சிந்தனைப் பொறிகள்

மலிவு

noreply@blogger.com (Anonymous) — Tue, 09 Jul 2013 16:02:00 +0000

தமிழர்கள் பண்டை காலம் கொண்டே வணிகத்தில் சிறந்து விளங்கினர். கடல் கடந்து முத்து, தங்கம், தாணிய வணிகத்தில் சிறந்து விளங்கினர் என்று படித்திருப்போம். தமிழர்களின் வணிக நுண்ணறிவிற்கு சிறந்த உதாரணமாக 'மலிவு' என்ற சொல் ஒன்றே போதும்.

தமிழகத்தில் இலவசம் என்ற சொல்லிற்கு அடுத்தபடி 'மலிவு'தான் mass. 'மலிவு விலை உணவகம்', 'மலிவு விலையில் காய்கனி' என்று நாள்தோறும் கேட்கிறோம், படிக்கிறோம். இங்கே மலிவு என்பதற்கு 'விலை குறைந்த' என்ற பொருள் கொண்டு படிக்கிறோம். மலிந்த என்ற வார்த்தையின் மூலத்தை (root) ஆராய்ந்தால் இங்கே ஒரு அறிவியல் கோட்பாடு மறைந்துள்ளதை உணரலாம்.

மலிவு என்ற சொல்லின் மூலம் 'மல்' ஆகும். மல்,மல்கு என்றால் பெருகு, அதிகமாக்கு என்று பொருள். 'நாட்டில் குற்றங்கள் மல்கி (அதிகரித்து) விட்டன', 'இந்தியாவில் ஊழல் மலிந்து (பெருகி) விட்டது', காவிரி மல்கி வழிகிறது போன்ற சொற்றொடர்கள் உதாரணம்.

மலிவின் பொருள் பெருகுதல் என்றிருக்க விலை சம்பந்தமான இடங்களில் மட்டும் விலை குறைந்த, cheap என்ற பொருளில் ஏன் பயன்படுத்தப்படுகிறது?

இங்கே தான் 'demand supply theory'யை தமிழர்கள் நுண்மையாக கையாண்டுள்ளார்கள். பொருளியலில் (economics) 'demand supply theory' படி ஒரு பொருளின் உற்பத்தியும் தரவும் (supply) அதிகமாக இருந்து தேவை (demand) குறைவாக இருந்தால் அதன் விலை குறைவாக இருக்கும். ஆக, மலிவாக (அதிகமாக) ஒரு பொருளின் தரவு இருந்தால் அதன் விலை குறைவாக இருக்கும். இதன் பொருட்டே வணிகம், விலை தொடர்பான சொற்றொடர்களில் 'மலிவு' என்பதன் பொருள் 'cheap' என்ற மருவிய உணர்வோடு பயன்பட்டு வருகிறது. அங்கே உள்ளார்ந்த பொருள், அந்த பொருளின் தரவு பெருகி உள்ளது என்பதே.

ஒரு சிறிய வார்த்தையில் ஒரு வணிக தத்துவமே மறைந்துள்ள நம் தமிழ் மொழி பழமை வாய்ந்தது மட்டும் அல்ல, அறிவியல் பூர்வமானதும் கூட என்பதற்கு இதைவிட வேறு எடுத்துக்காட்டு தேவை இல்லை.

பிச்சைப்பாத்திரம்

noreply@blogger.com (Anonymous) — Tue, 22 Jan 2013 17:37:00 +0000

ஒரு காலத்தில் பார்க்கிற பிச்சைக்காரர்களுக்கெல்லாம் எதாவது கொடுத்துட்டு இருந்தேன். பிறகு ஒரு காலத்தில் பிச்சையை ஆதரிப்பது தவறுன்னு அந்த பழக்கத்தை விட்டிருந்தேன். அதோடு இல்லாமல் பிச்சை கேட்பவர்களிடம் சில நேரங்களில் வாக்கு வாதமும் செய்திருக்கிறேன். ஒரு முறை பிச்சை எடுக்கும் ஒரு பாட்டியுடன் சண்டை போடும் அளவிற்கு போய்விட்டது. ஆனால் சமீப காலமாக திரும்பவும் பிச்சைக்காரர்களுக்கு உதவ ஆரம்பித்துள்ளேன். உந்துதல் - இரு வாரங்களுக்கு முன் சென்னை தி நகரில் நிகழ்ந்த நிகழ்வு. நல்லி சில்க்ஸ் வழியே சென்று கொண்டிருந்தேன். வெயில் மண்டையை பிளக்க அருகில் இருந்த ஆவின் கடையில் லஸ்ஸி வாங்கி குடித்துக்கொண்டிருந்தேன். குடித்து முடித்த வெற்று பாக்கெட்களை போட குப்பை தொட்டி இருந்தது. சென்னை வெயிலின் ஆசியால் குப்பை தொட்டி நிரம்பி இருக்க அங்கே வந்த ஒரு பிச்சைகாரர் - பார்க்க படு மோசமாக இருந்தார் - குப்பைத்தொட்டியில் இருந்த வெற்று பாக்கெட் ஒவ்வொன்றாக எடுத்து உரிந்து உரிந்து பாக்கெட்டில் இருந்த கடைசி துளிகளை நக்கிக்கொண்டிருந்தார். இந்தியாவில் இப்படிப்பட்ட காட்சியை பலர் கண்டிருப்போம்; இருந்தாலும் மனம் அதிர்ந்தது; உடனே ஒரு லஸ்ஸி பாக்கெட் வாங்கி அவர் கையில் கொடுத்து விட்டு கிளம்பினேன். அன்றிலிருந்து திரும்பவும் பிச்சைகாரர்களுக்கு உதவ ஆரம்பித்துள்ளேன்.

நீரில் மூழ்கிக்கொண்டிருப்பவனிடம் நீச்சல் பற்றி அறிவுரை எடுபடாது. அதே நேரத்தில் (நான் சண்டை போட்ட அந்த பாட்டி போல) நம் மனித நேயத்தை குறி வைத்து தொழில் செய்யவும் அனுமதிக்கலாகாது. பல நேரங்களில் நம்மால் நிலைமை என்ன என்று கணிக்க முடிவதில்லை; பதில் கிடைப்பதற்குள் traffic signal green ஆகிவிட வண்டியும் கிளம்பிவிடுங்கிறது; நமக்குள் குற்ற உணர்ச்சியே மிஞ்சுகிறது.

அறிவும் மனதும் போராடும் போர்களங்களுள் இதுவும் ஒன்று; பசியும் நேயமும் இருக்கும் வரை மனமே வெல்கிறது; ஆனால் அது நன்மையா என்பது கேள்விக்குரியே!

சலூனில் சாம்பிராணி

noreply@blogger.com (Anonymous) — Fri, 11 Jan 2013 12:23:00 +0000

மார்கழிக் குளிரில் விடியற்காலையில் முடி திருத்த போயிருந்தேன் சலூனுக்கு
சலூனில் சாம்பிராணி போட வந்திருந்தார் ஹுசேன் பாய்
சாம்பிராணி புகையை சலூன்காரர் முகம் நோக்கி வீசினார் குரானிலிருந்து படித்தவாறு
சலூன்காரரும் திருப்பாவை பாடியவாரே காணிக்கை கொடுத்து பாயை வழி அனுப்பிவைத்தார்

மார்கழி பனியில் சாம்பிராணி புகை இதமாக இருந்தது
இந்த புகையால் கண்களும் கசங்கவில்லை மனங்களும் நோகவில்லை
புகை கலைய பனி விலக மதம் மறைய தெய்வீக ஒளி மிளிர்ந்தது

சலூன் benchஇல் காத்திருந்தேன் என் முறை வர
தொலைக்காட்சியில் குண்டுவெடிப்பு செய்தி
குண்டு புகைகக்கு இடையே உயிர்களைத் தேடும் அவலக்குரல்கள்
இந்தப் புகையும் மறைவது என்றோ?

- அ

விரக்தி

noreply@blogger.com (Anonymous) — Wed, 02 Jan 2013 14:05:00 +0000

ஆசைகளும் தேவைகளும் பெருக
மனங்களும் பொறுமையும் குறுக
நாள்தோறும் நிகழ்கின்றன
மூன்றாம் உலகப்போர்கள்
சாலைகளில்!

பிறந்தநாள் வாழ்த்து

noreply@blogger.com (Anonymous) — Mon, 26 Nov 2012 17:05:00 +0000

ஆண்டுக்கு ஒருமுறை அதுவாய் வந்துபோகிறது
அதற்கு ஏன் உனக்கு வாழ்த்து?
அயராது உன்னை பெற்றெடுத்து வளர்த்த
பெற்றோருக்கு சொல்வேன்
உன் பிறந்தநாள் வாழ்த்து!

விலங்குகள் கொண்டாடும் தீபாவளி

noreply@blogger.com (Anonymous) — Wed, 14 Nov 2012 04:15:00 +0000

ஒருவன் மிருகத்தனமானவன் என்று
தர்க்கம் பேசினாலும்
அவன் மரணத்தை கொண்டாடும்போது
நமக்கும் மிருகத்தனம் ஏறவில்லையா?

உணவுக்காக கொன்றாலும் நன்றி சொல்லியே கொல்வோம்
ஆதிகாலம் முதல் 'Avataar' காலம் வரை
ஆனால் இன்றோ
செத்தவனை கொண்டாட ஊரெல்லாம் உற்சாகம்

குடும்பத்தோடு கொண்டாட ஆண்டுக்கொரு அத்தமம்
வீட்டுச்சூழல் மேம்பட சுற்றுச்சூழல் படுகொலை
செத்தவனும் சாம்பலானான் கொன்றவனும் கடவுளானான்
கண்கட்டி வித்தையாய் காரணம்சொல்லி கபளீகரம்

விளக்கறியா வெட்டில்பூச்சியாய் விலங்குகள் விழிக்க
பட்டாசு ஒலியில் பயந்தோடிய நாய்களும்
மாசுற்ற காற்றால் மயங்கிய மாடுகளும்
பறவைகளும் பிறஉயிர்களும் கடவுளிடம் மன்றாடின

காலம் கனிய கடவுளும் காத்திருக்கிறார் போலும்

அன்று
நாமும் அதே வெட்டில்பூச்சியாய் விழிப்போம்
பூமித்தாய் பூகம்ப bomb வெடிப்பாள்
கடல்தாய் பேரலை புஸ்பானம் விடுவாள்
மின்னல்கள் மத்தாப்பாய் மிளிரும்
வானத்திலிருந்து asteroid ராக்கெட்டுகள் பொழியும்

அப்போது
செத்தாண்டா மனுஷன் என்று
விலங்குகள் கொண்டாடும் தீபாவளி

கிறுக்கல்கள்

noreply@blogger.com (Anonymous) — Sat, 10 Nov 2012 02:26:00 +0000

"கொடுக்கற தெய்வம் கூரைய பிச்சிட்டு கொ.."
முடிப்பதற்குள் மழை கொட்ட
கூடையை தலையில் கவிழ்த்துக்கொண்டு
குடிசையுள் குடைபிடித்தால் பூக்காரி

ஆங்கிலம் கலக்காமல் நான்கு வரி எழுதினேன்
அழகான கவிதை என்று retweet செய்தான்
தமிழ் நண்பன்

3 பணம் இருப்பவர்களுக்கு தீபாவளி
பணம் இல்லாதவர்களுக்கு 'Deep'ஆ வலி

4 கூரை ஏறி கோழி பிடிக்க மறுத்தவன்
கோபுரம் ஏறி கும்பாபிஷேகம் செய்தானாம்

5 காலம் கனியுமென காத்திருக்காதே
எல்லாக் காய்களும் கனிப்பதில்லை
சில கருகிவிடுகின்றன
சில பிறர் தோட்டத்திற்கு விதைகளாகின்றன

6 நதிகளை தேசிய மயமாக்காததின் விளைவு
தேசிய நெடுஞ்சாலைகள் நதி போல் காட்சியளிக்கின்றன

மனிதநேயம்

noreply@blogger.com (Anonymous) — Sun, 04 Nov 2012 01:45:00 +0000

நேற்று மாலை நண்பரோடு பயணித்திருந்தேன்
time passக்கு நாட்டுநடப்பும் நீளம் புயலும்
'என்ன boss சென்னைக்கு வெறும் காத்து தான் வந்துச்சு மழையே வரல' என்றேன்
'உங்களையும் என்னையும் போல மனுஷங்க இருக்குறப்போ எப்படி arun மழை வரும்' என்றார் நக்கலாக.

சட்டென்று brake அடித்து வண்டியின் வேகத்தை குறைத்து ஓட்டினார்
'road freeயா தானே இருக்கு.. எதுக்கு speed குறைச்சீங்க' என்றேன்
'இல்ல இங்க சேரும் சகதியுமா இருக்கு.. வேகமா போனா நடந்து போறவங்க மேல சேர் அடிச்சிடும்' என்றார்.

புன்னகைத்து ஜன்னல் வெளியே பார்த்தேன்
ஆனந்ததாண்டவம் ஆட மழைமேகங்கள் மின்னலோடு ஒத்திகை பார்த்துக்கொண்டிருந்தன.

ஏக்கம்

noreply@blogger.com (Anonymous) — Tue, 16 Oct 2012 00:59:00 +0000

என்னால் நம்ப முடியவில்லை

அவள் இங்கு இல்லை

என்னை இருட்டினில் தள்ளினார் போல் உள்ளது
AC போட்டிருந்தும் உடல் வியர்துள்ளது
ஒருவர் இருக்கையில் அவர் அருமை புரிவதில்லை
அவளுக்காக இப்படி ஏங்குவேன் என்று நினைத்ததில்லை
அவளை திரும்ப அழைக்கத் நினைத்தேன்
கைபேசியில் எண்களை அழுத்தினேன்...
"Hello...எப்போ sir Current வரும்?"

குழாய்

noreply@blogger.com (Anonymous) — Fri, 12 Oct 2012 14:04:00 +0000

இன்றும் தெருவில் குழாய்அடி சண்டை
ஒருவழியாக எல்லோரும் குடிநீர் பிடித்து செல்ல
தெரு அமைதியானது
குழாய் மட்டும் அழுது கொண்டிருந்தது

காலை வாரிய calculation; கால் கொடுத்த கர்ணன்

noreply@blogger.com (Anonymous) — Tue, 09 Oct 2012 16:11:00 +0000

திங்கள் காலையில் டிங் டாங் என்று மணி அடிக்க
இனிதே துவங்கியது இந்த வாரம்
bike எடுத்துக்கொண்டு பந்தாவாய் கிளம்பினேன் officeகு
top gear தொட்டபிறகு bottom heartல் ஒரு லப் டப்
speedometer மேல்நோக்கி பறக்க fuel gauge கீழ்நோக்கி நாணியிருந்தது

அலுவலகத்தில் இருந்து அலைபேசி நச்சரிக்க
parallax error என்று physicsம் சமாதானம் சொல்ல
Ignore செய்தேன் Indian Oilஐ
தெம்பாக முறிக்கினேன் throttleஐ

விளைவு...
மண் சுமந்த மாட்டுவண்டிக்கு தோதாய்
மூச்சிறைத்து நின்றது என் வண்டி

திங்கள் என்றாலும் ஞாயிறு விட்ட பாடில்லை
ACயில் இருந்த உடம்புக்கு வெயில் easyயாக இல்லை
வராத காவிரியாய் வியர்வை வழிந்தோடியது

என்னை அவசர படுத்திய computer professionஐயும்
எனக்கு இல்லாமல் போன common senseஐயும்
சபித்துக்கொண்டே தள்ளினேன் சுடும்வெயிலில் வண்டியை

கண் இருட்டிக்கொண்டு கபாலம் கலங்கிய போது
கானல் நீராய் தோன்றினார் கர்ணனாய் அந்த உருவம்

நிலைமை அறிந்து நலம் கருதி உதவினார் அந்த அனானி
காலால் வண்டியை tow செய்து கறை சேர்த்தார்
கைமாறு கருதாமல் bye சொல்லி புறப்பட்டார்

ரொம்ப Thanks Boss என்று கை அசைத்தேன்
அதற்குள் மறைந்து விட்டது அவரது Hero Passion

In this age of techno gizmo
With scant regard for enviro
And compassion dropping to zero
This bro, for me, is an unsung hero

வருடல்

noreply@blogger.com (Anonymous) — Sat, 11 Aug 2012 14:05:00 +0000

Power cut டிலும் புலவன் ஆகலாம்
கொசுக்கடியிலும் கவிதை எழுதலாம்
மயிலிறகின் வருடலாய்
இளை(யராஜா)யின் இசையிருந்தால்!!

- அருண்

கூரை குறை தீர்த்த தலைவா வாழ்க!

noreply@blogger.com (Anonymous) — Sun, 29 Apr 2012 16:23:00 +0000

சாலையோர சந்திப்பிலிருந்து
கம்பீரமாய் கர்ஜித்தார் தலைவர்
நகரெங்கும் நடனமாடின
பளபளக்கும் பதாகைகள் (banner)

பதாகைகளின் ஆக்கிரமிப்பில்
பாதசாரிகள் அல்லோலப்பட
புலம்பியபடியே நடந்தேன்
பாலத்தின் மேலே

வற்றிய ஆறும் சுருங்கிய வயிறும்
சாக்கடை சேறுமாய் குப்பம் மிதக்க
கூரைக்கு பதில் குறைதீர்த்தபடி புன்னகைத்தார்
வாழ்த்தும் கையுமாய் தலைவர்
பழைய பதாகையாய்

- அருண்

பொருள் விளக்கம்

அத ஏ மாமு கேக்குற
நேத்து பஜார் பக்கம் போனேனா
ஏதோ கட்சி கூட்டம்னு ஒரே போஸ்டர் பா
தினுசு தினுசா பேன்னர் அடிசிருந்தானுங்க
ரோடெல்லாம் பேன்னர் அடிச்சு நடக்க கூட எடம் இல்லாம ஒரே பேஜாரா போச்சு
இந்த பேமானிங்க பேன்னர் அடிகலைன்னு எவன் அழுதான்னு பொலம்பினே சேரி பக்கம் போனேனா

அங்க நம்ம குப்பத்து ஆளுங்க குட்சைல மழை தண்ணி ஒழுவாம இருக்க
இந்த பழைய பேன்னர்லாம் கூர மேல போட்டிருந்தாங்க மாமு

அப்போதான் விவேக் சொன்னது மனசுக்கு வந்திச்சு

'இந்த அரசியல் கட்சிங்க மாநாடு நடத்துரதுக்கும் ஒரு பயன் இருக்கத்தான் செய்யுது'

குருவி

noreply@blogger.com (Anonymous) — Tue, 20 Mar 2012 11:10:00 +0000

வீட்டுத் தின்னையில் விளையாடிய குருவி
வீடே இல்லாமல் திரியுது எங்கோ!

ஊர் சுற்றி உறவாடிய குருவி
ஊன் இன்றி கருகுது எங்கோ!

கூரைகளில் கூடுகட்டி குடிபுகுந்த குருவி
கூரையின்றி தவிக்குது எங்கோ!

ஆறறிவு கொண்ட அரக்கர்கள் நாம்
அமைதி கொள்வது என்றோ?

குருவி - காகத்திற்கு அடுத்து மனிதனுக்கு மிகவும் அறிமுகமான பறவை.

இந்த வாக்கியத்தை உங்களால் நம்ப முடிகிறதா? நீங்கள் 1990க்கு முன்னால் பிறந்திருந்தாலே ஒழிய இதை நம்ப வாய்ப்பில்லை. மனிதனின் பொருளாதார வளர்ச்சியில் பலியான, பலி ஆகிக்கொண்டிருக்கும் இயற்கை வளங்களுள்
குருவிகளும் அடங்கும். கான்கிரீட் வீடுகள், இயற்கை நிழலில்லா குடியிருப்புகள், மரம் இல்லா சாலைகள், குறைந்து கொண்டே வரும் நீர் தேக்கங்கள் - இவற்றால் அதிகம் பாதிக்கப்படுவது
பறவைகள் - குறிப்பாக குருவிகள். மேலும் ஒரு முக்கிய காரணம் கைபேசி கோபுரங்கள் (cellphone towers). 10 - 14 நாட்களில் பொறிக்கும் குருவி முட்டைகள் கைபேசி அலைவீச்சால் 30 நாட்கள் ஆகியும் பொறிப்பதில்லையாம். இதுவே குருவி இனம் குறைய முக்கிய காரணம் என்று சொல்லப்படுகிறது.

ஓட்டு வீடுகளில் கூடு கட்டி, குஞ்சுகள் பொறித்து, முற்றத்தில் நெல் தின்று, இனிமையாக கூவி வந்த குருவிகளை சிறுவயதில் பார்த்து ரசித்தது இன்னும் நினைவில் நிற்கிறது. கூட்டாக பறந்து உணவு தேடி தின்னும் இப்பறவைகள் வண்டு, புச்சி, புழு போன்றவற்றை உண்டு நமக்கும் உதவுகின்றன. இவற்றின் கூவல்களை ரசிக்காதவர்களே இருக்க இயலாது. குறிப்பாக அந்தியின் மயக்கத்தோடு இவற்றின் கூவல்களின் பின்னணியில் மாலை பொழுதுகளை கழிப்பது தனி சுகம். சிலப்பதிகாரம், புறநானூறு, நற்றினை மற்றும் பல தமிழ் இலக்கியங்களிலும் பரவலாக குருவிகள் பற்றிய குறிப்புகள் உண்டு. தமிழ் வரலாற்றில் கூட, பாரி வள்ளல் குடும்பம் போரில் முற்றுகையால் அவதியுற்ற போது, குருவிகள் நெற்கதிர்களை கொண்டு வந்து உணவளித்ததாக சங்க பாடல்கள் கூறுகின்றன.

இன்று உலக வீட்டுகுருவிகள் நாள். ஊர் சுற்றித் திரிந்த குருவியை நினைவில் மட்டும் பறக்க விடலாமா?
குருவிகளால் எனக்கு என்ன பயன், காலப்போக்கின் மாற்றங்களால் ஓரம்கட்டப்படும் 'unfit species' குருவிகள், இவற்றை பாதுகாத்து என்ன பயன் போன்ற உலகமயமாக்களால் குறுகிப்போன சிந்தனையுடன் கேட்கப்படும் கேள்விகளுக்கு என்னிடம் பதில் இல்லை. ஆனால், தன் வளர்சிக்காக இயற்கையையே அடகு வைத்திருக்கும் நாம், பிராயச்சித்தமாக செய்யக்கூடிய சேவைகளுள் ஒன்று குருவிகள் மற்றும் மற்ற பறவைகளை ஆதரிப்பது. தங்கள் வீட்டின் வெளியில் சின்ன கிண்ணங்களில் நீர் நிரப்பி வைக்கலாம். வீட்டு மாடி, வாசலில், நெல் தானியங்களை தூவி வைக்கலாம். போதிய வசதி இருந்தால் சின்ன அட்டை பெட்டிகளில் ஓட்டை போட்டு கூடுகளாக மாற்றி பொருத்தமான இடத்தில் பொருத்தி குருவிகளை வரவைத்து அழகு பார்க்கலாம்.

இன்று மாலை காற்றின் மௌனத்தை நன்கு கேளுங்கள் - குருவிகளின் கூக்குரல் கேட்கிறதா?

ஒட்ட வைக்கும் வெட்டு

noreply@blogger.com (Anonymous) — Thu, 08 Mar 2012 12:52:00 +0000

பொங்கலோ பொங்கல்

noreply@blogger.com (Anonymous) — Sun, 15 Jan 2012 02:58:00 +0000

கரும்பு இனிக்க
மஞ்சள் மணக்க
பொங்கல் பொங்க
சுற்றம் வாழ்த்த
நெஞ்சம் நெகிழ
தரணி தழைத்திட
கதிரவனை வணங்கி
தமிழர் திருநாளை போற்றுவோம்

இனிய பொங்கல் நல்வாழ்த்துகள்!

சுனாமியின் சுவடுகளில்

noreply@blogger.com (Anonymous) — Sun, 25 Dec 2011 16:53:00 +0000

ஆண்டுகள் 7 ஆகியும் ஆழ்காயம் ஆறவில்லை
அமளி அடங்கியபின்னும் அடிமனம் ஓயவில்லை
அலைகள் ஓய்ந்தபின்னும் ஓயாத நினைவலைகள்...

தாயாக இருந்தவள்
   துர்கையாக மாறினாள்
காலனாய் அனுப்பிவைத்தாள்
   கடல் அலையை

ஊற்றினது தான்தானே
   உயிர்ப்பால் என்று
தெரிந்தே பொழிந்தாலோ
   தண்ணீர் கனையை

போதும் போதும் என்று
   பேதைநாம் கதற
தவறாய் உணர்ந்தாலோ
   தாய் இயற்கை

பசுமையே இல்லாத
   பாலைவனமாய் மாற
தமிழகம் சிதைய
   தவிக்கிறோம் இன்று

எமனாய் அனுப்பினாய் கடல்நீரை அன்று
எமனாய் ஆக்குகிறாய் நதிநீரை இன்று

தண்ணீரில் மிதந்தோம் பிணங்களாய் அன்று
தண்ணீரின்றி தவிக்கிறோம் ஜடங்களாய் இன்று

போதும் தாயே உன் விளையாட்டு
ரணங்கள் ஆயிரம் நீ நிப்பாட்டு
உன் பிள்ளைகள் வாழ வழிகாட்டு

தமிழ்ப்பால் குடித்த எங்களுக்கு
வாய்ப்பால் ஊற்றிவிடதே!

- அருண்

ஏழாம் அறிவு - வேலாயுதம் : குறுவிமர்சனம்

noreply@blogger.com (Anonymous) — Mon, 31 Oct 2011 02:36:00 +0000

திருக்குறள்

கான முயலெய்த அம்பினில் யானை
பிழைத்தவேல் ஏந்தல் இனிது

வலிவு மிகுந்த யானைக்கு குறி வைத்து அது தப்பினாலும் அது, வலிவற்ற முயலை வீழ்த்துவதை காட்டிலும் சிறந்தது.

செந்தில் -> கௌண்டமணி: அண்ணே ... நீங்க SSLC fail னே... நான் எட்டாம் class pass னே... fail பெருசா pass பெருசா?!?!

- அருண்

மொழி பிரச்சனையில் முழி பிதுங்குதப்பா!!

noreply@blogger.com (Anonymous) — Sun, 03 Jul 2011 07:17:00 +0000

'இந்தி மொழியை கட்டாய பாடமாக்க வேண்டுமா' என்பதை பற்றி நண்பர் ஒருவர் FB யில் ஒரு பதிப்பு இட்டிருந்தார்.

அந்த எண்ணங்களை வேறு ஒரு கோணலில் இங்கே பகிர்ந்துகொள்கிறேன்.

'தமிழர்களுக்கு தமிழில் ஒழுங்காக பேச, எழுத தெரிகிறதா?' என்ற கேள்விகள் எழும் இந்த கால கட்டத்தில், வேறு ஒரு மொழியை கட்டாய பாடமாக்க வேண்டுமா என்ற கேள்விகளும் எழுவது விந்தையாக உள்ளது. எரிகிற வீட்டில் கொள்ளையும் அடித்துவிட்டு எண்ணையும் ஊற்றுகிறார்களா!?!

' நான் டில்லி, குர்காவ்னில் இருக்கிறேன்... எனக்கு இந்தி தெரியாமல் சிரமமாய் இருக்கிறது... schoolலையே இந்தி படிச்சிருந்தா usefulல இருந்திருக்கும்' என்று தன் தேவையை மட்டும் பார்க்கும் myopic friends தங்கள் நேரத்தை வீண்செய்யாமல் பின்குறிப்பு 3க்கு செல்லவும். மொழி பிரச்னையை ஒரு சமுதாய வரலாற்று கண்ணோட்டத்துடன் காணும் பதிப்பே இது!!

இந்தியாவின் சிறப்பு அதன் வேற்றுமையே! ஒவ்வொரு இந்தியனுக்கும் பேச்சில், வாழ்வில், வழிபாட்டில் சுயஉரிமை என்ற கோட்பாடுகளின் அடிப்படையில் விடுதலை பெற்ற நாடு இது! இந்த விடுதலையை அந்நியர்களிடம் இருந்து நாம் பெற்றுவிட்டோம்; நம் சக இந்தியர்களிடம் இருந்து பெற்றுவிட்டோமா என்பது கேள்விக்குறியே!

மொழியும் சமுதாயமும் பின்னிப்பிணைந்தது. தனி மனிதனுக்கு மொழி தேவை இல்லை. சமுதாயம் உருவாகும் போதே மொழியின் தேவை வருகிறது. சமுதாயத்துக்கு ஏற்ப மொழி மாறும்; மொழிக்கேற்ப சமுதாயம் மாறும்; இது இயல்பு!

இந்திய நாடு பல கலாச்சாரங்களின் கலவை. ஒவ்வொரு மாநிலமும் ஒவ்வொரு கலாச்சாரத்தின் வெளிப்பாடு. இந்தியர் ஒவ்வொருவரும் அந்தந்த கலாச்சாரத்தை மதிக்கின்றோம்; அதே நேரத்தில் தன் சொந்த கலாச்சாரத்தை போற்றி காக்கவும் கடமை பட்டுள்ளோம். (ஊர்ல இருக்குற எல்லா அம்மாவும் நல்ல அம்மாதான்; ஆனா எனக்கு என் அம்மா தான் the best!!).

ஒரு கலாச்சாரத்தின் வெளிப்பாடு - மொழி , மதம், பண். இந்தியா என்னும் பாற்கடலை நாம் கலாச்சாரம் என்னும் மண்டர மத்தையும் நம் சுயதேவைகள் என்ற வாசுகி பாம்பையும் வைத்து கடையும்போது நாட்டு ஒற்றுமை என்ற அமிழ்தமும் வருகிறது; கலாச்சார பாதிப்பு (சிதைவு) என்ற நஞ்சும் வருகிறது. இதில் நஞ்சை கையாள எந்த சிவபெருமானும் நம்மில் இல்லாதததுதான் குறை!!

உவமைகளை விட்டுவிட்டு நிதர்சனத்துக்கு வருவோம்!

சமுதாயங்கள் ஒன்றோடொன்று உரையாடும் போதும் பரிமாறும் போதும் ஒரு பொது மொழி தேவை படுகிறது. இதனால்தான் இந்திய அரசு அரசாங்க மொழியாக இந்தியையும் ஆங்கிலத்தையும் அறிவித்தது. (இந்தியாவிற்கு தேசிய மொழி கிடையாது. நம்பாதவர்கள் இந்த இணைப்பிற்கு செல்லவும்). அறிவிக்கப்பட்ட கால கட்டம் - 1950, 60. அன்றைய சூழலில் இந்தியாவில் பெரும்பான்மையான தொழில்கள், வேலை வாய்புகள் அரசாங்கத்திடமே இருந்தது. அனைத்து தரப்பினரும் இந்தியை கட்டாயம் படிக்க வேண்டும்; அரசாங்க வேலையில் இந்தி மட்டுமே பயன்படுத்தப்படும் என்ற அரசாணை தென்னகத்தில் புரட்சியை ஏற்படுத்தியது. இந்த அரசாணை இந்தி தெரியாத தென்னவர்களுக்கு வேலைவாய்ப்பில் பின்னடைவை ஏற்படுத்தும் என்று எண்ணம் நடுவண் அரசுக்கு தெரியாதோ என்னவோ?! மேலும் ஒரு மொழியை கட்டாயமாக்குவது அந்த மொழி பேசாதவர்களின் அடிப்படை உரிமை மீறல் என்பது உணரவில்லையோ?! ஒரே மொழி பேசா விட்டால் இந்தியா சிதைந்து விடும் என்று நினைத்தவர்கள் மொழியை கட்டாயம் ஆக்கினால்தான் அப்படி ஆகும் என்று பின்பு புரிந்துகொண்டனர். விளைவு - ஆங்கிலமும் அரசு மொழியாக தொடர்ந்து நடைமுறையில் உள்ளது.

ஆங்கிலத்தை தொடர்ந்து பயன்படுத்தியதன் பலன் இப்போது நாம் அனைவரும் காண்கிறோம். உலகில் ஆங்கிலம் தெரிந்த நாடுகளின் பட்டியலில் இந்தியா முன்னிலை. உற்பத்தி துறையில் அபார வளர்ச்சி கண்ட சீனா தகவல் தொழில்நுட்பத்தில் (IT) இந்தியாவை வெல்ல முடியாததற்கு காரணம் அங்கே ஆங்கிலம் இல்லை. IT, BPO துறைகளில் நாம் கண்ட வளர்ச்சி எவ்வளவு! இதற்கு முழு இந்தியாவும் தமிழகத்துக்கு கடமை பட்டுள்ளது. நாம் நம் மொழியின் மேல் பற்று உள்ளவர்கள் தான். அதே நேரத்தில் நடைமுறை வாழ்க்கைக்கு ஏற்றவாறு நம்மை மாற்றிக்கொள்ள தெரிந்தவர்களே - அதனால்தான் தமிழோடு உலக பொது மொழியாம் ஆங்கிலமும் கற்றோம்.

இந்தி கற்காதளால் பல வாய்ப்புகளை இழந்தோம் என்று கூறுவது பொய்யான வாதம்; இந்தியாவில் அரசியல் தவிர வேறு எந்த தொழிலுக்கும் மொழி தடை இல்லை. வேலை தேடி தென்இந்தியாவுக்கு வரும் வடஇந்தியர்களே அதிகம். அவர்களின் புலம்பலாகத்தான் இதை பார்கிறேன். வாழ்நாள்முழுக்க இந்தி மற்றும் அதன் சகோதர மொழிகளை மட்டுமே பேசியவர்களுக்கு திராவிட மொழிகள் அந்நிய மொழிகளாகத்தான் தெரியும். அவர்களின் வார்த்தைகளே - இந்தி கற்காதளால் பல வாய்ப்புகளை இழந்தோம். ஆம், உண்மை தான்! வாய்ப்பை இழந்தது சென்னை தி நகரில் துணிமணி கடை வைக்க நினைத்த சேட்டு. காரணம் மக்களுக்கு இந்தி தெரியவில்லையே!! அதனால் அவர் வாய்ப்பை இழந்தார்! அதற்கு நாம் வருந்த தேவை இல்லை!! ஊரோடு ஒத்தி வாழ தெரியாதவர்களுக்கு பொருளாதாரம் தெரியாது. உலகமயமாக்கத்தால் இன்றைய கால கட்டத்தில் அரசு துறைகளில் வேலை தேடுவோரின் எண்ணிக்கை மிக குறைவு. பெரும்பாலும் வேலைகள் தனியார் துறையிலேயே உள்ளது. இங்கே பேசப்படும் மொழி ஆங்கிலம்.

எனக்கு ஒன்று மட்டும் விளங்கவில்லை. வட மாநிலத்தவருக்கு ஆங்கிலம் தெரியவே தெரியாதா?? எங்க ஊரு ஆப்ப காரம்மா கூட '2 aapam 10 rupees. change no. 10 rupee give' னு இங்கிலீஷ் பேசும். இந்தியாவில் இந்திய மொழியே பேச வேண்டும். வெள்ளையர்களை விரட்டி விட்டுட்டு ஆங்கிலம் மட்டும் எதற்கு என்று விதண்டாவாதம் பேசக்கூடாது (இந்தியில் 10% மட்டுமே சமக்ரிதம், மீதி 90% பெர்சிய மற்றும் உருது மொழி என்ற வாதம் வேறொரு கதை). உடுப்பது மேற்கத்திய உடை. உண்பது மேற்கத்திய உணவு. வேலை செய்வதும் மேற்கத்திய நாட்டின் இந்திய கிளை. இது உலகமயமாகத்தின் பிரதிபலிப்பு. மொழியும் அப்படியே.

ஊரோடு ஒத்து வாழ் - இது பழமொழி மட்டும் இல்லை. புது மொழியும் கூட.

பூனாவில் வேலை பார்த்தால் மராட்டியில் பேசு!
டில்லியில் வேலை பார்த்தால் இந்தி பேசு!
கொல்கத்தாவில் இருந்தால் பெங்காலி கற்றுக்கொள்!
சென்னையில் இருந்தால் தமிழ் கற்றுக்கொள்!

வீட்டில் மட்டும் உன் தாய்மொழி பேசு!

- அருண்

பின்குறிப்பு 1: இந்த பதிப்பை ஆங்கிலத்தில் இடலாம் என்றே தோன்றியது. முதலில் தமிழை தன் குழந்தைகளுக்கு சொல்லிகொடுக்காமல் இருக்கும் தமிழர்கள் இதை படிக்கட்டும் என்றே இந்த இடுகையை தமிழில் பதித்தேன். மதுரையில் கல்வி அறிவே இல்லாத தமிழர்களையும் பார்கிறேன்; சென்னையில் CBSEஇல் ஆங்கிலம் இந்தி மட்டுமே படிக்கும் மாணவர்களையும் பார்க்கிறேன். 'Tamil movies are sick; Bollywood is the best!' என்று பந்தா பண்ணும் தமிழ் கோமாளிகளையும் பார்க்கிறேன். எப்பொழுதும் இக்கரைக்கு அக்கறை பச்சையாகத்தான் தெரியும். ஒருவர் இருக்கும் போது அவரின் பெருமை தெரியாது. தமிழுக்கு அந்த நிலை வந்துவிடுமோ என்று ஆதங்கப்படும் தமிழர்கள் குறைந்தது தன் பிள்ளைகளுடனாவது வீட்டில் தமிழில் பேசுங்கள்!

பின்குறிப்பு 2 : இந்தியாவே ஒரு குப்பை ஊரு. இங்கே இருந்தா என் life spoil ஆயிடும் என்று கூறிக்கொண்டு green cardகாக எங்கும் தோழர்களுக்கு இந்த பதிப்பு ஒரு நகைப்பாய், 'obsolete crap' ஆகா தெரிந்தால் கூட வியப்பதிர்கில்லை.

பின்குறிப்பு 3: 'Schoolலையே இந்தி படிச்சிருந்தா usefulல இருந்திருக்கும்' என்று தன் தேவையை மட்டும் பார்க்கும் myopic friendsகளுக்கு - "ஏன் boss... .Net, Java லாம் நாம என்ன schoolலயா படிச்சோம்? 1 மாதம் class போனா நீங்களும் இந்தி பேசலாம். சமஜ்கயா?!?!"

படித்ததில் பிடித்தது - அன்னையர் தினம்

noreply@blogger.com (Anonymous) — Sun, 08 May 2011 14:20:00 +0000

இன்று அன்னையர் தினம் என்பதால் தாய்மை பற்றி சில சுவையான செய்திகள், கட்டுரைகள் படித்தேன்.

தமிழ் மொழியில் பெயர்கள் எவ்வாறு அறிவியல் பூர்வமாக அமைகின்றன என்று முன்பொரு பதிப்பில் கண்டோம். இதை மேலும் பறைசாற்ற ஒரு சுவையான செய்தி இங்கே...

அம்மா என்பவள் நமக்கு உயிர் கொடுத்தவள் என்பதால் முதல் எழுத்தாக 'அ' என்னும் உயிர் எழுத்தையும், நம்மை சுமந்து உடல் (மெய்) கொடுத்ததால் இரண்டாம் எழுத்தாக 'ம்' என்ற மெய் எழுத்தும் நமக்கு உடல் உயிரோடு உணர்வையும் சேர்த்து வளர்த்தால் மூன்றாம் எழுத்தாக 'மா' என்ற உயிர்மெய் எழுத்தும் சேர 'அம்மா' என்ற பெயர் சொல் உருவானது. இதே போல தான் அப்பா, அண்ணா, அக்கா என்ற பல முக்கிய உறவுகளும் பெயர் பெற்றன.

அம்மா மென்மையானவள் என்பதால் 'ம்' என்ற மெல்லினம் பயன்படுத்தப்பட்டுள்ளது.
அப்பா கண்டிப்பானவர் (வன்மை குணம்)என்பதால் 'ப்' என்ற வல்லினம் பயன்படுத்தப்பட்டுள்ளது.

இது தமிழ் மொழியின் தொன்மைக்கும் சிறப்புக்கும் அறிவியல்சார் தன்மைக்கும் மேலும் ஒரு சான்றாக அமைந்துள்ளதில் வியப்பு இல்லை!

நன்றி!
அருண்

தெரியுமா உங்களுக்கு?

noreply@blogger.com (Anonymous) — Thu, 05 May 2011 14:50:00 +0000

உலகில் பேசப்படும் மொழிகளின் எண்ணிக்கை - சுமார் 6800

இவற்றில் எழுத்து வடிவம் பெற்ற மொழிகளின் எண்ணிக்கை - 700

சொந்த எழுத்து வடிவம் கொண்ட மொழிகளின் எண்ணிக்கை - 100 (ஆங்கிலத்துக்கு சொந்த எழுத்து வடிவம் கிடையாது)

இந்த மொழிகளில் மூல மொழிகள் ( தாய் மொழிகள் ) - 6

இந்த 6 மொழிகளில் நடைமுறை பயன்பாட்டில் உள்ள மொழிகள் - 2

1 - சீனம் (Chinese)
2 - தமிழ்

நன்றி!
அருண்

LHS = RHS

noreply@blogger.com (Anonymous) — Sun, 01 May 2011 03:49:00 +0000

LHS = RHS

இது நம்மில் பலருக்கு பரிட்சையம் ஆன சமன்பாடு (equation). இயற்கணிதத்திலும் (algebra) திரிகோணகணிதத்திலும் (trignometry) சமன்பாடுகளை சமன் செய்து இறுதியில் LHS = RHS என்று நிரூபிப்போம். இதே சமனை வேறொரு கோணலில் நிரூபிக்காலமா என்று தோன்றியது; அதன் விளைவே இந்த பதிப்பு.

சமனை நிரூபிக்க நான் எடுத்துகொள்ளும் கரு வளையத்தில் படித்த ஒரு வரலாற்று சம்பவம்...

காலம்: 1892

இடம்: ஸ்டான்போர்ட் பல்கலைகழகம்

ஓர் இளம் மாணவன்; பெற்றோர் இல்லை அவனுக்கு. கல்வி கட்டணம் கட்ட பணம் இல்லாமல் தவித்து வந்தான். Necessity is the mother of invention என்று ஆங்கிலத்தில் சொல்வார்கள். அது போல விளிம்பில் தவித்த அவனுக்கு ஓர் எண்ணம் தோன்றியது; நாம் ஒரு மெல்லிசை நிகழ்ச்சியை நடத்தி அதில் வரும் வருவாய் மூலம் கல்வி கட்டணம் செலுத்தலாமே என்று தோன்றியது. அவன் தன் நண்பனோடு சேர்ந்து அதற்கான வேலையில் இறங்கினான். உலகின் தலை சிறந்த கின்னரப்பெட்டியாளர் (pianist) ஜெ. பதேறேவ்ச்கியை அழைத்து வந்து நிகழ்ச்சி நடத்த விரும்பினர். பதேறேவ்ச்கியின் உதவியாளரை அணுகினர். அவர் நிகழ்ச்சி கட்டணமாக 2000 டாலர்கள் கேட்டார். நிகழ்ச்சி முடிந்தவுடன் அதன் வரவில்லிருந்து நாங்கள் உங்கள் கட்டணத்தை செலுத்துவோம் என்று இந்த மாணவன் வாக்கு கொடுக்க நிகழ்ச்சிக்கு ஒப்புக்கொண்டார்.

மெல்லிசை நிகழ்ச்சி சிறப்பாக நடந்தது...

எனினும் நிகழ்ச்சியின் வருவாய் வெறும் 1600 டாலர்கள் தான். இந்த மாணவன் மனம் தளர்ந்து போனான். பதேறேவ்ச்கியை நேரில் சந்தித்து சம்பவத்தை விலகினான்; தன்னிடம் இருந்த 1600 டாலர்களை அவரிடம் கொடுத்து மீத தொகையை விரைவில் செலுத்துவதாக வாக்குறுதி கொடுத்தான். மாணவனின் நிலையை உணர்ந்த பதேறேவ்ச்கி அந்த தொகையை திருப்பி கொடுத்து 'உங்கள் கல்வி கட்டணத்தை முதலில் செலுத்துங்கள்; மீதம் உள்ள தொகையை மட்டும் எனக்கு கொடுங்கள்; எனக்கு அதுவே போதும்' என்றார். பதேறேவ்ச்கி ஓர் சிறந்த கின்னரப்பெட்டியாளர் மட்டும் அல்ல; சிறந்த மனிதரும் கூட என்று உணர்ந்து அந்த மாணவன் அவருக்கு நன்றி கூறி விடைபெற்றான்.

காலம் விரைந்தது..... கின்னரப்பெட்டியாளர் போலந்து (Poland) நாட்டின் முதன்மைஅமைச்சர் (Prime Minister) ஆனார். சிறப்பாக தன் நாட்டை வழி நடத்தி சென்றார். இருப்பினும் காலத்தின் கட்டாயமாக இரண்டாம் உலகப்போர் வந்தது... போலந்து தாகத்தில் பரிதவித்தது; நாட்டில் 15 கோடி மக்கள் பட்டினியில் தவித்தனர். உதவி கோரி அமெரிக்க உணவு மற்றும் பேரிடர் மீட்பு அமைப்பின் (US Food and Relief Administration) உதவியை அணுகினார். இந்த அமைப்பின் தலைவர் ஹெர்பர்ட் ஹூவர் (இவர் பிற்காலத்தில் அமெரிக்க குடியரசு தலைவராக உயர்ந்தார்).

ஹூவர் உடனே உதவ முன்வந்தார்; நிவாரண பொருட்கள் போலந்துக்கு அனுப்பப்பட்டு நிலைமை கட்டுக்குள் கொண்டுவரப்பட்டது.

ஹூவரின் உடனடி (அரசியல் பாதகத்தை பற்றி கவலை படாத) உதவியை கண்டு பதேறேவ்ச்கி மனம் நெகிழ்ந்தார். நன்றி சொல்ல ஹூவரை நேரில் சந்திக்க சென்றார்.

பதேறேவ்ச்கி நன்றி சொல்ல, அதை மறுத்த ஹூவர் 'தாங்கள் எனக்கு நன்றி சொல்ல கூடாது; நான் செய்தது வெறும் நன்றி கடன் தான். பல ஆண்டுகளுக்கு முன் ஒரு மாணவன் கல்லூரி கட்டணம் கட்ட உதவினீர்கள். அந்த மாணவன் நான் தான்' என்றார்.

இந்த கதையை படிக்கும்போது நான் உணர்ந்தது - கணிதத்தில் மட்டும் அல்ல வரலாறு, அறிவியல், ஆன்மிகம், மனிதம்...

அனைத்திலுமே LHS = RHS!!!

இந்த கருத்தை பறைசாற்றும் குறளுடன் இந்த பதிப்பை நிறைவு செய்கிறேன்.

பயந்துக்கார் செய்த உதவி நயன்தூக்கின்

நன்மை கடலின் பெரிது.

என்ன பயன் கிடைக்கும் என்று எண்ணிப் பார்காமலே, அன்பின் காரணமாக ஒருவர் செய்த உதவியின் சிறப்பு கடலை விடப் பெரிது.

நன்றி!

அருண்

காந்தியடிகளும் தமிழும்

noreply@blogger.com (Anonymous) — Mon, 18 Apr 2011 14:08:00 +0000

காந்தியடிகள் தன் ஆடையை துறந்து அரை நிர்வாணி ஆனது மதுரையில்தான் என்பது நாம் அறிந்த ஒன்று. அவரின் தமிழ் தொடர்பு அத்துடன் முடியவில்லை. மேலும் சில சுவையான தகவல்கள் இங்கே!

காந்தி ஒருமுறை 'லியோ டால்சுடாய்' எழுதிய ஒரு கட்டுரையில் திருக்குறளின் இன்னா செய்யாமை அதிகாரத்திலிருந்து 'இன்னா செய்தாரை ஒறுத்தல், அவர் நாண நன்னயம் செய்துவிடல்' என்ற குறட்பாவைப் பற்றி படித்தார். மிக உயர்வான கருத்தைச் சொல்லும் இப்படி ஒரு நூல் இந்தியாவில் உள்ளது என்பதை அறியாமல் இருந்ததற்கு காந்தி மிகவும் வருந்தினார். திருக்குறள் தமிழ்மொழியில் எழுதப்பட்ட ஒரு அறநூல் என்பதை கண்டறிந்தார். திருக்குறளை அதன் மூலமொழியான தமிழிலேயே படிக்க வேண்டும் என்று காந்தி ஆசைப்பட்டார். அதனால், தமிழ்மொழியைப் படித்தார்.

"திருக்குறளை அதன் மூலத்திலேயே படிப்பதற்காகவே, யான் தமிழ் கற்றேன்" என்று இதனை அவரே பதிவு செய்திருக்கிறார்.

தமிழை நன்றாகக் கற்றுக்கொண்ட காந்தி 'இந்தியன் ஒபினியன்' என்ற இதழை தமிழிலும் நடத்தினார்

காந்தியடிகளின் சபர்மதி ஆசிரமத்தில் நடந்த வழிபாடுகளிலும் பூசைகளிலும் திருவாசகப்பாடல் இடம் பெற்றன, சபர்மதி ஆசிரமத்தில் தமிழ் பள்ளிக்கூடம் ஒன்றையும் காந்தி நடத்தினார்.

தென்ஆப்பிரிக்கா போராட்டத்திற்கு ஆதரவு கேட்டு முதன்முதலில் 27 வயது இளைஞராகக் காந்தி 1896ல் தமிழகத்தில் பரப்புரை செய்தார். அப்போது பச்சையப்பன் கல்லூரி மண்டபத்தில் "தமிழர்கள் ஒரு சிறு அவமதிப்பையும் சகித்து கொள்ளாத இனத்தினர்" என்று பேசியுள்ளார்.

காந்தியை முதன்முதலாக உலகத்திற்கு "மகாத்மா" என்று அடைமொழியிட்டு அறிவித்தவர் 'சுதேசமித்ரன்' இதழ் ஆசிரியர் ஜீ.சுப்பிரமணியர் (ஐயர்)

காந்தியை 'தேசத்தந்தை' என்று இந்தியாவிற்குத் தெரிவித்தவர்கள் தமிழக மாணவர்கள் தாம்

காந்தி வாழ்க்கை வரலாற்றுச் செய்திகள் வெளியாகியது இந்தியமொழிகளிலேயே முதன்முதலில் தமிழில் தான்!

காந்தியடிகள் பற்றிய ஆவணப்படத்தை உருவாக்குவதற்கு அகிலமெல்லாம் சுற்றி, மூன்றாண்டுகள் முழுமுச்சாய் தவமிருந்து பதிவுசெய்தவர் தமிழரான ஏ.கே.செட்டியார் தான்!

நன்றி!

அருண்

மூலம்: இங்கே அழுத்தவும்

தமிழ் - உயிர், மெய் எழுத்துகள்

noreply@blogger.com (Anonymous) — Sun, 17 Apr 2011 06:27:00 +0000

'தமிழின் வியத்தகு மாண்புகளும், அதன் வளர்ச்சித் திசைவழியும்' என்ற கட்டுரையை வளையத்தில் படித்தேன். அக்கட்டுரையில் இருந்த ஒரு சுவையான கூறு இங்கே!

தமிழ் எழுத்துகளை உயிர் எழுத்துகள், மெய் எழுத்துகள் என்று அடிப்படையாக பிரிக்கலாம் (உயிர்மெய் எழுத்துகள் இவற்றின் சேர்க்கையே)

'அ' முதல் 'ஔ' வரையிலான எழுத்துகளை நாம் உச்சரிக்கும்போது உதடுகள் ஒட்டாமல், வாயின் மேலண்ணத்தை (upper palate) நாக்கு எங்கும் தொடாமல், காற்றுக் குழாயை அல்லது உதடுகளைக் குறுக்கியோ, விரித்தோ காற்றை ஒழுங்குபடுத்தி ஒலிக்கின்றோம். உயிருக்கு முதன்மையானது காற்றுதானே! எனவே, காற்றை மட்டும் பயன்படுத்தி உருவாக்கும் எழுத்துகள் உயிரெழுத்துகள் எனப்படுகின்றன.

'க்','ங்','ச்' முதல் 'ன்' வரையான எழுத்துகளை உச்சரிக்கும்போது நாவானது வாயின் மேலண்ணத்தைத் தொட்டோ அல்லது உதடுகள் ஒட்டியோ ஒலிக்க வேண்டியுள்ளது. அதாவது, காற்றைவிட உடலின் (மெய்யின்) பங்கே அதிகம். அவை மெய்யெழுத்துகள் எனப்படுகின்றன.

தமிழ் மொழியின் சிறப்பை கண்டீர்களா தோழர்களே! பெயர்சூடுதலில்கூட என்னவொரு அறிவியல் தன்மை!! நமது மொழிக்கு இது போன்று பல சிறப்புகள் உண்டு. இவற்றை கற்று நிகழ்கால தேவைகேற்ப நம் மொழியை வளர்ப்பது நம் ஒவ்வொருவரின் கனவாகவும் கடமையாகவும் இருத்தல் வேண்டும்.

பின் குறி: மூல கட்டுரையை படிக்க இங்கே சொடுக்கவும்

நன்றி!
அருண்

'சம' உரிமை

noreply@blogger.com (Anonymous) — Sun, 13 Mar 2011 05:54:00 +0000

பெண்கள் சம உரிமை மாநாட்டில் பங்கேற்றுவிட்டு வந்த இரு jeans t-shirt அணிந்த பெண்கள், பேருந்தில் ஏறினர். பேருந்தின் முன் இருக்கைகளில் அமர்ந்திருந்த ஆண்களை பார்த்து, 'இது ladies seat... எழுந்திரிங்க!!!'

!?!?!