വകതിരിവുകള്‍

പൊന്നാനിയിലെ മാനഭംഗവും സ്വീഡന്‍ കോടതി വിധിയും.

noreply@blogger.com (Qasim) — Mon, 22 Feb 2010 12:23:00 +0000

പൊന്നാനി കടപ്പുറം കാണാന്‍ വന്ന യുവതിയെ കാമുകന്റെ മുന്‍പില്‍ വെച്ച് പീഢിപ്പിക്കുകയും അത് മൊബൈല്‍ ഫോണില്‍ പകര്‍ത്തി ബ്ലൂടൂത്ത് വഴിയും ഇന്റര്‍നെറ്റു വഴിയും പ്രദര്‍ശിപ്പിക്കുകയും ചെയ്ത കൊടും ക്രൂരത അറിഞ്ഞ് പെണ്ണും പെങ്ങന്മാരും പെണ്മക്കളുമുള്ളവരടക്കം ആകാംക്ഷയോടെ ചോദിച്ച ഒരു ചോദ്യമുണ്ടായിരുന്നു...ആ പെണ്‍കുട്ടിയെ ഏതായാലും തിരിച്ചറിയാതെ പോയി, പക്ഷെ ആ പ്രതികളോ?
അവരെ ശിക്ഷിക്കാതിരിക്കുന്നതിന്റെ കാരണമെന്താ?

അതിനുള്ള അധികാരികളുടെ മറുപടി കേട്ട് ആ വാദകോലാഹലങ്ങള്‍ തല്‍ക്കാലം കെട്ടടങ്ങി... പെണ്‍കുട്ടിയ്ക്ക് പരാതിയില്ലെങ്കില്‍ പിന്നെ എന്തു ചെയ്യും എന്ന് നിഷ്പക്ഷ വിലയിരുത്തലില്‍ ഒത്തിരി ചിന്തകള്‍ പതിയിരിക്കുന്നുണ്ട്. വേദനയോടെ ആ വാര്‍ത്ത മറക്കാന്‍ ശ്രമിക്കാം.ആ സഹോദരിയോടു മാപ്പും ചോദിക്കാം... ഒരു പക്ഷെ ആ യുവതി തനിയ്ക്ക് പരാതിയുണ്ടെന്ന് പറഞ്ഞ് പ്രത്യക്ഷപ്പെട്ടാല്‍ നമ്മുടെ മാധ്യമപ്പട ഒരിക്കല്‍ കൂടി അവരുടെ തോലുരിക്കൈല്ലെന്ന് പറയാനാവില്ലല്ലൊ... ജീവിതം മാനക്കേടില്‍ തളച്ച് അതില്‍ ഒടുങ്ങാതിരിക്കാന്‍ ബുദ്ധിപ്പൂര്‍വ്വം തെരെഞ്ഞെടുത്ത വഴിയായിരിക്കാമിത്. അതോടൊപ്പം പ്രതികളെന്ന് സംശയിച്ച് പോലീസ് പിടിച്ചവരെ നാടൊട്ടുക്ക് കാണാന്‍ കഴിഞ്ഞതു വഴി ആ യുവാക്കാള്‍ക്കും കുടുമ്പത്തിനും വന്ന മാനഹാനി ഒരു ശിക്ഷയായി തന്നെ തീരട്ടെ.. അതു വഴി കുറ്റം ചെയ്തു പോയതില്‍ പശ്ച്ചാത്തപിച്ച് നന്നാകുകയെങ്കിലും ചെയ്യട്ടെ.
പൊന്നാനിയില്‍ പീഢനത്തിനു ഇരയായ പെണ്‍കുട്ടിയ്ക്ക് പരാത്തിയില്ലാത്തതിനാല്‍ പ്രതികള്‍ രക്ഷപ്പെട്ട വാര്‍ത്തയോര്‍ത്ത് വ്യാകുലപ്പെടുമ്പോഴാണു പരാതിയുമായി ചെന്നിട്ടും പ്രതിയെ വെറുതെ വിട്ട കഥ കേട്ട് അന്ധാളിച്ചു പോയത്.
സംഗതി ഇവിടെയൊന്നുമല്ലെന്ന് ആശ്വസിക്കാം.
സ്വീഡനിലെ ഹാംസ്റ്റഡ് (Halmstad)ജില്ലാ കോടതിയാണിങ്ങനെ ഒരു വിചിത്രമായ വിധി പുറപ്പെടുവിച്ചത്.
പുതുവര്‍ഷം ആഘോഷിക്കാന്‍ കാമുകന്റെ ക്ഷണം സ്വീകരിച്ചെത്തിയ 17-കാരിയായ കാമുകിയ്ക്കാണീ ദുരന്തമുണ്ടായത്.കാമുകന്‍ ആഘോഷത്തിലും അതിനിടയ്ക്ക് കാമുകി ക്ഷീണിതയായി മയങ്ങിപ്പോവുകയും ചെയ്ത സന്ദര്‍ഭത്തിലാണു സംഭവം.കാമുകന്റെ അച്ചന്‍ ഉറങ്ങിക്കിടന്ന പെണ്‍കുട്ടിയുടെ വസ്ത്രം നീക്കി നഗ്നയാക്കി ചിത്രങ്ങള്‍ എടുക്കുകയും ഇന്റര്‍നെറ്റിലൂടെ പരസ്യപ്പെടുത്തുകയും ചെയ്തു എന്നാണു കേസ്.
കോടതി വിധി ഞെട്ടിപ്പിക്കുന്നതായിരുന്നു.ആളുകളുടെ ഫോട്ടോ എടുക്കുന്നതിന്നു പൊതുവെ നിയമവിരുദ്ധമായ ഒന്നുമില്ലെന്നിരിക്കെ ഉറങ്ങിക്കിടയ്ക്കുന്ന ഒരാളുടെ ചിത്രമെടൂക്കുന്നതിലും പ്രത്യേകിച്ച് കുറ്റമൊന്നുമില്ലെന്നുമാണു പ്രസ്തുത കോടതി സുപ്രിം കോടതിയിലെ മറ്റൊരു വിധി ഉദ്ധരിച്ചു കൊണ്ട് പ്രസ്താവിച്ചത്.ലൈംഗീകപ്രവര്‍ത്തനത്തിനിടയില്‍ പങ്കാളി അറിയാതെ വീഡിയോയില്‍ പകര്‍ത്തിയെന്ന കേസ്സില്‍ പ്രതിയെ കുറ്റവിമുക്തനാക്കി എന്ന വിധിയാണു ഹാംസ്റ്റഡ് കോടതി വിധിക്കടിസ്ഥാനമായി ചൂണ്ടിക്കാട്ടിയത്.!!
നമുക്കു നമ്മെ ഓര്‍ത്ത് നിസ്സഹയരായ പെണ്ണുങ്ങളെ ഓര്‍ത്ത് അവരുടെ പാവം കാമുകന്മാരെ ഓര്‍ത്ത് സഹതപിക്കാം..

More Reading:
1.Ponnani beach women rapping news
2.Taking naked pictures of sleeping teen not a crime: Court

നങ്ങേലിയും കര'ഘോഷ'വും..

noreply@blogger.com (Qasim) — Sun, 21 Feb 2010 23:01:00 +0000

വിഖ്യാത ചിത്രകാരന്‍ വിന്‍സെന്റ് വാന്‍ ഗോഗും ആലപ്പുഴക്കാരി നങ്ങേലിയും തമ്മില്‍ എന്തു ബന്ധമാണുള്ളത്?

ഒരാള്‍ തന്റെ ചെവി അരിഞ്ഞെടുത്ത് ഒരുസ്ത്രീയ്ക്ക് മുന്നില്‍ വെച്ചു... മറ്റേയാള്‍ തന്റെ മുലയരിഞ്ഞ് ഒരു പുരുഷനു മുന്നില്‍ വെച്ചു... അത്രമാത്രം..
സ്വന്തം കാമുകി റേച്ചലിനു സമ്മാനമായി സ്വന്തം ചെവിതന്നെ അറുത്ത് നല്‍കിയ വാന്‍ ഗോഗിന്റെ ചരിത്രം ഹൈസ്കൂള്‍ ക്ലാസുകളുടെ ആരംഭകാലത്തു തന്നെ മഹച്ചരിതമാലയില്‍ നിന്ന് അത്ഭുതാവേശത്തോടെയാണു വായിച്ചത്.. എന്റെ ചെവി പലപ്പോഴും ഞാന്‍ അതിനുശേഷം പിടിച്ചു നോക്കിയിട്ടുണ്ട്.. എന്തൊരു ധൈര്യം വാന്‍ ഗോഗിനു എന്നോര്‍ത്ത് വിട്ടുകളയലാണപ്പോഴൊക്കെ...

പിന്നെയാണറിഞ്ഞത് മാനസീകവും ശാരീരികവുമായ (ലൈംഗീകവും--തുടര്‍ച്ചയായ വേശ്യാസമ്പര്‍ക്കവും-സിഫിലിസും)രോഗങ്ങളാല്‍ വട്ട് പിടിച്ച് നില്‍ക്കണ സമയമായിരുന്നു അതെന്ന്..

അപ്പോള്‍ നങ്ങേലിയുമായി അദ്ദേഹത്തിന്റെ ചരിത്രത്തിനു യാതൊരു ബന്ധവുമില്ല...
കാരണം ഒന്ന് ഭ്രാന്തമായ സ്നേഹം.. മറ്റൊന്നു ഭരണകൂടത്തോടുള്ള ശക്തമായ പ്രതിഷേധവും പ്രതികാരവും..ഇല്ല ആരുമായിട്ടും താരതമൃം ചെയ്യാനാവാത്ത ചരിത്രമാണു നങ്ങേലിയ്ക്കുള്ളത്..

ഒരു മഹച്ചരിത മാലയിലും അത് രേഖപ്പെടുത്തിയില്ലെന്നതാണു വാസ്തവം!!.

റോമാ സാമ്രാജ്യം കത്തിയെരിയുമ്പോള്‍ വീണ വായിച്ചെന്നറിയപ്പെട്ട നീറോ ചക്രവര്‍ത്തി മൂത്രമൊഴിക്കുന്നതിനു കരം(Urine tax) ചുമത്തിയിരുന്നു.ആളുകള്‍ മൂത്രമൊഴിച്ചത് ശേഖരിച്ച് തുകല്‍ ഊറക്കിടുന്നതിന്നും വസ്ത്രനിര്‍മ്മാണത്തിനും ആ മൂത്രമുപയോഗിക്കാന്‍ ഈ ഒന്നാം നൂറ്റാണ്ടുകാരന്‍ ആഞ്ജാപിച്ചിരുന്നു.(വിരോധാഭാസം... മലമൂത്രത്തിനു നമ്മില്‍പെട്ട ചിലര്‍ നികുതി കൊടുത്തു തുടങ്ങിയിരിക്കുന്നു ഈ അത്യന്താധുനിക യുഗത്തില്‍.. ചരിത്രം ആവര്‍ത്തിക്കുകയാണോ?)

പിന്നെ താടിയ്ക്കു കരം (Beard Tax) ചുമത്തിയിരുന്ന താടിക്കാരനായ ഹെന്‍റി എട്ടാമനും റഷ്യന്‍ നാടുവാഴി സാര്‍പീറ്റര്‍ ഒന്നാമനും (Csar Peter I )... വീടിന്റെ ജനലിന്നു നികുതിയടക്കാനും (Window Tax) അടുപ്പിനു നികുതിചുമത്താനും(Hearth Tax) ചരിത്രത്തില്‍ ഭരണാധികാരികളുണ്ടായിരുന്നു. ആത്മാവില്‍ വിശ്വസിക്കുന്നവര്‍ സോള്‍ ടാക്സടക്കാന്‍ (Soul Tax) ഉത്തരവിട്ടത്...ഇതെല്ലാം വിദേശങ്ങളിലായിരുന്നു.

നങ്ങേലി എന്ന് ആദ്യം കേള്‍ക്കുന്നത് ചട്ടമ്പിക്കല്ല്യാണിയിലെ 'നാലുകാലുള്ളൊരു...' എന്നുതുടങ്ങുന്ന പാട്ടില്‍ നിന്നാണു.. അതു ചട്ടമ്പിക്കല്യാണി ആയിരുന്നതിനല്‍ 'കല്യാണി' എന്നു പേരുള്ള ഒരു സഹാപാഠിയേയും ഓര്‍മ്മവരും നങ്ങേലിയായിട്ട്..

അന്നും അതിനുശേഷവും കല്യാണിയുടെ മുല ഞാന്‍ ശ്രദ്ധിച്ചിരുന്നു. അതിന്റെ ഭാഗത്ത് ഒന്നും ഇല്ലെന്നതിനാല്‍.. ആണുങ്ങള്‍ വസ്ത്രം ധരിച്ചാലെന്ന പോലെ ആയിരുന്ന് അവളും ധരിച്ചിരുന്നത്.. അല്ലെങ്കില്‍ തന്നെ ഏഴാം ക്ലാസില്‍ പഠിക്കുന്ന കല്യാണിയ്ക്ക് മുല വരാറായിട്ടേ ഉണ്ടാകുമായിരുന്നുള്ളു.

നമുക്കും ഉണ്ടായിരുന്നു ഒരു നീറൊ ചക്രവര്‍ത്തി.അദ്ദേഹം നികുതി ചുമത്തിയിരുന്നത് നേരത്തെ പറഞ്ഞിട്ടുള്ള ജനലില‍ന്നും മൂത്രത്തിനുമായിരുന്നില്ലെന്ന് മാത്രം.

മുലക്കായിരുന്നു കരം,!! മുലക്കരം(Breast Tax).പത്തൊമ്പതാം നൂറ്റാണ്ടിന്റെ തുടക്കത്തിലാണിതെന്നോര്‍ക്കണം.!!

താടിയ്ക്ക് റഷ്യന്‍ ചക്രവര്‍ത്തിമാര്‍ ഓര്‍ത്തഡോക്സ് പുരോഹിതന്മാര്‍ക്കിളവു ചെയ്ത് കൊടുത്ത പോലെ തിരുവിതാംകൂറിലെ ഭരണാധികാരിയായ ഒരു തിരുനാള്‍ അരുളപ്പാടു ചെയ്തു. താഴ്ന്ന ജാതിയില്‍ പെട്ട ദളിത് ഈഴവസ്ത്രീകള്‍ മാറുമറക്കാന്‍ പാടില്ല... അഥവാ മറക്കണമെന്നുള്ളവര്‍ മുലയുടെ അളവും രൂപവുമനുസരിച്ച് നികുതി അടക്കാന്‍ ബാധ്യസ്ഥരുമാണു...

ആര്‍ക്കും എതിര്‍വായില്ലാത്ത തിരുവാ..മാറു മറച്ച് പുറത്തിറങ്ങുന്ന സ്ത്രീകളുടെ മേല്‍ ചാടി വീണു നികുതി പിരിക്കാന്‍ പ്രത്യേക ഉദ്യോഗസ്തന്മാര്‍.

ആണായിപ്പിറന്നവരൊക്കെ ഭയന്ന് നടന്ന കാലം...നങ്ങേലിയുടെ പ്രസക്തി ചരിത്രം രേഖപ്പെടുത്താതെ പോയതും ആ ഭയപ്പാടിന്റെ പ്രതിധ്വനിയാലാണു.. അല്ലെങ്കില്‍ ആരാണോ ചരിത്രം സൃഷ്ടിച്ച് അതിനൊപ്പം നടക്കേണ്ടത് എന്ന് തീരുമാനിച്ച് നടക്കുമ്പോള്‍ അതിനെതിരെ സംഭവിക്കുന്നതൊന്നും രേഖപ്പെടുകയുമില്ലല്ലൊ.

ചേര്‍ത്തലയില്‍ താമസിക്കുന്ന നങ്ങേലിയ്ക്ക് അപ്പോള്‍ പ്രായം മുപ്പത്തഞ്ച്.. മുലക്കരം പിരിക്കാന്‍ കുടിലിനു മുന്നില്‍ വന്ന ഉദ്യോഗസ്ഥന്‍. നിലവിളയ്ക്ക് കത്തിച്ച് വാഴയിലയില്‍ കൊണ്ടു വെയ്ക്കുന്ന പണം കാത്തു നിന്ന അയാള്‍ക്കുമുന്‍പില്‍ ചടങ്ങൊന്നും തെറ്റിക്കാതെ വാഴയിലയില്‍ ആ ഈഴവ യുവതി വെച്ചു നീട്ടിയത് സ്വന്തം മുലയായിരുന്നു..!! ഭയന്ന് വിറച്ച ഉദ്യോഗസ്ഥന്റെ മുന്നില്‍ ചോരവാര്‍ന്ന് പിടഞ്ഞു മരിച്ചു. തന്റെ പ്രിയപ്പെട്ടവളുടെ വേര്‍പാടില്‍ മനംനൊന്ത് നങ്ങേലിയുടെ ഭര്‍ത്താവു കണ്ടപ്പന്‍ ആ ചിതയില്‍ ചാടി ജീവനൊടുക്കി.

നാടുവാഴിക്കെതിരെ നിശ്ശബ്ദമായി പ്രതികരിച്ച ആ ധീരവനിത ചരിത്രത്തിലെ തിളങ്ങുന്ന ആദ്യ വിപ്ലവ വനിതാരത്നമായിരുന്നു.

തിരുവിതാംകൂര്‍ ദിവാന്‍ മണ്‍റോ സായിപ്പ് സമ്മര്‍ദ്ദം ചൊലുത്തി ആ കരിനിയമം അവസാനിപ്പിക്കാന്‍ ശ്രമിച്ചെങ്കിലും റാണിലക്ഷ്മീഭായി തമ്പുരാട്ടി അത് വകവെയ്ക്കാതെ മുന്നോട്ട് പോയി...ഹെന്‍റി എട്ടാമന്‍ എന്ന താടിക്കാരന്‍ രാജാവു താടിയ്ക്ക് കരമേര്‍പ്പെടുത്തിയത് പോലെ മുലക്കരം പിരിവ് മലയാളവര്‍ഷം 986 വരെ ഈ മുലയുള്ള മഹതി രാഞ്ജിയും മുന്നോട്ടു കൊണ്ടു പോയി...!!

ചരിത്രം മറന്ന നങ്ങേലിയെ ചരിത്രത്തോടൊപ്പം പില്‍ക്കാലകേരളവും മറന്നുവെങ്കിലും ചേര്‍ത്തലക്കാരിയായി ജനിച്ച മറ്റൊരു വിപ്ളവ നായിക കെ ആര്‍ ഗൗരി അമ്മ അവരെ ഇടയ്ക്ക് ഓര്‍മ്മിക്കുകയുണ്ടായി.. പിന്നെ സീ രാധാകൃഷ്ണനും....

നമുക്ക് നന്ദി പറയാനുള്ളതും അവരോട് തന്നെ. ഒപ്പം മുല അരിഞ്ഞു രക്തം വീണു ചുവന്ന ആ 'മുലച്ചി പറമ്പ്' വാങ്ങി ആ ധീരവനിതയ്ക്ക് സ്മാരകം തീര്‍ത്ത കേശവന്‍ വൈദ്യര്‍ക്കും.