أونطه نص كوم

المشهد الثاني

2012-03-24T15:17:00.003-07:00

نادر : والله احنا في أخر زمن ..... عجبت لك يا زمن يلا اهو خد اخر جنيه في جيبي المشكلة دلوقتي اللى انا شايل همها هأتعشى ازاي .. واحشنى الزفر قوي مظلومة معاي يا بطني ...

تدخل سيدة وفي اديها صنية بطاطس

سيدة : هو فين الواد اللى ينقرص في ودانه .... الواحدة ما تعرفش تقيل في الحارة الهم دي اخييييييييه حنلاقيها منين ولا منين يا عيال بتسرخ يا نسوان بتسوط يا بتاع جرايد عمال بينبح ...ايه يا اختي ده. حاجة تقرف اما أنده على صحباتي أتفك معاهم شوية يا بختهم ..... بتبصولى كده ليه ما انا ليا صحبات برده ولا انتوا فاكريني ما ليش لا والنبي ومن نبا النبي نبى دلوقتي تشفوهم بعنيكم ليه هو انا كدابه ..

.... تنده عليهم

يا توحه يا موحة

عبال ما يجوا بقى أتكلم معاكم شويه أهو ندردش مع بعض شوية خدوا بالكم أنا زي العسل وانحط على الجرح يطيب وأحب موت اساعد الناس ..لو تقصدوني فأي حاجة هتلاقوني ما قولش لا.. أه أصل أنا جدعه و أحب الجيره ولا ينكن أبدا أتخانق مع جيراني اصلى طيبه قوي أه والنعمه . طاب دا انا أولة امبارح سمعت صريخ من البيت اللي قصادنا في الحاره قلت كفا الله اشر طلعت أجرى عليهم لقيت الراجل اللى ينذغد في بطنة بيضرب مراته الست الاميرة اللى بقها بينقط شهد ولا عمرها ابدا طلعت العيبه منه أصلنا جيران من زمان بقالنا يجي عشر سنين على الحلوة والمره والنبي ما سكت لجوزها قولتله هو انت شاريها ولا ايه يعني ايه تضربها رد علي وقال انتي مالك قوتله جاك مله على ودانك يا راجل يا شايب يا عرة الرجاله قامت المره الشايبه العايبه قايلالى أهو انتي اللى جوزك عره وشايب قال . رايح ادافع عنها تقوم تشتمنى بس انا والنبي ما سكتلها سمعتها كلام منقى اصلى مؤدبة وماحبش الحال المايل بس ساعة قلة الأدب ما حدش يقدر على أصل ابوي كان كده كان سواق في السكه الحديد وبياخد 30 جنيه وكانت اللحمه رخيصة كانت بالوقه مش بالكيلو كل حاجة انقل خيرها حتى البطاطس شايفين البطاطسه قلبها ناشف ازاي ...اصلى فضلة خيركم هأعمل النهاردة صنية بطاطس ما قولتلكمش انا طباخة بريمو في يوم حرقت البطاطس قمت رميتها من الشباك جت على دماغ واحد افندي عليه القيمة قام قالى يا ناس يا اللى فوق مش تخلوا بالكم من الناس اللى تحت رديت بكل ادب لموأخذه يا حضرت ابقي خد بالك المره الجايه وحياتكم عندي المره الجاية كان قاري فتحتى ما الواحده الواعية توقع الراجل من دول بحلة محشى بصحن كشك بدقية باميه الله ما اصلى على النبي اصلى بخاف من الحسد قوى اصل جوزي بيخاف على قوي ولا عمره يجرح مشاعيري باي كلمه أسم الله عليه طول بعرض شنباته يوقف عليها الصقر ولا شمشون الجبار وبرغم جبروته بس زي الخاتم في صباعي خايفه تقولوا عليى رغاية لا والنبى انا مش رغايه

يدخل الزوج ( رفيع ) .... انتي فين يا ولية

سيدة : نعمين يا بعلى

شكر : هو انتي غاوية شوارع يا ولية كل ما ادور عليكي الاقيكي في الحاره فين الزرار يا وليه ... انا غلبت معاكي خلاص كل يوم لازم تاخدي العلقة

الست : يوه ولازمتها ايه بقى ايه الفضيحة أوعوا تأخدوا على كلامه دا بيهزر

الراجل : لا مابهزرش

الست : بتهزر

الراجل : مابهزرش فزي قوي ماشش في ركبك

توحه النحنوحه : ايوه يا حبيبتي بتندهي عليا

توحه : ازيك يا يا ابو محروس

شكر : حسابي معاكي لما أرجع

سيدة : تردلى سالم غانم يا بعلى مش قوتلكم وحش كاسر

توحة : وفيه ايه يا حبيبتي

سيدة : والنبي ما تاخدي في بالك

توحة : كنتي عايزاني في حاجة يا أم محروس

سيده : طبعا انا مستغناش يا حبيبتي هو انا من غيرك اسوى حاجة انا قلت نتسامر مع بعض شوية احسن انا زهقانه شوية والهم طابق على مراوحي تتصورى قاعدة ساكته من الصبح

توحه : من ايه كفاله الشر يا اختي

سيده : المقروص في سنانه الواد بندق عكر دمي الله يعكر دمه

توحة : من يومه وهو فقري

توحه : بقولك ايه ولا يهمك احنا ننادي على موحه ونعقد كده ونرحرح ونتكلم براحتنا ايوه يا اختى محدش واخد منها حاجة على رأي المثل يسخطوك يا قرد قال ما انا قرد

تدخل موحة : ازيكوا يا نسوان

سيده : اهلا اقعدي يا موحة اتأخرتي كده ليه خلاص ما حدش في دماغك يا ولا ايه

موحة : اسكتي اسكتي

توحة : خير يا ام عادل ايه اللى جرا

موحة : قال ايه قاعده بتفرج على التلفزيون ما انتوا عارفيني بموت في حاجة اسمها تلفزيون واموت قوي في المذيعات الحلوين جاتنا نيله شيلنا الهم بدري

سيده : ما تتكلمي يا موحة شوقتيني يا اختي الله

موحة : قال ايه فيه مرض جديد اسمه الانفلونزا بيتكلموا عنه

توحة : يا اختي دا مرض كلنا عارفينه احنا برده متعلمين هو جالك

موحة : لا بيجي للفراخ وانتي الصدقه اسمه ابصر ايه انفلونزا الطيور

توحة : يا ختي بطلى هزار العملية مستكفيه أصحاب العقول فى مناحة

موحة : وحياتكم عندي الدنيا مقلوبة وبيقولوا كلام ياما عليه

طيب احنا نفتح الراديو وونسمع والميه تكدب الغطاس

سيدة : وماله افتحيه اهو يسلينا شويه

والى حضراتكم نشرة الاخبار :

المذيع : أعلن مصدر مسئول في وزارة الصحة المصرية بأن مصر ليست بمنأى عن الإصابة بهذا المرض الخطير الذي يهدد الثروة الداجنة في مصر والى حضاراتكم تقرير مفصل عن هذا الموضوع ورأي الشارع المصري في أنفلونزا الطيور .ونطرح سؤال هل هذا المرض حقيقة ام خيال

المذيع تسمع عن انفلونزا الطيور .... اننفلونزا ايه

المذيعة : الطيور يا حاج :

الحاج : ... الطيور ... لا والله ما سمعتش عنها قبل كده غريبة الحكاية دي ومعنا

سيدة شايلة عيل على كتفها : ايوه يا خوي سمعت عنها هو انا جاهلة ولا ايه . دا حتى بالامارة الفراخ اليومين اللي فاتوا دول كانت مخستكة شوية يكونش جالها المرض البطال ده الشر بره وبعيد ارحمنا يا رب ومعانا واحد فررجي : الفراخ البلدي مية مية هو في احلى من البلدي البلدي يوكل ولا تقوليلي انفلونزا ولا دياولوا . انتوا عايزين توقفوا حالنا ولا ايه ..

المذيعة : وزي ما انتوا شايفين الناس اللي يعرفوا عن المرض اقل بكتير من اللي ما يعرفوش عنه ونتمنى ان احننا كده نتثقف شوية ما ينفعش الكلام ده عشرين واحد اسألهم اتنين اللي يجوبوا أخص

يا جماعة بدل الرغي والكلام في التليفونات على الفاضي والمليان نفوق بقى وأشوفكم زي النهاردة لو كنت فاضية في برنامج انتي والامراض

سيدة : بطلوا ده واسمعوا ده قال الفراخ كمان بيجلها انفلونزا عشنا وشفنا

توحه : المشكلة في مناديل الورق هتلاحق على الفراخ ولا البنادمين

موحه: كل فرخة بعد كده هيبقى معاها باكو مناديل

سيدة : انتوا بردك مصدقين الكلام ده عيب عليكم عيب عليكم دا انا بقول عليكم مفتحين ومدردحين ومخكم يوزن بلد

توحه : ليه يا سيده يا اختي بتقولي الكلام ده شايفانا داقين عصافير ولا بنكرت في شعرنا

سيدة : لا يا اختى ماقصدش انا قصدي يعني الكلام دا ما يدخلش الدماغ قال ايه الفراخ بيجلها انفلونزا دا اللي يخاف من العفريت يبقى بليد اهوا كلام بيملوا بيه النشرة وخلاص يختي فضينا بلا هم

سيدة : ولا المذيعة شوفت اللي تنغدر قال ايه شتمتنا واحنا قاعدين

موحه : يا اختي اهي شتمت الناس كلها

سيدة : سيبك سيبك المهم هنم على مين

موحه : اسكتوا قال بيقولوا البت فكرية الخياطة اللى على ناصية الشارع جالها عريس مريش قوي

توحة : ودي وقعت عليه ازاي دي سودة ومقشفة

موحة : بيقولوا يا أختى الواد كان رايح يجيب اخته من عندها بعد ما كانت بتفصل شافها عجبته وخطبها

سيدة : يدقى الحلق للى بلا ودان بقى يا ناس حد يسيب بناتي اللى زي القمرات وياخد بوز الاخص دي

موحة : والنبى بناتك معملهم عمل بيطفش العرسان

سيدة : غلبت يا أختى ما فيش فايدة الحلاوة بالقيراط والطعامة بالفدان ناقصهم ايه مش عارفه

توحة : سهلة و الحل عندي انشاء الله قولى بس يارب والفرج عنده يا حبيبتي

تدخل البنتان عليهم : يا ماما يا ماما

انت فين يا ماما .... ازيك يا خالتي توحة ازيك يا خالتى موحة

توحة : يا أرض أحرسي ما عليكي نجمتين نزلوا من السما وقعوا على الارض

موحة : ولا وانتي الصادقة عصفورتين وقعوا من العش على الارض

ازيكم يا بنات

البنات : الحمد لله يا خالتي ..... ماما احنا خلصنا مسح وكنس وغسل صحون ومواعين فيه حاجة تانية نعملها

الام : شاطرين ي حبايب ماما روحوا العبوا شوية وزي ما عرفتكم اللعب يكون مع الكبار

البنات : حاضر يا ماما

الام : الهى يوقعلكم في كل خطوة عريس يا بنات بطني

قريب

2012-03-11T12:02:00.002-07:00

مهما تبعد برده قريب قلبي مخلص لساه طيب

بأشتاقلك ياحبيبي تملي من الدنيا أنت اللي فاضلي

خليك دايما مني قريب .

أوعي في يوم تنسى إحساسي ومشاعري يا أحلى ناسي

أوعاك تأسى وتكون ناسي خليك دايما مني قريب

أنافي البعد قريب منك ولا الهجر غير منك

خلاك تأسى في يوم أكمنك شوفت الدنيا مقربه منك

خليك عارف مهما حصلك يفضل قلبي ليك مأمنلك .

عايش عمري عشان أشوفك بحلم تاني المس كفوفك

يلا خلى العمر يجري يلا تعالى تاني في حضني

مشتقألك محتاجلك

مشهد من مسرحية عيشه والسلام

2012-03-10T13:04:00.002-08:00

مسرحية ( عيشة والسلام )

الفصل الأول (المشهد الاول )

أخر زمن

تدور الأحداث في حارة

بياع جرايد : أخبار أهرام جمهورية معايا صحف قومية ومعارضة مية مية أخبار يا هانم أخبار يا بيه عندي تلاقى اخبار الفن والجريمة والطبخ والنميمة ... اقرا اخر اخبار انفلونزا الطيور والراجل اللي اصله كان طور والست اللى طابقة في الزور خد منى الجرنان وادفى واعملك سندوتش واتعشى أتعلم الطبيخ وتعالى اشتري مني دا انا السلطة الرابعة

سيدة : تفتح البلكون : انت يا واد يا بندق الله يقلق راحتك وراحة أهلك ....عامل دوشه ليه يا واد ...ربنا يخدك ويوريني فيك يوم أنشاء الله.... سلطة ايه اللي واجع راسنا بيها الساعة دي

بندق : ايه يا ست أنا بنادي في ملك الحكومة

سيدة : حكومة ... حكومة لما تلهفك كل يوم مصدعنا على الفاضي .. قلنالك ما حدش بيقراها .. خلاص بطلناها .... الله يحنن عليك شوفلك مكان تاني تبيع فيه

بندق : هو ايه اللي بطلناها.... هي خمره ولا سجاير دي ثقافة يا ناس يا عدمات الثقافة هو أيه هو انتوا لا بتشتروا ولا بتسبونا نسترزق أعوذ بالله من دي حارة فقر

سيدة : ثقافة وتضحك ثقافة ايه يا واد اللي بتتكلم عنها ....ولا كبرت يا ابن.زليخه وعرفت تتكلم. حقه بطلوده واسمعوا ده ...الهي يطلعلك قرن وتبقى زي الطور يا بعيد بتتريق على يا بياع الورق يا برميل طرشي واندلق

بندق : الله يسامحك يا ست سيدة انتي بردك ليكي راجل يترد عليه وانا ما بردش على ستات أه ما بردش على ستات حد الله بيني وبينكم

سيدة : اياك اسمعك بتنادي تاني في الحارة.... يعني هما اللي في وشك دول مش عنين تشوف بيهم يا مخبل .... دا حتى المثل بيقول اللى ما يشوفش من الغربال يبقى أعمى

بندق : وانتي ايه اللى مزعلك قوي كده يكونش فكراني جوز امك

سيدة : امشي اصلك ناقض رباية مش تميز يا عبيط . جايلنا في وقت القيالة وكنا يدوبك داخلين نريح شوية تقوم تصدعنا بكلامك البايخ اخبار ايه اللى بتنادي عليه ي.....طيب كنت تنادي على شوية خضار شوية فاكهة ملابس حريمي مش ورق ...دا على رأي الست منيرة المهدية الله يرحمها ويبشش الطوبة اللى تحت راسها بعدا الغدا يحلى الهزار والبغدده ...

بندق : هي قالت برده بعد الغداء الله يرحمها لو كانت عايشة لحد النهاردة كانت رفعت عليكي قضية سب وقذف

سيدة : مش عاجبك كلامي يا بتاع الورق يا فنجان شاي واندلق والنبي ما انا اللى نازلها ومخليه اكبر حته فيك قد كده

بندق : لا والنبي ما تتعبي نفسك وتنزلي انا مش قصدي وحياة ربنا بس الست قالت بعد العشا مش بعد الغداء

سيدة : غدا ولا عشا كل اكل والسلام وبعدين هي تقول عشا عشان كانت بتنام طول النهار واحنا صاحيين من الفجرية يبقى نقول بعد الغداء... كده يبقى الكلام معقول يا راجل يا مخبول

بندق : يا حلاوه والنبي انا بدي اسألك سؤال طابق على مروحي من زمان

سيدة : تموت في الرغي تموت في الرغي ما هي فرصة قول وخلصنا

بندق : انتي متأكده إن ملكيش قرايب في اليونان

سيدة : هتبتدي تقبح ولا ايه

بندق : خليكي معاي للاخر

سيدة : لا والنبى انا مصرية بنت مصري

بندق : أصل انا حاسس انك تقربي لواحد صاحبنا اسمه افلاطين

سيدة : طين ... طين على دماغك يا بعيد والنبي ما انا الا مورياك الطين على ابوه استنى على شويه لو راجل بصحيح خليك مكانك لحد ما أجيلك ...تغلق البلكون

يجلس بندق على الارض يحدث نفسه

اه يا زمن بقى فيك المثقفين مجانين و المجانين فيك عاقلين والحقيقة بقت وهم والوهم صار دليل كل النفوس اتغيرت حتى الصحاب بقوا شياطين الله يرحمك يا ابا ويبشبش الطوبة اللى تحت راسك كان يقولى دايما يا واد يا بندق خليك مفتح ويروح يشتح وينام ساعات والف انا على كعوبي في شوارع وحارات والقط رزقى من هنا ومن هناك والخير كان ياما ويفيض وساعتها افتكرت إن الخير جاي أكيد وقولت لابوي انا مش رايح مدارس ولا عمري هاكون دارس ما انا رزقى كتير في ورقى اللى يوم يديني ويوم ياخد مني بس كان حنين ولا عمره كان يبين أن الزمن غادر وماكر وياريته قالى يمكن أكون خبير أه يا زمن أه يا زمن

يدخل الاستاذ نادر : انت فين يا عم بندق عمال دور عليك واتاريك هنا جنبي

بندق : هاروح فين يعني يا ستاذ نادر ما انت عارفني الف الف وارجع تاني هو انا ليا متوا غير هنا في الحارة منها خلقناكم واليها ترجعون

نادر : مالك يا بندق شكلك مضايق على الاخر

بندق : والله يا استاذ الحال ما بقاش الحال أنا من صباحة ربنا ما بعتش غير جرنان واحد والاكاده إن اللي اشتراه راجل شكله غلبان شاف صورة ممثله من بتوع اليومين دول واشتراه مخصوص عشانها والغريبة بعد ما خد الجرنان طلبت تمنه قالى خلى في عينك حصوة ملح انا شحات غلبان طلع شحات يا استاذ نادر ...الزباين بيقلوا يوم عن يوم الناس ما عدتش بتقرا جرايد زي زمان الواحد من دول يقولك انا يا عم فاضي والتاني يقولك كفاية على همي مش عادي و اللى زاد الطين بله البتاع ده اللى اسمه الانترنت خلاها خل خالص وبعد ما كنا بناكل العيش حاف بقينا حتى مش لقينه والمثل بيقول

ابوك البصل و أمك التوم منين تجيك الريحة الحلوة ما مشئوم

نادر : ودا اللى مزعلك يا بندق مش بس انت اللى بتعاني ناس كتير غيرك عايشة الغلب ما انا هو بص على رجلى شايف الجازمه اللي في رجلى شايف الشراب كله مخرم عامل زي المنخل

بندق : اخييييييه

نادر : شايف الفنله طالعة من بق كلب

بندق : يا حرام

نادر : اوريك البنطلون مخبي ايه كمان

بندق : لا والنبى كفايه على اللى شوفته ما نتحرمش منك ابدا

نادر : ممكن تقولى انت بتحلم بأيه في دنيتك

بندق :

من زمان وانا بحلم اكون بنادم عليه القيمه والبس بدلة وادخل الاوبرا واتفرج على قسارة البندق وبحيرة البجع يمكن ربنا يكرمني بشوية بندق ابيعهم بقرشين ينفعوني

نادر : الله يحظك يا بندق دا انت مثقف أهو..... شويه شويه هتكلمني عن العولمه والفزياء النووية

بندق : يا استاذ طباخ السم بيدوقه وانا شغلتي القراية ما عرفش غيرها في دنيتي

نادر : طيب ناولني الجرنان وقيد على النوته

بندق : احلى جرنان ليك يا بيه... يلى بسرعة هات جنيه ...واقرا وقولى على اللي فيه ...قولى بكره هيبقى احلى ولا ايه مستنيك تيجي يا يوم ..مستني انسى الهموم. قول يا بيه ولا قولك خلي اللي فيه.. وسيبني احلم احسن ... يلا بسرعة قبل ما تنزل المفتريه زيعيمة الحارة الست ديا ... ويترك المكان اقري يا هانم اقرا يا بيه

لماذا تزوج المشير الفنانة الشهيرة

2012-02-26T00:16:00.001-08:00

عندما تزوج المشير من الفنانة الشهيرة سألت نفسى عدة أسئلة هل كان المشير مغرم صبابه ومش قادر على بعد الفنانة ولا كان عايز يكمل نص دينه فقال هي دي اللى هتكمل نص ديني ولا كان عايز نص حلو فقال هي دي نصي الحلو ولا كان عايز يتفشخر قدام أصحابه فيقول دا أنا واخد حتة دين واحده صاروخ يا ناس . أنا مش ضد الفن ولا ضد الفنانه ولا ضد المشير القلب له أحكام على رأي اللى قال بس لما يحصل كارثة بسبب المشير أكيد الناس هتقول دا كان مركز في حاجات تانية هو فاضي لينا دا كفاية الوزه اللى معاه . وبداية الحكاية لما أتولدت الفنانه الشهيرة نفيسة في ابريل 1935 وحصلت على دبلوم التطريز ثم معد الفنون المسرحية وعملت بالمسرح وسرعان ما أصبحت أحدى بطلات الفن المصري وأحدى نجمات الإغراء .قدمت الفنانه نفيسه عدة أفلام وأشهرها سلطان وسر طاقية الإخفاء وصراع في الجبل وعن حكايتها مع المشير .بدأت قصة التعارف بين المشير وبرلنتى ليلة عودة المشير من سوريا بعد الانفصال، حيث أقام عدد من الضباط حفل شاى للمشير لرفع معنوياته وليثبتوا أنهم معه وأن ولاءهم له، وأنهم يشاركونه أزمته النفسية، وبعد انتهاء الحفل أراد المشير أن يقيم حفلاً صغيراً تحضره فقط نخبة من الأصدقاء، وفى الحفل شاهد برلنتى وجلس معها لأول مرة، وكانت وقتها صاحبة نشاط بارز، فهى تلتقى بالأدباء والمفكرين، خاصة فى فترة زواجها من أحد الماركسيين، ويبدو أن ثقافتها أبهرته، وبدأت قصة الحب التى تكللت بالزواج.ولجأت برلنتى بعد وفاة المشير إلى القضاء للحصول على نصيب ابنهما عمرو، فى ميراث والده، ولما كان الزواج العرفى وفقاً للقانون لا تترتب عليه أى حقوق، حصلت على ما تريد بشكل ودى مع أسرته. وأصدرت برلنتى فى عام 1993 كتابا حول قصة زواجها بعنوان «المشير وأنا»، ثم كتاب آخر عام 2002 بعنوان «الطريق إلى قدرى.. إلى عامر»، قالت فيه إن زوجها مات مقتولاً بالسم، وإنها توصلت إلى دليل مادى وصفته بأنه قوى، يثبت تورط أجهزة عبدالناصر فى قتله للتخلص من الحقائق التى بحوزته بشأن أسرار حرب الأيام الستة، وأنها تعرضت شخصيا للاعتقال والإقامة الجبرية لفترة طويلة، وحرمت من طفلها الذى كان رضيعاً وقتها، ولم تكن تجد ثمن الطعام، وأن جسدها تعرض للتفتيش من سيدات كان يتم إدخالهن معها إلى الحمام إمعانا فى إذلالها. وقالت برلنتى إنها وثقت أسرار هزيمة يونيو 1967 فى كتابها الأخير، معتمدة على وثائق وصفتها بأنها مهمة للغاية احتاجت إلى 700 صفحة، واستغرق الكتاب وقتاً طويلاً وبذلت فيه جهداً هائلا، إذ سافرت من أجله إلى الولايات المتحدة الأمريكية، حيث اطلعت على «وثائق خطيرة» فى مكتبة الكونجرس، بعكس كتابها الأول الذى كتبته على عجل بسبب الظروف التى كانت تواجهها. وفي النهاية تبقى برلنتى عبد الحميد والمشير عبد الحكيم عامر الغاز وشفيره يصعب فكها .

الواد فصيح مدير عام رئاسة الجمهورية

2012-02-17T06:39:00.000-08:00

شخصية اليوم لها وضع خاص لأنه لسه عايش للأن ولعب دورين مهمين في حياة المصريين الدور الأول هو دور الطفل في السينما المصرية ولقب بالطفل المعجزة زي فيروز وسليمان الجندي وغيرهم والدور التاني لعب دور في الحياة السياسية المصرية فكان مدير عام الإتصالات في رئاسة الجمهورية . لفرحات 12 فيلم تقريبا أشهرها على الإطلاق فيلم سر طاقية الإخفاء مع عبد المنعم ابراهيم وزهرة العلا والفيلم التاني فيلم شارع الحب مع عبد الحليم حافظ وفيلم اشاعة حب ( بابا أنت يا حبيبي)

حسونه

2012-02-16T13:42:00.000-08:00

لما بنرجع بالذاكرة ونشوف أطفال كانوا علامات في أعمال كبيرة زي رصيف نمره خمسه وشباب امرأه وأم العروسه يبقى بنتكلم عن طفل السينما المصرية بلا منازع سليمان الجندي الدم خفيف وكلامه ظريف شهرته كانت في طفولته ولما كبر قل بريقة لأن الناس حبته وهو طفل وأتعودت عليه طفل لما نشوف دوره في رصيف نمره خمسه كان علامه فهو محور أساسي في الفيلم كان إسمه حسونه وهو اللى كشف المجرم من خلال معرفته للغة الإشارة ودوره في ام العروسه كان أخو العروسه والولد الشقى بتاع المقالب في شباب امرأة غلب شكري سرحان في الفيلم . أتولد سليمان 1945 وقدم للسينما المصرية 25 فيلم تقريبا وتوفي في نفس الشهر من عام 1996م عن عمر 51 عام .

المرشح المحتمل للرئاسة

2012-02-16T00:32:00.000-08:00

زمان كنا بنتمنى يكون فيه انتخابات حقيقة في مصر والأيام دي زهقنا من كتر الإنتخابات في مصر وكان الخطاطين وأصحاب شركات الدعاية بيستنوا موسم الإنتخابات بفارغ الصبر ماهي سبوبة حلوة يا ولاد . أه نسيت وكمان الأرزقية اللى ببوزعوا الصور والدعاية والنجارين والبلطجية طبعا اللى بيلعبوا دور كبير جدا في انتخابات مصر وكلنا عارفين ذلك وامن الدولة اللى كان جزء أساسي ورئيسى في التزوير .بدات مرحلة الإنتخابات بالإستفتاء على الدستور ثم الشعب ثم الشورى سيبكم من كل ده خلينا نركز بقى في العنوان المرشح المحتمل للرئاسة . لو جربت تفتح التليفزيون بالليل أو بالنهار هتلاقى واحد من المحتملين دول بيتكلم وضروري هتلاقيه بيتكلم افضل كلام والغريب أن الأغلبية معروفه للناس ومحفوظة بس الغريب بقى أو الجديد أنهم لسه بيضحكوا علينا واحنا مصدقين رغم أننا كلنا عارفينهم وحافظينهم وعاجنينهم وخابزينهم وقرشنا ملحتهم ويطلع الواحد منهم يقولك مصر محتاجة قيادة عظيمة . ويكلمك عن مشاريع وقوانيين وأبصر ايه هو أصلا مش كفاءة ولا عنده الادوات و الكلام لما يبقى مزوق وكله لف ودوران واحلام واوهام حد كلمنا عن حلول عبقرية غير تقليدية لا . هل الكلام اللى على الورق في برامجهم هيقدروا يحققوه ولا هي مجرد برامج للإستهلاك الإعلامي وكل واحد مركز مع التاني . طيب ما تركز في حالك وإعمل اللى عليك ولو تستحقها أكيد هنفرح بيك ولا عزاء للباقيين .......

الأختان شكيب

2012-02-14T14:01:00.000-08:00

لما يطلع في أي عيلة مصرية دكتور أو مهندس بتبقى العملية أخر حلاوة وتلاقى الأب بيتفشخر والأم ما فيش على لسانها غير الدكتور جه المهندس راح ودا من حقها طبعا بس مش ملاحظين حاجه مصر بجلالة قدرها وقفت على الطب والهندسة والباقيين يموتوا بقى . يعني اللى ما يطلعش دكتور او مهندس يبقى فاشل بالمعايير المصرية مع إن مش كل الأطباء مرتاحين ولا كل المهندسين سعداء والحكاية اللى معانا حكاية أختان بنات مأمور قسم عابدين !!! وخالهم يبقى اسماعيل صدقى باشا ورغم هذا العز واكل الوز إلا انهم اتجهوا للعمل الفني وما فكروش في الطب والهندسة زينا يعني............. المهم الكبيرة هي زينب ( زوزو) والصغيرة أمينة ( ميمي) شكيب . أتولدت زينب في عام 1909 وامينه بعدها بأربع سنين عام 1913 م كانت بدايتهم في فرقة نجيب الريحاني إشتغلوا في مسرحياته حكم قراقوش وقسمتي ولكن لأن المسرح ما كانش بيتصور فمعرفتنا بيهم من خلال أفلامهم واشتركا في أعمال واحده زي فيلم سي عمر مع الريحاني زينب كانت أخت عمر بيه و أمينه كانت مرات عمر بيه الالفى وأتجوزت امينه من سراج منير اللى هو كمان شارك في نفس الفيلم بن عم عمر بيه شرفنطح . زينب تخصصت في أدوار المرأة الخاينة والعانس أما أمينة فتفوقت جدا في دور المرأة الارستقراطية لملامحها طبعا والغازية كما في ثلاثية نجيب محفوظ وبنت البلد . اتوفت زينب في 1978 ولحقت بها أختها أمينة عام 1983 لينهيا مشوار الحياة بما لهما وما عليهما بعد أن قدما عشرات الأفلام السنمائية .

المصريون يأكلون القطط والكلاب

2012-02-14T00:19:00.000-08:00

معقول يعني هو فيه حد بياكل قطط وكلاب إحنا المصريين أكلناهم ودا في عصر المستنصر بالله الفاطمي في عصر الدولة الفاطمية الرواية التاريخية بتقول أن المستنصر حكم مصر 60 سنة واللى يحكم فترة طويلة لابد من حدوث خراب في عصره يعني ناخد أمثلة على ذلك رمسيس الثاني اللى حكم أكثر من ستين عاما وحدثت قلاقل في نهاية عصره وكمان حسني مبارك اللى كانت نهايته مفزعة جدا . نكمل كلامنا عن القطط والكلاب في أيام المستنصر 1036- 1094 م إنخفض فيضان النيل وغاب الفيضان سبع سنوات شبهوها بسبع سنوات يوسف العجاف وطبيعي ان الماء هو سر الحياة المهم اللى حصل كان مفزع بيحكي المؤرخين حوادث يشيب لها الولدان فلقد تصحر ت الأرض وهلك الحرث والنسل وخطف الخبز من على رؤس الخبازين وأكل الناس القطط والكلاب حتى أن بغلة وزير الخليفة الذي ذهب لتحقيق في حادثة أكلوها وجاع الخليفة نفسة حتى أنه باع مأعلى مقابر أبائه من رخام وتصدقت عليه أبنة أحد علماء زمانه وخرجت النساء جياع صوب بغداد وذكر أن الناس أكلت الميته وأخذوا في أكل الأحياء وصنعت الخطاطيف والكلاليب لإصطياد المارة بالشوارع من فوق الأسطح وتراجع سكان مصر لأقل معدل في تاريخها تصورا كان أهل مصر عايشين ازاي في ظل حياة همجية بربرية وهذا معناه أن الجوع ينسى الدين فلقد كان منهم المسلم والمسيحي واليهودي الذي أكل الأموات والأحياء . الحمد لله الذي حرمنى من العيش في ذلك العصر وأدعوا الله أن لا تشهد مصر تلك الأيام مرة أخري .

باي باي ماري

2012-02-13T07:41:00.000-08:00

زي ما السينما المصرية ما جابت جميلات جابت برده ناس أقل في الجمال أو ممكن نقول ضعيفة الجمال طاب لو قولتلكم الممثلة دي كانت سجانة يعني بتحرس المساجين في السجن تقولوا ايه . الشخصية اللى بتكلم عنها هي ماري باي باي أشهر من مثلت دور المرأة القبيحة في السينما المصرية اسمها الحقيقى بهيجة محمد على إكتشفها يوسف وهبى وعملت في فرقة ثلاثى أضواء المسرح وفؤاد المهندس تاريخ ميلادها 1917 من أشهر ادوراها مشهد في فيلم مطارده غرامية مع عبد المنعم مدبولى لما مسك رجليها وبص في وشها واتخض وكمان فيلم اسماعسل يس في مستشفى المجانين

استر شطاح واللى راح راح

2012-02-12T12:13:00.000-08:00

يمكن نكون شفناها ويمكن لا . بس الأكيد انها مش معروفه بالنسبة لنا . اسمها استر شطاح ممثلة مصرية من أصول يهودية وكنت قلت قبل كده ان اليهود كانوا بيشتغلوا في السينما عشان كان الشغل فيها عيب على النساء المصريات أتولدت استر شطاح في دولة سوريا 1884 يعني من زمااااااااان المهم هاجرت الى القاهرة وعملت في فرقة سلامه حجازي عام 1916 يعني في نفس العام اللى تم فيه تقسيم البلاد العربية في معاهدة سايكس بيكو وتركتها كحال الممثليين في الوقت ده التنقل من فرقة الى فرقة وعملت في فرقة جورج ابيض وغيرها من الفرق . وطبعا لأن عمرها كان كبير لما بدات السينما المصرية إنتاجها فطبيعي كانت بتقوم بدور العجوزة التى تسبب المشاكل أشتركت في بعض الأفلام ومنها أه من حواء مع رشدي أباظه ولبنى عبد العزيز وتمر حنه مع نعيمه عاكف وعنتر وعبلة مع كوكا وفريد شوقى كانت ادوارها صغيرة ولكنها كانت مؤثرة .وتوفت فى عام 1971م عن عمر 87 عام .

عايدة الأيوبي والفرق بين الحنطور وميدان التحرير

2012-02-11T12:10:00.000-08:00

أيام مبارك كانت الأغنية الرائجة أركب الحنطور وأتحنطر وصدقوني أنا قعدت أدور على كلمة أتحنطر في القاموس لكن للأسف دي كلمة من ابداع الفكر الجديد بتاع الحزب الوطنى وبقينا نسمع في كل مكان أغاني غريبة وكلمات أعجب وأصوات اخرها تغني في الحمام وتلاقى طول اليوم إعلانات لمطربين شعبيين والطامه الكبرى القنوات الجديدة المبدعة في الهلث والمساخر أخيرا أطلقنا قناة للرقص الشرقى أخيرا بقى عندنا عشروميت قناة للأغاني ياه على التقدم وماله ما هو راس مال برده انا عمري ما كنت ضد الأغاني بالعكس الفن الراقى شهادة لصاحبه مش عك وخبط ورزع وأركب الحنطور وحجرين على الشيشه على فكره في مغني يغني أغنية واحده وتكون علامه ونفتكرها دايما ومن المغنيات أصحاب الفن الراقى ( عايدة الأيوبي ) عايدة مصرية من ام المانية ولو ناخد بالنا من شكلها هنلاقيها أوربيه حتى نبرة صوتها وهى من مواليد بنها 1964 ولها 3 البومات حققت البوماتها نجاح كبير جدا ومين ينسى لما قبلته مره صدفه حبيبي مش أي صدفه .ومن زمان وانا عايزه أقولك. على بالى بن بلدي على بالى وتركت مصر وعاشت في المانيا لفترة طويلة ثم عادت بشكل مختلف فقد إرتدت الحجاب وظهرت مع فرقة كاريوكي في أغنية ولا أروع وهي ( ميدان يا الميدان كنت فين من زماااان ) فلقد حركتها ثورة مصر فعادت تقدم ما تستطيع أن تقدمه وللعلم هى مطربة ومؤلفة أغانيها وملحنة أيضا مش تقولى أتحنطر .

قضى أخف من قضى

2012-02-11T11:28:00.001-08:00

الحمد لله الواحد مؤمن بالله وبقضاءه والمكتوب على الجبين بتشوفه العين وساعة القضى بتعمى البصر لما أتفجعت مصر باللى حصل في بورسعيد تصورنا أننا تحولنا الى عالم الغاب عالم ماوكلى في أرض الأدغال أو في عالم المايا في أمريكا والتضحية البشرية بالأغراب بس الحقيقة اللى حصل في مصر مش نهاية الكون وحصل قبله كتير يعني في عام 1969م حصلت حرب بين دولتين في أمريكا الجنوبية الدولة الأولى اسمها الهندوراس والتانية السلفادور والدولتين من دول امريكا الوسطى أصلهم من الهنود الحمر أصلا وكانت المبارة في تصفيات كأس العالم وبسبب التعصب بين الدولتين بعد تأهل فريق السلفادور أخد الفريق الهندوراسي علقة موت وساعتها قامت الدولتين بحرب ضروس ..استمرت 4 أيام وتدخلت الامم المتحدة وتم وقف الحرب التى راح ضحيتها 2000 شخص وأكثر والأف المصابين والمشردين يبقى نقول قضى أخف من قضى وكل يصيبنا الا ما كتب الله لنا يعني لو كنا فاكرين نفسنا همج فسبقنا للهمجية دول كتير وهتفضل الهمجية طول ما التعصب موجود .

شرفنطح

2012-02-10T12:22:00.000-08:00

في الغالب سمعت الإسم دا بس هل تعرف هو مين وليه لقبوه بشرفنطح ما هي العادة كده كل واحد في مصر له على الأقل اسمين يعني تلاقى واحد اسمه مثلا ابراهيم وتلاقيه رومه وواحد اسمه عادل تلاقيه حنكش وتالت تلاقيه زلطه ورابع وخامس يعني من الأخر بنحب نسمى الناس بأسماء تانية في الغالب بتكون تريقة بس في حالة شرفنطح فالوضع مختلف تماما اسمه الحقيقى محمد كمال المصري اتولد في11 أغسطس 1886 واتوفى في 25 أكتوبر 1966 اشتهر باسم شرفنطح اختار لنفسه الاسم ده من شخصيه كان جسدها فى واحده من المسرحيات. من أفلامه فيلم عفريته اسماعيل يس لما كان بيقول لبنته زالبيا فرمله ودوره في فيلم سى عمر دور عمه الغتيت الحرامي وسلامه في خير المدرس اللى كان في فصل نوفل وحسن ومرقص وكهين كان مرقص البخيل الجلده وكمان دوره في فيلم الأنسه ماما

( شرفنطح ) هو دا شرفنطح .

المزرعة السعيدة

2012-02-08T04:29:00.000-08:00

لو أنت من هواة الفيس بوك أكيد سمعت عنها او حد من أصدقائك بعتلك طلب عشان تلعبها معاه قال يعني الواد فلاح وبيعرف يزرع طيب قوله تعالى نلعب المزرعة السعيدة بجد في الصحراء المصرية قوله تعالى أروي الزرع قوله أكل الجاموسة هيقولك يا مامي !! قوله نضف الزريبة هيقولك بلاش قرف !! قوله مش انت بتحب المزرعة السعيدة هيقولك اه بس دي حاجه ودي حاجه دي لعب والتانية جد وانا ماليش في الجد انا ليا في اللعب وبس طبعا فيه ناس بتاخدها تسلية ودا من حقها وبالمناسبة أكلمكم عن حاجه أحلى من المزرعة السعيدة وهى حيوانات المزرعة ودي قصة لجورج أويل كاتب انجليزي تحولت لفيلم كرتوني رائع بتصور ثورة الحيوانات على أصحابها وإختيار حيوان يحكمها والذي يتحول الى حاكم فاسد بعد ما كان من الثوار فتحدث ثورة جديده عليه وأعتقد هذا ماحدث ويحدث في مصر أحنا ثورنا ضد مبارك وهيحكمنا واحد كويس ومع الوقت سيفسد وسنثور مرة أخرى .

الضرب في الميت حرام

2012-02-08T02:46:00.000-08:00

تخيل لو أنت ماشي لقيت ميت هتعمل إيه هتفكر بسرعة وعقلك هيدلك على تصرفات مختلفة ممكن مثلا تسرخ بصوت عالى وتقول الحقوني أو تهرب وتطلع تجرى أو تروح قسم الشرطة وتبلغ أو تدور وتشوف معاه أي إثبات شخصى عشان تعرف هو مين وتتصل بأهله ولو كنت في صحراء جرداء ولقيت جثة هتدفنها عشان إكرام الميت دفنه دي كلها تصرفات ممكن يعملها أى شخص فينا لو اتعرض للموقف أما الأيام دي في مصر فالحكمة تحولت من إكرام الميت دفنه الى الضرب في الميت أفيد . حالة من التخوين اللى أصبحت مقرفه وممله الثوار بيتهموا الإخوان والإخوان بيتهموا السلفين والسلفين مش راضيين عن دول ولا دول و فيه ناس بتتهم الثوار بالبلطجة وناس بتقول شهداء وناس بتقول بلطجية طيب هنفترض انه بلطجى ومات نقول الله يرحمه والله نقطع فيه ما هو حالته دي من الفقر والجوع وقلة الحيلة عايزه يبقى أستاذ جامعه يعني عشان تقول عليه ثائر المشكلة في مصر ضياع وغياب الحوار المتزن دا مجلس الشعب تحول لحلبة الشاطر اللى يعلى صوته وخلاص واخر اليوم يروح في برنامج يعمل فيها عنتر شايل سيفه وهو ولا عنتر ولا حاجه والوطنية بتظهر في الأعمال وليست الأقوال يا رجال .

أمان يا عم فهمى

2012-02-07T00:35:00.000-08:00

فهمى أمان كلنا أكيد شفناه دا لو بنشوف سينما . ممثل شهير عرف بتقديم أدوار الرجل العجوز الكركوبه خفيف الظل وجاءت شهرته عندما تقدم في السن ومين ينسى دور عم لالو الطرشجى في مسرحية سيدتي الجميلة مع المهندس وشويكار ودوره في فيلم لوكاندة المفاجأت مع اسماعيل يس اشتغل فهمى امان في العديد من الفرق المسرحية منها فرقة الريحاني والمهندس .,

السينما المصرية واليهود

2012-02-06T12:27:00.000-08:00

طبعا ولأن مصر هي بلد الوسطية و العلم والفنون عاش فيها كل الأشكال والألوان والأديان والثقافات ما قالتش لحد لا طول عمرها عامله زي الخلاط عماله تفرم وتطلع خليط مختلف تماما والدليل على ذلك السيما المصرية سيما عجب فيها ناس كتير قوي ولأن المصريين المسلمين كانوا بينظروا أن السينما عيب فأقبل عليها اليهود وخاصة من النساء فوجدنا العديد من اليهود يحتلون ادوار كثيرة في السينما المصرية ومن هؤلاء ليلى ذكي مراد والتى أسلمت واخيها موريس زكي منير والذي عرف بمنير مراد قدم افلام قليلة وعمل كملحن ( أسلم وتزوج من سهير البابلى ) كذلك توجو مزراحي الذي أخرج فيلم وداد لأم كلثوم ونجمه ابراهيم ( ريا ) وراقية ابراهيم و ليليان فكتور كوهين( كاميليا ) و صالحة قاصين وجراسيا قاصين وفكتوريا كوهين ونينات شالوم( نجوى سالم )

والياس مؤدب( اليا مؤدب ساون ) وداود حسني ( أغنية غالى على )

ودي بعض الصور ليهم .....

أنتوا فاكرينها بدأت دا لسه بدري

2012-02-06T01:41:00.000-08:00

الناس فكره أن الثورة حصلت في مصر دا مش حقيقى خالص استنوا أوضح كلامي المقصود بالثورة هو التغيير الاجتماعي والإقتصادي والسياسي والفكري واللى حصل هو إزاحة بعض العقبات في تحقيق هذه الثورة وهناك العديد من العقبات في طريق الثورة المصرية يعني مثلا إيه سبب الخلاف اللى المصريين فيه اليومين دول وعدم القدرة على إتخاذ القرارات . بعد بقى ما نقضي على العقبات نحقق الهدف وهو التغيير الإجتماعي وتحقيق العدالة الإجتماعية حد يقولى هما ليه مش قادريين يحققوها الرد عشان هما مش حاسين بقيمة العدل لأن من حكم في ظل الظلم والإستعباد صعب عليه أنه يحكم بالعدل من الأخر إحنا عايزين ثورة عقول تنهض بمصر وكفاية كلام أصل الواحد شبع كلام من كل الأصناف عايز تبني ابني وبلاش تقول ها ابني عايز تصلح صلح وبلاش تقول ها أصلح حرف الهاء دا مشكلة بقى المسؤلين في مصر شاطرين فيه قوي.

جالى صداع

2012-02-03T12:21:00.000-08:00

أي حد الأيام دي طبعا دماغه مصدعه من اللى بيحصل حواليه رغم إننا كلنا عارفين المشكلة فين المشكلة ببساطة معروفه للصغير قبل الكبير المشكلة في ناس ماتت عشان هدف أو حتى عدة أهداف واللى وراهم مش شايفين أى فايدة من تضحياتهم الإ كام أغنية لشوية مغنيين مجهولين عايزين الشهرة فيقوموا مغنيين حبة أغاني على أمل أنهم يتشهروا ولكن هيهات اللى بيعمل حاجه لوجه الله بتعيش واللى كان قصده الشهرة هيموت ويختفى نرجع لمرجوعنا ليه أنا مصدع عشان لما قامت الثورة قلنا الفساد هيخلص قلنا العدل هيتحقق قلنا الكرامة هترجع تاني قلنا المساواه هتتحقق قلنا هنلاقى الغاز ما لقينا قلنا هنلاقى عيش ما لقينا قلنا هنلاقى أمل اتارينا موهومين يبقى الموت بشرف أحسن من العيش في ذل المصري عاش حياته اللى فاتتفي ذل وفيه ناس كلنا عارفينهم مصممين أننا نكمل الحياة ونموت مذلولين ليه ما تعرفش الغريب في الموضوع التمثيل الكل عامل ثورجي وفي الأصل هو عصبجي كان زعيم عصابة زمان ولسه مستمر ونفسه الثورة تفشل وينزل دمعتين ويعملك دور الوطنى ودول كتير قوي بس خلاص الأقنعة شقطت وشلة الحرامية والمنتفعين هتسقط حتى لو مات مننا الوف الثورة هتكمل بينا أو بغيرنا .

الوارثــة في الحياة

2012-02-02T01:10:00.000-08:00

جت علينا فتره بقى كل شيء يورث في مصر ونلاقى بن الدكتور دكتور وبن المهندس مهندس وبن الممثل وبن الرئيس رئيس بس الحمد لله دي طلعت اونطى لولا الثورة كان زمانه هيورث أبوه عشان كده شفنا عاهات في كل المجالات وبقى معيار الوراثة بيغلب معيار الكفاءه يمكن في بداية الأمر الموضوع بيكون جذاب لكن بعد شويه بيفقد جاذبيته بعد ما نكتشف ان الوارث ليس في موهبة والده ولكن احيان كثيرة بنشوف الاب والإبن على درجة واحده من الموهبة وهناكالكثير من الأمثال وهضرب مثل في الفن مثلا عندنا فاخر فاخر وهاله فاخر سمير غانم ودنيا سمير غانم و اللمثل منسى فهمى وابنه اسكندر منسى بالنسبة للوالد منسى ابسخارون وشهرته منسى فهمى ممثل مسرحى وسينمائى مصري مولود فى قرية بنى عديات بأسيوط واحد من رواد المسرح المصرى التحق بوظايف فى المحاكم المختلطة سنه 1905 لغاية 1911 اشتغل مع الريحاني في فرقته وكما اشتغل في فرقة فاطمه رشدي اشتهر بأدوار الشر ومن أفلامه سيدة القصر وصراع في الوادي قلبي دليلى وصلاح الدين الأيوبي وسلامهفي خير وعمل ما يقرب من 40 فيلم أما بالنسبة للإبن هو اسكندر منسى ممثل أيضا اشتغل في فرقة الريحاني وله العديد من الأدوار وأشهرها مرقص أفندي في فيلم أم العروسة و30 يوم في السجن والزواج على الطريقة الحديثة والسفيرة عزيزة لعبة الست ولو كنت غنى مع بشاره واكيم وسي عمر ومن مسرحياته انا وهو وهى مع المهندس وشويكار وأعتقد لم يقل أبدا عن والده لأنه لم يستغل تلك القرابة ليفرض نفسه علينا .

زينات صدقى

2012-02-02T00:25:00.000-08:00

زدا اسم الشهرة اما اسمها الحقيقى زينب محمد سعد و هي ممثلة كوميدية مصرية. اتولدت في حي الجمرك في الأسكندرية عام 1913م وتوفت في 1978 م عملت فى بدايه حياتها منولوجست، ورقاصه هربت من عيليتها مع صاحبتها خيريه صدقى للشام وشالت اسمهاقابلت نجيب الريحاني اللى ضمها لفرقته وسماها زينات أشهر أدوارها دور العانس اللى محرومه من العريس أتجوزت مره واحده لفتره قصيرة وعاشت من غير عيلة باقى عمرها عملت مع اسماعيل ياسين عدد كبير من الأفلام والمسرحيات وكانوا ثنائي خطير مين ينسى دورهم في العتبة الخضراء وقبل وفاتها بسنتين خدت معاش استثنائي من الريس السادات كان ليها عبارات شهيره جدا في فيلم بن حميدو الوحش الكاسر الأسد الغادر انسان الغاب طويل الناب .وتعد زينات صدقى واحده من أكثر ممثلين عصرها في عدد الأفلام يعني نقول إنها كانت في منطقة اسماعيل يس كده وكان الإقبال عليها كبير والدليل العدد الضخم من الأفلام على سبيل الذكر فيلم حلاق السيدات و شارع الحب ( ترتر ) اسماعيل يس في مستشفى المجانين وفي جنينة الحيوانات و تمر حنه وحسن ومرقص وكهين وأربع بنات وظابط والملونير وغزل البنات صحيح ما نقدرش نقول أنها عملت أدوار البطولة ولكن فيه أفلام من غيرها ما تنفعش خالص لانها كانت ممثله من طراز فريد

كورة اونطى

2012-02-01T10:57:00.000-08:00

لما تشوف واحد متعصب تعرف على طول أنه متعصب للكورة انما متعصب لبلده لا . متعصب لشغله لا . هتلاقيه متعصب للكورة وبس وكل حياته كورة في كورة طيب فكرت مره وانت رايح تتفرج على ماتش أن التعصب ممكن يوديك في داهية فكرت انك تموت من متعصب اخر هو دا اللى ممكن يحصلك طاب والحل خلي روحك رياضية وأرضى بالنتيجة حتى لو كانت ضدك فكر في ولادك فكر في شبابك فكر في بلدك أنت هتموت بس هتموت وراك اسرة هل إحنا متفوقين في كل حاجه وفاضل الكورة مش معقول يعني هنبقى زي البرازيل ليه التعصب في مجتمعنا بيزيد كل يوم . بقينا نشوف تعصب ديني وسياسي وفكري وثقافى ورياضي بقينا في فوضى من التعصب ولما نركز هنلاقى الأمور دي كلها أونطى خليك وسطى في حياتك هو دا الحل .

الرجل العاشق المخلص

2012-02-01T07:35:00.000-08:00

الخيانة شيء موجود في بشر كتير واحيان كتير الزوج بيكون أونطجي عشان يعرف يعيش مع زوجته شديدة الغيرة واللى بتغير من هدومها وكتير من الحريم بتضيع حياتها بسبب غيرتها المفرطة لكن هناك في تاريخ البشر رموز للحب والوفاء والصبر والتضحية ومن هذه النماذج قصة شاه جهان الملك الهندي الذي كان يحب زوجته لدرجة أنه بنى لها مقبرة ضخمه تعد واحدة من أروع المباني المعمارية وهو تاج محل وسمى بهذا الأسم نسبة الى اسم الأميرة ممتاز محل ويوجد البناء الأسطوري في مدينة أغرا الهندية واستغرق 22 سنة عام في بنائه فهل منا في هذا اليوم مخلص كشاه جهان وهل هناك امرأة تشبه ممتاز محل حتى يحزن عليها زوجها ويخلد ذكراها أوحتى لا يتزوج بعد وفاتها قد يكون هذا الصنف من الناس موجود فالإخلاص موجود والأونطى برده موجوده في بني ادم

رائعة القذافي الكتاب الأخضر

2012-02-01T02:49:00.000-08:00

ليبيا بلد عربى أبتلى بحاكم ديكتاتور تصور انه من فصيلة هتلر وموسوليني ومن فصيلة فيدل كاسترو ولكنه ليس كذلك فهم أصحاب فكر ووجهات نظر اما هو فكان متعجرفا متكبرا فاسدا مفسدا لوطن طيلة أربع عقود كنت ساعات كتير بسأل نفسى معقول شعب ليبيا متمسك بهذا الرجل الذي لا يجيد أي حاجه غير الإستفذاذ والسخرية والتكبر لدرجة اني اعتقدت ان شعبه مثله تماما عندما كنت اقرأ مقطتفات من الكتاب الأخضر كنت أشعر أن هذا كلام فاضي والغريبه في ناس مؤمنه بيه لكن بعد ثورة ليبيا عليه ادركت اني كنت غلطان تماما في حق هذا الشعب الراجل كان أونطجي ووبتاع حركات وأصبح الكتاب الاخضر كتاب اسود بعد ان أنتهى عصرالقذافى لتشرق شمس الحرية على ليبيا .