பருத்தித்துறை

ஜேசன் மிராயஸ் - தெள்ளிய இசை

2010-07-19T08:43:00.000-07:00

மனித வாசம் படாத காட்டினுள்ளே தனியே நடந்து செல்லும் போது மௌனமான அந்த அமைதிக்குள் சில்வண்டுகளும் சிறு குருவிகளும் எமக்குப் பாடிக் காட்டும் இயற்கையின் கீதங்களைச் செவிமடுத்திருக்கிறீர்களா? அறுவடை முடிந்த விளைநிலங்களில் வளர்ந்திருக்கும் நாயுண்ணிப் பற்றைகளும் காவிளைப் பற்றைகளும் காற்றில் சிலுசிலுக்கும் போது வரும் ஓசையை நின்று கேட்டிருக்கிறீர்களா? பனைகளும் வடலிகளும் நிறைந்த காணிகளுக்குள்ளால் புகுந்து செல்லும் போது அந்த ஓலைகள் சரசரக்கும் போது அவை என்ன சொல்ல நினைக்கின்றன என்று யோசித்திருக்கிறீர்களா?, இழந்து விட்ட இளமைப் பருவத்தின் நினைவுகளில் உறைந்து போய் இருக்கும் நம் புழுதி படிந்த இயற்கையுடனான உறவின் எச்சங்களை நினைத்துப் பார்ப்பீர்களா?

நகரத்தின் நெரிசல் மிக்க இயந்திர வாழ்க்கையின் அவசரத்தில் இதைப் பற்றி யோசிக்கக் கூட உங்களுக்கு இப்போது நேரமில்லாமல் இருக்கலாம். ஜேசன் மிராயஸ்(Jason Mraz) என்ற இந்தக் கலைஞன், விட்டுப் போன வாழ்க்கையின் இயல்பான தருணங்களை இயற்கையின் குரலில் மீட்டும் போது தவற விட்ட எமது கணங்களை எமக்குச் சுட்டிக் காட்டுவது போல் உணர முடிகிறது.

செக் வம்சாவளியைச் சேர்ந்த ஜேசன் மிராயஸ் அமெரிக்காவிலுள்ள வேர்ஜினியாவில் பிறந்தவர். இயற்கையோடு ஒன்றிய வாழ்வை நேசிக்கும் இவர் பச்சைக் காய்கறிகளையே முதன்மை உணவாக உண்பவர். பல்வேறு பொதுச்சேவை நிறுவனங்களில் பங்காளியாக உள்ளவர். இதற்காக விருதுகளையும் பெற்றுள்ளார். இசை

இவரது முதல் ஒலித் தொகுப்பு 2002 ஆம் ஆண்டு வெளியானாலும் விற்பனை ரீதியில் பெரிதாக வெற்றியடையவில்லை. 2005 ஆம் ஆண்டில் வெளியான தொகுப்பு ஓரளவு வெற்றியைக் கொடுத்து அமெரிக்க அளவில் இவர் நிலையை உயர்த்தியது. 2008 ஆம் ஆண்டு வெளியான "We Sing. We Dance. We Steal Things" என்ற ஒலித் தொகுப்பே சர்வதேச அளவிலும் இணையத்திலும் மிகப் பிரபலமாக இடம் பிடித்தது. இவரது இசையின் சிறப்பே அதன் எளிமை தான். இசைக்கு மொழி இல்லை என்று நான் கருதுவதால், ஆங்கிலமாய் இருந்தாலும் அவர் பாடல்களை இங்கே பகிர்ந்துள்ளேன். அவரது பாடல்களை அவர் மேடையிற் பாடும் வீடியோ இணைப்புகள் கீழே உள்ளன, பார்த்து, கேட்டு உங்கள் கருத்துகளைப் பகிருங்கள்.

அக்டோபஸ் - எண்காலி

2010-07-16T21:48:00.000-07:00

உலகிலுள்ள முதுகெலும்பில்லாத உயிரினங்களிலேயே மிகவும் புத்திசாலியான சுவாரசியம் மிக்க அக்டோபஸ் பற்றி சில அறிந்திராத செய்திகளைப் பார்ப்போமா?

அக்டோபஸ் என்ற பெயரின் நேரடி அர்த்தம் எண்காலி என்றாகிறது. கணவாய்க்கும் இதற்கும் வித்தியாசம் இருக்கிறது, ஆனால் தமிழில் என்ன பெயர் என்று தெரியவில்லை, எண்காலி என்று மொழி பெயர்க்கலாம் என்று நினைக்கிறேன். சமீபத்தில் போல் என்ற பேருடைய ஒரு எண்காலி உலகக் கோப்பை முடிவுகளை முன்கூட்டியே எதிர்வு கூறிப் பிரபலமானது எல்லோருக்கும் தெரிந்திருக்கும், இந்தப் பதிவு அதைப் பற்றி அல்ல என்பதை முதலிலேயே சொல்லி விடுகிறேன்.

எண்காலிகள் பற்றிய முதல் சுவாரசியமான செய்தி, ஹவாய் தீவு மக்களின் பூமியின் மறு உருவாக்கம் பற்றிய கதைகளின் படி, அழிந்து போன முந்தைய உலகத்தின் ஒரே ஒரு மீதி, அதாவது இந்த உலகத்துக்கு சொந்தமில்லாத வேறு உலகத்தைச் சேர்ந்த உயிரினம் இந்த எண்காலி தான். வேற்றுக் கிரக வாசிகளின் படங்களிலும் நீங்கள் பார்த்திருக்கலாம், சில உயிரினங்கள், இந்த எண்காலி போல வடிவமைத்து இருப்பார்கள். ஏன் என்றால் அவற்றின் உருவம், பெரிய தலையும் கால்களும் மட்டும் கொண்டதாக, அதிக அறிவுத் திறனும் நிறைய வேலைகளை ஒரே நேரத்தில் செய்யக் கூடியதுமான தோற்றம் எண்காலிக்கு மட்டுமே இருப்பதால் தான்.

உககத்திலுள்ள எல்லா எண்காலிகளும் நச்சுத் தன்மை உடையன என்றாலும் நீல வளையங்களைக் கொண்ட எண்காலி மட்டுமே மனிதரைக் கொல்லக் கூடிய அளவு நச்சுத் தன்மையானது. இந்த அழகான எண்காலி உலகிலுள்ள மிகவும் நச்சுத் தன்மையான விலங்குகளில் ஒன்றாகக் கருதப்படுகிறது. இதன் நஞ்சுக்கு மாற்று மருந்து கிடையாது என்பதும் கவனிக்கத் தக்கது. கீழே அதைப் பற்றிய ஒரு காணொளி உள்ளது.

இவை இயல்பிலே தாக்கும் தன்மை கொண்டவை அல்ல, ஆனால் ஆபத்து நேரும் என அது கருதினால், உடனே அதை உடலில் உள்ள நீல வளையங்கள் பிரகாசமாக மாறும். அப்போது அதைத் தீண்டினால் பரலோகம் தான்.

எண்காலிகள் மிகவும் புத்திசாலிகள் என்று முதலிலேயே பார்த்தோம், இவற்றுக்கு பிரச்சினைகளைத் தீர்க்கும் திறமை, எளிதில் எல்லாவற்றையும் கற்றுக்கொள்ளும் திறன் எல்லாம் இருந்தாலும், இவற்றின் ஆயுட் காலம் மிகக் குறுகியதாய் இருப்பதால் நிறையப் புதிதாகக் கற்றுக்கொள்ளும் வாய்ப்பு மட்டுப்படுகிறது( இவற்றின் ஆகக் கூடிய ஆயுள் 5 வருடங்கள் மட்டுமே). இவற்றுக்கு குறுகிய கால நினைவுத் திறன், நீண்டகால நினைவுத் திறன் இரண்டும் இருப்பதால், மிக வேகமாக கற்றுக்கொள்ளுகின்றன. எண்காலிகளை ஆராய்ச்சி செய்த விஞ்ஞானிகளின் முடிவின் படி, இவற்றுக்கு உள்ள எல்லாத் திறமைகளும் இவை தம் வாழ்நாளில் கற்றுக் கொள்ளும் விடயங்களே அன்றி, எல்லா எண்காலிகளுக்கும் பொதுவாக உள்ளது என்று இல்லை. ஒவ்வொரு எண்காலியும் தனக்கு என்று தனித்துவமான வழக்கங்களை கொண்டுள்ளது.

எண்காலிகள் தமக்குள்ளே தகவல்களைத் தமது உடலின் நிறங்களை மாற்றிக் கொள்ளுவதன் மூலமே பரிமாறிக் கொள்ளுகின்றன என்று தெரிய வந்துள்ளது. இவற்றின் நிறம் மாற்றும் தன்மை உருமறைப்புக்கே முக்கியமானதாக இருந்தாலும், இந்தத் தன்மையையே அவை செய்திகளைப் பரிமாறிக் கொள்ளவும் பாவிக்கின்றன.

இவற்றின் மூளை மற்றும் நரம்புத் தொகுதி மிகவும் சிக்கலானது. மூளைச் செயற்பாடுகளைக் கையாளும் நியுறோன்களில் பெரும் பகுதி இவற்றின் கால்களின் உள்ளே உள்ள நரம்புத் தொகுதிகளில் அடங்கியுள்ளது. இந்த இயல்பு இவற்றின் கால்களின் இயக்கத்தின் முடிவெடுக்கும் திறனைத் தருவதோடு, மிகவும் சிக்கலான அசைவுகளைக் கட்டமைக்கும் திறனையும் வழங்குகிறது. எண்காலிகளுக்கு தாமாகவே விளையாடும் இயல்பும் உண்டு. இவற்றின் கூரிய அறிவுத் திறனினாலும் இவற்றின் உடலின் மென்மையான இயல்பினாலும், இவற்றை ஒரு இடத்தில் அடைத்து வைப்பது மிகவும் கடினம். முள்ளந்தண்டில்லாத விலங்குகளிலேயே இவற்றுக்கு மட்டும் உள்ள இன்னொரு இயல்பு கருவிகளைப் பயன்படுத்தும் திறன் ஆகும். தேங்காய் ஓடுகளை தமது ஒளிவிடங்களாகப் பாவிப்பதற்காக அவற்றைத் தம்முடன் எடுத்துச் சென்று பொருத்தும் திறமையைக் கொண்டுள்ளமை அவதானிக்கப்பட்டுள்ளது.

அடுத்த சுவையான விடயம், இவற்றின் எதிரிகளின் தாக்குதல்களில் இருந்து தப்ப இவை பயன்படுத்தும் உத்திகள். இவற்றின் முதல் உத்தி, மறைதல், அல்லது எண்காலி போன்று தோற்றமளிக்காமல் மறைத்தல். உருமறைவு என்றும் சொல்லலாம் இவை மிகச் சிறப்பாக தமது நிறத்தை மாற்றி உறுமறைவை உண்டாக்கக் கூடியன. அடுத்த உத்தி, வேகமாக அகலுதல். இவை தம்மை உண்ண வரும் விலங்குகளில் இருந்து தப்புவதற்காக மிக வேகமாகத் தமது கால்களால் நடந்து அல்லது நீர்த்தாரை முறையில் (water jet ) நீந்தி அகலக் கூடியன. சில எண்காலிகள், தாவரம் போலத் தோற்றமளிக்கக் கூடியதாக, தனது கால்களை வைத்துக் கொண்டு இரண்டு கால்களை மட்டும் உபயோகித்து நடந்து செல்வதும் உண்டு. இதனால் கொள்ள வரும் விளங்கு இதனை எண்காலி இல்லை என தப்ப விட்டு விடும். அடுத்த உத்தியாக இவை உபயோகிப்பது, கடும் நிறமுள்ள மையைத் தம்மைச் சுற்றி பரவ விட்டுத் தப்புதல். சில வகை எண்காலிகள் பல்லி தன் வாலைக் கழற்றுவதைப் போல் தமது ஒரு காலினைக் கழற்றி தப்பித்துக் கொள்ளும். இன்னொரு வகை எண்காலி, வேறு ஆபத்தான விலங்குகள் போன்ற தோற்றப்பாட்டை உருவாக்கித் தப்பித்துக் கொள்ளும். கீழே உள்ள படத்தில், இடது பக்கம் உள்ளது எண்காலி, வலது பக்கம் உள்ளவை உண்மையிலேயே ஆபத்தான கடல் பிராணிகள்.

எண்காலிகள் ஆராய்ச்சியாளர்களின் ஒரு விருப்பமான உயிரினமாகும். அவற்றின் புத்திசாலித்தனமும், சிறப்பியல்புகளும் அவர்களுக்கு பிரமிப்பாகவே உள்ளது. சில நாடுகளில் எண்காலிகளுக்கு சிறப்பு தராதரம் வழங்கப்பட்டு, அவற்றுக்கு மயக்க மருந்து உபயோகித்து மட்டுமே அறுவை செய்ய முடியும் என்ற கட்டுப்பாடு கூட உள்ளது. இப்படி எல்லாம் இருந்தால் கூட, நிறைய இடங்களில் இதை விரும்பி உண்ணத் தான் செய்கிறார்கள். நாங்கள் உண்ணும் கணவாய் கூட இதற்கு சொந்தக்காரர் தான். ஹவாய் தீவுகளிலும், ஜப்பானிலும் இது மிகவும் பிரபலமான உணவு வகை ஆகும். சில வகை எண்காலிகளை சமைக்காமலும் சிலவற்றை உயிருடனும் கூட உண்பது உண்டு.

எண்காலி மல்யுத்தம் என்று ஒரு விளையாட்டு கூட உள்ளது. இதன் போது மல்யுத்த வீரர் நீருக்குள் மூழ்கி, ஒரு எண்காலியுடன் மோதி, அதைக் கொன்று வெளியே கொண்டு வர வேண்டும். எண்காலி கள் மிருதுவான உடலைக் கொண்டிருந்தாலும், மிக்க வலிமை கொண்டவை, அதனால் இந்த விளையாட்டு 1950 -1970 வரைக்கும் பிரபலமாக இருந்துள்ளது. இப்போது விளையாடுகிறார்களா என்று தெரியவில்லை.

எண்காலிகளைப் பற்றிய இன்னொரு விதமான கதைகளை நாம் எல்லோரும் சிறிய வயதிலேயே கேள்விப்பட்டு இருப்போம். இராட்சத எண்காலிகள் பற்றிய கதைகள் தாம் அவை. கரீபியன் கடற்கொள்ளைக்காரர்கள் என்ற படத்திலும் அப்படியான இராட்சத எண்காலியைக் காட்டி இருப்பார்கள். கடலில் நெடுந்தொலைவு பயணம் செய்வோருக்கு இந்த எண்காலி பற்றிய கதைகள் அந்தக் காலத்தில் சிம்ம சொப்பனமாக இருந்திருக்கிறது. அப்படியான ஒரு இராட்சத மிருகம் 1896 ஆம் ஆண்டு, அமெரிக்காவில் உள்ள ப்ளோரிடாவில் கரையொதுங்கி இருந்தது. அப்போது அது ஒரு இராட்சத எண்காலியாகக் கருதப்பட்டாலும், தற்போது அது ஒரு வகைத் திமிங்கிலமாக இருக்கலாம் எனக்கண்டு பிடிக்கப்பட்டு இருக்கிறது.

பொன்வானம் பன்னீர் தூவுது

2010-06-25T22:05:00.000-07:00

இளையராஜாவின் இசையில், ஜானகியின் குரலில் ஒலிக்கும் இந்தப் பாடல் கேட்கும் போது தேவ கானமோ என்று எண்ண வைக்கும் அளவுக்கு உள்ளத்தை ஊடுருவிச் சென்று மனதை வருடும் தன்மையது. தூறலாய் ஆரம்பிக்கும் இசை மெல்ல மெல்ல மனதை தூவானமாய் நனைத்து, அடை மழை போல் வேகமெடுத்து வந்ததும், பாடல் வரிகள் மீண்டும் தூவானமாய் எம் மனதில் விசிறும் ஒரு அற்புதமான அனுபவத்தை உருவாக்கும் பாடல் இது. இன்று நீ நாளை நான் என்ற படத்தில் சிவகுமாரும் லஷ்மியும் தோன்றும் பாடல் காட்சி கீழே.

பொன்வானம் பன்னீர் தூவுது இன்னேரம்

அட எண்ணம் மீறுது, வண்ணம் மாறுது கண்ணோரம்

பொன்வானம் பன்னீர் தூவுது இன்னேரம்

மழைத்தூறலே ஒதுங்க இடம் பார்க்குதே

மலர் அம்புகள் உயிர் வரைக்கும் தாக்குதே

மழை செய்யும் கோளாறு...கொதிக்குதே பாலாறு

இது காதல் ஆசைக்கும், காமன் பூஜைக்கும் நேரமா

இந்த ஜோடி வண்டுகள் கோடு தாண்டிடுமா

பொன்வானம் பன்னீர் தூவுது இன்னேரம்

அட எண்ணம் மீறுது, வண்ணம் மாறுது கண்ணோரம்

பொன்வானம் பன்னீர் தூவுது இன்னேரம்

தங்கத்தாமரை மலர்ந்த பின்பு மூடுமோ

பட்டுப்பூங்கொடி படர இடம் தேடுமோ

மலர்க்கணை பாயாதோ...மதுக்குடம் சாயாதோ

இது வெள்ளை மல்லிகை தேவகன்னிகை தானம்மா

இது வெள்ளை மல்லிகைதேவகன்னிகை தானம்மா

மழை காமன் காட்டில் பெய்யுங்கால் அம்மம்மா

பொன்வானம் பன்னீர் தூவுது இன்னேரம்

அட எண்ணம் மீறுது, வண்ணம் மாறுது கண்ணோரம்

பொன்வானம் பன்னீர் தூவுது இன்னேரம்

எண்ணியல் - 1

2010-06-24T01:39:00.000-07:00

எண்களுக்கும் இயற்கைக்கும் நெருங்கிய தொடர்பு உள்ளதைப் போலவே, எண்களுக்கும் எங்களுக்கும் - மனிதர்களுக்கும் நெருங்கிய தொடர்புகள் உண்டு. இது எப்போது துவங்கியது என்று சரியாகத் தெரியாவிட்டாலும், ஆகக் குறைந்தது 30,000 வருடங்களுக்கு முதலே துவங்கி விட்டது என்பதற்கு ஆதாரங்கள் கிடைத்திருக்கிறது. இந்த ஆதாரங்கள், மனிதன் சந்திரனின் நிலைகளைக் குறித்து வைக்கப் பயன்படுத்தி இருக்கலாம் என நம்பப் படுகிறது. அந்தக் காலத்தில் அவன் வியாபாரம் செய்யத் துவங்கவில்லை போல் இருக்கு.

எண்களைப் பற்றி ஆராய்ந்து எண்களுக்கும் பிரபஞ்சத்திற்கும், இயற்கைக்கும், மனிதர்களுக்கும் உள்ள தொடர்புகளைப் பற்றி அறிவியல் ரீதியாகவோ அல்லது எல்லோராலும் ஏற்றுக்கொள்ளப்படாத சோதிட ரீதியாகவோ முடிவுகளை நிறுவும் முறைமையை எண்ணியல் எனலாம் (Numerology). எங்களுக்கு எண்ணியல் என்றால் உடனே ஞாபகத்துக்கு வருவது பிறந்த திகதி, பெயர் எண் எல்லாம் வைத்து பலன்களைச் சொல்லுதலும், சிலர் அந்த எண்களுக்காக பெயரை மாற்றுவதும் ( ஏன் என்றால் பிறந்த தேதியை மாற்ற முடியாது தானே) தான் ஞாபகம் வரும். பெயர் மாற்றுவதில் பலன் இருக்கோ இல்லையோ அது எங்கள் பிரச்சினை இல்லை.

எண்களுக்கும் எங்கள் வாழ்க்கைக்கும் உள்ள நெருங்கிய தொடர்புகளைப் பற்றித் தான் நாம் இங்கே பார்க்கப் போகிறோம்.

எண்களில் உள்ள சில அதிசயமான உண்மைகளைப் பார்ப்போமா?

எட்டு எட்டா வாழ்க்கை இருக்கு தெரிஞ்சுக்கோ என்ற பாட்டு எல்லாருக்கும் தெரிஞ்சிருக்கும் என்று நினைக்கிறேன். ஆனா ஒரு பையனின் வாழ்க்கையில் எட்டுக்கு ரொம்ப முக்கிய தொடர்பு இருக்கு. எட்டு மாதங்களில் அவனுக்கு பாற்பற்கள் முளைக்கின்றன, எட்டு வயதில் விழுகின்றன. எட்டும் எட்டும் பதினாறு வயதில் அவன் முழுமையாகப் பருவமடைகிறான், எட்டு தரம் எட்டில், அறுபத்து நான்கு வயதில் இனப்பெருக்க காலம் முடிகிறது. அதனால் தான் சீனா நாட்டில், எட்டு என்ற எண் ஆணின் வாழ்க்கையைக் குறிக்கிறது. அதே போல பெண்ணின் வாழ்க்கையைக் குறிக்கும் எண் ஏழு ஆகும். ( மேலே சொன்ன மாதிரி பெண்களுக்கும் சரியா வருதா என்று பார்த்துக் கொள்ளுங்கள்)

8 என்ற எண்ணுக்கு இன்னொரு சிறப்பு உண்டு. எந்த ஒரு ஒற்றை எண்ணின் வர்க்கத்திலிருந்தும், ஒன்றைக் கழித்தால், அந்த எண், 8 இன் மடங்காகவே இருக்கும். உதாரணத்துக்கு, 9 - 1, 25 - 1, 49 - 1. இதைக் கணித முறையில் நிறுவ முடியும்.

ஒற்றை எண் 2n + 1

வர்க்கம் 4n2 + 4n + 1

1 கழித்தால் 4n2 + 4n = 4n(n+1)

n ஒற்றை எண் என்றால், n+1 இரட்டை எண் ஆகும் எனவே n(n+1) ஒரு இரட்டை எண் ஆகும். ஆகவே அதை 2m என்று குறித்தால், கடைசிப் பெறுமதி 8m, எட்டின் மடங்காகவே இருக்கும்.

அடுத்த அதிசயமான எண், ஒரு தனிப் பெயரால் அழைக்கப் படுகிறது. இதை இயற்கை எண், தங்க விகிதம் ( golden ratio) என்றும் அழைப்பார்கள். phi என்று அழைக்கப்படும் கிரேக்க குறியீட்டால் இது குறிக்கப்படும் ( ϕ ). இதை எப்படி வரையறுக்கலாம் என்றால், ஒரு நீளத்தை இரு சமமற்ற பங்குகளாகப் பிரிக்கும் போது, முழு நீளத்தில் பெரிய பகுதி நீளம் என்ன விகிதத்தில் இருக்கிறதோ, அதே விகிதத்தில் பெரிய பகுதி நீளத்தில் சிறிய பகுதி நீளமும் அமைந்திருந்தால், அந்த விகிதமே மேலே சொல்லப்பட்ட தங்க விகிதம் ஆகும். இந்த எண்ணின் சரியான பெறுமதி கிட்டத்தட்ட 1.618 ஆகும்.

இந்த எண்ணுக்கு இருக்கும் இன்னொரு சிறப்பு என்ன என்றால்,

அதாவது, இந்த விகிதத்தின் தலைகீழ் பெறுமானமும், இவ்விகிதத்தில் இருந்து ஒன்றைக் கழித்து வரும் பெறுமானமும் சமம் ஆகும்.

உலகத்தில் இயற்கையால் படைக்கப்பட்ட நிறையப் படைப்புகள் இந்த எண்ணைத் தமக்குள்ளே கொண்டிருக்கின்றன. உதாரணத்துக்கு, உங்களையே எடுத்துக்கொள்ளுங்கள். உங்கள் உடலில் முழு உயரத்துக்கும், கீழிருந்து மார்புக் காம்புகள் வரையிலான உயரத்துக்கும் உள்ள விகிதம், உங்கள் முழுக் கையின் நீளத்துக்கும், முழங்கையிலிருந்து விரல் நுனி வரையிலான தூரத்துக்கும் உள்ள விகிதம், எல்லாமே இந்த தங்க விகிதம் தான். டா வின்சி கோட் நாவல் வாசித்தவர்களுக்கு இதை விட அதிக உதாரணங்கள் தெரிந்திருக்கும். தாவரவியலில், இந்த விகிதமும், இந்த விகிதத்தை தொடரிலே கொண்டிருக்கும் பிபோனாசி (fibonacci) தொடர் எண்களும் (1,1,2,3,5,8,13,21...) திரும்பத் திரும்ப உள்ள விடயங்களாகும்.

மனிதனின் படைப்புகளிலும், அழியாத புகழ் கொண்ட படைப்புகள், இந்த தங்க விகிதத்தை அடிப்படையாகக் கொண்டவையே. எகிப்திலுள்ள பிரமிட் கள், கிரேக்கத்திலுள்ள பாதினன் தேவாலயம் எல்லாம் இந்த விகிதத்தில் அமைந்த கட்டிடவியலை உபயோகித்திருக்கின்றன.

இந்த விகிதத்தைத் தனக்குள்ளே கொண்ட ஒரு பிரபலமான உருவம் ஐந்து முனைகளைக் கொண்ட நட்சத்திரம் ஆகும்.

இதில் தங்க விகிதம் அமையும் முறை வெவ்வேறு நிறங்களால் குறிக்கப்பட்டுள்ளது.

இந்த நட்சத்திர உருவம், பல்வேறு நாடுகளிலும், பல்வேறு தேவைகளுக்கு உபயோகிக்கப் படுகிறது. மிகப் பழைய காலம் தொட்டே இது உபயோகத்தில் இருக்கிறது. அந்தக் காலத்திலேயே இதன் சிறப்பினை அறிந்து பாவித்திருக்கிறார்கள். பண்டைய சமய வழிபாடுகளில் இந்த உருவம் மிகவும் மதிப்பிற்குரியதாக, புனிதமானதாக இருந்திருக்கிறது. இன்று, பல நாடுகளில் தேசியக் கொடியில் இது இருக்கிறது. அமெரிக்கா, சீனா, சிங்கப்பூர், போல எக்கச்சக்கமான நாடுகளின் கொடியில் இருக்கிறது. பல நாடுகளின் போர்ப் படைகளின் சின்னமாக உள்ளது. முக்கியமாக, ரஷ்ய , அமெரிக்க நாடுகளின் போர் விமானங்களில் இந்த சின்னத்தைக் காணலாம்.

யாருக்கு சொர்க்கம்? ( 18 + )

2010-06-18T07:37:00.000-07:00

சொர்க்கத்தில் சனத்தொகை கூடி இடப் பிரச்சினை ஆகி விட்டது. அதனால், ஒரு நாள் மட்டும் பரீட்சார்த்தமாக ஒரு கட்டுப்பாடு கொண்டு வரப்பட்டது. யார் ரொம்ப கஷ்டப்பட்டு மண்டையைப் போடுகிறார்களோ அவர்களை மட்டும் உள்ளே அனுமதிப்பது என்று தலைமைப் பீடம் உத்தரவு போட்டது.

வாசலில் நேர்முகம் ஆரம்பமானது. முதலில் வந்தவரிடம் கேட்கப்பட்டது, 'நீ எப்படி இங்கே வந்து சேர்ந்தாய் ?'
முதலாமவன் சொன்னான் 'அது ரொம்ப மோசமான நாள். என் மனைவியுடன் இன்னொருவனுக்கு தொடர்பு இருக்கு என்று எனக்குத் தெரியும், அன்று அவர்கள் இருவரையும் கையும் களவுமாக பிடிக்க சீக்கிரமே வீட்டுக்கு வந்து விட்டேன். வீடு முழுவதும் தேடியும் அவனைக் காணவில்லை, எங்கள் வீடு 25 ஆம் மாடியில் இருக்கு, வெளியில் வந்து பால்கனியில் எட்டிப் பார்த்தேன், வெளியில் பால்கனி விளிம்பில் பிடித்து அவன் தொங்கிக்கொண்டு இருந்தான். உடனே வீட்டுக்குள்ளே போய் சுத்தியல் எடுத்து வந்து அவன் கைகளில் போட்டேன் ஒரு போடு, கைகளை விட்டு கீழே விழுந்தான், ஆனால் அவன் பற்றைகளில் போய் விழுந்த படியால், தப்பி விட்டான், எனக்கு பொறுக்க முடியவில்லை, உள்ளே இருந்த ப்ரிட்ஜை தள்ளிக்கொண்டு பால்கனிக்கு வெளியே தள்ளி அவனுக்கு மேல் போட்டு விட்டேன். அதோடு அவனும் மண்டையை போட்டு விட்டான், இந்தத் தள்ளு முள்ளில் நானும் ஹார்ட் அட்டாக்கில் செத்து போய் விட்டேன்'
'ம்ம் இது ஒரு மோசமான சாவு தான், நீ சொர்க்கத்துக்கு போகலாம்'.
அடுத்தவனிடம் அதே கேள்வி கேட்கப்பட்டது.
இரண்டாமவன் சொன்னான் 'ச்சே, எவ்வளவு மோசமான நாள் அது. நான் 26 ஆவது மாடியிலுள்ள என் வீட்டின் பால்கனியில் உடற்பயிற்சி செய்து கொண்டு இருந்தேன், திடீரென்று என் கால் சறுக்கி பால்கனிக்கு வெளியே விழுந்து விட்டேன், அதிர்ஷ்டவசமாக கீழே அடுத்த மாடி பால்கனியைப் பிடித்து விட்டேன், ஆனால் திடீர் என்று ஒரு மனிதன் ஓடி வந்து சுத்தியலால் என் கையில் அடித்து கீழே தள்ளி விட்டான். அப்படி விழுந்தும், நான் பற்றைகளில் விழுந்த படியால் அடி படாமல் தப்பினேன், ஆனால் அந்த மனிதன் விடவில்லை, மேலிருந்து ப்ரிட்ஜை என்மேல் போட்டு என்னை இங்கே அனுப்பி விட்டான்'
'உன் சாவு ரொம்ப மோசமாக இருக்கு, அதனால் உனக்குச் சொர்க்கம்'
மூன்றாவது ஆள் வந்தான், 'சரி நீ சொல்லு, நீ இறந்த நாள் எப்பிடி இருந்தது?'
'நான் உடைகள் இல்லாமல் ஒரு ப்ரிட்ஜுக்குள் ஒளிந்து இருந்தேன் ....'

'அடப் பாவி, அவனா நீ?.. '

உங்களுக்கு ஒரு லோகோ

2010-06-16T05:11:00.000-07:00

ஒரு படம் ஓராயிரம் வார்த்தைகளுக்குச் சமமானது என்பது ஒரு பேருண்மை. எங்கள் மூளைக்கும், கருத்துக்களை விட உருவங்களை சேமிப்பதிலும் அவற்றை கையாள்வதிலும் மிகுந்த ஆற்றல் உண்டு என்பது விஞ்ஞான உண்மை ஆகும். இதை எமது வாழ்க்கை முறையிலேயே நாம் அனுபவத்தில் உணர முடியும். எமது மனதில் பதிய வைப்பதற்காகவே நிறுவனங்களில் குறியீடுகள் கவர்ச்சிகரமான, மனதில் பதியக் கூடிய உருவங்களாக உருவாக்கப்படுகின்றன. எந்த ஒரு பிரபலமான நிறுவனத்தையும் நீங்கள் மனதில் உருவகித்தால், அவற்றின் குறியீட்டு உருவமே உங்கள் மனதில் முன்னிற்கும்.

ஓவியம் என்பது உலக மொழி என்பதால், எந்த ஒரு நாட்டைச் சேர்ந்தவரும், எந்த மொழியைச் சேர்ந்தவரும், ஒரு படத்தின் கருத்தை இலகுவாக விளங்கிக் கொள்ள முடியும். உண்மையில், ஆதி மனிதனின் மொழியின் வரி வடிவமாக இருந்தது உருவப் படங்களேயாகும்.

இந்த லோகோக்கள் எங்கே துவங்கின, என்று பார்த்தால் தட்டையான அல்லது , உருளை அச்சுகளில் தான் முதல் முதலில் பாவிக்கப்பட்டு இருக்கின்றன. தட்டை அச்சுக்கள் இற்றைக்கு 4000 ஆண்டுகளுக்கு முன்னம் இருந்தே இந்த மாதிரி அச்சு பயன்படுத்தப் பட்டு இருக்கிறது.

மெசொபதேமியாவில் இந்த உருளை அச்சுகள் கி.மு 3500 ஆம் ஆண்டளவில் பாவிக்கப்பட்டதற்கான சான்றுகள் கிடைத்து உள்ளன. இந்த அச்சுகள் கடினமான ஒரு பதார்த்தத்தில் உருவாக்கப்பட்டு இருக்கும். ஈரமான களிமண் பலகையின் மீது இதை வைத்து உருட்டும் போது அந்த அச்சில் உள்ள உருவங்கள் களிமண் மீது புடைப்பாக உருவாகும்.

நமது அம்புலிமாமா கதைகளில் கேள்விப்பட்ட முத்திரை மோதிரங்கள் தான் அடுத்த தலைமுறை லோகோக்கள். ஒவ்வொரு முக்கிய பிரமுகரும் தமக்கென்று ஒரு லோகோ அல்லது இலச்சினையை உருவாக்கி அதை மோதிரத்தில் பதித்து, தம்முடனேயே வைத்திருந்தனர். அது அவர்களின் அத்தாட்சியை உறுதிப்படுத்தும் முக்கிய சான்றாக இருந்தது. சீனா நாட்டிலும், ஐரோப்பாவிலும் கூட இந்த முத்திரை உபயோகம் இருந்துள்ளது. முக்கியமான ஆவணங்கள், கடிதங்களில் அதிகாரிகளின் முத்திரை பதிக்கப்பட்டது, இரகசிய ஆவணங்கள் சீல் வைக்கவும் அனுப்புனரின் முத்திரை பாவிக்கப்பட்டது.

அதற்கு அடுத்ததாக, தமது முத்திரையை அரசர்கள் தமது நாட்டின் நாணயத்தில் பதித்து, அந்த நாட்டின் நாணயத்திற்கு தமது லோகோ வை கொண்டு சென்றனர். இது இப்போதும் கூட வழக்கத்தில் உள்ளது. நாடுகள், அரசரை இல்லாவிட்டலும், தம் நாட்டுக்குரிய சின்னங்களைக் கொண்டு லோகோக்களை உருவாக்கி நாணயத்தில் பதித்து வெளியிடுகின்றனர். நாணயங்களை சேகரிக்கும் பழக்கம் உள்ளவர்கள், நாணயத்தைப் பார்த்த உடனேயே அது எந்த நாட்டைச் சேர்ந்தது என்பதை அதிலுள்ள லோகோவை வைத்து அனுமானிக்க முடியும்.

தற்காலத்து லோகோக்கள் நேரடியாக ஒரு உருவத்தைக் கொண்டிராமல், அரூபமான வகையில் தமது கருத்தைச் சொல்கின்றன. இந்த வகை லோகோக்கள் 1950 களிலிருந்தே வெளிவரத் துவங்கின. இவற்றில் முன்னோடியாகக் கருதப்படும் இலச்சினை CHASE வங்கியின் இலச்சினை ஆகும்.

தற்போதைய நிறுவனங்களின் லோகோக்கள் அனேகமாக ஒரு குறியீட்டு உருவத்தையும், அதனுடன் நிறுவனத்தின் பெயரையோ அல்லது சுருங்கிய வடிவிலான பெயரையோ இணைத்து உருவாக்கப் படுகின்றன. ஒவ்வொரு நிறுவனத்தின் அடையாளங்களில், அவற்றுக்கான நிறங்களும், குறியீடுகளும் மிக முக்கியமாக கவனிக்கப்படும். பின்வரும் லோகோக்கள் இதற்கு மிகச் சிறந்த உதாரணங்களாகும்.

கீழே உள்ள லோகோக்களுக்கு சுவையான அர்த்தங்கள் உண்டு. அனுமானித்து விட்டு, இறுதியில் சரிபார்த்துக் கொள்ளுங்கள்.

அமேசான் நிறுவனத்தினுடைய லோகோ : அவர்களிடம் A இலிருந்து Z வரை எல்லாப் பொருட்களும் வாங்க முடியும் என்பதை அந்த அம்புக்குறி குறிப்பதோடு, வாடிக்கையாளரிடம் உருவாகும் புன்னகையையும் குறித்து நிற்கிறது.

பெட் எக்ஸ் நிறுவனத்தின் லோகோவைப் பார்த்தால், E க்கும் X க்கும் இடையில் ஒரு அம்புக்குறியைக் காணலாம். இந்த நிறுவனத்தின் துல்லியமான விநியோகத்தைக் காட்டும் குறியீடு அந்த லோகோவிலேயே உள்ளடக்கபட்டு இருக்கிறது.

BMW நிறுவனத்தின் லோகோ வின் நடுவிலுள்ள நீலமும் வெள்ளையும் கலந்த குறியீடு, நீல வானில் விமானம் பறக்கும் போது அதன் முன் பக்கத்திலுள்ள காற்றாடி சுழலும் உருவமாகும். இந்த நிறுவனம் முன்னர் விமான இயந்திரங்களைத் தயாரித்த பாரம்பரியத்தை குறிப்பிடும் சின்னமே இதுவாகும்.

அப்புறம், கீழே உள்ளவை சிரிப்பதற்கு. பொருளாதார வீழ்ச்சியின் போது பாதிக்கப்பட்ட நிறுவனங்களின் நிலைமையை லோகோவில் வேடிக்கையாக..

மாயத் தோற்றங்கள் (கவனம்)

2010-06-14T02:18:00.000-07:00

(இந்தப் படத்தில் அனிமேஷன் இல்லை)

கண்ணால் காண்பதும் பொய், காதால் கேட்பதும் பொய், தீர விசாரித்து அறிவதே மெய் என்று நம் முன்னோர்கள் சொல்லி விட்டுப் போனாலும் அதை நம்மவர்கள் கணக்கெடுப்பதில்லை. ( அதற்காக வீடியோவில் பார்த்தது பொய் என்று சொல்ல வரவில்லை) கண்ணால் நாம் காணும் காட்சிகளில் சில உண்மை அற்றவை, மூளையில் மாயத் தோற்றமாக உருவாக்கப் படுபவை என்பதைக் காட்டவே இந்தப் பதிவு.

கீழே சில மாயத் தோற்றங்களும் அவற்றின் விளக்கங்களும் உள்ளன. பார்த்து உறுதி
செய்து கொள்ளுங்கள். (படத்தின் மீது அழுத்தினால் பெரிதாகப் பார்க்கலாம்)

இதிலுள்ள இரண்டு ஆரஞ்சு வட்டங்களும் ஒரே அளவிலானவை.

இதிலுள்ள கோடுகள் எதுவும் வளையாத நேர் கோடுகள்.

இந்தக் கோடுகள் எல்லாம் சமாந்தரமானவை

இந்தச் சக்கரம் சுற்றவில்லை என்று சொன்னால் நம்பணும்

ஒவ்வொரு சந்தியிலும் கருப்பு நிறப் புள்ளி வந்து மறைவது மாயா..

சரி, இதற்கு முன்னம் வந்த படங்களைப் பார்த்து கண்களை நம்பாதே என்று முடிவு எடுத்து இருப்பீர்கள், இந்தப் படத்திலுள்ளது என்ன என்று வாசித்து விட்டால், உங்கள் கண்கள் ஒழுங்காக இருக்கின்றன என்று முடிவு செய்து விடலாம்.

கீழே உள்ளது எடிட் பண்ணப்பட்ட படம், ஆனா நல்லாயிருக்கு.

ஆப்பிள் ஐபோன் 4

2010-06-08T02:10:00.000-07:00

ஆப்பிள் நிறுவனம் தனது புதிய ஐபோன் 4 இனை வெளியிட்டுள்ளது. இந்த புதிய ஐபோன், நிறைய மாற்றங்களோடு புதிய வசதிகளோடு வெளிவந்துள்ளது. குறிப்பாக, எந்த விடயங்களில் முதல் தொகுதி ஐபோன் பின்தங்கி இருந்ததோ, அவற்றை எல்லாம் நிவர்த்தி செய்து கவர்ச்சிகரமாக வெளிவந்துள்ளது. பின்வரும் புதிய அம்சங்கள் ஐபோன் 4 இல் புதிதாக உள்ளடக்கப்பட்டு இருக்கிறது.

முகம் பார்த்து பேசும் வசதி

இருவர் தொலைபேசி மூலம் பேசும் போதே, ஒருவரை ஒருவர் பார்த்து பேசும் வசதி . இந்த போனில் இரண்டு காமராக்கள் உள்ளன, அவை இரண்டையும் மாற்றி மாற்றி உபயோகித்து வீடியோ உரையாடல் செய்ய முடியும். இந்த வசதி தொலைபேசி சேவை வழங்கும் நெட்வொர்க் இலும் தங்கி உள்ளது.

ரெடினா முகப்புத் திரை

இந்த ஐபோன் இல், உள்ள முகப்புத் திரையானது, முந்திய வெளியீடுகளின் முகப்புத் திரையின் துல்லியத்தை விட நான்கு மடங்கு துல்லியமானதாகும். இதனால், திரையில் உள்ள புள்ளிகளின் வேற்றுமையை மனிதக் கண்களால் கண்டுபிடிக்க முடியாது.

பல பயன்பாடுகளை ஒரே நேரத்தில் இயக்குதல்

இதற்கு முந்திய ஐபோன்களில் இருந்த பெரிய குறைபாடு, ஒரே நேரத்தில் ஒரு பயன்பாட்டை மட்டும் இயக்க முடியும் என்பதாகும். இதற்கு ஐபோன் இயங்குதளத்தில் ஒரு அப்டேட் ஐ ஆப்பிள் நிறுவனம் வெளியிட்டு இருந்தது. ஆனால் இந்தப் புதிய ஐபோன் 4 வெளியீட்டில் அந்த வசதி இணைக்கப்பட்டு இலகுவான முறையில் பயன்படுகளிடையே பயணிக்கும் முறைமை உள்ளடக்கப்பட்டு இருக்கிறது.

மிகை வரைவிலக்கண (Hi-Definition) வீடியோ

புதிய ஐபோன் HD வீடியோ பதிவு செய்யும் வசதியுடன், அதை எடிட் செய்யும் வசதியும் கொண்டுள்ளது. வீடியோ வை படமாக்கிய உடனேயே அதில் வைத்து எடிட் செய்து இன்டர்நெட் இல் தரவேற்றம் செய்ய முடியும்.

5 மெகா பிக்ஸெல் கேமரா

இதிலுள்ள 5 மெகா பிக்ஸெல் கேமரா மூலம் மிகத் துல்லியமான படங்களை பதிவு செய்ய முடியும். பின் பக்கத்திலுள்ள வெளிச்ச உணரி ( illumination sensor), குறைந்த ஒளியிலும், சிறந்த படங்களை எடுக்க உதவி புரியும்.
முன் பக்கத்திலுள்ள சிறிய கேமரா மூலமும் படங்களை எடுக்க முடியும்.

அறிமுக வீடியோ

அறிமுக வீடியோ காட்சியை பார்வையிட, மேலே உள்ள தொடுப்பை அழுத்துங்கள்.

யோசிப்பவரா நீங்கள் ?

2010-05-21T06:48:00.000-07:00

" எல்லோரும் ஒரே மாதிரி யோசிக்கிறார்கள் என்றால், அதில் சிலர் யோசிக்கவே இல்லை" இப்படி சொல்லியிருக்கிறார் ஜெனரல் ஜார்ஜ் பட்டன்.

யதார்த்தமும் அப்படித் தான் இருக்க வேண்டும் என்று நினைக்கிறேன். ஒவ்வொருவருக்கும் சிந்தனை என்பது வேறுபட்டால் தான் வேறு வேறு கருத்துக்கள் கிடைக்கும். அதிலிருந்து சிறந்த கருத்தைப் பெற முடியும். சிலர் தங்கள் கருத்து தான் சிறந்தது, வேறு கருத்துக்கள் கவைக்குதவாதவை என்று தீர்க்கமாகக் கருதுவார்கள்.

அதே நேரம் இன்னொரு கருத்தும் உண்டு. சிறந்தவர்கள் எல்லோரும் ஒரே மாதிரி தான் யோசிப்பார்கள் என்று. அந்தக் கருத்தை மனதில் வைத்துத் தானோ என்னவோ, சிலர் தாங்கள் நினைப்பது போல தான் எல்லோரும் நினைக்க வேண்டும் என்று ஒரு பாசிச மன நிலையுடன் இருப்பார்கள். தாங்கள் நினைப்பது சரியா தவறா என்பதைப் பற்றிக் கூட யோசிப்பதில்லை அவர்கள். இப்படியானவர்களை எங்கள் வாழ்க்கையில் எல்லா இடங்களிலும் காணக் கூடியதாய் இருக்கிறது.

இந்த பாசிச சிந்தனை எங்கே தோன்றுகிறது என்று பார்த்தால், ஒரு மனிதனின் முதல் சமுதாயப் படியான குடும்பத்தில் துவங்குகிறது. ஒரு விடயத்தில் முடிவெடுப்பதற்கு தந்தையும் தாயும் ஆரோக்கியமான கருத்தாடல் செய்து சிறந்த முடிவை எடுக்கும் சந்தர்ப்பத்திற்கான நிகழ்தகவு எமது சமுதாயத்தில் எந்த அளவில் உள்ளது என்பது உங்களுக்கே தெரியும். அங்கே அந்தக் குடும்பத்தின் அடுத்த தலைமுறை கற்றுக்கொள்வது தமது பெற்றோர்களின் உதாரணத்தில் இருந்து தான்.

நாம் வேலைத்தளங்களில் எதிர்நோக்கும் பாசிசம் அடுத்த வகையினது. தொழில் நிறுவனங்கள் தமது உத்தியோகபூர்வ சட்டநகல் ஒன்றை வைத்திருப்பார்கள். அது எப்படி இருக்கும் என்றால், நீங்கள் என்ன தான் பிடுங்கினாலும், அந்த நிறுவனத்தை உங்களால் என்னவும் செய்ய முடியாது, நிறுவன உரிமையாளர்கள் சொன்னால் சொன்னது தான் என்ற மாதிரியும், தங்கள் விரும்பினால் உங்களுக்கு ஏதும் போட்டுத் தரலாம் என்ற மாதிரியும் ஒரு கோப்பை உருவாக்கி, சில சட்ட வல்லுனர்களை வைத்து விளங்க முடியாத வார்த்தைப் பிரயோகங்களைப் பாவித்து உருவாக்கி இருப்பார்கள். நீங்கள் அந்த சட்ட நகலைப் பற்றி கேள்வி கேட்க முடியாதபடி அந்தச் சட்டத்திலேயே சட்டம் இருக்கும்

அடுத்து நமக்கு வாசிக்கக் கிடைக்கும் கட்டுரைகள், நூல்கள், பத்திரிகைச் செய்திகள். பொதுவாக செய்திகள் அல்லது நூல்களுடனான எமது பரிமாற்றம் ஒருவழியிலேயே நடக்கின்றது. அதாவது அவை தம் சொல்ல வந்ததை சொல்லுவதோடு நின்று விடுகின்றன. ஒரு பாடப்புத்தகத்தை வைத்து படம் நடத்தும் ஆசிரியர், அதில் மாணவர்களுக்கு உருவாகும் கேள்விகளுக்குப் பதில் சொல்ல முடியும், ஆனால் ஒரு புத்தகமோ, கட்டுரையோ தன்னளவில் அந்தப் பதில்களைக் கொண்டு இருக்கும் என்று சொல்ல முடியாது. அதனால், அந்த உள்ளடக்கங்கள், தாம் சொல்ல வருவதை சில நேரங்களில் பாசிச வகையில் சொல்லி, மனிதனைக் கருத்தாடல் மூலம் தெளிய முடியாத ஒரு நிலைக்குக் கொண்டு வருகின்றன. ஆனால், இப்போதுள்ள செய்தி ஊடகங்களில் செய்திகளுடன், அவற்றுக்கான உரையாடலுக்கும் இடம் வழங்கி, செய்திகளைக் கருத்தாடலுக்கு அனுமதிக்கும் போக்கு உருவாகியுள்ளமை மிகவும் வரவேற்கத் தக்கது.

அடுத்து நமக்கு மிகவும் தெரிந்த விடயம், பாசிசம் அரசியலில் காணப்படும் தன்மை. பொதுவாக எல்லோருக்கும் அதில் இருந்து தான் பாசிசம் எனும் பதம் அறிமுகமகியிருக்கக் கூடும். ஒரு குறிப்பிட்ட நபர் அல்லது ஒரு குழு, தாம் சிந்திப்பது போலவே எல்லோரும் சிந்திக்க வேண்டும் என நினைக்கும் போது அரசியலில் அது பாசிசமாகிறது.

பாசிச அடக்குமுறை ஒரு நாட்டோடு நின்று விடுவதில்லை, பாசிசத்தின் தலைமைப் பீடத்தின் ஆளுகை அளவுகளைப் பொறுத்து, சில நாடுகளை உள்ளடக்கிய பிராந்திய அளவிலும், பல நாடுகளை உள்ளடக்கி சர்வதேச அளவிலும் பாயும் வல்லமை இதற்கு உண்டு. இன்று ஜனநாயக நாடுகள் என்று கருதப்படும் பல நாடுகளில், ஆளும் கட்சியோ கூட்டணியோ, தமக்கு எதிரான கருத்து கொண்டவர்களை நசுக்கி, தமது கொள்கைகளை அல்லது அபிலாஷைகளை நடைமுறைப்படுத்துவது கண்கூடு.

ஒரு மனிதன் உனக்கு எதிரனவனாய் இருந்தால், உடல் ரீதியாக அவனைத் தோற்கடிப்பதன் மூலம் அவனை வெல்ல முடியாது, அவன் மனதைத் தோற்கடித்தால் தான் அவனை வெல்ல முடியும் என்பது ஒரு பழைய சொலவடை. இதைத் தெரிந்து கொண்டு தானோ என்னவோ இந்த அதிகார பீடங்கள், தமக்கு எதிரானவர்களை தோற்கடிப்பதில்லை அவர்களையே முடித்து விடுவார்கள்.

கட்டற்ற கலைக்களஞ்சியமான விகிபீடியவிலிருந்து, பாசிசத்தின் வரைவிலக்கணமாக தரப்பட்டுள்ளவை,

பாசிசம் (fascism) என்பது ஒரு சமுதாயத்தின் அதிகார வர்க்கத்தால் சர்வாதிகார முறையில் பொருளாதார மற்றும் மற்றைய விதயங்கள் தீர்மானிக்கப்படுவதையே குறிக்கும். முதலாளிகள் இவ்வதிகார வர்க்கத்திற்குள் அடங்குவர். ஆரம்ப கட்டங்களிலே அடிமட்ட மக்களின் ஆதரவும் இவ்வதிகார வர்க்கத்திற்கு கிடைக்கும். முசோலினியின் இத்தாலி, இட்லரின் ஜெர்மனி பாசிசத்திற்கு எடுத்துக்காட்டுகள்.
தனிமனித உரிமைகளை நாட்டு நலனுக்காக, வல்லமைக்காக எனக் கூறி மதிக்காமல் அரசுக்கு எதிராகக் கேள்வி கேட்பவர்களை அடக்குமுறைகள் மற்றும் வன்முறை மூலம் நசுக்குகின்ற அரசியல் நடைமுறையே பாசிசம் எனப்படும். தனியுரிமை முதலாளித்துவத்தின் தேய்ந்த நிலையே பாசிசம் எனமார்க்சியவாதிகள் அதனைக் கண்டிப்பதுண்டு. மார்க்சியவாதிகளின் இந்தக் கண்டனத்திலே உண்மை அதிகம் இருந்தபோதிலும், சில முக்கியமான விடயங்களைக் கருத்திலே கொள்ளாதிருக்கின்றது. தனியுரிமை, முதலாளித்துவம் கையாலாகாத நிலையில் பாசிசத்தைச் சரணடைகின்றது என்பது உண்மையே

இந்தக் கட்டுரையில் மேலிருந்து கீழாக, மற்றவரின் யோசிக்கும் உரிமையை, யோசிக்கும் தன்மையை மறுதலிக்கும், அவற்றை நசுக்கும் தன்மையான பாசிசம், எப்படி ஒரு தனி மனிதனின் அளவில் ஆரம்பித்து, மேலும் மேலும் வளர்ந்து ஒரு நிறுவன அளவிலும், இனத்தின் அளவிலும், ஒரு நாட்டின் அளவிலும், சர்வதேச அளவிலும் வியாபித்து உள்ளது என்பதைச் சுட்டிக்காட்ட எத்தனித்து உள்ளேன். எந்த ஒரு மனிதனும், ஏதாவது ஒரு நிலையிலுள்ள பாசிசத்தை தன் வாழ்க்கையில் எதில் கொள்ள வேண்டிய கட்டாயம் ஏற்படும் என்பதில் மறுப்பில்லை.

கருத்துக்கள் கருத்துக்களோடு மோதும் போது, சிறந்த கருத்துக்கள் வெல்ல வேண்டுமேயொழிய வலிமையனவர்களின் கருத்தோ, ஆயுத தாரிகளின் கருத்தோ வெல்ல வேண்டுமென்றில்லை. பிற்பகுதியின் கருத்துக்கள் மட்டுமே எடுத்துக்கொள்ளப்படும் என்றால், அடக்குமுறை அங்கே தொடக்கி விட்டது.