Dairii`s diary

2016-06-04T00:11:00.000+09:00

Нулимс чинь амтагдаад байна,цээжинд
Нуугдаж юунд уйлна вэ
Гуниг чинь мэдрэгдээд байна минь,сэтгэлд
Гутарч юунд шанална вэ
Дэргэд чинь биш ч зүрхэнд чинь
Зүрхэнд чинь биш ч сэтгэлд чинь
Хэвээрээ би байгаа бол
Хэзээ ч чи ганцаардахгүй ээ
Хайр амлаж,жаргал бэлэглэхгүй ч
Харь холоос бодож суугааг минь санаад
Инээмсэглээрэй

2016.6.4.Япон улс
Dairiijav Ayurzana

ОХИНДОО НОМ УНШИЖ ӨГӨӨРЭЙ

2016-03-31T01:00:00.001+09:00

Би 3-4настай л байсан юм боловуу?
Ой ухаан дөнгөж эргэн тойрноо бүдэг бадаг мэдэрч эхэлсэн балчирхан үеийн минь мартагдашгүй нэгэн тод дурсамж гэвэл одоо ч хайртай,хамгийн дуртай номтойгоо анх учирсан тэр мөч юм.
Аав минь зуны нэг өглөө эрт намайг дагуулаад гэрээс маань холгүй орших томоохон номын дэлгүүр орж,хүүхдийн 2ном авч өглөө.
Тавиур дээр эгнэсэн олон номуудаас аль гоё харагдсаныгаа хуруугаараа заахад хамгийн дээд эгнээний багавтар хэмжээний хүрэн улаан хавтастай,нимгэн,зурагтай ном,цэнхэр хавтастай бас нэг номыг худалдагч эмэгтэй гараа сунган авч өгч байсныг,тэр номоо худалдаж аваад номын дэлгүүрээс баруун тийш хэсэг алхаад байдаг дунд сургуулийн налуу,намхан,чулуун дэнж дээр намайг тэвэрч суугаад уншиж өгч байсныг,аав минь инээж байсныг,сахал нь дагзнаас хатгаж байсныг,цоо шинэ номын хуудаснууд маш гоё үнэртэй байсныг,дээл нь цэнхэр өнгөтэй байсныг ер мартдаггүй юм.

Одоо бодоод байхнээ,аав минь л анх номын ертөнцөд намайг хөтлөн оруулжээ.
Би өөрөө ном уншиж чаддаг болчихоод аавдаа уншиж үзүүлэхэд хамгийн их баярлаж байсныг нь,тэр их хайр,бахархал гэрэлтсэн харцыг нь ч мартдаггүй юм .

Охиндоо ном авч өгдөг,охиндоо ном уншиж өгдөг олон сайхан (номын андууд)аавууддаа хандаж хэлэхэд охин тань аавдаа тэврүүлээд ном уншсан энэ насаа хэзээ хойно ч марталгүй үр хүүхдэдээ ярьж,танаар бахархан дурсаж явдаг юм шүү!!
Бага ч болов зав гарвал охиндоо ном уншиж өгч байгаарай,хайрт аавуудаа.

2016-03-26T01:06:00.000+09:00

Өөрийгөө таних тусам бусдыг өөлөх,муулахаас айдаг,ичдэг зовдог,бусдын сул тал,алдаа гэмийг уучилж чаддаг болдог юм байна.
Хүн хэлэх яахав,өөрийгөө л хичээ!!гээд ээж минь багад ер бусдыг муулуулдаггүй,өөрөө ч хүн муу хэлдэггүй хүн байсансан.
Одоо бодож байхад хамгийн том үнэн сургаал,үлгэр дууриалал байжээ.
Бусдаас илүү гарах яах вэ?Ядахдаа хүн шиг хүн болохсон гэж л бодогдох боллоо.
Хүнийг хэлэх яахав,өөрийгөө л хичээе.

2016-03-20T01:07:00.000+09:00

-Алганы хээ шиг чи минь
Аль насны ерөөл юм бол доо...

-Дараа насандаа намайг
Заавал бэрээ болгоорой
Даанч гэнэхэн хүссэн
Гучин насны хавар аа...

-Бичихгүй захиагаа уншуулдаг
Биелэхгүй хүслээ илчилдэг
Хэлэхгүй үгээ дайдаг
Хэнэггүй харцанд чинь нь л хоргоддог

-Үнэрийг чинь элддэг минь үнээн
Үргэлж ард нь шиншилмээр
Чи тийм л анхилуун...

-Чи даанч мэдэхгүй
Надад бүтэхгүй хайрын дэвтэр л үлдсэнийг...
Чи мэдэхгүй,шүлэг бичээд сэтгэлээ номхруулдгийг минь,даанч...
Чи...

-Тархинд чи харваж
Зүрхэнд чи хурж
Шүлгэнд чи үлддэг ч
Дэргэд чи л үгүй...

-Хуримын бөгж нь сэтгэл сэмлэнэ
Хувааж идэх аргагүй хүний амттай хоол...

2016.3.20,Япон.
©Dairiijav Ayurzana

2016-02-15T01:18:00.000+09:00

-Хайрт минь гэж хэлж зүрхлээгүй хайр минь байсаан,чи...
Хайр минь гэж дуудаж чадаагүй хайрт чинь байсаан,би...

-Хайртай гэдэг үг бидэнд дутсан болохоор
Баяртай гэдэг үг л энд тунасан болохоор
Шивнээд үлдээсээн гэрэлтэй цонхны чинь гадаа
Сэмхэн унагасаан нулимсаа,гэртээ би ганцаараа

-Дахиад чамайг зүүдэлсэн ч сэтгэл догдлохгүй юм бол
Ахиад чамтай ярилцсан ч хоолой чичрэхгүй юм бол
Эргээд чамайг залгахад утсаа авахгүй юм бол
Энэ зургаан хавар хэний төлөө гуниглаа вэ

-Өгсөн чихрийн чинь цаас болгоныг хадгалдаг
Өнөөдөр харин эднийгээ хаямаар санагдаад болдоггүй ээ

-Юу ч байхгүй ээ,бидний дунд
Хамтдаа авхуулсан зурагнаас өөр...
Юу ч үлдээгүй ээ,бидний дунд
ганцаараа мөрөөдсөн үнсэлтээс өөр...

2016.2.14.Japan
©Dairiijav Ayurzana

Өнөөдрийн ном:13

2015-12-05T13:10:00.002+09:00

МЯНГАН НАРНЫ ЦАЦРАГ
Уг зохиол нь Халед Хоссейнигийн хоёр дахь ном бөгөөд өмнөх ЦААСАН ШУВУУ НААДУУЛАГЧын адил 2007онд худалдаанд гарсан цагаасаа Америкийн Нъю-Йорк Таймс сэтгүүлээс шалгаруулдаг хамгийн их борлуулалттай номын жагсаалтыг тэргүүлэн,2007оны шилдэг зохиолоор шалгарч,дэлхийн олон оронд орчуулагдан хэвлэгдэж,мөн кино болон дэлгэцнээ гарсан билээ.
Хэрэв зохиолч Халед Хоссени нь бага насандаа Америкт дүрвэж гараагүй бол магадгүй өнөөдөр дэлхий дахин Афганистан оронд,ЗХУ-ын өдөөсөн Афганы дайнд чухам юу болж өнгөрснийг,Талибанчуудын засаглал нь ялангуяа эмэгтэйчүүд болон Монгол гаралтай гэгдэх бүх Хазарчуудын хувьд тамын халуун тогоо байсныг ийм дэлгэрэнгүй мэдэж чадахгүй байсан л болов уу.Тиймдээ ч дэлхийн уншигчид гараа чичрүүлэн,нулимс дуслуулан уншсан бизээ.
Энэ зохиолыг уншсанаар өчигдөрхөн бид аль нэг мэдээгээр Ливи,Сири,Ирак болон бусад оронд террорист халдлага,дэлбэрэлт гарсан тухай сонсоод хүний амь үрэгдсэн тоог банкны хувьцааны тоон үзүүлэлт мэт чихний хажуугаар өнгөрөөдөг байсан бол Парисын халдлагын чинээ сэтгэл сэрдхийн,халаглан залбирдаг болно.
Исламчууд бүгд яргачин гэж хомроголон хэлмэгдүүлдэг байсан бол ислам шашинтан хүн өөрөө тэдний шашныг үнэ цэнэгүйдүүлж,амийг нь хумхын тоосны төдий ч саналгүй үрэгдүүлэгч алуурчид болон хөрөнгөтөн,хүчирхэг орнуудын золиос болон дайны хөлд хэлмэгдсээр байгааг ойлгох болно.
Зохиолын гол дүр бол НЭГЛИЙ ҮР гэгдэн эх,эцэгтээ гологдсон,бага зэрэг зөрүүд арван таван настай Мариам охин бөгөөд эх Нана нь түүний ухаан орсон цагаас эцэг Жалилыг нь эцэс төгсгөлгүй муулдаг байв.Гэвч пүрэв гариг бүрт өөрийг нь зорин ирдэг аавыгаа Мариам тэсэн ядан хүлээнэ.Тэр өөрийг нь голсон гэхэд итгэхийн аргагүй ихээр охиндоо хайртай бөгөөд ирэх бүртээ бэлэг сэлт болж,хамтдаа тоглон,элдвийг ярьж сонирхуулна.Гурван эхнэр,есөн хүүхэдтэй нь хамт ижил тогооноос хоол идэх эрхгүй,уулзах учир шалтгаангүй ч нэг л өдөр ах,эгч нарынхаа хамтаар барааг нь ч хараагүй зайрмагийг долоонгоо аавынхаа ажиллуулдаг кинотеатрт мөр зэрэгцэн суугаад кино үзэхийг мөрөөднө.Төрсөн өдрөөрөө амалсан ёсоор дагуулж явахаар ирэх ёстой аавыгаа хүлээж ядаад ээжийнхээ хориглосоор байхад нүдийг нь хариулан толгодын орой дахь умгар урцнаасаа уруудан гүйсээр аавынхаа амьдардаг хотод очно.Эхийнхээ үгэнд ороогүй энэ цаг мөч түүнийг нэг мөсөн хагацлын,зовлонгийн хар ангалд түлхэн унагана гэдгийг охин яахин мэдэх билээ?
Мариам охин дэндүү их хайр, итгэлээ эх,эцгийнхээ хамт алдаад зогссонгүй насан туршдаа төрсөн нутаг Гератаас алс хол орших Кабул хотод хайр сэтгэлгүй 30нас ах хүнд богтлогдон,гивлүүрний ард,эрх чөлөөгүй,эр нөхрийн гарын хор гаргагч,гэрийн хог цэвэрлэгч болон хүч мөхөс амьдрана.
Үр хүүхэд,баяр хөөргүй хөөрхий Мариамын амьдралыг Афганы дайн ч хангалттай хүндрүүлэн,Талибанчуудын дарангуйлал хэрцгийлэн зовооно.Гарах гарцгүй хүч мөхөс түүнтэй уулзахаар төрсөн эцэг нь эргэн ирэх боловч бүсгүй гэртээ оруулсангүй.Түүнд тэгэх ч бүрэн эрх,шалтгаан байсан юм.Олон жилийн хойно энэ бүхнийг өөртөө цорын ганц гэрэл гэгээ болон ирсэн нэгэн хар элгийн охинд ярьснаар Мариам өөрөө ч мэдэлгүй олон олон хүний хувьд мянган нарны цацраг мэт их аврал,ачлалын эзэн болно.Эцэст нь тэр бүхний төлөө Мариам орчлон хорвоод баян эзэнтний зарцаа эзэмдэн жирэмслүүлснээр төрсөн бутач үр болон мэндлэх ёстой байсан юм гэжүү?Тэр өдөр Мариамд яг юу тохиолдов?Яагаад бүх аз жаргал нь орвонгоороо эргэчихэв?
Мариам үнэндээ аавынхаа хувьд хэн байсныг амьддаа мэдэж чадаагүй нь харамсалтай.Уулзах гээд очиход нь хэрэв аавыгаа гэртээ оруулсан бол амьдрал нь лавтай зөв голдиролдоо орсон байхыг хэн мэдэх билээ?
Гэвч тэр нэгэн цагт түүнийг гүйгээд ирэхэд нь гэртээ оруулсансан бол аав нь өөрөө насны эцэст тийм захиаг үлдээлгүй,охиноороо толгойгоо түшүүлээд хорвоог тайван орхих байсан ч юм билүү?
Эцгээсээ та уучлал гуйсан захиа авч үзсэн үү?Би лав авч үзээгүй.
Тэр хэрээрээ Жалилын захиаг уншаад уйлахгүй байж чадаагүй юм.Үрээсээ уучлал гуйхгүйн тулд үрээ битгий гомдоогоорой,битгий хаяж яваарай,аав нараа.
Энэ зохиолыг уншаад хувь заяа,хүний оршин байгаа бүхэн,хорвоод мэндэлсэн бүхэн учир утгатай мэт санагдсан билээ.Би ч,та ч энэ хорвоод ирсэн нь ямар нэг учиртай,хэн нэгний хувьд утгатай нь үнэн юм байна.Энэ зохиолыг уншаад ингэж бодохгүй байхын аргагүй байлаа.
Та бүхэн өөрсдөө уншаад,дээр бичсэн олон оньсого ээдрээг тайлаад үзээрэй.Бүгд тайлагдахад сэтгэлд тань зөвхөн нарны зөөлөн цацраг мэт бүлээн илч л үлдсэн байх болов уу.
Харамсалтай нь Мариам шиг олон олон эмэгтэйчүүд өнөөдөр ч гивлүүрийн цаана зодуурын хөхөрсөн сорви,хатаж амжаагүй нулимсаа нуусаар яваа.Тэгэвч тэр л гивлүүрийнхээ дотор эрх чөлөө,аз жаргалыг бас мэдэрдэг нь гайхалтай.
Тэдэнд ажил хийх эрх,хайр сэтгэлээ өөрийн хүслээр сонгох,хүсээгүй жирэмслэлтээс өөрийгөө хамгаалах,сурах боловсрох,үгээ чөлөөтэй хэлэх,шүтэх эс шүтэх зэрэг та бидэнд бол хамгийн түгээмэл эрх чөлөөгөө эдэлж чадахгүй яваа нь үнэн.Дээр нь дотоодын шашин болон үндэстэн хоорондын мөргөлдөөн,гадны сөрөг довтолгооны улмаас үр хүүхэд болон хань ижил,хамаатан саднаасаа амь насаараа хагацан салж байна.Эрүүл саруул,элэг бүтэн байгаа нь л аз жаргал болсон хүн байдаг гэдгийг мэдэхээрээ бид өөрсдийн эрх чөлөөгөө улам хайрламаар тийм л ном,зохиолч ч үүнийг бидэнд ойлгуулах гэж зорьсон болов уу?

Нэр:Мянган нарны цацраг
Зохиогч:Халед Хоссейни
Орчуулсан:Доржсүрэнгийн Болдбаатар
Төрөл:Уран зохиол
Хэвлэлийн газар:Соёмбо Принтинг
Хэвлэсэн он:2013
Хэвлэсэн тоо:
Хуудас:489
Үнэ :
Хувийн үнэлгээ:☆☆☆☆☆
©Dairiijav Ayurzana2006-2015

Өнөөдрийн ном:12

2015-12-04T13:06:00.000+09:00

ЦААСАН ШУВУУ НААДУУЛАГЧ
Афганистан гаралтай ба Америкт бага насандаа гэр бүлээрээ дүрвэн гарсан,дотрын эмч, зохиолч Халед Хоссейнигийн анхны зохиол болох “Цаасан шувуу наадуулагч” нь 2003 онд Америкт хэвлэгдэн гарснаасаа хойш Нъю-Иорк Таймс сэтгүүлийн БЭСТ СЭЛЛЭР-ийн жагсаалтад 64долоо хоногийн турш жагсаж,дэлхийн олон орны хэлээр орчуулагдан,нийт 80сая хувь хэвлэгдэн гарсан гайхалтай зохиол,шилдэг ном юм.
Зохиолын үйл явдал 1975оноос эхэлнэ.
1963онд Афганистаны нийслэл Кабул хотод нутаг усандаа нэр хүнд,хөрөнгө чинээтэй Бабагийн хүү болон төрсөн Амир болон Бабагийн гэрийн зарц Алигийн хүү болох 1965онд мэндэлсэн Хассан хэмээх хоёр хүүгийн үй зайгүй үерхэл нөхөрлөлөөр өрнөнө.Амирын ээж боловсролтой,үзэсгэлэнтэй багш хүн байсан боловч хүүгээ төрүүлэхдээ өөрөө эндэж нас барна.Ажил ажил гээд завгүй аавын оронд ээжээс нь үлдсэн номууд л түүний хань болно.Заримдаа найз Хассандаа ном уншиж өгөх боловч,үсэг бичиг мэдэхгүйгээр нь далимдуулан даапаалж голоос нь зохион,худлаа уншиж өгнө./Энэ үеэс Амирын зохиол бичих авъяас нь тодорч эхэлнэ/Тэгсэн ч Хассан үл ажран,анхааралтай нь аргагүй сонсож,баярлан хөөрнө.Хассан бол тийм л гэнэн итгэмтгий,эзэндээ үнэнч,сайхан сэтгэлтэй хүү бөлгөө.Тэрээр ухаан орсон цагаасаа эцэг Алигийн хамт Амирийн гэрт зарцлагдан,бага эзэнтнийхээ өглөөний хоолыг бэлдэн,өмсөх хувцсыг нь индүүднэ.Ээж нь олны харцыг булаах үзэсгэлэнтэй хүүхэн байсан ч хормой султайгаасаа болоод хүүгээ төрүүлээд,хөхөө амлуулалгүй гэрээсээ зугатан одсон гэгддэг.Сургуульд хэдий суугаагүй ч Хассан бол төрөлхийн ухаалаг,даруу ,юманд эв дүйтэй,сонор соргог,сэргэлэн цовоо билээ.Хөвгүүдийн дунд чавхаар харвах, цаасан шувуу хөөргөх чадвараараа Хассаны өмнө гарах чадалтай хүү Кабул хотод лав байхгүй.Амирыг Хассан л хамгаалж,Хассан л өргөж явна.
Манайхаар бол юу юм болдоо?Цаасан шувуу хэмээх хөвгүүдийн авхаалж самбаа,ур чадварыг сорьдог тоглоомд Афганистанчууд учиргүй их ач холбогдол өгдөг болохыг энэ зохиолоос мэдэрч болно.Өөрийг нь гэхээс ажил алба,хар элгийн бусдад цаг мөнгөө зарж явдаг аавынхаа анхаарлыг татах гэж Амир хөвгүүн цагаан сараар зохиогддог ЦААСАН ШУВУУ хөөргөх уралдаанд Хассаны хамт оролцно.Хоёр хүү гайхамшигтай сайн тулалдаж,ялалтын эзэн болох боловч,уралдааны төгсгөлд Хассан хүүг Хазара ястангаар нь шалтаглан,цаасан шувуугаа булаалгаагүйд нь хорссон Асеф тэргүүтэй довны гурван овгор баньд дэндүү муухай доромжилно.
Цаасан шувуугаа хаана унасныг олохоор гүйж одсон Хассаны араас элдэн харанхуй бүрүйн дунд арай гэж олсон Амир хөвгүүн найзыгаа тэдэнд хэрхэн хүчирхийлүүлж байгааг харахаас өөр юу ч хийж чадаагүйгээр барахгүй,түрүүлээд зугтан харина.Хүн чанаргүй загнасан түүнд юу тохиолдсоноо хэлэх нь байтугай цус нөж болсон өмд хувцасаа холбирч унаад шалбарчихсан гэж худлаа хэлэн,тас нууна.Амир бүгдийг харсан.Бүгдийг мэдэж байгаа ч найзыгаа аварч чадаагүй өчүүхэн биедээ,үнэнээ хэлэлгүй гүрийсээр байгаа Хассанд өсөрхөн гомдно.Тэр хичнээн хоновч ганц ч үг цухуйлгасангүй.Харин өдөр ирэх тусам бие нь доройтож,үг ч дуугарахаа болино.Тэсвэр нь барагдсан Амир найзыгаа холдуулахаар шийднэ.Өөрөөс нь илүү Хассанд анхаарал,халамж тавиад байх шиг хар буудаг сэтгэл нь ч дарь нэмнэ.
Төдөлгүй төрсөн өдрөөрөө цугласан бэлэгнээс мөнгө,бугуйн цаг алга боллоо хэмээн аавдаа гомдоллон,Хассаныг л авснаас зайлахгүй гэж гүтгэнэ. Хассаны муу оромжинд аваачаад нуухаа тэр мэдэлгүй яахав.Яалтчгүй Хассаны гэрээс алдагдсан юмс нь гарч ирэхээр амыг нь асуув.-Тиймээ,би авсан гэж Хассан өлхөн хариулав.Тэр бол төрөлхийн дорд зарц хүнд эсэргүүцэх замгүйгээ ойлгосон гэмээр хүлцэнгүй хүү юм.Ямарсайндаа,”Таны төлөө бол мянган удаа ч байсан хамаагүй”гэдэг амны уншлагатай байхав.
Аргагүйдсэн зарц,хүү хоёр эзнийхээсээ явахаар шийднэ.Эзэнтэн хэдий уучилж,үлдэхийг хүсэвч тэд цөөхөн ачаагаа аваад хотыг орхин одно.
Амир хүү өөрийнхөө хувьд хэзээ ч уучилшгүй том нүглийг ингэж үйлдэх ба хожим хойно Хассан түүнд ямар их чухал хүн нь байсныг талийгч аавынхаа дотны найзын амнаас олж мэднэ.Яагаад амьддаа аав нь ч тэр,хэн ч тэр хөвгүүдэд үнэнийг хэлээгүй юм бол?Яагаад аав нь хүн бүрт өгөөмөр хийгээд Хассанд элгэн хайртай байсны учрыг мэдэх цаг үед бүх юм нэгэнт оройтсон байна.Али,Хассан хоёр явснаас төдөлгүй ЗХУ-гийн Афганистан дахь довтолгоон ширүүсч,Кабул хотод амьд амьтан тогтохын аргагүй болсон тул Амир хүү аавын хамт дүрвэн явсаар Америкт хүрч сууршина.
Цаг үе өнгөрсөөр,Афганы дайн дуусавч авран хамгаалагчын дүрээр орж ирсэн Талибанчуудын харанхуй засаглал байраа эзэлж,улс орныг улам туйлдуулсаар...
Эцэг хүү хоёрын амьдрал бага багаар цэгцэрсээр боловч Хассан,Али нар яажшуухан амьдарч явааг сураг гаргах аргагүй.Ялангуяа Хазара хэмээх Монгол гаралтай хэмээн адлагдан,шоо үзэгдэгсэн тэднийг дов хонхорын үзэлтэй Пуштунчуудын хэн нь яахин тоон сургийг нь гаргаж өгөх билээ.
Нас дээр гарсан аав нь хорт хавдраар өнөө маргаашгүй нь тодорхой болсон тул Амир өөрийн хайрт бүсгүйг ёс төртэйгөөр бэр буулган авч,хөл ихтэй хурим найр хийн,сэтгэлийг нь амраан,эцсийн замд үднэ.
Амьдрал үргэлжилсээр авч залуу хосод үр хүүхэд заяасангүй.Гэвч тэд биедээ гал халуун сэтгэлтэй,аз жаргалаар дүүрэн байна.Зохиолууд нь овоо зарагдах болоод ид эрч хүчээ авч эхэлсэн Амир руу нэг өдөр маш хуучны танил,аавынх нь найз Рахим ах нь утасдна.Түүнд цор ганц хүсэлт тавина.-Үхэхээс минь өмнө заавал ирж уулзна уу.
Сайхан эхнэр,боломжын амьдралаа орхиод дайны ул мөр арилаагүй аюултай нутаг руу тэр явах болов уу?Хассаныгаа олох болов уу?Үнэнч андынхаа өмнө хийсэн нүглээ цайруулж чадах болов уу?
Төгсгөлийг нь номын анд танд үлдээе.

Нэр:Цаасан шувуу наадуулагч
Зохиолч:Халед Хоссейни
Орчуулсан:Доржсүрэнгийн Болдбаатар
Төрөл:Уран зохиол
Хэвлэлийн газар:Соёмбо Принтинг
Хэвлэсэн он:
Хэвлэсэн тоо:500
Хуудас:496
Үнэ :
Хувийн үнэлгээ:☆☆☆☆☆
©Dairiijav Ayurzana2006-2015

Өнөөдрийн ном:11

2015-10-05T13:10:00.000+09:00

АЗ ЖАРГАЛТАЙ ТӨГСГӨЛҮҮД

Яруу найрагч,орчуулагч Батсуурийн Баясгалан маань энэ номыг 27хон насандаа хэвлэн гаргасан гэхээр түүний нөр их хөдөлмөрч,уран бүтээлч хийгээд гайхалтай авъяасыг бишрэхгүй байхын аргагүй.
Ахмад дуун хөрвүүлэгчдийн шийрийг хатаах ийм сайн орчуулагч эдүгээ бидний дунд амьдарч байгаа нь өөрөө азтай,аз жаргалтай явдал юм.
Гэвч уг номд өгүүлэх богино өгүүллэгүүд нь нэр шигээ тийм гоё төгсгөлүүдтэй та биднийг учруулахгүй.Харин ч айж сандарч,бачимдан гол зурна гэдгийг хэлье.
Яагаад ч юм номыг дуусгаад хаахдаа,хүний сонгосон зам гэдэг юунд ч хүргэж,хэнтэй ч учруулж болох юм даа?Аз жаргал,хагацал гуниг,бүр үхэлд ч...гэж бодон шүүрс алдлаа.
Хятад,Япон,Мексик,Англи,Америк,Канадын нэрт,шилдэг 10зохиолчын 11богино өгүүллэгээс бүрдсэн энэхүү гайхалтай ном харамсалтай нь одоо худалдаанд байхгүй болсон сурагтай.Ийм сайн бүтээлийг боломжтой бол дахин хэвлэж гаргаасай,илүү олон хүнд хүргээсэй гэж уншигчын зүгээс хүсье.
Нэр:АЗ ЖАРГАЛТАЙ ТӨГСГӨЛҮҮД
Орчуулагч:Батсуурийн Баясгалан
Төрөл:Уран зохиол
Хэвлэлийн газар:...
Хэвлэсэн он:2013
Хуудас:167ш
Үнэ:
Хувийн үнэлгээ:☆☆☆☆☆
2015.10.5.
©Dairiijav Ayurzana2006-2015

Өнөөдрийн ном:10

2015-10-01T13:08:00.000+09:00

УНШИХ ЧАДВАР

Ном унших чадал,чадвар гэдэг чухам юу болохыг сонирхож Япон улсын Мэйжигийн их сургуулийн утга зохиолын тэнхимийн багш,нэрт сурган хүмүүжүүлэгч Сайто Такашигийн бичсэн”УНШИХ ЧАДВАР”хэмээх номыг уншлаа.
УНШИХ ЧАДВАР БОЛ УЛС ОРНЫ ЧАДВАР ЮМ.
Уншина гэдэг өөрийгөө хөгжүүлнэ,тэлнэ гэсэн үг.Бусдын эрдэм мэдлэг,чадвар туршлагыг өөртөө шингээнэ гэсэн үг.
Хүн бүр ном уншвал өнөөгийн улс орны эдийн засгийн хямралаас гарах замыг дорхноо даван туулж,гарах гарцыг олж чадна.
Ном бол дуртай нэг нь л унших биш,хүн бүр зайлшгүй унших ёстой зүйл юм.
Гэвч дан уран зохиолын ном уншсанаараа та унших чадвартай гэсэн үг хараахан биш юм.
Харин номд дуртай болох,унших дадалд суралцахад уран зохиол чухал үүрэгтэй.
НОМД ДУРТАЙ БАЙХ,НОМ УНШИХ ЧАДВАРТАЙ БАЙХ ГЭДЭГ ОГТ ӨӨР ОЙЛГОЛТУУД!!!
Хэрэв та ном унших чадварт суралцъя гэвэл эхлээд дадах хэрэгтэй.Жишээ нь:
Хошин шог,элэглэл
Найз нөхөрлөл
Бусдын сонирхолтой туршлага
Амьдралын замаа сонгох
Өсөх насны эрч хүч
Чанга дуудаж уншихад тохиромжтой
Зовлон бэрхшээлтэй тулж,туулсан
Үхэл өмнө чинь тулгарахад
Этгээд,сонин яриа
Боловсролтой холбоотой
Өвөрмөц,содон нэгэнтэй учирснаар хэрхэн тэлж,өөрчлөгдөж байгаа тухай
Амьдрах сайхан
Зуурдын учрал
Өөрийн эрхгүй уйлуулдаг
...гэх мэт 15чиглэлээр тус бүр 10өөр ном/150ш/ уншиж байж унших дадалд суралцлаа гэж хэлж болно.Цааш нь бол жинхэнэ тэвчээр,ухаан шаардсан шилдэг сайн номууд уншиж байж та УНШИХ ЧАДВАРтай болно гэсэн ерөнхий санааг эндээс ойлгож авлаа.
Та ном унших явцдаа улаан,цэнхэр,ногоон3өнгийн бал,наалддаг өнгийн хавчуурга цаас ашиглан чухал гэсэн хэсэгтээ тэмдэглэгээ хийхээс гадна найз нөхөддөө заавал үйл явдал болон агуулгыг нь ярьж өгөх,тийм бололцоогүй бол номын тэмдэглэл хөтлөх нь цээжилж тогтоох,мартахгүй байх,цагаа хэмнэх хамгийн шилдэг арга юм.
Ном уншсанаар үзэл бодлоо нэгтгэн,товч,зөв илтгэх чадварт суралцахаас гадна бичгийн боловсрлыг давхар эзэмшдэг.
Хүн байнга ярьдаг тул ярианы чадвар төрөлхийн өсч хөгжих боломжтой боловч ном уншдаггүй хүнд бичгийн чадвар суудаггүй.
Таны өөрийгөө илэрхийлэх чадвар,бичгийн боловсрол нь ном хэр уншихаас шууд хамаарна.
Тиймээс ном бол заавал унших шаардлагагүй гэдэг ойлголт том эндүүрэл юм.
Уншдаг хүн ажлынхаа юу хамгийн чухлыг таньж,/голыг нь олж/чадварлагаар гүйцэтгэдэг.
Уншдаг хүн биеэрээ очоогүй ч олон газарт зорчиж,олон зүйлийг мэдэрч сурсан байдаг тулхүнд бэрхшээлийг даван туулах сэтгэлийн болон оюуны тэнхээтэйгээс гадна бусдын зовлон,жаргалыг ойлгож хуваалцах ухамсар, эрч хүчтэй байдаг тухай эндээс маш дэлгэрэнгүй ойлгож авч болно.
Номыг заавал дуустал нь унших албагүй ч яг юуг илэрхийлэх гээд байгаа гол санааг нь барьж авч,түүнийгээ товч,ойлгомжтой задлан дүгнэж чадаж байвал та өөрийгөө УНШИХ ЧАДВАРтай гэж үзэж болно.
Мөн энд бага,дунд ангийн багш нар сурагчтайгаа номын тухай байнга ярилцах,юу уншиж байгаагаа сурагчдадаа хуваалцах,ном унших цаг олгох,уншсан номоо бэлэглэх,ном санал болгох,ном хэлэлцүүлгийн дугуйлан зэргийг нээх нь шавь нарынх нь сурлагад маш чухал нөлөөтэйг чухалчилсан байсан.
НОМ УНШДАГГҮЙ ХҮН БАГШ БАЙХАД ХАНГАЛТГҮЙ гэсэн санааг ч хатуухан хэлж байсан.
Уг номын ерөнхий санаа нэг иймэрхүү.
2002оны9сард анх гарснаасаа хойш 2015оны3сар гэхэд даруй 39удаа хэвлэгдсэн энэ бяцхан ном нь олон,олон номын хорхойтон Япон уншигчын сэтгэлийг байлдан дагуулж,тэднийг улам их ном унших хүсэлд эргэлт буцалтгүй хөтөлсөн гэдэгт би итгэлтэй байна.
Үүнийг уншаад номд дуртайдаа баярлаж,ном унших чадварыг олох хүсэлд яах аргагүй хөтлөгдлөө.

*Уг номын төгсгөлд Сайто Такаши багш өөрөө уншиж байсан,УНШИХ ДАДАЛд суралцахад тохиромжтой гэж үзэн санал болгож буй дээрхи 15төрөл×тус бүр10ш=150номын нэрсийн жагсаалтыг хавсаргасан байгаа.

Нэр:УНШИХ ЧАДВАР
Зохиогч:Сайто Такаши
Төрөл:Боловсрол
Хэвлэлийн газар:Иванами Шиншёо
Хэвлэсэн он:2015он
Хуудас:210
Үнэ:740иэн
Хувийн үнэлгээ:☆☆☆☆☆
2015.10.1.
©Dairiijav Ayurzana2006-2015

Өнөөдрийн ном:9

2015-09-13T13:03:00.000+09:00

АНДЫН СЭТГЭЛ

Японы нэрт зохиолч Мүшянокоожи Санэацүгийн бүтээлтэй би анх удаа танилцлаа.
1920он буюу одоогоос бараг зуугаад жилийн өмнө бичигдсэн энэхүү тууж нь өнөө үеийнхэн уншсан ч өнгө,чанараа огт алдаагүй байх юм.
Залуу нас,гоо үзэсгэлэн,эрч хүч,хайр дурлал,анд нөхрийн холбоо,сонгосон амьдрал,заяа төөрөг...
Бид бүхний ижилхэн туулдаг замууд!!
Цөөн хуудас тууж тул энд би агуулгыг нь дурдахыг хичээсэнгүй.
Уншигч та харин өөрөө авч уншаад сэтгэгдэлээ хуваалцаарай.
Хэрэв би тэр гурвын оронд байсан бол хэнийх нь төлөө хэнийг нь сонгох байсан бол?
Дэндүү их хүсч тэмүүлсэн зүйлээ өөрийн болгохын тулд хамгийн чухал хоёр зүйлийнхээ аль нэгийг нь хаяж,золиослож чадах тийм зүрх,зориг надад байсан болов уу?

Ножимагийн зөв ч юм шиг...?
Оомиягийн зөв ч юм шиг...?
Сүгикогийн зөв ч юм шиг...?

Залуу зохиолч Оомия дотны анд Ножимад зориулан уншигчдадаа бүх үнэнээ дэлгэсэн тэр захиануудад сэтгэл хөдлөхгүй байхын аргагүй.
Өөрийн эрхгүй нулимс гарсан шүү,хэхэ
"Андын сэтгэл"хэмээх энэ Япон тууж уран зохиолд дуртай,номд хайртай бид бүхний ширээний ном болоосой.
Анд найздаа бэлэг болгон барьж,ам амандаа энэ номыг хэлэлцэн ярилцаасай.
Эрхэм номын андууддаа,ялангуяа ид хайрлаж,дурлаж,үерхэж,нөхөрлөж яваа охид хөвгүүд,залуустаа энэ номыг заавал уншиж үзэхийг санал болгож байна.

*Сэтгэлийн утсыг хөндсөн ийм гоё номтой учруулсан залуу орчуулагч Д.Алтанцэцэгтээ маш их баярласнаа илэрхийлж,улам олон сайхан бүтээл орчуулж хүргээрээй гэж чин сэтгэлээсээ хүсье.

Нэр:Андын сэтгэл
Зохиолч:Мүшянокоожи Санэацү
Төрөл:Тууж
Орчуулагч:Дамдинжавын Алтанцэцэг
Хэвлэсэн газар:"Виндзор"ХХК
Хэвлэгдсэн он:2015
Хуудас:111ширхэг
Үнэ:5500төгрөг
Зарагдаж буй номын дэлгүүр:Аз хур,Интер ном( Номин их дэлгүүр)

Өнөөдрийн ном:8

2015-06-13T13:31:00.000+09:00

"ШИЛИЙН БОГД" Гомбожавын Мэнд-Ооёо.

Эрт цагт Энэтхэг газар эрдэм сурахаар одсон

Эгэл нэг Монгол бадарчин дөчин жилийн аянаас эргэхдээ
Эцэг буурлын захиасыг санан эцсэн замын түшиг хийхээр
Ээлгүй харамч цэцэрлэгчээс элдвээр царайчлан ядаад
Эцэст нь нахиалан дэлбээлэхээ умартсан ганц зандан модны
Эгнэгт бул чулуу адил торойн хувхайрсан мөчрүүдийг
Энхрий сэтгэлээр дэлгэрэхийг хүсэмжлэн ээжийн бүүвэйг санагалзан
Эгшиг аялгууг түгээн эцэхээ мэдэхгүй дуулав гэнэ
Эргэх дөрвөн улирлыг элээн сууж хайлав гэнэ
Эргэн тойрныг бүчигсэд эхэндээ шохоорхов гэнэ
Элэглэж шоолов гэнэ,элдэвлэж жигшив гэнэ
Утгыг таньсан ламын уянга дуунд уяраа юу
уран мэхэнд унаа юу
Угийн сэтгэл сэргээ юү уйтай төрхөө гээгээд
Унаган төрхөө олоод урьдын өнгөөр ногоорсонд
Ухаант даяанч баясав гэнэ унхиагүй эзэн нь харамлав гэнэ
Гэвч нэгэнт шидийг үзүүлж сэргээн амилуулсан түүнээс
Гэмшиж хулгаад зайлахгүй тул гишүү төдий олговой
Гэгэлзэн баясаж хүртээд гэдрэг хойш буцахад нь
Гэсэр хатуужилаар хүлээсэн гэнэн хайртай аав нь
Гэртээ нэгэнт байсангүй гэмшиж харамсавч уулзсангүй
Эр зоригоор туулж энгүй говийг гатлавч
Эзэндээ очих хувьгүй эмтэрч хувхайрсан таяг
Эртнээс нүүдэлчдийн нутаг эгэлгүй түүхийн өлгийд
Эрдэмт даяанчыг түшиж эцсийн замд нь үдвэй
Холхи газраас гийчилсэн бурхны орноос буудалласан
Хожгор тахир гишүү хол өндөрт тэмүүлэн
Хур бороонд тэтгэгдэн хунгийн ганганаанд сэрвэлзэн
Холхиж доороо үндэслээд хотойж сууриа бэхлэв
Урьд хожид үзэгдээгүй цагаан зандан мод
Уран гоё мөчиртэй угалзат сайхан гишүүдтэй
Уужим цэнхэр тэнгэрийн доор ногоон навчисаа дэлгээд
Урь анхилуун үнэртэй үндэс бат суурьтайгаар
Уудам дэлгэр тал нутагт ургаж нэгэнт зохицжээ
Он цаг улирсаар орчлон ертөнц хувирсаар
Одож насыг барахад орыг залган мэндэлсээр
Орой нь тэнгэрт тулсан онцгойрч өнчрөн торойсон
Олны бишрэлийг тээсэн Онгоны элсний шүтээн
Оройн ганц модыг одоо эзэгнэн суугаа нь
Оосор бүчгүй тэнгэрийн оргилгүй цэнхэр хөндийд
Оломгүй хүчит Хангарьдийн орыг эзлэн үлдсэн
Огторгуйд дүүлэн нисэгч элэн халин шумбагч
Орь залуу хос Агшуу,Эгшүү шонхор
Онгон хайраа нэгтгэж овоохой үүрээ босгон
Олзны сайхныг шилэн амьтны сайныг авлан
Омгойт биеэ тэжээн амь биесээ эрхлүүлэн
Оюухай үрээ угтахаар озолдон жаргаж байтал
Ондоо нэг өдөр долоон тэмээ хөтөлсөн
Одой дөрвөн этгээд ойрхон буудаллаж аваад
Орсгой үмхий амнаасаа шар шүдээ гялалзуулан
Ор сонсож үзээгүй онцгой жигтэй хэлээр хэрээ мэт гуагалсаар
Омтгойлон дайрч ирээд огтолж бүхлээр нь тэгнээд
Олзлон авч одсонд Агшуу уурсав Эгшүү уйлав
Онгоны элсийг чимсэн галбарваасан шүтээн
Овойгүй хулгайчдын гарт алдагдаж сүйдсэнийг мэдээд
Огоорч сууж тэвчсэнгүй олж араас нь тандуулахаар
Будрын чулуунд оршсон уулын сүмийн өвгөн багш
Бушуу түргэн нэхэхийг бузгай залууд даатгавай
Агшуу шонхор хэрвээ хүний хэл мэддэгсэн бол
Нанзад хөвгүүн эсвэл шувууны дохиог ойлгодогсон бол
Олж ядах юмгүй сураглаж хайх төвөггүй
Олон говийг гатлахаар урагш жонжуулж явааг
Ойлгуулж барах юмгүй мөшгөж элдэх хэцүүгүй
Санаа сайн сэтгэл зөөлөн сайн ардын итгэлт хөвүүн
Сараар хөнжил нараар тэрлэг хийн
Саадыг үл ажран эрэл сураг гаргахдаа
Саатаж учирсан нэгэнд айлтгаж алдараа өчихдөө
Санаанд уяатай яваа тоорой ганц модыг
Сааталгүй холбон зохиож өөрийг шинээр нэрийдвэй
Сайн эрсийн хөшиг Шилийн Богдоо түшихдээ
Сэтгэл нийлсэн андуудтай учирч шийдэж бүгдийг хэлэлцэв
Сиймхийг алдахгүй сийргийг андахгүй
Санасанаа авч сааталгүй хүргэж
Сайны ерөөлийг хүртээд саалийн сүүгээр мялаалгаад
Сатааралгүй цааш нэхэж явтал
Саруул талд тэнцэхээр сая дөнгөж мэндэлсэн
Шарга хөөрхөн унагыг барьж тасдахаар гэтсэн
Саарал өлөн чоныг сайтар хүнд ташуураар
Сар гурав харагдтал сарьсан хоншоорыг ороолгоод
Салгаж хаясан цовдолыг нь хээрийн шувуудад орхиод
Сарвай сүүлийг унжуулаад хойд бүүргэндээ ганзагалав
Ардыг хайрлах ерөөлтэй ноёдыг хашраах цондонтой
Уртын дуунд мөнхрөх хувьтай эртний домогт эгнэх учиртай
Үеийн үед шагшигдан үрийн үрд бишрэгдсэн
Эрийн дээд Тоорой Банди
Эргэмэгийн дээд Жаахан шарга
Ийм сайн эр,ижил сайхан хүлэг хоюул
Энх талд ингэж учирсан гэнэм
Энэ хорвоог туулсан гэнэм
Үлгэр эндээс эхэлсэн гэнэм
Үлгэр эндээ төгссөн гэнэм

Шилийн богд роман бол миний ойлгосноор зүгээр нэг сайн эр,сайхан хүлэг,ганц модны хулгайн тухай домог зохиол биш юм.Ер нь яагаад Дарьганга нутагт тийм их сайн эрс байсан бэ?Тэнд Шилийн Богд уул байгаадаа биш,хийх юмаа олж ядсан хэнхэг танхайчууд цуглардагтаа биш,Монголын зусар бялдууч,өнгө мөнгөний,нэр алдрын төлөө бол хэдэн малаа байтугай ард түмнээ газар ус,юутай хээтэй нь худалдахаас сийхгүй арчаагүй ихэс дээдэстэн,тэдний нөмөр нөөлөгт ядуу ардыг хайр найргүй цөлмөж хэтэвчээ зузаатгадаг Манж ноёд,наймаа панз нар дэндүү их байсандаа болов уу.Хил давуулаад Монголын хамаг л өнгөтэй өөдтэй бүхнийг хямдхан зөөж,эргээд хужаагийн хямд хэврэг эд бараа хэд дахин үнээр өөрт ирдэг.Тэр цаг,энэ цагт огт ялгарах юм алга.Өнөөдрийн өрөвдөлт нийгмийг уг зохиол ёжтойгоор элэглэн сануулах мэт тийм ойр дотно мэддэг зүйлс байсан.Энэ романыг Монгол хүн бүр уншаасай.Ялангуяа өөрсдийгөө төрийн хүн гэж боддог,төрийн албанд байгаа удирдлагын хүн бүр уншаасай.Илд далд гэрээ хэлцэл баталдаг сайдууд,улсын төсөв тоншдог засаг дарга,авилгачид, гадаадынхны төлөө гар хөл бологсод,ард түмнээ хошгоруулдаг баагийнууд уншаасай.Харамсалтай нь тийм хүмүүс л уншихгүй байх даа.Ашиг хонжоо,нэр төрийн төлөө бясалгаад тархи нь завгүй байгаа юм чинь...

Номын нэр:Шилийн Богд
Номыг зохиогч:Г.Мэнд-Ооёо
Төрөл:Роман
Хэвлэлийн газар:Мөнхийн үсэг
Хэвлэсэн он:2015/3
Хуудас:250
Үнэ:
хувийн үнэлгээ:☆☆☆☆☆
2015.6.12-13
Япон улс
©Dairiijav Ayurzana2006-2015

Шинэ ном

2015-06-09T13:28:00.000+09:00

Ээжээс минь ном ирлээ.
Маш их баярлалаа.

зурагчин Жимми Нелсоний гайхамшигт илтгэлийг сонсоод үзээрэй

2015-05-31T13:35:00.000+09:00

Хүний бүхий л гоо сайхныг илрүүлж,илэрхийлж чадна гэдэг гайхамшиг...
Хийсэн ажлаараа бусдад цоо шинийг мэдрүүлж,ухааруулдаг ийм чадварлаг мэргэжилтэн болохсон.
Та заавал үзээрэй.
Үзэсгэлэнт зургууд,сонирхолтой яриаг нь үзсэн хэн ч бишрэхгүй өнгөрч чадахгүй боловуу.

Өнөөдрийн ном:7

2015-05-30T13:40:00.000+09:00

"Томчуудад зориулсан уншлагын бүрэн арга барил" Сайто Такаши

Япончуудын жигд өндөр мэдлэгтэйгээр уламжлал,соёлоо хадгалан,Мэйжигийн их шинэчлэлийг өрнүүлж,улмаар дайнд ялагдсан ч богино хугацаанд дахин маш хүчтэйгээр хөгжин,дэлхийн тавцанд гарч ирсэн нууц нь бүр Эдогийн үед ном эрдэмд нийгэм нийтээрээ дурлан шамдаж,хүн бүр асар их ном унших дадалд хэвшин,оюун ухаанаа зөв хөгжүүлж сурсаны үр дүн юм байна.

Ном уншдаггүй иргэдтэй улс оронд хөгжих үндэс байхгүй.

Япон залуус интернетийн баталгаат бус мэдлэгт дулдуйдан ном унших нь илт багасч байгаа нь энэ орны ирээдүйг бүрхэг болгож байна.
Ном бол шалгарсан үнэн тул жинхэнэ мэдлэг,боловсролыг олъё гэвэл интернет,SNS биш ном унш гэсэн санааг Мэйжигийн их сургуулын Сайто Такаши багшийн"Томчуудад зориулсан уншлагын бүрэн арга барил"номноос сийрүүлэв.
(＊уг номын тэмдэглэлийг дараа оруулнаа)

нэр:大人のための読書全技術
зохиогч:斎藤孝
хэвлэсэн он:2014
хэвлэлийн газар:KADOKAWA
хуудас:343
хувийн үнэлгээ:☆☆☆☆☆

Өнөөдрийн ном:6

2015-05-14T13:45:00.000+09:00

"Миний номын шүүгээ"
Энэ тухай огт уншиж байгаагүй болохоор номын сангаас авч уншлаа.
За өчүүхэн миний уншдаг номын тоо,жинхэнэ номтой нөхөрлөдөг,Японы мундагуудын харьцаа гэж тэнгэр газар шиг л юм байдгийм байна.
Энд нийтлэл бичсэн Японы нэртэй сэтгүүлч,зохиолч,кино найруулагч, гээд 23 алдартан өөрийн номын тухай,номтой хэрхэн учирсан,хэний нөлөөгөөр уншсан,яагаад ийм их ном уншиж,хураах болсон тухай гээд л төрөл бүрээр нь өгүүлжээ.
100хүрэхгүй номтой,зөвхөн дуртай,дурсгалтай номоороо л хүрээлүүлэн амьдардаг нэгэн байхад,ажлын шаардлагаар авсан,найзууд болон,хэвлэлийн компаниудаас бэлгэнд ирсэн зэрэг хаях хэцүү,хадгалах хэцүү 2000~70000номтой хүн ч зөндөө байх юм.Зарим нь олон номдоо дарагдаад,түүнээсээ болж эхнэртэйгээ хэрэлдэж,салж,бүр үхсэн хүн хүртэл байдгийг мэдээд инээд ч хүрэх шиг...
Тэгээд зогсохгүй номын жингээр гэрийн шал нь хонхойж,цөмөрдөг,зөвхөн номоо хийх гэж 2,3газар байр хөлсөлдөг,1номоо хайх гэж 10өдөр зардаг,далд байгааг нь гаргаж авахаас төвөгшөөж дахин1ийг нэмж авдаг,шалаар нэг овоолсон номын уул нуруудын дундуур амьсгаа түгжин арай гэж сүлжиж явж,унагаж,номын нуранги үүсэж,эргээд янзлах гэж байгаад нэг сонирхолтой ном олж барьж аваад тэр чигтээ 1цаг илүү суучихдаг,тэгээд ерөөс залхуу нь хүрээд тэр чигт нь эмхлэлгүй орхидог хүн хүртэл байвал яахуу!?хэхэхэ

Гэхдээ ганц энэ замбараагүй зүйл ч биш,эдгээр хүмүүс номын сайн сайхныг дэндүү мэдэрч,дурлаж,номондоо итгэж,бүхнээ зориулснаар түүний ачаар санаанд оромгүй амжилт,үйл явдалтай учран, мөрөөдлөө биелүүлж,оюун ухаанаараа одоо ч олныг удирдан залж,чиглүүлж,гэрэлтүүлж,эдээс илүү бие сэтгэл,оюуны эрх чөлөөг олсон байгааг нь мэдрэх сайхан,бахархалтай байлаа.

Хамгийн гол нь тэд уншихгүй байж гайхуулж,сайрхах гэж ном хураадаг хүмүүс биш юм.
Номын тавиуртаа цэмбийтэл нь өрөөд,өөрөө ч өрөөлийг ч хүргэдэггүй сэхээтний масктангууд биш юм.
Тиймдээ ч тэдний номны байршил байнга солигдож,урвуу зөрүү шүүгээндээ чихцэлдэн,ээлжээ хүлээж байдаг болов уу?

Япон хэлтэй,номонд дурладаг найз нар нэг уншаад,өрөөсөн дугуйнуудаа олж авсан юм шиг сэтгэлээ баясгаж,хорхойгоо хөдөлгөөрэй...📚😍✌🏼️🇯🇵

Нэр:Миний номын шүүгээ(私の本棚)
Хэвлэлийн газар:Шинчоша(新潮社)
Хэвлэсэн он:2013.8.30
Хуудас:181
Хувийн үнэлгээ:☆☆☆☆☆

Өнөөдрийн ном:5

2015-05-04T13:48:00.000+09:00

"ХОТЫН ҮЛГЭРҮҮД"Л.Өлзийтөгс

Тууж,өгүүллэгүүд...

Эмэгтэй зохиолч гэдэгтээ байна уу,сэтгэлд хачин ойр,дотно мэдрэмжүүдээр дүүрэн байлаа.Түүнийг бараг уншиж байгаагүй ч цаашид зүгээр өнгөрч чадахааргүй болтол сэтгэл гижигдсэн,сайн зохиолч байна гэж машид олзуурхлаа.

Ялангуяа,

"Эрэгтэй,Эмэгтэй",
"Өлсөхүй",
"Жирэмслэлт",
"Хоёрхон алдаа",
"Зөн"
...зэрэг нь миний хувьд их шинэлэг байлаа.
Уншсандаа харамсахгүй шүү.

Зохиолч:Л.Өлзийтөгс
Нэр:Хотын үлгэрүүд
Хэвлэсэн:2013он
Хэвлэлийн газар:Мөнхийн үсэг
Хуудас:334
Хувийн үнэлгээ:☆☆☆☆☆

Өнөөдрийн ном:4

2015-04-16T17:16:00.001+09:00

СЭТГЭЛД ХОНОГШСОН ӨГҮҮЛЛЭГҮҮД

Орчуулгын ном гэхэд ийм шууд гулсаад орчихдог,торолгүй уншигдах ном ховор шүү гэж өөрөө өөртөө дуу алдсаар дуусгалаа.
Монголчууд бид Япончуудтай ойртон дотносохын хэрээр тэдний амьдралын хэмнэл,нийгмийн үзэл санаа,шүтлэг бишрэл,соёл боловсрол гээд олон зүйлийг улам илүү таньж мэдэх шаардлага тулгарсаар байна.Харин тэр бүгдийг нэгтгэн илэрхийлж ойлгуулж чадах зүйл бол японы уранзохиол гэдэгтэй маргах хүн төдий л гарахгүй бизээ.
Та бүхэн ч бас энэ номыг уншиж,Япончуудын сэтгэлд хоногшсон өгүүллэгүүдээр тэдэнтэй илүү ойр дотно болоосой,энэ номын үйл явдлуудаар яриагаа хөгжөөн анд,нөхөрлөлөө улам зузаатгаасай.
Уншаад төрсөн сэтгэгдэл минь нэг иймэрхүү...

1.Дазай Осамү
-Гүй Мелос:ийм найзтай бол үхэхээс айх юм алгаа...

-Царцаа:хайрласан хүн минь танигдахын аргагүй болчихвол ингэхээс өөр аргагүй ч юм уу
2.Акүтагава Рюүносүкэ
-Тэргэнцэр:Эвий эвий...
-Бэрсүүт жүрж:яагаад ч юм нүдэнд яруу найрагч Ичинхорлоо эгчийн бага нас ч юм шиг...хэхэ☺️
-Хамар:хахаха,Одоо цагт байсан бол гоо сайхны мэс засалчид яаж өрсөлдөж байгаа бол...,Японд бол заалттай ТВгээр гаргана даа...
3.Мори Оогай
-Сүүлчийн үг:Хүйн холбоо гэж...,айхтар охин юмдаа...
-Саншёо Даюү:Еэ,бурхан минь,ямар гэдэг хувь заяа,ямар хатуу хорвоо вэ?(Лантуу хүү гэж орилмоор л байна шүү)
-Такасэ завь:Ингэж хилсдсэн хүн хичнээн их бол?Гэхдээ зовлон үзсэн хүнд бол жаргалын зам ч гэмээр юм уу?
4.Миязава Кэнжи
-Захиалга ихтэй зоогийн газар:
Сумын улаан буланд орсон шиг сонин мэдрэмж,гэхдээ энэ яг юу байсан бэ?...
нохойнууд байгаагүй бол ч өнгөрлөө л дөө
5.Ямамото Юүзо
-Шоколад:Хайран юм...Нэрэлхээд нэрээ идэхгүй гэдэг л болж дээ
6.Ясүока Шёотаро
-Циркийн морь:Монгол хүн бол ингэхгүй дээ...гэхдээ хаа газар бараг ийм байхдаа
7.Аришима Такэо
-Нэг багц усан үзэм:энэ л байхгүй юу даа
8.Изүми Кёока
-Мэс заслын өрөө:ёоо,тэгтлээ юугаа нуудаг байнаа...,тэр2тэгээд ямар учир жанцантай болж таарав?
Хуучин хосууд?
9.Кикүчи Кан
-Аав ирэв:Бүгдийнх нь зөв...,гэхдээ л аав нь буруутай
-Амиа егүүтгэгчийг аврах ажил
Хэхэхэ,муу эмгэний буруу ч гэж юу байхав...

Орчуулагч:Дамдинжавын Алтанцэцэг
Нэр:Сэтгэлд хоногшсон өгүүллэгүүд
Хэвлэсэн он:2014
Хэвлэлийн газар:Адмон Принт
Ангилал:уран зохиол/Япон/
Хувийн үнэлгээ:☆☆☆☆☆

2015.4.15Japan
©Dairiijav Ayurzana 2006-2015

Өнөөдрийн ном:3

2015-04-16T17:14:00.002+09:00

乙女の教室

Японы охид бүсгүйчүүдэд зориулсан алдарт MORE сэтгүүлд 10жил дараалан гоо сайхны зөвөлгөөний буланд нэрт дуучин,жүжигчин Мива Акихирогийн бичсэн эссэг нэгтгэсэн жинхэнэ эмэгтэй хүний гоо сайхан юунд оршдог тухай ёс суртахуун,соёл,боловсрол хүмүүжил зэрэг чухал сэдвийг энгийн,сайхан тайлбарласан маш гоё ном...
Эмэгтэй хүн бүхэн энэ номыг ширээний номоо болгоосой.
Япон найз минь бэлэглэж байсан хамгийн дуртай номнуудын нэгийг та бүхэнд санал болгохдоо баяртай байна.

Зохиогч:Мива Акихиро
Хэвлэсэн:2008он
Япон хэлээр
Хэвлэсэн:Шюүэйша компани
Агуулга:эмэгтэйчүүдийн гоо зүйн ёс суртахуун
Хувийн үнэлгээ:☆☆☆☆☆

Өнөөдрийн ном:2

2015-04-16T17:12:00.000+09:00

FOUJITA

21дүгээр зууны эхэнд Францад цор ганцаар амжилтад хүрч,FOUJITA нэрээрээ алдаршсан Фүжита Цүгүхарү(1886-1968) хэмээх Япон зураач байдгийг тэр бүр мэдэхгүй байх.
Эхнэрээ орхиод нутгаас гарахдаа удахгүй Парист уулзахын ерөөл,болзоог тависан боловч хувь заяа дахин тэднийг учруулсангүй.
Токиогийн зургийн сургуульд байхаас л өөрийн чадварыг Европт туршихыг хүсдэг байсан тэрээр 1913онд Францад хөл тависнаас хойш Пикассо болон олон авъяаслаг зураач залуусаар хүрээлүүлэн,модэль бүсгүйчүүдээр бүчүүлсээр нэг л өдөр цоо шинэ Фүжитагийн хэмнэл,урсгалыг гаргаж ирж чадсан юм.
Харин тэр хэзээ ч шавьтай болъё гэж хичээгээгүйгээс өөрийн арга барилын нууцыг хэнд ч өвлүүлээгүй гэгддэг.
Хамгийн сонирхолтой нь тэрээр 1939 оны Халх Голын дайны сэдэвтэй асар том зургийг 1941онд Токиод Японы батлан хамгаалах яамны захиалгаар зурж өгч байсан байна.Эцэг нь хэдийгээр цэргийн том дарга бөгөөд,Япон орныхоо төлөө эх оронч сэтгэл зүрхтэйдээ захиалгаар дайны сэдэвтэй зургууд зурахад хичээнгүйлэн зүтгэж олон зургийг Өрнө,Дорнын арга барилыг хослууан зурж үлдээж байсан авч тухайн үеийн Японы засгийн газрын бодлого болон өөрийг нь атаархан хорсогч мэргэжил нэгт нөхдийн зүгээс түүний бадрангуй тэмцлийг өгүүлэгч зургаас болж дайнд Япон орон ялагдсан мэт авирлах зарим сэтгэлгүй нэгэнд гомдох,үзэн ядах сэтгэлд автан,тэдэнтэй хэзээ ч ойлголцохгүйгээ мэдэн,удалгүй Францдаа буцаж,иргэншлээ сольж,нэрээ өөрчилсөн юм.
Жинхэнэ нэр нь :Фүжита Цүгүхарү
Шинэ буюу Францад болон дэлхийд түгсэн нэр нь Léonard Foujita.
Леонардо Да Винчигийн нэрнээс зээлдсэн гэдэг.
Өмнөд Америкт хэсэгхэн амьдарч,Францад насан эцэстлээ бүтээлээ туурвин амьдарсан тэрээр Notre-Dame-de-la-Paix өөрөө бүтээсэн гайхамшигт бяцхан бунхандаа нойрсож буй.

FOUJITA-INEDITS PAR SYLVIE BUISSON
(Англи,Япон,Франц хэлээр)
Зохиогч:Sylvie Buisson
Хэвлэгдсэн:2007он.
(агуулга:Фүжита судлал,амьдрал уран бүтээл)
Сэдэв:уран зураг
Хуудас:415
Хувийн үнэлгээ

Өнөөдрийн ном:1

2015-04-16T17:09:00.001+09:00

"Гэм Зэм"роман М.Ф.Достоевский

Ядуу оюутан залуу огт санаандгүй хүний амь хөнөөж орхино.Хэнд ч баригдаагүй боловч гэмийг нь хэн нэгэн илрүүлэхвий гэхээс хэрхэн тарчлан зовохыг яруу тодоор илэрхийлсэн зохиол.
Уншигч өөрөө алуурчин болсон мэт тийм гүн гүнзгий сэтгэлд нөлөөлтөл бичсэн зохиолч Достоевскийг бишрэхээс өөр аргагүй,бүр аймаар ч юм уу...
Заавал унших ном шүү.

Достоевский.Ф."Гэм Зэм"роман.
орчуулсан Гомбосүрэн.Ц.

Хувийн үнэлгээ:☆☆☆☆☆

2015-04-16T14:42:00.000+09:00

Нарvкэ Макото

Ном уншдаггvй хvн бол сармагчин мøн.

2015-04-14T18:00:00.000+09:00

Бороо зүсэрсээр...,өнгөрсөн 7хоногт дуусгаж амжаагүй номоо үдээс хойш дахин барьж авлаа

Цастай сакүра

2015-04-08T17:56:00.000+09:00

Цасанд хучигдсан Сакүра модны цэцэгсийг та бүхэндээ илгээе.❄🌸❄🌸❄

🌸

Цэцгийн баяр

2015-04-08T17:33:00.000+09:00

Өнөөдөр4сарын8.

Билгийн тооллын энэ өдөр бурхан багш Шагжмуни мэндэлсэн гэгддэгийг та бид сайн мэднэ.
Харин Японы Мэйжигийн эрин үеэс (1868-1912он) эхлэн жил бүрийн аргын тооллын энэ өдөр шашны урсгал үл харгалзан Япон орны өнцөг булан бүрт,бүх бурханы сүм хийдэд "Хана Мацүри(花祭り)Цэцгийн баяр"буюу бурхан багшийн төрсөн өдрийн баярыг тэмдэглэж,лянхуа цэцгийг төлөөлүүлэн амьд цэцгээр хүрээлүүлээд баруун мутраа дээш өргөн босоо зогссон Шагжмуни бурханд чихэртэй ногоон цайгаар угааль үйлдэн өргөл баридаг өргөн уламжлалтай.
Өөрөөр хэлвэл Бурханы шашны зул сарын баяры(крисмас)-г тэмдэглэдэг байна.
Чихэртэй цайг өргөн,бурханы тэргүүн дээрээс урсган угааль үйлдэх болсны учир нь,бурхан багш Маяа эхээс мэндлэхэд тэнгэр баясан даруй угааль үйлдэх ус болгон 9луугаар чихэрлэг рашааныг шүршүүлэн хур бороо илгээсэнд бяцхан бурханыг өлгийдсөн лянхуа цэцэг дэлбээлэн,Шагжмуни хөвгүүн мэлмийгээ нээн өндийж урагш долоо алхан баруун мутраа өргөн,анхны сургаалиа тавьж гэгээрлийг олсон гэдэг домог үлгэр байдагаас үүдэлтэй бололтой.
Бас энэхүү домгоос үүдэн Япончууд бийрийн уран бичлэгийг уг чихэртэй цайгаар бичвэл илэрхий чадварыг олдог хэмээн итгэдэг байна.

Лам хуврага,сүсэгтэн олноос аваад энгийн иргэдэд энэ өдөр буддын сүм,дуганууд нээлттэй байдаг ба сүм дугануудын харъяаны бүх цэцэрлэг,сургуулын хүүхдүүдийг багш нар нь албан ёсоор жил бүр заавал оролцуулж,бурхан багш болоод түүний гэгээрэл,сургаалын тухай анхны ойлголтыг нь өгч,бурханы өмнө ичих нүүртэй байж,нэр төрөө эрхэмлэн,гэр бүл,найз нөхдөөс аваад ан амьтан,хорхой шавжийг ч энэрэн хайрлах сэтгэлд сургадаг энгийн хэрнээ утга агуулга гүн,сайхан уламжлалтай юм байна.
Дашрамд дурдахад энэ уламжлал нь Японоос өөр Буддын шашинт оронд байдаггүй бололтой.

2015.4.8.Japan
©Dairiijav Ayurzana 2006-2015

2015-04-04T18:03:00.000+09:00

Хайрын тухай бяцхан өгүүллэгүүд,хөөрхөн юм байна лээ.