Nature & Wildlife Photography

සාර්ථක වන ජීවී ඡායාරූපයක් ගැනීමට නම්......

2014-09-07T11:16:00.000-07:00

1). එක් වරකට එක අරමුනක පිහිටා ඡායාරූප ගන්න.

සාර්ථක වන ජීවී ඡායාරූපයක් ගැනීමට ඔබගේ සිත එක අරමුනක තබා ගත යුතුය. බොහෝ වන ජීවී ඡායාරූප ශිල්පය හදාරන්නවුන් ඡායාරූප ගැනීමට ලොබ බඳී. එය එසේ විය යුතුය. එහෙත් මෙහිදී බොහෝ විට සිදු වන්නේ එක අරමුනක සිත නොයොදවා දකින දකින හැම අරමුනක්ම ඡායාරූප ගැනීමට පෙලඹීමයි. එය එසේ සිදු නොවිය යුතුය. ඡායාරූප ශිල්පයට අතපොත් තබන අවදියේදී මාද මෙලෙස අරමුනක් නැතුව දකින දකින හැම සත්වයෙක්ම ඡායාරූපයට නගා ගත්තෙමි. අරමුන පුළුවන් තරම් ඡායාරූප ගැනීම පමනක්ම විය. එහෙත් එය ඉතාම වැරදි ක්‍රම වේදයක් බව මා ඔබට පවසන්නේ අවුරුදු 20ක පමන අත්දැකීම් තුලින්ම ලබාගත් දැනූමේ සම්පින්ඩනයක් ලෙසිනි.

එක වරකට ඔබගේ අරමුන විය යුත්තේ එක් වස්තුවක් පමනි. උදාහරනයක් ලෙස අපි යාල දිවියෙකුගේ ඡායාරූප ගනිමින් සිටිනවායයි සිතමු. ඒ සමගම උක්ස්සෙකු ඇවිත් ඉතාම ලඟ අත්තක වැසුවොත් ඔබ අනිවාර්යෙන්ම ඒ දෙසෙටද කැමරාවා මානා උකුස්සාගේද පිංතූරයක් ගන්නවා නොඅනුමානය. ඒ මොහොත දිවියාගේ ඉතාමත් සිත්කළු, දුර්ලභ හැසිරීමක් ඔබට මග හැරීමට බොහෝ ඉඩකඩ ඇත. එම නිසා එක වරකට එක අරමුනක අපේ සිතත් කැමරාවත් තබා ගත යුතුය. වනජීවී ඡායාරූප ශිල්පය මට භාවනාවක් වන්නේ මේ නිසාය. එක මොහොතක එකම අරමුනක එකම වස්තුවක් කෙරෙහි අපගේ අවධානය යොමුකරගෙන සිත ඒකාත්මීය කරගනු ලබන්නේ මෙවලමද ඊට එකතු කර ගනිමිනි.

ඉහතින් දක්වා ඇත්තේ විල්පත්තුවේදී මවිසින් ඡායාරූපයට නගා ගත් මුහුදු උකුස්සන් දෙදෙනෙක්ගේ ඉතාමත් දුර්ලභ ඡායාරූපයකි. අහස් කුස පුරාම සැරිසරමින් අනග රංගනයක යෙදෙමින් සිටි මෙම උකුස්සන් යුවල වම්පසින් හා දකුනු පසින් පියාඹා විත් එක මොහොතක් මෙසේ නතර විය. එම දසුන මා හට ඡායාරූපයට නගා ගත හැකි වූයේ මෙම උකුස්සන් යුවල කෙරෙහිම සිත යොදවාගෙන උන්ගේම පිංතූර පමනක් ඡයාරූපයට නගා ගත් නිසාවෙනි.

මා වාසය කරන වටපිටාව ඉතාම සුන්දර වටපිටාවකි. කාර්යාලයට යන්නට මා නිතරම තෝරා ගන්නේ වෙල මැද්දෙන් වැටී ඇති පාරකි. එසේ යන බොහෝ විට මා වාහනය නතර කර වගුරු සහිත වෙල අසල මොහොතක් රැඳෙමින් කුරුල්ලන්ගේ ඉරියවු නරඹමින් සිටින්නෙමි. ඉන් මා සිතට ප්‍රබෝදයක් ලැබේ. දිනක් මෙසේ රැකියාවට එන අතරතුර මා අන් කවරදාටත් වඩා පැස්තුඩුවන් හා කොකුන් වගුරු බිමෙහි රැඳී සිටිනවා දුටුවෙමි. නැවත වාහනය හරවා ගත් මම නිවසට විත් කැමරා ආම්පන්න ටිකද රැගෙන නැවතත් වෙල අසල වගුරු බිමට පැමිනියෙමි.

පැස්තුඩුවන් හා කොකුන්ගෙන් වගුරු බිමේ සුන්දරත්වය ඉතාමත් ආකර්ශනීය කර තිබුනි. බොහෝ කුරුල්ලන් සිටියද මා අරමුනු කරගන්නේ වරකට එක් කුරුල්ලෙක් පමනි. වගුරින් ඒකා ඉගිලී යන තුරුම විවිද ඉරියවු ඡායාරූපයට නගා ගන්නා මම වගුරින් ඒකා ඉගිලී ගිය පසු වෙනත් කුරුල්ලෙකු වෙත අවධානය යොමු කර පෙර ලෙසම ඒ කුරුල්ලාගේම පමනක් ඡායාරූප අරගනිමි. එහි ප්‍රථිපලයක් ලෙස මට ඉතාමත් සුන්දර ඡායාරූප කීපයක්ම එදින ඡායාරූපයට නගා ගත හැකි විය.

ඉහතින් දක්වා ඇත්තේ මාළුවෙකු දඩයම් කල අභිජනන අවදියේ සිටින කොකෙකි. වතුරෙන් එලියට මාළුවා ඩැහැගත් එම අවස්තාව මට මෙසේ ඡායාරූපයට නගා ගත හැකි විය. මෙම ඡායාරූපය විශාල කර බැලීමේදී වරල් ගසන මාළුවාගේ වරල් වල ඇති වතුර සමග ඒකාගෙ ලේ බිඳු ද විසිරෙනු දැක ගත හැක. එය එසේ ඔබටද බලා ගත රිසි වනු වස් මා එහි විශාලනය කල ඡායාරූපයක් මෙසේ පල කරමි. ගොදුර ගිල දමා මෙම පක්ෂියා ඉගිලී ගිය පසු මාගේ අරමුන වෙනත් කොකෙකු වෙත් යොමු කලෙමි. එකාගේ ඉතාමත් සොඳුරු පිංතූරයක් මට ඡායාරූපයට නගා ගත හැකි වුයේ ආක්‍රමණික යෝධ නිදිකුම්බා පඳුරක තටු විදා වහන්නට සැරසෙන මොහොතකය. මෙහි පහතින් දිස් වනුයේ එකී ඡායාරූපයයි.

මෙම සුන්දර ඡායාරූප සියල්ලම ගැනීමට මාහට පාදක වූ එකම කාරනාව වූයේ එක් වරකට එක අරමුනක එක වස්තුවක් කෙරෙහි පමනක් අවධානය යොමුකරමින් ඒ වස්තුවෙහි පමනක් ඡායාරූප ගැනීමට මා පුරුදු වී සිටිමය. එසේ නොවන්නට මෙම ඡායාරූප සියල්ලම සාමාන්‍ය ඡායාරූපයකට වඩා වෙනසක් ගන්නේද නැත.

එබැවින් එක වරකට එක් වස්තුවක් එක අරමුනක තබාගෙන ඡායාරූපවලට නගා ගැනීමට ඔබද පුරුදු පුහුනු වන්න. ඉතාමත් සොඳුරු පිංතූර ගැනීමට ඔබට හැකිවනු නොඅනු මානය.

Extension Tube Experiment - Extension ට්යුබ් සමග පරීක්ෂනයක්

2012-07-26T11:37:00.001-07:00

මැක්‍රෝ පිලිබඳ උනන්දුවක් දක්වන බොහෝ දෙනෙකුගේ ඉල්ලීම පරිදි මම මේ පරීක්ෂනය හා අත් හදා බැලීම කලේ පහත සඳහන් උපකරන උපයෝගී කරගනිමිනි. මේ සඳහා Extension Tube ලබාදීම පිලිබඳව CameraLK ආයතනයේ අනුෂ්ක මල්ලීට මාගේ ස්තූතිය හිමිවේ.

1). Nikon D7000 කැමරාව

2). Nikon 105mm f2.8 මැක්‍රෝ කාචය

3). Nikon R1C1 ආලෝක කරන කට්ටලය

4). Extention Tubes

කැමරාව සහ ආම්පන්න ඉදිරියෙන් පෙනෙන ආකාරය

කැමරාව සහ ආම්පන්න පැත්තෙන් පෙනෙන ආකාරය

මේ සඳහා මා භාවිතා කලේ මා පලඳින කප්ස්ලින්ක් ජෝඩුවකින් එකකි. මේ එහි සම්පූර්ණ ඡායාරූපයයි. මෙහි එන ඡායාරූප කිසිවක් සංස්කරණ කර නැත. මුළු ෆ්‍රේම් එකේ තරමට වස්තුවේ විෂාලනය කොතෙක්දැයි ඔබට අවබෝදයක් ගැනීමට රිසි වනු වස් ක්‍රොප් කිරීමකින් තොරව ඡායාරූප මෙහි පලකර ඇත.

පරීක්ෂනයට භාජනය කල සම්පූර්ණ වස්තුව

Nikon 105mm f2.8 කාචය පමනක් භාවිතා කිරීමෙන්

Nikon 105mm f2.8 කාචයට යාහැකි උපරිම විශාලනය මෙයයි. මෙහි කැමරා දත්ත පහත සඳහන් අකාර වේ. මෙහිදී (Auto Focus) ස්වයැං නාභි ගත කරගැනීමේ වේගය සාමාන්‍ය ආකාරයට සිද්ධ වේ.

1). Shutter Speed /ෂටර් වේගය - 1/30s
2). Aperture/ ඇපචරය - f 10
3). ISO - 200
4). White Balance / ධවල තුලිත තාවය - Auto
5). Focal Length / නාභි දුර - 105mm
6). Flash Fired - Yes

12mm Extension ටියුබයට Nikon 105mm f2.8 කාචය සම්බන්ධ කිරීමෙන්

12mm Extension ටියුබයට Nikon 105mm f2.8 කාචය සම්බන්ද කිරීමෙන් යාහැකි උපරිම විශාලනය මෙයයි. මෙහි කැමරා දත්ත පහත සඳහන් අකාර වේ. ස්වයැං (Auto Focus) නාභි ගත කරගැනීම බොහෝ සෙමින් සිදුවේ. නියමිත වස්තුව නාභි ගත කරගැනීමට අපහසුතාවයක් දක්වයි. (Manual Focus) හස්තීය නාභි ගත කරගැනීම වඩා සුදුසුය.

1). Shutter Speed /ෂටර් වේගය - 1/30s
2). Appeture/ ඇපචරය - f 10
3). ISO - 200
4). White Balance / ධවල තුලිත තාවය - Auto
5). Focal Length / නාභි දුර - 105mm
6). Flash Fired - Yes

ඡායාරූපයේ කැමරා දත්ත වල වෙනසක් සිදු වී නැත.

20mm Extension ටියුබයට Nikon 105mm f2.8 කාචය සම්බන්ධ කිරීමෙන්

පහතින් දක්වා ඇත්තේ 20mm Extension ටියුබයට Nikon 105mm f2.8 කාචය සවි කිරීමෙන් ගන්නා ලද ඡායාරූපයකි

20mm Extension ටියුබයට Nikon 105mm f2.8 කාචය සම්බන්ද කිරීමෙන් යාහැකි උපරිම විශාලනය මෙයයි. මෙහි කැමරා දත්ත පහත සඳහන් අකාර වේ. ස්වයැං (Auto Focus) නාභි ගත කරගැනීම බොහෝ සෙමින් සිදුවේ. නියමිත වස්තුව නාභි ගත කරගැනීමට අපහසුතාවයක් දක්වයි. (Manual Focus) හස්තීය නාභි ගත කරගැනීම වඩා සුදුසුය.

1). Shutter Speed /ෂටර් වේගය - 1/30s
2). Appeture/ ඇපචරය - f 10
3). ISO - 200
4). White Balance / ධවල තුලිත තාවය - Auto
5). Focal Length / නාභි දුර - 105mm
6). Flash Fired - Yes

ඡායාරූපයේ කැමරා දත්ත වල වෙනසක් සිදු වී නැත.

36mm Extension ටියුබයට Nikon 105mm f2.8 කාචය සම්බන්ධ කිරීමෙන්

පහතින් දක්වා ඇත්තේ 36mm Extention ටියුබයට Nikon 105mm f2.8 කාචය සවි කිරීමෙන් ගන්නා ලද ඡායාරූපයකි

36mm Extension ටියුබයට Nikon 105mm f2.8 කාචය සම්බන්ද කිරීමෙන් යාහැකි උපරිම විශාලනය මෙයයි. ස්වයැං (Auto Focus) නාභි ගත කරගැනීම බොහෝ සෙමින් සිදුවේ. නියමිත වස්තුව නාභි ගත කරගැනීමට අපහසුතාවයක් දක්වයි. (Manual Focus) හස්තීය නාභි ගත කරගැනීම වඩා සුදුසුය. මෙහි කැමරා දත්ත පහත සඳහන් අකාර වේ.

මේ අනුව බලන කල කැමරාවේ දත්ත වල කිසිදු වෙනසක් සිදු නොවේ. ලැබෙන එකම ප්‍රතිඵලය වස්තුව විශාලනය වීමයි. නාභි ගත වන ප්‍රමානයද ක්‍රමක් ක්‍රමයෙන් අඩුවන බව ඔබට මෙම කප්ස්ලින්ක් එකට අල්ලා ඇති පුංචි ගල් නාභි ගත වී ඇති ආකාරයට වැටහී යනු ඇත. ඉතාමත් කුඩා වස්තුවක් ඡායාරූප ගත කිරීමට මෙය ඉතා යෝග්‍ය බව මා පැවසිය යුතුමය. අජීවී වස්තුවක් යොදාගෙන කල මේ අත් හදා බැලීමම සජීවී ජීවියෙකු සමගද කිරීමට උත්සාහ දැරිය යුතුයැයි මට හැඟේ. එහෙත් එය ඉතාමත්ම අසීරු කාරියක් වනු නොඅනුමානය.

මැක්‍රෝ ඡායාරූපකරණයට අත්වැලක් - Macro Photography

2012-06-26T05:31:00.000-07:00

ඡායාරූපකරණයේ ඇති දුෂ්කරවූ ඡායාරූපකරණය මැක්‍රෝය. ඉතාමත් සීමිත නාභි පරාසයක් (Depth of Field) තුල ලේන්සය නාභි ගත කිරීම ශරීරයට ඉතාමත් වෙහෙසකරය. එහෙත් අවසාන ප්‍රතිපලය සාර්ථක ඡායාරූපයක් නම් ඉන් ලැබෙන තෘප්තිය පවසන්නට ඔබට වචන නැතිවනු නොඅනුමානයි. ඡායාරූපකරණයේ නියැලෙන බොහෝ දෙනා විවිධාකාරයට මැක්‍රෝ ඡායාරූප ගනිති. කෙනෙකු මැක්‍රෝ සඳහාම වෙන්කළ ලෙන්සයක් භාවිතා කරන අතර තවකෙකු සාමාන්‍ය ලෙන්සයක් සීරු මාරු කර (Reverse Lens) භාවිතා කරයි. මෙම අවස්ථා දෙකෙන් ඡායාරූපයට වඩාත්ම ගුණාත්මක භාවයක් ගෙන දිය හැක්කේ මැක්‍රෝ සඳහාම නිෂ්පාදනය කල මැක්‍රෝ ලෙන්ස් එකක් භාවිතා කිරීම තුලින් බව මා පැවසිය යුතුමය. මැක්‍රෝ සඳහා පුහුණුවක් ලැබීමට Reverse Lens ක්‍රමය භාවිතා කලාට කිසිම වැරද්දක් නැත. එහෙත් ඔබ මැක්‍රෝ ගැන ඉතාමත් සැලකිල්ලක් දක්වන්නේ නම් ඔබ මැක්‍රෝ ලෙන්ස් එකක් ඔබගේම කරගත යුතුමය. ඒ විතරක් නොව මීට තව එකතු කරගත යුතු මෙවලම් කිහිපයක් වේ. එනම්, මැක්‍රෝ ආලෝකකරණ කට්ටලයක්, මැක්‍රෝ රේල් එකක්, ත්‍රිපාදයක් (Tri Pod) හා කේබල් රිලීසයක් ආදී වශයෙනි. මා පාවිච්චි කරනු ලබන්නේ Nikon කැමරා කට්ටලයකි. Nikon D200 හා D7000 යන කැමරා දෙක සමග මම Nikon 105mm f2.8 මැක්‍රෝ ලෙන්ස් එකත් Nikon R1C1 මැක්‍රෝ ආලෝකකරණ කට්ටලය සමග භාවිතා කරමි. ඉතාමත් සියුම් මැක්‍රෝ ඡායාරූපකරණයක් නම් මම බොහෝ විට මාගේ Manfretto මැක්‍රෝ රේල් එක හා Gitzo ත්‍රිපාදය භාවිතා කරමි. මෙසේ මේ දෙක එකතු කරගන්නා හැම අවස්ථාවකදීම කේබල් රිලීසය පාවිච්චි කිරීමටද වගබලා ගනිමි.

භාවිතයට ගැනුණු උපාංග

1. Nikon 105mm f2.8 මැක්‍රෝ ලෙන්ස් එක

2. Nikon R1C1 මැක්‍රෝ ආලෝකකරණ උපකරණය

3. Nikon කේබල් රිලීසය

4. Manfretto මැක්‍රෝ රේලය

5. Gitzo ත්‍රිපාදය

මැක්‍රෝ ඡායාරූපකරණයේදී ඉතා සියුම් පියවී ඇහැට පවා දැකිය නොහැකි දේ බලා ගැනීමට යම් මග පෑදීමක් ඇති කරගත හැකිය. එහෙත් ගුණාත්මක බවින් පිරිපුන් මැක්‍රෝ ඡායාරූපයක් ගැනීමට ඉතා හොඳ ඉවසීමක් සමග මනා පුහුණුවක් අත්‍යවශ්‍ය බව අවධාරණයෙන් කිව යුතුය. මවිසින් මැක්‍රෝ ඡායාරූප අත්හදා බලන කාලයේ පිංතූර සිය ගණන් ගෙන හිස් අතින් ගෙදර ආ වාර අනන්තය. ඡායාරූප ගොන්නෙන් එකක්වත් කෙසේවත් භාවිතයට ගැනීමට තරම් සුදුසු තත්වයේ නොවුනි. එහෙත් උත්සාහය ඇත නොහැර ඒ පිළිබඳව මනා අධ්‍යනයකින් හා කලින් දිනවල අත්හදා බැලීම් වලින් උගත් පාඩම් වලින් වැරදි නිවැරදි කරගැනීමෙන් මේවා සාර්ථක කරගත හැක. මුල්ම කාලයේදී මා ලෙන්ස් සීරු මාරු කර (Reverse) මැක්‍රෝ කරන්නට උත්සාහ කලෙමි. එසේ ගන්නා ඡායාරූප ලෝකයේ විවිධ ඡායාරූප ශිල්පීන්ගේ මැක්‍රෝ ඡායාරූප හා සංසන්ධනාත්වකව බැලුවෙමි. ඉන් මාගේ ඡායාරූප ගුණාත්මක බවින් තොර ඒවා බව මටම ප්‍රත්‍යක්ෂවූ කල මට මැක්‍රෝ ලෙන්ස් එකක් ගැනීමට සිදුවිය. ඒ වනවිට මැක්‍රෝ ඡායාරූපයක් ගැනීමේදී සෙලවීම පාලනය කිරීමට මා පුරුදු පුහුණු වී සිටියෙමි. ඉතා හොඳින් ආලෝකය ඇති අවස්ථාවල මට මැක්‍රෝ ඡායාරූප ගැනීම කල හැකි වුවද ආලෝකය මද අවස්ථා වලදී ඒවා ඉතාමත් නොසුදුසු තත්වයේ වීම මා මැක්‍රෝ ආලෝකකරණ උපාංගයක් ගැනීමට තරම් දහිරියමත් කළේය. කාලයත් සමග එන ඡායාරූප ඥානයත් සමග පුංචි සෙලවීම් පවා මට හොඳින් දැනෙන්නටවූ කල මම මේ සඳහා ත්‍රිපාදයද එකතු කරගත්තේ කේබල් රිලීසයද සමගිනි. සියල්ල මෙසේ සම්පූර්ණ වුවද ඉතා කුඩා නාභි පරාසයක පැහැදිලිව පෙන්විය හැකි ප්‍රමාණය මා සිතට ප්‍රමාණවත් නොවුනි. එසේ හෙයින් මට මැක්‍රෝ රේල් එකක වියදම දැරීමට සිදුවිය. ඉන් මට ඉතා ප්‍රයෝජනවත් තත්වයකට ඡායාරූප ගැනීමේ හැකියාව ප්‍රගුණ කල හැකි විය. එකම තලයක සිට විවිධ නාභි පරාසයන් ඔස්සේ ගන්නා වූ ඡායාරූප කිහිපයක් එක පිට එක අතිපිහිත කිරීමෙන් (Focus Stacking) එකම වස්තුවේ සැලකිය යුතු ප්‍රමාණයක් නාභි ගතකර පෙන්වීමට මට හැකියාව ඇති විය.

මැක්‍රෝ ඡායාරූපකරණයේදී පාලනය කල නොහැකි ජීවී වස්තුන් (ජීවින්) ඡායාරූප ගැනීම අතිශය වෙහෙසකර ක්‍රියාවකි. ඒ වගේම එකම තලයක තියා විවිධ නාභි දුරවල් වලින් ඡායාරූප කීපයක් ගෙන ඡායාරූප අතිපිහිත කිරීමද ඉතාමත්ම දුෂ්කරය. මා බොහෝවිට මේ සඳහා පුංචි මකුළුවන්ගේ පිංතූර ගැනීමට උත්සාහ කලද එය නිෂ්පල විය. එහෙත් ක්‍රමයෙන් උන්ගේ ක්‍රියාකාරිත්වය කෙරෙහි හොඳ අධ්‍යනයක යෙදීමෙන් අනතුරුව ඒ සඳහා යම් ඉඩක් ලබා ගත හැක. මෙයට බොහෝ විට බලපාන්නේ කැමරාවේ ෂටරය ක්‍රියාත්මක වීමේදී ඇතිවන ශබ්ධයයි. එම ශබ්ධයට මකුළුවා හෝ කෘමියා බියවී එතනින් පලා යයි.

මැක්‍රෝ ලෙන්ස් එකක් තිබුණු පලියට ඉන් ඡායාරූපගතකරන සියල්ල මැක්‍රෝ නොවේ. මැක්‍රෝ වීමට නම් ලෙන්සයේ සම්පූර්ණ නාභි දුරෙන් 1/10 අඩු ප්‍රමාණයක සිට නාභිගත කරගත යුතුයි. උදාහරණයක් හැටියට අපි 105mm f2.8 ලෙන්ස් එක ගැන සලකා බලමු. මින් 1/10 වන්නේ 10.5mm ය. එයත් ෆුල් ෆ්‍රේම් කැමරාවක නොවේ නම් සම්පූරණ නාභි දුර 157mm වී මැක්‍රෝ වීමේදී වස්තුවේ සිට 15.7mm ට වඩා අඩු දුරක සිට නාභි ගත කර ගත යුතු වන්නේය. මේ ආකාරයට මැක්‍රෝ වීමට නාභි දුර සම්පූරණ වීමේදී අපි 1:1 විශාලනයක් යැයි කියමු. ඊටත් වඩා කිට්ටුවට නාභි ගත කිරීමේදී 1:1 සිට 1:2, 1:3 ආකාරයට විශාලනය වැඩි වේ. 1:1 විශාලනය සහිතව අපි මැස්සෙකුගේ සම්පූරණ අහක් නාභි ගත කරගත්තොත් එය 1:2 වෙද්දී අපිට නාභි ගතකර ගත හැකි වන්නේ ඇහෙන බාගයක් පමණි. මේ ආකාරයට වස්තුවත් කැමරාවත් අතර දුර අඩු වෙන්න අඩු වෙන්න එසේත් නැත්නම් නාභි පරාසය අඩුවෙන්න අඩුවෙන්න වස්තුවේ විශාලනය වැඩිවේ. එසේ වීමේදී අපිට ඡායාරූපයට නගා ගත හැකි වන්නේ වස්තුවෙන් කොටසක් පමණි.

ඉහතින් පෙනෙන්නේ මැස්සකුගේ ඇහැක මැක්‍රෝ ඡායාරූපයකි. මෙහි පැහැදිලිව පෙනෙන්නේ මැස්සාගේ ඇහැ පමණි. පියවි ඇහැට දැකිය නොහැකි මැස්සාගේ සංයුක්ත ඇස් මනාව පැහැදිලිව මෙහි හොඳින් පෙන්නුම් කරයි. එහෙත් ශරීරය අපැහැදිලිය. මැස්සාගේ ඇසේ මේ විශාලනයත් සමග ශරීරයත් පැහැදිලිව ගැනීමට අවශ්‍ය නම් අපිට එකම තලයක සිට විවිධ නාභි පරාසයන් ඔස්සේ ගත් පිංතූර කිහිපයක් ගෙන ඒවා අතිපිහිත කිරීමට සිදුවේ.

සාර්ථක ඡායාරූපයක් ගැනීමට ඉවසීම ඉතාමත් වැදගත්ය. එසේ ඉවසීමෙන් ගන්න ඡායාරූප ගුණාත්මක බවින් වැඩිය. පහතින් දක්වා ඇති රොන් උරණ බඹරාගේ ඡායාරූපය ගැන අපි අවධානය යොමු කරමු.

මා මෙය නාභි ගත කලේ ශ්‍රී ජයවර්ධනපුර කෝට්ටේ, බැද්දගානේ පිහිටා ඇති පාපන්දු ක්‍රීඩාන්ගනයට මෙපිටින් ඇති කළු පිට්ටනිය යැයි ගම්මුන් විසින් හඳුන්වන භූමිය සමීපයේදීය. මෙම බඹරා වසා ඇත්තේ බෝවිටියා මලකය. බඹරා වැඩිවෙලා එකතැනක රැදෙන්නකු නොවන බව අපි අත්දැකීමෙන් දන්නා කරුණකි. ඒ සමගම එලිමහනක නිසා හුළං හැමීමෙන් වසා සිටින අත්ත නිතර එහාට මෙහාට පැද්දේ. හුළං හැමීම නතර වී අපට ඡායාරූපය නාභි ගතකර ගැනීමට ලැබෙන කාල පරාසය ඉතාමත් අඩු කාලයකි. එම සුළු කාලය තුල අපි නිවැරදි කෝණය වටහා ගෙන ඡායාරූපය නාභි ගත කර ගත යුතුයි. මෙය පැත්තෙන් සිට ගත් ඡායාරූපයකි. ඉදිරියෙන් කෝණය සකසා ගත්විට බඹරාගේ ඇස් දෙක ඇරෙන්න වෙන කිසිවක් ඡායාරූපයේ පැහැදිලිව පෙන්වීමට නොහැකි වේ. ඊට හේතුව මැක්‍රෝ වලදී අපිට ලැබෙන නාභි පරාසය ඉතාමත් අඩු වීමයි. ගැඹුර අඩු වුවද එකම තලයේ පිහිටන සියලු දේ අපිට පැහැදිලිව දැකගත හැකි වේ. එබැවින් ඇසත්, ශරීරයත් හොඳින් නාභි ගත කර ගන්නට නම් ඇසත්, ශරීරයත් එකම තලයකදී නාභි ගත කරගත යුතු වන්නේය. ඡායාරූපයට වඩාත් හොඳ සාධාරණයක් ඉටු කිරීමට හැකි එකම කෝණය එබැවින් මෙය බව දැන් ඔබට පසක් වනු ඇත. මෙම ඡායාරූපය Nikon D7000 කැමරාවට Nikon 105mm f2.8 ලේන්සය අමුණා Nikon R1C1 මැක්‍රෝ ආලෝකකරණ කට්ටලයෙන් ආලෝකමත් කර ලබා ගන්නා ලදී.

පහතින් දක්වා ඇති මෙම ඡායාරූපය බොහොම මෑතකදී ගන්නා ලද්දකි. 2012 මැයි 13 වෙනි දින සවස 6.39 ට පමණ මෙය ගන්නා ලද්දේ Nikon D7000 කැමරාවට 105mm f2.8 මැක්‍රෝ ලෙන්ස් එක එකතු කර ගැනීමෙනි.

ඡායාරූපයක් ගැනීමට තරමේ වෙලාවක් නොවුවද පැයක් පමණ එක දිගට ඇද හැලුණු පොද වැස්සෙන් පසුව මම එලියට ආවේ මා මිතුරු අජන්ත වත්තලගෙදරගේ යෝජනාවකට අනුව ෆොටෝ ටෙක්නිකා අධිපති හර්ෂ මල්වැන්න මහතා විසින් ස්තුති පූර්වකව ලබා දුන් MBD-11 බාහිර බැටරි ග්‍රීපය අත්හදා බැලීමේ දැඩි උවමනාව නිසාමය. පොද වැස්සෙන් ඇඟ පුරාම වැටුණු වැහි බිඳු සමග සිටි මේ බත්කූරා මෙදින මගේ වස්තු බීජය විය. මෙවැනි අවස්ථා අපිට ජීවිත කාලයටම මතක හිටින ඡායාරූප ගැනීමට අවකාශ සලසාලයි. ඡායාරූප ශිල්පියෙකු කිසිම දිනෙක මෙවැනි අවස්ථා ඇත නොහැරිය යුතුය. බත්කූරාගේ සංයුක්ත ඇස් වල පිහිටා ඇති සංයුක්ත කාච හොඳින් පැහැදිලිව පෙනෙන අතර වැහි බිඳිති නිසා එම සංයුක්ත අක්ෂි කාච තව දුරටත් විශාලනය වී පෙනෙන ලෙස මෙවැනි අවස්ථාවල දී ඡායාරූපයට හසු කරගත හැකිය.

දැන් අපි පහතින් ඇති අනෙක් ඡායාරූපය බලමු. මේ කොරකහ මලකි. මලත් සමඟ වැහි බිඳිති ඉතා පැහැදිලිව ඡායාරූපයට නගා ගන්නට මෙහි කෝණය සකසා ගෙන තිබේ.

මේ ඡායාරූපය මලට ඉදිරියෙන් කැමරාව තබා නාභි ගත කලේ නම්, මලේ රේණු හා උඩින්ම ඇති වැහි බිඳිති පමණක් ඡායාරූපයට පැහැදිලිව දැක ගත හැකි වන අතර බලන අයට මේ කොරකහා මලක් බව අඳුනා ගන්නට නොහැකි වේ. මලත් රේණුත් හා මලට සුන්දරත්වයක් එකතු කරන වැහි බිඳිතිත් පැහැදිලිව නාභි ගත කර ගැනීමට කෝණය මේ විදියට සකසා ගෙන ඇත.

ඡායාරූපයක් ගැනීමේදී අපි බොහෝ සේ සැලකිලිමත් විය යුත්තේ වස්තු බීජයට වඩාත්ම හොඳ සාධාරණයක් ඉෂ්ට කරන්නටය. අපි විසින් ඡායාරූපයට නගන වස්තු බීජය කුමක්දැයි ඡායාරූපය බලන්නන්ට හැකිතාක් දුරට නිවැරදිව අඳුනා ගත හැකි විය යුතුය. මැක්‍රෝ වලදී ඡායාරූප ශිල්පියාට මෙම අභියෝගය ජයගන්නට ඉතාමත් වෙහෙසක් ගන්නට සිදුවේ. ඊට හේතුව වන්නේ මැක්‍රෝ ඡායාරූපකරණයේදී නාභි ගත කරගැනීමට ලැබෙන නාභි පරාසය ඉතාමත් අඩු වීම බව මේ වනවිට ඔබට වැටහී තිබිය යුතුය. එය එසේ වුවද කෝණය වෙනස් කර ගැනීම තුලින් ශිල්පියාට ඊට වඩාත් හොඳ සාධාරණයක් ඉෂ්ට කලහැකි බව මා මෙහිදී සඳහන් කල යුතුමය. මෙම ඡායාරූප කලාව කරගෙන යෑමට උපකරණ මිලදී ගැනීමේදී වියදම අධික වුවත්, සාර්ථක ඡායාරූප ශිල්පියෙකුට ඉන් ලැබෙන තෘප්තිය මිල කල නොහැකි බව මා අවධාරණයෙන් යුතුව අවසානයේදී මෙහි සඳහන් කරමි.

ශ්‍රි ලංකාවේ සමනළුන් වර්ග - Butterflies in Sri Lanka

2012-05-19T17:06:00.002-07:00

අලු පැන්සයා - Grey Pansy
Junonia atlites
Family - Nymphalidae

තුඩු දිගු පත් සමනළයා - Lesser Albatross
Appias paulina galene
Family - Pieridae

තුඩඟ ප්‍රලාපනි - Tailed Jay
Graphium ageamemmnon
Family - Papilionidea

වියෝලා - Tawy Coster
Acraea violae
Family - Acraeidae

සෙලරුවා - Common Sailor
Neptis hylas
Family - Nymphalidae

මලවී පරාසියා - Indian Cupid
Everes lacturnus
Family - Lycaenidae

පිලල් අරිසියා - Common Jezebel
Delias eucharis
Family - Pieridae

ඉන්දු කාකයා - Common Indian Crow
Euploea core asela
Family - Danaidae

සදාසියා - Forget-me-not
Catochrysops strabo
Family - Lycaenidae

නීල පලිඟු ගෝමරා - Blue Glassy Tiger
Ideopsis similis
Family - Nymphalidae

තාල සරා - Pale Palm Dart

Telicota colon

Family - Hesperiidae

කෝනංගියා - Common Pierrot

Castalius rosimon

Family - Lycaenidae

වයිරන් සේලරුවා - Chestnut-streaked Sailor

Neptis jumbah

Family - Nymphalidae

Common Raven

Papilio castor

Family - Papilionidae

තුන් පුල්ලි තෘන පීතයා - Three Spot Grass Yellow

Eurema blanda

Family - Pieridae

ස්තිරි සෙව්වා - White Four-ring

Ypthima ceylonica

Family - Nymphalidae

පුන්චි සරා - Small Cupid

Chilades contracta

Family - Lycaenidae

මයුරු පැන්සයා - Peacock Pansy

Junonia almana

Family - Nymphalidae

රතු කෝනංගියා - Red Pierrot

Talicada nyseus

Family - Lycaenidae

නීල වන්සයා - Blue Admiral

Kaniska canace

Family - Nymphalidae

මැක්‍රො ඡායාරුප (Macro Photgraphy)

2012-05-18T23:04:00.001-07:00

ශ්‍රී ලංකාවේ කුරුළු වර්ග - Birds of Srilanka

2012-05-18T00:44:00.000-07:00

Indian Pond Heron or Paddybird
Ardeola grayii

පොරෝ කැදැත්තා - Malbar Pied Hornbill
Anthracoceros coronatus

බළල් සේරා (ගැහැනූ) - Pheasant-tailed jacana (Female)
Hydrophasianus chirurgus

බළල් සේරා (පිරිමි) - Pheasant-tailed jacana (Female)
Hydrophasianus chirurgus

කලපු කොකා - Gay Heron
Ardea cinerea

කරවැල් කොකා - Purple Heron

Ardea purpurea

මල් පිළිහුඩුවා ඡායරූප ගත කිරීමේ උත්සාහයක යෙදෙමින් පැය ගණනක මගේ ඉවසීම අපතේ ගියේ නැත. ඊට ස්වභාදහම මට මනා ගෙවීමක් කර ඇත. මෙසේ ඉවසීමෙන් ඉන්න අතර තුර කරවැල් කොකෙකු මාළුවෙකු ඩැහැ ගන්නා අයුරු මට ඡායරූප ගත කර ගත හැකි විය. මේ එම ඡායරූපයයි. "ඉවසීමෙන් සැනසීම ලැබේ" වනජීවී ඡායරූප ශිල්පියෙකුට එම උපහැරණය මනාව ගැලපේ.

ගෝමර පිළිහුඩුවා - Pied Kingfisher

Ceryle rudis

මෙම ගෝමර පිළිහුඩුවන් තිදෙනා මට එක්වර ඡායාරුප කර ගත හැකි වුයේ මාලබේ චන්ද්‍රිකා කුමාරණතුංග පාරේදීය. එක්වර තිදෙනෙක් දැකපු පළමු අවස්ථාව මෙයයි.

රුක් වඩු කුරුල්ලා - Baya Weaver

Ploceus Philippinus

මුකලන් හැලපෙන්දා - Forest wagtail

Dendronanthus indicus

සුදු කොකා - Median Egret

Egretta intermedia

සිවුරු හොරා - Asian paradise-flycatcher

Terpsiphone paradisi ceylonensis

මහා කුරුමිණි කුරුල්ලා - Blue Taild Bee Eater

Merops Philippinus

පිට සුදු වී කුරුල්ලා - White-rumped Munia/White-blacked Munia

Lonchura striata

ලතෝනි කොහා - Plaintive Cuckoo

Cacomantis merulinus

හංස කාවා - Indian Darter
Anhinga melanogaster

ලොටෙන්ගේ - Long-billed Sunbird, Loten's Sunbird
Nectarininia lotenia

කිතලා-පන් කුකුළා - Purple Swamphen (Purple Coot)
Porphyrio porphyrio

මාල ගිරවා - Rose ringed parakeet

Psittacula krameri

අළු කොබෙයියා - Spotted Dove
Streptopelia chinensis ceylonensis

දෙමලිච්චා - Yellow-billbed Babbler(Southern Commen Babbler)

Turdoides affinis taprobanus

පොළොස් කොට්ටෝරුවා - Brown headed barbet

Megalaima zeylanica

කහ කුරුල්ලා - Black hooded oriole

Orilolus xanthornus

කොන්ඩ කුරුල්ලා - Red-vented bulbul

Pycnonotus cafer

බොර ඉසැසි ගෝමර කෑරලා - Brown-capped Woodpecker

Dendrocopos nanus

රත් මූණත් කොට්ටෝරුවා - Crimson-Fronted Barbet

Megalaima rubricapillus

පොල් කිච්චා - Orianta magpie Robin
Copsychusaularis

රත් යටි මල් කිරළා - Red-wattled Lapwing

Vanellus indicus

නිතඹ දම් සූටික්කා - Purple rumped sunbird

Nectarina Zeylonica

පෙරදිගු සිතාසියා/හීන් මල්කුරුල්ලා - Small white eye

Zosterops palpebrosa

මයිනා - Commen Myna

Acridotheres tristis

මොණරා - Peacock
Pavo cristatus

කුඩා කුරුමිණි කුරුල්ලා - Little Green Bea-eater
Merops orientalis Ceylonicus

ඇඹල මාන කොකා - Painted Stroke
Myeteria leucocephalus

හරක් කොකා/එඬේර කොකා - Cattle Egret
Bubulcus ibis - Breeding

බැම සුදු හම්බු කුරුල්ලා - Plain prinia -white browed
Prinia inornata

පොරෝ කුරුල්ලා - Common Hoopoe

Upupa epops

පාදිලි මානව - Wooly-necked strok/white necked strok
Ciconia episcopus

කොන්ඩ උකුස්සා - Changeable hawk eagle
Spizateus cirrhatus

කුඩා දියකාවා - Little cormorant
Phalacrocorax niger

ලැම සුදු පිළිහුඩුවා - White Throated Kingfisher
Halcyon smyrnensis

කළු ඇස් පටියා - Philippine Shrike
Lanius cristatus lucionensis

කවුඩා - White-bellied Drongo
Dicrurus caerule scenes

කලපු කිරළා - Blacked-winged Stilt

Himantops himantopus

සුදු රෙදි හොරා - Asian Paradise-flycatcher (Indian Paradise flycatcher)

Terpsiphone paradisi paradisi

හිස කළු දෙමලිච්චා - Dark-fronted Babbler (Black-fronted babbler)
Rhopocichla atriceps siccata

නීළ කොබෙයියා - Emerald Dove
Chalcophaps indica robinconi

පියැඹීමට පෙර ඡායරූප 30කට අධික ප්‍රමාණයක් ගැනීමෙන් පසු තිබු එකම හොඳ යැයි සිතිය හැකි ඡායරූපය මෙයයි. මෙම සුකුමාල කුරුල්ලගෙ වර්ණ රටාව කැමරාවේ ප්‍රොසෙසරය නොමග යවන සුළුය. බොහෝ විට Exposure Level එක වරදවා වටහා ගනි. එහෙත් Nikon වලට පිංසිදු වන්නට හා Xspeed තාක්ෂනය නිසා මට මෙය මෙසේ ඡායරූප ගත කිරිමට හැකි වීම පිළිබඳ මා තුල ඇත්තේ සියුම් සතුටකි. විනාඩි 30කට අධික කාලයක් දෙකට නැවි ගෙන බොහොම සීරුවට මට සිටීමට සිදුවිය. අවසානයේ මේ කුරුල්ලා කුමාර ලීලාවෙන් මට කොතෙක් ලං වුවාද කිවහොත් 50mm එකකින් වත් නාභි ගත කල යුතු විය. මා හා කුරුල්ලා අතර දුර මීටර් දෙකක් පමණ තරමට කිට්ටු විය. 300-800mm ලෙන්ස් එක 300mm වලට දාගෙනද මට ෆෝකස් කරගැනිමට නොහැකි තරමටම මේකා මට ඇලුම් කර තිබුනි. නීළ කොබෙය්ය මේ තරම් ලඟින් අධ්‍යනය කිරිමට ලැබුනු පළමු අවස්ථාව මෙයයි. මා ගල් පිළිමයක් වී විනාඩි ගානක් සිටියේ කුරුල්ලා බිය විය හැකි යයි සිතුනු බැවිනි. ඒ සා කාලයක් මට ගල් වීමට හැකි වීම ගැනද මම සතුටු වෙමි.

ලතු වැකියා - Painted Stork

Mycteria leucocephala

රතු කෑරලා - Black-rumped flameback (Red-backed woodpecker)
Dinopium benghalense psarodes

බෙල්ලන් කොකා - Asian openbill (Openbill)
Anastomus oscitans

සුදු දෑතුඩුවා - Black-headed Ibis (White Ibis)

Threskiornis melanocephalus

දුඹුරු අස් පටියා - Brown shrike
Lanius cristatus cristatus

තඹ සේරුවා - Lisser Whistling Teal
Dendrocygna javanica

ශ්‍රී ලංකාවේ තල්මසුන් සහ ඩොල්ෆින්ස් - Whales & Dolpins in Srilanka

2012-05-15T20:44:00.001-07:00

පුරා දින හතරක් දිවයිනෙන් බැහැරව සිටි මා නැවත දිවයිනට පැමිණියේ 2012 මාර්තු 23 වනදා ඉතාමත් වෙහෙසකර සංචාරයකට පසුවයි. දින කිහිපයක් නිදිවර්ජිතව ගතකලද, නැවතත් මාර්තු 25 වනදින පාන්දර දෙකට මා ගෙදරින් පිටත් වුයේ, මා මිත්‍ර චින්තක ඩී සිල්වා නමැති සංචාරක උපදේශකයකු හා, පක්ෂීන් පිළිබද මනා දැනුමැත්තන් ගෙන් ලැබුණු ආරාධනයක් අනුව ඔවුන්ගේ සංචාරයකට සහභාගී වීමටය. ඔහුගේ සංචාරක ආයතනය වන Bird and Wildlife Team මගින් සංවිධානය කරනු ලැබූ තල්මසුන් සහ ඩොල්ෆින් මතස්‍යන් නැරබීමේ මෙම සංචාරයට මටද නොමසුරු අනුග්‍රාහක දායකත්වය ලබාදී තිබුණි. මා මිත්‍ර චින්තක ඩී සිල්වාට සහ, Bird and Wildlife Team ආයතනයට මගේ හද පිරි ස්තුතිය මේ අවස්ථාවේ පිරිනැමීමට කැමත්තෙමි.

නිල් තල්මසා (Blue Whale)

ඩොල්ෆින්ස් (Dolphins)

මාගේ කැමරා ආම්පන්න

2012-05-15T02:30:00.001-07:00

Lowerpro-protrekker-II-AW-Camera-Backpack-Open

Nikon D200 Body

Nikon D7000 Body

Micro-NIKKOR-105mm-f-2.8G-IF-ED_AF-S-VR

AF-NIKKOR-85mm-f-1.8D

NIKKOR-18-105mm-f-3.5-5.6G-ED-VR_AF-S-DX

AF-S-NIKKOR-50mm-f-1.4G

Sigma-300-800mm_5.6_APO-EX-DG-HSM

Sigma-300-800mm_5.6_APO-EX-DG-HSM Mounted on Gitzo Tripod

Wimberley II Gimbal Head

Remote shutter release cable

Nikon-Speedlight-R1C1- Close up Lighting Kit

To use with my D200

To use with my D7000

Super Moon

2012-05-14T01:50:00.000-07:00

බොහෝ ඡායාරුප ශිල්පින් සඳට පෙම් බැඳී අයවලුන් වෙති. මටද එවැනි සුවිශේෂ හඳක එක අවස්ථාවක් කැමරා කාචයට හසු කරගැනීමට හැකි විය. ඒ පසුගිය වෙසක් පුන් පෝය දාය. Super Moon ලෙස හැදින්වුණු මෙය මා එදින කාච ගත කර ගත්තෙමි. Nikon D200 කැමරාව Sigma 300-800mm f 5.6 ලෙන්ස් එකට අමුනා එය Gitzo ත්‍රිපාදයට සවි කර ගනු ලැබුවේ Wimberley II හෙඩ් එකේ ආදාරයෙනි. ඉතාමත් නොසෙල්වී සිටින සේ සකස් කල මෙය වෙසක් සඳට මානා ෆෝකස් කරගත්තෙමි. View Finder යට තැබූ ඇස මට අදහා ගන්නට නොහැකි තරමට මා ප්‍රථම වතාවට සඳ ඉතාමත් සුන්දර විදියට දුටුවෙමි. 2012මැයි 5වෙනිදා රාත්‍රී 11.04.54 පමණ නාභි ගතකර ගත් මෙය ඔබ සියළු දනා සමග විඳ ගැනීමට මෙසේ අන්තර්ජාලයට මුදා හැරියෙමි. ඡායාරූපය උඩ ක්ලික් කිරීම මගින් මෙය විශාල කර බලා ගත හැක

Camera : Nikon D200
Lens : Sigma 300-800mm f5.6
Tri Pod : Gitzo Carbon Fiber 5 Series
Head : Wimberley II
Date : 5th May 2012
Time : 23:04:54 hours
Location : Kaduwela, Sri Lanka

මැක්‍රෝ ලෙන්ස් එකින් බස්සාගේ පිංතූර......

2012-05-13T09:04:00.001-07:00

Collared Scops Owl / Indian Scops Owl (Otus bakkamoena) බස්සා...

බිරිඳගේ කට හඬ මට ඇසුනේ මම ගෙදර සිට කාර්යාලීය වැඩ වගයක් කරමින් ඉන්නා අතර තුරේදීය. "මේ..... ජනේලෙ ගාවින් චූස්...චූස් ගාලා ෂබ්ධයක් එනවා පොඩ්ඩක් බලනවාද....?" "චුට්ටක් ඉන්න මම පොඩි වැඩක්..." මමද උත්තර දුනිමි. එහෙත් මට වැඩි වෙලා එසේ ඉන්නට ලැබුනේ නැත. ඇගේ මැසිවිලි නැගීම නිසාම මම විදුලි පන්දමත් දල්වාගෙන මගේ නිවස පිටුපසින් ආ ආගන්තුක ශබ්ධය මොකක්ද බලන්න එලියට බැස්සෙමි.

ශබ්ධය එන දිසාවට එලිය විහිදූ මට දැක ගත හැකි වූයේ මේ රාත්‍රී කුමාරයාය. නැවත ගෙට දුවගෙන ආවෙමි. 70-300mm ලෙන්ස් එක නිකොන් D7000 කැමරාවට අමුනාගෙන SB800 ෆ්ලෑශ්‍ර් එකද හොට් ෂූ එකට එකතු කර ගත්තෙමි. විදුලි පන්දම ඇල්ලීමට මම කතා කරගෙන ගියේ මගේ චූටි දුවය. ඇය එක දිගටම එය අල්ලාගෙන සිටියද මගේ කරුමෙට ෆ්ලෑෂර් එකේ බැටරි බැහැලාය. ඒ මදිවට චූටි දුව සිටගෙන ඇත්තේ ඇඹලයො සිටිනා තැනකය. ඇඹලයෝ ඇගේ කකුල දිගේ උඩට එනවිට ඇය අඩි පොලොවේ හප්පයි. මේ අල්ල පනල්ලේ මේකා පියාඹා ඊට එහා ඉහල අත්තක වැහුවේ මගේ ඉහ මොල රත් කරය.

දුවගෙන් විදුලි පන්දම අරගත් මා ඇයව ගෙට ඇරලා කුරුල්ලා වහපු ගස මුලට ආවෙමි. හිමින් සීරුවේ විදුලි පන්දම මානා බස්සාව සොයා ගත්තෙමි. විදුලි පන්දම අතැතිව මට තනි අතින් කැමරාව ෆෝකස් කර ගැනීමට බොහෝම අසීරු විය. ශ්‍රී ලංකාවේ නිකොන් බලයලත් ඒජන්ත වරුන් වන ෆොටෝ ටෙක්නිකා ආයතනයෙන් මට තෑගි ලෙස දුන් බටරි ග්‍රිප් එකත් කැමරාවට සවි කර තිබීම නිසා කැමරාව බරින් වැඩිය. එලිය කුරුල්ලාට පතිත වන ලෙස මම විදුලු පන්කාව කකුල් දෙක මැද ගසාගත්තෙමි. දැන් මගේ දෙඅත නිදහස් බැවින් නිදහසේ කැමරාව මානා ෆෝකස් කරන්නට උත්සාහ කෙරුවෙමි. 70-300 ලෙන්ස් එකෙහි ෆෝකසින් අවුලක් පෙන්නුම් කරයි. එය ස්වැයංක්‍රීයව ෆෝකස් වන්නේ නැත. මම Manual Override එකක් ගෙන ලෙන්ස් එක ෆෝකස් කෙරුවෙමි. පිංතූරයක් ගත්තද එය හොඳ තත්වයේ නොවිනි. ෆ්ලෑෂර් එකේ බැටරි හොදටම බැස තිබුනි. මේ අතර කකුල් දෙක මත හිරකරගෙන හිටපු විදුලි පන්දම ගිලිහී වැටුනි. බස්සා නැවත ඉගිලී ගියේ ගිය පැත්තද සොයා ගත නොහැකි ආකාරයටය.

ගෙට ගොඩ වූ මා නැවත ශබ්දය ගැන කල්පනා කාරී වීමි. කාර්යාලීය වැඩ දැන් පසෙකය. නැවතත් එම ශබ්ධය සවනත වැකේ. දැන් මගේ ඉවසීමේ සීමාව ඉක්ම ගොස්ය. කල හැකි එකම දේ වුනේ මගේ මැක්‍රෝ ලයිටින් කිට් එක සවි කර ගැනීමය. 70-300 ලෙන්ස් එක ඉක්මනින් ෆෝකස් කරගත නොහැකි ලෙස අවුලක් පෙන්වූ නිසාත් SB800 ෆ්ලෑෂරයෙහි බැටරි බැස තිබුනු නිසාත් මම 105mm f2.8 ලෙන්ස් එක අර ගත්තෙමි. ඊට මැක්‍රෝ ලයිටින් කිට් එක අමුනා ගෙන විදුලි පන්දම ඇල්ලීමට මම මගේ පුතුගේ සහය ගත්තෙමි. විදුලි පන්දම දල්වන්නේ නැතුව මම පුතා සමග එලියට ආවේ නැවතත් බස්සා කලබල වී ඉගිලී යාවි යැයි යන සැකය සිත තුල කැකෑරුනු නිසාමය.

මට බස්සාගේ හඬ ඉතාම ආසන්නයෙන් ඇසේ. වාසනාව ගේ දොරකඩමය. මේ බස්සා ඉතාම පහල අත්තක වසා සිටියේය. ටොර්ච් එක මානා මම මගේ පුතු අතට දුනිමි. එහා මෙහා නොකරන්නට ඔහුට උපදෙස් දුනිමි. පුතාද එක එල්ලී විදුලු පන්දුව මානාගෙන මගේ උපදෙස් අකුරට පිලිපැද්දේය. සීරු මාරුවට කුරුල්ලාට මා ඉතා ලං වූයේමි. අවසානයේ මීටර් දෙකකට පමන කිට්ටු වී මේ ඡායාරූපය මෙමරි පතට දායද කර දුනිමි. සුන්දර දවසක අවසානය මෙසේ සනිටුහන් කරමින් මම එය මෙසේ ඔබ වෙත ඉදිරිපත් කරන්නෙමි.

— in Kaduwela, Sri Lanka.

Camera : Nikon D7000
Lens : Nikkor 105mm f2.8
Accessories : Nikkon R1C1 Macro Lighting Kit

කොර කහ මල්

2012-05-13T07:48:00.000-07:00

ඉතාමත් සිත් ගන්නා දම් පාටකින් හෙබි මේ මල ගසේ අතු ඈත අතීතයේදී මිදුල් ඇමදීම සඳහා යොදා ගෙන තිබේ. ඒ කාලයේ ඉපල් ලෙස හඳුන්වා ඇත්තේ මෙම ඉතිය. ඉතාමත් ලඟින් ලඟින් අතු බෙදී යන නිසා, ඉතා කුඩා අත්තක වුවද බොහෝ අතු රිකිලි ඇත.

Camera : Nikon D7000

Lense : Nikon 105 f2.8

Lightning Kit : Nikon Macro Lightning Kit R1C1

Captured on 13th May 2012 in Kaduwela, Srilanka

පිළිහුඩුවන් හඹා යෑම.....

2012-05-11T09:21:00.001-07:00

Common Kingfisher (Alcedo atthis) Male මල් පිළිහුඩුවා පිරිමි

ගෙයි ඇතුලෙ දවසෙම හිර වෙලා වගේ හිටපු නිසා ටිකක් වෙල පැත්තෙ ඇවිදින්න හිතුනා අද හවස. නුහුරු කුරුල්ලෙක් ඉගිලිලා ඇවිත් ඈත ගහක අත්තක වහනවා මම දැක්කා. හරියට කුරුල්ලා අඳුර ගන්න බැරි තැන ගෙට දුවගෙන ආවෙ කැමරාව අරගෙන යන්න. ඩ්රයි කැබිනට් එක ඇරලා අර මහා පත ලෙන්ස් එකත් එලියටඅරගෙන (ඔය ලෙන්ස් එක අරගන්න තියෙන අනිත් ලෙන්ස් සේරම එලියට ගන්න ඕන) ට්රයි ෆෝඩ් එකට අමුණ ගෙන ආයෙත් වෙලට දිවුවා. ඒත් යනකොට කුරුල්ලා ගිහින් එතන අළු කොබෙයි ජෝඩුවක් වහලා. ඉතින් ඉවසගෙන හිටියා කොයි මොහොතක හරි මේකා ඒවි කියලා. පැය භාගයකට පස්සෙ ආයෙත් ඉවෙන් වගේ දැනුනා අර පෙර විදියටම ඉගිලිලා ඇවිත් ඈත අත්තක ඒකා වැහුවා කියලා. කැමරාව මානලා පිංතූරෙ අරගෙන සූම් කරලා බලද්දි මල් කොට්ටෝරුවෙක් (Crimson - brested Barbet). ඡායාරූපය පල කිරීමට තරම් ගුණාත්මක තත්වයක නැති නිසා මම ඒක මෙහි පල කලේ නැහැ. ඊට පස්සෙ ඒකා තිතේ ඉගිලලා ගියා. හුස්මක් අරගෙන එන්න හිතනකොට හීන් හඬක් නංවගෙන මගේ පිටිපස්සෙ මීටර් 40ක් විතර ඈතින් මල් පිලිහුඩුවා. මට ඕන වුනා මුලු ෆ්රේම් එක පිරෙන්න මේ කුරුල්ලගෙ පිංතූරයක් අරගන්න. මම හොඳටම දන්නවා ඒක ලේසි පාසු වැඩක් නෙමෙයි කියලා. පුංචි චලනයකටත් මුන් හරි සංවේදීයි.

දැන් කරන්න ඉතුරු වෙලා තිබුනෙ කුරුල්ලට හොරා මම ඌට ලං වෙන එක. ඒකටත් මේ ලෙන්ස් තඩිය උස්සගෙන යනවා කියන එක අමුම වහක්. ඒත් මම ඒ චැලේන්ජ් එක බාර ගත්තා. පිළිහුඩුවා බොහෝ විට ඉගිලිලා ගිහින් ආයෙත් ඇවිත් වහන්නෙ හුඟක් වෙලාවට ඒ අත්තෙම හෝ ඊට ආසන්නම තැනක. මේ චර්යාව මම බොහෝ දවස් අධ්යනය කරලා තියෙනවා. ඉතිං කුරුල්ලා ඉගිලිලා යන කන් ඉඳලා මම කැමරාව අටවපු ට්රයි ෆෝඩයත් කර ගහගෙන හෙමින් හෙමින් අර පන් පඳුර ලඟට ලං වුනා. දැන් කුරුල්ලා වහන පන් පඳුරයි මායි අතර දුර මීටර් 20 විතර. දනක් උසට වතුර. මම ට්රයි ෆෝඩ් එක පහත් කරලා මාත් ඒ ගානටම පහත් වුනා. පස්ස සම්පූර්නයෙන්ම වතුරට යට වුනාට පස්සෙයි තේරුනේ පස්ස වතුරට යට වෙලා කියලා. මී උන රෝගයෙන් ගොඩ දෙනක් මලා කියලා මම අහලා තිබුනා. ඒ හුඟ දෙනෙක් මැරුනෙ වෙල් වල වතුර හේතුවෙන්. හිතට ඒක ආවත් පිංතූරය ගැනීම තමයි මගෙ එකම අරමුණ වුනේ. මී උන සිතුවිල්ල පැත්තකට දාලා මම ඇහැ තියා ගත්තා කැමරාවෙ වීව් ෆයින්ඩර් එකට. පැය භාගයක් පමණ ගත වුනාට පස්සෙ මල් පිලිහුඩුවගෙ කෙල්ල ඇවිත් වැහුවා ඔන්න මම මානගෙන හිටපු පඳුරෙ. දැන් මටත් මල් පිපිලා! පුල පුලා බලාගෙන හිටපු වස්තුව මට ඕන තැනටම ඇවිත්. පිංතූර කීපයක් අර ගත්තත් ඒවා ටිකක් විතර අඳුරුයි. ඔය එක්කම පිරිමි කුරුල්ලත් මාළුවෙක් හොටෙන් අරගෙන ඇවිත් ඒක කෙල්ලට පිලිගැන්වුවා. දෙන්නම එකට තියලා මම පිංතූරයක් අරගත්තා. ආයෙත් දෙන්නම ඉගිල්ලිලා ගියා. මම එක පිම්මෙ වැට අයිනට දිවුවා. පුතාට කතා කරලා කිවුවා මගේ ෆ්ලෑෂර් එක අරගෙන එන්න කියලා ඉක්මනට. පුතත් ඒ සැනින් මට ඒක ගෙනල්ලා දුන්නෙ දැන් දැන් ඒකටත් තේරෙන නිසා වෙන්න ඇති මොහොත ගෙවුනොත් හැම උත්සාහයක්ම වතුරෙ කියලා වන ජීවී ඡායාරූප කරනයේදි.

ආයෙත් බඩගාගෙන කැමරාව ලඟට ආවා. දැන් මමත් මඬ කරියෙක් වගේ. මුළු ඇඟේම වතුර. හිමීට සීරු මාරුවට හිටගෙන ෆ්ලෑෂර එක අටව ගත්තා කැමරාවට. ආයෙත් මම දැන් ස්නයිෆර් කෙනෙක් වගේ. කැමරාව මානගෙන හිටිය බොහෝ වේලාවක්. ඔය අතරෙ මගෙ හිත මතුරනවා අනේ වරෙන් අනේ වරෙන් කියලා. මගේ මැතිරිල්ලෙ බලෙන් වගේ ආයෙත් හීන් හඬක් නංවගෙන කිරිල්ලි ආවා. දෙසැරයක් හිතුවෙ නැහැ මම මගේ කාරිය ඉෂ්ඨ සිද්ධ කර ගත්තා. විටින් විට පැය එකහමාරක් විතර මම දෙන්නගෙම පිංතූර අර ගත්තා. ඔය තියෙන්නෙ ඒ උත්සාහයේ ප්රථිපල. බලන්න මම දරපු ඒ උත්සාහයට මට ලැබිලා තියෙන ප්රථිපලේ වටිනවද කියලා....

Camera : Nikon D7000
Lens : Sigma 300-800mm f5.6
Flasher : Nikon SB800 (Angled 45 degrees and bounced)
Tri Pod : Gitzo Carbon Fiber 5 Series
Ball Head : Wimberley II

Settings of the Camera
Shutter : 1/60s
F Number : f5.6
Focal Length : 800mm
Flasher : Flash fired, compulsory flash mode
White Balance : Manual White Balance Set to Day Light (If you set the white balance to Flash mode it creates a yellowish color on the background. Since i shoot in day light with Flasher the white balance set to Day light to get the Natural Colors as it is)

Common Kingfisher (Alcedo atthis)Female මල් පිළිහුඩුවා ගැහැනු
— in Kaduwela, Sri Lanka.

Common Kingfisher (Alcedo atthis)Male මල් පිළිහුඩුවා පිරිමි — in Kaduwela, Sri Lanka.

වනජීවී ඡායාරූපකරණය

2012-03-30T12:01:00.000-07:00

වන ජීවී ඡායාරූපකරණය හුදෙක් සල්ලිකාරයන්ගේ විනෝදාංශයක්ව පැවති වකවානුවක් තිබුනි. ඩිජිටල් තාක්ෂනය බිහිවීමට කලින් ස්ලයිඩ් හෝ ෆිල්ම් භාවිතයෙන් කරනු ලැබූ ඡායාරූපකරණය අතිශය මිල වැය වන විනෝදාංශයක් විය. කාලයත් සමඟ ඩිජිටල් තාක්ෂනය මෙලොවට බිහිවීමත් සමගමේ තත්වය කෙමෙන් වෙනස් වී බොහෝ දෙනා ඡායාරූපකරණයට අවතීර්න වීමට පටන් ගෙන ඇත්තේ එදා තරම් මුදලක් අද වැය කල යුතු නැති නිසාමය. එහෙත් කනගාටුවට කාරණය නම් දැන් හතු පිපෙන්නාක් මෙන් ඡායාරූපශිල්පීන් යැයි කියන කැමරා කාරයින් බිහිවීමයි. දන්න ඉලවුවක් නැති වුනත් ෆොටෝ ගැසිය හැකි නිසා ඔවුන් පොරවල් යයි සිතාගෙන සිටී. එහෙත් ඒ සියල්ලම කරන්නේ කැමරාවය. බොත්තම ඔබනවාට වඩා යමක් බොහෝ දෙනා දන්නේ නැත. මාසයක් දෙකක් ෆොටෝ ගැසුවාට පසු ඔවුන් මහා ආචාර්යවරුන් සේය. ඡායාරූප ශිල්පියේ හිනි පෙත්තටම ආ සහ, ඡායාරූපකරණය නගා සිටුවීමට දර දිය ඇදපු අයට වඩා දෙයක් කල සේ කතාවය. මේ සියල්ල අතර අවංකවම ඡායාරූපශිල්පය හැදෑරීමේ ආසාවෙන් පෙලෙන පිරිසක්ද වේ. මේ භූමිකාව ඒ අවංක උන් උදෙසාය.

වන ජීවී ඡායාරූපකරණයට පෙර සූදානම් වන්නේ කෙසේද....

වනජීවී ඡායාරූපකරණය අන් ඡායාරූපකරනයන්ට වඩා වෙහෙස මහන්සි වී කල යුතු වූවකි. එයට පෙර සූදානමක් සහ මනා හික්මීමක් තිබිය යුතුය. පරිසරය හා පාරිසරික වෙනස්කම් ගැන මනා වැටහීමක් ලබා ගත යුතුය. වන ජීවීන් හා උන්ගේ හැසිරීම් රටා අධ්‍යනය කල යුතුය. විවිද පාරිසරික තත්ව යටතේ ඊට ආවේනික ලෙස වන ජීවීන් හැසිරෙති. උන්ගේ වාස භූමි ඒ අනුව තෝරා ගනිති. යාල වනෝද්‍යානයේ සිටින තරමක් දිවියන් අපිට සිංහරාජයෙන් වාර්තා නොවේ. දිවියන් ඡායාරූපයට නැගීමට නම් යා යුතු වඩාත්ම සුදුසු තැන වන්නේ යාලය. ලංකාවේ විශාලම වනෝද්‍යානය විල්පත්තුය. එහෙත් පසුගිය කාලයේ පැවති දරුණු යුද්ධයත් සමග මෙහි සිටි බොහෝ වන ජීවීන් විල්පත්තුව මගහැර සිටියේය. මේ හේතුව නිසා විල්පත්තුවට වඩා යාල දිවි ගහනය වැඩිය. සංඛ්‍යා ලේඛන අනුව යාල එක් වර්ග කිලෝමීටරයකට එක දිවියෙක් දැක ගත හැකිය. මේ ආකාරයට විවධ වන සතුන්ට විශේෂ වූ වාස භූමි උන් තමන්ගේ නිජබිම් කරගෙන වාසය කරයි. අලින්ගේ ඡායාරූප ගැනීමට යාල යාමට වඩා උඩවලවට යාම වටී. ඊට හේතුව යාලට වඩා අලි ගහනය උඩවලව වනෝද්‍යානයේ වැඩිවීමයි. මින්නේරියද අලින්ගේ එකතු වීම් වලට ප්‍රසිද්ධය. මීට පාරිසරික හේතු බලපායි. අගෝස්තු හා සැප්තැම්බර් යන මාස වල කුඩා වැවු වල ජලය හිඳී යන අතර බොහෝවිට වතුර ඉතුරු වන්නේ මින්නේරිය ජලාශය පමනි. මේ හේතුවෙන් අනෙක් වනෝද්‍යාන වල වාසය කරන අලින් මින්නේරිය ජලාශ වටා එකතුවේ. මෙකී පාරිසරික තත්ව ගැන අවබෝධයෙන් සිටීම වනජීවී ඡායාරූප ශිල්පියෙකුට ඉතා වැදගත් වේ.

මේ ලෙසටම වන ජීවීන්ගේ හැසිරීම් රටා ගැනද යම් අවබෝධයක් ලබා ගැනීම ඉතාමත්ම වටී. ඉන් ගුණාත්මක භාවයකින් හා වටිනාකමින් වැඩි ඡායාරූපයක් ගැනීමට මග පාදා ගත හැකිය. බොහෝවිට පිහාටු පුම්බා ඇඟ ගස්සා කුරුල්ලෙක් හැසිරෙන්නේ වසුරු හෙලීමටය. එමෙන්ම බොහෝ කුරුල්ලන් පියාඹා ගොස් නැවත වහන්නේ උන් නිතර වහන අතු ඉති වලය. Common King Fisher නැතහොත් සිංහලෙන් අපි මල් පිළිහුඩුවා ලෙස හඳුන්වන පිළිහුඩුවා බොහෝවිට පියාඹා විත් වහන්නේ උන් නිතරම වහන අතු වලය. හිරු පායන විට රාත්‍රී ලැගුම් ගත් තැනින් එලියට එන මේ සුන්දර කුරුල්ලා ඉගිලී විත් උදේ පාන්දරම වහන්නේ ඌට හුරු පුරුදු එකම තැනය. මෙවැනි හැසිරීම් රටා පෙර අධ්‍යනය කර තිබීම ගුණාත්මක වනජීවී ඡායාරූපයක් ගැනීමට ඉතාමත් ඉවහල් වේ.

Name : Crested Serpent Eagle
Scientific Name :Spilornis cheela spilogaster
In Sinhala : සර්ප රාජාලියා

ඉහත රූපයේ දක්වා ඇත්තේ මවිසින් 2009 මයි මස 22වන දින කාර්යාලයට යන අතර තුරේදී අහම්බෙන් දැක අතුරුගිරියේ වානේ සංස්ථාව ඉදිරියේදී ඡායාරූපයට නගා ගත් සර්ප රාජාලියාය. කැමරාව මානාගෙන විමසිල්ලෙන් බලා සිටිද්දී මේකා පිහාටු පුම්බා හරිබැරි ගැසෙන විට මම කැමරාව සූදානම් කරගෙන එක දිගට ඡායාරූප කීපයක් අරගත්තෙමි. මෙම ඡායාරූපයේ මේකා වසුරු හෙලන ආකාරය හොඳින් සටහන් වී තිබුනි. කලින් මේ හැසිරීම් රටාව ගැන දැනුවත් වී තිබීම මට මෙම ඡායාරූපය රූප ගතකරගැනීමට මහඟු පිටිවහලක් විය.

පරිසරය හා වනජීවින් පිලිබඳ අද්‍යනයන්ට අමතරව තමාගේ කැමරා මෙවලම් භාවිතා කිරීම හා ඡායාරූපයක් ගැනීම ගැනද හොඳ වැටහීමක් ලබා ගතයුතුය. ඊට අපි ඡායාරූප ශිල්පග්ඥානය යැයි කියමු. මෙම ශිල්පඥානය ප්‍රගුන නොකල කෙනෙකුට ගුනාත්මක ඡායාරූපයක් ගැනීම අපහසු විය හැක. නවීන කැමරා වල තියෙන නූතන තාක්ෂනික හැකියාවන් සමග ඡායාරූපයක් ගන්නට හැකි වුවද සමහර අවස්ථාවලදී මෙම දනුම තිබිය යුතුම වන්නේය. ගොම්මන් වේලාව කිට්ටුවීගෙන එන වෙලාවක ඉගිලෙන කුරුල්ලෙකුගේ ඡායාරූපයක් ගැනීම මදක් අපහසුය. කැමරාව ස්වයැංක්‍රීය කර ඡායාරූපය ගත්තද බොහෝවිට බොඳවූ ඡයාරූපයක් ප්‍රතිපලය විය හැක. එවැනි අවස්තාවක අපට Manual Override එකක් ගැනීමට සිදුවේ. ISO අගය ඉහල දැමිය යුතුය, ෂටර් හා ඇපචර් අංකනයන් අදාල විදියට වෙනස් කර ගත යුතුය. මෙසේ කිරීමට තම මෙවලම ගැන හොඳ අවබෝධයකින් සිටිය යුතුය. එසේ නොවුනහොත් ඊට අදාල වෙනස් කම් කිරීමට මෙනුව පරීක්ෂා කරන අතර තුර කුරුල්ලා ඉගිලී ගොස් හමාර වීම නොඅනුමානය.

වනජීවී ඡායාරූප ශිල්පියෙකුට පරිසරයට අනුගත විය යුත්තේ කෙසේද කියන දේ ගැනද මනා වැටහීමත් තිබිය යුතුය. එහිදී තමුන් ඡායාරූප අරගන්නේ කුමන පාරිසරික තත්වයන් යටතේද යන්න සිතා බැලිය යුතුය. එම පරිසරයට අනුගත විය හැකි වර්නයන්ගෙන් යුත් ඇඳුමක් ඇදීම අනිවාර්ය වේ. බොහෝවිට කොලපාට වර්නයන්ගෙන් යුත් ඇඳුම් ඇඳීම ඉතා යහපති. එහෙත් ගස් කොලන් නැති දුඹුරු පැහැ පරිසර පද්දතියක් නම් එම පරිසරයේ වර්ණයන්ට වඩාත්ම ගැලපෙන අඳුමක් ඇඳීම වඩා සුදුසුය. එසේ පරිසර පැහයට සමාන අඳුමකින් සැරසීම මගින් සත්වයින්ට ආගන්තුකත්වයක් නොදැනීම නිසා ඡායාරූප ගැනීමට පහසුවක් ඇතිවේ. ඊට අමතරම අවදානමක් ඇති භයානක සතෙකු නොවේනම් සත්වයාට නොදැනී ඌට බොහෝ සේ කිට්ටුවී ඡායාරූපය ගැනීමට අපිට යම් පහසුවක් ඇතිවේ.

මේ සියළු කරුනු කාරනා වලට අමතරව වනජීවී ඡායාරූප ශිල්පියා ඉවසීම ප්‍රගුන කර තිබිය යුතුය. ඉවසීම නැති ඡායාරූප ශිල්පියෙකුට වනජීවී ඡායාරූපකරනය කල නොහැක. ඉවසීම ඇති කර ගැනීමට මනා හික්මීමක් හා ශික්ෂනයක් තිබිය යුතුය. හුදෙක් මෙය භාවනාවක් වැන්න. මෙකී භාවනාවට අනුගත වීමට මේ සියළු දෑ ප්‍රගුන කර තිබීම වනජීවී ඡායාරූප ශිල්පියෙකුට දිගු ගමනක් යාමට මග පාදනු ඇත.

වන ජීවී ඡායාරූපකරණයට අත පොත් තැබීම

වන ජීවී ඡායාරූපකරණයට අත ගැසීම භාවනාවකට අවතීර්න වීමක් වැන්න. ඉතාමත් සුන්දර වට පිටාවක නිදහස බුක්ති විදින සතා සිවුපාවගේ හැසිරීම් රටා අධ්‍යනය කිරීමට ලැබීම වාසනාවකි. එහෙත් මෙය දැක්ක එබුවා ගත්තා සම්ප්‍රදායෙන් කල නොහැක. මංගල ඡායාරූපකරණය, මෝස්තර නිරූපන ඡායාරූපකරණය හෝ ඡායාරූපගාරයක් තුල කරන ඡායාරූපකරණයට වඩා හාත් පසින්ම මෙය වෙනස්ය. අපිට හිතෙන හිතෙන ආකාරයට වස්තුව තබා ඡායාරූප ගත කල නොහැක. අවශ්‍යතාවයට අනුව කෘතිම ආලෝකය ලබා දිය නොහැක. මේ සියල්ලම ස්වභාවිකව අපට ස්වභාවධර්මයා දුන් අලෝක තත්ව යටතේ පරිසරයට අනුගත වී සත්වයාගේ ඉරියවු ගැන සැලකිලිමත් වෙමින් මනා ඉවසීමකින් හා ශික්ෂණයකින් කල යුත්තකි. ඉවසීම ප්‍රගුන කරන තරමටම වටිනා ඡායාරූපයකට හිමිකම් කීමට අවස්ථාවක් ලැබෙනු ඇත.

වන ජීවින් ඉතාමත් කිර්යාශීලි වනුයේ හිරු උදා වන විට හා හිරු බැස යන අවස්ථාවන්හිදීයි. මෙම අවස්ථා දෙකේදීම ආලෝක තත්වයන් අඩු බැවින් වේගවත් ලෙන්ස් භාවිතා කිරීමට සිදුවේ. අවාසනාව නම් මෙම ලෙන්ස් මිලෙන් ඉතා අධික වීමය. 600mm f4 වර්ගයේ ලෙන්ස් එකක් ලංකාවේදී නම් මුදල් ඇතත් එවෙලේ ගෙවා ගැනීමට තැනක් නැත. අත්තිකාරම් මුදලක් ගෙවා ඒ ආයතන මගින් ගෙන්වා ගත්තාට පසු ඉතිරි මුදල ගෙවා ලබා ගැනීමට සිදුවේ. කිසිදු ආයතනයක් මෙවන් මිල අධික වේගවත් ලෙන්ස් ගෙනත් ගබඩා කරගෙන විකුනන්නේ නැත. ඇනවුමක් මත පමනක් ආනයනය කරයි (Imports on Requests). සාමාන්‍යයෙන් 600mm F4 වර්ගයේ ලෙන්ස් එකක් ලංකා මුදලින් රුපියල් ලක්ෂ 15 ක් පමන වේ. ඒ විතරක් නොවේ. මෙය අතින් ඔසවාගෙන ඡායාරූප ගැනීමට ආර්නෝල්ඩ් වැනි කාය වර්ධනයේ යෙදුනෙක් විය යුතුය. අපි වැනි හාල්මැස්සන්ට ට්‍රයි ෆොඩයක් (ත්‍රිපාදයක්) අනිවාර්යෙන්ම භාවිතා කිරීමට සිදුවේ. එවැනි ලෙන්ස් එකක් ඇටවීමට ගන්නා ට්‍රයි පෝඩය ඉතා හොඳ බරක් ඉසිලිය හැකි එකක් විය යුතුය. හොඳ තත්වයේ GITZO හෝ Manfretto කාර්බන් ෆයිබර් ට්‍රයි පෝඩයක් ලංකා මුදලින් රුපියල් 135,000 පමන් වේ. ලෙන්සය සවිකිරීමට ගන්න හෙඩ් එක Whemberly II එකක් නම් එයද ලංකා මුදලින් රුපියල් 115,000 පමණ වේ.

GITZO ආයතනයේ වෙබ් අඩවිය : http://www.gitzo.com/

Whemberly II හෙඩ් එකක් GITZO ට්‍රයි පෝඩයක් මත

කැටලොග් එක මෙතනින් බාගත කල හැක : http://www.gitzo.com/service/request+a+catalog/#

එහෙත් මේ මිල අධික මෙවලම්ම වනජීවී ඡායාරූපකරණයට එකතු කර ගත යුතු නැත. මම වන ජීවී ඡායාරූපකරණයට අත පොත් තිබ්බේ Nikon D70s කැමරාවෙන් හා 70-300 f4-5.6 වන Zoom ලෙන්ස් එකෙනි. පසුව Sigma 170-500mm f4-6.3 ලෙන්ස් එක භාවිතයට ගත්තෙමි. අවුරුදු 12කට පමන පසුව Sigma 300-800mm f5.6 ලෙන්ස් එකක් මගේම කර ගත්තෙමි.

Sigma 300-800mm f5.6 ලෙන්ස් එක

ඡායාරූපකරණයේ මූලික ඉරියවු

ට්‍රයි ෆෝඩයක් (ත්‍රිපාදයක්) භාවිතා නොකරන අවස්ථාවන්හීදී ඡායාරූපකරණයේ මූලික ඉරියවු මෙසේය. එහෙත් වනජීවී ඡයාරූපකරණයේදී අපට බොහෝ විට ට්‍රයි පෝඩයක් (ත්‍රිපාදයක්) භාවිතා කිරීමට සිදුවේ.

වන ජීවී ඡායාරූපකරණය

වන ජීවී ඡායාරූපකරනයට කලින් අපි විසින් සැලකිය යුතු කරුනු කීපයක් වේ.

1). ඡායාරූප ගත කරන්නේ කොහේද

2). ඡායාරූප ගත කරන්නේ කාවද
3). ඡායාරූප ගත කරන වෙලාව මොකක්ද

4). උපයෝගී කරගන්නා මෙවලම් මොනවාද
5). අප ස්ථාන ගත විය යුත්තේ කොහේද, කෙලෙසද.

6). ස්වභාවික ආලෝක තත්වය කෙසේද.. (ඉර නැගීම හා ඉර බැසීම
සිදුවන්නේ අප ස්ථාන ගතවන තැනෙන් මොන පැති වලින්ද)

7). අඳිනා ඇදුම කුමක්ද

මා ඡායාරූපකරණයට අත ගැසූ සැටි....

2012-03-28T22:43:00.000-07:00

1995 රිකෝ II ෆිල්ම් කැමරාවකින් මම මගේ ඡායරූපකරණයට අත ගැසූයේ අවුරුදු කීපයක් තිස්සේ එකතු කරගත් සියළුම ධනය එක මොහොතකින් වියදම් කරමිනි. රුපියල් 22,000 කට ලබා ගත් කැමරාවට පසුව තව තව උපාංග ටිකක් එකතු කර ගනිමින් මම ඡයාරූපකරණයේ නව මං පෙත් එලි පෙහෙළි කර ගැනීමට උත්සුක වූයෙමි. දෙස් විදෙස් ඡායාරූප ශිල්පීන්ගේ ඡායාරූප තුලින් කමටහන් ලබා ගනිමින් හා ලැබෙන සෑම පත පොතක්ම කියවමින් මම මේ දුර ගෙවන්නට යත්න දැරූවෙමි. ඡායරූපකරණය හුදෙක් මාගේ විනෝදාංශය හා වියවුල් මා මනසට මෙය තවත් එක් භාවනාවකි. කාලය ලැබෙන සෑම අවස්ථාවකම මම මේ භාවනාවට සම වදිමි.

වර්ෂ 2000 දී ෆිල්ම් කැමරාවට සමු දී මම ඩිජිටල් Point and Shoot කැමරාවකට අත ගැසූවෙමි. එහෙත් ගුනාත්මක ඡයාරූප ගැනීමට හා මාගේ පරාසයන් පුළුල් කර ගැනීමට එයින් එතරම් දායකත්වයක් නොලබූයෙන් මට DSLR කැමරාවක අවෂ්‍යතාවය තදින්ම දැනෙන්නට විය. 2004 දෙසැම්බරයේදී කාර්යාලීය අවශ්‍යතාවයක් උදෙසා රාජකාරී මට්ටමින් සිංගප්පූරුවට යාමට ලැබුනු අවස්තාව ප්‍රයෝජනයට ගනිමින් හා එම සංචාරයට කාර්යාලයෙන් ලැබුනු අරමුදල් බොහෝම දුකසේ ඉතුරු කරගනිමින් තිබුන එකම ක්‍රෙඩිට් කාඩ් පතේ සියළුම පහසුකම් භාවිතා කරමින් Nikon D70s කැමරාවක් මා මගේම කර ගත්තෙමි.

මාස්පතා ලැබුනු පඩිය මෙම විනෝදාංශයට කිසිම දායකත්වයක් දුන්නේ නැත. පංති කර ලැබෙන මුදලින් කොටසක් මම දැඩි ලෙස පීඩා විඳිමින් හා මිරිකෙමින් ඉතුරු කරන්නට පෙරුම් පිරූයෙමි. නිතර දෙවේලේ අන්තර්ජාලය හරහා උපාංග හා මෙවලම් බලමින් ඒවා ලබා ගන්නට සිහින දකිමින් මම කාලය ගත කලෙමි. ඒ වගේම ඒ සිහින සැබෑ කරගන්න මම නිරතුරුව උත්සාහ කලෙමි. ටිකින් ටික, එකින් එක, මා මගේ මෙවලම් එකතු කලෙමි. කැමරා, ලෙන්සස්, ෆ්ලෑශර්ස්, ට්‍රයි ෆොඩ්ස්, මෙකී නොකී හැම දේම නිතර දෙවේලේ මගේ මනස තුල භ්‍රමනය වන්නට විය. උන සන්නියකට හැරී අතිශය උත්සන්න වූ තත්වයක් තුල මට මේ හැම දේම අත පත ගා බැලීමේ අවශ්‍යතාවය තදින්ම දැනෙනට විය. ඇති උන්ගෙන් ඉල්ලූ කල අතිජාත මිත්‍රයන් වුවද විවිධ හේතු කියා මග හරින අවස්ථා අනන්තය අප්‍රමාණය. දුක හිතේ පුරෝගෙන මම මේ හැම අවස්ථාවකම දහිරිය උපදවා ගත්තෙමි. යම් දවසක කෙසේ හෝ මේ සියළුම දේ මම ගන්නෙමියි යන ඒකායන ප්‍රාර්ථනයේ ඇනය මම මගේ හිස තුලටම ගසා ගත්තෙමි. ඒ ඇනයේ ආනුභාවයෙන් අද මම ඡායාරූපකරනයට අවශ්‍යව ඇති නවීණතම උපාංග වලට හිමිකම් කියන වාසනාවන්තයෙක්මි.

කැමරාවන් ලෙස Nikon D200, D7000 කැමරා දෙකද, Nikon 105mm f2.8 Macro, 85mm f1.8D, 50mm f1.4G, 18-105 Zoom, Sigma 300-800mm f5.6 යන ලෙන්ස් වර්ගද, ෆ්ලෑශ්‍ර්ස් ලෙස මැක්‍රෝ සඳහා Nikon R1C1 Close Up Lightning Kit එකද, SB800 ෆ්ලෑෂරයද, ට්‍රයි ෆෝඩ් එක ලෙස Gitzo 5 series කාර්බන් ෆයිබර් ට්‍රයි ෆෝඩයද Whemberly II හෙඩ් එකද, LowPro Pro Tracker AV II කැමරා බෑගයද අද මා සතුව ඇත.

මේ සියළු කරුණු කාරණා මෙසේ සඳහන් කලේ උජාරුව කියා පෑමටවත්, පුරාජේරුවටත් නොවන බව මා අවංකවම සඳහන් කරමි. මා මෙන්ම උපාංග ලබා ගැනීමට අනේක දුක්ඛ දෝමනස්සයන්ට මුහුන දෙන තවත් පරම්පරාවක් මා පිටුපස සිටින බව මා දනිමි. මා සතු උපාංග දකින අළුතින් ඡායරූපකරණයට නැඹුරු වූ බොහෝ දෙනා මා හා පැවසූයේ මේවා හීන වගේය යන්නය.

නිබඳවම මා ඒ හැම කෙනෙකුටම පවසන්නේ ඒ හීන වලට සීමා නොවී උත්සහයෙන් යුතුව ඉදිරියටම යන ලෙසය. මට වඩා දුර ගමනක් ඔවුනට යා හැකි බව මගේ විශ්වාසයයි.

" උත්සාහය උක් දන්ඩක් වැන්නේ

වැලඳූ පසුවයි මිහිර දැනෙන්නේ....."

ඡායාරූපද සමගින් මෙම මෙවලම් ඔබට මෙතනින් බලා ගත හැක.

මෙම ලින්ක් එක කොපි කර ඔබගේ බ්‍රවුසරයේ ලින්ක් සඳහන් කරන බාර් එකේ පේස්ට් කිරීම මගින් බලා ගත හැක.

http://www.facebook.com/media/set/?set=a.10150626540097947.390470.664642946&type=3

ඡායාරූප ශිල්පියා යනු....

2012-03-28T21:06:00.000-07:00

කැමරාවක් අතේ තිබුනු පලියට කෙනෙකු ඡායාරූප ශිල්පියෙකු වන්නේ නැත. ඡායාරූප ශිල්පය හදෑරූ පමනින්ද කෙනෙකු ඡායාරූප ශිල්පියෙකු වනෙනේ නැත. කැමරාවක් ගෙන හිතුන හිතුන දෑ ෆොටෝ ගැනීමෙන්ද ඡායාරූප ශිල්පියෙකු විය නොහැක. ඡායාරූප ශිල්පියාට මනා හික්මීමක් තිබිය යුතුය. ඉතා හොඳ ඉවසීමක් තිබිය යුතුය. සාමාන්‍ය කෙනෙකු බලන කෝනයට වඩා පුළුල් හා වෙනස් කෝණයකින් බලන කෙනෙකු විය යුතුය. මේ කෝණය ඡායාරූප ශිල්පියාගේ අනන්‍යතාවයය. එම කෝණයේ දැක්ම ඡායාරූපයේ වස්තු බීජයට සියලු අර්ථ කථන සැපයිය යුතුය. සාර්ථක ඡායාරූපයකින් සම්පූර්ණ කථාවක් දැනිය යුතු වන්නේය. එය චිත්‍රපටියක් බැලුවට වඩා හිතට කා වැදිය යුතුයි. ඡායාරූප ශිල්පියා අනිවාර්යයෙන්ම ඉවසීමෙන් හා ශික්ෂණයෙන් යුතු, මනා සංයමයකින් යුතුව, නිවැරදි කෝණය හදුනා ගතයුතු, සාමාන්‍ය මනුස්සයෙක් සිතන මට්ටමට වඩා ඉහලින් සිතිය හැකි පිවිතුරු හදවතකින් යුක්ත, සාධාරණ කෙනෙක් විය යුතුයි. අනිවාර්යයෙන්ම කුහක කමින් තොර විය යුතුමයි.