valaimanai

நங்கநல்லூர் விஜயம்

2022-02-03T21:52:00.005+05:30

சிறு வயதில் அப்பா அடிக்கடி அழைத்துச் செல்லும் இடம் நங்கநல்லூர் ஆஞ்சநேயர் கோவில். ஆன்மிக புரிதல்கள் அவ்வளவாக இல்லாவிட்டாலும் நமக்கு கிடைக்கும் குடும்ப சுற்றுலா வாய்ப்பு என்கிற வகையில் அது ஒரு இனிய அனுபவமாகவே இருக்கும்.

நுங்கம்பாக்கத்தில் இருந்து பழவந்தாங்கல் வரை ரயில் பயணம். அதன் பின்னர் நங்கநல்லூர் வீதிகளில் நடை பயணம். ஆட்டோல போலாமா என்பதெல்லாம் அபச்சார சொல். அப்பா ஐம்பது மீட்டர் வேகமாக நடக்க அம்மா, அக்கா, அண்ணன் நான் அனைவரும் பேசி சிரித்தபடி பொறுமையாக பின் தொடர்வோம். நாங்கள் பேசி சிரிக்க சிரிக்க அப்பாவின் வேகமும் கூடும்.

இப்போது ஆலயத்தை நினைத்தாலும் ஞாபகம் வருவது விஸ்வரூப ஆஞ்சநேயர் சிலையும், தரிசனம் முடித்து திரும்புபவர்களுக்கு வழங்கப்படும் பிரசாதமும் தான். பல சமயங்களில் படைக்கப்பட்ட வடை மாலையில் இருக்கும் வடை நமக்கு வழங்கப்படும். காரமாக மிளகு மற்றும் ஏதேதோ போட்டு கரமுர என அருமையாக இருக்கும்

பல வருடங்களாக போகாத நிலையில் சில நாட்களாக அங்கு செல்ல வேண்டும் என்கிற எண்ணம் தோன்றிக் கொண்டே இருந்தது. கொரோனா கட்டுப்பாடுகள் தளர்த்தப்பட கடந்த ஞாயிற்றுக்கிழமை நண்பன் பிரசன்னாவுடன் கொளத்தூரில் இருந்து நங்கநல்லூர் புறப்பட்டோம்.

சின்ன வயதில் அப்பா வேகமாக முன் நடக்க அவரை பின் தொடர்ந்து செல்வோம். சில சமயம் இடப்புறம் திரும்பினாரா வலப்புறம் திரும்பினாரா என குழம்பி நிற்போம். இப்பொழுது கூகுள் கண்மணி காதில் இப்படி திரும்பு அப்படி திரும்பு என சொல்லிக் கொண்டே வந்ததால் 45 நிமிடத்தில் ஆலயத்தை அடைந்தோம்.

சிறு வயது நினைவுகள் சிலிர்ப்பாய் எழுந்தன. தரிசனம் முடித்து திரும்புகையில் பிரசாதமாக சர்க்கரைப் பொங்கல் கொடுத்தார்கள். வடை சுவை நாவில் நாட்டியமாட எங்காவது கவுன்டர் சேல்ஸ் இருக்கிறதா என தேடிப் பார்த்தேன் கிடைக்கவில்லை.

பல வருடங்கள் கழித்து ஆஞ்சநேயரிடம் அட்டென்டென்ஸ் போட்ட திருப்தியில் திரும்பினேன்.

மறுநாள் நடந்ததுதான் அதிசயம். 'நேற்று நீ என்னை பார்க்க வந்திருந்தல்ல.. இன்னைக்கு உன்னை நான் பார்க்க வர்றேன்' என்பது போல திங்கட்கிழமை காலை அலுவலகத்திற்கு வந்து நின்றார் ஆஞ்சநேயர்!

அதிசய மூங்கில் - விடாமுயற்சி

2021-11-29T20:21:00.002+05:30

சீனாவில் ஒரு வகை அதிசய மூங்கில் உள்ளது. ஐந்தரை வருடங்களில் 80 அடி உயரம் அளவு வளரும் இது, முதல் 5 வருடங்களில் ஒரு அடி கூட வளர்வதில்லை. ஆனால் அதற்கடுத்த 6 மாத காலத்தில் சடாரென உயர்ந்து 80 அடி உயரத்தை எட்டுகிறது.

5 வருடங்களாக ஒரு அடி கூட வளராத அந்த மூங்கில் ஆறே மாதத்தில் அவ்வளவு உயரம் எழும்புவது எப்படி? அத்தனை காலங்களும் அது வெறுமனே தூங்கிக் கொண்டிருக்கவில்லை. நிலத்திற்கடியில் ஆழமாக தனது வேர்களை விஸ்தாரமாக வளர்த்துக் கொண்டு, உறுதியான அஸ்திவாரத்தை அமைத்துக் கொள்கிறது. இதன் காரணமாக அதனால் சொற்ப காலங்களில் அவ்வளவு கம்பீரமான உயரத்தை எட்ட முடிகிறது.

இதுபோல நாமும் நமது திட்டங்களில், வேலைகளில், ஏதோ ஒரு மாபெரும் லட்சியத்தை அடைய நெடுங்காலம் சில நேரம் பயணிக்க வேண்டி வரும். உடனடி பயன்களோ பலன்களோ கிடைக்காமல் நாம் சோர்வுற்றிருப்போம். அந்நேரங்களில் இந்த அதிசய மூங்கிலை நாம் நினைவில் கொள்வோம்.

தொடர்ந்து நமது பயிற்சியை, நமது முயற்சியை பலப்படுத்திக் கொண்டு அந்த வேர்களைப் போல் விஸ்தாரமான அஸ்திவாரத்தை நமது லட்சியத்திற்கு அமைத்தால் சரியான தருணத்தில் நாம் விரும்பிய பலனும் பயனும் அந்த 80 அடி மூங்கில் போல் எழுந்து நிற்கும்.

தி ஷசாங்க் ரெடம்ப்ஷன்

2020-04-07T18:59:00.000+05:30

கொரோனா எனும் கிருமியால் நவீன உலகம் அனுபவித்திராத சூழ்நிலை. யாவரும் வீட்டிற்குள். வேலைகள், தொழில்கள் முடக்கம். வரும் மாதங்கள், பொருளாதரம் குறித்த கவலை. கண்ணுக்கெட்டிய தூரம் வரை தெரியாத நம்பிக்கை ஒளி. இந்நிலையில் நம்மை நாமே ரீசார்ஜ் செய்துக் கொள்ள, எதிர்காலம் குறித்த நம் நம்பிக்கையை புதுப்பித்துக் கொள்ள ஒரு எளிய வழி இருக்கிறது. ஒரு திரைப்படம்!

தி ஷசாங்க் ரெடம்ப்ஷன் (The Shawshank Redemption)

உலக திரைப்படங்கள் குறித்த தகவல்களை தரும் IMDB.com இல் உலக அளவில் ரசிகர்களது வாக்குகளின்படி டாப் ரேட்டட் திரைப்படங்களில் நம்பர் 1 இடத்தை பிடித்து நிற்கிறது ஷசாங்க் ரெடம்ப்ஷன். வெளிவந்து 25 ஆண்டுகள் கடந்த பின்னரும் ரசிகர்களை ஆட்கொள்ள அப்படி என்னதான் இருக்கிறது இத்திரைப்படத்தில்...?

நாம் எவ்வாறான சூழ்நிலையில் சிக்கி சிறைபட்டு இருந்தாலும், ஒரு நாள் எல்லாம் நாம் விரும்பியபடி மாறும் என்கிற நம்பிக்கை கொண்டிருந்தால், முயற்சி செய்து கொண்டேயிருந்தால், நம் நிலை நாம் விரும்பியது போல் ஒரு நாள் நிச்சயம் மாறும். மாற்ற முடியும். நாம் கொண்ட நம்பிக்கை வீண் போகாது என்பதே இத்திரைப்படத்தின் சாராம்சம்.

கதைக் களம் :

தனது மனைவி மற்றும் அவரது காதலனை கொன்றதாக இரட்டை ஆயுள் தண்டனையுடன் ஷசாங்க் சிறைச்சாலைக்கு வருகிறார் வங்கி உயர் அதிகாரி ஆன்டி டுப்ரென்ஸ். வார்டன் நார்ட்டன் மற்றும் கேப்டன் ஹேட்லியின் இரும்புப் பிடியில் கைதிகள் அவதியுறும் சிறைச்சாலை அது.

இங்கு ஏற்கனவே கைதியாக இருப்பவர் ரெட். வெளியிலிருந்து சிகரெட், மதுபானம் மற்றும் சிற்சிறிய பொருட்களை வரவழைத்து உள்ளிருக்கும் கைதிகளுக்கு தருவிப்பதில் வல்லவர். ஆன்டியும் ரெட்டும் விரைவில் நண்பர்களாகிவிடுகின்றனர். தொடக்கத்தில் சிறையில் இருக்கும் மற்றொரு கும்பல் மூலம் ஆன்டிக்கு சுயபாலின துன்புறுத்தல்கள் ஏற்படுகிறது.

ஒருமுறை கேப்டன் ஹேட்லிக்கு ஏற்படும் நிதி கையாளுதல் பிரச்சனையை தக்க யோசனை தந்து உதவி புரிகிறார் ஆன்டி. இதன்மூலம் வார்டனின் பார்வை ஆன்டியின் மீது திரும்புகிறது.

சிறைச்சாலை, கைதிகளின் உழைப்பை பயன்படுத்தியும் ஆன்டியின் நிதி நிர்வாகத் திறனின் உதவியினாலும் வார்டன் ஊழல்கள் புரிந்து பெரும் பணம் ஈட்ட துவங்குகிறார். இதற்கு மாற்றாக ஆன்டி சிறைக்குள் இருக்கும் நூலகத்தை விரிவாக்கவும், கைதிகளுக்கு கல்வி பயிற்றுவிக்கவும் வார்டன் தடையாக நிற்பதில்லை.

19 வருடங்கள் சிறைத் தண்டனை அனுபவித்த நிலையில் சிறைக்கு வரும் மற்றொரு கைதி மூலமாக ஆன்டி குற்றமற்றவர் எனத் தெரிய வருகிறது. இதன் மூலம் தன்னை விடுவிக்க வேண்டும் என ஆன்டி வார்டனின் கேட்கும் நிலையில் தனது ஊழல் குற்றங்கள் வெளியே கசிந்துவிடும் என்பதால் வார்டன் கடுமையாக மறுக்கிறார்.

ஏமாற்றமும் விரக்தியுமாய் காணப்படும் ஆன்டி ரெட்டிடம் வினோதமாக பேசுகிறார். நம்பிக்கையின் சக்தி குறித்தும் விடுதலைக்கு தான் தகுதியானவன் எனவும் கூறுகிறார். என்றாவது ரெட் விடுதலையானால் ஒரு செயலை செய்ய வேண்டும் என்று கோருகிறார்.

ஆன்டியின் இத்தகைய பேச்சுக்களினால் கவலையுறும் ரெட் மற்றும் நண்பர்கள் குழாம் அவர் தற்கொலை செய்து கொள்வாரோ எனப் பயப்படுகிறது. அன்றைய நீண்ட இரவை கடினமாக கழிக்கிறார் ரெட்.

மறுநாள் காலை ஆன்டியின் செயல் அந்த சிறைச்சாலையையே திகைப்புக்குள்ளாக்குகிறது. அங்கிருந்து நாம் எதிர்பாராத திசையில் பயணிக்கும் திரைப்படத்தை நீங்களே பார்த்து ரசியுங்கள்.

ஆன்டியின் முடிவு என்ன, அத்தனை வருடங்களும் தனது புத்திக் கூர்மையால் சிறைக்குள்ளேயே அவர் செய்தது என்ன, வார்டனின் முடிவென்ன, ரெட் இறுதியாக ஆன்டி சொன்ன நம்பிக்கையின் வீர்யத்தை உணர்ந்தாரா என்பது ஆனந்த கண்ணீரை வரவழைக்கும் மீதிக்கதை.

இந்தத் திரைப்படத்தை பார்த்து முடிக்கையில் ஏற்படுத்தும் பாசிட்டிவ்வான பாதிப்பு அளவிட முடியாதது. மேலோட்டமாக மட்டுமே இப்பதிவில் கதை குறிப்பிடப்பட்டுள்ளது. படத்தின் கடைசி அரை மணி நேரம் நமக்கு தரும் உத்வேகம், எதிர்பாராத கிளைமேக்ஸ், ஆழமான வசனங்கள், கைதேர்ந்த கலைஞர்களின் நடிப்பு என நம் மனதை சலவை செய்து புத்துணர்வாக்கி விடும் வல்லமை கொண்டது ஷசாங்க் ரெடம்ப்ஷன்.

இன்றும் இத்திரைப்படம் நம்பர் 1 இடத்தில் இருப்பதற்கு காரணம், இது சொல்லும் சேதி.. அது..

"நம்பிக்கை அளவில்லாத சக்தி கொண்டது.... என்றும் வீண் போகாது."

சில சிறைச்சாலை வன்முறைக் காட்சிகள், டைட்டிலில் சில நொடிகள் வரும் காட்சிகள் மட்டும் சிறியவர்களுக்கு ஏதுவானது அல்ல.

- சுகுமார் சுவாமிநாதன், வலைமனை

Tags : The Shawshank Redemption in Tamil, ஷஷாங்க் ரெடம்ப்ஷன், ஷசாங் ரிடெம்ப்ஷன், ஷசாங் ரெடம்ஷன்

உங்கள் வீட்டிற்குள் வரும் 3டி மிருகங்கள்

2020-03-28T22:00:00.002+05:30

வீட்டில் இருக்க வேண்டிய இந்த சூழ்நிலையில் நேரத்தை உபயோகமாக செலவிட உள்ள வழிமுறைகளை தேடி வரும் பெற்றோர்களுக்கு வரப்பிரசதமாக அமைந்துள்ளது கூகுள் 3டி அனிமல்ஸ் தொழில்நுட்பம்.

இதில் குறிப்பிட்ட சில மிருகங்களை உங்கள் மொபைல் மூலம் உங்கள் வீட்டிலேயே காணலாம், அதன் அசைவுகளை, ஒலிகளை உணரலாம், செல்பி எடுத்துக் கொள்ளலாம்.

கீழே கொடுக்கப்பட்டுள்ள பட்டியலில் உள்ள மிருகங்களில் ஏதோ ஒரு மிருகத்தின் பெயரை கூகுளில் தேடுங்கள். உதாரணத்திற்கு படத்தில் குறிப்பிடப்பட்டுள்ளதைப் போல 'Panda' என கூகுளில் தேடவும்.

வரும் முடிவுகளில் 'Meet a life-sized giant panda up close' என்கிற வாசகம் வரும். அதன் அருகில் 'View in 3D' ஆப்ஷனை கிளிக் செய்யுங்கள். பின்வரும் அடுத்த ஸ்கிரீனில் பாண்டா மிருகம் 3டியில் தெரியும். மீண்டும் அதனருகே வரும்
'View in your space' எனும் ஆப்ஷனை கிளிக் செய்தால் உங்கள் மொபைல் கேமரா இயங்கத் துவங்கும்.

அப்போது வரும் குறிப்பைப் போல, உங்கள் கேமராவை தரையை நோக்கி பிடித்து லேசாக அங்கும் இங்கும் அசையுங்கள். சிறிது நொடிகளில் இப்போது உங்கள் வீட்டிற்குள்ளேயே முப்பரிமாணத்தில் பாண்டா அமர்ந்து மூங்கில் கடித்து சாப்பிட்டு ஒலியெழுப்ப ஆரம்பிக்கும்.

தற்போதைக்கு சிங்கம், சிறுத்தை, ஷார்க், வாத்து, ஆடு, பூனை, கழுகு, பென்குயின், பாம்பு, புலி போன்ற மிருகங்களை இந்த தொழில்நுட்பத்தில் காணலாம்.

Google 3D Animals - Augmented Reality - Article by Valaimanai.in

பேட்ட & விஸ்வாசம்

2019-01-11T20:48:00.000+05:30

விஸ்வாசம்

எத்தனை வருடங்கள் ஆயிற்று இப்படி நடிப்பில் இறங்கி அடிக்கும் அஜித்தைப் பார்த்து. ரசிகர்களுக்கு முதல் பாதியே நல்ல விருந்து. பில்ட் அப்கள், ஊரே தரும் மரியாதை என வழக்கமான டெம்ப்ளேட்டில் படம் துவங்குகிறதே என நினைத்தாலும், பதினைந்து நிமிடங்களில் பிளாஷ் பேக் அஜித் முகம் காட்டிய பின் ஆசுவாசப்படுத்துகிறார்.

அலப்பறையான அஜித். வாய்ஸ் மாடுலேஷேன், மேனரிஸம்ஸ் என சான்ட்விச், பிஸ்ஸா போல வறட்சியாக நடித்துக் கொண்டிருந்தவர், பல வருடங்களுக்குப் பிறகு இந்தப் படத்தில் ஒரு தமிழ்நாடு மீல்ஸ் பார்சல் சொல்கிறார்.

முதல் பாதியில் நயன்தாரா, லொகேஷன்ஸ், காஸ்ட்யூம்ஸ், கலர் டோன்ஸ் என கண்களுக்கு குளிர்ச்சியாக இருக்கிறது. இரண்டாம் பாதி ஓவர் டூ பாம்பே ஆகி தந்தை மகள் பாசம், குழந்தை வளர்ப்பு என நல்ல பேமிலி டிராமாவாக முடிகிறது.

தன்னை மட்டுமே முன்னிறுத்திக் கொண்டு மாஸ் மசாலாவாக இல்லாமல் நல்ல கருத்தை வலியுறுத்தும் விதத்தில் இதுபோன்ற கதைக்களனில் நடித்த அஜித்தும், இதை வடிவமைத்த சிவாவும் உண்மையிலேயே பாராட்டுக்குரியவர்கள்.

தம்பி ராமையா, ரோபோ சங்கர் போன்றவர்களின் அபத்தமான மேக்கப், விவேக் உள்ளிட்டு அனைவரின் மொக்கை காமெடி, அடிக்கடி வரும் துரத்தல், அடிதடி என படத்தில் சிலபல குறைகள் உண்டு. ஆனாலும் அவை இன்னமும் கொஞ்சம் மெனக்கெட்டிருக்கலாம் எனும் வகையே தவிர, அய்யோ சாமி ஆளை விடுங்கடா எனும் வகையல்ல.

பேமிலி ஆடியன்ஸ் தவிர்த்து பொது ரசிகர்களுக்கு இந்தப் படத்தில் ஒன்றமுடியாமால் போகலாம். ஆனால் அஜித்தை நீண்ட நாட்களுக்குப் பிறகு இப்படி துள்ளலாக பார்க்கும் வகையில் தல ரசிகர்களுக்கு பெரும் விருந்து இந்த விஸ்வாசம்.

பேட்ட!

ஃபேன் மேட் டிரைலர், ஃபேன் மேட் போஸ்டர் பார்த்திருப்போம். இது ஃபேன் மேட் ஃபீச்சர் பிலிம். மொத்த படத்தையும் தலைவர் ரசிகராய் இயக்கி இருக்கிறார் கார்த்திக் சுப்பராஜ்.

டைட்டிலில் துவங்கி எந்தெந்த கோணங்களில், விதங்களில், ஒலியில் ரஜினியை இதற்கு முன்னர் ரசித்தோமோ அதையெல்லாம் எடுத்துக் கொண்டு முதல் பாதி முழுவதும் காளியாட்டம் ஆடியிருக்கிறார் கார்த்திக்.

வசனம், காட்சியமைப்புகள், லொக்கேஷன்ஸ், நடிகர்கள் என முதல் பாதி ஹைஸ்பீடில் பறக்கிறது. பாடல்கள், பின்னணி இசை என அனிருத்தும் தன் பங்கிற்கு ஆட்டம் ஆடுகிறார். சிம்ரன் எபிஸோட் எல்லாம் இன்னும் கொஞ்சம் நீண்டிருக்கலாம் எனும் ரகம்.

முதல் பாதி தந்த பரவசத்தை இரண்டாம் பாதி பதம் பார்க்கிறது. ரொம்ப இழுவையான காட்சியமைப்புகள், அதிகப்படியான ஆக்ஷன் காரம் என கொஞ்சம் பொறுமையை சோதித்து பிறகு முடியும் தருவாயில் சின்ன டிவிஸ்ட் அப்புறம் ஒரு குட்டிக் கதை டிவிஸ்ட் என சின்ன ஆறுதலோடு முடிகிறது படம்.

நவாசுதீன், சிம்ரன், விஜய் சேதுபதி அருமை. பாபி சிம்ஹா, சசிக்குமார் பரவாயில்லை. திரிஷாவெல்லாம் அநியாயம்.

இரண்டாம் பாதியில் பிளாஷ் பேக் தவிர்த்து வெறும் துரத்தல் பழிவாங்கல் என வெகு நேரம் ஆடாமல் அசையாமல் செல்லும் திரைக்கதையில் கொஞ்சம் கவனம் செலுத்தி இருந்தால் நன்றாக இருந்திருக்கும்.

முதல் பாதி மாஸ். இரண்டாம் பாதி மரணம்!

Viswasam, Petta, Review, Valaimanai

இறைவி - புரிந்ததும் புரியாததும்

2016-06-03T21:00:00.001+05:30

"ஆமா.. படம் போனீங்களே எப்படி இருந்துச்சு.. நல்லா இல்லையா...?"

"அப்படிலாம் ஒண்ணும் இல்லையே ஏன் கேட்குற.."

"இல்ல.. வழக்கமா படத்துக்கு போயிட்டு வந்தா.. படம் நல்லா இருந்தா தங்கு தங்குன்னு குதிப்பீங்க.. மொக்கையா இருந்தா அமைதியா இருப்பீங்க.. இப்ப வந்து பத்து நிமிஷமா வாயே திறக்கலையே அதான் கேட்டேன்."

"ஹே.. சே... சே.. அப்படி சொல்றியா,,, படம் மொக்கைலாம் இல்ல.. நல்ல கதையுள்ள படமே வர்றது இல்லன்னு சொல்றாங்கல்ல.. அதுக்கு நல்ல துவக்கமா.. பேய், காமெடி டெம்ப்ளேட் படங்களில் இருந்து மாறுதலா ஹெவியா ஒரு நல்ல டிராமா மூவியா இறைவியை எடுத்துக்கலாம்.."

"அப்போ ரொம்ப நல்லா இருக்கா,,"

"அதுக்குன்னு அப்படியும் சொல்லிட முடியாது... அங்கங்க கொஞ்சம் ஸ்லோ, வயலன்ஸ்ன்னு சில மைனஸ்களும் இருக்கு.."

"அப்போ ஆவரேஜா.. ஒருவாட்டி பார்க்கலாம் வகை படமா.."

"நோ.. நோ.. இந்த படத்தை விமர்சனம்லாம் பண்ண மனசு வரலை... இது ஒரு அனுபவம்.. நல்ல பவர்புல் காஸ்டிங், ஸ்டிராங்கான கதை, கொஞ்சம் பொறுமையா உட்கார்ந்து பார்க்கிற மனநிலை இருந்தா நல்ல ரசனையான புராடக்ட் இந்த படம். பொதுவா நல்லா இருக்குன்னும் சொல்ல முடியாமா மோசம்னும் சொல்ல முடியாத வகை படங்களுக்கு வேணா ஆவரேஜ், ஒன் டைம் வாட்ச்னு அடிச்சிவிடலாம்... ஆனா இந்த படத்தை கூட்டத்தோட கூட்டமா அப்படி சொல்ல முடியாது."

"வேற எப்படி சொல்லலாம்..?"

"அதான் புரியாம பத்து நிமிஷமா யோசிட்டு இருக்கேன்!"

"அடப்பாவமே... அப்போ கதையையாச்சும் சொல்லுங்க எனக்காச்சும் புரியுதா பார்ப்போம்.."

"அதை சொல்லக் கூடாதுன்னு சொல்லிட்டாரும்மா.."

"யாரு..??"

"கார்த்திக் சுப்புராஜ்"

"அதாரு.,..??"

"படத்தோட டைரக்டர்"

"உங்கக்கிட்ட எப்போ சொன்னாரு... உங்க பேஸ்புக் பிரண்டாக்கும்.."

"இதென்னடா சோதனை.. பொதுவா பிரஸ் நோட்ல சொல்லியிருக்காரும்மா.."

"யாரோ எவரோ பிரஸ்ல சொன்னதுலாம் ஞாபகம் இருக்கு.. படம் முடிஞ்சு நான் என்னென்ன வாங்கிட்டு வரச்சொன்னேன்.. அதுல எத்தனை வாங்கிட்டு வந்து இருக்கீங்க பாருங்க.. இத்தனைக்கும் காலையில கழுதை மாதிரி கத்தி கத்தி அனுப்பினேன்... அஞ்சு பொருள் சொன்னா.. அதுல நாலு பொருள் காணும்.. "

"ஐயாம் வெரி சாரிம்மா.. இறைவி பார்த்தா ஒரு வாரமாச்சும் மனசு பாதிக்கும்னு சொன்னாங்க.. அதான் படம் தந்த பாதிப்புல மறந்துட்டேன் போல..."

"யாரு சொன்னாங்க.."

"அவங்களே மேக்கிங்-வெப் சீரிஸ்ல சொல்லிக்கிட்டாங்க..."

"ஏங்க படுத்துறீங்க.. எல்லா படமும் பார்க்க மாட்டேன்.. இது சயின்ஸ் பிக்ஷன் படம் சூர்யா நடிச்சது.. இது ஜிகர்தண்டா எடுத்தவரு படம்.. இது அப்படியாக்கும.. ஆணை பூனைன்னு ஒவ்வொரு படத்துக்கும் என்னத்தையாவது சொல்லிட்டு போக வேண்டியது.. சினிமான்னா எல்லாம் ஞாபகம் இருக்கு.. நான் சொல்ற பொருள் வாங்கிட்டு வர மட்டும் மறந்து போயிடுது இல்ல... சொல்றதை காதுல வாங்குறதில்லை.. என்ன பார்த்தா எப்படித்தான் தெரியுதோ.. ஒரு மனுஷியாவே மதிக்கிறது இல்ல.."

"அய்யோ.. இப்ப புரிஞ்சிடுச்சு.... இறைவிலயும் இதைத்தான்..."

"அடிங்ங்ங்ங்ங்....."

இந்தியா - ஆஸ்திரேலியா | லைவ் பிளாக்கிங்

2015-03-26T11:12:00.000+05:30

5:32 pm

சோர்ந்து போகவும் வசை பாடவும் இது 2007க்கு முந்தைய காலகட்டம் அல்ல. கோப்பைகள் எங்களிடம் நிறைந்திருக்கிறது. வெற்றி எங்களுக்கு பழக்கமாகி இருக்கிறது. ஒருவர் அவுட் ஆனதும் மற்றவர்கள் வரிசையாய் பின் செல்லும் தலைமுறையில் பிறந்து அந்த Fear of Failure மனப்பான்மையையே பார்த்து வளர்ந்த எனக்கு கடந்த பத்தாண்டுகளாய் யாரையும் எதிர்கொண்டு கடைசிவரை போராடும் தன்னம்பிக்கையை தோனி & கோ கற்றுத்தந்திருக்கிறார்கள். Respect, Salute, Won hearts, Legend போன்ற அலங்கார வார்த்தைகளால் தோனியின் தலைமைப் பண்பினையும் ஆற்றலையும் வர்ணிக்க வேண்டியதில்லை. சிம்பிளாக Leader என்றே சொல்லலாம். அந்த சொல்லின் அப்பட்டமான அர்த்தமாய் விளங்குபவர் அவர். இல்லை 'தல' என்றும் சொல்லலாம். இன்னும் கொஞ்சம் மெர்சலாகவும் இருக்கும்.

நாள் முழுவதும் இணைந்திருந்தவர்களுக்கு மனமார்ந்த நன்றி!

4:52 pm

ஏற்கனவே ICC ன்னா Indian Cricket Council ங்கிறாங்க. அப்புறம் நாங்களே டோர்னமென்ட் நடத்தி எங்களுக்கே கப் தந்துக்கிட்டோம்ங்கிற அவப்பெயர் எதுக்குப்பா... ? # ஏத்தி விட்டு அழகு பார்க்கிறவன்டா இந்த தமிழ்செல்வம்.
முத்தமிழ் கவிஞன் நான். தமிழ்த்தாயின் புதல்வன் நான்

4:42 pm

இறைவா.. குவார்ட்டர் பைனல்ஸ் தாண்ட முடியாமல் வாட்டர் குடித்துவிட்டு இப்பொழுது கலாய்க்கும் ஃபாரினர்ஸ்ஸை நாங்கள் பார்த்துக்கொள்கிறோம். ஆனால் யுவராஜ் சிங் இல்லை, சச்சின் இல்லை என புலம்பும் இந்தியர்களிடம் இருந்து எங்களை காப்பாற்று.

4:36 pm

விடு தல. 2011 வோர்ல்ட் கப்பே ஷெல்ப்லதான இருக்கு. அதை எடுத்து பாப்பாக்கிட்ட கொடுத்திட்டா போச்சு .. அவ்வ்வ்..

4:22 pm

அட கோஹ்லி, ஜடேஜா எல்லாரையும் விடுங்கப்பா. ஒரு பெரிய மனுஷன் இன்னைக்கும் பொறுப்பில்லாம உட்கார்ந்து எம்.டி.எஸ் ஹோம்ஸ்பாட் வித்துட்டு இருக்கலாமா.. என்ன மாமா இப்படி பண்றீங்களே மாமா

3:58 pm

ஒருவேளை இப்படி இருக்குமோ. இதுவரை செஞ்சுரி அடிக்காதது ஜடேஜாதான். ஒருவேளை அப்படி இருக்குமோ...?

3:05 pm

தல வந்துட்டாரு. வொன் ஹார்ட்ஸ், டயமன்ட், ஸ்பேட், கிளாவர்லாம் வேணாம் கேமையே வின் பண்ணிடு தல.

3:01 pm

அப்பாடா ரெய்னா அவுட்டு. ஹே சீக்கிரம் அந்த ஏசி விளம்பரத்தை போடுங்கப்பா. டெல்லி கணேஷ் என்னா அழகா ஹிந்தி பேசுராரு. பார்த்துட்டே இருக்கலாம் போல இருக்கு.

2:45 pm

இந்த ஸ்டார்க் பையன் ஏதோ வம்பிழுக்குறான் போல. எங்களுக்கென்ன வந்துச்சு. சப் டைட்டில் போடலைன்னா எங்க ஆளுக்கு புரியாதே.. புரியாதே.. ஜாலி.. ஜாலி..

2:41 pm

ரோஹித்தும் போச்சா. இட்ஸ் ஆல் இன் தி கேம். இன்னைக்கு ரெய்னா கையாலதான் ரத்தம் பார்க்கனும்னு இருக்காங்க போல ஆஸி.

2:27 pm

ரைட்டு விடு. ஒரு யூத்தா இதை நாம புரிஞ்சிக்க முடியும். ஃபிகர் பஸ் ஸ்டாப்ல வெயிட் பண்ணிட்டு இருந்தா ஒரு உண்மையான லவ்வர் பாய் எப்படிய்யா கிளாஸ்ல கான்சன்ட்ரேட் பண்ண முடியும்? நீங்க கௌம்புங்க தம்பி. இந்த ஸ்கோர் எல்லாம் ரஹானேவே முடிச்சிடுவாப்ல.

2:25 pm

ஹே.. ஜான்ஸ் என்னய்யா 'மும்பை இந்தியன்ஸ் ரூட்டு தல'யவே முறைக்கிற.. பிளேயிங் லெவன்ல இருக்க மாட்ட தெரியும்ல.

2:20 pm

எங்கூர்ல குடும்பத்தோட பைக்ல போனா டிராபிக் போலீஸ் கூட நிறுத்த மாட்டாங்க. ஆகவே யெல்லோ பாய்ஸ் கோஹ்லி அண்ணன் பேமிலியோட வந்திருக்காரு பார்த்து டீசன்ட்டா நடந்துக்குங்க.

1:55 pm

ஆல் ஆஸ்தி பாய்ஸ்,
ப்ளீஸ் நோட், இதுக்கு பேருதான் மௌனமா விளையாடியே வெறுப்பேத்துறது #Indian version of sledging

1:25 pm

அந்த குழந்தை முகத்தை பார்த்தா இன்னைக்கு சிங்கிளா 300 அடிக்கிற மூட்ல இருக்கிறாப்ல தெரியுது. எதுக்கும் தவான் நீங்க ஒரு 20 ரன் அடிங்க போதும்.

1:18 pm

நீங்க ஆஸ்திரேலியா பிள்ளையா இருக்கலாம். ஆனா எங்க தவான் ஆஸியோட மாப்பிள்ளைடா. பிள்ளைங்க இருந்தா சோறுதான் போடுவாங்க. ஆனா மாப்பிள்ளை வந்தா பிரியாணியே போடுவாங்க. மைன்ட் இட்.

1:13 pm

ஆக்சுவலா 2003 பைனல்ஸ்ல தோத்ததுக்கு பழிவாங்குற மாதிரி 359 அடிக்க விட்டு ஜெயிக்கிறதுதான் தோனியோட பிளான். ஆனா.. இந்த ஆஸி பசங்க அதை புரிஞ்சுக்காம நடுவுல நாலஞ்சு விக்கெட் விட்டாய்ங்கே. # பன்னி யெல்லா பெல்லோஸ்

1:00 pm

இந்தியாவின் சக்சஸ்புல் கேப்டன்னா சொல்றீங்கன்னு இந்த கங்குலி சிரிப்பை அடக்கிக்கிட்டே கருத்து சொல்றாப்புல. மேட்ச் இன்னும் முடியலை தாதாஜி. வெய்ட் அன்ட் சீ.

12:42 pm

லேடீஸ்னா கொஞ்சம் மேக்கப்லாம் போட்டுட்டு கௌம்பி வர்ற்துக்கு நேரம் ஆகும்தானே.. அதுக்காக அப்செட் ஆகி கேட்ச்சை விட்டியே ப்ரோ..

12:36 pm

நீ என்னய்யா 'ஜான்'சன்னு பேர் வச்சிக்கிட்டு முழம் சைஸுக்கு அடிக்கிற. செல்லாது செல்லாது.

12:34 pm

'வாட்'டுக்கும் வச்சாங்கல 'டாட்'டு. தம்பி அடுத்த ஆளை சீக்கிரம் அனுப்பு. ரெண்டு ஓவர்ல மிச்ச பசங்களையும் காலி பண்ணாதான் எங்களுக்கு ஒரு ஜாப் சாட்டிஸ்பேக்ஷன் வரும்.

12:24 pm

மஞ்ச சொக்கா போட்னு வன்ட்டா பெரிய கோல்ட்னு நெனப்பா.. தோ பாரு போல்டு.. கௌம்பு!

12:17 pm

நீங்க 4 அடிங்க இல்ல 6 தான் அடிங்க. ஆனா தோனி இருக்கிறவரை உங்களுக்கு 7.5 தான்டா...

12:00 noon

என்னய்யா கிளார்க்கு நீ? ஒரு டி.என்.பி.எஸ்.சி எக்ஸாம் கூட எழுதலையாமே? அதான் எங்க இருநூறு தளபதி ரோஹித்துக்கு கோவம் வந்து உன்னை டெர்மினேட் பண்ணிட்டாரு.

11:53 am

அவுட்டுக்கு இந்த அம்பயர் அங்கிள்ஸ் கையை தூக்க மாட்றாங்க. அதான் அவங்க கையில ஏதாச்சும் சுளுக்கா இல்லை நல்லா வொர்க் ஆகுதான்னு அப்பப்போ நம்ம பாய்ஸ் பவுன்சர் போட்டு டெஸ்ட் பண்றாங்க.

11:52 am

சர் ஜடேஜா சிரிக்க ஆரம்பிச்சிட்டாரு. அப்படின்னா ஆஸி பாய்ஸ் இன்னைக்கு நீங்க சிரிப்பா சிரிக்க போறீங்கன்னு அர்த்தம்.

11:48 am

இவ்ளோ நேரம் கரன்ட் கம்பத்துல கட்டி வச்சு என் தலைவனை அடிச்சீங்களடா.. இப்போ பாரு அவரு கோவம் வந்து 'உள்ளே போ'ன்னு ஒவ்வொருத்தனையா அனுப்ப ஆரம்பிச்சிட்டாரு.

11:40 am

இது IndvsAus இல்லைடா.. AusvsAshwin ன்னு எல்லாம் இரண்டு நாளா அலப்பறைய கௌப்பி விட்டவங்களுக்கு ஒரு விக்கெட் ஆச்சும் எடுத்து பெருமை செஞ்சுட்டீங்க அஷ்வின் .. பெருமை செஞ்சுட்டீங்க

11:30 am

தோனி இப்போ 'பீசு பீசா கிழிக்கும்போதும் இயேசு போல பொறுமை பாரு' மொமன்ட்ல இருக்காரு.. பேட் பண்ணும் போது பாருங்க.. பைப்பை பிடுங்கி அடிக்கப் போறாரு தல.
#பாட்ஷாடா... #தோனிடா..

10:59 am

இவங்க வேற கமெண்டரியில தோனி வாயை அசைச்சா கூட ஏதோ வியூகம் பண்றாருங்கிறாங்க. அது வியூகம் இல்லீங்க.. சிவிங்கம்.

10:50 am

விக்கெட் போகலைன்னு லீவை கேன்சல் பண்ணிட்டு மக்கள் மறுபடி ஆபிஸ் கிளம்புறாங்கன்னு தகவல் வருது. இப்போ ஸ்கோர் விடலைன்னா அப்புறம் ரோஹித் எப்படி 200 அடிக்கிறது, சின்ன தல கோஹ்லி எப்படி 100 அடிக்கிறது.. இவ்ளோ தூரம் பறந்து வந்திருக்கிற சின்ன அண்ணி டிஸ்ஸப்பாய்ன்ட் ஆயிட மாட்டாங்க..? இதுவும் ஒரு கேம் பிளானிங் மக்களே..

10:20 am

பிறந்த குழந்தைக்கு ஃபாரின்ல இருந்து பொம்மை வாங்கிட்டு வர்றவன் தகப்பன். ஆனா வோர்ல்ட் கப்பையே வாங்கிட்டு போறவன்தான் என் தலைவன். ‪#‎தலதோனிடா‬ ‪#‎அண்ணிசாக்ஷிடா‬‪#‎குட்டிபாப்பாடா‬

10:18 am

பீல்டிங் நிக்க வைச்சா 'இன்னும் அவங்க வரலியே'ன்னு தேடிக்கிட்டு இருக்காப்ல கோஹ்லி. அதான் தல அவரை கூப்ட்டு ஒரு ஓவர் கொடுத்து கேமை கான்சென்ட்ரேட் பண்ண வச்சாரு. என்னா ஐடியா தல. சான்ஸே இல்ல தல. மெர்சல் தல.

#IndvsAus | Live Blogging | valaimanai

வலைமனை | ஃபீலிங்ஸ் 25 02 15

2015-02-25T13:33:00.006+05:30

இதோ இன்னுமொரு உலகக்கோப்பை. ஆனால் 96ல் பப்பிள் கம் ஸ்டிக்கரையோ 99ல் பிரிட்டானியா பிஸ்கெட் பாக்கெட்டுகளையே சேர்த்து வைத்து கிரிக்கெட் பார்த்த ஆர்வம் இப்பொழுது இல்லை.

ஒன்று வருடா வருடம் ஆடித்திருவிழா மாதிரி ஐ.சி.சி ஏதோவொரு கோப்பையை வைத்து கல்லா கட்டி கரகாட்டம் ஆடத்துவங்கிவிட்டது காரணமாக இருக்கலாம். அல்லது வயதாவதாலும் இருக்கலாம். :)

டெக்கரேஷனுக்கு தூவும் கொத்தமல்லி தழை போல எப்பொழுதும் வந்து போகும் டெஸ்ட் அந்தஸ்து இல்லாத அணிகள் பயமுறுத்துவது இந்த உலகக் கோப்பையின் ஹைலைட். ஜிம்முக்கு சென்று வந்தது போல் ஜிம்பாப்வே இதுவரை விளையாடிய மூன்று போட்டிகளிலும் 275க்கு மேல் அடித்திருக்கிறார்கள். போன உலகக் கோப்பையிலேயே ரவுடியாக ஜீப்பில் ஏறி விட்ட அயர்லாந்து இம்முறை வெஸ்ட் இன்டீஸ் முகத்திலேயே மார்க் போட்டுவிட்டார்கள். ஆப்கானிஸ்தானும் பிளேடை மென்று வாயில் வைத்தபடி யார் மேல் துப்பலாம் என காத்திருக்கிறது. ஆக மொத்தம் ஆரோக்யமான போட்டித் தொடர் இந்த 2015 உலகக் கோப்பை.

•••

கோலி அளவிற்கோ தவான் அளவிற்கோ தோனி ஆடுவதில்லை என்கிறார்கள். அவங்களுக்கெல்லாம் ஒண்ணு சொல்லிக்கிறேன். 'தல'ன்னு ஃபார்ம் ஆயிட்டா.. நாம ஆட வேணாம்.. விராட் கோலியவோ , அருண் விஜய்யவோ ஆட விட்டு நின்னு அழகு பார்த்தா போதும். :)

•••

ஐ, இசை, என்னை அறிந்தால், அனேகன் என வாரா வாரம் முதல் காட்சிக்கு சென்ற சாதனையை விட்டுவிட வேண்டாம் என கடந்த வெள்ளியன்று புக்கிங் சைட்டை ஒப்பன் செய்தால் புதிய ரிலீஸ் 'சண்டமாருதம்'.

120 ரூவாய் கொடுப்பது கூட ஓ.கே. ஆனால் சரத்குமார் படத்திற்கு பார்க்கிங் காசு ரூ.100 கொடுத்தால் படம் பார்க்கும் பொழுது மனசாட்சி மவுனமாக இருக்காது என்பதால் அப்படியே சைட்டை குளோஸ் செய்துவிட்டேன்.

•••

சின்ன வயதில் சர்க்கஸ் பார்த்தது. கடந்த வாரம் சென்றிருந்தோம். சென்டிரல் ரயில் நிலையம் அருகே மூர் மார்கெட் திடலில் ஒரு மெகா சைஸ் டென்ட் அடித்து நடத்துகிறார்கள். முன்பு போல் மிருகங்கள் என எதுவுமே இல்லை. எல்லாமே மனிதர்களின் சாகசம்தான்.

டிக்கெட் விலை ரூ.100, ரூ.200, ரூ.300 என இருந்தது. உள்ளே செல்லும் பொழுது அது கொஞ்சம் அதிகமாய்த் தெரிந்தாலும் நிகழ்ச்சி முடிவில் அத்தனை கலைஞர்கள், அமைப்பு, பொருட்கள் என இந்த சினிமா-சீரியல்-ஐபிஎல் காலத்தில் இவ்வளவு கட்டணத்தில் இந்த கலையை பராமரித்து நடத்துவதே பெரிய விஷயம் போல் இருந்தது.

கழிப்பறைகள் சென்னை புத்தக கண்காட்சி தரத்தில் இருக்கின்றன என்பதையும் இங்கே குறிப்பிட்டாக வேண்டும். :)

குழந்தைகள் மற்றும் சிறுவர்களுக்காக புரமோட் செய்யப்படும் இந்த நிகழ்ச்சியில் சாகசம் செய்யும் வட, வடகிழக்கு மாநில பெண்களின் சின்ன சின்ன ஆடைகள் ஒன்றுதான் நெருடல்.

•••

இந்த எதிர்வினையை தோழிகள், சகோதரிகள் என பல பேரிடம் கேட்டிருக்கிறேன். எதற்காகவாவது ஐஸ்வர்யா ராயை இழுத்தால் பத்தில் எட்டு பெண்கள் அந்த பதிலை சொல்லி விடுவார்கள்.

அன்றும் அப்படித்தான், எங்கேயோ வெளியில் கிளம்புவதற்கு தங்கமணி தாமதமாக்கி கொண்டிருக்க, நான் கடுப்பில்,
"ஐஸ்வர்யா ராய்க்கு கூட மேக்கப் போட்டு கிளம்ப இவ்ளோ நேரம் ஆகாது." என்றேன். உடனே பல்வேறு கால நிலைகளில் கேட்டு பழகிய அதே பதில் வந்தது.

"ஐஸ்வர்யா ராய் என்ன பெரிய அழகியா..?"
"ஆமா.. இல்லையா பின்ன.. மிஸ் வேர்ல்ட் பட்டம் வாங்கியிருக்காங்கல...?"
"அவங்களுக்கு இன்டிரஸ்ட் இருந்துச்சு காம்பெட்டிஷன்ல கலந்துக்கிட்டாங்க... நாங்க கலந்துக்கலை. அவ்ளோதான்" என்றார் சிம்பிள் அன்ட் சீரியஸாய்.

சில வேளைகளில் ஏதோவொரு துணிக்கடையில் அந்த பளீர் லைட்டிங் வெளிச்சத்தில், பளபள கண்ணாடியில் முகத்தை பார்க்கும் பொழுது "ச்சே.. ஒரு ஆங்கிள்ல நாமளும் லைட்டா அழகாத்தான் இருக்கோம்.." என்று தோன்றும். ஆனால் அதை வெளியில் சொல்லும் தைரியம் வாய்த்ததில்லை. இந்த விஷயத்தில் இந்த பெண்களின் அநியாய தன்னம்பிக்கையும், துணிச்சலும் ஆச்சரியமூட்டுகிறது.

____________________________________________________

Best of 'பீலிங்ஸ்' : http://www.valaimanai.in/p/blog-page_9.html
____________________________________________________

வலைமனை பிற பதிவுகள் : சினிமா | நகைச்சுவை | புத்தகம்
பேஸ்புக் பக்கத்தில் இணைய : https://www.facebook.com/valaimanai.in

ஜப்பான் - நூல் அனுபவம்

2015-02-19T11:51:00.001+05:30

‘இது முரம்… இது தூண்…’ என கண்ணை கட்டிக் கொண்டு யானையை தொட்டுப் பார்த்து உணர்ந்தவர்கள் போல, ஜப்பான் என்றால் சுறுசுறுப்பான மக்கள், தொழிலிலும் தொழில்நுட்பத்திலும் கில்லாடிகள், அணுகுண்டு வீசப்பட்ட நிலையிலும் தங்களது அசாதாரண உழைப்பால் மீண்டெழுந்தவர்கள் என அப்படியும் இப்படியுமாய் ஒரு புரிதல் வைத்திருந்தேன்.

கட்டை அவிழ்த்ததும்தான் இது யானை என்கிற பிரம்மாண்ட நிஜம் புரிவது போல், எஸ்.எல்.வி.மூர்த்தி அவர்கள் எழுதி கிழக்கு பதிப்பகம் வெளியிட்டுள்ள ஜப்பான் என்கிற புத்தகம் அறிவுக் கண்ணைத் திறந்து இதுதான் உண்மையான ஜப்பான் என உள்ளதை உள்ளபடி காண்பித்து பிரமிக்க வைக்கிறது.

ஜப்பானை தேவதைகள் உருவாக்கிய விதம் என நம்பப்படும் புராதான கதையில் துவங்கி இன்றைய தொழில்நுட்ப சாதனைகள் வரை வெகு விரிவாக ஜப்பான் குறித்து அறியத் தருகிறது இந்நூல். முதலாம், இரண்டாம் உலகப்போர்களில் ஜப்பானின் பங்கு, தன்னை வலிமையான சக்தியாக நிருபிக்க அந்நாடு எடுத்த முயற்சிகள், அதன் விளைவாய் கொடுத்த மிகப்பெரிய விலைகள் என பாட புத்தகங்களில் நாம் மேலோட்டமாக அறிந்திருந்த நிகழ்வுகளின் முழு பின்னணியும் துல்லியமாக சொல்லப்பட்டிருக்கிறது.

“ஒட்டுமொத்த ஜப்பானிய மக்கள் வாழவும், விவசாயம் தொழில் நடத்தவும் இருக்கும் மொத்த நிலப்பரப்பு தமிழ்நாட்டின் 80% மட்டுமே.” என துவக்கத்திலேயே ஜப்பானின் உருவத்தை நம் மனதில் பதிய வைத்துவிட்டு அத்தகைய சிறிய இடத்தினுள் நடந்த பிரம்மாண்டங்களை ஆசிரியர் விவரிக்கையில் நமக்கு ஏற்படும் சுவாரஸ்யம் தொடர்ந்து அடுத்தடுத்த பக்கங்களை புரட்ட வைக்கிறது. ஜப்பானின் கற்காலம், மன்னராட்சிகள், சீனா உள்ளிட்ட பிற நாடுகளுடனான வியாபார உறவுகள், சமுராய்கள், மதம், மக்கள், சாதனைகள், அவமானங்கள், வல்லரசு கனவு, அதற்கான விலை, வீழ்ச்சியில் இருந்து மீள்வது, அமெரிக்க உதவி, தொழில் புரட்சி, இன்றைய சவால்கள் என ஜப்பான் குறித்து ‘அ’ துவங்கி ‘ஃ’ வரை மிக விரிவாக எடுத்துரைக்கிறது இந்த புத்தகம்.

ஒரு அரசியல், வரலாற்று புத்தகமாக, நமது இந்திய தேசம் எங்கே நிற்கிறது, இன்னும் எங்கே செல்ல வேண்டும் என யோசனைகளை இந்த புத்தகம் தோற்றுவிக்கும் அதே சமயம், ஜப்பான் மற்றும் ஜப்பானியர்களின் ‘கற்கும் பசி’ முதலிய குணாதிசயங்களில் இருந்து தனி மனித அம்சங்களாய் நாம் பின்பற்ற வேண்டியவைகளையும் கோடிட்டு காட்டி ஒரு சுய முன்னேற்ற புத்தகமாகவும் மிளிர்கிறது.

அத்தியாயங்கள் மிகப் பெரியதாக இருப்பதாலும் ஒரே அத்தியாயத்தில் பல கால நிலைகள் கடந்து பல விஷயங்கள் சொல்லப்படுவதாலும் ஒவ்வொரு அத்தியாயத்தின் முடிவிலும் தரப்பட்டுள்ள ’என்ன படித்தோம்’ என்பதை நினைவூட்டும் ஹைலைட்ஸ் பகுதி புத்தகத்திற்கு சிறப்பு சேர்க்கிறது. 192 பக்கங்கள் உள்ள ஒரு நான்-பிக்ஷன் புத்தகம். ஒரே அமர்வில் படிக்க நேரம் வாய்க்காமல் அவ்வப்போது விட்டுவிட்டு படிக்க நேரும் நிலையில், அந்த புத்தகம் நம்மை தொடர்ந்து ஈர்ப்பது அவசியம். அந்த வகையில் யாரோ அழைத்தால் ஒலியெழுப்பும் செல்போன் போல இந்த புத்தகம் தன்னை நோக்கி அழைக்கும் விதத்தில் சிறப்பம்சங்களை தன்னுள்ளே பெற்றுள்ளது.

மேம்போக்காக வளர்ச்சி, வீழ்ச்சி என் சொல்லிவிட்டு செல்லாமல் தேவைப்படும் இடங்களில் முக்கிய தரவுகளை தந்து படிப்பவர்களுக்கு சிறந்த புரிதல் அனுபவத்தை ஏற்படுத்தியிருக்கும் ஆசிரியரின் உழைப்பு பாராட்டுதலுக்குரியது. ஒரு தேசத்தின் பொருளாதாரம், ஏற்றுமதி, இறக்குமதி, உற்பத்தி என்கிற விஷயங்களைப் பற்றிய அறிவு சுத்தமாய் எனக்கு இருந்ததில்லை. ஆனால் இந்த புத்தகம் ஜப்பானின் பொருளாதாரம் பற்றி சொல்லும் அதே வேளை ஒரு தேசத்தின் பொருளாதாரம் என்றால் என்ன ஏற்றுமதி, இறக்குமதி, உற்பத்தி, வளர்ச்சி, வீழ்ச்சி என்றால் என்ன என்பதையும் நமக்கு அறிய தருகிறது. உதாரணமாக பண வீக்கம், பண வாட்டம் பற்றியெல்லாம் போகிற போக்கில் மிக எளிமையாக புரிய வைக்கிறார் ஆசிரியர்.

எந்த இடத்திலும் வலிந்து வார்த்தை தோரணங்களை சேர்க்காமல் மிக இயல்பாக, அதே நேரம் வேகமாக செல்லும் நூல், சொல்லப்பட்டிருக்கும் கனமான உள்ளடக்கத்திற்கு மேலும் வலு சேர்க்கிறது. இவ்வகையில் இந்த புத்தகம், மாணவர்கள், அதிகார மையத்தினர், தொழில் முனைவோர் உள்ளிட்ட அனைத்து தரப்பினரும் அவசியம் படிக்க வேண்டிய தரத்தில் அமைந்திருக்கிறது.

இதற்கு மேல் எவ்வளவு சொன்னாலும் கூட இந்த புத்தகத்தின் மதிப்பிற்கு இணையாக சொல்ல வேண்டிய விஷயங்கள் அதிகரித்துக் கொண்டேதான் போகும் என்பதால் இந்த புத்தகம் குறித்தான மதிப்புரைக்கு முடிவுரையே இல்லை!

ஆன் லைனில் வாங்க: https://www.nhm.in/shop/978-81-8493-782-4.html

(மதிப்புரை.காம்-இல் வெளிவந்த 'ஜப்பான்' நூல் குறித்த எனது பதிவு இது)

________________________________________________________________

வலைமனை பிற புத்தக பரிந்துரைகளை படிக்க : புத்தக அனுபவம்

வலைமனை பிற பதிவுகள் : சினிமா | நகைச்சுவை | ஃபீலிங்ஸ்
பேஸ்புக் பக்கத்தில் இணைய : https://www.facebook.com/valaimanai.in

அனேகன் - ஐந்து நட்சத்திரங்கள்

2015-02-13T19:03:00.000+05:30

"இவனை தூக்கிட்டு வர்றதுக்கு மூணு பேரா?" என தனுஷ்ஷை குறித்து ஒரு வசனம் வைக்கப்பட்டிருக்கிறது இந்தப் படத்தில். உண்மைதான். அவர் உருவம் அப்படி. ஆனால் தனுஷின் ஆற்றலை தனியாக டவுன்லோட் செய்து வைத்தால் முன்னூறு பேர் வந்தாலும் தூக்க முடியாது போல் இருக்கிறது. மூன்று வெவ்வேறு கால நிலை காதலனாக தனுஷ். மூனா ரூனா, அஷ்வின், காளி என கிரியேட்டிவ்வாக எதையாவது செய்யத் துடிக்கும் கலைஞனுக்கு செம ட்ரீட்டான ப்ராஜக்ட். தனுஷ் எப்படி செய்திருக்கிறார் என ஆராய்ந்து எழுத முடியாது. பம்மல் வ்வ்வே சம்பந்தம் சொல்வது போல அப்படியே அனுபவிக்க வேண்டியதுதான்.

கனா கண்டேன், அயன், கோ, மாற்றான் என குறிப்பிடத்தகுந்த இயக்குனர்கள் வரிசையில் கே.வி.ஆனந்த். பொதுவாகவே காதலை கசக்கி பிழியும் படங்கள் என்றாலே எனக்கு அலர்ஜி. அட.. புதுசா ஏதாச்சும் சொல்லுங்கய்யா என்பது போல் இருக்கும். "இதுவரை முழுமையான காதல் படங்கள் நான் செய்ததில்லை.. அனேகனில் பண்ணியிருக்கேன்" என கே.வி.ஆனந்த் ஒரு பேட்டியில் சொன்னபோது, 'என்னடா.. மாற்றான் தந்த சறுக்கலில் இவரும் இப்படி ஆயிட்டாரே.. படம் காதல் கத்திரிக்காய் என ரொம்ப சிம்பிளா இருக்கும் போலிருக்கு' என நினைத்துக் கொண்டிருந்தேன். இப்பொழுதுதான் தெரிகிறது பேட்டியில் 'க.மொ.வி.' இறக்க விரும்பாமல் தன்னடக்கமாய் இருந்துவிட்டு படத்தில் அதை செய்திருக்கிறார்.

கதையே கதாநாயகியை சுற்றி நகர்வதால் அழகு பதுமையாய் மட்டும் அல்லாமல் நடிக்கவும் செய்யும் பெண் வேண்டும். எங்க பாஸ் கண்டுபிடிச்சீங்க உதட்டை குவித்து காற்றில் முத்தமிட்டு அசத்தும் அமைராவை? மூன்று கால நிலைகளிலும் செம க்யூட் அன்ட் ஸ்வீட். தொடர்ந்து ஐ, இசை இரண்டு படங்களிலும் வெளி மாநில/நாட்டு கதாநாயகிகளின் மொழிக்கு பொருந்தும் அல்லது பொருந்த வைக்கப் பட்டிருக்கும் உதட்டசைவு தமிழ் சினிமாவிற்கு ஆரோக்யம்.

கனக்ஷன்ஸ் ஜெகன் ஒரு படத்தில் இருந்தால் அந்தப் படத்தை சென்சாருக்கு அனுப்பாமலே 'ஏ' சர்டிபிகேட் தந்துவிடலாம் என்கிற பொதுவிதி இந்த படத்தில் தளர்த்தப்பட்டிருக்கிறது. ஒன்றிரண்டு வசனங்களை தவிர அவரது வால்யூமை குறைத்தே வைத்திருக்கிறார்கள்.

முதல் பாதி கார்த்திக் சூப்பர். இரண்டாம் பாதியில் இன்னும் கொஞ்சம் சூப்பராக இருந்திருக்கலாம். 'இசை' போன்ற ஒரு ஸ்கிரிப்டில் சத்யராஜ் துவம்சம் செய்தது போல் அனேகனில் வாய்ப்பு இருந்தும் கார்த்திக் கொஞ்சம் குறைவாகவே செய்திருக்கிறார். இல்லை அவர் டிசைனே அப்படித்தானா தெரியவில்லை.

ஓரு பாடலின் துவக்கம் முதல் முடிவு வரை தியேட்டர் இடைவிடாமல் அதிர்ந்து கொண்டே இருந்தது கடைசியாய் எப்போதென ஞாபகம் இல்லை. டாங்கா மாரியில் ஸ்பீக்கரை விட ரசிகர் குரல் தெறிக்கிறது. வெறும் குத்தாட்ட பாடலாக இல்லாமல் அதற்குள்ளும் கதையை வைத்ததற்கு ஸ்பெஷல் சபாஷ். ஆனால் அதற்கடுத்தாய் பெரிதும் எதிர்பார்க்கப்பட்ட 'ரோஜா கடலே' பாடலை அப்படி கிராபிக்ஸ் பேக்கிரவுண்ட் லொக்கேஷன்களை வைத்து சுமாராய் காண்பித்தற்கு அந்த சபாஷை திரும்ப வாங்கி கொள்ள வேண்டும். ஹாரிஸ் இவ்வளவு அழகாக பாடல் போட்டும் இப்படி பண்றீங்களேம்மா...?

முதல் அரைமணி நேரம் அறுபதுகளில் பர்மா எபிசோட், பின்னர் இடைவேளை வரை இன்றைய காலகட்டம். இடைவேளை முடிந்ததும் எண்பதுகளின் சென்னை, பின்னர் இன்றைய நிகழ்வு என திறமையாக கட்டமைக்கப்பட்ட இந்த சயின்ஸ், பேன்டஸி, லவ் சப்ஜெக்ட், தமிழ் எழுத்துலகில் மின்னி பின் திரையிலும் மின்னத் தெரிந்த வெகு சொற்பமானவர்கள் பட்டியலில் சுபாவின் பெயரும் எப்படி இடம் பெற்றது என்பதற்கு தரமான சான்று.

தமிழுக்கு கொஞ்சம் புதிரான புதிதான கதை, அடுத்தடுத்து பரபரப்பாய் நகரும் காட்சிகள், அருமையான ஆழமான காதல் எபிசோட்ஸ், ஆங்காங்கே டிவிஸ்ட்ஸ் அன்ட் டர்ன்ஸ், நடிகர்களின் சிறப்பான பெர்பார்மன்ஸ், துள்ளலான இசை இவை எல்லாவற்றையும் சிறப்பாக அசெம்பிள் செய்யத் தெரிந்த கெட்டிக்கார இயக்குனர் என ஒரு சிறப்பான கமர்ஷியல் திரைப்படம் எப்படி இருக்க வேண்டுமோ அப்படி இருக்கிறது அனேகன்.

2 மணி 40 நிமிடங்களும் கொடுத்த ரூ.120க்கு ரூ.1000 கிடைத்தது போல் ஒரு திருப்தி. இது போன்ற கம்ப்ளீட் என்டர்டெயின்மென்ட்டிற்கு இண்டு இடுக்கு குறைகளை வைத்துக் கொண்டு மூணரை, நாலு ஸ்டார்கள் தருவது பாவம். நான் தருகிறேன் கே.வி.ஆனந்த்... இந்தாங்க பிடிங்க 5 ஸ்டார்ஸ் ★★★★★

வலைமனை பிற பதிவுகள் : சினிமா | நகைச்சுவை | புத்தகம் | ஃபீலிங்ஸ்
பேஸ்புக் பக்கத்தில் இணைய : https://www.facebook.com/valaimanai.in

Tags: Anegan, Anegan Review, KV Anand, Dhanush, Amyra, Harris Jayaraj, AGS Productions

ஒரு மெல்லிசான கோடு - மேட்ச்சை ஒழுங்கா ஆடு

2015-02-09T10:40:00.002+05:30

வேர்ல்ட் கப் 15 - போட்டோ கமெண்ட்ஸ் 1

// அனைத்தும் கற்பனையே... யார் மனதையும் புண்படுத்தும் நோக்கத்தோடு எழுதப்பட்டது அல்ல //

ஆடியன்ஸ் : "வி வோன்ட் கிவ் இட் பேக்.. வி வோன்ட் கிவ் இட் பேக்.. "
தோனி : "யோவ் சும்மா இருங்கய்யா.. அண்ணன் கடுப்புல இந்த பக்கம் திரும்பி சாத்திட போறாரு.."

"ஸ்டம்பு பால் பட்டுதான் பறக்குதா.. இல்ல சீனு மாமா ரிமோட் எதும் வச்சிருக்காரா தெரியலையே ஆண்டவா... "

"போன தபா வாங்குன கப்பை கேட்டா திருப்பி தர்ற வேண்டியதுதான.. அதை விட்டுட்டு 'வி வோன்ட் கிவ் இட் பேக்'னா ... வர்றவன்லாம் அடிக்காம என்ன செய்வான்...? இதை சொன்னா 'என்றா... சின்ன கவுண்டர்ல செந்தில் மாதிரி ஆராய்ச்சி பண்ணிட்டு இருக்க'ன்னு தோனியண்ணே கவுண்டர் கணக்கா எத்துறாரு.. ஏ..... ஹவா.. ஹவா.. ஹவ்வவ்வா.."

"இஷாந்த் டொமேட்டோ சாஸ் சாப்பிட்டு கையை கழுவாம வந்தாப்ல.. நாங்கதான் ஐடியா பண்ணி உனக்கு ரத்தம் வருது.. காயம் பட்டிருச்சு.. அன்பிட்னு சொல்லி அனுப்பிட்டோம். இப்போ அதையே சாக்கா வச்சு ஆஸ்திரேலியாவுல இருந்து அப்பீட் ஆகலாம்னு எல்லாம் இப்படி வந்து நிக்கிறீங்க.. இஷாந்துக்கு வந்தா மட்டும்தான் ரத்தம்.. வேற யாருக்கு நிஜமாவே வந்தாலும் அது தக்காளி சட்னிதான்.."

"கோட்டுக்கு அந்தப் பக்கம் போயிட்டா நான் நல்லவன்.. ஒரு மெல்லிசான கோடு.. "
"பஞ்ச் அடிக்காம மேட்ச்சை ஒழுங்கா ஆடு.."

"விஜய் டிவியில மேட்ச் போடுறாங்களாம் ப்ரோ.."
"அதுக்காக மனோ, சித்ரா, மால்குடி சுபாதான் அம்பையரா இருப்பாங்கன்னா எப்படி...?"

"பயமா இருக்கு பஜ்ஜியண்ணே.. விஜய் டிவியில என் போட்டோ கூட சோக மியூசிக்கை போட்டு.. எலிமினேட் ஆன யுவராஜ் திரும்ப டீம்ல வரனும்னா எஸ்.எஸ்.ஜே ஜீரோ செவன்னு டைப் பண்ணி எஸ்.எம்.எஸ் அனுப்புங்கன்னு ப்ரமோ போட்டுற போறாங்கன்னு..."

-வோர்ல்ட் கப் 15 போட்டோ கமெண்ட்ஸ் தொடரும்...

பிற போட்டோ கமெண்ட்ஸ் பதிவுகளை பார்க்க கிளிக் செய்யவும்
பேஸ்புக் பக்கத்தில் இணைய : https://www.facebook.com/valaimanai.in

என்னை அறிந்தால் | ஹாட்ரிக் என்னாச்சு?

2015-02-07T09:05:00.002+05:30

அஜித்திற்கு ஹாட்ரிக் வெற்றி நிகழுமா என்பதும் கவுதமிற்கு ஹாட்ரிக் தோல்வி தவிர்க்கப்படுமா என்பதும் 'என்னை அறிந்தால்' படத்தின் ரிசல்ட்டை பொறுத்து இருந்தது.

நடுநிசி நாய்கள், நீதானே என் பொன்வசந்தம் என கடைசி இரண்டு படத்தில் சறுக்கல். மேலும் 'கவுதம் சரியா ஸ்கிரிப்ட் ரெடி பண்ணலை' என்கிற சூர்யாவின் ஸ்கூல் மிஸ் கம்ப்ளெயின்ட். ஆகவே எதுவும் ரிஸ்க் எடுத்து சொதப்பி விடக்கூடாது. என்ன பண்ணலாம்..? சறுக்கிய ந.நவின் ஓவர்டோஸ் காட்சிகளோ, நீ.எ.பொ படத்தின் டோஸே இல்லாத காதல் காட்சிகளையோ அறவே தவிர்த்து விட வேண்டும். பிறகு?

பெயரைத் தந்த வேட்டையாடு விளையாடு, காக்க காக்க, விண்ணைத்தான்டி வருவாயா, வாரணம் ஆயிரம் படங்களின் ரசிக்கப்பட்ட போர்ஷன்களை எடுத்துக் கொண்டு அதில் அஜித், திரிஷா, அனுஷ்கா, அருண் விஜய், நாசர் எல்லாரையும் பொருத்தி சோளிகளை குலுக்கி போடுவது போல போட வேண்டியதுதான்.

ஆனாலும் அப்படி போடப்பட்ட இந்த 'என்னை அறிந்தால்' குலுக்கல் அழகாகவே விழுந்திருப்பது ஆச்சரியம். வெட்டுப்படாமல் தப்பிக்கவோ பழம் பழுக்கவோ ஆட்டத்தில் தேவைப்படும் நேரத்தில் விழுந்த தாயம் போல, கவுதமிற்கு மீண்டும் நற்பெயரை இந்த படம் நிச்சயம் வாங்கி தரும். (அதுக்காக அடுத்த படத்துக்கும் சோளியை கையில எடுத்து எங்க சோலியை முடிச்சுப்புடாதீங்கப்பு.)

அனுஷ்காவில் கதையை ஆரம்பித்து, அப்படியே அஜித்தை இணைத்து, அங்கே அருண் விஜய்யை கொண்டு வந்து பர பரவென மிக சுவாரஸ்யமாய் துவங்குகிறது படம். அஜித்தின் அந்த மெல்லிசான கோடு பிளாஷ்பேக்கை சொல்லி அவர் அந்தப் பக்கம் போய்விட்டார் என அருண் விஜய் உடனான கேங்ஸ்டர் எபிசோடை தந்து சடாரென இந்தப் பக்கத்திற்கு ஷிப்ட் அடிப்பதில் இன்னும் கலக்குகிறது ஸ்கிரிப்ட்.

அதன் பின்பு திரிஷா, அவருடனான காதல், இழப்பு, பழிவாங்கல் என இடைவேளை வரை படம் போவதே தெரியவில்லை. அதன் பின்பு பாசம், பயணம், ஆக்ஷன் என சென்று மீண்டும் அனுஷ்காவில் வந்து முன்பாதியில் விட்ட இடத்தில் அழகாக இணைகிறது. இதன் பின்புதான் பெரியதாக ஒரு டிவிஸ்ட்டோ சஸ்பென்ஸோ இல்லை. ஆனாலும் சேசிங், ஷார்ப் வசன மோதல் என போரடிக்காமல் சென்று சொதப்பாமல் முடிவது ஆறுதல்.

சும்மா நின்றாலே ரசிர்களுக்கு ஹேன்ட்ஸமாக அருள் பாலிப்பவர் அஜித். இதில் கவுதமின் ஆராதனையில் எப்படி இருப்பார்? கேங்ஸ்டர், ஐ.பி.எஸ், சால்ட் அண்ட் பெப்பர் என மூன்று தோற்றங்களிலும் அவ்வளவு லவ்லியாக இருக்கிறார். ஆசிஷ் வித்யார்தியிடம் தன் வீட்டில் கோபப்படும் இடம் ஆகட்டும், மேத்யூ கூட்டத்தை ஒழிக்க துப்பாக்கி எடுக்கும் இடம் ஆகட்டும், லுங்கியை கட்டிக்கொண்டு நாக்கை மடித்து ரசிகர்களுக்காக செம குத்து குத்தும் இடம் ஆகட்டும், பள்ளி வாகனத்தை மறித்து பெண்ணை கூட்டிக் கொண்டு பயணிப்பது ஆகட்டும்.. வழக்கம் போல தொண்டை கிழிய 'தல.. தல' என கத்தி மாளாமல் அமைதியாய் அதே உற்சாகத்துடன் அஜித்தை ரசிக்கும் விதத்தில் ரசிகர்களுக்கு வித்யாசமான ட்ரீட்.

திரிஷாவிடம் புரபோஸ் செய்யும் அந்த ரொமான்ஸ் காட்சியில் மட்டும் 'எனக்கு இதுல எல்லாம் இன்டிரஸ்ட் இல்லைப்பா' என்பது போலவே நடித்திருக்கிறார். இது வலிந்து செய்யப்பட்டதாக இருக்கலாம். (இந்த அம்சம் அன்புச்செல்வனில் இருந்தும் ராகவனில் இருந்தும் சத்யதேவை வேறுபடுத்தி காட்டும் முயற்சியாகவும் இருக்கலாம்.) *இப்படியும் பாஸிட்டிவ்வா சொல்லிக்கலாம்.

"யாராச்சும் பத்த வைங்கடா.. நான் எப்படி வெடிக்கிறேன் பாருங்க.." என்பது போல் இருக்கும் சரவெடியாய் அருண்விஜய். பாண்டியா, அமுதன்-இளமாறன் போன்றவர்களின் குரூரத்தினை வெளிப்படுத்தாத ஆனால் அதே நேரம் நட்பை நம்பி ஏமாந்துவிட்ட வெறியுடன் தரமான வில்லனாக வெடித்திருக்கிறார். ஒரு நடிகர் கவுதமின் வில்லன் பாத்திரத்தை சிறப்பாக செய்திருக்கிறார் என்பதை விட வேறென்ன பாராட்டு பெற்று விட முடியும்? பட்டாசு பாஸ்!

திரிஷாவா இது...? மை காட். பிளெயின் காட்டன் சாரியில் ஜெஸ்ஸியாக கவுதம் கைவண்ணத்தில் மின்னியவர்.. அப்படியே நேரெதிராய் சர்வ அலங்காரத்துடன் கண்களில் மையுடன் நடனத் தாரகையாக ஜொலிக்கிறார். திரிஷாவுடன் ஒப்பிடுகையில் வெயிட்டான ரோல் அனுஷ்காவிற்கு இல்லை. கொடுத்த ரோலை செய்திருக்கிறார். "என் ரோலை வேணும்னா அவங்க பண்ணட்டும்" என கவுதமிடம் அனுஷ்கா சொன்னதாக செய்திகள் வந்ததே. அதன் அர்த்தம் இப்பொழுதுதான் புரிகிறது. (வெவரம் மேடம் நீங்க!)

மியூசிக்கல் ப்ளே பார்த்திருக்கிறீர்களா.. பாடிக்கொண்டே முழுக் கதையையும் நடித்து காட்டிவிடுவார்கள். ஏறக்குறைய என்னை அறிந்தால் முதல் பாதி ஒரு லவ்லி மியூசிக்கல் ப்ளே. ஹாரிஸ் விளையாடி இருக்கிறார். சூப்பர் பாஸ்! தற்காலிக போர் நிறுத்த ஒப்பந்தத்தை போல கொஞ்ச நாளாவது ஹாரிஸை யாரும் கலாய்க்க மாட்டார்கள் என்கிற அளவிற்கு மனிதர் உழைத்திருக்கிறார். ('நான் முன்ன மாரி இல்ல இப்போ.. ரொம்போ மாறிட்டேன்'னு அனேகன்ல ஒரு லைன் வருதே.. செம டைமிங் பஞ்ச் பாஸ் அது..! ஆஹா நானே கலாய்ச்சிட்டேனே.. மன்னிச்சூ மன்னச்சூ..)

‘பில்லா 2வில் விட்டது. ஆரம்பம், வீரம் என அடுத்தடுத்து தீபாவளிக்கும் பொங்கலுக்கும் சொல்லி அடித்துவிட்டு, மூன்றாவதாக அஜித் 'என்னை அறிந்தால்' படத்தை தந்து ஹாட்ரிக் வெற்றி பெற்றிருக்கிறார்.

விண்ணைத்தாண்டி வருவாயாவில் அடித்தது. அடுத்ததாக நடுநிசி நாய்கள், நீதானே என் பொன்வசந்தம் இரண்டிலும் சறுக்கிவிட்டு இப்போது கவுதம் 'என்னை அறிந்தால்' படத்தை சிறப்பாக தந்து ஹாட்ரிக் தோல்வியை தவிர்த்திருக்கிறார்.

விவரிக்க முடியாத விஷுவல்ஸ், ஜில்லென்ற இசை, பற்றி எரியும் மோதல், பசுமையான காதல் என 'என்னை அறிந்தால்' தமிழ் சினிமாவின் உன்னதம். இங்கிலீஷ்ல சொன்னா எக்ஸலென்ட்!

ஏன் தமிழ், இங்கிலீஷ்ல சொல்றோம்னா... கவுதம் படம்னா எல்லாம் அப்படித்தான்!

வலைமனை | ஃபீலிங்ஸ் 04 02 15

2015-02-04T14:09:00.001+05:30

பள்ளி கல்லூரி நாட்களில் படிக்கும் பொழுது, இந்த சேப்டருக்கு இவ்ளோ நேரம் என ஷெட்யூல் போடுவது வழக்கம். 8-9 படிக்க வேண்டியது மிஸ் ஆகி 8.20 ஆகியிருக்கும். சரி ரவுண்டா 9 மணிக்கு ஆரம்பிச்சிடலாம் என நாடாளுமன்றம் போல அவை ஒத்திவைக்கப்படும். எப்போ ஒத்தி வச்சாலும் நாங்க கத்தி வைப்போம்ங்கிற உறுப்பினர்கள் மாதிரி, ஒன்பது பத்தாகி அப்படியே பரீட்சையும் பனாலாகி விடுவது வாடிக்கை.

அந்த உவமையை போல, கடைசியாய் ஃபீலிங்ஸ் நவம்பரில் எழுதியது. டிசம்பரில் சில நாட்கள் மிஸ் ஆகிவிட, சரி ரவுண்டா ஜனவரியில் ஆரம்பிச்சுடலாம் என இருந்தேன். அங்கும் தவறவிட ரவுன்டா பிப்ரவரி ஆனது. இப்பொழுது 'ஃபிப்'பும் ஆகிவிட்டது. சரி.. ரவுன்டா மார்ச் என எழுந்த எண்ணத்தை கஷ்டப்பட்டு மார்ச்சுவரிக்கு அனுப்பிவிட்டு இதோ இந்த போஸ்ட்.

எழுதப் போற நாலு வரிக்கு எதுக்குய்யா நாப்பது வரி முன்னுரை என்றால்... "அங்கிளுக்கான சேரை... சட்டுன்னு கொண்டு வந்துட்டோம்..." என்பது போல கொஞ்சம் அவுட்டேட்டட் சங்கதிகள் உள்ளடக்கத்தில் உண்டு. பொறுத்தருள்க :)

•••

எப்பொழுதும் புதுவருட துவக்கத்தை விடிய விடிய அப்பார்ட்மென்ட்ஸில் சிறுவர்கள் ஆடல் பாடல், அனைவருக்கும் கேம் ஷோ, பரிசு என நாங்கள் ஒருங்கிணைத்து கொண்டாடுவோம். இந்த முறை ஒரு வார்த்தை ஒரு லட்சம் ஃபார்மெட்டில் நடத்திய விளையாட்டு நல்ல வரவேற்பை பெற்றது. வி.ஐ.பிக்களின் முகத்தை மறைத்து வெறும் கண்ணை வைத்து இது யார் என கண்டுபிடிக்க சொன்ன கண்ணாம்பூச்சி கேள்விகளை சின்னஞ்சிறுவர்கள் துவம்சம் செய்தார்கள். மூன்றாம் வகுப்பு சிறுவன் ஒருவன் கண்ணை மட்டும் காண்பித்ததும் 'காஜல் அகர்வால்' என மில்லி செகன்டில் கண்டுபிடிக்கிறான். கூகுளை விட இந்த ஜெனரேஷன் கோகுல்கள் ஸ்பீடாய் இருக்கிறார்கள்.

கெட் டூ கெதர் நிகழ்வுகள், அலுவலக கொண்டாட்டம் போன்றவற்றிற்கு உபயோகப்படும். தேவைப்படுவோர் நான் வடிவமைத்த கேள்வி பதில்களை டவுன்லோட் செய்து இன்புறுக : http://goo.gl/jDJ5E9

•••

நல்லா படிச்சு இனிமேலாச்சும் நான் ஒழுங்கா வளரனும் :)

வருடா வருடம் சென்னையில் நடக்கும் உலகின் மாபெரும் பேஸ்புக் பிரன்ட்ஸ் மீட் (அ) புத்தக திருவிழாவிற்கு இம்முறை கடைசி நாள்தான் செல்ல முடிந்தது. அதிகமாய் நண்பர்களை காண முடியவில்லை. ஆக்ஸ்போர்ட் டிக்ஷனரியும், அகநாழிகையிலும் கிழக்கிலும் சில புத்தகங்களை வாங்கினேன். கிழக்கு பதிப்பக பத்ரி பேஸ்புக்கில் டாப் செல்லிங் புத்தக லிஸ்ட்டில் 'ஆரோக்யம் தரும் சிறுதானிய சமையல்' புத்தகத்தை குறிப்பிட்டிருந்தார். ஸ்டாலில் அவரை பார்த்து, 'சார் அந்த புக் எங்க இருக்கு?' என கேட்டதும், அவரே எழுந்து சென்று எடுத்து கையில் தந்தார். வரவேற்பில் உட்கார்ந்திருந்த ஹரன் பிரசன்னாவிடம் அறிமுகம் செய்து கொண்டு மதிப்புரை டாட் காமிற்காக அவர்கள் அனுப்பி வைத்த புத்தகத்திற்கும் எனது நூல் அனுபவத்தை வெளியிட்டமைக்கும் நன்றி தெரிவித்தேன். அது என்ன மதிப்புரை மேட்டரு என்பவர்கள் அடுத்த பத்திக்கு வரவும்.

•••

மதிப்புரை.காம் தளத்தில் விமர்சனம் எழுத விருப்பமாயின் இந்த சுட்டியில் தரப்பட்டிருக்கும் புத்தக லிஸ்ட்டில் நாம் விரும்பியதை குறிப்பிட்டால் அதை இலவசமாக வீட்டிற்கு அனுப்பி வைக்கின்றனர். புத்தகம் கிடைத்த 20 நாட்களுக்குள் அதை குறித்த விமர்சனத்தை எழுதி அனுப்ப வேண்டும்.

'ஜப்பான்' புத்தகம் குறித்த விருப்பத்தை அனுப்பிவிட்டு மறுநாள் வீட்டில், "கொரியர்ல.." என ஆரம்பித்த பொழுது, "என்ன.. புக் வருமா..? காலையிலேயே வந்துடுச்சு..!" என தந்தார்கள். ஒரே நாளில் கொரியர் வந்திருந்தது. அதைப் படித்து நான் அனுப்பி வைத்த பார்வையையும் பின்னர் மதிப்புரை டாட் காமில் வெளியிட்டிருந்தார்கள். இதோ அதன் சுட்டி :
http://mathippurai.com/2014/11/21/japan/

•••

தகவல் அறியும் உரிமை சட்டம் குறித்து தெரிந்த நண்பர்களின் உதவி தேவைப்படுகிறது. 'அம்மா வீட்டுக்கு போய் நகை கொண்டா.. பணம் கொண்டா'ன்னு துன்புறுத்தும் கணவர்கள் மேல் வரதட்சணை கொடுமை சட்டத்தில் புகார் தருவது போல, "எப்பங்க பிளாட் வாங்க போறோம்..? எப்பங்க ஒரு வீடு கட்டுறது?" என தினம் டார்ச்சர் செய்யும் மனைவிகள் மேல் புகார் கொடுக்க ஏதாவது சட்ட வழிமுறை இருக்கிறதா என்கிற தகவல் வேண்டும். பிளீஸ் ஹெல்ப்!

இசை

2015-02-01T13:28:00.001+05:30

எஸ்.ஜே.சூர்யா மூளையின் ரசிகன் நான். வாலி, குஷியில் அவரது பிரில்லியன்ஸ் வெகு சிறப்பாக வெளிப்பட்டிருக்கும். கொஞ்சம் ரிஸ்க் எடுத்து நியூவில் ஒரு வித்யாசமான பேன்டஸி சப்ஜெக்டையும், அன்பே ஆருயிரேவில் நினைவலைகளை கதை சொன்ன தைரியமும் என்னை வெகுவாக கவர்ந்திருந்தது. அதோடு இப்போது இசையின் டிரைலரும் சேர்ந்துக்கொண்டு ஈர்ப்பை அதிகரிக்க, முதல் காட்சிக்கு சென்றிருந்தேன்.

வாலி, குஷியில் கடைபிடித்த இலைமறை தரத்தை ஏனோ நியூவிலும், அ.ஆவிலும் இழந்துவிட்டிருந்தார். பேமிலி ஆடியன்ஸ் முகம் சுளிக்கும் வண்ணம் காட்சிகளையும் வசனங்களையும் அதிகரித்திருந்தார். இசையில் அதேபோல் காட்சிகளும் வசனங்களும் இருக்கிறது. ஆனால் முகம் சுளிக்கும் வண்ணம் இல்லை.

வழக்கமான தனது பாணியில் கதையின் ஒன் லைனை சொல்லிவிட்டே இசையையும் ஆரம்பிக்கிறார் எஸ்.ஜே.! இம்முறை வாலி அளவிற்கு இல்லாவிட்டாலும் அதைப் போன்ற ஒரு நல்ல ரொமான்டிக் திரில்லரை தந்திருக்கிறார்.

முதல் பாதியில் கதையை கொஞ்சமாக ஆரம்பித்துவிட்டு, நிறைய காதல், கொஞ்சம் காமெடி என அலுக்காமல் படம் நகர்கிறது. இரண்டாம் பாதியில் தொடர்ந்து சீரியஸான சஸ்பென்ஸ் காட்சிகள் அதிகரிக்கிறது. 'அட.. தெரிஞ்சதுதான' என நினைத்துக்கொண்டிருக்கும் பொழுதே எதிர்பாராத டிவிஸ்ட்டை வைத்து நிமிர்ந்து உட்கார செய்கிறார். 'முடிவு என்னாக போகிறோதோ' என நாம் நினைக்கும் போதே பெரிய ரிஸ்க் எடுத்து கதையின் அஸ்திவாரத்தையே மாற்றி ஒரு கிளைமேக்ஸை தந்திருக்கிறார் எஸ்.ஜே.சூர்யா.

இரண்டாம் பாதியின் முக்கிய டிவிஸ்ட் வந்த பின்னர்தான் முதல் பாதியில் இடிக்கும் விஷயங்களை ஞாபகப்படுத்தி 'அட ஆமால்ல.. சரியாத்தான் இருக்கு' என பொருத்திப் பார்க்க முடிகிறது. இன்னும் சில இடிக்கும் லாஜிக்குகளை கிளைமேக்ஸில் ஒரு வசனத்தில் சரி செய்து கொள்கிறார்.
ஆனால் இவ்வளவு தரமான திரில்லரை கொடுத்துவிட்டு அதற்கு ஒரு தீர்வு தந்து முடித்திருந்தால் முழுதிருப்தியோடு இருந்திருக்கும். இருப்பினும் வித்யாசமான வகையாக எடுத்துக் கொண்டால் இந்த முடிவையும் என்னால் ரசிக்கவே முடிகிறது.

எஸ்.ஜே.சூர்யா நடிப்பிலும் முன்னேறியிருக்கிறார். ஒரே மாதிரியான மாடுலேஷேனில் ஒரே மாதிரியான வசனங்களை நியூவிலும் அ.ஆவிலும் அதிகம் வெளிப்படுத்தியிருந்தவர், இசையில் வெவ்வெறு உணர்ச்சிகளை சிறப்பாக வெளிப்படுத்த துவங்கியிருக்கிறார்.

சத்யராஜுக்கு அல்வா சாப்பிடுகிற மாதிரியான ரோல். இவர் இல்லையென்றால் படமே இல்லை. மனிதர் வாழ்ந்திருக்கிறார். அவருடன் மிகச்சரியான இணையாக கஞ்சா கருப்பு. இருவரது காட்சிகளும் படத்தை தொய்வில்லாமல் கொண்டு போக வெகுவாக உதவியிருக்கிறது.

குளிர்ச்சியான முகவாட்டுடன் சாவித்திரி. முதல் பாதியில் வெறும் கவர்ச்சி கதாநாயகியாக வந்தாலும் இரண்டாம் பாதியில் சொதப்பாத நல்ல நடிப்பை வெளிப்படுத்துகிறார். ஒரு வடக்கத்திய நடிகை உதட்டசைவில் அக்கறை எடுத்து நடித்திருப்பதற்காகவே பாராட்டலாம்.

மருந்து கொடுக்கும் காட்சி, பாவ மன்னிப்பு காட்சி, பேக் தொலையும் காட்சி போன்ற சில காட்சிகளின் நீளத்தை குறைத்திருந்தால் படம் இன்னும் சிறப்பாக இருந்திருக்கும்.

இயக்குனராக அறிமுகமாகி, நடிகராக வெற்றி பெற்றவர்கள் பல பேர் உண்டு. அந்த வெற்றியுடன் நில்லாமல் அடுத்து இசையையும் கற்று அதையும் குறிப்பிடும்படியாக முதல் படத்திலேயே வெளிப்படுத்தி சாதித்திருக்கும் எஸ்.ஜே.சூர்யாவிற்கு 'தன்னம்பிக்கை தளபதி' என்ற பட்டத்தை தாராளமாக தரலாம்.

ஷங்கரின்? ஐ!

2015-01-16T11:56:00.000+05:30

முதலில் பாஸிடிவ் விஷயங்களை பார்த்துவிடுவோம். விக்ரம் உடலையும் உயிரையும் உருக்கி நடித்திருக்கிறார். பிரம்மாண்டமான செட்கள், அழகான லொக்கேஷன்கள், கண்ணில் ஒத்திக் கொள்ளும் ஒளிப்பதிவு, டிரென்டி பாடல்கள், வெளிநாட்டு பெண்ணாக இருந்தாலும் எமியின் பொருத்தமான வாயசைப்பு என வழக்கமாக ஷங்கர் படத்தில் கைகூடி வரும் தரமான தொழில்நுட்ப அம்சங்கள் அனைத்தும் இதிலும் இருக்கிறது. ஆனால் ஷங்கர்தான் இல்லை.

சின்ன சின்ன ரோலில் வருபவர்கள் கூட சங்கர் சிமென்ட் போல காலத்திற்கும் உறுதியாய் மனதில் நிற்கும் வகையில் இருக்கும் ஷங்கரின் கதாபாத்திர தேர்வு திறன் சொதப்புவது இதுவே முதல்முறை. சுரேஷ் கோபி, கதாநாயகின் அம்மா, ஆட் ஏஜென்சி முதலாளி போன்றவர்களால் ஷங்கர் படங்களின் உயர் தரம் இதில் மிஸ்ஸிங்.

டிவிஸ்ட்களை(!) கொண்ட முக்கிய கதாபாத்திரத்தின் 'அந்த கொழந்தையே நீங்கதான் சார்' போன்ற நடிப்பில் இரண்டு சீன்களிலேயே அவர்தான் வில்லன் என குழந்தை கூட கண்டுபிடிக்கும். குறும்பட இயக்குனர்கள் கூட இந்தா சாப்டு என டிவிஸ்ட்களுக்கே டிவிஸ்ட் வைக்கும் காலத்தில் இவ்வளவு அரதப் பழசான ஒரு டிவிஸ்ட் ஷங்கர் படத்திலா?

அவ்வளவு அழகான டாப் ரேட்டட் மாடல், ஒரு பிரேக் அப்பிற்கு பிறகு யாருமே அவளை திருமணம் செய்ய முன்வரவில்லையாம்.. உடனே அவரது அம்மா இந்த அங்கிளை திருமணம் செய்ய சொல்கிறாராம்.. ஷங்கர் சார், இரண்டாயிரத்து பதினைந்திலா இருக்கிறீர்கள்..?

ஒரு திருநங்கை கதாபாத்திரம் வந்த உடனேயே 'புளியமரம்' பாடலை கைகொட்டி ஷங்கர் படத்திலா பாடுகிறார்கள்? வழக்கமான முக்கோண காதல், ஏமாற்றம், பழிவாங்கல் வேண்டாம் என நீங்கள் மாறுதலாய் நினைத்து ஒரு பெண்ணிற்கு பதில் திருநங்கை பாத்திரத்தை வைத்திருக்கலாம். ஆனால் அவரது காதல், சீரியசாக காண்பிக்கப்பட்டிருப்பதாக நினைக்கிறீர்களா..? விக்ரம் அவரை உதறி விட்டு வந்ததும் அவர் படுத்துக்கொண்டே அழுகையில் தியேட்டரில் எல்லோரும் சிரிக்கிறார்கள். கடைசி வரை அவர் காதலிக்கும் போர்ஷன்கள் காமெடிக்காக சேர்க்கப்பட்டிருக்கிறதா.. இல்லை சீரியசாக சொல்கிறீர்களா என்கிற சந்தேகம் இருந்து கொண்டே இருந்ததால், அவர் பழிவாங்க கிளம்புவது சத்தியமாக மனதில் ஒட்டவில்லை.

அடுத்த பழிவாங்கி ராம்குமார். கம்பீரமான அவரது தோற்றம், உடைகள் எல்லாமே ஓகே. ஆனால் குரல், டோன் சரியாக இருக்கிறதா..? முக்கிய இடங்களில் அவர் இழுத்து இழுத்து பேசுவது பெரும் பின்னடைவு.

இன்னுமொரு முக்கிய வில்லன், அந்த விளம்பர மாடல் ஹீரோ. அவர் இன்னும் சுத்தம். அவரும் கதாநாயகியின் அம்மாவாக வருபவரும் பெண் பார்க்க வருபவரும் இஷ்டம் போல இந்தியில் பேச, கொஞ்சம் கூட சின்க் ஆக்க கஷ்டப்படாமல் தமிழில் டப்பிங் பேசி இருக்கிறீர்கள். ஒருவேளை பாலிவுட்டுக்கு பயன்படட்டும் என விட்டீர்களோ என்னவோ.. ஷங்கர் படம் பார்க்கிறோமா அல்லது பாலிமர் சேனலில் டப்பிங் சீரியல் பார்க்கிறோமா என்பது போல் இருந்தது.

ஷங்கருடன் ஏ.ஆர் என்றால் பின்னணி இசை எப்படி இருக்க வேண்டும்..? ஜெ.மே துவங்கி எந்திரன் வரை ஒவ்வொரு படத்தின் இசையும் சீன் பை சீன் மனப்பாடமாய் மனதில் இருக்கிறது. ஆனால் 'ஐ'யில்.. ?

வேறு மாடல் வேண்டும் என்கிற நிலையில் லோக்கல் விளம்பரங்களில் நடிக்கும் நடிப்பே வராத விக்ரமை பிடித்துக் கொண்டு அவருக்காக காதலிப்பது போல நடிக்கும் அளவிற்கு செல்ல வேண்டிய கட்டாயம்தான் எமிக்கு என்ன.. அவரது லைனில் நடிக்க தெரிந்த வேறு ஆணழகர்களே இருக்க மாட்டார்களா?

உருவ அவலட்சணங்களை குரூரமாக கிண்டல் செய்து ஒரு காமெடி டிராக் ஷங்கர் படத்திலா? பிரம்மாண்டங்களின் ரசிகர் நீங்கள். அதற்காக இவற்றையும் பிரம்மாண்டமாக்கி அதையும் காமெடி செய்கிறேன் என புண்படுத்தி.. சாரி சார்.. இவ்வகையில் எந்திரன் உங்கள் கனவு என்றால், 'ஐ' கெட்ட கனவு!

விக்ரம் - படத்தின் பிளஸ் பாயின்ட். மைனஸ் பாயின்ட் என்னவெனில் அவர் மட்டுமே பிளஸ் பாயின்ட் என்பதுதான். முன்பு சச்சின் காலத்தில், 'நீங்க விளையாடி ஜெயிச்சா ஓ.கே. எங்களையெல்லாம் கூப்பிடாதீங்க' என்பது போல் அவருக்கு பிறகு வரும் அனைவரும் வரிசையாக அவுட் ஆகி செல்வார்கள். அது போல, விக்ரம் இஷ்டப்பட்டு கஷ்டப்பட்டு கதற கதற நடித்திருக்கிறார். என்ன பயன்.. சச்சின் செஞ்சரி... ஆனால் இந்தியா தோற்றது கதைதான்!

ஒரு பாடலில் வெறும் நுரையுடன் வரும் ஏமி, திருநங்கை பாத்திர சித்தரிப்பு, யூடியூப் போன்ற வசனங்கள், உருக்குலைந்தவர்களை கிண்டல் செய்வது என இந்த படம் ஒரு புதிய ஜானரில் வந்திருக்கிறது.

ஆக இதை முன்னோடியாக வைத்து, இனி இது போல படம் எதுவும் வந்தால் U சான்றிதழுக்கு மேலே U/A அதுக்கும் மேலே A என இருந்தது போக, இனி அதுக்கும் மேலே 'I' சான்றிதழ் வழங்கலாம்.

இணைப்பு : ஷங்கரை வியக்கவும் ரசிக்கவும் தவறியதில்லை!
http://www.valaimanai.in/2012/01/blog-post_13.html
http://www.valaimanai.in/2010/10/blog-post_08.html

ரோஹித் 264 | வலைமனை போட்டோ கமெண்ட்ஸ்

2014-11-14T11:58:00.000+05:30

// முழுவதும் கற்பனையே யார் மனதையும் புண்படுத்தும் நோக்கத்தில் எழுதப்பட்டது அல்ல...//

"நாடி, நரம்பு, ரத்தம் எல்லாம் கிரிக்கெட் வெறி ஊறிப்போன ஒருத்தராலதான் இப்படி போட்டு அடிக்க முடியும்னு எக்ஸ்பெர்ட்ஸ் சொல்றாங்க..
சொல்லுங்க.. சொல்லுங்க.. சொல்லுங்.. பாம்பேல நீங்க என்ன பண்ணிட்டு இருந்தீங்க..."

"அங்கனயா.. மும்பை இந்தியன்ஸ்னு டீம்ல அடிவாங்கிட்டு இருந்தோம்.. ஏன்யா நல்ல நாள் அதுவுமா அதை ஞாபகப்படுத்திக்கிட்டு..."

"பாஸு.. தலையில கை வைக்காதப்பா.. ஹலோ.. அப்பால நிக்குற பிரதர், கன்னத்துல கையை எடுப்பா.. நானே என்னைக்காச்சும் ஃபார்ம்ல இருக்கேன்.."

"தாலி கட்டுற நேரத்துல பெண்ணோ பையனோ காணாம போனா மண்டபத்துல மாட்டுனவங்களை மணமேடையில உட்கார வைக்கிற மாதிரி நம்மளை கூப்பிட்டவே யோசிச்சிருக்கனும்.. இப்பல்ல புரியுது ஏன் வெஸ்ட் இண்டீஸ் நைட்டோட நைட்டா எஸ் ஆனாங்கன்னு... "

"ரன் மழை.. ரன் மழைம்பாய்ங்களே... இவ்ளோ அடிச்சும் ஒரு துளி கூட விழ மாட்டேங்குது..."

"அவ்ளோதாம்யா.. பத்து பதினைஞ்சு மேட்ச்ல வச்ச அரியர்ஸ்லாம் கிளியர் பண்ணியாச்சு.."

"நாங்க முதல் பெஞ்ச்ல மாசக்கணக்கா உட்கார்ந்து கஷ்டப்படுவோம்... கடைசி பெஞ்ச்ல உடகார்ந்து எல்லா கிளாஸ்லயும் தூங்குற நீங்க.. என்னைக்காவது ஒருநாள் படிச்சுட்டு வந்துட்டு படுத்துற பாடு இருக்கே.. அய்யோய்யோ..."

"நீங்கலாம் இருக்கீங்கற நம்பிக்கையிலதான வந்தோம்...
என்னம்மா இப்படி பண்றீங்களேம்மா.. "

"என்னைக்கும் இல்லாம கேக் வெட்ட கூப்பிட்டப்பவே புரிஞ்சிருக்கனும்.. அடுத்தது சிக்குன ஆட்டை வெட்ட போறாங்கன்னு.. "

"அடேய் ரோஹித்தா.. நான் இருவது செஞ்சுரிடா.."

"நான் இரண்டு டபுள் செஞ்சுரிண்ணே.. நூறு பெருசா.. இருநூறு பெரிசா..."

"ஹாங் வோர்ல்ட் கப்புக்கு டிக்கெட் போட்ருங் மணி... சோழர் பரம்பரையில் ஒரு எம்.எல்.ஏ"

வலைமனை | ஃபீலிங்ஸ் 12 11 14

2014-11-12T15:06:00.003+05:30

கும்பகோணம் அருகே உள்ள நாச்சியார்கோயில் நான் பிறந்த ஊர். கடந்த வார இறுதியில் அங்கு ஒரு திருமண நிகழ்ச்சி. எல்லாம் முடிந்து, சென்னைக்கு கிளம்புவதற்கு முன் சித்தப்பா வயலைப் பார்த்துவிட்டு வரலாம் என சென்றேன்.

வயலுக்கு போகும் வழியில் முன்பெல்லாம் ஒரு கடை இருக்காது. இப்போது ஆச்சரியமாய் ஒரு டாஸ்மாக் முளைத்திருந்தது. பஸ் ஸ்டாண்ட் அருகில் முக்கிய இடத்தில் டாஸ்மாக் இருந்ததால் அதை மாற்றக் கோரி ஊர் மக்கள் சாலை போராட்டங்கள் செய்திருக்கிறார்கள். அதனால் இங்கே மாற்றப்பட்டுள்ளதாம்.

தற்போது இதன் விளைவாய், குளக்கரையில் பட்டப்பகலில் ரசனையாய் அமர்ந்து மிக்ஸிங் செய்து குடித்துக் கொண்டிருந்தவர்களை பார்க்க முடிந்தது. டாஸ்மாக்கை சுற்றி நான்கைந்து சிக்கன் தள்ளுவண்டிகள், மிக்சர் பாக்கெட்டுகள், வாட்டர் பாக்கெட் சகிதம் ஒரு சைக்கிள் கடை என ரம்மியமாய் இருந்த வயல் பகுதிகள் ரம்மாய் காட்சியளிக்கிறது.

ஆறு இருந்த இடத்தை சுற்றி நாகரிகம் வளர்ந்தது போல இனி ஆட்களே இல்லாத எந்த பகுதியாவது டெவலப் ஆக வேண்டும் என்றால் அதில் ஒரு டாஸ்மாக்கை வைத்து விட்டால் போதும் போல.

எந்த ஆங்கிளில் அழகாக தெரிகிறேனோ அதில் ஒரு கிளிக் பண்ணிடுங்க என்றால், இந்த ஷாட்லதான் மாப்ள பார்க்கிற மாதிரி இருக்க என எடுத்து தருகிறார்கள் நண்பர்கள். எவ்வளவு பயிற்சி இருந்தாலும் ஊர் பசங்க கிண்டலை சமாளிப்பது கஷ்டம்.

•••

ஊருக்கு கிளம்ப வேண்டி இருந்ததால் இன்டர்ஸ்டெல்லார் காலை 9 மணி காட்சி வில்லிவாக்கம் ஏ.ஜி.எஸ் திரையரங்கில் பார்க்க வேண்டிய நிலை. பேஸ்புக் பேஜில் அவர்கள் சொன்னதுபோல் சப் டைட்டில் காண்பிக்கப்படவில்லை. சப் டைட்டில் கூட பரவாயில்லை. மெயின் டைட்டிலையே காண்பிக்கவில்லை. ஏதேதோ டிரைலர்கள் ஓடிக் கொண்டிருக்க படாரென கதாநாயகன் அவரது குழந்தைகளுடன் காரோட்டிக் கொண்டு செல்லும் காட்சியில் படம் ஆரம்பித்தது. டென்ட்டுக் கொட்டகையில் கூட எனக்குத் தெரிந்து இப்படி நடந்தது இல்லை. என்னம்மா இப்படி பண்ணிட்டீங்களேம்மா என அவர்களது பேஸ்புக் கணக்கிற்கு கேள்வி அனுப்பினால் இதுவரை பதில் இல்லை!

மற்றபடி படம் சுமாராக புரிந்தது. வீட்டிற்கு வந்து கதையை தேடி படித்த பின்தான் பரவாயில்லை படம் நல்லாத்தான் இருக்கு என்ற முடிவுக்கு வர முடிந்தது.

ஆனால் இன்னமும் எனக்கு ஸ்பேஸ் பிக்ஷன் என்றால் எண்டமூரி வீரேந்திரநாத் எழுதிய கண்சிமிட்டும் விண்மீன்கள் நாவல்தான். அதற்கு முன்னால் இன்டர்ஸ்டெல்லார் எல்லாம் சுமார்தான்.

•••

சரக்கடிக்கிறவங்களுக்கு கூட சங்கம் இருக்கு. ஆனா எங்க ஆளுங்களைத்தான் ரத்தம் குடிக்கிற காட்டேரி கணக்கா ஓட்டுறாங்க. இதுக்கெல்லாம் ஒரே தீர்வு 'கேண்டி கிரஷ் விளையாட்டு மேம்பாட்டு மையம்' ஆரம்பிக்கிறதுதான். இருள் விலகட்டும்!

•••

டாங்கா மாரின்னு அனேகன்ல ஹாரிஸ் போட்ட பாட்டு கேட்டுட்டு இருந்தேன். "கொஞ்ச நாளா இந்த நாக்க முக்க பாட்டை போட்டு அலற விடாம இருந்த.. மறுபடியும் ஆரம்பிச்சிட்டியா...?" என கிச்சனில் இருந்து அம்மா உடனே கத்துறாங்க.
# சாரிங்க பாஸ் வழக்கம்போல எல்லா தரப்பு சாட்சியும் உங்களுக்கு எதிராவே இருக்கு.

•••

கோபியின் வீடியோ வெளியான பின்னர் இனியும் கத்தி தானே செய்த இட்லி என முருகதாஸ் சொன்னால் அதை சட்னி கூட நம்பாதுதான். அதற்காக இன்னமும் அவரை துவைத்து தொங்கப் போட்டு கொண்டிருப்பது நியாயமாக படவில்லை. இதற்கு முன்னால் அவரே யோசித்து சமூகத்திற்கு சொல்லியிருக்கும் கருத்துக்களையும் அதனால் மக்கள் அடைந்த பலனையும் யோசித்து பாருங்கள்.

உதாரணத்திற்கு துப்பாக்கியில் கூட தண்ணீர் மேலாண்மை குறித்து அவர் ஒரு கருத்தை முன்வைத்திருக்கிறார். ஒரு இரவு கடற்கரையில் படுத்து தூங்கி எழுந்ததும் மறுநாள் காலை டீ ஷர்ட்டை உள்புறம் வெளிபுறமாய் திருப்பி மாற்றி போட்டுக் கொள்வார் விஜய். இதனை நாம் அனைவரும் பின்பற்றுவதன் மூலம் துவைப்பதற்காக ஆகும் தண்ணீர் எவ்வளவு சேமிக்கப்படும் என யோசித்து பாருங்கள்.!

நான் சின்ன வயசுல இருந்தே இப்படித்தான் பனியன் போடுறேன். என் ஐடியாவை தாஸ் சார் சுட்டுட்டாருன்னு யாராச்சும் கிளம்புனீங்க அப்புறம் அவ்ளோதான் சொல்லிட்டேன்.

•••

'Chill morning.. Enjoying hot coffee @Cafe day' என மொபைலில் ஸ்டேட்டஸ் போடுகிறார் ஷேர் ஆட்டோவில் அருகில் இருக்கும் இளம்பெண். இல்ல... நான் கேக்குறேன்.. என்ன இது? பேஸ்புக்குக்குன்னு ஒரு தர்மம், நியாயம் இல்ல..? Withனு போட்டு பக்கத்துல இருக்க என் பேரை டேக் பண்ண வேணாம்?

Tags : Kumbakonam Nachiyar Koil, Tasmac, Interstellar, Kansimitum vinmeengal endamoori virendranath

வலைமனை | ஃபீலிங்ஸ் 29 10 14

2014-10-29T13:57:00.000+05:30

நல்லவேளை பால் விலையைத்தான் ஏத்தி இருக்காங்களாம். நாங்கூட டீ, காபி விலையைத்தான் ஏத்திட்டாங்களோன்னு பயந்துட்டேன். இதுக்கும் மக்களின் முதல்வர்க்கு நன்றி சொன்னோம்னு வழக்கம்போல ஜெயா டிவியில் போட்டுக்கோங்க தல.

•••

படிக்கிறோமோ இல்லையோ எது கிடைத்தாலும் ஃபார்வார்ட் செய்யும் முரட்டு வியாதிக்கு பெயர் என்னவென்று தெரியவில்லை. 'Advance Diwali Wishes' என இன்று காலை வாட்ஸப்பில் ஒரு மெசேஜ். அதுக்குங் கீழே 'First wishes best wishes'னு கேப்ஷன் வேற.

•••

'இந்த முகத்தை யார் காசு கொடுத்து பார்ப்பது?' என முதல் படத்தில் விமர்சனம் செய்த பத்திரிக்கையை, ஐம்பது படங்களுக்கு பின்னர் 'அடுத்த சூப்பர் ஸ்டார்' என பட்டம் வழங்கச் செய்ய வைத்தது துணிவு, தன்னம்பிக்கை, அயராத உழைப்பே தவிர அப்பா இருக்கிறார் என்கிற பின்னணி அல்ல.

அப்படியாகப்பட்ட திறமை படைத்த ஒரு ஆளுமை, அவரோ அவரைச் சார்ந்தவர்களோ தெரிந்தோ தெரியாமலோ செய்த / செய்து கொண்டிருக்கும் அரசியல் ஆர்வக்கோளாறுகளினால் இன்றைக்கு சம்பாதித்த பெயரை, மதிப்பை சரித்துக் கொள்ள வேண்டிய சூழல்.

Time to lead என்கிற கேப்ஷனை நீக்கி முன்பு ஒரு படத்தை வெளியிட்டார்கள். அதற்கு ஒரு நன்றி நவிலல். இப்போது தயாரிப்பாளர்கள் பெயரை எடுத்து படத்தை வெளியிடும் நிலை. அதற்கும் நன்றி தெரிவிக்கிறார். நாளை விஜய் என்கிற பெயரையே எடுத்து படத்தை வெளியிட வேண்டிய நிலை ஏற்பட்டால் கூட அதற்கும் அசராமல் நன்றி சொல்வாரோ என்னவோ. ஆளுங்கட்சி ஆதரவு ச.ம.உ அண்ணன் சரத்குமார் கூட தனது படங்கள் வெளியீட்டின் போது இத்தனை நன்றிகள் சொன்னதில்லை.

குழந்தைகள் முதல் பெரியவர்கள் வரை மொத்த குடும்பத்தையே திரையரங்கத்திற்கு இழுக்கக் கூடிய சக்தியை ரஜினிக்கு அடுத்து சந்தேகமேயில்லாமல் விஜய் சம்பாதித்து வைத்திருக்கிறார். சுறா, ஆதி போன்ற டெம்ப்ளேட்களினால் அவரின் மீது ஆர்வம் விட்டுப் போன என்னைப் போன்ற பொதுவான ரசிகர்களை, நண்பன், துப்பாக்கி என பயணித்து தற்போது திரும்பி பார்க்க வைக்கிறார்.

இனி வரும் காலங்களில் அரசியல் என்ற கேள்விக்கு 'ஆம்', 'இல்லை', 'இருக்கலாம்' என சொல்லப் போகும் அவரது பதில் முக்கியமானது. மக்கள் விரும்பும் வகையில் காமெடி, ஆக்ஷ்ன், ரொமான்ஸ் யாவும் ஒன்றாக கைவரப் பெற்றவரான விஜய், அரசியலுக்கு 'இல்லை' என பதிலளித்துவிட்டு நிம்மதியாக அடுத்தடுத்த உயரங்களை தொடலாம்.

அதே சமயம்... 'ஆம்', 'இருக்கலாம்' என்று கூட பதில் சொல்ல அவருக்கு உரிமை உண்டு. அந்நிலையில் இந்த நன்றி அறிக்கை, சோக வீடியோக்களை விட்டுவிட்டு எதிர்வினைகளை சந்திப்பதே 'யார் பார்ப்பது?' இல் இருந்து 'அடுத்த சூப்பர் ஸ்டாரு'க்கு உயர கூடிய அளவு ஆற்றல் பெற்றவருக்கு மேலும் அழகு!

•••

தீபாவளிக்கு இப்பொழுதெல்லாம் புதுவகை குண்டுகள் வீட்டிற்குள் வந்து விழுகின்றன. தங்க நகையினை தீபாவளி பரிசாக கொடுத்து மனைவிக்கு வாழ்த்து சொல்கிறார்கள் மாடல் கணவன்கள். ஹே.. என்னங்கடா.. வர வர கலவரத்தை தூண்டுற விளம்பரங்களா வருது..?

•••

ஜெயா டிவியில் கடந்த ஞாயிறு மதியம் 'சிவகாசி'. மாலை 'பரமசிவன்' போட்டாங்க. நாங்க தல, தளபதி ரசிகர்கள் வேணும்ன்னா சண்டையை விட்டுட்டு ஆயுதங்கள்லாம் ஒப்படைச்சிட்டு சரண் அடைஞ்சு இருப்போம். இந்த மாதிரி அணு ஆயுதங்களை பிரயோகிச்சு இரு தரப்புக்கும் பலத்த சேதாரத்தை ஏற்படுத்தி இருக்க வேணாம்.

•••

"என்னம்மா இப்படி பண்றீங்களேம்மா...?" என்பது தமிழ் கூறும் நல்லுலகிற்கு கிடைத்துள்ள பொக்கிஷ வாக்கியம். இன்னமும் இந்த வார்த்தைக்கு அர்த்தம் தெரியாதவர்களானால் இந்த வீடியோவை பார்த்துவிடவும். விஜய் அவர்ட்ஸை ஜீ தமிழ் கலாய்த்ததற்கு சரியான பதிலடி.

https://www.youtube.com/watch?v=NHH_3R0kZIs

•••
அம்மா உள்ளே சென்றது முதலே அதகளப்பட்டது பேஸ்புக். அவர் வெளியே வந்த அன்று என் டைம்லைனில் ஒரு போஸ்ட் கண்ணில் பட்டது.

"வெற்றி.. வெற்றி.. அம்மாவுக்கு ஜமீன் கிடைத்தது".

ஏற்கனவே சொத்து குவிப்பு வழக்கு. இதுல புதுசா ஜமீனோட சொத்தையும் சேர்த்து கணக்கெடுத்தா என்னாகுறது? இதுக்குதான் 'அமைதியா இருங்க அப்ரசண்டீஸ்களா'ன்னு அம்மா வெளிய வந்ததும் அறிக்கை விட்டாங்க.

வலைமனை | ஃபீலிங்ஸ் 15 10 14

2014-10-15T12:25:00.003+05:30

கடந்த ஞாயிறு அன்று மாலை யுவன் ஷங்கர் ராஜா இசையில், விஷால் பிலிம் பேக்டரி தயாரிப்பில், வரலஷ்மி சரத்குமார், ஹாட் ஷு டான்ஸ் கம்பெனி வழங்கிய 'சிகாகோ' இசை நாடக நிகழ்ச்சிக்கு சென்றிருந்தேன். கலைஞர்களின் அட்டகாசமான நடன அமைப்புகளுக்கு ஏற்றவாறு கண்ணைக்கவரும் ஒளியமைப்பு, அலங்கார உடைகள், அழகான பின்னணி அமைப்புகள் என அசத்தி இருந்தார்கள். பாடிக்கொண்டே நடனமாடி நடித்த முக்கிய கதாபாத்திரங்கள் சிறப்பான திறமையை வெளிப்படுத்தினர். நிகழ்ச்சி ஆரம்பிக்கும் முன்னரே விஷ்ணு, பவதாரிணி, யுவன்ஷங்கர் ராஜா, பார்த்திபன், நாசர், குஷ்பு, விக்ராந்த் ஆகியோர் வந்திருந்தனர். நடுவில் விஜய் சேதுபதியையும் பார்க்க முடிந்தது. மனதைக் கவரும் ஜாஸ் இசை இரவாக அமைந்தது.

•••

சூப்பர் டிடெர்ஜெண்ட் பவுடர் இருக்கான்னு கேட்டா, அப்படி ஒண்ணு வந்திருக்கான்னு எதிர் கேள்வி கேட்குறாங்க கடையில. என் தலைவி ஹன்சிகா ரெண்டு மூணு மாசமா 'சூப்பர் .. சூப்பர்'னு என்ன அழகா பாட்டு பாடி விளம்பரம் பண்ணிட்டு இருக்காங்க... அந்த சிரிப்புக்காவது நீங்க தெரிஞ்சி வச்சிருக்க வேணாம்? என்னய்யா கடை நடத்துறீங்க?

•••

சில பாடல்கள் வழக்கமான Genreகளில் அடங்காது. 'முன்பே வா' எல்லாம் பாடலே அல்ல. அது ஒரு மாயாஜாலம். 'ஜனனி ஜனனி' தெய்வீகம். 'தென்றல் வந்து தீண்டும்போது' ஒரு மெஸ்மரிசம். 'காற்றின் மொழி' பாடலோ சிறந்த தியானம். இது போன்ற பாடல்கள், 'நான்' என்பதை மறந்து அந்தந்த இசை துகள்களில் ஒளிந்திருக்கும் வேறொரு உலகத்திற்குள் கரையச் செய்யும் வல்லமை பெற்றவை.

இது போல் எல்லோருக்கும் ஒரு பட்டியல் இருக்கும். எனது பட்டியலில் சமீபத்திய சேர்க்கை 'அம்மா அம்மா' பாடல். மேலே உள்ள பாடல்களுடன் இந்த பாட்டை ஒப்பிட்டு சொல்லவில்லை. அப்படி செய்யவும் முடியாது. ஆனால் ஒவ்வொரு பாட்டிற்கும் இருக்கும் தனித்தன்மை போல இந்த பாடலில் சொல்ல முடியாத துயரத்தை கொண்ட இசை துகள்கள் ஒளிந்திருப்பதாக உணர்கிறேன். வாழ்த்துக்கள் அனிருத்!

•••

விஜய் டி.வியில் நிகழ்ச்சியை வழங்குபவர்களில் எனக்கு மிகவும் பிடித்தவர் சமையல் கலைஞர் வெங்கடேஷ் பட். நிதானமான பாவனை, பக்குவமான பேச்சு என எளிதில் யாரையும் கவரும்படி இருப்பார். சமீபத்தில் அவர் செய்து காண்பித்த கேரளா கோழி ரோஸ்ட் சமையல் குறிப்பை கடந்த ஞாயிறு அன்று வீட்டில் செய்து பார்த்தேன். செய்வதற்கு மிக எளிமையாகவும் அட்டகாசமான சுவையுடனும் இருந்தது. முயன்று பாருங்கள்.

https://www.youtube.com/watch?v=cPSdKDUlODc

Tags : Vijay Tv Samayal Samayal, Venkatesh Bhat, Hot Shoe Dance Company's Chicago Musical, Hansika Super Detergent powder, Amma Amma Song VIP Anirudh

வலைமனை | ஃபீலிங்ஸ் 08 10 14

2014-10-08T11:01:00.002+05:30

இந்தியன் சூப்பர் லீக் கால்பந்தாட்ட போட்டித்தொடர் வரும் 12ம் தேதி துவங்க இருக்கிறது. சென்னையில் முதல் இரண்டு போட்டிகளுக்கான டிக்கெட்டுகள் புக்கிங் துவங்கிவிட்டன. 100 ரூபாயிலிருந்து டிக்கெட்டுகள் கிடைக்கின்றன. ஹிட் ஆகிவிட்டால் ஐபில் போல விலை ஏற்றிவிடுவார்கள் என்பதில் ஐயமில்லை.

'தயவு செஞ்சு லோகோவை மாத்துங்க' என சென்னை அணியின் பேஸ்புக் பக்கத்தில் மக்கள் கமெண்ட் போட்டுக்கொண்டே இருக்கிறார்கள். ஆனால் எனக்கு இது மிகவும் பிடித்துள்ளது. வழக்கமான சிங்கம், புலி, கரடி என யோசிக்காமல் கிரியேட்டிவ்வான ஐடியா. அவரவர் அணி லோகோ வீட்டில் இருக்கிறதோ இல்லையோ, நமது அணி சின்னமான திருஷ்டி பொம்மை நாட்டில் பலரது வீடுகளில் ஏற்கனவே இருக்கிறது :)

அபிஷேக் பச்சனுடன் தல தோனியும் தற்பொழுது இந்த அணியின் கோ ஓனர் ஆகி இருக்கிறார். எனது கவலை எல்லாம், மேட்ச் ஜெயிப்பது போல் இருந்தால், நான்தான் முடித்து வைப்பேன் என வழக்கம்போல் தோனி கிரவுண்டில் இறங்காமல் இருக்க வேண்டும் என்பதுதான்!

***

கடந்த வாரம் Times Now சேனலில் மோடியின் மேடிஸன் ஸ்கொயர் அமெரிக்க நிகழ்வினை பார்த்துக் கொண்டிருந்தேன். ஷங்கர் படத்திற்கு இணையான மேக்கிங்கில் இருந்தது.

தேசிய கீதத்தின் போது மோடியின் முகம் மீது ஒரு லேயரில் தேசிய கொடி பறக்கிறது. 30 வருடங்களுக்கு முன்னரே ஐயா எம்.எஸ்.உதயமூர்த்தி எழுதி வைத்த கட்டுரைகளை ஒத்த கருத்துக்களை ஹிந்தியில் பிரதமர் பேச அமெரிக்க இந்திய கொடிகளுடன் மோடியின் உருவம் பொறித்த பதாகைகளை அசைத்தபடி 'மோடி மோடி' என அரங்கமே அதிர்கிறது. இது போதாதென்று எந்த பிரதமருக்கும் இல்லாத பிரம்மாண்ட வரவேற்பு என மோடி பராக்கிரமங்களை கீழே ஸ்க்ரோலிங்கில் ஓட விட்டுக் கொண்டிருந்தது சேனல்.

இதையெல்லாம் உடன் பார்த்துக் கொண்டிருந்த நண்பன், நாடி நரம்பெல்லாம் முறுக்கேறி 'மோடிஜிதான்டா அடுத்த பிரதமர்.. அவருக்குதான் ஓட்டு போடுவேன்.. மன்மோகன் சிங்கை வீட்டுக்கு அனுப்பனும்' என்கிறான். ஃபன்னி ஃபெல்லோ..!

# தட் 'தேர்தல் முடிஞ்சிடுச்சில்ல.. பிரசாரத்தை எப்போ சார் முடிப்பீங்க...?' மொமண்ட்!

***

ஏதாச்சும் டீஸரோ, போஸ்டரோ வந்தா அது எதுல இருந்து காப்பின்னு கண்டுபிடிச்சு சொல்லலைன்னா நம்மளை இணையவாசியா ஒத்துக்க மாட்டாங்க. அதனால் என் பங்குக்கு இதை கண்டுபிடிச்சிருக்கேன். பைப்புக்குள்ள இறங்கி பல பேரை அடிச்சு நொறுக்கி பல தடைகள் கடந்து இளவரசியை காப்பாத்துற மேரியோவின் லைப் ஹிஸ்டரிதான் கத்தி படத்தின் கதை. எப்பூடி?

# ஐ காப்பிடா - கத்தி காப்பிடா - புரூ காப்பிடா

***

தங்கள் படங்கள் வரும்பொழுது சில ஹீரோக்கள் சி.டி. பஜார்களில் அதிரடி ரெய்டு நடத்தி "ஏன்டா இப்படி ஏமாத்தி பிழைக்கிறீங்க?" என கம்பீரமாய் கேட்கிறார்கள். ஆனால் பாருங்கள் 30 ரூபாய் பாப்கார்னை 150 ரூபாய்க்கு கேள்வி எதுவும் கேட்காமல் வாங்கி செல்கிறான் ரசிகன்.

# பஜார்ல பண்ணா ரத்தம்; மல்டிபிளக்ஸ்ல பண்ணா தக்காளி சட்னி

டெஸ்ட் மேட்ச்ல சங்கு - ஒன் டேல கிங்கு

2014-09-03T10:26:00.001+05:30

"என்ன மச்சான் .. 'டெஸ்ட்'ல அவ்ளோ கேவலமா தோத்தானுங்க???"

"அதான் இப்போ 'அரியர்ஸ்' வச்சி அடிக்கிறாங்களே.."

"அஞ்சு நாள் வெளாடுறதுலாம் ஒரு வெளாட்டாம். அதுல நாங்க தோத்துட்டோமாம். போங்கய்யா யோவ்.. அவனவனுக்கு ஐ.பி.எல், ஆட் பிலிம் ஷுட்டிங்னு ஆயிரம் வேலை இருக்கு. இதுல நின்னு நிதானமா வெளயாடுனுமாம். வாட் எ வேஸ்ட் ஆப் டைம், மணி ஆன்ட் எனர்ஜி"

"ஆங்.. டெஸ்ட் மேட்ச்ல சார்கிட்ட அடி வாங்குனவங்க எல்லாம் திருப்பி கொடுத்திட்டீங்கல்ல.. ?ஓ.கே பாஸ் நீங்க போய்ட்டு அடுத்த ஆளை உள்ள தள்ளிவிடுங்க."

"போங்க தம்பி.. என்னைய அவுட் ஆக்குனதுக்கெல்லாம் ஒரு செலிப்ரேஷனா.. ? இது எப்படி தெரியுமா இருக்கு..? அஞ்சான் டீசர் ஹிட்டுன்னு கேக் வெட்டி கொண்டாடுனாங்க பாரு.. அப்படி இருக்கு."

"கையில பேட் எடுத்து சும்மா போர் வாள் மாதிரி சொழட்டி சொழட்டி அடிக்கிறியே... நீ ரெய்னா இல்ல மச்சி கோச்சடையான்ல வர்ற ராணா"

"எப்போ பாரு கடைசியில வந்து சும்மா நின்னு பேரு வாங்கிக்கிறியே மாமா... நீ தோனி இல்ல ... அதே கோச்சடையான்ல கிளைமேக்ஸ்ல மட்டும் வர்ற சேனா.."

"ஆங்.. லெப்ட்ல பூசு... ஆங்.. ரைட்ல பூசு...
ஒன் டே மேட்ச்ல வசமா மாட்டுனீங்களா.. இப்போ எப்படி பூ மிதிக்கிறோம் பாருங்க.."

"டெஸ்ட் மேட்ச்ல கிரீஸ் டப்பாவை எப்படி எட்டி உதைச்சீங்க...?"

வலைமனை | ஃபீலிங்ஸ் 30 07 14

2014-07-30T12:41:00.001+05:30

விழாவை சிறப்பிக்க வந்தவங்களுக்கெல்லாம் போகும்போது தேங்காய் பை கொடுத்தா அது கல்யாணம். விருது கொடுத்தா அது விஜய் அவார்ட்ஸ் என்பது போல் ஆகிவிட்டது. உதாரணமாக ஷாருக் வந்ததற்காக வழங்கப்பட்டது போல் இருந்த என்டெர்டெயினர் அவர்ட். அவர் பேசும்பொழுதும் இதை லைட்டாக குறிப்பிட்டார்.

ரா.ஒன்னில் ரஜினி. சென்னை எக்ஸ்பிரஸ் படம். வருடா வருடம் விஜய் அவர்ட்ஸ் என சமீப காலமாக வடக்குத்தளபதி ஷாருக்கின் தமிழ்மண் மீதான பாசம் என்னைப் போன்ற இளகிய மனம் கொண்ட ரசிகர்களை புல்லரிக்க வைக்கிறது. "இங்க வர்ற உணர்வே நல்லா இருக்கு. நீங்க நான் வர்றதுக்காக விருது கூட தர வேணாம். பெரிய கலைஞர்கள் எல்லாம் இருக்கிற இந்த காற்றை சுவாசிச்சாலே போதும்" என்று அவர் சொன்னபொழுது 'அரசியலுக்கு வா தலைவா' என என்னையும் அறியாமல் உரக்க கத்திவிட்டேன். ஆனால் டிவிக்குள் இருந்ததினால் அது அவருக்கு கேட்கவில்லை. யாராவது ஹிந்தி தெரிந்தவர்கள் மக்கள் உணர்வை சொல்லி அவரை அழைத்து வந்தீர்களானால் 2016ல் கேப்டன், அடுத்த சூப்பர் ஸ்டாருக்கெல்லாம் செம டஃப் கொடுக்கலாம்.

•••

நேற்று முன்தினம் வில்லிவாக்கம் ரயில்வே கிராஸிங் தாண்டி ஒரு சின்னப் பையன் லிப்ட்டிற்கு கை காட்டினான். 'என் படங்கள் இங்கே இருந்து எடுக்கப்படுகின்றன' என ஆந்திராவை நோக்கி மக்கள் இயக்க கொடியில் விஜய் கை காட்டுவாரே.. அதே படம் பொறிக்கப்பட்ட கர்சீப் கையில்.

திங்கட்கிழமை காலை அதுவுமா நல்ல தீனிதான் என நினைத்து ஏற்றிக் கொண்டே பேச்சு கொடுத்தேன்.

"என்னய்யா.. விஜய் ஃபேனா...?"

"ஆமாண்ணா.." என பிரகாசமாகி விஜய்யின் வீர தீர பராக்கிரமங்களை மூச்சு விடாமல் எஸ்.பி.பி போல பாட்டாவே பாடிக்கொண்டு வந்தான். ஐ.சி.எப் சிக்னலுக்கு முன்னர் நிறுத்தச் சொல்லி இறங்கிக் கொண்டு "தேங்கஸ்ண்ணா" என்றவனிடம் நான்,

"ஆமா.. உங்களுக்குதான் இளைய தளபதின்னு பட்டம் இருக்குல்ல. ரஜினியோட சூப்பர் ஸ்டார் பட்டத்தை ஏன்யா எடுத்துக்கிட்டீங்க" என்றேன்.

"அவர்தானண்ணா பர்ஸ்ட்டு இளைய தளபதியா நடிச்சாரு!" என்று ஒரு குண்டை போட்டான்.

"என்னய்யா சொல்ற.. இது எப்போ நடந்துச்சு" என்றேன் அதிர்ச்சியாய்.

"ஆமாண்ணா.. கோச்சடையான் பாத்தீங்களா.. அதுல இளமையா தளபதியா நடிச்சாருல்ல... அதுக்கு நாங்க ஏதாச்சும் கேட்டோமா??" என்றான் சீரியஸாய்.

இந்த மாதிரி ரசிகர்கள் இருக்கிற வரைக்கும் விஜய் அண்ணாவை யாரும் அடிச்சிக்க முடியாது என நினைத்துக் கொண்டே "நீயெல்லாம் நல்லா வருவய்யா.. நல்லா வருவ.." என சொல்லிவிட்டு வண்டியை கிளப்பினேன்.

வலைமனை | ஃபீலிங்ஸ் 23 07 14

2014-07-23T09:33:00.000+05:30

வழக்கமாக #சி.எஸ்.கேடா #இந்தியாடா #தோனிடா என்று டேக் போட்ட எங்களை #இஷாந்த்டானு எல்லாம் டேக் போட வச்சிட்டீங்களேடா இங்கிலாந்து பாய்ஸ். இதுக்கும் மேலயா நீங்க கிரிக்கெட் விளையாடனும்? போங்கடா... போய் புள்ள குட்டிங்களை கிரிக்கெட் கோச்சிங்ல சேருங்க.

•••

இது தலைநகர் தில்லியின் லேட்டஸ்ட் புகைப்படம் (!). இப்பொழுதெல்லாம் மழை தண்ணீர் நிற்பதில்லையாம். கொசு கடிப்பது கூட இல்லையாம். மக்கள் அனைவரும் 'முவாங் சுவாங்' என சைனா பாஷையிலே ஜோக் அடித்து சிரித்து இன்புற்ற நிலையில் இருக்கிறார்களாம்.

"துபாய் எங்க இருக்குன்னு கேட்டா ஈரோடு பக்கம் தூத்துக்குடி பக்கம் இருக்கும்பேன்"கிற மாதிரி தேர்தல் நேரத்தில் சீன எழுத்துக்களை போட்டோஷாப்பில் சரியாய் கூட அழிக்காமல் சீனத்து பஸ் ஸ்டான்ட் போட்டோவை போட்டு, 'மோடியின் குஜராத்தை பாரீர்' என மார்க்கெட்டிங் பண்ண நல்லவங்களுக்காக இந்த பதிவை டெடிகேட் பண்றோம்.

# ஆப் கி பார்.. கொசு கடிக்குது சார்! போட்டோஷாப்லயே கொசுவை எப்படி கொல்றதுன்னும் சொல்லிக்குடுத்தீங்கன்னா...

•••

சூளைமேடு மெயின்ரோடை சுற்றிய பகுதிகளில் அதிக அளவில் வடகிழக்கு மாணவ மாணவிகளை பார்க்கலாம். சுரீரென மண்டையைப் பிளக்கும் சென்னை வெயிலையே 'போடா வெண்ணெய்' என சொல்வது போல் இவர்களது நிறம் மட்டும் எத்தனை வருடம் இங்கிருந்தாலும் மாறுவதே இல்லை. படிக்க வரும்பொழுதே ரிசர்வேஷனில்தான் வருவார்கள். அதனால் இவர்களை ஜோடியாகத்தான் பார்க்க முடியும்.

அன்றொருநாள் நெல்சன் மாணிக்கம் சாலையில் பைக்கை ஓரங்கட்டி செல்போனில் பேசிக்கொண்டிருந்த போது அதிசயமாக தனியாக ஒரு வடகிழக்கு பெண்ணை பார்த்தேன். என்னை நோக்கித்தான் வந்து கொண்டிருந்தார்.

"ஆஹா... இவங்க பாஷை நமக்கு புரியாதே.. அவசரத்திற்கு நமக்கு வாயில இங்கிலீஷ் வேற வராதே.. லிப்ட், கிப்ட் கேட்டா பைக்குல பெட்ரோல் வேற இல்லையே" என மனதில் பல குழப்பங்களுடன் அந்த பெண்ணை எதிர்நோக்க, அவரோ "அண்ணா ... வேர் இஸ் ஸ்கைவாக்..?" என சிம்பிளாக கேட்டார். 'அண்ணா'வில் 'ண'கர உச்சரிப்பு கூட அவ்வளவு சுத்தமாக இருந்தது.

அன்றுதான் தெரிந்துகொண்டேன். ஊருக்கு வந்த உடன் முதல் வேலையாக உள்ளூர் பாஷையில் 'அண்ணா' என்கிற வார்த்தையை வடகிழக்கு பெண்களும் கற்று வைத்துக்கொள்கிறார்கள் என்று.

வலைமனை | ஃபீலிங்ஸ் 16 07 14

2014-07-16T13:24:00.002+05:30

ஒருவழியாக கால்பந்தாட்ட திருவிழா முடிந்துவிட்டது. கிரிக்கெட் மேட்ச் பார்த்து பழக்கப்பட்ட கண்களுக்கு இடையிடையே கமர்ஷியல்ஸ், கீழே பேனர் ஆட்ஸ், பிட்ச்சில் லோகோ என எதுவும் இல்லாமல் பார்க்க லோக்கல் மேட்ச் போல இருந்தது. நமது BCCI இடம் FIFA அமைப்பை இரண்டு மாதம் பாடம் படிக்க சொல்ல வேண்டும். ஐடியா இல்லாத பசங்க!

•••

வழக்கமாக வாக்கிங் போகும் பார்க்கில் சென்ற வாரம் நெத்திலி மீன்கள் சைஸில் ஒரு காதல் ஜோடி. பெண் முன்னே செல்ல பத்தடி தள்ளி பையன் சென்றவாறே பேச... அவர்களை பார்ப்பவர்கள் இருவருக்கும் சம்பந்தம் இல்லை என நினைக்கும் வகையில் யாருக்கும் தெரியாமல் லவ் பண்றாங்களாமாம். கொண்டையை மறைக்காத 'பாடி ஸ்டுடா' போல் நாமும் இதேபோல் எவ்வளவு கேனைத்தனமாகவெல்லாம் இருந்திருக்கிறோம் என்று ஹிஸ்டரியை நினைத்து செம சிரிப்பாய் சிரித்துக்கொண்டே வாக்கினேன்.

•••

தமிழில் ஒரு குறிப்பிடும்படியான ஆவணத்தொடர் துவங்கியிருக்கிறது. 'யாதும் ஊரே' என பெயரிடப்பட்டுள்ள இதன் முதல் அத்தியாயம் லண்டனில் உள்ள மியூசியத்தை சுற்றி நகர்கிறது.

தெளிவான, மிதமான, கண்ணை உறுத்தாத ஒளிப்பதிவு ஆவணப்படத்தை தொடர்ந்து பார்க்க வைப்பதில் முக்கிய பங்கு வகிக்கிறது. சொல்லப்படும் பொருளுக்கு உரிய பாரம்பரியத்திற்கு இணையான பிரம்மாண்டத்தை கேமரா கோணங்களில் வெளிப்படுத்தும் விதமும், எடிட்டிங், இசை என யாவும் தொழில்நுட்பத்தில் சிறந்த தரத்தில் அமைந்திருக்கிறது. நந்தினி கார்க்கியின் சிறப்பான ஆங்கில சப் டைட்டில்ஸ் பிளஸ் பாயிண்ட்.

வழங்குபவரின் அமைதியான, அதே நேரம் உறுதியான பாவனை, நாம் பழகியறிந்த நண்பரை போன்ற தோரணை இவைகளினால் அவர் சொல்வதை மனம் கவனிக்கவும் கற்கவும் எளிதாக இருக்கிறது. முதல் முறையாக இந்த ஆவணப்படத்தின் மூலம் நிறைய தகவல்கள் அறிந்துகொண்டேன்.

படிக்க வேண்டிய ஒரு முக்கியமான புத்தகத்தின் வார்த்தைகளுக்கு உயிர் கொடுத்து ஒலிஒளி வடிவத்தில் சுவாரஸ்யமாக வழங்கியதை போன்ற அனுபவம். பொருள், காலம், உழைப்பு என பல்வேறு வடிவங்களில் இந்த உன்னதமான கற்பிக்கும் முயற்சியை முன்னெடுத்திற்கும் தவ சஜீதரன் மற்றும் அவரது குழுவினருக்கு மனமார்ந்த வாழ்த்துக்கள்.

•••

புது நம்பர் வாங்கி சிம்மை போட்டு செல் ஆன் பண்ணா.. நெட்வொர்க்ல வெல்கம் மெசேஜ் வர்றதுக்குள்ள அரக்கோணத்துல அரை கிரவுண்டு வாங்குங்கன்னு மெசேஜ் வருது.. ரியல் எஸ்டேட்காரங்களா.. ஆனாலும் தீயா வேலை செய்யுறீங்கப்பா...!

•••

நிஜமாகவே மாயக்கண்ணாடிகள் சலூனில்தான் இருக்கின்றன. 'பரவாயில்லை.. இப்போ கொஞ்சம் பாலிஷ்தான் ஆயிட்டோம்' என்று சலூன் கண்ணாடியில முகத்தை ரசித்து மேடி மாதிரி ஸ்மைல் எல்லாம் பண்ணிட்டு வந்து வீட்டு கண்ணாடியில பார்த்தால்... வழக்கமான அதே குரங்கு பொம்மைதான் தெரிகிறது.

•••

"ஏம்ப்பா பார்லிமென்ட்ல தூங்குற.. எழுந்திருப்பா.."
"ஆர்.டி.ஐ.. உமன் எம்பவர்மென்ட்.."
"உன்னை எழுப்புனது தப்புதான்.. தயவு செஞ்சு தூங்கு ராசா..."

வலைமனை | ஃபீலிங்ஸ் 09 07 14

2014-07-09T13:45:00.001+05:30

வழக்கமாக வீரர்கள் விளையாடி முடித்ததும் யாரோ அவர்களது உடைகளை துவைத்து காய வைப்பார்கள். ஆனால் நேற்று நடந்த அரையிறுதியில் ஜெர்மனி அணியினர் செய்தது வித்தியாசமானது. பிரேசில் வீரர்களது உடைகளை ஜெர்மனி வீரர்களே துவைத்து தொங்க விட்டார்கள். துவைக்கும் போது பிரேசில் வீரர்கள் உடையின் உள்ளே இருந்தார்கள் என்பதுதான் பிரேசில் நாட்டுக்காரர்களுக்கு வருத்தமாம்!

# தட் நானும் மேட்ச் பார்க்கிறேன் என்னையும் ஜீப்ல ஏத்திக்கோங்க மொமன்ட்

***

முதன்முறையாக ஒரு இசை வெளியீட்டு விழாவிற்கு செல்லும் வாய்ப்பு. விடக்கூடாது அல்லவா..? கடந்த வெள்ளிக்கிழமை சீரும் சிறப்புமாக சத்யம் திரையரங்கத்தில் நடைபெற்ற நம்ம கேபிள்ஜியின் 'தொட்டால் தொடரும்' திரைப்படத்தின் இசை வெளியீட்டு விழாவிற்கு சென்றிருந்தேன். பதிவர்கள் பலரையும் சந்திக்க முடிந்தது. இரண்டு டிரைலர்கள், இரண்டு பாடல்கள் திரையிடப்பட்ட பிறகு பிரபலங்கள் பேசி முடித்த பின் இசை வெளியிடப்பட்டது.

ஏற்கனவே பாஸு பாஸு சிங்கிள் டிராக் மூலம் அசத்தி இருந்தனர். இப்போது டிரைலரை பார்த்த பின்னர் வெற்றிப் படமாக அமையும் என தெரிந்து விட்டது. பாடல்களை பொருத்தவரை வெகு சிறப்பாக வந்திருக்கிறது. 'யாருடா மச்சான் அவ யாருடா' பாடலை மீண்டும் மீண்டும் லூப்பில் கேட்டுக் கொண்டே இருக்கிறேன். அடுத்து 'பெண்ணே பெண்ணே' நல்லதொரு மெலடியாக அமைந்திருக்கிறது. 'ஹே.. எனக்கென இந்த பூமியில் வந்தவனே' என மெஸ்மரைசிங் குரலில் துவங்கும் 'பூப்போல பூப்போல' பாடலும் 'ஜாதகத்தில் யோகம் வந்தது' பாடலும் பீல் குட் உணர்வினை தரும் ரகம். பாடல்களை கேட்கும் போதே படத்தை திரையில் காணும் ஆவல் எழுகிறது. கேபிள் சங்கர் கலக்கப்போகிறார்! வாழ்த்துக்கள்!

***

முதன்முறையாக ஒரு ஆங்கில இசை நாடகம் பார்த்தேன். 'விக்டர் ஹியுகோ' எழுதிய 'லே மிஸரபில்ஸ்' என்கிற புகழ்பெற்ற புத்தகத்தினை தழுவி லைவ் ஆர்கெஸ்ட்ராவுடன் சென்னையைச் சார்ந்த நடிகர்கள், இசைக் கலைஞர்களை வைத்து உலகத்தரத்தில் ஒரு பிரமிப்பான அனுபவத்தை தந்திருந்தார்கள் 'தி குக்கூ கம்பெனி'!

இசை வெளியீட்டு விழாக்கள் உள்ளிட்ட முக்கிய நிகழ்வுகள் நடைபெறும் சென்னையின் சிறப்பான ஆடிட்டோரியங்களில் ஒன்றான ஹாரிங்டன் சாலையில் உள்ள சார் முத்தா வெங்கட்ட சுப்பராவ் கான்சர்ட் ஹாலில் நடைபெற்றது. ஒலியமைப்பும் ஒளியமைப்பும் மிகத் தரமானதாக இருந்தது. லைவ் ஆர்கெஸ்ட்ராவுடன் பாடிக் கொண்டே நடித்த நடிகர்கள் அசத்தி விட்டார்கள். அருமையான அனுபவம்!

இதில் இடம்பெற்ற லுக் டவுன், மாஸ்டர் ஆப் தி ஹவுஸ், லவ்லி லேடிஸ் டிராக்குகளை தேடிப் பிடித்து கேட்கிறேன் கேட்கிறேன் கேட்டுக் கொண்டே இருக்கிறேன். மனதில் ஒட்டிக்கொண்டு அகல மறுக்கிறது.

***

சமீபத்தில் முன்னேர் பதிப்பகத்திற்காக நான் சில புத்தக அட்டைகள் வடிவமைத்திருந்தேன். கடந்த வாரம் அவைகளை கொரியரில் அனுப்பி வைத்திருந்தார்கள். இதுபோல புத்தம் புது புத்தங்களை இலவசமாக மணமணக்க அனுப்பி வைப்பதற்காகவே எவ்வளவு வேண்டுமானாலும் டிசைன் செய்யலாம்.

முன்னேர் பதிப்பக முகப்புத்தக பக்கம் : https://www.facebook.com/munnerpathippagam?fref=ts

***

கோச்சடையான் நான்காவது முறையாக சனிக்கிழமை சென்றிருந்தேன். தலைவர் ஏ.ஆர்.ரஹ்மானின் பின்னணி இசையை இன்னுமொரு முறை சுவைத்துவிடலாம் என்று.

படம் ஆரம்பித்ததும் பக்கத்தில் இருந்தவர் 3டி கண்ணாடியை அகற்றி அகற்றி பார்த்துக் கொண்டிருந்தார். நான் வினோதமாக அவரையே பார்க்க.., "கண்ணாடி எடுத்தா எப்படி தெரியுதுன்னு செக் பண்றேன்" என்றார். "நல்லா பண்ணுங்க.. படத்துலயே மொத்தம் பத்து நிமிஷம்தான் 3டி.. அதையும் இப்படியே பண்ணிடுங்க.." என நினைத்துக் கொண்டேன்.

ஒரு 2டி படத்தை 3டி கண்ணாடி மாட்டி பார்க்க வைக்கும் தொழில்நுட்பம் உலகத்திலேயே இதுதான் முதன்முறை.