና ነበር፡፡ ወደ ሮም ሄዶ ከሐዋርያው ጳውሎስ ጋር በተገናኘ ጊዜ በመንፈስ ስለሆነው ስለ ቆላስይስ ምእመናን ፍቅር አስታውቋል፡፡ በዚህ መልእክት መጀመሪያ አሳብ እንደምንረዳው የቆላስይስ ምእመናን ከኤጳፍራ ‹‹በሰማይ ከተዘጋጀላችሁ ተስፋ የተነሣ፤ በክርስቶስ ኢየሱስ ስለ እምነታችሁ፤ ለቅዱሳንም ሁሉ ስላላችሁ ፍቅር ሰምተን . .›› እንደ ተባለ፤ እምነት፤ ተስፋና ፍቅር (1 ቆሮ. 13፡13) ተምረዋል፡፡

እነዚህ በአንድ ክርስቲያን ውስጥ መንፈስ ቅዱስ የሚያስገኛቸው የተባረኩ ነገሮች ናቸው፡፡ እምነት ከእግዚአብሔር ጋር ያለን ግንኙነት የሚመሰረትበት ትክክለኛ ስፍራ ሲሆን፤ ተስፋ ደግሞ የእምነታችንን ፍጹም በረከት የምንገናኝበት መድረሻ ነው፤ ፍቅር ጅማሬንም ፍጻሜንም የሚያስቀጥል የነገሮች ሁሉ ማሠሪያ ነው፡፡ በክርስቶስ ያለን እምነት የሚገለጠው ለምእመናን ሁሉ በሚኖረን ፍቅር ነው፡፡ እምነት፤ ተስፋ፤ ፍቅር መሰረታቸው የወንጌል እውነት ቃል ነው፡፡

ኤጳፍራ ልክ እንደ ሐዋርያው ጳውሎስ በክርስቶስ ኢየሱስ ከእርሱ ጋር የታሰረ ነበር፡፡ ስለ ቆላስይስ ቤተ ክርስቲያን ለሐዋርያውና ለሌሎች አገልጋይ ወንድሞች የነገራቸውም በዚህ ጊዜ ነበር፡፡ ‹‹ታማኝ የክርስቶስ አገልጋይ›› እንደ ሆነ የተመሰከረለት እርሱ ስለ ቆላስይስ ቤተ ክርስቲያን በሚያገለግሉ በሌሎቹ ዘንድ ያስታወቀው እውነቱን ነው፡፡ ኤጳፍራ የስሕተት ትምህርት ፈተና ውስጥ ለነበረችው ለቆላስይስ ቤተ ክርስቲያን ምን ያህል የተሰጠ አገልጋይ እንደ ነበር ልብ እንላለን፡፡ የጌታ ጸጋ የምናገለግል ብቻ ሳንሆን ላገለገልናቸው በጸሎት የምንጋደል ያድርገን!

በመቀጠል የምናየው ሐዋርያው ‹‹አብረውኝ የሚሠሩ›› በማለት የጠቀሳቸውን አገልጋዮች ነው፡፡ ስለ ማርቆስ በእግዚአብሔር ቃል ውስጥ የምናውቀውን በጥቂቱ እንመልከት፡፡ በአንጾኪያ በርናባስን እና ሐዋርያው ጳውሎስን እስኪለያዩ ድረስ ወደ መከፋፋት ያደረሳቸው ማርቆስ የተባለው ዮሐንስ ጉዳይ እንደ ነበረ እናነባለን (ሐዋ. 15፡36-41)፡፡ በውጤቱም በርናባስ ማርቆስን፤ ሐዋርያው ጳውሎስ ደግሞ ሲላስን መርጠው ለአገልግሎት ተሰማሩ፡፡ ሐዋርያው ከእነርሱ ጋር ማርቆስን ሊወስድ ያልፈቀደበትን ምክንያት ‹‹ከጵንፍልያ ተለይቶ ነበርና፤ ወደ ሥራም ከእነርሱ ጋር አልመጣም ነበርና›› ተብለናል፡፡

በኋላ ግን ለጢሞቴዎስ ሁለተኛ ጊዜ በተላከለት መልእክት ‹‹ማርቆስ ለአገልግሎት ብዙ ይጠቅመኛልና ይዘኸው ከአንተ ጋር አምጣው›› (2 ጢሞ. 4፡11) የሚል እናነባለን፡፡ ‹‹ይጠቅመኛል›› የሚለው ቃል አናሲሞስ (ጠቃሚ) ከሚለው ጋር ያለውን የትርጉም ተዛምዶ አስተውሉ፡፡ ሐዋርያው አስቀድሞ ብዙም እንደማይጠቅም ያሰበው አልያም ብዙ የማይጠቅም የነበረው ማርቆስ በኋላ በብዙ የሚጠቅም እንደ ሆነ ተመስክሮለት እንመለከታለን፡፡

ተወዳጆች ሆይ፤ እንደማትጠቅሙ በልባችሁና በሌሎች ልብ የታሰባችሁበት ጊዜ ዛሬም ድረስ ሕመማችሁ ይሆናል፡፡ ዳሩ ግን የእግዚአብሔር ጸጋ ይህንን ይለውጣል፡፡ የእግዚአብሔር ቃል ያድግና ይበዛ እንደ ነበር በተጠቀሰበት ክፍል በርናባስና ሳውል አገልግሎታቸውን ፈጽመው ከኢየሩሳሌም ወደ አንጾኪያ በተመለሱ ጊዜ ማርቆስ የተባለውን ዮሐንስን ከእነርሱ ጋር ይዘውት መጥተው ነበር (ሐዋ. 12፡25)፡፡

በዚያን ጊዜ በመካከላቸው የነበረው ሁሉ በፍቅር ነበር፡፡ በኋላ ግን ማርቆስ ለበርናባስና ጳውሎስ መከፋፋት በመካከላቸው እስከሚሆን ድረስ የልዩነት ርእስ ሆነ፡፡ ደግሞ በሌላ ጊዜ ‹‹ለአገልግሎት ብዙ ይጠቅመኛል›› ተባለ፡፡ አሁንም ለፊልሞና በተጻፈው መልእክት ውስጥ ማርቆስ ‹‹አብሮ ሠራተኛ›› ነው፡፡ ሐዋርያው ለተሠራው ሥራና ለተገኘው ውጤት ሁሉ ራሱን በብቸኝነት አላቀረበም፤ በብቸኝነት የምንገልጠው ጌታን ብቻ ነውና፡፡ በአብያተ ክርስቲያናት መካከል የእግዚአብሔር ጸጋ የተገለጠው በእኔ ብቻ ሳይሆን በእነርሱም ነው እንደ ማለት ያለ ሐዋርያው የተወደዱትን አገልጋዮች ከራሱ ጋር አብሮ ይጠቅሳል፡፡

ቀጣይ የምናገኘው የመቄዶንያ ሰው የሆነ የተሰሎንቄውን አርስጥሮኮስን ነው (ሐዋ. 27፡2)፡፡ ሁለት ሰዓት ሙሉ የኤፌሶን አርጤምስ ታላቅ ናት እየተባለ በተጮኸባት የኤፌሶን ከተማ በነበረው አገልግሎት አርስጥሮኮስ በዚያ እንደ ነበር፤ በከተማው ከሆነው ድብልቅልቅ የተነሣም ነጥቀው ወደ ጨዋታ ስፍራ እንደወሰዱት እናነባለን (ሐዋ. 19፡29)፡፡ በዚያ በኤፌሶን ቤተ ክርስቲያን ምስረታ ከሐዋርያው ጋር የነበረውን የአገልግሎት ኅብረትና የከፈለውን ዋጋ መረዳት እንችላለን፡፡ እንዲሁ ሐዋርያው ታስሮ ሳለ ‹‹አብሮ ከእኔ ጋር የታሰረ›› በማለት እንደሚነግረን የቆላስይስ መልእክት ሲጻፍ ከሐዋርያው ጋር በእስር እንደ ነበር እናውቃለን (ቆላ. 4፡10)፡፡

ዴማስና ሉቃስ፤ በቆላስይስ መልእክት እንደ ተጠቀሰው ‹‹የተወደደው ባለ መድኃኒቱ ሉቃስ ዴማስም ሰላምታ ያቀርቡላችኋል›› (ቆላ. 4፡14) ተብሎ ተጽፎአል፡፡ ስለ ዴማስ በዚህ ክፍል ከተጠቀሰው በተጨማሪ የምናገኘው ‹‹ዴማስ የአሁኑን ዓለም ወዶ ትቶኛልና›› (2 ጢሞ. 4፡10) የሚል ነው፡፡ ይህ አገላለጽ አዎንታዊ ባይሆንም ዴማስ የተወው ሐዋርያው ጳውሎስን እንደ ሆነ ልብ ማለት አግባብ ካልሆነ ፍርድ ይጠብቀናል፡፡ ዳሩ ግን ሐዋርያው ጳውሎስን ስለ መተዉ ሳይሆን የአሁኑን ዓለም ስለ መውደዱ ሐዋርያው ዮሐንስ የሚለው አለው፡- ‹‹ . . ማንም ዓለምን ቢወድ የአባት ፍቅር በእርሱ ውስጥ የለም›› (1 ዮሐ. 2፡15-16)፡፡ ያለ አባት ፍቅር መኖር ውጤቱ ደግሞ ግልጽ ነው፡፡

ከአሕዛብ ወገን የሆነው ሉቃስን በተመለከተ የጌታችን የኢየሱስ ክርስቶስን ወንጌል (የሉቃስ ወንጌል) እና የመንፈስ ቅዱስ ሥራ (የሐዋርያት ሥራ) ሁለት የአዲስ ኪዳን መጻሕፍትን እንደ ጻፈ እናውቃለን፡፡ ሐዋርያው ስለ እርሱ ሲናገር ‹‹የተወደደ ባለ መድኃኒት›› ይለዋል፡፡ ቅዱስ ሉቃስ ሐኪምና መድኃኒት አዋቂ ቢሆንም እንኳ ‹‹ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና›› (ሉቃ. 2፡11) ለማለት አልተፈተነም፡፡

የትኛውም ጥበብ ‹‹ጥበብሰ ውእቱ ኢየሱስ ክርስቶስ›› የሆነውን ከመናገር ሊከለክለን አይገባም፡፡ በአሁኑ ዓለም ያለው በሚመጣው ዓለም የሚገለጠውን ክብር ሊጋርድብን አንፍቀድለት፡፡ ቅዱሱ ቃል የዚህችን ዓለም ጥበብ በእግዚአብሔር ፊት ሞኝነት ነው ይለናል (1 ቆሮ. 3፡18)፡፡ እናንተስ ፊት? ስልጣኔ እንደ ጨመረ፤ ቴክኖሎጂ እንደረቀቀ፤ የሰዎች ማስተዋል እንደ ሰፋ ስትሰሙ በእርግጥም ዓለም ሞኝነቷ አስክሯታል ማለት ነው፤ ማንም ራሱን አያታልል፡፡

‹‹ሰላምታ ያቀርቡልሃል›› የሚለው፤ የተወደደና አብሮ ሠራተኛ ለሆነው ለፊልሞና በሌሎቹ አገልጋዮች ዘንድ ያለውን ተቀባይነትና ኅብረት የበለጠ የሚያጠናክር ነው፡፡ እንዲህ ባለው ቅዱስ የሰላምታ ልውውጥ ውስጥ ፍቅርን መመልከት ከባድ አይሆንም፡፡ ሐዋርያው በሌሎቹ መልእክቶቹ እንዳደረገው ከእርሱ የተላከ መልእክት እንደ ሆነ በሚያረጋግጥ ሁኔታ ለፊልሞና የጻፈለትን ይፈጽማል፤ እኔም ፈጸምኩ፡፡

‹‹ወጸጋሁ ለእግዚእነ ኢየሱስ ክርስቶስ ምስለ መንፈስክሙ፡፡››

‹‹የጌታችን የኢየሱስ ክርስቶስ ጸጋ ከመንፈሳችሁ ጋር ይሁን፤ አሜን፡፡››!

‹‹ . . . ስለ እኛ ደግሞ ጸልዩ፤›› /ቆላ. 4፡3/!

መልእክት ኀበ ፊልሞና፡፡(7)

2016-04-08T15:25:00.000-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

አርብ መጋቢት 30 ቀን 2008 የምሕረት ዓመት

(መልእክት ወደ ፊልሞና)

‹‹እምጳውሎስ ሙቁሐ ለኢየሱስ ክርስቶስ፡ (ኤፌ. 3፡1)!››

‹‹አእሚርየ ከመ ትወስክ እንዘ አዘዝኩከ፤ ካዘዝሁህም አብልጠህ እንድትሠራ ዐውቄ ጻፍኩልህ፡፡›› /ቁ. 21/

ፍቅርን ለሚመለከቱ ቅን ልቦች የፊልሞና መልእክት መዋደድን ሊሞላን የሚችል ቅዱስ አሳብ የያዘ መጽሐፍ ነው፡፡ ግንኙነቶቻችንን የምንጠብቅበት ሰማያዊ መመሪያና መለኮታዊ አካሄድን በጥልቀት እንረዳበታለን፡፡ ሐዋርያው ጳውሎስ በፊልሞና እና በአናሲሞስ መካከል የተፈጠረውን መለያየት አስመልክቶ ‹‹ልቡን የሚያሳርፍ›› መፍትሔ እንዲመጣ በፍቅር ዝቅ ማለቱን እንመለከታለን፡፡ በአገራችን የሰዎችን አለመግባባት ለመፍታት የሚያስተራርቁ ሰዎች ድንጋይ ጭምር ተሸክመው በመካከል እንደሚቆሙ እናውቃለን፡፡

በዚህ አጭር መልእክት ውስጥ የጌታችን የኢየሱስ ክርስቶስ ስም አሥር ጊዜ ተጠቅሷል፡፡ ኢዮብ ‹‹ይኸው ስትሰድቡኝ አሥር ጊዜ ነው፤ ስታሻክሩኝም አላፈራችሁም›› (ኢዮ. 19፡3) እንዳለ፤ እንዲሁም በልማድ ‹‹አሥር ጊዜ አትነዝንዘኝ›› እንደሚባል (ይህንን ለመጀመሪያ ጊዜ ያለው የመጽሐፉ ኢዮብ ይመስለኛል)፤ ሐዋርያው ለቆሮንቆስ ምእመናን ‹‹ነገር ግን ወንድሞች ሆይ፤ ሁላችሁ አንድ ንግግር እንድትናገሩ በአንድ ልብና በአንድ አሳብም የተባበራችሁ እንድትሆኑ እንጂ መለያየት በመካከላችሁ እንዳይሆን በጌታችን በኢየሱስ ክርስቶስ ስም እለምናችኋለሁ›› (1 ቆሮ. 1፡10) ያለውን እዚህም ተግባራዊ እንዳደረገ ልናስብ እንችላለን፡፡

የጌታችን የኢየሱስ ክርስቶስ ስም የኃጢአታችንን ስርየት የተቀበልንበት ስም እንደ ሆነ ነቢያት ሁሉ ይመሰክሩለታል (ሐዋ. 10፡43)፡፡ ስሙ ሸክም ሳይሆን ሸክማችን የወረደበት ነው፡፡ የዋህ በልቡም ትሑት፤ ቀንበሩ ልዝብ፤ ሸክሙም ቀሊል (ማቴ. 11፡29) በሆነው ጌታ ስም የሚያስተራርቁ ብጹአን ናቸው (ማቴ. 5፡9)፤ መጠሪያቸውም የእግዚአብሔር ልጆች ነው፡፡ ሐዋርያው ጳውሎስ ፊልሞናን እየለመነው ያለው ከስም ሁሉ በላይ ያለውን ስም በወረሰው፤ በሰማይና በምድር ከምድርም በታች ያሉት ሁሉ በእርሱ ስም ይንበረከኩለት ዘንድ ባለው በጌታችን በኢየሱስ ስም ነው (ፊል. 2፡9-11፤ ዕብ. 1፡4)፡፡

ሐዋርያው ስለ ፊልሞና የሚሰጠውን ምስክርነት ልብ በሉ፤ ‹‹ከምልህ ይልቅ አብልጠህ እንድታደርግ አውቄ፤ እንድትታዘዝም ታምኜ›› ይለዋል፡፡ እንዲህ ላለው የጌታ ሠራተኛ መልእክት መጻፍ በእጅጉ ደስ የሚያሰኝ ነው፡፡ ለአመጸኞች ስለ ተጻፉ ደብዳቤዎች የምንኖርበት የአሁኑ ዓለም መልክ ምስክር ነው፡፡ አሁን እናንተ ይህንን ጽሑፍ እያነበባችሁ ባላችሁበት ቅጽበት ሰዎች ስለሚለዋወጡት መልእክት ጥቂት አስቡ፡፡ ምን ያህሉ የፍቅር ይዘት ያላቸው ይመስልሃል? ምን ያህሉስ የእውነት መሠረት ያላቸው ይመስልሻል?

በሚታዘዙ ልቦች መካከል የሚኖረው የመልእክት ልውውጥ በመለኮታዊ እረፍት የተሞላ ነው፡፡ እንዲህ ባሉ አንድነቶች ዘንድ ድብቅነት ቦታ የለውም (ሐዋርያው ‹‹አውቄ›› እንዲል)፤ የይፈጸም ይሆን? ሥጋትም አናስተውልም (ሐዋርያው ‹‹ታምኜ›› እንዲል)፡፡ ተወዳጆች ሆይ፤ ፊልሞና ከልኩ አብልጦ መልካም የሆነውን የሚያደርግ ክርስቲያን ነበር፡፡ በእናንተ ዘንድ የሰዎች ልካቸው ተሰፍሮ ቢሆን፤ ከዚያ ከፍ ብላችሁ ጽድቅ የሆነውን አድርጉ፡፡ ‹‹ . . እንደ ተባለ ሰምታችኋል፡፡ . . ባልንጀራህን ውደድ ጠላትህንም ጥላ እንደ ተባለ ሰምታችኋል፡፡ . . . ምን ብልጫ ታደርጋላችሁ?›› (ማቴ. 5፡38-48)፡፡

ሐዋርያው ጳውሎስ የሚጽፈው መልእክት ከንቱ እንዳላይደለ፤ ‹‹አውቄ›› እና ‹‹ታምኜ›› የሚሉት ቃላት እርግጠኝነትን ይገልጹልናል፡፡ በሌሎቹ መልእክታት ፊልሞናን በተመለከተ አንዳች ክፉን አለማግኘታችን እንደ ተጻፈው እንደዚያው በአናሲሞስና በፊልሞና መካከል ላለው ችግር የተጻፈው መልእክት መፍትሔ እንደ ሆነ እንረዳለን፡፡ ከእግዚአብሔር የሆነው ሁሉ የማይፈታው ቋጠሮ የለም፡፡ ባለ እንቆቅልሾች ፈቺውን እንኩ፤ ክርስቶስ ኢየሱስ!

‹‹የማስተናገጃ ቤት አዘጋጅልኝ››

‹‹እግዚአብሔር ቅዱሳንን ስላገለገላችሁ እስከ አሁንም ስለምታገለግሉአቸው ያደረጋችሁትን ሥራ ለስሙም ያሳያችሁትን ፍቅር ይረሳ ዘንድ ዓመፀኛ አይደለምና›› (ዕብ. 6፡10)፤ ያለን ሐዋርያ፤ ‹‹በጸሎታችሁ ለእናንተ እንድሰጥ ተስፋ አደርጋለሁና የማስተናገጃ ቤት አዘጋጅልኝ›› በማለት ፊልሞናን ይጠይቀዋል፡፡ ሐዋርያው ጳውሎስ መልእክቱን የጻፈው ለፊልሞና ቢሆንም በመልእክቱ መግቢያ ላይ ‹‹ለእኅታችንም ለአፍብያ ከእኛም ጋር አብሮ ወታደር ለሆነ ለአርክጳ በቤትህም ላለች ቤተ፡ ክርስቲያን›› እንዳለ አሳስባችኋለሁ፡፡

ሐዋርያው ለሮሜ ክርስቲያኖች ‹‹ትጸኑ ዘንድ መንፈሳዊ ስጦታ እንዳካፍላችሁ ላያችሁ እናፍቃለሁና›› (ሮሜ 1፡11) እንዳለ፤ በፊልሞና ቤት የምእመናን ኅብረት እንደ መኖሩ በሐዋርያው በኩል የእግዚአብሔርን ጸጋ እንዲካፈሉ (1 ቆሮ. 15፡10)፤ በጸሎት የእግዚአብሔርን ፈቃድ እንደ ለመኑ እንረዳለን፡፡ ‹‹ጳውሎስም በተከራየው ቤት ሁለት ዓመት ሙሉ ተቀመጠ፤ ወደ እርሱም የሚመጡትን ሁሉ ይቀበል ነበር . . የእግዚአብሔርን መንግሥት እየሰበከ ስለ ጌታ ስለ ኢየሱስ ክርስቶስ እጅግ ገልጦ ያስተምር ነበር›› (ሐዋ. 28፡30) ተብሎ እንደ ተጻፈ፤ እንዲሁ በፊልሞናም ቤት ያገለግል ዘንድ ‹‹አዘጋጅልኝ›› ይለዋል፡፡

በችግሮች መካከል ስፍራችን መፍትሔ መሆን እንደሚገባው ይህ መልእክት ያሳስበናል፡፡ የሰዎችን ዘላለማዊ ችግር በወንጌል መፍታት ትልቅ ተግባር መሆኑ እንዳለ ሆኖ፤ በዚህም ዓለም የጊዜው ኑሮ ውስጥ ሰዎች የሚገጥማቸውን የግንኙነት ፈተና ለመፍታት ከእምነት የሆነ ትጋት ማሳየትም አስፈላጊ ነው፡፡ ሐዋርያው ጳውሎስ ለአናሲሞስ ወንጌል መስበኩ በራሱ በቂ እንደ ሆነ ማስብ ብንችልም፤ እርሱ ግን ከዚህ አልፎ ባሪያ የሆነውን አናሲሞስ አሳዳሪው ከሆነው ከፊልሞና ጋር ለማስታረቅ እንደ ክርስቶስ አገልጋይ በጽድቅ ሁሉን አድርጓል፡፡ ‹‹ . . . ስለ እኛ ደግሞ ጸልዩ፤›› /ቆላ. 4፡3/!

መጻጉዕ፡ የባሰ አለ

2016-04-02T23:24:00.003-07:00

ቅዳሜ መጋቢት 24 ቀን 2008 የምሕረት ዓመት

‹‹ . . እንዴት ይልቅ የሚብስ ቅጣት የሚገባው ይመስላችኋል?›› /ዕብ. 10፡28/!

ምኩራብ፡ የተፈታ ቤት

2016-03-26T22:52:00.006-07:00

ቅዳሜ መጋቢት 17 ቀን 2008 የምሕረት ዓመት

‹‹እነሆ፤ ቤታችሁ የተፈታ ሆኖ ይቀርላችኋል፡፡›› /ማቴ. 23፡38/!

ቅድስት፡ ከዳተኛይቱ ጸደቀች

2016-03-19T23:40:00.002-07:00

ቅዳሜ መጋቢት 10 ቀን 2008 የምሕረት ዓመት

‹‹እግዚአብሔርም እንዲህ አለኝ፡- ከአታላይቱ ከይሁዳ ይልቅ ከዳተኛይቱ እስራኤል ጸደቀች›› /ኤር. 3፡11/፡፡

ማታለል መክዳት፤ መከዳት መታለል ከአሁኑ ዓለም መልክ መካከል ናቸው፡፡

መልእክት ኀበ ፊልሞና፡፡(6)

2016-03-14T22:54:00.000-07:00

በስመ አብ ወወልድ ወመንፈስ ቅዱስ አሐዱ አምላክ አሜን!

ሰኞ መጋቢት 5 ቀን 2008 የምሕረት ዓመት

(መልእክት ወደ ፊልሞና)

‹‹እምጳውሎስ ሙቁሐ ለኢየሱስ ክርስቶስ፡ (ኤፌ. 3፡1)!››

‹‹ወእመሰ እኁየ አንተ ተወከፎ ከማየ፤ ለእኔስ ወንድሜ ከኾንህ እኔ እንደ ተቀበልሁት ተቀበለው፡፡ አንድም ለእኔ ወንድሜ ከኾነ እኔን እንደ ተቀበልህ ተቀበለው››፡፡

‹‹ . . እንደ እኔ አድርገህ ተቀበለው ›› /ቁ. 17/

ሐዋርያው ጳውሎስ አናሲሞስን ‹‹እንደ እኔ›› ተቀበለው በማለት ይጠይቀዋል፡፡ ፊልሞና ጳውሎስን ተቀብሎ ለዘላለም እንደያዘው እናውቃለን፡፡ አሁንም በወንጌል እውነት በማመን ወደ ክርስትና የተቀላቀለውን አናሲሞስን ፊልሞና ጳውሎስን በተቀበለበት በዚያው መቀበል ሊቀበለው የተገባ ነው፡፡ ‹‹እንደ ባልንጀራ ብትቆጥረኝ›› ሲል በሁለቱ መካከል ያለውን የቀረበ ወዳጅነት ማስተዋል እንችላለን፡፡ ሐዋርያው ጳውሎስ ‹‹ባልንጀራህን እንደ ራስህ›› (ማቴ. 19፡19) የሚለውን ቅዱስ ትእዛዝ እንዴት ተግባራዊ እንዳደረገ በዚህ አጻጻፉ ልብ እንላለን፡፡

አስቀድመን ባየናቸው ቁጥሮች ውስጥ ‹‹ስለ ልጄ›› ‹‹ልቤ እንደሚሆን›› በማለት ፊልሞና አናሲሞስን ይቀበለው ዘንድ ለምኖአል፡፡ እውነተኛ ልጅ ደግሞ አባቱን መምሰሉ እውነታ ነው፤ እንደ እኔ ተቀበለው ማለቱም የአናሲሞስን እውነተኛ መለወጥ፤ የጳውሎስንም እውነተኛ መውደድ እናይበታለን፡፡ እንዲህና እንደዚያ ነው ልንል በማንችልበት ሁኔታ በጳውሎስና በፊልሞና መካከል ልዩ የሆነ መቀራረብና ጥብቅ ወዳጅነት እንደ ነበር ከመልእክቱ መረዳት እንችላለን፡፡ የመጀመሪያው ክርስትና መልክ ክርስቶስን ማሳየቱ ዛሬ ላለነው ወቀሳም ጭምር ነው፡፡

‹‹ይህን በእኔ ላይ ቁጠር››

እንደ እኔ አድርገህ ተቀበለው ካለ፤ ቀጥሎ በእርሱ ላይ ያለውን ሁሉ በእኔ ላይ ቁጠር ማለቱ የአሳብ ትክክለኛ ፍሰት ነው፡፡ ሐዋርያው ጳውሎስ አናሲሞስ በድሎ አልያም እዳ ኖሮበት ቢሆን ሁሉንም በእርሱ ላይ እንዲቆጥረው ይጠይቀዋል፡፡ ይህ አካሄድ ችግሮችን ለመፍታት እንዴት ያለ የተዋበ መመሪያ ነው? ፊልሞና በአናሲሞስ ድርጊት ውስጡ የቆሰለ ቢሆን እንኳ የጳውሎስ ንግግሮች ለዚያ ቁስል የዘይት ያህል ናቸው፡፡ ጌታ በተያዘበት ምሽት ‹‹እነዚህ ይሂዱ ተዉአቸው›› (ዮሐ. 18፡8) በማለት ራሱን የሰጠበትን ሁኔታ በዚህ ስፍራ ማስታወስ በእጅጉ ጠቃሚ ይሆናል፡፡

አናሲሞስ በነፍሱ ያለበት እዳ በክርስቶስ ቤዛነት ተከፍሎአል፡፡ አሁን ከእምነቱ የተነሣ ሙሉ ለሙሉ ከኃጢአትና ከሞት ተጠያቂነት (ሕጉ ከሚጠይቀው) ፍጹም ነጻ ነው፡፡ ፊልሞና ከሚያነሣው በደል አልያም እዳ ደግሞ እኔ እጠየቃለሁ የሚል ወንድም ሐዋርያው ጳውሎስ ይህንን እያደረገ ነው፤ ስለዚህ ከዚህም ነጻ ነው፡፡ ኦ! ምንኛ ደስ የሚያሰኝ ነገር ነው፡፡ ሐዋርያው ‹‹በእጄ እጽፋለሁ›› ሲል ‹‹እኔ እመልሰዋለሁ›› ማለቱን እርግጥ ለማድረግ እንደ ሆነ እንገነዘባለን፤ ልክ እንደ ፊርማ እናስበው፡፡ ሐዋርያው ጳውሎስ ፊልሞናን እንዳገለገለው ስናስብ ‹‹የራስህ ደግሞ ብድር እንዳለብህ አልልህም›› የሚለውን ግልጽ እናደርጋለን፡፡

‹‹በክርስቶስ ልቤን አሳርፍልኝ››

በአናሲሞስና በፊልሞና መካከል የተፈጠረው ክፍተት ቀለል ያለ እንደ ሆነ አናስብም፡፡ በሮም ሕግ መሠረት አንድ ከጌታው የኮበለለ ባሪያ የሞት ፍርድ ውሳኔ ይጠብቀዋል፡፡ ከዚህ መልእክት ጋር ወደ አሳዳሪው ፊልሞና የሚመለሰው አናሲሞስ ሞገስን ካገኘ ውጤቱ ከሞት የመትረፍን ያህል ነው፡፡ ሐዋርያው ልቤን አሳርፍልኝ ማለቱ በክርስቶስ መሆኑ የፊልሞናን ልብ ለፍቅር የሚፈትን ነው፡፡ በእርግጥም እንዲህ ያለውን ተማጽኖ ፊልሞና ረግጦ ወደ ዓለም ዳኝነት ፈቅ ሊል አይችልም፡፡

ሐዋርያው ሃያ አምስት ቁጥሮች ባሉት በዚህ መልእክት ውስጥ ሁለት ጊዜ ‹‹ወንድሜ ሆይ›› በማለት በቀጥታ ተናግሮአል፡፡ በክርስትና ውስጥ በወንድማማችነት መቀባበል የሁሉም ምእመን ትክክለኛ ስፍራ ነው፡፡ ልዩ ልዩ በሆነው የእግዚአብሔር ጸጋ ስጦታ ልዩነት ቢኖርም መንፈስ ግን አንድ ስለሆነ፤ መንፈስ ከሆነው ከእግዚአብሔር የተወለድን እኛ ደግሞ ልጆች ወንድማማቾች ነን፡፡ ‹‹እኔ እንድጠቀምብህ ይሁን›› የሚለው፤ ለእኔ እንደ ዋልክልኝ ቁጠረው ማለት ይሆናል፤ ስለ አናሲሞስ ፈንታ ጳውሎስ ራሱን ምትክ አድርጎአል፡፡ ስለዚህ የአናሲሞስን መጉዳት መጉዳቱ፤ ለአናሲሞስ የሚሆነውን መጥቀም ደግሞ እንደ ጥቅሙ ተመልክቶታል፡፡

ባሪያ የሆነውን አናሲሞስን በተመለከተ እንደ ሮማውያን ሕግ የጳውሎስን ልብ የሚያሳርፍ አንዳችም ነገር ሊኖር አይችልም፡፡ ጸጋንና እውነትን ተመልቶ በእኛ ካደረው (ዮሐ. 1፡14) ከክርስቶስ የተነሣ ግን ለአናሲሞስም ለጳውሎስም ለፊልሞናም እረፍት የሚሆን ነገር ሆኗል፡፡ ‹‹አሳርፋችኋለሁ›› (ማቴ. 11፡28) ያለ ጌታ ለክርስቲያን በማንኛውም ጉዳዩ ላይ እውነተኛ እረፍት ነው፡፡ የሚተራረቁም የሚያስተራርቁም ልቦች ትክክለኛ የእረፍት ስፍራ ክርስቶስ ነው!

‹‹ . . . ስለ እኛ ደግሞ ጸልዩ፤›› /ቆላ. 4፡3/!

ዘወረደ፡ ‹‹የአቤሴሎም ውበት››

2016-03-12T16:06:00.002-08:00

ቅዳሜ መጋቢት 3 ቀን 2008 የምሕረት ዓመት

‹‹በእስራኤልም ሁሉ ዘንድ እንደ አቤሴሎም በውበቱ የተመሰገነ ሰው አልነበረም ከእግሩ እስከ ራሱ ድረስ ነውር አልነበረበትም።›› (2 ሳሙ. 14፡25)፤ ‹‹ . . አቤሴሎምም የእስራኤልን ሰዎች ልብ ሰረቀ።›› (2 ሳሙ. 15፡6)!

ውበት የሰውን ልብ የመግዛት ከፍተኛ አቅም አለው፡፡ ውበት በተለያየ መንገድ እንደ መስፈርት ጥቅም ላይ ሲውልም እናያለን፡፡ ሰዎች ለውበታቸው ስፍራ እንደሚሰጡ፤ ብዙ ወጪ እንደሚመድቡ ልናስተውልም እንችላለን፡፡ ውበት ልብን ይሰርቃል፤ ውበት አቋም ያስለውጣል፤ ውበት ለሰዎች ዓይን ርሀብ ጥጋብ ይሆናል፤ ውበት ምኞት በረሃ ላደረገው አእምሮ እንደ ጥሩ ምንጭ ነው፡፡ ይስሐቅ በርብቃ ውበት ከእናቱ ሞት ተጽናንቷል (ዘፍ. 24፡27)፤ ያዕቆብ ስለ ራሔል ውበት ለአጎቱ ለላባ አሥራ አራት ዓመት ተገዝቶአል (ዘፍ. 29፡17)፤ ንጉሥ አርጤክስስ በአመፀኛይቱ አስጢን ፈንታ ለአስቴር ውበት እጅ ሰጥቶአል (መጽሐፈ አስቴር 2፡17)፡፡

ውበት ሰዎችን ከእውነት ፈቀቅ፤ ከሕሊና ዝቅ ያደርጋል፡፡ ንጉሡ ዳዊት በቤርሳቤህ ውበት ሚዛን ስቶ ነፍስ እስከ ማስጠፋት ደርሶአል (2 ሳሙ. 11፡2-4፤ 14-17)፤ ውስጡ በኢየሩሳሌም ቆነጃጅት ፍቅር የተለበጠው ንጉሡ ሰሎሞን የአህዛብን ጣዖታት ወደ ማምለክ የነዳው የአህዛብ ሴቶች ውበት ፍቅር ነው (1 ነገ. 11፡1)፤ ሳሙኤልን በዓይኑ ፊት ‹‹እግዚአብሔር እንደሚያይ እንዳያይ›› ያደረገው የኤልያብ ውበት ነው (1 ሳሙ. 16፡6)፡፡

ሶምሶንን ለጥፋቱ የልቡን ሁሉ እንዲገልጥ ያስገደደው የደሊላ ውበት ፍቅር ነው (መሳ. 16፡18)፤ ሕዝቅኤልን የዓይን አምሮት የሆነበት፤ ለተቀሰፈችው ሚስቱ በደረቁ ሀዘን ያስቀመጠው የገዛ አጋሩ ውበት ነው (ሕዝ. 24፡16)፤ አምኖንን ያስተከዘና ለሕመም የዳረገው፤ ሲያልፍም ያረከሰው የእህቱ ትዕማር ውበት ፍቅር ነው (2 ሳሙ. 13፡2)፤ የጲጥፋራ ሚስት በዮሴፍ ውበት ክፉ አስባለች (ዘፍ. 39፡6-10)፤ ውበትን የታከከ ፍቅር ለውድቀት የሆነባቸው ታሪኮች ብዙ ናቸው፡፡ ምድራችን ላይ ውበት ለእግዚአብሔር ክብር ከዋለበት ይልቅ ለአመጽ መሣሪያነት በእጅጉ አገልግሏል፡፡

ያለፉ ድርጊቶችን ከታሪክ መለስ ብለን ስናገላብጥ በውበታቸው ክፉ ምክርን ያስፈጸሙ፤ መንግሥት ያናወጠ ሴራ ጫፍ ያደረሱ፤ አቅል አስተው ለስሜት የተነጠፈውን ለሞት ሽኝት ያደረጉ ሰዎችን እንደርስባቸዋለን፡፡ ቆነጃጅት እንደ ፍልጥ ሰዎች ለለኮሱት ግጭት ተማግደዋል፤ የባለ ጠጎች ማጫወቻም መጫወቻም ሆነዋል፡፡ ቆንጆ የተፈጥሮ አበባ ገበያ ላይ እንደሚውል፤ ሕሊናቸውን በሸጡና ለዚህም በሚተባበሩ ቆነጃጅት አየር ባየር የሰው ንግዶች ዓለም ላይ ደርተዋል፡፡ ስለ ውበት ብዙ ልንል እንደምንችል እንዳለ ሆኖ ወደ ተነሣንበት ርዕስ እንመለስ፡፡

አቤሴሎም የስሙ ትርጉም ‹‹አባቴ ሰላም ነው›› የሚል ሲሆን፤ ለነቢዩ ዳዊት እጅግ የሚወደው ልጁም ነው፡፡ መጽሐፍ ቅዱስ በሌላ ስፍራ ደግመን በማናነበው መልኩ የአቤሴሎምን ውበት ‹‹ከእግሩ እስከ ራሱ ድረስ ነውር ያልነበረበት›› በማለት ይገልጸዋል፡፡ ስለ ጸጉሩ ውበት እንኳ ‹‹ጠጉሩም ይከብደው ነበርና በዓመት አንድ ጊዜ ይቆረጠው ነበር፤ ሲቆረጥም የራሱ ጠጉር በንጉሥ ሚዛን ሁለት መቶ ሰቅል ያህል ይመዘን ነበር›› (2 ሳሙ. 14፡26) ይለናል (አንድ ሰቅል አስራ ሁለት ግራም ያህል ይመዝናል)፡፡ በዚህ ሁሉ አገላለጽ አቤሴሎም ምን ያህል ውብ እንደ ነበር ልንረዳ ይቻለናል፡፡

አቤሴሎም የንጉሥ ልጅ ከመሆኑ ጋር ተያይዞ ውበቱ፤ የአባቱን መንግሥት ለመገልበጥና ዙፋን ላይ ለመቀመጥ የእስራኤልን ልብ ለመስረቅ ጠቅሞታል (2 ሳሙ. 15፡6)፡፡ በዚህም ሴራ ለአቤሴሎም ቁስ ሳይሆን ልቡን የሰጠው የኢየሩሳሌም ሕዝብ ሁለት መቶ ነበር፤ እነርሱም የሚሆነውን ነገር ከቶ ሳያውቁ በየዋህነት የተዋበውን አቤሴሎም ተከተሉት (2 ሳሙ. 15፡11)፡፡ አቤሴሎም ሕቡዕ በሆነ ሴራው ከአባቱ ከንጉሥ ዳዊት የሚሸሸውን እና ወደ እርሱ የሚተባበረውን ሕዝብ እያበዛ ሄደ፡፡ አባቱ በዙፋን እያለም በኬብሮን ቀንደ መለከት አስነፍቶ ንጉሥ መሆኑን አወጀ፡፡

የአቤሴሎም ክፋት አዛኝ ነው፡፡ አካሄዱም ማስተዋል ለሌለው ሰው በቀላሉ ግልጥ አልነበረም፡፡ አቤሴሎም ለእህቱ ለትዕማር የሚቆሮቆር፤ እግዚአብሔር የሾመው ዳዊትን ግን የሚያሳድድ ነበር፡፡ ከአመጸኛነቱ የተነሣ ሰው መጥራ ሲፈልግ እንኳ ‹‹እርሻውን አቃጥሉት›› የሚል ነበር፡፡ አቤሴሎም ወንድሙ አምኖንን ለማስገደል ሁለት ዓመት ከራሱ ልብ ጋር ሴራውን የመከረ፤ ይህንንም ለመፈጸም እንደ ንጉሥ ያለ ግብዣ ያዘጋጀ፤ ለሟች ወንድሙ የሚሰክርበትን ያስጠመቀ ነው፡፡ አባቱን የዙፋን ስደተኛ አድርጎ መካሮቹ በሰገነት ላይ በደኮኑለት ድንኳን ውስጥ ያባቱን ቁባቶች ያስነወረም ነበር፡፡

የዳዊት መንግሥት ባለበት የእስራኤል ግዛት ውስጥ በወንድሙ ላይ የሞት ፍርድን ያስተላለፈ፤ ወንድሙን ለሞቱ በስካር ያጠገበ ነው (2 ሳሙ. 13፡28)፤ አባቱን ዳዊትን ደግሞ ተከናንቦ ያለ ጫማ እያለቀሰ ወደ ደብረ ዘይት ዐቀበት ያሳደደ ነው (2 ሳሙ. 15፡30)፡፡ አቤሴሎም የአባቱን ዙፋን ፍርድ በሕዝቡ ዘንድ ያክፋፋ፤ እጁን ዘርግቶ ያስም የነበረ ‹‹በአገር ላይ ፈራጅ አድርጎ ማን በሾመኝ?›› የሚል ምኞት ያሰከረው ምስኪን ነበር፡፡ አቤሴሎም የዳዊት መካር የሆነውን አኪጦፌልን በማሳመን በንጉሡ በአባቱ በዳዊት ላይ ሴራው ጽኑ ሆነለት (2 ሳሙ. 15፡12)፤ ዳዊትም ከልጁ ከአቤሴሎም ሸሸ (15፡14)፡፡

ተወዳጆች ሆይ፤ በዳዊት ሕይወት የምንመለከታቸው ውድቀቶች እራሳቸውን የቻሉ የምልከታ ምእራፎች መሆናቸው እንዳለ ሆኖ እያየነው ያለነው የአባትነትን ሥፍራ ያላከበረውን የአቤሴሎምን ሕይወት ነው፡፡ ነቢዩ ሳሙኤልን ልኮ ዳዊትን የቀባው እግዚአብሔር ነው (1 ሳሙ. 16፡12-13)፤ የሳሙኤልን ዓይኖች በተመለከተ እግዚአብሔር ሲናገር ‹‹ሰው ፊትን ያያል እግዚአብሔር ግን ልብን ያያል›› አለው (1 ሳሙ. 16፡7)፡፡ አቤሴሎም ከራሱ እስከ እግሩ ነውር እንደ ሌለበት ተነግሮናል፤ ዳሩ ግን እግዚአብሔር ልብና ኩላሊትን ይመረምራል (መዝ. 7፡9)፡፡ አቤሴሎም የእስራኤልን ልብ መስረቅ የቻለ ቢሆንም የእግዚአብሔርን ልብ ግን አላገኘውም፡፡

እግዚአብሔር ለእርሱ የተዋበ የሆነውን ‹‹እንደ ልቤ የሆነ ሰው ፈቃዴንም ሁሉ የሚያደርግ የእሴይን ልጅ ዳዊትን አገኘሁ›› አለ (ሐዋ. 13፡22)፡፡ ምን ጊዜም እግዚአብሔር ልቡ ያለው እንደ ልቡ ምክር በሆነው ነገር ነው፤ ፈቃዱም የሚከናወነው እንደ ዘላለም አሳቡ ነው፡፡ የሰው ሩጫ የማይቀድመው፤ የሰው ጥበብ የማይጠበበው እግዚአብሔር ታላቅ ነው፡፡ የአቤሴሎም ውበት እግዚአብሔር የቀባውን ለመሸፈን፤ ሲያልፍም ስፍራውን ለመያዝ የቀናው ቢመስልም የነገሮች መጨረሻ ግን ‹‹እግዚአብሔር አትራፊ ነው›› ይላል፡፡ ለአቤሴሎም ደግሞ እጅግ ኪሳራ!

በነቢዩ በዳዊት መዝሙር ‹‹ውበትህ ከሰው ልጆች ይልቅ ያምራል ሞገስ በከንፈሮችህ ፈሰሰ ስለዚህ እግዚአብሔር ለዘላለም ባረከህ።›› (መዝ. 44፡2) የተባለለትን ውብ እናያለል፡፡ መዝሙሩ የቆሬ ልጆች ትምህርት ነውና ዳዊት ስለ ልጁ ስለ አቤሴሎም የጻፈው ቅኔ እንደ ሆነ ልናስብ አንችልም፡፡ ይልቁንም ከትምህርቱ ትንቢታዊ ይዘት የምንረዳው በቀጥታ ወደ ነቢዩ ኢሳይያስ ትንቢት እንድናመራ የሚጋብዘን መሆኑን ነው፡፡

‹‹የሰማነውን ነገር ማን አምኖአል? የእግዚአብሔርስ ክንድ ለማን ተገልጦአል? በፊቱ እንደ ቡቃያ ከደረቅም መሬት እንደ ሥር አድጎአል፤ መልክና ውበት የለውም፤ ባየነውም ጊዜ እንወድደው ዘንድ ደም ግባት የለውም፡፡ የተናቀ ከሰውም የተጠላ የሕማም ሰው ደዌንም የሚያውቅ ነው፤ ሰውም ፊቱን እንደሚሰውርበት የተናቀ ነው፤ እኛም አላከበርነውም›› (ኢሳ. 53፡1-3)፤ በዚህ የትንቢት ክፍል ከአቤሴሎም የሚበልጠውን፤ ውበቱ ከሰው ልጆች ሁሉ ይልቅ የሚያምረውን እናስተውላለን፤ ክርስቶስ ኢየሱስ የሕያው እግዚአብሔር ልጅ!

ተወዳጆች ሆይ፤ ‹‹ከኃጢአት በቀር በነገር ሁሉ እንደ እኛ የተፈተነ ነው›› (ዕብ. 4፡15) የተባለለት ክርስቶስ ነው፡፡ አቤሴሎም ውጫዊ መልኩ የሚማርክ እንደ ሆነ ብናውቅም፤ እንወደው ዘንድ ደም ግባት የለውም የተባለለት ጌታ፤ አብ ደስ የተሰኘበት ውበት ነው (ማቴ. 3፡17)፡፡ በአቤሴሎም ራስ ላይ በአመት አንድ ጊዜ የሚቆረጥ ብዙ ጠጉር የነበረ ሲሆን፤ ክርስቶስ ግን በራሱ ላይ የሾህ አክሊልን የደፋ ነው፡፡ በአቤሴሎም ራስ ላይ ያለው ጠጉር ከሚመዝነው ሰቅል በላይ ኢየሱስ ስለ ሁላችንም ኃጢአት በራሱ ላይ የተጫነው የእሾህ አክሊል እጅግ ይከብዳል፡፡ ክርስቶስ ኃጢአት የሌለበት ንጹሕ ነውና፡፡

ጌታችን ኢየሱስ ‹‹ፈቃዴን ለማድረግ አይደለም እንጂ የላከኝን ፈቃድ ለማድረግ ከሰማይ ወርጃለሁና›› (ዮሐ. 6፡38) እንዳለ የአባቱን ፈቃድ የፈጸመ ነው፡፡ እኔና አብ አንድ ነን (ዮሐ 10፡30) በማለት በምድር ላይ የአባቱን ውበት ያሳየ የመለኮት ሙላት ክርስቶስ ብቻ ነው፡፡ እርሱ የባሪያን መልክ የያዘ ቢሆንም፤ በሰው ምሳሌ ሆኖ ራሱን ባዶ ያደረገ ቢሆንም፤ በምስሉ እንደ ሰው ተገኝቶ ራሱን ያዋረደ ቢሆንም፤ ለመስቀል ሞት እንኳ የታዘዘ ቢሆንም (ፊል. 2፡7) ከራሱ እስከ እግሩ ነውር የሌለበት ቤዛችን ክርስቶስ እርሱ ብቻ ነው፡፡

ዓለም እንደ አቤሴሎም ባለ ውበት ብትሽቆጠቆጥ ለክብር የሚጋፉ፤ ለታይታ የሚተራመሱ፤ በሴራ ጉሽ የሰከሩ አደባባይ ናት፡፡ ለእኛ እውነተኛው አቤሴሎም ነውር የሌለበት ከሰማይ የወረደ የእግዚአብሔር ልጅ ኢየሱስ ነው፡፡ ስለ አቤሴሎም ‹‹በላያችን እንዲሆን የቀባነው›› (2 ሳሙ. 19፡10) በማለት ሕዝቡ በሰልፍ ለሞተው አቤሴሎም ቁጭታቸውን ሲገልጹ እናነባለን፡፡ ክርስቶስን በተመለከተ፤ ደቀ መዛሙርቱን ‹‹ማን እንደ ሆንሁ ትላላችሁ?›› ባላቸው ጊዜ ጴጥሮስ ‹‹ከእግዚአብሔር የተቀባህ ነህ›› አለ (ሉቃ. 9፡20)፡፡ ከእግዚአብሔር የተቀባውን ክብርና ስፍራ ማንም ሥጋን የለበሰ ሁሉ ሊወስድ አይቻለውም፡፡

አቤሴሎምን ለዚህ ክፋት ምክንያቱ የነበረውንና የሕይወቱን ፍጻሜ እንመልከት፡፡ ‹‹አቤሴሎምም ሕያው ሳለ፡- ለስሜ መታሰቢያ የሚሆን ልጅ የለኝም ብሎ ሐውልት ወስዶ በንጉሥ ሸለቆ ውስጥ ለራሱ አቁሞ ነበር፤ ሐውልቱንም በስሙ ጠርቶት ነበር›› (2 ሳሙ. 18፡18) የሚል ተጽፎ እናነባለን፤ እንዲሁም ሞቱን ‹‹አቤሴሎም ከዳዊት ባሪያዎች ጋር በድንገት ተገናኘ፤ አቤሴሎምም በበቅሎ ተቀምጦ ነበር በበቅሎውም ብዙ ቅርንጫፍ ባለው በታላቅ ዛፍ በታች ገባ ራሱም በዛፉ ተያዘ በሰማይና በምድር መካከል ተንጠለጠለ፤ ተቀምጦበትም የነበረው በቅሎ አለፈ›› (2 ሳሙ. 18፡18) ተብሎ ተጽፎ እናነባለን፡፡

የአቤሴሎም ፍጻሜ በእጅጉ አሳዛኝ ነው፡፡ አቤሴሎም ከስሙ ጋር የተያያዘ ፍላጎት እንደ ነበረው አስተውለናል፡፡ በርግጥ አቤሴሎም በዚህ ስፍራ እንዳነበብነው ልጅ ያልነበረው አልነበረም (2 ሳሙ. 14፡27)፡፡ ነገር ግን ዙፋኑ የዳዊት ስለ ነበር አቤሴሎምን የራሱ ልጆች እንኳ ከንግሥና ጋር በተያያዘ ሊያስቡት አይችሉም፡፡ ስለዚህ በንጉሥ ሸለቆ ለራሱ ሐውልት አቆመ፡፡ እግዚአብሔር የእርሱ በሆነው እኛ እንዳንቆም ይርዳን፡፡ አቤሴሎም እንዳሰበው ሊሆን አልቻለም፡፡ እንደዚያ ያለ ሴረኛ በኤፍሬም ዱር ውስጥ ያለ አንድ የዛፍ ቅርንጫፍ አንጠለጠለው፤ አቤሴሎም ውበቱ ጥፋቱ ሆነበት፡፡

ጌታችን ኢየሱስ ክርስቶስ ስለ ክብሩ ሳይሆን ስለ ክብራችን ራሱን አዋረደ፤ ከምድር ከፍ ከሰማይ ዝቅ ብሎ መስቀል ላይ ሞተ፡፡ አቤሴሎም ስለ ስሙ በምድርና በሰማይ መካከል በአንዲት ቅርንጫፍ ተንጠልጥሎ በጋሻ ጃግሬዎች ተመትቶ ሞተ፡፡ እርሱም በዱር ባለ በታላቅ ጉድጓድ ውስጥ ተጥሎ እጅግ ታላቅ የሆነ የድንጋይ ክምር ሸፈነው (2 ሳሙ. 18፡17)፤ የአቤሴሎም መታሰቢያው እንዲህ ሆነ፡፡ የተወደዳችሁ ሆይ፤ ክርስቶስ ስለ ሁላችንም መከራን ተቀብሎ፤ ሞቶ ከሞት ተነሥቶአል፡፡ ሁሉን በእርሱ ስም እናደርገው ዘንድ እርሱ ዛሬም ሕያው ነው፡፡

በራሳችን ስም ለራሳችን የሚቆም ሐውልት የለም፡፡ ‹‹. . እግዚአብሔር አብን በእርሱ እያመሰገናችሁ በቃል ቢሆን ወይም በሥራ የምታደርጉትን ሁሉ በጌታ በኢየሱስ ስም አድርጉት›› (ቆላ. 3፡17) እንደ ተባለ፤ ለዚህ ሕያውና የሚሠራ ቃል መታዘዝ ያስፈልገናል፡፡ በብሉይ ኪዳን የተተረከልን አቤሴሎም ዛሬ የለ ይሆናል፤ ዳሩ ግን መንፈሱ ባመኑና በሚያገለግሉ ላይ ይሠራል፡፡ እንዲህ ባለው ርኩሰት ራስን አለማሳደፍ እግዚአብሔር ‹‹እኔ ግን ንጉሤን ሾምሁ፤ በተቀደሰው ተራራዬ በጽዮን ላይ፡፡›› (መዝ. 2፡6) ያለለትን ልጁን ክርስቶስን በተግባር ማክበር ነው፡፡ ከሰማይ ወደ እኛ የወረደ ውበት፤ በአብ ዘንድ መታያ ውበት፤ በዘመናችን ሁሉ ዝርግፍ ጌጥ፤ በመለኮት ዙፋን ፊት የምንታይበት የውበት ልክ ኢየሱስ ክርስቶስ ነው (ሮሜ 8፡29)!

‹‹ . . . ስለ እኛ ደግሞ ጸልዩ፤›› /ቆላ. 4፡3/!

መልእክት ኀበ ፊልሞና፡፡(5)

2016-03-01T21:26:00.004-08:00

በስመ አብ ወወልድ ወመንፈስ ቅዱስ አሐዱ አምላክ አሜን!

ማክሰኞ የካቲት 22 ቀን 2008 የምሕረት ዓመት

(መልእክት ወደ ፊልሞና)

‹‹እምጳውሎስ ሙቁሐ ለኢየሱስ ክርስቶስ፡ (ኤፌ. 3፡1)!››

v ‹‹ሳልማከርህ ምንም እንኳ ላደርግ አልወደድሁም ›› /ቁ. 14/

ባለፈው ጥናት ሐዋርያው ጳውሎስ ‹‹ሐዋርያዊ ሥልጣኑን›› መሰረት ባደረገ መንገድ ሳይሆን፤

1. እድሜውን (እኔ ሽማግሌው)፤
2. የኢየሱስ ክርስቶስ እስር መሆኑን፤
3. የፊልሞና ሕሊና በጎነት፤

4. በመካከላቸው ያለውን የእምነትና ፍቅር አንድነት ማእከል በማድረግ
የሁሉም ነገር ማሠሪያ በሆነው ‹‹ስለ ፍቅር›› ለምኖታል፡፡ (ዮሐንስ አፈወርቅ)

አናሲሞስን በተመለከተ ሐዋርያው ጳውሎስ እርሱ ጋር በመሆን እንዲያገለግለው ሊያስቀረው ፈቅዶ ነበር፡፡ ዳሩ ግን አሳዳሪው ከነበረው አሁን ደግሞ በክርስቶስ ወንድሙ ከሆነው ከፊልሞና ጋር መመካከርን እንደ ወደደ ይገልጻል፡፡ በዚህ መልእክት ውስጥ ከምናየው የክርስቶስን ፍቅር ማዕከል ያደረገ እውነተኛ ግንኙነት አንጻር፤ በኋላ ፊልሞና አናሲሞስን ያገለግለው ዘንድ ወደ ሐዋርያው ጳውሎስ መልሶ ሊልከው እንደሚችል ልናስብ እንችላለን፡፡ ዳሩ ግን ሐዋርያው ምንም ሥልጣን ያለው ቢሆንም እንኳ የፊልሞና በጎነት በፈቃዱ እንጂ በማስገደድ እንዳይሆን ተጠንቅቋል፡፡

ተወዳጆች ሆይ፤ እውነተኛ በጎነት ፈቃደኝነትን የተከተለ መሆን አለበት፡፡ ሰዎች በተለያየ አስገዳጅ ምክንያት መልካምነታቸውን ሊገልጹልን፤ በስሌትም ሊወዱን ይችላሉ፡፡ ከፍቅር የሚመነጨውን በጎነት ግን ምንም ደግናችሁ አታገኙትም፡፡ ፍቅር የሚገራውን ልብ ኃይል አይገራውም፡፡ ሐዋርያው ፊልሞናን (አሳዳሪው) እና አናሲሞስን (ባሪያው) ለማገናኘት ያሳየው አቀራረብ ይህንን በሚመስል መደብ ለሚፈጠሩ ልዩነቶች ሁሉ ቋሚ ትምህርት ነው፡፡

መመካከር በክርስትና ሕይወት ትልቅ ስፍራ አለው (1 ተሰ. 5፡11)፡፡ ሐዋርያው በክርስቶስ ብዙ ድፍረት እያለው ከፊልሞና ጋር መመካከርን መርጧል፡፡ ይህም ጎዳና የሂደቱን ውጤት በእጅጉ ይወስናል፡፡ ሐዋርያው ፊልሞናን ‹‹አብሮን ለሚሠራ›› ካለ ‹‹ሳልማከርህ›› ማለቱ ትክክል ነው፡፡ ምክክር አብሮ የመሥራት ብዙ አካል ነው፡፡ በተለይ ለአገልጋዮች ጠቃሚ አቅጣጫን እናይበታለን፡፡ ያለ ምክክር ሥራ የሚፋረስ እንጂ ጠላትን (ዲያብሎስ) የሚያፈርስ ሊሆን አይችልም፡፡

v ‹‹ተቀብለህ ለዘላለም እንድትይዘው››

በምንኖርበት የአሁኑ ዓለም ቋሚ ነገር ብርቅ ነው፡፡ አዎን የሆነው በምናስነጥስበት ፍጥነት አይደለም ይሆናል፡፡ አይደለም ደግሞ እንዲሁ፡፡ ወዳጅነት አልዘልቅ፤ የጨበጥነው አልበረክት፤ ያሞገስነው አልጸና ይለናል፡፡ የማይሰብረኝ ካልነው ውስጥ እንክትክት የሚያደርግ ይወጣል፡፡ የፍቅርን ጥማት የሚቆርጥ ኢየሱስ ብቻ ነው (ጥሜን ቆረጠልኝ እንዲሉ)፡፡

‹‹ሰው በታናሽነቱ ቀንበር ቢሸከም መልካም ነው›› (ሰቆ. ኤር. 3፡27) ተብሎ እንደ ተጻፈ፤ እግዚአብሔር በቀላልም በከባድም ሁኔታ ውስጥ ብዙ አስተምሮኛል፡፡ እኔና አብ አንድ ነን (ዮሐ. 10፡30) ካለው ከሕያው እግዚአብሔር ልጅ ክርስቶስ በቀር ምድሪቱ ላይ የዓይንም የልብም ማረፊያ የሚሆን እንደሌለ ይህን አንድ ነገር ተረድቻለሁ፡፡

በሰው መካከል ላለ ሰው ‹‹ስለዚህ ክርስቶስ ለእግዚአብሔር ክብር እንደ ተቀበላችሁ እንዲሁ እርስ በርሳችሁ ተቀባበሉ›› (ሮሜ 15፡7) የሚለው ቃል ፈታኝ እንደ ሆነ ሥጋና ደም ሊያስብ ይችላል፡፡ በእርግጥ ስለ መንፈስ ማሰብ ካልሆነ በቀር ሕይወትና ሰላም ሊሆን እንዳይችል ቃሉ ያስረዳናል (ሮሜ 8፡6)፡፡ ተዋዳጆች ሆይ፤ ሐዋርያው ፊልሞናን እየጠየቀው ያለው ‹‹ለዘላለም መቀበልን›› ነው፡፡

የኮበለለ ሎሌን (ባሪያ) ቀርቶ ባል ሚስቱን ለዘላለም እንዳገባት በፊርማ ሥነ ስርዓቱ እድምተኛ ፊት ቢታወጅ ፍቅሬ አውጭኝ (እግሬ አውጪኝ እንዲሉ) እንደሚል አይጠረጠርም (ያውም የዘመናችን አብዛኛው ትዳር)፡፡ ጊዜያው መቀባበል፤ የኮትራት አብሮነት እያጋጋጠ ባለበት እድሜያችን እንዲህ ያለው መቀባበል ጊዜው እንዳለፈ ሊቆጠር ይችላል፡፡ የቃሉን እውነት መሆነ ለሚቀበል ልብ ሁሉ ግን ይህም እንታዘዘው ዘንድ የተገባ ነው፡፡

እናት የወለደችውን በምትክድበት ምድር እግዚአብሔር የወለደውን በክርስቶስም ልጄ ያለውን እንደ ወንድም እንድንቀበለው ተነግሮናል፡፡ ዘላለማዊ መዛመድ በክርስቶስ ወንድማማቾች የሆንበት ነው፡፡ በሥጋ የሆኑ መዛመዶች ሞት ይፈታቸዋል፤ ‹‹የሚያምንብኝ ቢሞት እንኳ ሕያው ነው›› (ዮሐ. 11፡25) ባለን በኢየሱስ ክርስቶስ የሆነው አንድነት ግን ሁል ጊዜ ከጌታ ጋር በመሆን ለዘላለም ይዘልቃል፡፡

አናሲሞስ ለጊዜው የተለየውን ለዘላለም ሊገናኘው ወደ ፊልሞና ተመለሰ፡፡ በዘላለም ያወቅናቸው በጊዜው ሊጎዱን አሳብ ሲቁነጠነጥባቸው ማየት ምንኛ አሳዛኝ ነው? ‹‹በክርስቶስ ኢየሱስ የነበረ ይህ አሳብ በእናንተ ዘንድ ደግሞ ይሁን›› (ፊል. 2፡5)፡፡ አናሲሞስ ‹‹ከእንግዲህ ወዲህ እንደ ባሪያ አይሆንም››፤ ከፊልሞና በኮበለለበት ማንነት ወደ እርሱ አልተመለሰምና፡፡ ፊልሞና አናሲሞስን ተቀብሎ ለዘላለም እንዲይዘው የፍቅር ግዴታ አለበት፡፡

v ‹‹ከባሪያ የሚሻል የተወደደ ወንድም››

መሻላችን ከእግዚአብሔር ጋር ባለን ትስስር የሚለካ ነው፡፡ ሰዎች በሀብት፤ በእውቀት፤ በዝና፤ በሥልጣን ለመበላለጥ ተግተው ሲሮጡ እናያለን፤ እኔ ግን እላችኋለሁ በክርስቶስ አትበለጡ፡፡ በእርሱ መሆን አይቅርባችሁ! ‹‹ሁሉን የሚችል አምላክ ወርቅና የሚብለጨለጭ ብር ይሆንልሃል›› (ኢዮ. 22፡25) ተብሎ እንደ ተጻፈ፤ ሕያው እግዚአብሔር በክርስቶስ ሁሉን የሚያስንቅ ብልጥግናችን ነው!

ከባሪያ የሚሻል ሕይወት በክርስቶስ ካልሆነ በቀር በሌላ እንዳይገኝ የተወደደው ወንድም አናሲሞስ ምስክር ነው፡፡ ‹‹በነጻነት ልንኖር ክርስቶስ ነጻነት አወጣን›› (ገላ. 5፡1) እንደ ተባለ፤ እውነተኛው ነጻነት በነጻ አውጪው በክርስቶስ በኩል የሚሆን ነው፡፡ አናሲሞስ ወደ አሳዳሪው ሲመለስ በሥጋውም ጭምር ሊያገለግል ነው፤ ዳሩ ግን እርሱ በሥጋ ሊሆን አይችልም፤ ሥጋን ከክፉ መሻቱና ከምኞቱ ጋር ሰቅሎታልና (ገላ. 5፡24)፡፡

አናሲሞስ ለሐዋርያው ጳውሎስ በተለየ የተወደደ ወንድም ነው፡፡ እርሱ የክርስቶስ ሎሌና የእግዚአብሔር ምስጢር መጋቢ (1 ቆሮ. 4፡1) በሆነው ጳውሎስ ልብ ውስጥ ካለው ስፍራ በበለጠ ለፊልሞና ከባሪያ የሚሻል የተወደደ ወንድም መሆኑ አሳማኝ ነው፡፡ አናሲሞስ በፊልሞና ዘንድ በሥጋው እንደ ባሪያ (አገልጋይ) ሲሆንለት፤ በጌታ ዘንድ ደግሞ የተወደደ ወንድሙ ነው፡፡ ሐዋርያው ‹‹ሰውን በክርስቶስ አውቃለሁ›› (2 ቆሮ. 12፡2) እንዳለ፤ ቅዱስ መተዋወቅ፤ ለዘላለም የሆነም መያያዝ ከዚህ ውጪ ሊሆን እንዴት ይቻላል? እናስተውል!

‹‹ . . . ስለ እኛ ደግሞ ጸልዩ፤›› /ቆላ. 4፡3/!

መልእክት ኀበ ፊልሞና፡፡(4)

2016-02-16T23:50:00.001-08:00

በስመ አብ ወወልድ ወመንፈስ ቅዱስ አሐዱ አምላክ አሜን!

ማክሰኞ የካቲት 8 ቀን 2008 የምሕረት ዓመት

(መልእክት ወደ ፊልሞና)

‹‹እምጳውሎስ ሙቁሐ ለኢየሱስ ክርስቶስ፡ (ኤፌ. 3፡1)!››

‹‹ሐዋርያው ጳውሎስ በተገኘበት ቦታ ሁሉ በጥልቅ ትህትና የተመላለሰ፤ ባሮችን ነጻ የሚያወጣውን እና ከጌቶቻቸው ጋር የሚያስተካክላቸውን፤ እንዲሁም የእግዚአብሔር ልጆች የሚያደርገውን የወንጌል ኃይል የገለጠ ነው›› /ከቀደሙት፡ - ቲዎዶሬት/

‹‹የእምነት ኅብረት›› /ቁ. 6/

ከሞት በኋላ የሚቀጥል አብሮነት ከእምነታችን ኅብረት የሚመጣ ነው (1 ዮሐ. 1፡3)፡፡ መጽሐፍ ቅዱስ ‹‹እምነት ከመስማት ነው፤ መስማትም በእግዚአብሔር ቃል ነው›› (ሮሜ 10፡17) እንዲል፤ እውነተኛ እምነት በእግዚአብሔር ቃል መሠረት ላይ የቆመ ነው፡፡ ፊልሞናን በተመለከተ ‹‹የእምነትህም ኅብረት›› ተብሎአል፡፡

በቀደመው ጥናታችን በፊልሞና ቤት ውስጥ ክርስቲያኖች በኅብረት ይሰባሰቡ እንደነበር አይተናል፡፡ ይህም ኅብረት ‹‹ሁለት ወይም ሦስት በስሜ›› (ማቴ. 18፡20) የሚለውን እውነት ማእከል ያደረገ ነው፡፡ ‹‹ለተወደደውና አብሮን ለሚሠራ›› በተባለለት በፊልሞና አገልግሎትም የክርስቲያኖቹ (ቅዱሳን) ልብ አርፎአል፡፡

ሐዋርያው ጳውሎስ በዚህ ስፍራ ፊልሞና የእምነቱ ኅብረት ‹‹ለክርስቶስ ኢየሱስ ፍሬ እንዲያፈራ›› ይለምነዋል፡፡ ተወዳጆች ሆይ፤ በክርስቶስ የሆነው የክርስትና ኅብረት በዋጋ ለገዛን (1 ቆሮ. 6፡20፤ 7፡23) ለክርስቶስ ፍሬ እያፈራ ነውን? ክርስትናው ከፀሐይ በታች ላለው ነገር ፍሬ የሚለቀምበት የደምና የሥጋ ማሳ ሆኖ ማየት እጅጉን አሳዛኝ ነው፡፡ ሐዋርያው እየለመነ ያለው ለምን እንደሆነ ልብ በሉ፤ ለክርስቶስ ኢየሱስ ፍሬ እንዲያፈራ ብቻ ነው፡፡

የንግዳችሁ ኅብረት ለዚህ ዓለምና ለእናንተ ፍሬ የሚያስገኝ መስክ ይሆናል፤ ዳሩ ግን በክርስቶስ ላይ ባለን እምነት የሆነው ኅብረት ፍሬው ‹‹ነፍሱን ስለ ኃጢአት መሥዋዕት ካደረገ በኋላ ዘሩን ያያል›› (ኢሳ. 53፡10) ተብሎ ለተተነበየለት ጌታ ፍጻሜ ሊሆን ይገባል፡፡ ሐዋርያው ጳውሎስ ምንም ያገለገለ ቢሆን የፍሬውን አድራሻ በስሙ ስለ ማድረግ ግን አልከጀለም፡፡ በኢየሱስ ክርስቶስ ደምና ስም የተመሠረተውን ክርስትና ጭምር በስማቸው ስላደረጉት ብዙዎች መንበርከክ ይገባናል፡፡

በእውነት እምነት የሆነ ኅብረት ለኢየሱስ ክርስቶስ ብዙ ፍሬን ያስገኛል፡፡ ፊልሞና እንደ ክርስቶስ ባሪያ በማገልገል ይደክማል፤ ፍሬውንም ለጌታ በአድራሻው አሳልፎ ይሰጣል፡፡ እንዲህ ያለው ወንድም በፍቅር የተሞላ ነበር፡፡ ‹‹ወንድሜ ሆይ፤›› ላለውም ሐዋርያ ብዙ ደስታና መጽናናትን አስገኝቶአል፡፡ ከሐዋርያው ጳውሎስ ምስክርነት እንደምንረዳው ፊልሞና በጌታና ባመኑት ወንድሞች ፊት ግብዝነት የሌለበት ንጹሕ ፍቅር የነበረው አገልጋይ ነበር፡፡

‹‹ስለ ፍቅር እለምናለሁ›› /ቁ. 9/

አግባብ የሆነውን ለማዘዝ በክርስቶስ ብዙ ድፍረት የነበረው፤ የኢየሱስ ክርስቶስ እስር የሆነው፤ ሽማግሌው ሐዋርያ ጳውሎስ ይህንን መብቱን በመተው ‹‹ስለ ፍቅር›› ይለምናል፡፡ ለአንድ ሰው መብቶቹን እንደ መተው ያለ ጭንቅ የለም፡፡ ይቅርታ ተጠያቂዎች ስንሆን ሳለ ይቅርታ መጠየቅ፤ ልንቀበል ተገብቶ ሳለ እንዲሁ መተው፤ የምናስተዳድር ሆነን ሳለ እንደ ባሪያ ዝቅ ማለት ብርቱ ፈተናዎች ናቸው፡፡

ጌታችን ደቀ መዛሙርቱን ‹‹በእናንተስ እንዲህ አይደለም›› ብሎ በተናገረበት ክፍል ‹‹ማንም ከእናንተ ታላቅ ሊሆን የሚወድ የእናንተ አገልጋይ ይሁን›› (ማቴ. 20፡26) አላቸው፡፡ በክርስትና የትልቅነት ምንጩ የባሪያን ስፍራ መያዝ መሆኑ መቼም አይቀየርም (ፊል. 2፡7-11)፡፡ ስለ ፍቅር ዝቅ ብሎ መለመንን፤ እንዲሁም መለመንን (ይጠብቃል) ባለመማራችን ምክንያት በጅምር የቀሩ፤ ደርጅተው የፈረሱ የሚያስቀኑ ግንኙነቶችን ልንፈትሽ አግባብ ነው፡፡

በሐዋርያነት ሥልጣን የሚያገለግለው ጳውሎስ ‹‹እለምናችኋለሁ›› የሚለውን ቃል ብዙ ጊዜ ይጠቀማል (ሮሜ 16፡17፤ 1 ቆሮ. 1፡10፤ 2 ቆሮ. 2፡8፤ ገላ. 4፡12፤ ኤፌ. 4፡1፤ ዕብ. 13፡19)፡፡ ፊልሞናንም በእስራቱ በወንጌል ስለ ወለደው ስለ ልጁ ስለ አናሲሞስ በፍቅር ይለምነዋል፡፡ እንዲህ ያለው አቀራረብ ለዛሬው ክርስትና የማንቂያ ደወል ነው፡፡ የአንድ ጥሩ ሰብእና ባለቤት የሆነን ሰው የአቀራረብ ደረጃ እንኳ የማይተካከል የምን ቸገረኝ ክርስቲያናዊ ግንኙነት በተበራከተበት ዘመናችን፤ በዚህ መጽሐፍ የመጣው ይህ ቃል የምንገሠጽበትም ጭምር ነው፡፡

‹‹አስቀድሞ ስላልጠቀመህ አሁን ግን ለእኔም ለአንተም ስለሚጠቅም›› የሚለው አገላለጽ ‹‹በእውነትህ ቀድሳቸው ቃልህ እውነት ነው›› (ዮሐ. 17፡17) የሚለውን ያስታውሰናል፡፡ አናሲሞስ ምንም እንኳ ጠቃሚ በሚል የስም ትርጉም እየተጠራ የኖረ ቢሆንም ዳሩ ግን ከእግዚአብሔር ያልተወለደ ባሪያ (በሥጋ ባርነቱ እንዳለ ሆኖ) ነበር፡፡ በሰውም በእግዚአብሔርም ፊት ዋጋችንን የሚያስወድደው ስለ እኛ የሞተልን ክርስቶስ ነው፡፡ አናሲሞስ እንደ ስሙ ጠቃሚ የሆነው ለሰማው የእውነት ቃል በእምነት ትክክለኛ ምላሽ በመስጠቱ ነው፡፡

የእግዚአብሔር ልጆቹ ተብላችሁ የተጠራችሁ ሆይ፤ በክርስቶስ ያላችሁን ሰማያዊና መንፈሳዊ ስፍራ ልብ እንድትሉ እመክራችኋለሁ (ኤፌ. 1፡3)፡፡ ቃሉ ‹‹ከእንግዲህ ወዲህ ልጅ ነህ እንጂ ባሪያ አይደለህም›› (ገላ. 4፡7) ይላልና፡፡ ለፍጥረቱ የበኩራት ዓይነት እንድንሆን በእውነት ቃል አስቦ የወለደን (ያዕ. 1፡18) የጌታችን የኢየሱስ ክርስቶስ አምላክና አባት ክብር ይግባውና በዚህ እውነት አስረጅነት እኛ ሁላችን ‹‹ጠቃሚ›› ነን፡፡

ራሳችሁን እንደ ማይጠቅም፤ ዋጋ እንደ ሌለው ሰው አድርጋችሁ የምታስቡ አተያያችሁን እንድታስተካክሉ መንፈስ ቅዱስ ይጠይቃችኋል፡፡ የእናንተን ውበት የምትጠይቁበትን መስታወት ለውጡ፡፡ ነቢዩ ‹‹ግሩምና ድንቅ ሆኜ ተፈጥሬአለሁና አመሰግንሃለሁ፤ ሥራህ ድንቅ ነው፤ ነፍሴም እጅግ ታውቀዋለች›› (መዝ. 138፡14) እንዳለ፤ ደግሞ ‹‹ማንም በክርስቶስ ቢሆን አዲስ ፍጥረት ነው›› (2 ቆሮ. 5፡17) እንደተባለ፤ ራሳችሁን ሕያው የሚሠራ በሆነው የእግዚአብሔር ቃል ተመልከቱ፡፡

ሐዋርያው ጳውሎስ አናሲሞስን እንደ ተወደደ ወንድም እንዲቀበለው ፊልሞናን ይጠይቀዋል፡፡ ‹‹ልቤ እንደሚሆን›› የሚለው አገላለጽ አናሲሞስ በጳውሎስ ዘንድ ያለውን ስፍራና ምስክርነት ያስረዳናል፡፡ አሁን ጠቃሚ እንደ ሆነ የተመሰከረለት የቀድሞው ባሪያ ተግባራዊ የሕይወት ለውጥ በዚህ መልእክት ውስጥ ግልጽ ነው፡፡ ወደ አሳዳሪው ለመመለስ፤ ይቅርታ ለመጠየቅና ለማገልገል በነበረው ፈቃደኝነት ውስጥ ለእውነት መሸነፉን እንመለከታለን፡፡ ‹‹እውነትንም ታውቃላችሁ እውነትም አርነት ያወጣችኋል›› (ዮሐ. 8፡31)!
‹‹ . . . ስለ እኛ ደግሞ ጸልዩ፤›› /ቆላ. 4፡3/!

መልእክት ኀበ ፊልሞና፡፡(3)

2016-01-26T00:03:00.003-08:00

በስመ አብ ወወልድ ወመንፈስ ቅዱስ አሐዱ አምላክ አሜን!

ማክሰኞ ጥር 17 ቀን 2008 የምሕረት ዓመት

(መልእክት ወደ ፊልሞና)

‹‹እምጳውሎስ ሙቁሐ ለኢየሱስ ክርስቶስ፡ (ኤፌ. 3፡1)››!

· ጸሐፊው፡- ሐዋርያው ጳውሎስ ሲሆን፤ መልእክታቱን በአገልግሎት አጠገቡ ሆነው በሚረዱት እርሱ እየተናገረ ያጽፍ እንደ ነበር (ሮሜ 16፡22፤ 1 ቆሮ. 16፡21፤ ገላ. 6፡11፤ ቆላ. 4፡18፤ 2 ተሰ. 3፡17)፤ ነገር ግን ለፊልሞና የተላከውን ይህንን መልእክት በገዛ እጁ እንደ ጻፈው ይነግረናል (ፊል. 19)፡፡

· የተጻፈበት ጊዜ፡- የፊልሞና መልእክት የቆላስይስ መልእክት በተጻፈና በተላከ ጊዜ በተመሳሳይ ከሮም (ሐዋርያው በእስር ቤት ሳለ) አብሮ የተላከ መልእክት ሲሆን፤ ጊዜውም ከ61 – 63 ዓ/ም ባለው ወቅት እንደ ሆነ ይታሰባል፡፡

· የመልእክቱ ጭብጥ ፡- ሁላችንም ባሮች የነበርን ሲሆን፤ ነገር ግን በክርስቶስ ወንድሞችና እህቶች ነን የሚል ነው፡፡

‹‹የተወደደ፤ የሚለው አገላለጽ ሙገሣን አልያም ልዩ መሆንን የሚያሳይ ሳይሆን፤ ጥልቅ የሆነ ፍቅርን ለማሳየት የተነገረ ነው፡፡ . . . አብሮን ለሚሠራ፤ የሚለው ደግሞ ወንጌልን ከማስፋትና ሌሎችን ወደ እምነት ከማምጣት ጋር በተያያዘ ያለውን አገልግሎት በተመለከተ የተነገረ ነው፡፡›› /ቅዱስ ዮሐንስ አፈወርቅ/

ሌሎችን መውደድ በሌለበት፤ በትክክል እግዚአብሔርን ማመን አይኖርም፡፡ በክርስትና ውስጥ አብሮ መሥራት ከመዋደድ ባነሰ ነገር ላይ ሊመሠረት አይችልም፡፡ ጌታ ለጴጥሮስ ትልቅ ኃላፊነት ሲሰጠው፤ አስቀድሞ የጠየቀው ‹‹ትወደኛለህን?›› (ዮሐ. 21፡15-17) በማለት ነበር፡፡ ፊልሞና በሌሎች ወንድሞች ልብ ውስጥ የተወደደ መሆኑ ጌታን ከመውደዱ የተነሣ እንደ ሆነ ልንረዳ እንችላለን፡፡

በእምነት እንደሚገባ ለመኖር ከፍቅር የበለጠና የተለየ ምንም ኃይል የለም፡፡ በዓለም ሥርዓት አብሮ ለመሥራት የተለያዩ ቅድመ ሁኔታዎች ይኖሩ ይሆናል፤ በእኛ ዘንድ ግን በክርስቶስ የሆነ ‹‹የእርስ በርስ መዋደድ››ን የሚተካ ምንም ነገር የለም (1 ቆሮ. 13)፡፡ ክርስትና ባሮች ወደ ‹‹ተወደደ ወንድምነት›› የሚለወጡበት፤ ከነገድ፣ ቋንቋና ዘር የተዋጀንበት (ራእ. 5፡9) ሰማያዊ ጥሪ ነው (ዕብ. 3፡1)፡፡ ከሁሉ በላይ በጌታ የተወደድን እንደ ሆንን ልናስተውል ያስፈልጋል፡፡

‹‹በቤትህ ላለች ቤተ፡ ክርስቲያን››

የቆላስይስ ምዕመናን በፊልሞና ቤት ውስጥ ይሰበሰቡ ነበር፡፡ አፍብያ የፊልሞና ሚስት እንደ ነበረች፤ አርክጳ ደግሞ ልጃቸው እንደ ሆነ ይታሰባል (ቅዱስ ዮሐንስ አፈወርቅ)፡፡ አርክጳን በተመለከተ ሐዋርያው ‹‹ለአርክጳም፡- በጌታ የተቀበልከውን አገልግሎት እንድትፈጽመው ተጠንቀቅ በሉልኝ›› (ቆላ. 4፡17) ብሎ ስለ ጻፈ፤ አገልጋይ ወታደር እንደ ሆነ እንገነዘባለን (ፊል. 2፡25)፡፡

በፊልሞና ቤተሰብ ውስጥ ሕያው እግዚአብሔር በመንፈስና በእውነት (ዮሐ. 4፡24) የሚመለክበት፤ በኢየሱስ ክርስቶስ ስም (ማቴ. 18፡20) ማኅበር ነበር፡፡ በክርስትናው ጅማሬ ከመንፈስ ቅዱስ መውረድ ጀምሮ ቤተ፡ ክርስቲያን (የክርስቲያን ወገን) በግለሰቦች ቤት ውስጥ የነበረ መሰባሰብ እንደ ሆነ እናውቃለን (ሐዋ. 1፡13፤ 2፡1)፡፡ ሐዋርያው ‹‹በክርስቶስም ያሉት የይሁዳ ማኅበሮች . . ›› (ገላ. 1፡22) እንዳለ፤ በየስፍራው ያለው መሰባሰብ በክርስቶስ አዲስ ፍጥረት (2 ቆሮ. 5፡17) የሆኑ ምእመናን አንድነት ነበር፡፡

ሐዋርያው ጵርስቅላና አቂላን በተመለከተ ‹‹. . በቤታቸውም ላለች ቤተ፡ ክርስቲያን ሰላምታ አቅርቡልኝ›› (ሮሜ 16፡5) ይላል፤ ንምፉንን በተመለከተም ‹‹. . በቤቱም ላለች ቤተ፡ ክርስቲያን ሰላምታ አቅርቡልኝ›› (ቆላ. 4፡15) በማለት ይናገራል፡፡ ‹‹ . . በየጸሎቱም ይተጉ ነበር›› (ሐዋ. 2፡42) ተብሎ እንደ ተጻፈ፤ ሁሉም በአንድ ልብ ሆነው አብረው ያመልኩ ነበር፡፡

ቤተ፡ ክርስቲያን፤ 1. የትንሣኤው ምስክሮች (ሐዋ. 1፡8፤ 2፡40፤ 17፡18) 2. ደቀ መዛሙርት (ሐዋ. 6፡1፤ 6፡7፤ 9፡1፤ 9፡26)፤ 3. ክርስቲያን (ሐዋ. 11፡26፤ 26፡27፤ 1 ጴጥ. 4፡16)፤ 4. ምእመናን (ሐዋ. 10፡45)፤ 5. ወንድሞች (ማቴ. 23፡8፤ ሐዋ. 11፡1፤ 28፡14) እና 6. ቅዱሳን (ሐዋ. 9፡13፤ ሮሜ 1፡7፤ 1 ቆሮ. 1፡1) በመባል በታወቁ የእግዚአብሔር ልጆች ኅብረትነቷ መጽሐፍ ቅዱሳችን ይገልጣታል፡፡ ቤተ፡ ክርስቲያን እንደ ሙሽሪት ክርስቶስ ሙሽራዋ (ኤፌ. 5፡30-32)፤ እንደ አካል ክርስቶስ ራስዋ (ቆላ. 1፡18)፤ እንደ ሕያው እግዚአብሔር ቤት ክርስቶስ ሊቀ ካህናቷ (1 ጢሞ. 3፡15) ነው፡፡

የቀደመችይቱ ቤተ፡ ክርስቲያን እንዲህ ያለው መንፈሳዊ አኗኗር ለዛሬው ክርስትና በእጅጉ ትምህርት ሰጪ ነው፡፡ ምእመናን በአጥቢያ አብያተ ክርስቲያናት ካልሆነ በቀር በቤታቸው መንፈሳዊ ልምምድ የሌላቸው መሆኑ፤ ክርስትናውን ጉልበት ያሳጣና ለክርስቲያኖች ምስክርነት አፈና ሆኖ የኖረ የሰው መንገድ ነው፡፡ በአደባባይ አንቱ የተባሉ፤ በቤትና በቅርቦቻቸው ‹‹አንተን /ቺን ብሎ . . ›› የሚባሉ ወገኖች፤ በሰው ፊት ብቻ ሳይሆን በመለኮት ዘንድም እንዲህ የሆነባቸው ተወቃሾች፤ ውስን የሆነው የክርስትና ልምምዳቸው ያመጣባቸው ነው፡፡

በቤተሰብ መካከል አብሮ መጸለይ አለመለመዱ፤ መጽሐፍ ቅዱስን በቤት ውስጥ የማንበብና የማጥናት ልማድ አለመዳበሩ፤ እንዲህ ያለው ተግባር ከኦርቶዶክስ ቤተ እምነት ያሸሻል ተብሎ መታሰቡ ክርስትናውን ያደባባይና የፈረቃ ብቻ አድርጎታል፡፡ ተወዳጆች ሆይ፤ በቤታችሁና በቤተ ሰዎቻችሁ አልያም አብረዋችሁ በሚኖሩ መካከል ያላችሁን መንፈሳዊ ኑሮ መለስ ብላችሁ ለመመልከት ሞክሩ፡፡ እንደ ቃሉ ለመኖር ትተጋላችሁን? በቅርባችሁ ያሉትን የሚያሸንፍ መንፈሳዊ ትጋት አላችሁን?

ሐዋርያው ጳውሎስ አናሲሞስን በክርስቶስ ክርስቲያን እንደ ሆነ ወንድም አድርገው የፊልሞና ቤተ ሰዎችና በቤቱ ያለው ጉባኤም ጭምር እንዲቀበለው መልእክቱን እንዲህ ባለ አቀራረብ ይጀምራል፡፡ አቀራረቡን ያሰረበት ሰላምታ ‹‹ከእግዚአብሔር ከአባታችን፤ ከጌታም ከኢየሱስ ክርስቶስ፤ ጸጋና ሰላም ለእናንተ ይሁን›› የሚል ነው፤ ከአብ (ቲቶ 2፡11) በወልድ (ገላ. 1፡6) በኩል የተገለጠው ጸጋ ለሰው ልጆች ሰላምን ያመጣ ነው፡፡

ሐዋርያው ‹‹ኅብረታችንም ከአባት ጋር ከልጁም ከኢየሱስ ክርስቶስ ጋር ነው›› (1 ዮሐ. 1፡3) እንዳለ፤ በመንፈስ ትስስር (መንፈስ ቅዱስ) የሆነው የክርስትና ኅብረት እውነተኛ ሰላም ምንጩ ከሰማይ ነው፡፡ ሰላምታውም በመጀመሪያይቱ ቤተ፡ ክርስቲያን ‹‹እንዴት አደርክ? . . እንዴት ዋልክ?›› የመባባልን ያህል የተለመደ ነበር፡፡ ይህንን የመጽሐፍ ቅዱስ ክፍል እያጠናችሁ ያላችሁ እንዲህ ያለውን ሰላምታ በግላችሁ ብትለማመዱ እመክራችኋለሁ፡፡

‹‹ስለ ፍቅርህና ስለ እምነትህ . . ››

Love and faith go together. As true faith includes works, so true faith includes love. We cannot believe in God without loving others. /The Orthodox Study Bible/.

በጌታ በኢየሱስ ዘንድ እና በቅዱሳን (ክርስቲያኖች፤ ሐዋ. 9፡13፤ 1 ቆሮ. 1፡2) ሁሉ ዘንድ ፊልሞና ስላለው ‹‹ፍቅርና እምነት›› ሐዋርያው ጳውሎስ መስማቱንና እግዚአብሔርን ማመስገኑን ይነግረዋል፡፡ በእግዚአብሔር ፊት የሆነ መንፈሳዊ ልምምድ፤ በሰዎችም ፊት ሲሆን (ከውዳሴ ከንቱ የፀዳ)፤ ለእግዚአብሔር ብዙ ክብርና ምስጋናን ያመጣል፡፡ ሐዋርያው በፊልሞና ዘንድ ያለውን መልካም ነገር ይጠቅሳል፡፡ በሌሎች መልእክታቱ እንደሚያደርገው በዚህም መልእክት ከፊልሞና ሕይወት ለማመስገን ምክንያት የሚሆነውን ነገር ይጠቅሳል፡፡

በሌሎች ዘንድ ያለውን መልካሙን ነገር በቸልታ አለመመልከት ለመልካም ግንኙነት ወሳኝ ነው፡፡ እንዲሁም በጎውን ለማስቀጠል እውነታውን መሰረት አድርጎ ለተግባራቸው እውቅና መስጠት ተገቢ ነው፡፡ በፊልሞና ሕይወት ያለው እምነትና ፍቅር ለሐዋርያው ጳውሎስ የሁልጊዜ የምስጋና ርዕስ ሆኖ አምላኩን ያመሰግን ነበር፡፡ ይህም በእስር (ስለ እግዚአብሔር ቃልና ስለ ኢየሱስ ምስክር) ላለው ሐዋርያ ብዙ ደስታና መጽናናትን ሰጥቶታል፡፡

እምነትና ፍቅር በክርስትና ውስጥ እጅግ ቁልፍ የሆኑ የማንነጣጥላቸው ነገሮች ናቸው፡፡ እምነት እግዚአብሔርን የምንረዳበት (የምንቀበልበት) ሲሆን፤ ፍቅር ደግሞ ያመነውን አምላክ የምንገልጥበት የበለጠው መንገድ ነው፡፡ ስለ እምነት ‹‹እምነትም ተስፋ ስለምናደርገው ነገር የሚያስረግጥ የማናየውንም ነገር የሚያስረዳ ነው›› (ዕብ. 11፡1) ተብሎ ተጽፎአል፤ ደግሞ ይህ እምነት ከመስማት ነው፤ መስማትም በእግዚአብሔር ቃል ነው (ሮሜ 10፡17)፡፡

እምነታችን ተስፋ የተደረገለትን ነገር እርግጥ ሲያደርግልን፤ በተስፋ የምንጠባበቀውንም ነገር እውን ያደርግልናል፡፡ በተስፋ የዳንን (ሮሜ 8፡24)፤ ኢየሱስ ክርስቶስ ከሙታን በመነሣቱ ለሕያው ተስፋና ለማይጠፋ፤ እድፈትም ለሌለበት ለማያልፍም ርስት ሁለተኛ የተወለድን እኛ (1 ጴጥ. 1፡3-5)፤ የተባረከው ተስፋችንን (ቲቶ 2፡12) በእምነትና በትእግሥት ልንጠባበቅ ያስፈልገናል፡፡ እምነት ያላየነውን አምነን በጽናት መዝለቅን ይሰጠናል፡፡

‹‹ተፈሣሕኩ ወተሐሠይኩ በእንተ ተፋቅሮትከ››

ስለ ፍቅር ‹‹እርስ በርሳችሁ ፍቅር ቢኖራችሁ፤ ደቀ መዛሙርቴ እንደ ሆናችሁ ሰዎች ሁሉ በዚህ ያውቃሉ›› (ዮሐ. 13፡35) በማለት አንዱ ጌታችን ኢየሱስ ክርስቶስ ተናግሯል፡፡ ተግባራዊ እምነት መገለጫው ፍቅር ነው፡፡ ወደ እግዚአብሔር የደረስነው ከእግዚአብሔር ለእኛ በተገለጠው ፍቅር (ዮሐ. 3፡16፤ 1 ዮሐ. 4፡10) በኩል እንደ መሆኑ ለሌሎች፤ በተለይ እንደ እኛ ላመኑቱ የፍቅር እዳ (ሮሜ 13፡8) አለብን፡፡ እግዚአብሔር ልጆቹ ተብለን የምንጠራበትን ፍቅር (1 ዮሐ. 3፡1) እንደ ሰጠን፤ እኛ ሌሎችን እንደ ተወደዱ ወንድሞችና እህቶች የምንቀበልበት ፍቅር ሊኖረን ይገባል፡፡ በእግዚአብሔር ማመናችን ሌሎችን መውደድን ይጠቀልላል፡፡
‹‹ . . . ስለ እኛ ደግሞ ጸልዩ፤›› /ቆላ. 4፡3/!

‹‹ይህ አሳርፎናል››

2016-01-06T10:16:00.001-08:00

በስመ አብ ወወልድ ወመንፈስ ቅዱስ አሐዱ አምላክ አሜን!

ረቡዕ ታኅሣሥ 27 ቀን 2008 የምሕረት ዓመት

‹‹ላሜሕም መቶ ሰማንያ ሁለት ዓመት ኖረ፥ ልጅንም ወለደ። ስሙንም፦ እግዚአብሔር በረገማት ምድር ከተግባራችንና ከእጅ ሥራችን ‹‹ይህ ያሳርፈናል›› ሲል ኖኅ ብሎ ጠራው።›› /ዘፍ. 5፡28-29/!

‹‹በተረገመች ምድር፡ ዕረፍታችን!›› በሚል ርእስ የጀመርነው ጽሑፍ ቀጣይ ንባብ ነው፡፡ ላሜሕ ‹‹ይህ ያሳርፈናል›› በማለት ተስፋውን በሚገልጥ መልኩ ከእረፍት ጋር በተያያዘ የልጁን ስም አውጥቷል፡፡ ዳሩ ግን ምድር ከአንተ የተነሣ የተረገመች ትሁን፤ በሕይወት ዘመንህም ሁሉ በድካም ከእርስዋ ትበላለህ፤ እሾህንና አሜከላን ታበቅልብሃለች፤ የምድርንም ቡቃያ ትበላለህ /ዘፍ. 3፡17/ ተብሎ የተረገመውን ላሜሕ (እኛንም ጨምሮ) ከወገቡ ፍሬ፤ ከእጁ ሥራ፤ ጽድቄ ከሚለው ተግባር እረፍትን ሊያገኝ አልቻለም፡፡

‹‹ጻድቅ የለም አንድ ስንኳ፤ አስተዋይም የለም፤ እግዚአብሔርንም የሚፈልግ የለም፤ ሁሉ ተሳስተዋል፤ በአንድነትም የማይጠቅሙ ሆነዋል፤ ቸርነት የሚያደርግ የለም፤ አንድ ስንኳ የለም›› /ሮሜ 3፡11-12/ ተብሎ እንደ ተጻፈ፤ ‹‹አንድ ስንኳ›› ቤዛ ለሰው ከሰው መካከል ባለ መኖሩ ‹‹በእርሱ የሚያምን ሁሉ የዘላለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለሙን እንዲሁ ወዶአል›› /ዮሐ. 3፡16/፡፡ እንግዲህ የእግዚአብሔር ልጅ ነፍሱን ለብዙዎች ቤዛ አድርጎ ሊሰጥና ኃጢአተኞችን ሊያድን ወደ ዓለም መጥቶአል /ማቴ. 20፡28፤ 1 ጢሞ. 1፡15/፡፡

የሰው ልጆች እንቆቅልሽ፤ የዚህችም ምድር ቋጠሮ ፍቺ በበረት በተወለደው በእግዚአብሔር ልጅ በኢየሱስ ክርስቶስ መገለጥ ውስጥ ነው (ዕብ. 1፡1-3)፡፡ ምቾትና እረፍትን ለሚፈልግ ልብ ‹‹ቃል ሥጋ ሆኗል›› /ዮሐ. 1፡14/፡፡ የእግዚአብሔር ልጅ ከድንግል ማርያም ተወልዶአል (ሉቃ. 2፡8-14)፡፡ በእውነት! ክብር ለእግዚአብሔር በአርያም ይሁን፤ ሰላምም በምድር ለሰውም በጎ ፈቃድ፤ ለሕዝቡ ሁሉ የሚሆን ታላቅ ደስታ የምስራች ኢየሱስ ብቻ ነው (2 ቆሮ. 5፡14)፡፡ ይህ አሳርፎናል!

በመጀመሪያዎቹ የማቴዎስና የሉቃስ ወንጌላት የትውልድ ቆጠራን እንመለከታለን፡፡ የእግዚአብሔር ልጅ፤ ‹‹የኢየሱስ ክርስቶስም ልደት እንዲህ ነበረ›› /ማቴ. 1፡18/ ካለ ወዲያ ግን ሌላ ትውልድ አይቆጥርልንም፡፡ ለዘመናት ክፉው ዲያብሎስ ሲያሳድድና ሲዋጋው የኖረው ዘር ‹‹የእግዚአብሔር ልጅ ከሆንህ›› /ማቴ. 4፡3/ በሚል ግራ መጋባቱ ፊት ሥራውን ሊያፈርስ ኢየሱስ በሥጋ ተገለጠ (1 ዮሐ. 3፡8)፡፡ እርሱ ከጨለማው ሥልጣን ያዳነን (ቆላ. 1፡13)፤ ወደሚደነቅ ብርሃኑ የጠራን (1 ጴጥ. 2፡9)፤ ከሞት ወደ ሕይወት ያሻገረን (ዮሐ. 5፡24)፤ ከሰማያዊው ጥሪ ተካፋዮች ያደረገን (ዕብ. 3፡1)፤ እውነትና ሕይወት መንገድም የሆነን (ዮሐ. 14፡6) . . ነው፡፡ ይህ አሳርፎናል!

ወንጌላቱ በእግዚአብሔር በአባቱ ስም የወጣለትን ‹‹ኢየሱስ›› /ማቴ. 1፡21/ እንደ ብቸኛ እረፍት ያቀርቡልናል፡፡ መልእክታቱም ይህንኑ በጥንቃቄ ያጠናክሩልናል፡፡ እርሱ ለድሆች ወንጌልን፤ ለታሰሩትም መፈታትን፤ ለዕውሮች ማየትን፤ ለተጠቁት ነጻ መውጣትን የሰበከ ነው (ሉቃ. 4፡17-19)፡፡

እርሱ የሕይወት ራስ (ሐዋ. 3፡15)፤ የማዕዘን ራስ (ሐዋ. 4፡11)፤ የወንድ ሁሉ ራስ (1 ቆሮ. 11፡3)፤ የቤተክርስቲያን ራስ (ቆላ. 1፡18)፤ የአለቅነትና የሥልጣን ሁሉ ራስ (ቆላ. 2፡10)፤ የመዳን ራስ (ዕብ. 2፡10)፤ የእምነታችን ራስና ፈጻሚ (ዕብ. 12፡2)፤ የሃይማኖታችን ሐዋርያና ሊቀ ካህናት (ዕብ. 3፡1)፤ . . ነው፡፡ ይህ አሳርፎናል!

እንደ ቃሉ በክርስቶስ ክርስቲያን ለሆኑ ሁሉ በአሁኑ ዓለም ኢየሱስ እረፍት ከሆነን በላይ ደግሞ ፍጹም እረፍት ወደ ፊት ተጠብቆልናል (ፊል. 3፡20)፡፡ በተስፋ እንደ መዳናችን (ሮሜ 8፡24)፤ የተባረከው ተስፋችንን እርሱም የታላቁን የአምላካችንንና የመድኃኒታችንን የኢየሱስ ክርስቶስን ክብር መገለጥ እንጠብቃለን (ቲቶ. 2፡11)፡፡ ስፍራ ላዘጋጅላችሁ ብሎ ስለ እኛ የቀደመው ጌታ እንደ ቃሉ ይመጣል (ዮሐ. 14፡2)፡፡ የማይጨረስ እረፍት በክርስቶስ!

ሕይወታችን የሆነ ክርስቶስ በክብር ሲገለጥ እኛ ደግሞ ከእርሱ ጋር በክብር እንገለጣለን (ቆላ. 3፡4)፤ ‹‹ኢየሱስ ክርስቶስ ከሙታን በመነሣቱ ለሕያው ተስፋና ለማይጠፋ እድፈትም ለሌለበት ለማያልፍም ርስት እንደ ምሕረቱ ብዛት ሁለተኛ የወለደን የጌታችን የኢየሱስ ክርስቶስ አምላክና አባት ይባረክ›› /1 ጴጥ. 1፡3/፡፡ የምስጋና ትልቅ ርእስ!

ኢየሱስ ክርስቶስ በጌርጌሴኖን አገር አጋንንት ያደረባቸውን ሁለት ሰዎች አግኝቶ ‹‹ኢየሱስ ሆይ፤ የእግዚአብሔር ልጅ ከአንተ ጋር ምን አለን? ጊዜው ሳይደርስ ልታሠቃየን ወደዚህ መጣህን?›› እያለ የሚጮኸውን ክፉ ከእነርሱ ወጥቶ ወደ እርያዎች መንጋ እንዲሰደድ አደረገው፡፡ ይህን ተከትሎ እረኞቹ ወደ ከተማ ሄደው የሆነውን ተናገሩ፡፡ ከተማው ሁሉ ኢየሱስን ሊገናኝ እንደ መጣ፤ ባዩትም ጊዜ ከአገራቸው እንዲሄድላቸው እንደ ለመኑት (ማቴ. 8፡28-34) ወንጌላዊው ጽፎልን እናነባለን፡፡

‹‹እግዚአብሔርንም፡- ከእኛ ዘንድ ራቅ፤ ሁሉንም የሚችል አምላክ ምን ሊያደርግልን ይችላል? አሉት›› /ኢዮ. 22፡17/ ተብሎ በቀደመው ኪዳን የተነገረው በአዲሱም ኪዳን በበለጠ ሲደገም እናስተውላለን፡፡ ዓለማችን ከመለኮት የሆነውን እረፍት በእሽታ መንፈስ በሚቀበሉ ሰዎች ብቻ የተሞላች አይደለችም፡፡ ‹‹እርሱ ሰላማችን ነው›› (ኤፌ. 2፡14) የተባለውን ጌታ የገፋች ምድርም እንደ ሆነች ልብ እንላለን፡፡ ደስታ የሆነውን አዝነውበት፤ ሰላም የሆነውን ታውከውበት፤ ጤና የሆነውን ታመውበት፤ እረፍት የሆነውን ተቅበዝብዘውበት፤ መፍትሔ የሆነውን ኢየሱስ ታውከውበት ‹‹ከአገራችን ሂድ›› አሉት፡፡

መፍትሔዋን ስለገፋችና ሰቅላ ስለገደለች ዓለም እንደነቅ ይሆናል፤ ዳሩ ግን ለክርስቶስ ጀርባውን ስለ ሰጠ ክርስትና (ሃይማኖትና ሥርዓት) የእግዚአብሔር ቃል የሚለውን ማስተዋል በእጅጉ አስፈላጊ ነው (ራእ. 3፡15-22)፡፡ የሎዶቅያ (የሰው አገዛዝ) ቤተክርስቲያን፤ ራስ የሆነው ክርስቶስ በስተውጪ ተጥሎ ‹‹እነሆ በደጅ ቆሜ አንኳኳለሁ፤ ማንም ድምፄን ቢሰማ ደጁንም ቢከፍትልኝ ወደ እርሱ እገባለሁ . . ›› የሚልባት የማኅበረ ምእመናን ስብስብ ናት፡፡ ‹‹በስሜ›› /ማቴ. 18፡20/ ያለው ጌታ፤ ስሙ ኢየሱስ ነው፡፡

የሕያው እግዚአብሔር ልጅ ኢየሱስ፤ እግዚአብሔር በረገማት ምድር ከተግባራችንና ከእጅ ሥራችን ያሳረፈን ነው፡፡ ነቢዩ በቅኔው ‹‹እግዚአብሔርን፡- አንተ ጌታዬ ነህ አልሁ፤ ከአንተ በቀር በጎነት የለኝም›› /መዝ. 15፡2/ እንዳለ፤ ሰው ከክፉ ሥራው ብቻ ሳይሆን በጎነቴ ከሚለውም ማረፍ አለበት፡፡ ደኅንነትን እንዳገኘ፤ ወደ ጽድቅም እንደ ደረሰ ሰው በበጎ ሥራና በፍሬ ልንገለጥ የሚያስፈልግ መሆኑ እንዳለ ሆኖ፤ ያንንም ልንደገፍበትና ከእግዚአብሔር ጋር ሒሳብ ልንተሳሰብበት ግን ፍጹም አይቻልም፡፡ ሰው ጽድቁም የመርገም ጨርቅ የሆነበት ምስኪን ነው፡፡

ስለ በጎ ፈቃዱ መፈለግንም ማድረግንም በእኛ የሚሠራ እግዚአብሔር ነው (ፊል. 2፡13)፡፡ ለዘላለም ሕይወት ሰው ለእግዚአብሔር የሚሠራለት ምንም ነገር የለም፡፡ የኃጢአታችን ደመወዝ ሞት እንደ ሆነ ሁሉ፤ የዘላለም ሕይወት ደግሞ በክርስቶስ ኢየሱስ የእግዚአብሔር የጸጋ ስጦታ ነው (ሮሜ 6፡23)፡፡ ሰዎች ሁሉ የሚድኑበት የእግዚአብሔር ጸጋ፤ ኃጢአተኝነትንና ዓለማዊን ምኞት የሚያስክድ ጸጋ ከእግዚአብሔር ለእኛ ተገልጦአል፡፡

ክርስቲያን ስላመነ እንዳመነ ሰው በእምነት ይኖራል (ሮሜ 1፡17) እንጂ ለዘላለም ደኅንነት እግዚአብሔር ከተግባሩና ከእጅ ሥራው (ከሰው) የሚፈልገው ምንም ነገር የለም፡፡ ጌታችን ‹‹እኔ ላደርገው የሰጠኸኝን ሥራ ፈጽሜ በምድር አከበርሁህ . . ›› /ዮሐ. 17፡4/ እንዳለ፤ ‹‹ኢየሱስም ሆምጣጤውን ከተቀበለ በኋላ፡- ተፈፀመ አለ፤ ራሱንም አዘንብሎ ነፍሱን አሳልፎ ሰጠ›› (ዮሐ. 19፡30)፡፡ የፈፀመው ጌታ አሳርፎናል!

በሰማርያ የተሰበከውን የምስራች ተከትሎ ከከተማው ብዙ ሕዝብ ወደ ኢየሱስ መጣ (ዮሐ. 4፡39)፡፡ ብዙዎችም በእርሱ አመኑበት፤ በእነርሱም ዘንድ እንዲኖር ለመኑት፡፡ ተወዳጆች ሆይ፤ አንዱ ኢየሱስ ጌርጌሴኖን ላይ ሂድልን ተብሎ ሲለመን፤ ሰማርያ ላይ ደግሞ ከእኛ ጋር ኑር ተብሎ ሲለመን እንመለከታለን፡፡ በእናንተ ልብ ውስጥ ኢየሱስ እንዴት ነው? በሰማርያ ያሉቱ ክርስቶስ የዓለም መድኃኒት እንደ ሆነ በማወቅና በማመን አረፉበት፤ ‹‹እነሆ ለሕዝቡ ሁሉ የሚሆን ታላቅ ደስታ የምሥራች እነግራችኋለሁና አትፍሩ፤ ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና›› /ሉቃ. 2፡10/፡፡ በእውነት! እርሱ ጌታ ክርስቶስ ኢየሱስ አሳርፎናል!!
‹‹ . . . ስለ እኛ ደግሞ ጸልዩ፤›› /ቆላ. 4፡3/!

በተረገመች ምድር፡ ዕረፍታችን!

2016-01-04T05:10:00.003-08:00

በስመ አብ ወወልድ ወመንፈስ ቅዱስ አሐዱ አምላክ አሜን!

በስመ አብ ወወልድ ወመንፈስ ቅዱስ አሐዱ አምላክ አሜን!

ሰኞ ታኅሣሥ 25 ቀን 2008 የምሕረት ዓመት

‹‹ላሜሕም መቶ ሰማንያ ሁለት ዓመት ኖረ፥ ልጅንም ወለደ። ስሙንም፦ እግዚአብሔር በረገማት ምድር ከተግባራችንና ከእጅ ሥራችን ይህ ያሳርፈናል ሲል ኖኅ ብሎ ጠራው።›› /ዘፍ. 5፡28-29/!

የመጽሐፍ ቅዱሳችን የመጀመሪያ ክፍል የሆነው የዘፍጥረት (የልደት) መጽሐፍ የትውልዶችን ጅማሬ የሚያስረዳን መጽሐፍ ነው፡፡ ስለ ተፈጥሮ ጅማሬ፤ ግሩምና ድንቅ ሆኖ ስለ ተፈጠረው የሰው ልጅ፤ ውድቀት ስላስከተለው ኪሳራ፤ ያንን ተከትሎ ለሰው ስለተሰጠው የመዳን ተስፋ የምናውቅበት ክፍል ነው፡፡ ምእራፍ አምስት ‹‹የአዳም የትውልዱ መጽሐፍ ይህ ነው›› በሚል ርእስ ይጀምራል፡፡

በምእራፉ ውስጥ፡

1. አዳም (5፡1-5)፡- ሰው ማለት ነው፡፡

2. ሴት (5፡6-8)፡- ምትክ ማለት ነው፡፡

3. ሄኖስ (5፡9-11)፡- ደካማ ማለት ነው፡፡

4. ቃይናን (5፡12-14)፡- አሳዛኝ ማለት ነው፡፡

5. መላልኤል (5፡15-17)፡- በእግዚአብሔር የተባረከ ማለት ነው፡፡

6. ያሬድ (5፡18-20)፡- ቀጣይ ትውልድ ማለት ነው፡፡

7. ሄኖክ (5፡21-24)፡- ትምህርት ማለት ነው፡፡

8. ማቱሳላ (5፡25-27)፡- ሲሞት ይመጣል ማለት ነው፡፡

9. ላሜሕ (5፡28-31)፡- ኃይለኛ ማለት ነው፡፡

10. ኖኅ (5፡32)፡- ዕረፍትና ምቾት ማለት ነው፤ (ዝርዝሩ እስከ ዘፍ. 6፡8 ድረስ ይቀጥላል)፡፡

ከላይ ከተዘረዘሩት ትውልዶች መካከል ኃይለኛና ብርቱ የሚል የስም ትርጉም ያለው ላሜሕ ለልጁ ለኖኅ ያወጣለትን የስም ትርጉም በተነሣንበት ርእስ ለማየት እንሞክራለን፡፡ ስሙንም፦ እግዚአብሔር በረገማት ምድር ከተግባራችንና ከእጅ ሥራችን ‹‹ይህ ያሳርፈናል›› ሲል ኖኅ ብሎ ጠራው፤ ተብሎ ተጽፎልናል፡፡ በላሜሕ ልብ ውስጥ ያለውን ታላቅ ምኞት አስተውላችሁ ከሆነ በአጭር ቃል ‹‹ዕረፍት›› መሆኑን ትደርሱበታላችሁ፡፡

‹‹ምድር ከአንተ የተነሣ የተረገመች ትሁን›› /ዘፍ. 3፡17/ የተባለውን አዳምን ስናስታውስ፤ ‹‹ስለዚህ ምክንያት ኃጢአት በአንድ ሰው ወደ ዓለም ገባ በኃጢአትም ሞት፥ እንደዚሁም ሁሉ ኃጢአትን ስላደረጉ ሞት ለሰው ሁሉ ደረሰ፤›› /ሮሜ 5፡12/ የሚለውን ግልጽ ታሪካችንን ልብ እንላለን፡፡ እግዚአብሔር በሰው ውድቀት ላይ ፍርድን ሲያስተላልፍ አብሮ የመዳን ተስፋን ስለሰጠ (እርሱ ራስህን ይቀጠቅጣል፥ አንተም ሰኰናውን ትቀጠቅጣለህ)፤ አዳምና ሔዋን የሰሙትን ተስፋ በማመን አዳኙን እንደጠበቁ እናስባለን፡፡

ትውልድ በቀጠለ ቁጥር ‹‹ራስህን ይቀጠቅጣል›› የተባለለትን ከወለዱት መካከል ተስፋ ያደርጋሉ፡፡ ሔዋን የመጀመሪያ ልጇን በወለደች ጊዜ ‹‹ወንድ ልጅ ከእግዚአብሔር አገኘሁ›› /ዘፍ. 4፡1/ በማለት ተናግራለች፡፡ ሔዋን በወለደችው በቃየን ውስጥ የእባቡን ራስ የሚቀጠቅጥ ማንነትን ተስፋ አድርጋ ይሆናል፤ ዳሩ ግን አምጣ የወለደችው የወንድሙን ራስ የሚቀጠቅጥ እባብ ሆነባት፡፡ ‹‹የምትዘገይ ተስፋ ልብን ታሳዝናለች›› /ምሳ. 13፡12/ ተብሎ እንደ ተጻፈ፤ የሔዋን (የሕያዋን ሁሉ እናት) ልብ ምን ያህል ያዝን ይሆን፡፡

አዳምና ሔዋን የበደላቸውን ውጤት ምድር ላይ አይተዋል፡፡ የመርገሙንም ቀጣይነት ተገንዝበዋል፡፡ አቤል (እስትንፋስ ማለት ነው) በወንድሙ ጭካኔ ወዲያው ታይቶ ሲጠፋ፤ ከእግዚአብሔር መለየት የሚያስከፍለው ዋጋ ለአዳምና ለሔዋን ግልጽ ነበረ፡፡ ሞት ምን እንደ ሆነ የማያውቁት አዳምና ሔዋን እግዚአብሔር አንድ እንስሳ ሠውቶ ባለበሳቸው በቁርበቱ በኩል፤ አቤል ደግሞ በእምነት ባቀረበው በመሥዋዕቱ (በበጉ) በኩል ከዘላለም ሞት የሚመለጥበትን አስተዋሉ (ዮሐ. 1፡29)፡፡

ብሉይ ኪዳን ትውልድ ይቆጥራል፡፡ ለመጀመሪያው ሰው የተሰጠውን ተስፋ ወደ ፍጻሜ መምጣት በሚወልዷቸው ልጆች መካከል በብርቱ ይፈልጋሉ፡፡ ስማቸውንም ሲያወጡ በአብዛኛው የተሰጠውን ተስፋ ባገናዘበ መልኩ ነበር፡፡ ይመጣል የተባለው መሲሕ መምጣቱ በእጅጉ ይናፈቅ ነበርና፡፡ አዳም ‹‹ሰኮናው የሚነከስ ክርስቶስ›› ከሔዋን እንደሚወለድና የእባቡ ራስ እንደሚቀጠቀጥ እግዚአብሔር የተናገረውን ሰምቶ (እምነት ከመስማት ነው) አምኗል፡፡ ከእርሱ ከሚወለደው የአብራኩ ክፋይ ‹‹ዕረፍትን›› እንዴት ሊናፍቅ እንደሚችል እንረዳለን፡፡

ኖኅ የስሙ ትርጉም እግዚአብሔር በረገማት ምድር እረፍት ወይም ምቾት የሚል ነው፡፡ አባቱ ላሜሕ በልጁ ላይ ምን ያህል ተስፋ እንዳደረገ እናስተውላለን፡፡ እረፍትን የሚፈልግ የተበላሸ የሰው ታሪክ ዛሬም የምድሪቱ ሸክም ነው፡፡ ላሜሕ ኃይለኛ (ብርቱ) የሚል ስም ቢኖረውም ለተረገመችየረቱ ምድር ግን እረፍት መሆን አልቻለም፡፡ ስለዚህ በእርሱ በኩል ያልመጣውን ምቾት በልጁ በኩል እንደሚሆን አሰበ፡፡

በእምነት የሚገኘውን ጽድቅ ወራሽ የሆነው ኖኅ፤ አካሄዱን ከእግዚአብሔር ጋር በማድረግ ዓለምን የኮነነ፤ የእግዚአብሔርን ማስጠንቀቂያ በመቀበል ስለማይታየው፤ ነገር ግን በተቀጠረው ጊዜ የሚሆነውን ፍርድ የተረዳና መርከብን በእምነት ያዘጋጀ ነበር (ዕብ. 11፡ 7)፡፡ በኃጢአተኞች ዓለም ላይ የጥፋትን ውኃ ያወረደው እግዚአብሔር፤ የጽድቅ ሰባኪ የነበረውን ኖኅን ግን ከሌሎች ሰባት ጋር እንዳዳነው ቅዱሱ መጽሐፍ ይነግረናል (2 ጴጥ. 2፡5-6)፡፡

የደኅንነት አምላክ አምላካችን እግዚአብሔር ነው፤ ከሞት መውጣትም ከእርሱ ብቻ ነው (መዝ. 67፡20፤ ሮሜ 1፡16)፡፡ እግዚአብሔር ከመጣው የጥፋት ውኃ ያዳነው ኖኅ፤ ገበሬ መሆን በጀመረና ወይን በተከለ ጊዜ ከዚያው ጠጥቶ እንደሰከረና እንደተራቆተ እንመለከታለን (ዘፍ. 9፡20)፡፡ በመጀመሪያው ሰው የታየው መራቆት ቀጣይነቱን እንዴት እንዳስጠበቀ አስተውሉ፡፡ ያ በእባብ ምክር ይኼ በሥጋው ምኞት ሁሉም እግሮች ወደ ሞት ይፈጥኑ ነበር፡፡

በቀደመው ኪዳን ‹‹ሰማዮችን ቀድደህ ምነው ብትወርድ›› /ኢሳ. 64፡1/ የተረገመችይቱ ምድር ብርቱ ጩኸት ነበር፡፡ ለሰው እረፍትና ምቾትን ሊያመጣ የሚችል ከሰው መካከል አንድ ስንኳ አልተገኘም (ሮሜ 3፡9-23)፡፡ ‹‹አቤቱ፤ እባክህ አሁን አድን፤ አቤቱ እባክህ አሁን አቅና፡፡›› /መዝ. 117፡25/ ጽድቁ እንደ መርገም ጨርቅ የሆነው /ኢሳ. 64፡6/ የሰው ዘር የጋራ ጸሎት ርእስ ነው፡፡ ላሜሕ ኃይለኛውን፤ ኖኅ እረፍት አልሆነውም፡፡ በእርግጥም ‹‹ይህ ያሳርፈናል›› የተባለው እውነተኛ የዘላለም እረፍት ሊሆን አልተቻለውም፡፡

‹‹እግዚአብሔርም አየ . . ሰውም እንደሌለ አየ . . ስለዚህ የገዛ ክንዱ መድኃኒት አመጣለት ጽድቁም አገዘው›› /ኢሳ. 59፡16/ ተብሎ እንደተጻፈ፤ ‹‹ . . የዘመኑ ፍጻሜ በደረሰ ጊዜ እግዚአብሔር ከሴት የተወለደውን ከሕግም በታች የተወለደውን ልጁን ላከ፤ እንደ ልጆች እንሆን ዘንድ ከሕግ በታች ያሉትን ይዋጅ ዘንድ፡፡›› /ገላ. 4፡4/፡፡ ሔዋን ከእግዚአብሔር አገኘሁ ያለችው ወንድ ልጅ በእባቡ መስመር የሄደ ቢሆንም፤ አለቅነት በጫንቃው ላይ የሚሆን፣ ስሙም ድንቅ መካር ኃያል አምላክ የዘላለም አባት የሰላም አለቃ ተብሎ የሚጠራ፤ የእባቡን ራስ የሚቀጠቅጠው ከእግዚአብሔር የተሰጠን ወንድ ልጅ ተወለደ (ኢሳ. 9፡6፤ ሉቃ. 2፡11)፡፡ ‹‹ይህ አሳርፎናል››!

ኖኅ ድካሙ ያመጣበትን ራቁትነት እናይበታለን፤ ኢየሱስ ክርስቶስ በእግዚአብሔር ጸጋ ስለ ሁላችን ኃጢአት እርቃኑን በመስቀል ላይ የተሰቀለ ነው (ዕብ. 2፡9)፡፡ እርሱ ኤሎሄ ኤሎሄ ላማ ሰበቅታኒ? (አምላኬ አምላኬ ለምን ተውኸኝ?) በማለት ራሱን ከእኛ ጋር በመቁጠር (ማር. 15፡34)፤ ‹‹በእንጨት የሚሰቀል ሁሉ የተረገመ ነው ተብሎ ተጽፎአልና ክርስቶስ ስለ እኛ እርግማን ሆኖ ከሕግ እርግማን ዋጀን›› /ገላ. 3፡13/፡፡ በተረገመችይቱ ምድር ስለ እኛ እርግማን የሆነው፤ በቤተልሔም በበረት የተወለደው ኢየሱስ ነው፡፡

እግዚአብሔር ‹‹ሕዝቡን ከኃጢአታቸው ያድናቸዋል›› ያለው ኢየሱስ ብቸኛው እረፍት ነው፡፡ እርሱ ብቻ ‹‹እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ።›› /ማቴ. 11፡28/ ማለት ተችሎታል፡፡ ተወዳጆች ሆይ፤ እረፍትና ምቾት በእግዚአብሔር ልጅ ላይ ባለን የእምነት መደገፍ የሚሆን ነው፡፡ - ይቀጥላል

‹‹ . . . ስለ እኛ ደግሞ ጸልዩ፤›› /ቆላ. 4፡3/!