ATENEO FOTOGRÁFICO

Fontes do río Sil

noreply@blogger.com (job - José Manuel Ortigueira Bobillo) — Tue, 25 Jun 2024 18:19:00 +0000

Se vas de Ponferrada a Babia levas sempre o Sil á túa beira, ata que chegas á ponte das Palomas. Alí hai 20 millóns de anos o Bierzo sufriu unha serie de cambios tectónicos que permitiron a captura dos regos da cabeceira do río Luna. De xeito parello o regueiro que baixa pola Cueta converteuse na fonte do Sil, co seu nacedoiro nas abas de Pena Orniz.

A esta lección de xeoloxía súmase outro agasallo da flora, a Saxifraga babiana, que medra en matogueiras entre as rochas calizas. A súa forma compacta, xunto coas súa follas pequenas e carnosas, impide a desecación excesiva e supón unha defensa adicional contra o frío.

Nuns poucos quilómetros cadrados entre Babia e Somiedo podes atopar máis de 70 cumios cunha altura superior aos 2.000 metros, é o territorio ideal para os rebecos.

Conta con 3 horas para ir da Cueta á Pena Orniz, pasando por Covalancha. Alí arriba asistirás atónito a unha sinfonía de 360 graos, podes dar varias voltas e identificar as Ubiñas, Cervata, Albos, Pena Chana, Calabazosa... E non perdas a ocasión de coñecer a Lagoa das Verdes, protexida polo Montihuero. O ideal é saír de Torre de Babia e deixar que a natureza te inunde coa súa enerxía. Chegarás a un lugar telúrico.

E se buscas un sitio con persoas encantadoras alóxate no Aposento de Babia, en Quintanilla.

Imaxes:

1.- Río Sil na ponte das Palomas.

2.- Saxifraga babiana no lago Calabazosa.

3.- Las Morteras dende La Cueta.

4.- Covalancha.

5.- Androsea villosa.

6.- Pena Orniz dende Cuetalbo.

7.- Panorámica dende Pena Orniz.

8.- Musgos do nacedoiro do Sil.

9.- Espadaña do Montihuero e Agulla das Coloradas custodiando a Lagoa das Verdes.

Para coñecer a vida microscópica das Fontes do Sil consulta as imaxes e textos de Antonio Guillén e do seu "PROYECTO AGUA".

Enciña da Lastra

noreply@blogger.com (job - José Manuel Ortigueira Bobillo) — Tue, 14 May 2024 18:34:00 +0000

A flora do parque natural da Serra da Enciña da Lastra maniféstase en todo o seu esplendor no mes de maio.

A sensación é de estar nun lugar único, cos sentidos agasallados por unha sinfonía de cores e sons de paxaros e insectos.

Antes de chegar a Vilardesilva podes parar no miradoiro da Portela e contemplar Penarrubia, a serra da Cabrera e os arribes do Sil. A aldea ten un encanto especial e dúas fontes. Na de abaixo escomenza o sendeiro a Covas, no que poderás observar media ducia de especies de orquídeas.

Nas inmediacións de Covas destacan os soutos de castiñeiros e o forno de cal. E xa sobrepasada a aldea, dous tesouros máis, unha sobreira e unha aciñeira monumental que dá nome ao parque natural.

Polo camiño hai roseiras silvestres, cantroxos, nazarenos, soaxes, trevos, chuchameis, carpazas mouras, leiterenas, papoulas, múltiples flores que inundan os nosos ollos.

Os substratos xeolóxicos que se atopan no parque natural son unha das súas peculiaridades. O compoñente máis relevante son as rochas calcarias e dolomías, compostas por carbonato cálcico as primeiras e carbnonato cálcico e magnésico, as segundas.

Outra das características esenciais desde espazo é a súa mediterraneidade, con baixas precipitacións e contraste climático acusado.

Conservemos o parque natural da Serra da Enciña da Lastra, biodiversidade en estado puro.

Imaxes:

1.- Mapa do parque natural Serra da Enciña da Lastra. Sendeiro Vilardesilva - Covas.

2.- Panorámica de Vilardesilva co cumio e encoro de Penarrubia.

3.- Forno de cal de Covas.

4, 5, 6.- Orquídeas: Ophrys scolopax (orquídea arcea), Ophrys sphegodes (abelleira escura), Aceras anthropophorum (flor do home aforcado).

7.- Tronco de castiñeiro con nogueira okupa.

8 e 9.- Sobreira e aciñeira monumental de Covas.

10.- Silene vulgaris.

11.- Muscari comosum (nazareno).

Paxaros do monte Iroite

noreply@blogger.com (job - José Manuel Ortigueira Bobillo) — Mon, 16 May 2022 07:45:00 +0000

Para ver a ría de Muros e Noia completa hai que subir ao monte Iroite (miradoiro da Balconada). Pero se te asomas pola vertente sur tamén contemplas a ría de Arousa e chegas a divisar as illas Ons e Cíes.

Dende o cumio baixan os paxaros en parapente ata a praia da Aguieira, con pouco vento o percorrido dura uns 10 minutos.

E alá arriba, a máis de 600 metros, varias greas de cabalos aproveitan a herba namentres as crías descansan.

Senda do Castro de Baroña

noreply@blogger.com (job - José Manuel Ortigueira Bobillo) — Sun, 23 May 2021 18:51:00 +0000

Un pequeno percorrido con encanto en Porto do Son (A Coruña).

Praia, castro e coído. Desde o outeiro podes ver Monte Louro e no fondo, Fisterra (segunda imaxe).

No camiño interior, a igrexa de San Pedro de Baroña, co cruceiro dos Milagres e unha agrupación de hórreos de hai 100 anos.

Párate na aldea para ver a sobreira. E cando remates podes ver con calma o castro, ideal para un solpor.

Duración aproximada: dúas horas, sobre terra, area e pedras.

Outono nos parques de Compostela

noreply@blogger.com (job - José Manuel Ortigueira Bobillo) — Sun, 01 Nov 2020 17:58:00 +0000

Estamos nun dos mellores momentos do ano para percorrer os parques de Compostela. Campus Sur, Galeras, Parque Xixón, Almáciga, Bonaval, Belvís, Brañas do Sar, Eugenio Granell. Podes facer un itinerario urbán á túa medida, de dez ou doce quilómetros sen saír das sendas marcadas.

E unha recomendación máis, emprega a Guía verde de Santiago de Compostela, de María Isabel Fraga, editada por Alvarellos.

Imaxes:

1.- Mapa do itinerario verde urbán.

2.- Arces de Bonaval.

3.- Carballeira de San Lourenzo.

4.- Ginkgos da Almáciga.

5.- Paulonia tomentosa (Bonaval).

6.- Escaleira de Bonaval.

7.- Indicación "Déixaos cruzar" (Sar, Auditorio).

Fotógrafos de paxaros

noreply@blogger.com (job - José Manuel Ortigueira Bobillo) — Sun, 06 Sep 2020 20:31:00 +0000

A organización inglesa "Bird Photographer of the year" (Fotógrafo de paxaros do ano) outorgou os premios 2020.
Trátase dunha asociación de fotógrafos da natureza, de carácer conservacionista.
Contan coa colaboración de Swarovski Optik, Alamy, Gitzo e Country Innovation.
Entre os gañadores de 2020 atopamos a Kiko Arcas, fotógrafo vigués, ornitólogo. Ralizou diversos traballos científicos sobre ecoloxía das especies, co seu irmán Xosé, doutor en bioloxía e artista da natureza.

Aí vai unha pequena escolma da edición deste ano.
Para ver todas as fotos, entra na web oficial Bird Photographer of the year.

Imaxes por categorías:

1.- Retratos. Copyright Majed Alza´abi. Kuwait. Foto gañadora
2.- Atención ao detalle. Copyright Moshe Cohen. Israel. Foto gañadora.
3.- Urbáns. Copyright Kiko Arcas. España
4.- Medio ambiente. Copyright Swayamsiddha Mohapatra. India.
5.- Branco e negro. Copyright Robert Sommer. Alemaña. Foto gañadora

Monsaraz, vila medieval

noreply@blogger.com (job - José Manuel Ortigueira Bobillo) — Sun, 26 Apr 2020 17:03:00 +0000

Son tempos para lugares únicos, íntimos, pequenos, fermosos.

Todos estes epítetos poden aplicarse a Monsaraz, vila medieval do Alentejo interior.

Un lugar luminoso, cheo de encanto.

Entramos pola Porta da Vila, percorremos as súas rúas e chegamos ao Castelo, verdadeiro niño de aguias.

Paga a pena baixar á praia fluvial do lago Alqueva, no río Guadiana, e contemplar as estrelas desde o observatorio astronómico.

Outros lugares interesantes do Alentejo son Estremoz, coa súa impresionante pousada e Vila Viçosa, co pazo ducal.

Imaxes:
1.- Monsaraz ao lonxe.
2.- Porta da Vila.
3.- Rúa de Santiago.
4.- Arcos.
5.- Lago Alqueva e observatorio astronómico (Río Guadiana).
6.- Pousada de Estremoz.

Máis imaxes na galería de Flickr.

Epicentro

noreply@blogger.com (job - José Manuel Ortigueira Bobillo) — Mon, 06 Apr 2020 17:41:00 +0000

Dicía Elliott Erwitt: “A fotografía é a arte da observación. Trátase de atopar algo interesante nun lugar ordinario. Ten pouco que ver coas cousas que ves e moito con como ves as cousas”.

Desde Bangalore a Buenos Aires, o planeta está descoñecido na súa realidade externa, non hai actividade nas rúas, prazas e estradas. Pero continúa moi vivo no interior das nosas vivendas.

Aquí quedan retratados os merecidos aplausos das oito da tarde, as compras dos supermercados e farmacias, o que vemos desde as nosas ventás, os traballos de microscopía e pintura. Namentres, a primavera boreal e o outono austral continúan o seu curso.

Esta é unha crónica visual das nosas vidas, tan iguais e tan diferentes. No epicentro desta realidade extraordinaria.

Imaxes:

1.- Pintando na casa.Taller de Graciela Bello. Buenos Aires

2.- Proyecto Agua. Homenaxe "Día mundial da auga". Antonio Guillén. Información detallada en Flickr.

3.- Bangalore, lugar de contrastes. Sen tráfico. Sharanya Nambiar.

4.- Farmacia do Porto. Joaquim Hierro Lopes.

5.- Gato paralizado. José María Gasalla.

6.- Aplausos ás oito da tarde. Pza. Nosa Señora da Mercé. Santiago. Manuel Fraga Carou.

7.- Sombra. Ramón Neira Torviso.

8.- Atención on line. Follas Novas. Agustín Pena Herva.

9.- Leña. Carmina Casal Nogueira.

10/11.- Primavera. Ramón Neira /Agustín Pena.

12.- Desde a miña ventá. Catedral de Santiago. Roberto Almuíña.

Coa colaboración do grupo de sendeirismo de Alumni USC, familiares e amigos do Ateneo Fotográfico.

Máis imaxes na galería de Flickr.

Confraternidade

noreply@blogger.com (job - José Manuel Ortigueira Bobillo) — Thu, 19 Mar 2020 17:42:00 +0000

Esta imaxe representa a mellor maneira de desexarvos ánimo nas circunstancias actuais.

Con ela quero transmitir a confraternidade no camiño.

Forma parte da exposición "Camiño de Inverno, de Ponferrada a Compostela", promovida por Alumni USC e patrocinada polo Xacobeo 21 (Xunta de Galicia), Oca Hotels e La Galiciana.

Subín con José Rúa, autor da primeira guía do Camiño de Inverno, ao Pico Sacro e alí apareceu de casualidade Antonio Cañete, despois de facer moitos quilómetros de camiño en solitario para chegar a Compostela.

Antonio aceptou encantado o retrato co mestre. José xa fixo 14 veces o Camiño de Inverno.

E finalmente outro pequeno agasallo, a saída do sol no Pico Sacro nos primeiros días do ano, despois do solsticio de inverno.

Francisco Almuíña

noreply@blogger.com (job - José Manuel Ortigueira Bobillo) — Sun, 08 Mar 2020 20:18:00 +0000

Esta é unha pequena homenaxe a Francisco Javier Almuíña Chorén (Francisco do Romualdo), unha persoa fóra de serie, que destaca pola súa xenerosidade e solidariedade.

Trátase dun dos heroes e anfitrións do Camiño de Inverno, de Ponferrada a Compostela, proxecto expositivo promovido por Alumni USC (Asociación de Antigas/os Alumnas/os da Universidade de Santiago de Compostela).

Francisco preside a Asociación Ribeira Sacra Rural, agrupación empresarial de aloxamentos de turismo rural e empresas de actividades e deportes de aventura na Ribeira Sacra.

É guía turístico e zanfonista da Casa do Romualdo. Na exposición aparece na lareira da Casa do Romualdo.

Coñece mellor ca ninguén cada recuncho das beiras do Miño e da Ribeira Sacra. Unha palpable demostración é a terceira das imaxes, na que guía a un grupo de persoas, coa fotógrafa Mónica R. Goya, autora da reportaxe "La armonía de Ribeira Sacra" para Iberia Excelente.

Exposición Camiño de Inverno, de Ponferrada a Compostela.
Hotel Oca Puerta del Camino. Santiago de Compostela.
Ata o 31 de de marzo. Entrada de balde. Horario: 24 horas.
Segunda imaxe: Belesar no outono.

Exposición Camiño de Inverno

noreply@blogger.com (job - José Manuel Ortigueira Bobillo) — Sun, 09 Feb 2020 10:42:00 +0000

A Asociación de Antigos Alumnos da Universidade de Santiago de Compostela (Alumni USC) prepara unha exposición sobre o Camiño de Inverno, de Ponferrada a Compostela.

Está patrocinada polo Xacobeo 21 (Xunta de Galicia) e conta con aportación económicas complementarias de Oca Hotels e LA GALICIANA.

Participan na mostra con obxectos propios o Ecomuseo Pazo de Arxeriz e o Museo Etnográfico Municipal de Quiroga.

Esta iniciativa está respaldada polas asociacións vinculadas ao Camiño de Inverno: El Bierzo, Valdeorras e Ribeira Sacra.

Alumni USC asumiu o reto de plasmar nunha exposición a realidade actual do Camiño de Inverno, destacando o traballo das persoas que contribúen ao seu desenvolvemento, con especial atención á economía rural e social.

Poderá verse durante todo o mes de marzo no hotel Oca Puerta del Camino, de Santiago de Compostela. A inauguración está prevista para o 29 de febreiro.

Imaxes:

1.- Logotipo da exposición deseñado por Ana Cividanes.

2.- Campás de Santa María de Nogueira de Miño (Chantada). Unha das imaxes da mostra.

Máis información: elcompostelano.online (Manuel Fraga Carou).

Ricard Terré. Fotografías

noreply@blogger.com (job - José Manuel Ortigueira Bobillo) — Sun, 29 Sep 2019 19:31:00 +0000

Primeira mostra individual de Ricard Terré en Santiago de Compostela.

Catalán de nacemento e galego de adopción desde 1959, ano no que traslada a súa residencia a Vigo, de onde era a súa muller.

A obra deste artista revela un profundo coñecemento da vida, sempre en clave de humor.

Nesta exposición destaca un conxunto de "Imaxes Abandonadas", retratos de imaxinería captados nas sancristías da diocese de Tui. Están instaladas na parte frontal do retablo, co que conviven en harmonía.

Esta mostra está promovida polo Ateneo de Santiago, coa colaboración da Universidade de Santiago, Concello de Santiago e Deputación da Coruña. Comisaria: Laura Terré.

Imaxes:

1.- Fotografía de referencia da exposición. Copyright Ricard Terré.

2.- Vigo 1956. Copyright Ricard Terré.

3.- Os rapaces de Sant Boi de Llobregat.Copyright Ricard Terré.

4/5.- Inauguración da exposición.

Máis imaxes na galería de Flickr.

Pode verse ata o 9 de novembro, na Igrexa da Universidade, a 50 metros do Arco de Mazarelos.

Vía Láctea, guía de peregrinos a Galicia

noreply@blogger.com (job - José Manuel Ortigueira Bobillo) — Thu, 12 Sep 2019 19:25:00 +0000

Magnífica exposición dirixida por Alfonso Freire (Lúdica Libros), no Pazo de Fonseca de Santiago de Compostela.

As fotografías son de Daniel Llamas e Daniel Lois, integrantes de Enfoque Nocturno, especialistas en astrofotografía.

Nos textos colaborou María Victoria Veguín Casas, escritora e catedrática de Matemáticas.

A mostra quere destacar a importancia da Vía Láctea como guía dos peregrinos a Compostela.

Imaxes:

1.- Fisterra - Copyright Daniel Lois.
2.- Vista da exposición no claustro alto do Pazo de Fonseca
3.- Illas Cíes - Copyright Daniel Llamas.

Esta exposición conta co respaldo financeiro do Xacobeo 21, a través do programa "O teu xacobeo".
Remata o 26 de setembro.

Fundación Enaire 2019

noreply@blogger.com (job - José Manuel Ortigueira Bobillo) — Sun, 28 Jul 2019 08:20:00 +0000

A Fundación Enaire expón no Real Xardín Botánico de Madrid os premios de fotografía 2019.

Os gañadores desta edición foron Jorge Fuembuena (Fire), Antonio Pérez (Un sueño en el Museo del Louvre) e Mara León (Pieza 014).

Esta mostra está acompañada polo proxecto "La sonrisa incisa" de Javier Vallhonrat, un traballo de 10 anos no glaciar da Maladeta, nos Pirineos. O autor fai fincapé na súa vulnerabilidade e progresiva desaparición.

Estas exposicións están integradas no programa de PHotoESPAÑA 2019.

Imaxes:
1.- Fire - © Jorge Fuembuena
2.- Figuras decorativas - © Verónica Vicente
3.- Entre la niebla y el agua - © Carmen Isasi
4.- Rótulo exposición
5.- Cuerpos transitorios - © Javier Vallhonrat
6.- Políptico #6, 2017 - © Javier Vallhonrat
7.- Exposición "La sonrisa incisa" - © Javier Vallhonrat

Cuntis, carreira e andaina

noreply@blogger.com (job - José Manuel Ortigueira Bobillo) — Sun, 07 Jul 2019 18:03:00 +0000

Celebrouse hoxe unha nova edición da carreira e andaina de Cuntis, promovida polo Xesteiras CDM.

Magnífico ambiente nunha xornada festiva na que primou a participación de corredores de toda Galicia.

A parte final do percorrido fíxose polas ribeiras do Umia e Gallo. Os organizadores colocaron un banco xusto onde conflúen os ríos. Un lugar idóneo para una boa merenda.

Parabéns a toda a organización e a todas aquelas personas que colaboran para que estas probas se realicen.

Moita saúde e que cante o merlo.

Imaxes:
1.- Corredores, antes da saída.
2.- Ribeira do Umia, bosque de Osmunda regalis.
3.- Banco de madeira na confluencia do Gallo co Umia.
4.- Corredores da provincia da Coruña.
5.- Integrantes de Coutadas, de Vigo.

De Espasante ao Barqueiro

noreply@blogger.com (job - José Manuel Ortigueira Bobillo) — Sun, 16 Jun 2019 18:40:00 +0000

Dentro do proxecto de Camiños Naturais do Ministerio de Agricultura, Pesca e Alimentación destaca o Camiño do Cantábrico, 150 quilómetros de sendeiros litorais de Ortigueira a Ribadeo, moi ben sinalizados.

Se imos de Espasante ao Barqueiro, percorremos unha costa accidentada, moi fermosa, chea de praias e cantís, sempre coa vista posta nos Aguillóns de Ortegal.
Hai unha ducia de miradoiros, cada un máis espectacular que o anterior.
Non perdas de vista Pena Furada e o embarcadoiro das Furnas, que ofrece unha paisaxe doutro planeta.
Á metade do camiño, párate uns minutos no mellor banco do mundo, en Loiba, lugar moi cotizado tamén durante a noite para observar a Vía Láctea.
Nestas terras reinou o suevo Remismundo, home de mal carácter. Cando sopra o vento, os veciños din que se escoitan os lamentos da súa muller, Hidelfrida, que saen dunha cova da serra.

Imaxes:
0.- Panel informativo
1.- Casa da Vela e Cariño
2.- Praia de Fábrega e Coitelo
3.- Praia das Furnas
4.- Areal de Esteiro
5.- Faro de Estaca de Bares

Máis fotografías na galería de Flickr.

De Corme a Laxe, polo Camiño dos Faros

noreply@blogger.com (job - José Manuel Ortigueira Bobillo) — Sun, 26 May 2019 19:55:00 +0000

A Asociación de Antigos Alumnos da Universidade de Santiago (Alumni USC) está de festa, rematou o Camiño dos Faros, entre Malpica e Fisterra.

Para ter a mellor vista da ría de Corme e Laxe hai que subir ao monte Castelo.

Despois de pasar polo Roncudo, percorremos as praias de Corme ata chegar a Balarés e Monte Branco, lugar idóneo para contemplar a desembocadura do Anllóns.

E xa que estamos aquí iremos ao Castro de Borneiro e ao Dolmen de Dombate, a catedral megalítica galega.

Os fermosos areais de Rebordelo e San Pedro son o mellor aperitivo para chegar a Laxe, que ten praia, faro e un porto abrigado.

A ría de Laxe e Corme supón unha experiencia única para os sentidos, o valor dunhas terras e mares cargados de maxia, tradicións e mitos.
Necesitarás dous días para facer este percorrido completo.
Unha recomendación final, alóxate e reláxate no hotel Playa de Laxe.

Máis información na web do Camiño dos Faros.

Imaxes:
1.- O Roncudo desde Punta do Cabalo.
2.- Praia da Ermida (Corme).
3.- Piraguas de Balarés.
4.- A ría de Corme e Laxe desde Monte Branco.
5.- Dolmen de Dombate.
6.- Praias de Rebordelo e San Pedro.
7.- Castro de Borneiro.
8.- Praia de Laxe.

Fuciño do Porco

noreply@blogger.com (job - José Manuel Ortigueira Bobillo) — Sun, 28 Apr 2019 19:00:00 +0000

A ría de Viveiro ábrese entre Punta Socastro e Punta Roncadoira.

Desde a praia da Abrela, a un par de quilómetros de distancia, avístase o Fuciño do Porco.

Por unha zigzagueante senda non paras de mirar a un e outro lado.

Paisaxe sonora e visual, unha festa para os sentidos.

Imaxes:
1.- Do Fuciño do Porco á Punta Roncadoira.

2.- No Fuciño do Porco.

3.- Illa Coelleira.

4.- Punta da Abrela.

5.- Praia da Pereira.

Toques, megalitos e fervenzas

noreply@blogger.com (job - José Manuel Ortigueira Bobillo) — Sun, 31 Mar 2019 11:28:00 +0000

Dous sendeiros en Toques que pagan a pena.

A serra do Careón marca o límite das provincias da Coruña e Lugo.

O Furelos gaña enerxía cinética nunha das fervenzas máis fermosas de Galicia.

E non moi lonxe, na meseta, o dolmen do Forno dos Mouros, que ten uns 5.000 anos.

É preciso mellorar o mantemento dos sendeiros e a colocación das marcas.

Imaxes:
1.- Fervenza e muíño de Brañas (Toques).
2.- Camiño da Fervenza.
3.- Dolmen de Forno dos Mouros.
4.- Ponte do Rego da Vela.
5.- Paisaxe de Brañas.

Crónica de Manuel Fraga Carou (elcompostelano.com)

O Fórum dos sentidos

noreply@blogger.com (job - José Manuel Ortigueira Bobillo) — Sun, 17 Mar 2019 19:25:00 +0000

Acaba de celebrarse na Coruña a edición 2019 do Fórum Gastronómico.

Resultou gañador do certame "Cociñeiro do ano" Alén Tarrío, de Pampín (Santiago de Compostela).

Tres días con múltiples actividades e con maior presenza de expositores.

Se queres revisar o programa, podes facelo na web oficial do Fórum Gastronómico.

Imaxes:

1.- Preparacións Dos Palillos. Barcelona.

2.- Cata de Aceites Abril.
3.- Xarda con alga, e aceite de oliva virxe extra Hojiblanca. A Horta d'Obradoiro.

4.- Alén Tarrío. Copyright Fòrum Gastronòmic.

De Cambados a Santiago, polo camiño de Martín Sarmiento

noreply@blogger.com (job - José Manuel Ortigueira Bobillo) — Sun, 03 Mar 2019 19:39:00 +0000

A Asociación de Antigos Alumnos e Amigos da Universidade de Santiago de Compostela rematou o camiño Martín Sarmiento.

Entre Cambados e Santiago hai tres casas singulares, de ilustres escritores, Valle-Inclán, Rosalía de Castro e Camilo José Cela. Non deixes de visitalas, as tres son moi interesantes.

En Catoira destaca o seu paseo fluvial, que precisa de mellores conexións.
En Carril, non te esquezas de ir a Cortegada e contemplar as Malveiras.
De Padrón a Santiago, o sendeiro coincide co camiño portugués, pasa por Iria Flavia, a Escravitude e o Pazo do Faramello.

Máis información na web da Mancomunidade do Salnés.

Imaxes:
1.- Con dos Tres Pés, Illa de Arousa.
2.- Praia Pasaxe - Terrón, coa ponte da Illa de Arousa.
3.- Casa de Valle-Inclán.
4.- Cortegada e as Malveiras.
5.- Paseo fluvial de Catoira e camiño de ferro.
6.- Torres do Oeste, de Catoira.

Castelao maxistral

noreply@blogger.com (job - José Manuel Ortigueira Bobillo) — Sun, 27 Jan 2019 18:47:00 +0000

Para celebrar o Día de Castelao —que coincide coa data do seu nacemento, 30 de xaneiro— a Cidade da Cultura de Galicia inicia o ciclo Diálogos ao redor de Castelao, un espazo de conversa, análise e reflexión.

Ata o 3 de marzo pode visitarse no Museo Centro Gaiás da Cidade da Cultura Castelao maxistral, unha exposición que exhibe por vez primeira en Galicia a obra icónica 'A derradeira leición do mestre', debuxada na Arxentina en 1945 polo artista de Rianxo, en homenaxe ao seu amigo e mestre Alexandre Bóveda, fusilado o 17 de agosto de 1936.

A exposición céntrase na escola da época e na relación de Castelao coa docencia.

Comisario: Miguel Anxo Seixas.

Imaxes:

1.- Cartel de entrada á exposición.
2.- Ollomol, unha das obras de Castelao.
3.- Galería da exposición.
4.- A derradeira leición do mestre.
5/6.- Visitantes. Copyright Manuel G. Vicente + Fundación Cidade da Cultura de Galicia.

Con do Corvo

noreply@blogger.com (job - José Manuel Ortigueira Bobillo) — Tue, 22 Jan 2019 18:55:00 +0000

Hai unha senda moi interesante do Petón Con Negro ao porto de Pedras Negras. Unha parte dela sobre area e terra, e outra sobre madeira.

Se saímos do porto percorremos as praias de Abelleira e Canelas, fermosos lugares, con vistas á illa de Ons.

E como remate a praia do Con do Corvo, na bocana da ría de Arousa. Na liña visual da Curota, atopamos a illa Pombeiro. O Camiño de Martín Sarmiento dá a volta completa á península do Grove.

Máis imaxes na galería de Flickr.

Camiñantes

noreply@blogger.com (job - José Manuel Ortigueira Bobillo) — Fri, 28 Dec 2018 18:28:00 +0000

Últimos días para ver a exposición de Tino Martínez no Museo das Peregrinacións e de Santiago.

Tino aproveita toda a súa experiencia vital e profesional para retratar aos peregrinos, verdadeiros protagonistas do Camiño de Santiago.

A mellor maneira de despedir o ano, unha camiñada! Que cante o merlo.

Imaxes:

1.- Tino Martínez. Fondo: Santo Domingo de la Calzada.

2.- Portomarín (2008).

3.- Charlotte Maria Jensen, peregrina.

4.- Vista da exposición.

Imaxes da inauguración da exposición, copyright Aigi Boga.

Todas as fotografías orixinais son de Tino Martínez.

Xardín Botánico de Xixón

noreply@blogger.com (job - José Manuel Ortigueira Bobillo) — Mon, 03 Dec 2018 19:06:00 +0000

En 2003 abriu as súas portas o Xardín Botánico de Xixón.

En total, 25 hectáreas cheas de vida e natureza. Incorpora nas súas coleccións o Xardín da Illa, con máis de 150 anos, e La Carbayeda del Tragamón, con árbores de ata 400 anos.

É un momento de contrastes cromáticos. Aí tes un agasallo, enmarcados o ginkgo e a pereira de flor.

Que cante o merlo.

Imaxes:

1.- Plano do Xardín Botánico

2.- Cyathea cooperi

3.- Acer palmatum Viridis

4.- Pyrus calleryana

5.- Ginkgo biloba

6.- Panorámica desde La Laboral

Toda a información na web oficial do Xardín Botánico de Xixón.