నాలో నేను

యురేకా..!!!

2014-04-18T17:23:00.000+05:30

అదుగో...గోడమీద బల్లి.. !!
ఉంటే ఉండనీ నీదేం పోయిందీ
అవును ఓ మూల గోడమీద పురుగూ పుటకా కనపడితే గటుక్కున మింగి ఏదో ఓ మూలనక్కుతే కాదంటానా ?? పన్నెండువేలు నెలకి అద్దెకడుతూ ఇల్లు తీసుకుంటే.. అది అటు ఇటూ తిరుగుతోంది ఇల్లంతా నాదే అన్నట్టు. అసలే ఒంటరిగా నెట్టుకొస్తోంటే దానికి మాత్రం ఓ జంట..అదీ ఇదీ ఒకదానివెంట ఒకటి పరుగులు. అది కీచులాటో..పోట్లాటో, తెలుగు సినిమాల్లో హీరోఇన్ వెనక హీరో పరిగెత్తినట్టు రొమాంటిక్ పాటో..... నాకెందుకులే గానీ ..ఎక్కడ టపీమని కింద పడతాయో అనేది నా భయ్యం.

ఓ రోజు గోడమీద ఉన్నది ఉండక.. నేలదిగి పరుగులు తీస్తే ఇహ నావల్ల కాలే.. చీపురందుకొని వెంటపడి అవతలకి ఊడ్చేసి హాయిగా ఊపిరి తీసుకున్నా..
రెండో రోజు మళ్ళీ ప్రత్యక్షం... .ఈ ఇల్లు దానికి పర్మనెంట్ అడ్రస్ అని నాకు తెలిసిందప్పుడే. సర్లే ఎక్కువ ఆలోచిస్తే జీవితం విరక్తి పుడుతుందని అనుకుని దాని మానాన దాన్ని వదిలేసా.
కానీ ఇవ్వాళ కిచెన్ వెనక బాల్కనీ ఓపెన్ చేద్దామని అనుకుంటున్నాన్నా.. డోర్ కి ఓ మూల ప్రత్యక్షం.. ఉష్ అన్నా..హశ్ అన్నా ఎంతకీ కదలదు. చీపురుతో తాకి చూసినా చలనంలేదు. చచ్చిందా గోడమీదే అనుకుంటే గుడ్లు మిటకరిస్తోంది. " నీవేం పీకగలవురా...ఒక్క దూకు మీదకి దూకానంటె..ఒళ్ళు జలధరించి చస్తావ్" అని వెక్కిరించినట్టనిపించింది. అవును ఓ సారి బల్లి పడి పాకి నప్పుడూ.. ఒళ్ళంతా మహా అసహ్యంగా...జలధరింపు. గంట సేపు స్నానం చేస్తేగానీ తగ్గలేదు మరి.
ఓటమి తాలూకు అవమాన భారంతో..సరే ఎంతసేపుంటావ్లే అనుకొని వచ్చికూర్చున్నా..

రెండుగంటలయ్యింది ..నా ఓపికని పరీక్షిస్తూ..అది అక్కడే బొమ్మలాగా ఉన్నది కానీ మిల్లీమీటరు కూడా కదల్లేదు. ఇహ లాభంలేదని.. గూగులింగు మొదాలెట్టా..
బల్లులని పారద్రోలటం ఎలా.. ??

1)పెస్ట్ కంట్రోల్ కి ఫోన్ చేయండీ ( ఇండియా బాబూ..రేపిస్టుల బారినించే కాపాడలేరు..ఇహ బల్లులా )
2) లక్ష్మణరేఖగీయండి..( చంపటం నా వల్ల కాదు )
3) ఉండటం మంచిదే,పురుగులని తింటుంది..( ఎవరొద్దన్నారు,నా సమస్యవేరు)
4)నెమలీకలు పెట్టండి..( ఇదివరకు పెడితే దానిమీదనుంచే పాకాయి )
5) గుడ్లు పొచ్చలు వేలాడ దీయండీ.. ( మిత్రుడి ఇంట్లో ఇవి పెద్దగా పని చేయలేదు)
6) పిల్లులుంటే బల్లులు రావు.. ( పిల్లినెక్కడ తేవాలిప్పుడూ )

ఒక్క అయిడిగా కూడా పనికొచ్చేదిలా కనిపించలే..

చివరాఖరికి ఒక అయిడియా తళుక్కున మెరిసింది. చూద్దాం వర్కవుటవుతుందా అని ట్రై చేసా.. ఎంటదీ అంటారా ?? ఏమీ లేదు... పిల్లి కూతని డౌన్లోడు చేసి..ఫోన్లో ఎక్కించి రిపిటెడ్ గా ఆ సౌండుని ప్లే చేసా...
మూడో కూతకే...బల్లిలో చలనం వచ్చింది. అటూ ఇటూ చూసింది..సౌండ్ కొంచం పెంచా.. బల్లి తలతిప్పి చూస్తోంది ఎక్కడుందా పిల్లీ అన్నట్టుగా.. మరికొంచం సౌండిచ్చా.. దాదాపు మూడు గంటలు చలనం లేనట్టు ఆస్కార్ రేంజ్ లో నటించిన బల్లిముండ ఇహ తోక వెనక్కి తిప్పి తలుపు సందులోగుండా.. మెల్లిగా బయటికి పరారయ్యింది... !!
చెట్టునుంచి ఆపిల్ పండు కిందపడ్డప్పుడు న్యూటన్ కి కలిగిన ఆనందమే నాకు ఒక్క క్షణం కలిగింది.

ప్రయోగం సగం సఫలం.. మరికొన్ని ప్రయోగాల తరవాత పేటెంట్ హక్కు కోసం ప్రయత్నాలు మొదలెట్టాలి. !! :) :)

.మనసుల దాకా వెళ్తామా ??

2014-02-21T23:09:00.002+05:30

కాలం కరుగుతోంది.. జీవితం గడుస్తూ ఉంది..
నేను బిజీ అనుకొని నువ్వూ..నీవు బిజీ అనుకొని నేనూ..
నువ్వేమనుకుంటావో అని నేనూ..నేనేమనుకుంటానో అని నీవూ..
ఈ కంపూటర్ తెర వెనక మొహాలు చాటేసుకుకొని..
నేనేంటో నీకు తెలియక..నీవేంటో నాకు తెలియక
మాటలే కలవలేదు..మనసుల దాకా వెళ్తామా ??

నీ గుడ్మార్నింగ్ పోస్టులకీ కామేంట్లు పెడుతూ నేను..
నా కవితని కడగంట కూడా చూడకుండా నీవు..
నీవు పెట్టిన హీరోఇన్ల పోటోలకి లైకులు కొడ్తూ నేను..
అచ్చంగా నా పోటో పెట్టినా పట్టించుకోని నీవూ..
ముఖ పుస్తకం కాదిది ముసుగు పుస్తకమై ..
ఉన్నావో లేవో తెలియని నీకై..నేనున్నానని నేనూ నా ప్రొఫైల్ !!

కాలం కరుగుతోంది.. జీవితం గడుస్తూ ఉంది..

Soul Kitchen – ‘ఆత్మ’గల వంటిల్లు

2013-11-29T11:43:00.000+05:30

సోల్ కిచెన్ – ‘ఆత్మ’గల వంటిల్లు

ఆత్మ అనగానే ఏదో దెయ్యాల సినిమా అనుకుంటున్నారా అబ్బే కాదండీ.. ఇదో సరదా కథ. బలమైన కథనం…సన్నని భావోద్వేగాలు ఉన్న హాస్య భరిత సినిమా ఇది.

” నేను నాకు సినిమా తీయాలని అనిపించినపుడు మాత్రమే సినిమాలు తీస్తాను.అదీ ఆప్పటి మూడ్ ని బట్టి . ఇప్పటివరకూ ‘ఎడ్జ్ ఆఫ్ హెవెన్‘ లాంటి సీరియస్ సినిమాలుతీసాను. సీరియస్నెస్ కి బానిస అయ్యా. ఎడ్జ్ ఆఫ్ హెవెన్ తీస్తుండగా స్నేహితుడయిన సినిమా నిర్మాత చనిపోయాడు. అరునెలలు బాధ పడ్డాను. కానీ జీవితం అన్నింటికీ అతీతమైనది. చావు జీవితంలో భాగం. నవ్వటం జీవితానికి అవసరం అనిపించింది. అందుకే “సోల్ కిచెన్ తీసా ” అంటాడు దర్శకుడు. ఓ సారి మిత్రుడి రెస్టారెంట్ కి వెళ్లాను. భలే సందడిగా ఉండే అక్కడ కస్టమర్లనీ ..వెయిటర్లనీ..ఓనర్నీ..ఇలా రక రకాల వ్యక్తులని గమనించాక ఒకరితో ఒకరు తమకే తెలియకుండా ప్రేమగా ఉన్నారనిపించింది. వాళ్ళంతా ఆ రెస్టారెంట్ ని ప్రేమిస్తున్నారనిపించింది. అప్పుడే సోల్ కిచెన్ కి బీజం పడింది అంటాడు.
కథ ఎలాంటిదయయినా దానిమూలాలు .స్పూర్తీ నిజ జీవితంలోనుంచే రావాలి అప్పుడే అది నేలవిడిచి సాము చేయదు. సో నిజ జీవిత స్పూర్తి తో రాసిన కథ కనక బానే ఉండుంటుంది కదూ..
ఇహ కథలోకి తొంగిచూస్తే ….

http://navatarangam.com/2013/11/soul-kitchen

Beyond the Hills – విశ్వాసాలకి ఆవలివైపు

2013-11-29T11:36:00.000+05:30

” ఇది వాస్తవ విషయాల ఆధరంగా అల్లుకున్న కథ. ఆ వాస్తవవిషయాలని సినిమా కథగా చేయటానికి నాకు కొంతకాలం పట్టింది. నేను మరో ఎక్సోరిసం -2 చేయాలనుకోలేదు. అలాగే ఎవ్వరినీ వేలెత్తి చూపాలనీ అనుకోలేదు.నేను ప్రజల గురించి వాళ్లు పడే అవస్థల గురించి, తమకే తెలియకుండా మనుషుల్లోకి వచ్చే హింసాత్మకత గురించి చెప్పదలచుకున్నాను. అందరికీ తట్టే కథలు చేయకపోవటం నాకు ముఖ్య విషయం. మంచి వెనక చెడు ఏవిధాంగా దాగి ఉంటుందీ అనేది ఈ కథాఇతివృత్తం. ఇది జరిగింది ఒక ప్రదేశంలోనే అయినా ప్రపంచంలోని పలు చోట్ల..రకరకాలుగా జరిగే విషయమే ఇది .”
ఈ దర్శకుడు ప్రస్తుత సమాజంలోని నైతిక అసంబద్ధత మీద కథని ఎంచుకుని సినిమాగా మలిచిన తీరు అసాధారణం. అందుకే ఆయనకి ఉత్తమ స్క్రీన్ప్లే రచయితగా అవార్డు దక్కింది.

పూర్తివ్యాసం..

http://navatarangam.com/2013/11/beyond-the-hills

చాయ్ సమోసా కబుర్లు..!!

2013-07-20T10:57:00.002+05:30

మా రమణ గాడు కలవక కలవక కలిసాడు.
చాయ్ చప్పరిస్తూ మాకంటే ఓ ఉద్యోగామంటూ లేదు .. నీకేమయ్యిన్దిరా చక్కగా సాఫ్ట్వేర్ జాబ్.. వెలగబెడుతున్నావ్ ..ముప్పై వేలకి పైగా సంపాదిస్తున్నావ్ నీకు పిల్ల దొరకటం లేదా.. లేక లవ్ లో పడి ఇంట్లో ఎలా చెప్పాలా అని ఆలోచిస్తున్నవా?? అని అడిగేశా

వాడు సమోసాని ఎలక కోరికినట్టు తన ముందు పళ్ళతో రెండుసార్లు కొరికి నమిలి మింగి గుక్కెడు నీళ్ళు తాగి చాయ్ ఓసారి చప్పరించి గాని సమాధానానికి ఉపక్రమించలేదు. ఇంత చేసాడంటే.. సమాధానం దీర్ఘమైయిందే అని అర్థమయ్యింది.
'ఉద్యోగం వచ్చి అరునేల్లె అయ్యింది కదరా.. అప్పటిదాకా నేను బికారినే కనక నా మొహం ఏ అమ్మాయి చూడలేదు. ఇప్పుడిప్పుడే చూస్తున్నారు. ఇహ మా ఆఫీసులో ఉన్న అమ్మాయిలని లవ్ చేసేంత దైర్యం నాకు లేదు. ఒకే ఆఫీసులో ఇలాంటి యవ్వారాలు నడిపితే రేపొద్దున ఏదన్న అయితే .. ఒకరిమోహాలు ఒకరు చూస్తూ ఉండలేము. అందుకే నో లవ్వు.'
అయినా నీకు సింపుల్ గర్ల్ కావలి అన్నావ్ కదరా.. దొరకటం కష్టం అవుతోందా ??
' మా మామగారు ఓ రెండు సంబంధాలు తెస్తే చూసాను,. మొన్నే.'
మరేమయింది..??
చెప్పనీ ...
మొదటి అమ్మాయి వసంత లక్ష్మి.. డిగ్రీ వరకే చదివింది.. ఆపై ఓ సంవత్సరం స్కూల్లో పనిచేసిన అనుభవం ఉంది.
మరింకేం నీవు కోరుకున్నట్టే.. సింపుల్ గర్ల్ అనుకుంటా...
అగు చెప్పనీ..
మా ఇద్దరినీ ఏకాంతంగా మాట్లాడుకోమని వదిలేసారు..
నేను పలకరింపు నవ్వు నవ్వాను.
ఆ పిల్లా నవ్వింది నేను కాఫీని జుర్రుతూ ఆ పిల్లని చూసాను...
హై హీల్ చెప్పులు.. గోర్లకి పాలిష్.. బంగారు పట్టీలు..లంగా హానీ లా ఉండే చీర..వడ్డానం,. చేతులకి అటు ఇటు బంగారు గాజుల మధ్యలో రెండు డజనుల గాజులు.. మెహందీ పెట్టిన చేతులు.. రాక్షసి లాగా పెంచిన గోళ్ళకి రక్తం రంగు పాలిష్.. మెళ్ళో నాలుగు రకాల నేక్లసులు.. చెవులకి పొడవాటి జూకాలు.. పాపిట బిల్లా .. పొడవాటి జడ, జడకి గంటలు...
మరింకేం రా ..లక్షణంగా లక్ష్మీ దేవి వస్తోంటే కాదన్నవా ??
నీ బొంద అవన్నీ నిజం బంగారం కాదు... నకిలీవి.
లేకపోతే నివు సంపాదించే బోడి ముప్పై వేలకి నిలివేల్లా నిజం బంగారం తొడిగి పెళ్లి చేస్తారా ??? సర్లే చెప్పు..
ఎలా వచ్చారు అంది.
కారులో అని చెప్పా
మీదేనా ?? అని అడిగింది..
కాదు కాబ్..
ఇల్లుందా ?
లేదు..
పోనీ లవ్వు చేసావా ఎవరినైనా ??
లేదు ఎవ్వరిని చేయలేదు.
పోనీ ట్రై చేసావా ??
య కొంతమందికి ట్రై చేశా..
మరి ఏమయ్యింది..
ఎవరు నన్ను లవ్వు చేయలేదు..
నిజంగానా ??
నిజంగానే లవ్వు గివ్వు ఏమీ లేదు..
ఓ కారు లేదు.. ఓ ఇల్లు లేదు.. నీ మొహాన్ని ఒకరు లవ్వు చేసిన పాపనా పోలేదు, ఎందుకు పనికి రాని నీ వెధవ పేస్ నాకు వద్దు. అని విసవిస వెళ్ళిపోయింది అక్కడినుంచి that సింపుల్ గర్ల్...
చాయ్ కూడా చివరి గుక్క తాగి కుప్పు పక్కన పెడుతూ ముగించాడు మావాడు.. ఈ పేస్ తో .
మరి రెండో సంబంధం...అత్రుతగా అడిగా
దానికి చాయ్ సరిపోదు బారు కి వెళ్దాం పదా అన్నాడు, ఇద్దరం లేచాం.

2013-04-09T00:08:00.001+05:30

చెమట కార్చటం నుంచి తప్పించుకోవాలి ఎలాగయినా....
ఇన్సులిన్ సూది గుచ్చుకుంటా ..కాని ఇటున్న సూది అటు పెట్టలేను..
వడి వడిగా నాలుగు అడుగులు వేయలేను, ______కిందికి బండి కావలి..
ఓ గంట మౌనంగా ఆలోచించలేను... చెవుల్లో బీట్ వినిపించాల్సిందే..
ఉషోదయం..సుబ్బలక్ష్మి గారి సుప్రభాతం... ఎవరిక్కావాలి??...టీవీ లో స్కాములు ..స్కాన్డల్స్ పెట్టు...
పదినిముషాలు నడకా ...అక్కర్లేదు న్యూస్ పేపర్ లో చావు వార్తలు చదువుతా!
ఆఫీసుకు వెళ్ళాలి బాక్స్ సర్ది చచ్చావా...
వారమంతా తెలియని అంకెల్లో అక్షరాలతో కంప్యూటర్ లో కుస్తీ పట్టి,
వారాంతం .. విద్యుద్దీపాల వెలుగులో ..వెలుగులేని మొహాల మధ్య..
ఓ పుచ్చు తెలుగు సినిమా, ఆపై ఇంపోర్టెడ్ విస్కీ గొంతు దించి.. రంగేసిన పెదాల రుచిని.. రెండు నిముషాల సుఖాన్ని పిండుకొని..
ఇంశ్టాల్మేంట్ అపార్ట్మెంట్లో అడ్డంగా పడి పోయి...

సుఖించానా లేదా...????

2013-04-08T17:25:00.000+05:30

చల్లగాలి తగిలితే ఎందుకు మనసుకు హాయిగా ఉంటుంది ??
వానపడితే ఎందుకు తడవాలనిపిస్తుంది ??
కోయిల పాట ఎందుకు వినాలనిపిస్తది ??
పువ్వుల పరిమళం ఎందుకు చూడాలనిపిస్తూంది ??
అహార పదార్థాలని చూస్తే నోరెందుకు ఊరుతుంది ??అవి 'ఎందుకో' నీకు తెలిస్తే.. నిన్ను 'ఎందుకు' ప్రేమించాలనిపిస్తూందొ నెను చెపుతా !!

మనకి మనమే ..

2013-01-26T14:40:00.003+05:30

హ్యారీ పాటర్ - 3
హ్యారీ పాటర్ సిరస్ ని కాపాడే ప్రయత్నం లొ ఉన్నాడు. సిరస్ కొలను ఒడ్డున చఛిపొతున్నాడు. డెమన్స్ చుట్టూ చేరాయి. ఇద్దరి జీవ శక్థులని పీల్చేస్తున్నాయి. హ్యారీ శక్తి హీనుడు అవుతున్నాడు.డెమన్స్ మాత్రం తమని వదలటం లేదు. సిరన్ నిస్సహాయంగా పడున్నాడు. నిస్సహాయతే వాటికి కావలసింది. ఇంకో కొన్ని క్షణాల్లో సిరస్ ప్రాణాలు పోతాయనగా హ్యారీ దీనంగా చావుబతుకుల మధ్య కొలను అవతలి వైపు చూసాడు అటు వైపు ఒక తెల్లని కాంతిపుంజం కనపడింది. ఆ కాంతి పుంజం అంతకంతకూ ఎక్కువయ్యి మొత్తం డెమన్స్ ని పారిపొయెలా చెసింది. లేచి చూస్తే హాస్పిటల్ బెడ్ మీద ఉన్నాడు. అసలేమి జరిగిందో గుర్తులేదు.పక్కన హర్మోయిని ఉంది నవ్వుతూ.
ప్రొఫెసర్ డంబెల్డొర్ వచ్చాడు. గడిచిన కాలంలో జరిగిన తప్పు సవరించటానికి ఇద్దరినీ గత కాలంలోకి పంపాడు. ఇద్దరూ అన్నింటినీ సవరిస్తూ .. సిరస్, హ్యారీ పాటర్ డెమన్స్ బారిన పడె దశకి వచ్చారు. అటువైపు సిరస్ కొలను ఒడ్డున చఛిపొతున్నాడు. హ్యారీ పాటర్ నిస్సహాయంగా చాస్తూఉన్నాడు. డెమన్స్ చుట్టూ చేరాయి. సిరస్..హ్యారీ జీవ శక్థులని పీల్చేస్తున్నాయి. హ్యరీ అంతకంతకూ శక్తి హీనుడు అవుతున్నాడు. ఇటువైపు ఇక్కడ హ్యారీ పాటర్ తనకి కాపాడే వాళ్ళకోసం చూస్తున్నాడు. చనిపోతున్న తనని కాపాడింది తన తల్లిదండ్రులే అని అతడు అనుకుంటున్నాడు. కనక వాళ్ళొచ్చి హ్యారీని ( తనని ) రక్షిస్తారని చూస్తున్నాడు. సిరస్ ప్రాణాలు మెల్లిగా గాల్లొకలిసి పోతున్నాయి. తన తల్లిదండ్రుల జాడలేదు. తాను కూడా కొలను ఒడ్డున ప్రాణాలు పోగొట్టు కునే దశలో ఉన్నాడు. సిరస్ ప్రాణాలు ఇంకో క్షణం అనంతవాయువుల్లో కలిసిపోతాయనగా ఇహ లాభంలేదని, ఇటు వైపున ఉన్న హ్యారీ తానే తన మంత్రదండాన్ని ప్రయోగించి డెమన్స్ ని పారద్రోలి హ్యారీ ని కాపాడాడు. అంటే సిరస్ ని.. తనని తాను కాపాడుకున్నాడు.
అంతా అయోమయంగా ఉండవచ్చు. సినిమా చూసిన వాళ్ళకి బాగా అర్థం అవుతుంది. ఇంతకీ దీనిలో ఉన్న గొప్పదనమ్ ఎంటి అంటే , రచయిత్రి రోజు వారీ విషయాలకి చక్కని రూపకల్పన చేసి గొప్ప కథని తయారు చెసింది. అది కాల్పనికత అద్బుతంగా తెరెకెక్కించ బడింది. విశయానికి వస్తె....
ఆ డెమన్స్ ఎవరో కాదు... మన అత్మన్యూనత, అలసత్వం, నిరాశ, భయం, దిగులు, ఆందోళన, పిరికితనం. సమస్యలు మొదలైనవి. ఎప్పుడయితే మనం ఆత్మవిస్వాసాన్ని, దైర్యాన్ని,ఆశని కొల్పొతామో అవన్నీ మన మీద పడి దాడి చేసి మన శక్తులని పీల్చి మనని ఓటమి అంచున నిలబెట్టి చావుదశకి తీసుకెళతాయి. మనని ఎవరూ కాపాడలేరు. చివరికి మనని కనిపెంచిన తల్లిదండ్రులు కూడా. ఏ దేవుడూ రాడు మనకోసం.
మరి అటువంటి పరిస్థితుల్లో ఎవరయా మనకి దిక్కు ?? ఎవరయా మనని కాపేడేది?? ఎవరయా మనకి సహాయం చేసెది..చేయగలిగేది అంటే .. 'మనకి మనమే .. మన ఆత్మవిశ్వాసమే'
ఆత్మవిశ్వాసపు మంత్రదండాన్ని ప్రయోగిస్తే .. ఆ డెమన్స్ అన్నీ తలో దిక్కూ పారిపోతాయి. ఎంతకాలం అయితే మనలో మనమీద మనకి విశ్వాసం ఉంటుందో అంతకాలం అవేవీ మన దరికి రావు.
అదీ ఈ ఎపిసోడ్ లో మనం గ్రహించవలసింది.

ఇంత దరిద్రం... థు.

2013-01-26T14:37:00.003+05:30

ఈ చట్ట సభల్లో ఒకరి పార్టిని..ఒకరిని ఒకరు తిట్టుకుంటూ ..వాకౌట్లు గుర్రు పెట్టటాలు..తప్ప మారుతున్న కాల పరిస్థితులు విసిరే సవాల్లని ఎదుర్కొని troubleshooting చేస్తూ చట్టాలు సవరించి ఉండి ఉంటె
ఈ రోజు దేశం ఇంత దరిద్రంగా ఉండకపోయేది. పెరుగుతున్న జనాభాని నియంత్రించే వాడు లేడు... రగులుకుంటున్న మత విద్వేషాన్ని చల్లార్చే దిక్కు లేదు... పెడదారి పడుతున్న యువతకి దారి చూపే నాథుడే లేడు .
ఆ కాపిటలిస్ట్ లతో కలిసి దేశాన్ని దోచుకోవటం, దాచుకోవటం, ( దోచుకు తినటం కుడా కాదు.ఎందుకంటే తినే యోగ్యతా...యోగం కుడా ఉండదు )
ఉంది కదా అని ప్రజల మీద ధురాధికారం చూపించటం తప్ప..చూపించే అధికారం వలన తన ప్రజలు సుఖపడుతున్నారా, చల్లగా ఉన్నారా అనేకంపాషన్ లేని దొంగ ____ లా కనపడుతుంటారు మనం ఎన్నుకున్న చట్ట సభల్లో కూర్చున్న పెద్దలు.
ఒక్కో సమస్య మీద ఒక్కో సభ్యుడు తన నివేదిక సమర్పించి.. సూచనలు పరిష్కారాలు చేసినపుడు దాన్ని సరిచూసి..మెజారిటి సభ్యులు ఎంచుకున్న దాన్ని చట్టంగా పెట్టటానికి ... నా బొంద, ఇంత రాద్దాంతం.. ఇంత నాటకాలు ..ఇంత సమయం.. ఇంత ఆర్భాటం..ఇంత లేకి తనం..ఇంత దరిద్రం... థు.

....అదీ ప్రేమ.

2013-01-26T14:33:00.000+05:30

ప్రయాణంలొ మొదట వేసెది అడుగు.. చివరన చేరేది గమ్యం.
ఆటలో మొదట్లొ వచ్చేది పాయింట్.. చివరన వచ్చెది గెలుపు.
యవ్వనం మొదట్లొనే అనిపింఛేది ఆకర్షణ ... చివరన కలిగే అనుభూతి ప్రేమ.
ఒకరినొకరు అర్థం చేసుకొని ..అన్ని ఒడుదుడుకులని సహించి.. జీవిత ప్రయాణం సాగించి ..సుఖ దఖాలని అనుభవించి ఇంకా ఒకరిమీద ఒకరికి అదే ఆకర్షణ గౌరవం కలిగిఉంటే, మిగిలి ఉంటే... అదీ ప్రేమ.

ఊరికే మొదట్లోనే ప్రేమించాను అనకండి.. ప్రేమ మొదలు పెట్టాను అనండి... చివరిదాకా నిలబడండి.. అప్పుడు చెప్పండి ప్రేమించాను అని.

సగటు భారతీయ స్త్రీ..

2013-01-26T14:28:00.003+05:30

మాట్లాడితే సగటు భారతీయ స్త్రీ అంటుంటారు. నాకు మాత్రం సమాజంలో చాలా మంది స్త్రీలు కనపడుతున్నారు.
బికినీలలో... అంగాంగ ప్రదర్శనలో...అష్టాదశ చుంబనాలలో జీవించేసే మన నటీమణులా ???
నడుముని నాగుపాములా తిప్పే ఐటెం గాళ్స్ ఆ ??
పబ్బుల్లో మినీ లంగాల్లో తాగి ఊగె పిల్లా ??
వంటిల్లు తప్ప లోకమే తెలియని ఓ ముసలి తల్లా ??
బ్రతుకు పోరులో పొద్దునే వెళ్లి , ఏ సాయంత్రానికో క్రష్ నుండి చంటాడిని చంకనేసుకొచ్చి వంట చేసి పెట్టె సగటు మధ్యతరగతి స్త్రీ యా ??
టీవీ సీరియళ్ళ ముందు కంటనీరు పెట్టె ఇల్లాలా ??
కూలీ డబ్బులు ఇచ్చేసి తాగి తంతే మూల కూర్చొని ఏడిచే పెళ్ళామా ??
మొగుడికి చద్ది తీసుకొచ్చి పొలంలో నాట్లు వేసే పల్లె పడుచా ??
మాసిన జుట్టుతో, ముక్కుకారే పిల్లాడిని ఎత్తుకొని x రోడ్డులో అడుక్కునే బిచ్చగత్తెనా ??
జీన్సుల్లో కాలేజీకేల్లి బాయ్ఫ్రెండ్ తో కబుర్లాడుతూ, చదువు 'కొనే ' అమ్మాయా..
పుట్టిన పాపానికి చెత్తకుప్పలో విసిరి వేయబడ్డ చంటిదా !
ఇందులో ఎవరు భారతీయ స్త్రీ ??? ....I am so confused .

అదీ సమస్య.

2013-01-26T14:18:00.002+05:30

అక్కడ వివిధ దేశాలు సుఖమయ జీవితానికి అవసరమయిన ఒక్కో అవిష్కరణనీ చేసుకుంటూ వేళుతోంటే ఆ సాంకేతికత నీ, వస్తువులనీ దిగుమతి చేసుకొని అనుభవిస్తూ ఆనందిస్తూ, పనేమీ లేక సుఖంగా పిల్లనని కంటూ.. మళ్ళీ విదేశీ సంకృతి అని వాటిని దెప్పి పొడవటం. అవేం మన దేశం మీద పడి సంస్కృతిని మార్చయా ?? లేక మనమే వాటిని అనుసరిస్తున్నామా ??అనుసరిస్తే ఎందువల్ల అనే ఆలోచన కూడా లేదు.

ఈ జీవితాన్ని అవగాహన చేసుకొని, విపత్తులని ధైర్యంగా ఎదురుకొని.. సుఖమయ జీవితానికి కావలసిన సాంకేతికత, వస్తు సామగ్రి తయ్యారు చేసుకొనే తెలివి లేక.. పరలోకంలో ఏదో ఏడిచిందనీ .. ఇక్కడికంటే అక్కడేదో బావుంటుందనీ నమ్మబలికి, బద్దకస్తులై, కనిపించని దేవుడిని ఆరాధిస్తూ..ఏ మాత్రం దేవుడు..స్వర్గం..మోక్షం అనే మాటలు మాట్లాడినా వాడికి దైవత్వం ఆపాదిస్తూ.. కనిపించిన నదుల్లో మునుగుతూ, తేలుతూ ఏదో పుణ్యలోకం ప్రాప్తిస్తుందనే భ్రాంతిలో బతుకుతూ మళ్ళీ దానికో పేరు.
పొనీ గొప్పదనుకుంటున్న సంకృతిని కాపాడుకునే శక్తీ ..ప్రణాలికలు కుడా లేవు. కాని ఉరికే ఏడుపోకటి.

ఆధ్యాత్మికత వ్యక్తిమనోగతం. ( దేవుడు అన్నారుగా, దానికి సంభందించింది.) సంస్కృతి జీవన విధానానికి (సామాజికం) సంభందించింది, అది బహిర్ముఖంగా మారుతుంది. ధర్మం, వ్యక్తి సామాజిక ప్రవర్థన కి సమాజానికి మధ్య నిలిచె అంతస్సూత్రం. మూడింటినీ కలపొద్దు.
ఆధ్యాత్మికతకీ.. సంస్కృతికీ .. పురాణాలకీ ..పిట్టకథలకీ.. మానసిక ఆనందం ఇచ్చే పనులకీ తేడా తెలియదు. అన్నింటినీ కలిపి ముడులు వెసుకుంటారు.. దాన్ని విప్పి దెనికదిగా చూడరు. చూచినా అర్థం కాదు. అదీ సమస్య.

జీవిత మకరందాలు

2012-12-11T23:50:00.002+05:30

ఓ పెంకుటిల్లు ,ముందు వాకిలి.. ఓ నాలుగు పూల మొక్కలు,

ఓ అయిదారు అల్లరి పిల్లలని వెనకేసుకొని ఓ కోడి పెట్ట ..

గడ్డి నేమరేస్స్తున్న గేదె, పక్కనే మూతి నాక్కుంటూ ఓ దూడ ,ఎక్కడినుంచో వచ్చి పంచన చేరి ఒళ్ళు విరుచుకుంటూకుక్క ..

.. హాల్లో, తాతగారి వాలు కుర్చీ, ఓ మూలకి నక్కిన నులక మంచం, తలుపులు లేని గూట్లో కిరసనాయిలు దీపపు బుడ్డీ ..

వంటింట్లో బంగారపు మెరుపుతో రెండు ఇత్తడి బిందెలు, దూలానికి వేలాడుతున్న ఉట్టి..

పెరట్లో జామ చెట్టు, గోడవారగా టమాటా, మిరప మొక్కలు, బీర కాయ తీగో, గుమ్మడి పాదో అలా పిట్టగోడ మీదకి పాకి, వేసిన చిన్ని పిందెలు..

ఇవేకదా పల్లె ఇంటి అందాలు.. జీవిత మకరందాలు.

నేను పరుగులు తీస్తుంటాను..

2012-12-09T09:42:00.003+05:30

అపార్ట్మెంట్ గూళ్ళ సాక్షిగా.. ..

క్రిక్కిరిసిన రోడ్ల సాక్షిగా

విద్యుద్దీపాల ధగధగల సాక్షిగా

నేను పరుగులు తీస్తాను..

బస్సుల్లో ...బైకుల్లో..కార్లల్లో..

నేను పరుగులు తీస్తుంటాను..

అటు నించి ఇటు.. ఇటు నించి అటు..

అలసినా ...సోలసినా..ఆయాసం వచ్చినా

పరుగులు పెడుతూనే ఉంటాను..
ఇది బతుకు పరుగు..చచ్చేదాకా ఆగేది కాదు.

రూపాయి కోసం నన్ను నేను తాకట్టు పెట్టుకుంటాను..
మంచి..మమతని అనుక్షణం చంపి పాతర వేస్తుంటాను..
జీవితపు అందం ఆనందం అంతా పచ్చనోటు రెప రేపల్లోనే కనబడుతుంది నాకు...
అర్థరాత్రి చాతి ఎడమపక్క కలుక్కుమంటే.. డబ్బులేకుండా ఈ పట్నంలో అడిగేదిక్కేది
..పిల్లల్ని కనాలన్నా వాళ్ళ చదువు కొనాలన్నా .....వాళ్ళ పెళ్ళిళ్ళు కుదరాలన్నా ఆ నోట్లే అవసరం..
బ్యాంకు బాలెన్సు ఇచ్చే ప్రశాంతత నాకేదీ ఇవ్వదు.
ఆత్మీయత , అనురాగం అన్నీ రూపాయి తరవాతే...
రూపాయికి ఉన్న విలువ మనిషికెక్కడిది ??
అందుకే..
కాలే కడుపు సాక్షిగా..
పెరిగే అవసరాల సాక్షిగా .
నేను పరుగులు తీస్తుంటాను..

బ్యాంకు బాలన్సు...

2012-11-08T13:38:00.001+05:30

ఎరా పెళ్లి ఎప్పుడు ? చేసుకోవా ?? అని అడిగా ఒక మిత్రుడిని..

అందము ప్రాయము ఐశ్వర్యము గల సుందరి దొరకుటె అరుదు కదా.
ఆమె మనని వరించుట కలయే కదా.. ఆది నిజమవదు కదా.. అని సెలవిచ్చాడు.
అరేయ్ మొహం చూసుకున్నావా అద్దంలో అని అడిగా..
" ఉంగరాల జుట్టు వాణ్ణి ..ఒడ్డు పొడుగు ఉన్నవాణ్ణి..
చదువు సంధ్య గల్గినోన్ని చౌక బేరమా ?? అన్నాడు.
అన్ని బానే ఉన్నాయ్ కాని ఒక్క సారి బ్యాంకు బాలన్సు చెప్పరా అన్నాను.
ప్రేమ ఆస్థి అంతస్తులు చూడదు అన్నాడు.
కాని ప్రేమించే పిల్ల చూస్తుంది, ప్రేమించినప్పుడు చూడకున్నా పెళ్లి చేసుకుందాం అనగానే చూస్తుంది.
ఒక విధమైన భ్రమలో పెళ్లి జరిగినా పెళ్లి అయ్యాక చూస్తుంది.
ఒంటరి జీవితానికి ఏది ఉన్నా లేకపోయినా ఫరవాలేదేమో కాని జంట అయితే మాత్రం జీవితంలో ఎప్పటికయినా బ్యాంకు బాలన్సు/ డబ్బు ముఖ్యం రా బాబు అన్నాను.
మా వాడు బిక్క మొహం వేసి.. అంతే అంటావా అన్నాడు.
ముమ్మాటికి అంతే..... అని ఫినిష్ చేశాను నాలుగో పెగ్గు .

ప్రతిక్షణం మరణిస్తాను..

2012-08-07T09:55:00.000+05:30

పచ్చగా కళ కళ లాడుతూ ఉగే కొమ్మలని చూసి మురిసి పోతాను..
మొగ్గలోంచి తొంగి చూసే పువ్వుని చూసి ఆశ్చర్య పడతాను ..
నిటారుగా నిలచిన వృక్షాల గంభీర్యానికి బిత్తర పోతాను..
కిల కిలా ఎగిరే పక్షుల స్వేచ్చకి ఈర్ష పడతాను.
ఆకాశంలో తేలే మబ్బులని చూసి అబ్బుర పడతాను..
నింగి నించి రాలే చినుకులని చూసి చిందులేస్తాను..
గడ్డి పరకలపై వాలిన మంచుబిందువులని చూసి ముచ్చట పడతాను..
కార్తీకపు చలిలో నెచ్చెలి వెచ్చదనం వెతుక్కుంటాను..
రాలుతున్న ఆకుల్లో విశ్వ రహస్యాన్ని ఆలోచిస్తాను..
వేసవి ఉదయాల్లో కోయిల రాగాలు ఆలకిస్తాను..
తొలికరి జల్లులో పుడమినై పులకరిస్తాను..
ప్రతి రోజు ప్రకృతికాంత వొడిలో పరవశిస్తాను.
విశ్వ సౌందర్యదీపపు వెలుగులో శలభాన్నై ప్రతిక్షణం మరణిస్తాను.

the joy of life.

2012-07-26T16:31:00.000+05:30

చిన్నప్పుడు క్లాసు లోకి ఎవరైనా కొత్తవాళ్ళు వచ్చినా, ఇంటి పక్కన కొత్తవాళ్ళు చేరినా. వాళ్ళతో స్నేహం చేయాలనే ఉబలాటం ఉండేది. ఇద్దరికీ కుదిరిందంటే ఆటలు పాటలు కలిసి ఆడటం , జేబులో చిల్లర ఉంటే ఏదన్న కొనుక్కొని సగం సగం తినటం ... పరీక్షల్లో చూపించుకోవటం..నోట్స్ రాయటం లో సహాయం చేసుకోవటం లాంటివి ఉండేవి. కాని ఇప్పుడు ...పెద్దయ్యాక, రోజు వారి ఎంతమంది పరిచయం అయినా...మనకి పనికోచ్చేవాళ్ళనే స్నేహితులుగా చేసుకుందాం అని ఆలోచిస్తాం తప్ప ..నచ్చిన వ్యక్తులతో గడపటం బహు తక్కువ.

" friendship is the joy of life. "

వర్షాన్ని చూస్తూ..

2012-07-24T15:27:00.000+05:30

భోరున వర్షం కురుస్తూనే ఉంది. స్ట్రీట్ lite నిలువెల్లా తడిసిపోయింది. అయినా ఇది నాకో లెక్కా అని కాంతిని వెదజల్లుతూనే ఉంది.కాంతి సరిపడినంత లేకపోవటంతో చెట్ల ఆకులు నలుపులో కనబడుతున్నాయి. చినుకు పడ్డ ప్రతిసారి అవి బరువుకి వంగి లేస్తున్నాయి. కేబుల్ మీద చినుకులు తీగ వాటుగా జారి తాపీ మని కిందకు దూకుతూ జారుడు బండ ఆట మొదలు పెట్టాయి. చినుకులన్ని ఒక్కటయ్యి కాలువగా మారి రోడ్డుమీద ఎక్కడికో ప్రయాణం కట్టాయి. అందరూ వెచ్చగా ఆదమరచి నిద్రపోతూ ఉన్నారు. నేను మాత్రం కిటికీ పక్కన నిల్చొని ... వర్షాన్ని చూస్తూ..
నీ కరుణామృత జలధార నాపై ఎప్పుడు కురుస్తుందా అని ఆలోచిస్తూ...

ఓ మై డాలింగ్..

2012-07-19T18:47:00.000+05:30

ఓ మై డాలింగ్..
నిన్ను ముద్దు పెట్టుకున్న ప్రతి సారి..
ఉపిరిగా మారి ...గుండెల్లో నిండి.
నర నరాన పాకుతూ .. మత్తెకిస్తావ్..
గంట గంట కీ నివు లేనిదే నాకేం తోచదు..
పని అయిన ..కాకున్నా..
బాధొచ్చినా.. సంతోషం చిందినా..
రోజు వారీ జీవితంలో గెలిచినా ఓడినా..
పొద్దు పొడిచినా...పొద్దు వాలినా..
ఎండనకా..వాననకా..
చలి లో.. గిలిలో...నీవే నాకు తోడు.
ఎప్పుడు ఎలా ఎందుకు పరిచయం అయ్యావో తెలిదు.
తెల్లని దుస్తుల్లో దేవతలా వచ్చావు..
నన్ను నా జీవితాన్ని పాలిస్తున్నావు..
బతుకంతా తోడుంటావు ..చితి దాకా నడిపిస్తావు.
నీవు నా చేతుల్లో వెలుగుతావు.. నా జీవితం నీ చేతల్లో ఆరుతుంది.అయినా I love u darling. :)

ఆహా ఎంత అభివృద్ధి సాధించాం..!!

2012-07-19T18:28:00.001+05:30

ఇంటిముందుకి వచ్చిన కూరగాయల బండి వాడితో గీచి గీచి బెరమాడుతాం..
రిలయన్స్ ఫ్రెష్ లాంటి వాటిల్లో మారు మాట్లాడకుండా వాట్ (వాత) పెట్టించుకొని వస్తాం..
ఆప్యాయంగా వచ్చే చిరునవ్వుని పలకరింపుని పట్టించుకోం.. ప్లాష్టిక్ నవ్వుకి..తప్పని మర్యాద పలకరింపుకి మురిసిపోతాం..
ఓ అయిదు రూపాయలు తక్కువ పడితే మనని నమ్మని వాడి దగ్గరే కొంటాం..కాని, దాందేముంది రేపు ఇద్దురు కానిలే అనేవాడిని సహించం.
రౌండ్ ఫిగుర్ పేరుతో చిల్లర నొక్కేది వాడు.. ప్రేమతో రెండు కాయలు ఎక్కువ వేసేది వీడు.
శ్రమని దోచుకొని పోయేది వాడు.. శ్రమజీవన సౌందర్యాన్ని చెప్పేది వీడు..
మనం కళ్ళకి మాత్రం artificial జిలుగులే తప్ప మనసు వెలుగులు కనిపించవు.
ఆహా ఎంత అభివృద్ధి సాధించాం..!!

వెతుక్కుంటున్నాను.

2012-05-06T19:02:00.002+05:30

ప్రపంచం అంతా ఎక్కడికో పరిగెడుతోంది పరిగెడుతోంది ... రాత్రిని పగటిగా వెలిగించే విద్యుద్దీపాలు.. ఆకాశ హర్మాలు.. రాజహంసలాంటి కార్లు..
దేశాలకి చేరవేసే విమానాలు..కొత్త ప్రపంచాన్ని సృష్టించే సాఫ్ట్వేర్ లు...

నేను మాత్రం.. మబ్బుల్లోని చల్లదనం ..ఆకాశపు రంగులు ..పర్వతాల గంభీరత... పక్షుల రెక్కల్లోని మృదుత్వం.. విత్తులో దాగిన చెట్టు...ఆకుల పచ్చదనం..మన్నులోని కమ్మదనం.. నా గుండెల్లో ప్రేమ.. జీవితానికి అర్థం..... వీటిని వెతుక్కుంటున్నాను.

కర్రీ పాయింట్ జీవితాలు.

2012-05-03T18:34:00.000+05:30

పొద్దున్న లేస్తే ఉరుకులు పరుగులు ఉద్యోగాల జీవితంలో తినటానికే టైం లేని రోజులివి. ఇహ వంట చేసుకొని తినటం అంటే చాలా కష్టమైన పని. దానికి తోడు కూరగాయల ధరలు విపరీతంగా పెరిగిపోవటం..మార్కెట్టు కెళ్ళి ఏకమొత్తంగా తెచ్చుకునే టైం లేకపోవటం.. తెచ్చినా అవి కడిగి తరిగి వంట చేసి తినే ఓపిక లేకపోవటం కర్రీ పాయింట్ వాళ్ళ బిజినెస్ పాయింటు. పెళ్లి అయినవాల్లయినా .. బ్రహ్మచారులయినా, పెళ్లి కాని ముదురులయినా.. విడిపోయిన ఒంటరులయినా అందరికీ ఆకలి తీర్చే అక్షయ పాత్ర ఈ కర్రీ పాయింట్లు.
జేబుల్లో డబ్బులున్నాయి..కాని వండే ఓపిక లేదు.
పొద్దున్నే బందీ మీద రెండిడ్లీలు గతికి .. మధ్యానం ఆఫీసులో ఏదో గడ్డి తిని ..రాత్రికి ఇంటికి వచేటప్పుడు రెండు చపాతీలు..ఓ కర్రీ.. లేదా ఓ పప్పు, సాంబారు తీసుకెళ్ళి రైస్ వండుకొని తినటం అలవాటయ్యింది జనానికి.
శని ఆదివారాలు ఎలాగు బయట తిరుగుళ్ళు..బయట తిండ్లె . ఓ నాలుగు వంటకాలు వండుకునేది మహా అంటే పండక్కే నేమో.
రాను రాను ఏ గడ్డు కాలం దాపురించ బోతోందో...!!

కోటి ఆశలతో..

2012-05-03T18:32:00.000+05:30

కోటి ఆశలతో నీకోసం వచ్చాను ...వెనక్కి పంపక నన్ను అక్కున చేర్చుకో.. దీనుల , హీనుల దరి చేర్చుకునేది నీవుతప్ప ఇంకెవరు తల్లీ...లోకంలో ,

నీ చరణ సన్నిధి కి చేరి 'అమ్మా' అని పిలవనిస్తే చాలు, నాకింకేమీ వద్దు.

నీవు కాదంటే నన్ను ఆదరించేవారు ఎవరున్నారు ??

ఎక్కడికని వెళ్ళను..?? ఈ చిక్కటి చీకటి వేళలలో ..రోదిస్తూ..!!
- రవీంద్రుని కవితకి తెలుగు అనువాదం

.....

ఎప్పుడూ అద్భుతమే.

2012-05-03T18:27:00.000+05:30

ఒకానొక ఉరికి ఓ యోగీశ్వరుడు వచ్చి ఒక మందిరాన్ని నిర్మించి అందులో ఉంటున్నాడు. ఆ మందిరంలో ఎన్నో వింతలూ విశేషాలు ఉన్నాయి . ఎంతోమంది అతన్ని కలుసుకొని ఆ వింతలకి తెలుసుకొని తమ తమ బాధలకి చిట్కా కనుక్కొని పోయేవారట.
ఒకనాడు ఒక యువకుడు అతని దగరికి వచ్చి. తన వంతు రాగానే
ఒకే ప్రశ్న అడిగాడు సూటిగా " నాకు ప్రపంచం సుందరంగా తోచటం లేదు. ఎటు చూసినా మోసం, దగా...దోపిడీ . నాకు బతుకు మీద ఆసక్తి పోయింది. " నాకు జీవితెచ్చని కలిగించే ఓ సూత్రాన్ని చెప్పగలరా ?? "
సరే అలాగే. ఒక పని చెయ్యి.. ఈ దీపం వెలిగించి చేతుల్లో పట్టుకొని ఈ మందిరాన్ని మొత్తం చూసి వచ్చి నాకు చెప్పు మందిరంలోని వింతలూ విశేషాలు " అన్నాడు
యువకుడు దీపాన్ని వెలిగించుకొని వెళ్ళాడు. ఓ రెండుగంటల తరవాత తిరిగొచ్చాడు. దీపం చక్కగా వెలుగుతోంది.
ఆ యోగీశ్వరుడు అడిగాడు. చెప్పు నాయనా ఎమేం వింతలూ చూసావో..??
దానికి యువకుడు నీళ్ళు నములుతూ.. "దీప్పాన్ని ఆరిపోకుండా కాపాడే ప్రయత్నంలో పెద్దగా ఏమి చూడలేకపోయాను. చూసినవి గుర్తే లేవు. " అని తల దించాడు.
యోగీశ్వరుడు చిరునవ్వు నవ్వి... సరే మరో అవకాశం ఇస్తున్నాను. మళ్ళీ తిరిగి వచ్చి చెప్పు అన్నాడు ఆ యువకునితో..
యువకుడు మళ్ళీ దీపంతో వెళ్లి మరో రెండుగంటల్లో ఆనందంతో .. ఉత్శాహంతో వచ్చి తను చూసిన వింతలూ వివరించాడు.
ఓపికగా విన్న యోగీశ్వరుడు.. ఆది సరే కాని దీపం ఆరిపోయింది కదా.. ఆది ఆరకుండా చూడాలని అన్నాను కదా.. అన్నాడు.
యువకుడు అప్పుడూ తేరుకొని దీపం వైపు చూస్తే ఆది ఆరిపోయి ఉంది. బిక్క మొహం వేసిన యువకుడిని చూసి చిరునవ్వు నవ్వి...
ఆనందం అనే దీపం బాల్యంలో బాగా వెలుగుతుంది. ఎందుకంటే
కల్మషం లేని మనసు ప్రమిదగా..అమాయకత్వం/ స్నేహం/ ప్రేమ వత్తిగా.. ఆసక్తి నునేగా వెలిగి ఏం చేసిన ఎటు చూసినా ప్రపంచం అంతాఅద్భుతoగా తోస్తుంది.
కాని మనం పెరిగి పెద్దయ్యే కొద్ది ఆ దీపపు వెలుగు తగ్గుతూ ఉంటుంది. ప్రమిద కల్మషంతో చిల్లులు పడుతుంది..స్నేహపు వత్తి కాలి చిన్నడైపోతుంది. ఆసక్తి కలుషితం అవుతుంది..దాంతో దీపం కొడిగడుతుంది.

కనక ఆ ఆనందం అనే దీప్పాన్ని ఆరకుండా చూడగలిగిన వాళ్లకి ప్రపంచం ఎప్పుడూ అద్భుతమే !!

మనిషిగా మిగిలిపో..

2012-04-29T13:34:00.000+05:30

సరే.. దోచుకున్నావు. వేల కోట్లు దోచుకున్నావ్ ?? ఆ కాగితపు కట్టలు నీ పేరుమీద దాచుకున్నావ్. ఎకరాలకి ఎకరాలు నీ పేరుమీద ఉందని మురిసిపోతావ్ .. కాని ఏం లాభం ?? చెప్పు ?

చెయ్యి ..ఎంజాయ్ చెయ్యి.. ఎంత చేయగలిగితే అంత చెయ్యి. తెలివితో సంపాదిన్చుకు న్నావ్ కనక చెయ్యి. కాని

ఆ చేత్తోనే... కలలో కుడా ఇలాంటి అదృష్టం / అనుభవం వస్తుందని అనుకోని ఒకడికి ఒక గొప్ప అనుభవాన్ని/అదృష్టాన్ని ఇచ్చి చూడు. పొంగి పోయే వాడి గుండె ని చూడు. వాడి కళ్ళలో ఆనందం చూడు. వాడు కృతజ్ఞతతో రెండు చేతులుఎత్తి చేసే నమస్కారం చూడు. మనుషుల మనస్సులో దాగిన ప్రేమని చూడు. దాన్ని సంపాదించుకున్న నీవు ఎంత గోప్ప వాడివో నీకు అర్థం అవుతుంది.

ఈ దేశంలో

రెండు పూటలా అన్నం.. తనకంటూ ఓ చిన్న గూడు ఇవీ మహత్తర అదృష్టంగా భావించే వాళ్ళు కోకొల్లలు.
శుబ్రమయిన మంచి నీళ్ళు దొరికితే చాలు అనుకునే ఉర్లు కోకొల్లలు..
చదువుకోటానికి తమ పిల్లలకి బడి దొరికితే చాలు అనుకునే వాళ్ళు కోకొల్లలు..
తమ ఉరికి బస్సొస్తే చాలు అనుకునే వాళ్ళు కోకొల్లలు.
తమ ఇంట్లో వాళ్ళ ఆరోగ్యం బాగాయితే చాలు అనుకునే వాళ్ళు కోకొల్లలు.
దిక్కు లేక ..రోడ్డున పది వెట్టి చాకిరీ చేస్తూ బాల్యాన్ని కోల్పోతున్న పసివాళ్ళు కోకొల్లలు..
వీళ్ళ0తా నీ కోసం.. నీ అభయ హస్తం కోసం...నీ సాయం కోసం ఎదురు చూస్తున్నారు...
కళ్ళు తెరువు. వాళ్ళని చూడు. నీది కాని నీ సంపదని.. వాళ్ళ సంపదని వాళ్ళకి ఇచ్చేసి మనిషిగా మిగిలిపో.. దేవుడిగా వెలిగిపో.