සංග්‍රාම භූමිය

ඝාතන සඳහා කෘත්‍රීම බුද්ධි තාක්ෂණය:හමාස් - ඊශ්‍රායෙල් ගැටුම

noreply@blogger.com (Unknown) — Sat, 16 Aug 2025 16:10:00 +0000

2023 ඔක්තෝම්බර් 7 වෙනිදා එල්ල වූ ප්‍රහාරය ගාසා තීරයේ ඉරණම තීන්දු කරන සිදුවීමක් බව දැන් පෙනෙන්නට තිබේ.ඔක්තෝම්බර් 7 ප්‍රහාරයෙන් පසුව ඊශ්‍රායල රෙජීමය සිය යුද මෙහෙයුම් සඳහා කෘත්‍රීම බුද්ධිය පුලුල් වශයෙන් භාවිතා කිරීම ආරම්භ කලා.දැන් තිබෙන තොරතුරු වලට අනුව කෘත්‍රීම බුද්ධි තාක්ෂණය පහත සඳහන් කාර්යයන් සඳහා සංකලනය කර තිබේ.

මුහුණු හදුනාගැනීමේ පද්ධතිවලින් ,තුවාල ලැබූ සටන්කරුවන් හදුනා ගැනීමට

පණිවුඩ හුවමාරුවල ශ්‍රව්‍ය විශ්ලේෂණය මගින් ඉලක්කවල භූ-පිහිටීම සොයා ගැනීමට

පණිවුඩ සහ සමාජ මාධ්‍යවල භාවිතාව අධීක්ෂණය කිරීමේදී අරාබි ස්වාභාවික භාෂා සැකසුමට(අරාබි භාෂාව යනු,ලොව වැඩිම පිරිසක් භාවිතා කරන නැගෙනහිර ආසියානු භාෂා හැරුණු පසු කෘත්‍රීම බුද්ධියට අසීරුතම භාෂාවලින් එකකි.මෙහිදී අසීරුතම යන්නෙන් අදහස් කලේ භාෂාව තේරුම් ගැනීම,විග්‍රහ කිරීම,හැසිරවීම ආදියයි.සරලව කිවහොත් අරාබි භාෂාව පරිවර්තනය කිරීම.)

හමාස් සංවිධානයේ අණදන නිලධාරීන් සැලසුම් සහගතව ඝාතනය කිරීමට සහ ඔක්තෝම්බර් 7 ප්‍රහාරයේදී අල්ලාගත් ප්‍රාණඇපකරුවෝ මුදාගැනීමට ඉහත කී තාක්ෂණයන් භාවිතා කර තිබේ.

1200කට වැඩි පිරිසකට මරුකැදවමින් සහ 250ක් පමණ පිරිසක් ප්‍රාණ ඇපකරුවන් බවට පත් කරමින් ඊශ්‍රායල භූමියට එල්ල වූ ඔක්තෝම්බර් 7 ප්‍රහාරයෙන් පසුව කෘත්‍රීම බුද්ධි තාක්ෂණයන් ක්ෂේත්‍ර භාවිතය සඳහා සීග්‍ර අනුමැතිය ලැබුණු බව ඊශ්‍රායල බලධාරීන් සිව්දෙනෙක් ප්‍රකාශ කර තිබේ.ඔවුන් සඳහන් කරන පරිදි,මේ ප්‍රහාරය නිසා ඊශ්‍රායල හමුදාවේ යුනිට් 8200 මගින් "ස්ටූඩියෝ" යන නමින් වෙනම කණ්ඩායමක් නිර්මාණය කලා.එය නිර්මාණය වන්නේ දැනට ඊශ්‍රායල හමුදාවේ ක්‍රියාකාරී සේවයේ නොමැති,සංචිතවල සිටින අයවලුන් මගින්ය.ඒ අතර ගූගල්,මෙටා,මයික්‍රෝෆොස්ට් වැනි ආයතනවල සේවය කරන අයවලුන්ද සිටින බව වාර්ථාවේ.කාණ්ඩායම පිහිටුවීමේ මුඛ්‍ය පරමාර්ථය වන්නේ කෘත්‍රීම බුද්ධි තාක්ෂණයෙන් සන්නද්ධ මෘදුකාංග නිර්මාණය කිරීමයි.මෙම මෘදුකාංග ඔස්සේ ඔවුන් ඉෂ්ඨ කරගන්නට බලාපොරොත්තු වන්නේ හමාස් ඇතුලු සතුරු කණ්ඩායම් අවේක්ෂණය සහ ඔවුන් සමග භූමියේ සටන් වදින සෙබලුන්ගේ සංග්‍රාමික හැකියාවන් වර්ධනය කිරීමයි.ඊශ්‍රායල හමුදාවේ යුනිට් 8200 එහි ක්‍රියාකාරීත්වය අතින්,ඇමෙරිකා එක්සත් ජනපදයේ ජාතික ආරක්ෂක කාර්යාංශයට සමානය.

ගෙවී ගිය මාස 18ක කාලය තුල ගාසා තීරයේ සටන් වලින් වැඩිම ජීවිත හානි සිදුවුනේ හමාස් සංවිධානය සහ ඔවුන්ගේ සිවිල් ප්‍රජාවටයි.ඊශ්‍රායල ප්‍රහාර හමුවේ මිය ගිය පිරිස් අතරින් හමාස් සංවිධානයේ සහ ඊට වක්‍රාකාරව සම්බන්ධ අයවලුන්ගේ මරණ 100%ක් සනාථ කර ගැනීමට තමන් සතු මුහුණු හදුනා ගැනීමේ මෘදුකාංග සමග කෘත්‍රීම බුද්ධ තාක්ෂණයන් ඒකාබද්ධ කිරීමට ඊශ්‍රායල රෙජීමය කටයුතු කර තිබේ.මින් පෙර තිබූ තාක්ෂණයන් සමග මුහුණු හදුනාගැනීමේ මෘදුකාංගවලට විනාශ වූ මුහුණුවල කොටස් හෝ තුවාල වූ මුහුණු සමග සැබෑ අනන්‍යතාවයන් ගැලපීමෙන් සාර්ථක ප්‍රතිඵල ලබා ගැනීමට පහසුවුනේ නැහැ.නමුත් කෘත්‍රිම බුද්ධ තාක්ෂණයන් මගින් වේගවත් ගැලපීම් සහ ප්‍රතිඵල ලබා ගත හැකිය.

ඔවුන් කෘත්‍රීම බුද්ධිය පාවිච්චි කර,ගුවන් ප්‍රහාර එල්ල කල හැකි ඉලක්ක ලැයිස්තු සකස් කර තිබේ.කෙටි පණිවුඩ,සමාජ මාධ්‍ය පෝස්ටු සහ අරාබි බසින් වන අනෙකුත් දත්ත පරිලෝකනය සහ විශ්ලේෂණය කල හැකි Chatbot බලගන්වන අරාබි භාෂාවේ කෘත්‍රීම බුද්ධි මොඩලයක්ද ඔවුන් විසින් සංවර්ධනය කර ඇත.Chatbot එකකට උදාහරණයක් ලෙස මේ වෙද්දී වඩාත් ජනප්‍රිය chatgpt ගත හැකිය.

ඔක්තෝම්බර් 7 ප්‍රහාරය සැලසුම් කල බවට චෝදනා ලබා ඇති,හමාස් සංවිධානයේ ජබාලියා මධ්‍යම බලසේනාවෙහි අණදෙන නිලධාරී ඊබ්‍රහීම් බියාරි ඝාතනය කිරීමේ ප්‍රයත්නය ඊශ්‍රායල රෙජීමය විසින් සිදු කරන්නේ 2023 වර්ෂයේ අග භාගයේදීය.ඊශ්‍රායල හමුදා බුද්ධි අංශ, බියාරි සහ අනෙක් හමාස් සාමාජිකයින් අතර පණිවුඩ හුවමාරු ග්‍රහණය කර ගැනීමට සමත් වුවත්,ඔහු ඒ වෙද්දී සිටි ස්ථානය තිතටම හොයා ගැනීමට අසමත් වූ බව සඳහන්.මේ නිසා ඔවුහු කෘත්‍රීම බුද්ධියෙන් බලගැන්වූ ශ්‍රව්‍ය මෘදුකාංගයක් වෙත යොමු වුනා.මේ මෘදුකාංගය මගින් සිදු කරන්නේ විවිධාකාර ශබ්ද විශ්ලේෂණය කිරීමයි.බොහෝවිට තත්ත්පර හෝ මිනිත්තු කිහිපයකින් ප්‍රතිඵල ලබා ගත හැකිය.සැලසුම් සහගත ඝාතන සඳහා මේ කාලය අතිශ්‍ය වැදගත්ය.ඊශ්‍රායල ප්‍රහාරක ජෙට් යානා ශබ්දයේ වේගයට ඉක්මවා යද්දී උත්පාදනය වන සොනික් දෝංකාර සහ ගුවන් ප්‍රහාර නිසා ජනිත වන ශබ්ද,මෙම මෘදුකාංගය මගින් විශ්ලේෂණය කරන ශබ්ද සඳහා උදාහරණ ලෙස ගත හැකිය.

සොනික් දෝංකාරය භාවිතා කර ඉලක්ක ගත පුද්ගලයාගේ පිහිටීම නිශ්චය කර ගත හැකි ක්‍රමයක් ඊශ්‍රායලය භාවිතා කරයි.මෙම ක්‍රියාවලිය ගැන දල අදහසක් පහත සටහනෙන් ලබා ගත හැකිය.

ඊබ්‍රහීම් බියාරි ගේ පණිවුඩ හුවමාරු සිදුවන ස්ථානය ආසන්න වශයෙන් හඳුනාගැනීමෙන් පසුව එම ප්‍රදේශයේ සිටින සිවිල් වැසියන්ට අනතුරු ඇඟවූ බව ඊශ්‍රායල හමුදාවේ බලධාරීන් පවසයි.මන්ද අදාල ප්‍රදේශය ජබාලියා සරණාගත කඳවුර ඇතුලත පිහිටා තිබීමත්,එහි තට්ටු ගොඩනැගිලි කිහිපයක් තිබීමත් නිසාය.බියාරිගේ මරණය සහතික කිරීමට නම් ගොඩනැගිලි කිහිපයක්ම ගුවන් ප්‍රහාර මගින් විනාශ කල යුතු බව ඔවුන් පවසා තිබේ.පසුව මෙහෙයුමට අනුමැතිය හිමි වූ අතර ඊශ්‍රායල හමුදාව එය ක්‍රියාවට නංවන ලදි.

එතැන් පටන් ඊශ්‍රායල හමුදා බුද්ධි අංශය ප්‍රාණඇපකරුවන් සොයා ගැනීමට මෙම ශ්‍රව්‍ය මෘදුකාංගය අනෙක් පසින් ගාසා තීරයේ භූගත උමං සංකීර්ණවල ඡායාරූප සහ සිතියම් සමග භාවිතා කිරීම ආරම්භ කලේය.ඊශ්‍රායල බලධාරීන් දෙදෙනෙකුට අනුව තනි තනි පුද්ගලයින් ඉහළ නිරවද්‍යතාවයකින් හඳුනාගැනීමට මෙම මෘදුකාංගය කාලයත් සමග වැඩිදියුණු කරන ලදි.

පුද්ගලයින්ගේ පිහිටීම ලුහුබැඳීම

මෙම වාර්තාවට පදනම් වූ ඊශ්‍රායල සහ ඇමෙරිකානු බලධාරීන් තිදෙනාට අනුව ,ඊශ්‍රායල නිලධාරීන් කෘත්‍රීම බුද්ධිය හා බැදුන නව යුදමය තාක්ෂණයක් සඳහා යොමුවන්නේ තම ඉලක්ක ලුහුබැදීම සඳහාය.මේ තාක්ෂණය දශකයකට පමණ පෙර සංවර්ධනය කල එකක් බවත් මෑතක් වන තුරු එය සංග්‍රාම භූමියේදී භාවිතා කර නොමැත.ඉහත කී මෘදුකාංගය වැඩිදියුණු කිරීමට නැවුම් පෙළඹවීමක් ලැබෙන්නේ ඝාතනය කල ඊබ්‍රහීම් බියාරි සොයා ගැනීමේ ප්‍රයත්නයෙන් අනතුරුවයි.මේ වෙද්දී යුනිටි 8200 ඒකකය සීඝ්‍රයෙන් කෘත්‍රීම බුද්ධිය ඔවුන්ගේ පද්ධතියට සංකලනය කරගනිමින් සිටියි.

බියාරිගේ දුරකතන සංවාදයට රහසිගතව ඇහුම්කන් දීමට හැකියාව ලබා ගැනීමත් සමගම ඒ වහාම,ඊශ්‍රායලය ඔවුන්ගේ කෘත්‍රීම බුද්ධිය මූලික කරගත් ශ්‍රව්‍ය මෘදුකාංගය පරීක්ෂා කිරීම ආරම්භ කෙරුවා.ඒ හරහා ඔවුන් බියාරිගේ පණිවුඩ හුවමාරුව සිදුවන පිහිටීම දළ වශයෙන් සොයා ගත්තා.මේ තොරතුර මත පදනම්ව ඊශ්‍රායල රෙජීමය,හඳුනාගත් ස්ථානය වෙත 2023 ඔක්තෝම්බර් 31දා ගුවන් ප්‍රහාරයක් එල්ල කිරීමට නියෝග කලා.එහි ප්‍රතිඵලයක් වශයෙන් ඊබ්‍රහීම් බියාරි මිය ගිය බව ඊශ්‍රායලය පවසනවා.

ඊශ්‍රායල හමුදාව විසින් නිකුත් කල ,ගුවන් ප්‍රහාර එල්ල කල ප්‍රදේශයේ ගුවන් ඡායාරූපයක්

එක්සත් රාජධානියේ ලන්ඩන් මූලික කරගත් Airwars නම් යුද ගැටුම් නිරීක්ෂණය කිරීමේ සංවිධානයේ වාර්තාවකට අනුව,මෙම ගුවන් ප්‍රහාරයෙන් සිවිල් වැසියන් 125කට වැඩි පිරිසක් මිය යන්නේ,කෘත්‍රීම බුද්ධි-උප්පාදිත පිහිටීමක ස්භාවය කියාපාමින්ය.ගාසා යුද්ධයේදී කෘත්‍රීම බුද්ධියේ මැදිහත්වීම සහිත යුදමය තාක්ෂණයන් පෙරනොවූ විරූ පරිමාණයකින් අත්හදා බැලීම සහ සීඝ්‍රයෙන් යෙදවීම සඳහා එක් උදාහරණයක් ලෙස මෙම ශ්‍රව්‍ය මෘදුකාංගය ගත හැකිය.

ඊබ්‍රහීම් බිහාරි ගැන ඊශ්‍රායල හමුදාව නිකුත් කල නිවේදනයක්

තිරය පිටුපස සමාගම් සහ සිවිල් වැසියන් සමූල ඝාතනවලට ප්‍රතිචාර

බොහොමයක් මෙම ප්‍රයත්නයන්ට හේතුවන්නේ දැනට සක්‍රීය සේවය නියුතු ,යුනිට් 8200 ඒකකයේ සෙබලුන් සහ සක්‍රීය සේවය නොමැති නමුත් ගූගල්,මක්‍රෝසොෆ්ට් සහ මෙටා වැනි සමාගම්වල සේවය කරන සංචිතවල සිටින අයවලුන් අතර සහයෝගීත්වයයි.මෙම වාර්තාව සඳහා තොරතුරු සැපයූ නිලධාරීන්ට අනුව යුනිට් 8200 ඒකකය මගින් "ස්ටූඩියෝ" නමින් වෙනම උප ඒකකයක්/කණ්ඩායම් නිර්මාණය කරන්නේ කෘත්‍රීම බුද්ධි ව්‍යාපෘති සඳහා විශේෂඥයෝ සම්බන්ධ කිරීමේ ස්ථානයක් සහ නවෝත්පාදන මධ්‍යස්ථානයක් වශයෙනි.මෙම ස්ටූඩියෝ සඳහා කලින් සඳහන් කල ප්‍රධාන පෙලේ සමාගම්වල සේවය කරන,හදිසි අවස්ථාවල හමුදාවට වාර්තා කල යුතු සංචිතවල සිටි අයවලුන් සම්බන්ධය.යුදමය අවශ්‍යතා සඳහා ගැලපෙන සේ කෘත්‍රීම බුද්ධි තාක්ෂණයන් සීඝ්‍රයෙන් යොදවා ගැනීම ස්ටූඩියෝ වෙහි මූලික පරමාර්ථය වේ.

හිටපු ඊශ්‍රායල ආරක්ෂක අමාත්‍ය යෝව් ගැලන්ට් යුනිට් 8200 හි සෙබලුන් හමුවූ අවස්ථාවක්

ඊශ්‍රායල රෙජීමය සීඝ්‍රයෙන් තම කෘත්‍රීම බුද්ධි අවි ගබඩාව සංවර්ධනය කරන අතරේ,මේ තාක්ෂණයන් සැබෑ ලෝකයේදී පාවිච්චි කිරීම හරහා වරදවා හඳුනා ගැනීම්,අයුතු අත් අඩංගුවට ගැනීම් සහ සිවිල් මරණ සිදුවීමට මග පාදා තිබේ.සැබෑ යුද ගැටුම්වලදී කෘත්‍රීම බුද්ධි මෙවලම් අත්හදා බැලීම අතින්,ඊශ්‍රායල රෙජීම තරම් වෙනත් කිසිදු රාජ්‍යයක් සක්‍රීය නොමැති බව ඇමෙරිකානු සහ යුරෝපියානු ආරක්ෂක බලධාරීන් පවසයි.අනාගත යුද්ධ සඳහා මෙවැනි තාක්ෂණයක් කෙසේ භාවිතා වේද යන්න මෙන්ම ඒවාහි සිදුවන දෝෂ නිසා හෝ වැරදි ලෙස භාවිතා කිරීම නිසා සිවිල් වැසියන් මිය යෑම ගැන මූලික අදහසක් ඊබ්‍රහීම් බිහාරිගේ සිදුවීම හරහා ලබා ගත හැකිය.

කෘත්‍රීම බුද්ධිය භාවිතයෙන් ගාසා යුද්ධයේදී ඝාතන සිදු කිරීම සම්බන්ධව අදහස් දැකීම මෙටා සහ මයික්‍රෝසොෆ්ට් සමාගම් විසින් ප්‍රතික්ෂේප කර ඇත.නමුත් එල්ලවන චෝදනාවලින් මිදීම සඳහා ගූගල් සමාගම මේ සම්බන්ධව සිය අදහස දක්වා තිබේ."ලෝකයේ විවිධ රටවල රෙජීම් හි සංචිත හමුදාවල අයවලුන් අප සමාගමේ සේවය කරති.ඔවුන් සංචිත සෙබලුන් ලෙස කරන කාර්යය අප සමාගමට අදාල නොවේ." -ගූගල් සමාගම

ඊශ්‍රායලයේ සමාගම්වලට ආයෝජකයින් සම්බන්ධ කරන,Startup Nation Central නම් ලාභ නොලබන සමාගමේ ප්‍රධාන විධායක නිලධාරි අවි හසන් පවසන පරිදි ගූගල්,මෙටා,මයික්‍රෝසොෆ්ට් සමාගම්වල සේවය කරන සංචිත හමුදාවලට අනුබද්ධ අයවලුන් ,ඩ්‍රෝන් සහ දත්ත සංකලනය යටතේ නවෝත්පාදන ඉදිරියට ගෙන යාමේදී වැදගත් කාර්යභාර්යක් ඉටු කරන ලදි.ඔක්තෝම්බර් 7 ප්‍රහාරයෙන් පසුව ඊශ්‍රායල හමුදාව ලොව පුරාව සිටින සංචිත හමුදාවල අයවලුන් ඊශ්‍රායලයට කැදවන ලදි.එලෙස කැඳවූ පිරිස ලක්ෂ තුනකට වැඩි බව වාර්තාවේ.එලෙස පැමිණි පිරිස අතර ඉහත කී සමාගම්වල සේවය කල තාක්ෂණික විශේෂඥයින්,ඉංජිනේරුවන් සිටියි.හමුදාවට ලබා ගත නොහැකි ප්‍රධාන තාක්ෂණයන්ට ප්‍රවේශ වීමේ හැකියාව මෙන්ම ඒවා සම්බන්ධ විශේෂිත දැනුම් සම්භාරයක් ඔවුන් ඊශ්‍රායලය වෙත පැමිණෙද්දී රැගෙන ආවා යැයිද හසන් මහතා පැවසුවා.

අවි හසන්

ඩ්‍රෝන් නිෂ්පාදන කර්මාන්තය තුල කෘත්‍රීම බුද්ධිය

යුක්‍රේන-රුසියා යුද්ධය සමග ඩ්‍රෝන් සඳහා කෘත්‍රීම බුද්ධිය යොදා ගැනීම සම්බන්ධව කතා බහක් ඇතිව තිබේ.තිබෙන තොරතුරුවලට අනුව ඊශ්‍රායලය දැනටමත් සිය ඩ්‍රෝන් යානා සඳහා මෙම තාක්ෂණය මුහුකර තිබේ.ඔක්තෝම්බර් 7 ප්‍රහාරයත් සමග නිර්මාණය වූ තත්ත්වය නිසාවෙන් සිය ඩ්‍රෝන් බල ඇණිය කෘත්‍රීම බුද්ධිය භාවිතා කල හැකි ලෙස වැඩිදියුණු කරන්නට ඊශ්‍රායල හමුදාවට හැකියාව ලැබිණි.ඊශ්‍රායල හමුදාව සමග සහයෝගයෙන් කටයුතු කරන මෘදුකාංග සහ ඩ්‍රෝන් සමාගමක් වන XTEND හි නිර්මාතෘ සහ ප්‍රධාන විධායක නිලධාරී වන අවිව් ෂපිරා මේ බව තහවුරු කරයි.දුර සිට ඉලක්ක අගුලු දැමීමට මෙන්ම ඒවා ලුහුබැද යා හැකි ඩ්‍රෝන් යානා සංවර්ධනයේදී කෘත්‍රීම බුද්ධිය මත පදනම් වූ ඇල්ගොරිතම් යොදාගන්න බව හෙතෙම පවසයි.ඔහුට අනුව අතීතයේදී,ඩ්‍රෝන් යානා ඉලක්ක සොයා ගියේ ලබාදී තිබෙන ඉලක්කයේ ඡායාරූපයක් පදනම් කරගෙනය.නමුත් දැන් කෘත්‍රීම බුද්ධියට වස්තුවක් තමන්ට හඳුනාගෙන ලුහුබැදීමේ හැකියාව පවතියි.ඉලක්කය ධාවනය වෙන රථයක් හෝ චලනය වන පුද්ගලයෙකු වුවත් කෘත්‍රීම බුද්ධියට ඉතා ඉහල නිරවද්‍යතාවයකින් හදුනා ගැනීම සහ ලුහුබැදීම සිදු කල හැකිය.

අවිව් ෂපිරා

මෙම නිලධාරියා පවසන පරිදි ඊශ්‍රයල රෙජීමයේ හමුදාව සහ ඇමෙරිකා එක්සත් ජනපදයේ ආරක්ෂක දෙපාර්තුමේන්තුව සිය සමාගමේ ප්‍රධානතම සේවාදායකයන් වේ.මේ දෙපාර්ශ්වයම කෘත්‍රීම බුද්ධිය යුද්ධයකදී භාවිතා කිරීම කොතරම් සදාචාරාත්මකද ,මෙම තාක්ෂණය වගකීම් සහගතව භාවිතා කිරීම ආදිය සම්බන්ධව සාකච්ඡා වල නිරත වෙමින් සිටිනවා යැයි අවිව් ෂපිරා පැවසුවද ජබාලියා සරණාගත කඳවුරේ සිදු කල සමූල ඝාතනවලින් පෙනී යන්නේ එවැනි කතා බහක් සැබැවින්ම ඔවුන් අතර නොමැති බවයි.

අරාබි භාෂාව :මහජන මතයට බලපෑම් කිරීමට සතුරාට සටන් බිමක්

ඊශ්‍රායල බලධාරීන්ට අනුව අරාබි භාෂා කෘත්‍රීම බුද්ධි මොඩලය,"ස්ටූඩියෝ" ඒකකය මගින් සංවර්ධනය කල මෘදුකාංග අතරින් තවත් එකකි.මෙය LLM එකකි(large language model).සරලව කිවහොත් අතිවිශාල දත්ත සමුදායන් මත පදනම්ව,මානව භාෂාවක් තේරුම් ගැනීමට,වචන/වාක්‍ය ජනනය කිරීමට හැකි සහ පුරෝකථනය කිරීමට පුහුණු කල කෘත්‍රීම බුද්ධි පද්ධතියකි.උදාහරණයක් ලෙස ChatGPT ඉංග්‍රීසි භාෂා මොඩලයකට ගත හැකිය.නූතන සම්මත අරාබි භාෂාව තේරුම් ගත හැකි මොඩලයක්/චැට්බොට් එකක් ලෙස Jais ගැනීමට පුළුවන්.

මෙවැනි භාෂා මොඩල සංවර්ධනය කරන අයට මින් පෙර තිබූ දුෂ්කරතාවයන් වූයේ මෙවැනි මොඩලයක් පුහුණු කිරීම සඳහා ප්‍රමාණවත් තරම් අරාබි බසින් වූ දත්ත නොමැති වීමයි.එවැනි දත්ත කට්ටල තිබුණත් ඒවායින් බහුතරය සම්මත ලිඛිත අරාබි භාෂාවෙන් විය.නමුත් සම්මත අරාබි භාෂාව අපිට දැක ගත හැකිවන්නේ ප්‍රවෘත්ති,සඟර,නිල ලේඛන ආදියේය.අරාබි භාෂාවේ 30කට අධික ප්‍රාදේශීය/කලාපීය ප්‍රදේභ දැක ගත හැකිය.මෙවැනි වෙනස් ප්‍රභේද වලින් පවසන දෙයක් තේරුම් ගැනීමේ හැකියාව නූතන සම්මත අරාබි භාෂාවේ දත්ත කට්ටල මත පුහුණු කල කෘත්‍රීම බුද්ධි භාෂා මොඩලයකට නොමැත.

ඊශ්‍රායල බලධාරීන්ට අනුව නම් ඔවුන්ගේ හමුදා ඉහත කී දුෂ්කරතාවලට මුහුණ දී නොමැත.අරාබි කතා ව්‍යවහාරයෙන් සමන්විත කෙටි පණිවුඩ,පටිගත කල දුරකතන සංවාද සහ සමාජ මාධ්‍ය සටහන් ඊශ්‍රායල රෙජීමය විසින් දශක ගණනාවක් තිස්සේ එකතු කරයි.මෙම දැවැන්ත දත්ත සමුදායට ප්‍රවේශ වීමට ලැබීමෙන් ඉහත කී දුෂ්කරතාවයන් මග හැරී ගොස් තිබේ.මෙහි ප්‍රතිඵලයක් වශයෙන්,ඔක්තෝම්බර් 7 ප්‍රහාරයෙන් පසුව ආරම්භ වූ ගාසා යුද්ධයේ පලමු මාස කිහිපය ඇතුලත LLM එකක් සහ අරාබි බසින් වූ විමසුම් හැසිරවිය හැකි චැට්බොට් එකක් සංවර්ධනය කරන්නට ස්ටූඩියෝ නම් ඒකකයට හැකිවෙනවා.ඔවුන් මෙම මෙවලම මල්ටිමීඩියා දත්ත සමුදායන් සමග සංකලනය කිරීමෙන් ඡායාරූප සහ වීඩියෝ මත පදනම්ව සංකීර්ණ සෙවීම් සිදු කිරීමේ හැකියාව විශ්ලේෂකයන්ට ලබා දෙනවා.

ඊබ්‍රහීම් බිහාරි සිටියේ යැ‍යි කියන ප්‍රදේශයට එල්ල වූ ගුවන් ප්‍රහාරයෙන් පසුව

2024 සැප්තැම්බර් මාසයේදී ඊශ්‍රායල රෙජිමය විසින් සයිද් හසන් නසරල්ලා ඝාතනය කිරීමෙන් පසුව,අරාබි කතා කරන ලෝකය තුල ඔහුගේ මරණයට ලැබුණු ප්‍රතිචාර විශේලේෂණය කිරීම සඳහා ඉහත කී චැට්බොට් එක භාවිතා කර තිබේ.ලෙබනනය තුල අරාබි භාෂාවේ විවිධ ප්‍රභේද වෙන් කර හඳුනාගෙන මහජන මතයට ප්‍රවේශ වීමට මෙන්ම හිස්බුල්ලා නායකයාගේ ඝාතනයට පළිගැනීමක් වශයෙන් ප්‍රහාරයක් එල්ල කල යුතු යැ‍යි මහජන මතයෙන් පීඩනයක් එල්ල වේද යන්න නිශ්චය කර ගැනීමට මේ අලුත් තාක්ෂණය ඊශ්‍රායල රෙජීමයට සහාය විය.

වාර්තා වන අන්දමට,මේ කියන සමයේදී එම චැට්බොට් එකට ,කෙලින්ම ඉංග්‍රීසි භාෂාවෙන් අරාබියට අක්ෂර පරිවර්තනයෙන් පමණක් ලියූ සමහරක් නූතන අවවහර වාක්‍යාංශ සහ වචන හඳුනාගැනීමේ හැකියාව නොතිබිණි.එක් බලධාරියෙක් කියා තිබුණේ මේ ගැටලුවේදී ඒ ඒ භාෂා ප්‍රභේදයට විශේෂිත බුද්ධි නිලධාරියෙක් ලවා චැට්බොට් එක සපයන ප්‍රතිඵල පුනරීක්ෂණය කිරීම සහ නිරවද්‍ය කිරීම සිදු කල බවයි.

චැට්බොට් එක අතරින් පතර සාවද්‍ය ප්‍රතිඵල ලබාදුන්නා.උදාහරණයක් ලෙස,අවියක ඡායාරූපයක් ලබා දෙනවා වෙනුවට පයිප්පයක ඡායාරූපයක් ලබා දීම.ඒ කෙසේවුවත්,කෘත්‍රීම බුද්ධි මෙවලම හරහා පර්යේෂණ සහ විශ්ලේෂණ ක්‍රියාවලිය සැලකිය යුතු ලෙස වේගවත් කල බව ඔවුන් පවසනවා.

මුහුණු හඳුනා ගැනීම සහ පුද්ගල අනන්‍යකරණය

ඔක්තෝම්බර් 7 ප්‍රහාරයෙන් පසුව උතුරු සහ දකුණු ගාසා අතර තාවකාලික මුරකපොලු පිහිටුවන ලදි.මෙම ස්ථානවල ඔවුන් අධිභේදන ඡායාරූප ලබා ගත හැකි කැමරා ස්ථාපනය කල අතර ඒවා මගින් ලබාගත් පලස්තීන ජාතිකයන්ගේ ඡායාරූප,කෘත්‍රීම බුද්ධිය මත පදනම් වූ මුහුණු හඳුනාගැනීමේ වැඩසටහනක් වෙත යොමුකරන ලදි.රෙජීමයේ බුද්ධි නිලධාරීන් දෙදෙනෙකුගේ ප්‍රකාශවලට අනුව,සමහර අවස්ථාවලදී මේ පද්ධතියට මුහුණු ආවරණය කර ගත් පුද්ගලයන් හඳුනා ගැනීමට අපහසු වී තිබේ.මුහුණු හඳුනා ගැනීමේ පද්ධතිය වරද්දවා හඳුනා ගත් පලස්තීන ජාතිකයන් රදවා තබාගෙන ප්‍රශ්න කිරීමට මෙය හේතුවක් බවට පත් විය.

බටහිර ඉවුරේ ඊශ්‍රායලේ මුර අට්ටාලයක් සහ එහි සවි කර තිබෙන කැමරා - 2006 ජනවාරි මාසයේ ලබා ගත් ඡායාරූපයකි

බුද්ධි නිලධාරීන් විසින් එකතු කරගත් හමාස් සාමාජිකයන් සම්බන්ධ තොරතුරු සැකසුම සහ අනෙකුත් කටයුතු සඳහා ඊශ්‍රායලය කෘත්‍රීම බුද්ධිය භාවිතා කරයි.ගාසා යුද්ධය ආරම්භ වන්නට පෙර ,ඊශ්‍රායල රෙජිමය විසින් ලැවෙන්ඩර් යන නමින් හඳුන්වන කෘත්‍රීම බුද්ධිය මත පදනම් වූ වැඩසටහනක් සංවර්ධනය කරන ලදි.මෙම වැඩසටහන නිර්මාණය කර තිබෙන්නේ දත්ත සීඝ්‍රයෙන් වර්ග කර පහළ පෙළේ සටන්කාමීන් හඳුනා ගැනීමටයි.මේ කෘත්‍රීම බුද්ධි වැඩසටහන පුහුණු කර ඇත්තේ හමාස් සාමාජිකයන් යැයි තහවුරු කරගත් අයවලුන්ගෙන් සමන්විත දත්ත ගබඩාවක් මතය.ඒ දත්ත මත පදනම්ව හමාස් සංවිධානයට අනුබද්ධ විය හැකි වෙනත් පුද්ගලයන් ගැන පුරෝකථනයක් ලැවෙන්ඩර් වැඩසටහන මගින් ලබා ගත හැකිය.

පලස්තීන වැසියන්ගේ අනන්‍යතාවය පරීක්ෂා කරන ඊශ්‍රායෙල් සෙබලෙක්

වාර්තාවලට අනුව හමාස් සංවිධානය සමග මොනයම් හෝ විදියකින් සම්බන්ධ 37,000ක් පමණ පිරිසකගේ ලැයිස්තුවක් ඊශ්‍රායල හමුදාවට සම්පාදනය කර දෙන්නට ලැවෙන්ඩර් වැඩසටහන සහාය ලබා දී ඇත.මේ දක්වා ගාසා තීරය තුල පමණක් මරා දැමුණු පිරිස 60,000 ඉක්මවා යයි.කෘත්‍රීම බුද්ධිය ලබා දුන් ඝාතන ලැයිස්තුවත්,සැබෑ මරණ ගණනත් අතර සම්බන්ධය ඔබ සිතා ගන්නට හැකි යැ‍යි සිතමි.ඔව්,ඊශ්‍රායලය මේ යුද්ධයේදී ඉලක්ක සොයා ගැනීමේදී මුළුමනින්ම වාගේ කෘත්‍රීම බුද්ධිය මත පදනම් වූ වැඩසටහනක් මත යැපෙන බව පැවසීමට තවත් සාක්ෂි කිමටද.එනමුත් මෙවැනි වැඩසටහනක් සිදු කරන පුරෝකථන කිසිම දෝෂයක් රහිත ඒවා යැයි කිසිවෙක් පිලිගන්නේ නම්,ඔහු හෝ ඇය ChatGPT වැනි චැට්බොට් කෙනෙක් වත් භාවිතා කර නොමැති අයෙක් බවට සැකයක් නොමැත.

ලැවෙන්ඩර් හැරුණු කොට දැනට අනාවරණය වී තිබෙන ,ඊශ්‍රායලය සතු තවත් කෘත්‍රීම බුද්ධිය මගින් බලගැන්වෙන ඉලක්ක උත්පාදන පද්ධතියක් ලෙස ගාස්පල් යන්න හඳුන්වා දිය හැකිය.ලැවෙන්ඩර් මෙන් නොව මෙය නිර්මාණය කර තිබෙන්නේ ඉදිකිරීම්/ගොඩනැගිලි ඉලක්ක කිරීම සඳහාය.සරල කිවහොත් සතුරාගේ යුදමය ව්‍යුහයන්,අවි ගබඩා,අණදෙන මධ්‍යස්ථාන ආදිය පෙර නොවූ විරූ වේගයකින් විනාශ කිරීම සඳහාය.

Gospel vs Lavender

100% නිවැරදි පුරෝකථන ඉදිරිපත් නොකලද ඊශ්‍රායල රෙජීමය ගාසා යුද්ධය ආරම්භයේදී ඉලක්ක තෝරා ගැනීමට සහාය ලබා ගත්තේ කෘත්‍රීම බුද්ධිය මූලික කරගත් වැඩසටහනකින්ය.ගාසා තීරයේ සියලු ජනයා මෙලෙස සමූල ඝාතනය කලද ඊශ්‍රායල රෙජීමයට එරෙහි නැගී සිටිය හැකි රාජ්‍යයක් පෙනෙන මානයක නොමැත.මේ සිදුවීම් වලින් අනාගතය ගැන අතිශය නරක පෙර නිමිති මැවී පෙනෙයි.යම් හෙයකින් ලොව අනෙක් රටවල රෙජීමයන්ට මේ කෘත්‍රීම බුද්ධි වැඩසටහන් වෙත පිවිසීමට ඉඩ ලැබුණොත් තම තමන්ගේ විරුද්ධවාදීන් මර්දනය,තම රෙජීමයන්ට එරෙහිව පැන නගින විරෝධයන් ළදරු අවදියේම මර්ධනය කිරීම් පෙර නොවූ විරූ අයුරින් පහසු සහ වේගවත් වනු ඇතැයි මගේ අනුමානයයි.ඔබේ අදහස කුමක්ද?

ඊසානදිග සිරියාවට තවත් රුසියානු සෙබලුන් සහ යුදෝපකරණ

noreply@blogger.com (Unknown) — Sun, 17 Jan 2021 15:13:00 +0000

ඇමෙරිකානු ප්‍රොක්සි හමුදාවක් වන කුර්දි ආධිපත්‍ය සහිත සිරියානු ප්‍රජාතන්ත්‍රික හමුදා සහ තුර්කි ප්‍රොක්සි හමුදා අතර ගැටුම් ඉහළ යද්දී ඊසානදිග සිරියාවේ යොදවා සිටින රුසියානු සෙබලුන් ප්‍රමාණය ඉහළ දමන්නට ක්‍රියා කරමින් සිටියි.වාර්තාවලට අනුව සෙබලුන් රැගත් ඉලියුෂන්-76 ප්‍රවාහන ගුවන් යානයක් කාමිෂ්ලි ගුවන් තොටුපොලට පැමිණ තිබේ.

කුර්දි ආධිපත්‍යයට නතු සිරියානු ප්‍රජාතන්ත්‍රික හමුදා දිගින් දිගටම ඩැමැස්කස් රජය සමග සමාදාන වීම ප්‍රතික්ෂේප කරයි.එමගින් ඊසානදිග සිරියාවේ ප්‍රධාන ප්‍රදේශවල සිරියානු හමුදාව ශක්තිය අඩු කරන්නට ඔවුන් උත්සාහ දරයි.ඒ වෙනුවට ඔවුන් කරන්නේ එක්සත් ජනපදය සමග එක්ව සිරියාවේ තෙල් සම්පත් කොල්ලා මුදල් ඉපැයීම සහ ඉස්ලාමීය රාජ්‍ය ත්‍රස්තවාදීන්ගෙන් මුදා ගත් අරාබි බහුතරය සහිත ප්‍රදේශ එක් කරගෙන ඇමෙරිකානු ආරක්ෂාව යටතේ කුර්දි ආධිපත්‍යය සහිත වෙනම රාජ්‍යයක් බිහි කිරීමට අසාර්ථක උත්සාහයක නිරත වීමයි.මෙහිදී තුර්කියෙන් එල්ල වන ප්‍රහාරවලින් කුර්දි පාර්ශ්වයට බේරා ගන්නට එක්සත් ජනපදය ඉදිරිපත් නොවේ.තුර්කියට අනුව සිරියානු ප්‍රජාතන්ත්‍රික හමුදා යනු ත්‍රස්තවාදී සංවිධානයක් වශයෙන් නම් කර තිබෙන කුර්දි කම්කරු පක්ෂයට සම්බන්ධ කොටසකි.ඊසානදිග සිරියාවේ කොටසක් තුර්කියට නතු වූයේද මේ හේතුව නිසාය.කෙසේහෝ රුසියාවේ සහ ඩැමැස්කස් රජයේ මැදිහත් වීම නිසා තුර්කි හමුදාවේ සහ ඔවුන්ගේ ප්‍රොක්සි හමුදාවල ගමන එම්4 මහා මාර්ගයෙන් මෙපිට නවතා ගන්නට සමත් විය.නමුත් සිරියානු ආණ්ඩුව,රුසියාව හරහා තුර්කිය සමග ඇති කර ගත් සටන් විරාමය උල්ලංඝනය කරන්නට සිරියානු ප්‍රජාතන්ත්‍රික හමුදා කටයුතු කරමින් සිටියි.

ඒ අතරතුර එම්4 මාර්ගයේ අයින් ඉසා සහ ටල් ටමර් යන නගර අතර සිවිල් ප්‍රවාහන කටයුතු සඳහා රුසියානු හමුදාව දිගටම ආරක්ෂාව සපයමින් සිටිති.මෙම රථ එවැනි ආරක්ෂාවක් රහිත ගමන් කල හොත් තුර්කි ප්‍රොක්සි හමුදා හෝ වෙනත් සන්නද්ධ කණ්ඩායම්වල ප්‍රහාරවලට ගොදුරු විය හැකිය.නැතිනම් ප්‍රවාහනය කරන භාණ්ඩ කොල්ලකෑමට ලක් වීමට ඉඩ තිබේ.

2021 වර්ෂය ආරම්භයේ සිට මේ දක්වා රුසියානු හමුදා පොලිසිය විසින් එම්4 මාර්ගය ඔස්සේ ගමන් කිරීමට රථ 1,500කට වැඩි ගණනකට සහ 3,500 වැඩි පිරිසකට ආරක්ෂාව සපයන ලදි.

සිරියාවේ බටහිර ප්‍රදේශයේ රුසියානු-තුර්කි හමුදා ඒකාබද්ධ මුර සංචාර තව දුරටත් සිදු කරමින් ඇත.මේ සඳහා තුර්කි සහ රුසියානු සන්නද්ධ රථ සහ රුසියානු හෙලිකොප්ටර් යානා සහභාගී වෙයි.

source:southfront.org

රුසියානු දැවැන්තයින් හය දෙනෙක් එකවර ගුවනට

noreply@blogger.com (Unknown) — Sun, 17 Jan 2021 08:08:00 +0000

රුසියානු ඉතිහාසයේ පළමු වතාවට ඇන්ටනොව්-124 "රස්ලන්" හමුදා ප්‍රවාහන ගුවන් යානා හයක් එකවර ගුවන් ගත කරන අවස්ථාවක් දැක්වෙන වීඩියෝ පටයක් එරට ආරක්ෂක අමාත්‍යාංශය ජනවාරි 16දා අන්තර්ජාලයට මුදා හැරියේය.මෙම ගුවන් ගමනේදී ඇන්ටනොව් යානා මීටර් 4000 උසකින් පියාසර කලේ පියාසැරි වේගය පැයට කිලෝමීටර් 500 ක සාමාන්‍යක රඳවා ගනිමින්ය.සම්පූර්ණ ගුවන් ගමන කි.මී.600කට වැ

මෙම පුහුණු ගුවන් ගමනේ අරමුණ වූයේ ඇන්ටනොව්-124 ප්‍රවාහන ගුවන් යානාවල තරුණ ගුවන් නියමුවන්ට සිය හැකියාවන් වැඩිදියුණු කර ගැනීමට අවස්ථාව ලබා දීම යැයි ආරක්ෂක අමාත්‍යාංශය පවසයි.

පුහුණු ගුවන් සැසිය සිදු කරන ලද්දේ ශීත කාලගුණය යටතේ හිම පතනය වෙමින් තිබියදීය.කෙසේවෙතත් සෝවියට් ගුවන් යානා නිර්මාණය කර තිබෙන්නේ ඕනෑම කටුක කාලගුණයක් යටතේ මෙහෙයුම් සිදු කිරීමට හැකි පරිදිය.

ඇන්ටනොව්-124 යානය බිහි වන්නේ මීට වසර තිහකටත් ඉහතදීය.නමුත් එය තවමත් ප්‍රවාහන ගුවන් යානා ක්ෂේත්‍රයේ හොඳ තරඟකරුවෙකි.රුසියාවේ සිට සිරියාවට එස්-300 මිසයිල පද්ධති ගෙන යෑම,පසුගිය දෙසැම්බරයේදී නගොර්නෝ-කරබැක් ප්‍රදේශයට රුසියානු සාම සාධක හමුදා ප්‍රවාහනය,ඇන්ටනොව්-124 යානා බල ඇණිය මෑත කාලයේදී සිදු කල මෙහෙයුම් අතර වේ.රස්ලන් යානය,උපායමාර්ගික ප්‍රවාහන ගුවන් යානයක් ලෙස හඳුන්වන්නේ එයට දෙන ලද වේලාවක සෙබලුන් 880ක් දක්වා ප්‍රවාහනය කිරීමට ඇති හැකියාව නිසාය.එක් ගුවන් යානයකට සම්පූර්ණ රෙජිමේන්තුවක්ම රැගෙන යා හැකි යැ‍යි පැවසේ.

රස්ලන් යානයක ප්‍රවාහන මැදිරියේ පරිමාව ඝන මීටර් එක්දහස් පනහකි.ඒ තුල මිල්-8 හෙලිකොප්ටර් යානා 5ක් හෝ සුකොයි-24 බෝම්බ හෙළන යානා දෙකක් ගබඩා කිරීමට ඉඩ තිබේ.මෙම යානයට උපරිමව ටොන් 120ක බරක් ගුවනට එසවිය හැකිය.

source:mil.ru

ඉරාන මිසයිල සහ ඩ්‍රෝන් යුද අභ්‍යාසයේ අවසන් අධියරය

noreply@blogger.com (Unknown) — Sun, 17 Jan 2021 05:35:00 +0000

ඉරාන ඉස්ලාමීය විප්ලවකාරී ආරක්ෂක හමුදාවේ පයම්බර්-ඊ අසාම් 15(උතුම් ශාස්තෘවරයා 15) යුද අභ්‍යාසයේ අවසන් අධියරය පසුගිය සෙනසුරාදා පැවැත් වුණු අතර එහිදී සතුරු නෞකා ඉලක්ක කරගෙන දිගු දුර බැලස්ටික් මිසයිල ප්‍රහාර එල්ල කලහ.

මෙම අධියරය සඳහා එරට සන්නද්ධ හමුදා මාණ්ඩලික ප්‍රධානී මේජර් ජෙනරල් මොහම්මඩ් බගෙරි,ඉරාන ඉස්ලාමීය විප්ලවකාරී ආරක්ෂක හමුදාවේ ප්‍රධාන අණදෙන නිලධාරී හොසෙයින් සලාමි,එම හමුදාවේ ගුවන් අංශයේ අණදෙන නිලධාරී බ්‍රිගේඩියර් ජෙනරල් අමිර් අලි හජිසඩෙ සහ තවත් උසස් හමුදා නිලධාරීන් කණ්ඩායමක් සහභාගී වී සිටියහ.

ඉලක්ක වෙත සාර්ථකව ප්‍රහාර එල්ල කිරීම සඳහා ඔවුන් සුල්ෆිකර්,සිල්සල් සහ ඩෙස්ෆුල් යන පන්තිවල බැලස්ටික් මිසයිල යොදා ගෙන තිබේ.

මෙම යුද අභ්‍යාසයේ පළමු අධියරය පවත්වන ලද්දේ ජනවාරි මස 15දාය.එහිදී අලුත් පරම්පරාවේ බැලස්ටික මිසයිලයක් අත්හදා බැලූ බව වාර්තාවේ.ඊට අමතරව ප්‍රහාරක,ඔත්තු බැලීමේ සහ මරාගෙන මැරෙන ඩ්‍රෝන් යානාද භාවිතා කලහ.

පහත දැක්වෙන්නේ මරාගෙන මැරෙන ඩ්‍රෝන් යානයක් ගුවන් ආරක්ෂක පද්ධතියක් විනාශ කරන අයුරුය.

ඉරාන ජෙනරල් හජිසඩෙ පවසන පරිදි කලින් අභ්‍යාසවලට වඩා මෙහිදී ඩ්‍රෝන් යානා සඳහා කෘත්‍රීම බුද්ධිය වැඩි වශයෙන් භාවිතා කර තිබේ.මෙහි දැකගන්නට ලැබෙන්නේ ෂහෙඩ්-161 ඩ්‍රෝන් යානා පෙළක් යුද අභ්‍යාසයේදී පියාසර කල අයුරුය.

ඉරාන බැලස්ටික් මිසයිල,සලකුණු කල ඉලක්ක මත නිවැරදිව පතිත වන ආකාරය පෙන්වන වීඩියෝ පටයක්

යුද අභ්‍යාසයේ අවසන් අධියරයේදී එමාඩ්,සෙජිල් සහ ගඩර් යන මැදි දුර බැලස්ටික් මිසයිල යොදාගෙන ඉන්දියානු සාගරයේ උතුරු කොටසේ මනඃකල්පිත සතුරු නෞකා ඉලක්ක කර ප්‍රහාර එල්ල කල අතර ඒවා ගමන් කල දුර කි.මී. 1800ක් යැ‍යි වාර්තාවේ.

එමාඩ් සහ ගඩර් මිසයිල දෙක පැරණි ෂහාබ්-3 මිසයිලයේ ව්‍යුත්පන්නයන්ය.ෂහාබ්-3 මිසයිලයක මෙහෙයුම් පරාසය කි.මී. 2,000කි.සෙජිල් මිසයිලවල සංස්කරණය අනුව මෙහෙයුම් පරාසය කි.මී. 2000-2500 අතර වේ.

යුද අභ්‍යාසයේදී සෙජිල්-2 ඝන ඉන්ධන,මැදි දුර බැලස්ටික් මිසයිල දියත් කිරීමක් සිදු කෙරිණි.එය නිර්මාණය කරන්නේ ෂහාබ් පවුලේ ද්‍රව ඉන්ධන බැලස්ටික් මිසයිල වෙනුවටය.සෙජිල් මිසයිලයක් ටොන් 23ක් පමණ බරය.

සෙජිල් බැලස්ටික් මිසයිල දියත් කිරීමක් - පයම්බර්-ඊ අසාම් 15 යුද අභ්‍යාසය,2021 ජනවාරි 15.

නාවික ඉලක්ක වෙත ජනවාරි 16දා එල්ල කල මෙම බැලස්ටික් මිසයිල ඉන්දීය සාගරයේ තිබූ වාණිජ නෞකාවකට සහ ඇමෙරිකානු ගුවන් යානා ප්‍රවාහන නෞකාවකට අනතුරුදායක සීමාවේ පතිත වූයේ යැ‍යි ඇමෙරිකානු ෆොක්ස් නිවුස් පුවත් සේවය වාර්තා කර තිබිණි.

එක් ඇමෙරිකානු නිලධාරියෙක් එම පුවත් සේවයට පවසා තිබූ පරිදි,අවම වශයෙන් එක් මිසයිලයක් වාණිජ නෞකාවකට කි.මී. 32ක් ඈතින් පතිත විය.ඔහු නෞකාව කුමක්දැයි සඳහන් නොකල අතර වැඩි දුර තොරතුරුද අනාවරණය නොකලේය.

තවත් ඉරාන මිසයිල දෙකක් යූ එස් එස් නිමිට්ස් ගුවන් යානා ප්‍රවාහන නෞකාවේ සිට කි.මී. 180ක් ඈතින් පතිත විය.

ඉරානය මට්ටු කිරීමට තවදුරටත් පර්සියානු බොක්ක ආශ්‍රිතව රැඳී සිටින්න යැයි මෙම යුද නෞකාව ප්‍රමුඛ නාවික ප්‍රහාරක කණ්ඩායමට ජනපති ට්‍රම්ප් නියෝග කර තිබේ.

ෆොක්ස් නිවුස් පුවත් සේවය පවසන පරිදි ඉරාන ඉස්ලාමීය විප්ලවකාරී ආරක්ෂක හමුදාව දියත් කල බැලස්ටික් මිසයිල වල ගමන් මග හඳුනා ගන්නට ඇමෙරිකානු ඔත්තු බැලීමේ චන්ද්‍රිකාවලට හැකියාව ලැබිණි.විශේෂඥයින් පවසන පරිදි එමාඩ්,සෙජිල් සහ ගඩර් යන ඉරාන මිසයිල නිර්මාණය කර තිබෙන්නේ ගොඩබිම් ඉලක්කවලට පහරදීම සඳහාය.නමුත් මෙවර ඔවුන් ඒවා නාවික ඉලක්ක වලට එරෙහිව භාවිතා කලහ.

source:southfront.org

ජෝ බයිඩන්ගේ දිවුරුම් දීමට සැරසෙන වොෂින්ටන් අගනුවර

noreply@blogger.com (Unknown) — Sat, 16 Jan 2021 17:15:00 +0000

ජෝ බයිඩන් එක්සත් ජනපදයේ ඊළඟ ජනපතිවරයා ලෙස දිවුරුම් දීමත් සමග ඇති විය හැකි විරෝධතා චණ්ඩ ලෙස මර්ධනය කිරීම සඳහා වොෂින්ටන් හි නව-ලිබරල් රෙජිමය සූදානම් වෙමින් සිටියි.

පසුගිය සතියේදී රිපබ්ලිකන් සහ ඩිමොක්‍රටික් ජාතික කමිටු මූලස්ථාන ආසන්නයේ තිබී පයිප්ප බෝම්බ හමුවීමත්, ජනවාරි 20දා ජෝ බයිඩන්ගේ දිවුරුම් දීමත් සමග සන්නද්ධ අන්තවාදීන් අගනුවර පහරදීමේ තර්ජනයක් මතු වීමත් නිසා ජාතික ආරක්ෂක බලකා ඒකක ඒ සඳහා සූදානම් වෙමින් සිටිති.

හමුවූ බව කියන පයිප්ප බෝම්බයක්

එක්සත් ජනපද මන්ත්‍රණ සභා ශාලා සංකීර්ණයේ ජාතික ආරක්ෂක බලකා සෙබලුන් විශාල ප්‍රමාණයක් රැදී සිටින ආකාරය දැක්වෙන ඡායාරූප සමාජ ජාල වෙබ් අඩවි තුල සංසරණය වේ.

මොවුන්ගෙන් වැඩි පිරිසක් එම්4 කැබින් රයිෆල් සහ කැරලිකරුවන්ට එරෙහිව භාවිතා කරන සන්නාහයන්ගෙන් සන්නද්ධය.

උද්ඝෝෂකයන් මන්ත්‍රණසභා ශාලා සංකීර්ණයෙන් ඈත් කර තැබීම සඳහා ආරක්ෂක වැටවල් ඉදි කරමින් තිබෙන අයුරු පහත වීඩියෝ පටයෙන් දැකගත හැකිය.

අගනුවර ජනාකීර්ණ කොටස් සහ මන්ත්‍රණ සභා ශාලා සංකිර්ණය වෙත දිවෙන මාර්ග අවහිර කරමින් හමුදාවේ ට්‍රක් රථ නවතා තිබෙන්නේ,ආරක්ෂාව වෙනුවෙන් දහස් ගණනක් සෙබලුන්ද යොදවා තිබියදීය.

බාධක යොදා මාර්ග අවහිර කර තිබෙන අයුරු

ඊට අමතරව තවත් සෙබලුන් බස් රථ මාර්ගයෙන් අගනුවර හෝටල් වලට රැගෙන එන අයුරුද දැකගත හැකිය.

දිවුරුම් දීම සිදු කෙරෙන ශාලා සංකීර්ණය ආශ්‍රිතව සිටින සෙබලුන් ගණන 3,000කට ආසන්නය.

වැඩබලන මෙට්‍රොපොලිටන් පොලිස් ප්‍රධානී රොබර්ට් කොන්ටී පවසන පරිදි ජාතික ආරක්ෂක බලකා මන්ත්‍රණ සභා ශාලා පරිශ්‍රය අවට ප්‍රදේශයේ සිය පිරිස් බලය 20,000 ටත් වඩා වැඩි කරනු ඇත.

ජාතික ආරක්ෂක බලකා රථවලින් රැගෙන එන රයිෆල් සහ පිස්තෝල සහිත ඇසුරුම් ඉවත් කරගන්නා අයුරු මෙම වීඩියෝ පටයේ දැකගත හැකිය.

මන්ත්‍රණ සභා ගර්භයේ සිටින සෙබලුන් එම්-4 රයිෆල් වලින් සන්නද්ධය.

තම අවි පසෙකින් තබා සභා ගර්භයේ නිදා සිටින සෙබලුන් අතරින් ගමන් කරන නීති සම්පාදකයෝ

මේ සිදුවීම් දාමයෙන් පැහැදිලි වන්නේ තේරී පත් වූ ජනපති ජෝ බයිඩන්ගේ ජනවාරි 20දා දිවුරුම් දීමේ උළෙල කොතරම් අවුල් ජාලයක් බවට පත් වේවිද කියාය.ඒ අතරතුර ඊළඟ සතියේදී සටන් වදින්නට සූදානම් වෙමින් ඇතැයි සැක කරන අන්තගාමී කෝලාහලකරුවන් සොයා අත් අඩංගුවට ගැනීම සඳහා ෆෙඩරල් විමර්ශන කාර්යාංශය කටයුතු කරමින් සිටින බවත් වාර්තාවේ.

southfront.org

නව ලිබරල්වාදීන්ගේ මැදිහත් වීම

noreply@blogger.com (Unknown) — Sat, 16 Jan 2021 07:35:00 +0000

තේරී පත් වූ ජෝ බයිඩන්ගේ පාලනතන්ත්‍රය තවමත් බලයට පිවිස නැතත් රජයේ ඉහළ තැන්වල සිටින එහි මිත්‍රයෝ,නව ලිබරල්වාදීන්ගේ සහ ගෝලීයවාදීන්ගේ වටිනාකම්වල සම්පූර්ණ ආධිපත්‍යයක නව ප්‍රවණතාවයට නොගැලපෙන ලාංඡනවලට එරෙහි සටනක් ආරම්භ කර තිබේ.

දැනට වැඩ බලන ජනපති ඩොනල්ඩ් ට්‍රම්ප් සහ ඔහුගේ ආධාරකරුවන්ගේ සමාජ ජාල ගිණුම් මෙන්ම එක්සත් ජනපද හමුදාව තුල ඇති "වැරදි මතවාදවල" මූලාශ්‍ර විමෝචනය කිරීම සිදුවෙමින් ඇත.

අහිතකර විය හැකි ප්‍රතිරූප මුලිනුපුටා දැමීම සඳහා සිය ඒකකවල ආදර්ශ පාඨයන්,අන්වර්ථ නාම,කාසි ආදී හඳුන්වාදීම් විමර්ශනය කරන්න යැයි එක්සත් ජනපද ගුවන් හමුදාවේ ප්‍රධානීන් නියෝග කලහ.

ඇමෙරිකානු දේශපාලනයේ සහ මාධ්‍යවල ආධිපත්‍යය දරන ගෝලීයවාදීන්,නව ලිබරල්වාදීන් සහ විවිධ සුළුතර කණ්ඩායම් වලට අහිතකර යැ‍යි විස්තර කරන ඉතිහාසික චරිත හා සංකේත ඉවත් කිරීම සහ ඇමෙරිකානු ඉතිහාසය නැවත ලිවීම යන ක්‍රියාවලියේ තවත් පියවරයක් වශයෙන් හමුදාවේ සංශෝධන සිදු කෙරේ.ඇමෙරිකානු සිවිල් යුද්ධයේ සටන් වැදුණු දකුණු ජනපදවල එකතුව සංකේතවත් කරන ප්‍රතිමූර්ථි ඇමෙරිකානු හමුදාවේ දේපල සහ නම්වලින් ඉවත් කිරීම ආරම්භ වන්නේ එහි එක් අධියරයක් වශයෙනි.

ගුවන් හමුදාව සහ නාවික හමුදාව ඇතුලු ඇමෙරිකානු සන්නද්ධ හමුදා නව ලිබරල් හමුදාවක් ලෙස පූර්ණ ප්‍රති සංවිධානයට තවත් ටික කාලයක් ගත වේවි.ප්‍රජාතන්ත්‍රවාදය සුරැකීමේ ව්‍යාපාරය යටතේ ඇමෙරිකානු පාලනතන්ත්‍රය පසුගිය වසරේදී ඔවුන්ගේ ප්‍රතිපත්තීන් සැපයුයේය.දැන් යුදමය මැදිහත්වීම් සහ ඇමෙරිකානු විදේශ ප්‍රතිපත්තිවල අනෙක් සක්‍රීය ක්‍රියාමාර්ග සාධාරණීකරණය කරන්නට සිදුවන්නේ පීඩකයන්ට එරෙහිව සටන් කිරීම සහ සුළුතරයන්ට මිත්‍රශීලී පරිසරයක් නිර්මාණය කිරීම යන හේතු ඉදිරිපත් කරමින්ය.

source:southfront.org

බෙලිකපන්නන්ගේ දිනපොත:ඉස්ලාමීය ත්‍රස්තවාදයට නතුවන අප්‍රිකාව

noreply@blogger.com (Unknown) — Fri, 15 Jan 2021 06:14:00 +0000

ජනවාරි මස 13දා මධ්‍යම අප්‍රිකානු ජනරජයේ කැරලිකරුවන් අගනුවර වන බන්ගුයි නගරයට ඒකාබද්ධ ප්‍රහාරයක් දියත් කලහ.එක්සත් ජාතීන්ගේ හමුදා ඔවුන්ගේ ප්‍රහාරය ව්‍යර්ථ කල බව වාර්තාවේ.

ජනපති ෆවුස්ටන් අර්චේන්ජ් ටුවඩේරා 2020 දෙසැම්බර් 27දා බලයට පත් වීමෙන් පසුව අගනගරය ආසන්නයට කැරලිකරුවන්ගේ ප්‍රහාරයක් එල්ල වූ ප්‍රථම වතාව මෙයයි.

ජනවාරි මස 13දා උදෑසන කාලේ මෙම ප්‍රහාරය ආරම්භ විය.බන්ගුයි නගරයේ සිට කි.මී. 9ක් සහ 12ක් දුරින් වූ ස්ථානවල හමුදා බ්‍රිගේඩ දෙකක් කැරලිකරුවන්ගේ ඉලක්කය වූ බව රට අභ්‍යන්තර කටයුතු අමාත්‍යවරයා පැසුවේය.

අගනුවරට දුරින් පිහිටා ඇති නගර වරින් වර කැරලිකරුවන්ගේ ප්‍රහාරවලට ලක් වන අතර එක්සත් ජාතීන්ගේ සාම සාධක හමුදා,මධ්‍යම අප්‍රිකානු හමුදාව සමග රුවන්ඩා,රුසියා සෙබලුන් මෙන්ම කුලී හේවයින් එක්ව එම ප්‍රහාර ව්‍යර්ථ කරයි.

බුර්කිනා ෆැසෝ රාජ්‍යයේ ඉස්ලාමීය ත්‍රස්ත ප්‍රහාර

බටහිර අප්‍රිකානු රාජ්‍යයක් වන බුර්කිනා ෆැසෝ හි උතුරු ප්‍රදේශයේ සිදුවු ත්‍රස්ත ප්‍රහාරයකින් අවම වශයෙන් හය දෙනෙක් වත් මිය යන්නට ඇතැයි ප්‍රංශයේ පුවත් සේවය ජනවාරි 5දා වාර්තා කලේය.

ජනවාරි 4දා ලුම්බිලා නම් ගම්මානයට කඩා වැදුණු සියයක් පමණ ත්‍රස්තවාදීන් කණ්ඩායමක් ගම්වාසීන් සමග සටන් වැදුණහ.ත්‍රස්තවාදියෝ වෛද්‍ය මධ්‍යස්ථානයකට සහ ගම්මානයේ වෙළඳපොලට පහර දුන්නෝය.ගම්මානයේ ස්ථාන කිහිපයක් ඔවුහු ගිනි තැබූහ.

මිය ගිය හයදෙනා ගෙන් දෙදෙනෙක් ඩිෆෙන්ස් ඔෆ් ද මදර්ලෑන්ඩ් නම් ජිහාඩ් විරෝධී බලකායේ සාමාජිකයන්ය.

මෝටර් සයිකල් කිහිපයක් සහ ආහාර සොරා ගැනීමෙන් පසුව ත්‍රස්තවාදීන් ගම්මානයෙන් ඉවත්ව ගිය බව වාර්තාවේ.

මොවුන් අල්කයිඩාවට සම්බන්ධ ජමා නුස්රාට් උල් -ඉස්ලාම් වා අල්-මුස්ලිමින් නම් ත්‍රස්තවාදී කණ්ඩායමට අයත් පිරිසක් යැයි විශ්වාස කෙරේ.මෙම කණ්ඩායම 2017 වර්ෂයේ පටන් උතුරු බුර්කිනා ෆැසෝ ප්‍රදේශයේ ක්‍රියාත්මකය.

මොවුන් මාලි,ඇල්ජීරියාව,ලිබියාව,මුරිටේනියාව,ටියුනීසියාව සහ චැඩ් යන රාජ්‍යයන්ගේ ක්‍රියාත්මකය.ජනවාරියේ මුල් සතියේදී මෙම ත්‍රස්තවාදීන් මාලි රාජ්‍යයේදී ප්‍රංශ සෙබලුන් තිදෙනෙක් මරා දැමීමට සම්බන්ධ යැ‍යි පැවසේ.

මේ දක්වා උතුරු බුර්කිනා ෆැසෝ හි ඉස්ලාමීය ත්‍රස්තවාදී කැරැල්ල හේතුවෙන් මිය ගිය ගණන 1,200ක් යැ‍යි වාර්තාවේ.උන්හිටි තැන් අහිමි වූ පිරිස මිලියනයක් පමණ වේ.මාලි රාජ්‍යය සමග දේශ සීමාවේ පාලනය බුර්කිනා ෆැසෝ රජය අතින් ගිලිහී ඇති බව පෙනෙන්නට තිබේ.

නයිජීරියානු හමුදාවට ඉස්ලාමීය රාජ්‍ය ත්‍රස්තවාදීන්ගෙන් ප්‍රබල ප්‍රහාරයක්

මෑතකදී ඊසානදිග නයිජිරියාවේ යොබේ පළාතේදී සිය කණ්ඩායම එල්ල කල ප්‍රහාරයකට අදාල ඡායාරූප පෙළක් ඉස්ලාමීය රාජ්‍ය ත්‍රස්තවාදීන් අමාක් පුවත් සේවය ඔස්සේ ජනවාරි 13දා ප්‍රසිද්ධ කලහ.

ප්‍රහාරය එල්ල වූයේ ජනවාරි 10දා ගුජ්බා නගරය ආසන්නයේ නයිජීරියානු සන්නද්ධ හමුදා රැඳී සිටි ස්ථානයක් ඉලක්ක කරගෙනය.ඉස්ලාමීය රාජ්‍ය ත්‍රස්තවාදීන්ගේ ප්‍රහාරයේ ප්‍රචණ්ඩත්වය හේතුවෙන් නයිජීරියානු සෙබලුන් පලා ගියහ.

අමාක් පුවත් සේවයට අනුව ප්‍රහාරයෙන් මිය ගිය සෙබලුන් ගණන 5කි.ත්‍රස්තවාදීන් එක පික් අප් රථයක් සිය භාරයට ගත් අතර නයිජීරියානු සෙබලුන් දමා ගිය තවත් පික් අප් රථ තුනක්,ට්‍රක් රථයක් සහ බුල්ඩෝසර් හතක් ගිනි තැබීමට ත්‍රස්තවාදීන් ක්‍රියා කලහ.

අනෙක් පසින් නයිජීරියානු හමුදාව පැවසුවේ ඔවුන් ප්‍රහාරය ව්‍යර්ථ කල බවයි.හමුදාවේ මාධ්‍ය ප්‍රකාශක බ්‍රිගේඩියර් ජෙනරල් බර්නා ඔන්යුකෝ සඳහන් කල පරිදි ප්‍රති ප්‍රහාර හමුවේ ඉස්ලාමීය රාජ්‍ය ත්‍රස්තවාදීහු 28 දෙනෙක් මරණයට පත්ව තිබේ.සටනේදී එක් සෙබලෙක් පමණක් අහිමි වූ බවද් හෙතෙම ප්‍රකාශ කලේය.

නයිජීරියානු හමුදාව සොයා ගත් ත්‍රස්තවාදීන්ගේ සුළු අවි සහ මැෂින් තුවක්කු

ත්‍රස්තවාදීන්ට අයත් රථයක් ප්‍රහාර වලින් ගිනි ගෙන දැවෙන අයුරු

මරාදමන ලද ත්‍රස්තවාදීන්ගේ මළ සිරුරු

බටහිර අප්‍රිකාවේ ඉස්ලාමීය රාජ්‍ය ත්‍රස්ත සංවිධාන ශාඛාව එරට බෝර්නෝ පළාත තුල සිය බලය ව්‍යාප්ත කර ගනිමින් සිටියි.එයට මායිම් වන යොබේ පළාත තුලද ත්‍රස්තවාදී කණ්ඩායම මුල් විහිදුවීමට මත්තෙන් ක්‍රියාමාර්ගයක් ගැනීමට නයිජීරියානු ආරක්ෂක අංශ ක්‍රියා කල යුතුව ඇත.

source:southfront.org

ඉරාන නාවික යුද අභ්‍යාසයේ ඔත්තු බලන්නට පැමිණි ඇමෙරිකානු න්‍යෂ්ඨික සබ්මැරීනය

noreply@blogger.com (Unknown) — Fri, 15 Jan 2021 03:59:00 +0000

ජනවාරි මස 13දා ආරම්භ වූ ඉරානයේ "එග්ටෙඩාර්" - ශක්තිය නම් නාවික යුද අභ්‍යාසය 13 සහ 14 යන දෙදින තුල මක්‍රන් වෙළරාශ්‍රිතව සහ ඉන්දීය සාගරයේ උතුරු කොටසේ පැවැත්විණි.

අභ්‍යාසයේදී කෲස් මිසයිල ප්‍රහාර එල්ල කිරීම,දේශීයව නිෂ්පාදිත සබ්මැරීනවලින් ටෝර්පිඩෝ ප්‍රහාර එල්ල කිරීම,විශේෂ මෙහෙයුම් ඒකකවල පුහුණු වීම්,ඩ්‍රෝන් සහ ඉලෙක්ට්‍රොනික් සංග්‍රාමික මෙහෙයුම් සිදු කලේය.

මෙහිදී විවිධ වර්ගවල දිගු දුර කෲස් මිසයිල අත්හදා බැලූ බව වාර්තාවේ.ෆටෙහ් නමින් හඳුන්වන ඉරාන සබ්මැරීන පන්තියේ සබ්මැරීනයක්ද ඊට සහභාගී විය.එම සබ්මැරීනය සිය පළමු ටෝර්පිඩෝ ප්‍රහාරය එල්ල කලේද මෙම නාවික යුද අභ්‍යාසයේදීය.ටෝර්පිඩෝ ප්‍රහාරය සාර්ථකව ඉලක්කය වෙත ලඟා වූ බව සඳහන්ය.

මෙම යුද අභ්‍යාසයේ සුවිශේෂී සිදුවීම වාර්තා වන්නේ ජනවාරි 14දාය.අභ්‍යාසය පැවැත්වෙමින් තිබූ මුහුදු ප්‍රදේශයට සබ්මැරීනයක් ළඟාවන අයුරු ඉරාන නාවික හමුදාවේ ඇස ගැටිණි.අන්තර්ජාලයට මුදා හැර තිබූ වීඩියෝපටයක දැක්වෙන පරිදි,ඉරාන නාවික හමුදාවේ SH-3 සී කින්ග් වර්ගයේ ප්‍රති-සබ්මැරීන හෙලිකොප්ටර් යානයක් සතුරු සබ්මැරීනය හඹා යයි.

වීඩියෝ පටයේ සබ්මැරීනය, ඇමෙරිකානු යු එස් එස් ජෝර්ජියා සබ්මැරීනය සමග සංසන්දනය

මෙම සබ්මැරීනය ඔහායෝ පන්තියට අයත් යූ එස් එස් ජෝර්ජියා නම් න්‍යෂ්ඨික,නියාමක මිසයිල සබ්මැරීනය යැයි විශේෂඥයෝ පවසති.එක්සත් ජනපදය යූ එස් එස් ජෝර්ජියා සබ්මැරීනය පර්සියානු බොක්කට එවන ලද්දේ 2020 වසරේ දෙසැම්බර් මාසයේදීය.

මෙම යුද අභ්‍යාසය භාරව සිටි රියර් අද්මිරාල් හම්සේ අලි කවියනි පැවසුවේ දෙදින නාවික අභ්‍යාසයේදී භාවිතා කරන සමහරක් අවි සහ පද්ධතීන් රහසිගත ඒවා බවයි.එක්සත් ජනපදය යුද අභ්‍යාසයේ ඔත්තු බැලීමට උත්සාහ දරන්නට ඇත්තේ මේ නිසා යැ‍යි විශ්වාස කල හැකිය.

source:southfront.org

බෙලිකපන්නන්ගේ දිනපොත:මෝටර් සයිකලයේ පැමිණි මරුවා

noreply@blogger.com (Unknown) — Thu, 14 Jan 2021 06:35:00 +0000

මර උගුල් නිර්මාණය කිරීම අතින් ඉස්ලාමීය රාජ්‍ය ත්‍රස්ත සංවිධානය ඉහළින් සිටින බව අවස්ථා ගණනාවකදී පෙන්වා දී තිබේ.කිසිවෙක් නොසිතන තැනක ඔවුන්ගේ මර උගුලක් තිබිය හැකිය.මෙහි දැක්වෙන්නේ 2020 වර්ෂයේදී ඉරාකය සිදු වූ සිදුවීමකි.

2020 අගෝස්තු මාසයේදී මෙම සිදුවීම වාර්තා වූ අතර මර උගුල අටවා තිබුණේ අතහැර දමා ගිය මෝටර් සයිකලයකයි.ඉරාක සෙබලුන් එරට අන්බාර් පළාතේ සෝදිසි මෙහෙයුමක් සිදු කරමින් සිටියදී ,ඔවුන්ට මෝටර් සයිකලයක් හමුවේ.

නමුත් එහි තම මරුවා සැඟව සිටින බව නොදන්නා එක් සෙබලෙක් එය පණගන්වන්නට උත්සාහ කරයි.මෙම සිදුවීම ඉස්ලාමීය රාජ්‍ය ත්‍රස්තවාදීන් විසින් පටිගත කරන්නට ඇතැයි විශ්වාස කල හැකිය.සෙබලුන් සිව්දෙනෙක් එම ස්ථානයේ රැදී සිටිති.ඔවුන්ගෙන් එක් අයෙක් මෝටර් සයිකලය නැගිට්ටුවා,තම සමග එහි ඡායාරූපයක් ද ලබා ගන්නේ සහෝදර සෙබලෙකු මාර්ගයෙනි.ඉන්පසු ඒ දෙදෙනා මෝටර් සයිකලයට නැගී එය පණ ගන්වනවාත් සමග පිපිරීමක් සිදුවේ.

පිපිරීමෙන් මියගිය සෙබලා(මැද)

පසුව වාර්තා වූ පරිදි පිපිරීමෙන් අලි ගානිමි නම් සෙබලා මෙහිදී ජීවිතක්ෂයට පත් ව ඇත.ඔහු සමග සිටි අනෙක් සෙබලා බරපතල තුවාල ලබන්නට ඇතැයි විශ්වාස කල හැකිය.

source:R&U videos@youtube

අලුත් යුද්ධයකට මගක් සෙවීම:අල්කයිඩාවේ නව මව් කඳවුර ඉරානයයි

noreply@blogger.com (Unknown) — Thu, 14 Jan 2021 05:54:00 +0000

ඊශ්‍රායලයෙන් ලැබෙන ආදරය අඩුවෙමින් තිබියදීත්,බලය අත්හැරීමට සිටින ජනපති ඩොනල්ඩ් ට්‍රම්ප්ගේ පාලනතන්ත්‍රය,අවසන් මොහොතේත් ටෙල් අවිව් හි ඇලුම්කම් වෙනුවෙන් ඇමෙරිකානු රුධිරය හෙළිය හැකි සෑම දෙයක්ම දිගටම කරගෙන යන බව පෙනේ.

තවමත් ආරක්ෂක ලේකම් ධූරයේ සිටින මයික් පොම්පේයෝ ජනවාරි 12දා චෝදනා කලේ,ඉරානය ඇෆ්ගනිස්තානයටත් වඩා නරක ලෙස අල්කයිඩාවේ අලුත් මවු කඳවුර බවට පත්ව ඇතැයි කියමින්ය.ගිය වර්ෂයේ ටෙහෙරාන් නගරයේදී අල්කයිඩාවේ දෙවැනියා ඝාතනය කිරීමේ පුවතට සහාය දක්වමින් ඔහු අදහස් දැක්වුවද,එම ඝාතනය ඊශ්‍රායලයේ වැඩක් යැයි පැවසුවේ නැත.

"අල්කයිඩාවට අලුත් මවු කඳවුරක් ඇත.එය ඉරාන ඉස්ලාමීය ජනරජයයි.අල්කයිඩාවට ප්‍රධාන භූගෝලීය කේන්ද්‍රස්ථානයක් ලෙස ඉරානය සැබවින්ම නව ඇෆ්ගනිස්තානයයි.නමුත් එය හුඟක් නරකයි

අල්කයිඩාව කඳුකරයන්හි සැඟව සිටි ඇෆ්ගනිස්තානය මෙන් නොව,අද අල්කයිඩාව ක්‍රියාත්මක වන්නේ ඉරාන රෙජිමයේ ආරක්ෂාව නම් දැඩි කවචය ඇතුලත සිටයි."

- මයික් පොම්පේයෝ

ලොව පුරා නපුර සඳහා වූ බලවේගයට එරෙහිව තවත් ජාත්‍යන්තර පීඩනය අවශ්‍ය යැ‍යි පොම්පේයෝ අවධාරණය කලේය්.ඒ රට තුල පැලපදියම් වී සිටින මේ කණ්ඩායමට එරෙහිව එක්සත් ජනපදයට ගත හැකි පියවර අල්පයක් යැයිද හෙතෙම පැවසුවේය.

ඒ අතරතුර ෆේස්බුක් සමාගම,ඉරාන රජයේ ප්‍රෙස් ටීවී නම් පුවත් සේවයේ ෆේස්බුක් ගිණුම අවහිර කරන්නට කටයුතු කලේය.නමුත් එම පුවත් සේවයේ අභියාචනයකින් පසුව නැවතත් ගිණුම සක්‍රීය කර දෙන්නට සමාගම පසුව පියවර ගෙන තිබිණි.ඊළඟට පත්වන ඇමෙරිකානු රජය ට්‍රම්ප්ගේ ඉරාන විරෝධය ඉදිරියට ගෙන ගියහොත් මෙවැනි වාරණය කිරීම් රැසකට මුහුණ දීමට ඉරාන මාධ්‍යවලට සිදුවේවි.කෙසේවෙතත්,ප්‍රධාන පෙළේ තොරතුරු තාක්ෂණික දැවැන්තයන් ට්‍රම්ප් සහ ඔහුගේ ආධාරකරුවන්ට,ඉරානයට වඩා වෛර කරන බව මෑත කාලයේදී දැකගන්නට ලැබිණි.

සෞදි ආක්‍රමණයට එරෙහිව යේමනයේ සටන් වදින ඉරානයේ සහාය හිමි අන්සාර් අල්ලාහ් ව්‍යාපාරය (හවුති),ත්‍රස්තවාදී සංවිධානයක් ලෙස නම් කිරීම සහ එක්සත් ජනපදයේ සහ ඊශ්‍රායලයේ අනෙකුත් ආක්‍රමණශීලී ක්‍රියාමාර්ග(ඉරානයේ ප්‍රධාන පෙළේ න්‍යෂ්ඨික විද්‍යාඥයින් ඝාතනය ආදිය),ඉරානය සහ අල්කයිඩාව අතර සම්බන්ධය යනාදිය ට්‍රම්ප් පරිපාලනයේ ප්‍රතිපත්තියෙහි ප්‍රයෝගික පියවරයන් ලෙස හැඳින්විය හැකිය.ඉරානයට එරෙහි සිය ආක්‍රමණශීලී ප්‍රවේශය සාධාරණීකරණයට ධවල මන්දිරය කල හැකි සියලු දේ කරයි.

ෂියා මුස්ලිම් රාජ්‍යයක් වන ඉරානය,මතවාදීව අල්කයිඩාවට සහ ඉස්ලාමීය රාජ්‍ය ත්‍රස්ත සංවිධානයට විරුද්ධය.ඉරාන හමුදා මෙම ත්‍රස්ත සංවිධානවලට එරෙහිව සිරියාවේ සහ ඉරාකයේ සටන් වදින්නේ,එක්සත් ජනපදය සහ ඉස්ලාමීය රාජ්‍ය ත්‍රස්ත සංවිධානයට එරෙහි ජාත්‍යන්තර සන්ධානය තම මෙහෙයුම් ආරම්භ කිරීමටත් පෙර සිටය.මේ සටනේදී,එක්සත් ජනපදය සහ එහි මිත්‍රයන්ගේ සෘජු සහාය හිමි වූ ත්‍රස්තවාදීන්ට එරෙහිව ඉරාන සහ ඉරාන ප්‍රොක්සි හමුදා සටන් වැදී සිටිති.සිරියාවේ සහ ඉරාකයේ ත්‍රස්තවාදී රාජ්‍යයක් පිහිටුවීමේ අල්කයිඩා සහ ඉස්ලාමීය රාජ්‍ය ත්‍රස්තවාදී සංවිධානවල බලාපොරොත්තු බිඳ වැටී වසර ගණනකට පසුවත් වොෂින්ටනය තවමත් අවධාරණය කරන්නේ,ඉරාන හමුදා "විපක්ෂයට එරෙහි කුරිරු යුද්ධයේදී" ඉරාන හමුදාව අසාද් පාලන තන්ත්‍රයට සහාය දුන් බවයි.සිරියාවේ සිටින මෙම විපක්ෂයේ බහුතරය හුදෙක් අල්කයිඩාවට සම්බන්ධ ත්‍රස්තවාදීන්ගෙන් සැදුම්ලත් එකක්ය යන කාරණය අද දක්වාම ධවල මන්දිරය විසින් ප්‍රතික්ෂේප කරයි.

1.2020 ජූනි 26දා පාර්චින් හි අවි ගබඩාවක පිපිරීමක් සිදු විය.

2. ජූනි මස 30දා මධ්‍යම ටෙහෙරාන් හි වෛද්‍ය සායනයක පිපිරීමකින් 19 දෙනෙක් මිය ගියහ.ඉරාන මාධ්‍යවලට අනුව එය ගෑස් කාන්දුවකි.

3.2020 ජූලි 2දා නටාන්ස් න්‍යෂ්ඨික ඉන්ධන බලගැන්වීමේ මධ්‍යස්ථානයේ ගින්නක් ඇති විය.

4.2020 ජූලි 3දා ෂිරාස් නගරයේ ගින්නක් ඇති විය.දින කිහිපයකට පෙර නගරයේ විදුලිය බිද වැටිණි.

5.2020 ජූලි 4දා අවාස් නගරයේ විදුලි බලාගාරයක ගින්නක් ඇති විය.

6.2020 ජූලි 7දා ටෙහෙරාන් ආසනන්යේ බකේෂාර් නගරයේ සෙපහාන් බොරෙෂ් කර්මාන්තශාලාවේ පිපිරීමකින් දෙදෙනෙක් මිය ගොස් තිදෙනෙක් තුවාල ලැබූහ

2021 ජනවාරි 12 දා ඇමෙරිකානු ගුවන් යානා ප්‍රවාහන නෞකා ප්‍රහාරක කණ්ඩායම්වල පිහිටීම

එසේ වුවත්,ඉරානයට එරෙහි සිය යුදමය සහ ආර්ථික ආක්‍රමණශීලීත්වය සාධාරණීකරණයට ට්‍රම්ප් පරිපාලනය බොරු හේතු සෙවීම මේ කිසිවකින් වැළැක්විය නොහැකිය.

source:southfront.org

ට්‍රම්ප්-නෙතන්යාහු ආදර කතාව නිම වෙයි

noreply@blogger.com (Unknown) — Wed, 13 Jan 2021 17:12:00 +0000

ඉතිහාසය තුල ඊශ්‍රායලයට වැඩිම පක්ෂපාතීත්වය දැක්වූ ඇමෙරිකානු ජනාධිපතිවරයා තමන් යැයි වරක් ඩොනල්ඩ් ට්‍රම්ප් විසින්ම ප්‍රකාශ කලේය.ධවල මන්දිරයේ මෙතෙක් කාලයකට සිටි ඊශ්‍රායලයේ හොඳම මිතුරා වන්නේ ට්‍රම්ප්ය යනුවෙන් ඊශ්‍රායල අගමැති බෙන්ජමින් නෙතන්යාහු ගිය වසරේදී පවසා තිබිණි.බොහොමයක් ඊශ්‍රායල නායකයෝ මෙන්ම එරට පුරවැසියන්ද,ට්‍රම්ප් දෙවන වර පත් වෙනවා දැකීමට කැමැත්තෙන් පසුවූහ.

නමුත් අවාසනාවට ඔහුට දැන් ධවල මන්දිරයෙන් පිටව යෑමට කාලය එළඹ තිබේ.ඊට සමගාමීව ඊශ්‍රායල අගමැති බෙන්ජමින් නෙතන්යාහුද සිය ට්විටර් ගිණුමේ තිබූ ට්‍රම්ප්ගේ ඡායාරූපයද ඉවත් කරගෙන ඇත්තේ,බලය හුවමාරුව සම්බන්ධව එක්සත් ජනපදය තුල ගැටුම්කාරී තත්ත්වයක් මතුව තිබියදීය.

2009 වර්ෂයේ පටන් ඊශ්‍රායලයේ නායකත්වය හොබවන නෙතන්යාහුටද අලුතෙන් පත්වන ඇමෙරිකානු ජනපතිවරයා සමග කටයුතු කරන්නට සිදුවේ.ඊශ්‍රායලයේ පැවැත්ම වෙනුවෙන් එක්සත් ජනපදය සමග යහපත් සබදතාවයක් තබා ගැනීම අතිශය වැදගත් වේ.

දෙරට අතර තිබෙන්නේ සුවිශේෂී සබදතාවයකි.එක්සත් ජනපදය,ඊශ්‍රායලයේ හොඳම මිත්‍රයා වන මුත් ඇමෙරිකානු ඉතිහාසය තුල සිටි සෑම ජනාධිපතිවරයාම ඊශ්‍රායලය පක්ෂපාතී හෝ එරට සමග මිත්‍රශීලී අය නොවූහ.රොනල්ඩ් රේගන්,බිල් ක්ලින්ටන් සහ ඩොනල්ඩ් ට්‍රම්ප් ආදී ඊශ්‍රායලයට වඩාත්ම පක්ෂපාතී ජනාධිපතිවරුන් ලෙස සැලකේ.ජිමී කටර් සහ බැරැක් ඔබාමා ඊශ්‍රායලය සමග මිත්‍රශීලී නායකයන් නොවීය.

ඩොනල්ඩ් ට්‍රම්ප් ඊශ්‍රායලයට වාසි වන පරිදි ආරක්ෂාව,රාජ්‍යතාන්ත්‍රික සහ දේශපාලනික ප්‍රශ්න කෙරෙහි ඇමෙරිකානු ප්‍රතිපත්ති වෙනස් කලේය.ඉරානය සමග න්‍යෂ්ඨික ගිවිසුමෙන් ඉවත් වීම,පලස්තීන ප්‍රශ්නයට විසදුමක් ඉදිරිපත් කිරීම,ජෙරුසලම ඊශ්‍රායලයේ අගනුවර ලෙස පිළිගැනීමත්,ගෝලාන් උස්බිම්(සිරියාවෙන් අත්පත් කරගත් භූමි ප්‍රදේශයකි)ඊශ්‍රායල භූමියේ කොටසක් යැයි පිළිගැනීම ඒ අතරින් විශේෂය.

මීට සති කිහිපයකට පෙර නෙතන්යාහු පවසා තිබුණේ,ට්‍රම්ප් තමාගේ හොඳ මිත්‍රයෙක් වූ බවත්,ඊශ්‍රායලයට වැදගත් පුද්ගලයෙක් වූ බවත්ය.කෙසේවෙතත් දැන් මැදපෙරදිග "එකම ප්‍රජාතන්ත්‍රවාදයේ " ඇලුම්කම්වලට අනුග්‍රහය පිණිස තවදුරටත් කැප කිරීම් කරන්නට ට්‍රම්ප්ට අවස්ථාවක් නොමැත.

දැන් ඉතින් ජෝ බයිඩන්ගේ පාලනතන්ත්‍රයට තම ආදරය පෙන්වීමට නෙතන්යාහුට අවස්ථාව උදාවී තිබේ.ඉතින් ආයුබෝවන් ට්‍රම්ප්!

source:southfront.org

හොඳම රුසියානු හෙලිකොප්ටර් යානා 5ක්

noreply@blogger.com (Unknown) — Wed, 13 Jan 2021 13:52:00 +0000

රුසියාව සතු හෙලිකොප්ටර් යානා සියල්ලකම පාහේ ඉතිහාසය සෝවියට් යුගය දක්වා දිව යති.බොහොමයක් රුසියානු හෙලිකොප්ටර් යානාවල නම ආරම්භ වන්නේ Mi යන කෙටි නාමයෙනි.මෙම යානා නිපදවූ වන්නේ මිල් මොස්කව් හෙලිකොප්ටර් කර්මාන්තශාලාවේය.එහි නිර්මාතෘවරයා වූයේ මිකායිල් මිල් නැමති ගුවන් යානා ඉන්ජිනේරුවාය.මෙහි දැක්වෙන හෙලිකොප්ටර් ලැයිස්තුවේ බොහොමයක් යානා ප්‍රහාරක කාර්යය සඳහාද අනෙක්වා ප්‍රවාහන සහ සෝදිසි හා මුදා ගැනීමේ මෙහෙයුම් සඳහා ද භාවිතා කෙරේ.

Mi-24 ක්‍රොකොඩයිල්

මෙම සුප්‍රසිද්ධ හෙලිකොප්ටර් යානයේ මූලාකෘතිය මුලින්ම දැක ගන්නට ලැබෙන්නේ 1971 වර්ෂයේදීය. යානයේ නිර්මාතෘවරුන් එය හෙලිකොප්ටරයක් සහ පාබල හමුදා රථයක් අතර දෙමුහුමක් වශයෙන් සලකනු ලැබීය.ආරක්ෂක සන්නාහය සහ අවි වලට අමතරව,සෙබලුන් 8 දෙනෙක් දක්වා සටන් බිමට ගෙන යෑමේ හැකියාව Mi-24 හෙලිකොප්ටරය සතුය.

ගුවන් යානා නාශක අවිවල තර්ජනය මධ්‍යයේ පාබල හමුදා යුද බිමක් මධ්‍යයට ගෙන යෑම නුවණට හුරු නොවන නිසා,Mi-24 යානය බහුලවම භාවිතා කරන්නේ ප්‍රහාරක මෙහෙයුම් සඳහාය.නේටෝ සංවිධානය "හයින්ඩ්" යන නමින් හඳුන්වන මෙය ක්‍රොකොඩයිල් යන නිල නොවන අන්වර්ථ නාමයෙන් හැඳින්වෙන්නේ පෙනුමෙන් එම උරගයාට සමාන නිසාය.

ඇෆ්ගනිස්ථානයේ සෝවියට් යුද්ධයෙහි සංකේතයක් වන Mi-24 හෙලිකොප්ටරය මේ දක්වා ලොව පුරා සන්නද්ධ අරගල ගණනාවකට සහභාගී වී තිබේ.ශ්‍රී ලංකා ගුවන් හමුදාව Mi-24 හෙලිකොප්ටර් යානා භාවිතා කරන්නේ 1995 වර්ෂයේ පටන්ය.

Mi-28 නිශාචර දඩයක්කරුවා

පළමුවරට Mi-28 යානයක් දැක ගන්නට ලැබෙන්නේ 1987 වර්ෂයේදීය.එතැන් පටන් වැඩිදියුණු කල සංස්කරණ කිහිපයක් හඳුන්වා දී තිබේ.දිවා-රාත්‍රි දෙකෙහි,ඕනෑම කාළගුණික තත්ත්වයක් යටතේ මෙහෙයුම් කිරීමට ඇති හැකියාව හේතුවෙන් මෙයට නයිට් හන්ටර් හෙවත් නිශාචර දඩයක්කරුවා යන ලැබිණි.Mi-24 යානයේ තිබූ සෙබලුන් ප්‍රවාහනය කිරීමේ හැකියාව Mi-28 යානය සතුව නැත.එනම් මෙය හුදෙක් ප්‍රහාරක කාර්යය සඳහා පමණක් නිර්මාණය කල හෙලිකොප්ටර් යානයකි.Mi-28 යානයේ ගමන් කරන්නේ නියමුවා සහ අවිකරුවා පමණි.

මෙම යානයත් Mi-24 යානය මෙන්ම මිසයිල සහ රොකට්වලින් සන්නද්ධය.ඊට අමතරව ස්වයංක්‍රීය මැෂින් තුවක්කුවක් නාසය කොටසට පහළින් සවි කර තිබේ.ඇල්ජීරියාව සහ ඉන්දියාව යන රටවල ගුවන් හමුදාවෝ මෙම නිශාචර දඩයක්කරුවා භාවිතා කරති.

Ka-52 ඇලිගේටර්

1980 දශකයේදී කමොව් සැලසුම් කාර්යාංශයේ සෝවියට් ඉන්ජිනේරුවන්,තනි අසුනේ "කමොව්-50" හෙලිකොප්ටරය නිර්මාණය කලේය.එය බ්ලැක් ෂාර්ක් - කළු මෝරා යන නමින් හැඳින්විණි.හැසිරවීම අතින් මෙම හෙලිකොප්ටරය සාම්ප්‍රදායික හෙලිකොප්ටර්වලට වඩා ඉහළින් පසුවිය.

පසුකාලීනව රුසියානු ඉන්ජිනේරුවෝ මෙහි වැඩි දියුණු කල සංස්කරණයක් ලෙස කමොව්-52 යානය හඳුන්වා දුන්හ.එහි නියමුවන් දෙදෙනෙකුට ගමන් කල හැකිය.කමොව්-52 හෙවත් ඇලිගේටර් යන අන්වර්ථ නාමයෙන් හඳුන්වන හෙලිකොප්ටර් යානය නිෂ්පාදනයට පිවිසෙන්නේ 2008 වර්ෂයේදීය.මෙම යානයත් දිවා,රාත්‍රී මෙහෙයුම් සිදු කල හැකි ඕනෑම කාලගුණික තත්ත්වයක් යටතේ ක්‍රියාත්මක විය හැකි එකකි.ප්‍රහාරක මෙහෙයුම් සඳහා විශේෂයෙන් නිර්මාණය කර තිබෙන අතර මිල්-28 නයිට් හන්ටර් යානයේ තරඟකරුවෙක් ලෙස කමොව්-52 යානය සැලකිය හැකිය.

Mi-8 හෙලිකොප්ටරය

මෙම ද්විත්ව එන්ජින් හෙලිකොප්ටරය,කලින් සඳහන් කල යානාවලට වඩා ප්‍රමාණයෙන් විශාලය.මිල්-8 යානය ප්‍රවාහන කටයුතු සඳහා විශේෂයෙන් නිර්මාණය කලද,සිවිල් මෙන්ම සංග්‍රාමික මෙහෙයුම් සඳහාද භාවිතා කරන අයුරු දැකගත හැකිය.සංග්‍රාමික මෙහෙයුම්වලදී වාසර අණදෙන ස්ථානයක්,අවි නැවක් මෙන්ම වාසර ඔත්තු බැලීමේ යානයක් වශයෙන්ද යොදා ගැනේ.

1967 වර්ෂයේදී හඳුන්වා දුන් මිල්-8 යානය මේ දක්වා නිෂ්පාදනය කෙරේ.ලෝක ඉතිහාසයේ වැඩියෙන්ම නිෂ්පාදනය කල හෙලිකොප්ටර් යානය වශයෙන් වාර්තාවක් පිහිටුවා තිබෙන්නේ මෙම යානයයි.

රුසියාව මෙන්ම රටවල් රැසක් මිල්-8 හෙලිකොප්ටර් යානය ගැණිය නොහැකි වැඩිදියුණු කිරීම්වලින් පසුව යුදමය සහ සිවිල් කාර්යයන් සඳහා භාවිතා කරති.සෝදිසි හා මුදා ගැනීම්,පුද්ගල නාශක බෝම්බ ඇතිරීම,පුද්ගලයින් සහ භාණ්ඩ ප්‍රවාහනය ආදී කාර්යයන් සඳහා මෙය යානය යොදා ගත හැකිය.

Mi-26 දැවැන්තයා

1980 දශකයේ මුල් භාගයේදී සෝවියට් ගුවන් හමුදාවට හඳුන්වා දුන් මිල්-26 යානය,මහා පරිමාණ නිෂ්පාදනයට පිවිසි ලොව විශාලතම හෙලිකොප්ටර් යානයයි.අද වන විට මෙම දැවැන්ත යානා නිෂ්පාදනය සිදුවෙමින් පවතියි.මිල්-8 යානය මෙන්ම මේ හෙලිකොප්ටරයත් සිවිල් සහ යුද මෙහෙයුම් සඳහා භාවිතා කරයි.

මිල්-26 යානයට පැවරී තිබෙන ප්‍රධාන කාර්යය වන්නේ බරින් වැඩි භාණ්ඩ ප්‍රවාහනය කිරීමයි.ටොන් 20 දක්වා බරක් රැගෙන යාමට ප්‍රමාණවත් ඉඩක් එය සතුය.චර්නොබෙල් න්‍යෂ්ඨික බලාගාරයේ සිදුවූ අනතුරින් පසුව හානිය අවම කිරීමේ මෙහෙයුම්වලට මිල්-26 යානය භාවිතා කලේය.

source:rbth.com

චීන-පාකිස්තාන නාවික යුද අභ්‍යාසය - නෞකා නාශක මිසයිල අත්හදා බැලීම

noreply@blogger.com (Unknown) — Wed, 13 Jan 2021 07:24:00 +0000

ජනවාරි 12දා චීන සහ පාකිස්තාන නාවික හමුදාවෝ දින නමයක නාවික යුද අභ්‍යාසයක් අවසන් කලෝය.මෙය සී ගාර්ඩියන් යන නමින් හැඳින්වීය.දෙරටේ සහභාගීත්වයෙන් පවත්වන ලද හයවන ඒකාබද්ධ නාවික යුද අභ්‍යාසය මෙයයි.පාකිස්තානය ආසන්න අරාබි මුහුදේ පැවැත් වූ යුද අභ්‍යාසය සඳහා විශේෂ බලකා,යුද නෞකාව,ගුවන් යානා මෙන්ම පළමුවරට සබ්මැරීනද එක් කරගෙන තිබිණි.මෙහිදී ජීව උණ්ඩ/මිසයිල යොදාගෙන තිබීම විශේෂත්වයකි.

යුද අභ්‍යාසය අතරතුර ජනවාරි 12දා උතුරු අරාබි මුහුදේ දී ටයිප් 21 එසේත් නැත්නම් ඇමසන් පන්තියේ ෆ්‍රිගෙට් වර්ගයේ යුද නෞකාවක් මිසයිල ප්‍රහාරයකින් ගිල්වා දමන්නට පාකිස්තාන නාවික හමුදාව ක්‍රියා කලේය.මෙම නෞකාව 1990 දශකයේදී බ්‍රිතාන්‍යයේ රාජකීය නාවික හමුදාවෙන් මිලදී ගත් එකකි.2014 වර්ෂයේදී එය විශ්‍රාම ගැන්වූයේ එම පන්තියේම තවත් නෞකාවක් සමගයි.

රාජකීය නාවික හමුදාව සේවයෙන් ඉවත් කල ටයිප් 21 ෆ්‍රිගෙට් නෞකා හයක් පාකිස්තානය මිලදී ගත් අතර දැනට ඉන් නෞකා තුනක් පමණක් පාකිස්තාන නාවික හමුදාවේ සේවයේ පවතියි.

තවත් ටයිප් 21 ෆ්‍රිගෙට් නෞකාවක් වූ ටිප්පු සුල්තාන්,මීට සමාන යුද අභ්‍යාසයකදී මිසයිල ප්‍රහාරවල ඉලක්කයක් ලෙස භාවිතා කලේය.එය 2020 අප්‍රේල් මාසයේ පැවති නාවික අභ්‍යාසයකදී ගිල්වා දමන ලදි.එලෙස අවසන් ගමන් යෑමට මත්තෙන් මෙම නෞකාව රාජකීය නාවික හමුදාවේ සහ පාකිස්තාන නාවික හමුදාවේ වසර 40කට වැඩි කාලයක් සේවය කර තිබිණි.

2020 අප්‍රේල් මාසයේ පැවති නාවික යුද අභ්‍යාසයේදී ඇමසන් පන්තියේ යුද නෞකාවක් ගිල්වා දමන අයුරු

ජනවාරි 12දා ගිල්වා දැමීමට සම්බන්ධ වූයේ අගොස්ටා පන්තියේ සබ්මැරීනයක් සහ සුල්ෆිකාර් පන්තියේ ෆ්‍රිගෙට් නෞකාවකි.නෞකා නාශක මිසයිල සහ ටෝර්පිඩෝ ප්‍රහාරය සඳහා භාවිතා කල බව වාර්තාවේ.

යුද අභ්‍යාසයට සහභාගී වූ අගොස්ටා සබ්මැරීනයක්

යුද අභ්‍යාසයට එක් වූ සුල්ෆිකාර් පන්තියේ යුද නෞකාවක්

ප්‍රහාරවලින් විනාශ වූ ඇමසන් පන්තියේ යුද නෞකාව

ගිලී යන නෞකාව

අගොස්ටා පන්තියේ සබ්මැරීන 1970 දශකයේදී ප්‍රංශය විසින් නිපදවන ලදි.දැනට පාකිස්තානය සතුව මෙම වර්ගයේ ඩීසල්-විදුලි වේග ප්‍රහාරක සබ්මැරීන දෙකක් තිබේ.චීනයේ නිෂ්පාදිත සුල්ෆිකාර් පන්තියේ යුද නෞකා හතරක් පාකිස්තාන නාවික හමුදාවේ සේවයේ යොදවා ඇත.

යුද නෞකාවක් බවට පරිවර්තනය කල ඉරාන තෙල් ප්‍රවාහන නෞකාව

noreply@blogger.com (Unknown) — Wed, 13 Jan 2021 05:20:00 +0000

දේශීයව නිෂ්පාදනය කර නාවික හමුදාවට එක් කල යුද නෞකා දෙකක් අද දිනයේ(ජන.13) පැවැත්වෙන යුද අභ්‍යාසයක් අතරතුර හෙළි කරන්නේ යැයි ඉරානය ජනවාරි 12දා පැවසුවේය.

මින් එක නෞකාවක් හෙලිකොප්ටර් ප්‍රවාහනය සහ ඉදිරි මෙහෙයුම් කඳවුරක් වශයෙන් භාවිතා කරන "මක්‍රන්" නමින් හඳුන්වන කාලයක් තෙල් ප්‍රවාහන නෞකාවක් ලෙස පාවිච්චි කල එකකි.මෙය ඉරානයට අයත් මුහුදු සීමාවේ මෙන්ම ඉන් පිටතදීත් සමුද්‍රීය මෙහෙයුම් සිදු කිරීමට වේදිකාවක් වශයෙන් යොදා ගත හැකිය.

පර්සියන් ගල්ෆ් යන නමින් හැඳින් වූ මෙම තෙල් ප්‍රවාහන නෞකාව හෙලිකොප්ටර් ගොඩ බෑමට අවශ්‍ය වේදිකාවක් සහ අනෙකුත් වෙනස්කම් සහිතව මක්‍රන් යන නමින් දියත් කරන්නට ඇතැයි විශ්වාස කෙරෙන්නේ පසුගිය වර්ෂයේ අගභාගයේදීය.එහි වියළි තටාකය ජලයේ ගිල් ඇති ආකාරය දැක්වෙන චන්ද්‍රිකා ඡායාරූපයක් 2020 වසරේ නොවැම්බර් මාසයේදී නිකුත් කර තිබිණි.නෞකාවේ අත්හදා බැලීමේ චාරිකාවන් දෙසැම්බර් මාසයේ මැද භාගයේ ආරම්භ වන්නට ඇත.

මක්‍රන් නෞකාව 2020 දෙසැම්බර් මාසයේ මුල් භාගයේදී - චන්ද්‍රිකා ඡායාරූප

2020 දෙසැම්බර් 04 සහ 09 යන දිනවලදී මක්‍රන් නෞකාව අත්හදා බැලීමේ චාරිකාව අතරතුර

මක්‍රන් නෞකාව නෞකා තටාකාංගනයේ

මක්‍රන් නෞකාවේ දිග අඩි 755කි.ප්‍රමාණයෙන් එය ඇමෙරිකානු නාවික හමුදාවේ Expeditionary Sea Base (ESB) නම් ඉදිරි මෙහෙයුම් නෞකාවට සමීපය.ඇමෙරිකානු නෞකාව අඩි 764ක් දිගය.එයද ඇලස්කා පන්තියේ තෙල් ප්‍රවාහන නෞකාවේ සැලැස්ම වෙනස් කරමින් නිර්මාණය කල එකකි.

ඉරාන ඉස්ලාමීය ජනරජ නාවික හමුදාවේ ප්‍රධානියා එරට මාධ්‍ය වෙත පවසා ඇති පරිදි මක්‍රන් නෞකාවට හෙලිකොප්ටර් යානා 6-7ක් පමණ රැගෙන යා හැකිය.නෞකාවේ සිට සී ස්ටැලියන්,සී කින්ග් සහ අගුස්ටා ඒබී212 ප්‍රති-සබ්මැරීන සංග්‍රාමික හෙලිකොප්ටර් යානා දියත් කරන ආකාරය දැක්වෙන වීඩියෝ පටයක්ද නිකුත් කර තිබේ.

මක්‍රන් නෞකාව පරිවර්තනයට පෙර පැවති ආකාරය

සිරස් අතට ගුවන් ගත වීමට සහ ගොඩබෑමට හැකි පෙලිකන්-2 නම් දේශීය ඩ්‍රෝන් යානයක්ද එම වීඩියෝවේ දැකගත හැකිය.මෙම ඩ්‍රෝන් යානා මාදිලිය ඉරාන නාවික හමුදාව දැනටමත් පාවිච්චි කරන එකකි.කෙසේවෙතත් මෙම ඩ්‍රෝන් යානය කුඩා ප්‍රමාණයේ ,ක්වාඩ් කොප්ටර් වර්ගයේ එකක් නිසා සීමිත බරක් රැගෙන කෙටි කාලයක් පමණක් පියාසර කරයි.

ඉරාන මාධ්‍ය පවසන පරිදි මක්‍රන් නෞකාවට ඉලෙක්ට්‍රොනික් සංග්‍රාමික සහ විශේෂ මෙහෙයුම් සිදු කිරීමට පුළුවනි.

ජනවාරි 13දා හෙළි කරනු ඇතැ‍යි කියන අනෙක් නෞකාව "සෙරෙහ්" නමින් හඳුන්වන මිසයිල ප්‍රහාරක නෞකාවකි.මෙය ඉරානය් සතු බලසම්පන්න සහ වේගවත් නෞකාවකි.

නෞකා දෙක ඉරාන නාවික හමුදාවේ දකුණු බලඇණියේ සේවයට එක්වී ඇත.මෙම බල ඇණිය ක්‍රියාත්මක වන්නේ ඕමාන බොක්ක ආශ්‍රිතවයි.

ටෙහෙරාන්-වොෂින්ටන් සීතල යුද්ධයේ ක්‍රමයෙන් උත්සන්න වීමත් සමග පසුගිය කාල සීමාවේ ඉරානය දේශීය නිෂ්පාදනය කල යුද නෞකා,ඩ්‍රෝන් යානා සහ මිසයිල ඇතුලුව යුදෝපකරණ රැසක් එළිදැක්වීය.හෝර්මුස් සමුද්‍ර සන්ධියේ සැරිසරන ඉරාන ඉස්ලාමීය විප්ලවකාරී ආරක්ෂක හමුදාවේ නාවික යාත්‍රා සමූහයක් දැක්වෙන චන්ද්‍රිකා ඡායාරූපද දින කිහිපයකට මත්තෙන් එක්සත් ජනපදයේ ප්ලැනට් ලැබ්ස් නම් ආයතනය ප්‍රසිද්ධ කලේය.

මක්‍රන් නෞකාව සහ එහි හෙලිකොප්ටර් වේදිකාවේ ඡායාරූප කිහිපයක්

ඊට අමතරව ඉරාන ඉස්ලාමීය විප්ලවකාරී ආරක්ෂක හමුදා නාවික හමුදාවට අයත් රහසිගත භූගත මිසයිල කඳවුරක දර්ශනද ඉරානය විසින් නිකුත් කලේය.

ඩොනල්ඩ් ට්‍රම්ප් ධවල මන්දිරයේ සිටින අවසන් දින හතක කාලය දැන් ගෙවී යමින් තිබේ.සියලුදෙනාගේම ඇස් ඔහු වෙත යොමුව තිබෙන්නේ,හෙතෙම ඉරානයට ප්‍රහාරයක් එල්ල කරාවිද යන සැකය මතයි.

source:southfront.org

යේමන යුද්ධය: 2020 වර්ෂයේ හවුති සටන්කාමීන්ගේ ජයග්‍රහණ

noreply@blogger.com (Unknown) — Mon, 11 Jan 2021 07:32:00 +0000

අන්සාර් අල්ලාහ් ව්‍යාපාරය/හවුති සටන්කාමීන් 2020 වර්ෂය තුල ලබා ගත් ජයග්‍රහණ සාරාංශ ගත කල කෙටි වාර්තා වැඩසටහනක් ජනවාරි මස 9දා හවුති මාධ්‍ය අංශය විසින් නිකුත් කලේය.

මෙම වීඩියෝ පටයේ ශීර්ෂපාඨය ලෙස යොදා තිබුණේ "මිනිත්තු 14ක වධහිංසාව" යන්නයි.එය ආරම්භ වන්නේ හවුති ගුවන් ආරක්ෂක මෙහෙයුම්වල දර්ශන සමගයි.2020 වර්ෂය තුල ඔවුන් සෞදිය ප්‍රමුඛ මිත්‍ර සන්ධානයේ ඩ්‍රෝන් යානා කිහිපයක් බිම හෙළීමට සමත් වූහ.නමුත් හවුති සටන්කාමීන් එම වසර තුල අත්කර ගත් සැලකිය යුතු ජයග්‍රහණයක් ලෙස පෙන්විය හැක්කේ යුරෝපයේ නිෂ්පාදිත සෞදි ටොනේඩෝ IDS වර්ගයේ ප්‍රහාරක-බෝම්බ හෙළන යානයක් බිම හෙළීමයි.2020 වර්ෂයේ පෙබරවාරි මස 14දා මෙම යානය බිම හෙළු අතර ගුවන් නියමුවා හවුති සටන්කාමීන්ගේ අත් අඩංගුවට පත් විය.

සෞදි ටොනේඩෝ IDS ප්‍රහාරක-බෝම්බ හෙළන යානයක්

සානා හි නහිම් දිස්ත්‍රික්කයේ සිදු කල "සොලිඩ් ස්ට්‍රක්චර්" නම් මෙහෙයුමේ දර්ශනද එහි ඇතුලත්ය.මෙම දැවැන්ත මෙහෙයුම අතරතුර,සෞදිය ප්‍රමුඛ මිත්‍ර සන්ධානයේ පාලනයෙන් වර්ග කිලෝමීටර් 2,500කට වැඩි භූමි ප්‍රමාණයක් මුදා ගන්නට හවුති සටන්කාමීන් සමත් වූහ.ඇති වූ සටන්වලින් සෞදි පාර්ශ්වයේ සටන්කරුවන් දහස් ගණනක් මිය යන්නට,තුවාල ලබන්නට සහ අත් අඩංගුවට පත් වන්නට ඇත.

උතුරෙහි වු අල්-ජව්ෆ් පළාතේ සෞදිය ප්‍රමුඛ සන්ධාන හමුදාවට එරෙහිව සිදුකල මහා පරිමාණ පාබල හමුදා මෙහෙයුම් මාලාවේ දර්ශනද දැකගත හැකිය.මෙම මෙහෙයුම්වලදීද කඳවුරු කිහිපයක් හවුති සටන්කාමීන් යටතට පත් විය.

වාර්තා වැඩසටහන:2020 වර්ෂයේ හවුති ජයග්‍රහණ

අල්-ජව්ෆ් හි අල්-කන්ජර් කඳවුර සඳහා වූ සටන අතරතුර ලබා ගත් වීඩියෝපටද මෙහි ඇතුලත්ය.

මීට අමතරව ඉස්ලාමීය රාජ්‍ය ත්‍රස්තවාදීන්ට සහ අල්කයිඩා සංවිධානයට එරෙහිව අල්-බෙයිඩා පළාතේ සිදු කල දැවැන්ත මෙහෙයුමද මිනිත්තු 14හි වාර්තා වැඩසටහන මගින් ආවරණය කර තිබේ.ඉහත කී මෙහෙයුමේදී ත්‍රස්තවාදීන් 250කට වැඩි පිරිසක් මියයන්නට,තුවාල ලබන්නට හෝ අත් අඩංගුවට පත් වන්නට ඇතැයි වාර්තාවේ.ඔවුන් වාල් රබි ප්‍රදේශයෙන් වර්ග කිලෝමීටර් 1,000ක භූමියක් මුදා ගත් අතර කඳවුරු සහ ත්‍රස්තවාදීන් රැදී සිටි ස්ථාන 12ක් අල්ලා ගත්හ.

ජිසාන් සහ නජ්රන් යන සෞදියේ දකුණුදිග පළාත් සීමාවන් හි හමුදාව රැදී සිටින ස්ථාන වටලන දර්ශනද වීඩියෝවේ දැකගත හැකිය.

මෙම වාර්තා වැඩසටහන මගින් ඉස්මතු කරන ප්‍රධාන කාරණයක් වන්නේ වර්ධනය වන හවුති ප්‍රහාරක හැකියාවන්ය.2020 වර්ෂයේදී ඔවුන්ගේ මෙහෙයුම් පෙරට වඩා ඉතා සාර්ථක විය.ඔවුන්ගේ ගමන් මග වළක්වන්නට සෞදි සන්ධානයේ ගුවන් ආධිපත්‍යය පවා සමත් ව තිබේ.2021 වර්ෂයේ තත්ත්වයත් මීට වඩා වෙනසක් නොවනු ඇත.

2020 ජූනි මාසයේදී යේමනයේ අල්-ජව්ෆ් පළාතේදී බිම හෙළු චීනයේ නිෂ්පාදිත CH-4 ඩ්‍රෝන් යානයක්

2020 වර්ෂයේ යේමන යුද්ධයේ සෞදිය ප්‍රමුඛ සන්ධානය සහ අන්සාර් අල්ලාහ් ව්‍යාපාරය(හවුති) ප්‍රයත්නයන්ගේ සංක්ෂිප්තයක් ජනවාරි 4දා ප්‍රසිද්ධ කරන ලද්දේ යේමන හමුදා ප්‍රකාශක බ්‍රිගේඩියර් ජෙනරල් යහියා සාරි විසින්ය.

2020 වර්ෂයේදී යේමනයේ පළාත් 13ක් ඉලක්ක කර සෞදි සන්ධානයේ යුද ගුවන් යානා ප්‍රහාර 8888ක් වැඩි ගණනක් සහ ඩ්‍රෝන් ප්‍රහාර 410ක් එල්ල කර තිබේ.පිළිවෙලින් මරිබ්,අල්-ජව්ෆ් සහ සාඩා පළාත්වලට ගුවන් ප්‍රහාර 3,621ක්,1,981ක් සහ 726ක් එල්ල කර ඇත.

අන්සාර් අල්ලාහ් ව්‍යාපාරය සිදු කල මෙහෙයුම් ගණන 974ක් වැඩිය.

සතුරන් 15,366ක් වැඩි පිරිසක් මියයන්නට හෝ තුවාල ලබන්නට ඇත.මිය ගිය පිරිස 6,467කි.

සෞදි සන්ධානයේ යුද ටැංකි,සන්නාහ සන්නද්ධ රථ සහ අනෙකුත් යුද රථ 1090 වැඩි ගණනක් විනාශ කරන ලදි.

හවුති මිසයිල බලකාය දියත් කල බැලස්ටික මිසයිල සහ කෲස් මිසයිල ගණන 253කි.ඉන් 178ක් යේමනය තුල සතුරු කඳවුරු සහ ස්ථාන වෙත පතිත විය.මිසයිල 75ක ඉලක්කය වූයේ සෞදි අරාබියයි.

බඩර්-පී මිසයිල 20කට වැඩි ගණනක්,බඩර්-1 මිසයිල 30ක්,කුඩ්ස් කෲස් මිසයිල 7ක් සහ් සුල්ෆිකර් මිසයිල 6ක් සෞදි අරාබියට එල්ල කරන ලදි.

හවුති පාර්ශ්වය සිදු කල ඔත්තු බැලිමේ සහ ඩ්‍රෝන් ප්‍රහාරක මෙහෙයුම් ගණන 5,613කි.ඩ්‍රෝන් ප්‍රහාරක මෙහෙයුම් 267ක් අතුරින් 180ක්ම යේමනය ඇතුලත සතුරු ඉලක්කවලට එරෙහිව සිදු කල ඒවාය.

අන්සාර් අල්ලාහ් ව්‍යාපාරයේ ගුවන් ආරක්ෂක බලකා විසින් බිම හෙළු ප්‍රහාරක,ඔත්තු බැලීමේ ඩ්‍රෝන් යානා සහ ෆයිටර් ජෙට් යානා ගණන 67කි.ඒවා අතරින් ටොනේඩෝ ෆයිටර් ජෙට් යානය සහ CH-4 ඩ්‍රෝන් යානා දෙක සුවිශේෂීය.

යුද රථ 100කට වැඩි ගණනක් ඉලක්ක කර මෙහෙයුම් 678ක් සිදු කරන ලදි.

ඩ්‍රෝන් යානාවල උදව් ඇතිව කාලතුවක්කු ඒකක මෙහෙයුම් 231ක් සිදු කලහ.

source:southfront.org

රුසියානු සුකොයි-57 ෆයිටර් ජෙට් යානය ගුවන් හමුදාවේ සේවය එක් වෙයි

noreply@blogger.com (Unknown) — Mon, 11 Jan 2021 05:15:00 +0000

පස්වන පරම්පරාවේ සුකොයි-57 ෆයිටර් ජෙට් යානය රුසියානු ගුවන් හමුදාවේ සේවයට එක් වූ බව ටාස් පුවත් සේවය පසුගිය දෙසැම්බර් මාසයේදී වාර්තා කර තිබුණේ රුසියානු හමුදා-යුදෝපකරන නිෂ්පාදන ක්ෂේත්‍රයේ නිර්නාමික මූලාශ්‍රයක් මත පදනම්වයි.නමුත් මේ දක්වා එම පුවත රුසියානු ආරක්ෂක අමාත්‍යාංශය නිල වශයෙන් තහවුරු කර නොමැත.

කෙසේවෙතත්,මහා පරිමාණයෙන් නිෂ්පාදනයට පිවිසීමෙන් පසුව නිපදවූ පළමු සුකොයි-57 ෆෙලන් යානය රුසියානු ගුවන් හමුදාව වෙත ලැබී තිබුණේ 2020 දෙසැම්බර් 25දා යැ‍යි වාර්තාවේ.එය ලැබී තිබුණේ රුසියාවේ දකුණු හමුදා දිස්ත්‍රික්කයේ ගුවන් හමුදා රෙජිමේන්තුවකටයි.2021 වර්ෂයේදී තවත් යානා හතරක් ලැබීමට නියමිතය.මෙම යානා 2021 පෙබරවාරි මාසයේ සිට සංග්‍රාමික මෙහෙයුම් සඳහා සූදානම් යැ‍යි ද සඳහන් වේ.

මෙම යානය කොම්සොමොල්ස්කි-ඕන්-අමූර් ගුවන් යානා සමාගමේ සිට මොස්කව් හි ෂුකොව්ස්කි ගුවන් තොටුපොල කරා එන ගමනේදී නොවොසිබිර්ස්ක් හි නවතා තිබූ කාලයේදී ලබා ගත් ඡායාරූප සහ වීඩියෝපටයක් සමාජ ජාල තුල සංසරණය වේ.

සුකොයි-57 යානය නිමවා තිබෙන්නේ සියලුම ආකාරවල ගුවන්,ගොඩබිම් ඉලක්ක විනාශ කිරීමට හැකි අයුරිනි.ස්ටෙල්ත් තාක්ෂණය සහිත පළමු රුසියානු ගුවන් යානය ලෙසද මෙය සැලකේ.මෙම යානය කෘත්‍රිම බුද්ධි තාක්ෂණය යටතේ මිනිසෙක් රහිතව දිගු දුරක සිට පාලනය කල හැකිය.

සුකොයි-57 යානා එකලස් කිරීමේදී රුසියානුවන් Augmented reality(AR) නම් තාක්ෂණය යොදා ගන්නා ආකාරය දැක්වෙන වීඩියෝපටයක් පසුගිය වසරේදී නිකුත් කර තිබිණි.ක්ෂණික ප්‍රතිචාර කේත සඳහන් සුකොයි-57 යානයේ කොටස් සමග කටයුතු කල හැකි මෙම තාක්ෂණයේදී,විශේෂඥයින්ට සැබෑ ලෝකය සහ පරිගණක මගින් නිර්මාණය කරන සමාකරණ වස්තූන් සංකලනයක් සමග වැඩ කිරීමට අවස්ථාව ලබා දෙයි.

2018 ආමි - ජාත්‍යන්තර හමුදා තාක්ෂණික ප්‍රදර්ශනයේදී(2018 අගෝස්තු )පළමු අධියරයේ එන්ජින් සමග සුකොයි-57 යානා දෙකක් රුසියානු හමුදාවට ලබා දෙන්නට රුසියානු ආරක්ෂක අමාත්‍යාංශය සහ සුකොයි සමාගම අතර ගිවිසුමක් ඇති කරගත්තේය.ඒ අනුව පළමු සුකොයි-57 යානය ආරක්ෂක අමාත්‍යාංශය ලැබීමට නියමිතව තිබුණේ 2019 වර්ෂය අවාසනයේදීය.

නමුත් පළමු සුකොයි-57 යානය අත්හදා බැලීම් අතරතුර කබරොව්ස්ක් ආසන්නයේදී කඩා වැටෙන්නේ 2019 දෙසැම්බර් 24දාය.අනතුර හේතුවෙන් යානය සේවයට එක් වීම ප්‍රමාද විය.මෙම අනතුරට හේතුව ලෙස අනුමාන කල හැක්කේ පාලන පද්ධතියේ දෝෂයකි.

source:southfront.org

සිරියාව තුල 2021 වසරේ පළමු ඊශ්‍රායල සහ රුසියානු ගුවන් ප්‍රහාර

noreply@blogger.com (Unknown) — Sun, 10 Jan 2021 14:27:00 +0000

2021 වර්ෂය තුල ඊශ්‍රායල ගුවන් හමුදාව සිරියාව තුල සිය පළමු ප්‍රහාරය දියත් කරන්නේ ජනවාරි මස 6දා රාත්‍රියත් 7වෙනිදා අලුයම් කාලයත් අතරතුරයි.ඊශ්‍රායල ජෙට් යානා සිරියාවේ රිෆ් ඩිමැෂ්ක් පළාතේ අල්-කිස්වා ප්‍රදේශයට මිසයිල ප්‍රහාරයක් එල්ල කලහ.

ප්‍රහාර ව්‍යර්ථ කිරීමට සිරියානු අරාබි හමුදාව සිය ගුවන් ආරක්ෂක පද්ධති ක්‍රියාත්මක කලේය.ඔවුන් මිසයිල කිහිපයක් බිම හෙළීමට සමත් වුවද,හිස්බුල්ලා සංවිධානයේ කඳවුරුවලට ප්‍රහාර එල්ල විය.

බටහිර අල්-සුවෙයිඩා හි අල්-ඩවුර් නගරය ආසන්නයේ තිබූ රේඩාර් මධ්‍යස්ථානයක්ද ප්‍රහාරවල ඉලක්කයක් වූ බව ප්‍රාදේශීය මූලාශ්‍රයක් වාර්තා කලේය.බටහිර ඩාරා හි කොවායා නගරයේ තවත් රේඩාර් මධ්‍යස්ථානයකට මිසයිල ප්‍රහාර එල්ල වූයේ යැ‍යි සටන්කාමීන් කණ්ඩායමක් පැවසුවේය.

ප්‍රහාරවලින් සිදු වූ හානිය ඉදිරි දිනවලදී ඊශ්‍රායල චන්ද්‍රිකා ඡායාරූපවලින් අනාවරණය කරනු ඇතැයි විශ්වාස කල හැකිය.

ඉඩ්ලිබ් මුදා නොගත් කලාපය ඉලක්ක කරගෙන මේ වර්ෂයේ සිය පළමු ප්‍රහාරය රුසියාව එල්ල කරන්නේ ජනවාරි 9දාය.ප්‍රහාරයේ ඉලක්කය වූයේ උතුරු ලටාකියා හි සටන්කාමීන් රැදී සිටින ස්ථානයි.

කබානි නගරයෙන් පිටත කඳු මුදුන් වලට මෙම ප්‍රහාර එල්ල විය.මෙම නගරය හයාට් ටරිර් අල්-ෂාම්,ඉස්ලාමීය තුර්කිස්ථාන පක්ෂය සහ අජ්නාඩ් අල්-කවුකාස් යන අල්කයිඩා සංවිධානයේ අතුරු ශාඛා හි බලකොටුවක් වශයෙන් හඳුන්වයි.

ප්‍රහාර සඳහා රුසියාව භාවිතා කර තිබුණේ සුකොයි-24එම් ප්‍රහාරක ජෙට් යානයකි.

මෙම ගුවන් ප්‍රහාරයට පෙර අල්-ෆටේ අල්-මුබීන් මෙහෙයුම් මැදිරිය විසින් උතුරු ලටාකියාහි සිරියානු හමුදාවේ ස්ථාන වෙත ප්‍රහාර එල්ල කලේය.එහිදී සිරියානු සෙබලුන් ගණනාවක් සහ රුසියානු නිලධාරියෙක් තුවාල ලැබූ බවයි.ඊට ප්‍රතිචාර වශයෙන් පසුදා ගුවන් ප්‍රහාරය එල්ල කර තිබේ.

source:southfront.org

බෙලිකපන්නන්ගේ දිනපොත:සිරියාවේ ඉස්ලාමීය රාජ්‍ය ත්‍රස්තවාදීන්ගේ ප්‍රහාර- 2020 වසරේ සාරාංශය

noreply@blogger.com (Unknown) — Sun, 10 Jan 2021 07:52:00 +0000

පසුගිය වසරේ සිරියාව තුල සිදු කල සිය මෙහෙයුම්වල සාරාංශයක් ඉස්ලාමීය රාජ්‍ය ත්‍රස්තවාදීන් 2021 ජනවාරි මස 6දා අමාක් පුවත් සේවය හරහා ප්‍රසිද්ධ කර තිබිණි.එම වාර්තාවට අනුව ත්‍රස්තවාදීන් ගිය වසරේදී සිරියාවේ පළාත් හතක් ඇතුලත මෙහෙයුම් 593ක් සිදු කර ඇත.පහත ලැයිස්තු ගත කර තිබෙන්නේ ඒවාය.

ඩීර් එසෝර් - ප්‍රහාර 389ක්

රක්කා - ප්‍රහාර 59ක්

අල්-හසකා - ප්‍රහාර 38ක්

හෝම්ස් - ප්‍රහාර 38ක්

ඇලෙපෝ - ප්‍රහාර 36ක්

ඩාරා - ප්‍රහාර 29ක්

හමා - ප්‍රහාර 3ක්

අමාක් පුවත් සේවයට අනුව මෙම ප්‍රහාරවලින් 256ක් සඳහා යොදාගෙන තිබෙන්නේ මර උගුල්ය.ප්‍රහාර 123ක් ප්‍රහාරක මෙහෙයුම්ද ,191ක් ඝාතනද ලෙස දක්වා ඇත.

ත්‍රස්තවාදීන් පවසන පරිදි සියලු ප්‍රහාරවලින් මිය ගණන පහත දැක්වේ.

කුර්දි ප්‍රමුඛ සිරියානු ප්‍රජාතන්ත්‍රික හමුදාවේ සාමාජිකයෝ 901ක්

සිරියානු හමුදාවේ සෙබලුන් 407ක්

නිදහස් සිරියානු හමුදාවේ සටන්කරුවන් 19ක්

විනාශ කල වාහන ගණන 292කි. ඉන් 148ක් පික් අප් රථද,13ක් සන්නාහ සන්නද්ධ රථ වේ.

වැඩිම පිරිසක්,එනම් 764ක් පමණ මරා දමා තිබෙන්නේ ඩීර් එසෝර් හිදීය.එම පළාතේ නැගෙනහිර කොටස පාලනය කරන්නේ කුර්දි ප්‍රමුඛ සිරියානු ප්‍රජාතන්ත්‍රක හමුදා විසින්ය.නැගෙනහිර කොටස සිරියානු රජයේ පාලනය යටතේ තිබේ.

මෙම ප්‍රහාර එල්ල කිරීමේදී සහ රජයේ හමුදාවන්හි මෙහෙයුම් හමුවේ ත්‍රස්තවාදීන්ටද හානි සිදු වී ඇති මුත්,මෙවැනි වාර්තා හරහා ඔවුන් උත්සාහ දරන්නේ තම ආධාරකරුවන්ගේ චිත්ත ධෛර්යය වර්ධනය කිරීමටයි.

ඉස්ලාමීය රාජ්‍ය ත්‍රස්ත සංවිධානය නැවත නැගිටීමක් ඇතිවීමට ඉඩ තිබෙන්නේ ඩීර් එසෝර් සහ ඩාරා යන පළාත්වලයි.මෙම පළාත්වල සිරියානු රජය පාර්ශ්වයේ පිරිස් ඉලක්ක කර එල්ල වන ප්‍රහාර මෑත කාලීනව සිඝ්‍රයෙන් වර්ධනය විය.

2020 වර්ෂයේ මධ්‍යම සිරියාවේ ත්‍රස්ත ප්‍රහාර එල්ල වූ ස්ථාන සිතියම් ගත කිරීම

source:southfront.org

සිරියානු යුද වාර්තාව:ක්‍රමයෙන් ඉහළ යන සිරියාවේ තුර්කි හමුදා ශක්තිය

noreply@blogger.com (Unknown) — Sun, 10 Jan 2021 06:01:00 +0000

සිරියානු හමුදාව විසින් වටලා තිබූ සිය නිරීක්ෂණ මුරපොල රැසක් පසුගිය කාලයේ ඉවත් කර ගැනීමට තුර්කි හමුදාව කටයුතු කලද,ඉඩ්ලිබ් හි මුදානොගත් ප්‍රදේශයේ සිය ශක්තිය ක්‍රමයෙන් වැඩි කරන්නට තුර්කිය කටයුතු කරමින් සිටියි.

මෑතකදී තුර්කි හමුදාව අල්-සවියා උස්බිමට අමතර භට පිරිස් සහ යුදෝපකරණ යැවීය.එම ප්‍රදේශයට යැවූ යුදෝපකරණ අතර යුද ටැංකි සහ BMC කිර්පි සන්නාහ සන්නද්ධ රථ ඇතුලත් විය.අල්-සවියා උස්බිම පාලනය කරන්නේ අල්කයිඩාවට සම්බන්ධ හයාට් ටරිර් අල්-ෂාම් කණ්ඩායම සමග තුර්කියේ සහාය හිමි විමුක්තිය සඳහා ජාතික පෙරමුණ නම් සටන්කාමී කණ්ඩායමයි.පසුගිය මාස දෙකක කාලය තුල තුර්කිය මෙම ප්‍රදේශයේ සිය භට පිරිස් ප්‍රමාණය ඉහළ දැමුවේය.ඊට අමතරව එහි භට පිරිස් සඳහා ස්ථිරව රැඳී සිටීමට ස්ථාන කිහිපයක් පිහිටුවනු ලැබීය.

ඊට සමගාමීව,දකුණු ඉඩ්ලිබ් හි එම්4 මහා මාර්ගය ඔස්සේ සිය ස්ථානවල ශක්තිය වැඩි කිරීමට තුර්කි හමුදාව ක්‍රියාකාරී පියවර ගන්නා ලදි.මෑතකදී ඔවුන් එහි නිරීක්ෂණ කුළුණු ඉදි කිරීම ආරම්භ කලේ,එම ප්‍රදේශයේ පිහිටුවා තිබෙන ස්ථිර නිරීක්ෂණ මුරපොලවලට අමතරවයි.

නිරීක්ෂණ කුළුණක්

උතුරු සිරියාවේ තත්ත්වය තවමත් අස්ථාවරය.ජනවාරි 3දා අයින් ඉසා නගරය ආසන්නයේ තුර්කි ප්‍රොක්සි හමුදා සහ කුර්දි ප්‍රමුඛ සිරියානු ප්‍රජාතන්ත්‍රික හමුදා අතර ගැටුම් උත්සන්න විය.එම්4 මාර්ගය අවහිර කිරීමේ අරමුණින් යුතුව හ්ෂාන් සහ අල්-කාලිදියා ගම්මානා අල්ලා ගැනීමට තුර්කි ප්‍රොක්සි හමුදා උත්සාහ දැරීය.

තුර්කියට පක්ෂපාතී සටන්කාමීන් ඊසානදිග සිරියාවේ රුසියානු කඳවුරකට ප්‍රහාර එල්ල කිරීමෙන් පසුව

සටන් විරාම ගිවිසුම උල්ලංඝනය කරමින් උතුරු ඇලෙපෝ හි තුර්කි පාලනය යටතේ තිබෙන අල්-බාබ් නගරය අල්ලා ගැනීමට "බියගුලු" අෂාඩ් රෙජිමය සහ රුසියානුවන් සැලසුම් කරමින් සිටින්නේ යැ‍යි තුර්කියට පක්ෂපාතී ප්‍රචාරණ යන්ත්‍රය කියමින් සිටින අතරතුර මෙම ගැටුම් ආරම්භ විය.

සුල්තාන් එර්ඩොගන් අතේ දුරින් තබා ගන්නා අතරේ,සිරියාවෙන් කැබැල්ලක් ඩැහැ ගැනීමේ උත්සාහය කුර්දි සටන්කාමීන් අතහැර නොමැති බව පෙනේ.කුර්දි පාලනය යටතේ තිබෙන උතුරු සිරියාව වෙනම රාජ්‍යයක් ලෙස පිළිගන්න යැ‍යි සිරියානු ප්‍රජාතන්ත්‍රික හමුදාහි දේශපාලන අංශයේ නියෝජිත සිනම් මොහමඩ් දෙසැම්බර් මස 30දා,තේරී පත් වූ ඇමෙරිකානු ජනපති ජෝ බයිඩන්ගෙන් ඉල්ලා සිටියේය.සිරියාව තුල අනවසරයෙන් රැදී සිටින ඇමෙරිකානු හමුදාවට සහ යුප්‍රටීස් ගංගාවේ නැගෙනහිර ඉවුරේ සිරියානු බලශක්ති සම්පත් ඇමෙරිකානු පාලනය යටතේ තබා ගැනීමට කුර්දි සටන්කාමීන්ගේ සහාය ලැබේ.

මෙවැනි තත්ත්ව යටතේ,මෙම ප්‍රජාතාන්ත්‍රික ක්‍රියාමාර්ගවල සෘණාත්මක ප්‍රතිවිපාක නොදැක්කා සේ සිටීමට කුර්දි නායකත්වය ක්‍රියා කිරීම පුදුමයක් නොවේ.කුර්දි පාලන ප්‍රදේශයේ බහුතරය නියෝජනය කරන්නේ අරාබීන්ය.ඉස්ලාමීය රාජ්‍ය ත්‍රස්තවාදීන් නැවත මතු වීමට අවශ්‍ය වාතාවරණය එහි නිර්මාණය වීමට එක් හේතුවක් වන්නේ ඇමෙරිකානු හමුදාව සහ කුර්දි සටන්කාමීන්ගේ දෙබිඩි පිළිවෙතයි.කුර්දි සටන්කාමීන්ගෙන් අරාබි බහුතරයට සිදුවන අඩන්තේට්ටම්ද ඉස්ලාමීය රාජ්‍ය ත්‍රස්තවාදීන්ගේ නැවත නැගිටීමකට හේතුවනු ඇත.

2020 දෙසැම්බර් මස 3දා රක්කා-සලාමියා අතර මාර්ගයේදී ඉස්ලාමීය රාජ්‍ය ත්‍රස්තවාදීන්ගේ ප්‍රහාරයකින් විනාශ වූ රජයේ හමුදාවන්ට අයත් තෙල් ප්‍රවාහන රථ පෙළක්

මධ්‍යම සිරියාවේ ඉස්ලාමීය රාජ්‍ය ත්‍රස්තවාදීන්ට එරෙහි මෙහෙයුමට රුසියානු ප්‍රහාරක හෙලිකොප්ටර් යානාවල සහායද ලැබිණි.

රජයේ පාලන ප්‍රදේශ සහ යුප්‍රටීස් බටහිර ඉවුරේ සිරියානු හමුදා රැදී සිටින ප්‍රදේශ නිතිපතා ඉස්ලාමීය රාජ්‍ය ත්‍රස්තවාදීන්ගේ ප්‍රහාරවල තියුණු වර්ධනයේ ප්‍රතිවිපාක අත්විදිමින් සිටියි.අල්-මයාඩීන් සහ අල්-බුකමල් නගර අතර විශාල කාන්තාරයේ ඒකාබද්ධ මෙහෙයුමක් යළිත් ආරම්භ කරන්නට සිරියානු හමුදාව සහ ප්‍රාදේශීය සන්නද්ධ කණ්ඩායම් ජනවාරි 3දා ක්‍රියා කලහ.එහි අරමුණ වූයේ ඉස්ලාමීය රාජ්‍ය ත්‍රස්තවාදීන්ගේ තිප්පොල සොයා ගෙන විනාශ කිරීමයි.ත්‍රස්තවාදීන් ආරක්ෂිත භූමියක් වශයෙන් භාවිතා කරන ඇමෙරිකානු පාලන ප්‍රදේශය ඇතුලුව ඉරාක-සිරියා දේශසීමාවේ සම්පූර්ණ පාලනය සිරියානු රජයට යටතට නොගන්නා තෙක් මෙම ත්‍රස්ත තර්ජනය මුළුමනින්ම අවසන් කිරීමට ඉඩ නොලැබෙනු ඇත

source:southfront.org

ඉරානය හෙළිදරවු කල භූගත මිසයිල කඳවුර

noreply@blogger.com (Unknown) — Sun, 10 Jan 2021 03:36:00 +0000

ජනවාරි 8 වෙනිදා ඉරානයේ ඉස්ලාමීය විප්ලවවාදී ආරක්ෂක හමුදාව එරට හෝමොස්ගන් පළාතේ පර්සියානු බොක්ක ආසන්න වෙරළ තීරයේ පිහිටුවා ඇති භූගත මිසයිල කඳවුරක වීඩියෝපටයක් නිකුත් කලේය.

කඳවුර හෙළිදරවු කිරීමේ අවස්ථාවට ඉරාන ඉස්ලාමීය විප්ලවවාදී ආරක්ෂක හමුදාවේ ප්‍රධානී මේජර් ජෙනරල් හොසේන් සලාමි සහ රියර් අද්මිරාල් අලි රෙසා ටන්ග්සිරි සහභාගි වූහ.

වීඩියෝපටය ආරම්භය:කඳවුරේ දොරටුව අසල බිම ඊශ්‍රායලය සහ ඇමෙරිකානු ධඡයන් පින්තාරු කර තිබෙන අයුරු නිරීක්ෂණය කරන්න.

නසිරි සහ නූර් යන මිසයිල ඇතුලුව,දුසිම් ගණනක් ඉරාන නෞකා නාශක කෲස් මිසයිල කඳවුරු භූමියේ තිබෙන අයුරු වීඩියෝපටයේ දැකගත හැකිය.ඊට අමතරව මිසයිල දියත් කිරීමට යොදා උපකරණද ඇතුලත්ය.සමහරක් මිසයිල දියත්කරණයන් සිවිල් ට්‍රක් රථ ලෙස වෙස් ගන්වා ඇත.පෙනෙන හැටියට මෙම කඳවුර නිර්මාණය කර තිබෙන්නේ ඉරාන ඉස්ලාමීය ආරක්ෂක හමුදා නාවික හමුදාව සඳහා නෞකා නාශක මිසයිල ගබඩා කිරීමටයි.

එම හමුදාවේ ප්‍රධානිය පැවසුවේ මෙය තමන් සතු නාවික උපායමාර්ගික මිසයිල පහසුකම්වලින් එකක් බවයි.ඉරානයේ දිගු දුර මිසයිල,නිවැරදිව ඉලක්කවලට පහරදිය හැකි ඉහළ විනාශකාරී ශක්තියක් ඇති,ඉලෙක්ට්‍රොනික් සංග්‍රාමික උපක්‍රමවලට ප්‍රතිවිරෝධී ඒවා යැයි මේජර් ජෙනරල් සලාමි පැවසුවේය.

අලුතින් හෙලිදරවු කල කඳවුරේ පිහිටීම තවමත් හරි හැටි සොයා ගෙන නැත.නමුත් දැනට තිබෙන සීමිත තොරතුරු මත පදනම් වී ස්වාධීන නිරීක්ෂකයන් විසින් කඳවුර තිබිය හැකි යැයි අනුමාන කරන ප්‍රදේශයක් නම් කර තිබේ.

ඔවුන් පවසන පරිදි එය හෝමොස්ගන් පළාතේ කඳුවැටියක ඉදිකල එකකි.ඉරාන ඉස්ලාමීය විප්ලවවාදී ආරක්ෂක හමුදාවේ කඳවුරු කිහිපයක්ද පිහිටා ඇති,පසුගිය වසරේදී නූර් සහ අනෙකුත් මිසයිල යොදාගෙන යුද අභ්‍යාසයක් සිදු කල කෙෂ්ම් දූපත දැනට සැක කරන පිහිටුමයි.

වොෂින්ටනය පසුගිය වර්ෂයන්හිදී ඉරානය වෙත දේශපාලනික,ආර්ථික සහ යුදමය අතින් දැඩි පීඩනයක් එල්ල කලේ ඔවුන්ට සිය න්‍යෂ්ඨික වැඩසටහන,මිසයිල වැඩසටහන සහ කලාපය මත යොදන බලපෑම අතහරින්නට බල කරමින්ය.නමුත් ඒ වෙනුවට ඉරානය එම වැඩසටහන් තවත් වේගවත් කිරීමටත් කලාපය තුල සිය බලපෑම වැඩි කිරීමටත් ක්‍රියා කලේය.

මේ සතිය මුලදී ඉරාන හමුදව මහා පරිමාණ ඩ්‍රෝන් යුද අභ්‍යාසයක් සංවිධානය කලේ,එක්සත් ජනපදයට සහ එහි කලාපීය මිත්‍රයන්ට(විශේෂයෙන් ඊශ්‍රායලයට) පණිවුඩයක් වශයෙන් යැයි පෙනේ.

source:southfront.org

රුසියාව සතු එකම ගුවන් යානා ප්‍රවාහන නෞකාව අලුත්වැඩියා කටයුතු අතරතුර

noreply@blogger.com (Unknown) — Sat, 09 Jan 2021 14:37:00 +0000

රුසියාව සතු එකම ගුවන් යානා ප්‍රවාහන නෞකාව මේ වන විට අලුත්වැඩියා කරමින් තිබෙන අතර එය අත්හදා බැලීමේ චාරිකාවක් සඳහා මුහුදට පිවිසීමට නියමිතව තිබෙන්නේ 2022 වර්ෂයේදී යැ‍යි රුසියානු ටාස් පුවත් සේවය වාර්තා කලේය.

අද්මිරාල් කුස්ට්නෙට්සොව් නෞකාව අලුත්වැඩියා කරමින් තිබියදී ගිනි ගැනීමකට ගොදුරු වන්නේ 2019 දෙසැම්බර් මාසයේදීය.හදිසි සේවා වාර්තා කරන පරිදි ගින්න ආරම්භ වී තිබෙන්නේ ආරක්ෂක නීති උල්ලංඝනය කරමින් පෑස්සුම් වැඩ කිරීම නිසාය.ගින්න වර්ග මීටර් 500ක භූමි ප්‍රදේශයක පැතිර ගියේය.ඊට ගොදුරු වීමෙන් පුද්ගලයින් දෙදෙනෙක් මිය ගොස් 14ක් තුවාල ලැබූහ.නෞකාව දැන් තිබෙන්නේ රුසියාවේ වයඹදිග ප්‍රදේශයේ මර්මන්ස්ක් හිය.

අද්මිරාල් කුස්නෙට්සොව් යුද නෞකාව නාවික හමුදාවේ සේවයට එක් වන්නේ 1990 වර්ෂයේදීය.මෙම නෞකාව විස්ථාපනය කරන ජල ප්‍රමාණයේ බර ටොන් 58,000කි.දිගින් මීටර් 304.5 වන මෙහි එන්ජින් මගින් නිපදවෙන ශක්තිය අශ්ව බල 200,000කි.සුකොයි සහ මිග් ෆයිටර් ජෙට් යානා 24-26 සහ හෙලිකොප්ටර් යානා 12ක් රැගෙන නාවික සැතපුම් 30 උපරිම වේගයකින් යාත්‍රා කිරීමට සමත් මෙම ගුවන් යානා ප්‍රවාහන නෞකාව එම වර්ගයේ අනෙකුත් නෞකාවලින් වෙනස් වන්නේ සිය ආරක්ෂාව සඳහා ගුවන් ආරක්ෂක මිසයිල පද්ධති සහ නෞකා නාශක මිසයිලවලින් සන්නද්ධ නිසාය.

මෙය සතුව තිබෙන්නේ ඉහළ ආනත වූ කෙළවරක් සහිත ස්කි-ජම්ප් මාදිලියේ ධාවන පථයකි.පහත දැක්වෙන්නේ සමාජ ජාල වෙබ් අඩවි තුල සංසරණය වන අද්මිරාල් කුස්නෙට්සොව් නෞකාවේ නවතම ඡායාරූප පෙළකි.

source:tass.com

ඉරාක හමුදාවට වසර සියයක් සපිරෙයි

noreply@blogger.com (Unknown) — Sat, 09 Jan 2021 11:51:00 +0000

ඉරාක සන්නද්ධ හමුදාව පිහිටුවා 2021 ජනවාරි 6දා වසර සියයක් සපිරිණි.එය සැමරීම පිණිස ඉරාක හමුදාව බැග්ඩෑඩ් නගරයේ හරිත කලාපය නම් අධි ආරක්ෂක ප්‍රදේශය තුල යුද පෙළපාලියක් සංවිධානය කර තිබිණි.

පෙළපාලිය පැවැත්වුනේ ඉරාකයේ අගමැති මුස්තාෆා අල්-කඩිමිගේ ප්‍රධානත්වයෙනි.ඉරාක හමුදාවේ ප්‍රධානීන්,රජයේ අමාත්‍යවරුන් ඇතුලුව බලධාරීන් රැසක් උත්සව අවස්ථාවට එක් ව සිටියහ.

පෙළපාලියට ත්‍රිවිධ හමුදාවන්හි සාමාජිකයෝ,ගුවන් සහ පාබල හමුදාවල යුදෝපකරණ රැසක් එක් කරගෙන තිබිණි.

ඉරාකය සිය පළමු බලමුළුව පිහිටුවන්නේ බ්‍රිතාන්‍ය පාලනය යටතේ 1921 ජනවාරි 6දාය.

යුද පෙළපාලියට එක් කර තිබූ යුදෝපකරණවල ඡායාරූප එකතුවක් පහත දැක්වේ.

රුසියාවෙන් මිලදී ගත් ටී-90 යුද ටැංකි

Mi-28N හෙලිකොප්ටර් යානා

පැන්ට්සියර්-එස්1 ගුවන් ආරක්ෂක පද්ධති:මිසයිල සහ තුවක්කු රහිතව

TOS-1 රොකට් විදින රථ

Mi-28NE(වම්පස) සහ Mi-35 හෙලිකොප්ටර් යානා දෙකක්

එෆ්-16 ෆයිටර් ජෙට් යානා

මැෂින් තුවක්කුවලින් සන්නද්ධ හමිවී රථ

එක්සත් ජනපදයේ නිෂ්පාදිත M1A1M යුද ටැංකි

T-72M1 යුද ටැංකි

M109A5 මි.මී. 155 හොවිත්සර්

9M133 Kornet-E යුද ටැංකි නාශක මිසයිල

BMP-3M රථයක්

BMP-1 රථ පෙළක්

ඉන්ජිනේරු බලකා රථ

ත්‍රස්ත මර්ධන ඒකක සහ ඔවුන්ගේ සන්නද්ධ රථ

සියවන සංවත්සරයට සමගාමීව ඉරාකයේ මෝසූල් නගරයේ පැවැත්වූ යුද පෙළපාලියේ දර්ශන කිහිපයක් පහත දැක්වේ.මේ සඳහා එක්සත් ජනපදයෙන් ලැබුණු සහ මිලදී ගත් හම්වී ඇතුලුව සිවිල් රථ රැසක් සහභාගී කරගෙන තිබිණි.

මධ්‍යම අප්‍රිකානු ජනරජයේ අගමැතිට රුසියානු කුලී හේවායන්ගේ ආරක්ෂාව

noreply@blogger.com (Unknown) — Sat, 09 Jan 2021 04:53:00 +0000

රුසියානු පෞද්ගලික ආරක්ෂක කොන්ත්‍රාත්කරුවන් මධ්‍යම අප්‍රිකානු ජනරජයේ අගමැති ෆර්මින් නග්‍රබාඩාට ආරක්ෂාව සපයන අයුරු දැකගන්නට ලැබේ.

ජනවාරි මස 7දා ප්‍රකාශයට පත් කල ඇඳිරි නීතිය ක්‍රියාත්මක වන්නේ කෙසේදැයි පරීක්ෂා කිරීම සඳහා ජනවාරි 8දා එරට අගනුවර වන බන්ගුයි හි සංචාරයක යෙදී සිටි අගමැති නග්‍රබාඩාගේ ආරක්ෂාව සඳහා රුසියානු කුලී හේවායන්ද එක්ව සිටින අයුරු දැක්වෙන වීඩියෝ පට සමාජ ජාල තුල හුවමාරු විය.

පසුගිය මාසයේදී දෙවන වරටත් තේරී පත් වූ ජනපති ෆවුස්ටින්-ආර්චේන්ජ් ටුවඩෙරා රට පුරා ඇඳිරි නීතිය පනවන ලෙස නියෝග කලේ,කැරලිකාර කණ්ඩායම්වලින් එල්ල විය හැකි අලුත් ප්‍රහාර කෙරෙහි බියෙනි.

රුසියානු යුද උපදේශකයෝ සහ කුලී හේවායෝ මධ්‍යම අප්‍රිකානු ජනරජයේ රැඳී සිටින්නේ කාලයක පටන්ය.පසුගිය මාසයේදී රුසියාව යුද උපදේශකයෝ 300 දෙනෙක් එරටට යවන ලද්දේ කැරලිකරුවන්ගෙන් එල්ල වන පීඩනය ඉහළ යෑමත් සමගයි.

රජයේ ඉල්ලීම මත රුසියානු හමුදාව මධ්‍යම අප්‍රිකානු ජනරජයේ හමුදා සෙබලුන් පුහුණු කිරීමෙහි නිරතව සිටියි.ඒ අතරතුර,කුලී හේවායන් රජයේ ඉහළ පෙලේ නිලධාරීන්ට ආරක්ෂාව සලසයි.ඔවුහු කැරලිකරුවන් සමග ගැටුම්වලට පවා සහභාගී වූ බව වාර්තාවේ.

මෑත කාලීන වාර්තාවලට අනුව,2020 දෙසැම්බර් 31දා සිට ජනවාරි 1දා කාලය තුල රජයේ හමුදා,කැරලිකරුවන්ගෙන් එල්ල වූ දැවැන්ත ප්‍රහාරයක් ව්‍යර්ථ කරන ලද්දේ රුසියානු උපදේශකයන්ගේද සහාය ඇතිවයි.

මෙහෙයුම් සඳහා සහභාගී වූ රුසියානු කුලී හේවායෝ

බන්ගුයි නගරයේ සිට කි.මී. 750ක් නැගෙනහිරින් වූ බැන්ගාසු හැර රටේ අනෙක් ප්‍රදේශවල කැරලිකරුවන්ගේ ප්‍රගතියක් නැතැයි එක්සත් ජාතීන්ගේ සංවිධානයේ සාම සාධක මෙහෙයුම් මධ්‍යස්ථානය පවසයි.කෙසේවෙතත්,නුදුරේදිම ගැටුම් යළි ආරම්භ විය හැකිය.

source:southfront.org

දකුණු කොරියාව හඳුන්වාදෙන නවතම රොබෝ රථ

noreply@blogger.com (Unknown) — Fri, 08 Jan 2021 16:20:00 +0000

දකුණු කොරියාවේ හන්වා ඩිෆෙන්ස් සිස්ටම්ස් නම් යුදෝපකරණ නිෂ්පාදන සමගාම ජනවාරි මස 6දා ප්‍රවර්ධන වීඩියෝ පටයක් හරහා නවතම උපායමාර්ගික මිනිසුන් රහිත ගොඩබිම් රථ පෙළක් හඳුන්වා දුන්නේය.

සම්පූර්ණයෙන් දේශීයව සැලසුම් කරන ලද මෙම ගොඩබිම් මූලික සංග්‍රාමික රොබෝ පද්ධතීන් විවිධ කටයුතු සඳහා විශේෂයෙන් නිමවා ඇත.

ප්‍රවර්ධන විඩියෝ පටයේ,නිරීක්ෂණ සහ ඔත්තු බැලීම් සඳහා ගොඩබිම් රොබෝවෙක්,සංග්‍රාම භූමියේ දී සෘජු සහාය ලබා ගැනීමට බහු කාර්ය රොබෝවෙක් සහ බිම් බෝම්බ ඉවත් කිරීම සඳහා තවත් රොබෝවෙක්ද දැකගත හැකිය.

බිම්බෝම්බ සහ අනෙකුත් පුපුරණ ද්‍රව්‍ය සොයාගෙන ඉවත් කිරීමට හැකියාව ඇති රොබෝවෙක් දේශීය තාක්ෂණය සමග සංවර්ධනය කිරීම සඳහා දකුණු කොරියාවේ යුදෝපකරණ ප්‍රසම්පාදන කාර්යාංශය දේශීය සමාගමක් සමග කොන්ත්‍රාත්තුවක් අත්සන් කරන ලද්දේ 2020 නොවැම්බර් මාසයේදීය.

වොන් බිලියන 18ක් එනම් ඇමෙරිකානු ඩොලර් මිලියන 16ක් වටිනා ව්‍යාපෘතියක් යටතේ,උතුරු කොරියානු මායිමේ බිම්බෝම්බ ඇතිරූ යුද මුක්ත කලාපයේ සහ අනෙකුත් අන්තරායදායි ප්‍රදේශවල සැරිසරමින් පුපුරණ ද්‍රව්‍ය සොයාගෙන විනාශ කල හැකි රොබෝවෙක් සංවර්ධනය කිරීමට හන්වා ඩිෆෙන්ස් සිස්ටම් සමාගම සැලසුම් සකස් කලේ යැයි වාර්තා වේ.

හන්වා සමාගම මේ සඳහා මූලික පර්යේෂණ සිදු කරන්නේ 2017 වර්ෂයේ සිට යැයි ජාතික ආරක්ෂක අමාත්‍යාංශයේ ආරක්ෂක ප්‍රතිග්‍රහණ වැඩසටහන් පාලනාධිකාරිය නම් ශාඛාව පවසයි.

එරටින් ලැබෙන වාර්තාවලට අනුව බිම්බෝම්බ හඳුනා ගැනීමේ කාර්යයේදී දකුණු කොරියානු හමුදාව අතේ ගෙන යා හැකි බිම්බෝම්බ හඳුනා ගැනීමේ උපකරණ සහ ආනයනය කල රොබෝවන් මත යැපේ.හඳුනා ගැනීමේ උපකරණ භාවිත කිරීමේදී සෙබලුන්ට හානි සිදුවීමේ හැකියාව තිබේ.ආනයනය කරන රොබෝවන්ගේ මිල ගණන්ද ඉහළය.

දේශීයව නිෂ්පාදනය කෙරෙන රොබෝවක් මගින් සිදුවිය හැකි මිනිස් ජීවිත අහිමි වීම් වළක්වා ගැනීමටත්,පුපුරණ ද්‍රව්‍ය සාර්ථක හඳුනා ගැනීමේ අවස්ථාව වැඩි කර ගැනීමටත් ඉඩ ලැබේ.එමෙන්ම අපේ ආරක්ෂක හැකියාවන්ගේ අභිවෘද්ධියට උදව්වකි.

සමාගමේ බලධාරීන්ට අනුව මෙම රොබෝ රථ පෙළෙහි සංවර්ධන කටයුතු අවසන් කිරීමට නියමිතව තිබෙන්නේ 2023 ජූනි මාසයේදීය.ක්‍රියාන්විත මෙහෙයුම් සඳහා යොදවනු ඇත්තේ 2024 වර්ෂයේදී පමණය.

හන්වා ඩිෆෙන්ස් සිස්ටම්ස් සමාගමේ නිල වෙබ් අඩවියේ මේ ව්‍යාපෘතිය යටතේ නිපදවෙන රොබෝවන් ඇතුලත් වේ.එහි දැක්වෙන රොබෝ පද්ධති හයක් පහත ලැයිස්තු ගත කර තිබේ.

බහුකාර්යය මිනිසුන් රහිත රථය:පාබල හමුදා කණ්ඩවලට අවශ්‍ය සංග්‍රාමික අඩුවැඩිය විශාල ප්‍රමාණවලින් ප්‍රවාහනය කිරීමට යොදා ගත හැකි රථයකි.මෙය සතුව වෙඩි බලයක් ද තිබේ.

මිනිසුන් රහිත සෙවුම් රථය:මෙය මධ්‍යම/විශාල ප්‍රමාණයේ සංග්‍රාමික රොබෝ පද්ධතියකි.යාන්ත්‍රික ඒකක සමග උපාය මාර්ගික මාර්ග,සංවර්ධනය නොකල/රළු මාර්ග ආදියේ මෙහෙයුම් කල හැකි එකකි.දුරස්ථපාලනය යටතේ සෙවුම්/ඔත්තු බැලීම්,ප්‍රහාර සඳහා මාර්ගෝපදේශනය සැපයීම ආදිය සඳහා මෙම රථය භාවිතා කල හැකිය.වැදගත් කුඩා කඳවුරු,මුරපොල ආදී වැදගත් පහසුකම්වල ආරක්ෂාව සඳහා යෙදවීමට පුලුවනි.මෙය ආරක්ෂක විද්‍යා පර්යේෂණ අධ්‍යයනායතනයේදී සංවර්ධනය කෙරෙමින් තිබේ.

කුඩා ඔත්තු බැලීමේ රොබෝව:මෙය කුඩා ප්‍රමාණයේ ඔත්තු බැලීමේ රොබෝවකි.මුර සංචාරක සෙබලුන්,රැක සිට පහරදීමකට ලක් වූ අවස්ථාවකදී භාවිතා කල හැකිය.මෙය තවමත් සංවර්ධනය කරමින් පවතියි.

බිම්බෝම්බ හඳුනාගැනීම සහ ඉවත් කිරීමේ රොබෝව:නාගරික සහ කඳුකර ප්‍රදේශවලදී ජංගම ඒකකවල ප්‍රහාරක සහ ආරක්ෂක මෙහෙයුම්වලට සහාය ලබා දෙයි.මෙම රොබෝව දුරස්ථව පාලනය කෙරේ.එයට ඔත්තු බැලීම,නිරීක්ෂණය,තර්ජන හඳුනාගෙන ඇඟවීම,බිම්බෝම්බ සහ පුපුරණද්‍රව්‍ය තිබෙන ස්ථාන පුරෝකථනය ආදී කාර්යයන් කල හැකිය.

මර උගුල් හඳුනා ගැනීමට ඉවත් කිරීමට හැකි රොබෝව:තනි සෙබලෙකුට හැසිරවිය හැකි කොරියානු පන්නයේ මර උගුල් හඳුනාගෙන ඉවත් කල හැකි රොබෝවකි.

ස්මාට් අත් බෝම්බ රොබෝව:මෙම රොබෝව දුරස්ථව පාලනය කල හැකි අතර එහි කඳුළු ගෑස් හෝ අධිබල පුපුරණ ද්‍රව්‍ය සහිත බෝම්බ රැදවිය හැකිය.ඉන්පසුව ඔත්තු බැලීම හරහා හඳුනාගත් සතුරු සහ ත්‍රස්ත ඉලක්ක වෙත නිවැරදිව ප්‍රහාර එල්ල කිරීමට යෙදවේ.

මේ සියලු රොබෝ පද්ධතීන් මනා හැකියාවෙන් යුක්ත බව පෙනෙන අතර ඉතා ඉක්මණින් මිනිසුන් රහිත පද්ධති වෙළඳපොලට පිවිසෙනු ඇතැයි අනුමාන කල හැකිය.

source:southfront.org

බෙලිකපන්නන්ගේ දිනපොත:ඊජිප්තු හමුදාවට එරෙහිව ඉස්ලාමීය රාජ්‍ය ත්‍රස්තවාදීන්ගේ ප්‍රහාර

noreply@blogger.com (Unknown) — Fri, 08 Jan 2021 05:58:00 +0000

ඊජිප්තුවේ සිනායි අර්ධද්වීපයේ දී ඊජිප්තු හමුදාවේ වාහනයක් ඉලක්ක කරගෙන ඉස්ලාමීය රාජ්‍ය ත්‍රස්තවාදීන් එල්ල කල මර උගුල් ප්‍රහාරයකට අදාල ඡායාරූප කිහිපයක් අමාක් නම් පුවත් සේවය විසින් ජනවාරි 7දා ප්‍රසිද්ධ කරන ලදි.

ත්‍රස්තවාදීන්ගේ ඉලක්කය වූයේ උතුරු සිනායි හි රෆා නගරයේ බටහිර කොටසේ අල්-නුෆාලා මුර පොල ආසන්නයේ ධාවනය වෙමින් තිබූ ආර්ජී-33 වර්ගයේ සන්නාහ සන්නද්ධ රථයකි.ප්‍රහාරය එල්ල වී තිබුණේ ජනවාරි 6 වෙනිදාය.මර උගුල් ප්‍රහාරයත් සමග වාහනය පිපිරී ගිනි බෝලයක් නිර්මාණය කරමින් එහි කැබලි සී සී කඩ විසිරී යන අයුරු දැකගත හැකිය.

ජනවාරි 7දා එම ප්‍රදේශයේදීම දෙවන ප්‍රහාරයකුත් එල්ල වී තිබේ.එවර ඉස්ලාමීය රාජ්‍ය ත්‍රස්තවාදීන්ගේ මර උගුලක ඉලක්කය වූයේ හමුදාවට අයත් බුල්ඩෝසරයකි.

මෙම ප්‍රහාර දෙක මේ සතිය තුල සිනායි අර්ධද්වීපයේ සිදු කල දෙවන සහ තුන්වන ප්‍රහාරයි.ජනවාරි 4දා බිර් අල්-අබ්ඩ් නගරයේ දකුණු දෙසින් වූ ටවුෆහා නගරය ආසන්නයේදී රථයක් ඉලක්ක කර මර උගුල් ප්‍රහාරයක් එල්ල විය.

පසුගිය වසර තුල පමණක් ඉස්ලාමීය රාජ්‍ය ත්‍රස්තවාදීන් සිනායි අර්ධද්වීපය තුල මර උගුල් ප්‍රහාර දුසිම් ගණනක් සිදු කර තිබේ.අවම අවදානමක්,අඩු වියදමක් දරමින් සතුරාට වැඩි හානියක් කල හැකි උපක්‍රමයක් ලෙස මොවුන් මර උගුල් භාවිතා කරයි.

සිනායි අර්ධද්වීපය තුල ඉස්ලාමීය රාජ්‍ය ත්‍රස්තවාදීන්ගේ ප්‍රහාර බහුල ප්‍රදේශ රතු පැහැ‍යෙන් සලකුණු කර ඇත

දැනට සිනායි ප්‍රදේශයේ ක්‍රියාත්මක ඊජිප්තු හමුදාවේ මෙහෙයුම් නිසා ඉස්ලාමීය රාජ්‍ය ත්‍රස්තවාදීන්ට පීඩනයක් එල්ල වී තිබෙන මුත්,මෙම ත්‍රස්ත කල්ලියේ තර්ජනය කලාපය තුල ක්‍රමයෙන් වර්ධනය වන බව පෙනේ.

source:southfront.org