குறிப்புகள் சில

அரசியல் நாடகம் அரங்கேறுகிறது.

noreply@blogger.com (அருண்) — Thu, 17 Feb 2011 03:51:00 +0000

தமிழக மீனவர்கள் இலங்கை கடற்படையினரால் சுட்டுக்கொல்லப்படும் போதெல்லாம் இது மத்திய அரசுக்கும் இலங்கை அரசுக்கும் இடையிலான ஒரு எழுதப்படாத ஒப்பந்தம்னு நினைச்சிகிட்டு இருந்தேன்.ஆனா இப்பதான் தெரியுது? அடப்பாவிகளா இவிங்களுமா!!?
தமிழக மீனவர்கள் 106 + 26 பேர் பருத்தித்துறை மீனவர்களால் சுற்றி வளைத்து பிடிக்கப்பட்டனராம்.இது தான் இப்போதைய எபிசொட். கதை,திரைக்கதை,வசனம்,இயக்கம் யாருன்னும் நடிப்பு யாருன்னும் மக்களுக்கு தெளிவாவே தெரியும்.ஆட்சியையும் அதிகாரமும் தன்னோட கையில இருக்கும் போது தன் மகளின் கைதுக்கு தந்தையே கண்டனம் தெரிவிக்கிறாராம்.இது போக எல்லா சேனல்களிலும் பிளாஷ் நியூஸ் இத் தான்.இலங்கையிலும் அனைத்து ஊடகங்களிலும் தலைப்பு செய்தி -
மீனவர் கைதை எதிர்த்து இலங்கை துணை தூதரகத்தை முற்றுகை இட்ட கனிமொழி எம்.பி உள்ளிட்ட பதினையாயிரம் பேர் காவல் துறையால் கைது செய்யப்பட்டனர்.
அந்தம்மா யாருன்னு தெரியாதவங்களுக்கு அடுத்த பிட்டு -
இவர் தமிழக முதல்வர் கலைஞர் கருணாநிதியின் மகள் ஆவார்.
இது போக கைது செய்யப்பட்ட மீனவர்களை அமைச்சர் டக்ளசும் பார்வையிட்டாராமாம்.
நமக்கு தான் நல்லாவே தெரியுமே கலைஞரய்யா கதை,திரைக்கதை,வசனம் எழுதுற திரைப்படங்கள்ல அவரது கொள்கைகளை ஆமோதிக்கிற!!? ஒரு பெரிய நடிகர் கூட்டமே நடிக்கும்னு.இப்போ ரீசண்டா வெளிவந்து இமாலய வெற்றி!!? அடைந்த "இளைஞன்" பார்த்தவங்களுக்கு தெரிஞ்சிருக்கும்.
ஏற்கனவே ஈழத்தமிழனின் இறுதி யாத்திரை மீது அரசியல் நடத்தியவர்கள் இப்போது தமிழக மீனவனையும் அடமானம் வைத்து விட்டார்களா?
அல்லது உண்மையாலுமே இலங்கை மீனவர்களுக்கும் தமிழக மீனவர்களுக்கும் பிரச்சினையா?
அப்பிடி ஒரு பிரச்சினை இருக்குனா அதை பற்றி நிருபமா ராவ் இலங்கை வந்த போது பேசவில்லையா?பேசியும் வெளியே சொல்லாமல் நிருபமா மௌனம் காத்து விட்டாரா?
என்னுள் தொக்கி நிற்கும் ஆயிரம் டாலர் கேள்விகள் இவைதான்? பதில நீங்க தான் சொல்லணும்.
ஆனா ஒன்னு தமிழனுக்கு விடிவு காலம் கண்ணுக்கெட்டுன தூரம் வரைக்கு தெரியல...

மெழுகுவர்த்தி அணைந்து விட்டது...

noreply@blogger.com (அருண்) — Mon, 14 Feb 2011 06:21:00 +0000

இன்னைக்கு வெள்ளிக்கிழமை,இந்த நாட்டுல எல்லாத்துக்குமே லீவு.
இப்போ நா ரூம்ல தனியாத்தான் இருக்கேன்,ரூம் மேட் வெளியில போயிருக்கான்.
சின்ன வயசுல இருந்தே எனக்கும் எங்க வீட்டுக்கும் ஏழாம் பொருத்தம் தான்.அப்பா,அம்மா சொல்றத கேட்டதே கிடையாது.அப்பா ரொம்ப கோவக்காரரு, ஆ ஊனா அடிதான்.நெறைய வாங்கிருக்கேன்.ஒரு நாள் பிரம்பெடுத்து விளாசி தள்ளிட்டாரு,ஒரே அழுகை,என்ன பண்றதுனே புரியல.வீட்ட விட்டு ஓடிட்டேன்.அட ரொம்ப தூரமெல்லாம் கிடையாது.அஞ்சு நிமிசந்தான்,பெரியம்மா வீட்டுக்கு.ஏன்னா அங்கதான் பெரியம்மா பொண்ணு,என் அக்கா இருப்பாங்க.
அவங்கதான் எனக்கு இருக்க ஒரே ஆறுதல்.வயித்துல பொறக்கலையே தவிர அவங்கதான் எனக்கு அம்மா.அஞ்சு ரூபா,பத்து ரூபான்னு வீட்ல குடுக்கும் போது எம்மேல நம்பிக்கை வைச்சு ஐநூறும்,ஆயிரமும் கொடுப்பாங்க.நான் அடிக்கடி என்னோட செல்போன மாத்திகிட்டே இருப்பேன்.ஏன்னு கேக்காம பணம் கொடுப்பாங்க.காதலிச்சாங்க,அவரையே கல்யாணமும் பண்ணிக்கிட்டாங்க,வெளியூர்லபோய் செட்டில் ஆகிட்டாங்க,அவங்க ஊருக்கு வாராங்கன்னு சொன்னாலே எனக்கு திருவிழாதான்.இப்பிடித்தான் ஒரு தடவை அவங்க வந்திருந்தப்போ என்னையும் என் ஃபிரெண்ட்சையும் வீட்டுக்கு கூப்பிட்டு ஒரு விருந்தே வைச்சு அசத்திட்டாங்க.
மத்த ஃபிரெண்ட்ஸ் வீட்ல ஏதாவது ஒரு விசேஷம்னா எத்தனையோ தடவை போய் நல்லா கொட்டிக்கிட்டஎனக்கு அவங்களையும் எங்க வீட்டுக்கும் கூப்பிடனுன்னு ஆசை,அதான் ஒரு நாள் அக்கா கிட்ட சொன்னேன்,அதுக்கென்ன செஞ்சிட்டா போச்சின்னு சொன்னவுங்க சொன்ன மாதிரியே செஞ்சாங்க.அப்போ மத்த ஃபிரெண்ட்ஸ் கிட்ட "இவன்தான் என்னோட மூத்த பிள்ளை"னு சொல்லும்போது எனக்கு எவ்வளவு சந்தோசம் தெரியுமா?
ஸ்கூல் படிப்பு முடிஞ்சதும் நான் டாக்டர் ஆகனுன்னு ஆசைப்பட்டாங்க. உள்ளூர்ல இருந்தா நீ உருப்பட மாட்டடானு சொல்லி என்ன இந்த நாட்டுக்கு அனுப்பிட்டாங்க.
கொஞ்சநாளாவே உடம்பு சரியில்லாம இருந்தவங்க ரெண்டு நாளைக்கு முன்னாடிதான்...!!?
ஊருக்கு போகணும் அவங்க முகத்த கடைசியா ஒரு தடவை பார்த்துடணும் நினைச்சேன்,நினைச்சோன்ன போக முடியல.அழுதுகிட்டு இருக்கேன் மனசுக்குள்ள..
வெளியில போன ரூம்மேட்டும் திரும்பி வந்துட்டான்.
நான் தனியாத்தான் இருக்கேன்.

2010 ல் பேசப்பட்ட இயக்குனர்களின் அடுத்த ஸ்டெப்...

noreply@blogger.com (அருண்) — Sat, 01 Jan 2011 09:13:00 +0000

2010 ல் கிட்டத்தட்ட 120 படங்கள் வெளிவந்துள்ளன,பெரும்பாலான படங்கள் வந்த சுவடே தெரியாமல் போய் விட பேசப்பட்ட படங்களை[தோல்வி அடைந்தவை உட்பட],ரசிகர்களை சந்தோசப்படுத்திய படங்களை இயக்கியவர்களின் அடுத்த படங்கள் பற்றி ஒரு பதிவு.

வெங்கட் பிரபு - "கோவா"வின் தோல்வியை தொடர்ந்து இவர் கையில் எடுத்திருப்பது "மங்காத்தா",பக்கா ஆக்சன் படம் என சொல்லப்படுகிறது."தல" அஜித் நடிக்க சக்தி சரவணன்,யுவன் என தன் கூட்டணியுடன் இறங்கியிருக்கிறார்.
செல்வராகவன் - "ஆயிரத்தில் ஒருவன்"க்கு அடுத்து விக்ரமை வைத்து ஒரு படம் பண்ணுவதாய் இருந்தது,ராணாவை வைத்து தமிழ்,தெலுங்குவில் ஒரு படம் பண்ணுவதாய் இருந்தது,எல்லாமே டிராப் ஆக தன் வீட்டுக்கே மறுபடியும் திரும்பியுள்ளார்.பழைய ஸ்கிரிப்டை கையில் எடுத்து "இது மாலை நேரத்து மயக்கம்"என ஆரம்பித்து இப்போ "இரண்டாம் உலகம்" என பெயர் மாற்றி ஜி.வியையும் தூக்கிவிட்டு யுவனுடன் இணைந்துள்ளார்.
கௌதம் மேனன் - வி.தா.வ பெரிய ஹிட்டாக அமைய அடுத்து சொந்தமாய் தயாரிப்பு நிறுவனம் துவங்கி அந்த பேனரிலேயே தன் அடுத்த படத்தை இயக்கியுள்ளார்."நடுநிசி நாய்கள்" என பெயரிடப்பட்டுள்ள இப்படத்தில் பாடல்கள்,பின்னணியிசை ரெண்டுமே இல்லை.இது ஒரு க்ரைம் திரில்லர் கதை எனவும் சொல்லப்படுகிறது.
வசந்த பாலன் - "அங்காடி தெரு" வெற்றிக்கு பின் இவர் கையில் எடுத்திருப்பது ஒரு சரித்திர கதையை."அரவான்" என பெயரிடப்பட்டுள்ள இப்படத்தில் ஆதி,தன்சிகா,பசுபதி கேரளத்து புதுவரவு அர்ச்சனா கவி ஆகியோர் நடிக்க பாடகர் கார்த்திக் இசையமைப்பாளராய் அறிமுகமாகிறார்.
லிங்குசாமி - "பையா" வெற்றிக்குப்பின் "வேட்டை" என பெயரிடப்பட்டுள்ள ஆக்சன் படத்தை இயக்குகிறார்.ஆர்யா,மாதவன்,சமீரா ரெட்டி நடிக்க யுவனின் இசை,நீரவ் ஷா ஒளிப்பதிவு,அன்டனி எடிட்டிங் என களமிறங்குகிறார்.இதில் மாதவன் வில்லன்.யுவனின் இசை பையாவை போலவே பக்கபலமாய் இருக்கும் என நம்பலாம்.
ஹரி - சிங்கத்தின் கர்ச்சனையை தொடர்ந்து இவரின் இயக்கத்தில் "வேங்கை", வழக்கமான ஹரி பட ஹீரோவான அருவாளுடன்,தனுஷ்,தமன்னா,ராஜ் கிரண் நடிக்க டி.எஸ்.பி இசையமைக்கிறார்.வேங்கை உறுமுமா?
மணிரத்தினம் - "ராவணன்" எல்லா மொழிகளிலும் தோல்வியை தழுவ அடுத்து ஒரு சரித்திர கதையை கையில் எடுத்திருப்பதாக கோடம்பாக்க குருவி கீச்சிடுகிறது.வாத்தியார் சுஜாதா இல்லாத காரணத்தினால் இம்முறை மணியின் சாய்ஸ் ஜெயமோகன்.
A.L.விஜய் - "மதராசப்பட்டினம்" ஹிட்டாக அதன் பின் விக்ரம்,அனுஷ்கா,அமலா பால் என "தெய்வமகன்" படத்துக்காய் களமிறங்கி இருக்கிறார்.
சுசீந்தரன் - "நான் மகான் அல்ல"க்கு பின் கௌதம் மேனன் தயாரிப்பில் இசைஞானியின் இசையில் "அழகர் சாமியின் குதிரை" படத்தை இயக்குகிறார், அதே பெயரில் வெளிவந்த பாஸ்கர் சக்தியின் சிறுகதையை தழுவியே உருவாக்கப்படுகிறது.அப்புக்குட்டி,சரண்யா மோகன் ஆகியோர் நடிக்கின்றனர்.
ராஜேஷ் - பாஸ் [எ] பாஸ்கரன் வெற்றிக்கு பின் உதயநிதியை ஹீரோவாக்குகிறார்.ஹீரோயின் திரிஷாவாம்,படத்தின் பெயர் "ஒரு கல் ஒரு கண்ணாடி" இல்லாட்டி "நண்பேண்டா" யுவன்,சந்தானம் என தன் முன்னைய இரண்டு படங்களை போலவே இதிலும் கலக்குவாரா?
சங்கர் - 3 idiots ஐ ரீமேக்கபோவதாக கூறுகிறார்கள்.ஆன்னல் அதிலும் ஏகப்பட்ட குளறுபடிகள்.யார் மூன்று பேர் என பேச்சுவார்த்தை இன்னமும் நடக்கிறது.சிம்பு முடியாதுன்னு சொல்ல,விஜய் வெளியேற சூர்யா கிட்ட பேசுறாங்களாம்.
மிஸ்கின் - "நந்தலாலா" ஜப்பானிய "கிகுஜிரோ"வின் பாதிப்பு இருந்தாலும் பாராட்டப்படவேண்டிய ஒரு முயற்சி.சேரன் நடிக்க "யுத்தம் செய்" இவரின் இயக்கத்தில் அடுத்து வெளி வர இருக்கிறது."Memories of Murder" எனும் கொரிய திரைப்பத்தின் பாதிப்பு இதில் இருக்கு என்கிறனர்.
சசிகுமார் - ஈசன் தோல்வியில் மனமுடைந்து போனவர் தன்னை நிரூபிக்க விரைவில் அடுத்த படம் இயக்கவுள்ளார்.சமுத்திரகனி இயக்கத்தில் "போராளி" படத்திலும் நடிக்கவுள்ளார்.
இவை தவிர ஏனையவர்கள் பற்றி இன்னொரு பதிவில்...[பாலா,ஜனநாதன்...]
அனைவருக்கும் என் புதுவருட நல் வாழ்த்துக்கள்.

மார்கழி மாசத்து சூர்யோதயம்...

noreply@blogger.com (அருண்) — Wed, 29 Dec 2010 10:26:00 +0000

எறும்புகளின் தினசரி உணவு
வீதி நெடுக வாசல் நிறைத்து
அரிசிமா கோலம்.

இதழ் விரிந்த பூ,
இதழ் உதிர்ந்த பூ,
ஒரே நேரத்தில் ஒரே செடியில்
அதுவும் என் வீட்டு தோட்டத்தில்.

பஜனை பாடும் பக்த கோடிகள்
வெள்ளை வெட்டி,வெற்றுடம்பு,
நெற்றி நிறைய திருநீறு சகிதம்.
ஒருவன் கையில் மணி,
இன்னொருவன் டோலக்கு,
பிறிதொருவன் பாட்டுக்கேற்ற பக்கவாத்தியம்,
மற்றுமொருவன் சில்லறை காணிக்கைகளுக்கு
விபூதி வழங்கும் வியாபாரி.
இதர சிலர் சுமைதூக்கிகள்
சாமியை.

அர்ச்சனை அவரவர் பெயர்க்கு,
காணிக்கை கடவுளுக்கு,
பசியாறுவதென்னவோ பஜனை பாடும் பக்தகோடிகள் தான்.
சிலநேரம் சாராயநெடியும் அடிக்கும்.

இத்தனை இருந்தும் இரவு தூங்கி
விடியற்காலையிலேயே விழிக்கத்தான் வேண்டியிருக்கிறது
மணியோசை கேட்டதும் மறுபடி காணிக்கை இட.

பதின்ம பருவத்து கிறுக்கல்கள் - 3

noreply@blogger.com (அருண்) — Fri, 24 Dec 2010 03:38:00 +0000

நீண்ட நாட்களுக்கு பின் ஒரு பதிவு,பல்கலைக்கழகம் போன பின் அதிகமாய் இணையப்பக்கம் வருவதில்லை,வீட்டுக்கு வரும் போது மட்டும் தான்.
2006 ம் ஆண்டு ஜனவரி மாதம் ஆரம்பித்த என் முதல் காதல் கிட்டத்தட்ட ஒன்றரை வருடங்கள் வெற்றிகரமாக ஓடியது.[இதென்ன சினிமாவா?]
அதே வருடம் டிசெம்பரில் ஒரு பொது பரீட்சை [O/L ] எழுதிவிட்டு சில மாதங்கள் பிரிய நேரிட்டது,அதன் பின்னர் ஆளாளுக்கு தங்கள் பாதையை தேர்ந்தெடுத்து போய் விடுவார்கள்.
அந்த சின்ன பிரிவு தான் எங்கள நிரந்தரமாக பிரிக்க போவுதுன்னு எனக்கு அப்போ தெரியல...சரி அத விடுங்க,அந்த சின்ன பிரிவுக்கு முன்னாடி ஆட்டோகிராப்பில் அவள் எனக்காய் எழுதிய கவிதை.

Dear Arun,
நழுவ முயற்சித்தாலும்
ஒரு குழந்தை போல
விடாமல்
தழுவி சிரிக்கிறது
உன் ஞாபகம்!

இது சுட்டதா இல்ல சொந்தமா எழுதுனதானு தெரியல ஆனா அப்ப இந்த கவித நல்லாயிருந்துச்சுன்னு மட்டும் தெரியும்.அப்ப மட்டும் இல்ல வாசிச்சுப்பார்த்தா இப்பயும் தான்.

முதல் காதல் முடிவுக்கு வந்து சில நாட்களின் பின்னர் ரெண்டாவது காதல் மலர்ந்தது.அவளுக்கு என் முதல் காதல் தெரியவர என்ன என்னமோ ப்ளேபாய் கணக்கா நினைச்சு வசனம் பேச "பொண்ணுங்கனா என்ன பகடைக்காய்களா உருட்டி விளையாடுறதுக்கு!" னு கேட்டா.அதுக்கு நம்மளும் வசனம் பேசாம எழுதி அனுப்பிய கவிதை.

காதல் விளையாட்டில்
பகடைக்காய்கள் பல உண்டு.
நின்று நிலைப்பது
ஒன்று மட்டுமே!
அது நீயா?

இந்த கேள்விக்கு பதில் சொல்ல முடியாம அவ பார்த்த பார்வையும் காட்டுன எக்ஸ்பிரஷ்ஷனும் இருக்கே இன்னைக்கு நெனைச்சாலும் பத்திக்கும்.
ஓகே ஓகே இன்னைக்கு இந்த அனத்தல் போதும்.
கிறிஸ்மஸ் கொண்டாடும் அனைத்து அன்பு நெஞ்சங்களுக்கும் என் இனிய கிறிஸ்மஸ் தின நல் வாழ்த்துக்கள்.

கொஞ்சல்வழிக் கல்வியில் நான் படித்தவை.

noreply@blogger.com (அருண்) — Tue, 09 Nov 2010 12:36:00 +0000

வீட்டிலிருந்து அனுப்பிய பணத்தை மீதப்படுத்தி நேற்று இரண்டு புத்தகங்கள் வாங்கினேன்.தபூ சங்கர் எழுதிய "கொஞ்சல்வழிக் கல்வி" வைரமுத்து அவர்கள் எழுதிய "சிற்பியே உன்னைச் செதுக்குகிறேன்".
"சிற்பியே உன்னைச் செதுக்குகிறேன்"கற்று கொடுத்தவை பற்றி மற்றொரு நாளில் பார்ப்போம்.

தபூ சங்கர் கவிதை விரும்பிகள் அதிலும் காதல் கவிதை விரும்பிகள் மத்தியில் பிரபலமான ஒருவர்,இவரை பற்றி அண்மையில் ஒரு வாசகர் கூறியிருந்தார்,

"எத்தனைபேரையோ கவிஞனாக்கியிருக்கின்றீர்கள் - ஆனால்
அத்தனைபேரையும் காதலனாக்கியிருக்கின்றீர்கள்"

மூன்றாண்டுகள் பின்னோக்கி என் நினைவுகள் நகர்ந்தன,மழை மண் மீது மையல் கொண்ட ஒரு காலகட்டத்தில் எதேச்சயாய் என் கண்ணில் பட்டது ஒரு புத்தகம் "இனிப்பு எடுத்துக்கொள்ளுங்கள் காதல் பிறந்திருக்கிறது".அட்டைப்படம் கண்ணைக்கவர எடுத்து படிக்க ஆரம்பித்தேன்.அவ்வளவு தான் ஞாபகம்...அதற்கு பின் நேற்று வாங்கிய இந்த "கொஞ்சல்வழிக் கல்வி",இவரின் கவிதைகள் காதல் நதியை பொங்கி பெருக்கெடுக்க செய்யும்.இதயம் முழுவது ஏன் உடல் முழுவதும் காதலால் நிரம்பி வழியச்செய்யும்.அப்படித்தான் இருந்தது நேற்று இரவும்...
இளங்கலை காதலியல் என தொடங்கும் போதே நாமும் ஈர்க்கப்பட்டு விடுகிறோம்.தொடர்ந்து கவிதை வரிகளில் சிக்ஸ்சர் பவுண்டரி என வெளுத்து கட்டுகிறார்.

"தும்மல் வரும்போது நம் உடலில்
இதயம் உட்பட அனைத்தும்
ஒரு நொடி நின்றுவிடும்

நீ வரும்போது
தும்மலே நின்றுவிடும்."

இப்படி நிறைய இடங்களில் இளமைத்துள்ளலுடன் இவரின் கவிதை நடை போடுகின்றது.இவரின் பாதிப்புடன் தான் நானும் மூன்று வருடங்களுக்கு முன் கவிதை எழுதவும் காதலிக்கவும் ஆரம்பித்தேன்.அதன் பின் ஆனந்த விகடனில் இவரை விடாமல் தொடர்ந்ததாய் நினைவுகளில் பசுமையாய் பதிந்துள்ளது.

"இயேசு வாழ்ந்த காலத்தில்
உலகின் மக்கள் தொகை
இருபது கோடி

நீ வாழும் காலத்தில்
அறுநூறு கோடி

உன்னைக் காண
இந்த மனித குலத்திற்கு
இவ்வளவு ஆசையா."

என புள்ளிவிபரங்களையும் தன் துணைக்கு அழைத்துக் கொள்ளும் இவரின் அணுகுமுறை என்னை கவர்கிறது.அது மட்டுமல்லாமல் விஞ்ஞானத்தையும் துணைக்கு அழைத்து இலகுவாய் வெகுவாய் எம்மை கவர்கிறார்.

"ஒவ்வொரு துடிப்புக்கும் இடையே கிடைக்கும்
மிகச் சிறிய இடைவெளியில்
இதயம் ஓய்வேடுத்துக்கொள்கிறது

ஆனால் என் இதயமோ
அந்த இடைவெளியிலும்
உன்னை காதலித்துக்கொண்டிருக்கிறது."

இவர் திரைப்பட பாடல்கள் எழுதுவதில்லையோ என யோசித்தேன்.அண்மையில் வெளிவந்த வல்லக்கோட்டை படத்தில் பாடல் எழுதியிருப்பதாய் அறிகிறேன்.[அப்படத்தின் இயக்குனர் வெங்கடேஷ் மற்றும் நடிகர் அர்ஜுன் கலந்து கொண்ட ஒரு தொலைகாட்சி நிகழ்ச்சியில் பார்த்து கேட்டது]."செம்மொழியே செம்மொழியே என ஆரம்பிக்கும் பாடலைத்தான் எழுதியிருக்கிறார்.[தவறாயின் திருத்தவும்].எஸ்.பி.பி மற்றும் ஜானகி பாடியுள்ள பாடல்,மிக நீண்ட நாட்களுக்கு பிறகு இருவரும் ஜோடி சேர்ந்து பாடியுள்ளதாய் அறிகிறேன்.ஒரு காலத்தில் ஏகப்பட்ட ஹிட்ஸ் கொடுத்தவர்கள்.இசை தினா வழமையாய் காதுகளை கிழிய வைப்பவர் இதை ஒரு முறையாவது கேட்க வைக்கிறார்.
இசை பாடல் வரிகளை ஆட்சி செய்கிறதோ என சில இடங்களில் எண்ணத் தோன்றினாலும் வரிகள் கண்ணியமானவை.காட்சியமைப்பில் வழக்கமான வெளிநாட்டு லொகேஷன்,வெங்கடேஷ் பட நாயகிகளுக்கே உரித்தான ஜலக்கிரீடை பளிங்கு தொடை தெரியும் நடை இன்னும் ஏராளம்.
இளமை ததும்பும் காதல் மெட்டுக்களை கொடுக்கக் கூடிய ஒரு இசையமைப்பாளருடன் தபூ சங்கர் இணையும் போது காதல் கீதங்களாய் அதிகமானோர் விரும்பும் காலர் டியூனாய் சில பல பாடல்கள் வெளிவருவது உறுதி.அந்த நாளை எதிர் பார்த்து ஒரு சாதாரண ரசிகனாய் நான்...

பதின்ம பருவத்து கிறுக்கல்கள் - 2

noreply@blogger.com (அருண்) — Tue, 09 Nov 2010 04:05:00 +0000

நீ அழும் போது கண்ணீர்

வருவதில்லையாமே
கண்ணீர் கூட உன்னை விட்டு
பிரிய மறுக்கும் போது
நான் மட்டும் எப்படி?

நீ சிரிக்கும் போது
சொல்லியனுப்பு
பாத்திரம் எடுத்துக்கொண்டு வருகிறேன்
உதிர்ந்து விழும் முத்துக்களை
பொறுக்குவதற்கு.

நீ தலை வாரும்போது
சீப்பில் சிக்கிக்கொண்டன
சில தலை முடிகள்
உன்னிடத்தில் நான் சிக்கிக்கொண்டதை போல்.

எதிர் காலத்தில் மின்சாரத்திற்கு
தட்டுப்பாடு நிலவுமாம்
உன் பார்வை மின்னல்களை
பாவிக்க சொல்லி சிபாரிசு செய்திருக்கிறேன்.

பௌர்ணமி தினத்தன்று
நிமிர்ந்து பார்த்து விடாதே
நிலவு கூட மேகத்திற்கு பின்னால்
ஓடி ஒளியும்.

நீ பார்த்த பார்வையில்
என் இதயம் துடிப்பதை மறந்துவிட்டது
எனக்கோ இதயம் இருப்பதே
மறந்துவிட்டது.

தீபாவளி பல்பு...

noreply@blogger.com (அருண்) — Sat, 06 Nov 2010 10:58:00 +0000

யுனிவர்சிடி தொடங்கி நாலு வாரம் ஆச்சு,எம்.பி.பி.எஸ் படிப்பு,180 பேரு,அதுல நாங்க நாலு பேருதான் தமிழ்,வீட்ல இருந்து 220 கிலோ மீட்டர் தூரம்,இது அத்தனியும் தாங்கிக்கலாம் ஆனா என்கிட்ட லேப் டாப் கிடயாது,சரி ஃபோன்ல நெட் பிரவுஸ் பண்ணலாம்னு பார்த்தா அங்கே 3G கவரேஜ் கிடையாது,ப்ளாக் வாசிக்க முடியல,பேஸ் புக் போக முடியல.
இது எல்லாத்துக்கும் ஆறுதல் கலர் கலரா சிங்கள ஃபிகருங்க தான்.பொதுவா எல்லோருமே ரொம்ப ஜோவியல் டைப்.அதுலயும் சில சிடு மூஞ்சி இருக்க தான் செய்யுது.[இனபிரச்சினையை காரணம் காட்டி இன்னமும் குளிர் காய்பவர்கள் அல்லது இதை வன்மையாக கண்டிப்பவர்கள் வரவேற்க படுகிறார்கள்].

சரி இனி பல்புக்கு வருவோ [ரெண்டு பேர் சேர்ந்து வாங்கின பல்பு].நாலாம் தேதி அதான் நேத்து வீட்டுக்கு வருவோம்னு பார்த்தா சனிக்கிழமை முதியோர் இல்லத்துல எல்லா வேலையும் நாங்க தான் பண்ணனும் அதுனால இந்த வீக் எண்டுல யாரும் வீட்டுக்கு போகாதிங்கன்னு மேலிடத்து உத்தரவு,ரைட்டு சைத்தான் சைக்கிள்ள வருதுன்னு நினைச்சா அதிஷ்ட தேவத கதவ தட்டி இல்ல சனிக்கிழம புரோகிராம் கேன்சல்னு சொன்னிச்சி,கடைசி பஸ்ஸ புடிச்சி வீடு வரலான்னு பார்த்தா நேத்து நைட்டு பஸ் இல்ல.விடியற்காலையில பஸ்ஸ புடிச்சி கண்டிக்கு வந்து அங்க இருந்த எதோ ஒரு பஸ்சுல ஏறுனோம்.ஆமை மாதிரி பஸ்சும் கிளம்புச்சி,கொஞ்ச தூரம் வந்ததுக்கு பிறகு கண்டக்டர் "டிக்கட் டிக்கட்"னான்,ஹட்டனுக்கு ரெண்டு டிக்கட்னு சொன்னா இது ஹட்டன் போகாதுன்றான்.
எங்கள நாங்களே நொந்துகிட்டு இடையில இறங்கி ஹட்டன் பஸ்ஸ புடிச்சி வந்தா எங்களுக்கு முன்னாடி ஒரு ஆக்சிடன்ட்,தீபாவளி கொண்டாட்டத்துல ஒரு வானும் தனியார் பஸ்சும் ஊடல் கொண்டிருந்தன.கிளியர் பண்ணுறதுக்கு ரொம்ப நேரம் ஆகும்னு தோண எங்க பிரெண்டுக்கு ஃபோன போட்டு பைக்க எடுத்துக்கிட்டு வர சொன்னோம்.முன்னாடி நின்னுட்டு இருந்த ஒரு சப்ப ஃபிகருக்கு நாங்க சீக்கிரமே போகப்போறத ஒரு பந்தா பார்வையில காட்டிட்டு அப்படியே பேக்கையும் எடுத்துகிட்டு நடக்க தொடங்கினோம்.
வழியெல்லாம் பனி மூட்டம்,மெயின் ரோடிலும் ஒரு மயான அமைதி,துளி துளியாய் சிறு மழைத்தூறல்,இசைஞானி பாடலாய் மனசுக்குள் ஒரு சந்தோசம்,நெற்றி பொட்டு வைத்து பட்டு புடவை கட்டி திராவிட பெண்கள் தீப ஒளித்திருநாளை கொண்டாடிகிட்டு இருந்தாங்க.மத்தாப்பிலிருந்து தீப்பொறி சிந்தியதோ இல்லையோ அவங்க உதட்டிலிருந்து புன்னகை சிந்தியது.சிந்தியவற்றை கோர்க்க ஆசைப்பட்டேன்,அமைதியை கிழித்துக்கொண்டு வாகனங்கள் வரும் சப்தம் கேட்டது.
அடப்பாவி அதுக்கிடையில ரூட்ட கிளியர் பண்ணிட்டாங்களா.மறுபடியும் அதே பஸ்சுல ஏறுனோம்.அப்ப அந்த சப்ப ஃபிகரு பார்த்திச்சு ஒரு பார்வை..டயருக்கு அடியில தலைய வைக்க்கலாம்போல இருந்திச்சு.ஏறுனதுக்கு அப்புறம் தான் நண்பன் பைக்க எடுத்துகிட்டு வருவானேனு ஞாபகம் வர ஃபோன் பண்ணி பேசுறப்போ பார்த்தா பஸ்சுக்கு எதிர்த்தாப்புல நின்னு பைக்க திருப்பிக்கிட்டு இருக்கான்.அப்புறம் என்ன பண்ண! மறுபடியும் பஸ்ஸ நிறுத்தி என்னோட மத்த பிரெண்டு இறங்கி அவனோட பைக்கில வந்தான்.
வீட்டுக்கு வரும்போது பகல் 12.15,அப்புறம் என்ன கொஞ்சும் வெந்நீர் குளியல்,கிரிக்கெட்டு மேட்ச்,இலங்கை வரலாறு காணாத வெற்றி,ஹர்பஜன் ஹாப் செஞ்சுரி,மணக்க மணக்க அம்மா சமைச்ச நாட்டுக்கோழி கொழம்போட சாப்பாடு,ஈவ்னிங் கலைஞர் டிவில சிவாஜி தி பாஸ்.நைட்டு செமையா ஒரு தூக்கம்.
வ குவாட்டர் கட்டிங் மாதிரி இதுவும் சில மணி நேர நிகழ்ச்சி.உலகமே ஒரு நாடக மேடை,அதில் நாமெல்லாம் நடிகர்கள்ன்னு சொன்னது ரொம்ப கரெக்டு தான்.

பதின்ம பருவத்து கிறுக்கல்கள் - 1

noreply@blogger.com (அருண்) — Sat, 09 Oct 2010 11:59:00 +0000

நான் பள்ளியில் படிக்கும் போது ஒரு பொண்ணு,கண்ணு ரெண்டுலயும் காந்தமே வைச்சிருந்தா.அந்த பொண்ணு முஸ்லிம்,கிட்டத்தட்ட நம்ம பசங்க 4,5 பேர் அந்த பொண்ண சைட் அடிச்சாங்க[நானும் தான்].நாங்க அந்த பொண்ண இம்ப்ரெஸ் பண்றதுக்கு என்னமாச்சும் பண்ணுவோம்.இதுல ஒருத்தன் டைமிங்ல ரைமிங்கா பேசியே அந்த பொண்ணையும் சுத்தி உள்ளவங்களையும் கல கலப்பா வைச்சுக்குவான்.நானும் இன்னொருத்தனும் கவிதை சொல்லி அந்த பொண்ணு மனச டச் பண்ண ட்ரை பண்ணுவோம்.காலையிலேயே குட் மோர்னிங் சொல்றதுக்கு முன்னாடி அவகிட்ட சொன்ன கவிதைகள்ல இதுவும் ஒன்னு.

ஓயாத அலைகளாய்
உன்
நினைவுகள் என் இதயத்தை
தொட்டு செல்ல
கரையினில்
பதித்த கால் தடமாய்
சிதைந்தது
என் காதல்.

*****************************

ஒரு வழியா ஸ்கூல் முடிஞ்சதுக்கு அப்புறமா diploma in English படிக்கலான்னு இன்னொரு ஊருக்கு[கண்டி] போய் சேர்ந்தேன்.அது நாலு மாச கோர்ஸ்.நாங்கதா படிக்க போற இடத்தில படிப்ப தவிர மத்த வேலைய கரெக்டா பார்ப்போமே!.அங்கயும் ஒரு பொண்ணு,அவ பேரே எனக்கு ரொம்ப புடிச்சிருந்துச்சி.அவ கண்ணு....சான்சே இல்ல.கொஞ்சம் கொஞ்சமா நெருங்கி பழகினதுக்கு அப்புறம் பார்த்தா அவ என்ன விட கரெக்டா ஒரு வயசு மூத்தவ.அதுக்காக எல்லாம் விட்ற முடியுமா!? அவளுக்கும் சில கவிதைகள் எழுதினேன்.அதுல ஒன்னு.

ஆயிரம் கண்கள்
உன்னை
அவதானிக்கலாம்.
ஆனால் உன்னை பார்க்கும்
ஒரு
ஜோடி கண்கள்
உன்னையே
ஜோடியாக்க துடிக்கின்றன.

பி.கு :- இத அவளுக்கு எஸ்எம்எஸ் பண்ணுனப்போ அவ பதில் அனுப்புனா.

"மரம் வாடினால்
தண்ணீர் விடுவேன்.
நீ வாடினால்
கண்ணீர் விடுவேன்."

ஆஹா வொர்க் அவுட் ஆகிடுச்சிடா மாப்பிளன்னு ரொம்ப சந்தோஷப்பட்டேன்.ஆனா அடுத்த வரியில வைச்சா பாருங்க ஆப்பு,

"இப்பிடித்தான் சில நேரம்
எஸ்எம்எஸ்ல ரீல் விடுவேன்."

இதுக்கு அப்புறம் நா என்னத்த சொல்ல,எல்லாம் நீங்க தான் சொல்லணும்.

அவள் பெயர் ஸ்டெல்லா.

noreply@blogger.com (அருண்) — Mon, 27 Sep 2010 13:34:00 +0000

"மச்சான் அவ பேரு
ஸ்டெல்லா,
வயசு 21,படிச்சது பி.காம்,பைனல் இயர் எக்ஸாம் எழுதிட்டு ரிசல்ட்க்காக வெயிட் பண்ணிக்கிட்டு இருக்கா"
நிறுத்தினான் கிஷோர்.தொடர்ந்தான் சசி

"அப்பா அம்மாவுக்கு ஒரே வாரிசு,அப்பா பிஸினஸ் மேன்,அம்மா ஹவுஸ் வைப்,அவங்க வீட்டு அட்ரஸ்...."

"எனக்கு முன்னாடியே அட்ரஸ் தெரியும்டா"என்றான் ரமேஷ்.ஸ்டெல்லாவை ஒருதலையாய் காதலிப்பவன்,மூன்று மாதங்களாய் அவள் பின்னால் திரிபவன்,இது வரை அவளிடம் ஒரு வார்த்தை கூட பேசியது கிடையாது.கேட்டால் கண்களினாலேயே காதலிக்கிறேன் என வசனம் பேசுவான்.

"இந்த டீடையில் கலெக்ட் பண்ண நானும் சசியும் ரெண்டு நாளா அலைஞ்சிருக்கோம்,அதுனால இன்னிக்கு நீதான் ஸ்பொன்சர்,ஓகேவா?"

"என் லவ்வ அவ அக்செப்ட் பண்ணுனதுக்கு அப்புறம் எல்லாத்துக்கும் சேர்த்து ட்ரீட் வைக்கிறேண்டா".ரமேஷ் கனவுலகில் மிதக்க தொடங்கினான்.

எனக்கென்னமோ இது சரிப்பட்டு வரும்னு தோணல"என கனவுலகில் கல்லை தூக்கி போட்டான் சசி.

"ஏண்டா?"

"அந்த பொண்ணு யாருனே உனக்கு இப்பதான் தெரியும்,அவ கூட இதுவரைக்கும் நீ பேசுனதே கிடையாது,அவங்க வேற மதம் இப்பிடி எத்தனையோ சொல்லலாம்"

"டேய் காதல்ங்குறது...."

"நிறுத்து,சும்மா வசனம் பேசாத,உன் ஆளுக்கு எக்ஸாம் முடிஞ்சிருச்சி,அடுத்து என்னன்னு யாருக்கும் தெரியாது,so லேட் பண்ணாம உன் லவ்வ சொல்லிடு"

அதுவும் சரியாகத்தான் பட்டது ரமேஷிற்கு.
ஸ்டெல்லாவின் வீடு இருக்கும் தெருவில் காத்துக்கொண்டிருந்தான்.அவளும் வெளியே வந்தாள் தன் அப்பா,அம்மா சகிதம்.
ரமேஷும் பின் தொடர்ந்தான் அவர்கள் சர்ச்சுக்குள் செல்லும் வரை.சர்ச்சிலிருந்து
வெளியே வந்தவுடன் தன் லவ்வை சொல்லிவிடுவது என தீர்மானித்துக்கொண்டான்.மனசுக்குள் ஒத்திகை பார்த்துக்கொண்டான்.

அன்னை தெரேஸா போன்று அர்ப்பணிப்புடன் ஏழை,எளியவர்களுக்கு உதவி செய்வதற்காய் சற்று முன் கன்னியாஸ்திரீயாய் மாறியிருந்த சிஸ்டர் ஸ்டெல்லாவிற்கு ஃபாதர் உட்பட எல்லோரும் வாழ்த்து தெரிவித்து கொண்டிருந்தனர்.

பாப்பா பாட்டு.

noreply@blogger.com (அருண்) — Mon, 20 Sep 2010 10:44:00 +0000

நேரம் நடுநிசியை தாண்டி சில நிமிடங்கள் ஆகியிருந்தது.
"நான் ஆணையிட்டால் அது நடந்துவிட்டால்" என குதுகலமாய் முணு முணுத்த படி சைக்கிளை மிதித்தான் சரவணன். பக்கத்து ஊரில் கட்டப்பட்டுக்கொண்டிருக்கும் சர்க்கரை ஆலையில் தினக்கூலிக்கு வேலை செய்பவன்,தினமும் வேலை முடிந்தவுடன் டவுனுக்கு போய் சினிமா பார்த்துவிட்டு வருவது வழக்கம்,இன்றும் அதுபோல் தான் சினிமா பார்த்துவிட்டு வந்துகொண்டிருந்தான்.
தூரத்தில் புள்ளியாய் ஒரு வெளிச்சம் தெரிந்தது.புள்ளி பெரிதாகிக்கொண்டே வந்தது,ஒருத்தனா,ரெண்டு பேரா இல்ல நாலு பேர் கையில் ஒரு பந்தத்துடன் வந்து கொண்டிருந்தனர்,வந்தவர்கள் கடந்து செல்லாமல் தன்னருகே நிற்பதை பார்க்க என்ன ஏது என்று யோசிக்கும் முன்னமே சரமாரியாய் அடிகள் இவன் மேல் விழத்தொடங்கின.
வந்தவர்களில் ஒருவன்
"ஏண்டா தினக்கூலிக்கு வேலை செய்ற ஒனக்கு காதல் கேக்குதோ?" என கூறிய படி ஓங்கி மிதித்தான்.
நடு நாயகமாய் நின்றவன்,
"காதல் பண்ணுறதா இருந்தா உன் சாதியில ஒருத்திய பண்ண வேண்டியதானே,
என்ன தைரியம் இருந்தா எங்க அய்யா பொண்ண காதலிப்ப,
இவன் கைய கால முறிங்கடா" என உத்தரவு போட்டார்.
ஓங்கி மிதித்ததில் சைக்கிளுடன் சரவணன் சரிந்தான்,மேலும் உதைகள் அவன் மேல் விழ கையில் கிடைத்த கல்லை எடுத்து நடு நாயகமாய் நின்றவனின் தலையை குறி பார்த்து அடித்தான்.

மறுநாள் காலை பள்ளிக்கூடம் வழமை போல் தொடங்கியது.பத்து நிமிடங்கள் கழித்து தமிழ்வாத்தியார் வகுப்பினுள் புகுந்தார்.
"வணக்கம் அய்யா"
"வணக்கம் எல்லா உக்காருங்க"
இருமி சற்று தொண்டையை சரி செய்து கொண்டார்.
"இன்னைக்கு நம்ம படிக்க போறது மஹாகவி பாரதியார் எழுதுன பாடல்கள்ல ஒன்னு,
டேய் முத்து நீ இத சத்தமா வாசி" என சொல்லி விட்டு அமர்ந்தார்.
முத்து வாசிக்க ஆரம்பித்தான்.சற்று நேரத்திட்கேல்லாம் மூன்றாம் வரிசை பாண்டி பக்கத்து சீட்டு வேலுவை சுரண்டினான்.
"என்னடா"
"வாத்தியார் தலையில என்னடா காயம்?"
"எங்கேயாச்சு தண்ணிய கிண்ணிய போட்டுட்டு தடுக்கி விழுந்திருப்பாருடா,நீ பாடத்த கவனி"
மறுபடியும் பாண்டி "டேய் எங்கேடா வாசிக்கிறான்"
"தோ இங்கேடா"
"சாதிகள் இல்லையடி பாப்பா-குல
தாழ்ச்சி உயர்ச்சி சொல்லல் பாவம்;"
என முத்துவின் குரல் அந்த வகுப்பறையில் ஓங்கி ஒலித்துக்கொண்டிருந்தது.

மீண்டும் ஒரு விருது பசங்கவுக்கு.

noreply@blogger.com (அருண்) — Wed, 15 Sep 2010 11:33:00 +0000

தேசிய விருதுகள் வெளிவந்த போது நான் ஆவலுடன் எதிர்பார்த்தது சிறந்த பிராந்திய மொழி திரைப்படம் தமிழில் எப்படத்துக்கு கிடைக்கும் என,என் எதிர்ப்பார்ப்பை வீணடிக்காது "பசங்க" என்று அறிவிக்கப்பட்டிருக்கிறது.அது மட்டுமல்ல சிறந்த குழந்தை நட்சத்திர விருதும் "பசங்க" படத்தில் நடித்த ஜீவா,அன்புக்கரசுக்கு அறிவிக்கப்பட்டிருக்கிறது.எதிர்கால தமிழ் சினிமாவிற்கு ஆரோக்கியமான நடிகர்கள் இருவர் கிடைத்திருக்கின்றனர்.
சிறந்த நடிகர் விருது "பா"-ஹிந்திப்படத்தில் நடித்த அமிதாப் பச்சனுக்கும்,சிறந்த நடிகைக்கான தேசியவிருது "அபோஹோமன்"-பெங்காலிப்படத்தில் நடித்த அனன்யாவுக்கும் வழங்கப்பட்டுள்ளது.
தமிழ் ரசிகர்கள் சந்தோஷப்படகூடிய இன்னொரு செய்தி சிறந்த பின்னணி இசைக்குரிய விருது பழசி ராஜா படத்திற்காய் இசைஞானி இளையராஜாவுக்கு வழங்கப்பட்டுள்ளது.
சிறந்த படத்திற்கான விருது "குட்டி ஸ்ரங்" என்ற மலையாள திரைப்படத்திற்கும்,சிறந்த பொழுதுபோக்கு திரைப்படம் அமீர் கான்,மாதவன்,சர்மன் ஜோஷி நடித்து ஹிந்தியில் வெளிவந்து சக்கை போடு போட்ட "3 இடியட்ஸ்" திரைப்படத்திற்கும் வழங்கப்பட்டுள்ளது.

பி.கு :- தமிழில் 3 இடியட்ஸ் எப்படி வெளிவரப்போகிறதோ,அதுவும் வேற வேற மாதிரி இருக்குமோ,ஹிந்தியில் அமீர் கான் வெளிப்படுத்திய நடிப்பை ஈடு செய்ய முடியுமோ யாமறியோம் பராபரனே...

காதல் எஸ்எம்எஸ்.

noreply@blogger.com (அருண்) — Wed, 01 Sep 2010 12:54:00 +0000

நைட் ஷோ பார்த்துவிட்டு வீட்டுக்கு வந்த ரமேஷுக்கு வேறொன்றும் தோன்றவில்லை தூங்கத்தான் தோன்றியது.
"என்னா மொக்க படம்டா சாமி,டைமும் வேஸ்ட்,பணமும் வேஸ்ட்"
என தன்னை நொந்துக்கொண்டே இசைஞானியின் இன்னிசைக்கு மத்தியில் தூங்கிப்போனான்.
அடுத்த நாள் காலை எழும்பி தன் அலைபேசியை பார்த்த போது one new message என்றிருந்தது.
"நைட்டு மப்புல எவனாவது காதலி எல்லாம் டூப்பு,நண்பன் தான் டாப்புனு அனுப்பிருப்பானோ?" என பார்த்தவனுக்கு ஒரு இன்ப அதிர்ச்சி.
"i love u"
அனிதா அனுப்பியிருந்தாள்.கூடவே புது நம்பரிலிருந்து 17 மிஸ்டு கால்கள்.
அனிதா கடந்த இரண்டு வருசமாய் அவனுடன் கூடப்படிப்பவள்.காலேஜில் அவளை முதல் முறை பார்த்தவுடனேயே இவன் தடுக்கி விழுந்தது என்னவோ உண்மைதான்.அதற்குப்பிறகு மெதுவாய் அவளிடம் நண்பனாகி இதோ நேற்று வரை அவளின் நெருங்கிய நண்பன்,இன்று முதல் காதலன்.
நினைக்கும்போதே புல்லரித்தது.
"இவ்ளோ ஆசையை மனசுக்குள்ளேயே வைச்சுகிட்டு தான் இருந்தியா?இன்னைக்கே வர்றேன்,என் காதலையும் உன்கிட்ட சொல்றேண்டி"
காலை டிபன் கூட சாப்பிடாமல் காலேஜுக்கு கிளம்பினான் ரமேஷ்.
அனிதா மைதானத்தில் இருந்தால்,தூரத்தில் அவளைக்கண்டவுடன் தலையை ஸ்டைலாக சீவிக்கொண்டான்.
அனிதா பக்கத்தில் வழக்கமான தோழிகள் ஓகே.ஆனா சுரேஷ்,பாலா,ஜெய்,அந்த ஜூனியர் பையன் இவங்கலாம் ஏன் நிக்கிறாங்க?
விடைதெரியாத கேள்விகளுடன் அவளை நெருங்கினான்.
"ஏய் ரமேஷ் வந்திட்டாண்டி"
அனிதா கண்கள் கலங்கியிருந்தது.
"இப்பதான் வர்றியா நேத்து நைட் எத்தன தடவ உன் நம்பருக்கு ட்ரை பண்ணேன் தெரியுமா?"
"ஏன் அனிதா?"
"நேத்து பஸ்ல போகும்போது ஒருத்தன் ஏன் செல்ல அடிச்சுட்டாண்டா?ஆட்டைய போட்டவன் சும்மா இல்லாம இதோ இவனுங்களுக்கெல்லாம் என்னவோ எஸ்எம்எஸ் அனுப்பிருக்காண்டா,உனக்கு ஏதும் அனுப்பிருந்தானா?"
"இல்லியே"என்றான் உதிர்ந்த புன்னகையை மறைத்துக்கொண்டு.ஆனால் அவனுக்கு தெரியும் உதிர்ந்தது புன்னகை மட்டுமல்ல.

யார் தமிழன்?

noreply@blogger.com (அருண்) — Sun, 29 Aug 2010 14:02:00 +0000

யார் தமிழன்?

தமிழனின்
தலை குறி வைக்கப்பட்டது.

விட்டெறிந்த சில்லறைகள்
தரையில் சிதறின,
பொறுக்க
தலை குனிந்தான்
ஒருவன்,
தலை தப்பித்தது.

தோல்வி திண்ணம்,
தெரிந்தும் போராடினான்
ஒருவன்,
தலை சிதறியது.

யார் தமிழன்?

*************************************************************************************

பௌர்ணமி.

அமாவாசை தினத்தில்
அவள்
மடியில் நான்,
எனக்கு மட்டும்
பௌர்ணமி.

நடுவர்களின் தவறான தீர்ப்பு - சரிந்தது இந்தியா அணி.

noreply@blogger.com (அருண்) — Sun, 22 Aug 2010 12:48:00 +0000

இலங்கையில் நடைபெற்று வருகின்ற இந்திய,இலங்கை,நியூசிலாந்து ஆகிய அணிகள் பங்கு பெறும் முக்கோண ஒருநாள் கிரிக்கெட் தொடரின் ஐந்தாவது போட்டியில் இலங்கை மற்றும் இந்திய அணிகள் மோதின.டாஸ் வென்ற இந்திய அணித்தலைவர் தோனி முதலில் துடுப்பெடுத்தாட தீர்மானித்தார்.
ஆரம்ப துடுப்பாட்ட வீரர்கள் ஷேவாக் மற்றும் தினேஷ் கார்த்திக் ஆரம்பம் முதலே சற்று தடுமாறினார்கள்.குலசேகராவின் பந்து வீச்சில் ஷேவாக் LBW முறையில் அவுட் ஆனார்.அந்த பந்து லேக் ஸ்டம்ப்ற்கு வெளியில் செல்லும் போது தான் விக்கெட்டில் பட்டது.இது போன்ற சந்தர்ப்பங்களில் சந்தேகத்தின் பலனை பேட்ஸ்மானுக்கு சாதகமாக்கியே தீர்ப்பு வழங்குவர் [Benefit of Doubt] ஆனாலும் துரதிஷ்டவசமாக ஷேவாக் ஆட்டமிழந்தார்.
விக்கெட் கீப்பர் சங்கக்காரவின் கையில் பிடி கொடுத்து தமிழக வீரர் தினேஷ் கார்த்திக்கும் ஆட்டமிழந்தார்,இது கேப்டன் சங்கக்காரவிட்கு 250 வது கேட்ச் ஆகும்.ஆனால் அது பேட்டில் படவில்லை,எனவே அதுவும் தவறான தீர்ப்பாக அமைந்தது.
இளம் வீரர் திசர பெரேராவின் பந்தில் சங்கக்காராவிடம் பிடி கொடுத்து சுரேஷ் ரைனாவும் ஆட்டமிழந்தார்.பின்பு பார்க்கும் போது இதுவும் பேட்டில் படவில்லை.ஆனால் ரைனா அதற்கு முதல் ஓவரிலேயே அவுட் ஆகியிருக்க வேண்டியது தான்,அந்த அவுட் வழங்கப்படவில்லை.
தனது அதிரடியை வெளிக்காட்ட பார்த்த யுவராஜ் சிங்கும் மலிங்காவின் பந்துவீச்சில் LBW முறையில் ஆட்டமிழந்தார்.அது ஆப் ஸ்டம்ப்ற்கு வெளியேதான் சென்றது.இதுவும் ஒரு தவறான தீர்ப்பாக அமைந்தது.
இறுதியில் 103 ரன்களுக்கு ஆல் அவுட் ஆனது இந்தியா.
நடுவர்களின் சில தவறான தீர்ப்புகள்,ஆடுகளத்துக்கு ஏற்றாற்போல் இந்தியா பேட்ஸ்மென்கள் ஆடத்தவறியமை மற்றும் இதையெல்லாம் தனக்கு சாதமாக பயன்படுத்திக்கொண்ட இலங்கை அணி போன்ற காரணங்களால் இந்தியா அணி சரிந்தது.
இது போன்ற தவறான தீர்ப்புகள் இல்லாத பட்சத்தில் தான் விறுவிறுப்பான ஒரு போட்டியை கிரிக்கெட் ரசிகர்கள் பார்க்க முடியும்.எனவே இனிமேலாவது நடுவர்கள் இது மாதிரியான தவறுகளை விடாமல் இருக்கட்டும்.

மௌனமே கீதமாய்.

noreply@blogger.com (அருண்) — Fri, 20 Aug 2010 08:20:00 +0000

ஒரு
வீணையின் நரம்புகளை
அறுத்து விட்டார்கள்.
ஒரு
புல்லாங்குழலின் துளைகளை
அடைத்து விட்டார்கள்.

காதலியே
எழுந்திரு.
நீ
என்றாவது வருவான்
என எதிர்பார்த்திருந்த
உன் காதலன்
வந்திருக்கிறேன்.

என்
உணர்வுகளுக்கு
உயிர் கொடுத்துவிட்டு
உன்
உயிரை ஏன்
அழித்துக்கொண்டாய்.

என்
வாழ்வில்
ஓர் வசந்தம்
உருவாகிய வேளை
நீ ஏன்
அஸ்தமனமானாய்.

உன்
மௌனமே கீதமாய்
காற்றில் கலந்து
ஒலிக்கிறது.

பதின்ம பருவத்தில் கிறுக்கியவை.

noreply@blogger.com (அருண்) — Mon, 09 Aug 2010 05:42:00 +0000

பூக்களே
இனி நீங்கள்
பூக்க வேண்டாம்.
ஒரு
புன்னகை பூ
பூத்து விட்டாள்
என்
இதயக்குளத்தில்.

உன்
பெயரை உச்சரித்தால்
உலகம் சுற்றும் வேகம் அதிகமானது.
உங்கள்
பிடித்திருந்தால் கிறுக்கியவை
இத்தனை மகிமையா என.

நீ
சிரித்தால்
என் தோட்டத்து பூக்கள்
தலை கவிழ்கின்றன.
ஒரு
புன்னகை பூவுடன்
போட்டியிட அவை
தயங்குகின்றன.

பூக்களை தழுவி
வரும் தென்றலுக்கு
எங்கிருந்து வந்தது இந்த
புது வாசம்,
ஓ.. புரிகிறது!
இன்றுதானே
நீயும் பூத்தாய்.

எதேச்சையாய் சந்தித்தேன்.

noreply@blogger.com (அருண்) — Wed, 04 Aug 2010 14:37:00 +0000

டீக்கடையில் வண்டியை நிப்பாட்டிவிட்டு ஒரு டீ சொன்னேன்.மழை அப்போதுதான் தூறத்தொடங்கியிருந்தது.தூறலுக்கு இதமாய் சிகரட்டை வாங்கி பற்றவைத்து நன்றாய் மூச்சிழுத்து புகை விடும்போதுதான் கவனித்தேன்.அவள்.....!பார்த்தும் பார்க்காத மாதிரி சட்டுன்னு முகத்தை திருப்பிக்கொண்டாள் அவள்....!அவளேதான்.

இதே அவள்தான் ஆறு மாதங்களுக்கு முன்பு இதே மாதிரி முகத்தை திருப்பிக்கொண்டாள்,ஆனால் அது ஊடலில்.
"ஸாரிப்பா ஒரு 10 minutes லேட்டாயிருச்சு,டிராபிக்ல மாட்டிக்கிட்டேன்"
"................"
பாதி நேரங்களில் மௌனம் தான் அவள் மொழி.
"என்ன கோவமா? பேசமாட்டியா? இப்போ நீ மட்டும் பேசலைன்னு வை,அதோ தூரத்துல வைட் கலர் சுடிதார்ல ஒரு பொண்ணு தனியாத்தான் நின்னுகிட்டு இருக்கா,இப்ப கூட நா வரும்போது பாத்து சிரிச்சா,அவகிட்ட போய் கடலை போட ஆரம்பிச்சிடுவேன்"
"..................."
உதட்டோரத்தில் மெலிதாய் ஒரு புன்னகை.என் பொய்யான மிரட்டலுக்கு பணிந்து அவளின் போலிக்கோபம் உடைந்த போது எதையோ சாதித்த உணர்வு என்னுள்.
"நீ எதையுமே சீரியஸா எடுத்துக்க மாட்டியா?"
"எதுக்கு சீரியஸாகி அப்புறம் BP ஏறி ஹார்ட் அட்டாக் வந்து ஹாஸ்பிடல் போய்..நம்ம பாலிசியே டேக் இட் ஈஸி பாலிசி தான்"
அப்போ எனக்கு தெரியாது வருங்காலத்துல என்ன நடக்கும்னு.
நினைத்துப்பார்க்கும்போதே சிகரட் கையை சுட்டது.நிகழ்காலத்திற்கு திரும்பினேன்.
அவள் இன்னமும் நின்றுக்கொண்டிருந்தாள்.அருகில் ஒருவன் காரிலிருந்து இறங்கினான்.
"ஸாரிப்பா 10 minutes லேட்டாயிருச்சு,ரொம்ப நேரம் காக்க வைச்சிட்டேனா?"
"It's ok,just நா இப்பத்தா வந்தேன்" எனக்கூறிக்கொண்டே காரில் ஏறி தூரமாகி புள்ளியாகி சென்று மறைந்தாள்.
மழை விட்டிருந்தது,நான் இன்னமும் நனைந்து கொண்டுதானிருந்தேன்.

நட்புக்காக.

noreply@blogger.com (அருண்) — Tue, 03 Aug 2010 12:41:00 +0000

நண்பர்கள் தினத்த எல்லாருமே சரக்கோட சந்தோசமா கொண்டாடி இருப்பிங்க,ஆனா ஒரு விஷயம் நண்பர்கள் கூட இருந்தா ஆல் டே ஹாப்பி டே தான்.
நம்மள ஒருத்தன் வெட்ட வரும்போது கால்ல விழுந்து "வேணா விட்ருங்க"னு கதர்றவங்க நம்மள பெத்தவங்களா இருப்பாங்க,
வெட்டுப்பட்டு மண்ணுல சரிஞ்சதுக்கு அப்புறம் பூவையும் பொட்டையும் அழிச்சிட்டு கண்ணீர் விடுரவ நம்ம பொண்டாட்டியா இருப்பா,
வெட்டும்போது நடுவில பூந்து உசுர கொடுக்கிறவந்தான் நம்ம நண்பனா இருப்பான்.அப்படிப்பட்ட நம்ம பங்காளிகளுக்கு இந்த கவிதை சமர்ப்பணம்.

காதல் வந்தால்
கனவுகள் தோன்றும்,
கற்பனைகள் வளரும்,
கவிதையாய் கொட்டும்,
கண்களும் கவி பாடும்,
காத்திருப்பதும் சொர்க்கமாகும்,
தூக்கம் தொலைந்து போகும்,
தூரத்தெரியும் நிலவை கூட தொட்டுவிட தோன்றும்,
மௌனம் தேசிய மொழியாகும்,
மதங்களும் தோற்றுப்போகும்,
இரவுகள் நீளமாகும்,
இருட்டும் வெளிச்சமாகும்,
இறுதியில் இதயங்களும் ஒன்றிணையும்,
ஆனால்
நட்புக்காக மட்டுமே
நம்
உயிரையும் கொடுக்க தோன்றும்.

ஆரம்பம் ஓர் முற்றுப்புள்ளி.

noreply@blogger.com (அருண்) — Mon, 02 Aug 2010 11:51:00 +0000

நேரம் காலை 7.00 மணி,திருச்சி மாநகரமே களை கட்ட தொடங்கி இருந்தது.பல மிடில் கிளாஸ் குடும்பங்கள் வாழும் அந்த காலனியின் 07 ம் நம்பர் வீட்டில் மட்டும் ஓர் இனம் புரியாத சோகம்.
08 ம் நம்பர் வீட்டுக்காரி தன் கணவன் காதில் கிசு கிசுத்தாள்.

"என்னங்க விஷயம் தெரியுமா,நம்ம பக்கத்து வீட்டு பொண்ணு சாந்தி,அதாங்க மாடர்ன் ட்ரெஸ்ல தளுக்கி மினுக்கிக்கிட்டு திரியுவாளே அவதான்,நேத்து ராத்திரி ஒரு பையனோட ஓடிப்போயிட்டாலாம்"

"எனக்கு அப்பவே தெரியும்,அவ ஆளும் நடையும்,பார்க்கிற பார்வையே சரியில்ல தெரியுமா, நான் கூட 02 03 வாட்டி ஒரு பையனோட பைக்கில கண்டிருக்கேன்.
அது சரி பையன் யாரு?"

"யாரோ கறிக்கடைக்காரர் வீட்டு பையனாம்.அதான் நம்ம சாதி சனத்துல யாரோடயாவது ஓடிப்போயிருந்தாலும் பரவாயில்ல அவனோட ஓடிப்போயி நம்ம குடும்ப மானத்தையே வாங்கிட்டாளேன்னு சாரதா காலையில இருந்து புலம்பிகிட்டு இருக்கா"

"சரி,சரி நம்ம பொண்ணு வர்றா பாரு,எதுக்கும் இவ மேலயும் ஒரு கண்ணு வைச்சிக்கோ"

இரண்டு நாட்களுக்கு பிறகு 07 ம் நம்பர் வீட்டிலிருந்து இலங்கைக்கு தொலைபேசி அழைப்பு விடுக்கப்பட்டது.
இலங்கை,மத்திய மலைநாடு,இந்திய வம்சாவளி தமிழர்கள் அதிகம் வாழும் பிரதேசம்,நுவரெலியா எனும் ஊரில் ஒதுக்குப்புறமாக அமைந்திருந்த ஒரு சிறிய கூரை வீட்டில் தொலைபேசி ஒலித்தது.

"ஹலோ யாரு பேசுறிங்க?"

"ஹலோ நான் திருச்சிலருந்து சாரதா பேசறேன்,மாலதி இருக்காளா?"

"அக்கா நான் மாலதிதான் பேசறேன்,எப்பிடிக்கா இருக்க?உங்க வீட்டுக்காரர் சௌக்கியமா?நம்ம சாந்தி எப்பிடி இருக்கா?உங்களையெல்லாம் பார்த்து எத்தனை வருசமாச்சு"என கேள்விகளை அடுக்கினாள்.

எதிர்முனை நிசப்தமாய் இருந்தது.

"என்னக்கா பதில் பேசவே மாட்டேன்ற?"

நிசப்தம் நொறுங்கி எதிர்முனை அழத்தொடங்கியது.

"அக்கா,என்னக்கா ஆச்சு?வீட்டில எது பிரச்சினையா?"

"என்னத்தடி சொல்றது,நா 20 வருஷமா பொத்தி பொத்தி வளர்த்த எம்பொண்ணு ஒருத்தன் கூட ஓடிப்போயிட்டாடி" என சகல விஷயங்களையும் தன் தங்கையிடம் ஒப்பித்தாள்.

"அக்கா நீ ஒன்னும் கவலைப்படாத,எல்லா நல்லதாவே நடக்கும்"

"மாலதி இப்போதான் என் மனசுக்கு கொஞ்சம் ஆறுதலா இருக்கு,உங்க வீட்லயும் எல்லாத்தையும் கேட்டதா சொல்லு"

"சரிக்கா நீயும் உடம்ப பத்திரமா பார்த்துக்கோ"

பேசி முடிந்து சில நிமிடங்கள் ஆகியும் மாலதி கண்கள் கலங்க அதைப்பற்றியே நினைத்து கொண்டிருந்தாள்.சீ பெத்து வளர்த்த அம்மா அப்பாவை விட்டுட்டு எவனோ ஒருத்தன்கூட ஓடிப்போறதுக்கு எப்பிடித்தான் இவங்களுக்கு மனசு வருதோ தெரியல.அவளின் ஆழ்ந்த யோசனையை ஆர்த்தியின் குரல் கலைத்தது.

"அம்மா,அம்மா எங்கேம்மா இருக்கே? "

அவள் வருவதற்குள் கண்களை துடைத்துக்கொள்ள முயன்றாள் மாலதி. அதற்குள்,

"அம்மா என்னம்மா கண்ணெல்லாம் கலங்கியிருக்கு"

"அது வந்து ஆர்த்தி"

மகளிடம் சொல்வதா வேண்டாமா என ஒரு கணம் யோசித்தாள்.பின்

"திருச்சிலருந்து பெரியம்மா கால் பண்ணிருந்தாங்க,அவங்க பொண்ணு சாந்தி இல்ல,அவ யாரு கூடவோ ஓடிப்போயிட்டாளாம்"

"அதுக்கு நீ ஏம்மா அழறே"

"ஆர்த்தி உனக்கே நல்லா தெரியும்,அவரு போனதுக்கு அப்புறம் உன்ன வளர்க்க நா எவ்வளவு கஷ்டப்பட்டிருக்கேன்னு! நீயும் இந்த மாதிரி காதல் கீதல்னு சொல்லி என் தலையில கல்ல தூக்கி போட்டுராதடி"

ஆர்த்தி திகைத்து போய் நின்றாள்.கடைசியா அப்பாவின் இழப்பின் போது அழுதவள்,இன்னைக்கு தன் முன்னாடியே கண்ணீர் விடுவதை அவளால் பார்க்க முடியவில்லை.

"அம்மா அழாதேம்மா" என ஆறுதல் கூற தொடங்கினாள்.
அழுகையின் நடுவே ஆர்த்தியின் கைபேசி அழைத்தது,இரு இதயங்களின் படத்துடன் சிவா எனும் பெயர் திரையில் மின்னியது.சிறிது நேரம் யோசித்தவள் கட் செய்தாள்.

"யாரு போன்ல?"

"அது யாரோ ராங் நம்பர்மா."

இவன்-அவள்

noreply@blogger.com (அருண்) — Thu, 29 Jul 2010 05:25:00 +0000

மாதுவின் சூழ்ச்சியால்
மதுக்கோப்பையை கைப்பிடித்தவன்
இவன்.

நினைவுகளை மட்டும்
நெஞ்சில் சுமந்து கொண்டு
நிகழ்காலத்தை தொலைத்தவன்
இவன்.

அவளோ
அடுத்த மாதம் வரும் பொங்கலுக்கு
சேலை வாங்க சென்றிருக்கிறாள்.

பக்கத்தில்
அவள்
இல்லாத சோகம்
இவன்
கண்களில் கண்ணீராய்,
முகத்தில் தாடியாய்.

அவளோ
புகுந்த வீட்டு
பலகாரத்தை
ருசித்து கொண்டிருக்கிறாள்.

தாடியால் மறைந்தது
இவன்
முகம் மட்டுமல்ல,
முத்தாய்ப்பான புன்னகையும்,
மகிழ்ச்சியும் கூட.

அவளோ
சின்னத்திரையில் சீரியல் பார்த்து
கண்ணீர் வடிக்கிறாள்.

பைத்தியக்காரன்,குடிகாரன்
இவை
சமுதாயத்தில் இவனுக்கு உள்ள
செல்லப்பெயர்கள்.

கண்ணா,புருஷா
இவை
காதலிக்கும் போது அவள் வைத்த
செல்லப்பெயர்கள்.

இவன்
தன வாழ்க்கையின்
இறுதி கீதத்தை
இசைக்க தொடங்கிவிட்டான்.

அவளோ
தன் குழந்தைகளுக்கு
தாலாட்டு பாடிக்கொண்டிருக்கிறாள்.

இவன்
உலகத்திலிருந்து
பிரியாவிடை பெற்று விட்டான்.

அவளோ
வாசலில்
தன் கணவனின்
வருகைக்காய் காத்திருக்கிறாள்.

மனிதர்கள்.

noreply@blogger.com (அருண்) — Wed, 28 Jul 2010 13:53:00 +0000

கீழே உள்ள கவிதையை நான் 6-7 வருடங்களுக்கு முன் எங்கேயோ வாசித்திருக்கிறேன்.எங்கே என்பது ஞாபகத்தில் இல்லை.தெரிந்தவர்கள் சொல்லவும்.

இந்த
Modern உலகத்தில்
மதிக்கப்படுவது
மனிதர்கள் அல்ல,
"Money"தர்கள்.

முரளியின் சாதனையை முறியடிப்பது யார்?

noreply@blogger.com (அருண்) — Tue, 27 Jul 2010 13:24:00 +0000

முரளி ஒரு சாதனை நாயகன்,புகழின் உச்சியில் இருக்கும் போதே டெஸ்ட் போட்டிகளிலிருந்து சந்தோஷமாய் விடை பெற்றவர்.இவர் தனது ஓய்வை அறிவித்த போது நான் சற்றே அதிர்ந்து போனேன்,காரணம் இன்னும் அவர் 800 விக்கெட்டுகளை கைப்பற்றி இருக்கவில்லை என்பதே.இதை பற்றி பிரஸ் மீட்டிலும்,சாதனை படைக்க முதல் நாளும் கேட்ட போது அவர் கூறிய பதில்,
"800 is just a number".இருப்பினும் 800 விக்கெட்டுகளை கைப்பற்றிய முதல் வீரர் எனும் பெருமையுடன் ஓய்வு பெற்றார்.
இவரின் ஓய்விற்கு பின்னர் கிரிக்கெட் ஆர்வலர்களுக்கும்,விமர்சகர்களுக்கும், முக்கியமாக ரசிகர்களுக்கும் எழுந்துள்ள கேள்வி அவரின் சாதனை முறியடிக்கப்படுமா?அது யாரால்?
இதில் ஹர்பஜன் சிங்கின் பெயரே அதிகமாய் அடிபடுகிறது.அவரும் ஒரு சிறந்த பந்து வீச்சாளர் என்பதில் சந்தேகமேயில்லை.30 வயதாகும் அவர் 355 டெஸ்ட் விக்கெட்டுகளை எடுத்துள்ளார்.அவர் நிலைக்கும் பட்சத்தில் இன்னும் 7-8 வருடங்களாவது கிரிக்கெட் விளையாடக்கூடும்.இருந்தாலும் தற்போது நடைபெற்று கொண்டிருக்கும் இலங்கை அணியுடனான தொடரில் முதல் போட்டியில் விக்கெட் எதனையும் இவர் கைப்பற்றவில்லை.முரளி 08 விக்கெட்டுகளை கைப்பற்றிய மைதானத்தில் இவர் ஒரு விக்கெட்டினையும் கைப்பற்றவில்லை. இரண்டாவது போட்டியின் இரண்டாம் நாளான இன்றுதான் ஒரு விக்கெட்டினை கைப்பற்றினார்.இது தொடர்ந்தால் இவர் 700 விக்கெட்டுகளை எடுப்பதே கஷ்டம் தான்.
அடுத்தவர் அஜந்தா மென்டிஸ்,ஆசியா கோப்பை 2008,இவரது சுழலில் சிக்கி இந்திய பேட்ஸ்மென்கள் அவுட்டானதை யாரும் மறக்க முடியாது.25 வயதாகும் இவர் விமர்சகர்களால் "The Mystery spinner"என அழைக்கபடுபவர்.ஆனால் சில நாட்களிலேயே இவரது பந்து வீச்சிற்கு சிக்சர்கள்,பவுண்டரிகள் என விளாசப்பட்டதை யாரும் மறக்க முடியாது.இருந்தாலும் இவர் இன்னும் 10-12 வருடங்களாவது விளையாடலாம் என்பதும் குறிப்பிட வேண்டிய விஷயம்.
அடுத்தவர் டேனியல் விட்டோரி,31 வயதாகும் இவர் 318 விக்கெட்டுகளை கைப்பற்றியுள்ளார்,ஆனால் இவரோ அடிக்கடி உபாதைக்கு உள்ளாகிறவர்.எனவே இவரா என்பதும் சந்தேகமே!
இன்னுமொரு விஷயத்தையும் நாம் மறந்து விடக்கூடாது.20/20 மோகம் அதிகரித்துள்ள நிலையில் டெஸ்ட் போட்டிகளின் எண்ணிக்கையும் குறைவடைந்து வருகின்றது.எனவே மேலே சொன்னவர்களோ அல்லது இன்னபிற பந்துவீச்சாளர்களோ முரளியின் சாதனையை முறியடிப்பது சந்தேகமே.

மழை.

noreply@blogger.com (அருண்) — Mon, 26 Jul 2010 14:08:00 +0000

மழை
விண்ணையும்
மண்ணையும்
மட்டுமா இணைத்தது,
உன்னையும்
என்னையும்
கூடத்தான் இணைத்தது!
ஒரே குடையின் கீழ்.

துடிப்பு

noreply@blogger.com (அருண்) — Mon, 26 Jul 2010 13:54:00 +0000

உனக்காக
துடிப்பதில்
உன்
இதயத்திற்கு
அடுத்த இடம்
எனக்கு.